@#/ /lam rim bsdus don gyi tshig 'grel snying po mdor bsdus gsal ba zhes
bya ba bzhugs so/ /

@001a @##/ /na mo su ma ti kI ti ye/ thugs bskyed mgyogs 'gro'i shugs
kyis nyer drangs pa'i/ /gzhan phan 'phrin las 'gro ba'i dpal du shar/
/skal ldan padmo yongs kyi gnyen gcig po/ /thub dbang

smra ba'i nyi ma de la 'dud/ /blo chen gzhan gyis shin tu dpag dka'
ba'i/ /zab don legs par 'grel ba'i rnam dpyod kyis/ /bzang po'i mdzad
mchog grags pa'i snang ba can/ /rje btsun bla ma'i zhabs la gus
phyag 'tshal/ /gang de'i

legs par bshad pa'i mthar thug ni/ /byang chub lam gyi rim pa zhes
grags pa/ /de yi gnad kun gcig tu rab bsgril pa/ /lam rim bsdus pa'i
dgongs don gsal bar bya/ /de la 'dir bdag cag gi bla ma chos kyi
rgyal po btsong kha pa chen

pos mdzad pa'i nyams mgur ram/ lam rim bsdus pa'i don ni gang bshad
par bya ba'i chos so/ /'di la gsum/ sngon 'gro mchod brjod sogs dang/
dngos gzhi gzhung don dang/ mjug gi bshad pa'i khyad par ro/ /dang
po la

gnyis/ mchod par brjod pa dang/ bshad bya ngos bzung ba'o/ /dang
po la'ang gnyis te/ dang po ni/ la lar na mo gu ru manydzu g+ho ShA
ya/ zhes 'byung ba ni sla'o/ /gnyis pa la lnga las/ dang po thub dbang
la phyag 'tshal ba ni/

phun tshogs dge legs bye bas bskrun pa'i sku/ /zhes sogs rkang pa bzhi
ste/ 'di la mkhyen brtse nus gsum mam/ spangs rtogs kyi yon tan spyi
dang/ bye brag sku'i yon tan gyi dbang du byas na/ mtshan dang dpe
byad sogs

@002a @#/ /yon tan du mas khyad par du byas pa de ni/ rgyu gang las
'khrungs pa yod de/ bsod nams dang ye shes kyis bsdus pa phun sum
tshogs pa'i dge legs re re tsam ma yin par bye bas bskrun pa ste bskyed
pa yin pa'i

phyir ro/ /'dir bye ba zhes pa ni/ mang tshig yin gyi/ grangs kyi bye ba
tsam la mi bzung ngo/ /mtshan dpe re re la rgyu ji tsam dgos pa ni/ rin
chen 'phreng ba las gsal la/ rgyu so so ba re re'i dbang du byas pa
ni/ yum gyi mdo sogs dang/ mngon

rtogs rgyan na'ang yod do/ /gsung gi yon tan la ngo bo'i dbang du
byas na'ang rung la 'bras bu'i dbang du byas na/ de bzhin gshegs pa'i
gsung gi yon tan nam byed las yod de/ grangs mtha' yas pa'i 'gro ba'i
gnas skabs dang mthar thug gi re ba

skong bar byed pa'i phyir ro/ /re ba skong tshul yang/ chos bstan nas
mngon mtho dang nges legs la bkod pa'i sgo nas phan 'dogs pa
dang/ de dang de'i skabs kyi the tshom gcod pa la bya'o/ /thugs kyi
yon tan gyi khyad par yod de/ ngo bo'i dbang du

byas na ma lus ji lta ji snyed kyi shes bya thams cad ji bzhin mngon
sum du gzigs pa'i phyir ro/ /de lta bu'i sku gsung thugs kyi yon tan
dang ldan pa/ shAkya'i rigs kyi gtso bo shAkya thub pa de la ji ltar
phyag 'tshal ba yod de/ yan lag gi

dam pa mgo bos phyag 'tshal ba ste 'dud par byed pa'i phyir ro/ /gnyis
pa ni/ zla med ston pa de yi/ zhes sogs bzhi ste/ phyag 'tshal lo/ /gang
la na/ 'gran zla med pa'i ston pa de yi chos kyi sras byang sems rnams
kyi nang nas mchog

@002b tu gyur cing rgyal ba de'i sku gsung thugs kyi mdzad pa kun
gyi khur bsnams pa ste bzhes nas 'jig rten gyi khams 'dir ma zad
grangs med pa'i sangs rgyas kyi zhing du byang sems sogs sprul pa
du ma'i gar gyis rnam par rol ba can mi pham byams pa dang 'jam pa'i
dbyangs gnyis la'o/ /mdzad pa'i khur

bzhes tshul ni/ byams 'jam dbyangs gnyis kyis thub pa'i dam pa'i chos
spyi dang/ khyad par rgya chen spyod pa dang zab mo'i lta ba'i
brgyud rim bzung ste spel bar mdzad pa 'di'o/ /gsum pa ni/ shin tu
dpag par dka' ba sogs bzhi ste/ phyag 'tshal lo/ /gang la na/ rgyal ba'i
gsung rab spyi dang khyad par/ shin tu

dpag par te rtogs par dka' ba rgyal ba'i yum rgyas 'bring bsdus pa
gsum gyi don ji lta ba bzhin du dgongs pa 'grel par mdzad pa'i sgo
nas 'dzam gling gi rgyan du gyur pa mtshon la mgon po klu sgrub
dang 'phags pa thogs med ces ni sa 'og sa steng sa bla ste sa gsum na
yongs su grags pa'i zhabs la'o/ /gang gis na/

de ? blo bzang grags pa'i dpal gyis so/ /bzhi pa ni/ shing rta chen po
gnyis las sogs bzhi ste/ 'dud do/ /gang la na/ shing rta chen po klu
sgrub dang thogs med rnam pa gnyis las legs par brgyud pa'i zab mo
lta ba dang/ rgya chen spyod pa'i lam gyi rim pa tshang la ma nor bar
yongs su rdzogs pa'i gnad

bsdus pa'i gdams pa'i mdzod 'dzin pa dpal mar me mdzad la'o/ /de
yang jo bo chen pos bla ma gser gling pa bsten nas byams pa dang
thogs med nas brgyud pa'i gdams pa gsan la/ rigs pa'i khu byug bsten
nas 'jam dbyangs dang klu sgrub nas brgyud pa'i gang sa dud ? ma
lus pa gsan nas gdams

pa'i chu bo gnyis zung du 'brel bar mdzad do/ /lnga pa ni/ rab 'byams
gsung rab kun la sogs bzhi ste/ phyag 'tshal lo/ /gang la na/ phyogs
re tsam ma yin par rab 'byams gsung rab kun la lta ba'i mig tu gyur
cing/ skal ba bzang por gyur ba'i gdul bya thar par bgrod pa'i 'jug
ngogs te lam

