@01a @#/ /rje btsun 'jam dpal dbyangs chos kyi rgyal mtshan gyis
mdzad pa'i grub mtha'i rnam gzhag bzhugs so/ /

@01a @#/ /bla ma mgon po 'jam dpal dbyangs dang ngo bo dbyer ma
mchis pa'i rje btsun dam pa rnams la phyag 'tshal lo/ /'dir
grub mtha'i rnam gzhag bshad pa la/ mtshan nyid/ dbye ba/

phye ba so so'i don bshad pa'o/ /dang po ni/ dkon mchog gsum
skyabs gnas yang dag tu khas len zhing/ de las gzhan pa'i
skyabs gnas mi 'dod pa'i grub mtha' smra ba'i gang zag de/
nang pa sangs rgyas pa'i

grub mtha' smra ba'i gang zag gi mtshan nyid/ gnyis pa de la
dbye na/ bye brag smra ba/ mdo sde pa/ sems tsam pa/ ngo bo
nyid med par smra ba dang bzhi las/ dang po gnyis la don smra
sde gnyis kyang zer ro/ /gsum

pa ni/ bye brag smra ba'i lugs/ mdo sde pa'i lugs/ sems tsam
pa'i lugs/ ngo bo nyid med par smra ba'i lugs bshad pa'o/
/dang po la mtshan nyid/ dbye ba/ sgra bshad pa/ yul gyi 'dod
tshul/ yul

can gyi 'dod tshul/ bdag med kyi 'dod tshul/ sa lam gyi rnam
gzhag bshad pa'o/ /dang po ni/ rang rig mi 'dod cing phyi don
bden grub tu 'dod pa'i theg dman gyi grub mtha' smra ba'i gang
zag bye brag

@02a @#/ /smra ba'i mtshan nyid/ gnyis pa ni/ de la dbye na/ kha
che bye brag smra ba/ nyi 'og pa/ yul dbus kyi bye brag smra
ba dang gsum yod/ gsum pa ni/ ci'i phyir bye brag smra ba zhes
bya zhe na/ bye brag

bshad mdzod chen mo'i rjes su 'brangs nas grub mtha' smra bas
na de ltar brjod pa'am yang na dus gsum rdzad kyi bye brag tu
smra bas bye brag smra ba zhes brjod pa'i phyir/ bzhi pa ni/
don byed nus pa dngos po'i

mtshan nyid/ dngos po/ yod pa/ shes bya rnams don gcig/ de la
dbye na/ rtag pa'i dngos po/ mi rtag pa'i dngos po gnyis las/
dang po ni/ 'dus ma byas kyi nam mkha'/ so sor brtags 'gog/

so sor brtags min gyi 'gog pa lta bu/ gnyis pa ni/ skyes pa/
byas pa/ mi rtag pa lta bu'o/ /yang dngos po la dbye na/ kun
rdzob bden pa dang/ don dam bden pa gnyis su yod/ dang po ni/
bcom

pa'am blos cha shas so sor bsal ba na rang 'dzin gyi blos 'dor
ba'i chos su dmigs pa de/ kun rdzob bden pa'i mtshan nyid/
mtshan gzhi ni/ bum pa dang snam bu lta bu yin te/ bum pa tho

@02b bas bcom pa na/ rang 'dzin gyi blos 'dor ba yin pa'i
phyir dang/ snam bu'i snal ma so sor bsal ba na rang 'dzin gyi
blos 'dor ba yin pa'i phyir/ gnyis pa ni/ bcom pa'am blos so
sor bsal ba na rang 'dzin gyi blos mi 'dor ba'i chos su

dmigs pa de don dam bden pa'i mtshan nyid/ mtshan gzhi ni/ rdul
phran phyogs kyi cha med dang/ shes pa dus kyi cha med dang/
'dus ma byas lta bu yin te/ mdzod las/ gang la bcom dang blo
yis gzhan/ /bsal na de blo mi 'jug pa/ /bum chu bzhin 

du kun rdzob tu/ /yod de don dam yod gzhan no zhes gsungs pa'i
phyir/ des na dus gsum rdzas su 'dod cing/ bum pa bum pa'i 'das
pa'i dus su yang yod/ bum pa bum pa'i ma 'ongs pa'i dus su yang
yod par 'dod pa'i phyir/ lnga pa yul can gyi

'dod tshul ni/ phung po lnga tshogs tsam gang zag gi mtshan gzhi
dang/ yid kyi rnam shes gang zag gi mtshan gzhir 'dod pa sogs
su yod pa'i phyir/ blo la tshad ma dang/ tshad min gyi blo gnyis
las/ dang po la mngon sum gyi tshad ma dang/ rjes su dpag

ba'i tshad ma gnyis/ dang po ni/ dbang po'i mngon sum/ yid kyi
mngon sum/ rnal 'byor mngon sum dang gsum las/ dbang po'i
mngon sum gyi tshad ma la shes pas ma khyab ste/ mig gi dbang
po mngon sum gyi tshad ma yin pa'i phyir/ rnal 'byor mngon sum

la yang/ gang zag gi bdag med mngon sum du rtogs pa'i rnal
'byor mngon sum dang/ phra ba'i mi rtag pa mngon sum du rtogs
pa'i rnal 'byor mngon sum gnyis yod/ dang po la/ gang zag rtag
gcig rang dbang can gyis stong par rtogs pa'i rnal 'byor

@03a @#/ /mngon sum dang/ gang zag rang skya thub pa'i rdzas
yod kyis stong par rtogs pa'i rnal 'byor mngon sum gnyis yod/
drug pa bdag med 'dod tshul ni/ bdag med phra mo dang/ gang zag
gi bdag med phra mo don gcig tu 'dod cing/ chos kyi bdag

med khas mi len te/ des gzhi grub na chos bdag yin pas khyab
pa khas len pa'i phyir/ de rnams kyi nang nas gnal ma bu pas
rtag gcig rang dbang can gyis stong pa'i gang zag gi bdag med
khas len zhing/ rang skya thub pa'i rdzas yod kyis stong pa'i
gang zag

gi bdag med khas mi len te/ des phung po dang ngo bo gcig dang
tha dad dang rtag mi rtag gang du'ang brjod du med pa'i rang
skya thub pa'i rdzas yod kyi bdag khas len pa yin pa'i phyir/
bdun pa sa lam gyi rnam gzhag la yang/ spang bya dang/ sa lam
gyi rnam gzhag dngos

bshad pa'o/ /dang po ni/ sgrib pa la/ nyon mongs can dang/
nyon mongs can ma yin pa'i sgrib pa gnyis su 'dod cing/ shes
sgrib kyi tha snyad med pa yin no/ /dang pos gtso bor thar pa
'thob pa la bar du gcod par byed/ gnyis pas/ gtso bor thams
cad mkhyen pa 'thob

pa la bar du gcod par byed pa yin pa'i phyir/ dang po'i mtshan
gzhi gang zag rang skya thub pa'i rdzas yod du 'dzin pa'i rtog
pa dang/ de'i dbang gis byung ba'i dug gsum sa bon dang bcas
pa lta bu'o/ /gnyis pa ni/ gang zag rang skye thub pa'i rdzas
yod du 'dzin pa'i

rtog pa'i bag chags dang/ de'i dbang gis byung ba'i sems kyi
gnas ngan len lta bu/ gnyis pa sa lam gyi rnam gzhag dngos
bshad pa la/ theg pa gsum gyi gang zag kyis lam bgrod tshul gyi
khyad par 'dod do/ /nyan thos kyi rigs can rnams kyis gang zag
rang

