@1 ! rdo rje 'chang dbang tha mal tshul ston zhes/ /rdo rje'i tshig gis bstan bzhin deng 'dir yang/ /rdo rje 'chang dbang ngur smrig gar rol pa'i/ /rdo rje'i zhabs pad spyi bo'i gtsug na rgyal/ /blo gros khang bzang thub gzhung nor bus phyug / bzang po'i spyod pa rgya mtshor 'dod rgur dbang/ /dbang bzhi'i lam gyis khyed thugs bum pa bzang/ /phyug pa'i bshes khyod stong pa'i rnam 'phrul blo/ /blo 'das bzang po'i gsang gsum mdzad pa'i cha/ /smra la smra ba'i dbang phyug ma thob kyang/ /blo ldan skal bzang dad pa 'phel phyir dang/ /dbang phyug bsgrub phyir cha tsam spel bar bya/ /bdag cag gi rnam 'dren dam pa lung rigs bye ba'i gter mdzod gzhung brgya smra ba'i mkhas pa'i khyu mchog ser byes mkhan zur rin po che mtshan brjod par dka' ba don gyi slad du mtshan nas smos te rje btsun blo bzang dbang phyug dpal bzang po mchog gang du sku bltams pa'i gnas ni/ mdo khams sa yi thig le dkar mdzes dgon gyi nye 'dabs chu len la mgo tshang bya ba'i khyim du rigs rus phun sum tshogs pa yab rin chen dar rgyas dang yum tshe ring sgrol ma gnyis kyi sras su bod rgyal lo 2028 phyi lo 1901 rab byung 15 pa'i bgrang bya 35 pa lcags mo glang gi lor ngo mtshar ba'i ltas du ma dang bcas gang sku chu shel gyi dkyil 'khor mngal gyi chu 'dzin gyi rgya las grol te mig gi bdud rtsir gyur/ sngon goms bag chags kyi mthus gzhon nu nyid nas byis pa tha mal pa'i @2 spyod pa mtha' dag las 'das te bag yod kyi brtul zhugs la gnas/ thugs rig grung zhing pha mar gus rtsi dang/ mchog gsum la dad mos che ba sogs la brten pha ma zhang po sogs kyis rab tu byung ba'i 'os su che bar gzigs/ gtso cher rgan rin po che nyid kyi thugs bskyed bzang po dus su bdo bas dgung grangs bdun du phebs pa na dkar mdzes mtshan nyid grwa tshang du sgrig zhugs mdzad cing zhang po dge ba'i bshes gnyen rin chen dar rgyas pa'i drung nas yi ge sbyor klogs sogs slob par gnang ba tshegs chen po la ma ltos par mkhyen/ chos spyod sogs thugs 'dzin mdzad bzhin pa'i skabs 'gar sku na phra ba dang yab yum la brtse gdung che stabs rgan gyis ma mkhyen par yab yum gyi drung du phebs pa'ang byung/ nyin gcig dge rgan gyis bskos nas dpe cha thugs 'dzin lam rim bsdus don gyi bsam gtan sems la dbang bsgyur rgyal po ste/ /bzhag na g.yo med ri yi dbang po bzhin/ /zhes pa'i skabs tshig don thugs la shar te de tshun chad phebs ma myong ba red ces gsungs/ mtshan nyid grwa tshang gi zhal 'don chos spyod kyi rim pa chos spyod rab gsal pod gcig /rgyan 'jug gnyis/ ser byes mkhas snyan grwa tshang gi thun mong ma yin pa'i chos spyod sna kha gsum/ gtor 'bul sna kha brgyad rnams 'bad rtsol cher ma dgos par thugs 'dzin gyis dgon pa'i tshogs dbus su rgyugs sprod bzhes gsol yod pa ltar rgan rin po che mchog nas sgra dag gsal gsum gyi sgo nas rgyugs 'bul gnang mdzad pas tshang mas @3 yi rang dang bsngags brjod kyi gnas su gyur te ang rim dang po phul/ bar skabs su mtshan nyid dang ldan pa'i mkhan slob las dge bsnyen gyi sdom pa dang bar ma rab byung gi tshul khrims/ tshig snga ma dge tshul gyi sdom pa rnams yang dag par nod de bslab bya rnams la tshul bzhin du slob par mdzad/ de nas rgyal ba'i bka' dang dgongs 'grel gyi bstan bcos rnams la thos pa rgya chen po 'tshol bar bzhed cing/ de yang dri ma med pa'i rigs pa'i lam nas brdar sha chod pa zhig ma byung na tshig spyi tsam gyis go don ji bzhin mi brnyed par gzigs te gdan sa chen por shing rta chen po dag gi gzhung la slob gnyer phebs bzhed nar mar yod pa na/ dkar mdzes mtshan nyid grwa tshang gi tshong pa zhig lha sar skyod kyi yod pa dang sdeb ste dgung grangs bco lnga par rdo rje gdan gnyis pa bod kyi rgyal sa lha ldan du phebs/ ston pa shAkya thub pa dang mi gnyis pa jo bo shAkya mu ni dang jo bo mi bskyod rdo rje sogs mjal nas thugs smon rgya chen po gnang/ de nas bshad sgrub bstan pa'i chu mgo gdan sa chen po gsum gyi ya rgyal se ra theg pa chen po'i gling du tre hor khang tshan la phebs te dge bshes sangs rgyas phun tshogs zhu ba khag theg rgan du 'tshol gnang gis mkhan po gsar mjal sogs zhus nas ser byes mkhas snyan grwa tshang gi chos sgor zhugs/ mi ring bar chos rwa gsar zhugs kyang mdzad de dge ba'i bshes gnyen rdo rje gnas skyabs dpe khrid dge rgan du tshul bzhin bsten nas/ @4 bsdus grwa chung 'bring che gsum blo rtags gnyis grub don sa gsum sogs la sbyang brtson mdzad/ chos thog skabs chos rwar phebs rgyu chos mtshams skabs khang tshan gyi brtsi bzhag la phebs rgyu sogs sgrig lam kun spyod kyi rim pa tshul bzhin 'khur gnang mdzad pas mig ltos la phan pa byung/ dpe khrid skabs rgan rin po che dgung lo chung ba dang thugs rig gsal bas slob grogs gzhan rnams kyis dge bshes pa'i mdun du 'phul bas/ rgan rin po che nas kyang dpe khrid nam yod la spos rkang re dge bshes pa'i mdun du 'bul skabs 'bul res kyi spos kyi dud pa dbu la g.yas bskor gyis 'khor ba gzigs pas dga' dad lhag par 'phel zhing rig pa la'ang shin tu phan pa byung zhes gsungs/ de nas skabs dang po'i spyi don sogs blo 'dzin gyis dbu nas rim bzhin yang dag mtha' bar la rtsod pa dang mtshan 'khyol dam bca' sogs ma chags par mdzad/ yang dag mtha' rtsod skabs grwa tshang rin po ches rigs chung tshogs lang gnang srol ltar rgyugs sprod bzhes skabs rtsod rgyugs dang blo rgyugs gnyis kar blo gsal gzhan las yang rtser son pas tshogs bzhengs ang dang po phul/ dge bshes rdo rje gnas skabs pha yul du phebs skabs dge bshes pas rgan rin po che gtsang pa khri zur rin po che lhun grub brtson 'grus grwa sar bzhugs bzhin yin pa'i sku mdun du khrid gnang nas 'di rig pa dang brtson 'grus yag po yod pas dpe khrid skyabs 'jug yong ba zhus pa na/ zhal nas rig pa yag po yod na ngas rgya gar paN grub lta bu zhig bzo chog gsungs pa gcig @5 byas na ku re zhal shob lta bu yin srid kyang rnam pa gcig tu na ma 'ongs mngon gzigs kyis lung bstan pa'am rjes su rgya gar paN grub dang mnyam pa las kyang lhag pa byung ba 'di'i rten 'brel 'grigs par mngon no/ /dge ba'i bshes gnyen bsam sbyor rnam par dag pas tshul bzhin du bsten nas mnyes pa gsum gyis mnyes par mdzad de drung nas dbu phar 'dul mdzod sogs la gsan sbyong mdzad skabs 'tsho ba dkon po yod kyang ji mi snyam par dpe cha kho nar gzigs pa las 'tshol thabs dang/ 'jig rten mthun 'jug sogs gtan nas mi gnang/ sku 'gyed zho gang dang/ phyed brgyad lta bu byung ba na 'phral 'phral du khrom nas bzhes bag dang gsol zhib gzigs pa las gsog rum gtan mi mdzad/ nyin gcig phyed brgyad gcig byung ba bsnams te gsol zhib nyo bar phebs pa na gsol chas med pa dang/ nyin mtshan 'khor mo yug tu dpe cha 'dzin skyor sbyong la 'bad stabs bser bus rkyen gyis sku gzugs 'gyel nas thugs dran med du song skabs der 'dzin grogs ha gdong sog po e chos mdzad kyis mthong nas rgan rin po che kho rang gi shag tu khrid/ gsol ja dang/ gsol tshig bcud can gsol zhib bcas phul kyang rgyun du zhal lag yag po med cing glo bur bcud can bzhes pa ma 'ju bar nyin shas phyag dpe gzigs ma thub/ chos mdzad 'di dang/ 'dzin gra gcig pa gzhan dag nas kyang skabs skabs su kha lag sprod kyi yod pa phan po yod ces gsungs/ skabs shig grwa tshang gi 'bru phog thel rtse gcig dang/ gong gsal sog po'i @6 thel rtse'ang rgan la phul ba'i gnyis byung ba chu bskor du bskyel ba len pa sogs dus tshod mang po zhig chud zos su 'gro bar 'dug /tshe 'di'i 'tsho ba las bsod nams kyi tshogs su gtong ba dgos pa che bar gzigs te thel rtse gnyis kyis gsol mar gzigs nas yi dam mdun du gser kong sbyong/ rten gzhan gyi drung du'ang mchod me 'bul bar mdzad/ phyed brgyad gcig lhag pa des gro zhib gzigs nas bzhes thug bskol te bzhes bzhin pa'i skabs dpe cha dge phrug 'phan po nas yin pa zhig gis gsol zhib sgye mo gang khur nas yong ste kha sang nang nas 'byor byung/ rgan la 'bul du yong ba yin zhus/ yi dam gyi dngos grub kyang yin par snang ste zhal nas lo rgyus dang sbrags yi dam dngos grub myur po yod ces gsungs/ yang skabs shig grwa tshang gi 'bul bsdud pa zhig 'byor nas 'gyed che tsam byung ba ma bzhes par sha rkang pa zhig nyos nas khri zur rin po cher phul tshul yang gsungs/ phar phyin gyi dus su skabs dang po'i spyi don/ drang nges legs bshad snying po/ byams chos sde lnga/ rgyan gyi bshad bya'i yum bar ma'i mdo tshig rnams thugs 'dzin gyis sku na cher smin skabs su'ang shar mar gsungs thub pa yod/ gzung ba rnams mtshan sbyong yang yang skyor bar mdzad/ dbu ma'i skabs rtsa 'jug gi TIk chen gnyis/ lhag mthong che chung stong mthun bcas kyi tshig gal che ba rnams thugs 'dzin dang/ 'jug pa'i TIk chen gyi tshig don thams cad sa bcad thog bsgril te 'jug pa dang sbyar nas skyor sbyong gnang @7 skabs mtshan phud 'gro gyi yod tshul yang gsungs/ dgung grangs nyer gnyis skabs rgyal ba sku 'phreng bcu gsum pa chen po'i mdun nas bsnyen par rdzogs par mdzad de bslab bya rnams mig 'bras ltar srung bar ma zad rnam kun gyi spyod lam thams cad 'dul ba dang mthun pa kho nar gnang/ 'di tsam nas gsar bu ba rnams la dpe cha khrid par mdzad/ 'dzin grwa 'di phyag dpe yag gras yin zhing lhag don rgan rin po che dang/ tshA ba byams pa mtha' yas rnam gnyis go rigs shin tu bzang bas drang nges sogs kyi rtsod par mkhan po rtsod gzigs su phebs pas gzigs pa na thugs yid rang dbang med par drangs te dus tshod ji song ma mkhyen pa lta bus chos rwa dus thog tu grol mi thub pa yang yang yong gi yod pas/ 'dzin grwa gzhan rnams nas mkhan po spyan gsal 'dzin grwar bzhugs 'dug pas chos rwa grol gyi ma red zer ba'ang byung/ rgan rnam gnyis la 'dzin grwa gcig pa tshos dge rgan lta bur brtsi yi yod cing/ dka' gnad rnams la brgal brtag mdzad skabs thog mar go gi yod kyang rigs pa phra ru song ba na nga tshos go gi med ces lha ram ang dang po bzhes te rgyud stod mkhan zur du phebs pa ha gdong rgan chos 'byor lags nas gsungs/ rgan rin po che rig rtsal che stabs mkhan pos gsungs don grwa tshang 'dir rnam 'grel gyi rtsod pa 'dzugs thub na snyam pas 'jang dgun chos su phebs dgos gsungs pa ltar zur bkol dang phar phyin dbu rnying skabs bcas lo gsum phebs/ bod zla bcu gcig pa gnam gshis shin tu grang ba'i dus yin yang lo dang po gnyis la gnas tshang gang yang med par rdo rwa'i phug tu sle @8 gu'i 'og tu bzhugs/ chos grwar phebs skabs sle gu'i mtha' rdos mnan nas 'jog par mdzad/ de'i skabs 'bras ye shes blo ldan/ dbang 'dus rgyal mtshan/ tre hor skyor dpon/ mi nyag skyor dpon sogs lo mang tshad mar sbyangs pa'i mkhas pa rnams dang bgro gleng gnang ba na gzhung don dang rtsod rigs gzhan las khyad thon pa byung/ khong rnams la blo bskyed chen po byung stabs lo mjug mar phebs rogs zhu mkhan yang byung/ zhal nas/ gzhan rnams kyis 'tshang ga brgyab nas gtong skabs tre hor skyor dpon gyis zur nas tshig 'ga' shas gsung gi yod gzhan tsho phebs zin 'phral sku 'khris su bcar te skabs don dri ba dwogs gcod lta bu gnang gi 'dug gsungs/ lo gsum par nyid kyi dge phrug rig pa bzang ba 'ga' zhig dang bcas ser smad grwa tshang gi yang steng du bzhugs/ lo gsum gar thor chos dam bca' 'jog gnang mdzad/ dbu phar gzigs grub pa'i skabs shig na thos pa'i don rnams rtse gcig tu sgrub pa lhur len par bzhed pa dang/ rkyen zhig gis kyang bskul te gsang stabs kyis phebs zhor du pa tshab lo tsA ba'i gdung rten mjal ba dang/ jo bo bka' gdams pa'i gdan sa rwa sgreng mjal bar phebs/ de skabs phyis su bod kyi srid skyong gnang ba'i rwa sgreng mchog sprul rin po che gdan sar bzhugs yod pa nas gnas skabs rwa sgreng du bzhugs dgos pa dang 'tsho ba sogs bla brang nas 'bul sbyor zhu rgyu/ phyag dpe khang du khrid gnang nas 'di dang 'di zhes bya ba yin gang bzhed gzigs chog pa'i gnang ba 'bul bar mdzad/ mchog sprul rin po che nas lung rigs gang la'ang thogs pa med pa'i mkhas dbang 'di 'dra @9 dben par gshegs na grwa tshang gi slob gnyer la gnod par dgongs te de don grwa tshang la yi ge phul/ de dang dus mtshungs mkhan chen ngag dbang phun tshogs pa ^gong sa mchog gis gzigs skyong che bas gzim chung du nam 'dod bcar chog pa zhig yod pa mjal bcar skabs ^gong sa mchog nas deng sang se ra byes pa'i mkhas pa tshos ga re gnang gi yod gsungs/ mkhan chen pa rgan blo bzang dbang phyug gi mtshan nas dris na gang 'dra zhu dgos snyam pa'i dngangs skrag skyes/ dgon par phebs ma thag tre hor khang tshan rgan la ^gong sa mchog gi bka' phebs 'gan blo bzod par mi 'dug rgan rwa sgreng du bzhugs yod 'dug pa lam seng gdan 'dren zhu dgos gsungs pa ltar gdan drangs te/ sngar bzhin slob gnyer ba rnams la dpe khrid dang/ rgan rang gi slob gnyer yang 'phro skyong gnang/ 'dzin grwa mdzod rnying du phebs pa na rigs chen tshogs bzhengs 'khor ba'i skabs dge bskos nas rgan rin po che dang/ tshA ba byams pa mtha' yas rnam gnyis la sho brgyab kyi yin pa ga 'dra gnang ga gsungs pa na rgan rnam gnyis gcig gis gcig sngon mar phebs dgos gsungs shing/ mthar rgan rin po ches u nan mthar bskyel gnang bas byams pa mtha' yas lags nas/ 'o na de ring ngas dang por phyin pa'i chog lha rams ang dang po khyed rang byed dgos kyi red ces gsungs/ chos grogs rnam gnyis phan tshun che mthong dang gus bkur gnang ba 'di tsam yang bstan pa'i mdzes rgyan ngo mtshar ba'i gnas su 'khums/ tshogs bzhengs snga rting grub nas lha rams 'dzin grwar phebs/ skyor gzhung skyor rgyu/ 'dul mdzod kyi @10 gzhung gi spyi bshad dang/ dka' gnad rnams la brgal brtag dpyis phyin par gnang bas 'dzin grwar blo bskyed 'phel/ 'dul mdzod kyi mu bzhi sogs rtags bsal sgrub rogs byed par dga' po byed kyi yod tshul yang gsungs/ mtshan rtags grub nas lo mang phyin rjes dge bskos tshab gnang ba'i nyin zhig lha rams 'dzin grwar yongs grags kyi mkhas pa gnyis mdzod kyi mu bzhi phra ba zhig yod med zhal ma mnyam par med pa'i rjes su phyogs pa mang du byung ba na/ rgan rin po che nas mu bzhi yod par bsgrub pa'i tshe rjes phyogs pa drag ga gcig nas de la mu bzhi 'dug na gser lug mgo tsam zhig 'bul chog ces zhus/ rtsa ba'i dam 'cha' ba por lung rigs dri ma med pas mu bzhi ngo 'phrod de khas blangs pa na sngar gyi rjes phyogs pa de la gser lug mgo tsam yang mi dgos lha rams 'dzin grwar gsol ja zhig phul cig gsungs/ gzhung don la dpyad pa'i rnam dpyod kyi rtsal shugs med kyang/ ham pa'i ri bo 'degs par rtsom pa dag la 'di nyid 'os shing sman pa nyid do/ / dge bshes gtong nyer yod kyang gtong sgo'i sbyin bdag 'tshol thabs sogs gtan nas ma mdzad/ rgyun du dge phrug tshor bslab bya skyong skabs su'ang/ mi la re ba ma che lha la gsol ba thob bya ba red/ mi la ngo bsrung byed mi dgos/ dkon mchog la gsol ba thob/ mi la rtag pa med cing dkon mchog la bslu ba yod pa ma red gsungs kyi yod pa de kho na ltar mdzad cing bzhugs pas de bzhin byung snang ste/ rtsod rgyugs ma ren tsam du tre hor dkar mdzes kyi tshong dpon bsod nams stobs rgyal nas gtong sgo'i sbyin bdag zhu rgyu zhus/ @11 lha rams pa'i rtsod rgyugs dmangs dang spyi mtshungs su bzhes par ma zad/ mi nyag skyor dpon dang rgan rnam gnyis mkhas snyan shin tu che bar brten srid skyong rwa sgreng rin po che nas dmigs bsal gyi rtsod rgyugs bzhes/ de yang bod kyi rgyal sa rdo rje gdan gnyis pa lta bu lha ldan dag pa'i zhing du grags pa'i byang phyogs srid skyong bzhugs gnas bzhi sde'i thog ga'i pho brang du rtsod dpang srid skyong mchog dang/ mtshan zhabs pa/ se 'bras kyi mkhas pa phal che ba 'dzoms pa'i dbus su gsungs rab kyi dka' ba'i gnad dag las brtsams te bgro gleng gnang ba na thog ma'i char rtags bsal sogs gcig las gcig bzang ba lta bur byung snang yang/ gzhung don zab tu 'gro ba dang rigs pa phra bar phyin pa'i tshe/ gang zhig thos bsam gyi lus stobs rgyas shing spobs pa'i spyi gtsug mtho ba legs bshad kyi 'gram chang rtag tu 'dzag pa la blo gsal bung ba'i tshogs mang du 'du ba/ sku nyams kyi gom stabs dal bur rgyu zhing/ rtsod ngag mi bzad pa'i sna zhags ring por bskyang ba'i khyu mchog de yang/ gang gis legs smon gyis byed pos bskrun pa'i skyes sbyang shes rab kyi lcags kyu rnon po dbu tshad kyi rigs pa'i ngar chu las drangs pa des rang dbang du bgyis pas snyan pa'i grags pa ches cher rgyas pa'i stobs kyis sngon chad zhal 'tsho tsam yang med pa'i skyor dpon gyi sbyin bdag ka shod pa yang yid kyi brtan pa dbang med du 'phrog te/ rgan rin po che rtsod rgyugs grub nas gtsug lag khang du gnas gzigs dang thugs smon mdzad rjes bar bskor phyi mar bskor ba skyon pa na/ ka shod chos @12 rgyal nyi ma lhun grub khong rang nyid kyis rgan rin po che gzims chung du gdan 'dren zhus nas dge bshes gtong sgo'i sbyin bdag zhu chog pa zhus pa na lam seng zhal bzhes ma gnang bar sbyin bdag gzhan zhig yod par dri dgos gsungs/ 'di yang deng dus dang bstun na ngo mtshar ba'i rnam thar ro/ /de nas bod zla 11 par dgun chos chen mo'i skabs dge bshes dam bca' dang/ gong gsal sbyin bdag nas gtong sgo zab rgyas zhus/ tre hor skyon dpon rin po che bya bral mdzad de sgrub pa la gshegs pa'i dus kyang 'di nas yin te/ khong bkra shis chos gling du bla ma rdo rje 'chang pha bong kha pa'i mdun bya bral du phebs rgyu'i gnang ba zhu bar phebs rjes se ra'i mdun bye rag yod sa nas rgan rin po che'i dge phrug gcig la rgan blo bzang dbang phyug dam bca' dang gtong sgo yag po byung 'dug pa thugs rje che zhus gsungs nas mjal dar zhig 'bul rgyur bskur/ zhal nas/ khong dgon pa'i 'khris su phebs nas shag tu mi 'ong ba gang yin nam snyam yang bla ma'i gnang ba thob ste sgrub pa la rings pa'i stabs kyis yin 'dug gsungs/ de nas dgung grangs 39 pa bod rgyal 2067 phyi lo 1939 rab byung bcu drug pa'i nyag ma 13 pa sa yos lor dgung gsar dgyes ston dkar gro'i tshogs bzhengs gnang/ de nas lha ldan smon lam chen mor gdan sa gsum gyi bka' rab 'byams dge ba'i bshes gnyen blo gsal 'dus pa rgya mtsho'i dbus su gzhung chen bka' pod lnga la sbyangs pa mthar phyin pa'i 'bras rtags su dam bca' 'jog gnang mdzad/ de yang zhog pa gsung chos rwa bar @13 rnam 'grel dang/ nyin gung 'khyams rwa chen mor dbu phar gyi skabs rnams su blo gsal zhing rigs lam la byang chub pa rnams kyis zab cing rno ba'i thal 'gyur gyi phreng ba mang du spros kyang gsung lan ral gri lta bus dum bu dum bur bcad pas thung nge ba las ma byung/ thugs la thung thung 'di 'dra rten 'brel la'ang mi legs par 'dug /dgong mo'i dam bcar lan lhod lhod byed dgos pa byung/ dam bca' grol nas smon lam tshogs skabs chos grogs gser kong mtshan zhabs rin po che nas lan yag po skyon song thugs rje che gsungs/ rgan rang gi dgongs tshul zhus pas/ gang yin gang yin rgyal ba dgyes pa'i mchod sprin sgrub pa'i mchod pa zer ba de yin pas lan yag po skyon rogs gnang zhes bskul ma gnang/ dgong mo 'dul mdzod kyi dam bcar/ gzhung lugs rab 'byams la mi 'jigs pa'i spobs pa gzengs su mtho ba'i dge ba'i bshes gnyen rnams kyis rtags bsal 'phangs pa la'ang gsung lan thogs med du gnang ba na/ mkhas pa 'ga' zhig thugs 'tshab ste sngon du go bsgrigs byas pa'i rtags bsal mi dran pa dang/ tsha la gi gu 'byar bas bzhad gad thing nge ba yang byung/ skyes bu ser skya'i rnam thar 'dzin pa'i rtog ge mgo 'khregs re tsam byung ba'ang gzhung len mkhan pos de gar tshar bcad pa'i lo rgyus kyang yod/ rgan rin po che dam bca' bzhag skor ser lho dge bshes tshul khrims yon tan nas rgan blo bzang dbang phyug dam bca' bzhag pa lta bu'i yag po de 'dra gzhan mthong ma myong/ lan khams dwangs po rtags @14 lan 'dod lan sha stag /gsar bu ba gcig gis btang na'ang 'dod lags zhes zhe sa dang 'brel nas gnang gi 'dug /grwa pa rgan pa rnams kyis rgan blo bzang dbang phyug gi thugs la gzhung thams cad par btab pa bzhin yod pa red gsung gi 'dug ces gsungs/ de ltar dam bca' bzhag grub pa na gzhung gi nges cha/ don gyi go ba/ rigs pa'i 'dzin mtshams sogs gang cir 'gran zla dang bral ba byung bas zhal btad skyor dpon nas kyang/ rgan nga rang gnyis rgan sngon ma red ces sogs zhus te rtsod med kyi ang gi dang po'i dang po bzhes/ dam bcar bzhugs nyin na gzab 'phyor gnang srol yod kyang rnam kun nas na bzar dwangs 'dod med gshis 'di nyin yang rten 'brel ched gser kong rin po ches dbu zhwa gsar pa zhig bsnams 'dug pa brjes pa ma gtogs rgyun chas de ga yin gsungs/ de nas mi ring por 'jam mgon tsong kha pa chen po'i gsang sngags kyi bka' srol nyams pa med par 'dzin pa'i dpal ldan smad rgyud grwa tshang du bzhugs 'ding skyon/ rgyud kyi rgyal po dpal gsang ba 'dus pa'i rtsa rgyud 'grel pa bzhi sbrags gsang sngags rgyud sde rgya mtsho'i dgongs don ji lta ba bzhin 'byed pa'i sbyang brtson rmad du byung ba mdzad de dgung grangs 40 lor sngags kyi rtsod rgyugs ang dang po bzhes te/ Ti ka skyor dpon dang/ khrid dpon bcas mdzad/ gzhan yang skabs skabs su ^gong sa lha mi'i rnam 'dren ^skyabs mgon sku 'phreng bcu gsum pa chen po mchog dang/ khyab bdag 'khor lo'i mgon po pha bong kha pa bde chen snying @15 po dpal bzang po/ lha btsun rdo rje 'chang thub bstan rab rgyas dpal bzang po/ khyab bdag bka' 'gyur ba brag ri lung rigs rgya mtsho dpal bzang po/ yongs 'dzin dga' khri gling sprul rdo rje 'chang dpal bzang po/ yongs 'dzin khri byang rdo rje 'chang dpal bzang po/ spangs rtogs yon tan bye bas mngon par mtho na yang/ dman la gcig tu dgyes pa'i mdzad pa can/ rang cag kha ba ri pa rnams la 'di phyi'i don gnyis 'bad med du 'jo bar mdzad pa'i sngon med pa'i yid bzhin gyi nor bu ^rgyal dbang sku 'phreng bcu bzhi pa chen po dge 'dun bstan 'dzin rgya mtsho dpal bzang po la sogs pa'i mdun nas byang chub lam rim chen mo'i bshad khrid/ dmar khrid sogs khrid kyi rigs/ bde gsang 'jigs dus sogs kyi dbang chen la sogs pa dbang lung khrid man ngag mtha' dag gsan te bstan pa yongs rdzogs kyi bdag po chen por bzhengs pa yin te/ ji skad du ^skyabs rje khri byang rdo rje 'chang nas bstsal ba'i zhabs brtan gsol 'debs su/ 'jam dpal rdo rje'i lung gi rtse brgya pas/ phas rgol log smra'i brag ri 'jig pa'i mthu/ /rang srid dge ldan skyong ba'i dpa' rtags su/ /'dzin byed bstan pa'i gnyen zhes don gnas kyi bsngags brjod mdzad cing/ bla ma gzhan dang gzhan gyis bsngags brjod ji ltar mdzad pa sogs ni mangs pas 'jigs nas ma bris so/ /ji ltar thos pa'i don rnams kyang thos lo tsam ma yin par thos don rgyud la sbyar bas zhi dul dang ldan pa/ chog mi shes pa sogs ltung ba 'byung ba'i sgo rnams bsdams te 'dod chung chog shes la gnas pa'i ngang nas ltung ba mi 'byung @16 ba'i thabs la 'bad cing/ rgya la byung ba rnams kyang 'phral 'phral du bshags sdom la 'bad par mdzad/ lhag par gso sbyong skabs bshags sdom bsten pa gal che tshul dang ma chag par 'gro dgos tshul sogs gsungs nas de bzhin du phyag len la 'debs par mdzad/ slob gnyer rgyab bzhin pa'i skabs gsung chos mang po zhu ba thugs mnyes po rang gnang gi med kyang mtshams mtshams su dbang chen zhu dgos/ dam sdom gso ba la khyad yod ces sogs gsungs te dam tshig dang sdom pa la gces spras shin tu che bar gnang/ rgyun gtan bzhugs tshul yang/ dgung grangs 47 skabs kho bos zhabs pad bsten pa'i skal bzang thob cing/ de skabs mkhas btsun bzang gsum gyi mtshan snyan che ba/ bla ma mang po'i yongs 'dzin gnang ba/ grwa tshang gnyis kyi dge skos zur pa bcas yin kyang che nyams dang rgyas spros sogs gang yang med par tre hor khams tshan gyi thog khar shag chung mdo sbug gnyis yod pa zhig tu bzhugs/ sbug tu chag sgam chung ngu zhig gi steng du sgam chag shel sgo spras pa'i nang rje rin po che dang/ rje btsun sgrol ma'i sku brnyan gnyis/ steng du phyag dpe mi nyung tsam zhig dang 'og tu sa gdan dang gdan khri gang yang med par bzhugs 'bol cha gcig zhal gdan dmar rkyang gcig /mdun du gsol lcog chung chung gcig /mdor gzim mal rkyang gdan gcig gi steng du grum gdan ser po rgal chad gcig dang gzim phrug rnying tsam pa/ gsol thab skor gnas skabs bed chod tsam las dmar ba gang yang med/ de ltar sku'i nyer spyad sogs mtha' gnyis su @17 ma lhung tsam dang phebs bzhugs gang gi tshe yang grwa btsun dkyus ma dang mtshungs par mkhas nyams che nyams sogs gtan nas mi mdzad pas su yin rung 'grogs bde ba yod/ zhal nas rab tu byung bas yo byad mang po gsog 'jog bya mi rung/ 'chi ba'i tshe bya rdo thog nas 'phur ba lta bu dgos zhes yang yang gsungs/ gsang sngags kyi nyer spyad kyang chag sgam du rdo dril dang nang mchod tsam yod pa las gzhan mngon mtshan che ba gang yang med par gsang zhing sbas pa'i sgo nas nyams bzhes gnang ba jo bo bka' gdams pa'i rnam thar gtsang ma bdag gir bzhes/ thugs rgyud kyang shin tu bzang ba zhig yod de/ 'gro ba nyam thag pa sdug bsngal gyis mnar ba gzigs pa'am gsan pa na thugs brtse ba chen pos bskyod nas spyan chab 'byin par mdzad pas dpog par nus la/ de yang rgan rin po che dge skos mdzad de rgyud smad e wam du tshogs pa'i skabs shig na gsar bu pa ngag dbang legs bshad sogs 'ga' zhig tshogs chen zhal ngos rku mar rta lcag gzhu sar lta bar phyin nas tshur 'ong ba dang/ dge skos nas ga bar phyin pa gsung pa na zhed snang tshad med skyes kyang lan drang por gsol bas/ ci 'dra ci byed 'dug gsungs par lus gcer bur bton te glang lcag gzhu gi 'dug zhus pas/ spyan chab char rgyun bzhin bsil te khong pa tshor yang bka' bkyon pa sogs ma byung/ dge bshes de ha cang gi thugs rgyud bzang po zhig yod ces phyis yang yang bsngags brjod byed pa dang/ yang dpe khrid skabs mu stegs rgyang phan sogs kyi 'dod pa 'chad skabs de @18 'dra'i lta ba log pa yang yong gi yod red gsungs nas brtse ba'i nyams kyis spyan chab bsil ba lta bu yin/ dar dgon dge bshes ser byes dge zur tshe bkra lags nas kyang blo bzang dbang phyug rigs pa'i dbang phyug red/ yar yar phyin rim bzhin thugs rgyud bzang du bzang du 'gro ba khong lta bu dgos pa red ces sogs gsungs/ bka' slob dang gsung mol ji 'dra zhig gnang rung mthar lus zhi dul dang sems bzang po dgos pa'i steng du kor re 'ong ba zhig yod/ mdor na gung thang rin po ches/ mang du thos pa rgya cher btsal bas mkhas/ /thos don ji bzhin rgyud la sbyar bas btsun/ /kun kyang bstan 'gro'i don du bsngo bas bzang/ /blo bzang rgyas ba'i bstan pa rgyal gyur cig /ces rje rin po che'i bka' srol 'dzin pa rnams kyi rnam thar gyi don bsdu mdzad pa ltar 'di nyid la mnga' ba yin no/ /bstan pa la bya ba mdzad tshul yang/ dgung grang nyer gnyis yan man nas dgung grangs mthar phyin gyi bar dmigs bsal 'ga' zhig gi skabs ma gtogs par dpe khrid kho na mdzad pa'i 'di nyid bstan pa'i bya ba rlabs che shos yin zhing/ dge phrug blo kha mtho ba rnams la yang dpe khrid byed dgos par yang yang gsungs/ gzhan yang dgung grangs zhe gcig thog smad rgyud grwa tshang gi dge skos/ zhe gnyis la ser byes grwa tshang gi dbyar kha'i dge skos bzhengs/ grwa tshang gnyis kyi sgrig lam dam chos 'dul ba'i dgongs don byang chub lam rim chen mo dang ngo bo dbyer med par gsung rgyun la yod pa ltar de dang mthun pa'i mi nyams gong 'phel nyams pa sor chud 'byung thabs/ tshogs @19 chos slob gnyer la bskul slong gnang rgyu sogs bstan pa'i mig rgyan dge skos kyi ming don mthun par mdzad/ dgung grangs zhe drug phebs skabs li thang shog drug skyabs mgon rin po che nas dbu ma'i lta ba'i skor phyag dpe tshigs bcad ma zhig brtsams nas sngon gyi mkhas pa'i srol ltar gdan sa chen po'i mkhas pa rnams la 'thad min brtag rgyur 'grems gnang mdzad pa na/ mkhas pa gzhan rnams mnyam nyid chen mo'i ngang du yur te lan gyi spros pa'i skabs ma byung/ rgan rin po che nas spyir bstan pa'i dag ther dang/ rtsom pa po'i bzhed pa bskong phyir skyon sel gyi mchan 'god mdzad de phul bas mchog tu dgyes te 'byin 'jug dgos pa rnams gnang nas phyis ljags lung gnang skabs sngon du 'di 'dra zhig yod kyang se ra'i dge bshes mkhas pa'i dbang po blo bzang dbang phyug gi gsung ltar 'di 'drar bcos tshul gsungs pa kho bo kyang thos/ zhe bdun la phebs pa na ^gong sa ^skyabs mgon yid bzhin nor bu se rar chos bzhugs bka' drin bskyang skabs tshogs chen 'du khang du mdzad sgo legs grub kyi dgyes ston dkar gro'i tshogs bzhengs gnang/ 'di lor grwa tshang gi khongs nas 'jang dgun chos su phebs mkhan zhan tsam byung stabs rgan rin po che'i dge phrug mkhan po las thog thub bstan bsam gtan mchog nas 'gro gron dang/ zhabs phyi btang te gdan zhus ltar rtags rig nas le'u bzhi pa bar nyin rer dpe khrid theng bzhi lnga tsam gnang ba'i bka' drin gyis nyin chos dang thor chos sogs la rtsod pa dang/ dam bca' sngon las lhag pa byung/ 'di skabs bla ma dbu mdzad bsko ba'i skabs @20 khel ba'i 'ga' zhig gis thugs 'dod yod med bka' 'dri zhus pa na/ lo chung dus yin na las sne 'dra yang byed 'dod yod da ni mdo sngags kyi lam rim gnyis la gang thub ci thub kyi nyams len byed snyam pa las gzhan 'dod pa gang yang med gsungs/ zhe brgyad bzhes pa'i skabs shig na nged cag la chos sdings gong du skyabs 'gro gsog gi yin gsungs/ don du sku mtshams bcad de sgrub pa rtse gcig tu mdzad par bzhed nas ^skyabs rje khri byang rin po cher de don gnang ba gsol bas sgrub pa las dpe khrid mdzad pa bstan pa spyi la phan che tshul gsungs te gnang ba ma bstsal bas sngar las kyang lhag par dpe khrid la brtson par mdzad/ 'di lor sku tsha nyi ma tshe ring btsun chung zhig zhabs zhur 'byor/ gzim shag tu zhabs phyi thog ma yin/ zhe dgur phebs skabs bod gzhung nas dge bshes mkhas pa gcig phyi rgyal du gtong dgos kyi 'dug gsungs nas dge bshes drag gras tshogs 'dur bskong ba sogs kyis cung zad thugs sun byung/ 'khrungs yul nas sku mched dkar mdzes dgon gyi spyi so tshe ring dbang phyug lha sar 'byor byung bas kyang phebs skul zhus yod tshod/ gtso cher smad phyogs kyi gdul bya 'dul ba'i dus mkhyen te 'khrungs yul du phebs rgyu'i dgongs pa btad/ rgyud pa nas 'then rgyu sogs sta gon rnams gsang stabs kyis mdzad/ 'di lo dgun khar rgyud smad du dam bca'i skabs rtags bsal bkra shis gang zhig ma gtong gnang mdzad pas 'ga' shas nas bkra shis brjod gnang song rgyud pa nas 'then rgyu yin pa red zer mkhan yang byung/ dgung grangs lnga bcur phebs pa lcags stag @21 lo'i smon lam skabs su rtags bsal tshig bzang sha stag gnang bas gang yin nam snyam pa byung/ bco lnga'i rgyab tsam la kho bor da nga lo chen po lnga bcur slebs zin pa red/ bla ma mang po'i mdun nas gsung chos mang po zhus khas len mang po zhus yod de dag ma bsgrub na dam tshig dang 'gal rgyu red/ de dag bsgrub ched pha yul du 'gro rgyu yin gzhan la ma lab gsungs/ gzhan rnams kyis kyang tshor te dge phrug rnams kyis grwa sa rang du bzhugs par gsol ba btab kyang gong ltar gsungs nas ma gsan/ ^skyabs rje khri byang rin po cher bshol 'debs gnang rog zhus pa na/ /rgan mkhas pa chen po red kho rang gi dgongs pa la ngas dgag bya zhu nus kyi ma red gsungs pas bya thabs bral/ smon lam grol rjes tre hor skyor dpon rin po che skyabs rje khri byang rdo rje 'chang gi mdun nas gsang bde 'jigs gsum gyi dbang chen zhu bar lha sar phebs/ khong dang thugs snang shin tu zab pas khong lha sa'i lho phyogs kyi grong zad mthar rtsig pa zhig gi 'khris su bzhugs yod sar rgan rdo rje bkra shis phyag phyir khrid nas mjal 'phrad gnang/ gsung mol mang du gnang/ skyor dpon rin po che nas nga tsho'i lung pa skyo po las 'bras dang blang dor la rmongs pa'i smag rum gyi khrod du rgan rin po che nas sgrub pa gcig po ma yin par bshad sgrub zung du 'brel ba'i sgo nas chos kyi sgron me spor dgos pa'i skul ma mdzad/ de rjes dgon pa nas lha sar dkar mdzes mtshan nyid grwa tshang gi khang par phebs bzhugs mdzad/ de nas rgan rin po che dang khang dmar rin po che sku 'khor/ ser byes @22 mkhan po/ se rung rin po che sogs chibs rag mdor bsdus bcas sku 'bum thang du grwa tshang/ khams tshan/ dge phrug spyi bcas nas phebs bskyel thabs bsu'i sar phebs/ gsol ja bzhes 'bras btegs/ mjal kha bcas grub nas mkhan rin po che dang/ se rung rin po che sogs kyis phar tsam bar phebs bskyel zhus/ khang dmar rin po che lhan phebs gnang/ dge phrug byings rnams dbu gur du mig mchi mas gang bzhin 'dus pa na der yod kyi dge phrug rgan pa lha rams pa mthu stobs lags nas spyan chab 'byin bzhin par ngu ngag gis rgan rin po che phebs lam du sku mnyel med par pha yul du bstan 'gro'i don thugs bzhed ltar 'grub pa dang/ nga rang tshos kyang tshogs chos slob gnyer rgan bzhugs pa'i skabs bzhin byed dgos pa'i bslab bya bskyangs/ de nas lam bar gyi dad ldan rnams kyi re ba skong bzhin par 'khrungs yul du phebs bsu zab rgyas dang bcas te phebs/ der lo bzhi lhag tsam bzhugs ring sgrub pa nyams bzhes gtso bor gnang thog bar bar du dad ldan gyi slob ma rnams la myur lam dmar khrid kyi nyams khrid/ byang chub lam rim chen mo/ legs bshad snying po/ spyod 'jug chen mo bcas kyi bshad khrid/ bla ma mchod pa/ dga' ldan lha brgya ma sogs kyi bka' khrid/ gsang bde 'jigs gsum gyi dbang chen/ mgon chos lha mo sogs kyi rjes gnang/ rje tshe 'dzin ma'i tshe dbang dpe cha ba rnams la dpe khrid gnang rgyu sogs gang la gang 'dod bzhin stsal/ lhag par sdom gsum bslab bya'i bka' khrid zab nan thog sdom pa bsrungs pa'i phan yon/ ma @23 bsrungs pa'i nyes dmigs/ nyams na phyir bcos tshul sogs zhib cing phra bar gsungs pas sngar dgon der gso sbyong la phebs mkhan dang/ chos gos rnam sbyar la do snang de tsam med kyang phyis gso sbyong la chag med dang/ chos gos rnam sbyar med na ngo nongs dgos pa lta bu'i srol chags te 'dul bstan nyin mo ltar gsal bar mdzad pa'i bka' drin bsam brjod las 'das/ /^gong sa ^skyabs mgon chen po mchog dgon der chibs sgyur gnang skabs dge slong rnam sbyar gyon pa sha stag gi 'phreng bstar nas bsu ba zhus pas thugs dgyes te bsngags brjod kyang gnang/ rong tsha ri khrod sogs su phebs nas chos mang du gsungs/ dkar mdzes sngags pa grwa tshang gi mkhan po'i mdzad khur lo gcig bzhes/ /de nas dgung grangs nga bzhi pa shing rta lor ^gong sa ^skyabs mgon chen po mchog nas ser byes mkhas snyan grwa tshang gi mkhan por dmigs bsal gyis bsko bzhag bstsal ba'i bka' yig rin po che phebs/ dgon der gdan sa khag nas slob gnyer mthar phyin pa'i dge bshes bcu phrag gnyis las brgal ba yod kyang khul de'i mi rnams ro gyong bas gzhan rnams kyis gdul byar ma gyur stabs grwa shar 'ga' shas nas/ nga tshor dge bshes phan thogs pa gcig yod pa de sde pa gzhung nas 'phrog rtsis byed pa red gtong gi min zer ba dang/ las sne rnams kyis rgan rin po che bzhugs rog gnang mkhan po dgongs zhu'i snyan zhu nga tshos 'bul gyi yin zhus pa dang/ rgan rang nas las sne gnang rgyu thugs 'dod med pas ji 'dra byed snyam du dgongs pa na/ sngar gyi rtsa @24 ba'i dge rgan dge bshes rdo rje gnas skyabs yar bzhengs te ^gong sa ^skyabs mgon chen po'i sku par spyi bor blangs nas sku na phra mo 'di 'dra'i skabs nas chos srid kyi mdzad 'khur chen po 'di lta bu bzhes kyi yod na bka' bcag nus bral bas rgan nas mkhan po gnang ste chos srid kyi zhabs 'degs gang yong sgrub dgos gsungs pa dang/ khul de'i bstan 'gro'i don yang phal cher grub zin pas yar phebs rgyur thugs gtan khel/ de nas khang dmar rin po che dang/ lam grags rin po che rnam gnyis kyis go ra thang du thugs spror gdan zhus ltar nyin bdun ring sku khams bsangs par mdzad/ gzhan spyi sger mang pos gsol ston bshams/ grwa pa gcig gis dkar yol yu ring dmar po zhig phul ba dbang gi mdog dang mthun pas bzhes pa yin gsungs/ de skabs nyams snang de tsam ma byung yang yi dam padma dbang chen dgyes pa'i brda mtshon lta bur gsungs pa yin nam snyam/ lha sar phebs nas nyams zhib mkhan gyis brtag pa na rin thang che ba'i dkar yol zhig yin 'dug /de nas phebs lam du zhugs nas chab mdor phebs/ der dge bshes byams pa mtha' yas lags nas mdo phyogs 'dzin grwa bcu gsum ser byes grwa tshang ji lta ba bzhin 'dzugs gnyer mdzad yod kyang/ sngags kyi 'dzin grwa 'dzugs rgyu yin pa bzhin 'di skabs rgan rin po che nas sngags kyi 'dzin grwa'i skar 'dzin nam dbu 'byed mdzad de/ sngags rim chen mo'i dbu nas brtsi bzhag lan gsum gtong ba bcas gnang/ de nas chab mdo mtshan nyid grwa tshang nas lha sa bar chibs thog gdan zhu chog pa zhus kyang snum 'khor thog @25 phebs nas spra mog tu ^gong sa ^kyabs mgon chen po'i mdun mkhan po gsar mjal zhus/ ^skyabs rje khri byang rdo rje 'chang mchog nas/ ya rgan blo bzang dbang phyug khyed rang da pha yul la skyid po gnang nas bzhugs dang zhes dang/ mar phebs dus grwa sa'i dge phrug tsho ngu shad tshag de ba bzos/ da yang pha yul du ngu shad tshag de ba bzos yod red sogs nang nyams kyis gsung gleng 'phel/ de nas rim phebs kyis bod zla 7 bdun pa'i tshes 28 nyer brgyad nyin lha sar 'byor te dbang 'dus khang gsar du bzhugs/ bod zla 8 brgyad pa'i tshes 3 nyin grwa tshang dang khams tshan gyis thab bsu bcas se rar phebs/ dge phrug mkhan zur dang bla sprul rnams chibs zhabs su bcar/ thog mar tre hor khams tshan gyi tshoms nang du rten 'brel gyi mdzad sgo gnang sar grwa tshang khams tshan sogs kyis maNDal rten gsum 'degs 'bul zhus/ gzhan yang dge phrug /thugs dge khag /lha sdod dkar mdzes dang dar rgyas khul gyi tshong rigs rnams kyang mjal khar bcar/ 'di dus se ra'i chab zhugs kyi skabs su khel zhing/ khang tshan gyi bgres pa rnams kyang nyin bdun tsam gyi ring gling khar chab zhugs thugs spro gtong srol yod pa der yang gdan 'dren zhus/ rnam kun khang tshan gyi las don skor la gros bsdur gnang gi yod kyang 'di lo rgan rin po che phebs pa'i dgyes ston lta bur las don gzhan bzhags te spro zhing bag phebs pa'i tshul gyis lhod bzhugs mdzad/ de nas bod rgyal 2081 phyi lo 1954 rab rgyal shing rta zla ba 8 brgyad pa'i @26 tshes 10 gza' skar mchog tu dge ba'i nyin ser byes grwa tshang gi 'du khang chen mo'i nang du byes smad sngags gsum gyi dge 'dun 'dus pa'i mang ja'i tshogs dbus su khams tshan dge rgan rnams kyis spos sne dang/ gong gsal thugs dge khag nas mtha' bsten dang bcas gdan drangs te yab rje rgyal ba gnyis pa'i sras kyi thu bo kun mkhyen blo gros rin chen sengge ba chen po'i mi 'jigs gdong lngas bteg pa'i chos kyi khri la zhabs sor bkod de chos kyi rgyal tshab chen por mnga' gsol/ der gzhung sa mchog nas gsol ja bzhes 'bras ^gong sa mchog gi phyag bsrung mjal dar bcas gnang/ gzhan yang grwa tshang tshogs chen khang tshan sogs kyis maNDal sku gsung thugs rten 'degs 'bul zhus/ tshogs dbus su ljags bsngo dang/ tshogs par bkra shis pa'i rdzas kha btags dkar gtsang re bcas 'bul gnang mdzad/ de nas grwa tshang yang steng bla brang gzim chung du gdan 'dren zhus/ gung tshig chos rwa'i skabs su chos khrir phebs/ shes rab snying po tshar gsum bzlog pa dgu bzlog tshigs bcad bcas grub mtshams dbu mdzad nas maNDal dbu bskul gnang/ grwa tshang nas mjal dar rten gsum phul rjes mkhan rin po che nas dbu bskul gnang ste lam rim chen mo'i mchod brjod bar gangs can shing rta bcugs nas lan gsum gsungs/ de skabs dbu zhwa phyag tu bzhes te gus btud gnang/ de nas sangs rgyas chos tshogs ma tshar gsum gyi rjes dbu zhwa dbu thog tu leb 'jog mdzad nas lam rim chen mo'i dbu nas chos thun gcig gnang grub rjes maNDal bcas phul te @27 gzim chung du phebs/ de nas gzim chung du chos phyogs kyi mdzad sgo'i thog mar rgyud smad mkhan po skal bzang rnam rgyal lam ka blo zhu ba de dang/ dge bshes thub bstan bkra shis/ kho bo cag sogs mi drug la dge bshes lha rams pa'i ming rtags gsol stsal gnang zhing/ grwa tshang tshogs 'du lhan rgyas su bka' mol gyi thog mar bcu dgu mchod pa'i skabs grwa tshang nas dge 'dun rer gsol zhib mda' zo kha bcad re 'bul gyi yod pa da nas bzung ji srid nam gnas bar kha gcod ma dgos par byur bur bkang ste 'bul rgyu'i thag gcod gnang ba ni grwa tshang gi thos bsam slob gnyer/ 'dod rgu longs spyod gsang 'phel du 'gyur ba'i rten 'brel du mngon/ de nas 'phags pa lha rigs chung tshogs bzhengs grub pa'i mdzad sgo gnang/ grwa tshang nas ston chos chen mo'i skabs 'bru phog yod med nges med gnang gi yod pa 'di lo nas bzung 'bru khal re 'bul rgyu gtan khel mdzad/ bod zla bcu par phar phyin gyi tshogs dbur phebs/ dgun khar bsnyun gzhi ljid tsam zhig bzhes par zhal nas/ 'ga' zhig gis gdan sar phebs pa ma legs tshul zer yang/ nga rang gi bsam par pha yul du yod na'ang las dbang gis na tsha 'di yong gi red/ rim gro dang/ sman bcos kyi cha rkyen 'di ga tsam mi 'dzoms pas 'chi ba las 'os med/ da len ma shi ba ^skyabs mgon rin po che'i bka' drin yin gsungs te gdams ngag gleng mo'i tshul gyis 'doms par mdzad/ shing lug lor ^gong sa ^skyabs mgon @28 chen po mchog gdan sa khag la gnas gzigs dang 'brel ser byes chos rwa'i nang rtsod gzigs su phebs te gam bcar ba rnams sku drung du med pa'i seng bar du grwa tshang gi las don skor bka' 'dri dang/ dka' ngal byung tshe snyan sun zhus chog pa'i bka' bzhes thob kyang de 'dra yod tshul dang/ snyan sun zhu ba sogs gtan nas ma mdzad/ dgun stod chog grwa rgyud smad dge 'dun pa bcu grangs dang rdor slob ^skyabs rje yongs 'dzin khri byang rin po ches gnang nas grwa tshang yang steng du nyin gsum ring rab gnas tshugs/ mkhan brgyud kha skong yang 'di dus gnang/ dge chos kyi klu rgyan la dgag lan brtsom rgyu'i sta gon gnang yang/ de rjes klu 'bum lha rams pa shes rab rgya mtshos rtsom gyi yod par gsan pas 'jog par mdzad/ me sprel lor grwa tshang gi tshogs gdan dang rgyun brgyab kyi mchod rdzas bgres zad che bar brten/ tshogs gdan gsar brje dang/ mchod rdzas sngon ma las che legs gsar bskrun gnang/ dam pa gong ma rnams kyis rten rnying par rab gnas yang yang bskyar dgos par gsungs pa ltar 'di lo zla ba lnga par rgyud smad tshogs yongs gdan zhus kyi tshogs dbur ^gong sa ^skyabs mgon chen po spyan drangs te rdor slob