@001a @#/ /rdor sems bsgom bzlas kyi khrid dmigs yi ger bkod ba
yid kyi gdung sel zhes bya ba bzhugs/

@001b @##/ /na mo gu ru badzra satwA ya/ snyigs ma'i skyon
brgyas sbags pa'i nyams thag 'gro'i/ /sdig sgrib sbyong la
rmad byung thugs bskyed mthu/ /ches cher rab 'bar bcom

ldan rdo rje sems/ /nyes ltung byang zhing dag par byin gyis
rlobs/ /rdo rje sems dpa'i bsgom bzlas nyams su len pa la/ lam
thun mong ba'i rim pas rgyud sbyangs shing/ bla med kyi lha

gang yang rung ba'i dbang dang/ bla med lugs kyi rngor sems
yab yum gyi rjes gnang srad dben nas brgyud pa'i chings lcang
skya rol pa'i rdo rje dang/ rje blo bzang chos kyi nyi mas
mdzad pa'am/

dben sa nas brgyud ba'i rdor sems yab rkyang gi chings skyid
shod ser zhabs drung ngag dbang bstan 'dzin 'phrin las kyis
mdzad pa dang/ snga ma gnyis dang cung zad mi 'dra ba rgyal
sras skal

@002a @##/ /bzang thub bstan 'jigs med rgya mo tshas mdzad pa
sogs kyi steng nas legs par thob pa'i gang zag gis 'di phyi'i
legs tshogs gang sgrub kyang sdig sgrib dang nyes ltung

sbyod ba'i thabs la 'bad pa gal che ste/ darpAn a tsarya'i
'tsho ba'i de kho na nyid las/ dngos grub chen po 'dod rnams
kyi/ /srog ni dam tshig sngom pa yin/ /zhes dang/ rje mi las/
sngon chang

'khor ba thog med kyi/ /kha na ma tho lci ba rnams/ /mthol
zhing bshags pa ma byas na/ /zab mo bshad pa'i snod mi rung/
/zhes gsungs/ nyes ltung sbyong ba'i sgo mang yang 'di nyid
mchog ste/ rje'i

rtsa ltung rnam bshad las/ sngags kyi phyir bcos gsungs nas/
de rjes/ gzhan yang rim pa gnyis bsgom pa dang/ bzlas pa dang/
gtor ma dang/ maNDal/ rten gyi mdun du bshags pa dang/

@002b sems can kyi srog bskyab pa dang/ bka' klags pa dang/
tsha tsha gdab pa dang/ sdig pa'i gzugs dmigs te til mer bsreg
pa dang/ ngan 'gro dgug dral dang/ bung po gsum pa 'don pa la
sogs pa'i sgo nas sdig ltung sbyangs par snying po rgyan

las gsungs shing/ rtag tu bag med par gnas na/ /nyes pa chung du
phra mo yang/ /sbrul gyi mche bas btab bzhin du/ /lus ngag sems
ni nyams bar byed/ /ces gal te bag med par byas na nyes pa phra
mo'ang rma la gos pa'i dug bzhin

du 'phel bar gsungs la/ ltung ba byung ba mi 'phel bar byed
pa'i thabs kyang gsungs te/ de nyid las/ sangs rgyas kun gyi
sku gcig bu/ /pad dkar zla ba'i dbus gnas par/ /rdo rje dril
bus brgyan spras pa'i/ /rdo rje sems dpa'

legs dmigs te/ /yi ge brgya ba cho ga bzhin/ /nyi shu rtsa ni
re re bzlas/ /ltung sogs byin gyis brlab 'gyur bas/ /'phel ba
ru ni mi 'gyur zhes/ /grub pa mchog rnams kyis bshad pas/
/thun mtshams su ni spyad par bya/ /'bum

phrag gcig ni bzlas gyur na/ /rnam par dag pa'i bdag nyid
'gyur/ /zhes so/ /zhes gsungs/ de yang 'dul bar phyir bcos
dang/ theg chen gyi mdor stobs bzhi sogs gsungs la/ de gnyis
kar bslab byin dge slong ma gtogs par

rang gcig bur gnas nas bshags bsngams la 'bad na sdig pa 'dag
kyang so thar gyi pham pa 'chab bcas 'dag ba'i thabs med par
gsungs/ sngags la bya rgyud thugs rje chen po'am/ dam tshig
gsum bkod lta bu'i smyung gnas rnam

@003a @#/ /dag sbyor dngos mjug gsum tshang ba byas na so thar
gyi pham bzhi 'dag/ de bzhin du spyod rgyud la'ang sdig bshags
yod/ rnal 'byor rgyud las kun rig gi rtsa sngags 'bum bzlas
pas sdig pa thams cad

'dag par gsungs/ 'on kyang de dag gis rnal 'byor rgyud man
chad nas bshad pa'i sdig ltung 'dag kyang sngags bla med kyi
thun mong ma yin pa'i ltung ba 'dag mi nus/ rdor sems yum bcas
kyi rnal 'byor la gnas nas yig brgya 'bum

bsrang na sngags bla med kyi ltung ba 'dag pas sgrib sbyong
thams cad las zab cing phan yon che/ sngon blo gsal gling la
dom 'brug gnyis zhes dge bshes grags can gnyis byung ba'i nang
tshan 'brug stag ngag dbang dpal bzang pas sngags

kyi rtsa ltung 'byung nye/ byung na nges par mnar med du 'phen
pas de'i tshe tshad rdzogs pa'i bar la phar phyin theg pa'i
dbang rnon 'tshang rgya/ gsungs pa la/ kun mkhyen 'jam dbyangs
bzhad pas/ de g.yag zhar gyi rtswa zos pa dang 'dra/ rdor sems

yum bcas kyi sgos yig brgya 'bum gyis rtsa ltung 'dag pa lta
bu'i thabs mkhas che ba ma shes pas lan gsungs/ mnyam med jo
bo chen pos/ sngags la ltung ba 'byung ba'i sgo bsam gyis mi
khyab ste/ bum pa lta bu zhig la'ang dngos po tha mal par

bltas na ltung bar 'gyur pas phyogs rdul che ba zhig tu maNDal
zhig phyis te bzhag na de ma thag rdul chags nas 'ong ba dang
'dra gsungs/ 'o na de la brten nas sangs rgyas myur du 'grub
dka' 'am zhus pas/ ltung ba sbyangs pa'i thabs bya brgya 'ur

@003b rdo gcig gis 'ded pa lta bu'i gdams bzab mo rdo rje sems
dpa'i bsgom bzlas bya ba gsang sngags pa la yod ces gsungs/
rgyud sde gong ma gnyis kyi sngags sngom gso ba'i thabs dngos
dbang len pa yin la/ so thar gyi nyes spyod sngom

pa'i tshul khrims byang sems dang sngags kyi sngom pa blangs na
gnas gyur nas gnyis tshogs su 'gyur bas de'i cha shas la 'jog
dgos/ des na sdom pa gong ma gnyis sor chud pa na de'i cha
shas so thar kyang sor chud pa'i mos pa dang nyams

len bskyangs chog gsungs/ gdams pa dngos la sngon 'gro dngos
gzhi rjes dang gsum/ dang po ni/ rang gi smin mtshams kyi thad
drang gi nam mkhar bla ma sbyi bor bzhugs pa'i rdor sems yab
yum la sangs rgyas byang sems sogs

skyabs yul ma tshang ba med pas bskor ba'am/ bde lam ltar gsal
btab kyang rung la/ 'jigs byed kyi cho ga lta bu dang 'brel
ba'i skabs de'i rten gzhal yas khang brten pa lha bcu gsum
dang bcas pa bskyed pa'i gtso po 'jigs byed

yab yum dang/ gti mug gshin rje gshed sogs rigs lnga sangs
rgyas dkon mchog kun 'dus/ sgo ba bzhi dang yum bzhi don la
gtso 'khor tha mi dang kyang byang sems kyi tshul bzung bas dge
'dun dkon mchog kun 'dus/ de

rnams kyi thugs rgyud kyi 'gog lam rtogs pa'i chos dang/ gzhal
yas khang gi rdo rje nor bu'i tog gi khang bu chung na bzhugs
pa'i rtsa rgyud kyi glegs pa ma lung gi chos dkon mchog kun
'dus te mchog gsum dngos kyi 'du shes bzhag/ rang

