@001a @#/ /mkhas grub sbyin pa dar rgyas kyis mdzad pa'i rgyu
'bras 'khor lo zhes bya ba bzhugs so/ /

@001a @##/ /na mo gu ru mny+dzu go+ha Sh+'a ya/ bla ma dang mgon
po 'jam pa'i dbyangs la phyag 'tshal lo/ /'dir rgyu 'bras kyi
rnam gzhag bshad pa la/ rgyu bshad pa/ rkyen bshad pa/ 'bras
bu bshad pa

dang gsum las/ dang po la/ mtshan nyid/ dbye ba/ 'das ma 'ongs
yod med bshad pa gsum las/ dang po ni/ skyed byed/ rgyu'i
mtshan nyid/ gnyis pa rgyu la dbye na/ dngos rgyu dang/ brgyud
rgyu

gnyis su dbye ba dang/ nyer len dang/ lhan cig byed rkyen
gnyis su dbye ba/ byed rgyu sogs drug tu dbye ba dang gsum
las/ dang po ni/ dngos su skyed byed/ dngos rgyu'i mtshan nyid/
brgyud nas skyed

byed/ brgyud rgyu'i mtshan nyid/ dngos po yin na/ de gnyis ka
yin pas khyab/ gzhi la sbyar na/ bum pa'i dngos su skyed byed/
bum pa'i dngos rgyu'i mtshan nyid/ bum pa'i brgyud nas skyed
byed/

bum pa'i brgyud rgyu'i mtshan nyid/ des gzhan rnams la'ang rigs
'gre'o/ /gnyis pa ni/ dngos po yin na/ lhan cig byed rkyen yin
pas khyab kyang/ nyer len yin pas ma khyab ste/ mar me skad
cig tha

ma de/ nyer len ma yin pa'i phyir te/ de'i rigs 'dra phyi ma
med pa'i phyir/ des na rgyun du gyur pa'i dngos po yin na/
nyer len dang/ lhan cig byed rkyen gnyis ka yin pas khyab bo/
/gsum pa ni/

@002a @##/ /rgyu la dbye na/ drug yod de/ byed rgyu/ lhan cig
'byung ba'i rgyu/ skal mnyam gyi rgyu/ mtshungs ldan gyi rgyu/
kun 'gro'i rgyu/ rnam smin gyi rgyu dang drug yod pa'i phyir/
mngon pa mdzod

las/ byed rgyu lhan cig 'byung ba dang/ /skal mnyam mtshungs
par ldan pa dang/ /kun tu 'gro dang rnam smin te/ /rgyu ni
rnam pa drug tu 'dod/ /ces gsungs pa'i phyir/ spyir byed
rgyu'i mtshan nyid

med kyang/ gzhi la sbyar na/ bum pa dang rdzas tha dad kyang
yin/ bum pa skye ba la gegs mi byed pa yang yin pa'i gzhi
mthun pa de/ bum pa'i byed rgyu'i mtshan nyid/ mtshan gzhi ni/
ka ba lta bu yin

te/ mngon pa mdzod las/ rang las gzhan pa byed rgyu'i rgyu/
/zhes gsungs pa'i phyir/ byed rgyu la sgras brjod rigs kyi sgo
nas dbye na/ byed rgyu nus ldan dang/ byed rgyu nus med gnyis
las/ dang po ni/

bum pa dang ka ba sogs 'dus byas mtha' dag la byed/ gnyis pa
ni/ rtag pa dang/ spyi mtshan sogs 'dus ma byas kyi chos mtha'
dag la byed/ sgras brjod rigs zhes smos pa la dgos pa

yod de/ byed rgyu nus med yin na/ byed rgyu ma yin pas khyab
par shes pa'i ched yin pa'i phyir/ byas pa la kho na re/ shes
bya chos can/ byed rgyu yin par thal/ bum pa'i byed rgyu yin
pa'i phyir te/

@002b bum pa'i byed rgyu nus med yin pa'i phyir zer na 'gal
khyab la 'bud rigs pa yin te/ bum pa'i byed rgyu nus med yin
na/ bum pa'i byed rgyu ma yin pas khyab pa'i phyir/ kho na re/
shes bya chos can/ bum pa'i byed rgyu yin par

thal/ bum pa las gzhan pa'i chos yin pa'i phyir zer na ma
khyab/ byas pa la kho na re/ de la khyab pa yod par thal/
mdzod las/ rang las gzhan pa byed rgyu'i rgyu/ /zhes gsungs
pa'i phyir zer na ma khyab ste/ rang las

gzhan pa zhes pa'i don ni/ bum pa sogs las rdzas gzhan pa'i
don yin la/ shes bya bum pa las rdzas gzhan ma yin pa'i phyir/
shes bya bum pa dang rdzas tha dad ma yin pa'i phyir/ der
thal/ shes bya rdzas su ma grub

pa'i phyir/ de ltar ma yin na/ bum pa 'joms byed kyi tho ba
chos can/ bum pa'i byed rgyu yin par thal/ bum pa las gzhan
pa'i chos yin pa'i phyir/ khyab pa khas/ 'dod mi nus te/ khyod
kyis bum pa skye ba la gegs byed pa'i

phyir/ des na/ bum pa'i rgyu yin na/ bum pa'i byed rgyu yin
pas khyab kyang/ bum pa'i byed rgyu yin na/ bum pa'i rgyu yin
pas ma khyab ste/ ka de bum pa'i byed rgyu yin kyang/ bum pa'i
rgyu ma yin pa'i phyir/ yang kha cig gis/ bum pa'i

lhan cig 'byung ba'i rgyu yin na/ lhan cig 'byung ba'i rgyu
yin pas khyab zer na/ ka ba chos can/ der thal/ de'i phyir/
khyab pa khas/ rtags grub ste/ bum pa dang phan tshun dus mnyam
zhing rdzas su grub pa gang zhig/ khyod kyis

@003a @#/ /bum pa skye ba la gegs mi byed pa'i phyir/ rtsa bar
'dod na/ ka ba chos can/ phan tshun dus mnyam zhing rdzas su
grub pa yang yin/ phan tshun skye ba la gegs mi byed pa yang
yin pa'i gzhi mthun pa yin par

thal/ lhan cig 'byung ba'i rgyu yin pa'i phyir/ rtags khas/
khyab ste/ de lhan cig 'byung ba'i rgyu'i mtshan nyid yin pa'i
phyir/ mngon pa mdzod las/ lhan cig 'byung gang phan tshun
'bras/ /zhes gsungs pa'i phyir/ gong

du 'dod na/ ka ba chos can/ phan tshun dus mnyam yin par thal/
'dod pa'i phyir/ 'dod mi nus te/ phan tshun du med pa'i phyir/
ma grub na/ de chos can/ phan tshun du yod par thal/ ma grub pa
de'i phyir/ rtags khas/

'dod na/ de chos can/ so so ba yin par thal/ 'dod pa'i phyir/
'dod na/ de chos can/ tha dad yin par thal/ so so ba yin pa'i
phyir/ khyab ste/ so so ba tha dad kyi mtshan nyid yin pa'i
phyir dang/ so so ba ma yin pa tha

mi dad kyi mtshan nyid yin pa'i phyir te/ de ltar sde bdun yid
kyi mun sel las gsungs pa'i phyir/ 'dod na/ ka ba chos can/
tha dad ma yin par thal/ tha mi dad yin pa'i phyir te/ gcig
yin pa'i phyir/ kha cig/ lhan

cig 'byung ba'i rgyu yin na/ rdzas tha dad yin pas khyab zer
na/ mig gi rnam par shes pa dang/ mig gi rnam par shes pa'i
'khor du gyur pa'i tshor ba gnyis ka chos can/ der thal/ de'i
phyir/ khyab pa khas/ ma grub na/

