@#/ /(bsags sbyang gi gnad bsdus pa yan lag bdun pa'i chog bzhugs so)/ bla ma rnams la phyag 'tshal lo/ /'dir bsags sbyang gi gnad bsdus pa yan lag bdun pas rgyud sbyang par 'dod pas/ gnas gtsang mar dkon mchog gi rten legs par bkram te mchod pa mdzes @08b par bshams la/ thams cad du ni sa gzhi dag gseg ma la sogs med pa dang/ /lag mthil ltar mnyam bai durya'i/ /rang bzhin 'jam por gnas gyur cig ces gnas byin gyis brlab/ / rnam dag chos kyi dbyings las ma g.yos kyang/ /thugs rjes tshad med 'gro la phyogs bcur gzigs/ /rgyal ba kun gyi 'phrin las rgyas mdzad pa/ /dus gsum bla ma 'khor bcas gshegs su gsol/ /thugs rje'i bdag nyid rtsa brgyud bla ma dang/ /yi dam lha tshogs skyabs gnas dkon mchog gsum/ /dpa' bo mkha' 'gro chos skyong srungs ma'i tshogs/ /spyan 'dren mchod pa'i gnas 'dir gshegs su gsol/ /phyogs dus kun nas skyabs gsum bka' sdod bcas/ /nyon mongs 'gro la mkhyen brtses rab dgongs nas/ /dpag med zhing nas thogs med rdzu 'phrul gyis/ /'dir gshegs mchod sprin rgya mtsho'i dbus bzhugs gsol/ /zhes tshogs zhing sbyan drangs/ khrus kyi khang pa shin tu dri zhim pa/ /shel gyi sa gzhi gsal zhing 'tsher ba ltar/ /rin chen 'bar ba'i ka ba yid 'ong ldan/ /mu tig 'od chags bla re bres pa der/ /zhes khrus khang bskyed/ /de bzhin gshegs dang de yi sras rnams la/ /rin chen bum pa mang po ? kyi chu/ /yid 'ong legs par bkang ba glu dang ni/ /rol mor bcas pa du mas sku khrus gsol/ /zhes khrus gsol/ de dag sku la mtshungs pa med pa'i gos/ /gtsang la dri rab bgos pas sku phyi'o/ /zhes skud byi/ /stong gsum kun tu dri ngad ldang ba yi/ /dri mchog rnams kyis thub dbang rnams kyi sku/ /gser sbyangs btso ma byi dor byas pa ltar/ /'od chags @09a @#/ /'bar bde dag byugs par bgyi/ /zhes dri bzang byug de nas de la kha dog legs bsgyur ba'i/ /na bza' shin tu dri zhim dam pa 'bul/ /gos bzang srab la 'jam pa sna tshogs dang/ /rgyan mchog brgya phrag de dang de dag gis/ /'phags pa kun tu bzang dang 'jam dbyangs dang/ /'jig rten dbang phyug sogs la brgyan par bgyi/ /zhes gos rgyan dbul/ bdag dang 'gro la thugs brtse'i phyir/ /nyid kyi rdzu 'phrul mthu yis ni/ /ji srid mchod pa bdag bgyid na/ /de srid bcom ldan bzhugs su gsol/ /zhes tshogs kyi zhing du bzhugs su gsol/ /sangs rgyas thams cad 'dus pa'i sku/ /rdo rje 'dzin pa'i ngo bo nyid/ /dkon mchog gsum gyi rtsa ba ste/ /bla ma rnams la phyag 'tshal lo/ /bla ma sangs rgyas bla ma chos/ /de bzhin bla ma dge 'dun te/ /kun gyi byed po bla ma yin/ /bla ma rnams la phyag 'tshal lo/ /gang gi drin gyis bde chen gnas/ /skad cig gis ni thob 'gyur pa/ /bla ma rin chen lta bu yi/ /rdo rje can la phyag 'tshal lo/ /skyob pa sangs rgyas kun dang gnyis su med/ /legs gsung sgron me ston pa chos kyi rje/ /ston pa'i bstan pa 'dzin pa'i gang zag mchog drin can bla ma rnams la phyag 'tshal lo/ /rab 'byams gsungs rab kun la blta ba'i mig skal bzang thar par bgrod pa'i 'jug ngogs mchog brtse bas bskyod pa'i thabs mkhas mdzad pa yis/ /gsal mdzad bshes gnyen rnams la phyag 'tshal lo/ /cher snyigs 'gro la thugs rje chen po yis/ /shin tu rgyas pa'i mdo sde'i snying po'i don/ /stsol mdzad dngos brgyud yongs 'dzin la sogs @09b pa/ /dpal ldan bla ma rnams la phyag 'tshal lo/ /thub pa chen po bde gshegs rdo rje 'chang/ /chos gzigs te lo ba dang nA ro pa/ /dpal mchog ToM bi ba dang a ti sha /nyams len byin brlabs brgyud la phyag 'tshal lo/ /byams pa thogs med dbyig gnyen rnam grol ste/ /mchog sde dul ba'i sde dang grags pa'i dpal/ /seng bzang ku sa li gnyis gser gling pa/ /rgya chen spyod pa'i brgyud la phyag 'tshal lo/ /yod med phyogs 'jigs rgyal sras klu sgrub dang/ /zla ba grags pa rigs pa'i khu byug che/ /sangs rgyas dgongs skyong 'phags pa yab sras sogs/ / zab mo lta ba'i brgyud la phyag 'tshal lo/ /thub pa'i bstan la shing rta'i srol btod nas/ /skye dgu rnams la legs pa'i lam ston pa/ /'dzam gling mdzes byed rgyan drug mchog gnyis sogs// 'phags yul paN chen rnams la phyag 'tshal lo/ /gsang chen lam gyi dngos grub mchog brnyes shing/ /skal ldan theg pa mchog la 'god mdzad pa'i/ /indra b+hu te sa ra ha ba sogs/ / grub pa'i dbang phyug rnams la phyag 'tshal lo/ /phyogs 'dir thub bstan dar zhing rgyas pa'i phyir/ /'jig rten dbang phyug la sogs rigs gsum mgon/ /kha ba can gyi mi rje'i tshul bzung ba; ;chos rgyal mes dpon rnams la phyag 'tshal lo/ /legs gsungs mdo rgyud dgongs 'grel bcas pa rnams/ /legs sbyar skad las yang dag bsgyur mdzad pa'i/ /legs lam blta ba'i mig gcig skad gnyis pa/ /sgra bsgyur dam pa rnams la phyag 'tshal lo/ /thos bsam sgom par rang rgyud legs par sbyangs/ /'chad rtsod rtsom pas thub bstan rgyas par mdzad/ / @10a @#/ /mkhas btsun bzang po'i dpal gyis mngon mtho ba'i/ /gangs can bla ma rnams la phyag 'tshal lo/ /kha ba can 'dir dpal ldan mar me mdzad/ /dga' ldan gnas na nam mkha' dri ma med/ /yid bzhin nor bu lta bur gzhan don mdzad/ /jo bo a ti sha la phyag 'tshal lo/ /yongs kyi dge ba'i bshes gnyen yongs kyi mgon/ /rgyal ba'i gdung tshob gyur ba rgyal ba'i sras// rang gzhan don gnyis 'byung gnas rin po che/ /bshes gnyen ston pa'i zhabs la phyag 'tshal lo/ /gsung rab rgya mtsho'i mthar son po to ba/ /bdag pas gzhan gces bsgom pa'i spyan snga ba// sgrub pa snying por mdzad pa'i phu chung ba/ /rgyal sras sku mched gsum la phyag 'tshal lo/ /byang chub thugs kyis x/ /dmigs med brtse ba'i x/ /bde bar gshegs