*, ,TSUL KHRIMS YANG DAG PAR SRUNG BA'I MAN NGAG CES BYA BA
BZHUGS SO,,

@001A #, ,RGYA GAR SKAD DU, SH'I LA SAm MYAKA RAKshA AU PA DE
SHA N'A MA, BOD SKAD DU, TSUL KHRIMS YANG DAG PAR SRUNG BA'I MAN
NGAG CES BYA BA, THAMS CAD MKHYEN PA LA

PHYAG 'TSAL LO, ,'KHOR MANG DBUS SU SENG GE'I SGRA BSGRAGS PAS,
,TSUL 'CHAL LOG PAR SMRA BA'I KLAD 'GEMS SHING, ,KHRIMS LDAN DAM
PA'I RJES 'GRO MA LUS PA, ,

DBUGS 'BYIN SH'AKYA SENG GE LA PHYAG 'TSAL, ,DE YIS BRTZE BAS
BCAS PA'I BKA' YI KHRIMS, ,'PHAGS TSOGS STONG GI SPYI BOS LEGS
BSTEN PA'I, ,YON TAN 'BYUNG GNAS

TSUL KHRIMS BSLAB PA LA, ,TSUL BZHIN BSLAB PA'I GDAMS PA BDAG
GIS BSHAD, ,BAG YANG SPYOD PAS GROL BAR SMRA BA DANG, ,'CHAL
TSUL DUR SMRIG ZOL LA SKYABS BCAS

@002A *, ,PA, ,DE DAG RNAMS KYI THUGS LA MI 'BAB KYANG, ,BLO
LDAN RNAMS LA DGA' BA RGYAS PAR BYED, ,DE LA 'DIR TSUL KHRIMS
YANG DAG PAR SRUNG BA'I MAN NGAG BSHAD PA LA

GNYIS, BLO CHOS SU 'GRO BA'I GDAMS PA DANG, CHOS LAM DU LONGS
PA'I GDAMS PA'O, ,DANG PO NI, MI KHA CIG ,CHOS 'DI RANG MI BDEN
PAR 'DUG ZER TE, NYI ZLA GZA' SKAR DANG BCAS

PA SA LA LHUNG ZHING GNAM SA MGO MJUG LDOG KYANG SRID, DE BZHIN
GSHEGS PA MI BDEN PA'I RDZUN GSUNG BA GCIG KYANG MI SRID DE,
TING NGE 'DZIN RGYAL PO LAS, ZLA BA SKAR MAR BCAS PA

GNAS LTUNG ZHING, ,RI DANG GRONG DU BCAS PA'I SA ZHIG LA, ,NAM
MKHA'I KHAMS NI RNAM PA GZHAN GYUR KYANG, ,KHYOD NI MI BDEN PA
YI TSIG MI GSUNG, ZHES GSUNGS PAS CHOS MI BDEN MI SRID,

GANG ZAG CHOS BZHIN MI BYED PA RE RE GNYIS GNYIS MTHONG BA LA
BRTEN NAS CHOS PA KUN LA 'BAR BAR 'DUG STE, RANG CHOS BYED
SNYING MI 'DOD PA'I SKYABS SU GZHAN LA 'CHA' BAR GDA',

@002B 'JIG RTEN GYI SNANG BA 'DIS RTAG THUB NA LTA CHOS MA BDEN
NA YANG DRAG STE, 'JIG RTEN GYI SNANG BA 'DIS BSLU BAR 'DUG
KYANG SKYUG MI LDOG ,CHOS BYAS PA'I 'PHRAL GYI BDE SKYID MTHONG
YANG MI BDEN PA SKAD

ZER BA'I MI MNO BSAM CHUNG LA KHA RTOGS CHE BA 'DI KUN 'CHI KHAR
SDUG SKAD 'CHOR TE, CHOS KYI LA YOGS KYIS SKYOB MKHAN BYI'U
'THENG MA GCIG KYANG MI YONG GSUNG, DE'I RIGS LA DAM PA RNAMS

THUGS KHREL NAS, DAM PA'I LHA CHOS BDEN PAR MI 'DZIN PAR, ,SNANG
BA BDEN PAR 'DZIN LA YID CHES BYED, ,CHOS BYED KHYAD DU GSOD
PA'I RANG RTZIS CAN, ,'CHI KHAR SDUG SKAD 'DON NA KHYOD LA
KHREL,

GSUNG, YANG MI KHA CIG ,TSE 'DIR SDUG BSNGAL CHER MA MYONG BAR
GSOG 'JOG 'JIG RTEN GYI BYA BA LA BLO ZHUGS, BYA BA BYA DGOS
MANG PO'I BSAM MNO GTONG GTONG NAS 'CHI BA YOD SEMS PA NI MED,

'KHOR DANG LONGS SPYOD 'DZOM PA'I RBOD GTONG NI YOD, BKA' GDAMS
GSAR RNYING GI RAB TU BYUNG BA GTZANG SING NGE BA DANG 'PHRAD NA
NI 'DRER 'DZIN GYIS KHONG KHRO BAR BYED CING, DER GZHAN GYIS DGE
BA LA BSKUL

NA'ANG NGED DAD PA CAN RANG MIN ZER NAS NGO NAG LOG GE 'GRO BA
TSAN CIG GDA' STE, SBYIN PA MI GTANG BA'I NOR BSAGS PA DON MED
YIN, 'CHI RTZA NA DGE BA'I LAS KYI 'BRAS BU TIL 'BRU TZAM YANG

@003A *, ,MED PA'I MI TSE STONG ZAD BYA BA NI, SKYES BU DAM PA
RNAMS KYI THUGS BRTZE BA'I YUL YIN GYI, GZHAN BYA THABS ZAD, DE
'DRA'I RIGS LA 'DI SKAD GSUNGS, 'JIG RTEN 'DI YI BDE BAS

TSIMS PA TSO, ,PHYI MA SDUG GI DOGS PA'I BSAM PA MED, ,SNANG BA
'GYUR KYANG RANG NYID RTAG TU RE, ,RE BAS BSLU STE BSLU SNYAM
SEMS PA MED, ,MI DE DNGOS PO'I BDUD KYIS KHYER BA YIN, ,GSUNG
BAR GDA',

YANG MI RMONGS PA LA LHA CHOS RANG MI YONG, NAN LTAR DKA', DE
LAS MI CHOS GYOB BE BA RE MI TSE 'BYID SLA ZER TE, DKA' SLA'I
'DAM GA SUS BTANG, CHOS DKA' YANG 'BRAS BU SANGS RGYAS DANG NAM
GZHAG

GTAN GYI MDUN MA YIN, THA NA BTZUN RKANGS ZIN TZAM LAS GZHAN MA
BYUNG NA'ANG SKYE BA PHYI MA 'TSENGS NAS 'GRO, MI CHOS SLA'ANG
'BRAS BU TSE 'DI GCIG PU'I BDE SKYID YIN, ,PHYI MA'I 'BRAS BU NI
NGAN SONG

GI SDUG BSNGAL DANG, 'KHOR BAR GTAN 'KHYAMS BYA BA YIN, GROGS PO
DAG SOMS DANG, CHOS PA NAN LTAR SDUG KYANG RANG NYID GCIG PU
SDUG PA YIN, KHYIM THABS BYAS NAS GZA' TSO NANG

GANG SDUG PA YIN, DE TZA NA BZA' MI SDUG 'THAB 'CHOR TE, DA RES
LAN BYAS PAS NI MA BYUNG, SDUG KUN 'KHUR BA MIN PA GZHAN MED,
CHOS BZHIN BYAS NA SKYID SDUG GI KHAG BLA MAS 'KHUR BA YIN GSUNG

@003B STE; DAM PA'I LHA CHOS DKA' NAS 'JOG PA TSO, ,SKYID PA MI
'DAM SDUG PA 'DAM PA TSO, ,'DAM GA NYES NAS KHYIM SO BYAS PA
TSO, ,DMYAL BA YI DVAGS PHYED MA THOB PA YIN, ,GLAN CING LKUGS
PAS DUD 'GRO DNGOS SU GYUR, ,

SPYANG KI GDONG DMAR BAS KYANG DMAR DAD CHE, ,RTA RENGS BONG
RENGS LAS KYANG 'DOD CHAGS CHE, ,BRDZUN TSIG SMRA BA WA BSHOR
LAS KYANG MKHAS, ,NYON MONGS THAMS CAD SKYED PA'I CHANG NYID LA,
,'DRE SRIN RGYAL 'GONG

BAS KYANG GDUNG BA CHE, ,TSE 'DI'I MIG NYES GTAN GYI BDE BA
SHOR, ,BSAM ZHIG YOD NA BSAM MNO DRAG TU THONG, GSUNGS, YANG MI
KHA CIG ,DANG PO SO MA'I THO LA CHOS BYAS, CHOS KYI GO BA NI MA
RNYED, LTO GOS SHA THANG THANG DU BSGRUB

DGOS PA BYUNG, GZHAN GYIS STER BA'I YON TAN NI MA LOBS, DKA'
THUB NI MA NUS, LAS KHA BYAS PAS NI CHOS SHOR, DER MNO BSAM
BTANG BAS GANG YANG MED PA'I 'DOM 'DOM 'DI LAS GZA' GROGS SHIG
BTZAL

LA SO NAM SPRAD SPRAD BYAS PA DRAG SNYAM NAS CHOS LOG ,DER MI
KUN GYIS CHOS MI NUS PA ZHES BSREGS PA NA, CHOS MA NUS PA'I
ZLA'U MANG PO BGRANGS NAS CHOS PA'I MTSANG SHOD, MI DGE BA SNA
TSOGS BYED, SKABS SU

SDUG 'GYOD RE BYUNG YANG BU SMAD GZHAG TU MA BTUB, DA DMYAL BAR
'GRO BA LA KHA GTING MED ZER BA'I RIGS LA 'DI SKAD GSUNGS, CHOS
SGOR ZHUGS NAS CHOS LAS LOG PA TSO, ,SKYID SDUG 'DAM GA NOR YANG
SKYOB

@004A *, ,TSIG SMRA, ,DPE ZLA NGAN PA BGRANG ZHID CHOS LA GSHE,
,MCHONG STEGS BRTZIGS NAS MTSO GTING MCHONG BA YI, ,MI DE DNGOS
SU BDUD KYIS KHYER BA YIN, GSUNG, YANG GSUNG RAB KYI DON MA

RTOGS PA 'GA' ZHIG ,CHOS BYAS MA BYAS KHYAD PAR MI 'DUG ,CHOS PA
LA'ANG NA TSA DANG SHI CHANG NI YONG GI 'DUG ,'DOD PA'ANG CHOS
PA RANG CHE BA 'DUG ZER TE, LAS NYON GYI DBANG GIS SKYES NAS
'CHI BA LAS 'OS

GANG YONG, CHOS BYAS MA BYAS 'CHI LUGS MI 'DRA, CHOS PA RAB 'CHI
BA LA BROD, 'BRING 'CHI BA LA MI 'JIGS, 'CHI BA LA DGA' YAL LE,
BAG DRO HUR RE 'CHI BA YIN TE, SKYES RABS LAS, GANG LAS BDAG GI
YID NI

'GYOD GYUR PA, ,DE NYID BDAG GIS BYAS PA YONGS MI DRAN, ,DKAR
PO'I LAS KYANG RAB TU GOMS PAR BYAS, ,CHOS LA GNAS NA 'CHIBS SU
ZHIG 'JIGS, ZHES DANG, TSOMS LAS KYANG, BSOD NAMS BYAS

SHING SDIG PA MA BYAS LA, ,DAM PA RNAMS KYIS BSTAN PA'I CHOS
SPYAD PAS, ,DE NI NAM YANG 'CHI BA'I 'JIGS MED DE, ,BRTAN PA'I
GRU YIS PHA ROL 'GRO BA BZHIN, ZHES GSUNGS PAS SO, ,CHOS MED
RNAMS

