@#/ /chos mngon pa'i mdzod kyi dgongs don gsal bar byed pa legs bshad nyin byed dbang po'i snang ba las/ ye shes bstan pa zhes bya ba gnas bdun pa'i rnam par bshad pa bzhugs so/ / @01 @#*@#/ /dri med bzod rnams shes pa min/ /zhes sogs kyi skabs su/ bzod pa dang/ shes pa dang/ lta ba rnams kyi khyad par bshad pa la/ dri med mthong lam bzod pa brgyad po rnams ni/ bzod shes lta ba gsum du phye ba'i shes pa ma yin te/ de gsum gyi nang tshan gyi shes pa ni rang yul la the tshom spangs pa'i nges pa'i bdag nyid can zhig la 'jog dgos la/ bzod pa bar chad med lam rnams phal che ba ni rang gi ngos skal gyi the tshom ma spangs pa'i phyir/ chags bral sngon song gi phyir mi 'ong zhugs pa'i rgyud kyi sdug bsngal chos bzod lta bu 'dod pa'i sdug bsngal mthong spang sngar spangs zin kyang zag med kyi bzod pa'i rigs su gnas pa'i phyir de gsum gyi nang tshan gyi shes par mi 'jog go/ 'di'i thad kyi 'grel pa mngon pa'i rgyan gyi mtshan bur/ dri med ces smos pas bzod pa zag bcas ni shes pa yin no/ /zhes gsungs pa ni/ bzod pa zag bcas bar chad med lam lta bu zhig yod pa min 'dra yang/ phar phyin drug gi nang tshan gyi bzod pa lta bu la dgongs pa'o/ /zad pa dang mi skye ba shes pa'i blo ni de gsum gyi nang tshan gyi lta ba ma yin te/ yang dag par rtog pa med pa'i phyir dang/ dmigs pa dang rnam pa tshol ba'i bsam pa can ma yin pa'i phyir/ de la ni yang dag pa'i shes pa zhes bya yi/ shes pa rang bzhin pa tsam du mi 'jog go/ bzod pa brgyad dang zad mi skye shes pa las gzhan pa'i 'phags pa'i zag med kyi blo sdug bsngal chos shes nas lam rjes shes kyi bar gyi shes rab rnams ni de gsum gyi nang tshan gyi shes pa dang/ yang dag pa'i lta ba gnyis ka yin te/ rang yul la the tshom spangs pas nges pa'i bdag nyid can dang/ yang dag par rtog pa'i bdag nyid can gnyis ka yin pa'i phyir ro/ /bzod pa brgyad la de gsum du phye ba'i shes pa med par gsungs pa las lta ba ni yod par nges te/ bzod pa'i ngo bor gyur pa'i yang dag pa'i lta ba yod pa'i phyir te/ de'i ngo bor gyur pa'i 'phags lam yan lag brgyad yod pa'i phyir @02a @#/ /snyam ste dpyad do/ /gong gi de dag la yang bzod shes lta ba gsum gyi nang tshan zhes pa'i khyad par ma sbyar na/ spyir mthong lam bzod pa yin na shes pa ma yin pas khyab par 'dod na ni ha cang thal bar 'gyur ro/ /de las gzhan zag bcas 'jig rten pa'i shes rab thams cad ni de gsum gyi nang tshan gyi shes pa kho na yin la/ sgo lnga'i rnam shes kyi 'khor du byung ba'i shes rab dge mi dge lung ma bstan thams cad dang/ yid shes 'khor gyi lta ba drug po ma gtogs pa'i shes rab nyon mongs can dang ma bsgribs lung ma bstan thams cad ni kun rdzob shes pa kho na yin no/ /yid shes 'khor gyi shes rab nyon mongs can 'jig lta sogs lnga dang/ 'jig rten pa'i yang dag pa'i lta ba dang drug ni kun rdzob shes pa dang lta ba gnyis ka yin no// ! shes pa zag bcas zag pa med/ /ces sogs kyi skabs su shes pa bye brag tu bshad pa ste/ de la shes pa ni chos shes rjes shes gnyis/ kun rdzob shes pa dang/ pha rol sems shes gnyis/ bden bzhi shes pa bzhi/ zad pa shes pa dang/ mi skye ba shes pa ste bcu 'o/ /de dag kyang bsdu na zag bcas zag med gnyis te/ kun rdzob shes pa ni zag bcas dang/ pha rol sems shes la zag bcas zag med gnyis kyi cha dang/ lhag ma brgyad ni zag med yin pa'i phyir ro/ /zag med de dag kyang chos shes rjes shes gnyis su 'du la/ de lta na kun rdzob shes pa dang/ chos shes rjes shes te shes pa gsum mo/ /gsum po de las kun rdzob shes pa'i yul du ni 'dus byas dang 'dus ma byas kyi chos thams cad ci rigs par 'gyur la/ chos shes kyi yul du ni 'dod pa'i sdug kun 'gog lam bzhi ci rigs dang/ rjes shes kyi yul du ni gong ma gnyis kyi sdug kun 'gog lam bzhi ci rigs su 'gyur ro/ /de'i phyir chos shes dang rjes shes de dag bden pa bzhi la dmigs pa'i sgo nas bzhi re 'o/ /yang/ chos shes rjes shes gnyis las zad pa dang mi @02b skye ba shes pa gnyis kyang 'jog la/ de gnyis ni lta ba'i rang bzhin ma yin zhing/ yul bden bzhi la dmigs pa'i sgo nas sdug bsngal shes pa la sogs pa bzhi re yod do/ /de yang zad pa dang mi skye ba shes pa de gnyis dang por skyes pa la ni sdug bsngal rjes shes dang kun 'byung rjes shes gnyis kho na te/ de gnyis dang por skyes pa ni nges par srid rtse'i sdug kun kho na la dmigs par 'dod pa'i phyir ro/ /des na rdo rje lta bu'i ting nge 'dzin la srid rtse'i bden pa bzhi ka la dmigs pa yod kyang/ zad pa shes pa dang mi skye ba shes pa gnyis dang por skyes pa la sdug kun la dmigs pa ma gtogs med par 'dod pa yang bye brag smra ba'i grub mthas btags pa ste khyad par med pa la khyad par rtog pa'o/ /zhes pa 'grel pa rnams las gsungs so/ /de'i phyir rdo rje lta bu'i ting nge 'dzin gyis gal te srid rtse'i sgom spang sdug kun gnyis la dmigs na ni/ zad pa dang mi skye ba shes pa gnyis dang por skyes pa dang dmigs pa gcig tu 'gyur la/ yang des 'gog lam la dmigs na ni dmigs pa mi gcig ste/ shes pa de gnyis dang por skyes pas ni srid rtse'i sdug kun kho na la dmigs pa'i phyir ro/ /zad pa dang mi skye ba shes pa gnyis kyang dang por skyes pa ma gtogs de'i rjes su ni bden pa bzhi char la yang dmigs pa yod do// ! bzhi las pha rol sems rig pa/ /zhes sogs kyi skabs su/ chos shes/ rjes shes/ lam shes pa/ kun rdzob shes pa bzhi las ni pha rol gyi sems shes pa bzhag ste/ gzhan sems zag bcas shes pa ni kun rdzob shes pa dang/ zag med shes pa ni lam shes pa ste/ de la gnyen po'i bye brag gis chos shes rjes shes gnyis 'byung ba'i phyir ro/ /sems shes des ni sa dang/ dbang po dang/ gang zag 'das pa rnams kyi sems mi shes la/ de yang 'di'i dngos bstan gyi 'das pa zhes pa ni rang gi gong ma rang las khyad par du gyur ba la byed pa yin pa las 'das ma 'ong gi 'das pa la byed pa ni ma yin zhing/ gong ma'i dbang du byas nas 'das pa ni dper na bsam gtan dang po'i sas bsdus kyi pha rol sems shes kyis bsam gtan gnyis pa la sogs pa gong ma'i sems rang stobs kyis mi shes pa dang/ dbang po 'das pa mi shes pa ni/ dad mos pa'i sems shes kyis mthong thob pa'i lam rang stobs kyis mi shes pa dang/ gang @03a @#/ /zag 'das pa mi shes pa ni phyir mi 'ong gi sems shes kyis dgra bcom pa'i lam rang stobs kyis mi shes pa lta bu'o/ /de yang rang stobs kyis mi shes pa la byed pa yin gyi sangs rgyas kyis byin gyis brlabs na 'og mas kyang gong ma'i sems shes pa yod do/ /'o na spyir 'og mas gong ma'i sems shes pa yod dam zhe na/ rtsa 'grel rnams kyi spam@ bshad dang mi 'gal bar byed na med ces bya la/ de yod par thal/ sangs rgyas kyis byin gyis brlabs na yod pa'i phyir na ma khyab zhes bya'o/ /yang kho na re/ 'og mas gong ma'i sems shes pa yod par thal/ bsam gtan gnyis pa'i sas bsdus kyi pha rol sems shes mngon du gyur pa'i bsam gtan dang po bas gnyis pa'i sems shes pa yod pa'i phyir zer na ma khyab/ ma grub na der thal/ de'i rgyud kyi gnyis pa'i sas bsdus kyi sems shes dang/ dang po'i sas bsdus kyi sems shes gnyis yul mthong tshul la khyad par yod pa'i phyir/ byas pa la kho na re/ bsam gtan gnyis pa'i sas bsdus kyi sems shes mngon du gyur pa'i bsam gtan dang po bas gnyis pa'i sems shes pa med par thal/ de ni sa dbang gang zag 'das/ /zhes gsungs pa'i phyir zer na skyon med de/ de'i rgyud kyi gnyis pa'i sas bsdus kyi sems shes dang gnyis pa'i sems gnyis bsam gtan gnyis par sa mtshungs pa'i phyir ro/ /yang/ pha rol sems shes kyis yul gzhan gyi sems ni da ltar ba kho na shes kyi/ zhig pa 'das pa dang/ ma skyes pa ma 'ongs pa ni mi shes te/ de gnyis shes pa'i kun rdzob shes pa ni rim pa ltar sngon gnas rjes dran dang/ 'chi 'pho skye shes dang rjes mthun ci rigs su 'gyur ba'i phyir ro/ /chos shes dang rjes shes kyi ngo bor gyur pa'i pha rol sems shes gnyis kyang rang rang gi ris dang mi mthun pa phan tshun gcig gis gcig mi shes te/ chos shes kyis rjes shes kyi lam mi shes la rjes shes kyis kyang chos shes mi shes pa'i phyir te/ de gnyis 'dod pa dang gong ma'i gnyen po tha dad pa la dmigs pa'i phyir/ yang/ mthong lam gyi ngo bor gyur pa'i pha rol sems shes ni med de mthong lam skad cig ma rnams bar ma chad du bskyed pas sems shes @03b kyi sbyor ba rtsom pa'i skabs med pa'i phyir dang/ mthong lam gyi tshe sangs rgyas dang dge 'dun la shes nas dad pa yang bden pa mngon sum du shes nas yid ches pa yin gyi pha rol gyi sems shes pa min no zhes pa yang grub mtha'i 'dod tshul lo// ! nyan thos mthong ba'i skad cig gnyis/ /zhes sogs kyi skabs su/ 'o na mthong lam rang nyid pha rol sems shes kyi yul du ji ltar 'gyur zhe na/ 'di la bye brag smra ba rang gi 'dod tshul ni/ nyan thos ni rang sangs rgyas dang sangs rgyas gnyis la ltos te dbang po rtul bas nyan thos 'phags pa'i pha rol sems shes kyi rgyun gcig gis mthong lam skad cig bco lnga las sdug bsngal chos bzod dang chos shes te skad cig ma dang po gnyis rig pa yin la/ de lhag shes par 'dod kyang sbyor ba gzhan gyis sgrub dgos la/ sbyor ba grub pa na skad cig bcu drug pa thob nas 'das par 'gyur ba'i phyir zhes 'dod do/ /'o na/ skad cig ma dang po gnyis kyang mi shes par 'gyur te/ de gnyis shes par 'dod nas sbyor ba brtsams te grub pa na skad cig ma gnyis po yang 'das par 'gyur ba'i phyir zer na/ skyon med de/ skad cig ma dang po gnyis po de shes par bya'o zhes sbyor ba rtsom pa min gyi gang zag 'di'i sems shes par bya'o zhes sbyor ba brtsams te mngon shes grub pa dang mnyam du skad cig ma dang po gnyis skyes pa dag shes par 'gyur ro zhes 'dod mod kyi/ de ltar na chos shes dang rjes bzod gnyis kyang shes pa yod par 'gyur te/ gang zag 'di'i sems shes par bya'o snyam du sbyor ba brtsams te sems shes grub pa dang mnyam du skad cig ma de gnyis skyes pa srid pa'i phyir zer na/ de gnyis ni gong 'og gi gnyen po rigs mi mthun pa'i phyir nyan thos kyi sems shes rgyun gcig gis shes pa med par 'dod la/ 'dir sems shes kyi rgyun gcig gis zhes sbyor dgos te/ skad cig ma dang po shes pa'i sems shes kyis gnyis pa mi shes pa dang/ skad cig ma gnyis pa shes pa'i sems shes kyis dang po mi shes par 'dod dgos pa yang rang gi grub mtha'i dbang gis yin pa'i phyir/ de yang skad cig ma dang po gnyis shes pa'i sems shes kyi sbyor ba brtsams yul gyi gang zag pha rol po de yang sbyor lam bzod pa ba lta bu zhig yin na rten gyi gang zag des sems shes 'grub pa dang pha rol po'i rgyud la mthong lam @04a @#/ /skad cig ma dang po skyes pa dus mnyam pa srid pas de'i dbang du byas kyi/ sbyor ba brtsam yul gyi gang zag de mthong lam pa lta bu zhig yin na ni skad cig ma dang po gnyis shes mi shes te/ mthong lam thob ma thag pa lta bu'i sems shes pa'i phyir du sems shes kyi sbyor ba brtsams nas sems shes 'grub pa'i tshe yul de'i rgyud la skad cig ma dang po gnyis ni nges par 'das dgos pas/ de gnyis las gzhan pa'i rigs mthun gyi skad cig ma gang yang rung ba gnyis shes pa yin no/ /de bzhin du/ bse ru lta bu'i rang sangs rgyas ni nyan thos las dbang po rno bas sbyor ba 'bad rtsol cher ma dgos pas de'i pha rol sems shes kyi rgyun gcig gis mthong lam skad cig ma dang po gnyis rig pa'i rjes su slar yang skad cig ma lnga'i bar la mngon shes 'grub ste skad cig ma brgyad pa dang gsum rig pa yod la/ de lhag dgu pa sogs ni mi rig ste sbyor ba gzhan gyis sgrub dgos par ma zad de nas dub pas skad cig ma bdun la yang sbyor ba mi rdzogs pa'i phyir zhes 'dod do/ /de ltar nyan thos kyi pha rol sems shes kyi rgyun gcig gis mthong lam skad cig ma dang po gnyis dang/ bse ru lta bu'i rang rgyal gyi sems shes rgyun gcig gis skad cig ma dang po gnyis dang slar yang sbyor ba brtsams nas sems shes 'grub pa'i tshe brgyad pa rig par bshad pa yang mtshan gzhir bzung ba tsam las/ der nges pa ni ma yin te/ nyan thos kyis rigs mthun pa'i skad cig ma gnyis dang/ rang rgyal gyis rigs mthun gnyis dang rigs mi mthun pa gcig ste gsum ci rig pa shes pa yod pa'i phyir te/ 'grel pa mngon pa'i rgyan las/ nyan rang gnyis ka la yang skad cig ma dang po gnyis shes par bshad pa ni mtshon pa ste/ nyan thos kyis ni rigs mthun pa'i skad cig ma gnyis ci rigs par shes par 'gyur la/ rang rgyal gyis ni rigs mthun pa gnyis dang mi mthun pa gcig ste gsum ci rigs par shes par 'gyur ro/ / zhes gsungs pa'i phyir ro/ /de la kho na re/ nyan thos kyi sems shes kyis rigs mi mthun gyi skad cig ma gcig shes pa yod par thal/ gang zag 'di'i sems shes par bya'o snyam nas sems shes kyi sbyor ba brtsams te mngon shes 'grub pa dang dus mnyam du chos shes rjes shes gang rung gcig @04b skyes pa srid pas/ de shes na rigs mi mthun gyi skad cig ma gcig shes pa yin pa'i phyir zer na/ rtags ma grub ste/ de ni sngar rigs mi mthun gyi skad cig ma gzhan shes pa sngon du ma song bas chos shes rjes shes gang rung gcig tsam shes pa la rigs mthun dang rigs mi mthun shes mi shes kyi tha snyad mi byed de/ /kho na re/ pha rol sems shes kyi yul la gzugs med kyi sems kyang yod par thal/ gang zag 'di'i sems shes par bya'o snyam pa'i sems shes kyi sbyor ba brtsams te sems shes 'grub pa dang pha rol po'i rgyud la gzugs med kyi dngos gzhi mngon du gyur pa dus mnyam pa srid pas/ de 'dra ba'i sems shes kyis gzugs med kyi dngos gzhi sa bsdus pa'i sems mi shes na/ de 'dra ba'i sems shes kyi yul gzhan med pa'i phyir dang/ de 'dra ba'i sbyor ba brtsams pa'ang srid de/ sbyor ba ni spyi la dmigs pa yin gyi bye brag ni ma yin pa'i phyir/ zhes gsungs pa'i phyir zer na/ de 'dra ba'i dogs pa skye ba ni bden mod/ 'on kyang de ni zhib tu ma brtags pa'i skyon te/ gang zag 'di'i sems shes par bya'o snyam pa'i sems shes kyi sbyor ba brtsams yang/ pha rol po'i rgyud la gzugs med kyi dngos gzhi skye ba la mngon du phyogs pa'i mtshan ma mthong nas sems shes 'grub mi srid pas de 'dra ba'i sbyor ba brtsams nas sems shes 'grub pa dang pha rol po'i rgyud la gzugs med kyi dngos gzhi mngon du gyur pa dus mnyam pa med pa'i phyir te/ dper na/ gang zag 'di'i sems shes par bya'o snyam pa'i sems shes kyi sbyor ba brtsams te pha rol po'i rgyud la sems med kyi snyoms 'jug gnyis gang rung zhig mngon du gyur pa'am mngon du gyur pa la phyogs pa'i mtshan ma mthong ba na yang sems shes mi 'grub pa bzhin no/ /de bzhin du gang zag 'di'i sems shes par bya'o snyam pa'i 'og ma'i sas bsdus kyi sems shes kyi sbyor ba brtsams te pha rol po'i rgyud la bsam gtan gong ma'i sems mngon du gyur pa'am mngon du gyur pa la phyogs pa'i mtshan ma mthong ba na/ de 'dra'i sbyor ba de nyid kyis sems shes 'grub mi srid de/ gong ma'i sems de 'og ma'i sems shes kyi yul ma yin pa'i phyir dang/ yul med pa'i sems shes kyang mi srid pa'i phyir/ gzhan yang sems shes thob @05a @#/ /pa'i gang zag yin na/ sprul pa la sprul par nges pa rnyed pas ni ma khyab pas/ des na sgyu ma mkhan gyis rdo shing gang zag tu sprul pa zhig la sems shes thob pa'i gang zag gis dmigs nas/ 'di'i sems shes par bya'o snyam pa'i sems shes kyi sbyor ba brtsams pa'i tshe/ sprul pa ni sems ldan min pas sems shes 'grub pa'i skabs med pa dang mtshungs so/ /sangs rgyas bcom ldan 'das rnams ni sbyor ba 'bad rtsol la ma ltos par mthong lam gyi ye shes skad cig ma kun mkhyen par 'gyur ba yin no// ! zad pa shes pa bden rnams la/ / zhes sogs kyi skabs su/ zad pa shes pa dang mi skye ba shes pa'i khyad par ji ltar zhe na/ zad pa shes pa ni bdag gis sdug bsngal shes so/ /kun 'byung spangs so/ /'gog pa mngon du byas so/ /lam bsgoms so zhes mnyam bzhag gi gnas skabs su rtogs pa ma zad/ mnyam gzhag las langs pa'i rjes thob kyi gnas skabs su yang de ltar du nges shes 'dren nus pa dang/ mi skye ba shes pa ni/ mnyam bzhag gi tshe sdug bsngal shes par byas te slar shes par byar med do/ /zhes sogs su rtogs pa ma zad rjes thob kyi tshe yang de ltar nges pa 'dren nus pa'o/ /'di la 'grel pa mngon pa'i rgyan du/ [@#line break?] mnyam bzhag gi tshe de ltar rtogs pa las langs pa'i rjes thob kyi shes pas nges pa ni mi skye ba shes pa'i blor kha che bas 'dod do/ /zhes gsungs pa'i don ni gong du bshad ma thag pa ltar zad pa dang mi skye ba shes pa gnyis kyis mnyam bzhag tu de ltar rtogs pa bzhin rjes thob kyi tshe yang nges pa so so nas 'dren nus pa'i don yin pa las/ mnyam bzhag gi tshe de ltar rtogs pa'i shes pa gnyis po rim pa bzhin zad pa dang mi skye ba shes pa min pa dang/ rjes thob kyi tshe de ltar du nges pa'i shes pa gnyis po zad mi skye shes su bshad pa ni ma yin no// ! rang bzhin dang ni gnyen po dang/ /zhes sogs kyis shes pa bcur 'jog pa'i rgyu mtshan bshad pa ste/ zag bcas kyi rang bzhin las kun rdzob shes pa dang/ gnyen po'i sgo nas chos shes rjes shes gnyis dang/ rnam pa mi 'dra ba'i sgo nas sdug bsngal shes pa dang kun 'byung shes pa gnyis 'jog @05b ste/ de gnyis rnam pa mi rtag pa sogs mi 'dra ba las dmigs pa nyer len gyi phung po la dmigs par mtshungs pa'i phyir/ rnam pa dang dmigs pa gnyis ka mi 'dra ba las 'gog pa shes pa dang lam shes pa gnyis dang/ sbyor ba las pha rol sems shes dang/ bya ba byas pa nyid las zad pa shes pa dang/ zad pa shes pas skal mnyam gyi rgyu byas pa las mi skye ba shes pa 'jog pa'i phyir ro// ! sgom pa'i lam la 'gog pa'am/ /zhes sogs kyi skabs su/ chos shes zhes bya ba ni spyir btang gtso che ba 'dod pa'i gnyen po yin mod kyang/ sgom lam gyi ngo bor gyur pa'i 'gog pa chos shes dang/ lam chos shes gnyis kyis ni khams gsum ga'i gnyen po byed pa srid de/ 'dod pa'i rten can gyi 'phags pa 'ga' zhig gi 'dod pa'i sgom spang dgu 'gog lam chos shes gang rung la brten nas rim gyis spangs pa'i rjes su khams gong ma gnyis kyi sgom spang yang sngar 'dris pa'i lam de nyid la brten nas spong ba srid pa'i phyir ro/ /'gog lam chos shes zhes smos pas sdug kun chos shes gnyis kyis gong ma'i gnyen po byed pa mi srid par bstan pa ste/ de gnyis kyi dmigs yul ni/ 'dod pa'i bden pa dang po gnyis kho nar nges pa'i phyir ro/ /sgom lam zhes smos pas mthong lam gyi ngo bor gyur pa'i 'gog lam chos shes kyis kyang gong ma'i gnyen po mi byed par bstan la/ de bzhin chos shes zhes smos pas ni sgom lam rjes shes kyis kyang 'dod pa'i gnyen po byed mi srid par bstan pa ste/ 'dod pa'i mthong sgom gyi spangs bya ni chos bzod dang chos shes kyis spong ba'i phyir ro// ! chos shes pa dang rjes su shes/ /rnam pa bcu drug /zhes sogs kyi skabs su/ chos shes rjes shes gnyis la ni rnam pa mi rtag la sogs bcu drug gi rnam pa can yod la/ kun rdzob shes pa ni sbyor lam gyi ngo bor gyur pa la bcu drug po de'i rnam pa can yod cing/ gnas skabs gzhan du ni ci rigs pa ste ma nges so/ /bden bzhi shes pa ni rang rang gi bden pa'i rnam pa can te bzhi bzhi yod do/ /pha rol sems shes zag med kyang lam shes pa yin pas lam bden gyi rnam pa bzhi pa can 'byung ngo/ /dri bcas sam zag @06a @#/ /bcas kyi pha rol sems shes ni rang gi shes bya sems dang sems byung rang rang gi mtshan nyid kyi rnam pa can te/ de yang sems 'dzin pa'i tshe sems byung mi 'dzin la sems byung 'dzin pa'i tshe sems mi 'dzin zhing/ sems byung yang tshor ba 'dzin pa'i tshe 'du shes mi 'dzin pa la sogs pa ste/ de ni zag med la yang mtshungs pas na sems shes zag bcas zag med gnyis kas sems dang sems byung rdzas re re ba spyod yul du byed pa las gnyis dang gsum la sogs pa dus gcig la yul du mi byed do/ /zhes pa ni bye brag smra ba'i 'dod tshul lo/ /'di la gzhan dag gis mdo dang 'gal ba sogs kyi skyon brjod pa dang/ de la bye brag smra bas 'gal ba spong