@#/ /grub pa'i mtha'i rnam par bzhag pa gsal bar bshad pa thub bstan lhun po'i mdzes rgyan zhes bya ba las sde tshan bzhi pa bzhugs so/ / @01a @#/ /gnyis pa ngo bo nyid med par smra ba dbu ma pa'i lugs la gnyis/ gang la brten pa'i gzhung dang/ de las byung ba'i grub mtha'i rnam gzhag go /dang po la/ sngar bshad pa ltar theg pa chen po spyi'i shing rta'i srol 'byed ni mgon po klu sgrub yin la/ de yang 'phags pa {langkar} gshegs pa las/ /so so rang rig theg pa ni/ /rtog ge pa yi spyod yul min/ /mgon po 'das pa'i 'og tu ni/ /'dzin par su 'gyur bshad du gsol/ zhes mnyam gzhag so so rang gis rig pa'i ye shes kyi yul sgra rtog gi spros pa zhi ba'i theg pa de nyid shin tu zab pas na ston pa mya ngan las 'das pa'i 'og tu su zhig gis 'dzin par 'gyur zhes zhus pa'i lan du ston pas/ bder gshegs mya ngan 'das pa'i 'og /tshul rnams 'dzin par 'gyur ba de/ /dus dag 'das nas 'byung ba ni/ /blo gros chen po khyod shes byos/ /lho phyogs be da'i yul du ni/ dge slong dpal ldan cher grags pa/ /de ming klu zhes 'bod pa ste/ /yod dang med pa'i phyogs 'jig pa/ /nga yi theg pa 'jig rten du/ /bla med theg chen rab bshad nas/ /rab tu @02a {@##/} /dga' ba'i sa bsgrubs te/ /bde ba can du de 'gro'o/ /zhes nges pa'i don gyi theg pa yod med kyi mtha' gnyis dang bral ba ni slob dpon 'di nyid kyis tshul bzhin du 'grel bar gsal bar lung bstan to/ /de bzhin du sprin chen po stong phrag bcu gnyis pa dang/ bya ba'i rgyud 'jam dpal rtsa ba'i rtog pa dang/ rnga bo che'i mdo rnams las kyang lung bstan la/ de yang mdo 'ga' zhig tu slob dpon 'dis dang po par bshad pa dang/ kha cig tu sa bdun pa par bshad pa dang/ dpal ldan zla bas 'grel ba sgron gsal las slob dpon 'di sngags kyi lam gyis sku tshe de nyid la rdo rje 'chang gi go 'phang mngon du mdzad par gsungs pa dang/ sprin chen dang rnga bo che las ma 'ongs par ye shes 'byung gnas 'od ces bya ba'i rgyal bar 'gyur ba sogs bshad tshul mi mthun pa mang yang mi 'gal te/ dper na bdag cag gi ston pa 'di nyid kyi thugs bskyed pa'i dus tshigs dang 'tshang rgya tshul sogs la mi 'dra ba'i rnam gzhag du ma zhig mdo las 'byung ba bzhin snang tshong dang gnas tshod thun mong dang thun mong ma yin pa'i dbang du byas pa yin pa'i phyir ro/ /zhes rje @02b bdag nyid chen pos gsungs so/ /slob dpon 'di ni sangs rgyas 'das nas lo bzhi brgya lon pa na lho phyogs be da {rd+ha'i} yul du bram ze phun sum tshogs pa zhig la bu med pa la rmi lam du bram ze brgya la chos ston drangs na bu rnyed par 'gyur ro zhes lhas lung bstan to/ /des de ltar byas te gsol ba btab pas zla ba ngo bcu na khye'u zhig btsas te mtshan mkhan la bstan pas mtshan mkhan na re/ mtshan bzang mod kyi zhag bdun gyi tshe las med do zhes zer ro; ;de la ci phan dris pas bram ze brgya la chos ston drangs na zla ba bdun dang dge slong brgya la chos ston drangs na lo bdun thub/ de nas thabs med zer ro/ /de nas de bzhin byas te lo bdun du nye ba na bu'i ro pha mas mthong ba me bzod pas g.yog dang bcas te 'khyam du btang ngo/ /de nas rim gyis song song ste dpal {nA lendra'i} sgo drung du sleb pa na snyan dngags kyi rig byed dag bsgrags pas der bram ze chen po sa ra ha bzhugs pas gsan nas/ nang du 'khrid nas ji ltar gyur pa'i rgyu mtshan bshad pas slob dpon na re/ rab tu 'byung nus na thabs yod gsungs pas rab tu 'byung/ mgon po tshe dpag med kyi sgo nas gdams pa gnang bas nyams su blangs te 'chi bdag las thar bar gyur to/ /der slob dpon de nyid las sngags kyi gdams pa mang du gsan/ {nA lendra'i} mkhan po sgra gcan 'dzin bzang po las bsnyen par rdzogs te dge slong dpal ldan zhes grags so/ /'di ni bu ston chos 'byung @03a @#/ /du bshad pa bzhin yin la mkhas pa 'ga' zhig gi gsung las mkhan po'i mtshan 'di dang mi 'dra bar byung ngo/ /de nas {nA lendra'i} dge 'dun gyi zhal ta ba mdzad de gser 'gyur byas nas dge 'dun gyi gdugs tshod sbyar ro/ /re zhig na dge slong bde byed ces bya bas rig pa'i rgyan zhes bya ba'i gzhung 'bum phrag bcu gnyis pa byas nas thams cad sun phyung ba slob dpon 'dis tshar bcad/ chos gsung ba'i che byis pa gnyis chos mnyan du 'ongs shing sa 'og tu 'gro ba gzigs pas su yin dris pa na klu yin zer/ der slob dpon gyis gnod sbyin gyi 'dam khyer la shog gsungs pas de gnyis kyis gtam de klu'i rgyal po la sbran/ klu'i rgyal po na re slob dpon spyan 'drongs na 'bul zhes zer bas don du 'gyur bar mkhyen nas klu yul du byon/ klu mang po la chos bstan cing klu'i 'dam mang po dang sher phyin 'bum pa sogs mi'i yul du spyan drangs pas klu sgrub tu grags/ /de nas li kha ra shing 'phel dang/ pa Ta be sar sogs yul mang por skye bo mang po la phan btags/ /byang gi sgra mi snyan du yang byon pa sogs rdzu 'phrul dang chos ston pa sogs kyis 'gro ba'i don dpag tu med pa mdzad/ gzhan yang mchod rten dang lha khang mang po bzheng ba dang rdo rje gdan la rdo rje'i dra mig gi ra bas bskor ba dang/ dpal ldan 'bras spungs kyi mchod rten gyi bkod pa yang bzheng ba sogs mdzad pa phyag rjes kyis @03b kyang bstan pa la phan pa bsam gyis mi khyab pa mdzad/ khyad par theg pa chen po'i bstan pa nub pa gzhi nas bsos shing rgyal ba'i bstan pa la rgyal ba nyid dang mtshungs par bka' drin gyis khyab par mdzad do/ /rgya gar nas bsgyur ba'i rgya nag gi lo rgyus 'ga' zhig tu mdo sde phal po che yang slob dpon 'dis klu yul nas spyan drangs par bshad la/ rgya gar gyi gzhung dang bod kyi bstan bcos rnying pa rnams su yang sher phyin 'bum pa la sogs pa zhes 'byung bas slob dpon 'dis klu yul nas spyan drangs pa'i theg chen gyi mdo sde ni sher phyin phyogs kyi mdo kho na min par gsal lo/ /mi'i yul du sku tshe ji tsam bzhugs pa la yang bshad tshul mi mthun pa mang na'ang lo drug brgyar bzhugs pa ni lung bstan gyi mdo dang mthun zhing/ bu ston thams cad mkhyen pa dang rje thams cad mkhyen pas kyang 'thad phyogs su mdzad do/ /slob dpon chen po 'dis chos sgra chen po lan gsum du bsgrags par bshad cing chos sgra chen po gsum gang yin gsal bar bshad pa sngon gyi gzhung lugs rnams dang rje yab sras kyi gsung las mi 'byung ngo/ /phyogs gzhan gyi mkhas pa kha cig gis chos sgra dang po ni dge slong bde byed la sogs pa'i nyan thos sde pa kha cig tshar bcad pa dang/ chos sgra gnyis pa ni dbu ma rigs tshogs drug la sogs pa'i zab mo stong pa nyid ston pa'i bstan bcos brtsams pa dang/ chos sgra gsum pa ni rnga bo che la sogs pa'i mdo la brten nas bder gshegs snying po khams chos dbyings rtag pa sems can thams cad la khyab par ston pa'i chos dbyings bstod pa sogs brtsams pa la byed par bshad cing @04a @#/ /de yang sprin chen dang rnga bo che'i mdo'i tshig zin 'ga' zhig la brten par snang ngo/ /rje btsun dam pa 'jam dbyangs bzhad pa'i rdo rjes kyang tshul 'di 'thad phyogs su mdzad nas/ /chos sgra phyi ma gnyis brjod bya 'khor lo bar pa dang mthun kyang chos sgra gsum pas sangs rgyas la rgyun gyi rtag pa dang nges don la mya ngan las mi 'da' tshul rgyas par ston pas chos sgra gnyis pa las zur du byas so/ /zhes bshad do/ /bdag nyid chen po 'dis rig pa'i gnas thun mong ba dang thun mong ma yin pa ston pa'i bstan bcos mang du mdzad cing/ gso ba rig pa'i bstan bcos sbyor ba brgya ba la sogs pa dang/ lugs kyi bstan bcos skye bo gso thigs dang shes rab brgya pa/ gzhan yang rten 'brel gyi rtsis/ spos sbyor/ gser 'gyur gyi gdams pa sogs bod du 'gyur snang ngo/ /nang rig pa la sa lu ljang pa'i med dang rten cing 'brel par 'byung ba'i mdo sogs mdo'i 'grel pa yang du ma zhig snang zhing/ khyad par du zab mo dbu ma'i lam nges pa'i don mthar thug pa lung gis bsgrub pa la mdo kun las btus pa dang/ rigs pas bsgrub pa la rtsa ba shes rab/ stong nyid bdun cu pa/ rtsod pa bzlog pa/ rigs pa drug cu pa/ zhib mo rnam 'thag /rin chen 'phreng ba ste drug go /rtsa shes la rgya gar na 'grel pa brgyad yod par grags kyang bod du 'gyur ba ni ga las 'jigs med/ sangs rgyas bskyangs kyi 'grel pa/ legs ldan 'byed kyi 'grel pa shes rab sgron me/ zla ba'i zhabs kyi 'gral pa tshig gsal bzhi dang/ shes rab sgron me'i 'grel bshad spyan ras @04b gzigs brtul zhugs kyis mdzad pa rnams so/ /ga las 'jigs med rang 'grel du 'dod pa ni mi 'thad par rje bdag nyid chen pos bzhed do/ /stong nyid bdun cu pa dang rtsod bzlog dang zhib mo rnam 'thag gsum la rang 'grel yod cing/ rigs pa drug cu pa'i 'grel pa zla ba'i zhabs kyis mdzad pa dang/ stong nyid bdun cu pa'i 'grel pa {paNDi} ta gzhan la phan pa bzang pos mdzad pa yod do/ /gzhan yang slob dpon chen po 'dis mdzad pa'i byang chub sems 'grel ni snga ma mang pos phar phyin gyi gdams ngag tu 'dod kyang rje yab sras kyis gsang ba 'dus pa'i gzhung gi le lag tu bzhed do/ /rim pa lnga pa la sogs pa gsang sngags kyi gzhung yang mang mod kyi 'dir ma spros so/ /bdag nyid chen po 'di'i rjes 'brangs la slob dpon 'phags pa lhas ni dbu ma'i skor la ye shes snying po kun btus/ 'khrul pa bzlog pa'i gtan tshigs sgrub pa/ dbu ma lag pa'i tshad sogs thor bu 'ga yang yod mod kyi brjod bya yongs su rdzogs pa ni rnal 'byor spyod pa bzhi brgya pa yin la/ 'di la zla ba'i zhabs kyi 'grel pa yang yod do/ /sangs rgyas bskyangs kyi rtsa she'i 'grel pa ni bshad zin la/ bstan bcos mang du mdzad par grags na'ang gzhan rnams ni bod du ma 'gyur snang ngo/ /legs ldan 'byed kyis rang rkang du brtsams pa ni dbu ma snying po dang de'i rang 'grel rtog ge 'bar ba gnyis te/ 'di las phyi pa dang nang pa'i grub mtha'i khyad par du ma zhig 'byung zhing dbu ma pa'i lta sgom spyod pa'i gnad 'gag rgyas par 'byung bas mnyam med jo bo chen pos kyang rgya gar dang bod du rtog ge 'bar ba'i @05a @#/ /bshad pa lan du mar mdzad 'dug go /dbu ma rin chen sgron ma ni legs ldan chung bar grags pas mdzad pa yin gyi slob dpon 'dis mdzad pa min no/ /slob dpon chen po zla ba grags pas ni rang rkang du brtsams pa dbu ma la 'jug pa rang 'grel dang bcas pa ste legs bshad phul du byung bar grags che'o/ /slob dpon ye shes snying pos bden gnyis rang 'grel dang bcas pa mdzad cing 'di'i 'grel bshad zhi ba 'tshos mdzad par grags pa ni kha g.yar ro/ / slob dpon zhi ba 'tshos dbu ma rgyan rang 'grel dang bcas pa mdzad/ 'di la rang 'grel du grags pa ni tshigs bcad lhug gnyis spel mar byas pa'i dbu ma rgyan gyi bstan bcos dngos yin la/ rtsa bar grags pa ni de'i nang gi tshigs bcad logs su bkol ba yin gyi rtsa ba sngon du mdzad nas 'grel pas phyis bkral ba'i bstan bcos gnyis ma yin no/ /zhes rje thams cad mkhyen pas gsungs so/ /'di'i dka' 'grel ka ma la shI las mdzad par grags pa ni rdzun ma yin par mkhas grub rjes gsungs so/ / dka' 'grel 'di la mi 'thad pa'i cha 'ga' zhig yod kyang slob dpon chos kyi bshes gnyen gyis slob dpon ka ma la shI la'i yin par bzhed pas slob dpon thugs ma rdzogs pa'i skabs shig tu mdzad pa yin nam brtag par bya'o zhes rje rin po che'i dbu ma rgyan gyi zin bris las gsungs so/ /dbu ma rgyan gyi 'grel bshad slob dpon chos kyi bshes gnyen gyis mdzad pa yod do/ /slob dpon ka ma la shI las dbu ma snang ba mdzad cing 'di las dbu sems kyi shing rta chen po rnams kyi thun mong @05b ma yin pa'i lugs rnams shin tu gsal bar mdzad la/ rigs pa'i gnad shin tu phra zhing rje bdag nyid chen pos kyang thugs gtsigs che bar mdzad do/ /dbu ma rgyan dang dbu ma bden gnyis dang dbu ma snang ba gsum la rang rgyud shar gsum du grag go /gzhan yang slob dpon 'di dag gis mdzad pa'i sngags kyi bstan bcos rnams su yang lta ba gtan la 'bebs pa'i rigs pa thor bu thor bu bshad pa du ma yod kyang 'dir ma smos so/ /slob dpon chen po zhi ba lha'i bslab btus dang spyod 'jug gnyis kyang dbu ma pa'i gzhung khyad par du 'phags pa'o/ /slob dpon dpa' bo dang/ klu'i byang chub dang/ 'phags pa grol sde dang/ seng ge bzang po dang/ sangs rgyas ye shes zhabs dang/ a b+ha ya ka ra rnams kyi gzhung lugs rnams kyang dbu ma pa'i phyogs su 'du'o/ /grub pa'i dbang phyug la'u hi pa/ dril bu pa/ nag po spyod pa/ {nA} ro pa/ mnga' bdag {mai} tri pa la sogs pa grub pa'i skye bo phal mo che yang slob dpon 'phags pa klu sgrub kyi rjes su 'brangs pa kho na yin no/ /'di dag thal rang gang yin pa ni 'og tu cung zad 'chad do/ /'di dag mdo tsam ste mtha' dag par ni gzhan las shes par bya'o/ /gnyis pa de las byung ba'i grub mtha'i rnam gzhag bshad pa la sgra bshad/ dbye ba/ mtshan nyid/ 'dod tshul bzhi las/ dang po ni/ slob dpon legs ldan gyis/ /mtha' gnyis rnam par spangs pa'i dbus dang 'dra bas na dbu ma ste/ dbus nyid dbu ma'o zhes rang gi don de la phan pa brjod pa'o zhes gsungs pa ltar/ yod pa dang med pa'i mtha' gnyis spangs pa'i dbus ni dbu ma dang/ de @06a @#/ /rjod par byed pa'i don gyis na dbu ma'i bstan bcos dang/ dbu ma'i grub mtha' dang/ dbu ma'i grub mtha' smra ba po'i gang zag rnams la yang dbu ma zhes pa'i ming 'thob ste/ slob dpon de nyid kyis dbu ma'i lam du ston par byed cing sgrog par byed pas na ka zhes bya ste/ skad kyi byings kyi sgra la bstan bcos bya ba 'am dbu ma zhes bya ba'i ming gang la yod pa de ni dbu ma ste/ yang na ka zhes bya ba'i ming gis brjod pa yin pas dbu ma zhes bya ba ste/ dbu ma'i grub pa'i mtha'o/ / zhes gsungs so/ /gnyis pa dbye ba la gnyis/ dngos dang/ zhar la byung ba'i rnam gzhag go/ dang po ni/ klu'i zhabs kyi slob ma rnams kyi nang nas 'phags pa lha ni sangs rgyas bskyangs la sogs pa gzhan rnams kyis kyang sleb dpon nyid dang 'dra bar tshad mar 'dzin pas yab sras de gnyis la gzhung phyi mo'i dbu ma pa dang gzhan rnams la phyogs 'dzin pa'i dbu ma pa zhes snga ma rnams kyis tha snyad mdzad de/ rje yab sras kyis kyang 'thad par bzhed do/ /de la phyi mo ba dang phyogs 'dzin pa'i tha snyad byed pa'i rgyu mtshan ni yab sras gnyis kyi dgongs pa mthar thug thal 'gyur ba'i lugs su gnas kyang gzhung gi bstan tshod la tha snyad du dngos po la rang mtshan zhal gyis bzhes mi bzhes dang/ phyi rol gyi don zhal gyis bzhes mi bzhes dang/ gzhan grags tsam gyi sgo nas phyir rgol la rjes dpag bskyed du rung mi rung sogs kyi rnam gzhag gsal bar phye ba med pas thal rang gi phyogs gnyis ka'i spyi la bzhugs pas na phyi mo zhes zer ro/ /byang chub sems 'grel las/ sems tsam 'gog tshul cung @06b zad byung mod kyang rang lugs la phyi don khas len mi len zhib tu bshad pa med do/ /slob dpon chen po sangs rgyas bskyangs kyis rtsa she'i 'grel pa budd+ha pA li tar rtsa bar bshad pa'i rigs pa rnams kyi don thal 'gyur mang po mdzad nas bkral zhing rang rgyud kyi gtan tshigs ma bshad do/ /de'i rjes su slob dpon legs ldan gyis sangs rgyas bskyangs kyi 'gral pa la skyon mang du bzung nas rang rgyud kyi gtan tshigs 'god dgos pa'i rgyu mtshan mang du bshad de/ rang rgyud du 'grel ba'i shing rta'i srol 'byed par mdzad do/ /de'i 'og tu dpal ldan zla ba grags pas ni sangs rgyas bskyangs la skyon de rnams mi 'jug pa dang rang rgyud kyi gtan tshigs khas len pa la gnod byed dang khas len mi rigs pa la sgrub byed mang du bstan nas 'phags pa'i dgongs pa dbu ma thal 'gyur du 'grel ba'i shing rta'i srol 'byed par mdzad do/ /de'i phyir 'di rnams la phyags 'dzin pa'i dbu ma pa zhes grag go /de ltar na stong thun chen mo las de'i rjes su slob dpon sangs rgyas bskyangs kyis rtsa she'i 'grel pa mdzad nas 'phags pa yab sras kyi dgongs pa thal 'gyur du bkral zhing zhes gsungs pa'i don du bsams nas sangs rgyas bskyangs thal 'gyur ba'i shing rta'i srol 'byed du rang re'i mkhas pa kha cig bzhed mod/ de ni rje bdag nyid chen po'i dgongs par ma son te/ sangs rgyas bskyangs kyis rang rgyud kyi gtan tshigs ma bshad par thal 'gyur tsam gyi sgo nas gzhung don 'grel bar mdzad med kyang de tsam gyis thal 'gyur ba'i shing rta'i srol 'byed du mi rung ba'i phyir/ de yang yin te/ lugs de @07a @#/ /dang de'i shing rta'i srol 'byed du 'jog pa la lugs de 'thad pa'i sgrub byed de dang de las gzhan du drang du mi rung ba'i rgyu mtshan gsal bar gtan la phab pa cig dgos pa'i phyir/ spyir gyi shing rta'i srol 'byed ngos 'dzin pa'i skabs su legs bshad snying po las/ de yang nges don gyi gsung rab kyi don gzhan du 'dren pa la gnod byed dang/ gzhan du drang du mi rung bar don der nges pa'i sgrub byed kyi rigs pas legs par gtan la phab pa cig gi rjes su 'brangs nas dgongs pa 'tshol dgos pas zhes gsungs pa'i phyir dang tshul da 'dir yang 'dra ba'i phyir ro/ /de bzhin du rnam bshad snying po'i rgyan dang stong thun chen mo las kyang shing rta'i srol 'byed kyi don de ltar bshad de mangs kyis dogs nas ma bris so/ /de ltar shing rta'i srol 'byad kyi don ngos zin na rje btsun byams pa dbu ma pa'i shing rta'i srol 'byed du mi 'jog pa dang/ mgon po klu sgrub kho na dbu ma pa'i shing rta'i srol 'byed yin pa yang shes par sla'o/ /gzhan yang sangs rgyas bskyangs kyis thal 'gyur ba'i shing rta'i srol phye ba yin na legs ldan 'byed kyis rang nyid dang sangs rgyas bskyangs gnyis rang rgyud pa yin pa la khyad par med par bzhed pa'i rgyu mtshan ci yang med par 'gyur ro/ /legs ldan gyis de ltar bzhed par cis mngon zhe na/ 'di ni rje bdag nyid chen pos gsal bar bshad de/ legs bshad snying po las legs ldan la yang sangs rgyas bskyangs dang rang nyid rang rgyud khas lan mi len mi mthun snyam pa mi 'dug gi rang rgyud khas lan pa 'os mang du byas pa'i lugs @07b su snang ngo/ /de'i gnad kyis kyang rang nyid dang sangs rgyas bskyangs gnyis la chos dang gang zag la rang bzhin 'gog pa'i dgag bya la yang khyad par yod par mi bzhed do/ /zhes gsungs pa'i phyir/ des na thal 'gyur pa'i shing rta'i srol 'byed pa po de rang rgyud pa yin na/ /zhes slob dpon legs ldan 'byed kyis bzhed da zhes smra ba las 'brel med pa ci zhig smrar yod/ thal 'gyur ba'i srol 'byed zla ba'i zhabs yin pa ni rje bdag nyid chen pos/ tshig gsal las sangs rgyas bskyangs rang rgyud mi bzhed pa dang dbu ma pas rang rgyud bya mi rigs pa'i sgrub byed dang bzlog phyogs la gnod byed mang du bstan nas shing rta'i srol phye la zhes pas gsal bar gsungs so/ /de la yang kha cag lung de'i don gnod byed ston mkhan zla grags yin la srol 'byed mkhan sangs rgyas bskyangs yin par bshad pa yin no/ /zhes zer ba ni chos 'bral med par blo gros dang ldan na go bar sla'o/ /'on stong thun las sangs rgyas bskyangs kyis rtsa she'i 'grel pa mdzad nas 'phags pa'i dgongs pa thal 'gyur du bkral bar gsungs pa'i don ci yin zhe na/ de ni sngar bshad pa ltar gzhung gi don 'chad pa na rang rgyud kyi gtan tshigs ma bshad par thal 'gyur tsam gyi sgo nas gzhung don bkral ba la bya yi thal 'gyur ba'i shing rta'i srol 'byed du bshad pa min no/ /'phags pa klu sgrub kyi sngon du dbu ma'i lta ba 'dzin pa'i rgyal po inda b+hu ti dang bram ze chen po sa ra ha la sogs pa byon zhing de dag gis lta ba mthar thug ston pa'i gzhung mdzad na'ang dbu ma pa'i shing rta'i srol 'byed du mi 'jog pa dang/ legs ldan 'byad kyi sngon du mdo sde spyod pa'i dbu ma rang @08a @#/ /rgyud pa'i lta ba 'dzin pa'i slob dpon de ba shra ma dang/ slob dpon zhi ba 'tsho'i sngon du 'phags pa grol sde la sogs pa'i rnal 'byor spyod pa'i dbu ma rang rgyud pa'i lta ba 'dzin pa'i slob dpon byon zhing de dag gis gzhung mdzad na'ang de dag lugs de dang de'i shing rta'i srol 'byed du mi 'jog pa'i rgyu mtshan ci yin legs par soms shig /mkhas grub chen po 'jam dbyangs bzhad pas kyang snga ma rnams kyi gsung dang bstun pa'i bshad pa phyogs gzhan du mdzad mod kyang rang gi dgongs pa ni zla ba grags pa nyid thal 'gyur ba'i shing rta'i srol 'byed du bzhed par nges te/ /grub mtha'i rtsa bar/ zla bas legs bkag thun mong min par bsgrubs/ zhes dang/ 'grel pas kyang/ thal 'gyur ba'i thun mong ma yin pa'i lugs dpal ldan zla ba kho nas gsal bar phye bar bshad pa'i phyir ro/ /dpal ldan dpa' bo dang/ klu'i byang chub sogs kyang dbu ma thal 'gyur bar gsal te/ dpa' bo'i don dam byang chub kyi sems bsgom pa dang/ klu byang gi rnam gzhag rim pa sogs kyis shes so/ /rgyal sras chen po zhi ba lha ni zla ba'i zhabs dang mthun par rje bdag nyid chen pos bzhed do/ /mnyam med jo bo chen po yang dbu ma thal 'gyur ba yin par lam sgron rtsa 'grel/ dbu ma'i man ngag rtsa 'grel sogs kyis shes shing rje yab sras kyis lan cig ma yin par bshad do/ /des na dbu ma pa'i dbye ba ni tha snyad 'dod tshul gyi dbang du byas na phyi rol gyi don 'dod pa dang mi 'dod pa gnyis su nges te/ de'i snga ma ni legs ldan 'byed dang zla ba'i zhabs rjes 'brangs dang bcas pa'o/ /phyi ma @08b ni zhi 'tsho yab sras sogs so/ /don dam pa stong pa nyid nges pa'i lta ba rgyud la skyed tshul gyi sgo nas phye na rang rgyud pa dang thal 'gyur ba gnyis su nges so/ /rang rgyud pa la mdo sde spyod pa'i dbu ma rang rgyud pa dang rnal 'byor spyod pa'i dbu ma rang rgyud pa gnyis su yod de/ /de'i snga ma ni legs ldan yab sras dang phyi ma ni zhi 'tsho yab sras so/ /thal rang gnyis kyi khyad par ni 'og tu 'chad par 'gyur ro/ /bod kyi mkhas pa snga ma dag gis snang stong gnyis tshogs don dam bden par 'dod pa sgyu ma rigs grub pa dang/ snang ba la spros pa rnam par bcad pa tsam don dam bden par 'dod pa rab tu mi gnas par smra ba ste dbu ma pa gnyis so zhes tha snyad byed pa la rngog lo chen po blo ldan shes rab kyi spring yig bdud rtsi'i thigs pa las don dam 'dod tshul gyi sgo nas gnyis su bzhag pa ni rmongs pa ngo mtshar skyed pa'i rnam gzhag go/ zhes 'gog par mdzad do/ /rje bdag nyid chen pos kyang rngog lo chen po'i gsung de shin tu legs te/ rigs shes rjes dpag gis gzhal ba'i don tsam don dam bden par 'dod pa'i dbu ma pa su yang med pa'i phyir ro/ /zhes gsungs so/ /'on kyang rje bdag nyid chen pos sgyu ma rigs grub pa'i don de ltar 'dod pa mi 'thad par bshad pa yin gyi spyir dbu ma pa la sgyu ma rigs grub pa dang rab tu mi gnas pa'i tha snyad tsam mi 'thad par bzhed pa ma yin te/ de 'dra'i tha snyad tsam ni slob dpon dpa' bos don dam byang chub kyi sems bsgom pa'i yi ge las gsal bar bshad pa'i phyir/ zhes mkhas grub chen po nor bzang rgya mtshos gsungs pa ni legs @09a @#/ /sam snyam ste/ 'di dag gi rgyu mtshan bshad par bya ba mang du yod kyang re zhig bzhag go /gnyis pa zhar la byung ba'i rnam gzhag bshad pa ni/ 'dir kha cig na re/ 'o na dbu sems kyi shing rta'i srol chen po 'di dag gangs can gyi ljongs su yang dbye ba sngar bshad pa 'di tsam du zad dam 'on te 'di dag las gzhan dbye ba'i rnam gzhag mang du yod/ dang po ltar na mi 'thad de/ gangs ri'i ljongs su grub pa'i mtha'i tha snyad 'dir ma bshad pa mang du yod pa'i phyir ro/ /gnyis pa ltar na yang mi 'thad de/ 'di dag las tshul gzhan du 'chad na theg pa chen po'i grub mtha' smra bar mi rung la tshul gzhan ma yin na ni grub mtha'i tha snyad gzhan du smra ba don med pa'i phyir ro zer na/ 'di la cung zad brjod par bya ste/ de yang bod kyi grub pa'i mtha' tha snyad mi 'dra ba mang du yod pa rnams ni bye brag smra ba'i sde pa bco brgyad ltar yul gyi ming dang slob dpon gyi ming las btags pa yang snang la/ kha cig ni rgya gar gyi paN grub re las gdams pa sna re zhus shing de nyid gtso bor nyams su len pa la gdams pa de'i ming gis grub mtha' zur par btags pa yang snang bas 'phags yul gyi theg chen grub mtha' smra ba ltar lta ba kho na'i sgo nas grub mtha'i ming btags pa'i nges pa mi snang ngo/ /de yang dper brjod na yul gyi sgo nas ming btags pa sa skya pa 'bri gung pa zhes pa lta bu shin tu mang zhing/ slob dpon gyi sgo nas ming btags pa karma pa zhes pa lta bu dang/ gdams pa'i sgo nas ming btags pa rdzogs chen pa phyag chen pa zhes pa lta bu'o/ /'on kyang 'dir ni lta ba @09b kho na'i khyad par la dpyod pa'i skabs yin zhing de'i dbang du byas na/ bod du bstan pa snga dar gyi dus su rgyal ba'i ring lugs yongs su rdzogs pa'i bshad sgrub ches cher dar ba ni lha btsan po khri srong lde btsan gyi dus yin par 'dug la de'i tshe yang slob dpon chen po padma 'byung gnas dang/ sngags 'chang d+harma ki rti dang/ bi ma la mi tra dang/ sangs rgyas gsang ba la sogs pa rgya gar ba'i paN grub du ma zhig byon kyang dam pa'i chos 'dul ba nas bzung ste dbu ma'i bar gyi bshad pa'i khur bsnams te 'chad nyan dar bar mdzad pa po ni slob dpon chen po zhi ba 'tsho yin par sngon gyi yi ge rnying pa dag las gsal bar snang ngo/ /slob dpon chen po padma 'byung gnas kyis bod kyi lha srin rnams dam la btags shing rgyal po yab sras sogs slob ma nyung 'dus la gsang sngags kyi dbang dang gdams pa gnang zhing d+harma ki rtis kyang yo ga rdo rje dbyings kyi dkyil 'khor du dbang bskur ba sogs mdzad snang ngo/ /'on kyang de dag gis mtshan nyid kyi gzhung chen mo'i bshad pa sogs mdzad pa'i gtam mi snang la sngags phyogs kyang de dus bka' shin tu dam par 'dug pas khyab gdal che bar ma mdzad snang ngo/ /lta spyod kyang lha btsan po'i bka' lung gis lta ba dang spyod pa ni mkhan po bo d+hi satwa'i lugs bzhin du gyis shig ces khrims bsgrags par bshad snang ngo/ /de ltar na mkhan chen zhi ba 'tsho ni 'phags pa klu'i rjes 'brangs kyi shing rta chen po rtsod med yin pas de dus kyi lta ba ni klu sgrub lugs kyi lta ba las ma 'das so/ /mkhan slob gnyis ka'i slob ma lo tsatsha ba chen po ye shes sde'i lta ba'i brjod byang las kyang klu sgrub @10a @#/ /lugs gtso bor mdzad cing de las kyang rnal 'byor spyod pa'i dbu ma rang rgyud pa'i lugs ji lta ba bzhin byas snang ngo/ /de rjes slob dpon phyir log cing mkhan chen 'das pa'i rjes su rgya'i mkhan po hwa shang ma hA ya na zhes bya bas ci yang yid la mi byed pa'i lta ba gtso bor ston pa'i bstan bcos mang du brtsams nas rang gi lugs spel bas rgyal po'i btsun mo 'bro bza' byang chub la sogs pa bod kyi mi mang po zhig de'i chos lugs la zhugs par gyur to/ /de nas lta btsan pos thabs kyi cha la skur pa 'debs pa'i lugs de sngar gyi mkhan po'i lugs dang ma mthun zhing bod mang po dge sbyor la g.yel ba'i rkyen gyis chos lugs rnam dag min par gzigs nas mkhan po'i bka' chems ltar slob dpon chen po ka ma pa shI la spyan drangs so/ /slob dpon chen po des rgya'i mkhan po lung dang rigs pa'i sgo nas legs par tshar bcad/ dbu ma'i sgom rim gsum la sogs pa so sor rtog pa'i shes rab la bsngags pa'i bstan bcos mang du brtsams te 'chad nyan gyi lugs dri ma med pa ngar ? bar mdzad/ de'i tshe yang rgyal pos da phyin chad lta ba slob dpon klu sgrub kyi lugs ltar bya dgos shing hwa shang gi lugs ltar byed pa la chad pas gcod do zhes dril bsgrags par snang ngo/ /de'i phyir bstan pa snga dar la sems tsam pa'i lugs 'dzin pa'i paNDi ta 'ga' zhig kyang byon mod kyang gtso bo ni zhi ba 'tsho dang ka ma la shI la'i lugs yin pas dbu ma rang rgyud pa'i lta ba nyid dar so shin tu che bar snang ngo/ /bstan pa phyi dar la lo chen rin chen bzang @10b pos paN grub du ma bsten/ sngags mtshan nyid kyi chos skor mang du sbyangs/ bka' bstan bcos kyi 'gyur mang du mdzad de 'chad nyan gyis gtan la phab cing lta ba ni rab tu mi gnas pa'i dbu ma yin par bshad do/ /lo chen 'dis klu skar rgyal btul/ sngags kyi log spyod pa rnams tshar bcad de bstan pa rnam par dag pas kha ba ri pa rnams la sku drin gyis khyab par mdzad do/ /lha bla ma ye shes 'od dang byang chub 'od kyis bod kyi sngags pa rtsing chos pa rnams kyis bstan pa dri ma can du byas pa ma bzod par dpal mnyam med jo bo chen po dI paM ka ra shrI dznyA na spyan drangs/ bstan pa'i dag ther mdzad phar gsol ba btab pas byang chub lam gyi sgron ma la sogs pa mdzad de/ rgyal ba'i bstan pa rin po che la rgyal ba nyid dang mtshungs pa'i bka' drin gyis khyab par mdzad ngo; ;mnyam med jo bo chen po 'di ni lta ba dbu ma thal 'gyur ba'i lugs la gtso bor mdzad de/ stong nyid gang gis rtogs zhe na/ /de bzhin gshegs pas lung bstan cing/ /chos nyid bden pa gzigs pa yi/ /klu sgrub slob ma zla grags yin/ / de las brgyud pa'i man ngag gis/ /chos nyid bden pa rtogs par 'gyur/ /zhes zla ba grags pa'i lugs gtso bor mdzad do/ /jo bo rje bod du phebs nas bod ston rnams kyis rang rang gi lta ba'i rtogs pa phul ba la jo bo thugs ma dgyes nas lta ba ji ltar byung yang rung/ /byang chub kyi sems sgoms shig bya ba gsungs skad/ phyis su 'brom ston pas slob dpon zla grags lugs kyi rtogs pa phul bas jo bo thugs dgyes nas phyag thugs kar thal mo sbyar/ ngo mtshar che/ da lta rgya gar shar phyogs na lta ba @011a @#/ /'di kho na 'dzin zhes gsungs so/ /de ltar na jo bo chen po las brgyud pa'i bka' gdams pa zhes rnam thar gcing ma'i mthar thug pa rnams kyi nang nas dge ba'i bshes gnyen po to ba sogs sku mched gsum du grags pa rnams kyi lam rim dang gsung sgros su dbu ma'i lta ba zla grags lugs dang mthun shas che bar 'byung ngo/ /rngog le chen po yab sras ni legs ldan 'byed dang zla ba'i zhabs sogs kyi gzhung khungs su drangs pa mang du snang na'ang lta ba skyong tshul zhi 'tsho yab sras dang mthun shas che bar snang ngo/ /gser gling pa las brgyud pa'i blo sbyong 'ga' zhig gi lta ba'i 'gros ni sems tsam rnam rdzun pa'i lugs dang mthun par snang ngo/ /'on kyang rjes 'brangs phal mo ches rgya gzhung de dag gi don ma 'dres par 'chad shes pa dkon par byung 'dug go /jo mo nang par grags pa'i lta ba'i khungs gtug sa ni gangs te se'i 'gram du skyes pa'i grub chen yu mo zhes bya ba ting nge 'dzin dang mngon shes thar thor yod pa zhig byung 'dug pa de yin par grags shing des dus kyi 'khor lo'i yig cha 'ga' zhig kyang byas so/ / lugs de rgyas par byed pa po ni kun mkhyen dol po bar shes rab rgyal mtshan yin par 'dug cing jo nang kun dga' grol mchog sogs phyis su yang brgyud 'dzin mang tsam byung 'dug go /de'i lugs kyi lta ba ni don dam bden pa grub pa rang dbang ba'i rtag pa yin par 'dod cing sems can thams cad kyi rgyud la khams bder gshegs snying po rtag brtan ther zug mtshan sum cu rtsa gnyis kyis mtshan pa rang chas su yod pa zhig tu 'dod do/ /'di ni dbu sems kyi shing rta chen po mtha' dag gi lugs @011b las phyi rol tu gyur pa zhig ste/ /yar 'brog pa rin chen tog /rje red mda' ba/ rje bdag nyid chen po yab sras sogs gang can gyi mkhas pa'i yang rtse rnams kyis lung rigs brgya phrag gis 'gog par mdzad do/ /rtsod dus kyi kun mkhyen chen po bu sten thams cad mkhyen pa ni grub pa'i mtha' mtha' dag la sbyangs pa'i mkhas pa 'gran zla med pa yin 'dug cing rang lugs kyi lta ba'i bshad pa ni bka' gdams pa dang mthun shas che zhing zla ba'i gzhung la gtso bor mdzad do/ /gzhan yang sngon gyi dus su lo tssa ba chen po ba tshab nyi ma grags kyis kyang kha che'i yul du lo nyi shu rtsa gsum sbyangs te paNDi ta gser gyi ga cha zhes bya ba spyan drangs/ dbu ma'i bstan bcos mang du bsgyur zhing 'chad nyan mdzad/ pha tshab bu bzhir grags pa sogs slob ma mang du byon; bod du slob dpon zla ba grags pa'i lugs kyi dbu ma'i bshad pa ni 'di las mang du 'phel snang ngo/ /'gos rin po che khug pa lhas btsas ni rgya gar du lan bcu gnyis byon/ paN grub bdun cu don gnyis la gtugs/ rgyud kyi bshad pa yang mang du mdzad snang zhing lta ba yang dbu ma'i lugs la gtso bor mdzad de/ de'i gsung rab rnams las thal rang gang yin brtag dka' bar snang ngo/ /lo tstsha ba khe gad 'khor lo grags la sogs pa lo chen mang po zhig ni paN chen a b+ha ya'i slob mar snang bas lta ba yang de la brten nam snyam ste gsal bar bshad pa mi snang ngo/ /de bzhin du rwa 'bro gnyan gsum sogs lo chen phal mo che yang rang nyid dbu ma par zhal gyis bzhes pa kho nar snang zhing thal rang gang yin sogs brtag @012a @#/ /dka' bar snang ngo/ ? /'brog mi sh'kya ye shes kyis rgya gar du byon/ slob dpon birwa'i slob ma Dom bi he ru ka'i brgyud 'dzin slob dpon mi thub zla ba zhes bya ba'i dngos kyi slob ma slob dpon dpa' bo rdo rje las kyi rdo rje rgyud gsum yan lag dang bcas pa la sogs pa gsan/ rgya gar du lo bcu gnyis bzhugs/ bod du phebs nas sngags dar bar mdzad/ phyis paNDi ta ga ya dta ra la gtugs te ma rgyud sker la sbyangs par snang zhing/ sa skya pa'i chos skor rnams kyang 'di nas brgyud pa mang bar snang ngo/ /lam 'bras pa rang lugs kyi lta ba rnams kyang dbu ma pa chen po yin par bshad 'dug la/ lta ba'i ngo sprod tshul lugs gzhan dang cung mi 'dra par snang ste/ sngags kyi gdams ngag dang 'brel ba'i ngo sprod tshul du snang zhing/ /gsal stong zung 'jug gi lta bar grags so/ /'on kyang grub chen barwa pa'i dgongs pa yin phyin thal 'gyur ba las ma 'das mod/ /rjes 'brangs rnams kyis bshad tshul kha mtha' gcig tu ma nges so/ /gnas lnga rig pa'i paNDi ta chen po 'jam dbyangs kun 'ga' rgyal mtshan bas kyang sngags phyogs kyi lta ba do kho nar snang zhing/ mdo phyogs kyi lta ba'i bshad pa rnams ni rab tu mi gnas pa'i dbu ma pa la bsngags pa che bar 'dug go /phyis kyi sa skya pa'i las chen pa mdzad pa'i rje btsun chen po red mda' ba ni zla ba'i zhabs kyi lugs la nges shes mchog tu rnyed ced dbu ma 'jug pa'i 'grel pa dang lta ba'i skor gyi 'khrid yig mdzad pa rnams kyang rje bdag nyid chen po'i gsung dang gnad shin tu mthun par yod do/ / @012b 'gro ba'i mgon po dam pa sangs rgyas nas brgyud pa'i zhi byed lugs su grags pa'i lta ba la/ spyir dam pa sangs rgyas 'di mgon po klu sgrub kyi dngos slob tu grags la/ gdams pa de skor gyi lo rgyus su dam pas grub thob pho mo brgyad cu bsten nas chos gsan par bshad cing/ bla ma de dag gi grangs 'dren pa'i tshe slob dpon klu sgrub nas bzung ste phyis kyi nA ro mai tri'i slob ma rnams kyang 'dren par byed do/ /chos 'byung rtsom pa'i mkhas pa grags che ba 'gas kyang lo rgyus snga ma ji lta ba bzhin bgrangs 'dug kyang nges pa 'thob dka' bar snang ngo/ /kha cig ni dam pa dang kha che paN chen sh'kya shrI gnyis gcig par yang 'chad de/ rgyu mtshan yang dag ma mthong ngo/ /gang ltar mgon po klu sgrub kyi dngos slob yin pa ni rgya nag gi lo rgyus 'ga' zhig dang yang mthun par snang bas bden pa 'dra'o/ /zhi byed lugs kyi lta ba'i khungs ni sher phyogs kyi mdo la gtugs par 'dug cing gdams ngag gi yi ge rnams su klu sgrub la tshad mar 'dzin pa dang/ ma cig lab sgron gyi gsung rnams kyang thal 'gyur ba'i phyogs dang mthun tshabs shin tu che'o/ /'on kyang bar skabs su gdams ngag 'dzin pa rnams kyis nya dang nyung ma mang du bsres snang ngo/ /gangs ri'i khrod kyi sgrub rgyud kyi bstan 'dzin chen po lho brag mar po chos kyi blo gros ni rgya gar du lan gsum bal por lan bzhi byon/ paN chen nA ro pa dang/ mnga' bdag mai tri pa/ dpal ye shes snying po/ grub chen zhi ba bzang po la sogs pa mkhas grub kyi bla ma brgya rtsa brgyad la gtugs/ dpal gsang ba 'dus pa la sogs pa'i rnal 'byor pha ma'i rgyud phal mo che'i rgyud kyi bshad pa gdams @013a @#/ /dag lag len dang bcas pa zhib tu sbyangs/ bod du byon te bka' babs kyi slob ma bzhi la sogs pa'i brgyud 'jin mang du byung zhing/ gsang sngags kyi 'phrin las khyab gdal shin tu che bas da lta'i bar du'ang gdams ngag gi brgyud pa mang du 'phel bar 'dug go/ /rje 'di nyid kyi lta ba ni paN grub kyi bla ma mang po las gsan pas dbu sems kyi gdams pa'i rgyun du ma zhig yod par snang mod kyang gtso bo ni rje rang nyid kyi gsung mgur du/ lta ba'i sgro 'dogs chod pa'i bla ma ni mai tri pa nyid yin par gsungs shing/ lta sgom spyod pa dang rgyud kyi bshad pa gang gi skabs su yang nA ro mai tri gnyis la gtso bor mdzad do/ /de la mnga' bdag mai tri pa ni dbu ma pa yin par ma zad dpal ldan zla ba'i lugs kho na gtso bor mdzad pa zhig ste/ de nyid kyis 'tsho ba'i de kho na nyid bcu pa las/ rnam bcas ma yin rnam med min/ bla ma'i ngag gis ma brgyan pa'i/ /dbu ma'ang 'bring po tsam yin no/ /zhes sems tsam rnam bden rdzun gnyis kas de kho na nyid kyi don rtogs pa min pa dang/ dbu ma pa la'ang bla ma'i man ngag gis ma brgyan pa'i dbu ma pa ni dbu ma 'bring po yin par gsungs la/ bla ma'i gdams ngag ni dpal ldan zla ba'i zhabs kyi gdams ngag kho na yin par de nyid kyi dngos kyi slob ma paNDi ta lhan cig skyes pa'i rdo rje'i 'grel pa las bshad do/ /paN chen nA ro pa yang dpal ldan zla ba'i lugs kho na 'dzin pa ste/ de nyid kyi rgyud phyi ma'i 'grel bar/ phyi ma'i rgyud kyi 'grel pa 'di/ /sgron ma gsal ba'i rjes 'brangs nas/ /klu sgrub man ngag bshad pa yin/ zhes dang/ @013b slob dpon klu sgrub 'phags pa lha/ /klu yi byang chub shAkya'i bshes/ /zla ba grags pa la sogs pa'i/ /man ngag rim pa la brten nas/ /zhes gsungs pa'i phyir dang lta ba'i bshad pa yang de kho na ltar snang ba'i phyir ro/ /de'i phyir sngon dang phyis kyi rtog ge pa kha cig mai tri pa sems tsam pa yin te shAnti pa'i slob ma yin pa'i phyir/ zhes zer ba ni 'phongs phyis pa'i rngo dang mtshungs pas dor bar bya ba kho na'o/ /de ltar na grub dbang mar pa'i lta ba ni dbu ma pa chen po thal 'gyur ba'i lta ba yin par gdon mi za'o// 'on kyang mar pa nas brgyud pa'i gdams ngag rnams su sems tsam lugs dang mthun pa'i brda' sprod lugs kyang mdzad mod/ de ni sngar bshad pa ltar rje mar pa la bla ma paN grub kyang mang zhing de nas brgyud pa'i gdams pa yang mang bar 'dug pas bla ma mar pa nas brgyud pa'i lta ba'i gdams pa yin tshad dbu ma pa'i lugs yin mi dgos so/ /rje btsun mi la ras pa'i mgur 'bum du yang tshe ring ma la gdams pa sogs las 'byang ba'i lta ba'i gsung rigs ni thal 'gyur ba'i lta ba dang mthun par 'dug cing/ rje bdag nyid chen pos kyang mgur de'i don dbu ma pa dang mthun par gsungs so/ /yang gsung mgur 'ga' zhig tu rnal 'byor bzhi'i ngo sprod mdzad 'dug cing de dag la yang dbu sems kyi lta ba'i bshad lugs ci rigs par yod do/ /de dag kyang bstan pa spyi'i rnam gzhag gi bstan bcos rtsom pa min phyin thad ka'i zhu ba po de'i blo ngo dang 'tsham pa'i lta sgom spyod pa re gsung ba ma gtogs grub chen de dag gis shes tshad mtha' dag mi de la bshad dgos don med pa dbang po rtul pos kyang @014a @#/ /shes nus so/ /rnal 'byor bzhi'i tha snyad ni slob dpon shAnti pas sems tsam rgyan du bshad mod bka' rgyud pa'i rnal 'byor bzhi la sems tsam pa'i lugs kyi nges pa mi snang ngo/ /phyag rgya chen po zhes bya ba'i gdams ngag gi ming 'dogs grags che bar mdzad pa po ni mnyam med sgam po pa yin la/ /de nyid kyi gsung las lta ba'i ngo sprod la phar phyin thag pa'i lugs dang sngags kyi lugs gnyis 'byung zhing de gnyis ka la'ang phyag rgya chen po'i gdams ngag gi ming 'dogs par mdzad do/ /phar phyin theg pa'i lugs la stong nyid la phyag rgya chen por gsungs pa yod tshul sogs mdo lung mang du drangs nas bsgrubs pa'i bstan bcos kyang mdzad snang ngo/ /phag mo gru pa rdo rje rgyal po dang/ 'bri gung skyur rin po che gnyis kyang de'i rjes su 'brangs par snang zhing 'di dag kyang snang phyogs rten 'brel la gtsigs che bar mdzad cing so sor rtog pa'i shes rab kyi dpyod pa mi 'dor ba'i lugs su snang ngo/ /'on kyang 'di dag gi bka' 'bum rnams su slob ma mkhas pa dang mi mkhas pa du ma zin bris nyag nog mang po bcug 'dug pa la yid brtan mi snang no/ /dkar po chig thub ces pa'i ming ni zhang tshal pa yin chad du dar rgyas che rgyu med cing zhang tshal pas dkar po chib thub la gtso bor byas pa'i bstan bcos kyang mdzad do/ / 'jam mgon sa skya paN chen gyis dgag pa mdzad yul gyi gtso bo yang 'di yin par snang ngo/ /phyis kyi rang bzhin mang pos kyang 'di phyogs la dgag pa mang du mdzad pa 'dug la/ zhal tshal pa rang gi bzhed pa la ci yang ying la mi byed pa'i @014b phyogs gnas pa yin na dgag pa de dag gnang du 'gro bar snang ste zhib par spro ma 'dod do/ /de ltar na bdag gis gong du bshad pa 'di rnams kyang rang rang gi grub mtha'i khungs gtugs gang yin rnams brtsad bcad nas bris pa yin gyi/ spyir bod kyi lo tstsha ba rgya gar gyi mkhas pa rtsod med la gtugs pa rnams kyis kyang mkhas pa de dang de'i lta ba'i bzhed pa brtsad bcad pa'i nges pa mi snang la/ brtsad bcad kyang paN grub de dag gis dri ba po'i blo ngor 'tsham pa'i lta sgom gyi gnod cig ston pa ma gtogs rang gis mkhyen tshad de la bshad pa'i nges pa mi 'dug ste/ tshul 'di ni theg pa chen po'i bshes gnyen bzang po dag gi ngang tshul yin gyi/ sha skam khog pa re'i yon la rang gis shes tshad rna ba sun sun du smra ba'i da lta'i 'chad pa po rnams dang mi 'dra'o/ /de'i phyir jo nang lugs dang phyis kyi stag tshang lo tstsha pa shes rab rin chen gyi lta ba'i lugs gnyis ma gtogs sngon gyi mkhas grub phal mo che'i lta ba'i gdams pa rnams la khungs gtugs rgya gar gyi paN grub re yod par 'dug mod/ de dag gi srol 'dzin pa rnams las kha cig ni myong ba thon thun yod kyang rigs pa mi shes pa dang/ 'ga' zhig ni cung zad sbyangs kyang grub mtha'i khyad par ma phyed pa dang/ la la ni zer sgros snga ma skyor 'dod kyang tshig ris tsam yang skyor ma shes pa dang/ phal mo che ni gdams pa mthong tshad rang lugs kyi gdams par bsre ba sogs brjod par dka' ba'i ngang tshul mang du snang ngo/ /jo nang pa'i lta ba ni rang mal nas glo bur du brdal ba'i lta ba zhig yin par 'dug cing mkhas grub kyi khungs gtugs ci yang med do/ /stag tshang bsam dpyad pa dang cung zad @015a @#/ /dpyad pa dang shin tu dpyad pa'i gnas skabs gsum du phye nas gnas skabs phyi ma phyi mas snga ma snga ma 'gog pa'i lta ba zhig bshad pa ni ngo mtshar te/ rang gi grub mtha' la rgol ba gzhan gyis 'gal ba sgrig mi dgos par rang nyid kyis bzhag pa'i bden gnyis kyi rnam gzhag rang nyid kyis bshig par snang ba'i phyir ro/ /ngang tshul 'di ltar gyur kyang rtsod med kyi shing rta chen po gzhan la 'gal ba bsgrig pa'i ngal ba bsten pa ni dam pa dag gis mchog tu snying brtse ba'i yul kho na'o/ /gzhan yang zhang thang sag pa la sogs pa sngon gyi dbu ma par khas 'ches pa dag gis kyang lta ba'i gnad la nor pa mang du yod pa rnams ni rje yab sras kyi gsung rab rgya mtsho lta bu las shes par bya'o/ /phyag rgya chen po a ma na si ba dang/ /sems phyogs par khas 'ches pa mang po zhig ni thabs kyi cha la skur pa 'debs pa'i rgya'i mkhan po hwa shang gi ring lugs kho na yin te/ de yang rnam pa kun tu thabs phyogs la skur pa 'debs pa dang/ spyod phyogs dgos kyang lta ba 'tshol ba'i tshe so sor rtog pa'i dpyod pa 'dor ba dang/ thog mar 'tshol ba'i tshe shes rab kyis dpyod dgos kyang dngos gzhi skyong ba'i tshe dpyod pa 'dor ba sogs mang du snang ste/ de thams cad hwa shang gi lugs las ma 'das pa kho na yin no/ /lta ba log pa 'di dag dar ches pas sngar bshad pa'i lugs de dag gi nang na'ang 'di dag ci rigs par bsres pa byung snang ngo/ /de ltar bdag gis gangs ri'i ljongs kyi lta ba'i khyad par mdo tsam brjod pa 'di ni gzhan las khyad thon pa dang @15b 'dod pa dang/ phyogs lhung dang grags 'dod kyis kun nas bslang ba ma yin gyi/ mkhas pa dang mi mkhas pa du mas skur bar bya ba'i gnas ma yin pa la skur ba dang lugs mi mthun pa du ma'i tha snyad thams cad gcig tu bsres pa dag gis dri ma med pa'i gzhung dri ma dang bcas par byed pa rnams la phan pa bsam pa dang/ khyad par du rje bla ma yab sras kyis shing rta chen po rnams kyi lugs 'khrul pa'i dri ma mtha' dag dang bral ba ma 'dres par phye ba 'di la rigs pa'i lam nas drangs pa'i dad pa bcos ma ma yin pa dang ldan pa rnams la yid dga' ba ches cher bskyed par byed pa dang/ bag chags bzang po can rnams la dri ma med pa'i lam mchog tu gyur pa ni rje rgyal ba gnyis pa'i ring lugs 'di nyi yin no zhes mtshon par bya ba'i phyir du smras pa la lags so/ /gzhan du na legs par bshad pa'i gser gyi zhun ma dang log par bshad pa'i mching bu'i gong bu gnyis mnyam pa nyid du rtogs pa'i chags bral gyi go 'phang mngon du byas pa'i 'gro ba 'di dag gi rna bar lung dang rigs pa'i gtam zab mo rgya cher bgyis pa la blo gros dang ldan pa'i mkhas pa su zhig mchog tu dga' ba yongs du 'dzin par 'gyur/ da ni 'di brjod par bya ste sngon lan cig ma yin par rgyal ba rnams kyi spyan sngar rgyal ba'i dam chos 'dzin pa'i smon lam gyi mthu yongs su brtas par byas pas bstan pa'i snying po yod med kyi mkha' thams cad dang bral ba zab mo dbu ma'i lam rten cing 'brel par 'byung ba'i rigs tshul seng ge'i nga ro chen po yongs su sgrogs par mdzad pas dus kyi mthar yang rgyal ba'i bstan pa skyon dang bral bas nor 'dzin gyi khyon ma lus pa yongs su 'geng ba @16a @#/ /byed pa po ni rang cag rnams kyi 'dren pa dam pa mtshan brjod par dka' ba rje btsun thams cad mkhyen pa blo bzang grags pa'i dpal zhes snyan pa'i ba dan 'jig rten gsum du rnam par g.yo ba de nyid yin la/ rje btsun de nyid shing rta chen po gang gi rjes su 'brangs pa ni mgon po nyid kyi gsung las 'di ltar 'byung ste/ khyod kyi bla med theg pa'i tshul/ /yod dang med pa'i mtha' spangs te/ /ji bzhin 'grel bar lung bstan pa/ /klu sgrub gzhung lugs kunda'i tshal/ /dri med mkhyen pa'i dkyil 'khor rgyas/ /gsung rab mkha' la thogs med rgyu/ /mthar 'dzin snying gi mun pa sel/ /log smra'i rgyu skar zil gnon pa/ /dpal ldan zla ba'i legs bshad kyi/ /'od dkar 'phreng bas gsal byas pa/ /bla ma'i drin gyis mthong ba'i tshe/ / bdag gi yid ni ngal gso thob/ /ces gsungs pa ltar dpal mgon 'phags pa klu sgrub dang dpal ldan zla ba'i lugs srol nyid mchog tu gzigs shing de nyid kyis skal ba dang ldan pa rnams la phyin ci ma log pa'i lam gsal bar mdzad do/ /de nyid kyi phyir na rje bdag nyid chen po 'di nyid la thun mong dang thun mong ma yin pa'i rnam par thar pa bsam gyis mi khyab pa zhig mchis kyang/ de thams cad kyi nang nas gtso por gyur ba ni rgyal ba'i mdo sngags kyi gsung rab mtha' dag gi dgongs pa'i don shing rta chen po rnams kyis tshul ji ltar phye ba rnams so sor ma 'dres par lung dang rigs pa dri ma med pa'i sgo nas 'khrul pa'i cha shas phra mo tsam yang med par rang gis nges shing gzhan dag la 'doms par mdzad pas thub pa'i bstan pa rin po che yongs su rdzogs pa'i bka' @16b drin gyis nor 'dzin gyi khyon khyab par mdzad pa 'di kho na yin no zhes blo gros dang ldan pa rnams kyis shes par bya'o/ /des na rje btsun 'di nyid kyis 'dul ba'i phyag len phra mo yan chad nas grub pa'i mtha' chen po rnams kyi bar dang/ sdags kyi 'ang dkyil 'khor gyi cho ga dang lag len phra mo yan chad nas rgyud kyi 'grel pa chen mo rnams kyi bar mtha' dag gang la'ang rung ste bla chos dang rang bzo'i nyes pas nam yang ma gos par rang rang gi srol 'byed pa po'i paN grub rnams kyi dgongs pa la gtugs shing de yang rgyal ba'i bka' dang legs par gtugs te gnad phra mo re la'ang lung rigs du mas dpyad de nges pa ster bar mdzad pa dang/ tshul des bstan pa thams cad 'gal ba med par gcig grogs su gcig 'gyur ba'i tshul gyis gang zag gcig 'tshang rgya ba'i cha rkyen du bsgrig par mdzad pas bshad sgrub kyi bstan pa gnyis char 'dzin cing spel bar mdzad pa'i rnam par thar pa 'di lta bu ni sngon byon pa'i gangs can gyi mkhas grub su la'ang med par ma zad rgya gar 'phags pa'i yul gyi 'phags pa klu sgrub lta bu la'ang 'di bas lhag pa yong thabs med par rigs pa'i tshul dri ma med pas 'grub pa yin no/ /de'i phyir che ge mo dang che ge mo zhig gis lung bstan pa'i skyes bu yin no zhes gzhan gyi lung bstan tsam la skyabs 'cha' ba'i rnam par thar pa dang 'dra ba'i go skabs ga la yod/ yi dam gyi lha du ma'i zhal gzigs pa dang/ ting nge 'dzin dang mngon par shes pa du ma brnyes pa sogs las kyang bshad ma thag pa'i rnam par thar pa nyid gtso bo yin no/ /rje bla ma rang nyid kyis/ dang por rgya chen thos pa mang du btsal/ /bar du gzhung lugs thams @17a @#/ /cad gdams par shar/ tha mar nyin mtshan kun tu nyams su blangs/ /kun kyang bstan pa rgyas pa'i ched du bsngos/ /zhes thog ma kho nar rgyal ba'i bka' dang de'i dgongs pa 'grel ba'i shing rta chen po rnams kyi gzhung lugs mtha' dag la 'ol spyi tsam dang phyogs re tsam ma yin par zhib tu thos pa rgya chen po btsal ba'i tshul dang/ de la brten nas 'dul ba ka ri ka nas dpal ldan 'dus pa'i bar gyi mdo dang bstan bcos mtha' dag gang zag gcig 'tshang rgya ba'i lam gyi gtso bo dang yan lag ci rigs par 'du ba'i tshul gyis gzhung lugs thams cad gdams par shar ba dang/ de ltar shar ba'i lam gyi lus yongs su rdzogs pa la dus rtag tu sgrub pa lhur len pa'i tshul gyis thugs nyams su bzhes pa la brten nas lam gyi gnang la rigs pa dri ma med pa'i sgo nas myong stobs kyis nges pa drangs pas mi 'phyugs pa'i gzer thebs pa'i 'bras rtags yang dag pa ni bstan pa thams cad 'gal med du 'khyer shes pa'i mdzad pa spyi dang/ khyad par du rje nyid kyi mdo sngags kyi gsung rab 'di dag yin te/ 'di dag la ci tsam brtags kyang ma 'brel ba dang zlos pa dang 'gal ba dang tshad thub kyi gzhung las phyi rol tu gyur pa'i klan ka 'gyur ba'i gnas rdul tsam yang med par mngon sum gyis grub pa'i phyir ro/ /de'i phyir/ gzhung lugs mang thos rigs pa'i lam du'ang/ /ngal ba mang bsten mngon par rtogs pa yi/ /yon tan tshogs kyis mi dman du mas kyang/ /'bad kyang rtogs par ma gyur gnas de ni/ /'jam mgon bla ma'i drin gyis legs mthong nas/ /shin tu brtse ba'i bsams pas bdag gis bshad/ /ces @17b gsungs pa ni rang bzhin brjod pa kho na'o/ /gsum pa mtshan nyid ni/ chos thams cad la don dam par grub pa'i yod mtha' dang/ tha snyad du yang med pa'i chad mtha' legs par 'gog cing bden med du grub par zhal gyis bzhes pa'i rang sde ni dbu ma pa'o/ / de la yang mtha' ni/ rtsa shes las/ yod ces bya ba rtag par 'dzin/ /med ces bya ba chad par lta/ /de phyir yod dang med pa la/ /mkhas pas gnas par mi bya'o/ /zhes gsungs pa ltar yod mtha' dang med mtha' gnyis yod la/ yod mtha' dang rtag mtha' dang sgro 'dogs kyi mtha' don gcig cing/ med mtha' dang chad mtha' dang skur 'debs kyi mtha' rnams don gcig go /mtha' dang mthar 'dzin mi gcig ste/ /mtha' la med pa zhig dgos la mthar 'dzin ni yod pa zhig dgos so/ /de la gzhan sde rnams gang zag dang chos gang la yang rgyu dang rkyen la brten nas 'byung ba'i rkyen nyid 'di pa tsam gyi rten 'brel nam yang khas mi len cing de dag bden par grub pa 'ba' zhig tu 'dod pa ni rtag chad kyi lta ba'i g.yang du lhung bar rang sde mtha' dag gis 'dod do/ /rang sde nyan thos sde gnyis ni rgyu rkyen la brten nas 'byung ba'i 'dus byas kyi rten 'brel khas len cing des rtag chad kyi mtha' spong bar 'dod de/ byed pa po rang bzhin mi 'gyur ba la sogs pa'i rtag pa'i mtha' 'gog cing rgyu 'bras dang bden bzhi la sogs pa gtan mi 'thad par 'dod pa'i chad pa'i mtha' 'gog pa'o/ /rnam par rig pa tsam du smra bas gzung 'dzin gnyis su med pa'i de kho na nyid gtan la phab nas kun brtags bden par grub pa la sogs pa rtag pa'i mtha' spong zhing/ ngo ba nyid gzhan gnyis ye med @18a @#/ /du 'dod pa'i chad mtha' spong bar 'dod de gong du bshad zin to/ /mkhas pa dbu ma pa rnams na/ rten cing 'brel par 'byung ba'i don nyid bden pas stongs pa'i don can du bzhed cing bden pas stongs pa'i don yang rten cing 'brel par 'byung ba'i don can nyid yin gyi/ don byed pa'i nus pas stong ba'i dngos po med pa'i don ni ma yin no zhes bzhad pas mtha' gnyis 'gag pa la rgyu mtshan so so ba gnyis mi dgos shing gang la bden pa'i rang bzhin bkag pa'i gzhi de nyid la rnam par bzhag pa thams cad 'thad pas rten cing 'brel par 'byung ba'i gtan tshigs nyid kyis rtag chad kyi mtha' gnyis ka 'gog par mdzad do/ /de'i phyir rang sde sems tsam pa man chad kyis dngos po la bden pa'i rang bzhin yod par 'dod pas na dngos po de rtag par mi smra yang rtag ltar 'gyur la/ dus snga mar bden par yod pa zhig dus gnyis par zhig par 'dod na de'i rgyun chad par khas mi len kyang chad ltar 'gyur pas dngos po la bden pa'i rang bzhin 'dod phyin chad rtag chad kyi lta ba las mi 'da'o/ /khyad par du rnal 'byor spyod pa pa dag gzhan dbang sems dang sems byung tsam zhig bden par grub pas med lta spong zhing/ gzhan dbang la kun brtags pa med pas rtag lta spong bar 'dod pa ni phyi rol la bltos pa'i gzung 'dzin tha snyad du yod pa la skur ba btab cing gzhan dbang bden par med pa la sgro btags pas rtag chad gnyis ka'i mthar ltung bas dbu ma pa'i lta ba kho na la yod med kyi mthar ma lhung ba dang rtag chad kyi skyon dang bral ba yod kyi gzhan la ni ma yin no/ /tshul de ni dpal ldan zla ba'i tshig gsal las/ gang zhig @18b gzhan dbang sems dang sems las byung ba dngos po tsam khas blangs nas de la kun tu brtags pa'i ngo bo nyid med pas yod par lta ba nyid spong zhing/ gzhan gyi dbang gi dngos po kun nas nyon mongs pa dang rnam par byang ba'i rgyur gyur pa tsam zhig yod pas med par lta ba nyid spong bar 'gyur ba de'i ltar na kun tu brtags pa nyid yod pa ma yin pa'i phyir dang/ gzhan gyi dbang yod pa'i phyir yod pa nyid dang med pa nyid du lta ba gnyis kar yang 'gyur bas mtha' gnyis sdong bar ga la 'gyur/ zhes dang/ de'i phyir de ltar dbu ma pa'i lta ba kho na yod pa dang med pa nyid du lta bar thal ba med pa yin gyi rnam par shes par smra ba'i lta ba la sogs pa dag la ni ma yin no zhes shes par bya'o/ /zhes gsungs so/ /mgon po klu sgrub kyis/ gang zag phung por smra ba yi/ /'jig rten grangs can 'ug phrug dang/ /gos med bcas la gal te zhig /yod med 'das pa smra na dras/ /de phyir sangs rgyas rnams kyi ni/ /bstan pa 'chi med yod med las/ /'das pa zab mo zhes bstan pa/ /chos kyi khud pa yin zhes gyis/ /zhes gsungs so/ / de'i phyir rtag chad kyi lta ba dang bral bar 'dod na gang zag dang chos rnams brten nas 'byung ba chu zla bzhin du bden pas stongs pa'i don can du khas blangs par bya'o zhes bzhed de/ rigs pa drug cu pa las/ gang dag brten nas dngos po rnams/ /chu yi zla ba lta bur ni/ /yang dag ma yin lag min par/ /'dod pa de dag ltas mi 'phrogs/ /zhes gsungs so/ /'o na ting nge 'dzin rgyal po las/ yod dang med ces bya ba gnyis ka mtha'/ /gtsang dang mi gtsang de yang mtha' yin te/ /de phyir gnyis ka'i @19a @#/ /mtha' ni rnam spangs nas/ /mkhas pas dbus la'ang gnas par yongs mi byed/ ces dang/ rje btsun byams pas/ tshu rol pha rol mtha' la min/ /de dag bar na'ang mi gnas pa/ /dus rnams mnyam pa nyid shes phyir/ /shes rab pha rol phyin par 'dod/ ces mtha' gnyis spangs pa'i dbus la'ang gnas pa bkag pa ma yin nam snyam du dogs na/ log par rtog pa 'di'i dbang gis dbu ma pa'i lugs la khas len med pa sogs nor bar smra ba mang du byung ba yan pas brjod par bya ste/ lung de dag gis ni dngos por smra ba rnams ltar mtha' nyi tshe ba zhig bkag nas de dang bral ba'i dbus bden par bzung nas mi gnas zhes ston pa yin gyi/ mtha' dang bral ba'i dbus med par ston pa ga la yan/ rnam bshad rigs pa las/ mtha' ni zad dang mjug cha dang/ /nye dang phyogs dang smad pa la'o/ /zhes gsungs pa ltar don mang po zhig la 'jug kyang skabs 'di'i mtha' ni/ slob dpon ka ma la shI las/ /gal te dbu ma la sems kyi rang gi ngo bo'i bdag nyid kyi dngos po don dam pa pa ci yang rung ba zhig yod par gyur na ni de'i tshe de la de yod pas rtag go zhe 'am mi rtag go zhes bya bar mngon par zhen pa yang ji ltar mthar 'gyur te dngos po'i de kho na nyid ji lta ba bzhin gyi rjes su song zhing tshul bzhin yid la byed pa nyid ni ltung ba'i gnas so zhes bya bar rigs pa ma yin no/ /zhes gsungs pa bzhin no/ /des na 'da' mtha' ma ltung ba'i gnas yin te/ 'jig rten na brag g.yang la mtha' dang/ da la lhung ba la mtha' la lhung zhes smra ba bzhin no// @19b de la yang dag par yod pa tha snyad du yang med pa'i phyir yang dag par med pa tha snyad du yod dgos la/ de'i phyir don dam par med ces pa med pa'i mthar 'dzin pa ma yin la/ de ltar ma yin zhes 'gog pa yang med mtha' 'gog pa ma yin mod/ dgag bya bka' ba'i med pa yang dag par yod do zhes 'dzin na dngos po med pa'i mthar ltung bas de 'gog pa yang med mtha' 'gog pa yin no/ /de'i phyir de ni sgro 'dogs kyi med mtha' yin la las 'bras sogs tha snyad du med pa skur 'debs kyi med mtha' yin no/ / chos rnams don dam par 'dzin pa'i yul yul can ni sgro 'dogs kyi mtha' dang de'i mthar 'dzin yin no/ /rang nyid dbu ma par khas 'ches pa la 'di dag shes dgos pas cung zad bshad la zhib par rje thams cad mkhyen pa'i gsung las shes par bya'o/ / des na bcos ldan 'das kyis dbu ma'i lam zab mo re zhig rtogs par mi nus pa'i gdul bya rnams drang bar bya ba'i phyir du/ la lar gang zag gi bdag yod par bstan pa dang/ 'ga' zhig tu gang zag gi bdag ni med kyi gzung 'dzin gnyis yod pa las brtsams nas bstan pa dang/ theg chen gyi rigs can 'ga' zhig la gzung 'dzin gnyis med kyi gnyis stong yod par gsungs la/ dbang po smin pa'i blo rab tu gyur pa la ni mtha' gnyis spangs pa'i dbu ma'i lam stong nyid snying rje'i snying po can ston par mdzad de/ rin chen 'phreng ba las/ brda' sprod pa dag ji lta bur/ zhes sogs dang/ 'phags pa lhas/ yod dang med dang yod med dang/ /gnyis ka min zhes kyang bstan te/ /nad kyi dbang gis thams cad ni/ /sman zhes bya bar 'gyur min nas @20a @#/ /zhes dang/ bsod nams min pa dang por bzlog /bar du bdag ni bzlog pa dang/ /tha mar lta zhig kun bzlog pa/ /gang gis shes de mkhas pa yin/ zhes gsungs so/ /des na dbu ma'i lta ba zhes bya ba ni 'dus byas dang 'dus ma byas kyi chos thams cad la bden par grub pa'i rang bzhin rdul tsam yang med pa dang/ de nyid la bskyed bya skyed byed dang dgag sgrub sogs 'khor 'das kyi rnam gzhag thams cad khas blangs pas chog pa gnyis tshogs shig dgos pa yin te/ bod kyi lugs mang po dag gi lta ba rnams dbu ma'i lta ba yin min dpyod par 'dod na 'di nyid kho na'i sgo nas dpyad par bya'o/ /tshul 'di ni 'phags yul gyi dbu ma thal rang gnyis ka'i rkang tshugs pa'i grub pa'i mtha' yin no/ /'phags pa klus/ rten cing 'bral par 'byung ba gang/ /de ni stong pa nyid du bshad/ de ni brten nas gdags pa ste/ de nyid