@001a @#/ /sgrol bstod mkhas pa'i gtsug rgyan gyi rnam bshad mkhas pa'i gtsug nor gyi phra rgyan ces bya ba bzhugs so/ @001b @#/ /bla ma dang 'phags ma sgrol ma gnyis su med pa'i zhabs la phyag 'tshal lo/ /tshe rabs thams cad du rjes su gzung du gsol/ 'dir legs bris mar grags pa rje btsun sgrol ma'i bstod pa mkhas pa'i gtsug rgyan ces bya ba bshad par bya ba la gsum/ bstod pa'i sngon 'gro/ dngos gzhi/ mjug gi don gsum mo/ /dang po ni/ 'phags pa spyan ras gzigs dbang phyug la phyag 'tshal lo/ /zhes pa de yin no/ /gnyis pa la/ bstod pa dngos dang; 'dod don la gsol ba gdab pa gnyis/ dang po la/ legs bris dpal gyi bdag po gser gyi mngal/ /lha yi bla ma glang gdong dpal gyi mgrin// @002a @#/ /padmo'i gnyen sogs lha brgya'i gtsug rgyan gyis/ /zhabs pad gus mchod sgrol ma'i zhabs la 'dud/ /ces pa ni/ 'jig rten na bla mar grags pa'i mthu bo che rnams kyis mchod na bdag cag lta ci smos zhes pa'i brda' yin pas/ de yang 'dod gzugs kyi lha rnams kyi lus la bkra shis pa'i ri mo yod pas na legs bris zhes pa lha de dag gi spyi ming yin zhing/ bye brag tu dpal gyi bdag po ni khyab 'jug dang/ gser gyi mngal ni tshangs pa dang lha yi bla ma ni phur bu dang/ glang gdong ni chogs bdag dang/ dpal gyi mgrin ni dbang phyug dang/ padmo'i gnyen ni nyi ma ste de dag la sogs pa'i lha @002b brgya phrag mang pos rang gi spyi bo'i gtsug rgyan gyi nor bu rin po ches gang gi zhabs kyi padmo la gus pas mchod par byed pa'i rje btsun sgrol ma'i zhabs la 'dud ces pa'o/ /yang/ thugs rje chen po'i thugs rje'i rnam 'phrul gyis/ /dus gsum rgyal ba'i mkhyen brtse nus pa rnams/ /rab mdzes 'phrin las lha mo'i skur bstan nas/ /phongs pa kun skyob sgrol ma'i zhabs la 'dud/ /ces pa ni/ thugs rje chen po ste spyan ras gzigs de'i thugs rje'i rnam 'phrul gyis dus gsum rgyal ba ma lus pa'i mkhyen brtse nus pa rnams rab tu mdzes pa'i lha mo'i skur bstan nas/ bdag cag phongs pa kun las skyob pa'i sgrol ma'i zhabs la 'dud ces pa'o/ /de nas/ dbyings rig rnam dag pad zla'i gdan steng na/ /mar gad mdog can zhal gcig phyag gnyis ma/ /lang 'tsho rab rgyas g.yas brkyangs g.yon bskums zhabs/ /thabs shes zung 'brel ma la phyag 'tshal lo/ /zhes pa la dbyings te yul stong nyid dang/ rig pa ste yul can ye shes rang bzhin gyis rnam par dag cing/ padmas mtshon pa'i don dam byang chub kyi sems dang/ zla bas mtshon pa'i kun rdzob byang chub kyi sems gnyis glo bur dri mas dag tshul mtshon pa'i pad zla'i gdan gyi steng na/ mar gad la dmar po dang ljang khu'i rigs gnyis las 'dir phyi ma'i @003a @#/ /dbang du byas nas sku mdog ni mar gang mdog can te 'phrin las sna tshogs kyi lha yin par mtshon zhing/ chos thams cad ro gcig tu rtogs pas zhal gcig pa dang/ tshogs gnyis sdud par byed pa'i phyag gnyis ma/ lang tsho rab tu rgyas pa ni bde ba chen po rgyas pa dang/ g.yas brkyangs shing g.yon bskums pa'i zhabs gnyis kyis thabs shes zung 'brel mtshon pa'i rje btsun ma la phyag 'tshal lo zhes pa ste 'dis sku 'gying bag gi nyams dang ldan par bstod pa'o/ /yang/ nu 'bur rab rgyas zag med bde ba'i gter/ /zhal ras zla ba rgyas pa'i 'dzum dkar can/ /zhi ba'i nyams ldan thugs rje'i spyan yangs ma/ /seng ldeng nags kyi mdzes ma khyod la 'dud/ /ces so/ /nu ma 'bur zhing rab tu rgyas pa ni zag med bde ba'i gter te/ dper na nu ma nu zho 'jo ba'i khungs yin pa ltar/ 'dir yang zag med bde ba'i 'byung khungs mtshon pa'am/ yang na rang cag rnams la zag med kyi bde ba ster ba'i brda' yin zhes bkral kyang mi rung ba med dam snyam/ zhal ras ni ston gyi zla ba nya gang ba ltar rgyas ba 'dzum zhing dkar ba'i mdangs can/ zhi ba'i nyams dang ldan zhing nang gi thugs rje chen po spyan zung yangs ma'i gzugs su shar ba/ bzhugs sa'i gnas ni ri bo gru 'dzin gyi seng ldeng @003b nags na bzhugs pas/ gnas de'i bdag po yin pa'i cha nas seng ldeng nags kyi mdzes ma khyod la 'dud/ ces so/ /g.yu yi ljon shing yal ga brkyangs 'dra ba'i/ /'jam mnyen phyag g.yas mchog spyin phyag rgya ni/ /mkhas rnams dngos grub mchog gi dga' ston la/ /mgron du 'bod 'dra khyod la phyag 'tshal lo/ /zhes pa ni/ dper na g.yu yi ljon shing gi yal ga brkyangs pa dang 