gnang/ gzhan yang khri thog go drug pa thub bstan kun dga' dpal bzang po/ ^skyabs rje yongs 'dzin rnam gnyis/ mkhan po las zur dang bcas dpal ldan smad rgyud pa'i phyag len ji lta ba bzhin rab gnas cho ga dge legs char 'bebs kyi sgo nas rten la lhag gnas dang/ @29 tshogs par yon gyis mnyes par mdzad/ rab gnas grub 'phral grwa tshang 'du khang du ^gong sa ^skyabs mgon chen por mdo lugs brtan bzhugs dang 'brel grwa tshang tshogs mang nas mjal kha zhus/ lhag gnas kyi mthus grwa tshang phyi nang snod bcud gang sar dge mtshan mngon gsal can byung ba de skabs kyi las byed pa po rnams mthun par gleng/ me bya lor rwa sgreng rin po che chos bzhugs kyi mdzad sgo dang/ 'di lo rgya gar 'phags pa'i yul nas chos tshogs kyi lta skor tshogs pa zhig bod du phebs nas gdan sa khag dang/ grwa tshang so sor gzigs skor gnang skabs grwa tshang gi sne len sar bstan pa rin po che yun du gnas pa'i thabs 'ba' zhig thugs la brnag pa'i mthus gzhan dag dang mi 'dra bar sku mgron la dga' bsu yod tshul dang/ 'phags bod chos kyi 'brel ba che tshul/ bod du chos lugs nyam dmas byung na rgya gar gzhung dang chos tshogs kyi rogs phan dgos pa'i 'bod bskul gnang/ sa khyi lor grwa tshang nas ^gong sa ^skyabs mgon mchog la brtan bzhugs dang/ ^skyabs rje yongs 'dzin rnam gnyis la'ang lha ldan gzim shag so sor brtan bzhugs 'bul bar mdzad/ ^gong sa ^skyabs mgon chen po mchog gis gzhung chen bka' pod lnga la sbyangs pa mthar phyin pa gnang grub nas phyi lo smon lam chen mo'i skabs lha rams mtshan rtags bzhes rgyu'i sngon 'gro gdan sa khag la phebs te se ra tshogs chen du mtshan rtags mdzad sgo'i nyin rgan rin po che dam bcar bzhugs te @30 ^gong sa mchog la gsung lan 'bul bar mdzad/ mkhan po gnang ring ^gong sa mchog gi mdzad chen gal che rigs la bka' dgongs bzhin dkar spro'i tshogs bzhengs yang yang gnang/ bod mi mang nas gser khri 'bul skabs kyi mdzad sgor tshogs bzhengs skabs sa bcu'i byang chub sems dpa' chen po la phyogs bcu'i rgyal ba rnams kyis 'od zer chen pos dbang bskur ba las brtsam te rig lam spro bar mdzad cing/ rin po che'i padma la bzhag ste zhes pa gser gyi khri la bzhag ste zhes tshigs bsgyur mdzad pas mchod yon sku 'khor tshang mar thugs smon gyi gsos 'debs bla na med par gyur/ ^gong sa mchog nas gsol mgron brgyud gser gyi gsol ltir nas gsol ja gnang bar mdzad/ de dag gi skabs kyi zhal btad rnams kyang lha rams ang dang po bzhes nas mkhan po'i go sar phebs pa ming don gnyis ka nas ches rgan par gyur pa dag yin mod kyang/ rgan rin po che'i 'bel ba'i gtam gyis thams cad kyang blo gsal gzhon nu'i ngang tshul la sbyor bar mdzad pa ni der 'khod gzur gnas rnams kyis mkhyen chub ltar dang/ der brten ^gong sa mchog nas rgan rin po che'i skor gsung gleng mang po gnang gi yod 'dug pa/ ^skyabs rje khri byang rin po che'i zhal nas deng sang rgyal ba rin po che'i gzim chung rgan blo bzang dbang phyug gis dag dag sbyang bzhag yod do/ /zhes phebs/ gong du bkod pa rnams kyis mtshon grwa tshang gi las don gang ci'i thugs 'gan bzhes shing/ ma zad zhog chos brtsis bzhag /nyin chos lam rim @31 'chad nyan dang brtsi bzhag /rgyun du dpe khrid/ dam bca' dang/ 'dzin grwa so sor rtsod gzigs bslab bya sogs yang yang gnang ba la brten nas dge 'dun gyi zhal grangs tshogs chos slob gnyer sogs gong 'phel du gyur/ de nas mkhan po dgongs pa zhu rtsis gnang ba na lho pa dge bshes blo bzang don yod lags nas lo rjes mar rwa sgreng rin po che rigs chung gi mdzad sgo/ 'phags pa lha mtshan rtags kyi mdzad sgo bcas khel stabs lo gcig bzhugs thub na legs tshul zhus par de dag khyed rang gi thog la gnang na 'grigs kyi red ces gsungs/ sa phag smon lam chen mor ^gong sa ^skyabs mgon chen pos rab 'byams pa'i mtshan bzhes bka' drin bskyangs grub pa'i rjes la dgongs zhu phul bas dgongs 'khrol legs par thob ste gsar pa gong gsal dge bshes de rang la phyag rtags phebs/ 1959 lor rkyen dbang gis btsan byol du phebs te sbag sa chos sgar spos skabs kyang mkhan po gsar pa ma phebs bar mkhan po'i las 'khur gnang/ yul gyi tsha ba dang dgung na'i babs kyi sku'i 'phrod bsten sogs gang cir sku'i ngal bar ma ltos par gtso che ^gong sa chen po'i bka' dgongs dang/ yang sgos rgyal bstan nyag phra thugs kyi ma bzod par ris med 'dus dmangs mnyam bzhugs kyis dad 'dud ris med dge 'dun rnams la byang chub lam rim chen mo'i bshad khrid/ drang nges legs bshad snying po'i bshad khrid theng gnyis/ sngags kyi sa lam dang/ sku gsum lam 'khyer gyi @32 khrid/ theg chen gso sbyong gi sdom pa/ 'grel pa don gsal gyi bshad khrid/ nyin ltar dbu phar sogs dpe khrid chos thun gnyis re phal cher chag med gnang/ gzhan yang dpe khrid gnang skabs don zab cing 'brel chags la go bde ba gsung bshad nyung ngus gzhung gong 'og kun la nges pa ster thub pa zhig yod pas/ a mdo dang/ dbus kyi gdan sa khag nas gzhung chen mtha' dag la sbyangs zin pa 'ga' zhig kyang gzhung chen mo lta ci/ bsdus grwa khrid skabs su yang chag med du bcar ba yang byung/ tre hor skyor dpon rin po che Dal hor du bzhugs skabs 'ga' zhig nas sbag sar phebs na grwa tshogs mang bas phan thogs che tshul zhus pa na/ nga 'gro dgos kyi ma red/ rgan blo bzang dbang phyug yod red ces gsungs/ mkhas pa mkhas pa'i nang na mdzes zhes pa yang 'di lta bu la zer bar mngon/ 1969 lor lho phyogs ma'i sor gzhis chags su phebs 'byor zin nas kyang gsang 'dus rim lnga gsal sgron/ sngags kyi sa lam/ grwa tshang 'di nyid kyi thun mong ma yin pa'i yi dam padma dbang chen gyi bka' dbang theng gnyis dang/ lhag par thugs brtson sngar las kyang cher bskyed kyis slob gnyer ba rgan gras rnams smos ci gsar zhugs blo gsal ba rnams la'ang rigs pa'i sgo 'byed bsdus grwa nas bzung rang rang 'dzin gra'i skabs dang mtshams pa'i dpe khrid sku'i nyog tshul cher bzhes ma byung bar nyin ltar chag med bka' drin che skyang la brten de skabs 'dzin grwa drug tsam phra tshugs/ de dag ni skyabs mchog dam pa gang nyid kyi thabs mkhas thugs rje dang ring mo zhig nas snyigs lnga'i dus 'dir rgyal ba'i bstan la gcig tu sman 'gyur gyi thugs bskyed dus su bdo ba gor ma chags shing/ ser byes rgyud smad mkhan zur u rgyan tshe brtan mchog nas yi dam gyi bka' dbang snyan gsan phul nas dus tshod gang tsam phyin pa'i nub gcig gzim lam du bud med chas bzang zhig nas byu ru dmar po mdog legs mang po zhig sku gzan gyi lteb tu phul zhing/ sku nyid nas de gzhan zhig tu byo bar mdzad pa na rdog gnyis lhag pa zhig byung ba yi dam gyis gnang ba bstsal bar dgongs nas grwa tshang tshogs yongs su bka' dbang theng dang @33 po gnang/ de skabs grwa pa gnyis grwa tshang gi las don du phyogs gzhan du bskyod nas dbang ma thob/ phyis khong gnyis nas zhus te tshogs yongs su theng gnyis pa bstsal/ byu ru gnyis lhag pa de'i ltas su mngon gsungs/ bka' dbang skabs kyi mchod gtor bca' gshom dang/ gang las brgyud pa bcas ^gong sa ^skyabs mgon chen po mchog gis ji lta ba bzhin gzigs pa gzim lam du byung tshul yang gsungs/ yang zhal nas/ rje btsun pa yang dgung grangs don drug las bzhugs yod pa ma red/ nga yang de tsam yin 'gro gsungs pa dang/ bkon rdor sprul sku sku na gzhon pa'i skabs shig la'ang rje btsun pa'i dge phrug yin na lo don drug sdod dgos zhes sogs gsungs kyi yod pa ltar dgung grangs don drug du phebs par nye ba na 'ga' zhig la ring por mi bzhugs pa'i zhal ta phebs shing/ gdan sa chen po rnams su thugs smon dang 'brel bsnyen bskur zab rgyas gnang/ de'i rjes tsam la ^gong sa mchog hun sur du phebs skabs zhal mjal ma thag dang/ gzim chung du'ang mchod 'bul gnang ba de ga re'i ched du yin pa zhes dang/ gzhan yang de skabs rgyud smad du phebs yod pa da lta'i khri zur rin po che 'jam dpal gzhan phan mchog dang/ blo chos rin po che sogs la'ang rgan blo bzang dbang phyug gis mchod 'bul chen po gnang ba dgongs pa ga re yin shes sam/ rgan lta bu lo shas bzhugs thub na'ang dga' po yong ba 'dug ga /mi 'dug gam zhes dang/ sku tshe brtan pa'i gsol ba 'debs dgos gsungs pa bzhin du khong rnams kyis kyang gsol ba btab/ @34 ^gong sa mchog rda sar phebs grub nas kyang tshe rdzas dang/ phyag bris bcas bstsal gnang mdzad pa ltar thugs 'dun bsgyur nas dgung grangs don dgu bar bzhugs/ bod rgyal lo 2106 phyi lo 1979 rab byung rgyal po'i bgrang bya 53 pa sa lug lor dgung grangs don dgur phebs pa na gzim lam du/ brag g.yang gzar po zhig gi ngos su grwa tshang yod pa la/ de'i thad gong nas brag rdo shin tu chen po skyi g.ya' ba zhig 'gril nas 'ong ba grwa tshang gi thog tu bab na bcom tshar ba lta bu'i dngangs skrag byung ba dang/ grwa tshang skyob thub na rang nyid ji ltar gyur kyang sla snyam pa'i thugs stobs bskyed de phyag gnyis brkyangs te bkag pas 'gog thub pa zhig rmis zhes rgan blo bzang bde legs la gsungs nas gzhan la ma bshad ang zhes gsungs/ de nas bzung grwa tshang rin po cher sku mnyel chen po zhig mi yong ngam zhes thugs ngal yang yang gnang/ rjes su brtan bzhugs 'bul skabs shig la brtan bzhugs legs po byung tshul zhus pa na'ang brtan bzhugs phul kyang kha seng nas lab tshar ba de ga rang red ces gsungs/ gsung 'di dag la dpag na bzhed bzhin du grwa tshang gi bar chad bzlog pa'i ched dgongs pa gzhan du gtad pa zhig yin par gor ma chag go /bod zla bzhi pa'i nang tsam nas nyin re bzhin 'jigs byed lha bcu gsum gyi bdag 'jug bzhes par mdzad/ phyi zla 6 tshes shar tsam la rnam kun dang cung mi 'dra ba'i blo gsar ba tshor slob gnyer byed phyogs/ bsgrigs lam khur stangs/ rgan gzhon go rim rtsi gal che lugs sogs kyi bka' slob gtso bor ston gnang ba dang/ gzhan yang dge 'dun phyogs 'ga' dang 'ga' la ring por mi bzhugs pa'i gsung sgo yang yang phebs par brten grwa tshang mkhan las 'dus mang yongs nas rang mos bla khag la thugs dam phul ba'i phyir phebs zhabs rim smin sgrub zhus dang zhu mur/ phyi zla 7 tshes 18 skor nas phran bu sku khams snyog tshul bstan par gong zla'i tshes 21 nyin ma'i sor sman khang du sman bcos gdan zhus kyis sku'i 'phrod bsten 'byung thabs dang/ phyogs gcig nas zhabs zung yun brtan gyi ched ^gong sa ^skyabs mgon chen po mchog dang/ ^skyabs rje yongs 'dzin rdo rje 'chang rnam gnyis/ gzhan yang rang mos bla khag la thugs dam brtags pa zhus phral/ phyir phebs zhabs rim rnams grwa tshang phyag khang dang/ 'dus dmangs yongs/ khang tshan/ bla brang zhabs 'bring/ dkar mdzes skyid sdug bcas spyi mgrin nas phyar ba gru 'degs kyi sgo nas phral phral smin sgrub dang/ brtan bzhugs star 'bul bcas sgo gang sa nas lhod yang du ma song ba zhu bzhin mur/ slob bu rnams bsod nams dman rkyen gyis bod zla 7 pa'i gnam gang/ phyi zla 9 tshes 21 nyin mo'i gung chu @35 tshod dang po yol tsam la dgongs pa zhi dbyings su mna' tshul bstan nas/ phyi zla 9 tshes 24 snga dro chu tshod lnga par thugs dam 'od gsal las bzhengs rtags byang sems dkar dmar phebs pa bstun/ gdung khrus dang/ zhugs 'bul zhu sgo sogs gzhung dang mthun pa zhu skabs nam mkhar 'ja' sprin 'khrigs pa dang/ sku gdung zhugs su phul ba'i dad rten yid ches kyi gnas su gyur pa bcas kyis bdag sogs gdul bya rnams bcos min gyi dad gus lhag par 'phel ba'i rgyur son cing/ dam pa gang nas drang nges legs bshad snying po thugs dam gtsigs cher gnang stabs sku gdung rin po che bzhugs kyi ring nyin mtshan sbrel nas bklags shing/ sku'i bdun tshig nam yin dang/ sku gshegs kyi dus chen nam yin la lo gcig ring grwa tshang tshogs dbus su gsung bsgrogs zhus/ dus chen gcig la ^gong sa yid bzhin nor bu tshogs dbur zhabs 'khod kyis lhan gsungs gnang/ gdung rten thub dbang gi sku bzhengs pa na bzo bo rang yang shin tu ya mtshan pa'i byon gtsang phebs pa da lta grwa tshang rin po che'i rten gtsor bzhugs pa lags so// // de ltar rje bla ma mchog gi thun mong ba'i mdzad pa rag rim tsam zhig rang gis mjal ba dang/ gzhan ngag sgros tshad ma las 'byung ba gcam bu dang/ rab rtog gis ma bslad par ser lho chos ldan sprul ming pas rang bzhin bcos min du bkod pa 'di yang tshe rabs kun tu rje btsun bla ma dam pas mnyes bzhin rjes su 'dzin pa'i rgyur gyur cig / @36 ! drang nges legs par bshad pa'i snying po'i zin bris blo gsal sgron me zhes bya ba bzhugs so/ / @37 ! oM swa sti/ gang sku mtshan dpe'i dkyil 'khor yongs su rdzogs/ /chos tshul snod dang mtshams pa'i 'od stong 'bar/ /mkhyen brtses dbyings dang 'dzin ma kun 'chings pa'i/ /rnam 'dren nyi ma'i gnyen la gus phyag 'tshal/ /rgyal O kun mkhyen rab gcig bsdus d+hI yig zol/ /rgyal O ba'i yab dang yum sras rnam rol las/ /rgyal O ba gnyis pa blo bzang grags pa'i gar/ /rgyal O ba'i dgongs zab 'byed par dad phyag brtsegs/ /blo O chen blo O yi lang tsho rab rgyas rigs tshul bzang O pos yongs su 'khyud/ /mkhas O pa'i mkhas O par bka' yi dbang O bgyid lung dang rtogs pa'i nor gyis phyug O /blo O gsal blo O yi rnam dpyod 'byed byed 'chad tshul bzang O po'i rlabs kyis brjid/ /dbang O po'i dbang O phyug O dpyid du bzhugs la byang chub bar du rjes su skyongs/ /dpyad gsum dag pa'i lung gi mda' stan la/ /tshul gsum rigs pa'i sgro ldan stong sbyar nas/ /gnas gsum don rnams cig car 'big byed pa'i/ /rigs gsum gcig bsdus bla ma'i gsung zin spel/ /de la bdag cag gi rnam par 'dren pa chen po/ bka' drin dang thugs rje mtshungs zla bral ba/ nges pa don gyi mkhas mchog smra ba'i seng ge mtshan brjod par dka' ba don gyi slad du mtshan nas smos te ser byes mkhan zur rin po che rdo rje 'chang blo bzang dbang phyug dpal bzang po'i zhal snga nas kyis zab don 'brel ba'i legs bshad rmad du byung ba rje nyid nas kyang bka' rtsom gzhan la ma sbyar bas mtshan legs par bshad pa'i snying po zhes bsngags pa don dang ldan pa'i @38 bstan bcos chen po 'di nyid kyi dpe 'khrid bstsal ba'i skabs gcig na ^skyabs rje pha bong kha pa'i mchog sprul rin po che nas zin bris 'debs par mdzad pa dang/ dgongs pa gzhan don du gshegs par nye ba na mkhan chen rdo rje 'chang de nyid kyi gsung sgra 'dzin 'khor lor bcug pa kha yar 'dug pa rnams gong 'og bsgrigs te phyogs gcig tu dgod pa la zhugs so/ /'di 'chad pa la gsum/ bshad pa la 'jug pa'i bya ba/ bshad pa nyid nye bar 'god pa/ bshad pa mthar phyin pa'i bya ba'o/ /dang po la gnyis/ mchod par brjod pa dang/ bshad par dam bcas te nyan par bskul ba'o/ /dang po la gnyis/ bstan bcos gzhan gyi 'gyur phyag dang mthun par mchod par brjod pa dang/ bstan bcos lus kyi mchod par brjod pa'o/ /dang po ni/ na mo gu ru manydzu g+ho ShA ya zhes pa ste don 'gyur byas na bla ma 'jam dbyangs la phyag 'tshal lo zhes pa ste dgos pa ni bstan bcos 'di mngon pa'i sde snod du gtogs pas sngon gyi bkas bcad dang mthun par mdzad pa'am/ yang na drang nges spyi don las/ khyad par du yang/ 'jam mgon bla ma'i drin gyis legs mthong nas/ /zhes 'jam dbyangs kyis bka' drin la brten nas drang nges kyi dgongs pa phyin ci ma log par rtogs zhes gsungs pas bstan bcos 'di'i thog mar bkod pa yin nam snyam mo zhes gsungs pa ltar te 'dis ni rang gi rtsa ba'i bla ma de sangs rgyas las lhag par blta dgos par yang bstan to/ /gnyis pa la gnyis/ ston pa la mchod par brjod pa dang/ @39 bstan 'dzin la mchod par brjod pa'o/ /dang po ni/ bde 'byung sprin la zhon dang zhes sogs te don ni srid pa gsum na 'gran zla med par rlom pa'i lha chen po brgyad sogs zil gyis gnon pa'i sgo nas bstod pa ste/ 'dir zil gyis mnan bya la 'gying zhes lus dang/ nga ro zhes ngag dang/ dregs pa'i zhes dang rlom pas zhes yid de gsum 'byung ba ltar sku'i gzi byin dang/ gsung rten 'brel zab mo'i nga ro dang/ thugs mkhyen brtse'i yon tan gyi sgo nas zil gyis gnon par sbyar du rung ngam snyam ste smra ba zla med kyi sgo nas mchod par brjod pa'o/ /'dis ni rang gzhan gyi ston pa dang bstan pa'i khyad par rig par byas te 'jig rten pa'i lha la skyabs su 'gro mi rung bar bstan to/ /gnyis pa la gsum/ sras kyi thu bo gnyis la mchod par brjod pa/ shing rta'i srol 'byed gnyis la mchod par brjod pa/ shing rta'i srol 'dzin rnams la mchod par brjod pa'o/ /dang po ni/ mkhyen brtse'i gting mtha' shin tu dpag par dka'/ /zhes sogs kyis 'chad/ don ni/ sras mchog gnyis rgya mtsho chen po dang chos mtshungs rnam pa gsum gyi sgo nas rgya mtsho chen po'i gzugs su bkod de mchod par brjod pa'o/ /chos mtshungs gsum ni/ rgya mtsho gting mtha' dpag dka' ba/ rba rlabs g.yo ba/ rin po che'i gter du gyur pa gsum dang/ 'di gnyis kyi mkhyen brtse/ byang chub spyod pa'i tshul/ legs par bshad pa'i gter du gyur pa rnams sbyar ba'o/ /'dis ni byang chub chen po bsgrub pa la zab rgyas kyi lam gnyis ya ma bral ba dgos par bstan to/ gnyis pa ni/ bde gshegs gsung rab tshul gnyis shing rta'i srol/ /zhes sogs kyis 'chad/ don ni/ 'di gnyis kyis bde @40 bar gshegs pa'i gsung rab kyi lam srol mi 'dra ba gnyis kyi shing rta'i srol legs par phye ba'i sgo nas bstan pa'i mchog theg chen gyi bstan pa sa gsum na gsal bar mdzad pa'i mdzad pa rlabs che ba'i sgo nas mchod par brjod pa ste/ 'dis ni gsung rab kyi zab don 'grel ba tshul 'di gnyis las 'dar mi rung bar bstan to/ /gsum pa ni/ shing rta chen po'i srol gnyis legs bzung nas/ /zhes sogs kyis 'chad/ don ni/ dbu sems kyi shing rta'i srol 'dzin 'di rnams kyis rang rang gi shing rta chen po'i srol legs par bzung nas 'dzam gling gi blo gsal rnams la shes rab kyi mig 'byed par mdzad pa'i yon tan brjod pa'i sgo nas mchod par brjod pa ste 'dis ni dam pa bar ma chad par brgyud pa'i man ngag dang ldan par bstan to/ /'di dag gis ni rnam grol don du gnyer ba'i nyams su blang bya'i chos de yang ston pa sangs rgyas kyis gsungs/ sras kyi thu bo gnyis sogs bka' bsdu ba po rnams kyis bsdus/ shing rta chen po sogs kyis legs par bkral/ paN grub dam pa gcig nas gcig tu brgyud de byin rlabs kyi brgyud pa bar ma chad pa zhig dgos kyi sa chos gnam chos thol byung sogs la yid brton du mi rung bar bstan pa yin no/ /gnyis pa bshad par dam bcas te mnyan par bskul ba la gnyis/ bstan bcos kyi che ba bstan te bshad par dam bca' ba dang/ blo gros dang ldan zhing don du gnyer ba'i nyan pa po la mnyan par bskul ba'o/ /dang po ni/ gzhung lugs mang thos zhes sogs rkang pa drug gis 'chad/ gnyis pa ni/ bstan pa'i de nyid ces sogs rkang pa gnyis kyis 'chad/ don ni/ mang du @41 thos pa/ rigs pa smra ba/ mngon par rtogs pa ste yon tan gsum ldan gyis kyang 'bad rtsol ji tsam bgyis kyang rtogs par ma gyur pa'i gnad de ni zhes pas bstan bcos 'di'i brjod bya dang/ bstan pa'i de nyid ces sogs kyis dgos pa/ smra ba zla med 'dod rnams zhes pas nying dgos/ 'brel ba shugs la bstan pa bcas dgos sogs chos bzhi dang/ rje nyid la bstan bcos rtsom pa'i rgyu phun sum tshogs pa mnga' bar yang bstan pa yin te/ go sla'o/ /'di dag gi tshig don zhib par rje btsun chos kyi rgyal mtshan dpal bzang po'i drang nges spyi don sogs las shes par bya'o/ /gnyis pa bshad pa nyid nye bar 'god pa la gnyis/ drang nges kyi khyad par rigs pa rnam dag gis gtan la 'bebs dgos par bstan pa dang/ de ltar gtan la 'bebs pa'i tshul lo/ /dang po la gnyis/ mdo'i drang nges 'byed dgos shing lung tsam gyis 'byed mi nus pa dang/ des na rigs pas drang nges 'byed dgos pa'o/ /dang po la gnyis/ spyir drang nges 'byed dgos tshul dang/ lung tsam gyis 'byed mi nus pa'i tshul lo/ /dang po ni/ stong pa zhi ba skye ba med pa'i tshul/ /zhes pas chos rnams kyi ngo bo bden pas stong ba/ rgyu bden par grub pa'i mtshan ma zhi ba/ 'bras bu bden pa'i skye ba med pa ste rnam par thar pa'i sgo gsum bstan/ de gsum 'dus byas 'dus ma byas kyi chos thams cad kyi steng du 'thad cing tshul de mi shes pas 'gro ba rnams 'khor bar 'khyams par gyur pa na bde ba mi 'byung zhing sdug bsngal rgyun mi chad pa des na 'gro ba de dag la brtse ba thugs rje chen po mnga' ba ston pa thugs rje can gyis sdug bsngal de dag gcod pa'i phyir du thabs kyi tshul sbyin sogs phar phyin drug dang @42 bsdu ba'i dngos po bzhi la sogs pa dang/ shes rab kyi tshul rten 'brel gyi rigs pa la sogs pa bden med sgrub pa'i rigs pa'i sgo mang po dang bcas pa thabs shes kyi chos gnyis bstan nas zab mo stong pa nyid kyi don khong du chud pa ste rtogs pa la 'dzud par mdzad do/ / stong nyid khong du chud pa yang nges don gyi gsung rab zhig la brten dgos la/ des na nges don gyi gsung rab ngos zin dgos te/ de gsung rab kyi drang nges 'byed pa la rag las pa'i phyir/ drang nges 'byed pa la'ang tshig dang don gyi drang nges 'byed tshul gnyis las/ dang po ni nges don dang drang don la yid dpyod tsam gyis go ba brnyed nas/ nges don brjod byar byed pa'i gsung rab la nges don dang/ drang don brjod byar byed pa'i gsung rab la drang don gyi gsung rab kyis go ba brnyed pa na yid dpyod kyis tshig gi drang nges 'byed par bzhag /gnyis pa yang de dang 'dra'o/ / mkhas pa 'ga' zhig tshig gi drang nges yid dpyod kyis 'byed nus kyang don gyi drang nges 'byed pa tshad mar rag las zer/ 'o na brjod bya don gyi drang nges 'byed pa'ang yid dpyod tsam gyis bzhag chog par thal/ tshig gi drang nges 'byed par yid dpyod tsam gyis chog pa gang zhig /rnam pa kun tu mtshungs pa'i phyir ro/ / yang gsung rab kyi drang nges 'byed pa'i don gsung rab las 'di drang don gyi mdo yin 'di nges don gyi mdo yin zhes gsungs pa rang nyid kyis shes shing de rgyu mtshan du byas nas drang nges 'byed pa yin gsungs na gnod byed gnyis kyi zlog tu med do/ / @43 'o na rang lugs la gsung 'di'i don ji ltar zhe na/ sngar gong du bshad pa de yin gsungs/ gnyis pa la gnyis/ lung tsam gyis nus pa la gnod byed dang/ mi nus pa'i sgrub byed do/ /dang po la gnyis/ lung tsam gyis nus na lung don 'chad mi dgos par thal ba dang/ 'gal ba la mi 'khrul ba yod par thal ba'o/ / dang po ni/ de gnyis rnam par 'byed pa yang 'di ni drang ba'i don no 'di ni nges pa'i don no zhes sogs kyis 'chad/ don ni/ drang nges rnam par 'byed pa la yang 'di drang don 'di nges don zhes lung tsam sgrub byed du byed mi nus te/ gzhan du na shing rta chen po dag gis drang nges 'byed pa'i dgongs 'grel brtsams pa chos can/ don med du 'gyur bar thal/ 'di 'di'o zhes gsungs pa'i lung tsam la brten nas drang nges 'byed nus pa'i phyir/ gnyis pa ni/ gsung rab las drang nges kyi 'jog tshul mi mthun pa du ma gsungs pa'i phyir dang zhes pa'i don ni/ 'gal ba la ma 'khrul ba'i tshad ma yod par thal/ lung tsam gyis drang nges 'byed nus pa'i phyir/ 'di dang snga ma'i thal 'gyur gnyis lung tsam gyis drang nges 'byed nus pa la gnod byed do 'gal ba la ma 'khrul ba'i tshad ma'i don ni/ gzhi de gnyis 'gal ba yin pa la/ de gnyis kyi gzhi mthun dmigs pa'i tshad ma yod na tshad ma de la 'gal ba la ma 'khrul ba'i tshad ma zer zhing 'di ni tha snyad du yang med do/ /'dir lung tsam gyis drang nges 'byed na 'di 'dra'i tshad ma yod par thal te/ de ltar byed na lung las drang don gyi mdor gsungs na drang don gyi mdo dang/ nges don gyi mdor gsungs na nges @44 don yin pas khyab dgos/ de ltar na yum rgyas 'bring bsdus gsum lta bu chos can/ drang don gyi mdo dang nges don gyi mdo gnyis ka yin par thal/ de ltar du lung las gsungs pa'i phyir/ de 'dra'i mdo chos can/ drang don gyi mdor gsungs te/ de ltar du 'khor lo mtha' ma mdo sde dgongs 'grel las gsungs pa'i phyir/ phyi ma der thal/ blo gros mi zad pas bstan pa las nges don gyi mdor gsungs pa'i phyir/ rtsa bar 'dod na/ spyir drang don gyi mdo dang nges don gyi mdo gnyis 'gal ba yin pa la/ de gnyis kyi gzhi mthun yod par thal/ rgyas 'bring bsdus gsum de gnyis kyi gzhi mthun du grub pa'i phyir/ 'dod na/ 'gal ba la ma 'khrul ba'i tshad ma yod par thal/ de gnyis kyi gzhi mthun rtogs pa'i tshad ma yod pa'i phyir te/ de gnyis kyi gzhi mthun yod pa'i phyir/ rtags khas/ gnyis pa mi nus pa'i sgrub byed ni/ 'di ni 'di'o zhes gsungs pa tsam gyi lung gis de ltar gzhag par ni mi nus la zhes sogs kyis 'chad/ bstan don ni/ gong gi thal 'gyur gnyis kyi rtags log chos dang chos log rtags su bkod pa'i tshul gsum tshang ba'i gtan tshig go /de'i tshe spyi la de ltar ma khyab pa ni zhes pa'i spyi ni gsung rab spyi dang/ de ltar ma khyab pa na zhes pa ni gsung rab spyi la yod par gsungs na yod pas khyab pa dang/ med par gsungs na med pas khyab pa med pas gsung rab kyi bye brag ste de'i nang tshan drang don yin gsungs pa'i mdo la drang don gyi mdo yin pas khyab @45 pa dang/ nges don gyi mdo yin gsungs pa'i mdo la nges don gyi mdo yin pas khyab pa med pa'i phyir te/ gsung rab 'ga' zhig tu bden grub yod par gsungs/ 'ga' zhig tu bden grub med par yang gsungs pa'i phyir/ gnyis pa des na rigs pas drang nges 'byed dgos pa la gnyis/ dngos kyi don dang/ shes byed kyi khungs so/ /dang po la gnyis/ shing rta chen po'i bstan bcos kyi rjes su 'brangs te drang nges 'byed dgos pa dang/ de ltar phye nas rigs pas drang nges 'byed par sgrub pa'o/ /dang po ni/ de'i phyir gsung rab kyi drang nges 'byed par lung bstan pa'i shing rta chen po dag gis zhes pa nas 'tshol dgos pas zhes pa'i bar gsungs/ don ni lung tsam gyis drang nges 'byed nus pa la gnod byed dang mi nus pa'i sgrub byed yod pa de'i phyir gsung rab kyi drang nges 'byed pa la rgyal bas lung bstan pa'i shing rta chen po klu sgrub dang thogs med kyis drang nges kyi dgongs pa ji lta ba bzhin du bkral ba'i rjes su 'brang dgos zhes pa'o/ /'o na shing rta chen po rnam gnyis kyis drang nges 'grel tshul ji ltar yin zhe na/ 'di la gnyis/ nges don gyi gsung rab kyi don gzhan du 'dren pa la gnod byed dang/ gzhan du drang du mi rung bar don der nges pa'i sgrub byed gnyis kyi sgo nas gsung rab kyi drang nges 'byed pa yin gsungs/ de yang mgon po klu sgrub kyis sher phyin gyi mdo'i dgongs pa gzhan du 'dren pa la gnod byed ni/ dper na/ myu gu chos can/ rgyu rkyen la mi ltos par thal/ rang bzhin gyis grub pa'i phyir zhes pa lta bu'o/ /sgrub byed ni myu gu chos can/ rang bzhin gyis mi skye ste/ rang gi rgyu rkyen la brten @46 nas 'byung ba'i phyir zhes pa'o/ /'dir dwogs gcod la/ de'i phyir gsung rab kyi drang nges 'byed par lung bstan pa'i shing rta chen po dag gis zhes shing rta chen po klu sgrub dang thogs med gnyis kyis nges don gyi gsung rab kyi don gzhan du 'dren pa la gnod byed dang/ gzhan du drang du mi rung bar don der nges pa'i sgrub byed kyi rigs pa gnyis kyi sgo nas drang nges 'byed dam mi 'byed/ dang po ltar na thogs med kyis de ltar 'byed par thal/ de gnyis kyis de ltar 'byed pa'i phyir/ 'dod na/ mi 'thad par thal/ 'phags pa thogs med kyis nges don gyi gsung rab kyi don gzhan du 'dren pa la gnod pa brjod pa'i sgo nas drang nges mi 'byed pa'i phyir/ des mdo sde dgongs 'grel gyi don gzhan du 'dren pa la gnod pa brjod pa'i sgo nas drang nges 'byed pas/ de ltar du bzhag pa yin no zer na/ de yang rigs pa ma yin par thal/ dgongs 'grel nges don gyi mdo ma yin pa'i phyir te/ skabs 'di spyi bshad yin pas thal 'gyur ba'i skabs yin pa gang zhig /dgongs 'grel skabs 'dir nges don gyi mdor mi 'dod pa'i phyir/ de'i phyir dgongs 'grel gyi don gzhan du 'dren pa la gnod pa brjod na nges don gyi gsung rab kyi don gzhan du 'dren pa la gnod pa brjod pas khyab pa med do/ /gzhan yang skabs 'dir nges don gyi gsung rab kyi don gzhan du 'dren pa la gnod byed dang/ gzhan du drang du mi rung bar don der nges pa'i nges don du sgrub pa'i sgrub byed kyi rigs pa'i sgo nas drang nges 'byed pa'i gang zag la dbu ma'i shing rta'i srol 'byed yin dgos @47 pa gang zhig /thogs med dbu ma pa'i shing rta'i srol 'dzin yin pa'i phyir/ gal te rang rang gi skabs kyi nges don gyi gsung rab la dgongs so zhe na/ 'o na/ lugs 'di gzhir bzhag na de 'dra'i gsung rab kyi drang nges 'byed pa'i gang zag la klu sgrub kho nar nges par thal/ thogs med kyang de ma yin/ de las gzhan pa'ang med pa'i phyir/ 'dod na/ bstan bcos 'di nyid las/ shing rta chen po dag gis drang nges kyi dgongs pa bkral zhing zhes pa dang 'gal te/ shing rta chen po dag gis zhes du ma'i tshig gsungs pa'i phyir/ rtsa ba'i dri ba gnyis pa gal te mi 'byed na drang ma thag pa'i gzhung dang 'gal/ yang mjug thogs su rigs pas legs par gtan la phab pa zhig gi rjes su 'brangs nas dgongs pa 'tshol dgos pas zhes byung bas/ sngar stong nyid rtogs pa drang nges 'byed pa la rag las pa'i don bzhag pa de ni de ltar yin pa gzhung 'dis kyang thon par gsungs/ gnyis pa de ltar phye nas rigs pas drang nges 'byed par sgrub pa ni/ mthar gtugs na dri ma med pa'i rigs pa nyid kyis dbye dgos te zhes sogs kyis 'chad/ don ni drang nges 'byed pa la yang/ dang po rang nyid kyis shing rta chen po de rnams kyi rigs pas legs par gtan la phab pa'i gsung rab dang bstan bcos 'di lta bu la thos bsam tshul bzhin du byed/ gsung rab de rnams las gsungs pa'i rigs pa rnams rang nyid kyis legs par sbyangs/ de nas tshad ma'i skyes bu de rnams kyi thugs rgyud la yod pa'i rigs pa de 'dra ba zhig rang rgyud la 'khor gang thub byed/ mthar rang nyid kyi @48 rgyud la de 'dra'i nges shes brnyed pa'i tshad ma rgyud la skyes pa na gsung rab la ma brten par de 'dra'i nges shes nyid kyis drang nges 'byed dgos par gsungs te/ bstan bcos 'di las/ mthar gtugs na dri ma med pa'i rigs pa nyid kyis zhes gsungs pa'i phyir/ rigs pa dang 'gal ba'i grub mtha' khas len na zhes pa'i dwogs gcod la/ slob dpon dbyig gnyen gyis rigs pa dang 'gal ba'i grub mtha' khas len nam mi len/ dang po ltar na tshad ma'i skyes bu ma yin par thal/ rigs pa dang 'gal ba'i grub mtha' khas len pa'i phyir/ /khyab ste/ bstan bcos 'di nyid las/ rigs pa dang 'gal ba'i grub mtha' khas len na smra ba po tshad ma'i skyes bur mi rung ba'i zhes gsungs pa'i phyir/ mi len na/ de ltar khas len par thal/ bden med sgrub pa'i rigs pa dang 'gal ba'i grub mtha' khas len pa'i phyir te/ gzhan dbang yongs grub bden par grub cing kun brtags bden med du khas len pa'i gang zag yin pa'i phyir/ de 'dra'i grub mtha' de rigs pa dang 'gal ba'i grub mtha' yin par thal/ gzhan dbang yongs grub bden grub tu khas len pa'i grub mtha' de/ de gnyis bden med du sgrub pa'i dbu ma'i rigs pa brgya phrag dang 'gal ba'i phyir ro/ /rang lugs ni/ de dag rigs pa dang 'gal ba'i grub mtha' ma yin te/ rigs pa dang 'gal ba'i grub mtha'i don ni/ rang nyid kyis thar par bgrod tshul gyi lam ji @49 ltar bstan pa ltar bsten kyang 'bras bu thar pa nam yang mi thob par ma zad/ de la brten nas ngan 'gro'i rgyu sgrub par byed pa'i grub mtha' rnams rigs pa dang 'gal ba'i grub mtha' dang/ de khas len na rigs pa dang 'gal ba'i grub mtha' khas len par bzhag gsungs/ gzhan dbang yongs grub bden par grub par khas len pa'i grub mtha' de la brten nas gdul bya sems tsam pa rnams kyis tshogs rgya chen po gsog / de la brten nas gdul bya de dag thar pa thob pa'i thabs mchog tu 'gyur ba yod pa la dgongs te ston pas gdul bya'i bsam pa'i dbang gis bden grub yod par gsungs pa'i phyir rigs pa dang 'gal ba'i grub mtha' ma yin no/ /gdul bya'i bsam pa'i dbang gis bden grub yod do/ /gnyis pa shes byed kyi khungs ni/ don gyi dbang 'di gzigs nas/ dge slong dag gam mkhas rnams kyis/ /zhes sogs kyi dpe gsum gyi sgo nas dpyad pa gsum gyis dag tshul bstan to/ /dwogs gcod la/ mthong ba mngon gyur ni ri rwa ba khang khyim sogs dbang shes kyi mngon sum gyi yul gang yin pa dang/ so skye tha mal bas dbang shes kyis mngon sum du rtogs mi nus pa nges par rtags la ltos dgos pa'i sgra mi rtag pa lta bu cung zad lkog gyur/ tshe 'dir sbyin pa btang ba la brten nas skye ba phyi mar longs spyod chen po 'byung ba lta bu shin tu lkog gyur ro/ /gsung rab yin na dpyad gsum gyis dag pas khyab bam ma khyab/ dang po ltar na/ sbyin pas longs spyod khrims kyis bde/ /zhes sogs kyi lung chos can/ der thal/ de'i phyir/ 'dod na/ de chos can/ mthong ba mngon gyur ston pa'i cha la @50 mngon sum tshad mas gnod pa med cing des grub pa sogs gsum po de yin par thal/ de dpyad pa gsum gyis dag pa gang zhig /dpyad pa gsum gyis dag tshul de yin pa'i phyir te/ de ltar mkhas grub sde bdun yid kyi mun sel las gsungs pa'i phyir/ 'dod na/ de 'dra'i lung chos can/ mthong ba mngon gyur sogs bstan par thal/ de gsum bstan pa'i cha la tshad ma gsum gyis mi gnod par ma zad de gsum gyis grub pa'i phyir/ 'dod na/ de 'dra'i lung shin lkog kho na ston pa'i lung ma yin par thal lo/ /'dod na/ de kho na bstan pa'i lung med par thal lo/ /rtsa ba'i dri ba gnyis pa la gsung rab yin na dpyad gsum gyis dag pas ma khyab na/ de ltar khyab par thal/ rten 'brel bstod pa las/ lam 'di nyid kyis gsung gzhan yang/ /tshad mar gyur pa nges pa skye zhes dang/ rnam 'grel las/ gtso bo'i don la mi slu'i phyir/ /gzhan la rjes su dpag pa yin zhes gsungs pa'i phyir/ 'o na sbyin pas longs spyod ces sogs rin chen phreng ba'i gzhung tshig 'dis mthong ba mngon gyur sogs gsum bstan nam zhe na bstan to/ /kha cig sbyin pas longs spyod khrims kyis bde zhes sogs kyi sogs khongs na rin chen phreng ba'i gzhung tshig thams cad bzhag nas des mthong ba mngon gyur sogs bstan par 'dod/ rang lugs ni/ gsung rab la dpyad pa gsum gyis dag pas khyab cing sbyin pa'i rdzas mthong ba mngon gyur dang/ gtong sems cung zad lkog gyur/ shin tu lkog gyur ni gong du bshad pa de yin gsungs/ gnyis pa de ltar gtan la 'bebs @51 pa'i tshul la gnyis/ mdo sde dgongs 'grel la brten pa'i phyogs dang/ blo gros mi zad pas bstan pa la brten pa'i phyogs so/ dang po la gnyis/ mdo sde nas ji ltar gsungs pa dgod pa dang/ de'i don ji ltar bkral ba'i tshul lo/ /dang po la bzhi/ mdo sde la 'gal spong gi dri ba/ 'gal ba de spong ba'i lan/ ngo bo nyid gsum gyi ngo bo ngos gzung ba/ de dag gis grub pa'i don zhus pa'o/ /dang po ni dgongs 'grel las/ bcom ldan 'das kyis rnam grangs du mar phung po rnams kyi rang gi mtshan nyid kyang bka' stsal zhes pa nas 'phel zhing yangs pa nyid kyang bka' stsal la zhes pa'i bar gyis 'khor lo dang po las gzugs nas byang phyogs so bdun bar rang gi mtshan nyid kyis grub pa sogs bka' stsal tshul dang/ bcom ldan 'das kyis chos thams cad ces pa nas bka' stsal lags na zhes pas 'khor lo bar pa las ngo bo nyid ma mchis pa sogs bstan tshul dang/ bcom ldan 'das kyis ci la dgongs nas zhes pa nas bka' stsal snyam bgyid lags te zhes pas gdul bya sems tsam pa la dwogs pa skye tshul dang/ bcom ldan 'das kyis ci la dgongs nas chos thams cad ces pa nas bdag yongs su zhu lags so zhes pa'i bar gyis 'khor lo gnyis pa la dri ba dngos su zhus nas dang po la don gyis zhus tshul bstan/ 'o na 'dir 'khor lo dang po la dri ba dngos su ma zhus par bar pa la dngos su zhu dgos tshul ji ltar zhe na/ de ni de'i dus su 'khor lo mtha' ma gsung pa'i dus la babs shing de'i gdul bya sems tsam pas 'khor lo dang por rang gi mtshan nyid kyis grub pa sogs gsungs pa gdul bya don smra sde gnyis @52 rjes su gzung ba'i phyir du gzugs nas byang phyogs so bdun bar la gsungs pa yin nam snyam pa'i dwogs pa chung la/ bar pa la ngo bo nyid ma mchis pa sogs lnga gsungs pa de sgras zin ltar na ches mi rigs pas de ltar gsungs pa de gang la dgongs nas gsungs pa yin nam snyam pa'i dwogs pa shas che bas de la dngos su zhus pa yin gsungs/ 'dir mdo sde dgongs 'grel la le'u bcu bzhag pa ni sa bcu la gnas pa'i byang chub sems dpa' bcus dri ba zhus pa'i dris lan dgu dang gleng gzhi'i le'u bcas bcu'o/ /byang chub sems dpa' bcus dri ba bcu zhus kyang dris lan dgu ma gtogs med pa ni byang sems gnyis kyis dri ba lhan du zhus pa'i dris lan mnyam du gsungs/ dwogs gcod/ byang chub sems dpa' don dam yang dag 'phags la de lta bu'i dwogs pa yod par thal/ dwogs pa de gcod pa'i phyir du ston pa la dri ba zhus pa'i phyir/ 'dod na mi 'thad par thal/ dang po dang bar pa la de ltar gsungs pa de dgongs gzhi gang la dgongs nas gsungs pa yin min rang nyid kyis shes pa'i phyir te/ rang nyid sa bcu pa ba yin pa'i phyir ro/ /rang lugs ni byang sems de la de 'dra'i dwogs pa med kyang rang nyid la yod pa ltar byas nas dri ba zhus pa yin pa'i phyir/ de la dwogs pa med kyang gdul bya sems tsam pa la de 'dra'i dwogs pa chen po yod pa rang nyid kyis gzigs shing/ gdul bya de rnams la de lta bu'i dwogs pa yod kyang bcom ldan 'das kyi sku'i gzi brjid dbang gis dngos su zhu ma nus pa byang sems des gzigs nas ston pa la de ltar dri ba zhus pa yin @53 gsungs/ 'o na de'i gnas skabs su gdul bya sems tsam pa yod dam med/ yod na mi 'thad par thal/ ston pa 'jig rten du byon/ de'i rjes su ston pa mya ngan las 'das nas lo bzhi brgya lon pa'i 'og tu dpal mgon klu sgrub kyis theg pa mchog dbu ma'i srol phyed/ de'i rjes thogs med kyis rnam rig pa'i srol gtod pa gang zhig / thogs med kyis srol ma gtod pa'i sngon rol du sems tsam pa med pa'i phyir te/ de'i snga rol gyi theg chen pa la dbu ma pa yin pas khyab pa'i phyir te/ kun gzhi rtsa ba las/ smra ba'i dam pas theg pa mchog /'dzin par lung bstan 'phags pa klus/ /theg mchog rgyas par mdzad pa'i rjes/ /lung bstan brnyes pa'i thogs med kyis/ /srol gtod sngon du dbu ma nyid ces gsungs pa'i phyir/ gal te de'i dus na gdul bya de med na mi 'thad par thal/ don dam yang dag 'phags kyis de 'dra'i dwogs pa de/ sems tsam pa'i rgyud la yod par gzigs nas ston pa la dri ba zhus pa yin pa'i phyir/ gzhan yang mdo 'di chos can/ sems tsam thun mong ma yin pa'i mdo ma yin par thal/ mdo de gsungs yul gyi gdul bya sems tsam pa de'i dus na med pa'i phyir/ rang lugs lung de'i dgongs pa ni/ ston pa 'jig rten du byon pa'i gnas skabs su sems tsam pa yod kyang ston pa mya ngan las 'das pa'i 'og tu theg chen gyi bstan pa ming tsam yang med par nub cing de'i rjes su dpal mgon klu sgrub byon nas theg chen gyi bstan pa rgyas par byas/ de'i rjes su thogs med kyis rnam rig pa'i srol phyed pa yin pas theg chen gyi bstan pa klu sgrub kyis srol phyed cing thogs @54 med kyis srol ma phye ba'i bar du theg chen pa la dbu ma pa nyid yin pas khyab ces pa'i don yin gyi/ thogs med kyis srol ma phye ba'i snga rol du sems tsam pa med ces pa'i don ma yin no/ /'dir 'khor lo dang po las 'grel rkang bdun gsungs pa'i de gang zhe na/ phung po'i sde tshan/ skye mched kyi sde tshan/ rten 'brel dang/ zas bzhi bcas sde tshan bzhi dang/ bden pa bzhi'i sde tshan/ khams kyi sde tshan/ byang phyogs so bdun gyi sde tshan dang bcas 'grel rkang bdun no/ /bshad bya'i 'khor lo dang po la/ gung thang 'jam dpal dbyangs kyis phung po sogs bzhi gsungs pa'i mdo ni rgyal po gzugs can snying po la gdams pa'i mdo/ bden pa bzhi'i mdo ni bden bzhi'i chos 'khor/ khams kyi mdo ni khams sna tshogs ston pa'i mdo/ byang phyogs so bdun gyi mdo ni dran pa nyer bzhag gi mdo rnams bzhag par gsungs/ bla ma rje btsun pas 'khor lo dang po la bden bzhi'i chos 'khor yin pas khyab dgos pa lta bur gsungs/ de ltar khyab na bden bzhi'i chos 'khor gyis phung po lnga nas zas bzhi'i bar la khyad chos lnga lnga khyad med du sbyar ba dang/ khams rnams la khyad chos gsum gsum khyad med du sbyar ba dang/ byang phyogs so bdun la khyad chos brgyad brgyad khyad med du sbyar bar thal/ de ltar 'khor lo dang po las sbyar ba gang zhig /'khor lo dang po la bden bzhi'i chos 'khor gyis khyab pa'i phyir/ 'dod na/ de 'dra'i bden bzhi'i chos 'khor gyi nang tshan du gyur pa'i de rnams la de ltar sbyar ba'i mdo tshig yod par thal @55 lo/ /'khor lo dang po las de ltar sbyar bar thal/ mdo sde dgongs 'grel las/ bcom ldan 'das kyis rnam grangs du mar phung po rnams kyi rang gi mtshan nyid kyang bka' stsal zhes sogs gsungs pa'i phyir/ 'di la dwogs pa chen po yod gsungs/ 'o na phung po lnga la khyad chos lnga lnga khyad med du ji ltar sbyor zhe na/ rang gi mtshan nyid kyang zhes pa ni sde tshan lhag ma kun la sbyar dgos pas 'di la spyi'i mtshan nyid kyang zer ro/ /lhag ma bzhi ni dper na/ gzugs phung la sbyar na 'di la lugs gnyis las/ gzugs skye ba'i tshe rang dbang gis mi skye bar las nyon gyi dbang gis skye ba dang 'jig pa zhes sbyar ba gnang yang/ dwogs pa bcad na gzugs phung skye ba dang 'jig pa'i tshe las nyon gyi dbang gis skye ba dang 'jig pa yin par thal ba dang/ kun 'byung gi char gyur pa'i phung po rnams spang bar bya ba dang/ sdug bden gyi char gyur pa'i phung po rnams yongs su shes par bya ba yin par thal/ dam bca' 'thad pa'i phyir/ 'dod na/ gzugs phung yin na de ltar yin pas khyab par thal/ 'dod pa'i phyir/ 'dod na/ sangs rgyas 'phags pa'i thugs rgyud kyi mtshan dpes spras pa'i sku gzugs chos can/ der thal/ de'i phyir/ gal te gzugs phung la las nyon gyis skye 'jig byed pa zhig yod pas gzugs phung la las nyon gyis skye 'jig byed par bzhag pa yin zer na/ shes bya la rwa yod par thal ba'i rigs pas gnod do/ /rang lugs la spyir gtang gi skye 'jig mtshan nyid pa bzhag na bde bar gsungs/ phyi ma gnyis ni zag bcas kyi phung po gang yin pa de spang bya/ zag med kyi phung po gang yin pa de yongs su shes par bya zhes @56 sbyar na bde gsungs/ 'o na skye mched bcu gnyis la khyad chos lnga sbyar na/ chos kyi skye mched la skye ba'i mtshan nyid dang 'jig pa'i mtshan nyid yod par thal/ skye mched bcu gnyis la de yod pa'i phyir/ 'dod na/ de med par thal/ rtag pa yin pa'i phyir/ med pa 'dod mi nus te/ dgongs 'grel las/ phung po rnams kyi ji lta ba de bzhin du skye mched rnams dang zhes sogs dang 'gal ba'i phyir/ 'on kyang 'di'i 'grel rkang bdun las spang bya kun nyon phyogs kyi 'grel rkang phyed dang drug dang/ blang bya rnam byang phyogs kyi 'grel rkang phyed dang gnyis bstan pas kun nyon phyogs kyi skye mched bcu gnyis po gang rung la 'dus byas kyis khyab pa'i phyir skyon med ces dge ba'i bshes gnyen rnams kyi gsung rgyun