@004a @#/ /gi mtha' skor du pha mas thog drangs dgra gnyen bar
ma'i 'gro ba rang rang gi rnam pa'am mi'i rnam par gsal btab/
rang dang mtha' skor gyi sems can rnams byang sa las 'byung ba
ltar gyi sdug bsngal brgya

rtsal sogs kyis mnar ba la gshed ma ral grig dengs pa'i drung
du gnas pa lta bu'i 'jigs skrag dang/ de las skyobs pa'i nus
ba mdun gyi skyabs gnas rnams ma gtogs su la yang med pa'i yid
ches kyis skyid sdug legs nyes ci byung

yang khyed shes kyi blo bkal te bdag dang ma sems can thams
cad byang chub ma thob par du 'jigs pa rgyu dang bcas pa las
bskyab tu gsol snyam pa'i 'dun mos dang/ dang gus shugs drag
kha tsam ma yin par yid dung nge bas/ dkon mchog

gsum la skyabs su 'gro/ /zhes skyabs 'gro tshig rkang gcig las
med kyang lam rim ltar gang la skyabs su 'gro ba'i yul sogs
bcad yongs su rdzogs par dran nas nyams su len zhing bdud rtsi
'bebs sbyangs byed/ rang gi mtha' skor

gyi rigs drug gis bsdus pa'i sems can thams cad la dmigs nas
de rnams kyis tshe rabs grangs med bar bdag gi ma byas/ de'i
dus tshe 'di'i ma ltar phan bde tshad med pa bsgrubs/ de'i drin
lan chos kyis 'jal dgos/ de rnams

bde ba 'ba' zhig 'dod kyang sdug bsngal gyi rgyu kho nar gzhol
bas bde bas phongs/ sdug bsngal gyis rtag par mnar ba'i tshul
bsams te bde ba dang ldan 'dod kyi yid 'ong gi byams pa dang/
sdug bsngal mtha'? dag dang gral? 'dod kyi

@004b snying rje bskyed/ de yang bdag gis nges par bya'o zhes
lhag bsam yid 'khul ba bsgoms/ des na bdag gis pha rol tu
phyin pa'i lam gyis grangs med gsum la sogs pa'i bar du tshogs
gnyis rgya chen po gsog pa la rang ngos nas ngang pa bad

mtshor 'jug ba lta bu'i sbro ba bskyed dgos kyang de'i bar la
sems can rnams sdug bsngal gyis mnar ba la mi bzod pas de'i
phyir myur ba myur bar zung 'jug rdo rje 'chang gi go 'phang
mngon du bya/ de'i ched lam 'di nyams su blangs par bya snyam

bas; sems can thams cad bdag gis sgrol/ /zhes smon sems dang/
rkang ba tha ma gnyis kyis byang chub kyi gnas te rgyu pha rol
tu phyin pa drug gis bsdus pa'i lam rim pa gnyis kyi nyams len
la rang gis spyad nas gzhan go 'phang der 'god

'dod kyi 'jug sems bskyed pa gnyis lam rim las 'byung ba ltar
lam gyi gnad yongs rdzogs byas nas nyams su len/ nga rang chos
bla ma'i thugs rje la brten nas rna bas mang bo thos kyang
tshig tu brjod pa tsam las 'char dka'/ tshig

mang nyung la ltos pa med par kun tshang ba nyams 'og tu tshud
pa la rag las pas rgyun par bsam bsgom gyis 'dris par bya ba
gal che/ de ltar skyabs 'gro sems bskyed lan gsum mam bdun
sogs bya ba ni rten gyi stobs te/ rdor sems

bsgom pa dang/ skyabs yul rten gyi stobs su byas pa'ang yod
do/ /mthar skyabs yul rnams 'od du zhu nas smin mtshams nas
thim pas rgyud byin gyis brlabs par bsam/ gnyis pa dngos gzhi
ni/ rang nyid rdor sems yab 
@005a @#/ /yum du bskyed kyang chog la/ yang na rang lhar gsal
ba'am/ tha mal du gnas pa'i smin mtshams nas sor brgyad kyis
gzhal ba'i mtshams spyi gtsug ste/ der padma'i ming yig dang po
pa la thig

les brgyan pa paM dkar po gyen 'greng/ de 'od du zhu ba las
nges 'byung gi bsam pa dang 'khor ba'i skyon gyis ma gos pa
mtshon pa'i padma dkar po 'dab brgyad/ thang sag pas dmar po
gsungs/ 'od kyi sbu gu'i yu ba can/ rtsa ba dmar

mdangs chags pa/ lte ba ljang ser/ ge sar dmar ser du yod ba'i
dbus su dbyangs dang po a yig dkar po chu las chu bur rdol ba
ltar thon ba de dang/ rgyal ba rnams kyi byang chub kyi sems
kyi bdag rkyen las zla ba'i dkyil

'khor dkar bsil nya gang ba/ ri bong gi mtshan ma sogs ra ri
dang bral ba/ shel dkar gyi maNDal kha sbubs pa lta bu padma'i
lte ba dang tshad mnyam pa zhig tu gyur/ de'i steng du phyogs
bcu'i sangs rgyas thams cad kyi thugs gnyis su

med pa'i ye shes sa bon hUM yig dkar po'i rnam par thol gyis
byung/ de 'od du zhu pa las phyag mtshan rdo rje dkar po rtse
lnga pa gyen 'greng gi lte bar shel phreng la thag pa brgyus
pa'am shel bum nang du mar me bzhag pa ltar hUM dkar pos
mtshan

pa; steng gi rwa dbus mar hUM yig bkod pa'ang yod/ de las 'od
zer 'phros pas dag ma dag gi 'jig rten khyab/ der mchod yul
dang snying rje'i yul gnyis las gang zag gzhan med pas nam
mkha'i mtha' khyab kyi 'gro ba'i grangs mnyam