'dra ba'i 'jam zhing mnyen pa'i phyag g.yas pa mchog sbyin gyi phyag rgya mdzad pa ni/ mkhas pa rnams dngos grub mchog gi dga' ston la 'dir shog ces mgron du 'bod pa dang 'dra ba khyod la phyag 'tshal lo zhes pa ste 'di ni phyag g.yas pas brda' ston tshul la bstod pa'o/ /phyag g.yon dkon mchog gsum mtshon skyabs sbyin gyis/ /'jigs pa brgya phrag mthong ba'i skye bo rnams/ /ma 'jigs nga yis myur du bskyab po zhes/ / gsal bar mtshon pa khyod la phyag 'tshal lo/ /zhes pa ni/ phyag g.yon dkon mchog gsum mtshon pa'i skyabs sbyin gyi phyag rgya mdzad pa yis/ 'jigs pa brgya phrag ste 'jigs pa mang po mthong nas 'jigs shing skrag pa'i skye bo rnams la bos nas/ khyed cag ma 'jigs shig nga yis myur du bskyab po zhes 'phrin las myur ba gsal bar mtshon pa khyod la phyag 'tshal lo zhes phyag g.yon pas brda' ston @004a @#/ /tshul la bstod pa'o/ /de nas/ phyag gnyis ud pal sngon pos mtshan pa ni/ /'gro kun srid pa'i bde la ma chags par/ /thar pa chen po'i grong du zhugs shig ces/ /brtson pa'i lcag gis skul 'dra khyod la 'dud/ /ces pa ni/ phyag gnyis na ud pal sngon pos mtshan pa ni/ 'gro ba kun srid pa'i bde ba la ma chags par myur du thar pa chen po'i grong gi lam la zhugs shig ces brtson pa'i lcag gis skul bar byed pa dang 'dra ba khyod la 'dud ces phyag mtshan gyi sgo nas bstod pa'o/ /padma rA ga'i mdangs ldan 'od dpag med/ /mnyam bzhag bdud rtsis gang ba'i lhung bzed bsnams// 'chi med dngos grub stsol bas spyi por brgyan/ /bdag gi 'chi bdag 'joms pa khyod la 'dud/ /ces pa ni/ padma rA ga'i mdangs dang ldan pa'i rgyal ba 'od dpag med kyis/ phyag gnyis mnyam bzhag gi steng na 'chi ba med pa'i bdud rtsis gang ba'i lhung bzed bsnams nas 'chi med tshe'i rig 'dzin gyi dngos grub stsol bar mdzad pa'i tshe lha de yis rang gi spyi bor rigs bdag gi tshul du brgyan pa ni/ bdag cag gi dus min gyi 'chi bdag gi 'jigs pa 'joms pa khyod la 'dud ces rigs bdag gi sgo nas bstod pa'o/ /de nas/ tshogs gnyis mtho ris bzo bo'i 'du byed kyis/ /gzhal med lha@004b yi yid bzhin nor bu rnams/ /mdzes mdzes gcig tu bsdus pa'i yid 'phrog can/ /kun gyis brgyan pa khyod la phyag 'tshal lo/ /zhes pa ni snyan dag gzugs can gyi rgyan yin pas/ de yang sgrol mas sngon bsags pa'i bsod nams dang ye shes kyi tshogs gnyis/ mtho ris bzo bo ste byed pa po lha yi bi shwa karma'i gzugs su bkod/ bzo bo de'i lag pas 'du byed kyis/ rin thang gzhal du med pa'i lha yi yid bzhin nor bu rnams las gang mdzes shing mdzes pa gcig tu bsdus nas bzos pa'i yid 'phrog pa'i rgyan kun kyis brgyan pa khyod la phyag 'tshal lo zhes pa ste rgyan gyi sgo nas bstod pa'o; ;de nas/ mar gang ri bos 'ja' tshon gyon pa bzhin/ /sku stod lha rdzas gos kyi ga sha can/ /phra zhing ldem la mdzes pa'i rked skabs ni/ /panytsa li ka'i sham thabs 'dzin la 'dud/ /ces so/ / rkang pa dang po 'di dpe rgyan la rab brtag gi nyams cung zad 'dris pa yin pas/ mar gang ri bos 'ja' tshon sna lnga'i gos gyon pa bzhin du/ sku stod lha rdzas gos kyi ga sha ste stod g.yogs can dang/ sku smad phra zhing ldem la mdzes pa'i rked skabs ni/ panytsa li ka'i ste lnga len zhes pa'i yul nas byung ba'i gos kyi sham thabs 'dzin la 'dud ces na bza' mdzes pa'i sgo nas bstod pa'o/ /yang/ g.yas @005a @#/ /na mya ngan med pa'i 'od zer can/ /zhi ba'i nyams ldan gser mdog nyi 'od 'phro/ /g.yon ra la gcig nam mkha'i mdzes pa 'phrog /khro chags brjid pas mdzes pa de la 'dud/ /ces pa ni/ rje btsun gyi g.yas phyogs na mya ngan med pa'i shing gi yal ga 'dzin pa'i lha mo 'od zer can ma zhi zhing 'dzum pa'i nyams ldan/ gser gyi mdog 'dra ba'i nyi ma'i 'od 'phro ba dang/ g.yon phyogs na lha mo ral gcig ma sngon mo nam mkha'i mdzes pa 'phrog pa dang/ gtso 'khor gsum ga khro chags brjid pa'i nyams kyis mdzes pa de la 'dud ces 'khor gyi sgo nas bstod pa'o/ /yang/ drug ldan glu dang mdzes pa'i gar la mkhas/ /gdugs dkar rda yab pi wang gling bu sogs/ /rab 'byams mchod rdzas 'dzin pa'i lha mo'i tshogs/ /nam mkha' gang bas mchod la phyag 'tshal lo/ /zhes pa ni/ drug ldan zhes pa la/ kha cig gis/ sa paN kyis mdzad pa'i rol mo'i bstan bcos las/ 'dren pa dang ni bkug pa