*, ,'DUL BA RGYA MTSO'I SNYING PO'I t'I KKA BLO BZANG DGONGS DON GSAL BA'I NYIN BYED CES BYA BA BZHUGS SO, @01A #, ,NA MO GU RU MU N'I NDRA MANYDZU GHO shA SA RA SVA TI YE, MTSAN DPE'I DPAL 'BAR SKU NI GSER RI'I DBUS NA SA 'DZIN DBANG PO JI BZHIN BRJID, ,YAN LAG DRUG CU'I GSUNG NI GANDHA RBHA YI BU MO'I RGYUD MANG JI BZHIN SNYAN, ,CHOS KUN MKHYEN PA'I THUGS NI MKHAR DBYINGS NGOS SU SPRIN BRAL NYIN BYED JI BZHIN GSAL, ,GSANG GSUM MI ZAD RGYAN GYI TZA KRA'I MNGA' BDAG DE YIS SHIS PAR MDZOD, ,MTHU CHEN RGYAL SRAS BOD 'BYUNG GTZUG RGYAN PHAL, ,RO 'DZIN BRGYA PA'I PHYOGS SU CHAS PA NA, ,DBANG PHYOGS TZONG KHA'I SPO LAS NYER THON PA'I, ,BLO BZANG MI BYIN SKYES DER GUS PHYAG 'TSAL, ,MGON DES LUNG BZHI'I AAPTI BSRUBS PA'I SNYING, ,SNGON MED 'DUL GZHUNG RIN CHEN DBANG GI RGYAL, ,DON 'GREL RGYAL MTSAN RTZE MOR LEGS @02A *, ,BKOD NAS, ,RANG GZHAN GTAN BDE'I GRU CHAR 'DI NA 'BEBS, ,PHYOGS ZHEN DRI MAS MA LBAGS SHING, LEGS NYES BRTAG PA'I BLO GROS LTO, ,DOG MIN BUM BZANG 'GA' YOD NA, ,LEGS BSHAD AA MRi TA 'DI LONGS, DE LA 'DIR RJE BTZUN CHOS KYI RGYAL PO SHAR TZONG KHA PA CHEN PO BLO BZANG GRAGS PA'I DPAL ZHES SA GSUM NA YONGS SU GRAGS PA DES MDZAD PA'I SO SOR THAR PA'I SDOM PA GTAN LA DBAB PA 'DUL BA RGYA MTSO'I SNYING PO BSDUS PA ZHES BYA BA'I BSTAN BCOS 'DI NYID 'CHAD PA LA GSUM, BSHAD PA LA 'JUG PA'I YAN LAG ,BSHAD PA NYID NYE BAR DGOD PA, BSHAD PA MTHAR PHYIN PA'I TSUL LO, ,DANG PO LA GSUM, SHIS PA BRJOD PA, BSTOD PHYAG MDZAD PA, RTZOM PAR DAM BCA' MDZAD PA'I TSUL LO, , DANG PO NI, AOm BDE LEGS SU GYUR CIG ,CES PAS STON LA, DON NI, AOm YIG GIS RGYAL BA RNAMS KYI SKU GSUNG THUGS KYI GSANG BA GSUM MTSON ZHING, MTSON DON DE DRAN PA'I SGO NAS @02B GSANG BA GSUM DANG LDAN PA'I RGYAL BA SRAS BCAS RNAMS LA MKHYEN PAR GSOL TE, 'GRO BA RNAMS KYIS GNAS SKABS LHA MI'I BDE BA DANG, MTHAR THUG NGES LEGS THAR PA DANG, THAMS CAD MKHYEN PA'I LAM DU ZHUGS NAS RGYAL BA RNAMS LA JI LTAR MNGA' BA'I GSANG GSUM GYI GO 'PHANG THOB PAR GYUR CIG CES PA'O, ,GNYIS PA NI, THAMS CAD MKHYEN PA LA PHYAG 'TSAL LO, ,ZHES PAS STON LA, DON NI, RJE BLA MAS GDUL BYA'I DON DU BSTAN BCOS 'DI RTZOM PA'I THOG MAR, GDUL BYA RNAMS KYIS SANGS RGYAS KYI CHE BA SHES PA DANG, RANG GI BSOD NAMS KYI TSOGS 'PHEL BA DANG, DAM PA RNAMS KYI SPYOD PA DANG MTHUN PA SOGS DANG, LHAG PAR SNGON GYI BKAS BCAD DANG MTHUN PA'I PHYIR DU BDAG CAG GI STON PA'I THUN MONG MA YIN PA'I YON TAN DRAN PA'I DAD GUS CHEN POS, SKU'I BA SPU LDANG ZHING PHYAG THAL MO SBYAR BA DBUR BZHAG STE, LAS 'BRAS PHRA MO SOGS SHES BYA THAMS CAD MNGON SUM DU MKHYEN PA'I SANGS RGYAS BCOM LDAN 'DAS LA PHYAG 'TSAL LO STE SGO GSUM DVANG BAS 'DUD DO ZHES PA'O,, ` GSUM PA LA GNYIS, 'DUL BA'I CHE BA BRJOD PA DANG, RTZOM PAR DAM BCA' BA'I SGO NAS LUS MDOR BSTAN PA'O, ,DANG PO NI, GANG LA BRTEN NA BDE BLAG TU, THAR PA'I GRONG DU BGROD PA'I THABS, @03A *, ,BDE GSHEGS BSTAN PA'I SNYING PO MCHOG ,SO SOR THAR CES GRAGS PA GANG, ZHES PAS STON LA, DON NI, BSTAN PA'I RTZA BA SO SOR THAR PA DANG DE BRJOD BYAR STON PA'I 'DUL BA GANG LA BRTEN CING SO THAR GYI SDOM PA BLANGS NAS TSUL BZHIN DU BSRUNGS NA DKA' LAS CHER MED PAR BDE BLAG TU MTHO RIS DANG, THAR PA DANG, THAMS CAD MKHYEN PA'I GRONG KHYER DU BGROD PAR BYED PA'I THEM SKAS SAM THABS, BDE BAR GSHEGS PA SANGS RGYAS KYI BSTAN PA RIN PO CHE GNAS PA'I SNYING DANG SNYING PO MCHOG TU GYUR PA, MTSAN SDOM PA BLANGS NAS TSUL BZHIN SRUNG MKHAN RNAMS 'KHOR BA LAS THAR CING, DE LAS LDOG PA RNAMS MI THAR BA'I RGYU MTSAN GYI SO SOR THAR PA'I SDOM PA ZHES YONGS SU GRAGS PA GANG YIN PA DE NI ZHES PA'O,, ` GNYIS PA NI, NGO BO DANG NI RAB DBYE DANG, ,SO SO'I NGOS 'DZIN SKYE BA'I RTEN, ,GTONG BA'I RGYU DANG PHAN YON TE, , RNAM PA DRUG GIS JI BZHIN BSHAD, CES PAS STON LA, DON NI, GONG DU SMOS PA'I SO THAR GYI SDOM PA DE NI 'DIR SO THAR GYI SDOM PA'I NGO BO DANG NI, SO