@#/ /bstan bcos mngon par rtags pa'i rgyan rtsa 'grel gyi spyi don rnam bshad snying po rgyan gyi snang ba zhes bya ba skabs gnyis pa bzhugs so/ @01a @#*/ /gnyis pa rnam mkhyen der bgrod pa'i thabs lam shes bshad pa la/ gzhung 'brel dang/ mtha' dpyad pa gnyis/ dang po la/ rnam mkhyen bshad zin pa'i rjes su lam shes 'chad pa'i rgyu mtshan/ gzhung don so sos ji ltar 'chad tshul/ dang po la rab 'byor gyi le'u dang skabs dang po'i gzhung rnams kyis rnam mkhyen bshad zin nas/ spyod pa khyad par can gyi le'u dang skabs gnyis pa'i gzhung rnams kyis lam shes 'chad par byed de/ 'grel chung gnyis ka las/ rnam pa thams cad mkhyen pa nyid rtogs pa ni lam shes pa nyid yongs su shes pa med na med pas lam shes pa nyid/ ces gsungs pa'i phyir/ 'o na rnam mkhyen bshad zin pa'i rjes su lam shes 'chad pa'i rgyu mtshan dang dgos pa ji lta bu zhe na/ de ltar 'chad pa'i rgyu mtshan yod de/ lam gsum shes pa'i lam shes rdzogs par nyams su ma blangs bar rnam mkhyen 'thob mi nus pa'i rgyu mtshan gyis de ltar bshad pa'i phyir/ dgos pa yod de/ dgag phyogs nas dkon mchog gsum la skyabs su 'gro btsam dang/ stong nyid sgom pa tsam gyis rnam mkhyen 'thob nus pa gcod pa dang/ sgrub phyogs nas rnam mkhyen 'thob pa la theg pa gsum gyi lam shes rdzogs par sgom dgos so zhes shes par bya ba'i ched yin pa'i phyir/ skabs dang por lam shes bshad nas slar yang 'dir bshad pa la zlos skyon med de/ de med par 'grel chen las brgal lan dang bcas te bshad pa'i phyir/ 'grel chen las brgal lan ji ltar bshad par mdzad na/ skabs gnyis par nyan rang gi lam shes pa'i lam shes kyi rgyu nges 'byed cha mthun bshad nas byang sems kyi lam shes kyi rgyu nges 'byed cha mthun mi 'chad pa'i rgyu mtshan ji lta bu zhe na/ de'i rgyu mtshan yod de/ de skabs dang por bshad zin pa'i phyir/ zhe na 'o na/ 'dir byang sems kyi lam shes kyang @02a @#*/ /'chad mi rigs par thal/ de skabs dang por bshad zin pa'i phyir te/ byang sems kyi sa bcu bshad zin pa'i phyir/ zhe na skyon med de/ brjod tshul dang dgos pa mi 'dra ba'i khyad par yod pa'i phyir/ brjod tshul mi 'dra ba'i khyad par yod de/ skabs dang por chos bcu mngon sum du rtogs pa'i rnam mkhyen gyi yul gyi ldog cha nas bstan/ gnyis par rnam mkhyen de'i rgyu'i ldog cha nas bstan pa'i phyir/ dgos pa mi 'dra ba'i khyad par yod de/ skabs dang por chos bcus yul gyis yul can mtshon pa'i ched dang/ 'dir rnam mkhyen 'thob pa la rgyu lam shes rdzogs par sgom dgos so zhes shes pa'i ched du chos bcu'i nang nas rgyu lam shes logs su bkar nas 'chad pa'i phyir te/ 'grel chen las/ brjod par bya ste rgyu dang 'bras bu ma lus par thugs su chud pa rnams kyis/ zhes sogs gsungs pa'i phyir/ gnyis pa gzhung so sos ji ltar 'chad tshul la 'o na/ skabs gnyis par rgyu lam shes gtan la 'bebs na mtshon byed kyi chos dus ji ltar mtshon te gtan la 'bebs she na/ mtshon byed kyi chos bcu gcig gi sgo nas gtan la 'babs shing/ bcu gcig po de yang bsdu na rnam pa gnyis su 'du ba yin te/ lam shes sgom pa po rten gyi gang zag dang des lam shes sgom tshul gnyis su 'du ba'i phyir/ sgom pa po rten gyi gang zag de khyad chos lnga ldan du 'chad pa'i nang nas lam shes dngos su skye ba'i rten gyi gang zag de bgegs mngon pa'i nga rgyal mngon 'gyur ba dang bral ba dgos so zhes shes pa'i phyir du/ bcom ldan 'das kyi rang bzhin gyi 'od kyis lha rnams kyi 'od mog mog por mdzad pa'i sgo nas bgegs dang bral ba'i rten gyi khyad chos de 'chad pa la/ mdor de bzhin gshegs pa'i rang bzhin gyi 'od kyi drung du lha rnams kyi rnam par smin pa las skyes pa'i 'od de ni lha mer ma yin lha ner ma yin lha nger ma yin gyi de bzhin gshegs pa'i 'od @002b 'bab zhig rab ces bya'o/ /dam pa dang gtso bo dang mchog dang mchog rab dang phul du byung ba dang bla na med pa dang gong na med pa dang gong ma'i gong ma zhes bya'o/ /zhes sogs dang/ bstan bcos su lha rnams rung bar bya ba'i phyir/ zhes sogs rtsa 'grel rnams gsungs/ der ma zad lam shes dngos su skye ba'i rten gyi gang zag de mthun rkyen byang chub mchog tu sems bskyed pa dgos zhes yul nges pa'i khyad par 'chad pa la/ mdo las/ btsun pa rab 'byor byang chen sher phyin la ji ltar gnas par bya/ byang chen gyi sher phyin de gang yin zhes dris pa'i lan du lha'i bu gang gis byang chub tu sems ma bskyed pa de dag gis kyang bla na med pa'i byang chub tu sems bskyed par bya'o/ /zhes dang/ bstan bcos su yul nges pa dang/ zhes pa rtsa 'grel gsungs/ de rjes sems tsam pa'i rigs can rjes su bzung ba'i phyir du/ gang yang dag pa skyon med pa la zhugs par gyur pa de dag la ni bla na med pa'i byang chub tu sems bskyed pa'i mthu med do/ /di ci'i phyir zhe na/ de dag gis 'khor ba'i rgyun gyi mtshams bcad pa'i phyir/ zhes zhi ba bgrod pa gcig pu pa'i nyan thos theg chen du mi 'jug par sgras zin la bstan nas/ 'on kyang gang yang gal te de dag gis kyang na med pa'i byang chub tu sems bskyed na de dag la yang rjes su ye rang bar bya'o/ /zhes mdo gong ma sgra ji bzhin pa ma yin pa'i drang don du bkral nas zhi ba bgrod pa gcig pu pa'i nyan thos mthong lam phas mtshon pa'i sems can thams cad la rigs kyis khyab pa'i khyad chos bstan cing/ de'i don gtan la 'bebs pa la khyab pa dang/ zhes pa rtsa 'grel gsungs/ de yang lam shes dngos su skye ba'i rten gyi gang zag la nyon mongs spang bya'i gtso bor byas nas mi spong ba'i rigs can zhig dgos so zhes ston pa la/ mdo las/ kho bos ni de dag gi dge ba'i rtsa ba'i phyogs la bar chad mi byed do/ /zhes dang/ bstan bcos su rang bzhin dang/ zhes pa rtsa 'grel gsungs/ de rjes de 'bra'i gang zag de gzhan don gtso bor sgrub cing yang dag mtha' mngon du byed pa'i dus dang dus ma yin pa la mkhas pa'i byed las can zhig dgos zhes 'chad pa la/ mdo las/ khyad par du 'phags pa'i chos rnams las khyad par du 'phags pa'i chos rnams mngon du @003a @#/ /byed do/ /zhes gsungs/ bstan bcos su de yi las/ zhes pa rtsa 'grel gsungs/ mdo bstan bcos de rnams kyis khyad chos lnga ldan gyi lam shes sgom pa po'i rten gyi gang zag bstan pa yin te/ 'grel pa las/ de'i phyir tshig zur gyi rten brjod pa yin no/ / zhes gsungs pa'i phyir/ gnyis pa lam shes ji ltar sgom tshul la/ 'o na/ de lta bu'i rten gyi gang zag gis lam shes sgom tshul ji lta bu zhe na/ de la gdul bya gzhan rjes su bzung ba'i phyir du shes mthong gis bltas nas 'dab pa'i sgom tshul dang/ byang sems rang nyid kyis mngon du bya ba'i phyir sgom tshul gnyis/ dang po la yang nyan thos kyi rigs can rjes su bzung ba'i ched du sgom tshul dang/ rang rgyal gyi rigs can rjes su bzung ba'i ched du sgom tshul gnyis las/ dang po la mthod lam gyi skabs su sgom tshul dang/ sbyor lam gyi gnas skabs su de'i rgyu nges 'byed cha mthun sgom tshul gnyis/ dang po la/ sems bskyed pa sngo ba shes rab gsum gyis zin pa'i sgo nas mi rtag sogs bcu drug mngon sum du rtogs pa'i theg chen gyi mthong lam sgom tshul mdo las bstan tshul gyi dbang du byas na/ brgya byin gyis rab 'byor la yum gang yin dris pa'i lan du/ ko'u shi ga de la byang chen gyis sher phyin gang zhe na/ 'di la byang chen rnam pa thams cad mkhyen pa nyid thang ldan pa'i sems bskyed pa de mi dmigs pa'i tshul gyi gzugs mi rtag pa nyid du yid la bya'o/ /bdag med pa dang/ sdug bsngal ba dang/ zhi ba nyid du yid la bya'o/ nad dang/ zug rngu dang/ sdig pa'i rnam pa nyid du yid la bya'o/ /pha rol nyid dang/ 'jig pa'i chos can nyid dang/ g.yo ba nyid dang/ rab tu 'jig pa nyid dang/ nad 'go ba nyid dang/ 'jigs pa dang/ nye bar tshe ba nyid du yid la bya'o/ /bdag med pa nyid dang/ zhi ba nyid dang/ dben pa nyid dang/ stong pa nyid dang/ mtshan ma med pa nyid dang/ smon pa med pa nyid dang/ mngon par 'du bya ba med pa nyid du yid la bya'o/ /zhes dang/ dran pa nye bar gzhag pa bzhi sgom mo// zhes pa nas/ sangs rgyas kyi chos ma 'bres pa bco brgyad kyi bar rnams sgom mo/ /zhes??? bar dang/ sbyin pa'i pha rol tu phyin pa @003b la spyod/ ces pa nas shes rab pha rol tu phyin pa la spyod/ /ces pa'i bar dang/ sher sbyin la spyod pa'i tshe/ chos kyi chos rnams la spyad par mi byed/ ces dang/ ko'u shi ka yongs su bsngos pa'i sems gang yin pa de sems ma yin zhes pa'i mdon rnams gsungs/ mdo de rnams kyis shes rab bya nyon thos kyi lam shes kyi dmigs pa bden bzhi'i steng gi khyad chos nyer gsum bstan pa yin te/ sdug kun gyi rnam pa bco lnga/ 'gog lam gyi rnam pa brgyad dang bcas pa bstan pa'i phyir/ sdug kun gyi rnam pa la bco lnga yod de/ sdug kun so so'i rnam pa brgyad// thun mong pa'i rnam pa bdun dang bcas pa rnams su yod pa'i phyir/ thun mong pa'i rnam pa bdun yod de/ yid 'byung ba'i rnam pa gnyis/ 'dod chags dang bral bar bya ba'i rnam pa gnyis/ 'gog par bya ba'i rnam pa gsum dang bcas pa rnams su yod pa'i phyir/ bden bzhi'i rnam pa mi rtag sogs bcu drug mdo las bstan tshul yod de/ gzugs mi rtag pa nyid du yid la bya'o/ /zhes pa nas/ zhi ba nyid du yid la bya'o/ /zhes pa'i bar gyis sdug bden gyi rnam pa gzhi po bstan/ nad nyid ces pa nas sdig pa nyid ces pa'i bar gyis kun 'byung gi rnam pa bzhi bstan/ bdag med pa/ dben pa/ zhi ba gsum gyis 'gog bden gyi rnam pa dang po gsum bstan/ stong pa nyid sogs bzhis nges 'byung gi rnam pa bstan/ dran pa nyer gzhag sogs kyis lam bden gyi rnam pa dang/ sbyin pa'i pha rol tu phyin ba zhes sogs kyis rig pa'i rnam pa dang/ sher phyin la spyod pa'i tshe chos kyi chos rnams la zhes sogs kyis sgrub pa'i rnam pa dang/ ko'u shi ka yongs su bsngos ba'i zhes sogs kyis nges 'byung gi rnam pa bstan pa'i phyir/ rnam pa de rnams stogs pa'i nyan thos kyi lam shes dngos bstan bstan bya'i gtso bor byas nas gtan la babs pa la/ lam shes nyid kyi tshul la ni/ zhes sogs kyi gzhung gsungs/ gnyis pa ni/ mthong lam gyi skabs su chos gsum gyi zin pa'i sgo nas rnam pa rnams mngon sum du rtogs pa la sbyor lam gyi skabs su chos gsum gyis zin pa'i sgo nas don spyi'i tshul gyis rtogs pa'i de'i rgyu nges 'phyed cha mthun bzhi sngon du 'gro dgos pas de 'chad pa la/ mdo'i dbang du byas na de nas bcom @004a @#/ /ldan 'das kyis tshe dang ldan pa rab 'byor la bka' stsal pa/ rab 'byor leg so legs so zhes gsungs pa'i phyir/ bstan bcos kyi dbang du byas na/ 'phags pa nyan thos lam la ni/ zhes sogs kyi gzhung gsungs/ gnyis pa rang rgyal gyi rigs can rjes su bzung ba'i phyir du rang rgyal gyi lam shes pa'i lam shes sgom tshul la/ de'i 'og de ma thag tu rang rgyal gyi lam she pa'i lam shes 'chad rigs na'ang re zhig de mi 'chad par/ nyan rang gnyis la khyad par yod dam med/ med na de gnyis kyi lam shes pa'i lam shes so sor 'chad mi rigs te/ yod na khyad par ji lta bu snyam pa'i dogs pa bsal ba'i phyir du/ de gnyis kyi khyad par mdo las 'chad pa'i dbang du byas na/ mdo las/ sbyor lam gyi skabs su gzugs la gnas pa yang ma yin mi gnas pa yang ma yin zhes pa nas/ rnam par shes pa'i bar la gnas pa yang ma yin mi gnas pa yang ma yin no/ /shA ri'i bu de ltar byang chub sems dpa' sems dpa' chen po sher phyi la gnas par bya ste/ gnas pa med pa'i tshul gyi gnas par bya'o/ /zhes gsungs pa nas/ 'khro gyi nang na lha'i bu kha cig gang gnod sbyin rnams kyis smras pa'i skad la sogs pa ni shes par nus kyi 'phags pa rab 'byor shes rab kyi pha rol tu phyin pa 'chad pa ni shes pa ma yin no snyam pa dang/ gang gnod sbyin rnams kyi skad dang/ gnod sbyin rnams kyi tshig dang/ gnod sbyin gyis smras pa dang/ gnod sbyin rnams kyis rab tu smras pa gang yin pa de dag ni smras par gyur na shes par rung gi gang 'phags pa rab 'byor shes rab kyi pha rol tu phyin pa 'chad pa dang/ rab tu brjod pa dang/ ston pa dang/ rab tu ston pa dang/ nye bar ston pa de shes par mi rung ngo/ /zhes sogs gang/ kyi ma gnas brtan rab 'byor ni shes rab kyi ha rol tu phyin pa gsal bar byed pa ste bral ba las kyang ches phra ba dang/ zab pa bas kyang ches zab pa dang/ zhes sogs gsungs/ de yang mdo tshan dang pos rang rgyal rigs nges rnams kyis srid pa tha ma pa'i tshe/ slob dpon gyi gdams ngag lam bltos par rang byung gi byang chub mngon du byed par bstan/ mdo tshan gnyis pas nyan thos @004b rnams kyis gang zag gi bdag med rtogs pas rtogs pa zab pa dang/ de'i steng du rang rgyal rnams kyis gzugs sogs phyi rol don gyis stong par rtogs pas nyan thos las kyang rtogs pa zab par bstan cing/ mdo tshan dang po'i don 'chad pa la bstan bcos su/ rang byung bdag nyid rtogs pa'i phyir/ gzhan gyi bstan yang mi dgos la/ zhes dang/ mdo tshan gnyis pa'i don 'chad pa la/ bse ru lta bu'i ye shes ni/ /zab pa nyid du mngon par brjod/ /ces pa dang/ chos ston tshul la dogs pa dpyod pa la/ gang gnag don ni gang gang la/ zhes gsungs pa'i phyir/ nyan rang gi khyad par de ltar yin na khyad chos de ldan gyi rang rgyal gyi lam shes pa'i lam shes sgom tshul ji lta bu zhe na/ de yang mdo'i dbang du byas na de nas tshe dang ldan pa rab 'byor gyis lha'i bu de dag la smras pa/ gzugs ni zab pa ma yin/ phra ba ma yin no/ /de ci'i phyir zhe na/ gzugs kyang kyi rang bzhin zab pa ma yin phra ba ma yin zhes pa dang/ de nas lha'i bu de dag 'di snyam du sems par gyur te/ gnas brtan rab 'byor la chos nyan pa ji lta bu zhig la blta bar bya snyam pa dang/ de nas tshe dang ldan pa rab 'byor gyis lha'i bu de dag la smras pa/ lha'i bu sems can rnam ni sgyu ma lta bu ste/ chos nyan pa yang sgyu ma lta bur btsal bar bya'o/ /sems can rnams ni sprul pa lta bu ste/ chos nyan pa yang sprul pa lta bur btsal bar bya'o/ /zhes gsungs/ de yang rang rgyal gyi lam de gzugs sogs phyi rol don 'dzin gyi gzung rtog spang bya'i gtso bor byas nas spong ba'i khyad par/ nang shes pha bden 'dzin mi spong ba'i khyad par/ rten rang gyi rigs la brten pa'i khyad chos gsum las/ mdo tshan dang po'i khyad chos dang po rten rang rgyal slob pa 'phags pa rnams kyis gzugs sogs phyi rol don gyis stong par rtogs/ rang rgyal dgra bcom pa rnams kyis gzugs sogs phyi rol don 'dzin gyi rtog pa spangs pa'i rgyu mtshan gyis/ gzugs sogs phyi rol don gyis stong pa mngon sum du rtogs pa'i ye shes dang phyi rol don 'dzin gyi rtog pa spangs pa'i spangs pa rang rgyal la bltos te zab pa dang/ phra ba ma yin par bstan pa'i phyir/ mdo tshan gnyis pas khyad chos gnyis pa @005a @#/ /bstan/ sgyu ma mkhan gyis rdo shing rta glang du sprul pa na rdor shing rta glang du ma grub kyang rta glang du 'dzin pa'i bden 'dzin gyi shes pa skye ba bzhin du/ nang gi shes pa bden par ma grub kyang rang rgyal slob pa 'phags pas nang shes pa bden med du ma rtogs/ rang rgyal dgra bcom pas shes pa bden 'dzin ma spangs bar bstan pa'i phyir/ khyad chos gsum pa ston pa'i dbang du byas nas/ yum par ma las/ tshe dang ldan pa gang dag phyir mi ldog pa'i byang chub sems dpa' chen po rnams bden pa mthong ba'i byang sems chen po rnams sam/ lta ba phun sum tshogs pa'i gang zag gam/ dgra bcom pa zag pa zad pa gang yin pa de dag yum 'di ltar yang dag par bshad pa la yang dag par 'dzin par 'gyur ro/ /zhes gang zag gsum gsungs/ sdud pa las/ rgyal sras bdan la mkhas dang phyir mi ldog pa dang/ /dgra bcom dri ma zad cing som nyi spangs pa dang/ /bzhi pa dge ba'i bshes kyis yongs su zin pa'o/ /zhes gang zag gsungs/ yang mdo las/ de nas lha rnams kyi dbang po brgya byin gyis stong gsum gyi stong chen po'i 'jig rten khams kyi rgyal chen rigs bzhi nas 'og min gyi bar gyi lha rnams kyis lha rdzas kyi me tog man d+ha ra pa mang po sprul nas/ sangs rgyas bcom ldan 'das rnams dang/ byang chen rnams dang/ dge slong gi dge 'dun rnams dang 'phags pa rab 'byor dang yum 'di la yang mngon par rab tu gtar ro/ /zhes gsungs pa'i phyir/ mdo de rnams kyi rten dang rigs kyi khyad par bstan te/ mdo dang po gsum gyis sgrub pa po rten gyi gang zag gi khyad par bstan/ mdo phyi mas rten pa chos nyid kyi khyad par bstan pa'i phyir/ dang po grub ste/ nyi khri nas gsungs pa'i bden pa mthong ba'i gang zag dang/ brgyad stong pa nas gsungs pa'i lta ba'i lta ba phun sum tshogs pa'i gang zag dang/ sdud pa nas gsungs pa'i rgya sras bden pa la mkhas pa gsum gyis gnas skabs rang rgyal du rigs nges pa'i rang rgyal tshogs lam pa bstan/ snga phyi bar gsum gyis phyi mi ldog pa zhes pas gnas skabs rang rgyal du rigs nges pa'i rang rgyal sbyor lam pa bstan/ mdo dang po gnyis kyis dgra @005b bcom pa zhes pa dang/ tha mas dgra bcom dri ma bsal dang som nyi spangs pa dang/ zhes pa gsum gyi rang rgyal gyi mthong sgom mi slong lam pa gsum bstan pa'i phyir/ gnyis pa grub ste/ mdo des sprul pa'i me tog man d+ha ra ba rnams don dam par med kyang/ tha snyad du mchod pa'i bya ba sogs byed par bstan pa de bzhi du/ rang rgyal gyi lam rnams kyang don dam par ma grub kyang tha snyad du bstan pa rigs kyi khyad par byas pa dang ldan par bstan pa'i phyir/ de rnams kyi dgongs pa bstan bcos su 'grel pa la/ gzung don rtog pa spong phyir dang/ zhes pas bstan bcos dang pos mdo don 'chad/ 'dzin pa mi spong phyir dang ni/ zhes pas khyad chos gnyis pa ston pa'i mdo don 'chad pa dang/ rton gyi bse ru lta bu'i lam/ zhes pas khyad chos gsum pa ston pa'i mdo don 'chad do/ /brtogs pa'i chos nyid mi 'gral ba/ zhes sogs kyis de'i rgyu nges 'byed cha mthun 'chad/ gnyis pa byang sems rang nyid kyi mngon du bya ba'i lam shes sgom tshul la/ byang sems kyis mthong lam gyi skabs su sgom chul dang/ sgom lam gyi skabs su sgom tshul dang gnyis/ dang po la mdo'i dbang du byas na/s de nas lha rnams kyi dbang po brgya byin gyis tshe dang ldan pa shA ri'i bu la 'di skad ces smras so/ /bcun pa shA ri'i bu shes rab kyi pha rol tu phyin pa gang las btsal bar bya/ zhes pa'i lan du shA ri'i bus smras pa/ ko'u shi ka sher phyin rab 'byor gyi le'u las bcal bar bya'o/ /zhes pa las 'phros nas/ gzugs kyi de bzhin nyid la de bzhin gshegs pa'i de bzhin nyid mi dmigs so/ /zhes sogs kyi mthong lam gyi mdo rnams gsungs/ mdo de rnams kyis sbas don theg chen gyi mthong lam shes bzod skad cig ma bcu drug mdor bstan rgyas bshad gnyis kyi sgo nas 'chad pa la/ bden pa dang bden la bzod pa dang/ zhes sogs mthong lam gyi gzhung rnams gsungs/ des shes bzod skad cig ma bcu drug phye tshul yod de/ bden dang zhes pas bden pa snga ma gnyis dang/ bden la zhes pa