@1A *, ,RTEN 'BREL GYI SPYI DON LEGS PAR BSHAD BA'I SNYING PO PADMA DKAR PO'I 'PHRENG BA ZHES BYA BA ZHUGS SO, @1B *, ,RTEN CING 'BREL 'BYUNG LUGS MTHUN DANG, ,ZHES SOGS KYI SKABS SU, RTEN 'BREL SHES PA'I PHAN YON BSHAD PA, SHES BYA RTEN 'BREL GYI RANG BZHIN BSHAD PA GNYIS, DANG PO NI, RTEN 'BREL ZAB MO'I DE KHO NA NYID SHES PA LA PHAN YON KHYAD PAR CAN YOD DE, DE MNGON SUM DU RTOGS PA LA BRTEN NAS CHOS DKON MCHOG 'THOB PAR 'GYUR, DE LA BRTEN NAS DKON MCHOG GSUM GA'I GO 'PHANG 'THOB PAR 'GYUR BA'I DGOS PA YOD PA'I PHYIR, DE SKAD DU YANG, RTEN CING 'BREL BAR 'BYUNG 'DI RGYAL BA YI, ,GSUNG GI MDZOD KYI GCES PA ZAB MO STE, ,GANG GIS 'DIR NI YANG DAG MTHONG BA DES, ,SANGS RGYAS DE NYID RIG PA RNAM MCHOG MTHONG, ,ZHES DANG, MDO LAS, GANG GIS RTEN CING 'BREL BAR 'BYUNG BA MTHONG BA DES NI CHOS MTHONG NGO, ,GANG GIS CHOS MTHONG BA DES NI DE BZHIN GSHEGS PA DGRA BCOM PA YANG DAG PAR RDZOGS PA'I SANGS RGYAS RNAMS MTHONG BA YIN NO, ,ZHES GSUNGS PA'I PHYIR, GNYIS PA LA BYE BRAG SMRA BA'I LUGS BSHAD PA, THEG CHEN PA'I LUGS BSHAD PA GNYIS, DANG PO NI, RTEN 'BREL LA SKAD CIG MA'I RTEN 'BREL, 'BREL BA CAN GYI RTEN 'BREL, GNAS SKABS KYI RTEN 'BREL, RGYUN CHAGS PA'I RTEN 'BREL SOGS BZHI'I THA SNYAD BYED CING, DANG PO GNYIS DON GCIG PA DANG, DE YANG SO SO SKYE BOS MA RIG PAS KUN NAS BSLANGS TE, DE BZHIN GSHEGS PA LA PHYAG 'TSAL BA LTA BU'I SKAD CIG MA GCIG LA YAN LAG BCU GNYIS RTZI BA'I TSUL YOD DE, DE'I TSE BSOD NAMS KYI LAS KUN NAS SLONG BYED KYI MA RIG PA DANG, LAS DANG, RNAM PAR SHES PA, MING GZUGS, SKYE MCHED, REG PA, TSOR BA DANG, YUL LA SRED PA DANG, DE CHER 'PHEL BA DANG, LAS NUS PA MTHU CHEN DU SONG BA DANG, LAS DE DANG POR GANG LAS SKYES PA, LAS RNYINGS NAS PHRO CHAD PA RNAMS RIM PA BZHIN DU MA RIG PA'I RTEN 'BREL NAS BZUNG STE, RGA SHI'I RTEN 'BREL GYI BAR DU 'JOG PA'I PHYIR, SKAD @2A *, ,CIG MA'I RTEN 'BREL DE LA 'BREL BA CAN GYI RTEN 'BREL ZHES 'CHAD PA'I RGYU MTSAN YOD DE, SKAD CIG PHYI MA RNAMS SNGA MA LA 'BREL BA'I RGYU MTSAN GYIS DE LTAR BSHAD PA'I PHYIR, PHYI MA GNYIS DON GCIG ,NYON MONGS PHYOGS KYI RTEN 'BREL YAN LAG BCU GNYIS PO DE BUL BA'I TSE NA TSE GSUM GYI GNAS SKABS LA RDZOGS DGOS PAS GNAS SKABS KYI RTEN 'BREL DANG, TSE GSUM PO DE LA RGYUN CHAGS SU 'JUG PAS, RGYUN CHAGS KYI RTEN 'BREL DU BSHAD PA'I PHYIR, DE'I LUGS LA MA RIG PA'I RTEN 'BREL SOGS LA, MA RIG PA SOGS KYIS MA KHYAB STE, MA RIG PA RGYU BA'I DUS KYI PHUNG PO 'DI MA RIG PA'I RTEN 'BREL YIN LA, MA RIG PA MA YIN KYANG MA RIG PA'I RTEN 'BREL DU 'JOG PA'I RGYU MTSAN YOD DE, DE'I SKABS SU MA RIG PA GTZO CHE BAS DE LTAR DU BSHAD PA'I PHYIR, MDZOD LAS, MA RIG NYON MONGS SNGON GNAS SKABS, ,ZHES DANG, GTZO BO'I PHYIR NA YAN LAG BSGRAGS, ,ZHES GSUNGS PA'I PHYIR, MDO SDE PA NI DE LTAR MI 'DOD DE, MA RIG PA GANG ZHE NA, SNGON GYI MTHA' MI SHES PA DANG, PHYI MA'I MTHA' MI SHES PA STE; ZHES SOGS KYI MDOS BKAG PAR 'DOD PA'I PHYIR, THEG CHEN PA'I LUGS BSHAD PA LA, RTEN 'BREL SPYI'I RNAM GZHAG BSHAD PA DANG, NYON MONGS PHYOGS KYI RTEN 'BREL BYE BRAG TU BSHAD PA DANG, RTAN 'BREL GTAN LA PHAB PA'I DGOS PA BSHAD PA'O, ,DANG PO LA; RTEN 'BREL GYI SKAD DOD PRA TI TA SA MUD PA TRA YA [*PRA T'I TYA SA MUT P'A DA] ZHES PA, PHRAD LTOS RKYEN GSUM LA 'JUG CING DE LA DNGOS SMRA BA RNAMS NI PHRAD NAS BYUNG BA'I DON DU 'DOD PA YIN TE, PHRAD PA RGYU RKYEN LA PHRAD PA DANG, BYUNG BA RGYU RKYEN LAS SKYES PA'I DON DU 'DOD PAS RTEN 'BREL LA 'DUS BYAS KYIS KHYAB PAR 'DOD PA'I PHYIR, LUGS 'DIR NI DE LTAR MI 'DOD DE, RANG GI LTOS SA LA BLTOS NAS GRUB PA 'AM BYUNG BA'I DON DU 'DOD PA'I PHYIR, DE LTAR NA LTOS NAS GRUB PA RTEN 'BRAL GYI MTSAN NYID, DE LA DBYE NA, NYON MONGS PHYOGS KYI RTEN 'BREL @2B DANG, RNAM BYANG PHYOGS KYI RTEN 'BREL GNYIS, NYON MONGS PHYOGS KYI LTOS NAS GRUB PA, NYON MONGS PHYOGS KYI RTEN 'BREL GYI MTSAN NYID, RNAM BYANG PHYOGS KYI LTOS NAS GRUB PA, DE'I RTEN 'BREL GYI MTSAN NYID, GNYIS PA MDO LAS BSTAN TSUL, BSTAN BCOS LAS BSDUS TSUL, DE DAG GI DON BSHAD PA DANG GSUM, DANG PO LA, MDO LAS BSTAN TSUL YOD DE, RNAM PAR 'BYED BA'I MDO LAS, 'DI YOD PAS 'DI 'BYUNG, 'DI SKYES PA'I PHYIR 'DI SKYES PA STE, 'DI LTA STE, MA RIG PA'I RKYEN GYIS 'DU BYED CES SOGS GSUNGS PA'I PHYIR, BSTAN BCOS KYIS BSDUS TSUL LA, YAN LAG BCU GNYIS PO DE RGYU MED LAS MA SKYES PA DANG, RGYU YOD KYANG RTAG PA LAS MA SKYES PA DANG, RGYU MI RTAG KYANG MI MTHUN PA'I RGYU LAS MA SKYES PAR BSHAD PA YIN TE, RANG NYID SKYED BYED KYI RGYU YOD PAS 'BYUNG BA DANG, RTAG PA LAS MA BYUNG BAR MI RTAG PA LAS SKYES PA DANG, YAN LAG GNYIS PA 'DU BYED KYI LAS DE DE DANG RIGS MTHUN PA YAN LAG DANG PO MA RIG PA LAS SKYES PA SOGS SU BSHAD PA YIN PA'I PHYIR TE, KUN BTUS LAS, MTSAN NYID KYI JI LTA BU ZHE NA, G-YO BA MED PA'I RKYEN LAS BYUNG BA DANG, MA RIG PA'I RKYEN LAS BYUNG BA DANG, NUS PA'I RKYEN LAS BYUNG BA'I PHYIR, ZHES GSUNGS PA'I PHYIR, LUNG 'DIS DE LTAR BSTAN PA YIN KYANG, GTZO BOR SDUG BSNGAL RGYU MED DU 'DZIN PA DANG, RGYU GCIG KHO NAS BSKYED PAR 'DZIN PA DANG, RANG BZHIN RTAG LA GNAS SKABS 'GYUR BAR 'DZIN PA DANG, DBANG PHYUG RTAG PA SOGS KYIS BLO'I G-YO BA SNGON DU BTANG NAS BYAS BA MA YIN PAR BSTAN PA YIN PA'I PHYIR, SDUG KUN GYI 'BREL BA LA PHYIN CI LOG TU ZHEN PA 'GOG PA'I CHED DU BSTAN PA YIN PA'I PHYIR, GSUM PA LA SO SO'I NGO BO, ,DBYE BA DANG BCAS PA BSHAD PA, DE DAG GI DPE BSHAD, BYED LAS, YAN LAG RKYEN DU 'GYUR TSUL, BSDU BA BSHAD, TSE DU LA RDZOGS, SA MTSUNGS BSHAD PA DANG BDUN, DANG PO LA BCU GNYIS YOD PA LAS, DANG PO LA, MA RIG PA SPYI'I RNAM GZHAG DANG, 'DIR BSTAN GYI MA RIG PA BYE BRAG TU BSHAD PA'O, ,DANG PO LA, BYE BRAG TU SMRA BA NI MA RIG PA DANG, 'JIG LTA 'GAL BAR 'DOD PA YIN TE, MA RIG PA NI KUN NAS NYON MONGS PHYOGS DANG RNAM BYANG PHYOGS GANG RUNG LA RMONGS PA'I SEMS BYUNG RMONGS PAR 'DOD, 'JIG LTA NI YUL LA @3A *, ,PHYIN CI LOG TU SPYOD PA'I SHES RAB NYON MONGS CAN YIN DGOS PA'I PHYIR, DANG PO DER THAL, MDZA' BA BKAG PAS MI MDZA' BA DANG, BDEN TSIG BKAG PAS BRDZUN TSIG TU MI 'GYUR GYI MDZA' BA DANG BDEN TSIG GNYIS KYI 'GAL ZLA GNYIS RIM PA BZHIN DU MI MDZA' BA DANG BRDZUN TSIG TU 'GYUR BA LTAR, SEMS BYUNG DGE BA BCU GCIG GI NANG NAS SEMS BYUNG GTI MUG MED PA'I 'GAL ZLA MI MTHUN PHYOGS YIN PA'I PHYIR TE, MA RIG MI MDZA' BRDZUN SOGS BZHIN, ,ZHES GSUNGS PA'I