@#/ /bstan bcos mngon par rtogs pa'i rgyan rtsa 'grel gyi spyi don rnam bshad snying po rgyan gyi snang ba zhes bya ba las skabs bzhi pa zhugs so/ / @01a @#*/ /gnyis pa len byed kyi sbyor bzhi bshad pa la/ dbang du byed pa rgyu 'bras bshad pa/ brten pa rgyu 'bras bshad pa gnyis/ dang po la/ dbang du byed pa'i rgyu rnam kun gyi sbyor ba bshad pa/ 'bras bu rtse mo'i sbyor ba bshad pa gnyis/ dang po la/ gzhung spyi'i bsdu ba dang/ gzhung don so sor bshad pa gnyis las/ dang po la/ mkhyen gsum bshad zin pa'i rjes su rnam rdzogs sbyor ba 'chad pa'i rgyu mtshan dang/ chos bcu gcig gis mtshon te gtan la phab tshul mtshon tshul dngos so/ /dang po la skabs dang po gsum gyis mkhyen gsum gyi rnam pa mtha' dag rgyas par gtan la phab zin nas/ mkhyen gsum gyi rnam pa rdzogs par nyams su len pa'i rnam rdzogs sbyor ba 'chad pa la skabs bzhi pa'i gzhung gsungs/ gzhung 'dis de lta bu'i rnam rdzogs sbyor ba 'chad na/ mkhyen gsum gyi rnam pa yang 'chad dgos pas/ dang po gsum du rgyas par bshad pa dang zlos pas skyon du 'gyur ro/ /zhe na de'i skyon med de/ ston tshul dang dgos pa mi 'dra ba'i khyad par yod pa'i phyir/ ston tshul mi 'dra ste/ dang po gsum du so sor gtan la phab pa/ 'dir ni zhi lhag zung 'brel gyis sbyor ba'i yul du bsdus nas gtan la phab pa dang/ yang dang po gsum du rang rang gi thun mong ma yin pa'i ngo bo shes pa'i ched du rang gi mtshan nyid kyis sgo nas bstan/ 'dir ni zhi lhag zung 'brel gyis yul du bsdus nas len byed kyi sbyor ba'i ngos nas bshad pa dang/ yang 'dir ni mkhyen gsum gyi rnam pa brgya bdun cu rtsa gsum pa mtha' dag la phyin ci log tu sgro 'dogs pa'i sgro 'dogs kyi gnyen por spang gnyen du so sor sbyar nas bshad pa dang/ dang po gsum du mkhyen pa gsum po de rang gi 'dzin stangs kyi ngo bo la nyon mongs pa'i bslad pa ma zhugs pa'i rang bzhin gyis zhi ba'i rnam pa can du @02a @#*/ /bstan pa'i phyir/ mkhyen gsum gyi rnam pa mtha' dag zhi lhag zung 'brel gyis sbyor ba'i yul du bsdus nas len byed kyi sbyor ba'i ngos nas bstan pa la dgos pa yod de/ mkhyen gsum gyi rnam pa brgya bdun cu rtsa gsum zhi lhag zung 'brel gyis sbyor ba'i yul du bsdus nas nyams su len tshul shes par bya ba'i ched du yin pa'i phyir/ shes pa la dgos pa yod de/ mkhyen gsum gyi rnam pa la sgom pa dbang sgyur thob par bya ba'i ched du yin pa'i phyir/ de la dgos pa yod de/ sangs rgyas kyi sa'i spangs pa mthar thug gis lag rjes 'jog pa'i dgos pa yod pa'i phyir te/ 'grel chen las/ yang thams cad mkhyen pa nyid gsum dang rnam pa kun mngon par rdzogs par rtogs pa'i khyad par gang zhig ce na/ kha cig na re/ thams cad mkhyen pa nyid gsum ni ji skad du bshad pa'i rnam pas rnam pa'i yul so sor nges pa yin la/ rnam pa kun mngon par rdzogs par rtogs pa ni rnam pa ma lus pa'i yul can yin no zhes 'dod do/ /gzhan dag ni thams cad mkhyen pa nyid gsum ni mtshan nyid nyid du rnam par gzhag pa yin la/ rnam pa kun mngon par rdzogs par rtogs pa ni sbyor ba pa yin no zhes zer ro/ /la la ni rnam pa kun mngon par rdzogs par rtogs pa ni mi mthun pa'i phyogs dang/ gnyen por bzhag pa'i rab tu phye ba yin la/ thams cad mkhyen pa nyid gsum ni rang bzhin gyis zhi ba'i rnam pa nyid yin pa'i phyir/ de lta bu ma yin no zhes 'chad do/ /zhes gsungs pa'i phyir/ skabs dang po gsum du ched du bya ba mkhyen pa gsum nyams len gyi yul du bstan/ 'dir len byed kyi sbyor ba'i ngos nas bshad pa yin gyi/ dang por thos bsam gyi yul tsam gyi sgo nas gtan la phab/ 'dir nyams len bya tshul tsam gyi sgo nas gtan la phab pa ma yin te/ thos bsam dang nyams len gyi gzhung so sor gcod mi rigs pa'i phyir/ der thal/ gang thos pas gtan la phab pa de nyid sgom @02b pas nyams su len dgos sgom pas nyams su blangs pa'i don de nyid thos pas gtan la 'bebs dgos pa'i phyir te/ mdzod las/ tshul gnas thos dang bsam gtan pa'i/ /sgom pa la ni rab tu sbyor/ /zhes gsungs pa'i phyir/ kha cig gi gsung na re/ bdag med pa'i rnam pa can bdun cu don gcig dang kun rdzob pa'i rnam pa can brgya dang gnyis dang bcas pa'i mkhyen gsum gyi rnam pa brgya dang bdun cu rtsa gsum/ thun mong ma yin pa'i rnam thar sgo gsum gyi dmigs par bsdus nas bden med du sgom pa de mkhyen gsum gyi bsdus sgom gyi don yin zhing/ de la sbyor ba nyi shur 'byed pa'i tshul yod de/ brgya bdun cu rtsa gsum gyi ngo bo bden med du rtogs pa'i zhi lhag zung 'brel gyi sems dpa'i rnal 'byor de rnam par thar pa'i sgo stong pa nyid dang/ gnas pa bkag pa'i sbyor ba dang/ de dag gi rgyu bden med du rtogs pa'i zhi lhag zung 'brel gyi sems dpa'i rnal 'byor de rnam par thar pa'i sgo mtshan ma med pa dang/ rnal 'byor bkag pa'i sbyor ba dang/ de dag gi 'bras bu bden med du rtogs pa'i zhi lhag zung 'brel gyi sems dpa'i rnal 'byor de rnam par thar pa'i sgo smon pa med pa de yin zhing/ sgo de la zab pas gzhi shes sbyor ba/ gting dpag dka' bas lam shes sbyor ba/ tshad med pas rnam mkhyen sbyor ba ste/ ngo bo'i sbyor ba lnga/ sgo re re la sgom pa po rten gyi sgo nas phye ba brgyad dang/ rdzogs par sgom pa thabs kyi sgo nas phye ba bzhi dang/ 'bras bu dang dus kyi sgo nas phye ba gsum gsum dang bcas pa'i nyi shur 'gyur ba'i phyir zer na/ byang sems rnams kyis nyer len gyi phung po rtag 'dzin gyi gnyen por mi rtag pa sgom lam mi sgom/ mi sgom na mi rigs te/ 'phags seng gnyis kas nyer len gyi phung po rtag 'dzin gyi gnyen por mi rtag pa'i rnam pa shar nas sgom par gsungs pa dang 'gal ba'i phyir dang/ mkhyen gsum gyi rnam pa brgya bdun cu rtsa gsum gyi dbye ba byas pa don med du 'gyur ba'i phyir/ sgom na mi 'thad de/ nyer len gyi phung po rtag 'dzin gyi dngos kyi gnyen po phung po mi rtag pa'i rnam pa shar ba'i gzhi shes kyi rnam pa sgom pa'i rnam rdzogs sbyor ba'i dbye ba mi mdzad pa de mi rigs pa'i phyir dang/ slob dpon seng ge bzang pos thams cad shes pa nyid kyis rang @03a @#/ /sangs rgyas rnams kyang bsdus pas zhes gzhi shes kyis rang sangs rgyas kyi mngon rtogs bsdus par gsungs pa la/ 'dir gzhi shes kyi dmigs pa mi rtag sogs tsam gtan la 'bebs pa'i skabs yin pas de ltar 'chad pa mi rigs zhes dgag pa byed pa mi rigs pa'i phyir dang/ stong nyid rtogs pa'i zhi lhag zung 'brel gyi sems dpa'i rnal 'byor de tshogs lam nas sa bcu pa'i bar du 'jog pa mi rigs te/ dman lam sngon ma song gi byang sems tshogs lam pa rigs nges des stong nyid rtogs pa'i zhi lhag zung 'brel gyi rnal 'byor thob pa dang theg pa chen po'i sbyor lam thob pa dus mnyam pa'i phyir/ gnyis pa la chos bcu gcig gis mtshon te gtan la phab tshul de yang bsdun rnam rdzogs sbyor ba spyi'i sgom tshul dang/ bsgoms pa la brten nas thar pa cha mthun nas bzung ste rgyud la skye ba'i rim pa gnyis su 'du zhing/ de gnyis gzhung gis bstan tshul la; dang po de 'chad pa la/ gzhi shes pa yi bye brag rnams/ /zhes pa nas bzung ste/ mtshan nyid bzhi bar bzhed pa yin/ /zhes pa'i bar gsungs/ gnyis pa de 'chad pa la/ mtshan med rab tu sbyin la sogs/ /zhes pa man chad gsungs/ dang po la rnam rdzogs sbyor ba'i ngo bo dang/ sgom pa po rten gyi gang zag gis tshul ji ltar du sgom pa'i tshul gnyis su 'du zhing/ dang po la yang sbyor ba dang po gnyis po sangs rgyas kyi sa'i spangs pa mthar thug gis lag rjes 'jog byed yin pas mi mthun phyogs mngon gyur ba dang spang bya'i sa bon spong ba'i gnyen po sgom pa'i rim pa dngos rtse sbyor gyi skabs su 'chad pa yin kyang/ 'dir yang mkhyen gsum gyi rnam pa brgya bdun cu rtsa gsum po mtha' dag la phyin ci log tu sgro 'dogs pa'i sgro 'dogs kyi gnyen po dang mi mthun phyogs kyi gtso bo bden 'dzin gyi gnyen po sbyor ba'i gtso bo stong nyid rtogs pa'i sbyor ba gnyis kyi sgo nas 'chad pas/ dang po la mdor bstan rgyas bshad gnyis las/ dang po de 'chad pa la/ gzhi shes pa yi bye brag rnams/ /zhes pa nas/ de ni rnam pa gsum du 'dod/ /ces pa'i bar gsungs/ gnyis pa rgyas par bshad pa la/ nyer len gyi phung po rtag 'dzin gyi gnyen por nyer len gyi phung po mi rtag @03b par rtogs pa'i gzhi shes kyi rnam pa sgom pa sogs gzhi shes kyi rnam pa nyer bdun sgom tshul 'chad pa la/ med pa'i rnam pa nas bzung ste/ zhes pa nas/ lam la de ni bco lngar bshad/ ces pa'i bar gsungs/ yul ma 'ongs pa la sred pa'i gnyen por lam shes sgom tshul sogs lam shes kyi rnam pa so drug sgom tshul 'chad pa la/ rgyu dang lam dang sdug bsngal dang/ zhes pa nas/ lnga dang bcu drug ces bsgrags so/ /zhes pa'i bar gsungs/ sangs 'phags kyi rgyud kyi dran pa nyer gzhag sogs rnam mkhyen gyi rnam pa brgya dang bcu sgom tshul 'chad pa la/ dran pa nyer gzhag nas bzung ste/ zhes pa nas/ sum cu rtsa dgu dag tu bzhed/ ces pa'i bar gsungs/ sbyor ba khyad par can stong nyid rtogs pa'i sbyor ba la nyi shur phye nas 'chad pa la/ gzugs la sogs la mi gnas phyir/ zhes pa nas/ de ni dag pa mtshams dang bcas/ /zhes pa'i bar gsungs/ sgom pa po rten gyi gang zag gis ji ltar sgom tshul la/ de lta bu'i sbyor ba sgom pa po'i rten gyi gang zag de ji lta bu zhig dgos zhe na/ sngon de bzhin gshegs pa sogs theg chen dge ba'i bshes gnyen bsnyen bkur sogs kyis mnyes par byas shing/ de ltar yang de'i mgon dang bcas pa'i sgo nas de la the tshom gyi gnas kun 'dri bar byed pa'i phyi nang gi rkyen gnyis dang ldan pa zhig dgos zhes 'chad pa la/ sangs rgyas rnams la lhag par byas/ /zhes pa nas/ snod du dam pa rnams bzhed do/ /zhes pa'i bar gsungs/ de lta bu'i sgom pa po rten gyi gang zag des sbyor ba sgom pa legs nyes kyi dbang gis skyon yon rnams 'byung tshul la yon tan rnam pa bcu bzhir phye nas 'chad pa la/ bdud kyi mthu bcom la sogs pa/ /yon tan rnam pa bcu bzhi'o/ /zhes pa'i gzhung gsungs/ skyon la zhe drug tu phye nas 'chad pa la/ skyon ni bcu tshan bzhir bcas pa/ /drug tu nges par rtogs par bya/ /zhes pa'i gzhung gsungs/ de 'dra'i gang zag des skyon yon rnams legs par shes pa'i sgo nas sbyor ba sgom pa'i tshe na sbyor ba spyi dang bye brag rnams kyi mtshan nyid kyi sgo nas tshang ma'i yul du nges dgos pas/ lam sher phyin gyi rnal 'byor spyi dang/ bye brag gi mtshan nyid/ mdor bsdus te 'chad pa la/ gang gi mtshon te mtshan nyid du/ / @04a @#/ /zhes pa las/ ngo bo nyid gang mtshon bya yang/ /zhes pa'i bar gsungs/ de la bye brag shes khyad byed pa gsum las/ dang po sems dpa'i gzhi shes sbyor ba mtshan nyid kyi sgo nas 'chad pa la/ de bzhin gshegs pa 'byung ba dang/ zhes pa nas/ shes pa'i mtshan nyid bsdus pa yin/ zhes pa'i bar gsungs/ lam shes sbyor ba mtshan nyid kyi sgo nas 'chad pa la/ stong nyid mtshan ma med bcas dang/ /zhes pa nas/ shes pa'i mtshan nyid yin par bzhed/ /ces pa'i bar gsungs/ rnam mkhyen sbyor ba mtshan nyid kyi sgo nas 'chad pa la/ de ni nyid kyi chos brten nas/ /zhes pa nas/ shes pa'i mtshan nyid ces bshad do/ /zhes pa'i bar gsungs/ dman pa'i sbyor ba las khyad par du 'phags pa'i sems dpa'i sbyor ba mtshan nyid kyi sgo nas 'chad pa la/ bsam mi khyab sogs khyad par gyi/ /zhes pa nas/ khyad par mtshan nyid bshad pa yin/ /zhes pa'i bar gsungs/ gzhan don byed pa'i byed las khyad par can dang ldan pa'i sems dpa'i sbyor ba mtshan nyid kyi sgo nas 'chad pa la/ bsam mi khyab dang mi mnyam dang/ /zhes pa nas/ 'di ni byed pa'i mtshan nyid yin/ /zhes pa'i bar gsungs/ sngar bshad pa de dag gi so so'i mtshan gzhi la bcu drug tu phye nas 'chad pa la/ nyon mongs rtags dang mtshan ma dang/ /zhes pa nas/ mtshan nyid bzhi par bzhed pa yin/ /zhes pa'i bar gsungs/ gnyis pa la tshogs lam gyi gnas skabs su lam rang gi ngo bo'i sgo nas skye tshul dang/ sbyor lam yan chad du nus pa'i sgo nas skye tshul gnyis las/ dang po la sgom pa po rten gyi gang zag des sbyor ba'i skyon yon mtshan nyid rnams legs par shes pa'i sgo nas sbyor ba bsgoms pa la brten nas bskal pa grangs med gsum nas 'tshang rgya ba'i lam gyi thog ma ji lta bu zhig thob pa yin zhe na/ sbyin sogs rang rgyud la bskyed pa la mkhas pa'i sems dpa'i chos mngon rtogs nam thob pa de'i tshe na/ grangs med gsum nas 'tshang rgya ba'i lam gyi thog ma thob pa yin/ zhes 'chad pa la/ mtshan med rab tu sbyin la sogs/ /zhes pa nas/ thar pa'i cha dang mthun par 'dod/ /ces pa'i @04b bar gsungs/ de la mkhas tshad de gang/ mkhas pa'i gdul bya de gang yin zhe na/ dad sogs yul lnga la mkhas pa de mkhas tshad yin zhing/ de la mkhas pa'i rgyan gyi ched du bya ba'i gdul bya la'ang dbang po rno rtul gnyis yod ces 'chad pa la/ sangs rgyas sogs dmigs dad pa dang/ zhes pa nas/ rtogs sla rtul pos rtags dkar bzhed/ /ces pa'i bar gsungs/ sbyor lam yan chad du nus pa'i sgo nas/ skye tshul bshad pa la/ thar pa cha mthun rdzogs rjes su gtso bor thabs kyi chos khyad par du byas pa'i sbyor lam nus pa'i sgo nas skye tshul dang/ ma dag sa bdun gyi gnas skabs su nus pa'i sgo nas skye tshul dang/ dag pa sa gsum gyi gnas skabs su nus pa'i sgo nas skye tshul gsum las/ dang po 'chad pa la/ dro ba rnams kyi dmigs pa 'dir/ /zhes pa nas/ smin byed sogs kyi shes par bya/ /zhes pa'i bar gsungs/ gnyis pa la byang sems tshogs sbyor ba rnams kyis thabs shes khyad par can gnyis rdzogs par nyams su blangs pa la brten nas phyir mi ldog pa'i rtags thob pas sbyor mthong sgom gsum gyi phyir mi ldog gi rtags mdor bstan pa'i tshul gyi 'chad pa la/ nges 'byed yan lag nas bzung ste/ /zhes pa nas/ de 'dir phyir mi ldog pa'i tshogs/ /zhes pa'i bar gsungs/ rgyas par bshad pa la; sbyor lam pa phyir mi ldog gi rtags la nyi shur phye nas 'chad pa la/ gzugs la sogs la ldog sogs rtags/ /zhes pa nas/ rdzogs pa'i byang chub las mi ldog /ces pa'i bar gsungs/ mthong lam pa phyir mi ldog gi rtags la bcu drug tu phye nas 'chad pa la/ mthong ba'i lam la bzod pa dang/ /zhes pa nas/ phyir mi ldog pa'i rtags dag yin/ /zhes pa'i bar gsungs/ gnyis pa la sgom lam gyi ngo bo dbye ba phyir mi ldog gi rtags dang gsum las/ dang po 'chad pa la/ nges 'byed yan lag dang mthong bas/ /zhes pa nas/ 'jal dang nges rtogs sgom pa'i lam/ /zhes pa'i bar gsungs gnyis pa dbye ba la dngos dang/ rtsod pa spong ba gnyis las/ dang po theg chen gyi sgom lam bar chad med lam de la chung ngu 'bring chen po dgu yod ces 'chad pa la/ de ni rgyun chags yin pa'i phyir/ zhes pa nas/ rnam pas rnam pa dgur bzhed do/ /zhes pa'i bar gsungs/ gnyis pa la/ grangs @05a @#/ /nges la rtsod pa spong ba dang/ byed las la rtsod pa spong ba gnyis/ dang po la kha cig na re/ theg pa chen po'i sgom lam bar chad med lam la chung ngu 'bring chen po dgu'i dbye ba mi 'thad par thal/ khyod kyi lugs la de dag bden par med pa gang zhig /de rnams re res kyang 'bras bu gzhal med grangs med 'byin par gsungs pa'i phyir/ zhe na skyon med de/ de dag bden par med kyang tha snyad du 'bras bu gzhal med grangs med 'byin par thugs rje chen po'i rgyu mthun gyi 'bras bur rgyal ba'i gsung rab las gsungs pa'i phyir/ zhes 'chad pa la/ grangs med la sogs bstan pa rnams/ /zhes pa nas/ rgyu mthun de dag thub pa bzhed/ /ces pa'i bar gsungs/ byed las la rtsod pa spong ba la/ sgom lam de rnams kyis bden 'dzin che 'bring chung ngu dgu po rim gyi spong ba mi 'thad par thal/ de dag bden par med pa'i phyir/ zhes rtsod pa de 'god par byed pa la/ dngos po brjod du med pa la/ zhes pa nas/ ci zhig nyams shing ci zhig 'thob/ /ces pa'i bar gsungs/ de dag don dam par ma grub kyang tha snyad du spang bya nyams shing gnyen po 'phel ba'i bya ba byed pa 'thad de/ dper na/ 'bras bu byang chub chen po don dam par ma grub kyang tha snyad du gdul bya'i rgyud kyi mi mthun phyogs spong zhing yon tan 'phel bar byed pa lta bu yin pa'i phyir/ de gnyis mtshungs te/ bden pas stong pa'i de bzhin nyid kyi mtshan nyid can du mtshungs pa'i phyir/ zhes 'chad pa la/ byang chub ji ltar de bzhin du/ /zhes pa nas/ de yang de yi mtshan nyid bzhed/ /ces pa'i bar gsungs/ kho na re/ theg chen gyi sgom lam bar chad med lam rnams kyis 'bras bu byang chub chen po 'byin pa mi 'thad par thal/ de skad cig re res kyang mi skye/ snga phyi dus mnyam du tshogs pas mi skye ba'i phyir/ zer na/ skad cig snga phyi re re kho nas mi skye dus mnyam du tshogs pas kyang mi skye yang skad cig snga ma rnams kyi phyi ma rnams la phan pa bsgrubs pa la brten nas skad cig snga phyi rnams kyis byang chub chen po bskyed la btags nas 'jog pa yin te/ dper na mar me skad cig snga phyi re re kho nas sdong bu snum ldan mi sreg /skad cig snga phyi dus mnyam tshogs pas mi zad kyang skad cig snga ma snga ma rnams @05b kyis bsregs pa'i nus pa phyi ma rnams la byin pa la brten nas skad cig snga phyi rnams kyis sdong bu snum ldan sreg par gtags nas 'jog pa lta bu yin pa'i phyir/ zhes 'chad pa la/ sems ni snga mas byang chub bar/ /zhes pa nas/ zab mo'i chos nyid rnam pa brgyad/ /ces pa'i bar gsungs/ gsum pa la; theg chen sgom lam gyi skabs su zab mo rnam pa brgyad thugs su chud pas drangs pa'i rjes thob lus dag gi tha snyad khyad par can gnyis po sgom lam pa phyir mi ldog gi rtags dngos yin no zhes 'chad pa la/ skye ba dang ni 'gag pa dang/ /zhes pa nas/ thabs mkhas pa la zab pa nyid/ /ces pa'i bar gsungs/ gsum pa la/ chos sku'i lag rjes 'jog byed srid zhi mnyam nyid sbyor ba dang/ longs sku'i las rjes 'jog byed zhing dag sbyor ba/ sprul sku'i lag rjes 'jog byed thabs mkhas sbyor ba ste/ sku gsum 'grub byed kyi sbyor ba khyad par can gsum nus pa'i sgo nas skye tshul rim pa bzhin du 'chad pa la/ chos rnams rmi lam 'dra ba'i phyir/ /zhes pa nas/ lan ni ji skad bshad par zad/ /ces pa'i bar dang/ sems can 'jig rten de bzhin du/ /zhes pa nas/ sangs rgyas zhing ni dag pa nyid/ /ces pa'i bar dang/ yul dang sbyor ba can 'di ni/ /zhes pa nas/ thabs la mkhas pa rnam pa bcu/ /zhes pa'i bar gsungs/ /gsum pa chos bcu gcig po des rnam rdzogs sbyor ba ji ltar mtshon pa'i tshul yod de/ rnam rdzogs sbyor ba spyi'i sgom tshul dang/ bsgoms pa la brten nas thar pa cha mthun nas bzung ste rgyud la skye ba'i rim pa gnyis kyi sgo nas mtshon pa'i phyir/ gnyis pa la/ gzhi shes pa yi byed brag rnams/ /zhes sogs kyi skabs su/ 'dir bstan gyi rnam pa ngos bzung/ rnam pa gnyen po'i mtshan nyid du gsungs pa'i don bshad/ rnam pa mdo las bstan tshul/ bstan bcos kyis bsdus tshul/ rnam pa sgom tshul lo/ /dang po la rnam pa zhes pa spyi'i sgra yin te/ skabs 'ga' zhig tu chos rnams kyi ngo bo la 'jug /'ga' zhig tu phyir mi ldog gi rtags la 'jug /'ga' zhig tu gzhi'i khyad par la 'jug pas 'dir ni phyi ma'i dbang du byas pa yin pa'i phyir/ de yang yin te/ sdug kun gyi chos rnams kyi steng gi stong bdag med la sogs pa rnams 'dir bstan pa'i rnam pa yin pa'i phyir/ @06a @#/ /de skad du 'grel bshad tshig gsal las/ rnam pa ni bye brag ste sangs rgyas kyi sa la sogs pa la chos kyi bye brag ji snyed cig yod pa ston pa'o/ /zhes gsungs pa'i phyir/ des na don rnam dang las rnam gnyis don gcig /shes rnam dang byed rnam gnyis don gcig cing/ nyer len gyi phung po'i steng gi stong bdag med lta bu dang po'i mtshan gzhi dang/ de dag gi rnam pa shar ba'i ye shes ni phyi ma'i mtshan gzhi yin/ gnyis pa la kha cig /rnam pa mtshon byar byas nas mtshan nyid mkhyen gsum gang rung gi rnam pa shar nas nyams su len pa'i sems dpa'i ye shes kyi zur nas kha 'gengs pa mi rigs te/ de ltar byed pa de ni 'dir rnam pa'i dbye ba rgyas par gtan la phab pas ci byed ma shes pa'i skyon yin pa'i phyir/ der thal/ rnam pa'i dbye ba rgyas par gtan la phab pa de ni mkhyen gsum gyi rnam pa mtha' dag la log par zhugs pa'i sgro 'dogs ji snyed pa de snyed kyi gnyen po'i rnam pa'i dbye ba rgyas par gtan la 'bebs pa'i ched yin pa gang zhig /rnam pa mtshon byar byed na de lta bu'i dgos pa sgrub mi nus pa'i phyir/ dang po der thal/ sngar dgos 'brel gyi skabs su/ gzhi gnyen rnam pa gsum gis mkhyen gsum mtshon pa'i sgo nas mkhyen gsum gtan la 'bebs zhes gsung ba ltar 'dir yang nyer len gyi phung po mi rtag pa'i rnam pa shar nas rtogs pa'i sems dpa'i ye shes de/ nyer len gyi phung po rtag 'dzin gyi zhen yul la dngos su gnod byed kyi sems dpa'i ye shes su gyur pa'i gnyen po'i mtshan nyid du 'jog pa sogs yin pa'i phyir/ de skad du nyi snang las/ dngos po las dmigs pa ni gzhi shes pa'i/ /bye brag ni mi mthun pa'i phyogs gang gi gnyen po'i mtshan nyid gang yin pa ste/ dper na rtag par 'dzin pa la mi rtag pa la sogs pa bzhin no/ /gnyen po'i phyogs kyang thams cad mkhyen pa nyid gsum gyis bsdus pa yin pas/ kun mkhyen nyid ni rnam gsum phyir/ /de ni rnam pa gsum du 'dod/ /ces bya ba gsungs so/ /zhes gsungs pa'i phyir/ kha cig /mkhyen gsum gang rung gi rnam pa shar ba'i sems dpa'i ye shes/ sems dpa'i gnyen po phyogs kyi shes @06b rnam gyi mtshan nyid zer na/ theg chen gyi mthong lam bar chad med lam chos can/ mtshan nyid der thal/ mtshon bya de'i phyir/ der thal/ sems dpa'i ye shes yin pa'i phyir/ 'dod mi nus te/ theg chen gyi bar chad med lam yin pa'i phyir/ yang kha cig /mkhyen gsum gang rung gi rnam pa nyams su len pa'i sems dpa'i ye shes/ gnyen po phyogs kyi shes rnam gyi mtshan nyid zer na/ mi 'thad de/ sangs 'phags kyi rgyud la yang gnyen po phyogs kyi shes rnam yod/ lam ma zhugs kyi rgyud la yang de yod pa'i phyir/ rang gi lugs la/ rang yul gyi rnam pa legs par shar ba'i sgo nas rang gi dmigs pa'i chos la phyin ci log tu sgro 'dogs pa'i sgro 'dogs kyi 'dzin stangs la dngos su gnod byed kyi rig pa/ gnyen po'i mtshan nyid yin pa dang/ rang yul du gyur pa'i mkhyen gsum gang rung gi gzhal bya'i rnam pa legs par shar ba'i sgo nas mkhyen gsum gang rung gi gzhal bya'i rnam pa la phyin ci log tu sgro 'dogs pa'i sgro 'dogs la dngos su gnod byed kyi sems dpa'i ye shes/ skabs 'dir dngos su bstan pa'i mkhyen gsum gang rung gi rnam pa nyams su len pa'i sems dpa'i ye shes su gyur pa'i gnyen po'i mtshan nyid/ de la dbye na/ gzhi shes kyi rnam pa nyams su len pa'i sems dpa'i ye shes su gyur pa'i gnyen po sogs gsum yod/ 'dir rnam pas gnyen po ji ltar mtshon tshul yod de/ nyer len gyi phung po rtag 'dzin la dngos su gnod byed kyi gnyen po ji lta bu zhig sgom snyam pa na/ nyer len gyi phung po mi rtag pa'i rnam pa shar ba'i ye shes shig sgom dgos zhes smras pa na/ de 'dra ba'i ye shes de nyer len gyi phung po rtag 'dzin la dngos su gnod byed kyi gnyen por gnus pa'i phyir/ 'dir gnyen po'i mtshan nyid gtan la phab pa la dgos pa yod de/ nyer len gyi phung po mi rtag pa'i rnam pa shar ba'i ye shes nyer len gyi phung po rtag 'dzin la dngos su gnod byed du shes pa'i dgos pa yod pa'i phyir/ 'dir bstan pa'i gnyen po de la rnam pa gsum yod de/ bsgom bya mkhyen gsum gyi dbang du byas pa gsum yod pa'i phyir/ gsum pa rnam pa mdo las bstan tshul yod de/ yum 'di ni ma mchis pa'i pha rol tu phyin pa'o/ /bcom ldan 'das kyis @07a @#/ /bka' stsal pa/ rab 'byor nam mkha' dmigs su med pa'i phyir/ zhes pa nas/ yum 'di ni mi g.yo ba'i pha rol tu phyin pa'o/ /bcom ldan 'das kyis bka' stsal pa/ chos kyi dbyings gnas pa nyid kyi phyir/ zhes pa'i bar gyis gzhi shes kyi rnam pa nyer bdun 'phangs te bstan pa'i phyir dang/ yum 'di ni 'dod chags dang bral ba'i pha rol tu phyin pa'o/ /zhes pa nas/ dngos po med pa'i ngo bo nyid stong pa nyid kyi pha rol tu phyin pa'o/ /zhes pa'i bar gyis lam shes kyi rnam pa so drug 'phangs te bstan pa dang/ yum 'di ni dran pa nye bar gzhag pa'i pha rol tu phyin pa'o/ /bcom ldan 'das kyis bka' stsal pa/ lus dang tshor ba dang sems dang chos dmigs su med pa'i phyir ro/ /zhes pa nas/ yum 'di ni sangs rgyas kyi pha rol tu phyin pa'o/ /bcom ldan 'das kyis bka' stsal pa/ rab 'byor chos thams cad rnam pa thams cad du mngon par rdzogs par 'tshang rgya ba nyid kyi phyir ro/ /zhes pa'i bar gyis rnam mkhyen gyi rnam pa brgya dang bcu 'phangs te bstan pa'i phyir/ de dag gis shes rnam dang don rnam ji ltar bstan pa'i tshul yod de/ mdo dang pos ni rab 'byor gyi dam bca' dang/ bcom ldan 'das kyi 'thad sgrub kyi don rnam dngos su bstan/ shes rnam shugs la bstan/ mdo bar pas don rnam dngos su bstan/ shes rnam shugs la bstan/ mdo phyi mas don rnam dang shes rnam gnyis ka dngos su bstan pa'i phyir/ phyi ma der thal/ yum 'di ni dran pa nye bar gzhag pa'i pha rol tu phyin pa'o/ /zhes pa nges shes rnam dngos su bstan/ lus dang tshor ba dang sems dang chos dmigs su med pa'i phyir/ zhes pas don rnam dngos su bstan pa'i phyir/ bzhi pa mdo de dag gi don bstan bcos kyis bsdus nas ji ltar bstan pa'i tshul yod de/ med pa'i rnam pa nas bzung ste/ /zhes pa nas/ lam la de ni bco lngar bshad/ /ces pa'i bar gyis/ yum 'di ni ma mchis pa/ zhes pa dang/ yum 'di ni mi g.yo ba'i pha rol tu phyin pa'o/ /zhes sogs kyi tshig so sor phye ste dngos su bstan/ dran pa nyer gzhag nas bzung ste/ /zhes pa nas/ sum cu rtsa dgu dag tu bzhed/ /ces pa'i bar gyis yum 'di ni dran pa nye @07b bar gzhag pa'i pha rol tu phyin pa'o/ /zhes dang/ chos thams cad rnam pa thams cad du sangs rgyas pa'i phyir/ zhes pa'i bar gyis mdo'i tshig so sor phye nas bstan/ rgyu dang lam dang sdug bsngal dang/ /zhes pa nas/ lnga dang bcu drug ces bsgrags so/ /zhes pa'i bar gyis mdo dang mtha' gnyis po des sa tshigs so sor phye nas dngos su bstan pa la brten nas go nus pas gzhung 'dis sa tshigs so sor phye nas dngos su ma bshad pa'i phyir/ lnga pa la/ byang chub sems dpa' rnams kyis sgrib pa gnyis kyi sa bon spong bar byed pa la thabs cha rgya chen pos zin pa'i stong nyid rtogs pa'i shes rab kyis spong ba yin kyang 'dir mkhyen gsum gyi rnam pa mtha' dag la phyin ci log tu zhugs pa'i sgro 'dogs kyi 'dzin stangs kyi log phyogs kyi gnyen po de sgom dgos te/ byang chub sems dpa' rnams kyis rang rgyud kyi nyon mongs dpal gzham pa dang/ de ltar ston dgos kyi gdul bya rjes su bzung ba'i phyir du sgom dgos pa'i phyir/ byang chub sems dpas rang rgyud kyi nyon mongs dpal gzham pa dang/ gdul bya nyan rang gi rigs can rjes su bzung ba'i phyir du skabs gsum par bshad pa'i gzhi shes kyi rnam pa de nyid 'dir rnam rdzogs sbyor ba'i sgo nas nyams su len tshul gtan la 'bebs par byed pa'i phyir/ mkhyen gsum bsdus sgom gyi don yang yod de/ mkhyen gsum gyi rnam pa brgya bdun cu rtsa gsum po thams cad zhi lhag zung 'brel gyi sbyor ba'i nyams len du bsdus nas sgom pa de'i don yin pa'i phyir/ nyer len gyi phung po mi rtag par rtogs pa'i gzhi shes kyi rnam pa sgom pa nas bzung ste/ sangs rgyas nyid kyi rnam mkhyen gyi rnam pa sgom pa'i tshul yod de/ thabs cha rgya chen pos zin pa'i sgo nas nyer len gyi phung po mi rtag par sgom pa de gzhi shes kyi rnam pa sgom pa nas/ yang des zin pa'i sgo nas stong nyid rtogs pa'i lta ba sgom pa ni sangs rgyas nyid kyi rnam mkhyen gyi rnam pa sgom pa yin pa'i phyir/ nyer len gyi phung po mi rtag par sgom pa'i ye shes des de rtogs pa'i gzhi shes sgom/ de 'dra ba'i gzhi shes sgom pa'i ye shes des kyang nyer len gyi phung po mi rtag par sgom dgos pa yin te/ rnam bshad las/ kha cig don rnam dang shes rnam gnyis su phye nas bsgom bya gang yin mi mthun pa so sor 'dod pa la ni snying @08a @#/ /po cung zad kyang med de/ mi rtag pa rtogs pa'i ye shes bsgom byar 'dod pa des kyang mi rtag pa sgom par khas len dgos la mi rtag pa bsgom byar 'dod pa des kyang de rtogs kyi ye shes sgom par khas mi len na gzhi stong bar 'gyur ba'i phyir ro/ /zhes gsungs pa'i phyir/ mkhyen gsum sgom pas sems dpa' ye shes med pa mi 'thad de/ rnam mkhyen nyams su len pa'i sems dpa'i ye shes yod pa gang zhig /de nyams su len pa des de sgom pas nyams su len pa yin pa'i phyir/ dang po der thal/ de ni nyid kyi chos brten nas/ /zhes sogs kyi gzhung rnams kyis rnam mkhyen sbyor ba mtshan nyid kyi sgo nas gtan la phab pa yin pa'i phyir/ kha cig na re/ rnam mkhyen sgom pa'i sems dpa'i ye shes med kyang rnam mkhyen gyi rnam pa sgom pas sems dpa'i ye shes yod de/ rnam mkhyen gyi don rnam yin na/ rnam mkhyen gyi rnam pa yin dgos pa'i phyir zer na/ thun mong ma yin pa'i rnam mkhyen gyi don rnam yin na/ de'i rnam pa yin dgos par thal/ dam bca' 'thad pa'i phyir/ 'dod na/ sangs rgyas 'phags pa'i thugs rgyud kyi dran pa nyer gzhag bzhi po chos can/ der thal/ de'i phyir/ der thal/ de'i gzhal bya yin pa'i phyir/ 'dod mi nus te/ thun mong ba'i rnam mkhyen gyi rnam pa yin pa'i phyir/ der thal/ nyan tos dang thun mong ba'i rnam mkhyen gyi rnam pa yin pa'i phyir/ kho na re rang rgyud kyi blo rnam mkhyen gyi ngo bor skyes zin pa'i byang chub sems dpa' yod par thal/ rang rgyud kyi blo rnam mkhyen gyi ngo bor bskyed nas sgom pa'i byang chub sems dpa' yod pa'i phyir zer na/ ma khyab ste/ de skyes pa dang bskyed pa la khyad ma phyed pa'i skyon yin pa'i phyir/ ma grub na/ der thal/ rnam mkhyen sgom pa'i sems dpa' yod pa gang zhig /snying rje chen po sgom pa mig gi gzugs la blta ba ltar ma yin par blo'i ngo bor bskyed nas/ sgom par gsungs pa'i phyir/ ! med pa'i rnam pa nas bzung ste/ zhes sogs kyi skabs su theg dman gyi rtogs rigs su gnas pa'i slob pa 'phags pa'i mkhyen pa/ 'dir dngos bstan gyi gzhi shes kyi rnam pa'i mtshan nyid/ de la dbye na/ bden pa dang po gsum la dmigs pa bzhi bzhi/ lam @08b bden la dmigs pa bco lnga yod/ 'dir dngos bstan gyi gzhi shes gyi rnam pa la slob pa 'phags pa'i mkhyen pa yin pas khyab ste/ 'grel pa las/ de la thams cad shes pa nyid kyi rnam pa ni nyan thos dang/ byang chub sems dpa'i bye brag gi go rim bzhin du zag pa med pa dang/ zag pa dang bcas pa dag kyang yin na/ /zhes gsungs pa'i phyir/ lam bden gyi rnam pa la dmigs pa bco lnga yod de/ byed pa po'i gang zag gi bdag med pa dang/ shes pa po'i gang zag gi bdag med pa dang/ dman pa'i gnas nas 'pho ba po'i gang zag gi bdag med pa dang/ nyon mongs 'dul ba po'i gang zag gi bdag med par mngon sum du rtogs pa'i mthong lam zag med bzhi dang/ phyi rol don du snang yang phyi rol don du med pa rmi lam sgra brnyan mi sgyu mig yor sgyu ma bzhin du rtogs pa'i sgom lam zag bcas lnga/ phyi rol don gyi chags sogs kyi kun nas nyon mongs pa med pa dang/ dad sogs kyi rnam par byang ba med pa dang/ bag chags kyis gos pa med pa dang/ gzugs la sogs pa'i dbye ba'i spros pa med pa dang/ rang gi rtogs pa la ro myong ba'i rlom pa med pa dang/ rtogs pa thob zin nyams pa med pa'i g.yo ba med par mngon sum du rtogs pa'i sgom lam zag med drug dang bco lnga yod pa'i phyir/ gzhi shes kyi rnam pa 'chad pa'i skabs 'dir shes sgrib gzung rtog gi gnyen po bstan pa la 'gal ba med de/ gzugs 'dzin rdzas gzhan gyis stong pa'i stong nyid mngon sum du rtogs pa'i ye shes byang sems kyi rgyud la bskyed nas sgom pa'i gzhi shes yin pas/ gzhi shes kyi rnam pa mtha' dag nyams su len tshul 'chad pa'i skabs 'dir gtan la 'bebs rigs pa'i phyir/ de ltar yin kyang rang sangs rgyas kyi mngon rtogs su gsungs pa dang 'gal ba med de/ rnam gzhag gi dbang du byas nas rang rgyal gyi mngon rtogs su gsungs pa'i phyir/ gsungs pa la dgos pa yod de/ rnam gzhag gi rten so sor nges par byas nas rtogs rigs so sor ma 'dres par shes pa'i ched du yin pa'i phyir/ kha cig na re/ gzhi shes kyi rnam pa 'chad pa'i skabs 'dir shes sgrib gzung rtog gi gnyen po 'chad mi rigs par thal/ skabs 'dir gzhi shes kyi dmigs par gyur pa'i lam bden gyi @09a @#/ /rnam pa 'chad pa'i skabs yin pa gang zhig /gzhi shes kyi dmigs pa gang yin la/ gzhi shes kyis bsdus pas ma khyab pa'i phyir/ gal te khyab na/ de'i dmigs par gyur pa'i sdug kun gyi rnam pa brgyad po yang gzhi shes kyis bsdus par 'gyur ba'i skyon yod pa'i phyir/ 'on te/ yang lam bden gyi rnam pa la dmigs pa'i gzhi shes kyi rnam pa 'dir 'chad na gzhi shes kyi dmigs par gyur pa'i lam bden gyi rnam pa 'dir 'chad mi rigs pa thal/ lam bden gyi rnam pa la dmigs pa'i gzhi shes kyi rnam pa 'chad pa'i phyir/ 'dod na/ gzhi shes kyi dmigs par gyur pa'i bden pa bzhi'i rnam gzhag kyang 'dir gtan la ma phab par thal/ 'dod pa'i phyir/ gzhi shes kyi dmigs par gyur pa'i lam bden gyi rnam pa mtha' dag gtan la 'bebs na sangs rgyas 'phags pa'i rgyud kyi gzugs 'dzin rdzas gzhan gyis stong pa'i stong nyid rtogs pa'i ye shes de yang gtan la phab par thal lo/ /zhe na/ 'dod pa kho na'o/ /zhes gsungs so/ /'o na mngon par rtogs pa'i rgyan gyi skabs gang du yang rnam rdzogs sbyor ba'i ngo bor gyur pa'i gzhi shes kyi rnam pa nyams su len tshul zhig ma bstan par thal/ skabs 'dir gzhi shes kyi rnam pa nyer bdun rnam rdzogs sbyor bas zhi lhag zung 'brel gyi sgo nas nyams su len tshul ma bstan pa'i phyir te/ lam bden gyi rnam pa la dmigs pa'i gzhi shes ma bstan pa'i phyir/ 'dod na/ rgyan gyi ched du bya ba'i gdul byas rgyan la brten nas lam gsum shes pa'i lam shes rang rgyud la bskyed nas mi sgom par thal/ 'dod pa de'i phyir/ kha cig na re/ gzugs 'dzin rdzas gzhan gyis stong pa'i stong nyid mngon sum du rtogs pa'i sgom lam de rang rgyal gyi sgom lam yin nam/ theg chen gyi sgom lam yin pa dag las gang yin/ dang po ltar na mi rigs te/ byang chub sems dpas rang rgyud la bskyed nas/ shes mthong gi bltas nas 'da' ba'i lam du gsungs pa dang 'gal ba'i phyir/ gnyis pa ltar na mi rigs te/ byang sems rnams kyis mthong lam gyi gnas skabs su sgom pa lhur len gyi tshul gyis bsgoms pas shes mthong gi bltas nas 'da' ba'i lam du gsungs pa dang/ @09b sgom lam gyi gnas skabs su sgom pa lhur len gyi tshul gyis mi bsgoms pas gnas nas 'da' ba'i lam ma yin par gsungs pa'i phyir/ zer na skyon med de/ sgom lam du sgom pa lhur len gyi tshul du mi bsgoms kyang sgom pa tsam yod pa'i phyir/ rgyu dang lam dang sdug bsngal dang/ /zhes sogs kyi skabs su; mkhyen gsum gang rung gi rnam pa nyams su len pa'i byang 'phags kyi mkhyen pa/ 'dir dngos bstan gyi lam shes kyi rnam pa'i mtshan nyid/ de la dbye na so drug yod de/ kun 'byung gi rnam pa la dmigs pa brgyad/ lam bden gyi rnam pa la dmigs pa bdun/ sdug bden gyi rnam pa la dmigs pa lnga; 'gog bden gyi rnam pa la dmigs pa bcu drug yod pa'i phyir/ phyi ma der thal/ 'gog bden gyi rnam pa bzhi/ gzhir bzung nas/ de la 'phags rgyud kyi mig sogs bden pas stong ba sogs stong nyid bcu drug tu 'byed pa dang/ 'phags rgyud kyi mig sogs bden pas stong pa sogs stong nyid bcu drug dbye gzhir byas nas 'gog pa zhi ba sogs 'byed pa gang rung gi sgo nas 'jog pa yin pa'i phyir/ de skad du rnam bshad las/ 'gog bden gyi rnam pa bzhi gzhir bzung nas stong pa nyid kyi rnam pa bcu drug tu 'byed pa dang/ stong nyid bcu drug blo bur gyi dri ma dang bral ba 'gog pa'i rnam pa sogs su bsgrub pa gang byas kyang don 'dra bar mngon no/ /zhes gsungs pa'i phyir/ 'dir dngos bstan gyi lam shes kyi rnam pa la byang 'phags kyi mkhyen pas khyab ste/ 'grel pa las/ lam shes pa nyid kyi rnam pa ni byang chub sems dpa' rnams kyi nyon mongs pa shin tu ma spangs pa'i phyir/ zag pa dang bcas pa kho na yin no/ zhes gsungs pa'i phyir/ kun 'byung gi rnam pa la dmigs pa'i lam bden gyi rnam pa 'chad pa'i skabs su gang zag gi bdag med mngon sum du rtogs pa'i theg chen gyi mthong lam des dug gsum gyi zhen yul med par mngon sum du rtogs par gsungs pa'i don yang dang por rang rkya thub pa'i rdzas yod du zhen nas yid du 'ong mi 'ong gi tshul min yid byed kyi rnam rtog skye/ de la brten nas chags sdang sogs skye bas dang po'i rtsa ba gang zag gi bdag 'dzin gyi zhen yul med par mngon sum du rtogs pa'i don yin gyi/ dug gsum gyi zhen yul med par rtogs pa'i don ma yin te/ dug gsum dang 'dzin stags @10a @#/ /dngos 'gal ma yin pa'i phyir te/ dug gsum gang zag gi bdag 'dzin ma yin pa'i phyir/ dran pa nyer gzhag nas bzung ste/ zhes sogs kyi skabs su mkhyen gsum gyi rnam pa yar ldan gyi tshul du rdzogs pa'i mkhyen pa mthar thug /'dir bstan rnam mkhyen gyi rnam pa'i mtshan nyid yin te/ 'grel pa las/ rna pa thams cad mkhyen pa nyid kyi lam gyi rna pa ni yang dag par rdzogs pa'i sangs rgyas kyis nyon mongs pa dang shes bya'i sgrib pa'i bag chags dang bcas te rnam pa thams cad du spangs pas chos thams cad la mnga' bsgyur ba'i phyir/ zag pa med pa kho na dag yin te/ zhes gsungs pa'i phyir/ rnam mkhyen gyi rnam pa la dbye na/ nyan thos kyi rgyud la yod pa dang rjes su mthun pa'i rnam mkhyen gyi rnam pa so bdun/ byang sems kyi rgyud la yod pa dang rjes su mthun pa'i rnam mkhyen gyi rnam pa so bzhi/ thun mong ma yin pa'i rnam mkhyen gyi rnam pa so dgu yod pa'i phyir/ sangs 'phags kyi thugs rgyud kyi dran pa nyer gzhag sogs byang phyogs so bdun po nyan thos kyi rgyud la yod pa dang rjes su mthun pa'i rnam mkhyen gyi rnam pa dang/ yang de dang sangs rgyas 'phags pa'i rgyud kyi thun mong ba'i rnam thar du gsungs pa rnams dang mi 'gal te/ rnam gzhag gi rten so sor nges par bya ba'i ched du yin pa'i phyir dang/ nyan thos kyi rgyud la yod pa dang rjes mthun gyi rnam mkhyen gyi rnam pa yin na byang sems kyi rgyud la yod pa dang rjes su mthun pa'i rnam mkhyen gyi rnam pa yin dgos pa'i phyir te/ sangs rgyas kyi sa'i ye she sla mkhyen pa gsum du 'byed rigs pa'i phyir te/ sangs rgyas kyi sa na mkhyen gsum gyi rnam pa yar ldan gyi tshul du rdzogs pa yod pa'i phyir/ sangs rgyas kyi sa'i ye shes la mkhyen pa gsum du 'byed pa'i rgyu mtshan yod de/ de ltar ma phye na mkhyen pa gsum po lam gang gi gnas skabs su rang rgyud la bskyed nas sgom pa dang/ sangs rgyas kyi sa na mkhyen gsum gyi yon tan yar ldan gyi tshul du yod pa de shes par mi 'gyur ba'i phyir/ sangs rgyas kyi sa'i dran pa nyer gzhag sogs nyan thos kyi rgyud la yod pa dang rjes su mthun pa'i rnam mkhyen gyi rnam pa yin kyang/ dngos po la yongs su rtogs @010b pa'i lam la zhes/ dran pa nyer gzhag tshogs lam nas bshad pa dang mi 'gal te/ theg chen gyi rigs can rnams kyis sangs 'phags kyi rgyud kyi dran pa nyer gzhag bsgoms pa la brten nas tshogs lam gyi gnas skabs su dran pa nyer gzhag mtshan nyid pa thob pa'i rgyu mtshan gyis de ltar bshad pa'i phyir/ thun mong ba dang thun mong ma yin pa'i khyad par ji lta bu yin zhe na/ kha cig rang gi sde tshan mtshan nyid pa dang/ nang tshan mtshan nyid pa/ nyer len mtshan nyid pa 'phags pa 'og ma pa'i rgyud la yod med dang/ bsgom bya thun mong ba yin min gyi sgo nas 'jog pa rnams las/ dang po gnyis po mi 'thad par thal/ sangs 'phags kyi rgyu kyi dran pa nyer gzhag gi sde tshan mtshan nyid pa dang nang tshan mtshan nyid pa 'phags pa 'og ma pa'i rgyud la med pa'i phyir/ der thal/ de rgyud la ldan pa'i 'phags pa 'og ma pa med pa'i phyir/ gsum pa mi 'thad de/ rnam mkhyen skad cig dang po la gnas pa'i sangs 'phags kyi thugs rgyud kyi stobs bcu'i nyer len mtshan nyid pa 'phags pa 'og ma pa'i rgyud la yod pa'i phyir/ der thal/ de 'dra'i sangs 'phags dang rgyud gcig tu gyur pa'i rgyun mtha'i bar chad med lam pa'i rgyud la de'i nyer len yod pa'i phyir dang/ shes pa yin na rang gi nyer len snga ma las byung bas khyab pas phyir/ rnam 'grel las/ rnam shes min pas rnam shes kyi/ /nyer len mi byed phyir yang 'grub/ /ces gsung pa'i phyir/ bzhi pa mi 'thad de/ sangs 'phags kyi thugs rgyud kyi stobs bcu po 'phags pa 'og ma pa dang bsgom bya thun mong ba yin pa'i phyir/ der thal/ de byang sems kyis kyang sgom/ sangs 'phags kyis kyang sgom pa'i phyir/ dang po der thal/ des rnam mkhyen gyi rnam pa brgya dang bcu sgom pa'i phyir/ rnam rdzogs sbyor ba brgya dang bcu yod pa'i phyir/ rang lugs la/ 'phags pa 'og ma'i rgyud la yod pa dang rjes su mthun pa'i rnam mkhyen gyi rnam pa/ thun mong ba'i rnam mkhyen gyi rnam pa'i mtshan nyid/ de la dbye na/ nyan thos kyi rgyud la yod pa dang byang sems kyi rgyud la yod pa dang rjes su mthun pa'i rnam mkhyen gyi rnam pa gnyis/ sangs rgyas 'phags pa kho na'i rgyud la yod pa dang rjes su mthun pa'i rnam mkhyen gyi rnam pa/ thun mong ma yin pa'i rnam mkhyen gyi rnam pa'i mtshan nyid/ mtshan gzhi sangs 'phags @11a @#/ /kyi rgyud kyi stobs bcu lta bu yin/ kho na re/ sangs 'phags kyi rgyud kyi dran pa nyer gzhag bzhi po chos can/ thun mong ba'i rnam mkhyen gyi rnam pa ma yin par thal/ thun mong ma yin pa'i rnam mkhyen gyi rnam pa yin pa'i phyir/ der thal/ sangs 'phags kho na'i rgyud kyi rnam mkhyen gyi rnam pa yin pa'i phyir/ zer na/ byang sems mthong lam pa'i rgyud kyi mi rtag sogs rtogs pa'i ye shes chos can/ skyes bu 'bring dang thun mong ba'i lam ma yin par thal/ skyes bu chen po dang thun mong ma yin pa'i lam yin pa'i phyir/ der thal/ byang sems mthong lam pa kho na'i rgyud kyi lam yin pa'i phyir khyab pa khes/ ! dran pa nyer gzhag ces sogs kyi skabs su byang phyogs so bdun spyi'i rnam gzhag bshad pa dang/ sde tshan so so'i rang bzhin bshad pa'o/ /dang po la sgra don/ sa mtshams/ dbye ba bsdu ba bshad pa dang gsum/ dang po la dran pa nyer gzhag sogs so bdun po de la byang chub kyi phyogs dang mthun pa zhes 'chad pa'i rgyu mtshan yod de/ zad mi skye shes kyi ye shes mthar thug de byang chub yin zhing de thob pa dang rjes su mthun pa'i rgyu mtshan gyis de ltar bshad pa'i phyir/ mdzod las/ zad dang mi skye shes pa ni/ /byang chub de dang mthun nyid phyir/ /sum cu rtsa bdun de phyogs mthun/ /zhes gsungs pa'i phyir/ gnyis pa la/ mdzod pa ba rnams ni dran pa nyer gzhag tshogs lam dang/ yang dag spong ba rdzu 'phrul gyi rkang pa dbang stobs gnyis sbyor lam drod sogs bzhi la rim pa bzhin du 'jog pa dang/ byang chub yan lag sgom lam dang/ 'phags lam yan lag mthong lam nas 'thob par bzhed de/ mdzod las/ sde tshan bdun ni go rim bzhin/ /las ni dang po pa dag dang/ /nges 'byed cha mthun rnams dang ni/ /sgom dang mthong la rab tu phye/ /zhes gsungs pa'i phyir/ rang lugs la/ dran pa nyer gzhag /yang dag spong ba/ rdzu 'phrul gyi rkang pa gsum tshogs lam chung ngu 'bring chen po gsum nas thob/ dbang po lnga brod nas/ stobs lnga bzod pa nas/ byang chub yan lag mthong lam mnyam gzhag ye shes nas/ 'phags lam yan lag mthong lam rjes thob ye shes nas thob pa'i phyir/ de yang thob skal @11b rtsis pa'i dbang du byas pa yin gyi/ sa mtshams nges pa can ma yin te/ theg chen tshogs lam chung ngu ba'i rgyud la yang dag spong ba yod pa'i phyir/ gsum pa la/ sde tshan gyi sgo nas dbye na 'dun/ rgyas par dbye na so bdun yod cing/ rdzas kyi sgo nas bsdu na bcur 'du ste/ dad pa'i dbang stobs gnyis dad pa'i rdzas du 'dus/ yang dag spong ba/ brtson 'grus kyi dbang stobs gnyis/ yang dag pa'i rtsol ba/ brtson 'grus yang dag byang chub kyi yan lag rnams brtson 'grus kyi rdzas dang/ dran pa'i dbang stobs gnyis/ yang dag pa'i dran pa/ dran pa yang dag byang chub kyi yan lag rnams dran pa'i rdzas su 'du/ dran pa nyer gzhag bzhi/ shes rab kyi dbang stobs gnyis/ chos rab tu rnam 'byed yang dag byang chub kyi yan lag /yang dag pa'i lta ba rnams shes rab kyi rdzas su 'du/ rdzu 'phrul gyi rkang pa bzhi/ ting nge 'dzin gyi dbang stobs gnyis/ ting nge 'dzin yang dag byang chub kyi yan lag /yang dag pa'i ting nge 'dzin rnams ting nge 'dzin gyi rdzas su 'du/ btang snyoms yang dag byang chub kyi yan lag btang snyoms kyi rdzas su 'du/ dga' ba yang dag byang chub kyi yan lag dga' ba'i rdzas su 'du/ yang dag pa'i rtog pa rtog pa'i rdzas dang/ yang dag pa'i ngag /yang dag pa'i las kyi mtha'/ yang dag pa'i 'tsho ba dang bcas pa rnams tshul khrims kyi rdzas su 'du/ shin tu sbyangs pa yang dag byang chub kyi yan lag shin sbyangs kyi rdzas su 'du ba'i phyir te/ mdzod las/ ming gi sgo nas rdzas su bcu/ /dad dang brtson 'grus dran pa dang/ /shes rab ting 'dzin btang snyoms dga'/ /rtog dang tshul khrims shin tu sbyangs/ / zhes gsungs pa'i phyir/ gnyis pa la/ dran pa nyer gzhag gi sde tshan sogs bdun las/ dang po la/ dran pa nyer gzhag gi dmigs pa/ ngo bo// grogs/ sgom tshul/ sgom pa'i dgos pa/ sgra don no// dang po dmigs pa'i khyad par yod de/ zag bcas kyi lus tshor sems chos bzhi de'i dmigs pa yin pa'i phyir/ de la yang phyi'i lus/ nang gi lus/ phyi nang gnyis ka'i lus sogs gsum gsum yod cing/ gsum po rnams kyi khyad par yod de/ skyes bu'i dbang po'i tshogs bas zin pa'i mig dbang sogs nang gi lus dang/ des ma zin pa'i gzugs sgra sogs phyi'i lus dang/ dbang rten @12a @#/ /khog pa phyi nang gnyis ka'i lus dang/ de'i steng gi tshor ba gsum/ sems gsum/ ldan min 'du byed du gyur ba'i chos gsum po rnams la rim pa bzhin du nang gi tshor ba sogs su 'jog pa'i phyir/ de dmigs par 'jog pa'i rgyu mtshan yod de/ byis pa rnams kyis lus bdag gi gnas dang/ tshor ba longs spyod kyi gzhi dang/ sems bdag gi ngo bo dang/ chos kun nas nyon mongs pa dang rnam par byang ba'i gzhir zhen pa'i sgo nas gang zag gi bdag tu zhen pas de dag dgag pa'i ched du yin pa'i phyir/ ngo bo ni dran pa dang shes rab ci rigs par 'jog pa yin te; mdzod las/ dran pa nyer gzhag shes rab ste/ /zhes dang/ kun btus las ngo bo nyid gang zhe na/ shes rab dang dran pa'o/ /zhes gsungs pa'i phyir/ de yang gtso che ba'i dbang du byas pa yin gyi der nges pa ma yin te/ de dang mtshungs ldan gyi sems byung rnams kyang de dag yin pa'i phyir te; mdzod las/ gtso bo smos pa de dag ni/ /sbyor byung yon tan kun kyang yin/ /zhes gsungs pa'i phyir/ de ltar byas na rang gi gzhal bya'i blang dor gyi gnas la so sor dbyad pa'i don dran pas mi brjed par 'dzin pa'i lta spyod gnyis su phye ba'i lta ba'i char gtogs kyi mkhyen pa/ dran pa nyer gzhag gi mtshan nyid/ de la dbye na/ lus dran pa nyer gzhag sogs bzhi yod/ grogs kyi khyad par yod de/ de dag dang mtshungs ldan gyi sems sems byung rnams de'i grogs yin pa'i phyir te/ kun btus las/ grogs gang zhe na/ de dang mtshungs par ldan pas sems dang sems las byung ba'i chos rnams so/ /zhes gsungs pa'i phyir/ sgom tshul la rang gi mtshan nyid lus mi gtsang ba dang/ tshor ba sdug bsngal ba dang/ sems mi rtag pa dang/ chos kun nas nyon mongs pa'i chos spang bya dang/ rnam byang gi chos rnams blang byar sgom pa dang/ spyi'i mtshan nyid 'dus byas thams cad mi rtag pa/ zag pa dang bcas pa sdug bsngal ba/ chos thams cad stong zhing bdag med par sgom pa yin te/ mdzod las/ dran pa nyer gzhag bsgom par bya/ /lus tshor sems dang chos rnams la/ /mtshan nyid gnyis su yongs brtags pas/ /zhes gsungs pa'i phyir/ der ma zad/ byang @12b chub sems dpas spyi'i mtshan nyid chos thams cad bden med du yang sgom pa yin te/ rnam bshad las/ rang gi mtshan nyid lus mi gtsang ba sogs dang spyi'i mtshan nyid mi rtag pa sogs dang bden pas stong bar shes rab kyis rtogs nas dran pas de la rtse gcig tu 'jog par byed pa'o/ /zhes gsungs pa'i phyir/ gzhan yang byang sems rnams kyi dran pa nyer gzhag sgom tshul yod de/ chags pa'i gnyen por mi sdug pa sgom pa dang/ rnam rtog gi gnyen por dbugs 'byung rngub la dmigs nas sgom pa yin pa'i phyir/ mdzod las/ de la 'jug pa mi sdug pa/ /dbugs rngub 'byung ba dran pa yis/ /'dod chags rnam rtog lhag rnams so/ /zhes gsungs pa'i phyir/ chags pa'i gnyen por mi sdug ba sgom tshul la yang so so'i gnyen po sgom tshul dang/ spyi'i gnyen po sgom tshul gnyis las/ dang po ji ltar sgom tshul yod de/ kha dog sogs la chags pa'i gnyen por dur khrod kyi ro rnam par dmar ba dang/ brngas pa sogs la dmigs nas bdag gi lus kyang 'di lta bu'i chos can 'di lta bu'i rang bzhin can mtshan nyid 'di lta bu las ma 'das so snyam du sgom pa'i phyir/ spyi'i gnyen po rkeng rus sgom pa yin zhing/ de yang las dang po bas sgom tshul yod de/ dpral ba'i dbus su sma btod de mtheb gang tsam gyi rus pa la dmigs nas sgom zhing/ de yang lus ril bu'i bar du rkeng rus kyis khyab par spros te sgom zhing slar yang mtheb gang tsam gyis rus pa de nyid la bsdus te sgom pa'i phyir te/ mdzod las/ rkeng rus chags bcas thams cad la/ /rus pa rgya mtsho'i bar du ni/ /spro zhing sdud pas las dang po/ /zhes gsungs pa'i phyir/ dpyad pa cung zad byas pa'i sgom tshul yod de/ sngar bshad pa ltar spro bsdu byas nas thod phyed yan chad kyi rus pa la dmigs nas sgom pa'i phyir te/ mdzod las/ rkeng rus nas ni thong phyed bar/ /btang bas sbyong ba byas par bshad/ /ces gsungs pa'i phyir/ yid byed rdzogs pa'i gang zag gi sgom pa'i tshul yod de/ spro bsdu sngar ltar byas pa la brten nas smin ma'i dbus su mtheb gang tsam gyi rus pa la dmigs nas sgom pa'i phyir te/ mdzod las/ smin ma'i bar du sems 'dzin pas/ /yid la byed pa rdzogs pa yin/ /zhes gsungs pa'i phyir/ de ltar sgom pa la dgos pa yod de/ de la brten nas zhi gnas skye zhing zhi @13a @#/ /gnas la brten nas lhag mthong gi ngo bo dran pa nyer gzhag skye ba'i phyir te/ mdzod las/ zhi gnas grub par gyur pa yis/ /dran pa nyer gzhag bsgom par bya/ /zhes gsungs pa'i phyir/ mdor bsdu na/ dran pa nyer gzhag sgom tshul yod de/ bden bzhi'i blang dor gyi gnas la shes rab kyis dpyad nas dran pas mi brjed par 'dzin pa'i tshul gyis sgom par byed pa'i phyir/ dran pa nyer gzhag sgom pa la dgos pa yod de/ gtsang bde rtag bdag tu 'dzin pa sogs phyin ci log bzhi'i gnyen po byed pa dang/ bden bzhi'i blang dor la 'jug pa'i dgos pa yod pa'i phyir/ der thal/ de nyid las/ phyin ci log gi gnyen por bzhi/ zhes gsungs pa'i phyir/ gnyis pa der thal/ lus mi gtsang bar sgom pa la brten nas lus gnas ngan len gyi ngo bor khong du chud pa'i sgo nas sdug bden shes byar khong du chud pa de 'byung/ tshor ba dran pa nyer gzhag sgom pa la brten nas tshor bas sred pa 'dren/ des 'khor ba'i rgyu byed pa mthong nas/ kun 'byung bden pa spang byar khong du chud ba de 'byung/ sems mi rtag par sgom pa la brten nas sems skad cig snga phyi skye 'jig byed pa mthong ste sems kyi steng du sdug kun 'gags pa'i 'gog pa mngon sum du bya nus su mthong nas 'gog pa thob byar shes pa 'byung/ chos dran pa nyer gzhag sgom pa la brten nas kun nas nyon mongs kyi chos rnams dor bya dang rnam byang gi chos rnams blang byar dmigs pa'i sgo nas blang dor tshul bzhin byed cing lam bdag med rtogs pa'i ye shes bsten byar khong du chud pa de 'byung ba'i phyir te/ dbus mtha' las/ gnas ngan len phyir sred rgyu'i phyir/ /gzhi yi phyir dang ma rmongs phyir/ /bden pa bzhi la 'jug bya bas/ /dran pa nye bar gzhag pa sgom/ /zhes gsungs pa'i phyir/ de la dran pa nyer gzhag ces 'chad pa'i rgyu mtshan yod de/ shing gshegs pa khye'u sa ? 'dzin zhes brjod pa ltar blang dor gyi gnas la shes rab kyis so sor dpyad nas dran pas mi brjed par 'dzin pas de ltar bshad pa'i phyir/ gnyis pa yang dag spong ba'i sde tshan la/ dmigs pa sogs drug las/ dmigs pa'i khyad par yod de/ mi dge ba'i chos skyes pa dang skye 'gyur dang/ @13b dge ba'i chos skyes pa dang skye 'gyur rnams de'i dmigs pa yin pa'i phyir/ ngo bo ni dran pa nyer gzhag thob pa'i gang zag gi rgyud kyi rang gi gzhal byar gyur ba'i blang dor gyi gnas la spro ba'i lta spyod gnyis kyi nang nas lta ba'i char gtogs kyi mkhyen pa/ yang dag spong ba'i mtshan nyid/ de la dbye na mi dge ba'i chos skyes ba spong ba sogs bzhi las/ gsum pa dran pa nyer gzhag bzhin/ bzhi pa la/ mdo las bstan tshul yod de/ mi dge ba'i chos skyes pa spong ba'i phyir/ 'dun pa skyed do// 'bad do// brtson 'grus rtsom mo rab tu 'dzin to// rab tu 'jug go/ zhes gsungs pa'i phyir/ kun btus las/ de ltar gsungs pa'i mtha' ma 'di ni brtson 'grus sgom pa gnas dang bcas pa'o/ /zhes dang/ mdo sde rgyan las/ 'dun pa la ni brten nas su/ /rnal 'byor rgyu mtshan bcas sgom pa/ /yang dag spong ba thams cad la/ /gnyer po zhes ni nges par brjod/ /ces gsungs pa rnams kyis sgom tshul bstan pa rnams kyi don yod de/ thog mar blang dor gyi gnas la 'dun pa skyed/ de nas blang dor la 'bad pas brtson 'grus rtsom/ ji ltar rtsom na bying ba skyes na dkon mchog gi yon tan dran pa'i sgo nas sems gzengs stod de/ dmigs pa la sems 'dzin par byed/ rgod pa skyes pa'i che 'khor ba'i nyes dmigs sems pa sogs kyi sgo nas sems 'phang smad de dmigs pa la rtse gcig tu 'jog par byed pa'i phyir/ mdor bsdu na/ yang dag spong ba sgom tshul yod de/ blang dor la tshul bzhin du 'jug pa'i phyir du zhi lhag zung 'brel sgom pa la brtson 'grus rtsom pa yin pa'i phyir/ lnga pa sgom pa la dgos pa yod de/ mi dge ba'i chos skyes pa spong ba sogs kyi dgos pa yod pa'i phyir/ drug pa la de bzhi po la yang dag spong ba zhes 'chad pa'i rgyu mtshan yod de/ mi dge ba'i chos skyes pa spong ba'i phyogs gcig gi ngos nas de ltar bshad pa yin pa'i phyir/ gsum pa rdzu 'phrul gyi rkang pa bshad pa la/ de'i dmigs pa'i khyad par yod de/ ting nge 'dzin la brten nas 'grub par 'gyur ba'i sprul sgyur sna tshogs ba rnams de'i dmigs pa yin pa'i phyir/ gnyis pa ni gtso bo'i dbang du byas nas ting nge 'dzin du bshad de/ mdzod las/ rdzu 'phrul rkang pa ting 'dzin to/ /zhes dang// @14a @#/ /kun btus las ngo bo nyid gang zhe na/ ting nge 'dzin to /zhes gsungs pa'i phyir/ de yang gtso bo'i dbang du byas te/ mdzod las/ gtso bo smos pa de dag ni/ /zhes sogs gsungs pa'i phyir/ de ltar byas na yang dag spong ba thob pa'i gang zag gi rgyud kyi sprul sgyur sna tshogs kyi rten byed pa'i rigs su gnas pa'i dge ba'i dmigs pa la rtse gcig tu gnas pa'i ye shes/ rdzu 'phrul gyi rkang pa'i mtshan nyid/ de la grogs kyi sgo nas dbye na/ 'dun pa'i rdzu 'phrul gyi rkang pa/ brtson 'grus kyi de/ sems pa'i de/ spyod pa'i rdzu 'phrul gyi rkang pa dang bzhi yod/ de bzhi'i khyad par yod de/ rim pa bzhin du gus sbyar la brten nas sems rtse gcig pa la reg pa dang/ rtag sbyor la brten nas de dang/ sngon ting nge 'dzin gom pa la brten nas de dang/ gzhan gyis bstan pa'i mthu la brten nas sems rtse gcig pa la reg pa rnams yin pa'i phyir/ gsum pa grogs sngar bzhin/ bzhi pa sgom tshul la skabs 'dir rdzu 'phrul gyi rkang pa sgom tshul dang/ zhi gnas sgom tshul gnad gcig pas de'i dbang du byas na/ mdo sde rgyan nas bshad tshul dang/ dbus mtha' nas bshad tshul gnyis las/ 'dir ni phyi ma'i dbang du byas nas/ nyes pa lnga'i gnyen por spang ba'i 'du byed brgyad brten nas sgom pa yin te/ dbus mtha' las/ nyes pa lnga spong 'du byed brgyad/ /bsten pa'i rgyu las byung ba'o/ /zhes gsungs pa'i phyir/ ting nge 'dzin sgom pa'i gegs nyes pa de la brgyad yod de/ ting nge 'dzin sgom pa la 'jug pa'i snga rol du le lo nyes pa/ 'jug pa'i tshe gdams ngag brjed pa nyes pa/ sgom bzhin pa'i tshe bying rgod nyes pa/ bying rgod byung ba'i tshe gnyen po mngon par 'du mi byed pa nyes pa/ ting nge 'dzin skyon med du gnas pa'i tshe gnyen po mngon par 'du byed pa nyes pa yin pa'i phyir/ de nyid las/ le lo dang ni gdams ngag rnams/ /brjed dang bying dang rgod pa dang/ /'du mi byed dang 'du byed de/ /'di dag nyes pa lngar 'dod do/ /zhes gsungs pa'i phyir/ lnga po de'i gnyen por 'du byed brgyad brten tshul yod de/ le lo'i gnyen por brtson 'grus rgyu 'bras bzhi/ gdams ngag brjed pa'i gnyen por dran pa/ bying @14b rgod kyi gnyen por de la rtog pa'i shes bzhin/ gnyen po mngon par 'du mi byed pa'i gnyen por/ gnyen po mngon par 'du byed pa'i 'du byed sems pa dang/ ting nge 'dzin skyon med du gnas pa'i tshe gnyen po 'du byed pa'i gnyen por 'du mi byed pa'i btang snyoms brten par bya ba yin pa'i phyir/ brtson 'grus rgyu 'bras bzhi po de le lo'i gnyen por 'gyur tshul yod de/ dad pa 'dun pa'i rgyu/ 'dun pa brtson 'grus kyi gnas/ brtson 'grus le lo'i gnyen po dngos/ shin sbyangs brtson 'grus kyi 'bras bur byed cing/ shin sbyangs khyad par can gyis le lo'i gnyen po byed pa'i phyir/ sgom rim las/ shin tu sbyangs pa gang zhe na/ lus dang sems las su rung ba'i mtshan nyid de sgrib pa mtha' dag sel ba'i las can no/ /zhes gsungs pa'i phyir/ de ltar byas na gnyen po la ldan min 'du byed shin tu yang yod do/ /de skad du yang dbus mtha' las/ /gnas dang de la gnas pa dang/ /rgyu dang 'bras bu nyid du'o/ /dmigs pa brjed par ma gyur dang/ /bying dang rgod pa rtog pa dang/ /de spong mngon par 'du byed dang/ /zhi tshe rnal du 'jog pa'o/ /zhes gsungs pa'i phyir/ mdo sde rgyan las rten bsam gtan gyi dngos gzhi dang/ rab dbye sngar bshad pa bzhi dang/ thabs bzhi dang/ 'bras bu mngon par 'grub pa drug gis sgo nas bstan te/ mdo sde rgyan las/ brtan pa rnams kyi rdzu 'phrul gyi/ /rkang pa mtshan nyid mchog ldan bzhi/ /bdag nyid dang ni gzhan dag gi /don kun bsgrub pa'i phyir skye'o/ /zhes gsungs pa'i phyir/ de yang spong ba'i 'du byed brgyad kyi nang nas dang po gsum 'bad par byed pa'i thabs/ shin sbyangs phan 'dogs byed kyi thabs/ dran shes bzhin gnyis gtod par byed pa'i thabs/ sems pa btang snyoms gnyis gnyen po'i thabs dang bzhis 'bras bu mngon par grub pa yin no/ /drug pa ni yul mthong ba spyan lnga/ gdams ngag nyan pa'i rgyu mngon shes drug /rdzu 'phrul gyi rtse pa/ smon lam khyad par can gyi sgo nas ji ltar 'dod pa bzhin gyi bya ba byed pa/ dbang bcu 'thob par byad pa/ mthar thug gi 'bras bu stobs dang mi 'jig pa rnams yin te/ mdo sde rgyan las/ bsam gtan pha rol phyin brten nas/ /rab tu dbye ba dag dang thabs/ /rnam bzhi mngon par sgrub pa @15a @#/ /ni; ;rnam pa drug tu brjod pa yin/ /zhes gsungs pa'i phyir/ lnga pa sgom pa la dgos pa yod de/ sprul sgyur sna tshogs 'grub de la brten nas rang gi ting nge 'dzin la rtsal sbyang gzhan 'dun pa sogs kyi dgos pa yod pa'i phyir/ drug pa sgra don la/ de la rdzu 'phrul gyi rkang pa zhes 'chad pa'i rgyu mtshan yod de/ rdzu 'phrul khyad par can gyi rten byed pa'i rgyu mtshan gyis de ltar bshad pa'i phyir/ bzhi pa dbang po lnga la dmigs pa sogs rnam pa drug las/ thun mong ba'i dbang du byas na bden pa bzhi la dmigs pa dang/ thun mong ma yin pa'i dbang du byas na/ byang chub chen po dang/ rgyal sras kyi spyod pa dang/ theg chen gyi gdams ngag thos pa dang/ theg chen gyi zhi gnas dang/ theg chen gyi lhag mthong rnams theg chen gyi dad sogs dbang po lnga po des rim pa bzhin du dmigs pa yin te/ mdo sde rgyan las/ byang chub spyod dang thos mchog dang/ /zhi gnas lhag mthong dad sogs kyis/ /gzhi yin par ni shes bya ste/ /zhes gsungs pa'i phyir/ sbyor lam drod yan chad thob pa'i gang zag gi rgyud kyi dad sogs dbang po lnga po gang rung gis bsdus pa'i rang 'bras 'phags lam skyed pa la dbang byed pa'i mkhyen pa/ 'dir bstan dbang po'i mtshan nyid/ de la rnam pa lnga yod de/ der gyur ba'i dad pa/ brtson 'grus/ dran pa/ ting nge 'dzin/ shes rab kyi dbang po dang lnga yod pa'i phyir/ gsum pa sngar bshad pa las shes nus so/ /bzhi pa sgom tshul la/ thun mong ba'i dbang du byas na rim pa bzhin du bden bzhi'i blang dor la dmigs pa'i yid ches gyi dad pa/ de la spro ba'i brtson 'grus/ 'dor len mi byed pa'i dran pa/ de la rtse gcig pa'i ting nge 'dzin/ de la dmigs pa'i so sor dpyod pa'i shes rab rnams bying rgod kyi skyon dang bral bar byas nas sgom/ thun mong ma yin pa'i dbang du byas na yul lnga po de la dmigs nas rim pa bzhin du/ dang ba dang 'dod pa'i dad pa/ spro ba'i brtson 'grus/ tshig don mi brjed pa'i dran pa rtse gcig pa rnams dang/ chos rab tu rnam 'byed rnams bying rgod dang bral bar byas te sgom pa yin no/ /lnga pa la dgos pa yod de/ bden pa myur du rtogs pa dang/ sbyor lam bzhi rdzogs pa'i dgos pa yod pa'i @15b phyir/ drug pa la/ de la dbang po zhes 'chad pa'i rgyu mtshan yod de/ sgom byunggtso bor gyur ba'i sgo nas rang 'bras rnam byang bden pa skyed pa la dbang byed pa'i rgyu mtshan gyis de ltar bshad pa'i phyir/ lnga pa stobs la rnam pa drug las gzhan rnams phal cher dbang po dang mtshungs shing/ ngo bo'i dbang du byas na sbyor lam bzod pa thob pa'i gang zag gi rgyud kyi dad sogs dbang po lnga po gang rung gis bsdus shing ma dad pa sogs kyis brdzi mi nus pa dang/ rang 'bras 'phags lam skyed pa la stobs dang ldan pa'i ye shes/ 'dir bstan stobs kyi mtshan nyid/ de la dbye na/ der gyur pa'i dad sogs kyi stobs lnga yod/ lnga po 'di rnams dbang stobs gnyis su phye ba'i dbang po ma yin kyang spyir byang phyogs so bdun gyi nang tshan du gyur pa'i dbang po yin te/ dbang stobs gnyis la rdzas rigs la khyad par med pa'i phyir dang/ 'phags rgyud la yang dad sogs dbang po lnga yod pa'i phyir/ slob pa 'phags pa rnams la dad sogs dbang po rno rtul gyi khyad par yod pa'i phyir/ 'o na de gnyis kyi khyad par gang zhe na/ gnyis ka'i mnyam gzhag gi tshe mi mthun phyogs ma dad pa sogs mngon gyur du mi 'jug par mtshungs kyang/ rjes kyi gnas skabs su dad sogs nus pa che chung gi dbang gis mi mthun phyogs ma dad pa sogs kyis brdzi nus mi nus kyi khyad par yod pa yin te/ kun btus las/ dbang po ji lta ba bzhin du stobs rnams la yang de bzhin no 'di bye brag yin te/ mi mthun phyogs ji ltar bsrab pas mi srid pa'i phyir stobs rnams so/ /zhes dang/ mdo sde rgyan las/ mi mthun phyogs nyams chung bas kyang/ /de dag nyid la stobs zhes bya/ / zhes dang/ mdo las/ chung ngu dang chen po'i bye brag gis brdzi ba dang brdzi ba med pa'i phyir/ zhes gsungs pa'i phyir/ brdzi ba dang mi brdzi ba'i don yang ma dad pa sogs skyes pa'i tshe gnyen po bsten pa na de ma thag zhi nus mi nus la byed de/ gang gi lung rnams kyis 'grub pa'i phyir/ lnga po de la stobs zhes 'chad pa'i rgyu mtshan yod de/ rang gis mi mthun phyogs 'joms pa dang/ rang 'bras rnam byang bden pa bskyed pa la shin tu stobs dang ldan pa'i rgyu mtshan gyis de ltar bshad pa'i phyir/ drug pa byang chub yan lag la rnam pa drug las/ bden pa bzhi po de byang chub yan lag gi dmigs pa yin te/ @16a @#/ /theg pa gsum gyi byang chub yan lag gi ngo bor gyur pa'i mthong lam bar chad med lam la bden pa bzhi la dmigs pa'i cha nas bden pa mngon rtogs zhes brjod pa'i phyir/ gnyis pa ngo bo la 'phags rgyud kyi dran sogs bdun po gang rung gis bsdus pa'i rang gang la ldan pa'i gnas skabs dang mthar thug gi byang chen gang rung gi yan lag tu gyur pa'i ye shes/ de'i mtshan nyid/ de la dbye na/ dran pa yang dag byang chub kyi yan lag/ chos rab tu rnam 'byed yang dag gi de/ brtson 'grus yang dag gi de/ dga' ba yang dag gi de/ shin tu sbyangs pa yang dag gi de/ ting nge 'dzin yang dag gi de/ btang snyoms yang dag byang chub kyi yan lag dang bdun yod/ bdun po de byang chub kyi yan lag tu 'gyur tshul yod de/ theg chen gyi mthong lam bar chad med lam la mtshon na/ de'i tshogs pa na yod pa'i dran pas stong nyid mi brjed par byed pa'i gnas kyi yan lag bar chad med lam de dpyad sgom yin zhing/ chos rab tu rnam 'byed kyi shes rab kyis gnas lugs kyi don la dpyod par byad pas rang bzhin gyi yan lag /brtson 'grus kyis lam gong mar nges par 'byung bar byed pas nges 'byung gi yan lag /de na yod pa'i dga' ba des byang sems de rnams tshim par byad pas phan yon gyi yan lag yin zhing/ phyi ma gsum nyon mongs med pa'i yan lag yin te/ de na yod pa'i shin sbyangs kyi byang chub sems dpa' de nyon mongs med pa'i gzhi'i yan lag /ting nge 'dzin de nyan mongs med pa'i gnas kyi yan lag /'du byed btang snyoms de nyon mongs med pa'i ngo bo'i yan lag yin pa'i phyir te/ de gsum gyis rim pa bzhin mthong lam bar chad med lam gyi nyon mongs kun btags kyi sa bon spong ba'i gzhi dang/ gnas dang/ ngo bo byed pa'i phyir te/ mdo sde rgyan las/ rang bzhin yan lag gnas yan lag /gsum pa nges 'byung yan lag ste/ /bzhi pa phan yon yan lag yin/ /rnam gsum nyon mongs med yan lag /ces dang/ dbus mtha' las/ 'di la gzhi dang gnas dang ni/ /ngo bo nyid du bstan pa yin/ zhes gsungs pa'i phyir/ theg chen mthong lam bar chad med lam pa'i rgyud kyi don dam sems bskyed kyi 'khor du gyur pa'i dran sogs @16b bdun po 'di 'khor sgyur gyi rin po che sna bdun dang chos mtshungs pa yin te/ de lta bu'i dran pa des shes bya ma rgyal pa las rgyal zhing gcod par byed pas na 'khor lo rin po che dang chos mtshungs/ chos rab tu rnam 'byed kyis phas rgol lta bu'i bden 'dzin kun btags kyi mtshan ma 'joms par byed pas glang po rin po che dang chos mtshungs/ brtson 'grus des dge ba'i bya ba myur du sgrub par byed pas rta mchog rin po che dang chos mtshungs/ dga' bas chos kyi snang ba rgya chen po'i sgo nas 'dod pa sgrub pas nor bu rin po che dang chos mtshungs/ shin sbyangs kyis zag med kyi bde ba ster bas bcun mo rin po che dang chos mtshungs/ ting nge 'dzin gyis sprul bsgyur sogs kyi yon tan gyi 'byor ba nye bar skye bas khyim bdag rin po che dang chos mtshungs/ btang snyoms kyis byang sems dge ba'i dmigs pa la ji ltar 'dod pa bzhin gnas par byed pas blon po rin po che dang chos mtshungs pa'i phyir/ de skad du mdo sde rgyan las/ shes bya ma rgyal rgyal bya'i phyir/ /dran pa dag ni kun tu spyod/ /'di yi rnam 'byed rtog pa yi/ /mtshan ma thams cad 'joms par byed/ /'di yis brtson 'grus ma lus ba/ /myur du rtogs pa bya phyir 'jug /chos kyi snang ba 'phel ba'i phyir/ /dga' bas rtag tu rgyas par 'gyur/ /sgrib pa kun las thar ba'i phyir/ /shin tu sbyangs pas bde ba theb/ /ting nge 'dzin las bsams pa'i don/ /'byor ba nye bar skye par 'gyur/ /btang snyoms kyis ni thams cad du/ /'di ni ji ltar 'dod bzhin gnas/ /rjes la thob dang mi rtog pa'i/ /gnas pa mchog gis rtag tu gnas/ /yon tan da lta'i sems dpa' ni/ /'khor los bsgyur ba 'dra bar 'jug /rtag tu rin chen 'dun lta bu'i/ /byang chub yan lag rnams kyis bskor/ /zhes gsungs pa'i phyir/ gsum pa sngar ltar ro/ /bzhi pa la/ sdug kun gnyis spang bya dang 'gog lam gnyis blang byar sgom pa byang chub yan lag gi sgom tshul yin te/ sdug bden gyi nyes dmigs shes pa'i sgo nas des dben pa 'tshol zhing gnas/ kun 'byung gi nyes dmigs shes pa'i sgo nas kun 'byung la 'dod chags dang bral ba 'tshol zhing gnas/ 'gogs pa'i phan yon bsams pa'i sgo nas gnas/ bdag med rtogs pa'i lam gyis nyon mongs spong bar shes nas rnam par spang ba yongs su sgyur @17a @#/ /bsgom pa rnams byang chub yan lag gi sgom tshul yin pa'i phyir/ de skad du mdo las/ dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong ba yongs su sgyur ba sgom pa'o/ /zhes gsungs pa'i phyir/ lnga pa byang chub yan lag bdun sgom pa la dgos pa yod de/ mthong lam gyi ngo bor gyur pa'i bdun po de sgom pas mthong spang spong ba sogs kyi dgos pa yod pa'i phyir/ drug pa la bdun po de la byang chub yan lag ces 'chad pa'i rgyu mtshan yod de/ rang gi byang chub kyi yan lag tu gyur pa'i sgo nas de rdzogs par byed pa sogs kyis de ltar bshad pa'i phyir/ bdun pa 'phags lam yan lag la drug las/ dmigs pa sngar bshad pa ltar yin te/ mnyam rjes phugs gcig pa dang mi gcig pa gang gi dbang du byas kyang bden pa bzhi la dmigs dgos pa'i phyir/ yang dag pa'i lta ba sogs brgyad po gang rung gis bsdus pa'i 'phags rgyud kyi mkhyen pa/ de'i mtshan nyid/ de la dbye na/ der gyur pa'i yang dag pa'i lta ba sogs brgyad yod/ yang dag pa'i lta ba la 'phags lam yan lag gi yang dag pa'i lta ba dang/ yang dag pa'i rtog pa la de'i rtog pa dang/ ngag la de'i dag gis ma khyab ste/ so skye'i rgyud la yang dag pa'i lta ba yod cing/ mdo yin na yang dag pa'i ngag yin dgos pa'i phyir/ brgyad po de'i ngo bo dang yan lag tu 'gyur tshul ji lta bu zhe na/ mnyam rjes phugs gcig gi dbang du byas na