THAR GYI SDOM PA'I RAB DBYE DANG, SO THAR RIS BRGYAD KYI SDOM PA SO SO'I NGOS 'DZIN DANG, SO THAR GYI SDOM PA SKYE BA'I RTEN DANG, SO THAR GYI SDOM PA GTONG BA'I RGYU DANG, SO THAR GYI SDOM PA BSRUNGS PA'I PHAN YON TE DON TSAN RNAM PA DRUG GIS NI, RGYAL BA'I DGONGS PA JI LTA BA BZHIN DU @03B BSHAD PAR BYA'O ZHES PA'O, ` ,GNYIS PA BSHAD PA NYID NYE BAR DGOD PA LA DRUG ,SO THAR GYI SDOM PA'I NGO BO BSHAD PA, SO THAR GYI SDOM PA'I RAB DBYE BSHAD PA, SO THAR RIS BRGYAD KYI SDOM PA SO SO'I NGOS 'DZIN BSHAD PA, SO THAR GYI SDOM PA SKYE BA'I RTEN BSHAD PA, SO THAR GYI SDOM PA GTONG BA'I RGYU BSHAD PA, SO THAR GYI SDOM PA BSRUNGS PA'I PHAN YON BSHAD PA'O, ,DANG PO LA GNYIS, SO THAR GYI SDOM PA'I NGO BO NGOS BZUNG BA DANG, NGO BO DE GZUGS SEMS GANG DU 'JOG GI RANG SDE'I BZHED TSUL LO, DANG PO NI, NGES 'BYUNG BSAM PAS RGYU BYAS NAS, ,GZHAN GNOD GZHI DANG BCAS PA LAS, ,LDOG PA, ZHES PAS STON LA, DON NI, GZHAN GYI LAD MO DANG G-YAM LA RGYUG TZAM MA YIN PAR 'KHOR BA MTHA' DAG LA ZHEN PA GTING NAS LOG STE YID NGES PAR 'BYUNG BA'I BSAM PAS RGYU BYAS PA STE KUN NAS BSLANGS TE, BLA MA'I SPYAN SNGAR GZHAN LA GNOD PA LUS NGAG GI MI DGE BA BDUN DANG, BDUN PO DE'I GZHI YID KYI MI DGE BA GSUM MAM BCAS PA'I KHA NA MA THO BA DANG BCAS PA LAS LDOG PAR KHAS BLANGS SHING DAM BCAS PA'I SDOM PA DE SO THAR GYI SDOM PA'I NGO BO'I ZHES PA'O, ` ,GNYIS PA NI, DE YANG LUS NGAG LAS, GZUGS CAN YIN ZHES 'DOD PA DANG, ,SPONG BA'I SEMS PA RGYUN CHAGS PA, ,SA BON DANG BCAS YIN NO ZHES, ,'DOD PA'I TSUL NI RNAM PA GNYIS, ,RANG GI SDE PA GONG 'OG SMRA, ZHES PAS STON LA, DON NI, DE YANG @04A *, ,SO THAR GYI SDOM PA'I NGO BO LUS NGAG GI LAS DE BYE BRAG SMRA BA RNAMS KYIS BSTAN MED THOGS MED KYI GZUGS CAN DANG, DBU MA THAL 'GYUR BA RNAMS KYIS CHOS KYI SKYE MCHED KYI GZUGS CAN YIN NO ZHES 'DOD PA DANG, MDO SDE PA SEMS TZAM PA DBU MA RANG RGYUD PA RNAMS KYIS SPONG BA'I SEMS PA RGYUN CHAGS PA SA BON DANG BCAS PA YIN NO ZHES 'DOD PA'I TSUL MI 'DRA BA NI RNAM PA GNYIS RANG GI PHYOGS NANG PA SANGS RGYAS PA'I SDE PA STE GRUB MTHA' GONG 'OG RNAMS SMRA BAR BYED DO ZHES PA'O, ,BSTAN MED THOGS MED KYI GZUGS DE YANG SKAD CIG DANG PO SDOM PA SKYES MA THAG RNAM PAR RIG BYED DANG, DE NAS RIG BYED MA YIN PA'I GZUGS SU 'DOD CING, SPONG SEMS SA BON DANG BCAS PA LA'ANG SHES PA DANG LDAN MIN 'DU BYED DU 'JOG PA GNYIS YOD PAR GSUNGS SO, ` ,GNYIS PA SO THAR GYI SDOM PA'I RAB DBYE BSHAD PA LA GNYIS, SO THAR GYI SDOM PA'I RAB DBYE DNGOS DANG, SO THAR GYI SDOM PA'I BSDU BA'O,, ` DANG PO NI, BSNYEN GNAS DGE BSNYEN PHA MA DANG, ,DGE TSUL PHA MA DGE SLONG MA, ,DGE SLONG MA DANG DGE SLONG STE, ,SO SOR THAR PA RIS BRGYAD DO, ZHES PAS STON LA, DON NI, THAR PA'I GO 'PHANG DANG BSNYEN PA STE NYE BAR GNAS PAR BYED PAS NA BSNYEN GNAS KYI SDOM PA DANG, DGE BA MYANG 'DAS LA BSNYEN PA STE NYE BAR BYED PAS NA DGE BSNYEN PHA'I SDOM PA DANG, DGE BSNYEN MA'I SDOM PA DANG, DGE BA MYANG 'DAS KYI TSUL TE @04B LAM DU ZHUGS PAS NA DGE TSUL PHA'I SDOM PA DANG, DGE TSUL MA'I SDOM PA DANG, DGE SLONG MA'I SDOM PA BSRUNG NUS THABS SU SPANG BYA BCU GNYIS LA SLOB PAS NA DGE SLONG MA'I SDOM PA DANG, DGE BA MYANG 'DAS KYI GO 'PHANG SLONG BA STE 'TSOL BAS NA DGE SLONG MA'I SDOM PA DANG, DGE SLONG PHA'I SDOM PA STE, SO SOR THAR PA'I SDOM PA LA DBYE NA RIS BRGYAD YOD DO ZHES PA'O, ` ,GNYIS PA NI, KHYIM PA'I SDOM PA DANG PO GSUM, ,RAB BYUNG SDOM PA THA MA LNGA, ZHES PAS STON LA, DON NI, GONG GI SO THAR RIS BRGYAD PO DE YANG RTEN GYI SGO NAS BSDU NA KHYIM PA'I PHYOGS KYI SDOM PA DANG, RAB BYUNG GI PHYOGS KYI SDOM PA GNYIS SU 'DU STE, KHYIM PA'I PHYOGS KYI SDOM PA NI BSNYEN GNAS, DGE BSNYEN PHA, DGE BSNYEN MA STE DANG PO GSUM YIN CING, RAB BYUNG GI PHYOGS KYI SDOM PA NI DGE TSUL PHA, DGE TSUL MA, DGE SLOB MA, DGE SLONG MA, DGE SLONG PHA STE THA MA LNGA PO YIN NO ZHES PA'O, ` ,GSUM PA SO THAR RIS