dang/ /bsgyur ba dang ni ldeng ba nyid do/ /zhes dang/ dbyangs kyis drangs la tshig gis dgug /dbyangs kyis bsgyur la tshig gis ldengs/ /dbyangs kyis drangs la tshig drangs dang/ /dbyangs kyis bkug la tshig bkug dang/ /dbyangs kyis bsgyur la tshig bsgyur dang/ /dbyangs kyis ldengs la tshig ldengs dang/ / @005b zhes pa ltar drug la byed zer/ yang kha cig gis/ sum pa paNTi ta'i bla mchod 'grel pa las/ 'gyur khug 'degs 'jog sbom phra ste yan lag drug ldan lhan cig tu bsngags pa brjod par byed pa dang/ lus kyi byad bzhin dang/ bsngags pa sna tshogs pa gsum dang/ dbu dang bar skabs su dang tha mar yang phral du bsngags pa ste shin tu snyan pa'i drug ldan glu dbyangs zhes pa ltar/ drug la byed zer bas brtag par bya/ gang ltar yang/ yan lag drug dang ldan pa'i glu snyan la mkhas pa dang/ mdzes pa'i gar khrab pa la mkhas pa dang/ gzhan yang gdugs dkar rda yab sogs mdzes pa'i rnam 'gyur gyis 'dzin pa dang; 'bud dkrol gyi rigs pi wang gling bu sogs rab 'byams te mu mtha' med pa'i mchod rdzas sna tshogs 'dzin pa'i lha mo'i tshogs nam mkha'i khams gang bas dus rtag tu mchod pa la brtson pa'i sgrol ma la phyag 'tshal lo zhes 'khor rnams kyis mchod tshul la bstod pa'o/ /de nas/ dpal mo legs brjod mi dang ri skyes sogs/ /yid 'ong 'chi med bu mo stong dag gis/ /khyod drung bran mo tsam yang thob dka' ba/ / mdzes sdug lha mo'i sku la phyag 'tshal lo/ /zhes pa ni mdzes pa phul du phyin par bstod pa yin pas/ de yang khyab 'jug gi chung ma dpal mo dang/ brgya byin gyi chung ma legs brjod ma dang/ dbang @006a @#/ /phyug gi chung ma ri skyes la sogs pa shin tu mdzes shing yid du 'ong ba'i 'chi med lha yi bu mo stong phrag mang po dag dang/ sogs khongs nas lha gzhan dag gi mdzes ma de dag gis rang rang mdzes par rlom yang mdzes pa'i cha nas rje btsun ma dang 'gran pa lha zhog khyod kyi drung du bran mo tsam yang thob dka' bas na mdzes sdug gi cha yongs su rdzogs pa'i lha mo'i sku la phyag 'tshal lo zhes sku la bstod pa'o/ /de nas/ thugs rje'i chu 'dzin rgyas pa'i klong yangs nas/ /gsung snyan tshangs dbyangs sprin gyi rnga sgra can/ /gdul bya'i 'dzin mar yan lag brgyad chos char/ /kun tu 'bebs mkhas ma la phyag 'tshal lo/ /zhes pa ni snyan ngag gi rgyan mtha' dag gzugs can yin pas/ de yang rje btsun ma'i thugs rje de chu 'dzin te sprin gyi gzugs su bkod/ sprin te shin tu mthug cing rgyas pa'i klong ste dkyil yangs ba nas/ gsung snyan pa tshangs pa'i dbyangs la 'gran pa de sprin gyi rnga sgra can te 'brug sgra grags pa can gyi gzugs su bkod/ gdul byas rgyud 'dzin ma ste sa gzhi'i gzugs su bkod pa der chu bo gang gA'i byed las dang mtshungs pa'i yan lag brgyad dang ldan pa'i dam pa'i chos kyi char pa chen po/ gdul bya'i khams dang mos pa la gzigs te dus kun tu 'bebs mkhas ma la phyag 'tshal lo zhes @006b gsung la bstod pa'o/ /yang/ shes bya kun gzigs yon tan rgya mtsho'i gter/ /ji bzhin ma lus brjod par su yis nus/ /blo gros thogs med stobs bcu mnga' ba'i thugs/ /mkhyen rab mthar phyin ma la phyag 'tshal lo/ /zhes pa shes bya kun ji lta ba bzhin du mkhyen pa'i thugs rgya mtsho ltar zab cing yangs pa dang/ rgya mtsho de nor bu'i 'byung khungs kyi gter yin pa ltar/ rje btsun gyi thugs kyang yon tan kun kyi 'byung khungs yin pa de/ ji lta ba bzhin du ma lus par brjod par su yis nus/ khyod kyi blo gros shes bya kun la thogs pa med pa'i tshul ni/ rje btsun tsong kha pa'i zhal nas/ de ltar gnas dang gnas min las kyi rnam smin mos pa 'jig rten khams/ /dbang po'i rim pa kun 'gro'i lam dang nyon mongs rnam byang sngon gyi gnas/ /'chi 'pho skye dang zag pa zad la mkhyen pa thogs pa med 'jug pa/ /zhes pa ltar stobs bcu mnga' ba'i thugs dang ldan pa'i mkhyen rab mthar phyin ma la phyag 'tshal lo zhes thugs mkhyen pa'i yon tan la bstod pa'o/ /yang/ zhi ba brnyes kyang thugs rje'i gzhan dbang gis/ /sdug bsngal rgya mtshor bying ba'i 'gro ba rnams/ /thugs rje'i phyag gis myur du 'dren mdzad ma/ /brtse ba mthar phyin ma la phyag 'tshal lo/ /zhes so/ zhi ba mi gnas pa'i myang 'das brnyes kyang thugs rje chen po'i gzhan @007a @#/ /dbang du song ba'i dbang gis sdug bsngal gyi