@1a @#/ /mkhas grub smra ba'i khyu mchog dge 'dun bstan dar ba chen po'i gsung dge 'dun nyi shu'i mtha' dpyod bzhugs so// @1b @#/ /chos mngon gsung rab lha lam yangs pa la/ /thogs med rgyu zhing mkhyen rab tsha zer gyis/ /log smra 'byung po'i blo mig ldong byed pa/ /yongs 'dzin nam mkha'i nor bu rgyal gyur cig /dbang po rtul dang rnon po dag / zhes sogs kyi skabs su/ gang la gnas pa 'bras bu'i rnam gzhag bshad pa dang/ de la gnas pa'i gang zag gi rnam gzhag bshad pa dang gnyis las/ dang po la dgag bzhag spang gsum las/ dang po la/ kha cig gis na re/ zhugs pa bzhi po gang rung gi rgyud kyi mngon rtogs yin na/ dge sbyong gi tshul yin pas khyab zer na/ nyan thos kyi sbyor lam stan gcig pa la gnas pa'i rgyun zhugs zhugs pa'i rgyud kyi mngon rtogs chos can/ der thal/ de'i phyir/ der thal/ chos can de yin pa'i phyir/ der thal/ de yod pa'i phyir/ 'dod na/ zag med bar chad med lam yin par thal/ 'dod pa'i phyir/ khyab ste/ mdzod las/ dge sbyong tshul ni dri med lam/ zhes gsungs pa'i phyir/ 'dod na/ ma yin par thal/ nyan thos kyi sbyor lam yin pa'i phyir/ kha cig dge sbyong tshul gyi 'bras bu yin na/ dge sbyong tshul las skyes pas khyab zer na/ rgyun zhugs 'bras gnas kyi rgyud kyi mthong spangs kun sbyor gsum spangs pa'i 'gog bden chos can/ der thal/ de'i phyir/ der thal/ dge sbyong tshul gyi 'bras bu de la/ 'dus byas rnam grol lam dang/ 'dus ma byas 'gog bden brgyad cu rtsa dgu yod pa'i phyir/ der thal/ mdzod las/ 'bras bu 'dus byas 'dus ma byas/ /de dag brgyad cu rtsa dgu'o/ /grol lam zad pa rnams dang bcas/ / zhes gsungs pa'i phyir/ 'dod na/ 'dus byas yin par thal/ 'dod pa'i phyir/ 'dod mi nus te/ 'dus ma byas yin pa'i phyir/ kha cig /dge sbyong tshul dang dge sbyong tshul gyi 'bras bu gnyis 'gal zer na/ spang bya rim rgyud pa'i rgyun zhugs 'bras @2a @#/ /gnas kyi rgyud kyi 'dod nyon drug pa'i dngos gnyen bar chad med lam chos can/ dge sbyong tshul ma yin par thal/ dge sbyong tshul gyi 'bras bu yin pa'i phyir/ der thal/ de rgyun zhugs 'bras gnas kyi rgyud kyi mngon rtogs yin pa'i phyir/ 'dod na/ dge sbyong tshul yin par thal/ phyir 'ong gi dge sbyong tshul yin pa'i phyir/ der thal/ de 'dra'i gang zag de phyir 'ong zhugs pa yin pa'i phyir/ kha cig /rgyun zhugs kyi 'bras bu de 'dod sems la brten nas skye ba yod zer na/ 'dod sems dang nyan thos kyi mthong lam bar chad med lam gyi gzhi mthun yod par thal/ dam bca' 'thad pa'i phyir/ 'dod na/ de 'dra'i gzhi mthun med par thal/ nyan thos kyi mthong lam bar chad med lam de 'dod sems la brten nas skye ba med pa'i phyir/ der thal/ 'grel chen las/ gang yang 'dod pa khams dang srid rtse na/ byang chub lam gyi yan lag du zhig spangs zhes bya ba ni thabs la mi mkhas pa'i nyan thos kyi dbang du byas te/ de dang 'di la 'gal ba med do/ /zhes gsungs pa'i phyir/ kha cig rgyun zhugs kyi 'bras bu de bsam gtan gyi dngos gzhi la rten nas gsar du thob pa yod zer na/ 'o na bsam gtan gyi dngos gzhi thob pa'i rgyun zhugs yod par thal/ dam bca' 'thad pa'i phyir/ 'dod mi nus te/ bsam gtan gyi dngos gzhi ma thob pa'i 'phags pa gcig yod pa'i phyir/ kha cig /dge sbyong tshul gyi 'bras bu bzhi po de/ dge sbyong tshul gyi 'bras bur 'jog pa'i rgyu mtshan yod de/ rang rang gi zhugs lam sngon du btang ba dang/ zhugs lam de las gzhan pa'i 'bras lam thob pa dang/ mthong spangs thams cad spangs pa'i zad pa sdom pa dang/ shes pa brgyad tshan thob pa dang/ mi rtag la sogs bcu drug rtogs pas khyab pa dang/ rgyu mtshan rnam pa lnga yod pa'i phyir zer na/ 'o na 'bras bu bzhi po gang rung thob pa'i gang zag yin na/ mi rtag la sogs bcu drug rtogs @2b pas khyab par thal/ khyod kyi rgyu mtshan 'thad pa'i phyir/ 'dod na nyan thos mthong lam rnam grol lam thob ma thag pa'i rgyun zhugs 'bras gnas chos can/ der thal/ de'i phyir/ der thal/ rgyun zhugs 'bras gnas yin pa'i phyir/ der thal/ chos can de yin pa'i phyir/ 'dod na/ nyan thos mthong lam bar chad med lam pa des mi rtag la sogs bcu drug rtogs par thal/ nyan thos mthong lam rnam grol lam thob ma thag pa'i rgyun zhugs 'bras gnas des mi rtag la sogs bcu drug rtogs pa'i phyir/ 'dod na/ des nyer len gyi phung po mi rtag pa dang/ 'gog bden gnyis rtogs par thal/ 'dod pa'i phyir/ 'dod mi nus te/ nyan thos mthong lam bar chad med lam pa des 'gog bden ma thob pa'i phyir/ kha cig /bar pa gnyis kyi rim rgyud pa'i 'bras bu gnyis po de 'jig rten pa'i lam la brten nas gsar du skye ba yod zer na/ 'bras bu rim rgyud pa'i phyir 'ong zhugs pa dang/ 'jig rten pa'i lam la gnas pa'i gang zag gi gzhi mthun yod par thal/ dam bca' 'thad pa'i phyir/ 'dod mi nus te/ 'bras bu rim rgyud pa'i phyir 'ong zhugs pa yin na/ nyan thos sgom lam pa yin pas khyab/ nyan thos sgom lam pa yin na/ 'jig rten pa'i lam la mi gnas pas khyab pa'i phyir/ kha cig /phyir 'ong gi 'bras bu de khams gong gi rten la gsar du thob pa yod zer na/ de med par thal/ khams gong gi rten la 'bras bu thod brgal ba'i phyir 'ong gi 'bras bu gsar du thob pa med pa gang zhig /'bras bu rim rgyud pa'i phyir 'ong gi 'bras bu gsar du thob pa med pa'i phyir/ dang po der thal/ 'bras bu thod brgal ba'i phyir 'ong gi 'bras bu thob kha ma'i gang zag yin na/ nyan thos kyi mthong lam bar chad med lam pa yin pas khyab pa gang zhig /de khams gong gi rten la gsar du skye ba med pa'i phyir/ phyi ma der thal/ 'bras bu rim rgyud pa'i phyir 'ong gi 'bras bu thob kha ma'i gang zag yin na/ rgyun zhugs 'bras gnas yin pas khyab pa gang zhig /khams gong gi rten can gyi rgyun zhugs 'bras gnas med pa'i phyir/ kha cig /chags bral sngon song de 'bras bu dang mtha' @3a @#/ /gnyis la bzhag tu yod zer na/ de med par thal/ rgyun zhugs la yang bzhag tu med/ dgra bcom la yang bzhag tu med pa'i phyir/ dang po der thal/ mthong lam gyi snga rol tu mthong spangs kun sbyor gsum spangs pa'i rgyun zhugs med pa'i phyir/ der thal/ mthong spangs kun sbyor gsum spangs pa'i gang zag yin na/ mthong lam rnam grol lam thob pas khyab pa'i phyir/ phyi ma der thal/ mthong lam gyi snga rol du srid nyon dgu pa spangs pa'i dgra bcom 'bras gnas med pa'i phyir/ der thal/ srid nyon dgu pa spangs pa'i gang zag yin na/ sgom lam rdo rje lta bu'i ting nge 'dzin thob pa'i gang zag yin dgos pa'i phyir/ kha cig /'bras bu thod brgal ba dang chags bral sngon song gnyis don mi gcig cing/ phyir 'ong la chags bral sngon song bzhag tu med zer na/ de mi 'thad par thal/ phyir 'ong la chags bral sngon song bzhag tu yod pa'i phyir/ der thal/ mthong lam gyi snga rol tu 'dod sred drug pa mngon gyur ba la chags bral byas pa'i phyir 'ong yod pa'i phyir/ der thal/ mthong lam gyi snga rol tu bsam gtan dang po'i nyer bsdogs dga' ba sdud pa yid byed rdzogs par thob pa'i phyir 'ong yod pa'i phyir/ der thal; mthong lam gyi snga rol tu nyon mongs rnam 'joms kyi bsam gtan dang po'i nyer bsdogs thob pa'i phyir 'ong yod pa'i phyir/ der thal/ mthong lam gyi snga rol tu bsam gtan dang po'i nyer bsdogs thob pa'i phyir 'ong yod pa'i phyir/ rtsa bar ma khyab na khyab pa yod par thal/ mthong lam gyi snga rol tu 'dod pa la 'dun pa'i 'dod sred dgu pa mngon gyur ba la chags bral byas pa'i phyir mi 'ong yin na/ chags bral sngon song gi phyir mi 'ong yin dgos pa'i phyir/ kha cig /spang bya cig car ba de 'bras bu bar pa gnyis la bzhag tu yod zer na/ de med par thal/ de phyir 'ong la yang bzhag tu med/ phyir mi 'ong la yang bzhag tu med pa'i phyir/ dang po der thal/ khams gsum sa dgus bsdus pa'i sgom spang nyon mongs drug cig car du spangs pa'i phyir 'ong med pa'i phyir/ der thal/ srid rtse'i sas sdus kyi sgom spangs nyon mongs drug spangs pa'i phyir 'ong med pa'i phyir/ @3b rtsa rtag phyi ma der thal/ khams gsum sa dgus bsdus pa'i sgom spangs nyon mongs chung ngu'i chung ngu dgu cig car du spangs pa'i phyir mi 'ong med pa'i phyir/ der thal/ srid nyon dgu pa spangs pa'i phyir mi 'ong med pa'i phyir/ der thal/ nyon mongs spangs pa'i phyir mi 'ong med pa'i phyir/ gnyis pa rang gi lugs bzhag pa la/ rang rgyud la ldan pa'i gang zag don dam pa'i dge sbyong du 'jog par byed pa'i nyan thos kyi zag med bar chad med lam de/ dge sbyong tshul gyi mtshan nyid/ de la dbye na rgyun zhugs kyi dge sbyong tshul nas/ dgra bcom pa'i dge sbyong tshul gyi bar bzhi yod/ rang thob byed kyi thabs su gyur pa'i dge sbyong tshul gyi stobs kyis thob pa'i nyan thos mthong lam rnam grol lam thob pa'i nyan thos kyi spangs rtogs gang rung gis bsdus pa'i yon tan/ dge sbyong tshul gyi 'bras bu'i mtshan nyid/ de la ngo bo'i sgo nas dbye na rgyun zhugs kyi dge sbyong tshul gyi 'bras bu nas dgra bcom pa'i dge sbyong tshul gyi 'bras bu'i bar bzhi yod/ de la rgyas par dbye na/ der gyur pa'i 'dus byas rnam grol lam brgyad cu rtsa dgu/ der gyur pa'i 'dus ma byas 'gog bden brgyad cu rtsa dgu yod/ 'bras bu bzhi po des gang la brten nas thob pa'i tshul yod de/ rgyun zhugs phyir 'ong 'bras bu rim rgyud pa'i phyir mi 'ong gi 'bras bu spang bya cig car ba'i dgra bcom pa'i 'bras bu dang bcas pa ni/ bsam gtan dang po'i nyer bsdogs mi lcogs med pa kho na la brten nas thob/ 'bras bu thod brgal ba'i phyir mi 'ong gi 'bras bu dang/ spang bya rim rgyud pa'i dgra bcom pa'i 'bras bu gnyis ni bsam gtan gyi dngos gzhi dang/ gzugs med ci yang med kyi dngos gzhi gang rung la brten nas thob pa'i phyir/ dang po der thal/ de rnams bsam gtan sa drug gang rung la brten nas thob pa gang zhig /bsam gtan gyi dngos gzhi thob pa'i rgyun zhugs dang phyir 'ong med pa'i phyir/ dang po der thal/ de dag gis 'dod sems dang/ gzugs med kyi dngos gzhi la brten nas nyan thos kyi zag med bar chad med lam rang rgyud la bskyed mi nus pa'i phyir/ rtsa rtags phyi ma der thal/ 'bras bu thod brgal ba'i phyir mi 'ong gi 'bras bu thob kha ma'i gang zag yin na/ bsam gtan @4a @#/ /gyi dngos gzhi thob la ma nyams pas khyab/ spang bya rim rgyud pa'i dgra bcom pa'i 'bras bu thob kha ma'i gang zag yin na/ bsam gtan gyi dngos gzhi dang/ gzugs med kyi dngos gzhi gang rung thob la ma nyams pas khyab pa'i phyir/ dang po der thal/ de yin na 'dod nyon dgu pa mngon gyur ba la chags bral byas pas khyab pa'i phyir/ 'bras bu bzhi po de mthong sgom gyi lam gang la brten nas thob pa'i tshul yod de/ rgyun zhugs chags bral sngon song gi phyir 'ong phyir mi 'ong dang bcas pa'i 'bras bu de mthong lam la brten nas thob/ bar pa gnyis kyi rim rgyud pa'i 'bras bu dang dgra bcom pa'i 'bras bu dang bcas pa rnams sgom lam la brten nas thob pa yin pa'i phyir/ dang po der thal/ 'bras bu de gsum gang rung thob kha ma'i gang zag yin na/ nyan thos mthong lam bar chad med lam pa yin pas khyab pa'i phyir; phyi ma der thal/ 'bras bu de gsum gang rung thob kha ma'i gang zag yin na/ nyan thos sgom lam pa yin dgos pa'i phyir/ der thal/ 'bras bu rim rgyud pa'i phyir 'ong gi 'bras bu thob kha ma'i gang zag des/ zhi rags kyi rnam pa can gyi nyan thos kyi sgom lam dang/ 'dod nyon drug pa'i dngos gnyen bar chad med lam ci rigs la brten nas phyir 'ong gi 'bras bu mngon du byed/ 'bras bu rim rgyud pa'i phyir mi 'ong gi 'bras bu thob kha ma'i gang zag des/ zhi rags kyi rnam pa can gyi nyan thos kyi sgom lam dang/ 'dod nyon dgu pa'i dngos gnyen bar chad med lam ci rigs la brten nas phyir mi 'ong gi 'bras bu mngon du byed/ dgra bcom pa'i 'bras bu thob kha ma'i gang zag yin na/ srid nyon dgu pa'i dngos gnyen bar chad med lam la gnas pas khyab pa'i phyir/ 'bras bu bzhi po de zag med bden pa'i rnam pa can gyi lam dang/ 'jig rten zhi rags kyi rnam pa can gyi lam gang la brten nas thob pa'i tshul yang yod de/ rgyun zhugs chags bral sngon song gi phyir 'ong phyir mi 'ong gnyis/ dgra bcom pa'i 'bras bu dang bcas pa rnams/ zag med bden pa'i rnam pa can gyi lam la brten nas thob/ bar pa gnyis kyi rim rgyud pa'i @4b 'bras bu de gnyis/ zag med bden pa'i rnam pa can gyi lam dang/ 'jig rten zhi rags kyi rnam pa can gyi lam ci rigs la brten nas thob pa'i phyir/ dang po der thal/ rgyun zhugs chags bral sngon song gi phyir 'ong phyir mi 'ong gang rung gi 'bras bu thob kha ma'i gang zag yin na/ nyan thos mthong lam bar chad med lam pa yin pas khyab/ dgra bcom pa'i 'bras bu thob kha ma'i gang zag yin na/ sgom lam rdo rje lta bu'i ting nge 'dzin la gnas pa'i gang zag yin pas khyab pa'i phyir/ rtsa rtags phyi ma der thal/ 'bras bu rim rgyud pa'i phyir 'ong zhugs pa de sngon zhi gnas la spyod pa shas cher goms pa zhig yin na/ 'jig rten zhi rags kyi rnam pa can gyi lam la brten nas phyir 'ong gi 'bras bu mngon du byed/ sngon lhag mthong la spyod pa shas cher goms pa zhig yin na/ zag med bden pa'i rnam pa can gyi lam la brten nas phyir 'ong gi 'bras bu mngon du byed/ de bzhin du 'bras bu rim rgyud pa'i phyir mi 'ong zhugs pa la yang mtshungs pa'i phyir/ 'bras bu bzhi po de khams gang gi rten la thob pa'i tshul yod de/ 'bras bu dang po gsum po de 'dod khams kho na'i rten la thob/ dgra bcom pa'i 'bras bu de khams gsum ga'i rten la thob pa yod pa'i phyir/ dang po der thal/ rgyun zhugs dang phyir 'ong gang rung yin na/ 'dod rten pa yin pas khyab pa gang zhig /khams gong gi rten la mthong lam gsar du skye ba med pa'i phyir/ rtsa rtags phyi ma der thal/ spang bya cig car ba'i rgyun zhugs des 'dod pa'i rten la myang 'das mngon du byed/ gzugs nyer 'gro'i phyir mi 'ong gong 'pho 'og min mthar thug 'gro des gzugs kyi rten la myang 'das mngon du byed/ gzugs med nyer 'gro'i phyir mi 'ong dang/ gzugs nyer 'gro'i phyir mi 'ong gong 'pho srid rtse mthar thug 'gro gnyis ni gzugs med kyi rten la myang 'das mngon du byed pa'i phyir/ mdzod las/ 'dod par gsum thob tha ma ni/ gsum du'o/ /zhes gsungs pa'i phyir/ chags bral sngon song dang 'bras bu thod brgal ba gnyis don gcig cing/ de 'bras bu dang mtha' gnyis la bzhag tu med de/ rgyun zhugs la yang bzhag tu med/ dgra bcom @5a @#/ /la yang bzhag tu med pa'i phyir/ dang po der thal/ 'bras bu'i ngos nas thod brgal bzhag tu med/ spang bya'i ngos nas chags bral sngon song bzhag tu med pa'i phyir/ dang po der thal/ rgyun zhugs kyi 'bras bu'i snga rol tu thod brgal rgyu'i 'bras bu gzhan med pa'i phyir/ phyi ma der thal/ mthong lam gyi snga rol tu mthong spang kun sbyor gsum spangs pa'i rgyun zhugs med pa'i phyir/ rtsa rtags gnyis pa der thal/ de la 'bras bu'i ngos nas thod brgal bzhag tu med/ spang bya'i ngos nas chags bral sngon song bzhag tu med pa'i phyir/ dang po der thal/ dgra bcom 'bras gnas yin na/ rang dang rgyud gcig tu gyur pa'i 'bras gnas dang po gsum po gang rung gcig sngon du song bas khyab pa'i phyir/ phyi ma der thal/ mthong lam gyi snga rol tu srid nyon dgu pa spangs pa'i dgra bcom pa med pa'i phyir/ de 'bras bu bar pa gnyis la bzhag tu yod de/ phyir 'ong la yang bzhag tu yod/ phyir mi 'ong la yang bzhag tu yod pa'i phyir/ dang po bzhag tu yod de/ 'bras bu'i ngos nas thod brgal bzhag tu yod/ spang bya'i ngos nas chags bral sngon song bzhag tu yod pa'i phyir/ dang po der thal/ rgyun zhugs kyi 'bras bu mngon du ma byas par phyir 'ong gi 'bras bu mngon du byas pa'i phyir 'ong yod pa'i phyir/ phyi ma der thal/ mthong lam gyi snga rol tu 'dod pa la 'dun pa'i 'dod sred drug pa mngon gyur ba la chags bral byas pa'i phyir 'ong yod pa'i phyir/ rtsa rtags gnyis pa der thal/ de la 'bras bu'i ngos nas thod brgal bzhag du yod/ spang bya'i ngos nas chags bral sngon song bzhag tu yod pa'i phyir/ dang po der thal/ rgyun zhugs dang phyir 'ong gang rung gi 'bras bu mngon du ma byas par phyir mi 'ong gi 'bras bu mngon du byas pa'i phyir mi 'ong yod pa'i phyir/ phyi ma der thal/ mthong lam gyi snga rol tu 'dod pa la 'dun pa'i 'dod sred dgu pa mngon gyur ba la chags bral byas pa'i phyir mi 'ong yod pa'i phyir/ gsum pa rtsod pa spang ba la/ kho na re/ rang rgyal dgra bcom pa'i rgyud kyi rnam grol lam chos can/ nyan thos kyi mthong lam rnam grol lam thob pa'i nyan thos kyi spangs rtogs gang @5b rung gis bsdus pa'i yon tan yin par thal/ dge sbyong tshul gyi 'bras bu yin pa'i phyir/ der thal/ rang rgyal gyi dge sbyong tshul gyi 'bras bu yin pa'i phyir/ der thal/ rang rgyal dgra bcom la 'bras gnas mtshan nyid pa gcig 'thad pa'i phyir/ der thal/ bsdu ba las/ rang rgyal ba ni nyan thos ji lta ba de kho na bzhin du rigs par bya ste nyan thos rnams dang lam gyi rang bzhin mtshungs pa'i phyir/ zhes gsungs pa'i phyir na ma khyab/ 'dod mi nus te/ chos can de yin pa'i phyir/ kho na re/ rgyun zhugs 'bras gnas kyi rgyud kyi 'gog bden chos can/ dge sbyong tshul gyi bskyed bya yin par thal/ de'i 'bras bu yin pa'i phyir/ khyab ste/ dge sbyong tshul la rgyu 'bras kyi rnam gzhag 'thad pa gang zhig /bskyed bya 'bras bu'i mtshan nyid yin pa'i phyir zer na/ ma khyab 'dod mi nus te/ 'dus ma byas yin pa'i phyir/ zhes zer na/ 'o na/ rgyun zhugs 'bras gnas kyi rgyud kyi 'gog bden chos can/ rgyun zhugs kyi bskyed bya yin par thal/ de'i 'bras bu yin pa'i phyir/ khyab pa khas/ ma grub na der thal/ rgyun zhugs kyi dge sbyong tshul gyi 'bras bu yin pa'i phyir/ 'dod mi nus so/ kha cig /'jig rten zhi rags kyi rnam pa can gyi lam la brten nas/ phyir 'ong gi 'bras bu thob ma thag pa'i phyir 'ong gi 'bras bu chos can/ khyod dngos su thob byed kyi dge sbyong tshul gcig yod par thal/ khyod dge sbyong tshul gyi 'bras bu yin pa'i phyir zer na/ ma khyab/ ma grub na der thal/ chos can de yin pa'i phyir/ 'dod na/ dge sbyong tshul dang zhi rags kyi rnam pa can gyi gzhi mthun yod par thal/ 'dod pa'i phyir/ 'dod na/ de 'dra'i gzhi mthun chos can/ zag med bar chad med lam yin par thal/ dge sbyong tshul yin pa'i phyir/ 'dod na/ mi 'thad par thal/ zhi rags kyi rnam pa can gyi lam yin pa'i phyir/ rtags khas/ kho na re/ dge sbyong tshul gyi rgyur gyur pa'i nyan thos mthong lam rnam grol lam la gnas pa'i rgyun zhugs 'bras gnas kyi rgyud kyi rnam grol lam chos can/ dge sbyong tshul gyi 'bras bu yin par thal/ nyan thos mthong lam rnam grol lam thob pa'i nyan thos kyi spangs rtogs gang @6a @#/ /rung gis bsdus pa'i yon tan yin pa'i phyir/ der thal/ de gang rung gis bsdus pa'i rtogs pa'i yon tan yin pa'i phyir/ der thal/ chos can de yin pa'i phyir/ 'dod na/ mi 'thad par thal/ dge sbyong tshul gyi rgyu yin pa'i phyir/ zer na/ ma khyab/ ma grub na der thal/ de rgyud la ldan pa'i rgyun zhugs de dge sbyong tshul gyi rgyu yin pa'i phyir/ kho na re/ dge sbyong tshul gyi 'bras bu de 'dus byas yin par thal/ dge sbyong tshul de dge sbyong tshul gyi 'bras bu bskyed byed yin pa'i phyir/ ma grub na/ dge sbyong tshul chos can/ khyod khyod kyi 'bras bu bskyed