@005b gyi 'od zer gyi sne las rdor sems yab yum zung re spros
pa sems can rang rang gi spyi bor 'khod pa snyoms par zhugs
pa'i sbyor mtshams nas byang chub kyi sems kyi bdud rtsi'i
rgyun gyis dbang bskur ba lus sems la zhugs pas thog med nas

bsags pa'i sdig sgrib bag chags dang bcas pa dag/ lus bdud
rtsis gang/ spyi bo'i rdor sems de dag la sib kyis thim pas
sgo gsum dang rdo rje sems dpa'i sku gsung thugs dbyer med du
byas te snod thams cad gzhal yas khang dang bcud kyi

sems can thams cad rdor sems su gyur/ 'od zer mchod pa'i yul
phyogs bcu'i sangs rgyas kyi zhing khams khyab bar 'phros pa'i
sne las mchod pa'i lha mo mchod rdzas ma tshang ba med pa thogs
pas phyi nang gsang ba de kho na nyid kyi mchod pa tshad

med pa phul bas thugs rgyud la des bskyed pa'i zag med kyi bde
ba gsar du 'khrungs te sras bcas rgyal ba'i byin rlabs thams
cad khab len gyi rdos lcags phye 'dren pa ltar 'od zer gyi
rnam par spyan drangs pa dang lhan cig rdor sems dang mchod

lha rnams kyang tshur bsdus nas thim pa ste don gnyis bya ba ni
grangs med gsum gyi tshogs kyi dod thub lta bu ste rgyu'i mdzad
pa'o/ /de las rdo rje hUM dang bcas pa 'od dang 'od zer gyi
gong bu gcig tu gyur pa las bla ma dang gnyis su med pa'i rdor
sems

yab yum gyi skur dkrong gis bzhengs pa yid ngor rdzogs par
'char thub na de'i go chod pas tshig ris thar chags su 'don
dgos pa'i nges pa mi 'dug kyang/ las dang po pa'i blo ngor
'char bde khyad rim gyis gsal 'debs pa ni/

@006a @#/ /sku mdog sdig sgrib sbyong ba'i rten 'brel du gangs
ri la nyi ma 'bum gyis 'khyud pa ltar dkar po/ zhal gcig/
phyag gnyis/ thabs shes mtshon ba'i rdo rje rtse lnga pa dang/
des yu ba byas pa'i dril bu

thugs kar bsnol nas 'dzin pa/ yum rdo rje snyems ma dkar mo
gri thod 'dzin pas yab kyi mgul ba nas 'khyud pa/ mthon mthing
ral ba'i thor tshugs kyi lhag ma sil bur babs pas sku stod
khebs pa/ rin po che'i rgyan brgyad dang/ sku stod

lha rdzas kyi gos kyi ga shal/ sku smad lha rdzas kyi dar gyi
sham thabs gsol ba/ yab rdo rje'i skyil krung gis bzhugs pa/
zhes pas shugs la yum padma'i skyil krung gis 'khyud par bstan
to/ /sangs rgyas thams cad kyi thugs rgyud kyi thabs

shes gnyis su med pa'i ye shes lha yab yum gyi rnam par shar
bas gnyis ka thugs rgyud gcig par go dgos/ 'dus par yum rdo
rje dbyings kyi dbang phyug ma dkar mo rdor dril 'dzin pa
gsungs pa rang rang gi rgya gzhung gi tshig ris dang bstun 

phas phyag mtshan tsam las 'di dang bde mchog gi rdo rje snyems
ma dang don 'dra zhing/ bde mchog gi skor 'ga' re na yab la
phyag rgya drug dang/ yum la thal ba ma gtogs lngas brgyan par
gsungs/ gong du drangs pa'i 'jam dpal

grags pa'i snying bo rgyan du yum tshig ris la mi gsal kyang go
sle ba la dgongs zhes khya dge blo gros rgya mtshos gsungs/ bde
mchog gi cho gar 'byung ba ltar gnas gsum du 'bru gsum gsal
btab chog kyang gsang 'jigs kyi cho gar

@006b shin tu dgos pa che bas rtsal du bton nas tshig ris la
hUM tsam las med/ yab tsam mam/ yum la'ang 'bru gsum bkod
chog/ gang ltar thugs kar kun rdzob byang chub kyi sems kyi
ngo bo zla ba dkar po khams thug ge pa/ de'i steng don

dam byang chub kyi sems kyi ngo bo rdo rje dkar po rtse lnga
pa/ lte bar zla ba'i steng du thugs bde stong gnyis su med
pa'i ye shes kyi ngo bo hUM dkar po/ de las shar ri'i rtser
nyi ma shar ba na 'dzam gling thams cad 'od kyis skad cig la
khyab pa

ltar 'od zer 'phros ma thag phyogs bcu'i zhing khams rab
'byams khyab song ba'i mos pa shin tu gal che zhes skyabs mgon
rdo rje 'chang dang khong 'dzam pa'i dbyangs rnam gnyis nas
yang yang gsungs/ 'od des rgyal ba sras bcas kyi thugs

rgyud rang dbang med par bskul te/ rang bzhin chos sku'i gnas
dang/ longs sprul gyi zhing 'og min dang bde ba can nas longs
sku dang 'od dpag med kyis rang nyid rjes su 'dzin pa'i phyir
rdor sems yab yum gyi rnam par byon pa sogs

thub dbang/ byams 'jam dbyangs/ gsang bde 'jigs gsum/ sgrol
dkar ljang/ mgon chos rnam sras sogs sangs rgyas thams cad
rdor sems yab yum gyi rnam par kha ba bu yug 'tshubs ba bzhin
byon nas thim pas skyabs gnas

kun 'dus su mos pa 'di sgrub thabs thams cad la 'dra/ 'dir med
kyang 'dus par oM sarba ta thA ga ta arg+haM sogs kyis ye
shes pa la mchod pa yod/ dzaH zhes ye shes pa de thams cad
rdor sems yab yum gcig tu gyur pa dam tshig pa'i

@007a @#/ /spyi bor byon/ hUM gis de la zhugs/ paM gyis dam ye
dbyer med 'dres/ hoH sa dbang du byas te dgyes bzhin bzhugs
par mos pa 'di'i gsung bshad sgrol dkar tshe khrid du bkod zin
pas

ma bris so/ /slar yang thugs ka'i hUM gi 'od zer gyis 'od
dpag med kyi thugs ka nas 'od dpag med rigs lnga'i rnam par
spyan 'dren pa sogs phyogs bcu'i rgyal ba sras bcas mi bskyod
pa gtso bor byas pa'i rigs lnga

zhal gcig phyag gnyis bum pa bdud rtsis gang ba thogs pa'i
rnam par spyan drangs/ 'dus pa'i cho gar panytsa kU la sa pa
ri wA ra arg+haM sogs kyis dbang lha rigs lnga 'khor bcas la
mchod pa yod/ rang dang spyi bo'i rdor sems gnyis

kas dbang bskur bar gsol ba 'debs dgos pas bdag dang 'di zhes
khyad par gyi tshig ma sbyar ba yin/ dbang lha rnams kyi zhal
nas oM sarba ta thA ga ta sogs sngags dang bkra shis kyi
tshigs bcad dbang gi skabs ltar brjod de

yab yum gyi spyi bo nas byang chub kyi sems kyi bdud rtsis chu
rub kyi tshul du dbang bskur bas sku gang/ dri ma dag/ ces pa
la sngon bla ma zhig la rdor sems la dri ma dag rgyu yod na de
la brten nas sgrib sbyong ga 'dra byed zhus par/ dam

nyams skal med khyod phar song/ gsungs pa'i lo rgyus kyang yod
de/ de yang/ rgyal ba'i sku gsung thugs la nyon mongs mi mnga'
yang/ /zhes sogs dang/ khyed sku rang bzhin yongs dag pa'i/
/zhes sogs ltar rang gi mos ngo

@007b tsam las don la rdor sems med snyam pa dang/ yod kyang
sems can zhig yin pa sogs sgro btags tsam du 'dzin pa'i rnam
rtog gi snang cha la 'char lugs sna tshogs yong ba de ltar na
skyon thams cad ma spang bar blo ngor thag chod pa

red; ma dag pa'i snang ba de 'gag nas snod bcud dag pa'i rnam
rol du 'char ba rlan gsher phor gang la chu rnag bdud rtsi
dang/ gang zag gcig la dgra gnyen bar ma dang skyon yon gyi
rnam pa 'char ba lta bu yin/ da lta'i bla ma rnams

rang 'dra'i mir snang ba la/ spyan snga blo gros rgyal mtshan
gyis/ bla ma mi ru mthong ba dga' rab yin/ /khyi dang phag tu
ma mthong ngo mtshar che/ /gsungs pa bzhin don yod med la ma
ltos par snang cha ci yang srid/ ma dag pa'i snang ba  

