@#/ /sems dpa' chen po glang ri thar pa rdo rje seng ges mdzad
pa'i byang chub sems sbyong gi gdams pa tshig brgyad mar grags pa'i
khrid

yig theg chen dga' ston zhes bya ba bzhugs so)// //dus gsum rgyal ba
sras bcas kyi/ /rang gzhan don gnyis bde blag tu/ /'grub pa'i theg
chen lam gyi srog /byang chub sems la phyag 'tshal lo/ /

de nyid bskyed dang spel ba'i thabs/ /rnam 'dren shAkya'i rgyal po
yis/ /legs gsungs bdud rtsi'i nyid khu mchog /rgyal sras mi pham 'jam
pa'i dbyangs/ /shing rta chen po klu sgrub dang/ /

grub chen zhi ba lha sogs nas/ /brgyud de mnyam med jo bo yi/ /thugs
kyi bum bzang legs par gtams/ /de nas rim bzhin rgyal ba 'brom/ /sku
mched rin chen rnam pa gsum/ /yab

sras brgyud par bcas pa la/ /legs brgyud rgyal sras pu to pa'i/ /sras
kyi thu bo nyi zla ltar/ /grags pa gnyis las sems dpa' che/ /glang ri
thang pa gang de yis/ /thos bsam sgom pa'i

bye dor dang/ /sgrub pa'i mchod pas legs mchod nas/ /don gnyis
dngos grub legs rtsol ba'i/ /tshigs su bcad pa bkra shis pa'i/ /rtags kyi
grangs ldan tshig brgyad mar/ /grags pa'i

@108b gdams ngag yid bzhin nor/ /rjes 'jug gdul bya'i spyi nor du/
/gsung rab rgya mtsho che las byung/ ? /de nyid nyams len rgyal
mtshan rtser/ /bkod de thos bsam sgom pa yi/ /rim 'gro byas

te don gnyis kyi/ /dngos grub blang tshul skal mnyam gyi/ /blo dman
rnams kyis go sla zhing/ /lag tu blang ba de mdor bsdus pa/ /shan ta
de ba'i legs bshad dang/ /bla ma dam pa'i gsung rgyun gyis/ /brgyan
pa'i yig chung 'di dgod do/ /'di la sbyor dngos mjug gsum las/ /dang
po sngon 'gro sbyor ba ni/ /bde ba'i stan la legs 'dug ste/ /dge sems
dang nas 'di ltar

bsam/ /phan bde legs tshogs ma lus pa/ /mtshon ldan bla mar rag las
pas/ /bsam sbyor gnyis kyis legs bsten te/ /mchod pa gsum kyis mnyes
par bya/ /don che rnyed dka'i

rten bzang 'di/ /da lta nyid du 'jig pa'ang srid/ /ngan 'gro tsha grang
bkres skom dang/ /glen lkug bkol spyod sogs kyi gzir/ /bde 'gro skye
rga na 'chi dang/ /'chi 'pho ltung ba sogs kyis

mnar/ /bdag dang rig drug 'gro ba kun/ /sdug bsngal mtsho las grol
ba'i thabs/ /gzhan du res ma mchis pas/ /bslu med bla ma dkon mchog
la/ /dpung gnyen mchog tu 'dzin

'dod kyi/ /bsam pa drag pos skyabs su 'gro/ /mchog gsum nam mkha'
gang ba yis/ /bdag sogs mgon skyabs dpung gnyen mdzod/ /bla ma
rnams la skyabs su mchi/ /rdzogs

sangs rgyas la skyabs su mchi/ /dam pa'i chos la skyabs su mchi/ /dge
'dun rnams la skyabs su mchi/ /de ltar bla ma dkon mchog la/ /skyabs
'gro lan mang byas pa'i mthar/ /