@003b de chos can/ der thal/ phan tshun dus mnyam zhing rdzas
su grub pa yang yin/ phan tshun skye ba la gegs mi byed pa yang
yin pa'i gzhi mthun pa yin pa'i phyir/ khyab ste/ de lhan cig
'byung ba'i

rgyu'i mtshan nyid yin pa'i phyir/ mngon pa mdzod las/ lhan cig
'byung gang phan tshun 'bras/ /zhes gsungs pa'i phyir/ yang de
gnyis chos can/ lhan cig 'byung ba'i rgyu yin par thal/
mtshungs ldan

gyi rgyu yin pa'i phyir/ khyab ste/ mngon pa mdzod kyi 'grel
ba rgyal sras ma las/ mtshungs par ldan pa'i rgyu gang yin pa
de ni/ lhan cig 'byung ba'i rgyu yang yin no/ /zhes gsungs
pa'i phyir/ gong du ma grub

na/ de gnyis chos can mtshungs ldan gyi rgyu yin par thal/ phan
tshun mtshungs ldan rnam pa lnga mtshungs kyang yin/ phan tshun
skye ba la gegs mi byed pa yang yin pa'i gzhi mthun par gyur
pa'i rig pa yin pa'i

phyir/ khyab ste/ de 'dra ba'i rig pa de/ mtshungs ldan gyi
rgyu'i mtshan nyid yin pa'i phyir/ rtsa bar 'dod na/ de gnyis
chos can/ rdzas tha dad ma yin par thal/ rdzas gcig yin pa'i
phyir/ ma grub na/ mig gi

rnam par shes pa chos can/ khyod dang khyod kyi 'khor du gyur
pa'i tshor ba gnyis rdzas gcig yin par thal/ khyod rnam par
shes pa yin pa'i phyir/ de bzhin du mig gi rnam par shes pa'i
mtshungs ldan gyi rgyu yin na/

@004a @#/ /mtshungs ldan gyi rgyu yin pas ma khyab ste/ gal te
khyab na/ mig gi rnam par shes pa'i 'khor du gyur pa'i tshor ba
chos can/ der thal/ de'i phyir/ khyab pa khas/ rtags grub ste/
mig gi rnam

par shes pa dang/ phan tshun mtshungs ldan rnam pa lnga mtshungs
kyang yin/ phan tshun skye ba la gegs mi byed pa yang yin pa'i
gzhi mthun pa yin pa'i phyir/ rtsa bar 'dod mi nus te/ phan
tshun mtshungs ldan rnam pa

lnga mtshungs ma yin pa'i phyir/ phan tshun du med pa yin pa'i
phyir/ rtags sla/ gzhan yang mig gi rnam par shes pa chos can/
khyod kyi 'khor du gyur pa'i tshor ba de/ khyod kyi mtshungs
ldan gyi rgyu yin par thal/

khyod khyod kyi 'khor du gyur ba'i tshor ba'i mtshungs ldan gyi
rgyu yin pa'i phyir/ ma grub na/ mig gi rnam par shes pa chos
can/ khyod khyod kyi 'khor du gyur pa'i tshor ba'i mtshungs ldan
gyi rgyu yin par thal/ khyod gtso sems

yin pa'i phyir/ byas pa la kho na re/ bum pa'i lhan cig 'byung
ba'i rgyu yin na/ lhan cig 'byung ba'i rgyu yin pas khyab pa
yod par thal/ bum pa'i skal mnyam gyi rgyu yin na/ skal mnyam
gyi rgyu yin pas khyab pa

yod pa'i phyir zer na ma khyab/ rtags grub ste/ bum pa'i nyer
len yin na/ nyer len yin pas khyab pa yod pa'i phyir/ khyab
ste/ bum pa'i skal mnyam gyi rgyu yin na/ bum pa'i nyer len
yin pas khyab pa yod

@004b pa'i phyir/ gong gi ma khyab mtshams la/ mig gi rnam par
shes pa'i mtshungs ldan gyi rgyu yin na/ mtshungs ldan gyi rgyu
yin pas khyab par thal/ mig gi rnam par shes pa'i byed rgyu
yin na/ byed rgyu yin pas

khyab pa'i phyir/ khyab pa 'grig/ rang lugs ni/ phan tshun dus
mnyam zhing/ rdzas su grub pa yang yin/ phan tshun skye ba la
gegs mi byed pa yang yin pa'i gzhi mthun pa de/ lhan cig
'byung ba'i rgyu'i

mtshan nyid/ mtshan gzhi ni/ lhan cig tu skyes pa'i 'byung ba
bzhi dang/ dngos rgyu'i tshogs pa gcig pa'i mig sogs dbang po
lnga dang/ dngos rgyu'i tshogs pa gcig pa'i bu ram gyi ro gzugs
gnyis

lta bu de de yin pa'i phyir/ tshad ma rnam 'grel las/ rgyu gcig
phyir na lhan cig gnas/ /dbang bzhin gzugs dang ro bzhin no/
zhes gsungs pa'i phyir/ spyir skal mnyam gyi rgyu'i mtshan nyid
med kyang

rang gi rigs 'dra phyi ma rang dang rigs 'dra bar skyed byed
de/ rang nyid skal mnyam gyi rgyu yin pa'i mtshan nyid/ mtshan
gzhi ni/ bum pa lta bu de yin te/ mdzod las/ skal mnyam rgyu
ni 'dra ba'o/ /zhes

gsungs pa'i phyir/ phan tshun mtshungs ldan rnam pa lnga mtshungs
kyang yin/ phan tshun skye ba la gegs mi byed pa yang yin pa'i
gzhi mthun par gyur pa'i rig pa de/ mtshungs ldan gyi rgyu'i
mtshan nyid

@005a @#/ /mtshan gzhi ni/ mig gi rnam par shes pa dang/ mig gi
rnam par shes pa'i 'khor du gyur pa'i tshor ba lta bu de yin
te/ sems yin na/ khyod dang khyod kyi 'khor du gyur pa'i tshor
ba gnyis

mtshungs ldan gyi rgyu yin pas khyab pa'i phyir/ mdzod las/
mtshungs ldan rgyu ni sems dag dang/ /sems byung rten mtshungs
can rnams so/ /zhes gsungs pa'i phyir/ mtshungs ldan lnga ni/
rten mtshungs pa/

dmigs pa mtshungs pa/ rnam pa mtshungs pa/ dus mtshungs pa/ rdzas
mtshungs pa dang lnga'o/ /mtshungs ldan gyi rgyu yin na/ sems
dang sems byung gang rung yin pas ma khyab ste/ mig gi rnam
par shes pa

dang/ de'i 'khor du gyur pa'i tshor ba gnyis/ sems dang sems
byung gang rung ma yin pa'i phyir/ mtshungs ldan gyi rgyu yin
na/ sems dang sems byung gang rung ma yin pas ma khyab ste/
mig gi rnam par

shes pa dang/ mig gi rnam par shes pa ma yin pa las log pa
gnyis ka mtshungs ldan gyi rgyu dang/ sems gnyis ka yin pa gang
zhig/ mig gi rnam par shes pa'i 'khor du gyur pa'i tshor ba
dang/ de ma

yin pa las log pa gnyis mtshungs ldan gyi rgyu dang/ sems byung
gnyis ka yin pa'i phyir/ rtags rnams grub tshul rigs pas shes
par bya'o/ /spyir kun 'gro'i rgyu'i mtshan nyid med kyang rang

