@078a @#/ /(bde bar gshegs pa'i sku gsung thugs kyi rten bzhengs pa sogs kyi phan yon bshad pa dge legs char 'bebs zhes bya ba bzhugs so//) @#/ /mtshan dpe'i dpal gyis mig gi bdud rtsir gyur/ /drug cu'i dbyangs kyis thos pa'i mod la grol/ /zab yangs thugs kyis chos kun gsal bar gzigs/ /gsang gsum rdo rje'i sku brnyes rnams la 'dud/ /blang dor kun byad chos kun gsal bar ston/ /nyes brgya'i rtsa ba nyon mongs drung nas 'byin/ /srid pa'i sdug bsngal rgyu bcas gtan du 'gog /lung dang rtogs ba'i dam chos rnams la 'dud/ /nges par legs pa'i dge tshogs yon tan spel/ /sdig ltung nyong mongs nyes pa'i skyon kun spong/ /tshogs kyi mchog tu rgyal bas rab tu bsngags/ /theg gsum slob pa'i dge 'dun rnams la 'dud; ;gang zhig bzhed dang bsnyen bskur legs bgyis pas/ /mtho ris thar bar bgrod pa'i bsod nams kyis/ /zhid mchog bde bar gshegs pa'i gsang ba gsum/ /legs mtshon sku gsung thugs rten rnams la 'dud/ /'dir skyed gu rnams kyi bsod nams kyi sog pa'i zhing dam pa sku gsung thugs kyi rten la brten nas tshogs ji ltar sogs pa'i tshul bshad pa la/ rten gsum po sngon ji ltar byung ba'i tshul bshad pa/ /da ltar ji ltar bzhengs pa'i tshul bshad pa/ /tshul bzhin bzhengs pa'i phan yon bshad pa/ /de la phyag mchod bsnyen bkur byas pa'i phan yon bshad pa/ /phan yon de thob pa'i rgyu'i gtso bo bshad pa dang lnga/ dang po ni/ sku'i rten ni sangs rgyas byang sems sogs kyi sku brnyan bris 'bur du bzhengs pa rnams yin la// @078b bris 'bur gyi sku brnyan bcom ldan 'das shAkya thub pa 'jig rten na bzhugs pa'i dus su byung ba yin te/ de'i dus na rgyal po gzugs can snying po dang/ rgyal po u tra ya na gnyis yul thag ring yang phan tshun gcig gis gcig la skyes skur res byed kyi na yong pa la/ nam zhig utra ya nas rin po che bai DUrya'i khrab rin thang gzhal du med pa zhig bskur ba'i skyes lan du gzugs can snying bos sangs rgyas kyi sku brnyan gyi bris sku bskur na ji ltar rung zhes bcom ldan 'das la zhus pas ston pas dbus su sangs rgyas kyi sku brnyan/ steng du brtsam par bya zhing dbyung bar bya/ zhis sogs kyi tshigs bcad/ 'og tu rten 'brel lugs 'byung ldog rnams bris la skur zhig /ces bka' stsal pa ltar bskur pa u tra ya nas mthong ba la brten nas brten pa mthong ba na rgyal pos; ;ring na bzhugs pa'i sangs rgyas kyis/ /shes rab kyi mig rnam par sbyongs/ /gang la de 'dra'i gsos mnga' ba'i/ /sman pa'i mchog la phyag 'tshal lo/ /zhes bstod phyag mdzad par 'dul ba lus las bshad cing/ bcom ldan 'das sum cu rtsa gsum du gshegs pa'i tshe/ rgyal po u tra ya nas bcom ldan 'das kyi sku tshab lta bur rgyu tsan dan las grub pa'i tsandan jo bor grags pa bzhengs/ bcom ldan 'das lha yul nas rin po che'i them skas las bab pa'i tshe sku brnyan des gom pa drug spos nas bsus/ bcom ldan 'das kyis sku brnyan 'dis rgya nag gi yul du 'gro ba'i don byed par 'gyur ro ces lung bstan par mdo las bshad cing/ de nas rim gyis rgya nag gi yul du spyan drangs pa da lta 'jam dbyangs gong ma chen pos gtso mdzad pa'i @079a @#/ /che phra dpag tu med pa'i mchod yul dam par bzhugs pa yin la/ bcom ldan 'das kyi zhal gyi sgo nas 'od zer gsum byung ba tshangs pa dang/ khyab 'jug dang/ brgya byin gsum la phog pas de gsum bcom ldan 'das kyi drung du 'khod nas sku gsum gyi rten bzhengs pa'i sbyin bdag byed bar zhus te lha tshangs bas lha'i rin po che las chos sku'i rten mchod rten bzhengs pa u rgyan na ye shes kyi mkha' 'gro ma rnams kyi mchod pa'i rten du bzhugs/ khyab 'jug gis klu'i rin po che las longs sku'i rten thub ba gangs can mtsho bzhengs pa/ phyi'i rgya mtshon gza' dang rgyu skar rnams kyi mchod pa'i rten du bzhugs/ brgya byin gyis lha dang mi'i rin po che las sprul sku'i rten che 'bring chung gsum bzhengs pa'i che ba thub dbang dgung lo nyer lnga'i sku tshad sum cu rtsa gsum du lha rnams kyi mchod pa'i rten du bzhugs par 'phags pa 'jig rten dbang phyug bod rje'i tshul bzung ba rgyal po srong btsan sgam po'i bka' 'bum las bshad do/ /da lta chos 'khor dpal gyi lha sa'i rten gyi gtso bo jo bo shAkya mu ni 'di yang lha'i dbang po brgya byin gyis lha dang mi la sogs pa'i nor bu rin po che sna tshogs pa sku rgyur spungs pa/ lha'i bzo bo bi shwa karmas lugs su blug shAkya'i rgyal po dgung lo bcu gnyis pa'i sku tshad can lta bas chog mi shes shing mthong thos dran reg tsam gyis thar ba'i sa bon khyad par can 'jog nus pa lus can thams cad kyi bsod nams kyi zhing dam bar bskrun/ rgyal