@109a @#/ /bla ma mchog gsum dam pa la/ /gus pas phyag 'tshal skyabs su
mchi/ /bdag dang mkha' mnyam 'gro ba'i rgyud/ /myur du byin gyis
brlab tu gsol/ /de ltar gsol ba

btab pa yis/ /skyabs yul rnams las 'od zer 'phros/ /bdag dang 'gro ba
kun la phog /sdig ltung sgrib pa ma lus sbyang/ /snyam du mos shing
skyabs 'gro yi/ /bslab bya rnams dang

dge sdig las/ /bde sdug 'byung tshul legs bsam nas/ /blang dor tshul
bzhin bya bar bslab/ /'gro kun bdag gi mar gyur te/ /drin gyis
bskyangs ba sha stag yin/ /sdug bsngal dngos

dang de rgyu la/ /spyod cing bde ba'i go skabs bral/ /'di rnams sdug
bsngal dang bral zhing/ /bde ba mchog la dgod pa'i phyir/ /rnam
'dren stobs bcu mnga' ba yi/ /go 'phang dam pa myur

du bsgrub/ /de phyir byang chub sems skyong gi /gdams pa zab mo
nyams su blang/ /snyam du sems mchog legs bskyed de/ /bla ma'i rnal
'byor bsgom pa ni/ /mkha' dbyings dbus

su pad zla la/ /bla ma sprul sku 'od dpag med/ /spyan ras gzigs dang
mthu chen thob/ /sangs rgyas byang sems nyan rang dang/ /chos
skyong srungs ma'i tshogs kyis bskor/ /gnas gsum rdo rje

gsum gyis mtshan/ /hUM yig 'od kyis ye shes pa/ /spyan drangs thim pas
dbyer med gyur/ /grangs med lus sprul gus phyag 'tshal/ /mchod rdzas
nam mkha' gang ba 'bul/ /thog med nas

bsags sdig ltung bshags/ /rang gzhan dge la snying nas rangs/ /zab
rgyas chos 'khor tshad med bskor/ /'khor ba srid du brtan par bzhugs/
/'dis mtshon dge ba ji snyed pa/ /

@109b rdzogs byang go 'phang thob phyir bsngo/ /bla ma mchog gsum
dam pa la/ /rtse gcig gus pas gsol ba 'debs/ /bdag dang mar gyur 'gro
kun gyis/ /byang sems 'byongs par byin

gyis rlobs/ /snying nas gdung shugs drag po yis/ /gsol ba rtse gcig
legs btab pas/ /'khor tshogs thams cad 'od du zhu/ /bla ma 'od dpag
med la thim/ /de nyid dgyes

bzhin gdan dang bcas/ /rang gi spyi bor byon nas bzhugs/ /phyag 'tshal
mchod cing sdig pa bshags/ /yi rangs bskul zhing bzhugs par gsol/
/dgo ba rang gzhan thams

cad kyis/ /kun mkhyen go 'phang thob phyir bsngo/ /kun 'dus bla ma
'od dpag med/ /rtse gcig gus pas gsol ba 'debs/ /bdag dang mar gyur
'gro kun gyis/ /byang sems

'byor par byin gyis rlobs/ /snying nas gsol 'debs shugs drag bya/ /'di
dag sbyor ba'i rim pa'o/ /gnyis pa dngos gzhi byang chub kyi/ /sems
mchog ji ltar sbyong ba la/ /

bdag gzhan mnyam brje'i sgo nas dang/ /rgyu 'bras man ngag bdun
sogs kyi/ /sgo nas sbyong tshul du ma las/ /'dir ni snga ma bzhin du ste/
/de yang rgyal sras zhi ba lhas/ /bdag bde

gzhan gyi sdug bsngal dag /yang dag brje bar ma byas na/ /sangs
rgyas nyid du mi 'grub cing/ /'khor ba na yang bde ba med/ /ces dang/
gang zhig bdag dang gzhan rnams ni/ /myur

du skyab par 'dod pa des/ /bdag dang gzhan du brje bya ba/ /gsang ba'i
dam pa spyad par bya/ /ces pas bdag gzhan brje ba yi/ /man ngag goms
par ma byas na/ /sangs rgyas go