rgya mtshor bying zhing nyam thag pa'i 'gro ba rnams sdug bsngal rgyu dang bcas pa las/ thugs rje'i phyag gis myur du 'den par mdzad ma yin pas brtse ba mthar phyin ma la phyag 'tshal lo zhes thugs brtse ba'i yon tan la bsngags pa'o/ /de nas/ zhi rgyas dbang dang drag po'i 'phrin las rnams/ /rgya mtshe'i rlabs bzhin dus las mi 'da' bar/ /lhun grub rgyun mi 'chad par 'jug mdzad ma/ /mdzad pa mthar phyin ma la phyag 'tshal lo/ /zhes pa bdag cag rnams kyi nyer 'tshe thams cad zhi bar byed pa dang/ legs tshogs thams cad rgyas par byed pa dang/ dbang du mi 'du ba rnams dbang bar byed pa dang/ shin tu mi rigs pa rnams drag po'i las kyis tshar gcod par mdzad pa'i las bzhi'i 'phrin las rnams rgya mtsho'i rlabs bzhin dus las mi bdab par gdul bya'i rgyud la 'bad med lhun grub tu rgyun mi 'chad par 'jug par mdzad ma yin pas/ mdzad pa mthar phyin ma la phyag 'tshal lo zhes thugs mdzad pa'i yon tan la bsngags pa'o/ /rgya mtsho'i rlabs bzhin dus las mi 'da' ba ni/ nyi ma bdun re'i mtshams su nges can du 'byung bar/ mkhas pa chen po gung thang pa dkon mchog bstan pa'i sgron mes gsungs so/ /yang/ 'jigs chen sdug bsngal brgyad dang @007b 'byung po'i gdon/ /nyon mongs shes bya'i sgrib pa'i 'jigs pa rnams/ /khyod zhabs dran pa'i mod la skyob mdzed ma/ /nus pa mthar phyin ma la phyag 'tshal lo/ /zhes pa 'jigs pa brgyad sdug bsngal brgyad dang gsum sogs 'byung po'i gdon sna tshogs dang/ nyon mongs pa dang shes bya'i sgrib pa dang de'i dbang gis byung ba'i 'jigs pa thams cad rje btsun ma'i mtshan brjod pa'am/ sku dran pa'i mong la ste de ma thag tu skyob par mdzad ma ste nus pa mthar phyin ma la phyag 'tshal lo zhes thugs nus pa'i yon tan la bsngags pa'o// ! //gnyis pa/ 'dod don la gsol ba btab pa la gnyis/ spyir gsol ba dang/ bye brag tu gsol ba'o/ /dang po ni/ de ltar skyabs 'os khyod kyi lus can rnams/ /nad rims gdon bgegs dus min 'chi ba dang/ /rmi lam ngan dang mtshan ma ngan pa sogs/ /'jigs pa kun las myur du bskyab tu gsol/ /zhes so/ /de ltar mkhyen brtse nus pa sogs kyi yon tan mthar phyin pas na gtan gyi skyabs su 'os pa rje btsun ma khyod nyid kyis/ lus can rnams nad rims dang/ gdon dang; bgegs dang/ ngus ma yin pa'i 'chi ba dang/ tha na rmi lam ngan pa dang mtshan ma ngan pa la sogs pa'i 'jigs pa kun las da lta nyid du bskyab tu gsol zhes pa'o/ /gnyis pa la brgyad las/ @008a @#/ /ngang po nga rgyal gyi 'jigs pa ni/ 'jig tshogs lta ba'i ri sul gnas bcas te/ /gzhan las mchog tu 'dzin pas sems khengs shing/ /pha rol khyad du gsod pa'i sbar khyim can/ /nga rgyal seng ge'i 'jigs pa bskyab tu gsol/ /zhes so/ /sho lo ka 'di'i tshig gi rgyan ni gzugs can gyi rgyan yin zhing/ don ni nga rgyal dang seng ge gnyis chos gsum gyi sgo nas mtshungs par bstan pa yin pas/ de yang seng ge gangs ri'i su la la gnas nas ri dwags gzhan rnams las nga stobs che'o zhes sems khengs shing/ bya dang ri dwags sogs nga la ci yang mi tshugs zhes sbar khyim rnon po ngoms nas pha rol po khyad du gsod pa'i rang bzhin kyang yin zhing/ dpe de bzhin du nga rgyal yang phung po 'jig cing tshogs pa la dmigs nas nga rang rkya thub par 'dzin pa'i 'jig lta la brten nas gnas bcas shing/ gang zag gzhan rnams las nga che bzang ngo zhes mchog tu 'dzin pas sems khengs shing/ rang las gzhan pa thams cad ci yang min zhes khyad du gsod pa'i rnam pa can gyi nga rgyal seng ge'i 'jigs pa las bskyab tu gsol zhes pa'o/ /'di la mthar chags su 'bru gnon na 'di ltar/ phung po 'jig cing tshogs pa la dmigs nas nga 'o snyam du 'dzin pa'i 'jig lta ri lta bu de'i sul la gnas bcas shing/ gang zag gzhan@008b las nga che bzang ngo zhes mchog tu 'dzin pas sems khengs shing/ rang las gzhan ba'i pha rol po rnams khyad du gsod pa'i nga rgyal seng ge sbar khyim rnon po can lta bu'i 'jigs pa las bskyab tu gsol zhes pa'o; ;ri sul zhes pa la/ 'dul ba lung gzhi'i 'grel pa las/ ri sul ni chu'i 'od pas zos pa'i ri su la lo/ /zhes dang/ yang bai ro tsa na rak+Shi ta'i slob spring 'grel pa las/ de'i sul ni dma' ba'am gzhol ba'i phyogs so/ /zhes so/ /yang ri sul gyi skad dod da rI zhes pa/ si tu gtsug lag chos kyi snang