phyi mas bden pa phyi ma gnyis te bzhi la dmigs pa'i shes bzod skad cig ma bcu drug tu phye nas phan yon chen po dang bcas te 'chad pa'i phyir/ gnyis sgom lam gyi skabs su sgom tshul la/ sgom pa po rten gyi gang zag ste/ sgom @006a @#/ /lam sgom pa la spro ba 'phel ba dang/ rjod byed kyi tshig nyung bas dang por sgom lam gyi byed pa 'chad pa la/ de yang mdo'i dbang du byas na/ mthong lam gyi skabs su yum la gnas pa'i byang sems rnams kyis rang gi skyon rigs par byas nas lam la slob par byas pa las 'phros nas/ de nas lha rnams kyi dbang po brgya byin gyis bcom ldan 'das la gsol pa/ bcom ldan 'das shes rab kyi pha rol tu phyin pa ni 'di ltar byang sems chen po rnams kyi rang gi skyon rigs par byas nas sems zhi ba dang/ dul ba dang/ nga rgyal ma mchis pa'i don du nye bar gnas pa ngo mtshar che'o/ /zhes gsungs/ mdo de'i don bstan bcos su theg chen sgom lam gyi byed pa drug tu phye nas 'chod pa la/ kun nas zhi dang thams cad la/ /zhes sogs kyi gzhung gsungs/ byed pa der ldan gyi sgom lam la yang theg chen gyi zag bcas sgom lam dang/ zag med sgom lam gnyis/ dang po la yang mos bsngo rjes su yid rang gsum gyi dang po mdo las bstan tshul gyi dbang du byas na/ byed pa drug pa'i skabs su shes rab kyi pha rol tu phyin pa 'di nyid gnas pa'i phyogs de sems can thams cad kyi mchod rten du gyur par byas pas zhes sogs gsungs pa las 'phros nas/ sher phyin la mchod pa dang/ de bzhin gshegs pa'i sku gdung la mchod pa gnyis bsod nams gang che zhus pa'i lan du mos pa sgom lam gyi rtsa ba'i mdo rnams gsungs pa yin te/ yum bar ma las/ shes rab kyi pha rol tu phyin pa zab mo 'di bris shing/ glegs bam du bgyis te sangs rgyas la mchod pa bgyis pa dang/ yongs su mya ngan las 'das pa'i sku gdung rnams rin po che sna bdun gyi nang du bcug ste/ mchod pa byas na/ sher phyin ni rnam pa thams cad mkhyen pa nyid kyi rgyur 'gyur ba'i phyir dang/ de'i rten du gyur pas sangs rgyas kyi skus mchod pa mnyes pa'i phyir/ dang po kho nar ches bsod nams mang po 'phel ba'i rgyu nyid kyi gang gsungs pa yin no/ /zhes gsungs/ de'i dgongs pa 'grel pa la/ bstan bcos su/ mos pa rang gi don dang ni/ zhes sogs gsungs/ mos pas bsags pa'i dge rtsa de nyid bsto pas rdzogs @06b byang du bsgyur dgos pas de'i rjes su bsngo ba sgom lam 'chad cing/ de yang mdo'i dbang du byas na yum bar ma las/ nyan thos dang rang sangs rgyas thams cad kyi sbyin pa la sogs pa'i bsod nams bya ba'i dngos po rnams las byang chen gyi bla na med pa yang dag par rdzogs pa'i byang chub mi dmigs pa'i tshul gyi bsngo ba 'di rab ces bya'o/ /dam pa zhes bya'o/ /zhes sogs gsungs/ de rnams kyi dgongs pa 'grel pa la/ bstan bcos su/ yongs su bsngo ba khyad par can/ /zhes sogs gsungs/ de yang 'dir bsngo bstan ? tshul yod de/ rkang pa dang po gnyis kyis bsngo ba'i rang bzhin bstan/ rkang pa gsum pas bsngo bya'i rdzas la bden zhen 'gag pa dang/ rkang pa bzhi pas bsngo byed kyi sems la bden zhen dgag pa dang/ dben dang zhes pas bsngo ba po la bden zhen dgag pa dang/ sangs rgyas bsod nams tshogs/ rang bzhin dran pa'i spyod yul can/ zhes pas rang gzhan gyi dge rtsa la bzang ngan gang rung bden zhen 'gog pa dang/ thabs bcas mtshan ma med ces pas bsngo ba thams cad la bden zhen 'gag pa dang/ sangs rgyas rjes su yid rang dang/ zhes pas tha snyad du rten 'brel sgyu ma lta bur shes nas 'khor ba'i rgyur mi bsngo zhing/ sangs rgyas kyi rgyur bsngo ba dang/ bsngo ba gzhan ni rnam gsum mo/ /zhes pas tha snyad du bsngo ba'i dbye ba bstan pa'i phyir/ rdzogs byang du bsngos pa'i dge rtsa de yang rjes su yi rang gis gong 'phel du byed dgos pas de rjes rjes su yid rang sgom lam 'chad cing/ de yang mdo las 'chad tshul gyi dbang du byas na bsngo ba sgom lam gyi skabs su rang gzhan gyi dge rtsa gcig tu yi rang bar gsungs pa na/ rab 'byor gyis bcom ldan 'das la ji tsam gyi rjes su yid rang bar 'gyur/ zhes zhus pa'i lan du/ rjes su yid rang sgom lam gsungs te/ nyi khri las/ bcom ldan 'das ji ltar na rjes su yid rang bar 'gyur/ zhes pa nas brtsams te/ thabs la mkhas pa'i mi dmigs pa'i tshul gyi dge ba'i rtsa ba de dag bla na med pa yang dag par rdzogs pa'i byang chub tu yongs su bsngo bar bya'o/ /zhes pa'i bar du gsungs/ de rnams kyi dgongs pa 'grel ba la bstan bcos su/ thabs dang mi dmigs pa dag gi/ zhes sogs gsungs/ lan/ gzugs sku'i lag rjes 'jog byed mos bsngo rjes su @07a @#/ /yid rang sgom lam gsum bstan tshul de ltar yin na/ chos sku'i lag rjes 'jog byed mnyam gzhag gis bsdus pa'i zag med sgom lam gnyis bstan tshul gnyis ji lta bu zhe na/ de yang mdo'i dbang du byas na/ bsngo ba dang rjes su yi rang gi skabs su mi dmigs par rtogs pa'i yum gyi dge rtsa bsngo ba dang/ rjes su yi rang bar gsungs pa las 'phros nas sgrub pa sgom lam dang/ rnam dag sgom lam gnyis gsungs pa yin te/ nyi snang las/ de la ngo bo nyid ni bcom ldan 'das kyi shes rab kyi pha rol tu phyin pa ni shin tu rnam par dag pas na snang bar bgyid pa'o zhes bya ba ni brtsams te/ zhes gsungs/ de yang sgrub pa sgom lam bshad bya'i mdo ni/ yum 'di nas dngos po ma mchis pa'i ngo bo nyid stong pa nyid kyi slad du chos thams cad kyi ngo bo nyid yang dag par ston par bgyid pa'o/ /zhes dang/ byang chen gyi yum 'dis ni sbyin pa'i pha rol tu phyin pa zil gyi gnon zhes pa nas/ bsam gtan gyi pha rol tu phyin pa zil gyis gnon zhes dang/ rnam pa thams cad mkhyen pa nyid kyi bar mngon par 'du mi byed pa dang/ skye ba med pa dang/ dngos po med pa dang/ 'byung ba med pa dang/ dmigs pa med pa dang/ 'jig pa med pas yum mngon par bsgrub par bya'o/ /zhes pa dang/ ji ltar mi dmigs pa dang/ mi len pa dang/ mi gnas pa dang/ mi 'dor ba dang/ mngon par ma chags par de ltar gtod par byed de/ zhes dang/ yum 'di ni pha rol tu phyin pa chen mo'o zhes gsungs/ mdo 'di rnams kyis sgrub pa sgom lam khyad chos lnga ldan du bstan pa yin te/ mdo dang pos ngo bo'i khyad par/ gnyis pas mchog nyid du byed pa'i khyad par/ gsum pas byed las kyi khyad par/ bzhi pas gnas skabs kyi khyad par/ lnga pas mthar thug gi khyad par bstan pa'i phyir/ mdo de rnams kyi dgongs pa 'grel ba la/ bstan bcos su/ de yi ngo bo nyid mchog nyid/ /ces sogs gsungs/ gnyis pa rnam dag sgom lam yang khyad chos lnga ldan du 'chad pa'i nang nas dang po rgyu'i khyad chos 'chad pa la/ byang chen de ni phyogs bcu'i 'jig rten gyi khams kyi de bzhin gshegs pa dgra bcom pa yang dag par rdzogs pa'i sangs rgyas tshad med grangs med pa la bsnyen @07b bkur nas 'dir 'ongs shing skyes pa ste/ zhes dang/ byang chen des bskal pa bye ba khrag khrig brgya stong grangs med tshad med pa nas bla med rdzogs byang dang yang dag par ldan par 'gyur ba ste/ sems dang po bskyed pa nas sbyin pa'i pha rol tu phyin pa la spyad/ ces sogs dang/ byang chen gang sems dang po bskyed pa nas nye ba bzung ste yum zab mo 'di la mi dmigs pa'i tshul gyi brtson par byed pa dang/ zhes dang/ skyes bu glen pa de dag ni bdud kyis byin gyis brlabs par 'gyur ba dang/ chos zab mo rnams la mos pa med cing dad par mi 'gyur ba dang/ phung po la sogs pa la mngon par zhen par 'gyur ba dang/ sdig pa'i grogs po'i lag tu song bas zhe sdang gi spyod pa can bdag bstod cing gzhan smod par 'gyur ba yin te/ rab 'byor rnam pa bzhi po de dag dang ldan na skyes bu glen pa de dag yum zab mo 'di spong bar 'gyur ro/ /zhes gsungs/ mdo des rnam dag sgom lam gyi rgyu'i khyad par bstan/ mdo tshan dang po gsum gyis skye ba'i khyad par bstan/ phyi mas mi skye ba'i khyad par bstan pa'i phyir/ dang po grub ste/ mdo dang pos sangs rgyas la bsnyen bkur ba dang/ gnyis pas pha rol tu phyin pa drug la bslab pa dang/ gsum pas zhi lhag gi thabs la mkhas pa de bstan pa'i phyir/ gnyis pa grub ste/ 'gal rkyen bdud kyis byin gyis brlabs pa sogs bzhi bstan pa'i phyir/ mdo dang po gsum gyi dgongs pa 'grel pa la bstan bcos su/ sangs rgyas bsten dang sbyin sogs dang/ /zhes sogs gsungs/ mdo phyi ma'i dgongs pa 'grel ba la/ chos kyi 'phongs pa'i rgyu dag ni/ /zhes sogs gsungs/ yum gyi khyad par 'chad pa la mdo las/ rab 'byor gzhan yang/ gzugs rnam par dag pa gang yin pa de ni 'bras bu rnam par dag pa nyid do/ /'bras bu rnam par dag pa gang yin pa de ni yum rnam par dag pa dang/ yum rnam par dag pa gang yin pa de ni gzugs rnam par dag pa ste/ de ltar na gzugs rnam par dag pa dang; 'bras bu rnam par dag pa dang yum rnam par dag pa gang yin pa 'di la gnyis su med de gnyis su byar med so so ma yin tha mi dad do zhes gsungs/ 'dis rnam dag sgom lam gyi yul gyi khyad par bstan tshul yod de/ rang bzhin rnam dag dngos su bstan nas/ blo bur gyi dri ma dag tshul shugs la @08a @#/ /bstan pa'i phyir/ dang po grub ste/ dge sbyong tshul gyi 'bras bu sgom lam rnam grol lam dang de'i dmigs yul gzugs sogs kyi chos bden grub kyis dag pa'i rnam dag ngo bo gnyis su med cing tshad mas ngo bo gnyis su dpyad du med par dngos su bstan pa'i phyir/ de nyid bstan bcos su/ 'bras bu dag pa gzugs la sogs/ /zhes sogs kyis 'chad/ de'i 'bras bu'i khyad par mdo las 'dod chags dang zhe sdang dang gti mug rnam par dag pa dang/ zhes sogs dang/ rga shi dang/ mya ngan dang/ smre sngags 'don pa dang/ sdug bsngal ba dang/ yid mi bde ba dang/ 'khrugs pa rnam par dag pa zhes sogs dang/ sbyin pa'i pha rol tu phyin pa rnam par dag pa dang/ tshul khrims kyi pha rol tu phyin pa rnam par dag pa zhes sogs gsungs/ mdo de rnams kyis 'bras bu'i khyad par bstan tshul yod de/ mdo tshan dang pos nyan thos kyi rnam dag /gnyis pas rang rgyal gyi rnam dag /gsum pas byang sems kyi rnam dag bstan pa'i phyir/ rnam dag shin tu ba'i mdo dang bstan bcos sbyor tshul 'phags seng gi 'grel pa gnyis su ma byung zhing de gsum mdo dang sbyor tshul bstan bcos su/ nyon mongs shes bya lam gsum gyi/ / sangs rgyas rnam kun shin tu ba/ /zhes gsungs/ 'bras bu'i khyad par ston pa'i mdo rdzogs rjes su ngo bo'i khyad par sogs ston pa'i mdo rnams gsungs te/ bstan bcos su/ nyan rang gi sgom lam bar chad med lam chung 'bring chen po dgu rims kyi skyes stongs kyis bden 'dzin che 'bring chung ngu dgu spong mi nus theg chen gyi sgom lam bar chad med lam dgus de ltar spong nus pa'i rgyu mtshan gyis sangs rgyas kyi rnam dag shin tu ba dang/ nyan rang gi rnam dag shin tu ba ma yin pa'i khyad par 'chad pa la/ sa dgu la ni chen po yi/ /zhes sogs kyi gzhung gsungs/ spong tshul de la klan ka ka spong ba la/ de la klan ka spangs pa yi/ /zhes gsungs/ 'o na/ yul ji lta bu zhig rtogs pa'i bden 'dzin spong zhe na/ gzhal byed dang gzhal bya bden stong mnyam pa nyid du rtogs pa'i khams gsum sa dgus bsdus pa'i bden 'dzin spong zhes 'chad pa la/ lam ni 'jal dang gzhal bya @08b dag / ces sogs kyi gzhung gsungs/ gsum pa mtshon tshul la/ chos bcu gcig po des lam shes rdzogs par mtshon nus te/ bcu gcig po de bsdu na lam shes sgom pa po rten gyi gang zag dang/ des lam shes ji ltar sgom tshul gnyis su 'du/ de gnyis kyis lam shes rdzogs par gtan la 'bebs nus pa'i phyir/ gnyis pa gzhung don la mtha' dpyad pa la/ ! theg pa gsum rnam par gzhag pa ni zhes sogs kyi skabs su mtha' dpyad pa la/ mthar thug theg pa gsum du 'dod pa'i lugs 'god pa/ mthar thug theg pa gcig tu sgrub pa/ 'khor ba la mtha' yod med dpyad pa/ nyan rang dgra bcom theg chen lam du 'jug pa'i tshe/ lam gang nas 'jug dpyad pa'o/ /dang po la nyan thos sde gnyis dang/ lung gi rjes 'brang gi sems tsam pa rnams mthar thug theg pa gsum du grub par 'dod/ bye brag tu smra ba rnams mthar thug theg pa gsum du 'dod de/ nyan thos kyi sbyor lam dang po gnyis la gnas pa'i gang zag nyan thos kyi rigs las log nas sangs rgyas kyi theg pa la dang/ rang rgyal gyi lam du sbyor lam dang po gsum la gnas pa'i nyan thos 'jug pa yod cing/ theg dman 'phags pa theg chen lam du 'jug pa'i ming tsam yang mi 'dod de/ mdzod las/ gnyis slob rigs las log nas ni/ /sangs rgyas su 'gyur gzhan gsum yang/ /zhes gsungs pa'i phyir/ rgyas 'bring bsdus gsum lta bu sangs rgyas kyi bkar mi 'dod pa'i nyan thos se 'da' ba lta bus kyang mthar thug theg pa gsum du grub par 'dod par mngon te/ des theg pa chen po khas len zhing/ nyan thos kyi lhag med myang 'das kyi tshe rig pa rgyun chad du 'dod pa'i phyir/ des theg chen khas len te/ des sangs rgyas kyi theg pa dang sangs rgyas yod par khas len pa'i phyir/ lung gi rjes 'brang gi sems tsam pa rnams kyang mthar thug theg pa gsum du grub par 'dod cing/ sgrub tshul yang lung rigs gnyis las/ dang po ni/ yum las/ gang yang dag pa'i skyon zhes sogs dang/ dgongs 'grel las/ nyan thos kyi rigs kyi gang zag zhi ba bgrod pa gcig pu ba rnams ni sangs rgyas thams cad brtson pa dang ldan yang byang chub kyi snying po la bzhag ste bla na med pa yang dag par rdzogs @09a @#/ /pa'i byang chub tu sems bskyed pa'i mthu med do/ de ci'i phyir zhe na/ de ni snying rje shin tu tshung pa'i phyir/ sdug bsngal gyis shin tu 'jigs pa'i phyir/ rang bzhin gyi rigs des ? dang kho na'o zhes dang/ khams sna tshogs pa ston pa'i mdo las/ sems can rnam ni khams sna tshogs pa'o/ /zhes sogs dang/ mdor na dri ma dang bcas pa'i sems bden grub tu ston pa'i mdo rnams kyis dngos shugs ci rigs par stan par 'dod do/ /gzhan yang/ dgongs 'grel las/ nyan thos byang chub tu yongs su 'gyur ba gang yin pa de ni ngas rnam grangs kyi byang chub sems dpa' yin par bstan te/ 'di ltar de ni nyon mongs pa'i sgrib pa las rnam par grol nas de bzhin gshegs pa rnams kyis bskul nas shes bya'i sgrib pa las sems rnam par grol bar byed/ ces dang/ blo gros mi zad pa'i mdo las/ gsum po 'di dag nges par 'byin par byed pa'i theg pa yin no/ /'di lta ste/ nyan thos kyi theg pa dang/ rang sangs rgyas kyi theg pa dang/ theg pa chen po'o/ /zhes pa'i lung la brten nas khas len zhing/ sems tsam pa mtha' dag ni ma yin te/ slob dpon shanti pas mthar thug theg pa gcig tu grub par bzhed de/ rnam 'grel las kyang chags sogs nyon mongs thams cad spong nus su/ rtag yin phyir ram thabs med phyir/ /zhes sogs mtha' gzhan 'gog pa'i rigs pa gsungs pa'i phyir/ yongs su 'gyur ba po'i nyan thos theg chen du 'jug kyang/ zhi ba bgrod ? pa gcig bu'i nyan thos theg chen lam du mi 'jug pa dang/ de la nyan thos rigs nges kyis khyab pa dang/ nyan thos kyi lam lnga ga la gnas pa'i de rnams yod par 'dod do/ /rigs pa'i sgrub byed yod de/ sems can rnams la thog ma med pa nas khams mi 'dra ba bden grub gsum/ de la brten nas mos pa mi 'dra ba bden grub gsum/ de la brten nas 'bras bu byang chub mi 'dra ba bden grub gsum 'byung ba'i rigs pas grub pa'i phyir dang/ theg dman gyi lhag med du zhugs pa'i tshe 'dus byas kyis rgyu ba gtan nas log pa nyon sgrib spangs nas log /shes sgrib gtan nas log pa'i sgo nas bzlog par 'dod de/ de skad du yang mdo sde rgyan las/ @09b khams rnams dang ni mos pa dang/ /sbrub ba tha dad dbye ba dang/ /'bras bu tha dad dmigs pa'i phyir/ /rigs yod nyid ces nges par brjod/ /ces gsungs pa'i phyir/ 'o na/ mthar thug theg pa gcig tu gsungs pa dang 'gal lo zhe na/ mi 'gal te/ de ltar gsungs pa dgongs gzhi dgos pa dngos la gnod byed gsum gyi sgo nas drang don du 'grel ba'i phyir/ dgongs gzhi rnam pa bdun la dgongs pa yin te/ theg pa gsum gyi gang zag gi rgyud kyi chos dbyings la ngo bo mi 'dra ba'i khyad par med pa'i phyir dang/ theg pa gsum ga'i 'phags pas bdag med rtogs pa mtshungs pa dang/ nyon sgrib spangs pa'i rnam grol lam yod par mtshungs pa dang/ nyan thos rigs ma nges pa kha cig theg chen lam du 'jug pa yod pas/ rigs tha dad pa'i gang zag gnyis lam gcig tu 'jug pa yod pa dang/ theg chen lam nas log nas nyan thos kyi byang chub thob pa'i dgra bcom 'ga' zhig bdag gis sngon rgyal sras kyi spyod pa spyad pas rdzogs byang thob snyam pa dang/ de bzhin gshegs pas bdag gis sngon rgyal sras kyi spyod pa spyad pas bla med byang chub thob snyam pa'i bsam pa rigs mtshungs pa lan cig skye srid pa dang/ sprul pa'i nyan thos kha cig nyan thos kyi theg pas yang dang yang du mya ngan las 'da' tshul ston pa dang/ mthar thug pa'i theg pa gcig las ma grub pa dang bcas pa'i dgongs gzhi bdun la dgongs pa'i phyir/ mdo sde rgyan las/ chos dang bdag med rnam grol rnams/ /mtshungs phyir rigs ni tha dad phyir/ /bsam gnyis thob phyir sprul pa'i phyir/ /mthar thug phyir na theg gcig nyid/ /ces gsungs pa'i phyir/ dgos pa yod de/ theg chen du rigs ma nges pa kha cig theg dman du mi ltung bar rjes su bzung ba dang/ theg dman rigs ma nges pa kha cig theg chen du drang ba'i ched yin pa'i phyir/ de nyid las/ kha cig dag ni drang phyir dang/ /gzhan dag rjes su bzung pa'i phyir/ /rdzogs pa'i sangs rgyas rnams kyis ni/ /ma nges rnams la theg gcig bstan/ /zhes gsungs pa'i phyir/ dngos la gnod byed yod de/ mthar thug theg pa gsum du ston pa'i lung rnams dang/ ma dag gzhan dbang bden grub tu sgrub pa'i rigs pas gnod pa'i phyir/ 'di pa'i lugs la mthar thug theg pa @10a @#/ /gsum du grub pa'i mthar thug pa'i theg pa gcig las ma grub par 'dod par mngon no/ /mthar thug theg pa gcig tu sgrub pa la lung rigs gnyis las/ dang po ni/ yum las/ 'on kyang de dag gis kyang bla na med pa yang dag par rdzogs pa'i byang chub tu sems bskyed na de dag la zhes sogs gsungs pa'i phyir dang/ lang gshegs las/ blo gros chen po nyan thos kyi theg pa ba rnams ni nyan thos kyi theg pas rnam par grol ba ma yin gyi/ 'on kyang de dag ni theg pa chen po'i mthar thug pa can yin no/ /zhes dang/ 'phags pa dpal phreng gis zhus pa las/ yongs su mya ngan las 'das pa ni thabs dam pa'i zhes dang/ dam chos pad dkar las/ drang srong chen pos theg pa gsum bstan pa/ /rnam 'dren rnams kyis thabs la mkhas pa ste/ /theg pa gcig ste gnyis su yod ma yin/ /bsti ba'i don du theg pa gsum bstan to/ /zhes dang/ bden pa dang po'i le'u las/ 'jam dpal gal te de bzhin gshegs pa kha cig la ni theg pa chen po ston par 'gyur la kha cig la ni nyan thos dang rang sangs rgyas kyi theg pa ston par 'gyur na/ de ni de bzhin gshegs pa'i thugs yongs su ma dag par yang 'gyur/ thugs rje chen po nyi tshe bar yang 'gyur/ 'du shes tha dad par yang 'gyur/ chos la slob dpon gyis dpe mkhyud byas par yang 'gyur ro/ /zhes dang/ gzhan yang/ pad