@003a @#/ /mchog tu gyur pa'i skyes bu gsum gyi lam gyi rim pa 'di nyid/
brtse ba'i thugs kyis bskyod pa ste drangs pa'i thabs mkhas kyi mdzad
pa yis gdul bya la gsal bar mdzad pa'i bshes gnyen rnams la'o/ /tshul
ji ltar na/ tshig tsam ma yin par yid gus pa'i sgo nas so/

'dir lta ba'i mig ces pa ni/ kha cig bshes gnyen la sbyor bar snang
yang/ lam rim nyid la byed par rje'i dgongs pa yin par lam rim chen
mo'i mjug tu gsal lo/ /gnyis pa bshad bya ngos bzung ba la gsum/
brgyud pa'i khyad par/ khyad chos/ dgos pa'o/ /dang po ni/ 'dzam
gling mkhas pa yongs kyi

sogs bzhi ste/ 'dzam gling 'dir byon pa'i mkhas pa yongs kyi gtsug gi
rgyan du gyur cing/ mkhas pa'i snyan pa phyogs kun du grags pa'i ba
dan 'gro ba'i gnas 'di na nyi ma ltar lhang nger gsal ba klu sgrub
dang thogs med gnyis las rim pa bzhin du legs par brgyud pa'i byang
chub lam gyi rim pa'i gzhung nyid

'chad par bya'o/ /zhes rtsom pa dam bca' don gyis mdzad do/ /gnyis
pa la gnyis/ dpe don gyi khyad par dang/ khyad chos dngos so/ /dang
po ni/ skye rgu'i 'dod don ma lus skong bas na/ /sogs bzhi ste/ de ltar
brgyud pa'i byang chub lam gyi rim pa 'di ni/ dpe don gyi khyad par
ji lta bu dang ldan zhe na/

yod de/ thar 'dod kyi skye rgu'i 'dod don ma lus pa skong bas na/
gdams pa rin chen dbang gi rgyal po lta bu ste/ yid bzhin gyi nor bu
rin po che dang chos mtshungs shing/ theg pa che chung gi gzhung
lugs bzang po stong gi legs bshad kyi chu bo ma lus pa 'du ba'i phyir
na/ dpal ldan te phun sum tshogs pa

legs par bshad pa'i rgya mtsho lta bu'ang yin no/ /'dod pa'i don skang
tshul ni/ 'di'i don nyams su blangs pa las mngon mtho dang nges legs
'grub pa dang/ gzhung lugs stong ste mang ? tshig smos pa yin pas
grangs stong kho nar mi bzung zhing/ de rnams 'du tshul yang rjod
byed kyi tshig thams cad 'du ba'i don min gyi

@003b brjod bya'i don mtha' dag 'du ba'o/ /gnyis pa ni/ bstan pa thams
cad 'gal med sogs bzhi ste/ de lta bu'i gzhung 'di ni/ khyad chos sam
che ba bzhi dang ldan te/ gdams pa 'di la brten nas rgyal bas chos
tshul ji snyad cig gsungs pa thams cad las/ kha cig ni lam gyi gtso bo/
kha cig ni de'i yan lag

ston byed du shes nas dngos dang brgyud ba ci rigs kyi sgo nas
'tshang rgya ba'i cha rkyen du go bar 'gyur bas na/ bstan pa thams
cad 'gal med du rtogs pa'i che ba dang/ mdo sngags kyi gsung rab
rnams dang de'i dgongs 'grel gyi bstan bcos rnams bshad chos tsam
du bzung nas nyams su len rgyu de dag gi don las gzhan

zhig na yod par 'dzin pa'i log rtog rnams ldog ste/ gsung rab
dgongs 'grel dang bcas pa'i brjod bya mtha' dag nyams su len gyi go
rim dang mthun par bshes gnyen bsten tshul nas zhi lhag gi bar
bsdus nas dpyad sgom dang 'dzeg sgom ci rigs kyi sgo nas nyams su
len tshul shes par 'gyur bas na/ gsung rab

thams cad gdams par 'char ba'i che ba dang/ de ltar gsung rab
thams cad gdams ngag gi mchog yin kyang blo ma sbyangs pa'i las
dang po bas gzhung che ba de dag gi dgongs don rang stobs kyis
rtogs nas nyams su lan mi shes pas/ de dag gi dgongs don rnams 'dus
pa'i bla ma'i man ngag byang chub lam gyi rim pa 'di lta bu la brten
nas gzhung che ba de rnams kyi dgongs don legs par rtogs par
'gyur bas na/ rgyal ba'i dgongs pa bde blag tu rtogs pa'i che ba dang/
de ltar rnyed pa'i tshe sangs rgyas kyi bka' thams cad dngos dang
brgyud ba ci rigs kyi sgo nas 'tshang rgya ba'i thabs su go nas 'tshang
rgya ba'i thabs mi ston pa'i

sangs rgyas kyi bka' med par shes te/ gsung rab de dag la gdul bya'i
dbang gis brjod bya cung zad re mi mthun pa dang mchog dman yod
kyang/ thams cad 'tshang rgya ba'i thabs ston pa tsam la khyad par
med par nges nas chos spong ba'i las mi 'byung ba ste/ nyes spyod
chen po'i g.yang sa las kyang srung ba'i che ba bzhi

