@001a @#/ /mi tra'i dbang bshad zin tho rnam grol bdud rtsi'i snye ma zhes bya ba bzhugs so// @001b @##/ /na mo gu ru manydzu g+hoSha ha sa badzra ye/ phyag na padmo'i thugs rje'i 'gram chang gis/ /dbye dka' 'khor lo bzhi yi 'dab ma'i rgya/ /grol bas zung 'jug sbrang rtsi'i dpal 'dzin pa/ /grub mchog mi tra dzo ki'i zhabs la 'dud/ /'dir dus gsum rgyal ba yongs kyi mkhyen brtse nus pa ma lus pa gcig tu 'dus pa'i bdag nyid snyigs dus bstan pa'i srog shing gangs can mkhas grub yongs kyi gtsug rgyan yongs rdzogs bstan pa'i mnga' bdag kun mkhyen 'jam dbyangs bzhad pa'i rdo rje rje btsun blo bzang thub bstan 'jigs med rgya mtsho dpal bzang po'i zhal snga nas dgung lo zhe gnyis bzhes pa/ rab byung bcu bzhi pa'i chu sprul hor zla dgu pa'i tshes bco lnga nas brtsams te/ yab rje gong ma'i gdan sa mdo sngags chos kyi skyed tshal dga' ldan@002a @#/ /chos 'khor gling du grub mchog mi tra dzi ki'i thugs dam brgya rtsar grags pa'i dkyil 'khor brgya rtsa brgyad kyi nang nas/ rdor phreng du yod pa rnams dam pa gong ma'i phyag len ltar des 'thus pa byas nas/ mi tra rkyang pa'i dkyil 'khor re drug gi dbang rdzogs par gnang pa'i skabs kyi dngos gzhi'i gsung bshad tho tsam zhig bri na/ khyed rnams la rmi lam brtag par gdams pa ltar/ rmi lam du sku gzugs dang mchod rten mthong ba/ dge 'dun gyi nang du zhugs pa/ rang gi bla ma las chos nyan pa/ nyi zla shar ba/ bang mdzod dang gter rnyed pa/ kha zas bzang po la longs spyod pa sogs legs pa rmis na sngags kyi dngos grub ci rigs pa 'grub pa'i ltas su shes nas zhen chags mi bya zhing/ bye ma dang thal spung gi ri la 'dzeg pa/ g.yang du lhung ba/ @002b skra bregs pa/ chus khyer ba/ lus la til mar gyis byug pa sogs rmis na ngan pa'i lhas yin kyang de la rnam rtog mi bya bar chos thams cad bden par med cing rang ngos nas ma grub pa'i lta bas rgyas 'debs pa dang/ slob dpon gyi thugs ka nas khro bo bdud rtsi 'khyil ba'i tshogs bsam gyis mi khyab pa spros nas rmi lam ngan pa sogs bgegs rnams bsal ba'i mos pa mdzad dgos gsungs/ spyi bshad la/ 'o de yang rang cag rnams gting dang mtha' mi mngon pa'i 'khor ba'i gnas su shing bal rlung gis bskyod ba bzhin gar 'gro'i gtol med par 'khyams pa las/ da lan bla ma'i thugs rje la brten nas ngan song gi btson ra las thar te dal 'byor gyi chos bco brgyad dang/ mtho ris kyi yon tan bdun/ rnam smin gyi yon tan brgyad la sogs ba chos sgrub pa'i mthun rkyen mtha' dag tshang ba'i rten bzang po 'di lta bu thob/ mjal bar dka' ba bskal bzang rnam 'dren stong gi nang nas padma dkar po lta bur bsngags pa ston pa shAkya thub pa'i mdo sngags zung 'brel gyi bstan pa spyi dang/ de'i yang snying khams gsum bla ma tsong kha pa chen po'i ring lugs gser sbyangs btso ma lta bu mdo sngags bshad sgrub thos bsam sgom gsum mtha' dag gdan thog gcig tu 'grub pa 'di lta bu dang mjal/ mtshan nyid dang ldan pa'i dge ba'i bshes gnyen du mas rjes su bzung ste mdo sngags yongs rdzogs ma tshang ba med pa la nyin mtshan du thos bsam byar yod pa'i dus 'di lta bur dal ba stong log tu ma btang bar gtan gyi 'dun ma'i rtsa ba tshugs pa cig e yongs lta dgos/ de ltar byed pa la thabs gzhan gang gis kyang mi phan pas chos rnam dag rang gi shes rgyud @003a @#/ /dang 'dres nges zhig byed dgos pas/ rje bdag nyid chen pos byang chub lam rim du/ chos nyams su len pa la shes dgos/ shes pa la thos dgos/ zhes gsungs pas dang por gal che ba thos pa yin/ de'ang thos lo tsam gyis mi chog par rten 'brel mgo nas ma 'chug pa zhig dgos pas/ snod kyi skyon gsum spangs/ 'du shes drug bsten pa sogs chos nyan pa don ldan du 'gyur ba'i kun slong rgyal pa'i gsung rab las ji ltar 'byung pa bzhin gsal btab ste sgo gsum bag med du ma btang bar tshul dang mthun pa'i sgo nas nyan dgos/ gsan bya'i chos ni ston pa thub pa'i dbang po de nyid kyis gdul bya rnams kyi dbang po'i rim pa dang 'tshams par chos kyi phung po ji snyed cig bka' stsal pa thams cad sde snod gsum mam theg pa che chung gi sde snod gnyis su 'du/ theg pa chen po la yang rgyu lam du byed pa pha rol tu phyin pa'i theg pa dang/ 'bras bu lam du byed pa gsang sngags kyi theg pa gnyis su yod pa'i nang nas mchog tu gyur pa gsang chen theg ba yin/ de la dgongs nas rje bdag nyid chen pos/ 'di na rdzogs sangs rgyas su bgrod pa la/ /zab mo rdo rje theg dang phar phyin theg /rnam pa gnyis yod gsang sngags phar phyin las/ /shin tu khyad par 'phags pa yin no zhes/ /nyi ma zla ba lta bur kun tu grags/ /zhes gsungs pa yin/ de lta bu'i ches mchog tu gyur pa gsang chen theg pa de la yang rgyud sde'i dbye ba bzhir yod pa/ kha sbyor las/ rgod dang blta dang lag bcangs dang/ /gnyis gnyis 'khyud dang rnam pa bzhi/ /srin bu'i tshul gyis rgyud @003b bzhir gnas/ /zhes 'dod chags rigs bzhi lam du byed tshul gyis bzhag pa dang/ gur las/ dman ba rnams la bya ba'i rgyud/ /bya med rnal 'byor de ltag la'o/ /sems can mchog la rnal 'byor spyod/ /rnal 'byor bla med de ltag la'o/ /zhes phyi'i bya ba khrus dang gtsang spra sogs gtso por gyur pas bya rgyud/ phyi nang gi rnal 'byor cha mnyam du spyod pas spyod rgyud/ rnal 'byor kho na gtso bor gyur pas rnal 'byor rgyud/ rnal 'byor de las gong na med pas rnal 'byor bla na med