@005b gi 'bras bur gyur pa'i rang dang sa gcig pa'i nyon mongs
phyi ma skyed byed kyi nyon mongs can de/ rang nyid kun 'gro'i
rgyu yin pa'i mtshan nyid/ mtshad gzhi ni/ 'dod chags lta bu yin
te/ mdzod las/ kun 'gro

zhes bya nyon mongs can/ rnams kyi rang sa kun 'gro lnga/ zhes
gsungs pa'i phyir/ 'di'i skabs su kun 'gro lnga ni/ sdug
bsngal mthong spang nyon mongs/ kun 'byung mthong spang nyon
mongs/ 'gog pa mthong spang nyon mongs/ lam mthong spang

nyon mongs/ sgom spang nyon mongs rnams yin pa'i phyir te/
sems byung kun 'gro lnga dang mi 'dra'o/ /rang dang sa gcig pa
zhes smos pa la dgos pa yod de/ 'dod pa'i 'dod chags  

de/ 'dod pa'i 'dod chags kyi 'bras bur gyur pa'i 'dod chags/
zhe sdang/ gti mug sogs kyi kun 'gro'i rgyu yin kyang/ 'dod
pa'i 'dod chags kyi 'bras bur gyur pa'i gzugs gzugs med kyi
'dod

chags/ zhe sdang sogs kyi kun 'gro'i rgyu ma yin pa'i rgyu
mtshan gyis de ltar smos pa'i phyir/ mi dge ba dang dge ba zag
bcas gang rung gis bsdus pa de/ rnam smin gyi rgyu'i mtshan
nyid/ mtshan gzhi ni/ srog gcod

kyi las lta bu de de yin te/ mdzod las/ rnam smin rgyu ni mi
dge dang/ dge ba zag bcas rnams kho na/ /zhes gsungs pa'i
phyir/ lung ma bstan yin na/ rnam smin gyi rgyu ma yin dgos
pa'i phyir/ des rna 

@006a @#/ /smin gyi 'bras bu 'byin mi nus pa'i phyir/ dper na/ sa
bon rul pa las myu gu mi skye ba lta bu yin pa'i phyir/ dge ba
zag med kyis rnam smin gyi 'bras bu mi 'byin te/ nyon mongs kyi

rlan dang bral ba'i phyir/ dper na/ rlan dang bral ba'i nas rdog
skam hril bas myu gu mi skyed pa lta bu yin pa'i phyir/ kha cig
gis/ rgyu drug po 'gal zer na/ de mi 'thad par thal/ mi dge ba'i
sems dang/

de'i 'khor du gyur pa'i tshor ba gnyis rgyu drug ka yin pa'i
phyir/ ma grub na/ de gnyis chos can/ rgyu drug ka yin par thal/
byed rgyu yin pa gang zhig/ lhan cig 'byung ba'i rgyu yang yin/
skal mnyam gyi rgyu yang

yin; mtshungs ldan gyi rgyu yang yin/ kun 'gro'i rgyu yang yin/
rnam smin gyi rgyu yang yin pa'i phyir/ dang po grub ste/ dngos
po yin pa'i phyir/ gnyis pa ma grub na/ de gnyis chos can/ lhan
cig 'byung ba'i

rgyu yin par thal/ mtshungs ldan gyi rgyu yin pa'i phyir/ ma grub
na/ mi dge ba'i sems chos can/ khyod dang khyod kyi 'khor du
gyur pa'i tshor ba gnyis/ mtshungs ldan gyi rgyu yin par thal/
khyod sems

yin pa'i phyir te/ rnam par shes pa yin pa'i phyir/ khyab ste/
sems dang/ yid dang/ rnam par shes pa gsum don gcig yin pa'i
phyir/ mdzod las/ sems dang yid dang rnam shes rnams/ /don

@006b gcig ces gsungs pa'i phyir/ gsum pa ma grub na/ de gnyis
gnyis chos can/ skal mnyam gyi rgyu yin par thal/ rang gi rigs
'dra'i rgyun dang bcas pa'i dngos po yin pa'i phyir te/ khyod
kyi rigs 'dra snga phyi

gnyis ka yod pa'i phyir/ der thal/ mi dge ba'i sems kyi rigs
'dra snga phyi gnyis ka yod pa gang zhig/ dge ba'i sems kyi de
gnyis ka yod pa'i phyir/ der thal/ sems kyi de gnyis ka yod pa'i
phyir te/ shes

pa'i de gnyis ka yod pa'i phyir/ de ltar yin yang rgyun dang
bcas pa'i dngos po yin na/ rigs 'dra'i rgyun dang bcas pa'i
dngos po yin pas ma khyab ste/ rjod byed kyi sgra'i rdzas rgyun
yod kyang de'i rigs 'dra'i rgyun med

pa'i phyir/ de med par sde mdun yid kyi mun sel las gsungs pa'i
phyir/ rjod byed kyi sgra chos can/ khyod kyi rgyun yod de/
khyod kyi rdzas rgyun yod pa'i phyir te/ khyod nyer len yin pa'i
phyir/ ma grub na/ de chos can/

nyer len yin par thal/ rjod byed kyi sgra skad cig gnyis pa'i
nyer len yin pa'i phyir/ ma grub na/ de chos can/ khyod khyod
kyi skad cig gnyis pa'i nyer len yin par thal/ rgyun bcas kyi
dngos po yin pa'i phyir/

gzhan yang/ rjod byed kyi sgra'i rgyun yod par thal/ sgra'i
rgyun yod pa'i phyir te/ sangs rgyas kyi gsung gi rgyun yod pa'i
phyir/ der thal/ sngon gyi mkhas pa rnams kyi rgyun yod pa'i
phyir/ gong gi rtags bzhi pa   

@007a @#/ /bsgrubs zin/ lnga pa ma grub na/ de gnyis chos can/
kun 'gro'i rgyu yin par thal/ rang gi rigs 'dra phyi ma dang
bcas pa'i nyon mongs can gyi shes pa yin pa'i phyir/ khyod kyi
rigs 'dra phyi

ma yod pa gang zhig/ khyod nyon mongs can gyi shes pa yin pa'i
phyir/ rtags dang khyab pa sla/ nyon mongs can gyi shes pa yin
na/ mi dge ba'i shes pa yin pas ma khyab ste/ nyon mongs can yin
na/ mi dge ba

yin pas ma khyab pa'i phyir/ ma grub na/ gzugs khams dang/ gzugs
med khams kyi nyon mongs chos can/ der thal/ de'i phyir/ khyab
pa khas/ rtags sla/ 'dod mi nus te/ lung ma bstan yin pa'i
phyir/

khams gong ma'i sas bsdus kyi nyon mongs yin pa'i phyir/ khyab
ste/ mdzod las/ gong ma thams cad lung ma bstan/ zhes gsungs
pa'i phyir/ gsum pa/ 'das ma 'ongs yod med bshad pa ni/ spyir
'das

pa dang ma 'ongs pa'i mtshan nyid med de/ 'das pa dang ma 'ongs
pa gnyis med pa'i phyir te/ gzhi grub na/ da lta ba yin pas
khyab pa'i phyir/ gzhi la ltos te 'jog na/ bum pa'i dus su skyes
zin pa yang

yin; bum pa'i dus su 'gag zin pa yang yin pa'i gzhi mthun pa de/
bum pa'i dus su 'das pa'i mtshan nyid/ de dang bum pa'i snga logs
su byung ba don gcig/ bum pa'i dus su grub zin pa yang

@007b yin; bum pa dang dus mnyam pa yang yin pa'i gzhi mthun pa
de/ bum pa'i dus su da lta ba'i mtshan nyid/ bum pa'i dus su skye
bzhin pa yang yin/ bum pa'dus su mi skye ba yang yin pa'i gzhi
mthun

par dmigs pa de/ bum pa dus su ma 'ongs pa'i mtshan nyid/ bum
pa'i ma 'ongs pa/ bum pa'i rgyu/ bum pa'i dus su 'das pa/ bum pa
la ltos te 'das pa rnams don gcig/ bum pa'i 'das pa/ bum

pa'i 'bras bu/ bum pa'i dus su ma 'ongs pa/ bum pa la ltos te ma
'ongs pa rnams don gcig/ spyir 'gags pa med/ zhig pa med/ skye
kha ma med/ skye bzhin pa med/ skye ba la mngon du phyogs pa med

kyang du ba 'gags pa yod/ du ba 'das pa yod/ du ba ma 'ongs pa
yod/ du ba skye bzhin pa yod/ du ba skye kha ma yod/ du ba skye
ba la mngon du phyogs pa yod kyang skye ba la mngon du phyogs
pa'i du ba med/ skye bzhin

pa'i du ba med/ skye kha ma'i du ba med/ 'gags pa'i du ba med/
zhig pa'i du ba med/ 'das pa'i du ba med/ ma 'ongs pa'i du ba
med/ dngos po/ mi rtag pa/ skad cig ma/ 'jig pa/ 'jig bzhin pa/

