@001A *, ,DBU MA'I RTZA BA'I DKA' GNAS CHEN PO BRGYAD KYI BRJED BYANG BZHUGS SO, , @001B #, ,RJE BTZUN DAM PA RNAMS LA PHYAG 'TSAL LO, ,SLOB DPON 'PHAGS PA KLU SGRUB KYIS MDZAD PA'I RTZA BSHES RAB LA 'GREL PA GRAGS CHE BA BRGYAD DU YOD CING, DE'I NANG NAS KYANG DGONGS PA PHYIN CI MA LOG PAR 'GREL PA NI SLOB DPON SANGS RGYAS BSKYANGS DANG, SLOB DPON ZLA BA GRAGS PA GNYIS KYIS MDZAD PA 'DI GNYIS YIN LA, DE LA YANG 'GREL BYED GZHAN DANG MI MTHUN PA'I KHYAD PAR PHRA MO MTHA' YAS KYANG GNAD DU CHE BA BRGYAD YIN GSUNG STE, GZHI'I SKABS SU THA SNYAD DU YANG KUN GZHI DANG RANG MTSAN KHAS MI LEN CING, PHYI DON KHAS LEN PA DANG, LAM GYI SKABS SU, DE KHO NA NYID RTOGS PA'I THABS SU RANG RGYUD DANG RANG RIG KHAS MI LEN CING, SGRIB GNYIS KYI 'JOG TSUL DANG, NYAN RANG LA CHOS RANG BZHIN MED PAR RTOGS PA KHAS LEN PA'I TSUL DANG, 'BRAS BU'I SKABS SU SANGS RGYAS KYIS JI SNYED PA MKHYEN PA'I TSUL TE, KHAS LEN PA'I DAM BCA' BZHI DANG, MI LEN PA'I PHYOGS BZHI'O, ,DE LA DANG PO KUN GZHI KHAS MI LEN PA LA, RTZOD PA DANG, LAN NO, ,DANG PO NI, KHA CIG NA RE, DGE MI DGE'I LAS 'BRAS BU SMIN PA'I BAR DU GNAS NA RTAG PAR 'GYUR BAS RTAG PA'I MTHAR LTUNG BAR 'GYUR LA, LAS BYAS PA'I SKAD CIG GNYIS PAR ZHIG NA, ZHIG PA DNGOS POR MI RUNG BAS LAS KYIS RNAM SMIN SKYED PA MI SRID PAS LAS BYAS PA CHUD ZOS PAR 'GYUR RO ZHES ZER TO, ,LAN NI, KHA CIG ,LAS ZHIG KYANG LAS KYI NUS PA RIM @002A *, ,CAN DU 'JUG PA'I GZHI KUN GZHI RTOG PAR BYED LA, GZHAN DAG YID KYI RNAM PAR SHES PA'I RGYUN KHAS LEN PAR BYED CING, KHA CIG ,LAS ZHIG KYANG LAS KYI THOB PA YOD PAR 'DOD PA DANG, LA LA BU LON GYI DBANG RGYA DANG 'DRA BAR CHUD MI ZA BA ZHES PA'I CHOS GZHAN ZHIG YOD PAS RTZOD PA DE'I LAN 'DEBS PAR BYED DO, ,RANG LAN NI, KUN GZHI SOGS BZHI PO KHAS MA BLANGS KYANG LAS BYAS PA CHUD ZOS PAR MI 'GYUR BAR THAL, DE KHAS MA BLANGS KYANG LAS ZHIG PAS 'BRAS BU SKYED PA MI 'GAL BA'I PHYIR, MA GRUB STE, ZHIG PA DNGOS POR MI RUNG BAS SO ZHE NA MA GRUB STE, RANG MTSAN KHAS BLANGS NA ZHIG PA DNGOS POR MI RUNG YANG, KHO BO CAG RANG MTSAN THA SNYAD DU YANG KHAS MI LEN PAS ZHIG PA DANG MA ZHIG PA'I LAM GNYIS DNGOS PO YIN MIN MTSUNGS PA'I PHYIR RO, ,DE YANG RANG MTSAN KHAS LEN PA RNAMS ZHIG PA DNGOS POR 'DOD PA SU YANG MED DE, DE'I RGYU MTSAN DNGOS PO NI CHOS GZHAN LOG PA LA MI LTOS PAR RANG DBANG DU BLO'I YUL DU 'CHAR DU RUNG BA ZHIG LA 'DOD LA, LAS ZHIG PA NI DANG POR ZHIG RGYU'I LAS BLO YUL DU SHAR NAS DE LOG PA TZAM MA GTOGS RANG DBANG DU 'TSAR BA CUNG ZAD KYANG MED PAR 'DOD PA'I PHYIR RO, ,RANG MTSAN KHAS MI LEN PA RNAMS LA ZHIG PA DNGOS POR SGRUB PA SHIN TU SLA STE, LAS ZHIG PA DANG MA ZHIG PA'I LAS GNYIS DNGOS PO YIN MIN MTSUNGS PAR THAL, YUL RANG @002B NGOS NAS GRUB PA'I RGYU 'BRAS KYI RJES SU 'GRO LDOG MA ZHIG PA'I LAS LA YANG MED LA, THA SNYAD KYI DBANG GIS BZHAG PA TZAM GYI RJES SU 'GRO LDOG ZHIG PA LA YANG YOD PA'I PHYIR, MA GRUB STE, ZHIG PA NI DNGOS PO LOG PA TZAM YIN PAS RGYUS BYANG CUNG ZAD KYANG BYED MI NUS PA'I PHYIR RO ZHE NA, 'O NA LAS KYANG RGYU MED PAR 'GYUR TE, GRUB ZIN PAS BYA BA CUNG ZAD KYANG BYED MI DGOS PA'I PHYIR, GZHAN YANG ZHIG PA GRUB ZIN NAS ZHIG RGYUS KHYAD PAR GZHAN ZHIG BYED PAR KHAS LEN PA MIN GYI ,ZHIG PAR BYED PA TZAM YIN NO, ,LAS DE RANG GI RGYU'I DUS NA MED CING, DE'I RJES SU 'BYUNG BAS RJES SU 'GRO LDOG MTHONG BA BZHIN DU, LAS ZHIG PA YANG LAS KYI DUS NA MED KYANG DE'I RJES SU 'BYUNG BAS LAS LA SNGA PHYI'I RJES SU 'GRO LDOG GRUB PA YIN NO, ,GZHAN YANG ZHIG PA DNGOS POR MI 'DOD NA, SKYE BA'I RKYEN GYIS RGA SHI ZHES PA'I LUNG DANG YANG 'GAL TE, SKYE BA SHI BA'I RKYEN DU GSUNGS PA'I PHYIR, ZHIG PA 'DU BYED KYI PHUNG PO'I NANG DU BSDUS NAS GSUNGS PA YANG MI 'THAD PAR 'GYUR RO, ,DES NA LAS LA SKYE BA RANG BZHIN GYIS MA GRUB PA'I PHYIR ZHIG PA RANG BZHIN GYIS MED LA, DE LTA NA MING TZAM GYIS BZHAG PA'I ZHIG MA ZHIG DNGOS POR MTSUNGS PAS KUN GZHI SOGS KHAS MA BLANGS KYANG ZHIG PAS 'BRAS BU SKYED PA'I PHYIR LAS BYAS PA CHUD ZOS PAR MI 'GYUR RO SNYAM DU DGONGS NAS SLOB DPON GYIS, GANG PHYIR LAS NI SKYE BA MED, ,'DI LTAR RANG BZHIN MED DE'I PHYIR, ,GANG PHYIR LAS NI MA SKYES PA, ,DE PHYIR CHUD ZAR MI 'GYUR RO, ,ZHES GSUNGS SO, ,'O NA BUM PA MED PA SOGS KYANG DNGOS POR 'GYUR RO ZHE NA, DE NI BUM PA DMIGS BYED KYI @003A *, ,TSAD MA LOG PA TZAM GYIS BZHAG LA, DE GNYIS SNGA PHYI'I RIM PA YANG MA GRUB PA'I PHYIR MI MTSUNGS SO, ,ZHIG PAS 'BRAS BU SKYOD NA KUN GZHI SOGS KHAS LEN PA DON MED PAR RANG BZHAN KUN MTHUN NO, ,GNYIS PA THA SNYAD DU YANG RANG MTSAN KHAS MI LEN PA'I RGYU MTSAN NI, SPYIR RANG MTSAN DON DAM DU GRUB PAR 'DOD NA DNGOS SMRA BAR 'GYUR LA, DON DAM DU MA GRUB KYANG THA SNYAD DU GRUB PAR 'DOD PA DBU MA RANG RGYUD PA DANG, THA SNYAD DU YANG MA GRUB PA SLOB DPON GNYIS KYIS BZHED PA'O, ,DE LA RANG MTSAN DON DAM DU GRUB PA BKAG NAS THA SNYAD DU GRUB PAR 'DOD NA 'PHAGS PA'I YE SHES DNGOS PO'I 'JIG BYED DU THAL BA DANG, STONG NYID DON GZHAN DANG LDAN PAS STONG PAR 'GYUR GYI RANG STONG MA YIN PAR 'GYUR BA'O, ,DE LA DNGOS PO RANG GI NGO BOS GRUB NA DE KHO NA NYID DU GRUB PAR 'GYUR BAS 'PHAGS PA'I MNYAM GZHAG GIS DMIGS RUNG DU 'GYUR RO, ,DE LTA NA STONG NYID MNGON SUM DU RTOGS PA'I TSE DNGOS PO MED PAR RTOGS PAR 'GYUR TE, DNGOS PO YOD NA 'PHAGS PA'I MNYAM GZHAG YE SHES KYIS DMIGS SU RUNG BA LAS MA DMIGS PA'I PHYIR, DES NA DNGOS PO SNGAR YOD LA, STONG NYID MNGON DU GYUR PA'I TSE MED PAR RTOGS PAS BUM PA THOBS? BSHIG PA LTAR YE SHES DE NYID DNGOS PO'I 'JIG BYED DU 'GYUR RO, ,GZHAN YANG SEMS TZAM PA RNAMS KYIS GNYIS MED KYI SHES PA BDEN PAR KHAS BLANGS NAS DE LA PHYI