yin gsungs/ rang gi mtshan nyid dang spang bya dang yongs su shes pa sbyar tshul gong dang 'dra/ bden pa bzhi la khyad chos gnyis gnyis sbyar ba yin na ji ltar sbyor zhe na/ gcig ni spyi'i mtshan nyid sbyar dgos la thun mong ma yin pa'i khyad chos ni sdug bden yongs su shes par bya/ de'i rgyu kun 'byung spang ba dang/ 'gog pa mngon du bgyi ba dang/ lam bsgom par bya zhes sbyar dgos par gsungs/ khams la ni khyad chos gsum po de sngar gyi skye mched bcu gnyis la sbyar ba dang 'dra/ 'dir khams sna tshogs pa dang du ma gnyis khyad gzhi dang khyad chos la 'jog mi 'jog gi khyad par yod pas gang byas kyang chog gsungs/ byang phyogs so bdun la/ rang gi mi mthun phyogs dang ma 'dres pas mi mthun pa dang/ @57 rang gi mi mthun phyogs kyi gnyen po dang/ lam de dag rang rgyud la yod na dge ba'i chos skye 'gyur skye ba dang/ sngar skyes pa'i lam de dag las gzhan du mi ltung bar lam der gnas par byed pa dang/ lam de dag yod pa'i stobs kyis mi bskyud pa ste mi brjed pa'i gzungs thob pa dang/ de dag yod pas lam gong ma sogs 'bad brtson chen po la mi ltos par slar zhing 'byung ba dang/ de dag yod pas rang rgyud kyi yon tan gong nas gong du 'phel ba dang/ spyi'i mtshan nyid dang khyad chos brgyad khyad med du sbyar ba yin no/ /gnyis pa 'gal ba de spong ba'i lan la/ ngo bo nyid med tshul gang la dgongs nas ngo bo nyid med par gsungs par bshad pa dang/ gang la dgongs nas ma skyes pa sogs su gsungs par bshad pa'o/ /dang po la gsum/ mdor bstan pa dang/ rgyas par bshad pa dang/ de dag gi dpe bstan pa'o/ /dang po ni/ dgongs 'grel las/ don dam yang dag 'phags zhes sogs kyis 'chad/ 'di nyid las ngo bo nyid med pa nyid rnam pa gsum la dgongs nas zhes pa'i ngo bo nyid med pa gsum ni mtshan nyid ngo bo nyid med pa nyid dang/ skye ba ngo bo nyid med pa nyid dang/ don dam pa ngo bo nyid med pa nyid gsum bzhag gi kun brtags mtshan nyid ngo bo nyid med pa/ gzhan dbang skye ba ngo bo nyid med pa dang/ yongs grub don dam pa ngo bo nyid med pa gsum bzhag na gsum pa la 'jog tshul gnyis gsungs pas de 'dra'i 'jog tshul gnyis mi 'thad par thal ba'i skyon yod pa'i phyir/ 'khor lo bar par ngo bo nyid med pa sogs lnga gang la dgongs nas gsungs zhes zhus pa'i lan du ngo bo nyid med pa nyid de dgongs gzhi gang la dgongs nas @58 gsungs pa'i dgongs gzhi ni mtshan nyid gsum la dgongs nas rang gi mtshan nyid kyis ma grub pa sogs lnga gsungs zhes bstan pa yin te/ gzugs nas rnam mkhyen gyi bar gyi chos rnams de gsum du 'du zhing/ de gsum la ngo bo nyid med tshul bshad na gdul byas go sla bar dgongs nas/ de gsum la ngo bo nyid sogs med tshul gsungs skabs 'dir ston pa rang nyid kyis gdul bya'i dbang gis bar pa drang don du 'grel ba yin gsungs/ 'di nyid las/ chos rnams ngo bo nyid med par gsungs pa'i chos kyi nang na don dam med do zhes sems dang ldan pa su zhig smra zhes dang/ gong du 'phags pa yab sras la sogs pa'i lugs las kyang phyi rol tu gyur pa'o zhes pas jo nang pa chen po dgag par mdzad/ de dag gi lugs las phyi rol tu 'gyur tshul ni/ jo nang pas don dam bden grub tu 'dod pa'i gnad kyis so/ 'di dag 'gog pa na/ kha cig de dag gi mtshan dngos su ma smos pa ni/ de dag gi lta ba'i phyogs la skyon yod kyang spyod phyogs nas bstan pa la phan thogs chen po byung ba dang lhag par yang rje bla ma rang nyid mkhas btsun bzang gsum gyi yon tan dang ldan zhing de'i nang nas kyang btsun pa'i yon tan ches mchog tu mnga' bas yin gsungs/ gnyis pa rgyas par bshad pa ni/ gal te ngo bo nyid med par gsungs pa'i chos rnams ngo bo nyid med pa gsum du sdud na de gsum gang yin ngo bo nyid med tshul ji ltar yin snyam na zhes sogs kyis bstan don ni/ 'khor lo bar pa las gzugs nas rnam mkhyen gyi bar la ngo bo nyid med par gsungs pa mtshan nyid gsum la dgongs nas ji ltar gsungs she na/ @59 dper na gzugs lta bu la mtshon na gzugs gzugs zhes brjod pa'i sgra 'jug pa'i gzhir rtog pas btags pa tsam yin gyi rang gi mtshan nyid kyis ma grub pa la dgongs nas gzugs kyi kun brtags rang gi mtshan nyid kyis ma grub par gsungs/ gzugs rkyen gzhan gyi dbang gis skye ba yin gyi bdag nyid gcig pa'i rgyu las mi skye ba la dgongs nas gzugs rang gi mtshan nyid kyis grub pa'i skye ba med par gsungs/ ngo bo nyid med pa gsum pa la 'jog tshul gnyis gsungs pa'i dang po ni/ gzhan dbang la don dam pa ngo bo nyid med ces pa'i don dam de ni/ rnam dag lam gyi dmigs pa mthar thug la don dam du bzhag nas/ gzhan dbang gi chos rnams rnam dag lam gyi dmigs pa mthar thug der ma grub pas de dag la don dam pa ngo bo nyid med par gsungs/ phyi ma'i don dam ni dgag bya'i chos bdag la bzhag nas/ chos kyi bdag med kyi yongs grub dgag bya chos bdag bcad tsam gyi med dgag de/ dgag bya de'i ngo bor ma grub pas don dam pa ngo bo nyid med par gsungs so/ /'o na kun brtags mtshan nyid ngo bo nyid med pa ston pa'i skabs/ mdo yi dmigs 'byed pa 'dis 'og ma gnyis kyang shes par bya'o zhes pa'i don ji ltar zhe na/ dri ba'i tshig dang lan gyi tshig gnyis bsdoms pas kun brtags mtshan nyid ngo bo med par bstan/ ji ltar bstan ce na/ dri tshig la chos rnams kyi mtshan nyid ngo bo nyid med pa gang lags zhus pa'i lan du kun brtags pa'i mtshan nyid gang yin pa'o gsungs/ gong 'og gnyis bsdoms nas kun brtags mtshan nyid ngo bo nyid med pa zhes byung/ rgyu mtshan dris pa'i lan du dgag @60 phyogs nas rang gi mtshan nyid kyis ma grub pa de'i phyir sgrub phyogs nas ming brdas bzhag pa'i rgyu mtshan bstan pas/ mdo 'di'i tshig mtshams bzhag lugs 'dis mdo 'og ma gnyis la'ang shes par bya zhes pa'i don no/ /'dir thal 'gyur bas yod pa rnams ming gi tha snyad kyi dbang gis bzhag pa dang ches mi mthun zhes pa'i don gang yin zhe na/ sems tsam pas kun brtags ming brdas bzhag lugs dang thal 'gyur bas chos thams cad ming brdas bzhag ces pa'i ming brdas bzhag lugs gnyis ches mi mthun pa ste/ mi mthun pa chen po yod ces pa'i don no/ /'di nyid las/ 'on kyang 'di'i rang mtshan gyis yod par 'dzin pa yod na thal 'gyur ba'i rang mtshan gyis grub par 'dzin pa yang yod la zhes sogs kyi don la/ kha cig gis sems tsam pa'i 'dod pa ltar gyi gzhi de rang gi mtshan nyid kyis grub par 'dzin na thal 'gyur ba'i 'dod pa ltar gyi gzhi de rang gi mtshan nyid kyis grub par 'dzin pas khyab zer/ 'o na sems tsam pa'i 'dod pa ltar gyi kun brtags rang gi mtshan nyid kyis grub par 'dzin pa'i blo chos can/ der thal/ de'i phyir/ 'dod na/ de chos can/ khyod kyis kun brtags tha snyad btags pa'i btags don btsal ba'i tshe na rnyed par 'dzin par thal/ 'dod pa'i phyir/ 'dod na/ blo don mthun yin par thal/ 'dod pa'i phyir/ 'dod na/ de ma yin par thal/ log shes yin pa'i phyir te/ khyod kyis kun brtags rang gi mtshan nyid kyis grub par 'dzin pa gang zhig /de de ltar ma yin pa'i phyir/ @61 rang lugs ni sems tsam pa'i 'dod pa ltar gyi rang gi mtshan nyid kyis yod par 'dzin pa'i gang zag gi rgyud la thal 'gyur ba'i 'dod pa ltar gyi rang mtshan gyis yod par 'dzin pa yod la/ gzhi 'ga' zhig sems tsam pa'i 'dod pa ltar gyi rang mtshan gyis yod par mi 'dzin yang phyi ma thal 'gyur ba'i 'dod pa ltar gyi rang mtshan gyis yod par 'dzin pa'i gang zag yod ces pa'i don no/ /yang don dam pa ni gang la dmigs nas goms na sgrib pa zad par 'gyur ba yin na gzhan dbang la dmigs nas goms pas sgrib pa dag par byed mi nus pa'i phyir ro zhes pa'i don la/ gzhan dbang yin na/ khyod la dmigs nas bsgoms pas sgrib pa zad par mi nus pas khyab zer na/ 'o na byang chub kyi sems bsgoms nas sgrib pa zad mi nus par thal/ gzhan dbang yin pa'i phyir/ gzhan yang stong nyid rtogs pa'i shes rab chos can/ der thal/ de'i phyir/ rang lugs ni/ kun brtags la de 'dra ba'i dwogs pa med pa'i phyir ro zhes gsungs pa'i dwogs pa de ji ltar yin zhe na/ stong gzhi chos can gzhan dbang dgag bya'i kun brtags kyis stong ba'i chos nyid de la rnam dag lam gyis dmigs nas sgrib pa dag par 'gyur bar shes pa na/ lam des stong gzhi chos can gzhan dbang la'ang dmigs dgos pa dang/ don dam yang yin pa des na rnam dag lam gyi dmigs pa'i don dam mthar thug tu 'gyur snyam pa'i dwogs pa che bar skye la/ kun brtags don dam du ma grub pas de 'dra ba'i dwogs pa med pa'i phyir ro/ /'o na de 'dra'i dwogs pa de gang zag su'i rgyud la yod ce na/ 'di la lugs gsum snang/ @62 mkhas pa'i dbang po kha cig gis de 'dra'i dwogs pa de bdag gis dben pa'i 'du byed kyi phung po dngos su rtogs nas/ bdag med shugs la rtogs pa'i nyan thos mthong lam bar chad med lam khas len pa'i nyan thos sde gnyis kyi rgyud la yod gsungs/ de yod tshul ni rnam dag gi lam nyan thos mthong lam bar chad med lam des gzhan dbang gi dngos po 'du byed kyi phung po mngon sum du rtogs pas de la dmigs pa yin zhing/ don dam pa yang yin pas de 'dra'i phung po de rnam dag gi lam de'i dmigs pa mthar thug gi don dam du 'gyur snyam du nyan thos sde pa la dwogs pa skye ba'i de 'dra'i dwogs pa de bcad pa'i phyir du dgongs 'grel las gzhan dbang don dam par ngo bo nyid med par gsungs pa yin zhes bzhed/ 'ga' zhig gis de 'dra'i dwogs pa de ngo bo nyid med par smra ba la yod gsungs/ de'i tshul ni/ rnam rig pas gzhan dbang bden grub tu khas len na/ dbu ma pa ltar na gzhan dbang bden par grub na don dam du grub dgos/ der grub na don dam bden pa yin dgos/ de ltar na/ rnam dag lam theg chen gyi mthong lam bar chad med lam gyis mngon sum du gzigs dgos shing/ de ltar gzigs na rnam dag gi lam theg chen gyi mthong lam bar chad med lam gyi dmigs pa mthar thug tu 'gyur ram snyam pa'i dwogs pa de dbu ma pa la yod pas de 'dra'i dwogs pa bcad pa'i phyir du dgongs 'grel las de ltar gsungs pa yin zhes gsungs/ sbra ti rin chen don grub kyi gsung rgyun drang nges chen mor/ de 'dra'i dwogs pa de sems tsam pa rang gi rgyud @63 la yod par bzhed/ de'i tshul ni dwogs pa de de'i rgyud la yod/ de yang lta ba ma rnyed bar du mi 'ong ba yin/ lta ba rnyed pa de'i tshe phyi rol don du grub pa'i chos cung zad kyang med cing chos thams cad sems kyi bdag nyid tsam du rtogs pa de 'ong/ de'i tshe rnal 'byor pa des phyi rol don gyis stong pa la dmigs kyang de ltar rtogs pa'i rnal 'byor pa des yid la de'i gnas skabs su sems gcig pu ma gtogs gzhan mi 'dug snyam du bsams shing/ rang nyid kyi yid shes des sems gcig pu rnam dag lam gyi dmigs pa mthar thug tu 'gyur snyam pas de 'dra'i rnal 'byor pa de'i rgyud kyi dwogs pa de bcad pa'i phyir du dgongs 'grel las de ltar gsungs shing/ de 'dra'i dwogs pa skye ba'i gzhi gzhan dbang de yang spyi tsam pa la mi byed par gzhan dbang gi gtso bo sems yin pas sems la byed par gsungs/ gzhan yang chos rnams kyi yongs su grub pa'i mtshan nyid yongs grub don dam par ngo bo nyid med par gsungs pa yin zer na/ yongs grub chos can/ chos kyi bdag med phra mo yin par thal/ skabs 'dir don dam par ngo bo nyid med ces pa'i med rgyu'i don dam de dgag bya'i chos bdag la bzhag nas/ de'i ngo bor med pas don dam par ngo bo nyid med par bzhag pa'i phyir te/ 'di nyid las/ chos rnams kyi bdag gi ngo bo nyid med pas rab tu phye ba ste de tsam gyis bzhag pa yin pa'i phyir chos rnams kyi ngo bo nyid med pa zhes kyang bya bas don dam pa ngo bo nyid med pa zhes bya'o zhes gsungs pa'i phyir/ 'dod na/ khyod la gang zag gi bdag med phra mo'i dbang du byas pa gcig med par thal/ 'dod pa'i phyir/ 'dod na/ khyod yin na chos kyi bdag med phra mo yin pas khyab @64 par thal/ 'dod pa'i phyir/ 'dod na/ gang zag gi bdag med phra mo yongs grub ma yin par thal lo/ /rang lugs chos kyi bdag med kyi dbang du byas pa'i yongs grub la bshad/ dgongs 'grel las/ gal te 'du byed kyi mtshan nyid dang don dam pa'i mtshan nyid ces pas stong gzhi chos can dang de'i steng gi stong nyid gnyis ngo bo gcig la ldog pa tha dad du bstan/ tha dad pa yin par gyur na ni zhes pas 'brel med tha dad par gyur na de'i steng gi bdag med tsam dang ngo bo nyid med pa tsam nyid de'i stong nyid ma yin par 'gyur zhes pa'o/ /mdo 'dis jo nang pa dgag par mdzad tshul ni/ jo nang pas yongs grub dgag bya bcad ldog nas mi 'jog par sgrub pa rang dbang bar khas blangs pas de la rje bla mas dgongs 'grel gyi lung drangs te dgag par mdzad do/ /gsum pa de dag gi dpe bstan pa ni/ dgongs 'grel las/ de la 'di lta ste dper na zhes sogs kyis 'chad/ don dam pa ngo bo nyid med pa nyid de las kyang gcig kyang blta bar bya'o zhes pa'i don ni/ yongs grub kyi dpe snga ma gnyis las kyang gsal ba gcig 'chad par bya'o zhes pa'o/ /'chad tshul ni de ma thag tu byung ba de yin/ yang/ yongs grub kyi dpe don ni dkyus na gsal lo zhes pa ni/ mdo der gsal bar snang zhes pa'o/ /mtshan nyid gsum rang gi mtshan nyid kyis ma grub par lta ba skur 'debs yin kyang/ kun brtags rang gi mtshan nyid kyis ma grub par lta ba skur 'debs ma yin/ kun brtags 'dogs gzhi gzhan dbang dang/ @65 de 'dogs pa po'i tha snyad sgra dang rtog pa'o/ /gnyis pa gang la dgongs nas ma skyes pa sogs su gsungs pa bshad pa ni/ ngo bo nyid med pa'i tshul de ltar yin na skye ba med pa sogs gang la dgongs nas gsungs she na zhes sogs kyi don ni/ 'khor lo bar bar skye ba med pa sogs bzhi gsungs pa'i dgongs gzhi la kun brtags dang yongs grub gnyis ma gtogs gzhan dbang ma gsungs/ kun brtags rang gi mtshan nyid kyis ma grub pas ma skyes/ ma skyes pas ma 'gag pa yin/ ma skyes pa dang ma 'gag pa yin pas gzod ma nas zhi ba ste gdod ma nas nyon mongs pa zhi ba yin/ de yin pas rang bzhin kun mongs dang ma 'dres shing de la yongs su mya ngan las 'das pa ste slar yang kun nyon dang bral rgyu cung zad kyang med do/ /zhes kun brtags la dgongs tshul lo/ yongs grub dgag bya'i bdag gi ngo bo nyid med pas yongs grub bdag de'i ngo bor skye ba med pa sogs 'og ma la yang sbyar dgos/ yongs grub ni rtag gtan ther zug yin te/ sangs rgyas 'jig rten du byon nas stong nyid bstan na yod pa dang ma byon pa'i skabs su mi 'byung ba ma yin par rtag pa ste snga ma snga ma'i dus ther zug ther zug ste phyi ma phyi ma'i dus su gnas pa yod pa'i phyir/ kun btus las ni ngo bo nyid gsum ga la dgongs par bstan/ gzhan dbang la bshad na de skye ba ngo bo nyid med pa ste/ de bdag nyid gcig pa'i rgyu las skye ba med pa dang/ bdag nyid gcig pa'i rgyu las skye ba'i 'gag pa med pa dang/ de 'dra'i gzod ma nas zhi ba dang/ de 'dra'i yongs su mya ngan las 'das so/ /zhes gzhan dbang de dag gi dgongs gzhir @66 gsungs pa ni/ bdag nyid gcig pa'i rgyu las skye ba rang gi mtshan nyid ma grub pa sogs lnga la dgongs nas gsungs/ dgongs 'grel las ma gsungs pa ni gzhan dbang tha snyad du skye 'gag sogs yod pa la dgongs so/ /dwogs gcod ni/ kun btus las/ gzhan dbang de ltar yod par gsungs pa de/ dgongs 'grel gyi dgongs pa yin nam min/ yin na dgongs 'grel las de ltar bstan par thal/ de'i dgongs pa yin pa'i phyir/ zhes brtag /dgongs 'grel gyis gzhan dbang gzod ma nas zhi ba dang/ rang bzhin gyis yongs su mya ngan las 'das pa'i gzhir ma mdzad pa ni gzhan dbang phal cher kun nyon gyis bsdus pas so/ /dwogs gcod/ rgyan las/ 'di la bsal bya ci yang med ces gsungs pas brtag dgos/ gsum pa ngo bo nyid gsum gyi ngo bo ngos gzung ba ni/ kun brtags mtshan nyid ngo bo nyid med pa yin na kun brtags nyid gang yin snyam na zhes sogs kyis 'chad/ dgongs 'grel las/ rnam par rtog pa'i spyod yul zhes pas smra ba dang rtog pa'i yul/ kun brtags 'dogs gzhi 'du byed kyi mtshan ma ste 'dus byas kyi mtshan nyid can/ de gsum gyis gzhan dbang khyad chos gsum ldan du bstan to/ /rtog pa'i spyod yul ni rang zhes brjod pa'i sgra'i brjod bya dang rang 'dzin rtog pa'i zhen gzhi'o/ /mdo 'dis stong tshul bstan pa nges don du 'dod pa dang zhes pas jo nang pa dgag par mdzad/ jo nang pas nges don du bzhed pa'i mdo la/ dgongs 'grel sogs mdo bcu yod gsungs/ @67 stong lugs kyang sa phyogs bum pas stong pa ltar don gzhan du yod pa bkag pa min gyi zhes sogs kyis gzhan dbang kun brtags kyis stong lugs ni/ sa phyogs bum pas stong lugs ltar don gzhan gyis stong pa ma yin gyi/ gang zag rdzas su med pa ltar yin par gsungs/ sa phyogs bum pas stong lugs ni gzhi der bum pa yod med kyis byed kyi/ gzhi de bum pa yin min la mi byed/ /gang zag rdzas yod kyis stong tshul ni rang gi ngo bo de der grub ma grub la byed do/ gang gis stong pa'i kun brtags ni mdo 'di'i kun brtags ngos bzung ba'i skabs gnyis kar zhes sogs kyis dgongs 'grel dngos bstan gyi kun brtags la ngo bo la kun btags pa dang/ khyad par la kun btags pas kun brtags gang rung gis khyab ces bstan/ ngo bo dang khyad par la kun btags pa'i kun brtags la'ang yod rgyu'i kun brtags dang med rgyu'i kun brtags gnyis las/ dang po ni/ gzugs gzugs 'dzin rtog pa'i zhen gzhi yin pa lta bu dang/ gzugs kyi skye ba zhes pa'i sgra 'jug pa'i gzhi yin pa lta bu ste/ de gnyis yod kyang rtag pa'o/ /gnyis pa med rgyu'i kun brtags la'ang de 'dra'i zhen gzhir rang gi gnas lugs kyi dbang gis grub pa dang/ de 'dra'i skye ba zhes pa'i sgra 'jug pa'i gzhir rang gi gnas lugs kyi dbang gis grub pa lta bu ste/ 'di gnyis tha snyad du'ang med do/ /des mtshon nas gzugs nas rnam mkhyen gyi bar chos kun la sbyar te gsungs/ de ltar gzugs phung la ji ltar sbyar ba bzhin du phung po lhag ma bzhi dang skye mched bcu gnyis dang rten 'brel bcu gnyis dang zas bzhi dang khams drug dang bco brgyad po re re la yang mtshan nyid @68 gsum gsum sbyar bar gsungs so zhes pa'i don ji ltar yin zhe na/ 'di la lugs gnyis las/ rje btsun chos rgyan gyis/ skye mched bcu gnyis kyi nang tshan chos kyi skye mched kyi ngo bor gyur pa'i 'dus ma byas kyi nam mkha'i steng du mtshan nyid gsum gyi rnam gzhag byed pa na nam mkha'i gzhan dbang la rang 'dzin tshad ma bzhag dgos te/ nam mkha'i gzhan dbang la gzhan dbang khyad chos gsum ldan zhig bzhag dgos pa'i phyir/ rtags der thal/ gzugs phung gi steng gi kun brtags kyi gdags gzhi khyad chos gsum ldan zhig bzhag dgos pa gang zhig /gzugs phung la ji ltar sbyar ba bzhin du phung po lhag ma bzhi dang skye mched bcu gnyis sogs la yang sbyar dgos pa'i phyir te/ bstan bcos 'di nyid las/ de ltar gzugs phung la ji ltar sbyar ba bzhin du phung po lhag ma bzhi dang zhes sogs gsungs pa'i phyir/ de bzhin du sdug bden la ni gdags gzhi sngar bzhin la zhes gsungs pa'i phyir/ gzhan yang de ltar dgos par thal/ yum gyi mdo las chos thams cad ngo bo nyid med par gsungs pa gang la dgongs nas ngo bo nyid med par gsungs pa bshad pa'i rgyas bshad kyi skabs su/ nam mkha'i gzhan dbang rkyen gzhan gyi stobs kyis byung ba yin gyi bdag nyid gcig pa'i rgyu'i stobs kyis skye ba ma yin pas skye ba ngo bo nyid med par bshad pa yin pa'i phyir/ rtags der thal/ de'i skabs su nam mkha'i gzhan dbang skye ba ngo bo nyid med par bshad pa gang zhig / @69 rkyen gzhan gyi stobs kyis skye ba yin gyi bdag nyid gcig pa'i rgyu las mi skye ba de skye ba ngo bo nyid med pa'i don yin pa'i phyir te/ dgongs 'grel las/ 'di ltar de ni rkyen gzhan gyi stobs kyis byung ba yin gyi bdag nyid kyis ma yin pas de'i phyir de ni skye ba ngo bo nyid med pa nyid ces bya'o zhes gsungs pa'i phyir/ de'i skabs su nam mkha'i gzhan dbang skye ba ngo bo nyid med par ma gsungs she na/ de ltar gsungs par thal/ 'khor lo bar pas gzugs nas rnam mkhyen gyi bar gyi chos thams cad la ngo bo nyid med par gsungs pa gang zhig /nam mkha' de'i nang tshan yin pa'i phyir/ dang po der thal/ 'di nyid las/ gzugs nas rnam mkhyen gyi bar gyi chos rnams kyi gsal ba'i dbye ba mtha' yas pa la ngo bo nyid dam rang bzhin med do zhes gsungs pa rnams ngo bo nyid med pa gsum du 'du zhing zhes sogs dang/ de'i mjug thog tu de ltar mdzad dgos pa yang zhes sogs gsungs pa'i phyir/ nam mkha'i gzhan dbang skye ba ngo bo nyid med par gsungs na/ skye ba med par gsungs pa'i don de dang ldan dgos la/ nam mkha' nam mkha'i gzhan dbang yin na sngar gong du bshad pa'i rigs pas gnod do/ /gzhan yang stong gzhi chos can bden par ma grub na de'i stong nyid kyang bden grub tu mi rung ba'i phyir te/ rtsa shes las/ 'dus byas rab tu ma grub pas/ /'dus ma byas ni ji ltar 'grub ces dang/ mdo las/ gzugs nyid kyang mi dmigs na gzugs kyi de bzhin nyid dmigs pa lta ga la 'gyur zhes gsungs la/ de dbu ma pa'i lugs @70 la dgongs so zhe na/ mi 'thad de bstan bcos 'di las/ /zhes gsungs pa bzhin du lugs gnyis kas lan du mar gsungs so/ /zhes gsungs pa'i phyir/ bzhi pa de dag gis grub pa'i don zhus pa la gnyis/ mdo dgod pa dang/ de'i don cung zad bshad pa'o/ /dang po ni/ de ltar na gsung rab la chos rnams rang gi mtshan nyid kyis yod pa dang zhes sogs kyi don ni go sla/ de la yang gnyis yod pas mdo sde gnyis drang don dang gcig nges don du sngar bshad pa rnams kyi shugs kyis shes par 'gyur ro/ /zhes sngar bshad pa ni mdo sde la 'gal spong gi dri ba zhu lugs dang/ de la ston pas mtshan nyid gsum la dgongs nas ngo bo nyid med pa sogs gsungs tshul dang/ tshul de ltar gsungs pas mdo sde dgongs 'grel gyis mtshan nyid gsum la bden par yod med gsal bar bstan pa yin pas/ de rnams la brten nas 'khor lo dang po gnyis drang don dang tha ma nges don du shugs kyis te don gyis go ba'o/ /shugs la go ba'i don ni/ dang po gnyis drang don dang tha ma nges don yin pa shugs la gnas pa'o/ /de ni dus kyi rim pa'i sgo nas 'khor lo rim pa gsum dang sbyar ba'i drang nges su 'gyur tshul don dam yang dag 'phags kyis ston pa la zhus pa ni/ dgongs 'grel las/ bcom ldan 'das kyis dang por yul wa ra NA sir zhes pa nas rtsod pa'i gzhi'i gnas su 'gyur pa ma lags so zhes pa'i bar gyis bstan/ gnyis pa de'i don cung zad bshad pa la gnyis/ mdo'i tshig don cung zad bshad pa dang/ drang nges kyi tshul cung zad @71 bshad pa'o/ /dang po ni/ de la 'khor lo dang po bskor ba la gnas ni tshig dang pos bstan la zhes sogs kyi don ni dkyus na gsal/ yul wa ra NA sir/ /zhes yul gyi ming gsungs pa ni mdo 'di'i ched du bya ba'i gdul bya la khyim pa'i phyogs mang po yod pa go ba'i ched dang/ drang srong smra ba ri dwags kyi nags su/ /zhes gnas kyi mtshan smos pa ni yul der rab byung gi gnas mang po yod pa dang mdo 'di'i ched du bya ba'i gdul bya la rab byung gi phyogs mang po yod pa go ba'i don du smras so/ /drang srong lhung ba'i ri dwags kyi nags zhes pa ni sngon sangs rgyas 'jig rten du ma byon pa'i dus su gnas der rang rgyal dgra bcom pa du ma yod cing/ nam zhig gi tshe ston pa sum cu rtsa gsum du lha'i bu dam pa tog dkar po'i skye ba bzhes pa'i tshe lha rnams kyis/ sangs rgyas 'jig rten du mi ring bar gshegs pas khyed cag gnas gzhan du gshegs shig ces nam mkha' nas sgra thos pa na dgra bcom pa de rnams kyis nam mkha' la 'phur ba dang/ nam mkha' la 'dug pa dang/ sku'i stod nas me 'bar sku'i smad nas chu 'bab pa sogs spyod lam rnam pa bzhi'i sgo nas mya ngan las 'das pa'i mdzad pa bstan te ring bsrel sa la lhung bas na de skad du brjod par gsungs so/ /'phags pa'i bden pa zhes pa ni bden bzhi mngon sum du rtogs pa'i gang zag la 'phags pas te des gzigs pa ltar don la gnas pas na bden pa'o/ /sngon ma thos pa zhig thos pas ngo mtshar rmad du byung ba zhes ngo mtshar skad du smra bas ni/ sngon ston pa 'jig rten du ma @72 byon pa'i gnas skabs su tshang pa dang dbang phyug la sogs pa 'jig rten dregs pa'i lha brgyad la sogs pa sus kyang bskor mi nus pa zhig gsungs pas ngo mtshar rmad du byung zhes pa'o/ / de yang zhes pas 'khor lo gsum pa gsungs pa'i dus su mdo 'di gsungs nas yun ring po song ba'i don no/ /nyan thos kyi theg pa la yang dag par zhugs pa zhes pas ched du bya ba'i gdul bya bstan/ 'di'i theg pa 'ga' zhig gis brjod bya don gyi theg pa la byed pas lam zhugs kyis khyab pa dang/ 'ga' zhig gis rjod byed tshig gi theg pa la byas nas de'i ched du bya ba'i gdul bya la lam zhugs kyis ma khyab par bzhed/ snga ma ni rje btsun chos rgyan sogs kyi bzhed par gsungs/ bar pa la theg pa chen po zhes sbyar ba ma gtogs gdul bya ngos 'dzin gong dang 'dra/ sde snod gsum pa wen tshig gis gsum pa la ltos nas bla na yod pa sogs las ma bshad cing zhes sogs kyi don ni/ rgya gar gyi mkhan po yang dag bden pa'i 'khor lo dang po dang bar pa la bla na mchis pa sogs sbyor tshul ni bla na mchis pa nas brtsis pa'i gsum pa drang ba'i don bsgrub byar byed de 'khor lo dang po gnyis la bla na mchis pa sogs bshad pa yin pas/ de yang dper na 'khor lo dang po drang don yin te/ bla na mchis pa skabs mchis pa rtsod pa'i gzhi'i gnas su gyur pa yin pa'i phyir/ bar pa la'ang de ltar sbyar nas bshad kyang/ rje bla mas mi legs par gzigs nas bstan bcos 'dir ma bris pa yin gsungs pa'i don no/ /skabs med pa'i snga ma ma gtogs pa zhes pas de'i gong du wen tshig gis skabs med pa'i bshad pa la gnyis sbyar nas gsungs pa'i dang po de ma gtogs rang lugs la 'thad pa yin/ bshad pa dang po ni phyis mchog tu 'gyur ba'i skabs med pa la bshad do/ /gnyis pa drang nges kyi tshul cung zad bshad pa ni/ de 'dra ba'i 'khor lo dang po la bden bzhi'i chos 'khor @73 dang zhes sogs kyis 'chad/ mdo 'di nyid kyi tshig dang bstun na/ /zhes pas dgongs 'grel las mtshan nyid gsum bden par yod med so sor phye bas de 'dra'i tshig dang bstun na 'khor lo tha ma'i mtshan la legs par rnam par phye ba'i chos 'khor zhes bya bar gsungs/ 'on kyang 'grel chen las btags pa de mdo'i dgongs pa ma yin pa ni min te/ don dam yang dag 'phags kyis ston pa la mdo 'di'i mtshan ci zhig lags zhus pa'i lan du dgongs 'gre las/ don dam rnam par nges pa zhes bya bar yang zungs shig ces gsungs pa'i phyir/ 'dul ba mdor bsdus zhes bya ba rung mthun du grags pa gsungs kyang/ /zhes 'dul ba mdor bsdus zhes pa'i don ji ltar yin zhe na/ ston pa sku mya ngan las 'da' khar sngon ngas 'dul ba'i bcas pa mdzad pa dang mi 'gal zhing de dang mthun na rung ba yin/ de dang mi mthun na mi rung ngo zhes bcas pa mdor bsdus te bstan pa'i mdo de la zer ro/ /kha cig gis mdo 'di la brten nas dus gsum par gsungs pa'i mdo thams cad nges don du bsgrubs nas/ /zhes pa'i kha cig ni jo nang pa'o/ /des ni dus gsum par gsungs pa'i mdo la nges don gyis khyab par bzhed/ de ltar bzhed pas gzhan sde'i rigs can tshe rabs snga mar bdag khas len pa'i grub mtha' la goms pa che ba'i dbang gis gang zag gi bdag khas len las 'bras dang dkon mchog khas len pa'i gdul bya 'ga' zhig nang pa'i grub mtha' la zhugs pa'i phyir du ston pas/ phung po lnga ni khur yin la/ /khur khyer ba yi bdag yod do/ / rtag gam mi rtag brjod mi bya zhes gang zag rang rkya thub pa'i bdag bstan pa'i mdo sgra @74 ji bzhin par 'dod cing/ don dam bden pa ma gtogs chos thams cad 'khrul snang tsam las rang gi ngo bo cung zad kyang med cing chos nyid bden grub yin min rnam par phye ba ste gsal bar bstan pa legs par rnam par phye ba'i don du 'dod do/ /de la gzhan dag gis ni mdo 'dis drang nges phye ba ltar yin na/ /zhes pa'i phyogs snga ni gung thang gis yar 'grogs pa rin chen tog yin par gsungs/ des 'khor lo tha ma nges don gyi mdo ma yin te/ de yin na dus gsum par gsungs pa'i mdo thams cad nges don du khas len dgos pa dang/ chos nyid bden par grub pa'i bden mi bden rnam par phye ba legs par phye ba'i don du 'dod dgos la de ltar mi rigs pas sgra ji bzhin pa min no zer/ gong 'og gnyis kas kyang mdo sde la 'gal spong gi dri ba byung lugs sogs la zhib tu ma brtags par de ltar rtsod pa de drang nges kyi rnam dbye byas pa tsam zhig la rtsod par gsungs/ gnyis pa de'i don ji ltar bkral ba'i tshul la gnyis/ slob dpon thogs med kyis gtso bor dgongs 'grel la brten tshul dang/ de la brten nas de kho na nyid gtan la phab pa'i tshul lo/ /dang po ni/ bsdu ba las/ don dam pa mtshan nyid lnga dang ldan pa yang dgongs 'grel las 'byung ba bzhin shes par bya'o zhes pa nas bstan/ 'dir slob dpon thogs med kyis gtso bor dgongs 'grel la brten pa dang zhes gtso bor gsungs pa spyir thogs med kyis 'phags pa dpal 'phreng gi mdo la sogs par brten nas rgyan rtsa ba dang/ rgyud bla ma'i dgongs pa dbu ma'i lugs su 'grel ba @75 yin yang/ skabs 'dir gtso bor dgongs 'grel 'di la brten zhes go ba'i phyir du gsungs zhes bstan bcos 'gar yod/ gnyis pa la gsum/ mtha' gnyis spong tshul spyir bstan pa/ sgro 'dogs kyi mtha' bye brag tu dgag pa/ des gsung rab kyi drang nges 'byed pa'i tshul lo/ /dang po la gsum/ byang sa nas bshad pa'i tshul dang/ bsdu ba nas bshad pa'i tshul dang/ de dag las gzhan pa'i gzhung nas bshad tshul lo/ /dang po la gnyis/ sgro skur du lta ba'i tshul dang/ de gnyis 'gog pa'i tshul lo/ /dang po ni/ byang sa las/ ji ltar yod ce na yod pa ma yin pa la sgro btags pa'i legs par ma zin pa spangs pa dang zhes sogs kyis bstan/ ji ltar yod ce na zhes pa 'ga' zhig gis chos thams cad kyi gnas tshul ji ltar yod ce na zhes gsungs par bzhed kyang/ rang lugs la gnas lugs thar thug chos nyid de ji ltar yod ce na zhes pa'i don yin/ yod pa ma yin pa la sgro btags pa'i legs par ma zin pa spangs pa dang/ /zhes pas sgro btags pa ste rtag mtha' dang/ yang dag pa la skur ba btab pa'i legs par ma zin pa spangs pa yod de/ /zhes rtag chad kyi mtha' spangs pa'i tshul du yod ces dbu ma'i lam mthar thug pa de bstan/ de 'dra ba de sgro skur spangs pa'i tshul du yod na sgro 'dogs dang skur 'debs ji ltar yin zhe na/ de gnyis ni byang sa las/ gzugs la sogs pa'i chos rnams dang gzugs la sogs pa'i dngos po la zhes sogs kyis bstan/ 'dogs pa'i tshig gi ngo bo nyid kyi/ /zhes pa'i spyir 'dogs @76 pa'i tshig de la gnyis su yod/ dang po ni/ kun brtags 'dogs par byed pa'i ming brda 'am kun brtags 'dogs par byed mkhan gyi sgra dang rtog pa la byed/ gnyis pa ni/ gang gis btags pa ste kun brtags 'dogs byed kyi sgra rtog gis gang 'dogs pa'i tshig ste gang btags pa'i kun brtags lta bu la 'dod/ mdor na gang gis 'dogs pa'i tshig 'dogs byed kyi tshig /kun brtags 'dogs byed kyi ming brda/ kun brtags 'jog byed kyi sgra rtog rnams ming gi rnam grangs/ gang 'dogs pa'i tshig /tshig gis btags pa'i kun brtags/ ming brdas bzhag pa'i kun brtags/ sgra rtog gis btags tsam rnams ming gi rnam grangs yin/ mtshan gzhi ni dper na gzugs gzugs 'dzin rtog pa'i zhen gzhir brjod pa'i sgra dang/ de ltar rtogs pa'i rtog pa lta bu dang po/ gzugs gzugs 'dzin rtog pa'i zhen gzhi yin pa dang/ de'i zhen gzhir rang gi mtshan nyid kyis grub pa lta bu gnyis pa'i mtshan gzhi yin/ skabs 'dir 'dogs pa'i tshig ni 'dogs byed kyi tshig la mi byed par gdags bya kun brtags la byed de/ dper na gzugs gzugs 'dzin rtog pa'i zhen gzhi yin pa lta bu la byed do/ /byang sa'i skabs gzhan du byung ba rnams kyang de ltar shes par bya'o/ /zhes pas 'di bzhin du gdags bya kun brtags la byed dgos par gsungs/ gzugs gzugs 'dzin rtog pa'i zhen gzhir dang gzugs gzugs zhes brjod pa'i sgra 'jug pa'i 'jug gzhir rang mtshan gyis ma grub ste/ de ltar du grub na de gzugs 'dzin @77 rtog pa'i zhen gzhir dang/ de ltar 'jug pa'i 'jug gzhir 'gro ba ming brda 'am sgra rtog gang la'ang ma bltos par rang gi gnas tshul gyi dbang gis 'gro dgos pa las de ltar mi 'gro ba'i phyir te/ de de'i zhen gzhir dang 'jug gzhir 'gro ba ming brda la bltos pa'i phyir te/ de ltar mi bltos na/ ming gi snga rol blo med phyir/ /zhes sogs kyi rigs pa gsum gyis gnod do/ /de bzhin du chos gzhan thams cad la sbyar nas shes dgos par gsungs/ gzugs la sogs pa'i chos rnams dang gzugs la sogs pa'i dngos po la/ zhes phyi ma la gzugs la sogs pa'i dngos po zhes smras pa ni/ sgro skur gnyis gzugs sogs kyi dngos po la shas che bas de ltar brjod par gsungs/ brjod du med pa'i bdag nyid kyis don dam par yod pa la/ /zhes brjod du med pa ni sgra rtog gis brjod du med pa'o/ /brjod du med pa'i don gang yin zhe na/ spyir dngos po la des khyab ste rang mngon sum du rtogs pa'i mngon sum tshad mas ji ltar rtogs pa de ltar du rang brjod pa'i sgras brjod mi nus pa dang/ rang rtogs pa'i rtog pas de ltar du rtogs mi nus pa'i phyir te/ de gnyis kyis sgra spyi dang don spyi brgyud pa la ma bltos par rang mtshan rjen gcer du brjod pa dang rtogs par mi nus pa'i phyir/ chos 'dul ba 'di las rab tu nyams pa yin par rig par bya'o zhes pa'i don ni/ sgro skur de ltar byas na gdul bya 'dul ba'i rim pa theg chen gyi chos zab mo 'di las nyams par bstan par gsungs/ don dam par yod pa la med par lta ba skur 'debs su bshad pa'i zlas drangs na zhes pa ni 'thad kar drangs na zhes pa'i don @78 yin pas don dam par yod pa la med par lta ba skur 'debs su bshad pas de'i dngos kyi log phyogs don dam par med pa la yod par lta ba sgro 'dogs su bshad dgos kyang/ skabs 'dir de ltar ma gsungs pa ni phan tshun mtshon res byed pa'i phyir du de ltar bstan pa yin/ des mtshon res byed tshul ni skabs 'dir gzhan dbang don dam par yod pa la med par lta ba skur 'debs su dngos su bshad pas/ gzhan dbang rang gi mtshan nyid kyis yod pa la med par lta ba skur 'debs su shugs la bstan pa dang/ skabs 'dir kun brtags rang gi mtshan nyid kyis med pa la rang gi mtshan nyid kyis yod par 'dzin pa sgro 'dogs su dngos su gsungs pas/ kun brtags don dam par yod par 'dzin pa sgro 'dogs su shugs la bstan pas mtshon tshul de ltar yin gsungs/ de ltar byang sa'i dngos bstan gyi skur 'debs la gzhan dbang don dam par yod pa la med par 'dzin pa'i blo yin pas khyab pa dang/ byang sa'i dngos bstan gyi sgro 'dogs la kun brtags rang gi mtshan nyid kyis yod par 'dzin pa'i blo yin pas khyab bo/ /gnyis pa de gnyis 'gog pa'i tshul ni/ gal te sgro skur byed tshul de ltar yin na de gnyis spong tshul ji ltar yin snyam na zhes pa nas bstan/ byang sa las/ 'di lta ste dper na/ gzugs la sogs pa'i phung po rnams yod na gang zag gdags su rung gi/ /zhes pas gzugs phung sogs don dam par med na gang zag med par thal ba bstan/ de bzhin du gzugs la sogs pa'i chos rnams kyi dngos po tsam yod na/ /zhes pas ni dngos po @79 don dam par med na chos dang gang zag gnyis su phye ba'i chos med par thal ba bstan/ dang po bstan tshul ni/ gzugs phung sogs don dam du med na/ btags chos gang zag med par thal/ gdags gzhi gzugs phung don dam par med pa'i phyir zhes pa'o/ /phyi ma ni gzugs la sogs pa'i dngos po don dam du mi 'dod na chos dang gang zag gnyis su phye ba'i chos med par thal/ rang nyid 'dogs pa'i tshig gam 'dogs byed kyi sgra rtog med pa'i phyir zhes pa'i don no/ /byang sa las/ de la 'dogs pa'i gzhi med du zin na ni gzhi med par 'gyur bas 'dogs pa yang med par 'gyur ro/ /zhes pa'i dwogs gcod ni/ gdags gzhi rang nyid med na rang nyid 'dogs pa po med pas khyab bam ma khyab/ dang po ltar na gzung 'dzin rdzas gzhan du grub pa chos can/ rang nyid 'dogs pa po med par thal/ gdags gzhi rang nyid med pa'i phyir/ des mtshon nas gzhan la yang rigs 'gre/ ma khyab na/ byang sa las/ de la 'dogs pa'i gzhi med du zin na zhes sogs dang 'gal/ des na gdags gzhi tshad ma med na 'dogs byed tshad ma med dgos zhes zer dgos sam snyam/ de la 'dir skur 'debs 'gog pa'i phyogs snga khas len mkhan ni gzhan sder 'ong don med la/ /zhes sogs la dwogs pa cung zad dpyad na/ las dang rnam smin don dam du med par 'dzin pa byang sa'i dngos bstan gyi skur 'debs yin nam min/ dang po ltar na de don dam du med par 'dzin pa'i phyi rol pa yod dam med/ yod na de 'dra'i gzhan sde chos can/ byang sa'i skur 'debs 'gog yul gyi phyogs snga @80 yin par thal/ las 'bras don dam du med par 'dzin pa'i 'dzin pa byang sas dngos bstan gyi skur 'debs gang zhig /khyod kyis de ltar du 'dzin pa'i phyir/ rtags snga phyi gnyis ka khas/ ma khyab na/ ngo bo nyid med par smra ba byang sa'i skur 'debs 'gog yul gyi phyogs snga yin pa'i rgyu mtshan gang yin/ las dang rnam smin don dam du med par 'dzin pa'i blo byang sas dngos bstan gyi skur 'debs yin par thal/ gzhan dbang don dam du med par 'dzin pa'i blo byang sas dngos bstan gyi skur 'debs yin pa'i phyir/ gzhan yang de byang sas dngos bstan gyi skur 'debs yin par thal/ de bsdu bas dngos bstan gyi skur 'debs yin pa gang zhig /byang sa dang bsdu ba gnyis sgro skur gyi mtha' dang de spong tshul gcig pa'i phyir te/ 'di nyid las/ byang sa dang 'di gnyis sgro skur gyi mtha' dang de spong tshul gcig go /zhes gsungs pa'i phyir/ rtags dang po de bsdu bas dngos bstan gyi skur 'debs yin par thal/ mngon brjod kyi bag chags las byung ba'i blo kun rdzob pa rang gi mtshan nyid kyis ma grub par lta ba de bsdu bas dngos bstan gyi skur 'debs gang zhig /mtshungs pa'i phyir/ rtags dang po der thal/ bsdu ba las/ de la 'di skad ces brjod par bya ste ngo bo nyid du dmigs pa de mngon par brjod pa dang kun rdzob kyi rgyu las byung ba yin par 'dod dam zhes sogs dang 'gal ba'i phyir/ rtsa bar 'dod na yang mi rigs par thal/ byang sa'i skur 'debs 'gog yul gyi gzhan sde med pa'i phyir te/ bstan bcos @81 'di las/ de la 'dir skur 'debs 'gog pa'i phyogs snga khas len mkhan ni gzhan sder 'ong don med la/ /zhes gsungs pa'i phyir/ byang sa las/ tshul bzhin ma yin par rnam par brtags te rigs pa ma yin pas bskyed pa'i rtog pa tsam gyis 'di thams cad ni btags pa tsam du zad de/ /zhes pa'i don rnal 'byor spyod pa bas thal 'gyur ba la tshul bzhin ma yin pa ste tshul min yid byed kyi rnam rtog gi dbang gis rigs pa ma yin pas bskyed pa'i rtog pa tsam gyis chos rnams rtog pas btags tsam yin/ gang zag sus 'di ltar chos thams cad rtog pas btags tsam du lta ba yang dag par lta ba yin no zhes zer ba ni chad lta'i gtso bo yin zhes pa'i don no/ / byang sa las/ gang zag tu lta ba ni bla yi stong nyid la log par zin pa de ni de ltar min no/ /zhes pa'i don snga ma 'dogs pa'i tshig rang gi mtshan nyid kyis yod pa min pa la rang mtshan gyis yod par 'dzin pa dang gang zag bdag tu med pa la bdag tu lta ba la sogs pa'i sgro 'dogs kyis ni bla'i ste stong nyid la log par gzung ba tsam dang/ shes bya la rmongs pa tsam ma gtogs pa shes bya thams cad la skur ba mi 'debs/ de'i dbang gis dmyal bar mi skye/ gzhan chos 'dod pa yang phung bar mi byed/ bslab pa'i gzhi la yang g.yel bar mi 'gyur la/ phyi ma skur 'debs kyis chos thams cad la skur ba 'debs pa sogs bzhi po de byed pa yin pa'i phyir/ /zhes skur 'debs khas len pa dag la gnod byed bzhi bstan te gzhan dbang rang gi mtshan nyid kyis med na de med dgos/ de med @82 na chos thams cad med par khas len dgos/ de ltar khas len na chos thams cad la skur ba 'debs/ chos thams cad med par khas blangs na las 'bras dang dkon mchog med par khas len dgos/ de khas len na de'i dbang gis ngan song du skye ba'i phyir dang/ gzhan dbang rang gi mtshan nyid kyis ma grub par khas len na thar pa med par khas len dgos/ thar pa med par khas len na gang zag gzhan thar pa 'dod pa rnams thar pa yod dam med snyam du the tshom za nas thar pa spong bar byed pas gzhan thar pa 'dod pa rnams phung bar byed cing bslab pa'i gzhi la yang g.yel bar 'gyur ro/ /de ltar byas na gang la gang med pa de ni des stong zhing lhag ma gang yin pa de ni yod pa yin la/ /zhes pa'i don ni gzhi gzhan dbang gang la kun brtags gang med pa de ni gzhan dbang kun brtags kyi ngo bos stong zhing de nyid kyi lhag ma yod pa ni gdags gzhi dngos po tsam dang 'dogs pa tsam yod pa'o/ /gnyis pa bsdu ba nas bshad pa'i tshul la gnyis/ phyogs snga ma dgod cing de'i don la dri lan bya ba dang/ lan btab pa'i phyogs dgag pa'o/ /dang po ni/ bsdu ba las/ theg pa chen po pa la la rang gis nyes par bzung bas zhes sogs kyis 'chad/ de la 'dir don dam gang yin dris pa ni/ /zhes pa'i don don dam gang yin dris pa ni don dam bden pa'i mtshan gzhi dris pa yin gyi don dam du med ces pa'i med sa'i don dam mam med sa'i bden grub de gang nas yin te/ don dam gang yin dris pa na dbu ma pas chos thams cad @83 kyi ngo bo nyid de rang gi mtshan nyid kyis med pa gang yin pa'o zhes lan btab pa gang zhig /med sa'i don dam de dris na dbu ma pas chos thams cad kyi steng gi don dam bden pa'o zhes lan mi 'debs pa'i phyir te/ dbu ma pas chos thams cad kyi steng gi don dam bden pa de med sa'i don dam yin par mi 'dod pa'i phyir/ de bzhin du kun rdzob gang yin dris pa na yang kun rdzob bden pa zhes pa'i tshig zur gyi kun rdzob de gang yin zhes dris pa yin gyi chos rnams tha snyad du yod ces pa'i yod sa'i tha snyad de gang yin zhes dris pa ma yin te/ /de 'dra'i yod sa'i tha snyad de tha snyad dpyod byed kyi tshad ma la byed pa gang zhig /de ltar dris na dbu ma pas ngo bo nyid du dmigs pa gang yin pa'i blo kun rdzob pa'o zhes lan 'debs par mi rigs pa'i phyir te/ de 'dra'i blo de blo don mthun ma yin par dbu ma pas 'dod pa gang zhig /tha snyad du yod ces pa'i yod sa'i tha snyad de blo don mthun yin par dbu ma pas kyang 'dod pa'i phyir/ gnyis pa lan btab pa'i phyogs dgag pa la gnyis/ gzhan gyi grub mtha' la 'gal ba bstan pa dang/ rang gi grub mtha' la 'gal ba spang pa'o/ /dang po ni/ de la thog mar kun rdzob kyi ngos 'dzin 'gog pa ni bsdu ba las zhes sogs kyis 'chad/ ngo bo nyid du dmigs pa de mngon par brjod pa dang kun rdzob kyi rgyu las byung ba yin par 'dod dam 'on te mngon par brjod pa dang kun rdzob tsam zhig yin par 'dod ces pa'i mngon par brjod pa ni rtog pa'o/ /'dir yang don dam du yod med kyi brtag pa bya dgos mod kyang don 'dra zhing brtag pa snga ma @84 go sla bas de ltar bshad do/ /zhes pa'i brtag pa snga ma ni rnam rig pas thal 'gyur ba la chos rnams rang gi mtshan nyid kyis grub par dmigs bzhin du rang mtshan gyis med ces pa mi rigs te/ de ltar brjod pa la rang gi mtshan nyid kyis grub par rtogs pa'i tshad mas gnod pa'i phyir/ /zhes smras pa la thal 'gyur bas de 'dra'i blos mi gnod de/ blo de log shes sam 'khrul shes yin pa'i