@110a @#/ /'phang mi 'thob pas/ /man ngag 'di la sbyang dgos gsungs/ /de
la bdag gzhan brje ba la/ /gzhan nyid gces par 'dzin pa yi/ /rgyu
mtshan shes nas bsam dgos

pas; ;zhi ba lha yis ji skad du/ /sems can rnams dang rgyal ba las/
/sangs rgyas chos 'grub 'dra ba la/ /rgyal la gus bya de bzhin du/
/sems can la min ci yi tshul/ /zhes

sogs sangs rgyas sems can gnyis/ /gang la brten nas sangs rgyas kyi/
/go 'phang thob pa'i rgyur 'gro ba/ /mtshungs phyir rgyal la ci bzhin
du/ /sems can la yang gus pa dang/ /

gces par bya bar rigs zhes gsungs/ /de gnyis mtshungs tshul ci zhe na/
/sangs rgyas thob phyir rgyal ba la/ /dad gus phyag mchod bsnyen
bkur dang/ /skyabs 'gro la sogs byed

dgos bzhin/ /sems can la yang sbyin gtong dang/ /tshad med sgom sogs
byed dgos phyir/ /rgyu mtshan des na bdag gis ni/ /mar gyur sems can
thams cad la/ /ci 'dod

dngos grub legs rtsol ba'i/ /bsam 'phel yid bzhin nor bu las/ /lhag pa'i
don mchog sangs rgyas kyi/ /go 'phang bsgrub pa'i bsam pa yis/ /rgyun
chad med par dus rtag tu/ /

shin tu gces par 'dzin par shog /bla ma 'od dpag med mgon gyis/
/rang las sems can gzhan dag rnams/ /gces par 'dzin pa'i blo rnal ma/
/bcos min skye bar byin gyis

rlobs/ /snyam pa'i smon 'dun gsol 'debs kyis/ /spyi bo'i bla ma'i gnas
gsum las/ /bdud rtsi 'od zer dpag med babs/ /rang gi tshangs pa'i sgo
nas zhugs/ /lus kyi

@110b nang gang sdig sgrib dang/ /gzhan gces 'dzin pa'i gegs byed
sbyang/ /tshe bsod yon tan thams cad dang/ /khyad par gces 'dzin bcos
min skyes/ /snyam pa'i mos pa shugs drag bya/ /

'og ma rnams la'ang rigs 'dra sbyar/ /rang nyid mchog 'dzin ma dor
bar/ /rang las gzhan la gces pa'i blo/ /bcos min shugs drag mi 'byung
bas/ /zhi ba lha yis ji skad du/ /

bdag nyid mtho bar 'dod pa des/ /ngan 'gro ngan dang glen par
'gyur/ /de nyid gzhan la spo byas na/ /bde 'gror rim 'gro thob par
'gyur/ /bdag nyid skyon bcas gzhan dag la/ /

yon tan rgya mtshor shes byas nas/ /bdag 'dzin yongs su dor ba dang/
/gzhan blang ba ni bsgom par bya/ /ces pas rang nyid mchog 'dzin la/
/brten nas ngan 'gro'i 'gro ba dang/ /glen

lkug tha chad rnams su 'gyur/ /gzhan dag mchog tu 'dzin pa yis/ /bde
'gror 'gro ba gzhan dag gis/ /mchod cing bkur ba'i gnas su 'gyur/ /de
phyir rang nyid skyon mang dang/ /

ldan pa'i dman par 'dzin pa dang/ /gzhan dag yon tan dpag med
dang/ /ldan pa'i mchog tu gzung bar gsungs/ /de bas bdag ni gnas
gang du/ /gang zag mchog dman su zhig dang/ /

'grogs nas 'gro 'am 'dug pa'i tshe/ /bdag nyid 'grogs yul de kun las/
/shin tu dman par blta bya zhing/ /sems can gzhan la do dga' sogs/
/bcos min bsam pa thag

pa yis/ /gzhan nyid mchog tu 'dzin par shog /bla ma 'od dpag med
mgon gyis/ /rang nyid yal bar 'dor ba dang/ /gzhan la mchog tu
'dzin pa'i blo/ /bcos min skye bar byin