'CHI RTZA NA 'GYOD TING NGE NGO NAG LOG GE 'CHI BA YIN TE, TSOMS
LAS, SDIG PA BYAS SHING BSOD NAMS MA BYAS LA, ,CHOS DANG GOL
ZHING CHOS MIN THOS PA'I MI, ,SDIG PA'I LAS CAN 'CHI BA'I 'JIGS

@004B 'GYUR TE, ,CHU CHEN NANG DU GRU NGAN ZHIG PA BZHIN, ZHES
GSUNGS, DE BZHIN DU CHOS TSUL BZHIN BYED PA RNAMS LA NA TSA SOGS
SDUG BSNGAL BYUNG YANG, SDUG NA KUN GYI SDUG BSNGAL 'KHUR, ,SDUG
BSNGAL RGYA MTSO

SKEMS PAR SHOG ,CES GSUNGS PA BZHIN DU LAM DU KHYER NAS 'GRO,
'DOD PA CHE BAR MNYAM YANG CHOS PA'I 'DOD PA CHOS KYI 'DOD PA
YIN PAS DGE BAR 'GRO BA SOMS DANG, DE LA DGONGS NAS YANG DGON
PAS, NA BA

ZUG TU MNYAM YANG GROGS SU 'KHYER, ,'CHI BA SROG DU MNYAM YANG
BDE BAR SNYEG ,'DRAD MI 'DRA CHOS KYI YON TAN YIN, ZHES GSUNGS
PAS, CHOS TSUL BZHIN BSGRUB PA'I GROGS PO DAG LA MIG YAR BLTAS
NAS

CHOS RNAM PAR DAG PA ZHIG NGES PAR BYED DGOS, DGOS PA'I RGYU
MTSAN YANG, RANG CAG RNAMS DA LTA BDE BA KHO NA 'DOD CING SDUG
BSNGAL MI 'DOD PAR MA ZAD, DBANG BYUNG NA TSER MA ZUG PA'I SDUG
BSNGAL TZAM YANG MI BZOD

PAR 'DUG NA NGAN 'GRO'I SDUG BSNGAL DRAG LA YUN RING BA DANG,
SKYE RGA NA 'CHI'I SDUG BSNGAL 'JIGS SU RUNG BA 'DIG NAS BZOD,
DES NA DA RES RANG RE RNAMS MI LUS RIN PO CHE THOB PA'I DUS
'DIR, YAR MTHO RIS SU

PHYIN NAS LHA'I BDUD RTZI 'THUNG BA ZHIG BYED DAM, MAR NGAN SONG
DU PHYIN NAS KHRO CHU KHOL MA DANG RNAG KHRAG SOGS MI GTZANG BA
'THUNG BA ZHIG BYED, RANG RE'I LAG NA 'DUG PA 'DAM GA MA NOR BA
ZHIG BYED DGOS TE, RJE THAMS CAD

@005A *, ,MKHYEN PA TZONG KHA PA'I ZHAL NAS, GTAN GYI BDE BA CIG
BSGRUB PA'I PHYIR DU CHOS RNAM DAG BSGRUB PA ZHIG MA BYUNG NA,
MA SHI TSUN CHAD KYI BDE BA BSGRUB PA DANG SDUG BSNGAL SEL BA
TZAM LA BRTZON PA

NI DUD 'GRO LA'ANG YOD PAS, BDE 'GROR SKYES KYANG DUD 'GRO DANG
'DRA GSUNG STE, SHIN TU THUGS MED DUD 'GRO RNAMS LA'ANG MA
'KHYAGS PA DANG, MA RTOGS PA'I DA LTA BDE BA DANG SKYID PA ZHIG
BYUNG NA BSAM PA YOD, RANG

RE LA'ANG TSE 'DIR KHA NGOMS GROD PA 'GRANGS TZAM GYI BDE SKYID
LA THOB BYAR BYAS NAS, BAG MED KYIS DUS 'DA' NA DUD 'GRO DANG
KHYAD PAR MED DE, SDUG BSNGAL RGYA MTSO CHE LAS SGROL BA'I GRU,
,DAL 'BYOR TSANG BA'I RTEN

'DI YIN NA YANG, ,BAG MED LE LO GNYID DANG BRE MO'I GTAM, ,RNYED
BKUR 'DOD PA'I SKYON GYIS SBAGS PA YIS, ,DON MED PHYOGS SU BKOL
BAS DON CHEN PO, ,BDE BLAG BSGRUB PA'I LUS BZANG CHUD GSON PA,
,MI YI SHA

TSUGS PHYUGS KYI 'DU SHES CAN, ZHES GSUNGS, 'O NA MI LUS RIN
CHEN THOB PA'I DUS 'DIR SDUG BSNGAL BZLOG DGOS PA'I RGYU MTSAN
CI YIN ZHE NA, MI'I LUS RTEN 'DI LAS GZHAN PA'I CHOS RNAM DAG
BSGRUB PA'I

RTEN MED DE, NGAN SONG GSUM NI SDUG BSNGAL CHE DRANGS NAS CHOS
BSGRUB PA'I SNGON LA CHOS KYI MNO BSAM TZAM YANG MED, LHA RNAMS
NI SKYO SHAS CHUNG BAS MI YONG, DES NA DA LTA RANG CAG RNAMS
RNYED PAR DKA' BA'I MI,

@005B LUS THOB, DBANG PO SGO LNGA TSANG, SANGS RGYAS KYI BSTAN
PA RIN PO CHE DANG MJAL, DGE BA'I BSHES GNYEN GYIS ZIN, CHOS
BYED TSUL NI SHES, BYED DBANG YOD PA'I DUS 'DIR MI BYED NA NAM
BYED, DAM PA'I ZHAL NAS, DA LTA MI

KHOM KHOM DUS NAM ZHIG YIN, ,SGRUB PA NAM BYED BLTA'O DING RI
BA, ZHES GSUNGS, YANG GAL TE SKYE BA PHYI MA RNAMS SU MI LUS
'THOB PAS DE DUS BYED DO ZHE NA, DA LTA MTHUN RKYEN 'DZOM PA 'DI
'DRA'I DUS SU MI BYED PAR PHYI MA

NGAN 'GROR SKYES PA'I DUS SU BYED DAM, SPYIR YANG BDE 'GRO TZAM
THOB PA LA TSUL KHRIMS LA SOGS PA'I DGE BA SNA RE DGOS, KHYAD
PAR DAL 'BYOR GYI RMI LUS RNAM DAG THOB PA LA TSUL KHRIMS RNAM
PAR DAG PAS GZHI BZUNG,

SBYIN SOGS KYIS GROGS BYAS, SMON LAM DRI MA MED PAS MTSAMS SBYOR
BA SOGS RGYU MANG PO BSGRUB DGOS PAS, PHYI MAR CHOS BYED PA'I
RTEN RNAM DAG THOB PA LA DA LTA CHOS RNAM DAG CIG BYED DGOS PAR
'DUG ,'O

NA TSE 'DIR CHOS MA BYAS PAR PHYI MA NGAN 'GROR SKYES KYANG, RE
ZHIG NAS THAR YONG BAS DE NAS BYED DO ZHE NA, DA LTA RANG RE
BLANG DOR PHRAN TSEGS SHES PA'I KHUNGS SU BYAS KYANG, NGAM NGAM
SHUGS KYIS MI DGE BA GANG

'DRA ZHIG GSOG GI 'DUG ,NGAN SONG DU SKYES NA BLANG DOR LA
RMONGS PAS SDUG BSNGAL MYONG BZHIN DU SDIG PA RANG SHUGS KYIS
GSOG ,DPER NA SPYANG KI LA SOGS PA RNAMS LA LTOS DANG, DES NA
SDUG BSNGAL

@006A *, ,MYONG BZHIN DU SLAR YANG NGAN 'GRO'I RGYU BSAGS NAS
BDE 'GRO'I MING TZAM YANG MI THOS PAR BSKAL PA MANG POR GNAS
DGOS TE, SPYOD 'JUG LAS, BDAG GI SPYOD PA 'DI 'DRAS NI, ,MI YI

LUS KYANG THOB MI 'GYUR, ,MI LUS THOB PAR MA GYUR NA, ,SDIG PA
'BA' ZHIG DGE BA MED, ,GANG TSE DGE SPYAD SKAL LDAN YANG, ,DGE
BA BDAG GIS MA BYAS NA, ,NGAN SONG SDUG BSNGAL KUN RMONGS PA,
,DE TSE BDAG GIS

CI BYAR YOD, ,DGE BA DAG KYANG MA BYAS LA, ,SDIG PA DAG KYANG
NYER BSAGS NA, ,BSKAL PA BYE BA BRGYAR YANG NI, ,BDE 'GRO'I SGRA
YANG THOS MI 'GYUR, ,DE NYID PHYIR NA BCOM LDAN GYIS, ,RGYA MTSO
CHER G-YENGS

GNYA' SHING GI ,BU GAR RUS SBAL MGRIN CHUD LTAR, ,MI NYID SHIN
TU THOB DKAR GSUNGS, ,SKAD CIG GCIG BYAS SDIG PAS KYANG, ,BSKAL
PAR MNAR MED GNAS 'GYUR NA, ,THOG MED 'KHOR BAR BSAGS SDIG

GIS, ,BDE BAR MI 'GRO SMOS CI DGOS, SHES DANG, DE TZAM KHO NA
MYONG GYUR NAS, ,DE NI RNAM THAR MI 'GYUR TE, ,'DI LTAR DE NI
MYONG BZHIN DU, ,SDIG PA GZHAN DAG RAB TU SKYE, ZHES GSUNGS PAS
SO, ,DES NA DAL 'BYOR

GYI RTEN THOB PA'I DUS 'DIR CHOS RNAM DAG CIG BYED DGOS SHING,
DE YANG DA LTA NYID NAS BYED DGOS TE, YANG DGON PAS, SKYE BA'I
SKYEL MA 'DI NI PHYI THAG THUNG, ,'CHI BA DANG, BSU MA 'DI NI
MEL TSE TSA, ,BDAG LA BZUR

@006B SA GZHAN YOD MA YIN NA, ZHES DANG, DAM PAS, G-YENG BA'I
RANG LA 'CHI BDAG BDUD KYIS KHYER, ,DA LTA NYID NAS SGRUBS SHIG
DING RI BA, ZHES PA DANG, YANG, YANG DGON PAS, TSE NGES MED LA
'CHI BA'I DUS BTAB MED,,

DGRA 'CHI BDAG KHO DAL BREL GYI BYUS MI RTZI, ,DUS DE RING LUS
SEMS BRAL GYUR NA, ,GDENG BLO BDE TSAGS SU CHUD DAM SOMS, ZHES
GSUNGS PAS, NAM 'CHI NGES MED KYI TSE THUNG ZHAG 'GA' 'O 'DI LA
DAM PA'I CHOS

RNAM DAG CIG BYA DGOS PA YIN NO, ,YANG MI LA LA SHI YANG SHI RU
CHUG ,KUN GYI LAM PO CHE YIN PAS 'JIGS RGYU CI YOD ZER TE, DE NI
RANG THOG TU MA BABS PA YIN TE, DE LTA SDUG BSNGAL DRAG PO RKANG
LAG GCOD PA'I

KHRIMS LA THUG PA ZHIG BYUNG NA 'JIGS SKRAG JI 'DRA ZHIG SKYE,
DE LAS 'CHI BA KHO 'JIGS TE, BRTZE BA MED PA'I 'CHI BDAG GI
GSHIN RJES NI ZIN, GNAD GCOD SDUG BSNGAL GYI TSOR BA DRAG POS NI
NYEN, BRTZIGS PA'I MKHAR

