*, ,LTA KHRID NGES DON RAB GSAL BZHUGS SO, ,RAB 'BYAMS RGYAL BA'I ME MKHYEN RAB KUN BSDUS GSUM GI DBANG PHYUG 'JAM PA'I DBYANGS, ,PHYOGS 'DIR ZAB DON NYI LTAR GSAL MDZAD ZLA MED KUN MKHYEN TZONG KHA PA, DE SRAS THU BO SMRA BA'I NYI MA MKHAS GRUB DGE LEGS DPAL BZANG PO, ,BRGYUD PAR BCAS LA DUS RNAMS KUN TU YID RAB DANG BAS PHYAG 'TSAL LO, ,ZAB CING RGYA CHE'I BLO GROS MCHOG GYUR RGYA MTSO LTA BUS THUGS RGYUD GTAMS, BLO GROS BZANG PO'I NYIN BYED 'OD KYIS SKAL LDAN PADMA RGYAS PAR MDZAD, BLO BZANG BSTAN PA'I KHANG BZANG MTHON POR SGYU PA'I RGYAL MTSAN LEGS PAR 'DZIN , SKAL DMAN 'GROL RGYAL BA LAS LHAG YONGS 'DZIN GSUM LA GUS PAS 'DUD, @118A *, ,GANG ZHIG RGYA BOD MKHAS GRUB DU MAS 'BAD KYANG RTOGS PAR MA GYUR BA'I, ,ZAB MO'I DON DE BLO DMAN BDAG 'DRA'I SPYOD YUL 'GYUR LTAG LA ZHIG ,'ON KYANG BSTAN LA TSAD MAR GYUR PA BLO BZANG RGYAL BA'I LEGS BSHAD DANG, YONGS 'DZIN DAM PA'I BKA' DRIN LA BRTEN 'DIR NI PHYOGS TZAM BRJOD PAR BYA, ,'DIR ZAB MO RTEN 'BYUNG GI DE KHO NA NYID GTAN LA PHAB NAS NYAMS SU LEN TSUL MDO TZAM BRJOD PA LA GNYIS, GROL BA DON GNYER GYIS DE KHO NA NYID KYI LTA BA BTZAL DGOS PA BSTAN PA DANG, DE KHO NA NYID GTAN LA PHAB NAS JI LTAR NYAM SU LEN PA'I TSUL LO, ,DANG PO LA GNYIS, ZAB MO'I DON LA NYAN BSAM SGOM GSUM BYAS PA'I PHAN YON DANG, DE DNGOS SO, ,DANG PO NI, MDO KUN LAS BTUS LAS, CHOS ZAB MO'I LA MOS PAS BSOD NAMS THAMS CAD SDUD PA YIN TE, SANGS RGYAS SU MA GRUB KYI BAR DU 'JIG RTEN PA DANG 'JIG RTEN LAS 'DAS PA'I PHUN SUM TSOGS PA THAMS CAD 'GRUB PAR GYUR TE, KHYE'U RIN PO CHES BYIN PA'I MDO LAS 'BYUNG, 'JAM DPAL BYANG CHUB SEMS DPA' THABS LA MKHAS PA DANG BRAL BAS BSKAL PA BRGYA STONG DU PHA ROL TU PHYIN PA LA SPYAD PA BAS, GANG GIS CHOS KYI RNAM GRANGS 'DI THE TSOM DANG BCAS PAS NYAN PA 'DI, BSOD NAMS DE BAS CHES MANG DU BSKYED NA GANG THE TSOM MED PAR LTA CI SMOS, GANG YI GER BRIS NAS LUNG 'BOGS PA DANG 'CHANG BA DANG, GZHAN DAG LA YANG RGYA CHER STON PA LTA CI SMOS, ZHES DANG, BZHI BRGYA PA LAS, BSOD NAMS CHUNG DUS CHOS 'DI LA, THE TSOM ZA BAR @118B YANG MI 'GYUR, THE TSOM ZA BA TZAM ZHIG GIS, SRID PA HRU LA POR BYED PAR 'GYUR, ZHES DANG, SDUD PA LAS 'DZAM BU'I GLING NA SEMS CAN JI SNYED MA LUS PA, DE DAG THAMS CAD BYANG CHUB MCHOG TU SEMS BSKYED NAS, LO STONG BYE BA MANG POR SBYIN PA BYIN BYAS LA, KUN KYANG 'GRO BA'I DON PHYIR BYANG CHUB RGYUR BSNGO YANG, GANG ZHIG SHES RAB PHA ROL PHYIN LA MNGON BRTZON PA THAN NYI MA GCIG CIG RJES SU MTHUN BYED NA, DE LA SBYIN PA'I PHUNG PO'I BSOD NAMS CHAR MI PHOD, DE PHYIR GA-YEL MED RTAG TU SHES RAB 'JUG PAR BYA, ZHES GSUNGS PA LTAR RO, , GNYIS PA THAR 'DOD KYIS DE KHO NA NYID KYI LTA BA BTZAL DGOS PA NI, MDO LAS GAL TE CHOS LA BDAG MED SO SOR RTOGS, SO SOR DE RTAGS GAL TE BSGOM PA NI, DE NI MYA NGAN 'DAS THOB 'BRAS BU'I RGYU, RGYU GZHAN GANG YIN DES NI ZHI MI 'GYUR, ZHES DANG, DPAL MGON 'PHAGS PA KLU SGRUB KYIS, MTSAN MA MED PA MA RTOGS PAR, KHYOD KYIS THAR BA MED PAR GSUNGS, ZHES DANG, GANGS RI'I KHROD KYI ZAB DON 'GREL BA'I SHING RTA CHEN PO RGYAL BA GNYIS PAS, 'JIG RTEN RGUD PA JI SNYED PA, DE YI RTZA BA MA RIG STE, GANG ZHIG MTHONG BAS DE LDOG PA, RTEN CING 'BREL BAR 'BYUNG BAR GSUNGS, ZHES GSUNGS PA LTAR YIN ZHING RGYU MTSAN DE NYID KYIS NA STON PA THUGS RJE CAN GYIS THABS KYI TSUL DANG RIGS PA'I SGO DU MA ZHIG GIS 'GRO BA RNAMS DE KHO NA NYID KHONG DU CHUD PA LA 'DZUN PAR MDZAD PA YIN TE, 'PHAGS PA YUL 'KHOR SKYONG GIS ZHUS PA LAS, STONG PA ZHI BA SKYE BA MED PA'I TSUL, MI SHES PAS NI 'GRO BA 'KHYAMS @119A *, ,GYUR PA;DE DAG THUGS RJE MNGA' BAS THABS TSUL DANG, RIGS PA BRGYA DAG GIS NI 'DZUD PAR MDZAD, CES DANG, RGYAL SRAS CHEN PO ZHI BA LHAS, YAN LAG 'DI DAG THAMS CAD NI, THUB PAS SHES RAB DON DU GSUNGS, DE YI PHYIR NI SDUG BSNGAL DAG ,ZHI BAR 'DOD PAS SHES RAB BSKYED, ZHES GSUNGS PAS SO, , GNYIS PA LA GSUM, ZAB DON 'GREL BA'I DGONGS 'GREL MKHAN PO GANG GI RJES SU 'BRANG BA DANG, DES ZAB DON JI LTAR BKRAL PA DANG, DE'I RJES SU 'BRANG NAS RANG NYID KYIS GTAN LA PHAB NAS SGOM TSUL LO, ,DANG PO NI, THAR 'DOD KYIS DE KHO NA NYID RTOGS DGOS NA RANG DBANG DU RTOGS PAR MI NUS SHING RGYAL BA'I BKA' YANG SHIN TU RTOGS DKA' BAS 'GREL BYED TSAD LDAN ZHIG GIS RJES SU 'BRANG DGOS PA LA, GANG GI RJES SU 'BRANG SNYAM NA, RGYAL BA RANG NYID KYIS DES DON 'GREL PAR LUNG BSTAN PA'I SHING RTA CHEN PO MGON PO KLU SGRUB DANG DE'I BZHED SROL JI LTA BA BZHIN 'DZIN PA'I ZLA BA GRAGS PA GNYIS KYI RJES SU 'BRANG BAR RIGS TE, MNYAM MED JO BO CHEN POS, STONG NYID GANG GIS RTOGS ZHE NA, DE BZHIN GSHEGS PAS LUNG BSTAN CING, CHOS NYID BDEN PA GZIGS PA YI, KLU SGRUB SLOB MA ZLA GRAGS YIN, DE LAS RGYUD PA'I MAN NGAG GIS, CHOS NYID BDEN PA RTOGS PAR 'GYUR, ZHES GSUNGS SHING, BDAG CAG GI 'DREN MCHOG DAM PA LA RJE BTZUN 'JAM DBYANGS KYIS, ZLA BA GRAGS PA NI STENG PHYOGS 'JIG RTEN GYI KHAMS KYI ZHING GCIG GI DE BZHIN GSHEGS PA ZHIG GI DRUNG NAS BYANG CHUB SEMS DPA' RNAM DPYOD DANG SNYING @119B STOBS MCHOG TU GYUR BA ZHIG ,ZHING 'DIR 'PHAGS PA KLU SGRUB KYI LUGS BSTAN PA'I SNYING PO GSAL BAR BYA BA'I SLAD DU BSAM BZHIN DU SKYE BA BZUNG BA YIN PAS, 'DI 'PHAGS PA KLU SGRUB KYI DGONGS PA 'GREL PA LA SNGAGS MTSAN NYID GANG GI SKABS SU'ANG 'KHRUL PA PHRA MO TZAM YANG MED PAS, 'DI LA RNAM PA THAMS CAD DU YID CHES KYI GNAS 'BA' ZHIG TU NGES PAR GZUNG DGOS PA YIN NO, ,ZHES GSUNGS PAS SO, ,GNYIS PA NI, 'O NA ZLA BA GRAGS PAS RGYAL BA'I BKA' DANG KLU SGRUB KYI DGONGS PA BZHIN, GZHI GANG GI STENG DU, RIGS PA GANG GIS, DE KHO NA NYID GTAN LA 'BEBS TSUL JI LTAR MDZAD CE NA, DE LA GZHI 'GRO BA RNAMS 'KHOR BAR 'CHING BYED KYI GTZO BO BDAG 'DZIN GNYIS KYIS DMIGS PA GANG LA NGA'O SNYAM PA SKYE BA'I GZHI GANG ZAG DANG DE'I RGYUD KYIS BSDUS PA'I CHOS MIG SNA SOGS SHAS CHER 'DUS BYAS KYI STENG DU, RIGS PA MTHA' BZHI SKYE 'GOG GI RIGS PA DANG RNAM BDUN GYI RIGS PA GNYIS GTZO BOR MDZAD DE DGAG BYA BDAG GNYIS BGAG PA'I SGOS BDAG MED GNYIS GTAN LA 'BEBS PAR MDZAD DO, ,DE YANG, DANG POR CHOS KYI BDAG MED GTAN LA 'BEBS PA LA, THOG MAR PHYI NANG GI DNGOS PO RNAMS RANG BZHIN GYIS SKYES PAR KHAS LEN NA, DE'I SGRUB BYED DU GANG KHAS BLANG DGOS PA DE MED PAR DAM BCA' BA'I PHYIR, DE NYID DE LAS 'BYUNG MIN GZHAN DAG LAS LTAG LA ZHIG ,GNYIS KA LAS KYANG MA YIN RGYU MED PAR NI GA LA YOD, CES