dbu ma'i lam yin no/ /gang phyir rten 'byung ma yin pa'i/ /chos 'ga' yod pa ma yin pa/ /de phyir stong pa ma yin pa'i/ /chos 'ga' yod pa ma yin no/ /zhes gsungs so/ /tha snyad du rang mtshan zhal gyis bzhes pa'i dbu ma pa rnams kyis kyang bden par grub pa rnam pa thams cad du zhal gyis mi bzhes pas sngar bshad pa'i rten 'byung dang stong nyid don gcig pa ni de kho na ltar 'chad de/ shes rab sgron me las/ rten cing 'brel par 'byung ba zhes bya ba stong pa nyid gang yin pa de ni brten nas gdags pa ste/ 'jig rten pa dang 'jig rten las 'das pa'i tha snyad 'dod pas nye bar len pa dag la brten nas gdags pa yin no/ /de nyid dbu ma'i lam @20b yin te/ dbu ma ni skye ba dang skye ba med pa dang yod pa dang med pa'i mtha' gnyis spangs pa'i phyir/ zhes gsungs so/ /de ltar gzhi'i lta ba gtan la 'bebs tshul phyin ci ma log pa 'di la nges pa rnyed na lam gyi gnas skabs su thabs shes ya ma bral pa'i gnad mi 'phyugs pa bde blag tu 'ong zhing/ des ni 'bras bu sku gnyis kyi rgyu phyin ci ma log pa rgyud la bskyed nus pas dbu ma'i lta ba 'di ni theg pa chen po'i gzhi lam 'bras bu'i gnas skabs thams cad du shin tu gal che ba la nges pa btsal dgos so/ /da ni 'di dpyad par bya ste/ ci dbu ma par 'jog pa la rang gi lta ba de nyid mtha' thams cad dang bral ba'i rten 'byung phra mo'i don rtogs pa zhig dgos na ni dbu ma rang rgyud pa dbu ma par mi rung ste/ rang rgyud pas chos dang gang zag gi btags don rigs pas btsal nas gdags gzhi khyad par ba re de dang der 'jog pa'i phyir na rang mtshan gyi mtha' phra mo ma khegs pa'i phyir ro/ /ci ste dngos po la mtha' thams cad bkag pa min kyang rang ngor mtha' thams cad khegs pa'i dbu ma par 'dod pas dbu ma par 'jog na dngos smra ba yang dbu ma par thal te/ des mtha' gnyis bkag pa'i sgo nas rang gi lta ba dbu ma'i lam du 'dod pa'i phyir ro/ /zhes zer na/ bshad par bya ste/ spyir chos de de ltar mi gnas kyang grub mtha'i dbang gis dgag bya bkag pa'i stong tshul zhig chos de dang de'i gnas lugs su 'jog pa ni blos byas kyi stong pa yin pas dbu ma'i don med la/ chos de dgag bya des stong par gtan la phab pa ltar chos de gnas kyang stong tshul des chos can dngos po mtha' dag la khyab pa min pa ni nyi tshe ba'i stong pa yin pas chos dbyings de bzhin nyid du mi rung ngo/ /de la dngos @21a @#/ /por smra ba'i lugs kyi gzugs rang 'dzin shes pa las rgyad chad du grub pas stong pa'i mngar 'dzin pa'i rtog pa'i zhen gzhar gnas tshod kyis grub pas stang ba lta bu ni stong tshul nges chos can gyi dngos po mtha' dag la khyab pa ma yin zhing/ rgyu mtshan des na/ stong tshul des chos thams cad kyi steng gi rten 'byung dang/ stong ba don gcig tu rtags par ma nus shing stang tshul de na chos thams cad la khyab pa'i stong pa yang ma yin no/ /de'i phyir chos thams cad kyi mtha' gnyis 'jog tshul dang snang stong grogs su 'gyur tshul legs par 'jog mi shes so/ /dbu ma rang rgyud pa rnams kyis tha snyad du rang mtshan bkag na gzhi nga tha snyad du yod par 'jog ma nus pas rang mtshan khas blangs kyang chos thams cad la blo gnad mang la ma ltos pa'i sdod lugs kyi grub tshul mi bzhed cod rigs pa'i rnam grangs du mas 'gag par mdzad do/ /de ltar bkag pa'i stong tshul de ni don la ma gnas pa ma yin pas blas byas kyang ma yin zhing/ 'dus byas dang 'dus ma byas kyi dngos po thams cad la khyab pas nyi tshe ba'i stong pa yang ma yin no/ /de'i phyir de ltar bkag pa'i stong tshul de nyid rten cing 'brel par 'byung ba dang/ don gcig tu yang rtogs par nus pas gzhi thams cad kyi steng du mtha' gnyis spang tshul sems tsam pa las ches shin tu phra'o/ /des na dbu ma rang rgyud pa rnams la dbu ma pa zhes brjod du rung zhing sems tsam pa la dbu ma pa'i sgra 'jug tu med de/ /rje bdag nyid chen pos mkhas pa de dag kyang chos bden par yod pa'i grub mtha' rigs pa'i sgo du mas 'gag cing bden med du legs par zhal gyis bzhes pas dbu ma pa @21b ni yin no/ /zhes gsungs pa'i don ni de ltar du shes par bya'o/ /spyan ras gzigs brtul zhugs kyis kyang/ tha snyad du phyi nang gi rten 'brel sgyu ma tsam du bya ba byed nus su yod cing don dam par ngo bo nyid med par shes pa ni 'phags pa yang sras dang legs ldan 'byad dang sangs rgyas bskyangs la sogs pa dbu ma'i lam smra ba rnams kyis shes rab kyi pha rol tu phyin pa'i tshul bstan pa'o/ /zhes gsungs so/ /'on kyang brten nas 'byung ba'i don shin tu phra ba rtogs pa ni dbu ma thal 'gyur pa kho na'o/ / bzhi pa grub mtha'i 'dod tshul la gnyis/ klu sgrub yab sras kyis mdo'i drang nges phye tshul dang/ grub mtha'i 'dod tshul bshad pa dngos so/ /dang po la gnyis/ mdo nas ji ltar gsungs pa dgod pa dang/ de'i don bshad pa'o/ /dang po ni/ mgon po klu sgrub kyis mdo gang la brten nas gsung rab kyi drang nges phye ba'i mdo'i khungs dngos su smos pa 'phags pa rang nyid kyi rigs tshogs dang mdo btus sogs su ma byung yang mdo'i don bshad tshul las don gyis bshad pa yod la/ dpal ldan zla bas tshig gsal las blo gros mi zad pas bstan pa'i mdo drangs nas bsrungs shing/ spyan ras gzigs brtul zhugs kyis kyang shes rab sgron me'i 'grel bshad du de ltar bshad la/ slob dpon ka ma la shI las dbu ma snang bar yang mdo de nyid drang ngas 'byed pa'i khungs su mdzad do/ /des na blo gros mi zad pa'i mdo nyid drang nges 'byed pa'i khungs yin la de las gsungs tshul ni mdo de nyid las/ nges pa'i don gyi mdo sde ni gang/ drang ba'i don gyi mdo sde ni gang zhe na/ mdo sde gang dag kun rdzob sgrub pa bstan pa de dag ni drang pa'i don @22a @#/ /zhes bya'o/ /mdo sde gang dag don dam pa sgrub pa bstan pa de dag ni nges pa'i don zhes bya'o/ /mdo sde gang dag tshig dang ye ge sna tshogs pa bstan pa de dag ni drang ba'i don zhes bya'o/ /mdo sde gang dag zab mo blta dka' ba rtogs par dka' ba bstan pa de dang/ ni nges pa'i don zhes bya'o/ /mdo sde gang dag bdag dang sems can dang srog dang gso ba dang skyes bu dang gang zag dang shed las skyes dang shed bu dang byed pa po dang tshor ba po skad sna tshogs kyis bshad par bya ba bdag po med pa la bdag po lta bur bstan pa de dag ni drang pa'i don zhes bya'o/ /mdo sde gang dag dngos po stong pa nyid dang mtshan ma med pa dang smon pa med pa dang mngon par 'du byed pa med pa dang skye ba med pa dang ma skyes pa dang sems can med pa dang srog med pa dang gang zag med pa dang bdag po med pa rnam par thar pa'i sgo ston pa de dag ni nges pa'i don zhes bya ste/ 'di ni nges pa'i don gyi mdo sde la rton gyi drang ba'i don gyi mdo sde la mi rton pa zhes bya'o/ /zhes gsungs pa'o/ /gnyis pa slob dpon gyis drang nges 'byed pa'i dgos pa ni/ bcom ldan 'das kyis yod pa dang med pa dang bden pa dang rdzun pa sogs rnam grangs du ma'i sgo nas chos bstan pa las gang zhig ni bden pa'i don can yin/ gang zhig ni rdzun pa'i don can yin zhes blo the tshom du gyur pa rnams dang; yang gang dag rang nyid blo gros dman pas drang ba'i don la nges pa'i don can du 'khrul ba dang/ de bzhin du nges pa'i don la cig shos su 'khrul pa'i log par rtog pa can rnams la drang nges kyi khyad par gsal bar phye nas de dag gi don mdzad @22b par dgongs pa yin te/ dpal ldan zla bas/ 'dir de kho na'i don can gyi bstan pa ni gang zhig yin/ dgongs pa can ni 'dir gang zhig yin snyam du gang zhig the tshom du gyur pa dang/ gang zhig blo zhan pa nyid kyis drang ba'i don gyi bstan pa la nges pa'i don du rtog pa de gnyis ka'i the tshom dang/ log pa'i shes pa dag rigs pa dang lung gnyis kyi sgo nas bsal bar bya ba'i phyir slob dpon gyi 'di brtsams so zhes gsungs so/ /drang nges ji ltar phye tshul ni/ nges pa'i don gyi mdo sde rnams kyi don ji ltar gnas pa las rnam pa gzhan du 'dren pa'i dogs pa'i gnas mtha' yas pa bkod nas rigs pas legs par sun phyung ste rnam par dag pa'i lam la rigs pa mang po'i sgo nas nges pa bla na med pa ster ba dang/ bcom ldan 'das kyi bka' nyid dbang du byas te lung gi sgo nas kyang don de bsgrubs par mdzad pa'o/ /de ltar yang dpal ldan zla bas lung de'i mjug thogs su/ de la bdag las ma yin zhes bya ba la sogs pas ni rigs pa gsungs pa yin no/ /bcom ldan 'das kyis chos gang zhig ces bya ba la sogs pa ni lung gsungs pa yin no/ /zhes so/ /blo gros mi zad pa'i mdo'i don dngos ni/ mdo sde gang dag kun rdzob sgrub pa bstan pa zhes sogs rkang pa gnyis kyis mdo'i drang nges kyi khyad par yul dang dus la sogs pa'i sgo nas mi 'jog par brjod bya'i sgo nas 'byed pa dang/ de yang kun rdzob gtso bor ston pa'i mdo drang don dang/ don dam gtso bor ston pa'i mdo nges don du 'jog tshul mdor bstan pa'o/ /de nas mdo sde gang dag tshig dang yi ge zhes sogs rkang pa gnyis kyi kun rdzob ston pa'i mdo dang don dam ston pa'i mdo gnyis @23a @#/ /ngos bzung ba ste/ de yang tshig dang yi ge mi 'dra ba sna tshogs pas don mi 'dra ba sna tshogs pa ston pa ni snga ma dang/ rtogs dka' ba'i don spros pa rnam par bcad pa'i ro gcig par ston pa ni phyi mar bzhag go /de nas mdo sde gang dag bdag dang sems can dang zhes sogs rkang pa tha ma gnyis kyis ni ston lugs ji 'dra ba zhig gis kun rdzob bstan par 'gro ba'i kun rdzob ston lugs dang/ ston lugs ji 'dra ba zhig gis don dam bstan par 'gro ba'i don dam ston lugs gnyis ston pa'o/ /de yang bdag dang zhes pa nas bdag po lta bu zhes pa'i bar gyis ni sgras zin la gang zag gi rnam grangs kho na byung yang don ni gang zag kho na la mi bya yi/ byed pa po de dang 'brel ba'i las su bya ba dang byed pa'i dngos po yod par ston pa mtha' dag la bya dgos te/ dper na rtsa she'i 'gro 'ong brtag pa'i rab byed rnams kyis kyang 'jig rten pha rol nas 'dir 'ong ba dang 'di nas pha rol tu 'gro ba po yod na gang zag bden pa yod dgos pa dang/ dge mi dge'i las byed pa po yod na gang zag bden pa yod dgos par dogs pa'i mtha' 'gog pas byed pa po dang las gnyis ka bstan kyang gang zag gi bdag med pa gtso bor gtan la phab pa'i rab byed du byed dgos pa ltar te/ des na 'dis kyang chos dang gang zag gnyis ka ston pa'i cha so sor byed dgos so/ /tshig rkang gnyis pa'i stong pa nyid dang zhes pa nas ma skyes pa zhes pa'i bar gyis ni chos kyi bdag med tshul gtso bor bstan la/ sems can med pa zhes pa nas bdag po med pa zhes pa'i bar gyis ni gang zag la bdag med @23b tshul gtso bor ston pa'o/ /ting nge 'dzin rgyal po las kyang/ stong pa bde bar gshegs pas bshad pa ltar/ /nges don mdo sde dag gi bye brag shes/ /gang las sems can gang zag skyes bu bstan/ /chos de thams cad drang ba'i don du shes/ / zhes gsungs so/ /de la drang don du 'gro lugs la drang ba ni gdul bya kha drang ba'i phyir du bstan pa tsam la mi bya yi/ mdo de'i don ji ltar bstan pa ltar gzung du mi rung bar da dung de'i dgongs pa bshad nas don gzhan du drang dgos pa'am yang na sgra ji bzhin par bzung bas chog kyang de tsam zhig de dag gi yin lugs de kho na nyid ma yin pas da dung de'i de kho na nyid de las gzhan du btsal dgos pas na drang ba'i don te/ don drang dgos pa'o/ /de'i dang po ni/ pha dang ma ni gsang bya zhing/ zhes pa lta bu ste; pha ma gsad par gsungs pa'i dngos zin gyi don ji lta ba bzhin du gzung du mi rung bas de las gzhan du las kyi srid pa dang sred pa la drang dgos pa'o/ /de ltar drang ba de yang da dung 'jog tshul phyi ma'i drang don du yod do/ /gnyis pa ni/ sbyin pa btang ba las longs spyod 'byung bar ston pa lta bu ste/ de'i don sgra ji bzhin par bzung bas chog mod kyang sbyin pas longs spyod rgya chen po bskyed pa de de'i yin lugs yin gyi de ma yin pa'i sbyin pa'i yin lugs med do zhes smra ba la/ sbyin pa'i yin lugs ni de tsam ma yin gyi de las gzhan du de'i de kho na nyid 'tshol dgos so zhes 'chad pa lta bu'o/ /nges pa'i don ni chos dang gang zag la bdag dang skye ba sogs spros pa rnam par bcad pa'i tshul gyis ston pa yin la/ de la ni dngos bstan gyi don de nyid gnas lugs mthar @24a @#/ /thug yin pas de phan chad du drang du med pa dang/ de las gzhan du gang zag gzhan gyis drang du mi rung ba dang/ de la sgrub byed tshad ma dang yang ldan pas na nges pa'i don te/ don nges pa'o/ /sa bon las myu gu skye bar gsungs pa lta bu la sgrub byed tshad ma yod kyang don dam pa'i dbang du mdzad pa min pas drang don te/ ka ma la shI las nges pa'i don yang gang la bya zhe na/ tshad ma dang bcas pa dang don dam pa'i dbang du mdzad nas bshad pa gang yin pa ste/ de ni de las logs shig tu gzhan gyis gang du'ang drang bar mi nus pa'i phyir/ zhes nges don la sgrub byed tshad ma dang ldan pa dang don dam pa ston pa gnyis tshogs dgos par gsungs so/ /ji ltar bstan pa ltar gyi don yod med tsam la drang nges su byed na tshad ma dang bcas pa gcig pus chog gi don dam pa'i dbang du mdzad pa zhes pa'i khyad par sbyar mi dgos so/ /des na shing rta chen po rnams kyi gsung gi zur re re la yang nus pa 'don lugs khyad par ba re yod pa zhib tu phyed dgos so/ /drang nges su 'jog pa la yang rjod byed kyi sgo nas phye na gsung rab 'di'i don gzhan du drang dgos mi dgos la 'jog dgos pa'i phyir gsung rab nyid drang nges kyi mtshan gzhir gzung dgos te/ dbu ma snang ba las/ de lta bas na don dam pa brjod pa kho na nges pa'i don yin la bzlog pa ni drang ba'i don yin no zhes bya bar khong du chud par bya'o/ /zhes dang/ skye ba med pa la sogs pa yang 'phags pa blo gros mi zad pas bstan pa las nges pa'i don no zhes bstan te/ zhes gsungs so/ /brjod bya'i dbang du byas nas drang nges 'byed na gzhan du drang dgos mi dgos @24b kyi don nyid la drang nges su 'jog dgos pas kun rdzob bden pa la drang don dang don dam bden pa la nges don du 'jog pa yin te/ 'phags pa sangs rgyas thams cad kyi yul la 'jug pa ye shes snang ba'i rgyan gyi mdo las/ nges pa'i don gang yin pa de ni don dam pa'o/ /zhes dang/ sngar drangs pa'i ting nge 'dzin gyi rgyal po'i mdo'i lung gis kyang 'grub bo/ /de yang sgom rim par pa las/ bcom ldan 'das kyi bka' thams cad ni legs par gsungs pa ste/ mngon sum du'am brgyud pas de kho na mngon du gsal bar byed pa dang de kho na la gzhol ba nyid do/ /zhes gsungs pa ltar rgyal bas chos ji snyed cig gsungs pa rnams thar pa 'thob pa'i ched du yin la/ kun rdzob kyi bden pa tsam goms pa las de thob mi nus shing/ de las gzhan du drangs te de kho na nyid bcal nas sgom pa'i stobs kyis thar pa 'thob dgos pa nyid shes pa la rag las so/ /yum gyi mdo las gzugs med/ gzugs kyi skye ba med/ ces sogs gsungs pa nges don gyi mdo ma yin par 'gyur te/ sgra ji bzhin du gzung du mi rung ba'i phyir ro snyam na/ de dag sgra bzhin pa ma yin pa'i mdo ma yin te/ yum rgyas pa nyid las/ de yang 'jig rten gyi tha snyad du yin gyi don dam par ni ma yin no/ /zhes dgag bya'i khyad par sbyar nas gsungs pa'i phyir dang de ltar skabs gcig tu dgag bya'i khyad par sbyar phyin gzhung de'i bar skabs su dgag bya'i khyad par ma sbyar ba'i tshig byung ba la'ang don gyis sbyar zin pa yin pas skabs der dngos su ma smos kyang de sgra ji bzhin pa ma yin par mi 'gyur ro/ /'di la rang rgyud pa ltar na sher phyin 'bum pa lta bu @25a @#/ /mdo de'i nang du dgag bya la don dam gyi khyad par dngos su sbyar ba'i tshig byung ba rnams sgra ji bzhin pa'i nges don dang/ shes rab snying po lta bu mdo de'i nang du dgag bya la bden pa'i khyad par gsal bar sbyar ba'i tshig med pa rnams ni sgra ji bzhin par bzung du mi rung bas gzhan du drang dgos pa'i drang don du bzhed pas/ mdo sde dgongs 'grel gyis 'khor lo bar pa drang don du gsungs pa na 'khor lo bar pa thams cad la zer rgyu min zhes bzhed do/ /thal 'gyur bas shes rab snying po la sogs pa dgag bya la don dam gyi khyad par dngos su ma sbyar ba'i 'khor lo bar ba'i mdo rnams kyang yum 'bum pa lta bu'i don dam gyi khyad par gsal bar sbyar ba'i mdo sde dang rigs mthun pas de dag la'ang dgag bya'i khyad par don gyis sbyar ba yin pas sgra ji bzhin pa'i nges don kho nar bzhed do/ /gzugs med/ sgra med ces pa la sogs pa'i mdo tshig gas gzugs sgra sogs ye med du bstan pa ni sgras zan la'ang bya mi rung bas/ gzugs med ces pa'i mdo tshig de gzugs med par bstan pa'i mdo tshig min dgos so/ /de ltar byas na mgon po klu sgrub kyis phyi nang gi rgyu 'bras rnams la bden pa'i rang bzhin yong pa la rgyu rkyen la bltos par 'gal ba la sogs pa'i gnod byed mang du bstan cing/ bden pa'i rang bzhin med pa la 'ching grol gyi rnam gzhag thams cad 'thad par sgrub byed du mas bsgrubs pa ni yum gyi mdo la sogs pa'i de kho na nyid ston pa'i mdo rnams nges pa'i don du bsgrubs pa dang/ de dag dang mi mthun par ston pa'i mdo rnams drang ba'i don du bsgrubs pa @25b yin pas rtsa ba shes rab la sogs pa'i rigs pa'i tshogs rnams kyis drang nges 'byed pa'i shing rta'i srol phye ba dang/ drang nges 'byed tshul de yang blo gros mi zad pa'i mdo la brten par klu sgrub rang nyid kyis bshad pa'i tshul yang des shes par 'gyur ro/ / 'o na mdo sde dgongs 'grel las/ gzhan dbang bden par med par mthong na mtshan nyid gsum ga la skur 'debs gyi lta ba skye bar gsungs pa ji ltar drang snyam na/ de ni theg pa chen po'i rigs can yin kyang de kho na nyid rtogs pa'i blo mchog dang mi ldan pa'i gdul bya'i bsam pa'i dbang gis de ltar gsungs pa yin te/ de nyid rtogs pa'i blo mchog dang ldan pa'i gdul bya la gzhan dbang bden med du rtogs pa nyid skur 'debs kyi lta ba 'gog pa'i thabs su 'gyur ba'i phyir ro/ /des na spyir yum gyi mdo la sogs pa'i 'khor lo bar pa nges don dang dgongs 'grel la sogs pa'i 'khor lo tha ma drang don yin kyang gdul bya de la bltos te tha ma nges don dang bar pa drang don du 'gro ba mi 'gal te/ dper na spyir bdag dang bdag med bstan pa gnyis las phyi ma mchog yin kyang re zhig bdag med bstan pa'i snong du mi rung ba'i gdul bya rnams kyi ngar snga ma mchog yin pa mi 'gal ba bzhin no/ /des na ji srid gdul bya de'i blo ngor chos thams cad bden par grub pa rdul tsam yang med pa dang/ de la rnam gzhag thams cad bzhag pas chog pa gnyis mi 'gal bar shes mi nus pa de srid du chos can gyi dngos po kha cig bden la kha cig mi bden pa'i rnam dbye mdzad nas de la chos bstan dgos te/ de la bdag med pa'i phyogs re bstan nas rim gyis 'khrid dgos pa'i @26a @#/ /phyir dang/ de la bstan pa'i bdag med de yang gang la 'jog pa'i gzhi bden pa ba med na kho'i blo ngor bzhag tu mi rung ba'i phyir ro/ /de'i phyir gang zag la rang bzhin bkag nas phung po la ma bkag ba dang/ gzung 'dzin rdzas gzhan bkag nas gnyis stong la rang bzhin mi 'gog pa'i tshul gsungs pa rnams kyi rgyu mtshan yang de yin no/ /'di dag las brtsams te da dung zhib tu bshad dgos pa mang du yod cing 'di dag legs par shes pa ni blo gros dang ldan pa rnams la rgyal pa'i bka' dang de'i dgongs pa 'grel ba'i tshad ldan gyi bstan bcos rnams la bcos ma ma yin pa'i dad pa brtan po skye ba'i sgo mchog tu gyur par snang ngo/ gnyis pa grub mtha'i 'dod tshul bshad pa dngos ni/ spyir 'phags pa'i rjes su 'brangs pa'i dbu ma pa rnams kyis gzhi'i skabs su gang zag dang chos gang la'ang bden pa'i rang bzhin rdul tsam yang med pa dang/ de la tha snyad du rnam gzhag thams cad grwa ma nyams par bzhag pas chog pa'i bden gnyis kyi rnam gzhag byed tshul gcig dang/ lam gyi skabs su de kho na nyid rtogs pa'i blo ngor mtshan 'dzin gyi dmigs gtad rdul tsam yang med pa'i lta ba ma nor ba'i zab mo'i lam gyi rim pa dang/ skyes bu chung 'bring gi bsam pa sbyang ba sngon du 'gro ba can gyi byams pa dang snying rjes drangs pa'i bcos ma ma yin pa'i byang chub kyi sems dang/ spyod pa pha rol tu phyin pa drug dang/ bsdu ba'i dngos po bzhis bsdus pa'i rgya che ba'i lam gyi rim pa rnams phan tshun zung du sbrel te thabs shes ya ma bral ba'i lam yongs su rdzogs pa la bslabs pa la @26b brten nas/ 'bras bu srid zhi gnyis char gyi mtha' la mi gnas pa'i byang chub mngon du byas te gzugs kyi sku rnam pa gnyis kyis gdul bya rigs can gsum gyi don ji ltar rigs par mdzad pa zhig theg pa chen po'i gzhi lam 'bras bu'i rnam gzhag tu 'dod pa ni spyi'i grub pa'i mtha'o/ /nyan thos dang rang sangs rgyas kyi rigs can rnams kyis kyang gang zag gi bdag med pa tsam zhig thabs kyi cha dang 'brel bar tshe gsum dang bskal pa brgya la sogs par goms par byas pa las rang gi byang chub 'thob par dbu ma rang rgyud pa rnams bzhed la/ grub pa brnyes pa'i slob dpon sangs rgyas bskyangs dang zla ba'i zhabs dang rje btsun zhi ba lha rnams kyis ni de dag la yang chos kyi bdag med pa rtogs pa yod par bzhed do/ /de la theg pa chen po'i rigs can dbang po rnon po bskal pa grangs med gsum gyi lam gyi 'go rtsom pa'i gang zag la khyad par ji lta bu zhig tshang dgos snyam na/ de la lam spyi'i chings ni/ rje btsun byams pas/ sangs rgyas sogs dmigs dad pa dang/ sbyin sogs spyod yul brtson 'grus dang/ bsam pa phun tshogs dran pa dang/ rnam par mi rtog ting 'dzin dang/ /chos rnams rnam pa thams cad du/ /shes pa'i shes rab dang rnam lnga/ /zhes gsungs pa ltar yin la/ de la dad pa ni dus gsum gyi sangs rgyas rnams kyi tshul khrims sogs la dmigs pa'i dad pas mtshon nas dkon mchog gsum rgyu dang 'bras bus bsdus pa ma lus pa la dad pa'i dad pa ni skabs 'di'i dad pa yin la/ /de lta bu'i dad pa de'i yul du theg chen rgyu 'bras kyi chos ma lus pa 'du bar 'gyur bas de lta bu'i dad pa @27a @#/ /skyes na dad pa la mkhas pa zhes bya'o/ /dran pa ni bsam pa phun tshogs kyi gtso bo byang chub tu sems bskyed pa yin zhing dran pa de'i yul du yang theg pa gsum gyi lam mtha' dag 'gyur bas na de lta bu'i dran pa byung na dran pa la mkhas pa zhes bya'o/ /brtson 'grus ni de ltar sems bskyed nas spyod pa la slob pa'i nan tan dang bral na byang chub mi 'grub pas go cha'i brtson 'grus kyi sgo nas spyod pa spyi la nan tan bskyed pa ste/ de lta bu'i brtson 'grus byung na brtson 'grus la mkhas pa zhes bya'o/ /ting nge 'dzin dang shes rab gnyis kyis ni khyad par du phar phyin tha ma gnyis la slob tshul ston cing/ de yang theg chen thun mong ma yin pa'i zhi gnas dang lhag mthong bsgom pa ni skabs 'di'i ting nge 'dzin dang shes rab la mkhas pa zhes bya'o/ /de ltar na skyes bu chung 'bring gi bsam pa sbyangs pa sngon du 'gro ba'i sgo nas theg chen thun mong ma yin pa'i skyabs su 'gro ba dang/ gzhan don dang byang chub don du gnyer ba shugs drag pos spyod pa'i rten sems bskyed nas rgyal sras kyi spyod pa rlabs chen po la slob pa ste/ de lta bu'i lam gyi spyi'i chings la mkhas par byas nas/ mtshan med rab tu sbyin la sogs/ zhes sogs kyis bstan pa ltar zag pa med pa'i ye shes sde tshan nyi shu rtsa gcig/ rgyas par phye na brgya dang bzhi bcu zhe bzhi yod pa'i mngon par rtogs pa'i rigs ma lus pa la thos bsam gyis sgro 'dogs legs par chod nas bsgoms pas thams cad la myong ba legs par thon pa'i myong ba theg mar skyas pa na grangs med gsum gyis 'tshang rgya ba'i lam @27b gyi mgo rtsom pa'i lam la thog mar zhugs pa zhes bya'o/ /stong pa nyid la bsgoms pa las byung ba'i shes rab kyis myong ba thon pa ni sbyor ba'i lam gyi gnas skabs su 'byung mod kyi/ de lta na yang skabs 'dir yang bsam pa las byung ba'i shes rab kyis goms par byas pa sogs ni gdon mi za bar dgos so/ /de ltar lam du zhugs pa de dag gis kyang theg pa chen po'i mthong lam 'thob kyi bar du ni mthong lam gyi tshe shes mthong gis bltas nas 'da' bar bya ba'i mngon par rtogs pa'i rigs rnams kyang goms pa ltur len pa'i tshul gyis bsgom par bya dgos par gsungs pas dal 'byor don che rnyed dka' nas bzung ste bden pa bzhi'i rnam pa bcu drug la sogs pa rnams kyang thun mong ma yin pa'i lam gyis zin pa'i sgo nas bsgom pa la 'bad par bya dgos so/ /sa thob pa'i gnas skabs su yang mngon par rtogs pa'i rigs mtha' dag zhi lhag zung du 'brel ba'i sgo nas dpyad 'jog gi sgom gnyis ka bya dgos shing/ de yang byang chub phyogs kyi chos sum cu so bdun sogs kyi sgo nas nyams su len pa sogs mdor na pha rol tu phyin pa drug nyid mnyam gzhag dang rjes thob kyi gnas skabs su ji ltar rigs par skyong ba las gzhan pa'i nyams len gyi rim pa ma mchis pas rgyal tshab dam pas phar phyin drug ni nyams len gyi sdom chen por gsungs pa la nges pa rnyed par bya'o// 'di dag kyang dbu ma pa chen po rnams kyi spyi'i lugs yin la las dang po pas lam gyi rim pa ji ltar yid la bya ba'i tshul dang/ lam gyi bogs 'don gegs sel sogs ji ltar bya ba'i tshul dang/ lam gyi gol sa ngo shes nas 'gog par byed pa'i tshul sogs @28a @#/ /rgyas par ni rgyal ba'i dgongs pa mthar thug/ shing rta chen po gnyis las brgyud pa'i man ngag/ mnyam med jo bo chen po dang rje bdag nyid chen pos legs par gsal bar mdzad pa'i lam srol chen po la sbyangs pa las shes dgos shing/ de yang rje yab sras dang de'i brgyud 'dzin gyi dam pa'i skyes bu rim par byon pa rnams kyis yig ris su mdzad pa'i pha rol tu phyin pa'i lam gyi rim pa'i gdams pa rnams dang/ tshul de la nang byan tshud pa'i bshes gnyen mkhas pa yun ring mnyes par byas pa las shes par bya'o/ /zab mo'i lam gyi rim pa de kho na nyid rtogs pa'i lta ba rgyud la skyed pa'i tshul bdag med gnyis gtan la 'bebs pa'i rnam gzhag la 'phags pa'i rjes 'brangs chen po rnams kyi gzhung las mi 'dra ba 'byung zhing/ de'i gnad kyis lam dang 'bras bu'i gnas skabs kyi rnam gzhag la yang mi 'dra ba cung zad yod pa rnams ni shin tu rgyas par rje yab sras kyi gsung las shes dgos shing/ kho bos kyang gsung de dag la brten nas phyogs gzhan du 'chad par 'dod mod kyi 'on kyang 'dir ni mdor bsdus pa tsam brjod par bya'o/ /de la gnyis/ dbu ma rang rgyud pa'i lugs bshad pa dang/ dbu ma thal 'gyur ba'i lugs bshad pa'o/ /dang po la/ mtshan nyid/ dbye ba/ 'dod tshul dang gsum/ dang po ni/'chi med mdzod las/ rang rgyud rang dbang bdag dbang dang/ zhes gsungs pa ltar/ rang rgyud dang/ rang dbang dang/ rang bzhin rnams don gcig par yod la/ rtsa she'i rab byed bcu gsum pa'i 'grel pa shes rab @28b sgron me las/ da ni sun 'byin pa'i lan btab pa dang rang dbang du rjes su dpag pa'i mthus 'du byed rnams rnams pa las ngo bo nyid med pa nyid bstan pa'i don gyi dbang gis rab tu byed pa bcu gsum pa brtsams so/ /zhes gsungs so/ /des na phyir rgol gyi khas blangs tsam la ma 'khris par gdags gzhi'i ngos nas don gyi sdod lugs kyi dbang gis rgol phyir rgol gyi tshad ma ma 'khrul ba la chos can mthun snang du grub cing/ chos can de'i steng du rtags kyi tshul rnams 'grub tshul nges par byas nas bsgrub bya rtogs pa'i rjes dpag bskyed pa zhig rang rgyud kyi don yin la/ de ltar dgos pa 'thad par khas len pa'i dbu ma pa la dbu ma rang rgyud pa zhes zer ba yin no/ /de yang rang rgyud pa'i lugs la dbang shes gnod med rnams tha snyad du snang yul la ma 'khrul ba yin la/ de ltar ma 'khrul ba'i rgyu mtshan yang gnod med kyi shes pa rnams la gzugs sogs rang gi ngo bos grub par snang zhing gzugs sogs kyang rang gi ngo bos grub par zhal gyis bzhes pa nyid la thug go /'di la dgongs nas byang chub lam rim chen mo las/ rang rgyud kyi rtags rang gi lugs la zhal gyis bzhes pa'i rgyu mtshan yang tha snyad du rang gi ngo bos brub pa'i rang mtshan yod pa 'di yin pas rang rgyud kyi rtags rang lugs la 'jog mi 'jog ni dgag bya shin tu phra ba 'di la thug pa yin no; ;zhes gsungs so/ /des na bden med sgrub pa'i rtags kyi tshul gsum rang ngos nas grub par khas len pa'i dbu ma pa de dbu ma rang rgyud pa'i mtshan nyid du bya'o/ /gnyis pa dbye ba la/ mdo sde spyod pa'i dbu ma pa dang rnal 'byor spyod pa'i dbu ma pa gnyis @29a @#/ /su nges so/ /dang po la mdo sde spyod pa zhes zer ba'i rgyu mtshan ni/ dbang po'i shes pa rnams kyi dmigs rkyen ni rdul phra rab bsags pa'i phyi rol gyi don du bzhed pas tha snyad du mdo sde pa dang mthun pa'i dmigs rkyen bzhed pas ma de na ltar btags so/ /gnyis pa la rnal 'byor spyod pa zhes zer ba'i rgyu mtshan ni/ /slob dpon zhi ba 'tsho'i dbu ma rgyan gyi rang 'gral las/ gzhan dag sems pa ni/ rgyu dang 'bras bur gyur pa yang/ /shes pa 'ba' zhig kho na ste/ /rang gis grub pa gang yin pa/ /de ni shes par gnas pa yin/ zhes dang/ de ltar byas na stug po bkod pa dang dgongs pa nges par 'grel ba la sogs pa las 'byung ba thams cad dang mthun pa yin no/ /zhes gsungs pa ltar tha snyad du phyi rol don gyis stongs pa'i rnam par rig pa tsam gyi tshul dang mthun par 'dod pas na rnal 'byor spyod pa'i dbu ma pa zhes bya'o/ /de'i phyir legs bshad snying po las/ nges na da 'dra ba'i lugs kyang re re tsam byung mod kyang gzhung rgyas par brtsams nas tha snyad du phyi rol med pa'i tshul gyi dbu ma'i grub mtha' ni slob dpon zhi ba 'tshos srol phye bar slob dpon ye shes sde bzhed pa ltar legs so/ /zhes gsungs so/ /'di la kha cig /mdo sde spyod pa'i dbu ma pa'i sgra don de mi 'thad de/ stong thun chen mo las/ slob dpon legs ldan 'byed dang ye shes snying po gnyis ka yang tha snyad kyi rnam gzhag mdo sde pa dang mthun pa ma yin te/ rang rig tha snyad du yang khas mi len pa sogs chos mi thun pa du ma yod pa'i phyir dang/ phyogs gcig mthun pas mthun par 'jog na thams cad thams cad dang grub mtha' mthun @29b par thal ba'i phyir ro/ /zhes gsungs pa'i phyir/ zhes zer na skyon med de/ /de ni bod snga ma dag gis mdo sde pas don dam du gang 'dod dbu ma pa'i 'di dag gis kun rdzob tu 'dod pa'i sgo nas sgra bshad pa la gnod pa brjod pa'i sgo bstan pa tsam yin gyi/ spyir mdo sde spyod pa'i dbu ma pa'i sgra bshad tshul la mdo sde pa dang phyogs gcig mthun pa'i sgo nas sgra bshad du mi rung bar bstan pa ma yin pa'i phyir dang/ sgra bshad pa dang 'jug pa tsam la mtshan nyid thams cad tshang mi dgos pa du ma yod pa'i phyir dang/ legs ldan gyis mdo sde pa dang mthun pa'i dbang po dang yul gyi 'jog tshul mdzad pa mi 'thad par dpal ldan zla bas bzhi brgya pa'i 'grel pa las bshad pa'i phyir dang/ legs ldan 'byed kyis de ltar bzhed tshul dbu ma snying po'i 'grel pa las gsal bar bshad pa'i phyir dang/ lam rim chen mo dang stong thun chen mo gnyis kyi legs ldan gyi bzhed pa 'chad pa'i skabs su yang de kho na ltar bshad pa'i phyir ro/ gsum pa 'dod tshul la gnyis/ mdo sde spyod pa'i dbu ma rang rgyud pa'i 'dod tshul dang/ rnal 'byor spyod pa'i dbu ma rang rgyud pa'i 'dod tshul lo/ /dang po la dngos por smra ba'i lugs 'gog pa'i tshul dang/ rang gi lugs bzhag pa gnyis/ dang po la yang gnyis/ dngos smra ba'i mtshan nyid gsum gyi rnam gzhag bshad pa mi 'thad par bstan pa dang/ phyi don med par bshad pa mi 'thad par bstan pa'o/ /dang po ni/ dbu ma snying po las/ 'dir bshad de bzhin gshegs bka' kun/ /kho bo cag gi tshad ma yin/ tshad ma yid chos lung yin phyir/ /bzang po dag ni sgrub par bzhed/ /lung gzhan dag @30a @#/ /gi the tshom dang/ lag pa'i blo can gzhan mi byed/ /de phyir de dag sgrub gzhug phyir/ /rigs pa ldan pa'i tshul bcal bya/ /zhes rnam rig pa rnams kyis dbu ma pa la smras pa'i nyes pa rnams tshad ma dang bral ba dang/ rang gi lugs ni tshad ma dang ldan pa'i phyir sems tsam pas dbu ma pa la rgal bar byas pa mtha' dag sun dbyung bar bya ba yin par bshad cing/ sun dbyung tshul yang de nyid las/ gnyis med pa yi dngos po ni/ zhes sogs gnyis stong gi shes pa bden grub 'gag pa dang/ phyi rol gyi don bkag pa mi 'thad pa dang/ kun brtags yod pa ma yin te/ zhes sogs kyis mtshan nyid gsum gyi rnam gzhag dgag par mdzad do/ /de la sems tsam pa khyod kyis/ /kun brtags pa'i ngo bo nyid chos can/ /mtshan nyid ngo bo nyid med pa yin te/ /kun nas sgro btags pa'i ngo bo nyid yin pa'i phyir/ dper na thag pa la sbrul du btags pa bzhin/ zhes zer ba mi 'thad de/ kun nas sgro btags pa yin pa'i phyir zhes pa'i gtan tshigs kyis thag pa la btags pa'i sbrul bzhin du kun brtags kyi ngo bo nyid kyi rang gi mtshan nyid gtan nas med pa zhig gam/ 'on te sgra dang rtog pas brjod par bya ba yin pa'i phyir/ thag pa'i ngo bo bzhin du kun brtags pa'i ngo bo nyid kyi mtshan nyid yod par 'gyur ba ma nges pa'i phyir yin/ gal te thag pa yang rang gi mtshan nyid kyis med do zhe na/ de la 'jig rten grags pas gnod par 'gyur te/ 'jig rten na chu dang/ thag pa dang/ mi'i lag pa'i rtsol bas bkal ba'i thag pa'i ngo bo nyid yod par grags pa'i @30b phyir ro/ /zhes 'chad par dbu ma snying po las/ kun brtags yod pa ma yin te/ /btags phyir sbrul dang 'drar mi 'dod/ /thag pa'i dngos por ma nges phyir/ /yang na grags pas gnod par 'gyur/ /zhes gsungs so/ /gzhan yang dpe'i skabs su log par btags pa'i cha sbrul dang/ 'dogs pa'i gzhi rang gi mtshan nyid kyis yod pa'i thig pa gnyis yod pa bzhin du don gyi gnas skabs su yang 'dogs byed 'khrul pa'i cha dang/ 'dogs pa'i gzhi kun brtags pa'i ngo bo nyid ma 'khrul ba'i cha gnyis yod dgos par 'gyur te/ khyed kyis thag pa la sbrul du btags pa bzhan zhes bkod pa'i dpe de la 'dogs pa'i gzhi dang btags pa la 'khrul ma 'khrul gyi cha shas gnyis yod pas dpe don mtshungs dgos pa'i phyir ro/ /de ni 'dod mi nus te/ khyod kyis kun brtags pa'i ngo bo nyid rang gi mtshan nyid kyis med par 'dod pa'i phyir dang/ kun brtags pa'i ngo bo nyid rang gi mtshan nyid kyis med na med dgos pa'i phyir ro/ /skyon de 'jug pa yang ngo bo dang khyad par du btags pa'i don de mtshan nyid ngo bo nyid med pa yin pa mi 'thad de/ ngo bo dang khyad par du btags pa'i yul tha snyad du mtshan nyid ngo bo nyid kyis yod pa'i phyir/ zhes dgongs pa ste de nyid las/ de ni 'khrul min gang gi phyir/ /du ma'i cha de mthong phyir ro/ /zhes gsungs so/ /gzhan yang khyod kyis kun brtags pa'i ngo bo thams cad du 'khrul par bshad pa mi 'thad de/ de lta na kun rdzob kyi chos la skur ba 'debs par 'gyur ba'i phyir dang/ kun rdzob med na so so rang gis rig par bya ba don dam pa'i ngo bo yang rtogs par mi nus pa'i phyir/ de nyid las/ khyod ni dngos la skur 'debs @31a @#/ /'gyur/ /rnam pa kun du yul 'gog phyir/ /zhes dang rtog ge 'bar ba las/ gal te sgra ji bzhin gyi ngo bo nyid ma yin pa'i dngos po so so rang gis rig par bya ba de lta bu cung zhig yod do zhe na/ de lta na yang kun rdzob kyi bden pa rnam par bzhag pa dang 'gal te/ mdo sde las/ kun rdzob kyi chos med par don dam pa rtogs par mi nus so zhes gsungs pa'i phyir ro/ /zhes gsungs so/ /gzhan yang sems tsam pa na re phyi rol gyi yul med kyang ming dang brda la brten nas don gyi mtshan mar snang ba 'byung bar 'gyur la/ de las kun tu rtog pa mtha' dag skye bar 'gyur bas kun brtags ni mtshan nyid ngo bo nyid med pa nyid du 'thad do zhe na/ de yang mi 'thad de/ ming dang yi ge dang nges pa'i tshig dang brda mi shes pa'i dud 'gro bya dang ri {dwags} la sogs pa la yang nyon mongs chen po skye ba mthong ba'i phyir/ des na nyon mongs de dag skye bar 'gyur ba'i yul gzugs la sogs pa'i phyi rol gyi don ni yod pa kho na'o/ zhes 'chad par de nyid las/ ming med par yang kun nyon mongs/ ming la don 'jug las byung min/ /smra mi shes pa'i dud 'gro yang/ /nyon mongs skye ba mthong phyir ro/ /zhes dang phyi 'grel las/ gang dag la brten nas nyon mongs pa skye bar 'gyur ba'i gzugs la sogs pa phyi rol gyi yul dag yod pa kho nar shes par bya'o/ /zhes gsungs so/ /gzhan yang sems tsam pa khyod kyis gzhan dbang rang gi mtshan nyid kyis yod par kho bo cag la bsgrub pa ni don med de/ kun rdzob tu sgrub na grub zin bsgrub par 'gyur ba'i phyir te/ kho bo cag gis kyang gzhan @031b dbang kun rdzob tu rang gi mtshan nyid kyis grub par 'dod pa'i phyir ro/ /don dam par rang gi mtshan nyid kyis yod par sgrub na ni de bas kyang mi 'thad do/ /gzhan dbang don dam par yod par sgrub pa'i rtags chos gnyis ldan gyi dpe mi rnyed pa'i phyir ro/ /khyod kyis/ dngos rnams ngo bo nyid med de/ mngon brjod bdag nyid stong ba'i phyir/ zhes pa'i gtan tshigs la 'gal ba'i skyon nyid du yang 'gyur ba'i phyir te/ rtags mngon par brjod pa'i bdag nyid kyis stong pa nyid kyis chos can gyi dngos po don dam par yod pa bsal ba'i phyir ro/ /zhes 'chad pa la de nyid las/ gzhan dbang yod pa nyid smras pa/ kun rdzob tu ni grub pa bsgrubs/ gal te don dam dpe med cing/ /gtan tshigs 'gal ba nyid du 'gyur/ zhes dang/ de'i phyi 'grel las kyang gsal bar bshad de/ mang gis dogs nas ma bris so/ /yang khyod kyis gnyis kyis stongs pa'i de kho na nyid yongs grub don dam par yod par 'dod pa ni mi 'thad de/ yongs su grub pa'i ngo bo nyid don dam par yod na don dam par yod pa'i phyir sgro 'dogs pa'i mtha' las grol bar mi nus la/ gal te don dam par med pa'i ngo bo nyid don dam par yod na skur ba 'debs pa'i mtha' las mi grol ba'i phyir ro/ /gzhan yang/ yongs grub don dam par grub na ji lta ba gzigs pa'i ye shes dmigs pa dang bcas par thal ba dang/ yang dag par rdzogs pa'i byang chub mnyam pa nyid ma yin par thal ba'i skyon du 'gyur bar 'chad pa la de nyid las/ yod dang med pa'i dngos nyid kyi/ /ngo bo don dam nyid yin na/ /sgro 'dogs pa dang skur mtha' las/ / @032a @#/ /grol pa khyod la ji ltar yod/ /ston pa dmigs med mi 'gyur te/ /de bzhin nyid la dmigs pa'i phyir/ /byang chub mnyam nyid mi 'gyur te/ /de nyid rang snang tha dad phyir/ /zhes dang de'i phyi 'grel las/ yongs su grub pa'i ngo bo nyid kyi de bzhin nyid ces bya ba la dmigs pa lta yod na ston pa sangs rgyas bcom ldan 'das dmigs pa med pa nyid du mi 'gyur te/ de bzhin nyid la dmigs pa'i phyir ro/ /des na lung las/ sangs rgyas nam mkha'i mtshan nyid de/ nam mkha' la yang mtshan nyid med/ /mtshan gzhi mtshan nyid ngas grol ba/ /dmigs med khyad la phyag 'tshal lo/ /zhes gsungs pa la sogs pa dang 'gal lo/ /ston pa de'i byang chub kyang mnyam pa nyid du mi 'gyur te/ gang gi phyir zhe na/ yongs su grub pa'i ngo bo nyid ces bya ba'i de bzhin nyid gcig dang/ rang snang ba'i ye shes gnyis tha dad pa'i phyir te/ de ltar gnyis yod na ngo bo nyid gnyis mngon par rtogs pa de ji ltar mnyam pa nyid du 'gyur/ zhes so/ /byang chub mnyam nyid du mi 'gyur par thal ba'i skyon 'phen lugs de ni sems tsam pas yongs grub bden grub tu 'dod par ma zad/ de kho na nyid la gnyis snang nub pa'i sgo nas mnyam par bzhag pa'i gnas skabs su yang mnyam gzhag ye shes de nyid mngon sum du rtogs pa'i rang rig mngon sum mngon gyur du yod par 'dod pa la gnod pa ston pa'o/ /gzhan yang sems tsam pa khyod kyis/ yul dbang rnam par shes pa sna tshogs su snang ba rnams ni thog ma med pa @032b nas kun gzhi'i rnam par shes pa la rang rang gi nus pa bzhag pa kho na'i dbang gis grub par 'dod na/ de lta na de bzhin nyid la dmigs pa'i blo so so skye bo rnams kyi rgyud la skye bar 'gyur ba ni shin tu 'gal ba ste/ so so skye bo de dag gi rgyud la sngon nam yang de bzhin nyid la dmigs pa'i blo'i nus pa kun gzhi'i rnam par shes pa la bzhag pa med pa'i phyir ro/ /gal te nus pa de med bzhin du skye na ni khyod kyi lugs la de bzhin nyid la dmigs pa'i blo ni rgyu med pa nyid du 'gyur te/ nam mkha'i me tog snang ba'i blo bzhin no/ /zhes 'chad par dbu ma snying po las/ de bzhin nyid la dmigs pa'i blo/ /nus pa ma bzhag ga las 'byung/ /nam mkha'i me tog snang ba'i blo/ /nus pa ma bzhag mi rigs bzhin/ /zhes dang de'i phyi 'grel las/ 'di ltar gzugs kun gzhi'i rnam par shes pa la nus pa ma bzhag pa des phyis kyang 'jog par mi rigs te/ nam mkha'i me tog mthong ba'i blo skye bar mi rigs pa bzhin no/ /zhes gsungs te/ rigs pa 'di dag ni pha rol pos phyi rol gyi don med kyang nang gi kun gzhi'i steng gi nus pa'i dbang kho na las yul snang 'byung bar 'dod cing nus pa yang bden par grub par 'dod pas tha snyad tsam du yin na skyon med kyang bden par grub pa la nus pa lan cig ma bzhag pa phyis kyang 'jog tu med par rigs pas 'phul ba yin nam snyam ste/ rtog ge 'bar ba las/ gzhung tshan 'di dag gi gong du/ de ni rnam pa kun tu brjod pa med pa nyid kyang yin te/ ngo bo nyid stong pa'i phyir ro/ /de lta bu'i ngo bo nyid ni don dam pa yin par sbyar ro/ /zhes dang/ rtsa ba las kyang/ ngo bo don dam nyid @033a @#/ /yin na/ zhes pa las 'phros pa'i phyir ro/ /slob dpon legs ldan 'byed kyis sems tsam pa'i mtshan nyid gsum gyi rnam gzhag 'gog pa'i tshul dbu ma snying po rtsa 'grel las shin tu rgyas par gsungs pa 'di dag snga ma sus kyang gsal bar bshad pa mi snang la shing rta chen po'i rigs pa'i gnad shin tu phra ba zhig tu 'dug pas/ blo gros dang ldan pa rnams gzhung lugs de dag la gzigs pa'i rkyen du 'gyur ram snyam nas bdag gis blo gros chung dus dpogs tshong tsam bris pa yin pas rgyas par gzhung de dag nyid du gzigs par 'tshal lo/ /slob dpon 'dis rtsa she'i 'grel pa shes rab sgron ma las kyang sems tsam pa'i mtshan nyid gsum gyi rnam gzhag 'gog tshul mdor bsdus shig gsungs pa ni rje bdag nyid chen pos legs bshad snying por bka' drin du stsal ba ltar yin la de ni phyogs gzhan du 'chad par 'dod do/ /gnyis pa phyi don med par bshad pa mi 'thad par bstan pa la/ dbu ma snying po las/ gal te gzung bar snang 'dod pas/ gzugs blo yang dag ma yin na/ des na gtan tshigs 'khrul 'gyur zhing/ /dam bcas pa yang nyams par 'gyur/ zhes dang/ de'i snga 'grel las/ gzung ba dang 'dzin pa'i rnam par rtog pa dang bral ba'i blo gang yin pa ni yang dag par na don ji lta ba bzhin yin par 'dod kyi/ gzugs la sogs pa'i blo ni rnam par mi rtog pa yin du zin kyang yang dag pa nyid ma yin te/ gzung bar snang ba'i phyir/ zla ba gnyis snang ba mthong ba'i blo bzhin no zhe na/ zhes gsungs te/ 'di'i don la/ sems tsam pas bkod pa'i gtan tshigs ni/ sngon po rang las bdag nyid @033b tha dad par snang pa'i sngo 'dzin mngon sum chos can/ ji ltar snang ba lam 'khrul ba ma yin te/ yul gzhan du snang ba'i rnam par rig pa yin pa'i phyir/ dper na zla ba gnyis snang gi dbang shes bzhin zhes pa yin te/ rnam par mi rtog pa yin du zin kyang zhes pas chos can mngon sum gyi shes pa yin par grub cing/ yang dag pa ma yin te zhes pas snang ba la 'khrul pa bsgrub bya dang/ gzung bar snang ba'i phyir zhes pas gtan tshigs bstan pa yin pa'i phyir ro/ /de la skyon brjod pa ni/ de ni gtan tshigs yang dag ma yin te/ chos can gzugs kyi blo dang/ gtan tshigs gzung bar snang ba gnyis tha dad pa ma yin pa'i phyir te/ gtan tshigs kyi don grub pa na chos can gyi ngo bo log pa nyid du grub zin pa'i phyir ro/ /zhes pa ste/ phyi 'grel las/ 'di ltar gzugs kyi blo ni gzung bar snang ba nyid ma gtogs par logs shig na ngo bo nyid med pas gzung bar snang ba nyid du rjes su dpag pa yang dag pa bsal ba'i phyir/ chos can gyi ngo bo nyid log par grub pas 'gal lo/ /zhes gsungs so/ /gzhan yang phyi rol med par sems tsam du 'dod pa mi 'thad de/ khas blangs pa dang 'gal ba dang grags pas gnod pa'i phyir ro/ /zhes 'chad par dbu ma snying po las sems tsam du ni dmigs pa dang/ gzugs la sogs pa mi 'dzin na/ /khas blangs pa dang grags pa yis/ /dam bcas pa la gnod par 'gyur/ zhes gsungs so/ /khas blangs pa dang 'gal tshul ni mig dang gzugs rnams la brten nas mig gi rnam par shas pa 'byung ngo/ /zhes gsungs pa'i lung khas blangs pa dang 'gal ba'o/ /grags pas gnod pa ni/ 'jig rten @034a @#/ /sogs pa'i don med par de 'dzin pa'i mig la sogs pa'i shes pa mi skye bar grags pas gnod pa'o/ /yang sems tsam pa na re/ don med kyang rnam par shes pa skye ba yod de/ dper na rmi lam gyi shes pa bzhin/ zhes zer na yang mi 'thad de/ rmi lam na yang thog ma med pa nas gzung ba dang 'dzin pa'i bag chags kyis bsgos pa'i shes pa dang ldan pa'i mig gis gzugs mthong ba yin pas na/ rmi lam gyi shes pa de yang dmigs pa dang bcas pa yin te/ sngon mthong ba'i sngon po slar dran pa'i shes pa bzhin no/ /de'i phyir dpe la 'dra ba yod pa ma yin no/ /der ma zad gzugs sogs don gyi dngos po spangs pa'i phyir yul la skur pa btab pa yang yin no/ /zhes 'chad pa la de nyid las/ de ltar snang ba skyes pa'i phyir/ rmi lam gzugs sogs blo bzhin du/ /gzugs la sogs pa don med par/ /rnam par shes zhes byar mi rung/ /gang phyir rmi lam la sogs pa'i/ /rnam shes chos la dmigs pa'i phyir/ /de'i phyir dpe yang med pa dang/ /yul la skur pa 'debs par 'gyur// zhes gsungs so/ /de'i rmi lam gyi shes pa ni mig gi shes pa zhes ma gsungs par 'grel pa las shes pa dang ldan pa'i mig gis zhes gsungs pas rmi lam du dbang shes yod par bzhed pa ma yin gyi/ spyir rmi lam gyi gzugs mthong ba'i shes pa la dmigs pa yod par bshad pa yin no/ /yang sems tsam pa na re/ phyi don yod pa mi 'thad de/ rdul phra rab gcig pu yul du 'dod na yang mi 'thad/ rdul phra rab du ma 'dus pa yul du 'dod na'ang mi 'thad pa'i phyir/ dang po grub ste/ rdul phra rab gcig pu ni dbang @034b shes kyi yul ma yin te/ dbang shas kyi yul gyi dngos por mi snang ba'i phyir/ dper na dbang po gzugs can dang ba bzhin/ gnyis pa grub ste/ rdul phra rab du ma 'dus pa ni dbang shes kyi yul ma yin te/ rdzas su ma grub pa'i phyir/ dper na zla ba gnyis su snang ba bzhin no zhes zer/ de ltar yang de nyid las/ de la gzugs rdul gcig pu ni/ /gzugs blo'i spyod yul ma yin te/ /der snang nyid du mi 'gyur phyir/ /dbang gzugs spyod yul ma yin bzhin/ /phra rab gzugs ni du ma ste/ /sems kyi spyod yul yin mi 'dod/ /dzas su yod pa ma yin phyir/ /dper na zla ba gnyis bzhin no/ /zhes gsungs so/ /de'i lan ni/ khyod kyis rdul phra rab 'ba' zhig pa ste rigs mthun 'dus pa ma yin pa'i rdul phra rab yan gar ba dbang shes kyi yul ma yin par sgrub na ni grub zin sgrub pa yin te/ kho bo cag gi kyang de dbang shes kyi yul yin par mi 'dod pa'i phyir ro/ /zhes 'chad par de nyid las/ de la gal te pha rol po/ /bsags pa min pa'i gzugs sems kyi/ /spyod yul min par sgrub byed na/ /de ni grub pa nyid bsgrub 'gyur/ zhes so/ /gal te rdul phra rab rigs mthun bsags pa'i gzugs dbang shes kyi spyod yul ma yin par sgrub na ni rdzas su ma grub pa'i phyir zhes pa'i gtan tshigs kho bo cag la ma grub pa nyid du 'gyur te/ rdul phra rab rigs mthun gzhan dang gzhan phan tshun sbyar zhing bsags pa ni kho bo cag gis rdzas yod kyi dngos por khas blangs pa'i phyir ro/ /de ltar bsags pa'i yul de ni dbang po'i shes pa'i dmigs pa yin par 'dod de/ rang 'dzin pa'i shes pa rang gi rnam ldan du skyed par byed pa yin pa'i phyir/ @035a @#/ /zhes 'chad pa la de nyid las/ gzugs gzhan dag gi bsags pa ni/ der snang blo ni skye phyir ro/ /de ni dmigs nyid yin 'dod de/ /der snang blo yi rgyur 'gyur phyir/ /'dod chags bzhin te de yi phyir/ /khyod dam bcas la rjes dpag gnod// ces gsungs so/ /de'i gtan tshigs ni rang 'grel las/ rdul phra rab rigs mthun pa bsags pa'i gzugs de ni dmigs pa nyid yin par 'dod do/ ci'i phyir zhe na/ 'di ltar rdul phra rab bsags pa de ni bsags pa'i gzugs der snang ba'i blo'i rgyu'i dngos po nyid du 'gyur ba'i phyir te/ gang dang gang der snang ba'i blo'i rgyur gyur pa de dang de ni bsags pa la dmigs pa yin te/ dper na 'dod chags yul la chags pa'i mtshan nyid ni bud med kyi gzugs la sogs pa bsags pa nyid la dmigs par 'dod pa bzhin te/ de'i phyir khyod kyis bsags pa'i gzugs ni dmigs pa ma yin no/ /zhes dam bcas pa de la rjes su dpag pa 'dis gnod par 'gyur ro/ /zhes gsungs so/ /lung dang 'gal ba ni rnam par shes pa'i tshogs lnga'i gnas dang dmigs pa ni bsags pa yin no zhes gsungs pa'i lung dang 'gal ba yin no/ /gal te khyod kyis rdul phra rab 'dus pa dbang shes kyi yul ma yin par sgrub na ni kho bo cag la skyon du mi 'gyur te/ kho bo cag gis kyang rdul phra rab 'dus pa dbang shes kyi dmigs pa yin par mi 'dod pa'i phyir ro/ / zhes 'chad par de nyid las/ 'dus pa dam ni ma bcas pas/ /de 'gog pa ni gnod pa med/ ces gsungs so/ /'o na bsags pa dang 'dus pa gnyis kyi khyad par ci yin zhe na/ rdul phra rab rigs mthun zhing rten gcig pa'i dbang du byas pa'i tshogs @35b pa la bsags pa zhes zer te/ dper na bum pa lta bu rang gi rtsom gzhir gyur pa'i rigs mthun gyi rdul phra rab du ma 'dab 'byar ba'i tshul gyis bsags pa'o/ /dmag dang nags tshul dang 'phreng ba lta bu rdzas rigs mi mthun pa'i rdul phra rab rten gzhi tha dad pa du ma phyogs gcig tu tshogs pa la 'dus pa zhes bya'o/ /gzhan yang dmigs brtag las bshad pa'i dmigs rkyen 'gog pa dang/ sems sems byung rdzas gcig dang tha dad brtag tshul sogs mang du gsungs te 'dir ma spros so/ /slob dpon 'dis rang rig 'gog pa'i rigs pa ni/ sems tsam pa na re/ rnam par shes pa yul dang 'phrad pa na cha shas gnyis kyi bdag nyid du skye ste/ yul gzung ba'i rnam pa can du snang ba dang yul can 'dzin pa'i rnam pa can du snang ba'o/ /zhes zer ba mi 'thad de/ yul gyi rnam par snang ba las gzhan du yul can rang nyid kyi rnam pa snang ba med pa'i phyir ro/ /zhes 'chad par de nyid las/ yul du snang ba ma gtogs par/ sems kyi bdag nyid gzhan ci yod/ ces gsungs so/ /de la kho na re/ gzhan med pa ma grub ste/ shas pa rang nyid rang gi ngo bor gnas pa'i phyir dang yul gzhan gyi rnam pa can du skyes pa'i phyir te/ dper na shel gyi nor bu bzhin no/ /zhes zer ro/ /de'i don ni shel gyi gong bu sngon po la sogs pa'i yul dang nye bar bzhag pa na shel gyi rang gi ngo bo ni gsal ba yin la yul dang nye ba'i dbang gis sngon po la sogs pa'i rnam pa can du yang yod do/ /dpe de bzhin du rnam par shes pa la yang yul snang ba'i tshe na yul du snang ba gzung ba'i rnam pa dang/ rang du snang ba 'dzin pa'i rnam pa gnyis yod do zhes 'dod pa'o/ /de mi 'thad de/ dpe ni bsgrub par bya ba dang mi mtshungs pa'i phyir te/ @36a @#/ /shel gyi gong bu sngon po la sogs pa'i yul dang nye bar bzhag pa na yul gyi dbang gis rang gi ngo bo ma bsgribs pa'i gsal ba yongs su btang nas sngon po la sogs pa'i rnam pa can du gyur pa yin gyi shel gsal ba'i skad cig ma snga ma gang yin pa de nyid sngon po la sogs pa'i rnam pa can du gyur pa ma yin te/ de ni 'gags zin pa'i phyir ro/ /des na shel gsal ba'i skad cig ma snga ma de yul nye bar bzhag pa'i dbang gis 'gags nas de'i skad cig phyi ma sngon po'i rnam ldan du skyes pa la skad cig snga ma'i shel de nyid yin par sems pa ni blo 'khrul pa'o/ /zhes 'chad par de nyid las/ gzhan ltar skyes phyir de gnyis snang/ /shel dang 'dra bar mi 'dod de/ /nye bar bzhag las der skye ba/ /shel gyi skad cig min phyir ro/ /de 'gags gzhan ni skyes pa la/ /de yi blo ni 'khrul par 'dod/ /ces gsungs so/ /gzhan yang gzung ba dang 'dzin pa'i rnam pa gnyis med de/ sngon po sogs kyi yul nye ba dang bral ba'i gnas skabs kyi shel lta bu'i shes pa rang snang ba'i bdag nyid can gyi gsal ba yan gar ba ni nam yang gzung du med pa'i phyir ro/ /gzhan yang shel gyi gong bu sngon po la sogs pa'i tshon dang nye bar bzhag pa na sngon po'i rnam pa can du snang bar rung yang shel nyid sngon po la sogs pa'i tshon gyi ngo bor 'gyur pa dang/ tshon nyid shel gyi ngo bor 'gyur ba gang yang ma yin te/ gzhan du na shel gyi gong bu tshon yin pa'am tshen yang shel gyi gong bu yin par thal bar 'gyur pa'i phyir ro/ /de bzhin du rnam par shes pa yang sa la sogs ba'i gzugs dang nye ba na rnam par shes pa gzugs kyi rnam pa can du skye ba yin @36b gyi; ;shes pa nyid gzugs kyi bdag nyid du 'gyur pa 'am gzugs nyid shes pa'i bdag nyid du 'gyur ba gnyis ka ma yin te/ gzhan du na sa la sogs pa yang sems dang bcas par 'gyur ba'am yang na sems kyang sa la sogs pa bzhin du sems med par thal bar 'gyur ba'i phyir ro/ /zhes pa rnams rtog ge 'bar ba las gsungs te/ khungs rnams mang gis dogs nas ma bris so/ /de'i 'og tu lhan cig dmigs nges kyi rtags 'gog tshul dang/ sems tsam pa'i tshad 'bras kyi rnam gzhag 'gog tshul rnams gsungs te/ rgyas par der blta bar bya'o/ /yang sems tsam pa na re/ khyod kyis sems tsam pa'i tshul 'gog pa mi 'thad de/ bcom ldan 'das kyi lung las khams gsum po 'di ni sems tsam mo zhes gsungs pa'i phyir ro zhe na/ skyon med de/ lung de'i don ni gzhan mu stegs byed dag gis btags pa ltar gyi rnam par shes pa las gzhan pa'i byed pa po dang za ba po yod pa 'gog pa'i phyir de ltar gsungs pa yin gyi/ phyi rol gyi don 'gog pa'i phyir de ltar gsungs pa ma yin pa'i phyir ro/ /de ltar yang sa bcu pa'i mdo las/ byang chub sems dpa' sa drug pa la byang chub sems dpa' rten cing 'brel bar 'byung ba lugs su 'byung ba dang lugs su ma yin pa la rnam par blta ba 'di snyam du sems te/ ma rig pa la sogs pa yan lag bcu gnyis las sdug bsngal gyi phung po 'ba' zhig pa byed pa po dang tshor ba po dang bral ba 'di 'byung zhing sdug bsngal gyi shing ljon pa mngon par 'grub par 'gyur ro snyam du de ltar nges pas/ kye rgyal ba'i sras dag 'di lta ste/ khams gsum po sems tsam ste sems kyis mngon par 'du byas pa dang sems kyis bris ba @37a @#/ /yin gyi/ sems las gzhan pa'i byed pa po dang za ba po ni 'ga' yang med do/ /zhes gsungs so/ /des na lung de'i don phyi rol gyi yul 'gog pa ma yin no/ /yang sems tsam pa na re/ phyi rol don gyis stongs pa ni mdo'i dgongs pa yin te/ sher phyin byams zhus kyi le'u las/ de la chos nyid kyi gzugs gang zhe na/ kun brtags pa'i gzugs des rnam par btags pa'i gzugs de la rtag tu ngo bo nyid med pa nyid dang chos bdag med pa nyid dang yang dag pa'i mtha' la sogs pa gang yin pa ste/ de la rdzes su yod pa yang ma yin la rdzes su med pa yang ma yin te/ rnam par btags pa'i don gyis stong ba nyid dang rnam par shes pa yod pa'i phyir ro/ /zhes gsungs pa'i phyir ro zhes zer na/ lung de'i don ni sgro btags pa ltar gyi don gyis stongs pa snang ba'i rnam par shes pa bsgrubs pa yin gyi don med pa'i rnam par shes pa bsgrubs pa min pa'i phyir te/ de bzhin gshegs pa'i so so rang gis rig par bya ba'i chos nyid kyi gzugs kyi don yod pa'i phyir/ des na sgro btags pa ma yin pa'i don mi 'gog pas rnam pa thams cad du rnam par shes pa rang las rdzas tha dad pa'i don gyis stongs pa ma yin no zhes 'chad par/ dbu ma snying po las/ gal te rnam btags don stong pas/ rnam par shes pa sgrub byed na/ btags pa ma yin don yod phyir/ /yul med par ni mi 'gyur ro/ /zhes gsungs so/ /des na de'i don gong du bshad pa ltar bya yi/ /so so rang gis rig pa'i chos nyid kyi gzugs kyi don bden par yod na sgro ma btags pa'i dngos po'i don yod pa'i phyir/ zhes 'chad pa ni gzhung gi dgongs par mi sems te/ @37b slob dpon 'dis phyi rol gyi don bzhed kyi don bden pa ba mi bzhed pa'i phyir dang/ rang 'grel las/ chos nyid kyi gzugs kyi don yod pa'i phyir zhes pa yang/ shes pa las rdzas tha dad pa'i yul yod par sgrub pa'i phyir yin gyi/ chos nyid phyi don du bsgrub pa dang/ de bden par bzhed pa gang yang ma yin pa'i phyir ro/ /rang 'grel las/ sgra ji bzhin gyi ngo bo nyid ma yin pa'i dngos po gang yin pa de yad pas/ zhes gsungs pa yang sgro btags pa ltar gyi ngo bos stongs pa'i yul gyi do yod pa la bya yi/ sems tsam pas 'dod pa ltar gyi brjod du med pa'i dngos po la mi gzung ngo/ /gnyis pa rang gi lugs bzhag pa la bzhi/ /rtags kyi dgag bya ngos bzung ba dang/ /de 'gog pa'i rigs pa bshad pa dang/ /gtan la phab pa'i bden gnyis kyi rnam gzhag bshad pa dang/ lam dang 'bras bu'i rnam gzhag cung zad bshad pa'o/ /dang po ni/ dbu ma snying po las/ 'dir ni sa la sogs pa dag don dam par na 'byung ba yi/ zhes gsungs pa'i 'grel bar/ don zhes bya ba ni shes par bya ba yin pa'i phyir don te/ /brtag par bya ba dang go bar bya ba zhes bya ba'i tha tshig go /dam pa zhes bya ba ni mchog ces bya ba'i tshig gi sgra yin no/ /don dam pa zhes bsdu ba ni de don yang yin la dam pa yang yin pas don dam pa'o/ /yang na dam pa'i don te/ rnam par mi rtog pa'i ye shes dam pa'i don yin pas dam pa'i don to/ /yang na don dam pa dang mthun pa ste/ don dam pa rtogs pa dang rjes su mthun pa'i shes rab la don dam pa de yod pas don dam pa dang mthun pa'o/ /zhes gsungs shing de yang don dam par 'byung ba'i ngo bo nyid ma yin te/ zhes pa'i don dam pa de gang @38a @#/ /la byed ces pa'i lan du don dam pa 'jog tshul gsum gsungs pa yin no/ /de las dang po ni/ don zhes bya ba ni zhes pa nas dam pa'ang yin pas don dam pa'o zhes pa'i bar te/ don dang dam pa gnyis ka yul la sbyar nas bshad pa'o/ / gnyis pa ni/ yang na dam pa'i don te zhes sogs te/ dam pa ni zag med rnam par mi rtog pa'i ye shes dang/ don de de'i yul la byas pa ste/ don dang dam pa gnyis yul yul can so sor sbyar ba'o/ /gsum pa ni/ yang na don dam pa dang mthun pa zhes sogs te/ de kho na nyed la tshul bzhin du dpyod pa'i thos bsam gyi shes rab yan chad de kho na nyid mngon sum du rtogs pa dang rjes su mthun pa'i shes rab la don dam par byas pa'o/ /'di ni don dang dam pa gnyis ka yul can la sbyar ba'o/ /'o na skabs 'di'i 'gog rgyu'i don dam pa de gang la byed ce na/ de ni rtog ge 'bar ba las don dam pa ni rnam pa gnyis te/ de la gcig ni mngon par 'du byed pa med par 'jug pa'i 'jig rten las 'das pa zag pa med pa spros pa med pa'o/ /gnyis pa ni mngon par 'du byed pa dang bcas par 'jug pa bsod nams dang ye shes kyi tshogs kyi rjes su mthun pa dag pa 'jig rten pa'i ye shes zhes bya ba spros pa dang bcas pa ste/ 'dir de dam bca' ba'i khyad par nyid du bzung bas nyes pa med do/ /zhes gsungs so/ /des na skabs 'dir sngar bshad pa'i don dam pa gsum pa mthun pa'i don dam rigs shes rjes dpag gi dor yod pa la don dam du yod pa dang de'i ngor med pa la don dam du med par bya'o/ /des na myu gu bden par grub na de kho na nyid dbyong ba'i rigs shes de'i ngor grub dgos te/ myu gu bden par @38b grub na de nyid myu gu'i gnas lugs su grub dgos pa'i phyir dang/ rigs shes de nyid gnas lugs 'jal byed kyi blo yin pa'i phyir/ /gal te de lta na myu gu'i cho nyid do dam du grub par thal te/ rigs shes kyi ngo na yod pa'i phyir dang/ myu gu'i gnas lugs su grub pa'i phyir ro zhen skyon med de/ bden par grub na