DON BKAG PA'I SGO NAS STONG PA DANG LDAN PAR 'DOD PA LTAR, DNGOS PO RNAMS GZHAN STONG DU 'GYUR GYI RANG STONG MA YIN PAR 'GYUR TE, DON DAM DU GRUB PA'I RANG BZHIN KHEGS KYANG RANG GI NGO BOS @003B GRUB PA MI KHEGS PA'I PHYIR RO, ,DE LTA NA MDO LAS, STONG PA NYID KYIS CHOS RNAMS STONG PAR MI BYED DE CHOS RNAMS NYID STONG PA NYID DANG ZHES SOGS KYI DON LOG PAR BSHAD PAR 'GYUR RO, ,DES NA RTEN 'BYUNG GI CHOS RNAMS MING TZAM BRDA TZAM GYI SGO NAS BYA BA BYED PA YIN LA, DE LA YANG RANG BZHIN KHEGS DGOS SHING GANG DU BYA BA BYED PA DER RANG BZHIN KHEGS PA DGOS PAS THA SNYAD DU YANG RANG BZHIN KHEGS PA YIN NO, ,DE LTA NA YANG DAG PA DANG LOG PA'I KUN RDZOB KYI RNAM DBYE MI RUNG BAR 'GYUR RO ZHE NA, SNANG TSUL LTAR DON BYED NUS MI NUS LA YANG LOG GI RNAM DBYE MI RUNG BA 'DOD PA YIN TE, 'JIG RTEN PA'I SHES PA LA SNANG BA LA SNANG BA LTAR MA GRUB PAS KHYAB PA'I PHYIR, DE LTA NA YANG THA SNYAD PA'I SHES PA NYID LA LTOS NAS YANG DAG KUN RDZOB DANG LOG PA'I KUN RDZOB KYI RNAM DBYE 'THAD DO, ,DE LA SNGON PO MTSAN GZHI, YANG DAG KUN RDZOB TU MTSON, KUN RDZOB BDEN PA GANG ZHIG DE KHO NA NYID MA RTOGS PAR, SNANG BA LTAR DU MA GRUB PAR RTOGS MI NUS PA, GZUGS BRNYAN MTSAN GZHI, LOG PA'I KUN RDZOB TU MTSON, , KUN RDZOB BDEN PA GANG ZHIG ,DE KHO NA NYID RTOGS PA LA MA LTOS PAR SNANG BA LTAR DU MA GRUB PAR RTOGS NUS PA, YUL BZHIN DU YUL CAN LA YANG YANG LOG GI RNAM DBYE 'THAD LA, RANG RGYUD PA RNAMS NI YUL CAN LA YANG LOG GI RNAM DBYE MI BYED DE, RANG SNANG MKHAN GYI RANG RIG MNGON SUM SNANG YUL LA 'KHRUL BA MI SRID PAS SNANG TSUL LTAR DON BYED NUS MI NUS KYI RNAM DBYE MI SRID PAR 'DOD PA'I PHYIR RO, ,THA SNYAD DU YANG RANG BZHIN MED NA KUN RDZOB KYI BDEN PA MI SRID PAS BDEN PA GNYIS SU BZHAG TU MED PAR 'GYUR RO ZHE NA, THA @004A *, ,SNYAD KYI BSAM PA'I NGOR BDEN PA THA SNYAD KYI BDEN PA YIN GYI, THA SNYAD DU BDEN PA MI SRID PAS NYES PA MED DO, ,DE LA BDEN PA GNYIS KYI MTSAN GZHI DANG, MTSAN NYID DANG, MTSAN GZHI LA MTSAN NYID NGES BYED KYI TSAD MA DANG, 'PHAGS PA'I MNYAM GZHAG GIS DE KHO NA NYID GZIGS PA'I TSUL LO, ,DANG PO NI, DNGOS KUN YANG DAG RDZUN PA MTHONG BA YIS, ,DNGOS SNYED NGO BO GNYIS NI 'DZIN PAR 'GYUR, ,ZHES GSUNGS PA LTAR PHYI NANG GI DNGOS PO 'DI RNAMS BYIS PA RNAMS KYIS KYANG RTOGS PAR NUS PA'I THA SNYAD PA'I SHES PAS RNYED PA DANG, GANG ZHIG LTA BA'I PHYIR TU 'PHAGS PA'I LAM SGOM PA 'BRAS BU DANG BCAS PAR 'GYUR BA DON DAM DPYOD PA'I TSAD MAS RNYED PA'I DON GNYIS GNAS TE, DE LA BYIS PA RNAMS LA BDEN PAR GRAGS PA'I SNGON PO LA SOGS PA KUN RDZOB KYI BDEN PA YIN LA, SNGON PO RANG BZHIN MED PA NI DON DAM PA'I BDEN PA YIN NO, ,GANG ZHIG SNGON PO LA SOGS PA BYIS PA RNAMS KYI NGOR KUN RDZOB KYI BDEN PA YIN NO ZHES ZER BA DE DAG GIS LOG PAR SMRAS PA YIN TE, SNGON PO KUN RDZOB KYI BDEN PAR RTOGS PA LA DE'I SNGON DU BDEN 'DZIN GYI SGRO 'DOGS CHOD PA 'GRO DGOS PA'I PHYIR RO, ,GNYIS PA LA, KHA CIG ,KUN RDZOB BDEN PA'I MTSAN NYID RTEN 'BREL SNA TSOGS SU SNANG BA DANG, DON DAM BDEN PA'I MTSAN NYID RANG BZHIN SPROS BRAL GANG ZHIG ,YONGS GCOD DU SHES RJOD KYI GZHAL BYA LAS 'DAS PA ZHES ZER TO, ,DE LTA NA LTA BA MA GO BA'I BYIS PA RNAMS KYIS KYANG KUN RDZOB BDEN PA'I DON MNGON SUM GYIS RTOGS PAR 'GYUR BAS BDEN 'DZIN GYI SGRO 'DOGS MNGON SUM TSAD MA'I STOBS KYIS CHOD PAR 'GYUR RO, ,DE LTA NA GANG ZAG DE 'PHAGS @004B PAR THAL LO, ,RNAM PA CAD TZAM DU GRUB PA'I DGAG PA YANG DON DAM BDEN PAR 'GYUR TE, RANG BZHIN GYI SPROS PA DANG BRAL BA GANG ZHIG ,YONGS GCOD DU SHES RJOD KYI GZHAL BYA LAS 'DAS PA'I PHYIR TE, YONGS GCOD DU MA GRUB PA'I PHYIR, RTAGS SNGA MA GRUB STE, RANG BZHIN GYI SPROS BRAL MIN NA BDEN PAR GRUB PAR 'GYUR RO, ,DES NA THA SNYAD PA'I TSAD MAS DNGOS SU RNYED PA KUN RDZOB KYI BDEN PA'I DON DANG, MTHAR THUG DPYOD PA'I RIGS SHES KYIS DNGOS SU RNYED PA DON DAM BDEN PA'I DON TO, ,GSUM PA LA, DON DAM BDEN PA'I MTSAN NYID NGES BYED DANG, KUN RDZOB BDEN PA'I MTSAN NYID NGES BYED DANG, KUN RDZOB BDEN PA DANG KUN RDZOB TZAM DU DBYE BA'I TSUL LO, ,DANG PO NI, MYU GU RANG BZHIN MED PA RIGS SHES KYIS DNGOS SU RTOGS PA NA DE RIGS SHES KYIS RTOGS PA'I LDOG PA DE NYID SHUGS LA RTOGS PA YIN TE, MYU GU RANG BZHIN MED PA LA BLO KHA PHYOGS, DE DNGOS SU MA RNYED PA'I SGRO 'DOGS RIGS SHES KYIS CHOD PA'I PHYIR, MTSAN GZHI NGES BYED KYI TSAD MA NYID KYIS MTSAN NYID KYANG SHUGS LA RTOGS PA YIN NO, ,GNYIS PA NI, SNGON PO DE THA SNYAD PA'I SHES PA 'KHRUL PA TZAM GYIS RNYED PAR GRUB PA LA SNGON PO 'JAL BA'I TSAD MA 'KHRUL SHES SU GRUB DGOS LA, DE YANG SNGO 'DZIN LA SNANG BA LTAR GYI RANG MTSAN MA GRUB PAR RIGS SHES KYIS RTOGS PA LA LTOS PAS MTHAR THUG DPYOD PA'I RIGS SHES DANG, SNGON PO 'JAL BA'I THA SNYAD PA'AM SHES PA GNYIS LA LTOS NAS MTSAN NYID NGES PAR BYED PA YIN NO, ,GSUM PA NI, KHA CIG ,SNGON PO SOGS BYIS PA'I NGOR KUN RDZOB KYI BDEN PA YIN LA, 'PHAGS PA 'OG MA GSUM GYI RJES THOB KYI NGOR KUN RDZOB TZAM YIN GYI KUN RDZOB KYI BDEN PA YIN NO @005A *, ,ZHES ZER TO, ,DE LTA NA NI 'PHAGS PA RNAMS KYIS BDEN GNYIS KYI RNAM DBYE PHYIN CI MA LOG PAR 'CHAD MI NUS PAR 'GYUR TE, RANG NYID KYI BLO'I NGOR KUN RDZOB KYI BDEN PA MI SRID PA'I PHYIR RO, ,DE NA KUN RDZOB TZAM ZHES PA NYAN RANG DGRA BCOM PA DANG DBANG THOB PA'I BYANG CHUB SEMS DPA' RNAMS KYI RJES THOB KYI NGOR BZHAG PA YIN LA, DE'I DON DE YANG DAG GI RGYUD LA GZUGS SGRA SOGS BDEN PAR 'JOG PA'I BLO KUN RDZOB PA MED PAR STON PA YIN GYI, DE DAG GI BLO KUN RDZOB PA'I NGOR GZUGS SGRA SOGS BDEN PAR MA GRUB PAR STON PA MIN NO, ,NYAN RANG 'PHAGS PA SLOB PA DANG SA BDUN PA MAN CHAD KYI 'PHAGS PA RNAMS KYI RGYUD LA BDEN