MTHA' BZHI'I SKYE BA MED PA'I DAM BCA' BZHI MDZAD DO, ,'DIR RANG BZHIN GYIS SKYE NA RGYU LA BLTOS MI BLTOS GNYIS SU KHA TSON CHOD CING, BLTOS @120A *, ,PA LA RGYU 'BRAS GNYIS RANG BZHIN GCIG DANG THA DAD GNYIS SU KHA TSON CHOD DO, ,DE LA RANG BZHIN GCIG PA'I SKYE BA NI BDAG SKYE DANG, THA DAD PA'I SKYE BA NI GZHAN SKYE YIN LA, DE DAG LA YANG BDAG GZHAN RE RE BA DANG, TSOGS PA LAS SKYE BA GNYIS SU KHA TSON CHOD PAS, BDAG GZHAN RE RE LAS SKYE BA DANG, GNYIS KA LAS SKYE BA GSUM DU NGES SHING, RGYU LA MI BLTOS PA NI RGYU MED DU SKYE BA YIN PAS, RANG BZHIN GYIS SKYE BA LA MTHA' BZHI'I SKYE BAR GRANGS NGES PA DANG, MTHA' BZHI GANG RUNG GI SKYE BA MED PAS NA RANG BZHIN GYIS SKYE BA MED PA 'GRUB LUGS RNAMS SHES PAR BYA'O, ,DE NAS DE LTAR DAM BCAS KYANG DE LA SGRUB BYED KYI DPE RTAGS MI BRJOD PAR DE'I ZLOG PHYOGS LA GNOD BYED STON PA LAS DANG PO BDAG SKYE 'GOG PA NI, MYU GU CHOS CAN, RANG GI BDAG NYID LAS SKYE NA SKYE BA DON MED PAR THAL, SKYE BA NI GANG DU SKYE BAR BYA BA DE'I BDAG NYID THOB PAR BYA BA'I PHYIR YIN NA, DE SNGAR RGYU'I DUS NAS THOB ZIN PA'I PHYIR, SKYE BA THUG MED DU THAL, SKYES ZIN PA'I SA BON SLAR YANG SKYE BAS DE NYID YANG DANG YANG DU SKYE DGOS PA'I PHYIR RO, ,DE LTA NA MYU GU LA SOGS PA 'BRAS BU'I RIGS 'DRA GTAN NAS MI SKYE ZHING, , RGYU'I RIGS 'DRA SA BON BAR MA CHAD DU SKYE BAR 'GYUR TE, SKYES ZIN SLAR YANG SKYE DGOS PA'I PHYIR, CES 'GOG STE, DE NI DE LAS 'BYUNG NA YON TAN 'GA' YANG YOD MA YIN, SKYES PAR GYUR BA SLAR YANG SKYE BA RIGS PA'ANG MA YIN NYID, SKYES ZIN SLAR YANG SKYE BAR YONGS SU RTOGS PAR 'GYUR NA NI MYU GU LA SOGS RNAMS KYI SKYE BA 'DIR RNYED MI 'GYUR ZHING, @120B SA BON SRID MTHAR THUG PAR RAB TU SKYE BA NYID DU 'GYUR, ZHES SO, ,GZHAN SKYE 'GOG PA NI, RANG BZHIN THA DAD PA'I RGYU LAS 'BRAS BU SKYE NA ME LCE LAS KYANG RANG GI BSAL BYA'I MUN PA 'THUG PO BYUNG BAR THAL, GZHAN YIN PAR MTSUNGS PA'I PHYIR, RGYU YIN MIN THAMS CAD LAS 'BRAS BU YIN MIN THAMS CAD SKYE BAR THAL, RANG BZHIN GYIS GZHAN YIN PAR MTSUNGS PA'I PHYIR, CES 'GOG STE, GZHAN LA BRTEN NAS GAL TE GZHAN ZHIG 'BYUNG BAR 'GYUR NA NI, 'O NA ME LCE LAS KYANG MUN PA 'THUG PO 'BYUNG 'GYUR ZHING, THAMS CAD LAS KYANG THAMS CAD SKYE BAR 'GYUR TE GANG GI PHYIR, SKYED PAR BYED PA MA YIN MA LUS LA YANG GZHAN NYID MTSUNGS, ZHES SO, ,GNYIS KA LAS SKYE BA 'GOG PA NI, BDAG GZHAN GNYIS KA LAS SKYE BA'ANG RIGS PA MA YIN PAR THAL, BDAG LAS SKYE BA'I CHA BDAG SKYE 'GOG PA'I RIGS PAS KHEGS LA, GCIG SHOS GZHAN SKYE 'GOG PA'I RIGS PAS KHEGS PA'I PHYIR, CES 'GOG STE, GNYIS LAS SKYE BA'ANG RIGS PA'I NGO BO MA YIN GANG GI PHYIR, BSHAD ZIN NYES PA DE DAG THOG TU 'BAB PA YIN PHYIR RO, ,'DI NI 'JIG RTEN LAS MIN DE NYID DU YANG YOD MIN TE, GANG PHYIR RE RE LAS NI SKYE BA 'GRUB PA YOD MA YIN, ZHES SO, ,RGYU MED DU SKYE BA NI, GAL TE RGYU MED PAR YANG SKYE NA, THAMS CAD THAMS CAD LAS SKYE BA DANG YUL DUS GCIG NA YOD PA'I SKYE BA DE YUL DUS THAMS CAD NA YOD PA 'AM YANG NA 'GAR YANG MED DGOS PAR THAL, RGYU LA MI BLTOS PAR SKYE BA'I PHYIR, 'JIG RTEN PA RNAMS STON THOG LA SOGS PA'I 'BRAS BU THOB PA'I PHYIR 'BAD PA DON MED @121A *, ,PAR 'GYUR DGOS PA ZHIG NA STON THOG LA SOGS PA'I 'BRAS BU 'THOB PA'ANG SNANG BAS MI 'THAD DO, ,CES 'GOG STE, GAL TE RGYU MED KHO NAR SKYE BAR LTA ZHIG 'GYUR NA NI; ;DE TSE MTHA' DAG RTAG TU THAMS CAD LAS KYANG SKYE 'GYUR ZHING, ,'BRAS 'BYUNG CHED DU 'JIG RTEN 'DI YIS SA BON LA SOGS NI, ,BRGYA PHRAG DAG GI SGO NAS SDUD PAR BYED PAR YANG MI 'GYUR, ,ZHES SO, ,'DI LA DNGOS SU DAM BCA' BSGRUB PA'I SBYOR NGAG MED KYANG THAL 'GYUR GYI BYED PA LA BRTEN NAS RJES DPAG SKYE BA YIN LA, THAL BA DGOD PA'I 'BRAS BU RTAGS LA BRTEN NAS RJES DPAG SKYES TSUL NI, GANG GI PHYIR NA BDAG DANG GZHAN DANG GNYIS KA LAS SKYE DANG, ,RGYU LA MA BLTOS YOD PA MIN PAS DNGOS RNAMS RANG BZHIN BRAL, ,ZHES PAS BSTAN TO, ,DE LTAR NA MTHA' BZHI'I SKYE BA MED PAS DNGOS PO RANG BZHIN GYIS SKYE BA MED PA 'GRUB PO, ,'O NA MTHA' BZHI'I SKYE BA MED NA DNGOS PO RNAMS JI LTAR SKYE ZHE NA, DNGOS PO RNAMS RANG GI RGYU RKYEN LA BRTEN NAS SKYE BAR 'GYUR TE, SKYE ZHING MTHA' BZHI DANG DBANG PHYUG GI RGYU LA SOGS PA LAS SKYE BAR MI 'GYUR BA DE'I PHYIR, CES STON PA NI, GANG PHYIR RGYU MED PA DANG DBANG PHYUG GI ,RGYU LA SOGS DANG BDAG GZHAN GNYIS KA LAS, ,DNGOS RNAMS SKYE BAR 'GYUR BA MA YIN PA, ,DE PHYIR BRTEN NAS RAB TU SKYE BAR 'GYUR, ,ZHES SO, ,RGYU 'DI LA BRTEN NAS 'BRAS BU 'DI 'BYUNG NGO, ,ZHES PA'I RIGS PA 'DI TZAM ZHIG GIS, THA SNYAD DU DNGOS PO RNAMS KYI SKYE BA LA SOGS PA YOD PA 'GRUB KYI, DE LAS GZHAN BDAG SKYE SOGS NI MA YIN PAS, RTEN @121B 'BYUNG GI RIGS PA 'DIS BDAG SKYE SOGS SU LTA BA'I LTA NGAN MTHA' DAG 'GOG PA YIN NO ZHES STON PA NI, GANG PHYIR DNGOS PO BRTEN NAS RAB 'BYUNG BAS, ,RTOGS PA 'DI DAG BRTAG PAR MI NUS PA, , DE PHYIR RTEN 'BYUNG RIGS PA 'DI YIS NI, ,LTA NGAN DRA BA MTHA' DAG GCOD PAR BYED, ,CES SO, ,DE NI MTHA' BZHI'I SKYE 'GOG GI RIGS PAS CHOS KYI BDAG MED GTAN LA PHAB TSUL MDO TZAM MO; ;RNAM BDUN GYI RIGS PA GANG ZAG GI BDAG MED GTAN LA PHAB TSUL NI, ,NGAR 'DZIN GYI DMIGS PAR GYUR PA'I BDAG GAM GANG ZAG DE, RANG BZHIN GYIS GRUB PA'I DNGOS PO MA YIN ZHING; ;NGO BO NYID KYIS PHUNG PO LAS NGO BO THA DAD PA YANG MA YIN LA, PHUNG PO'I TSOGS PA DANG YA GYAL GANG YANG DE MA YIN ZHING, BDAG PHUNG PO'I RTEN DANG, PHUNG PO BDAG GI RTEN DU'ANG MED LA, BDAG PHUNG PO DANG LDAN PA'ANG MA YIN PAR, PHUNG PO RNAMS LA BRTEN NAS BTAGS PA TZAM DU GRUB PO ZHES STON PA NI, DE PHYIR NGAR 'DZIN RTEN NI DNGOS PO MIN, PHUNG LAS GZHAN MIN PHUNG PO'I NGO BO MIN, ,PHUNG PO RTEN MIN 'DI NI DE LDAN MIN, ,'DI NI PHUNG PO RNAMS BRTEN 'GRUB PAR 'GYUR, ,ZHES SO, ,'O NA BDAG PHUNG PO LA BRTEN NAS BTAGS TZAM DU GRUB TSUL JI LTAR YIN ZHE NA, RTEN NAS BTAGS PA SHING RTA DANG 'DRA'O ZHES DPE'I SGO NAS GSAL BAR BYA BA'I PHYIR, SHING RTA RANG YAN LAG LAS GZHAN 'DOD MIN, ,GZHAN MIN MA YIN DE LDAN YANG MIN ZHING, ,YAN LAG LA MIN YAN LAG DAG DER MIN, ,'DUS PA TZAM MIN DBYIBS MIN JI BZHIN NO, ,ZHES SHING RTA RANG GI YAN LAG DANG NGO BO NYID KYIS GCIG DANG THA DAD DANG LDAN @122A *, ,PA DANG PHAN TSUN RTEN PA'I TSUL GNYIS DANG TSOGS TZAM DANG TSOGS PA'I DBYIBS TE BDUN PO GANG DU YANG BTZAL BAS MI RNYED KYANG, RANG GI YAN LAG LA BRTEN NAS BTAGS PA TZAM GYIS YOD PAR 'JOG PA BZHIN, ,GANG