PHYIR, DE GNYIS 'GAL BAR STON TSUL YOD DE, MDO LAS, 'JIG TSOGS LA LTA BA DANG MTSUNGS PAR LDAN PA'I MA RIG PA, ZHES GSUNGS PA'I PHYIR, MDO SDE PA NI DE GNYIS MI 'GAL BAR BZHED DE, MA RIG PA NI RIG PA YE SHES KYI 'GAL ZLA MI MTHUN PHYOGS YIN PA'I PHYIR TE, RNAM 'GREL LAS, RIG PA'I MI MTHUN PHYOGS PHYIR DANG, ,SEMS BYUNG NYID KYIS DMIGS PA'I PHYIR, ,LOG PAR DMIGS NYID MA RIG PA, ,GSUNGS PHYIR GZHAN NI RIG MA YIN, ,'GAL BA GANG YIN 'DIR BSHAD BYA, ,ZHES GSUNGS PA'I PHYIR, DE LTAR YIN KYANG SNGAR GYI MDO DANG 'GAL BA'I SKYON MED DE, DE 'JIG LTA MA RIG PA'I PHYOGS SHIG YIN PA LA DGONGS PA'I PHYIR, DPER NA P'A LA SHA DANG LDAN PA'I NAGS TSAL ZHES BRJOD PA LTA BU YIN PA'I PHYIR, BYE MDO GNYIS MA RIG PA LA KUN LHAN GNYIS 'DOD PA LA KHYAD PAR MED KYANG 'JIG LTA 'DOD TSUL LA KHYAD PAR YOD DE, MDO SDE PA NI 'JIG LTA LA KUN LHAN GNYIS 'DOD, BYE BRAG SMRA BA NI KUN BTAGS [*BRTAGS ETC THROUGHOUT] KYIS KHYAB PAR 'DOD PA'I PHYIR, LTA BAR GYUR PA'I NYON MONGS LA KUN BTAGS KYIS KHYAB PAR 'DOD PA'I PHYIR, DES RTZA NYON DRUG GI NANG TSAN GANG ZHIG ,SEMS BYUNG DGE BA BCU GCIG GI NANG TSAN DU GYUR PA'I SEMS BYUNG GTI MUG MED PA'I 'GAL ZLA MI MTHUN PHYOGS SU GYUR PA'I SEMS BYUNG RMONGS PA, MA RIG PA'I MTSAN NYID, MDO SDE PA NI RTZA NYON DRUG GI NANG TSAN GANG ZHIG ,RIG PA BDAG MED RTOGS PA'I YE SHES KYI 'GAL ZLA MI MTHUN PHYOGS SU GYUR PA'I SEMS BYUNG RMONGS PA, MA RIG PA'I MTSAN NYID DU 'DOD, THEG CHEN PA'I LUGS LA, KHA CIG ,NYON MONGS CAN MA YIN PA'I MA RIG PA YIN NAM RIG PA YIN PAS KHYAB ZER NA, @3B BDEN 'DZIN CHOS CAN, DER THAL, DE'I PHYIR, DER THAL, SHES SGRIB PHRA MO YIN PA'I PHYIR, 'DOD NA DE CHOS CAN, KHYOD RGYUD LDAN GYI DGRA BCOM PA MED PAR THAL, 'DOD PA'I PHYIR, KHYAB STE, NYAN RANG DGRA BCOM PA MA RIG PA'I SGO NGA'I SBUBS LAS GROL KYANG, GZHAN PHAN GYI SNYAN PA SGROG MI NUS, BYANG SEMS RNAMS MA RIG PA'I SGO NGA'I SBUBS LAS MA GROL YANG GZHAN PHAN GYI SNYAN PA SGROG NUS PA TSAD LDAN GYI GZHUNG LAS GSUNGS PA'I PHYIR, GZHAN YANG, GNYIS SNANG 'KHRUL BA'I BAG CHAGS KYIS MA NGES SO, ,RANG LUGS LA GANG ZAG GI BDAG MED RTOGS PA'I SHES RAB DANG, LAS 'BRAS KYI 'BREL BA RAGS PA RTOGS PA'I SHES RAB GANG RUNG DANG 'DZIN STANGS DNGOS SU 'GAL ZHING, RANG GI DMIGS YUL LA RANG STOBS KYIS RMONGS PA'I SEMS BYUNG RMONGS PA, MA RIG PA'I MTSAN NYID, DBYE NA, BDAG MED PA'I DE KHO NA NYID LA RMONGS PA DANG, LAS 'BRAS KYI 'BREL BA RAGS PA LA RMONGS PA'I MA RIG PA DANG GNYIS, DANG PO LA YANG 'JIG LTA DANG, DE LAS GZHAN PA'I GANG ZAG GI BDAG 'DZIN GNYIS, DANG PO NI, RANG RGYUD LDAN GYI GANG ZAG GI NGA DANG NGA YI BA LA DMIGS NAS GANG ZAG RANG RKYA THUB PA'I RDZAS YOD DU 'DZIN PA'I RTOG PA'O, ,GZHAN RGYUD KYI NGA LA DMIGS NAS GANG ZAG RANG RKYA THUB PA'I RDZAS YOD DU 'DZIN PA'I RTOG PA NI GNYIS PA YIN NO, ,LAS 'BRAS KYI 'BREL BA RAGS PA LA RMONGS PA'I MA RIG PA YOD DE, YAN LAG BCU GNYIS PA 'DU BYED KYI LAS KYI DUS KYI KUN SLONG DU GYUR PA'I MA RIG PA, DE 'DRA BA'I MA RIG PA YIN PA'I PHYIR, KUN BTUS LAS, RMONGS PA NI RNAM PA GNYIS TE 'BRAS BU RNAM PAR SMIN PA LA RMONGS PA DANG, DE KHO NA NYID KYI DON LA RMONGS PA'O, ,'BRAS BU RNAM PAR SMIN PA LA RMONGS PA NI MI DGE BA'I LAS MNGON PAR 'DU BYED PA RNAMS 'BYUNG NGO, ,DE KHO NA'I DON LA RMONGS PA NI BSOD NAMS DANG MI G-YO BA'I LAS MNGON PAR 'DU BYED PA RNAMS 'BYUNG NGO, ,ZHES GSUNGS PA'I PHYIR, LUGS 'DIR 'JIG LTA LHAN SKYES KYI DMIGS PA'I GTZO BO DE LA BDAG PHUNG GNYIS SU PHYE PA'I PHUNG PO YOD KYANG, THAL 'GYUR BA'I LUGS LA MI 'THAD DE, DE GNYIS LA PHUNG PO LA BTAGS PA'I NGA TZAM GANG ZAG GI MTSAN GZHIR 'DOD MI 'DOD KYI KHYAD PAR YOD PA'I PHYIR DANG, 'JIG CING TSOGS PA'I PHUNG PO LA DMIGS @4A *, ,PAS 'JIG TSOGS LA LTA BA ZHES BSHAD PA'I PHYIR, GZHAN RGYUD KYI NGA LA DMIGS NAS RANG RKYA THUB PA'I RDZAS YOD DU GZUNG BAS NI 'JIG LTAR MI 'GYUR TE, DE LA DMIGS PAS NGA'O SNYAM PA'I BLO RANG GI NGANG GIS 'BYUNG BA MED PA'I PHYIR, MA RIG PA LA RGYU'I SGO NAS DBYE NA KUN LHAN GNYIS, SPONG BYED KYI GNYEN PO'I SGO NAS DBYE NA MTHONG SPANGS DANG, SGOM SPANGS GNYIS YOD, BYED LAS KYI SGO NAS DBYE NA, 'PHEN 'GRUB RDZOGS GSUM GYI LAS KUN NAS SLONG BYED KYI MA RIG PA RNAM PA GSUM YOD, GSUM PA LA MTSAN NYID, DBYE BA, CHOS KYI KHYAD PAR RNAMS LAS, RANG NYID KYIS KUN NAS BSLANG BYAR GYUR PA'I YAN LAG GNYIS PA 'DU BYED KYI LAS GSAR DU KUN NAS SLONG BYED KYI 'JIG LTA, YAN LAG BCU GNYIS KYI DANG PO MA RIG PA'I MTSAN NYID, DE'I CHOS KYI KHYAD PAR YOD DE, DGE SOGS GSUM GYI NANG NAS LUNG MA BSTAN YIN PAS KHYAB, MTHONG SPANGS DANG SGOM SPANGS GNYIS KA YOD, KHAMS GSUM GA'I RTEN LA YOD PA DANG, SO SKYE KHO NA'I RTEN LA YOD PA'I PHYIR, DANG PO DER THAL, DER GYUR PA'I DGE BA DANG MI DGE BA MED PA'I PHYIR, GNYIS PA DER THAL, RNAL 'BYOR SPYOD PA'I SA LAS, RGYUN TU ZHUGS PAS YAN LAG DU ZHIG SPANGS SHE NA, THAMS CAD KYI PHYOGS GCIG SPANGS PA YIN GYI GANG YANG RIL GYI SPANGS PA MA YIN NO, ,LAN CIG PHYIR 'ONG BAS YAN LAG DU ZHIG SPANGS SHE NA, RGYUN TU ZHUGS PA LA JI LTA BA DE BZHIN NO, ,PHYIR MI 'ONG BAS YAN LAG DU ZHIG SPANGS SHE NA, GANG 'DOD PA NA SPYOD PA THAMS CAD DO, ,DGRA BCOM PAS YAN LAG DU ZHIG SPANGS SHE NA, KHAMS GSUM NA SPYOD PA THAMS CAD DO, ,ZHES GSUNGS PA'I PHYIR, DE LA KHA CIG NA RE, YAN LAG DANG PO MA RIG PA LA KUN BTAGS MED DE, KUN BTAGS KYIS LUS CAN THAMS CAD 'KHOR BAR 'CHING BAR MI NUS SHING, YANG SRID PHYI MAR RNAM SMIN GYI PHUNG PO 'PHEN BYED KYI LAS GSAR DU BSOG PAR MI NUS PAR GSUNGS PA'I PHYIR ZHE NA, SKYON MED DE, MA RIG PA KUN BTAGS KYIS GRUB MTHAS BLO BSGYUR MA BSGYUR GYI LUS CAN THAMS CAD 'KHOR BAR 'CHING BA'I RTZA BA MI BYED PA DANG, DE THAMS CAD KYIS YANG SRID PHYI MAR RNAM SMIN GYI PHUNG PO 'PHEN BYED KYI LAS GSAR DU @4B MI BSOG PA LA DGONGS PA'I PHYIR, DE LTAR MA YIN NA, LAS 'BRAS KYI 'BREL BA RAGS PA LA RMONGS PA'I MA RIG PA KUN BTAGS KYI DBANG GIS YANG SRID PHYI MAR RNAM SMIN GYI PHUNG PO 'PHEN BYED KYI LAS GSAR DU BSOG PA MED PAR THAL, MA RIG PA KUN BTAGS KYIS DE LTAR MED PA'I PHYIR, 'DOD NA YOD PAR THAL, LAS 'BRAS KYI 'BREL BA RAGS PA LA RMONGS PA'I MA RIG PAS KUN NAS BSLANGS TE MTHO RIS KYI PHYIR DU DBANG PHYUG GIS MCHOD SBYIN BYED PA YOD PA'I PHYIR DANG, 'DU BYED KYI LAS KYI DUS KYI KUN SLONG DU GYUR PA'I LAS 'BRAS KYI 'BREL BA LA RMONGS PA'I MA RIG PA YOD PA'I PHYIR, KUN BTUS LAS; 