yang dag pa'i lta ba ni mnyam gzhag gi gnas skabs su rtogs pa'i bdag med kyi don rjes kyi gnas skabs su gcod par byed pa'i ye shes yin la/ gcod par byed pa'i yan lag dang/ yang dag pa'i rtog pas ni mnyam gzhag tu rtogs pa'i don de nyid rjes kyi tshe gzhan la go bar byed pa'i ye shes yin pa'i go byed kyi yan lag dang/ yang dag pa'i ngag ni rang rgyud ldan gyi gang zag lta ba rnam dag dang ldan pa dang/ yang dag pa'i las kyi mtha' ni rang rgyud ldan gyi gang zag tshul khrims rnam dag dang ldan pa dang/ yang dag pa'i 'tsho ba ni rang rgyud la ldan pa'i gang zag 'dod pa chung zhing chog shes pa yo byad bsnyungs pa sogs kyi sgo nas spyod pa rnam dag dang ldan @17b @#/ /par yid ches pa'i ye shes yin pas yid ches pa'i yan lag dang/ yang dag pa'i rtsol ba yang dag pa'i dran pa yang dag pa'i ting nge 'dzin gsum ni gnyen po'i yan lag yin te/ dang pos rtsa nyon sogs spyi'i gnyen po byed/ gnyis pas bying rgod sogs nye nyon gyi gnyen po byed gsum pas snyom 'jug gi sgrib pa'i gnyen po byed pa'i phyir/ de skad du yang dbus mtha' las/ yongs su gcod dang go byed dang/ /rnam gsum gzhan yid ches par byed/ /mi mthun phyogs kyi gnyen por ni/ /lam gyi yan lag de brgyad de/ /lta dang tshul khrims yo byang snyungs/ /gzhan la rnam par rig byed 'dod/ /nyon mongs nye ba'i nyon mongs dbang/ /mi mthun phyogs kyi gnyen po'o/ /zhes gsungs pa'i phyir/ brgyad po de'i ngo bo yang dang po la lta bas khyab par khas blangs pa la nyes ba med/ gnyis pa ni rtog pa dang byed las mtshungs pa tsam gyis de ltar bshad kyi/ de la rtog pas ma khyab ste/ sangs rgyas kyi rgyud la yang de yod pa'i phyir/ yang dag pa'i ngag sogs gsum gyi rim pa bzhin du ngag gi rig byed khyad par can dang/ lus kyi rig byed khyad par can dang/ lus ngag gnyis ka'i rig byed khyad par can dang/ lhan cig 'jug pa'i ye shes dang/ phyi ma gsum ni spang bya gsum po de'i gnyen por gyur pa'i 'phags rgyud kyi dran pa; brtson 'grus ting nge 'dzin mtshan nyid pa la 'jog go/ mdo sde rgyan las/ de yi 'og tu ji lta bar/ /rtogs pa'i rjes su 'jug pa skye/ /rnam gzhag ji bzhin rtogs pa dang/ /rnam par gzhag la 'jug pa dang/ /las gsum rnam par dag pa dang/ /shes bya dag dang lam dang ni/ /yon tan khyad par can gyi ni/ /sgrib pa'i gnyen por sgom pa'o/ /zhes gsungs pa'i phyir/ brgyad po de bsdu na bslab pa gsum du 'du ste yang dag pa'i lta ba/ rtog pa/ rtsol ba/ dran pa bzhi shes rab kyi bslab pa/ las kyi mtha'/ 'tsho ba gsum/ tshul khrims kyi bslab pa/ yang dag pa'i ting nge 'dzin/ ting nge 'dzin gyi bslab par 'du ba'i phyir te/ phyi ma gnyis mnyam rjes phugs gcig gi dbang du byas nas/ de ltar bshad kyi snga ma la mnyam gzhag dang phyi ma la rjes thob kyis ma khyab ste/ mnyam rjes gnyis ka'i ngo bor gyur pa'i de gnyis ka yod pa'i phyir/ sgom tshul byang chub yan lag bzhin yin te/ kun btus las/ sgom @18a @#/ /pa ni byang chub yan lag bzhin no/ /zhes gsungs pa'i phyir/ sgom pa la dgos pa yod de/ sgom spangs spong ba spyi dang dpyod par byed pa sogs so so'i byed las kyi dgos pa yod pa'i phyir/ sgra don sla/ byang phyogs so bdun la thun mong dang thun mong ma yin pa gnyis gnyis yod pa gong gi lung rnams kyis grub cing de grub pa na so bdun po theg pa gsum ga'i rtogs rigs su gnas pa yang grub ste/ rigs can gsum ga'i slob pa 'phags pas bsgom bya'i gtso bor byas nas sgom pa'i phyir/ theg chen gyi rigs can rnams kyis sgom ste/ theg chen mthong lam bar chad med lam pa des theg chen mthong lam bar chad med lam gyi ngo bor gyur pa'i byang chub yan lag bdun sgom pa'i phyir/ de'i ngo bor gyur pa'i byang chub yan lag bdun yod pa'i phyir te/ mdo sde rgyan las/ rgyal sras byang chub phyogs mthun pa/ /rnam pa sna tshogs thams cad ni/ /rtag tu mthong ba'i lam de dang/ /lhan cig tu ni thob par 'dod/ /ces gsungs pa'i phyir/ sde tshan bdun gyi rjes su bshad pa'i lam bzhi'i khyad par yod de/ mngon par shes pa bul la dka' ba'i lam/ mngon par shes pa myur la dka' ba'i lam/ mngon par shes pa bul la sla ba'i lam/ mngon par shes pa myur la sla ba'i lam bzhi po yin pa'i phyir/ chos kyi gnas bzhi'i khyad par yod de/ brnabs sems med pa/ gnod sems med pa yang dag pa'i dran pa yang dag pa'i ting nge 'dzin rnams yin pa'i phyir/ ! byang sems kyi rgyud la yod pa dang/ rjes mthun gyi rnam mkhyen gyi rnam pa bshad pa la/ lam shes pa nyid la gnyen po'i lam/ zhes sogs kyi skabs su/ mtha' dpyad pa la/ thun mong dang thun mong ma yin pa'i rnam thar sgo gsum gyi dmigs rnam bshad pa dang/ gsung rab las rnam par thar pa stong nyid sogs gsum tshan gsum gsungs pa'i don bshad pa gnyis las/ dang po ni rnam thar sgo gsum gyi chos kyi sdom bzhi la dmigs pa'i tshe 'dus byas thams cad mi rtag pa/ zag bcas thams cad sdug bsngal ba gnyis rnam par thar pa'i sgo smon med kyi dmigs pa dang/ chos thams cad stong zhing bdag med pa rnam par thar pa'i sgo stong pa nyid kyi dmigs pa dang/ mya ngan las 'das pa zhi ba sgo @18b mtshan med kyi dmigs par 'jog ste/ mdo sde rgyan las/ ting 'dzin gsum gyi rgyu nyid du/ /chos kyi sdom ni rnam pa bzhi/ /byang chub sems dpa' rnams la bshad ces gsungs pa'i phyir/ bden pa bzhi la dmigs pa'i tshe dmigs par 'jog tshul yod de/ sdug bden gyi stong bdag med gnyis sgo stong pa nyid kyi dmigs par 'jog /'gog lam gyi rnam pa brgyad mtshan med kyi dmigs par 'jog /sdug bden gyi mi rtag sdug bsngal gnyis/ kun 'byung gi rnam pa bzhi ni sgo smon med kyi dmigs par 'jog pa'i phyir /mdzod pa pa ni 'gog bden gyi rnam pa kho na mtshan med kyi dmigs pa dang/ sdug bden gyi stong bdag med gnyis sgo stong nyid kyi dmigs par 'jog /rnam pa gzhan rnams smon med kyi dmigs par 'jog par byed de/ mdzod las/ mtshan med zhi ba'i rnam pa dang/ /stong nyid bdag med stong nyid du/ /'jug pa'o smon pa med pa ni/ /de las gzhan bden rnam pa'o/ /zhes gsungs pa'i phyir/ thun mong ma yin pa'i rnam thar sgo gsum po de'i dmigs pa'i khyad par yod de/ 'dus byas rnams kyi ngo bo rgyu 'bras gsum po de rim pa bzhin du dmigs par 'jog pa'i phyir/ gnyis pa la/ gsung rab las rnam par thar pa stong nyid sogs gsum dang/ stong nyid kyi ting nge 'dzin sogs gsum dang/ sgo stong pa nyid sogs gsum gsungs pa rnams kyi don yod de/ dang po gsum gyi rten gyi gang zag skye 'phags gnyis ka'i rgyud kyi sdug bden gyi stong bdag med rtogs pa'i thos bsam sgom gsum ga'i ye shes sogs rim pa bzhin du/ rnam par thar pa stong pa nyid gsum du 'jog pa dang/ skye 'phags gnyis ka'i rgyud kyi stong bdag med sogs rtogs pa'i sgom byung gi mkhyen pa kho na rnam par thar pa stong pa nyid kyi ting nge 'dzin sogs su 'jog pa dang/ 'phags pa'i rgyud kyi stong bdag med rtogs pa'i sgom byung gi ye shes kho na rnam par thar pa'i sgo stong nyid sogs su 'jog pa yin te/ gtan la dbab pa bsdu pa las/ gang du stong pa nyid dang/ smon pa med pa dang/ mtshan ma med pa bye brag med par gsungs pa der ni de dag thos pa dang bsam pa dang sgom pa las byung ba nyid yin par blta bar bya'o/ /gang du de dag ting nge 'dzin gyi sgra kho nar gsungs pa der ni de dag bsgoms pa las byung ba 'jig rten pa dang 'jig @19a @#/ /sten las 'das pa nyid yin par blta bar bya'o/ /gang du de dag rnam par thar pa'i sgo'i sgrar gsungs pa der ni de dag 'jig rten las 'das pa nyid yin par blta bar bya'o/ /zhes gsungs pa'i phyir/ de yang snga ma snga ma la phyi ma phyi mas ma khyab kyang/ phyi ma phyi ma la snga ma snga mas khyab bo/ /de ltar byas nas/ thun mong ba'i dbang du byas na skye 'phags gang rung gi rgyud kyi bdag med rtogs pa'i thos bsam sgom gsum gang rung gi lta ba'i char gtogs kyi mkhyen pa/ thun mong ba'i rnam par thar pa sgo stong pa nyid sogs dang/ mtshan med smon med gnyis/ ting nge 'dzin gyi sgras bstan pa gsum dang sgo'i sgras bstan pa gsum la yang mtshan nyid 'jog tshul ci rigs par shes par bya'o/ /rnam par thar pa'i sgo stong nyid sgom pa la dgos pa yod de/ bdag 'dzin la gnod byed kyi gnyen por 'gyur ba'i ched yin pa'i phyir/ mtshan med sgom pa la dgos pa yod de/ bdag lta de'i rgyu mtshan gyis tshul min yid byed kyi gnyen por 'gyur ba'i ched yin pa'i phyir/ smon med sgom pa la dgos pa yod de/ khams gsum la thob bya mthar thug tu smon pa'i gnyen po'i ched yin pa'i phyir/ des na thun mong ba'i rnam thar sgo gsum sgom pa/ bden bzhi mi rtag sogs bcu drug sgom pa skyes bu 'bring dang thun mong ba'i rgyud sbyong ba lta ba bkar btags kyi phyag rgya bzhi 'am/ chos kyi sdom bzhi sgom pa rnams gnad gcig cing/ thar pa dang thams cad mkhyen pa gang sgrub pa la yang med mi rung yin pas/ shin tu gces so// kha cig na re/ sangs rgyas 'phags pa'i rgyud kyi thun mong ba'i rnam thar sgo gsum byang phyogs so bdun bzhin du nyan thos kyi rgyud la yod pa dang rjes mthun yin pa la byang chub sems dpa'i rgyud la yod pa dang rjes mthun gyi rnam mkhyen gyi rnam pa 'chad pa'i skabs su 'chad pa ji ltar yin zer na/ 'di la 'bum gsum pa na re/ nyan thos rnams kyis gang zag gi bdag med rtogs pa'i shes rab kyis zin pas so bdun bsgom bya'i gtso bor byed pas de nyan thos kyi rgyud la yod pa dang rjes mthun gyi gzhi shes kyi rnam par bstan/ byang chub sems dpas sgo gsum po bden med rtogs pa'i shes rab kyis zin pa'i sgo nas sgom pa'i gsum po de byang chub sems @19b dpa'i rgyud la yod pa dang rjes mthun gyi lam shes kyi rnam par bstan pa yin gsungs/ 'o na so bdun po de yang byang chub sems dpas bdag med gnyis rtogs pa'i shes rab kyis zin pa'i sgo nas sgom pa'i phyir/ gser 'phreng las/ nyan thos rnams kyis nyon sgrib spong ba'i phyir du so bdun po rdzogs par sgom pas de rnams kyi rgyud la yod pa dang rjes mthun gyi gzhi shes kyi rnam pa bstan/ sgo gsum po byang chub sems dpas sgrib pa gnyis spong ba'i phyir du sgom pas byang chub sems dpa'i rgyud la yod pa dang rjes mthun gyi lam shes kyi rnam par bstan pa yin zhing/ 'di dang spong lam nyon sgrib kyi gnyen po'i rigs su gnas/ gzhan rnams shes sgrib kyi gnyen po'i rigs su gnas pa yin gsungs/ 'o na so bdun po yang byang chub sems dpa'i rgyud la yod pa dang rjes mthun gyi lam shes kyi rnam par 'chad rigs par thal/ so bdun po byang chub sems dpas sgrib gnyis spong ba'i phyir du rdzogs par sgom pa'i phyir dang/ spong lam dang gnyen po'i lam ston pa'i gzhung gnyis kyang zlod par thal/ gnyis kas mi rtag sogs bcu drug rtogs pa'i rnam mkhyen gyi rnam pa ston pa tsam du mtshungs pa'i phyir/ kha cig /'dir thun mong ma yin pa'i sgo gsum dngos su bstan pas mi 'gal zer na/ de yang mi 'thad de/ 'grel pa'i dngos zin dang 'gal spong lam ston pa'i gzhung dang zlos skyen du 'gyur ba'i phyir/ 'bre TIka las/ 'di ni mi shes pa snang ngo zhes gsungs/ de thams cad kyang nyan thos dang byang sems rtogs rigs 'gal ba dang nyan thos kyi rgyud la yod pa dang rjes mthun gyi rnam mkhyen gyi rnam pa yin na/ byang sems kyi rgyud la yod pa dang rjes mthun gyi rnam mkhyen gyi rnam pa ma yin dgos snyam du dgongs pa'i skyon du snang ngo/ /snying po rgyan rang lugs la/ de gnyis mi 'gal te/ byang chub sems dpas lam shes rdzogs par nyams su len pa la thun mong ba'i rnam thar sgo gsum gyis mtshon pa'i gzhi shes kyi rnam pa yang nyams su len dgos par shes pa'i phyir du thun mong pa'i rnam thar sgo gsum byang sems la yod pa dang rjes mthun gyi rnam mkhyen gyi rnam pa'i nang du bshad pa'i phyir/ spyir nyan thos kyi rgyud la yod pa dang rjes mthun gyi rnam mkhyen gyi rnam pa dang/ byang @20a @#/ /sems kyi rgyud la yod pa dang rjes mthun gyi rnam mkhyen gyi rnam pa mi 'gal te/ nyan thos kyi rgyud la yod pa dang rjes mthun gyi rnam pa yin na/ byang sems kyi rgyud la yod pa dang rjes su mthun pa'i rnam mkhyen gyi rnam pa yin dgos pa'i phyir/ sangs 'phags kyi rgyud kyi byang phyogs so bdun byang sems kyi rgyud la yod pa dang rjes mthun gyi rnam mkhyen gyi rnam pa yin pa'i phyir/ sems dpa'i rgyud la so bdun mtshan nyid pa tshang bar yod pa'i phyir/ ! sprul pa'i lam la gzugs kyi 'du shes rnam par ma bshig pa dang bshig pa dag gi /zhes sogs kyi skabs su mtha' dpyad pa la/ rten/ ngo bo// dgos pa/ sgra don rnams las/ dang po la/ lus rten gtso che ba'i dbang du byas na gzugs med kyi rnam thar khams gsum ga'i rten la skye/ gzugs can gyi rnam thar mi'i rten la skye ba yin te/ mdzod las/ gzugs med ces bya khams gsum gyi/ /rten can lhag ma mi las skye/ /zhes gsungs pa'i phyir/ sa'i dngos gzhi las mi kho na'i rten la skye ba dang/ de yang 'phags pa'i rten la skye bar gsungs pa ni theg dman gyi dbang du byas par mkhas pa kha cig bzhed/ rang lugs byang sems so skyes kyis kyang sgom ste/ theg chen tshogs lam chen po nas rdzu 'phrul gyi mngon shes/ chos rgyun gyi ting nge 'dzin sogs yon tan mtha' yas pa thob par gsungs pa'i phyir/ sems rten mdzod pa ba rnams gzugs can gyi rnam thar dang po gnyis ngo bo gzugs mi sdug pa sgom pa'i rnal 'byor dang bsam gtan dang po gnyis la brten/ gsum pa gzugs sdug pa sprul pa la ma chags shing bsam gtan bzhi pa la brten par bzhed de/ mdzod las/ rnam par thar brgyad dang po gnyis/ /mi sdug bsam gtan gnyis na yod/ /gsum pa tha na de ma chags/ /zhes gsungs pa'i phyir/ rang lugs sems rten ni rab mtha'i bsam gtan bzhi ba'i dngos gzhi la brten pa yin te/ kun btus las/ yon tan lhag ma rnams ni nyan thos sam byang chub sems dpa' 'am de bzhin gshegs pa yang rung ste dag pa'i bsam gtan bzhi pa la brten nas mngon par sgrub po zhes gsungs pa'i phyir/ kun btus @20b kyi lung 'dis phyi rol pa'i rgyud la rnam thar yod pa gcod/ kha cig /'di'i sems rten la bsam gtan gyi dngos gzhis khyab par 'dod pa mi rigs te/ nyi snang las/ bsam gtan dang gzugs med kyi dngos gzhi gdam nga can du gsung pa'i phyir/ nyi snang las/ sprul pa'i lam rnam pa gnyis las gzugs kyi 'du shes rnam par ma bshig pa nyid ni bdag nyid so sor bsam gtan nam gzugs med pa'i snyom par 'jug pa la brten nas gzugs kyi 'du shes mngon du byed pa ste/ gang gi gzugs kha dog bzang po dang/ ngan pa rnam la blta'o zhes bshad pa bzhin no/ /zhes gsungs pa'i phyir/ kha cig na re/ de'i skyon med de/ de'i don gzugs med kyi dngos gzhi rang lus la gzugs kyi 'du shes 'jog pa'i sems rten la dgongs zer/ kha cig/ gzugs med kyi dngos gzhi thob na gzugs kyi dus shes bshig sla ba la dgongs zer/ de gnyis ka mi 'thad de/ 'di gzugs can gyi rnam thar dang po'i skabs su byung ba gang zhig /dang po rnal 'byor pa rang lus la gzugs kyi 'du shes bshig pa'i rnam thar ma yin pa'i phyir/ yang kha cig /bsam gzugs brgyad la lugs 'byung lugs bzlog tu mnyam par gzhag slar yang yar song du mnyam par gzhag pa'i bsam gtan bzhi pa'i dngos gzhi rab mtha'i bsam gtan bzhi pa yin pas de'i sems rten la brten nas gzugs can gyi rnam thar dang po la mnyam par gzhag pa'i tshe gzugs med kyi dngos gzhi 'thob dgos pa'i de la dgongs zer na/ de yang mi 'thad par thal/ de ltar mnyam par gzhag pa'i tshe gzugs med kyi dngos gzhi 'thob dgos kyang de tsam gyi gzugs med kyi dngos gzhi de'i sems rten du bshad du mi rung ba'i phyir/ khyed rnams kyis sems rten gyi rten brten pa la rnam pa thams cad du ngo bo gcig pa'i rten brten par khas blangs pa'i phyir/ de ltar 'dod pa thams cad kyis sems rten gang la brten nas skyes pa'i yon tan de sems rten de'i ngo bor skye dgos su bya ba'i lugs su byas snang ste/ gzugs med kyi dngos gzhi'i sems rten las skye na gzugs dngos yul du byed pa'i slob pa'i rgyud kyi gzugs med kyi dngos gzhi yod par thal ba 'phen pa sha stag tu snang ba'i phyir/ 'o na 'gog snyoms srid @21a @#/ /rtse'i sems rten las skye bar bshad pa dang/ theg chen sems bskyed sangs rgyas la dmigs pa'i dad pa/ sems can la dmigs pa'i snying rje'i sems rten la brten nas skye ba dang/ dzi tA ris skyabs 'gro'i sems rten la brten nas skye bar gsungs pa sogs kyang mi 'thad par thal/ srid rtse'i dngos gzhir gyur pa'i 'gog snyoms med/ dad pa dang skyabs 'gro'i ngo bor gyur pa'i sems bskyed med pa'i phyir/ rang lugs la sems rten gyi rten brten pa la rnam pa thams cad du ngo bo gcig pas ma khyab cing/ nyi snang gi lung don yang yod de/ byang sems thams mkhas pas gzugs med kyi dngos gzhi'i de ma thag bsam gtan gyi dngos gzhi'i ngo bor gyur pa'i gzugs yul du byed pa'i rnam thar bskyed nus pa'i don yin pa'i phyir/ de nus te/ byang sems thabs mkhas pas srid rtse'i dngos gzhi'i de ma thag tu sems ma zhi ba mthar thug pa'i 'dod sems skyed nus pa'i phyir te/ mar 'ong mthar gnas snyom 'jug dgu la 'dod sems spel nus pa'i phyir/ gnyis pa ngo bo la nang pa sangs rgyas pa'i rgyud kyi bsam gtan gzugs med gang rung gi sems rten la brten nas phyi rol gyi gzugs che chung bzang ngan sogs la dmigs nas sprul sgyur sna tshogs la 'jug pa'i rang sa'i kun dkris las thar ba'i rnal 'byor/ gzugs can gyi rnam thar gyi mtshan nyid/ de la dbye na/ gzugs can gzugs la blta ba'i rnam thar/ gzugs med gzugs la blta ba'i rnam thar/ gegs sel sdug pa'i rnam thar dang bcas pa'i rnam pa gsum yod/ de gsum rim gyi thob dgos shing snga ma gnyis sgom tshul yod de/ rang gi sems rten bsam gtan gzugs med gang rung la brten nas nang rnal 'byor ba rang lus la rim pa bzhin gzugs can dang gzugs med kyi 'du shes bzhag nas phyi rol gyi gzugs che chung bzang ngan sogs yid yul du shar ba na de bas kyang lhag pa'i che chung bzang ngan sogs mtha' mang du sprul bar byed pa'i phyir/ rang lugs la/ gzugs can gyi 'du shes su byed pa dang mi byad pa'i rgyu mtshan yod de/ 'di dag sgom pa rang gi ting nge 'dzin la rtsal sbyang ba dang/ sprul sgyur sna tshogs kyi sgo nas gzhan 'dun pa'i ched du yin pa gang zhig /de la sprul pa @21b po snang mi snang gi sgo nas don du 'gyur mi 'gyur yang gnyis yod pa'i phyir/ byang 'phags rnams kyis longs sku'i gzugs yid yul du shar ba na de bas kyang ches mdzes pa'i gzugs kyang sprul nus te/ de ma nus na sprul sgyur yongs su mi rdzogs pa'i phyir/ de lta bu don la longs sku'i gzugs las mdzes pa ma yin te/ longs sku'i gzugs mdzes pa mthar thug pa yin pa'i phyir te/ de'i rgyu bsod nams kyi tshogs de rgyu bsod nams kyi tshogs mthar thug yin pa'i phyir/ gzugs che ba'i mthar thug dang chung ba'i mthar thug dang/ rdul phran phyogs kyi cha med sogs kyang khas len dgos pa 'dra ste/ phyogs kyi cha med kyi rdul las chung ba med/ rdul phra rab yod pa'i phyir/ phyogs kyi cha med kyi rdul yang cha bcas ni yin te/ rten 'brel yin pa'i phyir/ sdug pa'i rnam thar sgom tshul yod de/ de gnyis kyi skabs su/ gzugs sdug pa la sprul 'dod dang/ mi sdug pa la sprul du mi 'dod pa'i blo skyes pa na gzugs sdug mi sdug phan tshun ltos nas grub pa dang/ phan tshun rjes su 'brel bar sgom pa na mthar gzugs su snang ba thams cad sdug pa ro gcig tu mos nas sgom par byed pa'i phyir/ de ltar sgom pas sdug par ro snyoms nus te/ dang pos gzugs sdug mi sdug phan tshun bltas med kyi 'du shes dang/ gnyis pas de gnyis ngo bo nyid kyi tha dad pa'i 'du shes log par byed pa'i phyir/ sdug mi sdug phan tshun ltos grub yin te/ dper na dngul bum gyi gzugs de zangs bum gyi gzugs la bltos te sdug /gser bum gyi gzugs la bltos te mi sdug pa yin pa'i phyir/ sdug mi sdug gnyis phan tshun rjes su 'brel ba yang yin te/ dngul bum gcig pu'i steng du sdug mi sdug gi cha gnyis rjes su 'brel bar gnas pa'i phyir/ phyi rol pa rnams ting nge 'dzin la brten nas sprul sgyur sna tshogs ston nus pa yod kyang sprul lam med pa'i rgyu mtshan yod de/ rang sa'i kun dkris las thar ba'i thabs med pa'i phyir/ de la dgongs nas/ bla ma rje btsun gyis/ rnam thar zad par zil gnon rnams/ /sangs rgyas bstan pa kho na'i khyad chos yin/ /bstan la ma zhugs pa la 'di dag med/ /ces gsungs pa'i phyir/ gsum pa dgos pa yod de/ teng nge 'dzin rtsal 'byongs pa dang/ gdul bya 'dun pa sogs kyi dgos pa yod pa'i phyir/ de rnams la gzugs can gyi rnam @22a @#/ /thar zhes 'chad pa'i rgyu mtshan yod de/ gzugs yul du byed cing ro myang gi sgrib pa las thar bar byed pa'i rgyu mtshan gyis de ltar bshad pa'i phyir/ sprul lam zhes 'chad pa'i rgyu mtshan yod de/ de rnams kyis sprul sgyur sna tshogs pa'i rten byed pa'i rgyu mtshan gyis de ltar bshad pa'i phyir/ ! 'jig rten las 'das pa'i lam la bsam gtan bzhi dang/ zhes sogs kyi skabs su mtha' dpyad pa la/ byams chos mngon pa dang bcas pa nas bshad tshul/ de las gzhan pa'i gzhung nas bshad chul gnyis las/ dang po la rten gang gis snyom par 'jug pa dang/ sems gang gis lam gang la brten nas snyoms par 'jug pa dang/ yid la byed pa gang gis 'jug pa/ dgag bya gang 'gog pa/ khams gang du snyom par 'jug pa dang/ 'gog snyoms kyi ngo bo// dus ji tsam gyi bar du snyom par 'jug pa dang bdun/ dang po la/ 'o na 'gog pa la gang zag gang gis snyom par 'jug ce na/ 'di la so skyes snyom par mi 'jug ste 'di tshor 'du rags pa bkag pa'i yon tan gyi cha zhig yin pa gang zhig /so skye rnams bdag chad dogs kyi 'jigs pa'i dbang gis 'di la g.yang sa mthong ba dang 'dra ba'i phyir/ 'phags pa la rgyun zhugs dang phyir 'ong gis 'di la snyom par mi 'jug ste/ 'di la snyom par 'jug pa la srid rtse'i dngos gzhi thob dgos pa'i phyir/ des na 'di la theg dman gyi dbang du byas na phyir mi 'ong lus mngon byed dang gnyis ka'i cha las rnam grol gyi dgra bcom pa gnyis dang/ rang rgyal dgra bcom gyis snyom par 'jug/ theg chen slob mi slob kyi 'phags pa gnyis kas snyom par 'jug ste/ byang 'phags rnams mthong chos la bde bar gnas pa sogs dang/ sangs 'phags dbang 'byor gyi sgo nas snyom par 'jug pa'i phyir/ gnyis pa la/ sems rten srid rtse'i sems la brten nas 'jug ste/ 'di la snyom par 'jug pa la 'du shes kyi rgyu ba shin tu phra ba zhig dgos pa'i phyir/ mdzod las/ phra ba phra ba'i 'jug thogs su/ zhes dang/ kun btus las/ ci yang med pa'i skye mched la 'dod chags dang phral ba/ zhes gsungs pa'i phyir/ de la brten dgos pa'i rgyu mtshan yod de/ 'gog snyom tshor 'du rags pa zhi ba'i shin tu zhi ba gang zhig /tshor 'du rags pa dang bcas pa'i sems kyi de la @22b 'jug mi nus pa'i phyir/ lam 'das lam kho na la brten nas snyom par 'jug dgos te/ srid rtse'i spang bya ci rigs spangs pa'i zhi lhag la brten nas 'jug pa gang zhig /de la 'das lam kho nar nges pa'i phyir/ kun btus las/ srid pa'i rtse mo las kyang gyen du skyod de/ zhes dang/ mdzod las/ ma nges 'phags pa'i sbyor bas thob/ ces gsungs pa'i phyir/ gsum pa la/ tshor 'du rags pa zhi bar 'dod pa'i yid kyi snyom par 'jug pa yin te/ kun btus las/ zhi bar gnas pa'i 'du shes sngon du btang ba'i yid la byed pa dag gi/ zhes dang/ mdzod las/ 'di gnas don du srid rtser skye/ zhes gsungs pa'i phyir/ bzhi pa ni/ kun gzhi bzhed pa rnams kyi ltar na kun gzhi'i steng du tshogs drug nyon yid dang bcas pa'i bdun 'gog pa yin te/ kun btus las/ sems dang sems las byung ba brten pa ma yin pa rnam pa brten pa de dag la 'gog pa'i snyom par 'jug pa zhes btags so/ /zhes gsungs pa'i phyir/ nyan yid 'gag dgos te/ de ma bkag na/ 'du shes med pa'i snyom 'jug dang khyad med du 'gyur ba'i phyir/ kun gzhi mi 'dad pa rnams ltar na dgag gzhi yid kyi rnam shes phra mo'i steng du dgag bya tshor 'du rags pa 'gog phyir du 'jug ste/ des lus sems zos mi bde bar mthong nas de zhi ba'i don du 'gog pa mngon du byed pa yin pa'i phyir/ 'o na skabs 'dir kun gzhi khas len nam mi len zhe na/ spyir mdo'i dbang du byas na/ dgongs 'grel/ langs gshegs sogs dang/ rje btsun byams pas mdo sde rgyan/ dbus mtha' dang bcas pa las bshad cing de rnams kyi dgongs pa 'grel ba'i thogs med sku mched kyis sa sde sogs las rgyas par bshad/ yum gyi mdo sogs phal cher dang/ mngon rtogs rgyan rgyud bla ma dang bcas pa las zur tsam yang ma bshad/ de dang mthun par 'grel chen gnyis su yang gsal bar ma bshad/ rnam pa thams cad mkhyen dang zhes pa'i skabs su/ 'grel chen las/ shes bya'i gnas kun gzhi'i rnam par shes pa sogs bcu mkhyen pa'i ye shes dang/ zhes dang/ chos sku'i mtshams sbyar du gzhan lugs brjod pa'i skabs su rnam par shes pa brgyad nyid dang/ zhes pa tsam ma gtogs gsal bar ma byung zhing/ de yod na rnam shes tshogs drug 'chad pa'i skabs su bshad rigs pa las ma bshad pas mi @23a @#/ /bzhed par mngon no/ /der ma zad yid kyi rnam shes dge mi dge'i bag chags bsgo gzhir bzhag pas shes so/ /'gog pa la mnyam par gzhag pa'i sems can gyi rgyud la tshor 'du med pa dang/ 'gog pa la mnyam par gzhag pa sogs kyi gnas skabs bzhi'i skabs su sems med par 'dod pa sogs ches mi rigs te/ bzhi po de'i skabs kyi sems can sems can yin pa'i phyir/ gnyid kyi skabs su sems byung gnyid yod pas de 'khor du song ba'i sems kyang 'byung ba'i phyir/ lnga pa la/ 'o na de khams gsum gang du snyom par 'jug ce na/ kun gzhi 'dod pa rnams kyi lugs la khams gsum ga'i rten la snyom par 'jug /mi 'dod pa rnams kyi gzugs med du sgom pa med de/ der dgag bya tshor 'du rags pa med/ yid shes bkag na gzugs med kyi 'gro ba ldog pa'i skyon yod pa'i phyir/ rang gi lugs la phal cher gyis dang por mi'i rten la skye/ de nas mi'i nang ngam/ gzugs khams su yang sgom ste/ kun btus las/ 'gog pa la snyom par 'jug pa ni 'jig rten las 'das pa de mi rnams kyi nang du mngon par sgrub bo/ /mi rnams kyi nang du mngon par sgrub pa nas mi rnams kyi nang de nyid du'am/ gzugs kyi khams su mngon par 'du byed do/ /gzugs med pa'i khams su 'di mngon du gyur pa med/ zhi ba'i rnam par thar ba'i rnam par smin bas gnas pa rnams la 'di la 'bad pas brtsan par med pa'i phyir ro/ /mdzod las/ gnyis ka 'dod dang gzugs rten can/ /'gog pa dang po mi'i nang du'o/ /zhes dang/ de'i 'grel pa las/ 'gog pa'i snyom par 'jug pa ni dang po mi nyid du mi dag gi nang du skyed de/ phyis ni sngar yongs su nyams pa dag gis gzugs kyi khams su yang bskyed do/ /zhes gsungs pas 'gog snyoms gsar du bskyed ba'i rten la mis khyab pa yin zer ba sogs dpyad pa mang ngo/ /slob dpon rgyal po sras kyis 'gog snyoms sgom pa'i rten la gling gsum gyi mi 'dod lha rigs drug /gzugs khams gnas rigs bcu drug dang bcas pa'i nyi shu rtsa lnga bshad pa dang/ 'dod lha'i rten la mthong lam gsar du skye zhing/ 'dod lha la 'gog snyoms kyi dgag bya ni yod pas de dag gi rgyud la 'gog snyoms gsar du skye ba yod dam snyam/ de @23b ltar na mdzod rtsa 'grel gyi don yang gtso che ba la dgongs te/ gling gsum gyi mi dang khyad par 'dzam bu gling pa yon tan khyad par can skye ba'i rten du shin tu bsngags pa'i phyir/ drug pa ngo bo la/ kha cig na re/ 'dir 'gog snyoms 'das lam du bshad/ skabs brgyad par sangs rgyas 'phags pa'i rgyud kyi mthar gnas snyom 'jug dgu ye shes chos skur bshad pa sogs dang/ sems rten srid rtse'i dngos gzhi la bshad pa sogs la brten nas yid shes su bzhed/ 'phags rgyud kyi shes pa ma yin pa'i rgyu mtshan ldan min 'du byed du bzhed kyang/ ldan min 'du byed yin pa tsam gyi shes pa ma yin par mi 'gyur te/ rang rig ldan min 'du byed yin kyang shes pa yin pa'i phyir/ mkhas pa kha cig na re/ 'gog snyoms shes pa ma yin te/ dbyig gnyen gyi las sgrub pa'i rab byed las/ kha cig ni sems dang bcas pa'i gnas skabs 'dod de/ dper na btsun pa dbyig bshes kyi yongs su dri ba las gang gi ltar na 'gog pa'i snyom 'jug sems med pa yin pa de la skyon du 'gyur gyi kho bo cag ltar na ni 'gog pa'i snyom par 'jug pa yang sems las byung ba nyid ces smra ba lta bu'o/ /zhes sogs kyis 'gog snyoms kyi skabs su sems sems byung med pa rang lugs su mdzad pa'i phyir/ zhes gsungs yang/ 'di ni slob dpon gnyis 'gog snyoms kyi tshe yid kyi shes pa'i sems sems byung 'gog mi 'gog rtsod pa'i skabs su snang bas shes par mi 'dod pa la phan par dka'o/ /'on kyang/ kun btus las/ 'gog pa la 'gog pa'i snyom par 'jug pa zhes gdags so/ /zhes dang/ bsdu ba las/ 'gog pa'i snyom par 'jug pa rdzas su yod pa yin nam/ 'on te btags par yod pa yin zhe na/ btags pa'i yod pa yin gyi rdzas su yod pa ma yin par rig par bya'o/ /zhes btags yod du gsungs shing/ shes pa btags yod du mi 'thad pa'i phyir dang/ mkhas pa phal cher yang shes pa ma yin par bzhed bar snang bas de bzhin du 'dod par bya'o/ /'di la dpyad par bya ba mang yang yi ge mang bar 'gyur bas re zhig bzhag go/ de lta na de'i ngo bo'i khyad par yod de/ sems rten srid rtse'i dngos gzhi la brten nas dgag gzhi 'phags pa'i yid shes phra mo'i steng du dgag bya tshor 'du rags pa 'khor bcas @24a @#/ /bkag pa'i cha la 'gog snyoms zhes 'dogs par byed pa'i phyir/ mtshan nyid kyang/ rang gi sems rten srid rtse'i dngos gzhi la brten nas dgag gzhi 'phags pa'i yid shes phra mo'i steng du dgag bya tshor 'du rags pa 'khor bcas bkag pas rab tu phye ba'i rigs gnas gang zhig /mthar gnas snyom 'jug dgu'i nang tshan du btags pa'i snyom 'jug btags pa ba'o/ /'di shes pa ma yin pa'i rgyu mtshan gzhan yang yod de/ shes pa yin na 'gog pa'i rnam thar dang khyad par cung zad kyang med pas de gnyis la zlos skyon 'byung ba'i phyir/ phyogs snga ma rnams kyis sngar bshad pa'i sgrub byed rnams dang/ rtse sbyor gyi skabs su yang sgom lam rtse sbyor rang gi ngo bo 'chad pa na thol brgal gyi nang du 'gog snyoms bshad pa rnams dang 'gal ba'i skyon med de/ de dag gi skabs su 'gog pa la snyom par 'jug pa'i sems de 'das lam sogs su gsungs pa'i phyir/ snyom 'jug ma yin kyang de'i ming gi 'dogs su rung ste/ snyom 'jug nyon mongs can la snyom 'jug gi ming gis btags pa dang/ tshangs ris pa'i gzugs phung la 'bras bu skye ba'i bsam gtan zhes bsam gtan gyi ming gis btags pa lta bu yin pa'i phyir/ de ltar ma yin na/ bag chags yang dag bcom pa dang/ zhes pa dang/ byang chub sems dpa' rnams kyi nyon mongs pa ni rnam par rtog pa'o/ /zhes sogs 'chad mi rigs par thal/ sangs rgyas kyi rgyud kyi sgrib gnyis spangs pa'i spangs pa ye shes chos sku ma yin zhing/ shes sgrib gzung 'dzin gyi rnam rtog bzhi nyon mongs ma yin pa'i phyir/ rgyas par brgal brtags kyi skabs su shes par bya'o/ /bdun pa la 'o na 'di la yun ji tsam du snyom par 'jug ce na/ kha cig na re/ byang chub sems dpas 'di la yun ring du snyom par mi 'jug ste/ gzhan don rgyun chad pa'i dgag bya yod pa'i phyir/ zer na; de yang ma nges te/ gzhan don du 'gyur na yun ring mnyam par gzhag kyang 'gal ba med pa'i phyir te/ chos 'phags kyis lo bdun gyi bar du stong nyid la mnyam par gzhag pa lta bu yin pa'i phyir/ kha cig /'dod pa khams su zhag bdun las lhag pa snyom par mi 'jug ste/ 'dod @24b khams pa kha zas zhag bdun du bral na tsho'i dus byed pa'i phyir/ zer na de yang mi 'thad de/ 'dod khams su lus brtas par byed pa'i bsam pa'i zas dang/ rnam par shes pa'i zas sogs kyang yod pa'i phyir/ kha cig /snying rje pad kar las/ skye ba gcig gis thogs pa'i byang chub sems dpa' 'gog pa la nyom par 'jug pa'i sems kyi bar gyi bskal pa bcu po 'di 'da' bar byed do/ /zhes gsungs pas/ de 'dra ba'i bar du yang snyom par 'jug pa yod zer/ kha cig/ de snyom par 'jug pa'i nus pa la dgongs te/ rgyal ba rnams kyis 'gog las glong bar mdzad/ ces gsungs pa'i phyir/ zhes gsungs/ rang lugs la/ mtha' gcig tu nges pa med de/ don du 'gyur na ji srid 'phen pa btang ba de srid du mnyam par 'jog pa'i phyir/ gnyis pa de las gzhan pa'i gzhung nas bshad tshul ni/ sa bcu pa'i mdo/ /'jug pa sogs gzhung gzhan las bshad pa'i 'gog snyoms kyi khyad par yod do/ shes rab kyi phar phyin lhag stobs kyis dgag gzhi 'phags pa'i yid shes phra mo'i steng du dgag bya gnyis snang phra mo yang bkag pa'i stong nyid mngon sum du rtogs pa'i mnyam gzhag ye shes khyad par can zhig la 'dod/ thal 'gyur ba'i lugs la yang sngar bshad pa'i 'gog snyoms de mi 'dod pa ma yin te/ phyir mi 'ong lus mngon byed dang/ gnyis ka'i cha las rnam grol gyi dgra bcom bzhed pa'i phyir/ mdor bsdus pa tsam mo// ! spong ba'i lam la zhes sogs dang/ sangs rgyas kyi lam la zhes sogs kyi skabs su/ sangs rgyas 'phags pa'i rgyud kyi bden bzhi bden med du mngon sum du rtogs pa'i ye shes chos can/ khyod la spong lam bar chad med lam zhes 'chad pa'i rgyu mtshan yod de/ byang chub sems dpa' rgyud kyi mthong sgom gyi bar chad med lam rnams spong lam dngos yin zhing/ de'i rigs su gnas pa'i rgyu mtshan gyis de ltar bshad pa'i phyir/ byang chub sems dpa'i rgyud kyi pha rol tu phyin pa bcu po de la sangs rgyas nyid kyi lam zhes 'chad pa'i rgyu mtshan yod de/ sangs rgyas kyi sar bgrod byed kyi thun mong ma yin pa'i lam yin pa'i rgyu mtshan gyis de ltar bshad pa'i phyir/ sangs 'phags kyi rgyud kyi bcu po de la sangs rgyas nyid kyi lam zhes 'chad pa'i rgyu mtshan yod de/ @25a @#/ /byang sems kyi bcu po de'i rtogs rigs su gnas pa'i rgyu mtshan gyis de ltar bshad pa'i phyir/ kha cig /slob lam na phar phyin bcu med pa dang sangs 'phags kyi rgyud kyi sbyin sogs bcu po de byang chub sems dpa'i rgyud la yod pa dang rjes mthun gyi sangs rgyas nyid kyi lam du 'jog pa mi 'gal lo zer na/ 'o na sangs 'phags kyi bcu po de nyan rang gi rgyud la yod pa dang rjes mthun gyi rnam mkhyen gyi rnam par khas blangs pa yang nyes pa med par thal/ dam bca' 'thad pa'i phyir/ 'dod mi nus so/ /kha cig /sangs 'phags kyi rgyud kyi pha rol tu phyin pa bcu po de byang chub sems dpa'i rgyud la yod pa dang rjes mthun gyi de yin gyi/ sbyin sogs phar phyin bcu po de min zhes ring cha thung cha la 'khri ba rnams kyang snying po med de/ snying po rgyan rang du yang byang sems kyi rgyud la ring cha med pa'i phyin drug gi tha snyad mang du gsungs shing/ byang chub sems dpa'i rgyud la byang chub