DU SDOD DBANG MED PAR NI SHES, SDIG SDUG GTAM NGAN GSUM LA MA
'DZEM PAR SHA THANG THANG DU BSGRUBS PA'I ZAS NOR RNAMS DANG,
GNYEN BSHES BRTZE GDUNG CAN RNAMS DANG 'BRAL BAR NI SHES, BSHANG
GCIS BSGRES

PA'I STAN LA NI 'DRE LDOG BYED, YAN LAG RNAMS NI G-YOB, MIG RIG
RIG DU NI BLTA, MI TSE STONG ZAD LA SONG BAR NI SHES, LAS NGAN
PA'I RLUNG SHUGS KYIS BDAS NAS 'JIGS RUNG NGAN 'GRO'I G-YANG
SAR NI 'KHYER LA KHAD,

@007A *, ,TSE 'DI'I RTZA 'JING PHUN SUM TSOGS PA'I NANG NAS RANG
NYID MAR GSEB NAS SPU STON PA BZHIN DU DBANG MED KYIS SKYAS CHEN
PO MYUR DU 'DEGS DGOS YOD NA SU ZHIG 'JIGS PA CI'I PHYIR SKYE
BAR MI

'GYUR TE, ZHI BA LHAS, BDAG NI MAL NA GNAS BZHIN DU, ,GNYEN
BSHES KUN GYI MTHA' BSKOR YANG, ,SROG 'CHAD PA YI TSOR BDAG
,BDAG NYID GCIG PUS MYONG BAR 'GYUR, ,GSHIN RJE'I PHO NYAS ZIN
PA LA, ,GNYEN

GYIS CI PHAN BSHES CI PHAN, ,DE TSE BSOD NAMS GCIG SKYABS NA,
,DE YANG BDAG GIS MA BSTEN TO, ,MGON PO BDAG MED BDAG GIS NI,
,'JIGS PA 'DI 'DRA MA 'TSAL BAS, ,MI RTAG TSE 'DI'I CHED DAG TU,
,SDIG PA MANG

PO NYE BAR BSAGS, ,SKYE BO YAN LAG BCAD PA'I SAR, ,DE RING KHRID
PA'ANG BRED GYUR TE, ,KHA BSKOMS MIG RTZA ZHAN LA SOGS, ,SNGAR
LAS GZHAN DU 'GYUR MTHONG NAS, ,GSHIN RJE'I PHO NYA 'JIGS 'JIGS
LTA'I, ,

SHA GZUGS CAN GYIS ZIN GYUR TE, ,'JIGS CHEN NAD KYIS THEBS GYUR
PA, ,RAB TU NYAM THAG SMOS CI DGOS, ,SU ZHIG 'JIGS CHEN 'DI LAS
BDAG ,LEGS PAR SKYOB PAR BYED 'GYUR ZHES, ,BRED SHA THON PA'I
MIG

BGRAD DE, ,PHYOGS BZHIR SKYABS DAG 'TSOL BAR BYED, ,PHYOGS BZHIR
SKYABS MED MTHONG NAS NI, ,DE NAS KUN DU YI MUG GYUR, ,GNAS DER
SKYABS YOD MA YIN NA, ,DE TSE BDAG GIS JI LTAR BYA, ZHES DANG,
RGYAL

@007B SRAS RIN PO CHES KYANG, TSE 'DI SKAD CIG GCIG GIS 'DZAD
'GYUR ZHING, ,BSAGS PA'I LONGS SPYOD SPYOD PA'I DBANG MED PAR,
,GLO BUR NYID DU DU MA'I NANG NAS BDAG ,GCIG PUR 'GRO TSE TSE
'DI'I MDUN MAS BSLUS, ,

BA SPU GYEN LANGS BSHANG GCI 'THUR DU RGYUG ,BYANG SHA PHYIR
SPOS MIG 'BRAS NANG DU BROS, ,ZAS KYI ZHEN LOG SKOM GYI SRED PA
'PHEL, ,LUS BSKYOD MI NUS SEMS KYI GYA GYU LDANG, ,'DI 'DRA'I
SDUG BSNGAL DRAG POS

BTAB PA'I TSE, ,SMAN PA MKHAS KYANG BCOS PA'I THABS MED CING,
,ZANG ZING RIM GROS BZLOG PAR MI NUS NA, ,GNYEN BSHES BRTZE
GDUNG CHE YANG CI BYAR YOD, ,RIG RIG MIG GIS NYE DU'I GDONG LA
BLTA, ,NOM NOM

LAG PAS RANG GI GOS LA 'JU, ,NGAR NGAR DBUGS KYI 'PHRENG BA CHAD
LA NYE, ,'JIGS 'JIGS 'DRA BA'I GSHIN RJES ZIN PA NA, ,'KHOR LOS
SGYUR RGYAL GYIS KYANG SKYOB MI NUS, ,STONG GSUM NOR GYIS

BKANG YANG BSLUR MI RUNG, ,ZHES GSUNGS PAS SO, ,DES NA TSE 'DI'I
GNYEN TSAN DANG LUS LONGS SPYOD GANG LA'ANG MA CHAGS PAR TSE
DANG SGRUB PA MNYAM PA'I 'CHI CHOS RNAM DAG GCIG BYED DGOS TE,
TSE 'DIR LUS

LONGS SPYOD GNYEN BSHES SOGS LA CHAGS PAS, TSE 'DI DANG PHYI MA
GNYIS KAR GYI SDUG BSNGAL GYI RGYU BYED PAS SO, ,DE LTAR YANG
RGYAL SRAS RIN PO CHES, NYE DU LA SOGS PA RTZE BAS TSE 'DI YI,
,PHUN TSOGS SGRUB

@008A *, ,LA NAN GYIS BSKUL BYED NA, ,PHAN PAR 'DOD NAS GNOD PAR
BYED PA YI, ,BLUN PO TSE 'DI DON GNYER DE DAG NYID, ,THAR BAR
BYA PHYIR TSE 'DI BLOS BTANG NAS, ,ZAB MO'I LAM LA 'BAD PAR BYA
DGOS

PAS; ;DE DAG DON DU DE DAG RAB SPANGS NAS, ,DBEN PAR BSGRUB LA
BRTZON PA SHIN TU GCES, ,'BYOR PA'I TSE NA BROS KYANG RJES SU
SNYEG ,RGUD PA'I TSE NA DRUNG DU BSNYEGS KYANG 'BROS, ,BU YIS
RANG GI PHA YANG GSOD BYED NA, ,NYE

DU RNAMS LA SU ZHIG YID RTON BYED, ,MNGON DU GYUR NA DGA' BA'I
TSUL STON CING, ,LKOG TU GYUR NA MI SNYAN SNA TSOGS SGROG ,PHAN
BTAGS LAN DU GNOD PA SKYEL BYED PA'I, ,BYIS PA'I GROGS POS MDZA'
YANG NGES PAR

BSLU, ,'BYOR TSE BZHIN 'DZUM KHA GSAG SNA TSOGS BYED, ,BDAG GI
'BYOR BA THABS KYIS 'BREL BYED CING, ,RGUD NA BZHIN BSDUS 'THAB
CING CUNG ZAD KYANG, ,PHAN MED GNYEN BSHES SKYONG BA 'KHRUL BAR
ZAD, ,

GNYEN MNGAS DAR BA BSDONGS NAS PHA ROL 'JOMS, ,SO SOR GYES NAS
NANG DU CHAGS SDANG BYED, ,GAL LA BABS NA PHA BU PHAN TSUN GSOD,
,GNYEN GYIS PHAN BDE BSGRUB PA SHIN TU DKON, ZHES DANG, 'TSOL
BA'I

TSE NA NYON MONGS BRGYA YI RTEN, ,RNYED NAS SPYOD PAR 'DOD TSE
SER SNA'I GZHI, ,GAL TE GZHAN GYIS PHROGS NA SMRE SNGAGS RGYU,
,SHI NAS PHAN PA MED PA'I NOR GYIS CI, ,ZHES GSUNGS, GAL TE PHYI
MAR MI PHAN KYANG TSE

@008B 'DIR PHAN PAS ZAS NOR SOGS BSGRUBS NAS RGYAGS PHYE SOGS
'DZOM PA DANG CHOS BYA'O ZHE NA, TSE 'DIR PHAN PA ZAS PHYI MAR
GNOD PA THU, ZAS NOR SNGON GYI SPYIN SHUGS SHIG MED NA BSGRUBS
KYANG 'GRUB PA'I NGES PA NI

MI 'DUG ,DA LTA MI KHA CIG RKANG KHRAG SA, LAG KHYAG RDO BYAS,
KHA CIG LHO TSONG BYANG DU SDEBS, BYANG TSONG LHOR SDEBS, KHA
CIG AAR JAG BRKU GSUM BYAS KYANG SKYID PO MIG GIS MI MTHONG BA
'DUG ,KHA CIG DAL BAR BSDAD

KYANG 'BOL LE SHIG GE BA YONG BA 'DUG ,RANG RE'ANG SHI MA LE
BUNG KYANG DKON MCHOG MKHYEN SNYAM DU BLO BLTOS BCAS, CHOS LA
'BUNGS NA TSE 'DI PHYI GNYIS KAR DU, 'TSENGS NAS 'GRO BA 'DUG
STE BYED MKHAN NYUNG,

SA PAn GYIS, BLO LDAN TSE 'DI SGRUB NA YANG, ,CHOS KYIS BSGRUBS
NA BDE BAR 'GRUB, ,DAM PA RNAMS DANG CHOM RKUN GYI, ,PHUN SUM
TSOGS PA'I KHYAD PAR LTOS, ZHES GSUNGS, DES NA THOG TU MI 'BAB
LA NYES PA CHE BA'I TSE 'DI'I

MDUN GRABS ZHOR LA BSKYUR NAS PHYI MA'I GRABS BYED DGOS TE,
RGYAL SRAS RIN PO CHES, PHYI RTZIS GRABS GSHOMS GROG SKAM NYA
RGYA 'DRA, ,BSAM PA THOG TU MI KHEL 'DOD MDUN BSKYUNGS, ,CIS
KYANG DRAN NA 'BYOR RGUD

'DU 'BRAL SEMS, ,BLTOS THUB CHOS LAS 'DUG GE MA nI BA, ZHES
DANG, DAM PAS, PHYI MA'I GNAS DER GROGS PO THAMS CAD SONG, ,ZLA
GROGS RGYAGS PHYE YOD DAM DING RI BA, ZHES GSUNGS PA LTAR BSAM
MO, ,'O NA

@009A *, ,NAM 'CHI NGES MED KYI TSE THUNG ZHAG 'GA' 'O 'DI LA
GNYEN 'KHOR DANG, LUS LONGS SPYOD SNYAN GRAGS SOGS TSE 'DI'I BDE
SKYID GANG LA'ANG MA CHAGS PAR CHOS RNAM DAG CIG BYED DGOS NA,
BYED

TSUL GANG 'DRA ZHIG BYED PA YIN ZHE NA, SPYIR THAMS CAD MKHYEN
PAS GDUL BYA'I DBANG GIS SNA TSOGS SHIG GSUNGS KYANG, CHES GTZO
BOR GYUR PA GDUL BYA MCHOG DMAN 'BRING GSUM GA LA NYE BAR MKHO
BA'I CHOS NYAMS

SU LEN TSUL MDO RGYUD DANG, DAM PA RNAMS KYIS DGONGS PA GCIG
DANG DBYANGS GCIG GIS GSUNGS TSUL MDOR BSDUS TE STON PA NI 'DI
LTAR, DE'ANG KHYIM NA GNAS PA NI NYON MONGS PA DU MA'I SKYON
DANG BCAS PA, RAB TU