PA 'JOG PAR BYED PA'I BLO KUN RDZOB PA YOD DE, NYON SGRIB MNGON GYUR PA YOD PA'I PHYIR, DES NA DE DAG GI RJES THOB KYI NGOR GZUGS SGRA SOGS LA KUN RDZOB TZAM ZHES MI BYA'O, ,DES NA GANG ZAG DE'I RGYUD KYI BLO KUN RDZOB PA'I NGOR GZUGS SGRA SOGS BDEN PAR MA GRUB PA DANG, DE'I BLO KUN RDZOB PA'I NGOR GZUGS SGRA SOGS KUN RDZOB BDEN PAR MA GRUB PA GNYIS GCIG TU 'KHRUL NAS SO SOR MA PHYED PA YIN, BZHI PA NI, MDO LAS, 'GA' YANG MTHONG BA MED PA NI MTHONG BA DAM PA'O ZHES GSUNGS PA LTAR TE, DPER NA THOGS BCAS KYI GZUGS YOD NA DMIGS RUNG MA DMIGS PA LA NAM MKHA' MTHONG ZHES PA LTAR, 'PHAGS PA'I MNYAM GZHAG GIS BDEN MED RTOGS PA YIN TE, BDEN PA YOD NA DMIGS SU RUNG BA LAS MA DMIGS PA'I PHYIR, SNANG BA'I SPROS PA YANG MA LUS PAR LDOG PA DGOS PA YIN TE, SGRIB PA ZAD PAR MA SPANGS PA RNAMS LA KUN RDZOB SNANG NA BDEN PA SNANG DGOS PAS 'KHRUL SHES PA @005B 'GYUR BA'I PHYIR RO, ,KUN RDZOB PA RNAMS RANG GI DE KHO NA NYID MNGON SUM DU GZIGS PA'I NGOR MED DE, ,DE'I NGOR YOD NA RANG GI DE KHO NA NYID DU GRUB DGOS PA LAS RANG GI DE KHO NA NYID DU MA GRUB PA'I PHYIR, GSUM PA THA SNYAD DU PHYI ROL GYI DON KHAS LEN PA NI RNAL 'BYOR SPYOD PA BA RNAMS KYIS PHYI ROL GYI DON MED PA'I SEMS TZAM ZHIG DE KHO NA NYID DU GRUB PA YIN NO ZHES ZER TO, ,DE'I DPE JI LTAR YIN DRIS PAS RMI LAM GYI GNAS SKABS BZHIN NO ZHE NA, MI 'THAD DE, RMI LAM NA PHYI DON BDEN PA BA MED PA BZHIN DU SEMS KYANG BDEN PA BA YOD PA MA GRUB, SAD PA'I DUS SU SHES PA DRAN PA'I RTAGS LAS MYONG BA YOD PAR DPOG NA RMI LAM NA YANG DON YOD PAR 'GYUR TE, SAD DUS SU DRAN PA YOD PA'I PHYIR, GNYID KYI RKYEN GYIS DON SNANG GI SHES PA'I BAG CHAGS SMIN PA LAS RMI LAM GYI SHES PA SKYES PA MAN GYI, DON GYI DBANG GIS MA YIN NO ZHE NA, LONG BA LA YANG GNYID SAD PA'I TSE SNGO SOGS GSAL BAR SNANG BA'I SHES PA CI'I PHYIR MI SKYE ZHES DRIS PAS RKYEN MIG MED PA'I PHYIR RO ZHE NA, 'O NA LONG BA LA SAD PA'I DUS SU SNGO SOGS GSAL BAR SNANG BA'I SHES PA MI SKYE BA BZHIN DU RMI LAM GYI DUS SU'ANG MI SKYE BAR 'GYUR TE, GNYIS KA MIG MED PAR MTSUNGS PA'I PHYIR, RTAGS KHAS, DES NA SAD PA'I DUS SU YANG MIG DANG GZUGS DANG DER SNANG GI SHES PA RDZUN PA SKYE BA BZHIN DU RMI LAM GYI GNAS SKABS SU'ANG GSUM PO DE YOD PA YIN LA, DE KHO NA NYID MNGON DU GYUR PA'I NGOR GSUM PO MED PA BZHIN DU SAD PA'I DUS SU'ANG RMI LAM GYI GSUM PO MED PA YIN NO, ,RMI LAM GYI DUS SU MIG GZUGS SOGS YOD NA SAD PA'I DUS SU'ANG MTHONG BAR 'GYUR RO ZHE NA, DE LTA NA SAD @006A *, ,PA'I DUS NA'ANG MED PAR THAL, DE KHO NA NYID MNGON DU GYUR PA'I NGOR MED PA'I PHYIR, DER MED KYANG SAD DUS KYI SHES PA YUL DANG BCAS PAR GRUB NA RMI LAM GYI DUS NA'ANG SHES PA YUL DANG BCAS PA GRUB PA YIN NO, ,DES NA THA SNYAD PA'I TSAD MA'I NGOR DON SEMS GNYIS KA YOD PAR MTSUNGS LA, DE KHO NA NYID SEMS PA'I NGOR GNYIS KA MED PAR MTSUNGS PAS DON MED LA SEMS YOD PAR 'DOD PA MI RIGS SO, ,BZHI PA RANG RGYUD KHAS MI LEN PA LA, RANG RGYUD DANG GZHAN GRAGS SPYI'I RNAM GZHAG DANG, RANG RGYUD KHAS MI LEN PA'I 'THAD PA'O, ,DANG PO NI, SLOB DPON RNAM PA GNYIS RANG RGYUD KYI TSAD MA DANG GZHAL BYA GANG YANG ZHAL GYIS MI BZHES PAS RANG RGYUD KYI RTAGS MI SRID PA YIN GYI, RANG RGYUD KYI SBYOR DAG 'BA' ZHIG LA RANG RGYUD MI SRID PAR STON PA MIN NO, ,GZHAN GYI KHAS BLANGS LA LTOS PA MED PAR RANG DBANG DU 'DZIN STANGS KYI DON LA MI 'KHRUL BA'I TSAD MA LA TSAD MA RANG RGYUD PA DANG, DES NGES PA'I TSUL GSUM DANG LDAN PA'I RTAGS LA RANG RGYUD KYI RTAGS ZHES DBU MA RANG RGYUD PA MAN CHAD BZHED PAS, DE LTA BU MI SRID PAR GZHAN GAGS 'BA' ZHIG GI SGO NAS GZHAN GYIS DNGOS PO 'DI KHO NA NYID KHONG DU CHUD PAS MDZAD PA YIN NO, ,RANG RGYUD KYI RTAGS TSUL GSUM NGES BYED KYI TSAD MA'I RTZA BA RANG MTSAN LA MI 'KHRUL BA'I MNGON SUM LA LTOS PAR RANG RGYUD PA RNAMS BZHED KYANG DES JI LTAR BZUNG BA'I RANG MTSAN SLOB DPON 'DIS RTAGS KYI DGAG BYAR MDZAD PA YIN NO, ,DBU MA PA LA RANG RGYUD PA DANG THAL 'GYUR BA GNYIS KYI THA SNYAD SNGA MA RNAMS KYIS MDZAD PA LTAR YANG RUNG LA, YANG NA RANG RGYUD KYI @006B RTAGS KHAS LEN PA'I SGO NAS DE KHO NA NYID RTOGS PAR MDZAD PA DANG, DE KHAS MA BLANGS PAR GZHAN GRAGS KYI RTAGS KYI SGO NAS DE KHO NA NYID KYI RTOGS BSKYED PA'I DBU MA PA GNYIS SU DBYE'O, ,RTAGS DE GNYIS KYI KHYAD PAR YANG GZHAN GYI KHAS BLANGS LA MA LTOS PAR RANG DBANG DU 'DZIN STANGS KYI DON LA MI 'KHRUL BA'I TSAD MAS BZHAG PA'I TSUL GSUM DANG LDAN PA LA RANG RGYUD DBANG, DE LTA MIN PAR GZHAN GYIS KHAS BLANGS LA LTOS NAS TSAD MAS NGES PA'I TSUL GSUM DANG LDAN PA LA GZHAN GRAGS GYI GTAN TSIGS ZHES BYA'O, , KHA CIG ,TSUL GSUM GZHAN GYIS KHAS BLANGS PA'I KHAS BLANGS PA'I MTHAR THUG PA TZAM GYIS GZHAN GYI LOG RTOG 'GOS PA THAL 'GYUR BA DANG, TSUL GSUM TSAD MAS NGES PA'I SGO NAS BYED PA RANG RGYUD PA ZHES 'DOD PA DANG, GZHAN DAG BDEN PA 'GOG PA TZAM YIN GYI, BDEN MED MI SGRUB PA THAL 'GYUR BA DANG, BDEN MED KYANG SGRUB PA RANG RGYUD PA ZHES KHYAD PAR 'BYED PA NI MI 'THAD PA RGYAS PAR GZHAN DU GSUNGS ZIN PAS 'DIR BRJED BYANG DU MA BRIS SO, ,GNYIS PA NI, DBU MA PAS DNGOS SMRA BA'I NGOR MYU GU RANG BZHIN MED PAR SGRUB PA'I TSE MYU GU DE RANG RGYUD RTAGS KYI SHES 'DOD CHOS CAN DU MI RUNG BAR THAL, DE'I TSE GZHI MYU GU'I YOD LDOG DANG DGAG BYA'I CHOS RANG BZHIN GNYIS DON LDOG SO SOR 'CHAR RGYU YOD MED BTZAL BA'I TSE NA SO SOR 'CHAR RGYU MED PAR GCIG TU 'CHAR BAR DNGOS SMRA BAS 'DOD PA'I PHYIR, 'O NA RTAGS YANG DAG GI'ANG CHOS CAN DU MI RUNG BAR 'GYUR RO ZHE NA, SKYON MED DE, MYU GU RTEN 'BYUNG DU TSAD MAS NGES PAS PHYOGS CHOS GRUB, RTEN 'BYUNG RANG BZHIN GYIS YOD PA LA GNOD PA CAN GYI TSAD MA BSTAN PA'I SGO NAS