'BRAS BU RNAM PAR SMIN PA LA RMONGS PA NI, MI DGE BA'I LAS 'DU BYED PA RNAMS 'BYUNG NGO, ,ZHES GSUNGS PA'I PHYIR, GSUM PA DER THAL, KHAMS GSUM GYI SO SKYE PHAL CHER GYIS MA RIG PAS KUN NAS BSLANGS TE YANG SRID DU 'PHEN BYED KYI LAS GSAR DU BSAG PA YOD PA'I PHYIR, BZHI PA DER THAL; 'PHAGS PA'I RTEN LA YANG SRID PHYI MAR RNAM SMIN GYI PHUNG PO 'PHEN BYED KYI LAS GSAR BSOG MED PA'I PHYIR TE, RTEN 'BREL MDO 'GREL LAS, BDEN PA MTHONG LA 'PHEN PA MED, ,SRID DANG BRAL LA YANG SRID MED, ,CES GSUNGS PA'I PHYIR, GNYIS PA 'DU BYED KYI LAS BSHAD PA LA, LAS SPYIR BSHAD PA DANG, 'DU BYED KYI LAS BYE BRAG TU BSHAD PA'O, ,DANG PO NI, GONG DU BDEN BZHI'I SKABS SU BSHAD ZIN PA LAS SHES PAR BYA'O, ,GNYIS PA LA MTSAN NYID, DBYE BA, CHOS KYI KHYAD PAR RNAMS LAS, DANG PO LA, RANG NYID KUN NAS SLONG BYED YAN LAG DANG PO MA RIG PAS GSAR DU KUN NAS BSLANGS PA'I RIGS SU GNAS PA'I ZAG BCAS KYI SEMS PA, GNYIS PA 'DU BYED KYI LAS KYI MTSAN NYID, DBYE NA, DER GYUR PA'I BSOD NAMS DANG, BSOD NAMS MA YIN PA'I LAS DANG, MI G-YO BA'I LAS DANG GSUM, BSOD NAMS KYI LAS DANG, MI G-YO BA'I LAS MI 'GAL TE, BSOD NAMS CHA MTHUN GYI DGE RTZA DANG, RGYU SNYOM 'JUG GI BSAM GTAN GYI GZHI MTHUN YOD PA'I PHYIR RO, ,DE GSUM GYI MTSAN GZHI'I KHYAD PAR YOD DE, 'DOD PA'I BDE 'GRO'I RNAM SMIN GYI PHUNG PO 'PHEN BYED KYI LAS DE DANG PO DANG, NGAN 'GRO'I RNAM SMIN GYI PHUNG PO 'PHEN BYED KYI LAS GNYIS PA DANG, KHAMS GONG MA'I RNAM SMIN GYI PHUNG PO 'PHEN BYED KYI LAS DE @5A *, ,GSUM PA YIN PA'I PHYIR, GONG MA'I RNAM SMIN GYI PHUNG PO 'PHEN BYED KYI LAS LA MI G-YO BA'I LAS ZHES 'CHAD PA'I RGYU MTSAN YOD DE, BSAM GTAN DANG PO'I PHUNG PO 'PHEN BYED KYI LAS KYIS GNYIS PA YAN CHAD KYI PHUNG PO MI 'PHEN PA'I RGYU MTSAN GYIS DE LTAR BSHAD PA'I PHYIR, 'DOD PA'I RNAM SMIN GYI PHUNG PO 'PHEN BYED KYI LAS LA G-YO BA'I LAS ZHES 'CHAD PA'I RGYU MTSAN YOD DE, KHYI'I RNAM SMIN GYI PHUNG PO 'PHEN BYED KYI LAS DUS KYI RKYEN MA TSANG BA'I DBANG GIS DOM GYI RNAM SMIN GYI PHUNG PO 'PHEN PA YOD PAR GSUNGS PA'I PHYIR, CHOS KYI KHYAD PAR YOD DE, DGE MI DGE GANG RUNG YIN PAS KHYAB, MTHONG SPANGS DANG, SGOM SPANGS GNYIS KA'I CHA YOD, SKYE 'PHAGS GNYIS KA'I RTEN LA YOD, KHAMS GSUM GA'I RTEN LA YOD PA'I PHYIR, GNYIS PA YOD DE, NGAN 'GRO'I PHUNG PO 'PHEN BYED KYI LAS MTHONG SPANGS DANG, NGES PA'I RGYUN ZHUGS SRID PA LAN BDUN PA BA'I RGYUD KYI 'DU BYED KYI LAS DE SGOM SPANGS YIN PA'I PHYIR, GSUM PA YOD DE, 'PHAGS PA'I RTEN LA 'PHEN BYED KYI LAS GSAR BSOG MED KYANG, 'GRUB BYED KYI LAS GSAR BSOG YOD PA'I PHYIR TE, 'PHEN BYED KYI LAS LA SRED LEN GNYIS KYIS GSOS 'DEBS PA YOD PA'I PHYIR, DE'I RGYUD LA 'PHEN BYED KYI LAS YOD DE, DGRA BCOM PA'I RTEN LA SNGON SO SKYE'O RTEN LA BSAGS PA'I DGE MI DGE'I LAS MA NGES PA YOD PA'I PHYIR, MDZOD KYI 'GREL BA DON GSAL LAS, DGRA BCOM PA DAG LA YANG SNGON SO SO SKYE BO'I GNAS SKABS SU ZHES SOGS GSUNGS PA'I PHYIR, BZHI PA YOD DE, SRID RTZE'I RTEN LA SRID RTZE'I PHUNG PO 'PHEN BYED KYI LAS GSAR BSOG YOD PA'I PHYIR, GSUM PA LA, LAS NYON GYI DBANG GIS YANG SRID DU NYING 'TSAMS SBYAR MA THAG PA'I ZAG BCAS KYI RNAM PAR SHES PA, GSUM PA RNAM SHES KYI RTEN 'BREL GYI MTSAN NYID, SPYIR RNAM SHES TZAM LA DBYE NA, RNAM SHES TSOGS DRUG YOD, RGYU DUS KYI RNAM SHES KYI RTEN 'BREL DE YAN LAG BCU GNYIS KYI NANG TSAN DU GYUR PA'I RNAM SHES KYI RTEN 'BREL MA YIN TE, 'DU BYED KYI LAS KYI BAG CHAGS BSGO GZHI YIN PAS DES BSDUS PA'I PHYIR, DE'I CHOS KYI KHYAD PAR YOD DE, DGE SOGS GSUM GA YOD, MTHONG SPANGS DANG, SGOM SPANGS GNYIS KA YOD, SKYE 'PHAGS GNYIS KA'I RTEN LA YOD, KHAMS GSUM @5B GA'I RTEN LA YOD PA'I PHYIR, BZHI PA LA, RNAM SHES KYI RTEN 'BREL GRUB, SKYE MCHED KYI RTEN 'BREL MA GRUB PA'I GNAS SKABS KYI ZAG BCAS RNAM SMIN GYI NGO BOR GYUR PA'I MING GZUGS GANG RUNG DU DMIGS PA, BZHI PA MING GZUGS GANG RUNG GI RTEN 'BREL GYI MTSAN NYID, DE'I GNAS SKABS KYI ZAG BCAS KYI TSOR BA SOGS NI MING DANG, MER MER PO LTA BU NI GZUGS SU 'JOG PA'I PHYIR, LNGA PA LA, MING GZUGS GRUB RJES KYI REG PA'I RTEN 'BREL MA GRUB PA'I GNAS SKABS KYI ZAG BCAS RNAM SMIN GYI PHUNG PO'I NGO BOR GYUR PA'I SKYE MCHED DU DMIGS PA, LNGA PA SKYE MCHED KYI RTEN 'BREL GYI MTSAN NYID, DBYE NA DRUG YOD, DRUG PA LA, SKYE MCHED GRUB TSOR BA MA GRUB PA'I GNAS SKABS KYI YUL DBANG RNAM SHES GSUM 'DUS PA LA BRTEN NAS YUL GYI 'GYUR BA RANG STOBS KYIS SPYOD PA'I ZAG BCAS KYI SEMS PA, DRUG PA REG PA'I RTEN 'BREL GYI MTSAN NYID, DBYE NA, DER GYUR PA'I MIG GI 'DUS TE REG PA NAS YID KYI 'DUS TE REG PA'I BAR DRUG YOD, RANG RGYU REG PA'I RTEN 'BREL LA BRTEN NAS RANG YUL SIM GDUNG BAR MA GSUM GANG YANG RUNG BA RANG STOBS KYIS NYAMS SU MYONG BA'I ZAG BCAS KYI SEMS PA, BDUN PA TSOR BA'I RTEN 'BREL GYI MTSAN NYID, NGO BO'I SGO NAS DBYE NA, DER GYUR PA'I TSOR BA LA BDE SDUG BAR MA GSUM, BDAG RKYEN GYI SGO NAS DBYE NA, MIG GI 'DUS TE REG PA'I RKYEN GYIS TSOR BA NAS YID KYI 'DUS TE REG PA'I RKYEN GYIS TSOR BA'I BAR DRUG YOD, DE RNAMS KYI CHOS KYI KHYAD PAR YOD DE, DGE SOGS GSUM GA YOD, MTHONG SPANGS DANG SGOM SPANGS GNYIS KA YOD, SKYE 'PHAGS GNYIS KA'I RTEN LA YOD, KHAMS KYI DBANG DU BYAS NA 'DOD KHAMS SU TSANG BAR YOD, GZUGS KHAMS SU SNA LCE GNYIS KYI REG PA'I RKYEN GYIS TSOR BA MA GTOGS GZHAN RNAMS TSANG BAR YOD, GZUGS MED DU YID KYI 'DUS TE REG PA'I RKYEN GYIS TSOR BA KHO NA YOD KYANG, GZHAN RNAMS MED PA'I PHYIR, TSOR BA'I RTEN 'BREL LA BRTEN NAS RANG YUL LA RANG STOBS KYIS MI 'BRAL PAR 'DOD PA'I SEMS BYUNG, BRGYAD PA SRED PA'I RTEN 'BREL GYI MTSAN NYID, DBYE NA, DER GYUR BA'I 'DOD SRED, 'JIGS SRED, SRID SRED DANG GSUM YOD, DE GSUM GYI MTSAN GZHI YOD DE, YUL YID 'ONG LA MI 'BRAL BAR 'DOD PA'I SRED PA DANG PO DANG, YID MI 'ONG LA 'BRAL BAR 'DOD PA'I SRED PA GNYIS PA DANG, 'CHI BA'I @6A *, ,TSE BDAG CHAD DOGS KYIS 'JIGS PAS PHUNG PO LA SRED PA'I SRED PA GSUM PA YIN NO, ,SRED PA DE NYID CHER 'PHEL BA'I 'DOD CHAGS, DGU PA LEN PA'I RTEN 'BREL GYI MTSAN NYID, DBYE NA, 'DOD PA NYE BAR LEN PA, LTA BA NYE BAR LEN PA, BDAG TU SMRA BA NYE BAR LEN PA, TSUL KHRIMS DANG BRTUL ZHUGS MCHOG TU 'DZIN PA NYE BAR LAN PA BZHI YOD, YUL YID 'ONG LA LHAG PAR CHAGS PA'I 'DOD CHAGS DANG PO DANG, LTA NGAN LA LHAG PAR CHAGS PA'I 'DOD CHAGS GNYIS PA DANG, GANG ZAG GI BDAG TU SMRA BA LA LHAG PAR CHAGS PA'I 'DOD CHAGS GSUM PA DANG, BRTUL