` ,,NA MO GU RU MNYDZU GHO sh'A YA, THABS BZANG DU MAS ZAB DANG RGYA CHE'I TSUL, ,RING NAS GOMS PAS PHRA BA'I GNAS RNAMS LA'ANG, ,DRI MED MKHYEN PA THOGS PA MI MNGA' BA, ,ZLA MED SMRA BA'I MCHOG DES RTAG TU SKYONGS, ,DANG POR GSUNG RAB MANG DU THOS PA BTZAL, ,DE NAS LEGS PAR BSHAD PAS BSTAN PA SPEL, ,THA MAR SGRUB LA RING DU BRTZON MDZAD PA'I, ,BSHES GNYEN BZANG KHYOD YUN RING ZHABS BRTAN CIG ,MA 'DRIS MDZA' BSHES DE YIS GCUGS PA'I THUGS, ,BDAG LA MNGON DU PHYOGS PA LAS BYUNG BA'I, ,PHRIN YIG SNYAN PA PHUN TSOGS LJON PA YI, , 'BRAS BU BZANG PO'I SKYES BCAS SPRINGS PA 'PHROD, ,SGRIN CHEN CHU YIS RGYA MTSOR JI BZHIN DU, ,LEGS BSHAD GTAM GYIS DOMS PAR MA GYUR PAS, ,DA DUNG RIM PA GNYIS LA SBYOR BA'I TSUL, ,YI GER BKOD PA SGRINGS ZHES BKA' STZAL BYUNG, , @160B 'BAB CHU'I RGYUN GYIS RDZID DU CHUNG NGU BZHIN, ,BLO GROS CHUNG DU THOS PAS DGANG SLA MOD, ,BLO GROS RGYA CHE DAM PA RNAMS KYI YID, ,NGO MTSAR GTAM GYIS TSIM PA MED PA MTSAR, ,DE LTA MOD KYI THOS PA NYUNG, ,BLO GROS CHUNG ZHING SBYOR BA DMAN, ,TSIG 'GA' YOD KYANG DE YI DON, ,SGRUB LA SHIN TU LHOD GYUR PA, ,BDAG 'DRAS DAM PA KHYED KYI THUGS, ,RANGS PAR BGYID PA'I RNGO MI THOG ,'ON KYANG RLUNG GIS BSKUL BA NA, ,RANG LA MTHU NI YOD MIN PA'I, ,SHING BAL RNAMS KYANG 'DAB BZANG LA, ,'GRAN PA BZHIN DU BGROD PA LTANG, ,DAM PA'I GSUNG GIS LEGS BSKUL BAS, ,BDAG GIS MDO TZAM GSOL BAR BYA, ,DE LA 'O SKOL DAL BA'I RTEN BZANG PO NI RNYED, ,RGYAL BA'I BSTAN PA RIN PO CHE DANG NI MJAL, DGE BA'I BSHES GNYEN BZANG POS NI BZUNG, ,BLANG DOR LA DPYOD PA'I BLO YI MTHU YOD PA'I SKABS 'DIR, RTEN BZANG PO 'DI LA SNYING PO ZHIG NGES PAR BLANG 'TSAL, ,DE NI RGYAL BA'I BSTAN PA LA 'JUG PA KHO NA LA RAG LAS KYANG, BSAM PA BZANG BA TZAM GYIS ZHUGS PAS MI CHOG BSTAN PA LA 'JUG PA'I RIM PA PHYIN CI MA LOG BA SHES PA'AM, SHES PA CIG GIS KHRID PA LA NGES PAR LTOS PA YIN, DE YANG LAM GYI NGO BO LA MKHAS PA, GRANGS NGES LA MKHAS PA, GO RIM LA MKHAS PA CIG DGOS TE 'DI LTAR, LAM MA YIN PA LA YIN PA DANG, YIN PA LAM YIN PAR 'KHRUL NA SMAN LOG PAR SBYAR BA LTAR DES BSTAN PA'I LAM BSGRUB KYANG DON DU MI 'GYUR BAS GNOD PA BYIN PA LAS GZHAN DU PHAN BTAGS PA MED, LAM GYI NGO BO LEGS PAR SHES KYANG LHAG PA MI DGOS PA DANG, MA TSANG BAS MI NUS PA'I GRANGS NGES @161A *, ,MI SHES NA DE'I NANG NAS KYANG DGOS NGO SHES PA RNAMS CHAD NAS 'GRO ZHING, MI DGOS PA RNAMS KYANG SGRUB PA'I LHAG PA CIG 'ONG BAS GNAD DU MI 'GRO, NGO BO DANG GRANGS KYI NGES PA SHES KYANG DANG PO DANG, BAR DANG THA MAR GANG NAS 'KHRID PA'I BLO'I RIM PA DANG SBYOR MI SHES NA SMAN YIN SNYAM PA DANG, DE'I NANG NAS KYANG SMAN BZANG PO YIN PAS NA BA'I PHYIR NAD PA 'DI LA BTANG DU RUNG SNYAM NAS BTANG BA NA SMAN CHES MCHOG TU GYUR PAS PHAN MI THOGS PAR MA ZAD SROG 'PHROG PA'I GNOD PA CHEN PO STER BA LTAR, 'DI DAM PA'I CHOS YIN PAS SNYAM PA DANG, CHOS KYI NANG NAS KYANG CHOS ZAB PA YIN PAS 'DI BSTAN PA LA NYES PA CI YOD SNYAM NAS DES KHRID PA NA, GO RIM LA BAB NA YON TAN KHO NA STER YANG, GO RIM LAM BAB NA YON TAN MI STER BAR MA ZAD BDE 'GRO DANG THAR PA'I SROG 'PHROG PA'I RGYUR 'GRO BAS NA, KHYAD PAR DU'ANG GO RIM LA MKHAS DGOS PA LAGS, DE LTA BU'I NYAMS LEN GYI GNAD LA MKHAS PA YANG, SKYES BU DAM PA CIG GIS 'PHRIG BSKUR ZHING KHRID PAS, RTZOM PA PO TSAD LDAN GYIS BRTZAMS PA'I GZHUNG CHEN PO RNAMS LA'ANG KHOL 'DON TZAM RER MA SONG BA'I LUS YONGS SU RDZOGS PA'I LAM GYI RIM PA LA NGES PA RNYED PA CIG LA 'ONG BA YIN, DES 'KHRID TSUL PHYIN CI MA LOG PA'I MAN NGAG MDOR BSDUS PA RNAMS NI, GZHUNG CHEN MO RNAMS NAS BTUS