byed yin par thal/ khyod rgyu yin pa'i phyir na/ ma khyab/ 'dod mi nus so/ /'o na rgyun zhugs chos can/ khyod khyod kyi 'bras bu bskyed byed yin par thal/ khyod rgyu yin pa'i phyir/ khyab pa song/ gal te 'dod na mi 'thad par thal/ rgyun zhugs dang rgyun zhugs kyi 'bras bu gnyis dus mnyam yin pa'i phyir/ gzhan yang bdag gi 'bras bu bdag las skye bar thal/ bdag bdag gi 'bras bu bskyed byed yin pa'i phyir/ khyab pa song/ ma grub na/ bdag chos can/ khyod khyod kyi 'bras bu bskyed byed yin par thal/ khyod rgyu yin pa'i phyir/ 'khor gsum/ gal te 'dod na/ bdag gi 'bras bu chos can/ bdag las mi skye bar thal/ skyes zin slar yang skye ba don med yin pa'i phyir/ kho na re/ bar pa gnyis kyi rim rgyud pa'i 'bras bu gnyis po de 'jig rten pa'i lam la brten nas gsar du thob pa yod par thal/ de 'jig rten zhi rags kyi rnam pa can gyi lam la brten nas gsar du thob pa yod pa'i phyir/ zer na/ ma khyab/ 'dod mi nus so/ /'o na/ phyi rol pa'i rgyud kyi bsam gtan dang po'i nyer bsdogs sbyor ba mtha'i yid byed chos can/ bar chad med lam yin par thal/ 'jig rten pa'i bar chad med lam yin pa'i phyir/ 'khor gsum/ gal te 'dod na/ bar chad med lam rgyud la ldan pa'i phyir rol pa yod par thal lo/ /kho na re/ 'bras bu bzhi po gang rung gsar du thob pa'i gang zag yin na/ mi rtag la sogs bcu drug mngon sum du rtogs myong bas khyab par thal/ mdzod las/ 'bras bu bzhi rnams bzhag pa ni/ /rgyu lnga dag ni srid phyir ro/ /'bras la sngon lam btang ba dang/ /gzhan thob pa dang zad sdom dang/ /shes pa brgyad tshan thob @6b pa dang/ rnam pa bcu drug thob pa'o/ /zhes gsungs pa'i phyir na ma khyab/ 'o na/ rgyun zhugs zhugs pa yin na/ nyan thos mthong lam bar chad med lam pa yin dgos par thal/ mdzod las/ de la skad cig bco lnga ni/ /ma mthong mthong phyir mthong ba'i lam/ /dbang po rno rtul de dag tu/ /dad dang chos kyi rjes 'brang ba/ /zhes gsungs pa'i phyir/ 'dod mi nus te/ sbyor lam stan gcig la gnas pa'i rgyun zhugs zhugs pa yod pa'i phyir/ kho na re/ nyan thos kyi zag med bar chad med lam rgyud la ldan pa'i gang zag yin na/ don dam pa'i dge sbyong yin dgos par thal/ nyan thos kyi zag med bar chad med lam de rang rgyud la ldan pa'i gang zag don dam pa'i dge sbyong du 'jog byed yin pa'i phyir/ 'dod byas pa la/ gang zag chos can/ don dam pa'i dge sbyong yin par thal/ nyan thos kyi zag med bar chad med lam rgyud la ldan pa'i gang zag yin pa'i phyir/ der thal/ nyan thos kyi zag med bar chad med lam de gang zag gi rgyud kyi shes pa yin pa'i phyir na ma khyab/ ma grub na der thal/ shes pa yin pa'i phyir/ 'dod mi nus te/ de dang sangs rgyas 'phags pa'i gzhi mthun yod pa'i phyir zer na/ 'o na/ de rang chos can/ sangs rgyas 'phags pa yin par thal/ rnam mkhyen rgyud la ldan pa'i gang zag yin pa'i phyir/ khyab ste/ rnam mkhyen sangs rgyas 'phags pa'i rnam par 'jog byed kyi yum yin pa'i phyir/ 'dod na/ mi 'thad par thal/ gang zag dang khyi rgan rgya bo'i gzhi mthun yod pa'i phyir/ kho na re/ rgyun zhugs dge sbyong tshul gyi 'bras bu ma thob pa'i rgyun zhugs gcig yod par thal/ rgyun zhugs kyi dge sbyong tshul ma thob pa'i rgyun zhugs zhugs pa gcig yod pa'i phyir zer na/ ma khyab/ ma grub na/ nyan thos kyi sbyor lam stan gcig la gnas pa'i rgyun zhugs zhugs pa chos can/ rgyun zhugs kyi dge sbyong tshul thob par thal/ rgyun zhugs zhugs pa yin pa'i phyir/ khyab pa khas/ 'dod na/ de chos can/ khyod kyis rgyun zhugs kyi dge sbyong tshul ma thob par thal/ khyod kyis zag med bar chad med lam ma thob pa gang zhig /rgyun zhugs kyi dge sbyong gi tshul la zag med bar chad med lam gyis khyab pa'i phyir/ dang po der thal/ de so so skye bo yin pa'i phyir// ! //gnyis pa @7a @#/ /gang zag gi rnam gzhag bshad pa la/ rgyun zhugs zhugs 'bras bshad pa/ phyir 'ong zhugs 'bras bshad pa/ phyir mi 'ong zhugs 'bras bshad pa/ dgra bcom zhugs 'bras bshad pa dang bzhi/ dang po la/ zhugs pa bshad pa dang/ 'bras gnas bshad pa gnyis las dang po la/ dgag bzhag spangs gsum las/ dang po ni/ kha cig /mthong spangs kun sbyor gsum spangs pas rab tu phye ba'i dge sbyong tshul gyi 'bras bu thob phyir du brtson bzhin pa'i nyan thos/ rgyun zhugs zhugs pa'i mtshan nyid/ zer na/ rgyun zhugs kyi 'bras bu thob phyir du brtson bzhin pa'i nyan thos tshogs lam pa chos can/ der thal/ de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ 'bras bu bzhi rim gyis thob phyir du brtson bzhin pa'i gang zag gcig yod pa'i phyir/ der thal/ 'bras bu bzhi rim gyis thob pa'i nyan thos 'phags pa gcig yod pa'i phyir/ der thal/ de ltar du thob pa'i dgra bcom 'bras gnas gcig yod pa'i phyir/ rtsa bar 'dod na mi 'thad par thal/ nyan thos kyi sbyor lam thob ma myong ba'i gang zag yin pa'i phyir/ kha cig /bden bzhi'i gnas tshul de bzhin gshegs pa la dad stobs kyis rtogs pa'i rgyun zhugs zhugs pa/ rgyun zhugs zhugs pa dbang rtul dad pa'i rjes 'brangs kyi mtshan nyid/ bden bzhi'i gnas tshul chos rab tu rnam 'byed kyi shes rab kyi stobs kyis rtogs pa'i rgyun zhugs zhugs pa/ rgyun zhugs zhugs pa dbang rnon chos kyi rjes 'brangs kyi mtshan nyid zer na/ bden bzhi'i gnas tshul de bzhin gshegs pa la dad stobs kyis rtogs pa'i rgyun zhugs zhugs pa dbang rnon chos kyi rjes 'brangs chos can/ mtshon bya dang po der thal/ mtshan nyid dang po de'i phyir/ der thal/ bden bzhi'i blang dor gyi gnas la dad pa'i dad stobs kyis bden bzhi'i gnas tshul rtogs pa'i rgyun zhugs zhugs pa yin pa'i phyir/ der thal/ bden bzhi'i blang dor gyi gnas tshul la dad pa'i dbang po'i stobs kyis bden bzhi'i gnas tshul rtogs pa'i rgyun zhugs zhugs pa yin pa'i phyir/ der thal/ chos can de yin pa'i phyir/ 'dod mi nus te/ rgyun zhugs zhugs @7b pa dbang rnon chos kyi rjes 'brangs yin pa'i phyir/ gzhan yang/ bden bzhi'i gnas tshul rtogs pa'i rgyun zhugs zhugs pa dbang rtul dad pa'i rjes 'brangs chos can/ mtshon bya phyi ma der thal/ mtshan nyid phyi ma de'i phyir/ der thal/ chos can de yin pa'i phyir/ 'dod mi nus te/ rgyun zhugs zhugs pa dbang rtul dad pa'i rjes 'brangs yin pa'i phyir/ gzhan yang/ khyod kyi mtshan nyid mi 'thad par thal/ rgyun zhugs zhugs pa dbang rtul dad pa'i rjes 'brangs dang/ dbang rnon chos kyi rjes 'brangs gnyis la/ bden bzhi'i gnas tshul rtogs pas ma khyab pa'i phyir/ der thal/ nyan thos mthong lam bar chad med lam la gnas pa'i rgyun zhugs zhugs pa dbang rtul dad pa'i rjes 'brangs dang/ dbang rnon chos kyi rjes 'brangs gnyis ka yod pa'i phyir/ kha cig /bden bzhi'i gnas tshul gtso bor de bzhin gshegs pa la dad stobs kyis rtogs pa'i rgyun zhugs zhugs pa/ rgyun zhugs zhugs pa dbang rtul dad pa'i rjes 'brangs kyi mtshan nyid/ bden bzhi'i gnas tshul gtso bor chos rab tu rnam 'byed kyi shes rab kyi stobs kyis rtogs pa'i rgyun zhugs zhugs pa/ rgyun zhugs zhugs pa dbang rnon chos kyi rjes 'brangs kyi mtshan nyid zer na/ 'o na/ khyod kyis bden bzhi'i gnas tshul gtso bor de bzhin gshegs pa la dad stobs kyis rtogs pa dang/ gtso bor chos rab tu rnam 'byed kyi shes rab kyi stobs kyis rtogs pa'i don de/ bden bzhi mi rtag la sogs bcu drug rtogs pa la byed dam/ bden bzhi bden med du mngon sum du rtogs pa la byed pa dag las gang yin/ de gnyis ka mi 'thad de/ rgyun zhugs zhugs pa dbang rtul dad pa'i rjes 'brangs yin na/ bden bzhi mi rtag la sogs bcu drug rtogs pas ma khyab/ bden bzhi bden med du mngon sum du rtogs pas yang ma khyab pa'i phyir/ de bzhin du dbang rnon la yang de ltar ma khyab pa'i phyir/ kha cig /spang bya cig car ba'i rgyun zhugs zhugs pa med zer na/ de yod par thal/ khams gsum sa dgus bsdus pa'i sgom spangs nyon mongs chen po'i chen po dgu cig car du spong ba nas/ chung ngu'i chung ngu dgu cig car du @8a @#/ /spong nus par tshad mas nges pa'i rgyun zhugs zhugs pa gcig yod pa'i phyir/ der thal/ rgyun zhugs zhugs pa rnams kyi nang nas ches dbang po shin tu rnon po gcig yod pa'i phyir/ der thal/ de yod med dogs pa gcod pa'i skabs su/ gser 'phreng las/ brtags na rung tsam snang ngo/ /zhes gsungs pa'i phyir/ kha cig / rgyun zhugs zhugs pa yin na/ nyan thos mthong lam pa yin pas khyab zer na/ nyan thos sbyor lam stan gcig la gnas pa'i rgyun zhugs zhugs pa chos can/ der thal/ de'i phyir/ der thal/ de yod pa'i phyir/ der thal/ kun las btus las/ rgyun du zhugs pa'i 'bras bu la zhugs pa gang zhe na/ nges par 'byed pa'i cha dang mthun pa la mthong ba'i lam sems kyi skad cig ma bco lnga la gnas pa'i gang zag go /zhes gsungs pa'i phyir dang/ de'i 'grel pa las kyang/ nges par 'byed pa'i cha dang mthun pa stan gcig pa nas bzung ste dang po'i 'bras bu ma thob bar du'o/ /zhes gsungs pa'i phyir/ rtsa bar 'dod na/ mi 'thad par thal/ nyan thos sbyor lam pa yin pa'i phyir/ kha cig /theg chen gyi mthong lam shes bzod skad cig ma bcu drug cig car du skye yang/ theg dman gyi bzod pa brgyad rim can du skye ba yin zhes zer na/ de mi 'thad par thal/ rigs pa drug cu pa'i 'grel pa las/ theg dman gyi mthong lam bzod pa brgyad cig car du skye bar bshad pa gang zhig /rnam bshad snying po rgyan las/ slob dpon 'di dang/ rig pa drug cu pa rtsa 'grel nas 'byung tshul rnams khyad par yod par ma mthong zhing/ zhes gsungs pa'i phyir/ dang po der thal/ rig pa drug cu pa las/ chos shes pa yi 'jug thogs su/ /'di la bye brag yod na ni/ /dngos po shin tu phra ba yang/ rnam par mi mkhas de yi ni/ /rkyen las skyes pa'i don ma mthong/ /zhes gsungs pa'i phyir/ gnyis pa rang lugs la/ mthong spangs kun sbyor gsum spangs pas rab tu phye ba'i dge sbyong tshul gyi 'bras bu thob phyir du brtson bzhin pas rab tu phye ba'i zhugs pa'i gang zag /rgyun zhugs zhugs pa'i mtshan nyid/ de la dbang po'i sgo nas dbye na/ rgyun zhugs zhugs pa dbang rtul dad pa'i rjes 'brangs @8b dang/ dbang rnon chos kyi rjes 'brangs gnyis yod/ de gnyis kyi dbang po'i khyad par yod de/ shes rab yul la 'jug pa myur bul dang rgya che chung gi khyad par yod pa'i phyir/ de la spang bya'i sgo nas dbye na/ der gyur pa'i spang bya cig car ba dang/ rim rgyud pa gnyis yod/ spang bya cig car ba'i rgyun zhugs kyi 'bras bu thob phyir du brtson bzhin pa'i rgyun zhugs zhugs pa/ spang bya cig car ba'i rgyun zhugs zhugs pa'i mtshan nyid/ spang bya rim rgyud pa'i rgyun zhugs kyi 'bras bu thob phyir du brtson bzhin pa'i rgyun zhugs zhugs pa/ spang bya rim rgyud pa'i rgyun zhugs zhugs pa'i mtshan nyid/ rgyun zhugs zhugs pa'i spangs rtogs kyi khyad par yod de/ spangs pa'i khyad par 'dod pa la 'dun pa'i 'dod sred mngon gyur ba dang po nas lnga pa'i bar spangs ma spangs ci rigs yod/ drug pa nges par ma spangs pas khyab/ rtogs pa'i khyad par 'dod pa la 'dun pa'i 'dod sred mngon gyur ba dang po nas lnga pa'i bar gyi gnyen po thob ma thob ci rigs yod/ drug pa'i gnyen po nges par ma thob pas khyab pa'i phyir/ sa 'tshams ni/ nyan thos sbyor lam stan gcig pa nas nyan thos kyi mthong lam rjes shes la gnas kyi bar du yod/ gsum pa rtsod pa spong ba la/ kho na re/ spang bya cig car ba'i rgyun zhugs zhugs pa med par thal/ nyan thos mthong lam rnam grol lam la gnas pa'i rgyun zhugs zhugs pa med pa gang zhig /spang bya cig car ba'i rgyun zhugs kyi rtsom pa nyan thos mthong lam rnam grol lam las langs rjes su 'byung ba'i phyir/ zer na ma khyab/ phyi ma der thal/ kun las btus las/ cig car nges par 'byin pa ni bden pa rnams mngon par rtogs par byas nas mi lcogs med pa la brten nas 'jig rten las 'das pa'i lam gyis khams gsum gyi nyon mongs pa rnams rnam pas cig car spangs te/ 'di ni rgyun tu zhugs pa dang dgra bcom pa'i 'bras bu gnyis la gdags so/ /zhes gsungs pa'i phyir/ 'dod mi nus so/ /kho na re/ khyod 'bras gnas yin na/ khyod kyis zhugs pa gcig yod pas khyab par thal/ spang bya cig car ba'i rgyun zhugs zhugs pa gcig yod pa'i phyir/ 'dod na/ nyan thos @9a @#/ /mthong lam rnam grol lam la gnas pa'i rgyun zhugs chos can/ khyod kyi zhugs pa gcig yod par thal/ khyod 'bras gnas yin pa'i phyir/ 'dod na/ nyan thos mthong lam rnam grol lam la gnas pa'i rgyun zhugs kyi zhugs pa med par thal/ nyan thos mthong lam rnam grol lam la gnas pa'i rgyun zhugs zhugs pa med pa'i phyir/ zer na ma khyab/ kho na re/ rgyun zhugs zhugs pa yin na/ nyan thos mthong lam pa yin pas khyab par thal/ mtshon bya don gyi rgyun zhugs zhugs pa yin na/ byang sems mthong lam pa yin pas khyab pa'i phyir/ zer na ma khyab bo/ /ma grub na der thal/ 'grel pa las/ 'chad par 'gyur ba'i lam shes pa nyid kyis bsdus pa mthong ba'i lam skad cig ma bcu drug la brten nas dad pa dang/ chos kyi rjes su 'brang ba'i bye brag gi/ zhes gsungs pa'i phyir/ zer na/ 'o na/ rnam bshad snying po rgyan las sa 'tshams sbyor lam stan gcig pa nas rgyun zhugs kyi 'bras bus bsdus pa'i rnam grol lam ma thob tshun chad do/ /zhes/ rgyun zhugs zhugs pa'i sa 'tshams sbyor lam stan gcig pa nas bzung ba de mi 'thad par thal/ nyan thos sbyor lam stan gcig la gnas pa'i rgyun zhugs zhugs pa med pa'i phyir/ kho na re/ skyon med de/ de kun las btus pa'i bzhed pa bskyar ba yin no zhe na/ 'o na/ rnam bshad snying po rgyan du rang lugs la rgyun zhugs zhugs pa'i mtshan nyid dbye ba dngos su ma bstan par thal/ des de'i sa 'tshams dngos su ma bstan pa'i phyir/ der thal/ sa 'tshams sbyor lam stan gcig pa nas zhes sogs gsungs pa ni/ kun las btus pa'i bzhed pa bskyar ba tsam yin pa gang zhig /de las gzhan pa'i rgyun zhugs zhugs pa'i sa 'tshams dngos su ston byed kyi rnam bshad kyi gzhung tshig med pa'i phyir/ 'dod na/ mi 'thad par thal/ des rgyun zhugs 'bras gnas kyi mtshan nyid dbye ba dngos su bstan pa'i phyir/ des de ltar bstan par thal/ des skyes bu zung bzhi gang zag ya brgyad kyi rnam gzhag gcig dngos su bstan pa'i phyir/ der thal/ des dbang po rtul dang rnon po dag /zhes sogs kyi gzhung don gcig dngos su bstan pa'i phyir/ kho na re/ theg @9b dman gyi mthong lam bzod pa brgyad po rim can du skye bar thal/ kun btus las mthong ba'i lam sems kyi skad cig bco lnga la gnas pa'i gang zag /zhes gsungs pa'i phyir/ zer na skyon med/ de ni mthong lam sdug bsngal la chos bzod nas rim gyis grangs ba'i dbang du byas pa yin gyi rim kyis skye ba'i dbang du byas pa ma yin pa'i phyir/ de ltar ma yin na/ nyan thos kyi bcu drug pa lam rjes shes de nyan thos kyi mthong lam ma yin par thal/ khyod rang gi lung de'i phyir/ 'dod mi nus te/ nyan thos kyi mthong lam de la shes bzod skad cig ma bcu drug gi dbye ba 'thad pa'i phyir/ ! gnyis pa 'bras gnas bshad pa la/ dgag bzhag spang gsum las/ dang po la/ kun sbyor gsum spangs pa'i dge sbyong tshul gyi 'bras bu la gnas pa'i gang zag /rgyun zhugs 'bras gnas kyi mtshan nyid zer na/ dgra bcom 'bras gnas chos can/ mtshon bya der thal/ mtshan nyid de'i phyir/ der thal/ dgra bcom 'bras gnas yin pa'i phyir/ 'dod mi nus so/ /kha cig /mthong spangs kun sbyor gsum spangs pa'i dge sbyong tshul gyi 'bras bu la gnas pa'i gang zag rgyun zhugs 'bras gnas kyi mtshan nyid zer na/ phyir mi 'ong 'bras gnas chos can/ mtshon bya der thal/ mtshan nyid de'i phyir/ kha cig /rgyun zhugs kyi 'bras bu de/ mthong spangs kun sbyor gsum spangs pas rab tu phye ba'i don de/ mthong spangs kun sbyor gsum tsam spangs pa la byed zer na/ 'o na/ rgyun zhugs 'bras gnas des mthong spangs su gyur pa'i zhe sdang/ nga rgyal sogs ma spangs par thal/ des mthong spangs kun sbyor gsum tsam spangs pa'i phyir/ 'dod mi nus te/ des mthong spangs nyon mongs mtha' dag spangs pa'i phyir/ ma grub na/ de chos can/ khyod kyis mthong spangs nyon mongs mtha' dag spangs par thal/ khyod rgyun zhugs 'bras gnas yin pa'i phyir/ gnyis pa rang gi lugs la/ mtshan nyid/ dbye ba/ phye ba so so'i don dang gsum las/ dang po ni/ mthong spangs kun sbyor gsum spangs pas rab tu phye ba'i dge sbyong tshul gyi 'bras bu la gnas pa'i gang zag /rgyun zhugs 'bras gnas kyi mtshan nyid/ de la dbye ba ni/ dbang po'i sgo nas dbye na/ der gyur pa'i dbang rtul dad mos pa @10a @#/ /dang/ dbang rnon mthong thob pa gnyis/ spang bya spong tshul gyi sgo nas dbye na/ spang bya cig car ba'i rgyun zhugs 'bras gnas dang/ spang bya rim rgyud pa'i rgyun zhugs 'bras gnas gnyis yod/ de la sbyor ba'i sgo nas dbye na/ rgyun zhugs 'bras gnas khyad par can dang/ tsam po ba gnyis/ phye ba so so'i don bshad pa la gsum las/ dang po la/ kha cig gis rang dang rgyud gcig tu gyur pa'i rgyun zhugs zhugs pa dbang rtul dad pa'i rjes 'brangs kyi stobs kyis thob pa'i rgyun zhugs 'bras gnas/ rgyun zhugs 'bras gnas dbang rtul dad mos pa'i mtshan nyid/ rang dang rgyud gcig tu gyur pa'i rgyun zhugs zhugs pa dbang rnon chos kyi rjes 'brangs kyi stobs kyis thob pa'i rgyun zhugs 'bras gnas/ rgyun zhugs 'bras gnas dbang rnon mthong thob pa'i mtshan nyid zer na/ rgyun zhugs zhugs pa dbang rtul dad pa'i rjes 'brangs dang rgyud gcig tu gyur pa'i rgyun zhugs 'bras gnas dbang rnon chos can/ mtshon bya dang po der thal/ mtshan nyid dang po de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ rgyun zhugs zhugs pa rgyun zhugs kyi 'bras bu thob nas dbang rnon du gnas 'gyur ba yod pa'i phyir/ der thal/ nyan thos slob pa nyan thos dgra bcom pa'i 'bras bu thob nas dbang rnon du gnas 'gyur ba yod pa'i phyir/ der thal/ nyan thos dgra bcom pa tshe de la dbang rnon du 'pho ba yod pa'i phyir/ der thal/ rtogs pa'i 'os su gyur pa'i nyan thos dgra bcom pa yod pa'i phyir/ 'dod mi nus te/ chos can de yin pa phyir/ phyi ma mtshungs so; ;kha cig /rgyun zhugs 'bras gnas dbang rnon mthong thob pa yin na/ dbang rnon yin pas khyab zer na/ de chos can/ der thal/ de'i phyir/ 'dod na/ mi 'thad par thal/ dbang rtul yin pa'i phyir/ der thal/ rang bzhin gyi dbang rtul yin pa'i phyir/ der thal/ nyan thos yin pa'i phyir/ kha cig / nyan thos mthong lam rnam grol lam la gnas pa'i rgyun zhugs 'bras gnas khyad par can yod zer na/ nyan thos mthong lam rnam grol lam la gnas pa'i rgyun zhugs 'bras gnas dang/ phyir 'ong zhugs pa'i gzhi mthun yod par thal/ khyod kyi dam bca' 'thad pa'i phyir/ 'dod na mi @10b 'thad par thal/ de dang 'bras bu thod brgal ba'i phyir 'ong zhugs pa'i gzhi mthun yang med/ de dang 'bras bu rim rgyud pa'i phyir 'ong zhugs pa'i gzhi mthun yang med pa'i phyir/ dang po ma grub na/ nyan thos mthong lam rnam grol lam la gnas pa'i rgyun zhugs 'bras gnas dang/ 'bras bu thod brgal ba'i phyir 'ong zhugs pa'i gzhi mthun pa chos can/ khyod 'bras bu thod brgal ba'i phyir 'ong zhugs pa ma yin par thal/ khyod nyan thos mthong lam rnam grol lam la gnas pa'i gang zag yin pa'i phyir/ rtags khas/ rtsa rtags phyi ma ma grub na/ de 'dra'i gzhi mthun pa chos can/ khyed nyan thos sgom lam pa yin par thal/ khyod 'bras bu rim rgyud pa'i phyir 'ong zhugs pa yin pa'i phyir/ rtags khas/ 'dod mi nus te/ nyan thos mthong lam pa yin pa'i phyir/ rtags khas/ kha cig /spang bya rim rgyud pa'i rgyun zhugs 'bras gnas khyad par can yin na/ 'dod nyon drug pa'i spong gnyen la gnas pas khyab zer na/ 'o na/ phyir 'ong zhugs pa yin na/ 'dod nyon drug pa'i spong gnyen la gnas pas khyab par thal/ khyod kyi dam bca' 'thad pa'i phyir/ 'dod mi nus te/ 'dod nyon dang po nas drug pa'i bar gang yang rung ba spong ba'i sbyor ba la brtson bzhin pa'i phyir 'ong zhugs pa yod pa'i phyir/ ma khyab na/ 'gal lo/ /ma grub na/ der thal/ dge 'dun nyi shu chen mo las drug pa'i bar spong brtson pa dang/ nges par drug pa spong brtson pa/ phyir 'ong zhugs yin zhes pa ni/ gong 'og gnyis kyi khyad par ro/ zhes gsungs pa'i phyir/ kha cig /khams gsum sa dgus bsdus pa'i sgom spangs nyon mongs che 'bring chung ngu dgu cig car du spong ba'i rgyun zhugs 'bras gnas/ spang bya cig car ba'i rgyun zhugs 'bras gnas kyi mtshan nyid/ khams gsum sa dgus bsdus pa'i sgom spangs nyon mongs chung 'bring chen po dgu rim can du spong ba'i rgyun zhugs 'bras gnas/ spang bya rim rgyud pa'i rgyun zhugs 'bras gnas kyi mtshan nyid zer na/ dang po mi 'thad par thal/ khams gsum sa dgus bsdus pa'i sgom spangs nyon mongs chung 'bring chen po dgu cig car du spong ba'i rgyun zhugs 'bras gnas med ba'i phyir/ der thal/ nyan thos kyi sgom lam bar chad med lam chung 'bring chen po dgu cig car du rgyud la @11a @#/ /ldan pa'i gang zag med pa'i phyir/ mtshan nyid phyi ma sla/ kha cig /khams gsum sa dgus bsdus pa'i sgom spangs nyon mongs chung 'bring chen po dgu rnam pas cig car du spong ba'i rgyun zhugs 'bras gnas/ spang bya cig car ba'i rgyun zhugs 'bras gnas kyi mtshan nyid/ de 'dra ba de rim can du spong ba'i rgyun zhugs 'bras gnas/ spang bya rim rgyud pa'i rgyun zhugs 'bras gnas kyi mtshan nyid zer na/ dang po mi 'thad par thal/ khams gsum sa dgus bsdus pa'i sgom spangs nyon mongs chung 'bring chen po dgu rnam pas cig car du spong ba'i rgyun zhugs med pa'i phyir/ der thal/ de cig car du spong ba'i rgyun zhugs 'bras gnas med pa'i phyir/ gzhan yang/ rgyun zhugs kyi 'bras bu thob ma thag pa'i spang bya cig car ba'i rgyun zhugs 'bras gnas chos can/ mtshon bya phyi ma der thal/ mtshan nyid phyi ma de'i phyir/ rtags chos can gyis sgrub po/ /kha cig /khams gsum sa dgus bsdus pa'i sgom spangs nyon mongs chen po'i chen po dgu cig car du spong ba nas bzung ste/ chung ngu'i chung ngu dgu cig car du spong ba'i rgyun zhugs 'bras gnas/ spang bya cig car ba'i rgyun zhugs 'bras gnas kyi mtshan nyid/ de 'dra ba de rim can du spong ba'i rgyun zhugs 'bras gnas/ spang bya rim rgyud pa'i rgyun zhugs 'bras gnas kyi mtshan nyid zer na/ srid nyon dgu pa'i dngos gnyen bar chad med lam la gnas pa'i spang bya cig car ba'i rgyun zhugs 'bras gnas chos can/ mtshan nyid dang po der thal/ mtshon bya de'i phyir/ der thal/ chos can de yin pa'i phyir/ der thal/ de yod pa'i phyir te/ spang bya cig car ba'i dgra bcom gyi 'bras bu thob kha ma'i rgyun zhugs yod pa'i phyir/ der thal/ spang bya cig car ba'i dgra bcom zhugs pa yod pa'i phyir/ 'dod mi nus te/ srid nyon brgyad pa man chad spangs zin pa'i phyir/ gzhan yang/ 'dod nyon drug pa'i dngos gnyen bar chad med lam la gnas pa'i spang bya rim rgyud pa'i rgyun zhugs 'bras gnas chos can/ mtshan nyid phyi ma der thal/ mtshon bya de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ phyir 'ong gi @11b 'bras bu thob kha ma'i rgyun zhugs yod pa'i phyir/ 'dod mi nus te/ 'dod nyon chen po'i chen po spangs zin pa'i phyir/ kha cig /spang bya rim rgyud pa'i rgyun zhugs 'bras gnas des/ dang por 'dod pa'i sas bsdus kyi sgom spangs nyon mongs chen po'i chen po spong/ de'i rjes su bsam gtan dang po'i sas bsdus kyi sgom spangs nyon mongs chen po'i chen po spong ba nas/ srid rtse'i sas bsdus kyi sgom spangs nyon mongs chen po'i chen po spong/ de nas 'dod pa'i sas bsdus kyi sgom spangs nyon mongs chen po'i 'bring spong/ de rjes bsam gtan dang po'i sas bsdus kyi sgom spangs nyon mongs chen po'i 'bring spong ba nas/ srid rtse la de ltar du spong ba nas bzung ste/ 'dod pa'i sas bsdus kyi sgom spangs nyon mongs chung ngu'i chung ngu spong ba nas/ srid rtse la de ltar du spong bar byed pa yin zer na/ 'o na 'dod pa la 'dun pa'i 'dod sred dgu pa mngon gyur ba spangs pa'i phyir mi 'ong yin na/ srid rtse la 'dun pa'i 'dod sred brgyad pa man chad spangs zin pas khyab par thal/ khyod kyi rim rgyud pa'i spang bya spong tshul de 'thad pa'i phyir/ 'dod na/ gzugs kyi 'ching ba kun ldan gyi phyir mi 'ong gcig med par thal/ 'dod pa'i phyir/ 'dod mi nus te/ mdzod 'grel las bshad pa'i phyir mi 'ong khri nyis stong dgu brgya drug cu'i grangs ma tshang ba'i skyon yod pa'i phyir/ kha cig /spang bya cig car ba'i rgyun zhugs 'bras gnas dang/ spang bya rim rgyud pa'i rgyun zhugs 'bras gnas gnyis po de la/ khams gsum sa dgus bsdus pa'i sgom spangs nyon mongs chung 'bring chen po dgu mngon gyur ba spong tshul la khyad par yod pa yin gyi/ de dag gi sa bon spong tshul la khyad par med de/ de gnyis kas chen po'i chen po dgu'i sa bon cig car du spong ba nas bzung ste/ chung ngu'i chung ngu dgu'i sa bon cig car du spong ba'i phyir zer na/ 'o na/ de gnyis la khams gsum gyi 'dus byas thams cad ni mi rtag /zag pa dang bcas pa thams cad sdug bsngal/ chos thams cad stong zhing bdag med pa'o snyam du gtso bor bsdus te sgom mi sgom dang sgom pa yun ring thung gi khyad par med par thal/ khyod kyi dam bca' 'thad pa'i phyir/ 'dod na/ de gnyis la dbang po rno rtul gyi khyad par med par thal/ 'dod pa de'i phyir/ 'dod mi nus te/ spang bya cig car ba'i rgyun zhugs des de ltar @12a @#/ /nus/ rim rgyud pas de ltar mi nus pa'i phyir/ der thal/ spang bya cig car ba'i rgyun zhugs de rgyun zhugs rnams kyi nang nas dbang po ches shin tu rno ba'i phyir/ kha cig /khams gsum sa dgus bsdus pa'i sgom spangs nyon mongs dgu cig car du spong ba'i rigs can gyi rgyun zhugs 'bras gnas/ spang bya cig car ba'i rgyun zhugs 'bras gnas kyi mtshan nyid/ de rim can du spong ba'i rigs can gyi rgyun zhugs 'bras gnas/ spang bya rim rgyud pa'i rgyun zhugs 'bras gnas kyi mtshan nyid zer na/ khams gsum sa dgus bsdus pa'i sgom spangs nyon mongs dgu cig car du spong ba'i spong gnyen bar chad med lam dgu cig car du rgyud la ldan pa'i gang zag yin par [@#pa] yod par thal/ dam bca' 'thad pa'i phyir/ 'dod na/ srid nyon dgu pa'i dngos gnyen bar chad med lam rgyud la ldan pa'i spang bya cig car ba'i rgyun zhugs 'bras gnas de/ de ltar yin par thal/ 'dod pa'i phyir/ 'dod mi nus te/ khyod kyi lugs la rigs su gnas bya gnas byed gnyis la rtogs dka' sla'i khyad par mi 'dug pa'i phyir/ kha cig /spang bya cig car ba'i rgyun zhugs shi 'pho ba'i tshe nyan thos sgom lam rdo rje lta bu'i ting nge 'dzin la mnyam par gzhag nas 'gro ba gzhan la bar do 'ong ba'i dod la/ nyon sgrib ma lus par spangs nas dgra bcom pa'i go 'phang mngon du byed pa yin zer na/ nyan thos kyi sgom lam rdo rje lta bu'i ting nge 'dzin la mnyam par gzhag pa'i gang zag yang yin/ las nyon gyis rang dbang med par srog dbang 'gag bzhin pa'i gang zag yang yin pa'i gzhi mthun pa gcig yod par thal/ dam bca' 'thad pa'i phyir/ 'dod na/ mi 'thad de/ nyan thos kyi sgom lam rdo rje lta bu'i ting nge 'dzin la mnyam par gzhag pa'i gang zag yin na/ las nyon gyi dbang gis rang dbang med par srog dbang 'gag bzhin pa'i gang zag ma yin pas khyab pa'i phyir/ rtags 'bud/ kha cig /kun las btus las/ sangs rgyas 'byung ba med pa na rang rgyal bar 'gyur ro/ /zhes pa'i skabs nas dngos su bstan pa'i rang rgyal de rang rgyal mtshan nyid pa la mi byed zer na/ 'o na/ de 'dra ba de nyan thos dgra bcom pa mtshan nyid pa la byed par thal/ khyod kyi dam @12b bca' 'thad pa'i phyir/ 'dod mi nus te/ sangs rgyas 'byung ba med pa na rang rgyal bar 'gyur ro/ /zhes pa'i shugs kyis sangs rgyas 'jig rten du byon pa dang ma mjal na/ nyan thos dgra bcom pa'i go 'phang mngon du mi byed par bstan pa dang 'gal ba'i phyir/ kha cig /spang bya cig car ba'i rgyun zhugs dang/ spang bya cig car ba'i dgra bcom pa'i rnam gzhag de mngon pa gong ma ba yan chad kyi thun mong ma yin pa'i lugs yin gyi/ bye brag tu smra bas de 'dra'i rnam gzhag mi byed zer na/ de mi 'thad par thal/ bye brag du smra ba'i lugs la yang bsam gtan dang po'i nyer bsdogs mi lcog [@#lcogs] med pa la brten nas/ khams gsum sa dgus bsdus pa'i sgom spangs nyon mongs ma lus par spong nus pa'i nyan thos yod pa'i phyir/ der thal/ mdzod las/ nyer bsdogs mi lcog [@#lcogs] med pa yi/ /thams cad las ni 'dod chags bral/ /zhes gsungs pa'i phyir/ gnyis pa rang lugs la/ rang dang rgyud gcig tu gyur pa'i rgyun zhugs zhugs pa dbang rtul dad pa'i rjes 'brangs kyi stobs kyis thob pa'i rgyun zhugs 'bras gnas dbang rtul/ rgyun zhugs 'bras gnas dbang rtul dad mos pa'i mtshan nyid/ rang dang rgyud gcig tu gyur pa'i rgyun zhugs zhugs pa dbang rnon chos kyi rjes 'brangs kyi stobs kyis thob pa'i rgyun zhugs 'bras gnas dbang rnon/ rgyun zhugs 'bras gnas dbang rnon mthong thob pa'i mtshan nyid/ rang gi 'bras bu gong ma thob phyir du dngos su brtson bzhin pa'i rgyun zhugs 'bras gnas/ rgyun zhugs 'bras gnas khyad par can gyi mtshan nyid/ de ltar mi brtson pa'i rgyun zhugs 'bras gnas rgyun zhugs 'bras gnas tsam po ba'i mtshan nyid/ khams gsum sa dgus bsdus pa'i sgom spangs nyon mongs chung ngu'i chung ngu dgu cig car du spong ba'i rgyun zhugs 'bras gnas/ spang bya cig car ba'i rgyun zhugs 'bras gnas kyi mtshan nyid/ 'dod pa'i sas bsdus kyis sgom spangs nyon mongs chung ngu'i chung ngu spangs rjes su/ srid rtse'i sas bsdus kyi sgom spangs nyon mongs chung ngu'i chung ngu spong ba'i rgyun zhugs 'bras gnas/ spang bya rim rgyud pa'i rgyun zhugs 'bras gnas kyi mtshan nyid/ spang bya cig car ba'i rgyun zhugs 'bras gnas des lam gang gi gnas skabs su/ sa @13a @#/ /gang la brten nas spang bya gang tshul ji ltar du spong ba dang/ myang 'das tshul ji ltar du mngon du byed pa'i khyad par yod de/ lam nyan thos kyi bden pa mngon rtogs thob rjes su/ sa bsam gtan dang po'i nyer bsdogs mi lcog [@#lcogs] med pa la brten nas/ spang bya khams gsum sa dgus bsdus ba'i sgom spangs nyon mongs chung ngu'i chung ngu dgu cig car du spong bar byed/ myang 'das ni/ phal cher ni mthong chos kyi rten la myang 'das mngon du byed/ de la ma nus na/ bar srid kyi rten la myang 'das mngon du byed/ de la ma nus na/ sngon smon lam gyi dbang gis 'dod pa'i khams su skye ba blangs nas/ sangs rgyas 'jig rten du byon pa dang 'jal na/ nyan thos dgra bcom pa'i go 'phangs mngon du byed/ sangs rgyas 'jig rten du byon pa dang ma 'jal na/ rang rgyal lam du zhugs nas/ rang rgyal dgra bcom pa'i go 'phangs mngon du byed pa'i phyir/ gsum pa rtsod pa spong ba la/ kho na re/ spang bya rim rgyud pa'i rgyun zhugs 'bras gnas de/ 'dod pa'i sas bsdus kyi sgom spangs nyon mongs ma lus par spangs rjes su/ bsam gtan dang po'i sas bsdus kyi sgom spangs nyon mongs rnams spong bar thal/ de dang spang bya cig car ba'i rgyun zhugs 'bras gnas gnyis la/ khams gsum sa dgus bsdus pa'i sgom spangs nyon mongs che 'bring dgu'i sa bon spong tshul la khyad par yod pa'i phyir/ 'dod na/ des nyan thos kyi sgom lam bar chad med lam chen po'i chen po rang rgyud la skyes la ma nyams pa'i ngang nas/ nyan thos kyi sgom lam bar chad med lam chung ngu'i chung ngu rgyud la bskyed par byed par thal/ 'dod pa'i phyir/ 'dod na/ nyan thos sgom lam pa nyan thos sgom lam pa'i rtogs pa las nyams pa gcig yod par thal/ 'dod pa'i phyir zer na/ ma khyab bo/ /'o na/ des nyan thos sgom lam chen po'i chen po rang rgyud la bskyed rjes su/ nyan thos kyi sgom lam chung ngu'i chung ngu rang rgyud la bskyed par thal/ des 'dod pa'i sas bsdus kyi sgom spangs nyon mongs mngon gyur ba chung ngu'i chung ngu'i dngos gnyen du gyur pa'i nyan thos kyi sgom lam chen po'i chen po rang rgyud la bskyed rjes su/ bsam gtan dang po'i sas bsdus kyi sgom spangs nyon mongs mngon gyur ba chen po'i chen po'i dngos gnyen du gyur pa'i @13b nyan thos kyi sgom lam chung ngu'i chung ngu rang rgyud la bskyed par byed pa'i phyir te/ des de gnyis rim can du spong bar byed pa'i phyir/ khyab pa khas blangs shing/ rang nyid kyang dam bca'o/ /'dod na/ nyan thos sgom lam pa'i rtogs pa las nyams pa yod par thal/ 'dod pa'i phyir/ kho na re/ khams gsum sa dgus bsdus pa'i sgom spangs nyon mongs mngon gyur ba'i spong gnyen du gyur pa'i nyan thos kyi sgom lam de la chung 'bring dgu'i dbye ba mi 'thad zer na/ de 'thad par thal/ khams gsum sa dgus bsdus pa'i sgom spangs nyon mongs mngon gyur ba de la chung 'bring dgu'i dbye ba 'thad pa'i phyir/ der thal/ spang bya cig car ba'i rgyun zhugs dang/ spang bya rim rgyud pa'i rgyun zhugs gnyis po de la sgom spangs nyon mongs chung 'bring dgu po de'i sa bon spong tshul la khyad par med kyang/ de dgu po spong tshul la khyad par yod pa'i phyir/ rtags khas/ kha cig /spang bya cig car ba'i rgyun zhugs dang/ spang bya rim rgyud pa'i rgyun zhugs gnyis po de khams gsum sa dgus bsdus pa'i sgom spangs nyon mongs che 'bring dgu'i sa bon spong ba la khyad par med par thal/ de gnyis kas khams gsum sa dgus bsdus pa'i sgom spangs nyon mongs chen po'i chen po dgu'i sa bon cig car du spong ba nas/ chung ngu'i chung ngu dgu'i sa bon cig car du spong bar mtshungs pa'i phyir/ der thal/ de gnyis kas khams gsum gyis bsdus pa'i chos thams cad gang zag gi bdag med par rtogs pa yang mtshungs/ de gnyis kas khams gsum gyi nyon mongs pa spang bya'i gtso bor byas nas spong bar yang mtshungs pa'i phyir zer na ma khyab/ 'o na/ spang bya rim rgyud pa'i rgyun zhugs 'bras gnas kyi rgyud kyi 'dod pa'i sas bsdus kyi gang zag gi bdag 'dzin chen po'i chen po'i dngos gnyen bar chad med lam des/ 'dod pa'i sas bsdus kyi gang zag gi bdag 'dzin chung ngu'i chung ngu dngos su spong bar thal/ des 'dod pa'i sas bsdus kyi gang zag gi bdag 'dzin chung ngu'i chung ngu'i zhen yul med par mngon sum du rtogs pa gang zhig /de rgyud la ldan pa'i gang zag des/ de gnyis ka spang bya'i gtso bor byas nas spong ba'i phyir/ 'dod mi nus so/ kho na re/ spang bya cig car ba'i nyan thos 'chi 'pho ba'i tshe nyan thos kyi sgom lam rdo rje lta bu'i ting nge @14a @#/ /'dzin la mnyam par gzhag nyon mongs ma lus par spangs nas nyan thos dgra bcom pa'i go 'phangs mngon du byed par thal/ kun las btus las/ 'chi 'pho'i dus kyi tshe kun shes nyid thob par byed do/ /zhes gsungs pa'i phyir/ zer na/ skyon med de/ de'i don ni bar srid kyi rten la myang 'das mngon du byed pa la dgongs pa'i phyir/ bar srid la 'chi 'pho'i tshe zhes 'chad pa'i rgyun mtshan yod de/ bar do ba tshe thung ba'i rgyu mtshan gyis de ltar bshad pa'i phyir/ kho na re/ kun las btus las/ sangs rgyas 'byung ba med pa na rang rgyal bar 'gyur ro/ /zhes pa'i skabs nas dngos su bstan pa'i rang rgyal de/ rang rgyal btags pa ba la byed rigs par thal/ spang bya cig car ba'i rgyun zhugs rang rgyal lam du 'jug na/ rang rgyal tshogs lam du 'jug dgos pa gang zhig /de rang rgyal tshogs lam du zhugs pa la dogs pa med pa'i phyir/ der thal/ nyan thos dgra bcom pa rang rgyal tshogs lam du zhugs pa la dgos pa med pa'i phyir zer na ma khyab/ de ltar byas na/ rang gi lugs la/ spang bya rim rgyud pa'i rgyun zhugs 'bras gnas dang/ spang bya cig car ba'i rgyun zhugs 'bras gnas gnyis kyi spang bya spong tshul la khyad par yod de/ spang bya rim rgyud pa'i rgyun zhugs 'bras gnas des/ 'dod pa'i sas bsdus kyi gang zag gi bdag 'dzin che 'bring dgu/ des drangs pa'i 'dod pa la 'dun pa'i 'dod sred che 'bring dgu rim gyis ma lus par spangs rjes su/ bsam gtan dang po yan chad kyi sas bsdus kyi gang zag gi bdag 'dzin che 'bring dgu/ des drangs pa'i bsam gtan dang po yan chad la 'dun pa'i 'dod sred che 'bring dgu rim gyis spong bar byed/ spang bya cig car ba'i rgyun zhugs 'bras gnas des/ khams gsum sa dgus bsdus pa'i gang zag gi bdag 'dzin che 'bring dgu dang/ des drangs pa'i khams gsum sa dgu la bdun pa'i 'dod sred che 'bring dgu'i nang nas/ dang por khams gsum sa dgus bsdus pa'i sgom spangs nyon mongs chen po'i chen po dgu cig car du spong ba nas/ chung ngu'i chung ngu dgu cig car du spong pa'i phyir/ spang bya rim rgyud pa'i rgyun zhugs 'bras gnas de la dbye na/ rgyun zhugs srid pa lan bdun pa ba dang/ rigs nas rigs skye/ de las gzhan @14b pa'i rgyun zhugs 'bras gnas dang gsum yod pa las// ! dang po rgyun zhugs srid pa lan bdun pa ba la mtha' dpyad pa la gsum las/ dang po la kha cig /nyan thos srid pa lan bdun pa ba yin na/ rgyun zhugs srid pa lan bdun pa ba yin pas khyab zer na/ nges pa'i rgyun zhugs srid pa lan bdun pa ba dang rgyud gcig tu gyur pa'i nyan thos sbyor lam stan gcig la gnas pa'i rgyun zhugs zhugs pa chos can/ der thal/ de'i phyir/ der thal/ chos can de yin pa'i phyir/ khyab pa yod de/ nyan thos srid pa lan bdun pa ba de la skye 'phags gnyis yod pa'i phyir/ der thal/ blo gsal 'jug pa'i them skas las/ lan bdun pa la skye 'phags gnyis/ zhes gsungs pa'i phyir/ 'dod mi nus te/ rgyun zhugs zhugs pa yin pa'i phyir/ kha cig /rgyun zhugs srid pa lan bdun pa ba yin na/ nges pa'i rgyun zhugs srid pa lan bdun pa ba yin pas khyab zer na/ rgyun zhugs mchog tu thogs na lan bdun pa ba yin na/ nges pa'i rgyun zhugs mchog tu thogs na lan bdun pa ba yin dgos par thal/ dam bca' 'thad pa'i phyir/ khyab pa yod de/ tshad ldan gyi mdo dang bstan bcos rnams su/ rgyun zhugs srid pa lan bdun pa ba dang/ re ltar thogs na lan bdun pa ba dang/ mchog tu thogs na lan bdun pa ba/ po zos na lan bdun pa ba rnams don gcig ming gi rnam grangs su gsungs pa'i phyir/ rtsa bar 'dod mi nus te/ ma nges pa'i rgyun zhugs mchog tu thogs na lan bdun pa ba yod pa'i phyir/ der thal/ mdzod 'grel las/ mchog tu thogs na lan bdun pa gzhan yang yod mod kyi 'dir ma nges pa ma brjod do/ /zhes gsungs pa'i phyir/ gzhan yang gzugs nyer 'gro phyir mi 'ong gong 'pho gnas thams cad du 'chi 'pho ba yin na/ gzugs kyi gnas thams cad du las nyon gyi dbang gis skye ba len pas khyab par thal/ gzugs nyer 'gro phyir mi 'ong gong 'pho 'og min mthar thug 'gro yin na/ 'og min gyi rten la myang 'das mngon du byed pas khyab pa'i phyir/ der thal/ de dang rgyun zhugs srid pa lan bdun pa ba gnyis dpe don du sbyar nas gsungs pa gang zhig /rgyun zhugs srid pa lan bdun pa ba la/ nges pa'i rgyun zhugs srid pa lan bdun pa ba yin @15a @#/ /dgos pa'i phyir/ dang