@004a @#/ /dang ldan pa'i phyir ro/ /gsum pa la gnyis/ che ba de ldan gyi
chos 'di nyams su len rigs pa dang/ nyams su blangs pa'i phan yon
no/ /dang po ni/ de phyir rgya bod mkhas pa'i sogs bzhi ste/ sngar
bshad pa'i che ba de ltar yod pa'i rgyu mtshan de'i phyir na/ rgya gar
dang

bod kyi mkhas pa'i skye bo ni skal ba dang ldan pa du mas nyams len
du bsten pa'i gdams pa mchog tu gyur pa skyes bu chung 'bring che
gsum gyi lam gyi rim pa yis ni yid rab tu mi 'phrog pa'i rnam dpyod
dang ldan pa su zhig yod de med do/ /gnyis pa ni/ gsung rab kun gyi
snying po sogs bzhi ste/ theg pa che chung gi gsung rab kun gyi

$$$snying po bsdu bsdu ba'i gzhung gi tshul 'di ni/ lan mang du lta ci
thun re ston pa dang lan re nyan pas kyang gzhung che ba nas dam
chos 'chad pa dang thos pa'i phan yon gyi tshogs rlabs chen 'byung
bar gsungs pa de rnams sdud par nges pas so/ /rgyu mtshan des na/ de'i
don yid la bsam

par bya'o/ /zhes pa ni don bsdu ba'i sgo nas gdams pa'o/ /bsdu bsdu ba
ni gsung rab thams cad kyi gnad bsdus pa dang de yang mdor bsdus
te bstan pa'i don no/ /gnyis pa gzhung gi don bshad pa la/ mchod
brjod sogs ni/ gzhung gi yan lag yin la/ 'dir gzhung don dngos kyi
dbang du byas te 'chad

pa la gnyis/ thun mong ba dang/ thun mong ma yin pa'i lam la bslab
tshul lo/ /dang po la gnyis/ sngon 'gro dang/ dngos gzhi'o/ /dang po
ni/ de nas 'di phyi'i legs tshogs sogs brgyad de/ lam rim yongs rdzogs
dang de'i cha shas tsam las su blangs pa las kyang phan yon chen
po yod tshul bsam pa

sogs sngon du btang ste de nas 'di ltar nyams su blang bar bya'o/
/zhes mtshams sbyar ro/ /phan yon de ltar mthong ba des/ 'di dang
phyi ma'i legs tshogs ji snyed mchis pa'i rten 'brel legs par 'grig par
'gyur ba'i rtsa ba ni/ rang la lam ston pa'i dge ba'i bshes gnyen dam
par shes par byas te/ 'bad pa

@004b drag po yis/ bla ma la skyon rtog gi blo bkag nas dad pa skye
ci thub byed pa'i sgo nas bsam pas bsten pa dang/ bla ma mnyes pa sgo
mtha' dag nas bsgrub cing ma mnyes pa nam yang mi bsgrub pa dang/
lus kyis bkur zhing ngag gis bstod pa sogs dang/ ci gsung bka' bzhin
du sgrub pa'i sgo nas sbyor bas tshul

bzhin du bsten pa ru ste bsten pa la rag yas par mthong nas rkyen
cung zad tsam du ma zad/ srog gi phyir yang mi gtong bar bka'
bzhin du sgrub pa'i mchod pas mnyes par byed dgos so/ /de'i mjug tu/
rje'i gsung 'bum thor bu las/ rnal 'byor ngas kyang nyams len de
ltar byas/ /thar 'dod khyed kyang de bzhin bskyang 'tshal lo/ /

zhes 'byung ba ni/ rje'i gsung dngos yin la/ chos spyod las/ rje btsun
bla mas nyams len de ltar mdzad/ /thar 'dod bdag kyang de bzhin
bskyang 'tshal lo/ /zhes 'byung ba ni/ phyis gzhan gyis bsgyur ba ste/
don go sla zhing phyi ma gzhan la'ang sbyor/ bla ma'i mtshan nyid/
bsten tshul sogs lam rim sogs

nas shes par bya'o/ /gnyis pa la gnyis/ dal 'byor la snying po len par
bskul ba dang/ snying po ji ltar len tshul lo/ /dang po ni/ dal ba'i rten
'di yid bzhin nor sogs te/ dal brgyad 'byor bcu ldan pa'i sgo nas
chos sgrub pa la khos pas na dal ba'i rten khyad par can 'di ni/ yid
bzhin gyi nor bu rin po

che las kyang lhag pa 'di 'dra ba ni sngar yang yang rnyed pa ma
yin gyi rnyed pa dus da res tsam zhig yin no/ /des rnyed na don che
bar ma zad/ rnyed par dka' bar bstan to/ /yid bzhin gyi nor bu las
lhag tshul ni nor bu las dgos 'dod 'byung yang tshe 'di'i gnas skabs kyi
'dod don yin la/ rten 'di la brten nas mngon mtho tsam du ma zad/
nges legs thar pa dang thams cad mkhyen pa bsgrubs na'ang thob
nus par gsungs pa'i phyir na lhag go /de ltar rnyed dka' zhing rnyed
na don che ba'i dal 'byor gyi rten 'di don med du mi btang bar 'di la
rang gis ci nus kyi sgo nas chos bya ba'i dam bca' brtan po bya'o/
/gnyis pa snying po ji ltar len tshul la

@005a @#/ /gnyis/ lam gyi dbang du byas pa'i gsung rab rnams 'du tshul
dang/ nyams su len tshul dngos so/ /dang po ni/ sangs rgyas bcom
ldan 'das kyis chos kyi phung po ji snyed cig gsungs pa ni sems can
gyi don du yin la/ de yang mngon mtho nges legs gnyis las/ mngon

mtho las brtsams te gtso bor gsungs pa rnams skyes bu chung ngu
dngos sam de dang thun mong ba'i chos skor du 'du zhing/ nges
legs la gnyis las thar pa la brtsams te gtso bor gsungs pa rnams
skyes bu 'bring dngos sam de dang thun mong ba'i chos skor du 'du
la/ thams cad mkhyen pa sgrub pa las

brtsams te gsungs pa thams cad skyes bu chen po'i chos skor du 'du
ba yin no/ /'dir skyes bu chung 'bring dang thun mong ba'i lam 'ga'
zhig skyes bu chen po'i lam gyi yan lag tu dgos pa der 'khrid pa yin
gyi/ skyes bu chung 'bring dngos kyi lam la 'khrid pa ni ma yin te/
mngon mtho tsam zhig don gnyer gyi blo