gnas lugs su grub dgos pa dang rigs shes kyi ngor grub dgos kyang gnas lugs su grub pa dang rigs shes kyi ngor grub na bden par grub mi dgos pa'i phyir ro/ /de'i rgyu mtshan yang myu gu bden par grub na rags shes kyis myu gu bden grub tu rnyed dgos te rigs shes nyid de yod med dpyod byed yin pa'i phyir ro/ /myu gu bden par med pa rigs shes kyis rnyed kyang de ltar rnyed pa de myu gu bden par yod med dpyad nas bden par med par rnyed pa yin gyi myu gu'i bden med bden par yod med dpyad nas de yod par rnyed pa ma yin pa'i phyir ro/ /'di ni lugs 'di'i dka' ba'i gnas te/ 'de'i khyad par legs par ma phyed pa la brten nas sngon dus kyi mkhas pa chen po rdog ? lotstsha ba yab sras kyis kyang don dam bden pa shes bya ma yin par bzhed pa dang/ rig pa'i dbang phyug cha pa chos kyi sengges kyang bden med bden grub tu bzhed pa sogs 'khrul pa du ma byung bar rje bdag nyid chen po gsung ngo/ /legs bshad snying po dang 'jug pa'i rnam bshad chen mor sngar bshad pa de las gzhan legs ldan gya gzhung gi skor dang ye shes snying po'i bden gnyis kyi skor dang dbu ma rgyan rang 'grel dang bcas pa las kyang bya ngas 'dzin gsal bar ma bshad la/ dbu ma snang ba las kun rdzob tu yod tshul bshad dpa'i bzlog phyogs kyi yod pa ni @39a @#/ /bden par yod tshul yin pas de ltar bshad dgos so zhes gsungs pa la gzhan phyogs pa la cig legs ldan sogs kyi gzhung las don dam du grub tshul gang yang ma bstan par dgongs so snyam nas rje bla ma'i gsung de mi 'thad do/ bden gnyis las/ blo la snang ba 'di kho na/ /kun rdzob gzhan ni cig shos so/ /zhes gsungs pas kun rdzob tu grub tshad dang don dam du grub tshad gnyis ka bstan pa'i phyir zhes zer la/ rang re'i mkhas pa snga ma 'ga' zhig gis kyang de bden par snang zhes zer ba ni rje bla ma'i gsung dang gzhung gi don gnyis ka la legs par ma brtags pa'i ca cor zad do/ /de 'gog pa la mkhas grub chen po 'jam dbyangs bzhad pa'i rdo rjes bden gnyis kyi lung de'i kun rdzob ces pa yan chad kyi kun rdzob tu grub pa ni ba lang rdzi yan chad kyi blo la snang ba 'di kho na yin la zhes bshad cing/ lhag mas don dam du grub tshad pa lang rdzi sogs la mi snang bar bstan pa yin te/ zur snga ma 'grel pa 'grel bshad dang bcas pas grub la des cig shos mi snang ba la byed par rigs pas grub pa'i phyir/ des na khyed cag ltar na ba lang rdzi sogs grol zin par thal/ de dag la chos gang yan bden grub tu mi snang ba'i phyir/ de dag gis dbu ma'i lta ba rnyed zin par thal/ de dag la chos thams cad tha snyad du grub par snang ba'i phyir/ des na gzhung des kun rdzob dang don dam du grub tshad ston pa min gyi bden gnyis ngos 'dzin gyi gzhung yin no zhes gsung ngo/ /de ni gzhung chen mo la nang byan tshud pa'i mkhas pa chen po'i gsung yin pas shin tu legs mong/ da dung 'di ltar bshad na legs sam snyam ste/ spyir dgag @39b bya la don dam gyi khyad par spyar ba'i don dam la gnyis yod de/ thos bsam sgom gsum gyi rigs shes la don dam dang des sngar bshad pa ltar grub pa la don dam du grub par byas pa gcig dang/ blo gnod med kyi dbang gis bzhag pa min pa'i don gyi sdod lugs su yod pa la don dam du yod par bzhag pa gnyis so/ /don dam dpyod pa'i rigs shes kyi 'gal zla mi mthun phyogs su gyur pa'i lhan skyes kyi bden 'dzin gyis bden par bzung tshul ni phyi ma ltar yin no/ /de'i phyir bden med sgrub pa'i rtags kyi dgag bya'i gtso bo ni phyi ma'i bden grub nyid yin pas lugs 'di'i lta ba gtan la 'bebs pa rnams kyis kyang thog mar rang rgyud kyi bden 'dzin ngos gzung ba'i tshe phyi ma'i bden grub tu 'dzin tshul ngos 'dzin dgos pa yin no/ /de'i phyir snga ma'i don dam du grub tshul dbu ma snying po rtsa 'grel dang dbu ma rgyan rtsa 'grel sogs las rgyas par bshad pa rje bdag nyid chen po rang gis gsal bar bshad pas/ don dam par yod tshul de ni dbu ma snang ba ma gtogs pa'i rang rgyud pa'i gzhung khungs thub gzhan las gsal bar ma bshad par rje bla mas bzhed pa'i go skabs ga la yod/ 'jog tshul gnyis pa'i dbang du byas pa'i don da du yod tshul gsal bar bshad pa ni gzhung de dag tu yod na khyed cag gis ston cig dang kho bos stongs gdab par bya'o/ /gal te khyed cag gis drangs pa'i bden gnyis kyi lung nges 'jog tshul gnyis pa'i dbang du byas pa'i don dam du grub tshul bstan pa yin no zhes zer na/ tshig gang gis bstan pa ston cig gal te gzhan ni cig shos so/ /zhes pas bstan pa yin no zhes zer na/ de ltar na tshig des bshad pa'i don @40a @#/ /dam du grub tshul ltar grub pa'i chos cig mi srid par thal te/ 'jog tshul gnyis pa'i don dam ni bden grub la bya dgos shing bden grub yod par 'dod pa'i dbu ma pa mi srid pa'i phyir/ 'dod na/ don dam bden pa mi srid par thal/ de gzhan ni cig shos so zhes pa'i gzhung gi skabs nas bstan pa'i don dam pa der yod pa'i phyir ro/ /ma grub na/ 'grel bshad las gzhan ni zhes bya ba ni ji ltar snang ba las gzhan pa'o/ /de'i phyir 'dis ni rigs pa ji lta ba bzhin nyid ni don dam pa'i bden pa'o zhes ston to/ /zhes gsungs pa'i don ci yin ston cig gal te bden grub don dam bden par 'dod na ni dbu ma pa'i dri mi bro bar zad do/ /des na bden gnyis kyi lung gi don ni ji ltar snang ba 'di kho na/ kun rdzob ces pas tha snyad pa'i tshad ma la yul gyi gnas tshod dang mthun par ji ltar snang zhing mthong ba 'di kha na kun rdzob bden zhes phyed snga mas mchan nyed dang phyed phyi mas mtshon bya ston pa yin zhing/ de yang snang ba'i don mthong ba la byas nas ba lang rdzi yan chad grub mthas blo bsgyur ma bsgyur gnyis ka la yul steng du ji ltar gnas pa mthong ba de ltar kun rdzob bden par gnas par bshad pa yin gyi yang dag par grub pa'i don la kun rdzob tu bshad pa ma yin la/ kho na'i sgras kyang rigs shes kyis rnyed pa nyid gcod pa yin no/ /gzhan ni cig shos so zhes pas de las gzhan rigs shes kyis rnyed pa'am grub pa'i don ni cig shos don dam bden pa'i mtshan nyid yin zhes pa ste/ gzhan ni zhes pas mtshan nyid dang cig shos so zhes pas mtshon bya bstan pa yin no/ /de dag la dgongs @40b nas rgyal cheb rjes de'i phyi bgrel du/ de yang tha snyad pa'i tshad mas rnyed pa'i don kun rdzob bden par 'jog pa bzhin du rigs shes kyis rnyed pa'i don kho na don dam bden pa yin no zhes pa'o zhos gsungs so/ /rang 'grel 'grel bshad dang bcas pa las kyang don dam bden par gsal bar bshad pas gzhung 'dis rtags kyi dgag bya'i bden tshad bstan par shes rig dan ldan pa su zhig smra/ des na rje bla ma'i gsung la skyon gyi go skabs ga la yong/ tshul 'di ltar bshad na gzhung gi dgongs par 'gro tshabs shin tu che ste/ rje bla ma'i dgongs pa ni don dam pa 'jog tshul gnyis las lta ba gtan la 'bebs pa la phyi ma nges pa shin tu gal che ba dang phyi ma'i don dam du grub tshul dbu ma snang ba ma gtogs pa'i gzhung gzhan la gsal bar mi 'byung ba la dgongs nas de ltar gsungs pa yin pa'i phyir dang/ bden gnyis kyi lung don yang bshad ma thag pa las gzhan du drang du med pa'i phyir ro/ /'o na lhan skyes kyis kyi bden 'dzin gyis bden par 'dzin tshul dang de'i dbang du byas pa'i brtag pa mtha' bzung gi bden tshad ji ltar yin zhe na/ 'di ni rnal 'byor spyod pa'i dbu ma rang rgyud pa'i skabs su bshad par bya'o/ /de ltar na rigs shes la don dam du byas pa'i don dam dang de'i ngor grub pa gnyis ka yod la/ 'jog tshul phyi ma'i don dam dang der yod pa gnyis ka mi sing ngo/ /khyad par de dag ma phyed na sems tsam pas 'gyur med yongs grub don dam pa yin zhing gang yin sa der don dam par grub par 'dod pa ltar lugs 'dir yang bden stong don dam pa yin na don dam par grub dgos la don dam par med na don dam pa ma yin dgos pa'i log @41a @#/ /rtog rnams 'byung la/ 'di legs par shes na gshis lugs la dang/ don dam du med zer ba dang/ yang chos nyid yod par 'dod cing de nyid gshis lugs dang don dam yin par smra ba mi 'gal ba'i gnad rnams shes par 'gyur ro/ /gnyis pa de 'gog pa'i rigs pa bshad pa ni/ spyir 'di pa'i lugs la yang gtan tshigs chen po lnga la sogs pa bzhed pa yin te/ rtog ge 'bar bar yang phal che ba gsungs pa'i phyir dang/ bden gnyis rtsa 'grel las kyang mu bzhi skye 'gog nyid rtsal du bton pa'i phyir ro/ /'on kyang rtags dang mthun dpe sgrub sla ba la dgongs nas rgyu mtshan mtshungs pa mgo snyoms kyi rigs pa la gtso bor mdzad do/ /de yang dbu ma snying po rtsa 'grel du gzhi phung po lnga dang skye mched bcu gnyis dang khams bco brgyad rnams su bsdus nas de dag las kyang rags pa dang phra ba'i rim pas dang por gzugs phung dang de las kyang 'byung ba rnams la brtag par mdzad do/ /de yang dbu ma snying po las/ 'dir ni sa la sogs pa dag /don dam par na 'byung ba yi/ /ngo bo nyid min byas phyir dang/ /rgyu ldan sogs phyir shes pa bzhin/ zhes gsungs so/ /sa la sogs pa dag ces pas ni chos can gyi khyad par 'dzin cing sogs kyi sgras chu dang me dang rlung rnams rtsod gzhir 'dzin no/ /don dam par 'byung ba'i ngo bo nyid ma yin zhes pas ni chos kyi khyad par ston no/ /de yang don dam par zhes pas kun rdzob pa'i ngo bo mi 'gog cing ji ltar snang ba bzhin gyi blo'i dbang gis bzhag pa ma yin pa'i don gyi sdod lugs kyis yod pa 'gog par ston no/ /ngo bo nyid ma yin zhes pas 'di'i chos su @41b dgag sgrub gnyis las dgag pa dang de las kyang med dgag kho na 'dzin par ston te/ 'grel pa las/ 'dir ma yin zhes bya ba'i dgag pa 'di ni med par dgag pa'i don du gzung gi ma yin par dgag pa'i don du ni mi gzung ngo/ /zhes gsungs so/ /chos dang chos can bsdus pa ni phyogs yin no/ /byas phyir dang zhes pas ni gtan tshigs bstan pa yin no/ /de la phyogs kyi skyon bsal ba ni/ gzhan dag na re/ khyod kyis sa la sogs pa 'byung ba'i ngo bo nyid ma yin par bsgrub pa mi 'thad de/ khas blangs dang 'gal mngon sum dang 'gal/ grags pa dang 'gal ba'i phyir/ dang po grub ste/ ston pa'i lung las 'di skad ces/ kye bram ze thams cad ces bya ba ni phung po lnga dang skye mched bcu gnyis dang khams bco brgyad po dag go /zhes dang/ de bzhin du gzugs kyi mtshan nyid ni gzugs su rung pa'o/ /zhes sogs phung sogs kyi chos dang de dag gi mtshan nyid kyang gsungs la/ khyod kyis kyang lung de tshad mar khas blangs bzhin du chos de dag 'gog pa'i phyir ro/ /gnyis pa grub ste/ yul gyi rang gi mtshan nyid nges pa la 'jug pa na dbang po mngon sum yin par grags la mthong ba las lhag pa'i tshad ma gzhan med pa'i phyir dang/ khyod rang nyid kyi mig gis kyang 'byung ba'i dbyibs dang gzugs sogs mthong zhing 'dzin pa la sogs pa'i bya ba yang byed bzhin du de 'gog pa yang mngon sum la bsnyon par 'gyur ba'i phyir/ gsum pa grub ste/ sa la sogs pa dang de dag gi sra ba la sogs pa'i ngo bo nyid ni gdol pa yan chad 'jig rten pa thams cad la grags pa'i phyir zhe na/ skyon gsum ga med do/ kho bo cag gis don dam par zhes @42a @#/ /ba dam bcas pa'i khyad par la sbyar ba'i phyir ro/ /de yang skyon dang po med de/ bcom ldan 'das kyis chos rnams kyi ngo bo nyid dang mtshan nyid rnam par bzhag pa mdzad pa ni kun rdzob tu yin la don dam par ni ngo bo nyid med par gsungs pa'i phyir ro/ /sher phyin las/ kau shi ka chos thams cad ni ngo bo nyid kyis stong ste/ chos thams cad ngo bo nyid kyis stong ba gang yin pa de ni dngos po med pa'o/ /dngos po med pa gang yin pa de ni shes rab kyi pha rol tu phyin pa'o/ /zhes gsungs so/ /skyon gnyis pa yang med de/ dbang po'i shes pa ni rang bzhin 'tshol ba la blun pa yin pa'i phyir dang/ mthong ba la sogs pa'i nus pa med bzhin du yang rab rib can la skra shad la sogs pa snang ba yod pa'i phyir ro/ /skyon gsum pa yang med de/ 'jig rten pa ni rmongs pa'i dbang du gyur pas rang bzhin 'tshol ba'i nus pa med la 'dir ni don dam pa dpyod pa'i skabs yin pa'i phyir ro/ /byas pa'i phyir zhes pa'i gtan tshigs kyi don byas pa zhes pa ni rgyu dang rkyen gyis mngon par bsgrubs pa'o/ /mthun phyogs la rjes su 'gro ba'i sbyor ba'i ngag ni/ gang dang gang byas pa nyid yin pa de dang de ni don dam par 'byung ba'i ngo bo nyid ma yin te/ dper na shes pa bzhin zhes pa'o/ /'dir mi mthun phyogs la med pa nyid du sgrub pa'i dpe dang gtan tshigs ni ma bstan te/ de sgrub kyi mi mthun phyogs su gyur pa dngos po gang la ngo bo nyid yod pa ni rdul phran tsam yang med pa'i phyir/ rgyu ldan sogs phyir zhes pas ni gtan tshigs kyi rnam grangs gzhan bstan pa yin te/ rgyu dang ldan pa nyid dang dngos po nyid dang @42b shes bya nyid dang brjod par bya ba nyid la sogs pa'o/ /'dir gal che ba ni don dam par yod na ni ji ltar snang ba bzhin gyi blo'i dbang gis bzhag pa min par don rang nyid kyi gnas lugs kyi dbang gis yod dgos la/ de ltar na rang dbang du yod dgos pas gzhan su la yang mi ltos dgos so/ /de'i phyir byas pa yin par mtshungs bzhin du shes pa nyid 'byung ba ma yin la/ sa la sogs pa ni 'byung ba yin pa'i khyad par dbye bar nus pa'i tshad ma med do snyam du dgongs nas gong ltar rgyu mtshan mtshungs pa mgo snyoms kyi rigs pa gsungs pa yin pas de legs par shes dgos so/ /gzhan yang rtog ge 'bar ba las/ 'byung ba de dag gi bye brag la brtag pa dang/ phung po gzhan rnams brtag pa dang/ skye mched la brtag pa dang/ khams la brtag pa dang/ mtshan nyid dang/ mtshan gzhi dang/ skye 'jig gi byed pa dang/ bcing thar brtag pa sogs du ma gsungs pa rnams kyang rigs pa'i 'gros gcig go/ lung gi sgo nas bsgrub pa ni/ bcom ldan 'das kyis nang gi sa'i khams gang yin pa dang/ phyi rol gyi sa'i khams gang yin pa de ni de bzhin gshegs pas gnyis su med pa'i don dang gnyis su med pa dang gnyis su byar med pa ste/ 'di lta ste/ mtshan nyid med pa dang mtshan nyid gcig par mngon par rdzogs par sangs rgyas so/ /zhes dang/ blo yis rnam par dpyad pa na/ gang phyir dngos nyid gzung med pa/ /de phyir 'byung ba med pa dang/ /dngos nyid med par nga smra'o/ /zhes gsungs pa rnams so/ /gcig du bral gyi gtan tshigs kyang gsungs te/ rtog ge 'bar ba las/ de bzhin gshegs pa yang don @43a @#/ /dam par yod pa ma yin te/ sku dang gcig gam tha dad du dmigs su med pa'i phyir/ bdag dang sems can dang gang zag la sogs pa bzhin no/ /zhes so/ /kun rdzob tu sgyu ma ltar yod par sgrub pa'i lung ni mdo las/ de bzhin gshegs pa zag med dge ba yi/ chos kyi gzugs brnyan yin te 'di la ni/ /de bzhin nyid med de bzhin gshegs med kyang/ /'jig rten kun la gzugs brnyan kun tu snang/ /zhes bya ba la sogs pa'o/ /gsum pa gtan la phab pa'i bden gnyis kyi rnam gzhag la gnyis/ dngos dang 'phros don no/ /dang po ni/ bden gnyis kyi dbye gzhi ni shes bya'o/ /dbye ba ni kun rdzob kyi bden pa dang don dam pa'i bden pa gnyis so/ /gcig tha dang ni mdo sde dgongs 'grel las/ ngo bo tha dad dang ldog pa gcig pa la rigs pa'i gnod pa bzhi bzhi gsungs pa ltar 'dir yang bzhed pas ngo bo gcig la ldog pa tha dad du bya'o/ /de la ngo bo tha dad 'gog pa'i rigs pa bzhi ni/ myu gu'i gnas lugs rtogs pas myu gu la bden 'dzin gyi sgro 'dogs mi ched bar thal ba dang/ myu gu'i chos nyid de myu gu'i sdod lugs mthar thug ma yin par thal ba dang/ myu gu la bden pa bkag tsam myu gu'i chos nyid ma yin par thal ba dang/ sangs rgyas kyi thugs rgyud la yang bden 'dzin dang bden med rtogs pa'i shes rab gnyis dus cig car du 'jug par thal te/ myu gu dang myu gu'i chos nyid gnyis ngo bo tha dad pa'i phyir zhes pa ste/ thal ba bzhi ga yang ldog pa 'phen pa'i thal ba yin no/ /ldog pa gcig pa 'gog pa'i rigs pa bzhi ni/ so so skye bos kyang don dam bden pa mngon @43b sum du rtogs par thal ba dang/ chos nyid kun nas nyon mongs kyi dmigs par thal ba dang/ 'phags pa'i lam btsal mi dgos par thal ba dang/ kun rdzob la dbye ba mi 'dra ba sna tshogs med par thal te/ gzugs dang de'i de bzhin nyid gnyis ldog pa gcig yin pa'i phyir zhes pa ste/ bzhi g.yang ldog pa 'phen pa'i thal ba'o/ /bden gnyis kyi mtshan nyid ni/ tha snyad pa'i tshad mas rnyed pa'i don ni kun rdzob bden pa'i mtshan nyid don dam dpyod byed kyi rigs shes tshad mas rnyed pa'i don ni don dam bden pa'i mtshan nyid/ 'dir don dam la don dam bden pa dngos dang mthun pa'i don dam gnyis bshad de/ bden gnyis las/ skye ba la sogs bkag pa yang/ /yang dag pa dang mthun pa'i phyir/ /don dam yin par kho bo 'dod/ /ces dang/ dbu ma snang ba las kyang/ de ltar na skye ba med pa 'di yang don dam pa dang mthun pa'i phyir don dam pa zhes bya'i/ /dngos su ni ma yin te/ dngos su ni don dam pa spros pa thams cad las 'das pa'i phyir ro/ /zhes gsungs so/ /gzhan yang bden gnyis las/ bslu ba med pa'i rigs pa ni/ don dam yin te zhes dang/ dbu ma snang ba las kyang/ gang yang don dam par skye ba med ces bya ba la sogs smras pa de la yang don ni 'di yin par 'dod de/ yang dag pa'i thos pa dang bsam pa dang bsgom pa las byung ba'i shes pa thams cad ni phyin ci ma log pa'i yul can yin pa'i phyir don dam pa zhes bya ste/ 'di'i don dam pa yin pa'i phyir ro/ /zhes gsungs pas yul chos nyid la don dam par bshad pa dang yul can rigs shes la don dam par bshad pa gnyis yod la de re re la yang gnyis gnyis yod de/ yul @44a @#/ /stong pa nyid ni mnyam gzhag zag med ye shes kyi ngor gnyis snang gi spros pa dang bden pa'i spros pa gnyis char dang bral ba'i don dam dngos dang/ rigs shes rtog bcas kyi ngor ni bden pa'i spros pa dang bral yang gnyis snang gi spros pa dang ma bral bas spros pa phyogs gcig tsam dang bral pa yin la/ de'i phyir yul stong nyid de spyir don dam dngos yin kyang rigs shes rtog bcas de'i ngor spros pa gnyis char dang bral ba'i don dam ma yin pa ste/ yul gyi don dam la 'jog tshul gnyis so/ /'phags pa'i mnyam gzhag mi rtog ye shes ni de kho na nyid la 'jug pa na spros pa gnyis char rang gi yul du gcod nus pas don dam pa dngos dang/ rtags la brten nas de kho na nyid 'jal ba'i rigs shas rtog bcas ni rang gi yul du bden pa'i spros pa gcod nus kyang gnyis snang gi spros pa gcod mi nus bas snga ma dang rnam pa rjes su mthun pa tsam gyis don dam du bzhag pa mthun pa'i don dam ste yul can gyi don dam 'jog tshul gnyis so/ /mdor bsdu na yul chos nyid don dam bden pa dngos dang/ yul can gyi shes pa don dam bden pa dngos ma yin mod kyang gzhung las bshad tshod la de yang don dam par bshad pa dang/ de dag re ra la yang dngos dang rjas ? mthun pa gnyis gnyis kyi rnam gzhag yod par shes par bya'o/ /don dam pa'i skye ba sogs phung sogs kyi steng du bkag pa'i ma yin dgag gi stong pa ni don dam btags pa ba dang kun rdzob mtshan nyid pa yin te/ stong tshul de ni rang mngon sum du mthong ba'i blo'i ngor gnyis snang dang bcas pa kho nar 'char gyi gnyis snang dang bral bar gtan mi 'char pa'i phyir/ de yang yin te/ stong tshul de ni stong gzhi @44b de dag mngon sum du snang ba'i tha snyad pa'i tshad ma mig shes la sogs pa la'ang snang dgos pa'i phyir ro/ /'dis ni sangs rgyas kyi ji snyed pa mkhyen pa'i ye shes dang 'phags pa slob pa'i rjes thob kyi ye shes ma yin dgag sgyu ma lta bu'i don 'jal ba rnams kyi yul snang stong gnyis tshogs rnams kyang rnam grangs pa'i don dam yin gyi don dam bden pa dngos min no/ /zhes shes par bya'o/ /gzhan yang dbu ma snang ba las/ chos dang gang zag la bdag med pa'i mtshan nyid kyi de kho na nyid ni rigs pa dang ldan pas dam pa yin zhing don kyang de yin te/ sgrib pa spong ba don du gnyar ba rnams kyis rtogs par bya ba'i ched du don du gnyer bar bya ba yin pa'i phyir dang/ ye shes dam pa phyin ci ma log pa'i don te/ yul yin pa'i phyir/ don dam pa zhes bya'o/ /zhes chos dang gang zag gi bdag med gnyis ka don dam bden par bshad cing/ rje bdag nyid chen pos rang rgyud pa'i skabs kyi rtsa she TIka chen las kyang/ de'i phyir phung po'i chos dang gang zag gi bdag med rtags kyi dgag bya'i spros pa bcad tsam ni ji lta ba mkhyen pa'i ye shes zag pa med pas rnyed pa'i don yin la/ de'i ngor gang zag dang phung po'i gnyis snang gi spros pa yang zhi ba yin pas don dam pa'i bden pa'o zhes lugs 'dis gang zag gi bdag med kyang don dam bden par 'dod par gsungs la/ legs bshad snying po las kyang/ dbu ma snang ba'i lung don bdag med gnyis ka don dam pa mtshan nyid bar bstan par bshad do/ /rgyal tshab thams cad mkhyen pa'i bden gnyis dar TIka las kyang/ de dag dang mthun par bdag med gnyis ka don dam bden par bshad do/ /gzhan yang lugs 'dir rang mngon @45a @#/ /sum du rtogs pa'i mngon sum tshad mas gnyis snang nub pa'i tshul gyis rtogs par bya ba don dam bden pa'i mtshan nyid dang/ rang mngon sum du rtogs pa'i blos gnyis snang dang bcas pa'i tshul gyis rtogs par bya ba kun rdzob bden pa'i mtshan nyid du bya ba ni grags che zhing/ de ltar na gang zag gi bdag med mngon sum du rtogs pa'i 'phags rgyud kyi bar chad med lam gyis kyang rang yul la chu la chu bzhag ltar gnyis snang nub pa'i tshul gyis mnyam par bzhag pa las ma 'das pas gang zag gi bdag med don dam bden par khas len dgos par 'gyur ro/ /de la yang gzhan dag na re/ gnyis snang la rang las tha dad pa'i gnyis snang dang bden snang dang kun rdzob kyi snang ba la gnyis snang du bshad pa gsum yod pa'i dang po med kyang tha ma yod pas gnyis snang dang bcas pa mi 'gal la/ sher phyin gyi mdo las/ gzugs bdag med pa zhes bya bar nye bar ston pa yang sher phyin ltar bcos pa yin par gsungs pa dang/ sher phyin rnal mar spyod na dmigs pa med pa'i stong nyid la spyod dgos par gsungs pas theg pa 'og ma'i 'phags rgyud kyi bdag med mngon sum du rtogs pa'i mkhyen pa yang dmigs bcas kyi sher phyin las ma 'das pa'i phyir gnyis snang dang bcas par 'jog go /zhes gsungs shing stong thun chen mor yang sems tsam pa dang dbu ma rang rgyud pa dag gang zag gi bdag med don dam bden par mi 'dod cing gang zag gi bdag 'gog pa'i rigs pa yang kun rdzob dpyod byed kyi rigs par 'dod do/ /zhes gsungs so/ /de la phyogs snga ma ltar na 'phags rgyud kyi bar chad med lam de'i ngor kun rdzob kyi snang ba med pa ni da dung bsgrub par bya ba @45b yin gyi gtan tshigs su mi rung la/ lung gi don yang rnam pa gzhan du 'chad du rung bar snang ngo/ /rang rig khas len pa'i rang rgyud pa ltar na rang mngon sum du rtogs pa'i mngon sum tshad mas gnyis snang nub pa'i tshul gyis rtogs par bya ba don dam 'den pa'i mtshan nyid du 'jog pa la yang da dung brtag dgos so/ /gzhan yang gang zag rang rkya ba phung po dang gcig du bral gyis stongs par gtan la 'beb pa'i rigs pa de blo gnod med la snang ba'i dbang gis bzhag pa tsam gyis ma tshim ? par don gyi sdod lugs la dpyod pa'i rigs pa yin nam min/ yin na de tsam gyis don dam dpyod byed kyi rigs par 'gro 'am mi 'gro/ don dam dpyod byed du song yang rigs pa des de lta bu'i gang zag rang rkya ba de med par rnyed pa la don dam dpyod byed kyi rigs shes kyis rnyed pas khyab bam ma khyab/ de la yang blo ngo la ltos te rigs shes kyis rnyed pa'i don dam dngos su song ma song gi cha gnyis 'byed mi 'byed sogs legs par brtags te rje yab sras gsum gyi gsung rab rnams gung bsgrigs nas rtsod pa spong lugs shig shes na mkhas pa mgu ba'i gtam du 'gyur bar snang gi /gsung rab kyi phyogs gcig tsam mthong bas phyogs cig shos ras su 'bor ba dang/ rang bzos 'bru snon gang thub byed pa rnams kyis tshim sla bar mi 'os so/ /rtsa she'i rab dbye bco brgyad pa'i 'grel pa shes rab sgron ma las/ gal te phung po bdag yin na/ /skye dang 'jig pa can du 'gyur/ zhes sogs kyi skabs su/ 'dir sbyor ba'i tshig ni don dam par 'byung ba dang 'byung ba 'dus pa dang dbang po dang dbang po 'dus pa dang rnam par shes pa dang dbang po dang bcas pa'i @46a @#/ /lus dang rnam par shes pa dang bcas pa'i lus ni bdag ma yin te/ skye ba dang 'jig pa'i chos can nyid yin pa'i phyir/ dper na phyi rol gyi 'byung ba dag bzhin no/ /zhes sogs gang zag gi bdag med sgrub pa'i rigs pa re re bzhin nas don dam pa zhes pa'i khyad par sbyor bar mdzad la/ nang dang phyi rol nyid dag la/ /bdag dang bdag gi zang gyur na/ /nye bar len pa 'gag 'gyur zhing/ /de zad pas ni skye ba zad/ ces pa'i thad kyi 'grel ba las kyang/ /thar pa de yang gang zag gi bdag med pa mthong ba'i phyir 'phags pa nyan thos dang rang sangs rgyas kyi yin no/ /sangs rgyas kyi theg pas 'gro ba rnams kyis ni nyon mongs pa'i sgrib pa dang shes bya'i sgrib pa spangs pas thob ste/ nyon mongs pa'i sgrib pa spong ba'i thabs ni ji skad bstan pa de dag yin no/ / zhes rab byed der bshad pa'i rigs pa de rnams theg dman gyi rigs can rnams kyis kyang bsgom par bya bar gsungs shing gang zag gi bdag gis stong tshul de stong pa nyid kyi don du yang gsungs te/ bshad ma thag pa'i gzhung de'i snga 'grel las/ de ltar nang dang phyi rol gyi skye mched rnams kyi de kho na nyid rtogs par byed pa la brtson pa'i rnal 'byor pa des de dag stong pa nyid du rtogs pa'i phyir/ zhes gsungs so/ /rtog ge 'bar ba'i nyan thos kyi de kho na nyid la 'jug pa'i le'u las kyang de dang phyogs mthun pa mang du gsungs te 'dir ma spros so/ /tshul 'dis mdo sde spyod pa'i dbu ma rang rgyud pa la dogs pa med kyang rnal 'byor dpyod pa'i dbu ma rang rgyud pas gzung 'dzin gnyis stong gi de kho na nyid bden gnyis gang du 'dod pa'ang brtag par bya'o/ /rang rgyud pa'i lugs la @46b 'geg bden kun rdzob bden par 'dod pa'i phyogs la'ang stong thun chen mo nas gnod byed gsungs pa rnams 'jug tshabs shin tu che bar snang la khyad par du mthong lam rnam grol lam gyis mthong spang spangs ba'i 'gog pa mngon du byas par ni gdon mi za bar khas len dgos la/ de ltar na rnam grol lam gyis 'gog pa de mngon sum du byas pa'i don yang de mngon sum du rtogs pa las gzhan du 'os med pa'i phyir dang/ lam des mngon sum du rtogs pa'i yul ni don dam bden par 'dod dgos pa'i phyir ro; ;der ma zad shes bzod skad cig ma bcu drug gi bzod pa brgyad bar chad med lam dang shes pa brgyad rnam grol lam du 'jog pa'i tshe bar chad med lam gyi 'jug thogs kho nar shes pa gzhan gyis bar ma chod par glo bur dri bral gyi 'gog bden thob pa'i rnam grol lam gyi ngo bor gyur pa'i shes pa brgyad skyes pa des mi mthun phyogs spangs pa'i khyad par mngon du ma byas na bzad pa brgyad dang khyad par ci yang med par 'gyur la/ de las langs pa'i rjes thob kyi gnas skabs su 'gog bden mngon du byed don med pas mthong spang spangs pa'i 'gog pa nam yang mngon du mi byed par 'gyur ro/ /rigs pa 'dis ngo bo nyid sku la yang dpyad par bya ba'i gnas du ma zhig 'dug pas blo gros dang ldan zhing snying khams chung ba rnams kyis da dung legs par brtsad bcad par bya'o/ /kun rdzob bden pa'i dbye ba la/ bden gnyis las/ brtags pa'i don gyis dben gyur pa/ /dngos tsam brten nas gang skyes te/ /yang dag kun rdzob shes par bya/ zhes dang/ yang dag min ni kun brtags yin/ zhes yang dag kun rdzob bden pa dang log pa'i @47a @#/ /kun rdzob bden pa gnyis su bshad do/ /mtshan nyid ni/ snang du 'dra yang don byed dag /nus pa'i phyir dang mi nus phyir/ /yang dag yang dag ma yin pa'i/ /kun rdzob kyi ni dbye ba byas/ /zhes gsungs pas bstan to/ /de la spyir zla gnyis sogs dang gzhan sdes brtags pa'i gtso bo la sogs pa tha snyad du yang tshad mas ma grub pa rnams ni log pa'i kun rdzob tsam yin kyang/ gzhi ma grub pa'i phyir log pa'i kun rdzob bden pa ni ma yin no/ /de'i phyir bden gnyis kyi lung tshan snga mas don dam pa'i skye ba la sogs pa log pa'i kun rdzob bden par bstan pa min no/ /snang tshul ltar don byed nus pa dang mi nus pa tsam yang dag kun rdzob bden pa dang log pa'i kun rdzob bden pa'i mtshan nyid du 'dod pa ni mi 'thad de/ gzhi de snang tshul ltar don byed nus par tshad mas grub kyang yang dag kun rdzob kyi don tshad mas ma grub pa du ma yod pa'i phyir/ gzhan du na grub mthas blo ma bsgyur ba'i so so skye bos kyang sa la sogs pa la bden grub kyi don tshad mas khegs par thal te/ des de kun rdzob yin par tshad mas grub cing kun rdzob kyi don rdzun pa la byed par 'dod dgos pa'i phyir ro/ /nges na tha snyad pa'i tshad mas rnyed pa'i don gang zhig /rang snang ba'i blo la snang ba ltar don byed nus pa'i chos yang dag kun rdzob bden pa dang/ de gang zhig / rang snang ba'i blo la snang ba ltar don byed mi nus pa'i chos log pa'i kun rdzob bden pa'i mtshan nyid du shes par bya'o/ /yang dag pa'i kun rdzob kyi dbye ba ni rtogs par sla la log pa'i kun rdzob ni rtog med shes pa'i snang ba me long nang gi byad bzhin gyi @47b gzugs brnyan dang/ rtog pa'i gzung yul la sogs pa log pa'i kun rdzob kyang yin la kun rdzob bden pa yang yin no/ /grub mthas btags pa'i gang zag dang chos kyi bdag la sogs pa ni log pa'i kun rdzob yin kyang kun rdzob bden par mi gzung ste/ tshad mas khegs pa'i phyir ro/ /gal te dbu ma snang ba las/ bstan bcos byed pa kha cig gis grags pa las 'das te dngos po rnams brtags pa la sogs pa'i dngos por nye bar btags pa gang yin pa da ni log pa'i kun rdzob tu yod ces bya ste/ de ni grags par yang med pa'i phyir ro/ /gang yang rten cing 'brel bar 'byung ba dang rjes su mthun par rab tu btags par dper na/ 'di na bdag gam sems can med/ chos 'di rgyu dang bcas pa yin/ zhes bya ba lta bu de ni yang dag pa'i kun rdzob tu yod ces bya'o/ /zhes gsungs pa 'dis bdag gnyis la sogs pa yang log pa'i kun rdzob bden par bstan pa ma yin nam zhe na/ de ltar ma yin te/ des grub mtha'i dbang kho nas btags pa'i don rnams ni log pa'i kun rdzob tu yod par bstan gyi kun rdzob bden par bstan pa ma yin pa'i phyir te/ gzhan du na de ni grags par yang med pa'i phyir ro zhes gsungs pa dang 'gal bar 'gyur ba'i phyir ro/ /lugs 'dis yul ma gtogs yul can la yang log gi khyad par mi 'byed cing de yang rang mtshan tshad mas grub par bzhed pa la thug go /rang mtshan khas mi len na dbang shes la gzung yul gsal bar snang bar 'dra ba la/ chu la sogs pa snang ba ltar don byed nus pa'i yang dag kun rdzob dang/ zla gnyis dang zla ba gnyis snang la sogs pa snang ba ltar don @48a @#/ /byed mi nus pa'i log pa'i kun rdzob tu bzhed pa mi 'thad par 'gyur te/ de ltar na chu 'dzin dbang shes la chu rang gi mtshan nyid kyis grub par snang ba ltar don byed mi nus pa'i log pa'i kun rdzob tu thal ba bzlog tu med pa'i phyir te/ /gzhan yang gzugs rang gi mtshan nyid kyis grub pa bden med kyi 'gal zla dgag bya'i chos su 'dod par thal/ rang mtshan mthar thug spyod pa'i rigs shes kyi dgag bya yin pa'i phyir ro/ dgag bya bden pa dbang shes la snang bar thal te/ dbang shes kyi gzung yul du rang mtshan yod pa'i phyir ro/ /'dod mi nus te bden gnyis las/ bden par grub pa'i skye ba la sogs pa dbang shes la mi snang bar bshad cing dbang shes kyi snang ba ni nam yang mi 'gog par bshad pa'i phyir ro/ / kha cig bden gnyis las dgag bya bden pa dbang shes la mi snang bar bshad pa ni don dam dpyod byed kyi rigs shes la don dam dang de'i ngor grub pa la don dam du grub par bshad pa de dbang shes la mi snang bar bshad pa yin gyi bden par grub pa la mi byed do/ /zhes zer ba yang legs par bshad pa ma yin te/ bden gnyis 'grel pa dang bcas pa las/ yang dag par grub bo zhes bya ba la sogs par gzhan gyis yongs su btags pa rnams 'gog par rigs pa'i rgyu mtshan du bden par grub pa'i skye ba dang/ grangs can gyis btags pa'i gtso bo dang/ rgyang 'phen gyis btags pa'i 'byung ba 'gyur ba dang/ shes pa skad cig cha med la sogs pa rnams mngon sum la snang ba ma yin pa'i phyir ro zhes dgod par mdzad pa'i phyir dang/ gzhan yang snang @48b ba dgag par mi rigs pa'i rgyu mtshan du/ bden par btags pa ma yin par dbang shes la sogs kyi snang ba 'gog pa ni bdag la gnod par 'gyur ba 'ba' zhig tu gsungs shing/ de'i rgyu mtshan yang rtog med dbang shes tshad ma'i yul ni yang dag kun rdzob bden pa yin pas de la bden grub tu snang na bden grub de nyid kun rdzob bden par thal ba la thug pa'i phyir ro/ /gzhan yang dngos por smra ba gzhan gyis khas blangs pa'i dngos po bden par grub pa la don gyi ngo bo ji lta ba bzhin du tha snyad rung ba ma yin no zhes bshad nas bden grub la tha snyad don mthun mi rigs pa'i rgyu mtshan du dbang po'i rnam par shes pa la bden par grub pa rdul tsam yang mi snang ba bkod pa'i phyir ro/ /de'i phyir rgyal tshab thams cad mkhyen pas kyang lugs 'dis dgag bya bden grub dbang shes la mi snang bar bzhed par gsungs shing/ de ni rnal 'byor spyod pa'i dbu ma rang rgyud pa la yang 'dra ste/ rje bdag nyid chen pos 'jug pa'i rnam bshad chen mo las/ bden 'dzin des bden par yod pa ltar nye bar bstan pa mthong ba ni rtog pa yin gyi dbang shes min te/ bden gnyis kyi 'grel par dgag bya bden pa dbang shes la mi snang bar bshad pa 'dir yang 'dra ba'i phyir ro/ /zhes zhi 'tsho yab sras kyi bzhed pa 'chad pa'i skabs su gsungs pa'i phyir ro/ /de ltar ma yin par rigs ngo'i don dam la byed na bden 'dzin des bden par yod pa ltar nye bar bstan pa zhes pa'i don 'chad dka' bar 'gyur ro/ /sgyu ma dper byed tshul sogs la bshad rgyu mang mod kyang re zhig bzhag go gnyis pa 'phros don la mdo sde spyed pa'i rang rgyud @49a @#/ /pa 'di pas bden gnyis nges byed kyi tshad ma ni mngon sum dang rjes dpag tshad ma gnyis su 'dod pa ni 'dra la/ rjes dpag gi rten rtags kyi dbye ba sogs kyang phal cher snga ma rnams dang 'dra'o/ /mngon sum la rang rig mngon sum mi bzhed tshul gong du bshad zin pas dbang yid rnal 'byor mngon sum gsum du grang nges so/ /tshad 'bras kyi rnam gzhag kyang kyang sems tsam pa dang mi mthun la rigs pa'i rjes 'brang gi mdo sde pa dang yang mi mthun te/ rang rig bzhed pa'i phyir ro/ / dbang shes kyi rkyen gsum gyi rnam gzhag kyang sems tsam pa dang mi mthun te/ 'di pas rdul phra rab bsags pa'i re re nas dbang shes kyi rgyur bzhed pa'i phyir ro/ /rdul phra rab de yang rdzas yod du bzhed de/ rdul phra rab de yul steng nas grub cing btags don btsal ba'i mthar rnyed pa'i dbang du byas nas 'jog pa'i phyir ro/ /bden med zhal gyis bzhed pa'i dbu ma rnams kyis cha med kyi dngos po nam yang khas mi len par mkhas grub thams cad mkhyen pas stong thun chen po dang TIk chen de nyid snang ba sogs las gsungs so/ /de'i phyir lam rim chen mo las/ rdul phra ba'i mthar thug par yang bzhad par snang bas rdul cha med dmigs rkyen du bzhed do/ /zhes legs ldan gyi 'dod pa brjod pa'i skabs su gsungs pa'i don rigs pas ci tsam brtags kyang gtan nas cha 'byed rgyu med pa'i cha med la mi bya'i/ rigs shes la ma ltos pa'i dbang po'i shes pas de las phra ba'i cha mthong rgyu med pa'i rdul phra rab la dgongs par byas na 'grig gam snyam ste da dung brtag par bya'o/ /dpal ldan zla ba'i 'jug 'grel @49b las/ kha cig gis mdo sde pa rnams kyi lugs gang zhig don dam par smras pa de nyid dbu ma rnams kyis kun rdzob tu 'dod do zhes smras pa gang yin pa de ni dbu ma'i bstan bcos kyi de kho na nyid mngon par mi shes pa kho nas smras pa yin no zhes bya bar shes par bya'o/ /zhes gsungs pa dang/ bzhi brgya pa'i 'grel pa las kyang/ bye brag pa ltar rang gi sde pa rnams kyis rdzas rdzas kyi rdul phra rab khas blang bar mi rigs so/ /zhes gsungs pa rnams kyang 'di pa'i lugs la zur za bar snang ngo/ /thal 'gyur bas phyi don khas len mod kyang 'di pa dang 'jog tshul mi mtshungs te/ cung zad 'chad par 'gyur zhing rgyas par gzhan du shes par bya'o/ /yid kyi mngon sum yang tshad ma pa dang mthun mi mthun brtag par bya zhing rnal 'byor spyod pa'i dbu pa rang rgyud pa dang yang cung zad mi 'dra'am snyam mo/ /kun gzhi dang nyon yid kyang mi bzhed pa shes par sla'o/ /'di pas phyi don med pa mdo gang gi yang dgongs pa min par bzhed pas gnyis stong gi de kho na nyid rtogs pa'i rnal 'byor mngon sum yang mi bzhed do/ /de'i phyir slob dpon 'di pa'i lugs kyis rgyan gyi dgongs pa 'grel tshul yang phyogs gzhan dang mi 'dra bar byed dgos par snang ngo/ /bzhi pa ni/ 'di pas nyan rang gnyis kyi lam gyi ngo bo la khyad par gzhan mi 'dod cing bsgoms pa'i dus dang 'bras bu'i dbang du byas pa'i khyad par 'byed par 'dod do/ /rang rgyal la tshogs spyod che chung dang bse ru lta bu'i rnam gzhag kyang mdzad do/ /theg dman du chos kyi bdag med ma bstan par bzhed pas nyan rang rang lam du rigs nges pa rnams kyis chos kyi bdag med rtogs pa med par bzhed do/ /gal te de lta na @50a @#/ /dang por theg chen du zhugs nas chos kyi bdag med legs par gtan la phab pa zhig dang phyis nyan dang rang du lhung ba gnyis gzhi mthun srid pa ni 'dod dgos la/ de lta na de 'dra des chos kyi bdag med bsgoms pas mngon du 'gyur ba dang mthong zin goms par byed par yang yod dgos so/ /de yang 'dod na bden 'dzin kun brtags mthong lam nas spong ba dang lhan skyes bsgom lam nas kyang spong bar 'dod dgos pas bden 'dzin shes sgrib tu 'dod pa dang/ de nyan rang gi lam gyis spong ba med pa'i rnam gzhag rnams mi 'thad par 'gyur ro zhe na/ skyon med de/ de lta bu'i gang zag des de ltar bsgoms pa la brten nas bden 'dzin mngon gyur re zhig mgo gnon pa tsam 'ong yang bden 'dzin kun brtags dang lhan skyes gang gi yang sa bon spangs pa mi 'ong bas chos kyi bdag med mngon sum du mthong ba dang mthong zin goms par byed pa da yang de kho na nyid phra mo rtogs pa'i mthong lam dang bsgom lam du mi 'jog go /de'i rgyu mtshan yang bden 'dzin gyi sa bon spong ba la bdag med bsgom pa gcig pus mi chog gi tshogs mtha' yas pa'i grogs kyis zin pa dgos pa'i phyir ro/ /de'i phyir bden med rtogs pa'i shes rab spang bya spong ba'i gnyen po bar chad med lam gyi ngo bor skye ba ni thabs khyad par can gyi nus pa la bltos shing/ bar chad med lam gyi rang dus na yang thabs kyi rigs khyad par can rnams kyi nus pa rjes su 'brel bar yod dgos so/ /rigs pa 'dis rgyun mtha'i bar chad med lam gyi rang dus na rgyal ba'i zag med kyi yon tan kun rdzob pa dang don dam pa mtha' dag @50b skad cig gnyis par mngon du 'gyur nges kyi nus pa yongs su rdzogs pa mnyam gzhag ye shes de'i steng na yod dgos shing/ de lta na yang mnyam gzhag ye shes de la kun rdzob pa'i rnam pa mngon du 'gyur mi dgos so/ /'di dag ni pha rol tu phyin pa'i theg pa'i dka'i ba'i gnas yin par 'dur cing 'tshang rgya ba la nges par phar phyin theg pa'i lam gyi mthar sngags lam gyi son pa 'debs dgos pa'i gnad gcig ni 'di yin no/ /rtsod spong bya tshul 'di ni rnal 'byor spyod pa'i dbu ma rang rgyud pa la yang 'dra zhing rigs pa'i 'gros ni thal 'gyur ba'i skabs su yang shin tu mkho'o/ /'di dag kyang rje bdag nyid chen po'i legs par bshad pa'i khyad chos chen po 'gran zla med pa yin cing bdag gis kyang rje de nyid kyi gsung rab la brten nas smras pa yin gyi dka' ba'i gnas 'di dag bdag lta bus rang stobs kyis bshad par ga la nus/ yang gal te slob dpon legs ldan zhabs kyis nyan thos sde snod las chos kyi bdag med bstan na theg pa chen po bstan pa don med par 'gyur ro zhes gsungs pa las na theg dman 'phags pa la chos kyi bdag med rtogs pa mi srid dgos te/ gzhan du na chos kyi bdag med bstan pa kho na theg chen gyi khyad chos su mi 'gyur ba'i phyir ro zhe na/ skyon med de/ de kho na nyid phra mo rtogs pa'i shes rab ni chos bden par 'dzin pa'i gnyen po yin cing bden 'dzin shes sgrib yin pa'i phyir chos kyi bdag med ston pa ni shes sgrib spong ba'i ched du ston pa yin pas nyan thos kyi sde snod las chos kyi bdag med bstan na theg dman pa rnams kyis shes sgrib spong dgos par 'gyur zhing / de ltar na shes @51a @#/ /sgrib spong ba'i gnyen po sde snod de las rdzogs par ston dgos par 'gyur bas theg chen gyi sde snod don med du thal bar gsungs pa yin gyi chos kyi bdag med las gzhan pa'i theg chen gyi khyad chos med par bzhed pa ma yin pa'i phyir ro/ /spang bya sgrib pa la nyon sgrib dang shes sgrib gnyis su 'dod pa ni 'dra la theg chen rigs nges kyis sa brgyad pa thob pa'i tshe nyon mongs pa'i sgrib pa zad par spangs par rtog ge 'bar ba las bshad pas rang rgyud pa gzhan gyi lugs ltar rdo rje lta bu'i ting nge 'dzin gyis sgrib gnyis cig car du spong bar mi bzhed mod/ 'on kyang thal 'gyur ba ltar nyon sgrib ma zad par du shes sgrib spong ba'i mgo mi rtsom par bzhed pa'ang min no/ /mthong lam bar chad med lam gyi chos bzod pa bzhi bden bzhi'i chos nyid 'jal ba'i ldog pa'i sgo nas dbye ba dang rjes bzod bzhi yul can bzhi rtogs pa'i ldog pas phye nas 'jog pa dang/ shes pa brgyad la yang de 'dra'i khyad par byed tshul gyi mngon po gong ma'i rigs pa'i 'gros ni dbu ma thal rang thams cad la 'dra bar rgyal tshab rjes bzhed do/ /bden med mngon sum du rtogs pa'i rigs shes kyis bden med yod pa mi 'grub pa ni thal rang kun 'dra yang rnal 'byor spyod pa'i dbu ma rang rgyud pas bden med rtogs pa'i rigs shes nyams su myong ba'i rang rig gis rigs shes dngos su rtogs pa'i shugs la bden med yod pa 'grub par bzhed cing/ dbu ma thal 'gyur bas rigs shes rtog med kyis drangs pa'i bcad shes kyis bden med yod pa 'grub par bzhed cing rtog pa bcad shes dang mngon sum tshad ma yang mi 'gal bar @51b bzhed do/ /rang rgyud pa 'di pa'i lugs la de gnyis gang yang gzhag tu mi rung zhing rigs shes kyis bden med yod pa shugs la rtogs pa yang ma yin te/ rigs shes kyi dngos yul med dgag yin pa'i phyir ro/ /des na de ji ltar 'jog pa'i tshul bsam par bya ba kho nar 'dug cing de dag las brtsams te brjod par bya ba mang du 'dug kyang re zhig bzhag go /'bras bu'i gnas skabs kyi sku gsum gyi rnam par bzhag pa sogs ni dbu ma gzhan dang phal cher mthun zhing mi 'dra ba'i khyad par phra mo re gnyis yod kyang 'gongs ? tshung la gzhung gi bshad tshul mi 'dra ba tsam ni mang du yod kyang rnam grangs tsam gyi khyad par du zad kyi lugs mi mthun pa ma yin no/ /gnyis pa rnal 'byor spyod pa'i dbu ma rang rgyud pa la 'dod tshul spyir bshad pa dang/ bye brag tu bshad pa gnyis/ dang po la/ dbu ma rgyan las/ sems tsam la ni brten nas su/ /phyi rol dngos med shes par bya/ /tshul 'dir brten nas de la yang/ /shin tu bdag med shes par bya/ zhes dang/ de'i phyi 'grel las/ sems tsam gyi tshul la brten nas mtshungs par ldan pa dang bcas pa'i sems las phyi rol tu 'dod pa bdag dang bdag gi dang gzung ba dang 'dzin pa la sogs pa rang bzhin med pa tshegs med pa kho nar rtogs so/ /zhes thog mar gang zag gi bdag med gtan la 'bebs pa dang/ de nas gnyis stong gi de kho na nyid gtan la 'bebs pa'i rnam gzhag gnyis dang/ yang de nyid las/ tshul 'di ni rang 'byung ba med pas sems de rang bzhin med par rtogs su zin kyang mtha' thams cad spangs pa'i dbu ma'i lam du rtogs na gcig dang du ma'i rang bzhin dang bral bas rang bzhin @52a @#/ /med pa shin tu rtogs so/ /zhes rim pa snga ma gnyis kyi rjes la blo dang brtson pa lhag par che bas sems de la gcig dang du ma'i rang bzhin gyis brtags pa na don dam par grub pa rdul tsam yang med par mthong bas mtha' thams cad spangs pa dbu ma'i lam rtogs par 'gyur ba ste de kho na nyid gtan la 'bebs pa'i rim pa gsum du bshad do/ /de nyid mdo'i dgongs par sgrub pa ni mdo las/ kye rgyal ba'i sras dag gzhan yang khams gsum pa ni sems tsam du rtogs te dus gsum yang sems dang mtshungs par rtogs so/ /sems de yang mtha' dang dbus med par khong du chud do/ /zhes pa dang/ chos yang dag par sdud pa las/ bcom ldan 'das chos thams cad ni kun brtags pa'i snying po ste sems tsam du bas pa rdzas ma mchis pa sgyu ma ltar rtsa ba ma mchis pa'o zhes dang/ langkar gshegs pa las/ sems tsam la ni brten nas su/ /phyi rol don la mi rtog go /yang dag dmigs par gnas nas su/ /sems tsam las kyang shin tu 'da'/ /sems tsam las ni 'das nas kyang/ /snang ba med las shin tu 'da'/ /snang med gnas pa'i rnal 'byor pa/ /de yis theg pa chen po mthong/ /zhes sogs gsungs pa 'di rnams kyis gong du bshad pa'i rim pa de ltar du de kho na nyid kyi tshul gtan la 'bebs pa'i rnam gzhag bstan par bzhed do/ /de yang tha snyad du phyi rol don gyis stongs pa'i rnam par rig pa tsam gyi tshul dang/ don dam par chos thams cad ngo bo nyid med pa'i tshul gnyis kyi sgo nas theg pa chen po 'thob par bzhed do/ dbu @52b ma rgyan las/ tshul gnyis shing rta zhon nas su/ /rigs pa'i srab skyogs 'ju byed pa/ /de dag de phyir ji bzhin don/ /theg pa chen po pa nyid 'thob/ ces gsungs so/ /de lta bu'i tshul gnyis kyis theg pa chen po 'thob pa yang rgyal ba'i dgongs pa yin te/ langkar gshegs pa las/ tshul gnyis kyis bsdus pa'i theg pa chen po mdor bstan pa ni 'di sted de/ chos lnga dag dang rang bzhin dang/ /rnam par shes pa brgyad nyid dang/ /bdag med gnyis kyi dngos por ni/ /theg pa chen po thams cad 'dus/ zhes 'byung ngo zhes 'grel pa las bshad do/ /de lta na yang sems tsam pa 'dod pa ltar gyi rnam par shes pa bden par grub pa dang gnyis stong gi de kho na nyid bden grub ni tha snyad du yang mi bzhed la/ 'jug shes drug las ngo bo tha dad pa'i kun gzhi rnam par shes pa yang zhal gyis mi bzhes shing des nyon yid mi bzhed pa yang go bar nus so/ /'o na tha snyad du phyi rol med pa'i sems tsam gyi tshul 'di mgon po klu sgrub kyi bzhed pa yin nam min/ phyi ma ltar na mi rung ste zhi ba 'tsho yab sras mgon po klu sgrub kyi rjes su 'brangs pa'i shing rta chen po yin pa'i phyir ro/ /dang po ltar na tshul de mgon po klu sgrub kyi gzhung gang gis bstan brjod par gyis shig zer na/ rigs pa drug cu pa las/ 'byung ba che la sogs bshad pa/ /rnam par shes su yang dag 'du/ /de shes pas ni 'bral 'gyur na/ /log par rnam brtags ma yin nam/ /zhes gsungs pa 'dis bstan te/ de'i tshig dang po gnyis kyis 'byung ba dang 'byung 'gyur rnams rnam par shes pa las don logs su med cing rnam par shes pa nyid de dag gi @53a @#/ /rnam par snang ba la bzhag pa yin pas rnam par shes par 'du bar bstan to/ /dbu ma rgyan las/ tshul gnyis shing rta zhon nas su/ zhes sogs kyi phyi 'grel las dngos po'i stobs kyis zhugs pa'i rjes su dpag pa la 'jug pa rnams tshul gnyis brjod pas bsdus pa/ de bzhin gshegs pa rnams gshegs shing gshegs pa'i theg pa chen pos dngos po mtha' dag rang bzhin med par khong du chud par byed de ?/ shing rta chen po la zhon pa dag kha bsdams pa'i srab skyogs legs par bzung ba bzhin du don dang ldan pa'i theg pa chen po zhes bya ba yang dag par 'thob par byed do/ /zhes byang chub sems dpa' rnams kyis tha snyad du sems tsam gyi tshul dang don dam par rang bzhin med pa'i dbu ma'i tshul gnyis kyi shing rta la zhon nas dri ma med pa'i rigs pa'i srab skyogs 'ju bar byas pa las de kho na nyid kyi don can gyi theg pa chen po pa 'thob par gsungs so/ /rang rgyud pa 'di pa'i lugs la nang gses kyi 'dod tshul mi 'dra ba'i dbye ba phran tshogs mang du yod kyang de kho na nyid gtan la 'babs pa'i lus kyi rnam gzhag la bshad ma thag pa ltar 'dod par ni thams cad 'dra'o/ /'phags pa grol sdes nyi khri snang ba dang/ seng ge bzang pos rgyan snang dang/ le brgyad ma dang/ sdud 'grel rtogs sla dang/ sangs rgyas ye shes zhabs kyi phar phyin gyi gzhung rnams dang/ a b+hya ka ra'i gnad kyi zla zer dang/ thub pa dgongs rgyan rnams su yang lta ba gtan la 'bebs tshul 'di kho na ltar mdzad do ?/ /'phags grol sogs zhi 'tsho yab sras kyi sngon du rang rgyud pa 'di @53b pa'i lugs 'dod mkhan bag ? bzung ? byung mod kyang phyi rol med pa'i tshul gyi dbu ma'i grub mtha'i srol 'byed pa po ni slob dpon zhi ba 'tsho yin par rje thams cad mkhyen pa bzhed do/ /gnyis pa bye brag tu bshad pa la bzhi/ rtags kyi dgag bya ngos bzung ba dang/ de 'gog pa'i rigs pa bshad pa/ gtan la phab pa'i bden gnyis kyi rnam gzhag bshad pa/ lam dang 'bras bu'i rnam gzhag cung zad bshad pa'o/ /dang po ni don dam pa'i 'jog tshul gsum dang de dag tu grub pa la don dam du grub par 'jog mi 'jog gi khyad par legs par byed pa rnams gal che ba ni sngar bshad zin pas 'dir rtags kyi dgag bya'i bden chad ngos 'dzin tshul cung zad brjod par bya'o/ /de yang dbu ma snang ba las/ dngos po yang dag par ngo bo nyid med pa dag la yang de las bzlog pa'i rnam par sgro 'dogs pa'i 'khrul pa'i blo gang yin pa de ni kun rdzob ces bya ste/ 'di 'am 'dis de kho na nyid sgrib pa lta bur byed/ 'gebs pa lta bur byed pa'i phyir ro/ /de skad du mdo las kyang/ dngos rnams skye ba kun rdzob tu/ /dam pa'i don du rang bzhin med/ /rang bzhin med la 'khrul pa gang/ /de ni yang dag kun rdzob 'dod/ /ces gsungs so/ /de las byung ba'i phyir des nye bar bstan pa mthong ba'i dngos po rdzun pa thams cad ni kun rdzob pa kho na yin zhes bya'o/ /de yang thog ma med pa'i 'khrul pa'i bag chags yongs su smin pa'i dbang gis byung la/ des kyang srog chags thams cad la yang dag par dngos po'i bdag nyid lta bur nye bar bstan pa mthong bar 'gyur te/ de'i phyir de dag gi bsam pa'i dbang gis dngos po rdzun pa'i ngo bo @54a @#/ /thams cad ni kun rdzob tu yod pa kho na'o zhes bya'o/ /zhes kun rdzob tu yod tshul gsungs pa'i bzlog phyogs kyi yod pa ni rtags kyi dgag bya'i bden tshad do/ /de la dngos po yang dag par zhes pa nas blo gang yin pa de ni zhes pa'i bar gyis ni don dam par rang bzhin med pa la don dam par yod par sgro 'dogs pa'i 'khrul lugs bstan to/ /kun rdzob ces bya ste zhes sogs kyi don ni kun rdzob kyi skad dod kyi steng nas sgrib byed du bshad cing de yang yang dag pa'i gnas lugs mthong ba la sgrib pa'o/ /de las byung ba'i phyir zhes sogs kyi don ni bden 'dzin de las byung ba'i phyir bden 'dzin des bden par yod pa ltar nye bar bstan pa mthong ba'i dngos po rdzun pa rnams ni kun rdzob kho nar yod pa'o zhes ston pa'o/ /'di'i skabs kyi mthong ba ni rtog pa yin gyi dbang shes ma yin te/ lugs 'dis dgag bya bden pa dbang shes la mi snang bar 'dod do zhes rje thams cad mkhyen pas gsungs shing/ de yang rang rgyud pa lugs gnyis ka la 'dra bar gong du gsal bar bshad zin to/ /de yang thog ma med pa'i zhes sogs ni de lta bu'i bden 'dzin de ni thog ma med pa nas zhugs pa'i bden 'dzin lhan skyes yin par ston pa'o/ /de dag gi bsam pa'i dbang gis zhes pa'i bsam pa la rtog pa dang rtog med kyi shes pa gnyis ka lon par gsungs pas kha cig rtog med kyi shes pa kho nar 'dod pa mi 'thad de/ so skye'i rtog med kyi shes pa la mi snang ba'i chos rtog pa kho nas 'jog dgos pa du ma zhig yod cing de yang rang mtshan gyis grub par 'di pa bzhed pa'i phyir ro/ /des na 'jug @54b TIka chen mo las/ rtog pa kho na min gyi rtog med kyi shes pa la yang bya ste zhes gsungs pa'i kho na dang yang sgras rtog pa dang rtog med gnyis ka yod pa gsal bar bstan pa la lung des rtog blo med par bstan to zhes ma 'dzin cig /yang kha cig/ skabs 'di'i bsam pa la rtog med kyi shes pa yod par gsungs pa'i tshig 'dis kyang dgag bya bden pa dbang shes la snang bar bshad dam snyam du sems pa yang mi 'thad de/ gsung 'dis rtog bcas dang rtog med kyi shes pa'i dbang gis dngos po yod par 'jog tshul bstan la/ de yang de gnyis la snang ba'i dbang gis bzhag tsam gyi rang mtshan du yod par bstan cing de'i shugs kyis don dam du yod pa gcod pa'i phyir dang/ de gnyis la snang ba'i dbang gis bzhag pa tsam gyi rang mtshan ni kun rdzob bden pa yin gyi rtags kyi dgag bya ma yin pa'i phyir ro/ /de yang 'jug pa'i rnam bshad chen mo las/ de gnyis kyi dbang gis yod par bzhag gi don dam par yod pa min pa'i dngos po rdzun pa rnams kun rdzob kho nar yod pa ni/ dngos rnams skye ba kun rdzob tu/ zhes pa'i don te/ de yang bden 'dzin gyi kun rdzob tu yod pa'i don min no zhes gsal bar gsungs pas tha snyad 'jog tshul ston pa'i gsung gis rtags kyi dgag bya'i bden tshad bstan par smra ba ni legs par smra ba ma yin no/ /'o na lugs 'dis dngos po rnams la blo'i dbang gis bzhag pa'i rang mtshan tha snyad du khas len cing blo'i dbang gis bzhag pa la ma ltos pa'i don rang mtshan gyi sdod lugs su grub pa rtags kyi dgag bya'i bden tshad du bzhed na blo'i dbang gis bzhag ma bzhag @55a @#/ /gi don ji ltar bya snyam na/ bshad par bya ste/ sgyu ma mkhan gyis rde'u shing bu sogs rta glang du sprul pa'i tshe sgyu ma mkhan la rde'u shing bu sogs rta glang du snang ba tsam yod kyang rta glang du zhen pa med/ sngags rdzas kyis mig bslad pa'i ltad mo ba la ni sprul gzhi de rta glang du snang ba dang dar zhen pa gnyis ka yod/ sngags rdzas kyis mig ma bslad pa gnas der phyis sleb pa'i gang zag lta bu la sprul gzhi de rta glang du snang ba dang zhen pa gnyis ka med do/ /de yang sgyu ma mkhan ltar na sgyu ma'i sprul gzhi de sngags rdzas kyis bslad pa'i blo'i dbang gis rta glang du bzhag pa tsam ma gtogs de 'dra'i blo la ma ltos pa'i rde shing rang gi sdod lugs kyi ngos nas rta glang du snang ba ma yin no/ /'on kyang sngags rdzas kyis bslad pa'i blo'i dbang gis bzhag pa'i rde shing kho rang gi ngos nas rta glang du snang ba'i sdod lugs shig ni yod dgos so/ /de lta ma yin par shes pa 'khrul ba'i ngo tsam du rta glang du snang ba tsam yin gyi spyir sprul gzhi rta glang du mi snang zhes zer na snang ba la 'khrul pa'i blo mi srid par 'gyur te/ spyir rde shing rta glang du snang ba tsam yang mi srid pa'i phyir ro/ /des na sprul gzhi rta glang du snang bar 'jog nus mod kyang blo 'khrul pa la snang ba'i dbang is da ltar bzhag pa yin gyi de lta ma yin par sprul gzhi rang gi sdod lugs kyi dbang gis 'jog pa ma yin no/ /dpe de bzhin du dbu ma pa 'di ltar na dngos po rnams tshad mas mi gnod pa'i blo'i dbang gis 'jog pa dang/ de'i dbang gis bzhag pa'i dngos po rang gi sdod lugs shig kyang yod pa me 'gal te/ sngags @55b rdzas kyis bslang pa'i blo'i dbang gis sprul gzhi rta glang du snang bar 'jog nus shing blo de'i dbang gis bzhag pa'i sprul gzhi'i ngos nas kyang rta glang du snang ba'i sdod lugs yod pa bzhin no/ /de'i phyir myu gu sa bon las skye ba blo'i dbang gis bzhag pa dang myu gu rang gi ngos nas kyang sa bon las skye ba mi 'gal lo/ /'di ni lugs 'das tha snyad du yod par 'jog pa thams cad la shes par bya'o/ /sngags rdzas kyis mig bslad pa'i ltad mo pa la rta glang du snang ba de nang gi blo'i dbang gis bzhag pa'i sdod lugs su mi 'char gyi gang du rta glang snang ba'i gzhi der dang po nas rta glang mtshan nyid pa gcig yul gyi go sa mnan nas bsdad yod par 'dzin na/ /de bzhin du sems can tha mal pa rnams kyis dngos po rnams nang blo'i dbang gis bzhag pa la gtan ma ltos par yul rang gi sdod lugs kyi ngos nas grub grub pa zhig tu 'dzin pa yin te/ de ni bden 'dzin lhan skyes kyi 'dzin tshul lo/ /'dzin tshul des bzung ba ltar du grub na gcig du bral la sogs pa'i gtan tshigs kyis khegs par 'gyur gyi blo'i dbang gis bzhag pa'i sdod lugs tsam ni rigs pa de dag gis mi khegs par bzhed do/ /des na tshul 'dis 'di pa'i lugs kyi ji tsam gyis na de kho na nyid la dpyod par song ba'i sa mtshams kyang shes par nus te/ spyir myu gu sa bon las skye ba yin no zhes pa'i ming dang tha snyad tsam gyis mtshim par myu gu rang gi ngos nas sa bon las skye mi skye dpyod pa tsam ni de kho na nyid dpyod par song ba ma yin la/ myu gu'i skye ba de blo'i dbang gis bzhag pa la ma ltos pa'i yul kho rang gi sdod lugs kyi ngos @56a @#/ /nas skye'am mi skye dpyod pa na de kho na nyid la dpyod par 'jog pa yin no/ thal 'gyur ba'i lugs la ni dpyod tshul snga ma ltar na'ang de kho na nyid la dpyod par song ba yin zhing blos bzhag pa la ma ltos pa'i sdod lugs kyis yod par 'dzin pa ni phra ba'i bden 'dzin lhan skyes ma yin no/ /dngos por smra bas tshad ma gnyis kyi dbang gis gzhal bya rang spyi gnyis 'jog mod kyang don gyi sdod lugs su yod pa'i chos shig tshad mas rtogs par 'dod kyi tshad ma la snang ba'i dbang gis phar bzhag pa de ga yul gyi sdod lugs su 'dod pa min pas 'di ba'i blo'i dbang gis bzhag pa dang don gtan mi 'dra'o/ /'jug TIka chen mo las/ sgyu ma'i snang ba ni rnal 'byor spyod pa'i dbu ma pa ltar na rang rig mngon sum dang/ phyi rol khas len pa'i rang rgyud pa ltar na sa phyogs sam bar snang lta bu'i gzhi 'dzin pa'i dbang po'i mngon sum gyis grub la zhes gsungs pa ni rnal 'byor spyod pa'i dbu ma pa ltar na sgyu ma'i rta glang de sems kyi snang cha tsam yin pas sems de 'jal ba'i rang rig gis shugs la rtogs pa dang/ mdo sde spyod pa'i dbu ma pa ltar na sgyu ma'i rta glang de phyi rol don dang/ kun brtags pa'i gzugs kyi skye mched yin pas sa phyogs dang bar snang ci rigs 'dzin pa'i dbang mngon gyis 'grub pa la dgongs pa yin no zhes mkhas grub chen po 'jam dbyangs bzhad pa'i rdo rje gsung ngo/ /mig ma bslang ba'i ltad mo ba la rde'u shing bu rta glang du snang ba dang der zhen pa gnyis ka med pa dang mtshungs pa ni tshul bzhin sems pa'i rigs pas legs par dpyad cing @56b bsgoms pa las nam zhig rnam par mi rtog pa'i ye shes skyes pa na ye shes de'i ngor gnyis snang thams cad nye bar zhi bas bden par snang ba dang zhen pa gnyis ka med pa'o/ /mdor bsdu na rang rgyud pa'i lugs la dngos po rnams blo'i dbang gis bzhag par khas lan cing rtog pas btags par yang khas len yang blos bzhag pa la rtog pa kho nas bzhag pas khyab pa khas mi len te/ blos bzhag pa la rtog med kyi shes pas bzhag pa yang 'dod pa'i phyir ro/ /de lta na yang blo gang yin gyis bzhag pa thams cad tha snyad du yod par mi 'dod pas tshad mas mi gnod pa'i blo'i dbang gis bzhag pa gcig dgos so/ /de ltar byas na gzugs sogs kyi chos rnams snang phyogs nas blo gnod med la snang ba'i dbang gis phar bzhag pa tsam gyi sdod lugs su grub pa dang/ stong phyogs nas blos bzhag pa la ma ltos pa'i don rang gi sdod lugs kyi ngos nas grub pas stongs pa gnyis tshogs shig dgos so/ blo'i dbang gis bzhag pa tsam du gsungs pa'i tsam sgras kyang thun mong ma yin pa'i sdod lugs kyis grub pa gcod kyi ming brdas bzhag tsam ma yin pa'i sdod lugs yod pa mi gcod do/ /'di dag legs par shes na rang rgyud pa'i bden gnyis kyi 'jog tshul dngos smra ba man chad las phra ba dang dbu ma thal 'gyur ba las rags pa'i khyad par rnams ji bzhin du phyed nus shing/ de yang rje yab sras kyi gsung rab rnams la zhib tu dpyad nas chos kyi mde'u rtse nang du bsgyur ba zhig la 'ong rgyu yin par 'dug go /gnyis pa de 'gog pa'i rigs pa bshad pa la/ slob @57a @#/ /dpon zhi ba 'tshos dbu ma rgyan las ngo bo la dpyod pa gcig du bral gyi rigs pa nyid rtsal du bton nas 'chad par mdzad cing/ de yang mdo las/ blo yis rnam par gzhigs pa na/ /ngo bo nyid ni gzung du med/ /de phyir de dag brjod med dang/ /ngo bo nyid kyang med par bshad/ /ces sogs dang/ yab sras mjal ba'i mdo las/ me long shin tu yongs dag la/ /ji ltar rang bzhin med pa yi/ /gzugs brnyan snang ba de bzhin du/ /ljon pa chos 'di shes par gyis/ /nga yis rang bzhin stong pa zhes/ /gang bshad stong pa lta bar gyis/ zhes sogs dang/ langkar gshegs pa'i mdo las/ gcig dang gzhan nyid spangs pa yis/ /gzugs ni ji ltar me long la/ /snang yang de na yod ma yin/ /de bzhin dngos po'i ngo bo nyid/ /ces sogs kyi dgongs par 'chad par mdzad do/ /slob dpon chen po ka ma la shI la'i dbu ma snang ba las ni sems tsam pas dbu ma pa la rgol ba'i tshul mang po zhig gsungs nas de dag gi lan 'chad par lugs rigs mang du mdzad pa'i rigs pa'i skabs su rdo rje gzegs ma dang/ yod med skye 'gog dang/ mu bzhi'i skye 'gog dang/ gcig du bral dang/ rten 'brel gyi gtan tshigs rnams kyang rgyas par gsungs so/ /'dir gcig du bral gyi gtan tshigs nyid cung zad brjod par bya ste/ de yang dbu ma rgyan las/ bdag dang gzhan smra'i dngos 'di dag /yang dag tu na gcig pa dang/ /du ma'i rang bzhin bral ba'i phyir/ /rang bzhin med de gzugs brnyan @57b bzhin/ zhes rtags 'god par mdzad nas/ de'i tshul sgrub pa la phyogs chos sgrub pa dang khyab pa sgrub pa gnyis/ de'i dang po la bden pa'i gcig bral sgrub pa dang du bral sgrub pa gnyis/ de'i dang po la phyi nang gi sde bas btags pa'i rtag dngos gcig bden dgag pa dang/ gnas ma bu pa'i sde bas btags pa'i gang zag gcig bden dgag pa gnyis ni khyab pa'i gcig bden dgag pa dang/ rdul phran cha med kyis brtsams pa'i phyi don dgag pa dang/ don smra gnyis dang phyi rol pa dang rnam rig pas btags pa'i rnam shes gcig bden dgag pa rnams ni ma khyab pa'i gcig bden dgag pa dang/ bden pa'i du bral sgrub pa la bden pa'i gcig med pa nyid rtags su 'god par mdzad la/ khyab pa sgrub pa la gcig dang du ma phan tshun spangs 'gal la brten pa'i dngos 'gal du sgrub pa nyid kyis mdzad do/ /de yang gzhung dang sbyar nas rgyas par bshad na legs mod kyang ha cang mangs pas don gyi snying po tsam brjod na/ 'dir chos can du 'dzin rgyu ni gtso bo dang gang zag rang rkya ba sogs rang gzhan gyi sde pas btags pa'i dngos po nyid bzung bas chog ste/ rtags chos rnam par bcad tsam yin pa la gzhi ma grub chos can du bzung yang chog par mdo sde pa'i skabs su bshad zin pa'i phyir dang/ don dang blo dang rgol ba la ltos pa'i ma grub pa gsum gyi nang nas dang po la chos can gyi ngo bo med nas ma grub pa la sogs pa ma grub pa'i rtags lnga bshad pa yang rtags chos sgrub pa'i rnam pa can la dgongs pa yin gyi rtags chos med dgag yin pa la ma nges pa'i phyir ro/ /khyad par du 'dir @58a @#/ /ni slob dpon ka ma la shI la'i dbu ma snang ba las/ gang la dngos po'i chos yod pa'i ngo bor sgrub par mi 'dod kyi/ /'on kyang sgro btags pa'i chos rnam par bcad pa sgrub pa tsam zhig brjod par 'dod pa de la ni ma grub pa nyid la sogs pa'i nyes pa brjod pa tha snyad du yang dngos por gyur pa'i chos can mi dgos te/ de ni de'i chos ma yin pa'i phyir ro/ /de la bltos nas kyang de'i chos can nyid du mi 'thad pa'i phyir ro/ /de ma grub tu zin kyang bsgrub par bya ba med na ri ? 