@111a @#/ /gyis rlobs/ /snyam pa'i smon 'dun gsol 'debs kyis/ /bdud rtsi
'beb sbyang sngar bzhin bya/ /de la'ang khong khro la sogs pa'i/
/nyon mongs rnams kyi nyes

skyon rnams/ /bsam nas mngon gyur 'gogs dgos pas/ /rgyal sras chen
po zhi ba lhas/ /gal te lha dang lha min rnams/ /thams cad bdag gi
dgrar langs kyang/ /de dag

gis bdag mnar med pa'i/ /me nang 'khrid cing 'jug mi nus/ /nyon mongs
stobs can dgra 'dis ni/ /gang dang 'phrad na ri rab kyang/ /thal ba
yang ni mi lus pa/ /der bdag skad

cig gcig la 'dor/ /ces pas rigs drug 'gro ba rnams/ /thams cad dgra ru
langs gyur kyang/ /mnar med me nang 'khrid mi nus/ /sems dpar
khong khro lta bu yi/ /nyon mongs

drag po skad cig ma/ /gcig gis kyang ni der 'phen gsungs/ /des na bdag
gis 'gro 'chags sogs/ /spyod lam bya ba'i dus kun du/ /dran shes brtan
pos rang rgyud la/ /legs

par brtag te chags sdang sogs/ /nyon mongs mngon gyur skyes ma
thag /'dis ni bdag gzhan gnyis ka yang/ /'di phyir ma rung byed pas
na/ /btsan thabs gdong nas bzlog par

shog /bla ma 'od dpag med mgon gyis/ /nyon mongs mngon gyur
skyes ma thag /'bur 'joms gdong bzlog byed pa yi/ /gnyen po skye bar
byin gyis rlobs/ /snyam pa'i smon

'dun gsol 'debs kyis/ /bdud rtsi 'beb sbyang sngar bzhin bya/ /bdag
gzhan brje ba'i yan lag du/ /gzhan dag sdug bsngal mtha' dag dang/
/'bral 'dod snying rje bskyed

@111b dgos pas/ /zhi ba lha yis ji skad du/ /de bas ji ltar chung du na/
/mi snyan las kyang bdag srung ba/ /de bzhin 'gro la srung sems
dang/ /snying rje'i sems ni goms par bya/ /de bas mgon

po spyan ras gzigs/ /thugs rje chen pos 'gro ba yi/ /'khor gyi 'jigs pa
bsal ba'i phyir/ /rang gi mtshan yang byin gyis brlabs/ /ces pas 'gro la
srung sems dang/ /snying rje'i

bsam pa gal che bas/ /mgon po spyan ras gzigs dbang gis/ /'gro ba
thugs rjes bskyab pa'i phyir/ /mtshan yang thugs rje chen po zhes/
/brtag par gsungs pas de ltar bslab/ /

des na bdag gis rang bzhin gyi/ /bsam pa ngan dang 'tshams med sogs/
/sdig pa spyod dang sdug bsngal ba/ /drag pos non pa'i sems can
rnams/ /mthong tshe brtse yul rnyed dka'

ba; ;rnyed bas rin chen gter mchog dang/ /'phrad ltar shin tu dga'
ba yis/ /gces par 'dzin pa'i brtse bar shog /bla ma 'od dpag med mgon
gyis/ /sems can spyi dang khyad par du;

sdig sdug drag pos mnar rnams la/ /shin tu brtse bar byin gyis rlobs/
/snyam pa'i smon 'dun gsol 'debs kyis/ /bdud rtsi 'beb sbyang sngar
bzhin bya/ /gzhan dag bde ba phun

tshogs dang/ /lngon par 'dod pa'i byams pa dang/ /bsgom pa shin tu
gces pas na/ /rgyal sras chen po zhi ba lhas/ /bdag la dmigs nas gang
dag gis/ /khro 'am ma dad sems byung na/ /

de nyid rtag tu de dag gis/ /don kun 'grub pa'i rgyur gyur cig /gang
dag bdag la kha zer ram/ /gzhan dag gnod pa byed pa'am/ /de bzhin
'phyar kha gtong yang rung/ /thams cad byang