BRGYAD KYI SDOM PA SO SO'I NGOS 'DZIN BSHAD PA LA DRUG ,BSNYEN GNAS KYI SDOM PA'I NGOS 'DZIN BSHAD PA, DGE BSNYEN KYI SDOM PA'I NGOS 'DZIN BSHAD PA, DGE TSUL GYI SDOM PA'I NGOS 'DZIN BSHAD PA, DGE SLOB MA'I SDOM PA'I NGOS 'DZIN BSHAD PA, DGE SLONG MA'I SDOM PA'I NGOS 'DZIN BSHAD PA, DGE SLONG PHA'I SDOM PA'I NGOS 'DZIN BSHAD PA'O,, ` DANG PO LA GNYIS, BSNYEN GNAS KYI SDOM PA NGOS BZUNG BA DANG, SPANG BYA YAN LAG BRGYAD GTAN LA DBAB PA'O, ` ,DANG PO NI, RTZA @05A *, ,BA BZHI DANG YAN LAG BZHI, ,BRGYAD SPONG BSNYEN GNAS SDOM PA'O, ZHES PAS STON LA, DON NI, YUL DGE BSNYEN BSNYEN GNAS LA GNAS PA YAN CHAD GANG YANG RUNG BA'I MDUN DU, MI TSANGS SPYOD SOGS RTZA BA BZHI DANG, MAL CHE MTHO SOGS YAN LAG BZHI STE SPANG BYA YAN LAG BRGYAD NYIN ZHAG PHRUGS GCIG GI RING SPONG BAR KHAS BLANGS PA DE NI BSNYEN GNAS KYI SDOM PA'O STE YIN NO ZHES PA'O, ` ,GNYIS PA NI, MI TSANGS SPYOD DANG MA BYIN LEN, ,SROG GCOD BRDZUN DU SMRA BA RNAMS, ,RTZA BA BZHI YIN MAL CHE MTHO, ,CHANG 'THUNG GAR SOGS 'PHRENG SOGS DANG, ,PHYI DRO'I KHA ZAS YAN LAG BZHI, ZHES PAS STON LA, DON NI, MI TSANGS PAR SPYOD PA DANG, RIN THANG TSANG BA'I DNGOS PO MA BYIN PAR LEN PA DANG, MI'AM MIR CHAGS PA'I SROG GCOD PA DANG, MI CHOS BLA MA'I BRDZUN DU SMRA BA RNAMS RTZA BA BZHI YIN CING, MAL STAN RIN PO CHES SPRAS PA'I CHEN PO DANG KHRU GANG LAS LHAG PA'I MTHON PO LA SPYOD PA DANG, SEMS MYOS PAR BYED PA'I 'BRU DANG BCOS PA'I CHANG 'THUNG BA DANG, GAR BYED PA, SOGS SGRAS BSTAN PA GLU DANG ROL MO BYED PA, MGOR 'PHRENG BA 'CHING BA, SOGS SGRAS BSTAN PA SPOS 'BYUG PA, RGYAN 'DAGS PA, DRI BZANG GIS KHA DOG SGYUR BAR BYED PA DANG, PHYI DRO'I KHA ZAS ZA BA RNAMS YAN LAG BZHI YIN NO ZHES PA'O, ` ,GNYIS PA DGE BSNYEN GYI SDOM PA'I NGOS 'DZIN BSHAD PA LA GNYIS, DGE BSNYEN GYI SDOM @05B PA NGOS BZUNG BA DANG, DGE BSNYEN GYI SDOM PA'I DBYE BA BSHAD PA'O, ` ,DANG PO NI, GSOD RKU SMRA DANG LOG PAR G-YEM, ,MYOS 'GYUR 'THUNG BA LNGA SPONG BA, ,DGE BSNYEN GYI NI SDOM PA'O, ZHES PAS STON LA, DON NI, SLOB DPON DGE BSNYEN GYI SDOM LDAN YAN CHAD KYI MDUN DU SKYABS 'GRO SNGON DU 'GRO BAS, MI'AM MIR CHAGS PA GSOD PA DANG, KAR SHA PA nA'I BZHI CHA'I TSAD KYI RIN THANG TSANG BRKU BA DANG, MI CHOS BLA MA'I BRDZUN SMRA BA DANG, RANG GI BUD MED MA YIN PA LA LOG PAR G-YEM PA DANG, MYOS 'GYUR GYI KHU BA CHANG 'THUNG BA STE BSLAB PA'I GZHI LNGA DANG SKYABS 'GRO'I BSLAB BYA'I MI MTHUN PHYOGS RNAMS JI SRID 'TSO'I BAR DU SPONG BAR KHAS BLANGS PA DE DGE BSNYEN GYI NI SDOM PA'O ZHES PA'O ` GNYIS PA NI, SNA GCIG SNA 'GA' PHAL CHER SPYOD, ,YONGS RDZOGS SPYOD DANG TSANGS SPYOD DANG, ,SKYABS 'GRO'I DGE BSNYEN RNAM PA DRUG ,RTZA BA BZHI LAS GCIG GNYIS GSUM, ,'DOD LOG MI TSANGS SPYOD SPONGS DANG, SKYABS 'GRO TZAM GYI DGE BSNYEN DU, ,KHAS LEN RNAMS DANG GO RIM BZHIN, ZHES PAS STON LA, DON NI, DGE BSNYEN LA YAN LAG GI SGO NAS DBYE NA SNA GCIG SPYOD PA'I DGE BSNYEN DANG, SNA 'GA' SPYOD PA'I DGE BSNYEN DANG, PHAL CHER SPYOD PA'I DAG BSNYEN DANG, YONGS RDZOGS SPYOD PA'I DGE BSNYEN DANG, TSANGS SPYOD KYI DGE BSNYEN DANG, SKYABS GSUM 'DZIN PA'AM SKYABS 'GRO'I DGE BSNYEN TE RNAM PA DRUG YOD CING, DE DRUG GI NGOS 'DZIN NI, MI GSOD PA SOGS RTZA BA @06A *, ,BZHI LAS GANG RUNG GCIG SPONG BAR KHAS LEN PA DANG PO DANG, GNYIS SPONG BAR KHAS LEN PA GNYIS PA DANG, GSUM SPONG BAR KHAS LEN PA GSUM PA DANG, 'DOD PAS LOG PAR G-YEM PA SOGS BSLAB GZHI LNGA YONGS RDZOGS SPONG BAR KHAS LEN PA BZHI PA DANG, DE'I STENG DU MI TSANGS SPYOD SPONG BAR KHAS LEN PA LNGA PA DANG, DKON MCHOG GSUM LA SKYABS SU 'GRO BA TZAM GYI DGE BSNYEN DU KHAS LEN PA DRUG PA STE KHAS LEN DRUG PO RNAMS DANG DGE BSNYEN GYI DBYE BA RNAMS GO RIM JI LTA BA BZHIN ZHES PA'O, ,CHANG SPONG BA DANG SKYABS 'GRO'I BSLAB BYA LA NI DGE BSNYEN THAMS CAD KYIS SLOB DGOS SHING, DGE BSNYEN GYI SDOM PA BRGYAD PA'I 'GREL PA DANG THUB PA DGONGS RGYAN LAS