tshul sogs yod kyang mang bas 'jigs pas ma spros te/ shes par 'dod na rgyas 'grel rnams su blta'o/ /gzhan yang bye brag smra bas pha rol sems shes kyis sems 'di chags pa dang bcas pa'o/ /zhes shes kyi gzugs sogs yul 'di la chags pa'o/ /zhes sems de'i dmigs yul ni mi shes te/ gzugs sogs la dmigs pas pha rol sems shes ma yin par 'gyur ro/ /zhes 'dod do/ /des na pha rol sems shes thams cad kyi yul ni zag bcas zag med kyi sems sems byung gang rung kho na dang/ de yang dus da ltar ba dang/ rang gi mtshan nyid tsam 'dzin pa dang/ sems shes de la ltos pa'i pha rol po'i rgyud kyis bsdus pa zhig dgos kyi gzugs la sogs pa dang/ spyi'i mtshan nyid dang/ 'das ma 'ongs dang/ rang gi rgyud dang/ gzugs med rnams la dmigs pa med pa dang/ sems shes rang nyid kyang sa bsam gtan gyi dngos gzhis bsdus pas na dngos gzhi ma thob pa'i chags bcas pa la pha rol sems shes med pa dang/ lus la brten nas sgrub dgos pas lus rten kyang khams 'og ma gnyis gang rung gi rten can dang/ lam yang sgom lam gyi sbyor ba dang/ rnam grol dang/ khyad par can gyi lam sogs la ma gtogs/ mthong lam dang/ bsam gtan gyi nyer bsdogs dang/ bar chad med lam dang/ zad pa dang mi skye ba shes pa rnams la med pa dang/ rnam pa yang @06b zag med rnams lam bden gyi rnam pa can yin pas smon pa med pa'i rnam pa can yin gyi stong ba dang mtshan med kyi rnam pa can med par 'dod do/ /'di dag kyang grub mtha'i 'dod tshul yin pa las 'ga' zhig 'thad par ni ma mngon te/ dper na sems shes kyis sems 'dod chags dang bcas pa shes kyang yul gang la chags pa ma shes na/ de bzhin du yul gang la zhe sdang ba dang/ gang la ma dad pa dang/ gang la dad pa dang/ gang la the tshom pa sogs sems mtha' dag gi dmigs pa dang/ rnam pa dang/ 'dzin tshul sogs gang yang mi shes par sems tsam po ba zhig yul du byed par 'gyur la/ de lta na sems kyis bsam pa ji lta ba bzhin shes pa'i pha rol sems shes med par thal ba dang/ 'das ma 'ongs kyi sems dang/ gzugs med kyi sems rnams pha rol sems shes kyi yul du 'gyur mi srid na/ de dag shes pa gang gi yang mngon sum gyi yul du 'gyur mi srid pa sogs rigs pa'i gnod byed mang du 'jug la/ de'i phyir 'grel pa mngon pa'i rgyan las kyang/ 'di dag gi rgyu mtshan yang bye brag smra bas rnam par brtags pa kho na yin te/ yi ge mang bas 'jigs pas rnam par dpyad pa ni ma bris so/ /zhes gsungs pa ltar te/ dpyad pa 'ga' zhig ni 'og tu zur tsam zhar la 'god par 'gyur ro/ ! lhag ma rnam pa bcu gzhi can/ /zhes sogs kyi skabs su/ zad pa dang mi skye ba shes pa gnyis la ni stong ba dang bdag med pa'i rnam pa can med la/ de las gzhan pa'i rnam pa bcu bzhi pa can ni yod do/ /zag med kyi lam la rang gi mtshan nyid kyi rnam pa gzhan yod dam med ce na/ kha che ba rnams ni zag med la rnam pa bcu drug las gzhan med par 'dod la/ nyi 'og pa rnams ni bstan bcos las de dag las gzhan pa'i rnam pa yang gsungs pa'i phyir bcu drug las gzhan yang yod par 'dod do/ /yang mdo sde pa la sogs pas ni/ rnam pa bcu drug po de dag kyang ming gi sgo nas yin gyi rdzas su ni bdun du 'du ste/ sdug bden gyi rnam pa bzhi re re dang/ bden pa gzhan gsum la rgyu dang/ 'gog pa dang/ lam gyi rnam pa re re las gzhan du med de/ lhag ma rnams @07a @#/ /dang po'i ming gi rnam grangs tsam yin pa'i phyir zhes 'dod la/ bye brag smra bas ni don dam par rdzas su rnam pa bcu drug yod par 'dod do/ /bcu drug po re re'i 'jog tshul yang rkyen la rag lus pa'i phyir mi rtag pa'o/ /zhes sogs bshad de zhib par 'dod na rgyas 'grel rnams las shes so// ! rnam pa shes rab dang bcas pa'i/ /zhes sogs kyi skabs kyi 'grel pa rnams su/ rnam pa nyid gang zhe na/ rnam pa ni shes rab yin la/ zhes gsungs pa'i don/ yul gyi rnam pa 'dzin par byed pa'i yul can gyi gtso bo shes rab yin pa la dgongs nas bar gyi tshig mi mngon par bsdus nas gsungs pa las rnam pa zhes pa de shes rab yin zhes pa'i don ni ma yin pas de ltar du go na ni nor ba chen por 'gyur te rgyu mtshan shes sla'o/ /yul gyi rnam pa de dag gtso bor shes rab kyis 'dzin kyang de kho nar ma nges te shes rab de dang mtshungs ldan gyi dmigs bcas sems dang sems byung gzhan rnams kyis kyang 'dzin par byed la/ de dag gi gzung bya'i yul la ni yod pa thams cad 'byung ngo/ /des na bye brag smra ba 'ga' zhig /shes rab ni rnam pa dang bcas pa dang 'dzin pa dang bzung bar bya ba gsum ga dang/ shes rab las gzhan pa'i sems sems byung rnams 'dzin pa dang gzung bya yin kyang rnam bcas min pa dang/ dmigs pa med pa'i chos rnams bzung bya kho na yin par 'dod pa ni skabs 'dir rang lugs su khas len mi rigs te/ de ltar 'dod na mdo sde pas skyon 'phen pa ltar/ sems dang sems byung mtshungs ldan rnam pa lnga mtshungs su 'dod pa dang 'gal bar 'gyur ro// ! dang po rnam gsum gzhan rnams dge/ zhes sogs kyi skabs su/ shes pa bcu las kun rdzob shes pa la ni dge mi dge lung ma bstan gsum char yod la/ lhag ma dgu ni dge ba 'ba' zhig go/ yang/ kun rdzob shes pa ni 'dod pa nas srid rtse'i bar gyi sa thams cad du yod la/ chos shes ni bsam gtan sa drug dang/ rjes shes sa dgu char dang/ gzugs med dang po gsum gyis bsdus pa'i bden bzhi shes pa rjes shes phyogs lta ba'i ngo bor gyur pa rnams sgom lam kho nas bsdus pa sogs gong dang mtshungs so/ /'di'i thad kyi 'grel pa mngon pa'i rgyan du/ gzugs med dang po gsum gyis @07b bsdus pa'i bden pa bzhi shes ni rjes shes kyi phyogs sgom lam gyis bsdus pa kho na yod do/ /zhes gsungs pa'i don ni gong du bshad ma thag pa ltar/ gzugs med dang po gsum gyis bsdus pa'i bden bzhi shes pa rjes shes phyogs lta ba'i ngo bor gyur pa rnams sgom lam kho na yin pa'i don ma gtogs/ gzugs med dang po gsum gyis bsdus pa'i bden bzhi shes pa la rjes shes sgom lam ma gtogs med pa'i don ni gtan nas ma yin te/ gal te de ltar yin na gzugs med dang po gsum gyi sas bsdus pa'i zad pa dang mi skye ba shes pa la rjes shes kyi ngo bor gyur pa'i bden bzhi shes pa med par 'dod dgos la/ de ltar na/ de gnyis dang por skyes pa ni/ /sdug bsngal rgyu rjes shes pa yin/ /zhes de gnyis dang por skyes pa de srid rtse'i sdug kun rjes shes kho na dang/ de phyin chad bden pa bzhi char la dmigs pa yod par bshad pa sogs dang 'gal bar 'gyur pas go ba len tshul ma nor ba gal che zhing/ rjes shes sgom lam gyis bsdu tshul la yang gong du bkod pa ltar lta ba'i ngo bor gyur pa zhes pa'i khyad par sbyor dgos te/ lta ba ma yin pa'i chos shes dang rjes shes la zad pa dang mi skye ba shes pa yod pa sngar bshad zin pa ltar ro// ! gzhan yid shes pa bsam gtan bzhi/ / zhes sogs kyi skabs su/ pha rol sems shes ni sa bsam gtan gyi dngos gzhi bzhi po kho na las gzhan na med cing/ sems shes de ni lus rten yang 'dod pa dang gzugs kyi rten can gang rung kho na'o/ /chos shes kyang 'dod pa'i rten can kho na yin la/ pha rol sems shes dang chos shes gnyis las gzhan pa'i shes pa lhag ma brgyad la ni khams gsum ga'i rten can yod do// ! 'gog blo dran pa nyer gzhag pa/ /zhes sogs kyi skabs su/ 'o na/ shes pa de dag dran pa nyer gzhag gang gi ngo bo yin zhe na/ 'gog pa shes pa'i blo ni chos dran pa nyer gzhag gcig po'i ngo bo yin cing/ pha rol sems shes la ni lus la dmigs pa med pas lus dran pa nyer gzhag ma gtogs gzhan gsum ga yod pa dang/ 'gog pa dang pha rol sems shes gnyis las gzhan pa'i shes pa lhag ma brgyad la ni dran pa nyer gzhag bzhi ka ci rigs pa yod de/ lam shes pa'ang zag med kyi sdom pa la dmigs na @08a @#/ /lus dran pa nyer gzhag tu 'gyur la/ gzhan rnams ni shes sla'o// ! chos blo'i spyod yul dgu yin no/ /zhes sogs kyi skabs su/ 'o na shes pa de dag phan tshun gang gi dmigs par gang 'gyur zhe na/ chos shes spyi tsam pa de'i dmigs pa'am spyod yul du shes pa dgu 'gyur te/ lam chos shes kyis rjes shes ma gtogs pa'i zag med kyi shes pa bdun dang/ sdug bsngal chos shes dang/ kun 'byung chos shes gnyis kyis kun rdzob shes pa dang/ pha rol sems shes zag bcas gnyis la dmigs pa'i phyir ro/ /lam shes pa spyi tsam de'i dmigs yul la yang zag med kyi shes pa dgu char 'byung zhing/ kun rdzob shes pa ni mi 'byung ste/ lam shes de zag med kho na la dmigs pa'i phyir ro/ /rjes shes kyi yul du'ang chos shes ma gtogs pa'i dgu 'byung zhing/ chos shes ni ma yin te/ chos rjes blo phyogs phan tshun min/ /zhes 'byung ba'i phyir ro/ /sdug bsngal shes pa dang/ kun 'byung shes pa gnyis kyi yul du ni kun rdzob shes pa dang/ sems shes zag bcas gnyis kho na 'byung ngo/ /lhag ma kun rdzob shes pa dang/ pha rol sems shes dang/ zad pa shes pa dang/ mi skye ba shes pa bzhi'i yul ni shes pa bcu po thams cad ci rigs pa'i tshul du 'byung ngo/ /bzhi po de las gzhan rnams shes sla la/ sems shes kyi yul du bcu 'byung tshul ni/ sems shes zag med kyi yul du zag med kyi shes pa dgu dang/ zag bcas kyi yul du kun rdzob shes pa dang sems shes zag bcas 'byung ba'i phyir ro/ /yang/ 'gog pa shes pa gcig pu'i yul du ni shes pa bcu po gang yang mi 'byung ste/ de ni so sor brtags 'gog kho na la dmigs pa'i phyir ro// ! chos bcu dag ni sbyar bar bya/ /zhes sogs kyi skabs su/ chos bcu ni/ zag bcas 'dod pa dang gzugs dang/ gzugs med de khams gsum gyis bsdus pa'i chos dang/ 'dus byas zag med dang bcas pa'i chos bzhi po re re la mtshungs ldan dang mtshungs ldan ma yin pa gnyis gnyis su phye bas brgyad dang/ 'dus ma byas la so sor brtags 'gog don dam pa'i dge ba dang/ nam mkha' @08b dang so sor brtags min don dam pa'i lung ma bstan gnyis su phye bas bcu'o/ /bcu po de las shes pa gang gi yul du ji tsam 'gyur zhe na/ kun rdzob shes pa'i yul du ni chos bcu po thams cad 'gyur/ chos shes kyi yul du 'dod pa'i mtshungs ldan yin min gnyis dang/ zag med 'dus byas kyi mtshungs ldan yin min gnyis/ 'dus ma byas dge ba ste lnga dang/ rjes shes kyi yul du khams gong ma gnyis kyi chos gnyis gnyis dang/ zag med 'dus byas kyi gnyis/ 'dus ma byas dge ba ste bdun/ sdug bsngal shes pa dang kun 'byung shes pa so so'i yul du khams gsum gyi chos drug drug / 'gog pa shes pa'i yul du 'dus ma byas dge ba gcig pu/ lam shes pa'i yul du zag med 'dus byas kyi mtshungs ldan yin min gnyis/ pha rol sems shes kyi yul du 'dod gzugs dang zag med kyi mtshungs ldan gsum/ zad pa dang mi skye ba shes pa so so'i yul du 'dus ma byas lung ma bstan ma gtogs pa'i dgur 'gyur ro/ /nam mkha' dang brtags min gnyis ni bden bzhi gang rung du ma 'dus so// ! kun rdzob gcig pus rang tshogs las/ /zhes sogs kyi skabs su/ 'o na/ lugs 'dir shes pa gcig gis thams cad cig car du shes pa yod dam zhe na/ de ni med par 'dod la/ 'on kyang kun rdzob shes pa gcig gis rang gi ngo bo dang rang dang lhan cig tu 'byung ba'i chos rnams las gzhan pa'i chos thams cad bdag med pa nyid du skad cig ma gcig la shes par 'gyur ba ni yod de/ mos pas spyod pa'i so skye dag thos bsam las byung ba'i kun rdzob shes pas chos thams cad bdag med do zhes yid la byed pa'i phyir dang/ skad cig ma gnyis pas ni rang dang rang gi lhan cig 'byung ba las gzhan pa'i chos thams cad dang skad cig ma dang po lhan cig 'byung ba dang bcas pa'ang bdag med pa nyid du shes pas skad cig ma gnyis kyi yul du ni chos thams cad 'gyur ro zhes 'dod la/ de yang thos bsam ma gtogs sgom byung gis ni de ltar mi rtogs pas 'dod pa'i sas bsdus kyi thos bsam gnyis ka dang/ gzugs kyi sas bsdus kyi thos byung kho nas rtogs par 'dod do/ /rang nyid kyis rang nyid ni yul du mi byed de/ yul dang yul can la tha dad kyis khyab pa'i phyir/ ral gris @09a @#/ /rang nyid mi gcod pa bzhin no/ /rang dang lhan cig 'byung ba'i mtshungs ldan rnams kyang ma yin te/ de dag dmigs pa gcig pas rang nyid la yang dmigs par thal ba'i phyir ro/ /de bzhin du lhan cig 'byung ba'i mtshungs ldan ma yin pa rnams kyang ma yin te ha cang nye bas mig sman dang mig thur bzhin no zhes 'dod do/ /kun rdzob shes pa sgom byung gi chos thams cad cig car shes pa ma yin te/ sgom byung gis ni sa tha dad pa'i bden pa la so sor nges pa nyid du dmigs pa'i phyir dang/ gong dang 'og ma'i spyod yul can zhes gong 'og rnam par chad pa la dmigs pa'i phyir/ gal te sgom byung gis thams cad la cig car dmigs nas thams cad la cig car 'dod chags dang bral bar 'gyur ro zhes 'dod do/ /'di dag kyang bye brag smra bas rnam par brtags pa ste/ grub mtha' gong ma'i rigs pas gzhal na mi 'thad pa ma zad/ rang lugs la yang rigs pa dang khas len snga phyi 'gal bas gnod de/ ji ltar zhe na/ bye smra'i bsam tshod ni/ mos pas spyod pa dag gis thos bsam gang rung gi shes rab gcig gis chos rnams la so sor ma phye bar spyi tsam du chos thams cad bdag med pa'o zhes mos pa tsam yid la byed nus pas de 'dra'i mes pa'i dmigs yul du rang dang rang gi lhan cig 'byung ba las gzhan pa'i chos thams cad cig car du 'gyur ro snyam pa dang/ sgom byung gis mos pa yid byed tsam ma yin par khams dang sa so so'i bden pa rnams kyi rang gi mtshan nyid dang/ rnam pa so sor rtogs shing nges par byed pas na/ shes pa gcig gis de ltar nges mi nus pa la bsams nas chos thams cad cig car rtogs mi nus pa 'dod par snang mod/ chos rnams la so sor ma phye bar spyir bdag med pa'o snyam du mos pa yid la byed pa tsam gyis chos thams cad cig car yul du byed par 'gyur na/ rang dang rang gi tshogs pa gcig pa rnams kyang shes par 'gyur te/ de dag kyang so sor ma phye bar spyi tsam du mos pa yid la byed nus pa'i phyir dang/ sgom byung gis kyang chos thams cad cig car shes par 'gyur te/ des spyi tsam du mos pa yid la byed mi nus pa'i rgyu mtshan med @09b med pa'i phyir/ gzhan yang 'dus byas mi rtag pa'o snyam pa tsam gyis 'dus byas thams cad cig car rtogs pa dang/ khams gsum gyi sems thams cad zag pa dang bcas pa'o snyam pa tsam gyis khams gsum gyi sems thams cad shes par yang 'gyur la/ de ltar na/ de ni sa dbang gang zag 'das zhes 'og ma'i sems kyis gong ma'i sems mi shes par 'dod pa sogs dang yang 'gal bar 'gyur mod kyang/ rtsod pa'i tshe khas len 'dzin mtshams lta bu ni/ thos bsam gang rung gi shes rab gcig gis rang dang rang gi lhan cig 'byung ba las gzhan pa'i chos thams cad spyi tsam du bdag med par cig car du shes pa yin kyang/ chos thams cad cig car du shes pa min la/ sgom byung gis spyi tsam la ma dmigs par bye brag so sor phye nas dmigs pas na chos thams cad bdag med par cig car du rtogs mi nus pas de'i sgo nas khyad par phye ba las/ spyir chos thams cad cig car du shes ma shes sgo nas phye ba ma yin no zhes smra'o/ /de la kho na re/ kun rdzob shes pa gcig gis rang dang rang gi tshogs pa las gzhan pa'i chos thams cad cig car du rtogs par thal/ des rang dang rang gi tshogs pa las gzhan pa'i chos thams cad bdag med par cig car du rtogs pa'i phyir zer na ma khyab/ de la khyab par thal/ chos thams cad bdag med par rtogs pa la chos thams cad la dmigs dgos pa gang zhig /shes pa gang gis chos de la dmigs na chos de rtogs pas khyab pa'i phyir zer na/ rtags ma grub ste/ shes pa gang gis chos de dmigs na chos de rtogs pas khyab kyang/ chos de la dmigs na chos de rtogs pas ma khyab pa'i phyir/ zur dang po der thal/ shes pa de'i gzhal rtogs dmigs gsum don gcig yin pa'i phyir/ zur phyi ma der thal/ bden pa bzhi char la dmigs pa'i nyon mongs yod pa gang zhig /bden bzhi rtogs pa'i nyon mongs med pa'i phyir/ de la kho na re/ gzhi grub na kun rdzob shes pa'i yul yin pas ma khyab par thal/ khyod kyi blo rtse 'thad pa'i phyir/ 'dod byas pa la des khyab par thal/ kun rdzob yul ni thams cad do/ /zhes gsungs pa'i phyir zer na/ skyon med de/ de ni rdzas spyi nyis mgo spangs pa'i dbang du byas pa'i phyir/ de ltar ma yin na/ 'o na/ kho @10a @#/ /rang la/ kun rdzob shes pa chos can/ rang nyid rang nyid kyi yul yin par thal/ kun rdzob yul ni thams cad do/ /zhes gsungs pa'i phyir/ 'dod na mi 'thad par thal/ yul dang yul can la tha dad kyis khyab pa'i phyir dang/ rang nyid kyi rang nyid yul du mi byed pa'i phyir te/ 'grel pa mngon pa'i rgyan las/ rang nyid ni yul du mi byed de yul dang yul can la tha dad kyis khyab pa la yul dang yul can tha dad med pa'i phyir dang/ rang nyid la byed pa 'gal ba'i phyir te/ ral gris rang nyid mi gcod pa bzhin no/ /zhes gsungs pa'i phyir dang/ gzhan yang kun rdzob shes pas rang dang lhan cig pa'i mtshungs ldan dang mtshungs ldan ma yin pa rnams kyang mi shes te/ dang po de rnams rang dang dmigs pa mtshungs pas de rnams yul du byed na rang nyid kyang yul du byed dgos pa'i phyir dang/ phyi ma de rnams rang dang ha cang nye bas yul du byed mi nus pa'i phyir te/ 'grel pa de nyid las/ rang dang lhan cig 'byung ba'i mtshungs ldan rnams kyang mi 'dzin te/ de dag dang dmigs pa gcig pas rang nyid la yang dmigs par 'gyur ba'i phyir ro/ /rang dang lhan cig 'byung ba ldan pa ma yin pa rnams kyang mi 'dzin te/ ha cang nye bas phyir mig sman dang mig sman gyi thur ma bzhin no/ /zhes gsungs pa'i phyir/ de bzhin du shes pa yin na/ rang gis rang nyid dang rang dang lhan cig 'byung ba'i chos rnams mi rig pas khyab pa yang/ kun rdzob gcig pus rang tshogs las/ /gzhan ni bdag med nyid rig 'gyur/ /zhes pa'i shugs la 'grub par khas len dgos pa rang gi grub mtha'i dbang gis yin te/ shes pa gang yin kyang rang gis rang rig par 'dod na rang rig kyang yod par thal ba'i phyir te/ 'grel pa mngon pa'i rgyan las/ mdo sde pa la sogs pa ni rang rig 'dod pas rang gi tshogs pa'ang bdag med par shes par 'dod la/ zhes gsungs pa'i phyir ro/ /yang/ kho na re/ sgom byung gis sa thams cad la cig car du dmigs na/ sa thams cad la cig car 'dod chags dang bral bar thal ba'i rig pa 'di rang lugs su 'dod na/ khyod kyis gong du spang bya cig car ba 'dod pa dang 'gal bar 'gyur ro/ /zhe na/ mi 'gyur @10b te/ lugs 'di'i spang bya spong tshul gtso che ba ni spang bya rim gyis pa kho na'i dbang du mdzad pas na/ dngos su de'i dbang du byas pa'i skyon 'phen pa'i zhar la spang bya cig car ba'i dbang du byas na yang/ sgom byung gis chos thams cad la cig car du dmigs na khams gsum gyi nyon mongs che 'bring chung ngu dgu yang cig car du spong bar thal ba'i skyon yang shugs la 'phen pa'o// ! zag med skad cig dang po la/ /chags can shes pa gcig dang ldan/ /zhes sogs kyi skabs su/ zag med skad cig dang po sdug bsngal chos bzod la gnas pa'i 'phags pa 'dod chags dang ma bral ba'i chags bcas ni kun rdzob kyi shes pa gcig pu dang ldan gyi/ zag med kyi shes pa dgu po ni gang yang ma thob ste/ sdug bsngal chos bzod ni shes pa ma yin pa'i phyir ro/ /der ma zad 'dod pa'i so skye chags bcas dang gzugs med kyis so skye rnams kyang kun rdzob shes pa gcig pu dang ldan la/ 'dod gzugs la 'dod chags dang bral ba'i 'dod pa'i so skye ni de'i steng du pha rol sems shes dang yang ldan no/ /zag med skad cig gnyis pa sdug bsngal chos shes pa ni kun rdzob shes pa dang/ chos shes dang/ sdug bsngal shes pa gsum dang ldan la/ phyi ma gnyis ni ming gi rnam grangs te ngo bo sdug bsngal chos shes las gzhan du med do/ /de yan chad du sdug bsngal rjes shes kyi tshe sngar gyi gsum po'i steng du rjes shes te bzhi dang/ kun 'byung chos shes kyi tshe kun 'byung shes pa bsnan pas lnga dang/ 'gog pa chos shes kyi tshe 'gog pa shes pa bsnan pas drug /lam chos shes kyi tshe lam shes pa bsnan pas bdun no/ /de dag kyang chags can gyi dbang du byas pa yin gyi 'dod pa la 'dod chags dang bral ba sngon du song ba dag la ni de dag thams cad kyi steng du pha rol sems shes bsnan pa dang ldan pa'o/ /de las gzhan bzod pa phyi