@#/ (/byang chub lam gyi rim pa'i zhal shes blo bzang zhal lung zhes
bya ba bzhugs so/) /kun mkhyen rgyal ba'i dbang po tsong kha pa/
/yongs rdzogs bstan pa'i mnga' bdag chos kyi rgyan/ /

gangs can grub pa'i dbang phyug yongs 'dzin rje/ /yab sras brgyud
par bcas la gus pas 'dud/ /de la 'dir rnam pa thams cad mkhyen pa'i
sar bgrod par byed pa'i skye bo/ /

mchog gi chos lugs byang chub lam gyi rim pa'i khrid nyams su len
pa la nye bar mkho ba'i man ngag 'ga' zhig brgyud ldan bla ma dam
pa'i gsung rgyun ji lta ba bzhin du yi ger 'god par bya'o/ /

'di la gnyis/ thun gyi ngo bo la ji ltar bya ba dang/ thun gyi 'tshams
su ji ltar bya ba'o/ /dang po la gsum/ sbyor ba dang/ dngos gzhi dang/
mjug go /dang po la ji skad du byang chub lam gyi

rim pa las/ thun gyi ngo bo la ji ltar bya ba la/ dang po sbyor ba'i
chos ni drug ste/ zhes gsungs pa ltar drug las/ dang po gnas khang
byi dor byas la sku gsung thugs kyi rten bkram

pa ni; ;lam rim las/ gser gling pa'i rnam thar yin pas gnas khang legs
par byi dor byas la sku gsung thugs kyi rten legs par bkram/ zhes
gsungs pa ltar bya

ba la; gnas ni lha cig jo bo chen pos/ las dang po yi gang zag gis/
/lus dben pa la ma bsten par/ /sems dben rnyed par dka' ba'i phyir/ /'dre
spangs

@29a @#/ /nags su gnas par bya/ /'dres pas 'dris shing chags par byed/ /de
yis 'khor ba'i 'khor lo bskor/ /de lta'i 'dre ba spang byas la/ /rtag

tu bag dang ldan par bya/ /zhes gsungs pa ltar rang cag las dang
po pa rnams kyis dben pa bsten pa gal che zhing/ de yang mdo sde
rgyan las/ blo ldan gang du sgrub pa'i yul/ /

legs par rnyed dang gnas bzang dang/ /sa bzang ba dang grogs
bzang dang/ /rnal 'byor bde ba'i yo byad ldan/ /zhes gsungs pa lta
bu'i phun sum tshogs pa'i gnas

sam; tha na'ang srog dang tshangs spyod la 'tshe ba med cing dge
sbyor 'phel ba'i gnas shig bsten dgos pas de lta bu'i gnas su khang
pa'am brag phug sogs gang yang rung ba'i nang

du bla ma gser gling pa'i phyag bzhes ltar byi dor legs par byas la
rang nyid rig pa dangs shing sdod nyams spro bar bya/ de'i nang gi
dbus sam phugs su ji skad du 'jam dpal rtsa

rgyad las/ bu khyod 'jam dpal gzhon nu nyon/ /nga ni 'jig rten mya
ngan 'das/ /sa steng stong par gyur pa dang/ /chos kyi mdzod kyang
zhig pa dang/ /nyan thos rnams

kyang 'das pa na/ /rkang gnyis dam pa ston pa yi/ /sku gzugs mchod
rten dag kyang bya/ /spos dang dri dang byug pa yis/ /mchod dang
bsnyen bkur bya ba dang/ /

rnam pa sna tshogs gos mchog dang/ /gzhan yang nor bu'i gdub kor
rgyan/ /rnam pa sna tshogs bza' dang bca'/ /yang dag sbyar ba dbul
bar bya/ /rnam pa sna

@29b tshogs phun sum tshogs/ /ci 'dod kha zas za ba la/ /de bzhin sngags
ni bzlas byas dbul/ /sems can dge ba'i rtogs gnas 'gyur/ /dam pa'i 'gro
ba'i skye gnas

su; ;grong mchog dag tu skye bar 'gyur/ /mthar ni byang chub gzhol
'gyur zhing/ /phyi nas zhi bar yang dag 'gro/ /zhes gsungs pa'i phan
yon can gyi dge ba sogs

pa'i zhing rten khri phun sum tshogs pa'i steng du bka' gdams pa
rnams thub dbang gi sku re 'bral spang mdzad pa'i phyag srol ltar
yod na thub dbang gi skus gtso byas pa'i sku gsung thugs kyi rten

gang yod leg spar dgram/ de lta bu ma 'byor na steg mthon por rdo
leb lta bu'i steng du dbus dang phyogs 'tshams su 'bru'i tshom bu re
dgod la steng du lam rim brgyud pa sogs mchog gsum

dpag tu med pa bzhugs pa'i mos pa bya/ sgrub khang gi phyogs bzhir
thob zhi brtsegs te rgyal chen bzhir bskyed la mchod gtor phul
nas 'phrin las 'chol/ gnyis pa mchod pa

g.yo med cing bkod pa mdzes par bshams pa ni/ lam rim las mchod
pa g.yo med par btsal ya bkod pa mdzes par bshams zhes gsungs pa
ltar bya dgos la de'i tshul ni/ /

bshad ma thag pa ltar bkram pa'i rten gyi mdun du mchod lcog la
sogs pa'i khar rgyu bzang po las grub pa'i snod du chu gtsang mar
sman spos bzang po btab pa'i yon chab sogs chu bzhi

nyer spyod lnga/ rol mo/ /'dod yon lnga/ de dag kyang lam rim las/
mthun pa'i dngos po ni/ mi mthun pa bab las byug pa dang mar khus
'khrub dang gu gul gyis bdug pa

@30a @#/ /dang arga'i ? me tog la sogs pa dang/ gzhan yang yo byad
rung ba min pa dang bral ba rung ba'o/ /zhes 'byung ba ltar mi rung
ba ma yin pa/ gzhan yang rgyal

srid rin po che sna bdun/ bkra shis kyi rtags brgyad dang rdzas
brgyad rnams dngos sam bcos ma ci rigs/ sman sna/ 'bru sna/ bza' bca'
bzang po/ /rin po che las grub

pa'i maNDal sogs mchod pa'i yo byad bzang mang yod na/ bdag nyid
chen pos ji skad du yod bzhin du gtong mi nus par/ bdag ni bsod
nams mi ldan bkren chen te/ mchod pa'i nor

gzhan bdag la cang ma mchis/ zhes zer ba ni/ po to ba'i zhal nas/
dung por dri ma can tsig tu spang spos re btab nas tsan dan ga bur
spos kyi chu zhes dmus long gis mig ldan la

mgo skor byed gsungs pa dang 'dra'o/ /zhes gsungs pa lta bur ma
song bar rang la gang yod kyi mchod pa'i dngos po rnams/ dge
bshes 'ban gyis lan gcig yon bdag 'ga' re 'od

zer bas/ mchod bshams bzang po cig bshams te/ thugs bsam la brtag
pa na yon bdag gi ngor mdzes chos su 'dug pas slang thal ba spar
gang gtor nas/ dge slong

rang zag zog med par bzhugs shig gsungs/ zer ba'i lo rgyus lta bu
cig dgos pas/ gzhan gyi mig sngar mdzes chos dang/ tshe 'di'i rnyed
bkur grags pa sogs dang /

phyi ma'i mngon mtho'i bde ba dang/ rang nyid gcig bu'i phyir zhi ba
de rnams don du gnyer bas ma yin par/ gzhan don du bla med byang
chub thob pa'i phyir du dkon mchog mchod pas