GO MI'I DGE BSNYEN ZHES PA ZHIG KYANG BSHAD DE, DE YANG GO MI NI BTZUN PA'I MING STE BTZUN PA'I CHAS SU BYAS NAS JI SRID 'TSO'I BAR DU BSNYEN GNAS KYI SDOM PA BLANGS NAS BSRUNG BA LA GO MI'I DGE BSNYEN ZHES PHAL CHEN SDE PA'I LUGS SU GRAGS PAR MTSO SNA PAS GSUNGS SHING, RJE RIN PO CHES GZHUNG 'DIR DNGOS SU MA GSUNGS PA YANG THAMS CAD YOD SMRA BA'I LUGS MA YIN PA LA DGONGS SAM SNYAM MO, ,RJE BTZUN BLO BZANG DPAL LDAN YE SHES KYIS, 'GOS LO CHEN PO GONG MA'I DGE BSNYEN TSUL, ZHES GSUNGS PA YANG BRTAG GO , ` ,GSUM PA DGE TSUL GYI SDOM PA'I NGOS 'DZIN BSHAD PA LA GNYIS, DGE TSUL GYI SDOM @06B PA NGOS GZUNG BA DANG, DGE TSUL GYI BSLAB BYA GTAN LA PHAB PA'O, ` ,DANG PO NI, RTZA BA BZHI DANG YAN LAG DRUG ,BCU SPONG DGE TSUL SDOM PA'O, ZHES PAS STON LA, DON NI, MKHAN SLOB DGE 'DUN DANG BCAS PA'I DBUS SU NGES 'BYUNG GI BSAM PAS KUN NAS BSLANGS TE, SROG GCOD PA SOGS RTZA BA BZHI DANG, GAR SOGS YAN LAG DRUG STE SPANG BYA BCU JI SRID 'TSO'I BAR DU SPONG BAR KHAS BLANGS PA DE NI DGE TSUL GYI SDOM PA'O ZHES PA'O, ` ,GNYIS PA NI, GAR SOGS 'PHRENG SOGS RNAM GNYIS DANG, ,GSER DNGUL LEN DANG RNAM PA GSUM, ,PHYE BAS YAN LAG DRUG TU 'GYUR, ,MKHAN POR GSOL BA GDAB PA DANG, ,KHYIM PA'I RTAGS NI SPONG BA DANG, ,RAB BYUNG RTAGS NI LEN PA LAS,, NYAMS PA RNAM GSUM BSNAN PA YIS, ,SPANG BYA BCU GSUM DAG TU 'GYUR,, (YAN LAG LHAG MA DANG RTZA BZHI'I NGOS 'DZIN GZHUNG DU MI GSAL BA SNANG BSNYEN GNAS KYI SKABS SU BSHAD ZIN PA LA DGONGS SO),, ZHES PAS STON LA, DON NI, SROG GCOD PA, MA BYIN PAR LEN PA, MI TSANGS PAR SPYOD PA, RDZUN DU SMRA BA STE RTZA BA BZHI DANG, GAR SOGS DANG 'PHRENG SOGS TE RNAM PA GNYIS SO SOR PHYE BA DANG, GSER DNGUL LEN PA DANG RNAM PA GSUM PA DE'I STENG DU CHANG 'THUNG BA, PHYI DRO'I KHA ZAS ZA BA, MAL STAN CHE MTHO STE GSUM BSNAN PAS YAN LAG DRUG TU 'GYUR ZHING, RTZA BZHI YAN LAG DRUG DANG BCAS PA SLOB DPON LAS SDOM PA DNGOS SU BLANGS PA LAS 'DAS PA'I SPANG BYA'I GTZO BO DE BCU'I STENG DU, MKHAN POR GSOL @07A *, ,BA GDAB PA LAS NYAMS PA DANG, KHYIM PA'I RTAGS NI SPONG BA LAS NYAMS PA DANG, RAB BYUNG GI RTAGS NI LEN PA LAS NYAMS PA STE MKHAN PO LAS DNGOS SU BLANGS PA LAS 'DAS PA NYAMS PA RNAM PA GSUM BSNAN PA YIS DGE TSUL GYI SDOM PA DANG 'GAL BA'I SPANG BYA BCU GSUM DAG TU 'GYUR RO ZHES PA'O, ` ,BZHI PA DGE SLOB MA'I SDOM PA'I NGOS 'DZIN BSHAD PA LA GNYIS, DGE SLOB MA'I SDOM PA NGOS GZUNG BA DANG, DGE SLOB MA'I BSLAB BYA GTAN LA DBAB PA'O, ` ,DANG PO NI, DGE TSUL SDOM PA THOB RJES SU, ,RTZA BA'I CHOS DRUG RJES MTHUN GYI, ,CHOS DRUG SPONG BA'I SDOM PA NI, ,DGE SLOB MA YI SDOM PA YIN, ZHES PAS STON LA, DON NI, MKHAN MO DANG SLOB DPON MA DANG DGE 'DUN DANG BCAS PA'I DBUS SU NGES 'BYUNG GI BSAM PAS KUN NAS BSLANGS TE, SNGAR BSHAD PA'I DGE TSUL MA'I SDOM PA RNAM PAR DAG PA THOB PA'I RJES SU, KHRIMS GROGS MED PAR LAM DU MI 'GRO BA LA SOGS PA SPANG BYA SMYUG MA'I CHOS 'DZIN PA'I RTZA BA'I CHOS DRUG DANG, GSER SOGS BDAG GIR MI GZUNG BA LA SOGS PA SPANG BYA GLO BUR BA'I CHOS 'DZIN PA'I RJES MTHUN GYI CHOS DRUG STE SPANG BYA BCU GNYIS LO GNYIS KYI BAR DU SPONG BAR KHAS BLANGS PA'I SDOM PA DE NI DGE SLOB MA YI SDOM PA YIN NO ZHES PA'O, ` ,GNYIS PA NI, GCIG PU LAM DU 'GRO MI BYA, ,CHU BO'I PHA ROL RGYAL MI BYA, ,SKYES PA LA NI @07B REG MI BYA, ,SKYES PA DANG NI 'DUG MI BYA, ,SMYAN DU 'GYUR BA MI BYA ZHING, ,KHA NA MA THO 'CHANG MI BYA, ,DE DAG RTZA BA'I CHOS DRUG SPONG, ,GSER LA GZUNG BAR MI BYA ZHING, ,'DOMS KYI SPU NI BREG MI BYA, ,BYIN LEN MA BYAS ZA MI BYA, ,GSOG 'JOG BYAS PA ZA MI BYA, ,RTZA SNGON MI GTZANG 'DOR MI BYA, ,SA NI BRKO BAR MI BYA BA, ,RJES MTHUN CHOS NI RNAM DRUG SPONG, ZHES PAS STON LA, DON NI, KHRIMS GROGS MED PAR GCIG PU RU LAM DU 'GRO BAR MI BYA BA DANG, CHU BO CHEN PO'I PHA ROL TU BGROD PHYIR GCER PUR RGYAL BAR MI BYA BA DANG, SKYES PA LA NI REG PAR MI BYA BA DANG, SKYES PA DANG NI STAN