'das pa la mngon du phyogs pa/ zhig pa la mngon du phyogs pa
rnams don gcig/ mdo sde pa'i dbang du byas so/ de dag gi rtsod
pa spang ba la/ kho na re/ 'das pa yod par thal/ 'das pa'i sangs
rgyas

@008a @#/ /yod pa'i phyir te/ dus gsum sangs rgyas yod pa'i
phyir/ zer na ma khyab/ kho na re/ 'das pa'i sangs rgyas yod par
thal/ sangs rgyas 'das pa yod pa'i phyir te/ sangs rgyas 'gags

pa yod pa'i phyir zer na ma khyab/ yang kha cig na re/ 'das pa'i
gang zag yod par thal/ gang zag 'das pa yod pa'i phyir zer na ma
khyab/ shi ba'i gang zag yod par thal/ gang zag shi ba yod pa'i
phyir

zer na ma khyab/ kha cig na re/ shi ba'i gang zag yod par thal/
bsad pa'i gang zag yod pa'i phyir te/ rgyal po glang dar de bsad
pa'i gang zag yin pa'i phyir/ der thal/ de bsad pa'i phyir/ lha
lung dpal

gyi rdo rje de bsad pa'i phyir zer na ma khyab ste/ ma grub na/
der thal/ des de tshe 'di'i srog dbang dang bral bar byas pa'i
phyir/ gzhan yang lha lung dpal gyi rdo rjes rgyal po glang dar
ma bsad pa'i phyir te/ des de chos

'khor dpal gyi lha sar bsad pa'i phyir/ bstan pa spyi'i rnam
gzhag las/ lha lung dpal gyi rdo rje des/ rgyal po glang dar de
nyid ni/ lcags mda' lcags gzhu lag bkang ste/ chos 'khor dpal
gyi lha sar

bkums/ zhes gsungs pa'i phyir/ kha cig gis/ rgyal po glang dar
ma de/ shi ba'i gang zag yin zer na/ rgyal po glang dar ma chos
can/ shi bar thal/ 'dod pa'i phyir/ 'dod mi nus te/ srog dbang
dang ma

@008b bral ba'i phyir/ ma grub na/ de chos can/ srog dbang dang
bcas pa'i phyir te/ gang zag yin pa'i phyir/ gzhan yang de chos
can/ srog dbang dang bcas pa'i gang zag yin par thal/ dbang po
kun tshang ba'i gang zag

yin pa'i phyir/ khi na re/ shi ba'i gang zag yod par thal/ shi
'phos ma thag pa'i gang zag yod pa'i phyir/ der thal/ 'dod pa
nas shi 'phos ma thag pa'i gang zag yod pa'i phyir na ma khyab
ste/ 'dod pa nas shi 'phos

ma thag pa'i gang zag yin na/ shi 'phos ma thag pa'i gang zag
yin pas ma khyab pa'i phyir/ ma grub na/ 'dod pa nas shi 'phos
te gzugs kyi bar srid du skyes ma thag pa'i gang zag chos can/
der thal/ de'i phyir/

'dod mi nus te/ dbang po kun tshang ba'i gang zag yin pa'i phyir
te/ bar do ba yin pa'i phyir/ khyab ste/ mdzod las/ dbang po kun
tshang thogs med ldan/ zhes gsungs pa'i phyir/ yang kho na re/
'das pa yod par

thal/ 'das pa'i dus yod pa'i phyir te/ dus gsum yod pa'i phyir
zer na ma khyab/ rtags grub ste/ sngon gyi dus dang/ phyi ma'i
dus dang/ da lta ba'i dus gsum yod pa'i phyir/ gzhan yang/ dus
gsum yod par

thal/ dus grangs med pa yod pa'i phyir te/ snga dro'i dus la'ang
grangs med/ de bzhin du phyi dro'i dus dang/ gung gi dus dang/
nyin mo'i dus dang/ mtshan mo'i dus re re la'ang dpag tu med pa
yod de/ zhag dang lo re re

@009a @#/ /la'ang dpag tu med pa yod pa'i phyir/ kha cig na re/
ma 'ongs pa yod par thal/ ri bong rVa ma 'ongs pa yin pa'i phyir
te/ de ma 'ongs pa'i phyir zer na ma khyab/ ri bong rVa chos
can/ ma rig pa

yin par thal/ ma rig pa'i phyir/ khyab pa 'grig/ 'dod na/ de
chos can/ mi shes pa yin par thal/ ma rig pa yin pa'i phyir
khyab ste/ mi shes pa dang/ ma rig pa rmongs pa rnams don gcig
yin pa'i

phyir/ rtsa bar 'dod na/ de chos can/ yod par thal/ ma rig pa
yin pa'i phyir/ khyab ste/ ma rig pa yin na/ rig pa yin dgos
pa'i phyir/ kha cig gis/ gang zag gi bdag 'dzin du gyur pa'i
sems

byung chos can/ mi shes pa yin par thal/ ma rig pa yin pa'i
phyir/ 'dod na/ de chos can/ mi shes pa ma yin par thal/ shes pa
yin pa'i phyir zer na ma khyab/ des na ri bong gi rVa ma 'ongs
te/ ma 'ongs pa

ma yin/ de ma rig ste/ ma rig pa ma yin/ de mi shes te/ mi shes
pa ma yin/ bdag med yin na/ 'ongs ma 'ongs gang rung yin pas
khyab/ de yin na/ rig ma rig gang rung yin pas khyab/ de yin na/
shes

mi shes gang rung yin pas khyab ces khas len no/ kha cig gis/
skye ba'i rgyu yod dam zer na/ rang res yod byas pa la kho na
re/ skye ba'i rgyu med par thal/ skye ba med pa'i phyir/ dngos
po yin na/ skyes zin pas

@009b khyab pa gang zhig/ skyes zin pa'i dngos po slar yang skye
ba med pa'i phyir zer na ma khyab/ yang kho na re/ skye ba med
par thal/ skye 'gyur dang/ skye dgos dang/ skye bzhin pa rnams
re re nas med pa'i phyir zer na

ma khyab/ skye ba yod par thal/ skye ba snga phyi yod pa'i
phyir/ skye ba du mar tshogs gnyis goms pa yod pa'i phyir/ der
thal/ de goms pa las tshad ma'i skyes bur gyur pa yod pa'i phyir
te/ ston pa sangs rgyas

de; de ltar gyur pa yin pa'i phyir/ tshad ma kun btus las/ tshad
mar gyur pa 'gro la phan bzhed pa/ ston pa bde gshegs skyob la
phyag 'tshal te/ zhes gsungs pa'i phyir/ kho na re/ skye bzhin
pa'i

dngos po yod par thal/ ma'i mngal nas skye bzhin pa'i dngos po
yod pa'i phyir zer na ma khyab/ ma skyes pa'i dngos po yod par
thal/ ma'i mngal nas ma skyes pa'i dngos po yod pa'i phyir/
khyab pa 'grig/

rtags grub ste/ rdzus skyes kyi dngos po yod pa'i phyir/ gong du
'dod mi nus te/ dngos po yin na/ 'gag bzhin pa/ 'jig bzhin pa/
'gag pa la mngon du phyogs pa/ 'jig pa la mngon du phyogs pa
rnam

re re nas yin pas khyab cing/ skye bzhin pa/ skye ba la mngon du
phyogs pa sogs med pa'i phyir/ dbu ma 'jug pa las/ gal te skye
bzhin pa ni skye la phyogs par yod min zhing/ 'gag bzhin pa ni
yod kyang