@30b tshogs pa sogs pa'i bsam pas/ le lo dang bag med dang khyad
gsong sogs kyis sla chos dang bcas bder ma song bar gtsang sbra
byed cing bkod pa mdzes par bshams/ rang nyid shin tu

dbul bas de lta bu ma 'byor na'ang/ lam rim las/ phu chung ba'i zhal
nas ngas dang po spang spos sna tsha ting nge ba phul/ de nas ring
bu bzhi sbyor mngar sing ba phul da lta a ka ru dang du ru skal

sogs pa bsung ching nge ba 'bul gsungs pa ltar/ mchod pa chung
ngu la brnyes nas ma phul na tshe ril po de 'dra zhig tu 'grol/ chung
rim nas nan tan bskyed na je bzang du 'gro bas khong gi phyag

len ltar bslab/ zhes gsungs pa ltar yin pas tha na rdza phor gtsang
ma cig tu chu gtsang ma'i yon chab dang/ blci'am sa la bzos pa'i
maNDal/ de 'ang ma 'byor tshe rdo le blta bu'i

steng du tshom bu dgong pa sogs bya/ de ltar 'byor ba dang bstun
nas bshams te/ mchod pa'i sprin gyi gzungs/ oM na mo b+ha ga wa te
bdzra sE ra pra ma dz+ha ne/ ta thA ga tA arha te

samyaksaM ? bud+hA ya/ ta rya thA/ oM bdzre bdzre/ ma hA bdzre/
mahA te dza bdzre/ ma hA bidya bdzre/ ma hA bo d+hi tsi tta bdzre/
ma hA bo d+hi maNTo pa saM kra ma Na bdzre sarbakarma A ba ra NA
bi

shod+ha na bdzre swA hA/ zhes pa lan bdun nam gsum brjod de kun
tu bzang po'i mchod pa'i char babs par bsam/ gsum pa stan bde ba la
'khod nas skyabs 'gro sems bskyed

bya ba ni/ lam rim las/ gnas mal bde ba la lus drang por bsrang ste/
skyil mo krung dam skyil mo krung phyed du yang rung ba'i spyod
lam gyis 'khod nas skyabs su 'gro ba dang

@31a @#/ /sems bskyed pa rgyud dang 'dris nges pa cig bya/ zhes gsungs
la de yang gong du bshad pa ltar bkram pa'i rten la mngon du
phyogs par rang nyid 'dug pa'i 'og gzhir

sgrub pa las mi 'gyur ba'i rten 'brel dus dkar gyis g.yung drung ris
chos 'khor du 'khyil ba 'bri/ de'i steng du tshe ring ba dang ston pa'i
rnam mthar dang mthun pa'i phyir rtswa dur brtse mo dbus su

bstan la legs par bkram/ de'i steng du nang tshang can la sogs pa'i
stan 'jam po bting pa'i rgyab phyogs cung zad mtho ba'i mal bya/ de
lta bu'i bde ba'i stan la rang nyid 'dug

pa'i kun spyod/ lam rim las sgom rim bar pa dang tha ma las gsungs
pa ltar stan shin du 'jam po bde ba la lus kyi kun spyod chos brgyad
dang ldan par bya'o/ /zhes zhig nas kyi

skabs su gsungs kyang 'dir yang byung na phun sum tshogs pas/ rkang
pa dkyil krung yongs rdzogs sam phyed pa gang rung bya/ mig ha
cang mi dbye mi zum par sna rtser gtang/ lus

ha cang mi dgyi mi sgu bar drang por bsrang/ 'phrag pa gnyis thad
kar mnyam par bzhag /mgo mi mtho mi dma' zhing ma yo par sna nas
lte bar drang por bzhag /so dang mchu rang

lugs su tha mal bar gzhag /lce ya so'i drung du gzhag /dbugs sgra
can dang rngam pa dang rgod bag can du mi btang bar rgyu ba mi
tshor zhing dal bus 'bad med du 'jug pa de ltar bya'o/ /

de lta bu'i spyod lam gyis 'khod de/ rje bdag nyid chen pos/ legs nyes
thams cad kyi rtsa ba ni yid kho na yin te/ nyes par spyod pa dang
legs pa la 'jug pa'i sgo ni gsum du

@31b nges la lus ngag ni yid kyi gzhan dbang can yin pa'i phyir/ des
na thog mar kun slong gi bsam pa tshig tsam du ma song bar 'chos
pa cig shin tu gal che ba lags/ zhes gsungs shing/ des na

paN chen thams cad mkhyen pas kyang/ sgom rnams kun gyi dang po'i
mgo /rgya gar skad mtshungs rang rgyud la/ /legs par brtags pa yin
no zhes/ /zla med bla ma mchog de bzhed /

ces gsungs pa ltar/ thog mar rang rgyud la legs par brtags nas kun
slong 'cho ba gnad che bas dran pa nang du legs par bkug ste rang
rgyud la blo dge mi dge'i phyogs gang shugs che ba legs

par brtags/ dang po shugs che ba'am lung ma bstan lta bur 'dug na
rlung sna bug nas nang du rdub pa dang mnyam du phyogs bcu'i
mchog gsum dam pa rnams kyi byin brlabs zhugs nas

sems can thams cad kyi don du rdzogs pa'i sangs rgyas kyi go 'phang
myur ba nyid du thob par bya/ de'i phyir du bla ma dkon mchog la
skyabs su 'gro bar bya'o snyam pa'i dge sems shugs drag

skyes pa'i mos pa yang yang byas la dge sems khyad par can bskyed/
phyi ma shugs che bar 'dug na rlung phyir 'bud pa dang mnyam du
blo ngan pa de du ba nam mkha' la song nas yal ba ltar phyir la

thon te yal ba'i mos pa yang yang byas te/ zhi ba'i mthar sngar bzhin
dge sems drag po bskyed par bya/ dge sbyor gang la 'jug na'ang thog
ma nas kun slong ma dag na/ tshes

gcig nas 'chug na bcwo lnga'i bar zer ba bzhin yin pas/ kun slong
'cho ba shin du gal che gsungs/ de nas jo bo chen pos/ sgrub par
'dod pa'i gang zag gis/ /

@32a @#/ /sa ltar chos kun gzhir gyur bas/ /dang por skyabs su legs
'gro zhing/ /de yi bslab pa'i chos la bslab/ /zhes dang lam rim las
kyang/ bstan

pa la 'jug pa'i sgo dam pa skyabs su 'gro ba zhes gsungs pa ltar/ dang
por skyabs 'gro byed dgos pas/ skyabs yul gsal gdab pa ni/ rang gi
mdun gyi nam mkhar seng ge chen

po brgyad kyis btegs pa'i rin po che'i khri yangs shing rgya che ba'i
steng du/ dbus su seng ges btegs pa'i rin po che'i khri chung du zhig
gi steng du sna tshogs pad nyi zla ba'i dkyil 'khor gyi

steng du ngo bo rang gi drin can rtsa ba'i bla ma yin pa la/ rnam pa
bcom ldan 'das rgyal ba shAkya thub pa sku mdog gser btsom lta
bu dbu gtsug tor dang ldan pa zhal gcig phyag gnyis kyis

g.yas sa gnon dang g.yon mnyam bzhag gi steng na bdud rtsis
gang ba'i lhung bzed bsnams pa/ sku la chos gos ngur smrig gi mdog
can gsum mdzes par gsol pa/ mtshan

dpes brgyan pa dngas gsal 'od kyi rang bzhin can/ sku las skyes pa'i
'od kyi phung po'i dbus na zhabs rdo rje'i dkyil krung gis bzhugs pa/
de'i mdun du sna tshogs pad nyi zla

ba'i dkyil 'khor gyi steng du rtsa ba'i bla ma zhal mjal dus kyi rnam
pa can la dngos su chos 'brel yod pa'i bla ma rnams kyis bskor nas
bzhugs pa/ g.yas su pad nyi zla ba'i

gdan la rje btsun byams mgon la rgya chen spyod rgyud kyi bla ma
rnams kyis bskor ba/ rgyab du pad ma nyi zla'i gdan la rgyal ba rdo
rje 'chang la nyams len byin rlabs brgyud pa'i bla ma rnams