bas bcos pa'i phug ces bsgyur 'dug pas/ de ltar na brag phug gam gad pa brkos pa'i khung bu la bya rigs so/ /gnyis pa gti mug gi 'jigs pa ni/ dran shes lcags kyu rnon pos ma btul zhing/ /'dod yon myos chu 'thungs pas 'thoms pa'i mthus/ /log pa'i lam zhugs gnod 'tshe'i mche ba gtsigs/ /gti mug glang po'i 'jigs pa bskyab tu gsol/ zhes so/ de yang gti mug dang glang po che gnyis chos gsum gyi sgo nas mtshungs par bstan pa yin pas/ sems dran shes dang glang po che lcags kyu rnon pos ma btul bar 'dra zhing/ sems 'dod pa'i yon tan gyi myos shing/ glang po che myos chu ste chang 'thungs pas 'thoms pa'i mthus/ sems dang glad po gnyis ga log pa'i lam la @009a @#/ /zhugs nas sems can gzhan la gnod cing 'tshe bar byed/ glang po che mche ba rnon po gtsigs par byed pa'i gti mug glang po che smyon pa lta bu'i 'jigs pa las bskyab tu gsol zhes pa'o/ /gsum pa zhe sdang gi 'jigs pa ni/ tshul min yid byed rlung gis bskul ba las/ /nyes spyod dung sprin 'khrugs pa'i klong dkyil na/ /dge ba'i nags tshal bsreg pa'i nus pa can/ /zhe sdang me yi 'jigs pa bskyab tu gsol/ /zhes so/ /de yang gong ltar zhe sdang dang me gnyis chos gsum gyis mtshungs pa las/ zhe sdang tshul min yid byed kyis bskul ba dang/ me rlung gis bskul ba las/ zhe sdang gis nyes pa spyod cing mes dud sprin 'khrigs pa'i klong dkyil na 'bar bas zhe sdang gis dge ba'i rtsa ba gcod cing/ mes nags tshal bsreg pa'i nus pa can gyi zhe sdang me lta bu'i 'jigs pa las bskyab tu gsol zhes pa'o/ / bzhi pa phrag dog gi 'jigs pa ni/ ma rig 'thibs po'o khung du mngon zhen cing/ /gzhan 'byor phun tshogs mthong tshe mi bzod par/ /gdug pa'i dug gis myur du khyab byed pa'i/ /phrag dog sbrul gyi 'jigs pa bskyab tu gsol/ /zhes so/ /de yang gong ltar phrag dog dang sbrul gnyis rim pa bzhin du phrag dog ma rig pa 'thibs po la brten nas gnas shing/ sbrul mun khud du mngon par zhen @009b cing; phrag dog dang sbrul gnyis ka sa gzhan gyi 'byor pa phun sum tshogs pa mthong ba'i tshe mi bzod par 'dra zhing/ phrag dog gdug pa ste zhe sdang gi rkyen gyis khyab par byed pa dang sbrul gyis zin pa'i dug gis lus la myur du khyab par byed pa'i phrag dog sbrul gyi 'jigs pa las bskyab tu gsol zhes pa'o/ /lnga pa lta ngan gyi 'jigs pa ni/ brtul zhugs dman pa'i 'brog dgon 'jigs rung dang/ /rtag chad mya ngam thang la rab rgyu zhing/ /phan bde'i grong dang dgon pa kun 'joms pa'i/ /lta ngan rkun po'i 'jigs pa bskyab tu gsol/ /zhes so/ de yang lta ba ngan pa ni brtul zhugs dman pa'i spyod pa la zhen nas byung zhing/ rkun po ni 'brog dgon ste mi med lung stong 'jigs su rung ba las byung ba dang/ lta ngan ni rtag chad kyi mtha' la zhen cing rkun po ni mya ngam thang la rab tu rgyu zhing/ lta ngan gyis gnas skabs phan pa ste mtho ris dang/ mthar thug bde ba'i ste thar ba'i dpal 'joms pa dang/ rkun pos grong dang dgon pa'i dpal 'joms pa'i lta ngan rkun po lta bu'i 'jigs pa las bskyab tu gsol zhes pa'o/ /drug pa ser sna'i 'jigs pa ni/ mi bzad srid pa'i btson khang ra ba ru/ /lus can rang dbang med par 'ching byed cing/ /sred pa'i sgo lcags dbye dkas 'khyud pa yi/ /ser sna'i lcags sgrog 'jigs pa bskyab tu @010a @#/ /gsol/ /zhes so/ /de yang mi zad pa ste 'jigs su rung ba'i srid pa ste 'khor ba btson khang lta bu'i ra ba ru lus can rnams las dang nyon mngos kyis rang dbang med par spyir 'ching bar byed cing/ sgos su snying po med pa'i nor longs spyod la srid pa ste chags pa'i dbang gis 'ching bar byed pa sgo lcags dbye dka' bas 'khyud pa dang 'dra ba'i 'gro ba rnams ser sna'i lcags sgrog gi 'jigs pa las bskyab tu gsol zhes pa'o/ /bdun pa 'dod chags kyi 'jigs pa ni/ shin tu brgal dka' srid pa'i rgyun phyogs 'khyer/ /las rlung drag po'i rkyen dang nye ba las/ /skye rgan 'cha'i rba klong rab 'khrug pa'i; ;'dod chags chu bo'i 'jigs pa bskyab tu gsol/ /zhes so/ /don ni 'dod chags bsten pa'i mi des shin tu brgal bar dka' ba'i srid pa'i rgya mtshor gzhol ba'i chu bos rgyun phyogs su khyer zhing/ bar skabs su las kyi rlung drag po'i rkyen dang nye ba las te phrad pa las skye rgan 'chi'i sdug bsngal gyi rba klong rab tu 'khrug pa'i 'dod chags chu