phyir zhes lan 'debs par byed pa la/ rnam rig pas 'o na de 'dra'i 'khrul shes de rang mtshan gyis yod dam med ces pa'i brtag pa de yin no/ /de'i phyir dgongs 'grel gyi 'grel chen kha cig las kun brtags bden pa gnyis kar med la gzung 'dzin gnyis kyi gzhan dbang gi rten cing 'brel bar 'byung ba/ /zhes sogs kyi don ni de 'dra'i 'grel chen der kun brtags bden pa gnyis kar med pa dang gzung 'dzin rdzas tha dad du grub pa'i gzhan dbang yod par bstan pa de la rje bla mas 'di ltar gsungs te/ de ltar bstan pa de mdo sde dgongs 'grel gyi dgongs pa ma yin te/ de ltar yin na rnam rig pas khas len dgos pa la theg bsdus su dgongs 'grel drangs nas gzung 'dzin rdzas tha dad du grub pa kun brtags su bshad 'dug pas 'grel chen der de gzhan dbang du bshad pa mi rigs pa'i phyir/ der ma zad kun brtags de ltar bshad pa de mi 'thad de/ de tha snyad du yod par bshad pa'i phyir te/ bsdu ba las tha snyad las ni de'i ngo bo nyid yin par brjod par bya'o/ /zhes gsungs pa'i phyir/ kha cig gis @85 'grel chen de thogs med kyis mdzad zer ba ni ma brtags pa chen po yin te/ 'grel chen der rnam nges kyi lung yang drangs 'dug pas rnam nges rtsom pa po chos kyi grags pa yin pa gang zhig /dpal ldan chos kyi grags pa thogs med kyi rjes su byung ba'i phyir/ thogs med kyis mdzad pa'i dgongs 'grel gyi 'grel pa rnam par gtan la dbab pa bsdu bar dgongs 'grel gyi gleng gzhi'i le'u ma gtogs le'u gzhan rnams phal che ba drangs nas de dag gi dka' ba'i gnad rnams legs par gtan la phab 'dug pas de las gzhan pa'i dgongs 'grel gyi 'grel pa zur du mdzad dgos pa mi snang ngo zhes gsungs/ de'i mjug thogs su phyis kyi kha cig kyang zhes pa'i phyogs snga ma ni jo nang pa'o/ /gnyis pa rang gi grub mtha' la 'gal ba spong ba ni/ gal te byang sa dang bsdu ba las gzhan dbang don dam par yod par gsungs pa ltar yin na dgongs 'grel las zhes sogs kyis 'chad/ gzhan dbang don dam bden pa yin na dgongs 'grel las 'dus byas yin na don dam min par gsungs pa sogs lung drug dang mi 'gal lam zhe na/ mi 'gal te/ don dam par yod pa dang kun rdzob tu yod pa la 'jog tshul gnyis gsungs pas/ rtog pas btags tsam du grub pa 'jog tshul dang po'i dbang du byas pa'i kun rdzob tu yod pa'i don dang/ rtog pas btags tsam ma yin par yul rang gi thun mong ma yin pa'i sdod lugs kyi ngos nas grub pa dang po'i dbang du byas pa'i don dam du yod pa'i don yin/ rnam dag lam gyi dmigs pa mthar thug tu grub pa 'jog tshul @86 gnyis pa'i dbang du byas pa'i don dam bden pa'i don dang/ de ma yin pa gnyis pa'i dbang du byas pa'i tha snyad du yod pa'i don no/ /des na dgongs 'grel las de ltar gsungs pa dang/ dbus mtha' dang de'i 'grel pa dang mdo sde rgyan dang de'i 'grel pa rnams su gsungs pa'i don dam rnams phyi ma'i dbang du byas/ bsdu ba las rgyu mtshan dang rnam rtog kun rdzob tu gsungs pa phyi ma'i kun rdzob kyi dbang du byas pa yin no/ /mdo sde rgyan las/ yod min med min de bzhin min gzhan min/ /skye dang 'jig med 'bri bar mi 'gyur te/ /'phel ba med cing rnam par dag pa'ang med/ /rnam par dag 'gyur de ni don dam mtshan/ /zhes pas don dam bden pa mtshan nyid lnga ldan du bshad la/ de la mtshan nyid lnga ni yod min med min gyi mtshan nyid/ gcig dang tha dad min pa'i mtshan nyid/ skye 'jig med pa'i mtshan nyid/ 'phel 'grib med pa'i mtshan nyid/ rnam par dag pa dang rnam par dag pa med pa'i mtshan nyid dang lnga/ /dang po ni/ don dam bden pa de kun brtags dang gzhan dbang gi ngo bor yod pa ma yin yongs grub kyi ngo bor med pa ma yin pa'o/ /gnyis pa ni/ don dam bden pa rang gi stong gzhi chos can dang gcig ma yin 'brel med don gzhan gyi tha dad ma yin pa'o/ /gsum pa ni/ don dam bden pa rang gi ngo bo skye ba dang 'jig pa ma yin pa'o/ /bzhi pa ni/ don dam bden pa'i ngo bo la 'phel ba dang 'grib ba med pa'o/ lnga pa ni/ don dam bden pa'i ngo bo la sems can gyi dus su rang gi ngo bo sgrib pa'i rnam par ma dag pa dang/ @87 sangs rgyas pa'i dus su rang gi ngo bo sgrib pa'i rnam par dag pa'i khyad par de ltar med pa'o/ / 'ga' zhig gis don dam bden pa mtshan nyid lnga ldan la/ zab pa/ zhi ba/ spros pa dang bral ba/ 'od gsal ba/ 'dus ma byas dang lngar gsungs/ dang po ni/ so skyes mngon sum gyis yul ma yin pas zab pa'o/ /gnyis pa ni/ rang gi ngo bo nyon mongs kyis zhi ba'o/ /gsum pa ni/ don dam bden pa de rang mngon sum du gzigs pa'i gzigs ngor kun rdzob dang dgag bya'i spros pa thams cad dang bral ba'am/ rang mngon sum du gzigs pa'i rnam dag lam gyis ji ltar gzigs pa ltar du sgras brjod mi nus pa dang rtog pas de ltar rtogs mi nus pa'o/ /bzhi pa ni/ rang gi ngo bo rang bzhin gyis 'od gsal ba dang/ lnga pa ni/ rang nyid rgyu rkyen gyis 'dus ma byas pa'o/ /bsdu ba las/ mngon par brjod pa la yongs su goms pa'i ming la gnas pa'i rnam par shes pa'i dmigs pa gzugs la sogs pa'i ming can gyi dngos po gzugs la sogs pa'i bdag nyid gang gis yod pa de ni bdag nyid des rdzas dang don dam pa gnyis kar yang med do/ /zhes gsungs pa'i don yang/ mngon par brjod pa ste mngon brjod kyi bag chags yongs su goms pa'i ming la gnas pa'i rnam par shes pa ste rtog pa dang/ de'i dmigs pa ste de'i snang yul gzugs la sogs pa'i ming can gyi dngos po ste zhen gzhi'i gzugs sam gzugs la sogs pa'i don spyi de ni gzugs la sogs pa'i bdag nyid du rtog pa gang gis gzugs la sogs pa'i bdag nyid du yod par bzhag pa de ni rtog pa des der bzhag pa tsam ma gtogs gzugs sogs kyi ngo bor ma grub pas de 'dra'i gzugs sogs kyi ming can gyi dngos po zhes don spyi de ni rdzas yod dang don dam gnyis @88 gang du yang med ces pa'i don no/ /'di tshe rabs sngon mar gzugs zhes brjod pa'i sgra yang dang yang du brjod cing goms pa'i bag chags kyi dbang gis gzugs la gzugs so snyam du rtog pa'i rtog pa de la gzugs su snang ba'i gzugs snang ngam gzugs kyi don spyi de rtog pa de la gzugs su snang ba tsam ma gtogs de gzugs kyi ngo bor ma grub cing de ltar snang ba de rtog pa des bzhag pa tsam yin pas rdzas yod dang don dam du med par bstan/ de lta bas na gzugs la sogs pa'i ming can gyi chos de dag gi ngo bo nyid yod pa ma yin pa las zhes sogs kyis gzugs sogs kyi ming can nam gzugs la sogs pa'i don spyi de dag gzugs la sogs pa de dag gi ngo bor yod pa ma yin pa las rtog pa des kun brtags pa gang yin pa de ni rtog pas btags pa'i btags yod yin par rig par bya'o/ /zhes don spyi de btags yod du bstan/ yang bsdu ba las/ mngon par brjod pa la yongs su goms pa rnam par bsal ba'i ming can gyi zhes sogs kyi don ni/ /mngon par brjod pa la yongs su goms pa rnam par bsal ba'i ming can zhes pas mngon brjod kyi bag chags yongs su goms pa rnam par bsal ba ste bral ba'i ming can te de 'dra'i ming dang ldan pa'i rnam par shes pa'i dmigs pa gzugs la sogs pa'i ming dang ldan pa'i dngos po sgra rtog gis brjod du med pa'i bdag nyid shes pa gang gis yod par bzhag pa de ni rdzas yod dang don dam gnyis gar yod pa yin par rig par bya'o/ /zhes gzugs la sogs pa rdzas @89 yod yin par bstan/ des na gzugs lta bu la mtshon na/ gzugs kyi ming can gyi dngos po/ gzugs 'dzin rtog pa la gzugs su snang ba'i gzugs snang/ gzugs kyi don spyi/ zhen gzhi'i gzugs rnams don gcig /gzugs dang/ brjod du med pa'i gzugs gnyis don gcig go /gzugs kyi don spyi la gzugs kyi ming can zhes brjod pa ni gzugs 'dzin rtog pa la don spyi dang gzugs gnyis dbyer med gcig tu snang ba'i rgyu mtshan gyis de ltar bshad/ zhen gzhi'i gzugs la de'i ming can zhes brjod pa'i rgyu mtshan yod de/ rtog pa des gzhi gzugs lta bu rjen gcer du rtogs mi nus par don spyi brgyud pa'i sgo nas rtogs dgos pas de ltar brjod pa'i phyir/ gzugs lta bu la brjod du med pa'i dngos po zhes brjod pa ni sgra rtog gis brjod du med pa'o/ /yongs su goms pa rnam par bsal ba'i ming can gyi rnam par shes pa'i zhes pas rtog med rnam shes de bstan/ rdzas yod dang/ btags yod kyi don ni/ rang nyid nges pa la chos gzhan nges pa la ltos mi dgos pa dang dgos pa'o/ /'o na bum pa rdzas yod yin nam zhe na 'dod pa'o/ /de rdzas yod ma yin te/ rang nyid nges pa la chos gzhan nges pa la ltos pa'i phyir te/ lto ldir ba nges pa la ltos pa'i phyir zhe na/ lto ldir ba chos gzhan ma yin pa'i phyir te/ de bum pa yin pa'i phyir ro/ /rang nyid nges pa la mtshan nyid nges pa la ltos pa'i phyir zhe na/ 'o na mtshon bya yin na btags yod @90 yin pas khyab par thal bar 'gyur ro/ /dbus mtha' las/ don dang thob dang sgrub pa ni/ /don dam rnam pa gsum du 'dod/ /ces pas don don dam dang/ thob pa don dam dang/ sgrub pa don dam gsum bstan/ dang po'i mtshan gzhi ni de bzhin nyid lta bu/ gnyis pa ni theg chen gyi thar pa lta bu/ gsum pa ni theg chen gyi mthong lam bar chad med lam lta bu'o/ /'di gsum dbu ma pa'i skabs su gzhi lam 'bras gsum gyi dbu ma yin/ dbus mtha' las/ rnam dag spyod yul rnam gnyis te/ /gcig pu kho nar brjod pa yin/ /zhes pa'i rnam pa gnyis ni nyon sgrib rnam par dag byed kyi bar chad med lam dang/ shes sgrib rnam par dag byed kyi bar chad med lam mo/ /gcig pu kho nar brjod pa yin zhes pas ye shes de gnyis kyi yul la yongs grub gcig pu yin zhes bstan/ de ltar bstan pa la gzhan gyis/ lugs 'dis ye shes de rang rig tu bzhed pas ye shes kyang yul du 'gyur ro snyam na zhes rtsod pa dang/ de'i lan du yul gang la ltos nas de kho na nyid kyi don rtogs pa'i yul de la dgongs pas skyon med ces gsungs/ 'di'i dgongs pa 'grel tshul la gnyis las/ mkhas dbang kha cig gis ye shes de rang rig tu bzhed pas ye shes kyang zhes pa'i rang rig de 'dzin rnam yan gar ba la rang rig tu byas pa'i rang rig de la mi bzhed par ye shes rang nyid kyis rang rig pa la byas/ lan 'debs pa na ye shes rang nyid kyis @91 rang nyid rtogs kyang ye shes de don dam bden par mi 'gyur te/ gcig pu kho nar brjod pa yin zhes pa'i don ye shes rang nyid kyis yul gang rtogs pa la ltos nas rang nyid de bzhin nyid rtogs pa'i blor 'jog thub pa'i yul de la dgongs pas skyon med ces skyon spong mdzad pa yin zhes bzhed do/ /de dag gis ni theg chen mthong lam bar chad med lam gyis rang nyid rtogs pa yang bstan pa yin te/ des rang nyid ma rtogs na gong gi dwogs pa 'ong don med pa'i phyir dang/ rje bla mas skyon spong mdzad pa na'ang yul gang la dgongs nas de kho na nyid kyi don rtogs pa'i yul de la dgongs pas skyon med ces gsungs don med pa'i phyir zhes bzhed/ gzhan yang des rang nyid ma rtogs na/ don dam bden pa'i mtshan nyid kyi zur du khyod la ltos te mthar thug spyod pa'i rigs shes tshad mar song ba zhes sbyar dgos pa'i rgyu mtshan yang theg chen mthong lam bar chad med lam gyis rang nyid rtogs kyang rang nyid mthar thug spyod pa'i rigs shes tshad mar 'jog pa de rang nyid rtogs pa'i cha nas mi 'jog par don dam bden pa rtogs pa'i cha nas bzhag pa yin pas de'i mtshan nyid kyi zur du de ltar sbyar ba yin gsungs/ ye shes snying po kun las btus las/ gzung dang 'dzin pa las grol ba'i/ /rnam shes dam pa'i don du yod/ /blo mtsho'i pha rol phyin pa yi/ /rnal 'byor spyod pa'i gzhung du grags/ /zhes pa'i don ni/ gzung 'dzin gnyis las grol zhing des stong pa rtogs pa'i blo de 'khor ba'i rgya mtsho'i pha rol du bgrod par byed @92 pa'i lam dang don dam du yod ces rnal 'byor spyod pa ste sems tsam pa'i gzhung du grags zhes pa'o/ /zhes gsungs pa yang don dam par yod tshul snga ma la dgongs so zhes gzung 'dzin gnyis kyis stong par rtogs pa'i blo de 'jog tshul dang po'i dbang du byas pa'i don dam du gsal bar gsungs/ dbu ma 'jug pa dang rtsa shes sogs dbu ma'i bstan bcos du ma nas rnal 'byor spyod pa sems tsam pa dang rtsod pa na gzhi gzhan dbang yod med rtsod pa yang tha snyad kyi dbang du byas pa min te dbu sems gnyis kas de tha snyad du yod par khas len pa la mi mthun pa med pa'i phyir/ sems tsam pas gzhan dbang don dam par yod pa dang/ dbu ma pas gzhan dbang don dam par med ces don dam du yod med rtsod pa yin pas gong gi de gnyis legs par phyed dgos so zhes pa ste 'jog tshul dang po'i dbang du byas pa'i don dam du yod tshul dang phyi ma'i dbang du byas pa'i don dam pa yod tshul so sor phyed dgos so/ /de yang dbu ma pas don dam du med par 'dod pa ni 'jog tshul dang po'i dbang du byas nas med ces pa ma gtogs phyi ma'i dbang du byas pa'i don dam khas len te/ des rnam dag lam gyi dmigs pa mthar thug khas len pa'i phyir ro/ /slob dpon sku mched kyi gzhung du ni don dam pa'i rnam gzhag phyi ma'i phyogs la brten pa mang du 'byung ngo zhes pa ni/ slob dpon dbyig gnyen gyi gzhung las ni @93 don dam pa'i rnam gzhag phyi ma ste rnam dag lam gyi dmigs pa mthar thug la don dam du gsungs pa ma gtogs rtog pas btags tsam ma yin par yul rang gi thun mong ma yin pa'i sdod lugs kyi ngos nas grub pa la don dam par yod ces pa de gsal bar ma gsungs/ thogs med kyi lugs ni sngar bshad zin pa'i bsdu ba sogs nas bshad do/ /de ltar na rnam dag lam gyi dmigs pa mthar thug 'jog tshul gnyis pa'i dbang du byas pa'i don dam yin nam min/ yin na gang zag gi bdag med kyi yongs grub de rnam dag lam gyi dmigs pa mthar thug yin min spyi don rgol ngan tshar gcod na rtsod pa mang du yod pa dang/ 'di'i skabs kyi rnam dag lam gyi dmigs pa mthar thug ces pa de chos kyi bdag med kyi dbang du byas pa'i yongs grub la bzhag dgos pa 'dra gsungs/ rnam dag lam gyi dmigs pa mthar thug don dam du bzhag pa de'i zlas drangs pa ste thad drangs pa'i kun rdzob tu yod tshul ji ltar yin snyam na/ bstan bcos 'di nyid las/ ngo bo nyid dang po gnyis kun rdzob tu yod tshul ni/ bsdu ba las/ rgyu mtshan dang rnam rtog kun rdzob tu yod pa'i rgyu mtshan du/ kun nas nyon mongs pa kun nas slong ba'i phyir dang gdags pa'i gzhi yin pa'i phyir/ /zhes gsungs pa'i 'jog tshul gnyis pa'i kun rdzob tu yod tshul ni/ kun nas nyon mongs slong ba'i dmigs pa byed pa dang/ tha snyad 'dogs pa'i gzhi yin pa'i khyad chos gnyis ldan zhig la bya dgos/ gang la dmigs @94 nas sgom pa'i sgrib pa dag par 'gyur ba dang/ rnam dag lam gyi dmigs pa mthar thug la don dam du bshad pa'i zlog phyogs ni kun nas nyon mongs slong ba'i dmigs pa yin te/ snga ma la dmigs nas sgrib pa dag par 'gyur la phyi ma la de ltar mi 'gyur ba'i phyir/ dper mtshon na/ bum pa chos can/ khyod la dmigs nas sgom pa'i sgrib pa dag par mi 'gyur te/ khyod kyis kun nas nyon mongs slong ba'i dmigs pa byed pa'i phyir/ nyon mongs slong ba'i dmigs pa byed tshul ni/ khyod la dmigs nas nyon mongs skye ba'i rgyu mtshan gyis yin/ yongs grub de 'jog tshul gnyis pa'i dbang du byas pa'i don dam du yod de/ rnam dag lam gyi dmigs pa mthar thug yin pa'i phyir/ gzhan dbang dang kun brtags gnyis chos can/ 'jog tshul gnyis pa'i dbang du byas pa'i kun rdzob tu yod de/ kun nas nyon mongs slong ba'i dmigs pa dang/ gdags pa'i gzhir gyur pa'i khyad chos gnyis ldan yin pa'i phyir/ de yang drang nges rnam 'byed las/ rnam par dag pa'i dmigs pa la don dam du bshad pa'i zlas drangs pa na/ gang la dmigs pas kun nas nyon mongs kun nas slong ba'i don gyis kun rdzob tu yod par bzhag ste kun las btus dang mthun no/ / gnyis pa ni/ ming dang brda'i tha snyad kyis btags pa'i ngo bo nyid dang tha snyad 'dogs pa'i mtshan ma'i gzhir gyur pas tha snyad du yod pa zhes bya'o zhes gsungs/ @95 ming brdas btags pa'i ngo bo nyid dang tha snyad 'dogs pa'i gzhir gyur zhes pa ni kun brtags 'dogs pa'i ngo bo dang gzhi yin pa'i cha nas yin/ spyir rnam dag lam gyi dmigs pa mthar thug gi zlas drangs pa la de'i dmigs pa mthar thug ma yin pa bzhag na yang don la bsam na gong du bshad ma thag pa'i khyad chos gnyis ldan de bzhag dgos/ 'on kyang 'di'i skabs su gzhan dbang thams cad 'jog tshul gnyis pa'i dbang du byas pa'i kun rdzob tu yod pas rtsod pa mang du bya rgyu yod/ rgyu mtshan ni mngon par brjod pa'i tshig gi gnas su gyur pa'i dngos po la bshad do/ /zhes pa'i rgyu mtshan ni gzhan dbang ste tshig gi brjod byar gyur pa'i dngos po la bya zhes bshad pa yin/ dwogs gcod ni/ 'jog tshul gnyis pa'i dbang du byas pa'i don dam pa la rnam dag lam gyi dmigs pa mthar thug bzhag pas de las gzhan pa'i gzhan dbang rnams 'jog tshul gnyis pa'i kun rdzob tu yod dam med/ dang po ltar na/ 'phags pa'i mnyam gzhag ye shes chos can/ 'jog tshul gnyis pa'i dbang du byas pa'i kun rdzob tu yod par thal/ rtags de'i phyir/ 'dod na/ kun nas nyon mongs slong ba'i dmigs pa byed pa yin par thal ba'i skyon dang/ kun rdzob tu med par 'dod mi rigs te gzhan dbang yin pa'i phyir/ 'di'i skor 'og tu bsdu ba'i skabs su 'byung bar 'gyur zhing/ rnam dag lam gyi dmigs pa mthar thug don dam dang gang la dmigs nas kun nas nyon mongs slong ba'i dmigs pa byed pa kun rdzob tu bzhag pa de rnam bshad @96 rigs pas sgrub pa ni slob dpon dbyig gnyen gyis/ rnam bshad rigs pa las kyang/ 'jig rten pa'i shes pa 'khrul ba'i yul dang 'jig rten las 'das pa'i shes pa'i yul la dgongs nas bden pa gnyis po kun rdzob kyi bden pa dang don dam pa'i bden pa gsungs so/ /zhes rnam bshad rigs pa las bden pa gnyis 'jog skabs 'jig rten pa'i shes pa 'khrul shes de'i yul kun rdzob bden pa dang/ 'jig rten las 'das pa'i ye shes ma 'khrul ba'i shes pa de'i yul don dam bden pa bzhag pa yin/ spyir na 'jig rten pa'i shes pas kun rdzob bden pa yin pa de ma rtogs kyang/ 'jig rten pa'i shes pa'i yul du bzhag pa'i rgyu mtshan ni/ kun rdzob sna tshogs pa dmigs mkhan 'jig rten pa'i shes pa bzhag dgos pa'i gnad kyis yin no/ /'phags pa'i ye shes kyis don dam pa la dmigs shing/ des na kun rdzob bden pa dang don dam bden pa gnyis 'jig rten pa'i shes pa dang 'phags pa'i ye shes kyi yul gnyis la gtso bor bzhag /de yang gtso che ba'i sgo nas bzhag pa ma gtogs khyab pa med de/ 'jig rten pa'i shes pa la'ang stong nyid don spyi'i tshul gyis rtogs pa'i tshogs sbyor gyis don dam bden pa rtogs shing/ 'phags pa'i rgyud la'ang bum 'dzin rtog pa dang bum 'dzin mig shes sogs du ma yod pa'i phyir/ don 'di la dgongs nas 'jug pa las kyang/ mthong ba rdzun pa kun rdzob bden par gsungs/ /zhes dang/ 'jig rten nyid las bden yin zhes pa ltar 'jig rten @97 pa'i shes pa 'khrul ba'i blo de'i ngor bden gyi spyir mi bden pa'i cha nas kun rdzob kyi bden pa dang/ yang dag mthong yul gang de de nyid de zhes pa ltar 'phags pa'i ye shes kyis stong nyid mthong ba ltar don la yang gnas pas don dam pa'i bden pa bzhag pa yin/ don dam pa zhes pa'i don ni shes bya dang/ dam pa ni mchog yin pas shes bya'i mchog dang/ dam pa'i don zhes pa'i dam pa ni 'phags pa'i ye shes dang/ don ni yul yin pas dam pa'i don no/ / yang na/ don dang dam pa gnyis ka 'phags pa'i ye shes la byas nas don dam pa dang dam pa'i don gnyis 'dam kha can du gsungs/ brjod pa ni kun rdzob yin pas des khong du chud par bya ba'i bden pa ni kun rdzob kyi bden pa yin te gang la brjod pa 'jug pa ste/ /zhes pa'i brjod pa ni bum 'dzin rtog pa lta bu la bzhag dgos/ kun rdzob bden pa zhes pa'i tshig zur gyi kun rdzob de la thal 'gyur ba ltar na rang gi mtshan nyid kyis grub par 'dzin pa'i blo bzhag kyang/ spyir btang de 'dra'i tshig zur gyi kun rdzob de la sgra bshad tshul phra rags mang du yod de/ mdo sde pa dang sems tsam pas de 'dra ba'i tshig zur gyi kun rdzob bden pa zhes pa'i sgra bshad skabs/ bum 'dzin rtog pa de kun rdzob yin/ kun rdzob ces pa sgrib byed la go ba ltar rtog pa des bum pa'i rang mtshan rjen pa mthong ba la sgrib cing/ bum pa'i don spyi de rtog pa de'i ngor bden gyi spyir mi bden pas bum pa'i don spyi kun rdzob bden pa yin te/ rtog pa de la bum pa dang bum pa'i don spyi gnyis ka bum par snang ba'i phyir/ des na bum pa'i don spyi bum @98 pa dang 'dres nas snang ba ma gtogs bum pa rjen pa snang mi thub/ bum 'dzin mig shes kyis bum pa rjen pa bzung ba'i cha nas snang yul la mi sgrib pas tshig zur gyi kun rdzob ma yin/ gang la brjod pa 'jug pa ste/ dper na rkang pa gnyis kyis rgal bar bya ba'i 'bab stegs la rkang pa'i 'bab stegs zhes bya ba dang/ ko grus rgal bar bya ba'i 'bab stegs la ko gru'i 'bab stegs zhes bya ba lta bu'o/ /zhes chu phran gru la ma ltos par rkang pa'i 'degs 'jog tsam gyis rgal nus pa dang po dang/ gru la ma ltos par rgal mi nus pa ni phyi ma yin zer/ dpe de bzhin/ blo kun rdzob pa rtog pa de'i ngor bden gyi spyir mi bden pa'i cha nas kun rdzob bden pa zhes bya la/ don dam pa'i bden pa ni de ltar min zhes slob dpon dbyig gnyen gyi rnam bshad rigs par gsungs so/ /'o na/ bsdu ba las/ de bzhin nyid rtogs pa'i mnyam gzhag gi 'phags pa'i ye shes ni don dam par yod par gsungs te/ kun rdzob tu yod par 'jog pa'i rgyu mtshan snga ma gnyis med pa la dgos so/ / zhes stong nyid mngon sum du rtogs pa'i 'phags pa'i mnyam gzhag ye shes don dam du yod par gsungs pa 'jog tshul gnyis pa'i dbang du byas na mi 'thad de/ de la rnam dag lam gyi dmigs pa mthar thug yin dgos pa las ma yin pa'i phyir/ des na de chos can/ 'jog tshul gnyis pa'i kun rdzob @99 tu yod par thal/ 'dod na/ de mi rigs te kun rdzob tu yod par 'jog pa'i rgyu mtshan snga ma gnyis te kun nas nyon mongs kun nas slong ba dang/ gdags pa'i gzhi gnyis ma yin pa la dgongs nas don dam par yod pa gsungs pa'i phyir/ yang phyogs gzhan nas/ 'phags pa'i mnyam gzhag ye shes chos can/ 'jog tshul gnyis pa'i kun rdzob tu yod par thal/ kun nas nyon mongs kun nas slong ba yin pa gang zhig /de de'i dbang du byas pa'i kun rdzob tu yod pa'i don yin pa'i phyir/ der thal/ gang la dmigs nas sgom pa'i sgrib pa dag par gyur pa dang/ gang la dmigs nas nyon mongs 'phel bar gyur pa de gnyis 'jog tshul gnyis pa'i don dam dang kun rdzob kyi don yin pa'i phyir/ rtsa ba'i rtags dang po der thal/ khyod kyis kun nas nyon mongs slong ba'i dmigs pa byed pa'i phyir/ der thal/ 'phags pa'i mnyam gzhag ye shes la dmigs pa'i kun nas nyon mongs yod pa'i phyir te/ 'phags pa'i mnyam gzhag ye shes bdag tu grub par 'dzin pa yod pa'i phyir/ gzhi grub na khyod la dmigs pa'i nyon mongs yod pas khyab pa'i phyir/ 'dod mi nus te/ bstan bcos 'di nyid las/ gzhan dbang phal cher kun nyon gyis bsdus pa'i zhes sogs kyis mnyam gzhag ye shes de kun nyon gyis ma bsdus pa don gyis bstan pa'i phyir/ gong gi rtsod pa rnams kyi lan ni/ bum pa lta bu khyed la dmigs nas chags sogs nyon mongs 'phel bar @100 'gyur la/ 'phags pa'i mnyam gzhag ye shes la dmigs nas 'phel ba med pa'i phyir te/ rdo tshan rdo la rkang rjes bzhin yin pa'i phyir/ bsdu ba las/ 'phags pa'i mnyam gzhag ye shes kun rdzob tu 'jog pa'i rgyu mtshan gnyis med pa la dgongs nas don dam du gsungs pa gnyis pa'i dbang du byas pa'i don dam ma yin/ de bzhin du stong nyid don spyi'i tshul gyis rtogs pa'i 'phags pa'i rjes thob ye shes kyang don dam dang kun rdzob gnyis kar yod par gsungs pa ni/ zas za ba dang/ gos gyon pa la sogs pa'i tha snyad kyi mtshan mar dmigs pa'i cha nas tha snyad pa'i kun rdzob dang/ stong pa nyid rtogs pa'i cha nas don dam du yod par gsungs te/ 'di nyid las/ de'i rjes thob kyi ye shes ni kun rdzob dang don dam gnyis kar yod par gsungs te/ tha snyad kyi mtshan ma la dmigs pa'i sgo nas tha snyad du yod par gsungs so zhes gsungs pa'i phyir/ des na bsdu ba las 'phags pa'i mnyam rjes gnyis don dam du yod par gsungs pa'ang sgra ji bzhin pa ma yin par don 'di rnams la dgongs pa yin zhes drang don du 'grel dgos so/ / @101 tha snyad 'dogs pa'i gzhi'i mtshan mar gyur pa dang kun nas nyon mongs slong ba'i dmigs pa byed pas kun rdzob tu yod pa ni rang gi mtshan nyid kyis grub pa'i don dam par yod pa dang mi 'gal te zhes pa ni/ gzhan dbang lta bu tha snyad 'dogs pa'i gzhi dang/ kun nas nyon mongs slong ba'i dmigs pa yin pas 'jog tshul gnyis pa'i dbang du byas pa'i kun rdzob yin yang spyir don dam par grub pa mi 'gal zhes pa'i don yin/ rnam bshad rigs pa las/ nyan thos sde pas don dam pa stong pa nyid las/ las dang rnam smin yod la byed pa po ni mi dmigs so zhes gsungs pa de don dam pa yin na ji ltar na chos thams cad ngo bo nyid med/ kun rdzob tu yin na ni der byed pa po yod pas de mi dmigs so/ / zhes ji ltar brjod ces brtsad pa'i lan du kun rdzob dang don dam gang yin shes na de las de gnyis su yod par shes pas de gnyis gang yin dris pa na zhes pa'i don/ sems tsam pas rnam dag lam gyi dmigs pa mthar thug la don dam dang gang la dmigs pa'i kun nas nyon mongs slong ba'i don gyis kun rdzob tu bzhag pa la/ nyan thos sde pas 'di ltar rtsod de/ don dam pa stong pa nyid bstan pa'i mdo rgyas 'bring bsdus gsum lta bu las/ 'phen byed kyi las dang de'i 'bras bu rnam smin gyi phung po yod la las gsog pa po gang zag ni med ces pa de kun rdzob dang don dam gang gi dbang du byas zhes dris/ don dam gyi dbang du byas na'ang mi 'thad de las dang rnam smin skabs 'dir don dam du med pa'i phyir te/ rnam dag lam gyi dmigs pa mthar thug tu ma grub pa'i phyir dang/ kun rdzob kyi dbang du byas pa'ang mi 'thad de gang zag kun rdzob tu yod pa'i phyir te/ @102 kun nas nyon mongs slong ba'i dmigs pa byed pa'i phyir zhes rtsod pa'am/ yang na/ las dang rnam smin yod ces pa don dam du yod pa la byas na chos thams cad ngo bo nyid med par gsungs pa de ji ltar rigs te/ don dam du yod pa'i phyir/ kun rdzob tu yod pa la byas na byed pa po kun rdzob tu yod pas byed pa po mi dmigs gsungs pa ji ltar rigs zhes rnam rig pa la rtsod pa'i lan du/ kun rdzob dang don dam gnyis kyi 'jog tshul de shes na lan thebs par 'gyur bas thog mar nyan thos sde gnyis khyed rnams la bden pa gnyis kyi don gang yin zhes 'dri bar bya'o/ /de'i mjug tu sems tsam pa bdag cag gis rnam par phye ste lan gdab chog ces pa'o/ /dbyig gnyen gyis nyan thos sde pa la dris pa'i tshe/ ming dang brjod pa dang gdags pa dang tha snyad ni kun rdzob yin la/ chos rnams kyi rang gi mtshan nyid ni don dam pa yin no zhe na/ 'o na de ltar na las dang rnam par smin pa gnyis ming du yang yod/ rang gi mtshan nyid du yang yod pas de gnyis ji ltar 'dod par yod du rtog la rag go / zhes de gnyis rang gi mtshan nyid kyis grub pa la bzhag na ni don dam du yod pas don dam gyi dbang du byas na 'grig /gnyis ka ming 'jug pa'i gzhi yin pa'i cha nas kun rdzob kyi dbang du byas na'ang 'grig ces nyan thos sde pa la skyon spong gi lan btab pa yin/ rang lugs lung de'i don ni/ las dang rnam smin rdzas su yod/ byed pa po gang zag bdag tu ma grub ces pa'o/ /dwogs gcod/ ming gi dngos yul dang/ gzugs dang sgra zhes brjod pa'i sgra'i dngos yul/ gzugs so zhes gdags pa'i rtog pa'i dngos yul/ tha snyad 'dogs pa'i dngos yul te bzhi po de kun rdzob bden pa yin/ rang gi mtshan nyid kyis grub pa don dam bden pa @103 yin zhes nyan thos sde pas smra ba la/ ji ltar 'dod par yod du rtog la rag go zhes/ las dang rnam smin byed pa po gsum kun rdzob dang don dam gnyis ka yin zhes sems tsam pas smras pa de mi 'thad de/ las dang byed pa po gnyis nyan thos sde pa'i 'dod pa ltar gyi ming dang gdags pa ma yin pa'i phyir te/ nyan thos sde pas kun rdzob la rtag pa dang/ spyi mtshan yin dgos/ de la sgra rtog gis btags pa tsam gyis chos yin dgos pa'i phyir te/ de spyi mtshan gyi mtshan nyid yin pa'i phyir/ gang zag kun rdzob tu yod kyang rdzas su med gsungs pa'i rdzas ni rdzas btags gnyis su phye ba'i rdzas so/ /las dang rnam smin kun rdzob tu yod cing rdzas su yang yod la zhes pa'ang gong dang 'dra'o/ /de'i yul ni brjod du med pa spyi'i mtshan nyid yin pa'i phyir ro/ /zhes pa'i spyi'i mtshan nyid ni don dam bden pa yin/ de brjod du med pa ni sgra rtog gis ji lta ba bzhin brjod du med pa yin no/ / spyi'i mtshan nyid ni chos thams cad kyi chos nyid do/ /de'i mjug thogs su/ zhes smra ba la sngar gyi klan ka de 'jug par rnam bshad rigs pa las bshad pa 'di yang shin tu gsal lo/ /zhes pa'i sngar gyi klan ka ni nyan thos sde pas rnam rig pa la brjod pa'i klan ka de'o/ /zhes smra ba la zhes pa'i smra mkhan ni thal 'gyur ba'o/ /gsum pa de dag las gzhan pa'i gzhung nas bshad tshul la gnyis/ @104 mdo sde rgyan las bshad pa'i tshul dang/ dbus mtha' las bshad pa'i tshul lo/ /dang po ni/ rgyan las/ rang dang rang gi mtshan nyid du/ /zhes sogs kyis sher phyin gyi mdo las chos thams cad ngo bo nyid med par gsungs pa'i dngos bstan gyi dgongs gzhi bdun gsungs te/ de yang/ rang dang rang gi mtshan nyid du/ /med phyir rang gi ngo bo la/ /mi gnas phyir dang/ /zhes pas dus gsum gyi mtshan nyid gsum bstan/ 'dzin bzhin de/ /med phyir/ /zhes pas byis pas zhen pa ltar gyi gtsang bde rtag bdag bzhi med par bstan/ ngo bo nyid med 'dod/ /ces pas de bdun sher phyin gyi mdo'i dgongs gzhir 'dod ces pa'o/ /mngon pa kun btus las/ gong gi sde tshan gnyis dang ngo bo nyid med pa gsum bcas dgongs gzhi bcu la dgongs nas shin tu rgyas pa sher phyin gyi mdo las ngo bo nyid med pa gsungs par bshad/ byis pas gtsang bde rtag bdag gam kun brtags kyi mtshan nyid gzhan du zhen pa ltar gyi ngo bo nyid med pas/ /zhes pa'i don ni slob dpon dbyig gnyen gyis/ byis pas gtsang bde rtag bdag bzhi'i nang nas bdag 'dzin la gang zag gi bdag 'dzin dang chos kyi bdag 'dzin de kun brtags kyi mtshan nyid gzung 'dzin rdzas gzhan du 'dzin pa ltar gyi ngo bo nyid med pa la dgongs nas ngo bo nyid med pa gsungs par bzhed/ yang yum gyi mdo las chos thams cad skye ba med par gsungs pa'i dgongs gzhi brgyad mdo sde @105 rgyan las gsungs te/ rgyan las/ thog ma dang ni de nyid gzhan nyid dang/ /rang gi mtshan nyid rang dang gzhan du 'gyur/ /kun nas nyon mongs pa dang khyad par la/ /skye ba med pa'i chos la bzod par bshad/ /ces pas bstan/ spyir mi skye ba'i chos la bzod pa thob tshul chen 'bring chung gsum yod de/ chung ngu theg chen gyi sbyor lam drod nas thob/ 'bring mthong lam bar chad med lam nas thob/ chen po sa brgyad pa nas thob pa yin/ dang po der thal/ de'i gnas skabs su stong nyid la dmigs pa'i zhi lhag zung 'brel gyi ting nge 'dzin thob cing rang nyid kyis stong nyid rtogs tshul de 'dra zhig rang las dman pa'i gang zag gis rtogs na skrag rigs pa las rang nyid kyis de ltar rtogs pa la mi skrag pa'i phyir/ gnyis pa der thal/ mthong lam gyi gnas skabs su stong nyid mngon sum du rtogs shing rang nyid kyis stong nyid gzigs tshul de 'dra ba zhig lam 'og ma la gnas pa'i gang zag rnams kyis rtogs na skrag rigs pa las rang nyid kyis de rtogs pa la mi skrag pa'i phyir/ gsum pa des rigs 'gre/ de'i don ni 'khor ba na sngon med pa'i sems can mi skye ba dang/ /zhes pa'i don rang gi rgyun sngon med pa'i sems can mi skye zhes pa'i don no/ /de la dus gsum gyi chos la ngo bo nyid med tshul gyi da ltar ba ma gtogs pa dang/ byis pas zhen pa bzhin gyi ngo bo nyid med tshul snga ma ni nyan thos sde gnyis ka dang thun mong ba'o/ /zhes pas myu gu da lta ba rang grub pa'i dus @106 gnyis par mi sdod pas ngo bo nyid med par gsungs zhes pa ma gtogs pa'i 'das ma 'ongs gnyis dang/ byis pas zhen pa bzhin gyi ngo bo nyid med tshul snga ma mdo sde rgyan dang/ kun btus gnyis kyi bshad tshul de nyan thos sde gnyis dang khas len thun mong ba yin pa'am sher phyin gyi mdo'i dgongs gzhi thun mong ba gang rung yin zhes pa'i don no/ /de yang don smra sde gnyis kyis theg chen gyi bka' khas len par bzhed pa'i dbang du byas na sher phyin gyi mdo'i dgongs gzhi thun mong ba la sbyar/ de gnyis kyis theg chen gyi bka' khas mi len pa'i dbang du byas na khas len thun mong ba la sbyar dgos gsungs/ da lta ba la ngo bo nyid med tshul thun mong ba ma yin te/ mdo sde pas myu gu rang grub dus kyi skad cig gnyis par mi sdod par khas len/ bye brag smra bas myu gu lta bu rang grub pa'i dus gnyis par gnas par 'dod pa'i phyir/ sngar gzhan dbang sgyu ma lta bu dang/ yongs grub nam mkha' dang 'dra bar gsungs pa la/ gal te dgongs 'grel las gzhan dbang sgyu ma bzhin du gsungs shing/ rgyan las kyang 'dus byas thams cad sgyu ma bzhin du gsungs pas bden par grub pa de dag gi don min no zhe na zhes pa ni/ gzhan dbang la sogs pa bden par ma grub par thal/ dgongs 'grel dang mdo sde rgyan las gzhan dbang sgyu ma lta bur gsungs pa'i phyir/ khyab ste/ sgyu ma la sogs pa bden par ma grub pa'i dpe yin pa'i phyir zhe na zhes pa'i don no/ /sems tsam pa'i rang lugs la gzhan dbang @107 'dus byas thams cad sgyu ma lta bu yin yang bden par ma grub pa'i skyon med de/ sgyu ma la sogs pa bzhin du bshad pas bden par mi ston pa'i nges pa med de sgyu ma la sogs pa dper byed lugs la rag las so zhes gsungs/ rang rgyud pas sgyu ma lta bur bzhed tshul bden par grub pas stong pa sgyu ma lta bur 'dod pas gzhan dbang bden grub tu khas mi len pa yin/ sems tsam pas 'dus byas thams cad sgyu ma bzhin du 'dod kyang bden par ma grub pas ma khyab ste/ sgyu ma'i don snga ma ltar mi 'dod kyi/ gzhan dbang gzung 'dzin rdzas gzhan du snang zhing snang ba ltar ma grub pa'i sgyu ma lta bur khas blangs pa yin no/ /'o na sgyu ma'i dpe byed lugs ji ltar zhe na/ de yang rgyan las ji ltar sgyu ma de bzhin du/ /yang dag ma yin kun rtog 'dod/ /sgyu ma'i rnam pa ji lta bar/ /de bzhin gnyis su 'khrul ba brjod/ /ces pa ste ji ltar sgyu ma mkhan gyi sngags rdzas kyis bslad pa'i rgyu tshogs grangs tshang gi dngos po sgyu ma dang de'i stobs kyis rta glang sogs snang ba sgyu ma'i rnam pa de bzhin du/ gzhan dbang la yang dag pa dang yang dag min pa gnyis yod cing/ 'phags pa'i lam yan lag gis bsdus pa'i cha rnams yang dag pa dang/ sdug kun gyis bsdus pa'i gzugs sogs yang dag pa ma yin pa yin/ thog ma med pa nas rang rgyud la yod pa'i yang dag pa ma yin pa gzugs rang 'dzin rtog pa'i zhen gzhir rang mtshan gyis grub par 'dzin pa'i rtog pa kun rtog yin par 'dod/ rgyu tshogs grangs tshang gi dngos po de rta glang du ma grub kyang @108 rta glang sogs sgyu ma'i rnam par snang ba ji lta bar de bzhin kun rtog de la gzung 'dzin gnyis su med kyang gnyis snang 'khrul ba'i bag chags kyis bslad pas gnyis su snang ba'i 'khrul ba yin par brjod/ spyir bum 'dzin rtog pa la sogs pa rtog pa thams cad yang dag pa ma yin pa'i kun rtog yin/ kun rtog ces pa ni gzhi thams cad la de ma yin bzhin du yin par snang nas lhag po btags pa ste bum 'dzin rtog pa lta bus bum pa'i don spyi bum pa ma yin pa la bum par zhen nas lhag po btags pa lta bu yin/ skabs 'dir gzugs sogs rang 'dzin rtog pa'i zhen gzhir rang mtshan gyis grub par 'dzin pa'i rtog pa dang/ gzung 'dzin rdzas gzhan du zhen pa'i blo rnams kun rtog gi gtso bo yin no/ /sgyu ma dang sgyu ma'i rnam pa gnyis so sor 'jog dgos/ de yang sgyu ma mkhan gyis sngags rdzas btab ste rta glang sogs snang bar nges pa'i rgyu tshogs tshang ba'i shing bu sogs sgyu ma yin/ yang dag pa ma yin pa'i kun rtog gzhan dbang sgyu ma de dang 'dra/ sgyu ma dang ltad mo ba'i mig shes 'phrad pa las rta glang gi gzugs su snang ba ni sgyu ma'i rnam pa yin zhing/ kun rtog de'i dbang gis rang cag la gzung 'dzin rdzas gzhan du snang ba sgyu ma'i rnam pa dang 'dra'o/ /gzhan dbang la yang dag dang yang dag ma yin pa gnyis yod pa'i yang dag pa ma yin pas bsdus pa kun rtog de la yang dag pa ma yin pa zhes brjod/ so skye'i shes pa rnams rtog pa'i zhen gzhir rang mtshan gyis grub par @109 'dzin pa'i rtog pa'i bag chags kyis bslad pa na dbang shes sogs la gzung 'dzin rdzas gzhan du snang ba yin/ de ni sgyu ma mkhan gyis sngags btab pa'i ltad mo ba'i mig shes la rta glang gi gzugs su snang ba dang 'dra/ sprul gzhi rde'u shing la rta glang sogs snang rgyu yod pas khyab/ sngags rdzas kyis ma btab pa'i shing bu sprul gzhi rde'u shing ma yin/ sprul gzhi rde'u shing rta glang du med kyang mig bslad pa'i ltad mo ba la rta glang gi gzugs su snang ba de bzhin du gzhan dbang rdzas gzhan du ma grub kyang bag chags kyis bslad pa'i rang rgyud kyi rtog pa la rdzas tha dad du snang ba 'dra ba yin no/ /de yang gzhung 'di nyid las/ ces gsungs pa 'dis sgyu ma dper byed lugs bstan te/ 'khrul ba'i gzhi bong ba dang shing la sogs pa sgyu ma'i sngags kyis btab pa ni kun rtog gzhan dbang dang 'dra ste rkang pa dang po gnyis kyi don no/ /zhes pa nas phyi ma gnyis kyi don du dbyig gnyen gyis bshad do/ /zhes pa'i don yin yang rgyan las/ ji ltar de la de med pa/ /de bzhin du ni don dam 'dod/ /ji ltar de ni dmigs gyur pa/ /de bzhin du ni kun rdzob nyid/ /ces pa'i don ni/ ji ltar sgyu ma de la rta glang sogs snang yang rta glang du med pa dpe de bzhin gzhan dbang gzung 'dzin rdzas tha dad du snang yang rdzas gzhan du ma grub pa ni don dam ste stong nyid yin par 'dod/ ji ltar sgyu ma de rta glang gi ngo bor ma grub kyang rta glang gi gzugs su dmigs par gyur pa de bzhin kun rtog la gzhan dbang rdzas gzhan du @110 med kyang rdzas tha dad du snang ba ni kun rdzob kyi bden pa yin zhes pa ste/ gzhung las/ ces sgyu ma la glang po che la sogs pa med pa bzhin du gzhan dbang la gzung 'dzin gnyis med pa don dam dang sgyu ma de rta glang gi ngo bor dmigs pa bzhin du yang dag pa min pa la kun brtags pa de kun rdzob kyi bden par dmigs so zhes 'grel bar bshad do zhes gsungs/ sgyu ma'i rta rta mtshan nyid par med kyang de med pa min/ mig shes la sgyu ma'i rta glang snang yang rta glang gis stong pa de dang rtog pa la gzhan dbang rdzas tha dad du grub par snang yang des stong pa gnyis dpe don du sbyar dgos/ sngags rdzas kyis mig ma bslad pa'i gnas der phyis slebs pa'i ltad mo bar rde'u shing rta glang du mi snang ba de bzhin 'phags pa'i ye shes dang sangs 'phags la sngags rdzas kyis bslad par mi nus pas sgyu ma'i rta glang sogs su snang ba med do/ /rgyan las/ nang gi skye mched drug bdag dang srog la sogs par med bzhin du zhes pa ni/ nang gi skye mched de rgyud kyis bsdus pa'i gzugs kyi skye mched nas chos kyi skye mched bar drug bdag dang srog la sogs par med pa ste bdag tu grub par med bzhin du bdag tu grub pa der snang ba'i cha nas sgyu ma dang/ de ni sgyu ma la rta glang sogs med bzhin du der snang ba dang 'dra'o/ /nang gi skye mched drug gang zag gi bdag med du 'jog pa na rgyud kyis bsdus pa'i skye mched rnams gang zag rang rkya thub pa'i rdzas yod kyi bdag med la gzhag dgos/ phung po lnga rang rkya thub pa'i rdzas yod kyi bdag ma yin bzhin du bdag tu grub @111 par snang yang bdag gi ngo bor ma grub pas bdag gis stong par 'dod/ bum sogs phyi'i skye mched rnams rang rkya thub pa'i gang zag de'i longs spyad bya ma yin pa'i cha nas 'jog gi bum sogs rang dbang ba'i bdag gi ngo bor med pa'i sgo nas bdag med du bzhag rgyu med/ bum sogs gang zag yin bsam pa med kyang de dag bdag tu grub par 'dzin pa'i blo med pa'i skyon med de/ bum sogs rang rkya ba'i bdag gi longs spyad byar grub par 'dzin pa'i blo de de yin pa'i phyir te/ bum sogs rang rkya ba'i bdag gi longs spyad byar ma grub pa de'i steng gi bdag med phra mo yin pa'i phyir/ bum pa'i steng du bdag med 'jog pa na gzhan stong du gzhag dgos pa yin pas/ nang gi skye mched dang phyi'i skye mched gnyis gang zag gi bdag med du 'jog tshul mi 'dra ba yin no/ /phung po lnga rang rkya thub pa'i gang zag gi bdag gi mtshan gzhi ma yin yang rang res rang rkya ba'i bdag yod de rgyud kyi phung po de bdag yin snyam du phugs la zhen tshul de yod pas nang gi skye mched rang gi ngo bo'i sgo nas rang rkya ba'i bdag gis stong par 'jog chog pa yin/ de yang gzhung nyid las/ phyi'i skye mched drug gang zag gi bdag gi nye bar spyad byar med bzhin du der snang bas na rmi lam lta bur mdo sde las gsungs par bshad kyi phyi nang gi 'dus byas rang bzhin gyis stong bzhin du der snang ba'i dper ma gsungs so zhes gsungs/ des na sgyu ma lta bu 'jog tshul la phra rags du ma yod de/ mdo sde pa'i lugs la @112 gang gi bdag tu grub pa ma yin bzhin du bdag tu grub par snang ba'i sgyu ma lta bu dang/ sems tsam pas gzhan dbang gzung 'dzin rdzas tha dad du med kyang der snang ba'i sgo nas sgyu ma lta bur bzhed/ dbu ma pa'i lugs su gzugs sogs bden par med bzhin du bden par snang ba'i sgyu ma lta bur gsungs so/ /spyir na gzhung de las sgyu ma lta bur gsungs na bden par grub pa khas mi len pas khyab pa med de/ sgyu ma sogs dper byed lugs la rags las pa'i phyir/ phyi'i yul sgyu ma'i rta rtar med kyang rtar snang ba'i sgyu ma dang smig rgyu rmi lam sogs dper bshad pa bzhin du phyi rol gyi don ma grub kyang don du snang ba'i sgyu ma lta bu yin/ theg bsdus las kyang yum gyi mdo nas sgyu ma la sogs pa'i dper gzhan dbang bstan pa'i dpe don sbyor tshul ni/ phyi rol don du grub pa med na shes pa la phyi rol don du grub par snang ba ji ltar 'thad snyam na/ sgyu ma la rta glang mtshan nyid pa med kyang sgyu ma la rta glang mtshan nyid pa snang ba bzhin no/ /zhes dang/ phyi rol gyi don med na phyi rol don du snang ba'i blo ji ltar skye snyam na/ smig rgyu la chu mtshan nyid pa med kyang chu mtshan nyid pa snang ba'i dbang shes skye ba bzhin no/ /zhes dang/ phyi rol gyi don med na yul yid du 'ong mi 'ong la ji ltar spyod snyam pa na/ rmi lam du mi la sogs pa mtshan nyid pa mi dmigs kyang mi mtshan nyid pa snang ba'i blo skye ba bzhin yin te/ phyi rol gyi don med na yul du ji ltar dmigs snyam pa bzlog pa'i phyir sgyu ma dang zhes pa nas rmi lam la sogs pa'i dper bshad do zhes pa'i bar gyi don yin/ phyi don ni rgyud kyis ma bsdus pa'i gzugs sogs la gzhag dgos/ phyi don yod na sngon 'dzin mig shes kyi rdzas su ma grub pa'i sngon po zhig yod dgos pa las de med pa'i phyir te/ de gnyis rdzas gcig yin pa'i phyir/ lugs 'dir sngon po dang de 'dzin pa'i mig shes gnyis dus mnyam du grub cing sngon po de sngon 'dzin mig shes kyi dmigs rkyen du khas mi len pa yin/ de yin pa'i rgyu mtshan ni sngar gang zag rang nyid kyis sngon po mthong byed kyi