ZAG GAM BDAG KYANG 'JOG PAR GSUNGS SO, ,'DI LA DPE SHING RTEN RANG BZHIN GYIS YOD NA BDUN PO DE GANG RUNG DU YOD DGOS PA LA DE GANG DU YANG MED PAS MING GIS BTAGS PA TZAM MO, ,DE YANG SHING RTA RANG GI YAN LAG DANG RANG BZHIN GYIS GCIG TU MED DE, DER YOD NA YAN LAG RNAMS DU MA YIN PA BZHIN DU SHING RTA YANG DU MAR 'GYUR BA DANG, SHING RTA GCIG YIN PA BZHIN YAN LAG RNAMS KYANG GCIG TU 'GYUR PA'I SKYON 'BYUNG BA'I PHYIR RO, ,SHING RTA RANG GI YAN LAG DANG RANG BZHIN GYIS THA DAD DU MED DE, DER YOD NA BUM PA DANG SNAM BU BZHIN DU YAN 'GAR BA SO SOR DMIGS PAR 'GYUR BA LAS MA DMIGS PA'I PHYIR RO, ,SHING RTA RANG GI YAN LAG RNAMS KYI RANG BZHIN GYIS BRTEN PA DANG, SHING RTA RANG GI YAN LAG RNAMS LA RANG BZHIN GYIS BRTEN PA'I PHYOGS GNYIS KYANG MI 'THAD DE, MKHAR GZHONG LA ZHOG NAS PA LTAR RANG GI YAN LAG RNAMS KYI RTEN DU DANG, RE LDE LA LTA BYIN GNAS PA LTAR YAN LAG RNAMS LA BRTEN NAS KYANG MED PA NI NGO BO NYID KYIS SO SO BAR MA GRUB PA'I PHYIR RO, ,LHA BYIN BA LANG DANG LDAN PA'AM, LHAS BYIN RNA BA DANG LDAN PA LTA BU'I SGO NAS, SHING RTA RANG BZHIN GYIS RANG GI YAN LAG DANG LDAN PA'I TSUL YANG MI 'THAD DE LDAN TSUL SNGA MA LTAR NA NGO BO THA DAD DANG, PHYI MA LTAR NA NGO BO GCIG TU RANG BZHIN GYIS GRUB DGOS PA LAS DE GNYIS KA 'ANG BKAG ZIN @122B PA'I PHYIR RO, ,SHING RTA'I YAN LAG RNAMS TSOGS TZAM YANG SHING RTAR MI 'THAD DE, DE LTAR NA 'KHOR LO DANG GZIR BU DANG SROG SHING SOGS PHRAL NAS, SEL BUR GNAS PA RNAMS MA TSANG BA MED PAR PHYOGS GCIG TU 'TSOGS PA TZAM LA YANG SHING RTA YOD DGOS PA'I PHYIR RO, ,SHING RTA'I YAN LAG RNAMS BSGRIGS PA'I DUS KYI DBYIBS KHYAD PAR BA YANG SHING RTAR MI RIGS TE, DE LTAR NA YAN LAG SO SO BA'I DBYIBS SHING RTA YIN NAM, TSOGS PA'I DBYIBS DE YIN, ,DANG PO LTAR NA MA BSGRIGS PA'I DUS KYI DBYIBS DANG KHYAD PAR MED PA'I DBYIBS YIN NAM, SNGAR DANG MI 'DRA BA'I DBYIBS GZHAN ZHIG YIN, DANG PO LTAR NA SNGAR MA BSGRIGS PA DANG PHYIS BSGRIGS PA'I DUS KYI DBYIBS LA KHYAD PAR MED PAS, SNGAR MA BSGRIGS PA'I DUS NA SHING RTA MED PA LTAR PHYIS BSGRIGS DUS NA'ANG MED PAR 'GYUR RO, ,GNYIS LTAR NA YANG MI 'THAD DE, LNGA PHYI'I 'PHANG LO DANG SROG SHING SOGS DBYIBS MI 'DRA BA'I KHYAD PAR GZHAN ZHIG YOD NA DMIGS DGOS PA LAS MI DMIGS PA'I PHYIR RO, ,YAN LAG RNAMS TSOGS PA'I DBYIBS KYANG ZHING RTAR MI RIGS TE, DNGOS SMRA BA'I LUGS LA TSOGS PA RDZAS SU MA GRUB NA DE'I DBYIBS RDZAS SU GRUB PA MI 'THAD CING, SHING RTA YIN NA RDZAS SU GRUB DGOS PAR KHAS BLANGS PA'I PHYIR DANG, TSOGS PA RDZAS SU GRUB NA TSOGS CAN YAN LAG RNAMS DANG RANG BZHIN GCIG THA DANG GANG RUNG DU 'GYUR LA, DE KHA SNGAR BSHAD PA'I RIGS PA RNAMS KYIS GNOD PA'I PHYIR RO, ,RANG LUGS LA'ANG YAN LAG 'TSOGS PA'I DBYIBS SHING RTA'I GDAGS GZHI YIN GYI SHING RTAR MI 'DOD PAS, DBYIBS SHING RTA YIN PHA 'GOG PA'I @123A *, ,DGAG BYA LA KHYAD PAR SBYOR MI DGOS SO, ,DE LA KHO NA RE SHING RTA'I BTAGS DON JI SKAD BSHAD PA'I TSUL GYIS RNAM PA BDUN DU BTZAL BSAM RNYED NA SHING RTA MED DGOS LA, DE LTAR NA 'JIG RTEN NA SHING RTA'I THA SNYAD 'DOGS PA RNAMS BYAR MED PAR 'GYUR BA ZHIG NA DE YANG MI 'THAD PAS SHING RTA'I BTAGS DON BTZAL NA RNYED PA NYID DO, ,ZHE NA, SHING RTA'I BTAGS DON RNAM PA BDUN DU BTZAL NA MI RNYED KYANG, BTAGS DON 'TSOL BA'I RNAM PAR DPYAD PA MED PAR, 'JIG RTEN PA STE THA SNYAD PA'I SHES PA RANG 'GA' BA GNOD MED TZAM GYIS RANG GI YAN LAG LA BRTEN NAS BTAGS PA'I YOD PA NYID DU GRUB PA YIN NO ZHES STON PA NI, DE NI DE NYID DU'AM 'JIG RTEN DU, RNAM PA BDUN GYIS 'GRUB 'GYUR MIN MOD GYI, RNAM DPYAD MED PAR 'JIG RTEN NYID LAS 'DIR, RANG GI YAN LAG BRTEN NAS 'DOGS PA YIN ZHES SO, ,SHING RTA'I 'JOG TSUL DES 'PHANG LO SOGS RANG GI YAN LAG DANG CHA SHAS LA BLTOS NAS YAN LAG CAN DANG CHA SHAS CAN ZHES PA'I THA SNYAD DANG, 'PHANG LO SOGS NYE BAR LEN PA'I BYA BA LA BLTOS NAS BYED PA PO DANG NYE BAR LEN PA LA BLTOS NAS NYE BAR LEN PA PO'I THA SNYAD KYI DON DU YANG GRUB PO ZHES STON PA NI, DE NYID YAN LAG CAN TE CHA SHAS CAN, SHING RTA DE NYID BYED PO ZHES 'GROR BSNYAD, SKYE BO RNAMS LA LEN PO NYID DU GRUB, CES SO, ,SHING RTA DPYAD PA DE 'DRA BAS RNAM PA BDUN DU BTZAL BAS MI RNYED PAS NA RANG BZHIN GYIS YOD PAR MI 'GRUB LA, DES NA GONG DU BSHAD PA'I 'JOG TSUL DES SHING RTA RANG BZHIN MED PAR YANG RTOGS SLA ZHING KUN RDZOB KYI RNAM BZHAG KYANG NYAMS PAR MI 'GYUR BAS, SHING RTA'I GRUB TSUL NI MA BRTAGS PAR @123B BTAGS PA'I YOD PA DE BZHIN DU 'DOD PAR BYA'O ZHES STON PA NI, RNAM BDUN GYIS MED GANG DE JI LTA BUR, YOD CES RNAM 'BYOR BAS 'DI'I YOD MI RNYED, DES DE NYID LA'ANG BDE BLAG 'JUG 'GYUR BAS, 'DIR DE'I GRUB PA DE BZHIN 'DOD PAR BYA ZHES SO, ,DE LTAR NA SHING RTA LA BSHAD PA DE RNAMS GANG ZAG LA SBYOR DGOS NA DE'I TSUL JI LTA BU ZHE NA, DPE SHING RTA'I BTAGS DON RNAM PA BDUN DU BTZAL NA MI RNYED PA BZHIN GANG ZAG KYANG BTAGS DON BTZAL NA RANG GI GDAGS GZHI PHUNG PO DANG GCIG THA DAD SOGS BDUN PO GANG DU'ANG MI RNYED DO, ,DE YANG BDAG PHUNG GNYIS RANG BZHIN GCIG TU MA GRUB STE, DE LTA NA PHUNG PO BDAG YIN DGOS PA'I PHYIR GANG ZAG GCIG LA PHUNG PO DU MA YOD PA BZHIN BDAG MANG POR 'GYUR BA DANG, BDAG GCIG YIN PA BZHIN PHUNG PO YANG GCIG KHO NAR 'GYUR RO, ,ZHES STON PA NI, GAL TE PHUNG PO BDAG NA DE PHYIR TE, MANG PAS BDAG DE DAG KYANG MANG POR 'GYUR, ZHES SO, ,'DI NI SPYIR BDAG MANG PO 'DOD MI RIGS PAR STON PA MIN GYI, BDAG PHUNG RANG BZHIN GYIS GCIG TU 'DOD PA LA DBYER MED KYI GCIG TU PHUL NAS SKYON DE GNYIS KA 'BAB PAR STON PA'O, ,LEN PA PO BDAG DANG NYER LEN NAM BLANG BYA PHUNG PO GNYIS GCIG TU RIGS PA MA YIN TE, DE GNYIS GCIG NA BYA BA'I LAS DANG BYED PA PO YANG GCIG TU 'GYUR LA, DE LTAR NA GCOD PA PO GANG ZAG DANG GCAD BYA SHING DANG BUM PA DANG RDZA MKHAN SOGS THAMS CAD GCIG TU 'GYUR RO ZHES STON PA NI, LEN PO RANG NYER LEN GCIG RIGS DNGOS MIN, DE LTA NA LAS BYED PO GCIG NYID 'GYUR, ZHES SO, ,BDAG PHUNG GNYIS RANG BZHIN THA DAD PA YANG MI RIGS TE, DE LTAR NA 'BREL MED DON GZHAN DU @124A *, ,'GYUR BAS, BUM PA MA BZUNG BAR SNAM BU YAN GAR DU 'DZIN PA BZHIN, PHUNG PO MA BZUNG BAR BDAG BZUNG DU YOD DGOS PA LAS MED PA'I PHYIR CES STON PA NI, DE PHYIR PHUNG PO LAS GZHAN BDAG MED DE, PHUNG PO MA GTOGS DE 'DZIN MA GRUB PHYIR, CES SO, ,PHUNG PO BDAG DANG BDAG PHUNG PO LE RANG BZHIN GYIS BRTEN PA'I PHYOGS GNYIS KYANG MI 'THAD DE, RANG