'gag na sangs rgyas dngos su mthong yong gsungs/ chu'i lhag ma
spyi bor lud pa yongs su gyur pa las mi bskyod pa sngon po yab
yum mam yab rkyang zhal gcig phyag gnyis g.yas sa gnon dang
g.yon mnyam bzhag gi steng rdo rje 'dzin

pas dbu brgyan pa rgyu la 'bras bu'i rgyas gdab pa yin/ mchod
bstod rgyas bsdus ci rigs byed 'dod na byas chog/ ma byas
kyang chad pa'i skyon med gsungs/ skabs gzhan du dbang lha
rigs lnga'i rnam par spyan 'dren pa la

gshin rje gshed rigs lnga sogs mi 'dra ba'i khyad par yod/
thugs kar hUM dkar po nas hril mor btang ba'i tshad tsam gyen
'greng gi mthar yi ge brgya ba'i sngags phreng dkar po mgo
phyir bstan nas nyal stabs su gnas pa'am gyen

@008a @#/ /'breng 'phreng gcig tu bkod pa bde mchog gi cho ga'i
tshig la thon pa 'di la'ang 'dra/ rang gi mtha' skor du rigs
drug gi sems can thams cad 'god pa'am/ rang gi snying gar zla
ba'i steng du rang tha mal

ba'i rnam pa can/ de'i mdun du pha ma/ g.yas su spun zla/
g.yon du grogs mched/ rgyab tu gnyen bshes/ mtha' skor du sems
can 'khod bar mos pa 'dus pa'i rtsa rgyud las/ 'dod pa snying
gar bzhag bya ste/ /zhes pa'i man ngag go/ /

de nas las nges pa/ 'phel che ba/ ma byas pa dang mi phrad pa/
byas pa chud mi za ba sogs bsam nas sngar byas kyi sdig sgrib
dang dam tshig nyams chags rnams las 'bras bu yid du mi 'ong ba
'byung tshul la nges pa drangs nas dug khong du song ba lta

bu'i 'gyod sems shugs drag po bskyed pa ni rnam par sun 'byin
pa'i stobs dang/ phyis srog la babs kyang sdig pa'i las lus
ngag tu thon pa lta ci/ kun slong tsam yang mi rgyu bar bkag
nas 'phro chod pa cis kyang byed snyam pa nyes pa las slar

ldog pa'i stobs gnyis tshang ba'i sgo nas rang gis dbu mdzad de
sems can thams cad kyis mgrin gcig tu/ bcom ldan 'das rdo rje
sems dpa' bdag bzhan sems can gyi sdig sgrib dang dam tshig
nyams chags thams cad byang zhing

dag par mdzad du gsol/ zhes sngon gyi thugs dam bskul te gsol
ba btab pas thugs snying rje chen po'i gzhan dbang du song
ba'i stobs kyis thugs ka'i sngags phreng sa bon dang bcas pa
las 'od zer dkar po dpag tu med pa 'phros pa

@008b sems can thams cad kyi lus la phog pa tsam gyis sdig
sgrib sbyang ba'am/ 'od zer las bdud rtsi'i rgyun babs pas
sdig sgrib sbyang ba'am/ sngar ltar sems can gyi sdig sgrib
sbyangs/ sangs rgyas sras bcas la mnyes pa'i mchod pa phul/ 

spros pa'i 'od zer dang sras bcas rgyal ba'i mkhyen brtse nus
gsum sogs 'gro ba skyobs pa'i 'phrin las rgyu dang bcas ba
bdud rtsi 'od zer dkar dmar mtheng gsum mam/ 'od zer sna
lnga'am/ sdig sgrib sbyong ba'i rten 'bral du dkar po 'ba'

zhig gi rnam par bsdus nas sngags phreng sa bon dang bcas pa
la thim pas rdor sems yab yum dang/ de'i sku'i 'od zer dar
bdud rtsi sogs thams cad sdig sgrib sbyong ba la sngar las
kyang gzi brjid dang mthu stobs nus pa phun sum tshogs

par bsam pa 'di dmigs pa'i mdor bstan lta bu yin pas/ spyi
bo'i rdor sems la nga rgyal 'dzin dgos pa min yang thugs ka'i
hUM la sems zhugs pa bzhin byas nas sa bon sngags phreng gi
yi ge re re las kyang 'od zer 'phros pa phan tshun 'thab pas

sku'i nang thams cad dwangs shing gsal bar byas pa la dmigs pa
gtad nas yig brgya tshar gcig gam/ nyer gcig bzlas na dmigs pa
la gsal snang thon pa dang/ lha sngags la nus pa 'byung ba'i
dgos pa yod/ rgyal ba sras bcas la gzhan don

las dgongs rgyu med pas sems can gyi don du phyag mchod sogs
dge rtsa cung zad res thugs dgyes pa'i mchod par 'gyur bas/
dngos su bshams pa ja mchod dam/ spos rkang gcig yin kyang/
lag pa'i mthil nas mchod pa dpag med kyis//

@009a @#/ /zhes sogs dang/ ji ltar 'jam dbyangs la sogs pas/
/zhes sogs ltar 'od zer las mchod pa'i lha dang lha mo grangs
med pa spros nas lam khrid ltar kun tu bzang bo'i mchod sprin
dang/ mchod pa re

re dang/ de'i kha dog dang/ dbyibs sogs gzugs sgra dri ro reg
bya'i khyad bar dang/ de re re las 'od 'phros pas mchod sprin
nam mkha' gang ba/ skra tsam khyon la dus gsum tshad snyed
kyis/ /zhes sogs ltar 'das ma 'ong gi mchod pa

rnams kyang da lta'i dus skad cig ma rer rdzogs pa/ dus gsum
gyi zhing gi bkod pa dang mchod pa thams cad kyang rdul gcig
la rdzogs pa des zhing kun bkad ste skyabs yul rnams kyi ba
spu'i bug re rer skyabs yul mtshang ba med pa

bzhugs pa la mchod pa sgyu ma'i rnam thar gyi ting nge 'dzin
zhes sa brgyad pa yan chad la dngos su yod pa'i tshul de shes
nas mos pas mchod na tshogs rlabs po che rdzogs pa'i thabs
mkhas kyi 'phrul 'degs che/ rdul de snyed kyi sras bcas

rgyal ba'i byin rlabs nus mthu bsdus nas rang gi spyi bo'i
rdor sems la thim pas thugs ka'i sngags phreng sa bon dang
bcas pa las 'od dang bdud rtsi'i rgyun dkar po babs pa sku'i
dbyibs brgyud/ yab yum gyi sbyor mtshams nas thon te

rang gi spyi gtsug nas zhugs pas lus kyi nang thams cad bdud
rtsi 'od zer dang bcas pas gang bas/ sdig sgrib re re tsam ma
yin bar/ gang zhig thog med srid pa'i chu klung du/ /ma lus
kun rtog gis bsags rnyog pa rnams/ /zhes sogs