ba rang nyid kyis rab gnas mdzad/ byin rlabs kyi gzi 'od rab tu 'bar ba/ rim gyis lha yul u rgyan/ yul dbus ma ga ta rnams su byon/ @079b de nas rgya nag gi rgyal po'i bsod nams kyi mthus rgya gar nas rgya nag tu rdzings la spyan drangs/ ma ha tsi na'i yul gyi lus can rnams kyi mchod pa'i zhing du bzhugs pa'i tshe 'phags pa 'jig rten dbang phyug mi rje'i tshul bzung ba chos rgyal srong btsan sgam pos/ 'jam dbyangs brtan pa'i 'khor lo'i mi'i gzugs su rnam par rol pa rgya nag gong ma chen po thad tha'i rdung gi sras mo rje btsun sgrol ma'i rnam 'phrul 'o shing kong je btsun mor spyan drangs ba'i rten skal du gdan drangs pa thog mar ra mo cher bzhugs kyang phyis su lha sa'i rten gyi gtso bor lus can rnams kyi bsod nams sog pa'i zhing dam bar bzhugs su bcug pa dang/ ra mo che'i rten gyi gtso bo jo bo mi skyod rdo rje 'di yang brgya byin gyis sbyin bdag byas nas bzo bo bi shwa karmas shAkya'i rgyal po dgung lo brgyad pa'i sku tshad du bzhengs par sangs rgyas nyid kyis rab gnas mdzad pa rim gyis bal po'i yul du bzhugs pa bod rje srong btsan sgam po'i btsun mor jo mo khro gnyer can gyi rnam 'phrul bal za khri btsun byon skabs rten skal du spyan drangs te thog mar lha sar bzhugs pa phyis ra mo cher skyed dgu'i bsod nams kyi zhing dam par bzhugs su bcug par 'gro mgon phyag na padmo ngur smrig gar gyi rnam par rol ba rgyal dbang thams cad mkhyen pa ngag dbang blo bzang rgya mtshos lha sa'i kar chags tu bshad pas so/ /'di dag ni shA kya'i rgyal po zhing 'dir mngon sum du bzhugs pa'i skabs su rgyal ba rang nyid kyi sku brnyan bris 'bur byung tshul mdo tsam brjod pa yin gyi/ spyir na shAkya thub pa zhing 'dir ma byon pa'i gong du'ang sku gsung thugs kyi rten byung ba ni da lta lha sa'i byams pa chos @080a @#/ /'khor du grags pa 'di 'dzam bu gling pa tshe lo nyi khri ba'i dus su chos rgyal kri kris sbyin bdag byas nas rgyu li dmar las rje btsun mi pham mgon po'i sku brnyan bzhengs pa la sangs rgyas 'od srung gis rab gnas mdzad/ rim gyis bal yul du bzhugs pa bal za khri btsun gyis rten skal du spyan drangs pa'i tshe lam bar du brag dang chu 'thab pa'i sar zhabs thang la dngos su byon pa dang phyis kyang 'od zer 'phros pa sogs shin tu ngo mtshar ba'i rten khyad par can yin par rgyal dbang lnga pas bshad la/ des mtshon te gzhan yang mang du yod pa gor ma chags bas so/ / gsung gi rten ni rgyal ba'i gsung rab dgongs 'grel dang bcas pa yi ger 'khod pa rnams yin la/ kha cig sde snod gsum gyi glegs bam bka' bsdu gsum pa'i skabs su byung zhing / de yan chad du gsung rab yi ger 'khod pa med par 'dod pa yod kyang/ bcom ldan 'das zhal bzhugs pa'i dus su'ang gsung rab yi ger 'khod pa yod de/ bcom ldan 'das zhal bzhugs pa'i dus su yul ko'u sham bi'i rgyal po shar ba'i btsun mo sngo bsang ma 'khor bud med lnga brgya dang bcas bas mtshan mo sgron me'i 'od la sangs rgyas kyi bka' bklag par 'dul ba lung las bshad pas so; ;thugs kyi rten ni 'ga' zhig /'khor lo// rdo rje rin po che sogs phyag mtshan gyi rigs la byed cing/ mtshed rten ni chos sku'i rten du gsungs pas/ sku'i rten yin gyi thugs kyi rten min par bzhed pa yod na'ang chos sku zhes pa sgra yangs pa'i dbang du byas na sangs rgyas kyi sku gsung thugs thams cad la 'jug cing/ bye brag pa ye shes chos sku zhes pa ni sangs rgyas @080b kyi thugs mkhyen pa'i ye shes la byed pas chos sku yin pas sangs rgyas kyi thugs ma yin par mi 'gyur zhing/ ye shes chos sku yin na sangs rgyas kyi thugs yin dgos pas/ mchod rten kyi dag pa sbyor ba na bang rim dang po nas pre'i bar dran pa nyer bzhag nas 'phags lam yan lag gi bar byang phyogs so bdun/ chos 'khor bcu gsum ni stobs bcu dang ma 'dres pa'i dran pa nyer bzhag gsum/ thugs rje mdo gzung/ thugs rje chen po dang stong pa nyid dbyer med pa/ gdugs dang char kheb/ thabs dang shes rab/ zar tshag 'phrin las bzhi/ zla nyi mkhyen pa gnyis/ tog gnyis med zung 'jug dang sbyor bar bshad pas thugs kyi rten du mi rung ba med cing/ de yang bcom ldan 'das zhal bzhugs pa'i dus su byung ba yin de/ bcom ldan 'das grong khyer ser skyar sku bltams pa'i tshe/ pad spungs mchod rten/ rgyal po'i khab tu mngon par rdzogs par byang chub ba'i tshe/ byang chub mchod rten/ bar na sir chos 'khor bskor ba'i tshe/ bkra shis sgo mang mchod rten sogs bde gshegs mchod rten brgyad rim gyis byung bar mdo las bshad bas so/ /gnyis pa ji ltar bzhengs pa'i tshul bshad pa la; sbyin bdag /bzo bo sku rgyu sogs ni/ rgyal dbang lnga pa thams cad mkhyen pa ngag dbang blo bzang rgya mtshos mdzad pa'i gzung 'bul 'khrul spong nyin byed las/ rgyu'i yan lag sbyin bdag de ni mkhas pa'i gsung las/ sdig la mi 'dzem dad 'dun chud/ phan yon nam mthong yid mi ches/ bsgrub blo med pa'am yod na yang/ tshe 'di'i lo 'dod grags @081a @#/ /'dod phyir/ /rkyen dang mi 'tsham blo rgya byed/ /dad thung blo dog bzod sran chung/ /lha dang bzo po smod byed cing/ /'gyod ba skyes nas 'phro 'jog pa'o/ / zhes pa lta bu'i skyon dang mi ldan zhing/ /phan yon mthong ba'i shes rab can/ /rtse gcig sems pa'i bsam gtan can/ /brtan cing spro ba'i brtson 'grus can/ /dka' spyad mi skyo bzong bsran can/ /ngang ring tshig 'dzam tshul khrims can/ /g.yo med gtong phod sbyin par ldan/ /rims kyis dga' spro bsgom pa'o/ /zhes pa'i yon tan dang ldan pa zhig dgos so/ / de bzhin du ni bzo bo yang/ /yon tan mi mkhas nga rgyal che/ /'grogs pa mi bde bkur sti 'dod/ /'phral du tshig rtsub phug 'dod che/ /yon brgyag gla thang tshad med 'bebs/ / nges kyang mi tshim rgyu cha rku/ cung zad tsam la bzo 'phro 'jog /'gro sdig byad cing chang nag 'tshol/ /dge las sdig par bsgyur mkhan yin/ /zhes pa'i skyon rnams dang mi ldan zhing/ / yon tan gyi khyad par sdom 'byung las/ /dul zhing bzo rnams kun shes la/ /cho ga mthong zhing mnyam gzhag pa/ /zhes dang/ /dpal kha sbyor las/ dul zhing dad ldan lang tshor ldan/ / dbang po rnams gsal rnam rtog med/ /khro med lkog 'phyas mi byed cing/ /shin tu mkhas la spro ba che/ /bzod ldan snying rje chen po can/ /zhes rgyud sde rnams las legs par gsungs pa dang ldan dgos shing/ sku'i rgyu rnams kyang rang nyid kyi 'byor bzhin du ser snas bcings te rgyu ngan don tsam btang ba la 'bras bu bzang por 'dod pa dang/ blo gros kyi rtsal dang mi ldan pa @081b dag gis bkod pa legs su re ba rnams ni nam mkha'i padma dang mtshungs shing/ gzhan yang sku rgyu dang rgyan spros kyi rim pa sogs kyang spyir btang dmigs bsal gyi dbye ba legs par phyed dgos so// zhes gsungs pa ltar gyi skyon dang bral zhing yon tan dang ldan pa tshogs par byas te sku'i rten la/ chag tshad ji lta ba bzhin ma byung ba'i nyes dmigs ni/ bde mchog sdom 'byung las/ gos go mgrin pa byin pa ste/ gsum po ring na skyon chen po/ /sngags pa bdag nyid nges par ni/ /gnas las nyams shing bskrad par 'gyur/ /snyan dang shangs dang phyag sor te/ /gsum po thungs na skyon chen po/ /dngos grub nges par 'joms pa dang/ /de bzhin dpal yang nyams par 'gyur/ /zhes sogs tshad dang mi ldan pa'i skyon phra mo res kyang nyes pa chen po skyed bar gsungs pas/ dpal dus kyi 'khor lo'i rgyud/ /bde mchog sdom pa 'byung ba'i rgyud/ /de dag gi 'grel pa la sogs pa rgya bod kyi bka' bstan bcos nas 'byung ba rnams dang/ khyad par du rje btsun 'jam pa'i dbyangs kyi rnam 'phrul sman bla don 'grub pa'i thig rtsa dang/ dbyangs can mas dngos su rjes su bzung ba'i sprul sku 'phrad kha ba'i thig rtsa sogs thigs rtsa tshad ldan rnams las bshad pa ltar gyi skyon dang bral zhing/ chag tshad dang ldan pa dgos/ gsung gi rten yang/ lantsha wartu la sogs pa rgya gar gyi yi ge tshad ldan byung na shin tu legs na'ang/ de lta bu 'bri klog shes pa dkon pas/ / rje btsun 'jam pa'i dbyangs kyi rnam 'phrul thon mi saM b+ho Da nas brgyud pa'i gzab ma/ thig btab gru bzhi sgrom btsal te/ thu ? phyin snag ro med pa dang/ dkar che khongs yangs che snyom drad @082a @#/ /thams cad gru bzhi zur dod legs/ zhes sogs nas bshad pa ltar gyi tshad dang ldan pa dang/ gshar ma la yang/ 'bru tsha dang/ chog sgrig /zlum bris sogs yig rigs rnams tshad dang ldan pa dgos la khyad par du yangs bzang ma ti bas/ legs pa bas kyang mgyogs pa gtso/ /mgyogs pa pas kyang snyom pa gtso/ /snyom pa pas kyang dag pa gtso/ / des na dag pa gtso bo yin/ /zhes gsungs pa ltar sde bas dag pa gal che la/ de yang thon mi sam b+ho Tas mdzad pa'i sum cu ba dang rtags 'jug gnyis/ de dag gi 'grel pa mkhas pa rnams kyis mdzad pa dang/ lo chen blo ldan shes rab kyis mdzad pa'i dag yig nyer mkho/ /lo chen chos skyong bzang pos mdzad pa'i dag yig za ma tog sogs nas bshad pa ltar yi ge sdeb dang thob thang sogs ma nor zhing chad lhag med pa dgos/ thugs kyi rten ni/ mchod rten gyi chag tshad/ gtsug tor dri med 'grel ba dang bcas pa dang/ 'dul ba lung dang/ bu ston thams cad mkhyen pas mdzad pa'i mchod rten sgrub pa'i cho ga byin rlabs dpal 'bar/ stag lo shes rab rin chen