PA SHA STAG YIN LA, MAN NGAG GI DON YANG GZHUNG RGYA CHE BA DANG, DE'I DON SHIN TU RTOGS DKA' BA DANG, DGOS PA'I DBANG GIS GO RIM DKRUGS NAS BSTAN PA RNAMS @161B LA NGES PA BDE BLAG TU STER BA CIG LA BYED PA'I PHYIR, GZHUNG CHEN MO RNAMS BSHAD CHOS DANG, MAN NGAG CHUNG CHUNG RNAMS SGRUB PA'I CHOS SU BYAS NAS DE GNYIS MI MTHUN PAR 'DZIN PA NI, BSTAN PA'I GNAD YE MA GE BA YIN TE, 'DI LTAR RGYAL BA'I GSUNG RAB DGONGS 'GREL DANG BCAS PA RNAMS NI, THOS RTZOD SGRUB PA LHUR LEN PA, ZHES 'DON PA LTAR, SGRUB PA LHUR LEN ZHING SGRUB PA LA GZHOL BA SHA STAG YIN PA'I PHYIR RO, ,DE LTA NA BSHES PA'I SPRING YIG LAS, BSNYENGS DANG BRAL LA MANG DU GSOL CI 'TSAL, PHAN PA'I GDAMS NGAG DON PO 'DI LAGS TE, ,KHYOD KYI THUGS DUL MDZOD CIG BCOM LDAN GYIS, ,SEMS NI CHOS KYI RTZA BA LAGS PAR GSUNGS ZHES DANG, BZHI BRGYA PA LAS, SEMS MA GTOGS PAR 'GRO SOGS LA, ,GANG PHYIR BSOD NAMS LA SOGS PA, ,MA MTHONG DE PHYIR LAS KUN LA, ,YID NI DANG POR BRJOD PAR BYA, ,ZHES 'PHAGS PA YAB SRAS KYIS GSUNGS PA LTAR, ,LEGS NYES THAMS CAD KYI RTZA BA NI YID KHO NA YIN TE, NYES PAR SPYAD PA DANG LEGS PA LA 'JUG PA'I SGO NI GSUM DU NGES LA LUS NGAG NI YID KYI GZHAN DBANG CAN YIN PA'I PHYIR RO, ,DES NA THOG MAR KUN SLONG GI BSAM PA TSIG TZAM DU MA SONG BAR 'CHOS PA CIG SHIN TU GAL CHE BA LAGS DE 'CHOS PA'I RIM PA LA MANG DU BSHAD KYANG BLO RAB 'BRING THAMS CAD LA THUN MONG DU PHAN CHE BA NI, DANG PO 'JIG RTEN 'DIR RING DU MI GNAS PAR 'CHI BA RJES SU DRAN PA DANG, 'JIG RTEN PHA ROL TU 'GRO BA GNYIS SU JI LTAR 'GYUR BA RGYU DANG BCAS PA MANG DU BSGOMS PAS TSE 'DI DON DU @162A *, ,GNYER BA LAS BLO LDOG NAS, 'JIG RTEN PHYI MA PHAN CHAD KYI BDE BA DON DU GNYER BA'I BLO CIG CI SKYE BYA DGOS, DE NAS SRID PA MTHA' DAG GI SKYON DANG, ZHI BA'I PHAN YON SEMS PA LA SHIN TU 'GRUS PAR BYAS PAS 'KHOR BA'I PHUN TSOGS DON DU GNYER BA LAS BLO LDOG NAS THAR PA DON GNYER GYI BLO SHUGS DRAG LA RGYUN RING BA CIG BSKYED DGOS PA YIN, DE NAS RANG NYID LA BDE SDUG GIS PHAN GNOD BYED PA CI 'DRA BA DE 'DRA BAR SEMS CAN THAMS CAD KYANG YIN PAR MTHONG NAS, BYAMS PA DANG SNYING RJE BYANG CHUB KYI SEMS GSUM LA CHES SHIN TU GOMS PAR BYAS NA, SEMS CAN GYI BDE SDUG SGRUB PA DANG SEL BA LA JI MI SNYAM PAR RANG GI DON TZAM LHUR LEN PA'I BSAM PA LEGS PAR LDOG NAS, GZHAN GYI DON NYID MNGON PAR 'DOD PA'I DON DU MTHONG ZHING, DE SGRUB PA'I THABS KYI MCHOG KYANG SANGS RGYAS NYAG GCIG TU NGES NAS DE'I PHYIR DU SANGS RGYAS THOB PAR 'DOD PA'I BSAM PA SHIN TU BRTAN PA CIG SKYED PA LAGS, 'DI DAG LA TSIG SGRIGS KYI GO BA TZAM RE YOD PA'I 'KHRUL GZHI BYAS NAS, THOS BSAM SGOM PA LA 'JUG PAS, KHO BO NI 'DI DAG 'JIG RTEN PHYI MA'I CHED DU BYED DO ZHE 'AM, THAR PA'I PHYIR DU BYED DO ZHE 'AM SEMS CAN GYI DON DU BYED DO ZHES PA'I TSIG SNYAN SNYAN MANG DU BRJOD KYANG, BLO'I 'GRO TSOD NI TSE 'DI 'AM, DON 'KHOR BA'I BDE 'BRAS 'GA' ZHIG LA MING THAR PAR BTAGS PA ZHIG GAM, RANG GI DON NYI TSE'I CHED DU DMIGS PA CIG LAS GZHAN YOD MI BSAM, DES NA BSAM PA 'DI DAG BCOS MA MA YIN PAR SKYE BA LA GO BA TZAM GYIS @162B MI CHOG SGOM DGOS LA, BSGOM PA'I TSUL YANG 'DI 'DRA'I RIGS RNAMS RANG RANG GI SKABS KYI RGYU MTSAN RNAM PA DU MAR DPYAD KYIN SGOM PA'I DPYAD BSGOM NYID YANG DANG YANG DU GOMS PAS BSGRUB DGOS PA LAGS, DE LA DE DAG GI DMIGS RNAM SKYONG BA RGYU'I GTZO BO YIN MOD KYANG DE TZAM GYIS MI CHOG PAR THUN MTSAMS SU DE DAG LAS BRTZAMS PA'I BKA' DANG BSTAN BCOS DRI MA MED PA MAN NGAG DANG BCAS PA RNAMS LA BLTAS NAS NGES PA BRTAN PAR BYED PA DANG, BSAM PA DE DAG GI 'GAL RKYEN SEL BA