ma bdun dang rjes shes phyi ma gsum gyi tshe ni shes pa sngar med gsar du thob pa med de bzod pa rnams ni shes pa ma yin la/ rjes shes ni sngar bgrang zin pa'i phyir ro/ /bcu drug pa lam shes kyi tshe 'dod tshul gnyis te/ kha cig ni/ de'i tshe chags bcas la lam shes pa nyid dang chags bral la pha rol sems shes bsnan pas gnyis las mi ldan te/ 'bras bu thob pas shes pa snga @11a @#/ /ma rnams btang ba'i phyir te/ 'bras bu thob sbyangs nyams pa las/ /zhes gsungs pa'i phyir zhes 'dod pa dang/ Tika sogs las ni/ lam rjes shes kyi tshe chags can yin na sngar gyi shes pa bdun po nyid dang/ 'dod pa la 'dod chags dang bral ba yin na pha rol sems shes bsnan pas brgyad dang ldan par gsungs la/ 'dod tshul dang po ltar na yang shes pa gnyis tsam du ni ma nges te chags can la kun rdzob shes pa dang/ lam shes pa dang/ rjes shes te gsum dang/ chags bral la pha rol sems shes te bzhi dang nges par ldan pa 'dod dgos la/ 'dod tshul phyi ma ltar na ni/ /'bras bu thob sbyangs nyams pa las/ /zhes gsungs pas mthong lam gyi ngo bor gyur pa'i zag med kyi shes pa rnams btang kyang sgom lam gyi ngo bor gyur pa'i zag med kyi shes pa drug gsar du thob par 'dod dgos la/ de yang lam shes pa dang rjes shes gnyis da ltar ba dang/ sdug bsngal shes pa dang/ kun 'byung shes pa dang/ 'gog pa shes pa dang chos shes te bzhi ni ma 'ongs pa thob pa dang/ kun rdzob shes pa ni 'das pa dang ldan zhing/ chags bral sngon song yin na sems shes zag bcas 'das pa dang ldan la/ sgom lam gyi ngo bor gyur pa'i sems shes zag med ma 'ongs pa yang gsar du thob bo/ /des na spyir btang la 'dod tshul gnyis gang ltar byas kyang 'gal ba cher med mod kyang 'og tu/ chags bcas bcu drug pa la drug /zhes gsungs pa'i phyir lugs 'dir nges par phyi ma ltar khas len dgos so/ /bcu drug pa lam rjes shes las gzhan pa'i sgom lam pa gzhan yang chags bcas yin na pha rol sems shes dang/ zad pa dang mi skye ba shes pa ma gtogs bdun dang/ chags bral la sems shes bsnan pas brgyad de snga ma ltar ldan no/ /mi slob lam la gnas pa ni shes rab rkyang pa'i rnam grol yin na mi skye ba shes pa ma gtogs pa'i dgu dang ldan pa ni spyir btang dang/ dmigs bsal cig car ba'i dgra bcom dbang po rno bas dgra bcom thob ma thag nas mi skye ba shes pa thob pas de shes pa bcu dang ldan pa yin la/ gnyis ka'i cha las rnam grol yin na bcu po thams cad dang ldan pa yin no// ! mthong ba'i lam la bzod pa @11b dang/ /zhes sogs kyi skabs su/ 'o na/ gnas skabs gang du shes pa thob tshul ji ltar zhe na/ mthong lam bzod pa brgyad dang/ shes pa bcu po rang rang gsar du skyes pa na rang rang gi rigs 'dra ma 'ongs pa'ang thob pa yin la/ de la 'grel pa mngon pa'i rgyan du/ sdug bsngal la chos shes pa'i bzod pa skyes pa na sa gang la brten nas skyes pa de ni da ltar ba dang ma 'ongs pa thob pa las gzhan la brten pa ni ma 'ongs pa kho na thob ste/ zhes gsungs pa ni spyir btang la dgongs pa las bsam gtan sa drug gang rung la brten pa'i mthong lam thob na/ sa gzhan la brten pa'i mthong lam ma 'ongs pa thob pas khyab pa ni med de/ dper na rgyun zhugs zhugs pa dang chags bral sngon song gi phyir 'ong zhugs pa gnyis kyis bsam gtan dang po'i nyer bsdogs mi lcogs med la brten pa'i mthong lam sdug bsngal chos bzod thob pa na/ nyer bsdogs de nyid la brten pa'i chos bzod da ltar ba dang ma 'ongs pa thob pa las/ bsam gtan lhag ma lnga po gang la yang brten pa'i mthong lam ma 'ongs pa ma thob pa'i phyir te/ des bsam gtan gyi dngos gzhi ma thob pa'i phyir/ yang 'dod pa cam las 'dod chags dang bral ba sngon du song ba'i phyir mi 'ong zhugs pas bsam gtan dang po'i dngos gzhi tsam po ba la brten pa'i mthong lam sdug bsngal chos bzod thob pa na/ nyer bsdogs mi lcogs med dang/ bsam gtan dang po'i dngos gzhi khyad par can la brtan pa'i mthong lam gnyis ma 'ongs mi skye ba'i chos can thob la/ gnyis pa yan chad la brten pa ma thob ste/ des gnyis pa yan chad kyi dngos gzhi ma thob pa'i phyir/ gzugs la 'dod chags dang bral ba sngon du song ba'i phyir mi 'ong zhugs pa lta bus bsam gtan bzhi pa'i dngos gzhi la brten pa'i mthong lam mngon du byed na ni bsam gtan sa drug ga la brten pa'i mthong lam thob ste/ bzhi pa'i dngos gzhi la brten pa de da ltar ba dang/ ma 'ongs pa gnyis ka dang/ lhag ma lnga la brten pa ni ma 'ongs mi skye ba'i chos can thob pa'i phyir te/ gang las chags bral bya phyir gang/ /thob pa der ni 'og ma'ang thob/ /zhes pa'i rig pa 'dir yang mtshungs pa'i phyir/ yang/ gzugs la 'dod chags dang bral ba sngon du song ba'i phyir mi 'ong zhugs pas gal te bsam gtan dang @12a @#/ /po'i dngos gzhi la brtan pa'i mthong lam mngon du byed na yang bsam gtan lhag ma lnga la brten pa'i mthong lam ma 'ongs pa thob par 'jog dgos sam snyam yang gsal kha ma mthong bas dpyad par mdzod cig /sa gang la brten nas mngon du byed pa de las gzhan pa'i sa lhag ma rnams la brten pa'i mthong lam thob na ni ma 'ongs mi skye ba'i chos can kho na thob kyi skye ba'i chos can ni ma yin te/ mthong lam lan du mar mi skye ba'i phyir zhes so/ /rang rang gi rigs 'dra ma 'ongs pa thob tshul de ni bzod pa brgyad dang/ shes pa brgyad po thams cad la rigs 'gre zhing/ rnam pa yang mthong lam da ltar ba de mi rtag pa sogs gang gi rnam pa can yin kyang/ de dang 'dra bar ma 'ongs pa rnams kyang thob par 'dod do/ /de dag kyang mthong lam gyi dbang du byas kyi sgom lam la ni shes pa rigs 'dra ba dang/ mi 'dra ba dang/ rnam pa yang thams cad mngon sum du 'gyur ba yod pa'i phyir mthong lam las khyad par du 'phags pa'i ma 'ongs pa thob pa yod do// ! rjes gsum la ni kun rdzob kyang/ /zhes sogs kyi skabs su/ yang/ mthong lam gyi tshe yang rigs mi 'dra ba zag bcas kyi shes pa 'ga' zhig ma 'ongs pa gsar du thob pa ni yod de/ mthong lam sdug bsngal rjes shes dang/ kun 'byung rjes shes dang/ 'gog pa rjes shes gsum gyi tshe rang rang gi bden pa mngon par rtogs pa'i mtha' las byung ba'i kun rdzob shes pa re re gsar du thob pa'i phyir/ mthong lam chos shes gsum gyi tshe ni mi thob ste/ bden pa mngon par rtogs pa'i mtha' las byung ba zhes pa ni/ bden pa gsum po re re zad par rtogs pa'i rjes la thob pa'i don yin na/ chos shes gsum gyi tshe bden pa gsum po re re nas zad par ma rtogs pa'i phyir te/ rim pa bzhin khams gong ma gnyis kyi sdug bsngal mi shes shing/ kun 'byung ma spangs la/ 'gog pa mngon du ma byas pa'i phyir/ rjes shes gsum gyi tshe bden pa gsum po re re nas zad pa ste rdzogs par rtogs pas na/ bden pa de dag la dmigs nas rjes su shes pa'i kun rdzob shes pa re re yang gsar du thob bo/ /lam rjes shes lan de ltar mi thob ste/ kun rdzob shes pa 'jig rten pa'i lam gyis bden pa dang po gsum rtogs kyang lam bden rtogs mi srid @12b pa'i phyir dang/ 'di ni bden pa zad par mngon par rtogs pa'i mtha' las byung ba yin na/ lam ni zad par sgom mi nus te/ nyan rang sangs rgyas gsum gyi lam gyi rigs mang zhing mtha' med pa'i phyir dang/ de dag gang zag gcig gis dus gcig tu sgom pa'ang mi srid pa'i phyir/ zhes 'dod do/ /de lta na bden pa dang po gsum la yang mtshungs te/ sems can la mtha' med pa'i phyir sdug bsngal dang kun 'byung la yang mtha' med pas de thams cad gang zag gcig gis spangs mi nus pa'i phyir dang/ 'gog pa'i rigs mtha' dag kyang gang zag gcig gis mngon du byed pa mi srid pa'i phyir/ zhes pa'i gnod byed 'jug mod kyang/ grub mtha'i 'dod tshul gyis khyad par du brtags pa yin pas gnas skabs 'dir ni de ltar du khas len dgos so/ /bden pa mngon par rtogs pa'i mtha' las byung ba'i kun rdzob shes pa de dag kyang ma 'ongs mi skye ba'i chos can kho na yin la/ sa ni mthong lam sa gang la brtan pa de'i rang sa dang 'og sa'i kun rdzob shes pa thob ste/ mthong lam de mi lcogs med la brten na 'dod pa dang mi lcogs med kyis bsdus pa'i kun rdzob shes pa gnyis thob pa nas mthong lam bsam gtan bzhi pa la brten na 'dod pa dang bsam gtan sa drug ste sa bdun gyis bsdus pa'i kun rdzob shes pa thob pa'i bar du sbyar ro/ /yang/ de dag dran pa nyer gzhag gang gi ngo bo yin zhe na/ 'gog pa mngon par rtogs pa'i mtha' las byung ba'i kun rdzob shes pa ni chos dran pa nyer gzhag gcig pu yin la/ sdug bsngal dang kun 'byung mngon par rtogs pa'i mtha' las byung ba ni dran pa nyer gzhag bzhig yod do/ /de dag gi dmigs rnam yang sdug bsngal rjes shes sogs kyi dmigs yul bden pa de dang de la dmigs shing/ rnam pa yang rang rang gi bden pa'i rnam pa can dang/ mthong lam sgom stobs kyis thob pa'i phyir sbyor byung kho na dang/ 'khor dang bcas na ni 'dod pa'i sas bsdus rnams phung po bzhi dang/ gzugs kyi sas bsdus rnams bsam gtan gyi sdom pa rjes su 'brang bas phung po lnga pa can no// ! chags bcas bcu drug pa la drug /ces sogs kyi skabs su/ 'o na/ sgom lam gyi gnas skabs su shes pa ji tsam thob ce na/ bcu drug pa lam rjes shes la gnas pa'i 'phags pa chags bcas ni sngar bshad pa ltar sgom lam gyi ngo bor gyur pa'i bden pa bzhi shes @13a @#/ /dang/ chos shes rjes shes te drug gsar du thob cing/ de yang spang bya ni mthong spang las grol ba yin gyi sgom spang las grol ba ni ma yin la/ sa ni chags bcas yin pas mi lcogs med kho nas bsdus so/ /drug po de las gzhan pha rol sems shes dang/ zad pa dang mi skye ba shes pa dang/ kun rdzob shes pa dang bzhi gsar du thob pa ni med de/ rim pa bzhin bsam gtan gyi dngos gzhi ma thob pa'i phyir dang/ slob pa yin pa'i phyir dang/ kun rdzob shes pa spyi tsam ni sngar thob zin la/ gsar du thob bya'i kun rdzob shes pa khyad par du gyur pa yang med pa'i phyir ro/ /'o na/ gong du bcu drug pa lam rjes shes la gnas pa'i 'phags pa chags bcas de kun rdzob shes pa dang bcas pa'i shes pa bdun dang/ ldan par bshad pa ma yin nam zhe na/ de ni ldan tshul bshad pa yin la/ 'dir ni gsar du thob tshul bshad pa yin pas mi mtshungs so/ /'dod pa tsam ci yang med kyi bar sa ci rigs la 'dod chags dang bral ba sngon du song ba'i gang zag bcu drug pa lam rjes shes la gnas pa ni sngar gyi drug gi steng du sgom lam gyi ngo bor gyur pa'i sems shes zag med dang bdun gsar du thob la/ gzhan gsum gsar du mi thob pa ni gong dang mtshungs so/ /yang/ bcu drug pa lam rjes shes las gong du gyur kyang/ 'dod pa la 'dod chags dang ma bral ba'i 'phags pa sgom lam gyi sbyor ba dang/ bar chad med pa dang/ rnam grol dang/ khyad par can gyi lam la gnas pa rnams ni lam de dang de'i ngo bor gyur pa'i chos shes dang/ rjes shes dang/ bden pa bzhi shes dang/ kun rdzob shes pa dang bdun gsar du thob ste/ de yang sgom lam 'jig rten pa'i lam la brtan na ni kun rdzob shes pa da ltar ba dang/ gzhan drug ma 'ongs par thob la/ 'jig rten las 'das pa'i lam la brten na ni 'di dag 'dod pa la 'dod chags dang ma bral ba'i phyir 'dod pa'i gnyen po bsten dgos pas na rjes shes 'dod pa'i gnyen por mi rung bas de da ltar ba mngon du mi byed la/ des na chos shes dang/ bden pa bzhi shes gang rung gcig ste gnyis da ltar ba dang/ gzhan lnga ma 'ongs pa gsar du thob bo/ /pha rol sems shes dang/ zad mi skye shes mi thob pa ni rgyu mtshan gong dang mtshungs so/ /'di dag gsar du thob tshul bshad pa @13b na yang/ lam de dang de'i ngo bor gyur pa zhes pa lta bu'i khyad par sbyor dgos kyi/ spyir shes pa bdun po sngar nas thob zin pas tshig skyon ma bzad na khas len 'dzin mi bde'o// ! sa bdun las rgyal mngon shes dang/ /zhes sogs kyi skabs su/ yang/ slob pa bsam gtan bzhi dang/ gzugs med dang po gsum ste/ sa bdun la 'dod chags dang bral bar byed pa'i bar chad med lam la gnas pa rnams kyang lam de dang de'i ngo bor gyur pa'i shes pa bdun snga ma ltar thob la/ de yang zag bcas 'jig rten pa'i lam la brten na kun rdzob shes pa da ltar ba dang/ gzhan drug ma 'ongs pa dang/ 'jig rten las 'das pa'i sgom lam la brten na 'gog lam chos shes gnyis khams gsum ga'i gnyen por rung pas chos shes gnyis gang rung dang/ bden bzhi shes pa las gang rung gcig ste gnyis sam/ yang na gong ma'i gnyen po rjes shes dang/ bden bzhi shes pa gang rung gcig ste gnyis da ltar ba dang/ gzhan lnga ma 'ongs pa thob bo/ /pha rol sems shes dang zad mi skye shes gsum ni gsar thob med de/ bar chad med lam gyi ngo bor gyur pa'i sems shes med pa'i phyir dang/ slob pa yin pa'i phyir ro/ /yang/ slob pa zhag mngon shes dang po lnga thob byed kyi bar chad med lam la gnas na de'i ngo bor gyur pa'i shes pa bdun snga ma ltar gsar du thob la/ de yang 'dod chags dang bral ba'i stobs kyis thob na sngar ltar zag med kyi shes pa gnyis da ltar ba dang/ sbyor ba'i stobs kyis thob na kun rdzob shes pa da ltar ba thob bo/ /mi slob pa zhig mngon shes thob byed kyi bar chad med lam la gnas na de'i ngo bor gyur pa'i shes pa dgu'am brgyad gsar du thob ste/ de yang mi g.yo ba'i chos can yin na sngar bshad pa bdun gyi steng du zad pa dang mi skye ba shes pa bsnan pas dgu dang/ mi g.yo ba'i chos can min na zad shes bsnan pas brgyad thob bo/ /rtogs pa'i skal ba can zhig mi g.yo bar dbang po 'pho ba'i bar chad med lam la gnas na lam de'i ngo bor gyur pa'i chos shes/ rjes shes/ bden pa bzhi shes/ zad pa shes pa dang bdun gsar du thob la/ de la yang chos shes rjes shes gang rung zhig dang/ bden bzhi shes pa las gcig /zad pa shes pa dang gsum da ltar ba dang gzhan rnams ma @14a @#/ /'ongs pa'o/ /de'i ngo bor gyur pa'i kun rdzob shes pa dang/ sems shes dang/ mi skye ba shes pa gsar thob med de/ kun rdzob shes pa ni zag bcas yin pas 'phags pa dbang rtul dang srid rtse'i gnyen por mi rung zhing/ phyi ma gnyis rnam grol lam yin pas bar chad med lam la mi rung ba'i phyir ro/ /yang/ slob pa zhig bsam gtan spel sgom gyi bar chad med lam la gnas na de'i ngo bor gyur pa'i chos shes/ rjes shes/ bden pa bzhi shes/ kun rdzob shes pa dang bdun gsar du thob la/ de yang zag med la gnas pa'i tshe chos shes rjes shes gang rung zhig dang/ bden bzhi shes pa las gcig ste gnyis da ltar ba dang/ zag bcas kyi tshe kun rdzob shes pa da ltar ba'o// ! gong ma'i grol ba'i lam brgyad la'ang/ /zhes sogs kyi skabs su/ slob pa zhig srid rtse'i nyon mongs dang po brgyad las grol ba'i rnam grol lam brgyad po gang la gnas na yang/ rnam grol lam de dang de'i ngo bor gyur pa'i chos shes/ rjes shes/ bden pa bzhi shes/ sems shes zag med dang bdun gsar du thob la/ de la yang da ltar ba ni sngar bshad pa ltar gyi zag med gang rung gnyis so/ /'di la yang kun rdzob shes pa gsar thob med de srid rtse'i gnyen por mi rung ba'i phyir dang/ slob pa yin pas lhag ma gzhan gnyis kyang mi thob bo/ /slob pa dbang rtul zhig dbang rnon du 'pho ba'i rnam grol lam la gnas pa la/ chags bcas yin na de'i ngo bor gyur pa'i chos shes rjes shes/ bden bzhi shes pa ste drug dang/ chags bral yin na sems shes zag med dang bdun gsar du thob la/ zag med da ltar ba gnyis ni gong dang mtshungs so/ /gzhan dag kha cig /'di ni mthong lam dang 'dra bas bden pa mngon par rtogs pa'i mtha' las byung ba'i shes pa gsar thob yod par 'dod kyang rang lugs su ni mi 'dod do/ /yang/ slob pa dbang po sbyong ba'i bar chad med lam la gnas pa ni chags bcas chags bral gnyis kas lam de'i ngo bor gyur pa'i chos shes/ rjes shes/ bden bzhi shes pa dang drug kho na gsar du thob cing/ kun rdzob shes pa gsar thob med de mthong lam bzod pa dang 'dra ba'i phyir dang/ bar chad med lam dang slob pa yin pas shes pa gzhan gsum @14b yang mi thob bo/ /de bzhin srid rtse'i nyon mongs kyi gnyen po bar chad med lam dgu po gang gi tshe na'ang de dang de'i ngo bor gyur pa'i shes pa drug po de kho na thob kyi/ lhag ma bzhi mi thob pa'i rgyu mtshan gong ma rnams kyis shes so/ /srid rtse'i nyon mongs las grol ba'i rnam grol lam dgu pa zad pa shes pa la gnas pa ni dbang rtul yin na rnam grol lam de'i ngo bor gyur pa'i mi skye ba shes pa ma gtogs pa'i shes pa dgu dang/ mi g.yo ba'i chos can yin na de'i ngo bor gyur pa'i mi skye ba shes pa dang bcu gsar du thob bo/ /mi slob pa dbang rtul mi g.yo bar dbang po 'pho ba'i rnam grol lam mtha' ma la gnas pas kyang de'i ngo bor gyur pa'i shes pa bcu ka gsar du thob bo/ /'di dag la ni sdug kun shes pa gnyis gang rung zhig dang/ rjes shes/ zad pa dang mi skye ba shes pa gnyis gang rung zhig ste gsum da ltar ba dang/ gzhan rnams ma 'ongs pa thob bo// ! bshad pa'i lhag ma la brgyad thob/ /ces pa'i skyabs su/ sngar bshad pa'i lhag ma la/ slob pa'i dbang du byas na 'dod pa las 'dod chags dang bral ba'i rnam grol lam dgu pa dang/ bsam gtan dang po nas ci yang med kyi bar sa bdun po so so la 'dod chags dang bral ba'i rnam grol lam dang/ mngon shes dang/ spel sgom dang/ mi g.yo bar dbang po 'pho ba gsum gyi rnam grol lam dang po brgyad dang/ 'dod pa las 'dod chags dang bral ba'i phyir mi 'ong gi sbyor ba dang khyad par can gyi lam rnams la ni zad pa dang mi skye ba shes pa ma gtogs pa/ lam de dang de'i ngo bor gyur pa'i shes pa brgyad brgyad ma 'ongs pa gsar du thob la/ brgyad po de'i nang nas kyang 'jig rten las 'das pa la brten na zag med gnyis dang/ 'jig rten pa'i lam la brten na kun rdzob shes pa ni da ltar ba yang thob bo/ /rig pa 'dis sngar gong du lam de dang de'i tshe zag bcas zag med da ltar ba thob par bshad pa thams cad la da ltar bar ma zad ma 'ongs pa yang thob pa shes par bya'o/ /mi slob pa'i dbang du byas na mngon shes dang/ spel sgom dang/ mi g.yo bar dbang po 'pho ba sogs kyi bar chad med lam la gnas pa ni dus kyi rnam grol yin na sems shes dang mi skye ba shes pa ma gtogs gzhan lam de dang de'i ngo bor gyur @15a @#/ /ba'i shes pa brgyad re gsar du thob la/ mi g.yo ba'i chos can yin na sems shes ma gtogs pa'i dgu thob bo/ /yang/ rdzu 'phrul gyi mngon shes sogs gsum po de dag gi sbyor ba dang/ rnam grol dang/ khyad par can gyi lam la gnas pa rnams ni dus kyi rnam grol yin na mi skye ba shes pa ma gtogs pa dgu dang/ mi g.yo bas bcu thob bo/ /lha'i mig dang rna ba'i mngon shes gnyis kyi rnam grol lam ni lung ma bstan yin pas ma 'ongs pa thob pa med do/ /'o na/ mngon shes sprul pa ma gtogs pa/ /zhes mig rna'i mngon shes gnyis la thob pa sngar skyes yod par bshad pa dang 'gal lo/ /zhe na skyon med de/ de ni bsam gtan gyi sbyor ba'i stobs shugs drag khyad par can gyis sgrub pa 'ga' zhig tsam la ma 'ongs pa'ang yod pas dmigs bsal gyi dbang du byas la/ 'dir ni spyir btang gtso che ba'i dbang du byas pas na mi 'gal lo/ / des na mig rna'i mngon shes gnyis la ma 'ongs pa'i thob pa sngar skyes yod par thal/ mngon shes sprul pa ma gtogs pa/ /zhes gsungs pa'i phyir na/ ma khyab ste/ dmigs bsal la dgongs pa'i phyir zhes bya'o/ /de dag ni gtso che ba 'phags pa'i dbang du byas pa yin la/ so so skye bos ni 'dod pa dang/ bsam gtan dang po gsum la rim pa ltar 'dod chags dang bral ba'i rnam grol lam mtha' ma rnams la ni go rim bzhin bsam gtan dang po dang/ gnyis pa dang/ gsum pa dang/ bzhi pa rnams kyi dngos gzhi'i sas bsdus pa'i kun rdzob shes pa da ltar ba dang/ ma 'ongs pa gnyis ka dang/ pha rol sems shes ma 'ongs pa thob bo/ /bsam gtan bzhi pa las 'dod chags dang bral ba na nam mkha' mtha' yas kyi dngos gzhis bsdus pa'i kun rdzob shes pa ma gtogs sems shes gsar thob med de/ sems shes gzugs med kyis bsdus pa med pa'i phyir ro/ /de bzhin du gzugs med lhag ma rnams la yang mtshungs so/ /bsam gtan gyi dngos gzhi de dag gi sbyor ba'i lam dang/ rdzu 'phrul gyi mngon shes sogs gsum gyi rnam grol lam dang/ tshad med dang/ rnam thar dang po gsum dang zil mnon zad par gyi skye mched la sogs pa yon tan mngon par sgrub pa'i rnam grol gyi @15b lam rnams la yang de dag gi ngo bor gyur pa'i kun rdzob shes pa dang pha rol sems shes gnysi ka gsar du thob la/ yang/ so so skye bo 'dod pa dang bsam gtan snga ma gsum las 'dod chags dang bral ba'i rnam grol lam dang po brgyad dang/ de dag gi sbyor ba dang/ par chad med lam dang/ khyad par can gyi lam dang/ mngon shes gsum dang tshad med pa sogs yon tan mngon par sgrub pa'i bar chad med lam rnams la ni kun rdzob shes pa kho na ma gtogs de dag gi ngo bor gyur pa'i sems shes gsar du thob pa med de/ sa snga ma snga mar 'dod chags dang bral ba'i rnam grol dgu pa ma thob par sa phyi ma phyi ma'i dngos gzhi mi thob la/ sa de'i dngos gzhi ma thob par sa de'i sems shes kyang mi thob pa'i phyir dang/ de dag gi sbyor ba dang khyad par can gyi che gsar du thob rgyu'i sems shes med pa'i phyir dang/ bar chad med lam rnams la yang sems shes mi 'jog pa'i phyir ro/ /de bzhin du sbyor lam nges 'byed cha mthun gyi dngos gzhi rnams la yang sems shes med de/ de dag mthong lam gyi 'khor yin pa'i phyir zhes so/ /'o na/ zag bcas zag med kyi lam gang gis sa ji tsam gyi shes pa thob ce na/ zag bcas 'jig rten pa'i lam gyi dbang du byas na/ dang po'i nyer bsdogs mi lcogs med la brten nas 'dod pa las 'dod chags dang bral te bsam gtan dang po'i dngos gzhi thob pa na rnam grol dgu pa'i ngo bor gyur pa'i dang po'i nyer bsdogs dang dngos gzhis bsdus pa'i kun rdzob shes pa gnyis ka thob pa nas/ ci yang med la 'dod chags dang bral nas srid rtse'i dngos gzhi thob pa na rnam grol dgu pa'i ngo bor gyur pa'i srid rtse'i nyer bsdogs dang dngos gzhi gnyis ka'i kun rdzob shes pa gsar du thob pa'i bar du sbyar ro/ /zag med kyi dbang du byas na ni/ ! gang las chags bral bya phyir gang/ /zhes sogs kyi don sngar gnas gnyis par bshad zin pa ltar te/ dper na/ bsam gtan gnyis pa la 'dod chags dang bral ba'i phyir du bsam gtan gnyis pa'i dngos gzhi'i ngo bor gyur pa'i zag med sgom lam bar chad med lam mngon du byed pa na/ de dang rigs 'dra ba'i blo'o sam ? bsam gtan dang po'i nyer bsdogs dang dngos gzhi dang dngos gzhi khyad par can gyi ngo bor gyur pa'i sgom lam bar chad med lam thob cing/ @16a @#/ /rnam grol lam dgu pa'i tshe bsam gtan gsum pa'i dngos gzhi'i ngo bor gyur pa'i rnam grol lam zag med dang/ bsam gtan gnyis pa nas dang po'i nyer bsdogs bar gyi rnam grol lam zag med thob cing/ de bzhin du sa gong ma rnams kyi zag med la yang rigs 'gre'o// ! zad pa shes la zag bcas kyang/ /zhes sogs kyi skabs su/ gang gis zad pa shes pa thob pa de'i tshe ni zag med du ma zad/ zag bcas kyi yon tan mi sdug pa dang dbugs rngub dran pa dang/ dran pa nyer bzhag dang/ tshad med dang/ rnam thar zil gnon dang zad par la sogs pa sngar sbyor ba'i stobs kyis thob pa rnams las khyad par du gyur pa du ma zhig 'dod chags dang bral ba'i stobs kyis gsar du ma 'ongs pa thob bo/ /de yang 'dod rten pa rnams kyis ni sa thams cad kyis bsdus pa'i zag bcas kyi yon tan thob kyi sa 'ga' zhig tsam gyis bsdus pa yang ma yin no/ /de la kho na re/ zad pa shes pa thob pa na zag bcas kyi yon tan gong du bshad pa de dag gsar du thob pa mi 'thad par thal/ de dag las 'ga' zhig ni tshogs sbyor gyi gnas skabs nas thob cing/ gzhan rnams kyang zad pa shes pa ma thob gong du phal cher thob zin pa yin pa'i phyir zer na/ de dag bsam gtan gyi stobs sam sbyor bas sgrub pa rnams de'i gong nas thob mod kyang/ 'dir ni de dag sbyor bas sgrub pa las khyad par du gyur pa dag sbyor ba 'bad rtsol la ma ltos par 'dod chags dang bral ba'i stobs kyis gsar du thob pa yod pas mi mtshungs so/ / sa kun gyis bsdus pa thob tshul yang gong du bshad pa ltar 'dod rten pa rnams kyis khams gsum car gyis bsdus pa dang/ gzugs kyi rten can gyis khams gong ma gnyis kyis bsdus pa dang/ gzugs med kyi rten can gyis gzugs med kho nas bsdus pa thob la/ de bzhin du sa so so'i rten gyi sgo nas kyang khyad par phye tshul shes dgos te zag bcas kyi yon tan de dag sa 'phos pas gtong ba'i phyir ro// ! sngon rnyed mi thob bo/ /zhes pa'i don ni/ sngar rnyed zin pa'i yon tan rnams rgyud la ldan kyang gsar du thob pa'i tha snyad mi thob pa ma zad/ skabs 'di dag tu thob ma thob dpyod @16b pa'i gzhi ma yin par bstan pa las/ sngar rnyed zin pa mtha' dag gi thob pa btang ba'i don ni ma yin pas go ba ma nor ba gal che'o// ! rnyed dang bsten ces bya ba na/ /zhes sogs kyi skabs su/ thob pa la sgras brjod ris kyi sgo nas phye na/ rnyed pa thob pa dang/ bsten pa thob pa dang/ gnyen po thob pa dang/ thag bsring ba thob pa bzhi yod de/ de yang dge ba zag bcas lta bu la mtshon na/ dge ba zag bcas gang zhig sngar ma rnyed pa las gsar du rnyed pa ni rnyed pa thob pa dang/ da ltar ba mngon du byed pa ni bsten pa thob pa zhes bya zhing/ de yang da ltar ba'i chos la ni rnyed pa dang bsten pa thob pa gnyis ka yod la/ ma 'ongs pa la ni rnyed thob kho na dang/ 'das pa la ni de gnyis ka med do/ /gnyen po thob pa ni zag bcas kyi chos de dag la 'dod chags dang bral byed kyi gnyen po thob pa dang/ thag bsring ba thob pa ni de dag la 'dod chags dang bral ba'i rnam grol thob pa la byed pa ste/ phyi ma 'di gnyis ni de dag gi gnyen po dang spangs pa thob pa la chos de dang de'i thob pa zhes btags pa tsam las de dag gi thob pa dngos ni ma yin no/ /de ltar na dge ba zag bcas da ltar ba phal che ba la ni thob pa bzhi char yod la/ zag med la ni dang po gnyis ma gtogs phyi ma gnyis med de/ zag med la gnyen po dang thag bsring ba med pa'i phyir ro/ /nyon mongs can la ni gnyen po dang thag bsring ba gnyis char yod pa ma zad/ 'ga' zhig la ni rnyed pa dang bsten pa gnyis kyang yod mod kyang/ phal che ba'i dbang du byas te thob pa phyi ma gnyis yod pa dngos su bstan nas dang po gnyis yod pa shugs la bstan to/ /de la kho na re/ 'das pa la rnyed thob med par bshad pa mi 'thad par thal/ de la sngar ma rnyed pa las gsar du rnyed pa yod pa'i phyir te/ de gsar du rnyed pa yod pa'i phyir zer na rtags ma grub ste/ 'das pa gsar du rnyed pa yod na sngar ma rnyed pa las gsar du rnyed pa yod dgos pas de la 'das pa'i don ma tshang bar 'gyur ba'i phyir/ der thal/ thob bya'i chos de 'das pa'i ngo bor 'pho ba la thob bya'i chos ma 'ongs pa dang da ltar gang rung zhig rnyed pa sngon du 'gro dgos pas sngar ma rnyed pa las gsar du rnyed rgyu med pa'i phyir ro/ /de la kho na re/ thob bya'i chos 'das pa thob ma thag pa med par thal/ de gsar du thob pa med pa'i phyir zer na ma khyab/ @17a @#/ /ma grub na/ der thal/ de la rnyed thob dang bsten thob gnyis ka med pa'i phyir te/ 'grel pa mngon pa'i rgyan las/ ma 'ongs pa la rnyed pa thob pa kho na dang/ 'das pa la ni de gnyis ka med do/ /zhes gsungs pa'i phyir/ yang kho na re/ dge ba zag bcas thob zin yang dang yang du mngon du byed pa de bsten thob yin par thal/ 'grel pa mngon pa'i rgyan las/ bsten pa thob pa zhes bya ba ni dge ba 'dus byas rnams kyi thob zin yang dang yang du mngon du byas pa'i thob pa'o/ /zhes gsungs pa'i phyir zer na ma khyab ste/ de'i don ni/ bsam gtan gyi snyoms 'jug lta bu zhig sngar thob zin nas phyis bsam gtan gyi snyoms 'jug yang dang yang du nam mngon du byed res kyi snyoms 'jug de'i thob pa ni bsten thob yin zhes pa'i don yin pa'i phyir/ de ltar ma yin par/ phyis yang dang yang du mngon du byed res kyis sngar thob zin de nyid mngon du byed dgos na/ thob zin slar yang thob pa yod par 'dod dgos la/ de ltar na skyes zin slar yang skye bar 'dod pa la yang thag nye bar 'gyur ba'i phyir ro// ! sangs rgyas chos ni ma 'dres pa/ /zhes sogs kyi skabs su/ sangs rgyas kyi yon tan thun mong ma yin pa dang/ thun mong ba gnyis las/ dang po ni/ sangs rgyas kyis zad pa mkhyen pa brnyes pa'i tshe nyan thos sogs dang thun mong ma yin pa/ ma 'dres pa'i yon tan stobs bcu dang/ mi 'jigs pa bzhi dang/ dran pa nye bar bzhag pa gsum dang/ thugs rje chen po ste bco brgyad brnyes so/ /de la stobs bcu ni gnas dang gnas ma yin pa mkhyen pa'i stobs/ las dang rnam smin mkhyen pa'i stobs/ bsam gtan dang rnam thar sogs mkhyen pa'i stobs/ dbang po mchog dang mchog ma yin pa mkhyen pa'i stobs/ mos pa sna tshogs mkhyen pa'i stobs/ khams sna tshogs mkhyen pa'i stobs/ lam mtha' dag mkhyen pa'i stobs/ sngon gyi gnas rdzes su dran pa'i stobs/ 'chi 'pho ba dang skye ba mkhyen pa'i stobs/ zag pa zad pa mkhyen pa'i stobs dang bcu'o/ /de dag re re la shes pa ji tsam zhe na/ gnas dang gnas min mkhyen pa'i stobs la ni shes pa bcu po thams cad yod cing/ de yang stobs 'di'i ngo bor gyur pa'i kun rdzob shes pa'i yul du ni sngar gong du bshad pa'i @17b chos bcu po thams cad 'gyur la/ de'i ngo bor gyur pa'i chos shes kyi yul du 'dod pa'i mtshungs ldan yin min gnyis dang/ zag med 'dus byas kyi mtshungs ldan yin min gnyis/ 'dus ma byas dge ba ste lnga dang/ rjes shes kyi yul du khams gong ma gnyis kyi mtshungs ldan yin min gnyis gnyis dang/ zag med 'dus byas kyi gnyis/ 'dus ma byas dge ba ste bdun/ sdug bsngal dang kun 'byung shes pa so so'i yul du khams gsum char gyi mtshungs ldan yin min gnyis gnyis te drug re/ 'gog pa shes pa'i yul du 'dus ma byas dge ba kho na dang/ lam shes pa'i yul du zag med 'dus byas kyi mtshungs ldan yin min gnyis/ pha rol sems shes kyi yul du 'dod pa dang/ gzugs dang/ 'dus byas zag med bcas kyi mtshungs ldan gsum/ zad pa dang mi skye ba shes pa'i yul du 'dus ma byas lung ma bstan ma gtogs pa'i chos dgu 'gyur ro/ /zhes 'dod do/ /'di dag kyang bye brag smra bas spyir sangs rgyas kyi mkhyen pas chos thams cad mkhyen par 'dod kyang/ mkhyen pa'i bye brag re res chos thams cad mi mkhyen par bsams nas mkhyen pa 'di dang 'di'i yul du chos 'di dang 'di 'gyur zhes tshad dang ris su phye bar snang zhing/ de la grub mtha' gong ma'i 'dod tshul gyis gzhal na mi 'thad pa ma zad/ rang gi grub mtha' gzhir bzhag na yang khas len nang phan tshun 'gal bar 'gyur te/ ji ltar zhe na/ gnas dang gnas min mkhyen pa'i ngo bor gyur pa'i 'gog pa shes pa dang/ lam shes pa dang/ sems shes rnams kyi yul du rim pa bzhin 'dus ma byas dge ba dang/ zag med 'dus byas dang/ mtshungs ldan rnams ma gtogs mi 'byung na/ 'o na/ de dag gnas dang gnas min mkhyen pa'i stobs su mi 'gyur te/ de dag gis gnas dang gnas ma yin pa mkhyen tshul med pa'i phyir zer na/ rigs pa don mthun gyi lan 'debs dka' yang/ rtsod pa'i tshe gnas skabs khas len 'dzin mtshams lta bu 'di ltar smra ste/ dper na/ de'i ngo bor gyur pa'i 'gog pa shes pa la mtshon na/ des rang gi spang bya zag bcas spangs pa las 'gog pa mngon du byed pa gnas dang/ rang gi spang bya ma spangs pa las 'gog pa mngon du byed pa gnas ma yin par mkhyen pa yin no zer na/ 'o na/ de 'dra'i @18a @#/ /gnas dang gnas ma yin pa gnyis po de chos can/ so sor brtags 'gog yin par thal/ 'dus ma byas dge ba yin pa'i phyir/ der thal/ 'gog pa shes pa'i yul yin pa'i phyir/ rtsa bar 'dod na/ 'o na/ rang gi spang bya zag bcas spangs pa las/ 'gog pa mngon du byed pa de yang so sor brtags 'gog yin par thal/ de 'gog pa shes pa'i yul yin pa'i phyir/ 'dod na sla/ ma grub na der thal/ de 'dra'i 'gog pa shes pa des rang gi spang bya zag bcas spangs pa las 'gog pa mngon du byed pa mkhyen pa'i phyir te/ de ltar mngon du byed pa gnas yin par mkhyen pa'i phyir zer na ma khyab bo/ /de bzhin du lam shes pa'i yul du gyur pa'i gnas dang gnas ma yin pa gang rung la lam bden gyis khyab pa dang/ pha rol sems shes kyi yul du gyur pa'i gnas dang gnas ma yin pa gang rung la sems dang sems byung gang rung gis khyab par thal ba sogs 'phen na grub mtha'i khas len yin pas 'dod lan 'debs dgos pa 'dra'o/ /de la kho na re/ gnas dang gnas ma yin pa mkhyen pa'i stobs kyi yin pa med par thal/ gnas mkhyen pa'i stobs kyis gnas ma yin pa mi mkhyen/ gnas ma yin pa mkhyen pa'i stobs kyis gnas mi mkhyen pa'i phyir zer na ma khyab/ ma grub na der thal/ shes bya rang gi mtshan nyid rnams/ /rdzas re re zhig spyod yul lo/ /zhes gsungs pa'i phyir/ gzhan yang/ gnas dang gnas min mkhyen pa'i stobs kyi yin pa yod par thal/ gnas dang gnas ma yin pa re re nas mkhyen pa'i stobs de/ gnas dang gnas ma yin pa mkhyen pa'i stobs yin pa'i phyir/ de ltar ma yin na/ gnas mkhyen pa'i stobs dang gnas ma yin pa mkhyen pa'i stobs re re nas stobs bcu po gang yang ma yin par thal ba dang/ de bzhin du las dang rnam smin mkhyen pa'i stobs/ dbang po mchog dang mchog min mkhyen pa'i stobs/ mos pa sna tshogs mkhyen pa'i stobs/ khams sna tshogs mkhyen pa'i stobs/ lam mtha' dag mkhyen pa'i stobs/ 'chi 'pho ba dang skye ba mkhyen pa'i stobs rnams re re nas yin pa med par thal bas/ de ltar na stobs bcu po gang rung yin na/ stobs gsum pa brgyad pa bcu @18b pa gsum po gang rung yin pas khyab par thal ba'i skyon yod pa'i phyir ro/ /yang kho na re/ gnas dang gnas ma yin pa mkhyen pa'i stobs kyi yul du gyur pa'i gnas dang gnas ma yin pa gnyis kyi yin pa yod par thal/ gnas dang gnas ma yin pa mkhyen pa'i stobs kyi yin pa yod pa'i phyir zer na ma khyab/ de bzhin du 'og nas 'byung ba'i stobs lhag ma rnams la yang tshul 'di ltar du dpyad par bya ba mang yang re re nas 'god pa yi ges 'jigs nas ma bkod de rig pa 'di dag gis rjes su dpags te dpyod shes par bya'o/ /zhes dogs pa cung zad dpyad nas dkyus kyi don la 'jug pa ni/ zag bcas kyi las dang de'i 'bras bu rnam smin sna tshogs pa mkhyen pa'i stobs la ni 'gog lam shes pa ma gtogs pa'i brgyad yod de/ 'gog lam shes pa gnyis ni zag med kho na la dmigs shing/ zag bcas kyi las dang rnam smin la bden pa dang po gnyis kyis bsdus pas khyab pa'i phyir/ bsam gtan dang rnam thar sogs mkhyen pa dang/ dad sogs dbang po mchog dang mchog ma yin pa mkhyen pa dang/ nyan thos sogs kyi mos pa sna tshogs mkhyen pa dang/ khams sna tshogs mkhyen pa'i stobs rnams la ni 'gog pa shes pa ma gtogs pa'i shes pa dgu dgu yod de/ 'di dag 'dus byas zag bcas zag med gang rung kho na la dmigs pa'i phyir ro/ /'dir dbang po dang mos pa ni sems byung yin la/ khams ni sems can rnams kyi sngon goms pa'i rgyu mthun gyis grub pa'i sems dang sems byung khyad par ba la 'dod do/ /lam mkhyen pa'i stobs zhes pa'i dngos bstan gyi lam la ni lam bden gyis khyab pa med de/ de ni dmyal ba nas mya ngan las 'das pa'i bar thams cad du 'gro ba'i rgyu la lam zhes btags pa yin la/ de yang rgyu'am lam 'ba' zhig mkhyen pa la 'dod na ni 'gog pa shes pa ma gtogs pa'i dgu yin la/ lam 'bras bu dang bcas pa mkhyen pa la 'dod na ni 'gog pa yang lam gyi bral 'bras yin pas shes pa bcu ka yod par 'dod pa'i lugs gnyis las gang du 'dod kyang 'gal ba med 'dra'o/ /sngon gnas rjes dran dang/ 'chi 'pho dang skye ba mkhyen pa'i stobs gnyis ni kun rdzob shes pa kho na yin te/ sngon gnas rjes dran ni rang gzhan gyi skye ba snga ma dran pa yin la/ 'chi 'pho dang skye ba mkhyen pa ni ma 'ongs @19a @#/ /pa'i srid pa mkhyen pa ste/ 'di dag rang gi mtshan nyid la dmigs pa las spyi'i mtshan nyid bdag med pa'i rnam par ma zhugs pas bden pa la mi dmigs par 'dod do/ /zag pa zad pa mkhyen pa zhes pa yang zag pa zad pa 'gog bden 'ba' zhig mkhyen pa la 'dod na ni/ chos shes rjes shes/ 'gog pa shes pa zad pa dang mi skye ba shes pa/ kun rdzob shes pa dang drug las mi 'byung la/ yang zag pa zad pa'i rgyud la yod pa'i shes pa la 'dod na ni de'i rgyud la ni shes pa thams cad 'byung bas shes pa bcu ka yod de 'di yang 'dam kha can no/ /'o na/ bye smra'i rang lugs la stobs bcu po nang phan tshun 'gal lam mi 'gal zhe na/ mi 'gal ba 'dra ste/ lam 'bras bu dang bcas pa mkhyen pa'i stobs dang/ las dang rnam smin mkhyen pa'i stobs gnyis mi 'gal pa'i phyir te/ dang po'i khongs su phyi ma 'du ba'i phyir/ de gnyis so sor dbye ba don med do/ /zhe na/ nang gses su rgya che chung gi khyad par yod de/ lam dang 'bras bu thams cad mkhyen pa'i sgo nas lam mkhyen pa'i stobs dang/ zag bcas kyi las dang rnam smin 'ba' zhig tsam mkhyen pa'i cha nas las dang rnam smin mkhyen ba'i stobs bzhag pa'i phyir te/ dang pos 'gog lam la dmigs pa yod la/ phyi mas ma dmigs pa'i phyir/ gzhan yang bsam gtan dang/ rnam thar sogs mkhyen pa dang/ lam mkhyen pa gnyis kyang mi 'gal zhing/ dbang po mchog dang mchog min mkhyen pa dang/ mos pa sna tshogs dang/ khams sna tshogs mkhyen pa rnams kyang nang phan tshun mi 'gal ba 'dra yang re re nas ma bkod la/ 'on kyang de dag yin khyab mnyam yang ma yin pas blo gros zhib mos dpyod shes bar bya'o// ! sngon gnas 'chi 'pho skye ba'i stobs/ /bsam gtan dag na lhag ma ni/ /zhes sogs kyi skabs su/ 'o na/ stobs de dag sa gang la brten zhe na/ sngon gnas rjes dran dang/ 'chi 'pho dang skye ba mkhyen pa'i stobs gnyis ni bsam gtan gyi dngos gzhi bzhi po gang rung kho na la brten pa yin la/ stobs lhag ma brgyad ni nyer bsdogs phyi ma bdun ma gtogs pa'i zag med sa dgu la ci rigs su brten pa yod cing/ kun rdzob shes pas bsdus pa rnams @19b la ni sa thams cad la yang ci rigs su brten pa yid mod/ 'on kyang 'di dag yongs su dag pa'i ting nge 'dzin la brten nas mkhyen pa'i phyir phal che ba bsam gtan bzhi pa la brten pa'o/ /lus rten yang gling gzhan dang khams gzhan dang 'gro ba gzhan gyi rten la sangs rgyas mi 'byung zhing/ bud med kyi rten la yang mi 'byung bas dzambu gling gi skyes pa'i rten kho na la 'byung bar 'dod do// ! 