@32b kyis bskor ba/ g.yon du pad nyi zla ba'i gdan la rje btsun 'jam
dbyangs la/ zab mo lta ba rgyud kyi bla ma rnams kyis bskor ba/ de
dag gi mtha' skor du yi dam sangs rgyas byang sems nyan

rang srungs ma'i tshogs dpag tu med pas bskor nas bzhugs pa/ de dag
rang rang gi mdun na gdan khri phun sum tshogs pa la rang rang gis
gsungs pa'i lung gi chos rnams 'od kyi rang bzhin can

gyi po ti'i rnam par yod pa rnams bdag nyid kyi mos pa dang mchog
gsum gyi thugs rje las grub par bsam/ rang gi mtha' skor du rigs
drug gi sems can thams cad skyabs yul la gus

pa'i tshul gyis 'khod par gsal gdab/ skyabs su 'gro tshul ni/ phyogs kyi
glang pos/ gting mtha' med pa'i 'khor ba ni/ rgya mtsho'i nang na
rnam par gnas/ /

'dod chags la sogs mi bzad pa'i/ /chu srin gyis ni lus zos bas/ /de ring
gang la skyabs su mchi/ /zhes gsungs pa ltar bdag dang sems can
thams cad thog ma med

pa nas 'khor ba sdug bsngal gyi rgya mtsho chen por bzod par dka'
ba'i sdug bsngal dpag tu med pa myongs shing/ da dung nyon mongs
kyi gzhan dbang du gyur pas de las skyobs pa'i skyabs

cig ma bsten na sdug bsngal mu mtha' med pa myong bar snang bas
skyabs cig bsten dgos par 'dug /de la skyabs su su 'os na brgya lnga
bcu pa las/ gang zhig la ni nyes pa kun/

gtan nas yong ye mi mnga' zhing/ /gang la rnam pa thams cad du/
/yon tan thams cad gnas gyur pa/ /gal te sems shig yod na ni/ /de nyid
la ni skyabs 'gro zhing/ /

@33a @#/ /de bstod de ni bkur ba dang/ /de yi bstan la gnas pa'i rigs/
/zhes gsungs pa ltar skyon kun zad cing yon tan kun rdzogs pa cig
'os/ de ltar na de lta bu

dang ldan zhing skyabs su 'os pa'i rgyu mtshan gzhan/ rang nyid 'jigs
pa thams cad las grol/ gzhan de las sgrol pa'i thabs la mkhas kun
la thugs rje chen po nye ring med par

'jug phan btags ma btags thams cad kyi don mdzad pa'ang mnga' bas
na sangs rgyas bcom ldan 'das dang des mtshon nas chos dang dge
'dun dkon mchog rnams skyabs su bsten

par rigs te/ skyabs 'gro bdun cu pa las/ sangs rgyas chos dang dge
'dun ni/ /thar pa 'dod pa rnams kyi skyabs/ /zhes gsungs pa ltar ro/ /'o
na de rnams yon

tan dang ldan par skyabs su 'os na yon tan ji lta bu dang ldan
snyam na/ sangs rgyas bcom ldan 'das ni sku gsung thugs 'phrin las
kyi yon tan bzhi dang ldan te/ dang po ni sku la bstod pa

las; nye bar zhi la yid du 'ong/ /'bar la gnod pa mdzad mi mnga'/ /dul
la rngam brjid che ba yi/ /sku 'dis su zhig dad mi mdzad/ /ces dang/
mtshan dang dpe

byad bzang 'bar ba/ /khyod kyi sku las ma gtogs par/ /de bzhin gshegs
pa'i yon tan 'di/ /gzhan gang zhig la legs gnas 'gyur/ /zhes dang/ dpe
la bstod

pa las; khyod sku mtshan gyis spras gyur ba/ /mdzes gyur mig gi bdud
rtsi ni/ /sprin med ston gyi nam mkha' la/ /skar ma'i tshogs kyis spras
pa 'dra/ /zhes sogs

@33b gsungs pa ltar ro/ /gnyis pa ni/ bsngags 'os bsngags bstod las/
mos pa du ma dang ldan pa/ /mang po 'khod par gyur pa la/ /gsungs
gcig bka' ni stsal ba

las; ;du ma lta bur snang gyur te/ /kun gyis 'di ni bdag gi ched/ /kho
na'o snyam du go ba dang/ /de las ya mtshan che ci mchis/ /de las ngo
mtshar che ci mchis/ /

zhes dang/ brgya lnga bcu pa las/ mkhas pa rnams kyi dga' ba bskyed/
/bar ma rnams kyi blo yang spel/ /tha ma'i rab rib rnams 'joms bas/
/gsungs 'di skye

bo kun la sman/ /zhes pa ltar ro/ /gsum pa ni/ bsngags 'os bsngags
bstod las/ khyod 'ba' zhig gi ye shes kyis/ /shes bya mtha' dag khyab
lags kyi/ /

khyod las gzhan pa thams cad kyi/ /shes bya kho na lhag pa lags/
/zhes dang/ bcom ldan dus kun gtogs pa'i chos/ /rnam kun 'byung
gnas thams cad ni/ /

lag mthil skyu ru ra lta bur/ /khyod kyi thugs kyi spyod yul gyur/
/zhes dang/ brgya lnga bcu pa las/ 'gro ba 'di dag thams cad ni/
/khyad med nyon mongs rnams

kyis bsdams/ /khyod ni 'gro ba'i nyon mongs dag /dgrol slad yun ring
thugs rjes bsngams/ /dang por khyod la phyag bgyi 'am/ /'on te gang
gis 'khor bar khyod/ /

skyon mkhyen yun ring de lta bur/ /bzhugs mdzad thugs rje che la
bgyi/ /zhes gsungs pa ltar ro/ /bzhi ba ni/ bsngags 'os bsngags bstod
las/ /khyod

@34a @#/ /kyis gang las 'gro ba dag /ma drangs rgud pa de gang mchis/
/gang dang 'jig rten ma sprad pa'i/ /phun tshogs de yang gang zhig
mchis/ /zhes gsungs

pa ltar ro/ /chos kyi phan yon ni de lta bu'i sangs rgyas bcom ldan
'das de skyon spangs pa dang yon tan sgrub pa'i bdag nyid chos 'gog
pa dang lam gyi bden pa mngon du byas pa dang sgom

pa las byung bas na chos ni phan yon dpag tu med pa dang ldan te/
chos yang dag par sdud pa las gang sangs rgyas bcom ldan 'das de
dag ni yon tan mtha' yas mu med pa ste/ de dag ni

chos las skyes pa chos kyi bgo skal la spyod pa/ chos kyis sprul pa
chos kyi bdag por gyur pa chos las byung ba chos kyi spyod yul ba
chos la rton pa chos kyis grub pa ste/ zhes gsungs

pa ltar ro/ /brgya lnga bcu pa las/ bgrod pa gcig dang thabs bde
dang/ /legs par 'brel dang nyes pa med/ /thog ma bar dang mthar dge
bas/ /khyod kyi bstan 'dra

gzhan la med/ /ces gsungs pa ltar sangs rgyas kyi bstan pa lung gi
dam chos kyi yon tan yang bsam par bya'o/ /chos yang dag par sdud
pa'i mdo las/ dge 'dun ni chos smra

ba chos spyod pa chos sems pa chos kyi zhing chos 'dzin pa chos la
rton pa chos la mchod pa/ chos kyi bya ba byed pa/ chos kyi spyod
yul ba chos spyod pa phun sum tshogs pa rang bzhin gyis

drang ba rang bzhin gyis dag pa snying rje'i chos can snying rje
dang ldan pa rtag tu dben pa'i spyod yul ba rtag tu chos la gzhol
ba rtag tu dkar po spyod pa'o snyam mo zhes bya ba la sogs pa'o/
/zhes