pa'i x/ /'dul ba 'dzin pa x/ /gzhung lugs ral pa x/ /bkra shis rab brtan x/ /dbang phyug brgyud ldan x/ /dge legs yon tan x/ /blo bzang rgyal ba x/ /gang gis bdag la x/ /ston pa bla med sangs rgyas rin po che/ /skyob pa bla med dam chos rin po che/ /'dren pa bla med dge 'dun rin po che/ /skyabs gnas dkon mchog gsum la phyag 'tshal lo/ /yon tan kun rdzogs ston pa sangs rgyas dang/ /nyes pa'i skyon bral skyob pa dam chos dang/ /tshogs kyi mchog gyur 'dren pa dge 'dun te/ /skyabs gnas dkon mchog gsum la phyags 'tshal lo/ / don gnyis mthar phyin ston pa rdzogs sangs rgyas/ /bden gnyis zung 'jug bstan pa dam pa'i chos/ /tshogs gnyis nyams len 'phags mchog dge 'dun te/ /skyabs gnas @10b dkon mchog gsum la phyag 'tshal lo/ /mgon po thugs rje che ldan pa/ /thams cad mkhyen pa ston pa po/ /bsod nams yon tan rgya mtsho'i zhing/ /de bzhin gshegs la phyag 'tshal lo/ / dag pas 'dod chags bral bar gyur/ /dge bas ngan song las grol zhing/ /gcig tu don dam mchog gyur pa/ /zhi gyur chos la phyag 'tshal lo/ /grol nas grol ba'i lam yang ston/ / bslab pa dag la rab tu gus/ /zhing gi dam pa yon tan ldan/ /dge 'dun la yang phyag x/ /sangs rgyas gtso la x/ /skyob pa'i x/ /dge 'dun che x/ /gsum la rtag tu gus phyag 'tshal/ /phyogs bcu'i 'gro la mkhyen brtses rab dgongs nas/ /phyogs bcur chos kyi 'khor lo legs bskor nas/ /phyogs bcu'i 'gro kun yongs su skyobs mdzad pa'i/ / phyogs bcu'i sangs rgyas x/ /chos sku nam mkha' bzhin du dbyer med kyang/ /gzugs sku 'ja' tshon lta bur so sor gsal/ /thabs dang shes rab mchog la mnga' brnyes pa/ / rigs lnga bde bar gshegs la phyag 'tshal lo/ /dpal ldan 'dus pa 'khor lo sdom pa dang/ /rdo rje 'jigs byed dus kyi 'khor lo dang/ /dgyes pa rdo rje 'khor lo chen po sogs/ / yi dam dkyil 'khor tshogs la phyag 'tshal lo/ /gang zhig gzugs dang x/ /he ru ka dpal x/ /gnyis med thun mongs x/ /mthun pa'i smon lam mchog tu rmad byung zhing/ /spyad pa spyod tshe nam yang mched gyur la/ /skal bzang gcig la mdzad pa mthar phyin pa'i/ /rdzogs pa'i sangs rgyas stong la phyag 'tshal lo/ /gang gi mtshan tsam brjod dang dran pas kyang/ / @11a @#/ /mi bzad sdig pa'i dpung tshogs zhi 'gyur ba/ /shAkya thub la sogs bde gshegs so lnga la/ /rtse gcig gus pa'i yid kyis x/ /mtshan legs rin chen gser bzang mya ngan med; ;chos bsgrags mngon mkhyen sman bla shAkya thub/ /rgya chen smon lam yongs su rdzogs pa yi/ /bde bar gshegs pa brgyad la phyag 'tshal lo/ /sangs rgyas rnam gzigs gtsug tor thams cad skyob/ /'khor ba 'jigs dang gser thub 'od bsrung dang/ /shAkya thub pa go tam lha yi lha/ /sangs rgyas dpa' bo bdun la phyag 'tshal lo/ /gang gis dang por byang chub thugs bskyed nas/ /bsod nams ye shes tshogs gnyis rdzogs mdzad cing/ /dus 'dir mdzad pa rgya chen 'gro ba yi/ /mgon gyur shAkya'i gtso la phyag 'tshal lo/ /'jig rten 'dren pa'i gtso bo tshe dpag med/ /dus min 'chi ba ma lus 'joms mdzad pa'i/ /mgon med sdug bsngal gyur pa rnams kyi skyabs/ /sangs rgyas tshe dpag med la phyag 'tshal lo/ /thugs rje kun la snyoms pa'i bcom ldan 'das/ /mtshan tsam thos pas ngan 'gro'i 'jigs las skyob/ /dug gsum nad sel sangs rgyas sman gyi bla/ bai DUrya'i 'do la phyag 'tshal lo/ / chos dbyings rnam dag sgrib pa'i dra ba bcom/ /gnyis med ye shes thugs rje'i rtsa ba can/ /gzung 'dzin rtog pa kun gyis mi 'khrug pa'i/ /bcom ldan mi 'khrug pa la phyag 'tshal lo/ / gang zhig yid la dran pa tsam gyis kyang/ /ngan 'gro'i 'jigs las sgrol pa'i skyabs kyi mchog bcom ldan kun rig rnam par snang mdzad la/ /sgo gsum gus pa chen po'i phyag 'tshal lo/ / @11b gang la sems kyi dam pa rin chen de/ /skyes pa de yi sku la phyag 'tshal zhing/ /gang la gnod pa byas kyang bder 'brel ba/ /bde ba'i 'byung gnas de la skyabs su mchi/ /'jam dbyangs phyag na rdo rje spyan ras gzigs/ /sa yi snying po sgrib pa rnam par sel/ /nam mkha'i snying po byams pa kun tu bzang/ /nye ba'i sras chen brgyad la x/ byams chen me yis x/ skyon gyi mgos x/ /gzhon nu'i cha lugs x/ /stobs po che la x/ /lha dang lha min x/ /'khor ba las sgrol x/ /dpal ldan lha mo x/ / /bde gshegs thugs rjes x/ /rgyal ba kun gyi x/ /gsung gi dbang phyug pad ma'i rigs kyi gtso/ /sku mdog dmar nag zhal gsum phyag drug ldan/ /brjid pa'i zhabs brgyad bgrad pa'i dor stobs kyis/ /srid gsum bgegs dpung 'joms la x/ /sku mdog sngon po ral gri zhags pa 'dzin/ /g.yas bskum g.yon rgyangs bdud bzhi rab tu gnon/ /ma g.yos mi g.yo g.yo ba mi mnga' ba'i/ /bcom ldan mi g.yo ba la x/ /thub pas bka' bsgos bstan pa'i rgyal mtshan 'dzin/ /yan lag 'byung dang ma pham nags na gnas/ /dus ldan rdo rje mo'i bu bzang po dang/ /gser be'u bA ra d+hwa dza gser can mchog 'phags pa ku ba la dang sgra gcan 'dzin/ /lam phran b+hA ra d+hwa dza bsod snyoms len/ /lam stan klu'i sde sbed byed mi phyed pa/ /la sogs nyan thos rnams la x/ /zab mo rten 'brel bcu gnyis legs bsgom pas/ /rang 'byung rang sangs rgyas kyi ye shes ni/ /brten pa med pa'i tshul gyis thugs chud pa'i/ /'phags pa rang rgyal rnams la x/ /mkha' spyod @012a @#/ /la sogs gnas X/ /sngon tshe bcom ldan 'das X/ /mthong dang thos dang dran dang reg rnams la/ /bde legs dpal ster dam pa'i sku gzugs dang/ /yig 'bru mchod rten gnas gzhi la sogs pa'i/ /phyag 'os kun la gus pas X/ /dus gsum phyogs bcur X/ /mkha' ltar khyab pa'i rgyal ba sras bcas la/ /bdag dang mkha' mnyam 'gro ba ma lus pa'i/ /lus 'di