po der thal/ mdzod 'grel las/ gong du 'pho ba de dag bar skabs su yongs su mya ngan las 'da' rung bar blta'o/ /'og min dang srid pa'i rtse mo'i mthar thug pa nyid ni/ de phan chad du 'gro ba med pa'i phyir/ dper na rgyun tu zhugs pa mchog tu thogs na lan bdun pa nyid bzhin no/ /zhes gsungs pa'i phyir/ rtsa bar 'dod na/ gzugs nyer 'gro'i phyir mi 'ong gnas thams cad du 'chi 'pho ba de tshangs chen du las nyon gyi dbang gis skye ba len pa yod par thal/ 'dod pa'i phyir/ 'dod mi nus te/ tshangs chen log lta'i gnas yin pa'i phyir/ kha cig /rgyun zhugs kyi 'bras bu thob nas las nyon gyi dbang gis skye srid gcig blangs pa'i nges pa'i rgyun zhugs srid pa lan bdun pa ba yod zer na/ de med par thal/ rgyun zhugs srid pa lan bdun pa ba yin na/ rgyun zhugs kyi 'bras bu thob nas 'dod par las nyon gyi dbang gis skye srid gcig ma blangs pa dgos pa'i phyir/ der thal/ legs bshad gser 'phreng las/ 'di yang rtsom pa dang po la yin gyi/ nyon mongs gcig spangs pa dang/ skye ba gcig blangs nas ni mtshan nyid 'jig go /zhes gsungs pa'i phyir/ kha cig /nyan thos kyi sgom lam bar chad med lam la gnas pa'i rgyun zhugs srid pa lan bdun pa ba yod zer na/ de 'dra'i rgyun zhugs srid pa lan bdun pa ba chos can/ 'dod nyon dang po dang bral ba'i gang zag yin par thal/ khyod nyan thos bsgom lam bar chad med lam la gnas pa'i gang zag yin pa'i phyir/ 'dod na/ 'dod par rigs mthun gyi skye srid bdun len pa'i rigs can ma yin par thal/ 'dod pa'i phyir/ 'dod mi nus te/ rgyun zhugs srid pa lan bdun pa ba yin pa'i phyir/ rtags khas/ kha cig /'dod par rigs mthun gyi skye ba bdun len nges kyi spang bya rim rgyud pa'i rgyun zhugs 'bras gnas/ nges pa'i rgyun zhugs srid pa lan bdun pa ba'i mtshan nyid zer na/ 'dod nyon dang po spangs pa'i mi'i skye srid drug len nges kyi spang bya rim rgyud pa'i rgyun zhugs 'bras gnas chos can/ mtshon bya der thal/ mtshan nyid de'i phyir/ der thal/ 'dod par mi'i skye srid drug bar srid drug dang skye ba bcu gnyis len nges kyi spang bya rim rgyud pa'i rgyun zhugs 'bras gnas @15b yin pa'i phyir/ 'dod na/ 'dod nyon dang po ma spangs par thal/ 'dod pa de'i phyir/ 'dod mi nus te/ chos can de yin pa'i phyir/ kha cig /'dod par rigs mthun gyi skye srid bdun len pa'i spang bya rim rgyud pa'i rgyun zhugs 'bras gnas/ nges pa'i rgyun zhugs srid pa lan bdun pa ba'i mtshan nyid zer na/ nges pa'i rgyun zhugs srid pa lan bdun pa ba dang rgyud gcig tu gyur pa'i 'dod nyon dang po spangs shing 'dod lha'i skye srid bdun len nges kyi spang bya rim rgyud pa'i rgyun zhugs 'bras gnas chos can/ mtshon bya der thal/ mtshan nyid de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ lha'i rten la rgyun zhugs kyi 'bras bu gsar du thob pa'i nges ba'i rgyun zhugs srid pa lan bdun pa ba de/ 'dod par mi'i rigs mthun gyi skye srid gcig blangs/ de rjes lha'i rigs mthun gyi skye srid gcig len pa'i tshul gyis lha mi'i skye srid spel mar len pa'i phyir/ 'dod na/ 'dod nyon dang po ma spangs par thal/ 'dod pa'i phyir/ khyab pa yod de/ mdzod las/ 'bras gnas sgom spang bya ma zad/ zhes gsungs pa'i phyir/ 'dod mi nus te/ chos can de yin pa'i phyir/ kha cig /'dod nyon dang po ma spangs shing 'dod par rigs mthun gyi skye srid bdun len pa'i spang bya rim rgyud pa'i rgyun zhugs 'bras gnas/ nges pa'i rgyun zhugs srid pa lan bdun pa ba'i mtshan nyid zer na/ nges pa'i rgyun zhugs srid pa lan bdun pa ba dang rgyud gcig tu gyur pa'i 'dod nyon dang po'i dngos gnyen bar chad med lam la gnas pa'i 'dod lha'i rigs mthun gyi skye srid bdun len nges kyi spang bya rim rgyud pa'i rgyun zhugs 'bras gnas chos can/ mtshon bya der thal/ mtshan nyid de'i phyir/ der thal/ chos can de yin pa'i phyir/ 'dod na/ de chos can/ 'dod pa la 'dun pa'i 'dod sred mngon gyur ba chen po'i chen po dang ma bral bar thal/ 'dod pa'i phyir/ 'dod mi nus te/ 'dod nyon dang po'i dngos gnyen bar chad med lam la gnas pa'i gang zag yin pa'i phyir/ kho na re/ 'dod nyon mngon gyur ba dang po dang yang ma bral zhing srid pa nyer brgyad len pa'i spang bya rim rgyud pa'i rgyun zhugs 'bras gnas/ nges pa'i rgyun zhugs srid pa lan bdun pa ba'i mtshan nyid zer na/ 'dod sred mngon @16a@#/ /gyur ba dang po dang ma bral zhing/ 'dod par mi'i rigs mthun gyi skye srid bdun len/ lha'i rigs mthun gyi skye srid bdun mi len pa'i spang bya rim rgyud pa'i rgyun zhugs 'bras gnas chos can/ mtshon bya der thal/ mtshan nyid de'i phyir/ des srid pa nyer brgyad len par thal/ mi'i skye srid bdun/ bar srid bdun/ 'chi srid bdun/ sngon dus kyi srid pa bdun dang nyer brgyad len pa'i phyir/ der thal/ chos can de yin pa'i phyir/ der thal/ de yod pa'i phyir/ der thal/ mi'i rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba dang rgyud gcig tu gyur pa'i 'dod sred dang po dang ma bral zhing/ lha'i rigs mthun gyi skye srid gcig tsam blangs pa'i spang bya rim rgyud pa'i rgyun zhugs 'bras gnas yod pa'i phyir/ rtsa bar 'dod na/ de chos can/ lha'i rigs mthun gyi skye srid bdun len nges yin par thal/ nges pa'i rgyun zhugs srid pa lan bdun pa ba yin pa'i phyir/ rtags khas/ kha cig /nges pa'i rgyun zhugs srid pa lan bdun pa ba 'dod par rigs mthun gyi skye srid brgyad len pa yod zer na/ de med par thal/ mdo las/ 'phags pa'i gang zag lta ba phun sum tshogs pa srid pa brgyad pa mngon par 'grub pa'i gnas med cing skabs med do/ /zhes gsungs pa'i phyir/ kha cig /mi'i rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba des/ dang por lha'i skye srid gcig /de rjes mi'i skye srid gcig len pa'i tshul gyis lha mi'i skye srid spel mar blangs nas/ mthar mi'i rten la rgyun zhugs kyi 'bras bu gsar du thob pa'i mi'i lus rten de la myang 'das mngon du byed pa yin zer na/ 'o na/ mi'i rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba des/ lha mi'i skye srid spel mar blangs nas/ slar yang dang por mi'i rten la rgyun zhugs kyi 'bras bu gsar du thob pa'i mi'i lus rten de nyid len pa yod par thal/ khyod kyi dam bca' 'thad pa'i phyir/ 'dod mi nus te/ des mi'i rten la rgyun zhugs kyi 'bras bu gsar du thob pa'i mi'i lus rten de nyid dor nas/ slar lus rten de len pa med pa'i phyir/ der thal/ de lus rten de nyid slar yang len mi nus pa'i phyir/ kha cig /mi'i @16b rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba des/ dang por mi'i skye srid drug /de rjes lha'i skye srid bdun/ de nas mi'i skye srid gcig blangs nas/ rten de la myang 'das mngon du byed pa dang/ lha la de las bzlog de byed pa yin zer na/ de mi 'thad par thal/ mi'i rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba des/ dang por 'dod par lha'i rigs mthun gyi skye srid gcig blangs/ de rjes mi'i rigs mthun gyi skye srid gcig len pa'i tshul gyis lha mi'i skye srid spel mar blangs nas mthar mi'i rten la myang 'das mngon du byed pa'i phyir/ der thal/ kun las btus las/ lha dang mi dag gi nang du yan man du lan bdun 'khor te/ zhes gsungs pa'i phyir/ kha cig /mi'i rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba des/ dang por lha'i skye srid gcig len/ de rjes mi'i skye srid gcig len pa de'i tshe 'dod pa'i rigs nas rigs su skye ba ma yin par thal/ des lha mi'i skye srid rigs mi mthun pa len pa'i phyir zer na/ ma khyab/ 'o na/ mi'i rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba des/ dang por mi'i skye srid drug de rjes lha'i skye srid bdun len pa'i tshe na/ rigs nas rigs su skye ba ma yin par thal/ des lha mi'i skye srid rigs mi mthun pa len pa'i phyir/ 'dod na/ gcig shos la yang 'dod byas na ci gsung/ gnyis pa rang lugs la/ 'dod sred mngon gyur ba dang po tsam la yang chags bral ma byas shing/ 'dod par rigs mthun gyi skye srid bdun len pa'i rigs can gyi tshe de la rgyun zhugs kyi 'bras bu gsar du thob pa'i spang bya rim rgyud pa'i rgyun zhugs 'bras gnas/ rgyun zhugs srid pa lan bdun pa ba'i mtshan nyid/ de la nges pa'i rgyun zhugs srid pa lan bdun pa ba dang/ ma nges pa'i rgyun zhugs srid pa lan bdun pa ba gnyis/ 'dod pa la 'dun pa'i 'dod sred mngon gyur ba dang po tsam la yang chags bral ma byas shing/ 'dod par mi'i rigs mthun gyi skye srid bdun/ lha'i rigs mthun gyi skye srid bdun/ de dag gi bar srid bdun bdun dang @17a @#/ /srid pa nyer brgyad len pa'i rgyun zhugs srid pa lan bdun pa ba/ nges pa'i rgyun zhugs srid pa lan bdun pa ba'i mtshan nyid/ de la lha'i rten can dang/ mi'i rten can gnyis yod/ mi'i rten la rgyun zhugs kyi 'bras bu gsar du thob pa'i rgyun zhugs srid pa lan bdun pa ba des/ dang por lha'i rigs mthun gyi skye srid gcig blangs/ de rjes mi'i rigs mthun gyi skye srid gcig len pa'i tshul gyis lha mi'i skye srid spel mar blangs nas/ mthar mi'i rten la myang 'das mngon du byed/ lha'i rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba des dang por mi'i rigs mthun gyi skye srid gcig blangs/ de rjes lha'i rigs mthun gyi skye srid gcig len pa'i tshul gyis lha mi'i skye srid spel mar blangs nas/ mthar lha'i rten la myang 'das mngon du byed/ nges pa'i rgyun zhugs srid pa lan bdun pa ba des srid pa nyer brgyad nges par len dgos te/ de ltar myong nges kyi las bsags shing/ de ma blangs bar du las de sbyong mi nus pa'i phyir/ dper na/ sbrul gom pa bdun pas zin pa dang/ rims nyin bdun pas thebs pa lta bu yin pa'i phyir/ des srid pa nyer brgyad nges par len dgos kyang/ srid pa lan bdun pa yin pa mi 'gal te/ bdun tshan du mtshungs pa'i rgyu mtshan gyis de ltar bshad pa'i phyir/ dper na/ gnas bdun la mkhas pa'i dge slong dang/ shing 'dab ma bdun pa la/ dang po'i mkhas bya'i gnas de la sum cu so lnga yod pa dang/ shing de la 'dab ma brgya phrag du ma yod kyang/ bdun tshan du mtshungs pa'i phyir gnas bdun la mkhas pa'i dge slong dang/ shing 'dab ma bdun pa zhes brjod pa lta bu yin pa'i phyir/ des srid pa nyer brgyad las lhag pa len mi dgos te/ des srid pa nyer brgyad blangs nas dgra bcom pa'i 'bras bu thob pa'i dbang po smin nus pa'i phyir/ 'dod pa la 'dun pa'i 'dod sred mngon gyur ba dang po tsam la yang chags bral ma byas shing/ 'dod par rigs mthun gyi skye srid bdun len par ma nges pa'i rgyun zhugs srid pa lan bdun pa ba/ ma nges pa'i rgyun zhugs srid pa lan bdun pa ba'i mtshan nyid/ spyir lan bdun pa ba tsam la dbye na/ skye 'phags gnyis yod/ rgyun zhugs srid @17b pa lan bdun pa ba'i mtshan nyid/ dbye ba/ skye ba len tshul sogs de ltar 'thad de/ dge 'dun nyi shu chen mo las/ lan bdun pa la skye 'phags gnyis/ 'phags pa la yang nges ma nges/ rnam gnyis nyer brgyad len na yang/ bdun tshan 'dra phyir bdun zhes dang/ dang por thob pa'i rten de la/ /myang 'das mngon du byed pa de/ /gong 'og gnyis kyi gzhung rnams su/ /sku mched gnyis kyi dgongs par sgrub/ /zhes gsungs pa'i phyir/ gsum pa rtsod pa spong ba la/ kha cig /rgyun zhugs srid pa lan bdun pa ba yin na/ nges pa'i rgyun zhugs srid pa lan bdun pa ba yin dgos par thal/ de yin na/ 'bras gnas sgom spangs bya ma zad/ zhes pa'i skabs nas dngos su bstan pa'i rgyun zhugs srid pa lan bdun pa ba yin dgos/ de'i skabs nas dngos su bstan pa'i rgyun zhugs srid pa lan bdun pa ba yin na/ nges pa'i rgyun zhugs srid pa lan bdun pa ba yin dgos pa'i phyir/ phyi ma sla/ dang po der thal/ de rgyun zhugs srid pa lan bdun pa ba dngos su 'chad byed kyi gzhung yin pa gang zhig /de las gzhan pa'i rgyun zhugs srid pa lan bdun pa ba dngos su 'chad byed kyi mngon pa 'og ma'i gzhung tshig med pa'i phyir zer na/ ma khyab/ 'o na/ 'bras gnas sgom spangs bya ma zad zhes pa'i thad du/ mdzod 'grel las/ mchog tu thogs na lan bdun pa gzhan yang yod mod kyi 'dir ma nges pa ma brjod do/ /zhes gsungs pa la 'brel med par thal/ khyod kyi lugs la rgyun zhugs srid pa lan bdun pa ba yin na/ nges pa'i rgyun zhugs srid pa lan bdun pa ba yin pas khyab pa gang zhig /ma nges pa'i rgyun zhugs mchog tu thogs na lan bdun pa ba yin na/ rgyun zhugs srid pa lan bdun pa ba ma yin dgos pa'i phyir/ dang po khas/ phyi ma ma grub na/ 'khor gsum yod do/ /'dod mi nus so/ /gzhan yang/ /rgyun zhugs srid pa lan bdun pa ba yin na/ nges pa'i rgyun zhugs srid pa lan bdun pa ba yin pas ma khyab par thal/ 'dod par skye srid gnyis tsam blangs nas myang 'das mngon du byed pa'i rgyun zhugs srid pa lan bdun pa ba yod pa'i phyir/ der thal/ legs bshad gser 'phreng las/ mdor na sgom spangs gcig kyang ma spangs pa'i rgyun zhugs rim rgyud pa 'dod par skye ba gnyis len pa ni re ltar thogs na @18a @#/ /lan bdun pa spyi yin la/ khyad par lan bdun pa'i nges pa ni brjod zin to/ /zhes gsungs pa'i phyir/ kha cig /rgyun zhugs srid pa lan bdun pa ba la 'dod pa la 'dun pa'i 'dod sred mngon gyur ba dang po dang ma bral bas ma khyab par thal/ 'bras gnas sgom spangs bya ma zad/ zhes 'dod nyon dang po ma spangs pa dgos par gsungs pa yin gyi/ 'dod pa la 'dun pa'i 'dod sred mngon gyur ba dang po dang ma bral ba dgos par dngos su gsungs pa med pa'i phyir/ zer na/ ma khyab/ 'o na/ 'dod pa la 'dun pa'i 'dod sred dgu pa mngon gyur ba spangs shing/ de'i sa bon ma spangs pa'i phyir mi 'ong 'bras gnas de 'dod par las nyon gyi dbang gis skye ba len pa'i cha rkyen zad par spangs pa dang/ 'dod par las nyon gyi dbang gis skye ba mi len pa'i rigs can ma yin par thal/ 'dod nyon dang po'i dngos gnyen bar chad med lam la gnas pa'i rgyun zhugs srid pa lan bdun pa ba de/ 'dod par rigs mthun gyi skye srid bdun len pa'i rigs can yin pa'i phyir/ der thal/ rgyun zhugs srid pa lan bdun pa ba yin pa'i phyir/ 'dod na/ de 'dra ba'i phyir mi 'ong chos can/ 'dod par las nyon gyi dbang gis skye ba len pa'i cha rkyen zad par spangs pa dang/ 'dod par las nyon gyi dbang gis skye ba mi len pa'i rigs can yin par thal/ khyod phyir mi 'ong yin pa'i phyir/ kha cig /nges pa'i rgyun zhugs srid pa lan bdun pa ba des 'dod par rigs mthun gyi skye srid brgyad len pa yod par thal/ des 'dod par mi'i rigs mthun gyi skye srid bdun/ lha'i rigs mthun gyi skye srid bdun len pa gang zhig /de gnyis 'dod par skye ba len pa'i skye srid du rigs mthun pa'i phyir zer na/ ma khyab/ 'o na/ des 'dod pa'i rigs mthun gyi skye srid brgyad len pa yod par thal/ des 'dod pa'i mi'i skye srid bdun/ lha'i skye srid bdun len pa yod pa gang zhig /de gnyis 'dod pa'i skye srid du rigs mthun pa'i phyir/ 'dod na/ mi 'thad par thal/ mdo las/ 'phags pa'i gang zag lta ba phun sum tshogs pa srid pa brgyad pa mngon par 'grub pa'i gnas med cing skabs med do/ /zhes gsungs pa'i phyir/ kha cig /nges pa'i rgyun zhugs srid pa lan bdun pa ba de/ srid pa nyer brgyad len nges ma yin par thal/ des lha mi'i skye srid bsdus te bdun len pa'i phyir/ der thal/ lung las/ lha @18b dang mi rnams kyi nang du lan bdun 'khor te/ zhes gsungs pa'i phyir/ zer na/ ma khyab/ 'dod mi nus te/ des mi'i rigs mthun gyi skye srid bdun/ lha'i rigs mthun gyi skye srid bdun len pa'i phyir/ der thal/ 'od bsrungs sde pas 'dod pa'i lung las/ lha dag gi nang du lan bdun/ mi dag gi nang du lan bdun 'khor te/ zhes gsungs pa'i phyir/ kha cig /nges pa'i rgyun zhugs srid pa lan bdun pa ba yin na/ phyir 'ong tshe gcig bar chad gcig pa'i 'bras bu mngon du byed nges yin dgos par thal/ de yin na/ phyir 'ong gi 'bras bu mngon du byed nges yin dgos pa'i phyir/ zer na/ ma khyab/ 'dod na/ mi'i rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba chos can/ der thal/ de'i phyir/ 'dod na/ 'dod lha'i rten la myang 'das mngon du byed par thal/ 'dod pa'i phyir/ khyab pa yod de/ dge 'dun nyi shu chen mo las/ phyir 'ong bar chad gcig pa ni/ /nyon mongs bdun nam brgyad spangs shing/ /tshe 'phos 'dod lha'i rten de la; ;myang 'das mngon du byed par nges/ /zhes gsungs pa'i phyir/ 'dod mi nus te/ mi'i rten la myang 'das mngon du byed pa'i phyir/ der thal/ chos can de yin pa'i phyir// ! //rigs nas rigs skye la mtha' dpyad pa la gsum las/ dang po la/ kha cig /rgyun zhugs rigs nas rigs skye dang/ rgyun zhugs 'bras gnas tsam po ba'i gzhi mthun yod zer na/ de mi 'thad par thal/ de yin na/ rgyun zhugs 'bras gnas khyad par can yin dgos pa'i phyir/ der thal/ mdzod 'grel las/ sngon rnam pa gsum dang bzhi spangs pa 'am bdun dang brgyad spangs pa'i 'bras bu thob pa ni ji srid du 'bras bu khyad par can gyi lam mngon du ma byas pa de srid du rigs nas rigs su skye ba'am bar chad gcig pa ma yin no/ /zhes gsungs pa'i phyir/ kha cig /rgyun zhugs rigs nas rigs skye la rgyun zhugs 'bras gnas khyad par can gyis khyab kyang/ de la phyir 'ong zhugs pas ma khyab zer na/ de la phyir 'ong zhugs pas khyab par thal/ de yin na/ rang gi 'bras bu gong ma thob pa'i phyir du brtson bzhin pas khyab/ rang gi 'bras bu gong ma thob phyir du brtson bzhin pa'i rgyun zhugs rigs nas rigs skye yin na/ phyir 'ong gi 'bras bu thob phyir du brtson bzhin pa yin dgos pa'i phyir/ dang po der thal/ de yin na/ rgyun zhugs @19a @#/ /'bras gnas khyad par can yin dgos pa'i phyir/ khyab ste/ mdzod las/ 'bras thob 'bras bu'i khyad par gyis/ /lam thob med pa de yi phyir/ /'bras gnas khyad par bya ba'i phyir/ /mi rtson pa ni zhugs ma yin/ /zhes gsungs pa'i phyir/ kha cig /nyan thos mthong lam rnam grol lam la gnas pa'i rgyun zhugs rigs nas rigs skye yod zer na/ de med par thal/ rgyun zhugs rigs nas rigs skye yin na/ rgyun zhugs 'bras gnas khyad par can yin pas khyab/ nyan thos mthong lam rnam grol lam la gnas pa'i rgyun zhugs 'bras gnas khyad par can med pa gong du bsgrub zin pa'i phyir/ kha cig /'dod nyon gsum pa dang bzhi pa gang rung spangs shing/ 'dod par rigs mthun gyi skye srid gnyis sam gsum gang rung len pa'i spang bya rim rgyud pa'i rgyun zhugs 'bras gnas khyad par can/ rgyun zhugs rigs nas rigs skye'i mtshan nyid/ zer na/ 'dod nyon gsum pa spangs shing/ bzhi pa ma spangs pa'i rgyun zhugs rigs nas rigs skye chos can/ mtshan nyid der thal/ mtshon bya de'i phyir/ der thal/ chos can de yin pa'i phyir/ der thal/ de yod pa'i phyir/ mdzod las/ rnam gsum rnam bzhi las grol ba zhes gdam nga can du gsungs pa'i phyir/ 'dod mi nus te/ chos can de yin pa'i phyir/ kha cig /'dod pa la 'dun pa'i 'dod sred lnga pa mngon gyur ba spangs pa'i rgyun zhugs rigs nas rigs skye yod zer na/ de med par thal/ des 'dod pa la 'dun pa'i 'dod sred lnga pa mngon gyur ba spangs na drug pa tshe de la spong bar 'gyur/ drug pa spangs na phyir 'ong du 'gyur bas/ phyir 'ong 'dod par rigs mthun gyi skye srid gnyis sam gsum len pa mi 'thad pa'i phyir/ dang po der thal/ drug pa spangs pa la khams las 'da' mi dgos shing/ 'bras bu khyad par can phyir 'ong gi 'bras bu thob du yod pas de la brtson par 'gyur ba'i phyir/ der thal/ mdzod 'grel las/ ci'i phyir rnam pa