las bsags nas las smin pa na/ las kyi bag chags phyed kas phyi'i sngon po grub/ de'i phyed kyis nang gi dbang shes de grub cing las kyi bag chags gcig gis sngon po dang myong byed shes pa gnyis ka grub par byed pas de gnyis dngos rgyu tshogs pa gcig la rags las kyi 'brel ba grub pa yin/ de gnyis dus mnyam du grub cing 'gag pa na'ang dus @113 mnyam du 'gag pa yin/ des na sngon 'dzin las rdzas gzhan du sngon po med pas phyi don med do/ /de bzhin du shes pa gzhan la yang sbyor dgos gsungs/ lugs 'dir phyi don med cing chos thams cad sems kyi bdag nyid tsam du grub par gsungs pa des las 'bras la phan cha che ba yin/ de yang gzhan gyis rang la gnod pa byed pa sogs byung ba yang gnod pa byed dgos pa'i las rang nyid kyis bsags nas las de smin pa'i tshe gzhan gyis gnod pa byed pa yin te/ spyod 'jug las/ bdag gi las kyis bskul byas nas/ /bdag la gnod byed rnams byung ste/ /zhes dang/ mdzod las kyang/ las las 'jig rten sna tshogs skyes/ /zhes gsungs pa'i phyir/ rang la gzhan gyis tshig ngan zhig brjod na'ang de nyid rang gi las kyis byas shing/ gzhan yang ngan song gsum la sogs pa'i sdug bsngal rnams rang la snang zhing myong ba ni phyi rol gyi don du ma grub cing rang gi las kyi stobs kyis de dag myong byed kyi shes pa rang rgyud la 'grub par byed pas des myong ba yin te/ spyod 'jug las/ lcags bsregs sa gzhi su yis byas/ /me tshogs de dag ci las byung/ /de 'dra de dag thams cad ni/ /sdig sems yin par thub pas gsungs/ /zhes pa ltar rang gis lcags bsregs kyis bsregs pa'i sdug bsngal myong ba na sa gzhi de dag gzhan gyis bcos nas sgug sdod pa ma yin pa sngar ltar las gcig gis myang bya dang myong byed gnyis ka skyes pa yin no/ /brtag cing dpyad na ma byung mkhan tshang ma rang gces par 'dzin pa'i blo de yin/ sems tsam pa'i lta ba 'di la brten @114 nas las 'bras la nges pa chen po skye rgyu yod de/ dper na mi khong khro can zhig yin yang de ltar bsam pa'i tshe khong khro chung du 'gro ba dang/ 'jig rten gyi lha dang lha min thams cad rang gi dgrar langs kyang dmyal ba sogs la 'phen mi thub cing 'phen byed rang gi las gcig po yin te/ spyod 'jug las/ gal te lha dang lha min rnams/ /thams cad bdag la dgrar langs kyang/ /de dag gis kyang mnar med pa'i/ /me nang 'khrid cing 'jug mi nus/ /zhes dang/ de nyid las/ gang dang 'phrad na ri rab kyang/ /thal ba yang ni mi lus pa/ /der bdag skad cig nyid la 'dor/ /zhes gsungs pa'i phyir/ 'dis dmyal ba'i me'i tsha ba dper mdzad na dmyal ba'i mes ri'i rgyal po ri rab bsregs te thal ba yang mi lus par byed pa'i tshod du yod pa der gzhan gyis 'phen mi dgos par rang nyid kyi khong khro skad cig ma gcig gis kyang me tshogs der rang skad cig nyid la 'jug par byed pa yin/ des na 'khor 'das kyi rtsa ba rang rgyud kyi sems yin te/ sems rgyud 'dul bas thar pa dang thams cad mkhyen pa'i sar 'gro/ de ma 'dul bas ngan song gsum sogs su 'khyams par 'gyur ba'i phyir ro/ /gnyis pa dbus mtha' las bshad pa'i tshul ni/ dbus mtha' las/ yang dag ma yin kun rtog yod ces sogs tshigs bcad gnyis kyis lugs 'di'i zab mo stong pa nyid kyi don bshad pa dang/ 'khor lo gsum gyi drang nges 'byed tshul/ mdo'i don bshad tshul/ tshig gi dwogs pa bsal tshul dang bzhi yod/ @115 de yang mdo sde dgongs 'grel las/ de la gang na gang med pa de ni des stong pa dang 'di la lhag ma yod pa ni 'dir yod pa'o zhes pa 'di rtsa ba dang/ dbus mtha' las/ yang dag ma yin kun rtog yod ces pa'i tshigs bcad gcig de'i 'grel pa yin/ stong pa ma yin mi stong min zhes pa'i tshigs bcad gcig po de/ 'od srungs gi mdo las/ chos thams cad yod ces bya ba ni mtha' gcig go /med ces bya ba ni mtha' gnyis so mtha' de gnyis spangs pa ni dbu ma'i lam mo zhes pa'i 'grel pa yin no/ / yang dag pa ma yin pa ste rtog pa'i zhen gzhir rang mtshan gyis grub par 'dzin pa'i kun rtog gzhan dbang yod pa ste tshig gi lhag ma mi rdzogs par rang bzhin gyis yod ces tshig rkang dang pos gzhan dbang rang bzhin gyis grub par gsungs pas 'khor lo bar pa las chos thams cad rang mtshan gyis ma grub par bstan pa la dngos su gnod byed dang/ 'khor lo dang por gzung 'dzin rdzas tha dad du grub pa yod par bshad pa rang bzhin gyis yod pa tsam la dgongs zhes 'khor lo dang po'i dgongs gzhi 'chad pa yin/ yang dag ma yin kun rtog yod ces pas gzhan dbang rang bzhin gyis grub par bstan na yum gyi mdo las chos thams cad rang bzhin gyis stong par bshad pa dang 'gal zhe na/ de la gnyis po yod ma yin zhes lan btab nas yum gyi mdo las chos thams cad rang bzhin gyis stong par gsungs pa/ kun rtog gzhan dbang de la gzung 'dzin gnyis po yod pa ma yin pa ste rdzas tha dad du med pa'i der chos kun rang @116 bzhin gyis stong par gsungs pa yin zhes 'khor lo bar pa'i dgongs gzhi dang/ 'khor lo dang por gzung 'dzin rdzas gzhan yod par bstan pas de la dngos su gnod byed brjod pa yin/ 'o na chos thams cad rang ngos nas grub gzung 'dzin rdzas gzhan med na sems tsam pa'i lugs la de kho na nyid med par 'gyur ro zhe na/ lan du/ stong pa nyid ni 'di la yod ces pa 'dis stong nyid med snyam pa'i dwogs pa bsal te/ yang dag ma yin kun rtog yod ces pas gzhan dbang tha snyad du yod par bstan/ de la gnyis po yod ma yin zhes pas gzhan dbang rdzas gzhan du med par bstan pas/ gzhan dbang gzung 'dzin rdzas tha dad kyis stong pa'i stong nyid ni lugs 'di la yod ces pa'i don no/ /de ltar na sems can thams cad kyis stong nyid rtogs par thal/ chos rnams tha snyad du yod cing rdzas gzhan du med pa'i phyir zhes pa'i lan du/ de la yang ni de yod do zhes gsungs/ gang la stong nyid rtogs pa'i mthun rkyen tshang zhing 'gal rkyen dang bral ba des rtogs kyang/ rdzas tha dad kyis stong pa'i stong nyid mthong ba la sgrib byed kyi blo yod pa la ni rtogs par mi 'gyur bas skyon med ces pa'i don no/ /tshigs bcad dang pos stong nyid kyi mtshan nyid dang/ gnyis pas dbu ma'i lam du bstan pa yin te/ gzhan dbang gi gzhi gang na rang 'dzin rtog pa'i zhen gzhir rang mtshan gyis grub pa gang med pa'i gzhan dbang de ni rtog pa'i zhen gzhir rang mtshan gyis grub pa des stong pa dang/ stong pa de'i shul du lhag ma yod pa ni 'dir rang bzhin gyis yod pa'o/ / @117 gzhan dbang rang 'dzin tshad ma dang rdzas tha dad kyis stong par rtogs shing stong pa'i shul du rang bzhin nam tha snyad du yod par shes pa ni yod med kyi don ji lta ba bzhin shes pas stong nyid kyi mtshan nyid dam de'i ngo bo rjen par shes pa yin/ 'di'i lugs la rtog pa'i zhen gzhir rang mtshan gyis stong pa'i shul du lhag ma rang bzhin gyis grub pa mi khegs par rang mtshan gyis grub pa yod dgos/ thal 'gyur ba'i lugs la stong nyid ni dgag bya rang bzhin gyis grub pas stong zhing/ stong pa de'i shul du lhag ma rang mtshan mi lus par dgag bya rang bzhin gyis grub pas stong pa de yang rang mtshan gyis stong par 'dod do/ /tshigs bcad gnyis pas rtog pa'i zhen gzhir rang gi mtshan nyid kyis stong par rtogs pa'i blo dbu ma'i lam yin par bstan/ 'dis kyang de ston pa'i phyir stong nyid yang dag par bstan to zhes pa ni dgongs 'grel gyi mdo des yod med kyi don gsungs pa ma zad dbus mtha'i lung 'dis kyang sems tsam pa'i lugs kyi stong nyid kyi mtshan nyid dam ngo bo ji lta ba bzhin bshad ces pa'i don no/ /dgongs 'grel las gang na gang med pa zhes sogs kyi mdo de 'di'i lugs kyi lta ba bstan pa'i gzhung gtso bo yin/ mdo de'i don slob dpon dbyig gnyen gyis bshad pa de ltar blo gros brtan pas 'chad pa ni 'grel bshad las/ la la dag chos thams cad ri bong gi rwa ltar rang bzhin ye med do snyam du sems pa de'i phyir thams cad la skur ba dgag pa'i don du zhes gsungs pa ni/ thal 'gyur ba la sogs pa'i dbu ma pa la la dag gis chos thams cad @118 ri bong gi rwa ltar rang bzhin gyis grub pa ye med pa ste gtan nas med do snyam du sems pa de'i phyir dbu ma pas chos thams cad la skur ba dgag pa'i don du yang dag ma yin kun rtog yod ces tshig dang pos dwogs pa bsal ba'i sgo nas 'khor lo dang po'i dgongs gzhi dang/ 'khor lo bar pa las chos kun rang bzhin gyis stong par gsungs pa la dngos su gnod byed bstan cing skur 'debs 'gog pa yin/ kun rtog yod ces pa ni shes bya la srid pa tsam ma yin par lhag ma dbyung dgos pa ste tshig lhag zhig dgos la de yang rang bzhin gyis sam rang gi mtshan nyid kyis grub pa'i yod pa'o/ / tshig gnyis pas dwogs pa sel tshul ni kun rtog gzhan dbang rang bzhin gyis grub par khas blangs pa la/ de ltar na mdo las chos thams cad stong pa'o zhes bshad pas mdo dang mi 'gal lam zhe na/ mi 'gal te 'di ltar/ de la gnyis po yod ma yin zhes yang dag pa ma yin pa kun tu rtog pa gzung ba dang 'dzin pa'i ngo bo dang bral bas stong pa zhes bya'i rang bzhin ye med pa ni ma yin te de'i phyir mdo dang mi 'gal lo/ /zhes dwogs pa bsal ba'i sgo nas 'khor lo bar pa'i dgongs gzhi dang/ dang por dngos su gnod byed brjod cing sgro 'dogs 'gog pa yin/ yum gyi mdo dang mi 'gal tshul gzhung nyid las shin tu gsal/ lugs 'dir gzhan dbang don dam par grub par gsungs pas de stong par bshad pa thams cad kyang gzung 'dzin rdzas gzhan gyis stong par gsungs kyi de rang mtshan gyis stong par gsungs pa gtan nas min no zhes @119 pa ni/ lugs 'di la gzhan dbang rang stong du 'chad pa gtan min no zhes pa'i don yin/ tshig gsum pas dwogs pa sel tshul ni gal te kha cig gis de ltar gzung 'dzin gnyis po ni ri bong gi rwa ltar ye med la/ yang dag pa ma yin pa kun tu rtog pa ni don dam par rang bzhin gyis yod na de ltar na stong pa nyid med par 'gyur ro zhe na/ lan du 'di ltar stong pa nyid ni 'di la yod ces gzhan dbang gzung 'dzin rdzas tha dad kyis stong pa gang yin pa de stong pa nyid yin pas lugs 'dir de kho na nyid med par mi 'gyur ro zhes stong nyid med snyam pa'i dwogs pa bsal lo/ /dbus mtha'i rtsa bar kun rtog yod ces pa las kun rtog don dam par yod na zhes ma gsungs kyang de'i 'grel bshad las/ gzhan gyi rtsod pa bkod pa'i skabs su kun rtog don dam par rang bzhin gyis yod na zhes gsungs pa ni sems tsam pas kun rtog rang bzhin gyis yod na de don dam par rang bzhin gyis yod pa'i khyab par bzhed pas de la dgongs te kun rtog don dam par rang bzhin gyis yod na zhes sems tsam pa'i 'dod pa blangs pa'am brjod pa yin/ de yang lan gyi skabs su don dam par grub pa khas mi len zhes lan mi 'debs kyi de ltar du 'dod ces pa'i don yin te/ 'di nyid las/ kun rtog don dam par rang bzhin gyis yod na zhes pa nas khas blangs pa'i steng nas lan mdzad do/ /zhes gsungs pa'i phyir/ sum cu pa'i 'grel pa las kyang/ yang na yul can rnam par shes pa rang bzhin gyis grub pa de ltar du shes bya ste yul @120 phyi rol gyi don yang rang bzhin gyis grub pa'i rdzas nyid du ste gnyis ka don dam par rang bzhin gyis yod mnyam yin zhes kha cig nyan thos sde gnyis kyis 'dod/ dbu ma thal 'gyur ba gzhan dag gis shes bya ste phyi don don dam par ma grub pa ltar yul can rnam par shes pa yang kun rdzob nyid du yod kyi don dam par med snyam du 'dod pa mtha' gcig tu smra ba ste don shes gnyis rang bzhin gyis yod mnyam dang/ de gnyis rang bzhin gyis med mtshungs su smra ba 'di rnam pa gnyis dgag pa'i phyir slob dpon dbyig gnyen gyis rab tu byed pa sum cu pa brtsams so/ /zhes slob dpon blo gros brtan pa 'dis gsungs/ sum cu pa brtsams pa'i dgos pa yang de ltar yin no/ /skabs 'di'i shes pa yul can dang/ shes bya phyi rol gyi don la gzhag dgos/ gzhung rnams las de gnyis la don shes gnyis zhes tha snyad mdzad/ don shes gnyis yod mnyam du khas len pa dang mi len pa gnyis las/ nyan thos sde gnyis kyis don shes rang bzhin gyis yod mtshungs su 'dod/ thal 'gyur bas de gnyis rang bzhin gyis med mtshungs su 'dod kyang sems tsam pas de ltar mi bzhed de des shes pa rang bzhin gyis grub par khas blangs phyi don med par 'dod pa'i phyir/ 'dir gzhung gis sgrub pa na mchod brjod kyi go rim dang mthun par sems tsam pa'i slob dpon rnams kyi gzhung bkod pa yin/ dbyig gnyen gyi bzhed pa brjod zin nas da lta blo gros brtan pa'i 'chad tshul yin/ phyogs glang sogs kyang @121 mjug tu yod gsungs/ rkang pa bzhi pas dwogs pa sel tshul ni gzhan dbang stong gzhi chos can dang de'i steng du rdzas gzhan gyis stong pa de yod na gzhi chos can rtogs pas de'i gnas lugs mi rtogs pa ci zhe na/ lan du de la yang ni de yod do zhes stong nyid rtogs pa la bar du gcod pa'i sgrib byed gang zag de'i rgyud la yod pa'i phyir/ des na thams cad kyis gnyis stong mi rtogs sam snyam pa'i dwogs pa bsal lo/ /chos thams cad mtha' gcig tu stong pa dang mi stong pa dang yod pa dang med pa ni mtha' nyid du 'gyur gyi dbu ma'i lam ma yin pas zhes sogs kyi don/ chos thams cad mtha' gcig tu rang bzhin gyis stong pa dang/ gzung 'dzin rdzas gzhan gyis mi stong pa dang/ chos thams cad rang bzhin gyis yod pa dang/ rang bzhin gyis med pa ni rtag chad kyi mtha' nyid du 'gyur gyi dbu ma'i lam ma yin pas mtha' bzhi po de dag dgag pa'i don du stong pa ma yin mi stong min zhes sogs tshigs bcad gnyis pa gsungs/ chos thams cad rang bzhin gyis yod pas stong pa ma yin gzung 'dzin gnyis kyis mi stong pa yang min/ rgyu mtshan de lta bas na chos thams cad rang bzhin gyis stong pa yang min rdzas gzhan gyis mi stong pa yang ma yin pa de bshad pas stong nyid kyi don yang dag par bshad pa yin/ stong pa ma yin zhes pas skur 'debs spangs mi stong pa ma yin zhes pas rtag mtha' spangs so/ /de'i rgyu mtshan yang/ yod pas med pas yod pas na/ /de ni dbu ma'i lam yin no/ /zhes yod pas zhes pa kun rtog gzhan dbang gi chos thams cad rang bzhin gyis yod @122 pa'i zhes dang/ med pas zhes pa ni chos thams cad gzung 'dzin gnyis kyi mi stong pa min pa'i don du mtha' gnyis dang bral ba'i dbu ma'i lam bshad pa yin pa'i phyir/ 'di'i skabs nas bshad pa'i stong nyid de ni sems tsam pa'i lugs kyi dgongs 'grel las/ gang la gang med pa de ni des stong pa dang 'di la lhag ma yod pa ni 'dir yod pa'o/ /zhes yod med yang dag par ji lta ba bzhin shes pa ni stong nyid la 'jug pa phyin ci ma log par gsungs la zhes pa'i tshig dang mthun par bshad pa dang/ tshigs bcad de'i rtsa ba'i mdo ni 'od srungs gi le'u las/ yod ces bya ba ni mtha' gcig go /med ces bya ba ni mtha' gnyis so/ /mtha' de gnyis spangs pa ni dbu ma'i lam yin no zhes dbu ma'i lam du gsungs pa de dang mdo sde dgongs 'grel gyi don gnyis gcig tu byas nas bkral ba yin te/ bstan bcos 'di nyid las/ des na rnam par rig pa tsam gyi tshul 'di nyid dbu ma'i don du 'grel bas dbu ma pa gzhan gyi ltar na de gnyis snga ma las phyi ma mchog tu bzhed kyang tshul 'dis de gnyis don gcig tu mdzad pa yin no/ /zhes rnam par rig pa tsam gyi tshul 'di nyid dbu ma'i don du 'grel mkhan ni sems tsam pa dang/ dbu ma pa gzhan thal rang ltar na snga ma mdo sde dgongs 'grel las bshad pa'i dbu ma'i tshul dang/ phyi ma 'od srungs gi le'u las gsungs pa'i dbu ma'i tshul gnyis snga ma las phyi ma mchog tu gyur pa yin te/ snga ma sems tsam pa'i thun mong ma yin pa'i bshad pa'i stong nyid dang/ phyi ma'i de stong nyid yang dag pa yin pa'i phyir ro/ / @123 rje thams cad mkhyen pa rang nyid kyis/ /dbyig gnyen zhabs dang blo brtan phyogs glang dang/ /chos kyi grags pa'i zhabs sogs zhes mchod brjod mdzad pa'i rim pa dang mthun par bdag nyid chen po de rnams kyi dgongs pa ji lta ba bzhin du bkral ba'i tshul 'di dag la bltas na/ rang cag rnams kyi rje btsun blo bzang grags pa ni bdag nyid chen po bsam gyis mi khyab pa yin pa gdon mi za ba yin zhing/ de dag la mchod brjod mdzad pa yang dgos pa de'i phyir yin gyi mtshan grags che ba tsam rgyu mtshan du byas par mi snang ngo zhes zhal las thos/ de'i mtha' bsdoms skyon pa ni/ de ltar na dbyig gnyen dang blo gros brtan pas bkral tshul ni skabs skabs su brjod zin la zhes slob dpon dbyig gnyen dang de'i dngos slob blo gros brtan pas sems tsam pa'i lugs kyi mdo sde dgongs 'grel gyi don 'grel tshul rnams skabs skabs su bshad zin pa yin zhes pa'i don no/ / phyogs kyi glang pos kyang brgyad stong pa'i don rnams theg bsdus dang mthun par brgyad stong don bsdus su bkral la zhes gsungs pa'i don ni/ dbyig gnyen dang blo brtan gnyis kyis gzhan dbang yongs grub rang gi mtshan nyid kyis grub/ kun brtags rang mtshan gyis med cing gzung 'dzin rdzas gzhan gyis stong pa stong nyid du bshad pa ltar phyogs kyi glang pos kyang brgyad stong pa'i don rnams don tshan so gnyis su bsdus nas bstan pa ni/ rten dang dbang du bya ba dang/ /zhes sogs rten ni chos gsung ba po ston pa sangs rgyas dang/ dbang du bya ba ni 'khor nyan thos dang/ byang sems gnyis las rang rgyal med tshul bshad par bya ba mang du yod/ @124 las ni yum la ji lta ba bzhin du spyod pa ste ston pa nyid kyis chos bstan pa gdul byas don legs par go ba ni las dang/ sgom pa la rnam g.yeng gi rtog pa bcu'i gnyen po bcu/ de ni gdams ngag gi skabs su gdams ngag bcu bshad pa de yin/ rab dbye la stong nyid bcu drug /rtags la phyir mi ldog pa'i rtags dang/ bdud las gnyis/ ltung ba ni sher phyin spangs nas ngan song du skyes pa/ phan yon stong gsum rin po che sna bdun gyis bskang ste sbyin pa bas bsod nams lhag pa ste don tshan so gnyis de ltar du bsdus pa'i sgo nas brgyad stong pa'i don rnams sems tsam pa'i tshul du bkral te/ de yang brgyad stong don bsdus las/ med ces bya la sogs tshig gis/ rtag pa thams cad 'gog par byed/ /sgyu ma la sogs dpe rnams kyis/ /gzhan gyi dbang ni yang dag bstan/ /rnam par byang ba bzhi yis ni/ /yongs su grub pa rab tu bsgrags/ /zhes pas sems tsam pa'i lugs kyi mtshan nyid gsum bstan tshul yang/ med ces bya ba ste yum gyi mdo yi skabs su gzugs med sgra med ces sogs med ces pa'i tshig de rnams kyis rtag pa thams cad 'gog pa ste kun brtags rang mtshan gyis grub pa bkag pa dang/ yang yum gyi mdo las sgyu ma dang sgra brnyan zhes mi bden pa'i dpe de rnams kyis gzhan dbang bstan pa dang/ rnam par byang ba bzhi yis ni/ /zhes rnam byang bzhi ni sgo mang yig char bshad pa mang du yod kyang/ rang re'i mnyal ston bka' 'grel las rnam par byang ba bzhi ni/ ma skyes pa @125 dang/ ma 'gag pa/ gzod ma nas zhi ba/ rang bzhin gyis yongs su mya ngan las 'das pa bzhir bzhag pa des yongs grub bstan no/ /chos kyi grags pas rnam 'grel las/ de la gcig ni med pas kyang/ /gnyis ka'ang nyams par 'gyur ba yin/ /de'i phyir gnyis stong gang yin pa/ /de ni de yi'ang de nyid yin/ /zhes gsungs pa ltar de la gcig ste dper na sngon po dang sngon 'dzin mig shes gnyis kyi nang nas sngon po las rdzas tha dad pa'i sngon 'dzin mig shes med pa dang/ sngon 'dzin las rdzas tha dad pa'i sngon po med pas na/ gcig med na gcig shos kyang med par 'gyur te/ gcig nyams na gcig shos kyang nyams par 'gyur ba'i rdzas gcig dang bag chags gcig gis skyes pa'i phyir/ rdzas gcig pa'i gcig nyams na gnyis ka'ang nyams par 'gyur ba de'i phyir na sngon po dang sngon 'dzin tshad ma rdzas gzhan gyis stong pa gang yin pa de ni sngon po'i steng gi stong nyid du ma zad sngon 'dzin mig shes kyi stong nyid yang yin zhes rnam 'grel le'u gsum par sems tsam pa'i tshad 'bras gyi rnam gzhag thun mong ma yin pa'i lta ba 'di'i skor bshad de/ 'di nyid las/ /zhes gzung 'dzin rdzas gzhan gyis stong pa'i stong nyid gzhan dbang gi de kho na nyid du gsungs shing zhes bshad/ chos rnams rang bzhin med par mdo sde las gsungs pa'i don yang de nyid du 'grel te zhes rgyas 'bring bsdus gsum las chos thams cad rang bzhin med par gsungs pa de dgongs pa can du bkral ba yin te/ rnam 'grel las/ dngos rnams tha dad gnas pa ni/ /de tha dad la brten pa yin/ /de ni bslad pa nyid yin na/ /de dag tha dad kyang bslad 'gyur/ /zhes pa'i @126 don ni dper na chos bum pa dang ka ba tha dad du gnas pa ni bum pa dang ka ba 'dzin pa'i rtog pa dang/ mig shes tha dad du yod pa de la brten nas de gnyis tha dad ces rtog pa dang sgra'i brjod pa la brten pa yin gyi sgra rtog la ma ltos par chos rang ngos nas tha dad du grub rgyu med cing/ de 'dra'i rtog pa dang mig shes gnyis po de ni bslad pa ste ma rig bag chags sam gzung 'dzin rdzas gzhan du 'dzin pa'i bag chags kyis bslad pa de'i dbang gis yul tha dad du snang ba ma gtogs don la tha dad pa med pas gzugs dang gzugs 'dzin tshad ma tha dad pa ni de 'dzin rtog pa la brten pa yin la/ de 'dra'i rtog pa ni tshad ma ma yin gyi bag chags kyis bslad pa nyid yin no/ /yul can shes pa bag chags kyis bslad pas de dag tha dad du snang ba yang 'khrul ba'i bag chags kyis bslad pa'i dbang gis 'byung bar 'gyur/ yang gzung dang 'dzin pa'i rnam pa las/ /mtshan nyid gzhan ni yod ma yin/ /des na mtshan nyid stong pa'i phyir/ /rang bzhin med par rab tu bshad/ /ces yum gyi mdo la sogs pa las chos rang bzhin med par gsungs pa'ang/ /de ga sor bzhag ma yin pa gzung 'dzin rdzas gzhan du med pa la bshad pa yin zhes pa'i don te skabs 'dir mdo sde dgongs 'grel las bshad pa dang dbyig gnyen dang blo brtan sogs kyis bshad tshul rnams dgongs pa gcig tu babs pa yin no/ /ces dngos po rnams skye ba la sogs par tha dad du 'byed pa ni rang rig pa tsam gyis min gyi gnyis su snang ba'i shes pa nyid kyis 'byed do zhes dngos po rnams tha dad du 'byed pa ni rang rig gis 'byed mi thub la gnyis snang can gyi shes pas 'byed pa yin/ gnyis snang yang slod pa ste @127 brdzun pa yin pas des rnam par bzhag pa yang brdzun par 'gyur la zhes gnyis su snang ba'i shes pa'ang ma rig bag chags kyis bslad pa'i brdzun pa dang de la tha dad du snang ba yang brdzun pa yin pa'i don no/ /gzung 'dzin gyi rnam pa la don gzhan pa'i mtshan nyid kyang med cing/ gnyis su snang ba'i mtshan nyid kyang ji ltar snang ba bzhin du med pas rang bzhin med do zhes bshad do/ /de la dgongs nas yum gyi mdo las chos thams cad rang bzhin gyis ma grub par gsungs pa'i don dang/ yang rnam 'grel las/ phung po la sogs bye brag gis/ /mtshan nyid thams cad byed pa yi/ /khyad par can de'ang de nyid min/ /des kyang de dag mtshan nyid bral/ /zhes lto ldir zhabs zhum chu skyor ba'i don byed nus pa bum pa'i mtshan nyid yin pa'i cha rtag pa dang/ bum pa de'i mtshon bya yin pa'i cha rtag par nyan thos sde gnyis kyis kyang 'dod pas yum gyi mdo las rang bzhin med par gsungs pa yang bya byed kyi cha rtag pa yin pa la dgongs nas bya byed kyi khyad par rang bzhin gyis ma grub par gsungs pa de'i don rgyas par bshad pa la/ /zhes gzugs phung la sogs pa mtshon bya dang/ gzugs su rung ba la sogs pa mtshon byed du gsungs pa ni thams cad bya byed kyis khyad par du byas la/ de dag gi gzhi rdzas su yod kyang bya byed kyi cha nas de kho na nyid du ma grub pa la dgongs nas kyang mtshan nyid kyis stong ngo zhes gsungs par bshad de 'di ni nyan thos sde pa dang yang thun mong ba'o/ /zhes sngar bshad pa'i gzung 'dzin rdzas gzhan gyis stong pa'i stong tshul nyan thos sde pa dang thun mong ba ma yin yang 'di ni thun mong ba'o zhes pa'i don te/ mdo sde pas kyang bya byed kyi cha rtag pa bden par @128 ma grub pa 'dod pa'i phyir/ yang rnam 'grel las/ gal te thams cad nus med na/ /sa bon sogs ni myug sogs la/ /nus mthong gal te de kun rdzob/ /'dod na ji ltar de ltar 'gyur/ /zhes pa'i don ni gal te kha cig gis bya byed la sogs pa'i dngos po thams cad la don dam par don byed pa'i nus pa med do zhe na/ rgyu sa bon la sogs pas ni 'bras bu myu gu sogs la phan 'dogs pa'i bya ba byed pa'i nus pa mngon sum gyis mthong ba'i phyir/ gal te sa bon gyis myu gu bskyed pa'i bya byed kyi nus pa de kun rdzob tu grub par 'dod kyi/ don dam par grub pa mi 'dod do zhe na/ sa bon gyi sdod lugs kyi ngos nas 'bras bu bskyed pa khegs pa'i phyir/ thag khra la sbrul du rlom pa ltar 'gyur la/ rang ngos nas bya ba byed na ji ltar kun rdzob tu 'dod ces pa de ltar 'thad par 'gyur te mi 'gyur ro/ /zhes gsungs pa ni sngar bsdu ba las de la 'di skad ces brjod par bya ste zhes sogs ngo bo nyid med par smra ba thal 'gyur ba dang rtsod lan mdzad tshul dang gnad gcig go / 'di yan gyis sems tsam pa'i mkhas pa bzhi'i bshad pa rdzogs pa yin gsungs/ yang skyar bshad la/ de la gcig ni med pas kyang/ /zhes pa'i don ni de la gcig gzugs las rdzas tha dad pa'i gzugs 'dzin mig shes med na/ gzugs 'dzin mig shes las rdzas tha dad pa'i gzugs kyang med pas gcig med na gnyis ka'ang nyams par 'gyur ba dang/ de ni de yi'ang de nyid yin/ /zhes pa ni de lta bu'i rdzas gzhan gyis stong pa de gzugs kyi gnas lugs yin par ma zad gzugs 'dzin @129 mig shes de yi yang de kho nyid yin pa ltar/ nam mkha' rang 'dzin rtog pa'i zhen gzhir rang mtshan gyis grub pa'i stong pa de nam mkha'i steng gi stong nyid yin par ma zad nam mkha' 'dzin pa'i tshad ma'i steng gi stong nyid yin pa gzhung de'i dgongs par 'dod dgos pa yin/ gzugs dang gzugs 'dzin rtog pa rdzas gcig ma yin yang/ khyod dang khyod 'dzin tshad ma rdzas gcig yin no/ / yum gyi mdo las chos thams cad rang gi mtshan nyid kyis ma grub par gsungs pa gzung 'dzin rdzas gzhan du med pa la dgongs pa'i tshul de/ sems tsam pa'i slob dpon rnams dgongs pa gcig pa bzhin de ni sems tsam pa'i thun mong ma yin pa'i 'khor lo bar pa'i dgongs gzhi yin no/ /mdo sde dgongs 'grel gyi skabs su/ yum gyi mdo las ngo bo nyid med par gsungs pa'i dgongs gzhi bcu gcig skye ba med pa ste chos rnams rang bzhin gyis skye ba med pa de la bzod pa chung 'bring che gsum 'jog pa'i theg chen gyi sbyor lam drod chung ngu'i gnas skabs su mi skye ba'i chos la bzod pa dang po thob ste/ stong nyid thog mar rtogs pa'i tshe na skrag pa skye ba bzhin de la de ltar mi skye ba dang/ theg chen gyi mthong lam bar chad med lam thob pa na mi skye ba'i chos la bzod pa 'bring thob/ sa brgyad pa thob pa na sgom lam pa phyir mi ldog pa'i rtags zab mo brgyad thob pas na mi skye ba'i chos la bzod pa chen po 'thob pa dang/ mi skye ba'i chos la bzod pa zhes pa ni chos thams cad rang bzhin gyis ma grub par gsungs pa de'i don la bsam pa na rang bzhin ma grub pa'i don shin tu phra ba'i phyir/ rang bzhin gyis ma grub na @130 med par 'gyur snyam pa'i sems la mi bde ba chen po zhig 'char yong ba de la yang yang stong nyid kyi don bsgoms pas nam zhig sbyor lam drod thob pa'i tshe na stong nyid kyi don la mi bde ba med pa zhig gsar du skyed yong ba de ni mi skye ba'i chos la bzod pa zhes pa yin/ sngar de'i don la mi bzod nas 'ga' zhig skrag pa chen po skyes te ngan song du lhung ba yang yod la/ de ltar bzod pa chung 'bring che gsum byang sems dbang po rno 'bring rtul gsum la rim bzhin sbyor dgos/ 'di'i skor yang yang nan chen po gsungs/ yum gyi mdo las mi skye ba'i chos kyi don de ltar du sems tsam pas sgra ji bzhin du bzhag tu mi rung bas de'i don 'khor ba la thog ma'i skye ba med pa sogs la dgongs zhes skye ba med pa'i dgongs gzhi brgyad gsungs te/ mdo sde rgyan las/ thog ma dang ni de nyid gzhan nyid dang/ /rang gi mtshan nyid rang dang gzhan du 'gyur/ /kun nas nyon mongs pa dang khyad par la/ /skye ba med pa'i chos la bzod par bshad/ /ces gsungs pa'i phyir ro/ /gnyis pa sgro 'dogs kyi mtha' bye brag tu dgag pa la gnyis/ dgag bya sgro 'dogs ngos gzung ba dang/ de ji ltar 'gog pa'i tshul lo/ /dang po ni/ lugs 'di'i rigs pa'i dgag bya la gnyis yod pa'i skur 'debs ni grub mthas bzhag pa kho na dang/ de yang rang sde ngo bo nyid med par smra ba'i lugs su sngar bshad pa bzhin no/ /zhes sogs kyis bstan la/ byang sa dang bsdu ba las/ sgro 'dogs pa'i tshul dang/ skur ba 'debs pa'i tshul gnyis mnyam por gsungs yod kyang/ 'dir gzugs @131 rang 'dzin rtog pa'i zhen gzhir rang gi mtshan nyid kyis grub pa dang/ gzung 'dzin tshad ma rdzas tha dad du grub pa de/ skabs 'di'i sgro 'dogs kyi mtha' yin la de nyid bye brag tu bshad pa ste rgyas par bshad na/ spyir rigs pa'i dgag bya la gang zag gi bdag med rtogs pa'i rigs pa'i dgag byar gang zag gi bdag tu grub pa dang/ chos kyi bdag med rtogs pa'i rigs pa'i dgag byar chos kyi bdag tu grub pa lta bu gnyis yod la/ skur 'debs ni skabs 'dir 'khor lo bar pa sgra ji bzhin du khas len pa'i dbu ma pas chos thams cad rang bzhin gyis ma grub par lta ba 'di ni grub mtha' smra ba las gzhan bya ri dwags sogs la med la/ de yang ngo bo nyid med par smra ba thal 'gyur ba'i rgyud la grub mtha'i dbang gis bzhag pa yin/ de ltar chos thams cad rang mtshan gyis ma grub pa ni skur 'debs kyi mtha' dang/ der 'dzin pa ni skur 'debs yin/ skur 'debs ni grub mthas bzhag pa'i phyir kun brtags dang/ rang rgyud ldan gyi gang zag gis khas len dgos so/ spyir btang chos thams cad rang gi mtshan nyid kyis ma grub par 'dzin pa'i 'dzin pa yod na/ gang zag des khas len mi dgos te/ de 'dra'i lhan skyes kyi 'dzin pa la khas len dang 'brel nas 'dzin mi dgos/ kun brtags la khas len dang 'brel nas 'dzin dgos pa'i khyad par yod pa'i phyir/ des na ba glang la sogs pa'i rgyud la gang zag dang chos kyi bdag 'dzin yod kyang de 'dra'i 'dzin @132 pa kun brtags med de/ de'i rgyud la bdag 'dzin gnyis kyi khas len med pa'i phyir/ kun brtags ni grub mtha' ngan pas rgyud bslad pa'i dbang gis bsod nams ma yin pas byas pa'i khas len zhig yin dgos gsungs/ 'o na skabs 'dir rigs pa'i dgag byar kun brtags dang lhan skyes gnyis yod par bshad na/ de 'dra'i kun lhan gnyis chos can/ rigs pa'i dgag bya yin par thal/ 'dod na/ de 'dra'i kun brtags dang lhan skyes gnyis med par thal/ rigs pa'i dgag bya yin pa'i phyir/ khyab ste/ lam rim chen mo las/ dgag bya 'di ni shes bya la mi srid pa zhig dgos te/ yod na dgag mi nus pa'i phyir/ zhes rigs pa'i dgag bya yin na rigs pa'i stobs kyis dgag nus pa zhig yin dgos te/ spyir kho shes bya la srid na rigs pas dgag mi nus pa'i phyir/ lam gyi dgag bya la'ang lam rim las/ dgag bya 'di ni shes bya la srid pa zhig dgos te/ med na dgag mi dgos pa'i phyir zhes gsung pa ltar/ lam gyi dgag bya ni rang rgyud ldan gyi gang zag la yod pa zhig lam sgom stobs kyis 'gag dgos pa las/ med na lam sgom pa la dgos med du 'gyur ba'i phyir/ des na rigs pa'i dgag bya shes bya la mi srid pa zhig dgos na/ kun lhan gyi sgro 'dogs gnyis po de rigs pa'i dgag bya yin nam ma yin/ ma yin na/ lugs 'di'i rigs pa'i dgag bya la gnyis yod pa'i zhes sogs rigs pa'i dgag bya sgro 'dogs la kun lhan @133 gnyis yod pa drang nges rnam 'byed las gsungs pa dang 'gal zhing/ de bzhin du dbu ma pa'i lugs la bden 'dzin bden med sgrub pa'i rigs pa'i dgag bya yin par thal/ ma yin na/ gong du rigs pa'i dgag byar kun lhan gnyis yod par gsungs pa sogs la brten nas yin par khas len pa bzhin du 'gyur tshul sogs rtags bsal mang po btang srol yod gsungs/ skabs 'dir chos thams cad rang gi mtshan nyid kyis ma grub par lta ba'i skur 'debs de chos kyi bdag med sgrub pa'i rigs pa'i dgag byar 'dod kyi/ spyir shes bya med par lta ba'i skur 'debs sogs du ma yod kyang de dag rang sde ngo bo nyid med par smra ba'i lugs ma yin pa'i phyir/ de yang rigs pa'i dgag bya la gnyis yod pa'i skur 'debs ni grub mthas bzhag pa kho na dang zhes sogs kyi don no/ /sgro 'dogs pa ni lhag po btags pa ste gang zag dang chos kyi bdag tu ma grub pa la gang zag dang chos la bdag tu sgro 'dogs tshul gnyis yod pa'i kun brtags ni gzhan sde dang rang sde don smra gnyis kyi lugs so/ /zhes gsungs pa ltar gang zag gi bdag 'dzin kun brtags gzhan sde'i rgyud la yod de/ de rnams kyi grub mtha' ngan pa'i dbang gis gang zag gi bdag tu grub pa yin zhes khas len pa'i sgro 'dogs yod pa'i phyir/ chos kyi bdag tu sgro 'dogs pa'i kun brtags ni/ rang sde don smra sde gnyis kyi rgyud la yod de/ don smra gnyis kyis gzugs rang 'dzin rtog pa'i zhen gzhir rang gi mtshan nyid kyis grub ces dngos su khas @134 len zhing grub mthas bcos nas de ltar 'dzin pa'i phyir/ 'di'i babs la bltas na/ gang zag gi bdag tu sgro 'dogs pa'i kun brtags gzhan sder ma gtogs rang sde la med zer dgos pa 'dra ba zhig yod kyang/ rang sde gnas ma bu pa'i rgyud la gang zag gi bdag tu sgro 'dogs pa'i kun brtags med par 'dod mi nus te/ mdo las/ phung po lnga ni khur yin la/ /khur 'khyer ba yi gang zag yod/ /rtag gam mi rtag brjod mi bya/ /zhes bdag yod par bstan dgos kyi ched du bya ba'i gdul bya rang sde gnas ma bu pa'i sde pa yin pa'i phyir zhes rtags bsal sna tshogs btang tshul yod gsungs/ sgro 'dogs la ni kun brtags dang lhan skyes gnyis yod la kun brtags ni gzhan sde dang rang sde don smra gnyis kyi lugs so/ /zhes gzhan sde dang rang sde gnyis gsung dgos pa de/ bdag 'dzin gnyis kyi kun brtags gnyis po rim pa ltar gzhan sde dang don smra'i rgyud la yod pa bstan pas de la khyab pa yod par thal/ 'dod na/ skabs 'dir gzugs rang 'dzin rtog pa'i zhen gzhir rang gi mtshan nyid kyis grub par 'dzin pa'i sgro 'dogs kun brtags rgyud ldan gyi gang zag la don smra sde gnyis yin pas khyab par thal lo/ /'dod na/ rang rgyud pa chos can/ der thal/ de'i phyir/ rang rgyud pas de ltar khas len pa'i phyir te/ des chos thams cad rang gi mtshan nyid kyis grub par khas len pa'i phyir/ rang mtshan gyis grub pa'i gtan tshig khas len pa'i cha nas rang @135 rgyud par 'jog pa'i phyir/ chos kyi bdag tu sgro 'dogs pa'i sgro 'dogs kun brtags rang rgyud pa'i rgyud la bzhag par 'dod na'ang mi 'thad de/ gzhung nyid las/ gzhan sde dang rang sde don smra gnyis kyi lugs so zhes gsungs pa'i phyir/ bdag 'dzin kun brtags gnyis rim bzhin gzhan sde dang don smra gnyis kyi rgyud la yod ces tshig de cha che nas don bkral mi rigs par thal/ gang zag gi bdag 'dzin kun brtags la ma khyab tshul gong du bshad zin cing chos kyi bdag 'dzin kun brtags la'ang khyab pa med pa bshad ma thag pa ltar yin pa'i phyir/ lhan skyes la gang zag gi bdag tu sgro 'dogs pa ni 'og tu ston pas chos kyi bdag tu sgro 'dogs pa bshad par bya ste zhes gang zag gi bdag 'dzin lhan skyes 'gog tshul ni 'og tu thal 'gyur ba'i skabs su rgyas par 'gog par 'gyur la/ skabs 'dir chos kyi bdag 'dzin lhan skyes kyi sgro 'dogs tshul bshad par bya la/ bdag 'dzin kun brtags gnyis kyi sgro 'dogs tshul gong du bshad zin pa dang/ lhan skyes la'ang gang zag dang chos kyi bdag 'dzin lhan skyes gnyis yod pas de gnyis 'dzin pa yin kyang 'thad 'dzin ma yin te/ 'thad do snyam du grub mtha'i dbang gis 'dzin dgos pa las der 'dzin na gang zag des khas len dang 'brel ba'i sgo nas 'dzin dgos pa de'i phyir/ nang pa sangs rgyas pas gang zag gi bdag tu grub pa mi 'dzin kyang bdag tu grub par 'dzin pa'i 'dzin pa yod/ chos kyi bdag tu grub pa la'ang de dang 'dra/ bdag @136 tu grub par 'dzin pa'i 'dzin pa yod de/ de 'dra'i lhan skyes yod pa'i phyir dang/ lhan skyes la gang zag des khas blang mi dgos shing rgyu mtshan la ma ltos pa'i phyir/ 'thad 'dzin rgyud la ldan na gang zag des khas len dgos te/ rgyu mtshan bsam pa'i stobs kyis 'dzin dgos pa'i phyir/ des na rang rgyud pa'i rgyud la bden 'dzin yod kyang bden 'dzin kun brtags med de/ thog ma med pa nas bag chags kyi dbang gis ngam ngam shugs kyis 'dzin pa las/ 'thad do snyam du khas len dang 'brel nas mi 'dzin pa'i phyir/ skabs 'dir chos kyi bdag 'dzin lhan skyes 'gog tshul bshad pa na/ de la gzhan gyis 'dir lhan skyes 'gog tshul bshad pas lhan skyes kyi 'dzin tshul la gnod pa ma gtogs grub mtha'i dbang gis chos bdag 'dzin tshul la gnod pa mi 'gyur ro snyam na/ de'i lan du kun brtags rgyud ldan gyi gang zag gi grub mtha'i dbang gis chos bdag tu kun btags pa'ang thog ma med pa nas 'ong ba'i lhan skyes kyi 'dzin pa gzugs rang 'dzin rtog pa'i zhen gzhir rang gi mtshan nyid kyis grub par 'dzin pa dang/ gzung 'dzin rdzas tha dad du grub par 'dzin pa la bden kha byin pa lta bu ste/ de ltar du red snyam du 'thad ldan du 'dzin pa yin la/ de'i phyir rigs pa'i dgag bya'i gtso bo lhan skyes la gnod pa bstan pas grub mthas btags pa yang zhar la khegs shing/ rang lugs la lhan skyes kyi zhen yul med pa gtan la phab pa'i kun brtags kyis gang sgrub pa rnams kyang rtsa ba nas sun phyung @137 bas na gzhan gyi skyon de dag med pa'i don te/ 'di nyid las/ grub mthas chos bdag btags pa yang lhan skyes kyis bzung ba'i chos bdag sgrub pa'i don yin pa'i phyir dang rigs pa'i dgag bya'i gtso bo yang de yin pa'i phyir ro zhes gsungs/ 'di'i gzhung mang por gzung 'dzin rdzas gzhan du 'dzin pa chos kyi bdag 'dzin du bshad pa ma gtogs pa chos kyi bdag 'dzin gzhan ma bshad kyang/ mdo sde dgongs 'grel las/ gzhan dbang ngo bo dang khyad par du kun brtags pa'i ngo bor rang gi mtshan nyid kyis grub pa med pas mtshan nyid ngo bo nyid med pa chos kyi bdag med du bshad pa'i shugs kyis gzhan dbang la ngo bo dang khyad par du btags pa rang gi mtshan nyid kyis grub par 'dzin pa chos kyi bdag 'dzin du bstan la zhes sogs kyi don ni/ 'di'i gzhung mang po phyogs glang gi tshad ma kun btus dang chos kyi grags pa'i tshad ma rnam 'grel sogs yin pa stong thun du gsal bar bkod pa'i gzhung de dag tu gzung 'dzin rdzas tha dad du 'dzin pa chos kyi bdag 'dzin du bshad pa ma gtogs rang 'dzin rtog pa'i zhen gzhir rang gi mtshan nyid kyis grub par 'dzin pa chos kyi bdag 'dzin du gsal bar ma bshad pas de chos kyi bdag 'dzin ma yin nam snyam pa la/ rje bla mas mdo sde dgongs 'grel gyi skabs su gzhan dbang rang 'dzin rtog pa'i zhen gzhir rang gi mtshan nyid kyis ma grub pa chos kyi bdag med kyi yongs grub tu dngos su gsungs pa'i shugs kyis ngo bo dang khyad par la kun btags pa'i kun brtags rang gi mtshan nyid kyis grub par 'dzin pa chos kyi bdag @138 'dzin du bstan pas chos kyi bdag 'dzin ma yin par thal ba'i skyon med la/ de yang gzhan dbang rang 'dzin rtog pa'i zhen gzhir rang gi mtshan nyid kyis grub par 'dzin pa'i blo chos kyi bdag 'dzin yin pa mi shes par gzung 'dzin rdzas gzhan du 'dzin pa'i blo kho na la 'dod na/ sems tsam pa'i lugs kyi chos kyi bdag 'dzin dang des stong pa mtha' chod pa ste ma lus pa mi rtogs pa yin te/ gzhan dbang la chos bdag sgro btags pa'i kun brtags 'di ji ltar yin mi shes na lugs 'di'i chos kyi bdag 'dzin dang chos kyi bdag med mtha' chod par mi shes so/ /zhes gsungs pa'i phyir/ des na rnam 'grel sogs nas bshad pa'i gzung 'dzin rdzas tha dad du 'dzin pa dang des stong pa chos kyi bdag med yin pa ma zad/ dgongs 'grel dang byang sa dang bsdu ba dang theg bsdus las gsungs pa'i ngo bo dang khyad par la btags pa'i kun brtags rang mtshan gyis grub par 'dzin pa bdag 'dzin dang des stong pa chos kyi bdag med du 'jog shes na mtha' chod par shes pa yin no/ /de yang gzung 'dzin rdzas tha dad du grub par 'dzin pa la sogs pa de thams cad kyi zhen yul med pa gtan la 'beb dgos pa'i don no/ /gzugs de gzugs zhes pa'i rtog pa'i zhen gzhi yin pa dang de skye ba zhes pa'i sgra 'jug pa'i gzhi yin pa tsam zhig tu ni yod pas der 'dzin pa sgro 'dogs min gyi gzugs sogs rtog pa'i zhen gzhir rang gi mtshan nyid kyis grub par 'dzin pa skabs 'dir sgro 'dogs su bya dgos te/ 'di nyid las/ de tsam @139 zhig tu ni phung po la sogs pa yod pas der yod par 'dzin pa sgro 'dogs min gyi phung sogs ngo bo der rang gi mtshan nyid kyis yod par 'dzin pa sgro 'dogs so zhes gsungs/ gong gi gzhung kun btus dang rnam 'grel las dbang shes la ltos pa'i gzung 'dzin rdzas gzhan bkag tshul ma gtogs rtog pa yid shes la ltos pa'i rdzas gzhan 'gog tshul ma bshad pa de nyid la/ rje bla mas gzung 'dzin rdzas gzhan bkag pa la rtog pa yid shes la ltos pa'i gzung 'dzin rdzas gzhan yang 'gog dgos pa'i khungs gsal bar bkod pa yin no/ /bod snga rabs pa rnams kyis gzung 'dzin rdzas gzhan du 'dzin pa la chos kyi bdag 'dzin du bshad pa ma gtogs rtog pa'i zhen gzhir rang ngos nas yod par 'dzin pa chos kyi bdag 'dzin du mi bzhed pas/ rje btsun thams cad mkhyen pas phyi ma de chos kyi bdag 'dzin yin pa mdo sde dgongs 'grel sogs la brten nas bsgrubs pa na de la rtsod pa lnga byung ste/ de yang rang lugs kyis gzugs sogs rtog pa'i zhen gzhir rang gi mtshan nyid kyis grub par 'gog pa la/ gal te kha cig gis de ltar 'gog pa de rjod byed kyi dngos yul yin pa ste gzugs zhes brjod pa'i sgra'i dngos yul yin par 'gog 'dod na mi 'thad de/ gzugs zhes brjod pa'i sgra'i dngos kyi brjod bya dang brjod bya de la brten nas blo yul 'char ba'i rjod byed kyi don spyi dang sgra spyi dngos med de/ rang mtshan ma yin pa don smra rnams kyis grub zin pa'i phyir te/ dngos yul sogs nyan thos sde pas rtag par grub zin pa'i @140 phyir/ gzugs zhes brjod pa'i sgra'i dngos yul rang gi mtshan nyid kyis grub pas stong pa de chos kyi bdag med ma yin te/ des stong par grub pa'i tshad mas chos kyi bdag med mi 'grub cing de la dmigs nas sgom pa'i shes sgrib dag par mi 'gyur ba gang zhig /skabs 'dir dgongs 'grel las kun brtags rang mtshan gyis stong pa chos kyi bdag med dang byang sa las de shes sgrib dag byed kyi dmigs par bshad pa dang 'gal zhes rtsod/ yang gzugs sogs brjod byed kyi dngos yul yin pa mi 'gog par gzugs zhes brjod pa'i sgra'i zhen yul 'gog par bzhed na de la gnyis las/ zhen yul gyi gzhi ldog rang mtshan gyis yod pa 'gog na gzhan dbang rang mtshan gyis grub pa bkag par 'gyur zhes rtsod pa ni gzugs kyi gzhi ldog rtag pa yin yang de'i mtshan gzhi 'jog pa na gzugs rang nyid gzhag dgos pas de rang mtshan gyis grub pa bkag par 'gyur zhes rtsod pa yin no/ /zhen yul gyi rang ldog rang mtshan gyis grub pa 'gog na'ang mi 'thad de/ zhen yul gyi rang ldog gzugs 'dzin rtog pa'i gzhal byar gyur pa'i spyi mtshan rtag pa de dngos por med pa mdo sde pas kyang grub zin pas mi 'thad do/ /gzhan yang srid pa 'pho ba'i mdo las/ ming ni gang dang gang gis su/ /chos rnams gang dang gang brjod pa/ /de la de ni yod ma yin/ /'di ni chos rnams chos nyid do/ /zhes gsung pa'i lung sems tsam pas 'dod pa