@010a @#/ /'jig la phyogs par 'dod gyur pa/ zhes gsungs pa'i
phyir/ kho na re/ 'byung ba med par thal/ dngos po yin na/
'byung ba ma yin pas khyab pa'i phyir te/ dngos po yin na/ byung
zin

pas khyab pa'i phyir zer na ma khyab/ rtags grub ste/ dngos po
yin na/ rang gi rgyu las byang zin pas khyab pa'i phyir/ rtsa
bar 'dod na/ 'byung ba yod par thal/ 'byung bzhi yod pa'i phyir
te/ sa chu me rlung bzhi

yod pa'i phyir/ khyab ste/ de bzhi la 'byung bzhi zhes mkhas
mchog dbyig gnyen gyis gsungs pa'i phyir/ mngon pa mdzod las/
'byung ba dag ni sa khams dang/ chu dang me dang rlung khams
rnams/ zhes

gsungs pa'i phyir/ gzhan yang/ 'byung ba yod par thal/ 'byung
'gyur yod pa'i phyir te/ 'jam rtsub gnyis/ lci yang gnyis/ tsha
grang gnyis/ bkres skom gnyis rnams 'gyung 'gyur yin pa'i

phyir; ma grub na/ der thal/ 'byung 'gyur gyi reg bya yod pa'i
phyir/ reg bya la/ 'byung ba dang/ 'byung 'gyur rnam pa gnyis
yod pa'i phyir te/ mdzod las/ reg bya rnam pa gnyis yin te/ zhes
gsungs

pa'i phyir/ yang kho na re/ rang gi rgyu yod par thal/ rang gi
rgyu las skyes pa yod pa'i phyir/ dngos po yin na/ rang gi rgyu
las skyes pas khyab pa'i phyir na ma khyab/ 'dod byas pa la kho
na re/ rang gi rgyu med

@010b par thal/ rang rtag pa yin pa'i phyir/ ma grub na/ rang
chos can/ rtag pa yin par thal/ khyod dang rtag pa'i gzhi mthun
yod pa'i phyir te/ mi 'jig pa de/ khyod dang rtag pa'i gzhi
mthun yin pa'i phyir/ ma

grub na/ rang chos can/ mi 'jig pa de khyod dang rtag pa'i gzhi
mthun pa yin par thal/ khyod yod pa gang zhig/ mi 'jig pa de
khyod yin pa'i phyir/ dang po sla/ gnyis pa ma grub na/ mi 'jig
pa chos can/ rang

yin par thal/ rang yin pa'i rtag dngos gang rung yin pa'i phyir
te/ rang yin pa'i rdzas ldog gang rung yin pa'i phyir zer na ma
khyab/ rtags grub ste/ rang yin pa'i ldog chos yin pa'i phyir/
rtags sla/ des na/

bdag med yin na/ rang dngos po yin pas khyab/ byas pa la kho na
re/ shes bya chos can/ rang dngos po yin par thal/ bdag med yin
pa'i phyir zer na/ 'dod byas pa la kho na re/ shes bya chos can/
rang gi rgyu yod

par thal/ rang dngos po yin pa'i phyir zer na ma khyab/ byas pa
la kho na re/ rang chos can/ khyod dngos po yin na/ khyod kyi
rgyu yod pas khyab par thal/ gang zag gi bdag med yin pa'i phyir
zer na/ skyon can gyi lan

'debs so/ /des na dngos po yin na/ rang gi 'bras bu'i phan 'dogs
byed yin pas khyab/ byas pa la yang kho na re/ sangs rgyas kyi
bstan pa chos can/ sems can la phan 'dogs byed yin par thal/
sems

@011a @#/ /can gyi rgyu yin pa'i phyir zer na/ rtags ma grub ste/
sangs rgyas kyi bstan pa des sems can la phan 'dogs par byed
kyang/ de sems can la phan 'dogs byed ma yin pa'i phyir/ sangs
rgyas kyi

bstan pa des sems can la phan 'dogs par byed pa yin te/ de sems
can gyi sdug bsngal sel bar byed pa yin pa'i phyir/ ma grub na/
der thal/ de de rnams kyi sdug bsngal 'joms pa'i rtsi sman yin
pa'i phyir/

te/ spyod 'jug las/ 'gro ba'i sdug bsngal sman gcig pu/ /bde ba
thams cad 'byung ba'i gnas/ /bstan pa rnyed dang bkur sti dang/
/bcas te yun ring gnas gyur cig/ ces gsungs pa'i phyir/ kho na
re/ ston pa

sangs rgyas chos can/ sems can gyi rgyu yin par thal/ sems can
gyi skyed byed yin pa'i phyir/ ma grub na/ der thal/ sems can
gyi phan 'dogs byed yin pa'i phyir/ khyab ste/ tshad ma rnam
'grel las/ phan

'dogs gang yin skyed pa yin/ zhes gsungs pa'i phyir zer na/ gong
gi rtags phyi ma ma grub/ byas pa la kho na re/ ston pa sangs
rgyas chos can/ sems can gyi phan 'dogs byed yin par thal/ sems
can

la phan 'dogs byed yin pa'i phyir/ khyab ste/ der thal/ khyod
kyis sems can la phan 'dogs par byed pa'i phyir zer na ma khyab/
rtags grub ste/ khyod kyis 'khor ba'i sems can la phan 'dogs par
byed

@011b pa'i phyir/ khyod kyis 'khor ba'i sems can rnams 'khor
ba'i 'dam las skal ba ji lta ba bzhin drangs pa'i phyir/ mdzod
las/ 'khor ba'i 'dam las 'gro ba drangs mdzad pa/ / zhes gsungs
pa'i phyir/ gong

du 'dod na/ ston pa sangs rgyas chos can/ sems can gyi skyed
byed ma yin par thal/ sems can khyod kyi skyed byed yin pa'i
phyir/ der thal/ sems can khyod kyi rgyu yin pa'i phyir/ ma grub
na/ sems can de/

ston pa sangs rgyas kyi rgyu yin par thal/ byang chub sems dpa'
de/ ston pa sangs rgyas kyi rgyu yin pa'i phyir/ ma grub na/ der
thal/ ston pa sangs rgyas de/ byang chub sems dpa' las 'khrungs
ba'i phyir/ sangs

rgyas 'phags pa byang chub sems dpa' las 'khrungs pa'i phyir/
dbu ma 'jug pa las/ sangs rgyas byang chub sems dpa' las
'khrungs shing/ zhes gsungs pa'i phyir/ yang kho na re/ bud
shing de me'i

phan 'dogs byed yin par thal/ bud shing me'i rgyu yin pa'i
phyir/ 'dod na/ me de bud shing gi phan gdags bya yin par thal/
'dod pa'i phyir/ 'dod na/ me dang bud shing gnyis phan gdags bya
'dogs

byed yin par thal/ 'dod pa'i phyir zer na/ 'dod byas pa la kho
na re/ de ma yin par thal/ de gnyis gnod bya gnod byed yin pa'i
phyir zer na ma khyab/ rtags grub ste/ me bud shing gi gnod byed
dang/

@012a @#/ /bud shing me'i gnod bya yin pa'i phyir te/ me bud
shing gi sreg byed dang/ bud shing me'i bsreg bya yin pa'i phyir
te/ mngon pa mdzod las/ de bzhin bsreg bya 'jal byed pa'o/ /zhes

gsungs pa'i phyir/ kha cig gis/ bum pa 'joms byed tho ba de/ bum
pa 'jig pa skyed pa'i rgyu yin zer na/ bum pa 'jig pa de/ bum pa
'joms byed kyi tho ba la ltos par thal/ bum pa 'jig pa de/

de la ltos pa'i phyir te/ de de la brten nas skyes pa'i phyir/
de de'i 'bras bu yin pa'i phyir/ ma grub na/ bum pa 'jig pa de/
bum pa 'joms byed kyi tho ba'i 'bras bu yin pa thal/ bum pa
'joms byed kyi

tho ba de/ bum pa 'jig pa skyed pa'i rgyu yin pa'i phyir/ rtags
khas/ gong du 'dod na/ bum pa chos can/ rang grub tsam nas 'jig
nges ma yin par thal/ rang nyid 'jig pa rang las phyis 'byung gi
rgyu la ltos

pa'i phyir/ ma khyab na/ ltos pas nges pa 'gog pa'i rtags yang
dag mi srid par 'gyur ro/ /ma grub na/ bum pa chos can/ rang
nyid 'jig pa rang las phyis 'byung gi rgyu la ltos par thal/
khyod 'jig pa

khyod 'joms byed kyi tho ba la ltos pa gang zhig khyod 'joms
byed kyi tho ba de/ khyod kyi phyi logs su byung ba yin pa'i
phyir/ dang po khas/ phyi ma ma grub na/ der thal/ bum pa 'joms
byed kyi tho ba yod pa gang