de skyes bu chung ngu'i lam dngos dang/ rang don du thar pa tsam
zhig don gnyer gyi blo de skyes bu 'bring gi lam dngos yin pas/ der
'khrid na ni skyes bu chen po'i lam gyi go sar 'khrid pa'i skyon du
'gyur ba'i phyir ro/ /'o na/ de gnyis dang thun mong ba'i lam ji lta bu
zhe na/ sdig spong dge ba sgrub pa'i sgo nas mngon mtho

don gnyer gyi blo de/ skyes bu chung ngu dang thun mong ba'i lam
dang/ 'khor ba las grol 'dod kyi sgo nas thar pa don gnyer gyi blo
de skyes bu 'bring dang thun mong ba'i lam yin te/ de gnyis ka'ang
byang sems kyi rgyud la yod cing/ des nyams su len dgos pa'i phyir
ro/ /gal te skyes bu chung 'bring gi lam gnyis skyes bu

chen po'i lam gyi gol sa ? yin na/ de'i gegs sam mi mthun phyogs yin
pa'i phyir 'tshang rgya ba'i thabs kyang ma yin par 'gyur ro zhe na/
skyon med de/ lam de gnyis skyes bu chen po myur du 'tshang rgya ba'i
lam gyi gol sa yin pas de 'tshang rgya ba'i thabs ma yin kyang/ nyan
rang rnams rim gyis rgyud smin te 'tshang rgya

@005b ba'i thabs su 'gyur ba la 'gal ba ci yang med pa'i phyir ro/ /de
yang rang nyid gcig pu zhi bde don gnyer gyi blo lta bu la gtso bor
dgongs pa'o/ /gnyis pa la gsum/ skyes bu chung ngu dang thun mong
ba'i lam/ 'bring dang thun mong ba'i lam/ chen po'i lam dngos so/
/dang po la gnyis/ phyi ma don gnyer gyi blo

bskyed pa/ phyi ma'i bde thabs bsten pa'o/ /dang po la gnyis/ 'chi ba mi
rtag pa bsam pa dang/ ngan 'gro'i sdug bsngal bsam pa'o/ /dang po ni/
rnyed dka' 'jig sla sogs bzhi ste/ rgyu/ ngo bo/ dpe'i sgo nas rnyed par
dka' zhing/ 'chi rkyen mang bas 'jig par sla ba ni/ dper na/ nam mkha'i
glog myur du 'jig

pa dang 'dra ba'i tshul 'di bsams nas dgra 'dul gnyen skyong sogs 'jig
rten gyi bya ba kun dper na/ snying po med pa'i shun pa'i spun pa
'phyar ba bzhin du don med par rtogs par gyur nas nyin mtshan kun
tu rten 'di la snying po len pa dgos so/ /gnyis pa ngan 'gro'i sdug
bsngal bsam pa ni/ shi nas ngan 'gror mi skye

zhes pa ste/ de ltar 'chi ba mi rtag par ma zad/ shi nas las dkar nag
gnyis kyis ji ltar 'phangs pa bzhin skye ba len dgos la/ de ni dge ba'i
las kyis bde 'gror skye zhing bde ba myong la/ mi dge ba'i las kyis
ngan 'gror skye zhing sdug bsngal myong ngo/ /bdag gis ni bde skyo
'gror skye ba'i rgyu cher ma bsgrubs la/ ngan 'gror skye ba'i

ni mang du bsags so/ /de'i phyir na phyi mar dmyal ba la sogs pa ngan
'gror mi skye ba'i gdengs thob pa bdag la med cing/ med par ma zad/
der skye bshugs che'o snyam nas ngan 'gro'i sdug bsngal yang yang
bsams te de las thar 'dod shugs can bskyed do/ /gnyis pa phyi ma'i bde
thabs la gsum/ skyabs 'gro bslab bya dang

bcas pa dang/ de la las gnyis kyi blang dor la 'jug dgos pa dang/
rnam mkhyen sgrub pa'i rten bshad pa'o/ /dang po ni/ de yi 'jigs skyob
dkon mchog gsum sogs gsum ste/ de ltar las kyi dbang gis ngan
'gror ltung bar 'gyur bas ngan 'gro de yi 'jigs pa las skyob pa'i skyabs
ni dkon mchog gsum du nges

@006a @#/ /so/ /de yang ji skad du/ sangs rgyas chos dang dge 'dun te/
/thar pa 'dod pa rnams kyi skyabs/ /zhes 'byung ba ltar/ dkon mchog
gsum so so'i khyad par dang yon tan shes pa'i sgo nas skyabs su 'gro
dgos so/ /'gro tshul yang snying thag pa nas dkon mchog gsum

la 'khor ba dang ngan song gi sdug bsngal las skyob pa'i nus pa yod
par yid ches pa'i sgo nas re ltos 'cha' ba'i blo bskyed pa'o/ /de ltar
'jigs pa de las skyob nus par shes nas skyob pa de'i phyir du de gsum
la skyabs su song ba'i skyabs 'gro shin tu bsten pa dang skyabs 'gro
de yi bslab bya thun mong ba dang thun

mong ma yin pa lam rim sogs nas bshad pa la nyams pa med par bya'o/
/gnyis pa ni/ de yang dkar nag las 'bras sogs te/ de yang dad pa la
spyir dang ba'i dad pa/ yid ches pa'i dad pa/ 'dod pa'i dad pa dang
gsum yod kyang 'dir ni gtso bo yid ches pa'i dad pa ste/ dkon mchog
gis skyob pa de yang las

'bras la blang dor phyin ci log tu bsgrubs na mi 'byung bas/ dkar po
dge ba dang nag po mi dge ba'i las 'bras bu dang bcas pa ji ltar yin
legs par bsams nas dge ba 'bras bu dang bcas pa la blang bya dang/
mi dge 'bras bu dang bcas la dor byar byed pa'i sgo nas tshul bzhin du
sgrub pa la rag las so/ /mdor na

sangs rgyas kyis dge mi dge sogs sogs las dang 'bras bu ji ltar
gsungs pa la yid ches pa'i sgo nas blang dor byed dgos pa'i don no/
/lhag ma rje btsun bla mas sogs sla'o/ /gsum pa la gnyis/ dngos dang/
stobs bzhi bsten tshul lo/ /dang po ni/ lam mchog sgrub la sogs te/
khyad par du lam mchog

rnam mkhyen sgrub pa la tshe ring ba kha dog bzang ba sogs rnam
smin gyi rgyu brgyad sogs mtshan nyid tshang ba'i rten ci rigs pa ma
rnyid kyi bar du lam sgrub kyang sa chod mi 'ong bas/ de 'ong ba'i
ched du rten mtshan nyid tshang ba de yi ma tshang med pa'i rgyu sgrub
pa la bslab par bya'o/ /rgyu ni gzhan gyi srog skyob pa/ rten la mar
me 'bul ba sogs