bo'i 'jigs pa las bskyab tu gsol zhes pa'o/ /brgyad pa the tshom gyi 'jigs pa ni/ kun tu rmongs pa'i mkha' la rab rgyu zhing/ /nges pa don du gnyer la lhag par 'tshe/ /thar ba'i srog la rgol ba'i gdug pa can/ /the tshom sha za'i 'jigs pa bskyab tu @010b gsol/ /zhes so/ /de yang the tshom ni kun tu rmongs pa'i ste ma rig pa la brten nas skye ba ltar/ 'dre sha za yang nam mkha' la gnas 'cha' nas rab tu rgyu zhing yin min mtha' gcig tu nges par don du gnyer ba dag la lhag par 'tshe ba'i sha za lta bu the tshom ni/ ji skad du/ mdzod las/ 'gro mi 'dod dang lam nor dang/ /lam la the tshom de snyed cig /thar par bgrod la gegs byed pa/ /de yi phyir na gsum bstan no/ /zhes gsungs pa ltar/ the tshom ni thar par bgrod pa la/ shin tu gegs byed pa'i cha nas thar ba'i srog la rgol ba ste the tshom za bas gzhug tu mi ster ba'i gdug pa can the tshom sha za'i 'jigs pa las bskyab tu gsol zhes pa'o/ /de dag ni seng ge sogs phyi'i 'jigs pa brgyad dper byas nas nga rgyal sogs nang gi 'jigs pa brgyad las skyob par gsol ba btab pa yin la/ rgya gzhung na'ang/ seng ge la sogs pa'i 'jigs pa brgyad 'dren tshul mi 'dra ba mang mod/ 'on kyang grags che ba'i sngon gyi byung ba ni/ tA ra nA thas mdzad pa'i sgrol ma'i rgyud kyi 'byung khungs gsal bar byed pa'i lo rgyus gser gyi 'phreng ba las/ seng ge'i 'jigs pa las bskyabs pa ni/ shing 'thub zhig nags tshal du song ba las/ seng ge mo bkres pa dang 'phrad nas za bar brtsams te khar thogs nas @011a @#/ /rang gi tshang dang nye bar song/ dor 'jigs shing skrag nas sgrol ma la gsol ba btab pas/ mdun du bud med shing lo'i gos can zhig byung nas seng ge mo'i kha nas de blangs te/ grong khyer gyi tshong 'dus su bzhag go/ /glang po'i 'jigs pa las bskyabs pa ni/ yul gyi bu mo lo bcu gnyis lon pa zhig me tog 'thu bar nags gseb tu song ba na/ lu ni zhes bya ba glang po che gtum po dang 'phrad de/ des sna bshal gyis bcings/ mche ba bsnun par brtsams pa na/ sgrol ma'i mtshan dran par byas shing/ snying thag pa nas gsol ba btab pas glang po che dbang du gyur te/ rdo'i stegs mthon po la bzhag ste; sna bshal gyis phyag byas shing/ yang blangs nas grong khyer gyi tshong 'dus kyi gnas su yang de bzhin du byas so/ /de nas 'du khang dang/ lha khang dang/ rgyal po'i pho brang gi sgor yang de ltar du byas pas; bu mo'i 'di ni bsod nams dang ldan pa zhig go /zhes rgyal po'i btsun mor gyur to/ /me'i 'jigs pa las skyabs pa ni/ /sha 'khon chags pa'i khyim tshang gcig/ nub mo khang pa la dgra yis me btang bas 'bros par brtsams pa las mthar pa'i tshe/ kye sgrol ma kye ma ho sgrol ma zhes mtshan nas brjod pas/ khyim gyi steng du sprin shin tu sngo zhing mdzes pa zhig byung ste/ char gyi rgyun gnya' shing tsam khyi ma @011b kho na la babs pas me zhi'o/ /dug sprul gyi 'jigs pa las bskyabs pa ni/ grong khyer gyi smad 'tshong ma zhag dus lan gcig me tog gi do shal lnga brgya byin pa'i tshong dpon zhig rnyed de/ nam phyed kyi dus na tshong dpon gyi khyim du 'gro bar 'dod pas/ rang gi khyim nas song ste/ lam du shing shi ri Sha'i yal gzhig la 'jus pa na/ shing la 'khril ba'i sbrul gdug pas lus la 'khril zhing zin pa'i tshe/ rje btsun ma sgrol ma dran par byas pa tsam gyis dug sbrul de nyid me tog gi 'phreng bar gyur nas/ zhag bdun gyi bar du lus la gnas par gyur to/ /de nas sbrul de nyid dkar po dug dang bral bar gyur nas chu por zhugs so zhes grags so/ /chom rkun gyi 'jigs pa las bskyabs pa ni/ gu dzi ra tha'i yul gyi nang tshun b+ha ru gatstsha zhes bya bar/ tshong dpon shin tu longs spyod che ba zhig yod pa ma ru'i yul du rnga mong stong tsam dang/ khyu mchog lnga brgya tsam gyis khal bkal te song ba las/ lam khar chom rkun stong tsam gnas pa'i 'brog dgon par phyin pas/ sngon du song ba'i tshong ba thams cad gsad pa'i sha khrag rus pas phyogs thams cad du khyab/ tshong ba brgya stong ni gsal shing la btsugs/ chom rkun de rnams mi'i sha yang za ba srin po lta bu yod pas/ tshong dpon de shin tu 'jigs nas/ mgon skyabs gzhan med pas @012a @#/ /sgrol ma la gsol ba btab pas/ sgrol ma'i sprul pa dpa' bo go mtshon thogs pa'i dmag dpag tu med pa byung