dkar las/ gzhan yang de bzhin gshegs pa dgra bcom pa yang dag par rdzogs pa'i sangs rgyas rnams kyis snyigs ma lnga'i dus su sems can dri ma mang zhing dge ba'i rtsa ba chung ngur gyur pa 'byung ba de'i tshe thabs la mkhas pas theg pa gcig pu de nyid/ theg pa gsum du bstan nas 'dul ba'i don du de ltar bstan/ zhes dang/ yang de nyid las/ shA ri'i bu nga la dad par gyis shig /nga la yid ches par gyis shig/ nges par bzungs shig /shA ri'i bu de bzhin gshegs pa rnams brdzun gsung ba mi mnga' 'o/ /shA ri'i bu theg pa ni gcig kho nar zad de/ 'di lta ste/ sangs rgyas kyi theg pa'o/ /zhes dang/ gzhan yang/ de nyid las/ ma 'ongs dus na shA ri'i bu khyod kyang/ zhes sogs gsungs/ mthong @10b na dri ma dang bcas pa'i sems bden med du ston pa'i mdo rnams kyis dngos shugs ci rigs par ston/ bstan bcos kyi dbang du byas na/ chos dbyings bstod pa las/ chos kyi dbyings la dbyer med phyir/ /gtso bo'i theg dbyer ma mchis kyang/ /khyod kyis sems can drang don du/ /theg pa gsum du gsungs pa'o/ /zhes dang/ byang chub sems 'grel las/ theg pa gnyis po de dag kyang/ /theg pa chen por 'du bas na/ /srid pa'i lam gyi dub rnams la/ /gngal bso'i don te de nyid min/ /zhes dang/ skyabs 'gro bdun cu pa las/ byang chub dam pa gnyis thob nas/ /srid par skrag yid de dag ni/ /tshe zad la dga' mya ngan las/ /'das thob 'du shes can du 'gyur/ /de la mya ngan 'das yod min/ /'on kyang srid gsum khams gsum ni/ /skye ba de la yod ma yin/ /zag med dbyings nas de dag kyang/ /mi shes nyon mongs mi spong phyir/ /phyis nas sangs rgyas kyis bskul nas/ /byang chub kyi ni tshogs bsags te/ /de yang 'jig rten 'dren par 'gyur/ /zhes dang/ 'jug pa las kyang/ gang phyir 'di na de nyid shes las dri ma mtha' dag sel ba ni/ /lhur byed gzhan med chos rnams de nyid rnam 'gyur dbyer la'ang bstan min zhing/ /de nyid yul can blo gros 'di yang tha dad 'gyur ba ma yin pa/ /de phyir khyod kyis 'gro la theg pa mi mnyam dbyer med bstan/ /zhes sogs rnams kyis grub bo/ /rigs pa'i sgrub byed/ sems bden pas stong pa'i chos dbyings rang bzhin gyis rnam par dag pa sems can thams cad kyi rgyud la khyad par med par yod cing/ de la rigs mi 'dra ba'i khyad par cung zad kyang med la/ de la phyin ci log tu sgro 'dogs pa'i chags sogs nyon mongs thams cad kyi rtsa ba bden 'dzin thag khra ? la sbrul 'dzin gyi rtog pa ltar rtsa ba mi brtan par sems rgyud la 'bral rung blo bur ba gnyen pos 'bral rung yin pas/ sems can thams cad kyi rgyud kyi dri ma 'bral rung yin na/ nyan rang dgra bcom zhi ba'i dbyings las bzhegs pa rnams kyi rgyud kyi shes sgrib gnyen pos spang du mi rung ba dang/ de spangs pa'i thabs ston pa'i sangs rgyas kyis mdzad pa 'dor ba mi srid pa'i phyir/ dag pa'i zhing du zhi ba'i dbyings su rang gi bsam ngo la bltos te slar mi ldang ba'i tshul gyi nyer zhi la mnyam par @011a @#/ /gzhag pa'i nyan rang dgra bcom pa de dag kyang phyi'i rkyen de bzhin gshegs pas bskul zhing/ langs pa na gsung gis theg chen lam du 'jug pa'i chos bstan pa la brtan nas theg chen du 'jug pa'i mthun rkyen tshan/ 'bad rtsol dang bcas te mnyam par gzhag pas dus gtan du gnas pa'i nus pa med pa'i phyir te/ rgyud bla las/ dam chos padma dkar la sogs/ /chos kyi de nyid bstan pa yis/ /de dag ngar 'dzin las log ste/ /theg pa mchog la smin mdzad nas/ /byang chub mchog tu lung bstan to/ /zhes gsungs pa'i phyir/ gsung gis bskul tshul yod de/ lang gshegs las/ 'khor ba'i sdug bsngal tshe las khyod thar yang/ /da dung khyod ni mya ngan yong mi 'da'/ /sangs rgyas theg pa 'di ni btsal bar bya/ /zhes bskul ba'i phyir/ mnyam gzhag de la dus gtan du gnas pa'i nus pa med de/ dper na/ skyes bu chung gis smyos pa'i nus pa zed pa ltar/ mnyam par 'jog pa'i nus pa zad pa na ldang bar 'gyur ba'i phyir te/ de nyid las/ ting nge 'dzin gyi lus thob nas/ /bskal pa'i bar du mi sad do/ /dper na skyas bu myos pa ni/ /myos 'gyur med na sangs pa ltar/ /de bzhin de dag nga yi sku/ /mthong nas sangs rgyas chos zhes 'thob/ /ces gsungs pa'i phyir/ lhag med myang 'das thob pa'i nyan rang dgra bcom pas sdug kun gnyis ka spangs kyang skye ba len pa mi 'gal te/ ma rig bag chags kyi sa dang zag med kyi las la brten nas skye ba len pa'i phyir te/ dpal 'phreng gi mdo las/ bcom ldan 'das 'di lta ste dper na nye bar len pa'i rkyen can zag pa dang bcas pa'i las kyi rgyu las byung ba'i srid pa gsum 'byung ba de bzhin du/ bcom ldan 'das dgra bcom pa dang/ rang sangs rgyas dang byang chub sems dpa' rnams kyi yid kyi rang bzhin gyi lus ma rig bag chags kyi rkyen can zag pa med pa'i las kyi rgyu las gsum 'byung ngo/ /zhes gsungs pa'i phyir/ mdor na mthar thug theg pa gcig tu grub pa/ sems can thams cad 'tshang rgya ba/ /'khor ba la mtha' yod pa/ nyan rang lhag med du mya ngan las 'das pa rnams kyang theg chen du @011b 'jug pa rnams don gcig cing/ sgrub byed kyi rigs pa mthar gtugs pa na dri ma dang bcas pa'i sems bden med du grub pa'i rigs pa rnams kyis 'grub po/ /gsum pa 'khor ba la mtha' yod med dpyad pa la/ dogs pa 'god pa dang/ de'i lan dang bcas pa gnyis las/ dang po la 'di lta dri ba bya ste/ sems can thams cad kyis sangs rgyas thob pa srid dam/ mi srid/ srid na/ sangs rgyas phyi ma rnams sems can nyung shas 'ba' zhig gi don byed dgos pas gzhan don nyi tshe bar 'gyur zhing/ bsod nams kyi tshogs yongs su rdzogs par med par 'gyur ra/ /sems can thams cad sangs rgyas pa'i tshe na sems can gcig gi don yang mi byed pas gzhan don rgyun chad par 'gyur zhing/ zhi ba'i mthar ltung bar 'gyur ro/ /sems can thams cad kyis sangs rgyas thob pa mi srid na yang/ sangs rgyas rnams kyis rang nyid kyis brnyes pa'i go 'phang la sems can thams cad 'god par bzhed nas 'khor ba ma stong bar du mdzad pa bcu gnyis kyis tshul gyi chos kyi 'khor lo bskor ba 'bras bu med par 'gyur ba dang/ sems can thams cad 'khor ba'i sdug bsngal nye bar zhi ba tsam don du gnyer ba yang theg chen gyi snying rje chen po mtshan nyid yongs rdzogs ma yin te/ bcom ldan 'das kyis rang nyid kyis brnyes pa'i go 'phang de la sems can thams cad mi 'god na chos la slob dpon gyis dpe byung byas pa sogs nyes pa lnga gsungs pa'i phyir dang/ sems can thams cad kyis thar pa 'thob nus na mthar thug theg pa gcig tu legs par grub cing/ sems can thams cad kyis sangs rgyas thob pa 'bad med du grub/ thar pa tsam yang thob mi srid pa'i sems can yod na de ltar yod par ston pa'i mdo slob dpon 'phags pa thogs med kyis sgra ji bzhin pa ma yin par lung rigs kyis sgrub pa dang 'gal bas ji ltar yin brjod dgos shing/ sems can thams cad kyis sangs rgyas thob pa srid na 'khor ba la mtha' med par bshad pa yang mi 'thad par 'gyur ro zhe na/ gnyis pa lan la/ gzhan gyi lan dang/ rang gi lan gnyis/ dang po la kha cig gi gsung na re/ sems can thams cad 'tshang rgya ba sha stag lta zhog /rgya rung tsam du yang sgrub mi nus te/ 'bras bu 'byung rung du sgrub pa la @012a @#/ /rgyu tshogs ? grangs tshang ba rtags su 'god dgos/ sems can thams cad 'tshang rgya ba'i rgyu tshogs grangs ma tshang ba'i phyir/ sems can thams cad 'tshang rgya bar gsungs pa yang/ lam zhugs kyi sems can la dgongs shing/ 'di chu na chad du sems can 'khor bar 'khor ba yod/ 'di phan chad du sems can 'khor bar 'khor ba med ces pa'i 'khor ba la zad mtha' yang med do/ /zhes gsungs/ 'di ni/ rnam 'grel las/ rgyu tshogs pa las 'bras skye ba/ /zhes sogs gzhung don dpyis phyin par ma dgongs pa'i skyon dang dam 'cha' snga phyi'i 'gal ba ston tshul sogs rnam bshad las shes par bya'o/ /yang phar phyin pa chen po 'ga' zhig na re/ sems can thams cad 'tshang rgya yang rgya nges ma yin te/ 'tshang rgya ba'i 'gal rkyan gyi gegs dang bcas pa'i phyir/ rnam 'grel las/ ma nges pa ni nyid yin te/ /gegs byed pa ni srid phyir ro/ / zhes gsungs pa'i phyir/ zhes sogs gsungs pa yang/ sems can thams cad 'tshang rgya ba dang rgyas pa ma phyed pa'i skyon dang/ sems can thams cad kyis sangs rgyas thob pa yod pa dang/ thob pa ma phyed pa'i rtsong skyon dang/ /mdor na 'tshang rgya ba dang rgyas pa ma phe ba'i skyon du snang bas 'di dag gi brgal lan gsungs pa rnams kyang rgyas par shes par 'dod na rnam bshad du zhib tu gzigs/ rigs pa rnams kyi nang nas sems can thams cad gnas tshod kyi ngos nas 'chang rgya ma rgya gang rung du thag chod dam ma chod/ ma chod na khyed rang gi sems can thams cad 'tshang rgya bar thag bcad pa de mi rigs par thal/ sems can thams cad gnas tshod kyi ngos nas 'tshang rgya mi rgya gang du yang thag ma chod pa'i phyir/ 'tshang rgya bar khas blangs kyang thag ma bcad zer na/ de las mi rigs pa ci zhig yod/ gang rung du thag chod zur na/ 'o na/ gnas tshod kyi ngos nas 'tshang rgya bar thag chod par thal/ gnas tshod kyi ngos nas 'tshang rgya mi rgya gang rung du thag chod/ mi rgya bar thag ma chod pa'i phyir/ phyi ma ma grub na/ sems can thams cad 'tshang rgya ba dam 'cha' mi rigs par thal/ ma grub pa de'i phyir/ thal ba snga ma la 'dod na/ sems can thams cad 'tshang @012b rgya nges su thal/ sems can thams cad gnas tshod kyi ngos nas 'tshang rgya bar thag chod pa'i phyir/ 'di rigs pa shin tu bzang ngo/ /rnam bshad du sems can thams cad 'tshang rgya bar tshad mas ma nges na 'tshang rgya bar dam 'cha' mi rigs par gsungs pa'i brgal lan la don skyon mi srid kyang cung zad dpyad na/ sems can thams cad 'tshang rgya ba'i rigs pa mthar thug na dri ma dang bcas pa'i sems bden med du sgrub pa'i rigs pa la thug pa de'i tshe/ dri ma dang bcas pa'i sems bden med du dam 'cha' 'am mi 'cha'/ phyi ma ltar na khas len pa dang 'gal/ dam 'cha' na dri ma dang bcas pa'i sems bden med du tshad mas nges par thal/ dri ma dang bcas pa'i sems bden med du dam 'cha' ba'i phyir/ khyab pa khos zer na/ dpyad gzhi cung zad du snang ngo/ /sems can thams cad 'tshang rgya bar mi 'grub bo zer na/ tshig gi brjod tshul la dogs pa byed pa tsam ma gtogs pa sems can thams cad 'tshang mi rgya bar 'dod pa las ma 'das pas gong du bshad pa'i lung rigs gnyis kyis khegs so/ /yang kha cig /'khor ba la mtha' med zer ba dang/ kha cig /'khor ba spyi la mtha' med bye brag la mtha' yod zer ba gnyis las/ dang po mi 'thad de/ 'khor ba la phyi mtha' yod pa'i phyir te/ 'khor ba'i rtsa bar gyur pa'i bdag 'dzin yin na gnyen po bdag med rtogs pa'i shes rab kyis spong nus yin pa'i khyab pa'i phyir/ phyi ma mi 'thad de/ 'khor ba spyi la med pa'i khyad chos 'khor ba bye brag la yod pa mi srid de/ spyi shes bya la med pa'i khyad chos bum pa la yod pa mi srid pa'i phyir/ rang lugs kyi lan 'debs tshul yod de/ sems can thams cad sangs rgyas pa srid kyang sangs ma rgyas pa dang/ sems can thams cad kyis sangs rgyas thob pa yod kyang ma thob pa dang/ sems can thams cad 'tshang rgya ba la gegs yod kyang de nyid kyis 'tshang mi rgya bar byed mi nus pa dang/ sangs rgyas kyis don bya yul gyi sems can gtan nas med pa'i dus yod kyang nam yang med pa'i dus med pa dang/ 'khor ba stongs pa'i dus yod kyang 'khor ba pa'i sems can rgyun chad pa'i dus med pa dang/ sems can thams cad sangs rgyas pa'i sangs rgyas 'phags pa de sems can thams cad @013a @#/ /sangs rgyas pa'i tshe na yod cing sangs rgyas de rnams kyi rgyud kyi bsdus par khas blangs pa'i brgal lan rnams kyi gnad nges par byas nas lan 'debs par byed pa'i phyir/ sems can thams cad kyi rgyud kyi dri ma 'bral rung blo bur ba yin kyang dri ma 'joms byed kyi gnyen po skye rung du mi grub zer na/ de yang mi 'thad de/ sems can thams cad kyi dri ma rtag pa yin pa'i phyir ram/ de spangs pa'i thabs med pa'i phyir ram/ de yod kyang thabs de shes pa'i gang zag med pa'i phyir ram/ de yod kyang de la don gnyer skye mi srid pa'i sems can yod pa'i phyir ram/ de med kyang thabs de brtse bas 'doms pa'i gang zag med pa'i phyir ram/ de yod kyang thabs de goms par byed pa'i gang zag med pa dag las de thams cad mi 'thad pa'i phyir/ dang po mi 'thad de/ sems can thams cad kyi rgyud kyi dri ma byas pa yin pa'i phyir/ gnyis pa mi 'thad de/ bden med mngon sum du rtogs pa'i shes rab de de 'joms byed kyi thabs yin pa'i phyir/ gsum pa mi 'thad de/ bdag med gnyis bskal pa du mar goms par byas pa'i bcom ldan 'das bzhugs pa'i phyir/ bzhi pa mi 'thad de/ mngon mtho la don gnyer lan cig tsam yang skye ma myong ba'i sems can med pa de bzhin du/ re zhig nges legs la don gnyer ma skyes kyang/ sems can thams cad rigs gnyis dang bcas pas sangs rgyas kyis bskul ba na nges legs la yang don gnyer skye bar 'gyur ba'i phyir/ lnga pa yang mi 'thad de/ sems can gyi ngos nas mngon mtho dang nges legs la don gnyer skyes na/ sangs rgyas kyis de'i don mdzad pa la 'dor ba mi srid pa'i phyir/ drug pa yang mi 'thad de/ sems can rnams rigs sad byed kyi rkyen la brten nas rigs sad pa na thabs de la goms pa gong nas gong 'phel du byed pa'i phyir/ sangs rgyas kyis don bya yul gyi sems can thams cad 'tshang rgya yang sangs 'phags yin na rang gi don bya yul gyi sems can kyi don byed bzhin pa yin pas khyab pa'i gnad rnams kyang shes par bya dgos te/ nam mkha' la mtha' med pa bzhin du sems can la mtha' dang grangs med pa'i phyir/ rig pa la thog @013b mtha' med pas 'khor ba la yang thog mtha' med kyang/ 'khor ba spyi bye drag gnyis ka la phyi mtha' yod de/ gnyen po bdag med rtogs pa'i shes rab kyis spang du mi rung ba'i 'khor ba'i rtsa ba med pa'i phyir/ 'khor ba la phyi mtha' yod na mtha' yod dgos te/ de la zad pa yod na mtha' yod pa'i phyir te// bdag nyid chen pos paN gyis kyang/ sa bon thog mtha' yod min yang/ /mes bsregs pas na phyi mtha' mthong/ /de bzhin 'khor ba thogs med kyang/ /bdag med mthong na phyi mtha' mthong/ /zhes gsungs pa'i phyir/ de ltar yin kyang mdo kha cig las mtha' med par gsungs ba dang mi 'gal te/ nyes spyod chen po kha snyoms su spyod pa'i sems can kha cig 'di tshun chad du 'khor bar 'khor 'di phan chad mi 'khor zhes pa'i mtshams so skye rang ga bas 'dzin mi nus pa la dgongs pa'i phyir/ bzhi pa nyan rang dgra bcom lam gang nas 'jug dpyad pa la/ kha cig /chos kyi bdag med mngon sum du rtogs pa'i nyan rang dgra bcom rnams sa brgyad pa nas 'jug /ma rtogs pa rnams theg chen tshogs lam nas 'jug gsung yang/ rang lugs la/ chos kyi bdag med rtogs ma rtogs gang yin kyang/ theg chen gyi tshogs lam nas 'jug dgos te/ de dag kyang 'tshang rgya ba la bden 'dzin kun lhan gnyis rims kyis spangs nas 'tshang rgya dgos/ de la thabs rgya chen pos zin pa'i sgo nas stong nyid sngar ma rtogs pa gsar du rtogs pa mthong lam dang/ de nyid bsgom pa lhur len gyi tshul gyis bsgoms pa'i theg chen gyi sgom lam bskal pa'i bar du sgom dgos shing/ de 'dra'i mthong lam rgyud la skye ba la sbyor bzhi'i skabs su thabs rgya chen pos zin pa'i sgo nas sgom byung gi shes rab kyis sgom par byed dgos/ de la theg chen gyi tshogs lam gyi skabs su thos bsam gyi shes rab kyis gtan la 'bebs dgos pa'i phyir/ de ltar byas na/ kha cig /stong nyid rtogs ma rtogs gang yin kyang sa bdun pa nas 'jug pa dang/ kha cig / stong nyid rtogs ma rtogs kyi khyad par gyis rim pa bzhin sa dang po dang bdun pa nas 'jug pa'i khyad par rnams legs par khegs pa yin te/ de dag ltar na sa bdun pa man chad du bden 'dzin kun lhan gang yang mi spong ba 'am spong @014a @#/ /yang stong nyid mngon sum du rtogs pa tsam gyis spong nus pa gang rung du khas len dgos pa'i skyon du 'gyur ba'i phyir/ kha cig /nyan rang dgra bcom theg chen lam du zhugs pa'i theg chen tshogs lam pa so skyer 'dod pa dang/ kha cig /theg chen 'phags par 'dod pa dang/ kha cig theg chen so skye ma yin par 'dod pa/ de dag thams cad mi 'thad par mngon te/ 'phags pa'i spangs pa las nyams pa med pa'i phyir dang/ theg chen gyi mthong lam ma thob pa'i theg chen 'phags pa med pa'i phyir dang/ theg chen so skye la so skyes ma khyab pa'i phyir/ theg chen las dang po pa la las dang po pas ma khyab pa'i phyir ro/ /kha cig /nyan rang dgra bcom theg chen lam du zhugs pa'i theg chen tshogs lam pa 'phags pa yin yang 'phags pa phung gsum pa ma yin gsung ba mi 'thad de/ theg pa cheg chung gang gi yang 'phags pa ma yin pa'i 'phags pa yin pa'i phyir/ ma khyab na/ gnyis ma yin gyi phung gsum gyi chos shes bya la mi srid par thal/ ka bum gnyis kyi bar du de gnyis gang yang ma yin pa'i chos yod na de gnyis bar na gnyis ma yin gyi phung gsum gyi chos yod pas ma khyab pa de bzhin du bum snam sogs la yang mtshungs pa'i phyir/ thal ba snga ma la 'dod na/ phan tshun spangs 'gal gyi dngos 'gal gyi chos gzhi ma grub par thal/ bar du gnyis yin dang gnyis ma yin gyi chos spangs pa'i 'gal ba ma grub pa'i phyir te/ gnyis ma yin gyi phung gsum pa gzhi ma grub pa'i phyir/ lugs 'dir zhi ba bgrod pa gcig pu pa'i nyan thos med par 'dod pa ni 'di'i skabs kyi rnam bshad dang/ skabs lnga pa'i sgom spangs bstan pa'i 'grel pa sogs ma mthong bar zad do/ /theg gsum rnam gzhag gi skabs 'dir dogs pa'i gnas la mtha' dpyod tshul rgyas par brgal brtags su bshad zin pas shes par 'dod na der blta bar bya'o/ /! byang chub tu sems bskyed pa ni 'khor ba ji srid bar 'gro ba'i don byed par zhugs pa nyid kyi nyon mongs pa rnam pa thams cad du/ zhes sogs kyi skabs su/ gzhan lugs dgag pa/ rang lugs bzhag pa gnyis/ dang po la/ kha cig na re/ 'dir @014b bshad pa'i nyon mongs nyon mongs btags pa ba yin te/ bsod nams kyi tshogs 'tshol bas mi ngoms pa sogs brgyad la 'dir nyon mongs kyi ming gis btags pa yin pa'i phyir/ brgyad po'i khyad par yod de/ blo gros rgya mtshos zhus pa'i mdo las/ de dag gi 'khor ba'i rgyu dge ba dang mtshungs par ldan pa'i nyon mongs pa gang zhe na/ 'di lta ste/ bsod nams kyi tshogs yongs su 'tshol bas mi ngoms pa dang/ bsams bzhin du srid par skye ba yongs su 'dzin pa dang/ sangs rgyas dang phrad pa don du gnyer ba dang/ sems can yongs su smin par bya ba'i phyir/ mi skyo ba dang/ dam pa'i chos 'dzin pa la brtson pa dang/ sems can gyi bya ba ci yod pa la 'grus pa dang/ chos la chags pa'i bsam pa dang mi 'bral ba dang/ pha rol tu phyin pa'i kun tu sbyor ba rnams mi 'dor ba ste/ zhes gsungs pa'i phyir/ de rnams la nyon mongs kyi ming gis 'dogs pa'i rgyu mtshan yod de/ so