DANG, MTHUN RKYEN SGRUB PA'I BSAG SBYANG MANG PO GNAD DU GTONG DGOS, DE LTAR RGYU PHYOGS RE BA RE MIN PA'I MTSAN NYID TSANG BA RE BYAS NAS SO SOR RTOG PA'I SHES RAB KYIS ZHIB PAR SKYON YON LEGS PAR DPYAD CING BSGOMS PA NA 'DI'I DMIGS PA NI 'DI LTA BU, RNAM PA NI 'DI 'DRA BA YID LA BYED TSUL NI 'DI LTAR BYAS PAS, THUN MONG MIN PA'I LAG RJES 'DI 'DRA BA ZHIG RGYUD LA SKYE BAR 'DUG SNYAM DU KHONG DU CHUD NAS, NYAMS LEN GYI GNAD SHIN TU PHRA BA RNAMS LA'ANG GDENG RNYED NAS 'ONG BA YIN, DE'I TSE YON TAN GYI PHYOGS SGRUB PA DANG, SKYON GYI PHYOGS 'GOG PA'I RANG RANG GI BYED LAS THUN MONG MA YIN PA RNAMS SHES TE, SPONG LEN GANG LA'ANG 'DI NI NGES PAR DGOS TE, 'DI TZAM GYIS KYANG MI CHOG GO SNYAM NAS DAM PA'I CHOS GANG YANG MI SPONG BA CIG 'ONG BA LAGS, BSAM PA DE DAG KYANG DANG POR BSKYED DGOS, BSKYED PA TZAM GYIS MI CHOG PAR RGYUN BRTAN PA DANG, DER YANG MA ZAD GONG NAS GONG DU CI 'PHEL BYA 'TSAL BAS, 'DI DAG NI SNGON 'GRO'I CHOS YIN PAS GOMS PA SRID MI DGOS PA DANG, DUS THAMS CAD DU MI NYAMS PAR BYA MI DGOS KYI LAN CIG SNGON @163A *, ,DU BTANG BAS CHOG ,GZHAN YANG 'DI RNAMS NI SPUN PA DANG PHYI SHUN LTA BU'I RNAL 'BYOR YIN PAS BZHAG KYANG CHOG SNYAM NAS 'DI DAG LA RTZIS MED PAR BYAS TE, DNGOS GZHI NYID LA 'DRIS PAR BYA'O SNYAM PA NI LAM GYI GNAD GTAN NAS MA GO BA YIN TE SNGAR BSHAD PA LTA BU'I BSAM PA DANG KHYAD PAR DU BYANG CHUB KYI SEMS SNGAR BSHAD PA 'DRA BA ZHIG DANG BRAL NA, CHOS BYAS PAR SGOM PA RNAMS CHOS LTAR SNANG DU 'GRO ZHING, STONG PA NYID KYI TING NGE 'DZIN RNAM PAR DAG PA BSGOMS KYANG, THEG PA CHEN POR GTAN MI RUNG BAR LAN CIG MA YIN PAR GSUNGS PA'I PHYIR RO, ,DES NA THUN 'GOR BYANG CHUB KYI SEMS BSGOM PA DANG, THUN GSHAM DU SMON LAM RLABS PO CHES KHA BSGYUR BA NI, THUN GYI DNGOS GZHI LA BSKYANGS PA'I DGE BA DE NYID GNAD DU GTONG BA DANG MI ZAD PAR BYED PA'I THABS MKHAS CHEN PO YIN PAS GANG BYUNG RES MI CHOG PAR RGYUD DANG 'DRES NGES PAR BYED DGOS PA LAGS, DE LTAR DE LTA BU'I BSAM PA BSKYED PA DE LA GCES PAR BZUNG STE, MI NYAMS PAR BYED PA GZHIR BZUNG BA'I STENG NAS GSANG SNGAGS KYI LAM RIM PA GNYIS NYAMS SU LEN NA SPYIR THEG PA GANG GI SGOR 'JUG KYANG RANG RANG GI TSUL KHRIMS YONGS SU DAG PA GZHIR 'JOG DGOS LA, KHYAD PAR DU GSANG SNGAGS LA 'JUG PA LA SNGAR BSHAD PA'I BYANG CHUB KYI SEMS THEG PA CHEN PO'I LAM THAMS CAD KYI GNAD MTHAR THUG PA YIN PAS DE BRTAN PA SHIN TU GAL CHE ZHING DES NA MTSAN NYID DANG LDAN PA'I DGE BA'I BSHES GNYEN LAS RNAM PAR DAG PA'I DBANG BLANGS PA'I TSE NA THOB PA'I DAM TSIG DANG SDOM PA GTANG RGYUS MA BTANG ZHING @163B NYAMS PA'I RGYUS MA NYAMS PA YOD NA LEGS, GZHAN DU NA DBANG BLANGS TE DAM TSIG DANG SDOM PA GSOS LA, NYES LTUNG SNGA MA 'DAG NGES SU SBYANG, RTZA BA DANG YAN LAG GI NYES PA RNAMS LEGS PAR NGOS ZIN PAR BYAS LA, PHYIN CHAD 'PHRO CHOD NGES SU BSDAM, DE YANG RTZA BA'I LTUNG BAS YE MA GOS PA LA 'BAD CING, NYES PA LHAG MA RNAMS BYUNG NA NGOS ZIN PAR BYAS NAS LEGS PAR PHYIR BCOS PAR BYA, KHO BO'I LTAR NA 'DI NI RIM GNYIS BSGOM PA'I GZHIR MED MI RUNG DU 'JOG DGOS SHING, RIM GNYIS MI BSGOM YANG DBANG THOB NA NGES PAR BYA DGOS PAS 'DI LA NGES PA CHEN PO SKYED 'TSAL TE, DBANG THOB NAS DAM TSIG DANG SDOM PA RNAM PAR DAG NA RIM PA GNYIS TSE 'DIR MA BSGOMS KYANG, SKYE BA BDUN DANG BCU DRUG LA SOGS PAR MCHOG 'GRUB PAR GSUNGS SHING, RIM GNYIS SGOM PA LTAR BYAS KYANG DAM TSIG DANG SDOM PA KHAS BLANGS PA YAN PAR BTANG NA NGAN 'GROR LTUNG NAS MI 'GRUB PAR GSUNGS PA'I PHYIR RO, ,DES NA GSANG SNGAGS SGRUB PA'I RTEN KHYIM PA YIN NA GTAN KHRIMS LNGA LA