@72A.3 #, ,RGYA GAR SKAD DU, SA TYA DVA Y'A BA T'A RA, BOD SKAD DU,
BDEN PA GNYIS LA 'JUG PA, THUGS RJE CHEN PO LA PHYAG 'TSAL LO,
,SANGS RGYAS RNAMS KYIS CHOS BSTAN PA, ,BDEN PA GNYIS LA YANG
DAG BRTEN, ,'JIG RTEN KUN RDZOB

BDEN PA DANG, ,DE BZHIN DON DAM BDEN PA'O, ,KUN RDZOB RNAM PA
GNYIS SU 'DOD, ,LOG PA DANG NI YANG DAG GO, ,DANG PO GNYIS TE
CHU ZLA DANG, ,GRUB MTHA' NGAN PA'I RTOG PA'O, ,MA BRTAGS GCIG
PU NYAMS DGA' BA'I, ,SKYE BA DANG NI 'JIG PA'I CHOS, ,

DON BYED NUS DANG LDAN PA NI, ,YANG DAG KUN RDZOB YIN PAR 'DOD,
,DAM PA'I DON NI GCIG NYID DE, ,GZHAN DAG RNAM PA GNYIS SU 'DOD,
,CIR YANG MA GRUB CHOS NYID DE, ,GNYIS DANG GSUM SOGS GA LA
'GYUR, ,BSTAN PA'I TSIG GIS SBYOR BA YIS, ,

SKYE MED 'GAG MED SOGS PAS MTSON, ,DON DAM THA DAD MED TSUL
GYIS, ,CHOS CAN MED CING CHOS NYID MED, ,STONG PA NYID LA THA
DAD NI, ,CUNG ZAD YOD PA MA YIN TE, ,RTOG MED TSUL GYIS RTOGS
PAS NA, ,STONG NYID MTHONG ZHES THA SNYAD GDAGS, ,MA

MTHONG BA NYID DE MTHONG BAR, ,SHIN TU ZAB PA'I MDO LAS GSUNGS,
,DE LA MTHONG DANG MTHONG BYED MED, ,THOG MA THA MA MED ZHI BA,
,DNGOS DANG DNGOS MED RNAM PAR SPANGS, ,RNAM PAR RTOG MED DMIGS
PA BRAL, ,GNAS PA MED PA GNAS MED PA, ,'GRO

@72B 'ONG MED CING DPE DANG BRAL, ,BRJOD DU MED PA BLTAR MED PA,
,'GYUR BA MED PA 'DUS MA BYAS, ,RNAL 'BYOR PA YIS DE RTOG NA,
,NYON MONGS SHES BYA'I SGRIB PA SPANGS, ,MNGON SUM DANG NI RJES
SU DPAG ,SANGS RGYAS PA YIS DE GNYIS GZUNG, ,GNYIS

POS STONG NYID RTOGS SO ZHES, ,TSU ROL MTHONG BA'I RMONGS PA
SMRA, ,MU STEGS NYAN THOS RNAMS KYIS KYANG, ,CHOS NYID RTOGS PAR
THAL BAR 'GYUR, ,RNAM RIG PAS LTA SMOS CI DGOS, ,DBU MA PA LA MI
MTHUN MED, ,DES NA GRUB MTHA' THAMS CAD KYANG, ,TSAD MAS

'JAL PHYIR MTHUN PAR 'GYUR, ,RTOG GE THAMS CAD MI MTHUN PAS,
,TSAD MAS 'JAL BA'I CHOS NYID KYANG, ,MANG PO NYID DU MI 'GYUR
RAM, ,MNGON SUM RJES DPAG DGOS PA MED, ,MU STEGS RGOL BA BZLOG
PA'I PHYIR, ,MKHAS PA RNAMS KYIS BYAS PA YIN, ,LUNG

LAS KYANG NI GSAL PO RU, ,RTOG BCAS RTOG PA MED PA YIS, ,SHES PA
GNYIS KYIS MI RTOGS SHES, ,SLOB DPON MKHAS PA BHA BYA GSUNG,
,STONG NYID GANG GIS RTOGS SHE NA, ,DE BZHIN GSHEGS PAS LUNG
BSTAN ZHING, ,CHOS NYID BDEN PA GZIGS PA YI, ,KLU

SGRUB SLOB MA ZLA GRAGS YIN, ,DE LAS BRGYUD PA'I MAN NGAG GIS,
,CHOS NYID BDEN PA RTOGS PAR 'GYUR, ,CHOS KYI PHUNG PO BRGYAD
KHRI DANG, ,BZHI STONG GSUNGS PA THAMS CAD NI, ,CHOS NYID 'DI LA
GZHOL ZHING 'BAB, ,STONG NYID RTOGS PAS GROL 'GYUR