@009b ltar 'khor ba thog med nas bsags pa'i sdig sgrib nyes
ltung dam tshig nyams chags sems steng na las nyon sa bon bag
chags kyi ngo por gnas pa gang yod thams cad dud khu dang sol
khu/ des bskyed pa'i nad rims sogs rnag khrag/ gdon

bgegs sogs sdom sdig lbal lcong la sogs pa'i srog chags mi
sdug pa dang yid du mi 'ong pa'i rnam par phu chu'am shwa 'od
drag pos lung mdo'i nyal nyil dbang med du bsdus nas 'khyer ba
ltar gshang gci'i lam dang/ rkang ba'i sor mo

bcu sogs 'og gi ba spu'i sgo rnams nas thon te sangs kyis
dang/ lus shel bum du mar ma sbar ba ltar dwangs gsal 'od kyi
rang bzhin can du gyur pa'i mos pa byed pa gong nas mar ded
pas yas ded ces gsungs/ yang sngar ltar bdud rtsi

rkang mthil nas spyi gtsug par du gang bas snod chus khengs pa
na rtsa sbur sogs khar g.yengs nas lud de phyir 'pho ba ltar
mig gnyis kyi sgo/ kha sna'i bu ga sogs steng gi ba spu'i sgo
rnams nas nag nur gyis thon te lhag med du byang nas lus phru
ma

phus btab pa ltar song par bsam pa mas nas yar ded pas mas ded
ces bshad/ yang sngar ltar sdig sgrib thams cad thang? chen
po'i dkyil du thal ba'i phung po spungs pa ltar snying gar nag
phung nge yod pa la/ yab yum gyi spyor mtshams nas ye shes

kyi bdud rtsi'i rgyun drag tu babs pas 'bab chu'i steng du gad
pa chad pa'am/ lag mthil du dngul chu'i thig pa brdab pa ltar
steng 'og bar gsum gyi ba spu'i bug thams cad nas thon te shel
gong g.ya' dag pa ltar sangs kyis dag/ lus 
@010a @#/ /bdud rtsi dkar po'i rgyun gyis bar mtshams med par
gtams par bsam pa steng 'og bar gsum khyad med du bdas pas phung
ded kyi dmigs pa ste/ de gsum ka'i mjug tu lus shel ltar dag ba
dang/ sdig pa'i

'khor gsum mi dmigs pas rgyas btab ste stong pa nyid la nges pa
ci yod gsal btab na sdig pa 'dag tshabs shin tu che/ sdig sgrib
nag phung nge yod pa dang/ shel ltar dag par bsam pa gnyis kyang
stobs phyi ma gnyis gsal 'debs ched yin/ rdzogs

rim rlung zhugs gnas thim gsum sogs la rtsal du 'don na sdig
sgrib lus las phyi rol tu thon pa'i dmigs pa yang yang bskyangs
na rlung 'du ba la gnod pas bdud rtsi'i rgyun gyis lus gang/ 'od
zer gyis gsal bar byas pas sdig sgrib thams cad dung

gi rdul phyis pa'am/ mun khang du nyi zer zhugs pa ltar chos kyi
dbyings su zad de gar song cha med du yal bar mos nas bden med
kyi lta bas rgyas 'debs byed pa sdig pa 'dag pa'i thabs mkhas
bla na med pa yin/ mtha' bskor gyi sems can rnams kyi

spyi bor yang 'od zer gyi sne la rdor sems yab yum zung re spros
pa'i spyor mtshams nas bdud rtsi'i rgyun babs pas sdig sgrib dag
pa'i dmigs skor gsum ka sngar ltar bskyangs nas lus mtshan dpes
brgyan pa'i rdor sems yab yum gyi sku dang/

sems sgrib bral gyi chos skur gyur pa sogs lam yongs rdzogs kyi
dmigs ba dang/ byams snying rje byang chub kyi sems bsgom pa la
rtsal du 'don pa sdig pa spyangs pa la rlabs che ba'i gdams pa
ste/ spyod 'jug las/ de lta'i dge pa nyams rlung

@010b nyid la rtag /sdig ba stobs chen shin tu mi bzad pa/ /de
ni rdzogs pa'i byang chub sems min pa/ /dge gzhan gang gis zil
gyis non par 'gyur/ /zhes so/ /yang rdzogs rim gyi skabs/ rdor
sems kyi spyi bo'i oM la yig brgya dkar pos bskor ba las

bdud rtsi dkar po'i rgyun byung ba tshangs bug nas zhugs/ spyi bo
bde chen gyi 'khor lo khrig mer gyis gang bas tsher bas 'khor ba
thog med nas bsags pa'i nyon mongs ba dug gsum dang/ des bskyed
pa'i nad gdon dang/ khyad par du yang srog gcod pa/ ma byin

par len pa/ log g.yem la sogs pa lus kyi sgo nas bsags pa'i sdig
sgrib bag chags dang bcas pa dang/ dpal ldan bla ma dam pa'i sku
la bsdos pa la sogs pa lus kyi dam tshig nyams chags thams cad
byang zhing dag/ rdo rje sems dpa'i sku'i byin

rlabs thob par mos nas yig brgya bzla/ yang mgrin pa'i AH la
yig brgya dmar pos bskor ba las bdud rtsi dmar po'i rgyun byung
ba rang gi tshangs bug nas zhugs/ mgrin pa longs spyod kyi 'khor
lo gang bas tshe rabs 'khor ba thog med nas bsags pa'i

nyon mongs pa dug gsum dang/ des bskyed pa'i nad gdon dang/
khyad par du rdzun phra ma tshig rtsub ngag 'khyal la sogs pa
ngag gi sgo nas bsags pa'i sdig sgrib bag chags dang bcas pa
dang/ dpal ldan bla ma dam pa'i gsung bcag pa sogs ngag gi dam

tshig nyams chags thams cad byang zhing dag/ rdo rje sems dpa'i
gsung gi byin rlabs thob par bsam nas yig brgya bzla/ yang thugs
ka'i hUM la yig brgya sngon pos bskor ba las bdud rtsi sngon
po'i rgyun byung ba rang gi tshangs bug nas zhugs/ snying ga chos
kyi

@011a @#/ /'khor lo yan chad gang bas tshe rabs 'khor ba theg med
nas bsags pa'i nyon mongs pa dug gsum dang/ des bskyed pa'i nad
gdon dang/ khyad par brnab sems gnod sems log lta la sogs pa yid
kyi sgo nas

bsags pa'i sdig sgrib bag chags dang bcas pa dang/ dpal ldan bla
ma dam pa'i thugs dkrugs pa la sogs pa yid kyi dam tshig nyams
chags thams cad byang zhing dag/ rdo rje sems dpa'i thugs kyi
byin rlabs thob par bsam nas yig brgya bzla/ yang

thugs ka'i sngags phreng sa bon dang bcas pa las bdud rtsi'i
rgyun dkar nar ra? babs pa sku'i dbyibs brgyud/ yab yum gyi
sbyor mtshams nas byung ste rang gi tshangs bug nas zhugs/ spyi bo
bde chen gyi 'khor lo rtsa 'dab dang bcas pa gang/ de nas d+hu
tI'i

nang nas mar babs/ mgrin pa longs spyod kyi 'khor lo rtsa 'dab
dang bcas pa gang/ de bzhin du snying ga chos kyi 'khor lo/ lte
ba sprul ba'i 'khor lo/ gsang gnas bde skyong gi 'khor lo/ nor
bu'i dbus kyi rtsa 'dab brgyad pa/ brla g.yas g.yon rnams

su zhugs/ rkang sor gyi bar mer gyis gang/ thog med nas bsags
pa'i sdig sgrib thams cad dung khu dang sol khu'i rnam par 'og
sgo gnyis dang ba spu sogs nas nag nur gyis thon pas lus shel
gong g.ya' dag pa ltar gyur par mos/ yang bdud rtsi'i

rgyun gyis rim pas sgrib bzhi dag cing dbang bzhi thob/ lam gyi
nus pa 'jog pa dang/ sku bzhi thob par mos pa dang/ bdud rtsis
thun mong dang thun mong ma yin pa'i snying rje mtshon zhing de
'grub pa dang/ 'od zer gyis 'od gsal 'grub la/ gzhi lam