GNAS PA DANG, RAB TU BYUNG BA YIN NA SDOM PA GNYIS SAM GSUM LA GNAS NAS SGRUB DGOS PAR GSUNGS PAS, RDO RJE 'DZIN PA LA DGE SLONG MCHOG DANG DGE TSUL 'BRING DANG KHYIM PA THA MAR GSUNGS PA YANG, SDOM PA BSRUNG BA MANG NYUNG GIS GZHAG GI KHAS BLANGS PA TZAM GYIS NI MA YIN NO, ,DE'I PHYIR SO THAR DANG BYANG CHUB SEMS DPA'I SDOM PA GNYIS LA GNAS PAS SNGAGS SGRUB NA CHES MYUR DU 'GRUB PAR DE NYID SNANG BA LAS GSUNGS PA YANG, RAB TU BYUNG BA DANG BYANG CHUB SEMS DPA'I SDOM PA GNYIS SRUNG BAS SNGAGS KYI SDOM PA BLANGS NAS BSGRUBS NA, SNGAGS RANG GI SDOM PA TZAM ZHIG BSRUNGS NAS BSGRUBS PA LAS CHES MYUR BAR BZHED PA YIN NO, ,DE BZHIN DU PHA ROL TU PHYIN PA'I THEG PA'I LAM SGRUB PA LA YANG, @164A *, ,BYANG CHUB SEMS DPA'I SDOM PA TZAM ZHIG LA GNAS NAS BSGRUB PA LAS 'DUL BA LA RAB TU BYUNG STE BYANG CHUB SEMS DPA'I SDOM PA YANG BLANGS NAS SGRUB PA MCHOG YIN PA LA DGONGS NAS, MDO SDE DU MAR YANG BYANG CHUB SEMS DPA' MNYAM PA LA'ANG KHYIM PA DANG RAB TU BYUNG BA GNYIS PHYI MA LA BSNGAGS PA CHE BAR GSUNGS SO, ,'DI DAG GI RNAM PAR BZHAG PA LA'ANG BSHAD PA'I TSIG SGRIGS RE TZAM ZER BA MANG BAR SNANG NA YANG, NYAMS SU LEN PA LA SBYOR BA'I TSE BYED PA CHES NYUNG BAR SNANG BAS LEGS PAR GO DKA' BA'I RIGS SU 'DUG LAGS DE NAS, BSKYED BA'I RIM LA LEGS GNAS SHING, ,RDZOGS PA'I RIM PA 'DOD RNAMS LA, ,THABS 'DI RDZOGS PA'I SANGS RGYAS KYIS, ,SKAS KYI RIM PA LTA BUR GSUNGS, ,ZHES SKAS KYI RIM PA GONG MAR PHYIN PA 'OG MA RNAMS SU 'DZEG PA LA LTOS PA LTAR, BSKYED RDZOGS RNAMS RIM PA CAN DU BSGOMS PAS BGROD PAR BYA BA YIN GYI, GO RIM GANG BYUNG DANG, BSKYED RIM BZHAG KYANG CHOG PA NI MIN PAR GSUNGS PAS THOG MAR BSKYED PA'I RIM PA BSGOM PAR BYA'O, ,'DI'ANG GNAS SKABS KYI MI 'DOD PA ZHI BA DANG, 'DOD PA'I DNGOS GRUB PHRA MO 'GRUB PA LA NGES PA MED KYANG, BLA NA MED PA'I BYANG CHUB SGRUB PA'I BSKYED PA'I RIM PA NI, RGYUD SDE KHUNGS MA NAS LEGS PAR ZIN PA DANG, MKHAS PA TSAD LDAN GYIS LEGS PAR GTAN LA PHAB PA'I DKYIL 'KHOR GYI 'KHOR LO ZHIG LA BYA 'TSAL, DE LA YANG SBYOR BA TSOGS BSAG PA DANG, THUN MTSAMS SU DAG PA DRAN PAR BYA BA DANG, BZLAS PA DANG MCHOD GTOR LA SOGS PA RNAMS NI TSIG 'DON PA BYED PA TZAM DU MA SONG BA'I DE DANG DE'I DON LEGS PAR DRAN BZHIN @164B PA'I NGANG NAS RGYUD THOG TU KHEL BA RE BYA DGOS TE SPRO MI 'TSAL, DE NAS DNGOS GZHI LHA'I TING NGE 'DZIN BSGOM PA'I TSUL LEGS PAR SHES PA SHIN TU GAL CHE BAS DE'I TSUL CUNG ZAD BRJOD NA, BSKYED RIM BSGOMS PAS GOMS PA'I MTHAR JI LTA BU'I TING NGE 'DZIN ZHIG BSKYED PAR 'DOD PA DE SHES NA, DE SGOM PA'I TSUL LA YANG NGES PA SKYE SLA BAS DE'I PHYIR CI ZHIG BSKYED PAR 'DOD CE NA, DA LTA RTEN DANG BRTEN PAR BCAS PA'I SKU MDOG PHYAG MTSAN RGYAN CHA LUGS TE, MDOR NA KHA DOG DANG DBYIBS KYI RNAM PA BSGOM PA DE RNAMS MTHAR TING NGE 'DZIN ZHIG LA DUS GCIG TU YONGS SU RDZOGS PA GSAL BAR SNANG BA CIG SGRUB PAR 'DOD NAS BSGOM PA YIN NO, ,DES NA DANG POR DMIGS PA'I GZHI GCIG LA DMIGS NAS SBYONG DGOS SHING, DE'ANG GTZO BO LTA BU LA DMIGS NAS SBYONG NA JI LTAR SBYONG ZHE NA, 'DI LA SKU'I CHA PHRA SHOS GCIG LA DMIGS NAS GSAL SNANG SGRUB PA'I PHRA RIM NAS SBYONG BA CIG DANG, SKU DE'I RAGS RIM NAS SBYONG BA'I LUGS GNYIS SNANG BA'I SNGA MA NI, GANG ZAG GI KHYAD PAR 'GA' ZHIG LA 'TSAM SRID KYANG, THUN MONG DU PHAN CHE BA NI PHYI MA YIN TE, SKYE SLA BA'I PHYIR RO, ,DAS NA GTZO BO LTA BU'I RNAM PA PHRA RAGS GNYIS LAS, RAGS SHOS KYI DBU NAS ZHABS KYI BAR GYI RNAM PA TSANG BA TZAM ZHIG GSAL GDAB LA, NAM SNANG BA DANG DE NYID LA SEMS MI G-YO BAR BZUNG NGO, ,SKU'I SPYI GSAL NA DE