pa'i rgyud de rgyud sde'i dbye ba bzhir bzhag pa'i mchog ni bla med dang/ de la thabs sgyu ma'i sku rtsal du bton nas gtso por 'chad pa'i pha rgyud/ shes rab don dam 'od gsal rtsal du bton nas 'chad pa'i ma rgyud gnyis yod/ de dag gi rgyud kyi grangs sdom 'byung las/ rnal 'byor rgyud rnams kyi ni tshad; ;bye ba phrag ni drug tu nges/ /de bzhin rnal 'byor ma rgyud grangs/ /bye ba phrag ni bcu drug grags/ /zhes gsungs pa ltar gyi rgyud sde rab 'byams nas dkyil 'khor gyi 'khor lo bye ba phrag ji snyed cig gsungs pa'i nang nas/ 'dir rgyal ba kun gyi thugs rje'i bdag nyid 'phags mchog phyag na padmas rjes su bzung ste phyag rgya chen po mchog gi dngos grub brnyes pa/ zung 'jug nor bu'i za ma tog/ ngo mtshar ba'i rnam thar bco brgyad dang ldan pa'i grub ba'i 'khor los bsgyur ba/ rnal 'byor gyi dbang phyug mi tra dzo ka'i ma mtshan gzhan dpal ldan chos kyi bshes gnyen gyis 'phags pa'i bkas gnang pa stsal pa la brten nas/ phyi rabs kyi gdul bya rnams la phan pa'i phyir thugs bcud zab mo phyogs gcig tu bsgrigs pa/ gsang chen bstan pa'i nying khu mi tra brgya @004a @#/ /rtsar grags pa'i dbang gi rim pa rnams 'bul bar byed ba la/ thog mar gshin rje gshed dmar po'i dbang skur ba la rten 'brel dang dgos pa khyad par can yod pas/ dam pa gong ma rnams kyi phyag len la'ang de ltar mdzad gi yod gsungs/ rgyal brgya mtsho'i dbang gi nyin spyi bshad la/ dus gsum rgyal pa thams cad kyi dmigs pa med pa'i snying rje'i ring gzugs thugs rje'i gter chen mgon po spyan ras gzigs zhes rgyal sras dpa' bo kun gyi nang nas snying rje'i gter du bsngags shing/ khyad par byang phyogs kha ba can gyi ljongs 'di ston pa shAkya'i rgyal po nyid kyis dngos kyi 'dul zhing du ma gyur pa/ mgon po 'di la ched du gtad pa bzhin phyag mtshan du bzhes te sgo mtha' dag nas skyong par mdzad pas rang cag rnams kyi lha skal dang/ phyogs bcu'i rgyal pa sras dang bcas pa bsnyen bkur pa las 'di nyid kyi smyung gnas byas pas bskal ba du ma'i 'khor ba phyir bsnyil ba dang/ bsam pa rnam par dag pas gzungs sngags bzlas pas phan yon mtha' yas pa 'byung tshul tshad mar gyur pa'i mdo rgyud du ma nas yang yang gsungs pa ltar yin zhing/ gsang ba gsum gyi zlos gar mtha' yas pas gdul bya so so'i skal ba dang 'tshams par sku'i bkod pa mi 'dra ba mtha' yas pa yod pas/ dam pa gong ma rnams la brgyud pa'i lugs srol yang de snyed yod pa dge slong ma dpal mo nas brgyud pa dpal mo'i lugs/ chos rgyal srong btsan sgam po nas brgyud pa rgyal po'i lugs/ byang sems zla ba rgyal mtshan las brgyud pa zla rgyal lugs/ la stod @004b dmar po nas brgyud pa la stod lugs/ gnyan tshem bung las brgyud pa tshem du dmar khrid/ grub thob skyer sgang pa las brgyud pa skyer sgang lugs sogs mang du yod pa las/ skabs su babs pa grub chen mi tra dzo ki nas brgyud pa'i bla med lugs kyi 'phags mchog spyan ras gzigs sku mdog dkar po zhal gcig phyag gnyis yum bcas/ 'khor mkha' 'gro ma bzhi dang/ khro bo bzhis bskor ba lha dgu ma 'di'i sngags la yang dag mi dag sna tshogs zhig yod pa rgyal dbang skal bzang rgya mtshos dag ther mdzad de/ oM ma Ni padme hUM/ zhes pa gtso bo'i sngags/ d+hu ma g+ha ye yum gyi sngags/ ha ri ni sa mkha' 'gro bzhi dang/ ra tsa hrIH ya khro bo bzhi'i sa bon gyi sngags yin pas/ de yongs rdzogs la bsnyen pa byas pas gtso 'khor yongs rdzogs kyi bsnyen pa'i go chod la/ ma Ni rkyang pas kyang chog pas ma Ni mtha' gcig tu bya rgyud kyi lugs su byas nas bgrang dgos pa'i nges pa med par cho ga phyag len thams cad bla med ltar byas te lha 'di lta bu dang 'brel bar bzlas na mchog tu gyur pa yin gsungs/ de'ang gnas khang 'di'ang tha mal gyi rnam pa 'di lta bu ma yin par lha'i ye shes rang snang las grub pa'i thar ba chen po'i gzhal med khang dngos yin snyam pa dang/ bla ma yang tha mal gyi rnam pa can ma yin par dkyil 'khor gyi gtso po dngos dang tha mi dad par bltas la/ cho ga'i tshig rnams kyang dkyil 'khor gyi gtso po'i gsung tshangs pa'i dbyangs kyis bsgrags byung snyam pa byas na 'bras bu lam byed kyi dgos pa khyad par can yod pas/ bla ma dkyil 'khor gyi gtso bo dang dbyer mi phyed pa'i @005a @#/ /mos gus shugs drag pos snyim pa me tog dang bcas dbang bskur ba'i don du gsol pa lan gsum du 'debs dgos/ dkyil 'khor du 'jug pa la dkyil 'khor pa'i lha tshogs rnams dang rnam pa mthun pa byed dgos pas/ de'i ched du las sngags kyis byin gyis brlabs pa'i chas smad g.yogs/ stod g.yogs/ gtsug tor gsum dang/ mig dar 'ching ba'i sngags tsak+Shu mig/ band+ha 'ching ba/ ba ra mchog/ ma Na ya yid de yid mchog tu bya ba'i byir mig 'ching zhes pa yin pas dkyil 'khor gyi gsang ba re zhig ston par mi rung bas de gsang bar bya ba'i phyir mig dar dang/ me tog sbyin pa'i sngags A khaM bI ra hUM zhes pa'i A snang mtha'i sa bon/ khaM don grub kyi sa bon/ bI rnam snang gi ming yig dang po/ ra rin 'byung gi ming yig dang po/ hUM mi bskyod pa'i sa bon te ngo bo de bzhin gshegs pa lnga'i ye shes kyi rang bzhin la rnam pa kha dog sna lnga ba'i me tog gi phreng ba re dkyil 'khor du 'jug pa'i phyag rten du gtad/ sdom pa 'dzin pa la mdo sngags gnyis/ sngags kyi rgyud sde bzhi/ bla med kyi dbang bzhi ka la 'dzin dgos pas/ thun mong pa byang sems kyi sdom pa 