zhing rdul mnyam par rab sprul nas/ /rtag tu gus pa'i yid kyis X/ /ji snyed su dag nas X bdag gi bstod/ /ces phyag 'tshal/ rin chen sems mchog bzung bar bya ba'i phyir/ /de bzhin gshegs pa rnams dang dam pa'i chos/ /dkon mchog dri ma med dang sangs rgyas sras/ /yon tan rgya mtsho rnams la legs par mchod; ;thub dbang mchod gnas mchog la yid 'ong ba'i/ /me tog mand+ha ra dang pad ma dang/ u dpal la sogs dri zhim thams cad dang/ /'phreng ba spel legs yid 'ong rnams kyis mchod/ /spos mchog yid 'phrog dri dang khyab pa yi/ /bdug pa'i sprin tshogs rnams kyang de la dbul/ /zhal zas bza' btung sna tshogs bcas pa yi/ /lha bshos rnams kyang de la dbul bar bgyi/ /gser gyi pad ma tshar du dngar ba yi/ /rin chen sgron ma rnams kyang dbul bar bgyi/ /sa gzhi bstar ba spos kyi byugs pa der/ /me tog yid 'ong sil ma bkram par bya/ /gzhal med pho brang bstod dbyangs yid 'ong ldan/ /mu tig rin chen rgyan 'phyang mdzes 'bar ba/ /dpag yas nam mkha'i rgyan gyur de dag kyang/ /thugs rje'i @012b rang bzhin can la dbul bar bgyi/ /rin chen gdugs mdzes gser gyi yu ba can/ /'khor yug rgyan gyi rnam pa yid 'ong ldan/ /dbyibs legs blta na sdug pa bsgreng ba yang/ /rtag tu thub dbang rnams la dbul bar bgyi/ /me tog 'bras bu ji snyed yod pa dang/ /sman gyi rnam pa gang zhig yod pa dang/ /'jig rten rin chen ji snyed yod pa dang/ /chu gtsang yid du 'ong ba ci yod dang/ /rin chen ri bo dang ni de bzhin du/ /nags tshal sa phyogs dben zhing nyams dga' dang/ /ljon shing me tog rgyan spras sbud ? pa dang/ /shing gang 'bras bzang yal ga rud pa dang; ;lha sogs 'jig rten na yang dri dang ni/ /spos dang dpag bsam shing dang rin chen shing/ /ma rmos 'khrungs pa'i lo tog rnam pa dang/ /gzhan yang mchod par 'os pa'i rgyan rnams ni/ /mtsho dang rdzing bu pad mas brgyan pa dag /dang ba shin tu skad snyan yid 'ong ldan/ /nam mkha' rab 'byams khams kyi mthas gtugs na/ /yongs su bzung ba med pa de dag kun/ /blo yis blangs nas thub pa skyes kyi mchog /sras dang bcas pa rnams la legs 'bul na/ /yon gnas dam pa thugs rje che rnams kyis/ /bdag la brtser dgongs bdag gi 'di dag bzhes/ /bdag ni bsod nams me ldan bkrin chen te/ /mchod pa'i nor gzhan bdag la cang ma mchis/ /des na gzhan don dgongs pa'i mgon gyis 'di/ / bdag gi don slad nyid kyi mthus bzhes shig /rgyal dang de sras rnams la bdag gis ni/ /bdag gi lus kun gtan du dbul bar bgyi/ /sems dpa' mchog rnams bdag ni yongs @13a @#/ /bzhes shig /gus pas khyed kyi 'bangs su mchi bar bgyi/ /de las gzhan yang mchod pa'i tshogs/ /rol mo dbyangs snyan yid 'ong ldan/ /sems can sdug bsngal sim byed pa'i/ /sprin rnams so sor gnas gyur cig /dam chos dkon mchog thams cad dang/ /mchod rten rnams dang sku gzugs la/ /rin chen me tog la sogs char/ /rgyun mi chad par 'bab par shog /ji ltar 'jam dbyangs la sogs pas; ;rgyal ba rnams la mchod mdzad pa/ /de bzhin bdag gis de bzhin gshegs/ /mgon po sras dang bcas rnams mchod/ /yon tan rgya mtsho rnams la bdag /bstod dbyangs yan lag rgya mtshos mchod/ / bstod dbyangs snyan sprin de dag la/ /nges par kun tu 'byung gyur cig /me tog nas mchod par bgyi/ /bdag gzhan lus ngag yid gsum longs spyod dus gsum dge tshogs bcas/ /rin chen maNTal bzang po kun bzang mchod pa'i tshogs bcas pa/ /blo yis blangs te bla ma yi dam dkon mchog gsum la 'bul/ /thugs rje'i dbang gis bzhes nas bdag la byin gyis brlab tu gsol/ /zhes mchod pa dbul/ /'khor ba spyi bye brag gi sdug bsngal la shin tu 'jigs pa'i yid kyis dkon mchog la skyabs 'cha' ba'i bsam pa drag pos/ /gtso bo rgyal ba 'gro ba'i mgon/ /'gro ba skyob pa'i don brtson pa/ /stobs chen 'jigs pa kun sel la; ;de ring nyid nas skyabs su mchi/ /de yi thugs su chud pa'i chos/ /'khor ba'i 'jigs pa sel ba dang/ /byang chub sems dpa'i tshogs la yang/ /de bzhin yang dag skyabs su mchi/ /bdag ni 'jigs pas rnam skrag pas/ /kun tu bzang la bdag nyid dbul/ /'jam dpal dbyangs la'ang bdag nyid kyis/ /bdag gi lus 'di dbul bar bgyi/ /thugs rje spyod pa ma 'khrul ba/ /spyan ras gzigs mgon de la yang/ /nyams @13b thag nga ros 'o 'dod 'bod/ /sdig ldan bdag la skyabs tu gsol/ /'phags pa nam mkha'i snying po dang/ /sa yi snying po dag dang ni/ /thugs rje che mgon thams cad la/ /skyabs tshol snying nas 'o 'dod 'dod/ /gang zhig mthong nas gshin rje yi/ /pho nya la sogs sdang ba rnams/ /skrag nas phyogs bzhir 'byer byed pa/ /rdo rje can la skyabs su mchi/ /sngon chad khyed kyi bka' las 'das/ /da ni 'jigs pa che mthong nas/ /khyed la skyabs su mchi lags kyis/ / 'jigs pa myur du bsal du gsol/ /zhes bdag nyid bran du phul nas de dag gi skyabs 'og tu tshung bar bya/ dkon mchog gsum la nas yid kyis gzung ces mar gyur sems can thams cad kyi don du myur du sangs rgyas thob par bya'o snyam du sems bskyed/ de gnyis ni rten gyi stobs so/ /sangs rgyas rkang gnyis dam pa dag /thugs brtse thugs rje ldan pa'i thugs/ /gang dag phyogs bcu'i 'jig rten na/ /bzhugs pa bdag la dgongs su gsol/ / bdag gis sngon chad sdig pa'i las/ /shin tu mi bzad gang bgyis pa/ /stobs bcu'i spyan sngar bdag mchis te/ /de dag thams cad bshags par bgyi/ /pha ma dag tu mi 'dzin dang/ /sangs rgyas rnams su mi 'dzin dang/ /dge ba dag tu mi 'dzin dang/ /sdig pa bdag gis gang bgyis dang/ /phyug pa'i rgyag pas dregs pa dang/ /rigs dang longs spyod dregs pa dang/ /gzhon pa'i rgyags pas dregs pa yis/ /bdag gis sdig pa gang bgyis dang/ /nyes