@34b gsungs pa ltar ro/ /de ltar na bsngags 'os bsngags bstod las/
phyi yi yan lag stobs kun ni/ /khyod kyis yang dag bsgrubs lags te/
/nang gi stobs ngag ma tshang pas/ /

byis pa rnams ni sdug bsngal bsten/ /zhes gsungs pa ltar rang skyob
pa'i rgyu gnyis las/ phyi'i yan lag ni sangs rgyas bcom ldan 'das kyis
bsgrubs zin 'dug kyang nang gi yan lag blo

bkal nas skyabs su 'dzin pa ma byung bas sdug bsngal bar 'dug /des
na sngon chad kyang skyabs 'di lta bu ma bsten bas thogs med nas
da lta'i bar du sdug bsngal bar mtshams med

par myangs shing da dung yang ma bsten na mu mtha' med par
myong ba dang/ bsten na nges par skyob pa'i skyabs bsten du yod pa
rnams shes bzhin du ma bsten na/ snying rul bdag shin

tu yang tha chad par 'gyur pas da bdag dang sems can thams cad
kyis bla ma dkon mchog rnams la dpung gnyen zhu bas skyid sdug
legs nyes ci byung yang khyed rang rnams mkhyen no snyam pa'i

blo ling bsgyur gyis/ bla ma la skyabs su mchi'o/ /zhes brjod pas mdun
gyi skyabs yul spyi dang khyad par bla ma rnams kyi sku'i cha las
bdud rtsi 'od zer dpag tu med pa byung /

rang gzhan sems can thams cad kyi sgo gsum la zhugs pas thog med
nas bsags pa'i sdig sgribs thams cad dang khyad par du yang bla ma'i
sku la bsngos gsung ngag bcag thugs

rgyud dkrugs pa sogs mdor na bla ma'i dam tshig dang 'gal ba'i nyes
ltung thams cad byang zhing dag /lus dngas gsal 'od kyi rang bzhin
du gyur/ bla ma'i sku gsung thugs kyi byin

@35a @#/ /rlabs zhugs pas/ dpal ldan bla ma rnams kyi skyabs 'og tu
tshud byung snyam du bsam/ sangs rgyas la skyabs su mchi'o/ /zhes
brjod pas skyabs yul

spyi dang khyad par sangs rgyas rnams kyi sku'i cha thams cad las
bdud rtsi 'od zer dpag tu med pa byung/ rang gzhan sems can thams
cad kyi sgo gsum la zhugs pas/ khyad par du yang

'jig rten pa'i lha gzhan skyabs su bsten pa/ sangs rgyas kyi sku
brnyan la brnyas pa sogs sangs rgyas la skyabs su song ba'i bslab
bya dang 'gal ba'i nyes ldung thams cad sbyang zhing

dag /lus x de rnams kyi sku gsung thugs kyi byin brlabs zhugs pas de
rnams kyi thugs rje'i skyabs 'og tu tshud byung snyam du bsam/ chos
la skyabs su mchi'o/ /zhes

brjod pas skyabs yul spyi dang khyad par 'phags pa'i gang zag rnams
kyi thugs rgyud kyi spang rtogs kyi yon tan rnams bdud rtsi 'od zer
gyi rnam pa dang/ lung gi chos po ti'i rnam pa can

las dbyangs gsal gyi yig 'bru'i rnam pa dpag tu med pa byung/ rang
gzhan x khyad par du yang sems can la 'tsho ba/ glegs ba ma la ma
gus pa sogs chos la skyabs su song ba'i

bslab bya dang 'gal ba'i sdig sgrib thams cad byang zhing dag /lus x
lung rtogs gi yon tan khyad par can skyes pas chos dkon mchog gi
skyabs 'og tu tshud byung snyam du bsam/

dge 'dun la skyabs su mchi'o/ /zhes brjod pas skyabs yul spyi dang
khyad par du byang sems nyan rang srungs ma rnams kyi sku'i cha
las 'od zer x khyad par du yang grogs mu stegs

@35b can dang 'grogs pa/ dge sbyong gi rtags tsam dang/ de 'dzin pa
yan chad la ma gus pa sogs dge 'dun la skyabs su song ba'i bslab bya
dang 'gal ba'i sdig sgrib thams cad byang zhing x de

rnams kyi byin brlabs zhugs shing nyan rang byang sems rnams kyis
skyabs bsgrub pa'i zla grogs dang srungs ma rnams kyis 'gal rkyen
sel zhing mthun rkyen bsgrub par zhal gyis bzhes pas

de rnams kyi skyabs 'og tu tshud byung snyam du bsam/ de lta bu'i tshul
gyis bla ma la skyabs su mchi'o/ /sogs lan nyer gcig nas brgya stong
sogs skabs bsdun bya/ de ltar

skyabs su song nas gang gis skyobs pa ni/ tshoms las/ srid pa'i zug
rngu gcod byed lam/ /ngas ni khyed cag rnams la bstan/ /de bzhin
gshegs pa ston pa ste/ /

khyed cag rnams kyis bya dgos so/ /zhes dang/ lam rim las/ skyabs
dngos ni chos dkon mchog ste de thob pa na 'jigs pa las sgrol ba'i
phyir ro/ /mtha'i chos

dkon mchog de yang las dang po ba'i dus kyi skyon phyogs re tsam
spong ba'i spangs pa dang yon tan phyogs re tsam sgrub pa'i rtogs
pa gnyis gong du khyad zhugs par song ba la 'jog gi de las

gzhan blo bur du 'byung ba ma yin no/ /des na skabs 'dir ni dge mi
dge 'bras bu dang bcas pa'i rnam dbye la mkhas par byas nas/ 'dor len
tshul bzhin du sgrub pa gcig la

chos su bya dgos ste las gnyis 'bras bu dang bcas pa ring du bsam
nas blang dor tshul bzhin du ma byas na ngan 'gro'i rgyu mi ldog pas
ngan 'gro la 'jigs kyang 'jigs pa de las mi

@36a @#/ /grol ba'i phyir ro/ /zhes gsungs pa ltar shes par byas la
skyabs de rang rgyud la bsgrub pa dang skyabs 'gro'i bslab bya la
slob ba shin tu gal che gsungs/ 'dir dmigs skor

mdo tsam brjod pa yin pas bslab bya sogs rgyas par lam rim sogs las
shes par bya/ de nas sangs rgyas chos dang tshogs kyi mchog rnams
la/ /byang chub bar du bdag ni skyabs su mchi/ /

zhes brjod pas skyabs yul thams cad las bdud rtsi 'od zer dpag tu
med pa byung/ rang gi sgo gsum la thim pas thog med nas/ khyad par
du yang dkon mchog gsum gyi yon tan dran par

ma byas pa la sogs pa'i thun mong ba'i bslab bya dang 'gal ba'i x 'phel
zhing rgyas skyabs gsum gyi byin brlabs thams cad zhugs pas rang
nyid dkon mchog gsum gyi yon tan kun 'dus pa'i

bdag nyid du gyur par bsam/ bdag gi sbyin sogs bgyis pa 'di dag gis/
/'gro la phan phyir sangs rgyas 'grub par shog /ces pa'i skabs su bdag
gis dus gsum du than dud

'gro'i skye gnas su gtogs pa gcig la zas kham cig tsam byin pa yan
chad sbyin pa las byung ba dang/ bsnyen gnas nyin gcig bsrung
ba'am mi dge ba sna gcig spong ba lta bu tshul khrims

las byung ba dang/ byams pa 'am snying rje yud tsam cig bsgom pa
yan chad bsgom pa las byung ba'i dge ba'i rtsa ba 'di dag gang bgyis
pa de dag gis 'gro ba sems can thams cad la

phan bde ma lus pa bsgrub pa'i phyir du sangs rgyas bcom ldan 'das
kyi go 'phang myur du 'grub par gyur cig /de ltar 'grub par mdzad
du gsol/ /zhes smon lam dang gsol ba