'dzin pa la/ bla ma dang dkyil 'khor pa'i steng gi nam mkha' la rtsa brgyud kyi bla ma yi dam sangs rgyas byang sems nyan rang dpa' bo mkha' 'gro chos skyong bsrung ma'i tshogs bsam gyis mi khyab pa sprin gyi phung bo 'khrigs pa bzhin khra lam mer bzhugs pa'i drung du/ byang chub @005b sems dpa'i sdom pa blangs la ji srid byang chub snying po la mchis kyi bar du rtsa ba'i ltung ba bco brgyad dang nyes byas zhe drug gis ma gos par tshul bzhin du bsrung par bya'o snyam du rjes zlos lan gsum byas pa'i tha ma'i mjug gi cha la sngar byang sdom ma thob pa yin na gsar du thob pa dang/ thob zin yin na nyams pa sor chung cing gnas pa gong 'phel du gyur pa'i mos pa dang/ yang skyabs yul sngar ltar gyi spyan sngar sems can thams cad kyi don du rdzogs pa'i sangs rgyas kyi go 'phang dus myur ba nyid du thob par bya/ de'i ched du rigs lnga spyi'i dam tshig rtsa ltung bcu bzhi dang/ sbom po brgyad dam bcu/ so so'i dam tshig/ rnam snang rigs kyi dam tshig drug /mi bskyod rin 'byung ba zhi bzhi dang/ /'od dpag med gsum don grub kyi/ /gnyis te so so'i bcu dgu dang/ /zhes pa ltar nyes spyod sdom pa'i tshul khrims/ dge pa chos sdud kyi tshul khrims/ sems can don byed kyi tshul khrims gsum dang/ mchog gsum la nyin mtshan dus drug tu skyabs su 'gro ba ste rnam snang gi rigs kyi dam tshig drug/ rdor dril phyag rgya'i dam tshig gsum/ slob dpon bsten pa la dus drug tu slob pa ste mi bskyod pa'i rigs kyi dam tshig bzhi/ zang zing gi sbyin pa/ mi 'jigs pa'i sbyin pa/ chos kyi sbyin pa/ byams pa'i sbyin pa ste sbyin pa rnam pa bzhi la dus drug tu slob pa rin 'byung gi rigs kyi dam tshig bzhi/ rgyud sde gong 'og gnyis dang/ theg pa gsum gyi dam chos mtha' @006a @#/ /dag 'dzin pa la dus drug tu slob pa ste 'od dpag med kyi rigs kyi dam tshig gsum/ dam tshig dang sdom pa de dag gong 'phel du bsrung ba dang/ phyi nang gsang pa de kho na nyid kyi mchod pa la dus drug tu brtson pa ste don grub kyi rigs kyi dam tshig gnyis te rigs lnga so so'i dam tshig bcu dgu sogs rtsa ba dang yan lag gi dam tshig mtha' dag dus deng nas bzung ste zung 'jug gi go 'phang ma thob kyi bar du tshul bzhin du bsrung bar bya'o snyam du rjes zlos byed/ bdag ming 'di zhes pa'i skabs su sngar dbang thob pas gsang mtshan dang/ de min pas rang ming nas smos dgos la/ bdag gis sdom pa ma lus bzung/ /zhes pa'i skabs su sngar sngags sdom ma thob pas gsar du thob pa dang/ nyams pa sor chud/ gnas pa gong 'phel du gyur bar mos/ byang sems dang sngags kyi sdom pa gnyis byang chub mtha' can yin pas/ skyid shod zhabs drung la sogs pas dbang dang por sdom bzung byas pas chog pa sogs phyag bzhes mi 'dra ba yod kyang dam pa gong ma'i phyag len la mi tra dang rdor phreng gi skabs/ dbang dang po la sdom bzung rjes zlos byas nas dbang phyi ma rnams la dpon slob thams cad kyis mnyam 'don byas chog pa'i phyag len yod la/ yang dang po rjes zlos dang phyi ma rnams la mnyam 'don byed ba'ang yod/ de ltar phyogs bcu'i rgyal pa sras dang bcas pa dbang du bzhag nas @006b khas blangs pa'i rigs lnga spyi bye brag dang/ bsrung bsten bza' ba'i dam tshig mtha' dag srog dang bsngos te legs par bsrung dgos/ thams cad rnal 'byor gyi sems bskyed pa la/ sarba thams cad/ yo ga rnal 'byor/ tsitta sems/ utpA ta ya mi ni bskyed par bgyi'o zhes pa yin pas/ bla mas rdo rje me tog dang bcas snying gar bzhag ste sngags brjod pas bla ma'i thugs ka'i sems gnyis kyi ngo bo zla ba dang rdo rje las rang 'dra gnyis pa re chad nas slob ma'i snying ga'i zla ba dang rdo rje la thim pas thams cad rnal 'byor gyi sems bskyed pa de byang chub ma thob kyi bar du brtan par byas pa'i mos pa byed/ dbang bskur ba la dkyil 'khor du 'jug pa dang/ zhugs pa la dbang bskur ba gnyis/ dang po la gdong g.yogs dang bcas te 'jug pa dang/ dkyil 'khor mthong pa'i bdag nyid can du 'jug pa gnyis/ dang po la yol ba'i phyi 'jug dang/ nang 'jug gnyis las dang po song nas/ gnyis par phyag len la yol ba bsal ba dang/ sgom don la dkyil 'khor gyi shar sgo har gyis phye ba'i nang du zhugs par mos/ bla ma'i phyag gi rdo rje la 'jus te dkyil 'khor gyi nang lha rnams kyi phyi rtsig 'gram nas bskor ba lan gsum dang sgo phyag gi sngags sarba ta thA ga ta ni de bzhin gshegs pa thams cad/ pU dza u pa sthA na ya mchod pa dang bsnyen bkur ba'i phyir/ atma naM bdag gam bdag nyid/ niryA ta ya mi bdag 'bul bas/ sarba ta thA ga ta de bzhin gshegs @007a @#/ /pa thams cad/ badzra satwa rdo rje sems dpas/ a d+hi tiShTha maM bdag la byin gyis brlab tu gsol/ de bzhin du badzra bai ro tsa na rdo rje rnam par snang mdzad/ pU dza a b+hiSha kA ya mchod pa dang/ dbang bskur ba'i phyir/ badzra ratna a b+hi ShiShtsa maM ni bdag la rdo rje rin chen gyis dbang bskur du gsol/ bU dza pra warta na ya mchod pa rab tu bskor ba'i phyir/ badzra d+harma pra warta ya maM bdag la rdo rje chos rab tu bskor du gsol/ pU dza karma Ne mchod pa'i las kyi phyir/ badzra karma ku ru maM ni bdag la rdo rje las mdzad du gsol/ zhes pa yin zhing sngags don gzhan rnams 'dra bar 'dug/ sgo phyag byas pas lha de dang de las rang 'dra gnyis pa re chad nas thim pas de ltar byin gyis brlabs pa dang/ bsdus pa la thal mo spyi mgrin snying ga gsum