LA BZUNG ZHING, SPYI MI GSAL BAR CHA 'GA' ZHIG GSAL NA GANG GSAL BA LA BZUNG, DE YAL NA YANG SPYI GSAL GDAB LA GZUNG NGO, ,BSGOMS PA DANG YE MI MTHUN PA'I RNAM PA SHAR BYUNG NA DE'I RJES SU MI 'BRANG BAR RTZA BA'I DMIGS PA LA SEMS BZUNG NGO, ,'DI DAG LAS DANG PO BAS THUN RING @165A *, ,NA GNAD LA YE MI 'GRO BAR GSUNGS SHING, DE LTAR DU SNANG BAS SHIN TU THUNG BA, GRANGS JE MANG LA BTANG ZHING BSGOMS NA TING NGE 'DZIN SKYON MED SKYE BA YIN, DE YANG DANG POR RTOG PA SPYANG PO BYAS NAS BSGRIMS TE, BYING BA DANG RGOD PA'I DBANG DU SONG MA SONG LEGS PAR BRTAGS SHING BSGO BA MA BYAS NA NYOG NYOG PO CIG GIS YUN RING PO 'DA' PA LA RTOG PA RTZING POS BSGOM DU BZUNG ZHING BSGOMS PAS TSE RIL POR TING NGE 'DZIN 'DOD 'DRA MI SKYE BAS, LEGS PAR BRTAG 'TSAL LO, ,GTZO BO LTA BU'I RAGS PA'I SPYI LA TING NGE 'DZIN MTSAN NYID BZHI LDAN RTZOL BA DRAG ZHAN GNYIS KA LA SNANG NUS PA DANG, DES KYANG THUN BSKYANG THUB PA DANG, DE'I BAR DU BYING RGOD GNYIS KYI DBANG DU MI 'GRO BA DANG LUS SEMS LA DGA' BA DES REG CING ZHI GNAS KYI PHYOGS DANG MTHUN PAR SONG BA DANG, DE NAS DE BRTAN PAR BYAS SHING PHRA MO RNAMS LA'ANG SEMS BZUNG LA, DE NAS LHA GZHAN RNAMS LA DMIGS PA 'PHO BA NA SNGAR GYI LHA DE'I DMIGS PA MA BTANG BA'I STENG NAS SBREL BA YIN GYI, DA DOR NAS PHYI MA LA DMIGS PA BZUNG NA LHA DE RNAMS DUS GCIG TU SNANG BA GA LA 'ONG, DE LTAR NA BSKYED PA'I RIM PA NI RGYUD SDE RIN PO CHE RNAMS KYI BRJOD BYA LA MED MI RUNG DANG, SHIN TU GAL CHE BAR BYUNG ZHING BSNGAGS PA YANG CHE BAR 'BYUNG LA SNGAGS KYI LAM GYI 'GANGS LAGS PAS SGOM PAR BYED PA GNANG DU CHE BA YIN, RDZOGS PA'I RIM PA LA MI ZAB PA'I RDZOGS PA'I RIM PA DANG, ZAB MO RDZOGS PA'I RIM PA ZHES GNYIS SU SNGA MA RNAMS LA GRAGS PA'I DANG PO NI, RTZA RLUNG THIG LE SOGS SGOM PA LA @165B BYED PAR SNANG BAS SO SO'I GDAMS NGAG LAS BTZAL BAR BYA'O, ,PHYI MA NI STONG PA NYID BSGOM PA LA BYED PAR SNANG NGO, ,DE GNYIS RDZOGS RIM DU 'GRO MI 'GRO'I DPYAD PA BYA DGOS CI RIGS SU SNANG YANG RDZOGS RIM GYI SKABS SU NYAMS SU LEN PAR NI 'DRA BA YIN NO, , DE LA STONG PA NYID KYI LTA BA NI SNGAGS DANG PHA ROL TU PHYIN PA GNYIS 'DRA BAR YANG GSUNGS SHING, MKHAS PA RNAMS KYIS KYANG BKRAL BA DE'I PHYIR, DE'I TING NGE 'DZIN SKYED PA'I THABS PHA ROL TU PHYIN PA LA MA GRAGS PA SNGAGS KYI THEG PAR MANG BA DANG, SLA BA SOGS KYI KHYAD PAR YOD KYANG DANG POR DE'I GO BA 'TSOL LUGS LA NI PHA ROL TU PHYIN PA LAS LHAG PA CI YANG MED CING, LUNG DANG RIGS PA MDO SDE'I PHYOGS GSAL BAS, PHA ROL TU PHYIN PA'I GSUNG RAB DGONGS 'GREL DANG BCAS PA NAS 'BYUNG BA BZHIN DU THOS BSAM GYIS GTAN LA DBAB DGOS PA LAGS, DE LA GANG LA THOS BSAM BYA BA'I GZHI NI ZAB MO'I DON STON PA'I GSUNG RAB RNAMS DANG, DE'I DON GZHAN DU 'DREN PA LA MTHA' GZHAN DU DOGS PA THAMS CAD BCAD NAS RNAM PA GZHAN DU DRANG DU MI RUNG BAR DE KHO NA LTAR NGES PAR BYED PA'I RIGS PA'I BSTAN BCOS RIGS TSOGS LA SOGS PA RNAMS YIN NO, ,DE LTA NA SNGON YONGS SU SBYANG BA BYAS PA'I GANG ZAG GI KHYAD PAR 'GA' ZHIG LA TSE 'DIR RING DU MA SBYANGS KYANG, ZAB MO'I DON KHONG DU CHUD PA SRID KYANG, DE LTA BU NI CHES SHIN TU DKA' BAS DE LAS GZHAN PA RNAMS KYIS GCIG DANG DU BRAL LA SAGS PA'I RIGS PAS 'TSOL BA LA, SPROS PA SPYI CHOD DU MING BTAGS NAS BDE BLAG TU 'JUG PA'I SGO GZHAN KHAS 'CHES KYANG, @166A *, ,BLO GROS DANG LDAN PA RNAMS DGA' BA BSKYED PAR MI NUS SO, ,DE LTAR LUNG RIGS LA SBYANGS TE BTZAL BAS GOL PA DANG MA GOL BA'I GO BA SKYE TSUL GNYIS LAS, DANG PO NI CHOS RNAMS KYI SKYE BA DANG 'GAG PA LA SOGS PA LA RIGS PA'I SGO DU MA NAS DPYAD