CIG TU 'DUG PAR MI BYA BA DANG, PHO MO GNYIS SPROD PA SMYAN DU 'GYUR BA'I LAS KYANG MI BYA ZHING, ZLA MO'I KHA NA MA THO BA'AM LTUNG BA 'CHAB PAR MI BYA BA STE DE DAG NI RTZA BA'I CHOS DRUG SPONG BA YIN CING, GSER LA SOGS PA BDAG GIR GZUNG BAR YANG MI BYA ZHING, 'DOMS KYI SPU NI BREG PAR MI BYA BA DANG, BYIN LEN MA BYAS PAR ZA BAR MI BYA BA DANG, GSOG 'JOG BYAS PA ZA BAR MI BYA BA DANG, RTZA SNGON DAG KYANG BCAD PAR MI BYA ZHING MI GTZANG BA 'DOR BAR YANG MI BYA BA DANG, SA NI BRKO BAR MI BYA BA STE DE DAG NI RJES MTHUN GYI CHOS NI RNAM PA DRUG SPONG BA YIN NO ZHES PA'O, ,RTZA TSIG DE DAG PHAL CHER NI LUNG PHRAN TSEGS 'GREL PA DANG BCAS PA RNAMS SU YOD KYANG 'GYUR GYI DBANG GIS TSIG ZUR 'DRA MIN 'GA' ZHIG YOD PAR SNANG NGO, ` ,LNGA PA DGE SLONG MA'I SDOM PA'I NGOS 'DZIN BSHAD PA NI, PHAM BRGYAD LHAG @08A *, ,MA NYI SHU DANG, ,SPANG BA'I LTUNG BYED SUM CU GSUM, LTUNG BYED 'BA' ZHIG BRGYA BRGYAD CU, ,SO SOR BSHAGS PA BCU GCIG DANG, ,NYES BYAS BRGYA DANG BCU GNYIS TE, ,SUM BRGYA DRUG CU RTZA BZHI RNAMS, ,SPONG BAR BYED PA DGE SLONG MA, ZHES PAS STON LA, DON NI, MKHAN SLOB DGE 'DUN GYI SDE GNYIS DANG BCAS PA'I DBUS SU NGES 'BYUNG GI BSAM PAS KUN NAS BSLANGS TE, GSOL BZHI'I SGO NAS MI TSANGS SPYOD SOGS PHAM PA BRGYAD DANG, SMYAN BYED PA SOGS LHAG MA NYI SHU DANG, 'CHANG BA SOGS SPANG BA'I LTUNG BYED SUM CU RTZA GSUM DANG, RDZUN SMRA BA SOGS LTUNG BYED 'BA' ZHIG PA BRGYA DANG BRGYAD CU DANG, GZHAN GYI KHYIM NAS 'O MA BSLANGS TE 'THUNG BA SOGS SO SOR BSHAGS PAR BYA BA BCU GCIG DANG, SHAM THABS ZLUM POR MI BGO BA SOGS NYES BYAS BRGYA DANG BCU GNYIS TE LTUNG BA SUM BRGYA DANG DRUG CU RTZA BZHI RNAMS JI SRID 'TSO'I BAR DU SPONG BAR KHAS BLANGS NAS TSUL BZHIN SRUNG BAR BYED PA'I SDOM PA DE NI DGE SLONG MA'I SDOM PA'O ZHES PA'O, ` ,DRUG PA DGE SLONG PHA'I SDOM PA'I NGOS 'DZIN BSHAD PA NI, PHAM PA BZHI DANG LHAG MA NI, BCU GSUM SPANG LTUNG SUM CU DANG, ,LTUNG BYED 'BA' ZHIG DGU BCU DANG, ,SOR BSHAGS BZHI DANG NYES BYAS NI, ,BRGYA DANG BCU GNYIS BSDOMS PA YIS, ,NYIS BRGYA LNGA BCU RTZA GSUM RNAMS, ,SPONG BAR BYED PA DGE SLONG NGO, ZHES PAS STON LA, DON NI, MKHAN SLOB @08B DGE 'DUN DANG BCAS PA'I DBUS SU NGES 'BYUNG GI BSAM PAS KUN NAS BSLANGS TE, DA LTAR GYI CHO GA NYES MED PHUN TSOGS KYI SGO NAS BSNYEN PAR RDZOGS TE, MI TSANGS SPYOD SOGS PHAM PA BZHI DANG, KHU BA 'BYIN PA SOGS LHAG MA NI BCU GSUM DANG, 'CHANG BA SOGS SPANG LTUNG SUM CU DANG, RDZUN SMRA BA SOGS LTUNG BYED 'BA' ZHIG PA DGU BCU DANG, GRONG LAM DU DGE SLONG MA LAS ZAS LEN PA SOGS SO SOR BSHAGS PAR BYA BA BZHI DANG, MTHANG GOS ZLUM POR MI BGO BA SOGS NYES BYAS NI BRGYA DANG BCU GNYIS TE KHYON BSDOMS PA YIS KHRIMS NYIS BRGYA DANG LNGA BCU RTZA GSUM RNAMS JI SRID 'TSO'I BAR DU SPONG BAR KHAS BLANGS NAS TSUL BZHIN SRUNG BAR BYED PA'I SDOM PA DE NI DGE SLONG NGO STE DE'I SDOM PA YIN NO ZHES PA'O, ,DE YANG NYES LTUNG DE DAG GI SGRA BSHAD NI, SDOM PA NYAMS PAR BYED PA'I NYES SPYOD MTHAR THUG YIN PAS NA RTZA BA DANG, PHA ROL NYON MONGS PAS RANG PHAM PAR BYAS PAS NA PHAM PA DANG, GSO BA'I LHAG MA CUNG ZAD TZAM LUS PAS NA LHAG MA DANG, NYES PA DE PHYIR BCOS PA LA SPANG BRAL SNGON DU 'GRO DGOS PAS NA SPANG LTUNG DANG, BYED PA PO NGAN 'GROR LTUNG BAR BYED PAS NA LTUNG BYED DANG, NYES PA DE PHYIR BCOS PA LA DGE SLONG SO SOR MTHOL BA SNGON DU BTANG NAS BSHAGS DGOS PAS NA SO SOR BSHAGS PA DANG, BYA BA LEGS PAR MA BYAS PAS NA NYES BYAS DANG, YON TAN GONG MA SKYE BA LA SGRIB PAS NA SGRIB PA DANG, 'BRAS BU YI DU MI 'ONG BA 'BYIN PAS NA SDIG PA DANG, DAM @09A *, ,PA RNAMS KYI SPYAN SNGAR KHA NAS SMRA MI NUS PA'I LAS YIN PAS NA KHA NA MA THOB ZHES BRJOD PA YIN NO, ` ,BZHI PA SO THAR GYI SDOM PA SKYE PA'I RTEN BSHAD PA NI, DE LTAR SO THAR RIS BRGYAD PO, ,SGRA MI SNYAN PA MA GTOGS PA'I, ,GLING GSUM SKYES PA BUD MED KYI, ,RTEN LA SKYE YI ZA MA DANG, ,MA NING