skye tha mal pa nyon mongs kyi dbang gis 'khor ba'i gnas su skye ba dang/ byang 'phags rnams brgyad po de'i dbang gis 'khor ba'i gnas su skye ba lan pa tsam gyi byed ba mtshungs pa'i rgyu mtshan gyis de ltar bshad pa'i phyir/ de nyid las/ de dag gi byang chub sems dpa' khams gsum du kun tu sbyor la/ khams gsum po de yang nyon mongs pa'i rgyu las byung ba'o/ /zhes gsungs pa'i phyir/ dgos pa yod de/ byang 'phags rnams brgyad po de lta bu'i dbang gis 'khor ba'i gnas su skye ba yin gyi/ nyon mongs kyi dbang gis skye ba ma yin par shes pa'i ched yin pa'i phyir/ dngos la gnod byed yod de/ de rnams kyis rang rgyud la ldan pa'i gang zag gi sems rgyud ma zhi ba mi byed pa'i phyir te/ de nyid las/ de dag gis byang chub sems dpa' khams gsum par kun tu sbyor bas yin gyi sems nye bar nyon mongs pa byed pas ma yin no/ /zhes gsungs pa'i phyir zer na/ 'di ni chen po dag gi bzhed pa yin yang mi 'thad de/ brgyad po de rgyu lam shes kyi thabs kyi cha khyad par can yin pas byang 'phags kyi ched du gnyer nas mi spong/ nyan rang rnams kyis ched du gnyer nas spangs pa'i sgo nas rgyu lam shes/ nyan rang gi lam las khyad par 'phags sam mi 'phags @015a @#/ /snyam pa'i dogs pa rgol ba rtogs ldan la mi skye ba'i phyir dang/ nyan rang rnams kyis de rnams nyams su ma lon kyang spang bya'i gtso bor byas nas mi spong ba'i phyir/ gzhan yang 'dir bshad pa'i nyon mongs nyon mongs btags pa bar 'dod pa mi rigs par thal/ de ltar na nyan rang rnams kyi spang bya'i gtso bor gyur pa'i nyon mongs rnams kyang nyon mongs btags pa ba yin dgos pa las de mi 'thad pa'i phyir/ kha cig /dpal phreng gi zhus pa'i mdo las/ bcom ldan 'das len pa'i rkyen gyis zag pa dang bcas pa'i lus gsum 'byung ba de bzhin du/ ma rig pa'i bag chags kyi sa'i rkyen gyis zag pa med pa'i las kyi rgyu las dgra bcom pa dang rang sangs rgyas dang dbang thob pa'i byang chub sems dpa' rnams kyis yid kyi rang bzhin gyi lus gsum 'byung ste/ zhes bstan pa'i ma rig pa'i bag chags la byed pa yang mi rigs te/ de nyan rang gis spang bya'i gtso bor byas nas mi spong/ byang chub sems dpas spang bya'i gtso bor byas nas spong ba'i phyir te/ de shes sgrib phra mo yin pa'i phyir/ jo bo a du la dra sha'i gsung na re/ 'dir bstan gyi nyon mongs nyon mongs mtshan nyid pa yin te/ nyon mongs la sems rgyud ma zhi bar byed pa dang/ sdug bsngal bskyed pa dang/ rigs 'dra phyi ma bskyed pa dang/ skye ba len pa'i rgyu byed pa'i byed las dang bzhi yod pa las/ dang po gnyis ched du gnyer nas spong yang phyi ma gnyis mi spong ba'i don yin pa'i phyir gsung ba yang mi 'thad de/ byed las dang po gnyis ched du gnyer nas spong na de gnyis byed pa po nyon mongs pa yang ched du gnyer nas spong dgos pa'i phyir dang/ nyon mongs pas byang 'phags skye ba len pa'i rgyu byed pa 'gog pa'i phyir/ dang po der thal/ 'bras bu sdug bsngal ched du gnyer nas spong ba la rgyu kun 'byung ched du gnyer nas spong dgos pa'i phyir/ kha cig /'dir bstan gyi nyon mongs nyon mongs mtshan nyid pa yin te/ 'dod sred kyi nyon mongs byang 'phags skye ba len pa'i rgyur dgos pa'i phyir te/ 'grel chen gnyis ka las/ ma rig pa dang lta bas bsdus pa'i bag la nyal ni spong gis 'dod pa @015b dang srid pa'i zag pa ni ma yin te bsam bzhin du srid par skye ba len pa'i phyir ro/ /zhes gsungs pa'i phyir/ 'on kyang nyon mongs pas sems rgyud ma zhi bar byed pa dang/ nyon mongs pa'i gzhan dbang du gyur nas skye ba len pa sogs kyi nus pa bcom pas sa thams cad du nyon mongs pa'i nyes pa mi bskyed par gsungs pa yin no/ /zer na/ de ni mi 'thad de/ lung rigs gnyis ka dang 'gal ba'i phyir/ lung dang 'gal te/ rgyud bla mas/ 'phags pas na dang rga ba dang/ /'chi ba'i sdug bsngal brtsad nas spangs/ /las dang nyon mongs dbang gis skye/ /de la de med phyir de med/ /ces byang 'phags pas nyon gyi dbang gis mi skye bar gsungs pa'i phyir/ rigs pa dang 'gal te/ byang 'phags rnams snying rje dang smon lam gyi dbang gis ji ltar 'dod 'dod du skye mi nus par/ nyon mongs pa skye ba len pa'i rgyur dgos pa yin nam/ 'on te nyon mongs mi bzhed kyang 'chi 'pho'i tshe bdag chad dogs kyi 'jigs pas zag bcas kyi phung po la sred pa'i sred pa 'dren/ de'i dbang gis skye ba sogs las gang yin/ de gnyis ka mi rigs te/ nyon mongs pa'i gzhan dbang du gyur nas skye ba len pa'i nus pa bcom par 'dod pa dang 'gal ba'i phyir/ gzhan yang/ byang 'phags skye ba len pa'i rgyur nyon mongs dgos par 'dod pa yang mi 'thad par thal/ nyon mongs kyi dbang gis skye ba len na de'i dbang gis rang dbang med par na rga 'chi ba sogs su 'gyur/ de lta na gzhan don rgya chen po lta zhog /rang don yang 'dod pa bzhin mi 'grub pa'i phyir/ gnyis pa rang lugs la/ 'dir bstan gyi nyon mongs nyon mongs mtshan nyid pa yin zhing/ de byang chub sems dpas spang bya'i gtso bor byas nas mi spong ba'i rgyu mtshan yod de/ nyon mongs kyi rang don gzhan don gang sgrub kyang nye mkho med pa'i nyon mongs can gyi ma rig pa dang/ log lta sogs dang/ de ltar ma yin pa'i 'dod sred kyi nyon mongs sogs du ma yod pa las/ de thams cad byang 'phags kyi thabs shes khyad par can gyi zil gyis mnan pas sems ma zhi bar sogs dang/ de dag gis gzhan dbang du mi 'gyur zhing khyad pa'i phyi ma gnyis ni gzhan don sgrub pa'i yan lag tu 'gyur ba'i skabs yod pa'i phyir/ thabs shes @16a @#/ /khyad par can gyi zil gyis mnan pas nyes pa bskyed mi nus te/ 'od srungs le'u las/ ji ltar sman dang sngags kyi zin pa'i dug gis log par 'chi bar mi 'gyur ro/ /de bzhin du byang chub sems dpa'i nyon mongs pa shes rab dang thabs kyis zin nas byang chub sems dpa' log par 'chi bar mi 'gyur ro/ /zhes gsungs pa'i phyir/ phyi ma gnyis po de gzhan don sgrub pa'i yan lag tu 'gyur tshul yod de/ byang 'phags 'khor los bsgyur rgyal sogs su snying rje dang smon lam gyi dbang gis skye ba blangs nas sras stong la sogs pa bskyed pa la 'dod pa'i 'dod chags yan lag tu 'gyur/ gzugs khams su skye ba blangs nas de'i sas bsdus kyi 'dod chags sogs kyis gzhan dga' bar byas pa sogs kyi sgo nas gzhan don sgrub pa'i yan lag tu 'gyur ba'i phyir te/ de nyid las/ ji ltar grong khyer ser skya'i mi gtsang lud/ /de ni bu ram shing pa'i zhing la phan/ /de bzhin byang chub sems dpa'i nyon mongs lud/ /de ni sangs rgyas chos rnams bskyed la phan/ /zhes gsungs pa'i phyir/ des na 'grel chen gnyis kyi don yang de ltar yin gyi/ gzhan gyis bshad pa ltar ma yin te/ de la lung rigs dri ma med pas gnod pa'i phyir/ nyon mongs dang po gnyis dang phyi ma gnyis la byang 'phags kyis gnyen po ched du gnyer nas rten mi rten gyi khyad par yod de/ ma rig pa dang lta bas bsdus pa'i bag la nyal ni spong gi/ 'dod pa dang srid pa'i zag pa ni ma yin te/ bsams bzhin du srid par skye ba len pa'i phyir/ zhes gsungs pa gang zhig/ byang 'phags kyis nyon mongs de dag ngo bo'i sgo nas spong ba mtshungs/ spang bya'i gtso bor byas nas mi spong bar mtshungs/ de rnams kyis bag chags shes sgrib kyis bsdus pa rnams spang bya'i gtso bor byas nas spong bar mtshungs pa'i phyir/ gzhung 'dis nyan rang dang byang sems kyi snying rje chen po'i khyad par bstan pa yin te/ nyan rang snying rje chen po'i gzhan dbang du ma gyur pas rang don du nyon mongs mtha' dag spang bya'i gtso bor byas nas spong/ byang sems snying rje chen po'i gzhan dbang du gyur pa'i nyon mongs spang bya'i gtso bor byas @16b nas mi spong/ 'ga' zhig thabs mkhas kyis gzhan don sgrub pa'i yan lag tu 'gyur tshul bstan pa'i sgo nas yang dag mtha' mngon du byed pa'i dus dang dus ma yin pa la mkhas pa'i tshul bstan pa'i phyir/ /!lam shes nyid kyi tshul la ni/ /zhes sogs kyi skabs su mtha' dpyad pa la/ 'dir bstan shes bya'i lam ngos bzung ba/ de ji ltar shes par byed tshul/ shes par byas pa'i dgos pa bshad pa dang gsum/ dang po la/ nyan thos rang rgyud kyis bsdus pa'i mi rtag sogs bcu drug mngon sum du rtogs pa'i ye shes 'dir bstan shes bya'i lam ma yin te/ byang chub sems dpas rang rgyud kyi blo'i ngor bskyed nas mi sgom pa'i phyir/ mi rtag sogs bcu drug mngon sum du rtogs pa'i rnam gzhag gi dbang du byas pa'i nyan thos kyi lam de nyid 'dir bstan shes bya'i nyan thos kyi lam yin te/ nyan thos kyi lam gang yin pa bskyed par bya zhing shes par bya'o/ /zhes pa ltar gyi lam de nyid 'dir bstan shes bya'i lam yin pa'i phyir/ gnyis pa de ji ltar shes tshul yod de/ sbyor ba'i dus su sems bskyed/ dngos gzhi'i skabs su mi dmigs par rtogs pa'i shes rab/ rjes kyi skabs su rdzogs byang du bsngo bas zin pa'i sgo nas rang rgyud kyi blo'i ngor bskyed nas shes par byed pa'i phyir/ rtsa bas bstan tshul yod de/ mi dmigs par rtogs pa'i shes rab kyi zin byed dngos su bstan/ gzhan gnyis shugs la bstan pa'i phyir/ de yang/ mnyam gzhag tu mi rtag sogs bcu drug mngon sum du rtogs/ rjes thob tu yul can la yang nges shes 'dren pas nyan thos kyi lam shes pa'i tha snyad byas pa'o/ /'di'i bshad bya rtsa ba'i mdo las sdug kun gyi rnam pa bco lnga bshad kyang brgyad du ma 'dus pa'i skyon med de/ sdug kun gnyis kyi nyes dmigs lhag par shes nas yid 'byung ba sogs kyi phyir du thun mong ba'i rnam pa bdun gyi bdun po de yang sdug bden gyi rnam pa gnyis dang kun 'byung gi rnam pa bzhi po ci rigs pa'i rnam grangs yin pa'i phyir/ 'o na lam gang dang gang gis rnam pa gang dang gang gi sgo nas yid 'byung ba sogs byed ce na/ pha rol gyi dgra lta bu dang gnod byed 'jigs pa'i rnam pa gnyis kyi sgo nas theg pa che chung gnyis ka'i skabs @17a @#/ /su mthong lam gyi skabs su mngon sum gyis yid 'byung ba'i phyir du de gnyis kyi sbyor lam du zhugs pa dang/ sa bcu pa ma gtogs pa'i theg chen gyi sgom lam dang/ theg dman gyi sgom lam gyi skabs su rang grub dus kyi skad cig gnyis par mi bsdod pa'i g.yo ba dang/ phyis 'byung gi rgyu la mi bltos par rab tu 'jigs pa'i rnam pa gnyis kyi sgo nas mthong lam du zhugs pa dang/ 'dod chags dang bral ba'i phyir dang/ theg dman gyi lhag med myang 'das kyi skabs/ sangs rgyas kyi sar sdug kun gnyis ma lus par 'gog pa'i phyir du theg dman gyi lhag bcas myang 'das kyi skabs dang/ sa bcu pa'i skabs su gnod pa'i gnas su gyur pas 'jigs pa dang/ srin po sogs kyi glags thob pas nad 'go ba dang/ thog 'bab pa sogs kyi 'tshe ba'i rnam pa rnams kyi sgo nas zhugs pa yin te/ de skad du yang/ rnam grangs bsdu ba las/ yid 'byung ba ni mthong ba'i lam mo/ /'dod chags dang bral ba ni sgom lam yongs su la'o/ /'gog pa ni phung po thams cad 'gag pa'o/ /yid 'byung ba dang/ 'dod chags dang bral ba la zhugs pa ni de gnyis kyi sbyor ba la gnas pa rnams yin no/ /zhes gsungs pa'i phyir/ gsum pa la/ byang chub sems dpa' rnams kyis nyan thos kyi lam shes sgom pa la dgos pa yod de/ nyan thos kyi rigs can rjes su bzung ba dang/ skyes bu 'bring dang thun mong ba'i lam gyis rgyud sbyangs pas 'khor ba la yid 'byung bskyed pa sogs kyi dgos pa dang/ lam gsum shes pa'i lam shes rdzogs pa sogs kyi dgos pa yod pa'i phyir te/ sdug kun gyi rnam pa bco lnga sgom pas 'khor ba rgyu 'bras la yid 'byung skye/ 'gog lam gyi rnam pa brgyad sgom pas thar pa rgyu 'bras la yid ches rnyed nas 'jug byar shes pa 'byung ba'i phyir/ nyan rang gi rigs can tshul bzhin du rjes su 'dzin pa la mi rtag sogs bcu drug rang nyid kyis mngon sum du rtogs dgos te/ de ltar ma rtogs na tshul bzhin du ston mi nus pa'i phyir/ rnam 'grel las/ thabs byung de rgyu lkog gyur pa/ /de 'chad pa ni dka' ba yin/ zhes gsungs pa'i phyir/ de ltar byas @17b na; sems bskyed bsngo ba shes rab gsum gyis zin pa'i sgo nas nyan thos kyi rtogs rigs su gnas pa'i lta spyod gnyis su phye ba'i lta ba'i char gtogs kyi theg chen gyi bden pa mngon rtogs/ 'dir dngos su bstan pa'i nyan thos kyi lam shes pa'i lam shes kyi mtshan nyid/ mtshan gzhi mi rtag sogs bcu drug mngon sum du rtogs pa'i theg chen gyi mthong lam lta bu'o/ /!'phags pa nyan thos lam la ni/ /zhes sogs kyi skabs su/ sems bskyed bsngo ba shes rab gsum gyis zin pa'i sgo nas mi rtag sogs bcu drug gang rung don spyi'i tshul gyis rtogs pa'i theg chen gyi nges 'byed cha mthun/ 'dir bstan nyan thos kyi lam shes pa'i lam shes kyi rgyu nges 'byed cha mthun gyi mtshan nyid/ de la dbye na der gyur pa'i drod sogs bzhi yod/ bzhi pa gzhung gis bstan tshul yod de/ zin byed stong nyid don spyi'i tshul gyis rtogs pa'i theg chen gyi sbyor lam bzhi dngos su bstan nas/ mi rtag sogs bcu drug gang rung don spyi'i tshul gyis rtogs pa'i theg chen gyi sbyor lam bzhi shugs la 'phangs te bstan pa'i phyir/ de lta na'ang/ skabs dang por sbyor lam bstan pa dang zlos skyon med de/ ston tshul mi 'dra ba'i khyad par yod pa'i phyir/ /!rang byung bdag nyid rtogs pa'i phyir/ /zhes sogs kyi skabs su/ mtha' dpyad pa la/ thub ba'i dbang po las rten 'brel zab mo'i chos thos pa nyan sems bsgoms gsum byas pa la brten nas mthar slob dpon gzhan gyi gdams dag la ma bltos par rang byung gi byang chub mngon du byed pa'i rigs can gyi theg pa 'bring po'i gang zag / rang rgyal gyi mtshan nyid/ de la dbye na/ bse ru lta bu'i rang rgyal/ tshogs spyod chen po'i rang rgyal/ tshogs spyod chung ngu'i rang rgyal dang gsum/ de dag kyang khyad chos bdun gyi sgo nas shes par bya ba yin te/ rigs dang dbang po'i khyad par lam bgrod tshul gyi khyad par/ tshogs bsog tshul gyi khyad par/ 'bras bu mngon du byed tshul gyi khyad par/ gnas pa dang rgyu ba'i khyad par/ chos ston tshul gyi khyad par/ sgra don bdun gyi sgo nas shes par bya ba yin pa'i phyir/ dang po la/ rang rgyal de rnams kyi rigs dang dbang po'i khyad par yod de/ nyan thos las nyon mongs shas chung bas @18a @#/ /'du 'dzi la mi dga' bar gcig pur gnas pa la dga' ba dang/ byang sems la bltas te snying rje shas chung bas gzhan don rgya chen po la mi dga' bar nang du yang dag 'jog la dga' ba dang/ phyi rol don 'dzin gyi rtog pa rang lam du spong nus nang shes pa bden 'dzin rang lam du spong mi nus pas dbang po 'bring po rang rgyal gyi rigs la brten pa'i khyad par dang ldan pa'i phyir/ gnyis pa lam bgrod tshul gyi khyad par la/ de rnams kyi nang nas bse ru lta bu'i rang rgyal gyi lam bgrod tshul yod de/ skye ba gcig thogs man chad kyi tshe bskal pa brgyar sangs rgyas yongs 'dzin du bsten/ dam pa'i chos nyan/ tshul bzhin yid la byed pa sogs kyis rgyud smin par byas/ mkhas par bya ba'i dngos po drug la mkhas pa dang/ 'chi 'pho ba'i tshe smon lam chen po gsum btab/ skye ba phyi ma srid pa tha ma pa'i tshe skyes pa dang bud med dmangs rigs ma yin pa zhig tu skyes te/ sbyor lam drod yan chad rten thogs gcig la bgrod par byed/ tshogs spyod chen po bas skye ba gcig thogs man chad du sbyor lam bzod 'bring man chad la gnas nas sangs rgyas yongs 'dzin du bsten pa sogs byas te/ skye ba phyi ma srid pa tha ma pa'i tshe skyes pa dang bud med dmangs rigs ma yin pa zhig tu skyes te/ sbyor lam bzod chen yan chad rten thogs gcig la bgrod par byed/ tshogs spyod chung ngu bas skye ba gcig thogs man chad la mthong lam man chad la gnas nas sangs rgyas yongs 'dzin du bsten pa sogs byas nas/ skye ba phyi ma srid pa tha ma pa'i tshe skyes pa dang bud med dmangs rigs ma yin pa zhig tu skyes te sgom lam yan chad rten thogs gcig tu bgrod par byed pa'i phyir/ mkhas bya'i dngos po la drug yod de/ phung po// khams/ skye mched/ rten 'brel/ bden pa/ gnas dang gnas ma yin pa dang bcas pa'i gnas drug la mkhas par byas pa'i phyir/ smon lam chen po gsum gyi khyad par yod de/ sangs rgyas dang de'i nyan thos med pa'i zhing stong par skye bar gyur cig ces dang/ srid pa tha ma pa'i tshe slob dpon gzhan la ma bltos par rang nyid kyis byang chub @18b mngon du byed nus par gyur cig ces pa dang/ gzhan la sgra med du chos ston nus par gyur cig ces pa rnams yin pa'i phyir/ lam bgrod tshul de ltar 'thad de/ kun btus las/ nges par 'byed pa'i cha dang mthun pa sngon ma bskyed pa dang/ bskyed pa dang/ sngon 'bras bu ma thob pa dang thob pa yang rung ste sangs rgyas 'byung ba med par bdag nyid kyis lam mngon du byas te bse ru lta bur gyur te gcig pur gnas pa 'am rang rgyal bar gyur te tshogs dang spyod pa gang sdug bsngal gyi mthar 'byin pa 'thob pa'o/ /zhes gsungs pa'i phyir/ gsung rigs 'di 'dra snga phyir 'ga' zhig tu 'byung bas kun btus kyi lugs la rang rgyal la yang zhugs gnas kyi rnam gzhag mdzad par mngon no/ /gsum pa tshogs bsog tshul la/ kha cig/ bse ru lta bus bskal pa brgya/ /tshogs spyod chen po bas bskal pa brgya'i sum gnyis/ chung ngu bas bskal pa brgya'i sum cha tshogs bsog ste gsum po de dbang po rno rtul gyi khyad par gyi lam la sgom pa srid nus mi nus kyi khyad par yod pa'i phyir/ zhes zer/ kha cig/ gsum po de rim pa bzhin du bskal pa brgya/ nyis brgya/ sum brgyar tshogs bsog dgos te/ gsum po de dbang po rno rtul gyi rim pas tshogs bsag tshul la bogs che chung gi khyad par yod pa'i phyir/ zer na/ mi 'thad de/ tshad ldan gyi gzhung gis zin pa med cing rgyu mtshan de rnams kyang mtha' gcig tu nges pa med pa'i phyir/ rang lugs ni mtha' gcig tu ma nges te/ bse ru bskal pa brgya yi rgyus/ /de grangs mang gsum la sangs rgyas/ / zhes pa yang gtso che ba tsam la byed dgos par snang ba'i phyir te/ rgyan gyi ched du bya ba'i gdul bya lta bu la yang nang gses kyi lam bgrod pa myur bul gyi khyad par yod pa'i phyir/ byang sems 'di'i bskal pa bar bskal la mdzad pa mi 'thad de/ mdzod 'grel las/ bskal pa chen po brgyar byang chub kyi tshogs dag la spyad de bse ru lta bur 'gyur ro/ /zhes gsungs pa'i phyir/ rang lugs la gser 'phreng las/ rang rgyal gsum gas bskal pa brgyar mtshungs par tshogs bsag dgos par gsungs pa yang gtso che ba la dgongs pa yin gyi mtha' gcig tu ma nges te/ phyi @19a @#/ /nang gi rkyen khyad par can la brten pa'i tshogs gnyis po gas chen po bsags pas yun de tsam bsog mi dgos pa yang yod pa'i phyir te/ nyan thos la myur ba srid pa gsum gyi mthar/ zhes gsungs kyang sangs rgyas dang phrad pa'i mu stegs byed kha cig rten de nyid la nyan thos kyi lam bgrod nas dgra bcom thob pa mang du byung ba 'dir yang mtshungs pa'i phyir/ bzhi pa byang chub mngon du byed tshul gyi khyad par/ rang rgyal gsum gyi nang nas dang po gnyis la nyan thos kyi rtogs pa sngon song yod pa dang/ phyi ma la dang po nyid nas rang rgyal rigs nges yin te/ mdzod 'grel las/ rang sangs rgyas ni rnam pa gnyis te tshogs shing spyod pa dang/ bse ru lta bu rnams so/ /de la tshogs shing spyod pa rnams ni nyan thos kyi rigs gyur pa sngon du 'gro ba'i rang rgyal rnams shes bya'o/ /zhes gsungs pa'i phyir/ gsum gas kyang srid pa tha ma pa'i cho slob dpon gzhan gyis gdams ngag la ma bltos par rang nyid kyis byang chub mngon du byed par mtshungs te/ gsum gas de ltar nus pa'i smon lam 'debs pa gang zhig/ srid pa tha ma pa de rnams smon lam stobs can yin pa'i phyir/ lnga pa la rang sangs rgyas gsum po de thugs dang sku'i gnas tshul gyi khyad par yod de/ thugs kyi gnas pa gsum gis kyang rten 'brel yan lag bcu gnyis lugs 'byung lugs ldog tu sems pa dang/ rnam thar gsum gyi ting nge 'dzin la gnas par mtshungs kyang/ sku'i gnas bshas tshar bse ru lta bu'i rang rgyal de zla med gcig pur gnas/ tshogs spyad che chung gi rang sangs rgyas gnyis grogs mang po'i tshogs nang du gnas pa'i phyir/ rgyu ba'i khyad par yod de/ grong dang grong khyer la sogs par bsod snyoms la rgyu ba'i tshe/ dbang po'i sgo sdom pa dang/ ma dad pa rnams dad pa dang/ dad pa rnams ches cher spel ba'i phyir du rdzu 'phrul ya ma zung ston pa sogs kyi sgo nas rgyu ba'i phyir/ drug pa la chos ston tshul gyi khyad par yod de/ ngag sgra med par lus kyi stod nas me 'bar/ smad nas chu 'bab/ bar nas du ba 'thul ba sogs lus kyi rnam 'gyur gyi sgo nas gzhan rgyud la rtogs pa bskyed par byed pa'i phyir/ @19b ngag gi sgo nas mi ston pa'i rgyu mtshan yod de/ ngo bo la ma brtags khyad par lam dpyad par ngag gi sgo nas chos mi ston/ de ltar dpyad na ting nge 'dzin gyis rgyud 'khrugs par 'gyur ba'i phyir/ de yang gtso che pa'i dbang du byas pa yin gyi/ ngag gi sgo nas cung zad ston pa yang yod de/ sgron gsal las/ shas cher dag gi sgo nas mi ston zhes gsungs pa'i phyir/ bdun pa la de dag la rang rgyal zhes 'chad pa'i rgyu mtshan yod de/ slob dpon gzhan gyis gdams ngag la ma bltos par rang nyid kyi byang chub mngon du byed pa'i rgyu mtshan gyis de ltar bshad pa'i phyir/ dang po la/ bse ru lta bu dang/ phyi ma gnyis la tshogs na spyod pa zhes 'chad pa'i rgyu mtshan yod de/ rim pa bzhin du shas cher zla med gcig pur gnas pa dang/ grogs mang po dang lhan cig tu rang gi byang chub rgyu tshogs la spyad pa'i rgyu mtshan gyis de ltar bshad pa'i phyir te/ mdzod 'grel las/ lung med par bdag nyid gcig pu'i phyir sangs rgyas pas rang sangs rgyas te zhes dang/ 'grel bshad las/ bse ru lta bu yin zhes bya ba ni/ ji ltar bse ru dag gnyis pa med pa de bzhin du/ de dag kyang khyim pa dang rab tu byung ba rnams dang/ rang sangs rgyas gzhan dag dang/ ma 'dres par gnas pas na bse ru lta bu rnams zhes bya'o// zhes dang/ tshogs zhing spyod pa dang/ zhes gsungs pa'i phyir/ /!gzung don rtog pa spong phyir dang/ /zhes sogs kyi skabs su mtha' dpyad pa la/ 'dir bstan shes bya'i lam ngos bzung ba/ de ji ltar shes pa'i tshul/ shes par byed pa'i dgos pa/ dgos pa de ldan gyi rang rgyal gyi lam shes pa'i lam shes kyi ngo bo// zhar la rang rgyal dang sems tsam pa lta ba mtshungs mi mtshungs dpyad pa dang lnga/ dang po la/ 'dir dngos su bstan pa'i khyad chos gsum ldan gyi lam de ni byang sems 'phags pas chos gsum gyis zin pa'i sgo nas rgyud la bskyed nas shes par bya ba'i lam ma yin te/ byang sems 'phags pa rang rgyal lam du mi 'jug pa'i phyir/ des na khyad chos gsum dang ldan pa'i rang rgyal rnams kyis rnam gzhag gi lam gzung 'dzin rdzes ? gzhan gyis stong ba'i stong nyid mngon sum du rtogs pa'i ye shes de nyid byang sems 'phags pas chos gsum gyis zin pa'i sgo nas rgyud la bskyed nas @20a @#/ /shes par byed pa'i lam 'dir bstan shes bya'i lam yin te/ mdo las/ rab 'byor rang rgyal gyi lam bskyed par bya zhing shes par bya'o/ /zhes gsungs pa'i phyir/ chos gsum gyis zin pa'i sgo nas shes par byed tshul ni/ nyan thos kyi lam shes pa'i lam shes kyi skabs su bshad pa las dpags nas shes par bya'o/ /gsum pa dgos pa la/ byang sems 'phags pa rnams kyis rang rgyal gyi lam shes pa'i lam shes rgyud la bskyed pa la dgos pa yod de/ rang rgyal dang sems tsam pa'i rigs can rjes su bzung ba dang/ rang rgyud kyi gzugs phyi rol don 'dzin gyi rtog pa dpal gzhom pa dang/ theg pa gsum gyi lam shes rdzogs pa'i phyir du yin pa'i phyir/ dgos pa de ldan gyi rang rgyal gyi lam shes pa'i lam shes kyi ngo bo// chos gsum gyis zin pa'i sgo nas gzugs phyi rol don gyis stong ba mngon sum du rtogs pa'i theg chen gyi bden pa mngon rtogs gang zhig/ lta spyod gnyis kyi nang nas lta ba'i char gtogs pa/ 'dir dngos bstan gyi rang rgyal gyi lam shes pa'i lam shes kyi mtshan nyid/ mtshan gzhi byang sems mthong lam pa'i rgyud kyi gzugs dang gzugs 'dzin pa'i tshad ma rdzas gzhan gyis stong pa'i stong nyid mngon sum du rtogs pa'i ye shes lta bu'o/ /lnga pa lta ba mtshungs mi mtshungs dpyad pa la/ kha cig gi gsung na re/ rang rgyal slob pa 'phags pas gzung ba bden 'dzin rang lam du spong/ shes pa la bden zhen mi spong/ sems tsam pas gnyis stong gi shes pa bden grub tu 'dod pas de gnyis lta ba mi mtshungs pa yin no zhe na/ de'i don de/ gzung ba bden par 'dzin pa'i bden 'dzin rang lam du spong/ shes pa bden par 'dzin pa'i bden 'dzin rang lam du mi spong ba'i don yin nam/ 'on te/ gzung ba bden med du rtogs/ nang shes pa bden med du ma rtogs pa'i don yin nam/ gzugs gzugs 'dzin tshad ma dang rdzas tha dad yin pa khegs kyang/ gzugs 'dzin tshad ma gzugs dang rdzas tha dad yin pa ma khegs pa la byed/ dang po ltar na/ rang rgyal dgra bcom pas gzung ba bden par 'dzin pa'i bden @20b 'dzin spong par thal/ dam bca' dang po 'thad pa'i phyir/ 'dod na/ des bden 'dzin spangs par thal/ 'dod pa'i phyir/ gnyis pa ltar na/ mi 'thad de/ gzung ba bden med du rtogs pa'i rigs pa de'i byed pa la brten nas 'dzin pa yang bden med du tshad mas rtogs nus pa'i phyir// slob dpon 'phags pa lhas/ dngos gcig dngos po kun gyi ngo bo nyid/ /gang gi dngos gcig de bzhin nyid mthong ba/ /de yi dngos kun de bzhin nyid du mthong/ /zhes gsungs pa'i phyir/ gsum pa ltar na/ gzugs 'dzin rdzas tha dad kyis stong pa'i stong nyid rtogs pa'i gang zag mi srid par thal/ gzugs gzugs 'dzin tshad ma dang rdzas tha dad 'gog pa'i rigs pa des/ gzugs 'dzin tshad ma gzugs dang rdzas tha dad yin pa khegs mi nus pa'i phyir/ 'dod mi nus so/ /kho na re/ rnam 'grel las/ de yang brtsod pa mtshungs phyir dang/ zhes gzugs 'dzin tshad ma gzugs las rdzas tha dad 'gog pa'i rigs pa las logs su gsungs pa'i phyir/ zer na skyon med de/ de gnyis la rtogs dka' sla'i khyad par yod pa'i phyir te/ rtog pa de gnyis la mngon gyur ba 'go mnon dka' sla'i khyad par yod pa'i phyir/ mdo sde rgyan las/ de tshe de yi gzung ba yin /zhes sogs gsungs pa'i phyir/ des na 'dzin pa bden smra'i rang rgyal dang/ /gzugs 'dzin gnyis stong don dam du/ /smra ba'i rnam rig grub pa'i mtha'/ /mtshungs par 'dod pa'i mkhas pa mtshar/ /zhes pa yang gsal byed pa'i bzhad gad yin te/ su dbang po rtul yang/ gzugs gzugs 'dzin tshad ma dang/ rdzas gzhan yin pa khegs nas gzugs 'dzin tshad ma gzugs dang rdzas gzhan yin pa khegs mi nus pa mi srid pa'i phyir/ rang lugs la/ rang rgyal dang sems tsam pa lta ba mtshungs pa yin te/ gzugs 'dzin rdzas gzhan gyis stong par rtogs pa'i lta ba de nyid/ theg pa gsum gyi nang nas rang rgyal gyi lta ba dang/ grub mtha' smra ba bzhi'i nang nas sems tsam pa'i lta ba yin pa'i phyir te/ gnyis kas kyang lta ba de gnyis bsgom bya'i gtso bor byas nas sgom/ gzugs phyi rol don 'dzin gyi rtog pa spang bya'i gtso bor byas nas spong ba'i phyir/ rang @21a @#/ /rgyal gyi lam shes pa'i lam shes kyi rgyu nges 'byed cha mthun gyi ngo bo dang/ gzhung gis ston tshul sogs kyi ni nyan thos kyi lam shes pa'i lam shes kyi rgyu nges 'byed cha mthun la dpags te shes par bya'o/ /! bden dang bden la bzod pa dang/ /zhes sogs kyi skabs su/ mtha' dpyad pa la/ mthong lam kyi rten bshad pa/ brten pa mthong lam bshad pa gnyis/ dang po la/ lus rten sems rten gnyis/ lus rten la/ ngan song gsum/ tshe de la chos spong dang mtshams med kyi las stobs chen bsags la ma sbyangs pa dang za ma dang ma ning gi rten la mthong lam gsar du mi skye ste/ ngan song gsum po dang/ tshe de la mtshams med kyi las stobs chen bsags la ma sbyangs pa sogs mthong lam gsar du skye ba'i bgegs byed las sgrib shas che ba'i phyir dang/ za ma dang ma ning gi rten ni nyon mongs pa'i sgrib pa shas che ba'i phyir/ bde 'gro'i rten can yin kyang/ byang gi sgra mi snyan pa dang/ gzugs gzugs med kyi rten la'ang gsar du mi skye ste/ dang po rnam smin gyi sgrib pa shas che ba'i phyir dang/ phyi ma gnyis po de 'khor ba la skyo shas chung ba'i phyir/ khyab ste/ mthong lam gsar du skye ba la 'khor ba la skyo ba shugs drag dang/ thar pa don gnyer shugs drag po dgos pa'i phyir/ bsdu ba las/ gzugs kyi khams dang gzugs med pa'i khams gong mar skyes bas kyang/ dang por bden pa rnams mngon par mi rtogs te/ 'di ltar gnas de dag ni skyo bar 'gyur ba dka' ba yin pas/ re zhig skyo ba chung ngus kyang bden pa rnams mngon par mi rtogs na/ gang na skyo ba chung ngu yang thams cad kyi thams cad du med pas lta smos kyang ci dgos pa'i phyir/ zhes pa dang/ mdzod las/ gong na mthong lam med/ /mi skyo/ /zhes gsungs pa'i phyir/ rang lugs la/ de dag ma gtogs pa'i gling gsum gyi mi dang 'dod lha'i rten la gsar du skye ba yin te/ de rnams mthong lam la sogs pa'i yon tan khyad par can skye ba'i 'gal rkyen dang bral/ mthun rkyen tshang ba'i gsung rab dgongs 'grel dang bcas pa las shin tu bsngags shing/ de rnams kyi nang nas kyang rang cag @21b 'dzam bu gling pa la ches bsngags pa'i phyir/ kho na re/ khams gong ma'i rten la theg dman gyi mthong lam gsar du skye ba med kyang/ theg chen gyi mthong lam gsar du skye ba yod de/ de'i rten la lam shes gsar du skye ba yod pa'i phyir/ der thal/ 'dod gzugs kyi lha rnams kyi rgyud la lam shes skye rung du sgrub? pa'i phyir/ de bzhin gshegs pas rang bzhin gyi 'od kyi lha rnams kyi 'od mog mog por mdzad pa'i phyir/ zer na ma khyab ste/ gzugs khams kyi lha'i rgyud la lam shes myur du skye rung du byas pa cam gyi rten de la lam shes dngos su skye rung du byas pa mi 'grub cing/ theg dman gyi mthong lam las theg chen gyi mthong lam skye ba la skyo shas nges 'byung shas ches che ba dgos pa'i phyir/ gnyis pa sems rten bshad pa la/ spyir mthong lam gsar du skye ba'i sems rten bsam gtan sa drug ka yod cing/ bye brag tu theg chen gyi mthong lam gsar du skye ba'i sems rten yin na/ rab mtha'i bsam gtan bzhi pa'i dngos gzhi yin pas khyab/ gzugs med kyi dngos gzhi dang/ 'dod sems la brten nas mthong lam gsar du skye ba med de/ 'grel chen du/ theg chen gyi sgom lam bar chad med lam gyi sems rten du gyur pa'i srid rtse'i dngos gzhi dang/ 'dod sems gsungs kyang/ gzugs med kyi dngos gzhi zhi lhag gnyis kyi nang nas zhi gnas shas che/ 'dod sems shin tu rags pas 'phags lam gyi las dang po ba mthong lam mtshon mi nus pa'i phyir/ de skad du yang/ bsdu ba las/ gzugs med pa'i snyom par 'jug pa rnams las ni min te/ 'di ltar gzugs med pa'i snyom par 'jug pa'i lam ni zhi gnas shas che ba yin/ lhag mthong shas chung ba'i lam gyis ni bden pa rnams mngon par rtogs par mi nus pa'i phyir ro/ /zhes gsungs pa'i phyir/ theg chen gyi mthong lam gsar du skye ba'i sems rten la bsam gtan bzhi pa'i dngos gzhi yin pas khyab ste/ zhi rags kyi rnam pa can gyi bsam gtan bzhi pa'i dngos gzhi theg chen gyi sbyor lam chos mchog chen po nas thob pa gang zhig /zhi lhag cha snyoms kyi ting nge 'dzin gyi skyon brgyad las grol bas/ lam sla ba de lta bu la brten du yod bzhin du lam dka' ba gzhan @22a @#/ /brten pa la'ang dgos pa med pa'i phyir/ spyir mthong lam gsar du skye ba'i sems rten du gyur pa'i bsam gtan sa drug yod de/ rgyun zhugs zhugs pa dang chags bral sngon song gi phyir 'ong zhugs pa'i rgyud kyi mthong lam bar chad med lam de/ bsam gtan dang po'i nyer bsngogs mi lcogs med la brten nas skye/ de dag ma gtogs pa'i mthong lam bar chad med lam rnams bsam gtan gyi dngos gzhi bzhi sogs gang rung la brten nas skye ba'i phyir/ bsdu ba las/ bden pa mngon par rtogs pa ni bsam gtan rnams kho na dang/ bsam gtan dang po'i nyer bsngogs mi lcogs med la brten nas kyang mngon par rtogs par 'gyur gyi/ zhes gsungs pa'i phyir/ kha cig gis/ sems kyi rten brten pa la rnam pa thams cad du ngo bo gcig pas khyab par 'dod pa ni mi rigs te/ theg chen gyi sgom lam bar chad med lam gyi sems rten du gyur pa'i 'dod sems dang srid rtse'i dngos gzhi yod pa ni gang zhig /mnyam par ma gzhag pa'i sas bsdus kyi theg chen gyi sgom lam bar chad med lam med cing/ 'du shes kyi rgyu ba shin tu mi gsal ba'i theg chen gyi sgom lam med pa'i phyir/ theg chen gyi sbyor lam chos mchog chen po nas rab mtha'i bsam gtan bzhi pa'i dngos gzhi thob pa dang/ 'jug pa las/ sa der rgyal sras bsam gtan mngon shes dang/ zhes sogs gsungs pa yang mi 'gal te/ de ni mnyam gzhag khyad par can gyi stobs kyis thob pa'i bsam gtan dang/ mngon shes khyad par can la dgongs pa'i phyir/ gnyis pa brten pa mthong lam bshad pa la/ bye brag smra ba'i lugs bshad pa dang/ kun las btus pa'i lugs la dogs pa dpyad pa dang/ dbu ma pa rang gi lugs bshad pa dang gsum/ dang po la/ mdzod pa ltar na/ mthong lam shes bzod skad cig ma bco lnga po de rim can kho nar skye ba yin te/ dang por 'dod pa'i sas bsdus kyi mthong spangs nyon mongs kyi dngos gnyen bar chad med lam du gyur pa'i mthong lam sdug bsngal la chos bzod/ de'i rjes des dngos su drangs pa'i chas shas dang/ de'i rjes khams gong @22b gi sas bsdus kyi mthong spangs nyon mongs kyi dngos gnyen du gyur ba'i mthong lam sdug bsngal la chos bzod dang/ de'i rjes des dngos su drangs pa'i rjes shes skye/ de bzhin du bden pa lhag ma gsum la yang sbyar ba yin pa'i phyir/ sdug bsngal chos bzod la sogs pa'i skad cig ma bco lnga po mthong lam yin te/ bden pa sngar ma rtogs pa gsar du mngon sum du rtogs pa'i lam yin pa'i phyir/ bcu drug pa lam rjes shes mthong lam ma yin te/ bden pa sngar ma rtogs pa gsar du mngon sum gyis rtogs pa ma yin pa'i phyir/ mdzod las/ de la skad cig bco lnga ni/ /ma mthong mthong phyir mthong ba'i lam/ /zhes gsungs pa'i phyir/ zer na/ 'o na/ rjes shes dang po gsum yang mthong lam ma yin par thal/ bden pa sngar ma rtogs pa gsar du rtogs pa ma yin pa'i phyir/ bcu drug pa lam rjes shes de ma yin pa gang zhig /mtshungs pa'i phyir/ 'dod na/ mthong lam shes bzod skad cig ma bcu gnyis su 'gyur bar thal/ 'dod pa'i phyir/ de skad du yang 'grel chen las/ gal te de ltar yin na sdug bsngal la sogs pa'i bden pa gsum la yang sden med pa'i mthong ba ma tshang bas rjes su shes pa'i skad cig ma mthong ba'i lam ma yin pa'i phyir/ skad cig ma bcu gnyis kho nar 'gyur na de ltar na ni khas ma blangs pas 'di ni gyi na'o/ /zhes gsungs pa'i phyir/ gnyis pa kun las btus pa'i lugs la dogs pa dpyad pa la/ kha cig /kun las btus pa ltar na dang por khams gsum ga'i sas bsdus kyi mthong spangs nyon mongs kyi dngos gnyen bar chad med lam du gyur pa'i mthong lam sdug bsngal la chos bzod skye/ de rjes mthong spangs de las dngos su grol ba'i chos shes skye zhing/ rjes bzod kyis chos bzod dang chos shes gnyis la dmigs nas 'di ni rang 'bras 'phags chos rnams kyi rgyu'o zhes 'dzin la/ sdug bsngal rjes shes kyis bzod shes la dmigs nas sngar ltar 'dzin/ bden pa lhag ma gsum gyi rjes bzod dang/ rjes shes de ltar sbyar bar bya ba yin te/ de nyid las/ sdug bsngal la chos shes pa'i bzod pa gang zhe na/ sngar rnam par bcas pa'i dbang du byas na so so rang la mngon sum du gyur pa'i zag pa med pa'i shes rab ste/ @23a @#/ /gang gis sdug bsngal mthong pas spang bar bya ba'i nyon mongs pa spong ba ste/ sdug bsngal la chos shes pa'i bzod pa zhes bya'o/ /chos shes pa zhes pa gang zhe na shes pa gang gi bzod pa'i mjug thogs su/ rnam par grol ba mngon du byed do// sdug bsngal la rjes su rtogs par shes pa'i bzod pa gang zhe na/ sdug bsngal la chos shes pa'i bzod pa dang/ sdug bsngal la chos shes pa 'di gnyis 'phags pa'i chos rnams kyi rgyu'o/ /zhes so so rang la mngon sum du gyur te/ zag pa med pa'i shes rab bo/ /sdug bsngal la rjes su rtogs par shes pa gang zhe na/ sdug bsngal rjes su shes pa'i bzod pa de nges par 'dzin pa'o/ /bden pa lhag ma rnams la yang bzod pa dang shes pa rnams ci rigs su sbyar bar shes par bya'o/ /zhes gsungs pa'i phyir/ de ltar na sdug bsngal la chos bzod dang chos shes gnyis kyis yul bden bzhi la dmigs pa'i gzung ba rtogs pa dang/ rjes bzod dang rjes shes gnyis kyis yul can ye shes la dmigs pa'i 'dzin pa rtogs par gsungs te/ de nyid las/ sdug bsngal la chos shes pa'i bzod pa dang/ chos shes pas ni gzung ba rtogs so/ /sdug bsngal la rjes su shes pa'i bzod pa dang rjes su shes pas ni 'dzin par rtogs so/ /zhes gsungs pa'i phyir/ zhe na/ 'o na/ 'grel chen dang kun btus gnyis las theg chen gyi mthong lam shes bzod skad cig ma bcu drug 'jog tshul la khyad par med par thal/ khyod kyis bshad pa de kun las btus kyi dgongs pa mthar thug yin pa ni gang zhig /kun btus kyi gsung de rnams dang/ 'grel chen kyi skabs 'di'i gsung rnams la zhus dag thub pa tsam gyi khyad par med pa'i phyir/ 'dod mi nus te/ 'grel chen gyi lugs la shes bzod skad cig ma bcu drug po thams cad stong nyid la gnyis snang nub pa'i rnal 'byor du mtshungs pa'i phyir/ 'grel chen las/ bzod pa dang shes pa thams cad la rnal 'byor ba mtshan ma med pas mtshan mas gnas pa rig par bya'o/ /zhes gsungs pa'i phyir/ gzhan yang/ kun las btus kyi lugs la/ nyan thos kyi mthong lam shes @23b bzod skad cig ma bcu drug rims kyi skye bar thal/ bden pa re re la dmigs pa'i theg chen gyi mthong lam shes bzod skad cig ma bzhi rims kyi skye ba'i phyir/ 'dod mi nus te/ de ltar 'grel chen gyi lugs la'ang mtshungs pa gang zhig /'grel chen gyi lugs la theg dman mthong lam bzod pa brgyad cig car du skye/ shes pa brgyad kyang cig car du skye ba'i phyir/ der thal/ rigs pa drug cu ba'i rtsa 'grel las/ bzod pa brgyad dang shes pa