lnga spang [@#spong] ba'i phyir ma yin zhe na/ de spangs na drug pa'ang gdon mi za bar spong ba'i phyir/ zhes dang/ khams las mi 'da' ba'i phyir/ zhes gsungs pa'i phyir/ kha cig /lha'i rten la rgyun zhugs kyi 'bras bu gsar du thob pa'i rgyun zhugs rigs nas rigs skyes lha'i skye srid gsum las lhag pa mi len kyang/ lha mi'i skye srid rigs mi mthun pa bzhi len pa yod zer na/ de 'dra @19b ba'i rgyun zhugs rigs nas rigs skye chos can/ khyod rigs nas rigs skye ma yin par thal/ lha mi'i skye srid rigs mi mthun pa bzhi len pa'i rgyun zhugs yin pa'i phyir/ rtags dngos// ! //gnyis pa rang lugs la/ 'dod pa la 'dun pa'i 'dod sred mngon gyur ba gsum pa spangs shing/ 'dod par rigs mthun gyi skye srid gnyis nges par len pa'i tshe de la rgyun zhugs kyi 'bras bu gsar du thob pa'i spang bya rim rgyud pa'i rgyun zhugs 'bras gnas khyad par can/ rgyun zhugs rigs nas rigs skye'i mtshan nyid/ de la dbye na/ lha'i rten can gyi rgyun zhugs rigs nas rigs skye dang/ mi'i rten can gyi rgyun zhugs rig nas rigs skye gnyis/ de'i spangs rtogs kyi khyad par yod de/ spangs pa'i khyad par ni/ 'dod nyon gsum pa nges par spangs pas khyab/ bzhi pa spangs ma spangs ci rigs yod/ 'dod pa la 'dun pa'i 'dod sred lnga pa mngon gyur ba ma spangs pas khyab/ rtogs pa'i khyad par ni/ de dag gi spong gnyen du gyur pa'i zag med kyi dbang po thob ma thob ci rigs yod/ skye ba'i khyad par ni/ 'dod par rigs mthun gyi skye srid gnyis len pas khyab/ gsum pa len mi len ci rigs yod/ bzhi pa nges par mi len pas khyab/ rigs nas rigs skye'i mtshan nyid/ spangs rtogs kyi khyad par/ skye ba len tshul sogs de ltar 'thad de/ dge 'dun nyi shu chen mo las; nyon mongs gsum pa skye ba gnyis/ rim bzhin nges spangs nges par len/ /spang bya bzhi pa skye ba ni/ /gsum pa blangs dang ma spangs 'dra/ /spang bya lnga pa skye ba bzhi/ /nges par ma spangs ma blangs pa/ /rigs nas rigs skye'i khyad chos su/ /mkhas pa rnams kyis shes par bya/ /zhes gsungs pa'i phyir/ gsum pa rtsod pa spong ba la/ kho na re/ rgyun zhugs rigs nas rigs skye la chags bral sngon song bzhag du yod par thal/ sngon rnam pa gsum dang bzhi spangs pa'am zhes gsungs pa'i phyir zer na/ ma khyab/ 'dod mi nus so/ /kho na re/ rgyun zhugs srid pa lan bdun pa ba yin na/ tshe de la rgyun zhugs kyi 'bras bu gsar du thob pa'i brtsom pa dang po ba yin mi dgos par thal/ rgyun zhugs rigs nas rigs skye yin na/ tshe de la rgyun zhugs kyi 'bras bu gsar du thob pa'i brtsom pa dang po ba yin mi dgos pa'i phyir/ der thal/ rgyun zhugs rigs nas rigs skye rgyun zhugs kyi 'bras bu thob nas skye ba gcig blangs pa na/ rigs nas rigs @20a @#/ /skye'i mtshan nyid mi 'jig pa'i phyir/ der thal/ rgyun zhugs rigs nas rigs skye 'dod par rigs mthun gyi skye srid gnyis len pa yang yod/ gsum pa len pa'ang yod pa'i phyir zer na/ ma khyab/ ma grub na der thal/ mdzod las/ tshe gnyis gsum du rigs nas rigs zhes dang/ dge 'dun nyi shu chen mo las kyang/ de dang mthun par gdam nga can du gsungs pa'i phyir/ rtsa bar 'dod mi nus te bkag zin/ kha cig /'dod par lha mi'i skye srid rigs mi mthun pa bzhi len pa'i rgyun zhugs rigs nas rigs skye yod par thal/ 'dod par lha mi'i skye srid rigs mi mthun pa gnyis len pa'i lan cig phyir 'ong yod pa'i phyir zer na ma khyab/ ma grub na der thal/ mdzod 'grel las/ 'dod pa la spyod pa'i lha dag gi nang du song ste/ mi dag gi nang du lan cig phyir 'ong ba'i phyir/ lan cig phyir 'ong ba ste/ zhes gsungs pa'i phyir/ kha cig /spang bya rim rgyud pa'i rgyun zhugs 'bras gnas yin na/ rgyun zhugs srid pa lan bdun pa ba dang/ rgyun zhugs rigs nas rigs skye gang rung yin pas khyab zer na/ nges pa'i rgyun zhugs srid pa lan bdun pa ba dang rgyud gcig tu gyur pa'i 'dod nyon gsum pa spangs shing/ 'dod par rigs mthun gyi skye srid gnyis blangs zin pa'i rgyun zhugs 'bras gnas chos can/ der thal/ de'i phyir/ rtags gsal chos can gyis bsgrub bo// ! //gnyis pa phyir 'ong zhugs 'bras bshad pa la/ zhugs pa bshad pa/ 'bras gnas bshad pa gnyis las/ dang po la/ kha cig /nyan thos kyi sbyor lam stan gcig la gnas pa'i phyir 'ong zhugs pa med zer na/ de yod par thal/ nyan thos kyi sbyor lam stan gcig la gnas pa'i chags bral sngon song gi phyir 'ong zhugs pa yod pa'i phyir/ der thal/ rnam bshad snying po rgyan las/ chags bral sngon song gi phyir 'ong zhugs pa'i sa 'tshams rgyun zhugs zhugs pa dang mtshungs par gsungs pa'i phyir/ rang gi lugs la/ 'dod pa la 'dun pa'i 'dod sred drug pa mngon gyur ba la chags bral byas pas rab tu phye ba'i dge sbyong tshul gyi 'bras bu thob phyir du brtson bzhin pa'i rab tu phye ba'i zhugs pa'i gang zag /phyir 'ong zhugs pa'i mtshan nyid/ de la dbang po'i sgo nas dbye na/ der gyur pa'i dbang rtul dad pa'i rjes 'brang dang/ dbang @20b rnon chos kyi rjes 'brang gnyis yod/ spang bya spong tshul gyi sgo nas dbye na/ der gyur pa'i chags bral sngon song gi phyir 'ong zhugs pa dang/ 'bras bu rim rgyud pa'i phyir 'ong zhugs pa gnyis yod/ chags bral sngon song gi phyir 'ong gi 'bras bu thob phyir du brtson bzhin pa'i phyir 'ong zhugs pa/ chags bral sngon song gi phyir 'ong zhugs pa'i mtshan nyid/ spang bya rim rgyud pa'i rgyun zhugs 'bras gnas khyad par can/ 'bras bu rim rgyud pa'i phyir 'ong zhugs pa'i mtshan nyid/ dang po'i sa 'tshams rgyun zhugs zhugs pa dang mtshungs/ gnyis pa'i sa 'tshams spang bya rim rgyud pa'i rgyun zhugs 'bras gnas khyad par can gyi rtogs pa thob pa nas/ 'dod nyon drug pa'i dngos gnyen bar chad med lam la gnas kyi bar du yod/ phyir 'ong zhugs pa'i spangs rtogs kyi khyad par yod de/ spangs pa'i khyad par 'dod pa la 'dun pa'i 'dod sred mngon gyur ba dang po spangs pa nas brgyad pa'i bar spangs ma spangs ci rigs yod/ dgu pa nges par ma spangs pas khyab pa'i phyir/ rtogs pa'i khyad par de dag gi gnyen por gyur pa'i zag med kyi dbang po thob ma thob ci rigs yod/ gsum pa rtsod pa spong ba la/ kha cig /nyan thos sbyor lam stan gcig la gnas pa'i phyir 'ong zhugs pa'i rgyud la spangs pa yod par thal/ de'i spangs rtogs kyi khyad par rtsi rung ba'i phyir/ zer na ma khyab/ 'dod mi nus te/ de'i rgyud la 'gog bden med pa'i phyir zer na/ 'o na/ so so skye bo'i dge slong rnam dag gi rgyud la spangs pa yod par thal/ de'i rgyud la pham ba bzhi spangs pa'i spangs pa yod pa'i phyir/ der thal/ des pham pa bzhi spangs pa'i phyir/ khyab pa rim bzhin song/ 'dod na/ de'i rgyud la 'gog bden yod par thal lo/ /kha cig bsam gtan dang po'i nyer bsdogs sbyor ba mtha'i yid byed chen po'i chen po thob pa'i chags bral sngon song gi phyir 'ong zhugs pa yod par thal/ 'dod pa la 'dun pa'i 'dod sred brgyad pa mngon gyur ba spangs pa'i phyir 'ong zhugs pa yod pa'i phyir/ zer na ma khyab/ 'dod na/ 'dod pa la 'dun pa'i 'dod sred dgu pa mngon gyur ba spangs pa'i phyir 'ong zhugs pa yod par thal lo// ! //gnyis pa 'bras gnas bshad pa la/ rnam pa gsum las dang po la kha cig /'dod nyon drug pa spangs @21a @#/ /pas rab tu phye ba'i dge sbyong tshul gyi 'bras bu la gnas pa'i gang zag /phyir 'ong 'bras gnas kyi mtshan nyid zer na/ nyan thos mthong lam rnam grol lam la gnas pa'i phyir 'ong 'bras gnas chos can/ mtshan nyid der thal/ mtshon bya de'i phyir/ der thal/ chos can de yin pa'i phyir/ der thal/ de yod pa'i phyir/ 'dod na/ 'dod pa'i sas sdus kyi gang zag gi bdag 'dzin drug pa spangs par thal/ 'dod pa'i phyir/ 'dod na/ 'dod pa'i sas sdus kyi gang zag gi bdag 'dzin lhan skyes drug pa spangs par thal/ 'dod pa'i phyir/ 'dod mi nus te/ nyan thos mthong lam pa yin pa'i phyir/ kha cig lan cig phyir 'ong yin na/ 'dod par las nyon gyis lan cig phyir 'ong yin pas khyab zer na/ phyir mi 'ong gi 'bras bu mngon du byed kha ma'i phyir 'ong chos can/ der thal/ de'i phyir/ der thal/ phyir 'ong yin pa'i phyir/ 'dod na/ phyir mi 'ong 'dod par las nyon gyi dbang gis skye ba len pa yod par thal/ 'dod pa'i phyir/ 'dod mi nus so/ /kha cig /'bras bu gong ma thob phyir du brtson bzhin pa'i phyir 'ong 'bras gnas/ phyir 'ong 'bras gnas khyad par can gyi mtshan nyid/ de ltar mi brtson pa'i phyir 'ong 'bras gnas/ phyir 'ong 'bras gnas tsam po'i mtshan nyid zer na/ nyan thos mthong lam rnam grol lam la gnas pa'i phyir 'ong chos can/ mtshon bya dang po der thal/ mtshan nyid dang po de'i phyir/ der thal/ 'bras bu gong ma dgra bcom pa'i 'bras bu thob phyir du brtson bzhin pa'i phyir 'ong 'bras gnas yin pa'i phyir/ der thal/ dgra bcom pa'i 'bras bu thob bya'i gtso bor byas nas don du gnyer ba'i phyir 'ong yin pa'i phyir/ der thal/ thar pa thob bya'i gtso bor byas nas don du gnyer ba'i phyir 'ong yin pa'i phyir/ der thal/ phyir 'ong yin pa'i phyir/ rtsa bar 'dod mi nus so/ /kha cig /mthong lam gyi snga rol tu rang gi zhugs pa'i spang bya'i gtso bo spangs pa'i phyir 'ong 'bras gnas/ chags bral sngon song gi phyir 'ong 'bras gnas kyi mtshan nyid zer na/ nyan thos mthong lam rnam grol lam la gnas pa'i phyir 'ong 'bras gnas chos can/ mtshan nyid der thal/ mtshon bya de'i phyir/ chos can de yin pa'i phyir te/ de yod pa'i phyir/ 'dod na/ des nyon sgrib spangs par thal/ 'dod pa gang zhig /nyon sgrib de'i zhugs pa'i spang bya'i gtso bo yin pa'i phyir/ phyi ma @21b der thal/ thar pa de'i zhugs pa'i thob bya'i gtso bo yin pa'i phyir/ 'dod na/ mi 'thad par thal/ chos can de yin pa'i phyir/ kha cig /chags bral sngon song gi phyir 'ong med zer na/ de yod par thal/ phyir 'ong gi 'bras bu de 'dod pa la 'dun pa'i 'dod sred drug pa mngon gyur ba spangs pas rab tu phye ba'i dge sbyong tshul gyi 'bras bu yin pa gang zhig /mthong lam gyi snga rol tu 'dod pa la 'dun pa'i 'dod sred drug pa mngon gyur ba la chags bral byas pa'i phyir 'ong yod pa'i phyir/ khyab ste/ phyir mi 'ong gi 'bras bu de 'dod pa la 'dun pa'i 'dod sred dgu pa mngon gyur ba spangs pas rab tu phye ba'i dge sbyong tshul gyi 'bras bu yin pa gang zhig /mthong lam gyi snga rol tu 'dod pa la 'dun pa'i 'dod sred dgu pa mngon gyur ba la chags bral byas pa'i phyir mi 'ong yod na/ chags bral sngon song gi phyir mi 'ong yod dgos pa'i phyir/ gzhan yang/ chags bral sngon song gi phyir 'ong 'bras gnas yod par thal/ mthong lam gyi snga rol du 'dod pa la 'dun pa'i 'dod sred drug pa mngon gyur ba la chags bral byas pa'i phyir 'ong yod pa gang zhig /'bras bu thod brgal ba'i phyir 'ong 'bras gnas yod pa'i phyir/ gzhan yang chags bral sngon song gi phyir 'ong 'bras gnas yod par thal/ chags bral sngon song gi phyir 'ong tshe gcig bar chad gcig pa yod pa'i phyir/ der thal/ mdzod 'grel las/ sngon rnam pa gsum dang bzhi spangs pa'am bdun dang brgyad spangs pa/ zhes sogs gsungs pa'i phyir/ khyab pa yod par thal/ de'i don 'chad pa na/ legs bshad gser 'phreng las/ lung 'dis bar chad gcig pa la'ang chags bral sngon song yod par bstan to/ /zhes gsungs pa'i phyir/ kha cig /chags bral sngon song gi phyir 'ong 'bras gnas khyad par can de/ chags bral sngon song gi phyir mi 'ong zhugs pa yin zer na/ de'i stobs kyis thob pa'i phyir mi 'ong 'bras gnas de chags bral sngon song gi phyir mi 'ong yin par thal/ dam bca' 'thad pa'i phyir/ 'dod na/ de 'dra'i phyir mi 'ong 'bras gnas chos can/ mthong lam gyi snga rol tu 'dod pa la 'dun pa'i 'dod sred dgu pa mngon gyur ba la chags bral byas pa'i phyir mi 'ong yin par thal/ khyod chags bral sngon song gi phyir mi 'ong yin pa'i phyir/ 'dod mi nus te/ chos can de yin pa'i phyir/ kha cig @22a @#/ /phyir mi 'ong gi 'bras bu thob pa la 'dod nyon dgu pa kho nas bar du chod cing/ dgra bcom pa'i 'bras bu mngon du byed pa la skye ba gcig kho nas bar du chod pa'i phyir 'ong 'bras gnas khyad par can/ phyir 'ong tshe gcig bar chad gcig pa'i mtshan nyid zer na/ 'dod nyon brgyad pa spangs shing 'dod par mi'i skye srid gcig kho na blangs te rten de la myang 'das mngon du byed pa'i phyir 'ong 'bras gnas khyad par can/ mtshon bya der thal/ mtshan nyid de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ mi'i rten la rgyun zhugs kyi 'bras bu gsar du thob pa'i nges pa'i rgyun zhugs srid pa lan bdun pa ba des/ mi'i rten la myang 'das mngon du byed pa'i phyir/ 'dod na/ 'dod lha'i rten la myang 'das mngon du byed par thal/ 'dod pa'i phyir/ khyab pa gong du grub zin/ 'dod mi nus te/ mi'i rten la myang 'das mngon du byed pa'i phyir/ kha cig /phyir 'ong mthong chos zhi yod zer na/ de med par thal/ mthong lam thob pa'i tshe de la dgra bcom pa'i 'bras bu mngon du byed nges kyi phyir 'ong yin na/ tshe de la phyir mi 'ong gi 'bras bu mngon du byed pas khyab/ mthong lam thob pa'i tshe de la phyir mi 'ong gi 'bras bu thob nas tshe de la dgra bcom pa'i 'bras bu mngon du byed pa'i phyir mi 'ong yin na/ phyir mi 'ong mthong chos zhi yin dgos pa'i phyir/ gnyis pa rang gi lugs la/ 'dod pa la 'dun pa'i 'dod sred drug pa mngon gyur ba spangs pas rab tu phye ba'i dge sbyong tshul gyi 'bras bu la gnas pa'i gang zag /phyir 'ong 'bras gnas kyi mtshan nyid/ de la dbang po'i sgo nas dbye na/ der gyur pa'i dbang rtul dad mos pa dang/ dbang rnon mthong thob pa gnyis/ sbyor ba'i sgo nas dbye na/ der gyur pa'i khyad par can dang/ tsam po ba gnyis/ spang bya'i sgo nas dbye na/ der gyur pa'i chags bral sngon song dang/ 'bras bu rim rgyud pa gnyis/ rang gi 'bras bu gong ma thob phyir du brtson bzhin pa'i sbyor ba rgyun chags su gnas pa'i phyir 'ong 'bras gnas/ phyir 'ong 'bras gnas khyad par can gyi mtshan nyid/ de ltar mi gnas pa'i phyir 'ong 'bras gnas/ phyir 'ong 'bras gnas tsam po ba'i mtshan nyid/ mthong lam gyi @22b snga rol tu 'dod sred drug pa mngon gyur ba spangs pa'i phyir 'ong 'bras gnas/ chags bral sngon song gi phyir 'ong 'bras gnas kyi mtshan nyid/ rang dang rgyud gcig tu gyur pa'i rgyun zhugs 'bras gnas khyad par can gyi stobs kyis thob pa'i phyir 'ong 'bras gnas/ 'bras bu rim rgyud pa'i phyir 'ong 'bras gnas kyi mtshan nyid/ 'dod pa la 'dun pa'i 'dod sred bdun pa mngon gyur ba spangs shing 'dod lha'i skye srid gcig blangs te rten de la myang 'das mngon du byed pa'i phyir 'ong 'bras gnas khyad par can/ phyir 'ong tshe gcig bar chad gcig pa'i mtshan nyid/ gsum pa rtsod pa spong ba la/ kho na re/ mthong lam gyi snga rol tu 'dod pa la 'dun pa'i 'dod sred drug pa mngon gyur ba la chags bral byas pa'i phyir 'ong yod na/ chags bral sngon song gi phyir 'ong yod mi dgos par thal/ mthong lam gyi snga rol du 'dod pa la 'dun pa'i 'dod sred lnga pa mngon gyur ba la chags bral byas pa'i rgyun zhugs yod na/ chags bral sngon song gi rgyun zhugs yod mi dgos pa'i phyir na ma khyab 'o na rgyun zhugs kyi 'bras bu de 'dod pa la 'dun pa'i 'dod sred lnga pa mngon gyur ba spangs pas rab tu phye ba yin par thal/ phyir 'ong gi 'bras bu de 'dod pa la 'dun pa'i 'dod sred drug pa mngon gyur ba spangs pas rab tu phye ba yin pa'i phyir/ khyab pa stobs mtshungs so/ /'dod mi nus te/ de mthong spangs kun sbyor gsum spangs pas rab tu phye ba yin pa'i phyir/ kho na re/ chags bral sngon song gi phyir 'ong 'bras gnas med par thal/ chos mngon rgya mtsho'i snying po las/ 'di la yang phal cher chags pa dang bral ba sngon du song ba dang/ sgom lam gyi stobs kyis thob pa gnyis las snga ma chags bral sngon song du 'dod pa ha cang thal ba'o/ /zhes gsungs pa'i phyir zhe na/ de'i don ni phyir mi 'ong zhugs pa 'di la'ang phal cher chags pa dang bral ba sngon du song ba'i phyir 'ong 'bras gnas khyad par can gcig dang sgom lam gyi stobs kyis thob pa'i phyir 'ong 'bras gnas khyad par can gnyis las snga ma chags bral sngon song gi phyir mi 'ong zhugs par 'dod pa ha cang thal zhes pa'i don yin pa'i phyir/ kha cig /'dod nyon bdun pa spangs shing/ brgyad pa ma spangs pa'i phyir 'ong tshe gcig bar chad gcig @23a @#/ /pa chos can/ khyod bar chad gcig pa ma yin par thal/ phyir mi 'ong gi 'bras bu mngon du byed pa la 'dod nyon brgyad pa dang dgu pa gnyis kyis bar du chod pa'i phyir zer na ma khyab/ ma grub na der thal/ chos can de yin pa'i phyir/ der thal/ de yod pa'i phyir/ der thal/ mdzod las/ nyes cha bdun nam brgyad zad pa zhes dang/ dge 'dun nyi shu chen mo las/ nyon mongs bdun nam brgyad spangs shing/ zhes gdam nga can du gsungs pa'i phyir/ ! /gsum pa phyir mi 'ong zhugs 'bras bshad pa la/ zhugs pa bshad pa dang 'bras gnas bshad pa gnyis las/ dang po rang lugs la 'dod pa la 'dun pa'i 'dod sred dgu pa mngon gyur ba spangs pas rab tu phye ba'i dge sbyong tshul gyi 'bras bu thob phyir du brtson bzhin pa'i rab tu phye ba'i zhugs pa'i gang zag /phyir mi 'ong zhugs pa'i mtshan nyid/ de la dbang po'i sgo nas dbye na der gyur pa'i dbang rtul dad pa'i rjes 'brang dang/ dbang rnon chos kyi rjes 'brang gnyis/ spang bya'i sgo nas dbye na/ chags bral sngon song gi phyir mi 'ong zhugs pa dang/ 'bras bu rim rgyud pa'i phyir mi 'ong zhugs pa/ de las gzhan pa'i phyir mi 'ong zhugs pa dang gsum/ mthong lam gyi snga rol tu 'dod sred dgu pa mngon gyur ba spangs pa'i phyir mi 'ong zhugs pa chags bral sngon song gi phyir mi 'ong zhugs pa'i mtshan nyid/ 'bras bu rim rgyud pa'i phyir 'ong 'bras gnas khyad par can/ 'bras bu rim rgyud pa'i phyir mi 'ong zhugs pa'i mtshan nyid/ gsum pa'i mtshan gzhi ni/ chags bral sngon song gi phyir 'ong 'bras gnas khyad par can lta bu de yin/ phyir mi 'ong zhugs pa'i spangs rtogs kyi khyad par ni spangs pa'i khyad par 'dod pa la 'dun pa'i 'dod sred dgu pa mngon gyur ba spangs pa nas/ ci yang med la 'dun pa'i 'dod sred dgu pa mngon gyur ba spangs ma spangs ci rigs yod/ srid nyon dgu pa mngon gyur ba ma spangs pas khyab/ rtogs pa'i khyad par de dag gi gnyen por gyur pa'i zag med kyi dbang po thob ma thob ci rigs yod/ chags bral sngon song gi phyir mi 'ong zhugs pa'i sa 'tshams rgyun zhugs zhugs pa dang mtshungs/ gnyis pa'i sa 'tshams 'bras bu rim rgyud pa'i phyir 'ong 'bras gnas khyad par can gyi @23b rtogs pa thob pa nas/ 'dod nyon dgu pa'i dngos gnyen bar chad med lam la gnas kyi bar du yod/ ! /gnyis pa 'bras gnas bshad pa la/ mtshan nyid/ dbye ba/ phye ba so so'i don la dpyod pa dang gsum/ dang po la/ kha cig /'dod nyon dgu pa spangs pas rab tu phye ba'i dge sbyong tshul gyi 'bras bu la gnas pa'i gang zag phyir mi 'ong 'bras gnas kyi mtshan nyid zer na/ 'o na/ nyan thos mthong lam rnam grol lam la gnas pa'i phyir mi 'ong 'bras gnas chos can/ mtshan nyid der thal/ mtshon bya de'i phyir/ 'dod na/ 'dod pa'i sas sdus kyi gang zag gi bdag 'dzin dgu pa spangs par thal/ 'dod pa'i phyir/ kha cig gis ma khyab zer/ 'dod na/ de'i sa bon spangs par thal/ 'dod pa'i phyir/ 'dod mi nus te/ nyan thos mthong lam pa yin pa'i phyir/ gong gi ma