@006b mang ngo/ /de'i tshe las 'bras la blang dor ci thub byas kyang/
bag med pa dang nyon mongs mang ba'i dbang gis nyes pa 'byung bas
so/ /gnyis pa ni/ sgo gsum sdig ltung sogs te/ rang cag ni/ lus ngag
yid kyi sgo gsum las nyon spyi dang khyad par rang bzhin gyi kha na
ma tho ba'i sdig pa dang/ bcas pa'i kha na ma tho ba'i ltung ba'i

dri mas spags pa 'di ni/ las dang nyon mongs pa'i sgrib pa gnyis las
lhag par las kyi sgrib pa sbyong ba gnad che bas na/ dus rgyun tu
rten gyi stobs dang/ sun 'byin pa'i stobs/ slar ldog pa'i stobs/ gnyen
po kun tu spyod pa'i stobs te stobs bzhi'i bshags sdom tshang bar
bsten par gces so/ /dri

mas spags pa 'di zhes gzhung mang por 'byung ba ltar byas la/ chos
spyod du ni 'dis zhes 'byung ngo/ /stobs bzhi'i ngos 'dzin dang bshags
tshul rgyas par gzhan du shes par bya'o/ /rje btsun bla mas sogs
sngar bzhin no/ /gnyis pa skyes bu 'bring dang thun mong ba'i lam
nyams su len tshul gnyis/ sdug kun gnyis kyi nyes dmigs pa bsam

dgos pa'i rgyu mtshan dang/ bsam tshul dngos so/ /dang po ni/ sdug
bden gnyes dmigs sogs te/ 'khor ba las thar bar 'dod pas thog mar
sdug kun gnyis kyi nyes dmigs bsam dgos te/ ngan song gsum gyi
sdug bsngal dang bde 'gro'i sdug bsngal spyi dang bye brag skye
rgan 'chi sogs sdug bsngal bden pas bsdus pa'i

'khor ba'i nyes dmigs bsam pa la 'bad na ni/ sdug bsngal las thar 'dod
med par thar pa don gnyer gyi blo ji lta ba bzhin mi skye zhing/ 'dod
chags sogs kyi ngo bo skye tshul ji ltar yin pa'i khyad par shes pa'i sgo
nas kun 'byung bden pa 'khor ba'i 'jug rim tu 'gro tshul ma bsams na/
'ben ma mthong bar mda' 'phan pa

bzhin 'khor ba'i rtsa ba gcod tshul mi shes pas so/ /gnyis pa la gnyis/
sdug bsngal 'khor ba'i nyes dmigs dang/ kun 'byung gi 'khor ba'i 'jug
rim bsam pa'o/ /dang po ni/ srid las nges 'byung sogs te/ 'khor ba'i
gnas su skye rgan 'chi bzhi dang mya ngan dang smre sngags 'don
pa yid mi bde ba dang tsha grang 'thab rtsod

@007a @#/ /sogs kyi sdug bsngal rnams mthong nas srid pa 'khor ba las
nges par 'byung 'dod kyi skyo shas drag po bsten pa dang/ 'chad
'gyur ltar sdug bsngal de bskyed pa'i rgyu yang shes par bya'o/ /gnyis
pa ni/ 'khor bar gang gis sogs te/ 'khor bar 'ching ba byed gang gis
btsangs ?

ba shes pa gces pa ste gal che'o/ /'ching byed la las nyon gnyis te
khyad par phyen mang yang/ don bsgril na so skye'i rgyud kyi 'dod
chags khong khro nga rgyal ma rig pa the tshom nyon mongs can
phrag dog sogs nyon mongs thams cad ni nyon mongs pa'i kun
'byung bden pa yin la/ nyon mongs des kun nas bslangs pa'i

las dge mi dge gang yin kyang las kyi kun 'byung bden pa yin no/ /de
yang gtso bo ma rig pa'i dbang gis las bsags las kyi dbang gis 'khor
bar 'jug pa'i rten 'brel yan lag bcu gnyis kyi rim pa legs par shes
shing/ mdor na las dang nyon mongs gnyis kyi dbang gis 'khor bar
'khor tshul rnams

bla ma'i man ngag la brten nas shes pa ni/ kun 'byung 'khor ba'i 'jug
rim shes pa'o/ /'khor ba'i rtsa ba gcod tshul ni bdag med rtogs pa'i
shes rab kyis ma rig pa'i zhen yul legs par sun phyung ba'i tshul gyis
goms par byas pa'i mthar ma rig pa spangs pa na 'khor ba'i rtsa ba
bcad cing/ nyon mongs gzhan

thams cad kyang zhor la sbyong bar 'gyur ba yin no/ /sdug kun
gnyis kyi nang nas bun 'byung spangs na shing rtsa ba bcad na
bskams 'gro ba ltar sdug bsngal yang spong bar 'gyur pa gzhung
chen po rnams kyi dgongs pa yin mod/ deng sang gi las dang po bas
ni/ nyon mongs rtsa ba nas spong mi nus pas/ stobs bzhi'i

bshags pa la brten nas kun 'byung gi nang tshan sdig ltung rnams
spong ba gnad che'o/ /khyad par du tshul khrims kyi bslab pa sogs
gsum la 'bad dgos la/ tshul khrims kyi bslab pa ni gtso bo'i dbang du
byas na mi dge ba bcu spong ba'i spong sems yin la/ ting nge 'dzin gyi
bslab pa'i gtso bo ni