BYUNG BA NI NYON MONGS PA LAS RGYAB KYIS PHYOG SHING CHOS BSGRUB
PA DANG RAB TU MTHUN PAS NA, MKHAS PAS NI RAB TU BYUNG BA LA
MNGON PAR DGA' BAR BYA ZHING, DE'ANG KHYIM GYI NYES DMIGS DANG,
RAB TU BYUNG BA'I PHAN YON LEGS

PAR BSAMS NA, SNGAR RAB TU BYUNG BA RNAMS BSAM PA BRTAN PA DANG,
KHYIM PA RNAMS KYANG SMON PAR 'GYUR BAS BAG CHAGS BZANG PO 'JOG
PAR 'GYUR BAS CUNG ZAD BRJOD PAR BYA'O, ,DE LA KHYIM PA RNAMS NI
'BYOR PA CHEN CHE BAS

NYAMS KYIS DOGS PA DANG, 'BAD PAS BSRUNG BAS GDUNGS PA'I SDUG
BSNGAL DANG, DBUL NA DBUL BAS 'TSOL BA'I SDUG BSNGAL DANG, PHYI
MA'I SDUG BSNGAL GYI RGYU BYA BA NGAN PAS BREL ZHING, SHIN TU
RMONGS PAS PHYIN CI LOG

@009B LA BDE BAR 'DZIN PA LAS NGAN GYI 'BRAS BU YIN TE, SKYES
RABS LAS, BRTZON RA 'DRA BA'I KHYIM LA NI, ,NAM YANG BDE BAR MA
SEMS SHIG ,PHYUG GAM YANG NA DBUL YANG RUNG, ,KHYIM NA GNAS PA
NAD DU CHE, ,GCIG NI BSRUNG BAS

NYON MONGS LA, ,GNYIS PA 'TSOL BAS SHA THANG NGO, ,PHYUG GAM
YANG NA DBUL YANG RUNG, ,GANG NA BDE BA MED GYUR PA, ,DE LA DGA'
BA RMONGS PA NI, ,SDIG PA'I 'BRAS BU SMIN PA NYID, CES GSUNGS
SHING, CHOS SGRUB PA'I

KHUNGS BYAS KYANG RANG BZHIN GYIS CHOS DANG 'GAL TE, DE NYID
LAS, KHYIM GYI SO NAM BYAS NA NI, ,BRDZUN DU MI SMRAR MI RUNG
ZHING, ,PHA ROL NYES PA BYED PA LA, ,NAN TUR MI BYAR MI RUNG
NGO, ,GAL TE CHOS BSHAD KHYIM GYI SO NAM

'CHOR, ,KHYIM LA PHYOGS NA CHOS KYANG GA LA 'GRUB, ,CHOS KYI LAS
NI RAB TU ZHI BA YIN, ,KHYIM GYI DON NI DRAG SHUL CAN GYIS
'GRUB, ,DE BAS CHOS DANG 'GAL BA'I SKYON YOD PHYIR, ,BDAG LA
PHAN 'DOD SU ZHIG KHYIM

NA GNAS, SHES DANG, DREGS DANG NGA RGYAL GTI MUG SPRUL GYI TSAD,
,RAB TU ZHI BA DGA' BA'I BDE 'JIG PA, ,SDUG BSNGAL MI BZAD MANG
PO'I GNAS GYUR KHYIM, ,KHUNG DANG 'DRA BAR SU ZHIG GNAS PAR
BYED, CES GSUNGS PAS,

KHYIM GYI NYES DMIGS RIG PAR BYAS NAS, TSE RABS THAMS CAD DU RAB
TU 'BYUNG BA'I SMON PA BYA STE, DRAG SHUL CAN GYIS ZHUS PA LAS
KYANG, BDAG KYANG SDUG BSNGAL GYI GNAS KHYIM GYI GNAS NAS MNGON
PAR BYUNG STE NAM

@010A *, ,ZHIG NA 'DI LTA BU SPYOD PAR 'GYUR, BDAG KYANG NAM
ZHIG NA DGE 'DUN GYI LAS DANG, GSO SBYONG GI LAS DANG, DGAG
DBYE'I LAS DANG, 'DUD PA'I LAS DE LA GNAS PAR 'GYUR SNYAM NAS,
DES

'DI LTAR RAB TU BYUNG BA'I SEMS LA DGA' BAR BYA'O, ,ZHES KHYIM
PA'I BYANG SEMS KYIS KYANG BSNYEN PAR RDZOGS PA LA SMON PAR
GSUNGS SHING, RJE BTZUN BYAMS PAS KYANG, RAB TU BYUNG BA'I
PHYOGS DAG NI, ,YON

TAN TSAD MED RNAMS DANG LDAN, ,DE LTAS SDOM BRTZON KHYIM PA YI,
,BYANG CHUB SEMS DPA' LAS KHYAD 'PHAGS, ZHES GSUNGS LA, SHA RA
BA'I ZHAL NAS KYANG, KHYIM PA LAS KAS BREL BA'I DUS SU GOS BZANG
BZANG

GYON LA DEN PHAR SONG DANG, RAB TU BYUNG BA AA RE SKYID SNYAM
NAS MA 'ONGS PAN RAB BYUNG GI BAG CHAGS 'JOG GSUNG, MCHOG GI
SPRUL SKU'I RTEN CAN GYI YANG DAG PAR RDZOGS PA'I SANGS RGYAS
RNAMS KYANG RAB BYUNG GI RTEN KHO

NA LA 'BYUNG GI ,KHYIM PA'I RTEN LA MI 'BYUNG STE, CHO 'PHRUL
CHEN PO BSTAN PA'I MDO LAS KYANG, 'DOD PA DAG NI RAB TU BSTEN
BYED CING, ,BU DANG CHUNG MA DAG LA SRED BSKYED NAS, ,SMAD PAR
BYA BA'I KHYIM LA BRTEN PA DE, ,BLA MED

BYANG CHUB DAM PA GZHAR MI THOB, ,GANG DAG 'DOD PA LCI SKAM ME
BZHIN SPONG, ,BU DANG CHUNG MA DAG LA SRED SPANGS NAS, ,KHYIM
GYIS SKRAG STE KHYIM NAS MNGON BYUNG BA, ,DE DAG BYANG CHUB
MCHOG 'DI RNYED MI DKA', ,GANG

@010B DAG KHYEM NA GNAS PAR BYED BZHIN DU, ,BYANG CHUB DAM PA
MCHOG 'DI THOB PA YI, ,SANGS RGYAS GANG YANG SNGON CHAD MA BYUNG
STE, ,MA 'ONGS PA NA'ANG MI 'BYUNG GNAS PA MED, ,RGYAL SRID
MCHIL MA'I THAL BA BZHIN SPANGS NAS,,

DBEN PAR 'DONG STE DGON PAR GNAS BYED PA, ,NYON MONGS SPANGS TE
BDUD NI BCOM NAS SU, ,BYANG CHUB RDUL MED 'DUS MA BYAS 'TSANG
RGYA, ZHES DANG, LUNG LAS KYANG, PHAN YON LNGA MTHONG BA'I MKHAS
PAS RAB TU BYUNG

BAR MOS PAR 'OS TE, LNGA NI, RANG GI DON MA 'DRES PAR THOB PAR
'GYUR BA DANG, BRAN DANG MNGAG GZHUG DANG, BKOL BA DANG, RANG
DBANG MED CING DGA' MGUR 'GROR MED PA DAG GIS MCHOD PA DANG
BSTOD PAR BYA BAR

'GYUR BA DANG, MYA NGAN LAS 'DAS PA 'GRUB PA DANG, BDE BA BLA NA
MED PA THOB PA DANG, MYANG 'DAS DE THOB PA LAS NYAMS KYANG LHAR
SKYE BA DANG, SANGS RGYAS KYI NYAN THOS SKYES BU DAM PA YANG DAG
PAR SONG BA MCHOG RNAMS

KYIS RNAM GRANGS DU MAR RAB TU BYUNG BA BSNGAGS PAR MTHONG BAS,
MKHAS PAS RAB TU BYUNG BAR BYA BAR 'OS PA NYID, CES GSUNGS SO,
,DES NA THAR PA DANG THAMS CAD MKHYEN PA BSGRUB PA LA RAB BYUNG
GI RTEN BSNGAGS PAR

MDO RGYUD TSAD LDAN GYI DGONGS 'GREL DANG BCAS PA RNAMS MI MTHUN
PA MED PAS, KHYIM PA RNAMS KYANG 'DI LTA BU'I GNAS LA SMON PAR
BYA ZHING RAB TU BYUNG BA RNAMS KYIS NI CHOS GOS DANG, LHUNG
BZED DANG, BSOD

@011A *, ,SNYOMS NGAN NGON TZAM GYIS CHOG SHES PAR BYAS NAS,
RANG RGYUD KYI NYON MONGS PA SBYONG ZHING, GZHAN GYI YON GNAS
BYED PA'AM DE LTA BU LA SMON PAR BYA DGOS TE, GZHON NU MA BDUN
GYI RTOGS

PA BRJOD PA LAS, SKRA RNAMS BREGS PAR GYUR NAS NI, ,PHYAG DAR
KHROD KYI GOS 'CHANG ZHING, ,DGON PA YUL DU 'DOD PAR NI, ,NAM
ZHIG DE LTAR 'GYUR ZHIG GU ,GNYA' SHING GANG TZAM RNAM BLTA
ZHING, ,SA YI LHUNG BZED

LAG THOGS NAS, ,DBYAS MED KHYIM NAS KHYIM DU NI, ,NAM ZHIG SLONG
MO SPYOD PAR 'GYUR, ,RNYED DANG BSKUR STIR CHAGS MED CING, ,NYON
MONGS TSER MA'I 'DAM RDZAB DANG, ,SBYONG BAR BYED CING GRONG
KHYER GYI, ,SBYIN PA'I GNAS

SU NAM ZHIG 'GYUR, ZHES GSUNGS PA LTAR BSAM MO, ,YANG 'GA' ZHIG
GOS PHYAG DAR KHROD DANG 'TSO BA BSOD SNYOMS LA BRTEN PA NI, MI
GZHAN GYIS SPRANG PO LTAR BRNYAS PA BYED PA DANG, NGAL ZHING DUB
PAS SDUG BSNGAL

GYI 'DU SHES 'BYUNG BA YANG YOD MOD KYANG, BLO DANG LDAN PA DAG
GIS NI DE'I GNYEN POR SDUG BSNGAL DANG LEN DANG, CHOS LA NGES
SEMS KYI BZOD PA BSTEN NAS SPRO BA'I 'DU SHES BSKYED DGOS TE,
YANG DAG PAR

RDZOGS PA'I SANGS RGYAS KYIS KYANG GOS RIN THANG MED PA 'BUM RI
BA DANG, KHA ZAS RO BRGYA PA SPANGS NAS PHYAG DAR KHROD KYI CHOS
GOS DMAN PA GSOL ZHING, NYID KYI LHUNG BZED NYID KYIS BSNAMS NAS
GRONG KHYER

@011B DU BSOD SNYOMS LA BYON PA'I DRANG SRONG CHEN PO'I RNAM
THAR LA SDUG BSNGAL GYI 'DU SHES BSKYED NA, TSE RABS GZHAN DU
SDUG BSNGAL DNGOS MYONG DGOS PA DANG, BCOM LDAN 'DAS KYIS NI
BSOD SNYOMS LA SOGS PA SBYANGS

PA'I YON TAN BCU GNYIS DANG LDAN PA LA LHAG PAR BSNGAGS PA DANG
BSTOD PAR MDZAD DE, JI SKAD DU, SBYANGS PA'I YON TAN BCU GNYIS
KYI PHAN YON BSTAN PA LAS, SLONG BA'I ZAS LA RAB TU ZHUGS PA NI,
,NGA RGYAL SPONG