ZHUGS NGAN PA LA LHAG PAR CHAGS PA'I 'DOD CHAGS BZHI PAR 'JOG PA'I PHYIR, DE GNYIS KYI CHOS KYI KHYAD PAR YOD DE, DGE SOGS GSUM GYI NANG NAS LUNG MA BSTAN GYIS KHYAB, MTHONG SPANGS DANG, SGOM SPANGS GNYIS KA YOD, SKYE 'PHAGS GNYIS DANG, KHAMS GSUM GA'I RTEN LA YOD PA'I PHYIR, RANG NYID LA GSOS 'DEBS BYED SRED LEN GANG RUNG GIS GSOS BTAB PA'I LAS NUS PA MTHU CHEN DU SONG BA'I ZAG BCAS RNAM SMIN GYI NGO BOR GYUR PA'I SEMS PA, BCU PA SRID PA'I RTEN 'BREL GYI MTSAN NYID, SRID PA TZAM LA DBYE NA, SKYE SRID, 'CHI SRID, BAR SRID, SNGON DUS KYI SRID PA DANG BZHI, LAS NYON GYI DBANG GIS YANG SRID DU NYING 'TSAMS SBYAR BA DANG PO, ,DE'I DBANG GIS SROG DBANG 'GAGS PA GNYIS PA DANG, SROG DBANG 'GAGS NAS YANG SRID DU NYING 'TSAMS MA SBYAR BA'I BAR GSUM PA DANG, SBYAR NAS MA SHI BAR SNGON DUS KYI SRID PAR 'JOG PA'I PHYIR, LAS NYON GYI DBANG GIS SRID PAR NYING 'TSAMS SBYAR BA'I CHAR GYUR PA'I ZAG BCAS RNAM SMIN GYI NGO BOR GYUR PA'I PHUNG PO, ,BCU GCIG PA SKYE BA'I RTEN 'BREL GYI MTSAN NYID, SPYIR SKYE GNAS LA DBYE NA, MNGAL SKYES, SGONG SKYES, RDZUS SKYES, DROD BSHER SKYES DANG BZHI YOD, YI DVAGS LA MNGAL SKYES KYANG YOD DE, YI DVAGS MO'I RTOGS BRJOD LAS, BDAG GIS NYIN PAR BU LNGA BRGYA, ,MTSAN MO YANG NI LNGA BRGYA STE, ,ZOS KYANG BDAG LA TSIM PA MED, ,CES GSUNGS PA'I PHYIR, MI LA NI SKYES GNAS BZHI GA YOD DE, MI PHAL CHER MNGAL NAS SKYE, SLOB DPON 'PHAGS PA LHA LTA BU RDZUS SKYES DANG, RGYAL PO SPYI BO @6B SKYES LTA BU DROD GSHER LAS SKYES PA DANG, DGRA BCOM PA BRAG DANG NYE BA'I BRAG LTA BU SGO NGA LAS SKYES PA'I PHYIR, DUD 'GRO LA YANG BZHI GA YOD, DMYAL BA DANG LHA DANG BAR DO LA RDZUS SKYES KYIS KHYAB STE, MDZOD LAS, DMYAL BA RNAMS DANG LHA RNAMS DANG, ,SRID PA BAR MA RDZUS TE SKYE, ,ZHES GSUNGS BA'I PHYIR, LAS NYON GYI DBANG GIS PHUNG PO RNYINGS PA'I CHA, RGAS PA'I RTEN 'BREL GYI MTSAN NYID, DE LA SKRA DKAR BA SOGS DU MA YOD, LAS NYON GYI DBANG GIS SROG DBANG 'GAGS PA'I CHA, 'CHI BA'I RTEN 'BREL GYI MTSAN NYID, DE LA YANG TSE ZAD PA NAS DROD YAL BA SOGS DU MA YOD, CHOS KYI KHYAD PAR SRED LEN GNYIS DANG MTSUNGS, RGA SHI GNYIS YAN LAG GCIG TU BYED PA'I RGYU MTSAN YOD DE, KHA CIG MA RGAS PAR 'CHI BA DANG, KHA CIG MA SHI BAR RGAS PA YOD PA'I RGYU MTSAN GYIS DE LTAR BSHAD PA'I PHYIR, RTEN 'BREL GYI MDO LAS, MYA NGAN DANG SMRE SNGAGS 'DON PA SOGS GSUNGS KYANG, 'DIR YAN LAG TU MI 'DREN PA'I RGYU MTSAN YOD DE, TSANGS SPYOD RNAM DAG DANG LDAN PA'I DGE SLONG 'GA' ZHIG YID BDE BZHIN DU 'CHI BA YOD PA'I RGYU MTSAN GYIS MA BSHAD PA'I PHYIR, SDUG BSNGAL GYI PHUNG PO 'BA' ZHIG PA 'DI 'BYUNG BAR 'GYUR RO ZHES 'BA' ZHIG GI SGRA SMOS PA LA DGOS PA YOD DE, 'KHOR BA NA SDUG BSNGAL PHYIR BCOS KYI BDE BA TZAM YOD KYANG, BDE BA MTSAN NYID PA MED PA'I RGYU MTSAN GYIS DE LTAR BSHAD PA'I PHYIR, GNYIS PA DPE BSHAD PA LA, MA RIG PA SA BON SOGS BZHI DANG CHOS MTSUNGS TE, MA RIG PA'I SA BON LA BRTEN NAS SDUG BSNGAL GYI MYU GU 'BYUNG BA DANG, MA RIG PA'I KLU GNAS PA'I DBANG GIS SKYE BA'I RGYA MTSO MI BSKAMS PA DANG, MA RIG PA'I LJON SHING GI RTZA BA LA BRTEN NAS SDUG BSNGAL GYI SDONG BU 'BYUNG BA DANG, MA RIG PA'I LJON SHING GI SDONG BU LA BRTEN NAS SDUG BSNGAL GYI YAL 'DAB SOGS 'BYUNG BA'I PHYIR, SRED LEN GNYIS PO 'BRAS KYI SHUN PA DANG CHOS MTSUNGS TE, SRED LEN GYI SHUN PA DANG BCAS PA'I LAS LAS SDUG BSNGAL GYI MYU GU 'BYUNG BA'I PHYIR, LAS GNYIS SHUN BCAS KYI SA BON DANG CHOS MTSUNGS TE, SRED LEN GYI SHUN PA DANG BCAS PA'I LAS KYIS SDUG BSNGAL GYI MYU GU BSKYED PA DANG, SMAN 'GA' ZHIG KHU BA LAN CIG PHYUNG BA DANG, ME TOG GI RIGS @7A *, ,'GA' ZHIG GIS 'BRAS BU LAN CIG BYUNG BAS 'DZAD PA DE BZHIN DU, LAS GNYIS KYI 'BRAS BU BYUNG ZIN PAS 'DZAD PA'I PHYIR, 'BRAS BU'I RTEN 'BREL BDUN PO DE G-YOS LEGS PAR GRUB ZIN PA'I KHA ZAS DANG CHOS MTSUNGS TE, G-YOS LEGS PAR GRUB ZIN PA'I ZAS SKYES BU'I LONGS SPYOD BYA 'BA' ZHIG YIN PA DE BZHIN DU, 'BRAS BU'I RTEN 'BREL BDUN PO DE SKYES BU'I LONGS SPYOD BYA 'BA' ZHIG YIN PA'I PHYIR TE, MDZOD LAS, 'DI NI NYON MONGS SA BON BZHIN, ,KLU BZHIN RTZA BZHIN LJON PA BZHIN, ,DE BZHIN SHUN PA BZHIN DU 'DOD, ,LAS NI SHUN BCAS 'BRAS DANG 'DRA, ,DE BZHIN SMAN BZHIN ME TOG BZHIN, ,GZHI NI G-YOS LEGS GRUB PA YIN, ,ZHES GSUNGS PA'I PHYIR, GSUM PA BYED LAS LA, 'DRA BA'I BYED LAS YOD DE, YAN LAG SNGA MA SNGA MA RNAMS KYIS RANG 'BRAS YAN LAG PHYI MA RNAMS BSKYED PAR 'DRA BA'I PHYIR, MI 'DRA BA'I BYED LAS YOD DE, DANG PO MA RIG PAS BDAG MED PA'I DE KHO NA NYID LA SGRIB PAR BYED, GNYIS PAS YANG SRID PHYI MA'I RNAM SMIN GYI SA BON 'DEBS PAR BYED, GSUM PAS YANG SRID DU 'KHRID PAR BYED, BZHI PAS RNAM SMIN GYI PHUNG PO 'DZIN PAR BYED, LNGA PAS RNAM SMIN GYI PHUNG PO RDZOGS PAR BYED, DRUG PAS YUL DBANG RNAM SHES GSUM 'DUS PA LA BRTEN NAS YUL GYI 'GYUR BA RANG STOBS KYIS SPYOD PAR BYED, BDUN PAS TSOR BA BDE SDUG SOGS LA RDZOGS PAR LONGS SPYOD PAR BYED, BRGYAD PAS YANG SRID PHYI MA'I RNAM SMIN GYI PHUNG PO SDUD PAR BYED, DGU PAS NYE BAR SBYOR BAR BYED, BCU PAS MNGON PAR 'DU BYED, SKYE BA RGA SHI GNYIS KYIS SDUG BSNGAL BAR BYED PA'I PHYIR, DBU MTHA' LAS, SGRIB PA'I PHYIR DANG 'DEBS PA'I PHYIR, ,'KHRID PA'I PHYIR DANG KUN 'DZIN PHYIR, ,RDZOGS BYED PHYIR DANG GSUM SPYOD PHYIR, ,NYE BAR SPYOD PHYIR SDUD PA'I PHYIR, ,SBYOR BA'I PHYIR DANG MNGON 'DU'I PHYIR; ;DU KHA PHYIR NI 'GRO NYON MONGS, ,ZHES GSUNGS PA'I PHYIR, BZHI PA YAN LAG RKYEN DU 'GYUR TSUL YOD DE, GZUGS CAN DU GYUR PA'I YAN LAG SNGA MA RNAMS KYIS GZUGS CAN DU GYUR PA'I YAN LAG PHYI MA RNAMS KYI RGYU RKYEN DANG BDAG RKYEN CI RIGS PA BYED PA'I PHYIR, SHES PAR GYUR PA'I YAN @7B LAG SNGA MAS DE PHYI MA RNAMS KYI RGYU RKYEN DANG DE MA THAG RKYEN CI RIGS PA BYED, GZUGS CAN GYI RTEN 'BREL SNGA MA RNAMS KYIS SHES PAR GYUR PA'I RTEN 'BREL PHYI MA RNAMS KYI BDAG RKYEN DANG DMIGS RKYEN CI RIGS PA BYED, SHES PAR GYUR PA'I RTEN 'BREL SNGA MA RNAMS KYIS GZUGS CAN DU GYUR PA'I RTEN 'BREL PHYI MA RNAMS KYI RGYU RKYEN BYED PA'I PHYIR, LNGA PA BSDU NA RNAM PA GSUM DU 'DU STE, RGYU 'BRAS GNYIS, NYON MONGS GSUM, SDUG KUN 'BYUNG GNYIS SU 'DU BA'I PHYIR, RGYU 'BRAS GNYIS SU 'DU STE, MA RIG PA NAS TSOR BA'I BAR 'PHEN BYED RGYU 'BRAS GNYIS, SRED PA NAS RGA SHI'I BAR 'GRUB BYED RGYU 'BRAS GNYIS SU 'DU BA'I PHYIR, DANG PO DER THAL, MA RIG PAS KUN NAS BSLANGS TE 'DU BYED KYI LAS BSAGS, RGYU