du sbyar te shar sgo nas sgo gsum gyi phyag byas pas gtso bo las rang 'dra chad nas thim par mos/ dngos grub thams cad kyi rtsa ba dam tshig bsrung bar gdams pa'i phyir dam bzhag byed pa la phan yon gyi sgo nas dam la bzhag pa/ nyes dmigs kyi sgo nas dam la bzhag pa/ phan yon dang nyes dmigs gnyis ka'i sgo nas dam la bzhag pa/ bla ma'i bka' gnyan pa'i sgo nas dam la bzhag pa dang bzhi/ dang po ni/ deng khyod sogs so/ /gnyis pa nyes dmigs kyi sgo nas dam bzhag la/ gtso bor lus la 'byung pa'i nyes dmigs kyi sgo nas dam la bzhag ba/ spyi bor rdo @007b rje bzhag ste 'di ni khyod kyi sogs dang/ gtso bor sems la 'byung ba'i nyes dmigs kyi sgo nas dam la bzhag ba/ snying gar rdo rje bzhag ste de ring rdo rje sems dpa' sogs te/ snod min la gsang ba bsgrags pa nyes dmigs che bas dam bzhag de gsum ni/ yongs su ma smin sems can la/ /gsang ba nyid ni bstan pa dang/ /zhes pa'i rtsa ltung bdun pa la khyad par du dam bzhag mdzad pa yin/ phan yon dang nyes dmigs gnyis ka'i sgo nas dam la bzhag pa mna' chu ni rtsa ltung spyi'i dam bzhag dang/ bla ma la brnyas shang bka' las 'das pa nyes dmigs shin tu che bas bla ma'i bka' gnyan pa'i dam bzhag ni/ slob dpon smad par maM bya ste/ /zhes pa'i rtsa ltung dang po la khyad par du dam bzhag byas pa yin/ ye shes pa phab nas mig snang brtags pa la/ mig dar cung zad phye ste dkyil 'khor gyi steng gi bar snang la har gyis bltas pas dkar po mthong na zhi ba/ ser po rgyas pa/ dmar bo dbang/ sngon po dang nag po drag po/ ljang khu dang khra bo mthong na las sna tshogs pa'i dngos grub 'grub pa'i ltas yin/ me tog 'dor ba la/ yang dag pa'i ye shes kyi dkyil 'khor 'dir bdag gis slob ma bcug ba 'di lha gang gi rigs su 'tshang rgya ba dang; rigs gang gi snod du 'gyur ba dang/ mchog thun gyi dngos grub gang 'grub pa sogs bsod nams kyi mthu ji lta ba bzhin du me tog gi ltas la 'bab par shog ces bla mas lha la gsol 'debs dang/ de'ang brtag pa snga @008a @#/ /phyi rim pa du ma zhig 'byung bas so shing dor ba snod du rung mi rung brtag pa dang/ rmi lam brtag pa dngos grub 'grub pa la bgegs yod med dang/ snang ba'i kha dog brtag pa ni dngos grub gang 'grub dang/ me tog dor ba lha gang gi rigs su 'tshang rgya zhing las 'brel gang la yod pa brtag pa yin pas dgos pa mi 'dra/ de'ang me tog lha gang la phog pa de'i rigs can du 'gyur zhing/ sku dang nye na dngos grub myur la/ ring na yun ring pos 'grub pa dang/ sku'i stod dang/ bar dang/ smad la babs na dngos grub mchog 'bring dman pa gsum 'grub pa dang/ lha'i mdzod spu 'am gtsug tor dang dbu la babs na phyag rgya chen po dang mchog gi dngos grub/ zhal dang spyan la babs na sngags kyi dngos grub/ lha gnyis kyi bar du babs na gang la nye ba'i rigs dang/ nye ring mnyam na gnyis ka 'grub cing/ gang la dad pa de'i rigs su 'gyur ba dang; rdo rwa'i nang du lhung na yun ring po dang chogs chen pos 'grub pa dang/ rtsig pa'i phyi rol tu lhung na lan gsum bskyar zhing/ de'i tha ma la phyi rol tu lhung na dngos grub phra mo 'grub pa dang/ lwa ba pas mi gzung bar bshad/ phyi'i re kha zlum po dang rdo rwa'i phyir lhung na dngos grub med pas dkyil 'khor mi ston par sngags bzla ba la sogs pas skal ba dang ldan par bsgrubs nas phyis skal ba dang ldan na 'jug par gsungs pas/ sngar @008b phul ba'i me tog gi phreng ba'i nang nas yang zhing ma rnying pa'i me tog gcig bton la traM gis bsngags pa phyag gnyis thal mo sbyar ba'i bar du bzung nas gtso po 'khor bcas kyi mdun du 'dug bar mos la/ pra tItstsha badzra hoH zhes brjod de lha gang sgrub na 'grub sla zhing las 'brel yod pa der 'bab par shog cig snyam du ltos pa med bar 'dor dgos/ sngags don pra tItstsha so sor bzhes/ badzra ni me tog 'dor yul gyi lha la byed/ slar yang me tog spyi bor bcings te slob ma gang la me tog phog pa'i lha la gtad pas byang chub ma thob kyi bar du lha des rjes su 'dzin pa'i thabs zab mo yin zhing/ de la brten nas dngos grub sgrub na 'grub sla ba yin pas de ltar me tog gi phreng ba spyi bor bcings pa la brten nas me tog phreng ba'i dbang gi ngo bo bde ba phun sum tshogs pa dang/ bde ba nges stong pa nges pa'i bde stong dbyer med kyi ye shes khyad par can rgyud la 'khrungs par mos pa de me tog phreng pa'i dbang gi ngo bo yin/ ma rig ba'i sgrib g.yogs dang mig dar lhan cig tu bsal nas/ rdo rje'i mig gis rten dang brten pa'i dkyil 'khor mngon sum du mthong ba la dga' spro tshad med ba dang bcas ched du brjod pa ni/ oM rdo rje'i dkyil 'khor sogs so// dkyil 'khor du zhugs pa la dbang bskur ba la thun mong pa rigs lnga'i dbang dang/ thun mong ma yin pa rdo rje slob dpon gyi dbang gnyis las/ dang po dbang gi gsol 'debs kyi don ni/ byang chub rdo rje rgyal pa rdo rje 'chang gis @009a @#/ /'khor rigs lnga'i sangs rgyas rnams la mchod pa chen po dbang bskur ji ltar mdzad pa bzhin bdag 'khor ba sdug bsngal gyi rgya mtsho las bsgral ba'i phyir du rdo rje 'chang dang 'dra ba'i slob dpon khyod kyis smin byed rgyu'i dbang bskur ba stsal tu gsol/ zhes pa yin/ sbyangs pa bya ba'i sngags sarba pA paM ni sdig pa thams cad/ da ha na sreg bar byed pa/ badzra ya rdo rje'i ched du/ badzra satwa sya rdo rje sems dpa'i/ sarba pA paM da ha sdig pa thams cad