khyab 'tshams la/ 'o na/ 'dod nyon yin na 'dod sred yin dgos par thal/ 'dod nyon dgu pa yin na 'dod sred dgu pa yin dgos pa'i phyir/ der thal/ 'dod nyon dgu pa spangs na 'dod pa'i sas sdus kyi gang zag gi bdag 'dzin dgu pa spangs mi dgos pa'i phyir/ 'dod na/ 'dod pa'i gang zag gi rgyud gyi zhe sdang chos can/ der thal/ de'i phyir/ der thal/ chos can de yin pa'i phyir/ 'dod na/ lung ma bstan yin par thal/ 'dod pa'i phyir/ 'dod mi nus te/ mi dge ba yin pa'i phyir/ kha cig /mtha' ma'i cha mthun lnga spangs pas rab tu phye ba'i dge sbyong tshul gyi 'bras bu la gnas pa'i gang zag /phyir mi 'ong 'bras gnas kyi mtshan nyid yin zer na/ nyan thos mthong lam rnam grol lam la gnas pa'i phyir mi 'ong 'bras gnas chos can/ mtshan nyid der thal/ mtshon bya de'i phyir/ 'dod na/ 'dod pa la 'dun pa'i 'dun pa dang/ gnod sems spangs par thal/ 'dod pa'i phyir/ 'dod na/ de'i sa bon spangs par thal/ 'dod pa'i phyir/ ma khyab na/ bsam gtan gyi dngos gzhi thob la ma nyams pa'i phyi rol pa des 'dod pa la 'dun pa'i 'dun pa dang/ gnod sems spangs par thal/ de rnams spangs na de'i sa bon spangs mi dgos pa'i phyir/ 'dod na/ des 'dod pa'i 'dod chags spangs par thal/ 'dod pa'i phyir/ 'dod na/ de 'dra ba'i phyi rol pa chos can/ khyod kyis 'dod pa'i 'dod chags ma spangs par thal/ khyod phyi rol pa @24a @#/ /yin pa'i phyir/ gzhan yang/ nyan thos mthong lam rnam grol lam la gnas pa'i phyir mi 'ong 'bras gnas kyi 'dod nyon dgu pa ma spangs par thal/ phyi rol pa'i rgyud kyi bsam gtan dang po'i nyer bsdogs sbyor ba mtha'i 'bras bu yid byed des/ 'dod nyon drug pa ma spangs pa'i phyir/ khyab ste/ legs bshad gser 'phreng las/ rigs pa 'dis lhag ma rnams la yang shes par bya la de'i steng nas thod brgal ba'i dge 'dun gyi spang bya la yang zhib cha 'don par bya'o// zhes dang/ 'di dag ni chos mngon pa'i sgras zin tshod bshad pa yin gyi/ dgongs pa gang du gnas brtags pa ma yin no/ /zhes pa dang/ chos mngon rgya mtsho'i snying po las kyang/ thod brgal ba'i dge 'dun gyi rnam gzhag la mkhas par bya'o/ /zhes gsungs pa'i phyir/ kha cig /khyod 'bras gnas gang zhig /khyod kyis spangs pa'i sgom spangs nyon mongs yod na/ khyod kyis sgom lam thob pas khyab par thal/ nyan thos mthong lam rnam grol lam la gnas pa'i phyir mi 'ong 'bras gnas kyis 'dod nyon dgu pa ma spangs pa la rgyu mtshan yod pa'i phyir zer na ma khyab/ 'dod na/ nyan thos mthong lam rnam grol lam la gnas pa'i phyir mi 'ong 'bras gnas chos can/ der thal/ de'i phyir/ der thal/ des 'dod pa la 'dun pa'i 'dod sred dgu pa mngon gyur ba spangs pa gang zhig de sgom spangs nyon mongs yin pa'i phyir/ dang po der thal/ de phyir mi 'ong yin pa'i phyir/ phyi ma der thal/ de 'dod pa la 'dun pa'i 'dod sred dgu pa mngon gyur ba yin pa'i phyir/ rtsa bar 'dod mi nus so/ /kha cig / 'dod sred dgu pa spangs na de'i sa bon spangs dgos par thal/ 'dod nyon dgu pa la de'i phyir/ 'dod na/ zhi rag gi rnam pa can gyi lam la brten nas phyir mi 'ong gi 'bras bu thob ma thag pa'i phyir mi 'ong 'bras gnas chos can/ der thal/ de'i phyir/ der thal/ 'dod sred dgu pa mngon gyur ba spangs pa gang zhig /'dod sred dgu pa mngon gyur ba yin na/ 'dod sred dgu pa yin pas khyab/ 'dod sred dgu pa yin na/ 'dod sred dgu pa mngon gyur ba yin pas khyab pa'i phyir zer na/ ma khyab/ 'dod mi nus te/ chos can de yin pa'i phyir/ kha cig gis /phyir mi 'ong yin na/ 'dod nyon @24b dgu pa spangs pas khyab par thal/ mdzod las/ de dgu zad pa'i phyir mi 'ong zhes dang/ rnam bshad snying po rgyan las kyang de dang mthun par gsungs pa'i phyir zer na/ skyon med de de'i don ni/ 'dod sred dgu pa mngon gyur ba la dgongs pa'i phyir/ kha cig /spang bya rim rgyud pa'i phyir mi 'ong yin na/ 'bras bu rim rgyud pa'i phyir mi 'ong yin pas khyab zer na/ nyan thos mthong lam rnam grol lam la gnas pa'i phyir mi 'ong 'bras gnas chos can/ der thal/ de'i phyir/ der thal/ khyod phyir mi 'ong yin pa'i phyir/ khyab ste/ 'bras bu bar pa gnyis la spang bya cig car ba bzhag tu med pa'i phyir/ 'dod na/ de chos can/ khyod dang rgyud gcig tu gyur pa'i rgyun zhugs dang phyir 'ong yod par thal/ khyod 'bras bu rim rgyud pa'i phyir mi 'ong 'bras gnas yin pa'i phyir/ 'dod mi nus te/ chos can de yin pa'i phyir/ kha cig /rang dang rgyud gcig tu gyur pa'i phyir 'ong 'bras gnas khyad par can gyi stobs kyis thob pa'i phyir mi 'ong 'bras gnas 'bras bu rim rgyud pa'i phyir mi 'ong 'bras gnas kyi mtshan nyid zer na/ 'bras bu thod brgal ba'i phyir 'ong 'bras gnas khyad par can gyi stobs kyis thob pa'i phyir mi 'ong 'bras gnas chos can/ mtshon bya der thal/ mtshan nyid de yin pa'i phyir/ der thal/ chos can de yin pa'i phyir/ 'dod na/ de chos can/ khyod dang rgyud gcig tu gyur pa'i rgyun zhugs yod par thal/ khyod 'bras bu rim rgyud pa'i phyir mi 'ong 'bras gnas yin pa'i phyir/ 'dod mi nus te/ chos can de yin pa'i phyir/ de la kho na re/ de chos can 'bras bu rim rgyud pa yin par thal/ phyir 'ong dang phyir mi 'ong gnyis kyi 'bras bu rim gyis rgyud pa'i phyir mi 'ong yin pa'i phyir zer na/ ma khyab/ 'dod na/ de chos can/ 'bras bu rim rgyud pa ma yin par thal/ 'bras bu thod brgal ba yin pa'i phyir/ der thal/ rgyun zhugs kyi 'bras bu las thod brgal nas phyir mi 'ong gi 'bras bu mngon du byas pa'i phyir/ kha cig /tshe snga ma la rgyun zhugs dang phyir 'ong gang rung gi 'bras bu mngon du byas nas/ tshe phyi ma la phyir mi 'ong gi 'bras bu mngon du byas pa'i phyir mi 'ong/ 'dod par tshe yongs gyur gyi phyir mi 'ong gi mtshan nyid zer na/ nges pa'i rgyun zhugs srid pa lan bdun pa ba dang @25a @#/ /rgyud gcig tu gyur pa'i phyir mi 'ong 'bras gnas chos can/ mtshan nyid der thal/ mtshon bya de'i phyir/ der thal/ chos can de yin pa'i phyir/ 'dod mi nus te/ chos can de yin pa'i phyir/ kha cig /khams gong gi nyer 'gro'i phyir mi 'ong dang/ 'dod par tshe yongs gyur gyi phyir mi 'ong gi gzhi mthun yod zer na/ de med par thal/ 'dod par tshe yongs gyur gyi phyir mi 'ong yin na/ 'dod pa'i rten la myang 'das mngon du byed pas khyab pa'i phyir/ der thal/ mdzod las/ 'dod par tshe yongs gyur pa'i 'phags/ /khams gzhan du ni 'gro ba med/ /zhes gsungs pa'i phyir/ kha cig /'dod pa nas shi 'phos gzugs khams su nying 'tshams sbyar nas khams gong gi rten la myang 'das mngon du byed pa'i phyir mi 'ong/ gzugs nyer 'gro'i phyir mi 'ong gi mtshan nyid zer na/ gzugs nyer 'gro'i phyir mi 'ong skye 'da' ba dang rgyud gcig tu gyur pa'i gzugs kyi skye srid gcig blangs zin pa'i phyir mi 'ong chos can/ mtshon bya der thal/ mtshan nyid de'i phyir/ der thal/ chos can de yin pa'i phyir/ der thal/ de yod pa'i phyir/ 'dod na/ 'dod rten pa yin par thal/ 'dod pa'i phyir/ khyab ste/ legs bshad gser 'phreng las/ nyer 'gro gnyis las phye ba'i de dag ni 'dod rten pa'o/ /zhes gsungs pa'i phyir/ 'dod mi nus te/ chos can de yin pa'i phyir/ kha cig /'dod pa nas shi 'phos gzugs kyi lhar nying 'tshams sbyar nas khams gong gi rten la myang 'das mngon du byed pa'i 'dod pa'i rten can gyi phyir mi 'ong/ gzugs nyer 'gro'i phyir mi 'ong gi mtshan nyid zer na/ gzugs nyer 'gro'i phyir mi 'ong bar 'da' ba chos can/ mtshan nyid der thal/ mtshon bya de'i phyir/ der thal/ chos can de yin pa'i phyir/ 'dod na/ de dang rgyud gcig tu gyur pa'i bar srid kyi rten can gyi phyir mi 'ong de lha yin par thal/ 'dod pa'i phyir/ 'dod na/ de chos can/ khyod lha ma yin par thal/ khyod srid pa bar do ba yin pa'i phyir/ khyab ste/ mdzod las/ srid pa bar ma 'gro ma gtogs/ zhes gsungs pa'i phyir/ kha cig /'dod pa nas shi 'phos gzugs khams su nying 'tshams sbyar nas gzugs kyi rten la myang 'das mngon du byed pa'i 'dod pa'i rten can @25b gyi phyir mi 'ong/ gzugs nyer 'gro'i phyir mi 'ong gi mtshan nyid zer na/ gzugs nyer 'gro'i phyir mi 'ong gong 'pho srid rtse mthar thug 'gro chos can/ gzugs kyi rten la myang 'das mngon du byed par thal/ gzugs nyer 'gro'i phyir mi 'ong yin pa'i phyir/ der thal/ chos can de yin pa'i phyir/ 'dod mi nus te/ gzugs med kyi rten la myang 'das mngon du byed pa'i phyir/ kha cig /phyir mi 'ong bar 'da' ba yin na/ gzugs nyer 'gro'i phyir mi 'ong bar 'da' ba yin pas khyab zer na/ gzugs nyer 'gro'i phyir mi 'ong bar 'da' ba dang rgyud gcig tu gyur pa'i gzugs kyi bar srid kyi rten can gyi phyir mi 'ong chos can/ der thal/ de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ gser 'phreng las/ de ltar na 'da' ba bzhi dang gong 'pho ste/ lnga la ni gong ma'i rten can kyang yod la/ zhes gsungs pa'i phyir/ 'dod na/ 'dod rten pa yin par thal lo/ /kha cig /gzugs nyer 'gro'i phyir mi 'ong bar 'da' ba myur bar 'da' ba des/ gzugs kyi bar srid grub ma thag tu myang 'das mngon du byed pa yin zer na/ 'dod pa nas las nyon gyi dbang gis 'chi 'pho bzhin pa dang/ nyan thos kyi sgom lam rdo rje lta bu'i ting nge 'dzin la mnyam par gzhag pa'i gzhi mthun yod par thal/ dam bca' 'thad pa'i phyir/ 'dod mi nus te/ las nyon gyi dbang gis 'chi 'pho bzhin pa'i gang zag yin na/ nyan thos kyi sgom lam rdo rje lta bu'i ting nge 'dzin la mnyam par gzhag pa'i gang zag ma yin dgos pa'i phyir/ der thal/ mdzod las/ rtse gcig sems med la de med/ zhes gsungs pa'i phyir/ kha cig /gzugs nyer 'gro'i phyir mi 'ong bar 'da' ba des myang 'das gnyis kyi nang nas dang por lhag med myang 'das mngon du byed pa yin zer na/ 'o na/ des gzugs kyi bar srid nas shi 'phos pa dang myang 'das mngon du byed pa gnyis dus mnyam par thal/ dam bca' 'thad pa'i phyir/ 'dod na/ gzugs kyi bar srid nas 'chi 'pho bzhin pa yang yin/ nyan thos kyi sgom lam rdo rje lta bu'i ting nge 'dzin la mnyam par gzhag pa'i gang zag gi gzhi mthun yod par thal/ 'dod pa'i phyir/ 'dod na/ de 'dra ba'i gzhi mthun pa chos can/ khyod nyan thos kyi sgom lam rdo rje @26a @#/ /lta bu'i ting nge 'dzin la mnyam par gzhag pa'i gang zag ma yin par thal/ khyod las nyon gyi dbang gis 'chi 'pho bzhin pa'i gang zag yin pa'i phyir/ khyab ste/ mdzod las/ 'chi 'pho skye ba btang snyoms la/ /rtse gcig sems med la de med/ zhes gsungs pa'i phyir/ gzhan yang/ des gzugs kyi bar srid kyi lus rten de dor ba dang myang 'das mngon du byed pa dus mnyam par thal/ dam bca' 'thad pa'i phyir/ 'dod na/ des gzugs kyi bar srid kyi rten la myang 'das mngon du mi byed par thal/ 'dod pa'i phyir/ 'dod mi nus te/ de gzugs nyer 'gro'i phyir mi 'ong bar 'da' ba yin pa'i phyir/ kha cig /'dod pa nas shi 'phos gzugs khams su skye ba gcig blangs nas myang 'das mngon du byed pa'i gzugs nyer 'gro'i phyir mi 'ong/ gzugs nyer 'gro'i phyir mi 'ong skye 'da' ba'i mtshan nyid zer na/ gzugs nyer 'gro'i phyir mi 'ong bar 'da' ba chos can/ mtshon bya der thal/ mtshan nyid de'i phyir/ der thal/ 'dod pa nas shi 'phos gzugs kyi bar srid gcig blangs nas myang 'das mngon du byed pa'i gzugs nyer 'gro'i phyir mi 'ong yin pa'i phyir/ 'dod mi nus te/ chos can de yin pa'i phyir/ kha cig /gzugs nyer 'gro'i phyir mi 'ong skye 'da' ba yin na/ gzugs kyi skye srid gcig kho na len pas ma khyab zer na/ de khyab par thal/ gzugs nyer 'gro'i phyir mi 'ong bar 'da' ba de mngon par 'grub byed tsam gyi las dang ldan/ skye 'da' ba de skye gnas myong 'gyur gyi las dang ldan/ lan grangs gzhan la myong 'gyur kyi las dang mi ldan/ gong 'pho de gsum ka dang ldan pa'i phyir/ kha cig /'dod pa nas shi 'phos gzugs khams su skye ba gnyis rgyud mar blangs nas khams gong gi rten la myang 'das mngon du byed pa'i 'dod pa'i rten can gyi phyir mi 'ong/ gzugs nyer 'gro'i phyir mi 'ong gong 'pho'i mtshan nyid zer na/ gzugs nyer 'gro'i phyir mi 'ong skye 'da' ba chos can/ mtshon bya der thal/ mtshan nyid de'i phyir/ der thal/ 'dod pa nas shi 'phos gzugs khams su bar srid gcig skye srid gcig dang gnyis blangs nas khams gong gi rten la myang 'das mngon du byed pa'i 'dod @26b pa'i rten can gyi phyir mi 'ong yin pa'i phyir/ der thal/ chos can de yin pa'i phyir/ 'dod mi nus te/ chos can de yin pa'i phyir/ kha cig /gzugs nyer 'gro'i phyir mi 'ong skye 'da' ba dang/ gzugs nyer 'gro'i phyir mi 'ong gong 'pho gnyis mi 'gal zer na/ de gnyis 'gal bar thal/ gzugs nyer 'gro'i phyir mi 'ong skye 'da' ba de skye gnas myong 'gyur gyi las dang ldan/ lan grangs gzhan la myong 'gyur gyi las dang mi ldan/ gong 'pho de gnyis ka dang ldan pa'i phyir/ kha cig /'dod pa nas shi 'phos gzugs khams su skye srid gnyis rgyud mar blangs nas gzugs kyi rten la myang 'das mngon du byed pa'i gzugs nyer 'gro'i phyir mi 'ong/ gzugs nyer 'gro'i phyir mi 'ong gong 'pho'i mtshan nyid zer na/ gzugs nyer 'gro'i phyir mi 'ong gong 'pho srid rtse mthar thug 'gro chos can/ mtshan nyid der thal/ mtshon pa de'i phyir/ der thal/ chos can de yin pa'i phyir/ 'dod na/ gzugs kyi rten la myang 'das mngon du mi byed par thal/ gzugs med kyi rten la myang 'das mngon du byed pa'i phyir/ der thal/ chos can de yin pa'i phyir/ kha cig /'dod pa nas shi 'phos gzugs khams su skye srid gnyis rgyud mar blangs nas 'og min gyi rten la myang 'das mngon du byed nges kyi gzugs nyer 'gro'i phyir mi 'ong gong 'pho/ gzugs nyer 'gro'i phyir mi 'ong gong 'pho 'og min mthar thug 'gro'i mtshan nyid zer na/ gnas gtsang dang po gsum po gang rung gi rten la myang 'das mngon du byed nges kyi gzugs nyer 'gro'i phyir mi 'ong gong 'pho 'og min mthar thug 'gro chos can/ mtshan nyid der thal/ mtshon bya de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ mdzod 'grel las/ gong du 'pho ba de dag bar skabs su yongs su mya ngan las 'da' rung bar blta'o/ /zhes gsungs pa'i phyir/ kha cig /gzugs nyer 'gro'i phyir mi 'ong gong 'pho gang zhig /tshe 'dir bsam gtan spel sgom byed pa/ gzugs nyer 'gro'i phyir mi 'ong gong 'pho 'og min mthar thug 'gro'i mtshan nyid/ de gang zhig tshe 'dir bsam gtan spel sgom mi byed pa/ gzugs nyer 'gro'i phyir mi 'ong gong 'pho srid rtse mthar thug 'gro'i mtshan nyid @27a @#/ /zer na/ gzugs nyer 'gro'i phyir mi 'ong gong 'pho chos can/ mtshon bya dang po der thal/ mtshan nyid dang po de'i phyir/ phyi ma ma grub na/ de chos can/ mtshon bya phyi ma der thal/ mtshan nyid phyi ma de'i phyir/ rtags phyi ma dngos/ 'dod na/ de chos can/ khyod dang gzugs nyer 'gro'i phyir mi 'ong gong 'pho 'og min mthar thug 'gro'i gzhi mthun med par thal/ khyod gzugs nyer 'gro'i phyir mi 'ong gong 'pho srid rtse mthar thug 'gro yin pa'i phyir/ 'dod mi nus so/ /gzhan yang/ tshe 'dir bsam gtan spel sgom las nyams nges kyis da lta bsam gtan spel sgom rgyud la ldan pa'i gzugs nyer 'gro'i phyir mi 'ong gong 'pho 'og min mthar thug 'gro chos can/ mtshan nyid dang po der thal/ mtshon bya dang po de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ gzugs nyer 'gro'i phyir mi 'ong gong 'pho 'og min mthar thug 'gro mthong chos la bder gnas kyi rtogs pa las nyams pa yod pa'i phyir/ 'dod mi nus te/ chos can de yin pa'i phyir/ kha cig /'dod pa nas shi 'phos tshangs ris su skye srid gcig blangs/ de nas shi 'phos 'og min du skye srid gcig blangs nas/ rten de la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro/ gzugs nyer 'gro'i phyir mi 'ong gong 'pho 'og min mthar thug 'gro 'phar ba'i mtshan nyid/ 'dod pa nas shi 'phos tshangs ris su skye srid gcig blangs/ de nas shi 'phos mi che bar skye srid gcig blangs/ de nas shi 'phos 'og min du skye srid gcig blangs nas rten de la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro/ gzugs nyer 'gro'i phyir mi 'ong gong 'pho phyed 'phar gyi mtshan nyid dang/ 'dod pa nas shi 'phos tshangs chen ma gtogs gzugs khams gnas rigs bcu drug rim gyis rgyud nas mthar 'og min gyi rten la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro gzugs nyer 'gro'i phyir mi 'ong gong 'pho gnas thams cad du 'chi 'pho ba'i mtshan nyid zer na/ 'dod pa nas shi 'phos tshangs pa mdun na @27b 'don du skye srid gcig blangs/ de nas shi 'phos 'og min du skye srid gcig blangs nas rten de la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro 'phar ba chos can/ mtshan nyid dang po der thal/ mtshon bya dang po de'i phyir/ der thal/ 'dod pa nas shi 'phos gzugs khams su skye srid gnyis spel mar blangs nas/ gnas gtsang gi rten la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro yin pa'i phyir/ der thal/ chos can de yin pa'i phyir/ 'dod mi nus te/ chos can de yin pa'i phyir/ mtshan nyid bar pa la/ 'dod pa nas shi 'phos tshangs pa mdun na 'don du skye srid gcig blangs/ de nas shi 'phos mi gdung bar skye srid gcig blangs/ de nas shi 'phos 'og min du skye srid gcig blangs nas rten de la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro chos can/ mtshan nyid gnyis pa der thal/ mtshon bya gnyis pa de'i phyir/ der thal/ 'dod pa nas shi 'phos gzugs khams su skye srid gsum spel mar blangs nas/ gnas gtsang gi rten la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro yin pa'i phyir/ der thal/ chos can de yin pa'i phyir/ 'dod mi nus so/ /kho na re/ gzugs nyer 'gro'i phyir mi 'ong gnas thams cad du 'chi 'pho ba de/ 'phar ba ma yin zer na/ de 'phar ba yin par thal/ 'phar ba de la rnam pa gsum yod pa'i phyir/ der thal/ rtsa bar/ 'phar gsum srid rtse mthar thug 'gro/ zhes gsungs pa'i phyir/ kha cig /gzugs nyer 'gro'i phyir mi 'ong gong 'pho 'og min mthar thug 'gro la/ chags bral sngon song gis khyab zer na/ de ma khyab par thal/ de dang 'bras bu rim rgyud pa'i gzhi mthun yod pa'i phyir/ der thal/ gser 'phreng las/ mthar gyis pa la dbye ba 'di dag rung ba ni shin tu grags so zhes gsungs pa'i phyir/ de la kho na re/ de la chags bral sngon song gis khyab par thal/ de yin na mthong lam gyi snga rol tu bsam gtan bzhi pa'i dngos gzhi thob pas khyab pa'i phyir/ zer na ma khyab/ ma grub na der thal/ de yin na/ mthong lam gyi @28a @#/ /snga rol tu phyir mi 'ong gnas gtsang du skye ba len pa'i 'phen byed kyi las gsar du bsags pas khyab pa'i phyir/ der thal/ de yin na/ phyir mi 'ong gnas gtsang du skye ba len pa'i rnam smin gyi phung po 'phen byed kyi las bsags pas khyab/ 'phags pa'i rten la yang srid phyi ma'i rnam smin gyi phung po 'phen byed kyi las gsar du bsog pa med pa'i phyir/ kha cig /phyir mi 'ong gi rgyud kyi bsam gtan spel sgom yin na/ phyir mi 'ong gnas gtsang du skye ba len pa'i thun mong ma yin pa'i rgyu yin pas khyab zer na/ phyir mi 'ong gi rgyud kyi bsam gtan dang po'i dngos gzhi'i spel sgom chos can/ der thal/ de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ mdzod las/ dang por bzhi pa spel bar bya/ zhes bsam gtan bzhi pa'i dngos gzhi spel sgom grub rjes su bsam gtan dang po dang gnyis pa gsum pa'i spel sgom 'grub par gsungs