PA NA, KUN RDZOB PA'I RNAM GZHAG THAMS CAD ZHIG NAS GANG LA'ANG 'DI'O SNYAM DU 'DZIN PA MA RNYED PAS, BCINGS GROL THAMS CAD NI MO GSHAM GYI BU'I BCINGS GROL THAMS CAD DANG 'DRA BAR SRONG, DGE MI DGE LAS BDE SDUG 'BYUNG BA NI RI BONG GI MGO LAS RVA SKYE BA DANG KHYAD PAR MED PAR SONG NAS KUN RDZOB THAMS CAD LOG PA'I KUN RDZOB DANG, RTOG PA THAMS CAD ZHEN YUL LA 'KHRUL PA'I LOG SHES SU GO BA CIG 'ONG, DE LTAR DBU MA'I DON DER MTHONG BA LA GNYIS LAS GCIG GIS NI, DE LTA YIN NA RNAM GZHAG THAMS CAD MI RUNG BAS CHOS THAMS CAD RANG BZHIN MED PA'I LTA BA NI, CHAD LTA YIN GYI RGYAL BA'I DGONGS PA MIN NA, ,ZHES SHES RAB KYI PHA ROL TU PHYIN PA SPANGS PAS LAS KYI SGRIB PA GZHAN SHIN TU MI BZAD PA LA'ANG STONG PA NYID KYI LTA BA LA BRTEN NAS DAG PAR BYAR YOD KYANG 'DI LA NI, SPANGS NAS SKYABS MED GYUR PA DE NI MNAR MED 'GRO ZHES GSUNGS PA LTAR SKYABS DANG RTEN GZHAN MED PAS MNAR MED PAR CHES RING BAR GNAS DGOS PAR SEMS CAN DMYAL BA'I LE'U LAS GSUNGS SA, ,GCIG GIS NI BLOS STONG PA'I PHYOGS BZUNG ZHING SKYABS SU 'GRO BA DANG, BYANG CHUB KYI SEMS SBYONG BA DANG, BSKYED PA'I RIM PA SGOM PA LA SOGS PA RGYA CHE BA'I PHYOGS @166B LA BLO SBYONG BA THAMS CAD DANG, THOS PA DANG BSAM PA BYED PA THAMS CAD RTOG PAS BTAGS PA YIN LA RTOG PA THAMS CAD 'KHOR BAR 'CHING BYAD DU MTHONG NAS BZANG PO'I LAS THAMS CAD LA SKUR ZHING YAL BAR DOR BAS NGAN 'GRO'I SGO 'BYED PA 'BA' ZHIG GO ,'DI GNYIS KAS MNGON PA'I NGA RGYAL MA GTOGS PA STONG PA NYID KYI DON KHONG DU MA CHUD PAR 'DRA MOD KYANG, SNGA MA NI STONG PA NYID LA MOS PA'I RGYU DANG BRAL BA YIN LA, PHYI MA NI MES PA'I RGYU BZUNG BA'O, ,DE LTAR STONG PA NYID KYI DON PHYIN CI LOG TU BZUNG NA MOS PA YANG SREG PAR 'GYUR NA, LOG PAR BZUNG NAS SDANG BA LA SMOS SU MED PAR RIN PO CHE'I PHRENG BA LAS, DAD PA CAN NI BZUNG NYES PAS, CIG SHOS SDANG PHYIR KHROS PA YIS, ,DAD PA CAN YANG SREG BSHAD NA, , SDANG PAS PHYIR PHYOGS SMOS CI DGOS ZHES DANG, ,CHOS 'DI LOG PAR SHES GYUR NA, ,MI MKHAS RNAMS NI CHUNG KYANG 'DZA', ,'DI LTAR MED PAR LTA BA YI, ,MI GTZANG DER NI BYING BAR 'GYUR, ,GZHAN YANG 'DI NI LOG BZUNG NA, ,BLUN PO MKHAS PA'I NGA RGYAL CAN, ,SPONG PAS MA RUNGS BDAG NYID CAN, ,MNAR MED PAR NI SPYI'U TSUGS 'GRE, ,ZHES GSUNGS SO, ,PHYIN CI MA LOG PA'I GO BA SKYE TSUL NI, BYANG CHUB SEMS 'GREL LAS, CHOS RNAMS STONG PA 'DI SHES NAS, ,LAS DANG 'BRAS BU STON PA GANG, 'DI NI NGO MTSAR PAS NGO MTSAR, ,RMAD BYUNG BAS KYANG RMAD DU BYUNG, ,ZHES DANG, BSNGAGS PAR 'OS PA BSNGAGS PA'I BSTOD PA LAS, CHOS NYID 'DOR BAR MI MDZAD LA, ,KUN RDZOB DANG YANG RJES SU MTHUN, ,ZHES @167A *, ,GSUNGS PA LTAR BDEN 'DZIN GYI DMIGS PA JI 'DRA ZHIG LA BZUNG YANG, ZHEN PA RDUL TZAM YANG MED PAR MTHONG BA DANG, DE NYID KYIS RKYEN BYAS NAS, BCINGS GROL DANG LAS 'BRAS LA SOGS PA THAMS CAD LA 'DI LAS 'DI 'BYUNG GI NGES PA GTING NAS RNYED PA GNYIS LA, DANG PO RANG GI 'THAD PHYOGS SU BYAS PA NA, PHYI MA RANG LUGS LA MI BDE BAR GZHAN NGO 'AM, 'KHRUL NGOR BSKYAL MI DGOS PAR RANG GI LUGS LA GNYIS KA 'THAD PA DE MTHONG BA CIG BYUNG NA NGO MTSAR BA DANG RMAD DU BYUNG BA YIN TE, SKYE BO PHAL MO CHE LA 'GAL BAR SNANG BA MA 'GAL BAR KHONG DU CHUD PA'I THABS MKHAS THOB PA'I PHYIR RO, ,DES NA STONG PA RTOGS PAS 'KHOR 'DAS KYI RNAM GZHAG 'THAD PAR 'GRO DGOS KYI, DE MA RTOGS BAR DU 'THAD PA LA, ,RTOGS NAS RNAM GZHAG RNAMS BYAS MED PAR SONG NA, DNGOS POR SMRA BA'I GO LUGS DANG KHYAD PAR MED PAS, STONG PA YE MA RTOGS PAR RIG PAR BYA STE, DBU MA'I RTZA BA LAS GAL TE 'DI DAG KUN STONG NA, ,'BYUNG BA MED CING 'JIG PA