@011b 'bras bu'i skabs kun tu 'byung ba lnga'i khams dang/ dug
lnga spyongs/ ldog pas phye ba'i ye shes lnga dang rigs lnga
'grub pa sogs kyi don du 'od dang bdud rtsi thams cad kha dog
sna lnga bar byed/ yang bdud rtsi'i rgyun gyis bshes gnyen la ma
gus pa nas bdag

gnyis su mtshan mar 'dzin pa'i bar gyi lam dngos gzhi'i rtogs pa
skye ba'i gegs byed sbyangs nas lam tshang la ma nor ba'i rtogs
pa khyad par can skye ba'i snod rung du sgrub par bsam pa'i lam
yongs rdzogs kyi dmigs pa 'di kho na lam rim dang bskyed

rdzogs kyi 'gros ltar gal che/ 'od dang bdud rtsi dkar ser gyis
zhi sogs las bzhi dang/ mar khu'i mdog dang/ dkar sngon bsil
drod sogs kyi mos bas rlung dang pad kan sal ba dang/ tshe dang
shes rab spel ba sogs dmigs pa du ma zhar byung

du bsgrub nus so/ /yang sngags phreng las bdud rtsi'i rgyun
babs/ sbyi bo nas rkang mthil gyi bar khrig mer gyis gang/ tshe
rabs thog med nas bsags pa'i sdig sgrib thams cad dang/ khyad
par du yang sngags ma dag par bzlas pa la sogs pa ngag gi dam
tshig

nyams chags thams cad byang zhing dag/ rdo rje sems dpa'i gsung
gi byin rlabs ngag la zhugs/ ngag sngags bgrang ba la dbang ba'i
nus pa can du byin gyis brlabs bar bsam/ yang bdud rtsi'i rgyun
gyis sdig sgrib thams cad dag/ rang gi ba spu'i bu ga re re'i

nang du zla ba'i dkyil 'khor nya gang ba'i steng du hUM yig gi
mthar A li kA li'i sngags phreng gis bskor ba las 'od zer
'phros pas sgron me khri 'bum sbar ba ltar rtsa sbubs thams cad
'od kyis gang/ de las 'od zer dpag med 'phres pas zhing khams
rab

@012a @#/ /'byams khyab ste rgyal ba sras bcas mchod pas mnyes
bar byas/ de rnams kyi sku gsung thugs kyi byin rlabs dang
mkhyen pa'i yon tan thams cad hUM yig dbyangs gsal gyis bskor
ba'i rnam par spyan drangs te

ba spu'i sngags phreng sa bon dang bcas pa la thim pas sgron me
bye ba dung phyur dus gcig la sbar ba ltar 'od zer sngar las
ches cher 'bar bas rmongs pa'i mun pa thams cad sangs kyis dag
ste shes bya thams cad la blo gros kyi snang ba rgyas par bsam

pa ni 'di'i sgo nas shes rab 'phel ba'i dmigs pa thun mong ma
yin par bshad do/ /yang sdig sgrib thams cad dud khu dang sol
khu'i rnam par thon pa dbang chen gser gyis gzhi'i 'og tu song/
der skye 'gro'i srog la rngams pa'i 'chi bdag las

kyi gshin rje kha gdangs nas yod pa'i nang du dpal ldan bla ma
dam pa'i sku glud dang/ rang dang skye 'gro sems can thams cad
kyi tshe dang srog gi glud du btang bas 'grang ste ngoms shing
tshim nas lan chags bu lon sha 'khon thams cad byang zhing dag/

gnod 'tshe'i bsam sbyor ngan pa zhi nas byams snying rje byang
chub kyi sems dang ldan par bsam pas tshe sgrub dang 'chi blu
sogs su 'gyur gsungs/ sngags don oM sku rdo rje mtshon byed/
badzra satwa rdo rje sems dpa' zhes mtshan nas bos te/ sa ma ya
dam

tshig ste/ sngon thugs bskyed pa'i dus sangs rgyas nas sems can
thams cad go 'phang der 'god par dam bcas shing/ da lta sangs
rgyas nas mdzad pa lhun grub la mnga' brnyes pas sngon gyi dam
bca' de dran par mdzod ces bskul ba'o/ /ma nu pA la

@012b ya rjes su zung ngam/ rjes su skyong ba'i ched du zhes
pa'o/ /badzra sa twa sngar ltar/ twe no ba tiShTha ni nye bar
mnos shig gam gnas pa'o/ /Di Dho me b+ha wa bdag gi ched du'am
bdag la brten pa'i dngos po 'am rang bzhin du mdzod/ su to Shyo
me b+ha wa bdag la legs par

dgyes pa'i rang bzhin du mdzod/ su po Shyo me b+ha wa bdag la
shin tu rgyas pa'i rang bzhin du mdzod/ a nu rakto me b+ha wa
bdag la rjes su chags pa'i rang bzhin du mdzod/ ces pa ste rim
pa bzhin du/ bdag gi dge ba'i rtsa ba rnams brtan par mdzod/
bdag

nyon mongs ba'i dbang du song ba la mi dgyes pa med par rjes su
mdzod/ byang chub ma thob par bdag rjes su chags pa'am brts
mdzod/ byang chub ma thob par bdag rjes su chags pa'am brtse
bsam 'dor zhig/ ces pa'o/ /sarba sidd+hi mme pra ya tstsha bdag la
dngos grub

thams cad rab tu stsol/ sarba karma su tsa me bdag gi las thams
cad la yang/ tsa ttiM shrI ya ku ru sems la phan pa'i dpal du
mdzod/ dngos grub dang dpal gang zhe na/ ha bzhi dang ho ste ye?
shes lnga dang/ de thams cad gcig tu 'dus pa thugs rdo rje bde
stong dbyer

med kyi sa bon hUM mo/ /b+ha ga wa na bcom ldan 'das/ sarba ta
thA ga ta de bzhin gshegs pa thams cad/ badzra ma me munytsa
rdo rjes bdag ma btang zhig gam grol ba'o/ /badzra b+hi? wa rdo
rje can gyi rang bzhin/ ma hA sa ma ya dam tshig chen po/ satwa
sems dpa' ste/

bsdus na bcom ldan 'das de bzhin gshegs pa thams cad kyi rdo rje
can gyi rang bzhin gyi sems dpa' chen pos bdag dam tshig bzhin du
ma btang bar grol bar mdzod ces pa'o/ /A gsung rdo rje dang
stong nyid rtogs pa'i ye shes/ hUM bde chen gyi ye shes/ phaT