ste/ chom rkun de rnams rgyang ring du bskrad cing shi bsad ni med do/ /de ltar chom rkun rnams byer ba'i shul du tshong pa de nyid bde bar phyin nas slar yang b+ha ru gatstshar slebs so/ /btson ra las bskyabs pa ni/ rkun po'i dpon zhig gis rgyal po'i bad mdzod kyi khyim sus ste stong ba na; gzhan mgon skyabs med de/ sgrol ma la gsol ba btab pas 'dab chags kha dog sna lnga pa zhig nam mkha' nas babs te byung nas zhags pa rnams kyang bkrol/ btson khang gi sgo yang rang phye bar gyur te/ ci bder mthar nas rang yul du phyin pa na/ rmi lam du bud med rgyan thams cad kyis brgyan pa zhig byung ste/ gal te khyed nga'i drin dran na/ khyed cag 'khor dang bcas pa rkun po'i las spongs shig ces byung bas rkun po de nyid 'khor lnga brgya dang bcas chom rkun gyi las spangs nas dge ba rgya chen por byed pa byung ngo/ /rgya mtsho'i rlabs kyi 'jigs pa las bskyabs pa ni/ lho phyogs kyi lam du zhugs pa'i tshong pa lnga stong tsam zhig gru bo che gsum bzung ste/ gzings chen por zhugs nas/ rin po che'i gling du phyin nas/ gru gcig ni rin po ches 'khengs par byas so/ /yang de nas song ba na tsan@012b dan sa mchog gi gling dang 'phrad de/ gru gnyis pa tsan dan sa mchog gis gang bar byas so/ /de nas yul du 'ong bar 'dod pa la/ rgya mtsho'i nor bdag rnams khros te rlung chen po btab pas thag ring du khyer ro/ /rgya mtsho'i kha dog mi gcig pa mang po brgal ba'i mthar/ rba klong drag tu 'khrugs pa zhig tu sleb/ de gong du tshong pa rnams kyis/ tshangs pa/ khyab 'jug /dbang phyug /zla ba/ nyi ma/ ku be ra la sogs pa rnams la nyin mtshan du gsol ba 'debs kyang ma phan la/ der gru'i thag pa chad de/ rin po che dang tsan dan gyi gru yang stor/ gru che yang nub la khad pa na/ de na sangs rgyas pa'i dge bsnyin gcig yod pas/ sgrol ma dran pas yi ge bcu pa'i sngags skad gsangs mthon pos bzlas pas/ de ma thag tu mthun pa'i rlung byung ste/ gru tshur log nas nub gcig la 'dzam bu'i gling du slebs pa na/ rin po che dang tsan dan gyi gru yang rlung gis tshur bangs te mnyam du 'dzom mo/ /sha za'i 'jigs pa las bskyabs pa ni/ shang phyogs kyi gtsug lag khang zhig tu/ nyan thos send+ha pa kho na gnas pa zhig yin pa las/ der dus lan gcig nub mo res kyi gtsug lag khang gi phyi rol tu 'chag tu song ba'i dge slong re re shi nas/ gtsug lag khang de nyid kyi tshogs pa 'grib par gyur @013a @#/ /pa las/ nub gcig dge tshul zhig 'chag sar song bas/ sha za mdog rngam nag cing mi sdug pa mche ba gtsigs pa gcig byung nas mgo bo nas bzung ba na/ theg chen pa rnams la sgrol ma zhes bya ba 'jigs brgyad las skyob pa gcig yod ces zer gyi de la skyabs su 'gro'o snyam nas/ sgrol ma zhes mtshan nas bos so/ /der lha mo nag mo ral gri thogs pa zhig byung nas sha za de la sdigs pa na; sha za des dge tshul la bzod par gsol te/ sa 'og nas lcags kyi bum pa mu tig gis gang ba zhig phyung nas byin no/ /deng phyin chad gtsug lag khang der gnod pa de rgyun chad ngo/ /zhes gsungs pa ltar ro/ /de la nang gi 'jigs pa brgyad ni rtsa nyon drug gi steng du nye nyon gyi phrag dog dang ser sna gnyis bsnan pa yin la/ de dag gi go rim yang rags phra'i rim pa'am rgyud la skye tshul gyi rim pa gang yin zhes dpyad rigs shing/ de bzhin du the tshom dang sha za gnyis dpe don sbyor tshul ji ltar yin zhes dpyod dgos kyang/ kho bo rig pa brtul bas dpyis phyin par bshad pa'i rde mi thogs la/ 'on kyang g.yar khral tsam du smra na/ sha za sems can phra mo de mngon shes ma thob pa'i so so skye bo rnams la bskal don yin pas/ yul 'di dang de lta bu la sha za yod nges kyi dam bca' mi rigs par yid gnyis 'ba' zhig gi @013b yul yin pa bzhin/ the tshom yang rnam pa kun tu rang gi yul la rtse gnyis pa'i blo yin zhes na rung tsam snang mod/ 'on kyang gong du smos pa'i lo rgyus ltar na de lta bu'i sha za de rags pa'i lus can zhig tu mngon pas de ltar na sha za la rigs mang po yod dam mkhas pa rnams dbyed par 'tshal// gsum pa mjug gi don la/ smon lam btab pa dang/ mdzad byang ngo/ dang po la/ dam chos bsgrub pa'i 'gal rkyen zhi zhing mthun rkyen tshang bar smon pa ni/ khyed la bstod cing gsol ba btab pa'i mthus/ /dam chos sgrub pa'i 'gal