gyis mdzad pa'i mchod rten gyi thig rtsa/ sprul sku 'phrad kha pas mdzad pa'i mchod rten gyi thig rtsa sogs mkhas pas mdzad pa'i yig cha tshad ldan las bshad pa ltar gyi tshad dang ldan pa bzhengs dgos/ de ltar sku gsung thugs kyi rten bzhengs tshar nas bzo bo yon la sogs pas mnyes par bya dgos te / rab tu gnas pa'i rgyud las/ bzo bo ma mnyes pa'i lha la ye shes pa mi 'jug ste/ rab gnas kyi thog mar bzo bo mnyes par bya zhes dang/ mi g.yo ba'i rgyud las kyang/ bris rgyu tshad @082b ldan yongs su zin nas bris mkhan la ji ltar 'dod pa'i yon phab pa bzhin sbyin par bya'o/ /zhes gsungs pas so/ /rten de dag la rgyud sde nas bshad pa ltar gyi rab gnas tshad dang ldan pa bya dgos te/ rgyud las/ gang du sku gzugs rdzogs pa la/ byin ma rlabs par ring gnas na/ /de la bkra shis mi 'byung zhing/ /de srid mchod par mi 'os so/ /zhes dang/ sdom 'byung las/ ji ltar rab tu mi gnas lha/ /rab tu gnas par bya ba nus/ /slob mi dad pas gsol 'debs pa'i/ /bsod nams phyir ni bya ba yin/ /zhes dang/ rdo rje gur las/ rtag tu sangs rgyas rab gnas bya/ /zin pa'i de ma thag pa ru/ /rab tu gnas pa mchog tu 'gyur/ /'khor lo sgyur ba'i rgyal po yi/ /dbang phyug thob par the tshom med/ /ces gsungs pas so; ;gsum pa bzhengs pa'i phan yon bshad pa la/ /sku'i rten bzhengs pa'i phan yon ni/ /dam chos pad dkar las/ /la las 'di na rin chen sna bdun dang/ /la las de bzhin zangs dang 'khor ba las/ /bde bar gshegs pa rnams kyi gzugs byas pa/ /de dag thams cad byang chub thob par 'gyur/ /zhes dang/ ro nye dang ni lcags sam sa la'ang rung/ /bde bar gshegs pa rnams kyi gzugs byas te/ /blta na sdug pa'i 'jim pa'i las byed bcug /de dag thams cad byang chub thob par 'gyur/ /zhes dang/ gang gis rtsig ngos gzugs kyi ri mo dag ;bsod nams brgyas mtshan yongs su rdzogs pa'i sku/ /gang gis bris sam 'bri ru bcug kyang rung/ /de dag thams cad byang chub thob par 'gyur/ /zhes de bzhin gshegs pa'i @083a @#/ /sku gzugs rin po che sna bdun la sogs pa'i rgyu bzang po dang/ zha nye dang lcags dang sa la sogs pa'i rgyu ngan pa dag las 'bur du bzhengs pa dang/ rtsig ba'i ngos dang thang kha sogs la ri mor rang gis bris sam gzhan la 'brir bcug pa thams cad kyis/ de la brten nas bla na med pa'i byang chub mchog myur du 'thob par gsungs shing/ yang de nyid las / skyes bu dag gam 'on te gzhon nu 'ang rung/ gang dag la las de ni slob pa'i tshe/ /rtsed mo dag dang sad par byed pa yis/ /rtsig ngos se na mo 'am shing bus gzugs bris pa/ /de dag thams cad byang chub 'thob 'gyur te/ /de dag thams cad snying rje ldan par 'gyur/ /thams cad kyang ni srog chags bye ba sgrol/ /byang chub sems dpa' mang po yang dag ? 'dzud ?/ / ces gang la la zhig gis rtsed mo dang/ /nyams sad par byed 'dod pa'i bsam pas rtsig ngos sogs su de bzhin gshegs pa'i gzugs bris na des kyang bla na med pa'i byang chub 'thob cing snying rje chen pos srog chags dpag tu med pa 'khor ba las sgrol ba dang bla na med pa'i byang chub la 'god par gsungs/ gsal rgyal gyis zhus pa'i mdo las/ /'di na rgyal ba'i sku gzugs byed pa ni/ / gzugs dang skal bzang yon tan nye bar ldan/ /de ni dbang po sbas dang nyi ma'i 'od/ /'jig rten kun gyis mthong na dga' bar 'gyur/ /zhes sku gzugs bzhengs pas gnas skabs gzugs bzang ba/ dbang po sbas pa ste dul ba/ /'od gsal ba mthong na dga' bar 'gyur pa rnams 'byung ba dang/ yang de nyid las/ bde bar gshegs pa'i sku gzugs bzhengs @083b pa dag ;de yi lus ni dri ma med pa dang/ /nad dang 'jigs dang mya ngan sdug bsngal bral/ /padma'i nang bzhin 'jam dang yangs par 'gyur/ /zhes lus la dri ? nga ? dang mtshan ngan med pa; nad med pa/ pha rol gyi dgra'i 'jigs pa med pa/ yid la mya ngan med pa/ sdug bsngal med pa/ lus padma'i 'ong ba ma bzhin 'jam zhing blo gros yangs par 'gyur ba dang yang de nyid las/ 'di na rgyal ba'i sku gzugs byed pa gang/ /bran du mi 'gyur dbul po'i rang bzhin min/ /las byed ma yin skye ba dman par min/ /dbang po ma tshang min te skyes mchog 'gyur/ /zhes bran dang dbul po dang gla rngan ? la bltas te las byed pa dang/ skye ba dman pa dang/ dbang po ma tshang ba rnams su mi 'gyur zhing de dag las bzlog pa'i skyes bu mchog tu 'gyur bar bshad/ 'phags pa spyan ras gzigs kyi mdo las/ 'dren pa'i sku gzugs rab tu mdzes byas na/ /de ni mchog 'gyur skye bo mang mchod 'os/ /blo ldan phyug cing che nyid rgya cher ldan/ /dbang ldan 'khor los sgyur ba'i rgyal por 'gyur/ /zhes mi rnams kyi nang