MYU GU RANG BZHIN MED PAR RTOGS PA'I RJES DPAG @007A *, ,SKYED PAR NUS PA'I PHYIR, GNOD PA CAN GYI TSAD MA SNGAR MA MTHONG BA MTHONG RUNG DU YOD PA'I TSE KHYAB PA LA THE TSOM DANG LDAN PA'I SKABS MI SRID NA RJES DPAG BSKYED DU MED PAR 'GYUR LA, THE TSOM GYI SKABS YOD NA NGANG RGYUD RTAGS KYI KHYAB PAR 'GYUR TE, RTAGS RTEN 'BYUNG TSAD MAS NGES ZIN MA BRJED PA LA RANG BZHIN YOD MED THE TSOM DANG LDAN PA'I PHYIR CE NA, SKYON MED DE, RANG RGYUD KYI RTAGS YOD NA GZHI CHOS CAN GYI YOD LDOG DANG DGAG BYA'I CHOS GNYIS LA LTA BA MA GO BA'I GONG ROL TU YANG DON SPYI SO SOR 'CHAR DU RUNG BAS KHYAB LA, RTEN 'BYUNG GI YOD LDOG DANG, RANG BZHIN GNYIS LA DE LTA BU MI SRID PA'I PHYIR RANG RGYUD KYI KHYAB PAR YANG MI 'GYUR RO, ,GZHAN YANG MYU GU RANG BZHIN MED PAR SGRUB PA'I TSE RANG RGYUD KYI SHES 'DOD CHOS CAN DU MI RUNG NAS GRUB ZIN PA'I TSO NAM YANG MI RUNG BAS MI 'THAD DO, ,MYU GU RTOGS PA'I TSAD MA'I BYED PA MA NYAMS BZHIN DU'ANG KHYAB PA LA GNOD PA CAN GYI TSAD MA RAGS PA MTHONG NAS, CI DA NI MYU GU'ANG RANG BZHIN MED PAR BZHAG TU RUNG SNYAM DU THE TSOM DANG LDAN PA'I SKABS SRID PAS SPYIR RTAGS YANG DAG GI SHES 'DOD CHOS CAN DU NGES PAR RUNG BA YIN NO, ,MDOR NA LHAN SKYES KYI TSAD MA MTHUN SNANG DU GRUB PA DNGOS SMRA BA DANG GNYIS KA'I RGYUD LA YOD PAS DE KHO NA NYID KYI RTOGS PA SKYED DU RUNG BA YIN LA, GRUB MTHAS BZHAG PA'I MTHUN SNANG BA MED PAS RANG RGYUD MI RUNG BA YIN NO, ,CI STA SANGS RGYAS PAS BYE BRAG PA'I NGOR SGRA MI RTAG PAR SGRUB PA NA, 'BYUNG BA LAS GYUR PA'I SGRA BYE BRAG PA LA MA GRUB, NAM MKHA'I YON TAN DU GYUR PA'I SGRA @007B SANGS RGYAS PA LA MA GRUB KYANG, SGRA TZAM GNYIS KA LA GRUB PA BZHIN DU DBU MA PA DANG DNGOS POR SMRA BA RTZOD PA'I SKABS 'DIR YANG, BDEN RDZUN GANG GIS KYANG KHYAD PAR DU MA BYAS PA'I MYU GU TZAM GNYIS KA LA GRUB PAS RANG RGYUD KYI SHES 'DOD CHOS CAN DU RUNG NGO ZHE NA, DE NI DPE DON MI MTSUNGS PA YIN TE, KHYAD PAR DOR BA'I SGRA TZAM LA TSAD MAR 'GYUR BA YOD KYANG MYU GU'I RANG MTSAN LA'ANG TSAD MAR MA SONG, RANG MTSAN DANG BRAL BA'I MYU GU LA'ANG TSAD MAR MA SONG BA'I MYU GU TZAM LA TSAD MAR 'GYUR BA DBU MA PA DANG DNGOS SMRA BA GNYIS KAS BDEN GNYIS GANG RUNG DU'ANG GRUB PAR MI 'DOD PA'I PHYIR RO, ,THAL 'GYUR BA NANG PHAN TSUN THA SNYAD PA'I DON 'GA' ZHIG LA RJES DPAG SKYED PAR 'DOD PA'I TSE GRUB MTHAS BZHAG PA'I CHOS CAN MTHUN SNANG DU GRUB PA YOD KYANG RANG RGYUD DU MI 'GYUR TE, 'DZIN STANGS KYI DON LA MI 'KHRUL BA'I TSAD MA MI SRID PA'I PHYIR RO, ,LNGA PA RANG RIGS KHAS MI LEN PA'I TSUL LA, KHAS LEN PA'I PHYOGS DGOD PA DANG, DE MI 'THAD PAR BSTAN PA DANG, RANG LUGS BZHAG PA'O, ,DANG PO NI, SHES PA RDZAS GCIG GI STENG NA KHA PHYIR PHYOGS PA RANG RIG GI BYA BA'I CHAR GYUR PA'I GZUNG BA'I RNAM PA DANG NANG KHO NAR PHYOGS PAR BYED PA'I CHAR GYUR PA'I 'DZIN PA'I RNAM PA GNYIS YOD DE, DE LTA MA YIN NA, SNGON PO MNGON SUM GYIS RTOGS KYANG, MNGON SUM NGES BYED KYI TSAD MA MED PAS SNGON PO NYID KYANG TSAD MAS MI 'GRUB PAR 'GYUR BAS SHES PA RDZAS GCIG LA BYA BYED MI 'DRA BA'I RANG RIG YOD LA, DE LTAR YOD PA'ANG DRAN PA'I 'DZIN STANGS LAS SHES TE, 'DI LTAR, SPYIR DRAN PA MTHA' DAG MYONG BA'I RJES @008A *, ,SU 'BRANG BA YIN LA, BYE BRAG TU NGES SNGON PO SNGAR MTHONG NGO SNYAM DU DRAN PA'I TSE SNGON PO DRAN PA DANG SNGON PO MTHONG BA DRAN PA DRAN PA'I 'DZIN STANGS LA YOD LA, DES DPAG PAR BYA BA'I SNGON PO MYONG BYED DANG SNGON PO MTHONG BA MYONG BYED GNYIS YOD PAR GRUB PAS RANG RIG YOD PAR GRUB LA, GNYIS MED KYI SHES PA DE'ANG RANG RIG NYID KYIS 'GRUB PAS SGRUB BYED THUG PA MED PAR MI 'GYUR RO ZHES ZER TO, ,GNYIS PA NI, RTAGS SU BKOD PA'I DRAN PA RANG GI MTSAN NYID KYIS GRUB PA NI MTHA' BZHI'I SKYE BA BKAG PAS BKAG ZIN LA, THA SNYAD PA TZAM YIN NA'ANG RANG RIG SGRUB PA'I RTAGS SU MI RUNG STE, SGRUB BYA NGES PA'I SNGA ROL TU DPE LA RANG RIG MA GRUB PA'I PHYIR DANG, MYONG BA TZAM YOD PAR GRUB KYANG RANG MYONG YOD PAR MI 'GRUB STE, ME TZAM LAS ME SHEL DPOG PA LTAR MA NGES PA'I PHYIR, GZHAN YANG DRAN PA MYONG BA LAS SKYE BA MI 'THAD PAR THAL, GZHAN YIN PA'I PHYIR, BYAMS PA DANG, NYE SBAS KYI DRAN MYONG BZHIN, RGYUD GCIG PA DANG RGYU DANG 'BRAS BU SOGS KYI SGO NAS KYANG KHYAD PAR DBYE BAR MI RUNG STE, DE DAG LA'ANG RDZAS GZHAN GYIS GNOD PA YIN NO, ,RDZAS GCIG LA BYA BYED MI 'DRA BA GNYIS YOD NA DON DAM PA'I BYA BYED DU 'GYUR BAS RANG RIG KHAS LEN PAS RANG SKYE MI 'DOD BZHIN DU'ANG KHAS LEN DGOS SO, ,GSUM PA NI, DRAN PA'I RTAGS LAS MYONG BA TZAM DPAG NUS KYANG RANG DRAN LAS RANG MYONG DPAG MI NUS TE, SNGAR BSHAD PA LTAR DPE MED PA'I PHYIR DANG, SNGON PO DRAN PA'I RTAGS LAS SNGON PO RIG PA SNGON DU SONG BAR GRUB LA, SNGON PO RIG PAR GRUB PA NYID KYIS RIG PA TZAM DU GRUB ZIN PA'I PHYIR, RANG RIG LA SOGS PA'I SGRUB BYED GZHAN @008B RTOG PA DON MED DO, ,NGAS SNGAR MTHONG NGO SNYAM DU DRAN PA NA DRAN MKHAN RANG NYID KYIS MYONG MKHAN RANG NYID YUL DU BYAS PA'I RANG MYONG MED KYANG RANG DRAN 'THAD PA YIN NO, ,GZHAN YANG SNGON PO'I RNAM PA SHAD NAS SNGON PO DNGOS SU MYONG BYED DES SNGON PO DRAN PA'I LAG RJES BZHAG PA YIN PAS YUL GYI DRAN PA SKYE BA 'THAD LA, SNGON PO DNGOS SU RTOGS PA NA SNGON 'DZIN SHUGS LA RTAGS PAS SNGON 'DZIN DRAN PA'I LAG RJES 'JOG NUS PAS SNGON 'DZIN MYONG BYED MED KYANG DRAN PA SKYE BA'ANG 'THAD PA YIN NO, ,RANG RIG KHAS LEN PA RNAMS KYIS NI SNGON 'DZIN SHUGS LA RTOGS PAR BZHAG MI NUS TE, DE LTA NA RANG RIG DON MED DO SNYAM DU 'DOD DE, ,DON DE LA BSAM NAS 'JUG 'GREL DU, GANG NYAMS SU MYONG BAS MYONG BA DE DRAN PA'I SHES PAS MYONG BA MA YIN PAS DRAN PA YUL DANG LDAN PAR 'BYUNG LA, NYAMS SU MYONG