@03b skya thub pa'i rdzas yod kyis stong par rtogs pa'i lta ba
de/ bsod nams kyi tshogs chung ngu dang zung du 'brel te/ tshe
gsum la sogs pa'i bar du goms par byas nas byang chub chung
ngu 'thob par byed/ rang rgyal gyi rigs can rnams kyis de 'dra
ba'i lta ba de/ bsod nams

kyi tshogs 'bring dang zung du 'brel te/ bskal pa brgya la sogs
pa'i bar du goms par byas nas byang chub 'bring 'thob par
byed/ byang sems rnams kyis de 'dra ba'i lta ba de/ bsod nams
kyis tshogs chen po dang zung du 'brel te/ bskal chen grangs
med gsum la

sogs pa'i bar du goms par byas nas byang chub chen po 'thob
par byed pa yin pa'i phyir/ de rnams kyis tshogs gsog tshul gyi
khyad par yod de/ byang sems rnams kyis tshogs lam chen po man
chad du bskal chen grangs med gsum la sogs pa'i bar du

tshogs bsags nas sbyor lam drod nas mi slob lam gyi bar stan
thog gcig la mngon du byed/ rang rgyal gyi rigs can rnams/
/tshogs lam chen po man chad du bskal chen brgya la sogs pa'i
bar du tshogs bsags nas sbyor lam drod nas mi slob lam

gyi bar stan thog gcig la mngon du byed/ nyan thos kyi rigs
can rnams kyis slob lam bzhi ka'i gnas skabs su tshogs gsogs
cing 'phags lam thob nas kyang skye srid bcu bzhi'i bar du
slob lam la slob dgos pa yang yod pa'i phyir/ des na de dag
gis

sangs rgyas kyi gzugs phung sangs rgyas ma yin par 'dod de/ de
spang bya yin pa'i phyir te/ de sngar gyi byang sems sbyor lam
pa'i lus rten dang tshe gcig gis bsdus pa yin pa'i phyir/ khyab
ste/ byang sems sbyor lam pa'i lus rten de snga ma'i las nyon
gyis

@04a @#/ /'phangs pa'i phung po yin pa'i phyir/ des longs spyod
rdzogs sku khas mi len zhing/ mchog gi sprul sku lhag med du
mya ngan las 'das pa'i tshe rig pa rgyun chad par 'dod/ sangs
rgyas 'phags pas sdug kun ma lus par spangs kyang

de'i rgyud la sdug bden yod pa mi 'gal te/ sdug bden la dmigs
pa'i nyon mongs ma lus par spangs pa na sdug bden spangs par
'jog pa'i phyir/ nyan rang dgra bcom pas dgra bcom pa'i go
'phang thob nas sku tshe'i 'du byed ma btang gi bar lhag

bcas pa dang/ sku tshe'i 'du byed btang nas lhag med du mya
ngan las 'das par 'jog pa'i phyir/ lhag bcas myang 'das kyi
tshe nyon mongs can gyi sgrib pa ma lus par spangs kyang/ nyon
mongs can ma yin pa'i sgrib pa ma spangs pa yod/ lhag med
myang 'das kyi

tshe de gnyen po'i stobs kyis bcom pa ma yin kyang/ de med de/
de'i tshe de'i rten rig pa rgyun chad pa yin pa'i phyir/ dngos
smra ba rnams kyis mdo'i drang nges 'byed pa'i tshe sgra ji
bzhin du khas blang du rung mi rung gis sgo nas 'byed cing/
don smra gnyis kyis theg chen gyi

sde snod sangs rgyas kyi bkar mi 'dod de/ bye brag smra ba
phal che bas mdo la nges don gyi mdos khyab pa khas len pa'i
phyir/ !gnyis pa mdo sde pa'i lugs bshad pa la/ mtshan nyid/
dbye ba/ sgra bshad pa/ yul gyi 'dod tshul/ yul can gyi 'dod
tshul/ bdag med

kyi 'dod tshul/ sa lam gyi rnam gzhag bshad pa dang bdun/ dang
po ni/ rang rig dang phyi don gnyis ka khas len pa'i theg dman
gyi grub mtha' smra ba'i gang zag de/ mdo sde pa'i mtshan nyid/
mdo sde pa dang dpe ston pa don gcig/ gnyis pa de la dbye na/

@04b lung gi rjes 'brang gi mdo sde pa dang/ rigs pa'i rjes
'brang gi mdo sde pa gnyis yod/ dang po ni/ mngon pa mdzod kyi
rjes 'brang gi mdo sde pa lta bu/ gnyis pa ni/ tshad ma sde
bdun gyi rjes 'brang gi mdo sde pa lta bu'o/ /gsum pa ni/ ci'i
phyir mdo sde pa zhes bya zhe na/ bcom ldan

'das kyi mdo'i rjes su 'brangs nas grub mtha' smra bas na mdo
sde pa dang/ chos thams cad dpe'i sgo nas bstan par 'dod pas
na dpe ston pa zhes brjod pa'i phyir/ bzhi pa ni/ tshad mas
dmigs pa yod pa'i mtshan nyid/ de la dbye na/ kun rdzob bden pa
dang/ don dam bden pa

gnyis yod/ don dam par don byed nus pa'i chos de/ don dam bden
pa'i mtshan nyid/ don dam bden pa/ bden par grub pa/ dngos po/
byas pa/ mi rtag pa/ 'dus byas/ rdzas/ rang mtshan rnams don
gcig /don dam par don byed mi nus pa'i chos/ kun rdzob bden
pa'i mtshan nyid/

kun rdzob bden pa/ rdzun par grub pa/ rtag pa/ spyi mtshan
rnams don gcig/ yang yod pa la dbye na/ dgag pa dang/ sgrub pa
gnyis/ rang 'dzin gyi blos rang gi dgag bya bcad pa'i sgo nas
rtogs par bya ba/ dgag pa'i mtshan nyid/ rang 'dzin gyi blos
rang gi dgag bya ma bcad

pa'i sgo nas rtogs par bya ba/ sgrub pa'i mtshan nyid/ dang po
la yang/ med dgag dang/ ma yin dgag gnyis las/ dang po'i mtshan
gzhi ni/ 'dus ma byas kyi nam mkha'/ 'gog bden/ stong nyid lta
bu'o/ /gnyis pa'i mtshan gzhi/ dngos po ma yin pa las log pa/

bum 'dzin rtog pa la bum pa ma yin pa las log par snang ba lta
bu'o/ /yang yod pa la dbye na/ gcig dang tha dad gnyis las/
dang po la yang/ rdzun pa'i gcig dang/ bden pa'i gcig gnyis
las/ dang po ni/ shes bya dang/ spyi mtshan lta bu'o/ /gnyis pa
ni/ dngos