nas mchog tu 'gyur ba dang/ /mi mang pos mchod pa'i 'os su 'gyur ba dang/ blo gros dang ldan zhing longs spyod kyis phyug pa dang/ dbang phyug rgya chen po dang ldan pa dang/ 'khor los skyur ba'i rgyal por 'gyur bar bshad cing/ gzhan yang mdo rgyud bstan bcos du ma nas gnas skabs dang/ mthar thugs gi phan yon dpag tu med pa bshad/ gsung gi rten bzhengs pa'i phan yon ni/ sdud pa las/ la las gang ga'i glung gi bye snyed zhing rnams na/ sems @084a @#/ /can ji snyed 'khod kun dgra bcom nyid btul pas/ gang gis shes rab pha rol phyin 'di yig bris te/ sems can mchog la glegs byin bsod nams khyad par 'phags/ zhes gang ga'i glung gi bye ma snyed kyi zhing khams na sems can ji snyed yod pa de dag thams cad dgra bcom pa'i go 'phang la bkod pa'i bsod nams las/ shes rab kyi pha rol tu phyin pa'i mdo yi ger bris te glegs bam 'di dag nyams su len pa'i sems can mchog la byin pa'i bsod nams khyad par du 'phags par gsungs/ bde mchog sdom 'byung las/ he ru ka dpal mngon rdzogs rgyud/ / klog gam 'chang ngam bris pas ni/ /dngos grub rdzu 'phrul skal bzang dang/ /byang chub sems dpa' thob par 'gyur/ /zhes he ru ka'i rgyud bris pas dngos grub chen po brgyad dang/ rdzu 'phrul dang; skal bzang dang/ byang chub sems dpa'i go 'phang yang thob par 'gyur zhes bshad cing/ gzhan yang mdo bstan bcos du ma nas gsung rab bzhengs pa'i phan yon dpag tu med pa 'byung; thugs kyi rten bzhengs pa'i phan yon ni/ dam chos pad dkar las/ rgyal ba'i mchod rten dag la sus mchod cing/ /rin chen mchod rten stong phrag du ma dag /gser dang dngul dang 'on te shel gyi 'am/ /rdo yi snying po'i mchod rten gang gis byas/ /bai DUrya mchog de bzhin intra rnyil/ /la las mu tig ke ke ru las byas/ /de dag gis kyang byang chub thob par 'gyur; ;zhes gser dang dngul la sogs pa rin po che sna bdun po gang rung las byas pas bla med byang chub thob par 'gyur ba dang/ yang gang gis mchod rten rdo las byas pa dang/ / @084b gang gis a ga ru dang tsandan nam/ /gang gis thang shing mchod rten byas pa dang/ /la las shing ngam gzhan las byas pa dang/ /sa dang so phag las ni brtsigs pa yi/ /rgyal ba'i mchod rten dga' bzhin byas pa dang/ /de bzhin sa rdul phung po dag las kyang/ /mya ngan dgon pa dag tu byas pa dang/ /phyis pa'i rtsed mor de dag de dag tu/ /gang gis rgyal ba de phyir mchod rten dag / bye ma las ni phung po byas pa yang/ /de rnams kyis kyang byang chub thob par 'gyur/ /zhes rdo ? dang a ka ru dang tsandan dang thang shing dang/ /de dag sa gzhan pa'i shing dang sa la sogs pa las sems dga' bzhin byas pa dang/ /than byis pa'i rtsed mo'i bsam pas bye ma sogs las byas pas kyang byang chub 'thob par bshad/ /gsal rgyal gyis zhus pa las/ bcom ldan 'das kyi mchod rten rnams dang ni/ /sku gzugs rnams la rdul phran ci yod pa/ /de 'dra'i grangs de snyed kyi rgyal srid dag /lha yul sa steng mi yis nges par 'thog /ces gnas skabs su mchod rten dang sku gzugs la rdul phran ji snyed yod pa de snyed kyi grangs dang mnyam pa'i lha dang mi'i rgyal srid 'thob par bshad cing/ gzhan yang mdo bstan bcos rnams las mchod rten bzhengs pa'i phan yon dpag tu med pa bshad/ bzhi pa mchod pa sogs bsnyen bkur pa'i phan yon bshad pa la/ sku'i rten la mchod pa phul ba'i phan yon ni/ dam chos pad dkar las / de bzhin gshegs pa rnams kyi ring bsrel dang/ 'jim pa'i gzugs dang mchod rten dag la'ang rung/ /rtsig ngos bris dang rdul phung mchod rten la/ /de la me tog dang ni spos gsol te/ / @085a @#/ /der ni gang gis rab snyan cang ? te'u dang/ /dung dang rnga chen rol mo'i sgra byed bcug /byang chub mchog rab mchod par bya ba'i phyir/ /gang gzhig rnga rnams rab tu brdung byed cing; ;pi wang dang ni pheg dang mkhar chen rnga/ /rdza rnga rgyud gcig gling bu yid 'ong dang/ /a go na da rab tu snyan 'byin pa/ /de dag thams cad byang chub thob par 'gyur/ /zhes de bzhin gshegs pa'i ring bsrel dang sku gzugs dang mchod rten sogs la me tog dang spos dang rol mo la sogs pa'i mchod pa phul ba la brten nas bla med byang chub 'thob par bshad/ 'phags pa spyan ras gzigs kyi mdo las/ de bzhin gshegs pa mchod byas na/ /gzugs dang don ldan longs spyod dang/ /kha dog dang ni 'byor ba dang/ /kun tu grags dang ldan par 'gyur/ / zhes gzugs dang longs spyod dang kha dog dang 'byor ba dang grags pa phun sum tshogs pa dang ldan par 'gyur ba dang/ yang de ni tshe rabs dran 'gyur zhing/ /'dod chags kyis kyang 'phrog mi 'gyur/ ;'dod