kyi phogs dang mthun pa'i lam yod/ byang chub phyogs mthun med pa'i khyad par mi 'thad pa'i phyir/ 'di dag gi brgal lan sher phyin gyi skabs su rgyas par bstan zin pa las shes par bya'o// ! rnam pa thams cad mkhyen pa nyid kyi rnam pa ni shin tu phul du byung ba'i phyir/ zhes sogs kyi skabs su spyir bstan pa dang/ so sor bshad pa gnyis/ dang po la/ thun mong ma yin pa'i rnam mkhyen gyi rnam pa so dgu po de ngo bo// dbye ba/ rten/ ched du bya ba dang bzhi'i sgo nas shes par bya ba yin te/ 'grel chen gnyis ka las de ltar bshad pa'i phyir/ de ltar byas na stobs bcu/ mi 'jigs pa bzhi/ so so yang dag par rig pa bzhi/ ma 'dres pa bco brgyad dang bcas pa'i sde tshan bzhi bshad pa la dgos pa yod de/ thun mong ma yin pa'i rnam mkhyen gyi dbye ba rtogs pa'i ched du yin pa'i phyir/ de bzhin nyid kyi rnam mkhyen gyi rnam pa dang/ rang byung gi rnam mkhyen gyi rnam pa dang/ sangs rgyas nyid kyi rnam mkhyen gyi rnam pa dang gsum gsungs pa la dgos pa yod de/ stobs sogs thun mong ma yin pa'i rnam mkhyen gyi rnam pa rnams sgrib gnyis spangs pa'i de bzhin nyid la slar mi ldang ba'i tshul gyis mnyam par gzhag pa dang/ rang byung gi rten la brten nas chos 'khor @25b rdzogs par bskor ba dang/ stobs sogs de dag kyang ji snyed pa mtha' dag mngon sum du rtogs pa'i sangs rgyas kyi rnam mkhyen gyi rnam pa de'i ched du mngon du byas par shes pa'i ched yin pa'i phyir/ gnyis pa so so'i ngo bo bshad pa la/ bdun las/ mi mthun phyogs 'joms pa la lha'i dbang po brgya byin gyi rdo rje rin po che dang chos mtshungs pa'i thun mong ma yin pa'i rnam mkhyen gyi rnam pa/ 'dir bstan stobs kyi mtshan nyid/ de la dbye na/ gnas dang gnas ma yin pa mkhyen pa'i stobs/ las kyi rnam par smin pa mkhyen pa'i stobs/ mos pa sna tshogs mkhyen pa'i stobs/ rigs gnyis sna tshogs mkhyen pa'i stobs/ dbang po mchog dang mchog ma yin pa/ mngon mtho nges legs thams cad du 'gro ba'i lam/ bsam gtan dang rnam thar la snyom 'jug gi sgrib pa'i kun nas nyon mongs pa dang rnam par byang ba med pa mkhyen pa'i stobs/ sngon gyi gnas rjes su dran pa mkhyen pa'i stobs/ 'chi 'pho ba dang skye ba mkhyen pa'i stobs/ zag pa zad pa mkhyen pa'i stobs dang bcu'o/ /bcu po de lha dbang gi rdo rje rin po dang chos mtshungs te/ des lha ma yin gyi go cha rnams 'bugs/ rtsig pa rnams bshig /rib ma lta bu'i nags tshal rnams gcod par byed pa de bzhin du stobs bcu po 'di rnams kyis kyang gsum po de dang chos mthun pa'i sgrib pa gsum 'joms/ de rnams kyis tshur la mi phyed pa'i phyir/ de skad du rgyud bla ma las/ stobs nyid ma rig sgrib la rdo rje bzhin/ zhes dang/ stobs sogs rnams las stobs drug dang/ /gsum dang gcig gi rim pa bzhin/ /shes bya snyom par 'jug pa dang/ /bag chags bcas pa kun bsal ba'i/ /go cha rtsig ba shing bzhin du/ /phug dang bshig dang bcad phyir ro/ /zhes dang/ mi phyed phyir na rdo rje bzhin/ /zhes gsungs pa'i phyir/ gzhan yang/ bcu po de la stobs zhes 'chad pa'i rgyu mtshan yod de/ bcu po 'dis thabs la bslu ba'i bdud/ skyabs la bsru ba'i bdud/ rnam par dag pa la bslu ba'i bdud/ theg chen lam du nges par 'byung ba la bslu ba'i bdud bzhi bcom pa'i phyir/ mdo sde rgyan las/ thabs dang skyabs dang dag pa dang/ /theg chen nges par 'byung ba la/ /sems can rnams ni rab bslu ba'i/ /bdud 'joms khyod la phyag 'tshal lo/ /zhes gsungs pa'i phyir/ gnyis @26a @#/ /pa la/ 'khor gyi dbus su rang don rtogs pa phun tshogs sogs bzhi gang rung dam bcas pa la chos mthun gyi rgol ba po med pas rab tu phye ba'i thun mong ma yin pa'i rnam mkhyen gyi rnam pa/ 'dir bstan mi 'jigs pa'i rnam pa'i mtshan nyid/ de la dbye na/ 'khor gyi dbus su nga ni chos thams cad la mngon par rdzogs par sangs rgyas so zhes rang don rtogs pa phun tshogs dam bcas pa la chos 'di la mngon par rdzogs par sangs rgyas so zhes chos mthun gyi rgol ba po med pa'i mi 'jigs pa dang/ 'khor dbus su nga ni nyon mongs dang shes bya'i sgrib pa spangs so zhes rang don spangs pa phun tshogs dam bcas pa la sgrib pa 'di ma spangs so zhes sogs kyi de dang/ 'khor dbus su sgrib pa gnyis thar pa dang/ thams cad mkhyen pa thob pa la bar du gcod byed du nges par dam bcas pa la dang pos thar pa la bar du gcod pa dang/ shes sgrib kyis thams cad mkhyen pa la bar du gcod mi nus zhes gzhan don bar chad kyi chos dam bcas pa la chos mthun gyi rgol ba po med pa'i mi 'jigs pa dang/ gzhi shes dang lam shes thar pa dang thams cad mkhyen par bgrod byed du dam bcas pa la gzhi shes kyis thar pa dang lam shes kyis thams cad mkhyen par bgrod par mi nus zhes chos mthun gyi rgol ba po med pa'i mi 'jigs pa dang bzhi yod pa'i phyir/ de skad du yang/ mdo las/ kye ma bdag gi chos 'di dag mngon par rdzogs par sangs rgyas so zhes dam bcas pa na 'dir nga la chos 'di lta bu mngon par rdzogs par sangs ma rgyas so zhes bya bar dge sbyong dang/ bram ze 'am/ lha 'am/ bdud dam/ tshangs pa 'am/ gzhan su yang rung ste 'jig rten na chos dang mthun par rgol bar 'gyur ba'i rgyu de lta bu yang dag par rjes su ma mthong ngo/ /rgyu de lta bu yang dag par rjes su ma mthong bas bdag bde ba thob pa dang/ bag tsha ba med pa gnas te/ bag tsha ba med par gnas pas khyu mchog rlabs po che'i gnas su dam bca' 'o/ /'khor gyi nang du sengge'i sgra sgrog go /zhes gsungs pa'i phyir/ chos mthun gyi rgol ba mong ba la dge sbyong dang/ bram ze sogs smos pa'i rgyu mtshan yod de/ dge sbyong @26b dang bram ze rnams ni shes rab dang thos bas rlom/ lha dang bdud la sogs pa rnams mthu dang rdzu 'phrul gyis rlom pas rlom pa can de rnams kyis kyang chos mthun du rgol bar mi nus na gzhan gyis lta smos kyang ci dgos zhes shes par bya ba'i ched du yin pa'i phyir/ de ltar na ri dwags kyi rgyal po ri dwags phra mo rnams kyi nang du skrag pa med par gnas pa bzhin du 'khor nang du skrag 'jigs med par gnas pa yin te/ rgyud bla ma las/ mi 'jigs nyid ni 'khor du sengge bzhin/ /zhes dang/ rgyas bshad du/ ri dwags dbang po ji ltar nags mthar rtag 'jigs med/ ri dwags rnams la skrag pa med par rgyu ba ltar/ /de bzhin tshogs na thub pa'i dbang po sengge yang/ /legs gnags bltos med brtan pa'i rtsal dang ldan par gnas/ /zhes gsungs pa'i phyir/ bzhi po de'i dang po gnyis rang don gyi dbang du byas/ phyi ma gnyis gzhan don gyi dbang du byas te/ mdo sde rgyan las/ rang gzhan don du ye shes dang/ /spangs dang nges 'byung gegs byed rnams/ /ston mdzad mu stegs gzhan dag gis/ /mi brdzi khyod la phyag 'tshal lo/ /zhes gsungs pa'i phyir/ so sor yang dag gi rig pa bshad pa la/ 'chad bya 'chad byed kyi don la mkhyen pa chags thogs med par 'jug pas rab tu phye ba'i thun mong ma yin pa'i rnam mkhyen gyi rnam pa/ 'dir bstan so so yang dag rig pa'i mtshan nyid/ de la dbye na bshad pa'i dbang du byas pa la chos rnams kyi ming gi rnam grangs la mkhyen pa chags thogs mi mnga' bar 'jug pa'i so sor yang dag par rig pa/ chos rnams kyi rang spyi'i mtshan nyid la mkhyen pa chags thogs mi mnga' bar 'jug pa'i de/ 'chad byed kyi dbang du byas pa la sems can rnams kyi yul gyi skad la mkhyen pa chags thogs mi mnga' bar 'jug pa'i nges pa'i tshig so sor yang dag par rig pa/ chos rnams kyi ngo bo dang rnam pa'i rab dbye la mkhyen pa chags thogs mi mnga' bar 'jug pa'i de dang/ de dag 'chad pa la chags thogs med par 'jug pa'i spobs pa so sor yang dag par rig pa dang bzhi yod de/ mdo sde rgyan las/ rnam grangs dang mi mtshan nyid dang/ /tshig dang ye shes shes pa'i phyir/ /byang chub sems dpa'i yang dag rig /bzhi po mtshungs pa @27a @#/ /med par 'dod/ /ces dang/ mthar thug le'u las kyang/ bstan dang bstan pa bshad bya dang/ /gsung dang mkhyen pa 'chad byed la/ /blo gros rtag thogs mi mnga' ba/ /legs ston khyod la phyag 'tshal lo/ /zhes gsungs pa'i phyir/ 'chad bya 'chad byed kyi don la mkhyen pa chags thogs mi mnga' bar 'jug pa'i ldog cha nas thun mong ma yin par bshad pa yin gyi/ de'i rgyud kyi so sor yang dag par rig pa bzhi thun mong ma yin pa'i rnam mkhyen gyi rnam pa ma yin te/ byang sems sa dgu pa ba'i rgyud la so sor yang dag rig pa bzhi yod pas/ de thun mong pa'i rnam mkhyen gyi rnam par 'gyur ba'i phyir/ sa dgu pa ba'i rgyud la so so yang dag rig pa bzhi mtshan nyid pa yod pa'i phyir/ mdo sde rgyan las/ so so yang dag rig blo bzang/ /sa de legs pa'i blo gros yin/ /zhes dang/ sa dgu pa ba'i de'i sgo nas gdul bya la chos char rgya chen po 'bebs pa'i phyir te/ 'jug pa las/ char sprin rnams las chu char 'bebs pa ji ltar de bzhin 'gro rnams kyi/ /dge ba'i lo thog ched du rgyal sras las kyang lhun grub chos char 'bebs/ /zhes rgya cher gsungs pa'i phyir/ kho na re/ sangs 'phags kyi rgyud kyi mkhyen pa chags thogs mi mnga' ba'i so sor yang dag gi rig pa bzhi thun mong ma yin pa'i rnam mkhyen gyi rnam pa ma yin par thal/ sangs 'phags kyi de yin na chags thogs spangs pa'i so so yang dag rig pa yin dgos pa'i phyir zer na/ 'o na/ sangs 'phags kyi rgyud kyi gang zag gi bdag med mngon sum du rtogs pa'i ye shes de nyan thos kyi rtogs rigs su mi gnas par thal/ de yin na stong nyid dang las 'bras kyi 'brel pa phra zhing phra ba mngon sum du rtogs dgos pa'i phyir/ ma 'dres pa bco brgyad bshad pa la 'phags pa 'og ma ba rnams dang rtogs rigs ma 'dres pa'i rab tu phye ba'i thun mong ma yin pa'i rnam mkhyen gyi rnam pa; sangs rgyas kyi chos ma 'dres pa'i mtshan nyid/ de la dbye na rtogs pa ma 'dres ba drug /spyod pa ma 'dres pa drug /'phrin las ma 'dres pa gsum/ ye shes ma 'dres pa gsum dang bcas pa'i bco brgyad yod de/ mdo sde rgyan las/ spyod pa dang ni rtogs pa dang/ /ye shes dang ni 'phrin @27b las kyis/ /nyan thos rang sangs rgyas kun gyi/ /bla ma khyod la phyag 'tshal lo/ /zhes gsungs pa'i phyir/ rtogs pa ma 'dres pa de la drug yod de/ rje'i gsung las/ 'dun pa dang ni brtson 'grus dran pa dang/ /ting 'dzin shes rab rnam par phrol ba la/ /nyams pa'i go skabs ma lus ring du spangs/ /de phyir khyod kyi rtogs pa bla na med/ /ces gsungs pa'i phyir/ spyod pa ma 'dres pa drug yod de/ de nyid las/ sku gsung thugs la 'khrul pa'i ming yang med/ /dran pa ma nyams rtag tu mnyam par gzhag /tha dad 'dzin pa ma brtags btang snyoms kyis/ /dben phyir khyod kyi spyod pa yongs su dag /ces gsungs pa'i phyir/ phyi ma drug kyang yod de/ de nyid las/ sku gsung thugs kyi 'phrin las rnam par dag /dus gsum thams cad chags thogs med par mkhyen/ /zhes pa ltar ro/ /de dag gi ngos 'dzin ni TIka las shes so/ /bco brgyad po 'phags pa 'og ma pa rnams dang thun mong min tshul/ nam mkha' sa chu me rlung rnams dang regs mtshungs chos mtshungs te/ rgyud bla ma las/ de bzhin gshegs pa'i ma 'dres mkha' bzhin te/ /zhes dang/ de'i rgyas bshad du/ sa chu me rlung nam mkha' mtshungs pa 'jig rten na ni thun mong ste/ /ma 'dres nyid ni rdul phran tsam yang 'jig rten dag na thun mong min/ /zhes gsungs pa'i phyir/ mdzod pa ba dang 'dren tshul mi mthun te/ de'i lugs la stobs bcu mi 'jigs pa bzhi dran pa nyer gzhag gsum/ thugs rje chen po dang bco brgyad du mdzad pa'i phyir/ dus gsum chags thogs med par mkhyen pa'i ma 'dres pa'i skabs las spros nas dus gsum gyi rnam gzhag 'chad lugs yod kyang brgal brtags kyi skabs su rgyas bar bshad pa las shes par bya'o/ /med pa'i rnam pa nas bzung ste/ zhes sogs kyis nyan thos 'phags pa dang byang 'phags kyi rgyud kyi gzhi shes kyi rnam pa nyer bdun dngos bstan bstan bya'i gtso bor byas nas bstan zhing/ nyan thos 'phags pa'i nyer bdun po zag med dang/ byang 'phags kyi nyer bdun zag bcas/ rgyu dang lam dang sdug bsngal dang/ /zhes sogs kyis byang 'phags kyi rgyud kyi lam shes so drug dngos bstan bstan bya'i gtso bor byas nas bstan zhing/ de rnams la yang zag bcas su @28a @#/ /'chad pa'i rgyu mtshan yod de/ nyan rang rnams kyis nyon mongs spang bya'i gtso bor byas nas spong/ byang sems rnams kyis nyon mongs spang bya'i gtso bor byas nas mi spong ba'i rgyu mtshan gyis de ltar bshad pa'i phyir/ dran pa nyer gzhag nas bzung ste/ /zhes sogs kyi rnam mkhyen gyi rnam pa la/ mkhyen gsum gyi rnam pa dang de rnams la rgyas par phye ste brgya dang bcur bstan zhing/ de rnams la zag med ces 'chad ba'i rgyu mtshan yod de/ sangs rgyas 'phags pas nyon mongs dang shes bya'i sgrib pa bag chags dang bcas pa rnam pa thams cad du spangs pas chos thams cad la mnga' bsgyur ba'i phyir/ spyir sngom na mkhyen gsum gyi rnam pa de la brgya dang bdun cu rtsa gsum yod de/ gong du bshad pa'i dbye bas de ltar grub pa'i phyir/ 'o na brgya bdun cu rtsa gsum po de rten gyi gang zag ji lta bu zhig gis nyams su len pa yin zhe na/ gdul bya gang yang rung bas rdzogs par nyams su mi len te/ de sngon sangs rgyas la bsnyen bkur sogs kyis lhag par bya ba byas pas dge rtsa smin te da lta yang sangs rgyas yongs 'dzin du bsten/ brgya bdun cu rtsa gsum brjod byar ldan pa'i yum gyi tshig bla la len/ don yid la byed pa'i sgo nas dge rtsa gsar du bsag pa'i byang sems tshogs lam pa lta bu zhig gis brjad byar nyams su len dgas pa'i phyir/ ! gzugs la sogs la mi gnas phyir/ /zhes sogs kyi skabs su mtha' dpyad pa la/ mkhas pa gzhan gyi lugs brjod ba/ /rang lugs bzhag pa gnyis/ dang po ni 'be chen po'i dgongs par mdzad nas/ ar gyi gsung na re/ sbyor ba nyi shur phye ba'i dang po gzugs sogs la bden zhen bkag pa dang/ gnyis pas yul can sbyor ba dang/ de sgom pa po la bden zhen bkag pa dang/ sbyor ba de gnyis po des rim pa bzhin du gzhi shes kyi chos nyid zab pa/ lam shes kyi chos nyid gting dpag dka' ba/ rnam mkhyen gyi chos nyid tshad med pa rtogs pa'i cha nas zab pa gzhi shes sbyor ba/ gteng dpag dka' ba lam shes sbyor ba/ tshad med pa rnam mkhyen sbyor ba dang bcas pa'i ngo bo'i sbyor ba lngar 'dod/ rang bzhin gyi sbyor ba lnga po @28b de la phye ba'i gnas skabs kye sbyor ba bco lngar yod cing/ de yang lnga po de tshogs lam gyi skabs su yod pa'i tshogs chen yun ring rtogs dka'i sbyor bar 'jog pa nas/ sa bcu pa na yod pa rnam par dag pa'i sbyor bar 'jog pa'i bar rnams yin te/ dper na rang bzhin sor mo la gnas skabs khu tshur dang/ thal mor 'jog pa de lta bu yin pa'i phyir/ sa mtshams kyang tshegs chen yun ring rtogs dka'i sbyor ba tshogs lam nas thob/ lung bstan pa/ phyir mi ldog pa/ nges par 'byung ba'i bar chad med pa'i sbyor ba bzhi sbyor lam bzhi nas rim pa bzhin thob ste/ drod phyir mi ldog gi skabs su/ zab mo'i don la som nyid med/ ces ? dang/ rtse mo'i skabs su/ chos nyid ldan par 'gro nyid dang/ /zhes dang/ bzod pa'i skabs su/ gzhan gyi bkri bar mi btub dang/ /zhes dang/ chos mchog gi skabs su/ sangs rgyas dgyes pa'i spyod pa ste/ zhes gsungs/ de thams cad kyang sdud pa las/ mi zhig rgya mtsho'i chu ni lta phyir 'gro ba yis/ /gal te shing nags ri mthong da dung ring/ /ci ste rtags ma mthong na rgya mtsho chen po ni/ /nye bar gyur to snyam du de la rlom sems med/ /ces pa rnams la brtan nas de ltar 'dod/ byang chub la nye ba'i sbyor ba sa dang po nas dang/ myur du mngon par rdzogs par 'tshang rgya ba'i sbyor ba sa gnyis pa nas/ bdun pa'i bar la 'jog pa yin te/ de gnyis ston pa na/ sdud pa las/ dbyid dus bzang la sdong po lo ma lhag gyur na/ /yal gas ring bar mi thogs lo 'bras me tog bskrun/ /shes rab pha rol phyin 'di su yis lag thob pa/ /ring por mi thogs 'dren pa rnams kyis byang chub thob/ ces dang/ rgyan las/ byang chub nye dang/ zhes gsungs pa'i phyir/ sdud par bud med sbrum ma'i dpes gsungs shing/ rgyud bla ma las kyang/ sa bdun la brten dri ma ni/ /mngal sbubs dri ma dag dang mtshungs/ /zhes sogs kyis kyang grub pa'i phyir; gzhan don gyi sbyor ba sogs lnga sa brgyad pa nas thob/ 'bras bu rin po che sbyin pa'i sbyor ba sa dgu pa nas thob/ rnam par dag pa'i sbyor ba sa bcu pa nas 'jog pa dang/ sa mtshams kyi sbyor ba yum lo dang zla ba sogs dus tshigs su byas nas sgom pa'i sbyor ba yin pas lam bzhi ga'i @29a @#/ /skabs su yod par bzhed/ de la cha bas tshegs chen yun ring rtogs dka'i sbyor ba la stong nyid ma rtogs pas khyab pa dang/ rgyan gyi ched du bya ba'i gdul bya byang sems tshogs lam pa la stong nyid rtogs myong gis khyab pa'i dbang du byas nas/ tshegs chen yun ring rtogs dka'i sbyor ba tshogs lam nas bzhag pa dgag pa dang/ phyir mi ldog pa'i sbyor ba lnga po lung bstan thob pa'i sbyor ba'i rjes su 'chad pa yang mi 'thad de/ de rnams lung bstan thob pa la nye bar bshad kyi thob par ma bshad pa'i phyir/ zhes bkag nas rang lugs lo chen gyi bzhed pa ltar 'god par mdzad de/ /tshegs chen yun ring rtogs dka'i sbyor ba la stong nyid ma rtogs pas khyab par 'dod pa mi rigs te/ tshegs chen po dang bcas te stong nyid rtogs na stong nyid rtogs dgos pa'i phyir/ snying po rgyan gyi rjes 'brang kha cig /'dir dngos bstan gyi sbyor ba la stong nyid rtogs ma rtogs gnyis su byed par snang yang mi rigs te/ rnam bshad las/ bden 'dzin 'joms byed kyi sbyor ba khyad par can ngos bzung/ zhes dang/ 'di'i sbyor ba dang pos stong nyid rtogs na gzhan rnams lta ci smos pa'i phyir/ de ltar yin kyang lung bstan pa dang/ phyir mi ldog pa dang/ gzhan don byed pa sogs kyi ngos nas bshad pa la 'gal ba med de/ stong nyid rtogs pa'i sems dpa'i ye shes yin na yang lung bstan thob pa dang phyir mi ldog pa sogs kyi yon tan thob pa mi 'gal ba'i phyir dang/ sbyor ba sgom pa'i thabs mkhas kyis zin pa yang mi 'gal ba'i phyir/ gnyis pa rang lugs la/ rang gi mi mthun phyogs bden 'dzin dang 'dzin stangs dngos 'gal du zhugs pa'i sems dpa'i ye shes/ 'dir dngos bstan gyi sems dpa'i ye shes kyi mtshan nyid/ de la dbye na/ der gyur pa'i ngo bo'i sbyor ba lnga/ gnas skabs kyi sbyor ba bco lnga dang bcas pa'i nyi shu yod de/ gzugs sogs yul la bden zhen bkag pa gnas pa bkag pa'i sbyor ba/ sbyor ba rang nyid dang sgom pa po la bden zhen bkag pa'i rnal 'byor bkag pa'i sbyor ba/ gzhi lam rnam gsum la rim pa bzhin du bden zhen bkag pa'i cha nas zab pa gzhi @29b shes sbyor ba/ gting dpag dka' ba lam shes kyi sbyor ba/ tshad med pa rnam mkhyen gyi sbyor ba sogs 'jog pa'i phyir/ 'dir bshad pa'i zab pa gzhi shes kyi sbyor ba yin na/ gzhi shes kyi sbyor ba ma yin dgos te/ de yin na/ stong nyid rtogs pa'i sems dpa'i ye shes yin dgos pa'i phyir/ gnas skabs kyi sbyor ba de la bco lnga yod de/ sgom pa po rten gyi gang zag gi sgo nas phye ba brgyad/ rdzogs par bsgoms pa thabs kyi sgo nas phye ba bzhi/ 'bras bu dang dus kyi sgo nas phye ba gsum dang bcas pa'i bco lnga yod pa'i phyir/ de rnams kyi nang nas rdzogs par bsgoms pa thabs kyi sgo nas phye ba bzhi'i khyad par yod de/ skyon dang yon tan don dam par 'phel 'grib med par rtogs pa'i sems dpa'i ye shes dang/ dkar nag sogs chos dang chos min pa bden med du rtogs pa'i sems dpa'i ye shes dang/ gzugs sogs kyi chos nyid bsam gyis mi khyab pa don dam par med pa rtogs pa'i sems dpa'i ye shes dang/ gzugs sogs kyi mtshan gzhi gsum bden med du rtogs pa'i sems dpa'i ye shes bzhi po de yin pa'i phyir/ tshegs chen yun ring rtogs dka'i sbyor ba ma gtogs pa'i skabs 'dir dngos bstan bstan bya'i gtso bor gyur pa'i sbyor ba la/ stong nyid rtogs pa'i zhi lhag zung 'brel gyi sbyor ba yin pas khyab kyang/ 'dir lung bstan pa sogs kyi sgo nas 'chad pa'i rgyu mtshan yod de/ yon tan khyad par can thob tshul skyon ci rigs las dag tshul byed las khyad par can gyi sgo nas bzhag pa'i phyir/ 'dir dngos bstan bstan bya'i gtso bo'i sbyor ba la stong nyid rtogs pa'i zhi ltag zung 'brel gyis khyab ste/ mkhyen gsum gyi rnam pa brgya 'dun cu rtsa gsum zhi lhag zung 'brel gyi sbyor bas bsdus nas nyams su len pa'i sems dpa'i ye shes rnams kyi nang nas stong nyid rtogs pa'i zhi lhag zung 'brel gyi sems dpa'i ye shes de nyid kyis bden 'dzin gyis sa bon spong dgos zhes shes pa'i phyir du stong nyid rtogs pa'i zhi lhag zung 'brel gyi sems dpa'i ye shes de nyid/ 'dir dngos bstan bstan bya'i gtso bor byas nas bstan pa'i phyir/ sbyor ba dang po lnga po des rang gi ngos skal gyi bden 'dzin gyi sa bon spong yang 'dir dngos su 'chad pa'i rgyu mtshan yod de/ sbyor @30a @#/ /ba nyi shu 'chad pa'i skabs 'dir yang theg pa chen po'i lam 'bras bu dang bcas pa dngos shugs ci rigs la tshad bar bstan par shes pa'i phyir du tshogs sbyor gyi skabs kyi sbyor ba lnga po de yang smos pa'i phyir/ 'o na tshegs chen yun ring rtogs dka'i sbyor ba 'dir bshad pa rgyan gyi ched du bya ba'i gdul bya dbang po rno 'bring gnyis la bltos te tshegs chen yun ring rtogs dka' ba 'am/ rgyan gyi ched du bya ba'i gdul bya yum la dad pa skye tshul ston pa'i skabs su re zhig dad pa'i zhes sogs kyis rgyan gyi gdul bya tsam dad pa skye tshul bshad pa ltar gang yin dpyad par bya'o/ / bco lnga po de'i sa mtshams dang por gang nas thob pa ni 'be ar dang mthun par TIka las bshad pa bzhin shes par bya'o/ / ! bdud kyi mthu bcom la sogs pa/ /zhes sogs kyi skabs su/ sems dpa'i sbyor ba bsgoms stobs kyis thob pa'i yon tan khyad par can/ 'dir bstan sems dpa'i sbyor ba'i yon tan gyi mtshan nyid/ de la der gyur pa'i bdud kyi mthu bcom pa la sogs pa'i yon tan rnam pa bcu bzhi yod/ bcu bzhir 'jog tshul rgya bod kyi bzhed pa mi 'dra ba mang bar snang na yang ma spros shing/ ? rang lugs la yon tan snga ma bcu bzhi po 'di ma 'ongs pa na 'byung 'gyur dang/ phyi ma bzhi bcu po 'di da ? ltar thob pa'i yon tan gyi dbang du byas pa yin no/ /de'i tshul yang de'i sbyor ba bsgom pa'i sems dpa' de rnams la chos can/ sbyor ba la bdud kyi bar chad kyis mi tshugs pa'i bdud kyi mthu bcom pa'i yon tan 'byung ste/ da lta sbyor ba bsgoms pa la grangs bzhin du sangs rgyas kyi byin gyis brlabs pa thob pa'i phyir/ zhes bya ba'i sgo nas sbyor bar bya ba yin no/ /skyon ni bcu tshan bzhir bcas pa/ /zhes sogs kyi skabs su theg chen gyi sbyor ba skye ba 'am gnas pa gang rung la gegs byed/ theg chen gyi sbyar ba'i skyon gyi mtshan nyid/ de la sbyor ba'i 'gal rkyen rang la brten pa nyi shu/ rang gzhan gang rung la brten pa mthun rkyen ma tshang ba nyer gsum/ 'gal rkyen gzhan la brten pa gsum dang bcas pa'i zhe drug yod/ dang po la spobs pa'i dbang du byas pa la sogs pa'i bcu tshan dang po dang/ rgyu dang 'bras bu'i 'brel pa la sogs pa'i @30b bcu tshan gnyis pa dang bcas pa'i nyi shu/ gang rung la brten pa la yang slob dpon la brten pa rang nyid la brten pa gnyis ka la brten pa gsum gyi sgo nas nyer gsum du yod/ gzhan la brten pa gsum ni bdud dge slong gi cha byad du 'ongs nas yum nged kyi mdo sde nas 'byung ba ltar yin gyi/ rgyas 'bring bsdus gsum las 'byung ba ltar ma yin zhes chos dang gang zag gi bar du dben byed pa sogs gsum po da lta yang 'di 'dra ba'i cha byad mang du snang ngo/ /des na zhe drug pa 'di chos can/ khyod la sbyor ba'i skyon zhes 'chad pa'i rgyu mtshan yod de/ theg chen gyi sbyor ba skye ba'am gnas pa gong du 'phel ba sogs la 'gal rgyen gyis zin pa dang/ mthun rkyen ma tshang ba gang rung gi sgo nas gegs byed pa'i rgyu mtshan gyis de ltar bshad pa'i phyir/ ! gang gi mtshon te mtshan nyid du/ /zhes sogs kyi skabs su gzhan lugs dgag pa dang/ rang lugs gzhag pa gnyis/ dang po la go mi chen po'i bzhed par byas nas/ lo chen ba'i lugs dang/ rgyas mtshon pa'i lugs dang/ 'bras bus mtshon pa'i lugs dang/ de las gzhan pa'i lugs dang bzhi/ dang po la/ kha cig 'di'i mtshon tshul ni/ mtshan nyid mtshon bya mtshan gzhi mtshon pa ye shes bzhi'i sgo nas mtshon pa yin te/ dper na/ ngo bo tsha ba byed las sreg pa gnyis mtshan nyid/ me'i tha snyad bya rung ba mtshon bya/ rtsA las byung ba'i tsha shing sreg pa mtshan gzhi/ mtshan mtshon gzhi gsum gyi 'brel pa dpyod pa'i tshad ma mtshon pa ye shes su byed pa lta bu yin pa'i phyir/ de rnams gzhung gis bstan tshul yod de/ khyad mtshan dang byed mtshan ston pa'i gzhung gis mtshan nyid bstan/ ngo bo nyid mtshan ston pa'i gzhung gis mtshon bya bstan/ sbyor ba nyi shu ston pa'i gzhung gis mtshan gzhi/ shes mtshan bcu drug pa phrag gsum ston pa'i gzhung gis mtshon pa ye shes bstan pa'i phyir/ khyad mtshan byed mtshan gnyis ston pa'i gzhung gis mtshan nyid bstan pa yin te/ dang pos ngo bo'i khyad par rang don phun tshogs sgrub byed de bstan/ phyi mas byed las kyi khyad par gzhan don phun tshogs sgrub byed de bstan pa'i phyir/ ngo bo nyid mtshan ston pa'i gzhung gis mtshon bya bstan te/ chos sku'i thun mong ma yin pa'i rgyu'i tha @31a @#/ /snyad bya rung bstan pa'i phyir/ shes mtshan bcu drug pa phrag gsum po de ston pa'i gzhung gis mtshon pa ye shes 'phangs nas ston pa yin gyi de dag mtshon pa ye shes dngos ma yin te/ shes mtshan bcu drug pa phrag gsum gyis khyad mtshan dang byed mtshan la ma dmigs pa'i phyir dang/ mtshan pa ye shes de lam du ma zhugs pa'i rgyud kyi thos bsam gang rung gi shes pa dang/ lam zhugs kyi rjes thob rtog bcas la byed/ phrag gsum po de gang yang ma yin pa'i phyir/ sbyor ba nyi shu po de lam shes dngos dang rjes mthun pa ci rigs yin gyi gzhi shes kyi cha dang rnam mkhyen gyi cha ni ma yin te/ chos sku'i thun mong ma yin pa'i rgyu'i sbyor ba yin pas gzhi shes kyang ma yin/ slob lam gyi gnas skabs yin pas rnam mkhyen yang ma yin pa'i phyir/ sbyor ba nyi shu po de la mkhyen gsum gyi sbyor ba 'byed pa'i tshul yod de/ de la dmigs pa'i sgo nas 'byed cing de yang mkhyen gsum la dmigs pa'i sbyor ba de la re re la bco brgyad bco brgyad sdoms pa'i nyi shur 'gyur ba'i phyir/ gzhi shes sbyor ba la bco brgyad du 'byed pa'i tshul yod de/ mod pa'i rnam pa zhes sogs kyi skabs nas bstan pa'i sdug bsngal bden pa'i steng gi stong bdag med rtogs pa'i gzhi shes kyi rnam pa la dmigs pa'i sems dpa'i ye shes de gnas pa bkag pa'i sbyor ba dang/ 'gog bden gyi rnam pa bzhi lam bden gyi bco lnga la dmigs pa'i sems dpa'i ye shes de rnal 'byor bkag pa'i sbyor ba dang/ sdug bsngal bden pa'i phyi ma gnyis kun 'byung gi bzhi rtogs pa'i gzhi shes kyi rnam pa la dmigs pa'i de zab pa gzhi shes sbyor ba dang/ de gsum ga la rten gyi sgo nas phye ba brgyad/ thabs kyi sgo nas bzhi/ 'bras bu dang dus kyi sgo nas gsum ste/ bco brgyad yod pa'i phyir/ lam shes sbyor ba la bco brgyad yod de/ rgyu dang lam dang zhes sogs kyis bstan pa'i sdug bsngal bden pa'i steng gi dang po gnyis dang mtshan nyid med pa'i cha gcig rtogs pa'i lam shes kyi rnam pa la dmigs pa'i de gnas pa bkag pa'i sbyor ba dang/ 'gog bden gyi rnam pa bcu drug lam bden gyi rnam pa bdun rtogs pa'i de rnal @31b 'byor bkag pa'i sbyor ba dang/ sdug bsngal bden pa'i rnam pa phyi ma gnyis mtshan nyid med pa'i cha gcig kun 'byung gi rnam pa brgyad rtogs pa'i de gting dpag dka' ba'i lam shes sbyor ba dang/ de la yang snga ma de bzhin du yod pa'i phyir/ rnam mkhyen sbyor ba la bco brgyad yod de/ dran pa nyer gzhag ces sogs kyis bstan pa'i rnam thar sgo gsum/ spong lam bzhi/ de bzhin nyid kyi rnam pa ma gtogs pa chos can gyi rnam pa brgya dang gnyis kyi ngo bo bden pas stong pa'i stong nyid rtogs pa'i rnam par thar pa'i sgo stong nyid dang/ sdug bsngal bden pa'i rnam pa dang po gnyis la dmigs pa'i spong lam bar chad med lam dang/ de bzhin nyid kyi rnam mkhyen gyi rnam pa la dmigs pa'i sems dpa'i ye shes de rnam par thar pa'i sgo stong nyid dang gnas pa bkag pa'i sbyor ba dang/ de rnams kyi rgyu bden pas stong pa chos nyid mtshan med rtogs pa'i sgo mtshan med dang/ 'gog lam gyi rnam pa brgyad rtogs pa'i spong lam bar chad med lam/ de bzhin nyid kyi rnam pa'i cha gcig rtogs pa'i rnam mkhyen gyi rnam pa la dmigs pa'i sems dpa'i ye shes rnam par thar pa'i sgo mtshan med dang/ rnal 'byor bkag pa'i sbyor bar 'jog pa dang/ de rnams kyi 'bras bu bden pas stong pa'i tshes nyid smon med rtogs pa'i sgo smon med dang/ sdug bsngal bden pa'i rnam pa phyi ma gnyis dang/ kun 'byung gi rnam pa rnams rtogs pa'i spong lam bar chad med lam dang/ de bzhin nyid kyi rnam pa'i cha gcig la dmigs pa'i sems dpa'i ye shes rnam par thar pa'i sgo smon med dang/ chad med pa rnam mkhyen sbyor ba dang/ de la yang rten gyi sgo nas phye ba sogs snga ma bzhin du yod pa'i phyir/ mdor na sems dpa'i sbyor ba nyi shu po mtshan gzhi/ chos sku'i thun mong ma yin pa'i rgyu'i sbyor ba yin par mtshon/ don gnyis phun tshogs sgrub byed kyi sems dpa'i ye shes yin pa zhes mtshon pa yin no; ;gnyis pa rgyus mtshon pa'i lugs la/ kha cig /'di'i mtshon tshul ni mtshan nyid mtshan gzhi mtshon bya gsum gyi sgo nas mtshon zhing/ de rnams gzhung gis bstan tshul yod de/ sbyor ba nyi shu ston pa'i gzhung gis mtshan gzhi bstan/ nyon mongs rtags dang mtshan ma dang/ /zhes sogs @32a @#/ /kyis mtshon bya de bstan/ shes khyad byed pa gsum ston pa'i gzhung gis mtshan nyid bstan pa'i phyir/ gang du mtshon na rang 'bras sangs rgyas skyed byed du mtshon/ mtshan nyid kyi khyad par yod de/ rang 'bras sangs rgyas kyi sa'i mkhyen gsum gyi rtogs pa skyed byed kyi nus pa de yin pa'i phyir/ mdor na sems dpa'i sbyor ba nyi shu po mtshan gzhi/ rang 'bras sangs rgyas skyed byed du mtshon/ rang 'bras sangs rgyas kyi sa'i mkhyen gsum gyi rtogs pa bskyed pa'i nus ldan yin zhes mtshon zhing/ de ltar mtshon nus pa'i rgyu mtshan yod de/ mkhyen gsum gyi rtogs pa thob pa'i cha nas sangs rgyas su bzhag pa'i phyir/ de ltar mtshon dgos pa yin te/ 'di'i bshad bya rtsa ba'i mdo las/ sher phyin de sangs rgyas skyed byed yin pas de bzhin gshegs pa las drin che ba gsungs pa dang/ sher phyin sgom pa po'i byang chub sems dpa' la sangs rgyas rnams kyis grogs mdzad par gsungs pas/ de'i don 'dir gtan la 'bebs pa'i phyir/ dang po der thal/ stobs bcu la sogs bskyed pa'i sgo nas sangs rgyas skyed byed du gsungs pa'i phyir/ mdo las/ bcom ldan 'das ji ltar na sher phyin 'di de bzhin gshegs pa rnams bskyed pa lags/ ji ltar na shes rab kyi pha rol tu phyin pa 'dis de bzhin gshegs pa rnams ston pa lags/ de skad ces gsol pa dang/ bcom ldan 'das kyis bka' stsal pa/ rab 'byor sher phyin zab mo 'dis de bzhin gshegs pa'i stobs bcu dang mi 'jigs pa bzhi dang/ so so yang dag par rig pa bzhi dang/ byams pa chen po dang snying rje chen po dang sangs rgyas kyi chos ma 'dres pa bco brgyad dang/ rnam pa thams cad mkhyen pa nyid kyi bar bskyed do/ /chos 'di dag dang ldan pa'i de bzhin gshegs pa de bzhin gshegs pa nyid du brjod do/ /zhes gsungs pa'i phyir/ shes mtshan bcu drug pa phrag gsum skyed byed kyi nus pa sems dpa'i mkhyen gsum sbyor ba la shes mtshan gyi ming gis btags pa yin zhing/ 'dogs pa'i chos gsum tshang ste/ mkhyen gsum sbyor ba de'i rgyu yin pas rgyu la 'bras bu'i ming btags pa dang/ dgos pa de 'dra ba'i nus pa de nus pa @32b gzhan las khyad par 'phags pa dang/ dngos la gnod byed shes mtshan bcu drug pa phrag gsum po de mdo las sangs rgyas kyi sa'i ye shes su gsungs/ mkhyen gsum sbyor ba slob lam du yod pa'i phyir/ khyad mtshan gyi mtshon tshul ni sangs rgyas skyed byed kyi nus pa de sems dpa'i sbyor ba kho na la yod kyi/ dman pa'i sbyor ba la med pas gzhan ldan rnam bcad kyi sgo nas mtshon zhing/ de yang sems dpa'i sbyor ba nyi shu po mtshan gzhi/ khyod kho na sangs rgyas skyed byed du mtshon/ khyod kho na khyad par bcu drug dang ldan pa'i sgo nas sangs rgyas kyi sa'i mkhyen gsum gyi rtogs pa skyod byed kyi nus ldan yin pa zhes mtshon pa'i phyir/ de ltar mtshon nus te/ theg dman la chos kyi bdag med rtogs pa med pa'i phyir/ byed mtshan gyi mtshon tshul yod de/ de ltar rang gi sbyor ba'i rtogs pa la gzhan 'god pa'i gzhan don chung ngu dang ldan pa'i sems dpa'i sbyor ba nyi shu po mtshan gzhi/ gzhan don mthar thug gi sangs rgyas skyed byed du mtshon/ sangs rgyas sa'i rtogs pa chen po la gzhan bkod pa'i sgo nas gzhan don rgya chen po dang ldan pa'i sangs rgyas kyi sa'i mkhyen gsum gyi rtogs pa skyed byed kyi nus ldan yin pa zhes mtshon pa'i phyir/ gsum pa 'bras bus mtshon pa'i lugs la kha cig /'di'i mtshon tshul ni 'bras bus rgyu'i nus pa mtshon zhing/ de yang 'bras bu shes khyad byed pa gsum po de/ rang gi rgyur gyur pa'i sems dpa'i sbyor ba la rang nyid bskyed pa'i nus pa yod par mtshon par byed pa na mtshan nyid kyi sgra byed par sgrub pa dang/ de ngo bo nyid mtshon byed yin pas mtshan nyid kyi sgra las sgrub tu 'jug pa dang/ dper na ston dus kyi lo thog phun sum tshogs pa de rang gi rgyur gyur pa'i dpyid dus kyi zhing la rang nyid bskyed pa'i nus pa yod par mtshon pa lta bu yin zhing/ de yang rigs mi mthun de sel ba'i mtshan mtshon ma yin zhes gsungs/ de las gzhan pa'i lugs bshad pa la/ kha cig 'di'i mtshon tshul ni/ sbyor ba'i rang bzhin du mtshon zhing shes khyad byed pa gsum po mtshan gzhi dang/ ngo bo nyid mtshan de mtshon byar byed pa dang/ shes mtshan gyi mtshon tshul ni gzhi'i gnas lugs rtogs pa'i bye brag dang ldan pa'i shes mtshan dang/ phan bde skyob pa sogs byed pa dang ldan pa'i byed mtshan @33a @#/ /gnyis mtshan gzhi dang/ sems dpa'i gzhi shes sbyor ba mtshon bya dang/ lam gyi gnas lugs rtogs pa'i bye brag dang ldan pa'i shes mtshan dang/ skyob pa la sogs pa'i byed pa dang ldan pa'i byed mtshan gnyis mtshan gzhi dang/ lam shes sbyor ba mtshon bya dang de bzhin gshegs pa de nyid kyi chos la dmigs nas mthong chos la bde bar gnas pa rtogs pa sogs kyi bye brag dang ldan pa'i shes mtshan dang/ chos 'khor bskor ba sogs kyi byed pa dang ldan pa'i byed mtshan gnyis mtshan nyid dang/ rnam mkhyen