@05a @#/ /po dang/ mi rtag pa lta bu/ gnyis pa tha dad la yang/
rdzun pa'i tha dad dang/ bden pa'i tha dad gnyis las/ dang po
ni/ bum pa'i ldog pa dang ka ba'i ldog pa gnyis lta bu/ gnyis
pa ni/ bum pa dang ka ba gnyis lta bu/ des na 'das pa dang ma
'ongs pa gnyis

rtag pa dang/ da ltar ba dang dngos po don gcig yin no/ /lnga
pa yul can gyi 'dod tshul ni/ mdo sde pa la/ phung po'i rgyun
gang zag gi mtshan gzhir 'dod pa dang/ yid kyi rnam shes gang
zag gi mtshan gzhir 'dod pa gnyis las/ dang po ni/ mngon pa
mdzod kyi rjes

'brang gi mdo sde pa lta bu/ gnyis pa ni/ tshad ma sde bdun gyi
rjes 'brang gi mdo sde pa lta bu/ gsal zhing rig pa blo'i
mtshan nyid/ blo la tshad ma dang/ tshad min gyi blo gnyis yod/
gsar du mi slu ba'i rig pa tshad ma'i mtshan nyid/ tshad ma'i
mtshan nyid kyi zur du gsar

du dang/ mi slu ba dang/ rig pa zhes gsum smos pa la dgos pa
yod de/ gsar du zhes pas dpyad shes tshad ma yin pa gcod/ mi
slu ba zhes pas yid dpyod tshad ma yin pa gcod/ rig pa zhes pas
dbang po gzugs can pa tshad ma yin pa gcod pa yin pa'i 

phyir/ tshad ma la dbye na/ mngon sum gyi tshad ma dang/ rjes su
dpag pa'i tshad ma gnyis yod/ rtog pa dang bral zhing ma 'khrul
ba'i rig pa mngon sum gyi mtshan nyid/ rtog pa dang bral zhing
gsar du mi slu ba'i rig pa de/ mngon sum gyi tshad ma'i mtshan
nyid/ mngon

sum gyi tshad ma la dbye na/ rang rig mngon sum gyi tshad ma/
dbang po'i mngon sum gyi tshad ma/ yid kyi mngon sum gyi tshad
ma/ rnal 'byor mngon sum gyi tshad ma dang bzhi las/ kha nang
kho nar phyogs shing 'dzin pa yan gar bar gyur pa'i rtog pa
dang bral zhing

@05b gsar du mi slu ba'i rig pa/ dang po'i mtshan nyid/ rang gi
thun mong ma yin pa'i bdag rkyen dbang po gzugs can pa la
brten nas byung ba'i rtog pa dang bral zhing gsar du mi slu
ba'i rig pa/ gnyis pa'i mtshan nyid/ rang gi thun mong ma yin
pa'i bdag rkyen

yid dbang la brten nas byung ba'i rtog pa dang bral zhing gsar
du mi slu ba'i rig pa/ gsum pa'i mtshan nyid/ rang gi bdag
rkyen zhi lhag zung 'brel gyi ting nge 'dzin la brten nas phra
ba'i mi rtag pa dang/ gang zag gi bdag med phra rags gang rung
mngon sum du rtogs

pa'i ye shes/ /bzhi pa'i mtshan nyid/ rnal 'byor mngon sum gyi
tshad ma la dbye na/ phra ba'i mi rtag pa mngon sum du rtogs
pa'i tshad ma dang/ gang zag gi bdag med rags pa mngon sum du
rtogs pa'i tshad ma dang/ gang zag gi bdag med phra mo mngon
sum du rtogs

pa'i tshad ma dang gsum yod/ rang gi rten rtags yang dag la
brten nas skyes pa'i gsar du mi slu ba'i zhen rig de/ rjes su
dpag pa'i tshad ma'i mtshan nyid/ de la dbye na/ dngos stobs
rjes dpag/ grags pa'i rjes dpag/ yid ched rjes dpag dang gsum
las/ byas

rtags kyis sgra mi rtag rtogs kyi rjes dpag dang po'i mtshan
gzhi/ rtog yul na yod pa'i rtags las ri bong can zla sgras
brjod rung du rtogs pa'i rjes dpag gnyis pa'i mtshan gzhi/
dpyad gsum gyis dag pa'i lung gi rtags las/ sbyin pas longs
spyod khrims

kyis bde/ /zhes sogs kyi lung rang gi bstan don mi slu bar
rtogs pa'i rjes dpag lta bu/ gsum pa'i mtshan gzhi yin/ grags
pa'i rjes dpag la dngos stobs kyis rjes dpag gis khyab cing/
mngon sum yin na mngon sum tshad ma yin pas ma khyab pa dang/

@06a @#/ /rjes dpag yin na rjes dpag tshad ma yin pas ma khyab
ste/ gzugs 'dzin dbang po mngon sum skad cig gnyis pa dang/
sgra mi rtag rtogs kyi rjes dpag skad cig gnyis pa rnams dpyad
shes yin pa'i phyir te/ 'thad ldan las/ mngon sum dang

rjes su dpag pa'i skad cig dang po gnyis ni tshad ma yin la/ de
dag gi rgyun du gyur pa grub bde tha mi dad pa'i phyir phyi ma
rnams ni tshad ma yin pa spangs pa'o/ /zhes gsungs pa'i phyir/
gnyis pa gsar du mi slu ba ma yin pa'i rig pa/ tshad min gyi
blo'i mtshan nyid

de la dbye na/ dpyad shes log shes/ the tshom/ yid dpyod/ snang
la ma nges pa'i blo dang lnga yod/ rtogs zin rtogs pa'i rig
pa/ dang po'i mtshan nyid/ de la yang/ rtog pa dpyad shes/ rtog
med dpyad shes gnyis las/ dang po ni/ sngo 'dzin dbang mngon
gyis drangs nas

skyes pa'i sngon po dran pa'i dran shes dang/ sgra mi rtag
rtogs kyi rjes dpag skad cig gnyis pa lta bu/ gnyis pa ni/
gzugs 'dzin dbang po mngon sum skad cig gnyis pa lta bu/ gnyis
pa ni/ phyin ci log tu zhugs pa'i rig pa/ log shes kyi mtshan
nyid/ de la

yang/ rtog pa log shes dang/ rtog med log shes gnyis las/ dang
po ni/ sgra rtag 'dzin rtog pa lta bu/ gnyis pa ni/ zla gcig
zla gnyis su snang ba'i dbang shes dang/ gangs ri sngon por
snang ba'i dbang shes lta bu/ gsum pa ni/ rang stobs kyis
mtha' gnyis

su dogs pa'i sems byung the tshom gyi mtshan nyid/ de dang
mtshungs ldan du gyur pa'i yid kyi rnam shes dang/ de'i 'khor
du byung ba'i tshor ba rnams ni rang stobs kyis mtha' gnyis su
dogs pa ma yin te/ de rnams the tshom de'i stobs kyis mtha'
gnyis su