'byung gi gtan tshigs mngon par 'dod pa'i don grub pa la gegs byed pa med pa'i phyir ro/ /zhes rtags chos rnam par bcad tsam la chos can dngos po ba mi dgos pa gsal bar gsungs so/ /'on kyang rjes dpag skye ba'i tshe chos can 'ba' zhig pa'i sgra don phyi rgol gyi blo ngor khyab pa 'grub pa'i rten du dgos mi dgos sngar dpyad zin to/ /gal te gcig du bral gyi sbyor ba 'di rtags dang bsgrub bya'i chos med dgag kho na yin na bsgrub bya bsgrub pa mi 'thad de/ rtags chos kyi rang gi ngo bo med la/ de med na ngo bo gcig pa mi 'thad cing de ltar na bdag gcig pa'i 'brel ba med pas go bya go byed du mi rung bar 'gyur ba'i phyir ro/ /gal te rtags chos ma yin dgag yin zer na yang mi 'thad de/ de ltar na gcig dang du ma'i rang bzhin dang dral ba'i dngos po ba yod par 'gyur ba'i phyir dang/ de ni dbu ma pas khas mi len pa'i phyir ro/ /zhe na skron med de/ bdag gcig pa'i 'brel ba ni dngos po kho na la ma yin pas dngos po med pa la'ang yod pa'i phyir te/ de'i bdag nyid yin pa @58b ni ngo bo tha dad med pa'i rnam grangs yin la/ ngo bo nyid med pa dag kyang bdag med pa nyid du mtshungs pa'i phyir zhes dbu ma snang ba las gsungs te/ yod pa la ngo bo tha dad bkag na ngo bo gcig tu 'gyur zhing spyir gcig yin pa yang khegs pas ngo bo gcig pa'i tha dad pa'i bdag gcig 'brel ba yod pa dang/ rtags chos gnyis ka bdag mang ba'i ngo bor mtshungs pas med dgag yin kyang go bya go byed du mi 'gal lo snyam du dgongs pa'o/ /de ltar yang dbu ma snang ba las/ de ni rigs pa ma yin te/ de'i bdag nyid ni tha dad pa med pa'i rnam grangs yin pa'i phyir la/ de ni ngo bo nyid med pa dag kyang bdag med pa nyid du mtshungs pas 'gal ba med pa kho na'o/ /zhes dang/ de bzhin du dngos po rnams yang dag par na gzugs brnyan la sogs pa bzhin du gcig dang du ma'i rang bzhin las ldog pa ni don dam pa pa'i ngo bo nyid las kyang ldog par nges pas de'i phyir ldog pa'i bye brag la bltos pas byas pa'i tha dad pa yod pa'i phyir go bar bya ba dang go bar byed pa'i dngos por 'gyur ro/ /zhes gsungs so/ /'di la sngar gyi bod kyi mkhas pa dag gcig du bral gyi snang bas bden med kyi snang ba sgrub na ma yin dgag dang/ gcig du bral gyis don dam gyi dngos po'i tha snyad byar rung bas stong pa sgrub pa na med dgag bsgrub pa yin zhes zer ba sogs kyang 'di dag gi gnad ma rtogs pa dang/ bden med sgrub pa'i bsgrub bya'i chos la rnam par bcad tsam kho na 'dzin pa klu sgrub yab sras kyi rkang tshugs pa'i grub pa'i mthar gnas pa ma dgongs pas lan pa'o/ /dbu ma rgyan las/ bdag dang gzhan @59a @#/ /smra'i dngos 'di dag /ces sogs kyis gsungs pa'i rigs pa 'di sun 'byin pa'i ngag thal 'gyur dang sgrub pa'i ngag rang rgyud kyi sbyor ba gang byas kyang chog par dbu ma snang ba las gsungs shing/ de la dogs pa 'di yod de/ gal te thal 'gyur du byed na/ yang dag tu na gcig pa dang/ du ma'i rang bzhin bral ba'i phyir/ zhes bden pa'i gcig dang du ma gang rung dang bral ba gtan tshigs su smras pa mi rung bar 'gyur te/ thal 'gyur la ni pha rol pos khas blangs pa zhig rtags su bkod nas gzhan mi 'dod pa'i thal ba 'phen pa zhig dgos pa'i phyir zhe na/ skyon med de/ pha rol pos rtags bden pa'i gcig dang du ma dang bral ba dngos su khas ma blangs kyang shugs kyis khas blangs pa'i phyir dang/ de'i rgyu mtshan yang pha rol pos rtags de'i khyab bya dngos su khas blangs pa'i phyir dang/ khyab bya dngos su khas blangs na khyab byed kyang shugs la khas blangs par 'gyur ba'i phyir ro/ /de skad du yang dbu ma snang ba las/ de la 'di thal ba bsgrub na gtan tshigs ma grub pa yang ma yin te/ 'di ltar ci ste pha rol po dag gis dngos po rnams gcig dang du ma dang bral bar khas ma blangs su zin kyang/ 'on kyang des khyab pa'i chos khas blangs pa'i phyir shugs kyis na de yang khas blangs pa kho na yin te/ zhes gsungs pa'i phyir/ gal te khyab bya dngos su khas blangs pas khyab byed shugs la khas blangs pa yang mi 'thad de/ gzhan du na rgyang paN gyis kyang skye ba snga phyi dang thams cad mkhyen pa khas blangs par 'gyur ba'i phyir/ de'i rgyu mtshan yang @59b yod de/ rgyang paN gyis che 'di'i rig pa khas blangs la de la ni skye ba snga ma'i rig pa sngon du 'gro bas khyab pa'i phyir dang/ yang nges 'byung ba bzhi yod par khas blangs la/ de yod pa la thams cad mkhyen pas gzigs pas khyab pa'i phyir ro/ / gal te rgol ba de dag gis khas blangs zhes mi smra yi shugs kyis khas blangs par song ngo zhe na/ de yang mi 'thad de/ de lta na chos gcig brjod pa na de la khyab byed du yod pa'i chos thams cad sgra des shugs la brjod pa dang sgra'i rjes su 'brangs pa'i blo des de dag shugs la nges par 'gyur ba'i phyir ro zhes zer na brjod par bya ste/ 'dir khyab bya dngos su khas blangs pas khyab byed shugs kyis khas blangs par 'gyur tshul spyir khyab bya khas blangs na khyab byed shugs kyis khas len dgos zhes pa tsam yin na skyon de dag 'jug pa bden mod kyang/ gzhung gi don ni bden pa'i gcig min pa shugs kyis khas blangs pa'i khyab bya khyad par ba zhig pha rol pos dngos su khas blangs pa la dgongs nas de ltar gsungs pas skyon med do/ / de yang pha rol pos khas blangs pa'i dbang phyug rtag pa lta bu la mtshon na des de rtag par khas len chul ni/ snga dro'i dus na gang yod pa'i dbang phyug de nyid ma lus pa phyi dro'i dus na'ang yod par 'dod pas snga dro'i dus na yod pa'i dbang phyug gi cha shas 'ga' zhig phyi dro'i dus na yod kyang cha gzhan 'ga' zhig phyi dro'i dus na med par 'dod pa ma yin gyi/ snga dus na yod pa'i cha hril po phyi dus na yod cing/ phyi dus na yod pa'i cha snga dus na med pa yang med par 'dod do/ /des na dbang phyug @60a @#/ /yin pa'i cha ngo bo phan tshun tha dad pa mi 'dod pa ni dbang phyug rtag pa dang gcig tu 'dod pa'i 'dod lugs so/ /de'i phyir dbang phyug gcig gi rang bzhin dang bral bar dngos su khas ma blangs zhes pa'i rgyu mtshan de'o/ /yang de lta bu'i dbang phyug des snga dro bde ba skyed pa dang phyi dro sdug bsngal skyed par byed pa sogs kyi 'bras bu skyed pa'i rim pa du ma zhig ni khas len no/ /de ltar 'bras bu rim can la nye bar sbyor bar khas blangs pa des ni bden pa'i gcig ma yin pa shugs kyis khas blangs par 'gyur te/ bde sdug bsngal skyed pa'i dus tha dad pa du ma'i dbang phyug rnams rim can du yod dgos pas dbang phyug la rim pa du ma yod dgos par 'gyur la dbang phyug de dag kyang cha med yi gcig yin pa'i phyir ro/ /tshul 'dis ni gtso bo dang dus la sogs pa'i gzhi gzhan la'ang bden pa'i gcig min pa'i khyab bya khas blangs tshul yang shes par bya'o/ /'di dag ni rang lugs kyi bum pa gcig gi mtshan gzhir 'jog pa dang snga dro gnyis ka'i dus na yod par 'dod kyang snga dro'i dus kyi bum pa de phyi dro'i dus kyi bum pa dang gcig tu mi 'dod la de gnyis du ma'i mtshan gzhir yang 'jog pa dang/ yang sngon po gcig tu khas len zhing des sngo 'dzin snga phyi du ma rim can du bskyed pa lta bu la skyon de dag mi 'jug pa'i rgyu mtshan shes dgos pa yod do/ /de dag kyang dbu ma snang ba las de la re zhig gang gis dbang phyug la sogs pa rtag pa dang gcig pu'i ngo bo nyid du kun brtags pa de dag gis ni de dag gi 'bras bu rim gyis 'byung ba la nye bar sbyor ba nyid kyi chos su khas blangs pa'i phyir shugs kyis na gcig gi ngo bo nyid dang bral ba yang khas blangs pa nyid de/ ngo bo @60b gcig la skyed par mi byed pa'i gnas skabs dang khyad par med pa nyid kyis dus snga ma bzhin du dus phyis kyang skyed par byed pa nyid du mi rung ba'i phyir ro/ /'on te skyed par byed pa nyid yin na ni sngon gyi gnas skabs dang mtshan nyid mi mthun pa'i ngo bo nyid yin pa'i phyir gcig pa nyid nyams par 'gyur ba yin no/ /zhes pa'i don yin zhing gzhung der skyes bu dang gtso bo dang dus dang tshangs pa la sogs pa gzhan sde rtag smra rnams kyis btags pa'i rtag pa dang gcig pu rnams dang/ rang sde bye smras 'dus ma byas gsum po rtag pa'i dngos po nyid du smras pa dang/ gnas ma bu pas gang zag brjod du med par smras pa dang/ rnam rig pas shes pa bden pa'i ngo bo nyid du sgro btags pa dag gis kyang bden pa'i gcig dang bral ba'i gtan tshigs kyi khyab bya gcig min pa khas blangs tshub re re nas rgyas par gsungs te/ gzhan sde dang rang sde la bden pa'i gcig bral shugs kyis khas blangs par rigs pa'i 'phul mtshams mi 'dra ba phra mo du ma zhig yod cing/ rang sde la'ang don smra sde gnyis rnam rig pa'i lugs rnams la rigs pa'i gnod pa ston lugs pha rol po'i khas blangs la 'gro tshul mi 'dra ba'i khyad par phra mo du ma zhig yod pa zhib tu shes dgos mod/ ji srid rang gi blo gros ku sha'i rtse me ltar ma gyur pa de srid du shing rta chen po'i gzhung la zhib tu dpyod pas ngoms pa med pa dang/ bshes gnyen mkhas pa tshul bzhin du bsten pa sogs rgyu tshogs du ma zhig la 'bad pas btsal na shing rta chen po rnams kyi rigs lam phra mo'i gnad 'gag rnyed par 'gyur gyi/ brjod pa kha byang tsam las rang la gtol med pa'i zer sgros bsgrigs pa tsam la lo 'phul zla 'phul @061a @#/ /gyi slob gnyer sha lpags zad zad du byas kyang rtogs dka' bar snang ngo/ /rigs pa 'di rang rgyud du byed pa'i rtags kyi tshul sgrub lugs dang don dang tha snyad sgrub gang yin pa rnams kyi tshul cung zad bshad na/ tshul sgrub pa la gnyis/ phyogs chos sgrub pa dang/ khyab pa sgrub pa'o/ /dang po la gnyis/ bden pa'i gcig bral sgrub pa dang/ du bral sgrub pa'o/ /dang po ni/ gtso bo la sogs pa de dag chos can/ bden pa'i gcig tu ma grub ste/ 'bras bu snga phyi rim can du ma la phan pa snga phyi rim can du ma nye bar sbyor ba'i phyir/ gal te 'bras bu snga phyi tha dad skyed pa'i nus pa mi 'dra ba du ma yod pa'i phyir skyon med do snyam na/ de chos can/ rtag pa gcig bden ma yin par thal/ 'bras bu rim can gyi dbang gis snga phyi'i rang bzhin 'jig pa dang 'byung bar 'gyur ba'i phyir/ zhes 'chad par dbu ma rgyan las/ 'bras bu rim can nyer sbyor bas/ /rtag rnams gcig pu'i bdag nyid min/ /'bras bu re re tha dad na/ /de dag rtag las nyams par 'gyur/ /zhes so/ /rang sde gzhan dag gis bsgom byung 'phags pa'i mnyam gzhag ye shes kyis shes par bya ba'i 'dus ma byas gsum gcig tu bden par 'dod pa 'gog pa ni/ 'dus ma byas gsum chos can/ gcig tu bden pa ma yin te/ bsgom byung gi shes pa snga phyi rim can du ma dang yul dang yul can du 'brel ba'i phyir/ zhes 'chad par rgyan las/ bsgoms pa las byung shes pa yis/ /shes bya 'dus ma byas smra ba'i/ /lugs la'ang gcig min de dag ni/ /rim can shes dang 'brel phyir ro/ /zhes so/ /gal te rnam shes rim can dang 'brel yang yul bden @061b pa'i gcig tu yod pa mi 'gal lo zhe na/ shes pa snga ma'i yul du gyur pa'i shes bya shes pa phyi ma'i dus na yod na shes pa snga ma'ang de'i tshe yod dgos te/ yul shes dus mnyam pa'i phyir ro/ /'dod na/ bsgom byung gi shes pa snga phyi 'chol bar thal lo/ / gal te shes pa snga ma'i yul shes pa phyi ma'i dus na med na 'dus ma byas de chos can/ skad cig mar thal/ sngon gyi rang bzhin de phyi ma'i gnas skabs su mi 'byung/ phyi ma'i rang bzhin de snga ma'i gnas skabs su mi 'byung ba'i dngos po yin pa'i phyir/ bsgom byung gi shes pa bzhin/ yang na 'dus ma byas phyi ma rnams chos can/ 'dus ma byas su mi 'gyur te/ 'dus ma byas snga ma snga ma'i mthu la brten nas byung ba'i phyir/ dper na bsgom byung gi sems sems byung bzhin/ ma grub na/ de chos can/ rang dbang du byung bar thal/ rgyu gzhan la ltos med du byung ba'i phyir/ 'dod na rtag tu yod pa'am gtan nas med par thal/ rgyu'i rjes su mi byed pa'i dngos po yin pa'i phyir/ zhes 'chad par rgyan las/ rnam shes snga mas shes bya ba'i/ /rang bzhin rjes su 'brangs na ni/ /shes pa snga ma'ang phyi mar 'gyur/ /phyi ma'ang de bzhin snga mar 'gyur/ /sngon dang phyi ma'i gnas skabs su/ /de yi ngo bo mi 'byung na/ /'dus ma byas te shes pa bzhin/ /skad cig 'byung bar shes par bya/ /snga ma snga ma'i skad cig gi mthu yis 'byung bar gyur pas na/ /'dus ma byas su 'di mi 'gyur/ /skad cig pa rnams de dag tu/ /rang dbang 'byung bar 'dod na ni/ /gzhan la ltos pa med pa'i phyir/ /rtag tu yod pa'am med par 'gyur/ /zhes so/ /de lta bu'i rang sde dang gzhan sde gnyis kyis @062a @#/ /'dod pa'i rtag pa gcig bden rnams 'gog pa'i tshul 'di dag kyang phyogs snga mas gcig tu khas blangs lugs legs par shes nas des skyon khur lugs shes dgos pa gnad yin gyi/ de lta ma yin par gcig tsam dang rtag pa tsam rigs pa de dag gis 'gog par byas na gzhan la bkod pa'i skyon thams cad rang la yang mtshungs par 'jug pa bzlog tu med pas shing rta chen po rnams kyi gzhung phyin ci ma log par 'chad dka' bar 'gyur ro/ /gnas ma bu pa'i sde pas 'dod pa'i gang zag gcig bden dgag pa ni/ gang zag chos can/ bden pa'i gcig dang du ma dang bral bar thal/ rtag mi rtag gang du yang brjod du med pa'i phyir/ nam mkha'i me tog bzhin/ khyab ste/ skad cig mar gyur na ni du ma'i rang bzhin du 'gyur la/ skad cig ma ma yin na ni gcig pu'i ngo bo nyid du rigs kyi/ gnyis ka ltar yang brjod du med na ni tshegs med par gcig dang du ma'i rang bzhin gyis stong pa nyid du 'grub pa'i phyir/ zhes 'chad par/ de nyid las/ skad cig skad cig ma yin par/ /gang zag bstan du mi rung bas/ /gcig dang du ma'i rang bzhin dang/ /bral bar gsal bar rab tu shes/ /zhes so/ /khyab pa'i gcig bden dgag pa ni/ nam mkha' dang dus la sogs pa rnams chos can/ gcig tu bden pa ma yin te/ shar la sogs pa'i phyogs kyi cha shas dang 'das pa la sogs pa'i dus kyi cha shas du ma dang 'phrad 'dus 'brel ba'i phyir/ zhes 'chad par de nyid las/ tha dad phyogs can dang 'brel phyir/ /khyab rnams gcig pur ga la 'gyur/ /zhes so/ /rags pa gcig bden dgag pa ni/ bum @062b pa la sogs pa'i rags pa rnams chos can/ gcig tu bden pa ma yin te/ sgrib ma sgrib sogs rdzas la brten pa'i 'gal 'du/ g.yo mi g.yo sogs bya ba la brten pa'i 'gal 'du/ tshon gyis bsgyur ma bsgyur sogs yon tan la brten pa'i 'gal 'du sogs dang ldan pa'i phyir/ zhes 'chad par de nyid las/ sgrib dang ma sgrib dngos sogs phyir/ /rags pa rnams kyang gcig pu min/ /zhes so/ /rdul phran gcig bden dgag pa ni/ phyogs bcu'i rdul gyi dbus na gnas pa'i rdul phran chos can/ shar rdul dang phyogs lhag ma dgu'i rdul go sa tha dad med par thal/ /khyod kyi shar la bltas pa'i ngos de dang phyogs gzhan dgu la bltas pa'i ngos rnams gcig yin pa'i phyir/ 'dod na/ sa'i dkyil 'khor la sogs pa'i rags pa rgyas par 'gyur mi srid par thal lo/ / gal te phyogs bcur bltas pa'i ngos so sor 'dod na/ rdul phra rab de chos can/ cha med kyi gcig ma yin par thal/ phyogs bcu'i rdul la blta ba'i ngos du ma dang ldan pa'i phyir/ zhes 'chad par de nyid las/ 'byar ba dang ni bskor ba'am/ /bar med rnam par gnas kyang rung/ /dbus gnas rdul phran rdul gcig la/ /bltas ba'i rang bzhin gang yin pa/ /rdul phran gzhan la blta ba'i ngos/ /gal te gzhan du 'dod na ni/ /rab tu phra rdul ji lta bur/ /gcig pu cha shas med par 'gyur/ /zhes so/ /de ltar rdul gran cha med ma grub pas rang gi sde pa rnams kyis smras pa'i gzugs can gyi khams bcu po rnams dang gzhan gyi sde pas btags pa'i rdzas dang yon tan dang las dang spyi dang bye brag dang 'du ba la sogs pa rnams kyang bden par ma grub pa shes par 'gyur zhing/ khyad par @063a @#/ /du rang sdes smras pa'i gzugs can gyi khams bcu bden par med par shes na rnam par shes pa'i khams lnga yang bden par med par shes te/ de dag ni gzugs can gyi khams la brten nas skyes pa'i phyir ro/ /rnam par shes pa'i khams lnga bden par med na de ma thag pa'i rkyen gyis mngon par bsgrubs pa'i yid kyi rnam par shes pa yang bden par grub pa mi 'thad do/ /rnam par shes pa drug gi tshogs bden par ma grub na rnam par shes pa de 'das ma thag pa'i yid kyi khams kyang bden par mi rigs so/ /de ltar sems bden par med na de dang grub pa dang bde ba tha mi dad pa'i tshor ba dang 'du shes dang sems pa la sogs pa sems las byung ba rnams kyang bden par med pa bde blag tu 'grub bo/ /de'i phyir ldan pa ma yin pa'i 'du byed dang 'byung ba chen po rnams rgyur byas pas grub par smras pa'i rnam par rig byed ma yin pa'i gzugs kyang bden pa'i gcig tu ma grub par shes nus la/ nam mkha' la sogs pa'i 'dus ma byas rnams kyang sngar bkag zin pas khams bco brgyad thams cad bden pa'i gcig tu ma grub par rtogs par sla'o zhes dbu ma rgyan rang 'grel las gsungs shing/ de ni yul bden pa'i gcig tu grub pa 'gog pa'i rigs pa yul can la'ang sbyar nas 'gog tshul yin no/ /shes pa gcig bden 'gog pa'i rigs pa khyad par nga ni/ bye brag smra ba'i shes pa rnam med du 'dod pa'i lugs dgag pa dang/ mdo sde pa'i lugs la sna tshogs gnyis med pa/ sgo nga phyed tshul ba/ rnam shes grangs mnyam pa'i lugs dgag pa dang/ phyi rol pa'i lugs dgag pa la bye brag pa dang rig pa can pa'i @063b lugs/ zad byed pa'i lugs/ rgyang ? phan pa'i lugs/ grangs can gyi lugs/ rig byed gsang ba'i mthar smra ba'i lugs dgag pa rnams dang/ rnam rig pa'i lugs dgag pa la rnam bden dgag pa/ rnam rdzun dgag pa gnyis dang snga ma la'ang rnam pa 'dod tshul gyi sgo nas 'gog tshul gsum sogs kyi sgo nas bden pa'i gcig bral sgrub pa'i rigs pa rgyas par dbu ma rgyan rtsa 'grel las bshad do/ /de la spyir rang rgyud shar gsum gyi gzhung de dag gangs ri'i ljongs su bstan pa snga dar gyi dus dang phyi dar la rngog lo chen po yab sras sogs kyi dus su yang 'chad nyan gyi srol shin tu dar bar snang zhing/ de'i stobs kyis rje yab sras kyi dus su yang 'chad nyan gyi srol dar so che bar yod pas snga ma rnams kyis ma thon pa'i rigs pa'i gnad 'gag 'ga' zung ma gtogs rigs pa'i rnam grangs re re nas gzhung dang sbyar nas shin tu rgyas par 'chad par ma mdzad pa'i rgyu mtshan de ltar yin par rje'i gsung gi zur dang mkhas grub smra ba'i nyi ma'i stong thun gyis shes so/ /da lta ni gzhung de dag gi thog nas 'chad nyan byed pa'i srol nub pa ltar gyur pas 'grel pa don gsal gyis mngon rtogs rgyan gyi mchod brjod 'chad pa'i skabs su gcig dang du ma'i ngo bo nyid dang bral ba'i phyir zhes pa'i tshig zur zhig byung ba de la mkhas pa snga mas gcig du bral gyi rnam gzhag cung zad re 'chad par mdzad pa'i tshig sgros rnams las mgo mjug tshang ma tshang ci rigs la byang pa'i ma Ni 'dren pa ltar rjes zlos byed pa kho nas gcig du bral gyi gtan tshigs legs par shes pa'i mngon pa'i nga rgyal brtan par byas te gnas pa las gzhan du rtsa ba'i gzhung dang @064a @#/ /bstun nas rigs pa rgya bskyed lugs dang go ba 'tshol lugs sogs la blo kha phyogs pa dkon par snang ngo/ /rje bdag nyid chen pos drang nges rnam 'byed las/ rang gzhan gyi sde pas ci 'dra zhig khas blangs pa la yang dus kyi rim pa'am yul gyi cha'am shes pa'i yul gyi rnam pa sogs cha du ma med pa'i cha med mi srid par bstan nas zhes gsungs pa'i dus kyi rim pa'am zhas pas gtso bo dang/ gang zag dang/ dbang phyug dang/ bdag rtag pa la sogs pa dang/ bye smras btags pa'i 'dus ma byas rtag dngos gsum dang/ yul gyi cha'am zhes pas bum pa la sogs pa'i rags pa dang rdul phran cha med dang/ shes pa'i yul gyi rnam pa zhes pas phyi rol pa lugs lnga dang/ don smra sde gnyis dang/ rnam rig pa lugs gnyis rnams kyis 'dod pa ltar gyi shes pa rnams so sar cha du ma dang ldan par sgrub lugs kyi rigs pa'i rnam 'gyur shes dgos par gsungs pa yin zhang/ de'i rjes su yang de nyid las/ cha du ma dang ldan par grub pa na chos gcig cha du ma'i bdag nyid du yod pa tha snyad pa'i don la mi 'gal mod ? don ? dam par grub pa la ni cha dang cha can gnyis ngo bo tha dad na 'bral mang dang ngo bo gcig na cha rnams gcig tu 'gyur ba dang cha can du mar 'gyur ba'i gnod pa bstan nas zhes gsungs pa'i don ni/ rang gzhan gyi sde pa rnams kyis khas blangs pa'i chos de dag la bden pa'i gcig dang du ma 'gog pa'i rigs pa'i rnam 'gyur so so'i khas len la 'gro tshul dang/ des bden pa 'gog tshul rnams shas dgos par bstan pa yin te/ de yang 'gog pa'i skabs su pha rol po'i bsam ngo la bltos te bden pa'i khyad @064b par sbyor dgos shing/ spyir bden pa gnyis char du 'gog dgos pas bden pa'i khyad par sbyor mi dgos pa 'ga' zhig kyang yod mod/ phal mo cher ni bden pa'i khyad par sbyor dgos shing de yang kho rang gi lugs kyis rtag pa cha med du khas blangs pa dang dngos su khas ma blungs kyang rigs pas cha med du 'phul nas khas mi len dka' med du song rjes spyir cha med mi srid pa dang 'gal ba bsgrigs nas rigs pa'i gnod pa ston dgos pa sogs kyi khyad par mi 'dra ba du ma zhig yod do/ /de dag rang gzhan gyi sde pas btags pa'i dgag bya 'gog tshul yin kyang bden 'dzin lhan skyes kyi yul 'gog pa la'ang bden 'dzin gyis gzung ba ltar grub na yul gyi sdod lugs su grub dgos pa dang de yang blo la ma ltos pa'i sdod lugs su gyur pas rigs pa de dag gi gnod pa 'bab chul kyang legs par shes dgos so/ /kho bos de dag gi khyad par zhib bar smra ba'i rngo thogs mod kyi ha cang yi ge'i khur gyis 'jigs pas re zhig de tsam mo/ /gnyis pa bden pa'i du bral du sgrub pa ni/ bdag dang gzhan gyis smras pa'i dngos po de dag chos can/ bden pa'i du mar ma grub ste/ bden pa'i gcig dang bral ba de'i phyir/ khyab ste/ du ma ni gcig bsags pa'i mtshan nyid can yin pa'i phyir/ zhas 'chad par dbu ma rgyan las/ dngos po gang gang rnam dpyod na/ /de dang de la gcig nyid med/ / gang la gcig nyid yod min pa/ /de la du ma nyid kyang mang/ /ces dang/ phyi 'grel las/ 'di ltar du ma ni gcig bsags pa'i mtshan nyid do/ /gcig med na de yang med de/ shing la sogs pa med na nags tshul la sogs pa med pa bzhin no/ /zhes @065a @#/ /gsungs so/ /gnyis pa khyab pa sgrub pa la/ spyir rtags de mthun phyogs la yod par nges pa dang mi mthun phyogs la med par nges pa la tshad ma gsum dgos te/ rtags kyi mtshan gzhi nges pa'i tshad ma dang/ rtags dang dgag bya'i chos kyi gzhi mthun 'gog pa'i tshad ma dang/ bsgrub bya'i chos dang dgag bya'i chos dngos 'gal du nges pa'i tshad ma'o/ /de la dang po ni/ 'dir bden pa'i gcig dang du bral nges pa'i tshad ma ste bshad zin to/ /gzhan gnyis la bden par yod med dngos 'gal du nges pa'i tshad ma ni/ yod med gnyis gcig rnam par bcad tsam gyis cig shos yongs su gcod pa'i dngos 'gal du nges pas bden par yod med la phung gsum srid pa'i sgro 'dogs bcad nas blo kha phyogs pa tsam gyis dngos 'gal du nges par byad nus so/ /bden yod de bden pa'i gcig dang du bral yin pas rtags mi mthun phyogs la zhugs par mi 'gyur ram snyam na de tsam gyis rtags mi mthun phyogs la zhugs par mi 'gyur te/ rtags mi mthun phyogs la zhugs pa la ni dgag bya'i chos de yang yin rtags de yang yin pa'i gzhi mthun srid pa dgos shing/ bden yod yang yin bden pa'i gcig dang du bral yang yin pa'i gzhi mthun mi srid pa'i phyir skyon med do/ /de gnyis gzhi mthun mi srid par tshad mas nges pa ni gcig dang du ma gcig rnam par bcad na cig shos yongs su gcod pa'i dngos 'gal du nges pa'i tshad mas yod pa tsam la gcig dang du ma'i gnyis yin dang gnyis ma yin gyi phung gsum gyi sgro 'dogs bcad pa nyid kyis bden par yod pa la'ang bden pa'i gcig dang du ma'i @065b gnyis yin dang gnyis ma yin gyi phung gsum srid pa'i sgro 'dogs chod nas blo kha phyogs pa tsam gyis bden pa'i gcig dang du bral dang bden yod la gzhi mthun mi srid par nges nus so/ /zhes mkhas grub thams cad mkhyan pas gsungs so/ /dbu ma rgyan las kyang/ gcig dang du ma ma gtogs par/ /rnam pa gzhan dang ldan pa yi/ /dngos po mi rung 'di gnyis ni/ /phan tshun spangs ta gnas phyir ro/ /zhes dang/ phyi 'grel las/ gcig pu'i bdag nyid dang du ma'i bdag nyid ni phan tshun spangs te gnas pa'i mtshan nyid yin pas phung po gzhan sel to/ /zhes gtan tshigs 'di'i khyab pa sgrub pa'i skabs su gsungs so/ /dbu ma snang ba las kyang/ gang dag rnam pa thams cad la khyab par byed pa de dag ni phung po gzhan sel ba dag yin te/ dper na/ lus can dang lus can ma yin pa la sogs pa'i bye brag dag lta bu'o/ /gcig pa nyid dang du ma nyid dag kyang de dang 'dra la khyab par byed pa log pas kyang khyab par bya ba ldog par nges pas de'i phyir gtan tshigs mi mthun pa'i phyogs las ldog pa la the Etshom za ba ma yin te/ phung po gzhan mi srid pa'i phyir ro/ /zhes gsungs so/ /de la bden pa'i gcig dang du ma gang rung dang bral ba'i rtags kyis gang zag bden med du sgrub pa'i khyab pa nges pa'i tshad ma nges bden pa'i gcig du bral gyi gsal ba'i dbye ba mtha' dag la bden grub kyis stong pa'i khyab pa nges sam ma nges/ nges na de sgrub kyi bsgrub bya 'jal ba'i rjes dpag gis sgro 'dogs gsar du mi gcod par thal lo/ /ma nges so zhe na/ mi 'thad de/ spyis stong par nges na bye brag gis stong par nges pas khyab pa'i phyir ro zhe na/ @66a @#/ /'di'i lan la mkhas grub smra ba'i nyi mas ni rtag pa byas stong du 'jal ba'i tshad mas byas pa rtag pa'i gsal ba'i dbye ba mtha' dag la 'jug pa mi srid par ma nges kyang 'jug par 'dzin pa'i sgro 'dogs bcad cing/ phyis rtag pa'i khyad par la blo kha phyogs pa tsam gyis tshad ma gzhan la ltos med du de nyid byas pas stong pa'i nges pa 'dren pa yin no/ /'o na rjes khyab nges pa'i tshad mas byas pa'i gsal ba'i dbye ba mtha' dag la mi rtag pas ma khyab par 'dzin pa'i sgro 'dogs gcod nus par 'gyur la/ de lta na rjes khyab nges na bsgrub bya la sgro 'dogs chod pas khyab par thal lo zhe na mi mtshungs te/ spyis khyab kyang de'i bye brag gis khyab mi dgos shing spyi khegs na de'i bye brag kyang khegs dgos pa'i phyir ro/ /zhes gsungs shing 'dir yang de dang mtshungs par bzhed do/ /yang rgyal tshab rin po ches ni/ byas na mi rtag pas khyab pa nges pa'i tshad ma das byas pa'i steng du sgra'i rtag pas stong pa nges su chug kyang sgra khyad gzhir gzung ba'i steng du rtag pas stong bar mi nges pas skyon med la/ byas pa'i gsal ba'i dbye ba mtha' dag la mi rtag pas khyab pa nges pa'i tshad ma des kyang sgra'i byas pa la mi rtag pas khyab pa ma nges kyang sgra'i byas pa la blo kha phyogs nas byas pa'i gsal ba'i dbye ba mtha' dag la mi rtag pa dang tshogs pa tshad ma'i yul du song ba na bsgrub bya grub dgos pas/ de sgrub kyi tshul 'jal ba'i tshad mas sgrub bya grub par thal ba'i skyon med do/ /zhes gsungs so/ /bzhed pa snga phyi gnyis ka phal cher phyogs mthun par snang zhing sa bcad chen mor yang de dang mthun par 'byung ngo/ /sras gnyis @66b kyi bzhed pa rje'i dgongs pa dang gung bsgrigs na sgra mi rtag par sgrub pa'i tshul gsum nges pa'i tshad mas sgra mi rtag par shugs la rtogs pa'ang ma yin zhing sgra la rtag 'dzin gyi sgro 'dogs bcad pa'ang ma yin la/ tshul gsum nges pa'i tshad ma de skyes pa na bar du tshad ma gzhan brgyud mi dgos par de'i mthu la brten nas sgra rtag 'dzin gyi sgro 'dogs dang 'dzin stangs dngos su 'gal ba'i blo skyed nus pa zhig yin pas khyab pa nges na bsgrub bya grub pa'i skyon yang med la/ de'i bar du rjes dpag skyed byed kyi rtags gzhan dgod dgos pa'ang ? ma yin no zhes pa ni rje thams cad mkhyen pa yab sras gsum ga'i rtsa ba'i dgongs par snang la gzhung gi dgongs pa dang yang mthun zhing tshul de skabs 'dir yang 'dra bar sems so/ /des na 'di la phyis kyi mkhas pa kha cig dngos rtogs dang shugs rtogs gang yang min pa'i rigs stobs kyis rtogs pa zhes pa'i tha snyad mdzad par snang ba legs mod 'on kyang rtogs zhes pa tshad ma des rtogs pa la byar mi rung ste/ rtsa she TIk chen dang stong thun chen mo'i gsung dang bstun na tshad ma de'i stobs la brten nas sgra mi rtag par rtogs pa'i rjes dpag blo gzhan gyis bar ma bcad par skyed nus pa tsam la bzhed par snang ba'i phyir ro/ /da ni gcig du bral gyi gtan tshigs 'di don dang tha snyad sgrub gang yin dpyad par bya ste/ de la dbu ma rgyan dang snang ba las rtags 'di khyab byed ma dmigs pa'i rtags su gsungs shing rje yab sras kyi gsung 'ga' zhig las rang bzhin ma dmigs par yang bshad la/ stong thun chen mo las/ tha snyad 'ba' zhig bsgrub pa yin la de'i phyir tha snyad 'ba' zhig sgrub la rang bzhin @67a @#/ /ma dmigs pa'i rtags kyis khyab pa ma yin no zhes kyang gsungs so/ /rnam 'grel gyi yig cha mjad pa po 'ga' zhig gis rgyu dang khyab byed ma dmigs pa'i gtan tshigs gang rung yin na don dang tha snyad sgrub kyi rtags gnyis ka yin dgos te/ paN chen chos mchog gis/ 'bras bu dang khyab bya ltar mi rung ba la ni rgyu dang khyab par byed pa ma dmigs pas dangs pa me med pa dang dngos po me med pa'i tha snyad gnyis ka go bar byed la zhes gsungs pa'i phyir ro/ /zhes zer mod kyang lung de'i don der ma nges so/ /des na 'bras rang ma dmigs pa'i tha snyad sgrub ji tsam yod pa dang tha snyad 'ba' zhig sgrub ji ltar byed pa sogs kyi rnam gzhag mang mod kyang skabs don la sgrib par 'gyur bas 'dir mi spro'o/ /'dir skabs su ? bas pa ni spyir don dang tha snyad sgrub la gnyis te/ mtshan nyid la don dang mtshon bya la tha snyad du byas pa gcig dang/ bsgrub bya'i chos kyi don ldog la don dang/ de'i tha snyad gsum la tha snyad du byas pa'i 'jog tshul gnyis mkhas pa dag gi gsung las 'byung ngo/ /tha snyad gsum ni sgra blo lus gsum gyi tha snyad do/ /de la gtan tshigs 'di rang re'i mkhas pa kha cig gis don sgrub pa'i rtags su yang 'dod pa yod mod mkhas grub thams cad mkhyen pas ni tha snyad 'ba' zhig sgrub kyi rtags su bzhed cing/ rgyal tshab rjes brjed byang chen mor yang tha snyad 'ba' zhig sgrub tu gsungs pas rje'i dgongs par mngon no/ /de la 'jam dbyangs legs pa chos 'byor ba na re/ 'di tha snyad 'ba' zhig sgrub kyi rtags su bzhed pa'i rgyu mtshan bden par grub pa'i don tshang na gcig dang du ma gang rung du bden dgos @67b pas bden pa'i gcig dang du bral de myu gu bden med du sgrub pa'i tha snyad 'ba' zhig sgrub kyi rtags yang dag yin te/ bden med kyi don bden pa'i gcig dang du bral grub zin nas bden par med kyi tha snyad tsam zhig bsgrub par zad pa'i phyir ro snyam du dgongs pa yin na mi 'thad de/ sgra la rtag pa'i don chang na ma byas pa nyid du 'gyur dgos pas byas pa sgra mi rtag pa sgrub pa'i tha snyad 'ba' zhig sgrub tu 'gyur pa'i phyir/ gzhan yang rtags de'i phyogs chos 'jal ba'i blo yang mthar thug dpyod pa'i rigs shes su khas len dgos na de yang mi 'thad de/ gang zag phung po dang bden grub kyi gcig dang tha dad gang rung du ma grub pa tsam don dam bden pa ma yin pa'i phyir zhes dgos pa bslang bar mjad do/ /de la gzhan dag gis lan gyi rnam gzhag mdzad pa du ma zhig snang mod/ 'on kyang 'jam dbyangs legs pa chos 'byor gyis mkhas grub rin po che'i dgongs pa len lugs de tsam zhig gis phyogs snga ma'i bzhed pa longs ma longs gsal bar phye ba mi snang ngo/ /rtags 'di tha snyad 'ba' zhig sgrub yin pa ni rje yab sras su ma zad slob dpon zhi ba 'tsho'i dgongs pa yang yin te/ dbu ma rgyan rang 'grel las gtan tshigs 'di la ni dam bcas pa'i don gyi phyogs gcig pa yang med do/ sgrub pa'i yul gyi yul can shes pa dang sgra dang tha snyad rnams sgrub pa'i phyir te zhes tha snyad 'ba' zhig sgrub tu gsal bar gsungs pa'i phyir ro/ /tha snyad sgrub tu 'gro tshul ni bden pa'i gcig dang du ma dang bral ba gzhi chos can gyi steng du tshad mas nges shing/ bden par yod pa la bden pa'i gcig dang du ma gang rung gis khyab par @68a @#/ /nges pa'i gang zag gis gzhi chos can gyi steng du bden yod kyi don zhe 'dod kyis sgro 'dogs pa'i blo 'thad pas bsgrubs nas skye ba med cing tshul de ma brjed par yod bzhin du phung po gsum pa'i don gyi sgro 'dogs skyes med mod/ 'on kyang chos can de'i steng du bdan par med snyam pa'i blo dang bden par med ces pa'i sgra'i tha snyad dngos su byed pa la blo bde sing de pa ma yin pa'i gnas skabs su sngar gyi tshul gsum dran pa'i byed pa la brten nas tha snyad kyi yul du nges par gyur pa ste/ dper na byis pa chung du shed ma bye ba zhig gis ba lang chung ngu zhig mthong nas de la nog dang lkog shal 'dus pa dang de'i steng du ba lang gi tha snyad byed pa rnams mthong yang phyis ba lang chen po mthong ba na sngar ma 'dris pa'i dbang gis 'di ni ba lang ngo snyam pa'i blo dang sgra'i tha snyad 'jug mi nus pa de'i tshe 'di ni glang ste/ lkog shal la sogs pa 'dus pa'i bdag nyid kyi phyir ro zhes pa lta bu'i tshul gsum dran pa'i byed pa las ba lang du nges par 'gyur zhing de tha snyad 'ba' zhig sgrub tu 'jog dgos pa'i phyir ro/ /'di yang paN chen zhi ba 'tshos gsal bar gsungs te/ dbu ma rgyan rang 'grel las/ dper na 'di ni glang ste lkog shal la sogs pa 'dus pa'i bdag nyid kyi phyir ro/ /zhes bya ba dang 'dra bar ji skad smras pa'i 'thad pa rnams kyis gcig dang du ma'i rang bzhin dang bral bar bstan du zin kyang/ gang dag thog ma med pa'i 'khor ba nas phyin ci log gcig nas gcig tu brgyud de/ dngos po la mngon par zhen pa yongs su 'phel ba tshul bzhin yid la byed pas goms par mi byed pa'i phyir spang dka' bas yang dag par na dngos po mtha' @68b dag la khyab pa'i rang bzhin med pa nges par mi sems mi brjod cing gzhan dag la yang nges pa bskyed par 'dod pas tha snyad 'dogs par mi byed pa de dag la 'di ltar shes pa dang sgra dang tha snyad kyi yul nyid du sgrub ste/ dmigs su yod pa'i mtshan nyid du 'gyur ba las mi dmigs pas med ces bya ba lta bu'o/ /zhes gsungs so/ /tha snyad 'ba' zhig sgrub kyi don 'di ltar yin par slob dpon chos mchog gis kyang gsal bar gsungs te 'dir ma spros so/ /des na ? sras kyis mkhan chen zhi ba 'tsho'i bzhed pa 'chad par mdzad pa nyid gzhung gi dgongs pa dang mthun zhing don chen po dang bcas pa yin no zhes shes par bya'o/ /stong thun chen mo las/ chos gang la'ang bden pa'i gcig dang du ma gang gi'ang don sgro mi 'dogs par bden pa'i don sgro 'dogs pa phung po gsum pa'i don gyi sgro 'dogs skye sa med pas tha snyad 'ba' zhig sgrub yin la/ zhes gsungs pa'i don yang gang zag des de'i tshe gang zag phung po dang bden pa'i gcig tu yang med bden pa'i tha dad du yang med kyang gang zag bden par grub tshul 'di 'dra zhig yin par 'dug snyam pa'i sgro 'dogs skyes med cing/ bden par grub tshul phung gsum pa ston rgyu mi rnyed la/ de'i tshe gang zag des rtags kyi chul rnams la brten nas bden med kyi sgra blo'i tha snyad gang zag khyad gzhir gzung ba'i steng du sgrub pa nyid rtags de tha snyad sgrub tu 'gyur tshul yin no zhes gsungs pa yin gyi/ spyir des gang zag bden med kyi don rtogs zin pas rtags de tha snyad 'ba' zhig sgrub yin gsungs pa yang ma yin la/ rtags de'i phyogs chos 'jal ba'i blo gang zag bden med 'jal ba'i blor bzhed pa yang ma yin zhing/ gang @69a @#/ /zag phung po dang bden pa'i gcig dang/ du ma gang rung du ma grub pa tsam don dam bden par bzhed pa yang ma yin no/ /de ltar bshad na 'jam dbyangs legs pa chos 'byor gyis bkod pa'i dogs pa rnams kyang sel bar 'gyur la gzhung gi don yang legs par drangs bar 'gyur gyi/ gang zag phung po dang bden pa'i gcig tu ma grub pa gang zag gi gnas lugs yin par thal/ gcig bden par ma grub pa gcig gi gnas lugs yin pa'i phyir/ zhes sogs smras pas mkhas pa'i dbang po de'i dags pa sel ba la yang mi phan par ma zad 'brel med pa'i lan kho nar 'gyur ro/ /'phags pa'i mnyam gzhag gi gzigs ngor gang zag bden pa'i gcig dang du mar ma grub pa sogs gang zag gi gnas lugs yin kyang spyir gang zag bden pa'i gcig dang du ma gang rung du ma grub pa gang zag gi gnas lugs yin mi dgos te/ 'phags pa'i mnyam gzhag gi gzigs ngor phung sogs med pa phung sogs kyi gnas lugs yin kyang/ spyir phung sogs med pa phung sogs kyi gnas lugs yin mi dgos pa bzhin no/ /da dung de dag las brtsams te brjod par bya ba mchog tu mang mod kyi re zhig de tsam mo/ /drang nges rnam 'byed las/ 'di dag kyang mgon po klu sgrub kyi rjes su 'brangs pa'i rigs pa'i lam chen po ste rigs pa la blo rgyas par 'dod pas bslab par bya'o/ /zhes gsungs pas rigs pa 'di dag gi gnad shes pa shin tu gal che zhing legs par shes na gcig du bral gyi gtan tshigs kho na bsgom yang sgom rgyus phongs pa mi 'dug pas rang sems chos sku'i rang zhal blta bar rlom pa rnams kyis kyang rigs @69b pa 'di tsam re bslabs nas lus gnad bsrangs na legs par mngon no/ /gsum pa gtan la phab pa'i bden gnyis kyi rnam gzhag la/ bden gnyis kyi dbye gzhi dang/ dbye ba dang/ kun rdzob yang log gi khyad par dang/ bden gnyis gcig tha dad kyi rnam gzhag sogs ni sngar mdo sde spyod pa'i dbu ma rang rgyud pa'i skabs su bshad pa dang 'dra'o/ /bden gnyis nges byed kyi tshad ma la rnam pa 'dod tshul gyi sgo nas gnyis te/ 'phags pa grol sde dang slob dpon zhi ba 'tsho dang mkhas pa'i dbang po ka ma la shI la sogs ni tha snyad du rnam bden pa lta bur 'dod pa'i dbu ma pa'o/ /drang nges rnam 'byed las/ lugs 'dis sngo ser la sogs pa'i rnam pa dngos por 'dod de/ chos kyi grags pa'i bzhed pa yang de ltar 'grel bas tha snyad du rnam bden pa ltar 'dod pa'i dbu ma pa'o/ /zhes gsungs la/ de yang rnam bden sna tshogs gnyis med pa dang tshul mtshungs par bzhed do/ /slob dpon chen po seng ge bzang po ni zhi ba 'tsho'i rjes 'brangs yin kyang rnam rdzun pa dang tshul mtshungs te/ 'grel pa don gsal las/ gzung ba med na 'dzin pa med do snyam du nges par sems pas 'dzin pa'i rnam pa'i mtshan nyid rnam par rig pa tsam de yang bsal te gnyis su med pa'i ye shes 'ba' zhig 'di yang dag par yod pa'i ngo bo yin no snyam du nges par byas nas/ zhes sogs kyi skabs su rnam rdzun du 'grel bar gsal pa'i phyir ro/ /zhes mkhas grub bstan pa dar rgyas dang 'jam dbyangs bzhad pa sogs kyis gsungs so/ /slob dpon chen po la ba ba ni tha snyad du rnam rdzun pa ltar 'dod pa'i dbu ma pa yin par paNDi ta lhan cig skyes pa'i rdo rjes de kho na nyid bcu pa'i 'grel pa las @70a @#/ /bshad cing/ slob dpon dgra las rgyal ba'am dzai ta ri yang rnam rdzun pa yin par bder gshegs gzhung gi rang 'grel gyis shes so/ /slob dpon 'di dag gi rjes su 'brangs pa'i paN grub mang zhing rang rig khas len pa dang tshogs drug las ngo bo tha dad pa'i kun gzhi khas mi len pa sogs kyi rnam gzhag kyang phal cher 'dra'o/ /spyir 'phags yul gyi dbu ma par khas 'che ba'i paNDi ta re gnyis kyis kun gzhi dang rang rig gnyis ka khas len pa dang/ 'phags pa'i mnyam gzhag rnam par mi rtog pa'i ye shes kyi dngos yul snang stong gnyis tshogs su 'dod pa'i mnyam gzhag snang bcas su khas len pa yang re gnyis byung mod kyang/ de tsam gyis rnal 'byor spyod pa'i dbu ma rang rgyud pa'i lugs la 'phags pa'i zag med mnyam gzhag ye shes la sgyu ma lta bu'i snang ba yod par khas len pa sogs su mi 'gyur te/ de 'dra' 'phags yul gyi paNDi ta de dag gis shing rta chen po'i dgongs pa ji lta ba bzhin ma lon pa'i rang gi blo skyon grub mtha' la zhugs pa tsam du zad kyi rang gi grub ma'i ? tshul nges nas rnam gzhag byas pa ma yin pa'i phyir/ dper na bod kyi dbu ma thal 'gyur bar khas 'chi ba mang po zhig gis mi rigs pa'i rnam gzhag du ma zhig byas pa rnams de dag gi blo skyon yin gyi dbu ma thal 'gyur pa'i lugs ma yin par smra dgos pa bzhin no/ / de'i phyir lam rim chen mo las/ spyir dbu ma par khas 'che ba'i rgya bod kyi slob dpon 'ga' re de ltar du 'dod pa yod mod kyang slob dpon klu sgrub kyi rjes su 'brang ba'i dbu ma pa chen po rnams kyi lugs ji ltar yin gtan la dbab par bya yi phra mo rnams su zhig @070b gis bshad par nus/ zhes gsungs pa yang rje thams cad mkhyen pas rgyal ba'i dgongs pa 'grel ba la tshad mar gyur ba'i shing rta chen po rtsod med rnams kyi dgongs pa gtan la 'bebs pa gtso bor mdzad par bzhed kyi/ paNDi ta yin zer tshad dang grub pa thob zer tshad kyi lugs du ma phyogs gcig tu 'dren pa'i rnam grangs mang po gsog pa tsam la thugs ma dgyes pa'i gsung du snang ngo/ /tshogs drug las ngo bo tha dad pa'i kun gzhi mi bzhed kyang drug pa yid kyi rnam shes la char phye nas phra mo'i cha 'ga' zhig la kun gzhi'i sgras bstan pa ni dbu ma pa chen po 'ga' zhig gis kyang bshad la/ khyad par du sngags phyogs kyi gzhung na mang bar snang ngo/ /bden med gtan la 'bebs tshul dang tha snyad kyi rnam gzhag 'jog tshul de dag la brten nas mdo'i drang nges kyi don 'grel tshul la yang zhib cha mang du yod de/ mdo dgongs 'grel gyis ngo bo nyid med pa rnam pa gsum gyi dgongs pa bstan pa de nyid kyis yum gyi mdo la sogs pa rnams nges don gyi mdo kho nar bstan par bzhed cing/ sems tsam pas bzhag pa ltar gyi mtshan nyid gsum gyi rnam gzhag dang mi 'dra ba'i rang lugs kyi mtshan nyid gsum gyi rnam gzhag ni mdo de'i gtso bo'i don du bzhed do/ /'on kyang sems tsam pa'i mtshan nyid gsum gyi 'jog lugs de yang re zhig stong nyid phra mo rtogs mi nus shing rim gyis bkri dgos pa'i gdul bya'i bsam ngo la bltos te mdo'i don du 'jog par mdzad do/ /'khor lo bar ba la yang dgag bya la don dam gyi khyad par dngos su sbyar ba dang don gyis sbyar ba rnams ni sgra ji bzhin pa'i nges don dang mdo de'i nang du don dam pa dang bden pa'i khyad par gsal @71a @#/ /bar ma sbyar bar gzugs med ces pa la sogs pas bstan pa ni sgra ji bzhin par gzung du mi rung ba'i drang don du bzhed do/ /de dag gi tshul rgyas par ni legs bshad snying po las shes par bya zhing kho bos kyang gzhan du 'chad par 'dod do; ;bzhi pa lam dang 'bras bu'i rnam gzhag ni/ nyan rang gnyis la spangs rtogs kyi khyad par yod par bzhed cing de yang nyan thos kyis nyon sgrib dang rang rgyal gyis shes sgrib rags pa gzung ba don gzhan du 'dzin pa'i rtog pa spong bar bzhed do/ /lam ni rim pa bzhin du gang zag gi bdag med tsam dang de'i steng du gnyis stong gi de kho na nyid rtogs pa'i lam mo/ /mngon rtogs rgyan gyi rtse sbyor gyi skabs su rnal 'byor gyis bzhir byas nas dbang po'i rim pa bzhi dang sbyor bar snga ma dag bzhed mod kyang rje yab sras kyi dgongs pa ni/ sngon po sngor snang shes pa las rdzas tha dad yin pa khegs nas sngor snang shes pa sngon po las rdzas tha dad pa ma khegs pa'i gang zag gi rim pa mi 'thad pas de gnyis la rim pa gnyis ltar bstan pa ni bshad pa'i rim pa tsam yin gyi theg pa'i rim pa so so ba ma yin par bzhed do/ /des na lugs 'dir lta ba la brten pa'i theg pa'i rim pa ni gsum kho na bstan te/ chung ngu gang zag gi bdag med thun mong ba rtogs pa dang/ 'bring po gzung 'dzin rdzas tha dad kyis stong par rtogs pa dang/ chen po chos thams cad bden med du rtogs pa'o/ /theg pa chen po'i rigs can dbang po rnon pos ni yang dag pa'i de kho na nyid 'tshol ba sngon du btang ste de kho na nyid legs par nges pa na lta ba ngan pas rgyud yongs su @71b dkrugs pa'i 'gro ba gzhan rnams la snying rje lhag par bskyed de bdag nyid gcig pus 'gro ba mtha' dag gi don byed pa la rab tu dpa' ba'i byang chub kyi sems bskyed nas thabs dang shes rab khyad par can gyi spyod pa la slob par byed de/ dbu ma rgyan las/ yang dag shes 'tshol sngon btang ste/ /don dam rnam par des gyur nas/ /lta ngan 'thibs gnas 'jig rten la/ /snying rje kun tu bskyed nas su/ /'gro don byed par dpa' gyur pa/ /byang chub blo rgyas mkhas pa ni/ /blo dang snying rjes brgyan pa yi/ /thub pa'i brtul zhugs yang dag spyod/ /ces so/ /theg chen gyi rigs can dbang po rtul pos ni mi rtag pa dang sdug bsngal ba la sogs pa bden pa bzhi'i rnam pa yang dang yang du bsgoms pas myong ba legs par thon pa na sems can gzhan dag kyang sdug bsngal gyi rang bzhin can gyi 'khor bar 'khor ba dang/ de yang chos tsam gyi rgyu las chos tsam gyi 'bras bu 'byung ba'i kun byang gi rten 'brel nye bar rtogs pa la brten nas snying rje chen pos drangs pa'i byang chub tu sems bskyed la de'i rjes su spyod pa la slob pa'i dus nyid nas de kho na nyid shes pa 'tshol ba la brtson par byed do/ /de ltar yang de nyid las/ yang dag dad pa'i rjes 'brangs pa/ /rdzogs pa'i byang chub sems bskyed nas/ /thub pa'i brtul zhugs blang byas te/ /de nas yang dag shes 'tshol brtson/ /zhes so/ /de ltar byang chub kyi sems bskyed nas spyod pa phyin drug la slob pa'i chul la 'bad pa las phyi'i rkyen dge ba'i bshes gnyen dang nang gi rkyen tshul bzhin yid la byed pa @72a @#/ /sogs rgyu tshogs du ma la brten nas chos thams cad kyi de kho na nyid la dmigs pa'i bsgom byung gi shes rab skyes ba na sbyor ba'i lam 'thob par 'gyur ro/ /de nas nges par 'byed pa'i cha dang mthun pa bzhi las drod dang rtse mo gnyis kyi skabs su gzung ba bden 'dzin spong ba'i nus pa gong nas gong du khyad zhugs par gyur nas/ bzod pa skyes pa'i tshe gzung ba bden 'dzin lhan skyes mngon gyur gyi yang nus pa rags pa nyams par byed pa dang/ chos mchog skyes pa'i tshe 'dzin pa la yang bden zhen mngon gyur gyi nus pa nyams par byed do/ /de nas gnyen po'i phyogs nus pa 'phel ba dang spang bya'i phyogs dpal chogs pas rim gyis theg pa chen po'i mthong lam sdug bsngal chos bzod par chad med lam skyes pa'i dus na dngos kyi gnod bya mthong spang gi sa bon de 'gags shing gnyen po'i lag rjes kyis skye mi rung ba'i chos can du song ba'i tshe so sor brtags 'gog thob pa yin pas rnam grol lam thob par 'jog go /mthong lam skad cig ma gcig tu bshad pa ni dus mtha'i skad cig ma ma yin gyi stong pa nyid la mnyam par bzhag pa'i mnyam gzhag thun gcig yin la/ de'i yang bden pa mngon par rtogs pa skad cig ma gcig shes bzod skad cig ma bcu drug gi bdag nyid du skye ba yin no/ /de ni mnyam gzhag gi dbang du byas pa yin la spyir na shes sgrib lhan skyes kyi sa bon dngos su gzhom pa'i ched du stong pa nyid la mngon sum du mnyam par mi 'jog pa de srid tshun chad mthong lam gyis bsdus par 'jog go /mthong lam gyi skabs su @72b khams gsum gyi sas bsdus pa'i nyon sgrib kun brtags brgya dang bcu gnyis kyi sa bon dang shes sgrib kun brtags brgya dang brgyad kyi sa bon 'joms la/ sgom lam skor dgus sgom spang nyon mongs bcu drug gi sa bon dang sgom spang shes sgrib brgya dang brgyad kyi sa bon rim can du spong bar gsungs so/ /mtha'i rdo rje lta bu'i ting nge 'dzin gyis nyon mongs pa dang shes bya'i sgrib pa phra mo cig car du spangs nas skad cig gnyi pa la chos kyi sku mngon du byed par gsungs te de dag ni theg chen rigs nges kyi rnam gzhag go /de lta bu'i chos kyi sku ni ma rig bag chags kyi sa dang/ mtshan ma'i spros pa las byung ba'i zag med kyi las dang/ yid kyi rang bzhin gyi lus dang/ bsam gyis mi khyab par yongs su sgyur ba'i 'chi 'pho ba rnams dang bral ba'i phyir rim pa bzhin du gtsang ba dang/ bdag dam pa dang/ bde ba dang/ rtag pa'i pha rol tu phyin pa yin no/ /de lta na'ang sngon 'gro ba thams cad bla na med pa'i bde ba la 'god pa'i thugs rje chen po phul du byung ba'i mthu yongs su rdzogs pas thabs dang shes rab kyi cha shas rnam pa thams cad pa'i mchog dang ldan pa zag pa med pa'i ye shes kyi rdul phra rab 'dus pa'i longs spyod rdzogs pa'i sku yid bzhin gyi nor bu lta bu 'khor ba ji srid bar 'og min gyi gnas su bzhugs nas sprul pa'i sku sna tshogs pas 'gro ba thams cad kyi don mdzad do/ /de ltar yang dbu ma rgyan las/ des na rnam pa thams cad kyi mchog dang ldan pa'i shes rab dang/ thugs rje'i rdul phra rab 'dus pa'i sku/ nyon mongs @73a @#/ /ba dang shes bya'i sgrib pa'i phung po ma lus pa dang bral ba/ thams cad kyi mchog 'khor ba ji srid bar bzhugs so/ /zhes gsungs so/ /'dir ma bshad pa'i lam dang 'bras bu'i khyad par 'ga' zhig ni rang rgyud pa snga ma'i skabs su bshad pa dang thal 'gyur ba'i skabs su yang 'chad par 'gyur ba rnams las shes par bya zhing/ mngon rtogs rgyan gyi 'grel pa 'grel bshad rnams las rang rgyud pa 'di pa'i lugs kyi lam gyi rim pa'i rnam gzhag ni shin tu rgyas par gsungs pa da lta yang phyogs thams cad du grags che ba ltar ro/ /gnyis pa thub pa'i ring lugs 'dzin pa'i grub pa'i mtha' smra ba thams cad kyi yang rtse dpal ldan dbu ma thal 'gyur ba'i lugs mdo tsam brjod pa la mtshan nyid dang/ grub mtha'i 'dod tshul gnyis/ dang po ni/ dngos po rnams kyi don gyi sdod lugs kyi dbang gis rgol phyir rgol gyi tshad ma 'khrul ba la chos can mthun snang du grub pa'i sgo nas rtags kyi tshul sgrub mi dgos par phyir rgol gyi khas brangs tsam la 'khris nas phyir rgol rang la grags pa'i tshul gsum pa'i rtags kyis bden med rtogs pa'i rjes dpag bskyed par 'dod pa'i dbu ma pa ni thal 'gyur ba'i 'jog byed dam mtshan nyid yin no/ /de ltar yang tshig gsal las/ rang gi don gyi rjes su dpag par ni thams cad du rang la grub pa nyid brling ba yin gyi gnyis ka la grub pa ni ma yin no/ /de nyid kyi phyir rteg ge'i mtshan nyid brjod pa ni dgos pa med pa yin te/ sangs rgyas rnams kyis @73b rang la ji ltar grags pa'i 'thad pas de kho na ma shes pa'i gdul bya'i skye bo la phan btags pa'i phyir ro/ /zhes gzhan grags kyi gtan tshigs kyis bsgrub bya 'grub pa yin gyi/ rang rgyud khas len mi dgos pa'i rgyu mtshan 'thad pa dan bcas te/ gsungs shing 'jig rten gyi dpes kyang bstan te/ de nyid las/ de yang rang nyid la grub pa'i gtan tshigs nyid kyis yin gyi/ gzhan la grub pas ni ma yin te/ 'jig rten nyid du mthong ba'i phyir ro/ /'jig rten na ni res 'ga' dbang po rgol ba dang phyir rgol ba gnyis kyis tshad mar byas pa'i tshig gis rgyal ba'am pham par 'gyur la/ res 'ga' ni rang gi tshig kho nas 'gyur gyi/ gzhan gyi tshig gis ni rgyal ba'am pham par 'gyur ba ma yin no/ /'jig rten na ji ltar yin pa de bzhin du rigs pa la yang yin te/ 'jig rten pa'i tha snyad kho na rigs pa'i bstan bcos su skabs su babs pa yin pa'i phyir ro/ /zhes gsungs so/ /thal 'gyur ba'i go don de ltar 'jog pa ni gzhung gi dgongs pa rma med pa yin te/ byang chub lam rim chen mo las/ sngar bshad pa lta bu'i tshad mas rgol ba gnyis ka la grub pa'i rtags kyis bsgrub bya sgrub pa la rang rgyud kyi rtags dang des mi 'grub par phyir rgol gzhan la grags pa'i tshul gsum gyis bsgrub bya sgrub pa la thal 'gyur bar 'jog pa de ni slob dpon gyi dgongs par shin tu gsal ba yin no/ /zhes gsungs so/ /de ltar na rang rgyud khas mi len par gzhan grags tsam gyis bden med rtogs pa'i rjes dpag bskyed par 'dod pa'i dbu ma pa de thal 'gyur ba'i mtshan @74a @#/ /nyid ces byas kyang chog go /yang tha snyad du yang rang gi mtshan nyid kyis grub pa'i chos zhal gyis mi bzhes pa'i dbu ma pa de thal 'gyur ba'i mtshan nyid du byas kyang rung ste/ thal 'gyur ba'i bden gnyis kyi 'jog tshul thun mong ma yin pa mang du yod pa rnams kyi rtsa ba mthar gtugs pa yang tha snyad du yang rang mtshan zhal gyis mi bzhes pa 'di yin no/ /'jug 'grel las/ kho bo cag gis 'dir lugs gang zhig brgal lan dang bcas par bsnyad pa'i lugs 'di nas 'byung ba de yang stong pa nyid kyi chos ltar bstan bcos gzhan na med do zhes mkhas pa rnams kyis nges par mdzad du gsol lo/ /zhes rang gi lugs dbu ma pa gzhan gyis bkral ba dang thun mong ma yin par gsungs pa'i don 'chad pa na/ rje bdag nyid chen pos legs bshad snying po las/ rang gi lugs la tha snyad du yang rang gi mtshan nyid kyis grub pa'i chos mi 'dod la de dag ni de'i steng nas 'jog pa sha stag yin pa'i phyir ro/ /zhes gsungs so/ /bod kyi mkhas pa snga ma dag rab tu mi gnas pa'i dbu ma pa zhes pa'i tha snyad kyang gsungs te/ slob dpon dpa' bo'i don dam byang chub kyi sems bsgom pa'i yi ge las/ stong pa nyid sogs rnam grangs sgo/ /sgyu ma la sogs dpe mtha' yas/ /theg pa sna tshogs thabs tshul gyis/ /mi gnas dbu ma nye bar mtshon/ /zhes gsungs pa la brten par snang zhing jo bo rje'i gsung sgros rnams las kyang tha snyad de 'byung la rje yab sras kyis kyang bkag pa mi snang ngo/ /dpa' bo'i gzhung de slob dpon dpa' @74b pos mdzad pa min zer mkhan re gnyis yod par 'dug kyang sgrub byed med pa'i dam bca' tsam du zad cing gangs can gyi shing rta chen po rnams dang rang re'i mkhas grub rim byon mtha' dag gis tshad mar bzhed snang ngo/ /dbu ma thal 'gyur ba la rang rgyud pa lta bu'i nang gses kyi dbye ba mi 'dra ba bshad pa gzhung gzhan las mi 'byung zhing rje yab sras kyis kyang thal 'gyur ba'i dbye ba bshad pa mi snang ngo/ /gnyis pa grub mtha'i 'dod tshul la/ gzhi'i lta ba gtan la 'bebs tshul dang/ de la brten nas bden pa gnyis kyi rnam par bzhag pa byed tshul gyi khyad par dang/ lam bgrod tshul gyi khyad par dang/ 'bras bu'i khyad par bshad pa ste bzhi/ dang po la gnyis/ gzhi ci 'dra zhig gi steng du dgag bya gang 'gog pa dang/ dgag bya de bkag pa'i bdag med gtan la 'bebs pa'i rnam gzhag bshad pa'o/ /dang po ni sems tsam pa dang rang rgyud pa rnams kyis gang zag dang chos kyi steng du dgag bya gang bkag pas bdag med du 'jog pa'i dgag bya bdag gnyis dang/ der zhen lugs kyang mi 'dra ba kho nar 'dod la/ de'i phyir gang zag gi bdag med pa phra mo rtogs kyang stong nyid phra mo rtogs mi dgos bas thar pa tsam thob pa la chos kyi bdag med phra mo rtogs mi dgos par bzhed do/ /lugs 'dis shes rab kyi pha rol tu phyin pa'i mdo las dngos po'i 'du shes can la thar pa med par gsungs pas byang chub gsum gang thob kyang bdag med phra mo rtogs dgos par bzhed de/ zhi ba lhas/ gang phyir lung las lam 'di ni/ /med par byang chub med par gsungs/ /zhes so/ @75a @#/ /de'i phyir bdag med gnyis ni gzhi chos can phung sogs kyi chos dang gang zag gi dbye bas byas pa yin gyi med rgyu'i bdag mi 'dra ba gnyis kyi sgo nas khyad par phye bar mi bzhed de/ phung sogs kyi chos bden pas stong ba chos kyi bdag med du 'jog pa ltar gang zag bden pas stong ba yang gang zag gi bdag med du bzhag dgos te/ rgyu mtshan kun nas mtshungs pa'i phyir ro zhes dgongs so/ /de'i phyir dbu ma 'jug pa las/ bdag med 'di ni 'gro ba rnam dgrol phyir/ / chos dang gang zag dbye bas rnam gnyis gsungs/ /zhes gsungs so/ /'o na gzhi gang zag dang chos kyi steng du 'gog rgyu'i bdag ci 'dra zhig yin snyam na/ bzhi brgya ba'i 'grel pa las/ de la bdag ces bya ba ni gang zhig dngos po rnams kyi gzhan la rag ma las pa'i ngo bo rang bzhin te/ de med pa ni bdag med pa'o/ /de ni chos dang gang zag gi dbye bas gnyis su rtogs te chos kyi bdag med pa dang gang zag gi bdag med pa zhes bya ba'o/ /zhes gsungs pa ltar gzhi chos dang gang zag gang yin yang rung ste rtog pa'i dbang