@007b zhi gnas yin mod/ der ma nges te dge ba'am yang dag pa'i dmigs
pa la ring thud gang yin yang rtse gcig tu gnas pa'i sems pa rnams
ting nge 'dzin gyi bslab pas bsdus so/ /shes rab kyi bslab pa'i gtso bo
ni lhag mthong yin kyang/ der ma nges te/ bdag med phra rags ci
rigs la dpyod pa'i

rigs pa don mthun rnams dang/ chos kyi tshig don gzhan la'ang legs
par dpyod pa'i shes rab rnams ni shes rab kyi bslab par 'dus so/ /gsum
pa skyes bu chen po'i lam gyi rim pa la gnyis/ spyod pa'i rten sems
bskyed dang/ spyod pa la bslab tshul lo/ /dang po la gnyis las/ dang
po khyad chos sum

phan yon ni/ sems bskyed theg mchog sogs bzhi ste/ theg chen sems
bskyed ni/ theg mchog las kyi gzhung shing lta bu ste/ sbyin drug
sogs rlabs chen spyod pa rnams kyi skye ba dang gnas pa dang 'phel
ba'i gzhi dang rten yin la/ bsod nams dang ye shes kyi tshogs gnyis
kun rdzogs byang du sgyur bar byed pa la/

lcags khams gser du sgyur bar byed pa'i gser 'gyur gyi rtsi lta bu
dang/ rab 'byams dge tshogs mang po sdud pa'i bsod nams kyi gter
chen po'o/ /gzhung 'dis sems de bskyed dgos pa'i rgyu mtshan yang
bstan la/ gzhi dang rten zhes pas theg chen sems bskyed de/ theg
chen lam gyi 'jug sgor yang bstan

to; ;gnyis pa bskyed tshul ni/ de ltar shes nas sogs gnyis te/ theg chen
sems bskyed kyi khyad chos sam phan yon de ltar shes nas rgyal ba'i
sras byang chub sems dpa' gzhan don du 'jug par nus pa dpa' bo
rnams kyis ni/ sems can thams cad kyi don du sangs rgyas thob 'dod
kyi rin cen sems mchog de nyams yon

gyi gtso bo'am thugs dam gyi mthil du 'dzin par mdzad pa ltar bya'o/
/rje btsun sogs sngar bzhin no/ /gnyis pa spyod pa la bslab tshul la
drug /sbyin pa/ tshul khrims/ bzod pa/ brtson 'grus/ bsam gtan/ shes rab
po/ /dang po la gnyis las dang po khyad chos sam phan yon ni/ sbyin
pa 'gro ba'i sogs bzhi ste/

@008a @#/ /lus longs spyod sogs gzhan la gtong ba'i sbyin pa ni/ slong
ba po'i 'gro ba'i re ba skong bar byed pa'i yid bzhin gyi nor bu lta bu
dang/ dngos po la chags zhen gcod pa'i phyir na ser sna'i mdud pa
gcod pa'i mtshon cha mchog yin la/ 'gro ba'i don la ma zhum zhing
snying stobs skyed pa'i

rgyal sras kyi spyod pa dang/ gtong ba po'i snyan pa'i grags pa
phyogs bcur sgrogs pa'i gzhi'o/ /gnyis pa gtong tshul ni/ de ltar shes
nas sogs/ tshul de ltar shes nas rang gi lus dang zas nor sogs longs
spyod dang/ bder ge ? thams cad gzhan la yongs su gtong ba'i lam
bzang po mkhas pas bsten

par bya'o/ /longs spyod zhes pas zang zing gi sbyin pa dang/ dge zhes
pas kyang chos kyi sbyin pa'ang bsdus shing/ mi 'jigs sbyin pa ni shugs
kyis thob po/ /gnyis pa la sngar ltar gnyis las/ dang po ni/ tshul
khrims nyes spyad sogs bzhi ste/ tshul khrims la nyes spyod sdom pa/
dge ba chos sdud

sems can don byed gsum las gtso bor nyes spyod sdom pa'i dbang du
byas na/ tshul khrims de ni/ sgo gsum gyi nyes spyod kyi dri ma 'khrud
pa'i chu lta bu dang/ nyon mongs pa'i tsha gdung sel bar byed pa'i zla
ba'i 'od lta bu dang/ srung ba po'i rten gyi gang zag de skye rgu'i
dbus na bi rgyal lhun po lta bur brjid che zhing/ de lta bu'i

stobs kyis gzhan dag gis rang la 'tshe ba'i bsdigs pa med par 'gro ba
kun 'dud par byed do/ /gnyis pa srung tshul ni/ de ltar shes nas sogs
te/ tshul de ltar shes nas yang dag par blangs pa'i tshul khrims ni
sngon gyi dam pa rnams kyis mig bzhin du srung bar mdzad pa ltar
bya'o/ /gsum pa la gnyis las

dang po ni/ bzod pa stobs ldan sogs bzhi ste/ bzod pa la sdug bsngal
dang yin/ gnod pa la ji mi snyam pa/ chos la nges thob kyi bzod pa
gsum las/ 'dir dngos bstan par ba'i dbang du byas nas gnod pa la
bzod pa'i bzod pa ni/ gnod pa'i khur skyer nus pa'i byang sems stobs
ldan rnams la mdzes

@008b byed du gyur pa'i rgyan gyi mchog yin la/ nyon mongs pa'i mes
gdung ba'i gnyen po la dka' thub du ma yod kyang/ dka' thub kun
gyi phul te mchog dang zhe sdang lag 'gro ste sprul gyis mtshon par
byed pa slu'i dgra la mang du yod kyang/ nam mkha'i lding ste
khyud bzhin dang/ pha rol gyis tshig rtsub kyi mtshon 'phen pa la

des mi mig pa'i sra ba'i go cha srab lta bu yin no/ /gnyis pa de bsgom
pa ni/ de ltar shes nas sogs te/ tshul de ltar shes nas bzod pa'i mchog
sngon gyi dam pas rang gi go cha la thabs rnams sna tshogs tshul gyis
rgyud la goms par mdzad pa ltar bya'o/ /bzhi pa la gnyis las/ dang
po ni/ brtson 'grus la gsum

las/ dang po ni/ mi bzlog brtan pa'i sogs bzhi ste/ gtso bor go cha'i
brtson 'grus kyi dbang du byas na/ phyir mi bzlog cing brtan pa'i
brtson 'grus kyi go cha bgos na/ lung dang rtogs pa'i yon tan
thams cad yar do'i zla ba bzhin gong du 'phel la/ spyod lam thams
cad la rtsom pa don dang ldan par 'gyur zhing/