BZHIN GYIS GZHAN DE THA DAD DU MA GRUB PA'I PHYIR, CES STON PA NI, PHUNG POR BDAG YOD MA YIN BDAG LA YANG, PHUNG PO DE RNAMS YOD MIN GANG PHYIR 'DI, GZHAN NYID YOD NA RTOGS PA 'DIR 'GYUR NA, GZHAN NYID DE MED DE PHYIR 'DI RTOGS PA'O, ,ZHES SO, ,LHA BYIN GNAG STE BA LANG DANG LDAN PA'AM, LTA BYIN GZUGS PHUNG DANG LDAN PA LTAR, BDAG PHUNG PO DANG RANG BZHIN GYIS LDAN PA'I PHYOGS KYANG MI 'THAD DE, RANG BZHIN THA DAD DANG GCIG GNYIS KA MA GRUB PA'I PHYIR CES STON PA NI, BDAG NI GZUGS LDAN MI 'DOD GANG PHYIR BDAG ,YOD MIN DE PHYIR LDAN DON SBYOR BA MED, GZHAN NA GNAG LDAN GZHAN MIN GZUGS LDAN NA, BDAG NI GZUGS LAS DE NYID GZHAN NYID MED, CES SO, ,PHUNG PO 'DUS PA TZAM BDAG MA YIN TE, DE BDAG GIS GDAGS GZHIR GSUNGS PA'I PHYIR CES STON PA NI, MDO LAS PHUNG PO RTEN NAS YIN GSUNGS PA, DE PHYIR PHUNG PO 'DUS TZAM BDAG MA YIN, ZHES SO, ,PHUNG PO TSOGS PA'I DBYIBS KYANG BDAG MA YIN TE, DBYIBS NI GZUGS CAN KHO NA LO YOD PAS SEMS SOGS LA DE BZHAG TU MED PAR 'GYUR BA'I PHYIR, CES STON PA NI, DBYIBS ZHEN DE GZUGS CAN LA YOD PHYIR, KHYOD LA DE @124B DAG NYID BDAG CES 'GYUR GYI, SEMS SOGS TSOGS NI BDAG NYID 'GYUR MIN TE, GANG PHYIR DE DAG LA DBYIBS YOD MA YIN, ZHES SO, ,SHING RTA MA DPYAD PAR BTAG YOD TZAM DU 'JOG PAR BDAG KYANG MA DPYAD PAR PHUNG KHAMS SKYE MCHED SOGS NYER LEN LA BLTOS NAS NYE BAR LEN PA PO DANG, NYER LEN LAS LA BLTOS NAS BYED PA PO 'ANG YIN NO ZHES STON PA NI, DE BZHIN 'JIG RTEN GRA PAS PHUNG PO DANG, KHAMS DANG DE BZHIN SKYE MCHED DRUG BRTEN NAS, BDAG KYANG NYE BAR LEN PA NYID DU 'DOD, NYER LEN LAS YIN 'DI NI BYED PO'ANG YIN, ZHES SO, ,BDAG RANG BZHIN MED PAS BDAG GI BA YANG RANG BZHIN GYIS MED DO, ,ZHES STON PA NI, JI LTAR BYED PO MED CAN LAS MED PA, DE PHYIR BDAG GI BDAG MED PAR YOD MIN ZHES SO, ,BDAG DANG SHING RTA'I DPYAD PAD ? PO GZHAN LA BSGRE TSUL NI, BUM PA SNAM BU RE LDE DMAG DANG NAGS TSAL PHRED BA LJON SHING DANG, ZHES PA NAS, DE LAS GZHAN DU GYUR BAR 'JIG RTEN GRAGS PA'I SGO NAS YOD PA YIN, ZHES PA BAR GYIS STON NO, ,DE NI RNAM BDUN GYI RIGS PAS GANG ZAG GI BDAG MED GTAN LA PHAB TSUL MDO TZAM MO, ,DE LTAR ZLA BAS DBU MA 'JUG PAR BDAG MED GNYIS GTAN LA PHAB PA DE YANG, BDAG BCOS LAS DPYAD RTZOD LA CHAGS PA'I PHYIR, MA MDZAD RNAM GROL PHYIR NA DE NYID BSTAN, ZHES GSUNGS PA LTAR GO BAR BYA'O, ,GSUM PA DE'I RJES SU 'BRANG NAS RANG NYID KYIS LTA BA BTZAL TE BA TSUL LA GSUM, GANG 'GOG PA'I DGAG BYA NGOS BZUNG BA DANG, GANG GI STENG DU 'GOG PA'I GZHI NGOS BZUNG BA DANG, DE'I STENG DU BKAG PA'I BDAG MED BSGOM TSUL LO, ,DANG PO @125A *, ,SPYIR DGAG BYA LA LAM GYI DGAG BYA DANG, RIGS PA'I DGAG BYA GNYIS SO, ,DANG PO NI, DBU MTHA' LAS, NYON MONGS PA YI SGRIB PA DANG, SHES BYA'I SGRIB PA GNYIS SU BSTAN, DER NI SGRIB PA THAMS CAD DE, DE ZAD NAS NI GROL BAR 'DOD, CES GSUNGS BLTAR NYON MONGS PA DANG SHES BYA'I SGRIB PA GNYIS SO, ,DE LA NYON MONGS PA'I SGRIB PA NI STONG NYID BDUN BCU PA LAS, RGYU DANG RKYEN LAS SKYE DNGOS RNAMS, YANG DAG PAR NI RTOG BA GANG, DE NI STON PAS MA RIGS GSUNGS, DE LAS YAN LAG BCU GNYIS 'BYUNG, YANG DAG MTHONG PHYIR DNGOS STONG PAR, LEGS SHES MA RIGS MI 'BYUNG PA, DE NI MA RIGS 'GAG PA YIN, DE PHYIR YAN LAG BCU GNYIS 'GAG ,CES DANG, RIN CHEN PHRENG BA LAS JI SRID PHUNG POR 'DZIN YOD PA, DE SRID DE LA NGAR 'DZIN YOD, CES DANG, BZHI BRGYA PA LAS, LUS LA LUS DBANG JI BZHIN DU, GTI MUG KUN LA GNAS GYUR TE, DE PHYIR NYON MONGS THAMS CAD KYANG, GTI MUG BCOM PAS BCOM PAR 'GYUR, ZHES DANG, 'JUG PA LAS, NYON MONGS SKYON RNAMS MA LUS 'JIGS TSOGS LA, LTA LAS BYUNG BAR BLO YIS MTHONG 'GYUR CING, BDAG NI 'DI YI YUL DU RTOGS BYAS NAS, RNAL 'BYOR PA YIS BDAG NI 'GOG PAR BYED, CES DANG, 'JUG 'GREL LAS, DE LTAR NA SRID PA'I YAN LAG GIS YONGS SU BSDUS PA'I NYON MONGS PA CAN GYI MA RIGS PA'I DBANG GIS, ZHES CHOS DANG GANG ZAG LA RANG GI MTSAN NYID KYIS GRUB PAR 'DZIN PA'I MA RIG PA LHAN SKYES GNYIS NI 'KHOR BA'I RTZA BA DANG NYON MONGS @125B CAN GYIS MA RIG PAR GSUNGS PAS DE GNYIS DANG RTZA NYON NYE NYON RNAMS DANG, DE DAG GI BAG CHAGS LE GNYIS YOD PA'I BDEN 'DZIN DANG CHAGS SOGS NYON MONGS PA RANG RANG GI RIGS 'DRA PHYI MA BSKYED PA'I NGO BOR GYUR PA'I SA BON SOGS DE YIN NO, ,SHES SGRIB NI, 'JUG 'GREL LAS, DE LA MA RIG PA'I BAG CHAGS NI SHES BYA YONGS SU GCOD PA'I BSHEGS SU GYUR PA YIN LA, 'DOD CHAGS LA SOGS PA'I BAG CHAGS YOD PA NI LUS DANG NGAG DAG GI 'JUG PA DE LTA BU'I RGYU YANG YIN TE, MA RIG PA DANG 'DOD CHAGS LA SOGS PA'I BAG CHAGS DE YANG RNAM PA THAMS CAD MKHYEN PA DANG SANGS RGYAS KHO NAL LDOG PAR 'GYUR GYI GZHAN DAG LA NI MA YIN NO, ,ZHES GSUNGS PAS NYON MONGS BA DE DAG GI BAG CHAGS 'JUG SHES LA YUL RANG NGOS NAS GRUB PA LTA BUR SNANG BA'I BDEN SNANG TZAM ZHIG SKYED PA'I NUS PA'I NGO BOR GYUR PA SA BON DANG, BAG CHAGS DE LA BRTEN NAS 'JUG SHES LA YUL RANG NGOS NAS GRUB PA LTA BUR SNANG BA'I GNYIS SNANG 'KHRUL PA'I CHA MNGON GYUR RNAMS SO, ,RIGS BA'I DGAG BYA NI, PHYIN CI LOG GI 'DZIN PA'ANG DGAG BYAR GSUNGS MOD KYANG, GTZO BO NI CHOS RNAMS KYI NGO BO YUL CAN THA SNYAD KYI RTOG PA GZHAN LA RAG MA LAS PA STE RTOG PA DE'I DBANG GIS BZHAG PA MA YIN PA'I RANG BZHIN NAM RANG GI NGO BOS GRUB PA DE NYID YIN CING, DE LA DGAG BYA'I BDAG CES KYANG BYA STE, BZHI BRGYA PA'I 'GREL PA LAS, DE LA BDAG CES BYA BA NI GANG ZHIG DNGOS PO RNAMS KYI GZHAN LA RAG MA LAS PA'I NGO BO RANG BZHIN TE, DE MED PA NI BDAG MED PA'O, ,DE NI CHOS DANG GANG ZAG GI DBYIBS GNYIS SU RTOGS TE, CHOS KYI BDAG MED PA DANG GANG ZAG @126A *, ,GI BDAG MED PA ZHES BYA'O, ,ZHES GSUNGS PAS SO, ,GNYIS PA GANG GI STENG DU 'GOG PA'I GZHI NI, GANG ZAG DANG DE'I RGYUD KYI MIG SNA SOGS THA SNYAD DU YOD PA THAMS CAD YIN LA, DE YANG GANG ZAG NI MDO LAS, ,JI LTAR YAN LAG TSOGS RNAMS LA, ,BRTEN NAS SHING RTAR 'JOG PA LTAR, ,DE BZHIN PHUNG PO RNAMS BRTEN NAS, ,KUN RDZOB SEMS CAN ZHES BYA'O, ,ZHES PHUNG PO RNAMS LA BRTEN NAS BTAGS PA TZAM GYI YOD PAR GSUNGS SO, ,DE LA PHUNG PO LA BRTEN NAS 'DOGS PA PO NI RTOG PA YIN LA, PHUNG PO LA BRTEN NAS 'DOGS TSUL YANG BLO LHAN SKYES RANG DGA' BA 'DI LA ? NGA'O SNYAM PA'I BLO SKYE BA NI, SNGON DU RANG GI PHUNG BO'I TSOGS PA 'AM, PHUNG PO'I CHA SHAS GANG RUNG GCIG BLO YUL DU SHAR BA LA BRTEN NAS NGA'O SNYAM DU 'DZIN PAR 'GYUR GYI, RANG GI PHUNG PO'I TSOGS PA'AM, PHUNG PO'I CHA SHAS GANG YANG