'di'i stobs gang phyir thogs mi mnga'/ /zhes pa'i skabs su/ 'o na/ shes pa bcu po de dag nyan rang la sogs pa la yang ci rigs par yod bzhin du/ sangs rgyas kyi thugs rgyud la yod pa de dag kho na la ci'i phyir stobs zhes bya zhe na/ nyan rang la sogs pas kyang gnas dang gnas ma yin pa sogs 'ga' zhig tsam shes pa yod kyang mtha' dag mi shes pas shes bya la thogs pa dang bcas pa'i phyir stobs zhes bya ba'i ming mi thob la/ sangs rgyas kyi mkhyen pas ni shes bya thams cad la thogs pa mi mnga' bar 'jug pa'i phyir/ de dag kho na la nges par stobs zhes bya ba yin no/ /zhes so/ /de la kho na re/ sangs rgyas kyi mkhyen pas shes bya thams cad la thogs pa mi mnga' bar 'jug pa mi 'thad par thal/ shes bya thams cad la thogs pa mi mnga' bar 'jug pa'i don ma tshang ba'i phyir/ der thal/ sdug kun mkhyen pas 'gog lam mi mkhyen pa dang/ 'gog pa shes pas lam mi mkhyen pa dang/ lam shes pas 'gog pa mi mkhyen pa dang/ 'gog lam shes pas sdug kun mi mkhyen pa dang/ sems la dmigs pas sems byung mi 'dzin pa dang/ sems byung la dmigs pas sems mi 'dzin pa dang/ zag bcas la dmigs pas zag med mi 'dzin pa sogs yul so so la thogs pa sha dag yin pa'i phyir/ zer na ma khyab ste/ sangs rgyas kyi mkhyen pas shes bya thams cad la thogs pa mi mnga' bar 'jug pa'i don sbyor ba 'bad rtsol la ma ltos par bzhed ba tsam gyis mkhyen pa'i don yin pa las yul so so la mi thogs pa'i don ma yin pa'i phyir/ gal te yul so so la mi thogs par 'dod na/ 'o na/ gong du stobs bcu po so so la shes pa ji tsam 'byung dang/ shes pa so so'i yul du chos bcu las 'di 'gyur dang 'di mi 'gyur zhes bshad pa rnams dang 'gal bar 'gyur la/ gnas dang por yul thogs dang dmigs thogs sogs kyi khyad par bshad pa rnams dang @20a @#/ /yang 'gal bar 'gyur ro/ /des na sangs rgyas kyi mkhyen pa spyi tsam pa de shes bya thams cad la thogs pa med par 'jug pa yin la/ de'i bye brag re re nas phye na shes bya de dang de la thogs pa sha dag yin no/ /zhes smra dgos pa ni 'dod tshul gyi skyon yin kyang gnas skabs grub mtha'i rang lugs la de ltar smra ba las 'os med do// ! sku la sred med bu yi stobs/ /zhes sogs kyi skabs su/ 'o na sangs rgyas kyi thugs kyi stobs thogs pa mi mnga' na sku'i stobs ji ltar zhe na/ sku la ni sred med kyi bu'i stobs mnga'o/ /sred med kyi bu zhes pa ni stobs ches che ba'i rab kyi ming gi rnam grangs yin pa las gang zag bye brag pa zhig yod pa ni ma yin te/ 'grel pa mngon pa'i rgyan las/ de la sred med kyi bu zhes bya ba ni stobs kyi ming ste/ dper na/ grangs kyi gnas gzhan drug cu pa la grangs med ces brjod pa bzhin no/ /zhes gsungs pa'i phyir/ 'o na/ sred med kyi bu'i stobs kyi tshad ji tsam zhe na/ glang po che phal ba dang/ spos kyi glang po che dang/ tshan po che chen po dang/ rab gnon dang/ yan lag mchog dang/ stobs mchog dang/ sred med kyi bu ste bdun po de dag snga ma snga ma las phyi ma phyi ma bcu 'gyur gyis lhag pa'i stobs phyi ma ni sred med kyi bu'i stobs so/ / slob dpon 'ga' zhig ni/ sangs rgyas kyi sku'i rus pa'i tshigs re re na'ang sred med kyi bu'i stobs mnga' zhes 'dod la/ gzhan dag ni thugs kyi stobs mtha' yas pa bzhin sku'i stobs kyang mtha' yas te/ de lta ma yin na thugs kyi stobs ji ltar bzod par 'gyur zhes gsungs pa ltar don la gnas te sangs rgyas kyi sku'i stobs la yang tshad bzung du med mod kyang/ sku'i stobs la tshad bzung du yod bar smra ba yang grub mtha'i 'dod tshul lo/ /sku'i stobs de'i ngo bo ni reg bya'i skye mched du bzhed do// ! mi 'jigs pa ni rnam pa bzhi/ /zhes sogs kyi skabs su/ mi 'jigs pa ni rnam pa bzhi ste/ rang don rtogs pa phun tshogs su dam bcas pa la mi 'jigs pa dang/ de bzhin du rang don spangs pa phun tshogs su dam bcas pa dang/ gzhan don bar chad kyi chos su dam bcas pa dang/ gzhan don nges 'byung gi lam du dam bcas pa la mi 'jigs pa bzhi'o/ /de yang dang po ni chos thams @20b cad la mngon par rdzogs par sangs rgyas so zhes shes bya thams cad mngon sum du mkhyen par zhal gyis bzhes pa la sus kyang chos bzhin du rgol ba med pas mi 'jigs pa dang/ de bzhin du bdag nyid zag pa kun zad pa'am spangs par zhal gyis bzhes pa dang/ nyan thos la sogs pa la 'dod chags la sogs pa bar du gcod pa'i chos su bstan pa dang/ lam ni nges par 'byung ba nyid du bstan pa la sus kyang rgol du med pas na 'jigs pa med pa'i cha nas de dang de dag tu bzhag pa'i phyir/ de dag las mi 'jigs pa dang po la ni stobs dang po bzhin du shes pa bcu ka dang sa thams cad kyis bsdus pa yod la/ gnyis pa ni/ stobs bcu pa zag pa zad pa mkhyen pa'i stobs bzhin du shes pa drug gam bcu dang/ sa bcu gcig gis bsdus pa yod do/ /gsum pa ni/ stobs gnyis pa las dang rnam smin mkhyen pa bzhin du 'gog lam shes pa ma gtogs pa'i shes pa brgyad dang/ sa thams cad kyis bsdus pa dang/ bzhi pa ni/ stobs bdun pa thams cad du 'gro ba'i lam mkhyen pa bzhin du shes pa dgu'am bcu dang/ sa thams cad kyis bsdus pa yod do/ /'o na/ mi 'jigs pa de dag gi ngo bo shes pa yin nam zhe na/ bye brag smra bas/ mi 'jigs pa ni shes pa de dang de dag nyid du 'dod la/ slob dpon nyid kyi bzhed pa ni mi 'jigs pa ni shes pa de dag gi 'bras bu yin te/ shes pa de dag la brten nas mi 'jigs pa'am mi skrag pa 'byung ba'i phyir/ de lta na yang 'bras ming rgyu la btags nas shes pa de dag la yang mi 'jigs pa zhes brjod par bzhed la/ gang ltar yang skabs 'di'i dngos bstan gyi mi 'jigs pa ni shes pa nyid du 'dod dgos so/ /'o na/ stobs dang mi 'jigs pa de dag mi 'gal lam zhe na/ mi 'gal ba ma zad/ stobs dang po dang mi 'jigs pa dang po dang/ stobs bcu pa dang mi 'jigs pa gnyis pa sogs don gcig tu 'dod dgos te/ shes pa de dang de dag la brten nas mi 'jigs pa brnyes pa'i cha nas ming logs su btags pa las/ don la stobs kyi ngo bor gyur pa'i shes pa de dag las gzhan du yod par ma mngon te dpyad na shes so// ! dran dang shes bzhin bdag nyid gsum/ /zhes pa'i skabs su dran pa nyer bzhag @21a @#/ /gsum bshad pa ni/ dran pa dang shes bzhin gang rung gi bdag nyid dam shes rab kyi ngo bo yin la/ de yang sangs rgyas kyis nyan thos sogs la chos ston pa na/ de dag gis gus pas nyan pa dang/ sems gtod par byed na/ dgyes pa dang yid bde bar yang mi 'gyur la/ nyan pa dang sems gtod par mi byed na yang mi dgyes pa dang yid mi bde bar yang mi 'gyur zhing/ 'ga' zhig gis nyan par dang 'ga' zhig gis nyan par mi byed na yang dgyes pa dang yid mi bde ba gnyis kar mi 'gyur bar dran pa dang shes bzhin btang snyoms su bzhugs pa'i cha nas dran pa nyer gzhag gsum du bzhag pa ste/ de ni kun rdzob shes pa kho na yin par 'dod do// ! thugs rje chen po kun rdzob blo/ /zhes sogs kyi skabs su/ thugs rje chen po zhes pa ni sangs rgyas bcom ldan 'das rnams kyis 'jig rten gyi khams la nyin mtshan dus drug tu su ni der/ su ni rgud/ su ni ma smin pa smin par bya/ su ni smin pa ye shes kyi mtshon gyis brtol bar bya zhes bya ba la sogs pas sems can thams cad la sdug bsngal gsum ci rigs pa'i rnam pa can du gzigs pas kun rdzob shes pa'i bdag nyid can kho na te/ de yang gti mug med pa'i rang bzhin can no/ /de la thugs rje chen po zhes brjod pa'i rgyu mtshan ni/ bsod nams dang ye shes kyi tshogs chen pos 'grub pa dang/ rnam pa sdug bsngal gsum char la rtog pa'i rnam pa can dang/ spyod yul khams gsum gyi sems can thams cad la dmigs nas de thams cad 'du byed kyi sdug bsngal can du dran pa mnyam pa nyid du 'jug pa dang/ shes rab shin tu rno ba'i ngo bo yin pas de bas che ba gzhan med pas na ches che ba yin pa'i phyir ro// ! tha dad bya ba rnam pa brgyad/ /ces pa'i skabs su/ 'o na snying rje tsam po ba dang/ thugs rje chen po gnyis la khyad par ci yod ce na/ khyad par ram tha dad du 'byed tshul brgyad yod de/ snying rje tsam po ba de ni zhe sdang med pa'i ngo bo nyid dang/ sdug bsngal gyi sdug bsngal kho na'i rnam pa can dang/ dmigs pa 'dod pa'i sems can kho na la dmigs pa dang/ sa bsam gtan sa drug gam bzhi char na yod pa dang/ nyan rang dang so skye'i rgyud la yang yod pa dang/ 'dod pa las 'dod @21b chags dang bral pa tsam gyis thob pa dang/ nyan thos la sogs pas ni snying rje ba 'ba' zhig tu zad pa las 'khor ba'i sdug bsngal las yongs su mi skyob pa dang/ yul sdug bsngal gyi sdug bsngal can kho na la skye ba las sems can thams cad la 'dra bar snying rje ba ma yin la/ thugs rje chen po ni gti mug med pa'i ngo bo nyid dang/ sdug bsngal gsum char gyi rnam pa can dang/ khams gsum gyi sems can thams cad la dmigs pa dang/ ting nge 'dzin las su rung ba nyid kyis bskyed dgos pas bsam gtan bzhi pa'i sa pa kho na dang/ sangs rgyas 'phags pa kho na'i thugs rgyud la yod pa dang/ srid rtse las 'dod chags dang bral bas thob pa dang/ sems can thams cad 'khor ba'i 'jigs pa chen po las skyob pa dang/ sems can thams cad la 'dra bar thugs brtse ba yin pa'i phyir ro/ /'o na lugs 'dir snying rje chen po dang de 'dra'i snying rje tsam po ba gnyis la khyad par yod dam zhe na/ yod de/ snying rje chen po la de 'dra'i snying rje tsam po ba de ma yin dgos pa'i phyir/ der thal/ sangs 'phags kyi thugs rgyud la mngon du gyur pa'i snying rje chen po ni thugs rje chen po dang don gcig tu yod pa gang zhig /byang sems dang de'i rigs can gyi rgyud kyi snying rje chen po de yang de 'dra'i snying rje tsam po ba de ma yin pa'i phyir/ dang po der thal/ sangs 'phags kyi thugs rgyud kyi snying rje chen po de thugs rje chen po dang don gcig tu med na/ sangs 'phags kyi thugs rgyud la snying rje chen po med par 'dod pa'am/ yod kyang mngon du gyur mi srid par 'dod dgos na tshig tu mi mdzes par ma zad don la yang mi 'thad pa'i phyir te/ sangs rgyas rnams kyis mdzad pa'i gtso bo ni sdug bsngal can gyi sems can rnams sdug bsngal las bton te thar pa dang thams cad mkhyen pa'i go 'phang la 'god par bzhed pa nyid yin pa gang zhig /sdug bsngal can gyi sems can sdug bsngal gyis mnar ba gzigs pa'i tshe snying rje gtan nas skye ba med ces rang sde su zhig gis smra mi nus pa'i phyir/ rtsa ba'i rtags phyi ma der thal/ byang sems kyi snying rje chen po yod pa gang zhig /de'i rigs can lam du ma zhugs pa'i rgyud la yang de yod pa'i phyir/ dang po der thal/ byang sems kyi rgyud la de med na/ byang chub tu sems bskyed pa'i tshe sems can thams cad @22a @#/ /sdug bsngal las skye ba phyir du sems bskyed pa ma yin par thal ba dang/ byang sems kyi rgyud la sems can thams cad la dmigs pa'i byang chub kyi sems yod kyang/ sems can thams cad la dmigs pa'i snying rje chen po med par 'dod dgos pa dang/ sems can thams cad snying rje chen po'i dmigs yul du byar mi rung ba dang/ sdug bsngal can gyi sems can gang la dmigs kyang snying rje chen po gtan nas skye mi rigs pa dang/ byams sogs tshad med bzhi'i nang nas snying rje tshad med kyang byang sems kyi rgyud la med par thal ba dang/ byang chub kyi sems de snying rje chen po'i rtsa ba can ma yin par thal ba sogs mi 'os pa du ma zhig smra dgos pa'i phyir ro/ /byang sems kyi rigs can lam du ma zhugs pa'i rgyud la yang snying rje chen po yod par thal/ bdag cag gi ston ba dmyal ba'i shing rta 'dren pa'i gyed du sku 'khrungs pa'i tshe grogs la dmigs pa'i snying rje chen po gsar du skyes/ de nas sku tshe 'phos nas lhar skye ba bzhes/ de nas lho phyogs su rdza mkhan gyi khye'u snang byed du sku 'khrungs pa'i tshe de bzhin gshegs pa shAkya thub pa chen po'i drung du byang chub tu sems bskyed pa grub mtha'i rang lugs gang zhig /de 'dra'i byang chub kyi sems de yang dmyal ba'i rten la skye ba'i snying rje chen po'i rgyun gyis nyer lan byas pa la brten nas skye bar bye smra'i lugs bstan pa'i yig cha gzhan dag las 'byung ba ltar 'dir yang khas len dgos pa'i phyir dang/ des byang sems kyi rigs can gzhan la yang rigs 'grer mtshon chog pa'i phyir ro/ /de la kho na re/ byang sems kyi rgyud la snying rje yod kyang de ni thugs rje chen po las tha dad 'byed chos brgyad kyi sgo nas phye ba'i snying rje yin no zer na/ de mi 'thad par thal/ de 'dra'i snying rje tsam po ba de 'dod pa'i sems can sdug bsngal gyi sdug bsngal las bral 'dod tsam gyi snying rje yin pa gang zhig /byang sems kyi rgyud kyi snying rje chen po de ni sems can thams cad sdug bsngal gsum po mtha' dag las skyob 'dod kyi snying rje chen po yin pas de gnyis kyi khyad par shin tu che ba'i phyir/ dang po der thal/ 'grel pa mngon pa'i rgyan las/ nyan thos la sogs pas ni snying rje ba 'ba' zhig @22b tu zad kyi 'khor ba'i sdug bsngal las yongs su mi skyob pa dang/ zhes gsungs pa'i phyir/ phyi ma der thal/ snying rje tsam po ba de ni 'dod pa la chags pa dang bral stobs kyis thob dgos pa dang/ sa yang bsam gtan sa drug gi bsdus pa sogs yin pa gang zhig /byang sems kyi snying rje chen po ni 'dod pa la chags pa dang ma bral ba'i srid pa mtha' ma'i byang sems gzhon nu don grub lta bu'i rgyud la ni nges par yod pas de dang de'i rgyun snga mar gyur pa'i dmyal ba'i brten la gsar du skye ba'i snying rje chen po lta bu ni nges par 'dod pa'i sa pa kho na yin pa'i phyir/ der ma zad sangs 'phags kyi thugs rgyud kyi snying rje chen po ni thugs rje chen po dngos yin pas de'i khyad chos brgyad ka tshang zhing/ byang sems dang de'i rigs can gyi rgyud kyi snying rje chen po ni ngo bo dmigs rnam 'byed las sogs phal cher thugs rje chen po dang rjes su mthun gyi/ snying rje tsam po ba de dang gtan nas mi 'dra ba'i phyir/ 'on kyang byang sems sogs kyi rgyud kyi snying rje chen po de'i rten dang sa dang thob tshul gsum ni thugs rje chen po dang mi 'dra ste/ rten ni dmyal ba pa sogs so skye chags bcas pa'i rten la gsar du skye ba yod pa'i phyir dang/ sa ni 'dod pa dang bsam gtan sa drug ste sa bdun gyis bsdus pa yod pa'i phyir dang/ thob tshul kyang rten dang sa la dpags nas shes sla ba'i phyir/ byang sems sogs kyi rgyud kyi snying rje de dag la ci'i phyir chen po'i sgrar brjod ce na/ ngo bo gti mug med pa'i shes rab dang/ dmigs pa sems can thams cad la dmigs pa dang/ rnam pa sdug bsngal gsum char la rtog pa'i rnam pa can yin pas 'bras bu bsod nams tshad med pa 'dzin pa'i phyir chen po zhes brjod dgos pa yin no/ /'o na/ byang 'phags kyi rgyud la snying rje chen po gsar du skye ba yod dam/ zhe na med de/ sngar tshogs lam gyi skabs su thob pa'i snying rje chen po'i rgyun gtong rgyu ma byung bas ldan pa yin gyi/ drod nas zad mi skye shes kyi ye shes kyi bar stan thog gcig la bgrod dgos pas bar der snying rje mngon du gyur pa'am gsar du skye ba ni med ces bya'o/ /'di dag gang gis bstan na/ thugs rje chen po kun rdzob blo/ /zhes dang/ tha dad bya ba rnam pa brgyad/ /ces sogs rtsa 'grel rnams kyis shugs la bstan pa yin no/ /'o na spyir snying rje la snying rje chen po dang snying rje tsam po ba @23a @#/ /gang rung gis bsdus pas khyab bam zhe na ma khyab ste/ de gnyis gang gis kyang ma bsdus pa dmigs yul sems can nyi tshe ba la dmigs pa ngo bo zhe sdang med pa dang gti mug med pa gnyis car la gtogs pas 'dod pa'i sas bsdus zhig kyang 'jog dgos pa'i phyir ro// ! sangs rgyas thams cad tshogs dang ni/ /zhes sogs tshig rkang bzhi po'i don ni shes sla zhing/ gzhan yang sangs rgyas kyi sku gsung thugs kyi yon tan thun mong ma yin pa ni de dag tu ma zad de/ 'grel pa mngon pa'i rgyan las/ rgyu dang 'bras bu phan 'dogs pa/ /gsum po re re 'ang bzhi bzhi ste/ /zhes sogs rags bsdus sdoms kyi tshul du tshigs su bcad par sdebs nas gsungs pa rnams kyi don yang khong du chud par bya'o// 'o na 'dir tshogs gnyis kyi khyad par ji lta bu zhe na/ spyir bsod nams dang ye shes kyi tshogs tsam ni nyan rang gi rgyud la yang yod de/ theg pa rang rang gi byang chub tu sems bskyed nas rang rang gi byang chub 'grub byed kyi dge rtsa rnams tshogs gnyis kyis ma bsdus pa med pa'i phyir te/ rang 'grel las/ bskal pa chen po brgyar byang chub kyi tshogs dag la spyod pas bse ru lta bur 'gyur ro/ /zhes pa'i dngos shugs kyi don grub pa'i phyir ro/ /'on kyang tshogs gnyis khyad par can ni gtso bor sangs rgyas kyi sa'i mkhyen gzugs kyi yon tan 'grub byed kyi rgyu'i cha nas 'jog dgos te/ rang don stobs sogs ma 'dres pa'i mkhyen pa'i yon tan bco brgyad gtso bor 'grub byed kyi cha nas ye shes kyi tshogs dang/ gzhan don gzugs kyi sku dang de'i yon tan mtshan dpe sogs gtso bor 'grub byed kyi cha nas bsod nams kyi tshogs bzhag pa yin pa'i phyir dang/ tshogs gnyis po rang rang gi lag rjes mi 'dra ba re 'jog pa'i cha nas de gnyis so sor bzhag pa tsam las de gnyis po 'gal ba yang ma yin te/ gzugs sku 'grub byed bsod nams kyi tshogs kyis chos sku 'grub byed kyi rgyu dang/ chos sku 'grub byed ye shes kyi tshogs kyis gzugs sku 'grub byed kyi rgyu yang byed pa'i phyir te/ rnam gzigs mar me rin chen gtsug /zhes sogs dang/ gang nas byang chub sems dpa' yin/ /zhes sogs rtsa 'grel rnams kyi shugs kyis grub pa'i phyir ro// ! chos @23b gzhan slob dang thun mong yin/ /zhes sogs kyi skabs su/ sngar bshad pa de dag las gzhan pa'i yon tan 'ga' zhig ni slob ma nyan rang 'phags pa dang thun mong ba dang/ 'ga' zhig ni so so skye bo dang yang thun mong ba yin la/ de dag kyang gang zhe na/ nyon mongs med pa dang/ smon nas mkhyen pa dang/ so so yang dag rig pa bzhi dang/ mngon shes drug dang/ bsam gtan bzhi dang/ gzugs med bzhi dang/ tshad med bzhi dang/ rnam thar brgyad dang/ zil gnon gyi skye mched brgyad dang/ zad par gyi skye mched bcu dang/ ting nge 'dzin gsum la sogs pa'o/ /de dag las nyon mongs med pa nas so so yang dag rig pa bzhi'i bar dang/ zag zad kyi mngon shes dang/ 'gog pa'i rnam thar dang/ rnam par thar pa'i sgo gsum dang bcas pa rnams ni 'phags pa kho na dang thun mong ba yin la/ gzhan rnams ni so skye dang yang thun mong ba'o// ! nyon mongs med pa kun rdzob shes/ /zhes sogs kyi skabs su de dag rgyas par bshad pa ste/ de la dang po 'phags pa kho na dang thun mong ba nyon mongs med pa sogs bshad pa la/ de yang nyon mongs med pa'i ting nge 'dzin ni/ dgra bcom pa gang dag gzhan rgyud kyi nyon mongs spong bar 'dod nas bdag mthong ba dang/ bdag la dmigs nas gzhan rgyud la chags sdang sogs nyon mongs pa skye bar ma gyur cig snyam du rab mtha'i bsam gtan bzhi pa la mnyam par bzhag nas/ de las langs rjes su 'ang de dang rjes su mthun pa'i shes pa bskyed pa la byed pa ste/ de ni kun rdzob shes pa kho na yin la/ sa yang bsam gtan bzhi pa kho na dang/ gang zag ni dgra bcom pa mi g.yo ba'i chos can gyis yin gyis/ nyams pa'i chos can sogs kyis ni ma yin te/ de dag ni res 'ga' rang rgyud la yang nyon mongs skye ba srid na gzhan gyi nyon mongs spong ba lta ci smos pa'i phyir ro/ /lus rten ni gling gsum gang rung gi mi kho na yin la/ ting nge 'dzin 'di'i dmigs yul ni 'dod pa'i sas bsdus kyi sgom spang nyon mongs ma 'ongs pa gzhi dang bcas pa kho na yin gyi khams gong ma'i nyon mongs ni mi 'byung ste/ gong ma pa rnams 'phags pa la dmigs nas nyon mongs skye ba shes chung ba'i phyir/ de bzhin du mthong spang nyon mongs dang/ sgom spang nyon mongs 'das pa dang da ltar ba yang mi 'byung ngo/ /de la kho na re/ nyon mongs med pa'i ting nge 'dzin la @24a @#/ /gnas pa'i nyan thos dgra bcom pa chos can/ khyod la dmigs pa'i nyon mongs med par thal/ khyod la dmigs nas nyon mongs skye mi srid pa'i phyir zer na ma khyab te/ de dang rten gcig pa'i ting nge 'dzin de ma thob pa'i dgra bcom pa de la dmigs pa'i nyon mongs da ltar ba yod kyang/ de ni de'i tshe 'das pa'i ngo bor 'phos te 'gag zin la/ 'das pa la gsar skye med pa ni/ skyes zin slar yang skye ba med pa'i rtags kyis 'grub pa'i phyir dang/ de la dmigs pa'i nyon mongs ma 'ongs pa ni gzhan rgyud kyi sems bsrung ba'i nyon mongs med pa'i ting nge 'dzin gyi nus pas mi skye ba'i chos can du byas zin pa'i phyir te/ 'grel pa mngon pa'i rgyan gyi mchan bu las/ lam 'dis su yang nyon mongs par mi byed pas na nyon mongs med pa'o/ /'di ni gzhan gyi sems bsrungs ba'i thabs mkhas kyi khyad par ro/ /zhes gsungs pa'i phyir/ gzhan yang de la dmigs nas nyon mongs skye ba med par thal/ des gzhan rgyud la nyon mongs skye ba'i dmigs rkyen byed na/ des nyon mongs med pa'i ting nge 'dzin la mnyam par bzhag pa'i dgos don ma grub pa'i phyir ro// ! smon nas shes pa'ang de bzhin no/ /zhes sogs kyi skabs su/ smon nas shes pa'i ting nge 'dzin kyang ngo bo dang/ gang zag dang/ rten rnams nyon mongs med pa dang kun tu mtshungs la/ 'on kyang de'i dmigs pa la ni rang gi spyod yul du gyur pa'i gzugs sogs kyi chos thams cad 'byung ngo/ /smon nas shes pa zhes pa'i rgyu mtshan ni/ yul 'di dang 'di shes par bya'o snyam pa'i smon pa sngon du btang nas rab mtha'i bsam gtan bzhi pa la mnyam par bzhag ste de'i yul du ji tsam gyur pa shes pa'o/ /de yang bye brag smra bas ni/ des gzugs med ni mngon sum du mi shes te/ 'di bsam gtan bzhi pa'i sa pa yin pas gzugs med yul du byed mi nus pa'i phyir zhes 'dod la/ grub mtha' gong ma pa dag ni/ sangs rgyas rnams kyi mngon sum gyi yul du ma gyur pa ni 'ga' yang med pas gzugs med pa'ang mngon sum du mkhyen par 'dod la/ der ma zad mngon rtogs rgyan las/ nyan thos nyon mongs med pa'i lta/ /zhes sogs dang/ sangs rgyas smon nas mkhyen pa ni/ /zhes @24b sogs kyis sangs rgyas kyi nyon mongs med pa dang smon nas mkhyen pa ni nyan rang las ches khyad par du 'phags tshul mang du gsungs te 'dir ma bkod la/ lugs 'dir ni/ sangs rgyas sbyor ba 'bad rtsol la ltos dgos mi dgos tsam las/ khyad par gzhan ma bshad do// ! de bzhin chos don nges tshig dang/ /zhes sogs kyi skabs su/ so so yang dag rig pa ni bzhi ste/ chos so so yang dag par rig pa dang/ de bzhin du don dang/ nges pa'i tshig dang/ spobs pa so so yang dag par rig pa ste bzhi'o/ /de dag gi rten dang gang zag ni nyon mongs med pa'i ting nge 'dzin dang mtshungs la/ dmigs pa dang/ sa dang/ ngo bo la ni khyad par yod de/ dang po gsum ni rim pa bzhin ming dang don dang/ ngag rnams la dmigs nas so sor ma 'dres par thogs pa med par shes pa yin te/ dang po chos so so yang dag par rig pas ni chos rnams kyi ming tshig yi ge'i tshogs rig pa dang/ gnyis pas ni chos rnams kyi don rang gi mtshan nyid dam/ don gyi mchog mya ngan las 'das pa rig pa dang/ gsum pas ni/ chos rnams kyis bshad pa'i rgyu mtshan can gyi ngag rig pa ste/ rgyu mtshan can gyi ngag tshig de dag la nges pa'i tshig zhes kyang bya ba'o// 7bzhi pa spobs pa so so yang dag rig pa la gnyis te/ mngon par brjod pa la dbang ba dang/ lam la dbang ba gnyis las/ dang po ni/ chos rnams kyi 'gal 'brel gyi don rig nas gzhan la mngon par brjod pa la thogs pa med par shes pa dang/ gnyis pa ni/ rang nyid kyi yid la byed pa'i sgo nas zhi lhag gi ting nge 'dzin mi brjod pas lam la dbang ba la thogs pa med par shes pa ste/ dang po ni/ 'bel gtam la mkhas pa yin la/ gnyis pa ni rang gi yid la byed pa la mkhas pa'o/ /'di ni spobs pa'ang yin la so so rig pa'ang yin pas spobs pa so so rig pa'am/ yang na spobs pa ni rig pa dang grol bar smra ba yin la/ de shes pa'i phyir na de ltar brjod do// so so yang dag rig pa bzhi po 'di dag rang gi dmigs yul ming dang don sogs la mnyam rjes gnyis kar dmigs mod kyang/ smra ba ni rjes thob kyi tshe ma gtogs mi 'byung ngo/ /yang/ spobs pa so so yang dag par rig pa'i dmigs yul la ni ngag dang lam gnyis 'byung ste/ mngon brjod la dbang @25a @#/ /ba ni dag la dmigs shing/ lam la dbang ba ni lam la dmigs pa ste/ lam yang zag bcas zag med gnyis ka 'byung ngo/ /de la 'gog pa shes pa ma gtogs pa'i shes pa dgu 'byung ste/ ngag la dmigs pa la ni kun rdzob shes pa/ sdug kun shes pa gnyis chos shes rjes shes/ zad pa dang mi skye ba shes pa ste bdun dang/ lam la dmigs pa yang/ zag med kyi dbang du byas na lam shes pa/ chos shes/ rjes shes/ zad pa dang mi skye ba shes pa/ pha rol sems shes te drug dang/ lam zag bcas la dmigs na sdug kun shes pa dang kun rdzob shes pa'ang 'byung pas dgu'o/ /'o na/ ngag dang lam la dmigs pa la sdug kun shes pa ji ltar 'byung zhe na/ 'byung ste/ de'i dmigs yul du gyur pa'i ngag ni zag bcas yin pas sdug kun gyis bsdus la/ lam zag bcas kyang de dang mtshungs pa'i phyir ro/ /bzhi pa 'di ni sa yang 'dod pa nas srid rtse'i bar thams cad na ci rigs par yod do/ /don so so yang dag rig pa zhes pa'i don chos thams cad la 'dod na ni shes pa bcu po thams cad yod la/ 'on te myang 'das kho na rig pa la 'dod na ni/ 'gog pa shes pa/ chos shes/ rjes shes/ zad pa dang mi skye ba shes pa/ kun rdzob shes pa ste drug 'byung zhing/ sa yang thams cad na yod do/ /de gnyis las gzhan chos so so yang dag pa rig pa dang/ nges tshig so so yang dag par rig pa gnyis ni kun rdzob shes pa kho na yin la/ sa ni chos so so yang dag rig pa ni 'dod pa dang bsam gtan bzhi na yod kyi/ de yan chad na ming tshig yi ge'i tshogs med pa'i phyir/ nges tshig so so yang dag par rig pa ni 'dod pa dang bsam gtan dang po kho na na yod de/ de brtags don dpyad nas ngag tu smra bas na/ ngag ni rtog pas kun nas bslang dgos pas gnyis pa yan chad na rtog pa med pa'i phyir ro/ /de thams cad kyi sbyor ba ni sangs rgyas kyi bka'i rnam grangs ngo bo nges tshig dbye ba la mkhas par byas pas thob cing/ bzhi po de dag gcig thob na thams cad thob pa yin la gang rung gcig ma tshang bar thob pa ni med do/ /'on kyang sbyor ba'i gnas skabs kyi go rim ni yod de/ chos te yi ge'i rjes su 'brang ba las don rtogs shing/ don las nges pa'i tshig shes la/ de las rig grol gyi spobs @25b pa 'byung ba'i phyir ro/ /de la kho na re/ bsam gtan gnyis pa yan chad ni ngag smra ba med par thal/ ngag ni 'dod dang dang po ni/ /zhes gsungs pa'i phyir zer na ma khyab ste/ de yan chad kyi sas bsdus pa'i ngag smra ba med ces pa'i don yin pa'i phyir te/ gnyis pa yan chad ngag smra na kun slong gi rtog dpyod mngon du gyur nas smra dgos pas kun slong gi rtogs dpyod gang du bsdus pa'i sa der ngag kyang bsdu dgos pa'i phyir/ de ltar ma yin na/ 'o na/ kho rang la/ gnyis pa yan chad kyi sas bsdus kyi ming tshig yi ge gsum med par thal/ de gsum po de rnam rtog gi yul du gyur pa'i sgra spyi la 'dod pa gang zhig / de 'dra'i yid yul du shar ba'i sgra spyi 'dren byed kyi ngag smra ba gnyis pa yan chad na med pa'i phyir/ dang po der thal/ tshig gam ming yin de dag ni/ /gzugs dang 'du byed dag tu 'dod/ zhes gsungs pa'i phyir/ phyi ma der thal/ khyod kyis/ ngag ni 'dod dang dang po na/ /zhes pa'i don 'grel tshul 'thad pa'i phyir/ rtsa bar 'dod na mi 'thad par thal/ chos rig 'dod dang bsam gtan na/ zhes gsungs pa'i phyir/ de la yang kho na re/ gnyis pa yan chad na ming tshig yi ge gsum med par thal/ de gsum po ngag sgra rang mtshan pa yin pa'i phyir/ de gsum ni ka zhes brjod pa dang/ gzugs zhes brjod pa dang/ gzugs ni dbang po lnga dang don/ /zhes pa lta bu'i skad kyi gdangs la byed pa'i phyir zer na/ rtags ma grub ste/ de gsum po de 'dra ba'i skad kyi gdangs nyan shes kyi thos pa las byung ba'i rnam rtog gi yid yul du shar ba'i sgra spyi la 'dod pa gnas gnyis par rgyas par bshad zin pa ltar yin pa'i phyir ro/ /de ltar yin kyang gnyis pa yan chad kyi sas bsdus pa'i ngag tsam po ba ni yod de/ bsam gtan bzhi ka'i sas bsdus kyi bsam gtan dang zag med kyi sdom pa'i ngo bor gyur pa'i rig byed ma yin pa'i ngag yod pa'i phyir ro// ! drug po de dag rab mtha' bas/ /zhes pa'i skabs su/ nyon mongs med dang/ smon nas shes pa dang/ so so yang dag rig pa bzhi ste drug po de ni rab mtha'i bsam gtan bzhi pa'i stobs kyis thob par bshad pa yin la/ 'o na/ gong du so so yang dag rig pa bzhi'i gnyis pa dang bzhi pa gnyis su thams cad dang/ chos rig 'dod dang bsam gtan na/ /ngag ni 'dod dang dang po na/ /zhes pa'i khyad par bshad pa don @26a @#/ /med bar 'gyur ro zhe na/ de dag rab mtha'i bsam gtan bzhi pa'i stobs kyis thob par bshad pa las bsam gtan bzhi pa'i sa pa kho na yin par bstan pa ni ma yin no// ! de ni rnam drug bsam gtan mtha'/ /zhes sogs kyi skabs su/ rab mtha'i bsam gtan bzhi pa de la ni rnam pa drug yod de/ de'i ngo bor gyur ba'i nyon mongs med dang/ smon nas shes pa dang/ chos dang don dang spobs pa so so yang dag rig pa gsum dang/ de dag gang du'ang ma gtogs pa'i rab mtha'i bsam gtan 'ba' zhig pa drug yod pa'i phyir/ des na/ drug po de dag rab mtha' bas; ;zhes pa dang/ de ni rnam drug bsam gtan mtha'/ /zhes pa gnyis don mi mtshungs te/ dang po drug po gang rung yin na bsam gtan bzhi ba'i sas bsdus yin pas ma khyab la/ phyi ma drug po gang rung yin na bzhi pa'i sas bsdus yin pas khyab pa'i phyir ro/ /rab mtha'i bsam gtan bzhi pa de ni sa kun gyis mthun par byas pa yin te/ 'dod sems nas srid rtse'i bar snyoms par 'jug pa dang/ yang srid rtse nas 'dod sems kyi bar dang/ de nas yang 'dod sems nas bsam gtan bzhi pa la snyoms par 'jug pa'i bar sa kun gyis lugs 'byung dang lugs ldog tu snyoms par 'jug pas mthun par byas pa'i rjes su/ bsam gtan dang po las gnyis pa/ gnyis pa las gsum pa/ gsum pa las bzhi par 'phel bas na/ 'phel ba'i rab kyi mtha' yin pas de ltar brjod pa'i phyir/ des na rab mtha'i bsam gtan bzhi pa'i dngos gzhi thob pa la srid rtse'i bar gyi dngos gzhi thob dgos te/ sa thams cad la lugs 'byung lugs ldog tu snyoms par 'jug pa sngon du 'gro dgos pa'i phyir ro/ /nyon mongs med pa la sogs pa'i yon tan de dag kyang sngar bshad pa ltar gang zag gzhan gyis ni sbyor ba 'bad rtsol la ltos dgos kyi 'dod chags dang bral ba tsam gyi mi thob la/ sangs rgyas ni bzhad pa tsam la rag las bas sbyor ba la ltos dgos pa cung zad kyang med do// ! rdzu 'phrul rna ba yid dang ni/ /zhes sogs kyi skabs su/ phal che ba so so skye bo dang yang thun mong ba'i yon tan bshad pa la/ dang po mngon par shes pa la drug ste/ rdzu 'phrul @26b gyi mngon shes/ lha'i rna ba'i mngon shes/ de bzhin du gzhan gyi sems shes pa dang/ sngon gyi gnas rjes su dran pa dang/ 'chi 'pho ba dang skye ba shes pa dang/ zag pa zad pa zhes pa'i mngon shes te drug go/ 'o na/ lha'i mig gi mngon shes dang bdun du mi 'gyur ram/ zhe na/ mi 'gyur te/ lugs 'dir lha'i mig gi mngon shes de 'chi 'pho skye shes kyi mngon shes kyi khong su bsdus par 'dod par snang ste 'og tu 'chad do/ /de dag las dang po lnga ni so skye dang thun mong ba yin la/ drug pa ni/ dgra bcom pa kho na'i rgyud la yod do/ /mngon shes de dag thams cad kyang ngo bo ni rnam grol gyi lam shes rab kyi rang bzhin kho na yin no/ /'o na/ lha'i mig dang rna ba'i mngon shes ni dbang shes yin pas rnam grol lam du ji ltar 'gyur zhe na/ lam gzhan gyi rnam grol lam du 'gal yang mngon shes kyi rnam grol lam du 'jog pa mi 'gal bar 'dod do/ /des na spyir rnam grol lam yin na dge ba yin pas ma khyab par thal/ lha'i mig dang rna ba'i mngon shes gnyis rnam grol lam yin pa gang zhig /de gnyis dge ba ma yin pa'i phyir/ zer na/ 'dod lan 'debs dgos so/ /mngon shes de dag las gsum pa gzhan sems shes pa dang/ drug pa zag zad shes pa gnyis las gzhan pa'i lhag ma bzhi po thams cad ni kun rdzob shes pa kho na yin la/ gzhan sems shes pa la ni shes pa lnga yod de/ zag med kyi dbang du byas na chos shes/ rjes shes/ lam shes pa/ pha rol sems shes bzhi dang/ zag bcas la kun rdzob shes pa dang/ pha rol sems shes gnyis yod pa'i phyir/ shes pa gzhan rnams ni mi 'byung ste/ gzhan sems shes pa'i mngon shes la bden pa'i rnam pa can yin min gnyis dang/ de yang mtshungs ldan kho na la dmigs pa sogs yin pa pha rol sems shes dang mtshungs pa'i phyir/ zag pa zad pa'i mngon shes ni zag zad mkhyen pa'i stobs bzhin du de'i ngo bor gyur pa'i shes pa drug gam bcu yod la/ sa yang bcu gcig po thams cad kyis bsdus pa yod do/ /'di thad 'grel pa mngon pa'i rgyan du/ zag pa zad pa'i rgyud la yod pa'i shes pa yin par 'dod na ni de'i rgyud la shes pa bcu ka yod pa'i phyir shes pa bcu char yin no/ /sa yang ci rigs par bcu gcig po thams cad yin par shes par bya'o/ /zhes pa'i don @27a @#/ /zag pa zad pa'i rgyud la yod pa'i shes pa bcu dang sa bcu gcig gi ngo bor gyur pa'i zag zad kyi mngon shes yod pa'i don yin gyi/ zag pa zad pa'i rgyud kyi shes pa yin na zag zad kyi mngon shes yin pas khyab pa'i don ni ma yin te/ de'i rgyud kyi sa bcu gcig po gang rung gis bsdus pa'i shes pa bcu po gang rung la zag zad kyi mngon shes kyis ma khyab pa'i phyir te/ de'i rgyud kyi shes pa bcu po gang rung gi ngo bor gyur pa'i bar chad med lam rnams mngon shes ma yin pa'i phyir ro/ /'on kyang sangs rgyas kyi thugs rgyud kyi zag zad kyi mngon shes ni zag zad mkhyen pa'i stobs dang don gcig tu mngon no// ! lnga ni bsam gtan bzhi dag na/ /zhes sogs kyi skabs su/ mngon shes dang po lnga ni bsam gtan gyi sa bzhi po dag gang rung na yod la/ de dag las kyang gsum ni/ bsam gtan khyad par can las gzhan pa'i bsam gtan gyi dngos gzhi bzhi na yod cing/ lha'i mig dang rna ba'i mngon shes n dbang shes yin pas dngos gzhis ma bsdus kyang dngos gzhi la brten nas thob pa ni yin la/ de'i phyir 'grel pa rnams su mngon shes dang po lnga dngos gzhi bzhi na yod par gsungs pa'i dgongs pa yang de ltar yin par shes dgos te 'og nas kyang 'chad par 'gyur ro/ /de dag gzugs med kyi dngos gzhi na ni med de/ de dag 'dod pa la sogs pa'i gzugs la dmigs nas sgrub dgos na gzugs med kyi dngos gzhis 'og sa'i zag bcas la mi dmigs pa'i phyir/ de dag gzugs la dmigs nas sgrub dgos te/ rdzu 'phrul dang lha'i rna ba dang/ 'chi 'pho skye shes gsum ni gzugs la dmigs pa'i phyir dang/ sems shes dang sngon gnas rjes dran gnyis kyang gzugs la dmigs nas sgrub dgos pa'i phyir te/ gzhan sems shes pa ni bsam gtan la brten nas gzhan gyi gzugs 'di las sems kyi rnam pa ji 'dra zhig ces pha rol la yid gtad de/ gang gi tshe gzugs la ma bltos par gzhan sems shes pa de'i tshe sems shes grub par 'jog pa'i phyir dang/ de bzhin du bsam gtan la brten nas rang gzhan gyi gzugs la dmigs te yid kyi rnam shes 'gag ma thag pa'i mtshan ma bzung nas de snga ma snga ma la yid gtad de mthar nying mtshams sbyor ba'i sems dran pa dang/ de'i snga ma'i bar do'i sems dang/ de'i snga ma'i 'chi @27b srid dang/ de'i snga ma'i sngon dus kyi srid pa la yid gtad de/ gang gi tshe de'i sngon ma'i bar srid dran pa na sngon gnas rjes dran grub par 'jog pa'i phyir/ de yang dang po ni rim gyis dran la grub nas ni tshe gcig dang gnyis la sogs pa thod rgal du yang dran te/ de yang rang gzhan gang rung gis sngon nyams su myong pa kho na dran no/ /'di'i thad kyi 'grel ba mngon pa'i rgyan du/ 'o na rten 'dod pa'i sngon gnas rjes dran gyis gnas gtsang ma rnams ji ltar dran te/ phyir mi 'ong yin pas de dag 'dir mi skye zhing/ so so'i skye bo rnams der mi skye ba'i phyir ro zhe na/ nyams su myong ba ni mthong ba dang thos pas nyams su myong ba gnyis pas gnas gtsang ma pa rnams ni 'di lta bu yin no zhes thos pas nyams su myong ba'i phyir ro/ /zhes gsungs pa'i don/ 'dod pa ba dag gis skye ba sngon mar gyur pa'i phyir mi 'ong dran pa'i don ni ma yin te/ phyir mi 'ong gi skye ba phyi mar gyur pa'i 'dod pa ba med pa'i phyir te/ phyir mi 'ong 'dod par skye ba len pa med pa'i phyir/ des na de'i don ni 'dod pa bdag gis rang las rgyud tha dad pa'i gnas gtsang ma'i rten can gyi phyir mi 'ong dag gi skye ba sngon ma dran pa'i don yin la/ de yang phyir mi 'ong de dag gi gzugs sogs dngos su ma mthong yang 'di dang 'di lta bu zhes thos pa la brten nas de dag la yid gtad pa las de'i skye ba sngon ma dran pa yod pa'i don no/ /'o na/ de ltar dra pa'i 'dod pa'i so skye yod na/ de ni sa dbang gang zag 'das/ /zhes sogs kyis mi gnod dam zhe na/ mi gnod de/ de ni pha rol sems shes kyi dbang du byas la/ 'dir ni sngon gnas rjes dran gyi skabs yin pas mi mtshungs so/ /rdzu 'phrul dang lha'i rna ba dang mig gi mngon shes gsum gyi sbyor ba ni/ rim pa bzhin bsam gtan la brten nas lus yang ba dang 'phar ba sogs yid la byed pa dang/ thag ring po dang chung ngu'i sgra dang/ snang ba yid la byed pa yin la/ zag pa zad pa'i mngon shes kyi sbyor ba ni sngar gong du/ tshul gnas thos dang bsam ldan pa/ /zhes sogs nyon mongs spong ba'i thabs rgyas par bshad pa rnams so// ! rang dang 'og sa'i yul can yin/ /zhes sogs kyi skabs su/ mngon shes lnga po de dag kyang rang sa dang 'og sa'i yul rig pa'i spyod yul can yin gyi gong ma ni ma yin te/ 'og ma'i sas bsdus kyi mngon shes kyis gong sas bsdus pa'i yul mi 'dzin pa'i phyir/ des na rdzu 'phrul gyis kyang rang sa dang 'og mar 'gro @28a @#/ /zhing sprul pa las gong mar mi 'gro ba sogs gzhan la'ang sbyor ro/ /'o na lha'i mig dang rna ba'i mngon shes gnyis kyis bsam gtan gnyis pa yan chad kyi gzugs sgra sogs mi shes par 'gyur te/ de gnyis bsam gtan dang po'i sas bsdus pa'i phyir/ zer na/ dbang shes dang po'i sas bsdus kyang rten mig dang rna ba'i dbang po gong ma'i sas bsdus pa la ma brten par gong ma'i gzugs mthong ba sogs med de/ mig gis gong ma'i gzugs ma yin/ zhes 'byung ba'i phyir/ des na mig dang rna ba'i mngon shes gnyis kyang rten gyi sgo nas rang sa dang 'og sa'i yul can nyid du bsdus so/ /de la kho na re/ sngon gnas rjes dran gyi mngon shes kyis rang gzhan gang rung gi skye ba snga mar gyur pa'i gzugs med pa'i sems rig par thal/ des rang gzhan gang rung gi skye ba snga mar gyur pa'i gzugs med pa'i skye 'chi sogs dran pa'i phyir zer na ma khyab ste/ des rang gzhan gang rung gi skye ba snga ma'i skye 'chi sogs dran pa'i don ni rang gzhan gang rung gi rgyud la 'gag ma thag pa'i rnam shes kyi mtshan ma bzung nas snga ma snga ma la yid gtong pa na gzugs med pa'i skye 'chi sogs dran pa tsam gyi don yin pa las des de rnams shes pa'am rig pa'i don ma yin pa'i phyir/ der thal/ 'grel pa mngon pa'i rgyan las/ de ltar na gzugs med nas shi 'phos nas 'dir skyes pa ji ltar sngon gyi gnas rjes su dran pa'i mngon shes kyis dran te de ni bsam gtan bzhi'i sa pa yin pas des gong ma gzugs med kyi sems mi 'dzin pa'i phyir ro zhe na/ de ni pha rol po'i rgyud la brten nas bskyed de/ pha rol po'i yid shes 'gag ma thag pa'i mtshan ma bzung nas bskyed pa'i phyir ro/ /zhes gsungs pa'i phyir/ lung don de ltar yin pa yang de nyid las/ de'i phyir gzugs med pa'i sems ni sems kyi rnam grangs shes pa dang sngon gyi gnas dran pa'i mngon shes kyis mi 'dzin te/ de ni de'i gong ma'i sems yin pa'i phyir ro/ /zhes gsungs pa'i phyir/ de ltar ma yin na/ 'o na kho rang la/ sngon gnas rjes dran gyi mngon shes kyis gzugs med pa'i skye ba mi dran par thal/ des de'i skye ba mi shes pa'i phyir/ 'dod na/ des de 'dra'i @28b skye ba dran par thal/ des de 'dra'i skye ba thos pa'i nyams su myong ba'i stobs kyis dran pa'i phyir te/ des de 'dra ba'i gzugs med pa'i skye ba mi dran na de'i 'chi ba yang mi dran la/ de'i 'chi ba mi dran na de nas she 'phos te 'dir skye ba yang dran par mi 'gyur bas/ de ltar na sngon gyi gnas gang yang ma dran pas sngon gnas rjes dran gyi mngon shes kyis dran pa'i yul la des rig pa'i yul yin pas ma khyab par thal lo zer na/ 'dod pa yin te/ sngon gnas rjes dran gyi mngon shes kyi yul du gyur pa'i gzugs med kyi skye 'chi dang tshe'i tshad sems kyi gnas tshul sogs des dran pa'i yul yin kyang des rig pa'i yul ma yin pa'i phyir ro/ /gzhan yang/ skye ba 'dzin pa'i mngon shes kyis 'chi ba 'dzin la 'chi ba 'dzin pa'i mngon shes kyis skye ba 'dzin pa sogs yin par thal/ skye ba dran pa'i mngon shes kyis 'chi ba dran la 'chi ba dran pa'i mngon shes kyis skye ba yang dran pa sogs yin pa'i phyir te/ mdo las/ sngon gyi gnas rnam pa du ma dang bcas/ yul phyogs dang bcas/ gleng gzhi dang bcas pa rjes su dran no/ /zhes dang/ 'grel pa mngon pa'i rgyan las kyang/ sngon gyi gnas dang rus dang rigs dang kha zas la sogs dran dgos pa'i phyir gzugs la ltos pa yin la/ zhes gsungs pa'i phyir ro/ /'dod na mi 'thad par thal/ shes bya rang gi mtshan nyid rnams/ /rdzas re re zhig spyod yul lo/ /zhes gsungs pa'i phyir ro/ /'o na/ sngon gnas rjes dran gyi mngon shes kyis yul gang yang mi shes par thal/ gzugs med pa'i skye ba sogs dran pa'i sngon gnas rjes dran gyi mngon shes kyis gzugs med sas bsdus kyi skye ba sogs gang yang mi shes pa'i phyir zer na ma khyab ste/ 'di ni 'og sa'i mngon shes dang po lngas gong sa'i yul mi 'dzin pa'i rgyu mtshan gyis yin la/ rang sa dang 'og sa'i sngon gyi gnas rjes su dran pa'i mngon shes kyis rang sa dang 'og sa'i sngon gyi gnas dran par ma zad mngon sum du shes pa yang yin te/ rang dang 'og sa'i yul can yin/ /zhes gsungs pa'i phyir ro/ /mngon shes de dag kyang sngar ma bskyed pas ma 'dris pa dag gis ni sbyor bas thob par bya ba yin la/ tshe rabs sngon mar goms shing 'dris pa rnams kyis ni 'dod chags dang bral ba tsam gyis thob cing/ 'on kyang de dag mngon @29a @#/ /du 'gyur ba ni 'dris ma 'dris gnyis kas kyang sbyor ba'i stobs kho nas thob pa ste/ de yang sems can gyi dbang du byas so/ /de ltar na gnyis ka'i cha las rnam grol