rang gis bya ba gang brtsams pa'i las kyi mtha' rnams yid la bsams pa
bzhin du 'grub par 'gyur ro/ /gnyis pa rtsom tshul ni/ de ltar shes nas
sogs te/ ji skad bshad pa de ltar shes nas byi bshol gyi le lo kun sel
bar byed pa'i rlabs chen gyi brtson 'grus sngon rgyal sras rnams
kyis brtsams par byas pa

ltar 'jug go /lnga pa la gnyis las/ dang po ni/ bsam gtan sems la sogs
bzhi ste/ dmigs pa rtsa gcig pa'i bsam gtan ni/ rang gi sems la ji ltar
'dod pa bzhin dbang bsgyur ba'i rgyal po lta b+ha ste/ de yang dmigs
pa la bzhag na ni/ bying rgod kyis g.yo ba med par de yi dbang po

bzhin du gnas la/ bzhag pa de btang na yang dge ba'i dmigs pa ste
yul kun la 'jug cing/ rang gi lus sems dge ba'i phyogs la bgol cu
rung ba'i las su rung ba'i shin sbyangs kyi bde chen 'dren no/ /dmigs
pa la rtse gcig tu bzhag pa'i stobs kyis/ lus sems shin sbyangs kyi bde
ba khyad par can 'dren

@009a @#/ /tshul ni rje'i lam rim las shes par bya'o/ /gnyis pa bsgom tshul
ni/ de ltar shes nas sogs te/ tshul de ltar shes nas sngon byon pa'i
rnal 'byor gyi dbang po rnams kyis rnam g.yeng gi dgra 'joms shing/
dmigs pa la rtse gcig pa'i ting nge 'dzin dus

rgyun tu bsten pa ltar bslab po/ /'di ni gtso bo zhig gnas bsgoms pa'i
dbang du byas la/ rje btsun sogs sngar bzhin no/ /drug pa la gsum/
shes rab bsgom tshul/ zhi lhag zung du 'brel tshul/ mnyam rjes gnyis
ka skyong tshul yan lag dang bcas pa'o/ /dang po la khyad chos sam
phan yon dang/

bsgom tshul gnyis las/ dang po ni/ shes rab zab mo'i de nyid sogs bzhi
ste/ shes rab la ji lta ba rtogs pa'i shes rab sogs gsum yod kyang/ 'dir
gtso bo ni dang po'i dbang du byas nas/ zab don rtogs pa'i shes rab
ni/ chos rnams kyi zab mo'i de kho na nyid lta bar byed pa'i mig lta
bu dang/

srid pa 'khor ba'i rtsa ba ma rig pa drung nas 'byin pa'i lam du 'gyur
zhing/ yum gyi mdo sogs rgyal ba'i gsung rab kun las bsngags pa'i
yon tan gyi gter chen po dang/ rmongs pa'i gti mug gi mun pa sel
bar byed pa'i sgron me mchog tu grags pa yin no/ /gnyis pa ni/ de ltar
shes nas sogs te/

tshul de ltar shes nas thar pa 'dod pa'i mkhas pa yis lam de nyid 'bad
pa du mas rang rgyud la bskyed par mdzad do/ /gong du brjod pa'i
phyin drug so so'i ngo bo/ dbye ba sogs rgyas par ni 'dir mang du
dogs pas lam rim chen mo sogs las shes par bya zhing/ don bsdus pa
zhig kho bos lam rim dmar 'khrid

du bshad zin to/ /gnyis pa la gnyis las/ zhi lhag zung 'bral bsgom pa'i
dgos pa dang/ bsgom tshul dngos so/ /dang po ni/ rtse gcig bsam gtan
sogs brgyad de/ dmigs pa la rtse gcig pa'i bsam gtan tsam la 'khor
ba yi rtsa ba ma rig pa rtsad nas gcod pa'i nus pa ma mthong zhing/
de lta

@009b na'ang dmigs pa la rtse gcig tu gnas pa'i zhi gnas kyi lam dang
bral ba'i thos bsam gyi shes rab kyis kyang/ bden med sogs kyi dpyad
don la ji tsam dpyad kyang nyon mongs rtsad nas mi ldog pas na/
sngon gyi dam pas de kho na nyid kyi don tshul bzhin du go ba'i yin
lugs kyi don la phu thag chod pa'i shes rab de/ de kho na nyid la
bying

rgod kyi rnam rtog gis g.yo ba med pa'i zhi gnas kyi rta la bskyon
nas ni/ rtag chad kyi mtha' dang bral ba'i dbu ma'i rigs pa gcig du
bral la sogs pa'i mtshon rnon gyis ni/ rtag pa dang chad pa'i mthar
'dzin pa'i mthar 'dzin gyi dmigs pa'i gtad so bden grub tu bzung ba
ltar bden 'dzin gyi zhen yul thams cad 'jig

par byed pa'i rigs pa yang dag pa'i don la tshul bzhin du dpyod pa'i
yangs pa'i shes rab kyis de kho na nyid rtogs pa'i blo gros rgyas par
mdzad do/ /gnyis pa ni/ rtse gcig goms pas sogs drug ste/ rang gi
dmigs pa gang rung cig la dmigs nas mi dpyod par rtse gcig tu gnas
pa goms pas ting nge 'dzin 'grub

par 'gyur ba ni gzhir bcas shing smos pa ci 'tshal te brjod mi dgos kyi/
dmigs pa la rtse gcig tu gnas bzhin pa'i ngang nas don la tshul bzhin
du dpyod pa yi so sor rtogs pa yi shes rab kyis kyang yin lugs kyi
don la g.yo ba med par shin tu brtan par gnas pa yi ting 'dzin skyed
par nus pa blos mthong nas

zhi lhag gnyis las phyogs re tsam ma yin par zung 'brel sgrub par
byed pa la brtson pa rnams ya mtshan no ste ngo mtshar che'o/ /rang
gi dmigs pa la gtod de rtse gcig tu gnas pa goms kyang zhi gnas
'grub mod lhag mthong 'grub pa la ni/ de tsam gyis mchog par rtse
gcig tu gnas bzhin pa'i dad nas

dpyad stobs kyis shin sbyangs kyi bde ba 'dren nus pa dang dgos pa'i
don no/ /gsum pa ni/ mnyam gzhag nam mkha' sogs drug ste/ de kho
na nyid kyi don la mnyam par bzhag pa'i mnyam gzhag dgag bya
bden grub bkag pa'i nam mkha' lta bu'i stong nyid sgom pa dang/ de
las yangs nas rjes thob tu bden par snang