BLO LA MA SHAR BAR NGA'O SNYAM PA'I BLO SKYE MI SRID DO, ,LTO BA LDIR BA DANG MCHU' PHYANG BA SOGS BLO YUL DU LAM GYIS SHAR BA NA BRDAL SBYANG BA'I SKYES BU RNAMS LA BUM PA'O SNYAM PA'I BLO DANG GIS SKYE LA LTO BA DANG MCHU SOGS GANG YANG BLO LAM SHAR BAR BUM PA'O SNYAM PA'I BLO DANG GIS SKYE THABS MED PA BZHIN NO, ,RTOG PAS DE LTAR 'DZIN PA'ANG RANG GI PHUNG PO BLO LA SHAR TZAM NAS NGA'O SNYAM DU 'DZIN PA MA GTOGS RGYU MTSAN GZHAN GANG LA'ANG BRTEN NAS SKYE MI DGOS PA DANG, NGA DANG PHUNG PO DNGOS STENG NAS, NGO BO GCIG TU GRUB PA DANG NGO BO THA DAD DU GRUB PA GANG GI 'ANG 'DZIN TSUL MI 'DUG PA NI KHA NANG DU PHYOGS NAS BLTAS BSAGS LA BAR SHES PAR GSUNGS SO, ,DE BZHIN DU @126B RGYUD KYIS BSDUS PA'I MIG SNA SOGS DANG GZUGS NAS RNAM MKHYEN GYI BAR GYI CHOS THAMS CAD KYANG RTOG PA'I DBANG GIS BZHAG PA YIN LA, SA LAM DANG 'BRAS BU'I SKABS KYI THA SNYAD 'JIG RTEN LA MA GRAGS PA DAG KYANG DANG POR 'JIG RTEN THA MAL PA'I RTOG PAS BRDA SBYAR BA MA YIN KYANG, SANGS RGYAS KYIS 'JIG RTEN 'KHRUL PA'I GNYIS SNANG DANG BCAS PA'I RTOG PAS BRDA 'JI LTAR SBYOR BA DANG CHOS MTSUNGS PAR 'JIG RTEN GZHUGS PA'I TSUL DU BRDA' MDZAD NAS, DE'I RJES SU RJES 'JUG GI GDUL BYA RNAMS KYIS SA LAM SOGS KYI MING TZAM GYI RJES SU 'BRANG BA'I RTOG PAS MA DPYAD PAR BLANG DOR GYI THA SNYAD LA 'JUG PA YIN ZHING, MING BTAGS PA'I DON BTZAL NA MI RNYED PAS LAM SOGS LA'ANG MTSUNGS BAS MING TZAM GYIS MA BZHAG PA'I SKYON MED LA, SA LAM SOGS BRDA' SBYOR BA PO SANGS RGYAS KYI THUGS RGYUD LA RTOG PA MED KYANG, SANGS RGYAS KYIS SA LAM SOGS KYI BRDA' MDZAD PA DE GDUL BYA'I RTOG NGO LA BLTOS PA'I DBANG GIS MDZAD PA YIN PAS, RTOG PA'I DBANG GIS MA BZHAG PA'I NYES PA YANG MED DO, ,CHOS GANG LA'ANG BUM PA ZHES SOGS KYI MED TZAM ZHIG BLOS SBYAR BA'I RJES SU 'BRANG NAS MA DPYAD PAR 'JUG PA MA GTOGS, DPYAD NA MING DE GANG LA 'JUG PA'I GZHI CI'ANG MI RNYED PAS, DE'I PHYIR CHOS THAMS CAD MING TZAM ZHES BYA'O, ,DES NA THAL 'GYUR PAS KUN RDZOB RNAM PAR 'JOG PA 'JIG RTEN DANG BSTUN ? NAS 'JOG GO ZHES BYA BA'I DON YANG, SO SKYE DANG 'PHAGS PA SLOB PA THAMS CAD LA YOD PA'I 'JIG RTEN GYIS BLO LHAN SKYE SA MING TZAM GYI RJES SU 'BRANG NAS MA DPYAD PAR BLANG DOR LA 'JUG @127A *, ,PA 'DI BZHIN DU, DBU MA THAL 'GYUR BA YANG MING TZAM GYI RJES SU 'BRANG NAS MA DPYAD PAR KUN RDZOB RNAM PAR 'JOG PA LA BYA'I, GRUB MTHA' LA BLO KHA MA PHYOGS BA'I 'JIG RTEN BLUN PO DAG YOD PAR SMRA NA DED KYANG YOD PAR SMRA LA, DES MED PAR SMRA NA DED KYANG MED PAR SMRA'O ZHES BYA BA 'JIG RTEN DANG SGO BSTUN NAS 'JOG PA'I DON DU BZUNG NA CHES RNAM PAR 'KHYAMS PAR 'GYUR RO, ,DE LTAR NA DPYAD PAR GANG ZAG DANG CHOS 'JOG LUGS 'DI NI THAL 'GYUR PA'I KHYAD CHOS BLA NA MED PA YIN CING, 'DI LEGS PAR NGES PA NI BDAG MED RTOGS PA'I THABS MCHOG TU GSUNGS PAS 'DI LA NGES PA RNYED PA GAL CHE'O, ,GSUM PA NI, DBU MA'I BSTAN BCOS PHAL CHER LAS DANG POR CHOS KYI BDAG MED GTAN LA PHAB MOD, GZHI GANG ZAG DANG CHOS KYI STENG DU DES RGYU'I BDAG MED DE LA PHRA RAGS MED KYANG, KHYAD GZHI'I GNANG KYIS GANG ZAG GI STENG DU NGES SLA BAR GSUNGS PAS, THOG MAR GANG ZAG GI BDAG MED GTAN LA BAB NAS BSGOM TSUL BSHAD PAR BYA'O, ,'DI LA GSUM, BDAG MED RIGS PAS GTAN LA DBAB PA, DE MNYAM BZHAG TU NAM MKHA' LTA BU'I SKYONG TSUL, RJES THOB TU SGYU MA LTA BU'I SKYONG TSUL LO, ,DANG PO NI, STONG NYID LA MOS PA DANG LDAN ZHING MTHA' GNYIS SU MI 'DZIN PAR RANG BZHIN MED PA'I DAM BCA'I DON 'DZIN STENG GI YUL DU BYAS PA'I YID DPYOD TZAM GOMS PAR BYED PA NI STONG NYID LA BAG CHAGS TZAM 'JOG PA'I DGOS PA DANG BCAS NA'ANG, LTA BA'I NGES SHES SKYONG NA NGES SHES RIGS PA LTAR SNANG LA BRTEN NAS SKYE BA MI 'THAD PAS DPYOD TSUL YANG DAG TU SONG BZHIG @127B DGOS SO, ,DE LA SPYIR DBU MA'I BSTAN BCOS LAS, NGO BO LA DPYOD PA GCIG TU BRAL, RGYU LA DPYOD PA RDO RJE GZEGS MA, 'BRAS BU LA DPYOD PA YOD MED SKYE 'GOG ,RGYU 'BRAS GNYIS KA LA DPYOD PA MU BZHI SKYE 'GOG ,CHA THAMS CAD LA DPYOD PA RTEN 'BREL GYI RIGS PA SOGS DU MA GSUNGS PA LAS, LAS DANG PO PAS GO SLA BA'I DBANG DU MDZAD NAS BDAG NYID CHEN PO YAB SRAS KYIS GCIG TU BRAL GYI RIGS PA'I SGO NAS 'KHRID PAR MDZAD PAS 'DIR DE'I SGO NAS GTAN LA DBAB PAR BYA'O, ,'DI LA LHAG MTHONG CHUNG BAR GNAD BZHI GSUNGS PA'I, DANG PO NI, DGAG BYA NGOS ZIN PA'I GNAD DE, DE NGOS MA ZIN PAR 'GOG PA NI, 'BEN MA MTHONG BAR MDA' 'PHEN PA LTAR 'BREL MED DU 'GYUR BAS, SPYOD 'JUG LAS, BTAGS PA'I DNGOS LA MA REG PAR, DE YI DNGOS MED 'DZIN MA YIN, ZHES GSUNGS SO, ,DE NGOS 'DZIN TSUL NI SPYIR RIGS PA YANG DAG GI DGAG BYA GANG YIN SNGAR BSHAD ZIN MOD KYANG KHA PHYIR BLTAS KYI DPYAD PA GNANG DU MI 'GRO BAS RANG RGYUD KYI DGAG BYA 'DZIN PA'I RTOG PAS JI LTAR BZUNG BA SHES DGOS SHING, DE YANG SKABS KYI GTZO BO NI NGAR 'DZIN PA'I 'JIG LTA LHAN SKYES KYI 'DZIN STANG GI RNAM PA'I YUL YIN LA, DE LA NGAR 'DZIN PA'I BLO TZAM LA, DA RANG BZHIN GYIS GRUB PAS KHYAD PAR DU BYAS NAS 'DZIN PA, RANG BZHIN MED PAS KHYAD PAR DU BYAS NAS 'DZIN PA, DE GNYIS GANG GIS KYANG KHYAD PAR DU MA BYAS PAR 'DZIN PA DU MA YOD PA LAS 'DIR NI, 'JUG 'GREL LAS, DE LA 'JIG TSOGS LA LTA BA NI NGA DANG NGA YI SNYAM PA DE LTA BU'I RNAM PAR ZHUGS PA SHES RAB NYON MONGS CAN NO, ,ZHES GSUNGS PA LTAR DMIGS PA RANG RGYUD @128A *, ,KYI NGA'O SNYAM PA'I 'DZIN PA SKYE BA'I GZHIR GYUR PA'I GANG ZAG TZAM LA DMIGS NAS, RNAM PA RANG GI MTSAN NYID KYIS GRUB PA'I NGA'O SNYAM DU 'DZIN PA'I 'JIG LTA LHAN SKYES DES JI LTAR BZUNG BA SHES DGOS SO, ,DE LTA BU'I 'JIG LTA LHAN SKYES DE RE 'GA' MNGON DU 'GYUR, RE 'GA' BAG LA ZHA BA'I TSUL GYIS RANG RGYUD LA YOD BZHIN PA YIN KYANG, RTOG DPYOD MA BYAS PAR DES JI LTAR BZUNG NGOS MI ZIN PAS, DPER NA GAB TSANG NGOS 'DZIN PA NA SMAN DANG KHA ZAS MA 'PHRONG PA BTANG NAS BSLAD STE NGOS 'DZIN PA BZHIN, DGA' SDUG GI RTOG PA SHUGS DRAG SNGAR BYUNG ZIN ZHIG GSAL BTAB NAS NGAR 'DZIN DE NAM MNGON DU GYUR PA NA DE KA'I TSE BLO'I ZUR ZHIG GIS NGAR 'DZIN DES JI LTAR BZUNG BA RTAGS DGOS SO, ,DE'I TSE PHUNG PO'I TSOGS TZAM MA MA LUS SEMS DBYER MED 'DRA BA ZHIG GI STENG NAS NGA DE PHAR MING BRDAS BZHAG PA LAM BLTOS PAR DA KHO RANG GI NGOS NAS TSUGS THUB DU GDONG MA NAS GRUB PA'I SNANG BA 'TSAR LA, SNANG BA DE LTAR GRUB PA NI SKABS 'DI'I DGAG BYA YIN NO, ,DE LTA BU'I SNANG BA 'CHAR BA DPER NA, MUN KHUNG DU LAG PA BRKYANG PAS KA BA LA