pa dmigs bu ma mthong bas/ /nyes par bgyis pa'i las dang ni/ /nyes par bsam zhing zhes smras pa'i/ /sdig las bdag gis gang bgyis dang/ /byis pa'i blo yis 'jug pa dang/ /mi shes mun pa'i sems dang ni/ /sdig pa'i grogs po'i dbang gyur dang/ /nyon mongs rnam par 'khrugs sems dang/ /rtsed mo dga' ba'i dbang nyid dang/ /mya ngan dang ni nad dbang dang/ /nor gyi mi chog nyes pa yis/ /bdag gis sdig pa gang bgyis dang/ /'phags min skye bo 'dre ba dang/ /phrag @014a @#/ /dog ser sna'i rgyu dang ni/ /g.yo dang dbul ba'i nyes pa yis/ /bdag gis sdig pa gang bgyis dang/ /phongs dang rgud pa'i dus kyi tshe/ /'dod pa rnams kyis 'jigs rgyu dang/ /phyug po ma yin gyur ba yis/ /bdag gis sdig pa gang bgyis dang/ /g.yo ba'i sems kyi dbang nyid dang/ /'dod dang khro ba'i dbang dag dang/ /bkres dang skom pa'i nyen pa yis/ /bdag gis sdig pa gang bgyis dang/ /bza' ba dag dang btung ba dang/ /bud med rgyu dang gos kyi phyir/ / nyon mongs gdung ba sna tshogs kyis/ /bdag gis sdig pa gang bgyis dang/ /lus dang ngag dang yid kyi sdig /nyes par spyad pa rnam gsum dag /'di 'dra'i tshul gyis gang bgyis pa/ /de dag thams cad bdag 'chags so/ / sangs rgyas rnams dang chos rnams dang/ /de bzhin nyan thos rnams la yang/ /gus pa ma lags gang bgyis pa/ /de dag thams cad bdag 'chags so/ /gang yang rang sangs rgyas rnams dang/ /byang chub sems dpa' rnams la yang/ /gus pa ma lags gang bgyis pa/ /de dag thams cad bdag 'chags so/ /dam chos smra ba rnams la yang/ /gus pa ma lags bgyis pa dang/ /chos la'ang gus pa ma bgyis pa/ /de dag thams cad bdag 'chags so/ / bdag gis rtag tu mi shes pas/ /dam pa'i chos ni spangs pa dang/ /pha ma rnams la ma gus gang/ /de dag thams cad bdag 'chags so/ /blun pa dang ni byis pa dang/ /'dod chags zhe sdang gti mug dang/ /nga rgyal dregs pas sgrib bgyis pa/ /de dag thams cad bdag 'chags so/ /bdag gis phyogs bcu'i 'jig rten du/ /stobs bcu rnams la mchod par shog/ /bdag gis phyogs bcu'i sems can rnams/ /sdug bsngal kun la gdon par shog / sems can bsam kyis mi khyab kun/ /sa bcu la ni 'god par shog /sa bcu la ni gnas nas kyang/ /thams cad de bzhin gshegs gyur cig /ji srid sdug bsngal rgya mtsho las/ /de kun thar bgyid nus srid du/ /sems can re re'i @014b phyir yang ni/ /bskal pa byed par spyad par shog /gser 'os dam pa zhes bgyi ba/ /las rnams thams cad byang bgyid pa/ /zab mo dag ni ston pa 'di/ /sems can de dag ston par shog /gang gis bskal ba stong rnams su/ / sdig pa shin tu mi bzad bgyis/ /lan gcig rab tu bshags pa yis/ /de dag thams cad byang bar 'gyur/ /gang gis las kyi sgrib pa rnams/ /myur du yang dag zad 'gyur ba/ /gser 'od dam pa dge ba yi/ /bshags pa 'di dag bshags nas ni/ /rin chen 'byung gnas mchog bcu po/ /sa bcu la ni gnas par shog /sangs rgyas yon tan snang gyur cig /srid pa'i mtsho las sgrol bar shog /sangs rgyas rgya mtsho chu bo dang/ /yon tan rgya mtsho zab mo ste/ /sangs rgyas yon tan bsam yas kyi/ /thams cad mkhyen du rdzogs par shog /ting 'dzin brgya phrag stong rnams dang/ /gzungs rnams bsam gyis mi khyab dang/ /dbang stobs byang chub yan lag gis/ /stobs bcu'i dam par 'gyur bar shog /dgongs pa'i thugs kyis sangs rgyas rnams/ /bdag la rnam par gzigs su gsol/ /thugs rje ldan pa'i thugs kyis ni/ /nongs par rab tu bzung du gsol/ /bdag gis bskal pa brgya rnams su/ /sngon chad sdig pa gang bgyis pa/ /de phyir bdag ni mya ngan sems/ /phongs dang mya ngan 'jigs las bzir/ /sdig pa'i las la 'jigs par bgyid/ / yid ni rtag tu dman par gyur/ /gang dang gang du spyod bgyid pa/ /bdag ni gang du'ang dga' ma mchis/ /sangs rgyas thams cad thugs rje ldan/ /'gro ba kun gyi 'jigs sel bas/ / nongs par rab tu bzung du gsol/ /'jigs pa dag las bdag thar mdzod/ /bdag gi nyon mongs las rnams kyis/ /dri ma de bzhin gshegs pas sol/ /sangs rgyas @015a @#/ /rnams kyis bdag la ni/ /snying rje'i chu yis bkru bar gsol/ /sdig pa thams cad bshags par bgyi/ /sngon chad bdag gis gang bgyis dang/ /da ltar bdag gis sdig pa gang/ /de dag thams cad bdag 'chags so/ /nongs par bgyis pa'i las rnams kun/ /slan chad mi bgyi sdom par bgyi/ /bdag gi nongs pa bgyis pa gang/ /sdig de bcab bar mi bgyi'o/ /lus kyi las ni rnam gsum dang/ /ngag gi rnam pa bzhi dag dang/ /yid kyi rnam pa gsum po rnams/ /de dag thams cad bdag 'chags so/ /lus kyis bgyis dang ngag gi las/ /yid kyis rnam par bsams pa dang/ /las rnams bcu po bgyis pa dag /de dag thams cad bdag 'chags so/ /mi dge'i las bcu spangs nas su/ / dge ba bcu po bsten bgyis te/ /sa bcu la ni bdag gnas shing/ /stobs bcu mchog tu 'gyur bar shog /bdag gi sdig pa'i las gang dag /mi 'dod 'bras bu thob bgyid pa/ / sangs rgyas spyan sngar mchis nas ni/ /de dag thams cad bshags par bgyi/ /'dzam bu gling 'dir gang dag dang/ /'jig rten khams ni gzhan dag tu/ /gang rnams dge ba'i las bgyid pa/ /de dag kun la yi rang ngo/ /lus dang ngag dang yid kyis kyang/ /bdag gis bsod nams gang grub pa/ /bdag ni dge ba'i rtsa ba des/ /byang chub mchog la reg par shog /srid 'gro nya mngar byis pa'i blo yis ni/ /shin tu mi bzad sdig pa gang bgyis pa/ /stobs bcu mnga' ba'i spyan sngar mchis nas ni/ /sdig pa de kun so sor bshags par bgyi/ / @015b skye ba nyam nga srid pa nyam nga dang/ /'jig rten nya mang g.yo sems nyam nga bar/ /lus kyi spyod pa nyam nga sna tshogs kyis/ /bdag gis sdig pa gang bsags de 'chags so/ /byis pa blun byas g.yo sems nyam