brgyad cig car du skye ba gsungs pa gang zhig /rnam bshad las/ 'di dang rigs pa drug cu pa rtsa 'grel la mthong lam shes bzod skad cig ma bcu drug 'jog tshul khyad par yod pa ma mthong ngo/ /zhes gsungs pa'i phyir/ gang zhig der thal/ rigs pa drug cu pa las/ ches shes pa yi mjug thogs su/ /'di la bye brag yod na ni/ /shin tu phra ba'i dngos rnams la/ /rnam par mi mkhas de yi ni/ /rkyan las skyes pa'i don ma mthong/ /zhes dang/ de'i 'grel par/ gal te de ltar yin na mthong ba'i lam skad cig ma bco lngar rnam par gzhag ce na/ sde pa gzhan dag na re/ mthong ba'i lam skad cig ma bco lngar mi 'dod kyi/ 'o na ci zhe na/ mngon par rtogs pa skad cig mkho nar 'dod de/ re zhig de dag gi lugs dang bshad pa 'di mi 'gal lo// gang dag skad cig ma bco lngar 'dod pa de dag gi ltar na yang 'dul ba'i skye bo de lta bu lam bstan pas phan par 'dod pa'i phyir/ zhes gsungs pa'i phyir/ rtsa 'grel de gnyis dang 'dir bshad pa dgongs pa gcig tu 'grub ste/ theg dman gyi mthong lam skad cig ma bco lngar skye ? gsungs pa gdul bya'i don du gsungs pa'i sgra ji bzhin pa ma yin par gsungs pa'i phyir/ gsum pa dbu ma pa'i lugs bzhag pa la/ mthong lam gyi ngo bo// dbye ba/ slob dpon gyis 'grel chen du dgag pa ji ltar mdzad tshul/ slob dpon gyi bzhed pa bsdus te bstan pa/ 'da' bya 'da' byed kyi mthong lam skye ba'i rim pa bshad pa/ 'phes mtshams bshad pa dang drug/ dang po la rang gi nyer len du gyur ba'i theg chen gyi sbyor lam chos mchog chen po rdzogs rjes su byung ba'i bden bzhi mi rtag la sogs bcu drug bden stong spros bral du mngon sum du rtogs pa'i rang gi grogs ting nge 'dzin shes @24a @#/ /rab mtshungs ldan dang bcas shing sbyin sogs kyi thabs cha rgya chen pos zin pa'i theg chen gyi bden pa mngon rtogs/ skabs 'dir dngos bstan gyi theg chen gyi mthong lam gyi mtshan nyid/ spyi'i mtshan nyid ni/ stong nyid mngon sum du rtogs pa'i shes rab kyis zin pa'i theg chen gyi bden pa mngon rtogs so/ /gnyis pa dbye ba la theg chen gyi mthong lam la dbye na/ der gyur ba'i mnyam rjes gnyis/ mnyam gzhag la yang ji lta ba rtogs pa'i mnyam gzhag dang/ ji snying pa rtogs pa'i mnyam gzhag gnyis/ ji lta ba rtogs pa'i mnyam gzhag la dbye na/ theg chen gyi mthong lam shes bzod skad cig ma bcu drug yod/ de yang bzod pa brgyad po theg chen gyi mthong lam bar chad med lam las phye ba'i ngo bo gcig la ldog pa tha dad/ shes pa brgyad theg chen gyi mthong lam rnam grol lam las chi ba'i ngo bo gcig la ldog pa tha dad/ bzod pa brgyad du 'byed tshul yod de/ theg chen gyi mthong lam bar chad med lam gyis yul bden bzhi'i chos nyid mngon sum du rtogs pa'i cha nas chos bzod bzhi dang/ yul can chos bzod bzhi'i chos nyid mngon sum du rtogs pa'i cha nas rjes bzod bzher 'jog pa'i phyir/ bzhi po de la chos bzod ces 'chad pa'i rgyu mtshan yod de/ sngar mngon sum du rtogs ma myong ba'i bden bzhi'i chos nyid mngon sum du gsar du rtogs pa la skrag rigs pa las mi skrag pa'i rgyu mtshan gyis de ltar bshad pa'i phyir/ bzhi po de la rjes bzod ces 'chad pa'i rgyu mtshan yod de/ de'i rjes su yul can rjes bzod chos bzod bzhi'i chos nyid mngon sum du gsar du rtogs pa la skrag rigs pa las mi skrag pa'i rgyu mtshan gyis de ltar bshad pa'i phyir/ theg chen gyi mthong lam rnam grol lam la chos shes zhes 'chad pa'i rgyu mtshan yod de/ bden bzhi bden par 'dzin pa'i bden 'dzin kun btags spangs pa'i skro nas bden bzhi'i chos nyid mngon sum du rtogs pa'i rgyu mtshan gyis de ltar bshad pa'i phyir/ de la rjes shas zhes 'chad pa'i rgyu mtshan yod de/ bden 'dzin kun btags spangs pa'i chos shes kyis chos nyid mngon sum @24b du rtogs pa'i cha nas de ltar bshad pa'i phyir/ skad cig ma bcu drug gi 'jog tshul de ltar yin gyi chos bzod bzhi rtogs pa'i cha nas rjes bzod bzhi dang/ chos shes bzhi rtogs pa'i cha nas rjes shes bzhir 'jog pa sogs mi 'thad de/ theg chen gyi mthong lam bar chad lam gyis rang nyid dngos shugs gang du yang rtogs pa med pa'i phyir/ dngos su rtogs na slob lam na blo gcig gis bden gnyis dus cig car du mngon sum du rtogs pa yod par 'gyur/ shugs la rtogs na dman lam sngon du ma song ba'i stong nyid rtogs pa'i theg chen gyi sbyor lam gyis rang nyid shugs la rtogs dgos/ de ltar na de'i gzhal bya'i stong nyid med dgag ma yin par 'gyur ba'i phyir te/ chos gzhan shugs la 'phen pa'i ma yin dgag tu 'gyur ba'i phyir/ gzhan yang bden 'dzin bden med du mngon sum du rtogs pa'i theg chen gyi mthong lam gyi gzigs ngor bden 'dzin yod par thal/ theg chen gyi mthong lam bar chad med lam bden med du mngon sum du rtogs pa'i theg chen gyi mthong lam bar chad med lam gyi gzigs ngor theg chen gyi mthong lam bar chad med lam yod pa'i phyir/ 'dod mi nus te/ de'i gzigs ngor dri ma mtha' dag dang bral ba ltar snang yang/ dri ma mtha' dag dang ma bral bas der snang dang de sngong tshogs pa brdzun pa bslu ba'i chos can du gsungs pa'i phyir/ gzugs bden stong sgyu ma lta bu bden med mngon sum du rtogs pa'i theg chen mthong lam gyi gzigs ngor sgyu ma lta bu de yod par thal/ dam bca' 'thad pa'i phyir/ 'dod mi nus te/ de la dbu ma ba'i dri mi bro bar gsungs pa'i phyir/ gzhan yang rnam bshad las/ gzhan dbang gi chos nyid mngon sum du rtogs pa'i slob pa'i ye shes kyi gzigs ngor chos can gzhan dbang yod par 'dod pa la dbu sems gang gi yang lugs dang mi mthun par gsungs pa sogs kyis gnod do/ /'o na 'grel chen las/ de la chos shes pa'i bzod pa dang chos shes pas ni gzung ba rtogs la/ rjes su shes pa'i bzod pa dang rjes su shes pas ni 'dzin pa rtogs pa yin no/ /zhes gsungs pa dang/ rjes bzod kyis chos bzod dang chos shes la dmigs nas 'di ni 'phags pa'i chos rnams kyi rgyu'o snyam du 'dzin pa dang/ rjes shes @25a @#/ /kyis rjes bzod la dmigs nas de ltar 'dzin par gsungs pa dang 'gal zhing/ rnam bshad las kyang/ de'i rjes su chos bzhin du yul gzung ba'i chos nyid dang yul can 'dzin pa'i ye shes la nges shes 'dren pa'i don dang/ rjes bzod kyis chos la zhes par// bden bzhi'i chos nyid rtogs pa la bltos nas de'i yul can rtogs par 'jog pa yin no/ /zhes gsungs pa rnams dang yang 'gal lo zhe na/ skyon med de/ 'grel chen gyi lung dang po'i don chos bzod chos shes gnyis kyis yul gyi chos nyid rtogs pa dang/ rjes bzod rjes shes gnyis kyis yul can gyi chos nyid rtogs pa dang/ de gnyis kyis rim pa bzhin du yul gzung ba'i chos nyid dang yul can 'dzin pa'i ye shes la nges shes 'dren pa'i don dang/ rjes bzod kyis chos bzod dang chos shes la dmigs nas 'di 'phags pa'i chos rnams kyi rgyu'o snyam du 'dzin par gsungs pa ni rjes kyi gnas skabs su yon tan brgya phrag bcu gnyis sogs mthong ba na chos bzod chos shes kyi mthur mthong nas 'phags chos kyi rgyur nges shes 'dren pa'i don dang/ rnam bshad kyi lung snga phyi gnyis kyi don ni yul bden bzhi'i chos nyid rtogs pa la bltos nas de rgyud ldan gyi gang zag gis yul can de rtogs pa'i don dang/ chos bzod la mi skrag par de rgyud ldan gyi gang zag gis rtogs pa'i don yin pa'i phyir/ de gnyis rgyud la ldan pa'i gang zag gis rtogs te/ de gnyis rgyud ldan gyi gang zag gi rgyud la de gnyis myong byed kyi rang rig mngon sum yod pa'i phyir/ des na stong nyid mngon sum du rtogs pa'i theg chen gyi mthong lam skad cig ma gcig tu gsungs pa ni bya rdzogs kyi mnyam gzhag thun gcig yin pa'i don dang/ de la gnas pa'i gang zag la zhugs gnas gnyis kyi rnam gzhag kyang 'thad de/ snga ma bar chad med lam la gnas pa'i sems dpa' la zhugs pa'i tha snyad dang/ phyi ma rnam grol lam la gnas pa'i sems dpa' la 'bras gnas kyi tha snyad mdzad pa'i phyir/ gsum pa 'grel chen du dgag bzhag ji ltar mdzad pa'i tshul la/ lugs gsum bkod pa'i dang po gnyis slob dpon rang lugs kyi bzhad pa ma yin par @25b bstan pa dang/ gsum pa slob dpon rang lugs gyi bzhed par bstan pa gnyis las/ dang po la gnyis/ dang po la/ kha cig /chos nyid mngon sum du rtogs pa'i theg pa chen po'i mthong lam mnyam gzhag ye shes skad cig ma gcig dang/ skad cig ma bcu drug tu gsungs pa mi 'gal te/ skad cig ma gcig tu gsungs pa ni bden pa bzhi la bya ba cig car du byad pa'i bya ba'i mngon rtogs sam/ skad cig snga phyi med pa'i mnyam gzhag thun gcig gi skad cig ma gcig yin pa la dgongs pa dang/ so sor rtogs pa'i mngon par rtogs pa'i skad cig ma bcu drug tu bshad pa da rjes kyi gnas skabs su mi rtag sogs bcu drug la phyin ci log tu sgro 'dogs pa'i sgro 'dogs sel ba'i nges shes mi 'dra ba bcu drug rim can du 'dren pa'i nus pa'ang mnyam gzhag gi gnas skabs su/ nus pa mi 'dra ba bcu drug rim pa can du skye ba'i don yin pa'i phyir/ de ltar byas na mthong lam yan chad la mnyam gzhag la gnas pa'i tshe zhugs pa'i ming can dang/ sgro 'dogs bsal ba'i tshe 'bras gnas kyi ming can du 'jog pa'i phyir zer ba yin te/ 'grel chen las/ kha cig na re/ rgyu ma tshang ba med pa spong bar mi nus pa'i phyir/ sdug bsngal mthong bas spang bar bya ba'i dus su kun 'byung spong ngo/ /de nyid kyi na 'gog pa mngon du byed do/ /de yang gzhan du mi 'thad pas lam sgom mo/ /kun 'byung la sogs pa yang de bzhin te/ de ltar 'bras bu'i mngon par rtogs pa la bltos nas theg pa chen po'i mthong ba'i lam la mngon par rtogs pa skad cig ma gcig yin no/ / bden pa re re la yang phyin ci log rnam par bsal bas so sor rtogs pa'i mngon par rtogs pa las skad cig ma bcu drug kho nas mngon par rtogs pa byed pas zhes pa nas/ des na/ zhugs pa la sogs pa'i rnam par gzhag pa legs par gnas pa yin no/ /zhes gsungs zer/ 'di slob dpon gyis bzhed pa ma yin zhing/ rigs pas kyang mi 'thad de/ de lta na/ 'gog bden thob pa la lam bden sngon du 'gro mi dgos pa dang/ gzhi gcig la bltos pa'i bar chad med lam dang/ rnam grol lam gnyis cig car du skye bar thal ba'i skyon yod pa'i phyir te/ sdug bsngal chos bzod @26a @#/ /kyi dus su kun 'byung spangs pa'i 'gog pa mngon du byas pa'i phyir/ kho na re skyon med de/ sdug bsngal chos bzod kyi gnas skabs su 'gog pa mngon du byed par 'gyur ba la dgongs pa'i phyir zhe na/ 'o na/ sdug bsngal chos bzod kyi rjes su kun 'byung spangs ba'i 'gog pa mngon du byas pas mthong lam mnyam gzhag ye shes skye bar thal/ dam bca' 'thad pa'i phyir/ 'dod mi nus te/ stong nyid mngon sum du rtogs pa'i theg chen gyi mthong lam la skad cig snga phyi med pa'i skad cig ma gcig dang/ so sor rtogs pa'i mngon par rtogs pa skad cig ma gcig bcu drug tu phye ba don med du 'gyur ba'i phyir/ 'grel pa 'di slob dpon rang lugs kyis bzhed par 'dod pa mi 'thad de/ rnam bshad dang mi mthun zhing/ 'grel chen las zhes zer ro/ /zhes ma rangs pa'i tshig gsungs pa'i phyir/ lugs gnyis pa mi 'thad pa'i tshul la/ kha cig stong nyid mngon sum du rtogs pa'i theg chen gyi mthong lam de/ so sor rtogs pa'i mngon par rtogs pa las kyang snga phyi med pa'i skad cig ma kho na yin te/ lta ba dang lta min gyi nyon mongs kun btags spong ba'i phyir du theg chen mthong lam bar chad med lam la snyom par 'jug pa yin pa ni gang zhig /de spong ba la chos nyid mngon sum du rtogs dgos/ theg chen mthong lam bar chad med lam de chos nyid la sgrub 'jug yin pas/ sdug bden gyi chos nyid mngon sum du rtogs pa'i tshe/ bden pa gzhan gsum gyi chos nyid kyang mngon sum du rtogs par 'gyur ba'i phyir/ dper na/ tshur mthong gi rgyud kyi sngon 'dzin dbang po'i mngon sum de sngon po la sgrub 'jug yin pas sngon po mngon sum du rtogs pa'i tshe sngon po'i steng gi byas mi rtag sogs kyang mngon sum du mthong ba lta bu yin pa'i phyir/ theg chen mthong lam bar chad med lam gyis lta ba dang lta min gyi nyon mongs kun btags spong ba de'i tshe na chos nyid mngon sum du rtogs dgos pa yin te/ lta ba dang lta min gyi nyon mongs kun btags rnams/ bden 'dzin kun btags kyi rtsa ba can yin pas/ rtsa ba bden 'dzin kun btags spong ba la chos nyid mngon sum du rtogs dgos pa'i phyir/ de ltar na 'ang/ @26b mthong lam gyi skabs su mi rtag sogs bcu drug sgom par gsungs pa dang mi 'gal te/ mi rtag sogs bcu drug sgom pa'i lam/ stong nyid rtogs pa'i lam gyi yongs sbyong gi lam yin pa'i phyir/ zhes zer ba mi 'thad de/ 'grel chen las/ gzhan dag ni 'jig tshogs la lta ba la sogs ba'i lta ba'i tshogs dang/ 'dod chags la sogs pa'i nyon mongs pa'i tshogs ni dngos po rnams yang dag par khas len pa'i phyin ci log gis kun nas bslangs pa yin la/ grol ba ni dmigs su med pa mthong ba las yin pa'i phyir/ de'i yongs su sbyong bar bya ba nyid kyi sgom pa lhag ma rnams de'i don du yin no/ /zhes ji skad bshad pa'i tshul du chos thams cad dngos po med pa 'am/ bdag med pa 'am/ stong pa zhes sgom par byed pa rnams kyi/ sgom pa yongs su rdzogs pa na/ /don kyi rang gi ngo bo gcig /bdag nyid mngon sum yin pa la/ /tshad ma rnams kyis brtags bya gang/ /ma mthong cha gzhan ci zhig yod/ /ces bya ba'i tshul gyi rnam pa thams cad kyi rang gi ngo bo rtogs par byed pa'i shes pa zag pa med pa chos thams cad kyi yul can skye bar 'gyur ro/ /de bas na so sor rtogs pa las mthong ba'i lam gyi mngon par rtogs pa ni skad cig ma gcig yin no/ /zhes gsungs/ zhes zer na/ 'di yang slob dpon rang lugs kyis bzhed pa ma yin te/ 'di ltar na/ theg chen gyi mthong lam bar chad med lam dang rnam grol lam rim can du mi skye bar cig car du skye ba 'dod pa gang zhig /slob dpon gyis de ltar mi bzhed pa'i phyir/ gang zhig der thal/ 'di la zhugs gnas kyi rnam gzhag mi 'thad pa'i thal ba 'phangs par mdzad pa'i phyir/ 'grel chen las/ de lta na ni skad cig ma gcig kho na la rnam pa thams cad rtogs pa'i phyir/ rnam pa gzhan dag gi mthong ba'i lam la sgom pa gzhan mi 'thad pa'i phyir/ zhugs pa la sogs pa'i gnas skabs su ji ltar 'gyur zhes/ nges par 'byung ba'i lam log pa'i rjes su 'brang ba rnams 'dod do/ /zhes gsungs pa'i phyir/ gzhan yang/ 'grel ba de slob dpon rang lugs kyi 'grel ba ma yin te/ de ltar 'dod pa po de ni thal 'gyur ba'i lugs 'dzin par 'dod kyang/ ji lta ba bzhin mi 'dzin zhing/ rnam 'grel las/ stong nyid lta bas @27a @#/ /grol 'gyur zhing/ /sgom pa lhag ma de don yin/ /zhes pa'i skabs nas dngos su bstan pa'i stong nyid kyi lta ba mthar thug tu 'dod pa zhig yin pa'i phyir/ lugs gsum pa slob dpon rang lugs su sgrub pa la/ theg chen gyi mthong lam bzod pa brgyad dang shes pa brgyad cig car du mi skye bar rim pa can du skye ba yin te/ mthong spangs su gyur pa'i phyin ci log gi nyon mongs pa'i sa bon spangs pa'i spangs pa thob pa la bar chad med lam gyi rnam pa sgom pa las gzhan mthong lam rnam grol lam gyi rnam pa sgom mi dgos pa'i phyir/ 'khrul rgyu 'ga' zhig las mthong spangs su gyur pa'i phyin ci log gi nyon mongs skye ba ni gang zhig /de theg chen gyi mthong lam bar chad med lam tsam gyis spangs pa ma yin pa'i phyir/ 'khrul rgyu 'ga' zhig las mthong spangs su gyur pa'i phyin ci log gi nyon mongs skye ba'i dpe yod de/ kha dog dkar por chos mtshungs pa las nya phyis la dngul 'dzin gyi rtogs pa skye ba lta bu yin pa'i phyir/ des na stong nyid mngon sum du rtogs pa'i theg chen mthong lam la gnas pa'i gang zag de la zhugs gnas kyi ming can gyi rnam gzhag kyang 'thad de/ theg chen mthong lam bar chad med lam la gnas pa'i gang zag la rgyun zhugs zhugs pa'i ming can dang/ rnam grol lam la gnas pa'i gang zag la rgyun zhugs 'bras gnas kyi ming can gyi rnam gzhag 'thad pa'i phyir/ theg chen mthong lam shes bzod skad cig ma bcu drug po rigs pa'i stobs kyi skad cig ma gcig yin te/ bya rdzogs kyi skad cig gcig la mnyam gzhag thun gcig tu skye ba'i skad cig ma yin pa'i phyir/ de ltar na yang so sor rtogs pa'i mngon par rtogs pa skad cig ma bcu drug tu 'chad pa'i rgyu mtshan yod de/ mnyam gzhag de las langs pa'i rjes thob tu mi rtag sogs bcu drug gi steng gi stong nyid la nges shes mi 'dra ba bcu drug 'dren pa'i rgyu mtshan gyis de ltar bzhag pa'i phyir/ theg chen gyi mthong lam sdug bsngal la chos bzod sdug bsngal gyi chos nyid la mngon sum gyi chad mar 'gro ba la/ sgro 'dogs gcig chod pa la bltos dgos te/ de la sgro 'dogs gcig ma chod na @27b de la ched mar mi 'gyur ba'i phyir/ dper na/ tshur mthong gi rgyud kyi sngon 'dzin dbang po'i mngon sum des sngon po'i steng gis byas mi rtag sogs mngon sum du gzung yang de la sgro 'dogs ma chod pa'i de la tshad mar mi 'gyur ba bzhin yin pa'i phyir/ kho na re/ so skyes dang 'phags pa'i chad ma la khyad par med par thal/ 'phags pa'i rgyud kyi tshad ma de yul de la tshad mar 'gyur ba la yul de mngon sum du mthong ba tsam gyis mi chog par sgro 'dogs gcig chod pa la bltos dgos pa'i phyir/ zhe na skyon med de/ 'phags rgyud kyi tshad mas sgro 'dogs kyi sa bon sel nus shing/ 'phags pa la snang la ma nges pa med/ so skye'i tshad ma des sel mi nus shing snang la ma nges pa yod pa'i phyir/ de ltar yang 'grel chen las/ gzugs chos mthun pa mthong ba las/ /nya phyis la dngul rnam pa ltar/ /gal te 'khrul pa'i rgyu mtshan gyis/ /yon tan gzhan sbyor mi byed na/ /de ltar 'gyur ba zhig na gang gi tshe 'khrul pa'i rgyu mtshan 'ga' zhig las sgro btags pa'i rnam pa gzhan dag yod pa'i phyir/ de phyin ci log las byung ba'i nyon mongs pa dang bcas pa drungs nas phyung ba'i phyir/ rnam pa gzhan dag gi sgom pa gzhan yang yod pas brgyad pa la sogs pa'i gnas skabs legs par gnas pa yin no/ /dgongs pa 'di nyid kyi na rigs pa'i stobs kyi mthong ba'i lam gyi mngon par rtogs pa skad cig ma gcig yin kyang/ mngon par rtogs pa skad cig ma bcu drug nyid du bshad pa yin no/ /de bas na rnam par shes pas rang gi ngo bo rnam pa thams cad du gzung ba nyid yin na'ang/ cha gang la goms pa gsal bar gyur pa la sogs pa'i sgro btags pa'i rnam pa nges par sel nus pa de nyid la/ de'i gegs su gyur pa'i sgrib pa sel ba'i de tshad ma yin gyi gzhan du ma yin te/ skad cig ma nyid la sogs pa dang 'dra'o/ /de ltar na 'phags pa rnams so so skye bo rnams las khyad par ci zhig yod ces kyang brjod par mi bya ste/ rnam pa ji tsam zhig gsal bas de dag gi shes pa 'khrul ba'i rgyu mtshan dang bral bar gyur pa de tsam gyi de dag khyad par 'phags pa'i phyir te/ shin tu spros pas chog go/ zhes gsungs pa'i phyir/ 'di nyid slob dpon gyis bzhed pa yin te/ theg chen gyi @28a @#/ /mthong lam bzod pa brgyad kyi ngo bor gyur ba'i bar chad med lam dang/ shes pa brgyad kyi ngo