MTSAN GNYIS SOGS LA MIN, ZHES PAS STON LA, DON NI, SNGAR BSHAD PA DE LTAR SO SOR THAR PA'I SDOM PA RIS BRGYAD PO DE BYANG SGRA MI SNYAN PA GLING PHRAN GNYIS DANG BCAS PA MA GTOGS PA'I 'DZAM BU GLING DANG, LUS 'PHAGS PO DANG, BA LANG SPYOD DE GLING GSUM PA DE'I SKYES PA DANG BUD MED KYI RTEN CAN LA SKYE YI, GRONG PA'I CHOS SPYOD PA'I MTHU MED PA'I ZA MA DANG, SKYES NAS MA NING, ZLA PHYED MA NING, 'KHYUD LDANG MA NING, PHRAG DOG MA NING, NYAMS PA MA NING STE PHO MA NING LNGA DANG, MTSAN GNYIS MA NING, GLE 'DAMS MA NING, RTAG TU ZLA MTSAN 'DZAG PA'I MA NING, ZLA MTSAN MI 'DZAG PA'I MA NING, MTSAN MA TZAM YOD PA'I MA NING STE MO MA NING LNGA DANG, PHO MO'I DBANG PO GNYIS KA YOD PA'I MTSAN GNYIS PA DANG, DER MA ZAD GZHAN YANG MTSAMS MED BYAS PA DANG, RKU THABS SU GNAS PA DANG, LOG LTA CAN SOGS LA NI SO THAR GYI SDOM PA SKYE BA MIN NO ZHES PA'O, ` ,LNGA PA SO THAR GYI SDOM PA GTONG BA'I RGYU BSHAD PA LA GNYIS SDOM PA GTONG BA'I RGYU BSHAD PA DNGOS DANG, DE LA RANG SDE'I BZHED TSUL BSHAD PA'O, ` ,DANG PO LA GNYIS, SO @09B THAR RIS BRGYAD KA'I GTONG RGYU THUN MONG BA BSHAD PA DANG, SO SO'I GTONG RGYU THUN MONG MA YIN PA BSHAD PA'O, ` ,DANG PO NI, SDOM PA GTONG BA'I RGYU LA GNYIS, ,BSLAB PA PHUL DANG SHI 'PHOS DANG, ,MTSAN GNYIS BYUNG DANG LAN GSUM GYUR, ,DGE RTZA CHAD RNAMS THUN MONG NGO, ZHES PAS STON LA, DON NI, DE YANG SO THAR GYI SDOM PA GTONG BA'I RGYU LA SO THAR RIS BRGYAD KA'I GTONG RGYU THUN MONG BA DANG, SO SO'I GTONG RGYU THUN MONG MA YIN PA GNYIS YOD PA LAS, YUL DGE SLONG SOGS KYI MDUN DU BSLAB PA 'BUL LO, ZHES SOGS KYI CHO GA BRJOD NAS BSLAB PA PHUL BA DANG, SHI 'PHOS PA DANG, PHO MO'I MTSAN MA GNYIS CIG CAR DU BYUNG BA DANG, MTSAN LAN GSUM DU GYUR PA DANG, DGE BA'I RTZA BA CHAD PA STE LOG LTA SKYES PA RNAMS NI THUN MONG GI GTONG RGYU'O ZHES PA'O, ` ,GNYIS PA NI, NYI SHU MA LON DER SHES DANG, ,BSTEN PHYIR KHAS BLANGS NYIN ZHAG 'DAS, ,RIM BZHIN DGE SLONG DGE SLOB MA, ,BSNYEN GNAS RNAMS KYI THUN MONG MIN, ZHES PAS STON LA, DON NI, MNGAL SHOL DANG BCAS PA'I LO NYI SHU MA LON PA LA LON PAR 'DU SHES TE BSNYEN PAR RDZOGS PA LAS, SLAR LO NYI SHU MA LON PA DER SHES SHING DE'I TSE'ANG LO NYI SHU MA LON PA DANG, SKYES PA DANG 'KHRIG PA BSTEN PA'I PHYIR KHAS BLANGS PA DANG, JI LTAR 'PHEN PA BTANG BA LTAR NYIN ZHAG GI MTHA' 'DAS PA GSUM NI, RIM PA BZHIN DU DGE SLONG GI SDOM PA DANG, DGE SLOB MA'I SDOM PA DANG, BSNYEN GNAS KYI SDOM PA RNAM KYI GTONG @10A *, ,RGYU THUN MONG MIN PA YIN NO ZHES PA'O, ` ,GNYIS PA DE LA RANG SDE'I BZHED TSUL BSHAD PA NI, RTZA BA'I LTUNG BA BYUNG BA DANG, ,DAM PA'I CHOS NI NUB PA LAS, ,SDOM PA GTONG ZHES 'DOD PA'ANG YOD, ,KHA CHE BYE BRAG SMRA BA RNAMS, ,SDOM LDAN RTZA LTUNG BYUNG BA LA, ,BU LON NOR LDAN BZHIN DU 'DOD, CES PAS STON LA, DON NI, MDO SDE PA DANG NYI 'OG BYE BRAG SMRA BA SOGS RTZA BA'I LTUNG BA BZHI GANG RUNG BYUNG BA LAS SDOM PA GTONG ZHES 'DOD PA DANG, DE BZHIN DU NYAN THOS SDE PA BCO BRGYAD KYI NANG TSAN GOS DMAR BA SOGS 'GA' ZHIG DAM PA'I CHOS NI NUB PA LAS SDOM PA GTONG NGO ZHES 'DOD PA'ANG YOD CING, KHA CHE BYE BRAG TU SMRA BA RNAMS NI RTZA LTUNG BYUNG BAS SDOM PA GTONG BAR MI 'DOD DE, SO THAR GYI SDOM PA RNAM DAG DANG LDAN PA'I DGE SLONG LTA BU ZHIG LA SROG GCOD LTA BU'I RTZA BA'I LTUNG BA BYUNG BA NA, DE NI SROG GCOD SPONG BA'I CHA NAS TSUL 'CHAL YIN KYANG MA BYIN LEN SOGS SPONG BA'I CHA NAS TSUL LDAN YIN TE, DPER NA SKYES BU ZHIG LA BU LON DANG NOR GNYIS KA YOD NA DE NI BU LON YOD PA'I CHA NAS DBUL PO YIN KYANG NOR DANG LDAN PA'I CHA NAS PHYUG PO YIN PA BZHIN NO ZHES 'DOD LA, DE BZHIN DU THOGS MED SKU MCHED SOGS NI DAM PA'I CHOS NUB PAS SDOM PA GTONG BAR MI 'DOD DE, DAM PA'I CHOS NUB KYANG SDOM PA SNGAR MED GSAR DU 'THOB PA MED KYI, THOB ZIN GTONG BA MIN PAR BZHED @10B DO ZHES PA'O, ` ,DRUG PA SO THAR GYI SDOM PA BSRUNGS PA'I PHAN YON BSHAD PA LA