nga dang/ /sdig pa'i grogs dang phrad pa'i nyam nga dang/ /srid pa nyam nga 'dod chags nyam nga dang/ /zhe sdang nya mang gti mug nyam nga dang/ /dal ba'i nyam nga dus kyi nyam nga dang/ / bsod nams sgrub pa nyam nga dag gis kyang/ /rgyal ba yang dag mngon sum mchis nas ni/ /sdig pa de kun so sor bshags par bgyi/ /zhes sngar byas kyi nyes pa la 'gyod sems drag po bya ste rnam par sun 'byin pa'i stobs so/ /bdag ni mi shes gti mug pas/ /rang bzhin kha na ma tho 'am/ /bcas pa'i sdig pa gang yin las/ /gang yang rung ba bgyis pa rnams/ / mgon po'i spyan sngar mngon sum du/ /thal sbyar sdug bsngal 'jigs sems kyis/ /yang dang yang du phyag 'tshal te/ /de dag thams cad bshags par bgyi/ /'dren pa rnams kyis bdag gi sdig /nongs pa lags par bzung du gsol/ /'di ni bzang po ma lags pas/ /slan chad bdag ni yongs mi bgyid/ /ces phyin chad mi bya'o snyam du sdom sems drag po bya ste/ /nyes pa las slar ldog pa'i stobs so/ /gang zhig gzugs la mi gnas tshor la mi gnas shing/ /gang zhig 'du shes mi gnas sems dpar mi gnas la/ /rnam shes gang mi gnas pa chos nyid gnas pa ste/ /'di ni shes rab pha rol phyin mchog spyod pa yin/ /rtag dang mi rtag bde dang sdug bsngal sdug mi sdug /bdag dang @016a @#/ /bdag med de bzhin nyid dang de bzhin stong/ /'bras bu thob dang dgra bcom sa la mi gnas shing/ /rang ? rgyal sa dang de bzhin sangs rgyas sang mi gnas/ /ji ltar 'dren pa 'dus ma byas khams mi gnas shing/ /de bzhin 'dus byas la yang mi gnas gnas med spyod/ /de latr byang chub sems dpa'i gnas la gnas med spyod/ /gnas med gnas yin 'di ni rgyal bas gnas par gsungs/ /gang dag bde gshegs nyan thos 'gyur bar bya snyam dang/ /rang sangs rgyas dang de bzhin chos rgyal 'gyur 'dod pa/ /bzod pa 'di la ma brten thob par mi nus te/ /dper na pha rol tshu rol 'gro dogs mi mthong bzhin/ /chos 'chad pa dang nyan dang bshad bya gang yin dang/ /'bras bu thob dang rkyen rgyal de bzhin 'jig rten mgon/ /mkhas pa gsal bas thob pa'i mya ngan 'das gang yin/ /de kun sgyu ma lta bur de bzhin gshegs pas bstan/ /ji ltar smig rgyu dri za'i grong khyer dang/ /sgyu ma ji bzhin rmi lam ji lta bur/ /mtshan ma bsgom pa ngo bo nyid kyis stong/ /chos rnams thams cad de bzhin shes par bya/ /zhes chos thams cad rang bzhin med pa sgyu ma lta bur bsam pa ni gnyen po kun tu spyod pa'i stobs so/ /'dod chags nas/ /so sor bshags ces bshags pa bya/ /phyogs bcu'i nas bdag yi rang/ /ces rang gzhan gyi dge ba la dga' ba bsgom/ /gang rnams nas bskor bar bskul/ /ces chos 'khor skor bar bskul/ /mya ngan 'da' nas/ /gsol bar bgyi/ /zhes gsol ba gdab/ de ltar bgyis @016b pa'i bsod nams dang/ /bdag gis bgyis dang ma bgyis gang/ /des ni sems can thams cad kyang/ /bla med byang chub sems ldan shog /sems can thams cad dri med dbang/ /yongs rdzogs mi khom kun 'das shing/ /spyod pa rang dbang yod pa dang/ /'tsho ba bzang ngang ldan par shog /lus can dag ni thams cad kyang/ /lag na rin chen nyid ldan shing/ /yo byad thams cad mtha' yas pa/ /'khor ba srid du mi zad shog /bud med thams cad dus kun du/ /skyes mchog nyid du 'gyur bar shog /lus can thams cad rig pa dang/ /rkang par ldan pa nyid du shog /lus ngan kha dog ldan pa dag /gzugs bzang gzi brjid che ba dang/ /lta na sdug shing nad med dang/ /stobs chen tshe dang ldan par shog thams cad thabs la mkhas gyur te/ /sdug bsngal kun las thar pa dang/ /dkon mchog gsum la gzhol ba dang/ /sangs rgyas chos nor cher ldan shog /byams dang snying rje dga' ba dang; ;nyon mongs btang snyoms gnas pa dang/ /sbyin dang tshul khrims bzod brtson 'grus/ /bsam gtan shes rab kyis brgyan zhing/ /tshogs rnams thams cad yongs rdzogs te/ / mtshan dang dpe byad gsal ba dang/ /bsam gyis mi khyab sa bcu dag /rgyun mi chad par bgrod par shog /bdag kyang yon tan de dag dang/ /gzhan kun gyis kyang rgyan ldan te/ / nyes pa kun las grol ba dang/ /sems can kun mchog byams pa dang/ /sems can kun gyi bsam pa dang/ /dge ba thams cad rdzogs bgyid cing/ /rtag tu lus can thams cad kyi/ @17a @#/ /sdug bsngal ser bar bgyid par shog 'jig rten kun na skye bo gang/ /su ngag 'jigs pas skyob de/ /bdag gi ming tsam thos pas kyang/ /shin tu 'jigs pa med par shog bdag ni mthong dang dran pa dang/ /ming tsam thos pas skye bo rnams/ /rab dang sa 'khrugs med rnal ma dang/ /rdzogs pa'i byang chub nges pa dang/ /tshe rabs kun du rjes 'brang ba'i/ /mngon shes lnga po thob par shog /sems can kun la rnams kun du/ /rtag tu phan bde bgyid par shog 'jig rten kun na skye bo gang/ /sdig pa byed par 'dod gyur pa/ /de dag thams cad gnod med par/ /rtag tu gcig char bzlog gyur cig sa dang chu dang me dang rlung/ /sman dang dgon pa'i shing bzhin du/ /rtag tu sems can thams cad kyis/ /rang dgar dgag med spyod par shog sems can rnams la srog bzhin 'phangs/ /bdag la de dag ches 'phangs shog /bdag la de dag sdig smin cing/ / bdag dge ma lus der smin shog ji srid sems can 'ga' zhig kyang/ /gang du ma grol de srid du/ /de phyir bla na med pa yi/ /byang chub thob kyang gnas gyur cig phyag 'tshal ba dang zhes pa nas/ chen por bsngo/ /zhes bsngo ba bya'o/ /rje bdag nyid chen pos de ltar na phyag dang mchod pa dang bskul ba dang gsol ba gdab pa dang yi rang dang lnga ni mthun rkyen tshogs bsogs pa yin la/ /bshags pa ni 'gal rkyen sgrib pa sbyong ba dang/ yi rang gi phyogs gcig rang gi dge ba byas pa la dga' bab bsgom pa ni rang gi dge