DUS KYI RNAM SHES KYI RTEN 'BREL LA LAS KYI BAG CHAGS BSGOS NAS TSOR BA'I BAR RNAMS 'GRUB RUNG DU BYAS PA'I PHYIR, GNYIS PA DER THAL, SRED LEN GNYIS KYIS 'DU BYED KYI LAS LA GSOS BTAB SRID LAS NUS PA MTHU CHEN DU SONG STE, SKYE BA DANG RGA SHI 'GRUB NGES SU BYAS PA'I PHYIR, RTEN 'BREL MDO 'GREL DU, GANG GIS 'PHEN DANG JI LTAR GANG, ,DE SGRUB BYED DANG DE LA YANG, ,NYES PA GANG YIN DE DAG RNAMS, ,YAN LAG BCU GNYIS RNAMS KYIS BSTAN, ,ZHES GSUNGS PA'I PHYIR, NYON MONGS GSUM DU 'DU STE, NYON MONGS PA'I KUN NAS NYON MONGS PA DANG, LAS KYI KUN NAS NYON MONGS PA DANG, SKYE BA'I KUN NAS NYON MONGS PA GSUM LAS, NYON MONGS GSUM NYON MONGS PA'I KUN NAS NYON MONGS PAR 'DU, LAS GNYIS LAS KYI KUN NAS NYON MONGS PAR 'DU, 'BRAS BU'I RTEN 'BREL BDUN NI GZHI 'AM SKYE BA 'BRAS BU'I KUN NAS NYON MONGS PAR 'DU BA'I PHYIR, DE NYID LAS, NYON MONGS GSUM DANG LAS GNYIS SO, ,GZHI BDUN DE BZHIN 'BRAS BU'O, ,ZHES GSUNGS PA'I PHYIR, SDUG KUN GNYIS SU 'DU STE, LAS GNYIS NYON MONGS GSUM KUN 'BYUNG DANG, LHAG MA BDUN NI SDUG BDEN DU 'DU BA'I PHYIR, DBU MA RTEN 'BREL SNYING PO LAS, DANG PO BRGYAD PA DGU NYON MONGS, ,GNYIS PA BCU PA LAS YIN TE, ,LHAG MA BDUN NI SDUG BSNGAL YIN, ,ZHES GSUNGS PA'I PHYIR, MA RIG PA'I RTEN 'BREL LA, MA RIG PAS KHYAB PA SOGS YIN KYANG, DES @8A *, ,BSDUS NA DE YIN PAS MA KHYAB STE, TSOR BA'I RTEN 'BREL RGYU BA'I GNAS SKABS KYI MIG DBANG MIG SHES SOGS DES BSDUS KYANG DE MA YIN PA'I PHYIR, DRUG PA TSE DU LA RDZOGS DPYAD PA LA, BYE BRAG SMRA BA NI JI LTAR BUL BA'I TSE NA TSE GSUM LA RDZOGS PAR BZHED PA YIN TE, DANG PO GNYIS TSE DANG PO DANG, SRED LEN SRID PA GSUM GNYIS PA DANG, LHAG MA RNAMS TSE GSUM PA LA RDZOGS PA'I PHYIR, MDZOD LAS, SNGON DANG PHYI MTHAR GNYIS GNYIS DANG, ,BAR DU BRGYAD YONGS RDZOGS LDAN LA, ,ZHES GSUNGS PA'I PHYIR, DE LTAR BSTAN PA LA DGOS PA YOD DE, BDAG SNGON GYI GNAS SKABS SU JI LTAR GYUR, DA LTAR GYI DUS SU JI LTAR GNAS, MA 'ONGS PA'I DUS SU JI LTA BU ZHIG TU 'GYUR SNYAM PA'I BDAG TU RMONGS PA BZLOG PA'I CHED YIN PA'I PHYIR, THEG CHEN PA'I LUGS LA MYUR BA'I TSE NA TSE GNYIS LA RDZOGS PA YOD DE, MI'I RTEN LA MI'I RNAM SMIN GYI PHUNG PO 'PHEN BYED KYI LAS BSAGS, RTEN DE NYID LA SRED LEN GYIS GSOS BTAB MIR SKYES PA DE'I TSE NA LAS GNYIS NYON MONGS GSUM DANG PO DANG, LHAG MA BDUN GNYIS PA LA RDZOGS PA'I PHYIR, DE LTA BU'I LAS NI YOD DE, MI'I 'PHEN BYED KYI LAS LA SKYES NAS GZHAN DU MYONG 'GYUR YOD PA'I PHYIR, TSE GSUM LA RDZOGS PA YOD DE, MI'I RTEN LA DE'I RNAM SMIN GYI PHUNG PO 'PHEN BYED KYI LAS BSAGS, DE LA GSOS MA BTAB PAR 'GRO BA GZHAN DU SKYE BA BLANGS, RTEN DE LA SRED LEN GNYIS KYIS GSOS BTAB MIR SKYE BA BLANGS PA DE'I TSE NA DANG PO GNYIS TSE DANG PO DANG, SRED LEN SRID PA GSUM NI TSE GNYIS PA DANG, GZHAN RNAMS TSE GSUM PA LA RDZOGS PA'I PHYIR, TSE BZHI LA RDZOGS PA YANG YOD DE, MI'I RTEN LA MI'I RNAM SMIN GYI PHUNG PO 'PHEN BYED KYI LAS BSAGS, DE SRED LEN GNYIS KYIS GSOS MA BTAB PAR 'GRO BA GZHAN DU SKYE BA BLANGS, RTEN DE LA SRED PAS GSOS BTAB MI'I BAR SRID DU SKYE BA BLANGS NAS LEN PAS GSOS MA BTAB PAR 'GRO BA GZHAN ZHIG TU SKYE BA BLANGS, RTEN DE LA SNGAR GYI LAS LA PHEN PAS GSOS BTAB STE MIR SKYE BA BLANGS PA DE'I TSE DANG PO GNYIS TSE DANG PO DANG, BRGYAD PA DANG BCU PA GNYIS TSE GNYIS PA DANG, DGU PA TSE GSUM PA DANG, @8B GZHAN RNAMS TSE BZHI PA LA RDZOGS PA'I PHYIR, MDO LAS, 'DI YOD PA'I PHYIR 'DI 'BYUNG, 'DI SKYES PA'I PHYIR 'DI SKYE BA STE, 'DI LTA STE, MA RIG PA'I RKYEN GYIS 'DU BYED, CES SOGS KYIS RTEN 'BREL YAN LAG BCU GNYIS TSANG BA ZHIG BSTAN KYANG, TSAR GCIG GI DBANG DU BYAS PA NI MA YIN TE RTEN 'BREL YAN LAG BCU GNYIS TSAR GCIG GI SRED LEN SRID PA GSUM PO TSAR GCIG GI 'DU BYED KYI LAS KYI RJES DER 'BYUNG BAS RNAM SHES KYI RTEN 'BREL GYI SNGON DU 'BYUNG BA GANG ZHIG ,MDO DES GSUM PO DE TSOR BA'I RJES SU BSTAN PA'I PHYIR, BCU GNYIS PO RIM PA 'CHOL BAR BSTAN PA LA DGOS PA YOD DE, RTEN 'BREL GZHAN GYI TSOR BA LA BRTEN NAS GZHAN GYI SRED LEN SRID PA GSUM 'BYUNG BAR SDUG KUN GNYIS 'GAL ME'I 'KHOR LO BZHIN 'KHOR BAR SHES PA'I CHED DU YIN PA'I PHYIR, KHA CIG ,SNGON DANG PHYI MTHAR GNYIS GNYIS DANG, ,ZHES SOGS LA BRTEN NAS BYE BRAG SMRA BA'I LUGS LA; YAN LAG BCU GNYIS TSE GSUM KHO NA LA RDZOGS PAR 'DOD PA YIN ZER BA MI RIGS TE, DE'I LUGS LA YANG SKYES GNAS MYONG 'GYUR GYI YAN LAG GNYIS PA 'DU BYED KYI LAS YOD PA'I PHYIR TE, LUNG LAS GZHON NU GTZUG PHUNG CAN GYIS PHA DGRA BCOM PA BSAD PA'I LAS KYI DBANG GIS DMYAL BAR SKYES PAR GSUNGS PA SGRA JI BZHIN DU 'DOD PA'I PHYIR, DE LTA NA'ANG, SNGON DANG PHYI MTHAR GNYIS GNYIS DANG, ,ZHES SOGS DANG MI 'GAL TE, DE'I DON NI DGE SLONG DAG 'DI YOD PA'I PHYIR, ZHES SOGS KYI LUNG GIS TSE DANG PO LA RTEN 'BREL TSAR GCIG GI YAN LAG DANG PO GNYIS DANG, GSUM PA LA THA MA GNYIS RDZOGS, TSE BAR PA LA RTEN 'BREL GZHAN ZHIG GI RNAM SHES SOGS LNGA DANG, TSAR GCIG PO DE'I SRED LEN SRID PA GSUM RDZOGS PAR YOD PAR BSTAN PA DANG, DGOS PA BSHAD MA THAG PA DANG, BDAG GI DUS GSUM DU RMONGS PA LDOG PA'I CHED DU YIN PAR BSTAN PA'I PHYIR; BYE BRAG SMRA BA'I LUGS LA 'GRO BA DE'I BAR SRID DU SKYES NAS BZLOG MI SRID PA SOGS KYI JI LTAR BUL BA'I TSE YANG TSE GSUM LA RDZOGS DGOS PAR 'DOD KYANG, THEG CHEN PA'I LUGS LA SNGAR BSHAD PA LAS BZHI LA RDZOGS PA YOD PA'I RGYU MTSAN GZHAN YANG YOD DE, BAR SRID @9A *, ,LAS BZLOG PA YOD PA DANG, 'CHI KHAR BDAG CHAD DOGS KYI 'JIGS PA'I DBANG GIS PHUNG PO LA SRED PA'I SRED PA DE RTEN 'BREL TSAR GCIG GI SRED PA DANG, MI'I BAR DOR SKYES PA'I BAR DOR PHA MA GANG RUNG LA CHAGS PA'I 'DOD CHAGS TSAR GCIG PO DE'I LEN PAR YANG BYED DGOS PA'I PHYIR, TSE GCIG LA RDZOGS PA NI MED DE, SNGA MA NAS MA SHI BAR 'DIR SKYE BA LEN PA MED PA'I PHYIR, KHA CIG ,TSE GNYIS LA RDZOGS TSUL DE MI 'THAD PAR THAL, MI'I SKYE BA SNGA PHYI GNYIS KYI BAR DU RTEN 'BREL GZHAN GYI TSES CHOD PA'I PHYIR, DER THAL, TSE GZHAN GYIS CHOD PA'I PHYIR, ZER NA, MA KHYAB CING, RTAGS DER THAL, MI'I BAR SRID KYI TSE DE MI'I TSE LAS GZHAN GYI TSE YIN PA'I PHYIR, DER THAL, MI'I BAR SRID PA DE 'GRO BA RIGS DRUG PO GANG YANG MA YIN PA'I PHYIR, MDZOD LAS, SRID PA BAR MA 'GRO MA GTOGS, ,ZHES GSUNGS PA'I PHYIR, KHA CIG NA RE, BUL BA'I TSE NA TSE BZHI LA RDZOGS PA DE MI 'THAD PAR THAL, KHYI'I PHUNG PO 'PHEN BYED KYI LAS GCIG GIS 'PHANGS PA'I YAN LAG BCU GNYIS KHYI'I