@36b btab pas bla ma thub pa'i dbang po las rang 'dra gnyis pa zhig
chad de rang la thim pas rang nyid thub dbang du dngos su gyur
par mos la rtse gcig tu mnyam par gzhag /de nas rang thub dbang

du mos pa'i dang nas mtha' skor gyi sems can rnams la bltas te/ ma
rgan sems can 'di rnams thog ma med pa nas da lta'i bar du phan
tshun 'ga' zhig la nye bar bzung 'ga' zhig

la ring bar bzung nas chags sdang gis las dan sna tshogs bsags pa'i
dbang gis spyir 'khor ba dang khyad par ngan 'gro'i sdug bsngal
dpag med myong bar 'dug /'di rnams phan

tshun la nye ring du bzung ste chags sdang gi sems dang bral nas
btang snyoms la gnas na ci ma rung/ gnas par gyur cig /bdag gis
kyang 'di rnams las kha cig la nye ba dang

kha cig la ring bar bzung nas chags sdang mi byed par thams cad la
sems snyoms par bya'o/ /zhes btang snyoms dang/ 'di rnams thog ma
med pa nas bde ba kho na 'dod

kyang de'i rgyu ma bsgrubs pas bde ba rnal ma gcig dang ma 'phrad
par 'dug /da lta bde bar rlom pa bag re yod na'ang myur du sdug
bsngal du 'gyur nas 'gro bas bde ba dang bde ba'i rgyu

dang ldan na ci ma rung/ ldan par gyur cig /zhes byams pa dang/ 'di
rnams thog med nas sdug bsngal gyi rgyu 'ga' zhig bsgrubs pas sdug
bsngal dpag tu med pa

myangs shing da lta'ang myong bzhin du de'i rgyu bsgrub par 'dug
pas sdug bsngal dang sdug bsngal gyi rgyu dang bral na ci ma
rung/ bral bar gyur cig /snyam pa'i snying rje dang

@037a @#/ /'di rnams sdug bsngal med pa'i bde ba dang bde ba'i rgyu
thams cad dang ma bral na ci ma rung/ mi 'bral bar gyur cig /de lta
bu byung na dga'o ang snyam du dga'

ba rnams bsgom par bya'o/ /spyir btang snyoms 'jug tu bsgom pa'ang
yod mod/ 'dir sems can nang phan tshun sems snyoms pa dang/ rang
nyid kyang sems can

rnams la sems snyoms pa gnyis ka bsgom pas yin gsungs/ de nas
skyabs yul rnams rang la thim pas byin gyis rlabs par bsam/ bzhi pa
tshogs gsog pa'i zhing

gsal gdab pa ni/ lam rim las/ mdun gyi nam mkha' la rgya chen spyod
pa dang zab mo lta ba'i brgyud pa'i bla ma rnams dang gzhan yang
sangs rgyas dang byang chub sems dpa'

'phags pa nyan thos dang rang sangs rgyas bka' sdod dang bcas pa
dpag tu med pa bzhugs par bsams te tshogs gsog pa'i zhing gsal gdab/
zhes gsungs pa ltar bya

dgos pas bdag gis ma sems can thams cad kyi don du yang dag par
rdzogs pa'i sangs rgyas kyi go 'phang thob par bya de'i phyir du lam
zab mo bla ma lha'i rnal 'byor gyi sgo nas

byang chub lam gyi rim pa'i khrid bsgom pa la 'jug par bgyi'o snyam
pa'i dge sems khyad par can gyi ngang nas/ rang gi mdun gyi nam
mkhar seng ge brgyad kyis btegs pa'i rin

po che'i khri yangs shing rgya che ba'i steng du cung zad rgyab la
phyogs par rin po che'i khri chung ngu zhig gi steng du ngo bo drin
can rtsa ba'i bla ma yin pa la rnam pa bcom ldan 'das shAkya thub
pa/

@037b zhes pa nas/ bzhugs pa zhes pa'i bar sngar bzhin gsal gdab/
thub pa'i dbang po'i g.yas su sna tshogs pad nyi zla ba'i dkyil 'khor
gyi steng du rje btsun byams pa sku mdog dmar ser

zhal gcig phyag gnyis pa/ g.yas sdong bu dang bcas pa'i pad ma'i
steng du 'khor lo g.yon sdong bu dang bcas pa'i klu shing gi me
tog gi steng du ril ba spyi blug bsnams pa/ thub pa'i

dbang po'i g.yon du sna tshogs pad nyi zla ba'i dkyil 'khor gyi steng
du rje btsun 'jam dbyangs sku mdog dmar ser zhal gcig phyag gnyis
pa/ g.yas sdong bu dang bcas pa'i udpala gyi

steng du ral gri/ g.yon sdong bu dang bcas pa'i udpala gyi steng
du glegs bam bsnams pa/ gnyis ka'ang chos 'khor gyi phyag rgya can
mtshan dpe dang rin po che'i rgyan gyis brgyan zhing

dar sna tshogs kyi na bza' gsol ba/ zhi zhing 'dzum pa zhabs sems dpa'i
dkyil krung gis bzhugs pa/ byams pa'i g.yas phyogs su sna tshogs pad
nyi zla ba'i dkyil 'khor

gyi gdan de'i steng du 'phags pa thogs med nas rtsa ba'i bla ma'i bar
rgya chen spyod brgyud kyi bla ma re dang/ 'jam dbyangs kyi g.yon
phyogs su sna tshogs pad nyi zla ba'i dkyil 'khor gyi

gdan de'i steng du mgon po klu sgrub nas rtsa ba'i bla ma'i bar zab
mo lta brgyud kyi bla ma re rnams tshom chen po'i nang du bzhugs
gral bsgrigs pa ltar spangs chags su bzhugs pa/ thub

dbang gi mdun du rin po che'i khri'i steng du sna tshogs pad nyi zla
ba'i dkyil 'khor gyi steng du rtsa ba'i bla ma zhal mjal dus kyi rnam
pa can la dngos su chos 'brel yod pa'i bla ma thams cad kyis

@038a @#/ /bskor nas bzhugs pa/ thub dbang gi steng gi rgyab la phyogs
par sna tshogs pad ma nyi zla'i dkyil 'khor gyi steng du rgyal ba rdo
rje 'chang la nyams len byin brlabs

brgyud kyi bla ma dang gzhan yang brgyud pa so so'i bla ma rnams
kyis bskor nas bzhugs pa/ thub dbang gtso 'khor rnams kyi mtha'
bskor du gsang bde 'jigs gsum la sogs

pa'i yi dam dkyil 'khor gyi lha tshogs/ de'i mtha' skor du skal bzang
gi sangs rgyas stong dang sangs rgyas sum cu so lnga sogs sangs
rgyas dpag tu med pa/ de'i mtha'

skor du 'phags pa'i gnas brtan bcu drug la sogs pa'i nyan rang dpag
tu med pa/ de'i mtha' skor du myur mdzad ye shes kyi mgon po sogs
chos skyong dpag tu med pa/ de

dag gi phyi rol phyogs bzhir rgyal chen bzhi rang rang gi 'khor
gyis bskor ba rnams bstan pa bsrung ba'i tshul gyis rang rang gi gdan
la bzhugs pa/ de dag rang rang gi mdun na gdan khri

phun sum tshogs pa'i steng du rang rang gis gsungs pa'i lung gi chos
rnams 'od kyi rang bzhin can gyi po ta'i rnam par yod pa/ thams cad
kyi sku las sprul pa'i bkod pa bsam

gyis mi khyab pa phyogs bcur 'phro ba de lta bu'i gtso 'khor thams
cad kyi spyi bor oM dkar po/ /mgrin par AH dmar po/ /thugs kar hUM
sngon po/ /lte bar swa ser po/ /

gsang gnas su ha ljang kus mtshan pa/ thugs ka'i hUM las 'od zer
'phros bas phyogs bcu'i zhing rab 'byams mu med pa nas bla ma yi dam
sangs rgyas byang sems nyan rang

@038b bka' sdod srungs ma'i tshogs dpag tu med pa spyan drangs par
bsam la/ ma lus sems can kun gyi mgon gyur cing/ /zhes sogs dang/
rnam dag chos kyi dbyings las ma g.yos

kyang; ;zhes sogs dang/ phyogs dus kun nas skyabs gsum bka' sdod
bcas/ /zhes sogs brjod/ ye shes pa rnams dam tshig pa so so la bstim/
thams

cad skyabs gsum kun 'dus kyi bdag nyid du mos pa drag po bskyed/
gong du skyabs yul 'di ltar gsal btab nas/ skyabs 'gro'i mthar mi bsdu
bar slar yang gsal legs

par btab ste yan lag bdun pa 'bul ba sogs byas kyang rung gsung
ngo/ /lnga pa bsags sbyang gi gnad bsdus pa yan lag bdun pa dbul ba
ni/ lam rim las/ de

nas lam rgyud la skye ba'i mthun rkyen tshogs bsag pa dang 'gal
rkyen sgrib pa sbyong ba'i lhan cig byed rkyen med na nyer len gyi
rgyu dmigs rnam skyong ba tsam la 'bad kyang lam shin tu skye dka'
bas

bsags sbyong gi gnad rnams bsdus pa'i yan lag bdun pas rgyud
sbyang dgos so/ /zhes gsungs pa ltar 'di shin tu gal che bas/ rang
dang sems can thams cad kyis tshogs

zhing rnams la gus pas 'dud par bsam la/ phun tshogs dge legs bye bas
bskrun pa'i sku/ zhes sogs dang/ byams pa thogs med dbyig gnyen
rnam grol sde/ zhes

sogs dang/ 'jam dbyangs yod med phyogs 'jigs klu sgrub dang/ /zhes
sogs dang/ thugs rje chen po bde gshegs rdo rje 'chang/ /zhes sogs
dang/ gang gis