ba spel bar yang 'gyur ro/ / @17b bsngo bas ni bsags pa dang sbyangs pa dang spel ba'i dge ba nyung du yang ches mang por spel ba dang/ gnas skabs su 'bras bu byung te zad par 'gyur ba rnams nam yang mi zad par byed pa ste/ bsdu na ? bsags pa dang sbyangs pa dang spel zhing mi zad par byed pa gsum du 'du'o/ /zhes gsungs/ chos rje bus de la yan lag bdun pa ni sgrib pa sbyong ba yin la/ de la gsum te bya bar 'os pa ma byas pa dang/ mi bya bar 'os pa byas pa dang/ byas pa chud gzan pa'i nyes pa dang gsum las/ dang po yul dam pa la phyag dang mchod pa bya bar 'os pa ma byas pa ste/ de'i gnyen por phyag 'tshal ba dang mchod pa dbul ba'i yan lag gnyis so/ /gnyis pa ni rang gi sgo gsum gyis mi dge ba byas pa dang/ gzhan dge ba byas pa la mi dga' ba byas pa dang gzhan chos ston pa la bar chad byas pa dang/ dge ba'i bshes gnyen gyi sku tshe mi gnas par dga' ba byas pa dang bzhi ste/ de'i gnyen por sdig pa bshags pa dang/ dge ba la rjes su yi rang ba dang chos kyi 'khor lo bskor bar bskul ba dang/ mya ngan las mi 'da' bar gsol ba gdab pa dang bzhi'o/ /gsum pa ni dge ba byas pa rnams la log lta skyes pa dang/ 'gyod pa dang/ bsgrags pa dang yul dam pa la khong khro skyes pa'i rgyus zad pa dang/ log par bsngos pa ste/ de'i gnyen por bsngo ba'i yan lag go /zhes gsungs/ bla ma snga ma dag gi gsungs sgros las/ de yang dgos cher sdig pa byas pa/ bsod nams ma byas pa/ chos kyis phongs pa'i las byas pa 'am gzhan gyi chos la bar chad byas pa/ dge rtsa zad pa te bzhi'i gnyen por ro/ / @18a @#/ /dang po ni phyag 'tshal ba dang sdig pa bshags pa/ gnyis pa ni mchod pa dang yi rang/ gsum pa ni bskul ba dang gsol gdab/ bzhi pa ni bsngo ba ste sngags kyi las kha tshar gyi dod yin/ sngags kyi de phugs kyi khe mi myong bar phral gyi nyen 'byung nyen yong/ 'di kun phan yon tshe la nyen med pa'i las yin/ gegs sel ba dang tshogs rdzogs pa'i thabs mchog yin pas sngon gyi che bsgres mang pos kyang thugs dam gyi mthil du mdzad/ rang cag rnams kyang dge sbyor gyi gtso bo 'di kho na la bya zhes 'byung ngo/ /'di dag ni phan yon te legs par bsam la spro shugs 'phel bar byas te 'di dag la 'grus par bya'o/ /ces pa 'di ni gyi na ba blo bzang chos ldan gyis rang gi nyams len du sgrigs pa'o/ /'dis kyang rang gzhan thams cad myur du tshogs gnyis rdzogs sgrib gnyis sbyangs te 'tshang rgya bar gyur cig/ // @#/ (/byang chub lam gyi rim pa'i dmigs khrid kyis bcad mdor bsdus bzhugs so/ /) bla ma dam pa rnams la phyag 'tshal lo/ /'dir skal pa dang ldan pa'i gang zag rnam pa thams cad mkhyen pa'i sar bgrod pa'i skye bo mchog gi chos lugs byang chub lam gyi rim pa'i khrid kyis bcad mdor bsdus dgod pa la/ mdzad pa po'i che ba/ chos kyi che ba/ chos la nyan bshad ji ltar bya ba/ gdams pa dngos kyis slob ma ji ltar bkri ba'i rim pa bzhi/ mdzad pa po'i che ba la/ bstan pa'i bdag po ston pa sangs rgyas kyi che ba dang de nas rim par jo bo chen po la brgyud tshul/ jo bo chen po'i che ba dang de nas rim par rje bdag nyid chen po la brgyud @18b tshul; rje bdag nyid chen po'i che ba dang de nas rim par rang la brgyud tshul gsum/ chos kyi che ba la/ bstan pa thams cad 'gal med du rtogs pa/ gsung rab ma lus gdams ngag tu 'char ba/ rgyal ba'i dgongs pa bde blag tu rnyed pa/ nyes spyod chen po rang 'gags su 'gro ba'i che ba bzhi/ che ba gnyis dang ldan pa'i chos la nyan bshad ji ltar bya ba la/ chos nyan pa'i tshul; bshad pa'i tshul/ thun mong du 'jug tu ji ltar bya ba'i tshul gsum/ chos nyan pa'i tshul la/ chos thos pa'i phan yon/ chos nyan pa'i kun spyod/ snod kyi skyon gsum spong ba; 'du shes drug bsten pa'i tshul bzhi/ chos bshad pa'i tshul la/ chos bshad pa'i phan yon/ stong pa dang chos la rim 'gro skyed pa/ bsam pa dang sbyor ba ji lta bus bshad pa gsum/ gdams pa dngos kyis slob ma ji ltar bkri ba'i rim pa la/ lam gyi rtsa ba bshes gnyen bsten tshul/ bsten nas blo ji ltar sbyang ba'i rim pa gnyis/ lam gyi rtsa ba bshes gnyen bsten tshul la/ thun gyi ngo bo la ji ltar bya ba/ thun 'tshams su ji ltar bya ba gnyis/ thun gyi ngo bo la ji ltar bya ba la/ sbyor ba/ dngos gzhi/ 'jug gsum/ sbyor ba la/ gnas khang byi dor byas te sku gsung thugs kyi rten bkram pa/ mchod pa g.yo med cing bkod pa mdzes par bshams/ stan bde ba la lus drangs por bsrang ste skyabs 'gro sems skyed rgyud dang 'dres nges bya ba/ mdun gyi nam mkhar tshogs zhing gsal gdab pa/ bsags sbyang gi gnad bsdus pa'i yan lag bdun pa 'bul pa/ maNDala phul te man ngag bzhin du @19a @#/ /gsol ba 'debs pa ste sbyor ba'i chos drug dngos gzhi la/ dge ba'i bshes gnyen bsams pas bsten tshul/ sbyor bas bsten tshul gnyis/ bsams pas bsten tshul la/ bla ma'i yon tan bsam ste dad pa bskyed pa/ bka' drin bsam ste gus pa bskyed pa gnyis/ sbyor bas bsten tshul la/ zang zing gi dngos po 'bul ba/ lus ngag gis bsnyen bkur byed pa/ bla mas ci gsung bka' bzhin bsgrub dgos tshul gsum/ mjug gi bya ba la/ bla ma la gsol ba gdab pa/ bla ma rang la bstim pa/ sngags bzla ba; dge ba bsngo ba bzhi/ thun 'tshams su ji ltar bya ba la/ shes bzhin du spyod pa/ dbang po'i sgo sdom pa/ zas kyi tshod rigs pa/ mi nyal bar rnal 'byor la brtson zhing nyal ba'i tshe ji ltar bya ba/ ldang ba'i bsam pa dang khrus sogs ji ltar bya ba'i tshul lnga/ bsten nas blo ji ltar sbyang ba'i rim pa la/ dal 'byor gyi rten la snying po len par bskul ba dang/ snying po ji ltar len