THOGS PA NA, GZHI DER SNGAR NAS KA BA KHO RANG GI NGOS NAS TSUGS THUB TU 'KHRANG THANG DE GRUB GRUB PA CIG LA THUG PA'I SNANG BA 'BYUNG BA LTA BU'O, ,DE LTA BU'I DGAG BYA'I SPYI LEGS PAR SHAR NAS DGAG BYA NGOS ZIN PA NA 'OG NAS 'BYUNG BA'I RIGS PA RNAMS KYIS DPYAD PAS DGAG BYA DE MED PA'I BDAG MED KYI LTA BRNYED PAR 'GYUR GYIS, DE NGOS MA ZIN PAR DPYAD PA CI TZAM BYAS KYANG RKUN MAN GAS LA SONG BA'I RJES SPANG LA RTZAD GCOD PA 'DRA BA ZHIG LAS MI 'ONG BAR GSUNGS SHING, DE NGOS ZIN PA'ANG SHIN TU @128B DKA' BAR SNANG BAS 'DI LA 'BAD DGOS SO, ,GNYIS PA NI, KHYAB PA DES PA'I GNAD DE, DE YANG RANG BZHIN GYI GRUB NA GRUB TSUL 'DI DANG 'DI GANG RUNG ZHIG TU GRUB DGOS ZHES KHA TSON CHOD PA ZHIG GIS BRTAGS PA BYAS NAS, GRUB TSUL DE DAG GANG DU'ANG MA RNYED NA RANG BZHIN GYIS MED PA'I NGES PA SKYE BAR NGES KYI, RANG BZHIN GYIS GRUB KYANG GRUB TSUL DE DAG TU YOD MI DGOS PA LA GRUB TSUL DE DAG TU MED PAS RANG BZHIN GYIS MED PAR NGES SHES 'DREN MI NUS LA, PHUNG PO'I STENG DU GRUB NA PHUNG PO DANG GCIG THA DAD GANG RUNG DU GRUB PAS KHYAB KYANG, DE LTAR MA NGES NA 'OG NAS 'BYUNG BA'I RIGS PAS PHUNG PO DANG GCIG THA DAD GANG DU 'ANG MA GRUB PAR NGES KYANG DA DUNG PHUNG PO'I STING DU MA GRUB PAR DES MI NUS PAS, DBU MA RGYAN LAS, GCIG DANG DU MA MA GTOGS PAR, RNAM PA GZHAN DANG LDAN PA YI, DNGOS PO MI BZUNG 'DI GNYIS NI, PHAN TSUN SPANGS TE GNAS PHYIR RO, ,ZHES GSUNGS PA LTAR, SPYIR YOD NA GCIG THA DAD GANG RUNG DU YOD DGOS PA DANG, CHOS GANG LA YANG GCIG DANG DU MA GANG YIN BRTAGS NAS, BLO LA 'CHAR BA'I TSE 'ANG YANG NA GCIG GI RNAM PA 'CHAR, YANG NA DU MA'I RNAM PA 'CHAR BA MA GTOGS PHUNG GSUM MED PA DANG, PHUNG PO'I STENG DU GRUB NA PHUNG PO DANG GCIG THA DAD GANG RUNG DU GRUB DGOS PA RNAMS NGES PAR BYAS TE, SNGAR NGOS BZUNG BA'I DGAG BYA'I BDAG DE PHUNG PO'I STENG DU GRUB NA PHUNG PO DANG GCIG THA DAD GANG RUNG DU GRUB DGOS PA'I NGES PA MYONG THOG NAS DRANGS PAR BYA'O, ,GSUM PA NI PHYOGS CHOS KYI TSUL LA RTAGS MGO GNYIS YOD PA'I ZUR GCIG NGES PA STE, DE YANG DE LTA BU'I NGA DE PHUNG PO'I SENG DU GRUB NA PHUNG PO DANG GCIG @129A *, ,THA DAD GANG RUNG DU GRUB DGOS PAR 'DUG PA LAS PHUNG PO DANG GCIG TU AE GRUB SNYAM NA, GCIG TU GRUB NA DE 'DRA BA'I NGA DE RANG BZHIN GYIS GRUB PA'I PHUNG PO DANG DBYE BA GTAN MED KYI GCIG TU 'GYUR DGOS LA, DE LTA NA BDAG KHAS BLANGS PA DON MED DU THAL BA DANG, BDAG MANG POR THAL BA DANG, BDAG SKYE 'JIG CAN DU THAL BA'I GNOD BYED GSUM YOD PA'I DANG PO NI, BDAG KHAS BLANGS PA DON MED DU THAL, BDAG KHAS BLANGS PA NI PHUNG PO 'DOR LEN BYED PA PO SGRUB PA'I DON DU YIN LA, BDAG PHUNG PO DANG DBYE BA GTAN MED KYI GCIG YIN NA NYE BAR LEN PA PHUNG PO LAS MA GTOGS PA'I NYE BAR LEN PA PO BDAG MED PAR 'GYUR BA'I PHYIR, CHA MED GCIG LA THA DAD PA GNYIS BZHAG TU MED PA'I PHYIR, RTZA SHES LAS, NYE BAR LEN PA MA GTOGS PA'I, BDAG YOD MA YIN BYAS PA'I TSE, NYE BAR LEN NYID BDAG YIN NA, KHYOD KYI BDAG NI MED PA YIN, ZHES SO, ,GNYIS PA NI, SNGAR BSHAD PA LTAR RO, ,GSUM PA NI, PHUNG PO SKYE 'JIG BYED PA BZHIN BDAG KYANG SKYE 'JIG BYED PAR THAL, DE GNYIS GCIG YIN PA'I PHYIR, RTZA SHES LAS, GAL TE PHUNG PO BDAG YIN NA, SKYE DANG 'JIG PA CAN DU 'GYUR, ZHES SO, ,DE LA MI 'DOD PA CI YOD SNYAM NA SPYIR LAS 'BRAS KYI RTEN DU GYUR PA'I BDAG THA SNYAD DU SKYE 'JIG BYED MOD KYANG, DE LTA BU'I BDAG DE SKYE 'JIG BYED NA RANG GI NGO BOS GRUB PA'I SKYE 'JIG BYED DGOS LA, DE LTAR NA SKYON GSUM 'JUG STE, DANG PO SKYE BA DRAN PA MI 'THAD PA NI, NGA DE'I TSE DE'I DUS NA 'DI 'DRA ZHIG TU GYUR TO, ,ZHES SKYE BA DRAN PA MI 'THAD PAR THAL, SKYE BA DRAN PA LA SNGA PHYI'I BDAG GNYIS RGYUD GCIG PA ZHIG DGOS NA, SKYE BA @129B SNGA PHYI'I BDAG GNYIS RANG BZHIN GYIS GRUB PA'I SO SO BA GZHAN LA RAG MA LAS PA'I RANG DBANG CAN GYI TSUGS THUB TU GRUB PA'I PHYIR TE, 'JUG PA LAS, GANG DAG RANG MTSAN NYID KYIS SO SO BA, DE DAG RGYUD GCIG GTOGS PAR RIGS MA YIN, ZHES SO, ,GNYIS PA LAS BYAS PA CHUD ZOS PA NI, SNGAR LAS BSAGS PA'I 'BRAS BU MYONG BA MED PAR THAL, LAS SOGS PA PO'I BDAG 'BRAS BU MA MYONG GONG DU ZHIG CING DE DANG RGYUD GCIG PA'I BDAG GZHAN YANG MED PA'I PHYIR TE, DE RANG BZHIN GYI ZHIG PA'I PHYIR RO, ,GSUM PA LAS MA BYAS PA DANG PHRAD PA NI, GAL TE SNGA MA'I BDAG ZHIG KYANG BDAG PHYI MA ZHIG GIS LAS DE'I 'BRAS BU LA LONGS SPYOD DO SNYAM NA, LAS MA BYAS PA DANG 'PHRAD PAR THAL, RANG BZHIN GYIS GRUB PA'I GANG ZAG GZHAN GIS BSAGS PA'I LAS KYI 'BRAS BU, RANG BZHIN GYIS GRUB PA'I GANG ZAG GZHAN GYIS MYONG BA'I PHYIR, 'JUG PA LAS, MYA NGAN 'DAS SNGON SKAD CIG DAG LA NI, SKYE 'JIG BYED PO MED PAS DE 'BRAS MED, GZHAN GYIS BSAGS LA GZHAN GYIS ZA BAR 'GYUR, ZHES DANG, RTZA SHES LAS, GAL TE 'DI NI GZHAN 'GYUR NA, DE MED PAR YANG 'BYUNG BAR 'GYUR, DE BZHIN DER NI GNAS 'GYUR ZHING, DER MA SHI BAR SKYE BAR 'GYUR, CHAD DANG LAS RNAMS CHUD ZA DANG, GZHAN GYIS BYAS PA'I LAS RNAMS NI, GZHAN GYIS SO SOR MYONG BA DANG, DE LA SOGS PAR THAL BAR 'GYUR, ZHES SO, , LAS BYA BYED GCIG TU 'GYUR BA YANG SNGAR BSHAD PA LTAR TE, RTZA SHES LAS, BUNG SHING GANG DE ME YIN NA, BYED PA PO DANG LAS GCIG 'GYUR, ME DANG SHING GI BDAG DANG NI, NYE BAR BLANG @130A *, ,BA'I RIM PA KUN, BUM SNAM SOGS DANG LHAN CIG TU, MA LUS PAR NI RNAM PAR BSHAD, CES SO, ,DE LTAR DPYAD NAS PHUNG PO DANG GCIG TU MA GRUB PAR NGES PA'I DES SHES MYONG THOG NAS DRANGS PAR BYA'O, ,BZHI PA NI, RTAGS ZUR GCIG SHOS NGES PA STE, DE LTAR BRTAGS PAS GCIG TU MA GRUB PAR NGES NAS PHUNG PO DANG THA DAD DU AE GRUB SNYAM NA, THA DAD DU GRUB NA RANG BZHIN GYIS THA DAD DU GRUB DGOS LA, DE LTAR NA DE 'DRA BA'I BDAG DE PHUNG PO 'DUS BYAS SU MTSON PAR BYED PA'I MTSAN NYID SKYE 'JIG GNAS GSUM DANG MI LDAN PAR THAL, DE GNYIS PHAN TSUN BLTOS PA GTAN MED KYI THA DAD DU GRUB CING DE LTAR NA RTA BA LANG LAS DON GZHAN DU GRUB PAS BA LANG GI MTSAN NYID DANG MI LDAN PA BZHIN YIN PA'I PHYIR, RTZA SHES LAS, GAL TE PHUNG PO RNAMS LAS GZHAN, PHUNG PO'I MTSAN NYID MED PAR 'GYUR, ZHES SO, ,DE PHUNG PO DANG THA DAD DU MA GRUB PAR THAL, THA DAD DU GRUB NA PHUNG PO LNGA NANG PHAN TSUN SO SOR NGOS 'DZIN RGYU YOD PA LTANG DE 'DRA'I NGA DE PHUNG PO LNGA BSAL RJES SU 'DI NI DA'O ZHES NGOS 'DZIN RGYU YOD DGOS PA LA JI LTAR DBYAD KYANG MI RNYED PA'I PHYIR TE, RTZA SHES LAS, BDAG NI NYE BAR LEN PA LAS, GZHAN DU 'THAD PA NYI