@013a @#/ /kyis de gnyis dbyer med pa mtshon par gsungs te sngags
don bskyed rim rnams su mang yang don thob go ba gal che gsungs/
de ltar rdor sems bsgom nas dmigs pa rnams res mos kyi tshul du
sems skad cig

kyang ma yengs par bzlas pa'i skyon brgyad dang bral ba'i sgo
nas sngags don dran bzhin yig brgya thun re la brgya stong sogs
sdig pa dag pa'i mtshan ma brtan po ma byung gi bar du bzla ba ni
gnyen po kun tu spyod pa'i stobs te stobs bzhi tshang na byas
bsags tshang ba'i

myong nges kyi las kyang zil gyis gnon par chos bzhi bstan pa'i
mdo las gsungs so/ /rang res mchog gsum gyi thugs rje la brten
nas nyes ltung cung zad re dag kyang glang bo che'i khrus ltar
song nas sems rgyud je bzang du 'gro rgyu med pa nyes ltung la
'gyod

sngom ma yong bas lan pa red/ sdig sgrib zer dus che ba mi bsad
pa dang/ chung ba 'bu srin bsad pa lta bu las mi 'char kyang/
sdig pa ni 'bras bu sdug bsngal/ rgyu mi dge pa'i las/ de'i rgyu
nyon mongs pa phra rags/ rtsa ba ma rig pa sa bon dang bcas pa
dang/

sgrib pa nyon sgrib dang shes sgrib gnyis ste gzhung chen mo'i
brda 'di gal che/ thog med nas sdig pa rgyal po chen po'i gan
mdzod ltar bsags yod/ rgyal po chen po'i mdzod du gser dngul
sogs rin po che/ nas 'bras sogs 'bru/ gos dar/ rta nor sogs

cha gang nas bltas kyang 'di'i mi rabs thams cad du 'di kho na
bsags snyam pa'i tshod du yod pa ltar rang re'i rgyud kyi srog
gcod kyi las lta bu sdig pa sna re re la bsam kyang thog med nas
da lta'i bar srog gcod kho na byas pa lta bur yod/ 'bu srin shin
tu phra

@013b mo tshun chad kyi rgyud na nyon mongs pa brgyad khri bzhi
stong dang/ des mtshon pa'i nyon mongs pa'i spyod pa sems can gyi
khams bzhin du mtha' med par mdo dang yig cha las gsungs pa
dang/ des bskyed pa'i las bag la zha ba'i tshul du yod pas de dag
gi byed

las gzugs su grub na mtha' med/ da lta rang cag bza' btung skabs
mi dge ba mi byed pa la rtsi mod/ der yang dran shes ma bsten
pa'i nyes dmigs/ brnab sems dang sred pa sogs nyon mongs pa
dang/ de dang mtshungs ldan mdzod dang kun btus sogs

las gsungs ba dang/ da lta chos nyan pa'i skabs kyang sems mi
brtan zhing rnam 'gyur bsam gyis mi khyab pa de snyed mtshungs
ldan dang bcas pa/ so thar lus ngag gi bcas pa yin pas bya ba
gang la'ang ma zhugs na bcol ba dang shan ltung ma gtogs nyis

brgya lnga bcu nga gsum gang yang gnas skabs der mi skyed pa
ltar yod kyang/ sngags byang sems la lus ji ltar bsdams yang yid
kyi rgyu ba'i steng nas nyes ltung bar ma chad du 'byung tshul la
dpyad na sdig pa mi bsags pa'i skabs skad cig ma

gcig kyang 'jog dka'/ grwa sa'i tshogs gtam la/ dbu lo legs kyi
snye ma lta bu/ gral mu tig star la brgyus pa lta bu/ kha yeng
mig yeng du ma song ba sogs ji snyed yod pa thams cad bcas pa'i
khrims bsrung ba dang/ dge 'dun gyi chos spyod 'phel ba'i

thabs sha stag yin pa go dgos/ chos dang mjal nas dge sdig gi
blang dor ston mkhan yod la/ rang gis shes bzhin sdig pa 'di
ltar gsog na chos dang ma mjal ba'i skabs ci 'dra yod rgyu red/
'dul ba lung du/ khyod spre'u dang 'dra zhes rtsed mo

@014a @#/ /byas pas tshe rabs lnga brgyar spre'u ra skyes pa sogs
kyi gleng gzhi mang bo yod pa de 'dra rang res rtag par smra
bzhin pa dang/ des mtshon nas srog gcod lta bu re re la yang
mdzod las/ sdug bsngal phyir dang bsad phyir dang/ /

gzi byin med phyir 'bras rnam gsum/ /zhes sbyor dngos mjug gsum
gyis rnam smin rgyu mthun bdag 'bras ci ltar 'grub lugs sogs la
dpyad na mi lus zhig thob lugs med pa la da res stes dbang tsam
du lan gcig thob pa 'di nges par dkon mchog gi

bka' drin du 'dug snyam du dkon mchog dang las 'bras la dad pa
shugs dag po dang/ thog med nas bsags pa'i sdig pa thams cad rma
smin pa bcad rung dang/ rnag smin pa gzag rung ltar da lta nyid
du smin rung du yod par bsam nas de'i 'bras bu ngan song gsum

sogs kyi sdug bsngal yid du mi 'ong ba lta snying 'gas pa lta
bu'i 'jigs skrag dang/ rgyu sdig pa mi dge ba'i las la 'gyong
sems dang/ phyis sdig pa'i 'phro bcad de mi bgyid pa'i sdom sems
kyis yig brgya tshar gcig bzlas te/ mthar thog med nas bsags pa'i

sdig pa de thams cad lhag med du dag song snyam du dga' ba lhang
lhang ba bskyad na 'dag tshabs che bas sngags kyi grangs mang
nyung dang bdud rtsi 'bebs sbyangs tsam la ltos pa cher med/
thog med nas sdig pa bsags pa phar zhog/ tshe 'dir bsags tshad blo
la gcig

char 'char dka' yang sangs rgyas kyi spyan gyis gzigs ba'i sdig
ba'i las rgyud la gang yod sbyangs bar mos na stobs che/ sdig ba
bshags pa'i tshe nyes ltung la skyo bas rub pa lta bu dang/ gnyen
po dang bshags yul gyi thugs rje 'phrin las la dga' ba nam

@014b langs pa lta bu/ yang skyo ba kha bu ba tu brgyal ba lta
bu dang/ dga' ba gan rkyal tu 'gyel ba lta bu dgos par lho brag
mar ba yab sras gsungs/ khyad par 'byung nye zhing 'gog dka'
ba'i rigs la dmigs kyis bkar nas rgyun bar dran shes bsten/ sdig
pa'i

las de spyir byang chub ma thob par dang/ sgos tshe 'di dang lo
'di dang zla ba 'di la mi byed snyam pa dang cis kyang 'phro ma
chod na de ring gtan nas mi byed snyam du sdom sems shugs drag
po dang bshags bsdams byas/ de ltar byung na dga' ba dang/ ma
byung na ci mi

snyam par mi 'jog par 'gyod bshags byas te rim pas nyin kha shas
'gog pa la bslab/ de nas nyi ma gsum tshun chad dang/ bdun dang/
dgu dang/ nyi shu ? zla ba gcig dang gnyis gsum sogs je mang la
btang ste bslab na mthar tshegs med par 'gog nus pa

yongs zhes dpon slob byams pa rin po ches gsung gsungs/ yang
phyir bcos sogs kyi tshe phyin chad sdom par khas blangs nas
phyis de bzhin ma byung na nyes pa mi 'dag pa tsam du ma zad/
rdzun gyi nyes par yang 'gyur zhes gsungs pa la/ yongs 'dzin rin

po ches ltung thun byin rlabs kyis las la mi sgrib pa ltar de
ltar byas pas 'phro mchod kyang sdig pa 'dag pa sangs rgyas kyi
bcas dbang yin gsungs pa gzhan la ci ltar yin rung/ nged la ni
sdig pa bshags pa'i thabs su blo skyed che zhes skyabs mgon rdo
rje 'chang