sreg pa/ swA hA gzhi tshugs zhes pa bsdus na sdig pa thams cad sreg par byed pa'i rdo rje'i ched du rdo rje sems dpa'i sdig pa thams cad sreg par byed ba la gzhi tshugs shig ces pa yin pas sngags don ltar na sdig pa bsal ba'i ched dang/ lwa pa pas mi gtsang ba bsal ched dang/ bi b+hu tis byung bsal ba'i ched sbyangs pa bya bar gsungs pa gang byas kyang 'gal ba med pas sbyangs pa byas pa na sdig sgrib dang bkra mi shis pa sogs bar du gcod pa thams cad bla mas bya bas te sbyangs par bsam/ me long du slob ma'i gzugs brnyan shar ba la nye reg dang/ a mr-i tas lus la dri'i byugs pa/ dbu la me tog gi phreng ba/ mdun du mchod yon/ spyan la snang gsal phul/ a mr-ita dang hUM lan bdun brjod pas sbos dkar gyi dud pa btang/ sbyangs pa'i skor 'di rgyal pa rgya mtsho kho na la mdzad/ bod snga ma 'ga' zhig dbang gi tshe @009b bum pa sogs dbang rdzas la shis pa brjod de me tog 'thor bar bzhed kyang/ dam pa gong ma'i phyag lan la de ltar ma yin par bla ma dang dbang lha rnams kyis slob ma la shis brjod dang me tog 'thor te chu dbang sogs bskur bar bzhad pas de ltar mos pa mdzad dgos/ dbang bskur ba'i tshe bla ma'i thugs ka nas spros pa'i 'od zer gyis reg pa tsam gyis thugs rgyud bskul te sngon gyi thugs bskyed dam bca' bzhin smon lam gyi dbang gis 'byon pas de'ang gshegs pa dang gshegs ma/ sems dpa' dang sems ma/ khro bo dang khro mo la sogs pa'i rnam par spyan 'dren pa dang/ mi bskyod pa la sogs pa rigs lnga so so'i rnam par spyan 'dren pa dang/ skabs 'dir dkyil 'khor rang rang gi rigs lnga'i rnam par spyan 'dren pa dang/ gzhan du skabs gang yin gyi gtso bo la sangs rgyas byang sems khro bo khro mos bskor ba spyan 'dren par gsungs ba gang byas kyang 'gal ba med la/ dbang bskur ba bya byed las gsum la sbyar na dbang bskur pa po'i bla ma dang/ sgrub zin pa'i dkyil 'khor pa dang/ spyan drangs ba'i dbang lha rnams byed pa po/ dbang rdzas rnams byed pa/ slob ma'i shes rgyud las/ dbang rdzas de dang de'i dbang bskur ba byed pa'i las/ skabs so so'i sgrib pa spyangs shing yon tan rdzogs pa bya ba la 'jog/ de'ang chu dbang bskur bas phyogs bcu'i rgyal ba sras dang bcas pa'i byin rlabs dang rang gi dang mos chogs pa'i rten @010a @#/ /'brel las zhe sdang dang nges bskyed pa'i las ngan 'bras bu dang bcas pa sbyangs te mi bskyod pa dang mA ma kI'i rigs kyi dngos grub sgrub ba la dbang bar byed pas slob dpon gyis dbang lha bskyed bstims byas te/ rdo rje snying po rgyan gyi rgyud las/ til gyi gang bu ltar gang ba'i/ /rgyal pas bum pa bzung nas ni/ /zhes gsungs pa ltar/ bla ma dang nam mkhar bzhugs pa'i dbang lha phyag na bum pa thogs pa rnams kyis chu rub kyi tshul du dbang bskur bas lus kyi nang thams cad ye shes kyi bdud rtsi'i chu rgyun gyis gang/ thog med nas bsags pa'i sdig sgrib thams cad sbyangs te chu dbang gi ngo bo bde stong gi ye shes khyad par can skyes par bsam/ rin 'byung yab yum snyoms par zhugs pa zhu ba las byung ba'i rigs lnga'i rang bzhin gyi cod pan rnams gcig la gcig thim gyis bla ma'i phyag gi cod pan la thim pa spyi bor bcings pas sangs rgyas kyi rigs bdag 'grub pa'i nus pa 'jog/ de bzhin du 'od dpag med yab yum snyoms par zhugs pa zhu ba las byung pa'i rdo rje lag tu gtad pa snying gar gsor bas rgyal pa'i thugs gnyis su med pa'i ye shes 'grub pa'i nus pa 'jog; nam mkhar bzhugs pa'i dbang lha rnams kyi phyag gi dril bu rnams don grub yab yum snyoms par zhugs pa zhu ba las byung ba'i dril bu la thim pa lag tu gtad pa snying gar 'khyud pa'i phyag rgya byas pas sangs @010b rgyas kyi gsung dbyangs rnam pa thams cad pa 'grub pa'i nus pa 'jog/ bla mas gsang mtshan btags pa dang mnyam du nam mkhar bzhugs pa'i rgyal ba sras dang bcas pas mgrin gcig tu rang rang gi rigs dang mthun pa'i ming btags pa la brten nas ma 'ongs pa na sangs rgyas pa'i tshe sangs rgyas kyi mtshan gyi nus pa 'jog cing/ de ltar rigs lnga'i dbang gis nyon mongs pa lnga'i dri ma 'khrud cing/ ye shes lnga bskyed pa dang/ de dag gi dbang gi ngo bo bde stong gi ye shes khyad par can skyes par mos/ mthar dbang lha rnams rang gi lus ngag yid gsum dang bsdu'i bu ga nas thim pas rang mi bskyod pa sogs su gyur par bsam/ de dag gi spyan sogs rig pa lngas bskur ba'i dbang dang/ rig pa ye shes lnga'i nus pa 'jog pas na rig pa'i dbang lnga'o/ /rdo rje sku'i dam tshig/ dril bu gsung gi dam tshig/ rang lha sku phyag rgya chen por gsal ba phyag rgya'i dam tshig ste de gsum byin pa la brten nas slob dpon gyi dbang gi ngo bo bde stong gi ye shes khyad par can rgyud la skyes pa dang/ rnal 'byor rgyud kyi skabs/ khyed rang rnams kyis g.yas kyi sor mo gsum bsgrengs te snying gar rdo rje gtod pa'i tshul du 'dzin pa rdor sems kyi phyag chen bcings/ g.yon dril bu dkur bsten te rdor sems su gsal bar dmigs pa la brten nas thabs shes dbyer mi phyed pa'i zab gsal gnyis su med pa'i ye shes slob dpon gyi dbang gi ngo bor gyur @011a @#/ /ba rgyud la skyes par mos gsungs/ slob dpon gyi dbang gi mtha' rtan la rten dang brten par bcas pa'i dkyil 'khor gyi de kho na nyid dang slob dpon gyi las kyi rim pa/ sngags gtad cing mig sman me long mda' gzhu rnams sbyin pa/ thun mong pa rdo rje'i brtul zhugs/ spyi dang bye brag gi