ZHING BRNYAS PA BZOD PAR 'GYUR, ,LUS NI LCI BA'I DBANG DU GTONG
MI 'GYUR, ,MGRON DU BOS PA'I NYAMS NGA SDUG BSNGAL MED, ,TSIG TU
SMRA BA MED PAR SKYE BO DAG ,DGE BA RGYA CHEN GZHIR GYUR SBYIN
LA SBYOR, ,KHYIM GYI BSLAB

PA NGES PAR GANG YIN PA, ,DE LA SPYOD PA'I DGE SLONG SHIN TU
MDZES, ,DGE SLONG TSUL GYIS RANG NYAMS BDER 'TSO ZHING, ,RANG GI
BRTZON PAS BSGRUBS PA ZA BA NI, ,'TSO BA'I SKYON GYIS ZIL GYIS
GNON MI 'GYUR, ,'DI

LA PHYOGS SU CIS KYANG 'PHONGS PA MED, ,GANG LA BRTEN NAS RAB TU
BYUNG DE LA, ,DE BZHIN KHO NAR BSGRUB PA RNAM PAR MDZES, ,DON DU
GNYER BAS GNOD PAR MI 'GYUR ZHING, ,DAM PA RNAMS KYIS SPYOD PA'I
RJES SU

'JUG ,NYE DU'I SKYE BO SDUG DANG BDAG NYID KYI, ,LUS LA BSOD
PA'I KHA ZAS DE SPANGS NAS, ,ZAS KYI RO LA CHAGS PAR MA GYUR PA,
,CHOG PAR 'DZIN PA'I DGE SLONG RAB TU BRJID, CES GSUNGS PA'I
PHYIR RO, ,GNYIS

@012A *, ,PA CHOS LAM DU LONGS PAR BYED PA'I GDAMS NGAG NI, DE
LTAR RAB TU BYUNG NAS TSUL KHRIMS RNAM PAR DAG PA BSRUNG BA YIN
LA, TSUL KHRIMS RNAM DAG BSRUNG BA'ANG, TSUL KHRIMS BSRUNGS

BA'I PHAN YON DANG, MA BSRUNGS PA'I NYES DMIGS SHES PA LA RAG
LAS PAS, DES NA 'DI LA GSUM, BSRUNGS PA'I PHAN YON, MA BSRUNGS
PA'I NYES DMIGS, DE'I PHYIR TSUL BZHIN BSRUNG BAR GDAMS PA'O, ,

DANG PO NI, SO SO THAR PA'I DBANG DU BYAS PA'I TSUL KHRIMS 'DI
NI YON TAN THAMS CAD KYI GZHI RTEN YIN TE, DPUNG BZANG GIS ZHUS
PA LAS, JI LTAR LO THOG THAMS CAD SA LA NI, ,BRTEN NAS SKYON MED
PAR NI

SKYE BA LTAR, ,DE BZHIN TSUL KHRIMS BRTEN NAS DKAR CHOS MCHOG
,SNYING RJE'I CHUS BRLAN PAS NI RNAM PAR SKYE, ZHES DANG, MGON
PO KLU SGRUB KYIS KYANG, KHRIMS NI RGYU DANG MI RGYU'I SA BZHIN
DU, ,YON TAN KUN

GYI GZHI RTEN LEGS PAR GSUNGS, ,SHES DANG, DGRA BCOM CHOS KYI
TSONG DPON GYIS KYANG, JI LTAR SA NI SKYE DGU KUN GYI GZHI, ,DE
LAS 'BRU RNAMS SKYE BAR 'GYUR BA LTAR, ,DE BZHIN 'DUL BA SDOM
BRTZON

RNAMS KYI GZHI, ,DE BZHIN DE LAS BSOD NAMS RNAMS KYANG SKYE,
,TSUL KHRIMS YON TAN KUN GYI GNAS SU DGONGS, ,DE YI GNAS NI 'DUL
BA YIN PAR GSUNGS, ,'DI LA GNAS PAR GYUR NA MTHAR PHYIN

@012B 'GYUR, ,'DI LA MI GNAS MTHAR PHYIN GA LA 'GYUR, ,ZHES
GSUNGS SO, ,GZHAN YANG, MYANG 'DAS LA, TSUL KHRIMS NI DGE BA'I
CHOS THAMS CAD KYI THEM SKAS SO, ,SHING LA SOGS PA'I RTZA BAS
YIN PA LTAR RTZA

BA'O; ;TSONG DPON TSONG PA THAMS CAD KYI THOG MAR 'GRO BA LTAR,
,DGE BA'I CHOS THAMS CAD KYI THOG MAR 'GRO BA'O, ,BRGYA BYIN GYI
RGYAL MTSAN BSGRENG BA LTAR, CHOS THAMS CAD KYI RGYAL MTSAN NO,
,SDIG PA THAMS CAD

DANG NGAN SONG GI LAM GTAN GCOD PA'O, ,SDIG PA'I NANG THAMS CAD
GSO BA'I SMAN GYI SDONG PO LTA BU'O, ,SRID PA'I LAM NYAM NGA
BA'I RGYAGS TSOGS SO, ,NYON MONGS PA'I DGRA 'JOMS PA'I GO MTSON
NO, ,NYON MONGS PA'I

SBRUL GDUG PA SEL BA'I RIG SNGAGS SO, ,SDIG PA'I CHU LAS SGROL
BA'I ZAM PA'O, ,ZHES GSUNGS LA, DGE SLONG LA RAB TU GCES PA'I
MDO LAS KYANG, SHIN TU LEGS PAR TSUL KHRIMS GANG, ,BSDAMS PA'I
MI DE

MDZES PA'I GZUGS, ,'DUL BA LA NI NYE BAR GNAS, ,TSUL KHRIMS
BSLAB LA RANG YID CHES, ,MI DE NYI MA GCIG LA YANG, ,BSOD NAMS
PHUNG PO DPAG TU MED, ,GSOG CING SANGS RGYAS 'BRAS BU 'GRUB, CES
DANG,

TSUL KHRIMS 'DI NI BDE BA'I MCHOG ,TSUL KHRIMS 'DI NI THAR PA'I
LAM, ,TSUL KHRIMS 'DI NI YON TAN GZHI, ,TSUL KHRIMS 'DI NI SANGS
RGYAS RGYU, ZHES GSUNGS SO, ,MDOR NA SANGS RGYAS KYANG SGRIB
GNYIS

@013A *, ,BAG CHAGS DANG BCAS PA ZAG MED KYI SHES RAB KYIS
SPANGS PAS THOB PA YIN LA, SHES RAB DE NI TING NGE 'DZIN LAS
BYUNG ZHING, TING NGE 'DZIN DE YANG LHAG PA'I TSUL KHRIMS RNAM
DAG LAS BYUNG BA

YIN TE, LUNG LAS, DGE SLONG DAG TSUL KHRIMS LA GOMS PAR BYAS NA
TING NGE 'DZIN YUN RING DU GNAS PAR 'GYUR RO, ,TING NGE 'DZIN DE
LA GOMS PAR BYAS NA SHES RAB YUN RING DU GNAS PAR 'GYUR RO,
,SHES

RAB GOMS PAR BYAS NA 'DOD CHAGS DANG, ZHE SDANG DANG, GTI MUG
LAS SEMS YANG DAG PA KHO NAR RNAM PAR GROL BAR 'GYUR, ZHES
GSUNGS PAS SO, ,GZHAN YANG TSUL KHRIMS LA BRTEN NAS RIM GYIS

SNYING RJE'I BDAG NYID CAN BYANG CHUB SEMS DPA' RNAMS DANG
MTSUNGS PAR 'GYUR BA DANG, NYES SPYOD THAMS CAD SPANGS PA'I
THAMS CAD MKHYEN PA'I YE SHES THOB PA DANG, RGYAN GZHAN NI HA
CANG RGAN PA DANG, GZHON

PA LA BTAGS NA BZHAD GAD DU 'GYUR ZHING MI MDZES KYANG, TSUL
KHRIMS KYI RGYAN NI RGAN GZHON PAR MA GANG LA LDAN KYANG MDZES
PA DANG, DRI GZHAN NI RLUNG GI PHYOGS SU 'GRO BAS PHYOGS RE BA
YIN LA, TSUL KHRIMS

KYI GRAGS PA'I DRI NI PHYOGS THAMS CAD DU 'GRO BA DANG, TZAN DAN
LA SOGS PA'I BYUG PA NI RAB BYUNG LA 'GAL YANG, NYON MONGS KYI
TSA GDUNG SEL BA'I TSUL KHRIMS KYI BYUG PA RAB BYUNG DANG MTHUN
PA DANG, RAB BYUNG

@013B GI RTAGS TZAM 'DZIN PAR MTSUNGS KYANG, TSUL KHRIMS RNAM
DAG DANG LDAN PA NI GZHAN LAS PHUL DU BYUNG STE, DPA' BOS, TSUL
KHRIMS DE NI KHYAD PAR 'THOB PA'I LAM, ,SNYING RJE'I DAD CAN
RNAMS DANG MNYAM PAR

SGRUB, ,YE SHES GTZANG MA PHUL GYI RANG BZHIN TE, ,SKYON BRAL
RGYAN DU GYUR PA'I MCHOG CES BYA, ,KHAMS GSUM KUN TU YID 'ONG
DRI BSUNG STE, ,RAB TU BYUNG DANG MI 'GAL BYUG PA YIN, ,CHA LUGS
MTHUN YANG TSUL

KHRIMS LDAN GYUR NA, ,MI YI NANG NA DE NYID 'PHAGS PAR 'GYUR,
ZHES GSUNGS SHING, GZHAN YANG 'BAD RTZOL GYIS MA BSGRUBS KYANG
LONGS SPYOD NGANG GIS 'DU ZHING, STOBS KYIS MA BSDIGS KYANG SKYE
BO KUN NGANG GIS

SDUD PA DANG, GNYEN BSHES SOGS MA YIN ZHING SNGAR PHAN BTAGS PA
MA YIN PA'I NGO MA SHES PA'I SKYE BO RNAMS KYANG BYAMS SHING,
RKANG RJES KYI RDUL YANG LHA MI RNAMS KYIS MCHOD PA LA SOGS PA'I
PHAN YON

RNAMS KYANG TSUL KHRIMS LAS BYUNG STE, DE NYID LAS, TSIG TU MA
BRJOD TSOGS SU MA GYUR KYANG, ,NYAMS SU MKHO BA'I LONGS SPYOD
RIM GRO 'DU, ,BSDIGS PA MED PAR 'JIG RTEN KUN 'DUD DE, ,TSEGS
MED MA

BSGRUBS DBANG PHYUG 'THOB PAR 'GYUR, ,BRJOD DU MA 'OS RIGS SU
'BYUNG BA DANG, ,PHAN ZHING DBEN PA GANG YANG MA BYAS SHING,
,SNGON CHAD MI SHES SKYE BO THAMS CAD KYANG, ,TSUL KHRIMS LDAN
PA'I SKYE BO DE LA 'DUD, ,

@014A *, ,RKANG PAS BKRA SHIS GYUR PA'I RDUL DAG KYANG, ,SPYI
GTZUG DAM PAS BLANGS SHING LHA DANG MIS, ,PHYAG 'TSAL MGOS GTUGS
THOB PA KUN DU 'KHYER, ,DE PHYIR TSUL KHRIMS DAD LDAN RIGS

MCHOG YIN, ZHES GSUNGS SHING, DE DAG GI DON NI RJE THAMS CAD
MKHYEN PAS, TSUL KHRIMS NYES SPYOD DRI MA 'KHRUD PA'I CHU, ,NYON
MONGS TSA GDUNG SEL BA ZLA BA'I 'OD, ,SKYE DGU'I DBUS NA LHUN PO
LTA BUR