@012b zhig/ ljon shing gcod byed kyi sta re de/ ljon shing gi
phyi logs su byung ba yin pa'i phyir/ gnyis pa grub ste/ ljon
shing gcod byed kyi sta re de/ ljon shing la brten nas byung
ba'i phyir/ de ljon shing gi 'bras

bu yin pa'i phyir/ der thal/ ljon shing steng gi bya rog ljon
shing gi 'bras bu yin pa'i phyir/ ma grub na/ der thal/ mkhar
gzhong nang gi rgya shug mkhar gzhong gi 'bras bu yin pa'i
phyir/ mkhar gzhong

de rang gi rgya shug sogs kyi skyed byed yin pa'i phyir/ ma grub
na/ tshad ma rnam 'grel las/ rgya shug sogs la'ang de yi yul/
/skyed pa mkhar gzhong sogs pas nus/ /zhes gsungs pa'i phyir/
byas pa la

kho na re/ ljon shing gcod byed sta re de/ ljon shing gi dus su
ma grub par thal/ de ljon shing gi 'bras bu yin pa'i phyir/
rtags khas/ 'dod na/ de'i dus su ljon shing 'gags zin par thal/
'dod

pa'i phyir zer na/ 'dod byas pa la kho na re/ des ljon shing
gcod mi nus par thal/ gcad bya ljon shing gi dus su gcod byed
sta re ma grub/ gcod byed sta re'i dus su gcad bya ljon shing
'gags zin pa'i

phyir zer na ma khyab ste/ bum pas bum nang gi chu skyor mi nus
par thal/ skyor byed bum pa'i dus su skyor bya bum nang gi chu
ma grub/ skyor bya bum nang gi chu'i dus su skyor byed bum pa
'gags zin pa'i phyir/

@013a @#/ /khyab pa 'grig/ 'dod mi nus te/ bum pas bum nang gi
chu phyi rol tu mi gtong bar nang du skyor bar byed pa'i phyir/
der thal/ bum pas bum nang gi chu phyir 'ong pa'i gegs byed pa'i
phyir/ tshad

ma rnam 'grel las/ 'ong ba yi ni gegs byed phyir/ /zhes gsungs
pa'i phyir/ gzhan yang/ bum pas bum nang gi chu skyor bar thal/
bum pa de bum nang gi chu'i rgyu yin pa'i phyir/ der thal/ de
de'i rten

yin pa'i phyir/ tshad ma rnam 'grel las/ chu sogs kyi ni rten
gyur gyi/ /zhes gsungs pa'i phyir/ gnyis pa rkyen bshad pa la
mtshan nyid dang/ dbye ba gnyis las/ dang po ni/ grogs byed pa/
rkyen gyi

mtshan nyid/ gnyis pa ni/ rkyen la dbye na/ rgyu rkyen/ dmigs
rkyen/ de ma thag rkyen/ bdag rkyen dang bzhi yod cing/ bzhi po
gang rung las gzhan pa'i rkyen lnga pa ni med de/ dbu ma rtsa
shes las/ rkyen rnams

bzhi ste rgyu dang ni/ /dmigs pa dang ni de ma thag/ bdag po
yang ni de bzhin te/ /rkyen lnga pa ni yod ma yin/ /zhes gsungs
pa'i phyir/ de yang rgyu rkyen dang/ rkyen don gcig cing/ dngos
po yin na/ de

gnyis yin pas khyab/ gnyis pa ni/ sngon 'dzin mngon sum sngon
po'i rnam ldan du gtso bor dngos su skyed byed de/ sngon 'dzin
mngon sum gyi dmigs rkyen gyi mtshan nyid/ sngon po dang yul dus
rang

@013b bzhin gang la ltes te grub bde rdzas gcig yin na/ sngon
'dzin mngon sum gyi dmigs rkyen yin pas khyab/ gsum pa ni/ sngon
'dzin mngon sum myong ba gsal rig tsam du gtso bor dngos su
skyed

byed kyi rig pa de/ sngon 'dzin mngon sum gyi de ma thag rkyen
gyi mtshan nyid/ mtshan gzhi ni/ sngon 'dzin mngon sum gyi snga
logs de ma thag tu byung ba'i sngon po yid la byed pa'i shes pa
lta bu'o/ bzhi pa ni/ sngon

'dzin mngon sum rang dbang du gtso bor dngos su skyed byed de/
sngon 'dzin mngon sum gyi bdag rkyen gyi mtshan nyid/ mtshan gzhi
ni/ sngon 'dzin mngon sum gyi thun mong ma yin pa'i bdag rkyen
du gyur pa'i mig

dbang gzugs can pa dang/ sngon 'dzin mngon sum gyi thun mong
ma
yin pa'i bdag rkyen du gyur pa'i yid dbang lta bu'o/ /mdor na
dbang shes yin na/ khyod kyi rkyen bzhi ga yod pas khyab/ shes
pa yin na/

khyod kyi bdag rkyen dang/ de ma thag rkyen gnyis ka yod pas
khyab/ dbang shes yin na/ khyod kyi thun mong ma yin pa'i bdag
rkyen du gyur pa'i dbang po gzugs can pa yod pas khyab cing/ yid
shes yin na/

khyod kyi thun mong ma yin pa'i bdag rkyen du gyur pa'i yid
dbang yod pas khyab ste/ mdo las gzugs shes pa ni rnam gnyis te/
mig dang yid la brten pa'o/ /zhes dang/ tshad ma kun btus las/
thun mong ma

@014a @#/ /yin rgyu yi phyir/ /de yi tha snyad dbang pos byas/
/zhes gsungs pa'i phyir/ dbang shes yin na/ khyod kyi dmigs
rkyen yod pas khyab kyang/ de yin na/ khyod kyi dmigs pa yod pas
ma khyab ste/

log shes su gyur pa'i dbang shes yin na/ khyod kyi dmigs pa med
pas khyab pa'i phyir/ log shes yin na/ khyod kyi dmigs pa med
pas khyab pa'i phyir/ rtsod pa spang ba la/ kho na re/ grogs
byed pa/ rkyen

gyi mtshan nyid ma yin par thal/ 'gal rkyen yod pa'i phyir zer na
ma khyab/ rtags grub ste/ gnod byed yod pa'i phyir/ mi mthun
pa'i rkyen yod pa'i phyir zer na/ ma khyab mtshams la/ 'gal rkyen
dang grogs

byed pa 'gal bar thal/ khyod kyi sgrub byed de 'thad pa'i phyir/
'dod na/ 'gal rkyen dang mthun rkyen 'gal bar thal/ 'dod pa'i
phyir/ 'dod mi nus te/ 'gal rkyen yin na/ mthun rkyen yin dgos
pa'i phyir/

'gal rkyen yin na/ rkyen yin pas khyab pa gang zhig/ rkyen yin
na/ mthun rkyen yin pas khyab pa'i phyir/ der thal/ rkyen yin
na/ phan 'dogs byed yin pas khyab pa'i phyir/ dngos po yin na/
phan 'dogs byed yin

pas khyab pa'i phyir/ der thal/ dngos po yin na/ rang gi 'bras
bu'i phan 'dogs byed yin pas khyab pa'i phyir/ gsum pa 'bras bu
bshad pa la/ mtshan nyid/ dbye ba/ sgras brjod rigs kyi sgo nas
dbye ba gsum