bor gyur pa'i rnam grol lam gnyis rim can du bskyed par sgrub pa'i phyir/ snga ma brgyad la gnas pa'i gang zag zhugs pa dang/ phyi ma brgyad la gnas pa'i gang zag la 'bras gnas kyi tha snyad du gsungs pa dang/ rigs stobs kyi skad cig ma gcig yin kyang so sor rtogs pa'i mngon par rtogs pa skad cig ma bcu drug tu gsungs pa'i phyir/ bzhi pa slob dpon gyi bzhed pa bsdus te bstan pa la/ skad cig ma bcu drug gi grangs 'jog tshul sogs ni/ rang lugs bzhag pa dang 'grel pa gsum pa'i don bshad pa la brten nas go nus shing/ theg chen gyi mthong lam sdug bsngal chos bzod kyis sdug bsngal bden pa'i chos nyid mngon sum du rtogs shing/ kun 'byung gi chos nyid mngon sum du ma rtogs par 'dod pa la snyan bya sgra mi rtag par sgrub pa'i rtags yang dag tu khas len dgos pa sogs ni/ sdug kun gnyis yin khyab mnyam yin pa'i rgyu mtshan gyis/ sdug bsngal bden pa'i chos nyid tshad mas nges na kun 'byung gi chos nyid tshad mas nges dgos pa'i don du sems so/ /theg chen mthong lam bar chad med lam la mnyam par gzhag pa'i tshe na phar phyin re re'i nang du drug drug tshang bar bsdus nas/ nyams su len pa'i nyams len med kyang/ 'di 'dra'i nyams len gyi nus pa khyad par can yod de/ de med na bden 'dzin kun btags kyi sa bon dngos su spong mi nus pa'i phyir/ de bzhin du theg chen mthong lam bar chad med lam pa'i rgyud la kun rdzob sems bskyed kyang med de/ de med par lung rigs gnyis kas grub pa'i phyir/ lung gis grub ste/ skal bzang mig 'byed las/ kun gzhi mi bzhed pa'i dbu ma rang rgyud pa'i lugs la stong nyid mngon sum du rtogs pa'i theg pa chen po'i mthong lam la mnyam par gzhag pa'i tshe na dbang shes ni med/ yid shes thams cad zag med ye shes su song ba'i bden 'dzin lhan skyes kyi bag chags kyis bsgos pa'i shes pa med/ bden 'dzin lhan skyes kyi bag chags bsgo gzhi'i kun gzhi khas ma blangs pa'i de'i rgyud la bden 'dzin lhan skyes kyi bag chags med par gsungs pa'i @28b phyir/ rnam bshad dgongs pa rab gsal las/ ci yang med pa'i dngos gzhi'i sems rten la brten nas nyan thos kyi sgom lam rdo rje lta bu'i ting nge 'dzin la mnyam par gzhag pa'i phyir mi 'ong de srid rtse'i gang zag dang/ ci yang med pa'i gang zag gnyis gang yang ma yin par 'gyur ba'i kun gzhi bzhed pa rnams kyis gang zag gnas 'gyur gyi rigs pa 'phangs pa la thal 'gyur bas lan don mthun thebs shing/ rang rgyud ba man chad kyis lan don mthun mi thebs par gsungs ba sogs dang 'gal ba'i phyir/ 'gal tshul yod de/ khyed rnams kyi lugs la de'i rgyud la srid rtse'i dngos gzhi yang yod pa'i phyir/ rigs pas sgrub tshul la/ de ltar ma yin na theg chen mthong lam bar chad med lam pa'i rgyud kyi kun rdzob sems bskyed de chos can/ khyod blo mngon gyur ba dngos su skyed byed kyi rgyu nus pa mthu chen gcig yod par thal/ khyod blo mngon gyur ba yin pa'i phyir/ der thal/ blo yin pa'i phyir/ rtsa bar khyab ste/ blo'i bag chags yin na rang nyid blo'i bag chags su dngos su skyed byed kyi rgyu nus pa mthu chen yod dgos pa'i phyir/ gzhan yang/ rgyun mtha'i bar chad med lam pa'i rgyud kyi kun rdzob sems bskyed chos can/ 'khrul shes yin par thal/ slob pa'i rgyud kyi kun rdzob sems bskyed yin pa'i phyir/ 'dod na/ de'i rgyud la 'khrul pa'i bag chags yod par thal/ de'i rgyud la 'khrul shes yod pa'i phyir/ 'dod na/ de'i rgyud la shes sgrib yod par thal/ 'dod pa'i phyir/ 'dod na/ skye 'gyur gyis spong ba dang/ 'gag 'gyur gyi tshul gyis spong ba'i grub mtha' gnyis phyogs gcig tu khas len rigs par thal/ theg chen mthong lam bar chad med lam gyis bden 'dzin kun btags kyi sa bon spong ba skye 'gyur gyi tshul gyis spong ba gang zhig /rgyun mtha'i bar chad med lam gyis shes sgrib phra mo 'gag 'gyur gyi tshul gyis spong ba'i phyir/ dang po der thal/ theg chen gyi sbyor lam chos mchog skad cig tha ma'i rgyud la theg chen mthong lam bar chad med lam skye ba la mngon du phyogs pa dang/ bden 'dzin kun btags kyi sa bon 'gag pa la mngon du phyogs pa dus mnyam/ de'i rgyud la bar chad med lam rdzogs par skyes zin pa dang/ bden 'dzin kun btags 'gag @29a @#/ /zin pa dus mnyam pa'i tshul gyis spong ba'i phyir/ phyi ma der thal/ byang sems rgyun mtha' ba'i rgyud la rgyun mtha'i bar chad med lam dang de'i ngos skal gyi shes sgrib phra mo gnyis dus mnyam du 'gag pa'i tshul gyis spong ba'i phyir/ gzhan yang/ bar chad med lam pa'i rgyud la kun rdzob sems bskyed med par 'thad de/ dbu ma thal 'gyur ba dang sngags bla med kyi skabs sogs dang shin tu mthun pa'i phyir/ des na bar chad med lam pa'i rgyud la theg chen sems bskyed dbang ldan gyi tshul gyi yod kyang de'i rgyud la yod go mi chod cing/ lam rim las/ theg chen pa yin min sems de yod med kyi rjes su 'gro ldog byed do/ /zhes gsungs pa dang mi 'gal te/ de theg chen sems bskyed sngar sgom zhing phyis kyang sgom pa'i nus pa ma nyams pa yod med kyi rjes su 'gro ldon byed pa'i don yin pa'i phyir/ rgyas par ni brgal brtags kyi skabs las shes par bya'o/ /lnga pa 'da' bya 'da' byad bcas kyi mthong lam skye tshul bshad pa la/ 'da' bya 'da' byed bcas kyi mthong lam gnyis kyang rim can kho nar skye ba yin te/ dang por 'da' byed kyi mthong lam skye/ de rjes 'da' bya'i mthong lam skye ba'i phyir/ de ltar yin kyang/ theg pa gsum char thob pa'i rgyu/ zhes pa dang/ 'da' bya'i mthong lam skye ba thug med du thal ba'i skyon med de/ dang po'i don ni/ theg pa gsum gyi rtogs rigs tshang bar thob pa'i theg pa chen po'i mthong lam de stong nyid rtogs pa'i theg chen sbyor lam drod sogs bzhi'i nye 'bras su 'gyur ba'i don dang/ phyi ma ni theg chen gyi mthong lam nas sgom lam du 'phos mtshams bshad pa las shes par 'gyur ba'i phyir/ drug pa 'phos mtshams bshad pa la/ theg chen mthong lam nas sgom lam du 'phos mtshams yod de/ bden 'dzin lhan skyes spang ba'i phyir du stong nyid la mnyam par mi 'jog tshun chad mthong lam dang/ de ltar mnyam par gzhag pa nas sgom lam du 'phos pa yin pa'i phyir/ rnam bshad kyi gsung 'di dag la brten nas/ stong nyid don spyi'i tshul gyis rtogs pa'i theg chen gyi mthong lam mnyam gzhag nas stong nyid mngon sum du rtogs pa'i sgom lam mnyam @29b gzhag tu song ba dang/ theg chen mthong lam bar chad med lam dang rnam grol lam las rdzas gzhan pa'i stong nyid mngon sum du rtogs pa'i theg chen gyi mthong lam med par grub snyam du sems so/ /stong nyid rtogs pa'i mthong lam mnyam gzhag nas sgom lam mnyam gzhag tu 'pho ba yang 'thad de/ sa nas ser 'pho ba'i tshe mnyam gzhag nas mnyam gzhag tu 'pho ba'i phyir ro/ / ! theg chen gyi sgom lam bshad pa la/ theg chen gyi sgom lam gyi byed pa bshad pa/ byed pa can gyi theg chen gyi sgom lam bshad pa gnyis/ dang po la/ theg chen gyi sgom lam bshad pa'i dang por theg chen gyi sgom lam gyi byed pa 'chad pa'i rgyu mtshan yod de/ theg chen gyi sgom lam sgom pa po theg chen gyi sgom lam sgom pa la gus par 'gyur pa dang/ ston byed gnyis kyi nang nas theg chen sgom lam gyi byed pa ston pa'i ye ge nyung ba'i phyir/ theg chen sgom lam thob pa'i gang zag gi theg chen sgom lam sgom stobs kyis thob pa'i phan yon/ theg chen sgom lam gyi byed pa'i mtshan nyid/ de la dbye na rnam pa drug yod de/ skyis bu byed pa'i 'bras bu bzhi/ rgyu mthun gyi 'bras bu gcig/ bdag 'bras gcig rnams su gsungs pa'i phyir/ dang po grub ste/ byang sems sgom lam pa'i rang rgyud kyi lam gong 'phel du byed pa'i mthun rkyen gyi rgyu'i dbang du byas pa gnyis/ rang rgyud kyi 'gal rkyen sal ba'i rgyu'i dbang du byas pa gnyis yod pa'i phyir/ dang po grub ste/ rang rgyud kyi lam gong 'phel du byed pa'i nyer len gyi rgyu/ sems zhi zhing dul bar byed pa'i yon tan dang/ de'i lhan cig byed rkyen gyi rgyu nga rgyal bsal te dge ba'i bshes gnyes gong pa thams cad la 'dud pa'i yon tan dang gnyis su yod pa'i phyir/ phyi ma gnyis yod de/ nang gi 'gal rkyen 'dod chags sogs nyon mongs pa dang bral ba'i yon tan/ phyi'i 'gal rkyen pha rol gyi dug tshon sogs kyis mi tshugs pa'i yon tan dang gnyis yod pa'i phyir/ rtsa rtags gnyis pa grub ste; thob bya'i rnam mkhyen de theg chen gyi sgom lam sgom stobs kyis thob pa'i rgyu mthun gyi 'bras bu yin pa'i phyir/ rtsa rtags gsum pa grub ste/ byang sems sgom lam pa gang du bzhugs pa'i sa phyogs de lha dang bcas pa'i 'jig rten thams cad kyi mchod gnas su 'gyur ba'i phyir/ gnyis pa byed @30a @#/ /pa can gyi theg chen gyi sgom lam bshad pa la/ sgom lam gyi rten bshad pa dang/ brten pa sgom lam bshad pa gnyis/ dang po la'ang/ lus rten dang/ sems rten gnyis las/ dang po yod de/ nyan thos kyi sgom lam khams gsum ga'i rten la skye ba dang/ rang rgyal gyi sgom lam 'dod rten la skye ba dang/ theg chen gyi sgom lam 'dod gzugs gnyis ka'i rten la skye ba yod pa'i phyir/ gzugs med kyi rten la theg chen gyi sgom lam skye ba ni mi 'thad de/ byang sems sgom lam pa snying rje dang smon lam gyi dbang gis ji ltar 'dod 'dod du skye nus/ gzugs med khams su gzhan don rgya chen po mi 'gyur ba'i phyir/ sdud pa las/ byang chub yon tan pha rol phyin nyams 'gyur 'ong zhes/ /zhes sogs gsungs pa'i phyir/ gnyis pa sems rten la/ nyan rang gi sgom lam rnams sems rten bsam gtan dang po'i nyir bsdogs mi lcogs med dang/ bsam gtan gyi dngos gzhi ci rigs pa la brten nas skye zhing/ nyan rang thabs la mi mkhas pas 'dod sems dang srid rtse'i sems rtan la brten nas sgom lam gsar du mi skye yang/ byang sems thabs la mkhas pas de gnyis dang bsam gzugs brgyad ka'i dngos gzhi la brten nas skye ba yin te/ 'grel chen las/ 'dod pa khams dang/ gzugs kyi khams dang gzugs med pa'i khams su zhes smos pas ni/ 'dod pa'i khams la sogs pa'i sa dgu pa'i sgom pa'i lam bzung par bya'o/ /gang yang 'dod pa khams dang srid rtse na/ /byang chub lam gyi yan lag spangs/ /zhes brjod pa ni thabs la mi mkhas pa'i nyan thos kyi dbang du byas pa yin gyi/ de dang 'di la 'gal ba med ces bya ba ni kha cig gi'o zhes gsungs pa'i phyir/ gnyis pa brten pa sgom lam bshad pa la/ mtshan nyid/ dbye ba/ phye ba so so'i don bshad pa dang gsum/ dang po la/ stong nyid mngon sum du rtogs zin bsgom pa lhur len gyi tshul gis bsgoms pa'i nyams len gyis zin pa'i theg chen gyi rjes la mngon rtogs/ theg chen gyi sgom lam gyi mtshan nyid/ de la dbye na/ theg chen gyi zag bcas sgom lam dang/ zag med sgom lam @30b gnyis yod/ phye ba so so'i don bshad pa la/ de la gnyis su 'byed pa'i rgyu mtshan yod de/ gzugs sku'i lag rjes 'jog byed kyi dbang du byas na zag bcas sgom lam dang/ chos sku'i lag rjes 'jog byed kyi dbang du byas na zag med sgom lam bzhag pa'i phyir/ zag bcas zag med kyi don gang yin zhe na/ de la 'jog mtshams mi 'dra ba du ma yod de/ mngon pa gong ma'i skabs su zag pa sgo drug gang rung dang 'brel ba'i cha nas zag bcas dang/ de med pa la zag med du bzhag pa dang/ mngon pa 'og ma'i skabs su/ ngo bo dang mtshungs ldan ci rigs pa'i sgo nas zag pa rgyas rung la zag bcas dang/ de med pa la zag med du byed pa dang/ dbu ma pa'i skabs su yang nyon mongs la zag par byas nas/ de spangs ma spangs la zag pa dang bcas bral du byed pa dang/ skabs 'ga' zhig tu spang bya la zag bcas dang/ gnyen po la zag med du byed pa dang/ 'ga' zhig tu sgra don 'dres rung du 'dzin pa'i zhen rig dang bcas bral la zag bcas zag med du byed pa dang/ 'ga' zhig tu nyon mongs spang bya'i gtso bor byas nas mi spong ba la zag bcas/ spang bya'i gtso bor byas nas spong ba la zag med du byas pa dang/ 'ga' zhig tu bden grub la zag bcas dang/ de med pa la zag med du byas pa du ma yod pa'i nang nas 'dir ni sgra don 'dres rung du 'dzin pa'i zhen rig dang bcas pa la zag bcas dang/ de dang bral ba la zag med du byed pa yin te/ tshig gsal las/ zag pa dang bcas pa dang zag pa med pa'i bye brag ni rnam par rtog pa dang bcas pa dang de dang bral ba ni gtso bor gyur ba'o/ /'dir bsdus pa'i don ni mos pa dang bsngo pa dang rjes su yi rang ba yid la byed pa dag ni/ dag pa 'jig rten pa'i skabs rjes kyi ye shes lam gyi sbyor ba yin la/ mngon par sgrub pa na mnyam par gzhag pa'i ye shes so/ /zhes gsungs pa'i phyir/ de ltar byas na/ sgra don 'dres rung du 'dzin pa'i zhen rig dang bcas pa'i theg chen gyi rjes la mngon rtogs/ theg chen gyi zag bcas sgom lam gyi mtshan nyid/ de la dbye na/ mos bsngo rjes su yid rang gi sgom lam gsum yod/ 'di gsum ni bsod nams la dbang ba'i skyes bu zhig gis rin po che'i 'byung khungs dag nas gser gyi @31a @#/ /gar bu rnyed/ de nyid gser mgar ? gyi rgyan du bsgyur/ bsgyur ba de nyid rgyan du byas nas rang gzhan la dga' ba skyes pa'i gong 'phel du 'gyur ba bzhin du/ byang sems sgom lam pas gzhung lam 'bras bu'i sher phyin gsum la mos pas bsod nams kyi tshogs sngar med gsar du bsog pa de nyid bsngo bas rdzogs byang du sgyur bar byed/ de nyid rjes su yi rang gis gong nas gong du 'phel bar byed pa'i phyir/ de yang theg pa chen po'i lam lnga ga'i rjes thob tu bsod nams kyi tshogs bsog rnams 'di gsum gyis bsdus pa yin/ lam shes la thabs shes khyad par can gyi cha gnyis yod pas thabs khyad par can bsog tshul gyi sgo nas mos bsngo rjes su yid rang gsum dang/ lag rjes kyi sgo nas rdzogs smin sbyang gsum du 'jog pa'i phyir/ 'o na lam dang po gsum gyi skabs su bsal nas mi 'jog pa'i rgyu mtshan ci yin zhe na/ 'dir bzhag pa la dang po gsum gyi skabs su yang go nus pa dang/ mthong lam rjes thob yun thung/ sgom lam rjes thob de las log pas gsal bar ma smos pa'i phyir/ mthong lam rjes thob rgyun thung ba'i rgyu mtshan yod de/ mthong lam rjes thob nas sgom spangs spong phyir du stong nyid la mngon sum du mnyam par gzhag pa nas sgom lam du 'pho ba'i phyir/ 'o na gsum po de'i khyad par ci lta bu zhe na/ de la mos pa sgom lam bshad pa sogs gsum/ dang po la dngos dang/ phan yon bshad pa gnyis/ dang po la mos yul/ ngo bo// dbye ba/ sa mtshams dang bzhi las/ dang po la/ spyir lung rigs rnam dag gis gtan la phab pa'i don rnams yul yin zhing/ 'dir mos yul gyis gtso bo ni/ gzhung lam 'bras bu sher phyin gsum yin te/ shes rab pha rol phyin pa la/ /mos pa'i gnas skabs rnam ? la ni/ /zhes sogs gsungs pa'i phyir/ gnyis pa ngo bo la kha cig /mos pa sgom lam la gzhung lam 'bras bu sher phyin gsum la yid ches pa'i dad 'dun gang rung gis khyab ste/ tshig gsal las/ 'di'i ngo bo nyid kyis nges par byas pa'i dngos po nges par 'dzin pa'o zhes gsungs pa'i phyir/ zer na/ mi 'thad de/ mos pa dang mtshungs ldan gyi gtso sems su gyur pa'i @31b mos pa sgom lam du ma yod pa'i phyir/ der thal/ dran pa nyer gzhag la dran pa shes rab mtshungs ldan gyi gtso sems du ma yod pa lta bu yin pa'i phyir/ des bsngo ba sgom lam dang rjes su yi rang gi sgom lam la yang mtshen zhing/ sngar gyi lung dang mi 'gal te/ de grogs la dgongs pa'i phyir/ / kha cig / mos pa sgom lam gsum yin khyab mnyam du gzhed pa mi 'thad de/ rnam bshad las gsum po de ma dag sa bdun dang dag pa sa brgyad pa dang sa dgu pa gnyis dang/ sa bcu pa la gtso che chung du bzhag par gsungs pa dang 'gal ba'i phyir/ yang kha cig / mos pa sgom lam chen po'i chen po la/ theg chen gyi sgom lam chen po'i chen pos khyab par bzhed pa sogs ni mi 'thad de/ sa dang po'i ngo bor gyur pa'i rang don mos pa sgom lam chen po'i chen po de sgom lam chen po'i chen po ma yin pa'i phyir/ de sgom lam chung ngu'i chung ngu yin pa'i phyir/ sa dang po'i sgom lam yin pa'i phyir/ kha cig / bsam pas gzhan don la dmigs kyang sbyar bas rang don gtso bor sgrub pa'i mos pa sgom lam/ rang don mos pa sgom lam gyi mtshan nyid/ bsam pas gzhan don la dmigs kyang sbyor bas rang gzhan gnyis ka'i don gtso bor sgrub pa'i mos pa sgom lam/ gnyis don mos pa sgom lam gyi mtshan nyid/ bsam pas gzhan don la dmigs par ma zad sbyor bas kyang gzhan don gtso bor 'jug pa'i mos pa sgom lam/ gzhan don mos pa sgom lam gyi mtshan nyid/ de yang dang po ma dag sa bdun gyi sgom lam kho nar 'jog ste/ der nyon yid ma spangs pas nga rgyal mngon gyur du 'jug pa'i phyir/ gnyis pa sa brgyad pa dgu pa gnyis kho nar 'jog ste/ der bdag gzhan mnyam pa nyid du rtogs pa'i phyir/ gsum pa sa bcu pa kho nar 'jog ste/ der rjes thob kyi gnas skabs su gzhan don byed pa'i sgo sangs rgyas dang mnyam pa thob pa'i phyir/ 'grel chen las/ bdag tu nga rgyal ba'i sa bon ma spangs pas dang por rang gi don gyi mos pa rnam pa dgu bstan te/ zhes pa dang/ rang dang gzhan mnyam pa nyid kyis rang dang gzhan gyi mos pa zhes dang/ 'di ni gzhan gyi don lhur len pa yin no/ /zhes gsungs pa'i phyir/ zer na/ mi 'thad de/ mos pa sgom lam gsum ga la @32a @#/ /don gsum ga'i byed las yod pa'i phyir dang/ skabs 'dir nyon yid sogs khas mi len zhing/ 'grel chen gyi don yang sa de dag tu gtso che chung la dgongs pa'i phyir/ gtso che chung 'byung ba'i rgyu mtshan yod de/ bdag 'dzin mngon gyur du 'jug pa'i tshe rang don gyi bya ba la 'jug pa sogs gtso che chung yod pa'i phyir dang/ gsum po de la yang dman mchog gi khyad par yod pa'i phyir/ bsod nams kyi tshogs khyad par can bsog pa rang don gzhan don gnyis kyi nang nas gzhan don gtso bor yin pa'i phyir/ rang lugs la/ yum don gsum po gang rung gi 'byung gnas su yid ches pa'i rang gi grogs dang 'dun gang rung dang mtshungs ldan gyi sgra don 'dres rung du 'dzin pa'i zhen rig dang bcas pa'i theg chen gyi rjes la mngon rtogs/ mos pa sgom lam gyi mtshan nyid/ gsum pa la/ de la dbye na/ rang don mos pa sgom lam/ gnyis don mos pa sgom lam/ gzhan don mos pa sgom lam dang gsum/ yum don gsum po gang rung gi 'byung gnas su yid ches pa'i dad pa sgom pa'i rang don gyi bya ba la 'jug pa'i byed las can gyi mos pa sgom lam/ dang po'i mtshan nyid/ yum gsum po rang gzhan gnyis ka'i don gyi 'byung gnas su yid ches pa'i dad pa sgom pa la brten nas rang gzhan gnyis ka'i don gyi bya ba la 'jug pa'i byed las kyi mos pa sgom lam/ gnyis pa'i mtshan nyid/ yum don gsum po gang rung gi 'byung gnas su yid ches pa'i yid ches kyi dad pa sgom pa la brten nas gzhan don gyi bya ba la 'jug pa'i byed las can gyi mos pa sgom lam/ gsum pa'i mtshan nyid yin te/ nyi snang las/ rang gi don gyi mos pa ni gang gi rang gi don nyid sgrub par byed cing gzhan gyi don yang ched du bya ba'i rang bzhin gyi byed pa'o/ /gnyis ka'i don gyi mos pa ni gang gis