pa'i tshul dngos gnyis/ dal 'byor gyi rten la snying po len par bskul pa la/ dal 'byor ngos bzung ba/ don che bar bsam pa/ rnyed dka' bar bsam pa gsum/ snying po ji ltar len pa'i tshul dngos la/ skyes bu chung du dang thun mong ba'i lam rim/ 'bring dang thun mong ba'i lam rim/ chen po'i lam rim gsum/ chung du dang thun mong ba'i lam rim la; 'jig rten phyi ma don gnyer gyi blo bskyed pa/ 'jig rten phyi mar bde ba'i thabs bsten tshul gnyis/ 'jig rten phyi ma don gnyer gyi blo bskyed pa la/ 'chi ba mi rtag pa bsam pa/ @19b ngan 'gro'i nyes dmigs bsam pa gnyis/ 'chi ba mi rtag pa bsam pa la/ nges par 'chi ba bsam pa/ nam 'chi cha med bsam pa/ 'chi ba'i tshe chos ma gtogs gang gis kyang mi phan pa bsam pa ste rtsa ba gsum/ nges par 'chi bsam pa la/ 'chi bdag nges par 'ong zhing rkyen gang gis kyang bzlog tu med pa/ tshel snon pa med cing 'brid byed par mchad dang bcas pa; gson pa'i tshe yang chos bya ba'i long med pa ste rgyu mtshan gsum dang/ des na chos nges par bya bar zag bcad pa/ nam 'chi nges med bsam pa la/ spyir 'dzam bu gling ba'i tshel nges pa med pa/ 'chi rkyen mang zhing gson rkyen nyung ba/ lus shin tu nyams chung pa ste rgyu mtshan gsum/ des na chos da lta nyid nas bya bar thag bcad pa/ 'chi ba'i tshe chos ma gtogs gang gis kyang mi phan pa bsam pa la 'chi ba'i tshe rang gi gnyen zhe du grogs mdza' bshes kyis mi phan pa/ nor longs spyod zas gos gnas mal gyis mi phan pa/ lhan cig skyes pa'i sha rus rdos bcas kyi lus 'dis kyang mi phan pa ste rgyu mtshan gsum/ des na chos kho na bya bar thag bcad pa/ ngan 'gro'i nyes dmigs bsam pa la/ dmyal ba'i sdug bsngal/ yi dwags kyi sdug bsngal/ dud 'gro'i sdug bsngal bsam pa gsum/ dmyal ba'i sdug bsngal la/ tsha dmyal/ grang dmyal/ nye tshe nye 'khor gyi sdug bsngal gsum/ yi dwags kyi sdug bsngal la phyi'i sgrib pa can/ nang gi sgrib pa can/ zas skom la sgrib pa can gyi sdug bsngal gsum/ dud 'gro'i sdug bsngal la/ bying na gnas pa/ kha 'thor ba'i sdug @20a @#/ /bsngal gnyis/ 'jig rten phyi mar bde ba'i thabs bsten pa la/ dkon mchog gsum la skyabs su 'gro tshul/ bde legs thams cad kyi rtsa ba las 'bras la yid ches kyi dad pa bskyed tshul gnyis/ dkon mchog la skyabs su 'gro tshul la/ dkon mchog gsum skyabs su 'os tshul/ de la skyabs su 'gro tshul/ skyabs su song ba'i phan yon/ skyabs 'gro'i bslab bya la slob tshul bzhi/ bde legs thams cad kyi rtsa ba las 'bras la yid ches kyi dad pa bskyed tshul la/ las 'bras spyir bsam pa/ las 'bras so sor bsam pa; las 'bras la blang dor bya tshul gsum/ las 'bras spyir bsam pa la/ las 'bras so sor nges pa/ las 'zas 'phel che ba/ las ma byas pa dang mi 'phrad pa/ byas pa chud mi za bar bsam pa bzhi/ las 'bras so sor bsam tshul la/ nag po'i las 'bras bsam pa dkar po'i las 'bras bsam tshul gnyis/ nag po'i las 'bras bsam tshul la/ mi dge ba'i las lam bcu ngos bzung ba/ de'i rnam smin gyi 'bras bu/ rgyu mthun gyi 'bras bu/ bdag po'i 'bras bu bsam pa bzhi/ dkar po'i las 'bras bsam pa la/ dge ba bcu ngos bzung ba/ de'i rnam smin/ rgyu mthun/ bdag 'bras bsam pa bzhi/ las 'bras la blang dor bya tshul bsam pa la/ las 'bras kyi rnam bzhag ston pa'i rgyal ba'i gsung la yid ches bskyed pa/ mi dge ba spong zhing dge ba bsgrub ci thub la 'bad pa/ khyad par du rnam mkhyen bsgrub pa'i rten khyad par can rnam smin gyi yon tan brgyad ldan bsgrub tshul/ @20b sngar bsags kyi mi dge ba'i gnyen po stobs bzhi'i bshags bsngam la 'bad tshul bzhi/ skyes bu 'bring dang thun mong pa'i lam rim la/ thar pa don gnyer gyi blo bskyed pa/ thar bar bgrod pa'i lam gyi rang bzhin nyams su len tshul gnyis/ thar pa don gnyer gyi blo bskyed pa la sdug bden 'khor ba'i nyes dmigs/ kun 'byung 'khor ba'i 'jug rim bsam pa gnyis/ sdug bden 'khor ba'i nyes dmigs la/ 'khor ba so so'i sdug bsngal/ thun mong ba'i sdug bsngal bsam tshul gnyis/ so so'i sdug bsngal la/ ngan song gsum/ mi lha ma yin/ 'dod lha / khams gong ma'i lha'i sdug bsngal bsam tshul lnga/ thun mong ba'i sdug bsngal la/ sdug bsngal drug sdug bsngal gsum/ mdor na 'khor ba thams cad sdug bsngal gyi rang bzhin can du bsam pa gsum/ kun 'byung 'khor ba'i 'jug rim la/ 'khor ba'i rgyu nyon mongs ngos bzung ba/ des las sogs pa'i tshul/ 'chi 'pho ba dang nying 'tshams sbyor tshul gsum/ nyon mongs ngos bzung ba la/ nyon mongs bcu ngos bzung ba/ de'i rgyu rkyen ngos bzung ba/ de'i nyes dmigs bsam pa gsum/ nyon mongs la brten nas/ las sogs tshul la/ ma rig pa dang 'jigs lta la brten nas nyon mongs gzhan skye ba/ de'i dbang gis las sogs pa'i tshul gnyis/ 'chi 'pho ba dang nying 'tshams sbyor tshul la/ 'chi 'pho byed tshul/ shi nas bar do 'grub lugs/ bar do ba de nyid 'tshams sbyor tshul gsum/ 'chi pho byed tshul la/ 'chi ba'i rkyen/ 'chi ba'i sems/ 'chi ba'i tshe lus kyi drod gang nas sdud pa gsum/ @21a @#/ /bar do 'grub lugs la/ bar do ji ltar 'grub pa/ bar do'i lus/ tshe tshad/ sdug bsngal bzhi/ thar bar bgrod pa'i lam gyi rang bzhin nyams su len pa la/ 'khor ba las thar pa'i thabs ngos bzung ba/ las dang po bas thog mar lhag pa'i bslab pa gsum gyi gzhi rten so thar gyi tshul khrims la 'bad dgos pa/ de la ltung ba 'byung ba'i sgo bzhi 'gog dgos tshul gsum/ skyes bu chen po'i lam rim la/ theg pa chen po'i lam la dang po nas 'jug dgos tshul/ der 'jug pa'i sgo spyod pa'i rten sems bskyed tshul/ sems bskyed nas spyod pa la slob tshul gsum/ theg pa chen por 'jug pa'i sgo spyod pa'i rten sems bskyed tshul la/ rgyu 'bras man ngag bdun gyi sgo nas bskyed tshul/ bdag gzhan mnyam brje'i sgo nas bskyed tshul gnyis/ rgyu 'bras man ngag bdun gyi sgo nas sems bskyed tshul la/ sems can thams cad la sems snyom par sgrub pa/ gzhan don don gnyer gyi blo bskyed pa/ sems bskyed tshul dngos gsum/ gzhan don don gnyer gyi blo bskyed pa la/ mar shes/ drin dran/ drin bzo/ /yid 'ong gi byams pa/ snying rje chen po/ /lhag bsam rnam dag ste drug bdag gzhan mnyam brje'i sgo nas sems bskyed tshul la/ gtong len sbyong ba dang/ sems bskyed tshul gnyis/ sems bskyed nas spyod pa la slob tshul la/ spyod pa spyil slob tshul dang/ khyad par du phar phyin tha ma gnyis la slob tshul/ mthar rdo rje theg pa la 'jug dgos tshul gsum/ spyod pa spyi la slob tshul la/ rang rgyud smin byed phyin drug la @21b slob tshul/ gzhan rgyud smin byed bsdu bzhi la slob tshul gnyis/ rang rgyud smin byed phyin drug la slob tshul la/ sbyin pa tshul khrims bzod pa brtson 'grus bsam gtan shes rab kyi phar phyin la slob tshul drug sbyin pa'i phar phyin la slob tshul la/ de'i phan yon/ zang zing gi sbyin pa/ mi 'jigs pa'i sbyin pa/ chos kyi sbyin pa la slob tshul bzhi/ tshul khrims kyi phar phyin la slob tshul la/ de'i phan yon/ nyes spyod sdom pa/ dge ba chos sdud/ sems can don byed kyi tshul khrims la slob tshul bzhi/ bzod pa'i phar phyin la slob tshul la; de'i phan yon/ gnod byed la ji mi snyam pa/ sdug bsngal dang len/ chos la nges sems kyi bzod pa la slob tshul bzhi/ brtson 'grus kyi phar phyin la slob tshul la/ de'i phan yon/ go cha'i brtson 'grus/ dge ba chos sdud/ sems can don byed kyi brtson 'grus la slob tshul bzhi/ bsam gtan gyi phar phyin la slob tshul la/ de'i phan yon/ ngo bo'i sgo nas dbye ba/ phyogs kyi sgo nas dbye ba/ byed las kyi sgo nas dbye ba'i bsam gtan la slob dgos tshul bzhi/ shes rab kyi phar phyin la slob tshul la/ de'i phan yon/ kun rdzob rtogs pa'i shes rab/ don dam rtogs pa'i shes rab/ sems can gyi don byed tshul rtogs pa'i shes rab la slob dgos tshul bzhi/ gzhan rgyud smin byed bsdus ba zhi la slob tshul la; sbyin pas 'khor sdud pa/ snyan smras dge ba la sbyor ba/ don spyod kyis dge ba spyod du 'jug pa/ don mthun gyis rang yang de bzhin spyod pa la slob tshul bzhi/ khyad par du phar phyin @22a @#/ /tha ma gnyis la slob tshul la/ bsam gtan gyi ngo bo zhi gnas bsgrom tshul/ shes rab kyi ngo bo lhag mthong ba sgom tshul gnyis/ zhi gnas bsgom tshul la/ de'i phan yon/ zhi gnas kyi dmigs pa/ de la sems gtong tshul/ zhi gnas skye ba'i gags byed 'gog ? tshul zhi gnas skye ba'i mthun rkyen dran shes bsten tshul lda/ shes rab kyi ngo bo lhag mthong bsgom tshul la/ de'i phan yon/ shes rab kyi yul bdag med gtan la 'beb tshul/ bdag med la dmigs pa'i lhag mthong bsgrub tshul gsum/ bdag med gtan la 'beb tshul gang zag gi bdag med/ chos kyi bdag med gtan la 'beb tshul gnyis/ gang zag gi bdag med gtan la dbab pa la/ dgag bya ngar 'dzin lhan skyes kyis bdag bden par 'dzin tshul ngos 'dzin pa dgag bya nges pa'i gnad/ dar 'dzin lhan skyes kyis bzung da ltar gyi bdag yod na lus sems gnyis dang gcig tha dad gang rung cig tu grub dgos pa khyab pa nges pa'i gnad / de 'dra'i bdag lus sems gnyis dang gcig tu ma grub pa gcig bral nges pa'i gnad/ lus sems gnyis dang tha dad du ma grub pa du bral nges pa'i gnad te/ gnad bzhi'i dpyad pa byed tshul; de 'dra'i bde lus sems gnyis dang gcig tha dang gang du 'ang ma grub pas gtan nas med par nges pa'i nges shes skyong tshul lnga/ chos kyi bdag med gtan la dbab pa la/ rang gi lus bden par 'dzin pa'i bden 'dzin lhan skyes kyi lus ji ltar bzung brtags pa sogs gnad bzhi'i dpyad pa byed tshul/ des chos thams cad mtshon tshul gnyis/ mthar sngags la @22b 'jug tshul la lam mthun mong ba'i rim pa rnams la blo legs par sbyangs pa'i 'og tu rdo rje slob dpon mtshan nyid dang ldan pa las dbang zhu dgos pa/ dbang dus su khas blangs pa'i dam tshig dang sngom pa srung dgos pa/ mtshan bcas mtshan med dam rim gnyis kyi rnal 'byor la bslab dgos pa/ rang cag las dang po ba rnams kyis snga ma snga ma rnams da lta nas lag tu len pa dang phyi ma phyi ma da lta lag len mi btub pa rnams smon pa'i yul du byas nas/ mdor na dngos sam 'dun pa ci rigs kyi sgo nas bshes gnyen bsten tshul nas zung 'jug gi bar thams cad nyams su len pa la 'bad de dal 'byor thob pa don ldan du bya dgos par bstan pa'o/ /de ltar byang chub lam gyi rim pa'i dmigs khrid nyams su len tshul gyis bcad mdor bsdus 'di ni snyoms las pa ngag dbang blo bzang chos ldan gyis mtsho bdun gyi lha khang chen mor sdom brtson sde snod 'dzin pa'i dka' rab 'byams mang pos gtso byas/ rnam dpyod mos 'dun can gyi dge tshul slong sogs btsun skya mang po la lam rim gyi dmigs khrid phog skabs/ rang gi gam du nye bar gnas pa 'ga' zhig gis sa bcad logs su bkod pa zhig yod na blo la bzung nas khrid dmigs gyi bshad pa tshor bsam blo la bzung nas khrid dmigs gyi bshad pa tshor bsam blo btang na 'char sla la sdums bde ba zhig 'ong ba 'dra bas sa bcad logs su bsgrigs pa zhig gyis zhes bskul ba'i ngor bsgrigs pa ste/ yi ge pa ni chos 'di la mos pa'i dpyod ldan dge tshul dpal bzang ngo/ / 'dis kyang rgyal ba blo bzang grags pa'i bstan pa'i snying po chos tshul dri ma med pa 'di nyid phyogs dus thams cad du dar zhing rgyas la yun ring du gnas par gyur cig / //