BA'I SHES PAS YONGS SU DPYAD PA GANG YIN PA DE DRAN PAS YONGS SU MA DPYAD PA MA YIN PAS, BDAG GIS MTHONG NGO ZHES BYA BAR YANG 'GYUR RO, ,ZHES YUL GYI SKABS SU NYAMS SU MYONG BA ZHES PA DANG, YUL CAN GYI SKABS SU YONGS SU DPYAD PA ZHES GSUNGS PAR SEMS SO, ,DRUG PA NYAN RANG LA CHOS RANG BZHIN MED PA RTOGS PA YOD PAR BZHED PA NI, GANG ZAG LA DGAG BYA PHRA MO RANG BZHIN GYIS GRUB PA KHEGS PA NA GZHI PHUNG PO LA'ANG, SNGAR GYI KHYAB PA DANG GTAN TSIGS BSTAN PA TZAM GYIS PHUNG PO RANG BZHIN MED PAR RTOGS NUS PAS CHOS RANG BZHIN MED PAR RTOGS PAR GRUB PA YIN NO, ,PHUNG PO DANG MTSAN NYID MI MTHUN PA'I RANG SKYA THUB PA'I RDZAS YOD KYI BDAG MED PAR RTOGS PA TZAM GYIS CHOS KYI BDAG MED RTOGS PAR BZHAG MI NUS KYANG DE TZAM GYI GANG ZAG GI BDAG MED KYIS @009A *, ,DGAG BYA RDZOGS PAR MI KHEGS PA NI 'OG TU 'CHAD PAR 'GYUR RO, ,CHOS RANG BZHIN MED PA MI RTOGS NA MYANG 'DAS THOB PA'ANG BZHAG MI NUS TE, MDO LAS, DRANG YANG SKYE BA DRANG NGO, ,TSANGS PA SPYOD PA BSTEN NO, ,BYA BA BYAS SO, ,'DI LAS SRID PA GZHAN MI SHES SO, ,ZHES BYA BA 'DIR DGRA BCOM PA LHAG BCAS LA SKYE BA ZAD DO SNYAM PA'I SHES PA MI RIGS PAR 'GYUR TE, DA LTAR GYI SDUG BSNGAL RANG BZHIN GYIS SKYE BA MED PAR THUGS SU MA CHUD PA'I PHYIR, DA LTAR GYI SDUG BSNGAL RANG GI MTSAN NYID KYIS GRUB KYANG MA 'ONGS PA'I SKYE BA GZHAN MI LEN PA'I DBANG DU BYAS NAS DE SKAD GSUNGS PA YIN NO SNYAM NA'ANG MI 'THAD DE, TSIG DANG PO GSUM GYI RGYAS BSHAD DU, GANG SDUG BSNGAL 'DI MA LUS PAR SPANGS PA NAS, NUB PA ZHES PA'I BAR DU GSUNGS PAS SKYE BA ZAD DO ZHES PA'I TSIG NI DA LTAR GYI SDUG BSNGAL RANG BZHIN GYIS MI SKYE BA'I MTSON BYED DU GSUNGS TE, 'DI ZHES PA'I NYE TSIG SMOS PA'I PHYIR DANG, MA 'ONGS PA'I DBANG DU BYAS NAS TSIG THA MA'I RGYAS BSHAD DU, SDUG BSNGAL GZHAN MTSAMS MI SBYOR ZHES SOGS GSUNGS SO, ,LHAG BCAS KYI SKABS SU NYON MONGS SPANGS BA MNGON DU BYAS PA'I DBANG DU BYAS NAS GSUNGS KYI, PHUNG PO LOG PA MNGON DU BYAS PA'I DBANG DU MDZAD PA MA YIN NO ZHE NA, DE LTA NA SDUG BSNGAL 'DI ZHES MI GSUNG BAR NYON MONGS PA 'DI MA LUS PAR SPANGS PA ZHES SOGS GSUNG REGS NA, DE SKAD DU YANG MA GSUNGS SO, ,SDUG BSNGAL YANG NYER LEN GYI PHUNG PO SPYI'I RNAM GRANGS SU RNAM PAR BZHAG GO ,SPYI SGRA BYE BRAG LA 'JUG PAS NYON MONGS LA SDUG BSNGAL GYI SGRA SBYAR BA YIN NO ZHE NA, @009B SPYI'I SGRA SPYI KHO NA LA SBYAR BA LA SKABS 'GAR GNOD PA MTHONG NA KYI BRAS? LA 'JUG PA RIGS KYANG, 'DIR NI SPYI LA GNOD PA MED PAS BYE BRAG KHO NA LA SPYI SGRA SBYAR BA MI RIGS SO, ,'DI DAG RGYAS PAR RIGS PA DRUG CU PA'I 'GRAL PA LAS SHES SO, ,DES NA RTZA SHER NYAN THOS KYIS CHOS KYIS BDAG MED RTOGS PA LUNG DANG RIGS PA'I SGO NAS RGYAS PAR BSGRUBS SHING, RTZA SHA'I CHED DU BYA BA'I GDUL BYA RIGS CAN GSUM G-YOD PAS THEG PA THUN MONG BA'I BSTAN BCOS SU SLOB DPON ZLA BA GRAGS PA BZHED LA, SLOB DPON LEGS LDAN 'BYED NI NYAN THOS LA CHOS KYI BDAG MED RTOGS PA MED PAS THOG PA THUN MONG MA YIN PA'I BSTAN BCOS SU BZHED PA YIN NO, , BDUN PA SGRIB PA GNYIS KYI 'JOG TSUL LA, SEMS TZAM PA'I 'DOD PA DANG DBU MA PA'I 'DOD PA'O, ,DANG PO NI, NYON MONGS CAN GYI MA RIG PA RIG PA YE SHES KYI 'GAL BA MI MTHUN PHYOGS YIN PAR SLOB DPON KUN MTHUN YANG, SLOB DPON THOGS MED SKU MCHED NI, MA RIG PA NI PHUNG PO'I GNAS LUGS LA RMONGS PA TZAM GYI MA RTOGS PA'I BLO YIN GYI, LOG RTOG MA YIN LA, 'JIG LTA NI GANG ZAG GI BDAG DANG, DE'I BDAG GI BAR SGRO 'DOGS PA'I SHES RAB NYON MONGS CAN LOG RTOG GIS BSDUS PAR BZHED LA, SLOB DPON PHYOGS GLANG YAB SRAS NI 'JIG LTA'ANG NYON MONGS CAN GYI MA RIG PAR BZHED CING, MA RIG PA MTSUNGS LDAN DU BSHAD PA'ANG MI 'GAL TE, PA LA SHA DANG LDAN PA'I NAGS ZHES PA LTAR MA RIG PA'I PHYOGS GCIG YIN PAS MA RIG PA DANG LDAN PAR BSHAD DO ZHES BZHED DO, ,DE LTA BU'I NYON MONGS PA SA BON DANG BCAS PA RNAMS NYON MONGS PA'I SGRIB PA DANG, @010A *, ,GZUNG 'DZIN RDZAS THA DAD DU 'DZIN PA'I RTOG PAS SA BON DANG BCAS PA SHES BYA'I SGRIB PAR BZHED LA, GANG ZAG PHUNG PO DANG MTSAN NYID MI MTHUN PA'I RANG RKYA MTHUN PA'I RANG RKYAN THUB PA'I RDZAS YOD DU 'DZIN PA NI GANG ZAG GI BDAG 'DZIN YIN ZHING, DE'I ZHEN YUL BKAG PA GOMS PAR BYAS PA TZAM GYIS SRID PA LAS GROL NUS PAR DON SEMS DANG DBU MA RANG RGYUD PA RNAMS MTHUN NO, ,GNYIS PA DBU MA PA'I LUGS LA, RANG RGYUD PA RNAMS NI NYON SGRIB NGOS 'DZIN TSUL GRUB MTHA' 'OG MA GSUM DANG MTHUN LA, SHES SGRIB NI BDEN 'DZIN GYI BLO SA BON DANG BCAS PA LA BZHED DO, ,DBU MA THAL 'GYUR BA ZHES SAM, GZHAN GRAGS PA ZHES PA'I LUGS LA, RANG RGYUD PA'I LUGS DE MI 'THAD PAR BSTAN PA DANG, DE'I SKYON SPONG DGAG PA DANG, RANG GI LUGS BZHAG PA DANG, DE LA RTZOD PA SPANG BA'O, ,DANG PO LA, DGAG PA DNGOS DANG, NYES PA DE DAG 'JUG PA'I RGYU MTSAN NO, ,DANG PO NI, GANG ZAG PHUNG PO DANG MTSAN NYID MI MTHUN PA'I RANG RKYA THUB PA'I RDZAS YOD MED PAR RTOGS PA'I BLO GOMS PAR BYAS PA TZAM GYIS SRID PA LAS GROL BA'I LTA BA DE'I CHA YONGS SU RDZOGS PA YIN NA, GZUNG 'DZIN RDZAS THA DAD KYIS STONG PA RTOGS PAS KYANG RNAM MKHYEN THOB BYED KYI DE KHO NA NYID KYI LTA BA YONGS SU RDZOGS PAR 'GYUR RO, ,GZUNG 'DZIN RDZAS THA DAD KHEGS KYANG RNAM SHES BDEN 'DZIN GYI SGRO 'DOGS GCAD DU YOD PAS RNAM MKHYEN THOB PAR BYED PA LA RNAM SHES BDEN MED DU RTOGS DGOS SO ZHE NA, SNGAR GYI GANG ZAG GI BDAG DE KHEGS KYANG GANG ZAG RANG BZHIN GYIS GRUB PAR 'DZIN PA'I SGRO 'DOGS GCAD DU YOD @010B PAS SRID PA LAS GROL BA LA GANG ZAG RANG BZHIN MED PO'I GANG ZAG GI BDAG MED KYANG RTOGS DGOS SO, ,GNYIS PA NI, THEG PA CHEN PO'I SDE SNOD LAS CHOS KYI BDAG MED PHRA RAGS GNYIS GSUNGS PAR GYUR, THEG PA DMAN PA'I SDE SNOD LAS KYANG GANG ZAG GI BDAG MED