@06b dogs pa yin pa'i phyir/ de la yang/ don 'gyur gyi the
tshom/ don mi 'gyur gyi the tshom/ cha snyoms pa'i the tshom dang
gsum las/ dang po ni/ sgra mi rtag gam snyam pa'i the tshom lta
bu/ gnyis pa ni/ sgra rtag gam snyam pa'i the tshom lta bu/
gsum pa ni/ sgra rtag gam mi rtag

snyam pa'i the tshom lta bu/ bzhi pa ni/ rang yul la zhen pas
slu ba'i zhen rig don 'thun de/ yid dpyod kyi mtshan nyid/ de
la yang/ rgyu mtshan med pa'i yid dpyod/ rgyu mtshan dang 'gal
ba'i yid dpyod/ rgyu mtshan ma nges pa'i yid dpyod/ rgyu mtshan
ma grub pa'i yid

dpyod/ rgyu mtshan yod kyang gtan la ma phebs pa'i yid dpyod
dang lnga las/ sgra mi rtag ces ba'i ngag tsam la brten nas
sgra mi rtag par 'dzin pa'i blo lta bu/ dang po'i mtshan gzhi
yin te/ sgra mi rtag ces pa'i sgra des sgra mi rtag pa'i dam
bca' brjod pa yin gyi/

sgra mi rtag pa'i rgyu mtshan yang dag ma brjod pa'i phyir/ don
byed nus stong gi rtags las sgra mi rtag par 'dzin pa'i blo
lta bu/ gnyis pa'i mtshan gzhi yin te/ don byed nus stong sgra
dang 'gal ba yin pa'i phyir/ gzhal bya'i rtags las sgra mi
rtag par 'dzin

pa'i blo lta bu/ gsum pa'i mtshan gzhi yin te/ gzhal bya sgra
mi rtag par sgrub pa'i ma nges pa'i gtan tshigs yin pa'i phyir/
mig shes kyi gzung bya'i rtags las sgra mi rtag par 'dzin pa'i
blo lta bu/ bzhi pa'i mtshan gzhi yin te/ mig shes kyi

gzung bya sgra mi rtag par sgrub pa'i ma grub pa'i gtan tshigs
yin pa'i phyir/ sgra mi rtag par chad mas ma nges pa'i gang
zag gi rgyud kyi byas rtags las sgra mi rtag par 'dzin pa'i
blo lta bu/ lnga pa'i mtshan gzhi yin te/ byas pa sgra mi rtag
par

@07a @#/ /sgrub pa'i rgyu mtshan yang dag yin yang/ de 'dra ba'i
gang zag des de'i rgyu mtshan yang dag de/ gtan la ma phabs pa
yin pa'i phyir/ lnga pa ni rang yul ma nges pa'i gsal snang
can gyi ma 'khrul ba'i rig pa de/ snang la ma nges ba'i blo'i

mtshan nyid/ de la dbye na/ kho rang du gyur ba'i dbang mngon/
yid kyi mngon sum dang rang rig mngon sum gsum las/ dang po
ni/ mig gzugs mdzes pa la lhag par chags pa'i dus kyi sgra
'dzin nyan shes lta bu/ gnyis pa ni/ so skye'i rgyud kyi gzugs
sogs

don lnga 'dzin pa'i yid kyi mngon sum lta bu/ gsum pa ni/ so
skye'i rgyud kyi gzugs sogs don lnga 'dzin pa'i yid kyi mngon
sum nyams su myong ba'i rang rig lta bu/ spyir yul can la dbye
na/ skyes bu/ ngag/ tshad ma gsum yod/ yul can tshad ma de la
dbye na/ skyes

bu tshad ma/ ngag tshad ma/ shes pa tshad ma dang/ gsum las/ dang
po ni/ ston pa sangs rgyas lta bu la byed/ gnyis pa ni/ bden
bzhi'i chos 'khor lta bu la byed/ gsum pa ni/ mngon sum tshad
ma dang/ rjes su dpag pa'i tshad ma lta bu yin no/ /drug pa
bdag med 'dod

tshul ni/ gang zag rtag gcig rang dbang can gyis stong pa gang
zag gi bdag med rags pa dang/ gang zag rang skya thub pa'i
rdzas yod kyis stong pa gang zag gi bdag med phra mor 'dod
cing/ chos kyi bdag med khas mi len pa bye brag smra ba dang
mtshungs/ bdun pa

sa lam gyi rnam gzhag ni/ rigs can gsum ga'i tshogs gsog pa'i
tshe slob lam bzhi ga'i gnas skabs su tshogs gsog pa yin pas
de'i rgyu mtshan gyis sangs rgyas kyi gzugs phung sangs rgyas
su khas len pa yin no/ /sgrib pa'i rnam gzhag dang

@07b sa lam gyi bgrod tshul sogs bye brag smra ba dang mtshungs
so/ ! /gsum pa sems tsam pa'i lugs bshad pa la/ sa bcad sngar
ltar bdun las/ dang po ni/ phyi don khas mi len cing/ rang rig
bden grub tu 'dod pa'i theg chen gyi grub mtha' smra ba'i gang
zag de/ sems

tsam pa'i mtshan nyid/ sems tsam pa dang/ rnam rig pa dang/
rnal 'byor spyod pa ba rnams don gcig/ gnyis pa de la dbye na/
sems tsam rnam bden pa dang/ rnam rdzun pa gnyis las/ sems
tsam pa gang zhig/ tshur mthong gi rgyud kyi gzugs 'dzin mngon
sum la

gzugs rags par snang ba'i cha la ma rig bag chags kyis bslad
pa ma zhugs par 'dod pa de/ dang po'i mtshan nyid/ de gang
zhig/ tshur mthong gi rgyud kyi gzugs 'dzin mngon sum la gzugs
rags par snang ba'i cha la ma rig bag chags kyis bslad pa
zhugs

par 'dod pa de gnyis pa'i mtshan nyid/ rnam bden pa la dbye na/
gzungs 'dzin grangs mnyams pa/ sgong nga phyed tshal ba/ sna
tshogs gnyis med pa dang gsum yod/ de rnams so so'i 'dod tshul
yod de/ bya ma leb kyi gshog steng gi khra bo 'dzin pa'i mig
shes kyi khra

bo 'dzin pa'i tshe/ yul gyi ngos nas sngo ser sogs mi 'dra ba
re re'i rnam pa gtad cing/ yul can gyi ngos nas kyang sngo ser
sogs mi 'dra ba re re'i rnam pa rnam bden du skye bar 'dod pas
na gzungs 'dzin grangs mnyams pa dang/ de ltar 'dzin pa'i tshe
yul gyi ngos nas sngo

ser sogs mi 'dra ba re re'i rnam pa gtad cing/ yul can gyi
ngos nas sngo ser sogs mi 'dra ba re re'i rnam pa rnam med du
skye bar 'dod pas na sgong nga phyed tshal ba dang/ de ltar
'dzin pa'i tshe yul gyi ngos nas sngo ser sogs mi 'dra ba re
re'i rnam pa ma gtad cing/