BRJID, ,STOBS KYIS BSDIGS PA MED PAR 'GRO KUN 'DUD, ,DE LTAR
SHES NAS YANG DAG BLANGS PA'I KHRIMS, ,DAM PA RNAMS KYIS MIG
BZHIN BSRUNG BAR MDZAD, ,RNAL 'BYOR NGAS KYANG NYAMS LEN DE LTAR

BYAS; ;THAR 'DOD KHYED KYANG DE BZHIN BSKYANG 'TSAL LO, ,ZHES
GSUNGS PA LTAR RO, ,GZHAN YANG TSUL KHRIMS LEGS PAR BSRUNGS NA
ZAS GOS KYANG RNYED SLA STE, TSUL KHRIMS 'CHAL BA TSAR GCOD

PA'I MDO LAS, SH'A RI'I BU, NGA'I BSTAN PA 'DI LA NYES PA THOB
PAR MI 'GYUR LA, NGA'I NYAN THOS RNAMS NI CHOS GOS DANG BSOD
SNYOMS KYIS DUB PAR MI 'GYUR BAS, SH'A RI'I BU, SANGS RGYAS KYI
SA LA MNGON PAR

BRTZON PAR GYIS SHIG ,SH'A RI'I BU, 'JIG RTEN ZANG ZING LA GCES
PAR MA BYED CIG ,SH'A RI'I BU LTOS SHIG ,NGA NI 'DI SKAD DU,
RNAL 'BYOR SPYOD PA'I DGE SLONG RNAMS LA NI LHA BYE BA STONG
PHRAG DAG BDE BA THAMS CAD KYIS

@014B STOB PAS BRTZON PAR GNAS TE, SH'A RI'I BU MIS NI DE LTA
BU'I MCHOD PA DANG RNYED BKUR BYED PAR MI NUS SO, ,ZHES DANG,
SH'A RI'I BU, GANG GIS DE BZHIN GSHEGS PA'I RIGS SU BYUNG NAS
CHOS DE LA BRTZON 'GRUS KYIS

GNAS NA, 'DOD PA CHUNG BA'I LHA RNAMS DANG, 'DOD PA CHUNG BA'I
MI RNAMS DANG, 'DOD PA CHUNG BA'I SEMS CAN THAMS CAD LAS, DGE
SLONG RNAL 'BYOR SPYOD PA'I LHUNG BZED DANG, CHOS GOS 'BYUNG BAR
'GYUR RO, ,ZHES

DANG, YANG STON PAS, KHYIM PA'I SKYE BO THAMS CAD NI, ,SEN MO'I
STENG DU ZHING RMOD KYANG, ,NGA YI RAB TU BYUNG BA RNAMS, ,'TSO
BAS 'PHONGS PAR MI 'GYUR RO, ,ZHES GSUNGS SHING, DER MA ZAD TSUL
KHRIMS RNAM PAR DAG PA

BSRUNGS NA SNYAN PA'I GRAGS PAS KHYAB PA DANG, RGYAL PO DANG MI
DANG MI MA YIN GDUG PA CAN RNAMS KYIS KYANG GNOD PAR MI NUS PA
DANG, SNGON SANGS RGYAS MTHONG BA'I LHA RNAMS DGA' BAR 'GYUR
ZHING DE DAG GIS BSRUNG BA

DANG, BDE BAR GNYID LOG CING SAD PAR 'GYUR BA DANG, 'JIG RTEN
PA'I SKYE BO KUN GYIS BSTOD CING SBYIN GNAS SU 'GYUR BA DANG,
BLA MA DANG GROGS TSANGS PA MTSUNGS PAR SPYOD PA RNAMS KYI MDUN
DU NGO NONGS PA DANG BAG

TSA BA MED PA DANG, YON TAN GONG 'PHEL DU 'GYUR ZHING, 'GYOD PA
MED PAR TSE'I DUS BYAS NAS MTHO RIS SU SKYES NAS, RIM GYIS SDUG
BSNGAL THAMS CAD LAS GROL BA THOB STE, TSUL KHRIMS YANG DAG PAR
LDAN

@015A *, ,PA'I MDO LAS, TSUL KHRIMS LDAN PA SANGS RGYAS 'BYUNG
DANG 'PHRAD, ,TSUL KHRIMS LDAN PA RGYAN RNAMS KUN GYI MCHOG
,TSUL KHRIMS LDAN PA DRI DANG BYUG PA YIN, ,TSUL KHRIMS LDAN PA
GDUNG BA

SEL BA'I CHU, ,TSUL KHRIMS LDAN PA DGA' BA KUN GYI GNAS, ,TSUL
KHRIMS LDAN PA 'JIG RTEN KUN GYIS BSTOD, ,TSUL KHRIMS DAG GIS
'GRO BA DAM PA MNOS, ,JI LTAR SBRUL GDUG KLU CHEN NAG PO YANG,
,TSUL

KHRIMS LDAN LA GNOD MED GZHAN CI SMOS, ,TSUL KHRIMS LDAN PA'I
DGE SLONG 'OD DANG LDAN, ,TSUL KHRIMS LDAN PA GRAGS 'GYUR BDE BA
THOB, ,CES GSUNGS SO, ,MDOR BSDU NA, DPA' BOS, LHAR BCAS DGA'

RGYU MI YI LONGS SPYOD DANG, ,BDE MCHOG RO MCHOG LHA YI PHUN SUM
TSOGS, ,TSUL KHRIMS RGYUS BYUNG CI ZHIG NGO MTSAR CHE, ,SANGS
RGYAS CHOS RNAMS DE LAS BYUNG LA LTOS, ,SHES GSUNGS PA LTAR,
TSUL KHRIMS

LA BRTEN NAS SANGS RGYAS KYI GO 'PHANG MYUR DU THOB NA, DE LAS
GZHAN PA'I YON TAN RNAMS LTA CI SMOS, DES NA SHES RAB DANG LDAN
PA RNAMS KYIS PHAN YON 'DI DAG LEGS PAR BSAMS LA, BSLAB PA'I CHA
PHRA

MO TZAM LA'ANG SROG BSNGOS BYAS TE BSRUNG BA LA GDAMS PA'I MTHIL
DU ZUNGS SHIG ,GNYIS PA MA BSRUNGS PA'I NYES DMIGS NI, DGE SLONG
LA RAB TU GCES PA'I MDO LAS, LA LA'I TSUL KHRIMS BDE BA STE, ,

@015B LA LA'I TSUL KHRIMS SDUG BSNGAL YIN, ,TSUL KHRIMS LDAN PA
BDE BA STE, ,TSUL KHRIMS 'CHAL BA SDUG BSNGAL YIN, ,ZHES TSUL
KHRIMS BLANGS NAS MA BSRUNGS NA NYES DMIGS SHIN TU CHE BAR
GSUNGS SHING, SKYE

BA PHYI MA RNAMS SU LCAGS KYI LHUNG BZED ME 'BAR BA LA SOGS PA'I
DMYAL BA RNAMS SU YUN RING POR SDUG BSNGAL MYONG DGOS TE DE NYID
LAS, LHUNG BZED LA SOGS RAB 'BAR BAS, ,BSKAL PA STONG PHRAG DU
MA RU, ,DMYAL

PA'I KHRO CHU LTA BUR 'TSED, CES GSUNGS PAS SHIN TU 'JIGS PAR
GDA', DES NA RAB BYUNG GI SDOM PA BLANGS NAS TSUL BZHIN DU MI
SRUNG BAR TSE RING PO BSDAD PA LAS, TSUL KHRIMS DANG LDAN BZHIN
DU MYUR DU

SHI BA BLA STE, STON PAS, DGE SLONG DAG SROG DANG BRAL ZHING SHI
BA NI BLA'I, TSUL KHRIMS NYAMS SHING ZHIG PA NI DE LTA MA YIN
NO, ,DE CI'I PHYIR ZHE NA, SROG DANG BRAL ZHING SHI BAS NI SKYE
BA 'DI NYID KYI TSE YONGS SU ZAD PAR 'GYUR

GYIS, TSUL KHRIMS NYAMS SHING ZHIG PAS NI SKYE BA 'BUM PHRAG
BRGYA'I BAR DU RIGS DANG BRAL ZHING BDE BA SPANGS TE, RNAM PAR
LTUNG BA CHEN PO NYAMS SU MYONG BAR 'GYUR RO, ,ZHES GTAN TSIGS
DANG BCAS TE GSUNGS SO, ,

GZHAN YANG TSUL KHRIMS KYI RKANG PA NYAMS NA NI, 'KHOR BAS SKYO
NAS THAR PAR 'BROS 'DOD KYANG, 'GRO BAR MI NUS PAR MA ZAD SLAR
YANG NGAN 'GRO'I SDUG BSNGAL DRAG POS 'JOMS PA DPE DANG BCAS
PA'ANG, TING NGE

@016A *, ,'DZIN RGYAL PO LAS, MI ZHIG CHOM RKUN MANG POS RAB
GTZES NAS, ,'TSO BAR 'DOD PAS BROS SHING 'GROR BTZAL NA, ,DE YI
RKANG PA 'GRO ZHING RGYUG MI NUS, ,CHOM RKUN DAG GIS DE BZUNG
BCOM PA

LTAR; ;DE BZHIN TSUL KHRIMS NYAMS PA RMONGS PA'I MI, ,'DUS BYAS
DAG LAS 'BROS PAR 'DOD MOD KYI, ,TSUL KHRIMS NYAMS PAS DE YANG
'BROS MI NUS, ,NA RGA 'CHI BA DAG GIS SHIN TU 'JOMS, SHES DANG,
TSUL

KHRIMS YANG DAG PAR LDAN PA'I MDO LAS, JI LTAR MIG MED GZUGS
MTHONG MI RUNG LTAR, ,DE BZHIN TSUL KHRIMS MED NA CHOS MI
MTHONG, ,JI LTAR RKANG MED LAM 'JUG GA LA NUS, ,DE BZHIN TSUL
KHRIMS MED NA THAR

MI 'GYUR, ZHES NYES PA BSTAN PA BSAM GYIS MI KHYAB CING, TSUL
KHRIMS NYAMS NA GSANG SNGAGS RNAM PAR DAG PA YANG MI 'GRUB STE,
'JAM DPAL RTZA RGYUD LAS, TSUL KHRIMS 'CHAL LA THUB DBANG GIS,
,SNGAGS 'GRUB

PAR NI MA GSUNGS TE, ,MYA NGAN 'DAS GRONG 'GRO BA YI, ,YUL DANG
PHYOGS KYANG MA YIN NO, ,BYIS PA NGAN PA 'DI LA NI, ,SNGAGS
'GRUB PAR NI GA LA YOD, ,SKYE BO TSUL KHRIMS MED 'DI LA, ,DE LA
BDE 'GRO GA LA YOD,,

MTHO RIS SU YANG MI 'GYUR ZHING, ,BDE BA MCHOG TU'ANG MI 'GYUR
NA, ,RGYAL BAS GSUNGS PA'I SNGAGS RNAMS NI, ,'GRUB PAR 'GYUR BA
SMOS CI DGOS, ,SHES MDO RGYUD BSTAN BCOS DU MA NAS TSUL KHRIMS
'CHAL

@016B PA'I NYES DMIGS MTHA' YAS PA ZHIG GSUNGS SO, ,DE YANG MI
TSANGS SPYOD KYI DBANG DU BYAS PA'I NYES DMIGS NI, BU STON RIN
PO CHES, LOG PAR G-YEM PAS DMYAL BA BSDUS 'JOMS SU, ,GSAL SHING
'BAR BAR

RO SMAD 'BIGS PAR 'GYUR, ,DE NAS MI RU SKYES KYANG MA NING
'GYUR, ,RMI LAM BUD MED SPYAD PA'I RO MYANGS KYANG, ,DMYAL BA
PADMA LTAR GAS NANG DU NI, ,BUM PAR 'TSOD CING GTUN GYIS 'TSOG
'GYUR NA, ,DNGOS SU SPYAD PA