chos bshad pa'i rjes gnang/ lung bstan dbugs dbyung rnams su yong/ mig sman gyis ma rig pa'i ling thog bsal nas lha'i mig gi mngon shes bskyed pa dang/ stong nyid don spyi'i tshul gyis rtogs ba'i nus pa khyad par can 'jog/ me long gis chos thams cad snang la rang bzhin med pa sgyu ma lta bu dang/ khyad par rang gi snying la zhugs pa'i rdo rje sems dpa' me long nang gi gzugs brnyan ltar bden stong sgyu ma lta bur rtogs pa'i nus pa 'jog/ mda' 'phen pa'i sngags don/ sarba ta thA ga ta de bzhin gshegs pa thams cad/ a nu ra ga ya mi ni mnyes par bgyi'o/ /zhes pa ste/ de ltar brjod cing phyogs bzhi dang steng 'og gnyis te drug tu mda' 'phen pa'i stangs ka byas pas chos dbyings shin tu phra ba'i 'ben gting thug par 'bigs shing/ drang don phyi'i bgegs dang/ nges don gyi bgegs 'jig lta lhan skyes dang bden 'dzin drungs nas 'byin pa'i stong nyid mngon sum du rtogs pa'i nus pa khyad par can 'jog/ dril bu dkrol ba'i sgra las nges don gyi dbyangs zab mo bsgrags @011b byung snyam du/ srid pa ngo bo nyid kyis dag /sogs brjod/ lung bstan la bla ma rgyal pa shAkya thub pa'i rnam pa can dang/ slob ma gang la me tog phog pa'i lha'i skur gsal ba la bla ma dang nam mkhar bzhugs pa'i rgyal pa sras dang bcas pas ma 'ongs pa na ji ltar 'tshang rgya ba'i tshul mgrin gcig tu lung bstan par bsam/ dbang gi phan yon bstan pa'i sgo nas dbugs dbyung ba ni/ da ni khyod nyid dkyil 'khor gyi/ /sogs so/ /gsang dbang dang sher dbang gi don du phyag rgya mtshan nyid dang ldan pa phul bar mos la maNDal phul/ yum med pa mgon po lta bu la yum mgon po dang sku mdog phyag mtshan sogs 'dra ba la yum gyi rnam pa can dang/ yum rnams la rang 'dra yab kyi rnam can du gyur; zhes gsungs/ a ho ni kye ma zhes ngo mtshar ba'i tshig dang/ ma hA su kha ni bde ba chen po zhes pa ste/ slob dpon rdo rje dril bu bas/ kye ma bde ba chen po zhes/ /bla ma la ni zhu bar bya/ /zhes gsungs pas/ gsang dbang gi ngo bo bde stong gi ye shes skyes ba na bdag gi rgyud la 'di lta bu skyes so zhes bla ma la rtogs pa 'bul ba yin/ sher dbang la yab yum gnyis 'dod lha yab yum du gsal ba lha'i 'du shes/ gnyis ka'i mkha' gsang byin gyis brlabs te sngags bkod ba sngags kyi 'du shes/ bas 'di la brten nas zag med kyi bde ba mngon du bya'o snyam pa chos kyi 'du shes te 'du shes gsum dang ldan pa'i sgo nas snyoms par zhugs te 'khyud pa'i @012a @#/ /phyag rgya dang bcas/ oM sarba ta thA ga ta sogs kyis rjes chags kyi nga rgyal byas te dga' bzhi drangs pa las bde stong dbyer med kyi ye shes sher dbang gi ngo bo rgyud la skyes par mos/ dbang bzhi ba chig gis ngo sprad pa'i don la go ba rnyed pa las skyes par mos/ mtha' rten pha rgyud rnams la thun mong ba rdo rje'i brtul zhugs kho na dang/ ma rgyud bde mchog nas me tri mkha' spyod kyi bar la de'i steng du spyod pa'i brtul zhugs dang po slob ma lhar bskyed pa la/ hrIH ha ha sogs kyis cang te'u tshad sa skud thod pa kha TwAM ka/ brtul zhugs gnyis pa rigs lngar byin gyis brlabs pa'i 'khor lo/ rna rgyan/ mgul phreng/ gdu bu/ ska rags rnams dang/ gsum pa lha bskyed snga mas 'thus pa mdzad nas/ hrIH ha sogs dang/ badzra bai ro dang/ DA ki nAM sogs kyis brlab pa'i cang te'u thod pa kha TwAM/ ka ra ka ra sogs kyis brlab pa'i phyag rgya drug dang nye ba'i phyag rgya/ sarba budd+ha sa mgul rgyan/ shrI badzra gyis thod pa'i do shal/ hrIH ha sogs kyis rna rgyan/ sarba budd+ha sa glang lags/ haM yoM sogs kyis ska rags/ TA ki nI sogs kyis thod pa/ badzra bai ro sa thod skam rnams dang/ rgyal ba rgya mtshor thun mong ma yin pa'i brtul zhugs dang po gnyis dang/ phag mo so bdun ma nas mgon po'i bar la thun mong ma yin pa'i brtul zhugs dang po tsam las phyi ma gnyis ma mdzad/ rgyal ba rgya mtshor chu dbang @012b gi gong der slob ma khrus dkyil du bkod/ slob dpon gyi dbang gi dus dbus su gdugs/ g.yas su rgyal mtshan/ g.yon du ba dan rnams bshams/ dbang bzhi pa rdzogs pa nas dam tshig bsgrags pa'i gong der/ spyan ras gzigs snying rje'i lha yin pa dang pod gangs can gyi lha skal yin pas sgrub thag shin tu nye zhing/ de'ang 'di la zur bka' med pas grub chen mi tra dzo ki sa 'di'i srol gsar du btod pas dbang gi skabs phyag len rgyas pa dang skabs 'dir bskor ba dngos su byed pa'i phyag srol yod pa ltar/ da lan 'du khang nang ku dogs pas phyi rol du ma hA ra ta sogs gsung bzhin par sems ma g.yengs pa'i sgo nas dkyil 'khor la bskor ba byed pa'i mos pa brtan po dgos gsungs/ bskor ba rdzogs nas dkyil 'khor gyi drung du/ rgyud rnams 'dzin par 'gyur ba yi/ /slob ma 'di ni 'bul ba lags/ /zhes slob ma lha la phul nas dam tshig bsgrags pa man dkyus ltar mdzad/ de'ang sprul sku 'grub byed bum dbang/ longs sku 'grub byed gsang dbang/ chos sku 'grub byed sher dbang/ zung 'jug 'grub byed dbang bzhi ba dang/ yang sku rdo rje 'grub byed bum dbang/ gsung rdo rje 'grub byad gsang dbang/ thugs rdo rje 'grub byed sher dbang/ sku gsung thugs rdo rje gsum dbyer med 'grub byed dbang bzhi pa dang/ yang bskyed rim smin byed bum dbang/ kun rdzob sgyu ma'i rdzogs rim smin @013a @#/ /byed gsang dbang/ don dam 'od gsal gyi rdzogs rim smin byed sher dbang/ bden gnyis dbyer med zung 'jug gi rdzogs rim smin byed dbang bzhi pa yin/ de nas/ slob dpon smad par mi bya ste/ /zhes sogs dngos grub thams cad kyi rtsa ba dam tshig bsgrags pa dang/ deng khyod skye ba 'bras bur bcas/ /zhes sogs spro ba bskyed pa ste/ de ltar tshig zin la thon pa rtsa ltung bcu bzhi dang/ ma thon pa sbom po brgyad las/ dang po ni/ slob dpon smad par ma bya ste/ /zhes dbang bskur rgyud bshad man ngag ston pa'i bla ma la zhe nas smod pa rtsa ltung dang po/ bde gshegs bka' las 'da' mi bya/ /zhes sdom gsum gang rung gi bcas mtshams la bsam bzhin khyad gsod kyis zhugs pa gnyis pa/ de bzhin khros nas spun rnams la/ /nyes pa brjod par mi bya'o/ /zhes bla ma gcig las dbang bskur dus gcig gam snga phyir thob pa'i rdo rje'i spun la khros nas skyon brjod pa pha rol pos shes pa/ thos pa/ de'i don go ba'i yan lag gsum tshang ba gsum pa/ sems can rnams la byams pa'i sems/ /nam yang nges par spangs mi bya/ /zhes sems can gang yang rung ba gcig la dmigs nas bde ba dang bral na snyam du byams pa btang ba bzhi pa/ byang chub sems ni dor mi bya/ /zhes sems can gzhan gyi don sgrub mi nus snyam du smon sems btang blta pa/ rang @013b gzhan chos la mi smod do/ /zhes nyan rang gi theg pa ston pa'i lung la bka' min zhes snying thag pa nas skur ba 'debs pa drug pa/ yongs su ma smin sems can la/ /gsang ba nyid ni bstan mi bya/ /zhes dbang gis ma sman pa la sngags kyi gsang ba bstan pa bdun pa/ bdag nyid phung po smad mi bya/ /zhes lus dka' thub kyis gdungs pa dang/ rang gi phung po mi gtsang ba lhar bsgom mi rung zhes brnyas pa brgyad pa/ chos rnams ngo bo sun mi dbyung/ / zhes stong nyid zab mo la yid mi ches pas smod pa dgu pa/ gdug pa'i byams pa rtag tu spangs/ /zhes rang gi bla ma dang dkon mchog la smod cing 'tshe ba la lus ngag gis byams par byed pa bcu pa/ chos la tshad gzung mi bya'o; ;zhes ming tshig sogs kyi spros pa dang bral ba'i don gang rigs rnyed nas spros bral de zhag gcig ma bskyangs pa bcu gcig pa/ dad ldan sems can bslu mi bya/ /zhes theg chen gyi chos kyi don 'dri ba la de las 'dun pa bzlog 'dod kyis don gzhan bstan te log pa bcu gnyis pa/ rtag tu dam tshig bsten par bya/ /zhes nang mchod dang tshogs rdzas la mi gtsang snyam du the tshom gyis dang du mi len pa dang/ rdor dril sogs dam tshig rdzas la dgos pa med snyam du 'dor ba bcu gsum pa/ shes rab rang bzhin bud med la/ /skyon gyi nyes pa mi brjod do/ /zhes bud med gcig la skyon 'od gsal 'dod kyis spyi la smod tshig brjod pa bcu bzhi pa dang/ tshig zin la @014a @#/ /dngos su mthon pa sbom po brgyad ni/ shes rab stobs kyis len pa dang/ /de yi bdud rtsi stobs kyis len/ /zhes phyi'i phyag rgya la brten pa gnyis dang/ snod min la ni mi gsang dang/ zhes dbang ma thob pa'am thob kyang mi dad pa la gsang ba'i rdzas bstan pa gsum pa/ tshogs kyi nang du rtsod pa dang/ /zhes tshigs 'khor gyi skabs tha mal gyi snang zhen dang bral nas dag pa'i rten brten pa'i snang zhen brtan po'i sgo nas tshogs 'khor gyi bya bar 'jug dgos/ de min kyang rang lha de dngos yin snyam pa'i mos pa yid byed tsam ma mthar byas nas tshogs 'khor mdzad na dam tshig nyams chags skong ba dang/ dpa' bo dang mkha' 'gro rnams dgyes pa'i thabs rmad du byung ba yin/ gzhan du rtsod pa dang thal mo rdeb pa sogs byed na sgom po bzhi ba'i nyes par 'gyur ba dang/ dad ldan la gzhan chos ston dang/ /zhes don dam pa'i gtam 'dri ba la kun rdzob kyi gtam ston pa lta bu lnga pa/ nyan thos nang du zhag bdun gnas/ /zhes gsang sngags sun 'byin pa'i nyan thos kyi nang du srog skyob pa dang rgyal po'i bka' sgrub phyir ma yin par zhag bdun gnas pa drug pa/ rdzun gyi rnal 'byor nga rgyal byed/ /ces lha'i sgrub thabs tsam shes pas de nyid shes par rlom pa'i mngon pa'i nga rgyal gyis gzhan la ston pa bdun pa/ dad pa med la chos ston pa/ /zhes dbang thob kyang sngags la mi dad pa las @014b sngags kyi gsang ba bstan pa brgyad pa ste des mtshon pa'i rtsa ba dang yan lag gi dam tshig mtha' dag bsrung ba la 'bad dgos/ bkra shis rtags rdzas bkrams pa'i tshe mi shis pa'i rgud pa mtha' dag bsal te bstan 'gro yongs la sman pa'i legs byas kyi sgo 'phar yangs por phye nas dge mtshan phun sum tshogs pa'i mos pa mdzad dgos/ de'ang bstan pa spyi'i 'jug sgo skyabs 'gro/ theg chen gyi 'jug sgo sems bskyed/ gsang chen rdo rje theg pa'i 'jug sgo ni dbang rnam par dag pa thob pa yin pas de sngon du 'gro dgos pa ni/ bshad rgyud rdo rje phreng ba las/ dbang bskur ba ni gtso bo ste/ /dngos grub thams cad rtag tu gnas/ /nga yis ji bzhin don bshad kyis/ /de phyir thog mar yang dag nyon/ /thog mar slob ma gang gi tshe/ /blo ldan yang dag dbang bskur na/ /rdzogs pa'i rim pa'i rnal 'byor la/ /de yi tshe na snod du 'gyur/ /zhes dang/ phyag chen thig le las/ dang por re zhig gang tshe slob/ /lan gcig dbang rnams kyi ni bskur/ /de tshe gsang chen bshad pa yis/ /nges par snod du gyur pa'o/ /zhes sogs gsungs pa ltar yin pas gsang sngags kyi lam zab mo'i sgo nas mchog thun mong gi dngos grub sgrub pa'i gzhi rten du dbang gi rtogs pa rnal ma rgyud la skye nges shig dgos/ dbang gi rnam bzhag la legs par dpyad shes na dbang la brten nas sngags lam gyi gnad mtha' dag @015a @#/ /la nges pa rnyed pas dbang la bsngags brjod cher mdzad pa yin te/ de la dgongs