@039a @#/ /bdag la rigs pa bslab pa dang/ zhes sogs dang/ ston pa bla
med sangs rgyas rin po che/ zhes sogs dang/ ji snyed su dag phyogs
bcu'i 'jig rten na/ /

zhes pa nas/ /bde bar gshegs pa thams cad bdag gis bstod/ /ces pa'i bar
rnams brjod de lcogs na phyag bya/ de nas mchod pa'i tshigs bcad ci
rigs pa dang/ me tog

dam pa phreng ba dam pa dang/ /zhes pa nas/ rgyal ba kun la phyag
'tshal mchod par bgyi/ /zhes pa'i bar brjod de mchod pa 'bul de nas
nyes pa snga ma la 'gyod sems dang phyi ma la sdom

sems drag pos/ byang chub ltung bshags/ gser 'od dam pa'i bshags pa/
'dod chags zhe sdang gti mug dbang gis ni/ /zhes pa nas/ so sor
bshags zhes

pa'i bar rnams brjod de bshags pa bya de nas phyogs bcu'i rgyal ba
kun dang sangs rgyas sras/ /zhes sogs kyi yan lag lhag ma rnams
bya'o/ /drug pa man ngag bzhin du gsol

ba 'debs pa ni/ lam rim las/ de nas dmigs pa gsal bar byas nas maNDAl
phul ste bshes gnyen la ma gus pa sogs phyin ci log gi blo sna mtha'
dag 'gag pa dang/

bshes gnyen la gus pa sogs phyin ci ma log pa'i blo sna thams cad
bde blag tu skye ba dang phyi nang gi bar gcod thams cad nye bar
zhi bar byin gyis brlab tu gsol zhes 'dun pa drag pos

lan mang du gsol ba gdab bo/ /zhes gsungs pas sngar bshams pa'i
maNDAl gyi steng du gsar du tshom bu so bdun sogs ci rigs bkod de/ de
nyid dbang chen gser gyi sa gzhi/

@039b ri rab/ gling/ nyi zla gter chen po'i bum pa sogs lha mi'i 'dod
dgu'i dpal 'byor phun sum tshogs pa thams cad ma tshang ba med pa
yangs shing rgya che bar mos la phul/ de nas

tshogs zhing rnams rang dang sems can thams cad la thugs dgyes
bzhin du brtse ba chen pos gzigs pa dang rang dang sems can rnams
kyis tshogs zhing rnams la dad gus chen pos gsol

ba 'debs par mos shing dmigs pa gsal pos/ dpal ldan rtsa ba'i bla ma
rin po che/ /zhes pa nas/ bstsal du gsol/ zhes pa'i bar brjod pas thub
dbang gi mdun

gyi rtsa ba'i bla ma las gnyis pa zhig chad de rang gi spyi bor seng
khri pad ma nyi zla'i gdan la bzhugs par bsam/ slar yang sku gsung
thugs kyi dngos grub bstsal du gsol/ /zhes

brjod pas spyi bo'i bla ma las gnyis pa zhig chad de rang la thim pas
dpal ldan bla ma'i go 'phang mngon du byas byung snyam du bsam/
'dren pa mnyam med ston pa bcom ldan 'das/ /

zhes sogs kyi rkang pa dang po'i tshe bla ma thub dbang/ gnyis pa'i tshe
rje btsun byams mgon/ gsum pa'i tshe 'phags pa thogs med rnams gsal
gdab/ bzhi pa'i tshe khyed

rnams kyis bdag sogs rnams kyi rgyud la phyin ci log gi blo sna
mtha' dag 'gag par byin gyis brlabs du gsol/ zhes gsol ba btab pa ste
zhu ba phul bas tshogs zhing spyi dang khyad

par sangs rgyas byang sems gsum gyi sku'i cha las bdud rtsi 'od zer
gyi rgyun babs/ rang gzhan sems can thams cad la zhugs pas thog
med nas bsags pa'i sdig sgrib

@040a @#/ /thams cad dang khyad par du rgya chen spyod pa'i lam gyi
mi mthun phyogs bshes gnyen la ma gus pa nas/ rang gces 'dzin
dang/ phyin drug gi mi mthun phyogs

kyi bar gyi phyin ci log gi blo bag chags dang bcas pa thams cad
byang zhing dag  /lus dangs gsal 'od kyi rang bzhin du gyur/ slar
yang sangs rgyas byang sems gsum la

gsol ba 'debs zhes gnyis pa brjod pa'i tshe khyed rnams kyis bdag sogs
rnams kyi rgyud la phyin ci ma log pa'i blo sna mtha' dag skye bar
byin gyis brlab tu gsol/ zhes gsol

ba btab pas tshogs shing spyi las bdud rtsi 'od zer dang khyad par de
gsum las rang 'dra gnyis pa re mar me gcig las gnyis chad kyi tshul
du byung nas rang gzhan thams cad la thim

pas lam 'di nyams su len pa'i mthun rkyen tshe ring ba nad med pa zas
gos sogs tshegs med par rnyed pa'i bsod nams la sogs pa'i yon tan
thams cad 'phel zhing rgyas

lam gyi rim pa spyi dang khyad par dge ba'i bshes gnyen la gus pa
nas/ byang chub kyi sems dang/ pha rol tu phyin pa drug gi bar gyi
rgya chen spyod pa'i lam snying po dang bcas pa skyes

byung snyam du bsam/ bsam gtan dang shes rab gnyis la zab mo lta
ba'i lam gyi cha yod kyang 'dir phyin drug rgya chen spyod pa'i
phyogs su bsdus pa spyi ldog nas yin gsungs/

'dzam gling mkhas pa'i gtsug rgyan dbyig gi gnyen/ /zhes sogs rgya
chen spyod pa'i brgyud 'debs phyi ma rnams la'ang dmigs pa skyong
tshul des shes par bya/ smra ba zla med

@040b 'dren mchog shAkya'i tog  /zhes sogs kyi skabs su dmigs pa
gzhan sdar dang 'dra la/ khyad par ni/ khyad par du yang zab mo
lta ba'i lam gyi mi mthun phyogs bdag 'dzin gnyis

dang des drangs pa'i chags sdang sogs nyon mongs bag chags dang
bcas pa thams cad byang zhing dag  /zhes dang/ 'phel zhing rgyas/
lam gyi rim pa spyi dang khyad par bdag

med pa'i de kho na nyid kyi ngon rtogs pa'i zhi gnas dang lhag
mthong sogs zab mo lta ba'i lam snying po dang bcas pa skyes byung
snyam du bsam/ zhes pa sbyor des phyi ma rnams la'ang rigs

'dra; rje yan gyi brgyud 'debs so so lam rim gsol 'debs lam mchog sgo
'byed ltar la/ de nas/ phun tshogs dge legs lung rtogs nor bu'i dpal/
/zhes sogs

dang; dge legs 'byung gnas rgyal ba'i bstan pa dang/ /zhes sogs
dang/ rgyal ba kun gyis gsungs pa'i chos rnams kyi/ /zhes sogs dang/
rigs kun bdag po

drug pa rdo rje 'chang/ /zhes sogs dang/ dpal ldan mkhas mchog bye
ba'i zur phud la/ /zhes sogs dang/ dge legs yon tan ma lus 'byung ba'i
gnas/ /zhes

sogs dang/ mkhyen brtse'i blo gros rab tu rgyas pa yis/ /'phrin las
bzang pos skal ldan smin mdzad cing/ /lung rtogs dam chos ba gam
mthon po'i rtser/ /sgrub pa'i

rgyal mtshan 'dzin la gsol ba 'debs/ /zhes dang/ gang gis bdag la rigs
pa bslab pa dang/ /zhes sogs dang/ rab 'byams gsung rab kun la lta
ba'i mig