@014b las/ dang po ni/ bskyed bya/ 'bras bu'i mtshan nyid/ gnyis
pa de la dbye na/ dngos 'bras dang/ brgyud 'bras gnyis las/
dngos su bskyed bya/ dngos 'bras kyi mtshan nyid/ brgyud nas
bskyed bya/ brgyud 'bras kyi mtshan nyid/

gzhil la sbyar na/ bum pa'i dngos su bskyed bya/ bum pa'i dngos
'bras kyi mtshan nyid/ bum pa'i brgyud nas bskyed bya/ bum pa'i
brgyud 'bras kyi mtshan nyid 'di dngos po yin na/ dngos 'bras
dang/ brgyud 'bras gnyis ka

yin pas khyab/ bum pa'i dngos rgyu dang/ bum pa'i brgyud rgyu
'gal pa bzhin du/ bum pa'i dngos 'bras dang/ bum pa'i brgyud 'bras
'gal zhing/ de dngos po mtha' dag la rigs 'dra'o/ /gsum pa ni/ 'bras
bu la

sgras brjod rigs kyi sgo nas dbye na/ rnam smin gyi 'bras bu/
bdag po'i 'bras bu/ rgyu mthun gyi 'bras bu/ skyes bu byed pa'i
'bras bu/ bral ba'i 'bras bu dang lnga las/ dang po ni/ zag bcas
nyer len gyi phung po

lnga lta bu'o/ /rnam smin dang/ rnam smin gyi 'bras bu don gcig/
gnyis pa bdag po'i 'bras bu yod de/ ma dag pa'i snod kyi 'jig
rten lta bu de yin pa'i phyir/ gsum pa rgyu mthun gyi 'bras bu
la dbye na/ myong ba

rgyu mthun gyi 'bras bu dang/ byed pa rgyu mthun gyi 'bras bu
gnyis las/ dang po ni/ bde 'gror skyes kyang tshe thung ba lta
bu/ gnyis pa ni/ 'di 'gror skyes kyang srog gcod pa la dga' ba
lta bu'o/ /bzhi pa skyes

@015a @#/ /bu byed pa'i 'bras bu yod de/ zhing ba'i rtsol bas
bsgrubs pa'i lo tog lta bu la byed pa'i phyir te/ mngon pa kun
btus kyi 'grel ba rgyal sras ma las/ skyes bu byed pa'i 'bras bu
ni/ 'di lta ste/ lo

tog la sogs pa'o/ /zhes gsungs pa'i phyir/ lnga pa bral ba'i
'bras bu dang/ so sor brtags 'gogs dang/ 'gog bden rnams don
gcig go/ rgyu 'bras gnyis ka'i rtsod pa spang ba la/ kho na re/
shes bya

rnams par 'jog byed kyi snga logs su byongs ba yin par thal/
grub na/ de chos can/ 'bras bu yin par thal/ byung ba yin pa'i
phyir/ snga logs su byung ba yin pa'i phyir/ der thal/ rnam par
'jog byed kyi

snga logs su byung ba yin pa'i phyir/ ma grub na/ shes bya rnams
par 'jog byed kyi snga logs su byongs ba yin par thal/ rnam par
'kog byed kyi rgyu yin pa'i phyir zer na/ 'gal kyab la 'bud pa
yin te/ rnam par

'jog byed kyi snga logs su byung ba med kyang de'i rgyu yod pa'i
phyir/ mtshan nyid yin na/ rnam par 'jog byed kyi rgyu yin pas
khyab pa'i khyab pa'i phyir/ der thal/ mtshan nyid dang/ rnam par
'jog byed dang/ rnam par 'jog

byed kyi rgyu gsum don gcig/ /mtshon bya dang/ rnam par gzhag bya
dang/ rnam par gzhag bya'i 'bras bu gsum don gcig pa'i phyir/
tshad ma rigs gter las/ des na rnam par gzhag 'jog gi/ rgyu

@015b 'bras gnyis la tshad 'bras 'dod/ /ces gsungs pa'i phyir/
gong du ma grub na/ blo'i yul du bya rung ba chos can/ rnam par
'jog byed kyi rgyu yin par thal/ shes bya'i rnam par 'jog byed
kyi rgyu yin pa'i phyir te/

shes bya'i rnam par 'jog byed yin pa'i phyir/ der thal/ shes
bya'i mtshan nyid yin pa'i phyir/ khyab ste/ shes bya'i rnam par
'jog byed kyi rgyu dang/ shes bya'i rnam par 'jog byed dang/
shes bya'i mtshan nyid rnams

don gcig /blo'i yul du bya rung gi rnam par gzhag bya'i 'bras bu
dang/ blo'i yul du bya rung gi rnam par gzhag bya/ blo'i yul du
bya rung gi mtshon bya rnams don gcig pa bzhin du/ mtshan mtshon
mtha' dag la

rigs 'dra ba yin pa'i phyir/ /yang kho na re/ /rnam smin gyi
phyi logs su byung ba'i mi dge ba chos can/ rnam smin gyi rgyu
yin par thal/ mi dge

ba yin pa'i phyir/ byas pa la kho na re/ 'dod byas pa la kho na
re/ de chos can/ rnam smin gyi rgyu ma yin par thal/ rnam smin
gyi 'bras bu yin pa'i phyir/ ma grub na/ de chos can/ der thal/
rnam smin gyi phyi logs su byung

ba yin pa'i phyir/ byas pa la kho na re/ rnam smin chos can/
khyod kyi phyi logs su byung ba yin na/ khyod kyi 'bras bu yin
pas khyab par thal/ khyod gang zag gi bdag med yin pa'i phyir
zer na/ chos can

@016a @#/ /skyon can no/ yang kha cig/ rnam smin gyi
snga logs su
byung ba'i srog dbang chos can/ rnam smin gyi rgyu yin par thal/
rnam smin gyi snga logs su byung ba yin pa'i phyir zer na ma
khyab/

byas pa la/ rnam smin chos can/ khyod kyi snga logs su byung ba
yin ma/ khyod kyi rgyu yin pas khyab yin par thalkhyod bdag med
yin pa'i phyir zer na yang skyon can yin gong du 'dod na/ rnam
smin gyi snga

logs su byung ba'i srog dbang chos can/ rnam smin gyi rgyu ma
yin par thal/ rnam smin gyi 'bras bu yin pa'i phyir te/ rnam
smin yin pa'i phyir/ der thal/ srog dbang yin pa'i phyir/ khyab
ste/ mngon pa mdzod

las/ srog ni rnam bcu gnyis gnyis/ zhes gsungs pa'i phyir/ khyab
ste/ des srog dbang yin na/ rnam smin yin pas khyab par bstan
pa'i phyir/ bcu gnyis gnyis zhes pa'i don yod de/ dbang po

gzhan bcu gnyis la rnam smin yin min gnyis gnyis yod ces pa'i
don yin pa'i phyir/ dbang po bcu gnyis la rnam smin yin min
gnyis gnyis yod de/ mig gi dbang po/ /rna ba'i dbang po/ sna'i
dbang po/

lce'i dbang po/ /lus kyi dbang po/ yid kyi dbang po/ bde ba'i
dbang po/ yid bde'i dbang po/ sdug bsngal gyi dbang po/ btang
snyoms kyi dbang po/ pho'i dbang po/ mo'i dbang po dang bcu
gnyis la de ltar yod