ma zad nyan thos sde pa la yang grub pa ste des khas blangs pas mdo des bstan pa'i stong nyid @141 las lhag pa rang 'dzin rtog pa'i zhen gzhir rang gi mtshan nyid kyis grub pas stong pa'i chos nyid la yang mi snang bas sems tsam pa'i lugs la rtog pa'i zhen gzhir rang mtshan gyis grub par 'gog pa mi 'thad ces rtsod/ stong tshul 'di la gzung 'dzin rdzas tha dad bkag pa'i rnam par rig pa tsam gyi don med pas zhes pa ni rang 'dzin rtog pa'i zhen gzhir rang mtshan gyis grub pa'i stong tshul 'di la gzung 'dzin rdzas gzhan bkag pa'i rnam rig tsam du 'jug pa'i nus pa med pas shes sgrib dag byed kyi dmigs par bshad pa ji ltar 'thad/ rgyu mtshan des sems tsam pa'i lugs 'di la 'gal ba de dag med pa'i rgyu mtshan bshad par gyis shig ces snga rabs pa rnams kyis rtsod pa yin no/ /bshad par bya ste stong tshul 'di byang sa las shes sgrib dag par byed pa'i ye shes kyi dmigs pa dang zhes pa'i don/ ngo bo dang khyad par du kun btags pa'i kun brtags kyis stong pa dang/ zhen gzhir rang gi mtshan nyid kyis grub pas stong pa gnyis byang sa las shes sgrib dag par byed pa'i ye shes kyi dmigs pa dang dbu ma'i lam mtha' gnyis spangs pa'i gong na med par bshad/ theg bsdus las 'di'i sgo nas 'jug pa de rnam rig tsam du 'jug par gsungs pa'i phyir nyan thos sde pas grub zin pa ma yin no/ /don smra gnyis kyis mi 'grub ste/ des shes sgrib dag par byed pa'i ye shes khas mi len pa'i phyir te/ sgrib pa gnyis kyi nang nas nyon mongs pa'i sgrib pa ma gtogs shes sgrib khas mi len pa'i phyir/ sde pa gnyis kyis rnam rig tsam du 'jug pa mi 'dod de/ des phyi rol don du grub pa khas blangs pa gang zhig / @142 rnam par rig pa tsam du 'dod na phyi don khas mi len dgos pa'i phyir/ khas ma blangs pa de'i phyir de'i bzlog phyogs kyi ngo bo dang khyad par du ming gis btags pa ste gzugs sogs rang gi mtshan nyid kyis grub par 'dzin pa'i grub mtha'i khas len kyang nyan thos sde pa la yod do/ /rtog pa'i zhen gzhir rang mtshan gyis grub par 'gog pa na byang sa las lung gis bkag cing gzhan sde phyi rol pa la rang gi ston pa'i lung gis 'gog tu mi rung bas dgag pa'i yul la rang sde yang yod dgos la/ rang sde yod na nyan thos sde pa yin dgos pa'i rgyu mtshan ni/ skabs 'dir 'khor lo gsum gyi drang nges la rtsod pa gang zhig /sems tsam pas 'khor lo gsum gyi nang nas mtha' ma dgongs 'grel sgra ji bzhin du khas blangs pa na/ 'khor lo dang po nges don du 'dod pa'i nyan thos sde gnyis dang rtsod pa gcig /bar pa nges don du 'dod pa'i thal 'gyur ba dang rtsod pa gcig ste gnyis byung zhing/ don smra gnyis kyis chos thams cad rang gi mtshan nyid kyis grub par 'dod pas de la sgro 'dogs 'gog dgos/ thal 'gyur bas chos thams cad rang gi mtshan nyid kyis ma grub par 'dod pas na de la chad lta 'am skur 'debs 'gog dgos pa'i phyir/ des na 'gog yul nyan thos sde gnyis yin te 'khor lo gsum gyi khyad par la rtsod pas gzhan sde med/ ngo bo nyid med par smra ba thal 'gyur ba dang rtsod na skur 'debs 'gog dgos pa las skabs 'dir sgro 'dogs dgag pa'i phyir na/ nyan thos sde gnyis yin dgos zhes 'os med kyi rigs pa mdzad pa yin te/ bstan bcos 'di @143 nyid las/ ngo bo nyid med par smra ba dang rnal 'byor spyod pa'i khyad par la 'gog pa min pas nyan thos sde pa'o/ /zhes gsungs pa'i don no/ /nyan thos sde gnyis la sgro 'dogs 'gog skabs dgongs 'grel gyi lung drangs na mang po yod kyang des khas mi len pas de dag la grub pa ste sde gnyis kyis bzhed pa'i yid ches kyi lung srid pa 'pho ba'i mdo dang/ don gyi sde mtshan gyi mdo/ /kA tyA ya na la bstan pa'i mdo gsum gyis bkag go /de la thog mar sgro 'dogs lhan skyes ngos gzung na bsdu ba las zhes sogs kyis bstan don ni/ byis pa rnams kyis gzugs rang 'dzin rtog pa'i zhen gzhir rang gi mtshan nyid kyis grub par khas len pa'i rgyu mtshan gyis byis pa rnams kyi rgyud la sgro 'dogs lhan skyes yod de/ de dag la gzugs rang 'dzin rtog pa'i zhen gzhir rang mtshan gyis grub par 'dzin pa'i 'dzin pa ngam ngam shugs kyis yod pa'i phyir/ de yod pa'i rgyu mtshan lnga yod pa'i dang po ming rgyu mtshan bsdu ba nas bshad skabs/ de la byis pa rnams ni brjod par bya ba'i dngos po la rgyu lngas ming ji lta ba dang brjod pa ji lta ba bzhin du zhes gsungs pa ni/ rtog pas ming brjod pa ltar ming zhes pa'i sgra 'jug pa'i 'jug gzhir rang gi mtshan nyid kyis grub par 'dzin pa dang rang rtog pa'i zhen gzhir rang mtshan gyis grub pa mngon par zhen pa yin/ gzugs zhes brjod pa'i don de'i ngo bo nyid gang yin dris pa na zhes pa'i don/ gzugs zhes brjod pa'i sgra de'i don gang yin zhe na/ gzugs zhes ming du btags pa tsam zhig gzugs kyi ngo bo yin par mi 'dod/ @144 de'i ngo bo nyid gzugs yin pa snang ba ltar ming rgyu mtshan la ltos nas gzugs rang 'dzin rtog pa'i zhen gzhir rang gi mtshan nyid kyis grub pa de gzugs yin pa byis pa de dag gis 'dod do/ /dper na gzugs rung la gzugs zhes brjod pa na/ don de'i ngo bo nyid gang yin/ brjod pa de gzugs rang nyid de brjod pa'i sgra'i yul du rang ngos nas song ba yin nam rang nyid de'i yul du rtog btags tsam gang yin zhes dris pa yin/ lan du de'i ngo bo gzugs rang gi thun mong ma yin pa'i sdod lugs kyi ngos nas grub par byis pa rnams kyis 'dod pas de dag la sgro 'dogs lhan skyes yod pa des shes so/ /de'i phyir gzugs zhes tha snyad btags pa'i tshe sngon po gzugs kyi tha snyad 'dogs pa'i gzhi yin pa de ji ltar snang bltas pas na zhes pas bstan bya ni/ sngon po la gzugs zhes btags pa'i gzhi yin pa de sngon 'dzin mig shes la snang ba na ming brdas bzhag pa ma yin par sngon po rang gi thun mong ma yin pa'i sdod lugs kyi ngos nas grub par snang ba yin te/ de sngon 'dzin la snang ba na sngon po pha gi na yod pa lta bu snang ba ma gtogs blo'i dbang gis bzhag pa mi snang ste/ de la sngon po phyi rol don du grub par snang ba'i phyir ro/ /sems tsam pas sngon 'dzin mig shes la sngon po phyi rol don du grub par snang zhing/ de yang sngon po rgyang chad du snang 'brel ba med pa lta bu snang kyang 'brel med du mi snang zer dgos/ sngon 'dzin gyis drangs pa'i sngon 'dzin rtog pa la sngon 'dzin la ji ltar snang ba ltar snang zhing rtog pas 'thad do snyam du grub par 'dzin gyi yod/ 'dzin tshul ni sngon po de sngon po zhes pa'i sgra'i yul du ming dang brdas bzhag pa ma yin @145 par sngon po rang gi gnas lugs kyi ngos nas grub pa lta bur snang zhing/ /de ltar snang bas rtog pa la mi ltos par snang ba yin/ rtog pa la mi ltos par snang bas na shes pa la'ang ma ltos par snang zhing shes pa dang 'brel ba med pa lta bur snang gi yod/ de ltar snang bas rtog pa la ltos pa'i phyi rol don du grub par song ba yin no/ /sngon po rtog pa'i zhen gzhir rang mtshan gyis grub par khegs pa na sngon 'dzin la sngon po phyi rol don du snang ba ltar du ma grub pa de rtogs pa yin/ de ltar rtogs pa'i rgyu mtshan ni sngon 'dzin mig shes la sngon po ming brdas bzhag pa min par phyi rol don du grub par snang ba gang zhig / sngon 'dzin rtog pas de 'thad snyam du 'dzin zhing rtog pa'i zhen gzhir rang mtshan gyis grub par 'dzin tshul de la sngon 'dzin la ltos pa'i phyi don grub par 'dzin lugs de tshang ba'i phyir/ dbang shes la sngon po lta bu ming brdas bzhag pa min par sngon po rang gi gnas lugs kyi dbang gis grub par snang ba de rtog med la phyi don snang tshul yin/ sngon 'dzin rtog pa la sngon po de sngon po zhes pa'i sgra rtog gi yul du song ba de ming brda la ltos nas song ba ma yin par sngon po rang ngos nas 'gro bar zhen cing de ltar 'dzin pa de rtog pa la brten pa'i phyi rol don du grub par 'dzin tshul yin/ de'i phyir sngon po rang gi thun mong ma yin pa'i sdod lugs kyi ngos nas ma grub pa rtogs pa na/ sngon po de sngon po zhes pa'i sgra'i yul du 'gro ba de sngon 'dzin rtog pa la brten pa de go zhing/ des na sgra rtog la brten nas skyes pa go /de'i rgyu mtshan gyis sngon po de @146 phyi rol gyi don ma yin pa go ba'i phyir ro/ /mdor na sngon 'dzin de la rtog pa dang yid kyi shes pa'am mig gi shes pa gnyis yod/ mdzod las sngon po sogs gnyis kyis shes par gsungs/ shes tshul ni mig gis shes yid shes kyis kyang shes pas shes pa gnyis kyi gzung byar 'dod/ mdo sde pas sngon po phyir rol don du grub par 'dzin ste/ dbang shes la ltos nas de ltar 'dzin rtog pa la brten nas kyang phyi don du 'dzin pa'i phyir te/ des de dbang shes la snang ba ltar yang 'dzin rtog pa'i zhen gzhir rang mtshan gyis grub par yang 'dzin pa'i phyir/ de yang dbang shes kyis 'dzin pa na de'i bdag nyid du ma grub par de dang rdzas tha dad du 'dzin gyi yod/ de ji ltar snang bltas pas na ming dang brdas bzhag pa min par rang gi gnas lugs kyi dbang gis grub pa bzhin du snang ngo zhes pas dbang shes la sbyar nas snang tshul bshad pa yin/ don bsdus na rtog pa dang rtog med la ltos pa'i rnam rig tsam du 'jug tshul don gcig cing der 'jug thub pa na sems tsam pa'i grub mtha' mthar thug pa de'i go chod pa yin/ dbang shes la phyi don snang ba ma gtogs des de 'dzin mi thub ste/ de ltar 'dzin na yid shes dang shes sgrib yin dgos pa'i phyir/ dbang shes la snang tshul de 'gog dgos rtog pa'i zhen tshul 'gog dgos pa yin no/ /de byis pa rnams la yod par sngar bshad pa des 'grub cing de 'dra ba'i 'dzin stangs de 'thad ldan du don smra sde gnyis kyis kyang 'dod pas sgra'i brjod bya'i rang ldog rtog btags yin kyang de'i gzhi ldog tu rang mtshan 'ong ba'i lugs dang ga la mtshungs zhes @147 pa'i don ni/ don smra gnyis dang sems tsam pas sngon 'dzin mig shes la sngon po de ming brdas bzhag pa min pa rang gi gnas lugs kyi dbang gis grub par snang ba mtshungs kyang sems tsam pas sngon 'dzin 'khrul shes su 'dod pas de la snang ba ltar 'thad ldan du mi bzhed/ sde gnyis kyis ma 'khrul ba'i shes par khas blangs pas snang ba ltar 'thad ldan du 'dod pas sngon po zhes pa'i sgra'i brjod bya'i rang ldog gam dngos yul rtog btags yin pa la rtsod pa med kyang/ de'i gzhi ldog tu dgag bya'i rang mtshan mi 'ong ba'i sems tsam pa'i lugs dang gzhi ldog tu dgag bya'i rang mtshan phyi rol don du grub pa'i bum pa lta bu 'ong ba'i mdo sde pa'i lugs gnyis mi mtshungs pa ste so so yin/ spyir na sems tsam pa'i lugs la sngon po'i gzhi ldog la sngon po yin pas khyab kyang/ skabs 'dir mdo sde pa dang rtsod pa'i tshe gzhi ldog tu dgag bya'i rang mtshan 'ong tshul ni/ sems tsam pas gzhal ba'i tshe mdo sde pas sngon po'i gzhi ldog tu dgag bya'i rang mtshan zhig khas blang par song ba yin te/ des sngon 'dzin mig shes la snang ba ltar 'thad ldan du 'dod cing/ sngon po rtog pa'i zhen gzhir rang mtshan gyis grub pa dang sngon po phyi rol don du grub pa gnyis ka dgag bya yin la/ de mdo sde pas rang mtshan du 'dod pa'i phyir/ de bzhin du phyi rol don du grub pa'i bum pa bum pa'i gzhi ldog yin dgos/ sems tsam pa'i lugs la phyi rol don du grub pa'i bum pa med pas de bum pa'i gzhi ldog ma yin/ rnam rig pa'i lugs la sngon po'i gzhi ldog tu 'gog rgyu'i rang mtshan zhig de gnyis kyis khas blangs pa @148 yin te/ rnam rig pa'i lugs la skabs 'di'i sngon po'i gzhi ldog de sngon po ma yin par dgag bya'i rang mtshan yin la/ de'i gzhi ldog tu sngon po mtshan nyid pa zhig nyan thos sde gnyis kyis 'dod pa'i phyir te/ sngon po rtog pa'i zhen gzhir grub pa dang de phyi rol don du grub pa gnyis de'i gzhi ldog yin par 'dod pa gang zhig /lugs 'dir de gnyis ka dgag bya yin pa'i phyir/ mdo sems gnyis la mi 'dra ba byung ba'i rgyu mtshan yang sngon 'dzin mig shes 'khrul shes su bzhed mi bzhed la thug pa yin no/ /yang rnam rig pas gzhi ldog spyi tsam pa ma zad gzugs 'dzin mig shes skad cig snga mas kun gzhi rnam shes kyi steng du gzugs 'dzin mig shes phyi ma skye ba'i bag chags bzhag cing/ bag chags de la brten nas byung ba'i gzugs 'dzin mig shes phyi ma de la gzugs gzugs 'dzin rtog pa'i zhen gzhi yin par snang yang de 'dra'i zhen gzhi yin par rang mtshan gyis ma grub par 'dod cing de 'dra'i bag chags de la mngon brjod kyi bag chags zhes bya'o/ /nyan thos sde gnyis kyis de 'dra'i zhen gzhi yin pa de rang mtshan gyis grub par 'dod pas gzhi ldog la rang mtshan 'ong la/ de 'dra'i lugs dang ga la mtshungs zhes gzugs sogs rjod byed kyi zhen yul yin pa 'gog pa la zhen yul gyi gzhi ldog rang mtshan gyis yod pa 'gog na gzhan dbang rang mtshan gyis grub pa bkag par 'gyur zhes rtsod pa la/ gzhi ldog dgag bya'i rang mtshan bkag na'ang gzhan dbang rang mtshan gyis grub pa bkag par mi 'gyur ba'i lan 'debs pa yin no/ /de bzhin du sgra @149 'dzin nyan shes sogs mngon sum kun la phyi rol don du grub pa snang ba dang de'i rjes su skye ba'i rtog pas kyang de ltar du grub par 'dzin pas gnyis ka'i yul du phyi don yod pa yang shes dgos/ de bzhin du yul yul can gnyis su shar ba na gnyis ka rdzas tha dad du snang ba bzhin du yod par 'dzin pa yang chos kyi bdag tu 'dzin pa'i sgro 'dogs so zhes pa ni/ yul bum pa dang yul can bum 'dzin tshad ma lta bu blo la shar ba na 'di bum pa'o 'di ni bum 'dzin tshad ma'o zhes bum pa dang bum 'dzin shes pa gnyis rdzas tha dad ltar bur blo la shar ba bzhin tha dad du 'dzin pa'ang sgro 'dogs yin no/ /gnyis pa de ji ltar 'gog pa'i tshul la gnyis/ dgag pa dngos dang/ de la rtsod pa spang ba'o/ /dang po ni/ dgongs 'grel las gzhan dbang kun brtags kyis stong par sgrub pa'i rigs pa ma gsungs pa rtogs par bya ba'i phyir byang sa dang bsdu ba las rigs pa gsum gsum gsungs shing zhes sogs nas bstan/ de yang 'phags pa thogs med kyis nyan thos sde gnyis la lung gsum dang rigs pa gsum gyi sgo nas bkag pa'i lung ni srid pa 'pho ba'i mdo dang/ don gyi sde mtshan gyi mdo/ kA tyA ya na la gdams pa'i mdo gsum sngar bshad zin cing/ rigs pa gsum 'chad par skabs su babs pa'i/ dgongs 'grel las gzhan dbang kun brtags kyis stong par gsungs yod na'ang stong ba'i rigs pa ma gsungs la/ de'i phyir byang sa dang bsdu ba sogs nas gzhan dbang kun brtags kyis stong tshul rigs pa'i sgo nas don bsdus te bshad pa yin/ dwogs pa gcod pa la/ dgongs 'grel las gzhan dbang kun brtags kyis stong ba'i rigs pa ma gsungs na/ @150 dgongs 'grel las ming brdas bzhag pa'i rtags kyis gzhan dbang ngo bo dang khyad par la kun btags pa'i kun brtags rang gi mtshan nyid kyis ma grub pa'i rigs pa ma bstan par thal/ 'dod pa'i phyir/ 'dod mi rig ste/ dgongs 'grel las/ dgag phyogs nas rang gi mtshan kyis ma grub pa dang sgrub phyogs nas ming dang brdas bzhag par gsungs so zhes gsungs pa'i phyir/ yang gzhan dbang kun brtags kyis stong pa sgrub pa'i rigs pa bstan pa'ang 'dod mi rig ste/ skabs 'dir drang nges rnam 'byed las/ dgongs 'grel las gzhan dbang kun brtags kyis stong par sgrub pa'i rigs pa ma gsungs pa rtogs par bya ba'i phyir/ /zhes gsungs pa'i phyir/ 'o na rigs pa ma gsungs zhes pa'i don gang yin zhe na/ skabs 'dir bshad pa'i rigs pa gsum gyi sgo nas gzhan dbang kun brtags kyis stong par sgrub pa'i rigs pa de dgongs 'grel nas ma gsungs pa'i don yin no/ /'di dka' sa zhig yin gsungs/ rigs pa gsum po de ma gsungs pa rtogs par bya ba'i phyir byang sa dang bsdu ba las rigs pa gsum gsum gsungs shing/ theg bsdus las kyang/ gzhan gyi dbang gi ngo bo kun btags pa'i bdag nyid du ji ltar snang ba de yi bdag nyid ma yin par ci mngon zhe na ste snang ba ltar ma grub pa'i rgyu mtshan gang yin zhes dri ba bkod pa'i lan du/ ming gi snga rol blo med phyir/ /mang ba'i phyir dang ma nges phyir/ /de yi bdag nyid bdag mang dang/ /bdag 'dres 'gal bas 'grub par 'gyur/ /zhes gsungs/ ming gi snga rol blo med pa'i rigs pa/ bdag mang por thal ba'i rigs pa/ bdag 'dres par thal ba'i rigs @151 pa ste gsum las/ ming gi snga rol blo med phyir/ /mang ba'i phyir dang ma nges phyir zhes tshig rkang gnyis kyis rtags dang/ de yi bdag nyid bdag mang dang/ /bdag 'dres zhes pas bsgrub bya'i chos bstan/ 'gal bas 'grub par 'gyur zhes pa'i tshig de gong gi gsum ga la sbyar dgos te/ ming gi snga rol blo med phyir/ /bdag nyid 'gal bas 'grub par 'gyur/ mang ba'i phyir/ bdag mang 'gal bas 'grub par 'gyur/ ma nges phyir/ bdag 'dres 'gal bas 'grub par 'gyur zhes tshigs bcad so sor spel te sbyor dgos pa yin/ rigs pa dang po ni de la chos de'i bdag nyid du 'gal bas gzhan dbang kun brtags kyis stong pa 'grub tshul go sla bar brjod na zhes sogs kyis bstan/ chos de'i bdag nyid du 'gal zhes pa ni bum pa lta bu rang 'dzin rtog pa'i zhen gzhir rang gi mtshan nyid kyis grub pa de/ bum pa yin pa'am bum pa'i ngo bo nyid du med pas rtog pa'i zhen gzhir grub pa de bum pa'i bdag nyid du 'gal ba yin te/ bum pa rang 'dzin rtog pa'i zhen gzhir rang mtshan gyis ma grub pa'i phyir/ thal 'gyur ni lto ldir ba bum pa'i tha snyad kyi gzhir 'jog pa brda la gtan nas mi ltos par thal/ lto ldir ba bum pa'i tha snyad kyi gzhir 'jog pa lto ldir ba rang gi dngos po'i gnas tshod kyi ngos nas rang mtshan gyis grub pa'i phyir/ 'dod na/ lto ldir ba la bum pa'o snyam pa'i blo skye ba brda la mi ltos par skye bar thal/ 'dod pa'i phyir/ 'dod na/ lto ldir ba la bum pa zhes ming ma btags pa'i snga rol du'ang lto ldir ba mthong tsam nas 'di ni bum pa'o snyam pa'i @152 blo skye bar thal lo/ /de ltar thal ba las de'i gong du de 'dra'i blo skye ba med pa'i phyir/ de de'i tha snyad kyi gzhir rang gi mtshan nyid kyis ma grub bo/ /bum pa zhes tha snyad btags sa de lto ldir ba dang/ de la bum pa zhes ming btags pa la brten nas gzhi 'am gnas su song ba ma gtogs ming brda la ma ltos par lto ldir ba rang ngos nas gzhi dang gnas su mi 'gro ba yin/ lto ldir ba bum pa'i gzhi 'am gnas yin pa de de'i gnas lugs sam rang mtshan gyis grub na lto ldir ba bum brda'i yul yin pa de brda'i dbang gis ma bzhag par yod dgos/ de ltar na brda'i yul can gyi blo yang brda la mi ltos pas zhes gsungs pa dang 'gal/ bum pa zhes pa'i sgra dang bum 'dzin rtog pa gnyis brda'i yul can yin/ rang rgyud kyi sbyor ba 'god na/ lto ldir ba chos can/ bum pa zhes pa'i sgra'i yul du rang gi mtshan nyid kyis ma grub ste/ khyod la bum pa'o snyam pa'i blo skyes pa ming brda sbyar ba la ltos pa'i phyir/ bdag mang 'gal ba'i rigs pa ni don gcig nyid don gyi bdag nyid mang por 'gal bas 'grub pa ni phyogs snga ltar na zhes sogs kyis bstan/ don ni sgra 'jug pa'i gzhir rang mtshan gyis grub na don gcig don mang por thal bar 'gyur te/ de yang dper na skyes bu gcig la brgya byin dang dbang po dang grong 'joms la sogs pa'i ming du ma 'jug pa de ming brda la ma ltos par dngos dbang gis 'jug dgos shing/ brgya byin zhes pa'i sgra'i 'jug gzhir brgya byin rang nyid song ba ma gtogs gzhan gnyis med/ dbang po dang grong 'joms zhes pa'i sgra 'jug pa de yang @153 de gnyis so so nas dngos dbang gis 'jug dgos la/ de ltar na skyes bu gcig la brgya byin dang dbang po dang grong 'joms zhes pa'i dngos ming tha dad pa gsum 'jug pa bzhin rgyud tha dad du 'gyur ba yin/ don gcig nyid don gyi bdag nyid mang por 'gal bas zhes pa nas de bzhin du dngos po la gnas pa'i phyir don de du mar 'gyur ro/ /zhes pa'i don thal 'gyur du 'god na/ brgya byin dang dbang po dang grong 'joms rnams chos can/ rgyud tha dad yin par thal/ brgya byin dang dbang po sogs ming 'jug pa'i gzhir rang gi mtshan nyid kyis grub pa'i phyir/ rang rgyud ni brgya byin dang dbang po grong 'joms rnams chos can/ brgya byin la sogs pa'i ming 'jug pa'i gzhir rang mtshan gyis ma grub ste/ ming brda la ltos nas bzhags pa'i phyir/ 'dir dngos dbang gis 'jug na zhes pa ni sgra dang rtog pa la ma ltos par dngos po rang gi sdod lugs kyi ngos nas grub pa la zer/ bdag 'dres 'gal ba'i rigs pa ni don ma 'dres pa'i ngo bo 'dres par 'gal bas 'grub pa ni phyogs snga ltar na zhes sogs kyi don ni/ shar phyogs kyi nyer sbas de nyer sbas zhes pa'i sgra'i 'jug gzhir rang mtshan gyis grub na nub phyogs kyi de yang sgra 'jug pa'i gzhir rang gi mtshan nyid kyis grub dgos/ de ltar na shar nub kyi nyer sbas gnyis rgyud gcig tu thal ba'i skyon yod de/ shar nub kyi nyer sbas gnyis chos can/ rgyud gcig tu thal/ de gnyis nyer sbas zhes pa'i sgra 'jug pa'i gzhir rang ngos nas grub pa'i phyir/ khyab ste/ 'di nyid las/ de'i ming dang rtog pa yang dngos po'i dbang gis de gnyis la 'jug pa'i phyir don gnyis don gcig tu 'gyur ro/ @154 /zhes gsungs pa'i phyir/ /de ni dper mtshon pa ste shar nub kyi bum pa yang so so nas zhen gzhir rang mtshan gyis grub na gcig tu thal ba'i skyon gong ltar mtshungs/ mdo sde pa ltar na bum pa zhes pa'i sgra'i dngos kyi brjod bya rang mtshan gyis grub na de 'dra'i skyon yod kyang/ dbang shes la bum pa rang 'dzin rtog pa'i zhen gzhir de ltar snang ba rang gi mtshan nyid kyis grub pa la skyon med ces smra yang rnam rig pas de 'dra'i khyad par dbye mi nus par rigs pa de dag gis 'phul ba yin no/ /'di'i ming brdas bzhag pa'i don ni rang nyid blo yul du 'char ba la ming brda blo yul du 'char ba la ltos dgos pa'o/ /rtog pas btags tsam yin na ming brda tsam gyis 'jog nus pas ma khyab ste/ sgra rtag pa lta bu ming brda tsam gyis 'jog mi nus pa'i phyir te/ sgra rtag pa zhes brjod pa tsam gyis sgra rtag pa'i ngo bor mi gnas pa'i phyir/ ri bong can la zla ba zhes pa'i ming brda tsam gyis 'jog nus te/ de la zla ba zhes pa'i ming brjod pa tsam gyis zla ba'i ngo bor gnas pa'i phyir/ sgra rtag stong dang nam mkha' sogs rtog pas btags tsam yin kyang ming brdas bzhag pa ma yin te/ rang nyid blo yul du 'char ba la ming brda blo yul du 'char ba la ltos mi dgos pa'i phyir te/ byas pa'i rtags kyis sgra mi rtag par sgrub pa'i phyi rgol gyis rtags de'i bsgrub bya rtogs pa na ming brda blo yul du 'char ba la ma ltos par sgra rtag stong shugs la rtogs pa'i phyir/ des na lto ldir ba la bum pa zhes btags pa dang bum pa grub pa dus mnyam par gsungs/ 'o na 'dir bum pa bum 'dzin rtog pa'i zhen gzhir rang mtshan gyis grub na bum pa'i ming ma @155 btags pa'i snga rol nas lto ldir ba la bum pa'o snyam pa'i blo skye bar 'gyur ro zhes bkag pa ji ltar yin zhe na/ de ni gang zag bye brag pa gcig la brda sbyor tshul gyi dbang du byas pa yin gsungs/ gang zag bye brag pa gcig la bum pa'i brda ma thob pa'i snga rol du de 'dra'i gang zag gi rgyud kyi lto ldir ba 'dzin pa'i rtog pa de bum pa 'dzin pa'i rtog pa ma yin/ de bzhin du skyes bu la lhas byin zhes pa'i ming ma btags pa'i snga rol gyi de dang rgyud gcig tu gyur pa'i byis pa 'dzin pa'i rtog pa de de yin kyang/ de lhas byin 'dzin pa'i rtog pa ma yin gsungs/ de ltar na brda ma thob pa'i skyes bu'i rgyud la bum 'dzin rtog pa yod kyang de bum 'dzin rtog pa ma yin zer dgos sam snyam/ de ltar ma yin na rtog pa'i mtshan nyid kyi zur du 'dres rung zhes smos pa ni bum brda ma sbyar ba'i skyes bu'i rgyud kyi bum 'dzin rtog pa bsdu ba'i phyir du smos pa yin gsungs pa'ang yod do/ /mdor na rtog pa'i zhen gzhir rang mtshan gyis grub na brda'i yul can gyi blo yang brda la mi ltos par thal ba'i skyon gcig dang/ skyes bu gcig la ming du ma 'jug pas skyes bu gcig nyid rgyud tha dad par thal ba dang/ rgyud tha dad pa la ming gcig 'jug pas de gnyis rgyud gcig tu 'gyur ba ste skyon gsum yod pa yin no/ /gzugs sogs rtog pa'i zhen gzhi yin pa de zhes pa nas de 'gog pa'i rigs pa yang 'dra'o zhes pa ni/ rigs pa gsum gyis brda shes pa'i gang zag gi rgyud kyi sgro 'dogs de bkag pa ma zad brda mi shes pa'i ba lang la sogs pa'i rgyud kyi dgag bya sgro @156 'dogs de yang bkag pa yin/ byang sar don sngar yod la 'di 'di'o zhes ming phyis 'dogs na zhes sogs kyi don ni/ lto ldir ba sngar yod la de la bum pa zhes ming phyis 'dogs na ste brda phyis sbyar na de ltar na ma btags pa'i dus su don gyi ngo bo med par 'gyur te/ ming ma btags pa'i dus su don de med pa'i phyir ma btags pa'i tshe yang ngo bo yod pa la phyis ming 'dogs na ming ma btags pa'i dus su 'di gzugs so snyam pa'i blo skye bar 'gyur zhes bkag go /byang sa'i rigs pa dang gong gi gsum po mtshungs pa yin/ gang la brda 'dogs pa'i dngos kyi yul de don de'i ngo bor rang mtshan gyis grub na brda 'brel byas par mi ltos par ming gi blo skye ba sogs kyi skyon yod mod kyang zhes sogs nyan thos sde pas dgag bya phra ba de bkag mi thub kyang rigs pa rags pa tsam gyis lan btab pa yin/ de yang sde pa gnyis kyis bum pa bum pa zhes pa'i sgra 'jug pa'i dngos kyi yul rtag pa de bum pa yin na sngar gyi thal ba gsum po 'jug kyang/ gang la brda 'dogs pa'i dngos yul rtag pa de don de'i ngo bor rang mtshan gyis grub na ste bum pa yin na lto ldir ba la bum pa'o snyam pa'i blo skye ba brda 'brel byas pa la ma ltos par ming gi blo skye bar thal ba'i sems tsam pa khyed kyi skyon de dag yod pa ma gtogs/ de bum pa zhes pa'i sgra 'jug pa'i gzhir rang mtshan gyis grub pa la skyon de dag mi 'jug ces nyan thos sde gnyis kyis lan mdzad pa yin/ nyan thos sde pa dag smra mod kyang 'dra'o zhes pa ni/ sde gnyis kyis brda 'dogs pa'i dngos kyi yul de bum pa yin na skyon de dag 'gyur zhes pa de dang/ @157 sems tsam pas rtog pa'i zhen gzhir rang mtshan gyis grub na skyon 'jug par bshad pa de gnyis mtshungs pa yin pas/ brda 'brel byas pa la ma ltos par ming gi blo skye ba'i thal ba de dag la nyan thos sde pas gong ltar so so nas khyad par 'byed pa mi 'thad pas gang khas blangs kyang don 'dra'o/ /sgro 'dogs la kun lhan gnyis yod cing de yang 'gog rgyu'i gtso bo de lhan skyes yin te/ de sems can rnams 'khor bar 'khyam pa'i rgyu'i gtso bo yin pa'i phyir/ 'o na gzhung rnams las kun brtags shas cher bkag cing lhan skyes de ltar mi 'gog pa'i rgyu mtshan ci zhe na/ kun brtags ni brtags shing dpyad nas 'jug cing des rgyu mtshan mang po'i sgo nas rang 'dzin rtog pa'i zhen gzhir rang gi mtshan nyid kyis yod par 'dzin pas gzhung nas 'gog pa na'ang rgyu mtshan dang rigs pa du ma'i sgo nas bkag pa'i phyir/ 'o na kun brtags de 'gog rgyu'i gtso bo ma yin par thal/ 'dod pa'i phyir/ 'dod na/ gzhung rnams nas brtags shing dpyad de 'gog pa sha stag ma yin par thal lo/ /'dod na/ der thal/ lung dang rigs pa gnyis kyis bkag pa yin pa'i phyir te/ gzhung rnams nas dpyad nas 'gog pa sha stag byung ba yang mi 'gal bas zhes gsungs pa'i phyir/ kun lhan gnyis kas rtog pa'i zhen gzhir rang mtshan gyis grub par 'dzin pa mtshungs pas kun brtags kyi 'dzin pa bkag na lhan skyes kyi zhen yul yang khegs pa yin te/ rtog pa'i zhen gzhir de ltar grub pa de kun lhan gnyis ka'i zhen yul gyi gtso bo yin pa'i phyir/ @158 de ltar na gzugs sogs rtog pa'i zhen gzhi yin pa de ming dang brdas bzhag pa'i kun brtags yin mod kyang zhes sogs kyi don ni/ ming brdas bzhag pa'i kun brtags la gnyis yod pa'i gzugs rtog pa'i zhen gzhi yin pa de ming brdas bzhag pa'i kun brtags yin kyang tshad mas grub pas dgag mi nus te/ yod pa'i phyir/ gzugs de nyid rang 'dzin rtog pa'i zhen gzhir rang mtshan gyis grub pa ming tsam gyis bzhag pa'i kun brtags de shes bya la mi srid pa yin pas ming brdas bzhag pa la tshad mas grub ma grub gnyis yod do/ /ming brdas bzhag pa yin na dngos po ma yin pas khyab cing gzhan dbang ming brdas bzhag pa ma yin te/ ming brdas bzhags pa la rgyu 'bras mi rung bas khyab pa sems tsam pa'i lugs yin pa'i phyir/ gzhung 'di'i nang du 'di pa 'dod do zhes pa dang 'dir sems so zhes sogs kyis sems tsam pa'i lugs sogs rje nyid kyi rang lugs min par bstan/ thal 'gyur ba'i lugs brjod pa na gong gi tshig de rnams mi 'byung ba ni rje'i rang lugs yin pa'i rgyu mtshan gyis yin no/ /don smra gnyis kyis gzugs sogs brda 'dogs pa'i gzhi dang rtog pa'i zhen gzhir rang gi mtshan nyid kyis grub par khas blangs pa'i phyir de dag rang mtshan gyis grub pa khegs na med dgos pas gzugs sogs de dag yod par 'jog mi shes pa yin te/ tshad ma pa la grags pa'i rang mtshan te don dam don byed nus pa gang zhes rnam 'grel las bshad pa'i don byed nus pa'i rang mtshan ma yin gyi rang gi thun mong ma yin pa'i sdod lugs kyi ngos nas grub pa la 'jog pa'i phyir/ bstan bcos 'di nyid las/ @159 don smra gnyis kyis gzugs sogs rtog pa'i zhen gzhi dang brda 'dogs pa'i gnas su rang mtshan gyis grub pa khegs na de dag yod par 'jog mi shes te tshad ma pa la grags pa'i rang mtshan ni min no/ /zhes gsungs pa'i dgongs pa'o/ /dper na bum med med dgag yin zhing de dang sa phyogs gzhi mthun du 'du yang med dgag dang dngos po gnyis 'gal ba mi 'gog pa ltar zhes pa ni/ bum med dang sa phyogs gzhi mthun 'du ba ste gzhi mthun pa yod kyang gzhi mthun des med dgag dang dngos po'i 'gal ba mi 'gog pa yin te/ de gnyis 'gal ba'i phyir/ med dgag yin na dngos po dang 'gal bas ma khyab ste/ bum pas dag pa'i sa phyogs de bum med yin pa'i phyir/ 'o na bum med med dgag ma yin par thal/ khyod dang sa phyogs kyi gzhi mthun yod pa'i phyir zer na ma khyab/ med dgag dang dngos po'i gzhi mthun med cing dngos po la dgag pa yin phyin chad ma yin dgag gis khyab bo/ /de dang sa phyogs gzhi mthun du 'du yang med dgag dang dngos po'i 'gal ba mi 'gog pa ltar zhes dpe dang/ don la sbyar na rnam shes rtog pa'i zhen gzhi yin pa de zhes sogs kyis rnam shes rang 'dzin rtog pa'i zhen gzhi yin pa de don dam par ma grub pa'i kun brtags yin kyang/ rnam shes don dam pa'am rang gi mtshan nyid kyis grub pa gnyis mi 'gal ba bzhin no/ /de'i phyir ming ni gang dang gang gis su/ /zhes sogs nyan thos sde pa la grub pa'i mdo yin yang de dag gis bshad pa dang don khyad par med pa min te zhes pas nyan thos sde pa dang sems tsam pa gnyis mdo de sgra ji bzhin du khas len tshul mi mtshungs @160 te/ sde pa gnyis kyis de gang zag gi bdag med bstan pa'i mdo dang/ sems tsam pas chos kyi bdag med bstan pa'i mdor khas len pa'i phyir/ dper na phal chen sde pas gang zag gi mtshan gzhir yid kyi rnam shes bzhed kyang 'di pa sems tsam pas de'i mtshan gzhir kun gzhi 'dod pa bzhin yin/ sngar gyi rigs pa gsum dang lung rnams kyis rtog pa'i zhen gzhir rang mtshan gyis grub pa 'gog pas rnam rig tsam la ji ltar 'jug snyam na/ gzugs nas rnam mkhyen gyi bar gyi chos thams cad la rang rang gi ming gi tha snyad 'dogs pa'i gnas gzugs dang gzugs 'dzin rtog pa'i zhen gzhi yin pa de rtog pa'i zhen gzhir rang mtshan gyis grub par khegs pa na/ rjod byed kyi ming gzugs zhes pa'i sgra dang brjod bya'i don gzugs dang ming don gnyis 'brel ba la brten nas brjod bya'i don gzugs kyi ngo bo dang khyad par du rang gi mtshan nyid kyis grub par rtog pa la snang zhing de ltar du blos zhen pa yin/ ngo bo dang khyad par du snang ba'i rtog pa'i zhen sa'i don gzugs de'i zhen gzhir rang mtshan gyis grub pa de med pas de ltar 'dzin pa'i blo la 'khrul shes kyis khyab cing/ ma 'khrul ba yang med do snyam ste gzung 'dzin gnyis med pa'i rtog med dbang shes la brten pa'i rnam rig tsam du 'jug go / 'phags pa thogs med kyi theg bsdus las rnam rig tsam du 'jug mkhan de byang chub sems par gsungs pas/ byang sems so skye'i gnas skabs su chos kyi bdag med don spyi'i tshul gyis rtogs pa'i 'tshol ba bzhi sgom pa la brten nas mthong lam thob pa na chos kyi bdag med @161 mngon sum du rtogs pa'i yongs su shes pa bzhi'i sgo nas rnam rig tsam du 'jug pa yin/ theg bsdus kyi dngos bstan la byang sems su bshad kyang spyir na byang chub sems pa yin pas ma khyab bo/ /theg bsdus las/ 'di ltar byang chub sems dpa' rnam par rig pa tsam la 'jug par brtson pa de lta bu de yi ge dang don snang ba'i yid kyi brjod pa de la yi ge'i ming de yang yid kyi rtog pa tsam du zad par yang dag par rtog go zhes sogs kyis gzung 'dzin gnyis med pa'i rnam rig tsam la 'jug tshul la 'tshol ba bzhi dang/ yongs shes bzhi'i sgo nas 'jug tshul gnyis yod/ 'tshol ba bzhi ni/ ming 'tshol ba/ don 'tshol ba/ ngo bo 'tshol ba/ khyad par 'tshol ba dang bzhi/ yongs shes bzhi ni/ ming yongs su shes pa la sogs pa bzhi'o/ de la yang ngo bo dang khyad par du kun btags pa'i kun brtags kyi dbang du byas pa gcig dang/ phyi don med pa'i dbang du byas pa gnyis yod pa'i dang po la dper mtshon na/ bum pa zhes pa'i ming de bum pa zhes pa'i ming 'jug pa'i gzhi lto ldir ba'i ming du rang gi mtshan nyid kyis grub bam/ ming de brjod 'dod kyi kun slong gi dbang gis bum pa zhes btags pa gang yin 'tshol na ming 'tshol ba yin zhing bum pa zhes pa'i ming de lto ldir ba'i ming du rang gi gnas lugs kyi dbang gis ma grub par rtogs pa na ming 'tshol ba'i sgo nas rnam rig tsam la 'jug pa'o/ / lto ldir ba de bum pa zhes pa'i ming 'jug pa'i 'jug gzhir lto ldir ba'i gnas tshul gyi dbang @162 gis grub bam de'i 'jug gzhir ming brda'i dbang gis bzhag pa gang yin 'tshol ba ni don 'tshol ba'o/ /lto ldir ba bum pa zhes pa'i ming 'jug pa'i 'jug gzhir rang gi gnas tshul gyi dbang gis ma grub par rtogs pa na don 'tshol ba'i sgo nas rnam rig tsam la 'jug pa'o/ /lto ldir ba de bum pa'i ngo bo zhes pa'i sgra 'jug pa'i 'jug gzhir lto ldir ba'i gnas lugs kyi dbang gis grub bam/ de'i ngo bo zhes pa'i sgra 'jug pa'i 'jug gzhir ming brda'i dbang gis bzhag pa gang yin 'tshol ba ni ngo bo 'tshol ba'o/ /de'i 'jug gzhir rang gi mtshan nyid kyis ma grub par rtogs pa na ngo bo 'tshol ba'i sgo nas rnam rig tsam la 'jug go /de bum pa'i skye ba zhes pa'i sgra 'jug pa'i 'jug gzhir bum pa'i ngo bo'i sgo nas grub bam/ de'i 'jug gzhir ming brda'i dbang gis bzhag pa gang yin 'tshol ba ni khyad par 'tshol ba'o/ / de'i 'jug gzhir rang gi gnas tshul gyi dbang gis ma grub par rtogs pa na khyad par 'tshol ba'i sgo nas rnam rig tsam la 'jug pa'o/ /gnyis pa ni bum pa zhes pa'i ming de lto ldir ba la glo bur du yid rtog la snang ba'i dbang gis btags pa tsam zhig yin nam/ de lto ldir ba'i ming du phyi rol don du grub pa gang yin 'tshol ba na ming 'tshol ba'o/ /de der gnas lugs kyi dbang gis ma grub par rtogs pa na ming 'tshol ba'i sgo nas rnam rig tsam la 'jug tshul ni 'og ma la yang rigs 'gre dgos/ lto ldir ba de yang bum pa zhes pa'i sgra'i yul du glo bur du yid rtog la snang ba'i @163 dbang gis btags tsam zhig yin nam/ lto ldir ba bum pa zhes pa'i sgra'i yul du phyi rol don du grub 'tshol ba na don 'tshol ba'o/ /lto ldir ba de bum pa'i ngo bo zhes pa'i sgra 'jug pa'i gzhir yid rtog la snang ba'i dbang gis bzhag pa tsam zhig yin nam/ de'i ngo bor phyi rol don du grub pa gang yin 'tshol ba na ngo bo 'tshol ba'o/ /de bum pa'i skye ba dang 'gag pa zhes pa'i sgra 'jug pa'i gzhir yid rtog la snang ba'i dbang gis btags pa tsam yin nam/ de'i sgra 'jug pa'i 'jug gzhir phyi rol don du grub pa gang yin 'tshol ba ni khyad par 'tshol ba'o/ /mdo sde rgyan las kyang/ ming dang dngos dag phan tshun du/ /glo bur ba ni nyid du btsal/ /'dogs pa rnam pa gnyis po 'dir/ / de tsam nyid du tshol ba'o/ /zhes gsungs/ shes pa bzhi ni/ bum pa zhes pa'i ming de lto ldir ba la glo bur du yid rtog la snang ba'i dbang gis bzhag tsam yin gyi de ltar min par lto ldir ba'i ming du phyi rol don du ma grub par mngon sum du shes pa'i rig pa de ming shes pa'i rig pa'o/ /lto ldir ba de bum pa zhes pa'i sgra 'jug pa'i yul du phyi rol don du ma grub par mngon sum du shes pa'i rig pa de don shes pa'i rig pa'o/ /lto ldir ba bum pa'i ngo bo zhes pa'i sgra'i yul du phyi rol don du ma grub par mngon sum du shes pa'i rig pa de ngo bo shes pa'i rig pa'o/ /lto ldir ba bum pa'i skye 'gag zhes brjod pa'i sgra'i yul du phyi rol don du ma grub par mngon sum du shes pa'i rig pa de khyad par yongs su shes pa'i rig pa'o/ /de dag kyang yi ge dang don snang ba'i yid kyi brjod pa de la zhes pa @164 nas yang dag pa ji lta ba bzhin du yongs su shes pa bzhi po dag gis yi ge dang don snang ba'i yid kyi rnam par rtog pa de dag la rnam par rig pa tsam nyid du 'jug go zhes pa'i rim gyis bstan/ gal te 'di yid shes rtog pa la ltos pa'i gzung 'dzin khegs pa yin la/ bag chags brtan pa las byung ba'i rtog med kyi shes pa la ltos pa'i gzung 'dzin rigs pas khegs pa min pas rnam rig tsam la 'jug par ji ltar 'thad ce na/ zhes kha cig gis rtsod tshul ni/ theg bsdus las 'tshol ba bzhi'i sgo nas rnam rig tsam du 'jug par bshad pa 'di yid shes rtog pa la ltos pa'i 'jug tshul yin la/ de la rtog med dbang shes la brten pa'i rnam rig tsam du 'jug pa med pas rnam rig tsam du 'jug pa la dbang shes la ltos pa'i rnam par rig tsam du 'jug dgos so zhe na/ de'i lan du skyon med de 'di ltar sngon po gzung ba don gzhan du 'dzin pa'i rtog pa'i zhen gzhi yin pa rang mtshan gyis yod pa rigs pas khegs na sngon po zhen gzhi yin pa snang ba'i sngon 'dzin de snang yul la 'khrul bar 'grub ste zhes gsungs/ don ni yul gzung ba sngon po de don gzhan du 'dzin pa'i rtog pa ni sngon po rang 'dzin rtog pa'i zhen gzhir rang gi mtshan nyid kyis grub par 'dzin pa'i blo de yin la/ des yul sngon po de shes pa dang 'brel ba med pa ltar 'dzin pas don gzhan du 'dzin zhing/ de'i zhen yul sngon po rang 'dzin rtog pa'i zhen gzhi yin pa de rang gi mtshan nyid kyis grub par khegs pa na zhen gzhi der ma grub par rtogs pa yin la/ de'i tshe sngon po rang 'dzin rtog pa'i zhen gzhi rang gi mtshan @165 nyid kyis grub par snang ba'i sngon 'dzin mig shes de yang snang yul la 'khrul bar 'grub pa ste 'khrul bar rtogs pa'i phyir/ rtog pa'i zhen gzhir rang mtshan gyis ma grub par rtogs ma thag tu sngon 'dzin mig shes 'khrul bar rtogs sam/ de rtogs pa la brten nas rjes su 'khrul shes su 'grub dgos pa gang yin zhe na/ gzhan dag gis 'khrul bar 'grub ces pa ma 'ongs pa'i tshig yin pas sngon du rtog pa'i zhen gzhir rang mtshan gyis ma grub par rtogs nas de'i rjes su sngon 'dzin mig shes 'khrul bar 'grub dgos te/ rtog pa'i zhen gzhi yin pa rang mtshan gyis yod pa rigs pas khegs na sngon po zhen gzhi yin pa snang ba'i sngon 'dzin de snang yul la 'khrul bar 'grub ste zhes snga phyi yin pa'i rgyu mtshan mang po'i sgo nas bshad/ spyir btang rtog pa'i zhen gzhir rang mtshan gyis grub par 'dzin pa'i blo dang gzung 'dzin rdzas tha dad du 'dzin pa'i blo gnyis kyi zhen yul ngos bzung dka' sla'i khyad par yod dam med ce na/ yod de rtog pa blo rags pa yin pas de la snang tshul de ngos bzung sla ba yin/ dbang shes blo phra bas de la gzung 'dzin rdzas gzhan du snang tshul ngos bzung dka' ba yin/ dka' sla yod pa'ang de gnyis yul du byed pa'i yul can blo la phra rags yod pa'i gnad kyis yin gyi dgag bya gnyis la phra rags gtan nas yod pa ma yin te/ dper na rang rgyud pa sogs kyi lugs la chos kyi bdag 'dzin kun lhan gnyis kyi zhen yul dang des stong ba la phra rags med kyang kun @166 brtags kyi 'dzin pa de blo rags pa dang lhan skyes kyi 'dzin pa de blo phra ba yin pas de gnyis kyi dgag bya ngos bzung dka' sla yod pa bzhin yin/ chos kyi bdag 'dzin kun brtags kyi zhen yul khegs pa na chos kyi bdag med phra mo rtogs shing de'i tshe lhan skyes kyi zhen yul yang khegs te/ kun lhan gnyis kas gzhi de bden grub tu 'dzin cing dgag bya gnyis la phra rags gtan nas med pa'i phyir/ bden 'dzin kun brtags kyi zhen yul med pa chos kyi bdag med rags pa dang/ lhan skyes kyi de chos kyi bdag med phra mo yin zhes khyad par 'byed mi dgos par spyir stong nyid rtogs na kun lhan gnyis ka'i zhen yul med pa rtogs pa yin no/ /gang zag gi bdag 'dzin la yang de ltar du shes dgos/ de bzhin du rang 'dzin rtog pa'i zhen gzhir rang mtshan gyis ma grub par rtogs na gzung 'dzin rdzas gzhan gyis stong ba rtogs pas khyab ste/ rtog pa yid shes la brten pa'i rnam rig tsam du 'jug na rtog med dbang shes la brten pa'i rnam rig tsam du 'jug pa'i phyir te/ gzugs rtog pa'i zhen gzhir rang mtshan gyis grub par 'dzin pa'i blo des gzugs phyi rol don du'ang grub par 'dzin pa'i phyir/ der thal/ gzugs 'dzin rtog pa'i zhen gzhir rang mtshan gyis grub par 'dzin pa'i blo de la gzugs phyi rol don du grub par 'dzin pa'i 'dzin tshul tshang ba'i phyir/ de'i rgyu mtshan yang gzugs 'dzin rtog pas gzugs de rtog pa'i zhen gzhir sgra rtog gis bzhag pa min pa rang gi gnas lugs kyi ngos @167 nas grub par 'dzin pa gang zhig /de rtog pa la ltos pa med par 'dzin pa la shes pa la ltos pa med par 'dzin dgos/ shes pa la ltos med du 'dzin na phyi rol don du grub par 'dzin dgos pa'i phyir te/ shes pa la ma ltos par yul de'i ngos nas grub pa lugs 'dir phyi don du grub pa'i tshad yin pa'i phyir/ des na rtog pa'i zhen gzhir rang mtshan gyis ma grub par rtogs na chos kyi bdag med phra mo rtogs shing de las lhag pa'i stong ba phra mo med do/ / de ltar dgos pa'i rgyu mtshan gong du rtsod lan gyi skabs su ngo bo dang khyad par la btags pa'i kun brtags kyis stong ba de dgongs 'grel las chos kyi bdag med kyi yongs grub tu bshad/ byang sar stong pa de shes sgrib dag byed kyi ye shes kyi dmigs pa mthar thug dang dbu ma'i lam gong na med par bshad/ theg bsdus las 'di'i sgo nas 'jug pa rnam par rig pa tsam du 'jug par gsungs pa'i phyir stong pa de nyan thos sde gnyis kyis ma rtogs pa sgrub pa yin te/ bstan bcos 'di nyid las/ bshad par bya ste stong tshul 'di byang sa las zhes pa nas grub zin pa min no/ /zhes gsungs pa'i phyir/ des na ngo bo dang khyad par du btags pa'i kun brtags kyis stong pa de khyad chos gsum ldan du gsungs pas des stong pa rtogs na gzung 'dzin rdzas gzhan gyis stong pa yang tshad mas nges pa yin pas nges dka' sla'i khyad par med/ 'ga' zhig gis brten nas zhes 'byung bas @168 rtogs tshul snga phyir bzhag pa ni gzhung 'di dag dang 'gal bas mi 'thad do/ /rtogs tshul ni skyon med de 'di ltar sngon po gzung ba ste yul dang shes pa las don gzhan du 'dzin pa'i rtog pa'i zhen gzhi yin pa rang mtshan gyis yod par rigs pas khegs na sngon po zhen gzhi yin pa snang ba'i sngon 'dzin mig shes snang yul la 'khrul bar 'grub pa ste 'khrul