@041a @#/ /zhes sogs sbyor/ byin brlabs dpung zhus kyi gsol 'debs re
dang dngos gzhi'i dmigs skor re sbyar nas bskyang na'ang rung
mod/ gsol 'debs

rdzogs rjes tshogs zhing rnams nyer bsdu byas te dngos gzhi'i dmigs
skor skyong tshul khrid yig tu bkod pa ltar bya ba la gsol 'debs gyis
skabs 'dir yang lam rim gyi dmigs skor

tshang bar bstan pas/ de skyong tshul ni/ yon tan kun gyi gzhir gyur
drin can rje/ /zhes pa nas/ gus pa chen pos bsten par byin gyis rlobs/
/zhes pa'i bar

don dran bzhin du brjod pas/ tshogs zhing spyi dang khyad par rtsa
ba'i bla ma la dngos su chos 'brel yod pa'i bla ma rnams kyis bskor
nas bzhugs pa rnams las bdud rtsi 'od zer gyi

rgyun babs/ rang gzhan/ zhes pa nas/ sdig sgrib thams cad dang/ zhes
pa'i bar gong bzhin byas la/ khyad par du yang dge ba'i bshes gnyen
la ma gus pa ma dad pa

skyon rtog gi blo skyes pa sogs bshes gnyen tshul bzhin du bsten pa
la gegs byed kyi sdig sgrib bag chags dang bcas pa byang zhing dag
/lus dangs gsal/ zhes pa nas/ gyur/

zhes pa'i bar sngar bzhin/ slar yang gus pa chen pos bsten par byin
gyis rlobs/ /zhes brjod pa'i skabs su/ de rnams las rang 'dra gnyis pa
re chad nas/ rang

gzhan la thim/ zhes dang/ lam gyi rim pa spyi dang khyad par bla ma
la skyon rtog gi blo skad cig tsam yang mi skye zhing ci mdzad yon
tan du mthong ba sogs bshes gnyen tshul bzhin du

@041b bsten nus pa'i rtogs pa khyad par can skyes byung snyam du
bsam/ lan gcig rnyed pa'i dal ba'i rten bzang 'di/ zhes pa nas/ myur du
rgyud la skye bar byin gyis rlobs/ /zhes pa'i

bar la'ang skabs gad yin pa de'i gegs byed sbyang ba dang/ de'i rtogs
pa khyad par can skyes pa'i dmigs gsal ma gtogs gzhan rnams 'dra/
thun mong lam sbyang snod du gyur pa na/ zhes

pa nas/ dam pa'i gsung bzhin sgrub par byin gyis rlobs/ /zhes pa'i bar
gyi dmigs pa rnams brgyud ldan bla ma dam pa'i zhal las shes par
bya/ de ltar lam bzang ston pa'i

bshes gnyen dang/ zhes sogs kyi skabs su/ lam bzang po zab pa dang
rgya che ba'i lam ston pa'i bshes gnyen dam pa rnams dang/ lam de
tshul bzhin sgrub pa'i grogs bzang po

rnams kyi zhabs pad brtan cing/ lam 'di sgrub pa'i 'gal rkyen phyi
nang gi bar du gcod pa'i tshogs thams cad nye bar zhi bar byin gyis
brlab tu gsol/ zhes gsol ba btab pas/

lam 'di sgrub pa'i 'gal rkyen phyi nang gi bar chad thams cad nye
bar zhi zhing/ mthun rkyen thams cad lhun gyis grub par byin gyis
brlabs byung snyam du bsam/ skye ba kun tu yang dag bla ma

dang; ;zhes sogs kyi skabs su/ skye ba 'di dang phyi ma kun tu bla ma
thub dbang rdo rje 'chang dang skad cig tsam yang 'bral ba med par
zab pa dang rgya che ba'i lam nyams su blang ste/

sa bcu dang lam lnga'i yon tan mtha' dag rab tu rdzogs nas/ myur
du bla ma thub dbang rdo rje 'chang gi go 'phang mngon du byed
nus pa'i skal pa can du gyur song snyam pa'i mos pa bya/ de nas

@42a@#/ /bla ma thub dbang las 'od zer 'phros tshogs zhing rnams la
phog pas/ phyir mi nas 'od du mer gyi zhu nas yi dam rnams kyi bar
nang ma nang ma la thim/ yi dam rnams

brgyud pa'i bla ma rnams la thim/ de rnams mas rim nas yar thub
dbang la thim/ rtsa ba'i bla ma'i mtha' skor gyi bla ma rnams rtsa
ba'i bla ma la thim/ de yang thub pa'i dbang po'i

thugs kar thim/ steng gi bla ma rnams kyang phyi rim nas rdo rje
'chang la thim/ de nas thub dbang gi spyi gtsug nas byon te thugs
kar ye shes sems dpa'i tshul du bzhugs par bsam/

de nas thub dbang la dmigs nas bla ma sangs rgyas mngon sum du
mthong ba'i skal ldan gyi skyes bu de ngal snyam du rtse gcig tu
mnyam par bzhag /de nas bdzra sa mA dzaH zhes brjod la thub

dbang spyan drangs te spyi bo'i bla ma la bstim/ de yongs su gyur pa
las/ ngo bo drin can rtsa ba'i bla ma yin pa la/ rnam pa bcom ldan
'das rgyal ba shAkya thub pa/ zhes pa nas/

rdo rje'i skyil mo krung gis bzhugs pa/ zhes pa'i bar sngar bzhin gsal
btab la yan lag bdun pa maNDal dang bcas pa phul te/ sku bzhi'i bdag
nyid bla ma lhag pa'i lha/ zhes

sogs kyis rtse gcig tu gsol ba gdab bo/ /gnyis pa dngos gzhi ni/ lam
rim las/ thog mar gang bskyang bar bya ba'i dmigs pa rnams kyi
grangs dang go rims nges nges bya

de nas ji ltar nges par byas pa de las gzhan du mi gtang bar bya'o
snyam pa'i 'phen pa drag po 'ga' zhig btang la/ ji ltar nges par byas
pa de las lhag chad med par dran shes bzhin dang

@42b ldan par bskyang bar bya'o/ /zhes gsungs pa ltar/ dang por
gang bskyang rgyu'i dmigs pa rnams kyi ngo bo grangs des go rims
rnams lam rim che chung las 'byung ba ltar nges par bya/ de nas

dngos gzhi la 'jug pa'i thog ma nyid du sngar nges par byas pa de
nyid ma 'chug par bya snyam pa'i 'phen pa drug po gtang/ de ngos
gzhi skyong ba'i tshe sngar nges par byas pa de nyid tshul bzhin du
dran pa'i dran

pa dang/ de las chad lhag byung ma byung rtogs pa'i shes bzhin
brtan po gnyis dang ldan par bskyang ba ni thams cad la gal che'o/
/spyir rnam dpyod yangs pa rnams kyis nyams len gyi dmigs

skor re re bzhin gyi mjug tu gsol 'debs sbyor dgos pa'i nges pa med
kyang/ lam rim las/ bzang na tshig mi zin/ bsam na don mi go /bsgom
na rgyud la mi skye ba'i blo'i mthu shin

tu chung ba'i dus su zhing gi mthu la brten pa man ngag yin no/
/zhes gsungs pas rang cag blo shin tu dman pa rnams kyis dmigs skor
dngos gzhi yid la byed pas myong ba 'don pa dang/ de la  

myong ba thon par bla ma lha la gsol ba rtse gcig tu 'debs pa zung
du sprel na bla ma lha'i thugs rje dang byin brlabs kyis nyams len
la bogs che bas yongs rdzogs bstan pa'i mnga' bdag paN chen

thams cad mkhyen pa'i dmar khrid nas 'byung ba ltar bya gsungs/
gsum pa mjug tu ji ltar bya ba ni/ dngos gzhi'i dmigs skor ji ltar 'tsham
pa bskyangs zin pa dang rang gi spyi bo'i bla ma thub

dbang la dmigs nas/ bcom ldan 'das de bzhin gshegs pa dgra bcom pa
yang dag par rdzogs pa'i sangs rgyas shAkya thub pa la phyag 'tshal
zhing gsol ba 'debs so/ /byin