MED, ,'PHAGS PA'I BDEN PA BZHI PO RNAMS, ,KHYOD LA MED PAR THAL BAR 'GYUR, ,ZHES THAMS CAD RANG BZHIN GYIS STONG NA 'KHOR 'DAS KYI RNAM BZHAG MI RUNG BAR BRTZOD PA'I LAN DU, GAL TE 'DI KUN MI STONG NA, ,'BYUNG BA MED CING 'JIG PA MED, ,'PHAGS PA'I BDEN PA BZHI PO RNAMS, ,KHYOD LA MED PAR THAL BAR 'GYUR, ,ZHES SOGS KYIS MI STONG BA'I PHYOGS LA DE DAG MI RUNG GI, STONG PA'I LUGS LA SHIN TU 'THAD PAR GSUNGS PA DANG, YANG DE NYID LAS, GANG @167B LA STONG PA NYID RUNG BA, ,DE LA THAMS CAD RUNG BAR 'GYUR, ,GANG LA STONG NYID MI RUNG BA, DE LA THAMS CAD RUNG MI 'GYUR, ,ZHES RJES SU 'GRO LDOG GI SGO NAS GSAL BAR GSUNGS SO, ,DE'I PHYIR DNGOS PO RNAMS LA YUL DANG DUS CHAS GSIL NA GANG DU'ANG GZUNGS MI 'DUG SNYAM PA'I GO BA SKYES PA TZAM LA STONG PA NYID KYI LTA BA RNYED PAR 'JOG NA, SBYANG PA TZAM MA BYAS PA'I DBANG PO SHIN TU BRTUL BAS KYANG RTOGS PAR NUS PAS DKA' BA'I DON MED KYANG, DE TZAM GYIS MI CHOG GI ,DON DAM PAR DMIGS GTAD THAMS CAD NYE BAR ZHI BA DANG, KUN RDZOB SGYU MA LTA BU LA 'KHOR 'DAS KYI RNAM GZHAG THAMS CAD KHAS BLANGS PAS CHOG PA'I GNYIS TSOGS DE DKA' BAS STONG PA NYID RTOGS PAR DKA' BA YIN LA, DE GNYIS KA DGOS PAS BDEN PA GNYIS KYI RNAm DBYE MA SHES NA, BSTAN PA'I DE NYID MI SHES PA DANG, SHES PA NI RGYAL BA'I DGONGS PA LA MI RMONGS PA DANG, DON DAM PA DANG KUN RDZOB LA BRTEN PA'I TSOGS GNYIS BSAGS NAS RAB KYI MTHAR PHYIN PAR 'GRO BAR GSUNGS TE, RTZA BA LAS, GANG DAG BDEN PA RNAM GNYIS KYI, ,RNAM DBYE RNAM PAR MI SHES PA, ,DE DAG SANGS RGYAS BSTAN PA NI, ,ZAB ME'I DE NYID RNAM MI SHES, ZHES DANG, BDEN GNYIS LAS, BDEN GNYIS RNAM DBYE SHES PA DAG ,THUB PA'I BKA' LA MI RMONGS TE, ,DE DAG MA LUS TSOGS BSAGS NAS, ,PHUN TSOGS PHA ROL 'GRO BAR 'GYUR, ,ZHES GSUNGS SO, ,'DI NA BCOM LDAN 'DAS BZHUGS PA'I DUS KYI 'KHOR NA'ANG RTOGS DKA' BAR GSUNGS TE, YON TAN RIN PO CHE SDUD PA LAS, 'DREN PA RNAMS KYI CHOS 'DI ZAB STE MTHONG BAR DKA', ,SUS KYANG RTOGS PA MED CING THOB @168A *, ,PAR 'GYUR MED PA, ,DE PHYIR PHAN MDZAD BRTZE LDAN BYANG CHUB BRNYES NAS NI, ,SEMS CAN TSOGS SUS SHES SNYAM THUGS KHREL CHUNG BAR MDZAD, ,CES GSUNGS SHING STONG PA NYID LA SEMS BDE BLAG TU 'JUG PAR MI NUS PA DPE DANG BCAS PA DANG, MDO DE'I DON YANG RIN PO CHE'I PHRENG BA LAS, RE ZHIG LUS NI MI GTZANG NYID, ,RAGS SHING MNGON SUM SPYOD YUL BA, ,RTAG TU SNANG BA'ANG GANG GI CHE, ,SEMS LA GNAS PA MA YIN PA, ,DE TSE DAM CHOS GNAS MED PA, ,PHRA RAB MNGON SUM MA YIN PA, ZAB MO DE KO JI LTA BUR, ,SEMS LA BDE BLAG 'JUG PAR 'GYUR, ,CHOS 'DI ZAB PHYIR SKYE BO YIS, ,SHES PAR DKA' PAR THUGS CHUD DE, ,DES NA THUB PA SANGS RGYAS NAS, ,CHOS BSTAN PA LAS LOG PAR GYUR, ,ZHES GSUNGS SO; ;DES NA SPYIR 'DI STON PA DANG, NYAN PA DANG, KHYAD PAR DU 'DI'I TING NGE 'DZIN RGYUD LA SKYED PA'I STON PA PO DANG, NYAN PA PO NI CHES SHIN TU RNYED PAR DKA' BAS NA GANG BYUNG BYUNG LA BYAS PAS MI 'ONG NGAM SNYAM, DE LTAR DRI MA MED PA'I THOS BSAM GYIS, STONG PA NYID KYI LTA BA RNAM DAG RNYED PA NI, STONG PA NYID KYI TING NGE 'DZIN RNAM PAR DAG PA SKYED PA LA MED MI RUNG DU DGOS TE, GZHAN DU NA DNGOS PO'I DE KHO NA NYID KHONG DU MA CHUD NA CI LA DMIGS NAS SKYE, DE TZAM DU MA ZAD SGRUB TSUL PHYIN CI MA LOG PAS BSGRUBS PA'I ZHI GNAS DNGOS SAM, YANG NA SNGAR BSHAD PA LTA BU'I MTSAN NYID BZHI LDAN GYI TING NGE 'DZIN ZHI GNAS DANG RJES SU MTHUN PA CIG NGES PAR BTZAL DGOS SO, ,DE GNYIS TSOGS SU TSUD PA DANG, SPROS PA DANG BRAL BA'I DON LA RTZE GCIG @168B TU GNAS PA'I ZHI LHA GZUNG 'BREL GYI TING NGE 'DZIN BSGRUB PAR BYA STE, SNGAR BSHAD PA'I LTA BA