sbyor ba mtshon byar byas nas mtshon pa dang/ khyad mtshan gyi mtshon tshul ni sdug bsngal bden pa'i steng gi chos nyid bsam gyis mi khyab pa rtogs pa sogs kyi sgo nas dman pa'i sbyor ba las khyad par 'phags par mtshon pa yin no/ /zhes gsungs so/ /lugs dang po mi 'thad de/ sems dpa'i sbyor ba nyi shu po de lam sher phyin gyi mtshan gzhi tsam du rung yang/ 'phags seng gnyis kyi rgyan rtsa ba'i dgongs pa bkral ba ltar na/ nyon mongs rtags dang mtshan ma dang/ /zhes sogs kyis lam sher phyin gyi rnal 'byor mtshan gzhi dang/ mtshon bya lam sher phyin dngos de bstan pa'i phyir dang/ shes mtshan bcu drug pa phrag gsum ston pa'i gzhung gis mtshan gzhi'i steng du mtshan nyid nges byed kyi tshad ma bstan pa gsal bar gsungs pa'i phyir/ sems dpa'i sbyor ba nyi shu po de chos sku'i thun mong ma yin pa'i rgyu'i sbyor bar mtshon par mi 'thad de/ de tshad mas nges na de chos sku'i thun mong ma yin pa'i rgyu'i sbyor bar tshad mas nges dgos pa'i phyir/ der thal/ de tshad mas nges na de byang chub la nye ba'i sbyor ba dang/ myur du 'tshang rgya ba'i sbyor bar tshad mas nges dgos pa'i phyir/ rgyus mtshon pa'i lugs de mi 'thad de/ sangs rgyas kyi sa'i mkhyen gsum gyi rtogs bskyed byed kyi nus pa des sems dpa'i mkhyen gsum sbyor ba rang 'bras sangs rgyas skyed byed du mtshon pa mi rigs pa'i phyir/ de ltar mtshon pa dgos pa med pa'i phyir/ shes mtshan bcu drug pa phrag gsum po de theg chen gyi sbyor ba'i tha snyad bya rung ba'i rgyu mtshan du byed pa mi rigs te/ skabs 'dir sbyor ba'i mtshan nyid gtan la phab pa'i dgos @33b pa mi shes pa'i skyon du 'gyur ba'i phyir dang/ mtshon tshul sogs kyang bzhag dka' ba'i phyir/ sems dpa'i mkhyen gsum sbyor ba de shes khyad byed pa gsum gyi dman pa'i sbyor ba las khyad par du 'phags par mtshon pa ma yin te/ khyad mtshan gyi de gsum dman pa'i sbyor ba las khyad par 'phags par mtshon pa'i phyir/ lugs gsum pa mi 'thad de/ mtshan nyid sgo bzhi khas mi len pa'i mtshon sbyor gyi rnam gzhag byad pa dgos pa med pa'i phyir/ gnyis pa rang lugs bzhag pa la/ mtshan gzhi/ mtshon bya/ mtshan nyid/ ji ltar mtshon tshul/ sa mtshams dang lnga/ dang po ni sems dpa'i ngo bo nyid kyi rnal 'byor bcu drug po de yin/ gnyis pa la spyi dang/ bye brag gnyis las/ dang po ni yum gyi mdo dang/ rgyan gyi bstan bya'i gtso bor byas nas bstan pa'i lam sher phyin gyi rnal 'byor de nyid yin zhing/ 'dir de'i mtshan nyid gtan la 'bebs pa'i rgyu mtshan yod de/ theg chen gyi rigs can dbang rnon rnams kyis ched du gnyer bya'i gtso bo mthar thug ni 'bras bu sher phyin yin la de thob pa la lam sher phyin rdzogs par nyams su len dgos/ de la de tshad mas nges dgos/ de yang mtshan nyid kyi sgo nas tshad ma'i yul du mtshon dgos pa'i rgyu mtshan gyis de'i mtshan nyid dngos bstan bstan bya'i gtso bor byas nas bstan pa'i phyir/ 'bras bu sher phyin de theg chen gyi rigs can dbang rnon rnams kyis ched du gnyer bya mthar thug yin te/ shes rab nang nas kun mkhyen ltar/ /zhes gsungs pa'i phyir/ yum gyi mdo dang rgyan gyi lam sher phyin de nyid bstan bya'i btso bor byas nas bstan pa yang yin te/ de gnyis kyis sher phyin gyi sgras bstan pa'i gzhung lam 'bras bu'i sher phyin gsum yang dang yang du bstan bya'i gtso bor byas nas bstan zhing/ gsum po'i nang nas lam 'bras kyi sher phyin la mngon par rtogs pa brgyad du phye/ rjod byed gzhung sher phyin la skabs brgyad du phye nas bstan bya'i gtso bor byas nas bstan pa'i phyir/ mtshon bya bye brag pa ni shes khyad byed pa gsum gyi sems dpa'i ye shes rnams dang/ ngo bo nyid mtshan rnams kyang yin/ mtshan nyid ni 'chad pa ltar gyi spyi dang bye brag gi mtshan nyid du 'gyur ba rnams yin no/ /bzhi pa mtshon tshul la/ spyi dang bye brag gi mtshon tshul gnyis las/ dang po ni nyon @34a @#/ /mongs rtag sogs kyis dben pa sogs kyi sems dpa'i ngo bo nyid kyi rnal 'byor bcu drug po mtshan gzhi/ 'dir dngos su bstan pa'i sher phyin gyi rnal 'byor du mtshon/ snying rje chen po dang/ stong nyid rtogs pa'i shes rab kyis zin pa'i sems dpa'i ye shes yin pa zhes mtshon/ mtshon tshul de 'thad de/ dang po nyid nas theg chen rigs nges kyi lam nyams len gyi rim pa mdo las sbas don du bstan pa de nyid 'dir dngos bstan bstan bya'i gtso bor byas nas bstan pa'i phyir/ gdul byas blang dor gyi gnas tshad mas nges pa'i phyir du mtshan mtshon gzhi gsum gyi tha snyad gnas par gsungs te/ mdo sde rgyan las/ sangs rgyas rnams kyi sems can la/ /phan gdags phyir na mtshan nyid dang/ /mtshan gzhi de ni mtshon pa yi/ /rab tu dbye ba bdag gis bshad/ /ces dang/ rigs pa'i bstan bcos su gal che ba'i skabs mang por yul yul can mtshan nyid kyi sgo nas gtan la phab pa shin tu mang ba'i phyir/ bye brag gi mtshon pa rang rang gi gzhung dang sbyar te bshad na/ de bzhin gshegs pa 'byung ba dang/ zhes sogs kyi skabs su/ nyon mongs rtag sogs kyis dben pa sogs kyi sems dpa'i ngo bo nyid kyi rnal 'byor dang po bzhi mtshan gzhi 'dir dngos bstan gyi sems dpa'i gzhi shes sbyor ba yin par mtshon/ nyon mongs rtag sogs kyis dben zhing gzhi shes pa'i sher phyin la brten nas de bzhin gshegs pa 'byung ba sogs yul bcu drug gang rung rtogs pa'i shes rab kyis zin pa'i sgo nas nyan thos kyi rtogs rigs su gnas pa'i sems dpa'i ye shes yin pa zhes pas mtshon/ 'dir dngos bstan gyi sems dpa'i gzhi shes sbyor ba la dbye na/ zin byed kyi sgo nas bcu drug yod/ stong nyid mtshan ma med bcas dang/ /zhes sogs la sems dpa'i rnal 'byor bar pa lnga mtshan gzhi/ skabs 'dir dngos su bstan pa'i sems dpa'i lam shes sbyor ba yin par mtshon/ stong nyid mtshan ma med bcas sogs yul bcu drug po gang rung rtogs pa'i shes rab kyis zin pa'i sgo nas theg chen gyi rtogs rigs su gnas pa'i sems dpa'i ye shes yin pa zhes mtshon zhing/ de la yang zin byed kyi sgo nas bcu drug yod/ de ni nyid kyi chos @34b bsten nas/ zhes sogs kyi skabs su/ gzhi lam gyi khyad par la dmigs pa sogs kyi sems dpa'i ngo bo nyid kyi rnal 'byor bdun po mtshan gzhi/ skabs 'dir dngos bstan gyi rnam mkhyen sbyor ba yin par mtshon/ de bzhin gshegs pa de nyid kyi chos la brten nas mthong chos la bde bar gnas pa sogs rtogs pa'i shes rab kyis zin pa'i sems dpa'i ye shes yin pa zhes mtshon zhing/ de la dbye na zin byed bcu drug gi sgo nas rnam pa bcu drug yod/ bsam mi khyab sogs khyad par gyi/ /zhes sogs kyi skabs su/ dang po nyid nas theg chen rigs nges kyi rgyud kyi theg chen gyi shes bzod skad cig ma bcu drug mtshan gzhi/ 'dir dngos bstan gyi dman pa'i sbyor ba las khyad par du 'phags pa'i sems dpa'i sbyor bar mtshon/ sdug bsngal bden pa'i chos nyid bsam gyis mi khyab pa sogs rtogs pa'i shes rab kyis dngos su zin pa'i dang po nyid nas theg chen rigs nges kyi sems dpa'i ye shes yin pa zhes mtshon zhing de la yang yul bcu drug rtogs pa'i zin byed kyi sgo nas bcu drug yod/ 'o na skabs 'dir sbyor ba phyi ma gnyis dman pa'i sbyor ba las khyad par 'phags pa dngos su bstan/ sems dpa'i gzhi shes sbyor ba dman pa'i sbyor ba las khyad par 'phags pa dngos su mi 'chad pa'i rgyu mtshan ci yin zer na/ kha cig /sbyor ba gzhan gnyis ngo bo'i sgo nas dman pa'i sbyor ba las khyad par 'phags par sgrub nus/ sems dpa'i gzhi shes sbyor ba rang gi ngo bo'i sgo nas dman pa'i sbyor ba las khyad par 'phags par sgrub mi nus pas de'i dbang du byas pa yin zer na/ de mi 'thad par thal/ sems dpa'i gzhi shes sbyor ba ngo bo'i sgo nas dman pa'i sbyor ba las khyad par 'phags par sgrub nus pa'i phyir te/ de ngo bo'i sgo nas dman pa'i sbyor ba las khyad par 'phags pa'i phyir te/ des dman pa'i sbyor ba rnams zil gyis gnon pa'i phyir/ der thal/ spyod pa nan tan dang bral ba'i sems bskyed kyis kyang nyan rang gi yon tan gyi rgyan thams cad zil gyis gnon par gsungs shing/ brda las byung ba'i sems dang po bskyed pa'i theg chen gyi sgrub pas kyang/ tshal drug dang chos mthun gyi theg dman gyi rtogs pa'i chos drug zil gyis gnon par gsungs pa'i phyir/ kho na re/ sems dpa'i gzhi shes sbyor @35a @#/ /ba thabs shes khyad par can gyis zin pa la brten nas dman pa'i sbyor ba las khyad par 'phags kyang de lta bu'i zin byed la ma bltos par dman pa'i sbyor ba las khyad par 'phags par sgrub mi nus pas/ de'i dbang du byas pa yin zer na/ 'o na sbyor ba gzhan gnyis kyang dman pa'i sbyor ba las khyad par mi 'phags par thal/ de gnyis kyang thabs shes khyad par can gnyis kyis zin byed la ma bltos par dman pa'i sbyor ba las khyad par 'phags par sgrub mi nus pa'i phyir/ de gnyis kyis zin pa'i dbang gis dman pa'i sbyor ba las khyad par 'phags pa'i phyir/ kha cig na re/ de'i rgyu mtshan yod de/ 'dir khyad gzhi theg chen gyi mthong lam skad cig ma bcu drug gi steng gi sbyor ba phyi ma gnyis dman pa'i sbyor ba las khyad par du 'phags par sgrub/ sems dpa'i gzhi shes sbyor ba bcu drug po de'i nang du ma gtogs pa'i rgyu mtshan gyis dman pa'i sbyor ba las/ khyad par du 'phags par dngos su ma bstan pa yin pa'i phyir na/ 'o na theg chen gyi sgom lam gyi ngo bor gyur pa'i sbyor ba phyi ma gnyis kyang dman pa'i sbyor ba las khyad par 'phags par sgrub mi nus par thal/ sgom lam du gyur pa'i sbyor ba phyi ma gnyis theg chen gyi mthong lam shes bzod skad cig ma bcu drug gi nang du ma gtogs pa'i phyir/ rang gi lugs la/ sbyor ba gzhan gnyis dman pa'i sbyor ba las khyad par du 'phags par dngos su bstan/ gzhi shes sbyor ba dman pa'i sbyor ba las khyad par du 'phags par dngos su mi 'chad pa'i rgyu mtshan yod de/ mkhyen gsum sbyor ba'i nang nas phyi ma gnyis po gang rung la khyab mtha' bzung ba'i sgo nas/ dman pa'i sbyor ba las khyad par du 'phags par sgrub nus/ gzhi shes sbyor ba la khyab mtha' bzung ba'i sgo nas/ dman pa'i sbyor ba las khyad par du 'phags par sgrub mi nus pa'i rgyu mtshan gyis sbyor ba gsum la de lta bu'i khyad par phye ba yin pa'i phyir/ ma grub na/ der thal/ gzhi shes sbyor ba la dman pa'i sbyor ba las khyad par du 'phags pas ma khyab pa'i phyir/ ma grub na/ der thal/ theg dman slob pa'i mkhyen pa yin na/ gzhi shes sbyor ba yin pas khyab pa'i phyir/ ! phan dang bde dang skyob @35b pa dang/ zhes sogs kyi skabs su/ nyon mongs rtag sogs kyis dben pa'i sems dpa'i ngo bo nyid kyi rnal 'byor bcu drug mtshan gzhi/ gzhan don sgrub pa'i byed las khyad par can dang ldan pa'i sems dpa'i sbyor ba yin par mtshon/ phan bde skyob pa sogs byed las bcu gcig po gang rung dang ldan pa'i sems dpa'i ye shes yin pa zhes mtshon zhing/ de la dbye na bcu gcig yod de/ gzhi shes sbyor ba'i byed las khyad par can gsum/ lam shes sbyor ba'i byed las khyad par can bdun/ rnam mkhyen sbyor ba'i byed las khyad par can gcig rnams su yod pa'i phyir/ nyon mongs rtag dang mtshan ma dang/ / zhes sogs kyi skabs su/ nyon mongs rtag sogs su 'dzin pa spangs shing/ gzhi shes pa'i sher phyin la brten nas de bzhin gshegs pa 'byung ba sogs rtogs pas zin pa'i sems dpa'i ye shes/ 'dir dngos bstan gyi ngo bo nyid mtshan gyi mtshan nyid de la dbye na bcu drug yod/ kha cig gi gsung na re/ ngo bo nyid mtshan mtshon byar byed par mi 'thad par thal/ de mtshan nyid yin pa'i phyir/ mtshan nyid bzhi par bzhed pa yin/ /zhes gsungs pa'i phyir/ zer na/ skyon med de/ mtshan nyid kyi sgra byed sgrub dang las sgrub gnyis ka la 'jug pa'i shes khyad byed pa gsum gyi skabs su dang po'i dbang du byas pa'i 'jug tshul dang/ 'dir phyi ma'i dbang du byas pa'i 'jug tshul yin pa'i phyir/ de yang mtshan gzhi nyon mongs rtag sogs kyis dben pa'i sems dpa'i ye shes sogs blo yul du shar ba na lam sher phyin gyi rnal 'byor spyi dang khyad par shes khyad byed pa gsum mtshon byar go ba 'byung tsam gyi dbang du byas par mngon no/ /lnga pa sa mtshams ni lam sher phyin gyi sa mtshams theg chen tshogs lam nas rgyun mtha'i bar du yod/ sems dpa'i gzhi shes sbyor ba dang ngo bo nyid mtshan gyi dang po bzhi dang sems dpa'i gzhi shes sbyor ba ma gtogs pa'i shes khyad byed pa gsum yang tshogs lam nas rgyun mtha'i bar du yod/ lnga po de ni tshogs lam nas rgyun mtha'i sbyor ba'i lam gyi bar du yod do/ / ! g.yo ba la sogs zhes bya dang/ /zhes sogs gyi skabs su/ lung ma bstan gyi lta ngan bcu bzhi gang la bsdu ba'i gzhi dang/ bsdus ba'i ngo bo// dbye bsdu/ gang zag gang la gtso che ba/ sgra @36a @#/ /don bshad pa'o/ /dang po ni lta ngan bcu bzhi po 'di dag lta ngan drug cu re gnyis las bsdus shing/ de la re gnyis yod de/ sngon gyi mtha' la brten pa bco brgyad/ phyi ma'i mtha' la brten pa zhe bzhi dang bcas pa re gnyis yod/ dang po rtag par smra tshul ji ltar yin zhe na/ lta ngan 'di rnams ni shas cher zag bcas kyi mngon shes la brten nas 'byung ba yin te/ mu stegs byed kha cig mngon shes kyis bar bskal nyi shu dang/ kha cig gis bzhi bcu dang/ kha cig gis brgyad bcu dran pa sogs yod pas de 'dra ba'i mngon shes kyis brtag pa na/ lha 'ga' zhig gis lus bzang po nas bzang por skye ba dang/ ngan pa nas ngan par skye bar mthong ba na de dag lus dang bcas pa rtag par lta ba'i lta ngan skyes/ tshangs pa chen po ma shi zhing 'khor gyi lha 'ga' zhig shi nas mir skye ba mthong ba na tshangs pa chen po ni rtag /gzhan ni mi rtag par lta ba'i lta ngan skyes/ lha 'ga' zhig ni shi 'phos 'ga' zhig ma 'phos par mthong ba na la la mi rtag par lta ba'i lta ngan skyes pa sogs yin pa'i phyir/ rgyas par shes 'dod na tshangs pas dris pa'i mdo dang/ kun btus sogs las shes par bya'o/ /de rnams las bsdus nas bcu bzhi mdzad pa yin te/ rtsa ba shes rab las/ gang 'das phan chad mtha' sogs dang/ /rtag la sogs par lta ba dang/ /mya ngan 'das dang phyi mtha' dang/ /sngon gyi mtha' la brten pa yin/ /zhes gsungs pa'i phyir/ gnyis pa ngo bo ni gang zag gi bdag 'dzin kun btags yin te/ gang zag rang rkya thub pa'i rdzas yod dang phung po de'i dbang bsgyur byar zhen nas/ bdag dang 'jig rten rtag pa sogs su zhen pa yin pa'i phyir/ gsum pa dbye bsdu la dbye ba dang/ bsdu ba gnyis las/ dang po dbye tshul la/ bdag dang 'jig rten rtag par lta ba mi rtag par lta ba/ gnyis kar lta ba/ gnyis ka ma yin par lta ba sogs kyi sgo nas dbye ba yin zer na/ 'di la tshig don gnyis ka la skyon chags te/ dang po chos can/ gang zag gi bdag lta kun btags yin par thal/ 'dir bstan lung ma bstan gyi lta ngan yin pa'i phyir/ 'dod mi nus te/ bdag dang phung po rtag par 'dzin pa lhan skyes yin pa'i phyir/ gnyis pa mi 'thad de/ @36b de 'dzin stangs don mthun yin pa'i phyir/ gsum pa mi 'thad de/ bdag dang phung po gnyis rtag par lta na mi rtag par lta ba 'gal/ mi rtag par lta na rtag par lta ba 'gal ba'i phyir/ yang kha cig gis rtag par bden par lta ba mi rtag par bden par lta ba sogs kyi dbye ba yin zer na/ de yang mi 'thad de/ dang po bden 'dzin kun btags yin pa'i phyir/ gnyis pa chos can/ khyod kyi zhen yul med par rtogs pa'i sems dpa'i ye shes sems dpa' gzhi shes sbyor ba yin par thal/ khyod 'di bstan lung ma bstan gyi lta ngan yin pa'i phyir/ 'dod mi nus te/ de stong nyid rtogs pa'i sems dpa'i ye shes yin pa'i phyir/ de la sogs pa'i tshig don gyi skyon gcod tshul brgal rtags kyi skabs su rgyas par bkad pa las shes par bya'o/ /rang lugs la/ sngon gyi mtha' la brten pa'i bzhi tshan gyi khyad par yod de/ gang zag gi bdag dang 'jig rten rtag par lta ba/ mi rtag par lta ba/ rang bzhin rtag la gnas skabs 'gyur bar lta ba/ rtag mi rtag gnyis ka ma yin pa'i gang zag gi bdag dang phung por lta ba rnams yin pa'i phyir/ de bzhi la sngon gyi mtha' la brten pa'i lta ba zhes 'chad pa'i rgyu mtshan yod de/ skye ba snga ma'i bdag dang phung po sogs la dmigs nas phyin ci log tu lta ba'i rgyu mtshan gyis de ltar bshad pa'i phyir/ bzhi tshan gnyis pa'i khyad par yod de/ gang zag gi bdag dang 'jig rten mtha' dang mi ldan pa ste skye ba phyi mar 'jug pa'i de gnyis su lta ba/ mtha' dang ldan pa ste skye ba phyi mar mi 'jug par lta ba/ 'ga' zhig 'jug 'ga' zhig mi 'jug par lta ba/ de gnyis ka ma yin pa'i gang zag gi bdag dang phung por lta ba rnams yin pa'i phyir/ bzhi po de la phyi ma'i mtha' la brten pa'i lta ba zhes 'chad pa'i rgyu mtshan yod de/ skye ba 'di'i bdag dang phung po la dmigs nas phyin ci log tu lta ba'i rgyu mtshan gyis de ltar bshad pa'i phyir/ bzhi tshan gsum pa'i khyad par yod de/ grol bar 'dod pa'i gang zag gi bdag grongs phan chad 'byung bar lta ba/ mi 'byung ba'i gang zag gi bdag tu lta ba/ 'ga' zhig 'byung 'ga' zhig mi 'byung bar lta ba/ gnyis ka ma yin pa'i gang zag gi bdag tu lta ba rnams yin pa'i phyir/ de rnams la myang 'das kyi mtha' la brten pa'i lta ba zhes 'chad pa'i rgyu @37a @#/ /mtshan yod de/ grol bar 'dod pa'i gang zag gi bdag las brtsams pa'i dri ba yin pa'i rgyu mtshan gyis de ltar bshad pa'i phyir/ lus srog la brten pa gnyis kyi khyad par yod de/ lus dang gang zag gi bdag rdzas gcig tu lta ba dang/ rdzas tha dad du lta ba dag yin pa'i phyir/ de gnyis la lus srog la brten pa'i lta ba zhes 'chad pa'i rgyu mtshan yod de/ gang zag gi bdag dang phung po gnyis la dmigs nas phyin ci log tu lta ba'i rgyu mtshan gyis de ltar bshad pa'i phyir/ bzhi pa bsdu ba la bcu bzhi po bsdu na g.yo ba/ 'du ba bkram pa bcum pa'i lta ba bzhir 'du bas dbang du byas na/ gang zag gi bdag dang 'jig rten rtag par lta ba mtha' dang mi ldan par lta ba/ grol bar 'dod pa'i bdag shi phan chad 'byung ba lta ba/ lus srog rdzas tha dad du lta ba'i lta ba rnams g.yo ba'i lta bar 'dus shing/ de rnams la g.yo ba'i lta ba zhes 'chad pa'i rgyu mtshan yod de/ yul la sgrub pa'i rnam pas 'jug pa'i rgyu mtshan gyis de ltar bshad pa'i phyir/ gang zag gi bdag dang phung po mi rtag par lta ba/ de gnyis mtha' dang ldan par lta ba/ grol bar 'dod pa'i bdag grongs phan chad mi 'byung bar lta ba/ lus srog rdzas gcig tu lta ba rnams 'du ba'i lta ba yin zhing/ de ltar 'chad pa'i rgyu mtshan yod de/ yul la dgag pa'i rnam pas 'jug pa'i rgyu mtshan gyis de ltar bshad pa'i phyir/ rtag mi rtag gnyis kar lta ba/ krol bar 'dod pa'i bdag shi phan chad 'byung mi 'byung gnyis kar lta ba rnams bkram pa'i lta ba yin zhing/ de rnams la bkram pa'i lta ba zhes 'chad pa'i rgyu mtshan yod de/ yul la dgag sgrub mnyam pas 'jug pa'i rgyu mtshan gyis de ltar bshad pa'i phyir/ rtag mi rtag gnyis ka ma yin pa sogs bzhi tshan gsum gyi mtha' ma gsum bcum pa'i lta ba yin zhing/ de rnams la de ltar 'chad pa'i rgyu mtshan yod de/ yul la dgag sgrub gnyis ka bkag pa'i rnam pas 'jug pa'i lta ba yin pa'i rgyu mtshan gyis de ltar bshad pa'i phyir/ lnga pa gang zag gang la gtso che ba bshad pa la/ lta ba de rnams gang zag gang la gtso che ba'i tshul yod de/ bzhi tshan gsum gyi dang po gsum dang lus srog rdzas tha dad du lta ba ni @37b grangs can la gtso che/ gnyis pa rgyang phan la gtso che/ gsum pa'i gsum gcer bu ba dang/ bzhi pa'i gsum mu stegs gnas ma bu pa la/ lus srog rdzas gcig tu lta ba bye brag pa la gtso che ba yin pa'i phyir/ grangs can la gsum po de gtso che ba'i rgyu mtshan yod de/ des bdag dang 'jig rten rtag pa dang/ bdag dang 'jig rten phyi mar 'gro ba dang/ grol ba'i bdag shi nas 'jig rten phyi mar 'gro ba dang/ lus srog rdzas tha dad du 'dod pa'i phyir/ rgyang phan la gsum po de gtso che ba'i rgyu mtshan yod de/ des skye ba snga phyi mi 'dod pas tshe 'di'i bdag dang phung po mi rtag pa dang/ skye ba phyi mar mi 'jug pa dang/ grol bar 'dod pa'i bdag kyang skye ba phyi mar mi 'jug par 'dod pa'i phyir/ gsum po de gcer bu pa la gtso che ba'i rgyu mtshan yod de/ des bdag dang 'jig rten rang bzhin rtag la gnas skabs 'gyur ba dang/ bdag 'ga' zhig 'jig rten phyi mar 'jug /'ga' zhig mi 'jug pa dang/ grel bar 'dod pa'i bdag 'ga' zhig grongs phan chad 'byung/ 'ga' zhig mi 'byung bar 'dod pa'i phyir/ mu stegs gnas ma bu pa pa la gsum po de gtso chen ba'i rgyu mtshan yod de/ des bdag dang 'jig rten rtag mi rtag gang du yang brjod du med pa'i bdag rang rkya thub pa'i rdzas yod dang/ phung po de'i dbang bsgyur byar 'dod pa'i phyir/ lus srog rdzas gcig tu lta ba bye brag pa la gtso che ba'i rgyu mtshan yod de/ des bdag gang yin lus dang lus gang yin bdag gam srog tu 'dod pa'i phyir/ lnga pa sgra don la spyir lan la 'go gcig /rnam phye/ dri ba po nyid la dri ba dris pa'i lan dngos su mi 'debs pas lan dang bzhi yod pa'i de dag gi khyad par yod de/ yang srid skyes pa rnams 'chi 'am mi 'chi zhes dris pa la 'chi zhes 'go gcig gi lan 'debs pa dang/ yang de slar skye ba len nam mi len dris pa na srid pa spangs pa rnams ni mi len/ ma spangs pa rnams ni len zhes phye sto lan 'debs pa dang/ skyes bu 'di khyad par 'phags sam zhes dris par gang las zhes dri ba po nyid la dris nas lan 'debs pa rnams yin no/ /zhes 'chad par byad pa la/ mdzod las/ 'go gcig pa dang rnams bye dang/ /dri dang bzhag par lung bstan pa/ /'chi dang skye dang khyad par 'phags/ /bdag gzhan la sogs go rim @38a @#/ /bzhin/ /zhes gsungs pa yin pa'i phyir/ de rnams kyi nang nas 'di ni phyi ma'i dbang du byas pas de ltar na bcu bzhi po de la lung ma bstan gyi lta ba zhes 'chad pa'i rgyu mtshan yod de/ mu stegs kyi ston pa rnams kyis lta ngan re gnyis po bcu bzhir bsdus nas gang zag rang rkya thub pa'i rdzad yod dang/ phung po de'i dbang bsgyur bya yin pa zhe phug la bzhag nas/ ston pa la bdag dang 'jig rten rtag gam mi rtag sogs kyi dri ba bcu bzhi byas pa la dri ba rnams khyad gzhi gang zag gi bdag las brtsams pas dri ba yin pas khyad gzhi gang zag gi bdag bkag na ni mu stegs byed de dag bdag med ston pa'i snod du mi rung/ ma bkag par rtag mi rtag sogs su lung bstan na lta ngan lhag par 'phel nas don du mi 'gyur ba la dgongs nas lan dngos su lung ma bstan pa la dgongs nas lung ma bstan gyi lta ngan zhes bshad pa'i phyir/ ji skad du yang rin chen phreng ba las/ 'jig rten mtha' dang ldan nam zhes/ /zhus na rgyal bas mi gsungs bzhugs/ /gang phyir 'di ltar zab mo'i chos/ /snod min 'gro la mi gsung ba/ /de yi phyir na mkhas rnams kyis/ /kun mkhyen thams cad mkhyen par shes/ /zhes gsungs pa'i phyir/ sgra don de ltar yin par ma zad dge sogs gsum gyi nang nas kyang lung ma bstan yin te/ bdag 'dzin kun btags yin pa'i phyir dang/ mi dge ba yin na bdag dang 'jig rten mtha' ldan du lta ba dang/ de bzhin gshegs pa grongs phan chad mi 'byung bar lta ba rnams de yin dgos pa la de rnams mi dge ba ma yin pa'i phyir te; gang zag gi bdag dang 'jig rten skye ba phyi mar mi 'gro bar lta ba dang/ grol bar 'dod pa'i gang zag gi bdag grongs phan chad 'byung mi 'byung du lta ba mi dge ba ma yin pa'i phyir/ 'di dag la go ba dbyis phyin pa rnyed na 'jig rten mtha' ldan la sogs med phyin ro/ /zhes pa'i don yang dbyis phyin par go bar 'gyur bas mang bkur bas phung po bdag tu khas blangs pa la mu stegs byed kyis ston pa la/ 'jig rten mtha' dang ldan nam zhes dris pa la rnam pa thams cad du lan lung ston mi rung bas ma khyab par thal/ khyod kyi lugs la phung po bdag yin pa gang zhig /phung po @38b mi rtag par lung ston rung gi mu stegs pa yod pa'i phyir/ zhes pa'o// lung ma bstan gyi lta ngan bcu bzhi zhen yul med par rtogs pa'i sems dpa'i ye shes chos can/ sems dpa'i gzhi shes sbyor ba yin te/ theg dman gyi rtogs rigs su gnas pa'i sems dpa'i ye shes yin pa'i phyir/ mtshan med rab tu sbyin la sogs/ /zhes sogs kyi skabs su/ mtha' dpyad pa la/ rten/ ngo bo// dbye ba/ thob pa'i rtags/ sgra don bshad pa la// dang po la lus rten/ sems rten gnyis las/ dang po la/ bye brag smra ba rnams ni gling gsum gyi mi kho na'i rten la skye bar 'dod de/ mdzod rang 'grel las/ mi rnams kyi nang kho na dang gling gsum ngag nas 'phen gyi gzhan nas ni ma yin no ci'i phyir zhe na shes rab dang skye ba med pa'i phyir/ zhes gsungs pa'i phyir/ theg chen pa'i lugs la de ltar ma nges te/ de tshe lha mi stong phrag brgyas/ /byang chub mchog tu sems bskyed do/ /zhes pa dang/ mdo las kyang/ klu nyi khri chig stong gis byang chub mchog tu sems bskyed par gsungs pa dang/ 'dod gzugs kyi lha mang pos byang chub tu sems bskyed nas lam shes myur du skye rung du byas pa sogs kyis kyang de dag gi rgyud la theg chen gyi tshogs lam gsar du skye ba yod pa 'grub pa'i phyir/ gnyis pa sems rten ni/ bsam gtan gyi dngos gzhi la brten ma brten gnyis ka yod de/ mi'i rten la yang bsam gtan gyi dngos gzhi la brten nas byang chub tu sems bskyed pa yod/ 'dod gzugs kyi lhas kyang sems bskyed pa yod/ ngan song gsum gyi rten la yang theg chen gyi tshogs lam gsar du thob pa yod pa'i phyir/ de ltar byas na/ theg chen tshogs lam 'dod sems dang bsam gtan sa drug gang rung la brten nas gsar du skye/ theg chen gyi tshogs lam chen po rab mtha'i bsam gtan gyi dngos gzhi la brten nas skye ste/ de nas rab mtha'i bsam gtan gyi dngos gzhi la brten nas chos rgyun gyi ting nge 'dzin thob pa'i phyir/ gnyis pa mdzod pa ba ltar na thos bsam gang rung gi mkhyen pa la bzhed/ mdzod las/ thos bsam las byung las gsum mo/ /zhes gsungs pa'i phyir/ rang lugs la/ de'i ngo bor gyur pas thos bsam sgom gsum ga'i shes rab yod de/ kun btus las/ tshogs kyi lam @39a @#/ /gang zhe na/ so so'i skye bo'i tshul khrims dang/ dbang po'i sgo sdom pa dang nam gyi cha stod dang cha smad la mi nyal bar rnal 'byor la brtson pa dang/ shes bzhin du gnas pa la mngon par dga' ba dang/ yang gang rgyur gyur pa'i dge ba gzhan dang thos pa dang bsam pa dang sgom pa las byung ba'i shes rab kyang rung ste/ zhes gsungs pa'i phyir/ de la sgom byung gi shes rab yod pa mi 'thad de/ nyi snang las/ 'di dag thams cad kyang thos pa dang bsam pa las byung bar rig par bya ste/ dang po kho nar bstan pa la 'jug pa'i rgyu yin pa'i phyir/ zhes gsungs pa'i phyir/ zhe na/ skyon med de/ 'di gnyis gtso che ba la dgongs pa'i phyir/ de ltar ma yin na/ tshogs lam na bsam gtan gyi dngos gzhi med par thal/ der sgom byung gi blo med pa'i phyir/ 'dod mi nus te/ de na tshad med bzhi yod pa'i phyir/ theg chen tshogs lam chen po nas stong nyid rtogs pa'i zhi gnas thob ste/ dman lam sngon du ma song ba'i theg chen gyi sbyor lam drod thob ma thag pa'i lhag mthong 'di rang gi nyer len stong nyid rtogs pa'i zhi gnas la brten nas skyes pa'i phyir/ stong nyid rtogs pa'i lhag mthong gsar thob yin pa'i phyir/ kha cig /theg chen gyi tshogs lam yin na stong nyid rtogs myong yin pas khyab ste/ rgyan du theg chen gyi tshogs lam gyi mtshan nyid ston pa la 'di las gsal ba'i gzhung ma byung zhing 'dir mtshan med rab tu sbyin la sogs/ zhes sogs gsungs pa'i phyir dang/ rgyud bla ma las/ chos la mos pa sa bon te/ /pha rol phyin mchog ma las skyes/ /zhes gsungs pa'i phyir zer na/ de ni mi 'thad de/ theg chen gyi rigs can dbang po rnon pos theg chen lam du ma zhugs pa'i snga rol nas stong nyid rtogs par byed/ dbang rtul gyis theg chen gyi lam du zhugs rjes su stong nyid rtogs par byed pa yod par gsungs pa'i phyir/ dang po der thal/ dbu ma rgyan las/ yang dag shes rtsol sngon btang ste/ /zhes sogs gsungs pa'i phyir/ phyi ma der thal/ de nyid las/ yang dag dad pa'i rjes 'brang ba/ /zhes gsungs pa'i phyir/ kho na re/ phyi ma'i don theg chen gyi rigs can dbang rtul kha cig gis stong nyid la myong ba ma thon par snying rje chen po la myong ba thon de nas byang chub @39b kyi sems la myong ba 'don pa'i rigs can yod pa la dgongs pa'i phyir/ zer na/ 'o na de ltar sbyangs pas myong ba thon pa'i byang sems yod par thal/ dam bca' 'thad pa'i phyir/ 'dod na/ stong nyid la myong ba ma thon pa'i byang sems yod par thal lo/ /gzhan yang/ rtsa ba'i dam bca' mi 'thad par thal/ rnam bshad las/ theg chen gyi rigs can dbang rtul la nges pa med de/ zhes pa dang/ blo sbyongs ma byas sems can la/ /stong pa nyid ni bshad pa dang/ /zhes stong nyid ston pa'i snod mi rung gi byang sems la stong nyid bstan pas rtsa ltung 'byung bar gsungs pa dang/ sum brgya pa las kyang/ mig dang ldan pa'i mi zhig mun par zhugs te ci yang mi mthong ba de bzhin du gang dngos por lhung ba'i byang chub sems dpa'i sbyin par blta bar bya'o/ /zhes bden 'dzin gyis bcings pa'i byang sems kyi sbyin pa gsungs pa'i phyir/ gzhan yang/ byang sa las kyang gzugs sogs phyi rol don gyis stong bar bstan pa'i don la myong ba thon pa'i de'i ched du bya ba'i gdul bya med par thal/ der sems bskyed thabs rgyas par bshad pa'i don la myong ba thon pa'i de'i ched du bya ba'i gdul bya med pa'i phyir/ ma grub na song/ 'dod na/ de 'dra'i gdul bya chos can/ byang chub sems dpa' yin par thal/ byang chub kyi sems la myong ba thon pa'i gdul bya yin pa'i phyir/ 'dod na/ stong nyid rtogs shing ma nyams pa'i gang zag yin par thal/ byang chub sems dpa' yin pa'i phyir/ khyab pa khes/ 'dod na ma yin par thal/ sems tsam pa yin pa'i phyir/ der thal/ byang sa'i ched du bya ba'i gdul bya yin pa'i phyir/ rtsa bar 'dod mi nus te/ byang sa'i de kho na nyid kyi le'u brtsams pa la dgos pa yod pa'i phyir/ kha cig gis/ rgyal tshab chos rje'i gzhung chung 'ga' zhig dang/ rnam bshad las/ lam du ma zhugs pa'i byang chub sems dpa' zhes kyang bya/ zhes sogs la brten nas theg chen lam du ma zhugs pa'i byang sems yod par gsungs/ 'o na gzhan don don gnyer gyi byang chub kyi sems la myong ba thon/ byang chub don gnyer gyi byang chub kyi sems la myong ba ma thon pa'i theg chen lam du 'jug kha ma'i gang zag de de 'dra'i byang sems yin par thal/ dam bca' 'thad pa'i phyir/ 'dod na/ de 'dra'i byang chub @40a @#/ /kyi sems byang chub kyi sems yin par thal/ 'dod pa'i phyir/ 'dod na/ de chos can/ byang chub kyi sems ma yin par thal/ byang chub don gnyer gyi blo la myong ba ma skyes pa'i phyir/ gzhan yang/ byang chub kyi sems yin na/ gzhan don don gnyer dang/ byang chub don gnyer gyi blo gnyis ka la myong ba thon dgos par thal/ rgyal sras las dang po ba'i rgyur gyur pa'i byang chub kyi sems de bur shun gyi ro lta bu'i byang chub kyi sems btags pa bar gsungs pa'i phyir/ kho na re/ de 'dra ba de chos can/ byang chub kyi sems yin par thal/ gzhan don don gnyer gyi byang chub kyi sems yin pa'i phyir/ zhe na/ gang zag rang rkya thub pa'i rdzas yod kyis stong pa'i stong nyid chos can/ ston nyid yin par thal/ gang zag rang rkya thub pa'i rdzas yod kyis stong pa'i stong nyid yin pa'i phyi/ khyab pa khas/ lam la theg pa gsum gang rung gi lam dang/ thar pa cha mthun la theg pa gsum gang rung gi thar pa cha mthun gyis ma khyab ste/ rgyan gyi ched du bya ba'i gdul bya theg chen lam du 'jug kha ma'i rgyud kyi thar pa don gnyer gyi blo de lam yin kyang theg pa gsum po gang rung gi lam ma yin zhing/ de thar pa cha mthun yin kyang/ theg pa gsum po gang rung gi thar pa cha mthun ma yin pa'i phyir/ lam dang thar pa cha mthun yin te/ myong ba thon pa'i thar pa don gnyer gyi blo yin pa'i phyir/ gzhan yang/ de thar lam yin te/ lam gyi gtso bo gsum gyi nang nas byang chub kyi sems dang thar 'dod kyi blo thar lam du 'gyur ba la de gnyis la myong ba thon dgos/ stong nyid rtogs pa'i lta ba thar lam du 'gyur ba la myong ba thon mi dgos par rje'i gsung las 'byung ba'i phyir/ des na lam zhugs kyi gang zag la yang gsum po de gang rung gi lam zhugs kyis ma khyab par yang shes par bya'o/ /theg chen gyi thar pa cha mthun la yang bskal pa grangs med gsum nas 'tshang rgya ba'i thog ma yin pas ma khyab ste/ de la zag med kyi ye shes sde tshan (zhes rje'i gsung gi dgongs tshong bslangs pa'o//) nyer gcig gi rigs la myong ba thon dgos pa'i phyir/ des na theg chen gyi chos mngon rtogs/ theg chen gyi tshogs lam gyi mtshan nyid/ sbyin sogs rang rgyud la sgrub par mkhas shing dang po nyid nas theg chen @40b du rigs nges pa'i theg chen gyi chos mngon rtogs/ skabs 'dir dngos bstan bstan bya'i gtso bor gyur pa'i theg chen gyi tshogs lam gyi mtshan nyid/ de la dbye na der gyur pa'i theg chen tshogs lam chung 'bring chen po gsum yod/ gsum pa la thar pa cha mthun gyi rtogs pa rgyud la skyes pa'i rtags yod de/ gang zag gang gis 'khor ba'i nyes dmigs dang/ thar pa'i phan yon thos pa na lus kyi ba spu g.yo ba dang/ mig nas mchi ma 'khrug pa sogs kyi rtags khyad par can 'byung ba'i phyir/ mdzod 'grel las/ gang gis 'khor ba'i nyes dmigs dang bdag med pa dang thar pa'i phan yon brdzod pa'i gtam thos pa na spu zing zhes byed pa dang mchi ma 'khrug ces byed pa de dag la thar pa'i cha dang mthun pa'i dge ba'i rtsa ba yod par rig par bya'o/ /dper na dbyar gyi dus myu gu skyes pa na yul gyi gseb na sa bon yod pa shes pa bzhin/ zhes gsungs pa'i phyir/ bzhi pa/ de rnams la thar pa cha mthun zhes 'chad pa'i rgyu mtshan yod de/ thar pa bral ba'i khyad par yin zhing de'i cha dang mthun pa'i rgyu mtshan gyis de ltar bshad pa'i phyir/ nyi snang las/ 'dir thar pa ni bral ba'i khyad par yin la de'i cha la phan pa na cha mthun/ zhes gsungs pa'i phyir/ dman lam sngon song gi byang sems tshogs lam pa dang/ theg dman lam du ltung nges kyi tshogs lam pa gnyis shugs la bstan pa yin no/ /! sangs rgyas sogs mi dad pa dang/ zhes sogs kyi skabs su/ rgyan gyi ched du bya ba'i gdul bya byang sems tshogs lam pa des sbyin sogs rang rgyud la sgrub par mkhas tshul de gang zhe na/ de yang bsdu na/ dad sogs yul lnga la mkhas par 'du zhing/ de lnga'i khyad par yod de/ theg chen gyi lam 'bras bu dang bcas pa la dmigs pa'i dad pa dang/ yid ches kyi dang ba/ theg chen sems bskyed