gyi nyan rang dgra bcom pas mngon shes mngon du 'gyur ba la sbyor ba 'bad rtsal la ni ltos dgos te/ 'grel pa mngon pa'i rgyan las/ de dag mngon sum du 'gyur ba ni 'dris pa dang ma 'dris pa gnyis ka'ang sbyor ba'i stobs kho nas thob par bya ba yin no/ /zhes gsungs pa'i phyir/ 'on kyang mngon shes 'grub byed kyi sbyor ba bar chad med lam la ni ltos mi dgos te/ 'grel pa de nyid kyi mchan bu las/ gal te bar chad med lam gyis bsdus na dgra bcom gnyis ka'i cha las rnam grol la mngon shes med par 'gyur te bar chad med lam btang nas med pa'i phyir ro/ /zhes gsungs pa'i phyir/ ! gsum pa dran pa nyer gzhag gsum/ /zhes sogs kyi skabs su/ 'o na/ mngon shes de dag la dran pa nyer gzhag gang dang gang yod zhe na/ /mngon shes gsum pa gzhan sems shes pa ni mtshungs ldan kho na la dmigs pas na tshor ba dang sems dang/ chos dran pa nyer gzhag gsum po ci rigs par yod la/ rdzu 'phrul dang lha'i rna ba dang lha'i mig gi mngon shes gsum la ni dngos dang rjes mthun ci rigs pa'i lus dran pa nyer gzhag yod de/ rdzu 'phrul gyi mngon shes kyis ni phyi'i skye mched gzugs dri ro reg bya bzhi po gang rung la dmigs shing/ lha'i rna bas ni sgra la dmigs pa dang/ lha'i mig gis ni 'chi ba dang/ bar do dang/ skye srid pa rnams kyi kha dog bzang ngan sogs gzugs la dmigs pa ste/ don du de gsum char gyis gzugs la dmigs pa'i phyir zhes so/ /'di la yang dngos dang rjes mthun pa zhes pa'i khyad par sbyor dgos te/ ci'i phyir zhe na/ rdzu 'phrul gyi mngon shes la lus dran pa nyer gzhag dngos gnas pa yod par 'dod chog kyang/ lha'i mig dang rna ba'i mngon shes gnyis la dran pa nyer gzhag rjes mthun tsam las dngos gnas pa yod par 'dod mi rigs te/ de ltar 'dod na dran pa nyer gzhag la lung ma bstan zhig yod par 'dod dgos pa dang/ byang phyogs so bdun po gang rung la yang lung ma bstan 'jog dgos @29b pa sogs gong 'og mang po zhig dang 'gal bar snang la/ der ma zad 'grel pa rnams su mngon shes 'di dag dran pa nyer gzhag de dang de'i ngo bo yin pa lta bur gsungs ba rnams kyang mngon shes de dag gi ngo bor gyur pa'i dran pa nyer gzhag de dang de yod pa'i don yin pa las/ mngon shes de dag gang rung yin na dran pa nyer gzhag yin pas khyab pa'i don yang gtan min pas gzhung chen po'i spam bshad la ma 'khrul ba'i dgongs pa len tshul shes dgos kyi/ de lta min pa spam bshad ltar 'dod na mngon shes gsum pa de dran pa nyer gzhag gsum ka yin pa dang/ sngon gnas rjas dran la dran pa nyer gzhag bzhi ka yin pas khyab pa sogs su yang 'dod dgos par 'gyur ro/ /de la kho na re/ 'chi 'pho skye shes kyi mngon shes dang lha'i mig gi mngon shes don gcig yin par thal/ 'di'i thad kyi 'grel pa mngon pa'i rgyan du/ de gnyis don gcig lta bur gsungs snang ba'i phyir zer na ma khyab ste/ 'grel pa de nyid las/ gal te lha'i mig gi mngon shes kyi dmigs yul gzugs kyi skye mched kho na yin na zhes pa nas sems kyi rnam grangs shes pas shes pa yin no zhes bya bar rigs so zhes pa'i bar ni bye smra'i 'dod tshul la rigs pa'i 'phul mtshams bstan pa las de gnyis don gcig tu gsungs pa ma yin te/ 'chi 'pho skye shes kyis 'chi 'pho ba dang skye ba sogs la dmigs dgos pa gang zhig /lha'i mig gi mngon shes ni gzugs kyi skye mched kho na la dmigs dgos pa'i phyir/ dang po der thal/ des 'chi 'pho ba dang skye ba lam dmigs na de shes pa'i mngon shes kyi don ma tshang ba'i phyir/ phyi ma der thal/ des gzugs kyi skye mched kho na la ma dmigs na/ 'grel pa mngon pa'i rgyan du/ bye smra phyogs sngar bslangs nas/ gal te lha'i mig gi mngon shes kyi dmigs yul gzugs kyi skye mched kho na yin na zhes sogs rigs pas 'phul ba gang zhig /bye smras de ltar mi 'dod na phyogs snga ma lon par thal ba'i skyon 'jug pa'i phyir ro/ /'o na/ khyod kyis gong du 'chi 'pho skye shes kyi mngon shes kyi khongs su lha'i mig gi mngon shes kyang bsdus nas mngon shes drug tu 'dren pa mi 'thad par thal lo zer na/ skyon med de lha'i mig gi mngon shes de 'chi 'pho skye shes kyi mngon shes rjes @30a @#/ /mthun pa yin pas de'i khongs su 'du ba yin pa'i phyir te/ chos de'i khongs su 'du na chos de yin mi dgos pa'i phyir ro/ /gzhan yang/ de gnyis 'grub byed kyi sbyor ba gcig gis 'grub pa yod pa'i rgyu mtshan gyis kyang 'chi 'pho skye shes kyi mngon shes kyi khongs su gcig shos 'du rigs pa'i phyir ro/ /'o na de gnyis sbyor ba gcig gis 'grub pa yod na dang por gang 'grub ce na/ de la ni nges pa med de/ gang zag gi rigs 'ga' zhig gis 'chi 'pho skye shes kyi mngon shes sngar 'grub nas des gcig shos 'dren pa'ang yod la/ 'ga'zhig gis lha'i mig gi mngon shes sngar 'grub nas des gcig shos 'dren pa'ang yod pa'i phyir dang/ bye smras lha'i mig gi mngon shes kyi rjes 'brang gi yid shes la de'i 'khor zhes brtags pa'i rgyu mtshan yang de lta bu'i sgo nas yin no/ /de ltar ma yin na/ 'o na kho rang la/ lha'i mig gi mngon shes chos can/ 'chi 'pho ba dang skye ba gang rung shes par thal/ 'chi 'pho skye shes kyi mngon shes yin pa'i phyir te/ de gnyis don gcig yin pa'i phyir/ 'dod na de'i yul du gyur pa'i skye 'chi gnyis po re re nas chos can/ gzugs kyi skye mched yin par thal/ lha'i mig gi mngon shes kyi yul yin pa'i phyir/ de la ma khyab na khyab par thal/ 'grel pa mngon pa'i rgyan las/ lha'i mig gis 'chi ba dang bar do dang skye ba'i srid pa'i kha dog bzang ngan la sogs pa'i gzugs la dmigs pa'i phyir dang/ de thams cad gzugs can yin pa'i phyir ro/ /zhes gsungs pa'i phyir/ gzhan yang 'chi 'pho skye shes kyi mngon shes kyi ngo bor gyur pa'i 'chi 'pho ba dang skye ba mkhyen pa'i stobs chos can/ dbang shes lung ma bstan yin par thal/ mig dang rna ba'i mngon shes ni/ /lung du ma bstan zhes gsungs pa'i phyir/ 'dod na mi 'thad par thal/ yid shes su gyur ba'i bsam gtan gyi sas bsdus pa'i dge ba yin pa'i phyir te/ sngon gnas 'chi 'pho skye ba'i stobs/ /bsam gtan dag na zhes gsungs pa'i phyir/ yang gal te 'chi 'pho skye shes kyi mngon shes kyi ngo bor gyur pa'i 'chi 'pho ba dang skye ba mkhyen pa'i stobs med do zer na/ de mi 'thad par thal/ sangs rgyas kyi thugs rgyud kyi 'chi 'pho skye shes kyi mngon shes des 'chi 'pho ba dang skye @30b pa thogs med du mkhyen pa'i cha nas 'chi 'pho ba dang skye ba mkhyen pa'i stobs su 'jog pa las lhag pa'i 'jog byed gzhan med pas sangs rgyas kyi thugs rgyud kyi de gnyis don gcig tu grub pa yin pa'i phyir ro/ /der ma zad/ lha'i mig gi mngon shes la 'chi 'pho skye shes kyi mngon shes dang sbyor ba gcig gis bsdus pas ma khyab ste/ 'di dang lha'i rna ba'i mngon shes gnyis la rim pa bzhin 'og nas 'chad 'gyur gyi lha'i mig dang rna ba la brten pa yod pas/ des na lha'i mig la brten pa'i lha'i mig gi mngon shes kyi yul la 'chi 'pho skye shes kyi mngon shes dang sbyor ba gcig bsdus kyi mngon shes kyi yul yin pas ma khyab pa'i phyir/ der thal/ 'chi 'pho skye shes kyi mngon shes dang de dang sbyor ba gcig bsdus kyi lha'i mig gi mngon shes gang rung gi yul la ma 'ongs pas khyab pa gang zhig /lha'i mig la brten pa'i lha'i mig gi mngon shes kyi yul la gzugs dus gsum ka yod pa'i phyir ro/ /dang po der thal/ sngon gnas rjes dran gyi mngon shes kyi yul la 'das pa dang/ 'chi 'pho skye shes kyi mngon shes kyi yul la ma 'ongs pas khyab pa'i phyir te/ 'grel pa mngon pa'i rgyan las/ 'das pa dang ma 'ongs pa shes pa ni rim pa ltar sngon gnas rjes dran dang 'chi 'pho skye shes yin la de dag kyang kun rdzob shes pa yin pa'i phyir ro/ /zhes gsungs pa'i phyir dang/ gsum ni rig pa sngon mtha' sogs/ /zhes ?pa'i rtsa 'grel gyis kyang 'grub pa'i phyir ro/ /phyi ma der thal/ lha'i mig gis gzugs gang mthong ba de la brten pa'i lha'i mig gi mngon shes kyis shes pa'i phyir/ de la kho na re/ yul da ltar ba la dmigs pa'i sngon gnas rjes dran gyi mngon shes dang/ 'chi 'pho skye shes kyi mngon shes gang yang med par thal/ de gnyis gang rung gi yul la 'das ma 'ongs gang rung gis khyab pa'i phyir zer na/ 'dod pa yin te/ de gnyis kyis da ltar ba yul du byed na dang po de la sngon gyi tshe rabs dran pa'i mngon shes dang phyi ma de la ma 'ongs pa'i tshe rabs dran pa'i mngon shes kyi don ma tshang ba'i phyir dang/ skye 'chi da ltar ba shes pa la mngon shes 'grub mi dgos pa'i phyir/ yang kho na re/ lha'i rna ba'i mngon shes chos can/ rang nyid la bskal don du song ba'i sgra 'dzin par thal/ 'grel pa mngon pa'i rgyan las/ lha'i rna ba ni bskal pa dang ma bskal ba'i sgra la dmigs pa'i phyir dang/ @31a @#/ /zhes gsungs pa'i phyir zer na ma khyab ste/ de'i don ni/ mngon shes ma thob pa'i tshur mthong la bskal don du song ba'i sgra la dmigs pa'i don yin pa las rang nyid la bskal don yin pa'i don ma yin pa'i phyir ro/ /kho na re/ mig rna'i mngon shes gnyis dbang shes lung ma bstan du 'dod pa mi 'thad par thal/ lnga ni bsam gtan bzhi dag na/ /zhes mngon shes dang po lnga la bsam gtan bzhi ka'i sas bsdus yod par gsungs pa dang/ yang/ skabs 'gar 'grel pa rnams su de dag bsam gtan bzhi pa'i sa bar gsungs pa rnams dang 'gal ba'i phyir te/ bsam gtan gnyis pa yan chad kyis bsdus pa'i dbang shes med pa'i phyir zer na/ skyon med de/ mig dang rna ba'i mngon shes gnyis la bsam gtan bzhi ka'i sas bsdus yod par gsungs pa ni/ gong du bshad pa ltar dbang shes de gnyis kyi rten dbang po gzugs can la bsam gtan bzhi ka'i sas bsdus yod pa dang/ de la brten nas bsam gtan gong ma rnams kyis rang sa dang 'og sa'i gzugs mthong bas na rten gyi sgo nas de ltar gsungs pa yin la/ yang/ bsam gtan bzhi ba'i sa par gsungs pa ni/ mngon shes de dag thog mar sgrub pa na lam sla ba'i mchog yin pas bar chad med lam bsam gtan bzhi pa la brten nas sgrub pa'i phyir bar chad med lam gyi dbang gis da ltar gsungs so/ /des na mig dang rna ba'i mngon shes gnyis dbang shes ma yin par thal/ de la bsam gtan bzhi ka'i sas bsdus yod pa'i phyir/ der thal/ lnga ni bsam gtan bzhi dag na/ /zhes gsungs pa'i phyir na ma khyab ste/ rten gyi dbang du mdzad pa'i phyir zhes sogs lan 'debs shes par bya'o/ /yang/ dogs pa dpyad par bya ba 'di yod de/ mig dang rna ba'i mngon shes gnyis ma bsgribs lung ma bstan du bshad pa'i skabs kyi 'grel pa mngon pa'i rgyan gyi mchan bur/ de dag skyes thob min la/ sbyor byung yang min te/ de ni thos bsam sgom gsum gyis bsdus la/ de la skyes thob dang sbyor byung gnyis ka mi srid pas so/ /zhes dang/ yang/ gong du mngon shes rnam drug rnam grol blo/ zhes pa'i mchan bur/ lha'i mig dang rna ba'i mngon shes ni dbang shes yin pas rnam grol lam ji ltar yin zhe na/ lam gzhan gyi rnam @31b grol du de dag 'gal yang mngon shes kyi rnam grol yin pas skyon med de/ de lta min na sgom byung gi mngon shes su 'gal te rnam grol lam min pas so/ /zhes gsungs pa 'di dag 'gal med du 'chad tshul ji ltar byed/ skyes thob dang sbyor byung la thos bsam sgom gsum gang rung gis bsdus pa'i rgyu mtshan gyis/ mngon shes de gnyis la skyes thob dang sbyor byung gnyis ka med par 'dod na/ 'o na de gnyis skom byung gi mngon shes su ji ltar 'jog/ mngon shes de dag thog mar sgrub pa'i tshe bsam gtan gyi dngos gzhi la brten pa'i sbyor ba bar chad med lam gyis sgrub dgos par 'dod bzhin du sgom byung dang/ sbyor byung med par ji ltar 'gyur/ der ma zad/ thob bya 'dris pa chags bral bas/ /zhes sogs kyi skabs su/ mngon shes de dag sngar ma 'dris pas sbyor bas thob pa dang/ 'dris ma 'dris gnyis kas kyang mngon du gyur pa ni sbyor ba'i stobs kho nas thob dgos par 'dod bzhin du sbyor byung med pa ji ltar 'thad/ gal te de gnyis la bsam gtan sgom stobs kyis thob pa'i sgom byung gi mngon shes dang/ sbyor ba sgom stobs kyis thob pa'i mngon shes yod kyang/ spyir de la sgom byung dang sbyor byung gang yang mi srid do zhes smra na ni shin tu tha chad de/ de las gzhan du sgom byung dang sbyor byung gi don ji ltar 'jog /'o na/ ji ltar zhe na/ mchan bu dang po 'di'i dgongs don dngos gzhi ni/ mngon shes de gnyis mtha' gcig tu ma bsgribs lung ma bstan yin pa'i rgyu mtshan/ de gnyis la nyon mongs can ni mi srid la/ dge ba skyes sbyor gnyis kyang mi srid de/ dge ba skyes sbyor gnyis ni thos bsam sgom gsum gang rung gis bsdus la/ mngon shes de gnyis ni dge ba skyes sbyor gang yang min pas mtha' gcig tu ma bsgribs lung ma bstan yin pa'i don yin nam snyam ste mkhas pa rnams kyis dpyad par mdzod cig /de ltar dogs pa rnams dpyad nas slar yang dkyus la 'jug pa ni/ sngar bshad pa de dag gi lhag ma sngon gnas rjes dran gyi mngon shes la ni gzugs dang sems dang sems byung gsum ka la dmigs pa yod pas dran pa nyer bzhag bzhi ka yod la/ zag zad kyi mngon shes ni 'gog pa 'ba' zhig la dmigs na chos dran pa nyer gzhag gcig pu dang/ zag pa zad pa'i rgyud kyi shes @32a @#/ /pa la dmigs na ni dran pa nyer gzhag bzhi ka 'byung ngo/ /yang mig dang rna ba'i mngon shes gnyis las gzhan pa'i lhag ma bzhi ni dge ba kho na yin la/ 'di thad 'grel pa mngon pa'i rgyan gyi mchan bur/ de yang bsam gtan gyi sas bsdus pa'i rnam grol kyi lam yin pas so/ /zhes gsungs pa ni mig rna'i mngon shes gnyis las gzhan pa'i lhag ma rnams phal che pa'am gtso che ba bsam gtan gyis sa bsdus pa'i dge ba yin pa'i don du shes par bya'o// ! gsum ni rig pa sngon mtha' sogs/ /zhes sogs kyi skabs su/ mi slob pa'i rig pa gsum zhes bshad pa ni/ mi slob pa'i rgyud kyi sngon gnas rjes dran dang/ 'chi 'pho skye shes dang/ zag zad kyi mngon shes gsum la byed pa ste/ de gsum gyis rim pa bzhin sngon gyi mtha' dang/ phyi ma'i mtha' dang/ bar gyi gnas gsum la rmongs pa'i ma rig pa rnam bar bzlog pa'i phyir ro/ /'di la yang mi slob pa'i rgyud kyi zhes pa'i khyad par sbyor dgos kyi spam bshad ltar mi bzung ngo/ /de gsum las phyi ma ni mi slob pa dang rig pa gnyis ka yin la/ dang po gnyis ni mi slob pa'i rgyud la skyes pa'i cha nas de ltar brjod pa las mi slob lam bden dngos ni min te/ zag bcas yin pa'i phyir ro/ /'o na/ slob pa'i rgyud kyi mngon shes de dag skabs 'di'i rig par mi 'jog pa ci zhe na/ sgom spang gi ma rig pa ma spangs pa'i phyir skabs 'di'i dngos bstan gyi rig par ma bzhag go/ ! dang po gsum pa drug pa ni/ / zhes sogs kyi skabs su/ dang po rdzu 'phrul gyi mngon shes dang/ gsum pa sems kyi rnam grangs shes pa dang/ drug pa zag zad kyi mngon shes rnams la ni rim pa bzhin rdzu 'phrul gyi cho 'phrul dang kun brjod pa'i cho 'phrul dang/ rjes su bstan pa'i cho 'phrul zhes bya ste/ dang pos pha rol gyi sems 'dun pa'i sgo nas yid 'phrog pa dang/ gnyis pas pha rol gyi bsam pa shes te chos bstan pas yid 'phrog pa dang/ gsum pas bstan pa bzhin du sgrub pas smin cing grol ba'i sgo nas yid 'phrog par byed pa'i phyir ro/ /de gsum las rjes su bstan pa'i cho 'phrul ni mchog yin te @32b zag med kyi rgyu la ma 'khrul zhing/ nyon mongs pa dang bral ba'i 'bras bu la sbyor ba sogs kyi phyir ro/ /cho 'phrul dang po gnyis ni rig sngags dang/ sman gyi nus pas kyang 'grub pas mtha' gcig tu zag med kyi rgyu la mi 'khrul ba sogs min pas mchog tu ma bzhag go/ ! rdzu 'phrul ting 'dzin de las ni/ /zhes sogs kyi skabs su/ bye brag smra bas rdzu 'phrul ni ting nge 'dzin du 'dod la/ ting nge 'dzin de las yul sprul pa dang 'gro ba la dbang 'byor ba'i phyir/ de la rdzu 'phrul gyis 'gro ba ni gsum ste/ bya bzhin du rim gyis lus mgyogs por phyin par byed pa lus phyin byed dang/ thag ring po'ang thung dur mos pa byas pas myur du sleb pa mos pa las byung ba dang/ yid la bsam pa tsam gyis der sleb pa yid 'phyogs te gsum mo/ /de gsum las yid 'phyogs kyi 'gro ba ni ston pa sangs rgyas kho na la mnga' zhing/ gzhan gnyis kyang sangs rgyas la mnga' ba ni yin la/ nyan thos sogs lus phyin byed dang/ mos pa las byung bas 'gro ba gnyis yod do/ / de la kho na re/ dgra bcom pa dag gi lus kyi stod nas me 'bar ba dang smad nas chu 'khrugs pa'i rdzu 'phrul la ma zung chos can/ ting nge 'dzin yin par thal/ rdzu 'phrul yin pa'i phyir te/ de la rdzu 'phrul du grags pa'i phyir zer na ma khyab ste/ de ni rdzu 'phrul gyi ming 'bras bu sprul pa la btags pa'i sprul pa yin gyi/ rdzu 'phrul ma yin pa'i phyir ro/ /yang kho na re/ yid la bsam pa tsam gyis der slebs pa'i yid 'gyogs kyi 'gro bston pa sangs rgyas kho na la mnga' ba'i ma 'thad par thal/ 'dod gzugs kyi bar do bdag la yang yid la bsam pa tsam gyis de bslebs pa'i yid 'gyogs kyi 'gro ba yod pa'i phyir zer na rtags ma grub ste/ bar do ba ni las stobs kyis 'gro ba'am bgrod ba myur ba yin mod kyang/ yid la bsam pa tsam gyi der slebs pa'i tha snyad mi thob ste/ bsam kyang 'khrul pa'i dbang gis der mi slebs par gzhan dang gzhan du slebs pa'ang srid la rang nyid khams gang gi sar gtogs pa'i khams de las brgal te 'gro ba ni gang gis kyang mi nus pas/ de dag la ni yid 'gyogs kyi 'gro ba rjes mthun pa tsam yang 'jog dka' ba'i phyir ro// ! 