PHRA RAGS GNYIS GSUNGS LA, SNGA MA'I GDUL BYA'I GTZO BO DGAG BYA PHRA MO DGAG PA BSTAN DGOS KYI DBU MA PA YIN GYI ,CHOS KYI BDAG MED RAGS PA BSTAN DGOS KYI SEMS TZAM PA ZHAR BYUNG GI GDUL BYA YIN PA LTAR, PHYI MA LA'ANG GANG ZAG GI BDAG MED PHRA MO BSTAN DGOS KYI NYAN THOS GDUL BYA'I GTZO BO YIN GYI, CIG SHOS PHAL PA'I GDUL BYA YIN NO, ,GZHAN YANG GANG ZAG GI BDAG MED RAGS PA RTOGS PA DANG, GANG ZAG MI RTAG PAR RTOG PA GNYIS SRID PA'I RTZA BA GCOD BYED YIN MIN MTSUNGS PAS SRID PA LAS GROL BA LA NGES PAR GANG ZAG RANG BZHIN MED PAR RTOGS DGOS PA YIN NO, ,GNYIS PA NI, GANG ZAG BDEN PAR 'DZIN PA'I BLO GANG ZAG GI BDAG 'DZIN YIN NA NYES PA DE DAG MTSUNGS KYANG KHO BO CAG RNAM PAR SHES PA NYID GANG ZAG TU 'DOD PAS, GANG ZAG BDEN 'DZIN GYIS RNAM SHES BDEN PAR BZUNG BAS PHUNG PO LA BDEN PAR 'DZIN PA'I CHOS KYI BDAG 'DZIN YIN NO ZHES SLOB DPON LEGS LDAN 'BYED BZHED DO, ,DE NI MI 'THAD DE, GANG ZAG NI PHUNG PO LEN PA PO YIN LA, PHUNG PO NI DE'I NYE BAR BLANG BYA YIN PAS, NYE BAR LEN PA PO DANG BLANG BYA GNYIS GCIG TU MI RIGS LA, KHYED 'DOD PA'I GANG ZAG GI BDAG 'DZIN DE NI KUN BRTAGS YIN GYI LHAN SKYES MA YIN PAS GRUB MTHAS BLO MA BSGYUR @011A *, ,BA RNAMS LA 'KHOR BAR SKYE BA'I RGYU MED PAR 'GYUR BA DANG, RTZIG PHUGS NA GLANG CHEN MED PAR RTOGS PAS DUG SBRUL YOD PAR 'DZIN PA'I 'JIGS PA ZLOG MI NUS PA LTAR, DE 'DRA'I BDAG MED RTOGS PAS SRID PA'I SDUG BSNGAL LAS GROL BAR YANG MI 'GYUR RO, ,GSUM PA NI, BDEN 'DZIN SA BON DANG BCAS PA NYON MONGS PA'I SGRIB PA YIN LA, GNYIS SNANG 'KHRUL PA'I BAG CHAGS SA BON DANG BCAS PA NI SHES BYA'I SGRIB PA YIN NO, ,DE LA BDEN 'DZIN MTHA' DAG NYON MONGS CAN GYI MA RIG PA YIN ZHING, 'JIG LTA YIN LA GANG ZAG GI BDAG 'DZIN MA YIN PA NI NGAR 'DZIN PA'I 'JIG LTA'O, ,GANG ZAG GI BDAG 'DZIN YIN LA 'JIG LTA MA YIN PA NI GANG ZAG GZHAN LA BDEN PAR 'DZIN PA DANG, GNYIS KA YIN PA NI NGA RANG GI MTSAN NYID KYIS GRUB PAR 'DZIN PA'I 'JIG LTA'O, ,GNYIS KA MA YIN PA NI PHUNG PO LA BDEN 'DZIN TO, ,STONG NYID BDUN CU PA DANG 'JUG PA SOGS SU BDEN 'DZIN NYID SRID PA'I RGYUR GYUR PA'I NYON MONGS CAN GYI MA RIG PAR GSUNGS PA 'DI NI NYAN THOS LA CHOS KYI BDAG MED RTOGS PA YOD PA'I SGRUB BYED YANG DAG PA'O, ,BZHI PA NI, SNGAR GYI GANG ZAG GI BDAG 'DZIN RAGS PA DE 'JIG LTA YIN NA, DE'I YUL MED PAR RTOGS PA GOMS PAS SRID PA LAS MI GROL BA 'GAL LA, 'JIG LTA MA YIN NA, GZUNG 'DZIN RDZAS THA DAD DU 'DZIN PA'I RTOG PA'ANG CHOS KYI BDAG 'DZIN MA YIN PAR 'GYUR RO ZHE NA, 'JIG LTA YIN YANG KUN BRTAGS YIN GYI LHAN SKYES MA YIN PAS NYES PA DE DAG MED DO, ,'O NA DE 'DRA'I GANG ZAG GI BDAG MED GOMS PA LAS @011B GSAL SNANG SKYE BA SRID LA, DE LTA NA TSAD MAS YONGS SU DAG PA'I BDAG MED LA GSAL SNANG SKYES PAS RNAL 'BYOR MNGON SUM DU 'GYUR ZHING, DE LTA NA SRID PA LAS GROL BAR YANG 'GYUR RO ZHE NA, DE 'BA' ZHIG GOMS PA LAS GSAL SNANG SKYE BA SRID KYANG SBYOR LAM GYI RTOGS PA'ANG SKYE MI SRID PAS NYES PA DE DAG MED DO, ,'O NA BDAG 'DZIN DE KUN BRTAGS YIN PAR GANG GIS SHES SNYAM NA, BLO LHAN SKYES LA LAG PA NA BA TZAM LA BA'O? ZHES PA'I THA SNYAD SKYON MED MTHONG BAS NGA DANG PHUNG PO GNYIS MTSAN NYID MI MTHUN PA'I RANG SKYA THUB PA'I RDZAS YOD SO SO BAR 'DZIN PA MED PAR SHES SO, ,DE BZHIN DU GZUNG 'DZIN RDZAS THA DAD DU 'DZIN PA'I RTOG PA'ANG KUN BRTAGS YIN GYI LHAN SKYES MA YIN TE, GZUNG 'DZIN NI RGYU 'BRAS YIN LA, 'JIG RTEN NA RGYU 'BRAS RDZAS GZHAN DU 'DZIN PA'I BLO LHAN SKYES MED PA'I PHYIR TE, DE YANG SHING GI SA BON TZAM BTAB NAS PHYIS KYI SDONG PO LA DMIGS TE NGAS 'DI BTZUGS SO SNYAM DU 'DZIN PA'I THA SNYAD SKYON MED MTHONG BA'I PHYIR RO, ,'O NA GZHAN SKYE THA SNYAD PA'I SHES PAS KHEGS PAR 'GYUR RO ZHE NA, 'JIG RTEN PA RNAMS RGYU 'BRAS DON GZHAN DU YOD PAR MI 'DZIN PA YIN GYI ,DON GZHAN DU MED PAR RIGS SHES KYIS RTOGS DGOS SO, ,`RANG LUGS LA, 'JIG LTA LHAN SKYES KYIS GANG ZAG LA DMIGS PA YIN GYI PHUNG PO LA DMIGS PA MI SRID PAS GANG ZAG GI MTSAN GZHIR YANG PHUNG PO'I YA GYAL DANG TSOGS PA GANG YANG MI RUNG STE, NYE BAR LEN PA PO DANG BLANG BYA GCIG TU MI 'THAD PA'I PHYIR DANG, GANG ZAG NI PHUNG PO LA BRTEN NAS BTAGS PA TZAM YIN PAS PHUNG PO NYID GANG ZAG DANG PHUNG PO LAS DON GZHAN YANG GANG ZAG TU MI @012A *, ,'THAD DO, ,'DI DAG NI SHING RTA'I DPYAD PA RNAM PA BDUN GYI SKABS LAS SHES PAR BYA'O, ,'O NA GZUGS BDAG YIN PA SOGS 'JIG TSOGS LA LTA BA'I MTHA' NYI SHUR BSHAD PA JI LTA BA'I YIN ZHE NA, DE DAG NI PHUNG PO LA DMIGS KYI KUN BRTAGS YIN GYI LHAN SKYES MA YIN TE, RGYUN DU ZHUGS PA'I 'BRAS BU THOB PA'I TSE ZAD PAR SPONG BAR GSUNGS PA'I PHYIR RO, , ` BRGYAD PA SANGS RGYAS KYIS JI SNYED PA MKHYEN PA'I TSUL LA, RTEN 'BREL GYI CHOS RNAMS BDEN SNANG DANG BCAS BZHIN DU MNGON SUM DU MKHYEN PA MA YIN TE, DE LTA NA BDEN SNANG LOG PAS YUL SNANG TZAM LDOG PAR 'GYUR RO, ,DE 'DOD NA, BDEN 'DZIN GYI BLO LOG PAS KYANG YUL CAN GYI BLO TZAM LDOG DGOS PAS SANGS RGYAS LA YUL CAN GYI BLO MED PA'AM, YANG NA BDEN 'DZIN MA SPANGS PAR 'GYUR RO, ,'O NA BDEN SNANG DANG BRAL BZHIN DU JI SNYED PA MNGON SUM DU MKHYEN PA'I TSUL JI LTA BU ZHE NA, RTEN 'BYUNG RANG BZHIN MED PA MNGON SUM DU RTOGS PA'I TSE BDEN PA'I SNANG BA LDOG DGOS TE, DE LTA MA YIN NA DON DAM BDEN PA'I MA MTHUN PHYOGS DNGOS SU SNANG BAS SNANG YUL LA 'KHRUL BAR 'GYUR RO, ,DES NA RTEN 'BREL GYI DON DAM PA'I 'DUG LUGS MNGON SUM DU MTHONG BA'I TSE BDEN SNANG LDOG DGOS PA'ANG BDEN PA RTEN 'BREL LA MI SRID CING DE'I 'DUG LUGS 'KHRUL MED DU MTHONG BAS YIN NO, , DE BZHIN DU RTEN 'BYUNG RNAMS RANG BZHIN GYIS DBEN PAS BYA BA BYED PAR GNAS LA, DE'I 'DUG LUGS 'KHRUL MED DU MTHONG BA'I TSE NA'ANG, BDEN PA SNANG