gis bzhag pa ma yin par rang gi ngo bo'i sgo nas yul steng du grub par 'dzin pa ni lhan skyes kyi 'dzin tshul yin la/ de'i zhen yul ni skabs 'di'i 'gog rgyu'i bdag dang brtag pa mtha' bzung gi bden tshad do/ /dbu ma rang rgyud pas bden pa dang don dam pa dang yang dag par grub pa 'gog kyang rang bzhin nam rang gi mtshan nyid dam rang gi ngo bos grub pa mi 'gog pa'i khyad par 'byed kyang 'di ba'i lugs la bden par grub pa sogs dang rang gi mtshan nyid kyis grub pa sogs @75b don gcig par bzhed do/ /des na drang nges rnam 'byed las/ don gyi ngos nas sdong lugs yod pa rang dbang ba'i ngo bo'o/ /zhes gsungs shing/ rang rgyud rang dbang don gcig tu bzhed pas dbu ma rang rgyud bas tshul gsum rang ngos nas grub par bzhed pa la yang lugs 'di'i bden grub kyi don tshang ngo/ /bzhi brgya pa las/ 'di kun rang dbang med pa ste/ /des na bdag ni yod ma yin/ /zhes dang/ de'i 'grel pa las kyang/ 'di na gang rang gi ngo bo dang rang bzhin dang rang dbang dang gzhan la rag ma las pa nyid yin pa de la ni zhes de rnams don gcig tu gsungs so/ /'o na rtog pa'i dbang gis bzhag pa ma yin pa'i sdod lugs kyis grub pa skabs 'di'i 'gog rgyu'i bdag yin no/ rtog pa'i dbang gis bzhag ces pa'i rtog pa de gang la byed/ de'i dbang gis bzhag tshul ji ltar yin/ rang rgyud pas blo'i dbang gis bzhag pa ma yin pa'i sdod lugs med par bzhed pa dang khyad par ji ltar yod ce na/ de la rtog pa'i dbang gis bzhag tshul ni/ bzhi brgya pa las/ rtog pa med par 'dod chags la/ / sogs la yod nyid yong min na/ /yang dag nang dang rtag pa zhes/ /blo dang ldan pa su zhig 'dzin/ /zhes pa'i 'grel pa las/ rtog pa yod pa kho nas yod pa nyid dang/ rtog pa med par yod pa nyid med pa de dag ni go ra ma chag par thag pa bsngogs pa la btags pa'i sprul ltar rang gi ngo bos ma grub par nges so/ /zhes gsungs pas rtag pa ni thog ma med pa nas 'di gzugs so 'di tshor ba'o zhes sogs yang dang yang du goms par byas pa las gzugs sogs su 'dogs pa'i blo lhan skyas @76a @#/ /rang dga' ba 'di'o/ /de'i dbang gis bzhag tshul ni/ dper na thag pa la mun pa babs pa'i tshe thag pa'i mdog khra bo dang 'khyil lugs sbrul dang 'dra zhing yul mi gsal bar snang ba na sbrul lo snyam pa 'byung ngo/ / de'i tshe thag pa'i mdog dang dbyibs dang cha shas gzhan rnams dang de dag tshogs pa gang yang sbrul gyi mtshan gzhir 'jog rgyu med kyang de'i sbrul ni thag pa la brten nas rtog pas btags pa tsam kho na'o/ /de bzhin du rang gi gdags gzhi phung po lnga'i steng du nga'o snyam pa'i blo 'byung ba na phung po lnga po de'i ya gyal dang tshogs pa dang rgyun dang cha shas gang yang nga de'i mtshan gzhir 'jog rgyu med la/ de dag las ngo bo tha dad pa'i chos gzhan de'i mtshan gzhir 'dzin rgyu yang cung zad kyang med de/ nga de ni rtog pas phung po la brten nas bzhag pa tsam mo/ /de ltar chos thams cad rtog pas btags tshul thag pa la sbrul du btags pa dang 'dra mod kyang thag pa'i sbrul dang gzugs sogs tha snyad du yod med mi mtshungs te/ btags pa ltar khas blangs pa la tha snyad pa'i tshad mas gnod mi gnod mi mtshungs pa'i phyir ro/ /ming gis btags tsam yin pa'i tshul yang gzugs la sogs pa'i chos 'di dag la 'di ni gzugs so 'di ni tshor ba'o zhes sogs kyi tha snyad btags pa'i ming tsam la brten nas blang dor la zhugs pas 'dod pa'i don 'grub cing ming tsam de la 'thad mi 'thad sogs kyi dgag sgrub dang bya byed thams cad rung ba yin gyi/ ming tsam des ma tshim par gzugs zhes brjod pa 'di kha dog la bya'am dbyibs la bya'am @76b cha shas gzhan la bya'am de thams cad tshogs pa la bya zhes sogs btags don btsal nas zhugs na gang yang mi rnyed cing rnam gzhag thams cad mi 'thad par 'gyur ba'i phyir ro/ /ming tsam gyi rjes su zhugs nas la/ da mi 'thad kyi rnam gzhag byed pa ni shin tu rung ste/ dper na grong gi mi gnyis shig grong khyer du ltad mo'i phyir du dong ba na lha khang zhig tu zhugs nas ri mo blta bar brtsams pa dang gcig gis smras pa/ lag na mdung rtse gsum pa thogs pa 'di ni sred med kyi bu'o/ /lag na 'khor lo thogs pa 'di ni dbang phyug chen po'o/ /zhes smras pa dang/ cig shos na re/ khyod kyis log par bzung ba ste lag na rtse gsum thogs pa ni dbang phyug chen po'o/ /lag na 'khor lo thogs pa ni sred med kyi bu'o zhes de gnyis rtsod par gyur to/ /de nas nye 'khor na kun tu rgyu zhig 'dug pa'i gan du song ste rang rang gi bsam pa smras pa dang/ kun tu rgyu des de na dbang phyug chen po yang med/ sred med kyi bu yang med do/ rtsig pa la brten pa'i ri mo'o snyam du shes mod kyi de lta na yang lha de gnyis med/ ri mo yin no zhes mi zer gyi 'jig rten gyi tha snyad dang bstun nas 'di ni bden no 'di ni mi bden no zhes smra zhing/ de ltar smras pa las grong gi mi gnyis kyi 'dod pa yang 'grub par 'gyur la kun tu rgyu des rdzun smras pa'i skyon du yang mi 'gyur ro/ /de bzhin du chos thams cad rang gi yul steng nas grub pa med kyang ming tsam la brten nas 'di 'thad dang 'di mi 'thad ces pa'i rnam gzhag 'thad la/ bcom ldan 'das kyis kyang chos thams cad bden med du gzigs @77a @#/ /kyang 'jig rten gzhug pa'i tshul du brda mdzad nas blang dor bstan pas 'gro ba'i don mdzad do/ /tshul 'di ni grub pa brnyes pa'i slob dpon chen po sangs rgyas bskyangs kyis rtsa she'i rab byed bco brgyad pa'i 'grel pa las gsungs shing ming tsam la bya byed 'thad pa'i tshul gzhan yang zla ba'i zhabs dang rje btsun zhi ba lhas kyang dpe dang rigs pa du ma'i sgo nas 'chad par mdzad de/ 'dir de tsam las ma spros so/ /tha snyad rnam par 'jog pa'i tshul 'di ni slob dpon de gsum gyis 'phags pa'i dgongs pa 'grel tshul thun mong ma yin pa zhig yin la/ dbu ma'i lta ba'i mthar thug pa'i dka' sa yang 'di nyid yin no zhes rje thams cad mkhyen pa yab sras kyis lan cig ma yin par gdams par mdzad do/ /tshul de ni nye bar 'khor gyis zhus pa'i mdo las/ sna tshogs yid dga' me tog kha bye zhing/ /gser gyi khang mchog 'bar ba yid 'ong ba/ /'di na de la'ang byed po 'ga' med de/ /de dag rtog pa'i dbang gis bzhag pa yin/ /rtog pa'i dbang gis 'jig rten rnam brtags te/ /zhes dang/ ting 'dzin rgyal po las/ mya ngan 'das pa zab par yang/ /sgra yis rab tu bstan pa ltar/ /mya ngan 'das pa mi rnyed de/ /de yi sgra yang mi rnyed do/ /zhes sogs dang/ shes rab kyi pha rol tu phyin pa'i mdo las/ 'di lta ste/ byang chub sems dpa' zhes bya ba 'di ni ming tsam mo/ /'di lta ste/ byang chub ces bya ba 'di ni ming tsam mo/ /'di lta ste/ shes rab kyi pha rol tu phyin pa zhes bya ba 'di ni ming tsam mo/ /zhes sogs dang/ 'phags pa @77b klu'i zhabs kyi rin chen phreng ba las/ gzugs kyi dngos po ming tsam phyir/ /nam mkha' yang ni ming tsam mo/ /'byung med gzugs lta ga la yod/ /de phyir ming tsam nyid kyang med/ /ces don dam par ming tsam yang med pa dang/ yang de nyid las/ tha snyad gdags pa ma gtogs par/ /gang zhig yod dang med 'gyur ba'i/ /'jig rten don du ci zhig yod/ /ces tha snyad du ming gi tha snyad kyi dbang gis bzhag pa tsam ma gtogs pa ci yang med par gsungs so/ /rgyu mtshan de dag khong du ma chud pa la brten nas dbu ma rang rgyud pa man chad kyis gang zag 'dis las 'di byas so zhes pa'i tha snyad btags pa la/ gdags gzhi'i gseb nas cha shas sam tshogs pa'am rgyun lta bu zhig rnyed nas gang zag de 'jogs byung na las gsog pa po la sogs par 'jog nus la ma rnyed na 'jog mi nus shing/ de ni mdo sde pas thogs pa'i reg bya rnam par bcad tsam gyi med dgag la nam mkhar bzhag pa yan chad la'ang 'dra'o/ /lugs 'di la ni de ltar btags don btsal nas rnyed mi dgos par gang zag de las gsog pa por 'jog pa sogs bya byed thams cad bzhag pas chog pa 'di ni rmad du byung ba'i khyad chos so/ /rang rgyud pas blo'i dbang gis bzhag pa ma yin pa'i sdod lugs la dgag byar byed ces pa'i blo ni gnod med kyi shes pa ma 'khrul ba la byed par 'dod cing/ 'di bas rtog pa'i dbang gis bzhag par 'dod pa'i rtog pa ni 'khrul shes su bzhed pas mi 'dra'o/ /des na 'jig lta lhan skyes kyi dmigs pa la yang nga tsam dang gang zag tsam @78a @#/ /'jog gi phung po sogs mi 'jog go /nga yir 'dzin pa'i 'jig lta lhan skyes kyi dmigs pa ni nga yi ba nyid do/ /rgyud gzhan gyi gang zag rang gi mtshan nyid kyis grub par 'dzin pa ni 'jig lta lhan skyes min kyang gang zag gi bdag 'dzin lhan skyes yin no/ /chos kyi bdag 'dzin lhan skyes kyi dmigs pa ni rgyud kyis bsdus pa dang ma bsdus pa'i gzugs phung sogs so/ /de ltar gang zag dang chos kyi bdag 'dzin gyi dmigs pa tha dad kyang rnam pa rang gi mtshan nyid kyis grub par 'dzin pa ni mtshungs pas 'khor ba'i rtsa ba 'dzin stangs mi mthun pa gnyis su thal ba'i skyon med do/ /bden 'dzin lhan skyes kyis gzugs sogs phung po'i steng du gang zag rang mtshan gyis grub par 'dzin tshul yang gcig tha dad sogs dpyad nas 'dzin pa ma yin zhing rgyu mtshan gang yang med par rang dgar goms pa'i dbang gis 'dzin pa ste/ blo lhan skyes la gcig tha dad sogs kyi 'dzin tshul med do/ /de'i phyir rje thams cad mkhyen pas ma dpyad pa'i bden 'dzin lhan skyes zhes kyang gsungs so/ /rigs pa'i dgag bya la bden 'dzin kyang 'jog mod kyi gtso bo ni zhen yul nyid do/ /'di dag gi rnam gzhag zhib par gzhung chen mo rnams zhib tu sbyangs pa dang rje yab sras kyi gsung gi gdams pa rnams la nang byan tshud pa'i bshes gnyen mkhas pa ring du bsten pa sogs rgyu tshogs du ma zhig bsten pa las shes dgos kyi/ blun sgom phyogs mos byed pa'i sdug yus mkhan po dang kha phyir bltas gshags 'gyed kyis mi tshe stong zad la go 'phang mchog tu bsgom @78b pa'i rtsal bshad mkhan po gnyis ka'i spyod yul ma yin no/ /gnyis pa de bkag pa'i bdag med gtan la 'bebs pa'i rnam gzhag bshad pa la/ dgag bya 'gog pa'i rigs pa'i gtso bo ngos gzung ba dang/ des dgag bya bdag gnyis 'gog pa'i tshul lo/ /dang po la/ de rigs pas 'gog dgos pa'i rgyu mtshan dang/ rigs pa'i gtso bo ngos gzung ba gnyis/ dang po ni/ de la nges don gyi mdo'i dgongs pa 'phags pa klu'i zhabs kyis bkral ba don ji lta ba bzhin du gsal bar 'grel ba po ni sangs rgyas bskyangs dang zla ba'i zhabs gnyis yin la slob dpon chen po zhi ba lha yang de gnyis dang mthun par bzhed do/ /shing rta chen po 'di gsum gyi bzhed pa ltar na thams cad mkhyen pa lta zhog 'khor ba las grol ba'i thar pa tsam thab pa la yang gang zag dang chos la bdag med pa'i de kho na nyid nges par rtogs dgos pa sher phyogs kyi mdo'i dgongs pa yin te/ shes rab kyi pha rol tu phyin pa'i lung las dngos po'i 'du shes can la thar pa med par gsungs pa dang dus gsum gyi yang dag par rdzogs pa'i sangs rgyas dang rgyun zhugs nas rang rgyal gyi bar thams cad kyang sher phyin 'di la brten nas 'thob par gsungs pa'i phyir dang/ nyan thos kyis la slob par 'dod pas kyang shes rab kyi pha rol tu phyin pa 'di la bslab par bya'o zhes sogs gsungs pa'i phyir ro/ /'phags pa klu'i dgongs pa yang yin te/ rigs pa drug cu pa las/ yod pas rnam par mi grol te/ /med pas srid pa 'di las min/ /zhes yod med kyi mthar lhung ba la grol ba med par bstan nas/ @79a @#/ /dngos dang dngos med yongs shes pas/ /bdag nyid chen po rnam par grol/ /zhes dngos po yod med kyi de kho na nyid phyin ci ma log par shes pas 'phags pa rnams srid pa las grol bar gsungs pa'i phyir dang rin chen 'phreng ba las kyang mngon mtho'i sgrub byed yid ches kyi dad pa yin la de sngon du song ba las nges legs sgrub byed shes rab kyi snod du 'gyur bar bsgrubs shing/ shes rab ni bdag dang bdag gi ba gnyis don dam par med par shes pa yin la/ de la brten nas phung po bden med du shes pa na ngar 'dzin zad par 'gyur ba dang/ phung po bden 'dzin ma zad bar du 'khor ba mi ldog cing zad pa na ldog pa dang/ med ltas ngan song dang yod ltas bde 'gror 'khor bas de gnyis las thar ba la yod med kyi mtha' gnyis la mi brten pa'i yang dag pa'i don shes dgos par gsungs pa'i phyir ro/ /rin chen 'phreng ba las/ ji srid phung por 'dzin yod pa/ /zhes sogs dang/ 'jig rten las 'das par bstod pa las/ mtshan ma med pa ma rtogs par/ /khyod kyis thar pa med par gsungs/ /zhes sogs so/ /rigs pa drug cu pa dang/ rin chen 'phreng ba gnyis kyis stong nyid phra mo rtogs pa zhig 'khor ba las grol ba'i lam la nges par dgos pa gtso bor bsgrubs pa yin te/ rtsa she'i {TIk} chen las/ 'di dang snga ma gnyis su yang gang zag dang chos la rang bzhin bkag pa'i rten 'byung gi de nyid bstan pa yang mang mod kyi mtha' gnyis la mi brten pa'i yang dag pa'i don shes pa gcig 'khor ba las grol ba'i lam la nges par dgos so zhes gtso bo de bsgrub pa'i yan lag tu snang la/ @79b zhes gsungs pa'i phyir ro/ /de kho na nyid rtogs pa yang bdag 'dzin lhan skyes kyi 'dzin stangs sun dbyung ba zhig gis rtogs dgos kyi blo bdag gnyis lam zhugs pa tsam dang yul gzhan la 'phro ba bkag pa tsam gyis stong nyid rtogs par bzhag mi nus te/ gzhan du na gnyid dang brgyal ba la sogs pas kyang de kho na nyid rtogs par thal bar 'gyur ba'i phyir ro/ /'phags pa lhas/ yul la bdag med mthong na ni/ /srid pa'i sa bon 'gags par 'gyur/ /zhes dang/ zla ba'i zhabs kyis/ rtog rnams dngos po yod na 'gyur ba ste/ /dngos po ji ltar med par yongs dpyad zin/ /zhes dang/ slob dpon legs ldan gyis/ blo gros mnyam gzhag 'og tu ni/ /tha snyad sgo nas gzung bya ba'i/ /chos rnams dngos po 'di dag la/ /shes rab kyis ni 'di ltar brtag /ces dang/ rje btsun zhi ba lhas kyang/ de nyid du ni btsal byas na/ /gang zhig sred cing gang la sred/ /ces sogs dang/ dpal chos kyi grags pas kyang/ 'di yul sun phyung med par ni/ /de spong bar ni nus ma yin/ /zhes sogs shing rta chen po thams cad kyis dbyangs gcig dang dgongs pa gcig gis gsungs so/ des na bdag gnyis su mtshan mar gzung ba'i blos ji ltar gzung ba de ji 'dra ba zhig yin pa de legs par dpyad nas rnam par dag pa'i lung rigs kyis/ khos gzung ba ltar med pa la nges pa drangs pa'i sgo nas 'khrul pa'i rdzun phugs rdib pa zhig dgos pa ni med du mi rung ba'i gnad dam pa yin pas so sor rtog pa'i shes rab kyis yang dang yang du dpyod pa zhig gal che'o/ / @80a @#/ /de ltar yang 'phags pa 'jam dpal rnam par rol pa'i mdo las/ bu mo ji ltar na byang chub sems dpa' g.yul las rnam par rgyal ba yin/ gsol pa/ 'jam dpal/ rnam par brtags na chos thams cad mi dmigs pa gang lags pa'o/ /zhes dang/ 'phags pa ting nge 'dzin gyi rgyal po las/ gal te chos la bdag med so sor rtog /so sor de brtags gal te bsgom pa ni/ /de ni mya ngan 'das 'thob 'bras bu'i rgyu/ /rgyu gzhan gang yin des ni zhir mi 'gyur/ /zhes dang/ 'phags pa dkon mchog sprin las/ lhag mthong gis brtags nas ngo bo nyid med par rtogs pa ni mtshan ma med pa la 'jug pa'o/ /zhes dang/ tshangs pas zhus pa las/ tshul bzhin du chos la so sor rtog pa de dag ni blo gros dang ldan pa yin no/ /zhes gsungs so/ /des na shing rta chen po rnams kyis spyir rgyal ba'i gsung rab kyi drang nges 'byad pa'i rigs pa'i lam dgag sgrub kyi sgo nas mang du gsungs shing/ khyad par du de kho na nyid gtan la 'bebs pa'i rigs pa'i rnam grangs mang du gsungs pa rnams ni skal pa dang ldan pa rnams la rnam par grol ba'i lam gsal bar byed pa'i phyir du mdzad pa kho na yin gyi rtsod pa lhur len pa'i ched du ni ma yin te/ bud {d+hA pA} li ta las/ /ci rten cing 'brel par 'byung ba rjes su bstan pa la dgos pa ci yod can/ bshad pa/ slob dpon thugs rje'i bdag nyid can gyis sems can rnams sdug bsngal sna tshogs kyis nyen par gzigs nas de dag rnam par grol bar bya ba'i phyir dngos po rnams kyi yang dag pa ji lta ba nyid rab tu bstan par bzhed pas rten cing 'brel par 'byung ba rjes @80b su bstan pa brtsams te/ zhes dang/ dbu ma la 'jug pa las/ bstan bcos las dpyad rtsod la chags pa'i phyir/ ma mdzad rnam grol phyir ni de nyid bstan/ ces dang/ rje bdag nyid chen pos/ dbu ma'i bstan bcos las rigs pa'i dpyad pa ji snyed cig gsungs pa thams cad ni sems can gyis rnam grol 'thob pa kho na'i ched yin la zhes gsungs pa'i lung snga ma'i rtsod la chags pa'i phyir ma mdzad ces dang lung phyi ma'i kho na'i tshig gis gang gcad pa rnams legs par shes dgos so/ /spyir thos bsam sgom pa gang gi skabs su yang so sor rtog pa'i dpyod pa lung rigs tshad ma la dbang por byas pa zhig gal che ba dang/ de ltar dpyod pa rnams kyang rang gzhan gyis thar pa dang thams cad mkhyen pa thob pa'i thabs su dmigs pa'i rgyu dang dus kyi kun slong khyad par can gyis zin pa zhig byung na ston pa bla na med pa de nyid dang/ /shing rta chen po rnams kyis 'bad pas bka' stsal pa'i don dang mthun par 'gyar bas bdag legs su 'dod pa rnams kyis tshul de la 'bad par rigs so/ /gang yang rang gis chos byed par rlom pa dang bsngan pa la phan pa bgyid par rlom pa rnams kyis thos bsam sgom pa dang 'chad rtsod rtsom pa ji snyed cig bgyis pa phal mo che zhig ni rang gzhan la ma phan par ma zad chos la brtan pa'i sdig pa du ma zhig gis rgyud gos par 'gyur zhing mjug sdud pa na 'thab pa dang rtsod pa dang bong ba dang mtshon dang dbyig pa dag gis bstan pa 'dzin par sems pa dag ni kun slong ma dag pa'i dbang gis sman dug tu gyur cing lha bdud du babs pa kho nar shes par bya'o/ /des na/ 'phags pa lhas/ bsod nams chung ngus chos 'di la/ /the tshom za bar mi 'gyur te/ /the tshom zes pa @81a @#/ /tsam gyis kyang/ /srid b+hrul ? por byed par 'gyur/ /zhes chos nyid zab mo la don 'gyur gyi the tshom zos pa tsam gyis kyang srid pa'i sdug bsngal las ring du bgyid par gsungs pa dang/ khyad par du dpal ldan zla bas/ sangs rgyas gzhung lugs thams cad mkhyen pas gsungs pa'i don nyid bral zhing 'khrugs pa'i tshe/ gang zhig skad cig tsam yang yid gnyis pas la nas stong nyid rtogs de skal bar ldan/ zhes bstan pa'i tha ma la babs pa'i tshe shin tu zab pa'i gnas 'di la skad cig tsam mos pa yang skal pa ches shin tu bzang bar gsungs pa dang/ bdud 'dul ba'i le'u dang ma skyes dgra'i mdo las/ chos nyid zab mo 'di la mos pas mtshams ? med pa'i las kyi sgrib pa yang 'dag na cho ga dang tshul khrims la lag par zhugs pa phran tshogs lta ci smas par gsungs pa sogs legs par nges par byas nas chos 'di'i rigs kyi nus pa rtas par byed pa'i thabs la 'bad dgos te/ rje bdag nyid chen pos/ des na rgyu 'bras rten 'brel gyi nges pa la ma gnod pa'i ngang nas zab mo'i gzhung nyan cing 'dzin pa dang don sems pa dang bsgom pa dang tshe rabs kun tu mos pa'i smon lam gdab par bya'o/ /zhes gsungs pa'i phyir ro/ /gnyis pa ni/ spyir dbu ma'i gzhung las bdag med gtan la 'bebs pa'i rigs pa'i rnam grangs mtha' yas pa zhig gsungs pa rnams gang zag dang chos kyi bdag med gtan la 'bebs pa'i rigs pa gnyis su 'du ste/ 'khor bar 'ching byed kyi gtso bo bdag gnyis su mngon par zhen pa'i gzhi ni gang zag dang chos gnyis yin pas bdag med gtan la 'bebs pa'i gzhi'i gtso bo yang de @81b gnyis yin dgos pa'i phyir ro/ /de ltar yang drang nges rnam 'byed las/ gang la nga'o snyam pa skye ba'i dmigs pa gang zag dang de'i rgyud kyi chos gnyis la bdag gnyis su mngon par zhen pa 'ching byed kyi gtso bo yin pas/ rigs pas gang du bdag tu 'dzin pa 'gog pa'i gzhi'i gtso bo yang de gnyis yin no/ /de'i phyir rigs pa rnams kyang bdag gnyis 'gog par 'du zhing/ zhes gsungs so/ /de las kyang chos kyi bdag med gtan la 'bebs pa'i rigs pa'i gtso bo ni mtha' bzhi skye 'gog gi rigs pa nyid yin te/ sa bcu pa'i mdo las mnyam pa nyid bcus sa drug pa la 'jug par gsungs pa'i dgongs pa 'chad pa'i skabs su 'phags pa klu sgrub kyis chos thams cad skye ba med par mnyam pa nyid kho na rigs pas bstan pas mnyam pa nyid gzhan rnams bstan sla bar dgongs te rtsa she'i thog mar/ /bdag las ma yin gzhan las min/ /zhes sogs gsungs shing/ dpal ldan zla ba'i dbu ma la 'jug pa las/ de nyid de las 'byung min gzhan dag las lta ga la zhig /ces pa nas/ rnam dpyod pa ni myur du grol bar 'gyur/ zhes pa'i bar gyis chas kyi bdag med gtan la 'bebs pa'i rigs pa bstan pa yang mtha' bzhi skye 'gog gi rigs pa kho nar snang ba'i phyir ro/ /des na drang nges rnam 'byed las/ chos kyi bdag med sgrub pa'i rigs pa'i gtso bo ni mtha' bzhi'i skye ba 'gog pa'i rigs pa'o/ /zhes gsungs pa yin no/ /gang zag gi bdag med gtan la 'bebs pa'i rigs pa'i gtso bo ni rnam bdun gyi rigs pa nyid yin te/ dbu ma 'jug pa las/ rnam bdun gyis med gang de ji lta bur/ yod ces rnal 'byor @82a @#/ /pas 'di'i yod mi rnyed/ des de nyid la'ang bde blag 'jug 'gyur bas/ /'dir de'i grub pa'ang de bzhin 'dod par bya/ /zhes shing rta rnam pa bdun du btsal bas mi rnyed kyang rang gi yan lag la brten nas btags pa'i btags yod du 'jog pa bzhin du gang zag kyang de ltar 'jog par gsungs shing de nyid zab mo'i lta ba bde blag tu rnyed pa'i thabs su gsungs pa'i phyir dang/ bstan bcos der gang zag gi bdag med gtan la 'bebs pa ni rnam bdun gyi rigs pa nyid kyis mdzad pa'i phyir dang/ /drang nges rnam 'byed las kyang rigs pa de gtso bor gsungs pa'i phyir ro/ /rten 'brel gyi gtan tshigs ni lugs 'di'i rigs pa mtha' dag gi gtso bo yin zhing rigs pa snga ma de dag thams cad kyi mthar gtugs pa yang rten 'byung gi rigs pa kho na yin no/ /de ltar yang zla ba'i zhabs kyis/ gang phyir dngos po brten nas rab 'byung bas/ /rtog pa 'di dag brtag par mi nus pa/ /de phyir rten 'byung rigs pa 'di yis ni/ /lta ngan dra ba mtha' dag gcod par byed/ ces gsungs te rigs pa gzhan mtha' dag 'di nyid la gtugs dgos tshul dang 'dis lta ngan gyi dra ba gcod phul shin tu che ba 'dra ba rigs pa gzhan la med tshul rnams shin tu rtogs dka' bar yod do/ /de'i phyir 'di la rigs pa'i rgyal po rten 'brel gyi gtan tshigs zhes rje yab sras kyis bsngags par mdzad do/ /yod med skye 'gog dang mu bzhi'i skye 'gog ni chos kyi bdag med gtan la 'bebs pa'i rigs pa yin la/ gcig tu bral ni bdag med gnyis ka la sbyor bar mdzad do/ /lam rim chung ngu las/ gcig du bral gyi rigs pa nyid gnad bzhi'i dpyad pa'i @82b sgo nas rgyas par gsungs pa ni rtsa she'i rab byed bco brgyad pa la brten pa yin zhing/ rtsa she'i rab tu byed pa gzhan nyer drug po mtha' dag gi don nyams su len pa'i rim par dril ba ni rab byed 'dis ston par gsungs pas de ltar mdzad pa la gnad shin tu che zhing / de la'ang rgyu mtshan mang po zhig yod de re zhig bzhag go /gnyis pa la gsum/ chos kyi bdag 'gog pa'i rigs pa bshad pa dang/ gang zag gi bdag 'gog pa'i rigs pa bshad pa dang/ thun mong du rigs pa'i rgyal po rten 'brel gyi gtan tshigs bshad pa'o/ /dang po la/ mtha' bzhi'i skye ba 'gog pa'i rdo rje gzegs ma'i rigs pa bshad pa ni/ rtsa shes las/ bdag las ma yin gzhan las min/ gnyis las ma yin rgyu med min/ /dngos po gang dag gang na yang/ /skye ba nam yang yod ma yin/ /zhes mtha' bzhi las skye ba med pa'i dam bca' bzhi gsungs shing dam bcas pa'i don yang sgrub chos gzhan mi 'phen pa'i med dgag kho na yin no/ /'o na ci'i phyir dam bca' bzhi kho na bshad ce na/ dngos po rang bzhin gyis kye ba yod na mtha' bzhi'i skye ba gang rung gis khyab pa'i rgyu mtshan gyis dam bca' de bzhi grub na rang bzhin gyis skye ba med pa bde blag tu 'grub pas mtha' bzhi 'gog pa'i rigs pa ni mtha' chod pa'i rigs pa'o/ /gal te mtha' bzhi'i skye ba khegs na rang bzhin gyis skye ba dgag pa yang shugs kyis 'grub par 'gyur na dam bca' med dgag ma yin par thal lo zhe na/ skyon med de/ ma yin par dgag pa la sgrub chos gzhan 'phen pa'am sgrub pa zhig dgos pa'i phyir ro/ /rang bzhin gyis skye na mtha' bzhi'i skye ba gang rung gis khyab pa'i rgyu mtshan ni/ skye @83a @#/ /ba la rgyu yod med gnyis su nges shing/ rgyu yod pa la 'bras bu dang rgyu gnyis rang bzhin gcig pa dang rang bzhin tha dad pa dang rang bzhin gnyis ka tshogs pa las skye ba gsum du kha tshon chod pa'i phyir ro/ /rje thams cad mkhyen pas rtsa she dang 'jug pa'i rnam bshad chen mo gnyis kar de ltar gsungs pa ni gzhung chen mo myong thog nas bshad pa'i legs bshad gnad che ba zhig yin kyang dbu ma'i yig 'jog mdzad pa po phal mo ches mkho chung ba'i gras su bzhag pa yin nam gang ltar gleng brjod nyung bar snang ngo/ /bdag skye 'gog pa la/ rang dang ngo bo gcig pa'i rgyu las skye ba dgag pa ni/ skye bzhin pa'i myu gu de rang gi bdag nyid las slar yang skye na skye ba don med par 'gyur te/ myu gu'i rang gi ngo bo yod pa nyid sngar rgyu'i dus nas thob zin pa'i phyir / khyab ste/ skye ba ni rang gi bdag nyid 'thob pa'i don du yin pa'i phyir ro/ /gal te rang gi bdag nyid thob zin kyang slar yang skye ba mi 'gal lo zer na/ de ltar na myu gu la sogs pa'i 'bras bu'i rigs 'dra rnams gtan nas mi skye zhing sa bon la sogs pa'i rgyu'i rigs 'dra rnams srid pa'i mthar thug par bar ma chad du skye bar 'gyur te/ skyes zin pa de nyid yang dang yang du ldabs nas skye dgos pa'i phyir ro/ /de ni 'jug pa las/ de nyid de las 'byung na yon tan 'ga' yang yod ma yin/ skyes par gyur pa slar yang skye ba'ang rigs pa ma yin nyid/ skyes zin slar yang skye bar yongs su rtog par 'gyur na ni/ myu gu la sogs rnams kyi skye ba 'dir rnyed mi 'gyur zhing/ sa bon srid mthar thug par rab tu skye ba nyid du 'gyur/ zhes so/ /'di la grangs can pas sa @83b myug phan tshun tha dad pa kho nar 'dod pas myu gu myu gu las skyes bar mi 'dod kyang myu gu'i rang bzhin dang sa bon gyi rang bzhin gnyis gcig yin zhing/ de'i rang bzhin rnams par yin tshur yin du 'dod pas bshad ma thag pa'i skyon 'jug la rang re ltar na de ltar mi 'dod mod kyang sa myug gnyis rang bzhin gyis gcig yin na gcig yin pa de sa myug gi gnas lugs su song bas dbye ba byar med par rigs pas 'phul nas skyon ston pa yin no/ /'jug pa rtsa 'grel las/ rgyu 'bras ngo bo gcig pa las myug gnyis dbyibs dang kha dog ro nus sogs tha dad med par thal ba dang/ gnas skabs snga ma spangs na sa myug gnyis rang bzhin gcig pa nyams par 'gyur ba dang sa myug gi gnas skabs gnyis kyi re rer gnyis ka gzung du yod med mtshungs par thal ba dang/ sa myug gnyis rang bzhin gcig pa la 'jig rten grags pas gnod pa ste 'grel pa mdzad pa'i rigs pa rnams dang/ bskyed bya skyed byed dang bya byed las gsum gcig tu thal ba'i rtsa she'i rigs pas 'gog pa rnams mdzad do/ /gzhan skye 'gog pa la gzhan skye'i gzhan ni gzhan tsam ma yin gyi rang gi mtshan nyid kyis grub pa'i gzhan yin la/ de yang sa lu'i sa bon rang 'bras sa lu'i myu gu las ji ltar rang gi mtshan nyid kyis grub pa'i gzhan yin pa de bzhin du me dang sol ba sogs kyang sa lu'i myu gu las rang gi mtshan nyid kyis grub pa'i gzhan yin pa ni gzhan skye smra ba rnams kyi 'dod tshul lo/ /de ltar gzhan yin tshul gnyis po de mtshungs par 'dod na sel byed me lce 'bar ba las kyang bsal bya mun pa 'thug po 'byung ba dang rgyu yin min thams cad las 'bras bu yin min thams cad 'byung bar @84a @#/ /'gyur te de dag la rang gi mtshan nyid kyis grub pa'i gzhan nyid mtshungs par yod pa'i phyir ro/ /'di ni rtsa she'i rab byed nyi shu pa las/ rgyu dang 'bras bu gzhan nyid na/ rgyu dang rgyu min mtshungs par 'gyur/ zhes pa dang/ de'i thad kyi sangs rgyas bskyangs kyi 'grel pa dang/ dpal ldan zla bas/ gzhan la brten nas gal te gzhan zhig 'byung bar 'gyur na ni/ /'o na me lce las kyang mun pa 'thug po 'byung 'gyur zhing/ /thams cad las kyang thams cad skye bar 'gyur te gang gi phyir/ / skyed par byed pa ma yin ma lus la yang gzhan nyid mtshungs/ /zhes sogs kyis bstan pa'i rigs pa'o/ /gzhan yang rgyu 'bras rang gi mtshan nyid kyis grub pa'i gzhan tsam gyis rgyu 'bras su mi 'jog gi 'bras bu rab tu bya bar nus pa sogs gzhan khyad par pa kho nas rgyu 'bras su 'jog pas rgyu yin min gyi nges pa 'thad do zer na/ de yang mi 'thad de/ rang gi mtshan nyid kyis grub pa'i gzhan yin phyin gzhan yin pa de kho rang gi gnas lugs yin dgos/ de yin phyin phan tshun 'brel pa gtan nas med pa'i don gzhan yin dgos/ de ltar nas lu'i sa bon dang nas kyi sa bon gnyis sa lu'i myu gu bskyed pa la nus pa yod med sogs kyi khyad par gtan mi 'thad pa'i phyir ro/ /gzhan yang gzhan skye rang gi ngo bos yod na 'bras bu de rang skyes pa'i snga rol tu yod dgos te/ skye ba 'dod phyin chad rgyu 'gag bzhin pa dang 'bras bu skye ba la mngon du phyogs pa gnyis dus mnyam dgos shing/ de ltar na skye 'gag gi bya ba gnyis kyang dus mnyam pas rgyu 'bras gnyis kyang dus mnyam dgos pa'i phyir ro/ / @84b de'i rgyu mtshan skye ba la mngon du phyogs pa'i bya ba ni/ 'bras bu 'di skye zhes pa'i byed pa po myu gu sogs la brten dgos pas rten brten pa yin la/ de lta bu'i rten dang brten pa rang mtshan gyis grub na ni dus nam gyi tshe yang skye ba'i bya ba yod phyin chad myu gu yod dgos te/ rang bzhin gzhan du 'gyur ba mi 'thad pa'i phyir ro/ /de'i phyir dbu ma 'jug pa las/ skye ba 'di ni byed po med par rigs pa'i ngo bo'ang min/ zhes gsungs so/ /tha snyad tsam du skye ba la lan cig rten dang brten par song na dus thams cad du 'gro mi dgos pas skyon de dag med do/ /'di ni lugs 'di'i gzhan skye 'gog pa'i rigs pa phra la don che ba zhig tu rje thams cad mkhyen pa bzhed do/ /lugs 'dis gzhan skye tha snyad du yang mi bzhed par ma zad rgyu 'bras gnyis rang gi mtshan nyid kyis tha dad pa'i gzhan du 'dzin pa yang blo lhan skyes la med par bzhed de/ dbu ma 'jug pa las/ gzhan las skye ba 'jig rten las kyang med/ ces so/ gnyis ka las skye ba 'gog pa la/ bdag las skye ba'i cha ni bdag skye 'gog pa'i rigs pas khegs la/ gzhan las skye ba'i cha ni gzhan skye 'gog pa'i rigs pas khegs pa ste/ 'jug pa las/ gnyis las skye ba'ang rigs pa'i ngo bo ma yin gang gi phyir/ bshad zin nyes pa de dag thog tu 'bab pa yin phyir ro/ /zhes so/ /rgyu med las skye ba 'gog pa ni/ rgyu med las skye na ni/ yul dus rang bzhin nges pa'i skye ba la rgyu med pas gcig las skye na thams cad las skye ba dang/ rtsom pa thams cad don med pa nyid du 'gyur ro/ /gal te rgyu med kho nar skye bar lta zhig 'gyur na ni/ /de tshe mtha' dag rtag tu thams cad las kyang skye 'gyur zhing/ /'bras 'byung ched du @85a @#/ /'jig rten 'di yis sa bon la sogs ni/ brgya phrag dag gi sgo nas sdud par byed par yang mi 'gyur/ zhes so/ /de ltar mtha' bzhi'i skye ba bkag pas kyang rang gi mtshan nyid kyis skye ba khegs par 'gyur gyi tha snyad tsam du skye ba 'gog pa ma yin te/ tha snyad tsam du skye ba la mtha' bzhi'i skye ba gang rung yin mi dgos pa'i phyir ro/ /der ma zad brten nas skye ba nyid kyis mtha' bzhi las mi skye bar 'grub ste/ rtsa she'i TIka chen las/ des na sa bon la brten nas myu gu skye bar khas blangs dgos pa kho nas de bzhi 'gog nus pa ni rigs pa'i rgyal po rten 'byung gi rigs pa'i khyad chos yin pa la/ zhes gsungs so/ /grub pa brnyes pa'i slob dpon sangs rgyas bskyangs kyis kyang/ 'dir smras pa/ re zhig ji ltar skye bar brjod pa tha snyad tsam yin pa de ltar rab tu ston cig /bshad pa/ de dang por bstan par bya'o/ /bdag las ma yin gzhan las min/ zhes sogs gsungs so/ /yang 'grel pa budd+ha pA la ti las/ de'i phyir skye ba med pas skye bar brjod pa ni tha snyad tsam yin no/ /zhes kyang gsungs so/ /mu bzhi'i skye 'gog ni/ rang re'i phyis kyi mkhas pa dag ye shes snying po'i bden gnyis rtsa 'grel las bshad pa'i rigs pa rnams 'dir sbyor bar mdzad cing thal 'gyur ba'i skor gyi gzhung phal mo che las rdo rje gzegs ma'i gtan tshigs nyid la mu bzhi'i skye 'gog tu bshad pa ma gtogs bden gnyis kyis bshad pa de rtsal du bton nas bshad pa cher mi snang ngo/ /yod med skye 'gog gi rigs pa ni/ rgyus 'bras bu rang bzhin gyis yod pa mi bskyed @85b de; rang bzhin gyis yod pa la rkyen gyis dgos pa med pa'i phyir ro/ /'bras bu med pa'ang mi bskyed de/ med pa la rkyen gyis byar med pa'i phyir ro/ /'bras bu yod med gnyis ka'ang mi bskyed de de gnyis tshogs pa mi srid pa'i phyir ro/ /yod med gnyis ka dang bral ba'ang rkyen gyis bskyed pa ma yin de/ de gnyis gang yang ma yin pa mi srid pa'i phyir ro/ /'di ni 'jug pa rtsa 'grel dang spyod 'jug dang lam sgron las kyang bshad do/ /gcig du bral ni rnam bdun gyi rigs pa bshad pas shes par 'gyur ro/ /gnyis pa gang zag gi bdag med gtan la 'bebs pa'i rigs pa bshad pa la gsum/ bdag rang bzhin med par gtan la dbab pa/ des bdag gi ba yang rang bzhin med par 'grub par bstan pa/ rigs pa de gzhan la sbyor ba'i tshul lo/ /dang po na rtsi she las/ phung min phung po las gzhan min/ de la phung med der de min/ de bzhin gshegs pa phung ldan min/ /de bzhin gshegs pa gang zhig yin/ zhes rnam lnga'i rigs pa gsungs shing phan tshun brten pa'i phyogs gnyis dang ldan pa'i phyogs gsum gcig tha dad kyi phyogs gnyis su 'du mod kyang 'jig ltas 'dzin tshul gyi 'jug pa la bltos nas rab byed bcu pa dang nyer gnyis par phyogs lnga gsungs so/ /de ltar na mdo las/ gzugs bdag ma yin/ bdag gzugs dang ldan pa ma yin/ gzugs la bdag med/ bdag la gzugs med pa dang/ de bzhin du phung po lhag ma bzhi la'ang de ltar gsungs nas/ 'jig tshogs la lta ba'i cha nyi shu'i gnyan po gsungs pas rnam par dpyad pa bzhi bzhi skabs su bab pa ma yin nam/ ci'i phyir rnam pa lngar bshad ce na/ mdo las @86a @#/ /de ltar gsungs pa ni sngon du phung po rnams ma bzung bar 'jig ltas bdag tu mngon par zhen par mi nus pas rnam pa bzhi bzhi'i sgo nas phung po rnams la dmigs shing bdag la 'jug pa yin no/ /de'i phyir phung po rnams ma gtogs par gzhan du bdag tu zhen pa'i gzhi lnga pa mu stegs pa ma gtogs pa la mi 'byung bas cha lnga pa ma gsungs pa'i rgyu mtshan ni de yin no/ /rtsa she las phyogs lnga pa gsungs pa ni mu stegs pa'i lugs kyang dgag par bzhed nas gsungs pa yin zhing/ de yang rang rgyud la bdag med gtan la 'bebs pa'i skabs su lhan skyes kyi bdag 'gog pa'i mtha' gcod pa'i yan lag tu shes par bya'o/ /dpal ldan zla ba'i zhabs kyis ni de'i steng du tshogs tsam bdag yin pa 'gog pa dang/ dbyibs bdag yin pa 'gog pa gnyis bsnan nas rnam bdun gyi rigs par mdzad pa ni rang sde dngos smra dang rang rgyud pa kha cig gis sems la bdag tu 'jog pa dang yang gang zag gi khyad par 'ga' zhig phung po'i tshogs pa dang dbyibs kyi khyad par la 'jog pa sogs 'gog pa'i ched du bsnan pa yin la/ gzhan yang mdo las/ bdag ces bya ba bdud kyi sems/ /khyod ni lta bar gyur pa yin/ /'du byed phung po 'di stong ste/ /'di la sems can yod ma yin/ /ji ltar yan lag tshogs rnams la/ /brten nas shing rtar brjod pa ltar/ /de bzhin phung po rnams brten nas/ /kun rdzob sems can zhes bya'o/ / zhes bdag dang shing rta'i tha snyad 'jog tshul 'dra bar gsungs pa dang de'i 'dra tshul yang rang rgyud pa man chad dang thun mong ma yin pa'i 'jog lugs khyad par ba zhig yod pa de gsal bar bya ba'i ched du rnam bdun gyi rigs pa gsungs pa yin te/ zhib @86b par rje'i gsung la sbyangs pa las shes par bya'o/ /de ltar na rnam bdun gyi rigs pa ni rgyas bsdus 'chams shing yon tan gyi khyad par du ma dang ldan te/ byang chub lam rim chen mo las/ mdor na shing rta la brtsams nas sngar bshad pa lta bu'i rnam gzhag byas pa 'di la yon tan gsum yod de/ /chos rnams la rang bzhin sgro 'dogs pa'i rtag lta dgag sla ba'i yon tan dang/ rang bzhin med pa la rten 'brel mi 'thad snyam pa'i chad lta dgag sla ba'i yon tan dang/ yon tan de gnyis dpyod tshul ji lta bu zhig byas pas 'grub pa'i rnal 'byor pas nye bar brtag pa'i rim pa'o/ /zhes gsungs shing de'i gsum pa ni/ brtag tshul 'dis brtags na sgyu ma lta bu'i rten 'brel la nges pa rnyed sla ba'i khyad par du bshad do/ /da ni rnam bdun gyi rigs pa nyid bshad par bya ste/ de la gnyis/ dpe dgod pa dang/ don la sbyar ba'o/ /dang po ni 'jug pa las/ shing rta rang yan lag las gzhan 'dod min/ /gzhan min ma yin de ldan yang min zhing/ /yan lag la min yan lag dag der min/ /'dus pa tsam min dbyibs min ji bzhin no/ zhes shing rta rang gi yan lag las gcig tha dad sogs rnam pa bdun du dpyad na mi rnyed kyang rang gi yan lag la brten nas btags pa'i shing rta tshad mas gnod med du bzhag pas chog pa ltar bdag dang phung po sogs kyang de bzhin du 'jog par gsungs so/ / de la shing rta chos can/ rang gi yan lag srog shing dang 'khor lo dang gzer bu sogs dang rang bzhin gcig ma yin te/ gcig yin na yan lag rnams du ma yin pa bzhin du shing rta yang du mar 'gyur ba dang/ yang na shing rta gcig yin pa bzhin du yan lag @87a @#/ /rnams kyang gcig tu 'gyur ba dang/ byed pa po dang bya ba'i las gcig tu 'gyur ba sogs kyi skyon yod pa'i phyir/ de chos can/ rang gi yan lag rnams dang rang bzhin gyis tha dad ma yin te/ gzhan du na ngo bo tha dad du 'gyur zhing/ ngo bo tha dad dus mnyam yin na 'brel med don gzhan yin dgos pas rta dang ba lang bzhin tu shing rta rang gi yan lag rnams dang so sor dmigs dgos pa las de ma dmigs pa'i phyir ro/ /de chos can/ rang gi yan lag rnams la rang bzhin gyis brten pa dang rang gi yan lag rnams khyod la rang bzhin gyis brten pa'i phyogs gnyis kyang mi 'thad de/ de gnyis yin na rang bzhin gyis tha dad du yod dgos pa las de mi 'thad pa bshad zin pa'i phyir ro/ /de chos can/ lhas sbyin ba lang dang ldan pa'am lhas sbyin rna ba dang ldan pa lta bu'i sgo nas shing rta rang gi yan lag dang rang bzhin gyis ldan pa'i tshul yang mi 'thad de/ ldan tshul snga ma ltar na ngo bo tha dad dang/ ldan tshul phyi ma ltar na ngo bo gcig tu rang bzhin gyis grub dgos la de gnyis ka'ang bkag zin pa'i phyir ro/ /de chos can/ khyod kyi yan lag rnams tshogs tsam yang khyod du 'jog pa mi 'thad de/ de ltar na 'khor lo dang gzer bu la sogs pa phral nas sil bur gnas pa rnams ma tshang ba med par phyogs gcig tu spungs nas tshogs pa tsam la yang shing rta yod par thal bar 'gyur ba'i phyir ro/ /rang sde dngos por smra ba dag yan lag can ni med kyi yan lag 'dus pa tsam zhig 'dod pa de'i ltar na yang mi 'thad de/ yan lag can med pa'i phyir yan lag kyang med par 'gyur ba'i @87b phyir ro/ /de chos can/ khyod kyi yan lag rnams kyi dbyibs khyad par ba yang khyod du 'jog mi rigs te/ yan lag so so ba'i dbyibs shing rta yin pa yang mi 'thad/ yan lag rnams tshogs pa'i dbyibs shing rta yin pa yang mi 'thad pa'i phyir/ dang po grub ste/ sngar ma bsgrigs pa'i dus kyi dbyibs dang khyad par med pa'i dbyibs shing rta yin na yang mi 'thad/ sngar dang mi 'dra ba'i dbyibs gzhan zhig shing rta yin na yang mi 'thad pa'i phyir/ dang po grub ste/ gzhan du na sngar ma bsgrigs pa dang phyis bsgrigs pa'i dus kyi 'phang lo la sogs pa'i dbyibs la mi 'dra ba'i khyad par med pas sngar ma bsgrigs pa'i dus na shing rta med pa ltar phyis bsgrigs pa na yang shing rta med par 'gyur ba'i phyir ro/ /gnyis pa yang grub ste/ sngar ma bsgrigs pa'i dus kyi 'phang lo dang srog shing sogs la med pa'i phyis bsgrigs pa'i gnas skabs kyi 'phang lo srob kyi dbyibs kyi mi 'dra ba'i khyad par gzhan yod na dmigs dgos pa las ma dmigs pa'i phyir ro/ /gong gi rtags zung gnyis pa yan lag tshogs pa'i dbyibs shing rtar mi 'jog pa yang de ltar yin te/ dngos smra ba'i lugs la tshogs pa rdzas su ma grub pas de'i dbyibs rdzas su grub pa mi 'thad cing/ shing rta ni rdzas su grub par khas blangs pa'i phyir/ de yang yin te/ lugs de dag gis btags yod thams cad 'dogs pa'i gzhi rnams rdzas yod du khas blangs pa'i phyir ro/ /btags yod kyi gdags gzhir rdzas yod mi 'dod pa'i rang lugs la'ang yan lag tshogs pa'i dbyibs shing rta'i gdags gzhi yin gyi/ shing rta ma yin no/ /gal te de ltar rnam pa bdun du btsal @88a @#/ /ba na shing rta mi rnyed pas shing rta med par 'gyur la/ de ni mi 'thad de/ shing rta 'on cig /nyos shig /'chos shig ces bya ba la sogs pa 'jig rten gyi tha snyad la grags pa'i phyir zhe na/ skyon med de/ kho bo cag gi lugs la shing rta de ni rnam pa bdun gyis dpyad pa na mi rnyed cing de yang don dam pa dang kun rdzob kyi bden pa gnyis char du mi rnyed pa yin mod/ 'on kyang des shing rta med par mi 'gyur ba'i phyir te/ shing rta khas len pa ni rang bzhin yod med dpyod pa'i rigs pas grub nas khas blangs pa min gyi btags don 'tshol ba'i rnam par dpyod pa med par 'jig rten pa ste/ tha snyad pa'i shes pa rang dga' ba gnod med tsam gyis grub pa yin pa'i phyir dang/ de'i 'jog tshul yang rang gi yan lag 'phang lo sogs la brten nas btags pa'i btags yod tsam du grub pa yin pa'i phyir ro/ /de ni dbu ma 'jug pa las/ de ni de nyid du 'am 'jig rten du/ /rnam pa bdun gyis 'grub 'gyur min mod kyi/ /rnam dpyad med par 'jig rten nyid las 'dir/ /rang gi yan lag brten nas 'dogs pa yin/ zhes gsungs so/ /'jug 'grel las/ phyogs 'dis 'jig rten la grags pa'i sgo nas shing rta'i tha snyad 'dogs pa ches gsal bar grub pa 'ba' zhig tu ma zad kyi 'di'i ming gi khyad par gang dag yin pa de dag kyang rnam par dpyad pa med par 'jig rten la grags pa'i sgo nas khas blangs par bya'o/ /zhes ming gi khyad par gyi sgo nas 'grub tshul gsal bar gsungs so/ /rang rgyud pa man chad kyis yan lag tshogs pa la sogs pa gang yang rung ba zhig yan lag can la sogs pa'i @88b mtshan gzhir ma bzhag na/ de rnams las ngo bo tha dad pa'i yan lag can la sogs pa yang med par mthong nas/ gdags gzhi'i gseb nas chos de dang de 'jog par 'dod de/ chos de'i btags don btsal nas ma rnyed na chos de 'jog mi shes pa yin no/ /de'i phyir shing rta sogs ming du btags pa tsam du mi 'dod pas shing rta sogs la tha snyad du rang gi mtshan nyid khas len pa yin no/ /lugs mchog tu gyur pa 'dis ni yan lag tshogs pa dang de'i ya gyal sogs gang yang yan lag can la sogs pa'i mtshan gzhir ma bzung yang yan lag can la sogs pa'i ming du btags pa tsam zhig la bya byed thams cad legs par 'jog nus pa gsung rab kyi don du 'grel ba ni thub pa'i dgongs pa thun mong ma yin pa yin pas rnam dpyod can gyis dgongs pa 'grel lugs 'di la sbyang dgos so zhes rje thams cad mkhyen pas 'doms par mdzad do/ /tshul 'di ni rgya gar 'phags pa'i yul na'ang yongs su grags pa'i paNDi ta chen po du ma zhig gi blo'i spyod yul du ma gyur pa dang/ bod gangs can du'ang rje thams cad mkhyen pa yab sras las gzhan du mkhas pa dang grub pa'i skye bo phal mo cha zhig gis phyogs tsam yang mthong bar ma nus pa'i dka' gnas mchog tu snang ngo/ /dpyod tshul 'di ni stong pa nyid kyi lta ba myur du rnyed pa'i thabs zab mo yin te/ 'jug 'grel las gang gi phyir 'jig rten gyi kun rdzob 'di de ltar rnam par dpyad pa na yod par mi 'gyur zhing ma brtags par grags pas yod pa de nyid kyi phyir rnal 'byor pas rim pa 'di nyid kyis 'di la rnam par dpyod pa na ches myur ba kho nar de kho na nyid kyi gting dpogs par 'gyur @89a @#/ /ro; ;zhes gsungs so/ /gnyis pa don la sbyar ba ni/ nga'o snyam du zhen pa'i gzhir gyur pa'i bdag gam gang zag zhes bya ba de rang gi phung po rnams dang gcig dang tha dad gang du yod bsam par bya ste/ yod na de gnyis gang rung du yod dgos pa'i phyir te/ spyir chos de zla bcas su blos yongs su bcad pa na zla med yin pa rnam par gcod cing zla med du yongs su bcad na zla bcas yin pa rnam par gcod pa 'jig rten na mthong bas gcig dang tha dad ni phan tshun spangs pa'i dngos 'gal yin pa'i phyir ro/ /de la bdag phung gnyis gcig tu grub na skyon gsum yod de/ bdag tu khas blangs pa don med pa dang/ bdag mang por 'gyur ba dang/ bdag skye 'jig can du 'gyur ba'o/ /dang po ni/ bdag phung gnyis rang bzhin gyis gcig na bdag khas blangs pa don med de/ bdag phung po'i rnam grangs tsam du 'gyur ba'i phyir te/ dper na zla ba dang ri bong can bzhin/ /rtsa she las/ /nye bar len pa ma gtogs pa'i/ /bdag yod ma yin byas pa'i tshe/ /nye bar len nyid bdag yin na/ / khyod kyi bdag ni med pa yin/ /zhes so/ /gnyis pa ni/ bdag phung rang bzhin gyis gcig tu grub na phung po du ma bzhin du bdag kyang du mar 'gyur ba'i phyir te/ 'jug pa las/ gal te phung po bdag na de phyir de/ /mang bas bdag de dag kyang mang por 'gyur/ zhes so/ /gsum pa ni/ bdag phung gnyis gcig yin na bdag skye 'jig gi chos can du thal te/ phung po skye 'jig gi chos can yin pa'i phyir/ rtsa she las/ gal te phung po bdag yin no/ /skye dang 'jig pa can du 'gyur/ / @89b zhes so/ /bdag skye 'jig can du 'gyur ba la skyon ci yod ce na/ tha snyad tsam yin na skyon med mod kyang rang mtshan gyis grub pa'i skye 'jig byed na skyon gsum yod de/ skye ba dran pa mi 'thad pa dang/ las byas pa chung zos pa dang/ las ma byas pa dang 'brang pa'i nyes pa gsum mo/ /de yang skye ba snga phyi'i bdag rang gi mtshan nyid kyis so so ba yin na 'brel med don gzhan du 'gyur ba'i rgyu mtshan gyis skyon de gsum 'byung ba'o/ /gal te rang mtshan gyis so so ba yin kyang rgyud gcig pas skyon med do zhe na/ de yang mi 'thad de/ rang gi ngo bos tha dad na ni rgyud gcig tu mi rung ba'i phyir/ dper na byams pa dang nyer sbas bzhin/ 'jug pa las/ byams pa nyer sbas la brten chos rnams ni/ gzhan nyid phyir na rgyud gcig gtogs min te/ gang dag rang mtshan nyid kyis so so ba/ /de dag rgyud gcig gtogs pa rigs ma yin/ zhes so/ /bdag phung gnyis tha dad pa'i phyogs dgag pa ni/ bdag phung po las rang gi mtshan nyid kyis tha dad na/ bdag de phung po'i mtshan nyid skye 'jig gnas pa dang mi ldan par 'gyur te/ phung po dang 'brel med don gzhan yin pa'i phyir/ dper na rta ba lang las don gzhan du grub pas nog sogs dang mi ldan pa bzhin no/ /de lta na bdag tu tha snyad 'dogs pa'i gzhi dang bdag tu 'dzin pa'i yul du med par 'gyur te; 'dus ma byas yin pa'i phyir/ dper na nam mkha'i me tog bzhin/ zhes gzhan grags kyi sbyor ba byed par tshig gsal las gsungs so/ /gzhan yang bdag phung rang bzhin gyis tha dad na/ phung po'i mtshan nyid gzugs su rung ba sogs @90a @#/ /las don tha dad du dmigs dgos te/ dper na gzugs dang sems tha dad du dmigs pa bzhin/ rigs pa snga phyi gnyis rim pa bzhin rab byed bco brgyad pa las/ gal te phung po rnams las gzhan/ phung po'i mtshan nyid med par 'gyur/ zhes dang/ nyer bdun pa las/ gal te gzhan na len med par/ gzung yod rigs na gzung du med/ ces pa rnams kyis bstan to/ /gcig tha dad 'gog pa'i rigs pa 'di rnams la dka' ba'i gnad bshad rgyu shin tu mang mod kyang 'dir ma spros so/ /rigs pa de dag gis phyogs lhag ma rnams kyang legs par 'gyur ba'i tshul ni/ de ltar rang bzhin gcig tha dad gnyis khegs pas phung po la bdag dang bdag la phung po brten nas yod pa'i brten pa'i phyogs gnyis kyang khegs par 'gyur te/ /de gnyis ni rang bzhin tha dad du yod na 'thad par 'gyur ba las rang bzhin tha dad pa'i phyogs bkag zin pa'i phyir ro/ /bdag phung po dang ldan pa'i phyogs kyang mi 'thad da/ sngar shing rta'i skabs su bshad pa ltar ldan tshul gnyis ka gcig tha dad kyi phyogs las ma 'das pa'i phyir ro/ /phung po tshogs tsam yang bdag tu mi 'thad de/ phung po lnga la brten nas bdag tu 'dogs par gsungs pas na phung po lnga gdags gzhi dang gang zag btags chos yin pa'i phyir dang/ gdags gzhi btags chos su mi 'thad pa'i phyir ro/ /rigs pa 'di'i gnad ni cung zad rtogs dka' bar yod cing de yang sngar drangs pa'i/ ji ltar yan lag tshogs rnams la/ /brtan nas shing rtar brjod pa ltar/ de bzhin phung po rnams brten nas/ kun @90b rdzob sems can zhes bya'o/ /zhes pa'i mdo'i tshig zur gyi nus pa 'don lugs thun mong ma yin pa zhig yod pa dang/ 'jug pa rang 'grel las/ rigs pa 'di sgrub pa'i dag gis gsal bar mdzad pa'i rigs pa'i gnad zhib tu rtogs pa las shes dgos so/ /gzhan yang tshogs pa bdag yin pa la bya byed gcig tu 'gyur ba'i skyon yang yod de/ 'dis rang sde 'ga' zhig gis phung po'i rgyun la bdag tu 'dod pa yang khegs so/ /phung po'i dbyibs bdag tu 'dod pa yang mi 'thad de/ dbyibs ni gzugs can kho na la yod pas na sems la sogs pa la bdag gzhag tu med pa'i phyir/ de ltar rnam pa bdun du rigs pas dpyad pa na bdag gang du'ang ma rnyed pa ni bdag rang bzhin med pa'i don yin la tshul de ni bden pa gnyis char du 'dra bas tha snyad du'ang bdag rang mtshan gyis grub pa mad do/ /da lta na yang btags don btsal ba'i dpyad pa med par bdag dang gang zag bya ba byed nus su bsnyon mi nus par tshad mas grub pa'i phyir gang zag tha snyad du yod la/ de yang da'o snyam pa'i blo skye ba na rang rgyud kyi phung po lnga gzhir byas pa la brten nas skye ba'i phyir phung po lnga la brten nas btags pa tsam du yod do/ /de dag kyang 'jug pa las/ de ni de nyid du'am 'jig rten du/ zhes sogs sngar drangs pa rtsa 'grel gyi dgongs pa'o/ /bzhi brgya pa'i 'grel pa las/ de'i phyir de ltar yongs su dpyad pa na dngos po rnams kyi rang bzhin 'grub par mi 'gyur bas so so nas dngos po rnams la sgyu ma lta bu de nyid lhag mar lus par 'gyur ro/ /zhes sgyu ma'i don lhag mar lus dgos par gsungs shing/ rigs pa'i dpyad pas dgag @091a @#/ /bya lhag ma med par khegs pa dang de bkag shul du rgyu 'bras rten 'brel gyi bya byed thams cad sgyu ma lta bur grwa ma nyams par bzhag pas chog pa gnyis tshogs 'di srid mtha' tsam du song bas dbu ma'i lta ba shin tu rnyed dka' ba yin no/ /zhes rje thams cad mkhyen pas gsungs so/ /de la rang sde theg pa gong 'og gi grub mtha' smra ba thams cad kyis rang rang gi lugs de mtha' dang bral ba'i lugs su 'jog pa dang/ khyad par dbu sems kyi shing rta chen po gzhan dag gis mtha' bral dbu ma'i don 'jog tshul dang sgyu ma lta bu'i rnam gzhag mdzad pa rnams kyi grub mtha' 'og ma 'og ma las grub mtha' gong ma gong ma'i bzhed tshul rnams gnad du 'gro tshabs che zhing rtogs dka' ba dang/ de lta na yang de thams cad kyis lugs mchog tu gyur pa 'di'i bden gnyis kyi 'jog tshul lta bu'i mtha' thams cad dang bral ba'i gnad ma zin pa dang/ lugs 'di kho nas shin tu phra ba'i mtha' thams cad sel tshul dang/ sgyu ma lta bu'i 'jog tshul la yang gzhan rnams dang gtan mi 'dra ba'i zab pa'i khyad par yod tshul rnams legs par shes na spyir klu sgrub yab sras dang khyad par thal 'gyur ba'i lugs tshul bzhin du 'grel ba'i grub pa'i dbang phyug chen po rnams kyi gzhung dang rje bdag nyid chen po yab sras kyi gsung rab la rigs pa'i lam nas drangs pa'i dad pa brtan po bcos ma ma yin pa skye bar 'gyur ro/ /sngar bshad pa'i rigs pa rnams kyi gnad dang sgyu ma lta bu'i 'jog tshul gyi gnad rnams ji ltar yin pa dang/ de dag tshul bzhin yid la byed pa'i rim pa dang/ myong ba skye ba'i khyad par gyi spu ris phra mo rnams ni rje'i gsung rab spyi @091b dang khyad par lam gyi rim pa che chung rnams la kha byang tsam ma yin par nad byan legs par tshud pa dang/ rje bdag nyid chen po'i gsung gi gsang ba'i gnang ? phra mo 'ga' zhig sras kyi dam pa sar gnas kyi sems dpa' chen po rnams la snyan rgyud du stsal ba rim par brgyud bdag lugs 'di'i mkhas pa dang grub pa'i skye bo rnams kyis yig ris su mdzad pa rnams zhal shes dang bcas pa legs par thob pa'i bshes gnyen dam pa tshul bzhin du bsten pa dang/ gzhung gi don tshul bzhin sems pa'i rigs pas yang yang yid la byed pa dang/ gzhan yang phyi nang gi rgyu tshogs du ma zhig la brtson pa lhag par bskyed pa las shas dgos shing tshul de la 'bad par yang shin tu rigs te/ rgyal tshab thams cad mkhyen pas/ ji srid rje btsun dam pa ma rnyed pa/ de srid srid pa'i rtsa ba gcod ? byed lam/ rtan 'byung mtha' dang bal ba'i dbu ma ni/ /phyogs tsam zhig kyang rtogs par ma gyur to/ /zhes 'phags yul 'dzam gling rgyan drug lta bu la co 'dri ba'i rig pa'i dbang phyug chen po de nyid kyis kyang rje bdag nyid chen po dang zhal ma mjal gong du mtha' bral dbu ma'i lta ba 'di nyid kyi phyogs tsam yang ma rtogs pa dang/ bshes gnyen dam pa'i legs par bshad pa las/ rten 'byung mtha' dang bral ba'i dbu ma'i don/ mgon po klu sgrub bzhed pa ji bzhin du/ /sangs rgyas bskyangs dang zla grags zhi ba'i lha/ /dgongs pa gcig pa ji bzhin gsal bar bshad/ /ces rje thams cad mkhyen pa'i drin gyis mtha' bral dbu ma'i don rtogs par gsungs pa dang/ mtha' bral dbu ma'i de nyid ma rtogs par/ /'phags mchog @092a @#/ /go 'phang reg par mi nus pas/ /stong pa rten 'brel don du mtha' dpyad nas/ /tshul bzhin 'bad pas sgrub la brtson par bya/ /zhes tshul 'di thar pa dang thams cad mkhyen pa'i lam gyi srog dam pa yin pas 'bad dgos par gsungs pa dang/ bskal ba bye ba brgyar yang rnyed dka' ba/ /klu sgrub lugs bzang bden gnyis smra ba dag zhing 'dir ring por mi thogs nub 'gyur pas/ /rnam dpyod ldan rnams myur du brtson 'grus bskyed/ ces lugs mchog 'di rnyed par dka' ba dang de yang ring por mi thogs par nub par 'gyur ba'i tshul shes par byas nas rnam dpyod dang ldan pa rnams kyis myur ba myur bar brtson 'grus bskyed dgos par gsungs pa 'di rnams gnad shin tu che zhing gdam ngag zab mo'i mthar thug par snang ba'i phyir ro/ /'dir thal 'gyur ba'i skor rnams mdor bsdus tsam 'chad par 'dod pas lugs 'di'i grub mtha'i gnad rnams rgyas par gzhan las shes par bya'o/ gnyis pa des bdag gi ba yang khags par bstan pa ni/ de ltar bdag de rang bzhin yod med 'tshol ba'i rigs pas bcal ba na bdun po de gang du yang ma rnyed pas bdag la rang bzhin khegs pa de'i tshe bdag gi ba la yang rang gi mtshan nyid kyis grub pa bde blag tu khegs par 'gyur te/ rtsa she las/ bdag nyid yod pa ma yin na/ bdag gi yod par ga la 'gyur/ zhes so/ /de yang nga rang bzhin med par rtogs pa'i blo de nyid kyis nga yi ba rang bzhin med par mi 'dzin kyang nga yi ba la rang bzhin yod med dpyod pa'i tshul gyis blo kha phyogs pa na blo snga ma'i byed pa la brten @092b nas rang bzhin med pa bde blag tu 'grub par 'gyur gyi/ sgrub byed gzhan la ma ltos pas gzhung chen mo rnams su rigs pa zur pa ma gsungs so/ /rang rgyud kyis bsdus pa'i mig sna sogs ni nga yi ba'i mtshan gzhi yin kyang nga yir 'dzin pa'i 'jig lta lhan skyas kyi dmigs pa ma yin pa ni rje yab sras kyi dgongs par 'chad pa dang/ mig rna sogs nga yi ba'i gdags gzhi yin gyi nga yi ba'i mtshan gzhi min te/ gdags gzhi btags chas su mi 'thad pa'i phyir/ stong thun chen mo las mig rna sogs nga yi ba'i mtshan gzhir bshad pa ni nga yi bar byed rgyu'i mtshan gzhir bstan pa tsam yin gyi nga yi ba rang nyid yin par bstan pa mi yin zhing 'chad tshul ? 