pa rnams kyi skyon shes shing/ /tshangs par spyad pa spyod par 'gyur/ /zhes tshe rabs dran pa dang/ 'dod chags kyi dbang du mi 'gro ba dang/ /'dod pa'i skyon shes shing tshangs par spyad pa spyod par 'gyur pa dang/ yang 'jig rten sgron me mchod byed pa/ /tshe rabs dag ni thams cad du/ /mya ngan med cing gnod med dang/ /'khor los sgyur ba 'byor chen 'gyur/ / zhes tshe rabs thams cad du mya ngan dang nad med pa dang 'khor los sgyur ba dang 'byor ba chen po dang ldan par 'gyur par bshad/ yul 'khor skyong gis zhus pa'i mdo las/ khyod la mchod pas lha @085b yi bde ba ni/ /rnam pa mang dang de bzhin mi yi 'thob/ /mi yi bdag po 'grol phan bgyid pa/ /phyug cing nor chen 'byor ba chen por 'gyur/ /zhes lha dang mi yi bde ba rnam pa mang po 'thob pa dang; ;mi'i rgyal po gzhan la phan 'dog pa dang phyug cing 'byor ba chen po dang ldan par 'gyur ba dang/ mtshungs med khyed la dad pa skyes pa yis/ /gling bzhi'i bdag po 'khor los sgyur ba mchog 'gro la dge ba bcu po kun byed pa/ /rin chen dar bzang bdun ldan 'thob par 'gyur/ /zhes gling bzhi la dbang bsgyur zhing 'gro ba rnams dge ba bcu la 'god par byed pa rin chen sna bdun dang ldan pa'i 'khor los bsgyur ba'i rgyal por 'gyur ba dang/ rgyal ba khyod la mchod pa bgyis pa ni/ /tshangs pa brgya byin 'jig rten bdag po dang/ /yongs su dga' ldan lha yi bdag po dang/ /gzhan 'phrul ba dang 'thab bral rab dga' 'gyur/ /zhes tshangs pa dang brgya byin 'jig rten skyong ba dang dga' ldan la sogs pa'i lha rnams kyi rgyal por 'gyur bar bshad cing/ 'gro ba'i rnam mang sdug bsngal sel mdzad pa/ /mnyam med khyod la mchod dang mthong ba dang/ /thos pa'ang de ltar 'bras bu mchis legs te/ /gnas mchog rga shi med pa thob par 'gyur/ /zhes bshad ma thag pa'i phan yon de dag mchod pa phul ba dang mthong ba dang thos pas dang pa la'ang 'byung zhing der ma zad thob bya'i gnas mchog tu gyur ba rga shi med pa mya ngan las 'das pa'ang thob par 'gyur zhes bshad/ gsung gi rten mchod pa'i phan yon ni/ sdud pa las/ la las bder gshegs yongs su mya ngan 'das pa yi/ /mchod rten rin chen bdun las byas shing mchod byed la/ / @086a @#/ /bde bar gshegs pa'i mchod rten de dag gang ga yi/ /bye ma snyed kyis bye ba stong phrag zhing bkang ste/ /yongs su brtag bzung zhing rnams bye ba mtha' yas na/ /sems can ji snyed 'khod pa de dag thams cad kyis/ /las gzhan mi byed lha yi me tog spos rab dang/ /byug pas dus gsum bskal pa'ang de bas lhag mchod la/ /gang zhig gang las rnam 'dren stobs bcu 'byung gyur pa/ /bde bar gshegs kyi yum 'di glegs bam la bris te/ /'chad zhing me tog byug bas bsti stangs byed par 'gyur/ /mchod rten byas mchod bsod nams des ni char mi phod/ /ces rin chen sna bdun las byas pa'i mchod rten gyis zhing gangga'i klung gi bye ma snyed bye ba phrag stong bkang ste/ zhing ? bye ba mtha' yas pa na yod pa'i sems can ji snyed pa de thams cad kyis lha'i me tog dang spos dang byug pa sogs kyis nyin re zhing dus gsum du mchod pa bskal pa'am de bas lhag par mchod pa'i bsod nams kyis/ shes rab kyi pha rol tu phyin pa'i glegs bam bris te 'chang zhing me tog dang byug pa sogs kyis bsti stangs byas pa'i bsod nams kyi char yang mi phod par gsungs shing/ de bzhin du mdo bstan bcos mang po las gsungs/ thugs kyi rten mchod pa'i phan yon ni/ gsal rgyal gyis zhus pa'i mdo las/ su dag bde bar gshegs pa'i mchod rten la/ /mchod pa'i khyad par ci 'dod ci 'byor ba/ /mtshan par 'bul byed de dag dri med cing/ / mya ngan med pa'i bla med byang chub 'thob/ /ces sangs rgyas kyi mchod rten la ci 'byor ba'i mchod pa phul bas/ bla med byang chub 'thob par gsungs/ las rnam par 'byed pa'i mdo las/ de bzhin @086b gshegs pa'i mchod rten la me tog phul pa'i phan yon bcu ste/ bcu gang zhen/ 'jig rten na me tog lta bur 'gyur ba dang/ de'i sna'i dbang po nam yang nyams par mi 'gyur ba dang/ lus kyi dri nga ba rnam par dag par 'gyur ba dang/ dri zhim pa 'byung bar 'gyur ba dang/ phyogs dang phyogs 'tshams rnams su de'i tshul khrims kyi dri dad ldang bar 'gyur ba dang/ 'jig rten gyi sngon du 'gro bar 'gyur ba dang/ sdug pa'i chos rnams thob par 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste/ bcu po 'di dag ni de bzhin gshegs pa'i mchod rten la/ me tog phul ba'i phan yon yin no/ /zhes me tog phul ba'i phan yon dang/ yang de bzhin gshegs pa'i mchod rten la spos phul ba'i phan yon bcu ste/ bcu gang zhe na/ 'jig rten na spos lta bur 