GYI; ,SGOM PA LHAG MA DE DON YIN, ,YANG DAG KUN RDZOB KHYAD BSAD
NAS, ,STONG PA NYID LA GOMS BYED NA, ,KUN RDZOB RGYU 'BRAS DGE
SDIG SOGS, ,'JIG RTEN PHA ROL BSLUS PAR 'GYUR, ,CUNG ZAD THOS PA
LA BRTEN TE, ,RNAM PAR BDEN DON MI SHES SHING, ,

MI GANG BSOD NAMS MI BYED PA, ,SKYES BU THA SHAL DE DAG BRLAG
,STONG PA NYID LA BLTA NYES NA, ,SHES RAB CHUNG RNAMS PHUNG BAR
'GYUR, ,SLOB DPON ZLA GRAGS 'DI SKAD DU, ,THABS SU GYUR PA KUN
RDZOB BDEN PA DANG, ,THABS LAS BYUNG BA DON DAM BDEN

@73A *, ,PA DAG ,GNYIS PO'I DBYE BA GANG YIN MI SHES PA, ,DE DAG
LOG PAR RTOGS PAS NGAN 'GROR 'GRO, ,THA SNYAD LA NI MA BRTEN
PAR, ,DAM PA'I DON NI RTOGS MI 'GYUR, ,YANG DAG KUN RDZOB RNAMS
KYI SKAS, ,MED PAR YANG DAG KHANG CHEN GYI, ,

STENG DU 'GRO BAR BYED PA NI, ,MKHAS LA RUNG BA MA YIN NO, ,KUN
RDZOB JI LTAR SNANG BA 'DI, ,RIGS PAS BRTAGS NA 'GA' MI RNYED,
,MA RNYED PA NYID DON DAM YIN, ,YE NAS GNAS PA'I CHOS NYID DO,
,RGYU RKYEN DAG GIS BSKYED PAS NA, ,KUN RDZOB JI LTAR

SNANG BA GRUB, ,GAL TE GRUB PAR MI RUNG NA, ,CHU ZLA LA SOGS SU
YIS BSKYED, ,DES NA RGYU RKYEN SNA TSOGS KYIS, ,BSKYED PAS SNANG
BA THAMS CAD GRUB, ,RKYEN RNAMS RGYUN NI CHAD GYUR NA, ,KUN
RDZOB TU YANG MI 'BYUNG NGO, ,DE LTAR LTA BAS MA RMONGS SHING, ,

SPYOD PA SHIN TU DAG GYUR NA, ,GOL BA'I LAM DU MI 'GRO ZHING,
,'OG MIN GNAS SU 'GRO BAR 'GYUR, ,TSE NI YUN THUNG SHES BYA'I
RNAM PA MANG, ,TSE YI TSAD KYANG JI TZAM MI SHES PAS, ,NGANG PA
CHU LA 'O MA LEN PA LTAR, ,RANG GI 'DOD PA DANG LA BLANG

BAR GYIS, ,TSU ROL MTHONG BA'I RMONGS PA BDAG GIS NI, ,BDEN
GNYIS GTAN LA DBAB PAR MI NUS KYANG, ,BLA MA RNAMS KYI GSUNG LA
BRTEN NAS NI, ,KLU SGRUB LUGS KYI BDEN GNYIS BKOD PA 'DI, ,GSER
GLING RGYAL PO'I NGOR BYAS 'DI LA NI, ,GAL TE

DING SANG SKYE BO DAD GYUR KYANG, ,LEGS PAR BRTAGS LA BLANG BAR
BYA BA YI, ,DAD PA TZAM DANG GUS PA TZAM GYIS MIN, ,GSER GLING
RGYAL PO GU RU PHA LA YIS, ,DGE SLONG DE BA MA TI BTANG GYUR
NAS, ,DE YI NGOR BYAS BDEN GNYIS LA 'JUG 'DI, ,DING SANG

MKHAS PA RNAMS KYIS BRTAG PAR RIGS, ,BDEN PA GNYIS LA 'JUG PA
SLOB DPON MKHAS PA CHEN PO DPAL MAR ME MDZAD YE SHES KYIS MDZAD
PA RDZOGS SO,, ,,PAndI TA DE NYID DANG LO TZ'A BA RGYA BRTZON
SENG GES BSGYUR CING ZHUS TE GTAN LA PHAB PA,, ,,