'di rtsa she'i TIka chen gyi dgongs pa yin no zhes gsungs pa'i bzhed chul mi 'dra ba gnyis snang ngo/ /bzhed pa snga phyi gnyis ka la dpyad gzhi che ba snang yang logs su spro bar 'dod do/ /gsum pa rigs pa de gzhan la sbyor tshul ni/ 'jug pa las/ yan lag yon tan 'dod chags mtshan nyid dang ni bud shing la sogs dang/ yon tan can yan lag can chags dang mtshan gzhi me la sogs don dag / de rnams shing rta'i rnam dpyad byas pas rnam pa bdun du yod min zhing/ /de las gzhan du gyur bar 'jig rten grags pa'i sgo nas yod pa yin/ zhes 'jig rten na grags pa'i chas mtha' dag rnam pa bdun du btsal na yod pa ma yin zhing ma dpyad pa'i tha snyad pa'i shes ngo na yod par 'jog par gsungs so/ /'phags pa sdom pa gsum bstan pa las/ 'jig rten nga dang rtsod kyi/ nga ni 'jig rten dang mi rtsod de/ 'jig rten na gang yod pa dang med par 'dod pa de nga yang de ltar 'dod do/ /zhes 'jig rten gyi grags pa @093a @#/ /rigs pas mi 'gog par gsungs so/ /gsum pa rigs pa'i rgyal po rten 'brel gyi gtan tshigs bshad pa la dngos dang/ rigs pa gzhan rnams 'di la gtugs tshul gnyis/ dang po ni/ blo gros rgya mtshos zhus pa las/ gang rnams rten cing 'brel par 'byung/ /de ni ngo bo nyid kyis zhi/ /zhes rten 'byung gi rtags kyis rang bzhin gyis grub pa 'gog par gsungs pa dang/ ma dros pas zhus pa las kyang/ /gang zhig rkyen las skyes pa de ma skyes/ /de la skye ba'i rang bzhin yod ma yin/ /rkyen la rag las gang de stong par bshad/ /gang gis stong nyid shes de bag yod yin/ /zhes gsungs so/ /de la rkyen las skyes pa ni gtan tshigs so/ /ma skyes zhes bya ba ni sgrub par bya ba'o/ /de'i don ni rkang pa gnyis pas bstan te/ skye ba tsam gcod pa min gyi rang bzhin gyis skye ba gcod pa'i don no/ /de yang langkar gshegs pa las/ blo gros chen po rang bzhin gyis ma skyes pa la dgongs nas ngas chos thams cad ma skyes pa'o zhes gsungs so zhes ston pa rang nyid kyis rang gi dgongs pa blangs pa ltar ro/ /gang zhig ces bya ba dang de zhes bya ba sbrel bas ni gzhi chos can bstan pa yin te/ myu gu la sogs pa phyi dang 'du byed la sogs pa nang gi dngos po rnams so/ /rkang pa gsum pas rkyen la rag las shing bltos pa nyid rang bzhin gyis grub pas stong pa'i don du gsungs pa ni/ rang bzhin gyis grub pas stong pa rten 'byung gi don yin gyi skye tsam bkag pa'i don byed pas stong pa min par bstan pa'o/ /gtan tshigs 'dis mtha' thams cad 'gog par ston pas bka' stsal ba 'di kho na rang gi ston @093b pa bcom ldan 'das ston pa gzhan las khyad par du 'phags pa'i 'phags chos bla na med par gzigs shing tshul 'dis thugs phrogs nas dpal mgon 'phags pa klu sgrub kyis rtsa she dang/ rigs pa drug cu ba dang/ bstod tshogs sogs su bcom ldan 'das la rten 'byung gsungs pa nyid kyi sgo nas bstod par mdzad la/ bdag cag gi rnam 'dren dam pa rje bdag nyid chen pos kyang/ gang zhig gzigs shing gsung ba yis/ /mkhyen dang ston pa bla na med/ rgyal ba rten cing 'brel par 'byung/ /gzigs shing 'doms pa de la 'dud/ ces sogs tshul 'dis bstod par mdzad pa ni rigs pa'i lam nas drangs pa'i dad pa bcos ma ma yin pas nye bar drangs pa'i bstod pa'i ngag rnam par dag pa yin gyi rab btags dang gcam bu'i tshig ma yin no/ /de la rten cing 'brel bar 'byung ba'i skad dod/ /pra tI t+ya sa muddAH ? zhes yod pa la sngon gyi slob dpon phal cher gyis pra ti ni zlos pa ste so so ba dang/ i ti 'gro ba ste chas pa dang 'jig pa la 'jug pa dang/ da la ya rkyen byin pas de phan gyi khyad par du sbyar ba 'gro bar rung ba'i don du song bas so sor 'gro zhing 'jig pa dang ldan pa rnams kyi 'byung ba ni rten cing 'brel bar 'byung ba'o/ /zhes zer ro/ /de ltar na pra ti'i don de rgyu las 'bras bu 'byung ba'i rten 'brel spyi tsam ma gtogs mig la brten nas rnam par shes pa 'byung zhes pa lta bu'i khyad par re re la bkar ba'i tshe mi rung bar 'gyur te/ gcig la so so'i sgra bshad du med pa'i phyir ro/ /de phan gyi mtha' can du byed pa yang mi 'thad de/ de ltar na mig la gzugs la brten nas zhes 'don pa mi rigs par/ rnam pa kun tu mig dang gzugs la brten pa rnam par @094a @#/ /shes pa zhes bya bar 'don par 'gyur dgos par 'gyur ba'i phyir ro/ /brten pa dang mig gi bar du ram dbyed ma mthong pa'i phyir la yab kyi mtha' can mi zad pa kho na rigs pa'i phyir/ yang slob dpon legs ldan 'byed ni pra tI zhes sogs kyi don so sor bshad par mi byed kyi/ 'di yod na 'di 'byung zhes pa'am rkyen 'di dang ldan pas 'di 'byung zhes pa'i don la brda sbyar ba tsam yin te/ dgon pa'i thig le bzhin no/ /zhes bshad de/ tshig gsal las/ ci ste yang dgon pa'i thig le zhes bya ba la sogs pa ltar rten cing 'brel bar 'byung ba'i sgra ni gting chugs pa'i sgrar khas blang nas de skad du brjod do zhe na zhes gsungs pa'i phyir ro/ /de yang mi 'thad de/ slob dpon 'phags pa klu sgrub kyis/ de dang de brten gang 'byung ba/ / rang gi dngos por de ma skyes/ /zhes brten pa dang 'byung ba zhes pa'i sgra'i yan lag so sor phye nas gsungs pa'i phyir ro/ /ci ste rin chen 'phreng ba las/ /'di yod pas na 'di 'byung dper/ /ring po yod na thung ngu bzhin/ /zhes pa'i don du 'chad par 'dod na yang 'phrad pa'i don du bshad dgos te/ thung ngu dang 'phrad cing thung ngu la brten te'am thung ngu la bltos nas ring por 'gyur ro zhes pa de nyid khas blangs dgos pa'i phyir ro/ /des na slob dpon zla ba'i zhabs kyi rang lugs ni pra ti 'phrad pa dang/ i ti 'gro ba la 'jug pas/ de nyid la la yab kyi mtha' can pra tI t+ya zhes nyer bsgyur gyis bsgyur ba'i dbang gis 'phrad pa ste bltos pa'am brten pa la 'jug ste/ i ti rkyang ba spyir 'gro ba la 'jug kyang pra ti dang bsres pa'i tshe 'phrang ba la sogs pa'i don du 'gyur pa ni/ @094b dper na ganggA'i chu ni shin tu mngar mod kyi rgya mtsho dang bsres pas ba tshwa can gyi ror 'gyur ba bzhin no/ /de ltar yang tshig gsal las/ de la pra ti ni 'phrad pa'i don no/ /i ti ni 'gro ba'i don no/ /la yab kyi mtha' can pra tI t+ya'i ? sgra ni 'phrad pa ste bltos pa la 'jug pa yin te/ skad kyi byings ni nye bar bsgyur bas yongs su 'gyur ba'i phyir ro/ /nye bar bsgyur ba'i dbang gis ni/ /skad byings don ni yongs 'gyur te/ /ganggA'i chu ni mngar mod kyi/ /rgya mtsho'i chu yis ji bzhin no/ /zhes bshad do zhes gsungs so/ /sa mud gong na yod pa'i pA da'i sgra ni 'byung ba la 'jug cing yod pa dang grub pa la'ang bshad du rung ngo/ /des na rang lugs mdor bsdu na dngos po rnams kyi yod pa'am grub pa'am 'byung ba rgyu dang rkyen la bltos pa ni rten cing 'brel par 'byung ba'i don no zhes bya ba ste/ tshig gsal las/ de'i phyir dngos po rnams kyi 'byung ba rgyu dang rkyen la bltos pa ni rten cing 'brel bar 'byung ba'i don to/ /zhes gsungs so/ /de ltar shing rta chen po rnams kyi rten cing 'brel par 'byung ba'i sgra'i don 'chad lugs mi 'dra ba mang du yod pa rnams legs par shes pa gal che ste/ 'di la brten nas rten 'brel gyi gtan tshigs kyi don la khyab che chung dang de kho na nyid kyi gting dpogs pa la nges pa skyed lugs mi 'dra ba'i gnad du ma zhig yod pa'i phyir ro/ /de yang rgyas par gzhan du 'chad 'dod pas dpal ldan zla ba'i bzhed pa mdo tsam brjod par bya ste/ de ltar rten cing 'brel par 'byung ba'i don 'phrad pa dang bltos pa dang brten pa la bshad du yod la grub pa'i rgyu mtshan ni 'di ltar yin te/ spyir 'phrad ltos rten gsum rnam @095a @#/ /grangs par yang gsungs mod kyang go ba chags sla ba'i phyir phral nas brjod na/ 'phrad pa zhes bya bas ni gtan tshigs kyi don dngos po rang gi rgyus bskyed pa'i rten 'brel 'dzin pa yin la/ 'di ni grub pa'i mtha' 'og ma dang yang thun mong ba'o/ /de yang de tsam zhig rten 'brel gyi don du 'dod par 'dra bas thun mong ba zhes bya yi de dag gis 'dod pa'i rten 'brel bden pa ba 'dod pa ni ma yin la de dag gis bden med bsgrub byar 'dod pa yang ma yin no/ /'phrad pa ni rgyu dang 'bras bu'i skye 'gag gi bya ba 'phrad pa la bya yi rgyu 'bras gnyis 'phrad pa ni ma yin no/ /bltos pa zhes bya bas ni 'dus byas dang 'dus ma byas kyi chos rnams rang rang gi cha shas la bltos nas rang gi bdag nyid rnyed pa'i gtan tshigs bstan pa ste sa mu dpA da grub pa la 'chad pa'i dbang du byas pa'o/ /'di ni snga ma las khyab che zhing dngos bstan gyi don tsam dbu ma pa gzhan dang thun mong ba'o/ /brten pa zhes bya bas ni chos thams cad brten nas btags pa'i gtan tshigs kyi don bstan pa ste/ rang rang gi gdags gzhi la brten nas btags pa tsam du grub pa'o/ /'di ni lugs mchog tu gyur pa 'di kho na'i khyad chos yin te/ /rang rgyud pa man chad dang thun mong ma yin pa'o/ /de ltar na tshig gsal gyi lung de'i dngos po 'byung ba zhes pa'i 'byung ba'i don skye ba tsam la byas na gtan tshigs snga ma dang/ grub pa dang yod pa la byas na gtan tshigs phyi ma gnyis kyang ston no/ /rgyu dang rkyen la zhes bya ba ni myu gu'i nye bar len pa'i rgyu sa bon dang rkyen chu lud sogs tsam la byas na gtan tshigs snga ma dang/ bdag nyid kyi ngo bo grub pa'i rgyu gdags @095b gzhi 'am cha shas la byas na gtan tshigs bar pa dang/ rang rang 'dogs byed kyi rtog pa la byas na gtan tshigs phyi ma ston no/ /des na zla ba'i bzhed pas rgyu dang rkyen la bltos pa zhes pa'i rgyu rkyen ni 'du byas kyi rgyu rkyen sa bon dang chu lung lta bu kho na la mi bya bar 'dogs byed kyi rtog pa la'ang bya dgos pa 'di dpal ldan zla ba dang rje bdag nyid chen po'i dgongs pa khyad par can zhig yin mod/ rtse mo rab tu rno ba'i paN zhwas dbu la mdzes pa'i rnam dpyod can phal mo che zhig gis da dung ma thon 'dug go /'phrad ltos rten gsum rnam grangs bar byas pa'i sgo nas kyang gtan tshigs phyi ma kho na 'chad tshul gzhan dag gis ma thon pa zhig yod de 'dir mi spro'o/ /de dag kyang rje bdag nyid chen pos byang chub lam rim chung ba las/ des na myu gu la sogs pa phyi dang 'du byed la sogs pa nang gi dngos po rnams rim pa bzhin du sa bon la sogs pa dang ma rig pa la sogs pa la brten nas 'byung la zhes gsungs pas gtan tshigs dang po bstan pa dang/ yang de nyid las/ rang la rang dbang ba'i tshugs thub kyi rang bzhin grub dgos pas rgyu rkyen la rag las pa 'gal ba'i phyir te/ zhes pas gtan tshigs bar pa bstan pa dang/ yang de nyid las/ 'dis ni gang zag dang bum pa sogs kyang rang gi tshogs pa la brten nas btags pa yin pas rang bzhin gyis grub pa med par shes par bya sde zhes pas gtan tshigs gsum pa bstan pa yin kyang thun mong dang thun mong ma yin pa gnyis su bsdus nas de nyid las/ rten 'byung gi gtan tshigs kyi rnam gzhag gnyis ? so/ /zhes gsungs so/ /der ma zad dbu ma @96a @#/ /la 'jug pa'i rnam bshad chen mo las kyang/ ji skad du bcom ldan 'das kyis/ de la chos kyi brda ni 'di yin te/ 'di lta ste/ 'di yod na 'di 'byung/ 'di skyes pas 'di skye ste gang 'di ma rig pa'i rkyen gyis 'du byed rnams zhes bya ba la sogs pa gsungs pa dang/ rin chen 'phreng ba las/ 'di yod pas na 'di 'byung dper/ /ring po yod na thung du bzhin/ /'di skyes pas na 'di skyes dper/ /mar me byung bas 'od bzhin no/ /zhes dang/ rtsa she las kyang/ byed po las la brten byas shing/ las kyang byed po de nyid la/ /brten nas 'byung ba ma gtogs bar/ /grub pa'i rgyu na mi mthong ngo/ /zhes pa'i lung tshan gsum rim pa bzhin du drangs pa'i re res kyang rnam gzhag gsum ga ston par rung mod kyang gtso che chung dang go rims kyi dbang gis gtan tshigs kyi rnam gzhag mi 'dra ba gsum 'chad pa yin no/ /'di ni dpal ldan zla ba'i bzhed pa yang yin te/ bzhi brgya pa'i 'grel pa las/ 'di na gang rang gi ngo bo dang rang bzhin dang rang dbang dang gzhan la rag ma las pa nyid yin pa de la ni rang las grub pas rten cing 'brel bar 'byung ba yod pa ma yin na/ 'dus byas thams cad rten cing 'brel par 'byung ba yang yin no/ /de ltar dngos po gang la brten nas 'byung ba yod pa de ni rang dbang du mi 'gyur te/ rgyu dang rkyen la rag las te skye ba'i phyir/ /'di kun rang dbang med pa ste/ /de'i phyir dngos po gang la yang/ /bdag ste rang bzhin yod pa ma yin no/ /zhes gsungs pa'i don la lhag mthong chen mo @96b las 'bru snon mjad tshul zhib par shes na rtogs par 'gyur ro/ /'di 'dra'i gnad khyad par ba 'ga' zhig la brten nas nges pa don gyi mkhas grub chen po nor bzang rgya mtshos/ gzhi grub na 'dus byas yin pas khyab ces gsungs par grags shing/ de la mkhas pa dang mi mkhas pa du ma zhig gis/ 'dus ma byas kyi nam mkha' chos can/ /zer ba la sogs pa'i bsdus chad pa gsar bu pa rnams kyis rgyud mar sgrogs pa'i gnod byed du ma zhig ston cing khrel rgod byed par 'dug mod/ mdo sngags mtha' dag la nang byan chud pa'i mkhas grub chen po des rigs pa de tsam mi shes pa ga la srid/ gsung de la brten nas brten 'brel gyi don la go ba 'char lugs brling po zhig yong du re nas gsung bar 'dug kyang/ las kyis nongs pa'i gang zag la/ sman byin pa'ang dug tu 'gyur/ zhes pa'i dper song bar snang ngo/ /rten 'brel gyi gtan tshigs kyi don gong du bshad pa de rnams kyang zla ba'i zhabs kyis rten cing 'brel par 'byung ba'i sgra'i don bshad pa nyid kyi dgongs pa bla na med pa yin zhing /rje bdag nyid chen po'i dgongs pa mthar thug kyang yin mod/ gzhan dag gis gsal bar bshad pa mi snang bas kho bos mdo tsam bshad pa yin no/ /da ni gtan tshigs 'di la brten nas mtha' gnyis sel tshul cung zad brjod par bya ste/ 'dir lta ba rnam dag rtogs pa'i gol ba'i gtso bo ni rnam pa gnyis te/ gcig ni chos rnams la bden par 'dzin pa'i bden 'dzin gyi dmigs gtad can gyi rtag lta dang sgro 'dogs kyi lta ba'o/ /gnyis pa ni dgag bya'i tshad ma zin par thal drags pas kun byang @97a @#/ /gi rgyu 'bras mtha' dag la rang ngor nges pa drang du med par song ba ste/ chad lta dang skur 'debs kyi lta ba'o/ /de gnyis ka'ang rten 'brel gyi gtan tshigs 'di nyid la brten nas lhag ma med par 'gog nus te/ gtan tshigs nges pas chad lta sel zhing rgyu 'bras kyi rten 'brel la nges pa rnyed pa dang/ bsgrub bya nges pas rtag lta sel zhing rang bzhin med pa la nges pa rnyed pa'o/ /de 'dra'i nges pa rnyed pa la stobs shin tu che ba ni brten nas btags pa'i gtan tshigs nyid yin no/ /'di yang rje bla ma'i legs bshad sengge'i nga ro zla med pa zhig gi yin cing da dud rje de nyid kyi gsung gi gsang ba'i gnad la brten nas gtan tshigs dang bsgrub bya nges pa re res kyang mtha' gnyis ka sel tshul dang/ spyir snang bas yod mtha' sel zhing stong pas med mtha' sel ba dbu ma thal 'gyur ba'i khyad chos yin gsung ba yang dngos bstan de ga tsam zhig ma yin pa'i dbu ma thal 'gyur ba'i khyad chos su 'gro lugs mi 'dra ba zhig yod pa shes dgos kyi/ /gzhan du grub mtha' bzhi po rang rang gi lugs la yang snang bas kyang yod mtha' dang med mtha' gnyis ka sel zhing stong pas kyang gnyis ka sel ba'i 'chad tshul re yod pa'i phyir ro/ /spyir dngos po la rtan 'brel yin pas mtha' gnyis sel tshul dang/ khyad par dbu ma'i gzhung la thos bsam byed pa'i dus kyi gang zag gi blo ngor gtan tshigs la brten nas mtha' gnyis sel tshul dang/ bsgom byung gi rtogs pa skyes pa la yang so skye dang 'phags pa'i gnas skabs gnyis ga 'phags pa la yang rim gyi sgom ma rnams @97b kyi blo'i nus pa khyad par du gyur ba'i blo ngor ? mtha' gnyis sel tshul 'og ma 'og ma las rje bar 'u ? gra ba'i da bar phra rags du ma zhig yod de/ zhi ba lhas/ rnal 'byor ba yang blo khyad kyis/ /gong ma gong ma rnams kyis gnod/ /ces gsungs pa'i phyir ro/ / de phyir dbu ma thal 'gyur ba'i bden gnyis kyi rnam gzhag thams cad rten 'brel gyi gtan tshigs 'di'i khong nas slong ba zhig yin 'dug cing/ lam ngang 'bras bu'i gnas skabs kyi thun mong ma yin pa'i khyad par du ma zhig la'ang gal che ba'i rgyu mtshan mang ngo/ /de yang snang phyogs nges pa'i rgyu mtshan gyis stong phyogs ngos zin pa dang/ stong phyogs rgyu mtshan du song bas snang phyogs la nges pa drangs pa'i go ba mtha' chod pa'i gang zag rnams kyis legs par shes nus kyi/ lta ba'i go ba legs par ma rnyed pa'i thog ma'i 'char tshul la de thams cad chang ba zhig yong mi nus so/ /de dag kyang 'khor 'das kyi rnam gzhag thams cad btags pa tsam du grub tshul dang de la yang ming rkyang btags yod tsam zhes pa'i rnam bcad yongs gcod kyi don legs par shes pa zhig la rag las par snang ngo/ /smras pa/ kye ma bsod nams mi dman shar ri'i rtser/ /blo bzang legs bshad bdud rtsi'i 'od 'phreng can/ /mngon dga' skyed pa'i phyir du 'ongs pa ni/ /bdag yid kho na'i dpal du gyur tam snyam / rnam dag rigs pa'i bir gyis bris pa yi/ /gzhung brgya'i don bzang lus phra'i 'ja' tshon gzugs/ /bdag blo'i me long nang du shar ba yis/ /nyams dang 'gyur ba stong gis dga' ba ster/ /klu sgrub gzhung lugs bye ba'i tshal gnas shing/ /'dri med rigs @98a @#/ /pa'i ting 'dzin pho nya yis/ /stong dang rten 'byung mdzes ma 'gugs mkhas pa'i/ /drang srong de la dbu ma pa zhes smra/ /yang dag 'jog gi bde ba ring spangs shing/ /tshigs spyi'i 'chad rtsod gom 'gros 'khyog por bgrod/ /de dag kha nas rten 'byung brgya smras kyang/ /ri mo'i mar me bzhin du don gyis stong/ /phyogs re'i gzhung la 'chal por sbyangs pa dang/ /drang nges 'byed pa'i blo yi mthu bral yang/ /yin min mgo ltag 'byed pa'i khur len pa/ /de dag mi smrar gyur na cis ma legs/ dri med gzhung la ngal ba'i 'bras bu ni/ /bsgom byung rtogs pa'i ro mchog ma myong yang/ /rten 'byung ji bzhin smra ba'i skal ba'i shes/ /blo bzang yab rjes bdag la bskrun 'di rmad/ /ces bya ba ni bar skabs kyi tshigs su bcad pa'o/ /gnyis pa rigs pa gzhan rnams 'di la gtugs tshul ni/ /bdag med pa sgrub byed kyi 'brel zla ma dmigs pa'i gtan tshigs thams cad kyi gnad rten 'byung gi gtan tshigs nyid la thug ste/ gtan tshigs de dag thams cad kyi don gyi gtso bo ni mtha' gnyis cig car bsal nas dbu ma' lta ba rgyud la bskyed pa nyid yin zhing don de ni rten 'brel gyi gtan tshigs 'di nyid kyis dngos su sgrub pa'i phyir dang/ rigs pa de dag kyang mthar gtugs na tshul 'di nyid la thug pa'i phyir ro/ /de'i tshul yang lugs 'dis bdag med gnyis gtan la 'bebs pa'i rigs pa'i gtso bo mtha' bzhi'i skye ba 'gog pa dang rnam bdun gyi rigs pa gnyis la bya dgos pa ni bsgrubs zin pa ltar yin zhing/ de gnyis kyi gnad rten 'byung la gtugs tshul ni dbu ma 'jug pa las gsal bar gsungs te / @98b de nyid las/ gang phyir rgyu med pa dang dbang phyug gi /rgyu la sogs dang bdag gzhan gnyis ka las/ dngos rnams skye bar 'gyur ba ma yin pa/ /de phyir brten nas rab tu skye bar 'gyur/ zhes mtha' bzhi'i skye 'gog gi rigs pa rten 'byung la gtugs tshul dang/ de nyid las/ de ni de nyid du 'am 'jig rten du/ /rnam pa bdun gyis 'grub gyur min mod kyi/ /rnam dpyang med par 'jig rten nyid las 'dir/ /rang gi yan lag brten nas 'dogs pa yin/ /zhes rnam bdun gyi rigs pa rten 'byung la gtugs tshul gsal bar gsungs pa'i phyir ro/ /de yang myu gu la sogs pa skye zhes pa'i tha snyad btags pa'i btags don btsal nas bdag dang gzhan dang gnyis ka dar rgyu med pa las mi skye ba'i nges pa rnyed pa na myu gu sogs kyi skye ba tha snyad btags pa tsam yin pa la nges pa rang stobs kyis 'dren cing/ skye ba'i tha snyad btags pa tsam yin pa la nges pa rnyed pa na skye ba'i tha snyad btags pa'i btags don btsal na mi rnyed pa la yang nges pa rang stobs kyis 'dren pa ste/ tshul 'di ni mtha' bzhi'i skye 'gog gi rigs pa'i gnad rten 'byung la thug tshul yin te/ legs bshad snying po las/ myu gu la sogs pa phyi dang 'du byed la sogs pa nang gi dngos po rnams sa bon dang ma rig pa la sogs pa'i rgyu rkyen la brten nas 'byung ba nyid kyis/ de dag skye ba la sogs pa rang gi mtshan nyid kyis grub pa'i rang bzhin gyis stong pa dang/ bdag /gzhan/ gnyis ka/ rgyu med las skye ba min no zhes 'gog pas lta ngan gyi dra ba mtha' dag gcod byed rigs pa'i rgyal po rten 'byung gi rigs pa nyid la gtugs nas 'gog go /zhes gsungs so/ /'di ni gtso bor @99a @#/ /brten nas skye ba'i gtan tshigs yin la zhib tu na brten nas btags pa'i gtan tshigs la yang gtug dgos te/ de ni snga ma las rtags par dka'o/ /rnam bdun gyi rigs pa'i gnad rten 'byung la gtug tshul yang rnam pa bdun du ma rnyed pa nyid kyis gang zag phung po la btags pa tsam yin pa la nges pa 'dren pa dang btags pa tsam du rtags pa nyid kyis cig shos la yang nges pa 'dren pa ste/ legs bshad snying po las/ 'di yang phung po la brten nas btags pa nyid kyis bdun po der gang zag mi rnyed pa gang zag gi bdag med kyi don yin pas rten 'byung gi rigs pa la thug go zhes gsungs so/ /de ltar na bdag med sgrub pa'i 'brel zla ma dmigs pa'i gtan tshigs gzhan dag la'ang rgyu mtshan de dag chang zhing/ gtan tshigs de dag re re la yang dgag bya rang bzhin gyis grub pa'i 'brel yul btags don btsal ba'i mthar rnyed pa bkag pa'i gtan tshigs kyi byed pa'i ldog cha nas rtag lta 'gog pa dang/ dgag bya rang bzhin gyis grub pa'i 'gal zla brten nas btags pa tsam yin pa gtan tshigs su song ba'i byed pa'i ldog cha nas chad lta 'gog pa ste/ byed pa so so la brten pa'i lag rjes gnyis gnyis shes par bya'o/ /de lta na yang dngos kyi 'god tshul la brten nas 'gal zla dmigs pa dang 'brel zla ma dmigs pa'i gtan tshigs su 'gyur tshul yang lags par phyed dgos so/ /rten 'brel gyi gtan tshigs 'dis mtha' gnyis dngos su sel ba'i nus pa phul shin tu che ba 'dra ba stong phyogs rtags su bkod pa'i gtan tshigs gzhan la med cing/ rten 'brel gyi gtan tshigs nyid la yang @99b brten nas btags pa'i gtan tshigs nyid stobs shin tu che'o/ /legs ldan yab sras dang zhi 'tsho yab sras kyis kyang bden grub 'gog pa'i rigs pa'i rtsa ba cha bcas la thug pa dang/ cha bcas rten 'byung gi don du 'dod mod kyang 'di ba'i rigs pa gzhan rnams kyi gnad rten 'byung la gtugs tshul gtan mi 'dra la/ rten 'byung gi gtan tshigs kyis mtha' gnyis dngos su sel ba yang lugs de dag dang mi 'dra'o/ /stong dang rten 'byung don gcig par rang rgyud pa dpon slob kyis kyang gsungs mod kyi lugs 'di dang don gcig lugs mi 'dra la/ gtan tshigs 'di la rigs pa'i rgyal po'i thi snyad byed pa yang thal 'gyur ba nyid kyis gtso bor mdzad pa yin no/ /byang chub lam rim chen mo las/ sems can gzhan rnams ni rgyu dang rkyen la brten nas skye bar bzung ba na de la brten nas rang gi ngo bo nyid kyis grub pa'i rang bzhin yod par 'dzin pas 'ching bar 'gyur la/ mkhas pa dag la ni rgyu mtshan de la brten nas rang bzhin yod pa 'gog cing rang bzhin med pa la nges pa drangs te mthar 'dzin gyi lta ba'i 'ching ba gcod pas na rten 'brel gyi rtags kyis rang bzhin med pa 'grub pa 'di ni rmad du byung ba'i thabs la mkhas pa chen po'o/ /zhes dang/ rten 'brel bstod pa las/ gang du bzung bas byis pa rnams/ mthar 'dzin 'ching ba brtan byed pa/ /de nyid mkhas la spros pa yi/ /dra ba ma lus gcod pa'i sgo/ /zhes rten 'byung gi gtan tshigs nyid mkhas pa rnams la mthar 'dzin gyi 'chid ba mtha' dag gcod pa'i sgor gsungs pa ni stong pa dang rten 'brel don gcig tu song ba la dgongs pa'o/ /de yang klu sgrub @100a @#/ /yab sras dang rje thams cad mkhyen pas stong pa rten 'brel gyi don du gsungs pa de yang lto ldir ba bum pa'i don du 'jog pa lta bu yang ma yin la gcig rtogs pa'i blos cig shos rtogs pa tsam la byed pa yang ma yin no/ / des na stong pa rten 'byung gi don du 'gra ba ni gang zag su rung rung la ma yin gyi lta ba rnam dag nges zin ma brjed pa'i gang zag cig gi ngor 'jog pa yin no/ /rtsa she'i TIka chen las/ stong pa'i don rten 'byung gi don du 'gro ba ni rang bzhin gyis grub pa tshad mas khegs pa'i dbu ma pa rnams la yin gyi gzhan la ma yin no/ /zhes gsungs so/ /des na rang re'i mkhas pa la la phyir rgol rgyud smin pa yan chad la bya bar bzhed pa dang la la lta ba'i dpyad pa rdzogs pa'i gang zag la bzhed pa yang yod kyang sngar bshad pa nyid 'thad par sems so/ /rje thams cad mkhyen pas/ nam zhig res 'jog med par cig car du/ /rten 'brel mi slu mthong ba tsam nyid nas/ /nges shes yul gyi 'dzin stangs kun 'jig na/ /de tshe lta ba'i dpyad pa rdzogs pa lags/ /zhes pa'i gsungs gcig dang/ de'i mjug tu/ gzhan yang snang bas yod mtha' sel ba dang/ /stong pas med mtha' sel zhing stong pa nyid/ rgyu dang 'bras bur 'char ba'i tshul shes na/ /mthar 'dzin lta bas 'phrog par mi 'gyur ro/ /zhes gsungs pa'i gsung de rnams kyis stong pa rten 'brel gyi don du 'gro tshul gsal bar gsungs mod/ 'on kyang gsung de dag gi don shin tu rtogs dka' bar yod do/ /gzhi gcig gi steng du rgyu rkyen las 'byung ba'i rten 'brel yin pa @100b dang rang bzhin gyis med pa gnyis cig car du 'char thub pa tsam lung snga ma'i don du 'dod pa yang 'thad par mi sems so/ /gsung de dang cha 'dra ba zhig rje red mda' bas kyang gsungs te/ rgyu 'bras bslu ba med pa'i yid ches dang/ rten 'brel stong par rtogs pa'i shes rab gnyis/ 'bral med zung du chud par nam gyur pa/ /de tshe mtha' bral dbu ma'i lam la zhugs/ zhes dang/ snang dus nyid na stong par rtogs pa dang/ /stong par rtogs tshe snang ba mi 'gog pa/ /zung 'jug tshul la nges pa nam rnyed pa/ / de tshe rgyal ba'i dgongs pa rtogs pa yin/ zhes gsungs so/ /des na ji lta ji ltar rigs pa dri ma med pas rnam par brtags pa na chos de dang de dag gi rang bzhin med pa'i tshul la nges shes cher skye ba de lta de ltar chos de dag gi brten nas btags pa tsam gyi tshul la yang nges pa 'dren phul shin tu che bar 'gyur ba dang/ ji ltar ji ltar brten nas btags pa tsam gyi tshul la nges shes 'dren phul che ba de lta de ltar cig shos la yang nges pa 'dren phul che bar 'byung ba ste/ de yang rten 'brel gyi rtags kyis myu gu rang bzhin med par rtogs pa'i rjes dpag tshad mas drangs pa'i nges shes skyes zin ma nyams pa'i gnas skabs nas bzung gnas skabs gong ma gong mar rim gyis bgrod pa las nges shes gnyis gcig grogs su gcig 'gyur tshul nus pa che chung mi 'dra ba'i rim bdu ma zhig yod par mngon no// gnas 'di shin tu rtogs dka' zhing rtogs na ya mtshan pas mgon po klu sgrub kyis/ chos rnams stong pa 'di shes nas/ /las dang 'bras bu bsten pa gang/ /ngo mtshar bas kyang 'di ngo mcher/ /rmad byung bas kyang 'di rmad byung/ /zhes dang/ rje bdag nyid @101a @#/ /chen pos/ 'di kun ngo bos stong pa dang/ /'di las 'di 'bras 'byung ba yi/ /nges pa gnyis po phan tshun du/ /gegs med par ni grogs byed pa/ /'di las ngo mtshar gyur pa dang/ /'di las rmad du byung ba gang/ zhes gsungs pa yin no/ /stong pa dang rten 'brel don gcig pa'i don sngar bshad pa de las da dung zhib tu shes dgos pa du ma zhig yod de/ rje thams cad mkhyen pa'i gsung rab lhag mthong che chung dang rtsa she'i TIk chen las thon pa lta bu phyi rabs kyi mkhas pa dag gis brtsam pa'i shin tu gsal bar grags pa'i lta khrid kyi yi ge dang gzhung gi spyi don dang mtha' dpyod sogs gang du yang mi 'byung bas rje bla ma'i gsung rab de dag bshad shes pa zhig gis bshad/ nyan shes pa zhig gis mnyan na dga' ba skyed pa'i gnas du ma zhig yod par mngon no/ /gnyis pa de la brten nas bden pa gnyis kyi rnam par bzhag pa byed tshul gyi khyad par bshad pa la gnyis/ dngos dang/ lugs 'di'i thun mong ma yin pa'i 'dod pa'i gtso bo rnams mdo tsam du bshad pa'o/ /dang po la gsum/ dbye ba'i gzhi/ phye ba'i grangs/ phye ba so so'i don no/ /dang po ni/ bden pa de bden gnyis kyi dbye gzhi zer ba dang snang tsam de dbye gzhi zer ba dang rten 'brel sna tshogs pa bden gnyis kyi dbye gzhi zer ba sogs mang du yod kyang/ yab sras mthal pa'i mdo la brten nas shes bya nyid bden gnyis kyi dbye gzhir mdzad do/ /gnyis pa ni/ shes bya gzhir bzhag pa la gcig yongs su grub na cig shos yongs su gcod pa'i phung po gsum pa sel ba'i phyir kun rdzob kyi bden pa dang don dam pa'i bden pa gnyis so/ @101b de gnyis kyang ngo bo tha dad pa dang ldog pa gcig pa la rigs pa'i gnod pa 'bab tshul rang rgyud pa'i skabs su bshad zin pa ltar yin pas ngo bo gcig la ldog pa tha dad do/ /gsum pa phye ba so so'i don la kun rdzob bden pa bshad pa dang/ don dam bden pa bshad pa'o/ /dang po ni/ 'o na kun rdzob bden pa zhes pa'i sgra'i don ci zhig yin zhe na/ de la kun rdzob bden pa zhes pa'i tshig zur gyi kun rdzob ni kun rdzob kyi skad dod {saM} pri ta la nges tshig gi bshad pa byas pas kun nas sgrib pa dang 'gebs pa la 'jug cing/ de yang skabs stobs kyis gnas lugs la sgrib pa la byed dgos pas yang dag pa'i don mthong ba la sgrib par byed pa bden 'dzin la bya'o/ /bden pa zhes pa ni bden 'dzin de'i ngor bden pa ste/ so so skye bo la bden 'dzin de'i dbang gis chos rnams snang tshul dang gnas tshul 'thun pa ltar snang ba'o/ /de ltar yang 'jug pa las/ gti mug rang bzhin sgrib phyir kun rdzob ste/ /des gang bcos ma bden par snang de ni/ /kun rdzob bden zhes thub pa des gsungs te/ zhes gsungs pa ltar ro/ /'jug 'grel las kyang/ de ltar re zhig srid pa'i yan lag gis yongs su bsdus pa'i nyon mongs pa can gyi ma rig pa'i dbang gis kun rdzob kyi bden pa rnam par bzhag go /zhes gsungs so/ /gal te de lta na blo gros mi zad pa'i mdo las/ de la kun rdzob kyi bden pa gang zhe na/ ji snyed du 'jig rten gyi tha snyad yi ge dang sgra dang brdas bstan pa'o/ /zhes shes brjod kyi tha snyad kyis bstan du rung ba la kun rdzob bden par gsungs pa ma yin nam ci'i phyir sgrib byed kho na la 'chad ce na/ skyon med de/ da ni kun rdzob bden pa'i mtshan gzhi tsam @102a @#/ /bstan pa yin gyi sngon po sogs kun rdzob pa gang gi ngor bden par 'jog pa'i kun rdzob ngos bzung ba ma yin pa'i phyir ro/ /de bzhin du tshig gsal las kun rdzob kyi sgra bshad pa'i skabs su phan tshun brten pa'i don la bshad pa gcig dang/ brjod bya rjod byed shes pa dang shes bya la sogs pa'i mtshan nyid can gyi 'jig rten gyi tha snyad la bshad pa gcig ste 'chad tshul gnyis byung ba yang kun rdzob kyi sgra bshad tshul tsam yin gyi/ blo kun rdzob pa gang gi ngor bden par 'jog pa'i kun rdzob ngos bzung ba ma yin no/ /des na lam rim chung ngu las/ de la gzugs sogs rnams shes pa kun rdzob pa gang gi ngor bden par 'jog pa'i kun rdzob pa ni/ gsum gyi dang po yin la zhes gsungs pas skabs 'di'i kun rdzob ni tshig gsal las kun rdzob kyi sgra bshad tshul gsum byung ba'i dang po de yin par bstan nas/ de'i mjug thogs su yang de nyid las/ de yang chos rnams la rang bzhin gyis grub pa'i rang gi ngo bo med pa la yod par sgro 'dogs pa'i ma rig pa yin la zhes bden 'dzin la 'jog dgos pa gsal bar gsungs so/ /de ltar na rtsa she'i TIk chen las kyang 'jig rten kun rdzob bden pa'o zhes pa'i skabs su kun rdzob 'jog tshul gsum gsungs pa yang de dang mtshungs par shes par bya'o/ /de ni gang gi ngor bden pa'i kun rdzob dang der bden pa'i bden lugs ngos bzung ba yin gyi blo kun rdzob pa de'i ngor bden pa tsam zhig la kun rdzob bden par 'jog pa ma yin te/ chos nyid dang bdag gnyis lta bu'o/ /zla ba'i zhabs kyi 'jug 'grel las/ de yang nyan thos @102b dang rang sangs rgyas dang byang chub sems dpa' nyon mongs pa can gyi ma rig pa spangs pa/ 'du byed gzugs brnyan la sogs pa'i yod pa nyid dang 'dra bar gzigs pa rnams la ni bcos ma'i rang bzhin yin gyi bden pa ni ma yin te/ bden par mngon par rlom pa med pa'i phyir ro/ /zhes gsungs pa ni dgra bcom gnyis dang dag sa'i sems dpa' la gzugs sogs bden par 'jog pa'i bden zhen gyi kun rdzob med pa'i rgyu mtshan gyis gzugs sogs de dag gi ngor mi bden par bsgrubs pa yin gyi gzugs sogs de dag gi ngor kun rdzob bden pa ma yin par bsgrubs pa ma yin no/ /de yang blo des bden par ma gzigs kyang blo de'i ngo na blo gzhan gyis bden par mthong ba med mi dgos pas ka bum sogs de'i ngon kun rdzob bden pa yin pa yang mi 'gal lo/ /kun rdzob bden pa'i mtshan nyid ni shes bya rdzun pa bslu ba'i don 'jal ba'i tha snyad pa'i tshad ma'i rnyed don gang zhig /tshad ma de khyod la tha snyad dpyod byed du song ba ni rang nyid kun rdzob bden pa yin pa'i 'jog byed do/ /de yang 'jug pa rang 'grel las/ mthong ba rdzun pa'i yul gang yin pa de ni kun rdzob kyi bden pa'o/ /zhes gsungs pas tha snyad pa'i tshad ma'i rnyed don kun rdzob bden pa'i 'jog byed du gsungs kyang 'bras bu'i skabs kyi yul 'jal tshul bsdus pa'i dbang du byas nas mtshan nyid bshad ma thag pa ltar 'jog pa 'jug pa'i rnam bshad chen mo'i dgongs pa yin no/ /la la dag ji lta ba mkhyen pa'i ye shes kyis grub na don dam dpyod byed kyi tshad mas grub dgos par smra zhing de nyid 'jug pa'i rnam bshad chen mo'i don du @103a @#/ /'dod pa ni mi 'thad do/ /mtshan nyid kyi zur de ma tshang na yang skyon med de/ bum pa ji lta ba mkhyen pa'i rnam mkhyen gyis gzigs kyang de'i rnyed don ma yin par smras pas chog pa'i phyir ro snyam na/ de ni shes pas yul 'jal tshul gyi rnam gzhag la rmongs pa ste/ yul de rang rtogs pa'i mngon sum tshad mas dngos su rtogs pa la chos de ma rnyed pa 'gal ba'i phyir ro/ /bum pa kun rdzob tu yod ces pa'i tshig zur gyi kun rdzob ni kun rdzob bden pa zhes pa'i tshig zur gyi kun rdzob dang mi gcig ste/ phyi ma bden 'dzin la byed cing snga ma tha snyad pa'i tshad ma la byed dgos pa'i phyir ro/ /gzugs sogs gang gi ngor bden par 'jog pa'i blo kun rdzob pa ni de kho na nyid la blo kham phyogs pa'i so skye'i rgyud la yod cing gzugs sogs de'i ngor bden par yang 'jog mod kyi gzugs sogs de dag gi ngor kun rdzob bden par 'jog pa ma yin te/ gzhi de kun rdzob bden pa'i don du blos 'grub mi dgos pa yang shes par bya'o/ /gzugs sgra sogs bden pa de ma rig pa'i ngor bzhag pa yin yang gzugs sgra sogs ma rig pa des bzhag pa gtan min te/ dper na thag pa la sprul 'dzin gyi log shes kyi ngon thag pa sprul du bzhag pa yin kyang thag pa de log shes des bzhag pa ma yin pa bzhin no/ /gzugs sgra sogs rnam par 'jog pa'i blo ni gnod pa med pa'i shes pa drug po rnams yin la de dag gis grub pa'i don ni tha snyad du yod cing rigs shes kyis kyang mi 'gog go /kun rdzob bden pa'i dbye ba ni dbu ma rang rgyud pa rnams shes pa rang gi mtshan nyid kyis grub par snang ba ni snang ba ltar du grub pas yul can @103b la yang log gnyis mi 'byed la/ yul la snang ba ltar don byed nus mi nus kyi sgo nas yang log gnyis su 'byed do/ /lugs 'dis ni kun rdzob pa'i chos thams cad ni tha snyad tsam du yang gnas tshul gzhan du gnas nas snang tshul gzhan du snang ba'i rdzun pa yin pas khyab pas na dbang po'i shes pa rnams kyang snang yul la 'khrul zhing/ ma 'khrul ba'i cha gzhan yang med pas na kun rdzob pa'i don yul yul can gang la yang yang dag dang log pa gnyis su mi 'byed par bzhed do/ /rtog med kyi shes pa drug po 'di dag tha snyad tsam du yang 'khrul na tha snyad du gzugs sogs rnam par 'jog pa'i tshad mar 'jog pa mi 'thad do zhe na/ yul bden pa 'jog pa la yul can ma 'khrul ba dgos kyang gzhal bya rdzun pa 'jog pa la yul can ma 'khrul ba dgos kyang gzhal bya rdzun pa 'jog pa la yul can 'khrul pas 'jog pa shin tu 'thad pas skyon med do/ / tha snyad du yang gzhal bya rdzun pa 'jog pa 'di ni tha snyad du yang rang mtshan khas mi len pa la thug cing/ dbu ma pa gzhan dag gis yang dag kun rdzob 'dod pa yang tha snyad du rang mtshan khas len pa la thug pa yin no/ /'phral gyi 'khrul rgyus ma bslad pa'i shes pa drug yul dang bcas pa dang des bslad pa'i shes pa drug yul dang bcas pa la yang dag dang log pa'i khyad par 'jog pa ni/ 'jig rten pa'i shes pa'i ngo la bltos te yin gyi thal 'gyur ba rang lugs la yang log gnyis su 'byed pa ma yin no/ /'jug pa'i rnam bshad chen mo las/ 'phags pa zhes pa dang dbu ma'i lugs zhes pa ni 'dir don 'dra'o zhes gsungs pas don dam dpyod byed kyi rigs shes la bltos nas 'jog ces pa dang 'phags pa la bltos nas 'jog ces pa dang dbu ma pa rang lugs la 'jog @104a @#/ /ces pa rnams skabs 'dir don 'dra'o/ /ci ste yang dag pa khas blangs na rang mtshan khas len dgos na thal 'gyur bas 'jig rten shes ngo la bltos te rang mtshan khas len par thal/ de la bltos te yang log gi khyad par 'byed pa'i phyir zhe na skyon med de/ gzhi de 'khrul pa'i shes pa'i don bden par khas blangs na gzhi de bden par khas len mi dgos pa'i phyir ro/ /'jug pa las/ gnod pa med pa'i dbang po drug rnams kyis/ /gzung ba gang zhig 'jig rten gyis rtogs te/ / 'jig rten nyid las bden yin lhag ma ni/ /'jig rten nyid las log par rnam par bzhag /ces gsungs pa'i 'jig rten nyid snga phyi gnyis byung bar rang re'i mkhas pa dag gis gnyis ka tha snyad pa'i tshad ma la byed pa dang/ gnyis ka tshad min gyi shes pa kho na la byed pa dang/ snga ma log shes zhig dang phyi ma tshad ma zhig la 'jog pa sogs 'chad tshul mi 'dra ba mang zhing/ lam rim chung ngu las/ 'jig rten pa'am tha snyad pa'i tshad ma nyid la bltos nas yang dag pa dang log pa'i kun rdzob tu 'jog gi zhes gsungs pa la yang 'bru snon lugs mi 'dra ba du ma zhig mdzad snang ngo/ /rtsa she'i TIk chen las/ 'jig rten pa'i bsam pa rang dga' ba la bltos nas yang dag pa zhes gsungs shing/ 'jug pa'i rnam bshad las kyang 'jig rten pa'i blo rang dga' ba dang bsam pa rang dga' ba zhes gsungs so/ /stong thun chen mo las kyang/ 'jig rten pa'i blo lhan skyes rang dga' bas yang log gnyis kyi dbye ba byed pa'i don yin gyi zhes gsungs so/ de ltar na de kho na nyid la blo kha ma phyogs pa'i tha snyad pa'i tshad mas log par @104b rtogs nus pa'i yul yul can rnams ni 'jig rten shes ngo'i log par 'jog pa dang/ des log par rtogs mi nus pa'i yul yul can rnams ni 'jig rten shes ngo'i yang dag tu 'jog pa rje'i dgongs par snang bas 'jig rten shes ngo zhes pa'i shes pa de de kho na nyid la blo kha ma phyogs pa'i shes pa gcig la bya dgos par mngon no/ /'jug pa las/ skyon ldan dbang can rnams kyi shes pa ni/ /dbang po legs gyur shes bltos log par 'dod/ /ces gsungs pa'i dbang po legs gyur ces pa yang 'phral gyi 'khrul rgyu'i gnod pa med pa la gsungs pas da du ra sogs phyi nang gi 'khrul rgyus ma bslad pa la bya ba dgos mod kyang bden 'dzin gyis ma bslad pa la bya mi rung ste/ gzhan du na bdag 'dzin gnyis yul dang bcas pa log pa'i kun rdzob tu mi 'jog par gsungs pa dang 'gal ba'i phyir ro/ /stong thun chen mor/ 'jig rten shes ngo na yang dag dang log pa gnyis su 'byed kyi de'i ngon yang dag kun rdzob dang log pa'i kun rdzob tu 'byed pa zla ba'i zhabs dang rje'i dgongs pa ma yin par gsungs pa la brten nas rang re'i mkhas pa dag /lam rim chung ngu las/ 'jig rten pa'am tha snyad pa'i tshad ma nyid la bltos nas yang dag dang log pa'i kun rdzub tu 'jog go /zhes gsungs pa ni 'jig rten shes ngo la bltos te yang dag yin pa dang spyir kun rdzub yin pa la dgongs nas de ltar gsungs so zhes 'bru snon par snang ngo/ /yang stong thun chen mo las/ 'jig rten pa'i tha snyad pa'i tshad mas yang log gnyis su dbye ba byed pa gtan ma yin te/ tshad mas grub pa'i don du khas blangs nas rang lugs la khas mi len no zhes smra @105a @#/ /ba ni rigs pa smra ba'i tshul las 'das pa go bar byed pa'i phyir zhes kyang gsungs so/ /da ni 'di ltar bshad par bya ste/ thal 'gyur bas rang lugs la tha snyad du yang yang dag pa khas mi len zhes pa dang/ thal 'gyur bas 'jig rten shes ngor yang dag pa dang log pa'i khyad par khas len zhes pa'i yang dag pa snga phyi gnyis ming gcig kyang don mi gcig ste/ yang dag pa snga ma ni rang mtshan la bya dgos shing phyi ma ni nges par rdzas brkus pa'i gang zag cig gis kho bos rdzas brkus so zhes smras pa la bden pa dang/ kho bos rdzas ma brkus so zhes pa lta bu la log par 'jog pa'i nang tshan gyi bden pa lta bu la 'jog dgos pa'i phyir/ dper na nor la la med la/ la la yod ces pa'i yod rgyu'i la la dang med rgyu'i la la mi gcig pa bzhin no/ /yang dag pa snga ma rang mtshan la byed dgos pa'i rgyu mtshan ni skabs 'di'i thal 'gyur ba rang lugs zhes pa dang/ 'phags pa'i gzigs pa la bltos nas zhes pa dang/ rigs shes la bltos nas zhes pa rnams don gcig ngar rje bdag nyid chen pos bzhed pas de gsum la bltos nas bum sogs yang dag par 'jog pa ni bum sogs rang mtshan du grub par 'jog pa las 'os med pa'i phyir ro/ /dbu ma pa gzhan gyi lugs la bum sogs yang dag kun rdzob tu bzhag pas chog pa ni/ de dag gi lugs la bum sogs rang mtshan du grub pa la rigs shes kyis mi gnod pa'i rgyu mtshan gyis yin no/ /yang dag pa phyi ma'i don de ltar byed dgos pa'i rgyu mtshan ni de kho na nyid la blo kha ma phyogs pa'i tshad mas rkun mas rdzas brkus par smras pa @105b log par bzhag mi nus pas de'i ngor 'thad cing bden pa dang/ rdzas ma bskus pa la tshang mas gnad pas log par 'jog dgos pa'i phyir dang/ tha snyad pa'i tshad ma des chos de de lta bu'i yang dag par grub kyang spyir chos de yang dag par grub mi dgos te/ spyir chos de yang dag par grub ma grub ni rigs shes nyid la bltos dgos pa'i phyir ro/ /de'i phyir thal 'gyur ba'i lugs la bum pa 'jig rten shes ngo la bltos te yang dag pa yin par khas len yang/ spyir bum pa yang dag pa yin par khas len mi dgos pa'i rgyu mtshan yang de yin no/ /de'i phyir lam rim chen mo las/ dbang shes rnams snang yul la 'khrul par 'dra yang 'jig rten pa'i ngor snang ba dang rjes su mthun pa'i don yod pa dang med pa'i sgo nas gzugs brnyan sogs snang ba'i dbang shes rnams log pa'i kun rdzob yin la/ de las gzhan pa'i dbang shes gnod med rnams yang dag kun rdzob yin no/ /zhes gsungs shing sngar rtog pas btags tsam gyi skor 'chad pa'i skabs su {budd+ha} pA li ta'i lung dbang phyug dang sred med kyi bu'i sku dper byas pa las kyang shes so/ /rtsa she'i TIk chen las kyang/ yang dag dang log par 'jog pa ni 'jig rten pa'i shes pa kho na la bltos nas yin te/ de dag ji ltar snang ba ltar gyi don du yod pa la 'jig rten pa'i shes pa'i gnod pa med pa dang yod pa'i phyir ro/ /zhes gsungs so// gtsang bde rtag bdag tu 'dzin pa log pa dang/ mi gtsang ba sdug bsngal ba mi rtag pa bdag med pa bzhir 'dzin pa yang dag pa yin par dpal ldan zla ba'i rigs pa drug cu pa'i 'grel pa las gsungs pa yang 'jig rten shes ngo la bltos te yang log 'jog @106a @#/ /pa'i dbang du mjod pa yin pas/ 'jig rten nyid las bden yin zhes pa'i 'jig rten la log pa'i shes pa gcig 'jog dgos pas khyab par 'dod pa yang mi 'thad do/ /stong thun chen mor/ tha snyad pa'i tshad ma'i ngor yang log 'jog pa min gsungs pa yang spyir tha snyad pa'i tshad ma tsam gyi ngor yang log 'jog pa min gyi de kho na nyid la blo kha ma phyogs pa'i tha snyad pa'i chad ma zhig dgos pa'i don du byas na bde'o/ /yang der 'jig rten shes ngor yang dag dang log pa gnyis su yod kyi 'jig rten shes ngo na yang dag kun rdzob dang log pa'i kun rdzob gnyis su 'jog pa ma yin par gsungs pa yang/ gzhi de blo de'i ngo na yang dag pa dang rdzun pa gnyis ka yin par 'jog pa 'gog pa'i phyir gsungs par zad kyi/ spyir thal 'gyur ba'i lugs la bum pa 'jig rten shes ngo la bltos te yang dag kun rdzob tu bzhag pa tsam gyis yang dag dang kun rdzob gnyis ka 'jig rten shes ngo la skyel mi dgos so/ /des na lam rim che chung gi lung yang sgra sor bzhag gis chog pas kyogs bshad mang po mi dgos so/ /da dung mtha' gzhan du dogs pa gcod rgyu mang na'ang re zhig bzhag go /gnyis pa don dam pa'i bden pa bshad pa la/ ci'i phyir don dam pa'i bden pa zhes bya zhe na/ tshig gsal las/ don yang de yin la dam pa yang yin pas na don dam pa'o/ /de nyid bden pa yin pas don dam bden pa'o/ /zhes gsungs pas dbu ma pa gzhan dag 'chad pa ltar don dang dam pa so sor phral nas mi 'chad par gnyis ka don dam bden pa nyid la bzhed do/ /'di'i bden pa'i don ni mi bslu ba @106b yin la/ de yang gnas tshul gzhan du gnas shing snang tshul gzhan du snang nas 'jig rten pa la mi bslu ba'i phyir bden pa zhes bya'o/ /de don dam pa'i bden par ni 'jig rten gyi tha snyad kyi dbang gis bzhag par gsungs so/ /don dam bden pa'i mtshan nyid ni 'jug 'grel las/ de la don dam pa ni yang dag pa gzigs pa rnams kyi ye shes kyi khyad par gyi yul nyid kyis bdag gi rang gi ngo bo rnyed pa yin gyi rang gi bdag nyid kyis grub pa ni ma yin te/ 'di ni ngo bo gcig yin no zhes gsungs so/ /de la yang dag pa gzigs pa rnams ni 'phags pa rnams so/ /ye shes kyi khyad par ni ji lta ba mkhyen pa'i ye shes so/ /bdag gi rang gi ngo bo rnyed pa ni des rnyed pa'i don no/ /des ji ltar rnyed pa ni gnyis snang phra mo yang ma gzigs pa'i tshul gyis gzigs pa ste/ rab rib can gyi mig gis bar snang gi gzhir skra shad 'jag par mthong ba na rab rib med pa'i mig gis gzhi der skra shad 'jag pa'i snang ba tsam yang ma mthong ba bzhin du/ so so skye bo rnams la phung sogs bden par snang ba de nyid ye shes de dag la gnyis snang phra mo yang ma gzigs pa'i tshul gyis de dag gi de kho na nyid gzigs pa'o/ /des na don dam dpyod byed kyi rigs shes tshad ma'i rnyed don gang zhig ched ma de yul de la rigs shes tshad mar song ba ni rang nyid don dam bden pa yin pa'i mtshan nyid do/ /'jug 'grel las/ gal te de lta bu'i rang bzhin mthong ba mad pa nyid ma yin nam/ ji ltar de dag gis gzigs she na bden mod kyi/ 'on kyang ma gzigs pa'i tshul gyis de dag gzigs so zhes bshad do/ /de'i don ni ma rig pa'i rab rib kyi mthus dmigs pa'i phung sogs @107a @#/ /'di rnams yang dag par ram de kho na nyid du grub na 'phags pa'i mnyam gzhag zag med ye shes kyis gzigs dgos pa las des phung sogs de rnams ci yang ma gzigs pa'i sgo nas de dag gi de kho na nyid gzigs pa yin no zhes pa'o/ /de bzhin du mthong ba med pa ni mthong ba dam pa'o zhes gsungs pa'i don yang de dang 'dra'o/ /mdo las/ don dam pa'i bden pa gang zhe na/ gang la sems kyi rgyu ba yang med na yi ge rnams lta smos kyang ci dgos zhes gsungs pa ni slob pa 'phags pa'i mnyam gzhag gi dus su rnam rtog gi rgyu ba re zhig la log pa dang sangs rgyas kyi dus su gtan log pa la bya yi sems sems byung gi rgyu ba med pa'i don ma yin no/ /ye shes des de kho na nyid gzigs pa'i ngo na yul yul can gyi gnyis snang phra mo yang med pas de'i ngo na yul yul can gyi 'brel pa sogs mi 'jog go /'on kyang ye shes des yul de rtogs pa sogs ni tha snyad pa'i shes pa'i ngor 'jog dgos so/ /sems 'gag pas de sku yis mngon sum mdzad/ /ces pa ni sems sems byung gi kun rtog gi rgyu ba mtha' dag 'gags pas chos kyi sku mngon du byed pa po ni longs spyod rdzogs pa'i sku kho na yin no zhes pa ste/ 'di'i gnad shin tu rtogs dka' bar yod do/ /de ltar de kho na nyid gzigs pa'i ngor ji snyed pa'i chos ma gzigs kyang ye shes des ji snyed pa'i chos mtha' dag kyang mngon sum du gzigs pa yin te/ ye shes skad cig ma gcig yin kyang yul so so la bltos te mkhyen tshul tha dad pa gnyis 'ong ba ni gnyis snang 'khrul pa'i bag chags ma lus pa zad par spangs pa'i lag rjes mthar thug yin pas rgyun mtha' man chad dang thun @107b mong ma yin pa sangs rgyas kho na'i khyad chos so/ /sangs rgyas kyi ye shes kyis sangs rgyas kyi ye shes rang nyid 'jal tshul la mkhas pa dag bzhed pa mi 'dra ba mang zhing rje'i sras kyi thu bo gnyis kyi bzhed pa la yang mkhas pa chen po dag gis dpyad pa mang du mdzad snang ngo/ /de dag rgyas par gzhan du 'chad par 'dod la/ stong thun chen mor rnam pa ma shar bar mkhyen pa 'dra zhig gsungs pa dang/ spyod 'jug dar TIka tu rang nyid la rang nyid mi snang bar rtogs par gsungs pa rnams dang/ rje bdag nyid chen pos mi snang yang rtogs pa'i shugs rtogs sangs rgyas la mi rung bar gsungs pa dang de yang rnam pa shar nas rtogs dgos par gsungs pa dang/ 'di'i skabs su rang rig 'thad mi 'thad dpyad pa byas pa'i rang lugs kyang dran dgos par gsungs pa rnams gung bsgrigs na/ ye shes rang nyid dang grub bde dbyer med kyi chos mtha' dag snang zhing de dag gi rnam pa yang shar ba nyid kyis ye shes rang nyid dngos su rtogs pa dang mngon sum du rtogs pa'i tha snyad byed pa yin zhing/ de yang lugs 'di la shin tu 'thad pa yin gyi de las logs su rang nyid rang las tha dad par rig bya rig byed kyi tshul du snang dgos pa ma yin te/ gzhan du na ye shes de snang yul la 'khrul bar thal ba bzlog tu med do/ /des na rang nyid rang las tha dad pa'i gnyis snang med pas gang dag ye shes des rang nyid gzhal ba'i ngo na rang nyid rang dang rig bya rig byed tha dad pa'i snang ba yod par 'dod pa ni legs par smras pa ma yin no/ /rje'i sras kyi thu bo mkhas grub thams cad mkhyen pas rang las tha dad pa'i gnyis snang med pa la dgongs nas gnyis snang nub pa'i tshul gyis rtogs par gsungs pa la/ phal mo che zhig gis @108a @#/ /de mi 'thad de/ gnyis snang la mang du yod pas kun rdzob kyi snang ba la gnyis snang du byas pa'i gnyis snang yod pa'i phyir zhes rang nyid phyogs snga ma las mthong rgya che khul gyi sun 'byin smra ba yang/ mkhas grub thams cad mkhyen pa la gnod byed du 'gro ba'i rigs pa zhig yin tshod du mi 'dug go /des na stong thun dang spyod 'jug dar TIka gnyis kyi gsung lugs sgras zin la khyad par cung zad yod kyang gnyis ka'i dgongs pa ni rang dang grub bde dbyer med kyi khyad chos mtha' dag snang zhing de dag gi rnam pa shar ba nyid kyis rang nyid dngos su rtogs par 'jog gi /de las gzhan pa'i rnam pa 'char lugs logs pa zhig mi dgos par bzhed pa yin la 'di ni yab rje bdag nyid chen po'i bzhed pa yang yin te/ 'di pa'i lugs kyi tshad ma 'jog tshul dang rang rig 'gog lugs sogs kyi rigs pa'i 'gros rtsa she dang 'jug pa'i rnam bshad sogs las zhig par gsungs pa rnams kyis shes nus so/ /de tsam gyis rang nyid dngos su rtogs par mi 'jog par de las gzhan cha can rang nyid rtogs tshul logs pa zhig btsal nas 'jog rgyu yin na dbu ma thal 'gyur ba'i gral du bzhugs dka' bar 'dug pas rigs pa smra ba rnams kyis da dung dpyod par mdzod cig rje rin po ches rang rig bkag pa dran dgos par gsungs pa yang/ 'jug pa las/ gang phyir gang gis yul myong gyur de las/ /zhes sogs kyi mtha' dpyad pa'i skabs su rang lugs kyi sngo 'dzin 'grub tshul gsungs pa de nyid yin te/ phal mo che la gleng rgyu mi snang ngo/ /don dam bden pa'i dbye ba ni/ stong pa nyid la rgyas par phye na stong nyid bcu drug dang/ 'bring du na dngos @108b po dang dngos med dang rang dang gzhan gyi ngo bo stong pa nyid de bzhi dang/ bsdu na gang zag dang chos kyi bdag med pa gnyis su gsungs pa ltar ro/ /gzhung gzhan las don dam dngos dang mthun pa'i don dam gnyis su gsungs pa sogs kyi rnam gzhag ni gong du bshad zin to/ /gnyis pa ni/ /dbu ma thal 'gyur bas mdo dang 'phags pa'i dgongs pa 'grel tshul thun mong ma yin pa'i gtso bo ni rang gi mtshan nyid kyis grub pa rdul tsam yang med pa dang ming gis btags tsam la bya byed thams cad grwa ma nyams par bzhag pas chog pa 'di gnyis yin par 'dug la/ de la brten nas rnam par dag pa'i grub mtha' 'grel byed gzhan dang thun mong ma yin pa mang du yod pa las gtso bo ni dka' ba'i gnas brgyad du bsdus nas 'chad par rang re'i mkhas pa rnams la grags so/ /de ni rje thams cad mkhyen pas 'jug pa'i rnam bshad chen mo las/ rnam par dag pa'i grub mtha' 'grel byed gzhan dang thun mong ma yin pa mang du yod de/ de gang zhe na/ re zhig gtso bo rnams brjod na/ tshogs drug las ngo bo tha dad pa'i kun gzhi rnam shes dang; rang rig 'gog lugs thun mong ma yin pa dang/ rang rgyud kyi sbyor bas phyir rgol gyi rgyud la de kho na nyid ji lta ba bzhin bskyed pa khas mi len pa gsum dang/ shes pa khas len pa bzhin du phyi don yang khas blang dgos pa dang/ nyan rang la dngos po rang bzhin med par rtogs pa yod pa dang/ chos kyi bdag 'dzin nyon mongs su 'jog pa dang/ zhig pa dngos po yin pa dang/ de'i rgyu mtshan gyis dus gsum gyi 'jog tshul thun mong ma yin pa sogs yin no/ /zhes gsungs pa la brten par snang zhing sogs @109a @#/ /khong nas 'don rgyu lam dang 'bras bu'i gnas skabs kyi khyad par yang mang du yod do/ /la la dag tshogs drug las ngo bo tha dad pa'i kun gzhi'i rnam shes 'gog pa thal 'gyur ba'i thun mong ma yin pa'i grub mthar mi 'thad de/ mdo sde spyod pa'i rang rgyud pas kyang de 'gog pa'i phyir zhes sogs gzhan rnams la yang de 'dra re sbyor zhing/ zhig pa dngos por 'dod pa yang thun mong ma yin par mi 'thad de/ bye brag smra bas kyang de dngos por 'dod pa'i phyir zhes rnam bshad kyi tshig zin la dgag pa gtong khul byed pa dang/ rang re'i rje'i rjes 'jug kha cig gis kyang rigs pa de dag gis gnod kyis dogs nas rnam bshad kyi sgras zin la tshig gi lhan thabs du ma zhig snon pa'i bsam pa bzang po'i khur len par 'dug ste/ phan tshun gnyis kas gzhung chen po klog pa tsam yang mi shes pa'i rnam 'gyur gsal bar bstan te/ rnam bshad kyi 'gog lugs thun mong ma yin pa zhes dang 'jog tshul thun mong ma yin pa zhes dang 'jog tshul thun mong ma yin pa zhes pa rnams tha ma'i gsal byed yin pa dang/ gsung de dag gi rnam bcad yongs gcod kyi dgos pa ci yang ma shes par snang ba'i phyir ro/ /ngang tshul 'di lta bur gyur pa dag gis kyang gzhung lugs 'chad rtsod rtsom pa'i khur len pa ni bstan pa rin po che ches cher nyams pa'i rtags su mngon zhing dpyod ldan mchog tu yi mug pa'i gnas kho na'o/ /da ni 'dir thun mong ma yin pa'i khyad par de dag las ni gtso bo 'ga' zhig mdo tsam brjod par bya ste/ de la khyad chos gtso bor brgyad bshad pa dang/ rang mtshan 'gog lugs dang/ de la brten nas mdo'i dran nges 'byed tshul gsum/ de'i dang po la brgyad @109b las/ dang po kun gzhi rnam shes 'gog tshul thun mong ma yin pa ni/ rang bzhin gyis grub pa mi 'dod pa'i lugs la kun gzhi dang chud mi za ba dang thob pa la sogs pa khas ma blangs kyang las 'bras kyi rnam gzhag 'jog nus pas de dag khas len don med do/ /de 'jog nus tshul ji ltar yin zhe na kun gzhi khas ma blangs kyang las bsags pa 'gags zin pa las 'bras bu 'byung ba'i rnam gzhag byar rung ba yin te/ las 'gags pa rang bzhin gyis ma grub pa'i phyir/ de de'i rgyu mtshan du 'gro tshul ni/ gang phyir rang bzhin gyis de mi 'gags pa/ de phyir zhes pa'i rgyu mtshan nyid kyis las zhig pa'i zhig pa las phyis kyi 'bras bu 'byung ba 'grub pa nyid yin no/ /rang bzhin gyis med pa'i las zhig pa las 'bras bu 'byung ba la rnam smin thug med du 'byung ba dang rnam smin 'chol bar 'byin pa'i skyon yang med de/ yod pa ma yin par mtshungs kyang rab rib can la skra shad snang gi bong bu'i rwa mi snang ba'i nges pa yod pa ltar/ rang bzhin med kyang rnam smin phyung zin pa las 'bras bu mi 'byung zhing las dge mi dge'i 'bras bu so sor nges pa'i rnam gzhag 'thad pa'i phyir/ lang kar gshegs pa dang/ dgongs 'grel dang/ theg pa chen po'i chos mngon pa'i mdo las kun gzhi yod par gsungs pa dang mi 'gal te/ de ni chos nyid zab mo re zhig ston pa'i snod du mi rung ba'i gdul bya rnams chos zab mo la rim gyis drang ba'i dgongs pa'i dbang gis gsungs pa yin pa'i phyir/ dgos pa ni de yin la/ dgongs gzhi ni rang bzhin gyis grub pas stangs pa'i stong nyid do/ /dngos la gnod byed ni/ kun gzhi khas blangs na @110a @#/ /kun gzhi'i bag chags smin pa las gzugs sgra sogs su snang ba tsam du zad kyi phyi rol gyi don med par khas blangs dgos na/ de ni mi 'thad de/ don shes gnyis don dam du med mnyam dang tha snyad du yod mnyam yin pa rigs pas grub pa'i phyir/ zhes sogs rigs pa dang/ lung las kyang ston pa rang nyid kyis kun gzhi bshad pa'i dgongs pa bstan pa rnams yin no/ /'o na 'di pa'i lugs kyi dge mi dge'i las kyi bag chags 'jog pa'i gzhi'am rten du ci zhig 'dod par bya zhe na/ gtan du ba'i bag chags bsgo gzhi ni nga'am gang zag tsam dang res 'ga' ba'i bag chags bsgo gzhir sems kyi rgyud kyang bzhag chog par bzhed do/ /'di dag la brten nas mthong lam bar chad med lam pa'i rgyud la sgom spang gi bag la nyal gyi rten 'jog tshul dang/ de'i rgyud la theg chen sems bskyed yod med dang/ nam mkha' mtha' yas skye mched la sogs par skyes pa'i 'phags pa'i rgyud la zag med kyi sems mngon du gyur pa na de dag gi 'gro ba ldog mi ldog sogs rje rin po che'i gsung dang shing rta chen po dag gi gzhung gung bsgrigs na dpyad par bya ba'i gnas phra mo mtha' yas pa zhig yod do/ /gnyis pa rang rig 'gog tshul thun mong ma yin pa la gnyis/ dngos dang/ tshad ma'i rnam gzhag bshad pa'o/ /dang po ni/ phyogs snga ma'i rang rig 'dod tshul ni sems tsam pa'i skabs su bshad pa ltar yin la/ de 'gog lugs ni dran pa'i rtags kyis rang rig sgrub pa mi 'thad do/ rang gi mtshan nyid kyis grub pa'i dbang du byas nas phyi dus kyi dran pa rtags su 'god na rtags de sgrub byed ma yin te/ sgra mi @110b rtag par bsgrub pa la mig gi gzung bya bzhin no/ /'jig rten pa'i tha snyad kyi dbang du byas na yang mi 'thad de/ rang rig pa'i 'bras bu dran pa med pa'i phyir te/ rang rig med na de'i 'bras bu dran pa mi 'grub pa'i phyir/ 'brel ba med par ni bsgrub bya mi 'grub ste chu tsam las nor bu chu shel dang/ me tsam las me shel dpog pa bzhin no/ /gal te dran pa dang rang rig rgyu 'bras su grub pa'i sgo nas rang rig bsgrub pa min gyi dran pa la brten nas sngar gyi shes pa la myong ba yod par dpogs la/ de la rang myong dang gzhan myong gnyis su kha tshon bcad nas gzhan myong bkag pa las rang myong 'grub bo zhe na/ de yang mi 'thad de/ shes pas yul rig pa la mdo sde pa dang sems tsam pas bzhag pa ltar gyi rang myong dang gzhan myong gnyis su kha tshon ma chod pa'i phyir/ de dag ni sgrub byed 'gog pa'i rigs pa yin la bsgrub bya rang rig 'gog pa'i rigs pa ni/ 'dzin rnam yan gar ba mi 'thad de/ yid ji tsam gtad kyang kho rang kho rang dang rig bya rig byed tha dad pa'i drnam pa mi 'char ba'i phyir dang/ rang la rang gi byed pa rang bzhin gyis 'jug na bya byed las gsum gcig tu thal ba'i skyon yon pa'i phyir/ mes kyang rang nyis bsreg par thal ba la sogs pa'o/ /rang lugs la rang rig med kyang dran pa skye ba 'thad de/ sngar sngon po mthong ba'i shes pa dang phyis kyi sngo 'dzin mig shes dran pa'i shes pa gnyis rang bzhin gyis grub pa'i so so ba ma yin pa'i phyir dang/ nga'i sngo 'dzin mig shes kyis sngon po mthong bas ngas sngon po mthong bar yang 'jog nus pa'i phyir dang/ sngar sngo 'dzin mig shes kyis mthong ba'i sngon po de nyid phyis kyi dran shes kyis kyang gced pas @111a @#/ /myong dran yul gcig pa'i phyir/ 'jug pa rtsa 'grel gyi rigs pa'o/ /rang rig med kyang dran pa skye ba 'thad de/ sngon po dran pa'i shes pa skye ba na sngar gyi mig shes spangs nas dran pa ma yin par sngar sngon po 'di mthong ngo zhes sngon po dang sngo 'dzin mig shes 'brel bar dran pa'i phyir/ dper na dgun dus su byi bas lus la rmugs pa na rmugs pa myong gi dug ma myong yang phyis 'brug gi sgra thos pa na sngar rmugs pa'i dus su dug zhugs par 'dug snyam du dran pa skye ba mi 'gal ba bzhin no zhes pa spyod 'jug nas bshad pa'i rigs pa'o/ /gnyis pa tshad ma'i rnam gzhag bshad pa la/ lugs 'dis tshad ma'i mtshan nyid ni rang gi 'dzin stangs kyi yul la mi bslu ba'i shes pa tsam la byed kyi gsar du mi bslu ba'i khyad par sbyar mi dgos so/ /sgra bshad kyang rab tu'am legs par 'jal ba la bzhed do/ /dbye ba ni/ mngon rjes gnyis dang/ yid ches dang/ dpe nyer 'jal gyi tshad ma ste bzhir tshig gsal las bshad do/ /de lta na yang mngon rjes gnyis su grangs ma nges pa yang ma yin te/ tshad ma phyi ma gnyis rjes dpag tu 'du ba'i phyir dang/ bzhi brgya pa'i 'grel pa las kyang gnyis su bshad pa'i phyir ro/ /tshad ma'i grangs ni gzhal bya'i dbang gis bzhag pa ste/ gzhal bya mngon gyur dang lkog gyur dang shin tu lkog gyur gsum du yod pa'i phyir dang/ dpe nyer 'jal gyi gzhal bya ni phan tshun 'dra ba'i chos lkog tu gyur pa'o/ /chad ? ma gang/ rtags la ma ltos par rang gi 'dzin stangs kyi yul gyi gzhal bya mngon sum pa la mi bslu ba ni mngon sum tshad ma'i ngo bo'o/ /rang rig mngon sum mi bzhad pas bdag rkyen dbang @111b po gzugs can pa la brten pa'i mngon sum tshad ma dang/ bdag rkyan yid dbang la brten pa'i mngon sum tshad ma gnyis so/ /yid mngon la zhi lhag zung 'bral la ma brten pa dang brten pa gnyis yod pa'i snga ma yid mngon dang phyi ma rnal 'byor mngon sum mo/ / spyir rnal 'byor mngon sum yang yid mngon yin mod kyang mngon sum la gsum du phye ba'i tshe de gnyis 'gal ba yin no/ /rnal 'byor mngon sum gyi 'dzin stangs kyi yul ni bden bzhi'i khyad chos sam bdag med phra rags gang yang rung ba'o/ /rang rgyud pa min chad kyis rnal 'byor mngon sum la 'phags pa'i ye shes kyis khyab par bzhed kyang/ 'di pa'i lugs la bdag med phra mo ma rtogs pa'i snga rol tu yang bden bzhi'i rnam pa mi rtag sogs bcu drug dang gang zag gi bdag med rags pa sogs rtogs pa'i rnal 'byor mngon sum yod par bzhed pas so so skye bo'i rgyud la yang rnal 'byor mngon sum yod do/ /yid mngon yang gzhan dag dang mi mthun te/ rang yul gsal bar rtogs pa'i rtog bral mi dgos pas dran shes dang rjes dpag gis drangs pa'i bcad shes sogs la yang mngon sum tshad ma yod do/ /yid shes 'khor gyi tshor ba bde sdug sogs nyams su myong ba'i yid mngon ni rang rig dang mi 'dra ste/ kha nang blta la gnyis snang nub pa mi dgos par myong bya myong byed tha dad pa nyid du blo la snang bar bzhed pa'i phyir ro/ /gzhal bya mngon gyur ba ni rtags la ma brten par myong stobs kyis rtogs par bya dgos pa'i chos so/ /lkog gyur ba ni rtags la brten nas rtogs dgos pa'i chos so/ /rtags la dngos su brten nas rang gi 'dzin stangs kyi yul du gyur pa'i gzhal bya @112a @#/ /lkog gyur ba la mi bslu ba'i shes pa ni rjes dpag tshad ma'i ngo bo'o/ /'di la yang dngos stobs rjes dpag dang yid ches rjes dpag dang dpe nyer 'jal gyi rjes dpag gsum mo/ /thal 'gyur tsam la brten pa dang tshul gsum pa'i gtan tshigs la brten pa'i rjes dpag gnyis kyi tha snyad kyang