@112a @#/ /chub skal ldan gyur/ /ces pas rang la phan sems can/ /lta
zhog gnod pa byed rnams la'ang/ /rang la gnod sems bskyed pa
dang/ /gnod pa byas pa de nyid kyis/

don kun 'grub par shog snyam pa'i/ /byams pa bsgom par gsungs pas
na/ /bdag gis sems can gang zhig la/ /phan btags pa'am de min kyang/
/rang la phan pa byed snyam pa'i/ /

re ba che ba 'ga' zhig gis/ /phyir zhing gnod pa cher byed pa'i/ /shin tu
mi rigs byed na yang/ /dge bskul bshes gnyen dam pa ru/ /bltas te shin
tu byams par shog /bla ma 'od

dpag med mgon gyis/ /sems can spyi dang khyad par du/ /gnod byed
rnams la byams pa'i sems/ /shugs drag skye bar byin gyis rlobs/ /snyam
pa'i smon 'dun gsol 'debs

kyis; ;bdud rtsi 'beb sbyang sngar bzhin bya/ /gzhan gyis gnod pa ci
byas kyang/ /gyong dang bug kha 'khur ba dang/ /rgyal kha gzhan
la 'bul dgos pas/ /zhi ba lha yis ji skad du/ /

rtag tu gsod dang smod pa'am/ /brdeg sogs ci dgar byed la reg /bdag
gis lus la rtse byed dam/ /co 'drig zha'i rgyu byed kyang/ /bdag gi lus
'di byin zin gyi/ /'di yi kha

tas ci zhig bya/ /de la gnod par mi 'gyur pa'i/ /las gang yin pa byed du
chug /cis pas gzhan gyis rang nyid la/ /gsod smod brdeg dang brnyas
pa dang/ /mnar pa'i

sems kyis rtsed mo dang/ /bzhad gad rgyu sogs gang byed kyang/
/kho rang gang 'dod byed 'jug cing/ /ngang gis dang du blang
gsungs pas/ /bdag la gzhan gyis phrag dog gis/ /kun nas bslad

@112b ste gshe ba dang/ /sgro sgur rdeg sogs mi rigs pa'i/ /bya ba ci
dang ci byed kyang/ /gyong dang bug kha rang gis blang/ /khe dang
rgyal kha gzhan dag la/ /'bul la 'gyod pa med pa dang/ /spro sems

shugs drag skye bar shog /bla ma 'od dpag med mgon gyis/ /gyong
pham rang gis len pa dang/ /khe rgyal gzhan la 'bul ba'i sems/ /shugs
drag skye bar byin gyis rlobs/ /snyam pa'i

smon 'dun gsol 'debs kyis/ /bdud rtsi 'beb sbyang sngar bzhin bya/
/bdag gzhan brje ba dngos gzhi la/ /sdig sdug rang la len pa dang/
/bde dge gzhan la btang dgos pas/ /

glu sgrub zhabs dang zhi ba lhas/ /bdag la de dag sdig smin cing/
/bdag dge ma lus der smin shog /'gro ba'i sdug bsngal gang ci'ang
rung/ /de kun bdag la smin gyur cig /byang chub

sems dpa'i dge 'dun gyis/ /'gro ba bde la spyod par shog /lus dang
longs spyod de bzhin du/ /dus gsum dge ba thams cad kyang/ /sems
can kun gyi don bsgrub phyir/ /'phangs

pa med par btang bar bya/ /zhes pas sems can thams cad kyi/ /sdig
dang sdug bsngal ma lus pa/ /rang la blang zhing bdag nyid kyi/ /lus
dang longs spyod bde ba dang/ /dus gsum

bsags pa'i dge ba kun/ /'phangs pa med par btang gsungs pas/ /don gyi
snying po mdor bsdu na/ /skabs su babs tshe dngos su 'am/ /gzhan du
gtso bor bsam pa yis/ /

lus dang longs spyod dus gsum dge /phan bde ma rnams kun la 'bul/
/ma yi gnod pa sdig sgrib dang/ /sdug bsngal kun kyang snod min la/
/gsang bas bdag la len par shog