rang bzhin gnyis ka'i don nyid sgrub par byed pa'o/ /gzhan gyi don gyi mos pa ni gang gis gzhan kho na'i don du 'gyur ba ste/ zhes gsungs pa'i phyir/ bzhi pa sa mtshams dag ma dag gi theg chen gyi sgom lam gnyis ka'i gnas skabs su yod cing gtso che chung gong du bshad pa ltar ro/ /gnyis pa zhar byung la/ mos pa sgom lam @32b sgom pa'i byang sems sgom lam pa la sangs rgyas byang sems gang rung thugs dgyes pa'i cha dang dngos gnas kyi yon tan brjod pa'i cha gang rung du dmigs pa/ 'dir dngos su bstan pa'i bstod pa skur bsngags gsum gang rung gi mtshan nyid/ de la dbye na der gyur pa'i snga ma snga ma las phyi ma phyi ma mchog tu gyur pa'i bstod pa dgu /bskur ba dgu /bsdags pa dgu dang bcas pa'i nyi shu rtsa bdun yod do/ / ! yongs su bsngo ba khyad par can/ /zhes sogs kyi skabs su/ dngos dang/ zhar la bsngo ba'i rnam gzhag bshad pa gnyis/ dngos la/ rang gzhan gyi dge rtsa rdzogs byang du sgyur bar byed pa'i theg chen gyi zag bcas sgom lam/ 'dir dngos bstan gyi bsngo ba sgom lam gyi mtshan nyid/ de la dbye na rnam pa bcu gnyis yod/ bcu gnyis po gzhung las bstan tshul yod de/ /yongs su bsngo ba khyad par can/ /de yi byed pa mchog yin no/ /zhes pa'i byed las khyad par can bshad pa'i sgo nas nyan rang gi bsngo ba las khyad par du 'phags pa'i bsngo ba sgom lam bstan/ rkang pa gsum pas bsngo ba'i rdzas la bden zhen bkag pa'i de bstan/ rkang pa bzhi pas sngo byed kyi sems bden zhen bkag pa'i de bstan/ dben dang zhes pas bsngo ba po la bden zhen bkag pa'i de bstan/ sangs rgyas bsod nams tshogs/ /rang bzhin dran pa'i spyod yul can/ /zhes pas/ rang gzhan gyi dge rtsa la bzang ngan du bden zhen bkag pa'i de bstan/ thabs bcas/ zhes pas phyin drug gi dge rtsa la bzang ngan du bden zhen bkag pa de bstan/ mtshan ma med/ ces pas bsngo ba thams cad la bden zhen bkag pa'i de bstan/ sangs rgyas rjas su yi rang dang/ /zhes pas tha snyad du rten 'brel sgyu ma lta bur rtogs pa'i de bstan/ khams gsum gtogs pa ma yin dang/ /zhes pas 'khor ba'i rgyur mi bsngo zhing/ sangs rgyas kyi rgyur bsngo ba de bstan/ bsngo ba gzhan ni rnam pa gsum/ /zhes pas tha snyad du nges pa'i dbye ba bstan pa'i phyir/ bsngo ba sgom lam bcu gnyis po yin khyab mnyam yin min yang dpyad do/ /gnyis pa zhar la bsngo ba'i rnam gzhag @33a @#/ /bshad pa la/ bsngo ba'i rdzas/ bsngo ba'i sa/ ched du bya ba/ grogs/ ngo bo// dgos pa/ bsngo ba dang smon lam gyi khyad par bshad pa dang bdun/ dang po ni/ rang gzhan gyi dus gsum du bsags pa'i dge rtsa rnams bsngo ba'i rdzas yin te/ rdo rje rgyal mtshan gyi bsngo ba'i le'u las/ 'gro kun dge rtsa ji snyed yod pa dang/ /byas dang byed 'gyur de ni byed pa dang/ /bzang po ji bzhin de 'dra'i sa dag la/ /kun nas kun kyang bzang po der gyur cig / ces gsungs pa'i phyir/ gang du bsngo ba'i sa yang rdzogs byang du bsngo dgos pa yin te/ byang chen gyi dge ba'i rtsa ba de dag kyang bla na med pa'i byang chub tu bsngo ba yin gyi nyan thos dang rang sangs rgyas kyi sar bsngor mi 'jug go /zhes gsungs pa'i phyir/ gsum pa yin te/ sems can thams cad kyi sangs rgyas thob phyir du bsngo bar byed dgos pa'i phyir/ de yang sems can thams cad dang thun mong du byas te/ zhes gsungs pa'i phyir dang/ nyan thos dang rang sangs rgyas kyi sar bsngor mi 'jug ces gsungs pa'i phyir/ bzhi pa grogs stong nyid rtogs pa'i shes rab kyis zin pa'i sgo nas bsngo dgos te/ bsngo ba'i 'khor gsum bden par 'dzin pa'i bden 'dzin gyis bcings na dug can du 'gyur pa'i phyir/ mi dmigs pa'i tshul gyi zhes gsungs pa'i phyir/ lnga pa ngo bo yod de/ yul khyad par can du sgyur bar byed pa'i 'dun pa khyad par can gcig la byed pa'i phyir/ drug pa dgos pa yod de/ 'bras bu phyung pa'i mi zad pa'i ched du yin pa'i phyir/ ji ltar chu thigs rgya mtsho che nang lhung/ /zhes gsungs pa'i phyir/ khong khro sogs kyis 'joms mi nus pa lung don ma yin te/ byang sems bdag nyid chen po'i dge rtsa yang khong khro sogs kyis 'joms par gsungs pa'i phyir/ bdun pa bsngo smon gyi khyad par yod de/ bsngo rgyu'i rdzas dang bcas pa'i sgo nas yul khyad par can la re bltos 'cha' ba'i sems pa bsngo ba dang/ bsngo rgyu'i rdzas yod med gang yin kyang yul khyad par can la rang stobs kyi re bltos 'cha' ba'i sems pa smon lam yin pas mi @33b 'gal zhing/ rgya che chung gi khyad par tsam yin pa'i phyir/ thabs dang mi dmigs pa dag gis/ /zhes pa'i skabs su/ rjes su yi rang gis gong 'phel du byed tshul la/ kha cig / gzhan rgyud kyi dge rtsa la dga' ba sgom pas dge rtsa che chung mnyam pa thob pa yin zer na/ mi 'thad de/ sems can gyis sangs 'phags kyi dge rtsa la dga' ba sgom pas sangs 'phags kyi dge rtsa dang mnyam pa thob mi nus pa'i phyir/ sangs 'phags kyi dge rtsa dang che chung mnyam pa thob pa'i sems can mi srid pa'i phyir/ sangs 'phags kyi dge rtsa de mnyam pa med pa'i dge rtsa yin pa'i phyir/ yang kha cig / dge rtsa che chung mnyam pa thob pa la yul rten gnyis rgyud tshod mnyam pa dgos pa yin zer na/ byang sems sa gnyis pa bas dge rtsa bsags ma bsags la khyad par med par thal/ des rang rgyud kyi dge rtsa la dga' ba sgom pa ni yod pa'i phyir/ 'dod mi nus so/ /rang lugs la/ rang dang gzhan gyi bsod nams bya ba mnyam pa nyid thob ces gsungs pa'i don yod de/ gzhan gyis byas pa'i dge rtsa la phrag dog med par dga' ba sgom na dge rtsa thob pa mnyam pa'i don yin pa'i phyir/ de yang yul rten gnyis kyi rgyud tshod mtho dman gyi dge rtsa che chung gi khyad par dang/ sangs rgyas byang sems gzhan gyis so skye'i dge rtsa rdzogs byang du bsngos pa dang/ dga' ba sgom pas 'phel btags pa'i dge rtsa 'gyur mi 'gyur sogs la dpyad par bya'o/ /de ltar na rang gzhan gyi dge rtsa la dga' ba sgom pa'i rang gi grogs yid bde dang mtshungs ldan dang bcas pa'i theg chen gyi rjes la mngon rtogs/ 'dir dngos bstan gyi rjes su yi rang gi sgom lam gyi mtshan nyid/ de la dbye na grogs thabs shes gnyis kyi dbye bas gnyis su yod do/ /gnyis pa zag med sgom lam la/ go rim/ ngo bo// dbye ba/ phye ba so so'i don dang bzhi las/ dang po ni/ kha cig gi gsung na re/ zag bcas zag med kyi sgom lam gnyis kyi dbye ba 'di dman mchog gi gong rim yin par gsungs/ rang lugs ni/ tshogs gnyis kyi go rim yin te/ sgom lam gyi ngo bor gyur pa'i ye shes kyi tshogs khyad @34a @#/ /par can du 'gyur ba la bsod nams kyi tshogs kyis zin dgos pa'i phyir/ gnyis pa la/ sgra don 'dres rung du 'dzin pa'i zhen rig dang bral ba'i theg chen gyi rjes la mngon rtogs/ theg chen gyi zag med sgom lam gyi mtshan nyid/ gsum po de la dbye na/ sgrub pa sgom lam dang rnam dag sgom lam gnyis/ phye ba so so'i don la kha cig / de gnyis kyi khyad par kun rdzob sgyu ma lta bu mngon sum du rtogs pa'i cha nas sgrub pa sgom lam/ don dam nam mkha' lta bu mngon sum du rtogs pa'i cha nas rnam dag sgom lam 'jog pa yin te/ 'grel chen las/ yon tan mngon par sgrub pa'i lam dang/ phyi ma la rnam par dag pa'i lam/ zhes gsungs pa'i phyir/ zer na/ de mi 'thad de/ mdo las/ de mi dmigs pa'i tshul gyis dge ba bsngo bar gsungs pa'i mi dmigs par rtogs pa'i yul ngos 'dzin pa na sgrub pa sgom lam gsungs pa dang/ 'dir yang de yi ngo bo nyid mchog nyid/ ces pas stong nyid rtogs pa'i lam bstan pa'i phyir/ kha cig / 'di nyid gang rung la mnyam gzhag ye shes kyis khyab ste/ slob pa'i rgyud kyi rjes thob ye shes yin na rtog pa yin dgos pa'i phyir/ zer na/ ches mi 'thad de/ rtog bral gyi rjes thob ye shes yod cing/ sgrub pa sgom lam du gyur pa'i rjes thob ye shes yod pa'i phyir/ theg chen sgo 'byed las/ sgrub pa sgom lam rjes thob kyi gnas skabs su 'byung ba yin kyang myu gu bden stong sgyu ma lta bur mngon sum du rtogs pa'i blo sgra don 'dres rung du 'dzin pa'i rtog bral lo/ /zhes gsungs pa'i kha cig / 'di gnyis la stong nyid rtogs pa'i blos khyab par 'dod pa mi rigs te/ sgrub pa sgom lam rtogs pa'i mthar thug gi lag rjes 'jog byed gang zhig / de la kun rdzob dngos yul du byed pa'i ye shes du ma yod pa'i phyir/ rtogs pa chen po'i lag rjes 'jig byed kun rdzob dngos yul du byed pa yod cing/ /gong gi lam bsgrigs kyis kyang grub pa'i phyir/ sbyor ba phyi ma gnyis rtogs pa mthar thug gi lag rjes 'jog byed @34b dang/ de gnyis la kun rdzob dngos yul du byed pa'i lam du ma yod pas grub bo/ /kha cig / de gnyis kyi khyad par bar chad med lam dang rnam grol lam gyi sgo nas 'jog pa yin zer na mi rigs te/ rnam dag sgom lam gyi ngo bo'i khyad par 'chad pa na/ sa dgu la ni chen po yi/ / gnyen po chung ngu'i chung ngu la/ /zhes bar chad med lam dgu gsungs pa'i phyir/ rang lugs ni/ de gnyis yin khyab mnyam dang/ de yang rtogs pa mthar thug gi lag rjes 'jog pa'i cha nas sgrub pa sgom lam dang/ spangs pa mthar thug gi lag rjes 'jogs pa'i cha nas rnam dag sgom lam du 'jog pa'i phyir/ de ltar byas na/ gtso bor rtogs pa mthar thug gi lag rjes 'jog byed kyi theg chen gyi zag med sgom lam/ sgrub pa sgom lam gyi mtshan nyid/ gtso bor spangs pa mthar thug gi lag rjes 'jog byed kyi theg chen gyi zag med sgom lam/ rnam dag sgom lam gyi mtshan nyid/ de mdo bstan bcos rnams kyis sgrub pa sgom lam khyad chos lnga ldan du 'chad/ gzhung dang pos ngo bo'i khyad par/ gnyis pas mchog nyid du byed pa'i khyad par bstan/ gsum pas byed las kyi khyad par bstan/ bzhi pas gnas kyi khyad par bstan/ lnga pas mthar thug gi khyad par bstan pa'i phyir/ rnam dag sgom lam ston pa'i gzhung rnams kyis kyang rnam dang sgom lam khyad chos lnga ldan du 'chad/ sangs rgyas bsten dang/ zhes sogs nas/ sdig pa'i grogs pos yongs zin pa'o/ /zhes pa'i bar gyis de skye ba dang mi skye ba'i khyad par bstan/ 'bras bu dag pa gzugs la sogs/ zhes pa nas/ dpyad du med pas dag par brjod/ /ces pa'i bar gyis khyad par bstan/ /nyon mongs shes bya lam gsum gyi/ /zhes pa nas/ sangs rgyas rnams kun shin tu ba/ / zhes pa'i bar gyis 'bras bu'i khyad par bstan/ sa dgu la ni chen po yi/ /zhes pa nas/ sogs pa'i lam ni dag pa yin/ /zhes pa'i bar gyis ngo bo'i khyad par bstan/ de la klan ka spangs pa yi/ /zhes sogs kyis gnyen pos spang bya spong tshul la rtsod pa spong ba'i sgo @35a @#/ /nas gzhal bya'i khyad par bstan pa yin pa'i phyir/ yul gyi khyad par gyi skabs su/ kha cig / sa gnyis pa'i rnam grol lam chos can/ khyod bden grub kyis rnam par dag pa na khyod kyi dmigs yul gzugs sogs kyi chos rnams bden grub kyis rnam par dag pa yin te/ khyod bden grub kyis rnam par dag pa'i rnam dag de dang/ /khyod kyi dmigs yul gzugs sogs bden grub kyis rnam par dag ? pa'i rnam dag gnyis dag bya gcig gis dben pa'i dag pa rigs gcig yin pa'i phyir zer na mi 'thad de/ dngos bstan stong nyid kyi rim pa dang sbas don mngon rtogs kyi rim pa gnyis kyi nang nas skabs 'dir gang gtan la 'bebs pa'i skabs ma phye ba'i skyon du 'gyur ba'i phyir kha cig / de chos can/ khyod rang gi ngos skal gyi dri mas rnam par dag pa na khyod kyi dmigs yul gzugs sogs kyang khyod kyi ngos skal gyi dri mas rnam par dag pa yin te/ zhes sogs 'god pa yin zer zhing/ rnam grol lam yin na rang gi ngos skal gyi dri ma med pas khyab zer na/ 'o na/ nyon mongs shes bya lam gsum gyi/ /zhes sogs kyi skabs nas bstan pa'i rnam dag de'i dgag bya'i dri ma yang shes bya la med par thal/ dam bca' 'thad pa gang zhig / 'dir rnam dag sgom lam gyi dmigs yul dri mas dag tshul gtso bor 'chad pa'i phyir/ 'dod mi nus te/ de'i skabs nas dngos su bstan pa'i rnam dag rnams 'gog bden mtshan nyid pa yin pa'i phyir/ yang kha cig / sa gnyis pa'i sgom lam bar chad med lam chos can du bzung nas sngar ltar 'god zer na/ mi rigs te/ 'di'i skabs kyi 'bras du zhes pa mtshon bya don gyi dge sbyong tshul gyi 'bras bu dang/ de dag dge sbyong gi tshul gnyis kyi nang nas dge sbyong tshul gyi 'dras bu yin pas sher phyin dang gnyis po don gcig tu byed na mi rigs pa'i phyir/ rang lugs la/ sa gnyis pa'i rnam grol lam chos can/ khyed rang 'dren byed kyi bar @35b chad med lam gyi ngos skal gyi dri mas rnam par dag pa na khyod kyi dmigs yul gzugs sogs kyang khyod 'dren byed kyi bar chad med lam gyi ngos skal gyi dri mas rnam par dag pa yin te/ de gnyis dag bya gcig gis dben pa'i dag pa rigs gcig yin pa'i phyir/ zhes 'dod do/ /de la kha cig / 'o na rnam mkhyen skad cig dang po rgyun mtha'i bar chad med lam gyi ngos skal gyi dri mas rnam par dag pa na de'i dmigs yul gzugs sogs kyi chos rnams rgyun mtha'i bar chad med lam gyi ngos skal gyi dri mas rnam par dag par thal/ sa gnyis pa'i rnam grol lam rang 'dren byed kyi bar chad med lam gyi ngos skal gyi dri mas rnam par dag pa na de'i dmigs yul gzugs sogs kyi chos rnam de 'dren byed kyi bar chad med lam gyi ngos skal gyi dri mas rnam par dag pa'i phyir/ 'dod na/ rnam mkhyen skad cig dang po rgyun mtha'i bar chad med lam gyi ngos skal gyi dri mas rnam par dag pa na sgom spangs shes sgrib chung ngu'i chung ngu kho rang gis kho rang dag par thal/ 'dod pa de'i phyir ro/ /'dod na/ sgom spangs chung ngu'i chung ngu kho rang gis kho rang dag par thal/ rnam mkhyen skad cig dang po des dag pa ba ? de kho rang gis dag pa gang zhig / rnam mkhyen skad cig dang po des dag pa'i phyir zer na ma khyab ste/ de'i don rnam mkhyen skad cig dang po thob pa'i tshe dmis yul gzugs sogs kyi chos gang la dmigs kyang rgyun mtha'i bar chad med lam gyi spangs tshod kyi gnas ngan len gyi dri ma phra mo rgyun mtha'i bar chad med lam gyi lag rjes bzhag stobs kyi de'i rgyud la slar mi skye ba'i chos can du song ba'i don yin pas gong gi des shes 'dod ma rtogs pa'i phyir/ 'bras bu'i khyad par gyi skabs su/ rang nyid 'thob byed kyi nyan thos mthong lam bar chad med lam gyi ngos skal gyi nyom sgrib kun btags spangs pa' i ? nyan thos kyi so sor bltags 'gog nyan thos kyi rnam dag yi mtshan nyid du 'jug pa nas gzhan gnyis la yang sbyar zhing/ gnas ngan len gyi dri ma phra zhing phra ba spangs pa'i spangs pa mthar thug / rnam dag shin tu ba'i mtshan @36a @#/ /nyid/ byang sems kyi rnam dag la lam gsum gyi dri ma spangs par bshad pa ni dman lam sngon ma song gi theg chen mthong lam bar chad med lam gyis nyon sgrib kun btags dang shes sgrib kun btags phra rags gsum ga'i sa bon spangs pa/ de bzhin du sgom lam bar chad med lam rnams kyis rang gi ngos skal gyi dri ma lhan skyes gsum spangs pa'i don/ gtso bor byang sems rnams kyi rnam dag 'chad pa'i skabs su nyan rang gi rnam dag bshad pa la ma 'brel ba'i skyon med de/ rigs can gsum gyi rnam par dag byed kyi lam gyi nus pa che chung gi khyad par shes pa'i ched du yin pa'i phyir/ rnam dag shin tu ba dang mtha' 'das kyi rnam dag don gcig cing/ de la mtha' 'das kyi rnam dag ces 'chad pa'i rgyu mtshan yod de/ shes sgrib ma lus par spangs pas dngos po'i mtha' las 'das pa dang/ 'gyur med kyi chos sku brnyes pas dus kyi mtha' las 'das pa'i rgyu mtshan gyis de ltar bshad pa'i phyir/ rnam dag rnams kyi nang nas sangs rgyas kyi rnam dag shin tu bar 'jog pa'i rgyu mtshan yod de/ theg chen gyi sgom lam bar chad med lam dgu rims kyi skyes stobs kyis bden 'dzin lhan skyes che 'bring chung ngu dgu rims kyi spangs pa la brten nas thob pas de ltar bshad pa'i phyir/ bzhi pa ngo bo'i khyad par la/ sa bcu po re la thog mtha' gnyis gnyis dang/ de gnyis kyi bar du yang skye bas rigs bsdus nas dgu'i drangs nges byed kyi lam gyi nus pa che chung gi dbang gi mtha' gcig tu ma nges so/ /de ltar byas na bar chad med lam dang rnam grol lam yang mi 'gal te/ sa brgyad pa thob ma thag pa'i bar chad med lam de rang gi ngos skal gyi bden 'dzin chung ngu'i chen po'i dngos gnyen bar chad med lam dang/ sa bdun pa'i skad cig tha ma'i ngos skal gyi bden 'dzin las dngos su grol ba'i rnam grol lam yin pa'i phyir/ lnga pa gzhal bya'i khyad par la/ klan ka spang ba dang/ grub don bshad pa dang gnyis las/ dang po la nyi snang gi lugs dang/ don @36b gsal gyi lugs gnyis/ dang po la klan ka dang/ lan gnyis las/ dang po dngos smra ba rnams na re/ ma dag gzhan dbang bden par grub par thal/ spang bya bden 'dzin lhan skyes dgu grub pa'i phyir/ dag pa'i gzhan dbang bden par grub par thal/ gnyen po theg chen gyi bar chad med lam dgu grub pa'i phyir/ zhes pa gnyis ni kun rdzob sgo can gyi klan ka yin zhing/ de gnyis la dbu ma pa'i kun rdzob khas blangs nas khyab med kyi lan 'debs/ bsod nams dang ye shes kyi tshogs la 'bad pa don med par thal/ spangs gnyen bden par med pa'i phyir/ thob pa dang mngon par rtogs pa med par thal/ spangs gnyen bden par med pa'i phyir/ zhes pa gnyis ni don dam sgo can gyi klan ka yin zhing/ de gnyis la dbu ma pa'i don dam khas blangs nas kun rdzob la bltos te khyab med kyi lan dang/ don dam la bltos te 'dod lan 'debs so/ /gnyis pa don gsal gyi lugs la/ klan ka dang/ lan gnyis las/ dang po ni gnyen po theg chen gyi sgom lam bar chad med lam dgu chung rims nas skye/ spang bya bden 'dzin lhan skyes dgu che rims nas 'gag pa'i spang gnyen skye 'gag gi rim pa de mi 'thad par thal/ bar chad med lam chung ngus bden 'dzin lhan skyes chen po spong mi nus/ chung ngu spong ba la gnyen po bar chad med lam chen po mi dgos pa'i phyir/ dper na/ dgra stobs ldan 'dul ba la gshed ma stobs ldan dgos/ dgra stobs chung ba la gshed ma stobs che ba mi dgos pa lta bu yin pa'i phyir/ zer na gnyis pa lan la/ spang gnyen skye 'gag gi rim pa sngar bshad pa de dag 'thad par thal/ dri ma phra rags gnyis kyi nang nas rags pa sbyang sla ba dang/ phra mo sbyang dka' ba'i phyir/ dper na; gos la chags pa'i dri ma rags pa sbyang ba la btso lag mkhan ched du gtad nas 'bad mi dgos/ phra mo sbyang ba la btso lag mkhan ched du gtad nas 'bad dgos pa lta bu yin pa'i phyir/ gnyis pa grub don la/ des na yul yul can bden stong mnyam pa nyid de theg @37a @#/ /chen gyi sgom lam bar chad med lam dgu'i ngo bor gyur pa'i rnam dag sgom lam gyi gzhal byar grub pa'i phyir/ de la dngos smra ba rnams kyis klan ka mi 'jug cing lan don mthun thebs pa'i phyir ro// //shes rab kyi pha rol tu phyin pa'i man ngag gi bstan bcos mngon par rtogs pa'i rgyan rtsa 'grel gyi spyi don rnam bshad snying po rgyan gyi snang ba zhes bya ba dge slong dge 'dun bstan pa dar rgyas kyis sbyor ba'i skabs gnyis pa'i 'grel bshad rdzogs so// //