@43a @#/ /gyis brlab tu gsol/ zhes mos gus drag pos gsol ba btab pas de
nyid 'od du mer gyis zhu nas rang la thim pas rang nyid thub pa'i
dbang por gyur pa'i thugs kar pad

zla'i gdan la/ oM yig dkar po'am ser po hUM sngon pos mtshan pa/
oM mu ni mu ni mahA mu ni ye swA hA/ zhes pa'i sngags 'phreng gis
bskor ba las 'od zer 'phros/ snod bcud

thams cad la phog pas/ snod kyi 'jig rten rnams dag pa'i zhing dang/
bcud kyi sems can rnams thub pa'i dbang por gyur pa'i thugs kar pad
zla'i gdan la oM yig sngags 'phreng

gis bskor ba dang/ rang gzhan thams cad kyi rang rang gi sa bon la
sems bzung nas bzla bar mos la gong gi sngags ci nus su bzla bar
bya'o/ /mthar snod bcud thams cad mi dmigs

pas rgyas btab la bsags pa'i dge ba rnams bzang po spyod pa sogs kyis
bsngo bar bya'o/ /de lta bu'i tshul gyis zhag re la bya ba'i thun gyi
grangs dang yun tshad ni/ lam rim las/

de lta bu des tho rangs dang snga dro dang phyi dro dang sro de
thun bzhi la bsgom par bya ste de yang dang por yun ring na bying
rgod kyi dbang du 'gro sla zhing de la goms na blo 'chos dka' bas
thun chung la grangs

mang bar bya/ bsgom 'dod pa'i 'phro la bcad kyi na byas na phyi ma
res kyang 'jug snying 'dod gzhan du na mal mthong ba'i tshe na
skyug log log 'ong gsungs pa ltar ro/ /cung zad brtan du

song ba na thun bsrid ste sbyor ba ha cang dam drag pa dang ha
cang lhod pa'i skyon dang bral bar byas la bskyang ste des ni gegs
nyung zhing ha cang dub pa dang bying rmugs sogs zhi bar 'gyur
ro/ /

@43b zhes gsungs pa ltar bya la de yang sbyor ba nas mjug gi bar
thams cad dkyus thog gcig la rdzogs dgos pa'i nges pa med pas sun
snang 'ong bar dogs pa'am dmigs pa mi gsal bar

bying rmugs rgod pa sogs kyi dbang du 'gro bar dogs pa byung tshe
'phro bcad phyin skabs kyi gegs bsal nas 'phro skyong ba gal che
gsungs/ gnyis pa thun gyi 'tshams su ji ltar bya ba ni/

lam rim las/ de dag kyang thun gyi ngo bo tsam la min gyi thun rjes
la sogs pa'i spyod lam thams cad du dran par byas nas rgyun ldan
du bskyang na bogs che ba yin te/ sgom rim par

ba las; snying rje de ting nge 'dzin la/ 'dug kyang rung spyod lam
thams cad du yang rung ste dus thams cad du sems can thams cad
la bsgom par bya ste/ zhes gsungs la snying

rje ni mtshon pa tsam ste dmigs rnams gang skyong thams cad la
'dra'o/ /zhes gsungs pas skabs gang yin pa de'i dmigs rnams yang yang
dran par byed pa gal che zhing/ dmigs

rnams de la nges pa 'dren pa dang blo rgyas pa'i phyir de'i chos skor
ston pa'i gsung rab la blta ba/ bsags sbyangs la brtson pa/ bsrung
sngom la 'bad pa rnams gtso bo yin la/

gzhan yang/ dbang po'i sgo sdom pa/ shes bzhin du spyod pa/ zas kyi
tshod rigs pa/ mi nyal bar rnal 'byor la brtson zhing nyal ba'i tshe ji
ltar bya ba rnams legs par

shes par byas te tshul bzhin du bslab par bya'o/ /'dir thun dang thun
'tshams kyi nyams len byis pa'i blo can gyis 'khyer bde bar mdo tsam
zhig bkod pa yin pas rgyas par ni

@44a @#/ /lam rim che chung sogs dang/ dge ba'i bshes gnyen yun ring
du mnyes par byas pa las shes dgos so/ /de lta bu'i thun dang thun
'tshams su ji ltar bya ba'i rim

pa 'di ni/ lam rim las/ de ltar na dngos gzhi'i skabs kyi skyong tshul
thun mong ma yin pa ma gtogs pa sbyor ba dang dngos gzhi dang
mjug dang thun mtshams su ji ltar bya ba rnams ni 'di nas bzung

ste lhag mthong gi bar gyi dmigs rnams gang skyong thams cad la
sbyar bar bya'o/ /zhes gsungs pas dge ba'i bshes gnyen bsten pa'i dmigs
skor nas lhag mthong gi bar gyi dmigs skor rnams

so sor lo zla'am zhag gam thun kha yar rer skyong ? ba yin na
dmigs skor de thams cad la re re bzhin sbyor zhing/ thams cad zhag
gcig gam dkyus gcig la skyong ba yin na sbyor ba dang mjug chog

gnyis lan res kyang chog gsung ngo/ /ji skad du lha cig dI pa ma ga
ra'i zhal nas/ rtsod pa'i dus kyi tha ma la/ /tshe thung nad mar longs
spyod dman/ /rkyen ngan bar chad mang ba yis//

yun ring gnas pa'i mthu med pas/ /tshig rjes gcad par mi nus kyi/ /rigs
la gnas pa'i gang zag des/ /bshes gnyen dam pa bsten byas la/ /shin tu
brtson pa'i

sems kyis ni/ /'khor ba'i sdug bsngal dran byas la/ /bdag gzhan thol
bar bya ba'i phyir/ /snying po myur du bsdu bar bya/ /zhes rang cag
rjes 'jug rnams la thugs

brtse ba chen pos gdams par gda' bas/ gong du bshad pa'i tshul gyis
dal ba don yod du bya ba'i phyir 'bad 'tshal lo/ /de ltar byang chub
lam gyi rim pa'i khrid/ /skyong

@44b bar 'dod pas thun dang thun mtshams su/ /ji ltar bya tshul mdor
bsdus bkod pa 'di/ /yab rje blo bzang rgyal ba'i dbang po las/ /mkhas
grub chos kyi rgyal por brgyud pa yi/ /  

man ngag bdud rtsi'i snying po ci zhig ltar/ /yongs 'dzin dam pa'i
drin las legs rnyed pa/ /rang nyid brjed byang bya phyir yi ger bris/
/bdag gi ma rtogs pa dang log rtog gis/ /

nyes par brjod gang dngos brgyud bla mar 'chags/ /'dis mtshon dge
bas tshe rabs thams cad du/ /lam bzang 'di nyid 'dzin zhing spel bar
shog/ //ces byang chub

lam gyi rim pa'i zhal shes blo bzang zhal lung zhes bya ba 'di ni/ paN
chen thams cad mkhyen pa'i thugs sras lam 'di la sgrub pa snying
por mdzad pa'i grub mchog dam pa drung pa rin po

che blo bzang rgyal mtshan pa'i zhal gyi bum bzang las 'ong ba'i
bdud rtsi'i zegs ma cung zad myangs pa'i gyi na pa ngag dbang blo
bzang chos ldan dpal bzang pos rang gi dran pa gso ba'i

phyir yi ger bkod pa'o/ /'dis kyang rgyal ba blo bzang grags pa'i bstan
pa dar zhing rgyas la yun ring du gnas par gyur cig / //