@08a @#/ /khra tsam gyi rnam pa gtad/ yul can gyi ngos nas sngo
ser sogs mi 'dra ba re re'i rnam pa rnam med du ma skyes par/
khra tsam gyi rnam pa rnam med du skyes par 'dod pas na sna
tshogs gnyis med pa zhes brjod pa yin pa'i phyir/ gnyis

pa rnam rdzun pa la dbye na/ dri bcas rnam rdzun pa/ dri med
rnam rdzun pa gnyis su yod/ gsum pa sems tsam pa'i sgra bshad
pa ni/ ci'i phyir/ sems tsam pa zhes bya zhe na/ chos rnams
sems kyi bdag nyid tsam du 'dod pas na sems tsam pa dang/ chos

thams cad rnam par rig pa'i bdag nyid tsam du 'dod pas na rnam
rig pa zhes brjod pa yin pa'i phyir/ bzhi pa yul gyi 'dod tshul
ni/ shes bya la dbye na/ don dam bden pa dang/ kun rdzob bden
pa gnyis yod/ rang mngon sum du rtogs pa'i

mngon sum tshad mas gnyis snang nub pa'i sgo nas rtog par bya
ba/ dang po'i mtshan nyid/ don dam bden pa/ chos nyid/ chos
dbyings/ gnas lugs mthar thug rnams don gcig/ don dam bden pa
la dbye na/ chos kyi bdag med phra mo dang/ gang

zag gi bdag med phra mo gnyis yod/ chos kyi bdag med phra mo
la stong gzhi'i sgo nas dbye na/ stong nyid nyi shu/ de las
bsdu na bco brgyad/ de las bsdu na bcu drug/ de las bsdu na
stong nyid bzhi sogs yod/ chos kyi bdag med phra mo'i mtshan
gzhi ni/

gzugs dang gzugs 'dzin pa'i tshad ma rdzas gzhan gyis stong
pa'i stong nyid dang/ gzugs gzugs zhes pa'i sgra 'jug pa'i
'jug gzhir rang gi mtshan nyid kyis grub pas stong pa'i stong
nyid lta bu/ gang zag gi bdag med phra mo'i mtshan gzhi ni/
gang

@08b zag rang skya thub pa'i rdzas yod kyis stong pa'i stong
nyid lta bu/ rang mngon sum du rtogs pa'i mngon sum tshad mas
gnyis snang dang bcas pa'i sgo nas rtogs par bya ba de/ kun
rdzob bden pa'i mtshan nyid/ dbye na/ gzhan dbang dang/ kun
btags kyis

bsdus ba'i kun rdzob bden pa gnyis su yod/ dang po dang 'dus
byas don gcig/ gnyis pa dang/ don dam bden pa las gzhan pa'i
'dus ma byas kyi chos don gcig/ dngos po thams cad bden par
grub pa dang/ rdzun pa'i gzhi 'thun du khas le na/ chos

nyid thams cad bden par grub pa dang/ bden pa'i gzhi 'thun du
khas le na/ chos nyid las gzhan pa'i 'dus ma byas thams cad
rdzun par grub pa dang/ rdzun pa'i gzhi 'thun du khas lan pa
yin no/ /chos nyid la med dgag gi khyab cing/ med dgag gzhan

rnams kyi mtshan gzhi mdo sde ba dang mtshungs la/ gzugs sogs
don lnga po de kun gzhi'i rnam shes kyi steng du thun mong ba
dang thun mongs ma yin pa'i las kyi bag chags bzhag pa la
brten nas nang shes pa'i rdzas kyi steng nas skyes pa yin gyi
phyi rol gyi don

du grub pa ma yin pa'i phyir/ rnam bden pa ltar na/ gzugs sogs
don lnga po de/ phyi rol gyi don ma yin kyang rags par grub
par khas len/ rnam rdzun pa ltar na/ gzugs sogs don lnga rags
pa ma yin te/ rags par grub na phyi don du grub dgos pa'i
phyir/ lnga pa

yul can gyi 'dod tshul ni/ rnam bden pa ltar na/ rnam shes
tshogs brgyad du khas len te/ grub mtha' smra ba gzhan gyis
khas len pa'i rnam shes tshogs drug gi steng du/ kun gzhi'i
rnam shes dang/ nyon yid bsnan pa'i rnam shes tshogs brgyad du
'dod/ kun gzhi'i

@09a @#/ /rnam shes dang/ nyon yid gnyis kyi mtshan gzhi yod de/
rnam shes tshogs drug las don gzhan zhing/ rang gi bdag rkyen
dbang po la mi ltos pa'i rnam shes dang po dang/ dmigs pa kun
gzhi la dmigs shing rnam pa rang skya thub

pa'i rdzas yod kyis ngar 'dzin pa'i rnam shes gnyis pa yin par
'dod/ kun gzhi'i rnam shes de/ las 'bras kyi rten du gyur pa'i
gang zag gi mtshan gzhir 'dod/ rnam rdzun pa ltar na rnam shes
tshogs drug tu 'dod cing/ las 'bras kyi rten du gyur pa'i gang

zag gi mtshan gzhir/ yid kyi rnam shes tsam 'jog pa yin pa'i
phyir/ blo la tshad ma dang/ tshad min gyi blo gnyis su 'dod
cing/ tshad ma la mngon sum tshad ma dang/ rjes su dpag pa'i
tshad ma gnyis su 'dod/ mngon sum la bzhi yod cing/ rang rig
mngon

sum dang/ rnal 'byor mngon sum la ma 'khrul ba'i shes pas
khyab/ so skye'i rgyud kyi dbang po'i mngon sum la 'khrul shes
kyis khyab/ de'i rgyud kyi yid kyi mngon sum la 'khrul shes
dang ma 'khrul ba'i shes pa gnyis yod/ mngon sum la mngon sum
gyi

tshad mas ma khyab ste/ so skye'i rgyud la gzugs 'dzin yid
mngon yod kyang/ de'i rgyud la gzugs 'dzin yid mngon gyi tshad
ma med pa'i phyir/ de'i rgyud kyi gzugs 'dzin yid mngon nyams
su myong ba'i rang rig dang/ gzugs 'dzin dbang po'i mngon sum
skad

cig gnyis pa rnams tshad ma ma yin pa'i phyir/ rnal 'byor mngon
sum la phra ba'i mi rtag pa mngon sum du rtogs pa'i rnal 'byor
mngon sum dang/ gang zag gi bdag med phra mo dang/ gang zag gi
bdag med rags pa dang/ chos kyi bdag med mngon sum du

@09b rtogs pa'i rnal 'byor mngon sum dang bzhi yod/ rjes dpag
tshad ma la rtog pas khyab cing/ chos de la rjes dpag yin na
chos de la rtog pa yin pas ma khyab ste/ sgra mi rtag rtogs
kyi rjes dpag de sgra rtag stong la rjes dpag yin kyang de la
rtog pa ma yin pa'i

phyir te/ chos de la rtog pa yin na chos de'i rnam pa shar bas
khyab pa gang zhig sgra mi rtag rtogs kyi rjes dpag de la sgra
rtag stong gi rnam pa ma shar ba'i phyir/ des de dngos su ma
rtogs pa'i phyir/ des sgra mi rtag pa dngos su rtogs pa'i
shugs la de rtogs pa'i

phyir/ drug pa bdag med 'dod tshul ni/ gang zag gi bdag med
phra rags kyi mtshan gzhi rang rgyud pa man chad 'jog tshul 'dra
la/ chos kyi bdag med kyi mtshan gzhi/ gzugs dang gzugs 'dzin
tshad ma rdzas gzhan gyis stong pa'i stong nyid lta bu la byed/
bdun

pas lam gyi rnam gzhag bshad pa la/ spang bya dang/ sa lam gyi
rnam gzhag dngos bshad pa'o/ /dang po ni/ gang zag gi bdag
'dzin sa bon dang bcas pa dang/ de'i dbang gis byung ba'i dug
gsum sa bon dang bcas pa nyon sgrib dang/ bden 'dzin sa bon
dang

bcas pa dang/ de'i bag chags dang de'i dbang gis byung ba'i
gnyis snang 'khrul pa thams cad shes sgrib tu 'jog/ gnyis pa
ni/ gang zag gi bdag med rtogs pa'i lta ba de/ nyan thos kyi
rigs can rnams kyis ched du bya ba rang don du bsod nams kyi
tshogs

chung ngu dang/ rang rgyal gyi rigs can rnams kyis ched du bya
ba rang don du bsod nams kyi tshogs 'bring dang zung du 'brel
te/ tshe gsum dang bskal pa brgya la sogs pa'i bar du goms par
byas pa la brten nas rang rang gi byang chub mngon du byed/
byang sems