@010a @#/ /yang der ma grub pa'i sgyu ma lta bu'i stong pa nyid gnyis
po bsgoms nas/ sbyin pa la sogs pa thabs dang/ stong nyid rtogs pa'i
shes rab gnyis ka zung du 'brel ba yi sgo nas rgyal sras spyod pa
rgya mtsho'i pha rol tu 'gro ba ni rgyal dang de sras rnams kyis
bsngags

so/ /rjes thob tu sgyu ma lta bu bsgoms pa ni stong nyid sgom pa
dngos min na'ang phyogs mthun yin pas deng btags pa tsam mo/ /ji
skad bshad pa de ltar rtogs nas thabs shes phyogs re ba'i lam gyis ni
tshim pa med pa skal bzang rnams kyi lugs so/ /gnyis pa thun thor ma
yin pa sngags kyi theg pa la bsla

tshul ni/ de ltar rgyu dang 'bras bu'i theg chen gyi/ /sogs drug ste/
sngar bshad pa de ltar lam bgrod tshul de ni/ rgyu pha rol tu phyin
pa'i theg pa dang/ 'bras bu sngags kyi theg pa'i theg chen gyi lam
mchog gnyis gar dgos pa'i thun mong ba'i lam yin la/ de ji lta ba
bzhin rgyud la bskyed

de; de nas snags la mkhas pa'i ded dpon gyi mgon rdo rje slob dpon
la brten nas rgyud sde'i rgya mso chen por zhugs nas mdo sngags
gnyis kyi lam gyi gnad yongs su rdzogs pa'i man ngag bsten pa'i
gang zag des/ dal 'byor gyi lus rten 'di thob pa don dang ldan par
byas pa yin

no; ;rje btsun sogs sngar ltar ro/ /gsum pa mjug ni/ rang gi yid la
sogs drug ste/ rang gi yid la goms par bya ba'i phyir dang/ don gnyer
can gyi skal bzang gzhan la'ang phan par bya ba'i phyir du/ rgyal ba
dgyes pa'i yongs su rdzogs pa'i lam

mdor bsdus nas/ go sla'i ngag gis bshad pa'i dge ba des ni/ phyogs re
tsam ma yin par 'gro ba kun kyang rnam dag lam bzang 'di dang/
'bral ba med par gyur cig ces ni smon lam 'debs so/ /rje btsun bla mas
sogs sam/ rnal 'byor ngas kyang smon lam

@010b de ltar btab/ /thar 'dod khyed kyang de bzhin 'debs 'tshal lo/
/zhes pa gang byas kyang don ni sla'o/ /'di'i 'phror ston pa bla na med
pa'i bstan pa dang/ /zhes sogs tshigs bcad gcig dang/ nga yi bla ma blo
bzang grags pa de/ /zhes sogs tshigs bcad gcig

dang/ dang por rgya chen thos pa mang du btsal/ /zhes sogs tshigs
bcad gcig ste tshigs bcad gsum 'byung ba ni/ gzhan gyis 'don cha la
kha bkang ba ste/ 'di'i mjug dngos min pas ma bris so/ /zhes byang
chub lam gyi rim pa'i nyams len gyi rnam gzhag mdor

bsdus te brjed byang du byas pa 'di ni/ mang du thos pa'i dge slong
spong ba pa blo bzang grags pa'i dpal gyis 'brog ri bo che dge ldan
rnam par rgyal ba'i gling du sbyar ba'o/ /zhes pa ni sla'o/ /'dir byang
chub lam gyi rim pa'i gnad tshang bas/ 'don pa'i tshe dal bus don yid la
bshad par

byas na lam rim gyi don bsdus nas nyams su blangs par 'gyur yang/
tshig tsam ton pas ni min no/ /des na 'di kha ton byed pas ni/ dbyangs
kyi sgra snyan pa tsam la chags par mi bya'o/ /'dir nyams su len tshul
rgyas par lam rim dang sbyar nas 'chad nus na'ang mang du dogs
shing/

dmigs skor zhig logs su bris yod pas rgyas par ma bshad la/ tshig don
rdzogs par sngar gzhan gyis bkral ba ma mthong yang rang blos
ci nus kyis bkral ba'o// //smras pa/ rgyal ba'i gsung rab kun gyi snying
po'i don/ /nyams su len pa'i

dom par rab bsgril ba/ /byang chub bgrod pa'i lam gyi rim pa 'di/ /thub
bstan rgyal mtshan rtse na nor bu bzhin/ /de phyir tshul 'dir nyams
len phyogs tsam zhig /bgyis pa yis kyang skal bar ldan 'gyur na/ /ji
skad bshad bzhin rdzogs par nyams len du/ /bstar

@011a @#/ /ba gang yin ngo mtshar cis mi che/ /gzhung don cha shas
yongs rdzogs kun da'i gnyen/ /thub bstan lha lam mdzes par bya
phyir dang/ /'gro 'di'i khams kyi sgrib mun bsal ba'i ched/ /lhag bsam
dag pa'i mgyogs 'gro'i shugs kyis

drangs/ /'dir 'bad 'o mtsho las 'khrungs rnam dkar gyi/ /dge legs bdud
rtsis don gnyer ldan pa yi/ /'chi med yid kyi re ba yongs rdzogs te/
/gtan bde srog gi nyer 'tshor 'gyur bar shog /ces byang chub lam gyi
rim pa'i bsdus don gyi tshig 'phrel snying po mdor

bsdus gsal ba zhes bya ba 'di ni/ dad dang rnam dpyod zung du 'brel
ba'i khya'o lung dga' bcu pa blo bzang bsam 'grub kyis bskul ba'i
ngor/ shAkya'i dge slong bshad sgrub ming can gyis 'phral du
mgyogs las su bris pa ste/ phyis bar du brko ba'i tshe yi ge ba'ang bskul

ba po nyid do/ /'dis kyang rgyal ba'i bstan pa rin po che phyogs thams
cad du dar zhing rgyas la yun ring du gnas par gyur cig / //dge'o/ /