NA MED PA GSAL SNANG DU 'GYUR BAS BDEN SNANG GIS STONG BZHIN DU MNGON SUM GYIS RTOGS PA @012B YIN NO, ,YANG NA 'DI LTAR SHES PAR BYA STE, MNGON SHES CAN GYIS TSAD NAD CAN LA BLTAS PA'I TSE TSAD NAD CAN LA YUL LOG PAR SNANG BA MNGON SUM DU MTHONG YANG 'KHRUL PAR MI 'GYUR TE, RANG GI BLO'I SKYON GYI DBANG GIS LOG PAR SNANG BA MA YIN PA'I PHYIR, DE BZHIN DU BDEN SNANG MTHA' DAG JI SNYED PA MKHYEN PA'I YE SHES KYIS MNGON SUM DU RTOGS KYANG 'KHRUL BAR MI 'GYUR TE, NANG GI BLO'I SKYON GYI DBANG GIS BDEN PAR MI SNANG BA'I PHYIR RO, , ` DA NI DE DAG GI ZHAR LA DRANG DON DANG NGAS DON GYI RNAM DBYE SHES PAR BYA STE, DE LA'ANG SEMS TZAM PA RNAMS KYIS MDO GANG LA BRTEN LA DRANG NGES JI LTAR 'BYED PA DANG, DBU MA PA RNAMS KYIS GANG LA BRTEN NAS 'BYED PA'I TSUL GNYIS KYIS SHES PAR BYA'O, ,DANG PO NI MDO DGONGS 'GREL GYI RJES SU 'BRANGS PA YIN TE, BYANG CHUB SEMS DPA' BCUS DRI BA BCU ZHUS PA'I LAN DU DGONGS 'GREL GSUNGS PA YIN LA, DE'I NANG NAS BYANG CHUB SEMS DPA' DON DAM YANG DAG 'PHAGS KYIS DRANG DON DANG NGES DON ZHUS PA'I DRI LAN GYI DON, RNAM PAR GTAN LA DBAB PA BSDU BAR GSUNGS PA'I DON CUNG ZAD BSHAD NA, BYANG CHUB SEMS DPAS DRI BA ZHUS PA DANG, STON PAS LAN GSUNGS PA DANG, LAN GYI DON ZHUS PA DANG, DES DRANG DON DANG NGES DON JI LTAR GRUB PA'I TSUL LO, ,DANG PO NI, BCOM LDAN 'DAS KYIS PHUNG PO LA SOGS PA'I CHOS THAMS CAD RANG GI MTSAN NYID KYIS GRUB PAR YANG BKA' DANG PO SOGS SU GSUNGS LA, YANG SHER PHYIN GYI MDONG, CHOS THAMS CAD NGO BO NYID MA MCHIS PA, MA SKYES PA, MA 'GAGS PA, BZOD PA MA NAS ZHI BA, RANG BZHIN GYIS MYA NGAN LAS 'DAS PA ZHES KYANG GSUNGS NA, NGO BO NYID MED PA SOGS @013A *, ,GSUNGS PA'I DGONGS GZHI DANG DGOS PA GANG YIN ZHES ZHUS PA'O, ,NGO BO NYID MED PA'I TSUL GSUNGS PA NA, RANG GI MTSAN NYID KYIS GRUB PAR GSUNGS PA'I DGONGS PA'ANG BDE BLAG TU RTOGS PAR 'GYUR BAS DE'I DGONGS GZHI SOGS GANG YIN NI MA ZHUS SO , ,GNYIS PA LA, NGO BO NYID MED PA'I DGONGS PA BSHAD PA DANG, LHAG MA BZHI'I DGONGS PA BSHAD PA DANG, DE LTAR GTAN LA PHAB PA'I DGOS PA'O, ,DANG PO LA, NGO BO NYID MED PA'I DGONGS GZHI NGOS BZUNG BA DANG, NGO BO NYID MED PA'I SGRAS STON PA'I RGYU MTSAN DPE DANG BCAS PA'O, ,DANG PO NI, MTSAN NYID NGO BO NYID MED PA DANG, SKYE BA NGO BO NYID MED PA DANG, DON DAM PA NGO BO NYID MED PA GSUM LA DGONGS NAS CHOS THAMS CAD NGO BO NYID MED PA'O ZHES GSUNGS SO, ,GSUM PO DE GANG YIN ZHE NA, KUN BRTAGS DANG, GZHAN DBANG DANG, YONGS GRUB BO, ,GNYIS PA NI, KUN BRTAG LA MTSAN NYID NGO BO NYID MED PA ZHES STON PA'I RGYU MTSAN NI, MING DANG RDAS RNAM PAR BZHAG PA TZAM YIN GYI RANG MTSAN DU MA GRUB PA'I PHYIR RO, ,GZHAN DBANG LA SKYE BA NGO BO NYID MED PA'I SGRAS STON PA'I RGYU MTSAN NI, RKYEN GZHAN GYI DBANG GIS BYUNG BA YIN GYI BDAG LAS SKYE BA'I NGO BO MED PA'I PHYIR RO, ,DON DAM PA NGO BO NYID MED PA NI, GZHAN DBANG LA BSHAD PA DANG YONGS GRUB LA BSHAD PA GNYIS SO, ,DANG PO NI, GANG ZHIG RTOGS NA SGRIB PA LAS GROL BAR 'GYUR BA'I DMIGS PA DE RNAM PAR DAG PA'I DMIGS PA YIN PAS NA DON DAM PA ZHES RNAM DAG GI DMIGS PA LA DON DAM DU GSUNGS PA DER GZHAN DBANG MA GRUB PAS NA, GZHAN DBANG LA'ANG DON DAM PA NGO BO NYID MED PA ZHES BYA STE, DE LA DMIGS NA KUN NAS NYON @013B MONGS PA 'PHEL BAR 'GYUR BA'I PHYIR RNAM GRANGS PA'I KUN RDZOB KYANG YIN NO, ,YONGS GRUB NI DON DAM YIN LA DNGOS POR MED PAS NA DON DAM PA NGO BO NYID MED PA ZHES BYA'O, ,DPER NA NAM MKHA'I ME TOG DNGOS POR MED PA LTAR KUN BRTAGS KYANG NGO, ,GZHAN DBANG NI SGYU MA LTA BU STE, GNYIS SNANG GI SHES PA LA YUL PHYI ROL TU CHAD PA LTAR SNANG YANG PHYI ROL TU MA GRUB PAS SGYU MA LTA BU YIN GYI, BDEN SNANG DANG BDEN STONG TSOGS PA'I SGYU MA LTA BU NI MA YIN NO, ,YONGS GRUB NI, THOGS BCAS KYI GZUGS BKAG PA'I NAM MKHA'I DPES GSUNGS SO, ,GNYIS PA NI, KUN BRTAGS NGO BO NYID MED PA'I PHYIR NGO BO NYID KYIS MA SKYES ZHES SOGS SBYAR RO, ,GZHAN DBANG LA BDAG SKYE'I MA SKYES PA ZHES SOGS SBYAR RO, ,'DIS NI, SHER PHYIN GYI MDOR NGO BO NYID MED PAR GSUNGS PA NI, KUN BRTAGS DANG, GZHAN DBANG LA DGONGS KYI, YONGS GRUB BDEN DNGOS SU GRUB PA SLOB DPON THOGS MED KYI DGONGS PA YIN NO ZHES PA'I NGAN RTOG KYANG BSAL BA YIN TE, NGO BO NYID GSUM GA DGONGS GZHIR GSUNGS PA'I PHYIR DANG, GZHAN DBANG DANG YONGS GRUB GNYIS KA RANG GI MTSAN NYID KYIS GRUB PAR GSUNGS PA'I PHYIR RO, ,GSUM PA NI, BYIS PA RNAMS GZHAN DBANG DANG BDAG GNYIS KYIS DBEN PAR GYUR PA'I YONGS GRUB KYI GZHI LA RTOG PAS JI LTAR BTAGS PA LAR GYI KUN BRTAGS PA'I NGO BO NYID DU BDEN PAR MNGON PAR ZHEN PAS 'KHOR BAR 'KHOR BAR 'GYUR RO, ,'KHOR BA LAS GROL BA'I PHYIR TU DANG POR GZHAN DBANG SKYE BA NGO BO NYID MED PA BSTAN NAS SRID PA LAS YID 'BYUNG BAR BYED, DE NAS KUN BRTAGS MTSAN NYID NGO BO NYID MED PA DANG, YONGS GRUB DON DAM PA NGO BO NYID MED PA BSTAN NAS SRID PA LAS GROL BAR BYED DO, ,GANG ZAG GI BDAG MED RTOGS PA'I LAM DANG, 'BRAS BU @014A *, ,RNAM GROL THEG PA GSUM GA KHYAD PAR MED PA LA DGONGS NAS THEG PA GCIG TU GSUNGS PA YIN GYI, MTHAR THUG THEG PA CHEN PO KHO NAR NGES PA NI MIN TE, RANG BZHIN GYIS DBANG PO RNO 'BRING BRTUL GSUM SO SOR NGES PAS ZHI BA BGROD PA GCIG PU PA'I NYAN THOS NI NAM YANG 'TSANG RGYA BA MI SRID PA'I PHYIR RO, ,GSUM PA LAN GYI DON ZHUS PA NI, BYANG CHUB SEMS DPA' DON DAM YANG DAG 'PHAGS KYIS STON PAS GSUNGS PA'I NGO BO NYID GSUM PO'I DON 'DI LTAR KHONG DU CHUD CES BYA STE, GZUGS NAS RNAM MKHYEN GYI BAR GYI CHOS THAMS CAD LA RTOG PAS NGO BO NYID DANG KHYAD PAR DU BTAGS PA DE DAG NI KUN BRTAGS YIN LA, DE LTAR 'DOGS PA'I GZHI GNYIS SNANG GI SHES PA GZHAN DBANG DANG, DE BDAG GNYIS KYIS STONG PA YONGS