SKYES GNAS BRGYAR RDZOGS DGOS PA YOD PA'I PHYIR DANG, 'PHEN BYED KYI LAS DANG, RNAM SMIN GYI PHUNG PO'I BAR DU BSKAL PA BRGYA PHRAG DU MAS CHOD PA'I LAS SHIG YOD PA'I PHYIR, DANG PO DER THAL, TSIGS BCAD GCIG TZAM NYAN PA LA, ,GANG GIS BLA MAR MI 'DZIN PA, ,KHYI YI SKYE BA BRGYAR BLANGS NAS, ,RME SHA CAN DU SKYE BAR 'GYUR, ,ZHES GSUNGS PA'I PHYIR, GNYIS PA DER THAL, MDO LAS, LUS CAN RNAMS KYI LAS RNAMS NI, ,BSKAL PA BRGYAR YANG CHUD MI ZA, ,TSOGS SHING DUS LA BABS PA NA, ,'BRAS BU SMIN PA NYID DU 'GYUR, ,ZHES GSUNGS PA'I PHYIR, ZER NA, SKYON MED DE, DANG PO'I DON NI, KHYI'I SKYE BA BRGYA PO DE KHYI'I 'PHEN BYED KYI LAS GCIG GIS 'PHANGS PA'I TSE YIN PAS RTEN 'BREL GZHAN GYI TSE MA YIN PA'I PHYIR TE, CHA CAN GCIG LA CHA SHAS BRGYAR PHYE BA YIN PA'I PHYIR, GNYIS PA'I DON NI, 'PHEN BYED KYI LAS DANG RNAM SMIN GYI PHUNG PO'I BAR GYI TSE DE RNAMS RTEN 'BREL GZHAN GYI TSE YIN PA'I PHYIR, BDUN PA SA MTSUNGS @9B BSHAD PA LA, SHES BYED KYI LUNG BKOD, LUNG GI DON BSHAD PA'O, ,DANG PO LA SA MTSUNGS TSUL GANG LAS MTSUNGS PA'I TSUL YOD DE, DON GSAL RNAM NGES LAS, SKYE BA'I SA PA GANG YIN PA MNGON PAR 'GRUB PAR BYED PA'I NYON MONGS PA YANG NGES PAR DE'I SA PA'O, ,'PHEN PAR BYED PA'I NYON MONGS PA LA NI MA NGES TE, ZHES GSUNGS PA'I PHYIR, GNYIS PA LA GZHAN LUGS DANG, RANG LUGS GNYIS, DANG PO LA KHA CIG NA RE, MA RIG PA MA GTOGS GZHAN RNAMS GANG DU SKYE SAS BSDUS PAS SA MTSUNGS PA KHO NA YIN ZHING, MA RIG PA LA NYON YID 'KHOR DU GYUR PA'I MA RIG PA DANG, YID SHES 'KHOR DU GYUR PA'I MA RIG PA DANG GNYIS LAS, DANG PO GANG DU LAS BSOG PA'I RTEN GYIS BSDUS PA YIN TE, SUM CU PA LAS, GANG DU SKYES PA DE YI'O, ,ZHES GSUNGS PA'I PHYIR, GNYIS PA NI, 'OG SAS BSDUS PA YIN TE, 'DOD PA NAS BSAM GTAN DANG POR SKYE BA LEN PA'I TSE DE 'DOD PA'I SAS BSDUS PA NAS BZUNG STE, CI YANG MED NAS SRID RTZER SKYE BA LEN PA'I TSE, DE CI YANG MED KYI SAS BSDUS PA DANG, SRID RTZE NAS CI YANG MED DU SKYE BA LEN PA'I TSE DE RNAM SHES KYI SAS BSDUS PA NAS, BSAM GTAN GNYIS PA NAS DANG POR SKYE BA'I TSE DE 'DOD PA'I SAS BSDUS PA'I PHYIR, ZHES ZER, KHA CIG NA RE, 'DOD PA NAS 'DOD PAR SKYE BA LEN PA'I TSE YAN LAG BCU GNYIS SA MTSUNGS PAR MA ZAD, BSAM GTAN DANG PO NAS BSAM GTAN DANG POR SKYE BA LEN PA'I TSE NA THAMS CAD SA MTSUNGS PA YIN TE, TSANGS RIS KYI RTEN LA TSANGS PA 'DUN NA 'DON DANG; TSANGS CHEN DU SKYE BA'I LAS BSAGS, LAS DE LA GSOS BTAB NAS DE NYID DU SKYES PA DE'I TSE YAN LAG BCU GNYIS PO THAMS CAD BSAM GTAN DANG PO'I SAS BSDUS PA'I PHYIR, ZHES GSUNGS, DE GNYIS KYI LUGS LA, GONG MA'I SNYOMS 'JUG LAS MA NYAMS PAR 'OG SA'I NYON MONGS MNGON DU GYUR PA MED KYANG, NYAMS NAS 'OG SA'I NYON MONGS PA MNGON DU GYUR PA YOD PA LUNG RIGS KYIS 'GRUB PA'I PHYIR, MDZOD LAS, 'CHI 'PHO BDAG LAS NYON MONGS KUN, ,ZHES GSUNGS PA'I PHYIR, SA GZHAN GYI LAS KYIS SA GZHAN GYI RNAM SMIN GYI PHUNG PO 'PHEN 'GRUB MI NUS PA BZHIN @10A *, ,DU; ;SA GZHAN GYI NYON MONGS KYIS SA GZHAN GYI LAS LA GSOS MI 'DEBS PA'I PHYIR, ZHES GSUNGS, KHA CIG NA RE, SRED LEN GNYIS MA GTOGS SNGAR BSHAD PA LTAR YIN ZHING, SRED LEN GNYIS PO DE 'DOD PA NAS BSAM GTAN DANG POR SKYE BA LEN PA DE'I TSE 'DOD PA DANG, BSAM GTAN DANG PO GNYIS KA'I SAS BSDUS PA YOD, BSAM GTAN DANG PO NAS 'DOD PAR SKYE BA LEN PA'I TSE SRED LEN GNYIS KA BSAM GTAN DANG PO'I SAS BSDUS PA YIN TE, GONG SA'I RTEN LA 'OG SA'I NYON MONGS MNGON DU GYUR PA MED PA'I PHYIR, DE NA MA RIG PA LA NYON YID 'KHOR DU GYUR PA'I MA RIG PAS KHYAB BO ZHES GSUNGS, DE THAMS CAD KYI KHAMS GSUM SA DGU GANG NAS 'DOD PAR SKYE BA LEN PA DE'I TSE NA YAN LAG BCU GNYIS PO THAMS CAD SA MTSUNGS PA KHO NA YIN NO, ,ZHES GSUNGS PA YIN NO, ,'O NA BSAM GTAN DANG PO'I RTEN LA BSAM GTAN DANG PO'I 'PHEN BYED KYI LAS BSAGS, DE LA SRED LEN GNYIS KYIS GSOS MA BTAB PAR 'DOD PAR SKYE BA BLANGS, SNGAR GYI LAS LA SRED LEN GNYIS KYIS GSOS BTAB NAS BSAM GTAN DANG POR SKYE BA BLANGS PA'I TSE MA RIG PA 'DOD PA'I SAS BSDUS PAR THAL, 'OG SA NAS GONG SAR SKYE BA LEN PA DE'I TSE NA DE 'DRA'I MA RIG PA DE 'OG SA 'OG SAS BSDUS PA YIN PA'I PHYIR, 'DOD MI NUS TE, BSAM GTAN DANG PO'I SAS BSDUS PA'I PHYIR, GZHAN YANG, SRID RTZE'I RTEN LA CI YANG MED KYI RNAM SMIN GYI PHUNG PO 'PHEN BYED KYI LAS BSAGS, LAS DE'I DBANG GIS CI YANG MED DU SKYES PA DE'I TSE NA MA RIG PA RNAM SHES KYI SAS BSDUS PAR THAL, DAM BCA' DE'I PHYIR, 'DOD MI NUS TE, SRID RTZE'I RTEN LA CI YANG MED KYI PHUNG PO 'PHEN BYED KYI LAS BSOG PA MED PA'I PHYIR, ZER NA, DE YANG RIGS PA MA YIN TE, DE'I RTEN LA DE 'DRA'I LAS GSAR DU BSOG PA YOD PA'I PHYIR, DER THAL, BSAM GTAN DANG PO'I RTEN LA 'DOD PA'I 'PHEN BYED KYI LAS GSAR BSOG YOD PA'I PHYIR, DER THAL, GONG SA'I RTEN LA 'OG SA'I NYON MONGS MNGON DU GYUR PA YOD PA'I PHYIR, GZHAN YANG, GONG SA'I RTEN LA 'OG SA'I 'PHEN BYED KYI LAS GSAR BSOG MED PA DANG, @10B BSAM GTAN DANG PO'I RTEN LA BSAM GTAN DANG PO'I 'PHEN BYED KYI LAS GSAR BSOG MED PA MKHAS PA PHYI MA GNYIS KYI LUGS LA MI 'THAD DE, BSAM GTAN DANG PO'I RTEN LA DE'I 'PHEN BYED KYI LAS BSOG PA YOD PA GANG ZHIG ,KHAMS GONG DU RANG SA'I RTEN LA RANG SA'I RNAM SMIN GYI PHUNG PO 'PHEN BYED KYI LAS GSAR BSOG YOD PA'I PHYIR, DANG PO DER THAL, TSANGS RIS KYI RTEN LA TSANGS PA MDUN NA 'DON DANG, TSANGS CHEN DU SKYE BA'I LAS GSAR BSOG YOD PAR KHAS BLANGS PA DANG 'GAL BA'I PHYIR, GNYIS PA DER THAL, GONG SA'I SNYOMS 'JUG LAS MA NYAMS PAR 'OG SA'I NYON MONGS MNGON DU GYUR PA MED KYANG, NYAMS NAS MNGON DU GYUR PA YOD PAR LUNG RIGS KYIS BSGRUBS PA DANG 'GAL BA'I PHYIR, DE LA KHO NA RE, BSAM GTAN DANG PO'I RTEN LA BSAM GTAN DANG PO'I 'PHEN BYED KYI LAS GSAR BSOG MED PAR THAL, DE'I RTEN LA BSAM GTAN DANG PO'I NYER BSDOGS SGOM PA MED PA'I PHYIR; ZER NA, DE MI 'THAD DE, DE'I RTEN LA DE'I NYER BSDOGS GSAR DU SGOM PA YOD PA'I PHYIR, DER THAL, BSAM GTAN DANG PO'I DNGOS GZHI LAS NYAMS NAS BSAM GTAN DANG PO'I NYER BSDOGS GSAR DU SGOM PA'I BSAM GTAN DANG PO BA'I GANG ZAG YOD PA'I PHYIR TE, BSAM GTAN DANG PO'I DNGOS GZHI LAS NYAMS PA'I BSAM GTAN DANG PO BA'I GANG ZAG YOD PA'I PHYIR, GZHAN YANG, BSAM GTAN DANG PO'I RNAM SMIN GYI PHUNG PO 'PHEN BYED KYI LAS YIN NA BSAM GTAN DANG PO'I NYER BSDOGS YIN DGOS PAR THAL, KHYOD KYI SGRUB BYED 'THAD PA'I PHYIR, 'DOD MI NUS TE, RGYU SNYOMS 'JUG GI BSAM GTAN DANG PO LA DE'I NYER BSDOGS KYIS MA