pa'i phyir/ 'dod mi nus te/ chos can de yin pa'i phyir/ kha cig /nyan thos 'phags pa'i rgyud kyi bsam gtan bzhi pa'i dngos gzhi spel sgom yin na/ rang rgyud la ldan pa'i gang zag gnas gtsang du skye ba len pa'i thun mong ma yin pa'i rgyu yin pas khyab zer na/ nyan thos dgra bcom pa'i rgyud kyi bsam gtan bzhi pa'i dngos gzhi spel sgom chos can/ der thal/ de'i phyir/ der thal/ chos can de yin pa'i phyir/ der thal/ de yod pa'i phyir/ der thal/ lhag bcas myang 'das la gnas pa'i nyan thos dgra bcom pa mthong chos la bder gnas kyi rtogs pa las mi nyams pa'i phyir du bsam gtan bzhi pa'i dngos gzhi spel sgom byed pa yod pa'i phyir/ 'dod mi nus te/ chos can de yin pa'i phyir/ kha cig /phyir mi 'ong gi rgyud kyi bsam gtan spel sgom gyi nang tshan du gyur pa'i bsam gtan bzhi pa'i dngos gzhi zag med de/ phyir mi 'ong gnas gtsang du skye ba len pa'i thun mong ma yin pa'i rgyu yin zer na/ de chos can/ 'khor ba'i thun mong ma yin pa'i rgyu yin par thal/ phyir mi 'ong gnas gtsang du skye ba len pa'i thun mong ma yin pa'i rgyu yin pa'i phyir/ 'dod mi nus te/ 'khor ba rgyun gcod byed yin @28b pa'i phyir/ der thal/ 'phags pa'i rgyud kyi bsam gtan bzhi pa'i dngos gzhi zag med yin pa'i phyir/ kha cig /phyir mi 'ong gi rgyud kyi bsam gtan bzhi pa'i dngos gzhi spel sgom gyi nang tshan du gyur pa'i bsam gtan bzhi pa'i dngos gzhi dag pa ba de zhi rags kyi rnam pa can la mi byed zer na/ de'i ngo bor gyur pa'i sems byung de mi g.yo ba'i las ma yin par thal/ khyod kyi dam bca' 'thad pa'i phyir/ 'dod mi nus te/ de mi g.yo ba'i 'grub byed kyi las yin pa'i phyir/ der thal/ mi g.yo ba'i 'grub byed kyi las yod pa'i phyir/ der thal/ mi g.yo ba'i 'phen byed kyi las yod pa'i phyir/ der thal/ mi g.yo ba'i las kyi dbang gis khams gong du skye ba len pa yod pa'i phyir/ kha cig /phyir mi 'ong gnas gtsang du skye ba lan pa'i phyir du bsam gtan bzhi pa'i dngos gzhi'i spel sgom byed pa de'i tshe phyir mi 'ong gnas gtsang du skye ba len pa'i rnam smin gyi phung po 'phen byed kyi las de phyir mi 'ong gi rten la gsar du bsags pa yin zer na/ de mi 'thad par thal/ 'phags pa'i rten la yang srid phyi ma'i rnam smin gyi phung po 'phen byed kyi las gsar du bsag pa med pa'i phyir/ der thal/ rten 'brel mdo 'grel las/ bden pa mthong la 'phen pa med/ /srid dang bral la yang srid med/ zhes gsungs pa'i phyir/ kha cig /phyir mi 'ong gnas gtsang du skye ba len pa'i rnam smin gyi phung po 'phen byed kyi las med zer na/ de yod par thal/ phyir mi 'ong gnas gtsang du skye ba blangs pa'i skye ba'i rten 'brel 'phen byed kyi las yod pa'i phyir/ ma grub na/ de 'dra ba'i skye ba'i rten 'brel chos can/ khyod 'phen byed kyi las yod par thal/ khyod rten 'brel yan lag bcu gnyis kyi nang tshan du gyur pa'i skye ba'i rten 'brel yin pa'i phyir/ kha cig /phyir mi 'ong gnas gtsang du skye ba len pa'i rnam smin gyi phung po 'phen byed kyi las yod kyang/ de phyir mi 'ong gnas gtsang du skye ba len pa'i rnam smin gyi phung po 'phen byed kyi las su bsog pa po med zer na/ de yod par thal/ de phyir mi 'ong gnas gtsang du skye ba len pa'i rnam smin gyi phung po 'phen byed kyi las su dngos su skyed byed yod pa'i phyir/ der thal/ de @29a @#/ /'dra ba'i las de phyir mi 'ong gnas gtsang du skye ba len pa'i rnam smin gyi phung po 'phen byed kyi las yin pa'i phyir/ kha cig /phyir mi 'ong gi rgyud kyi bsam gtan spel sgom gyi nang tshan du gyur pa'i bsam gtan bzhi pa'i dngos gzhi zag bcas de/ phyir mi 'ong gnas gtsang du skye ba len pa'i rnam smin gyi phung po 'grub byed kyi las yin zer na/ de chos can/ las yin par thal/ phyir mi 'ong gnas gtsang du skye ba len pa'i rnam smin gyi phung po 'grub byed kyi las yin pa'i phyir/ 'dod na/ sems byung yin par thal lo/ kha cig /bsam gtan bzhi pa'i so skye'i rnam smin gyi phung po 'phen byed kyi las kyis 'phags pa'i rnam smin gyi phung po 'phen pa med zer na/ de yod bar thal/ phyir mi 'ong sngon so so skye bo'i gnas skabs su bsam gtan bzhi pa'i so skye'i rnam smin gyi phung po 'phen byed kyi las bsags pa de nyid/ phyis bsam gtan spel sgom byas pa la brten nas gnas gtsang du skye ba len pa'i cha rkyen du 'gyur ba yod pa'i phyir dang/ 'phen byed kyi las gcig gis 'phangs pa'i skye 'phags gnyis ka'i rnam smin gyi phung po yod pa'i phyir/ der thal/ so skyes lus rten de la dgra bcom pa'i 'bras bu mngon du byed pa yod pa'i phyir/ kha cig /phyir mi 'ong gi rgyud kyi bsam gtan spel sgom chung ngu gsum spel de la bsam gtan gyi dngos gzhi zag med gnyis kyi bar du zag bcas gcig spel nas sgom par byed/ 'bring drug spel la yang de'i steng du bsam gtan gyi dngos gzhi zag med gnyis kyi bar du zag bcas gcig spel nas sgom par byed pas de gnyis la spel tshul mi 'dra ba'i khyad par med pas/ chung ngu gsum spel nus pa'i gang zag la/ 'bring drug spel nus pas khyab zer na/ de mi 'thad par thal/ chung ngu gsum spel nus shing 'bring drug spel mi nus pa'i gang zag yod pa'i phyir/ der thal/ mdzod 'grel las/ dang po la ni sems gsum mo zhes bya ba ni gang zag de la nus pa de tsam yod pa ste/ de bzhin du 'og ma rnams la yang brjod par bya'o/ /zhes gsungs pa'i phyir/ kha cig /phyir mi 'ong gi rgyud kyi bsam gtan bzhi pa'i dngos gzhi spel sgom gyi nang tshan du gyur pa'i @29b bsam gtan bzhi pa'i dngos gzhi zag bcas zag med kyi don de rtog pa'i zag pa dang bcas bral gyi don la byed pa yin zer na/ de mi 'thad par thal/ phyir mi 'ong gi rgyud kyi bsam gtan bzhi pa'i dngos gzhi'i ngo bor gyur pa'i bdag med don spyi'i tshul gyis rtogs pa'i ye shes de/ phyir mi 'ong gnas gtsang du skye ba len pa rgyun gcod byed yin pa'i phyir/ kha cig /phyir mi 'ong gi rgyud kyi bsam gtan spel sgom de la/ chung ngu gsum spel/ 'bring drug spel/ chen po dgu spel/ shin tu chen po bcu gnyis spel/ ches shin tu chen po bco lnga spel rnams su yod pas/ 'bring drug spel byed pa de'i tshe ni dang por bsam gtan gyi dngos gzhi zag med rgyun ldan gnyis la snyoms par 'jug /de'i rjes zag bcas rgyun ldan gnyis la snyoms par 'jug de nas zag med rgyun ldan gnyis la snyoms par 'jug pa'i tshul gyis spel bar byed/ gzhan rnams la yang des rigs 'dra ba yin zer na/ de mi 'thad par thal/ mdzod 'grel las/ dang po la zag pa med pa dang/ zag pa dang bcas pa dang/ zag pa med pa'i las dang/ sems gsum mngon du byed do/ /zhes pa nas gzhan rnams la yang de bzhin du sbyar bar gsungs pa'i phyir/ kha cig /'dod pa nas shi 'phos khams gong du skye ba blangs nas gzugs med kyi rten la myang 'das mngon du byed pa'i 'dod pa'i rten can gyi phyir mi 'ong/ gzugs med nyer 'gro'i phyir mi 'ong gi mtshan nyid zer na/ gzugs nyer 'gro'i phyir mi 'ong gong 'pho srid rtse mthar thug 'gro chos can/ mtshon bya der thal/ mtshan nyid de'i phyir/ der thal/ chos can de yin pa'i phyir/ kha cig /gzugs med nyer 'gro'i phyir mi 'ong bar 'da' ba yod zer na/ de med par thal/ gzugs med khams su gang du skye 'gyur gyi 'gro ba de'i gzugs kyi dbyibs 'dzin pa med pa'i phyir/ der thal/ gzugs med khams su gzugs med pa'i phyir/ kha cig /gzugs med nyer 'gro'i phyir mi 'ong phyed 'phar pa yod zer na/ de med par thal/ gzugs med khams su skye srid gsum spel mar len pa med pa'i phyir/ der thal/ gzugs med kyi gnas de la mu bzhi kho nar grangs nges pa'i phyir/ kha cig /phyir mi 'ong gi 'bras bu thob pa'i tshe de la myang 'das mngon du byed pa'i @30a @#/ /phyir mi 'ong/ phyir mi 'ong mthong chos zhi'i mtshan nyid zer na/ nges pa'i rgyun zhugs srid pa lan bdun pa ba dang rgyud gcig tu gyur pa'i phyir mi 'ong chos can/ mtshon bya der thal/ mtshan nyid de'i phyir/ der thal/ chos can de yin pa'i phyir/ 'dod na/ 'dod par tshe yongs su ma gyur pa'i phyir mi 'ong yin par thal/ 'dod pa'i phyir/ 'dod mi nus te/ 'dod par tshe yongs gyur gyi phyir mi 'ong yin pa'i phyir/ der thal/ chos can de yin pa'i phyir/ gnyis pa rang gi lugs la/ 'dod pa la 'dun pa'i 'dod sred dgu pa mngon gyur ba spangs pas rab tu phye ba'i dge sbyong tshul gyi 'bras bu la gnas pa'i gang zag /phyir mi 'ong 'bras gnas kyi mtshan nyid/ de la dbang po'i sgo nas dbye na/ der gyur pa'i dbang rtul dad mos pa dang/ dbang rnon mthong thob pa gnyis/ spang bya spong tshul gyi sgo nas dbye na/ der gyur pa'i chags bral sngon song gi phyir mi 'ong/ 'bras bu rim rgyud pa'i phyir mi 'ong/ de las gzhan pa'i phyir mi 'ong 'bras gnas dang gsum yod/ de la 'phags chos sten tshul gyi sgo nas dbye na/ 'dod par tshe yongs gyur gyi phyir mi 'ong 'bras gnas dang/ 'dod par tshe yongs su ma gyur pa'i phyir mi 'ong 'bras gnas gnyis/ mthong lam gyi snga rol tu 'dod pa la 'dun pa'i 'dod sred dgu pa mngon gyur ba spangs pas rab tu phye ba'i dge sbyong tshul gyi 'bras bu la gnas pa'i phyir mi 'ong 'bras gnas/ chags bral sngon song gi phyir mi 'ong 'bras gnas kyi mtshan nyid/ rang dang rgyud gcig tu gyur pa'i 'bras bu rim rgyud pa'i phyir 'ong 'bras gnas khyad par can gyi stobs kyis thob pa'i phyir mi 'ong 'bras gnas/ 'bras bu rim rgyud pa'i phyir mi 'ong 'bras gnas kyi mtshan nyid/ 'dod par 'phags chos skye ba rgyud mar bsten nas 'dod pa'i rten la myang 'das mngon du byed pa'i phyir mi 'ong 'bras gnas/ 'dod par tshe yongs gyur gyi phyir mi 'ong 'bras gnas kyi mtshan nyid/ mtshan gzhi ni/ nges pa'i rgyun zhugs srid pa lan bdun pa ba dang rgyud gcig tu gyur pa'i phyir mi 'ong lta bu yin no/ /mthong lam thob pa'i tshe de la phyir mi 'ong gi 'bras bu thob pa'i phyir mi 'ong 'bras gnas/ 'dod par tshe yongs su ma gyur @30b pa'i phyir mi 'ong 'bras gnas kyi mtshan nyid/ de la dbye na/ gzugs nyer 'gro'i phyir mi 'ong 'bras gnas/ gzugs med nyer 'gro'i phyir mi 'ong 'bras gnas/ phyir mi 'ong mthong chos zhi/ lus mngon byed rnams su yod pa'i phyir/ 'dod pa nas shi 'phos gzugs khams su nying 'tshams sbyar nas khams gong gi rten la myang 'das mngon du byed pa'i 'dod pa'i rten can gyi phyir mi 'ong/ gzugs nyer 'gro'i phyir mi 'ong gi mtshan nyid/ de la dbye na/ der gyur pa'i bar 'da' ba/ skye 'da' ba/ gong 'pho dang gsum/ 'dod pa nas shi 'phos gzugs kyi bar srid gcig kho na blangs nas rten de la myang 'das mngon du byed pa'i gzugs nyer 'gro'i phyir mi 'ong/ dang po'i mtshan nyid/ de la dbye na/ gzugs nyer 'gro'i phyir mi 'ong bar 'da' ba myur bar 'da' ba/ myur ba ma yin par 'da' pa/ dus yun ring mo zhig nas 'da' ba dang gsum/ gzugs kyi bar srid dang por grub pa'i dus skad cig gnyis par myang 'das mngon du byed pa'i gzugs nyer 'gro'i phyir mi 'ong bar 'da' ba/ dang po'i mtshan gzhi/ gzugs kyi bar srid grub nas skye srid 'tshol ba'i snang ba la ma zhugs tsam du myang 'das mngon du byed pa'i gzugs nyer 'gro'i phyir mi 'ong bar 'da' ba/ gnyis pa'i mtshan gzhi/ de gang zhig /skye srid 'tshol ba'i snang ba la zhugs nas myang 'das mngon du byed pa gsum pa'i mtshan gzhi/ 'dod pa nas shi 'phos gzugs kyi skye srid gcig kho na blangs nas rten de la myang 'das mngon du byed pa'i gzugs nyer 'gro'i phyir mi 'ong/ gzugs nyer 'gro'i phyir mi 'ong skye 'da' ba'i mtshan nyid/ de la dbye na/ der gyur pa'i skyes tsam nas 'da' ba dang/ mngon par 'du byed med par 'da' ba dang/ mngon par 'du byed dang bcas te 'da' ba dang gsum/ gzugs kyi skye srid grub pa'i dus skad cig gnyis par myang 'das mngon du byed pa'i gzugs nyer 'gro'i phyir mi 'ong skye 'da' ba/ dang po'i mtshan gzhi/ 'bad rtsol rags pa med par myang 'das mngon du byed pa'i gzugs nyer 'gro'i phyir mi 'ong skye 'da' ba/ gnyis pa'i mtshan gzhi/ 'bad rtsol rags pa dang bcas te myang 'das mngon du byed pa'i gzugs nyer 'gro'i phyir @31a @#/ /mi 'ong skye 'da' ba/ gsum pa'i mtshan gzhi yin no/ /'bad rtsol med par myang 'das mngon du byed pa'i sems can mi srid de/ 'bad rtsol med par sgom lam rdo rje lta bu'i ting nge 'dzin mngon du byed nus pa'i sems can med pa'i phyir/ der thal/ ma rig bag chags kyi sa dang zag med kyi las spangs pa'i sems can med pa'i phyir/ 'dod pa nas shi 'phos gzugs khams su skye srid gnyis rgyud mar blangs nas khams gong gi rten la myang 'das mngon du byed pa'i gzugs nyer 'gro'i phyir mi 'ong/ gzugs nyer 'gro'i phyir mi 'ong gong 'pho'i mtshan nyid/ de la dbye na der gyur pa'i 'og min mthar thug 'gro dang/ srid rtse mthar thug 'gro gnyis/ 'dod pa nas shi 'phos gzugs khams su skye srid gnyis rgyud mar blangs nas gnas gtsang gi rten la myang 'das mngon du byed pa'i gzugs nyer 'gro'i phyir mi 'ong gong 'pho/ dang po'i mtshan nyid/ de la dbye na/ der gyur pa'i 'phar ba dang/ phyed 'phar/ gnas thams cad du 'chi 'pho ba dang gsum/ 'dod pa nas shi 'phos gzugs khams su skye srid gnyis tsam rgyud mar blangs nas gnas gtsang gi rten la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro/ dang po'i mtshan nyid/ 'dod pa nas shi 'phos gzugs khams su skye srid gsum spel mar blangs nas gnas gtsang gi rten la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro/ gnyis pa'i mtshan nyid/ mtshan gzhi ni phyogs snga ma'i mtshan nyid ltar yin no/ /gsum pa'i mtshan nyid phyogs snga ma dang mtshungs so/ /'dod pa nas shi 'phos gzugs khams su skye srid gnyis rgyud mar blangs nas gzugs med kyi rten la myang 'das mngon du byed pa'i gzugs nyer 'gro'i phyir mi 'ong gong 'pho/ gzugs nyer 'gro'i phyir mi 'ong gong 'pho srid rtse mthar thug 'gro'i mtshan nyid/ phyir mi 'ong gnas gtsang du skye ba len pa'i rgyu bsam gtan spel sgom de la/ sbyor ba dang/ dngos gzhi gnyis las/ dang po sbyor ba la/ rtsol ba gcig gi byed pa la brten nas/ dang po bsam gtan bzhi pa'i dngos @31b gzhi zag med rgyun ldan la snyoms par 'jug /de'i rjes zag bcas rgyun ldan la snyoms par 'jug /de rjes zag med rgyun ldan la snyoms par 'jug pa'i tshul gyis sgom par byed/ dngos gzhi la yang lnga yod de/ chung ngu gsum spel/ 'bring drug spel/ chen po dgu spel/ /shin tu chen po bcu gnyis spel/ ches shin tu chen po bco lnga spel rnams su yod pa'i phyir/ de rnams kyi mtshan gzhi yod de/ bsam gtan bzhi pa'i dngos gzhi zag med gnyis kyi bar du zag bcas gcig spel ba chung ngu gsum spel/ de nyid drug tu spel ba 'bring drug spel/ de nyid dgur spel ba chen po dgu spel/ de nyid bcu gnyis su spel ba shin tu chen po bcu gnyis spel/ de nyid bco lngar spel ba ches shin tu chen po bco lnga spel yin pa'i phyir/ bsam gtan spel sgom gyi nang tshan du gyur pa'i bsam gtan gyi dngos gzhi zag bcas zag med kyi don yang yod de/ bden bzhi mi rtag sogs bcu drug gang rung mngon sum du rtogs pa'i bsam gtan bzhi pa'i dngos gzhi de/ bsam gtan gyi dngos gzhi zag med dang/ zhi rags kyi rnam pa can gyi bsam gtan bzhi pa'i dngos gzhi de/ bsam gtan gyi dngos gzhi zag bcas su 'jog pa'i phyir/ bsam gtan spel sgom byed pa de'i tshe na/ dang por bsam gtan bzhi pa'i dngos gzhi spel sgom byed pa'i rgyu mtshan yod de/ bsam gtan bzhi pa'i dngos gzhi de tshor ba yid bde dang/ yid mi bde sogs bzhi pa la ltos pa'i skyon brgyad las grol zhing zhi lhag cha snyoms pas spel sla ba'i phyir/ bsam gtan spel sgom la lngar grangs nges te/ phyir mi 'ong bsam gtan spel sgom gyi dbang gis skye ba len pa'i gnas de la gnas gtsang ma lngar grangs nges pa'i phyir/ phyir mi 'ong des sngon so so skye bo'i gnas skabs su bsam gtan bzhi pa'i so skye'i rnam smin gyi phung po 'phen byed kyi las bsags pa de nyid/ phyis phyir mi 'ong gi rten la bsam gtan spel sgom byas pa la brten nas phyir mi 'ong gnas gtsang du skye ba len pa'i rnam smin gyi phung po 'grub byed kyi rgyur 'gyur ba tsam yin gyi/ las de nyid phyir mi 'ong gi rten la gsar du bsags pa ma yin te/ 'phags pa'i rten la yang srid phyi ma'i @32a @#/ /rnam smin gyi phung po 'phen byed kyi las gsar du bsog pa med pa gong du bsgrubs zin pa'i phyir/ 'dod pa nas shi 'phos gzugs med du nying 'tshams sbyar nas gzugs med kyi rten la myang 'das mngon du byed pa'i 'dod pa'i rten can gyi phyir mi 'ong/ gzugs med nyer 'gro'i phyir mi 'ong gi mtshan nyid/ de la der gyur pa'i skyes tsam nas 'da' ba/ mngon par 'du byed med par 'da' ba/ mngon par 'du byed dang bcas te 'da' ba/ gong 'pho dang bcas pa rnam pa bzhi yod/ gong 'pho de la yang/ 'phar ba dang/ gnas thams cad du 'chi 'pho ba gnyis yod/ 'gog snyoms thob la ma nyams pa'i phyir mi 'ong/ phyir mi 'ong lus mngon byed kyi mtshan nyid/ mthong lam thob pa'i tshe de la myang 'das mngon du byed pa'i phyir mi 'ong/ phyir mi 'ong mthong chos zhi'i mtshan nyid/ gsum pa rtsod pa spong ba la/ kha cig /'dod pa nas shi 'phos tshangs rigs su bar srid gcig blangs skye srid ma blangs par shi 'phos nas tshangs pa mdun na 'don du bar srid gcig blangs skye srid ma blangs par shi 'phos nas mi che bar bar srid gcig blangs rten de la myang 'das mngon du byed pa'i phyir mi 'ong chos can/ gzugs kyi bar srid gcig kho na blangs nas rten de la myang 'das mngon du byed par thal/ gzugs nyer 'gro'i phyir mi 'ong bar 'da' ba yin pa'i phyir/ der thal/ bar srid kho na blangs nas rten de la myang 'das mngon du byed pa'i phyir mi 'ong yin pa'i phyir/ zer na ma khyab/ rtags der thal/ chos can de yin pa'i phyir/ der thal/ de yod pa'i phyir/ der thal/ mi'i bar srid blangs skye srid ma blangs par shi 'phos nas lha'i bar srid blangs/ de nas lha gzhan gyi skye srid blangs nas rten de la myang 'das mngon du byed pa'i phyir mi 'ong yod pa'i phyir/ der thal/ kun las btus las/ ci ste na ldog go/ de na gnas pas kyang las bsog go /zhes gsungs pa'i phyir/ kha cig /gzugs nyer 'gro'i phyir mi 'ong 'phar ba la/ skye srid gnyis spel mar len pa dang/ phyed 'phar la skye srid gsum spel mar len pas ma khyab par thal/ bar srid gnyis spel mar len pa dang/ gsum spel mar len @32b pa'i phyir mi 'ong yod pa'i phyir zer na/ ma khyab bo/ /'dod mi nus so/ /kha cig /'gro ba la rigs lnga'am drug tu grangs ma nges par thal/ srid pa bar do ba de 'gro ba rigs lnga po gang rung yang min/ rigs drug po gang rung yang min pa'i phyir na/ ma khyab na/ 'o na/ sangs rgyas kyi sku la/ longs sku/ sprul sku; ngo bo nyid sku gsum du grangs ma nges par thal/ mtshan bzang po sum cu so gnyis po de de gsum gang rung ma yin pa'i phyir/ 'khor gsum/ 'dod mi nus so/ /kha cig /phyir mi 'ong gi rgyud kyi bsam gtan bzhi pa'i dngos gzhi spel sgom gyi nang tshan du gyur pa'i bsam gtan gzhi pa'i dngos gzhi zag med de/ phyir mi 'ong gnas gtsang du skye ba len pa'i cha rkyen yin par thal/ phyir mi 'ong gi rgyud kyi bsam gtan bzhi pa'i dngos gzhi spel sgom de de ltar yin pa'i phyir/ khyab ste phyir mi 'ong gi rgyud kyi bsam gtan bzhi pa'i dngos gzhi spel sgom gyi nang tshan du gyur pa'i bsam gtan bzhi pa'i dngos gzhi zag bcas zag med gnyis kyi nang nas zag med gtso che ba'i