DAM YIN, GAL TE GZHAN NA LEN MED PAR, GZUNG YOD RIGS NA GZUNG DU MED, CES SO, ,DE LTAR BRTAGS NAS PHUNG PO DANG THA DAD DU MA GRUB PAR NGES PA'I NGES SHES MYONG THOG NAS DRANGS PAR BYA'O, ,DE LTA BU'I RIM PA LAS SO SO NAS NGES PA RNAM DAG 'DRONGS PA NA SNGAR NGOS BZUNG BA'I DGAG BYA'I PA'ANG BDAG DE PHUNG PO'I STENG DU GRUB NA PHUNG PO DANG GCIG THA DAD GANG RUNG DU GRUB DGOS PA @130B DE PHUNG PO DANG GCIG TU MA GRUB PA DANG, THA DAD DU MA GRUB PAR NGES PA'I RGYU MTSAN GSUM LA BRTEN NAS, DE LTA BU'I DA DE GTAN NAS MI 'DUG SNYAM NGU LTANG GIS NGES PA'I NGES SHES SKYES PA NA BDAG MED KYI LTA BA DANG POR RNYED PA YIN NO, ,GNYIS PA MNYAM BZHAG TU NAM MKHA' LTA BU'I SKYONG TSUL NI, LEGS BSHAD SNYING PO LAS, 'DI YANG PHUNG PO LA BRTEN NAS BTAGS PA NYID KYIS BDUN PO DER GANG ZAG MA RNYED PA DE GANG ZAG GIS BDAG MED KYI DON YIN PAS ZHES GSUNGS PA LTAR, BSHAD MA THAG PA'I RIGS PA DE RNAMS KYIS SNGAR NGOS BZUNG BA'I DGAG BYA'I NGA DE PHUNG PO DANG GCIG THA DAD GANG DU'ANG MA RNYED PAS GTAN NAS MA RNYED PA DE GANG ZAG GIS BDAG MED KYI DON YIN PAS, ,DE LTAR MA RNYED PA 'AM, MED PAR NGES PA'I NGES PA THOG MAR SKYES PA DE GANG ZAG GI BDAG MED RTOGS PA'I RIGS SHES RJES DPAG TSAD MA YIN LA, DE NAM SKYES PA NA BLO GZHAN GYIS BAR MCHOD PAR BLO DE'I 'DZIN STANGS SHUGS ZHAN DU MA SONG BA'I NGANG LA CI TZAM NUS KYI BAR MNYAM PAR BZHAG GO ,'DZIN STANGS SHUGS ZHAN PA DANG MI GSAL BAR 'GRO BAR RTZOM PA NA SHES BZHIN GYIS DE MA THAG RIG PAR BYAS TE MNYAM BZHAG LAS LANGS TE, SLAR YANG LHAN SKYES KYI SNANG TSUL BRTAGS PA NAS NGAS SHES BSKYED PA'I BAR SNGAR BZHIN BYAS LA, LHAN SKYES LA SNANG BA LTAR GYI NGA MI 'DUG SNYAM DU NGES PA LHANG GIS SKYES PA NA SNGAR BZHIN MNYAM PAR BZHAG GO ,DE LTAR YANG YANG BSKYAR GYIN STONG NYID LA DMIGS PA'I GNAS CHA BTZAL LA GNAS CHA CUNG ZAD RNYED PA NA BSGOM BZHIN PA'I DANG NAS DPYOD PA'I DPYAD SGO MA LA 'JUG DGOS PAS DE'I TSUL NI, DAR 'DZIN LHAN SKYES KYI JI LTAR BZUNG BRTAGS PA NAS RIMS @131A *, ,BZHIN SDAR LTAR BSGOM STE DRAN SHES DANG LDAN PAR ,NYAM PAR BZHAG PA'I TSE, 'DZIN STANGS KYI SHUGS CUNG ZAD ZHAN DU 'GRO BAR DOGS TZAM NA, DES SHES KYI RGYUN RANG GI 'DZIN STANGS MA SHOR BA'I LHANG NGE BA DE LAG NAS BZHIN PA'I NGANG NAS, SHES PA'I CHA SHAS PHRA MO ZHIG GIS SNGAR GYI GNAD BZHI DRAN TZAM RE BYAS PAS NGES SHES KYI 'DZIN STANGS SHUGS DRAG TU 'GRO ZHING DE'I NGANG LA 'JOG PA DANG, YANG 'DZIN STANGS SHUGS ZHAN DU 'GRO BAR DOGS PA NA SNGAR BZHIN BYA STE, DE NI DPER NA MTSO SHIN TU DANGS BA RLUNG GIS GA-YO BA MED PAR KHRIG GE GNAS PA'I NANG NA NYE'U CHUR 'KHYUG PA LTA BU'O, ,DE YANG GNAS CHA MA RNYED GONG DU SNGAR BSHAD PA BZHIN BSGOM PA'I DUS SU MI DPYOD PAR GNAS CHA BTZAL BA GTZO BOR BYA ZHING, GNAS CHA RNYED NAS DPYAD 'JOG SPEL MAR BYA'O, ,DE LTA BU'I TSUL GYIS NAM MKHA' THOGS PA'I REG PA BCAD TZAM DU GNAS PA DANG MTSUNGS PA'I, NGA RANG BZHIN GYIS GRUB PA BKAG TZAM GYI MED DGAG KHO NA NGES YUL DU BYAS NAS SGOM PA NI MNYAM BZHAG NAM MKHA' LTA BU'I SKYONG TSUL LO, ,GSUM PA RJES THOB TU SGYUR MA LTA BU'I SKYONG TSUL NI, MNYAM BZHAG GI STOBS KYIS 'CHAR PA DANG CHED DU BCOS NAS 'CHAR 'JUG PA GNYIS LAS, DANG PO NI, DPER NA SGYU MA'I RTA GLANG MIG GI SHES PAS MTHONG BA DANG, SNANG BA LTAR GYI RTA GLANG MED PAR YID SHES KYIS NGES PA GNYIS LA BRTEN NAS, RTA GLANG DU SNANG BA DE SGYU MA'AM RDZUN PA'I SNANG BAR NGES PA SKYE BA BZHIN DU, GANG ZAG LA SOGS PA YANG THA SNYAD PA'I SHES PA LA BSNYON MED DU SNANG BA DANG, DE NYID RANG GI NGO BOS GRUB PA'I RANG BZHIN GYIS STONG PAR RIGS SHES KYI @131B NGES PA GNYIS TSOGS LA BRTEN NAS, GANG ZAG DE SGYU MA'AM RDZUN PA'I SNANG BAR NGES PA SKYE BA YIN NO, ,DE'I GNAD KYIS MNYAM BZHAG TU MTSAN 'DZIN GYI DMIGS GTAD RDUL TZAM YANG MED PA'I NAM MKHA' LTA BU'I STONG NYID SGOM PA GNAD DU SONG NA, DE'I STOBS KYIS DE LAS LANGS NAS YUL SNANG 'CHAR BA LA BLTAS PA NA RJES THOB TU SGYU MA LTA BU'I STONG PA 'CHAR BA'O, ,GNYIS PA NI, MNYAM BZHAG TU SDAR LTAR BSGOMS NAS DE LAS LANGS PA'I RJES THOB DUNG SNYAM PA BYUNG BA DANG GZHAN YANG KA BUM SOGS YUL SNA TSOGS PA RNAMS SNANG BA'I TSE THAMS CAD RANG NGOS NAS GRUB PA LTA BUR LAM LAM SHAR BYUNG BA NA, SNGAR GYI MNYAM GZHAG GI LTA BA DRAN PAR BYAS TE, SNANG TSUL 'DI LTAR GRUB PA MED SNYAM PA'I BLOS THAG BCAD PA'I DRAN PA MNYAMS PAR SKYONG BA'I SGO NAS STONG PHYOGS DANG, GANG ZAG GI THA SNYAD BSNYON MED DU SNANG BA RNAMS BLO YUL DU 'CHAR BCUG STE RANG BZHIN MED KYANG LAS SOGS PA PO DANG 'BRAS BU MYONG BA PO BZHAG TU YOD PA'I SNANG PHYOGS GNYIS KA LA NGES PA SHUGS CAN YANG YANG BSKYED PAS, YID SHES RTOG PA'I NGES NGOR RANG BZHIN MED PA DANG, SNANG NGOR GANG ZAG GI THA SNYAD BSNYON MED DU SNANG BA GNYIS TSOGS PA'I SNANG BA SGYU MA LTA BUR 'CHAR BAR GSUNGS SO, ,GZHI GANG GRAG GI STENG DU SNGAR BSHAD PA'I GCIG DU BRAL GYI RIGS PAS DPYAD PA BYED TSUL DE LTA BU YANG YANG BSGOM PAS RANG BZHIN MED PA LA NGES PA 'DRONGS NAS BYAD PA NA, RNAM BDUN SOGS RIGS PA GZHAN MANG POS KYANG BSGOM ZHING, DE NAS NGA YI PA DANG GANG ZAG GZHAN DANG, CHOS KYI BDAG MED GTAN LA DBAB PA'I GZHI GANG ZAG LAS GZHAN PA'I RGYUD KYIS BSDUS PA DANG MA BSDUS PA'I DNGOS @132A *, ,PO DANG DNGOS MED KYI CHOS THAMS CAD LA RIGS PA DE DAG KHA SPOS NAS BSGOM PAR BYA STE, TING 'DZIN RGYAL PO LAS, JI LTAR KHYOD KYIS BDAG GI 'DU SHES NI, SHES PA DE BZHIN KUN LA BLOS SBYAR BYA, ZHES SO, ,DE LTAR BSGOMS PAS CHOS GZHAN RNAMS KYI RANG BZHIN MED PA RTOGS NUS PA NI, BZHI BRGYA PA LAS, GCIG GI LTA PO GANG YIN PA, DE NI KUN GYI LTA BOR BSHAD, GCIG GI STONG NYID GANG YIN PA, DE NI KUN GYI STONG NYID YIN, ZHES SO, ,GCIG TU BRAL GYI RIGS PA GZHAN LA KHA SPOS NAS BSGOM TSUL NI, CHOS GANG YIN PA DE RANG BZHIN GYIS GRUB PAR 'DZIN PA'I RANG RGYUD KYI BLO LHAN SKYES LA JI LTAR SNANG BRTAG PA DANG, SNANG BA DE LTAR GRUB NA CHA MED KYI SHES BYA MED PAS RANG GANG LA BLTOS PA'I CHA DE DANG GCIG THA DAD GANG RUNG DU GRUB DGOS PA DANG, DE GANG DU GRUB BRTAGS PA NI GCIG THA DAD GANG DU'ANG MA RNYED PAS, SNANG BA DE LTAR MA GRUB PAR NGES PA RNAMS RIM BZHIN BSKYED DE MA NYAM RJES NYID GNYIS KYIS SKYONG BA'O, ,NGA NI RIGS PA'I RGYAL PO RTEN 'BREL GYI RIGS PA MDO TZAM BRJOD PAR BYA'O, ,DE YANG MYU GU CHOS CAN, RANG GI NGO BOS GRUB PA'I RANG BZHIN MED DE, RTEN 'BREL YIN PA'I PHYIR, DPER NA BYAD