bar rtogs so/ /sngon 'dzin mig shes la sngon po rtog pa'i zhen gzhir rang mtshan gyis grub pa snang ba'i phyir te/ de la sngon po phyi rol don du grub pa snang ba'i phyir/ 'o na de la sngon po rdzas gzhan du mi snang bar thal/ de la sngon po rtog pa'i zhen gzhir rang mtshan gyis grub pa snang ba'i phyir zer na/ khyab pa med de/ zhen gzhir rang mtshan gyis grub par snang ba de la/ rdzas gzhan du snang ba'i snang tshul tshang ba'i phyir te/ rtog pa'i zhen gzhir rang mtshan gyis grub par snang zhes pa ni su la yang mi ltos par kho rang de'i yul du song bar snang ba de yin pas sngon 'dzin mig shes la ma ltos par snang ba yin no/ /de yang thun mong ma yin pa zhes pas rtog pa la ltos pa de bcad de/ sngon po de sngon po zhes pa'i sgra dang rtog pa'i yul du 'gro ba de de'i thung mong ma yin pa'i sdod lugs kyi ngos nas song na gzhan su la'ang mi ltos dgos pa las de ltar ma yin pa sgra dang rtog pa la ltos nas song ba'i phyir/ des na gnyis ka'i snang tshul yang phyi don snang tshul dang chos bdag gi ngo bor snang tshul yin/ 'on kyang gtso bo dbang shes la gzung 'dzin @169 rgyang chad du snang ba dang/ rtog pa la zhen gzhir thun mong ma yin pa'i sdod lugs kyi ngos nas grub par snang tshul de bzhag pa'o/ /kha cig gis sngon 'dzin mig shes la rdzas tha dad du snang ba ma gtogs rang 'dzin rtog pa'i zhen gzhi rang gi mtshan nyid kyis grub pa ma snang zer ba yod kyang/ de ni mi 'thad de/ drang nges kyi gzhung 'dir/ rtog pa'i zhen gzhi yin pa rang mtshan gyis yod par rigs pas khegs na sngon po zhen gzhi yin pa snang ba'i sngon 'dzin de zhes gsungs pas gsal bar go nus la/ dbang shes la 'khrul bar grub tshul snang yul dang rtog pa la 'khrul bar grub tshul zhen yul yin dgos/ rtsa ba'i rtsod pa 'di 'ong tshul yang gzung 'dzin rdzas gzhan gyis stong pa chos kyi bdag med phra mo dang/ der 'dzin pa'i blo lugs 'di'i chos kyi bdag 'dzin yin pa gzhung mang po nas bshad kyang ngo bo dang khyad par du btags pa'i kun brtags kyis stong pa chos kyi bdag med phra mo dang/ de rang gi mtshan nyid kyis grub par 'dzin pa'i blo chos kyi bdag 'dzin yin pa gzhung gzhan rnams las dngos su bshad pa med pas bod snga rabs pa dag gis sems tsam pa'i lugs 'dir gzung 'dzin rdzas gzhan gyis stong pa'i stong nyid ma gtogs rtog pa'i zhen gzhir rang mtshan gyis stong pa de chos kyi bdag med phra mo yin pa 'jog mi shes par brten/ rje thams cad mkhyen pas rang 'dzin rtog pa'i zhen gzhir rang mtshan gyis grub pas stong pa chos kyi bdag @170 med phra mo dang der 'dzin pa'i blo chos kyi bdag 'dzin yin pa dgongs 'grel las bstan cing/ de bzhin du 'phags pa thogs med kyi byang sa dang bsdu ba theg bsdus kyi gzhung rnams kyis bsgrubs nas lugs 'dir rtog pa'i zhen gzhir rang mtshan gyis ma grub pa chos kyi bdag med du bshad pa la/ snga rabs pa kha cig gis ngo bo dang khyad par du btags pa'i kun brtags kyis stong pa chos kyi bdag med phra mo ma yin te/ de la gzung 'dzin rdzas gzhan bkag pa'i nus pa med pa'i phyir zhes rtsod pa na/ lan du rje thams cad mkhyen pas de chos kyi bdag med phra mo yin lugs dang de la rdzas gzhan bkag pa'i nus pa yod tshul dgongs 'grel dang byang sa bsdu ba theg bsdus kyi gzhung rnams kyis bsgrubs pa yin no/ /gangs can shing rta'i srol 'byed tsong kha pa zhes rje thams cad mkhyen par gangs can gyi shing rta chen po'i mtshan gsol ba'i rgyu mtshan yang rtog pa'i zhen gzhir rang mtshan gyis grub pas stong pa lugs 'dir chos kyi bdag med phra mo yin pa gsar du srol phye bas yin gsungs/ rtog pa'i zhen gzhir rang mtshan gyis stong pa nges pa na sngon 'dzin mig shes 'khrul bar 'grub ste/ sngon 'dzin de la rtog pa'i zhen gzhi rang gi mtshan nyid kyis grub par snang ba'i phyir zhes rang lugs kyis rtags bkod pa la/ 'o na rnam shes rtog pa'i zhen gzhi yin pa de don dam par grub pa rigs pas khegs pa na rnam shes de snang ba'i rang rig mngon sum de yang snang yul la 'khrul bar 'grub ste/ rang rig la rnams shes de snang ba na rang mtshan gyis @171 grub par snang ba'i phyir ro zhes kha cig gis rnam shes nyams myong gi rang rig la rnam shes rtog pa'i zhen gzhi rang mtshan gyis grub pa snang bar bsams nas brtsod pa yin/ de yang rnam shes rang 'dzin rtog pa'i zhen gzhir rang mtshan gyis grub par rigs pas khegs pa na/ rnam shes zhen gzhi der snang ba'i rang rig de snang yul la 'khrul bar grub te/ rang rig la zhen gzhi der snang ba na rang gi mtshan nyid kyis grub par snang ba'i phyir/ 'dod na/ rnam shes nyams myong gi rang rig de la gnyis snang dang 'khrul snang yod par thal/ de rang gi snang yul la 'khrul bar grub pa'i phyir/ 'dod na/ rang rig de rnam shes la gnyis snang nub pa'i sgo nas myong byed du skye ba ma yin par thal/ 'dod pa'i phyir/ 'dod na/ rnam shes de rang nyams myong gi rang rig mngon sum gyi ngo bor myong tsam du rang mtshan gyis ma grub par thal/ 'dod na/ gzhan dbang gi gtso bo shes pa bden par grub pa rang myong rang rig mngon sum gyis grub pa'i rnal 'byor spyod pa'i grub mtha' dor rigs par thal lo zhes rtsod/ rang lugs rnam shes nyams myong gi rang rig la rnam shes rtog pa'i zhen gzhi rang mtshan gyis grub par mi snang ste/ de ltar na de la lugs 'di'i dgag bya snang dgos pa las de mi snang ste rang rig yin pa'i phyir/ khyab ste/ rang rig ni shes pa kho na la dmigs kyi phyi rol gyi yul la ma dmigs pas rnam shes nyams myong gi rang rig kyang rnam shes gcig po la dmigs kyi de las gzhan pa'i chos la dmigs na kha phyir ltas kyi shes par 'gyur ba'i phyir/ kha cig gis rnam shes nyams myong gi rang rig la de rtog pa'i zhen gzhi rang mtshan gyis grub par snang zhing/ rnam shes rtog pa'i zhen gzhi yin pa don dam par grub pa khegs pa na de snang ba'i rang rig snang yul la 'khrul ba de grub dgos shing/ de ltar na rnam shes de myong ba'i ngo bor rang mtshan gyis grub pa med pas rnal 'byor spyod pa ste sems tsam pa'i grub pa'i mtha' dor ba 'gyur ro zhes rtsod/ rnam shes myong ba'i ngo bor rang mtshan gyis grub ces pa ni/ rnam shes de rang nyams su myong ba'i rang rig la snang ba ltar grub pas bzhag pa yin/ 'o na rnam shes de snang ba ltar grub par thal/ rang nyams su myong ba'i rang rig la snang ba ltar grub pa'i phyir zer na ma khyab bo/ /myong ba'i ngo bor rang mtshan gyis grub pa'i don ni myong ba'i ngo bo ste rnam shes dang myong byed rang rig gnyis ngo bo gcig dang/ rang mtshan gyis grub ces pa @172 rnam shes de rang rig la snang ba na 'khrul ba'i cha gtan nas med pas grub pa yin pa'i phyir/ sems tsam pa'i lugs la shes pa gang 'dra zhig yin yang rang nyams su myong ba'i rang rig gis grub pas khyab/ de ltar ma khyab na/ rnal 'byor spyod pa'i grub mtha'i rtsa ba de rlags pa yin no/ /'o na sems tsam pa'i grub mtha'i rtsa ba gang yin zhe na/ de'i lugs la chos thams cad yod pa rang rig gis grub cing de yang phyi don med pa rang rig gis grub/ rang rig gis phyi don med pa ma rtogs kyang de med pa rtogs pa'i blo yod pa sgrub mkhan gyi tshad ma rang rig gzhag dgos pas rang rig gis phyi don med pa grub bo/ /des na rang rig med na chos gang yang yod pa 'jog mi shes pas chos thams cad kyi rtsa ba rang rig la thug pa yin te/ dbu ma 'jug pa las/ gal te gzung med 'dzin pa nyid bral zhing/ /gnyis kyis stong ba'i gzhan dbang dngos yod na/ /'di yi yod pa gang gis shes par 'gyur/ /ma bzung ba yang yod ces byar mi rung/ de nyid kyis de myong bar grub ma yin/ /zhes sems tsam pas rang rig kho nas gzhan dbang de 'dzin par gsungs pa la dpal ldan zla bas dgag pa mdzad pa'i phyir ro/ /rtsod pa de'i skyon med de rang rig kha nang bltas kyi shes pa yin pas de la rnam shes rtog pa'i zhen gzhi yin pa mi snang la/ sngon 'dzin gnyis snang can gyi shes pa yin pas de la sngon po phyi rol tu zhen pa'i zhen gzhi yin pa snang ba'i phyir te/ zhen gzhi yin pa de yul dang yul can tha dad kyi gnyis snang nub pa'i rang rig la @173 sogs par 'char du mi rung yang yul sngon po snang ba'i gnyis snang can gyi sngon 'dzin la snang ba mi 'gal ba'i phyir/ rtog pa'i zhen gzhi de gnyis snang can gyi shes pa min pa la mi snang ste/ de snang ba na nges par gnyis snang yod dgos pa'i phyir te/ zhen gzhi de'i don spyi 'char ba na nges par gnyis snang yod dgos pa'i phyir/ zhen gzhi yin pa de snang ba na rtog pa de la gnyis snang yod dgos pa'i rgyu mtshan ni/ zhen gzhi de'i don spyi 'am sgra spyi rtog pa la 'char na nges par gnyis snang gi rnam pa can du 'char ba'i phyir ro/ /'di shes pa la mtshungs pa ma yin te rtog pa la spyi 'char ba na'ang myong tsam gyi rnam pa can du 'char ba'i phyir ro zhes pa ni/ rtog pa'i zhen gzhi yin pa de'i don spyi rtog pa la 'char ba na nges par gnyis snang yod dgos pa 'di shes pa la mi mtshungs te/ shes pa 'dzin pa'i rtog pa la shes pa'i don spyi 'char ba na gnyis snang yod mi dgos pa'i phyir/ de yang shes pa rang 'dzin pa'i rtog pa la snang ba na shes pa'i don spyi de yang myong tsam gyi rnam pa 'char te/ rang 'dzin rtog pa la shes pa'i spyi de shes pa'i rnam pa can du 'char ba'i phyir te/ shes pa de yul myong tsam dang rig tsam gang zhig /rang 'dzin rtog pa la shes pa dang de'i spyi gnyis gcig tu snang ba'am 'dra bar snang bas rtog pa la shes pa'i spyi 'char ba na myong tsam gyi rnam pa can du 'char ba yin no/ / kha cig gis shes pa'i spyi rtog pa la snang ba na gnyis snang gi rnam pa can du @174 'char dgos par thal/ rtog pa rang nyid la gnyis snang yod pa'i phyir zhe na/ ma khyab ste/ rtog pa la gnyis snang yod pa dang yul de gnyis snang gi rnam pa 'char tshul mi gcig pa ste so so yin/ gal te sngon po rtog pa'i zhen gzhi yin pa de rtog pa'i dbang gis bzhag pa yin pa'i phyir rtog bral la mi snang ngo snyam na zhes pa'i don ni/ gong du sems tsam pas rtog pa'i zhen gzhi yin pa de sngon 'dzin la snang ba khas len pa na/ gal te mdo sde pas sngon po rtog pa'i zhen gzhi yin pa de rtog pas bzhag pa tsam yin pa'i phyir rtog bral te sngon 'dzin mngon sum la mi snang ste/ rtog btags yin pa'i phyir/ khyab ste/ rtog pa'i snang yul dang rtag pa don gcig pa'i phyir snyam na/ mdo sde pa'i lugs la de ltar yin yang 'dir sems tsam pas sngon 'dzin tshad ma 'khrul shes su 'dod pas khyab pa med de/ sgyu ma rta glang yin pa rtog btags tsam yin yang rtog bral mngon sum la snang ba'i phyir ro/ / yang 'di shes pa la mtshungs pa ma yin te zhes pa'i don 'grel tshul la gnyis las/ dang po ni/ spyir gzhi grub na rtog pas rtogs pa'i yul yin pas khyab pas shes pa rtogs pa'i rtog pa yod par grub la/ de 'dra'i shes pa rtogs pa'i rtog pas rang yul shes pa de rtogs pa na myong ba gsal rig gi cha de rtogs shing rang la shes pa de'i don spyi snang yang don spyi de myong ba gsal rig dang 'dra bar snang ba tsam ma gtogs yul yul can rgyang chad lta bur mi snang la/ shes pa rtog pa'i zhen gzhi yin @175 pa de snang ba na nges par gnyis snang gi rnam pa can du 'char dgos pas shes pa dang mi mtshungs zhes 'grel/ gnyis pa ltar na sngon 'dzin mig shes lta bu rang nyams su myong ba'i rang rig gis myong tshul rtog pa la 'char ba na myong tsam mam gnyis snang nub pa'i rnam pa can du 'char ba ma gtogs de 'dra'i rtog pa de la de las gzhan pa'i snang tshul med pa'i phyir/ rtog pa de la de 'dra'i don spyi'i rnam pa 'char yang gnyis snang nub pa dang dbyer med gcig tu chu dang 'o ma 'dres pa ltar snang bas don spyi de gnyis snang nub pa las gzhan du mi snang ba'i phyir zhes 'grel zhing/ de'i mjug tu rtog pa la gnyis snang nges par yod pas mtshungs so zhes smra mi nus te/ /zhes gsungs pa dang 'brel na phal cher 'thad snyam/ des na ngo bo dang khyad par du btags pa'i kun brtags kyis stong pa yongs grub tu dgongs 'grel las gsungs pa de la gzung 'dzin rdzas gzhan bkag pa med pa yang min no zhes pa ni/ gong du rnam rig tsam du 'jug tshul bshad pa rnams kyi don bsdu yin/ sngon po rtog pa'i zhen gzhir rang mtshan gyis stong pa rtogs na gzung 'dzin rdzas gzhan dang sngon 'dzin mig shes 'khrul shes su rtogs pa dang/ de la gzung 'dzin rdzas gzhan bkag pa'i nus pa yod tshul bshad zin pa des na ngo bo dang khyad par du btags pa'i kun brtags kyis stong pa mdo sde dgongs 'grel las gsungs pa de la gzung 'dzin rdzas gzhan bkag pa med pa yang min no ste bkag pa'i nus pa yod ces pa'i don yin/ dpe phal cher nang yin no zhes yod kyang min no zhes pa nyid dag pa yin/ spyir kun @176 brtags la spyi mtshan thams cad dang nam mkha' la sogs pa du ma zhig yod kyang zhes pa'i don/ spyir ming brdas bzhag pa'i spyi mtshan thams cad dang ming brdas ma bzhag pa'i nam mkha' la sogs pa du ma zhig yod kyang zhes sbyar na 'brel che bar gsungs/. de ltar ma yin na spyir kun brtags la spyi mtshan thams cad ces pa'i khongs su nam mkha' sogs gtogs pas phyi ma nam mkha' sogs zhes smra na zlos skyon du 'gyur ba'i phyir/ phyi rol la ltos pa'i gzung 'dzin 'gog pa ni theg bsdus su rmi lam dang gzugs brnyan la sogs pa'i rigs pa dang/ nyi shu par rdul cha med 'gog pa'i rigs pa dang/ chos kyi grags pas gzung 'dzin gyi mtshan nyid skyes la 'dra ba 'gog pa'i rigs pa dang/ phyogs glang gis rdul 'dus pa dang phra rab gzung don yin pa 'gog pa'i rigs pa rnams yin no/ /zhes pa'i don rnams rim bzhin bshad na/ phyi rol 'gog pa'i rigs pa'am gzung 'dzin rdzas gcig tu sgrub pa'i rigs pa ni theg bsdus las nang gi skye mched drug rmi lam lta bu dang phyi'i skye mched drug gzugs brnyan lta bur gzhan dbang sgyu ma dang 'dra bar bshad pa'i skabs su gsungs pa de yin/ slob dpon dbyig gnyen gyis nyi shu par cha med 'gog pa'i rigs pa gsungs la/ de yang cha med 'gog pa'i rigs pa de phyi rol 'gog pa'i rigs pa yin te/ cha med bsags pa'i rags pa yod pa phyi rol don du grub pa yod tshul yin pa'i phyir/ nyan thos sde gnyis dang mu stegs pas rdul phra rab de shar nub kyi cha dang steng 'og gi cha med pas cha med du 'dod cing cha med kyis brtsams pa'i gzugs @177 rags pa khas blangs pas phyi don bzhed kyang/ de dang mig shes gnyis rdzas gcig ma yin te/ de'i rtsom gzhir gyur pa'i rdul cha med de mig shes kyi yul du byed mi thub pa'i phyir te/ cha med yin pa'i phyir/ rdul phra rab de la shar la sogs pa'i cha yod na cha bcas sam rags pa yin dgos te/ ji srid shar la sogs pa cha dang ma bral bar de srid du ni rdul phra ba'i yang mthar thug pa 'jog mi nus so/ /chos kyi grags pa'i gzung 'dzin gyi mtshan nyid skyes la 'dra ba 'gog pa'i rigs pa ni/ nyan thos sde pas phyi don yod pa'i sgrub byed du gzung 'dzin gyi mtshan nyid skyes la 'dra ba sgrub pa'i rigs pa de nyid chos kyi grags pas 'gog pas na gzung 'dzin gyi mtshan nyid skyes la 'dra ba 'gog pa'i rigs pa zer/ de yang nyan thos sde pa'i phyi don sgrub pa'i rigs pa ni/ sngon 'dzin mig shes chos can/ phyi rol don du gyur pa'i sngon po myong bar 'gyur ba yin te/ de las skyes shing de dang 'dra ba'i phyir zhes de las skyes shing de dang 'dra ba de phyi don yod pa sgrub pa'i rigs par bzhed/ sngon po de'i dmigs rkyen yin pas sngon 'dzin mig shes sngon po de las skyes pa dang sngon po'i rnam pa can yin pas de dang 'dra bar 'dod/ phyi don sgrub pa'i rigs pa de dpal ldan chos grags kyis 'gog tshul la/ slob dpon lha dbang blo dang bram ze chen mos 'gog tshul gnyis yod kyang gtso bo ni/ sngon 'dzin dran pa'i dran pa chos can/ phyi rol don du gyur pa'i sngon 'dzin myong bar 'gyur bar thal/ de las skyes shing de dang 'dra ba'i @178 phyir/ rtags der thal/ sngon 'dzin de sngon po las skyes pa bzhin sngon 'dzin dran pa yang sngon 'dzin las skyes/ de sngon po'i rnam pa can yin pa ltar dran pa de yang sngon 'dzin gyi rnam pa can yin pa'i phyir ro/ /mkhas grub TIk chen las/ sngon 'dzin myong ba chos can/ rtags bsal gong dang 'dra la rigs pa 'di zab par gsungs/ de yang rang lugs shes pa la phyi don gyi tha snyad mi byed kyang nyan thos sde gnyis ltar na phyi rol don du gyur pa'i shes pa myong bar thal/ de las skyes shing de dang 'dra ba'i phyir zhes khyab bsgrigs btang ba yin/ slob dpon phyogs kyi glang pos rdul cha med du ma 'dus pa'i cha can bum pa sogs dang rdul phra rab mig shes kyi gzung don te dmigs rkyen yin pa 'gog pa'i rigs pa rnams yin no/ /yum gyi mdo nas med ces gsungs pa thams cad kyis kun brtags 'gog pa theg bsdus las gsungs pa rnams la dgongs 'grel gyi kun brtags 'gog tshul 'di mi shes na/ gzung 'dzin rdzas gzhan gyi kun brtags kho na la bshad pas rnal 'byor spyod pa ba dag gi lugs la yang ches mi rigs pa du ma zhig smra dgos la zhes sogs kyi don ni/ lugs 'dir ngo bo dang khyad par du btags pa'i kun brtags kyis stong pa nges par khas len dgos pa ma gtogs gzung 'dzin rdzas gzhan gyis stong pa gcig po chos kyi bdag med du 'dod na yum rgyas 'bring bsdus gsum las gzugs med sgra med ces sogs thams cad rdzas gzhan med pa sha stag la dgongs zhes smras na rnal 'byor pa sems tsam pa'i lugs la ches mi rigs pa du ma zhig smra dgos shing/ gzhan yang yum gyi @179 mdo nas rtag pa'ang ma yin mi rtag pa yang min par gsungs pa rnams kyang rang 'dzin rtog pa'i zhen gzhir rang gi mtshan nyid kyis grub pa'i rtag pa ma yin mi rtag pa yang min zhes sbyar na 'grigs kyi gzhan du na rtag mi rtag gang du yang gzung sa med par gsungs pa rnams sbyor sa mi brnyed pas sems tsam pa'i lugs la dgongs gzhi bshad pa shin tu dka'o/ /dgongs 'grel gyi kun brtags 'gog tshul 'di mi shes pas smra mi rigs pa du ma zhig smra dgos 'byung ba de'i phyir bod snga rabs pa dag gis gang du yang gzung sa med pa ste rtag mi rtag dang yod pa'ang min med pa yang min par gsungs pa 'phags pa'i mnyam gzhag gi ngor dang/ 'di mi rtag pa dang 'di rtag pa min zhes so sor phye nas gzung sa yod par gsungs pa rjes thob kyi gnas skabs la dgongs so zhes smra ba ni zer rgyus phongs pa yin no/ / gnyis pa de la rtsod pa spong ba ni/ dgongs 'grel las/ gzhan dbang la kun brtags kyi ngo bo nyid du mngon par zhen pas nyon mongs pa skyed cing des las bsags nas 'khor bar 'khor la zhes sogs kyis 'chad/ de'i phyir nyan rang gis kyang chos kyi bdag med rtogs pa mdo 'di'i don du byed dam mi byed byed na sngar thun mong ma yin par bshad pa rnams dang 'gal lo/ /zhes pa'i sngar thun mong ma yin par bshad sa ni snga ma gnyis ni theg pa che chung so so ba yin la zhes pa de'o/ /mi byed na mdo'i don ji ltar bshad ce na zhes pa'i don/ kha cig des dgongs 'grel las gzhan dbang kun brtags kyi ngo bor grub par 'dzin pa 'khor ba'i rtsa ba ma rig par gsungs/ gzhan dbang kun brtags kyis stong par @180 rtogs na des skyed pa'i nyon mongs ldog par nus/ nyan rang dang byang sems gsum gas gzhan dbang kun brtags kyis stong par rtogs pa'i lam 'di kho na sgrub pa ste gzhan dbang kun brtags kyis stong pa'i stong nyid 'di kho na la brten nas rang rang gis myang 'das 'thob par gsungs shing/ dgongs 'grel las gzhan dbang des stong tshul sngar bshad pa de las gzhan pa yang ma gsungs pas rgyu mtshan de'i phyir nyan rang gis chos kyi bdag med rtogs par bzhed dam mi bzhed/ bzhed na sngar snga ma gnyis ni theg pa che chung so so ba yin la zhes pa dang 'gal la/ mi bzhed na mdo 'di las nyan rang 'phags pas chos kyi bdag med mngon sum du rtogs par thal/ de gnyis kyis dgongs 'grel gyi skabs nas bstan pa'i gzhan dbang kun brtags kyis stong par mngon sum du rtogs pa'i phyir te/ de mngon sum du ma rtogs par rang lam gyi myang 'das mi thob pa'i phyir te/ de thob pa la gzhan dbang kun brtags kyis stong par rtogs pa'i lam 'di kho na la brten nas thob dgos par gsungs pa'i phyir zhes 'dod/ de'i lan ni/ 'di la byang sar yang ngo bo dang khyad par du rtog pa dang ril por 'dzin pa'i rnam rtog gis zhes pa'i ril por 'dzin pa rigs mi mthun pa du ma tshogs pa'i tshogs pa 'dzin pa'i bdag 'dzin lta bu ste dper na nags tshal dang dmag la sogs pa bdag tu 'dzin pa lta bu'o/ / spros pa'i gnas skyed pa ni de gsum gyi dbang gis chos gzhan chos kyi bdag tu sgro 'dogs pa'i bdag 'dzin gzhan skyed par byed pa'o/ /de snga ma gnyis kyis yin pa'i tshul gyis stong pa yongs grub tu bya dgos na/ /zhes pa'i snga ma gnyis ni rang 'dzin rtog pa'i zhen gzhir rang mtshan @181 gyis grub par sgro 'dogs pa'i ngo bo dang khyad par la kun btags pa'i kun brtags dang gzung 'dzin rdzas gzhan gyi kun brtags gnyis yin la/ chos kyi bdag 'dzin yang rdul phra rab phyogs kyi cha med dang de bsags pa'i gzung ba dang zhes sogs kyi chos kyi bdag 'dzin ni chos kyi bdag 'dzin rags par gsungs/ yum gsum gnod 'joms las/ yongs grub stong gzhir byas nas gzhan gnyis kyis stong par bshad pa dang 'gal ba spong ba ni/ gnod 'joms kyis bshad pa ni rtog pa la rjod byed sgra spyi dang brjod bya don spyi snang ba ni kun brtags kyi mig dang zhes sogs kyis 'chad/ don bsdus na kun rtog la mig gi rjod byed kyi sgra spyi dang brjod bya don spyi snang ba de kun brtags kyi mig dang/ rtog pa la snang ba'i gzugs 'dzin mig shes rnam btags kyi mig dang/ mig gi chos nyid la mnyam par bzhag pa'i mnyam gzhag gi ngor rtog pa la snang ba'i sgra spyi dang don spyi dang rtog pa la snang ba'i gzugs 'dzin mig shes snang ba dang bral ba'i chos nyid de chos nyid kyi mig tu 'dod/ de 'dra'i chos nyid de rang mngon sum du rtogs pa'i mnyam gzhag gi ngor sgra don dang gzung 'dzin du snang ba'i gnyis snang dang bral ba la ngo bo nyid snga ma gnyis kyis ngo bo nyid mnyam gzhag gi yul de stong pa de yum gyi mdo las mig ni mig gis stong zhes pa'i don du bkral bas/ de 'dra'i stong tshul de chos nyid de mnyam gzhag gi ngor gnyis snang de dag dang bral ba la yongs grub snga ma gnyis kyis stong zhes bshad la/ de'i phyir de 'dra'i stong tshul de rnam rig pa'i lta ba mthar thug thos bsam gyis @182 gtan la 'bebs pa'i tshul ma yin pa'i phyir te/ bstan bcos 'di nyid las/ des na de gzhi'i lta ba chos kyi bdag med kyi yongs grub gtan la 'bebs pa'i tshul min no zhes gsungs/ yum gsum gnod 'joms zhes pa de chos can/ khyod rtsom pa po slob dpon dbyig gnyen ma yin par thal/ de ltar yin pa la gnod byed gsum dang bcas pa'i phyir/ 'di ltar de 'dra'i bstan bcos de las nyan thos kyi skyes bu chen po'i rnam rtog brgyad nyi khri rnam 'grel du kha 'phangs pa bzhin du der yod cing/ nyi khri rnam 'grel mdzad pa po btsun pa grol sde gang zhig /slob dpon dbyig gnyen gyis btsun pas mdzad pa'i bstan bcos su zhal 'phangs mdzad mi rigs pa'i phyir te/ dbyig gnyen gyi dus su btsun pa grol sde 'byung dgos yin pa'i phyir te/ dang po dbyig gnyen byon/ de'i rjes su dbyig gnyen gyi dngos slob blo brtan byon/ de'i rjes su blo bstan gyi dngos slob 'phags pa grol sde byon/ de'i rjes su 'phags pa grol sde'i dngos slob btsun pa grol sde byung ba yin pa'i phyir/ gzhan yang de dbyig gnyen gyis mdzad pa ma yin par thal/ dbyig gnyen gyis gzhan dbang yongs grub gnyis bden grub tu bsgrub pa gang zhig /khyod kyis de gnyis bden par grub pa rigs pas dpyad bzod du bkag pa'i phyir te/ bstan bcos 'di nyid las/ gzhan dbang dang yongs grub gnyis ka yin lugs dpyod pa'i rigs pas dpyad bzod bkag pa'i phyir zhes gsungs pa bden par grub pa'i rigs pas dpyad bzod du bkag pa'i zhes 'thad pa yin gsungs/ de yang gnod 'joms las/ 'di ltar khyod don dam @183 pa yid la byed pa sgom pa'i tshe 'du byed kyi mtshan ma'i dngos po mi snang bas don dam par ni de med kyi kun rdzob tu yod par shes par gyis shig ces gsungs pa'i phyir/ gzhan yang de dbyig gnyen gyis mdzad pa ma yin par thal/ dbyig gnyen gyis yum gyi mdo'i dgongs pa'i don dgongs 'grel gyis bshad pa bzhin du byed dgos par yum gyi mdo'i dgongs 'grel rnam bshad rigs pa las bshad pa dang bshad tshul ches shin tu mi mthun pas mdzad pa po dbyig gnyen ma yin no/ /'o na gnod 'joms mdzad pa po su zhe na/ daMShTrA se na ste kha che mche ba'i sdes mdzad pa'o/ 'di nyid las/ gnod byed gnyis pa'i skabs su gzhan dbang yongs grub gnyis ka yin lugs dpyod pa'i rigs pas dpyad bzod bkag pa'i phyir zhes sgras zin la de ltar gsungs mod/ don ni gong du gnod byed gsum bstan pa'i don bzhin du sbyar dgos par gsungs/ de ltar ma yin na/ der gzhan dbang dang yongs grub gnyis yin lugs dpyod pa'i rigs pas dpyad bzod bkag pa mi rigs pa'i gnod byed bstan dgos la/ de bstan na rang lugs la de yod par khas len dgos pa las de yod pa khas len pa'i nang pa'i grub mtha' smra ba su yang med pa'i phyir te/ de yod na grub mtha' rang rang gi lugs kyi gang zag gi bdag med rtogs pa'i rigs pa'am chos kyi bdag med rtogs pa'i rigs pas dpyad bzod pa'i chos zhig yod pa khas len dgos pas de 'dra'i dpyad bzod kyi chos grub mtha' su'i lugs la yang med pa'i phyir te/ dper na mdo sde pa'i lugs la de 'dra'i chos zhig yod na gang zag rang rkya thub pa'i rdzas @184 yod kyis stong pa rtogs pa'i rigs pas gang zag rang rkya thub pa'i rdzas su grub ma grub dpyad pa na dpyad mi bzod pa'i phyir te/ des dpyad bzod na gang zag gi bdag gis stong pa grub rgyu med par thal ba las des stong pa grub rgyu yod pa de rigs pa des dpyad mi bzod pa yin pa'i phyir/ 'o na chos gzhan la de ltar yin kyang gang zag gi bdag med phra mo bdag med rtogs pa'i rigs pas chos gzhan bdag tu grub ma grub dpyad pa na der ma grub pa rtogs pas rtog pa'i ngor yod pas rigs pas dpyad bzod du 'gyur snyam na/ de'i ngor yod kyang bdag med phra mo'ang rigs pas bdag tu grub ma grub dpyad pa na der ma grub pa rtogs rgyu yod pa'i phyir ro/ /khyad par du rnam rig pa'i lugs 'dir rigs pas dpyad bzod yod na mi rigs te/ 'di nyid las/ yin lugs dpyod pa'i rigs pas dpyad bzod pa'i don dam par yod pa des gtan mi 'dod pa ni stong pa nyid stong pa nyid dang don dam pa stong pa nyid dang 'dus ma byas stong pa nyid kyi skabs su de ltar 'dod pa la dmigs kyis phye ba'i dgag pa du ma brjod pas shes te mangs pas 'jigs nas ma bris so/ /zhes gsungs pa'i phyir/ gsum pa des gsung rab kyi drang nges 'byed pa'i tshul ni/ dngos po'i de kho na nyid slob dpon sku mched kyis bkral ba'i tshul de ltar byas na zhes sogs kyis 'chad/ de yang 'khor lo dang po dang bar pa gnyis drang don du 'chad tshul gyi khyad par ni/ dang po'i sgras zin gyi don ni de'i dgongs pa'i don du 'dod/ de'i dgongs gzhi ni de'i brjod bya'i don nam bstan don du mi rung/ 'khor lo bar pa'i sgras zin gyi don de de'i bstan don ma yin @185 zhing dgongs gzhi bstan don yin pa'i khyad par 'thad pa'i phyir/ 'khor lo dang po'i dgongs gzhi bstan don du mi rung te/ de'i dgongs gzhi la gnyis las rnam shes drug gi sa bon rnam shes bdun pa'i rten du gyur pa'i nus pa kun gzhi rnam shes kyi steng du phyi rol don snang ni bag chags bzhag pa smin pa la brten nas phyi rol don snang gi dbang shes skye ba yod pa la dgongs nas phyi rol don du grub pa gsungs pa gang zhig /de 'dra ba de 'khor lo dang po'i ched du bya ba'i gdul byas khas mi len pa'i phyir/ bar pa'i dgongs gzhi bstan don yin par thal/ dgongs gzhi mtshan nyid ngo bo nyid med pa gsum la dgongs nas gsungs pa gang zhig /de de'i bstan don gyi gtso bo yin pa'i phyir/ bar pa'i sgras zin gyi don bstan don ma yin par thal/ chos thams cad rang gi mtshan nyid kyis ma grub pa de'i ched du bya ba'i gdul byas khas mi len pa'i phyir te/ de'i ched du bya ba'i gdul bya yin na sems tsam pa dbang po shin tu rnon po yin pas khyab pa'i phyir te/ 'khor lo bar pa'i dgongs pa rtogs pa la 'khor lo mtha' ma la mi ltos par bar pa'i dgongs pa rang dbang du rtogs nus pas khyab pa'i phyir/ 'di drang don du 'chad tshul ni 'khor lo dang po las gzung 'dzin gsungs pa drang don du 'gro lugs dang ches shin tu mi 'dra ste zhes sogs dang/ gang la dgongs nas ngo bo nyid med par gsungs pa'i ngo bo nyid med tshul gsum ni yum gyi mdo'i don du 'chad pa'i phyir dang zhes sogs gsungs pa'i phyir/ 'di nyid las/ yum gyi mdo nges don du bzhed pa rnams kyang de yang 'jig rten gyi tha snyad du yin gyi don dam par ni ma @186 yin no/ /zhes pa nas re re la ma sbyar yang spyi la sbyar zin pas zhes pa'i bar thal 'gyur ba'i bzhed tshul gsungs / de lta min par myu gu'i skye ba tshad mas grub na don dam pa'i skye bar song nas/ /zhes sogs kyis jo nang pa dgag par mdzad do/ /dgongs 'grel las/ 'khor lo rim pa gsum gsungs pa ni 'khor gyi 'du thebs dang ston pa'i sku tshe'i tshigs la sogs pas 'jog pa min gyi brjod bya'i ngos nas yin no/ /zhes pa'i don la 'khor gyi 'du thebs zhes pa ni ston pas chos 'khor bskor ba'i 'du thebs dang po sogs dus chen gsum byung bas de'i dbang du byas nas kyang mi 'jog /ston pa'i sku tshe'i tshigs ni ston pa mngon par rdzogs par sangs rgyas pa'i dgung lo so lnga de nas lnga bcu bar du tshigs dang po/ de nas drug cu re lnga'i bar gnyis pa/ de nas brgyad cu'i bar gsum pa yin pas de'i dbang du byas nas kyang mi 'jog par brjod bya'i ngos nas 'jog par gsungs/ 'di dag la brten nas bla ma rje btsun pa'i gsung nang 'khor lo gsum po gang rung yin na dgongs 'grel nas gsungs pa'i 'khor lo gsum po gang rung yin pas khyab par bzhed/ dang por wa ra NA sir gang zag gi bdag med gsungs shing phung po la sogs pa'i chos nyung shas shig ma gtogs pa bden par grub pa ma bkag cing bden par yod pa mang du gsungs pa'i skor gcig go / zhes pa'i don 'chad tshul la mi 'dra ba du ma snang bas rje btsun chos rgyan gyis/ phung po la sogs pa'i 'grel rkang bdun gyi nang nas chos khams dang chos kyi skye mched sogs nyung shas shig ma gtogs bden par grub pa ma bkag cing bden par grub pa mang du gsungs pa'i skor @187 gcig go zhes gsungs/ paN chen gyis 'di thal 'gyur ba'i shan zhugs pa yin gsungs/ gung thang gis phung po la sogs pa'i 'grel rkang brgya rtsa brgyad kyi nang nas chos nyung shas 'grel rkang bdun ma gtogs de'i lhag ma rnams la bden par grub pa ma bkag cing 'grel rkang bdun la bden par yod pa mang du gsungs pa'i skor gcig go zhes gsungs/ 'grel pa 'ga' zhig gis lung de'i don dri ba zhus pa'i 'khor lo dang po des phung sogs kyi chos la dgag bya nyung shas gang zag gi bdag la bden grub tu byas pa'i bden grub de bkag pa ma gtogs rang 'dzin rtog pa'i zhen gzhir bden grub tu bstan zhes 'grel lo/ /sher phyin man ngag las mdo gang dag gi don sgra ji bzhin pa yin pa de ni nges pa'i don kho na'o zhes sogs kyi don ni/ 'dir sher phyin man ngag ces pa ni sems tsam pa'i slob dpon chen po shAnti pas mdzad pa yin kyang 'dis 'khor lo gsum la drang nges 'byed tshul de thogs med sku mched kyi dgongs pa dang cung zad mi mthun pas 'dir zur du gsungs dgos pa'i rgyu mtshan yang de yin gsungs/ de'i tshul ni sher phyin man ngag las/ gang gis don nges she na mdo de nyid dang de las gzhan pa dang gnyis kas kyang ngo zhes gsungs pas mdo rang nyid nges don du shes tshul la gsum yod par bzhed de/ gsum ni mdo rang nyid nges don yin pa rang kho na la brten nas nges pa dang/ gzhan la brten nas nges pa dang/ rang gzhan gnyis ka la brten nas nges pa gsum du 'dod do/ / dang po ni dgongs 'grel dang lang gshegs gnyis la 'dod de mdo de gnyis las gzhan dbang yongs @188 grub bden grub dang kun brtags bden med du legs par gsal bar phye bas rang la brten nas rang nyid nges don gyi mdor shes snyam du sems pa'o/ /gnyis pa gzhan la brten nas rang nyid nges don gyi mdo yin par shes pa ni brgyad stong pa ste/ 'di nges don gyi mdo yin pa gzhan dgongs 'grel gyis brgyad stong pas gzhan dbang yongs grub bden par med pa bstan pa'i dgongs pa bkral nas brgyad stong pa nges don gyi mdor shes dgos shing rang nyid la byams zhus kyi le'u med pa'i gnad kyis so/ /gsum pa ni nyi khri sogs la 'dod de rang nyid nges don gyi mdo yin pa rang la brten nas nges nus te/ nyi khri byams zhus kyi le'us mtshan nyid gsum la bden par yod med gsal bar phye bas de la brten nas nyi khri rang nyid nges don gyi mdor nges nus/ gzhan dgongs 'grel gyis kyang nyi khri nges don gyi mdor bsgrub pa yin snyam du bsams so/ de ltar shAnti pas byams zhus kyi le'u'i mtshan nyid gsum gyi rnam gzhag dang dgongs 'grel gyi mtshan nyid gsum gyi rnam gzhag gnyis don gcig tu bzhed do/ /de gnyis don gcig na rnam gzhag de ltar 'thad kyang rnal 'byor spyod pa'i slob dpon chen po dbyig gnyen gyis yum gyi mdo drang don du dgongs 'grel la sogs pa mdo sde gzhan gyis bsgrubs nas yum gyi mdo sgra ji bzhin pa la snga phyi 'gal ba bstan pa na byams zhus kyi le'us yum gyi mdo drang don du ma bsgrubs pas thogs med sku mched kyi dgongs pa min par gsungs te/ 'di nyid las/ sku mched kyi dgongs pa min no zhes gsungs/ 'o na dbyig gnyen gyis yum gyi mdo sgra ji @189 bzhin pa la 'gal ba bstan pa'i gzhung tshig ji ltar yin zhe na/ rnam bshad rigs pa las/ gal te ngo bo nyid med pa la sogs pa'i tshig rnams sgra ji bzhin pa yin na 'di thams cad dang 'gal bar 'gyur te zhes sogs kyi gzhung tshig go /de gnyis don gcig na ngo bo nyid med par smra ba'i lugs la'ang chos thams cad don dam par ngo bo nyid med la tha snyad du yod pa yum gyi mdo'i dgongs don du bshad du mi rung ba rnam rig pa ltar 'gyur zhing dpyad gzhi yang shin tu 'gangs che bas dbu ma'i skabs su bshad par bya bar gsungs pa'i dbu ma'i skabs ni dgongs 'grel dang 'gal ba spong ba dang de dang byams zhus kyi le'u mi mtshungs par bstan pa'o zhes pa'i skabs so/ /slob dpon shAnti pa ni rgyan rtsa ba'i dgongs pa sems tsam du thog mar 'grel ba po yin gsungs/ gnyis pa blo gros mi zad pas bstan pa la brten nas drang nges 'byed pa'i phyogs la gnyis/ mdo sde nas ji ltar gsungs pa dgod pa dang/ de'i don ji ltar bkral ba'o/ /dang po ni/ mgon po klu sgrub yab sras kyis drang nges 'byed pa'i mdo'i khungs dngos su smos nas drang nges phye ba med kyang zhes sogs kyis 'chad/ dpal mgon 'phags pa klu sgrub kyi man ngag ni rje btsun 'jam dpal dbyangs la brten cing drang nges 'byed pa'i mdo'i khungs dngos su smos nas gsungs pa med kyang don gyis bshad pa yod de/ de yang tshig gsal sogs su blo gros mi zad pa'i mdo khungs su byas nas drang nges 'jog par gsungs pas de 'dra'i mdo de 'dir yang drang nges 'byed pa'i mdo'i khungs su bya dgos par gsungs/ blo gros mi zad pa'i mdo las/ nges pa'i @190 don gyi mdo sde ni gang drang ba'i don gyi mdo sde ni gang zhe na/ /zhes pas drang nges 'jog tshul gsum gsungs pa'i dang po ni/ kun rdzob bden pa dngos bstan bstan bya'i gtso bor byas nas bstan pa'i mdo drang don dang/ don dam bden pa dngos bstan bstan bya'i gtso bor byas nas ston pa'i mdo nges don gyi mdor mdzad nas drang nges su gsungs/ gnyis pa ni mdo sde gang dag tshig dang yi ge sna tshogs pa bstan pa de dag ni drang ba'i don zhes bya'o/ / zhes sogs dang/ gsum pa ni mdo sde gang dag bdag dang sems can dang zhes sogs kyis bstan/ 'di dngos bstan la sbyar dgos/ 'di la gnyis bshad pa'i gnad kyis gong ma la yang chos dang gang zag gnyis ka yod par ston pa dgos so zhes pa'i 'di ni/ mdo sde gang dag dngos po stong pa nyid dang mtshan ma med pa dang zhes sogs kyi mdo 'di yin la/ gnyis bshad pa ni mdo sde gang dag dngos po stong pa nyid dang zhes pa nas ma skyes pa dang zhes pa'i bar gyis chos kyi bdag med bstan/ sems can med pa dang zhes pa nas bdag po med pa rnam par thar ba'i sgo ston pa de dag ni nges pa'i don zhes bya ste zhes pa'i bar gyis gang zag gi bdag med bstan/ mdo 'di la bdag med gnyis bshad pa'i gnad kyis gong ma mdo sde gang dag bdag dang sems can dang srog dang zhes sogs kyi mdo des kyang gang zag dang chos gnyis ka bstan pa yin gsungs/ gnyis pa de'i don ji ltar bkral ba'i tshul la gnyis/ mgon po klu sgrub kyis mdo'i don ji ltar bkral ba dang/ de'i rjes su 'brang ba rnams kyis ji ltar bkral @191 ba'i tshul lo/ /dang po la gnyis/ rten 'byung gi don rang bzhin med pa'i don du bkral tshul dang/ de nyid gsung rab kyi don gyi snying por bsngags pa'i tshul lo/ /dang po ni/ mdo las skye 'gag la sogs pa yod pa dang med pa gnyis ka'ang bshad la zhes sogs kyis 'chad/ 'dir dngos su gnyis ma gtogs ma gsung kyang 'gal ba med par gsungs/ don dam par ram rang gi mtshan nyid kyis skye ba sogs med par bshad pa'i zhes pa nas de dag gis dben pa nyid de kho na nyid mthar thug par 'chad pa yang rigs na zhes pa'i bar rnam rig pas yum gyi mdo las ngo bo nyid med par gsungs pa sgra ji bzhin par 'dzin mi rigs pa'i tshul bstan/ des na rgyu rkyen la rag las pa nyid kyis rang gi mtshan kyis grub pa med pa yin la zhes pa 'dis rten 'byung stong pa'i don du gsungs/ de'i tshul ni rgyu dang rkyen la brten nas byung ba'i rgyu mtshan gyis rang bzhin gyis stong par sgrub pa'i gnad kyis so/ /'di nyid las/ rang gi mtshan nyid kyis ma grub par mthong na mtshan nyid gsum ga la skur 'debs kyi lta ba skye bar dgongs 'grel las gsungs pa ni/ de ltar gang mthong thams cad la min gyi blo mchog dang mi ldan pa'i gdul bya la yin no/ /zhes gang mthong thams cad gsungs kyang gong 'og thams cad zer dgos sam dpyad gsungs/ de ni rang mtshan gyis ma grub pa mthong na mtshan nyid gsum la skur 'debs su gsungs pa gong ma rnam rig pa dang 'og ma thal 'gyur ba'i skabs thams cad la @192 min gyi gong ma sems tsam pa'i skabs su yin par gsungs zhes 'grel dgos/ gong 'og ni gzhung 'di'i gong 'og la go dgos so/ /rtsa shes las/ gal te 'di kun mi stong na/ /zhes sogs kyis stong pa rten 'byung gi don du gsungs/ de'i tshul ni rang bzhin gyis mi stong na skye 'jig dang 'phags pa'i bden pa bzhi la sogs pa mi rung zhing rang bzhin gyis stong pa'i rgyu mtshan gyis dngos po rnams la skye 'jig byung ba yin pa'i phyir/ 'di'i phyogs snga ni nyan thos sde gnyis yin/ tshig gsal las/ slob dpon gyis drang ba dang nges pa'i don gyi mdo'i rnam par dbye ba bstan par bya ba'i phyir dbu ma'i bstan bcos 'di mdzad pa yin no/ /zhes 'di sgra 'jug yul ni dbu ma rtsa ba shes rab yin de ltar na tshig gsal ni rtsa she'i 'grel pa'o/ /'dir rtsa shes brtsams pa'i dgos pa la stong pa rten 'byung gi don yin pa'i rgyu mtshan gyis dngos po la sogs pa'i chos rnams rang bzhin gyis ma grub par bstan pa'i gsung rab thams cad nges don gyi gsung rab tu shin tu 'grub pa la dgongs nas rtsa shes brtsams la/ gzhan yang der ma zad the tshom dang log pa'i shes pa dag rigs pa dang lung gnyis kyi sgo nas bsal bar 'dod nas slob dpon klu sgrub kyis rtsa shes brtsams te/ the tshom ni rang bzhin gyis med par bstan pa'i dgongs pa mi shes pas nges pa'i don ni gang zhig yin drang ba'i don ni gang zhig yin snyam du the tshom du gyur pa'o/ /'ga' zhig ni blo zhan pas drang ba'i don du 'dzin pa'i log pa'i shes pa'o/ /de'i phyir gang zag la @193 rang bzhin bkag nas phung po la phal cher ma bkag pa dang/ /zhes pa'i rang bzhin ni rang rkya thub pa'i bdag la rang bzhin du byas pa'i bdag de gang zag la bkag pa dang/ phung po la phal cher ma bkag pa dang/ /zhes pa'i ma bkag pa ni rang gi mtshan nyid kyis grub pa la bya dgos par gsungs pas rang bzhin gnyis so sor gzhag dgos la/ 'di ni sngar sems tsam pa'i skabs su phung po la sogs pa'i chos nyung shas shig ma gtogs pa bden par grub pa ma bkag cing bden par yod pa mang du gsungs pa'i skor gcig go /zhes pa'i don du 'grel bar bstan bcos 'ga' zhig tu snang/ dwogs gcod ni/ 'o na don smra sde gnyis la gang zag rang bzhin gyis grub par bkag kyang phung po rang bzhin gyis grub pa ma bkag par thal/ rin chen phreng ba las/ kha cig la ni gnyis bstan pa/ /zhes dang/ 'di nyid las/ de'i phyir gang zag la rang bzhin bkag nas phung po la phal cher ma bkag pa dang/ /zhes gsungs pa'i phyir/ 'dod na/ don smra sde gnyis la gang zag rang bzhin gyis ma grub par bstan par thal/ 'dod pa'i phyir/ 'dod na ha cang thal lo/ /de lta na'ang theg pa mchog gi rigs can la yang las 'bras sogs la chad par lta ba'i nyen chung ba rnams la ni zhes pa'i theg pa mchog gi rigs can ni rnam rig pa la sogs pa'o/ /gdul bya shin tu mang po zhig theg pa chen po la bkri ba'i thabs mkhas chen por snang ngo/ /zhes pa'i theg pa chen po ni rang bzhin med par khas len pa'i theg chen pa'o/ /de dag gi dgongs pa 'grel @194 ba'i bstan bcos mdzad pa pos ji ltar bkral ba ltar gyi don de rang lugs la mi bzhed pa'i bstan bcos kyang gdul bya'i dbang gis de'i bsam pa dang mthun par bkral bar khong du chud par bya'o/ /zhes pa'i don ni slob dpon thogs med kyis dgongs 'grel gyi dgongs pa sems tsam du bkral ba'i bstan bcos byang sa dang bsdu ba la sogs pas ji ltar bkral ba yang gdul bya sems tsam pa'i bsam pa dang mthun par bkral ba yin gyi slob dpon rang gi bzhed pa min pa'i khyad par shes dgos par gsungs/ de ltar gsungs pa de slob dpon rang gi bzhed pa ma yin te/ rang nyid dbu ma thal 'gyur ba yin pa'i phyir/ gnyis pa de nyid gsung rab kyi don gyi snying por bsngags pa'i tshul ni/ de ltar rgyu dang rkyen la brten nas 'byung ba'i gtan tshigs nyid kyis chos rnams la rang gi mtshan nyid kyis grub pa'i rang bzhin med do/ /zhes rang bzhin gyis stong pa'i don rten 'byung gi don du gsungs pa 'di nyid rang gi ston pa smra ba gzhan las khyad par du 'phags pa'i 'phags chos bla na med par gzigs nas zhes sogs kyi don ni/ rang re rnams kyi ston pa ni ston pa bla na med pa/ smra ba bla na med pa/ mkhyen pa bla na med pa/ brtse ba bla na med pa'i khyad par gyi chos dang ldan pa'i phyir/ de chos can/ ston pa bla na med pa yin te/ sngon ston pa 'jig rten du ma byon pa'i dus su 'jig rten gyi dregs pa'i lha brgyad la sogs pa gang gis kyang ston par mi nus pa'i thar pa dang thams cad mkhyen pa'i lam phyin ci ma log par gdul bya la ston par mdzad pa'i phyir/ smra ba bla na med pa yin te/ dregs pa'i lha de rnams @195 sus kyang smra bar mi nus pa'i rten 'byung stong pa'i don dang stong pa rten 'byung gi don du gsungs pa'i smra ba bla na med pa yin pa'i phyir/ mkhyen pa bla na med pa yin te/ ji lta ji snyed kyi chos thams cad ye shes skad cig ma gcig gis dus gcig tu mngon sum du mkhyen pa'i phyir/ brtse ba bla na med pa yin te/ 'khor ba ji srid ma stong gi bar du sems can thams cad la khyod kyi 'phrin las gdul bya la btang snyoms cung zad kyang mi mnga' ba'i phyir/ ston pa'i gsung rab thams cad ni kun rdzob dang don dam pa'i bden pa gnyis la brtsams nas 'jug la/ de gnyis kyi rnam dbye mi shes na bstan pa'i de kho na nyid mi shes pas zhes sogs kyi don ni/ spyir kun rdzob la drang don dang don dam la nges don bzhag dgos pas/ kun rdzob la drang don zhes brjod pa'i rgyu mtshan yod de/ ston pas kun rdzob pa'i chos can sna tshogs pa ji snyed cig gsungs pa thams cad ni nges don don dam bden pa nyid rtogs pa la drangs pa'i phyir du gsungs pa'am de rtogs pa'i thabs su gsungs pas na de ltar brjod pa'i phyir/ don dam bden pa la nges don zhes brjod pa'i rgyu mtshan yod de/ ston pa'i gsung rab las chos can kun rdzob pa gsungs pa thams cad nges bya mthar thug don dam bden pa rtogs thabs su gsungs pa yin zhing nges bya mthar thug don dam bden pa kho na yin pa'i rgyu mtshan gyis de ltar bshad pa'i phyir/ ston pa'i gsung rab ji snyed cig bka' bstsal pa thams cad brjod bya bden gnyis gang rung zhig la brtsams nas gsungs pa sha @196 stag yin la/ kun rdzob dang don dam gang yin gyi rnam dbye ma shes na ston pa'i bstan pa ji ltar yin mi shes pas bden gnyis kyi sgo nas gsung rab 'grel tshul yang de nyid yin par gsungs/ /zhes gsungs pa bzhin du don dam bden pa bzhed pas zhes sogs kyi don ni/ shing rta'i srol gnyis te dbu sems gnyis dgag gzhi rten 'brel la dgag bya'i bdag rnam par bcad tsam la don dam bden pa 'jog par mtshungs pa bstan pa yin/ rtsa shes las/ gang dag stong pa nyid lta ba/ /de dag bsgrub tu med par gsungs/ /zhes pas gang dag stong pa nyid bden grub tu lta ba'i gang zag de dag la lta ba de gsor mi rung ba gsungs zhes pa'o/ /dper na me gsod byed chu yin la/ de la me 'bar na me gsod byed kyi chos gzhan med pa bzhin du bden 'dzin gyis bcings pa'i nad pa la nad de las thar ba'i stong pa nyid kyi sman thun gcig yod pa de bden grub tu bzung na nad de la phan pa'i thabs gzhan med par gsungs pa'i don no/ / stong thun zhes pa'i don yang 'di yin gsungs/ gsor mi rung ba de la slar sor chud pa'i thabs med par gsungs/ phan 'dogs pa ltar bcos nas 'drid pa la/ /zhes pa'i 'drid pa ni bslu ba'i ming gi rnam grangs so/ /dbu ma par rlom pa mang po yang de dang rang nyid kun rdzob rnams rang gi ngo bos stong par 'dod pa gnyis mthun par 'dod pa gnyis ka yang rang stong gi don phyin ci log tu gzung ba yin zhing/ /zhes pa ni snga rabs pa 'ga' zhig dngos po rnams rang bzhin gyis stong pa de kun rdzob chad stong du 'dod cing/ dbu ma par rlom pa 'ga' zhig gis ni de 'dra'i stong tshul de dang rang nyid @197 kyi kun rdzob pa'i chos rnams rang nyid rang nyid kyis stong par khas len pa gnyis mthun par 'dod la de ltar 'dod pa gnyis ka'ang rang stong gi don phyin ci log tu gzung ba yin zhes pa'o/ / srol phye ba dang po ltar yin na de tsam du mi dka'o/ /zhes pa'i don ni srol phye ba dang po rnam rig pa'i 'dod pa ltar gyi rten 'brel rtag chad dang bral ba la byed na de tsam du mi dka' bas/ gting rtogs dka' bar mkhyen gyur nas/ /zhes pa'i rtogs dka' ba'i gnas ni thal 'gyur ba'i 'dod pa ltar gyi rten 'brel rtag chad dang bral ba la bya dgos par gsungs/ gnyis pa de'i rjes su 'brang ba rnams kyis ji ltar bkral ba'i tshul ni/ slob dpon 'di yi rjes su 'brang ba'i gtso bo ni slob dpon 'phags pa lha yin te zhes pa nas 'chad/ slob dpon gnyis ka'i gzhung la gzhung phyi mo zhes pa'i slob dpon gnyis ni klu sgrub dang 'phags pa lha yin la/ de yang slob dpon 'phags pa lha ni gling phran gzhan zhig gi rgyal po'i sras yin zhing khong gis 'phags yul du dam chos dar ba mkhyen te 'phags yul phyogs su tshong pa dang lhan du byon/ de nas yul lho phyogs be ta'i yul zhes pa ste ku sha skyes pa'i yul na slob dpon klu sgrub gzhug gnas su byon pa na slob dpon dang zhal mjal bas slob dpon gyis nga'i nye gnas byed dam gsungs pa na 'phags pa lhas zhal gyis bzhes/ de nas slob dpon gyi drung du zab mo dbu ma'i lta ba gsan sbyong mdzad pa yin gsungs/ de yang slob dpon dpa' bo dang klu'i byang chub la sogs pa mkhas pa'i dbang @198 po mang po yod mod kyang 'di dag gis bkral ba'i dbu ma'i bstan bcos 'gyur ba mi snang bas zhes pa ni slob dpon dpa' bo dang klu'i byang chub sogs kyis mdzad pa'i dbu ma'i bstan bcos mang po yod kyang bstan bcos de dag bod yul du bsgyur ba mi snang zhes pa'o/ / 'on kyang jo bo chen po'i zhal 'don mdzad rgyu'i nang slob dpon dpa' bos mdzad pa'i don dam byang chub sems sgom zhes pa zhig yod gsungs/ de las gzhan pa'i gzhung yod pa rnams kyi lugs khyad par che ba rnams bshad par bya ba 'di la gnyis las/ dbu ma rang rgyud pas 'phags pa'i gzhung ji ltar bkral ba dang/ dbu ma thal 'gyur bas 'phags pa'i gzhung ji ltar bkral ba'o/ /dang po la gnyis/ slob dpon legs ldan 'byed kyis ji ltar bkral ba dang/ zhi ba 'tsho yab sras kyis ji ltar bkral ba'o/ /dang po la gsum/ don dam par gang zag dang chos la rang bzhin yod med ji ltar bshad pa dang/ tha snyad du phyi rol gyi don yod med ji ltar bshad pa dang/ don dam par yod pa 'gog pa'i rigs pa'i gtso bo gang la byed bstan pa'o/ /dang po ni/ slob dpon gyi dbu ma'i bstan bcos rnams kyi gtso bo ni/ rtsa ba shes rab yin la/ /zhes pa'i don ni spyir slob dpon gyis mdzad pa'i bstan bcos la rigs tshogs dang/ bstod tshogs/ gtam tshogs sogs du ma yod/ rigs tshogs ni rtsa shes sogs lnga'am drug go /bstod tshogs ni 'jig rten las 'das pa'i bstod pa rang re'i ston pa la rten 'brel gsungs pa'i sgo nas bstod pa'i bstan bcos rnams so/ /gtam tshogs ni bshes pa'i spring yig la sogs pa'o/ / @199 de rnams kyi nang nas dbu ma rtsa ba shes rab ni dbu ma'i bstan bcos kyi gtso bo yin par gsungs/ de la 'grel pa ga las 'jigs med dang/ de ba shar ma sogs brgyad yod/ legs ldan 'byed ni de ba shar ma'i 'grel pa dkar po rnam par 'char ba'i rjes su 'brangs nas bkral bar spyan ras gzigs brtul zhugs kyis bshad do/ /de la de ba ni lha shar ma ni dge sbyong zhes don bsgyur du byas na lha yi dge sbyong zhes bya zhing des mdzad pa'i 'grel ba dkar po rnam par 'char ba zhes pa ni mtshan no/ /spyan ras gzigs brtul zhugs ni sku tshe'i stod la phyi rol pa yin la/ de dang slob dpon legs ldan 'byed gnyis rtsod pas su pham kyang de gzhan de'i bstan pa la bzhugs par dam bcas ste rtsod pa na spyan ras gzigs brtul zhugs pham zhing/ de nas khong rab tu byung bar brtsams te skra bcad pa na gcod byed kyis dbu skra bcad ma thub pas de la legs ldan gyis nga'i lha spyan ras gzigs la yang ral pa yod pas khyed rang de'i brtul zhugs te lugs srol byas nas dge bsnyen gyi sdom pa longs shig ces gsungs pa na de'i mtshan la yang spyan ras gzigs brtul zhugs zhes grags par gsungs/ legs ldan 'byed rang rgyud pa'i shing rta'i srol 'byed yin kyang rtsa shes dgongs pa thog mar rang rgyud du 'grel ba po ma yin te/ de'i gong du de ba shar ma ste lha yi dge sbyong gis rtsa shes dgongs pa rang rgyud du bkral zin pa'i phyir/ ga las 'jigs med rtsa she'i rang 'grel ma yin te/ rang 'grel yin na klu sgrub rang nyid kyis brtsams pa'i @200 bstan bcos yin dgos pa las/ der bzhi brgya pa'i lung drangs pa gang zhig /klu sgrub kyis rang gi slob mas mdzad pa'i lung shes byed du 'dren mi rigs pa'i phyir rang 'grel gyi don med do/ /rgyu mtshan der ma zad sangs rgyas bskyangs la sogs pa'i rtsa shes kyi 'grel pa'i nang 'grel pa de'i zur tsam yang ma byung ba'i phyir ro/ /bzhi brgya pa'i lung ni/ nyan pa po dang mnyan bya dang/ /smra po 'byung ba shin tu dkon/ /de'i phyir mdor na 'khor ba ni/ /mtha' yod ma yin mtha' med min/ /zhes pa'i tshigs bcad kyi don ni nyan pa po'i gang zag dang mnyan bya'i chos mtshan nyid dang ldan pa gcig byung yang de la smra ba po'i gang zag mtshan nyid dang ldan pa zhig 'byung ba shin tu dkon pa yin la/ rgyu mtshan de'i phyir nyan pa po'i gang zag mtshan nyid dang ldan pa la mnyan bya'i don mtshan nyid dang ldan pa zhig smra ba po'i gang zag mtshan nyid tshang ba zhig gis smra ba byung na 'khor ba la mtha' yod la de rnams ma byung na 'khor ba la mtha' med pa dang 'dra zhes pa'o/ /de'i rgyu mtshan rnams shes par bya dgos so/ /shes rab sgron ma las/ de la 'dir gal te gzugs zhes bya bar yid la brjod pa dang tshig tu brjod pa'i kun brtags pa'i ngo bo nyid gang yin pa de med do zhe na ni/ /zhes sogs kyi don rim pa bzhin du/ rnam rig pas kun brtags rang gi mtshan nyid kyis ma grub par khas blangs pa la legs ldan 'byed kyis kun brtags rang gi mtshan nyid kyis ma grub ces pa kun brtags 'dogs byed kyi ming dang rtog pa la byed @201 dam de gnyis kyis btags pa'i kun brtags rang la byed/ dang po kun brtags 'dogs byed la byed na dngos po la skur ba 'debs pa yin te/ 'dogs byed kyi sgra dang rtog pa la skur ba 'debs pa'i phyir ro zhes pa'o/ /yid la brjod pa ni kun brtags 'dogs byed kyi ming ngam kun brtags byed kyi rtog pa'o/ /tshig tu brjod pa ni kun brtags 'dogs byed kyi brda'am 'dogs byed kyi sgra la byed do/ /rtog pa dang ming la byed na de gnyis phung por gtogs pas zhes pa'i phung po ni 'du byed kyi phung po'o/ /'dis ni slob dpon legs ldan 'byed kyis rang gi mtshan nyid kyis grub par bzhed pa gsal bar bstan/ bstan bcos 'dir de yang dgongs 'grel las rang gi mtshan nyid kyis ma grub pas mtshan nyid ngo bo nyid med par bshad cing zhes gsal yang mtshan nyid ngo bo nyid med par ma bshad cing zhes zer dgos par gsungs/ 'di nyid las/ der ming ldan min du bshad la zhes gsal yang don ni ldan min 'du byed du bshad ces pa'o/ /yang kun brtags dngos por med pas chos gzhi ma yin la zhes ga gzhir gsal yang ba bzhi yin par gsungs/ de yang yin te kun brtags dngos por med pas rgyu mtshan gyis ming dang/ rgyu mtshan dang/ rnam par rtog pa dang/ yang dag pa'i ye shes dang bzhi ma yin pa bshad pa'i phyir/ gnyis pa btags don kun brtags rang nyid rang gi mtshan nyid kyis ma grub ste/ dper na ming rtog gnyis kyis thag khra la sbrul du btags pa'i btags don rang mtshan gyis ma grub pa bzhin no zhe na/ de ltar ma yin te/ gzugs rung la tshor ba zhes btags pa'i btags don @202 rang mtshan gyis ma grub kyang gzugs rung la gzugs su btags pa'i btags don rang mtshan gyis grub pa yin te/ dper na thag khra la sbrul du btags pa'i btags don rang mtshan gyis ma grub kyang sbrul 'khyil ba la sbrul du btags pa'i btags don rang mtshan gyis grub pa bzhin yin pa'i phyir/ de la rnam rig pas/ kun brtags mtshan nyid ngo bo nyid med par ston pa'i mdo'i don 'chad pa la skyon de gnyis mi 'jug par thal/ gzugs rung la gzugs zhes btags pa'i btags don don dam par rang mtshan gyis ma grub pa kun brtags mtshan nyid ngo bo nyid med pa'i don du 'chad pa'i phyir zer na/ 'o na kun brtags mtshan nyid ngo bo nyid med pa'i mdo'i don 'chad tshul dbu ma'i rjes su 'brang rigs par thal/ khyod kyis ngo bo dang khyad par la kun btags pa'i kun brtags mtshan nyid ngo bo nyid med pa'i don 'chad pa gang zhig /de 'chad pa la dbu ma'i rigs pa la ltos dgos pa'i phyir te/ de mtshan nyid ngo bo nyid med pa'i don ngo bo dang khyad par la kun btags pa'i kun btags don dam par mtshan nyid ngo bo nyid med pa la byed dgos pa gang zhig /de'i don shes pa la sems tsam gyi rigs pa la brten nas shes mi nus par nges par dbu ma'i rigs pa mi 'dra ba zhig la ltos dgos pa'i phyir/ des na ngo bo dang khyad par du kun btags pa'i kun brtags mtshan nyid ngo bo nyid med par ston 'dod pas ni dbu ma'i rigs pa 'dod par bya'o/ /zhes pa'i sbyor tshul 'dis ni dngos po bden stong du bsgrub pa'i 'thad sgrub dang chos nyid dang ltos pa'i rigs pa gsum don gyis bstan to/ / @203 rigs pa ni rtsa shes las/ brjod par bya ba ldog pa ste/ /sems kyi spyod yul ldog pas so/ /ma skyes pa dang ma 'gags pa/ /chos nyid mya ngan 'das dang mtshungs/ /zhes sangs rgyas rnams kyis chos gang yang don dam par ma bstan pa yin te/ don dam par brjod par bya ba ste chos bstan par bya ba ldog pa'i phyir te/ don dam par sems kyi spyod yul las ldog pa ste med pa'i phyir/ der thal/ don dam par ma skyes pa dang ma 'gags pa dang rang bzhin gyis mya ngan las 'das pa chos nyid rnams dgag bya bden grub bcad tsam du mtshungs pa'i phyir zhes pa'i don no/ /dgongs 'grel las rang gi mtshan nyid kyis rnam par gnas pa ni ma yin zhes pa'i rang mtshan gyis mi gnas pa dang ming dang brdas rnam par bzhag tsam zhes pa'i ming brdas bzhag tsam nges pa la dbu ma'i rigs pa 'di lta bu la ltos dgos zhes pa'o/ /spyir dbu ma'i rigs pa la bzhi yod de/ ltos pa'i rigs pa/ bya ba byed pa'i rigs pa/ 'thad pa sgrub pa'i rigs pa/ chos nyid kyi rigs pa rnams su yod pa'i phyir/ dang po ni/ theg pa gsum gyi tshul bzhin yid la byed pa la brten nas yang dag pa'i lta ba skyed pa ltos pa'i rigs pa dang/ gnyis pa ni/ de 'dra'i yang dag pa'i lta bas theg pa gsum po rang rang gi 'bras bu thob pa bya ba byed pa'i rigs pa dang/ gsum pa ni/ rten 'brel gyi rtags las myu gu bden med du rtogs pa'i rigs pa dang/ bzhi pa ni/ me gyen du 'bar ba dang/ sbyin pa las longs spyod 'byung bar rtogs pa'i rigs pa lta bu yin te/ mdo sde rgyan @204 las/ tshul bzhin yid la byed pa dang/ /yang dag lta ba 'bras ldan dang/ /tshad mas rnam 'byed bsam mi khyab/ /rigs pa bzhir ni shes par gyur/ /zhes gsungs pa'i phyir ro/ /de yang lto ldir ba la bum pa zhes btags pa'i brdas bzhag pa'i yul don dam par grub pa 'gog pa la dbu ma'i rigs pa dgos zhes smra ba yin te zhes pa'i don ni/ ming dang brdas rnam par bzhag tsam yin gyi zhes gzugs sogs ming dang brdas der btags pa tsam du nges pa la dbu ma'i rigs pa dgos zhes bshad pa la/ kho na re/ gzugs sogs ming dang brda tsam gyi yul yin pa don dam par grub pa 'gog pa la dbu ma'i rigs pa la ltos par thal/ dam bca' 'thad pa'i phyir zer na ma khyab ste/ ming dang brdas rnam par bzhag pa yin gyi zhes pa'i skabs su lto ldir ba bum pa zhes pa'i ming gis bden grub tu brjod pa dang/ brdas bden grub tu 'dzin pa las don la bden par ma grub ces bstan pa yin gyi/ lto ldir ba bum pa zhes pa'i ming brda tsam gyi yul don dam par grub pa 'gog pa la dbu ma'i rigs pa dgos zhes smra ba gtan nas min te/ de don dam par grub pa 'gog pa la dbu ma'i rigs pa la mi ltos pa'i phyir te/ de don dam par ma grub pa don dam ma yin pa'i phyir te/ lto ldir ba bum pa zhes pa'i brda tsam gyi yul tha snyad du ma grub pa'i phyir te/ lto ldir ba bum pa zhes pa'i btags tsam gyi yul ma yin pa'i phyir/ ma grub na/ lto ldir ba blo'i yul du 'char ba la bum pa zhes pa'i brda kho na la ltos par thal/ ma grub pa de'i @205 phyir/ 'dod na/ bum pa'i ming mi shes par lto ldir ba tshad mas nges pa med par thal lo/ /'dod mi nus te/ bum pa'i brda smra mi shes pa'i lkugs pa sogs kyis don lto ldir ba shes shing ba glang la sogs pas kyang dri dang gzugs la sogs pas rang gzhan gyi bu shes nus pa'i phyir/ des na lto ldir ba bum pa zhes pa'i brda tsam gyi yul lto ldir ba'i kun rdzob pa'i de kho na nyid du mi gnas pa dang/ lto ldir ba bum pa zhes pa'i brda tsam gyi yul don dam par ma grub pa de lto ldir ba'i don dam pa'i de kho na nyid du mi gnas pa dbu sems gnyis kas 'dra bar bzhed pa'i phyir te/ rtog ge 'bar ba las/ ming gi brdas bzhag pa dngos po'i de kho na nyid du mi gnas pa rnal 'byor spyod pa dang dbu ma pa gnyis ka la 'dra bar bshad pas so zhes gsungs pa'i don no/ /de ltar na gzhan dbang mtshan nyid ngo bo nyid med par gsungs kyi kun brtags ma yin no snyam du mi gzung ste zhes sogs kyi don ni/ dgongs 'grel las chos rnams kyi kun brtags pa'i mtshan nyid ces pa'i gzhung 'dis kun brtags mtshan nyid ngo bo nyid med par bshad pa de mi 'thad par thal/ des gzhan dbang mtshan nyid ngo bo nyid med par bshad pa'i phyir te/ gzhan dbang don dam par rang gi mtshan nyid kyis ma grub pa mtshan nyid ngo bo nyid med pa'i don du bshad pa'i phyir zer na ma khyab ste/ gzhung 'dis gzhan dbang don dam par rang gi mtshan nyid kyis ma grub pa gzhan dbang mtshan nyid ngo bo nyid med pa'i don du ma bshad pa'i phyir/ phyi ma der thal/ gzhan dbang don dam par rang gi mtshan @206 nyid kyis grub pa med rgyu'i mtshan nyid kyi ngo bo der ma grub pa mtshan nyid ngo bo nyid med pa'i don du bshad pa'i phyir/ de ltar ma yin na rnam rig pa'i lugs la yang gzhung 'dis kun brtags mtshan nyid ngo bo nyid med par ma bshad par thal/ gzhan dbang mtshan nyid ngo bo nyid med par bshad pa'i phyir te/ gzhung 'dis gzhan dbang rang 'dzin rtog pa'i zhen gzhir rang gi mtshan nyid kyis ma grub pa de kun brtags mtshan nyid ngo bo nyid med pa'i don du bshad pa yin pa'i phyir zhes pa'o/ /gzhan dbang bden par grub na ji ltar snang ba bzhin grub dgos pas zhes sogs kyi don ni/ gzhan dbang der grub na bden 'dzin la snang ba ltar grub dgos pa las de ltar ma grub ste/ dper na sgyu ma'i rde shing rta glang du snang yang rta glang du med pa ltar gzhan dbang bden par snang yang bden par med pa dgongs 'grel gyi mdo'i don yin zhes pa'o/ /mdor na slob dpon legs ldan gyis rnam rig pa'i 'dod pa ltar gyi mtshan nyid gsum gyi rnam gzhag de dgongs 'grel gyi sgras zin gyi don dang bstan don gang yang ma yin pa bzhed par gsungs/ gnyis pa tha snyad du phyi rol gyi don yod med ji ltar bshad pa ni/ de ni kun rdzob pa'i dngos po don dang shes pa gang du 'dod bshad par bya ste zhes sogs kyis 'chad/ 'dir de ni kun rdzob pa'i dngos po zhes gsal yang da ni kun rdzob pa'i dngos po zhes brjod dgos par gsungs/ phyi rol bkag pa de mdo gang gi yang don min par bzhed dam dpyad par bya'o/ /zhes pa ni phyi rol bkag pa de mdo gang gi yang sgras zin @207 gyi don ma yin zhes pa'i don yin la/ de ltar ma yin na slob dpon legs ldan gyis kun gzhi bstan pa'i mdo bzhed pas kun gzhi bstan pa'i mdo la phyi don med par bstan pa'i mdos khyab pa legs ldan 'byed rang nyid kyis bzhed pa'i phyir te/ de ltar du spyi don rgol ngan tshar gcod na gsal/ sems tsam gyi don ni sngar ltar ro/ /zhes pa'i snga ma ni gzhan sde 'dod pa ltar sems las gzhan pa'i 'jig rten gyi byed pa po 'gog pa zhes sogs yin/ lugs 'dir phyi rol yod par sgrub pa'i rigs pa dang lung gnyis las/ gzugs sgra la sogs pa bsags pa'i skabs su ni zhes sogs kyis rigs pas sgrub bo/ /dmag dang nags tshal la sogs pa zhes pa'i skabs su bsags pa dang 'dus pa'i khyad par bshad de/ bsags pa ni rigs mthun pa'i rdul phra rab du ma bsags pa'i dngos po dang bum pa la sogs pa yin/ gnyis pa ni rigs mi mthun pa du ma 'dus pa'i dngos po dmag dang nags tshal la sogs pa'o/ /dang po ni de ltar yin te/ dper na gser gyi bum pa lta bu rigs mthun pa'i gser gyi rdul du ma bsags pa la brten nas gser bum grub pas bsags pa yin zhing/ de ni rdzas btags gnyis kyi nang nas rdzas su yod par gsungs/ de bzhin du sngon po la sogs pa'i kha dog dang shes pa rnams kyang yin no/ /gnyis pa de ltar yin te/ dmag zhes pa ni mi la sogs pa rdzas rigs mi mthun pa du ma zhig 'dus pa la brten nas btags pas 'dus pa yin zhing/ de ni rdzas btags gnyis kyi nang nas btags yod du gsungs/ de bzhin nags tshal sogs la yang shes dgos/ @208 phyi rol med na mdo sde las dbang po'i shes pa rnams dmigs rkyen las skye bar gsungs pa la skur ba btab par yang 'gyur te/ /zhes pa ni lung gi sgrub byed do/ /gsum pa don dam par yod pa 'gog pa'i rigs pa'i gtso bo gang la byed bstan pa ni/ slob dpon 'dis don dam par yod pa 'gog pa'i rigs pa'i gtso bo gang la byed ce na zhes sogs kyis bstan/ des na ngo bo nyid las yod pa don dam du yin na rgyu rkyen dang 'dus pa'i ngo bo las logs shig na zhes sogs kyi don ni/ dper na 'byung ba bzhi'i nang tshan sa lta bu don dam par sra ba'i ngo bo yin na rgyu rkyen dang rdzas brgyad la sogs pa 'dus pa ma yin par de las logs su 'ba' zhig ste gang la'ang ma ltos par yan 'gar gnas dgos pa las/ sa la sogs pa'i 'byung ba dang gzugs la sogs pa'i 'byung 'gyur rnams ni rdul rdzas brgyad 'dus dang sems sems byung rnams ni phan tshun brten nas 'byung zhing/ de las gzhan pa'i dngos po thams cad kyang rang rang gi rgyu rkyen tshogs pa la brten nas 'byung ba yin la de dang bral na cung zad kyang med par 'gyur la de med na don dam par yang med rdzas su yang med par 'chad do/ /rgyu rkyen dang 'dus pa las logs su ngo bo med par bstan pa yang don dam par yod na 'ba' zhig pa ste gang la yang ma ltos par yod dgos zhes gnod pa ston no/ /gnyis pa zhi ba 'tsho yab sras kyis @209 ji ltar bkral ba'i tshul la bzhi/ don dam par gang zag dang chos la rang bzhin yod med ji ltar bshad pa dang/ tha snyad du phyi rol gyi don yod med ji ltar bshad pa dang/ mdo sde dgongs 'grel gyi don ji ltar bshad pa dang/ don dam par yod pa 'gog pa'i rigs pa'i gtso bo gang la byed bstan pa'o/ /dang po ni/ mdo dgongs 'grel las/ mtshan nyid ngo bo nyid med pa dang zhes sogs kyis bstan/ gnyis pa ni/ tha snyad du phyi rol yod dam med ce na/ 'di la shes rab sgron ma las zhes pa nas des na 'di 'dra ba'i lugs kyang re re tsam byung mod kyang zhes pa'i bar gyis slob dpon zhi ba 'tsho ma byon gong du phyi rol med pa khas len pa'i dbu ma pa byung tshul bshad/ de byung tshul gang gis shes na legs ldan 'byed rjes 'brang dang bcas pas phyi don med pa 'gog pa'i phyogs snga la de 'dra'i dbu ma pa 'ga' zhig bzung nas bkag pa de la brten nas shes pas de'i tshul gsungs so/ /'on kyang de lta bu'i srol legs par phye ba zhi 'tsho rjes 'brang dang bcas pa min par dngos su ma byung zhes gsungs/ /shAnti pas 'di gnyis ka klu sgrub kyi yin par byas nas zhes pa'i gnyis ni/ 'di la skye ba ci yang med/ /'gag par 'gyur ba'ang ci yang med/ /ces sogs kyi tshigs bcad gnyis so/ /zhi ba 'tshos rgyun gcig tu drangs pa la bsam par mngon yang zhes pa ni slob dpon shAnti pas 'di ltar dgongs pa yin te/ tshigs bcad gnyis po zhi ba 'tshos dbu ma rgyan du drangs pa de'i tshe mdo tshig dang rigs pa drug cu pa'i tshig gi dbye ba ma mdzad par dkyus gcig tu drangs @210 pas tshigs bcad snga phyi gnyis ka rigs pa drug cu pa'i gzhung yin par dgongs la/ de ltar ma yin pa rje bla mas mkhyen nas der byed pa po so sos mdzad pa rgyun gcig la drangs pa gzhan yang yod do zhes gsungs/ don ni dbu ma rgyan der gong dang 'dra ba bstan bcos mdzad pa po so sos mdzad kyang dkyus gcig tu drangs pa gzhan yang du ma yod ces pa'o/ /sems tsam rnam bden rdzun gyi khyad par ni/ sngo ser la sogs pa'i rnam pa rnams dngos por bzhed mi bzhed kyis sgo nas 'jog par gsungs/ gsum pa mdo sde dgongs 'grel gyi don ji ltar bshad pa ni/ 'o na lugs 'dis mdo sde dgongs 'grel gyi don rnal 'byor spyod pa ba bdag gis ji ltar bshad pa de bzhin du 'dod dam ji ltar 'dod ce na/ dbu ma snang ba las/ de'i don du bcom ldan 'das kyis skye ba med pa la sogs pa bstan pa don dam pa'i dbang du mdzad pa kho nar brjod cing zhes sogs kyis bstan/ de'i don ni rje bla mas 'di nyid du/ /zhes dgongs 'grel gyis ngo bo nyid med pa gsum gyi dgongs pa bstan pa de nyid kyis yum gyi mdo la sogs pa nges pa'i don yin pa'i gzhung btsugs par 'chad do zhes sogs kyis 'grel/ 'dir dgongs pa bstan pa de gnyis kyis zhes gsal yang de nyid kyis zhes brjod dgos par gsungs/ dgongs 'grel las/ gzhan dbang rkyen gzhan gyi dbang gis skye'i bdag nyid kho nas mi skye bas skye ba ngo bo nyid med par bshad pa ni gzhan dbang brten nas 'byung ba yin pas bden par grub pa'i skye ba ngo bo nyid med pa la 'dod do/ /de yang mkhas pa rnams brten nas 'byung ba gang yin pa de rang bzhin gyis stong pa nyid du 'dod pas/ @211 ma dros pas zhus pa las/ gang zhig rkyen las skyes pa de ma skyes/ /de la skye ba'i rang bzhin yod ma yin/ /zhes gsungs pa dang 'dra bar bzhed/ de lta bas na de la mi rtag pa la sogs pa zhes sogs kyi don ni/ mi rtag pa la sogs pa bden par grub pa bzung ba'i don ni skabs 'di'i kun brtags yin la/ de 'dra'i kun brtags de gzhi de la ji ltar btags pa bzhin du ma grub pas kun brtags mtshan nyid ngo bo nyid med par gsungs te 'dis mi rtag pa sogs la sgro 'dogs sel lo/ /dgongs 'grel las/ kun brtags rang gi mtshan nyid kyis ma grub pas mtshan nyid ngo bo nyid med par bshad cing ngo bo nyid gzhan gnyis la de ltar ma gsungs pa ni/ ngo bo nyid gzhan gnyis don dam par ma grub pa'am bden par ma grub pa kho na kun brtags rang gi mtshan nyid kyis ma grub pa'i mtshan nyid ngo bo nyid med par bshad pa'i don du slob dpon zhi 'tsho yab sras kyi lugs la bzhed ces pa'o/ /kun brtags don dam par rang mtshan gyis ma grub pas sgro 'dogs dang/ tha snyad du rang mtshan gyis grub pas skur 'debs spong ba shin tu gsal bar gsungs/ 'di pas kyang legs ldan 'byed ltar zhen yul la 'dod pa sngar bshad pa dang 'dra'o zhes pa'i don ni/ dgongs 'grel las kun brtags kyis gzhan dbang stong par gsungs pa'i kun brtags ni bden 'dzin gyi zhen yul bden grub de la byed ces pa'i don no/ /sngar bshad pa ni de'i tshe kun brtags la mtshan nyid ngo bo nyid med do zhes gsungs pa'i kun brtags ni zhen yul de don dam par kun brtags pa de yin la zhes pa de @212 yin no/ /dbu ma snang bar/ mdo sde kha cig las chos thams cad ni ngo bo nyid med pa ma skyes pa zhes sogs gsungs pa ni drang don yin te zhes pa'i don ni/ kha cig gis yum gyi mdo'i nang tshan du gyur pa'i gzugs med ces pa'i mdo de drang don yin par thal/ dgongs 'grel gyis de 'dra'i mdo de'i dgongs pa bstan pa'i phyir/ /zhes rtsod pa'i lan du dgongs pa bstan pa tsam gyis mdo de nges don yin pa mi 'gal zhes gsungs/ dgongs 'grel gyis yum gyi mdo'i nang tshan du gyur pa'i gzugs med ces pa'i mdo de'i dgongs pa bstan pa nyid kyi phyir skye ba med pa la sogs pa bstan pa nges pa'i don nyid du bsgrub pa'i phyir zhes sogs gsungs/ yang dwogs gcod la yum gyi mdo'i nang tshan du gyur pa'i skye ba med ces pa'i mdo'i sgras zin tsam la mthong ba tha snyad du 'gal ba spangs shing sgras zin tsam sgra ji bzhin du rtog pa bsal ba'i phyir zhes brjod dgos par gsungs/ sgra ji bzhin du rtog pa bsal bar byed pa po ni dgongs 'grel gyi nang tshan mtshan nyid gsum ston pa'i le'u yin zhing/ de 'dra'i le'u des yum gyi nang tshan gyi skye ba med ces pa'i mdo'i dgongs pa bstan nas nges don du dngos su sgrub pa'i bshugs la/ shes rab snying po'i nang tshan gyi gzugs med ces pa'i mdo de drang don du bsgrubs pas de gnyis 'khor lo bar pa tsam du gcig kyang mdo gcig min no/ yum gyi mdo'i nang tshan gyi gzugs med ces pa'am skye ba med ces pa'i mdo'i dgongs pa bstan nas nges don du sgrub pa yin gyi/ yum gyi mdo ril po ma yin te/ de las dgag bya la don dam gyi khyad par dngos su sbyar ba'i phyir/ de'i nang @213 tshan gyi skye ba med ces sogs kyi mdo tshig de dgongs pa bstan nas nges don du bsgrub dgos te/ dgag bya la don dam gyi khyad par sbyar yang dngos su ma sbyar bas de ltar dgos zhes pa'o/ /de 'dra'i mdo de'i sgras zin la mthong ba tha snyad dang 'gal ba spang mi dgos so/ /'on kyang 'di dgongs pa bstan dgos kyi mdo ma yin te/ nges don gyi mdo yin pa'i phyir/ de de ltar yin par thal/ dgongs 'grel gyis de 'dra'i mdo de'i dgongs pa bstan nas nges don du sgrub pa'i phyir zer na ma khyab bo/ / 'di'i 'gal spong dbu ma snang ba las ma mdzad mod kyang dgongs pa ni/ /zhes brjod dgos kyi tshig zin ltar na mdzad mod kyang zhes gsal ba dpar skyon yin par gsungs/ 'dir dgongs pa bstan nas nges don du sgrub byed kyi mdo la dgongs 'grel ril po bzhag na mi rigs kyang/ dgongs 'grel gyis yum gyi mdo nges don du yang sgrub drang don du yang sgrub pas spyir bsgrub bya mdo gcig sgrub byed mdo gcig gis sgrub pa mi 'gal ba'i phyir/ dgongs 'grel gyis de drang don du sgrub par thal/ dgongs 'grel las theg pa chen po la yang dag par zhugs pa rnams la stong pa nyid smos pa'i rnam pas ches ngo mtshar rmad du byung ba'i chos kyi 'khor lo gnyis pa bskor te zhes sogs kyis drang don du sgrub pa'i phyir/ des yum gyi mdo nges don du yang sgrub par thal/ dgongs 'grel yum 'bum pa nges don du gzhung 'dzugs pa'i mdor lugs 'dis bzhed pa'i phyir te/ @214 bstan bcos 'di nyid las/ dgongs 'grel ni yum 'bum pa lta bu rnams nges don du gzhung 'dzugs pa'i mdor bzhed do/ /zhes gsungs pa'i phyir/ mdo de dag las cig car du chos thams cad rang bzhin med par rtogs nus pa'i gdul bya la bshad pa dang snga ma gnyis ka yod pas cha phye nas mdo'i don du 'jog go zhes pa'i don ni/ rnam rigs pa'i mtshan nyid gsum gyi rnam gzhag de dgongs 'grel gyi sgras zin gyi don dang/ zhi 'tsho rang lugs kyi mtshan nyid gsum gyi rnam gzhag de de'i bstan don du 'dod pas cha phye nas 'jog tshul de ltar ro/ /slob dpon zhi ba 'tsho'i gzhung 'gyur ba rnams las/ zhes pa'i don ni/ slob dpon zhi ba 'tshos mdzad pa'i gzhung bod du bsgyur ba rnams las mtshan nyid gsum gyi rnam gzhag gsal bar ma byung yang slob dpon kA ma la shI las mdzad pa'i dbu ma snang bar bshad pa bzhin zhi ba 'tshos bzhed pas slob dpon de gnyis dgongs pa gcig tu yod ces pa'o/ /bzhi pa don dam par yod pa 'gog pa'i rigs pa'i gtso bo gang la byed bstan pa la gnyis/ rigs pa'i dgag bya ngos gzung ba dang/ de ji ltar 'gog pa'o/ dang po ni/ gal te chos rnams la rang gi mtshan nyid kyis grub pa'i rang bzhin tsam zhig tha snyad du 'dod na zhes sogs kyis 'chad/ de rnams su grub pa mi srid ces pa'i brda 'jigs pa tsam la brten nas zhes tshig zin la gsungs kyang brda 'dogs pa tsam la brten nas zhes brjod dgos/ rtog ge 'bar ba las/ don zhes bya ba ni shes par bya ba yin pa'i phyir don te zhes sogs kyi skabs su don dam @215 'jog tshul gsum gsungs te/ dang po'i don ni shes bya la bya zhing dam pa ni shes bya'i dam pa ste phul du byung ba la byas nas bsdu ba na shes bya dam pa zhes so/ /gnyis pa'i dam pa ni stong nyid mngon sum du rtogs pa'i ye shes la bya zhing don ni de'i yul lam rnyed pa'i don la byas nas bsdu ba na ye shes dam pa'i rnyed don te don dam pa'o/ /gsum pa'i dam pa ni rnam par mi rtog pa'i ye shes dam pa dang rjes su mthun pa'i rigs shes rjes dpag la bya zhing don ni de'i yul la byas nas bsdu ba na don dam pa rtogs pa dang rjes su mthun pa'i shes rab kyi rnyed don yin pas don dam pa'o/ /dbu ma snang ba las thos bsam sgom gsum gyi shes rab gsum la dam pa byas nas de gsum gyi rnyed don yin pas de ltar brjod pa dang/ mngon sum dang brgyud pas byas pa'i khyad par ni yod de zhes de gsum la mngon sum du rtogs ma rtogs kyi khyad par yod par gsungs/ bdag med gnyis ni rigs pa dang ldan pas dam pa yang yin la zhes sogs kyi don ni/ bdag med gnyis 'thad pa'i sgrub pa'i rigs pa dang ldan la sgrib pa spong 'dod pas rtogs bya'i ched du don du gnyer bya'i gtso bo dang ye shes dam pa'i don te yul yin pas don dam mtshan nyid pa yin zhes gsungs/ des na gang zag gi bdag med phra mo don dam mtshan nyid pa yin min dpyad dgos/ rang gi gnyug ma'i rgyu rkyen las der snang du bskyed pa min te zhes pa'i gnyug ma'i rgyu rkyen ni bsngags rdzas btab pa la mi ltos par sprul gzhi'i ngos nas rta glang du snang ba'i ngo bor bskyed pa min zhes pa'o/ / sngar bshad pa'i bden 'dzin de ni 'di pa'i lugs kyi lhan skyes kyi bden 'dzin yin la zhes @216 pa'i sngar bshad pa ni/ de ltar yin pa la rang gi yul can gyi blo'i snang ba'i dbang gis ma bzhag par myu gu rang gi gnas lugs kyi dbang gis skye ba yod par 'dzin pa ni don dam par skye ba yod par 'dzin pa yin la zhes pa de yin no/ /brda mi shes pa'i sems can la'ang blo'i dbang gis ma bzhag pa'i khyad par du byas nas 'dzin pa med kyang blo'i snang ba'i dbang gis ma bzhag par 'dzin pa'i 'dzin pa de'i 'dzin tshad de la tshang bar yod do/ / gdams pa'i don por shes par bya ste zhes pa'i don po ni snying po'o/ gnyis pa de ji ltar 'gog pa ni/ de lta bu'i dgag bya de 'gog pa'i rigs pa'i gtso bo gang la byed ce na zhes sogs kyis bstan/ gnod pa ston mtshams mthar thug pa ni cha cha can la gcig tha dad kyi brtag pa byas nas 'gog pa 'di'o/ /zhes pa'i don ni cha dang cha can gnyis bden grub kyi gcig yin na tha dad gtan med kyi gcig dang/ de gnyis bden grub kyi tha dad na 'brel med don gzhan gyi tha dad yin dgos pa 'di gnod byed mthar thug pa yin zhes pa'o/ /gnyis pa thal 'gyur ba rnams kyis 'phags pa'i dgongs pa ji ltar bkral tshul ni/ slob dpon sangs rgyas bskyangs kyis rtsa ba shes rab kyi 'grel pa mdzad pa la legs ldan gyis skyon mang po bzung yang bdag med gnyis la mi mthun pa yod pa'i sgo nas skyon ma brjod la zhes sogs kyis 'chad/ 'jug 'grel las/ de'i phyir kha cig gis mdo sde pa rnams kyi lugs don dam par smras pa de nyid dbu ma pa rnams kyis kun rdzob tu 'dod do zhes pa'i don 'grel tshul gnyis las/ kha cig @217 gis mdo sde pas rdul phran cha med bsags pa'i rags pa de bden grub tu 'dod pas de dbu ma pas kun rdzob tu 'dod ces pa ni dbu ma'i bstan bcos kyi gnas tshul ji lta bar mi shes pa kho nas smras pa yin zhes dang/ bye brag smra ba'i lugs la yang de ltar gsungs zhes zer/ 'ga' zhig gis don smra gnyis kyi chos gang yod par 'dod pa na don dam par grub par smra la/ dbu ma pa'i de 'dra'i chos rnams don dam par mi 'dod cing kun rdzob tu 'dod ces pa yin gsungs/ de ltar min te/ 'di nyid las/ rang gi lugs ni dbu ma pa gzhan dang thun mong ma yin pa'i gtan tshigs kyis zhes pa nas de dag ni de'i steng nas 'jog pa sha stag yin pa'i phyir ro zhes pa'i bar gyi gzhung don ltar 'thad pa'i phyir/ de'i don ni/ dbu ma pa gzhan dang thun mong ma yin pa'i gtan tshigs rgyu rkyen la brten nas byung ba'i rten 'brel gyi gtan tshigs nyid kyis rang gi mtshan nyid kyis grub pa'i chos mi 'dod la dngos smra ba de dag ni de'i steng nas 'jog pa sha stag ste don dam du yod par 'dod pa ni rang mtshan gyis grub pa 'ba' zhig yin zhes pa'o/ /de'i mjug thogs su bden gnyis gang rung gcig las nyams na cig shos las kyang nyams par 'gyur ba gsungs pas de nyams tshul ji ltar yin brtag dgos par gsungs/ 'dis bstan bcos rtsom pa'i dgos pa bshad pa tshad ma'i de kho na nyid bsdus pa'i 'grel bar bkag pa'i phyir dang zhes sogs kyi don ni/ de 'dra'i 'grel bshad de slob dpon zhi ba 'tshos mdzad pa ma yin te/ 'grel bshad de rtsom pa'i dgos pa bshad pa ni slob dpon zhi 'tshos mdzad pa'i tshad ma'i de kho na @218 nyid bsdus pa zhes pa de'i 'grel pa'i nang du bkag pa gang zhig /'grel bshad de zhi 'tshos mdzad na kA ma la shI la'i tshad ma'i de kho na nyid bsdus pa'i 'grel par de dgag mi rigs pa'i phyir dang/ de 'dra'i 'grel bshad de'i nang du gzung ba dang 'dzin pa ji ltar snang ba bzhin du med par bshad pa mngon sum dang 'gal zhing grags pas kyang gnod pa'i phyir/ der ma zad des bden gnyis rang 'grel las bshad pa sgra sor bzhag nas bshad pas slob dpon gyis mdzad pa ga la yin te ma yin zhes pa'o/ /'jug 'grel las/ bdag dang gzhan las skye ba dgag la rag mod zhes pa ni/ de ltar dgag pas chog mod zhes pa'o/ /de mi 'dod na kun rdzob tu yang bden pa med pas kun rdzob kyi bden pa med par 'gyur ro zhes rgol ba ste de ltar rtsod pa la zhes pa'i don no/ /dbu ma pa gnyis la dgag bya'i khyad par de tsam yod na zla ba grags pas de la dmigs bsal can gyi dgag pa ci'i phyir ma mdzad ces smra bar mi rigs so/ /zhes pa ni rang rgyud pas rang gi mtshan nyid kyis grub pa'i rgyu las rang mtshan gyis grub pa'i 'bras bu skye ba khas len pa la dmigs bsal can gyi dgag pa med zer ba mi 'thad par bstan/ dmigs bsal can gyi dgag pa ni 'og tu 'di la 'jug pa'i rtsa bar rigs pa gsum dang 'grel par rigs pa gcig ste bzhis bkag go zhes pa de yin no/ /dgag pa'i rnam gzhag spyir bshad pa dang chos gzhan 'phen tshul gyi don bye brag tu bshad pa'o/ /dang po ni/ de la dgag pa ni sgras brjod pa na zhes sogs kyi dgag pa ni rang zhes brjod pa'i sgras rang nyid brjod pa na tshig @219 gis zin par rang gi dgag bya bcad pa'am de min yang rang gi rnam pa blo la 'char ba na dgag bya bkag pa'i rnam pa can du dngos su shar nas rtogs par bya ba zhig ste/ rtsa shes TIk chen las/ spyir dgag pa ni blos dgag bya dngos su bcad nas rtogs par bya ba yin pas rang ma yin bcad pa lta bu dngos po la dgag bya bcad pa tsam dgag pa min la/ chos nyid dang don dam bden pa lta bu sgras dgag bya dngos su ma bcad kyang de'i don blo la 'char ba na spros pa bcad pa'i rnam pa can du 'char ba rnam dgag pa yin no/ / zhes gsungs pa ltar ro/ /dgag pa de la rgyas par dbye na/ ldog pa bsdus pa las/ med dang gzhan dang 'dra ba dang/ /dman dang zhum dang zhan pa dang/ /phra dang nyung dang myur ba dang/ /chung dang lhag ma med pa dang/ /'ga' las mtha' dag ma yin dang/ /mi mthun gnyen po bral ba yi/ /rnam grangs bco lngar bshad pa yin/ /zhes gsungs pa ltar bco lnga yod pa las/ bsdu na med par dgag pa dang/ ma yin par dgag pa dang/ 'dra ba las dang/ dman sogs gsum dman par bsdus te dman pa dang/ phra ba la sogs pa drug phra bar bsdus te phra ba dang/ mi mthun pa dang/ gnyen po dang/ bral bar dgag pa brgyad dang/ de las mi mthun pa gnyen por bsdus te bdun dang/ dman pa dang phra ba gnyis zhum par bsdus te drug /don gyis go ba dang/ tshig gcig gis sgrub pa dang/ de gnyis ka dang ldan pa dang/ de dag las gzhan pa dang/ dngos su ston pa lnga dang/ kun tu btags pa'i dang dman sogs dgu bsdus te @220 rang gi gzhi las dang/ zhum pa'i dang/ gzhan pa'i dang/ 'gal ba'i dgag pa bzhi dang/ med par dang/ gzhan pa dang/ gnyen por dgag pa gsum dang/ med par dgag pa dang/ ma yin par dgag pa gnyis su 'du'o/ /kha cig gis bdag med lta bu med dgag yin gyi gang zag la bdag med ces pa lta bu gzhi sgrub pa dang tshogs na chos gzhan sgrub pa 'phangs pas med dgag min zhes pa dang/ gzhan dag shes bya la bdag med ces pa lta bu gzhi gzhan dang tshogs na chos gzhan shes bya 'phen pa lta bu blo ngor 'phangs pa de med dgag min par smra ba 'dod pa gnyis ka yang mi rigs te/ dgag pa gnyis kyi khyad par ni sngar bshad pa bzhin tshad chen dang ldog pa bsdus pa rnams su'ang byung la/ des na bram zes chang mi btung zhes pa lta bu la gzhi sgrub pa bram ze dang tshogs kyang chos gzhan mi 'phen pa'i phyir ro/ 'di'i skabs su bram ze de ni dgag bya chang 'thung ba lta bu bcad nas chos gzhan 'phen mi 'phen brtsi ba'i gzhi yin gyi 'phangs pa'i chos gzhan min pas 'dod tshul de gnyis 'brel ba ci yang med do/ /rje yab sras kyis ldog pa bsdus pa'i tshig lung 'dren byed pa'i tshe shes rab sgron me'i 'grel bshad du drangs pa las zhes pa ma gtogs gzhung dngos kyi ming gis ma drangs pa ltar na de'i dus su ldog pa bsdus pa'i gzhung bod yul du ma bsgyur ba'am rgyu mtshan gzhan gang yin brtag dgos so/ /sde bdun rgyan dang bcas pas dngos po thams cad sgrub pa dang don rang mtshan gyi sel ba sel ba btags pa bar gsungs/ @221 rnam 'grel TIk chen du/ don gyi sel ba yin na/ sel ba btags pa de yin pas khyab par 'dod pa slob dpon de dag gi dgongs par smra ba'ang slob dpon de dag gi gzhung lugs ma mthong bar gsal te/ blo dang don gyi dbye bas so/ /zhes pa'i 'grel par bdag nyid chen po kA ma la shI las/ 'dis ni rang gi mtshan nyid gzhan sel bar bstan pa ni/ dngos yin no zhes shes par bya'o/ /zhes sogs kyis don gyi sel ba nyid sel ba dngos yin par legs par bsgrub pa'i phyir ro/ /zhes don rang mtshan gyi sel ba sel ba btags pa bar 'dod pa zhi 'tsho yab sras kyi gzhung dang 'gal bar gsungs/ tshad ma rigs rgyan las/ kha cig /rtog pa la bum par snang ba lta bu blo'i gzhan sel yin zhes smra ba mi 'thad de/ de dgag pa ma yin pa'i phyir ro/ /zhes sogs mi rtag pa dang rtog pa la bum par snang ba lta bu dgag pa min par gsungs pa sogs tshig zin la 'dra min dang dgag pa bco lnga sogs la dpyad bya yod/ ces rje btsun blo bzang dbang phyug dpal bzang po'i gsung drang nges legs bshad snying po'i zin bris blo gsal sgron me zhes bya ba rdzogs so/ /thal 'gyur ba'i skor zin bris de tsam las ma bzhugs/ rnam grol zhi ba'i rgya mtshor ro gcig tu/ /gzhol ba'i mtha' yas chos tshul dal babs klung/ /tshig gi gzegs ma res kyang dug gsum gyi/ /dri ma yongs 'khrud legs bshad bdud rtsi 'di/ /dpar du bkrun pa'i rnam dkar phung po'i mthus/ /yang dag @222 chos kyi sgo mo stong phrag brgya/ /gdangs te rgyud lnga'i 'gro ba ma lus pa/ /nges legs nor bu'i mdzod la dbang 'byor shog /ces dpar bsngo'i smon tshig tu shAkya'i dge sbyong chos smra ba ngag dbang blo bzang bstan 'dzin rgya mtshos sbyar ba'o/ /rgyud smad mkhan rin po che dge bshes rdo rje bkra shis nas dpe deb 1000 dpar bskrun zhu skabs/ dga' byang klu 'bum mkhan zur dge 'dun bzang po mchog sogs 'ga' zhig la 'bul bskul zhus 'bras su byung ba hin sgor 50000 lnga khri tham pa dang/ de 'phrod sgor 50000 lnga khri ser smad rgyal rong mkhan zur dge bshes blo bzang mthar phyin mchog nas yon sbyar zhus pa dang/ khong gi slob bu a ri'i dge slong blo bzang chos 'dzin la kham phi'u Tar thog bcug rgyu bka' slob dang 'brel/ dge slong khong nas kyang dpar bskrun las don dang blangs kyis mthar phyin pa gnang ste/ bod rgyal lo 2120 phyi lo 1993 phyi zla 8 tshes la dpar 'debs zin cing/ ser byes ha bya dor sprul sku dang/ bkra shis tshe thar gnyis kyis sgra 'dzin 'khor lo nas yig thog tu phab ste ser lho sku zhabs chos ldan rin po che mchog nas zhus dag lan gnyis bgyis pa las slad kyi yi ge pa ni rje btsun dam pa gang gi zhabs pad spyi bor blangs pa ser byes bra ti bkra shis tshe thar pas/ rab byung 17 pa'i smin drug zla ba'i dkar phyogs kyi rgyal ba dang po'i nyin rdzogs par bris pas skye phreng thams cad du theg mchog bshes gnyen dam pas rjes su 'dzin pa'i rgyur gyur cig /sarba manggalaM// //