nas rje bdag nyid chen po'i sngags rim las/ bum dbang ganggA'i chu rgyun bskur ba yis/ / tha mal snang zhen lus kyi dri ma bkrus/ /gsang dbang ye shes bdud rtsi myang ba yis/ /ngag gnas rlung gi rgyu ba sngags su 'char/ /gsum pa lhan skyes dga' ba'i lcags kyu yis/ /yid kyi skyes bu don dam dbyings su drangs/ /bzhi pa zung 'jug don la ngo sprad pas/ /mthar thug skyel so'i gnad la the tshom bcad/ /dbang bzhi'i gnad don tshul bzhin nges pa las/ /mchog tu gyur pa'i gdams pa yod min zhes/ /rang gi rtogs pa glu ru blangs pa 'di/ /bla ma rnams dang 'jam pa'i dbyangs la 'bul/ /de skad smras pa'ang dbang gi rim pa rnams/ /lam gyi sngon 'gro tsam du zad do zhes/ /rtsa ba bor nas yal ga tshol rnams kyi/ /yid mun stug po zhi ba'i don du'o/ /zhes gsungs pa ltar yin/ dbang rnam par dag pa thob nas dam tshig dang sdom pa bsrung ba la brtson par byas na tshe 'dir sngags lam bsgom bam byung yang skye ba bdun nam bcu drug tshun la mchog gi dngos grub thob/ de'i steng du rim gnyis kyi lam bsgom pa la brtson par byas na tshe 'di'am bar dor mchog gi dngos grub 'grub pa la the tshom med cing/ dam tshig dang sdom pa yal bar dor nas rim gnyis @015b bsgom pa'i ngal ba byas kyang dngos grub thob pa phar zhog/ bde 'gro tsam yang thob dka' ba gsang ba'i mdzod kyi rgyud las/ dbang bskur yang dag sbyin ldan na/ /skye zhing skye bar dbang bskur 'gyur/ /de yi skye ba bdun la ni/ /ma bsgom par yang dngos grub thob/ /gang la bsgom pa dang ldan zhing/ /gal te dam tshig sdom la gnas/ /skye 'dir las dbang gis ma grub/ /skye ba gzhan du dngos grub thob/ /re zhig dam tshig nyams pa na/ /dngos grub thob pa lta zhog gi /mi yi skye ba'ang rnyed par dka'/ /zhes gsungs pa ltar yin/ des na dngos grub thams cad kyi rtsa ba dam tshig dang sdom pa bsrung ba ni rgyal ba kun gyis mgrin gcig dbyangs gcig tu lan gcig ma yin par gsungs pa yal bar mdor bar dam tshig dang sdom pa bsrung ba la rang rang gi blo'i nus pa ci yod kyis 'bad de nyams len gyi mthil du byed dgos pas/ sngags rim chen mo las/ don 'di la rje btsun grags pa rgyal mtshan gyi zhal nas/ rdo rje theg la dad cing ma smin pas/ /zab mo bsgom kyang 'bras pu ngan 'gro las/ /mchog gzhan mi 'grub sangs rgyas gsungs pas na/ /bla ma mchog la dbang bskur nod par mdzod/ /dbang thob man ngag zab mo tshol ba yis/ /sa steng rgyas par kun tu btsal byas kyang/ /phan pa'i don po gdams ngag dam @016a @#/ /tshig ste/ /'di med 'gram rtsa zad pa'i khang rul 'dra/ /legs par smin las dam tshig bsrung byas na/ /rim gnyis zab mo'i man ngag ma bsten kyang/ /skye ba bcu drug dag na 'grub po zhes/ /'gro ba'i rtsa lag phan par mdzad pas gsungs/ /bdag ni thos nyung shes rab mig bral yang/ /dri med rgyud las legs gsungs mthong bas na/ /dbang blangs dam tshig bsrung bar mdzod cig ces/ /kun la thal mo sbyar nas gsol ba 'debs/ /zhes gsungs pa ni rgyud sde'i gnang mkhyen pa'i gtam yin te bdag kyang de ltar du gsol pa 'debs so/ /zhes gsungs pa ltar yin la/ /gal te mi shes pa dang/ ma gus pa dang/ bag med pa dang/ nyon mongs mang ba ste ltung ba 'byung ba'i sgo bzhi ci rigs kyi dbang gis nyes ba byung na/ rtsa ltung ma yin pa'i nyes pa rnams sngags kyi sdom ldan gyi drung du phyir bcos kyis bshags pa dang/ rtsa ltung byung na bla ma las dbang nyan nas gso zhing/ de lta bu'i skabs med na bdag 'jug blangs nas gso dgos par rgyud rdor phreng sogs las gsungs shing/ mdor na nged rang rnams sngags byang sems so thar thams cad kyi bsrung bya mtha' yas pa bsrung bar dam bcas pa sha stag yin pas/ rab byung na @016b nyes ltung gis ma gos pa zhig dang/ gal srid nyes pa byung na'ang bshags bsdams la 'bad par byas na rang la nyams len byung/ sangs rgyas kyi bstan pa 'dzin pa'ang byung/ chos kyi khrims brtsis pa'ang byung/ rang gzhan thams cad kyi don de'i nang na grub nas yod pas/ sdom gsum gyi bcas mtshams dang dge 'dun gyi bca' khrims mtha' dag dgos don gal che shos su bzung nas/ 'grig lam gang yod nyams chags su ma song ba'i ngos yar rgyas su 'gro ba'i thabs la kun gyis 'bad dgos gsungs/ de ltar ngo mtshar ba'i rnam thar bco brgyad dam nyi shu dang ldan pa grub mchog mi tra dzo gi'i rgyud don man ngag dang 'brel ba'i legs bshad mtha' yas pa'i snying bor gyur pa mi tra brgya rtsar grags pa'i dbang bskur gyi rim pa rnams phul grub pa yin gsungs/ 'di dus sta gon dang thog ma'i dbang kha shas la bshad pa rgyas par mdzad cing/ bar skabs su chos nyan pa'i khrod du chams pa zhig byung pa'i rkyen gyis zhag bdun brgyad tsam la chos mtshams byas/ de nas gnang bar nyi ma re la dbang mang po 'gro dgos pa dang/ ston mjug @017a @#/ /nyi ma thung zhing lnga mchod dang yang nye bas brel dbang gis gsung bshad cher ma mdzad kyang gang gnang la gces spras kyis 'phral du zin thor thebs par byas te bkod pa lags so/ / mi tra'i dbang bshad zin bris tho/ /rnam grol bdud rtsi'i snye ma 'di/ /dge slong shes rab rgya mtsho yis/ /dga' ldan chos 'khor gling du bris// //oM swa sti/ mdo smad lho brgyud mdzod dge smad kyi yul; ;kun mkhyen yab sras thugs rje la brten pa'i/ /rgyud grwa chen po dga' ldan rab rgyas gling/ /mi 'dzad chos sbyin spel phyir par du bsgrub// //sarba mangga laM// // @017b [blank page]