KHYAB PA'I PHYIR, DER THAL, RGYU SNYOMS 'JUG GI BSAM GTAN DANG PO'I DNGOS GZHI CHUNG NGU 'BRING CHEN PO GSUM BSGOMS PA LA BRTEN NAS BSAM GTAN DANG PO'I GNAS SU SKYE BA'I PHYIR, YANG, SRID RTZE'I PHUNG PO 'PHEN BYED KYI LAS YIN NA CI YANG MED KYI RTEN LA BSAGS PAS KHYAB PAR THAL, CI YANG MED NAS SRID RTZER SKYE BA LEN PA'I TSE NA MA RIG PA LA CI YANG MED KYI SAS BSDUS PAS KHYAB PA'I PHYIR, 'DOD NA, 'DOD PA'I RTEN LA GSAR DU BSAGS PA'I SRID RTZE'I 'PHEN BYED KYI LAS CHOS CAN, DER THAL, DE'I @11A *, ,PHYIR, MA GRUB NA, DER THAL, 'DOD PA'I RTEN LA SRID RTZE'I NYER BSDOGS GSAR DU SGOM PA'I PHYI ROL PA YOD PA'I PHYIR, 'DOD MI NUS SO, ,GZHAN YANG, BSAM GTAN DANG PO'I RTEN LA BSAM GTAN DANG PO'I 'PHEN BYED KYI LAS GSAR BSOG YOD PAR THAL; TSANGS RIS KYI RTEN LA TSANGS PA MDUN NA 'DON DANG, TSANGS CHEN DU 'PHEN BYED KYI LAS GSAR BSOG YOD PA'I PHYIR, DER THAL, 'OG SA 'OG SA'I RTEN LA GONG SA GONG SA'I 'PHEN BYED KYI LAS GSAR DU BSOG PA YOD PA'I PHYIR, GONG SA'I RTEN LA 'OG SA'I NYON MONGS MNGON DU GYUR PA MED PA'I LUGS LA, TSANGS CHEN PA'I LHA'I RTEN LA DMYAL BA 'PHEN BYED KYI LAS GSAR BSOG YOD DAM MED, MED NA MI RIGS TE, DE 'DRA'I GANG ZAG DE THAR PA LA YID BRTAN DU MI RUNG BA'I LOG LTA'I DBANG GIS DMYAL BA'I RNAM SMIN GYI PHUNG PO'I 'PHEN BYED KYI LAS GSAR BSOG YOD PA DON GSANG RNAM NGES LAS GSUNGS PA DANG 'GAL BA'I PHYIR, YOD NA, DE TSANGS CHEN PA'I RTEN DE NYID LA BSAGS SAM, DE NAS SHI NAS BAR SRID KYI RTAN LA BSAGS, DANG PO LTAR NA KHAMS GONG MA'I RTEN LA 'OG MA'I RNAM SMIN GYI PHUNG PO 'PHEN BYED KYI LAS GSAR BSOG MED PA DANG 'GAL, GNYIS PA LTAR NA, DE 'DRA'I BAR SRID KYI RTEN LA THAR PA MA YIN PA LA THAR PAR 'DZIN PA'I LOG LTA SKYES SHING, TSANGS CHEN GYI RTEN LA MA SKYES PA'I KHYAD PAR 'THAD PAR THAL, TSANGS CHEN PA'I LHA SHI 'PHOS NAS BDE 'GRO'I BAR SRID KYI RTEN LA THAR PA LA YID BRTAN MI RUNG BA'I LOG LTA SKYES SHING, DE 'DRA BA'I LHA'I RTAN LA MA SKYES PA'I KHYAD PAR 'THAD PA'I PHYIR, 'DOD NA, TSANGS CHEN LOG LTA'I GNAS MA YIN PAR THAL, 'DOD PA'I PHYIR, 'DOD PA'I BDE 'GRO'I BAR SRID DU 'CHI 'PHO KHA MA'I TSANGS CHEN PA'I LHA'I RGYUD LA DE 'DRA BA'I BAR SRID DU SKYE BA'I SRID LAS DE DANG MTSUNGS LDAN GYI NYON MONGS YOD PAR THAL, DE'I RGYUD LA DE 'DRA BA'I LAS YOD PA'I PHYIR, DER THAL, DE 'DRA BA'I BAR SRID DU SKYE BA LEN KHA MA'I GANG ZAG YIN PA'I PHYIR, 'DOD NA, GONG SA'I RTEN LA SOGS PA'I NYON MONG MNGON DU GYUR PA YOD PAR THAL, 'DOD PA'I PHYIR, @11B KHA CIG ,GONG SA'I RTEN LA 'OG SA'I 'PHEN BYED KYI LAS GSAR BSOG MED PA DANG, BSAM GTAN DANG PO'I BAR SRID KYI RTEN LA DMYAL BA'I 'PHEN BYED KYI LAS GSAR BSOG YOD PAR 'DOD PA KHAS BLANGS NANG 'GAL BA YIN TE, TSANGS CHEN GYI BAR SRID KYI RTEN LA DMYAL BA'I 'PHEN BYED KYI LAS GSAR DU BSAGS NA KHAMS GONG GI RTEN LA'ANG BSAGS DGOS PA'I PHYIR, DER THAL, DE 'DRA BA'I GANG ZAG DE KHAMS GONG MA'I GANG ZAG YIN PA'I PHYIR TE, GZUGS NYER 'GRO'I PHYIR MI 'ONG BAR 'DA' BA DE KHAMS GONG GI NYER 'GRO'I PHYIR MI 'ONG YIN PA'I PHYIR, GZHAN YANG, KHAMS GONG GI RTEN LA DMYAL BA'I 'PHEN BYED KYI LAS GSAR BSOG YOD PAR THAL, TSANGS CHEN GYI RTEN LA MA RIG PAS KUN NAS BSLANGS TE, CHOS LA BRTEN PA'I SDIG PA GSAR BSOG YOD PA'I PHYIR, KHA CIG MA KHYAB ZER, MA GRUB NA, DER THAL, DE'I RTEN LA THAR PA MA YIN PA LA THAR PAR 'DZIN PA'I LOG LTA SKYE BA YOD PA'I PHYIR, MA KHYAB MTSAMS LA, MA RIG PAS KUN NAS BSLANGS TE THAR PA DANG THAMS CAD MKHYEN PA DANG, SKYE BA SNGA PHYI SOGS MED PAR LTA BA'I LOG LTA'I DBANG GIS DMYAL BAR 'PHEN BYED KYI LAS GSAR BSOG MED PAR THAL, MA KHYAB PA GANG ZHIG , CHOS YIN PA LA CHOS MA YIN PAR BZUNG BA DANG, CHOS MA YIN PA LA CHOS SU BZUNG BA SDIG PA MNYAM PAR GSUNGS PA'I PHYIR, RANG GI LUGS BSHAD PA LA, GANG DU MTSUNGS PA'I SA BSHAD, GANG MTSUNGS PA'I CHOS, JI LTAR MTSUNGS PA'I TSUL DANG GSUM, DANG PO YOD DE, SPYIR KHAMS GSUM SA DGU DANG, DE YANG BSDU NA RANG SA, GONG SA, 'OG SA DANG BCAS PA RNAMS YOD PA'I PHYIR, GNYIS PA YOD DE, YAN LAG BCU GNYIS PO DE YIN PA'I PHYIR, JI LTAR MTSUNGS PA'I TSUL YOD DE, KHAMS GSUM SA DGU GANG NAS GANG DU SKYE BA LEN PA'I TSE NA SA MTSUNGS MI MTSUNGS GNYIS KA YOD, 'DOD PA NAS 'DOD PAR SKYE BA LEN PA'I TSE NA SA MTSUNGS MI MTSUNGS GNYIS KA YOD, 'DOD PA NAS BSAM GTAN DANG POR SKYE BA LEN PA DE'I TSE NA GNYIS KA YOD PA NAS BZUNG STE, CI YANG MED NAS SRID RTZE DANG, ,SRID RTZE NAS CI YANG MED DU SKYE @12A *, ,BA NA GNYIS KA YOD PA NAS, BSAM GTAN DANG PO NAS 'DOD PAR SKYE BA'I TSE NAS MTSUNGS MI MTSUNGS GNYIS KA YOD PA'I PHYIR, 'DOD PA NAS 'DOD PAR SKYE BA LEN PA DE'I TSE SA MTSUNGS PA YOD DE, 'DOD PA'I RTEN LA DE'I RNAM SMIN GYI PHUNG PO 'PHEN BYED KYI LAS BSAGS, RTEN DE NYID LA SRED LEN GNYIS KYIS GSOS BTAB NAS 'DOD PAR SKYE BA BLANGS PA'I TSE THAMS CAD 'DOD PA'I SAS BSDUS PA'I PHYIR TE, MA RIG PA DANG LAS GNYIS SRED LEN GNYIS KYANG DE'I SAS BSDUS, GZHAN RNAMS KYANG 'DOD PA'I SAS BSDUS PA'I PHYIR, DANG PO DER THAL, DE'I TSE NA 'JIG LTA LHAN SKYES 'DOD PA'I SAS BSDUS PA'I PHYIR, DER THAL, DE'I TSE NA NGA'O SNYAM PA'I BLO LHAN SKYES 'DOD PA'I SAS BSDUS PA'I PHYIR, NYON YID 'DOD PA'I LUGS LA, NYON YID GANG DU SKYES PA'I RTEN GYI SAS BSDUS PA'I PHYIR, GANG DU SKYES PA DE YI'O, ,ZHES GSUNGS PA'I PHYIR, GNYIS PA DER THAL, SA GZHAN GYI LAS KYIS SA GZHAN GYI RNAM SMIN GYI PHUNG PO 'PHEN 'GRUB MI BYED CING, SA GZHAN GYI LAS LA SA GZHAN GYI NYON MONGS PAS GSOS 'DEBS PAR MI NUS PA'I PHYIR, GSUM PA DER THAL, 'BRAS BU'I RTEN 'BREL BDUN PO DE DER SKYES PA'I 'GRO BA DE RNAMS KYI PHUNG POR GTOGS PA'I PHYIR TE, SKYE BA'I SA PA GANG YIN PA ZHES SOGS GSUNGS PA'I PHYIR, SA MI MTSUNGS PA'I TSUL YOD DE, BSAM GTAN DANG PO'I RTEN LA 'DOD PA'I PHUNG PO 'PHEN BYED KYI LAS BSAGS, LAS DE LA SRED LEN GYIS GSOS MA BTAB PAR 'DOD PAR SKYE BA BLANGS RTEN DE LA SNGAR GYI LAS LA GSOS BTAB, 'DOD PAR SKYE BA BLANGS PA'I TSE NA MA RIG PA BSAM GTAN DANG PO'I SAS BSDUS, GZHAN RNAMS 'DOD PA'I SAS BSDUS PA'I PHYIR, 'PHEN PAR BYED PA'I NYON MONGS PA LA NI NGES PA MED DE, ZHES GSUNGS PA'I PHYIR, 'DOD PA NAS BSAM GTAN DANG POR SKYE BA DE'I TSE NA SA MTSUNGS MI MTSUNGS GNYIS YOD DE, 'DOD PA'I RTEN LA BSAM GTAN DANG PO'I 'PHEN BYED KYI LAS BSAGS, DE LA SRED LEN GYIS GSOS BTAB @12B BSAM GTAN DANG POR SKYES PA DE'I TSE NA MA RIG PA 'DOD PA'I SAS BSDUS, GZHAN