bzhed do/ /dpe nyer 'jal la tshul gsum pa'i gtan tshigs dang thal 'gyur gzhan gyis bkad pa med kyang rgyu mtshan la brten nas 'jal ba yin pas rtags la brten par bzhag chog go /lugs 'dis sngo 'dzin mngon sum chad ma 'grub tshul ? ni sngo 'dzin mig shes rang nyid la phyi rol nas sngon po'i rnam pa shar ba'i dbang gis rtogs bya rtogs byed tha dad du snang zhing/ de ltar snang bas sngo 'dzin mig shes rang nyid kyi ngo bo yod pa la yang tshad mar song ba yin pas gzhan gyi lugs ltar rang rig sogs kyis 'grub mi dgos so/ /'di ni tshig gsal las/ gzhal bya'i rnam pa'i rjes su byed pa tsam gyis tshad ma dag gi rang gi ngo bo rnam par 'jog pa'i phyir zhes pa'i don du bzhed do/ /'di shin tu dka' bar snang bas blo gros zhib mos dpyod shes dgos so/ /rjes kyi dran shes kyis kyang 'grub la de ni sngo 'dzin mig shes kyis sngon po gzhal ba'i stobs kyis tshad ma gzhan rgyud mi dgos par de ltar bzung ba dran pa'i shes pa dngos su 'dren la/ dran shes de nyid kyis kyang sngon po med pa dang sngo 'dzin mig shes med pa gnyis ka'i sgro 'dogs gcod pa'i phyir dang/ dran shes de nyid mig shes yod pa la tshad ma yin pa'i phyir ro/ /'di ni stong thun gyi yang dgongs bar snang zhing snga ma las cung zad rtogs sla'o/ /'di dag rgyas @112b par gzhan du shes par bya'o/ /gsum pa rang rgyud kyi gtan tshigs khas mi len pa'i khyad par la/ dngos dang/ gzhan grags kyi 'dod tshul lo/ /dang po ni/ rang rgyud pa rnams ni bdan med sgrub pa'i rtags kyi tshul gsum rgol phyir rgol gang yang rung ba'i dor grub pa tsam gyis mi chog gi don gyi sdod lugs kyi steng nas grub dgos la/ de ltar grub na bsgrub bya rtags pa'i rjes dpag bskyad pa cig rang rgyud kyi don du 'dod do/ /de'i rgyu mtshan yang de dag gi lugs la rtog pa dang rtog med kyi tshad ma gang yin kyang rang nyid tshad mar song ba snang yul dang zhen yul rang mtshan la ma 'khrul ba zhig nges par dgos te/ de la 'khrul na tshad ma des gzhal bya rnyed par 'jog mi nus pa'i phyir ro/ /de yang tha snyad du ming rkyang btags yod tsam ma yin pa'i rang gi rang bzhin zhig med na chos de yod par 'jog mi nus pa la thug pa yin no/ /des na rtag mi rtag dang bden par yod med sogs rgol phyir rgol gyis rtsod par bya ba'i khyad par gyi ches rnams gang la brten pa'i gzhi yul steng na grub grub pa zhig ston rgyu mthun snang du grub pa zhig med na de'i steng du rtags kyi tshul bsgrub par mi nus te/ khyad gzhi med pa'i khyad chos mi 'thad pa'i phyir ro snyam du bsam pa ste ? chos can mthun snang ba'i don yang de yin no/ /lugs dam pa 'di ltar na 'di 'dra zhig ston rgyu yod phyin de nyid rang gi ngo bos yod pa'i don du song la de nyid don dam par grub pa'i don yang yin pas/ de nyid khyad gzhir gzung ba'i steng du khyad par gyi chos gzhan sgrub tshul rgol phyir rgol gnyis ka la mthun snang du grub pa zhig yod par 'dod pa ni shin tu mi 'thad de/ snga rgol dbu ma pa ltar na rang @113a @#/ /gi ngo bos yod pa tha snyad du'ang mi 'thad pas de lta bu zhig med dgos shing/ phyir rgol la ni ji srid lta ba rgyud la ma skyes kyi bar du rang gi ngo bos yod pa dang yod pa tsam gyi khyad par mi phyed pas tha snyad tsam gyi yod lugs lta ba ma rtogs bar du ston mi nus pa'i phyir ro/ /des na phyir rgol gyi khas blangs la 'khris pa tsam ma yin par yul gyi steng nas grub lugs rgol phyir rgol gnyis ka la mthun snang du yod pa zhig mi rnyed pas chos can mthun snang ba med par bzhed pa yin no/ /de dag kyang tha snyad du rang mtshan bzhed mi bzhed la thug cing rang rgyud pa kun rdzob la yang log 'byed pa dang thal 'gyur bas rang lugs la yang dag kun rdzob mi bzhed pa sogs kyi gnad kyang 'di dag la brten nas shes dgos so/ /gnyis pa ni/ thal 'gyur ba'i lugs la rang rgyud kyi gtan tshigs khas mi len yang tshul gsum pa'i rtags nges par khas len dgos la tshul gsum yang tshad mas grub pa zhig nges par dgos so/ /de yang gzhan grags kyi gtan tshigs kyis byed pa yin te/ sngar bshad pa ltar rgol phyir rgol gnyis la yul steng nas gzhal bya 'grub lugs mthun snang du grub pa zhig med pas/ pha rol po'i khas blangs la 'khris nas pha rol po rang la grags pa 'am snga rgol dbu ma pa la bltos te gzhan la grags pa'i gtan tshigs 'god pa yin pas rang grags dang gzhan grags kyi gtan tshigs gnyis don gcig go / de yang rtsa she'i rab byed gsum pa las/ lta de rang gi bdag nyid ni/ /zhes sogs kyis bshad pa lta bu la mtshon na/ chos can mig dang/ rtags rang la mi lta ba dang/ dpe bum pa @113b rnams ni phyir rgol rang nyid kyis khas blangs pas de'i ngor sgrub mi dgos so/ /khyab pa ni rjes su 'gro ldog gi sgo nas nges par byed pa ste/ rang la mi lta ba la gzhan la blta ba rang gi ngo bos med pas khyab lugs kho rang la grags pa'i dpe'i steng nas rjes su 'gro ldog nges par byed pa'o/ /gtan tshigs 'di'i rnam gzhag shin tu gnad che ste rtogs kyang dka' bar yod la/ lam rim chen mo las zhib tu gsungs pa lta bu rjes 'brangs sus kyang gsal bar bshad pa mi snang ngo/ /bzhi pa phyi don khas len pa'i khyad par bshad pa ni/ sems tsam pa ltar phyi don med par shes pa bden pa ba 'dod pa ni mi 'thad de/ de kho na nyid du na don shes gnyis ka rigs pas btsal nas yod par 'jog mi nus shing 'jig rten grags pa'i dbang las na shes pa yod pa bzhin du don yang yod pa'i phyir/ bcom ldan 'das kyis kyang shes rab kyi pha rol tu phyin pa'i mdo las phung po lnga char yang rang bzhin gyis grub pas stong bar gsungs pas don dam par med mnyam du gsungs shing/ chos mngon pa'i mdo las ni phung po lnga char yang rang dang spyi'i mtshan nyid la sogs pa'i sgo nas kun rdzob tu yod mnyam du gsungs pas na don dang shes pa la yod med kyi khyad par 'byed pa ni bden gnyis kyi rim pa 'di dag bshig par 'gyur ba'i phyir ro/ /'o na sems tsam pas rdul cha med med pas de bsags pa'i phyi don 'gog pa'i rigs pas phyogs kyi cha med kyi phyi don mi khegs par 'gyur ram snyam na/ skyon med de/ de 'dra'i phyogs kyi cha med kyi phyi don mi khegs pa ma yin kyang de khegs pa tsam gyis phyi don khegs mi dgos pa'i phyir ro/ /de bzhin du shes pa skad cig cha @114a @#/ /med dang de 'thung ba'i rgyun khegs kyang shes pa khegs mi dgos pa yang shes par bya'o/ /sems tsam pa'i lugs kyis ni phyi rol cha med khegs na snang ba la ma 'khrul pa'i dbang shes khegs la/ de ltar na dbang shes 'khrul pas don 'jog ma nus pas phyi don khegs so snyam du bsam pa yin no/ /lugs dam pa 'dis ni dbang shes 'khrul pas gzhal bya bden pa 'jog mi nus pa bden mod kyang gzhal bya rdzun pa 'jog pa la de grogs su 'gro bas de nyid don yod pa'i sgrub byed yin gyi don med pa'i sgrub byed min no snyam du dgongs so/ /mdo las sems tsam du gsungs pa'i dgongs pa ni gnyis te sa bcu pa'i mdo las/ khams gsum po 'di ni sems tsam mo/ /zhes pa'i mdo'i tsam sgras phyi don gcod pa ma yin gyi khams gsum po mtha' dag kyang las kyis byas la/ las ni sems pa dang bsam pa gnyis su nges pas khams gsum sems kyis byas par grub pas/ de'i phyir sems las gzhan pa'i dbang phyug la sogs pa 'jig rten gyi byed pa po yod pa dgag pa'i ched du tsam sgra smos pa yin no/ /yang langkar ? gshegs pa'i mdo las/ phyi rol snang ba yongs med de/ /sems ni sna tshogs rnams su snang/ /lus dang longs spyod gnas 'dra ba/ /sems tsam du ni ngas bshad do/ /zhes gsungs pas ni sems tsam du gsungs pa yin mod kyang de kho na nyid la rim gyis gzhug dgos pa'i gdul bya'i bsam pa'i dbang gis gsungs pa yin gyi sgra ji bzhin du gzung du mi rung ste/ gong du bshad pa'i rigs pa rnams kyis gnod pa'i phyir dang/ bcom ldan 'das nyid @114b kyis kyang/ ji ltar nang pa nad pa la/ /sman pas sman rnams gtong ba ltar/ /sangs rgyas de bzhin sems can la/ /sems tsam du yang rab tu gsungs/ /zhes gsungs pa'i phyir ro/ /gzhan yang 'jug pa rtsa 'grel las/ phyi don med kyang shes pa rang bzhin gyis grub pa'i dper rmi lam gyi shes pa dang skra shad 'dzag snang gi dbang shes dper bkod pa'i sems tsam pa'i lugs dgag pa na/ de dag gi tshe phyi rol gyis bsdus pa'i glang po che dang skra shad sogs med kyang yod pa lta bur snang bas yul can gyi shes pa yang rdzun pa yin gyi rang mtshan gyis med pas/ don shes rang bzhin gyis grub ma grub mtshungs pa'i rigs pas dpe mi 'thad par gsungs pa yang phyi don mi 'thad pa 'gog pa'i rigs pa stobs che ba zhig yin no/ /lnga pa nyan rang la chos kyi bdag med rtogs pa yod par bsgrub pa la lung ni/ sa bcu pa'i mdo las/ sa bdun pa la gnas pa'i byang sems kyis chos rang bzhin med rtogs kyi shes rab kyi sgo nas nyan rang rnams zil gyis gnon la sa drug pa man chad du zil gyis gnon mi nus par gsungs pa'o/ / rigs pa la 'jug 'grel las gsum bshad pa'i dang po ni/ nyan rang la chos kyi bdag med phra mo rtogs pa med na 'jig rten pa'i lam gyis ci yang med man chad la chags pa dang bral ba'i drang srong rnams ltar nyan rang de dag sems dang po bskyed pa'i byang chub sems dpas kyang rang bzhin med rtogs kyi shes rab kyi sgo nas zil gyis gnon nus par thal ba dang/ rigs pa gnyis pa ni/ nyan rang dgra bcom pa dag gis nyon mongs pa thams cad kyi rtsa ba bden 'dzin dang 'dzin stangs dngos su 'gal ba'i lam rgyud @115a @#/ /la ma skyed pa'i phyir/ de dag phyi rol pa'i drang srong bzhin du khams gsum na spyod pa'i phra rgyas kyi nyon mongs pa thams cad ma spangs par thal ba'o/ /rigs pa gsum pa ni/ nyan rang rnams kyis chos kyi bdag med phra mo ma rtogs na gzugs la sogs pa'i phung po la bden par dmigs pas blo phyin ci log tu gyur pa'i phyir gang zag gi bdag med kyang mtshan nyid rdzogs pa rtogs pa med par 'gyur te/ nga'am gang zag tu 'dogs pa'i gzhi phung po la bden par dmigs pa'i yul sun phyung ba med pa'i phyir ro/ /zhes pa ste/ 'dis gdags gzhi phung po la bden par 'dzin pa'i zhen yul sun ma phyung bar btags chos gang zag la bden par 'dzin pa'i zhen yul yang sun mi phyin par bstan te/ rin chen 'phreng ba las/ ji srid phung por 'dzin yod pa/ /zhes sogs kyi dgongs par bzhed do/ /'di dag rgyas par gzhan du shes par bya'o/ /drug pa chos kyi bdag 'dzin nyon mongs su 'jog pa'i khyad par bshad pa la/ sangs rgyas bskyangs kyis nyan thos kyi sde snod las chos thams cad bdag med do zhes gsungs pa'i med rgyu'i bdag ngos gzung ba'i tshe ngo bo nyid kyis grub pa la bshad pa ltar dpal ldan zla bas kyang bzhed de/ de yang bdag med mtshan nyid rdzogs pa'am bdag med phra mo'i dbang du byas pa'o/ /de'i phyir gang zag gi bdag med mtshan nyid rdzogs pa yang gang zag ngo bo nyid kyis grub pa med pa la bya dgos pas bdag med gnyis la phra rags kyi khyad par med par bzhed de/ rgyu mtshan sngar bshad zin to/ /de'i phyir gang zag gi bdag med mtshan nyid rdzogs pa rtogs pa la chos kyi bdag med phra @115b mo yang nges par rtogs dgos so/ /rgyu mtshan de dag ltar na chos bden par 'dzin pa nyon mongs su nges par 'dod dgos so/ /chos dang gang zag la bden par 'dzin pa'i bden 'dzin gnyis ka nyon mongs pa can gyi ma rig pa yin pa dang/ de dgra bcom gnyis dang mi skye ba'i chos la bzod pa thob pa'i byang sems gsum gyis spangs par 'jug 'grel dang bzhi brgya pa'i 'grel pa gnyis ka las bshad do/ /sgrub byed kyi rigs pa ni/ gang zag dang chos rang bzhin gyis grub pa 'gog pa'i rigs pas de gnyis la rang gi mtshan nyid kyis grub pa khegs pa'i tshe de gnyis rang mtshan du grub par 'dzin pa zhen yul la 'khrul ba'i bden 'dzin du 'grub/ de grub na gang zag dang chos gnyis bden grub tu 'dzin pa bdag 'dzin gnyis su 'grub/ de grub na bden 'dzin de de kho na nyid kyi don rig pa'i rig pa ye shes kyi 'gal zla mi mthun phyogs su 'grub pas ma rig par 'grub cing/ de ma zad bar du 'jig lta yang mi 'dzad par bsgrub nus pas de gnyis nyon mongs can gyi ma rig par 'grub pa yin no/ /rje rin po che'i legs bshad la brten nas thal 'gyur ba'i lugs la chos kyi bdag 'dzin nyon mongs can gyi ma rig pa yin pa tsam shes mkhan mang bar 'dug kyang/ de ltar yin pa sgrub lugs rje'i dgongs pa ltar 'chad shes mkhan dkon par snang ngo/ /de lta na yang mngon pa gnyis nas bshad pa'i nyon mongs rnams kyang nyon mongs rags par mi bzhed pa ma yin zhing/ de nas bshad pa'i lam gyis nyon mongs rags pa de dag mngon gyur mgo gnon nus la/ de'i tshe yang bden 'dzin phra mos drangs pa'i chags sogs mngon gyur @116a @#/ /kyang mgo gnon mi nus pa sogs dbyang rgyu'i dka' gnas mang du 'dug go /thun mong ma yin pa'i ma rig pa dang 'jig lta mthar lta la yang kun brtags dang lhan skyes gnyis yod do/ /da ni 'di bshad par bya ste/ 'di pa'i lugs kyi shes sgrib ni nyon mongs pa'i bag chags la bzhed cing de la yang nyon mongs kyi sa bon la bag chags su bzhag pa zhig dang nyon mongs kyi sa bon min pa'i bag chags gnyis las shes sgrib tu 'jog rgyu ni phyi ma ste/ dgra bcom gnyis dang dag sa la gnas pa'i sems dpa' la nyon mongs kyi sa bon thams cad zad pas bden 'dzin mi skye yang de'i bag chags kyis bslad pas snang yul la 'khrul ba'i blo skye ba'o/ /de ltar na nyon mongs pa'i bag chags ni shes sgrib kyi gtso bo dang de'i 'bras bu gnyis snang 'khrul pa'i cha rnams kyang der bsdu ba yin no/ /rje'i gsung gi sgras zin 'di tsam la rjes 'brangs mkhas pa phal mo che mthun cing/ rgyud bla ma'i ngar TIka las shes sgrib kun brtags yod pa lta bu'i bshad pa zhig mdzad mod kyang shes sgrib la lhan skyes kyis khyab pa lung rigs du mas grub pas gsung de sgra ji bzhin du khas mi len par stong thun chen mo rjes 'brangs dang bcas pas bzhed pa ltar legs so/ /phyis kyi rigs pa smra ba pradznyA'i mtshan can gyis/ shes sgrib kun brtags yod pa dang TIka chen gyi gnyis snang 'khrul pa'i cha zhes pa'i tshig zur gyi 'khrul pa zhes pa'i skabs nas dngos su bstan pa'i 'khrul shes yod pas shes sgrib dang shes pa'i gzhi mthun yod pa rje'i dgongs pa yin cing/ stong thun las shes sgrib kun brtags med par bshad pa @116b bag chags kyi shes sgrib kho na la dgongs so zhes smra mod kyang 'thad par ma mthong ngo/ /mdo dgongs 'grel las sa bcu re re'i ngo skal gyi spangs bya kun tu rmongs pa re yod par gsungs mod kyang de nas bshad pa'i spang gnyen gyi rnam gzhag rnams skabs 'dir ji lta ba bzhin khas len dgos pa'i shes byed med do/ /skyabs 'gro bdun cu pa las/ mi shes nyon mongs min spangs phyir/ /zhes dang/ ma rig nyon mongs med yod pas/ /zhes pa dang/ 'jug 'grel las/ nyon mongs pa can ma yin pa'i ma rig pa zhes gsungs pa la brten nas shes par gyur pa'i shes sgrib yod pa 'thad phyogs su paN chen bsod nams rgyal mtshan dang mkhas grub chen po 'jam dbyangs bzhad pa'i rdo rjes gsungs so/ /de lta na yang shes sgrib kyi ma rig pa'i 'bru snon rje thams cad mkhyen pas mdzad pa rnams su gnyis snang 'khrul pa'i bag chags la 'bru snon mdzad pa ma gtogs shes par gyur pa'i ma rig pa la 'bru snon mdzad pa mi snang ngo/ /mkhas grub thams cad mkhyen pa dang/ rigs pa'i dbang phyug se ra rje btsun chos kyi rgyal mtshan yab sras/ mkhyen rab gter chen 'jam dbyangs dga' ba'i blo gros/ rje thams cad mkhyen pa dge 'dun rgya mtsho/ paN chen bsod nams grags pa sogs mkhas grub phal mo ches shes par gyur pa'i shes sgrib med par bzhed cing/ rje bla ma'i bshad rgyud dang sgrub rgyud gnyis ka'i bstan pa'i bdag por gyur pa paN chen thams cad mkhyen pa blo bzang chos kyi rgyal mtshan gyis kyang/ shes pa gcig gis bden gnyis cig car du/ /mngon sum gzigs pa'i sgrib byed phra ba la/ /ma rig ces btags shes pa dngos min pas/ / @117a @#/ /de la 'gal ba cha tsam yod ma yin/ /zhes rgyu mtshan dang bcas te gsungs pa rnams rje'i gsung phal mo che dang mthun tshabs che bar 'dug pas da dung blo gros dang ldan pa rnams kyis zhib tu dpyad par bya'o/ /bdun pa zhig pa dngos po yin pa'i bzhed tshul thun mong ma yin pa ni/ bye smra rnams kyi 'dod tshul sogs sngar bshad zin cing mdo sems rang rgyud pa rnams kyis ni myu gu lta bu'i dngos po gcig zhig pa na myu gu'i cha shas kyi dngos po thams cad ni lag la de las gzhan bum pa la sogs pa'i dngos po gzhan gang yang ma thab pas zhig pa de dngos po gtan min par 'dod de/ sngon po la sogs pa skye mched re re ba'i dngos po dang cha shas tshogs pa'i dngos po gang yang de'i mtshan gzhir mi rung ba'i phyir zhes smra ste/ btags don btsal nas 'jog dgos pa'i gnad kyis yin no/ /lugs 'dis ni de ltar btsal nas ma bzhag kyang zhig pa dngos por khas blang du rung bas zhig pa de dngos po yin par bzhed da/ /de la yang lung ni sa bcu pa las/ skye ba'i rkyen gyis rga shi zhes sems can shi ba rkyen gyis bskyed par gsungs pa'i phyir dang/ shi ba ni gang shi ba'i sems can de zhig pa la bzhag dgos pa'i phyir ro/ /yang de nyid las/ 'chi ba yang bya ba gnyis su nye bar gnas te/ 'du byed 'jig par yang byed pa dang yongs su mi shes pa rgyun mi 'chad pa'i rgyu yang 'byin pa'o/ /zhes shi ba rgyus bskyed pa dang shi bas ma rig pa bskyed par yang gsungs pas gang rang nyid rgyus bskyed pa dang rang nyid kyis 'bras bu bskyed nus pa de ni dngos por 'dod dgos pa'i phyir ro/ /de ni rgyun gyi zhig pa yin yang skad @117b cig ma dang po dus gnyis par zhig pa la yang 'dra'o/ /rigs pa ni sems can skyes pa dang shi ba gnyis dang skad cig ma gnyis par mi sdod pa dang skad cig ma gnyis par ma bsngad pa rnams la dngos por 'jog mi 'jog dang rgyu la bltos mi ltos kun nas mtshungs par bsgrub pa'o/ /lugs 'dis zhig pa yang 'jig par bzhed la gzhan dag gis zhig 'jig 'gal bar 'dod do/ /rigs pa drug cu pa'i 'grel pa las mar dang snying po zad pa mar me shi ba'i rgyur bshad pa lta bu rnams ni rgyun gyi zhig pa dngos por bsgrubs pa'i tshul yin no/ /skad cig dang po dus gnyis par zhig pa ni dngos su dgag bya bcad nas rtags dgos pas dgag pa yin la/ de yang zhig rgyu de bcad pa tsam ma yin gyi bcad pa'i dngos po zhig 'phangs pas na ma yin dgag yin no/ bye brag smra ba dang 'di gnyis dus gsum dngos por 'dod pa tsam du mtshungs kyang 'dod tshul shin tu mi mtshungs te/ lugs 'dis rdzas yod rnam pa thams cad du mi bzhed pa dang myu gu'i zhig pa yang zhig rgyu'i dngos po la brten nas skyes pa tsam gyis dngos por 'dod kyi zhig rgyu'i dngos po dang/ de dang rigs mthun pa'i dngos po gang yang myu gu zhig pa'i mtshan gzhir rigs pas bcal nas 'jog pa'i rgyu mtshan gyis de dngos por 'dod pa ma yin pa'i phyir ro/ /'di dag kyang shin tu rtags dka' ba'i gnas phra mo yin par gsungs pas zhib tu gzhung chen mo rnams las shes dgos so/ /brgyad pa dus gsum gyi rnam gzhag byed tshul thun mong ma yin pa ni/ myu gu lta bu la mtshon na rgyu rkyen las skyes zin pa'i myu gu rang gi dus gnyis par zhag pa ni myu gu 'das pa'i dus @118a @#/ /dang/ myu gu skyed byed kyi rgyu yod kyang dgun dus kyi zhing lta bu yul dus 'ga' zhig tu rkyen ma tshang ba'i dbang gis re zhig ma skyes pa ni myu gu ma 'ongs pa'i dus so/ /myu gu rang nyid skyes la ma 'gags pa ni myu gu da ltar ba'i dus so/ /des na 'das pa la da ltar ba las log pa tsam gyis mi chog par byung zin zhig pa'i cha zhig dgos pas gzhung chen mo rnams las byung la 'gags pa zhes kyang gsungs so/ /de'i byung la zhes pa ni gang 'das rgyu'i myu gu lta bu la bya'o/ /ma 'ongs pa yang ma sleb lugs khyad par ba zhig la dgongs nas rgyu yod kyang ma byung ba zhes gsungs so/ /'di dag ni mdo sde pa yan chad thams cad 'dra'o/ /'on kyang rang rgyud pa man chad kyis 'das pa dang ma 'ongs pa gnyis dngos med du 'dod cing de yang med dgag tu 'dod do/ / thal 'gyur ba'i lugs la dus gsum ga dngos por bzhed cing 'das pa dang ma 'ongs pa gnyis ma yin dgag tu bzhed de/ myu gu zhig pa'i sgras myu gu ma zhig pa gcod pa dang myu gu zhig pa myu gu la brten nas 'byung ba 'phen pa gnyis ka byed pa dang/ myu gu ma 'ongs pa'i sgras myu gu sleb pa gcod pa dang myu gu ma 'ongs pa nyid myu gu skye ba'i rkyen ma tshad pa'i dngos por 'phen pa gnyis ka byed pa'o/ /myu gu la sogs pa re re la dus gsum gsum du byed pa ma yin zhing 'das pa dang ma 'ongs pa gnyis rang las gzhan pa'i dngos po zhig zhig pa dang ma skyes pa'i cha nas 'jog dgos pas phal pa dang/ da ltar ba ni rang nyid da ltar bar 'jog pa dngos po gzhan zhig zhig ma zhig dang skyes ma skyes kyi sgo nas bzhag mi dgos pas gtso bo yin no/ /myu gu'i zhig pa 'das par 'jog @118b pa mi 'thad de/ de yang rag dus su skyes la ma 'gags pa'i phyir da ltar ba yin no zer na/ skyon med de/ myu gu zhig pa de nyid rang dus na rang nyid zhig pa ma yin kyang myu gu zhig pa yin la/ de bzhin du myu gu zhig pa'i zhig pa yang rang dus na rang nyid zhig pa ma yin kyang myu gu zhig pa skad cig dang po zhig pa yin pas spyir zhig par bzhag dgos pas da ltar ba ma yin gyi 'das pa kho na yin no/ /de'i phyir 'das pa'i rigs 'dra ji snyed cig byung yang dngos po gzhan zhig zhig pa'i sgo nas rang gi ngo bo bzhag dgos la ma 'ongs pa'i rigs 'dra ji snyed cig byung yang dngos po gzhan zhig ma skyes pa'i sgo nas rang gi ngo bo bzhag dgos so/ /de ltar ba ni de ltar mi dgos par rang nyid skyes la ma 'gags pa'i myu gu lta bu yin pas dus gsum po 'gal ba yin no/ /de lta na yang dus gsum phan tshun bltos nas grub pa yang mi 'gal te/ gzhan gnyis ltos tshul go sla la da ltar ba yang skyes la zhes pa'i tshig gis ma 'ongs pa gcod pa dang ma 'gags pa zhes pas 'das pa gcod pa la bltas dgos pa'i phyir/ mtshan nyid ni dngos po gzhan zhig skyes zin zhig pa'i cha 'das pa'i mtshan nyid/ dngos po gzhan zhig rang skyed byed kyi rgyu yod kyang rkyen ma chang ? bas ma skyes pa de ma 'ongs pa'i mtshan nyid/ dngos po gzhan zhig pa dang ma 'ongs pa'i cha gang yang ma yin zhing skyes la ma 'gags pa de de ltar ba'i mtshan nyid cas 'jog pa'am yang na stong thun las 'byung ba ltar bzhag pas chog go /myu gu'i dus su 'das pa dang myu gu'i @119a @#/ /'das pa sogs kyi khyad par yang shes dgos te/ grags che ba dang gzhan du shes par bya'o/ /gnyis pa khyad chos de dag thams cad kyi rtsa ba mthar gtugs pa rang mtshan 'gog lugs la/ 'jug pa rtsa 'grel las rigs pa bzhi bshad pa'i dang po ni/ dngos po rnams la rang gi mtshan nyid kyis grub pa'i rang bzhin yod na 'phags pa rnams kyis chos thams cad rang bzhin med par rtogs pa'i tshe ye shes des de dag dmigs dgos ? pa las ma dmigs pa'i phyir de med par 'gyur ro/ /de ltar na dngos po sngar yod pa phyis med pa ni de zhig pa yin la/ ? de'i 'jig rgyu yang ye shes des byas par 'dod dgos pas 'phags pa'i mnyam gzhag dngos po'i 'jig rgyur thal ba'o/ /gnyis pa ni/ dngos po rnams rang gi mtshan nyid kyis grub na skye ba'i tha snyad btags pa'i btags don la rigs pas dpyad pa'i tshe sa myug rang bzhin gyis gcig gam tha dad gang rung gis skye ba rigs pas btsal nas rnyed dgos te/ gzhan du na tha snyad tsam du 'gyur gyi rang gi mtshan nyid kyis grub par mi 'gyur ba'i phyir zhes pa ste/ tha snyad bden pa rigs pas dpyad bzod du thal ba 'phen pa'o/ /gsum pa ni/ dngos po rnams kyi skye ba tha snyad du rang gi mtshan nyid kyis grub pa mtha' bzhi'i skye 'gog gi rigs pas mi khegs na don dam du grub pa yang mi khegs par 'gyur te/ rang mtshan gyis grub na don dam par grub dgos pa'i phyir ro/ /rigs pa 'di gsum ga la rang rgyud pas lan 'debs @119b tshul dang de lta na'ang rang rgyud pas smras pa'i lan des skyon spong mi nus pa'i rgyu mtshan rnams kyang shes dgos so/ /bzhi pa ni/ rang gi mtshan nyid kyis yod na 'od srung gis zhus pa la sogs pa mdo du ma las chos rnams rang bzhin gyis stongs par gsungs pa mi 'thad par thal ba'o/ /'di yang mdo de dag gis sems tsam pa dang rang rgyud pa dag gis bkral ba'i lta ba rnams lta ba mthar thug ma yin par gsung lugs kyi rgyu mtshan rnams zhib tu shes dgos pa yod do/ /gsum pa de dag la brten nas mdo'i drang nges 'byed tshul ni/ 'khor lo dang por gang zag la bdag med lugs rags pa bshad nas phra mo ma bshad pa dang phung sogs rang gi mtshan nyid kyis grub par gsungs pa rnams drang don yin te/ dgongs gzhi tha snyad du yod pa tsam la dgongs nas dgos pa bdag med phra mo bstan na chad lta skye bas ra zhig snod du mi rung ba'i gdul bya rnams rim gyis rgyud sbyangs nas gzhug pa'i phyir du gsungs pa yin la/ sgra ji bzhin pa la gnod byed ni rang mtshan gyis yod pa 'gog pa'i rigs pa rnams yin pa'i phyir/ 'khor lo bar par gang zag dang chos la rang gi mtshan nyid kyis grub pa bkag nas tha snyad tsam du yod par gsungs pa ni nges pa'i don mthar thug pa yin te/ stong pa rten 'byung gi don du rtogs nus pa'i theg pa chen po'i rigs can gyi gdul bya dbang rnon la gsungs pa'o/ /de la yang rang rgyud ? pa lugs gnyis dang mi 'dra bar lugs dam pa 'di pas 'khor lo bar pa'i nang tshan gyi yum 'bum pa lta bu dgag bya la don dam gyi khyad par dngos su @120a @#/ /sbyar ba rnams su ma zad shes rab snying po lta bu don dam gyi tha snyad dngos su ma sbyar yang rang bzhin gyis stong pa ste rang mtshan gyis stong pa'i khyad par dngos su sbyar ba dang/ de tsam yang ma sbyar bar spyir skye ba med 'gag pa med ces pa lta bu zab mo stong pa nyid ston pa'i mdo mtha' dag nges don gyi mdo yin par 'dra bar bzhed de/ brjod bya rigs mthun pa'i mdo sde gcig la don dam gyi khyad par sbyar phyin de dang brjod bya mthun pa'i mdo sde gzhan la yang don gyis sbyar ba yin pa'i phyir/ dper na da ltar gyi rtsom pa po gcig gis brtsams pa'i bstan bcos brjod bya mthun pa gcig tu byung ba rnams de ma byung ba'i sar yang 'khyer dgos pa dang 'dra'o/ /'khor lo tha mar mtshan nyid gsum la rang gi mtshan nyid kyis yod pa dang med pa'i khyad par gsungs pa ni drang ba'i don te/ de yang dgongs gzhi ni ngo bo nyid dang po gnyis dang phyi ma la sems tsam pas 'dod pa ltar gyi ming brngas bzhag ma bzhag gi khyad par tha snyad tsam du yod pa la dgongs pa'o/ /dgos pa ni gdul bya theg chen gyi rigs can yin yang re zhig chos thams cad kyi steng gi stong pa dang rten 'brel don gcig tu rtogs mi nus pa la sngon du rags pa'i chos kyi bdag med bstan ta rgyud sbyangs nas phyis phra ba'i chos kyi bdag med la gzhug pa'i phyir yin no/ /sgra ji bzhin pa la gnod byed ni chos thams cad rang mtshan gyis grub pas stong pa'i phyogs la rigs pa'i gnod pa cung zad kyang med cing rang mtshan gyis grub par 'dod pa'i phyogs la bya byed thams cad bzhag tu mi rung bar sgrub pa'i rigs pa rnams so/ /de yang dgongs 'grel nas bshad pa'i 'khor lo gsum gyi drang nges 'jog tshul yin gyi spyir 'khor lo @120b dang po yin tshad drang don du bzhed pa ma yin te/ 'khor lo dang por gang zag dang chos la rang bzhin med par gsungs pa rnams nges don yin pa'i phyir ro/ /de ltar na rnam rig pas ngo bo nyid gsum la rang gi mtshan nyid kyis yod med kyi khyad par phye nas bkral ba de dgongs 'grel gyi mdo'i don yin kyang gsung pa po ston pa'i dgongs pa min la/ mdo'i don yin pa yang gdul bya'i bsam pa'i dbang gis brjod bya de lta bu ston pa yin pas na de bkag pas mdo'i don bkag par yang mi 'gyur la/ lugs mi mthun pa gnyis gsungs pas gsung ba po la nang 'gal yod par yang mi 'gyur ro/ /'di la phal mo che dag gsung ba po ston pa dang mdo'i dgongs pa yin kyang de gnyis kyi mthar thug gi dgongs pa min zhes zar mod kyang legs bshad snying po'i sgras zin ltar gsung pa po'i dgongs pa ma yin kyang gsung rab kyi brjod bya'i don yin no zhes smras na don dang mthun zhing tshig la yang 'grig par 'gyur te/ gzhan dbang la rang gi mtshan nyid kyis grub pa yul dus grub pa'i mtha' 'gar yang 'jog mi nus pa'i phyir ro/ /'on te legs bshad snying po las/ re zhig zab mo'i don rdzogs par ston pa'i snod du mi rung ba'i gdul bya'i blo la bltos te rang gi mtshan nyid kyis grub pa yod la/ zhes gsungs pa ji ltar drang zhe na/ skyon med de/ de ni de'i blo la bltos te rang mtshan gyis yod par ston pa mdo sde'i don yin par bshad pa tsam yin pa'i phyir ro/ /thal 'gyur ba rang lugs kyi mtshan nyid gsum gyi rnam gzhag ni ji ltar snang ba ltar gyi chos can kun rdzob pa 'di gzhan dbang dang/ de nyid yul gyi gnas lugs sam gshas ? lugs su sgro btags pa'i cha kun brtags dang/ de ltar sgro btags pas stong pa'i cha yongs grub tu 'jog pa @121a @#/ /yin no/ /gsum pa lam gyi khyad par ni/ lugs 'di la theg pa gsum gyi lam so sor 'jog pa dang nyan rang gi lam la yang zhugs pa dang gnas pa'i skyes bu chen po rnams kyi rnam par bzhag pa dang/ rang rgyal la tshogs spyod gnyis dang bse ru lta bu sogs kyi rnam gzhag kyang byed do/ /nyan rang gnyis kyi bgrod byed lam la shes rab dang thabs kyi cha gnyis las shes rab la gang zag gi bdag med dang chos kyi bdag med phra mo gnyis ka rtogs dgos kyi/ rang rkya thub pa'i rdzas yod kyis stongs pa'i bdag med tsam rtogs pas theg pa gsum gang gi yang 'phags lam 'thob mi nus par bzhed do/ /der ma zad gzung 'dzin rdzas tha dad kyis stongs pa'i chos kyi bdag med tsam dang/ blo gnod med la snang ba'i dbang gis bzhag tsam ma yin pa'i yul rang gi sdod lugs kyi ngos nas grub pas stongs pa'i bdag med tsam la ji tsam goms par byas kyang chos thams cad rang mtshan gyis grub pas stongs pa'i bdag med phra mo ma rtogs na 'phags lam 'thob par mi nus so/ /gal te de lta na nyan rang 'phags pa rnams kyis shes bya'i sgrib pa yang spong bar 'gyur te/ blo yul gyi gnas lugs la ji lta ba bzhin du zhugs pa'i lam goms pa rab kyi mthar thug pa las phyin ci log sa bon dang bcas pa drungs nas 'byin par nus pa'i phyir ro zhe na/ skyon med de/ bden 'dzin sa bon dang bcas pa spangs kyang nyon sgrib spangs par zad kyi shes sgrib spangs pa ma yin la/ gnyis snang 'khrul pa'i bag chags ni bdag med pa'i lta ba tsam goms par byas pa kho nas spong mi nus pa'i phyir ro/ /theg pa che chung la chos kyi bdag med rdzogs par sgom mi sgom gyi khyad par yang yod do/ @121b theg dman pas ni rigs pa mdor bsdus pa zhig gis de kho na nyid tshad mas grub na de nas rigs pa'i sgo mi 'dra ba du ma la brten nas yang dang yang du rnam pa du mar dpyod pas de kho na nyid la blo gros ches cher rgyas par mi byed kyi rigs pa mdor bsdus pa de kho nas bdag med pa gnyis kyi don la 'jog par byed do/ /theg chen pas gzhi re re'i steng du yang rigs pa mi 'dra ba re re la brten nas bden med nges par byed pa dang/ gzhi gcig gi steng du yang rigs pa mi 'dra ba'i sgo du mas de kho na nyid la blo shin tu rgyas par byed pa'i phyir ro/ / thabs kyi cha la ni theg pa dman pa rnams kyis rang don 'ba' zhig gi ched du lhag pa tshul khrims kyi bslab pa shin tu brtan par byed cing 'phan med par bya ba'i phyir srog bzhin du gces par byed la/ shin tu sbyangs pa du mas bsgrubs pa'i ting nge 'dzin gyi khyad par 'jig rten dang 'jig rten las 'das pa du ma la yang goms par byed pa dang/ bden pa bzhi'i khyad chos rnams dang rten cing 'brel par 'byung ba bcu gnyis kyi don rnam pa du mas goms par byed la/ tshangs pa'i gnas pa bzhi yang goms par byed do/ /de dag la byams pa dang snying rje tshad med pa yod kyang snying rje chen po ni med do/ /mkhas pa dag theg dman la snying rje chen po yod kyang gzhan don khur du 'khyer ba'i lhag bsam 'dren nus kyi snying rje chen po med pa byang chub lam rim gyi dgongs par mdzad pa yang mkhas pa'i bshad pa'i rnam gangs yin mod kyi/ de lta na yang 'dir byams pa dang snying rje la chen po'i sgra 'jug pa'i chen po ni spyir snying rje che ba tsam la mi byed par che lugs mi 'dra ba zhig dgos par snang ste/ mdo sde rgyan las/ dmigs pa che ba nyid dang ni/ /de bzhin sgrub pa gnyis dag @122a @#/ /dang; ;ye shes brtson 'grus rtsom pa dang/ /thabs la mkhas par gyur pa dang/ /yang dag 'grub pa chen po dang/ /sangs rgyas 'phrin las chen po ste/ /chen po 'di dang ldan pa'i phyir/ /theg chen zhes ni nges par brjod/ / ces theg chen gyi chos thams cad chen po bdun gyis khyad par du byas tshul gsungs pa ltar gyi chen po de lta bu dag dang ldan pa zhig la snying rje chen por bya dgos par mngon no/ /de'i phyir 'phags pa blo gros mi zad pa las snying rje chen po kho na theg pa chen po yang dag par 'grub pa'i sngon du 'gro ba yin par bstan pa dang/ 'phags pa ga ya gau ri las kyang snying rje chen po byang chub sems dpa'i spyod pa'i rtsom pa dang gnas su gsungs pa dang/ mdo sde phal po che las snying rje chen po nyid byang chub sems dpa' nyan rang las 'phags pa'i khyad chos su gsungs pa sogs kyi skabs su snying rje chen por gsungs kyi nyan rang la snying rje chen po yod pa dang/ de theg chen gyi snying rje chen po dang mi 'dra ba'i khyad par ci yang ma gsungs pa dang/ dpal ldan zla ba'i skyabs gsum bdun cu pa las/ rang don la gzhol de dag ni/ /snying rje chen po dang bral ba'i/ /rang rgyal rgyal ba'i gsung las skyes/ /theg pa chen por mi bsngags so/ /zhes nyan rang la snying rje chen po med par bshad pa dang/ byang chub lam rim las kyang byams pa dang snying rje tshad med pa ni nyan thos dang rang sangs rgyas la yang yod kyang zhes nyan rang la yod rgyu de byams pa dang snying rje tshad med par gsungs kyi snying rje chen por ma gsungs pa dang/ sras kyi thu bo gnyis kyi gsung rab rnams las kyang nyan rang la snying rje chen po med pa sgra sor bzhag tu mdzad 'dug pas snying rje tshad med @122b yod ? kyang snying rje chen po med par byas na gzhung chen po du ma'i go ba la phan tshabs che bar snang ngo/ /snying rje chen po skyes pa'i tshad sogs la yang dpyad rgyu mang ste re zhig bzhag go/ lhag bcas lhag med kyi myang 'das ni theg dman gyis nyon mongs pa zad par spangs pa'i che mnyam gzhag gi don ? phung po'i snang ba lhag ma med par nub pa'i 'gog pa ni de'i lhag med kyi myang 'das dang/ phung po'i snang ba ma nub pa'i rjes thob kyi tshe de'i lhag bcas kyi myang 'das su 'jog pa yin no/ /theg pa chen po'i lam la mos spyod kyi sa ni/ sems bskyed brtan pa nas tshogs lam du 'jog dgos mod kyang grangs med gsum gyi mgo rtsom pa la/ sangs rgyas sogs dmigs dad pa dang/ zhes sogs dang/ bzang dang smon pa'i stobs can dang/ zhes sogs kyis bshad pa ltar gyi mtshan nyid du ma zhig tshang dgos par snang bas zhib tu phyed dgos so/ /de dag gis mtshon te zhib tu dpyad na lam phung po gsum pa la gnas pa yang mtha' yas pa zhig snang ngo/ /sbyor lam ni stong nyid rtogs pa'i lhag mthong gsar du thob pa nas 'jog dgos na'ang dman lam sngon du song ba la ji ltar bya dgos pa dpyad par bya zhing phal cher bsod nams kyi zin tshul khyad par ba zhig gi mtshams nas 'jog dgos pa 'dra'o/ /drod dang rtse mo'i dus su yul yul can gyi gnyis snang yod cing de yod pa myong stobs kyis nges nus/ bzod pa'i dus na mnyam gzhag la bsgom yul gyi snang ba mi nges kyang sgom byed kyi snang ba yod/ chos mchog gi dus su bsgom bya sgom byed kyi snang ba phal cher log kyang nges mi nus par bla ma snga ma rnams bzhed de/ ka ma la shi' la'i sgom rim dang po dang mthun par snang ngo/ /'on kyang der bshad pa dang @123a @# / /lugs 'di gnyis la zhib cha cung zad dgos par snang yang gtso bo ni stong pa nyid la mnyam par bzhag pa'i tshe gnyis snang gi spros pa je srab tu song ba'i rim pa las drod sogs bzhir phye ba tsam du ni 'dra ba yin no/ /'phags pa'i lam la sa bcu'i mnyam gzhag ye shes kyis chos nyid rtogs tshul la khyad par med kyang rjes thob kyi gnas skabs su yon tan gyi rten byed pa'i khyad par mi 'dra ba du mas sa bcur bzhag par gsungs so/ /de ni yon tan 'thob tshul gyi khyad par dang/ mthu phul du byung ba 'thob pa'i khyad par dang/ phar phyin lhag pa'i khyad par dang/ rnam smin gyi skye ba 'dzin tshul gyi khyad par bzhi'o/ /dang po ni/ sa dang po la skad cig thang cig yud tsam gcig la sangs rgyas brgya mthong ba dang/ sangs rgyas brgya'i byin rlabs rtogs pa dang/ bskal pa brgyar gnas pa dang/ sngon dang phyi ma'i mtha'i bskal pa brgyar ye shes kyi mthong ba 'jug pa dang/ ting nge 'dzin brgya phrag gcig la snyams par 'jug ldang byed pa dang/ zhing khams brgya g.yo bar byed pa dang/ zhing khams brgya snang bar byed pa dang/ sems can brgya smin par byed pa dang/ sangs rgyas kyi zhing brgyar 'gro ba dang/ chos kyi sgo brgya 'byed pa dang/ rang gi lus la lus brgya ston par byed pa dang/ de'i brgya po re re zhing yang 'kher rgyal sras brgya dang bcas par ston pa ste yon tan brgya phrag bcu gnyis so/ /de bzhin du sa gnyis pa la de dag stong phrag bcu gnyis so/ /gsum pa la 'bum phrag bcu gnyis so/ /bzhi pa la bye ba phrag brgya pa bcu gnyis so/ /lnga pa la bye ba phrag stong bcu gnyis so/ /drug pa la bye ba brgya phrag stong bcu gnyis so/ /bdun pa la @123b bye ba khrag khrig 'bum phrag bcu gnyis so/ /brgyad pa la ni stong gsum gyi 'jig rten gyi khams 'bum gyi rdul phra rab snyed kyi grangs dang mnyam pa'i yon tan sde tshan bcu gnyis dang/ dgu pa la stong gsum grangs med pa 'bum phrag bcu'i rdul phra rab snyed kyi grangs dang mnyam pa'i sde tshan bcu gnyis dang/ bcu pa la sangs rgyas kyi zhing brjod du med pa'i yang brjod du med pa'i rdul phra rab kyi grangs dang mnyam pa'i yon tan sde tshan bcu gnyis 'thob par gsungs so/ /gnyis pa mthu phul du byung ba'i khyad par ni sa so so'i skabs kyi dri ma sbyong pa'i stobs dang lam bgrod pa'i stobs gong nas gong du 'phel ba la bya dgos shing/ de la yang sa dang por chos nyid rtogs pa'i blo yul chos nyid dang gnyis snang phra mos kyang bar ma chod par chu la chu bzhag gi tshul du song ba'i ye shes thog mar rgyud la skyes pa na mthong lam thob pa dang theg chen gyi bden pa mngon sum du gsar du rtogs pa dang theg chen gyi 'phags lam thob pa dang sa dang po thob pa rnams dus mnyam pa'i tshul gyis 'byung zhing/ skad cig gnyis par mthong spang spangs pa'i spangs pa rang gi rgyud steng du mngon du byas pa na mthong lam rnam grol lam mngon du byas pa yin no/ /de lta bu'i mthong lam ni chos ma chag tha ma'i ye shes dang mnyam gzhag thun gcig gis bsdus pa yin zhing sa 'pho tshul yang mnyam gzhag nas mnyam gzhag tu 'pho ba kho na yin no/ /'di la shes bzod skad cig ma bcu drug gi rnam gzhag kyang shes par bya zhing bden bzhi'i chos nyid 'jal ba'i ldog pa ni chos bzod bzhi dang bden bzhi'i chos nyid kyi yul can ldog pas phye ba bzhi rtogs pa'i cha ni rjes bzod bzhi ste bzod pa brgyad bar chad med lam dang/ de lta bu'i tshul gyis @124a @#/ /chos shes bzhi dang rjes shes bzhi ni rnam grol lam du 'jog pa ni lugs 'di la yang 'dra bar rgyal tshab thams cad mkhyen pa bzhed de/ rang rig khas len pa ni ma yin no/ /zhes mkhas pa snga ma dag bzhed la/ phyis kyi yig cha rtsom pa po thams cad zhal mthun par rgyal tshab rje'i dgongs pa rim pa ltar yul dang yul can gyi chos nyid rtogs pa la dgongs pa dang/ rjes kyi nges shes 'dren pa'i nus pa 'jog lugs mi 'dra ba la bshad dgos kyi gzhan du na stong nyid mngon sum du rtogs pa'i mthong lam mnyam gzhag ye shes des bden gnyis cig car du dngos su rtogs pa sogs su 'gyur ro zhes gsungs pa'i khas len la phyi ma bde bar snang na'ang gzhung gi dgongs pa gang yin da dung brtag par bya'o/ /sa dang po'i sgom lam yod med la yang mi mthun pa gnyis su snang mod/ sgom lam yod pa'i dbang du byas na sa dang po'i sgom lam la sgom spang chen po'i chen po la phra rags gnyis su phye ba'i rags pa'i dngos gnyen bar chad med lam dang de spangs pa'i rnam grol lam gnyis 'jog par rang re'i mkhas pa rnams kyi gsung rgyun las 'byung ba ltar bya'o/ /sgom spang lhan skyes chen po'i phra ba ni sa gnyis pa'i sgom lam bar chad med lam dang sbyor/ chen po'i 'bring dang sa gsum pa'i de sbyor/ chen po'i chung ngu ngang sa bzhi pa'i de sbyor/ 'bring gi chen po dang lnga pa'i de sbyor/ 'bring gi 'bring dang drug pa'i de sbyor/ 'bring gi chung ngu dang sa bdun pa'i de sbyor/ chung ngu skor gsum ni cig car du spong ba yin zhing de yang rang re'i mkhas pa 'ga' zhig gis sa bdun pa'i tha ma'i char chung ngu skor gsum gyi dngos gnyen bar chad med lam bskyed cing de spangs pa'i rnam grol lam thob pa @124b dang sa brgyad pa thob pa dus mnyam pa yin te/ sa brgyad pa'i ye shes la nyon sgrib kyis dag pa'i ye shes kyis khyab pa'i phyir ro zhes bzhed do/ /yang rang re'i mkhas pa kha cig ni sa brgyad pa'i thog ma'i ye shes la sgom spang nyon mongs chung ngu skor gsum gyi dngos gnyen bar tshad med lam 'jog cing/ sa brgyad pa'i dkyil stod kyi bar chad med lam dang shes sgrib chen po spang gnyen du sbyor bar bzhed de/ sa bdun pa man chad du bskal pa 'bum la spang mi nus pa yang sa 'di pas yud tsam gyis spong nus pa sgom spang nyon mongs chung ngu skor gsum la byed dgos pa'i phyir dang/ chags pa med pa'i blo ni skyon rnams dag dang lhan cig mi gnas phyir/ /sa brgyad pa la dri ma de dag rtsa bcas nye bar zhi 'gyur zhing/ /zhes sa brgyad pa'i gnas skabs su bden 'dzin sa bon dang bcas pa zad par gsungs pa'i phyir ro/ /zhes gsungs te/ lugs gnyis las rje'i dgongs par gang son brtag par bya'o/ /shes sgrib chen po dang sa brgyad pa'i shes sgrib kyi dngos gnyen bar chad med lam sbyor/ shes sgrib 'bring dang dgu pa'i de sbyor/ chung ngu rags pa dang bcu pa'i thog ma'i de sbyor/ chung ngu'i phra ba dang rgyun mtha'i bar chad med lam sbyor ba yin te/ rnam grol lam rnams kyang des shes sla'o/ /rgyun mtha'i bar chad med lam gyis drangs pa'i rnam grol lam ni mi slob lam yin no/ /'di dag rigs nges kyi dbang du byas pa yin cing dman lam sngon du song ba la ma dag sa bdun gyi gnas skabs kyi spang bya spong lugs ni/ rang re'i mkhas pa la la dag dgongs 'grel nas bshad pa'i sa bcu'i ngo skal gyi kun rmongs nyi shu dang gnas ngan len bcu gcig yod pa dang/ sa gong ma'i yon tan brgya phrag bcu @125a @#/ /gnyis la sogs pa 'thob pa la gegs byed kyi sgrib pa yod pas de rnams spong ba'i bar chad med lam yod par bzhed do/ /yang mkhas pa kha cig ma dag sa bdun gyi gnas skabs su stong nyid mngon sum du rtogs pa'i mnyam gzhag ye shes yod kyang de 'dra'i bar chad med lam dang rnam grol lam med la/ rjes thob kyi bsod nams kyi tshogs rgya chen po gong du 'phel ba'i khyad par gyis yon tan gong ma rnams mngon du byed pa'i rim pa 'thad cing de nyid la brten nas sa'i rim pa 'jog pa yin no; ;zhes bzhed par snang ste/ gang ltar dman lam sngon du song bas kyang sa brgyad pa ma thob bar du shes sgrib cung zad kyang spong mi nus shing/ shes sgrib spong ba la bskal pa grangs med pa gnyis sam nyer bdun lta bu'i bsod nams kyi tshogs kyis zin pa zhig nges par dgos pa ni/ rje bla ma'i bzhed pa mthar thug yin cing gnad kyang shin tu che ste/ theg chen pa gzhan gyi lugs la yang shin tu mkho bar snang ngo/ /'on kyang dgongs 'grel las bshad pa de dag 'dir khas len mi dgos pa ni gong du bshad zin to/ /gsum pa phar phyin lhag pa'i khyad par ni/ /sa dang por sbyin pa'i pha rol tu phyin pa lhag par thob pa dang/ de bzhin du tshul khrims nas shes rab kyi bar lnga dang thabs la mkhas pa dang smon lam dang stobs dang ye shes kyi pha rol tu phyin pa rnams sa gnyis pa nas bcu pa'i bar la lhag par thob pa'o/ /de la sbyin pa nas ye shes kyi bar gyi phar phyin bcu po mtha' dag la pha rol tu phyin pa'i don ni pha rol 'dir phyin pa zhes pa'i las kyi sgra sbyar ba ni sangs rgyas kyi @125b sa kho na na yod cing slob lam na med la/ 'dis pha rol tu phyin pa zhes byed pa la sbyar na slob lam na yang phar phyin bcu po bzhag tu yod do/ /de gnyis gang yin kyang phar phyin mtshan nyid par 'jog pa la ni khyad par med do/ 'dis bgrod pa rgyu'i theg pa dang 'dir bgrod pa 'bras bu'i theg pa gnyis ka yang theg pa mtshan nyid par 'jog pa bzhin no/ /des na rnam bshad snying po'i rgyan gyi gsung gi zin tshod kyi tshig re gnyis la 'khrul ba kha cig slob lam na sher phyin med la shes rab kyi pha rol tu phyin pa yod ces zer ba dang/ yang 'ga' zhig slob lam na phar phyin drug ka med kyi phar phyin drug gi nyams len yod ces zer ba rnams kyang legs par mi sems so/ /sa re re na yang phar phyin gzhan rnams med pa ma yin mod kyi sa der phar phyin de lhag par gsungs pa ni/ sa dang po la mtshon na sbyin pa nyams su len pa la rtogs pa'i mthu phul du byung ba de'i tshod tsam tshul khrims la sogs pa nyams su len pa la med pa'i don te/ sa der bdag gi lus dang/ phyi'i yo byed gtong ba la sbyin pa'i phar phyin dang 'gal ba'i kun 'dzin gyi chags pa chung zad kyang mi 'byung bar gsungs pa ltar spyod nus la/ tshul khrims la rtsa ltung dang/ rang bzhin gyi kha na ma tho bas nam yang gos mi srid kyang bcas 'gal gyi 'chal khrims kyi dri ma mtha' dag gis rmi lam du yang gos pa med pa sa gnyis pa'i tshod tsam mi nus pa'o/ /sa gnyis pa la sbyin pa lhag pa yar ldan du yod pa'i steng du phar phyin lhag ma dgu'i nang nas tshul khrims kyi nyams len lhag pa'o/ /de bzhin du sa phyi ma rnams la yang sbyar bar bya zhing sa re re'i thad kyi @126a @#/ /phar phyin lhag tshul tshod 'di tsam nas phar phyin de lhag par 'jog ces pa'i rnam gzhag phyi ma rnams la re re nas bya dgos shing/ de yang cung zad dka' bar yod pas zhib par 'jug pa rtsa 'grel dang byang sa dang rje'i gsung rnams gung bsgrigs nas shes dgos so/ /bzhi pa rnam smin gyi skye ba 'dzin tshul gyi khyad par ni/ spyir byang chub sems dpas skye ba 'dzin tshul la dbang gi skye ba dang rnam smin gyi skye ba gnyis yod la de'i snga ma la bzhi ste/ mos pas spyod pa 'dod par las kyi dbang gis skye ba dang/ sa thob pa yang ngan 'gror smon lam gyi dbang gis skye ba dang/ bsam gtan dang gzugs med thob kyang 'dod par ting nge 'dzin gyi dbang gis skye pa dang/ sprul pas dga' ldan gyi gnas la sogs par skye ba dbang 'byor ba'i dbang gis skye ba ste bzhi'o/ /byang chub sems dpa' sa dang po nas kyang rtsol ba shin tu bsten na yid kyi rang bzhin gyi lus phra mo blang du rung mod kyang dka' dka' ltar snang la lhun gyis grub pa'i tshul gyis yid lus phra mo blangs nas srid pa'i 'gro ba rnams su bdag nyid kyi lus rnam pa sna tshogs su ston pa ni sa brgyad pa nas thob ste/ der dbang rnam pa bcu po thob par 'gyur ba'i phyir ro/ /'dir dpal 'phreng seng ge'i nga ro'i mdo las yid lus rnam pa gsum gyi rnam gzhag gsungs pa'i phyi ma de yid lus phra mo dang de yang theg pa chen po gzhan nas bshad pa'i yid lus phra mo dang mi 'dra ba'i khyad par rnams shin tu rtogs dka' bar yod cing/ paN chen byams pa gling pa chen pos dpal 'phreng gi mdo'i yid lus @126b gsum pa'i rnam gzhag bshad pa mkhas pa gzhan gyi bshad srol dang cung mi 'dra bar snang ngo/ /sa brgyad pa na gzhon nu'i sa dang/ dgu par rgyal chab thob la bcu par ni 'khor lo bsgyur pa ltar rgyal ba rnams kyis dbang bskur ba thob bo/ /de'i 'thob tshul ni sa bcu par ting nge 'dzin grangs med pa 'bum phrag bcu thob ba'i tha ma la thams cad mkhyen pa'i ye shes dang khyad par med par dbang bskur ba dang ldan pa zhes bya ba'i ting nge 'dzin mngon du 'gyur ro/ /de ma thag tu stong gsum 'bum phrag bcu'i gtos dang mnyam pa'i rin po che chen po'i padma rin po che rnam pa thams cad kyi mchog dang ldan pas spras pa zhes bya ba nas rgyas par stong gsum 'bum phrag bcur chad pa'i rdul phra rab rdul snyed kyi padma'i 'khor dang ldan par 'gyur zhing/ byang sems de'i lus kyang de dang 'tshams shing rkyen du bab par gnas so/ /de ting nge 'dzin de thob ma thag tu padma de la 'dug par kun tu snang zhing/ de de la 'dug pa dang sangs rgyas bcom ldan 'das sangs rgyas kyi zhing kun nas gdan 'dzom pa rnams kyis mdzod spu nas 'od zer dag phyung nas byang sems de la dbang bskur bar sa bcu pa las gsungs so/ /'di dag gi tshul legs par shes na 'tshang rgya kha ma'i byang chub sems dpa'i sku'i bye brag rnams sangs rgyas ma thag tu ji ltar 'gyur ba'i dpyad pa dang/ longs sku chung ngu'i rnam gzhag kyang 'thad mi 'thad sogs shes par nus te/ go mkhan dang shod mkhan nyin mo'i skar ma bas kyang dkon par snang ngo/ /rnam smin gyi skye ba ni phal cher sa dang po nas rim pa bzhin du dzam bu gling dang/ gling bzhi pa dang/ sum cu rtsa gsum @127a @#/ /dang; 'thab bral dang/ dga' ldan dang/ 'phrul dga' dang/ gzhan 'phrul dbang byed dang/ stong spyi phud dang/ stong bar ma dang/ gnas gtsang ma'i lha'i rgyal por skye ba 'dzin pa'o/ /bzhi pa 'bras bu'i rnam par bzhag pa bshad pa la/ lam gyi gnas skabs su byang chub sems dpa' rnams kyis brjod du med pa'i yang brjod du med pa'i sbyin pa la sogs pa pha rol tu phyin pa rnams la rnam pa du mar goms par byas pa dang/ tshad med pa'i smon lam dang/ bsngo ba dang/ thabs la mkhas pas yang dang yang du zin par byas pa las mtha' yas pa'i shes bya'i de kho na nyid zab mo la ye shes ro gcig tu zhugs pa'i dga' ba rnam pa du mar nyams su myong ba yongs su brtan par byas pa las 'bras bu rang dang gzhan gyi don gnyis mthar thug pa'i gzugs dang chos kyi sku 'thob par byed de/ rin chen 'phreng ba las/ sangs rgyas rnams kyi gzugs sku 'dar/ /bsod nams tshogs las byung ba ste/ chos kyi sku ni mdor bsdu na/ /rgyal po ye shes tshogs las 'khrungs/ /zhes so/ de yang yon tan dpag tu med pa'i byang chub ni rgyu'i tshogs dpag tu med pa las 'byung bar 'gyur gyi phyags re ba las ni ma yin te/ de ltar yang de nyid las/ gang zhig dpag med dus gnas te/ /lus can dpag tu med don du/ /byang chub dpag tu med 'dod cing/ /dag pa dpag tu med byed pa/ /des ko byang chub dpag med kyang/ /dpag tu med pa rnam bzhi yi/ /tshogs kyis ring po mi thogs par/ /ji lta bur na 'thob mi 'gyur/ /zhes so/ /de yang sku bzhi mngon du byed tshul dang/ /sku bzhi'i khyad @127b par dang/ yon tan nam 'phrin las bsam gyis mi khyab pa'i rnam gzhag ste gsum mo/ /dang po ni/ sa bcu'i rgyun gyi tha me'i shes bya'i sgrib pa shin tu phra ba'i dngos gnyen gyi bar chad med lam de nyid chos thams cad kyi de bzhin nyid dang ro gcig tu zhugs pas gnyis snang phra mos kyang bar ma chod pa'i chu la chu bzhag lta bu yin kyang mnyam gzhag de'i steng na rang gi rjes thob de ma thag tu sangs rgyas kyi gsang ba gsum gyi yon tan bsam gyis mi khyab pa mtha' dag par ma chad par skad cig gcig la 'byung du rung ba'i rgyu'i nus ba mtha' dag yongs su rdzogs pa'i tshul gyis yad pa yin no/ /bar chad med lam de'i skad cig gnyis par rnam grol lam skyes pa'i tshe shed bya ji lta ba la gnyis snang phra mos kyang bar ma chod pa'i chu la chu bzhag gi tshul du mnyam par bzhag bzhin du ye shes de'i gzigs ngor ji snyed pa'i shes bya'i gsal ba'i dbye ba mtha' yas pa dag kyang lag mthil du skyu ru ra rlon pa bzhag pa ltar mngon sum du gzigs par 'gyur te/ gnyis snang 'khrul pa'i bag chags drungs nas phyung bas shes bya thams cad la chags pa dang thogs pa mi mnga' ba'i spyan yongs su dag pa thab pa'i phyir ro/ /de la ni shes bya'i sgrib pa zad par spangs pa dang yang dag pa'i mtha' mngon du byas pa dang chos kyi sku mngon du byas pa dang chos thams cad rnam pa thams cad du mngon par rdzogs par byang chub pa zhes bya bar 'jog pa yin no/ /de'i tshe byang sems rgyun mtha' ba'i mchan dpes brgyan pa'i sku de nyid kyi rigs 'dra phyi ma yang longs spyod rdzogs pa'i skur 'gyur @128a @#/ /zhing; sprul pa'i sku yang longs spyod rdzogs pa'i sku de las rnam par rtog pa med bzhin du 'gro ba'i don rnam pa sna tshogs pa mdzad pa'i 'gro ba rnams kyi mos pa dang 'tshams pa'i sna tshogs pa'i rnam pa can gyi sku 'dzin pa nyid yin te/ dpal ldan zla ba'i zhabs kyis/ sangs rgyas nyid kyi gzugs kyi sku/ /mtshan dang dpe byad dag gis 'bar/ /'gro ba rang gi mos pa yi/ /dbang gis sna tshogs sku 'dzin gang/ /zhes gsungs so/ /des na de'i tshe chos longs sprul pa'i sku cig car du mngon du byed pa yin te/ srid pa dang zhi ba mnyam pa nyid kyi sbyor ba dang/ zhing dag pa bla na med pa'i sbyor ba dang/ thabs mkhas kyi sbyor ba gsum gi'i goms pa mthar thug pa'i 'bras bu cig car du grub pa'i phyir dang/ de'i tshe yon tan thams cad yongs su rdzogs pa la gegs byed cung zad kyang med pa'i phyir ro/ /gang zhig rnam bshad snying po'i rgyan gyi gsung gi sgras zin 'ga' zhig gi don la zhib tu dpyad pa med par myur du kha tshon gcod pa la dga' ba kha cig gis rgyun mtha'i bar chad med lam gyi skad cig gnyis pa la chos dang longs spyod rdzogs pa'i sku mngon du byas pa de'i tshe mchog gi sprul pa'i sku de dang tshogs pa gcig tu med pas mchog gi sprul dku la de'i rjes su rim can du grub pas khyab par 'dod pa ni rigs par mi sems te/ gsang ba bsam gyis mi khyab pa'i mdo la sogs pa las rnam par rtog pa med bzhin du skad cig de nyid la mdzad pa bcu gnyis rnam grangs du ma @128b cig car du ston par bshad pa dang/ 'phags pa thogs med kyis dbang 'byor ba rnam pa lngas chos kyi skur dbang 'byor ba cig car du 'thob par bshad pa dang/ mdo dang shing rta chen po phal mo ches gzugs kyi sku gnyis nor bu dang de'i 'od bzhin du bshad pa dang/ mdo sde sa bcu pa la brten nas/ dpal ldan zla bas kyang/ skad cig de kho na nyid la longs spyod rdzogs pa'i sku de'i ba spu'i khung bu re re las kyang sprul pa'i sku bsam gyis mi khyab pa zhing dpag tu med par cig car du ston par bshad pa dang/ theg pa chen po gzhan du yang sku rnam pa gsum cig car du 'grub pa rnam grangs du mar bshad pa sogs mdo rgyud dgongs 'grel du ma dang mi 'grig pa'i phyir ro/ /rigs pas kyang ma yin te/ sbyor ba rnam pa gsum las thabs mkhas sbyor ba kho na mthar ma thug pa'i sangs rgyas 'phags pa yod par thal ba dang/ rang gi mchog gi sprul pa'i skus gdul bar bya ba'i sems can rnams 'dul ba'i rgyu'i nus pa yongs su rdzogs pa la gegs dang bcas pa'i sangs 'phags yod par thal ba sogs dang/ sprul pa'i sku sprul pa rtsol ba'i khyad par la ltos par thal ba dang/ rim pa dang rim pa ma yin pa'i bya ba'i nges pa sems can gyi mos pa'i dbang mos pa'i dbang tsam ma yin par sangs rgyas rang gi nus pa'i ngos nas kyang bzhag dgos pa sems can dang 'dra bar thal ba sogs bzlog tu med pa'i phyir ro/ /des na rgyal tshab thams cad mkhyen pa'i dgongs pa ni longs spyod rdzogs pa'i skus bdag rkyen byas pa la brten nas 'dzam bu gling lta bur mchog gi sprul pa'i @129a @#/ /sku ston pa'i khyad par 'ga' zhig la gdul bya'i snang tshod la bltos te snga phyi'i rim pa'i khyad par bzhag tu rung ba yang yod pa la bya ste/ dpal ldan zla bas/ slar yang mi g.yo sku mnga' khyod kyis srid gsum byon nas sprul rnams kyis/ zhes sogs gsungs pa dang tshul mtshungs pa'o/ /des na sku bzhi'i dbang du byas na rgyun mtha' ba'i mnyam gzhag ye shes de'i skad cig gnyis pa rnam grol lam mngon du byas pa'i tshe mnyam gzhag ye shes de nyid mnyam rjes ngo bo gcig pa'i ye shes chos kyi skur 'gyur ba dang/ bar chad mad lam gyi chos nyid de sgrib bral gyi ngo bo nyid skur 'gyur ba dang/ de'i mtshan dpes spras pa'i sku de longs spyod rdzogs pa'i skur 'gyur ba dang/ de'i tshe sngon gyi smon lam gyi stobs kyis kun slong med par phyogs bcu'i zhing rab 'byams su sprul pa'i sku mtha' yas pa ston pa rnams cig car du 'byung ba yin no/ /pha rol tu phyin pa'i theg pa'i lam gyis bgrod pa'i rjes su theg pa chen po gzhan gyi lam gyi snon pa btab nas gzugs sku 'grub pa'i tshul ni bshad ma thag pa dang i 'dra mod kyang sku bzhi cig car du 'grub pa tsam ni der yang 'dra bar shes par bya'o/ /gnyis pa sku bzhi'i khyad par la bzhi las ngo bo nyid sku ni/ sangs rgyas kyi sa'i dbyings rnam par dag pa bden grub kyi mtshan ma thams cad dang bral ba dang/ dgag bya glo bur gyi dri ma nyon mongs pa dang shes bya'i sgrib pa phra mo dang bral ba'i cha gnyis ka yin te/ theg pa chen po rgyud bla ma las/ 'dus ma byas shing lhun gyis grub/ /gzhan gyi rkyen gyis @129b rtogs min pa/ /zhes rang don chos sku la dbyings rig gnyis dang/ dbyings la 'dus ma byas dang lhun grub gnyis bshad pa'i 'dus ma byas pa ni/ skye 'jig gnas gsum dang thog mtha' dbus gsum dang bral ba'i 'dus ma byas pa chos kyi sku yang dag pa'i mthas rab tu phye ba dang/ lhun gyis grub pa ni/ glo bur rnam dag 'bad rtsol nye bar zhi ba'i lhun grub pa la bshad pa'i phyir te/ de nyid las/ thog ma dbus mtha' med pa yi/ /rang bzhin yin phyir 'dus ma byas/ /zhi ba chos kyi sku can phyir/ /lhun gyis grub ces bya bar brjod/ /ces gsungs pa'i phyir ro/ /'o na gzhan don lhun gyis grub pa ni gzhan don gyi skus bsdus par rigs mod ci'i phyir rang don chos sku'i dbye bar bshad ce na/ skyon med de/ 'dir gzhan don lhun grub tu 'byung ba'i rgyu mtshan spangs pa phun sum tshogs pa'i ldog pa nas 'chad pa'i phyir ro/ /de yang 'bad rtsol nye bar zhi ba lhun grub kyi rgyu mtshan du 'gro tshul ni/ gzhan don 'bad med lhun grub tu 'byung ba'i 'gal rkyen phra ba ni shes sgrib kyis bsdus pa'i rten 'brel yan lag bcu gnyis kyi nang nas zag pa med pa'i las zhes pa lus ngag gi las mngon par 'du byed pa'i kun slong gi rtsol ba phra mo de yin la/ de zhi ba na spangs pa phun sum tshogs pa mthar thug cing gzhan don lhun grub tu 'byung ba yin no/ /yang chos kyi sku ni sngar bshad pa lta bu'i 'du ma byas pa dang/ chos kyi dbyings las ngo bo tha dad pa'i tshul du rnam par dbyer med pas tha mi dad pa dang/ sgro 'dogs dang skur 'debs kyi mtha' gnyis su lhung ba med @130a @#/ /pas phyin ci ma log pa dang/ sgrib pa gsum dang bral ba rnam par dag pa'i khyad par dang/ dri ma rang bzhin gyis med cing rnam par rtog pas rtog pa med pa dang dbyings de nyid so so rang gi rig pa'i tshul gyis mthong bar bya bas na 'od gsal ba'i khyad par ste mtshan nyid lnga dang ldan te/ de nyid las/ 'dus ma byas shing rnam dbyer med/ /mtha' gnyis dag ni rnam par spangs/ /nyon mongs shes bya snyoms 'jug gi /sgrib pa gsum las nges grol te/ /dri med rnam par rtog med dang/ /rnal 'byor rnams kyis yul yin phyir/ /chos dbyings ngo bo nyid kyis ni/ /dag pa'i phyir na 'od gsal ba/ /zhes gsungs so/ /dri