'dod par gtogs pa'i sprul pa ni/ /zhes sogs kyi skabs su/ sprul pa ji lta bu zhe na/ bye brag smra bas/ sprul ba ni phyi'i skye mched sprul gyi nang gi skye mched ni mi sprul te/ de sprul rda sngon med kyi @33a @#/ /sems can 'byung bar thal ba'i phyir zhes 'dod la/ de'i don yang 'khor ba'i sems can rnams kyi yid kyi rnam par shes pa'i rgyun ni thog ma med pa nas brgyud de longs pa sha dag las/ sngar gyi rgyun med par bar skabs zhig nas thol byung gi tshul du rnam shes gsar du byung ba med pa'i don yin pa las/ sngon med kyi mi gsar du skyes pa med pa dang/ lha gsar du skyes pa med pa sogs kyi don ni min pas go ba gtso bor bzung dgos kyi/ tshig tsam la 'khris nas sngon med kyi sems can gsar du 'byung ba yod par thal/ sngon med kyi mi gsar du skyes pa yod pa'i phyir zer nam khyab ces brjod rgyu yin te/ mi gsar du skyes pas sems can gsar du skyes pa'i go mi chod pa'i phyir ro/ /des na 'dod par gtogs pa'i sprul pa ni phyi'i skye mched gzugs dri ro reg bya bzhi po gang rung sprul gyi sgra ni mi sprul te sgra la rgyun med pa'i phyir zhes so/ /de yang rten 'dod pa bas rang lus kyi tshogs pa na yod pa'i gzugs sogs kyi skye mched bzhi po de sprul gzhir byas nas rang sa'i phyi'i skye mched bzhi po de dang der bsgyur ba'am sprul pa de rang lus dang 'brel ba'i sprul pa dang/ rang las phyi rol tu gyur pa'i gzugs sogs sprul gzhir byas nas phyi'i skye mched de dang der sprul ba de gzhan lus dang 'brel ba'i sprul pa dang/ yang khams gong na dri ro med pas des rang lus la mngon du gyur pa'i gong sa'i reg bya nyid sprul gzhir byas nas gong sa'i gzugs reg gi skye mched de dang der sprul pa de rang lus dang 'brel ba'i sprul pa dang/ rang lus la mngon du ma gyur pa'i gong sa'i gzugs reg gnyis sprul gzhir byas nas gong sa'i gzugs reg gi skye mched de dang der sprul pa de gzhan lus dang 'brel ba'i sprul pa ste bzhi dang/ de bzhin du rten gong ma bas rang gzhan gyi lus dang 'brel ba'i rang sa'i sprul pa gnyis dang/ rang lus la mngon du gyur pa'i 'dod pa'i reg bya nyid sprul gzhir byas nas 'dod pa'i skye mched bzhi po de dang der sprul pa'i rang lus dang 'brel ba'i sprul pa dang/ rang lus la mngon du ma gyur pa'i 'dod pa'i skye mched bzhi sprul gzhir byas nas 'dod pa'i skye mched de dang der sprul pa de gzhan lus dang 'brel ba'i sprul pa ste spyir 'dod gzugs sdoms pa'i sprul pa rnam pa brgyad de/ / @33b skabs 'dir rang gzhan gyi lus dang 'brel ba'i sprul pa zhes bya ba'i don yang/ spyir rang rgyud kyis bsdus pa'i gzugs sogs sprul gzher byas nas rang sa'i skye mched gang sprul kyang de dag la rang lus dang 'brel ba'i sprul pa zhes bya zhing/ rang rgyud kyis ma bsdus pa'i gzugs sogs sprul gzhir byas nas rang sa'i skye mched gang sprul kyang de dag la gzhan lus dang 'brel ba'i sprul pa zhes bya la/ dmigs bsal rang dang sa mi mtshungs pa'i rang gzhan gyi lus dang 'brel ba'i sprul pa zhig sprul na rang lus las mi mtshungs pa'i reg bya gzhan zhig mngon du gyur nas de sprul gzhir byas te sa gzhan gyi skye mched de dang der sprul pa la rang lus dang 'brel ba'i sprul pa dang/ rang lus la mngon du ma gyur pa'i sa gzhan gyi gzugs sogs sprul gzhir byas nas sa gzhan gyi skye mched de dang der sprul pa la gzhan lus dang 'brel ba'i sprul pa zhes bya ba yin no/ /des na gzugs kyi rten can gyis rang lus la 'dod pa'i reg bya zhig mngon du gyur nas des sprul gzhir byas na dri ro sogs kyang ldan par mi 'gyur te/ sa so so'i sred pas mtshams gcod pa'i phyir/ des 'dod pa bas rang lus dang 'bral bar gong sa'i gzugs reg sogs sprul pa la yang mtshungs so/ /de la kho na re/ gong ma'i rten can gyi lus la mngon du gyur pa'i 'dod pa'i reg bya sprul gzhir byas pa'i dri ro gnyis chos can/ gong ma'i rten can gyi lus dang 'brel bar thal/ de dang 'brel ba'i sprul pa yin pa'i phyir zer na ma khyab ste/ de la mngon du gyur pa'i reg bya nyid de 'dra'i lus dang 'brel ba yin la/ des sprul gzhi byas pa'i sprul pa la de dang 'brel ba'i sprul pa zhes brjod kyi de de dang 'brel ba ma yin pa'i phyir dang/ de 'dra'i reg bya de yang de 'dra'i lus la mngon du gyur pa'i cha nas de dang 'brel bar 'jog pa las de dang tshogs pa gcig tu 'brel ba'i don ma yin te/ sa gzhan gyi reg byas gzhan gyi lus dang tshogs pa gcig tu 'du ba mi srid pa'i phyir ro/ /yang kho na re/ gong ma'i lus la 'dod pa'i reg bya mngon du gyur pa'i tshi dri ro gnyis kyang mngon du gyur par thal/ de 'dra'i 'dod pa'i reg bya'i skye mched de rdul rdzas brgyad ldan gyi gong du yin pa gang zhig /des de mngon du gyur pa'i phyir zer na ma khyab ste/ de 'dra'i rdul rdzas brgyad ldan gyi gong bu de mngon du gyur kyang/ de'i tshogs pa na yod pa'i dri ro sogs kyi rdul rdzas mngon du ma gyur pa ni rdul rdzas so sor @34a @#/ /grub pa'i dbang gis yin pa'i phyir ro/ /'o na lugs 'dir sprul pa la gang zag 'jog gam mi 'jog tse na/ mi 'jog ste/ sprul pa la phyi'i skye mched kyis khyab pa'i phyir te/ phyi yi skye mched bzhi rnam gnyis/ /gzugs gtogs gnyis sprul zhes gsungs pa'i phyir/ byas pa la sprul pa la gang zag yod par thal/ 'gral pa mngon pa'i rgyan las/ de yang bdag nyid sengge dang glang po che la sogs par bsgyur ba'i bdag gi lus dang 'brel ba dang/ zhes gsungs pa'i phyir zer na ma khyab ste/ de'i don ni rang rgyud kyis bsdus pa'i gzugs sogs sengge dang glang chen sogs kyi rnam pa can du sprul pa'i don las sprul pa la gang zag yod pa'i don ma yin pa'i phyir te/ sprul pa la sngar med gsar du sprul pa zhig dgos pa gang zhig /sprul pa la gang zag 'jog na sngar med kyi sems can gsar du skyes pa yod par thal ba'i skyon spong mi nus par thal ba'i phyir ro// ! de dag kyang ni bcu gcig 'o/ /zhes sogs kyi skabs su/ mngon shes kho nas sprul pa sprul par byed dam zhe na/ ma yin te/ mngon shes kyi 'bras bu sprul sems kyis sprul pa yin la/ sprul sems de la bcu gcig yod de/ bsam gtan dang po'i 'bras bu sprul sems la 'dod pa'i sprul sems dang bsam gtan dang po'i sprul sems gnyis/ bsam gtan gnyis pa'i 'bras bu la 'og sa gnyis dang rang sa ste gsum/ gsum pa'i 'bras bu la 'og sa gsum dang rang sa ste bzhi/ bzhi pa'i 'bras bu 'og sa bzhi dang rang sa ste lnga bcas bsdoms pas bcu gcig 'o/ /des na bsam gtan so so'i 'bras bu sprul sems la rang sa dang 'og sa'i sprul sems ma gtogs gong sa'i sprul sems mi 'byung ste/ gong sa ma thob par de'i sprul sems bskyed mi nus la/ thob na ni de nyid kyi 'bras bur 'gyur ba'i phyir ro/ /yang/ 'dod pa'i sas bsdus kyi sprul par mtshungs kyang bsam gtan 'og ma'i 'bras bu 'dod pa'i sprul sems kyis sprul pa de las/ bsam gtan gong ma'i 'bras bu 'dod pa'i sprul sems kyis sprul pa de 'gro ba'i sgo nas khyad par du 'phags te/ dper na/ bsam gtan dang po'i 'bras bur gyur pa'i 'dod pa'i sprul sems kyis sprul pa'i 'dod pa'i sprul pa des bsam gtan dang po'i bar du 'gro nus kyi/ gnyis pa la sogs par 'gro mi nus la/ bsam @34b gtan gnyis pa'i 'bras bu 'dod pa'i sprul sems kyis sprul pa'i 'dod pa'i sprul pa des bsam gtan gnyis pa'i bar du 'gro nus pa ste/ des mtshon nas bsam gtan gsum pa sogs la yang shes par bya'o// ! de rnyed bsam gtan bzhin de ni/ /zhes sogs kyi skabs su sprul sems de dag rnyed tshul ni bsam gtan gyi dngos gzhi bzhin du 'og sa las 'dod chags dang bral bas rnyed cing/ sprul sems de dag la 'jug pa dang ldang ba'i tshe ni bsam gtan gyi dngos gzhi dag pa ba kho na la brten dgos la/ des na sprul sems de las rgyun gyi tshe rang nyid dang/ ldang ba'i tshe bsam gtan dag pa ba'i sems te gnyis 'byung ngo/ /sprul pa thams cad kyang rang sa'i sprul sems kyis rang sa'i sprul pa kho na sprul gyi sa gzhan gyi sprul sems kyis sa gzhan gyi sprul pa sprul bar mi byed la/ yang sprul pa dag smrar 'jug pa'i sems ni 'og sa la ltos pa'ang yod de/ bsam gtan gnyis pa yan chad kyi sa pa'i sprul pa dag smrar 'jug na/ rang sa na ngag smra ba'i kun slong rtog dpyod med pas sprul pa po des 'og ma bsam gtan dang po'i smra sems mngon du byas te smrar 'jug pa yin la/ yang 'dod pa dang bsam gtan dang po'i sa pas ngag smra ba ni rang sa so so'i smra sems kho nas smrar 'jug pa'o// ! ston min sprul pa po dang bcas/ /zhes pa'i skabs su/ sprul pas ngag smra/ tshul yang ston pa sangs rgyas las gzhan nyan thos sogs kyi sprul pa ni sprul pa po dang lhan cig tu smra bas sprul pa po mi smra na sprul pas kyang mi smra la/ ston pa sangs rgyas ni bzhed pa tsam gyis thams cad 'byung ba'i phyir nges pa med do/ /'o na/ nyan thos sogs kyi sprul pas ngag smra ba'i tshe sprul pa po dang de'i sprul pa ji snyed yod pa de snyed kyis lhan cig tu smra dgos na/ de dag gis smra ba'i ngag gi tshig don thams cad kyang gcig pa smra ba yin nam zhe na/ de ni ma yin te/ sprul pa po'i smra sems kyi 'phen pa dang smra yul gyi mos pa'i dbang gis rang rang gi bsam pa dang mthun par tshig kyang mi 'dra ba dang don yang mi 'dra bar smra ba yod ces bya'o/ /de la kho na re/ sprul pa la gang zag yod par thal/ sprul pas ngag smra ba yod pa'i phyir zer na ma khyab/ 'o na kho rang la/ sprul pa gang zag yin par thal/ sprul pas ngag smra ba'i phyir/ khyab pa 'grig/ des na sprul pa sa ngag smra ba sprul pa po'i smra sems kyi mthus smra ba las sprul ba rang @35a @#/ /nyid kyi bsam pa'i mthus smra ba ma yin pa'i phyir te/ de yin na sprul pa sems ldan du khas blangs dgos la de ni mi rigs pa'i phyir te/ gdugs pa las/ smras ba rgyur byas pa'i gzugs can no zhes brjod par bya ste/ sems med pa zhes kyang brjod par bya'o/ /zhes gsungs pa'i phyir ro/ /der ma zad nyan thos sogs kyi sprul pas ngag smra ba ni sprul pa pos ngag smra ba la ltos dgos pa 'dis kyang sprul pa la gang zag med par grub pa yin no/ /'o na/ sprul pas smra ba'i ngag de dag rang mtshan pa yin na gang zag su'i rgyud kyis bsdus zhe na/ ngag de'i smra sems gang la ldan pa'i sprul pa po'i rgyud kyis bsdus te/ dper na/ bsam gtan gnyis pa yan chad kyi sprul pas ngag smra ba ni sprul pa pos dang po'i sas bsdus kyi smra sems mngon du byas te smra dgos pas ngag dang smra sems gnyis ka sprul pa po rang nyid la ldan pa bzhin no/ /'di la yang 'grel ba rnams su smra pa'i ngag mang po sprul na ni sgra yang sprul par 'gyur bas phyi'i skye mched bzhi zhes ba dang 'gal la/ ngag gcig las med na mang po smra ba mi 'thad do/ /zhes skyon 'phen mdzad pa ltar gyi gnod byed 'jug mod kyang/ gnas skabs grub mtha'i 'dod tshul yin pa'i phyir ngag mang po smra ba smra sems kyi bsam pa'i bye brag gi mthu yin pa las sprul pa min zhes smra dgos so// ! byin gyis brlabs nas gzhan 'jug phyir/ zhes sogs kyis/ 'o na rgyud gcig la yid shes rdzas tha dad pa gnyis cig car mngon du 'gyur mi srid pas smra sems yod pa'i tshe sprul sems med la/ sprul sems yod pa'i tshe smra sems med na sprul ba ji ltar smra 'jug ce na/ de ni dang po sbyor pa'i tshe sprul sems kyis sprul pa sprul nas bdag gi sprul pa 'di yun ring du gnas par gyur cig ces dang/ de nas smra sems kyis smra bar gyur cig ces rim pa ltar 'byung bar byin gyis brlabs pa ltar gyi sprul sems ? gzhan pa'i smra sems kyis smrar 'jug pa'i phyir skyon med do/ /zhes so/ /'o na/ byin gyis brlabs pa zhes pa de gson po kho na la yin nam/ 'on te shi ba'i rjes su yang yod ce na/ sprul pa po shi yang byin rlabs yun ring du 'jug pa yod de/ 'od srungs chen pos rang gi sku gdung byams pa ma byon gyi bar du @35b gnas par byin gyis brlabs pa lta bu'o/ /'di la yang kha che bye brag smra ba rnams ni rus pa lta bu brtan pa la byin rlabs yod kyi sha khrag sogs mi brtan pa la med pas/ des na 'od srungs kyi gdung yang keng rus 'ba' zhig gnas par 'dod la/ gzhan dag ni de las gzhan du yang smra bar byed do// ! dang bor du mas gcig yin te/ /zhes sogs kyi skabs su/ sprul sems gcig gos du ma sprul lam gcig kho na sprul zhe na/ dang por ma byang ba'i tshe sprul sems du mas sprul ba gcig sprul par byed la/ phyis byang bar gyur nas ni sprul sems gcig gis du ma sprul par byed do// ! sgom las skyes pa lung ma bstan/ /zhes sogs kyi skabs su/ sprul sems mtha' dag lung ma bstan yin nam/ zhe na/ sgom byung gi sprul sems ni lung ma bstan kho na yin cing/ lha klu la sogs pa'i skyes thob kyi sprul sems la ni gzhan la phan gnod bya phyir du yang sprul bar byed pas dge mi dge lung ma bstan gsum g.yed par 'dod med/ de lta na sgom byung gi sprul sems la yang dge ba yod par 'gyur te/ gzhan la phan pa'i phyir du sprul pa yod pa'i phyir zer na ma khyab ces bya ste grub mtha'i 'dod tshul lo/ /de bzhin du lha klu la sogs pas skyes thob kyis rang gi rgyud dang 'brel bar sprul pa la sgra ma gtogs pa'i gzugs can gyi skye mched thams cad yod pas skye mched dgu par 'dod pa dang/ gzhan lus dang 'brel bar sprul na ni sngar bshad pa ltar skye mched bzhi ba kho na yin no/ /zhes 'dod cing/ skyes thob kyi sprul pa la sems yod par 'dod pa yang yin no/ /'di dag gi tshe gong 'og ma 'brel ba lta bur smra dgos pa yang rang gi grub mtha' yin la/ skabs thob khas len 'dzin mi bde ba lta bur snang ba'ang/ gcig tu rang gi grub mthas kun brtags pa'i skyon dang/ phal cher tshig skyon ma bcad par gzhung chen mo'i spam bshad ltar khas len pa'i skyon du snang bas/ des na tshig skyon bcad nas khas len ma 'chol par byed na/ skyes thob kyi sprul sems dang sprul ppa rnams de dang de rjes mthun pa'am btags pa yin pa las de dang de dngos ma yin par 'dod na snga gyi thams cad mi 'gal ba'i khas len bde bar ma zad/ 'og nas 'chad 'gyur gyi rdzu 'phrul dang mngon shes sogs kyang 'di @36a @#/ /dang mtshungs par 'dod dgos su snang bas don la yang de ltar yin 'dra snyam mo/ /de lta na gzhan lus dang 'brel ba'i skyes thob kyi sprul pa ni skye mched bzhi pa kho na yin par gsungs pas sems ldan min par grub la/ rang lus dang 'brel ba'i skyes thob kyi sprul pa sems bcas dang skye mched dgu par gsungs pas/ de la gang zag kyang 'jog dgos par snang ngo/ /byas pa la kho na re/ de la gang zag 'jog na skye mched bcu gnyis pa yin dgos pas/ skye mched dgu pa med mtha' bzung mi rigs so zhe na/ skyon med de/ skyes thob kyi sprul sems kyi yul du gyur pa la sgra las gzhan pa'i gzugs can gyi skye mched dgu las lhag mi 'byung bas de'i yul du gyur pa'i gzugs can gyi skye mched dgu las lhag mi ldan zhes pa'i don no/ /'o na/ dbang po lnga de'i yul du ji ltar 'gyur te/ des dngos su dbang po sprul par mi byed pa'i phyir zer na/ skyon med de/ lha klu lta bus rang nyid pha rol po gzhan dang rnam pa 'dra bar sprul nas gzugs la blta ba dang sgra nyan pa sogs kyi tshe rang dang sprul pa gnyis ngo bo tha mi dad du sprul pa na rang dang sprul pa de'i dbang po yang ngo bo tha mi dad du song bas de 'dra'i dbang po lnga sprul sems de'i yul du 'gyur zhes pa'i don yin pa'i phyir/ de ltar yin kyang de'i tshe de gnyis kyi dbang po ngo bo gcig tu song ba tsam las dbang po rnams dngos su sprul par ni mi byed de/ 'grel pa mngon pa'i rgyan las/ dbang po dang tha mi dad pa'i phyir de skad du brjod kyi dbang po ni dngos su sems can du ston pa kho na yin pas sngon med pa'i sems can 'byung bar thal bar 'gyur ba'i phyir sprul par mi byed do/ /zhes gsungs pa'i phyir/ yang kho na re/ skyes thob kyi sprul sems kyis chos kyi skye mched kyang sprul pa yod par thal/ des gang zag gzhan du sprul pa yod pa'i phyir zer na/ 'dod pa yin te/ skyes thob kyi sprul sems kyis gang zag rang nyid gzhan du sprul pa yod pa gang zhig / rang nyid skye mched bcu gnyis kyi nang tshan du gyur pa'i chos kyi skye mched yin pa'i phyir ro/ /de yod par gang gis 'grub na skyes thob kyi sprul pa sems bcas su bshad pa'i lung rigs rnams kyis 'grub bo// ! rdzu 'phrul gsang sngags sman dag dang/ /zhes sogs kyi skabs su/ rdzu 'phrul la yang dngos dang @36b rjes mthun gyi sgo nas phye na lnga ste/ sgom byung dang/ skyes thob dang/ sngags las skyes ba dang/ sman las skyes pa dang/ srid pa bar ma'i rdzu 'phrul lta bu las las skyes pa dang lnga'o/ /de dag las sgom byung gi rdzu 'phrul ni rdzu 'phrul dngos yin la/ gzhan rnams ni rjes mthun pa'o// ! lha yi mig dang rna ba yin/ /zhes sogs kyi skabs su/ 'o na skabs 'di'i dngos bstan gyi lha'i mig dang rna ba zhes bshad pa de dag 'dra ba'i sgo nas btags pa yin nam/ lha'i mig dang rna ba dngos yin zhe na/ de ni dngos yin te bsam gtan pa dag bsam gtan la mnyam par bzhag nas/ sgra dang snang ba la yid gtad pa na mig dang rna ba'i thad kor du bsam gtan gyi sa pa'i 'byung bzhi rgyur byas pa'i dbang po gzugs can dang ba 'grub ste/ de ni bsam gtan gyi sa pa'i dbang po dngos yin pa'i phyir ro/ /lha'i mig dang rna ba de gnyis ni rtag tu rnam shes rten pa dang bcas pa kho na yin la/ gzugs sgra thag ring po dang/ phra ba dang/ bar du chod pas sgrib pa dag kyang yul du byed pas sha'i mig las khyad par du 'phags so/ /'o na/ lha'i mig gis ji tsam mthong zhe na/ bsam gtan dang po'i mig gis 'dod pa dang/ bsam gtan dang po'i gzugs mthong ba sogs ni sngar bshad zin la/ nyan rang dgra bcom pa dang sangs rgyas gsum gyi lha'i mig gis mngon par 'du byed pa med pas ni rim pa ltar stong gcig dang stong gnyis dang stong gsum gyi 'jig rten gyi khams mthong la/ mngon par 'du byed pa'i stobs kyis ni nyan thos dgra bcom pa rnams kyis stong gnyis dang/ bse ru lta bu'i rang rgyal dgra bcom pas stong gsum dang/ sangs rgyas rnams kyis ji tsam bzhed pa'i 'jig rten gyi khams grangs med pa gzigs bar bshad la/ lha'i mig gis mthong tshul gyi rig pas lha'i rna bas thos tshul la yang mtshungs sam snyam mo/ /'dir yang sangs rgyas kyis 'jig rten gyi khams grangs med pa gzigs pa mngon par 'du byed pa la ltos dgos par thal lo zer na ma yin te bzhed pa tsam la ltos dgos pa'i don yin pas nyan rang gi rigs 'gre ma thal ba gal che'o/ /gzhan yang/ lha'i rgyud kyi mig rna gang rung la 'dir bshad pa'i mig rna gang rung yin pas ma khyab ste/ bsam gtan gyi snyoms 'jug ma thob pa'i 'dod pa'i lha'i rgyud kyi mig rna gang rung la de gnyis gang rung ma yin @37a @#/ /pas khyab pa'i phyir dang/ yang de gnyis gang rung yin na lha'i rgyud kyis bsdus pas ni ma khyab ste/ dngos gzhi thob pa'i mi'i rgyud la'ang de gnyis char yod pa'i phyir ro/ /dngos gzhi thob pa'i lha'i rgyud kyi mig rna gang rung la yang de gnyis gang rung yin pas ma khyab ste/ de gnyis gang rung la rten bcas kyi dbang pos khyab pas phyir te/ rtag tu rten bcas zhes gsungs pa'i phyir ro// ! gzhan yang skye bas thob des ni/ /zhes sogs kyi skabs su/ gzhan yang lha'i mig dang/ rna ba'i mngon shes dang/ sngon gnas rjes dran dang/ pha rol sems shes bzhi rjes mthun pa la yang skyes thob sogs yod kyang mngon shes dngos gnas pa ni ma yin te/ 'grel pa mngon pa'i rgyan las/ skyes thob gyis ni cung zad kyang mngon shes kyi ming mi thob bo/ /zhes gsungs pa'i phyir/ 'dis ni gong gi skyes thob kyi sprul sems dang/ sprul pa dang/ skyes thob dang las kyi rdzu 'phrul sogs kyang dngos gnas ma yin par 'grub pa yin no/ /der ma zad srid mtha' byang sems chags bcas pa sogs gang zag khyad par can 'ga' zhig gi rgyud la yang sngon gnas rjes dran sogs yod par mngon zhing/ de dag 'dir bshad pa'i sbyor byung gi mngon shes de dang de dngos min kyang rjes mthun par ni 'jog dgos te/ de dag med par 'dod na mngon sum la skur 'debs su 'gyur ba'i phyir dang/ skyes thob kyi mngon shes sogs su'ang 'dod mi rigs te/ mi la skyes thob kyi mngon shes sogs med par rtsa 'grel las dngos su bshad pa rnams dang 'gal ba'i phyir ro/ /skyes thob kyi lha'i mig gis srid pa bar ma mi mthong ste/ de ni skyon bcu gcig dang bral ba'i lha'i mig dag pa kho na'i yul yin pa'i phyir/ lha'i mig skyes thob de ni klu dang 'dod gzugs kyi lha rnams la yod do/ /gzugs med na ni mngon shes lnga sogs skyes thob kyang med do/ /skyes thob kyi pha rol sems shes la ni dge mi dge lung ma bstan gsum char yod la/ der ma zad rtog ge ba rnams kyis mtshan ma las sems shes pa dang/ rig sngags kyis byas pa'i sems shes la yang dge mi dge lung ma bstan gsum ga yod cing/ sgom byung gi sems shes ni dge ba kho na'o// ! dmyal ba pas ni dang po shes/ /zhes sogs kyi @37b skabs su/ skyes thob kyi sems shes dang sngon gnas rjes dran gnyis ni dmyal ba pa dang/ lha dang klu dang/ yi dwags rnams la'ang yod la/ de dag las dmyal ba pas ni dang po skyes nas sdug bsngal gyi tshor bas ma nyen pa de srid du pha rol gyi sems dang/ sngon gyi gnas shes pa yod la/ phyis nas ni sdug bsngal gyi tshor bas yid nyams par byas pas mi shes mod/ 'on kyang ldan par ni 'dod dgos so/ /de las gzhan lha dang dud 'gro dang yi dwags rnams la ni rgyun du'ang shes pa yod do/ /mi la ni rdzu 'phrul sogs sngar bshad pa de dag sgom byung dang/ rtog ge dang/ rig sngags dang/ sman dang las las skyes pa rnams yod kyi skyes thob ni med de/ skyes pa tsam gyis mi ldan pa'i phyir ro/ /'o na/ rang bzhin gyis tshe rabs dran pa de gang zhe na/ de yang las las skyes par 'dod do/ /des na rdzu 'phrul la rtog ges byas pa med la/ mig dang rna ba'i mngon shes dngos ni sgom byung yin la rjes mthun pa la skyes thob dang las las byung ba yod kyi/ sman dang sngags dang rtog ges byas pa ni med do/ /pha rol sems shes kyang sgom byung yin la de rjes mthun pa la ni skyes thob dang/ las dang/ rig sngags dang/ rtog ges byas pa rnams yod kyi/ sman las byung ba ni med zhing/ sngon gnas rjes dran ni sgom byung dang de rjes mthun pa la skyes thob dang/ las las skyes pa gnyis yod kyi/ sman dang sngags dang rtog ges byas pa ni med do/ /yang skyes thob sogs kyi pha rol sems shes dang sngon gnas rjes dran de dag mngon shes yin par thal/ dang pos pha rol gyi sems shes pa'i phyir dang/ phyi mas sngon gyi gnas rjes su dran pa'i phyir zer na ma khyab ces bya dgos so/ /bzod shes lta ba'i khyad par 'byed tshul dang/ /shes pa'i rang bzhin de yi yon tan sogs/ /khong du chud par 'dod pa'i shes ldan dag /mchis na tshul 'dir 'bad pas blta bar rigs/ /chos mngon pa'i mdzod kyi dgongs don gsal bar byed pa legs bshad nyin byed dbang po'i snang ba las/ ye shes bstan pa zhes bya ba gnas bdun pa'i rnam par bshad pa'o// //