GNYIS, SO THAR GYI SDOM PA BSRUNGS PA'I PHAN YON BSHAD PA DNGOS DANG, PHAN YON CAN GYI SDOM PA DE BSRUNG BAR GDAMS PA'O, ` ,DANG PO NI, SDOM PA DE DAG BSRUNGS PA LAS, ,GNAS SKABS 'BRAS BU LHA MI DANG, ,MTHAR THUG 'BRAS BU BYANG CHUB GSUm, ,THOB BAR 'GYUR ZHES GSUNGS PA'I PHYIR, ZHES PAS STON LA, DON NI, SNGAR BSHAD PA'I SO SOR THAR PA'I SDOM PA RIS BRGYAD PO DE DAG TSUL BZHIN DU BSRUNGS PA LAS GNAS SKABS KYI 'BRAS BU MNGON MTHO LHA DANG MI'I GO 'PHANG DANG, MTHAR THUG GI 'BRAS BU NGES LEGS NYAN THOS KYI BYANG CHUB DANG, RANG RGYAL GYI BYANG CHUB DANG, BLA NA MED PA YANG DAG PAR RDZOGS PA'I BYANG CHUB GSUM THOB PAR 'GYUR RO ZHES MDO RGYUD DGONGS 'GREL KUN LAS LAN CIG MA YIN PAR GSUNGS SHING, KHYAD PAR 'JUG PA LAS, SO SO'I SKYE BO RNAMS DANG GSUNG SKYES DANG, ,RANG BYANG CHUB LA BDAG NYID NGES RNAMS DANG, RGYAL SRAS RNAMS KYI NGES PAR LEGS PA DANG, ,MNGON MTHO'I RGYU NI TSUL KHRIMS LAS GZHAN MED, CES GSUNGS PA'I PHYIR RO ZHES PA'O, ,GNYIS PA NI, BRTZON LDAN RNAMS KYIS SO SOR THAR, ,RTAG TU GUS PAS 'BAD DE BSRUNG ZHES PAS STON LA, DON NI, PHAN YON MTHA' YAS PA YOD PAR GSUNGS PA'I RGYU MTSAN DE'I PHYIR DAL 'BYOR DON YOD BYA BAR 'DOD PA'I BRTZON 'GRUS DANG LDAN PA RNAMS KYIS BSTAN PA'I RTZA BA SO SOR THAR PA'I SDOM PA'I BCAS @11A *, ,MTSAMS RNAMS RTAG TU SBYOR BA DANG, GUS PAR SBYOR BA'I BRTZON 'GRUS GNYIS KYIS RANG GI SROG LAS KYANG GCES PAR BYAS NAS 'BAD 'BUNG BSKYED DE BSRUNG BAR BYA'O ZHES PA'O, ` ,GSUM PA BSHAD PA MTHAR PHYIN PA'I TSUL LA GNYIS, BSTAN BCOS BRTZAMS PA'I DGE BA BSNGO BA DANG, MDZAD BYANG BSHAD PA'O, ` ,DANG PO NI, DGE DES SKYE BAR LUS CAN RNAMS, ,RTAG TU TSANGS SPYOD LA GNAS SHOG ,CES PAS STON LA, DON NI, DE LTAR 'DUL BA RGYA MTSO'I SNYING PO ZHES BYA BA'I BSTAN BCOS 'DI BRTZAMS PA LAS BYUNG BA'I DGE BA JI SNYED THOB PA DES DUS DENG NAS GZUNG STE SKYE BA THAMS CAD DU MKHA' MNYAM GYI LUS CAN RNAMS, RTAG TU DAL 'BYOR GYI RTEN THOB CING BSTAN PA'I SGOR ZHUGS NAS TSANGS PAR SPYOD PA'I TSUL KHRIMS DRI MA MED PA LA GNAS TE, RNAM MKHYEN RGYAL BA'I GO 'PHANG MYUR DU THOB PAR SHOG CIG CES PA'O, ` ,GNYIS PA NI, CES SO SOR THAR PA'I SDOM PA GTAN LA DBAB PA 'DUL BA RGYA MTSO'I SNYING PO BSDUS PA ZHES BYA BA 'DI NI, YUL GANGS CAN GYI MTHAR SKYES PA'I SNYAN NGAG MKHAN SHAR TZONG KHA PA BLO BZANG GRAGS PA'I DPAL GYIS SBYAR BA'O, ,ZHES PAS STON LA, DON NI, DE YANG ZHIB TU BSHAD NA CES NI GA MTHA'I TSIG PHRAD YIN CING, SO SOR THAR PA'I SDOM PA ZHES PA'I SGRA DON NI GONG DU SMOS ZIN LA DE LTA BU'I SDOM PA DE MA THOB PA THOB PAR BYA BA, THOB PA @11B MI NYAMS PAR BSRUNG BA, NYAMS NA PHYIR BCOS PA'I TSUL RNAMS DNGOS SHUGS GANG RUNG GI SGO NAS GTAN LA DBAB PA STE 'BEBS PAR BYED PA'I SNGON MED PA'I LEGS BSHAD MTSAN 'DUL BA'I SDE SNOD KYI BRJOD BYA SPONG BDUN 'KHOR BCAS KYI TSUL KHRIMS KYIS NYON MONGS PA 'DUL ZHING DBANG PO DUL BAR BYED PAS NA 'DUL BA DANG, 'DUL BA'I SDE SNOD DE YANG JI SKAD DU, SO THAR GYI MDO LAS, SANGS RGYAS 'DUL BA GANGS CAN MTSO, GTING MTHA' MED PA THAMS CAD KYI, ,GNAS PA'I SNYING DANG SNYING PO NI, ,SO SOR THAR PA 'DI YIN NO, ZHES GSUNGS PA LTAR, DPER NA RGYA MTSO CHEN PO NI GTING MTHA' DPAG DKA' ZHING RIN PO CHE THAMS CAD KYI 'BYUNG GNAS YIN PA LTAR DAM PA'I CHOS 'DUL BA 'DI YANG DGAG SGRUB GNANG GSUM SOGS BCAS MTSAMS KYI GTING MTHA' DPAG DKA' ZHING, MNGON MTHO DANG NGES LEGS KYI YON TAN THAMS CAD KYI 'BYUNG GNAS YIN PAS NA RGYA MTSO'I DANG, RGYA MTSO DE'I SNYING PO KHYAD PAR CAN NI YID BZHIN GYI NOR BU RIN PO CHE YIN PA LTAR, 'DUL BA'I YANG SNYING PO KHYAD PAR CAN NI SO SO THAR PA'I SDOM PA 'DI YIN LA, 'DIR YANG SDOM PA DE RTZAL DU BTON NAS 'CHAD PAS NA SNYING PO DANG, TSIG GI LO 'DAB HA CANG RGYAS PA MA YIN PAS NA BSDUS PA ZHES BYA BA 'DI NI, 'PHAGS PA'I YUL RDO RJE GDAN GYI BYANG PHYOGS KHA BA CAN GYI LJONGS 'DI LA STOD MNGA' RIS SKOR GSUM, BAR DBUS @12A *, ,GTZANG RU