GRUB TU GSUNGS PAR DGONGS SO, ,DE LTAR RANG GI MTSAN NYID KYIS GRUB PAR GSUNGS PA RNAMS NI GZHAN DBANG DANG YONGS GRUB YIN LA, RANG GI MTSAN NYID KYIS MA GRUB PA NI KUN BRTAGS YIN ZHING, GZHAN DBANG DANG YONGS GRUB GNYIS KYANG RNAM GRANGS KYI NGO BO NYID MED PA'I DGONGS GZHIR GSUNGS PAS NGO BO NYID YOD MED KYI TSUL MDO THAMS CAD LA DE LTAR DU SHES PAR BYA'O, ,BZHI PA NI, DANG POR DRANG SRONG SMRA BA RI DVAGS KYI NAGS SU NYAN THOS KYI THEG PA LA YANG DAG PAR ZHUGS PA RNAMS LA CHOS THAMS CAD RANG GI MTSAN NYID KYIS GRUB PAR GSUNGS PA'ANG SGRA JI BZHIN PA MIN LA, BAR DU CHOS THAMS CAD NGO BO NYID MED PAR GSUNGS PA'ANG SGRA JI BZHIN PA MIN NO, ,'O NA GANG YIN ZHE NA, MDO DGONGS 'GREL 'DIR THEG PA THAMS CAD LA YANG DAG PAR ZHUGS PA RNAMS @014B LA KUN BRTAGS RANG GI MTSAN NYID KYIS MA GRUB CING GZHAN DBANG DANG YONGS GRUB RANG GI MTSAN NYID KYIS GRUB BO ZHES YOD PA DANG MED PA'I DGONGS PA LEGS PAR PHYE NAS BSTAN PA LEGS PAR RNAM PAR PHYE BA DANG LDAN PA'I CHOS KYI 'KHOR LO 'DI NI NGES PA'I DON TO ZHES GSUNGS SO, ,DES NA KHA CIG DE BZHIN GSHEGS PA'I SNYING PO RTAG BRTAN SOGS SU GSUNGS PA'I MDO KHO NA THA MA NGES DON DU GSUNGS PA 'DI'I MTSAN GZHIR MDZAD PA DANG, GANG DAG SHER PHYIN GYI MDO RNAMS 'DI'I MTSAN GZHIR 'DZIN PA NI DRI LAN GYI DON RGYAS PAR MA RTOGS PA'I MUN SPRUL 'BA' ZHIG GO, DES NA MDO 'DI DANG MTHUN PAR YOD MED 'BYED TSUL RNAMS NGES PA'I DON TO, , ` GNYIS PA DBU MA RNAMS KYIS GANG LA BRTEN NAS 'BYED PA'I TSUL NI BLO GROS MI ZAD PA'I MDO'I RJES SU 'BRANGS PA YIN TE, DE LA DRANG NGES KYI SGRA BSHAD PA DANG, DBYE BA DANG, MTSAN NYID DO, ,DANG PO NI, DON GZHAN DU DRANG DGOS PA DANG, DON DER NGES PA DRANG NGES KYI DON YIN GYI GDUL BYA DRANG BA'I PHYIR TU GSUNGS PA TZAM LA MI BYA STE, NGES DON YANG DRANG DON TU 'GYUR BAS SO, ,DPER NA GZUGS SKYE'O ZHES BSTAN PA'I TSE GZUGS KYI DE KHO NA NYID KYI DON DER MA ZAD KYI DA DUNG GONG DU DRANG DU YOD PA'O, ,GZUGS RANG BZHIN MED PA BSTAN PA NA GZUGS KYI DE KHO NA NYID KYI DON DER NGES KYI GONG NA GZHAN MED PAS NGES PA'I DON TO, ,GZHAN DU DRANG DGOS PA'I DON DANG, DER NGES PA'I DON LA DRANG NGES SU BYAS PA'I TSE BRJOD BYA KUN RDZOB DANG DON DAM PA'I BDEN PA GNYIS KYANG DRANG DON DANG NGES DON DU 'GYUR RO, ,DON GZHAN DU DRANG DGOS PA DANG MI DGOS PA LA DRANG NGES SU BYAS PA'I TSE RJOD BYED LA DRANG NGES SU DBYE'O, ,GNYIS PA @015A *, ,LA MTSAN NYID KYI DBANG DU BYAS NAS GSUNGS PA DANG, MTSAN GZHI'I DBANG DU BYAS NAS GSUNGS PA'O, ,DANG PO LA, GDUL BYA'I DBANG DU BYAS PA NI, LAM LA 'JUG PA'I PHYIR TU GSUNGS PA NI DRANG BA'I DON DANG, 'BRAS BU LA 'JUG PA'I DON DU GSUNGS PA NI NGES PA'I DON TO, ,LAM NI RANG BZHIN MED RTOGS KYI SHES RAB YIN LA, DE LA 'JUG PA'I THABS NI MI RTAG PA BSTAN PA SOGS SO, ,'BRAS BU NI MYA NGAN LAS 'DAS PA YIN LA, DE LA DNGOS SU 'JUG PA'I THABS NI RANG BZHIN MED RTOGS SO, ,BRJOD BYA'I DBANG DU BYAS PA NI, KUN RDZOB STON PA NI DRANG BA'I DON DANG, ,DON DAM STON PA NI NGES PA'I DON TO, ,DE YANG KUN RDZOB KYI RANG LDOG SGYU MA LTA BU STON PA NGES DON YIN YANG GZHI LDOG SEMS CAN SOGS STON PA LA BYA'O, , GNYIS PA NI, SEMS CAN DANG GANG ZAG SOGS BSTAN PA DANG, STONG NYID MTSAN MA MED PA SOGS BSTAN PA RNAMS SO, ,GSUM PA NI, DON DAM PA'I BDEN PA DNGOS SU STON PA DANG TSAD MA DANG LDAN PA GNYIS TSOGS NGES PA'I DON DANG, DE LAS GZHAN PA NA DRANG BA'I DON TO, ,SNGAR BSHAD PA'I DGONGS 'BREL GYI MDO SLOB DPON ZLA BA GRAGS PA DRANG DON 'BA' ZHIG TU 'GREL ZHING, SLOB DPON LEGS LDAN 'BYED NI GZHAN DBANG RANG MTSAN PA YOD PAR GSUNGS PA SGRA JI BZHIN PAR 'CHAD LA, SLOB DPON KA MA LA SH'I LA NI NGO BO NYID MED PA'I DGONGS PA GTAN LA PHAB PA'I SGO NAS SHER GYIN GYI MDOR NGO BO NYID MED PAR GSUNGS PA NGES PA'I DON DU MDO 'DIS SGRUB CING DE'I GZHUNG 'DZUGS PA YIN NO ZHES 'CHAD DO, ,SNGAR BSHAD PA DE RNAMS KYI DGOS PA @015B NI STONG PA RTEN 'BYUNG GI DON DU RTOGS NAS RANG BZHIN RDUL TZAM KHANG MED PAR RTOGS PA'I SHES RAB KYIS MTSAN 'DZIN GYI DMIGS GTAD THAMS CAD BSHIG PA DANG, BYA BYED THAMS CAD DE KHO NA LA 'THAD PA'I GNYIS TSOGS LA MKHAS PAR BYA'O, , STONG PA BRTEN 'BYUNG GDON ZHES PA MING DON DU MI 'THAD DE, STONG PA MA RTOGS PAR RTEN 'BYUNG MI RTOGS PAR 'GYUR BA'I PHYIR, YUL YUL CAN GYI DON YANG MIN TE, DE'I YUL CAN DU RTEN 'BYUNG MI RUNG BA'I PHYIR, BRJOD BYA RJOD BYED KYI DON YANG MIN TE, RTEN 'BYUNG DE'I RJOD BYED MIN PA'I PHYIR, DNGOS SHUGS KYI DON DU'ANG MI RUNG STE, RTEN 'BYUNG DNGOS SU RTOGS PAS STONG PA SHUGS LA RTOGS MI NUS PA'I PHYIR, RNAM BCAD YOD PA GCOD KYI DON YANG MIN TE, RTEN 'BYUNG YONGS SU BCAD KYANG STONG PA RNAM PAR GCOD MI NUS PA'I PHYIR, DES NA STONG PA RTEN 'BYUNG GI DON ZHES PA'I TSIG BRJOD BYAS DBEN PA MIN NAM ZHE NA, LTA BA MI GO BA'I GONG GI GANG ZAG LA LTOS NAS STONG PA RTEN 'BYUNG GI DON DU KHO BO CAG MI SMRA YI, RANG BZHIN RDUL TZAM YANG MED PAR RTOGS PA'I SHES RAB SKYES PA NA CHOS RNAMS KYI YOD PA RANG NGOS NAS CUNG ZAD KYANG BZHAG TU MED PAR RTOGS SHING GZHAN LA LTOS PA'I YOD PA KHO NAR MTHONG BA NA, LTOS PA ZHES PA'I SGRA'I DON DNGOS SU NGES PA NA RANG NGOS NAS MED PA'I STONG PA SHUGS LA NGES SHING, STONG PA DNGOS SU NGES PA'I BLO DE MA THAG 'DREN PAR BYED PA LA STONG PA RTEN 'BYUNG GI DON DU GSUNGS PA YIN NO, ,'DI DAG GI DON RGYAS PAR LAM GYI RIM PAR GSUNGS ZIN PAS BRJED BYANG DU MA BRIS SO, ,DGE BA'I BSHES GNYEN GYI GSUNG GI GDAMS PA RNAMS MI NYAMS @016A *, ,PA'I DON DU, THEG PA MCHOG GI BRTUL ZHUGS LA GNAS PA'I DGE SLONG DAR MA RIN CHEN GYIS BRJED BYANG DU BRIS PA'O, ,'DIS BSTAN PA RIN PO CHE DAR ZHING RGYAS LA YUL RING DU GNAS PAR GYUR CIG ,DGE'O, ,