kyi grogs gzhan don du rdzogs byang dran pa'i dran pa dang/ phyin drug la slob pa la spro ba'i brtson 'grus/ de bzhin gshegs pa'i sku gzugs sogs la dmigs pa'i zhi gnas sngon du 'gro ba can gyi dmigs pa la 'di'o snyam du mi bsngo ba'i nam mkha' mdzod la sogs pa'i theg chen thun mong ma yin pa'i ting nge 'dzin/ ji lta ji snyed kyi don rtogs pa'i shes rab khyad par can dang bcas pa rnams yin pa'i phyir/ lnga po de yang bsdu na gsum du 'du ste/ dad pa sngon du 'gro ba can gyi theg @41a @#/ /chen gyi 'jug sgo sems bskyed/ bskyed nas spyod pa spyi la slob tshul/ khyad par phar phyin mtha' ma gnyis la slob tshul dang gsum du 'du ba'i phyir/ lnga po de la mkhas tshul yod de/ theg chen gyi lam 'bras bu dang bcas pa la dang bas dad pa/ yid ches kyi dad pa ldog tu med pa'i brtan po rnyed pa na dad pa la mkhas par 'jog pa nas/ ji lta ji snyed kyi don la shes rab gsal myur sogs brtan po rnyed pa na shes rab la mkhas par 'jog pa'i phyir/ sangs rgyas sogs mi dad pa dang/ zhes pas theg chen thun mong ma yin pa'i skyabs 'gro'i gtso bo bstan pa yin pas dang po la mkhas par 'chad pa'i rgyu mtshan yod de/ spyir dad pa yon tan gyi rtsa ba yin pa bzhin du theg chen gyi thun mong ma yin pa'i dad pa yang theg chen gyi yon tan gyi rtsa bar shes par bya ba'i ched yin pa'i phyir/ 'be chen po'i gsung na re/ rdzogs pa'i byang chub rnon po yis/ rtogs sla/ zhes pas theg chen gyi rigs can dbang po rno rtul gnyis bstan nas/ dbang 'bring zur nas kha 'grengs par mdzad/ ar gyi 'dir bshad pa'i dbang rtul theg dman gyi rigs can la sbyor bar mdzad kyang mi 'thad de/ gzhung gong 'og gnyis kas rnam rdzogs sbyor ba'i ngo bor gyur pa'i thar pa cha mthun bstan pas yul lnga la mkhas pa'i gdul bya gnyis kyang theg chen gyi rigs can la byed dgos pa'i phyir/ bla ma rje btsun chen po'i gsung na re/ 'dir dngos su bstan pa'i dbang rnon dang po nyid nas theg chen du rigs nges pa'i theg chen tshogs lam pa la byed/ dbang rtul theg dman du ltung nges kyi theg dman du rigs nges pa'i theg chen tshogs lam pa la byed pa dngos bstan gyi don dang/ shugs bstan la theg dman du rigs nges kyi nang nas nyan thos kyi rigs nges des nyan thos kyi byang chub mngon du byed nges/ rang rgyal du rigs nges rang rgyal gyi byang chub mngon du byed nges yin pa'i don no zer na/ mi 'thad de/ nyi snang las/ rtul pos rtogs dka' bzhed ces bya ba ni byang chub sems dpa' ganggA'i klung gi bye ma snyed bla na med pa yang dag par rdzogs pa'i byang chub las phyir mi ldog par bstan pa de dag mngon par rdzogs par dka' ba yin pa dang/ zhes gsungs pa'i phyir/ nyan rang gi rigs can gyi byang sems @41b tshogs lam pa sogs mi rigs pa'i phyir/ gzhan yang/ gzhung gong ma gnyis kyi skabs su theg dman du rigs nges pa'i theg chen gyi tshogs lam dngos su bstan par thal/ 'dir dngos su bstan pa'i dbang rtul gyi ngos 'dzin de 'thad pa'i phyir/ gzhan yang theg dman lam du mi ltung yang rdzogs byang thob dka' ba'i byang sems tshogs lam pa med par thal/ thob dka'i don theg dman du ltung ba la byed pa'i phyir/ rnam bshad rang lugs la/ rgyan gyi ched du bya ba'i gdul bya byang sems tshogs lam pa dbang po rno rtul gnyis po de bla med rdzogs byang thob sla par mtshungs kyang de gnyis la nang gses kyi rdzogs byang thob dka' sla'i khyad par yod de/ rnon po rtogs sla/ rtul pos de la bltos te rtogs dka' ba'i phyir/ zhes pa dngos bstan gyi don dang/ shugs bstan gyi don yod de/ rtsa bas shugs la bstan pa'i dad sogs chung ngu nyan thos dbang po rno rtul gnyis la yang nyan thos kyi byang chub thob dka' sla dang/ dad sogs 'bring po rang rgyal gyi rigs can dbang po rno rtul gnyis la yang/ rang rgyal gyi byang chub thob dka' sla 'phangs nas bstan pa yin pa'i phyir/ 'dir rgyan gyi ched du bya ba'i gdul bya dbang 'bring bsdus nas rno rtul gnyis su byas pa yin gyi dbang 'bring med pa ma yin te/ theg chen gyi rigs can spyi la dbang po rno rtul gsum yod pa gang zhig /de la brten nas rgyan gyi ched du bya ba'i gdul bya la yang dbang po rim pa gsum 'grub pa'i phyir/ gang zhig der thal/ byang sems dbang rnon gyis sbyor lam nas phyir mi ldog pa'i rtags thob/ dbang 'bring gis mthong lam nas thob/ dbang rtul gyis sa brgyad pa nas thob pa sogs gsungs pa'i phyir/ 'dir mdo las byang chub sems dpa' la rigs can gsum gyi ming gi bstan pas kyang 'grub pa'i phyir/ de ltar byas nas nyan thos tshogs lam pas myur na tshe gsum la nyan thos kyi byang chub thob pa dang/ rang rgyal tshogs lam pas bskal pa brgya nas thob pa dang/ theg chen tshogs lam pas bskal pa grangs med gsum nas 'tshang rgya bar gsungs pa gtso che ba'i dbang du mdzad pa yin te/ lung ltar na so skye'i nyan thos srid pa tha ma par gsungs pa dang/ theg chen la grangs med so gsum sogs dgos pa 'grel chen las @42a @#/ /gsungs pa dang/ mdo las phyugs kyi shing rta lta bus bgrod pa sogs kyi myur bul bzhi gsungs pa dang/ rgyan gyi ched du bya ba'i gdul bya gnyis ka theg chen gyi rigs can dbang po shin tu rnon por mtshungs kyang nang gses kyi dbang po'i khyad par rdzogs byang thob dka' sla sogs 'thad pa yod pa'i phyir/ / ! dro ba rnams kyi dmigs pa 'dir/ zhes sogs kyi skabs su/ gtso bor thabs kyi char gyur ba'i dman lam sngon du ma song ba'i theg chen gyi don mngon rtogs/ skabs 'dir dngos bstan bstan bya'i gtso bor gyur ba'i theg chen gyi sbyor lam gyi mtshan nyid/ de la der gyur ba'i theg chen gyi sbyor lam drod sogs bzhi yod/ mdo las gtso bor thabs kyi cha nas bstan tshul yang/ drod kyi skabs su gtso bo thabs kyi cha nas bstan pa yin te/ sems can thams cad la sems mnyam pa byams pa phugs su phan pa khong mi khro ba mi 'tshe ba dang lnga/ skyes pa dang bud med rgan pa la pha ma/ mnyam pa la spun dang sring mo/ /gzhon pa la bu dang bu mor lta ba rnams dang/ bshes dang grogs dang gnyen dang gzhan gyi bsnyen sems bcu'i sgo nas lta bar gsungs pa'i phyir/ rtse mo'i skabs su gsungs tshul yod de/ mi dge ba bcu spong la rang gnas nas gzhan de la 'god pa dang/ ma bskul bar bzhugs pa la bsngags pa brjod pa/ mthun par byed pa la dga' ba sgom par gsungs pa'i phyir/ bzod pa'i gnas skabs su de bzhin nyid du bden bzhi'i 'dor len la sbyor ba dang/ chos mchog gi skabs su sems can smin grol la 'god pa la sbyar nas gsungs so/ /de ltar gtso bor thabs kyi chas khyad par du byas nas ston pa'i rgyu mtshan yod de/ 'og nas 'tshang ba'i phyir mi ldog gi rtags rnams thob pa la thabs shes gnyis kyi nang nas thabs gtso bor shes pa'i ched du yin pa'i phyir/ / ! rnam pa dang lam dang gzhi thams cad rnam par sgom pas dbye bas/ zhes pa'i skabs su/ mkhas pa snga ma'i bzhed pa bkod/ de 'thad mi 'thad dpyad pa/ rang lugs bzhag pa dang/ lung dang 'gal ba spong ba dang bzhi/ dang po la/ 'grel pa 'di slob dpon rang lugs kyi 'grel par mdzad nas/ lam gsum btags mtshan pa'i lugs brjod pa dang/ de la lo chen dpon @42b slob sogs kyis skyon brjod pa'i tshul dang gnyis/ dang po la 'grel pa che chung gnyis dang/ sdud 'grel dang bcas pa rnams su tshig ris ni mthun pa tsam ma gtogs tshang bar bkod cing/ de ltar bkod pa'i dgos tha mar/ skabs dang po drug tu sbyor mthong sgom gsum lan drug tu bstan pa la zlos skyon spong phyir du yin zhing/ de'i spong tshul la lo chen dpon slob/ 'be ar/ a b+hyA ka ra dang bcas pa rnams kyi gsung na re/ skabs dang po drug tu sbyor mthong sgom gsum lan drug tu bstan pa la zlos pa'i skyon med de/ skabs dang po gsum du bstan pa'i sbyor mthong sgom gsum po de sbyor mthong sgom gsum mtshan nyid pa dang/ sbyor ba dang po gsum gyi skabs nas bstan pa'i sbyor mthong sgom gsum de sbyor mthong sgom gsum btags pa ba yin pa'i phyir/ de lta na skabs dang po gsum du bstan pa'i sbyor lam sogs mtshan nyid pa yin na zlos so snyam na/ de'i skyon med de/ skabs dang por rnam mkhyen gyi rnam pa bden med du rtogs pa'i ldog cha nas bstan/ gnyis par lam shes bden med du rtogs pa'i ldog cha nas bstan/ gsum par gzhi shes bden med du rtogs pa'i ldog cha nas bstan pas ston tshul mi 'dra ba'i khyad par yod pa'i phyir/ sbyor ba dang po gsum gyi skabs nas bstan pa'i sbyor lam de sbyor lam btags pa ba sogs yin na/ 'dogs pa'i gzhi de gang 'dogs pa'i chos gsum ji ltar tshang zhe na/ sbyor ba dang po gsum la tsam khyad gnyis yod pa las/ dang po'i skabs nas bstan pa'i sbyor lam de sbyor lam mtshan nyid pa yin pa sogs dang/ phyi ma'i skabs nas bstan pa'i sbyor mthong sgom gsum po de sbyor mthong sgom gsum btags pa ba yin te/ sa brgyad pa'i ye shes chung ngu 'bring chen po gsum po de la rnam rdzogs sbyor ba khyad par can gyi skabs su sbyor mthong sgom gsum gyi ming btags nas bstan/ sa dgu pa dang bcu pa thob ma thag dang bcu pa'i dkyil stod kyi ye shes gsum po de la/ rtse mo khyad par can gyi skabs su sbyor mthong sgom gsum gyi ming gis btags nas bstan/ bcu pa'i dkyil smad kyi ye shes chung ngu 'bring chen po gsum po de la mthar gyis sbyor ba khyad par can gyi skabs su sbyor mthong sgom gsum gyi ming gis btags nas bstan pa'i phyir/ 'dogs pa'i rgyu mtshan @43a @#/ /yod de/ sbyor mthong sgom gsum po de dang dag sa'i ye shes chung ngu 'bring chen po gsum po de rnams rims kyis skye bar chos mthun pa'i phyir/ btags pa la dgos pa yod de/ dag sa'i ye shes gsum po de 'bad rtsol rags pa zhi ba yin pas/ cig car skye 'am snyam pa'i log rtog dgag pa'i ched du yin pa'i phyir/ dngos la gnod byed yod de/ ye shes de gsum sbyor lam mtshan nyid pa ma yin pa'i phyir/ sbyor mthong sgom gsum mtshan nyid pa yin na zlos pa'i skyon du 'gyur ba'i phyir/ zhes gsungs par dgongs nas lo chen dpon slob kyi gsung na re/ 'grel pa 'di slob dpon rang lugs kyi 'grel par mdzad nas lam gsum btags mtshan pa'i lugs de ltar byed pa mi 'thad de/ de ltar na lam rkyang pa pa'i lugs de yang 'thad dgos pa las de mi 'thad pa'i phyir/ der thal/ mkhyen pa gsum gyi rnam pa sbyor bzhis nyams su blangs pas 'bras bu chos sku thob pa rje btsun gyi dgongs pa yin pa'i phyir te/ yul ni rnam pa gsum po rgyu/ /zhes gsungs pa'i phyir/ 'dogs pa'i rgyu mtshan yod de/ dag sa'i ye shes dang sbyor mthong sgom gsum la 'dra chos khyad par ba med pa'i phyir/ btags pa la dgos pa yod de/ dag sa'i ye shes chung ngu 'bring po rnams cig car skye 'am snyam pa'i dogs pa rtags ldan la skye ba med pa'i phyir/ gal te yod na chung ngu 'bring chen po zhes rang ming gis smos pas ldog nus/ de mi chus na sbyor mthong sgom gsum gyis ming btags kyang ldog mi nus pa'i phyir/ dngos la gnod byed yod de/ de rnams dag sa'i ye shes ma yin pa'i phyir/ zlas skyan yang med pa'i phyir/ lam gsum btags mtshan pa na re/ 'grel pa 'dis lam gsum btags mtshan bstan pa yin kyang/ dngos la gnod byed med pa'i skyon med de/ dag sa'i ye shes chen po rnams sa dgu nang phan tshun du ldan pa'i sgom lam gyi ming gis btags pa'i phyir/ kha cig na re/ 'grel pa 'di slob dpon rang lugs kyi 'grel pa ma yin zhing lam gsum btags mtshan bstan pa yin te/ 'dir yang kha cig gis 'dod/ ces dang/ rtse sbyor gyi skabs su sngon gyi slob dpon rnams 'chad do/ /zhes @43b gsungs pa'i phyir/ legs bshad gser phreng ba na re/ sbyor ba dang po gsum gyi skabs nas bstan pa'i sbyor mthong sgom gsum mtshan nyid pa yin kyang/ de gsum gyi skabs su sbyor mthong sgom gsum gyi ming gis btags pa'i sbyor mthong sgom gsum btags pa ba yod gsungs so/ /gnyis pa 'thad mi 'thad dbyang ba la/ lam gsum btags mtshan pa rnams na re/ slob dpon gyis lam gsum btags mtshan pa bzhid cing 'thad pa yang yin te/ 'grel chen las/ rnam pa de lta bu'i rnam par rtogs pa rnams ni sngon nyid yongs su spangs par gyur pas ji ltar rab kyi mthar thug pa rtogs pa'i gnas skabs 'di la spong bar bstan zhe na/ de ni nyes pa med de/ gang gi phyir/ dgongs pa nges par 'grel ba'i mdo la sogs pa las gsang ba phra mo la rjes su 'jug pa dang/ mngon par shes pa chen po'i las la gegs byed pa'i kun tu rmongs pa dag dang/ de'i sa bon ni sa bcu pa la spong ngo/ /zhes gsungs pa de bas na ji skad bshad pa'i kun tu rmongs pa'i bag chags kyi rgyu yang dag par bcad pa'i rgyu can bzung ba dang 'dzin pa'i rnam par rtog pa bzhi po rnam pa de lta bu'i rnam pa ni rab kyi mthar thug pa rtogs pa'i ngo bo nyid yin pas na sa bcu dang 'brel ba'i rtse mo'i mngon par rtogs pa la nges par spong bar byed pa yin la/ gzhan dag tu ni res 'ga' ba'i spong ba yin zhes sngon gyi slob dpon rnams 'chad do/ /zhes gsungs pa'i phyir/ sdud 'grel las/ khyad par gyi lam gyi rang bzhin ma yin na ma nges par 'byed pa'i cha la sogs pa'i tha snyad gsungs/ zhes sogs gsungs pa'i phyir zer na/ sbyor ba dang po gsum gyi skabs nas bstan pa'i sbyor mthong sgom gsum btags pa bar byed pa ma yin par thal/ de ltar yin na skabs dang po gsum gyi skabs nas bstan pa'i sbyor mthong sgom gsum po de yang btags pa bar byed dgos par mtshungs pa'i phyir/ gzhan yang/ 'grel chen gyi srid zhi mnyam nyid kyi mtshams sbyar du slob pa phyir mi ldog pa'i dge 'dun gyi mtshan nyid bshad zin to/ /de ni mi slob pa'i dge 'dun gyi mtshan nyid bstan par 'dod pas/ zhes gsungs pa mi 'thad par thal/ nges 'byed yan lag la gnas pa'i/ zhes sogs kyi skabs nas bstan pa'i ye @44a @#/ /shes dang/ mthong ba'i lam la/ zhes sogs dang chos rnams rmi lam 'dra ba'i phyir/ zhes sogs kyi skabs nas bstan pa'i ye shes rnams khyod kyi lugs la sa brgyad pa'i ye shes yin pa gang zhig /de rgyud la ldan pa'i byang sems 'phags pa gcig nyid la slob mi slob gnyis kyi dbye ba med pa'i phyir/ btags mtshan pa kha cig ni/ sbyor ba dang po gsum gyi skabs nas bstan pa'i sbyor lam sbyor lam btags pa ba yin te/ bag la nyal kun 'joms pa dang/ zhes shes sgrib kyi bag la nyal 'joms pa dang/ rang nyid smin cing grol ba la gnas nas/ gzhan dag phun sum tshogs pa thams cad kyi mthar thug pa la 'god pa dang/ rtse sbyor gyi skabs su/ kun mkhyen nyid gsum chos rnams kyi/ zhes mkhyen gsum gyi chos yongs su rdzogs par gsungs pa gang zhig /de 'dra'i sbyor lam dang mthong lam med pa'i phyir zer na/ 'o na/ shes sgrib kyi bag la nyal 'joms pa'i sa brgyad pa'i ye shes chung ngu dang/ gzhan dag phun sum tshogs pa thams cad kyi mthar thug pa la 'god pa'i sa brgyad pa'i ye shes dang/ theg dman gyi chos yongs su rdzogs pa'i sa dgu pa'i ye shes yod par thal/ bag la nyal kun 'joms pa dang/ zhes gsungs pas sbyor ba dang po gsum gyi skabs nas bstan pa'i sbyor lam de sbyor lam btags pa ba yin pa gang zhig /khyod kyi dam bca' 'thad pa'i phyir/ 'dod mi nus te/ shes sgrib spangs pa'i sa brgyad pa'i ye shes med pa'i phyir dang/ rnam mkhyen thob pa'i sa dgu pa'i ye shes med pa'i phyir/ skabs dang po'i skabs nas bstan pa'i sbyor lam de yang sbyor lam mtshan nyid pa ma yin par thal/ lung ston pa dang rlam pa zad/ ces lung ston pa dang/ rlom pa zad pa dang/ sgo gsum rnam par dag pa dang/ mtshan dag pa dang/ zhing dag pa dang/ dpa' bar 'gro ba'i ting nge 'dzin sgom pa dang/ ting nge 'dzin rnam par mi rtog pa sgom par gsungs pa gang zhig /de 'dra ba'i sbyor lam med pa'i phyir/ de la kha cig skyon med de/ lkog tu lung ston pa dang rlam pa rags pa zad pa dang mos pa yid byed tsam la gnas pa dang rgyu tsam la gnas pa la dgongs pa yin pa'i phyir/ zhe na cig shos la yang mtshungs @44b te; shes sgrib kyi bag la nyal spong ba'i rgyu tsam la gnas pa dang/ mkhyen gsum rjes mthun pa rdzogs pa tsam la dgongs pa'i phyir/ nges 'byed yan lag nas bzung ste/ zhes sogs kyi skabs su sbyor mthong sgom gsum ga la gnas pa'i phyir mi ldog gi rtags ma bstan par thal/ de'i skabs nas bstan pa'i sbyor lam de sbyor lam dang mthong lam mthong lam ma yin pa'i phyir/ 'dod na/ mngon par rtogs pa'i rgyan du de ltar ma bstan par thal/ 'dod pa'i phyir/ 'dod na/ de'i bshad bya rtsa ba'i mdos de ltar ma bstan par thal lo/ /gzhan yang/ dro ba rnams kyi dmigs pa 'dir/ zhes pa'i mtshams sbyar du thar ba'i cha dang mthun pa skyes pa'i sbra ba can la nges par 'byed pa'i cha dang mthun pa 'byung bas zhes mtshams sbyar ba mi 'thad par thal/ khyod ltar na/ dro ba rnams kyi/ zhes pa'i skabs nas bstan pa'i ye shes de sa brgyad pa'i ye shes yin pa gang zhig /byang sems tshogs lam pa'i rgyad la sa brgyad pa'i ye shes skye ba'i mtshams sbyar ba la dgos pa med pa'i phyir/ do ba rnams kyi dmigs pa 'dir/ zhes pa'i skabs su sbyor lam drod sogs bzhi po re re la chung ngu 'bring chen po gsum gsum gyi dbye ba mdzad pa la theg dman gyi sbyor lam chos mchog skad cig ma gcig tu gsungs pa dang 'gal zhes rtsad pa skyon med de/ theg dman rnams thabs la mi mkhas pas skad cig ma gcig tu gsungs/ byang sems thabs la mkhas pas chung ngu 'bring chen po gsum du skye bar gsungs pa'i phyir/ zhes lan byed pa mi rigs par thal/ khyod ltar na de'i skabs nas bstan pa'i sbyor lam de sbyor lam ma yin pa'i lan byed rigs pa'i phyir/ rnam pa dang lam dang/ zhes sogs kyi 'grel pa slob dpon rang lugs kyi 'grel par byas nas 'dis lam gsum btags mtshan bstan par bsams nas de la skyon de brjod pa mi rigs par thal/ lam gsum btags mtshan 'dod pa la sngar gyi skyon de 'jug kyang/ slob dpon lam gsum btags mtshan mi bzhad pa 'og nas 'chad pa'i phyir/ 'grel ba slob dpon rang lugs kyi 'grel pa yin te/ de ma yin na 'gog byad kyi 'grel pa gcig 'byung rigs pa las de mi 'byung ba'i phyir/ 'byung rigs te/ 'grel chung gnyis su gzhan lugs bkod nas @45a @#/ /phal cher la de 'gog byed kyi 'grel pa 'byung pa'i phyir/ gser 'phreng ba'i lugs de yang mi 'thad de/ de yang lam gsum btags mtshan pa las mi 'das pa'i phyir/ gsum pa rang lugs bzhag pa la/ rnam pa dang lam dang/ zhes sogs kyi 'grel pa 'di lam gsum zlos spong la cung zad sbyar du rung yang/ gtso bor lam gsum zlas spong gi gzhung ma yin te/ gtso bor lam rkyang pa ba'i log rtog 'gog pa'i gzhung yin pa'i phyir/ lam gsum zlos spong la cung zad sbyar du rung ste/ skabs dang po drug tu sbyor mthong sgom gsum lan drug tu bstan pas skabs 'og ma rnams su yang ston pa ma yin nam/ ston na dgos pa ci'i phyir ston snyam pa'i dgos pa de dpyad pa'i phyir du 'dir gsungs pa'i phyir/ mngon par rtogs pa lam rkyang pa ba de mdo dang bstan bcos gang la log par zhugs pa'i tshul la kha cig /mdo'i sbas don mngon rtogs kyi rim pa la log par zhugs pa yin te/ rnam mkhyen mtshon byed kyi chos rnams tshogs sbyor gyi gnas skabs 'ba' zhig tu cig car rgyun gcig tu skye ba dang/ lam shes mtshon byed kyi chos rnams sa dang bo nas brug pa'i bar dang/ gzhi shes mtshon byed kyi chos rnams sa bdun pa 'ba' zhig tu skye ba nas bzung ste/ mthar gyis sbyor ba sa bcu ba'i dkyil smad 'ba' zhig tu skye bar khas len pa'i phyir zer na/ 'o na/ des theg chen sgrub pa'i dmigs pa chos thams cad dang/ de'i rten rang bzhin gnas rigs dang ched du bya ba rnams tshogs sbyar gyi gnas skabs su skye bar 'dod par thal/ khyod kyi dam bca' 'thad pa'i phyir/ 'dod mi nus te/ de rnams skye bar 'dod pa'i nang sde'i grub mtha' smra ba med pa'i phyir/ byed brag smra bas kyang de rnams 'dus ma byas su 'dod pa'i phyir/ gzhan yang des mi mthun phyogs kyi gzhi shes dang/ 'bras yum la ring ba'i gzhi shes dang/ mi rtag sogs mngon sum du rtogs pa'i mthong lam rnams sa bdun pa'i gnas skabs su skye bar 'dod par thal/ dam bca' 'thad pa'i phyir/ 'dod mi nus te/ byang sems sa bdun pa ba theg dman lam du ltung ba med pa'i phyir dang/ mi rtag sogs mngon sum du rtogs pa'i theg chen mthong lam sa bdun pa'i gnas skabs su @45b skye ba ma 'dod pa'i phyir/ rang lugs la lam rkyed pa bas mdo la log par zhugs tshul yod de/ rnam mkhyen gyi bshad bya rtsa ba'i mdos byang sems tshogs lam pa'i nyams len 'ba' zhig bstan zhing/ rnam mkhyen gyi nyams len tshogs sbyor gyi gnas skabs 'ba' zhig tu skye ba nas bzung ste/ mthar gyis sbyor ba'i bshad bya rtsa ba'i mdos/ sa bcu pa'i dkyil smad kyi nyams len 'ba' zhig bstan zhing/ mthar gyis sbyor ba'i nyams len sa bcu pa'i dkyil smad 'ba' zhig tu skye bar 'dod pa'i phyir/ de ltar yin kyang rnam bshad las lam rkyang pa bas sngar ltar 'dod par gsungs pa dang 'gal ba'i skyon med de/ tha snyad bde ba'i phyir du tshig zor yang gi sgo nas bstan pa'i phyir/ lam rkyang pa dang khug pa ba gnyis las/ rang lugs mngon par rtogs pa'i lam khug pa'i lugs yin te/ rnam mkhyen gyi rnam pa sbyor mthong sgom gsum ga'i gnas skabs su nyams su len pa'i lugs yin pa'i phyir/ lam lug pa ba'i lugs de rje btsun gyi dgongs pa yang yin te/ rnam mkhyen gyis mkhyen gsum gyi rnam pa sbyor bzhis nyams su blangs pa la brten nas 'bras bu chos sku thob pa rje btsun gyi dgongs pa yin pa'i phyir/ yul ni rnam pa gsum po rgyu/ zhes sogs gsungs pa'i phyir/ lam gsum btags mtshan pa la lam rkyang pa bas ma khyab kyang/ lam rkyang pa ba yin na lam gsum btags mtshan pa yin pas khyab ste/ lam rkyad pa ba des nges 'byed yan lam nas bzung ste/ zhes pa'i skabs nas bstan pa'i sbyor lam de sbyor lam btags pa ba dang/ mthong ba'i lam la bzod pa dang/ zhes sogs kyi skabs nas bstan pa'i mthong lam de mthong lam btags pa bar 'dod pa yin pa'i phyir te/ de'i nyams lan des brgyad pa'i nyams len yin pa'i phyir/ lam gsum btags mtshan pa la lam rkyad pa ba yin pas ma khyab ste/ lam gsum pa rtags mtshan pa des/ mkhyen gsum gyi rnam pa sbyor mthong sgom gsum gis gnas skabs su nyams su len pa 'dod pa'i phyir te/ sbyor ba dang po gsum po de sbyor mthong sgom gsum pa'i gnas skabs su nyams su len par 'dod pa'i phyir/ lam gsum btags mtshan pa dang lam rkyad pa gnyis kyi nang nas phyi ma de mdo'i sbas don mngon rtogs kyi @46a @#/ /rim pa la log rtog zhugs/ de 'gog pa'i phyir du rje btsun gyis skabs dang po drug tu sbyor mthong sgom gsum phal cher gsal bar bstan pa la zlos so snyam nas lam gsum btags mtshan byas pa'i sgo nas lam gsum btags mtshan pa rgyan gyi brjod bya la log par zhugs pa'i phyir/ bzhi pa lung dang 'gal ba spong ba la/ slob dpon lam gsum btags mtshan mi bzhed kyang 'grel chen las/ rnam pa de lta bu'i zhes sogs gsungs pa dang 'gal ba'i skyon med de/ sbyin pa la sogs re res ni/ zhes pa'i thad ? du shes sgrib bzung 'dzin gyi rnam par rtog pa kun btags brgya rtsa brgyad theg chen mthong lam bar chad med lam gyis spong ba gsungs/ kha cig / de mi 'thad par thal/ de rnams bzung 'dzin gyi rnam par rtog pa kun btags mngon gyur ba yin pa gang zhig / mngon gyur ba rnams sngar sbyor lam gyi gnas skabs su spangs ba yin zer na/ skyon med de/ shes sgrib bzung 'dzin gyi rnam par rtog ba kun lhan gnyis kyi bag chags yang yang goms pa las skyes pa'i kun lhan gnyis kyi sa bon rnam rdzogs sbyor ba bsgoms pa rab kyi mthar thug ba'i sa bcu dang 'brel ba'i mthong lam rtse sbyor dang/ sgom lam rtse sbyor gnyis kyis spong bas theg chen mthong lam bar chad med lam gyi rnam par rtog pa kun btags kyi sa bon spong ba ni rtsa ba nas spong tshul dang / sbyor lam gyi gzung 'dzin gyi rnam par rtog pa de rnams mngon gyur ba re zhig spong bas res 'ga' ba'i spong tshul yin pa'i phyir/ de lta bu'i mthong lam rtse sbyor dang sgom lam rtse sbyor gnyis kyis kun lhan gnyis kyi sa bon spong ba yin te/ dgongs 'grel la sogs pa las sa bcu po re re'i gnas skabs su kun rmongs sa bon dang bcas pa gnyis gnyis spong ba gsungs pa'i phyir/ slob dpon lam rkyang pa bar mi 'dod kyang rnam pa dang lam dang zhes sogs gsungs pa dang mi 'gal te/ gzhung 'og ma'i nges par 'byed pa'i cha la sogs pa'i tha snyad gsungs par shes par bya'o zhes pa gzhung gong ma'i mjug tu sbyar ba dang/ gzhung gong ma'i 'jig rten pa'i nges par 'byed pa'i cha dang mthun pa sngon du 'gro bzhes pa gzhung 'og ma'i mthong @46b dang sgom pa'i lam zhes pa'i gong du sbyar nas lam rkyang pa ba bkag gi lam gsum btags mtshan ma bstan pa'i phyir/ gzhung 'og ma'i nges par 'byed pa'i cha dang mthun pa la sogs tha snyad gsungs pa shes par bya'o/ /zhes pa gzhung gong ma'i mjug tu sbyar nas/ gzhung gong mas lam rkyang pa ba'i log rtog bkag tshul yod de/ skabs dang po gsum du sbyor mthong sgom gsum gyi tha snyad gsungs pa de/ rnam mkhyen mtshon byed kyi chos kyi nyams len tshogs sbyor gyi gnas skabs 'ba' zhig tu skye de phan tshun du mi skye ba nas bzung ste/ gzhi shes kyi nyams len sa bdun pa'i gnas skabs 'ba' zhig tu skye de phan chad du mi skye ba'i cig car skye ba dgag pa'i ched yin pa'i phyir/ de ltar bstan pas dgag nus te/ mkhyen gsum gyi nyams len de 'jig rten pa'i nges par 'byed pa'i cha dang mthun pa sngon du 'gro ba'i mthong ba dang/ sgom pa'i lam gyi gnas skabs su chung ngu 'bring chen po rims kyi skye ba'i phyir/ der thal/ der nyams su len pa'i phyir/ gzhung 'og mas lam rkyang pa ba'i log rtog bkag tshul yod de/ sbyor ba dang po gsum gyi skabs su sbyor mthong sgom gsum gyi tha snyad gsungs pa de/ rnam rdzogs sbyor ba'i nyams len sa brgyad pa'i gnas skabs 'ba' zhig tu skye ba nas bzung ste/ mthar gyis sbyor ba'i nyams len sa bcu pa'i dkyil smad 'ba' zhig tu skye/ de phan chad du mi skye ba'i cig car skye ba dgag pa'i ched yin pa'i phyir/ de ltar bstan pas dgag nus te/ rnam rdzogs sbyor ba sgom pa gong nas gong 'phel gyi khyad par gyi lam nyan rang gi lam las cha rnam pa thams cad khyad bar du 'phags pa'i khyad par gyis bsdus pa 'dzin stangs la nyon mongs kyi bslad pa ma zhugs pa'i 'jig rten pa'i nges par 'byed ba'i cha dang mthun pa sngon du 'gro ba'i mthong lam dang sgom lam gyi gnas skabs su nyams len chung ngu 'bring chen po rims kyi skye ba'i phyir/ der thal/ de'i gnas skabs su de rnams nyams su len pa'i phyir zhes bstan pa'i phyir/ de ltar bla ma gser gling pas bzhed pa'i phyir/ kha cig slob dpon lam rkyang pa ba'i lugs de mi bzhed pa mi 'thad par thal/ 'grel chen gyi chos sku'i mtshams sbyar du lam rkyang pa ba'i lugs su gsungs pa'i phyir/ sdud @47a @#/ /'grel las/ chos goms pa dang ldan pa'i rtogs pa de lta bu la sogs pa rnams ni sems bskyed pa'i rang gi ngo bo ste/ zhes gsungs pa'i phyir zer na/ skyon med de/ 'grel chen gyi lung de ni gleng bzhi las lam rkyang pa ba'i lugs su bstan pa ltar snang yang/ 'grel pa che chung gnyis kyi skabs gzhan du lam khugs pa ba'i lugs su mdzad pa'i phyir/ sdud 'grel gyi de ni sems bskyed sogs chos bcu lam gyi gzhir bzung nas rnam mkhyen gyi nyams len tshogs sbyor gyi gnas skabs su yod pa nas bzung ste/ mthar gyis sbyor ba'i nyams len sa bcu pa'i dkyil smad du yod par bstan pa'am/ mkhas pa gzhan gyi bzhed pa bkod pa gang rung yin pa'i phyir/ mdor bsdu na lam rkyang pa ba'i lugs de mi 'thad par ma zad/ lam gsum btags mtshan pa yang mi 'thad de/ lam rkyang pa ba'i lugs de 'thad na rgyan rtsa ba dang 'gal ba'i phyir dang/ btags mtshan pas skabs dang po drug gi skabs nas bstan pa'i sbyor mthong sgom gsum sbyor mthong sgom gsum mtshan nyid pa yin na zlos so snyam du bsams pa gang zhig / zlos pa'i skyon med pa'i phyir/ der thal/ skabs 'dir rje btsun gyis mdo'i sbas don mngon rtogs kyi rim pa gtan la 'bebs pa gang zhig / mdo las don gcig nyid lan du mar gsungs pa sogs gdul bya nye ba'i bsam pa la dgongs pa ma gtogs mdo la zlos skyon rtsi ba mi 'thad pa'i phyir/ ! theg chen tshogs lam gyi skabs su zag med ye shes kyi rigs nyams su blangs pa'i sbyor lam yan chad du yon tan gyi khyad par ji lta bu 'thob pa yin zhe na/ sbyor mthong sgom gsum gyi phyir mi ldog gi rtags rnams thob ces 'chad pa la/ nges 'byed yan lag nas bzung ste/ zhes sogs kyi gzhung gsungs/ 'di'i skabs su mtha' dpyad pa la/ dang por thob pa'i sa mtshams kyi sgo nas phyir mi ldog gi dge 'dun gyi dbye ba bshad pa/ phyir mi ldog gi don bshad pa/ de rtags kyi dpog tshul bshad pa dang gsum/ dang po la/ kha cig gis/ theg chen gyi rigs can dbang rnon gyis tshogs lam nas phyir mi ldog gi rtags thob/ sbyor lam yan chad nas dbang po rno rtul gang @47b yin kyang phyir mi ldog gi rtags thob pa yin te/ 'dir nges 'byed yan lag nas bzung ste/ zhes pa dang/ 'grel bshad tshig gsal las/ rang gi rgyud nges pa'i rgyu mtshan gtso bo mdzad pa zhig na thar pa'i cha dang mthun pa'i dge ba'i rtsa ba 'di yang phyir mi ldog pa nyid du brjod mod kyang/ rang gi rtogs pa dang mtshams par gzhan yid ches pa'i yon tan rnams 'di la med pa'i phyir dang/ rang la dngos po nges kyang nges par byed pa'i rtags bzung sla ba 'di la med pa'i phyir/ 'di phyir mi ldog pa'o zhes gang du yang ma gsungs so/ /zhes gsungs pa'i phyir zer na/ de mi 'thad par thal/ 'dir bshad pa'i phyir mi ldog gi don dang rtags ni lam gzhan gyi bar ma chod par bla med rdzogs byang mngon du byed nges tsam dang/ de'i rgyu mtshan yang dag rgyud la thob pa la byed pa ma yin pa'i phyir/ de ltar ma yin na theg chen lam du ma zhugs pa la yang phyir mi ldog gi don dang/ phyir mi ldog gi rtags thob pa'i gang zag yod par thal ba'i phyir ro/ /gzhan yang de ltar 'dod pa mi rigs par thal/ rgyan snang las/ la la rigs ma nges pa yin kyang 'dir thabs kyi khyad par bsam gyis mi khyab pa dang ldan pas dbang po rnon po'i lam kho na nas de thob pa'i phyir ro/ /zhes dang/ sa brgyad pa ni thams cad phyir mi ldog pa nyid du brjod par bya'o/ /zhes rnam bcad mdzad nas gsungs pa'i phyir dang/ tshig gsal gyi rang la dngos po nges kyang nges par byed pa'i rtags bzung ba sla ba ma thob pas 'di phyir mi ldog pa'o zhes sogs dang yang 'gal ba'i phyir/ gzhan yang/ byang sems tshogs lam pa dbang rnon gyis phyir mi ldog gi rtags ma thob par thal/ nyi shu po gang rung dang/ brgyad tshan bar pa dang/ brgyad tshan tha ma gsum gang yang ma thob pa'i phyir/ khyab ste/ mdo dang dgongs 'grel gyi bstan bcos tshad ldan gang las kyang de rnams las lhag pa'i rtags ma gsungs pa'i phyir/ gzhan yang de ltar 'dod pa mi rigs par thal/ nges 'byed yan lag nas bzung ste/ zhes de nas ma mtha' byas pa dang theg chen gyi tshogs lam gyi yon tan 'chad pa'i skabs gang du yang phyir mi ldog gi rtags ma gsungs pa'i phyir/ 'o na rang gi rgyud nges pa'i rgyu mtshan gtso bor @48a @#/ /mdzad pa zhes sogs kyi don gang zhe na/ skabs 'dir rang rgyud la bla med rdzogs byang lam gzhan gyi bar ma chod par 'byung nges dang/ de'i rgyu mtshan yang dag tsam la 'chad na byang sems tshogs lam pa dbang rnon yang phyir mi ldog gi rtags thob par 'gyur ba las de lta ma yin zhes pa'i don no/ /rang lugs la/ phyir mi ldog gi rtags thob pa'i dge 'dun gyi dbye ba yod de/ byang sems dbang rnon gyis sbyor lam nas phyir mi ldog gi rtags thob/ sems dpa' dbang 'bring gi mthong lam nas phyir mi ldog pa'i rtags thob/ sems dpa' sgom lam pa ji ltar dbang po rtul yang sa brgyad pa nas thob pas de'i dbang du byas nas phyir mi ldog gi rtags rnams rgyud la ldan pa'i sems dpa'i dbye ba dang/ rtags rnams thob pa'i sems dpa'i dbye ba gsum gsum byed pa'i phyir/ dbang po 'bring pos mthong lam dang/ rtul pos sa brgyad pa nas thob pa yod kyang/ phyir mi ldog gi rtags thob pa'i dbang po 'bring rtul ni med de/ nyi snang las/ byang chen mi rnams kyi nang nas shi 'phos te/ mi rnams kyi nang du skye ba len pa gang yin pa de ni/ phyir mi ldog pa'i byang chen ma gtogs pa dbang po rtul ba yin no/ /zhes pa'i thad du/ phyir mi ldog par bkol ba ni dbang po rnon po'i lam kho nas de thob pa'i phyir/ zhes gsungs pa'i phyir/ lus ngag khyad par can gyis phyir mi ldog gi rtags 'dren nus kyang dbang rnon du ma song na dbang rnon du song mtshams mi rnyed pa'i phyir dang/ sangs 'phags dbang rtul khas blangs pa la yang nyes pa mi 'byung ba'i phyir/ de lta na'ang rnam bshad du mthong sgom gyi phyir mi ldog gi rtags thob pa'i sems dpa' sgrub pa'i tshe sems dpa' dbang 'bring dang/ dbang rtul chos can du bzung ba mi 'gal te/ de dag gi rdzas rgyun yin pa tsam la dgongs pa'i phyir/ rtags de rnams snga ma snga ma thob pa la phyi ma phyi ma thob pas ma khyab par ma zad/ phyi ma phyi ma thob pa la snga ma snga ma thob pas kyang ma khyab ste/ sbyor lam gyi skabs su rtags ma thob par mthong lam gyi skabs su thob pa dang/ mthong lam skabs su ma thob par sgom lam gyi skabs su thob pa yod cing/ sbyor lam pa @48b phyir mi ldog gi rtags yin na sbyor lam gyi skabs su thob pa'i rtags sogs yin dgos pa'i phyir/ kha cig ma dag sa gnas kyi sems dpa' yang rdzogs byang las phyir ldog pa yod de/ rgyud rdo rje rtse mo las/ ji srid sa brgyad ma thob pa/ /de srid theg pa dman gyi 'jigs/ /zhes gsungs pa'i phyir zhe na/ de ni mi 'thad de/ 'jig ce na 'gyur ma dag / 'jigs zhes na khyab pa ma nges pa'i phyir te/ dman sgrib kyi 'jigs pa dang bcas na dman par ltung bas ma khyab pa'i phyir ro/ /gshen pa nag po'i gtam rgyud la de 'dra ba zhig snang yang sgra ji bzhin du mi rung ste/ gser lta bu'i sems bskyed tshogs lam 'bring nas thob/ de thob nas theg chen gyi bsam pa mi nyams par gsungs pa'i phyir dang/ byang 'phags don dam sems bskyed las nyams pa mi srid pa'i phyir/ stong nyid mngon sum du rtogs pa'i rtogs pa las nyams pa mi srid pa'i phyir/ sems dpa' dbang po rno 'bring rtul gsum gyi rim pas sbyor mthong sgom gsum nas thob par ni zla 'od las kyang gsal bar bshad do/ /gnyis pa phyir mi ldog gi don la/ 'dir bstan pa'i phyir mi ldog gi don yod de/ bsam pa'i sgo nas nyan rang yid byed kyi bsam pa mngon gyur skye ba'i go skabs bcom/ sbyor ba'i sgo nas rang rgyud la ldan pa'i gang zag las blo dma' bas kyang rdzogs byang las phyir mi ldog par rtogs nus pa'i lus ngag gi