LTA YANG SMOS CI DGOS, ,BUD MED MTHONG NAS TSUL MIN YID BYED NA,
,MIG NI ZANGS ZHUN 'BAR BAS SREG PAR BYED, ,BUD MED GLU DBYANGS
THOS PAS CHAGS GYUR PA, ,RNA BAR RO MYAGS SKOL BA LDUGS PAR
BYED, ,BUD MED

GLU DBYANGS GAR LA CHAGS PA YIS, ,KHU BA PHYUNG NAS 'GYOD PAR MI
BYED PA, ,LCAGS KYI ME MDAG CHAR PA LUS LA 'BAB, ,GZHAN GYI
CHUNG MA LA SPYAD RDZUN SMRA BA, ,NGU 'BOD CHEN POR MUN PAS KUN
KHYAB PA, ,SPYI BO NAS PHUG

LCE PHYUNG BCAD KYANG NI, ,SKAD CIG RE RER SKYE ZHING GCOD PAR
BYED, ,MI RU SKYES KYANG DMUS LONG 'ON PA DANG, ,LAM ZAN SLONG
BA DAG TU SKYE BAR 'GYUR, ,DGE BSNYEN MA LA LOG PAR G-YEM PA
YIS, ,RAB TU CHE BAR THAL BA'I

LHAG MA YANG, ,MED PAR SREG CING TSE RABS BZHI BRGYA RU, ,ZA MA
DAG TU SKYE BAR 'GYUR BA YIN, ZHES DANG, BUD MED MTSAN MA SNYAN
NGAG GIS BSTOD PA, ,SKYE BA LNGA BRGYA MNGAL GYI SRIN BUR SKYE,
,CHAGS PAS SPYAD CING REG  

@017A *, ,PAS SMOS CI DGOS, SHES, MDO DANG 'DUL BA RNAMS NAS
GSUNGS PA'I DON BSDUS PAR 'DUG PAS 'JIGS PA SHIN TU CHE BAR MI
GDA' 'AM, GROGS PO DAG LEGS PAR SOMS LA BCAS

PA'I CHA SHAS PHRA MO LA'ANG RMA MA BYUNG BA ZHIG 'TSAL, YANG
CHOS MANG DU SHES KYANG TSUL KHRIMS MA BSRUNGS NANG NA 'GROR
'GRO BA LA KHYAD PAR MED DE, ZLA BA SGRON MA LAS, JI SNYED CHOS
KYI RNAM PAS BYANG CHUB KYANG, ,THOS PAS

RGYAGS PAS TSUL KHRIMS MI SRUNG NA, ,TSUL KHRIMS 'CHAL BA NGAN
'GROR DE 'GRO STE, ,DE LA THOS PA MANG POS SKYOB MI NUS, SHES
GSUNGS PA LTAR RO, ,MDOR BSDU NA PHAR PHYIN BSDUS PA LAS, TSUL
KHRIMS NYAMS

PAS RANG DON MI NUS NA, GZHAN DON TSUL LA MTHU YONG GA LAS 'ONG,
ZHES TSUL KHRIMS NYAMS NA RANG GZHAN GYI DON GANG YANG MI NUS
SHING, GZHAN YANG TSE 'DIR YANG THAMS CAD KYIS 'PHYA ZHING SMOD
PA DANG, RANG

DANG NYE BA RNAMS NGO TSA ZHING YID MI DGA' BA DANG, CHAGS SDANG
'GRAN SEMS CAN RNAMS MGU BAR 'GYUR BA DANG, SNGAR 'DRIS MED KYI
MIS KYANG RGYA CHER SMOD CING, YID NANG DU BKUG NAS BSAMS NA MYA
NGAN LDANG ZHING

'GYOD PA SKYE BA DANG, DKAR PHYOGS KYI LHA RNAMS KYIS RGYA CHER
'PHYA ZHING, NAG PHYOGS BDUD KYI SDE RNAMS DGA' BAR 'GYUR BA
DANG, MKHAN SLOB DANG TSANGS PA MTSUNGS PAR SPYOD PA'I DAM PA
RNAMS KYIS THUGS KHREL

@017B ZHING, DE DAG MTHONG NA 'BROS PA SOGS BAG CHAGS NGAN PA
'JOG PA DANG, MTHAR 'GYOD BZHIN DU SHI NAS NGAN SONG GI SDUG
BSNGAL MI ZAD PA MYONG DGOS PA SOGS BRJOD LAS 'DAS TE, DGE SLONG
LA RAB TU GCES PA'I

MDO LAS, BSLAB LA MI GNAS RTAGS 'DZIN LA, ,'JIG RTEN PA NI THAMS
CAD KYI, ,SNYING DU SDUG PAR MI 'GYUR ZHING, ,KUN GYI TSIG GI
NGAN GNOD PA, ZHES GSUNGS SHING, BU STON RIN PO CHES KYANG, GAL
TE KHYOD NI SDIG LTA'I

DBANG GYUR TE, ,MA MTHONG 'BRAS LA YID MI CHES NA YANG, ,MTHONG
BA'I CHOS KYI NYES DMIGS MANG PO ZHIG ,RANG GI BLO YIS MTHONG
BAR MA GYUR TAM, ,DAL 'BYOR LUS LA BSLAB GSUM RGYAN DANG LDAN,
,BSTAN LA

ZHUGS NAS SGRUB PA GTZOR BYED PA'I, ,DGE SLONG 'DUS NAS LAS LA
SPYOD PA'I TSE, ,SHING RUL BZHIN DU SPONG BA MA MTHONG NGAM,
ZHES DANG, SNGON CHAD RANG LAS DMA' DANG MNYAM POS KYANG, ,WA
SKYES YIN ZHES BRNYAS

PA MA MTHONG NGAM, ZHES DANG, SNGON CHAD RANG LA PHAN THOGS
'DRIS 'BREL BA'I, ,MA BZHIN SHA TSA SNYING NYE'I GROGS MCHOG
KUN, ,BU GCES SHI BA'I MA MA JI BZHIN DU, ,MYA NGAN KHANG BUR
ZHUGS PA MA MTHONG NGAM, ,SNGON CHAD

RANG LA PHRAG DOG 'GRAN SEMS CAN, ,MI MNYAM MNYAM DU RE BA'I
'BYUNG PO'I BYA, ,GTAM NGAN MUN PA GTIBS PAR SHES NAS NI, ,SKAD
NGAN GAD MO SGROG PA MA MTHONG NGAM, ,SNGON CHAD 'GROGS 'DRIS
MED PA'I LAM

@018A *, ,CHEN MI, ,CHAGS SDANG GNYIS KA SA DBEN PA'I SKYE BO
YANG, ,LO LEGS SNYE MA SAD KYIS KHYER MTHONG NAS, ,MYA NGAN CA
CO SGROG PA MA MTHONG NGAM, ,SNGON CHAD CHOS DANG ZANG ZING
GNYIS KA YIS,,

PHAN 'DOGS BKA' DRIN CHE BA'I SLOB DPON YANG, ,BKOR MDZOD RKU LA
SHOR BA'I BDAG PO BZHIN, ,MI DGA' BZHIN DU THABS MED MA MTHONG
NGAM, ZHES GSUNGS SO, ,GZHAN YANG TSUL 'CHAL NI WA DANG CHOS

BZHI'I SGO NAS 'DRA BAR DKON BRTZEGS LAS GSUNGS TE, MI GTZANG
BA'I KHUNG DU 'JUG ,MI GTZANG BA'I KHUNG DU GZHOL, 'TSO BA MI
GTZANG, KHYI LTA BU'I NYON MONGS PAS PHAM PAR BYAS PA'O, ,DES NA
SENG GE DANG 'DRA BA'I

TSUL KHRIMS DANG LDAN PAS WA DANG 'DRA BA'I TSUL KHRIMS 'CHAL BA
LA BSNYEN BKUR BYAS NA'ANG NYES DMIGS SHIN TU CHE STE, LUNG ZHU
BA LAS, TSUL KHRIMS DANG LDAN PAS TSUL KHRIMS 'CHAL BA LA SHES
BZHIN DU SO SHING

STOBS PAR BYED NA, LO STONG PHRAG DGU BCUR DMYAL BAR SKYE LA,
TSUL 'CHAL DANG LHAN CIG SKYA RENGS MA SHAR GYI BAR DU NYAL NA,
LO STONG PHRAG DGU BCU DANG, SKYA RENGS SHAR NAS NYAL NA LO BYE
BA PHRAG DGU BCUR DMYAL

BAR SKYE BAR GSUNGS PAS, TSUL 'CHAL DANG MNYAM DU NYAL BA TZAM
LA'ANG NYES PA DE LTAR GSUNGS NA, TSUL KHRIMS 'CHAL BA'I NYES PA
BRJOD GA NA DGOS, GZHAN YANG TSUL KHRIMS 'CHAL BA TSAR GCOD PA'I
MDO LAS,

@018B MI DGE BA BCU DANG LDAN PA'I MI ZHIG GIS LO BRGYA'I BAR DU
BAR MA CHAD PAR SDIG PA BSAGS PA LAS, RAB BYUNG TSUL KHRIMS RAL
BAS DRANG SRONG GI RGYAL MTSAN GYIS G-YOGS TE, DAD PAS BYIN PA
LA ZHAG GCIG

LONGS SPYAD NA MI DGE BA CHES CHE BAR GSUNGS SHING, LUNG RNAM
'BYED LAS KYANG, LCAGS GONG ME LCE 'BAR BA DAG ,ZOS PAR GYUR PA
MCHOG YIN GYI, ,TSUL 'CHAL YANG DAG MI SDOM PAS, ,YUL 'KHOR BSOD
SNYOMS

ZA BA MIN, ZHES GSUNGS LA, BU STON RIN PO CHES, TSUL 'CHAL YUL
'KHOR BSOD SNYOMS SPYOD PA NI, ,LCAGS GONG ME LCE 'BAR BA ZA BAR
SKYE, ,KHRIMS 'CHAL DGE 'DUN BTUNG BA 'THUNGS PA YIS, ,ZANGS
ZHUN

'BAR BA 'THUNG BAR SKYE BAR 'GYUR, ,SHES LDAN KHYOD LA MANG DU
SMOS CI DGOS, ,TSUL KHRIMS 'CHAL BAS SA NI GOM GANG DANG, ,ZAS
NI KHAM GCIG BTUNG BA CHU PHOR GANG, ,TZAM ZHIG DGE 'DUN RDZAS
LA LONGS SPYAD NA,,

LOG 'TSO YIN TE DMYAL BAR SKYE BAR GSUNGS, ,DE SOGS NYES DMIGS
MANG PO MDO LAS GSUNGS, ,SHES GSUNGS SO, ,DES NA 'DI DAG LA 'GA'
ZHIG BLOR MI SHONG BA DE 'DRA RANG CUNG MI BDEN SNYAM DU DE
BZHIN GSHEGS

PAS BSDIGS MO MDZAD PA LTA BU'I 'DU SHES SKYE BA'ANG 'BYUNG MOD,
DE NI LHA DANG BCAS PA'I 'GRO BA THAMS CAD KYI MGON SKYABS DAM
PA SANGS RGYAS BCOM LDAN 'DAS BDEN PA GSUNG BA DE NYID KYI GSUNG
LA YID MI CHES

@019A *, ,PA'I LOG RTOG CHEN PO YIN PAS RNAM PA THAMS CAD DU
DGAG PAR BYA STE, DGE RTZA 'JOMS BYED DANG NGAN 'GRO'I RGYU CHE
SHOS SHIG YIN PAS SO, ,GZHAN YANG BAG MED KYI SGO NAS BCAS PA
PHRA MO