MED NA RTZE GCIG TU GNAS PA BYUNG YANG SPROS PA DANG BRAL BA'I DON LA GNAS PA MIN PAS ZHI GNAS SU ZAD KYI LHAG MTHONG GI DON MED DO, ,DE BZHIN DU PHYIN CI MA LOG PA'I LTA BA'I GO BA RNYED KYANG ZHI GNAS BRTAN PO MED NA SEMS DMIGS PA LA HA CANG G-YO BAS SO SOR RTOG PAS JI TZAM DPYAD KYANG ZHI LHAG ZUNG DU MI 'BREL BAS GNYIS KA DGOS PAR GZHUNG TSAD LDAN PHAL CHE BA NAS GSUNGS PA'I DON DE LTAR LAGS, PHYIN CI LOG GI GOL SA BCAD NAS PHYIN CI MA LOG PA'I LTA BA SKYED PA'I LUGS LA MDO TZAM BKOD NA 'DOD PA MI RDZOGS PAR SNANG ZHING, RGYAS PAR BYAS NA TSIG GI KHUR HA CANG YANG CHES NAS 'GRO BAR SNANG BAS DA RES LA YI GER MA BKOD, SPYIR 'DI LTA BU'I LAM GYI RNAM PAR BZHAG PA BYAS KYANG PHAN THOGS PA'I RIGS SU MI SNANG BAS GYIS ZER BAS SKUL MKHAN CHE CHUNG CI RIGS SU BYUNG YANG SNGAR MA BYAS, DAM PA KHYED GZHAN DANG MI 'DRA ZHING, GSUNG SHOG BKA' NAN CHER GNANG BA DANG, GSUNG 'PHRIN LA'ANG NAN CHE BA'I RGYU MTSAN GZHAN YANG SNANG BAS LUNG DANG SBYOR BA DANG, RIGS PAS MTHA' GCOD PA'I SPROS PA RNAMS DER NAS MDO TZAM PHUL BA LAGS PAS, YANG DANG YANG DU DPYAD DE RIGS PA LTA NA THUGS NYAMS SU BZHES PA ZHU, DPAG MED DKA' BAS 'PHAGS PA'I YUL BGROD CING, , MKHAS PA'I BSHES GNYEN DU MA BSNYEN PA YIS, RGYAL BA'I BSTAN PA YONGS SU RDZOGS PA'I GNAD, ,JI BZHIN RNYED NAS MI SHES MUN GLING 'DI, ,GANG GI RMAD BYUNG MDZAD PAS GSAL MDZAD PA, ,SGRA SGYUR DBANG PO BLO LDAN SHES RAB CES, ,LHAR BCAS 'GRO @169A *, ,NA SNYAN PA'I BA DAN G-YO, ,BDAG PAS GZHAN LA BRTZE BA'I THUGS MNGA' BA, ,'JIG RTEN MIG DE'I RGYAL TSAB GO 'PHANG BRNYES, ,SDOM BRTZON MKHAS PA BLO GROS RGYA CHE BA, ,DKON MCHOG LA GUS TSUL KHRIMS BZANG PO CAN, ,DE YI DGONGS PA YONGS SU BSKANG BA'I PHYIR, ,DRI MED GZHUNG LUGS MANG DU THOS PA'I DON, ,TSUL BZHIN SGRUB PA'I MKHAS PA'I RJES 'JUG PA, ,BAS MTHA'I GNAS LA DGA' BA'I SPONG BA PA, ,BLO BZANG GRAGS PAS TSUL 'DIR NGAL BA BYAS, ,DE LAS THOB PA'I DGE BA'I MTHU BZANG GIS, ,SA GSUM BLA MAS LEGS PAR BSHAD PA'I GZHUNG, ,'GRO BA KUN GYIS JI BZHIN RTOGS GYUR TE, ,TSUL BZHIN SGRUB PA'I DGA' STON RGYAS GYUR CIG ,PANG NAS SKYES DANG NYE RGYAL JI BZHIN DU, ,DGE ZHING DES PA'I THUGS MNGA' KHYED DANG BDAG ,SU YIS THOG MAR BDUD RTZI THOB PA DES, ,CIG SHOS LA NI BGO BSHA' BGYID PAR SMON, ,AE MA HO DAL THOB SKAL PA BZANG, ,RGYAL BA'I BSTAN DANG MJAL BA LEGS, ,DA NI DON CHEN 'GRUB PA'I LUS, ,NYIN MTSAN DON YOD BYA BA'I RIGS, ,NYI TSE BA LA NYI TSE DANG, ,MTHA' DAG PA LA MTHA' DAG PA'I, ,'BRAS BU 'GRUB PAR GSUNGS PA'I PHYIR, ,SHES LDAN SU ZHIG PHYOGS RES TSIM, ,MI RTAG SRIN POS MA ZOS PA'I, ,SEMS CAN DE NI 'GA' MA BYUNG, ,DA DUNG DE BZHIN KHO NAR BAS, ,SEMS KHYOD DAL BAR JI LTAR SDOD, ,DE PHYIR 'BAD KYANG 'DOR DGOS PA'I, ,SNYING PO MED PA'I BYA BA THONG, ,GANG DU PHYIN KYANG RJES 'BRANG BA'I, ,LAS GNYIS LA NI RTAG TU SOMS, DE LTAR BSAMS NAS NGO TSA KHREL YOD DANG, ,DRAN DANG SHES BZHIN BAG YOD BRTAN PA YIS, ,GDUL BAR DKA' BA'I SEMS NI LEGS BTUL NAS, , @169B 'CHI TSE YID LA DGA' BA RGYAS PAR BYOS, ,BDE LEGS GZHIR GYUR BSTAN PA GNAS PAR SHOG ,DAM CHOS SPYOD LA 'TSE BA MED PAR SHOG ,'GRO BA'I RE BA CHOS BZHIN 'GRUB PAR SHOG ,PHAN TSUN BYAMS PA'I YID DANG MI 'BRAL SHOG ,CES LAM GYI RIM PA MDO TZAM DU BSTAN PA 'DI NI, MANG DU THOS PA'I DON TSUL BZHIN DU BSGRUB PA'I SPONG BA PA CHEN PO BSTAN PA RIN PO CHE'I RTZA LAG DAM PA 'GRO BA DU MA'I 'DREN PAR GYUR PA, DKON MCHOG TSUL KHRIMS KYI ZHAL SNGA NAS BKA' STZAL SPRINGS PA'I LAN DU, ,SH'AKYA'I DGE SLONG BLO BZANG GRAGS PA'I DPAL GYIS AE'I SA PHYOGS TE'UR DGON PAR SBYAR BA'O,,