tha snyad khyad par can 'dren nus kyi thabs shes kyi rtogs pa brtan po dang ldan pa de 'dir bstan phyi mi ldog gi don yin pa'i phyir/ de yin te/ 'di man chad du theg chen gyi sbyor mthong sgom gsum gyi rdzogs byang las phyir mi ldog pa'i nus pa khyad par can dang/ khyad par dag pa sa gsum gyi skabs su sku gsum 'grub byed kyi nus pa khyad par can gyi yon tan 'chad par byed pa'i phyir/ gsum pa de rtags kyi dpog tshul la/ spyir rtags la theg chen gyi rigs sad pa'i rtags/ stong nyid rtogs pa'i bag chags sad pa'i rtags/ thar pa cha mthun gyi dge rtsa skyes pa'i rtags/ rdzogs byang las phyir mi ldog pa'i rtags khyad par can rnams las 'dir phyi ma yin la/ 'de la gzhan lugs dgag pa/ rang lugs bzhag pa gnyis las/ dang po la kha cig / rjes thob brtags yin gyi mnyam gzhag @49a @#/ /ma yin te/ rnal 'byor pa'i rgyud la so sor rang rig pa'i ye shes skad cig ma rnams gzhan yid ches pa'i mtshan nyid min/ zhes gsungs na/ de mi rigs te/ mnyam rjes gnyis rtags tsam ma yin par rnam pa kun tu mtshungs/ phyir mi ldog gi rtags ma yin pa yang mtshungs pa'i phyir/ rjes thob lus ngag gi tha snyad khyad par can 'dir bstan rtags su 'jog pa yin zer na/ 'o na rtags de'i 'god tshul yin 'god byed dam/ yod 'god byed/ dang po ltar na rtags ldan byang sems sbyor lam pa lus ngag gi tha snyad khyad par can du 'gyur/ gnyis pa ltar na shes bya chos can/ phyir mi ldog gi dge 'dun yin par thal/ lus ngag gi tha snyad khyad par can yod pa'i phyir/ de gnyis dang ldan pa'i byang sems phyir mi ldog gi 'dir bstan gyi rtags yin zer na/ de 'dra ba'i byang sems tshogs lam pa dbang rnon gyi ma nges/ de 'dra ba'i byang sems tshogs lam pa yod de/ lus kyi kun spyod khyad par can dang ldan pas yum gyi mdo 'chad pa'i byang sems tshogs lam pa yod pa'i phyir/ thabs shes kyi rtogs pa brtan po gnyis kyis drangs pa'i lus ngag gi tha snyad khyad par can dang ldan pa'i sems dpa' 'dir bstan pa'i rtags yin zer na/ lus ngag gi tha snyad khyad par can dang ldan pa'i theg chen gyi sbyor lam bzod pa dbang rtul chos can/ phyir mi ldog gi rtags thob pa'i dge 'dun yin par thal/ thabs shes kyi rtogs pa brtan pos drangs pa sogs de'i phyir/ der thal/ brtan pa zhes ni mngon par brjod/ /ces gsungs pa'i phyir/ gzhan yang/ de mi 'thad de/ sangs rgyas 'phags pa phyir mi ldog gi rtags thob pa'i gang zag yin/ de'i steng du rtags de 'god tshul dang mthun par ma grub pa'i phyir/ de la brten nas rtags thob pa dang ldan pa'i khyad par sogs kyang shes par bya'o/ /kha cig / mnyam gzhag rang ngor rtags/ rjes thob gzhan ngo'i rtags/ zhes smra ba yang go ba cung zad chags pa ltar snang yang chu thub tu mi 'byung ngo/ /kha cig / sbyor lam pa phyir mi ldog gi rtags la gzugs sogs la bden zhen mngon gyur ba 'gog pa sogs rtags nyi shu po de thob pa'i @49b nges 'byed cha mthun la gnas pa'i sems dpa' zhes sbyor ba ni phyogs chos grub na bsgrubs zin grub pa'i skyon dang/ drod kyi phyir mi ldog gi rtags thob na sbyor lam bzhi ga'i rtags thob dgos pa sogs kyi skyon yod pa'i phyir/ mi 'thad do/ /kha cig / rtags kyi grub pa'i tshe na phyir mi ldog gi rtags thob pa zhig gi ngor gang zag gzhan zhig phyir mi ldog tu sgrub pa yin te/ rtags chos kyi 'brel ba shes rgyud kyi steng du grub pa dgos pa gang zhig / mthun dpe gzhan zhig 'dzin na thug med du 'gyur ba'i phyir/ zer na/ mi 'thad de/ go'u ta ma kun mkhyen du sgrub pa'i tshe rtags chos kyi 'brel ba sgrub pa po'i shes rgyud kyi steng du sgrub dgos na ha cang thal ba'i phyir ro/ /rang lugs la stong nyid phyin ci ma log pa dang/ theg pa chen po'i lam 'bras bu dang bcas pa tshang bar ston pa'i dag gi tha snyad khyad par can dang/ sems can sdug bsngal gyi mnar ba mthong ba na lus kyi ba spu g.yo mig nas mchi ma 'khrug pa sogs kyi lus kyi tha snyad khyad par can la brten nas der ldan byang sems sbyor lam pa dbang rnon thabs shes kyi rtogs pa brtan po khyad par can dang ldan par dpog / de la brten nas der ldan gyi byang sems sbyor lam pa dbang rnon de 'di bstan bla med rdzogs byang las phyir mi ldog pa'i dge 'dun du sgrub pa'am dpog par byed pa yin no/ /de 'dra'i rtags gnyis dgag sgrub gnyis kyi nang nas sgrub rtags dang/ de yang snga ma 'bras rtags dang/ phyi ma rang mzhin gyi rtags su mngon te/ rnam pa de dag dang rtags de dag dang mtshan ma de dag dang ldan pa'i byang chen phyir mi ldog pa nyid du bzung bar bya'o/ /zhes pa'i 'grel chen las/ bzung bar bya'o zhes bya ba ni/ nus pa'i rgyu las 'bras skye bar/ /rjes su dpog pa gang yin pa/ /don gzhan la ni mi ltos phyir/ /de ni rang bzhin yin par brjod/ /ces gsungs pa'i phyir/ kha cig gi gsung na re/ phyi ma de 'dra'i rang bzhin gyi rtags ma yin te/ rang las blo dma' ba'i gang zag gis mngon sum du mi rtogs pa'i phyir gsungs te/ khyab pa ma nges so/ /gzhung gcig la 'di'i don gtan la 'bebs par dka' zhing go chod bshad pa la yang tshig skyon dka' ba snang bas rnam bshad dang mi 'gal bar bshad pa yin pas @50a @#/ /blo dang ldan pa rnams kyis dpyad par mdzod/ gzugs sogs la bden zhen mngon gyur ba ldog pa sogs rtags nyi shu po gang rung dang ldan pa'i nges 'byed cha mthun la gnas pa'i sems dpa'/ sbyor lam pa phyir mi ldog gi rtags dang ldan pa'i byang sems sbyor lam pa'i mtshan nyid/ sbyor lam pa phyir mi ldog gi rtags de la nyi shu yod de/ der gyur pa'i gzugs sogs la bden zhen mngon gyur ba ldog pa sogs drod kyi rtags bcu gcig / der gyur pa'i lus la srin bu'i rigs brgyad khri mi 'byung ba sogs rtse mo'i rtags drug / bzod pa'i gnyis/ chos mchog gi gcig dang bcas pa nyi shu yod pa'i phyir/ bden 'dzin kun btags spangs pa'i sgo nas gzugs sogs la bden 'dzin mngon gyur ba ldog pa sogs theg chen gyi mthong lam shes bzod skad cig ma bcu drug gis drangs pa'i lus ngag gi tha snyad khyad par can gang rung dang ldan pa'i theg chen gyi bden pa mngon rtogs la gnas pa'i sems dpa'/ phyir mi ldog gi rtags ldan gyi byang sems mthong lam pa'i mtshan nyid/ de'i phyir mi ldog gi rtags la der gyur pa'i skad cig ma bcu drug gis drangs pa'i rnam pa bcu drug yod/ rnam bshad du theg chen mthong lam shes bzod skad cig ma bcu drug dang/ des drangs pa'i lus ngag gi tha snyad khyad par can gnyis ka tshul gsum tshang ? pa'i mthong lam pa phyir mi ldog gi rtags su bshad pa la yang dpyad par bya'o/ /'dir theg chen gyi mthong lam shes bzod skad cig ma bcu drug gis drangs pa'i lus ngag gi tha snyad khyad par can la shes bzod skad cig ma bcu drug gi ming gis btags pa ni drang don du 'grel ba yin te/ 'dogs pa'i rgyu mtshan 'bras bu la rgyu ming gis btags/ dgos pa sems can 'dul ba'i dgos pa khyad par can ma gtogs pa rjes thob kyi spyod pa phal cher mnyam gzhag dang mthun par shes pa'i ched dang/ dngos la gnod byed rang las blo dma' bas shes bzod skad cig ma bcu drug mngon sum du ma rtogs pas nang gi thabs shes kyi rtogs pa brtan po dpog mi nus pa'i gnod byed dang bcas pa'i phyir/ dgos pa de ltar yod de/ dpung bzang gi rgyud @50b las/ gang gi rang bzhin chags sdang dang bral yang/ /chags sems can la chags pa ltang ston cing/ /gdug pa 'dul phyir khra la khro ston pa/ /byang chub mchog brnyes de la phyag 'tshal lo/ /zhes gsungs pa'i phyir/ ! 'dir dbang po'i rnam par gzhag pa cung zad bshad pa la/ sgra don/ dbye ba; grangs nges/ so so'i mtshan nyid dang bzhi las/ dang po la sbyi'i sgra don dang/ so so'i sgra don gnyis/ dang po ni/ bsdu ba las/ dbang po'i sgra don ci yin zhe na/ smras pa/ dbang byed pa ni dbang po'i don no/ /zhes gsungs pas rang gi dbang bsgyur bya la lhag par dbang byed bas na de ltar bshad cing/ des na rang gi dbang bsgyur bya la lhag par dbang byed pa'i 'dus byas su tshad mas dmigs pa de/ dbang po'i mtshan nyid/ gnyis pa la/ mig sogs dbang po drug pa chos can/ khyod la dbang po zhes 'chad pa'i rgyu mtshan yod de/ rang gi bdag 'bras su gyur pa'i rnam par shes pa bskyed pa la dbang byed pas de ltar brjod pa'i phyir/ pho mo'i dbang po gnyis chos can/ bsal ba 'dra/ rigs brgyud kyis khyad par la dbang byed pas na de ltar brjod pa'i phyir/ srog gi dbang po chos can/ bsal ba 'dra/ rten gyi gang zag 'tsho ba'i don du las kyi mtha' la sbyor ba la dbang byed pas na de ltar brjod pa'i phyir/ tshor ba'i dbang po chos can/ bsal ba 'dra/ rnam smin gyi 'bras bu la longs spyod pa la lhag par dbang byed pas de ltar brjod pa'i phyir/ dad sogs dbang po lnga po chos can/ bsal ba 'dra/ 'jig rten pa'i rnam byang skyed pa la lhag par dbang byed pas na de ltar brjod pa'i phyir/ dri med kyi dbang po gsum chos can/ bsal ba 'dra/ 'jig rten las 'das pa'i rnam byang skyed pa la lhag par dbang byed pas na de ltar brjod pa'i phyir/ de ltar yang/ bsdu ba las/ dbang po nyer gnyis kyi don ci yin zhe na/ smras pa/ drug ni yul 'dzin pa la lhag par dbang byed pa'i don gyis so/ /gnyis ni rigs brgyud rnam par dag pa la lhag par dbang byed pa'i don gyis so/ /gcig ni 'tsho ba'i don du las kyi mtha' la sbyor ba la lhag par dbang byed pa'i don gyis so/ /lnga pa ni rang 'bras la yongs su longs spyod pa la dbang byed pa'i don gyis so/ /gzhan lnga ni 'jig rten pa'i @51a @#/ /rnam par byed pa la lhag par dbang byed pa'i don gyis so/ /gsum ni 'jig rten las 'das pa'i rnam par byad pa la lhag par dbang byed pa'i don gyis so/ /zhes gsungs pa'i phyir/ gnyis pa ni/ de la grangs kyi sgo nas nyer gnyis yod de/ kun nas nyon mongs phyogs kyi dbang po bcu bzhi dang/ rnam byang gi dbang po brgyad yod pa'i phyir/ dang po de yod de/ gzugs can gyi dbang po bdun/ srog yid gnyis/ tshor ba'i dbang po lnga rnams su yod pa'i phyir/ gnyis pa de la de ltar yod de/ dad sogs dbang po lnga dang/ dri med kyi dbang po gsum rnams su yod pa'i phyir/ de yang gtso che ba'i dbang du byas kyi der nges pa ni ma yin te/ 'das lam du gyur pa'i yid dbang/ tshor ba bde ba/ yid bde ba/ tshor ba btang snyoms rnams kyang yod pa'i phyir/ gsum pa mdo sde ba'i lugs dang/ slob dpon gyi rang lugs bshad pa gnyis/ dang po ni; dbang po de la nyer gnyis su grangs nges te/ de la sems kyi rten byed pa'i dbang po/ /sems can gyi bye brag 'byed pa'i dbang po/ /rigs su gnas pa'i dbang po/ /kun nas nyon mongs kyi dbang po/ /rnam byang gi rgyu phyogs kyi dbang po/ /rnam byang gi ngo bo phyogs kyi dbang po rnams su nges pa'i phyir/ de yang dang po'i dbang du byas nas/ mig sogs dbang po drug /gnyis pa'i dbang du byas nas pho mo'i dbang po dang/ gsum pa'i dbang du byas nas srog dbang/ bzhi pa'i dbang du byas nas zag bcas kyi tshor ba'i dbang po lnga dang/ lnga pa'i dbang du byas nas dad sogs dbang po lnga dang/ drug pa'i dbang du byas nas dri med kyi dbang po gsum bzhag pa'i phyir te/ mdzod las/ sems kyi rten dang de'i bye brag /gnas dang kun nas nyon mongs nyid/ /tshogs dang rnam byang ji snyed pa/ /dbang po dag kyang de snyed do/ /zhes gsungs pa'i phyir/ gnyis pa ni/ de la yang sngar ltar grangs nges te/ kun nas nyon mongs kyi dbang po bcu bzhi dang/ rnam byang gi dbang po brgyad du nges pa'i phyir/ dang po de la der nges te/ de la 'khor bar 'jug pa'i rten gyi dbang po/ /zhugs nas skye ba'i dbang po/ /skyes nas gnas pa'i dbang po/ /gnas nas rnam smin la longs spyod @51b pa'i dbang po rnams su nges pa las/ mig sogs dbang po lnga/ pho mo'i dbang po gnyis/ srog yid kyi dbang po/ /tshor ba'i dbang po lnga rnams rims pas bzhag go /dang po'i rgyu mtshan yod de/ ma'i mngal du 'jug kha ma'i bar srid yin na/ dbang po kun tshar yin dgos pa'i phyir/ gnyis pa yang 'thad de/ pho mo'i dbang po gnyis 'phro 'du byed pa la brten nas yang srid phyi mar nyid 'tshams sbyor ba'i phyir/ gsum pa yang 'thad de/ de'i rten gyi gang zag ches yun ring du gnas par byed pa'i phyir/ bzhi pa yang 'thad de/ ngan song ba rnams rnam smin gyi char gyur pa'i sdug bsngal dang yid mi bde gnyis la longs spyod pa dang/ 'dod pa'i mi nas bsam gtan gnyis pa'i bar du ni rnam smin gyi char gyur pa'i tshor ba yid bde la gtso bor longs spyod/ bsam gtan bzhi pa nas/ srid rtse'i bar du ni tshor ba btang snyoms la gtso bor longs spyod pa'i phyir/ gnyis pa la yang der grangs nges te/ rnam byang du 'jug pa'i rten gyi dbang po/ /zhugs nas skye ba'i dbang po/ /skyes nas gnas pa'i dbang po/ /gnas nas longs spyod pa'i dbang po rnams su nges pa las/ dang po'i dbang du byas nas dad sogs dbang po lnga bzhag /de bzhin du gnyis pa/ gsum pa/ bzhi pa rnams la kun shes byed pa'i dbang po/ /kun shes pa'i dbang po/ /kun shes ldan pa'i dbang po bzhag pa'i phyir/ dang po 'thad de/ sbyor lam pas dad sogs dbang po lnga la brten nas bden pa mngon rtogs su gyur pa'i rnam byang 'byung ba'i rgyu mtshan gyis de ltar bshad pa'i phyir/ gnyis pa grub ste/ bden pa mngon rtogs su gyur pa'i rnam byang thos pa dang/ kun shes byed pa'i dbang po thob pa dus mnyam pa'i phyir/ gsum pa grub ste/ kun shes pa'i dbang po de bcu drug pa lam rjes shes nas theg pa rang lugs kyi sgom lam tha ma'i bar du yun ring du gnas pa'i phyir/ bzhi pa grub ste/ kun shes ldan pa'i dbang po thob pa'i tshe mthong chos la bde bar gnas pa la gtso bor longs spyod pa'i phyir/ de ltar yang/ mdzod las/ yang na 'jug pa'i rten dang ni/ /skye dang gnas dang nyer spyod dang/ /bcu bzhi de bzhin ldog pa yi/ /dbang po rnams ni gzhan yin no/ /zhes gsungs pa'i phyir/ @52a @#/ /bzhi pa so so'i mtshan nyid la/ kha cig /rang 'bras mig shes kyi thun mong ma yin pa'i bdag rkyen byed pa'i nang gi rdul dang ba de/ mig dbang gi mtshan nyid/ lhag ma rnams la rigs 'phres zer na/ de la kha cig /mi 'thad de/ rdul med pa'i phyir/ bem po med pa'i phyir/ phyi don med pa'i phyir/ zer yang kun btus dar TIka ltar na 'dir ma khyab/ yang kha cig /rang 'bras yid shes kyi thun mong ma yin pa'i bdag rkyen byed pa'i rig pa de/ yid dbang gi mtshan nyid zer na/ yid dbang dang mtshungs ldan gyi sems byung chos can/ mtshon bya der thal mtshan nyid de'i phyir/ chos can de yin pa'i phyir/ 'dod na/ yid yin par thal/ 'dod pa'i phyir/ 'dod na sems su thal/ 'dod pa'i phyir/ khyab ste/ mdzod las/ sems dang yid dang rnam shes ni/ /don gcig /zhes gsungs pa'i phyir/ yang kha cig /rang gi bdag 'bras su gyur pa'i mig shes kyi thun mong ma yin pa'i bdag rkyen du gyur pa'i nang gi gzugs can dang ba/ mig dbang gi mtshan nyid zer na/ de mtshungs gyi mig dbang chos can/ mtshan nyid der thal/ mtshon bya de'i phyir/ chos can de'i phyir/ 'dod na rten bcas kyi mig dbang du thal/ 'dod pa'i phyir/ 'dod mi nus te/ chos can de yin pa'i phyir/ gzhan yang/ de rten bcas kyi mig dbang ma yin par thal/ de'i bdag 'bras su gyur pa'i dbang shes med pa'i phyir/ ma grub na/ gnyid thug gi skabs na mig shes yod par thal/ ma grub pa de'i phyir/ gzhan yang/ gzugs khams pa'i gang zag gi rgyud kyi lce'i dbang po chos can/ rang gi bdag 'bras su gyur pa'i lce shes kyi thun mong ma yin pa'i bdag rkyen byed pa'i nang gi gzugs can dang ba yin par thal/ lce'i dbang po yin pa'i phyir te/ chos can de yin pa'i phyir/ der thal/ gzugs khams na gzugs yod pa'i phyir te/ de na khams bcu bzhi yod pa'i phyir/ mdzod las/ gzugs kyi khams na bcu bzhi'o/ /zhes gsungs pa'i phyir/ rtsa bar 'dod na/ de ma yin par thal/ de'i bdag 'bras su gyur pa'i lce shes med pa'i phyir/ gzugs khams pa rnams dri ro la 'dun pa'i 'dod chags dang bral ba'i phyir te/ / @52b gzugs khams pa rnams phal cher 'dod pa la 'dun pa'i 'dod chags dang bral ba'i phyir/ kha cig /rang gi bdag 'bras su gyur pa'i mig shes kyi thun mong ma yin pa'i bdag rkyen byed pa'i rigs su gnas pa'i nang gi gzugs can dang ba de/ mig dbang gi mtshan nyid zer na/ de la kha cig /rten bcas kyi mig dbang dang tshogs pa gcig na yod pa'i 'byung ba'i nang gi gzugs can dang ba chos can/ mtshon bya der thal/ mtshan nyid de'i phyir/ 'dod na/ 'bras gzugs yin par thal lo/ /'dod pa'i phyir zer na/ ma khyab/ 'dod na/ ma yin par thal/ rgyu gzugs yin pa'i phyir/ ma khyab mtshams la; kho na re/ khyab pa yod par thal/ mig dbang yin na 'byung 'gyur gyi gzugs yin dgos/ de yin na 'bras gzugs yin dgos pa'i phyir/ dang po grub ste/ mdzod las/ lus ni gzugs can rags/ zhes gsungs pa'i phyir/ gnyis pa grub ste/ 'byung ba'i gzugs yin na/ rgyu gzugs yin dgos pa'i phyir/ kha cig /rigs gnas sngar dang 'dra ba la 'byung 'gyur gyi nang gi gzugs can dang ba de/ mig dbang gi mtshan nyid zer na/ chos can snga ma'i steng du 'byung 'gyur du gyur pa'i nang gi gzugs can phra rab chos can/ mtshon bya der thal/ mtshan nyid de'i phyir/ chos can de yin pa'i phyir/ /'dod na rags pa'i gzugs yin par thal/ 'dod pa'i phyir/ 'dod mi nus te/ phra ba'i gzugs yin pa'i phyir/ des na/ gzugs can gyi dbang po bdun gyi nang tshan gang zhig /rang gi rten gzhi mig gi dbang rten la gtso bor brten pa de/ mig dbang gi mtshan nyid des rna ba/ sna/ lce; lus dbang gi mtshan nyid kyang rags 'dre'o/ /mig dbang la dbye na rten bcas kyi mig dbang dang/ de mtshungs kyi mig dbang gnyis yod/ rang gi bdag 'bras su gyur pa'i mig shes kyi thun mong ma yin pa'i bdag rkyen byed bzhin pa'i mig dbang de/ dang po'i mtshan nyid/ de ma yin pa'i rigs su gnas pa de/ gnyis pa'i mtshan nyid/ gzhan rnams la yang dbye ba de ltar du shes par bya'o/ /dang po sla/ gnyid 'thug po log bzhin pa dang/ rmi lam gyi gnas skabs kyi mig dbang rnams gnyis pa'i mtshan gzhi yin/ mig dbang gang du gnas rtogs sla/ lus dbang ni skra @53a @#/ /dang sen mo ma gtogs pa'i lus kyi cha shas thams cad na gnas te/ de gnyis ma gtogs pa'i lus kyi cha shas gang la gnod pa byas pa'i lus shes 'khor gyi tsho rab sdug bsngal 'byung ba'i phyir/ drug pa yid dbang gi mtshan nyid ni/ rang gi bdag 'bras su gyur pa'i yid shes kyi thun mong ma yin pa'i bdag rkyen byed pa'i gtso bo'i rnam rig /de'i mtshan nyid/ bdun pa pho mo'i dbang po'i rnam gzhag bshad pa la/ kha cig /pho'i rang bzhin la lhag par dbang byed pa'i lus dbang gi phyogs gcig gang zhig /'doms kyi phyogs su gnas pa de/ pho dbang gi mtshan nyid/ res mo dbang la'ang rigs 'dre zer na/ gzugs khams pa'i gang zag gi rgyud kyi pho'i rang bzhin la lhag par dbang byed pa'i pho'i 'doms kyi phyogs su gnas pa'i lus dbang chos can/ mtshon bya der thal/ mtshan nyid de'i phyir/ rtags gnyis ka grub ste/ gzugs khams pa'i gang zag yin na/ pho yin dgos pa'i phyir/ 'dod mi nus te/ gzugs khams na pho dbang med pa'i phyir te/ de la rten rtsa 'khor med pa'i phyir/ gzhan yang/ mig dbang yin na/ rang rgyud ldan gyi dpral ba'i phyogs su gnas pas khyab par thal/ pho dbang yin na 'doms kyi phyogs su gnas pas khyab pa'i phyir/ 'dod na/ brgya byin gyi lag pa la gnas pa'i mig dbang chos can/ der thal/ de'i phyir/ yang kha cig /pho'i rang bzhin la lhag par dbang byed pa de/ pho dbang gi mtshan nyid/ cig shos la rigs 'dres zer na/ pho'i dbang po yin na/ rang rgyud ldan gyi gang zag pho yin dgos pa dang/ mo'i dbang po yin na rang rgyud ldan gyi gang zag mo yin dgos par thal/ mtshan nyid 'thad pa'i phyir/ 'dod na/ ma ning mtshan gnyis pa'i rgyud kyi pho dbang chos can/ der thal/ de'i phyir/ mtshan gnyis pa'i mo dbang yang chos can/ der thal/ de'i phyir/ gnyis ka la 'dod na/ de pho mo'i gzhi mthun yin par thal lo/ /'dod mi nus te/ pho mo 'gal ba'i phyir/ rang lugs na/ gzugs can gyi dbang po bdun gyi nang tshan gang zhig /rang gi rten gzhir gyur pa'i pho'i dbang rten la gtso bor rten pa/ pho'i dbang po'i mtshan nyid/ mo la'ang rigs 'dre @53b ring du gnas pa srog dbang bshad pa la/ kha cig /drod dang rnam shes kyi rten byed pa'i dbang po de/ srog dbang gi mtshan nyid zer na/ 'dod khams pa'i rgyud kyi drod dang rnam shes kyi rten du gyur pa'i yid dbang chos can/ mtshon bya der thal/ mtshan nyid de'i phyir/ rtags chos can gyis sgrub/ 'dod na/ ? ldan min 'du byed du thal/ 'dod pa'i phyir/ 'dod mi nus so/ /kha cig /de 'dra'i rten byed pa'i tshe/ srog dbang gi mtshan nyid zer na/ gzugs med khams pa'i gang zag gi rgyud kyi srog dbang chos can/ mtshan nyid der thal/ mtshon bya de'i phyir/ 'dod mi nus te/ de na drod med pa'i phyir te/ de na gzugs med pa'i phyir te/ mdzod las/ gzugs med khams na gzugs med do/ /zhes gsungs pa'i phyir/ rang gi lugs la/ drod dang rnam shes ci rigs pa'i rten byed pa'i tshe/ srog dbang gi mtshan nyid yin te/ gdogs ? pa'i bstan chos las/ srog gi dbang po'i rten ci yin zhe na/ khams gsum pa'i tshe'o/ /zhes dang/ gtan la dbab pa bsdu ba las kyang/ de ni gang gi tshe ma yin/ sngon gyi las kyis 'phangs pa'i dus nges pa la tshe zhes bya'o/ /zhes dang/ mdzod las kyang/ srog ni tshe yin drod dang ni/ /rnam shes rten gang yin pa'o/ /zhes gsungs pa'i phyir/ rtogs dka' ba tshor ba'i dbang po lnga la/ kha cig /bde ba'i dbang po dang/ sdug bsngal gyi dbang po gang rung yin na/ dbang shes 'khor gyi tshor ba yin pas khyab/ yid bde dang/ yid mi bde gang rung yin na/ yid shes 'khor gyi tshor ba yin pas khyab/ zer na/ dang po mi 'thad par thal/ dbang shes 'khor gyi tshor ba med pa'i phyir te/ dbang shes gtso sems ma yin pa'i phyir/ gnyis pa'ang 'dre/ kha cig /dbang po dang ba gnyis gang rung yin na/ dbang po'i rnam par shes pa'i 'khor du byung ba'i tshor ba yin pas khyab/ phyi ma gnyis gang rung yin na/ yid kyi rnam par shes pa'i 'khor du byung ba'i tshor ba yin pas khyab zer na/ lhas sbyin gyi rgyud kyi bde ba'i dbang po chos can/ der thal/ de'i phyir/ chos can de yin pa'i phyir/ de yod pa'i phyir/ 'dod na/ de chos can/ dbang po'i rnam par shes pa de khyod dang mtshungs ldan gyi blo yin par thal/ khyod de'i 'khor du @54a @#/ /byung ba'i sems byung yin pa'i phyir/ 'dod na/ dbang po'i rnam par shes pa chos can/ khyod lhas sbyin gyi rgyud kyi shes pa yin par thal/ 'dod pa'i phyir/ kha cig /dang po gnyis gang rung yin na/ lus tshor yin pas khyab/ phyi ma gnyis gang rung yin na/ sems tshor yin pas khyab zer na/ de mi 'thad par thal/ yid bde ba de bde ba'i dbang po yin pa'i phyir te/ de bde ba yin pa'i phyir dang/ yid mi bde de sdug bsngal gyi dbang po yin pa'i phyir te/ sdug bsngal yin pa'i phyir/ der thal/ de sems kyi sdug bsngal yin pa'i phyir/ tshor ba la lngar phye ba'i bde ba sdug bsngal/ yid bde yid mi bde rnams 'gal yang/ tshor ba bde ba dang yid bde ba mi 'gal/ tshor ba sdug bsngal dang yid mi bde ba mi 'gal te/ phyi ma phyi ma la snga ma snga mas khyab pa'i phyir/ ma khyab na 'bud/ de bzhin du tshor ba'i dbang po la lngar phye ba'i tshor ba bde ba'i dbang po dang/ tshor ba sdug bsngal gyi dbang po dang/ yid mi bde ba'i dbang po dang/ yid bde ba'i dbang po 'gal yang spyir mi 'gal te/ tshor ba yid bde ba'i dbang po yin na/ bde dbang yin pas khyab pa sogs yin pa'i phyir/ de ltar khyab pa yang yin te/ tshor ba yid bde yin na tshor ba bde ba yin pas khyab pa'i phyir te/ yid shes su gyur pa'i tshor ba bde ba yin na/ tshor ba bde ba yin dgos pa'i phyir/ tshor ba la lngar phye ba'i lnga po 'gal ba yin te/ tshor ba la lngar phye ba'i yid bde ba'i dbang po yin na/ yid shes yin pas khyab/ der phye ba'i bde ba'i dbang po yin na/ dbang shes yin pas khyab/ der phye ba'i yid mi bde ba'i dbang po la yid shes kyis khyab/ der phye ba'i sdug bsngal gyi dbang po la dbang shes kyis khyab pa'i phyir/ kha cig /rang yul sim par nyams su myong ba'i shes pa/ tshor ba bde ba'i mtshan nyid zer na/ tshor ba bde ba dang mtshungs ldan gyi rnam shes chos can/ mtshon bya der thal/ mtshan nyid de'i phyir/ der thal/ tshor ba bde ba dang mtshungs ldan gyi shes pa yin pa'i phyir/ de 'dra ba'i sems byung zer na/ de dang mtshungs ldan gyi 'du shes kyi ma nges/ rang lugs la/ rang yul rang @54b stobs kyis nyams su myong ba'i sems byung/ tshor ba'i mtshan nyid/ de la rkyen gyi sgo nas dbye na mig gi 'dus te rig pa'i rkyen gyis tshor ba sogs drug yod/ yul gyi sgo nas dbye na tshor ba sim gdung bar ma gsum yod/ dbang po nyer gnyis kyi nang tshan gyi tshor ba la gong du bshad pa ltar gyi steng du tshor ba btang snyoms pa snan pas lnga yod/ rang yul sim par rang stobs kyis nyams su myong ba'i tshor ba/ tshor ba bde ba'i mtshan nyid/ rang yul gdung bar rang stobs kyis nyams su myong ba'i tshor ba/ tshor ba sdug bsngal gyi mtshan nyid/ rang yul sim gdung bar mar rang stobs kyis nyams su myong ba'i tshor ba/ tshor ba btang snyoms kyi mtshan nyid/ dbang shes su gyur pa'i tshor ba bde ba/ de la lngar phye ba'i tshor ba bde ba'i dbang po'i mtshan nyid/ dbang shes su gyur pa'i tshor ba sdug bsngal/ de la lngar phye ba'i tshor ba sdug bsngal gyi dbang po'i mtshan nyid/ yid shes su gyur pa sbyar nas phyi ma gnyis 'jog lugs shes par bya'o/ /de la kho na re/ bsam gtan gsum pa'i phan yon gyi yan lag tu gyur pa'i tshor ba bde dbang chos can/ dbang shes su gyur pa'i tshor ba yin par thal/ tshor ba bde dbang yin pa'i phyir te/ chos can de yin pa'i phyir/ de yod pa'i phyir/ mdzod las/ sems kyi de ni bde dbang po/ /zhes gsungs pa'i phyir/ zhe na skyon med de/ de'i don lus shes 'khor bcas la phan 'dogs pa'i cha nas bde dbang gi ming btags nas bstan pa yin pa'i phyir dang/ mdo las bsam gtan gsum pa'i skabs su bde ba lus kyi myong la zhes pa yang de la dgongs pa yin pa'i phyir/ dad sogs dbang po lnga bshad pa la/ kha cig /rang yul dge ba'i dmigs pa la rang stobs kyis dang ba'i sems byung de/ dad pa'i dbang po'i mtshan nyid/ de bzhin du/ mi brjod pa'i de/ spro ? ba'i de/ rtse gcig pa'i de/ rnam par 'byed pa'i de rnams re re nas rim pa bzhin du mtshan nyid yin zer na/ dang po la sdug bsngal bden pa la dmigs pa'i dad pa'i dbang po chos can/ mtshan nyid der thal/ mtshon bya de'i phyir/ der thal/ chos can de yin pa'i phyir/ de 'dra yod pa'i phyir te/ bden bzhi'i blang dor la dad pa'i dad pa yod pa'i phyir/ rtsa bar 'dod na/ @55a @#/ /sdug bden de dge ba yin par thal/ 'dod pa'i phyir/ 'dod mi nus te/ de lung ma bstan yin pa'i phyir te/ rnam smin lung du ma bstan chos/ zhes gsungs pa'i phyir/ kha cig /rang gi dmigs yul la dang ba'i sems byung de/ dang po'i mtshan nyid dang/ des gnyis pa sogs la rigs 'dre zer na/ lam ma zhugs kyi gang zag gi rgyud kyi mi dge ba la spro ba'i sems byung chos can/ brtson 'grus kyi dbang po yin par thal/ rang gi dmigs pa la spro ba'i sems byung yin pa'i phyir te/ chos can de'i phyir/ de 'dra yod pa'i phyir te/ dge ba la mi spro ba'i sems byung yod pa'i phyir/ rtsa bar 'dod na/ ma yin par thal/ chos can de yin pa'i phyir/ rang lugs ni/ rang gi dmigs pa la rang stobs kyis dad pa'i lam gyi ngo bor gyur pa'i sems byung de/ 'dir dngos bstan gyi dang po'i mtshan nyid dang/ gzhan rnams la rigs 'dre/ rang stobs kyi spro ba de/ brtson 'grus kyi dbang po dang/ rang stobs kyi mi brjed pa de/ dran pa'i dbang po dang/ rang stobs kyi rtse gcig pa de/ ting nge 'dzin gyi dbang po dang/ rang stobs kyi rnam par 'byed pa'i de shes rab kyi dbang po'i mtshan nyid yin/ dri med kyi dbang po gsum bshad pa la/ kha cig /zag med kyi bden pa mngon rtogs/ kun shes byed pa'i dbang po'i mtshan nyid/ zag med kyi rjes la mngon rtogs/ kun shes pa'i dbang po'i mtshan nyid/ ? mi slob lam gyi ngo bor gyur pa'i zag med kyi dbang po de/ kun shes ldan pa'i dbang po'i mtshan nyid/ zer na/ nyan thos kyi mthong lam bcu drug pa lam rjes shes chos can/ zag med kyi rjes la mngon rtogs yin par thal/ kun shes pa'i dbang po yin pa'i phyir te/ chos can de'i phyir/ 'dod mi nus te/ bden pa mngon rtogs yin pa'i phyir/ kha cig /sbyor lam stan gcig pa'i rtogs pa thob nas bcu drug pa lam rjes shes kyi rtogs pa ma thob pa'i zag med kyi dbang po de/ dang po'i mtshan nyid/ bcu drug pa lam rjes shes kyi rtogs pa thob cing/ dgra bcom pa'i rtogs pa ma thob pa'i zag med kyi dbang po de/ gnyis pa'i mtshan nyid/ gsum pa'i mtshan nyid/ sngar ltar @55b zer zhing nyan thos dgra bcom rang rgyal lam du 'jug pa yod zer na/ spang bya cig car ba'i rgyun zhugs kyi rtogs pa sngon du song ba'i lam rjes bzod chos can/ bcu drug pa lam rjes shes kyi rtogs pa ma thob par thal/ kun shes byed pa'i dbang po yin pa'i phyir te/ chos can de'i phyir/ 'dod na sla/ gzhan yang/ nyan thos dgra bcom gyi rtogs pa sngon du song ba'i rang rgyal gyi mthong lam bcu drug pa lam rjes shes chos can/ dgra bcom gyi rtogs pa ma thob par thal/ kun shes pa'i dbang po yin pa'i phyir te/ chos can de'i phyir/ 'dod na sla/ kha cig /theg pa rang lam gyi sbyor lam stan gcig pa'i rtogs pa thob cing/ theg pa rang lam gyi bcu drug pa lam rjes shes kyi rtogs pa ma thob pa'i zag med kyi dbang po de/ dang po'i mtshan nyid/ gzhan la'ang rigs 'dre zer na/ byang sems tshogs lam pa'i rgyud kyi stong nyid rtogs pa'i mkhyen pa chos can/ mtshan nyid kyi zur dang po der thal/ mtshon bya dang po de'i phyir/ theg chen gyi de yin pa'i phyir/ mos spyod kyis bsdus pa'i zag med kyi dbang po yin pa'i phyir/ khyab ste/ gtan la dbab pa bsdu ba las/ byang chub sems dpa'i kun shes par byed pa la sogs pa gsum ji ltar rnam par gzhag ce na/ smras pa/ mos pas spyod pa'i lam ni dang po rnam par gzhag go/ zhes gsungs pa'i phyir/ gzhan yang/ dman lam sngon du ma song ba'i theg chen gyi mthong lam bco lnga pa lam rjes bzod chos can/ theg pa rang lam gyi bcu drug pa lam rjes shes kyi rtogs pa thob par thal/ kun shes pa'i dbang po yin pa'i phyir te/ theg chen gyi de yin pa'i phyir te/ de byang 'phags kyi rgyud kyi zag med kyi dbang po yin pa'i phyir/ khyab ste/ bsdu ba las/ de las gzhan pa lhag pa'i bsam pa rnam par dag pa la sogs pa'i sa dag la ni gnyis pa'o/ /de bzhin gshegs pa'i sa la ni dbang po gsum rnam par gzhag par lta bar bya'o/ /zhes gsungs pa'i phyir/ rtsa bar 'dod na/ de ma thob par thal/ chos can de dang gcig yin pa'i phyir/ rang lugs la/ mdzod pa ba'i lugs dang/ theg chen pa'i lugs gnyis las/ dang po ni mthong lam gyi ngo bor gyur pa'i zag med kyi dbang po de/ dang @56a @#/ /po'i mtshan nyid/ sgom lam gyi ngo bor gyur pa'i zag med kyi dbang po de/ gnyis pa'i mtshan nyid dang/ mi slob lam du gyur pa'i de/ gsum pa'i mtshan nyid/ mthong lam gyi ngo bor gyur pa'i zag med kyi dbang po dang po dgu ni/ dang po'i mtshan gzhi dang/ phyi ma gnyis la rigs 'dre/ dgu ni 'phags lam gyi ngo bor gyur pa'i dad sogs dbang po lnga/ yid kyi dbang po// bde ba'i dbang po// tshor ba btang snyoms kyi dbang po rnams yin te/ mdzod las/ mthong sgom mi slob lam la dgu/ gsum yin gsum ni dri ma med/ / ces gsungs pa'i phyir/ gnyis pa la theg dman gyi dri med kyi dbang po gsum bshad pa dang/ theg chen gyi de bshad pa gnyis/ dang po ni/ theg pa rang lam gyi sbyor lam stan gcig pa'i rtogs pa thob cing/ theg pa rang lam gyi bcu drug pa lam rjes shes kyi rtogs pa ma thob pa'i theg dman gyi zag med kyi dbang po de/ theg dman gyi kun shes byed pa'i dbang po'i mtshan nyid yin te/ kun btus las/ mi shes pa gang shes par byed pa'i dbang po gang zhe na/ sbyor ba'i lam dang/ mthong ba'i lam gyi skad cig ma bco lnga la dbang byed pa'o/ /zhes gsungs pa'i phyir/ theg pa rang lam gyi bcu drug pa lam rjes shes kyi rtogs pa thob cing/ theg pa rang lam gyi mi slob pa'i lam gyi rtogs pa ma thob pa'i theg dman gyi zag med kyi dbang po de/ theg dman gyi kun shes pa'i dbang po'i mtshan nyid yin te/ kun btus las/ kun shes pa'i dbang po gang zhe na/ slob pa'i lam thams cad la dbang byed pa'i/ zhes gsungs pa'i phyir/ des kun shes ldan pa yang mtshon/ gnyis pa ni/ theg chen gyi mos spyod kyi sas bsdus pa'i zag med kyi dbang po de/ theg chen gyi kun shes byed pa'i dbang po'i mtshan nyid/ sa thob pa'i skabs kyi theg chen slob pa'i zag med kyi dbang po de/ theg chen gyi kun shes pa'i dbang po mtshan nyid/ sangs rgyas sa'i zag med kyi dbang po de/ kun shes ldan pa'i dbang po'i mtshan nyid yin te/ gtan la dbab pa bsdu ba las/ byang chub sems dpa' kun shes par byed pa la sogs pa gsum ji ltar rnam @56b par bzhag ce na/ smras pa/ mos pa'i spyod pa'i sa la ni/ dang po rnam par gzhag go/ de las gzhan lhag pa'i bsam pa rnam par dag pa la sogs pa'i sa dag ni gnyis pa'o/ /de bzhin gshegs pa'i sa bcu la ni dbang po gsum pa rnam par gzhan par blta bar bya'o/ /zhes gsungs pa'i phyir/ ngag don ni/ mthong ba'i lam la bzod pa dang/ zhes sogs kyi skabs su/ phyir mi ldog gi rtags bcu drug bshad pa la/ de'i nang nas kyang bcu gnyis pa 'gog pa rjes shes kyis drangs pa'i mthong lam gyi phyir mi ldog gi rtags bye brag tu 'chad pa la/ rtsa bar/ sogs dang dbang sogs bcas pa yi/ /g.yul 'gyed ser sna la sogs pa/ /blo ldan mthong ba'i lam gnas pa'i/ /phyir mi ldog pa'i rtags dag yin/ /zhes pa dang/ 'grel par/ gzung ba dang 'dzin pa dag spang bar bya ba nyid kyi dbang po dang rtan grong khyer la sogs pa'i g.yul 'gyed pa la snga ma bzhin du sbyor ba dang rjes su sbyor ba'i gnas pa 'gog pa zhes bya ba bzhi ni 'gog pa'i rnam pa yin/ zhes pa'i skabs su bcu gnyis pa 'gog pa rjes shes kyis drangs par gyur pa'i rjes thob lus ngag gi tha snyad khyad par can dang ldan pa'i byang sems mthong lam pa chos can/ phyir mi ldog gi rtags thob pa'i dge 'dun yin te/ grong gi sgras bstan pa'i dbang po dang/ grong khyer gyi sgras bstan pa'i dbang rten dang/ bdag gi sgras bstan pa'i rnam par shes pa/ grong brdal gyi sgras bstan pa'i yul gzugs sogs la bden par 'dzin pa'i bden 'dzin kun btags mngon gyur ba dang/ de bden stong du rtogs pa'i shes rab gnyis spang gnyen du g.yul 'gyed pa la bden 'dzin kun rtags mngon gyur ba bzlog pa'i sgo nas/ thabs shes kyi rtogs pa brtan pos drangs pa'i rjes thob lus ngag gi tha snyad khyad par can thob pa'i sems dpa' yin pa'i phyir/ sgom lam pa phyir mi ldog gi rtags bshad pa la/ zab mo rnam pa brgyad rtogs pa'i theg chen gyi rjes la mngon rtogs kyis drangs pa'i rjes thob lus ngag gi tha snyad khyad par can gang rung dang ldan pa'i theg chen gyi rjes la mngon rtogs la gnas pa'i sems dpa'/ sgom lam pa phyir mi ldog gi rtags dang ldan pa'i @57a @#/ /byang sems sgom lam pa'i mtshan nyid/ de'i phyir mi ldog gi rtags la dbye na/ zab mo rnam pa brgyad rtogs pas drangs pa'i rtags rnam pa brgyad yod/ gong du smos pa bzhin gzhung 'di'i don rtogs dka' bas zhib tu ched cig /sgom lam gyi gzhung gis khongs dpyad tshul gzhung gi bsdu bas thon pas/ rtsod pa gnyis kyi don cung zad bshad na/ kha cig /rtsod pa dang po smra ba po rnam rig pa ma yin te/ mdo dang bstan bcos rtsom pa'i dus su rnam rig pa med pa'i phyir dang/ des 'bras bu'i grangs dang mnyam pa'i dgos par mi 'dod pa'i phyir te/ rgyu gcig gis kyang 'bras bu du ma bskyed pa yod par 'dod pa'i phyir/ de bye brag smra ba yin no zer na/ mi rigs te/ rigs pa de nyid bye brag smra ba la yang mtshungs pa'i phyir/ mdo bstan bcos gnyis las sems tsam pas ma 'ongs pa na de ltar rtsod pas phyogs snga blangs pa yin pas de la bya rung ngo/ /nyi snang gis rtsa bas rtsod lan gnyis ka dngos su bstan par byas nas/ rkang pa dang po gnyis kyis theg chen gyi sgom lam dgus bsod nams grangs med la sogs pa bskyed pa mi 'thad par thal/ bsod nams grangs med la sogs pa don dam par ma grub pa'i phyir zhes dang/ rkang pa gnyis pas khyab pa ma nges te/ bsod nams grangs med sogs don dam par ma grub kyang kun rdzob tu rgyal pa'i gsung las gsungs pa ltar thub pa bzhed pa'i phyir/ zhes 'chad/ slob dpon ltar na theg chen gyi sgom lam dgu kho na'i grangs nges mi 'thad par thal/ dgu po re ras kyang bsod nams grangs med sogs skyes pa gang zhig /'bras bu'i grangs dang mnyam pa'i rgyu dgos pa'i phyir/ zhes pa'i rtsod pa kha bskang nas/ rtsa ba ril pos lan 'debs shing/ de yang don dam la bltos te/ 'dod lan/ kun rdzob la bltos te khyab med kyi lan 'debs pa'i phyir/ rtsod lan phyi ma gnyis kyi don la/ theg chen gyi sgom lam bar chad med lam dgus spang bya nyams 'phel gyi bya ba mi byed par thal/ de rnams bden par med pa'i phyir/ bden pas stong ba'i gnas lugs zab mo dang ldan pa'i phyir/ zhes pa yin/ lan 'debs tshul la @57b gzhan lugs dgag pa/ rang lugs bzhag pa gnyis las/ dang po ni kha cig /de 'dra'i rtsod pa po sems tsam pa yin zhing/ de la don dam la bltos pa'i 'dod lan/ kun rdzob la bltos te khyab pa ma grub pa'i lan 'debs/ de yang byang chub chen po rtogs pa ye shes chos sku bden par med kyang gzhan don byed pa lta bu zhes/ rtogs pa ye shes chos sku bden med du dang theg chen gyi sgom lam bden med du ma rtogs pa'i ngor lan 'debs pa'i dbang du byas zer na/ rang tshig dang 'gal te/ rtsod pa po sems tsam par byas pa'i phyir/ yang kha cig /byang chub chen po gzung 'dzin rdzas gzhan gyis stong ba'i mtshan nyid can yin pa dang/ gzhan don byed pa dper byed pa yin zer/ gzhung gi tshig don la cung zad kyang ma zhugs te/ rtsod pa pos theg chen gyi sgom lam bar chad med lam dgus spang bya nyams 'phel gyi bya ba mi byed par thal/ de rnams gzung 'dzin rdzas gzhan gyis stong pa'i phyir zhes 'phangs par thal ba dang/ sgom pa'i lam ni zab pa ste/ zhes pa'i zab pa yang gzung 'dzin rdzas gzhan gyis stong pa tsam la byed par thal/ dam bca' 'thad pa'i phyir/ 'dod mi nus so/ /gser phreng du byang chub chen po'i de bzhin nyid kyi mtshan nyid can yin kyang gzhan don byed pa bzhin/ zhes gsungs pa'i phyir/ gsal po ma byung zhing/ bden pas stong ba'i mtshan nyid la byed na rnam rig pa'i ngo bor ma grub pa dang/ byang chub de bzhin nyid mtshan nyid dang zlos kyi dogs/ rang lugs la/ rtsod pa de la khyab pa ma nges te/ byang chub chen po rtogs pa ye shes chos sku la don dam par nyams 'phel med kyang gzugs sku'i snang ba bskyed nas mya ngan las 'da' tshul bstan pa sogs kyi sgo nas gzhan don byed pa lta bu'am/ yang na byang chub chen po de don dam par rang gi ngos skal gyi spang bya nyams pa dang gnyen po 'phel ba'i bya ba mi byed kyang gdul bya'i spang bya nyams 'phel gyi bya ba byed pa bzhin zhes pa gang rung zhig zer dgos par mngon/ byang chub de bzhin nyid kyi mtshan nyid sogs kyi don gyi de gnyis dpe don mtshungs te/ tha snyad du bya byed nus mtshungs/ don dam par med par mtshungs pa'i phyir/ zhes pa'i don @58a @#/ /no; ;gong du bshad pa de dag 'thad de/ nyi snang las/ ji skad du rtogs pa thams cad la ngar 'dzin pa rnam par 'phel ba bkag pas bla na med pa yang dag par rdzogs pa'i byang chub ji lta ba de bzhin yid la byed pa la sogs pa yongs su bsngo ba dang ldan pa de skal ba dang ldan pa nyid du gsungs pa yin no/ /zhes gsungs pa'i phyir/ kha cig /byang chub ji ltar sogs kyis sems tsam pas byang chub chen po bden med du sgrub nas de ltar bkod pa ma yin gyi/ de bzhin du tshor ba dang zhes pa bzhin snga ma'i kyus kyi bshad pa yin gsung ba yang khyab pa ma nges pa'i dpe de'i skabs yin pas mi rigs so/ /'di rnam bshad las chos skus longs sku'i bdag rkyen longs skus sprul sku'i bdag rkyen byed par gsungs pa ni/ bdag rkyen mtshan nyid pa ma yin te/ nang du chos sku grub pa'i dbang gi phyi rol du gzugs sku grub pa tsam la dgongs pa'i phyir/ dper na chos thams cad bar chad med pa'i rtse sbyor gyi dmigs rkyen du gsungs pa lta bu yin pa'i phyir/ kun rdzob la bltos pa'i rtsod lan sla/ ! chos rnams rmi lam 'dra ba'i phyir/ /zhes sogs kyi skabs su/ 'phros don dang/ mtha' dpyad pa gnyis/ dang po ni/ zab mo brgyad pa'i skabs su/ byang sems kyi rnam thar sgo gsum la gnas nas gzhan don byed par bshad pa na/ shA ri'i bus rab 'byor la rmi lam du rnam thar sgo gsum gyi ting nge 'dzin la snyoms par zhugs na sher phyin rnam par 'phel lam zhes pa'i lan du/ nyin par bsgoms pas kyang rnam par 'phel lo/ /de ci'i phyir zhe na/ rmi lam dang nyin par rnam par rtog pa ma mchis pa'i phyir ro/ /zhes nyin par gyi myang 'das dang/ rmi lam gyi 'khor ba mtshon nas srid zhi bden stong mnyam nyid du dngos su bstan nas/ de rtogs pa'i sbyor ba shugs la bstan pa de nyid 'dir dngos su 'chad do/ /gnyis pa la/ srid zhi mnyam nyid kyi sbyor ba ngos bzung ba/ gzhal bya srid zhi mnyam nyid la mtha' dpyad pa gnyis/ dang po la srid zhi bden stong mnyam nyid du mngon sum du rtogs pa'i shes rab kyis zin pa'i sgo nas gtso bor @58b chos sku'i lag rjes 'jog byed kyi dag sa'i ye shes/ srid zhi mnyam nyid kyi sbyor ba'i mtshan nyid/ des srid zhi bden par mi rtog pa'i rgyu mtshan yod de/ bskal pa grangs med gnyis kyi bar du thabs cha rgya chen pos zin pa'i sgo nas stong nyid rtogs shing goms par byas pas rjes kyi gnas skabs su bden 'dzin mngon gyur ba skye ba'i go skabs bcom pa'i sems dpa'i ye shes yin pa'i phyir/ dag sa'i snying rje chen po dang byang chub kyi sems la dmigs med kyi snying rje chen po dang/ dmigs med kyi sems bskyed kyis khyab ste/ de gnyis la rang gi dmigs yul du gyur pa'i sems can dang/ rdzogs byang bden med du snang bas khyab pa'i phyir/ rnam bshad las/ sa brgyad pa thob nas rjes thob kyi gnas skabs su shes bya ji snyed pa gang snang yang me long nang gi byad bzhin gyi gzugs brnyan bzhin du snang ba yin gyi/ zhes sogs gsungs pa'i phyir/ de ltar byas na thal 'gyur ba'i lugs su ma zad/ 'di pa'i lugs la yang sems can bden grub tu yang snang bden med du yang snang bas sems dpa'i ye shes kyi gzhi mthun yod de/ sa brgyad pa ba'i rgyud kyi sems can bden grub tu snang ba'i snying rje chen po de la sems can bden grub tu snang ba gang zhig /bden med du yang snang ba'i phyir/ dang po sla/ gnyis pa der thal/ sems can bden stong sgyu ma lta bur snang ba'i phyir/ ma khyab na/ stong nyid mngon sum du rtogs myong gi gang zag gi rgyud kyi sems can rtogs pa'i blo yin na sems can bden stong sgyu ma lta bur snang ba'i blo yin dgos par thal/ ma khyab pa de'i phyir/ 'dod na/ bshad ma thag pa'i lung dang rigs pas gnod do/ /gzhung 'di la brten nas srid zhi bden par 'dzin pa'i bden 'dzin mngon gyur pa spangs na/ srid zhi bden par 'dzin pa'i bden 'dzin spangs pas ma khyab pa yang 'grub po// gnyis pa la/ nyan thos chen po gnyis kyi rtsod pa bkod pa/ rtsod lan dang po'i don 'grel pas rgyas par bshad tshul lo/ /dang po nyin par dge mi dge'i las bsog 'phel byed pa med pa'i rtsod spangs/ rmi lam du dge mi dge'i srog gcod kyi las lam rdzogs par thal ba spangs pa/ lung dang 'gal ba'i @59a @#/ /rtsod spangs/ ha cang thal ba'i rtsod spangs dang bzhi/ dang po la/ rtsod pa dang/ lan gnyis/ dang po bcom ldan 'das kyis ma 'ongs pa na srid zhi bden stong mnyam nyid las brtsams te/ dbu ma pa dang/ dngos smra ba 'di lta bu rtsod len byung ba la dgongs nas shA ri'i bu dang/ rab 'byor gnyis kyi shes rgyud byin gyis brlabs nas rtsod len gyi spong ba yod par mdzad/ de yang shA ri'i bu rtsod pa po dang/ rab 'byor lan 'debs pa po yin pas/ shA ri'i bu'i gsung na re/ nyin par dge mi dge'i las bsog 'phel byed pa mi rigs par thal/ las gnyis bden par ma grub pa'i phyir/ dper na rmi lam bzhin/ zhes gsungs pa yin te/ tshe dang ldan pa rab 'byor/ byang chen gyi rmi lam du byas pa'i las de bsog pa 'am 'bri bar 'gyur ba yod dam/ zhes gsungs pa'i phyir/ gnyis pa lan la rab 'byor gyis khyab pa ma grub pa dang dpe ma grub pa'i lan gnyis mdzad pa yin te/ mdo las/ rab 'byor gyis smras pa/ tshe dang ldan pa shA ri'i bu/ ji ltar bcom ldan 'das kyi chos thams cad rmi lam lta bur gsungs pa de lta na las de bsog pa'am 'bri bar 'gyur ba med do/ /de ci'i phyir zhe na/ rmi lam gyi chos gang yang bsog pa 'am 'bri bar mi dmigs pa'i phyir/ 'on te sad nas rnam par rtog na ni de las de bsog pa dang 'bri bar yang 'gyur ro/ /zhes gsungs pa'i phyir/ gong du rab 'byor gyis sad rmis gnyis ka'i dus su las bsog pa yod par khas blangs nas rtsod lan de ltar byed pa ni brgal lan gyi sgo nas gsal bar byas pa'o/ /mdo des lan btab tshul yod de/ mdo tshan dang pos kun rdzob la bltos te khyab pa ma grub pa dang/ don dam la bltos te 'dod lan/ tha mas dpe ma grub pa'i lan mdzad pa'i phyir/ gnyis pa la rtsod pa dang/ lan gnyis las/ dang po la rab 'byor gyi rtsod pa'i skabs dbye ba/ shA ri'i bu'i rtsod pa dngos so// dang po la rab 'byor gyis rmi lam du srog bcad pa rmis nas sad dus su mngon zhen drag pos gsos btab na dge mi dge'i las lam du 'gyur bar 'dod kyi las de la khyod ci skad zer zhing rtsod pa'i skabs dbye bar mdzad pa yin te// @59b yum bar ma las/ rab 'byor gyis smras pa/ tshe dang ldan pa shA ri'i bu nyin par dang rmi lam du srog gcod pa de la 'di snyam du srog gcod pa de la 'di snyam du bdag gis bsad do/ /bdag gis bsad pa legs so/ /zhes sad de rnam par rtog na/ tshe dang ldan pa shA ri'i bu las de la khyod ji skad zer/ zhes gsungs pa'i phyir/ gnyis pa rtsod pa spong ba la/ rmi lam du srog bcad pa rmis nas sad dus su mngon zhen drag pos gsos btab na srog gcod kyi mi dge ba'i las lam du 'gyur ba'i phyir te/ mdo las/ smras pa/ tshe dang ldan pa rab 'byor dmigs pa med par las mi skye/ las ni dmigs pa dang bcas pa kho na las skye'o/ /dmigs pa med par sems mi 'byung/ sems ni dmigs pa dang bcas pa kho na las 'byung/ zhes gsungs pa'i phyir/ gal te 'dod na/ mi 'thad par thal/ srog gcod kyi las lam rdzogs pa la kun slong skye ba'i gzhi dang/ 'du shes kyi dmigs pa'i gzhi sogs dgos pa la rmi lam du de 'dra ba'i gzhi bsam pa sbyor ba rnams med pa'i phyir te/ rmi lam du mi med pa'i phyir/ ma khyab na/ bcas ldan dge slong gi rmi lam du mi bsad pa rmis pa la sad dus su mngon zhen drag pos gsos btab na srog gcod kyi pham pa 'byung bar thal/ ma khyab pa de'i phyir/ zhes gsungs pa yin te/ gong gi mdo de'i phyir/ gnyis pa lan la/ 'on kyang bcas ldan dge slong la pham pa 'byung ba'i skyon ni med de/ de 'byung ba bcom ldan 'das kyis bcas dbang gi yin pa'i phyir/ srog gcod kyi las lam yongs su rdzogs pa la gzhi bsam pa sbyor ba sogs dogs pa bden yang/ rmi lam gyi srog gcod kyi las la de dag yod de/ rmi lam gyi mi la dmigs pa sogs yod pa'i phyir zhes pa 'am/ yang na thal 'gyur phyi ma la lan 'debs pa yin te/ mdo las/ rab 'byor gyis smras pa/ tshe dang ldan pa shA ri'i bu de de bzhin no/ /de de bzhin te/ dmigs pa med par las mi skye'o/ /dmigs pa med par sems mi 'byung ngo/ /dmigs pa dang bcas par las skye ste/ dmigs pa med pa ma yin no/ /dmigs pa dang bcas par sems 'byung ste/ dmigs pa med pa ma yin no/ /zhes gsungs pa'i phyir/ klan ka gsum pa la/ rtsod @60a @#/ /pa dang/ lan gnyis las/ dang po ni shA ri'i bus sad rmis gnyis ka'i dus su las gnyis bsog 'phel byed pa mi 'thad par thal/ mdo las/ lus dang sems thams cad dben pa'o zhes bcom ldan 'das kyis gsungs na/ de ji ltar na dmigs pa dang bcas par las skye ste dmigs pa med pa ma yin no/ /zhes gsungs pa'i phyir/ zhes gsungs/ shA ri'i bus sngar nyin par dge mi dge'i las bsog pa yod par khas blangs/ las dmigs pa dang bcas pa las skye ba dang/ sems dmigs pa dang bcas par skye bar khas blangs pa la rab 'byor gyis bden kha sbyin bzhin du slar yang de ltar rtsod pa mi 'thad do/ /zer na skyon med de/ ma 'ongs pa na dngos smra ba rnams kyis mdo de sgra ji bzhin du khas mi len pa dang/ dbu ma pas khyab med kyi lan 'debs dgos par shes pa'i phyir du de ltar rtsod tshul mdzad pa'i phyir/ lan la rab 'byor gyis khyab med mdzad pa yin te/ rtsod pa de la khyab pa ma nges te/ mdo las de ltar gsungs pa don dam gyi dbang du byas/ kun rdzob tu dmigs pa dang bcas te las skye ba'i phyir/ zhes gsungs pa yin te/ mdo las/ tshe dang ldan pa shA ri'i bu mtshan mar bzung na dmigs pa dang bcas par las skye'i dmigs pa med par ma yin/ dmigs pa dang bcas par sems 'byung ste/ dmigs pa med par ma yin/ zhes gsungs pa'i phyir/ klan ka bzhi pa la/ rtsod lan gnyis las/ dang po la shA ri'i bus byang chen gyi rmi lam du phyin drug la spyad par dmigs nas sad dus su dge rtsa de nyid rdzogs byang du bsngos na rdzogs byang gi rgyu rgyal sras kyi spyod par yang 'gyur bar thal/ rmi lam du dge mi dge'i las bsags sad dus su mngon zhen drag pos gsos btab na dge mi dge'i las lam yongs rdzogs su 'gyur ba'i phyir/ 'dod na/ ha cang thal lo /zhes gsungs pa yin te/ rab 'byor byang chen gyis rmi lam du sbyin pa btang/ tshul khrims bsrungs/ bzod pa bsgoms/ brtson 'grus brtsams/ bsam gtan la mnyam par gzhag /shes rab bsgoms te/ dge ba'i rtsa ba de yang bla med rdzogs byang du yongs su bsngos na des @60b bla med rdzogs byang du yongs su bsngos par 'gyur/ zhes gsungs pa'i phyir/ rab 'byor gyis 'dod lan don gyi btab zin kyang dngos su byams pa la kha 'phangs mdzad pa yin te/ tshe dang ldan pa shA ri'i bu/ byang chub sems dpa' sems dpa' chen po byams pa skye ba gcig gis thogs pa bcom ldan 'das kyi phyir mi ldog par lung bstan pa de mngon du gyur pa de la dris shig dang/ des 'di'i lan 'don par 'gyur ro/ /zhes gsungs pa'i phyir/ de ltar kha 'phangs mdzad pa'i rgyu mtshan yod de/ srid zhi mnyam nyid las brtsams pa'i rtsod lan bstan pa 'di la mi rdzogs pas byams pa'i bstan pa la yang byed dgos par shes pa'i ched du yin pa'i phyir/ byams pas kyang lan gyi 'khor gsum bden med du dngos su bstan nas lan don gyi btab cing dngos su btab pa ma yin te/ tshe dang ldan pa shA ri'i bu kho bo ni gang la lan klan pa dang/ gang gis lan klan pa dang/ gang lan klan pa'i chos de lta bu yang dag par rjes su mi mthong ngo/ /zhes gsungs pa'i phyir/ lan don gyi btab ste/ 'khor gsum mi dmigs par rtogs pa'i shes rab kyis zin pa'i rmi lam gyi phyin drug la spyad pa'i dge rtsas rdzogs byang gi rgyur 'gyur bar bstan pa'i phyir/ lan dngos su mi 'debs pa'i rgyu mtshan yod de/ ma 'ongs pa'i sangs rgyas brgyud ma nas brgyud mar 'byon pa yang srid zhi mnyam nyid las brtsams te bden gnyis gzhi gcig gi steng du 'du mi rung ba'i slog rtog sel ba'i phyir du 'byon pa sha stag tu shes pa'i ched yin pa'i phyir/ gnyis pa rtsod lan dang po'i don 'grel bas rgyas par 'chang tshul la/ stobs mtshungs kyi sgo nas lan 'debs tshul dang/ de las gzhan pa'i sgo nas lan 'debs tshul gnyis/ dang po la/ mkhas pa kha cig /'grel pa 'dis rtsod pa dang po la lan 'debs tshul ni stobs mtshungs kyi sgo nas lan 'debs pa yin zhing/ de yang srog gcad kyi mi dge ba'i las med par thal/ gsod byed kyi gnod pa ma byas kyang bsang bya'i srog rang grub dus kyi skad cig gnyis pa'i dus su med par 'gyur ba'i phyir/ khyab pa khas/ rtags der thal/ de'i srog dbang skad cig ma yin pa'i phyir/ skad cig ma nyid kyi rgyu med @61a @#/ /par 'jig pa'i phyir/ gsod byed kyis bsad bya bsad pa'i mi dge ba'i las med par thal/ bsad bya'i srog 'phen pa zad nas/ 'chi ba de sngon gyi las kyis 'phangs pa'i phyir/ snod bcud kyi 'jig rten rnams thun mong dang thun mong ma yin pa'i las kyis 'phangs pa'i phyir te/ mdzod las/ 'jig rten sna tshogs las las skyes/ zhes gsungs pa'i phyir/ thal ba gnyis kyi khyab pa khas blangs te/ rang nyid kyis dbu ma pa la srog gcod kyi mi dge ba'i las mthar thug pa'i rigs shes kyis dpyad bzod du med na med dgos par 'phangs pa'i phyir/ don smra gnyis na re/ dge mi dge'i las rdzogs pa kun rdzob rgyu can la bltos nas 'jog pa yin zhe na/ 'o na/ 'khor gsum tshang ba'i dge mi dge'i las don dam du med na med pas ma khyab par thal/ de dag don dam rdzas yod du med kyang kun rdzob btags yod du yod pa'i phyir/ cha TIka seng ge sogs kyis 'go mtshungs mdzad pa'o/ /de la gzhan gyis lan 'debs tshul ni/ rtsod pa dang po 'di klan ka rnams kyi gtso bo yin pas 'di la don dam la bltos pa'i 'dod lan/ kun rdzob la bltos pa'i khyab pa ma grub pa dang/ dpe ma grub pa'i nang nas khyab pa ma grub pa la/ don smra rang la bltos pa'i khyab pa ma grub pa dper bkod pa/ de dbu ma pa la mtshungs par bstan pa dang gnyis/ dang po la don smra khyod rang gi lugs la yang blo don dam pa mngon sum ma 'khrul ba'i ngor med na med pas ma khyab par thal/ bsad bya gsod byed sogs mi dge ba'i las lam gyi cha can dang/ srog gcod spong ba sogs dang/ sbyin bya sbyin byed la sogs pa'i dge ba'i las lam gyi cha can du snang ba blo don dam pa'i ngor med kyang/ kun rdzob rtogs ngor yod pa dang/ de rnams don dam rdzas yod du med kyang kun rdzob btags yod du yod pa'i phyir/ blo don dam pa'i ngor de rnams kyi cha can du snang ba med de/ sems can gyi blo la de ltar snang na cha can ngo bo tha dad du snang dgos pas blo don dam pa 'khrul shes su 'gyur pa'i phyir/ dge mi dge'i las lam yongs rdzogs de rgyun la bltos nas 'jog dgos te/ @61b las gnyis rang grub dus kyi skad cig gnyis par mi gnas pa'i skad cig ma yin kyang rigs 'dra'i rgyun 'jug pas 'bras bu gnyis bskyed pa'i phyir dang/ rang gi grub pa'i mthong mdzod las kyang/ 'jig rten sna tshogs las las skyes/ zhes gsungs pas bsad bya'i srog dbang 'gags pa sngon las kyi 'phen pa zad pa'i dbang gis yin par gsungs pa'i phyir/ 'dir rnam bshad las don smra gnyis kyi lugs la/ blo don dam pa'i bzung ngor phra ba'i mthar thug pa'i skad cig ma dang/ rdul phran gnyis snang la zhes rnam bcad mdzad pa sgra ji bzhin du khas blangs na/ sngon po de de gnyis gang yang ma yin pas tshur mthong gi sngon 'dzin dbang mngon la mi snang bar khas len dgos/ de ltar na ched 'bras kyi rnam gzhag sogs kyang bzhag mi nus pas blo ldan rnams kyis dpyad par bya'o/ /kha cig /don smra gnyis kyi lugs la don dam du yod na don dam yin mi dgos pas 'dus byas yin na don dam du grub pas khyab pa khas len pa yin gsungs/ thar lam gsal byed kyi gsung rigs ltar na/ don dam du yod pa dang/ bden par yod pa khyad med du mdzad pa 'dra ba zhig snang yang/ byang chub lam rim chen mor de gnyis kyi lugs la/ myu gu dang gang zag lta bu'i btags yod rnams don dam par med par 'di'i 'grel pa'i don du gsungs shing/ 'jug par yang/ bum sogs 'di dag de nyid du med cing/ /'jig rten rab tu grags par yod ji bzhin/ /zhes gsungs pa de gnyis kyi lugs la de gnyis khyad par 'byed dgos par mngon no/ /gnyis pa de dbu ma pa la mtshungs par bstan pa la/ khyed rang gi lugs la khyab pa med pa de bzhin du de dbu ma pa la mtshungs te/ 'khor gsum tshang ba'i dge mi dge'i las blo don dam pa gnas lugs mngon sum du rtogs pa'i slob pa 'phags pa'i mnyam gzhag ye shes kyi gzigs ngor med kyang bden zhen can gyi sems can gyi blo kun rdzob pa'i ngor yod pa'i phyir dang/ de rnams don dam du ma grub kyang 'jig rten kun rdzob tu grub pa'i phyir/ gnyis pa dpe ma grub pa la/ rmi lam dang sad dus su dge mi @62a @#/ /dge'i las bsog pa med pa'i mthun dper 'dzin pa mi rigs par thal/ nyi shu pa las/ rmi lam sems ni gnyid kyis nyams/ /des na 'bras bu 'dra ma yin/ /zhes rmi lam gyi las dus kyi las las stobs che chung tsam ma gtogs bde sdug gi 'bras bu 'byin par gsungs pa'i phyir/ de gnyis la 'bras bu 'byin pa la stobs che chung 'byung ba'i rgyu mtshan yod de/ sad rmis gnyis su bsad bya gsod byed mtshan nyid pa yod med dang/ gnyid kyis bslad pa yod med sogs kyi khyad par yod pa'i phyir/ kha cig /don dam du yod med dang bden par yod med khyad par du byas nas don smra gnyis kyi lugs la rigs rgyun gang rung la bden med kyis khyab par 'dod pa shin tu mi rigs te/ de lta na dbu ma pa la 'phangs pa'i thal 'gyur dang po de rang nyid la bzlog na 'khor gsum lan med du 'gyur zhing/ de lta na'ang de gzhan la sun 'byin yang dag tu 'dad pa shin tu mi rigs pa'i phyir/ mdor bsdu na/ dge mi dge'i las bden par med na med pas ma khyab par thal/ khyod rang gi lugs la yang cha cha can du snang ba dang/ rgyun rgyun can du snang ba'i cha don dam du med na med pas ma khyab pa lta bu yin pa'i phyir/ grub don la/ srid zhi bden stong mnyam nyid du grub ste/ srid zhi bden stong mnyam nyid du dam bcas pa la gnad byed du bkod pa'i sun 'byin rnams mi 'jug cing/ dbu ma pas lan don mthun thebs pa'i phyir/ sbyor ba gnyis pa'i mdo 'phros ni/ sbyor ba dang po'i skabs su byang sems kyi ming mang du byung ba las 'phros nas/ ji ltar byang chen gyi phyin drug rdzogs par bgyid cing/ rnam mkhyen la nye ba lags/ zhes zhus pa'i lan du 'di'i rtsa ba'i mdo dang/ sems can 'jig rten de bzhin du/ /zhes sogs gsungs so/ /de ltar byas na/ snod bcud kyi zhing khyad par can sbyangs stobs kyis longs sku 'grub pa'i lag rjes 'jog byed kyi dag sa'i yi shes/ zhing dag sbyor ba'i mtshan nyid/ gsum pa'i 'phres ni yum la spyod pa'i byang chen gyi ji ltar rnam thar sgo gsum dang/ chos so bdun la 'dris par byed pa @62b dang/ snyom par 'jug ces dris pa'i lan du rtsa ba'i mdo dang/ yul dang sbyor ba can 'di ni/ zhes sogs gsungs/ 'di'i skabs su mtha' dpyad pa la/ ngo bo ngos bzung ba dang/ bdud bzhi'i rnam gzhag bshad pa gnyis/ dang po la/ thabs mkhas bcu'i sgo nas gzhan don sgrub pa'i dus dang dus ma yin pa la mkhas shing gtso bor sprul sku'i lag rjes 'jog byed kyi dag sa'i ye shes/ thabs mkhas sbyor ba'i mtshan nyid/ dbye ba rnam pa bcu yod/ gnyis pa bdud bzhi'i mtha' dpyad pa la/ grangs nges pa/ so so'i ngo bo/ bcom pa'i sa mtshams gsum/ dang po ni/ bdud de la bzhir grangs nges te/ 'chi med kyi go 'phang thob pa la bar chad byed pa'i cha nas bdud du bzhag cing/ 'chi med kyi go 'phang la yang las nyon gyi dbang gis 'chi ba med pa'i go 'phang dang/ bsam gyis mi khyab pa'i 'chi 'pho'i dbang gis 'chi ba med pa'i go 'phang gnyis las/ gang gi dbang du byas kyang bzhir grangs nges pa'i phyir/ bzhir grangs nges pa'i rgyu mtshan yod de/ gang du 'chi ba'i dbang du byas nas phung po'i bdud bzhag/ gang gis 'chi ba'i dbang du byas nas nyon mongs pa'i bdud bzhag/ 'chi ba rang gi ngo bo'i sgo nas 'chi bdag gi bdud bzhag/ de gsum las 'da' ba la bar du gcod byed kyi dbang du byas nas lha'i bu'i bdud bzhag pa yin pa'i phyir/ dang po rags pa'i dbang du byas nas de ltar yin te/ nyer len gyi phung po snga ma gcig ngor/ phyi ma gcig blangs pa'i nyer len gyi phung po zhig phung po'i bdud du bzhag pa'i phyir/ gnyis pa de ltar yin te/ 'phen 'grub kyi nyon mongs kyi dbang gis dbang med du 'chi ba'i nyon mongs la der bzhag pa'i phyir/ gsum pa de ltar yin te/ las nyon gyi dbang gis tshe'i rigs mthun 'dor ba la 'chi bdag gi bdud du bzhag pa'i phyir/ bzhi pa de ltar yin te/ de gsum las 'da' ba la dga' rab dbang phyug gis bar chad rtsom pa'i de lha'i bu'i bdud du bzhag pa'i phyir/ de skad du nyan sa las/ gang gi 'chi ba dang/ gang 'chi ba dang/ 'chi ba de gang yin pa dang/ bar chad kyi dngos po gang gis 'chi ba las yang dag par @63a @#/ /'da' bar mi byed pa de dag gi dbang du byas nas bdud bzhi rnam par gzhag go/ zhes gsungs pa'i phyir/ bdud bzhi phra mo la yang sbyar bar bya'o/ /gnyis pa so so'i ngo bo la/ bdud bzhi po re re la yang phra rags gnyis gnyis su 'byed pas de'i dbang du byas na/ phung po'i bdud la phra rags gnyis yod de/ zag bcas nyer len gyi phung po phung po'i bdud rags pa dang/ ma rig bag chags kyi sa dang zag med kyi las kyi dbang gis bslangs pa'i yid lus de phra mo yin pa'i phyir/ de bzhin du nyon mongs pa'i bdud la yang phra rags gnyis yod de/ khams gsum na spyod pa'i nyon mongs sa bon dang bcas pa rnams nyon mongs pa'i bdud rags pa dang/ de dag gi bag chags phra zhing phra ba rnams de phra mo yin pa'i phyir/ gsum pa la yang phra rags gnyis yod de/ las nyon gyi rang dbang med par sog dbang 'gag pa'i cha 'chi bdag gi bdud rags pa/ bsam gyis ma khyab pa'i 'chi 'pho ba de phra mo yin pa'i phyir/ bzhi pa la yang phra rags gnyis yod/ dga' rab dbang phyug lha'i bu'i bdud rags pa dang/ ma rig pa'i bag chags phra zhing phra ba de phra mo yin pa'i phyir/ sdug bden la phung po'i bdud rags pa yin pas ma khyab ste/ rgyun zhugs srid pa lan bdun pa ba sdug bden yin kyang phung po'i bdud ma yin pa'i phyir te/ dge 'dun dkon mchog yin pa'i phyir/ de la spang byas kyang ma khyab ste/ dal 'byor gyi chos bco brgyad dang ldan pa'i mi'i lus kyi nyer len gyi phung po de phung po'i bdud yin kyang spang bya ma yin pa'i phyir te/ dam chos sgrub pa'i rten khyad par can du gsung rab dgongs 'grel dang bcas pa las bsngags pa'i phyir te/ nyon mongs pa'i bdud rags pa la de mngon gyur ba yin pas ma khyab ste/ nyon mongs kyi sa bon de de rags pa yin zhing/ de mngon gyur ba ma yin pa'i phyir te/ de shes pa ma yin pa'i phyir/ bdud gzhan gsum las 'da' ba la bar du gcad byed kyi bdud rigs kyi gang zag la lha'i bu'i bdud yin pas ma khyab ste/ de la dud 'gro yod pa'i phyir te/ de 'dra'i klu'i bdud @63b yod pa'i phyir/ kha cig /dga' rab dbang phyug gis bar chad byed pa'i cha lha'i bu'i bdud yin gyi dga' rab dbang phyug de ma yin te/ de spang bya ma yin pa'i phyir te/ de'i rdzas rgyun sangs rgyas kyi sar 'gro ba'i phyir te/ de 'tshang rgya ba'i phyir/ zer na/ rdzas rgyun sangs rgyas kyi sar 'gro ba la spang bya ma yin pas ma khyab ste/ sdig grogs bdud dang spang byar yang gsungs pa'i phyir/ mdo las/ sdig pa'i grogs po rtag tu spang bya zhing/ /dge ba'i grogs po dag la brten par bya/ /zhes gsungs pa'i phyir/ de lta min na dga' rab dbang phyug bdud ma yin par 'gyur ba dang/ lam bcos mi ston pa'i bdud la bdud nyid du shes pa'i phyir mi ldog gi rtags sogs kyang gsungs pa'i phyir/ des na sngar bshad pa'i bzhi po'i ngos 'dzin de dag 'thad de/ nyan sa las/ de la phung po'i bdud ni nye bar len pa'i phung po lnga'o/ /nyon mongs pa'i bdud ni khams gsum na spyod pa'i nyon mongs pa rnams so/ /'chi ba'i bdud ni sems can de dang de dag sems kyi rigs de dag de dag nas 'chi ba'i dus byed pa gang yin pa'o/ /lu'i bu'i bdud ni phung po dang nyon mongs pa dang/ 'chi bdag gi bdud las yang dag par 'da' ba'i phyir dge ba'i phyogs la rab tu brtson pa de dag la bar chad bya ba dang/ rnam par g.yeng bar bya ba'i phyir 'dod pa'i khams su skyes pa'i lha'i bu dbang phyung thob pa dag nye bar 'ong ba gang yin pa ste/ de ni lha'i bu'i bdud ces bya'o/ /zhes gsungs pa'i phyir/ gsum pa bcom pa'i sa mtshams bshad pa la/ kha cig /theg dman gyi mthong lam nas lha'i bu'i bdud bcom/ dgra bcom pa'i go 'phang thob nas nyon mongs pa'i bdud bcom/ gnyis ka'i cha las rnam grol gyi nyan thos dgra bcom gyi go 'phang thob nas bdud gzhan gnyis bcom/ dman lam sngon du ma song ba'i theg chen gyi dbang du byas nas phyir mi ldog gi rtags thob nas lha'i bu'i bdud bcom/ bdud gzhan gsum rags pas brgyad pa nas bcom/ bdud bzhi phra mo ma lus pa bcom pa dang sangs rgyas pa dus mnyam pa yin zer na/ theg dman gyi bcom pa'i sa mtshams de rnams @64a @#/ /dang theg chen gyi lha'i bu'i bdud bcom mtshams de rnams mi 'thad par thal/ bdud bzhi bcom pa dang sangs rgyas pa dus mnyam pa'i phyir te/ chos sku gtsang bde rtag bdag gi go 'phang thob pa dang sangs rgyas pa dus mnyam pa'i phyir/ dman lam sngon ma song gi sa brgyad pa nas nyon mongs pa'i bdud mngon gyur pa bcom pa dang/ yang de rags pa bcom pa mi 'thad de/ des nyon mongs kyi sa bon rgyun mtha'i bar chad med lam gyis spong ba'i phyir/ bdud rags pa gzhan gnyis sa brgyad pa nas spong ba yang mi 'thad par thal/ de gnyis sa dang po nas bcom pa'i phyir te/ sa dang po nas las nyon gyi dbang gi 'chi 'pho dang/ zag bcas nyer len gyi phung po dang bral ba'i phyir/ 'phags pas na dang rga ba dang/ /zhes sogs gsungs pa'i phyir dang/ 'di'i bcom chul sa bon spangs pa la mi byed pa'i phyir/ kha cig /theg dman gyi dbang du byas na rags pa'i bcom tshul de ltar yin zer na/ 'o na gnyis ka'i cha las rnam grol gyi lhag bcas myang 'das la gnas pa'i nyan thos dgra bcom pas kyang phung po'i bdud rags pa dang/ 'chi bdag gi bdud rags pa gnyis spangs par thal/ dam bca' 'thad pa'i phyir/ 'dod na/ de chos can/ phung po'i bdud rags pa ma spangs par thal/ khyod de dang bcas pa'i phyir te/ chos can de yin pa'i phyir/ kha cig /de med zer na/ mi 'thad par thal/ mi'i rten la 'gog snyoms gsar du skyes pa'i nyan thos dgra bcom yod pa'i phyir/ der thal/ 'gog snyoms ma thob pa'i nyan thos dgra bcom yod pa gang zhig / mi'i rten la 'gog snyoms gsar du sgrub pa'i nyan thos yod pa'i phyir/ des 'chi bdag gi bdud kyang ma bcom par thal/ de las nyon gyi dbang gis srog dbang 'gag dgos kyi gang zag yin pa'i phyir te/ de'i nyer len gyi phung po las nyon gyi dbang gis 'jig pa'i phyir/ der thal/ de las nyon gyi dbang gis 'phangs pa'i phung po gang zhig /'jig rgyu don gzhan la ltos med kyi dngos po yin pa'i phyir/ / @64b gnyis pa rang lugs bzhag pa la/ theg dman gyi dbang du byas na rags pa bcom pa'i dus mtshams yod de/ nyan thos kyi mthong lam thob nas lha'i bu'i bdud rags pa bcom/ nyan thos dgra bcom gyi go 'phang thob nas nyon mongs pa'i bdud rags pa bcom/ lhag med myang 'das thob nas gzhan gnyis rags pa bcom pa yin pa'i phyir/ dang po yin te/ nyan thos kyi mthong lam thob nas skyabs gnas yang dag la de yin min gyi the tshom gyi sa bon gyi dngos gnyen par chad med lam rang rgyud la bskyed pas dkon mchog gsum la dang pa khyad par can thob pas 'phags pa dgyes pa'i tshul khrims kyi dga' ba dang ldan pa'i phyir/ mdzod las/ bden gsum mthong na tshul khrims dang/ /chos la shes nas dad pa thob/ /lam mngon rtogs na sangs rgyas dang/ /'phags pa'i dge 'dun dag la yang/ /zhes gsungs pa'i phyir/ gnyis pa der thal/ dgra bcom thob nas nyon mongs sa bon dang bcas pa spangs pa'i phyir/ gsum pa der thal/ lhag med myang 'das thob nas nyer len gyi phung po dang las nyon gyi dbang gis 'chi ba spangs pa'i phyir/ kha cig /gnyis ka'i cha las rnam grol yin na las nyon gyi dbang gis mi 'chi bas khyab par thal/ de yin na tshe ji ltar gnas par 'dod 'dod kyi bar du gnas nus pas khyab pa'i phyir/ zer na/ ma khyab ste/ las nyon gyi dbang gis lus ji 'dra zhig blangs kyang 'chi ba las ma 'das pa'i phyir/ dman lam sngon ma song gi theg chen gyi dbang du byas na/ phyir mi ldog gi rtags thob nas lha'i bu'i bdud rags pa bcom pa yin te/ the tshom mi dal zad pa dang/ /zhes dang/ lam gzhan nye bar ston bdud la/ /bdud ces bya bar rtogs pa dang/ /zhes gsungs pa'i phyir/ phung po'i bdud rags pa dang/ 'chi bdag gi bdud rags pa gnyis mthong lam nas dang/ nyon mongs pa'i bdud mngon gyur pa sa brgyad pa nas bcom pa yin te/ gnyis po de nyid bcom pa gong du bsgrubs zin pa'i phyir dang/ sa brgyad pa nas nyon mongs mngon gyur pa spangs pa'i phyir/ bdud bzhi phra mo bcom pa dang sangs rgyas pa @65a @#/ /dus mnyam ste/ rgyud bla ma las/ bsam mi khyab 'gyur 'chi 'pho yi/ /de ni mi 'chi bstan pa yin/ /'chi med zhi ba'i gnas thob pa/ /'chi bdud rgyu ba med pa'i phyir/ /zhes gsungs pa'i phyir dang/ tshig gsal las kyang/ 'di dag bdag la nyal dang bcas pa ni khyod nyid byang chub pa dang dus mnyam pa kho nar bdud bzhi bcom pa lags sam zhes pa ni cig car du bcom par shes par bya'o/ /zhes gsungs pa'i phyir ro// //shes rab kyi pha rol tu phyin pa'i man ngag gi bstan bcos mngon par rtogs pa'i rgyan rtsa 'grel gyi spyi don rnam bshad snying po rgyan gyi snang ba zhes bya ba mkhas shing grub pa brnyes pa'i dge slong dge 'dun bstan pa dar rgyas kyi sbyar pa las skabs bzhi pa'i 'grel bshad do/