gis gsungs/ yang sdig sgrib spyi dang/ bshes gnyen la ma gus
pa'i sdig ltung thams cad dag nas dge ba'i bshes gnyen tshul
bzhin du bsten nus pa'i rtogs pa khyad par can skye bar byin
gyis brlab tu gsol/ zhes sogs bshes gnyen bsten tshul/ dal 'byor
@015a @#/ /rnyed dka'/ 'chi ba me rtag ba/ las rgyu 'bras nas mi
slob pa'i zung 'jug gi bar gyi lam yongs rdzogs dang/ skabs su
babs pa'i dmigs skor re re bzhin spyi ma shor ba'i dang nas
dmigs phugs pa byed/ de ltar byang

chub kyi sems gnyis dang lha'i gsal snang brtan po'i sgo nas res
stobs bzhi/ res bdud rtsi 'bebs sbyangs/ res 'od zer gyi spro
bsdu/ res sngags don dran pa/ res lam yongs rdzogs kyi gegs byed
sbyangs nas rtogs pa skye ba'i dmigs pa gang 'os dang

khyad par nyal khar nyams chags dag pa'i dmigs pa rtsal du bton
nas yig brgya nyer gcig bzlas bas ltung ba'i 'phel kha chad
cing/ 'bum bzlas pas sngom pa gsum gyi rtsa ba'i ltung ba 'dag
par gsungs/ de thams cad gcig char mi 'ong ba/ mdo las/ sems

can rnams ni rnam par shes pa'i rgyun re re ba'o/ /zhes gsungs
pas shes la/ sdig ltung 'dag tshul la yang phra rags mang pa gos
kyi dri ma bkru ba'i dpe dang/ tha na khang ba'i rdul phyag lugs
tsam gyis kyang shes pas sa'i dngos gzhi dang bsdu ba ltar 'gyod

bas bsal ba dang/ gnyen pos bsal bas byas bsags ma tshang bar
bsgyur te las kyi 'bras bu skyed pa'i nus pa bcom pa dang/ mthu
chung dur byas pa dang/ yun ring bor dmyal ba la sogs pa myong
ba yun thung dur byas pa dang/ tshe 'dir mgo bo na ba la sogs

pas 'byang ba dang/ rtsa ba nas dag pa yang yod pa ma skyes dgra
sogs kyi byung ba las dpog ste/ bshes sbrings las/ gang zhig
sngon chad bag med gyur ba las/ /phyis ni bag dang ldan par gyur
de yang/ /zla ba sprin bral lta bur rnam mdzes te/ /dga' bo sor

@015b phreng mthong ldan bde byed bzhin/ /zhes so/ /gsum pa ni/
bdag thog med nas da lta'i bar las 'bras kyi blang dor mi shes
ba'i rmongs ba ma rig pa'i dbang du song ste sbyir sdig ltung
mtha' yas pa dang/ khyad par sdom gsum gyi bcas pa dang/ rtsa ba
dang yan

lag gi dam tshig khas blangs pa las 'gal zhing/ ltung bas sdom
gsum las nyams pa'i 'bras bu yid du mi 'ong ba mthong nas 'gyod
sems bskyed de rnam par sun 'byin pa'i stobs gsal btab/ bla ma
mgon bos skyabs mdzod cig ces pa tshig gong ma dang 'og

ma la sbyar ba gnyis yod kyang gnad 'dra/ da phyin chad nga rang
gis 'di phyi'i don gang la yang re ltos 'cha' ba'i yul/ gtso bo
rdo rje 'dzin pa khyod gcig bu las med pas/ sngar phan bdag rang
gis rang phung bar byas pa la thugs mkhrel bar rang nyes pa
mtha' dag

las grol zhing/ gzhan sgrol bar 'dod pa'i thugs rje chen po'i
bdag nyid thabs shes kyi yon tan yongs su rdzogs pa khyod la
phyis sdig pa mi bgyid pa'i sdom sems dang bcas byang chub ma
thob kyi bar skyabs su song ba yin pas slan chad nyes ltung gi
dbang du nam

yang mi 'gro bar byin gyis brlab tu gsol snyam du nyes pa las
slar ldog pa'i stobs gsal btab la/ bdag ni mi shes rmongs pa
yis/ /zhes sogs dal bus brjod de gsol ba btab pas bla ma dang
dbyer med pa'i spyi bo'i rdor sems yab yum shin tu dgyes

te gsung tshangs pa'i dbyangs kyis/ rigs kyi bu khyod kyi sdig
sgrib dang dam tshig nyams chags thams cad byang zhing dag go/
/zhes gsung 'byon bzhin pa rang gis thos bas sdig ba thams cad
dag song snyam du dga' ba bskyed/ de ltar rang la thim pas rang
gi lus

@016a @#/ /dang rdor sems kyi sku/ rang gi ngag dang rdor sems
kyi gsung/ rang gi yid dang rdor sems yab yum gyi thugs dbyer
med du gyur pas phyin chad sdig ltung gis nam yang mi gos bar
byin gyis brlabs par bsam/ yang na

rdor sems yab yum sku je chung du song ba dbu ma'i lam brgyud de
snying padma 'dab brgyad kyi lte bar shin tu phra ba'i thig le
dkar dmar gyi dbus su rang gi shin tu phra ba'i rlung sems dang
dbyer med du srog 'dzin gyi kha dog dang mthun par skya krong
nge bzhugs

par bsam zhes kun mkhyen 'jam dbyangs bzhad pas gsungs/ padma'i
'dab ma kha zum pa'i rtser rdor sems kyi dbu skra'i tog mthong
tsam byed pa/ phyi rol tu yig brgya'i sngags phreng gis g.yas
skor du dkris/ phyi nang thams cad shel dkar gyi zhal ba byas pa
bzhin

mun pa mi 'byung bar 'od kyi snang bas gang 'dug pa la dmigs ba
bzhag na dgos pa che zhes dam pa gong ma'i gsung rgyun las
'byung ngo/ /de ltar dpal ldan rdo rje sems dpa' dang/ /dbyer
med bla ma mchog gis rjes bzung ste/ /thog med nas bsags sdig
sgrib nyes

ltung dang/ /dam tshig nyams chags thams cad dag par shog/ //ces
rdor sems bsgom bzlas kyi dmigs rim yid kyi gdung sel zhes bya
ba 'di yang khyab bdag rdo rje sems dpa' mi'i gzugs can bka'
brin mnyam med/ ! rje btsun dkon mchog rgyal mtshan dpal bzang
po'i zhal snga nas

las snga phyir khrid lan mang du mnos pa'i gsung bshad rags rim
phyogs bsdebs kyi tshul du dge srong shes rab rgya mtsho sa rang
lo so bdun bas phag? zla ba bcu ba'i mar ngo'i tshes bcu rje
rgyal ba gnyis pas zung 'jug mngon du mdzad pa'i dus mchod kyi
nyin skyid pa'i nags khrod dben gnas dkar po bkra shis chos
rdzong du bris ba'o/ /

@016b oM swa sti/ chos srid 'byor ba'i mdzod dang dge bcu ldan/
/dga' ldan rang rgyas zhes bya'i rgyud grwa cher/ /kun mkhyen
'jam 'byangs bzhad pa yab sras kyi/ /thugs rjes chos sbyin 'dzad
med rgyun 'di spel// //sarba mangga laM// //