@016b pa'i phyir/ yang rnam smin chos can/ rnam smin gyi 'bras
bu yin par thal/ rnam smin yin pa'i phyir/ 'dod na/ de chos can/
khyod khyod kyi 'bras bu ma yin par thal/ bdag med yin pa'i
phyir zer na skyon can

no/ des na/ rnam smin gyi 'bras bu gyur pa'i mi dge ba dang/ der
gyur pa'i dge ba gang rung med de/ rnam smin gyi 'bras bu yin
na/ lung ma bstan yin dgos pa'i phyir/ mdzod las/ rnam smin lung
du ma bstan

chos/ zhes gsungs pa'i phyir/ de bzhin du rnam smin gyi rgyur
gyur pa'i lung ma bstan med kyang rnam smin gyi snga logs su
byung ba'i lung ma bstan yod pa yang shes par bya'o/ gzhan yang/
rgyu 'bras 'di la skyon

can gyi lan 'debs dgos ba shin tu mang ste/ bral ba chos can/
khyod kyi 'bras bu med par thal/ khyod rtag pa yin pa'i phyir/
zhes pa dang/ de chos can/ khyod kyi rgyu yod par thal/ khyod
kyi 'bras bu yod pa'i phyir/

zhes pa dang/ de chos can/ khyod kyi phyi logs su byung ba yod
par thal/ khyod kyi 'bras bu yod pa'i phyir/ zhes pa rnams
la'ang skyon can gyi lan 'debs shing/ gzhan yang de 'dra ba mang
du yod pa'i phyir/ de

yang yin te/ bral ba rtag pa yin pa'i phyir/ bral ba dang/ bral
ba'i 'bral bu/ 'gog bden rnams don gcig/ de rnams gang rung yin
na/ rtag pa yin dgos pa'i phyir/ smras pa/ tshul 'dir phra

@017a @#/ /zhib byang bor sbyangs na yang/ /rang bzo spangs te
mkhas pa'i gzhung bzhin du/ /skal ldan blo dman rnams la phan
phyir du/ /phyin drug dang po'i ming can bdag gis bkod/ /'di
yang 'gro

kun 'phral dang yun tu bde zhing bla med rdzogs byang myur du
thob pa'i rgyur gyur cig/ //smras pa/ blo gter smra ba'i seng ge
mi yi zol/ /bzang po'i 'phrin las thub bstan srog gi gsos/ grags
snyan sa

gsum mkhas mang rna ba'i dpyid/ rgyal ba gnyis pa srid zhi'i
khongs na brjid/ sbyin tshul bzod brtson ting 'dzin kai la shar/
shes rab nyin byed 'bar bas 'khyud pa las/ legs bshad chu klung
kun tu dar

ba'i gnyen/ zab rgyas dbyig gi gan mdzod mchog der bsngags/
gzhan du mi gyo spyi don rtsa ba brtan/ dgag sgrub mtha' dpyod
yal 'dab me tog bkra/ /phra zhib rigs pa'i dri bsung 'bum 'phro
bas//

gzhung bzang 'di ni dpal gyi dum bur sems/ /de'i phyir blo gsal
bye ba'i nyer 'tsho'i gzhir/ /'khor ba ji srid mi nyams gnas pa'i
slad/ /dad gtong thos brtson nor bu'i rgyan ldan pas/ /ngo mtshar
dpag

yas spar gyi phyi mo bskrun/ /de yi dge bas rgyal rnams skyed
pa'i yum/ mkha' khyab skye rgu phan bdes skyong ba'i ma/ /nang
gi mun sel dam pa'i 'od snang can/ lung rtogs bshad sgrub bla
nas blar 'phel shog /khyad par

@017b gangs ri'i mgon po'i sku tshe brtan/ /gsang gsum 'jug pa
nam mkha'i mtha' la 'khu/ /mdo rgyud 'o mtshor mkhas grub ngang
mo'i khyu/ /'chad rtsod rtsom pa'i mgrin rnga brdung gyur cig
/rgyu sbyor 'brel thogs ltos par bcas

pa yang/ tshe ring nad med dpal 'byor rgyas pa dang/ phyin drug
bsdu bzhi'i bde lam yangs po nas/ /myur bar zhi ba'i khri 'phang
gnon gyur cig /mdor na 'gro kun mdza' zhing skyid pas 'tsho/
/bstan pa'i snying po bshad sgrub gtsang mas

mdzes/ nges don dam pa'i dbu 'phang mtho ba sogs/ /bkra shis
rgya mtshos nor 'dzin dge gyur cig /ces pa 'di ni/ rigs pa'i
dbang phyug mkhas grub chen po'i sbyin pa dar rgyas kyis mdzad
pa'i rgyu 'bras 'khor lo zhes bya ba snga mi nas 'brog ri dga'
ldan byang rtser slob

dpon rim pas brtsi gzhag tu gnang dang gnang mus yin 'dug na'ang
blun po'i bris nor 'gyel ba 'gyel 'jus kun tu 'byams pa las dga
ba'i dpe rgyun glog dang mar me skad cig tha ma'i ngang chul
'dzin pa la nyer bar brten/ rab byung bco lnga pa'i chu khyi lor
tre hor dpon khag lnga'i nang tshan ba

ri dgon ltag gling bsres sprul skya blo bzang bstan 'dzin grags
pa mtha' yas/ dge rgan byams pa don ldan phyag mdzod dga' phrug
nas sbar gzhi sgrub bzhed kyi thugs bskyed bzang pos kho bor
zhus dag tu bsrings shing/ de bzhin mkhan rin po che bstan dar
bas kyang nyid

dang dge bshes mang gi 'dun mongs yin tshul gyi phyag bris dang/
dngos 'jal du'ang gsungs pa dang du blangs te tshig don gnyis ka
brags dpyad zhin mo bgyis khul la/ dogs gnas 'ga' zhig dgos
dbang gis rang sor bzhag ste ma phyir sbel ba chu phag zla ba
dang po'o nad bri

@018a @#/ /brko legs par grub pa'i tshe dge rtsa chud mi 'dzad
zhing gnas dam par bsngo ba'i smon tshig 'di lta bu zhig dgos
zhes bsod nams sgrub pa po mchog sprul rin po ches nye bar

bskul ba'i ngor/ 'jam mgon chos kyi rgyal po'i rjes su dad gus
kyis phyogs pa bam chung rigs smra'i tha shal shes rab rgya
mtshos nor gling rang spyil thos bsam nor bu'i lding

khang du sbyar ba dge ldan lugs bzang phyogs brgyar rgyas gyur
cig/ dus gsum rgyal ba'i mdo rgud gsungs rab don/ thad kar ma
nor snga phyi 'gal med par/ ji bzhin 'byed

pa'i 'phrul gyi lde mig mchog/ rgyu dang 'bras bu'i 'khor lo'i
rnam gzhag 'dis/ rang gzhan kun la 'phral phugs phan gnod kyi/
blang dor la rmongs snyigs dus nyams thag 'gror//

rmongs sel blang dor 'byed blo skyed pa'i phyir/ dga' khri go
brgad 'ja dpal gzhan phan dang/ mdzod pa bcas nas brgya phrag
bzhi yi grangs/ bskrun pa'i dge bas 'gro kun ma lus pa'i//

zhi bde tshangs la ma nor legs bstan pa'i/ nang bstan gzhung lugs
'gro ba'i lam bstod du/ ji srid nam mkha' zad par ma gyur bar/
de srid nyams med sra brtan gyas gyur cig/ rgyu

@018b sbyor ltos bcas skye kun rgyal bstan dang/ 'bral med nyams
len 'gro'i mgon byed shog/ ches rgyal ba kun gyi mdo rgyud gsung
rab kyi dgongs don ma nor ma 'khrug 'gal med ji bzhin gtan la
'phab pa'i

rigs lam 'phrul gyi lde mig dga' byang thos bsam nor gling grVa
tshang gi yig cha rgyu 'bras 'khor lo dpe grangs bzhi brgya thams
pa dga' ldan khri pa go brgyad pa 'jam dpal gzhan phan dang mdzod
pa dbu phar rab

'byams pa bkra shis rgyal mtshan gnyis nas spar 'debs zhus pa'i
dge ba'i smon tshig 'di bzhin gong smos khri pa do mas bgyis pa
dge'o/ dga' byang dpe mdzod las byed har gdong dge bshes

bsod rnams rnam grol dang/ tshwa ba dge bshes byams pa don grub/
tsha ba dge slongs sangs rgyas dgos grub bcas nas lhag bsam dkar
pos las khur bgyis kyang/ skye ba'i phreng bar rgyal ba'i

bstan pa la/ zhugs nas tshul khrims phung po legs rdzogs dang/
sa dang lam gyi grod pa thar phyin ste/ rnam mkhyen rgyal ba'i
go 'phang myur thob shog/ dge legs 'phel/