@10a @#/ /rnams kyis gzungs 'dzin rdzas gzhan gyis stong par
rtogs pa'i lta ba de ched du bya ba gzhan don du bsod nams kyi
tshogs chen po dang zung du 'brel te bskal pa grangs med gsum
la sogs pa'i bar du goms par byas pa la

brten nas rang gi byang chub mngon du byed/ rnam bden pa ltar
na/ nyan rang dgra bcom pa rnams lhag med du mya ngan las 'das
pa na rig pa rgyun chad par 'dod/ sangs rgyas 'phags pa rig pa
rgyun chad pa mi srid par 'dod pa yin te/ byang sems rnams
dang

por 'og min du longs skur sangs rgyas pa'i longs sku de 'khor
ba ji srid ma stongs kyi bar du rnam pa'i rigs 'dra rgyun mi
chad par gdul bya rang rang gi skal ba dang 'tsham par sprul pa
sna tshogs kyis gzhan don byed par 'dod pa'i phyir/ theg pa
gsum

rigs so sor nges pa yin te/ sems can rnams thog ma med pa nas
rigs sam khams mi 'dra ba gsum/ de las mos pa mi 'dra ba gsum/
de las sgrub ba mi 'dra ba gsum/ de las 'bras bu mi 'dra ba
gsum/ de las 'bras bu mi 'dra ba gsu 'thob par 'dod pa yin
pa'i phyir/ rnam rdzun pa

ltar na/ nyan rang dgra bcom pa rnams lhag med du mya ngan las
'das pa na rig pa rgyun chad par mi 'dod de/ des de'i tshe sdug
kun gyis bsdus pa'i rig pa tsam rgyun chad par 'dod kyang/ rig
pa tsam zhig sangs rgyas kyi sar 'gro bar 'dod pas mthar thug
theg

pa gcig tu grub par 'dod do/ ! /bzhi pa ngo bo nyid med par
smra ba'i lugs bshad pa la/ mtshan nyid/ dbye ba/ phye ba so
so'i don bshad pa'o/ /dang po ni/ bden dngos tha snyad du yang
mi 'dod pa'i theg chen gyi grub mtha' smra ba'i gang zag de/
ngo bo nyid med par smra

@10b ba'i mtshan nyid/ gnyis pa ni/ de la dbye na/ rang rgyud
pa dang/ thal 'gyur pa gnyis yod/ gsum pa ni/ rang rgyud pa'i
lugs bshad pa dang/ thal 'gyur ba'i lugs bshad pa'o/ /dang po
la/ mtshan nyid/ dbye ba/ sgra bshad pa/ yul dang/ yul can gyi
'dod tshul/ bdag

med kyi 'dod tshul/ sa lam gyi rnam gzhag bshad pa dang bdun
las/ dang po ni/ rang rgyud kyi rtags zhal gyis bzhes ba'i sgo
nas bden dngos tha snyad du'ang mi 'dod pa'i dbu ma pa de/
rang rgyud pa'i mtshan nyid/ de dang rang bzhin gyis yod par
smra

ba'i dbu ma pa don gcig/ gnyis pa de la dbye na/ mdo sde spyod
pa'i dbu ma rang rgyud pa dang/ rnal 'byor spyod pa'i dbu ma
rang rgyud pa gnyis yod/ tha snyad kyi rnam gzhag phal cher
mdo sde pa dang sgo bstun nas smra ba'i dbu ma pa de/ dang
bo'i mtshan

nyid; tha snyad kyi rnam gzhag phal cher sems tsam pa dang sgo
bstun nas smra ba'i dbu ma pa de/ gnyis pa'i mtshan nyid/ dang
po'i mtshan gzhi legs ldan 'byed dang/ ye shes snying po lta
bu'o/ /gnyis pa'i mtshan gzhi/ zhi ba 'tsho/ seng ge

bzang po/ ka ma la shI la dpon slob lta bu'o/ /gsum pa ni/
legs ldan 'byed chos can/ khyod la dbu ma rang rgyud pa zhes
brjod pa'i rgyu mtshan yod de/ rang rgyud kyi rtags khas len
pa'i dbu ma pa yin pa'i rgyu mtshan gyis de ltar brjod

pa'i phyir/ bzhi pa ni/ rang gi mtshan nyid kyis grub pa/ rang
ngos nas grub pa/ rang bzhin gyi sa grub pa rnams don gcig/
'dus ma byas kyi nam mkha'/ 'gog bden/ 'das/ ma 'ongs/ gang
zag gi bdag med phra mo rnams med dgag dang/

@011a @#/ /kun rdzob bden pa gnyis kar 'dod/ don dam bden pa/
chos nyid/ chos kyi bdag med phra mo rnams don gcig /mdo sde
spyod pa'i dbu ma pa ltar na/ gzugs sogs don lnga shes pa dang
ngo bo tha dad cing/ rdul phran cha med

las brtsams pa'i rags pa phyi don du 'dod/ rnal 'byor spyod
pa'i dbu ma pa ltar na/ gzugs sogs don lnga rang 'dzin pa'i
shes pa dang ngo bo gcig tu 'dod/ lnga pa ni yid kyi rnam shes
gang zag gi mtshan gzhi dang/ rnam shes tshogs drug tu 'dod/

blo la tshad ma dang tshad min gyi blo gnyis yod/ dang po la
mngon sum tshad ma dang/ rjes su dpag pa'i tshad ma gnyis yod/
mdo sde spyod pa'i dbu ma pa ltar na/ rang rig mngon sum mi
'dod/ gcig shos ltar na/ mngon sum bzhi ga 'dod cing/

rang rig mngon sum dang/ rnal 'byor mngon sum la ma 'khrul
ba'i shes pas khyab/ gzhan gnyis la 'khrul ma 'khrul gnyis ka
yod/ mdo sems gnyis ka dang rang rgyud pa rnams kyis mngon sum
la rtog bral gyi shes pas khyab pa dang/

dpyad shes la tshad min gyi shes pas khyab pa dang/ rang gi
zhen yul la 'khrul ba'i shes pa la/ log shes kyis khyab pa
dang/ chos de la 'khrul shes yin na/ chos de la tshad ma ma yin
pas khyab pa dang/ rjes dpag yin na rang gi snang yul

la tshad ma ma yin pas khyab pa sogs khas len pa'i phyir/ drug
pa ni/ gang zag rtag gcig rang dbang can gyis stong pa gang
zag gi bdag med rags pa dang/ gang zag rang skya thub pa'i
rdzas yod kyis stong pa gang zag gi bdag med phra mor