@113a @#/ /bla ma 'od dpag med mgon gyis/ /bdag gi bde dge gtong ba
dang/ /gzhan gyi sdig sdug len pa'i sems/ /bcos min skye bar byin gyis
rlobs/ /snyam pa'i smon 'dun

gsol 'debs kyis/ /bdud rtsi 'beb spyad sngar bzhin bya/ /lus sogs gtong
tshul zhi ba lhas/ /sems can dbul zhing 'phongs pa la/ /bdag ni mi zad
gter gyur te/ /yo byad

mkho dgu sna tshogs su/ /mdun du nye bar gnas gyur cig /zhes pa ltar
ro mos pa yis/ /rang lus yid bzhin nor bu las/ /so so'i 'dod dgu sprul
nas gtong/ /len pa'i tshul

yang mos pa yis/ /sems can rnams kyi sdig sdug kun/ /rang gi rgyud
steng byung bar bsam/ /da lta mos pas spyod pa'i skabs/ /gang la'ang
mos pa gtso che bas/ /gtong len dmigs pa

'di ltar sbyang/ /rang gi sna bug gnyis nas rlung/ /phyir la 'gro tshe
bde dge kun/ /'od zer dkar po'i rnams pa yis/ /rlung dang 'grogs nas
phyir song ba/ /ma rnams kun gyi sna bug

nas; ;zhugs pas ma rnams bde bas tshim/ /nang du 'jug tshe ma rnams kyi/
sdig sgrib sdug bsngal ji snyed pa/ /thams cad 'od zer nag po yi/ /rnam
pas ma yi sna bug nas/ /thon

nas rang gi sna bug tu/ /zhugs te rang la smin par bsam/ /de ltar
rlung la bskyon pa yi/ /gtong len mos pas legs sbyangs na/ /rlung
sems 'jug pa gcig pa'i phyir/ /bsam pa shugs drag

skye sla gsungs/ /de lta'i bsam pa sbyang tsam gyis/ /gzhan la dngos
su phan dka' na'ang/ /bsam pa sbyong ba don che ste/ /'phags pa klu
yis ji skad du/ /gzhan phan las la mthu med kyang/ /

@113b de yi bsam pa rtag tu bya/ /gang la de ni yod gyur pa/ /de la de
ni don gyis zhugs/ /ces dang zhi ba lha yis kyang/ /gal te 'gro ba dbul
por pa/ /sbyin pa'i pha rol phyin yin na/ /da dung 'gro bkren

yod na sngon/ /skyob pa ji ltar pha rol phyin/ /bdog pa thams cad
'bras bcas te/ /skye bo kun la btang sems kyis/ /sbyin pa'i pha rol phyin
gsungs te/ /de ltar de ni sems nyid do/ /zhes

so des na bsam pa 'di/ /dam pa rnams kyis rab bsngags pas/ /rgyun tu
sbyong ba gnad kyi don/ /de ltar kun mkhyen thob bya'i phyir/ /bsod
nams tshogs chen legs bsags pa/ /

ye shes tshogs kyis zin dgos te/ /zhib lha yis ji skad du/ /yan lag 'di dag
thams cad ni/ /thub pas shes rab don du gsungs/ /de yi phyir na sdug
bsngal dag /zhi bar 'dod

pas shes rab bskyed/ /ces pas byang sems phyin drug sogs/ /thabs kyi
yan lag thams cad ni/ /bdag med rtogs pa'i shes rab kyis/ /sgrib gnyis
spong phyir gsungs par bshad