BZHIN GYI GZUGS BRNYAN BZHIN, ZHES PA NI GZHAN GRAGS KYI GTAN TSIGS SO, ,'DI'I SGO NAS RANG BZHIN MED PA NGES PA LA GNAD GSUM STE, DGAG BYA NGES PA, KHYAB PA NGES PA, GTAN TSIGS NGES PA'O, ,DANG PO NI, MYU GU RANG BZHIN GYIS GRUB PAR 'DZIN PA'I RANG GI BLO LHAN SKYES LA JI LTAR SNANG NGES PA'O, ,GNYIS PA NI, RTEN 'BREL YIN NA RANG GI NGO BOS MA GRUB PAS KHYAB TE, , @132B DE YIN NA GZHAN LA RAG LAS PA'I GZHAN DBANG CAN YIN PAS KHYAB LA RANG GI NGO BOS GRUB NA GZHAN LA RAG MA LAS PA'I RANG DBANG CAN GYI TSUGS THUB TU GRUB PAS KHYAB PA'I PHYIR, BZHI BRGYA PA LAS, GANG LA BRTEN NAS 'BYUNG YOD PA, DE NI RANG DBANG MI 'GYUR RO, ,'DI KUN RANG DBANG MED PA STE, DES NA BDAG NI YOD MA YIN, ZHES SO, ,GSUM PA NI, DE CHOS CAN, RTEN 'BREL YIN TE, RANG GI RGYU RKYEN LA BRTEN NAS SKYES PA'I PHYIR, DES NA RANG BZHIN GYIS MED DE, 'JIG RTEN LAS 'DAS PAR BSTOD PA LAS, SDUG BSNGAL RANG GIS BYAS PA DANG, GZHAN GYIS BYAS DANG GNYIS KAS BYAS RGYU MED PAR NI RTOG GIS 'DOD, KHYOD KYIS BRTEN NAS 'BYUNG BAR GSUNGS, RTEN CING 'BREL BAR GANG 'BYUNG BA, DE NYID KHYOD NI STONG PAR BZHED, DNGOS PO RANG DBANG YOD MIN ZHES, , MNYAM MED KHYOD KYI SENG GE'I SGRAS, ZHES SO, ,DE LTAR 'DUS BYAS RNAMS NI RANG GI RGYU RKYEN LA BRTEN NAS SKYES PA DANG, 'DUS MA BYAS RNAMS RANG GI CHA SHAS LA BLTOS NAS GRUB PA DANG, RANG 'DOGS BYED KYI MING RTOG GIS BTAGS PA KHO NA YIN PAS, GANG LA'ANG MA BRTEN PA'AM MA BLTOS PA'I CHOS MED LA, RANG GANG LA BLTOS PA DE DANG NGO BO NYID KYIS GCIG TU GRUB NA BYA BYED THAMS CAD GCIG TU 'GYUR BA DANG, THA DAD DU GRUB NA DE LA BLTOS PA 'GAL BAS BLTOS NAS GRUB PA'I RTEN 'BREL YIN PA'I RGYU MTSAN GYIS RANG BZHIN MED PA KHO NA YIN TE, RTZA SHES LAS, GANG LA BRTEN TE GANG 'BYUNG BA, DE NI RE ZHIG DE NYID MIN, DE LAS GZHAN PA'ANG MA YIN TE, DE PHYIR CHAD MIN RTAG MA YIN ZHES DANG, GANG PHYIR RTEN 'BYUNG MA YIN PA'I, ,CHOS 'GA' YOD PA MA YIN PA, DE PHYIR @133A *, ,STONG PA MA YIN PA'I, CHOS 'GA' YOD PA MA YIN NO, ,ZHES DANG, BLO GROS RGYA MTSOS ZHUS PA LAS, GANG RNAMS RTEN CING 'BREL BAR 'BYUNG, DE RNAMS NGO BO NYID KYIS MED, CES DANG, MA DROS PAS ZHUS PA LAS, GANG ZHIG RKYEN LAS SKYES PA DE MA SKYES, DE LA SKYE BA'I RANG BZHIN YOD MA YIN, RKYEN LA RAG LAS GANG DE STONG PAR BSHAD, GANG ZHIG STONG NYID SHES TE BAG YOD YIN, ZHES SO, ,'DI LTA BU'I RTEN 'BREL GYI RIGS PA'I TSUL LA NGES PA 'DRONGS NA BSGRUB BYA NGES PAS RTAG LTA SEL ZHING RANG BZHIN MED PA LA NGES PA RNYED PA DANG, GTAN TSIGS NGES PAS CHAD LTA SEL ZHING LAS 'BRAS SOGS THA SNYAD KYI RNAM BZHAG LA NGES PA RNYED PAR 'GYUR LA, NGES PA DE GNYIS RNYED NA, STONG PA DANG RTEN 'BREL MI 'GAL ZHING SNANG STONG ZUNG DU 'BREL BA'I DBU MA'I LAM NGO MTSAR RMAD DU BYUNG BA RNYED PA YIN TE, BYANG CHUB SEMS 'GREL LAS, CHOS RNAMS STONG PA 'DI SHES NAS, LAS DANG 'BRAS BU BSTEN PA GANG, NGO MTSAR BAS KYANG 'DI NGO MTSAR, RMAD BYUNG BAS KYANG 'DI RMAD BYUNG, ZHES DANG, YAB RJE DAM PAS KYANG, 'DI KUN NGO BOS STONG PA DANG, 'DI LAS 'DI 'BRAS 'BYUNG BA YI, NGES PA GNYIS PO PHAN TSUN DU, GEGS MED PAR NI GROGS BYED PA, 'DI LAS NGO MTSAR GYUR PA DANG, 'DI LAS RMAD DU BYUNG BA GANG, ZHES GSUNGS SO, ,DE LTA BU'I TSUL GYIS LTA BA BTZAL NAS SKYONG BA LA, RJE BTZUN GYIS, LHA DANG BLA MA DBYER MED DU BYAS NAS GSOL BA RTZE GCIG TU 'DEBS PA, BSAGS SBYANG STOBS CHE LA YUN RING BA, DBU MA'I GZHUNG LUGS NAS 'BYUNG BA'I RIGS PAS ZHIB TU @133B DPYOD PA, SUM DRIL DU BYAS NAS NYAMS SU BLANG NA RING POR MI THOGS PAR DBU MA'I LTA BA'I GNAD MTHAR THUG PA RNYED PAR 'GYUR RO, ,ZHES RJE NYID LA GDAMS PA NI RJES 'JUG GI GDUL BYA RNAMS LA GTZO BOR DGONGS PA YIN PAS DE LTAR BYA BA GAL CHE ZHING, SBYOR DNGOS MJUG GI SKABS SU JI LTAR BYA TSUL, GEGS SEL BO GAS ? 'DON GYI RIM PA RNAMS ZHIB PAR BRGYUD LDAN BLA MA DAM PA'I ZHAL LAS SHES PAR BYA DGOS LA, BDAG LTA BU'I SKYES BU CHUNG NGU KHYAD PAR BTZAM GYI GRANGS SU YANG MI TSUNG KYANG THAMS CAD MKHYEN PA RMI LAM DU YANG MI 'DOD CING TSE 'DO'I RNYED BKUR GRAGS SOGS KYI BYANG CHUB CHEN PO GZHAN DON DU 'GYUR DOGS KYIS 'BAD PAS BSGRUB PA'I THEG CHEN PAR KHAS 'CHI BA RNAMS LA NI MI DGOS MOD, GZHAN KHO NA'I PHYIR RDZOGS BYANG DON DU GNYER BA'I THEG CHEN PA RNAMS SHES SGRIB SPONG BA LHUR LEN PAS DBU MA RTZA BA SOGS NAS GSUNGS PA LTAR GZHI RE RE YANG RIGS PA'I RNAM GRANGS MTHA' YAS PAS BDAG MED DU BSGRUB PA'I SGO NAS DE KHO NA NYID LA BLO SHIN TU RGYAS PAR BYED DGOS PAR GSUNGS PAS RNAM DPYOD DANG LDAN PA DAG GIS DBU MA'I GZHAD LUGS RGYA CHEN PO RNAMS LA LEGS PAR SBYANGS TE BLO GROS DBYAR MTSO LTAR 'PHEL BAR MDZAD DGES PAR YANG GDA' 'O, ,GANG ZHIG RNYED NA BSEL LA ZHI BA THAR PA'I KHANG BZANG MCHOG DER 'JUG ,GZHAN DU DU: KHA'I SREG ZA RAB 'BAR MI BZAD SRID PA'I BTZON DONG 'DIR, MNAR ZHING THAR PA'I GO SKABS MI RNYED MTHA' BRAL DBU MA'I LAM BZANG STE, LUNG LA BRTEN NAS PHYOGS TZAM SMOS PA 'DI YANG YONGS 'DZIN DAM PA'I DRIN, GNAS LUGS ZAB MO'I GTAM TZAM THOS PA'ANG DPAGS YAS BSKAL PAR RNYED DKA' ZHING, , @134A *, ,ZAB MO'I DON LA SOM NYIS KYANG NI SRID PA HRUL POR BYED GSUNGS NA, DAM PA'I DRIN LAS YID DPYOD TZAM GYIS NGES PA'I CHA TZAM RNYED 'DI YANG, BLO BZANG RJES 'JUG CHOS PA'I GZUGS BRNYAN BDAG NI SKAL PA BZANG SNYAM BGYID, BSTAN BCOS RTZOM PAR NUS SHING 'OS PA'I RGYU TSOGS 'GA' YANG YOD MIN KYANG, RANG GIS RNYED BKUR GRAGS PA 'DOD DANG GZHAN LA 'GRAN NAM PHRAG DOG GI, KUN SLONG DMAN DANG RTOG BZOS MA YIN DRI MED LUNG DANG GSUNG RGYUN LA, BRTEN NAS YID LA 'DRIS PHYIR BYAS PA 'DI LA NONGS PA MED DAM SNYAM, 'ON KYANG BDAG NI SKYE BAS THOB DANG SBYANGS PA'I BLO GROS RAB DMAN PAS, RTOGS DKA'I GNAS LA RMONGS PA'I BLO YIS TSUL MIN BRJOD PA GANG YIN PA, MCHOG GSUM RNAMS DANG GZUNG GNAS MKHAS PA'I SKYE BO RNAMS LA SNYING NAS 'CHAGS, BRTZE BA CHEN POS BZOD PAR MDZOD LA NYES KUN DAG PAR MDZAD DU GSOL, 'DIR 'BAD LAS BYUNG ZLA LTAR DKAR BA'I DGE BA GANG ZHIG THOB PA DES, MAR GYUR 'GRO RNAMS YANG DAG RIGS PAS MTHAR 'DZIN DMIGS GTAD KUN BSHIGS TE, GNYIS MED GSUNGS PA'I STON PA MCHOG GI GO 'PHANG BDE BLAG THOB PA DANG, 'JAM DPAL SNYING PO'I DRI MED BSTAN PA PHYOGS DUS KUN TU RGYAS GYUR CIG ,CES LTA KHRID NGES DON RAB GSAL ZHES BYA BA 'DI NI SPRANG BTZUN SNYOMS LAS PA NGAG DBANG BLO BZANG CHOS LDAN ZHES BGYI PAS DE KHO NA NYID KYI DON LA BAG CHAGS 'JOG PA'I PHYIR SBYAR BA'O,, ,,