@011b 'dod/ rnal 'byor spyod pa'i dbu ma pa ltar na/ gzugs
dang gzugs 'dzin pa'i tshad ma rdzas gzhan gyis stong pa chos
kyi bdag med rags pa dang/ chos thams cad bden pas stong pa
chos kyi bdag med phra mor 'dod pa yin pa'i phyir/ bdag med

gnyis dgag bya'i sgo nas 'byed pa yin gyi stong gzhi'i sgo nas
'byed pa ma yin te/ gzhi gang zag gi steng du dgag bya bden
grub bkag pa de chos kyi bdag med phra mo dang/ gzhi gang zag
gi steng du rang skya thub pa'i rdzas yod du grub pa bkag pa
de/ gang

zag gi bdag med phra mo yin pa'i phyir/ bdag 'dzin gnyis 'dzin
stangs kyi sgo nas 'byed pa yin gyi dmigs pa'i sgo nas ma yin
te/ gzhi gang zag la dmigs nas bden grub tu 'dzin pa de/ chos
kyi bdag 'dzin dang/ gzhi gang zag la dmigs nas

rang skya thub pa'i rdzas yod du grub par 'dzin pa de/ gang
zag gi bdag 'dzin yin pa'i phyir/ bdun pa ni/ rnal 'byor spyod
pa'i dbu ma pa ltar na/ theg pa gsum gyi gang zag gi khyad par
rnams spang bya'i gtso bo sgrib pa mi 'dra ba gsum/ bsgom

bya'i gtso bo lta ba mi 'dra ba gsum gyi sgo nas 'jog pa yin
te/ nyan thos kyi rigs can rnams kyis rang skya thub pa'i
rdzas yod du grub par 'dzin pa'i rtog pa 'khor bcas spang
bya'i gtso bor byas nas de'i gnyen por gang zag rang skya thub
pa'i rdzas

yod du grub pas stong par rtogs pa'i lta ba de bsgom bya'i
gtso bor byas pa las byang chub chung ngu 'thob par byed/ rang
rgyal gyi rigs can rnams kyis gzugs dang gzugs 'dzin pa'i tshad
ma rdzas gzhan du 'dzin pa'i rtog pa spang bya'i gtso

@012a @#/ /bor byas nas de'i gnyen por gzungs 'dzin rdzas gzhan
gyis stong par rtogs pa'i lta ba sgom bya'i gtso bor byas pa
las byang chub 'bring 'thob par byed/ byang sems rnams kyis
bden 'dzin bag

chags dang bcas pa spang bya'i gtso bor byas nas de'i gnyen
por chos thams cad bden med du rtogs pa'i lta ba sgom bya'i
gtso bor byas pa las byang chub chen po 'thob par byed pa yin
pa'i phyir/ mdo sde spyod pa'i dbu ma pa

ltar na/ nyan rang gnyis kyi spang bya'i gtso bo dang bsgom
bya'i gtso bo la khyad par med de/ de gnyis kas nyon sgrib
spang bya'i gtso bor byed pa mtshungs/ gang zag gi bdag med
bsgom bya'i gtso bor byed pa yang mtshungs

pa'i phyir/ 'on kyang/ de gnyis la 'bras bu dman mchog gi
khyad par yod pa'i rgyu mtshan yod de/ bsod nams kyi tshogs rgya
che chung dang yun ring thung gi dbang gis khyad par yod pa'i
phyir/ mdo la theg chen gyi 

mdo dang theg dman gyi mdo gnyis dang/ drang nges kyi cha gnyis 
su 'dod pa sems tsam pa dang mtshungs la/ mtshan gzhi mi 'dra ba 
yin te/ sems tsam pas 'khor lo dang po gnyis drang don gyi mdo 
dang/ phyi ma nges

don gyi mdor 'dod/ skabs 'dir 'khor lo thog mtha' gnyis drang
don gyi mdo dang/ bar pa la drang nges kyi cha gnyis yod de/
dgag bya la don dam gyi khyad par sbyar ba rnams nges don gyi
mdo dang/ de ltar ma sbyar ba'i

@012b 'khor lo bar pa rnams drang don gyi mdor 'dod pa yin
pa'i phyir/ ! /gnyis pa thal 'gyur ba'i lugs bshad pa la/
sngar ltar bdun las/ dang po ni/ gzhan grags kyi thal 'gyur
tsam zhal gyis bzhes pa'i sgo nas

bden dngos tha snyad du'ang mi 'dod pa'i dbu ma pa de thal
'gyur ba'i mtshan nyid/ gnyis pa ni/ slob dpon sangs rgyas
bskyangs/ zla grags/ zhi ba lha lta bu'o/ /gsum pa ni/ slob
dpon sangs rgyas bskyangs chos can/ khyod

la thal 'gyur ba zhes brjod pa'i rgyu mtshan yod de/ thal 'gyur
tsam gyis phyi rgol gyi rgyud la bsgrub bya rtogs pa'i rjes
dpag skye bar 'dod pas de ltar brjod pa'i phyir/ bzhi pa yil
gyi 'dod tshul ni/ yul de la lkog gyur dang/

mngon gyur gnyis yod/ rtags la brten nas rtogs dgos pa'i yul
rnams lkog gyur dang/ tshur mthong rnams kyis rtags la mi brten
par myong stobs kyis nges nus pa'i yul rnams mngon gyur du
'jog/ dang po'i

mtshan gzhi/ sgra mi rtag pa/ sgra bden stong lta bu la byed/
gnyis pa'i mtshan gzhi/ bum pa dang/ snam bu lta bu la byed/
mngon sum dang/ mngon gyur don gcig/ yang yul de la/ kun rdzob
bden pa dang/ don

dam bden pa gnyis yod/ tha snyad dpyod byed kyi tshad ma'i
rnyed don gang zhig /tha snyad dpyod byed kyi tshad ma rang
nyid la tha snyad dpyod byed kyi tshad mar song ba/ rang nyid
kun rdzob bden pa yin pa'i mtshan nyid/ de la yang dag

@013a @#/ /kun rdzob dang/ log pa'i kun rdzob gnyis su 'byed mi
rigs te/ yang dag kun rdzob med pa'i phyir te/ kun rdzob yin
na yang dag ma yin dgos pa'i phyir te/ de yin na log pa yin
dgos pa'i phyir/

kun rdzob bden pa la 'jig rten shes ngo la ltos te yang log
gnyis su 'byed rigs te/ gzugs de 'jig rten shes ngo la ltos te
yang dag dang/ me long nang gi byad bzhin gyi gzugs brnyan de
'jig rten shes ngo la ltos te log

pa yin pa'i phyir/ 'jig rten shes ngo la ltos te yang dag yin
na yod pas ma khyab ste/ gzugs bden grub de/ de yin pa'i
phyir/ gnyis pa ni/ mthar thug dpyod byed kyi tshad ma'i rnyed
don gang zhig /mthar thug dpyod byed

kyi tshad ma rang nyid la mthar thug dpyod byed kyi tshad mar
song ba/ rang nyid don dam bden pa yin pa'i mtshan nyid/ dbye
ba sems tsam pa'i skabs dang 'dra zhing/ skabs 'dir 'gog bden
la don dam bden pas khyab pa khas

len pa'i phyir/ lnga pa yul can gyi 'dod tshul ni/ phung po
lnga la brten nas btags pa'i nga tsam gang zag gi mtshan gzhir
'dod cing/ gang zag la ldan min 'du byed kyis khyab/ blo la
tshad ma dang tshad min gyi blo gnyis

yod/ tshad ma la mngon sum gyi tshad ma dang rjes su dpag pa'i
tshad ma gnyis yod/ rang rig mngon sum mi 'dod cing/ sems can
gyi rgyud kyi dbang shes la 'khrul shes kyis khyab/ yid shes
dang rnal 'byor mngon