des na nyams len de dag dang/ /des mtshon kun byang chos kun
kyang/ /ngo bos grub pa'i skye 'gag dang/ /rtag chad 'gro 'ong gcig
tha dad/ /mtha' brgyad chos sam dngos po ru/ /'dzin

pa'i rtogs pa'i dri ma yis/ /ma spags mtha' bral dbu ma'i lam/ /rang
bzhin med par mnyam par gzhag /de las langs pa'i rjes thob tu/ /chos
kun rang bzhin med na yang/ /

tha snyad tsam du sgyu ma ltar/ /snang zhing grub par shes pa yis/
/ngo bos grub pa'i rtag mtha' dang/ /gtan nas med pa'i chad mtha' ru/
/zhen pa'i 'ching ba las grol te/ /bla med byang

@114a @#/ /chub myur thob shog /bla ma 'od dpag med mgon gyis/ /chos
kun ngo bos stong pa dang/ /tha snyad tsam du snang ba'i blo/ /zung
'brel skye bar byin gyis rlobs/ /snyam pa'i

smon 'dun gsol 'debs kyis/ /bdud rtsi 'beb sbyang sngar bzhin bya/ /'di
dag dngos gzhi'i rim pa ste/ /gsum pa 'jug gi cho ga ni/ /bla ma 'od
dpag med mgon gyis/ /bdag gzhan 'gro ba

ma lus pas/ /khyod kyi go 'phang dam pa de/ /myur du 'thob par byin
gyis rlobs/ /de ltar gdung shugs drag po yis/ /gsol ba btab pas dgyes
bzhin du/ /'od du zhu ste spyi

gtsug nas/ /zhugs te snying ka'i padmar bzhugs/ /de yi thugs ka'i hUM
yig las/ /'od zer 'phros te 'gro kun gyi/ /sdig sgrib sbyangs shing tshogs
rdzogs te/ /'od dpag med du

zur par bsam/ /'di ltar bgyis pa'i dge tshogs kyis/ /bdag dang ma 'gyur
'gro ba la/ /byang chub sems mchog rin po che/ /ma skyes pa rnams
skye gyur cig /skyes pa nyams pa med

pa dang; ;gong nas gong du 'phel bar shog /rang rgyud smin byed
phyin drug dang/ /gzhan rgyud smin byed bsdu bzhi sogs/ /rlabs chen
tshogs gnyis rab rdzogs te/ /kun mkhyen go 'phang

myur thob shog /'dir ngag rnams kyi brjod bya la/ /go ba legs par
bskyed byas te/ /yang dang yang du bsam pa yis/ /sems la myong ba
'don dgos kyi/ /don la dpyod pa mi byed

par/ /tshig tsam ngag du brjod pa yis/ /smra mkhan ne tso'i 'don par
ltar/ /sems rgyud la ni ci zhig phan/ /'on kyang rang cag mi dge
dang/ /lung ma bstan gyis dus 'da' zhing/ /

@114b dge ba la ni yid phyogs pa/ /srid mtha' tsam du gyur rnams kyis/
/man ngag gdams pa 'di 'dra'i tshig /ngag tu lan re brjod pa dang/ /tshig
rjes 'brang ba'i go ba tsam/ /lan re bskyed pa'ang

skal pa bzang/ /blo dman sbyangs pa chud rnams kyis/ /tshig 'bru la ni
ma brten par/ /don la go ba skye 'gyur pa'i/ /dpyad pa byed pa shin tu
dka'/ /des na gdams pa'i brjod byed

tshig /blo la legs par byang byas te/ /de la legs par dpyod pa yis/ /nor
'khrul med pa'i go ba btsal/ /nge nas go ba legs rnyed tshe/ /yang yang
yid la bsam pa yis/ /