LAS 'DAS NA'ANG SDUG BSNGAL CHEN PO THOB STE, LUNG RNAM 'BYED
LAS, GANG ZHIG STON PA THUGS RJE'I BSTAN PA LA, ,YANG BAR SEMS
SHING CUNG ZAD 'DA' BYED PA, ,DE NI DE LAS SDUG BSNGAL GZHAN
DBANG THOB, ,SMIG

TSAL BREGS PAS AA MRA'I TSAL NYAMS BZHIN, ,'DI NA LA LA RGYAL
PO'I TSIG CHEN YANG, ,'DAS NA LAN DGA' CHAD PA THOB MI 'GYUR,
,THUB PA'I DKA' LUNG TSUL MIN 'DA' BYED NA, ,DUD 'GROR SKYE
'GYUR AE LA'I

'DAB KLU BZHIN, ZHES GSUNGS PA LTAR RO, ,YANG LTUNG BA BSHAGS
PAS CHOG SNYAM NAS 'GYOD SEMS DANG SDOM SEMS MED PAR 'JUG
NA'ANG, PHYIR BCOS CHOG ZER NAS DUG ZA BA DANG 'DRA STE, BYAMS
PA SENG GE

SGRA'I MDO LAS, BYAMS PA PHYI MA'I TSE PHYI MA'I DUS LNGA BRGYA
THA MA LA BYANG CHUB SEMS DPA' KHYIM NA GNAS PA DANG RAB TU
BYUNG BA KHA CIG ,DE DAG 'DI SKAD CES, SDIG PA'I LAS NI NYES PA
BSHAGS PAS MA LUS PA

ZAD PAR 'GYUR RO, ,ZHES ZER ZHING, DE DAG GIS SDIG PA MNGON PAR
'DU BYA BA MNGON PAR 'DU BYAS NAS YANG DAG PAR BSHAGS PAR BYA'O,
,ZHES LTUNG BA LHAG PAR 'BYIN PAR BYED CING, PHYIS SDOM PAR MI
BYED PA DAG 'BYUNG BAR 'GYUR

@019B TE, DE DAG NI 'CHI BA'I LAS CAN YIN NO ZHES NGA SMRA STE,
'CHI BA YANG GANG ZHE NA, 'DI LTA STE, DPER NA DUG ZA BA'I MI
NGAR 'DRA BAR 'CHI BA'I DUS BYAS NAS, LOG PAR LTUNG BA RNAMS SU
'GRO BAR 'GYUR BA YIN NO, ,ZHES DANG, BYAMS

PA 'PHAGS PA'I CHOS 'DUL BA 'DI LA DUG CES BYA BA DE NI 'DI LTA
STE, BSLAB PA'I GZHI JI LTAR BCAS PA DAG LAS 'DA' BAR BYED PA
YIN PAS, KHYED CAG GIS NI DUG ZA BAR MI BYA'O, ,ZHES GSUNGS PA
LTAR RO, ,GSUM PA NI, DE LTAR

PHAN YON NYES DMIGS SHIN TU LEGS PAR RIG PAR BYAS LA, RANG GIS
JI LTAR KHAS BLANGS PA'I TSUL KHRIMS SROG LA BABS KYANG MI GTONG
BAR BSRUNG DGOS TE, TING NGE 'DZIN RGYAL PO LAS, BSKAL PA BYE BA
GANGG'A'I BYE SNYED

DU, ,DANG BA'I SEMS KYIS ZAS DANG SKOM RNAMS DANG, ,GDUGS DANG
BA DAN MAR ME'I PHRENG BA YIS, ,SANGS RGYAS BYE BA KHRAG KHRIG
RIM GRO BYAS, ,GANG GIS DAM CHOS RAB TU 'JIG PA DANG, ,BDE
GSHEGS BSTAN PA 'GAG

PAR GYUR PA'I TSE, ,NYIN MTSAN DU NI BSLAB PA GCIG SPYOD PA,
,BSOD NAMS 'DI NI DE BAS BYE BRAG 'PHAGS, ZHES SNGON BSKAL PA
BZANG PO'I DUS SU MKHO BA'I YO BYAD THAMS CAD KYIS SANGS RGYAS
BYE BA KHRAG KHRIG LA BSNYEN

BKUR BYAS PA LAS, DUS NGAN 'DI LTA BU'I DUS SU BSLAB PA SNA GCIG
TZAM BSRUNGS NA DE BSOD NAMS CHE BAR GSUNGS PA'I PHYIR RO, ,DE
YANG DE BZHIN GSHEGS PAS JI LTAR BCAS PA'I BSLAB PA RNAMS SRUNG
BAR MI BYED NA,

@020A *, ,BDAG SKRA BREGS SHING GOS NGUR SMRIG GYON PA DON MED
DO SNYAM DU BSAM DGOS TE, TING NGE 'DZIN RGYAL PO LAS, SANGS
RGYAS BSTAN PA 'DI LA RAB BYUNG NAS, ,SDIG PA'I LAS RNAMS SHIN
TU SPYOD PAR BYED, ,

NOR DANG 'BRU LA SNYING POR 'DU SHES SHING, ,BZHON DANG BA LANG
SHING RTA RNAMS LA CHAGS, ,GANG LA BSLAB PA'I NAN TAN MED PA
RNAMS, ,DE DAG GIS KYANG CI PHYIR MGO BO BREGS, ZHES GSUNGS PAS
SO, ,DE LTAR BSRUNG BA'I

TSUL NI BSLAB BYA CHEN MO RNAMS SU BLTA BAR BYA STE, 'DIR YI GES
'JIGS NAS MA BRIS SO, ` ,'DIR SMRAS PA, KVA YE SANGS RGYAS 'JIG
RTEN 'BYUNG BA DANG, ,DAL BA'I RTEN DANG RAB TU BYUNG BA DANG,
,TSUL KHRIMS

DGE DANG DGE BA'I BSHES GNYEN LA, ,BRTEN PA RNYED DKAR GSUNGS
PA'I DON LA DGONGS, ,MI LUS RIN CHEN NYIN MO'I SKAR MA DANG,
,LANG TSO'I DPAL YANG STON KA'I ME TOG 'DRA, ,TSE 'DI RI GZAR
'BAB CHU LTAR 'GRO

NA; ;MI TSE STONG ZAD BYED PA KHYOD DRAN NAM, ,TSE 'DI'I LUS
DANG LONGS SPYOD KUN BOR NAS, ,RNAM SHES SKYES BU PHYI MAR 'GRO
BA'I TSE, ,CHOS LAS GZHAN GYIS PHAN PA CANG MED NA, ,'CHI CHOS
TSAGS SU TSUD DAM SNYING RUL PO, ,

SNGON CHAD 'PHAGS PA'I 'GRON PO GRANGS MED THAL, ,BDAG CAG MYA
NGAN 'KHOR BA'I THANG LUS NA, ,DON MTHUN PHAL CHER SONG BA'I
TSONG PA LTAR, ,G-YENGS MED PHYI BZHIN BSNYEGS DANG SNYING RUL
PO, ,KYE MA MTHON PO KUN

@020B GYI MTHA' LTUNG ZHING, ,BSAGS PA KUN 'DZAD 'DUS PA'I THA
MA 'BRAL, ,SKYES PA KUN GYI THA MA 'CHI BAS NA, ,DON MED BYA BAS
'DA' BA SMYON PA RANG, ,GROGS DAG SDUG BSNGAL RGYA MTSO SGROL
BA'I THABS, ,RNAM DAG KHRIMS KYI GRU

GZINGS LA BRTEN NAS, ,THAR PA DAM PA'I GLING DU DENG 'GRO ZHES,
,DED DPON CHOS KYI RGYAL MTSAN 'O DOD 'BOD, ,'ON KYANG SNYIGS
DUS SKYE BO KHRIMS LAS G-YEL, ,DE PHYIR GZHAN LA PHAN PA DKA'
MOD KYANG, ,RANG NYID TSE RABS

KUN TU LAM BZANG 'DIR, ,GOMS PAR BYA PHYIR DAM PA'I GSUNG BZHIN
BKOD, ,'DIS MTSON LEGS PAR SPYAD PA KUN GYI MTHUS, ,SROG GI
DBANG PO 'GAGS PA'I DE MA THAG ,YID DGA' CHOS 'DZIN PADMO LAS
SKYES TE, ,MI  

PHAM 'JAM DPAL SNYING PO'I ZHABS BSTEN SHOG ,DE YI MTHU LAS
RGYAL BA'I DAM CHOS KUN, ,RGYAL BA'I DGONGS PA JI BZHIN LEGS
BZUNG NAS, ,NAM MKHA' MNYAM PA'I 'GRO BA SGROL BA LA, ,KUN BZANG
'JAM DPA'I DBYANGS

DANG MTSUNGS PAR SHOG ,CES TSUL KHRIMS YANG DAG PAR SRUNG BA'I
MAN NGAG 'DI NI, LAS DANG PO PA RNAMS LA PHAN GDAGS PA'I BSAM PA
NYE BAR BZHAG STE, SNYAN NGAG DANG SDEBS SBYOR LA SOGS PA'I TSIG
GIS MA BCINGS

PAR, CHOS SMRA BA'I DGE SLONG BLO BZANG CHOS KYI RGYAL MTSAN
GYIS GRUB PA'I GNAS MCHOG DBEN SA CHOS KYI PHO BRANG DU RDZOGS
PAR SBYAR ZIN PA NYID, PHYIS THON BSAM GRUB MTHONG SMON GYI
GZHIS KAR GLEGS BU'I NGOS LA

@021A *, ,LEGS PAR BKOD PA 'DIS KYANG, BSTAN PA RIN PO CHE DAR
ZHING RGYAS LA YUN RING DU GNAS PAR BYED NUS PAR GYUR CIG `
,BSLU MED BLA MA MCHOG GSUM THUGS RJE'I MTHUS, ,LHAG BSAM

DAG PAS BSKRUN PA'I BSGRUB PA'I SDE, ,LEGS PAR TSUGS SHING DAR
RGYAS YUN RING DU, ,BSTAN PA'I GSAL BYED DAM PAR 'GYUR BAR SHOG
, ` ,,AOm SVA STI, RGYAL BA KUN DNGOS RJE BTZUN BLA MA YI,
,RLABS CHEN

MDZAD PA'I RGYA MTSO LAS 'ONGS PA'I, ,TSUL KHRIMS BSRUNG BA'I
MAN NGAG YID BZHIN NOR, ,THAR 'DOD KUN GYI GCES NOR GCIG PU YIN,
,GANG 'DI'I CHOS SBYIN SPEL BA'I RIM GRO PA, ,DGE SLONG BLO GROS
RGYAL MTSAN ZHES BYA

STE; ;RIG BYED 'BRUG RGYAL PHYAG RDOR MCHED GROGS SO, ,'DI YI
PHYOGS SU 'BAD PA GANG BGYIS PA'I, ,RAB DKAR DGE DES LUS CAN
MTHA' DAG KYANG, ,'DREN PA MCHOG 'DIS RJES BZUNG BYIN BRLABS
PAS, ,TSUL GNAS

THOS BSAM SGOM PA MTHAR PHYIR TE, ,BLA MED BYANG CHUB DAM PA
MYUR THOB SHOG ,MANGGA LAm,, ,, *, ,AOm SVASTI, PHAN BDE'I
'BYUNG GNAS RGYAL BSTAN YONGS 'DU'I LJON, ,RAB RGYAS 'GRO KUN
THAR MCHOG 'BRAS BZANG

LA; ;SPYOD PHYIR BKRA SHIS LHUN GRUB CHOS GRVA CHER, ,CHOS SBYIN
'DZAD MED DAL 'GRO'I RGYUN 'DI SPEL,, ,,SARBA DZA GA TAm,, ,