@013b sum la 'khrul ma 'khrul gnyis yod/ mngon sum gyi tshad ma
la rtog bcas mngon sum tshad ma dang/ rtog med mngon sum tshad
ma gnyis yod/ dang po'i mtshan gzhi/ sgra mi rtag rtogs kyi
rjes dpag skad cig gnyis pa

dang/ sngo 'dzin dbang mngon gyis drangs nas skyes pa'i sngon
po don 'thun du dran pa'i dran shes lta bu la byed/ gnyis pa'i
mtshan gzhi/ gzugs 'dzin dbang po'i mngon sum lta bu la byed/
mngon sum tshad ma yin na mngon sum yin

pas mkhyab ste/ rnal 'byor mngon sum yin na mngon sum ma yin
dgos pa'i phyir te/ mngon sum dang mngon gyur don gcig pa'i
phyir/ dpyad shes yin na mngon sum tshad ma yin pas khyab/ rjes
dpag la dbye na/

dngos stobs rjes dpag/ grags pa'i rjes dpag /dpe nyer 'jal gyi
rjes dpag/ yid ches rjes dpag dang bzhi yod/ grags pa'i rjes
dpag dang dpe nyer 'jal gyi rjes dpag gnyis dngos stobs rjes
dpag gi nang du 'du/

tshad ma yin na rang gi zhen yul la ma 'khrul pas ma khyab ste/
sgra mi rtag rtogs kyi rjes dpag de sgra mi rtag pa la 'khrul
shes yin pa'i phyir/ shes pa yin na rang gi gzhal bya rtogs
pas khyab ste/ ri bong rwa'i don spyi

ri bong rwa 'dzin rtog pa'i gzhal bya dang/ sgra rtag pa'i don
sbyi sgra rtag 'dzin rtog pa'i gzhal bya yin pa'i phyir/ drug
pa bdag med 'dod tshul ni/ gang zag rang skya thub pa'i rdzas
yod kyi grub pa'i stong pa gang zag gi bdag

@014a @#/ /med rags pa dang/ gang zag bden pas stong pa gang
zag gi bdag med phra mor 'dod/ rdul phran cha med bsags pa'i
rags pa dang/ de 'dzin pa'i tshad ma rdzas gzhan gyis stong pa
chos kyi bdag med rags pa

dang/ gdags gzhi phung po bden pas stong pa chos kyi bdag med
phra mor 'jog pa yin pa'i phyir/ bdag med gnyis stong bzhi'i
sgo nas 'byed pa yin gyi/ dgag bya'i sgo nas mi 'byed de/ gzhi
gang zag gi steng du dgag bya/

bden grub bkag pa gang zag gi bdag med phra mo dang/ gzhi
phung sogs kyi steng du dgags bya bden grub bkag pa chos kyi
bdag med phra mo yin no/ /bdag 'dzin gnyis dmigs pa'i sgo nas
'byed pa yin gyi/ 'dzin

stangs kyi sgo nas 'byed pa ma yin te/ gzhi gang zag la dmigs
nas bden grub tu 'dzin pa gang zag gi bdag 'dzin dang/ gdags
gzhi phung sogs la dmigs nas bden grub tu 'dzin pa chos kyi
bdag 'dzin phra mor 'jog pa yin

pa'i phyir/ bdun pa sa lam gyi rnam gzhag bshad pa la/ spangs
bya dang/ sa lam gyi rnam gzhag dngos bshad pa'o/ /dang po ni/
bdag 'dzin phra rags sa bon dang bcas pa dang/ de'i dbang gis
byung ba'i chags sogs sa

bon dang bcas pa nyon sgrib dang/ gtso bor thar pa 'thob pa la
bar du gcod pa'i sgrib par 'jog/ bden 'dzin gyi bag chags dang
de'i dbang gis byung ba'i gnyis snang 'khrul pa'i cha thams
cad shes sgrib dang/ gtso bor thams cad

@014b mkhyen pa 'thob pa la bar du gcod pa'i sgrib par 'jog/
theg pa gsum ga'i gang zag rnams kyi bsgom bya'i lta ba la
mtho dman gyis khyad par med de/ de gsum gyi gang zag gi bdag
med dang/ chos kyi bdag med phra mo bsgom bya'i gtso

bor byed pa mtshungs pa'i phyir/ spang bya'i gtso bo la khyad
par yod de/ nyan rang rnams kyis bdag 'dzin gnyis sa bon dang
bcas pa spang bya'i gtso bor byed/ byang sems rnams kyis de'i
bag chags spang bya'i gtso bor byed/ nyan rang dgra bcom

mnyam gzhag pa'i rgyud kyi bdag 'dzin gnyis sa bon dang bcas
pa spangs pas khyad par du byas pa'i de bzhin nyid lhag med
myang 'das dang/ nyan rang dgra bcom rjes thob pa'i rgyud kyi
de 'dra ba'i de bzhin nyid lhag bcas myang 'das yin pa'i

phyir/ dang po nyid nas rigs nges pa'i theg chen gyi rigs can
rnams kyis nyon sgrib spangs pa dang/ sa brgyad pa thob pa dus
mnyam zhing/ shes sgrib spangs pa dang sku bzhi mngon du byed
pa dus mnyam pa yin pa'i phyir// //

@#/ /swa sti/ gsung rab rgya mtsho bsrub pa'i snying po mchog/
rgya bod mkhas pa yongs kyi grub pa'i mtha'/ /bye mdo sems
tsam dbu ma thal rang gis/ /bzhed srol ma 'dres gsal bar mdzad
pa'i gzugs/ /gsal byed nor bu'i me long

grub mtha'i gzhung/ /nyung ngu'i tshig gis gsal bar bshad 'di
rmad/ /par bskrun sbyin bdag mkhas dbang zhwa sar gyi/ /bstan
pa'i gsal byed rgya lu sprul pa'i sku/ /dge 'dun bsod nams
chos 'phel sku mchog dang/ /mdzod pa

@015a @#/ /chos mdzad blo bzang bstan pa yis/ /'dir 'bad dge
bas bdag dang 'gro ba kun/ /zung 'jug sku bzhi'i go 'phang
myur thob shog/ bcas par byang smon tshig 'di ni ser byes mkhan
zur bsod nams

grags pas sbyar ba'i yi ge pa ni rtse'i drang yig bstan 'dzin
phun tshogs so/ /'dis kyang thub pa'i bstan pa rin po che sge
thams cad nas phyogs thams cad du dar zhing rgyas la yun ring
du gnas par gyur cig/ bkra shis// //