phyir zer na ma khyab/ kha cig /khams gong ma'i las kyis de las gzhan pa'i sa'i rnam smin gyi phung po 'phen pa yod par thal/ phyir mi 'ong sngon so so skye bo'i gnas skabs su bsam gtan bzhi pa'i so skye'i rnam smin gyi phung po 'phen byed kyi las bsags pa des/ gnas gtsang gi rnam smin gyi phung po 'phen pa yod pa'i phyir zer na ma khyab/ ma grub na der thal/ phyir mi 'ong gnas gtsang du skye ba len pa'i rnam smin gyi phung po 'phen byed kyi las gcig gzhi grub pa'i phyir/ rtsa bar 'dod mi nus te/ khams gong gi las la mi g.yo ba'i las zhes brjod pa la rgyu mtshan yang dag yod pa'i phyir/ kha cig /phyir mi 'ong gi rgyud kyi bsam gtan spel sgom gyi nang tshan du gyur pa'i bsam gtan bzhi pa'i dngos gzhi zag bcas de/ phyir mi 'ong gnas gtsang du skye ba len pa'i rgyu ma yin par thal/ de phyir mi 'ong gnas gtsang du skye ba len pa'i rnam smin gyi phung po 'phen byed kyi las dang/ 'grub byed kyi las gang rung ma yin pa'i phyir/ zer na/ ma khyab/ ma grub na der thal/ las ma yin pa'i phyir/ kha cig /gzugs nyer 'gro'i phyir mi 'ong gong 'pho 'og min mthar thug 'gro gnas thams cad @33a @#/ /du 'chi 'pho ba de/ 'phar ba ma yin par thal/ des tshangs chen ma gtogs gzugs khams gnas rigs bcu drug rim gyis rgyud nas/ mthar 'og min gyi rten la myang 'das mngon du byed pa gang zhig /tshangs chen phyir mi 'ong skye ba len pa'i gnas ma yin pa'i phyir zer na ma khyab/ khyab pa yod par thal/ tshangs chen dang/ 'dod khams gnyis phyir mi 'ong skye ba len pa'i gnas ma yin par mtshungs pa gang zhig /'dod khams su skye ba ma blangs par gzugs khams su skye srid blangs pa'i phyir mi 'ong la/ phyir mi 'ong 'phar bas ma khyab pa'i phyir zer na ma khyab bo; ;kha cig /phyir mi 'ong lus mngon byed 'dod par tshe yongs su ma gyur pa'i phyir mi 'ong gi dbye ba'i ya gyal du 'dren mi rigs par thal/ de dang 'dod par tshe yongs gyur gyi phyir mi 'ong gi gzhi mthun yod pa'i phyir/ der thal/ 'dod par 'phags chos skye ba rgyud mar bsten nas 'dod pa'i rten la myang 'das mngon du byas pa'i 'gog snyoms thob la ma nyams pa'i dgra bcom pa yod pa'i phyir/ der thal/ 'dod pa'i rten la myang 'das mngon du byas pa'i 'gog snyoms thob la ma nyams pa'i dgra bcom pa yod pa'i phyir/ zer na ma khyab/ ma grub na der thal/ dgra bcom pa'i gnas de la nyi shu rtsa lnga yod pa 'grel pa rgyal sras ma las gsungs pa'i phyir/ kha cig /nyan thos mthong chos zhi yin na/ phyir mi 'ong yin dgos par thal/ mthong chos zhi de/ phyir 'ong la yang bzhag tu med/ rgyun zhugs la yang bzhag tu med pa'i phyir/ 'dod na mi 'thad par thal/ phyir 'ong mthong chos zhi yang yod/ rgyun zhugs mthong chos zhi yang yod pa'i phyir/ der thal/ mthong chos kyi tshe de la myang 'das mngon du byed pa'i phyir 'ong dang/ rgyun zhugs yod pa'i phyir/ khyab ste/ rang nyid bsags pa'i tshe de la myong nges kyi las yin na mthong chos la myong 'gyur gyi las yin dgos pa'i phyir zer na ma khyab/ 'dod mi nus so// kha cig /phyir mi 'ong lus mngon byed dang/ 'dod par tshe yongs gyur gyi phyir mi 'ong gi gzhi mthun yod par thal/ 'gog snyoms dang po gsar du thob pa de'i tshe na mi kho na'i rten la thob dgos pa gang zhig /'gog snyoms thob la ma @33b nyams pa'i 'dod lha'i rten can gyi phyir mi 'ong yod pa'i phyir/ dang po der thal/ mdzod las 'gog pa dang po mi nang du zhes gsungs pa'i phyir/ zer na/ skyon med de/ gtso che ba la dgongs pa'i phyir/ 'dod mi nus so/ /kha cig /gzugs nyer 'gro'i phyir mi' ong gong 'pho 'og min mthar thug 'gro gnas thams cad du 'chi 'pho ba de/ gzugs nyer 'gro'i phyir mi 'ong gong 'pho 'og min mthar thug 'gro la/ 'phar ba dang/ phyed 'phar dang/ gnas thams cad du 'chi 'pho ba dang gsum du phye ba'i 'phar ba yin par thal/ de 'phar ba yin pa'i phyir/ zer na/ ma khyab/ 'dod mi nus te/ de gsum du phye ba'i gnas thams cad du 'chi 'pho ba yin pa'i phyir/ zer na/ nye nyon nyi shu'i nang tshan du gyur pa'i khro ba chos can/ nyon mongs dang nye ba'i nyon mongs gnyis su phye ba'i nyon mongs yin par thal/ nyon mongs yin pa'i phyir/ khyab pa khas/ der thal/ chos can de yin pa'i phyir/ 'dod na/ rtsa nyon yin par thal; 'dod pa'i phyir/ 'dod mi nus te/ nye nyon yin pa'i phyir/ kha cig /'dod pa nas shi 'phos tshangs ris su skye srid gcig blangs/ de nas shi 'phos 'og min du skye srid gcig blangs/ rten de la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro/ gzugs nyer 'gro'i phyir mi 'ong gong 'pho 'og min mthar thug 'gro 'phar ba'i mtshan nyid dang/ 'dod pa nas shi 'phos tshangs ris su skye srid gcig blangs/ de nas shi 'phos mi che bar skye srid gcig blangs/ de nas shi 'phos 'og min du skye srid gcig blangs rten de la myang 'das mngon du byed pa'i gzugs nyer 'gro'i phyir mi 'ong gong 'pho 'og min mthar thug 'gro/ gzugs nyer 'gro'i phyir mi 'ong gong 'pho 'og min mthar thug 'gro phyed 'phar gyi mtshan nyid yin par thal/ dge 'dun nyi shu chen mo sogs las de ltar gsungs pa'i phyir/ zer na/ skyon med de/ mtshan gzhi la mtshan nyid kyi ming gis btags nas bstan pa tsam yin pa'i phyir/ der thal/ mtshan nyid bzhi par bzhed pa yin/ zhes gsungs pa lta bu yin pa'i phyir/ /bzhi pa dgra bcom zhugs 'bras bshad pa la/ kha cig /srid nyon dgu pa spangs pas rab tu phye ba'i dge sbyong tshul gyi 'bras bu thob phyir du brtson bzhin @34a @#/ /pa'i nyan thos/ dgra bcom zhugs pa'i mtshan nyid zer na/ nyan thos dgra bcom pa'i 'bras bu thob phyir du brtson bzhin pa'i nyan thos tshogs lam pa chos can/ mtshon bya der thal/ mtshan nyid de'i phyir/ der thal/ chos can de yin pa'i phyir/ der thal/ de yod pa'i phyir te/ nyan thos dgra bcom pa'i go 'phang thob bya'i gtso bor byas nas don du gnyer ba'i nyan thos tshogs lam pa yod pa'i phyir/ 'dod mi nus te/ chos can de yin pa'i phyir/ kha cig /srid nyon dgu pa spangs pas rab tu phye ba'i dge sbyong tshul gyis 'bras bu thob phyir du brtson bzhin pa'i zhugs pa'i gang zag /dgra bcom zhugs pa'i mtshan nyid zer na/ nyan thos dgra bcom pa'i 'bras bu thob phyir du brtson bzhin pa'i rgyun zhugs zhugs pa chos can/ der thal/ de'i phyir/ rtags gsal chos can gyis sgrub po// //rang lugs la/ srid nyon dgu pa spangs pas rab tu phye ba'i dge sbyong tshul gyi 'bras bu thob phyir du brtson bzhin pa'i rab tu phye ba'i zhugs pa'i gang zag /dgra bcom zhugs pa'i mtshan nyid/ de la dbang po'i sgo nas dbye na/ der gyur pa'i dbang rtul dad pa'i rjes 'brang dang/ dbang rnon chos kyi rjes 'brang gnyis/ spang bya spong tshul gyi sgo nas dbye na/ spang bya gcig car ba'i dgra bcom zhugs pa dang/ spang bya rim rgyud pa'i dgra bcom zhugs pa gnyis yod/ 'dod pa'i sas sdus kyi sgom spang nyon mongs chung ngu'i chung ngu dang/ srid rtse'i sas sdus kyi sgom spangs nyon mongs chung ngu'i chung ngu gnyis cig car du spangs pa'i dgra bcom pa'i 'bras bu thob phyir du brtson bzhin pa'i dgra bcom zhugs pa/ dang po'i mtshan nyid/ de gnyis rim can du spangs pas rab tu phye ba'i dgra bcom pa'i 'bras bu thob phyir du brtson bzhin pas rab tu phye ba'i dgra bcom zhugs pa/ gnyis pa'i mtshan nyid/ de gnyis kyi sa 'tshams kyi khyad par yod de/ dang po rgyun zhugs 'bras gnas khyad par can gyi rtogs pa thob pa nas/ srid nyon dgu pa'i dngos gnyen bar chad med lam la gnas kyi bar du yod/ gnyis pa'i sa 'tshams phyir mi 'ong 'bras gnas khyad par can gyi rtogs pa thob pa nas srid nyon dgu pa'i dngos gnyen bar chad med lam @34b la gnas kyi bar du yod/ dgra bcom zhugs pa'i spangs rtogs kyi khyad par yod de/ spangs pa'i khyad par srid nyon brgyad pa spangs ma spangs ci rigs yod dgu pa nges par ma spangs pas khyab/ rtogs pa'i khyad par de dag gi gnyen por gyur pa'i zag med kyi dbang po thob ma thob ci rigs yod pa'i phyir/ srid nyon dgu pa spangs pas rab tu phye ba'i dge sbyong tshul gyi 'bras bu la gnas pa'i gang zag /dgra bcom 'bras gnas kyi mtshan nyid/ de la spang bya spong tshul gyi sgo nas dbye na/ spang bya cig car ba'i dgra bcom dang/ spang bya rim rgyud pa'i dgra bcom gnyis yod/ 'dod pa'i sas sdus kyi sgom spang nyon mongs chung ngu'i chung ngu dang/ srid rtse'i sas sdus kyi sgom spang nyon mongs chung ngu'i chung ngu gnyis cig car du spangs pa'i dgra bcom 'bras gnas/ dang po'i mtshan nyid/ de gnyis rim can du spangs pa'i dgra bcom 'bras gnas/ gnyis pa'i mtshan nyid/ spang bya rim rgyud pa'i dgra bcom 'bras gnas la 'bras bu rim rgyud pa'i dgra bcom 'bras gnas kyis ma khyab ste/ chags bral sngon song gi phyir mi 'ong 'bras gnas khyad par can gyi stobs kyis thob pa'i dgra bcom 'bras gnas de/ spang bya rim rgyud pa yin kyang 'bras bu rim rgyud pa'i dgra bcom 'bras gnas ma yin pa'i phyir/ dang po ma grub na de chos can/ spang bya rim rgyud pa yin par thal/ rang dang rgyud gcig tu gyur pa'i phyir mi 'ong 'bras gnas khyad par can gyi stobs kyis thob pa'i dgra bcom 'bras gnas yin pa'i phyir/ phyi ma ma grub na/ de chos can/ 'bras bu rim rgyud pa'i dgra bcom 'bras gnas [the 1969 indian edition sponsored by ser smad spom ra dge bshes chos mdzad mkhas grub thub bstan reads differently/ starting at this point and picking up on the next line at "shes rab"H [46a.2]...ma yin par thal/ khyod dang rgyud gcig tu gyur pa'i phyir 'ong dang rgyud [@#rgyun] zhugs med pa'i phyir/ dra bcom 'bras gnas la dbang po'i sgo nas dbye na/ dbang rtul dus sbyor ba dang/ dbang rnon dus mi sbyor gnyis/ yon tan thob tshul gyi sgo nas dbye na/] la 'bras bu rim rgyud pa'i dgra bcom 'bras gnas kyis ma khyab ste/ chags bral sngon song gi phyir mi 'ong 'bras gnas khyad par can gyi stobs kyis thob pa'i dgra bcom 'bras gnas de/ spang bya rim rgyud pa yin kyang 'bras bu rim rgyud pa'i dgra bcom shes rab rkyang pas rnam grol gyi dgra bcom dang gnyis ka'i cha las rnam grol gyi dgra bcom gnyis yod/ mngon shes thob ma thob kyi sgo nas dbye na/ dgra bcom pa rgyan bcas dang rgyan med gnyis yod/ dbang rtul dus sbyor ba de la dgra bcom pa nyams pa'i chos can/ 'chi ba'i sems @35a @#/ /pa ba; rjes su gsungs pa ba/ /gnas pa las mi bskyod pa/ rtog pa'i 'os su gyur pa dang lnga/ de dag gi mtshan gzhi'i khyad par yod de/ bdag bsad kyang rung/ ma bsad kyang rung/ 'dod yon la sems bsrungs kyang rung ma bsrungs kyang rung mthong chos la bder gnas kyi rtogs pa las nyams nges kyi dgra bcom pa dbang rtul/ dang po'i mtshan gzhi/ bdag bsad na mthong chos la bder gnas kyi rtogs pa las mi nyams shing/ bdag ma bsad na mthong chos la bder gnas kyi rtogs pa las nyams nges kyi dgra bcom pa dbang rtul/ gnyis pa'i mtshan gzhi/ bdag ma bsad kyang 'dod yon la sems bsrungs na/ mthong chos la bder gnas kyis rtogs pa las mi nyams shing 'dod yon la sems ma bsrungs na mthong chos la bder gnas kyi rtogs pa las nyams nges kyi dgra bcom pa dbang rtul/ gsum pa'i mtshan gzhi/ mthong chos la bder gnas kyi rtogs pa las mi nyams kyang/ tshe de la dbang rnon du 'pho mi nus pa'i dgra bcom pa dbang rtul bzhi pa'i mtshan gzhi/ tshe de la dbang rnon du 'pho nus pa'i dgra bcom pa dbang rtul/ lnga pa'i mtshan gzhi/ 'gog snyoms thob la ma nyams pa'i dgra bcom/ gnyis ka'i cha las rnam grol gyi dgra bcom pa'i mtshan nyid/ 'gog snyoms ma thob pa'i dgra bcom shes rab rkyang pas rnam grol gyi dgra bcom pa'i mtshan nyid/ mngon shes thob la ma nyams pa'i dgra bcom pa dgra bcom pa rgyan bcas kyi mtshan nyid/ mngon shes ma thob pa'i dgra bcom pa dgra bcom pa rgyan med kyi mtshan nyid/ dgra bcom pa'i rtogs pa las nyams pa med de/ dgra bcom pa'i rgyud kyi spangs pa de gang zag gi bdag 'dzin gyi sa bon spangs pa'i spangs pa yin pa'i phyir/ khyab ste/ rnam 'grel las/ bdag lta'i sa bon spangs pa'i phyir/ slar mi gshegs pa nyid yin no/ /zhes gsungs pa'i phyir/ kha cig /dgra bcom pa'i rgyud kyi rtogs pa yin na/ rang nyid las nyams pa'i gang zag med pas khyab zer na/ dgra bcom pa'i rgyud kyi mthong chos la bder @35b gnas kyi rtogs pa chos can/ der thal/ de'i phyir/ der thal/ chos can de yin pa'i phyir/ 'dod mi nus te/ dgra bcom pa nyams pa'i chos can yod pa'i phyir/ mtshon bya don gyi dge 'dun chos can/ khyod la nyi shu yod de/ rgyun zhugs zhugs pa dbang rtul dad pa'i rjes 'brang dang/ dbang rnon chos kyi rjes 'brang gnyis kyi ming can nas bzung ste/ bse ru rang sangs rgyas kyi ming can gyi bar rnam pa nyi shu yod pa'i phyir/ theg chen mthong lam bar chad med lam pa la mtshon bya don gyi rgyun zhugs zhugs pa zhes ming 'dogs pa'i rgyu mtshan yod de/ rgyun zhugs zhugs pa dang spangs rtogs chos mthun cung zad rtsi rung ba'i rgyu mtshan gyis de ltar btags pa yin pa'i phyir/ de ltar btags pa la dgos pa yod de/ khyim pa'i rten can gyi byang 'phags rnams 'phags pa'i dge 'dun dkon mchog min nam snyam pa'i log rtog dgag pa'i phyir du yin pa'i phyir/ dngos la gnod byed yod/ de rgyun zhugs zhugs par 'dod pa la lung rigs mtha' yas pas gnod pa'i phyir/ ! mkhas shing grub pa brnyes pa sems pa chen po dge 'dun bstan pa dar rgyas kyis mdzad pa'i dge 'dun nyi shu'i mtha' dpyod padma dkar po'i phreng ba zhes bya ba rdzogs so// // ! zhugs gnas skyes bu chen po'i dka' gnad bzhugs so/ /'dod nyon drug pa ma spangs pa'i/ /sbyor lam stan gcig nas bzung ste/ lam la rjes bzod bar dag la/ /gnas pa de ni rgyun zhugs zhugs/ /lan bdun pa la skye 'phags gnyis/ /'phags pa la yang nges ma nges/ /rnam gnyis nyer brgyad skye na yang/ /bdun tshan 'dra phyir bdun zhes dang/ /dang por thob pa'i rten de la/ /myang 'das mngon du byed pa de/ /gong 'og gnyis kyi gzhung rnams kyis/ /sku mched gnyis kyis dgongs par bsgrubs/ /nyon mongs gsum dang skye ba gnyis/ /rim bzhin nges spangs nges par yin/ /bzhi pa spangs dang skye ba ni/ /gsum pa blangs dang ma blangs 'dra/ /spang bya lnga pa skye ba bzhi/ /nges par ma @36a @#/ /spangs ma blangs pa/ /rigs nas rigs skye'i khyad chos su/ /mkhas pa rnams kyis rtogs par bya/ /drug pa'i bar spong brtson pa dang/ /nges par drug pa spong brtson pa/ /phyir 'ong zhugs yin zhes pa ni/ /gong 'og gnyis kyi lugs su bshad/ /phyir 'ong bar chad gcig pa ste/ /nyon mongs bdun nam brgyad spangs shing/ /tshe 'phos 'dod lha'i rten dag la/ /myang 'das mngon du byed par bstan/ /gzugs su nyer 'gro rnam pa bcu/ /'dod pa'i rten la phye ba dang/ /gnas gtsang skye rgyu spel sgom lnga/ /mkhas pa'i dgongs pa ji bzhin bshad/ /dgra bcom spangs pa ldog ces pa'i/ /bye brag smra ba'i ngan rtog rnams/ /sangs rgyas gnyis pas lung rigs kyis/ /legs par bkag rnams rgyas par bkral/ /mangs kyis dogs nas shes byed rnams/ /rgyas par ma bkod rang 'grel dang/ /'grel bshad dgongs pa tshul bzhin du/ /phye ba yin gyi som nyi dor/ /thod rgal ba la rdzas bdun dang/ /zhugs pa dang po rnam pa gsum/ /rgyun zhugs sogs su 'dod pa yi/ /ngan rtog bkag nas thod rgal ba'i/ /'phags pa rnams kyi spangs rtogs dag /ma nor bshad nas bdag gzhan rnams/ /mkhas pa'i rjes su khrid nas ni/ /blun pa'i ngan rtog bral bar byas/ /zhugs pa dang gnas pa'i skyes bu chen po rnams kyi dka' gnad/ shar tsong kha pa blo bzang grags pas sbyar ba'o// // ! mkhas dang grub pa kun gyi zur phud la/ /zhabs sen zla tshes 'god mkhas bstan dar ba'i/ /rnam dag gsung rgyun dpe don dge 'dun gyi/ /zhugs gnas khyad par gsal byed thal 'phreng 'di/ /thar 'dod blo gsal rnams la sman pa'i phyir/ /gzhung lugs rab @36b 'byams smra ba'i mkhas pa'i phul/ /ser smad dpon slob spom 'bor zhal snga nas/ /sbyin pa kun dgas rab dkar lhag bsam phyir/ /mthun pa'i rgyu tshogs dang bcas par gyi gzhir/ /bskrun pa'i dge mthus 'jam mgon ring lugs mchog /bshad dang sgrub pas yun du gnas pa dang/ /'gro kun phan bdes rtag tu 'tsho bar shog /khyad par thos bsam nor bu'i gling mchog ces/ /mnyan yod rgyal byed tshal lta'i 'dus sde 'di/ /tshul ldan thos sgom rnyed dang bkur stir bcas/ /srid mtha'i bar du mi nyams 'phel gyur cig /bar dang yi ge'i 'du byed mkhan la sogs/ /tshul 'dir 'brel thog kun kyang tshe rab tu/ /rgyal bstan zab mor 'jug pa lhur blangs te/ /ring min sku bzhi'i sa la reg gyur cig /ces bdag nyid chen po mkhas grub bstan dar ba'i gsung rgyun dge 'dun nyi shu'i mtha' dpyod 'di bzhin ser smad dpon slob sbyin pa kun dga' nas rgyu sbyor ba mdzad de par du bskrun pa'i par byang smon tshig zhig dgos zhes gsungs pa ltar sprul ming blo bzang 'phrin las rnam rgyal gyis sbyar ba dza yantu// // ! jo bo'i slob ma byams pa'i rnal 'byor pas/ blo sbyong mgur du bzhes pa ni/ kwa ye pha mar gyur pa'i 'gro ba ma lus drang ba'i phyir/ /bdag la yod pa'i nyon mongs dug lnga gang dag gis/ /sems can rnams kyi dug lnga ma lus drang bar bya/ /'dod chags la sogs med pa'i dge ba gang yod rnams/ /'gro drug sems can rnams la snyoms par brim par bya/ /na tsha la sogs 'bras bur gyur pa'i sdug bsngal gyis/ /de dang rigs mthun sdug bsngal ma lus drang bar bya/ /na tsha la sogs med pa'i phan bde gang yin de/ /'gro drug sems can rnams la snyoms par brim par bya/ /de ltar byas na rang nyid 'khor ba'i rgya mtsho 'dir/ /skad cig tsam yang 'khyam pa'i go skabs ga la srid/ /'on kyang ji srid byang chub ma thob bar/ /myong 'gyur nyon mongs rgyu 'bras ji snyed pa/ /thams cad skye ba 'di la yongs su rdzogs par bya/ /de yang da lo zla ba 'di la drang bar bya/ /de yang de ring da lta nyid du rdzogs byas nas/ /sdug bsngal brang breng rab chad tsam cig thabs su @37a @#/ /brten/ /blo 'di 'byongs par gyur cig byams pa'i rnal 'byor pa/ /zhes byams snying rje byang chub kyi sems gyer sgom rdo rje'i glus gsungs pa'o// ! //blo sbyong tshigs brgyad ma bzhugs so/ /bdag ni sems can thams cad la/ /yid bzhin nor bu las lhag pa'i/ /don mchog sgrub pa'i bsam pa yis/ /rtag tu gces par 'dzin par shog /gang du su dang 'grogs pa'i tshe/ /bdag nyid kun nas dman lta zhing/ /gzhan la bsam pa thag pa yis/ /mchog tu gces par 'dzin par shog /spyod lam kun tu rang rgyud la/ /rtogs cing nyon mongs skyes ma thag/ bdag gzhan ma rung byed pas na/ /btsan thabs gdong nas bzlog par shog /rang bzhin ngan pa'i sems can ni/ /sdig sdug drag pos non mthong tshe/ /rin chen gter dang 'phrad pa bzhin/ /rnyed par dka' bas gces 'dzin shog /bdag la gzhan gyi phrag dog gis/ / bshe bskur la sogs mi rigs pa'i/ /gyong kha rang gis len pa dang/ /rgyal kha gzhan la 'bul bar shog /gang la bdag gis phan btags pa'i/ /re ba che ba gang zhig gis/ /shin tu mi rigs gnod byed na'ang/ /bshes gnyen dam par lta par shog /mdor na dngos dang brgyud pa yis/ /phan bde ma rnams kun la 'bul/ /ma yi gnod dang sdug bsngal kun/ /gsang bas bdag la len par shog /de dag kun kyang chos brgyad kyi/ /rtog pa'i dri mas ma sbags shing/ /chos kun sgyu mar shes pa'i blos/ /zhen med 'ching ba las grol shog / //