med man chad 'od gsal ba'i khyad par zhes gcig tu bsrang ngo/ /gzhan yang ngo bo nyid kyi sku de ni de bzhin gshegs pa'i dri ma med pa'i dbyings ni tshad 'di tsam du zad do zhes gzhal du med pas na rgya che ba dang/ gang gA'i klung gi phye ma snyed las kyang 'das pas na grangs med pa dang/ mu gzhing rtog ga bas bsam du med pas na bsam med dang/ de mngon du ma byas pa gzhan su dang yang mi mnyam pas na mnyam med dang/ nyon mongs pa bag chags dang bcas pa'i nyes pa mnyam par spangs pas na dag pa mthar thug pa'i yon tan te yon tan lnga dang ldan pa yin te/ de nyid las/ gzhal med grangs med bsam med pa/ /mnyam med dag pa'i mthar thug pa'i/ /yon tan rnams dang yang dag par/ /ngo bo nyid kyi sku ldan te/ /rgya che'i phyir dang grangs med phyir/ /rtog ge'i yul ni min phyir dang/ /'ba' zhig @130b bag chags bcas spangs phyir/ /gzhal med la sogs go rim bzhin/ /zhes gsungs so/ /'dir 'gog bden don dam bden par bzhed pas glo bur dri bral gyi ngo bo nyid sku yang don dam bden par bzhed pa rtsod med yin la/ dbu ma pa gzhan gyis 'gog bden kun rdzob bden par bzhed pa ltar na glo bur rnam dag gi char gyur pa'i ngo bo nyid sku yang don dam bden pa ma yin par bya dgos par rgyal tshab thams cad mkhyen pa bzhed cing/ mkhas grub rje'i bzhad pa ltar na thal rang gnyis 'dra bar snang ba sogs sngar rang rgyud pa'i skabs su yang cung zad dpyad zin to/ /bden gnyis las/ rigs pa'i rjes 'brangs ngo bo'i phyir/ /skyob pa rnams kyi chos skur 'dod/ /ces gsungs pa la yang 'chad tshul gnyis snang ngo/ /gnyis pa ye shes chos sku ni/ spyir sku bzhi dang gsum du 'dod pa dang/ /de bas kyang grangs mang bar 'dod pa dang/ /sku gnyis su bsdu ba sogs thal rang gi khyad par ma yin gyi dbye bsdu tsam yin pas 'di pa'i lugs la yang ye shes chos sku logs su byar rung la; theg pa chen po gzhan gyi lugs la yang sku bzhi par gsungs pa'i rnam gzhag snang ngo/ /ngas na 'dir ji ltar ji snyed kyi shes bya la bltos te gzigs pa mthar thug pa'i ye shes ni ye shes chos kyi sku'i ngo bo'o/ /dbye na chos dbyings ye shes la sogs pa ye shes lnga'am/ yang na zag pa med pa'i ye shes sde tshan nyi shu rtsa gcig gam/ rgyas par phye na brgya dang zhe bzhi sogs su yod do/ /nyer gcig ni mngon rtogs rgyan las/ byang chub phyogs mthun tshad med dang/ zhes pa nas @131a @#/ /bzung ste/ chos kyi sku zhes brjod pa yin/ zhes pa'i bar gyis bshad pa ltar te grags che'o/ /rgyud bla ma rtsa 'grel las stobs bcu mi 'jigs pa bzhi sangs rgyas kyi chos ma 'dres pa bco brgyad rnams chos kyi sku'i bral ba'i yon tan so gnyis su yang gsungs so/ /gsum pa longs spyod rdzogs pa'i sku ni/ gzugs khams gnas rigs bcu bdun brgal ba'i steng na gnas rigs bco brgyad pa dbang phyug chen po'i gnas zhes kyang bya ba'i 'og min stug po bkod pa'i zhing khams yod la/ de ni sangs rgyas rnams kyi tshogs mtha' yas pas bskyed pa nam mkha' bzhin du rgya dang ris su ma chad pa dang/ gzhal du med pa'i yon tan bgrang las 'das pas brgyan pa zhig yod pa der bzhugs pa yin no/ /de lta bu'i gnas de yang dag pa'i ye shes kyi cha shas las grub pa yin gyi rdul phra rab bsags pa ma yin pa dang/ sangs rgyas 'phags pa yin tshad 'og min stug po bkod pa'i gnas gcig tu sangs rgyas pa yin min dang/ rang gang du 'tshang rgya ba'i longs sku'i zhing khams gsar du 'grub dgos mi dgos dang/ dgos na der 'tshang rgya dgos mi dgos sogs theg pa chen po lugs gnyis ka gung bsgrigs nas dpyad rgyu mang zhing khyad par du byams chos nyid kyi lugs gzhir bzhag pa la yang de dag gi rnam gzhag dpyad rgyu mang po zhig snang mod/ rje yab sras kyis gsal bar bshad pa mi snang la/ rjes 'brangs 'chad rtsod rtsom pa'i khri 'phang mthon po la mkhas pa'i snyan pas sa chen dog por byed bzhin bsnyems @131b par gzhes pa rnams kyis kyang 'di ltar yin gsal bar gsungs pa mi snang zhing/ phar phyin gyi thal 'phreng mgo mjug tshang ma tshang ci rigs bklags pas ngoms nas gna' dus shig nas sangs rgyas zin zin lta bu'i rnam 'gyur gyis bsnyems pa rnams kyis ni ji ltar yin the tshom tsam yang 'jug dka' bar snang ngo/ /'on kyang rje yab sras kyi mdo sngags kyi gsung rab rnams gung bsgrigs na 'ol spyi tsam 'chad thang bar 'dug ste 'dir ma bris so/ /longs spyod rdzogs pa'i sku dngos ni rgyud bla ma las/ brjod ston mdzad rgyun mi 'chad dang/ mngon par 'du byed med pa dang/ de yi ngo bor min ston la/ /'dir ni sna tshogs rnam lngar brjod/ ces mtshan dpes spras pa'i sku rigs 'dra rgyun mi 'chad par ston pa dang/ gsung rigs 'dra rgyun mi 'chad pa'i chos brjod pa dang/ thugs mkhyen brtses mdzad pa rgyun mi 'chad pa dang/ de gsum 'bad rtsol gyis mngon par 'du byed pa med pa dang/ rgyud so so ba tha dad pa sna tshogs su rang gi ngo bor mi gnas kyang rang gi rkyen las mchog gi sprul pa'i sku la sogs pa'i mdzad pa rnam pa sna tshogs pa ston pa ste yon tan lnga dang ldan par gsungs so/ /'di la kha cig sna tshogs rnam lnga zhas 'dren mod kyang 'dir ni sna tshogs rnam lngar brjod ces pa'i don/ de yi ngo bor min ston la/ 'dir ni sna tshogs zhes tshig snga ma dang sbrel rgyu yin gyi yon tan dang po gsum ma gtogs phyi ma gnyis la sna tshogs sbyor rgyu min pa 'dra'o/ /gzhung 'di dang theg bsdus las/ longs spyod rdzogs pa'i sku ci'i phyir ngo bo nyid kyi sku ma yin zhe na/ rgyu drug gi phyir @132a @#/ /te; de gzugs kyi skur snang ba dang/ sangs rgyas kyi 'khor gyi dkyil 'khor chad med pa dag na tha dad par snang ba dang/ mos pa ji lta ba bzhin du mthong bas ma nges pa'i ngo bo nyid du snang ba dang/ gzhan dang gzhan du snang bas g.yo ba'i ngo bo nyid du snang ba dang/ byang chub sems dpa' dang nyan thos dang lha la sogs pa 'khor sna tshogs dang 'dres par snang ba dang/ kun gzhi rnam par shes pa dang 'jug pa'i rnam par shes pa gnyis gnas 'gyur bas mi rigs par snang ba'i phyir longs spyod rdzogs pa nyid ngo bo nyid kyi skur mi rigs so/ /zhes gsungs pa rnams la brten nas longs sku la nges pa lnga ldan gyi khyad par mi 'thad par bzhed pa'i phyogs yod cing/ legs bshad gser phreng las kyang/ nges pa lnga ldan du smra ba la ni don bsdus sgron mar/ nges pa bzhi ste 'khor dang ni/ /gnas dang ston pa chos su ste/ /zhes pa tsam las ma mthong la 'di ni khungs su mi rung zhing/ der ma zad theg bsdus ltar na de la gnod byed kyang snang bas dpyad par bya'o/ /zhes gsungs pa yang bshad ma thag pa de dag la dgongs pa 'dra'o/ /de la rgyud bla ma las kyang gsungs pa ni longs sku'i yon tan gyi khyad par bshad pa yin la/ de yang sku de nyid sna tshogs pa'i ngo bo nyid du med kyang rgyud tha dad pa lta bu'i rnam pa can gyi sna tshogs pa'i skur ston nus pa la bya dgos pas longs sku rang nyid sna tshogs pa'i rnam pa can ma yin kyang sna tshogs pa'i sprul sku ston nus pa'i don du bshad kyang rung bar snang la/ theg bsdus las bshad pa ni/ longs sku ngo bo nyid kyi sku ma @132b yin pa'i sgrub byed du bkod pa yin par 'dug pas mdzad pa sna tshogs pa dang sprul pa sna tshogs pa ston pa'i bdag nyid can yin pas ngo bo nyid du mi rung bar gsungs pa ste/ ngo bo nyid la rang bzhin nam gshis kyi don tshang dgos pa'i phyir ro/ /des na dga' ldan gyi gnas nas 'pho ba la sogs pa'i mchog gi sprul pa'i sku'i mdzad pa rnams kyang ston pa po ni rtsa ba'i longs sku yin pas de dag de'i yon tan du mi 'gal mod kyang sprul sku de longs sku yin mi dgos so/ /dbu ma la 'jug pa las/ zhi sku dpag bsam shing ltar gsal gyur cing/ /yid bzhin nor bu ji bzhin rnam mi rtog /'gro dgrol bar du 'jig rten 'byor slad rtag /ces gsungs pas rtog pa med kyang nam mkha' ji srid du 'gro ba'i don mdzad phyir bzhugs pa'i nam mkha' ji srid pa dang 'jig rten ji srid pa'i dus nges pa dang/ de'i mjug thogs su/ 'di ni spros dang bral la snang bar 'gyur/ /zhes gsungs pas byang sems sa thob pa kho na'i spyod yul yin pa'i 'khor nges pa bstan par byas kyang rung ngam snyam ste/ 'jug pa'i rnam bshad chen mo las/ longs sku 'di ni byang sems spros pa dang bral ba ste/ rang gi tshogs gnyis las shes rab dri ma med pa'i me long thob pa'i sa thob pa rnams kho na la snang bar 'gyur gyi spros pa dang bcas pa so skye rnams la ni dngos su snang ba ma yin no/ /zhes gsungs shing/ skyabs 'gro bdun cu pa las kyang/ /bsod nams tshogs ni tshad med las/ /'khrungs pa de ni rgyal ba'i sras/ /sa bcu la ni gnas rnams kyis/ /mthong bar gyur pa sku de yis/ /chos kyi @133a @#/ /rdzogs longs spyod 'di ni/ /rgyal ba rnams kyi spyod pa yin/ /zhes gsungs pas kyang 'khor nges par 'grub bam snyam mo/ /mdo sde las/ /las can gyi lha 'ga' zhig sangs rgyas kyi mthus 'og min du phyin par gsungs pa lta bus mi gnod de/ /sangs rgyas kyi mthus skad cig bskal par byin gyis brlabs pa yod kyang dus mtha'i skad cig ma dang bskal pa tshad mnyam mi dgos pa bzhin no/ /longs spyod rdzogs pa'i sku de ni mtshan dang dpe byad kyis spras pa yin kyang zag pa med pa'i ye shes kyi rang bzhin 'ba' zhig yin gyi bem po'i rdul phra rab bsags pa ni ma yin no/ /ye shes kyi rang bzhin yin lugs kyang sems tsam pa dang rang rgyud pa 'ga' zhig gis sngon po sngo 'dzin shes pa'i bdag nyid du 'dod pa lta bu ma yin te/ thal 'gyur bar ma zad de dag gi lugs la yang sngon po sngo 'dzin shes pa'i bdag nyid yin lugs dang longs spyod rdzogs pa'i sku ye shes kyi bdag nyid yin lugs gnyis mi 'dra bar 'dod dgos pa'i phyir ro/ /dag sa'i sems dpa' rnams kyis ma rig bag chags kyis dang zag med kyi las la brten nas blangs pa'i yid kyi rang bzhin gyi lus dang yang mi 'dra ste/ de ni rgyu kun 'byung phra mos bsdus pa'i phyir dang/ de yid kyi rang bzhin yin lugs kyang theg pa 'di'i lugs la yid ltar thogs pa med pa sogs kyi sgo nas gtso bor bshad dgos pa'i phyir ro/ /des na zag pa med pa'i chos mtha' dag rang gi bdag nyid du yongs su 'dzin pa'i ye shes mthar thug pa nyid bskal pa @133b grangs las 'das par smon lam dang snying rje chen pos mngon par 'du byas pa'i dbang gis gzugs sku bzhin lag gi rnam pa can du shar ba yin la/ 'di'i sku'i cha shas re res kyang chos thams cad mngon sum du gzigs pa dang/ chos kyi sgra dbyangs bsam gyis mi khyab pa sgrog pa sogs gsang ba bsam gyis mi khyab pa'i mdo ltar shes dgos so/ /de dag gi rgyu mtshan mthar thug pa yang theg pa chen po gzhan dang gung bsgrigs nas shes dgos par rje yab sras kyis bzhed pa ltar ro/ / bzhi pa sprul pa'i sku'i rnam gzhag ni/ rje btsun byams pas/ thugs rje chen pos 'jig rten mkhyen/ /'jig rten kun la gzigs nas ni/ /chos kyi sku las ma g.yos par/ /sprul pa'i rang bzhin sna tshogs kyis/ /skye ba mngon par skye ba dang/ /zhes sogs gsungs pa dang/ zla ba'i zhabs kyis/ slar yang mi g.yo sku mnga' khyod kyis srid gsum byon nas sprul rnams kyis/ gshegs pa dang ni bltams dang byang chub zhi ba'i 'khor lo'ang ston par mdzad/ de ltar khyod kyis 'jig rten g.yo bag spyod can re ba'i zhags pa ni/ /mang pos bcings pa ma lus thugs rjes mya ngan 'das par bkri bar mdzad/ ces gsungs pa ltar sngon brjod du med pa'i bskal par dpag tu med pa'i bsod nams kyi phung po yongs su bsags shing sems can mtha' dag gi don du smon lam rlabs chen po bsam gyis mi khyab pa yang dang yang du btab pa la brten nas/ 'bras bu'i dus 'dir 'gro ba rnams kyi khams dang bsam pa dang dbang po dang bag la nyal ji lta ba bzhin du sku dang gsung dang thugs kyi rnam par rol @134a @#/ /pa bsam gyis mi khyab pas 'gro ba'i don nam mkha' ji srid du rgyun mi 'chad par ston pa ste/ dpal ldan zla bas/ de la gang gis na rtog pa med par gyur du zin kyang gdul ba'i bya ba ji ltar 'tsham pa ltar 'jug pas sems can gyi khams mtha' yas pa'i don byed par 'gyur ba/ ji ltar sangs rgyas bcom ldan 'das 'di dag de ltar de ltar rnam par rtog pa mi mnga' zhing yid bzhin gyi nor bu dang dpag bsam gyi shing dang 'dra bar ji ltar 'tsham par sems can gyi don sgrub pa lhur mdzad cing chos kyi dbyings las skad cig kyang mi bskyod la/ sems can 'dul ba'i dus las kyang mi 'da' ba de bzhin du bdag kyang gyur cig ces byang chub sems dpas sngar smon lam gang btab pa'i smon lam de'i shugs dang/ gdul ba rnams kyi rnam pa de lta bu'i chos nyan par 'gyur ba'i las yongs su smin pa las bya ba'i khyad par de 'dra ba dag mngon pa yin no/ /de ltar na da lta skyed pa'i 'bad rtsol med par de kho na nyid nye bar ston pa dang/ sems can gyi don bya ba yang 'grub bo zhes bya bar shes par bya'o/ /zhes gsungs pa ltar ro/ /de yang sems can de 'dul ba'i dus la ma babs na sems can de gdul mi nus kyang 'dul ba'i dus la babs pa na dus las skad cig kyang yol bar mi byed de/ 'di ni sngar smon lam btab ba'i dbang kho na las de ltar 'byung ba yin cing/ de 'dul ba'i dus la babs pa yang rnam pa de lta bu'i chos nyan par 'gyur ba'i las yongs su smin pa las zhes gsungs pa ltar sangs rgyas kyi mdzad pa de dang 'phrad pa'i dge @134b ba'i rtsa ba yongs su smin pa la bya ste/ ji skad du/ ji ltar nyi ma dag ni shar ba na/ padma yongs su smin pa kha 'byed ltar/ /de bzhin gshegs pa dag kyang shar ba na/ /bsam pa yongs su smin pa dag par 'gyur/ /zhes gsungs so/ / rtog pa dang 'bad rtsol med kyang gdul bya'i skal ba dang mthun par re ba yongs su rdzogs par mdzad pa'i tshul 'di ni 'thad pa dang bcas par dpal ldan zhi ba lhas kyang gsungs te/ yid bzhin nor bu dpag bsam shing/ /ji ltar re ba yongs skong ba/ /de bzhin gdul bya smon lam gyi/ /dbang gis rgyal ba'i skur snang ngo/ /dper na nam mkha' lding gis ni/ /mchod sdong bsgrubs nas 'das gyur pa/ /de 'das yun ring lon yang de/ /dug la sogs pa zhi byed bzhin/ /byang chub spyod pa rjes mthun pas/ /rgyal ba'i mchod sdong bsgrubs pa yang/ /byang chub sems dpa' mya ngan las/ /'das kyang don rnams thams cad mdzad/ /ces gsungs pa ltar ro/ /spyir sprul pa'i sku la gzings dang/ zam pa dang /gter dang /sman la sogs pa sems yod dang sems med kyi rnam pa du ma yod cing de thams cad sprul sku rnam pa gsum pa gang rung du 'du dgos pa ma yin kyang gtso bo ni mdo snge rgyan las/ bzo dang skye ba byang chub che/ /mya ngan 'das ba rtag ston pa/ /sangs rgyas sprul pa'i sku 'di ni/ rnam par grol pa'i thabs chen po/ /zhes gsungs bo sprul sku/ skye ba sprul sku/ mchog gi sprul sku ste gsum mo/ /'di gsum gyi khyad par ni sangs rgyas kyis sprul pa'i bi shwa karma lta bu dang po dang/ dri @135a @#/ /za'i rgyal po rab dga' 'dul ba'i phyir du pi lbang dkrol mkhan du sprul pa lta bu gnyis pa dang/ bdag cag gi ston pa lta bu gsum pa yin zhes zer ba dang/ yang la la bi shwa karma lta bu dang po dang/ ri dwags ru ru'i rnam par ston pa lta bu gnyis pa yin zhes zer ba dang/ yang 'ga' zhig pi lbang len pa'i gzugs su sprul ba lta bu dang po/ ljon shing dang sman la sogs par sprul ba lta bu gnyis pa yin par 'dod pa dang/ bzo skye'i sprul sku gnyis ka yang 'gal mi 'gal sogs la bzhed tshul sna tshogs pa zhig 'dug pas brtag par bya'o/ /sprul pa la yang sangs rgyas rang rgyud kyis bsdus ma bsdus gnyis dang/ ma bsdus pa la yang gang du sprul pa de dang de mtshan nyid pa yin min gnyis rnams su shes par bya dgos shing/ de thams cad kyi nang nas sprul sku mchog ni bdag cag gi ston pa lta bu yin te/ sku mtshan dpe gsal rdzogs kyis spras pa dang/ gsung mngon mtho nges legs kyi don tshang bar sgrub pa'i chos 'khor rdzogs par bskor ba dang/ mdzad pa 'phrin las kyang mdzad pa bcu gnyis rdzogs par ston pas ni mchog gi sprul sku'am byang chub chen po'i sprul sku zhes zer ro/ /lha'i bu dam pa tog dkar lta bu skye ba sprul sku yin gyi mchog gi sprul sku ma yin par bzhed pa ltar na'ang skyon med de/ mchog gi sprul sku'i mdzad pa yin na mchog gi sprul sku yin mi dgos pa'i phyir ro/ /mchog gi sprul sku'i mdzad pa rnams kyi gtso bo ni chos 'khor bskor ba'i mdzad pa yin @135b la; de yang thog ma chos kyi sdom bzhi bstan nas 'khor ba la dga' ba'i sems can rnams skyo ba bskyed de rgyud smin par byed/ de rjes nyan rang gi rigs can rnams rang rang gi byang chub dang/ theg chen gyi rigs can rnams mi gnas pa'i byang chub la 'god par mdzad/ nyan rang dgra bcom zhi ba'i dbyings su zhugs pa rnams kyang dam chos padma dkar po la sogs pa las chos kyi de nyid 'khor gsum yongs su dag pa'i gtam mthar thug theg pa gcig tu sgrub pa'i tshul bstan nas/ nyan rang de dag nyer zhi de las gong du bgrod mi dgos par 'dzin pa las bzlog ste/ thabs dang shes rab mchog gi lam bstan pas rjes su bzung nas theg chen la 'khrid de bla med byang chub mchog tu lung bstan par 'dzad pa yin te/ mgon po byams pas/ mi rtag sdug bsngal bdag med dang/ /zhi ba'i sgra yis thabs mkhyen pas/ /sems can srid gsum skyo bskyed nas/ /mya ngan 'das la rab 'jug mjad/ /zhi ba'i lam la rab zhugs pa/ /mya ngan 'das thob 'du shes can/ /dam chos padma/ dkar la sogs/ /chos kyi de nyid bstan pa yis/ /de dag sngar 'dzin las bzlog ste/ /thabs dang shes rab yongs bzung bas/ /theg pa mchog la smin mdzad de/ /byang chub mchog tu lung bstan to/ /zhes gsungs pa ltar ro/ /'di'i chos kyi sdom bzhi ni/ theg pa chen po'i rigs can rnams la yang thog mar ston par bshad de/ tshigs bcad 'di dag gis spyir mchog gi sprul sku'i mdzad pa'i gtso bo chos 'khor bskor ba'i mdzad pa yin pa dang/ chos 'khor rnams kyi don @136a @#/ /bsdus na yang skyes bu gsum gyi lam gyi rim par ma tshang ba med par 'du bar bstan pa yin te/ rje btsun byams pa mgon po'i man ngag mchog tu gyur ba'o/ /gsum pa yon tan dang 'phrin las kyi khyad par bshad pa la/ yon tan ni dpal ldan zla ba'i 'jug pa rang 'grel las/ sangs rgyas bcom ldan 'das rnams kyi gzugs kyi sku'i ba spu'i bu ga re re dang skyes bu chen po'i mtshan dang dpe byad dang stobs dang mi 'jigs pa dang sangs rgyas kyi chos ma 'dres pa la sogs pa yon tan gyi khyad par yongs su gcod par ni sangs rgyas kho nas spyod la/ gal te gsungs na ni rang nyid kyi ye shes kyi yul du gyur pa bskal pa grangs med pa bsam gyis mi khyab par sku tshe'i tshad byin gyis brlabs shing 'phrin las gzhan mi mnga' bar skyen pa skyen par gsungs pa de lta na yang yon tan dag yongs su rdzogs par mi 'gyur na/ byang chub sems dpas lta ci smos te rang sangs rgyas dang nyan thos rnams kyis sangs rgyas kyi yon tan mthar phyin par shes pa'am brjod par nus par 'gyur ba lta smos kyang ci dgos/ zhes gsungs pa ltar rgyal ba'i gsang ba gsum gyi yon tan mtha' yas ba rnams ni rgyal bas kyang sku tshe'i 'du byed byin gyis brlabs te mdzad pa gzhan med par de kho na gsungs na yang yon tan yongs su rdzogs par gsung du mi spyod do/ /de lta na yang gdul bya'i khams dang 'tsham bar mdo sde rnams las kyang rgyas bsdus ci rigs par gsungs la/ de dag gi don mdor bsdus te rgyal tshab mi pham mgon po dang klu sgrub thogs med la sogs pa'i shing rta chen @136b po rnams kyis sde tshan du bsdus te ci rigs par bshad do/ /de yang bstan bcos mngon rtogs rgyan du ni zag pa med pa'i ye shes sde tshan nyi shu rtsa gcig dang mtshan so gnyis dang dpe byad brgyad cu'i sgo nas bshad do/ /theg pa chen po rgyud bla ma las ni stobs bcu mi 'jigs pa bzhi ma 'dres pa bco brgyad mtshan bzang po sum cu so gnyis te ldan chos drug cu rtsa bzhi'i sgo nas bshad do/ /'phags pa thogs med kyis ni byams chos rnams kyi 'grel par rtsa ba nas bshad pa ltar dang byang chub sems dpa'i sa las ma 'dres pa'i chos brgya dang bzhi bcur bsdus te bshad do/ /kun mkhyen dbyig gnyen gyis kyang rnam bshad rigs par gsung dbyangs yan lag drug cu sogs kyi rnam gzhag mdo las 'byung ba thor bu thor bur bshad do/ /dpal mgon 'phags pa klu sgrub kyis rin chen 'phreng bar mtshan bzang rgyu dang bcas pa bstan cing mdo kun las btus sogs su zhar la thor bur bshad pa yang yod do/ /slob dpon chen po legs ldan gyis rtog ge 'bar ba las sangs rgyas kyi chos ma 'dres pa sum brgyar phye ste bshad do// dpal ldan zla bas 'jug pa rtsa 'grel du gzungs kyi dbang phyug rgyal pos zhus pa'i mdo la brten nas stobs bcu la sogs pa'i khyad par rgyas par bshad do/ /'on kyang 'dir ni de dag ming tsam zhig ste rgyas par gzhung chen mo sbyangs pa las shes par bya'o/ / 'phrin las ni lhun gyis grub pa dang rgyun mi 'chad pa gnyis te/ rgyud bla ma las/ gdul bya'i khams dang 'dul ba'i thabs dang ni/ /gdul bya'i khams kyi 'dul ba'i bya ba dang/ /de yi yul dang dus su gshegs pa la/ /khyab bdag rtag tu lhun gyis grub par 'jug /ces @137a @#/ /gdul bya'i khams dang rigs dang mos pa sna tshogs pa mngon sum du mkhyen pa dang/ 'dul ba'i thabs gzugs sku rnam pa gnyis dang/ gzings dang zam par sprul ba la sogs pa dang/ khams kyi 'dul ba'i bya ba zhi ba dang drag po la sogs pas 'dul ba'i kun spyod kyis 'bras bu mngon mtho nges legs la dgod pa dang/ don 'grub pa'i thabs ston pa sogs kyi ched du gdul bya gang na yod pa'i yul du gshegs pa dang/ de yang 'dul ba'i dus su gshegs pa la 'bad rtsol gyi mtshan ma nye bar zhi bas 'phrin las lhun gyis grub par 'jug pa'i/ /rgyal ba'i thugs rje chen po la brtan nas sems can gyi rgyud kyi sgrib gnyis 'joms shing tshogs gnyis bsags te sa bcu rim gyis bgrod nas 'bras bu byang chub 'thob pa'i 'phrin las rgyun mi 'chad du mdzad pa ni de nyid las/ gnas drug po ni 'di dag rnams/ /go rim ji bzhin rgya mtsho dang/ /nyi ma dang ni nam mkha' gter/ /sprin dang rlung bzhin shes par bya/ /zhes gsungs pa ltar te/ de yang ye shes kyi chus rgyas par byed pa dang yon tan rin po che dang ldan pa'i phyir sa bcu po rnams rgya mtsho bzhin no/ /sems can thams cad kyi nyer 'tsho'i gnas su gyur pa'i phyir tshogs gnyis ni nyi ma bzhin no/ /yon tan rgya chen po mtha' dang dbus med pa'i bdag nyid yin pa'i phyir byang chub chen po ni nam mkha'i khams bzhin na/ /yang dag par rdzogs pa'i @137b sangs rgyas kyi chos nyid rang bzhin gyis rnam par dag pa yon tan thams cad 'byung rung de nyid gnas pa'i phyir sems can gyi khams ni gter bzhin no/ /glo bur pa dang sgrib bya la khyab pa dang rang bzhin du ma grub pa'i phyir sems can rnams kyi nyon mongs pa rnams ni sprin bzhin no/ /sgrib pa de 'thor ba'i don du nye bar gnas pa'i phyir bcom ldan 'das kyi thugs rje chen po ni mi bzad pa'i rlung bzhin no/ /de yang sa bcu dang tshogs gnyis kyis bsdus pa'i rkyen gzhan gyi dbang gis nges par 'byung ba ni rgya mtsho dang nyi ma gnyis kyis bstan te/ gzhan don rgyun mi 'chad pa'i rgyu'i khyad par ro/ /bdag dang sems can mtshungs par chos nyid rang bzhin du gnas par gzigs pa ni nam mkha' dang gter gyi dpes bstan te/ gzhan don rgyun mi 'chad pa'i ngo bo'i khyad par ro/ /sems can gyi nyon mongs dang rgyal ba'i thugs rje mtha' yas pa ni sprin dang rlung gi dpes bstan te/ mdzad pa yongs su ma rdzogs par 'byung ba'i phyir gzhan don rgyun mi 'chad par mdzad pa'i 'bras bu'i khyad par bstan pa yin te/ de nyid las/ gzhan gyi dbang gis nges 'byung dang/ /bdag dang sems can mtshungs gzigs dang/ /mdzad pa yongs su ma rdzogs phyir/ /'khor ba srid du mdzad mi 'chad/ ces so/ spyir 'phrin las la ye shes chos sku'i bdag rkyen las byung ba'i rnam dkar gyi bya ba mtha' dag bzhag tu rung la/ rje btsun byams pas mngon par rtogs pa'i rgyan du 'phrin las nyer bdun du bsdus nas bshad @138a @#/ /pa ni mngon par rtogs pa'i rim pa rgyud la skyed pa la nges pa phyin ci ma log pa ster ba'i gnad dam pa yod pa la dgongs pa'o/ /mdor na mngon rtogs rgyan las/ de bzhin 'khor ba ji srid 'di'i/ / las ni rgyun mi 'chad du 'dod/ /ces gsungs pa ltar nam mkha' ji srid kyi bar du sangs rgyas bcom ldan 'das rnams kyi thugs rje chen po'i dbang gis 'phrin las kyi sgo sna tshogs pa rgya mtsho lta bu rnams ni nam yang rgyun chad pa med par lhun gyis grub par 'jug pa yin no/ /gsum pa sngags kyi theg pa'i rnam gzhag mdo tsam bshad pa la/ de yang sngags kyi theg pa ni theg pa chen po bas kyang ches chen po yin pas ston pa mngon par rdzogs par sangs rgyas pa'i dus kyang gsang sngags rang lugs la mdo sde phal po che la sogs pa nas bshad pa ltar brjod du med pa'i yang ches brjod du med pa'i bskal pa du ma'i snga rol nas mngon par rdzogs par sangs rgyas par bya dgos la/ sangs rgyas nas slar yang byang chub kyi snying por sprul skus 'tshang rgya tshul ston pa'i grangs tshad kyang bsam gyis mi khyab pa zhig yod do/ dbu ma la 'jug pa las/ bde bar gshegs pa ma lus phyogs zhing sangs rgyas yul dag na/ phra rab rdul gyi rdul rnams bdog par gyur ba ji snyed pa/ /byang chub mchog rab dam par gshegs pa'i bskal pa de snyed de/ /'on kyang khyod kyi gsang ba 'di ni bsnyad bgyi ma lags so/ /zhes gsungs pa 'dir yang mtshungs pa'i phyir dang/ dpal dus @138b kyi 'khor lo'i 'grel chen las/ sangs rgyas bcom ldan 'das ni sangs rgyas kyi zhing stong gsum gyi stong chen po'i 'jig rten gyi khams rnams su sgyu ma'i sprul pa'i sku sgrib pa dang bral ba mtha' yas pa mtha' yas pa rnams kyis sems can mtha' yas pa mtha' yas pa rnams kyi skad mtha' yas pa mtha' yas pa rnams kyis gsol ba 'debs pa po sna tshogs kyis gsol ba btab pa na sems can thams cad kyi skad la rab tu 'jug pa thams cad ma byin pa'i gsung gis 'jig rten dang 'jig rten las 'das pa'i chos ston par mdzad de thams cad mkhyen pa de du ma ma yin no/ /des na sems can thams cad la 'jig rten dang 'jig rten las 'das pa'i chos bstan pa'i phyir sangs rgyas bcom ldan 'das sngon sa bcu gnyis kyi dbang phyug tu gyur pa mkhas pa sgyu 'phrul chen po 'chang ba sgyu 'phrul chen po'i mig 'phrul dang ldan pa 'phags pa'i yul lumbi nir shAkya'i rigs mi'i dbang po zas gtsang ma'i lha mo sgyu 'phrul chen mo'i lhums nas bltams pa ni gzhon nu don grub yin la/ zhes bdag cag gi ston pa shAkya thub pa bskal pa mtha' yas pa'i snga rol nas sangs rgyas zin sprul pa'i sku'i rnam par rol par gsungs pa'i phyir ro/ /rgyu mtshan de dag gi phyir na sngags kyi theg pa ni 'og min stug po bkod pa'i zhing khams su longs sku rdo rje 'chang chen pos rnam pa du mar gsungs pa dang/ gling bzhi pa'i 'jig rten gyi khams 'dir yang rdzogs ldan gyi dus su ri rab kyi rtse mo dang mo Di ya na la sogs @139a @#/ /pa'i gnas chen po rnams su sprul pa'i dkyil 'khor tshad med pa dag sprul nas rgyud sde bsam gyis mi khyab pa dag gsungs par bshad do/ /bdag cag gi ston pa'i bstan pa 'di'i dbang du byas pa'i gsang sngags kyi chos 'khor bskor tshul yang bla med kyi rgyud sde du ma nas bshad pa'i rnam grangs mang po zhig snang mod/ dpal dus kyi 'khor lo'i dgongs pa ltar na ston pa shAkya thub pas rgya gar 'phags pa'i yul rdo rje gdan du mngon par rdzogs par sangs rgyas pa'i tshul bstan te pha rol tu phyin pa spyi dang/ bya rgod phung po'i rir shes rab kyi pha rol tu phyin pa'i chos kyi 'khor lo bskor/ de nas rgya gar lho phyogs dpal gyi ri dang nye ba na dpal ldan 'bras spungs kyi mchod rten chen por byon nas mchod rten gyi nang gi 'og tu chos dbyings gsung gi dbang phyug gi dkyil 'khor dang/ steng du dpal ldan rgyu skar gyi dkyil 'khor chen po spros te/ gnas phun sum tshogs pa bde ba chen po'i gnas rdo rje dbyings kyi dkyil 'khor chen por rdo rje seng ge'i khri la bzhugs/ ston pa phun sum tshogs pa shAkya seng ge dus kyi 'khor lo'i ting nge 'dzin la snyoms par zhugs nas dkyil 'khor gyi bdag po'i rnam par bzhengs/ 'khor phun sum tshogs pa la gsum ste/ dkyil 'khor la bkod pa'i 'khor ni sangs rgyas dang byang chub sems dpa' dang khro bo dang lha dang klu dang lha mo'i tshogs kyi rnam par gnas pa'o/ /zhu ba po'i 'khor ni dpal @139b phyag na rdo rje'i sprul pa'i sku rgyal po zla ba bzang po la sogs pa'o/ /nyan pa po'i 'khor ni byang chub sems dpa' du ma dang shamb+ha la'i yul chen po dgu bcu rtsa drug gi rgyal po dgu bcu rtsa drug dang/ gzhan yang skal ba dang ldan pa'i lha dang lha ma yin la sogs pa'i tshogs dpag tu med pa'o/ /chos phun sum tshogs pa 'jig rten dang 'jig rten las 'das pa'i dbang bskur ba byin nas sangs rgyas su lung bstan te dpal dus kyi 'khor lo'i rtsa ba'i rgyud stong phrag bcu gnyis pa gsungs pa yin te/ de dang dus mtshungs par bla med kyi rgyud thams cad gsungs par bzhed do/ /de skad du yang dpal dus kyi 'khor lo'i rgyud phyi ma las/ dpal ldan 'bras spungs chos kyi dbyings su stobs bcu pa yis sangs rgyas pa yi rgyud rnams mtha' dag bstan/ ces dang/ nyi ma dpal gyis kyang/ der nyi ma de nyid la lha la sogs pa la sangs rgyas kyi dbang bskur nas rgyas pa dang bsdus pa'i dbye bas gsang sngags kyi tshul thams cad bstan to/ /zhes gsungs so/ /de lta na yang bya ba dang spyod pa'i rgyud thor bu 'ga' zhig ni sprul pa'i sku'i rnam pa ma bsgyur bar ston pa'i gzugs nyid kyis gsungs pa yang yod do/ / de lta bu'i sngags kyi theg pa de la ni rdo rje'i theg pa zhes bya ste/ thabs dang shes rab dbyer med par sbyor ba'i rdo rje sems dpa'i rnal 'byor lam dang 'bras bu'i gnas skabs na yod pas so/ /thabs kyi theg pa zhes @140a @#/ /kyang bya ste/ pha rol tu phyin pa'i theg pa las thabs mkhas pa shin tu rgya che ba'i phyir ro/ /'bras bu'i theg pa zhes kyang bya ste/ 'bras bu'i sku dang longs spyod dang gnas dang mdzad pa yongs su dag pa'i rnam pa da lta nas lam du byed pa'i phyir ro/ /gsang sngags kyi theg pa zhes kyang bya ste/ snod min la gsang zhing sbas pas 'grub pa dang/ thabs shes khyad par can gyis yid skyob pa'i phyir ro/ /de lta bu'i gsang sngags kyi theg pa ni pha rol tu phyin pa'i theg pa las khyad par du 'phags pa yin te/ theg pa chen po pa rnams kyi don du gnyer bya'i gtso bo ni gzhan don yin la/ 'bras bu'i skabs su gzhan gyi don dngos su mdzad pa ni gzugs kyi sku rnam pa gnyis yin cing/ gzugs kyi sku sgrub par byed pa'i rgyu ni theg pa 'di las gsal bar byung ba'i tshod tsam pha rol tu phyin pa'i theg pa la med pa'i phyir ro/ /de ltar yang theg pa gsum rnam par bzhag pa las/ kun rtsod tsam gyis ji ltar rgya che bar 'gyur zhes gang smras pa ni 'dir/ dmigs pa rnam par dag pa dang/ /grogs kyi mthu dang spyod pa yis/ /blo ldan rnams kyi theg pa ni/ /chen po'i chen po nyid du bsgrags/ /zhes dmigs pa dang grogs dang rjes su spyod pa gsum rgya che bas pha rol tu phyin pa las khyad par du 'phags pa'i gsungs so/ /dpal rdo rje gur las kyang/ ston pa sum cu rtsa gnyis mtshan/ /mnga' bdag dpe byad brgyad cur ldan/ /de phyir thabs des bsgrub bya ste/ /thabs ni ston pa'i gzugs can no/ /zhes gsungs so/ /de lta bu'i sngags kyi theg pa la 'jug pa'i sgo mi 'dra ba ji tsam @140b zhig yod ce na/ gur gyi bcu gsum pa las/ dman pa rnams la bya ba'i rgyud/ /bya med rnal 'byor de ltag la'o/ /rnal 'byor mchog ni sems can mchog /rnal 'byor bla med de ltag la'o/ /zhes rdo rje theg pa'i gdul bya la dbang po'i rim pa bzhi yod pa dang sgo bstun nas bya ba'i rgyud dang/ spyod pa'i rgyud dang/ rnal 'byor rgyud dang/ rnal 'byor bla na med pa'i rgyud bzhi gsungs so/ /theg pa 'di'i gdul bya dbang po dman pa yang pha rol tu phyin pa'i theg pa'i gdul bya dbang po ches rno ba rnams las kyang snying rje lhag par che ba dang/ dbang po rno ba dang/ skal ba mchog dang ldan pa zhig dgos par rgyud sde rin po che rnams dang dgongs 'grel mang po las gsungs so/ /de'i phyir gang dag dus ring por byang chub sgrub pa dang/ dka' ba chen pos byang chub sgrub pa la blo gros zhum pa dag la sngags kyi theg pa bstan par sems shing smra ba ni rang nyid rgyud kyi don la gtol ci yang med pa gsal bar byed pa'o/ /phar phyin theg pa las sngags kyi theg pa myur bar gsungs pa yang gdul bya snod ldan la bltos nas yin kyi su rung rung la ma yin pas/ chos de sngags kyi theg pa yin pa mi chog gi gang zag de sngags kyi theg pa la tshul dang mthun pas zhugs pa zhig dgos par snang ngo/ /de ltar sngags kyi theg pa la legs par zhugs pa rnams la ni theg pa gzhan dang mi 'dra ba'i lam gyi sa phyod shin tu che ba yin te/ rgyud sde 'og ma gsum la yang lha'i rnal 'byor dang/ bzlas pa'i mthu la brten nas thun mong gi dngos grub mang po dang/ sangs rgyas dang @141a @#/ /byang chub sems dpa' chen po rnams kyis dngos su rjes su bzung nas byin gyis rlob pa la sogs pa'i thabs mkhas pa mang pos byang chub kyi spyod pa rdzogs par byed pa yin pa'i phyir dang/ sngags bla med la ni gzhi lam 'bras bu'i gnas skabs thams cad du rnal 'byor rgyud man chad la med pa'i khyad chas khyad par du 'phags pa shin tu mang por gsungs pa'i phyir te/ gzhi lus ngag yid gsum shin tu phra ba'i gnas tshul dang/ lam de dag la gnad du bsnun pa las shes sgrib chas shin tu phra ba rnams kyang tshe 'di nyid la spong nus pa sogs kyi gnad du ma yod pas/ rgyal ba'i sku gsum gzhi rten 'di nyid kyi steng du 'grub par byad pa'i phyir/ dpal kha sbyor gyi rgyud las/ de phyir nga rgyas ci zhig bya/ /mdor bsdus pas ni sangs rgyas nyid/ /bskal pa bya ba grangs med pas/ /ji srid sangs rgyas gang thob pa/ /gang gi dam pa'i bde bas khyod/ /skye ba 'dir ni 'thob par 'gyur/ /zhes gsungs pas skal ba dang ldan pa rnams kyis 'jug dogs rmad du byung ba 'dir skyes bu'i rtsal ci yod kyis 'bad par rigs so/ /gsum pa de dag gis grub pa'i don ni/ rnam dpyod dang ldan pa dag na re/ da ltar rang dang gzhan gyi grub pa'i mtha' rab tu mang po ches shin tu mi mthun pa rnam par rtog pa'i dra bas yongs su sbyar ba dag rnam par 'byed pa la blo gros kyi ngal ba chas cher bsten pa 'das ci zhig bya ste/ phyir zhing rnam par rtog pa'i dra ba brtas shing 'thas par 'gyur ba'i phyir ro/ /das na gang yang dag pa'i don la lags par gnas pa'i snying po @141b mngar byas pa kho na nyid 'chad par rigs kyi rnam pa gzhan dang gzhan gyis lugs tha dad pa mang po yongs su brtags pa'i dka' thub rnam par bsten pa ni bya rog gi so rtog pa'i bstan bcos ltar don med pa 'ba' zhig go snyam du sems na/ brjod pa bya ste/ 'di ni dam pa'i chos ches rab tu rgya che ba dag la ngal ba yangs su ma bsten pas gnas ma yin pa la log par rtog pas rgyud yongs su 'bags pa las dam pa'i chos spong bar byed pa'i brjod pa ngan pa ste/ gang yang bcom ldan 'das kyis blang ba dang dar ba'i gnas rab tu shes par bya ba'i phyir lung rgya chen po dag nyan zhing sems par bya bar gsungs pa'i don khong du ma tshud pa'i phyir ro/ /de lta bas na mang du thos pa 'tshol ba ni bdag legs su 'dod pa rnams kyi phun sum tshogs pa thams cad kyi gzhi yin ta/ kun mkhyen gnyis pa dbyig gi gnyen pos/ legs pa ston pa la brten pas phan yon lnga yod de/ lam ngan pa yongs su spong ba dang/ lam bzang po la yang dag par gnas par byed pa dang/ 'brog dgag pa las brgal ba'i dbugs 'byin pa dang/ bde bar 'gro ba dang/ 'dod pa'i yul du yang dag par phyin par byed pa yin no/ /de bzhin du dam pa'i chos ston pa la brten na lag par lta ba la sogs pa lam ngan pa yongs su spong ba dang/ yang dag pa'i lta ba la sogs pa lam bzang po la gnas par byad pa dang/ 'khor ba'i 'brog dgon pa las brgal ba'i dbugs 'byin pa dang/ ngan song las mchongs te bde bar 'gra ba dang/ 'dod ba mya ngan las 'das pa'i yul du yang dag par phyin par byed pa @142a @#/ /yin no/ /de dag kyang mnyan pa las 'byung gi ma mnyan pa las ma yin pas gus par mnyan par bya'o zhes gsungs so/ /de yang dam pa'i chos yongs su 'tshol ba rnams kyis don du gnyer bar bya ba ni rang nyid sdug bsngal thams cad yangs su spong ba dang gzhan sdug bsngal thams cad las skyob par 'dod pa gnyis yin la/ gzhan skyob pa la yang rang nyid sdug bsngal las thar ba med na mi 'byung ngo/ /rang nyid sdug bsngal las thar ba la ni thar bar byed pa'i lam bsten dgos la de la ni lam de 'tshol dgos so/ /lam la ni gnyis te/ phyi rol pa'i drang srong dag gis rnam par brtags pa dang/ ston pa thugs rje can gyis rnam par bstan pa'o/ /de la bdag nyid thar bar 'dod pa'i blo gros can des de gnyis las gang zhig ni yang dag pa'i lam ma nor ba yin la/ gang zhig ni lam 'khrul ba yin legs par brtag par bya ste/ gzhan du na brtag pa med par tsham tshom du 'jug pa ni skye bo mdzangs pa rnams kyi lugs ma yin pa'i phyir dang/ gal te gol bar zhugs na ni bdag nyid nyam nyes par 'gyur ba'i phyir ro/ /de ltar brtag pa la ni de gnyis kyi lugs so sor legs par shes dgos te/ gzhan du na de'i mtshan nyid legs par mi shes pas 'khrul ba dang ma 'khrul ba rnam par dbye bar mi nus pa'i phyir ro/ /de'i phyir shing rta chen po klu sgrub dang/ thogs med dang/ rig pa'i dbang phyug phyogs kyi glang po dang/ dpal chos kyi grags pa la sogs pa rgyal ba'i bstan pa yongs su 'dzin pa'i chen po dag gis rang dang gzhan gyi ston pa dang @142b bstan pa'i khyad par la rigs pa brgya phrag du mas yang dang yang du dpyad de/ dri ma dang bcas pa'i phyogs rnam par bsal ba dang dri ma med pa'i phyogs yongs su bzhag par mdzad pa ni/ grol ba don du gnyer ba mtha' dag la 'dod pa'i don gyi gtso bo yongs su bsal bar byad pa'i blo gros kyi mig rnam par 'byed pa'i thabs rmad du byung ba yin pas/ ci nas kyang bdag legs su 'dod pa rnams kyis 'bad pa chen pos tshul 'di la sbyang bar rigs te/ rgyal ba gnyis pa rje bdag nyid chen pos/ blang dor gnas la kun nas 'thoms pa'i mun/ /yang dag thos pa'i sgron mes ma bsal bar/ /lam mi shes na thar pa'i grong mchog tu/ /'jug par 'gyur ba smos kyang ci zhig dgos/ /de nyid phyir na mi pham chos rje dang/ /'dzam gling rgyan drug mchog gnyis zhes grags pa'i/ /gzhung la phyogs re ba dang rags pa res/ /tshims par ma byas kun la zhib tu sbyangs/ /zhes rang gi rtogs pa brjod pa mgur du stsal ba de nyid rang cag rnams la brtse bas gdams pa'i gsung du snang ba'i phyir ro/ /des na phyi rol mu stegs byed ngag gi lugs rnam par 'gog pa'i tshul ni yang dang yang du sems par bya ba yin te/ skye ba gzhan du lam ngan pa yongs su bzung ba'i bag chags nyams smad par bya ba'i phyir dang/ rang gi ston pa dang bstan pa la dad pa brtan po gting tshugs pa skye bar bya ba'i phyir dang/ skye ba phyi ma rnams su yang lam ltar snang gis bkri bar mi rung zhing lam bzang po la rang gi ngang gis 'jug par 'gyur ba'i phyir dang/ skye bo gzhan dag la yang dgos pa de gsum rang gis sgrub par nus par bya @143a @#/ /pa'i phyir dang/ rgyal ba'i dam chos yongs su 'dzin pa'i snying stobs dang smon lam ches cher rgyas par 'gyur ba'i dgos ba du ma dang ldan pa'i phyir ro/ /de ltar gzhan gyi ston pa rnams kyis rnam par brtags pa ni snying po med pa las kyang chos snying po med pa nyid du rtogs pas rang gi ston pa'i dgongs pa 'tshol ba la yongs su zhugs pa rnams kyis ni rang gi sde pa'i grub pa'i mtha' rnams mtha' dag pa la zhib tu sbyang bar bya ste/ ci'i phyir zhe na ston pa thugs rje can gyis dbang po sna tshogs pa dang mos pa sna tshogs pa dang khams sna tshogs pa'i gdul bya'i skye bo mtha' yas pa rnams mngon par mtho ba dang nges par legs pa'i rim gyis mthar thug pa'i lam la 'god par bya ba'i phyir du thabs kyi tshul dang rigs pa'i rnam grangs ji snyed cig gsungs pa'i dgongs pa'i don zhib tu nges par bya ba'i phyir dang/ bdag nyid kyang smin pa dang gral ba'i lam gyis rim pa ji lta ba bzhin du nges par 'byin par bya ba'i ched dang/ gzhan dag la yang skal ba ji lta ba bzhin du sman pa bsgrub par bya ba'i phyir ro/ /nges pa don gyi thams cad mkhyen pa dge 'dun rgya mtshos grub mtha' 'og ma 'og ma'i lta ba go ba gong ma gong ma'i lam stegs su gsungs pa nyid shing rta chen po'i dgongs pa yang yin la/ de dag gi thun mong ma yin pa'i khas len 'ga' zung tsam ma gtags rtag gcig rang dbang can gyi bdag gis stongs pa dang/ rang rkya thub pa'i rdzas yod kyis stongs pa'i bdag med dang/ gzung 'dzin gnyis stong gi de kho na nyid dang/ chos thams cad tha snyad du rang mtshan gyis yod kyang don dam par @143b ngo bo nyid med pa dang/ chos thams cad tha snyad du yang rang mtshan gyis grub pa rdul tsam yang med pa la rgyu 'bras 'ching grol gyi bya byed thams cad bzhag pas chog pa'i bdag med kyi rim pa rnams phyi ma phyi ma las snga ma snga ma rnams rtogs sla ba dang/ snga ma rnams phyi ma la 'jug pa'i thabs su 'gyur ba rnams mdo dang shing rta chen po rnams kyi dgongs pa yin cing rje bdag nyid chen pos kyang legs par bshad pa'i gzhung chen mo rnams su ji ltar rigs par bka' stsal ba yin te/ sngar bshad pa rnams kyi 'gros dang gzhung de dang de dag tu sbyangs pa las shes par bya'o/ /da ni don hril gyis dril na sngar bshad pa'i grub pa'i mtha' da dag la lags par 'dris par byas pa'i gang zag gis don de dag thams cad blo kha nang du phyogs te rgyud steng du nyams su len pa'i 'gag sngam zhig shes dgos te/ gzhan du na kha phyir blta'i thos bsam gyis rgyud la ci yang mi phan pa'i phyir dang/ thos bsam gyis gtan la phab pa yang sgom pas nyams su len pa'i ched du yin pa'i phyir dang/ grub pa'i mtha' gtan la phab pa yang lam phyin ci ma log pa rgyud la skyed pa kho na'i ched yin pa'i phyir ro/ /des na dkyu sa gzhan du bstan nas rgyug sa gzhan du byed pa lta bur ma song ba zhig shin tu gal che'o/ /'o na nyams su len pa'i 'gag sdom de ji lta bu zhig yin zhe na; de ni dus gsum rgyal ba thams cad kyi yum shes rab kyi pha rol tu phyin pa'i dgongs pa/ rje btsun byams pa mgon pos gsal bar mdzad pa'i gdams pa/ shing rta chen po klu sgrub dang thogs med gnyis las brgyud pa'i lam srol/ rgyud pa'i @144a @#/ /chu bo gsum gcig tu 'dres pa dpal dI paM ka ra shrI dznyA nas yongs su rdzogs par lam gyi rim par bsgrigs te gsal bar mdzad pa rim pa bzhin du brgyud pa las/ rje btsun 'jam dpal dbyangs dang ngo bo tha mi dad pa mtshan brjod par dka' ba rje bdag nyid chen po blo bzang grags pa'i dpal gyis byang chub lam gyi rim pa che chung du gsungs pa nyid yin te/ tshul 'di ni bcom ldan 'das nyid kyis gzungs kyi dbang phyug rgyal pos zhus pa las nor bu sbyong ba'i dpes bka' stsal ba dang/ mgon po klu sgrub kyis rin chen 'phreng ba las mngon mtho nges legs kyi lam la rim can du 'khrid par gsungs pa dang/ 'phags pa thogs med kyis byang chub sems dpa'i sa las gdams ngag chung 'bring che gsum gyis gdul bya rim gyis 'khrid par gsungs pa dang/ 'phags pa lhas rnal 'byor spyod pa bzhi brgya par gtsang bde rtag bdag tu 'dzin pa'i gnyen po smin byed dang grol byed kyi lam la rim can du slob par gsungs pa dang/ slob dpon dpa' bo dang/ legs lan 'byed dang/ dpal ldan zla ba dang/ zhi ba 'tsho la sogs pa mtha' dag gis lam gyi go rim nges pa can du gsungs pa'i don gyi snying po yin no/ /de'i phyir skal pa dang ldan pa'i gang zag rnams kyis dal ba rnyed dka' zhing ring du mi gnas pa dang/ rgyal ba'i bstan pa rin po che yang 'jig rten na ring du 'phel dka' ba dang/ dus kyi tha ma snyigs mar sbyor ba'i ngang tshul rnams bsams nas bstan pa'i snying po 'di lta bu dang 'phrad pa la dbul pos gter rnyed pa lta bu'i dga' ba bsgoms te phyi gshol gyi le lo @144b spangs nas nyin dang mtshan du 'bad pas dal ba don yod par bya bar rigs te/ rnam bshad rigs pa las/ de ltar sangs rgyas kyi gsung ni yongs su nyams pa dang yun ring du mi gnas par rig par byas nas ji srid du cung zad lus pa de srid du 'di mnyan pa dang gzung ba don mthun par bsgrub pa la dad pa can rnams kyis rab tu 'bad par bya'o/ /zhes dang/ de lta bas na ji srid du mun pa gcig pu'i 'thibs po mi 'byung ba de srid du yang dag pa ji lta ba bzhin gyi don rab tu rnam par dbye ba'i phyir sangs rgyas kyi gsungs mnyan pa la dad pa can rnams kyis shin tu rings par bya'o/ /zhes gsungs pas so/ /bcom ldan 'das kyis legs par gsungs pa'i chos la lhag par brtson pa rnams kyis ni bsod nams rgya chen po dang ye shes rgya chen po la nye par 'jug pa'i phyir legs pa'i tshogs thams cad dpag bsam gyi ljon pa bzhin du nye bar 'grub pa yin no/ /de ltar bdag gis grub pa'i mtha'i rnam par bzhag pa 'di ni 'phags pa byams pa'i chos sde lnga/ klu sgrub kyi rigs tshogs drug dang mdo kun las btus/ 'phags pa thogs med kyi sa sde dang theg bsdus/ mngon pa kun las btus/ dbyig gnyen gyi mdzod rtsa 'grel/ rnam bshad rigs pa/ sum cu pa/ nyi shu pa/ phyogs glang yab sras kyi sde bdun mdo dang bcas pa rnams dang/ de dag gi 'grel pa 'grel bshad chen po phal mo che dang/ bzhi brgya ba rtsa 'grel/ bslab spyod gnyis/ dbu ma snying po rtsa 'grel/ 'jug pa rtsa 'grel/ bden gnyis rtsa 'grel/ dbu ma rgyan rtsa 'grel/ tshad ma'i de kho na nyid bsdus pa rtsa 'grel/ @145a @#/ /dbu ma snang ba/ sgom rim gsum sogs dang/ gzhan yang shanti pa/ mai tri pa yab sras/ dzai ta ri/ byang chub bzang po/ /mnyam med jo bo chen po la sogs pa rgya gar 'phags pa'i yul gyi paN grub rnams kyi gzhung lugs phal mo che la cung zad 'dris par byas shing/ gangs ri'i ljongs kyi thub pa'i bstan pa la bya ba lhag par mdzad pa'i mkhas pa chen po 'jam mgon sa skya paNDi ta yab sras/ rdog lo yab sras/ bu ston thams cad mkhyen pa/ rje btsun reng mda' ba chen po; ;paN chen phyogs las rnam rgyal la sogs pa chen po dag gi gsung rab rnams dang/ khyad par du rang cag rnams kyi 'dren pa dam pa rje bdag nyid chen po'i gsung rab gzhung lugs chen mo rnams nas bzung gsung gi zin bris phra mo yan chad mtha' dag dang/ sras kyi tha bo gnyis dang/ gung ru rgyal mtshan bzang po/ /thams cad mkhyen pa dge 'dun grub la sogs pa rje'i dngos slob rnams dang/ 'dul 'dzin grags pa dpal ldan/ paN chen byams pa gling pa chen po/ /mkhas grub nor bzang rgya mtsho/ /'jam dbyangs dga' ba'i blo gros/ shanti pa blo gros rgyal mtshan/ paN chen bsod nams rgyal mtshan/ kun mkhyen chos 'byor dpal bzang/ thams cad mkhyen pa dge 'dun rgya mtsho/ /se ra rje btsun chos kyi rgyal mtshan yab sras/ paN chen bsod nams grags pa/ mkhas grub bstan pa dar rgyas/ mkhas pa'i dbang po gung ru chos kyi 'byung gnas/ 'jam dbyangs stag lung brag pa la sogs pa'i dbu phar 'dul mngon tshad ma'i skor gyi gzhung chen mo'i rnam bshad/ @145b sbyor TIka/ dri lan/ zin bris/ spyi don/ thal 'phreng phal mo che la yang dang yang du sbyangs par byas/ de dag gi don la tshul bzhin sems pa'i rigs pas legs par dpyad/ grub mtha'i rnam gzhag snga phyi du ma dang/ khyad par du lung rtogs bshad sgrub kun gyi mnga' bdag mkhas grub chen po 'jam dbyangs bzhad pa'i rdo rje mtshan gzhan ngag dbang brtson 'grus pas mdzad pa'i grub mtha'i rnam bshad chen mo nyid gsal la rgyas shing legs bshad kyi gter du 'dug pas de nyid dang so bstun 'phags bod kyi gzhung lugs de dag la rang gi blo gros kyis ji ltar dpogs pa'i bshad pas zur brgyan te rjod byed mdor bsdus pas brjod bya rgya che ba snying por dril te med du mi rung ba'i dka' ba'i gnad 'ga' zhig la dpyod ldan rnams kyi blo gros 'jig pa'i yan lag tu rigs pas mtha' gcod pa dang bcas rang bzo'i dri mas ma gos par bkod pa lags so/ /smras pa/ lhag bsam ches cher dkar ba'i mdangs kyis lan brgyar byugs pa'i rab gsal blo gros 'od kyi zhags pa rnon po ni/ /nyi ma'i gnyen gyi gsung rab sngo bsangs mdzes ma'i 'gram pa'i mtha' la 'gran bzhin 'khyud pa'i rtsed 'jo lhur len pa'i/ /ya mtshan rmad byung rol mos dus kyi mtha' 'di ci zhig ltar stes skal ba bzang po nyid du sgrub byed pa/ /de yi kha las skyugs pa'i legs bshad gtam 'di sras bcas rgyal ba dgyes bskyed bdud rtsi'i mchod yon nyid ces grags/ /'jig rten mtha' dag gya nom dngos pos lan brgyar bkang ste 'bad pa med bzhin mngon par byin pa yis/ /'di na sred ldan gang dag dga' bas myos pa'i ca co sgrogs shing @146a @#/ /lus kyi brtan pa nyams byed gang/ /dga' ba des ni blo gros rnam par gsal ba'i mkhas pa dag la legs bshad gtam gyis bskyed byas pa'i/ /dga' ba'i cha shas phra mo dag la'ang lan cig tsam yang 'gran du bzod pa'i go skabs ga la mchis/ /gang zhig bsgrubs kyang 'grub par ma nges grub na'ang gdon mi za bar 'dar dgos pa'i/ /mnog chung phun tshogs don du'ang rmongs pa 'di dag nam yang brtsan pa mi 'dor na/ /nges par gtan gyi bde ster thar pa dam pa'i lam ni ma nor sgrub pa'i ched/ /rnam dag rigs chul lan brgyar smra la'ang mkhas pa dag ni brtson pa ci'i phyir 'dor/ /thub pa'i gzhung la thub pa nyid bzhin du/ /rnam par dpyod pa'i shing rta chen po'i gzhung/ /ma lus tshon brgyas gsal bar phyi ba bzhin/ /blo gros chu mtshor lhag gar bkra 'di rmad/ /kye ma drang srong mchog gi lugs/ /bdag gi blo dang mja' ba ni/ /thub pa rnams kyi thugs rje ni/ /skye dgu rnams la 'khyud pa bzhin/ /de yi shugs kyis bris pa yi/ /mgon po dam pa'i gzugs brnyan ni/ /yid la yang yang gsal gyur kyang/ /mngon du ma gyur bdag yid gdungs/ /gang gi gdung 'tsho ba che rnams kyi/ /gzhung lugs bdud rtsi'i thigs pa ni/ /snying gi bcud du bsten pa las/ /dga' ba'i sim pa'ang lan brgyar myong/ /bskal par ting 'dzin bde ba'i ro myangs ba/ /rkang mig sogs kyis gang gi cha tsam yang/ /ma spyad rigs pa'i lam gyi dga' ston dag mngon sum lta bur spyod 'di skal ba bzang/ /de lta na yang bdag cag ni/ /byis pa'i blo can nyid yin pas/ /dpag dka' drang srong chen po'i @146b lugs/ /rang gi nus pas ji ltar dbogs/ /rgyal ba'i dam chos 'dzin pa'i smon lam mthu/ /mngon par grub pa 'jam dpal snying po yi/ /gsung la ngal ? ba mang du byas pa dang/ /bshes gnyen dam pa bsten pa'i mthu las so/ /rnam dag rigs pa'i lam bzang po/ /gtan bde ster ba'i thabs gcig pu/ /'di la brtson byar yod bzhin du/ /don med 'da' rnams phyugs las phyugs/ /bde ba'i mchog ni bor nas su/ /bde ba min la bde bar 'dzin/ /log par 'phyan pa'i rmongs pa dag ci zhig gis ri bde bar bkri /mi bzad las kyis dbyen spyos pa/ /gang dag chags bral gsung nyid kyis/ /phyir zhing zhen lta 'phel byed pa/ /'di dag la ni sus kyang ci/ /rang gi rmongs pa'i dri ma'i btsog chu nyid/ /dri med gzhung lugs slong ? phyir sbyor byed pa; ;da dag rnams kyi gtam gyi 'phreng ba ni/ /dpyod ldan snying gi zug rngu mchog las ci/ /mnyan par 'os pa'i gtam gyi sbyor ba dag ji ltar byas kyang spel bar mi nus pa/ /de dag rnams kyi lce yi rtse mo ni/ /snying las chung ngur bsti na cis ma legs/ /'dun pas 'gro dang 'jigs pas 'gro ba la/ /dad pa'i rjes su 'brangs par 'khrul pa dang/ /sdang bas 'gra dang rmongs pas 'gro ba la/ /chos kyi rjes su 'brangs par 'khrul pa mang/ /gzhan gyis rigs tshul bye bas bsnyad gyur byed/ / rang nyid gang la zhen pa de nyid la/ /rnam par 'thas pa nam yang mi gtong ba/ /dam pa'i lugs su smra 'di bzhad gad gnas/ /la la gzhan gyis rjes su zlos pa la'ang/ /shed ma bye ba'i byis pas smra ba bzhin/ /dka' ba bsten yang 'chad rtsod @147a @#/ /rtsom pa'i khur/ /'dzin pa 'di dag mchog tu brtse ba'i yul/ /legs nyes gser dang bong ba mnyam nyid du/ /gzigs pa'i chags bral skye bo 'di dag la/ /bdag gi legs par bshad pa 'di yis kyang/ /bgyi ba cung zad tsam yang yod ma yin/ /rang nyid mchog tu gyur ba'i lugs 'di dang/ /nam yang mdza' ba nyams pa med pa'i phyir/ /rigs pa'i gtam gyi dga' ston zab mo dag rang la rang gis smras pa nyid du zad/ /'on te blo bzang rgyal ba'i bstan pa dang/ /legs par mjal ba'i skal bar ldan pa rnams/ /phyogs lhung dor ba'i ngang tshul 'dzin 'dod na/ /dga' bas zhugs te don gyi ro myong zhig thos bral ri su la bsten pa'i dka' thub dang/ /tshig tsam kho nar 'tshel ba'i thos bsam pa/ /gnyis ka'ang rgyal ba'i lam las gol ba ste/ /ngal ba kho na don gyi snying por zad/ /de'i phyir thos bsam sgom pa dang/ /lung rtogs bshad sgrub ma lus pa/ /phan tshun gcig la gcig brten par/ /shes shing spyod na dam pa legs/ /dam pa'i legs par bshad pa la/ /ji lta ba bzhin spyod pa ni/ /dam pa nyid du dam pa dag lan brgyar bsngags pa shes par mdzod/ /kyi hud bdag ni dus kyi snyigs mar skyes/ /snying med 'du 'god za zi'i rlubs su chud/ /las rlung drag pos phyogs rnams kun du bdas/ ngam chos ji bzhin sgrub pa'i skal ba phra/ /yang dag lam gyi snying po ni/ /bde blag nyid du ster mdzad pa/ /dam pa'i mgon gyi zhabs rdul ni/ /tsod pan nyid du byas mod kyang/ /de yi zhal gyi sgo dag las/ /rnam par 'ongs pa'i bdud rtsi'i rgyun/ /sgrub pa @147b lhur len gyis spyod pa'i/ /rang dbang bral 'dis shes pa 'phyo/ /rigs par smra ba'i gtam gyi dga' ston dang/ /thub pa'i lugs la shes nas dad pa dang/ /de nyid kho na 'dzin 'dod smon pa'i yid/ /'di dag bdag gi yid la 'gran bzhin 'phel/ / de ltar bdag gi 'dir ni thub pa'i lugs/ /'bad pa du mas legs par gsal byas mod/ /byis blo'i phyir na nongs par gang gyur rnams/ /mkhas pa'i skye bo rnams la bdag 'chags so/ /tshul 'dir rab tu ngal ba las byung rab dkar dge ba ston zla rgyas pa'i dpal bzang pos/ /drin gyis lci ba'i skye dgu'i yid kyi kun gsal rmongs pa'i mun tshogs mtha' dag dang bral te/ /bsod nams ye shes rnam par dge ba'i snang ba mchog gi dge legs dam pas khyab gyur nas/ /yid 'ong bla na med pa'i dga' ston bde bas myur ba nyid du rnam par rol gyur cig rgya mtsho'i rdul gyi grangs snyed rnam mang zhing gi 'gro la theg pa mchog gi gtam zab mos/ /yang dag lam mchog gsal bar byed cing log pa'i ring lugs ma lus drungs nas 'byin pa la/ rgyal ba mchog gi sras kyi thu bo 'jam dpal dbyangs zhes grags dkar ba don g.yo ba de'i/ /rnam par thar ba bye ba phrag brgyar 'dzin la phul du byung ba nyid du bdag gyur cig rgyal ba mchog gi bshes gnyen rgya mtsho'i spyan sngar bskal pa rgya mtshor skad cig re re zhing/ /kun bzang spyod pa rgya mtsho yongs su rdzogs par spyod cing thugs kyi gsang ba rgya mtsho'i mdzod/ /yang dag 'dzin pas sems can rgya mtsho mtha' dag srid pa'i rgya mtsho che las sgrol ba la/ /rmad byung snying stobs rgya mtsho'i dpal @148a @#/ /gyis brtsen pa'i rgyal sras rgya mtsho'i thu bor bdag gyur cig /bdag gi bsod nams rab tu dkar ba 'dir ni dge ba'i cha shas skad cig ji snyed mchis pa gang/ /de snyid grangs kyi bskal pa du mar rgyal sras rnams kyi zab cing rgya che'i theg mchog chos kyi gtam/ /rgya cher sgrog pa'i skal ba bzang pos 'jig rten 'di dag snying la ya mtshan bde ba skyed byed ba'i/ /ya mtshan dpal mchog de ni thub pa rnams kyi 'phrin las ji bzhin 'dir yang nyams pa med gyur cig gang na rtag dang chad par smra ba'i tshogs kyis kun tu lus can phan bde'i zug rngu rnam par skyed byed pa/ /der ni bdag ni thub pa'i lugs mchog rigs tshul drang po'i rnga chen brdung ba'i dpa' bo'i dbang por legs gyur te/ /smra ngan mun pa mthar byed rgyal ba'i gdung 'tsho ba chos kyi srid la 'gro rnams bde blag nyid du 'god pa la/ /mchog tu bsngags pa'i cod pan dkar pos rgyal ba rnams kyis bdag gi mgo la dge legs ster gyur cig /ces grub pa'i mtha'i rnam par bzhag pa gsal bar bshad pa thub bstan lhun po'i mdzes rgyan zhes bya ba 'di ni dang por sems dpa' chen po rje btsun chos rgya mtsho ba dang sde snod 'dzin pa'i dge ba'i bshes gnyen chen po dka' chen shes rab dar rgyas pa dang rje grub pa'i dbang phyug 'dul 'dzin blo bzang chos 'dzin pa sogs kyi bka' 'drin las mdo sngags kyi gsung rab du ma la dpyod pa'i sgo mang du rnyed cing/ phyis su chos kyi rgyal po sangs rgyas bcom ldan 'das kyi rgyal srid la 'dod dgur dbang bsgyur ba'i rgyal ba'i @148b dbang po thams cad mkhyen pa blo bzang bskal bzang rgya mtsho'i zhal snga nas las dam pa'i chos kyi bdud rtsi'i bgo skal blangs ba dang/ gzhan yang bshes gnyen dam pa du ma'i zhabs rdul spyi bos blangs shing mkhas pa rnams dang dka' ba'i gnas la 'bel ba'i gtam yang mang du bgyis pa dang/ khyad par du rje rgyal ba gnyis pa'i rgyal tshab dam pa phyi nang gi rten 'brel rnams chu'i zla ba ltar gzigs shing byang chub kyi thugs lhag par 'byongs pa rim gnyis kyi ting 'dzin la mnga' brnyes pa'i grub pa'i dbang phyug chen po rje btsun dam pa khri chen ngag dbang mchog ldan pa'i zhal snga nas las dpal mnyam med ri bo dge lugs pa'i mdo sngags kyi bshad srel du ma dang khrid chen brgyad sogs legs par thob pa'i bka' drin las rang gzhan gyi grub pa'i mtha' du ma dang/ rgyal ba'i gsung rab rab 'byams la blo gros kyi snang ba cung zad rgyas shing blo bzang rgyal ba'i ring lugs la mi phyed pa'i dad pa brtan po thob pa'i snyoms las pa dge slong ye shes bstan pa'i sgron me/ 'jam dbyangs gong ma'i lung gis bkwan ting phu'u shan bkwang tshi tA kau shri zhes bsngags pa lcang skya rol pa'i rdo rjer grags pas rang nyid gzhung lugs chen mo rnams la bag chags 'jog pa'i phyir dang/ skal mnyam gzhan la'ang phan pa'i bsam pas kun nas bslangs te sngar sems tsam yan chad bsgrigs pa la mkhyen rab kyi gter chen po lung dang mngon par rtogs pa'i yon tan rin po che'i mdzod 'dzin pa khri chen sprul pa'i sku blo bzang bstan pa'i nyi ma dpal bzang po'i zhal snga nas kyis gzigs nas ngo mtshar rmad du @149a @#/ /byung ba'i legs bshad cig yong bar 'dug pas cis kyang mjug grub par gyis zhes dngul gyi maNDal lha rdzas bcas bka' stsal pa dang du blangs te rgyal khab chen po'i nye 'dabs ri bo spos ldan gyi 'gram dam chos dga' tshal du sbyar ba'i yi ge ba ni shing sA la chen po lta bu'i rigs mthon por skyes shing blo gros rmad du byung ba thu med lha btsun ye shes bstan 'dzin rgya mtsho dang/ glegs bam du 'dri ba po ni dad brtson rnam dpyod mchog tu yangs pa'i dge slong bsod nams phun tshogs kyis bgyis pa'o/ /'dis kyang thub bstan spyi dang khyad par rgyal ba blo bzang grags pa'i ring lugs dri ma med pa phyogs dus thams cad du dar zhing rgyas pa dang 'gro ba mtha' dag kyang rgyal ba'i bstan pa la legs par zhugs te phan bde'i dpal bzang po la rnam pa kun tu spyod par gyur cig grub mtha' thub bstan lhun po'i mdzes rgyan 'di bzhin ro don khyab brdal che'i ba'i rig gzhung rtsa chen yin pa dang 'di ga'i mtshan nyid slob tshan khongs kyang yod stabs/ gam bcar phan bde legs bshad gling grwa tshang dang/ rgyud rnying slar gso tshogs pa thun mong nas yon sbyar te dpe gzugs lnga brgya tham pa bod rgyal lo/ 2109 lor dpar bskrun zhus so// //