rkyen zhi ba dang/ /tshe dang bsod nams dpal dang 'byor pa sogs// mthun pa'i rkyen rnams yid bzhin 'grub par mdzod/ /ces pa sgrol ma khyod la de ltar bstod cing gsol ba btab pa'i mthu la brten nas/ tshe rabs kun tu dam pa'i chos sgrub pa'i 'gal rkyen zhi ba dang/ tshe dang bsod nams dpal dang 'byor pa la sogs pa'i mthun pa'i rkyen rnams yid bzhin du 'grub par mdzod ces smon pa'o/ /yang 'gro ba rnams bde bcan du skyes nas myur du sangs rgyas par smon pa ni/ zhing mchog bde ba can de ra 'gro ba kun/ /'dren pa 'od dpag med pas rjes bzung nas/ /dka' ba brgya phrag spyad pa med par yang/ /myur du sangs rgyas sa la reg gyur cig /ces pa zhing mchog bde ba @014a @#/ /can der skyes pa'i 'gro ba kun kyang 'dren pa 'od dpag med pas dgyes bzhin du rjes su bzung ba la brten nas/ dka' ba brgya phrag ste mang po spyad pa la ltos pa med par yang myur du sangs rgyas kyi sa la reg gyur cig ces smon pa'o/ /yang bdag kyang byang chub kyi sems la brten nas rgyal sras kyi spyod pa la rtag tu slob par smon pa ni/ bdag kyang rtag tu tsho rabs dran pa dang/ /byang chub sems dang nam yang mi 'bral zhing/ /rgyal sras spyod pa rlabs chen tshol ba la/ /brtson 'grus chu bo'i rgyun bzhin bsten par shog /ces pa bdag kyang 'di nas bzung ste dus rtag tu tshe rabs dran pa dang byang chub kyi sems dang nam yang mi 'bral zhing rgyal sras kyi spyod pa rlabs chen tshol ba la nam yang mi zhum pa'i brtson 'grus chu bo'i rgyun bzhin du bsten par shog ces smon pa'o// yang rang don min par gzhan don kho na sgrub pa'i mthun rkyen tshang bar smon pa ni/ rang don sgrub la nam yang mi re zhing/ /gzhan don 'ba' zhig sgrub la gzhol ba ngang/ /spyan dang mngon shes smra mkhas bzod pa sogs/ /gzhan don byed ba'i rkyen rnams tshang bar shog /ces pa bdag tsha rabs thams cad du rang ngon sgrub la nam yang mi re zhing gzhan don 'ba' zheg sgrub la gzhol ba @014b dang; de'i tshe na spyan lnga dad mngon shes drug dang smra mkhas pa dang dka' spyad bzod pa la sogs pa'i gzhan don byed pa'i rkyen rnams tshang bar shog ces smon pa'o/ /yang bstan pa dang 'gro ba'i don kho na'i ched du sangs rgyas thob par smon pa ni/ rab 'byams zhing du rgyal ba'i dam chos kun/ /rgyas par byed la nam yang mi zhum zhing/ /rtag tu sems can kun don bsgrub pa'i phyir/ /rgyal ba'i go 'phang bde blag thob gyur cig /ces pa ra ba 'byams te grangs med pa'i zhing du rgyal ba'i dam chos kun rgyas par byed la nam yang mi zhum zhing/ rtag tu sems can kun gyi don bsgrub pa'i phyir du rgyal ba'i go 'phang bde glag tu thob par gyur cig ces smon pa'o// gnyis pa mdzad byang ni/ rje btsun bcom ldan 'das ma seng ldeng nags kyi sgrol ma la bstod pa mkhas pa'i gtsug rgyan zhes bya ba 'di ni/ shAkya'i dge slong dge 'dun grub pa dpal bzang pos yun ring du gsol ba btab ste/ byang chub chen po'i dben gnas theg chen pho brang du legs par sbyar ba'o zhes pa ste go sla'o// 'di'i yun ring du gsol ba btab ces pa/ rje dge 'dun grub de nyid rje btsun sgrol ma lhag pa'i lhar ba sten nas dgung lo yang brgyad cu gya bzhi bzhes shing/ de'i ring la dam pa'i chos sgrub pa la @015a @#/ /bar chad gtan med cing/ mthun rkyen thams cad 'bad med lhun grub tu byung ba yang rje btsun sgrol ma'i bka' drin yin pa bzhin rang cag kyang de bzhin du gsol ba gdab na phan yon de dag 'byung bar gdon mi za'o// smras pa/ 'bol rtsom de lta bu la rnam bshad kyi/ /dgos pa chung yang bskul ba po yi ngor/ /don dang mi 'gal tshig gi 'bru non tsam/ /bsam pa rnam par dag pas bsgrubs par byas/ /dge ba 'di yang 'gro ba ma lus pa/ /bshes gnyen dam pas 'dzin pa'i rgyu ru bsngo/ /ci yi phyir na legs tshogs ci mchis pa/ /bshes gnyen drin las byung bar gsungs phyir ro/ / zhes sgrol bstod mkhas pa'i gtsug rgyan zhes bya ba'i rnam par bshad pa mkhas pa'i gtsug nor gyi phra rgyan zhes pa 'di yang u rang shog gi chos rje ngag dbang chos dar gyis lhar rdzas srang gang gi ngong tse bcas bskul ba'i ngor/ lha lngan smon lam chen mo'i grwa skor ba a lag sha pa dag dbang bstan dar gyis rang lo don bdun thog tu sbyar ba'o// dza yantu// 'di yang sku 'bum byams pa gling du par du bsgrubs pa'o//