gdams don de la yid 'gyur pa'i/ /myong ba thon phyir 'bad pa gces/ /re
zhig tshig rjes 'brang ba yi/ /go bar bshar sbyang bya 'dod na/ /tshes med
thams cad blor bzung nas/ /

de don yid la bsam zhing brjod/ /thams cad bshar longs ma byung
tshe/ /sbyor ba'i skabs gyi tshos med dang/ /dngos gzhi tshig brgyad ma
nyid dang/ /mjug chog tshe med sprel te brjod/ /

tshig brgyad ma zhes bya ba yi/ /gdams pa dngos gzhi dgod pa ni/ /bdag
gis sems can thams cad la/ /yid bzhin nor bu las lhag pa'i/ /don
mchog sgrub pa'i bsam pa yis/ /

shin tu gces par 'dzin par shog /gang du su dang 'grogs pa'i tshe/
/bdag nyid kun las dman blta zhing/ /gzhan la bsam pa thag pa yis/
/gzhan nyid gces par 'dzin par shog

spyod lam kun tu rang rgyud la/ /rtog cing nyon mongs skyes ma
thag /bdag gzhan ma rung byed pas na/ /btsan thabs gdod nas bzlog
par shog /rang bzhin dang pa'i sems can dang/

@115a @#/ /sdig sdug drag pos non mthong tshe/ /rin chen gter dang
'phrad pa ltar/ /shin tu dga' bas gces 'dzin shog /gang la bdag gis
phan btags pa'am/ /re ba

che ba 'ga' zhig gis/ /shin tu mi rigs byed na yang/ /bshes gnyen dam
par blta bar shog /bdag la gzhan gyis phrag dog gis/ /gshe bskur la
sogs mi rigs pa'i/ /spyod kha

rang gis len pa dang/ /rgyal kha gzhan la 'bul bar shog /mdor na
dngos sam bsam pa yis/ /phan bde mi rnams kun la 'bul/ /ma yi gnong
dang sdug bsngal kun/ /gsang bas

bdag la len par shog /de dag kun kyang chos brgyad kyi/ /rtog pa'i
dri mas ma spags par/ /chos kun sgyu mar shes pa yis/ /zhen pa'i 'ching
ba las grol shog /ces so 'di

dag rnams kyi don/ /gong du bshad ltar legs par bsam/ /de ltar
byang chub sems sbyong gi /gdams pa zab mo tshig brgyad ma'i/ /'grel
ba nyams len dang sbyar ba/ /shin tu gsal

pa bkod pa 'di/ /'di snang chos brgyad rnam g.yeng gi /khol por
gyur pa'i gyi na pa/ /blo bzang chos ldan ming can gyis/ /paN chen
thams cad mkhyen pa'i sras/ /grub mchog chos

'phel mtshan can las/ /gdams pa'i khrid rgyun legs mnos shing/ /nyid
kyis brjed byang mdzad pa yi/ /zin bris mdor bsdus yig chung dang/
/sems dpa' chen por sgreng bas/ /mdzad

pa'i 'di yin rnam bshad dang/ /rgyal sras chen po zhi ba lha'i/ /spyod
'jug rnams la blo chung gis/ /dpyod de rang gis go tshad tsam/ /rang
nyid bag chags 'jog pa dang/ /skal mnyam gzhan la'ang

@115b phan 'dod kyi/ /bsam pas kun gyis go bde bar/ /gnas mchog 'jam
dbyangs gong ma che/ /khang shis rgyal bstan spel ba'i slad/ /mtsho
bdun mchod yon bkram pa'i sar/ /gsar

bzhengs lha khang chen mor sbyar/ /yi ge pa ni thub pa yi/ /gzhung
lugs rab 'byams smra ba la/ /rnam dpyod yangs pa'i spobs pa can/
/sdom brtson blo bzang nyi ma'o/ /'dis mtshon dge ba

ji snyed pa/ /'gro kun byang chub sems ldan zhing/ /blo bzang rgyal
ba'i dbang po yi/ /bstan pa dar zhing rgyas phyir bsngo// //