BZHI, SMAD MDO KHAMS SGANG GSUM RNAMS SU YOD PAR GRAGS PA LAS, YUL GANGS CAN GYI SHAR PHYOGS KYI MTHA' SMAD MDO KHAMS SGANG GSUM GYI NANG TSAN TZONG CHU 'BAB PAS NA TZONG KHA SGANG DU GRAGS PA DER SKYES SHING, SPYIR GYI DPAL LDAN DAndI'I GZHUNG LUGS KYI LAM RNAM PAR DBYE BA NAS SKYON BCU SPONG PA'I BAR LA LEGS BAR SBYANGS SHING, KHYAD PAR ME LONG LAS, SHIS BRJOD PHYAG BYA DNGOS PO NI, ,NGES PAR BSTAN PA'ANG DE YI SGO, ZHES DANG, DNGOS PO RNAMS KYI RANG BZHIN GANG, ,GNAS SKABS SNA TSOGS DNGOS GSAL BYED, ,DE NI RANG BZHIN BRJOD PA STE, ZHES GSUNGS PA LTAR, BSTAN BCOS 'DIR YANG DANG POR SHIS BRJOD KYI SGO DANG, PHYAG BYA BA'I SGO DANG, DNGOS PO NGES BSTAN GYI SGO GSUM TSANG ZHING, DNGOS GZHI YANG DON RGYAN SO LNGA'I DANG PO RANG BZHIN BRJOD PA'I RGYAN GYI SGO NAS RJES SU BSNGAGS PA'I SDEB SBYOR DU BYAS LA DE YANG BOD SKAD LA YOD PA'I YI GE LCI YANG LEGS PAR SPEL ZHING, RANG TSIG DANG, SNGA PHYI DANG, DNGOS SHUGS 'GAL BA DANG, ZLOS BUR BRJOD PA DANG GRENG TSIG 'DRAS PA SOGS SKYON PHRA MOS KYANG DBEN CING, 'DUL BA LUNG SDE BZHI'I DON THAMS CAD YI GE NYUNG NGUS 'GREL BA, DNGOS ZIN GYI DON GO SLA LA, BRJOD BYA'I GTING RGYAL SRAS MTHU CHEN DAG GIS KYANG DPAG DKA' BA YIN PAS NA DE MDZAD PA PO LA SNYAN NGAG MKHAN ZHES @12B GSUNGS PA YIN PAS DE NYID KYI MTSAN 'KHRUNGS YUL LAS BTAGS PA SHAR TZONG KHA PA DANG RAB TU BYUNG BA'I MTSAN BLO BZANG GRAGS PA'I DPAL GYIS GZHAN GYIS BSKUL BA LA MA LTOS PAR THUGS BRTZE BAS KUN NAS BSLANGS TE SBYAR BA'O ZHES PA'O, ,SMRAS PA, 'PHAGS YUL WA RA nA SI'I NOR 'DZIN CHAR, ,RNAM 'DREN BZHI PA'I MGUR GYI BUM BZANG LAS, ,LEGS 'ONGS BDEN BZHI'I CHOS KYI KHRUS CHAB KYIS, ,SKAL BZANG BLO YI DRI MA BKRUS SO SKAD, DE YI CHOS TSUL RGYU CHA DPAG DKA'I PHRENG, ,NYUNG NYUNG TSIG GI SRAD BU LA BRGYUS NAS, ,BLUN BLUN 'GRO BA'I MGUL PAR SPUD MDZAD PAR, ,'DREN MCHOG BLO BZANG GRAGS PA ZHES SU GRAGS, ,GANG GSUNG 'DAB STONG DBUS GNAS DON BZANG BCUD, ,MTHAR SKYES RKANG DRUG TSOGS KYIS MA RNYED PAR, ,RJES BRTZE YANG SPRUL GAR GYI RTZED 'JO LA, ,YONGS 'DZIN NYIN MOR BYED PA ZHES BRJOD KYANG, ,DNGOS BSTAN NYAM CHUNG BLOS KYANG RTOGS SLA MDO, ,BRJOD BYA'I GTING MTHA' YE NAS SHES DKA' BA'I, ,RGYAL BA GNYIS PA'I GSUNG RAB 'O MA'I MTSO, ,RGYAS MDZAD MTSAN MA'I MGON PO 'ANG KHYOD LAS CI, ,DUS NGAN SNYIGS MAS HA CANG SBAGS DUS KYANG, ,RNAM DAG KHRIMS KYI SGONG RGYA MA GROL BAR, ,ZAB LAM RIM GNYIS GLU DBYANGS SGROG MKHAS PA'I, ,'DAB BZANG DES NI BDAG GI YID RAB 'PHROGS, ,MDZES MDZES GOS KYIS ZAG PHUNG KHABS PA DANG, ,ZHIM ZHIM ZAS KYIS LTO BA KHENGS PA LA, ,ZAB ZAB SNYING POR SEMS PA'I BLO GROS @13A *, ,'DI; ,RMONGS RMONGS PHYUGS KYI PHU NU YIN PAS NA, ,YANG YANG RNYED DKA'I DAL 'BYOR MI LUS 'DI, ,PHANGS PHANGS DBUL PO'I NOR BU LTAR MTHONG NAS, ,THUNG THUNG BLO SNA LDAN PA'I BRTZON 'GRUS KYIS, ,LEGS LEGS GTAN MDUN BSGRUB NA MI LEGS SAM, ,LNGA BDO'I MUN PAS KHYAB PA'I DUS NGAN 'DIR, ,NYAM CHUNG SRIN BU'I KHA YI 'OD SDANG GIS, ,BRTAN G-YO'I SMAG RUM BCIL BAR MI NUS PAS, ,RANG MGO RANG GIS BTON NA CIS KYANG LEGS, ,'DI LTAR 'BAD LAS BYUNG BA'I LEGS BYAS NI, ,RAB DKAR BYA BA'I RJES SU 'GRO BA DE, ,SKYE DGU'I SGRIB GNYIS TSA GDUNG YONGS BYANG NAS, ,TSOGS GNYIS CHU GTER 'PHEL BA'I RGYU RU BSNGO,, (ZHES SO SOR THAR PA'I SDOM PA GTAN LA DBAB PA 'DUL BA RGYA MTSO'I SNYING PO BSDUS PA'I t'I KKA BLO BZANG DGONGS DON GSAL BA'I NYIN BYED CES BYA BA 'DI NI, YONGS 'DZIN MAH'A PAndI TA YE SHES RGYAL MTSAN DPAL BZANG POS MDZAD PA'I RNAM BSHAD 'DUL GZHUNG GSAL BA'I SGRON ME LA BRTEN NAS, RTZA BA'I BLA MA NGAG DBANG RDO RJE DPAL BZANG PO'I) (BKA' DRIN GYIS 'TSO BA'I BDUN PA SU DHA RME NDRAS KUN DGA'I LO TSIM BYED ZLA BA'I DMA' PHYOGS KYI RDZOGS PA DANG PO'I NYIN, BZHAD DNGUL CHU RI KHROD DGA' LDAN RTZER SUG BRIS SU BGYIS PA DZA YANTU,, ,,*, SDE DGE'I PAR RKOS TSE RING DBANG RGYAL GYIS PAR TU BSDUBS PA DGE'O, ,ZHAL GRO, ,,)