'gyur pa dang/ sna'i dbang po rnam par dag par 'gyur ba dang/ lus kyi dri mi zhim pa rnam par dag par 'gyur ba dang; rtag tu lus dri zhim par 'gyur ba dang/ gzugs bzang bar 'gyur ba dang/ 'jig rten gyi mgon du 'gro bar 'gyur ba dang/ sdug pa'i chos rnams thob par 'gyur ba dang/ logs spyod che bar 'gyur ba dang/ mtho ris su skye bar 'gyur ba dang/ mthar yongs su mya ngan las 'da' ba ste/ bcu po 'di dag ni de bzhin gshegs pa'i mchod rten la spos phul ba'i phan yon yin no/ zhes spos phul ba'i phan yon dang/ de bzhin gshegs pa'i mchod rten la mar me phul ba'i phan yon bcu ste/ bcu gang zhe na/ 'jig rten na mar me lta bur 'gyur ba dang/ sha'i mig rnam par @87a @#/ /dag pa 'thob pa dang/ lha'i mig rnam par dag pa 'thob par 'gyur ba dang/ dge ba dang mi dge ba'i chos rnams la shes rab 'byung bar 'gyur ba dang/ ma rig pa dang gti mug gi mun pa sel ba dang/ shes rab kyi snang ba thob par 'gyur ba dang/ de 'khor ba na 'khor ba'i tshe nam du yang mun pa na gnas par mi 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste/ bcu po 'di dag ni de bzhin gshegs pa'i mchod rten la mar me phul ba'i phan yon yin no/ zhes mar me phul ba'i phan yon dang/ 'phags pa spyan ras gzigs kyi mdo las/ rgyal ba'i mchod rten spos byug phul byas na/ /de ni ngan songs rnams ma lus spong/ /de bzhin gshegs dang nye ba 'thob par 'gyur/ /dad pa 'thob cing rtag tu bde la dga'/ /zhes byug pa phul ba'i phan yon dang/ /las rnam par 'byed pa'i mdo las/ /de bzhin gshegs pa'i mchod rten la rol mo sil snyan bul ba'i phan yon bcu ste/ bcu gang zhe na/ gzugs bzang zhing blta na sdug par 'gyur ba dang/ skad snyan par 'gyur ba dang/ yid du 'ong ba smra ba dang ldan par 'gyur ba dang/ grags pa dang ldan par 'gyur ba dang/ gzung ba'i tshig tu 'gyur ba dang/ rtag tu dga' bar 'gyur ba dang/ kun dga' ba'i sgra rgya chen po thob par 'gyur ba dang/ longs spyod che bar 'gyur ba dang/ mtho ris su skye bar 'gyur ba dang/ myur du yongs su mya ngan las 'da' ba ste/ bcu po 'di dag ni de bzhin gshegs pa'i mchod rten la rol mo sil snyan phul ba'i phan yon yin no/ /zhes rol mo phul ba'i phan yon gsungs/ gsal rgyal gyis zhus pa'i mdo las/ mi rnams gang dag sangs rgyas mchod rten nam/ /sku gzugs dag la mgos gtugs phyag 'tshal ba/ /de dag lha rnams dang ni mi rnams kyi/ /cher yang che bar bkur ba'i gnas su 'gyur/ /zhes dang/ 'phags pa spyan ras gzigs kyi mdo las/ sangs rgyas mchod rten thal sbyar phyag 'tshal ba/ mtho ris 'jig rten gnas @87b shing lha dbang 'gyur/ /mir gyur na yang mi yi rgyal por 'ong/ /de ni gzhan yang yongs su nyams mi 'gyur/ /zhes phyag 'tshal bas tshe rabs thams cad du lha dang mi rnams kyis bkur ba'i gnas su 'gyur ba dang/ lha dang mi'i rgyal por 'gyur ba dang/ nam yang nyams par mi 'gyur ba sogs kyi phan yon 'byung bar bshad/ gsal rgyal gyis zhus pa'i mdo las/ su zhig dad pas thub pa'i mchod rten nam/ /sku gzugs dag la skor ba byed pa de/ phyi ma'i tshe la dgra chan rnams kyis btud/ /ces dang/ 'phags pa spyan ras gzigs kyi mdo las/ 'jig rten mgon gyi mchod rten la/ /mi gang skor ba byed pa yi/ /bsngags pa bskal pa bye bar yang/ /brjod pas zad par byed mi nus/ /zhes skor ba byas pa'i phan yon brjod kyis mi langs par gsungs/ gzhan yang mchod pa phul ba dang phyag 'tshal ba dang skor ba byas pa sogs bsnyen bkur byas pa'i phan yon mdo rgyud bstan bcos mang po nas dpag tu med pa bshad do; ;lnga pa ni/ de ltar sku gsung thugs kyi rten bzhengs pas mdo sde nas bshad pa'i phan yon de lta bu 'thob pa la rgyu'i kun slong bzang ba cig gal che ste/ kun slong bzang po'i sgo nas sbyor ba dan pa byas kyang nyes skyon med par 'bras bu phan yon bzang po 'byung ba dang/ kun slong dan pa'i sgo nas sbyor ba bzang po byas kyang 'bras bu ngan pa 'byung bar gsungs pas so/ /de yang yin te/ sngon bcom ldan 'das zhal bzhugs pa'i dus su dge slong pha bu gnyis rgyal byed tshal du 'ong ba g+hande brdung ba'i sgra thos pas dge slong gzhon pas rang gi pha dge slong rgan po la myur du 'gro zhes bskul bas dge slong rgan pos rgas drag pas dbugs 'tshang nas shi ba bcom ldan 'das la zhus par bu'i bsam pa bzang bas 'tshams med du mi 'gyur bar gsungs pa dang/ dgra bcom pa zhig shin tu bsnyung bas nad kyis gdungs nas nad g.yog byed pa'i dge slong la nga yi mgrin pa sngom zhes sngom du bcug pa nad g.yog dge slong gis @88a @#/ /bsdams pas dgra bcom pa grong ba la yang de bzhin gsungs pa dang/ mchod rten rnying bgog bo zhig gsos bya ba'i phyir bshigs pas nye ba'i mtshams med kyi rgyu byas kyang nyes par mi 'gyur bar bsod nams kyi phung po 'ba' zhig 'thob pa dang/ lam kha zhig na thub pa'i sku 'dra zhig yod pa char chen po zhig 'bab pa'i nyin mo lam der 'gro mkhan zhig gis mthong nas sku 'dra chang gyis zhig dogs pas char kheb btsal bas gzhan ma rnyed par mchil lham gog bo 'phang ba zhig rnyed de sku 'dra'i dbu la bzhag pa dang/ de'i rjes su 'gro mkhan zhig gis de mthong nas sku 'dra'i dbu la rtsog pa 'di 'dra bzhag pa nyes pa che snyam nas mchil lha ma blangs pas mchil lha ma 'jog mkhan dang bsal mkhan gnyis ka'i bsam pa bzang bas gnyis kas sbyor pa de la brten nas rgyal srid thob par gsungs/ rgyu mtshan de'i phyir na bsam pa kun slong legs nyes kyi dbang gis dge sdig dang 'bras bu bzang ngan gyi rgyur 'gyur bas so/ /de ltar yang/ 'phags pa lhas mdzad pa'i sems kyi sgrib spyod las/ chos rnams sngon du 'gro ba'i yid/ /yid gtso yid ni sngon 'gro ste/ /yid kyi yis ni 'bad pa yis/ /smra ba 'am ni byed pa'o/ /dge slong rang gi pha rgan la/ /myur 'dengs zhes ni bskul gyur nas/ /bskul bas de ni shi gyur kyang/ / 'tshams med sbyor ba ma yin no/ /shin tu na ba'i dgra bcom pas/ /dge slong nad g.yog byed pa la/ /nga yi mgrin pa sdom zhes bskul/ /de ni shi yang skyon med bstan/ /ces dang/ de 'du bya ba'i blo yis ni/ /mchod rten bshig gsungs nyes pa med; ;nye ba'i 'tshams med byas pas kyang/ /bsod nams phung po 'ba' zhig go /bsam pa bzang pos mchil lham gnyis/ /thub pa'i dbu la bzhag pa dang/ /de bzhin gzhan gyis bsal gsungs pa/ /gnyis kas rgyal srid thob par 'gyur/ /de phyir bsam pa'i rtsa ba las/ /bsod nams sdig pa nye bar gnas/ /zhes gsungs pas so/ /dge ba byas pa'i mjug tu dge brdzogs byang du bsngo ba'i bsngo ba smon lam rnam pa dag pas 'tshams sbyar pa cig gal che ste/ dper na chu shing la 'bras bu chags pan chu shing de skam 'gro ba ltar @88b rdzogs byang du ma bsdos pa'i dge ba rnams rang gi 'bras bu phyung ba na dge ba de zad par 'gyur la/ rdzogs byang du bsdos pa'i dge bas 'bras bu phyung kyang byang chub kyi bar du mi 'dzad par 'phel bar 'gyur bas so/ /de ltar yang/ rgyal sras zhi ba lha'i spyod 'jug las/ dge ba gzhan kun chu shing bzhin du ni/ /'bras bu phyung bas zad par 'gyur ba nyid/ /byang chub sems kyi ljon shing rtag par yang/ /'bras bu 'byin pas mi zad 'phel bar 'gyur/ /zhes dang/ blo gros rgya mtshos zhus pa'i mdo'i don tshigs su bcad pa las/ ji ltar rgya mtsho che nang chu thig lhung/ rgya mtsho ma zad bar du de mi 'dzad/ /de bzhin byang chub yongs bsngos dge ba yang/ /byang chub ma thob par du de mi 'dzad/ /ces gsungs pas so/ /de yang thog mtha' bar gsum thams cad du rang bzhin med rtogs kyi lta bas rtsis zin pa cig byung na shin tu legs pas rnam dpyod dang ldan pa rnams kyis dus gsum du bsags pa'i dge rtsa thams cad rang bzhin med par lta bas rgyas gdab par bya'o/ /smras pa/ de ltar sku gsung thugs rten bzhengs pa dang/ /de la phyag mchod bsnyen bkur bgyis pa yi/ /phan yon mdo las ji skad bshad pa rnams/ /blta dang mnyan dang yid la bsam byas te/ /bdag cag 'gro ba kun la rgyu med par/ /gcig tu phan par mdzad dgos thugs rje can/ /kun mkhyen bden pa kho na gsung ba yis/ /bden pa'i gsung gis 'di ltar bka' stsal to/ /snyan pa'i yid ches dad bdun shugs drag gis/ /rten bzhed sogs la nus pa ci yod kyis/ /bdag nyid legs su 'dod rnams 'dab 'tshal zhes/ /rang gzhan kun la gsol 'debs bgyid lags so/ / ces bde bar gshegs pa'i sku gsung thugs kyi rten bzhed pa sogs kyi phan yon bshad pa dge legs char 'bebs zhes bya ba 'di ni skye bas thob pa'i blo gros kyi rtsal dang ldan zhing rigs @89a @#/ /gnas yon tan du ma la sbyangs ba mi dman pa/ khyad par bzo rig pa'i gtso bo sku gsung thugs kyi rten gyi chag tshad dang ri mo/ /lanytsha/ wartu/ gzab ma/ zlum rig sogs la rnam dpyod phul du phyung ba'i dge slong blo bzang chos grags zhes bgyi bas 'di lta bu zhig gyis zhes bskul ba ltar yul byang phyogs kyi mthar skyes pa'i ban chung gyi na ba ngag dbang blo bzang chos ldan gyis 'jam dbyangs gong ma'i rgyal khabs be'i cing gi bod chos lha khang du rdzogs par sbyar ba'i yi ge snod rab 'byams la rnam dpyod yangs pa'i sdom brtson rab 'byams smra ba blo bzang nyi ma'o// 'dis kyang lus can mtha' dag dge ba la spro shugs 'phel te rnam dkar la brtson pa drag pos myur du mngon par rdzogs par 'tshang rgya bar gyur cig / //