RNAMS BSAM GTAN DANG PO'I SAS BSDUS PA'I PHYIR, BSAM GTAN DANG PO'I RTEN LA BSAM GTAN DANG PO'I 'PHEN BYED KYI LAS BSAGS, DE LA SRED LEN GYIS GSOS MA BTAB PAR LAS GZHAN ZHIG GI DBANG GIS 'DOD PAR SKYE BA BLANGS SNGAR GYI LAS LA GSOS BTAB, DE'I DBANG GIS BSAM GTAN DANG POR SKYE BA BLANGS PA DE'I TSE THAMS CAD BSAM GTAN DANG PO'I SAS BSDUS PA'I PHYIR, DE 'DRA BA'I LAS KYANG YOD DE, MDZOD 'GREL DU MDO DRANGS PA LAS, LAS KYI 'KHOR BA LCI GANG DANG, , NYE BA GANG DANG GOMS PA GANG, ,SNGON BYAS GANG YIN DE DAG LAS, ,SNGA MA SNGA MA RNAM SMIN 'GYUR, ,ZHES GSUNGS PA'I PHYIR, SRID RTZE NAS SRID RTZER SKYE BA DE'I TSE SA MTSUNGS MI MTSUNGS GNYIS YOD DE, SRID RTZE'I RTEN LA SRID RTZE'I 'PHEN BYED KYI LAS GSAR DU BSAGS, RTEN DE NYID LA GSOS BTAB STE SRID RTZER SKYES PA DE'I TSE, THAMS CAD SRID RTZE'I SAS BSDUS, CI YANG MED KYI RTEN LA SRID RTZE'I 'PHEN BYED KYI LAS BSAGS, LAS DE LA SRED LEN GNYIS KYIS GSOS MA BTAB PAR, LAS GZHAN ZHIG GI DBANG GIS SRID RTZER SKYES, SNGAR GYI LAS LA GSOS BTAB SRID RTZER SKYES PA DE'I TSE NA DANG PO CI YANG MED KYI SAS BSDUS, GZHAN RNAMS SRID RTZE'I SAS BSDUS PA'I PHYIR, KHA CIG NA RE, SRID RTZE'I RTEN LA SRID RTZE'I 'PHEN BYED KYI LAS GSAR BSOG MED DO, ,ZHE NA, YOD DE, BSAM GTAN DANG PO'I RTEN LA BSAM GTAN DANG PO'I 'PHEN BYED KYI LAS GSAR BSOG YOD PAR BSGRUBS ZIN PA'I PHYIR, SRID RTZE NAS CI YANG MED DU SKYE BA LEN PA'I TSE NA SA MTSUNGS MI MTSUNGS GNYIS KA YOD DE, SRID RTZE'I RTEN LA CI YANG MED DU SKYE BA'I LAS BSAGS, LAS DE LA GSOS BTAB CI YANG MED DU SKYES PA DE'I TSE MA RIG PA SRID RTZE'I SAS BSDUS, GZHAN RNAMS CI YANG MED KYI SAS BSDUS PA'I PHYIR DANG, CI YANG MED KYI RTEN LA DE'I 'PHEN BYED KYI LAS BSAGS, DE LA GSOS MA BTAB PAR LAS GZHAN ZHIG GI DBANG GIS SRID RTZER SKYE BA BLANGS, SNGAR GYI LAS LA GSOS BTAB CI YANG MED DU SKYES PA DE'I TSE THAMS CAD CI YANG MED KYI SAS @13A *, ,BSDUS PA'I PHYIR, KHA CIG NA RE, SRID RTZE'I RTEN LA CI YANG MED KYI 'PHEN BYED KYI LAS BSOG PA MED ZER NA, MI RIGS TE, YOD PA SNGAR BSGRUBS ZIN PA'I PHYIR, MKHAS PA GONG MA RNAMS KYI GSUNG RIS DANG CUNG MI MTHUN PA'I KHAMS GSUM SA DGU GANG NAS GANG DU SKYE YANG, YAN LAG BCU GNYIS PO SA MTSUNGS GNYIS KA YOD PAR 'DOD DGOS PA'I GNAD NI 'DI LTAR YIN TE, DON GSANG RNAM NGES KYI LUNG DANG, KHAMS GSUM SA DGU PO DER RANG SA NAS RANG SAR SKYE'I LAS GSAR DU BSOG PA YOD, 'OG SA NAS 'OG SAR SKYE BA'I LAS GSAR BSOG YOD, GONG SA NAS 'OG SAR SKYE BA'I LAS GSAR BSOG YOD, GONG SA'I RTEN LA 'OG SA'I SNYOMS 'JUG DANG, NYON MONGS MNGON DU GYUR PA YOD, GONG SA'I RTEN LA MI DGE BA'I LAS GSAR BSOG YOD PA'I LUNG RIGS LA BRTEN NAS DE LTAR 'DOD DGOS PAR MNGON PA'I PHYIR, SAS BSDUS PA'I DON SA DE DANG DE NA YOD PA DANG, DE'I CHOS LA DMIGS PAS DES BSDUS PAS MA KHYAB STE, BSAM GTAN GNYIS PA YAN CHAD KYI LUS DBANG MIG DBANG SOGS GNYIS PA SOGS NA YOD KYANG BSAM GTAN DANG PO'I SAS BSDUS PA DANG, RNAM MKHYEN GYIS KHAMS GSUM GA'I CHOS LA DMIGS KYANG, DE DAG GIS MA BSDUS PA'I PHYIR, DANG PO DER THAL, GNYIS PA SOGS NA LUS MIG DANG, ZHES SOGS GSUNGS PA'I PHYIR, RANG LUGS SAS BSDUS TSUL YOD DE, 'DOD PA'I SAR GTOGS 'DOD PA'I SAS BSDUS PA NAS BZUNG STE, SRID RTZE'I SAR GTOGS SRID RTZE'I SAS BSDUS PA'I PHYIR, DE YANG MTHA' GCIG TU MA NGES TE, BSAM GTAN GNYIS PA SOGS KYI LUS DBANG MIG DBANG SOGS RTOG DPYOD KYI SA PA YIN PAS, RTOG DPYOD LA 'DOD CHAGS DANG MA BRAL BA'I BSAM GTAN DANG PO'I SAS BSDUS, GNYIS PA'I NYER LEN GYI PHUNG PO LTA BU DE RNAM SMIN GYI PHUNG PO YIN PAS GNYIS PA'I SAS BSDUS, GNYIS PA'I DNGOS GZHI LTA BU DE'I YON TAN YIN PAS DE NYID KYIS BSDUS PA'I PHYIR, GSUM PA RTEN 'BREL GTAN LA PHAB PA LA DGOS PA YOD DE, BDEN BZHI'I @13B BLANG DOR LA 'JUG PA'I DGOS PA YOD PA'I PHYIR, DER THAL, NYON MONGS PHYOGS KYI RTEN 'BREL LUGS MTHUN DU BSTAN PA LA BRTEN NAS SDUG BDEN SHES BYAR KHONG DU CHUD PAR 'BYUNG, LUGS LDOG TU BSTAN PA LA BRTEN NAS KUN 'BYUNG SPANG BYAR SHES PA DE 'BYUNG, RNAM BYANG PHYOGS KYI RTEN 'BREL LUGS MTHUN DU BSTAN PA LA BRTEN NAS 'GOG PA MNGON DU BYA BAR SHES PA DE 'BYUNG, DE LUGS LDOG TU BSTAN PA LA BRTEN NAS LAM BDEN BSTEN BYAR KHONG DU CHUD PAR 'BYUNG BA'I PHYIR, DANG PO DER THAL, MA RIG PA'I RKYEN GYIS 'DU BYED 'BYUNG BA NAS SKYE BA'I RKYEN GYIS RGA SHI 'BYUNG BAR BSAMS PA LA BRTEN NAS, SKYE BA DANG RGA SHI'I NYES DMIGS SDUG BSNGAL GYI RANG BZHIN DU SHES PA DE 'BYUNG BA'I PHYIR, GNYIS PA DER THAL, RGA SHI 'BYUNG, GANG LAS 'BYUNG NA SKYE BA LAS 'BYUNG BA NAS 'DU BYED KYI LAS 'BYUNG BA NA, MA RIG PA LAS 'BYUNG BAR BSAM PA LA BRTEN NAS SDUG BSNGAL LAS NYON GYI RTZA BA CAN DANG, DE YANG MA RIG PA LAS 'BYUNG BAR MTHONG BA'I SGO NAS KUN 'BYUNG SPANG BYAR KHONG DU CHUD PA DE 'BYUNG BA'I PHYIR, GSUM PA DER THAL, MA RIG PA 'GAGS PAS 'DU BYED 'GAG PA NAS BZUNG STE, SKYE BA 'GAGS PAS RGA SHI 'GAG PA'I BAR BSAM PA LA BRTEN NAS, LAS NYON GNYIS GNYEN POS GTAN ZAD BYAS PA LA BRTEN NAS SDUG KUN GNYIS 'GAGS PA'I 'GOG BDEN MNGON DU BYA NUS SU KHONG DU CHUD PA 'BYUNG BA'I PHYIR, BZHI PA DER THAL, RGA SHI 'GAG ,GANG 'GAGS PAS 'GAG NA SKYE BA 'GAGS PAS 'GAG PA NAS BZUNG STE, 'DU BYED 'GAG ,GANG 'GAGS PAS 'GAG NA MA RIG PA 'GAGS PAS 'GAG PA'I BAR BSAM PA LA BRTEN NAS BDAG MED RTOGS PA'I YE SHES, BDAG 'DZIN GNYIS KYI GNYEN POR RIGS PAR MTHONG BA LA BRTEN NAS LAM BDEN BSTEN BYAR KHONG DU CHUD PAR 'BYUNG BA'I PHYIR, MDO LAS, MA RIG PA'I RKYEN GYIS 'DU BYED CES SOGS GSUNGS PA DE RANG 'BRAS PHYI MA SKYED PA'I DON YIN GYI, RTEN 'BREL TSAR GCIG GI GO RIMS BSTAN PA MA YIN TE, RTEN 'BREL TSAR GCIG GI DBANG DU BYAS NAS, MA RIG PAS KUN NAS BSLANGS 'DU BYED KYI LAS BSAGS, DE LA SRED LEN GYIS GSOS @14A *, ,BTAB SRID LAS NUS PA MTHU CHEN DU BYAS NAS, 'BRAS DUS RNAM SHES KYI RTEN 'BREL DANG SKYE BA'I RTEN 'BREL DUS MNYAM DU GRUB NAS DE NAS RGA SHI'I BAR DU GRUB PA'I PHYIR, DON BSDU NA, LTOS NAS GRUB PA'I RTEN 'BREL PHRA MO GTAN LA PHAB PA LA DGOS PA YOD DE, DE GTAN LA PHAB PA LA BRTEN NAS DE MNGON SUM DU SHES TE MI GNAS PA'I MYANG 'DAS THOB PA'I DGOS PA YOD PA'I PHYIR RO,, ,,SHES RAB KYI PHA ROL TU PHYIN PA'I MAN NGAG GI BSTAN BCOS MNGON PAR RTOGS PA'I RGYAN GYI DGONGS 'GREL PADMA DKAR PO'I PHRENG BA ZHES BYA BA LAS MKHAS SHING GRUB PA BRNYES PA'I DGE SLONG DGE 'DUN BSTAN PA DAR RGYAS KYIS SBYAR BA'I RTEN 'BREL GYI SPYI DON BSHAD ZIN TO,,