@#/ /bod gzhung dril bsgrags las khungs nas rgya gar spyi yongs
rlung 'phrin thog dang/ gsar shog khyab 'grems gnang byed du dus
chen khag gi

'grel bshad bsgrig rtsom ^snyan bskul gnang don ltar/ phyogs
bsgrigs mdzad pa/ /

@001a @##/ /bdag cag gi ston pa zas gtsang sras po de nyid bgrang
yas bskal pa'i snga rol nas byang chub mchog tu thugs bskyed/
rdzogs smin sbyang gsum

mthar phyin te bla med sku bzhi'i rgyal thabs mngon du mdzad zin
na'ang/ mgon po byams pas/ gang gis 'khor ba ji srid par/ /'gro
la phan pa sna tshogs dag /mnyam du mdzad

pa'i sku de ni/ /thub pa'i sprul sku rgyun mi chad/ /ces gsungs
pa ltar/ 'dzam bu'i gling 'dir mchog gi sprul sku'i rnam pa ston
par bzhed de/ yum lha mo sgyu 'phrul ma'i lhums su zhugs

shing sku bltams pa'i mdzad pa ni/ byang chub sems dpa' dam pa
tog dkar po dga' ldan gyi lha'i gnas na lha'i dpal phun sum
tshogs pa la bde bar rol bzhin/ lha rnams la chos ston cing

@002a @#/ /bzhugs pa'i tshe/ sangs rgyas rnams kyi byin rlabs kyis
lha'i sil snyan gyi rol mo'i sgra las/ bsod nams rgya che tshogs
mnga' dran rtogs dang/ /blo gros mtha' yas

shes rab 'od mdzad pa/ /mtshungs med stobs mnga' sgyu rtsal rgya
che ba/ /mar me mdzad kyi lung bstan dgongs par mdzod/ /skyes
mchog khyod kyi bsod nams dpal gyis ni/ /dga' ldan pho brang

shin tu mdzes mod kyi/ /'on kyang thugs rje'i mthu dang ldan pas
na/ /'dzam bu'i rgyal mtshan du ni char pa phob/ /ces sogs 'dzam
bu'i gling du 'byon pa'i dus la bab par bskul ba la brten

nas rin po che'i cod pan byang chub sems dpa' ma pham pa'i dbu
la bcings te lha rnams la chos ston pa'i rgyal tshab tu dbang
bskur zhing/ 'jig rten na rigs dang/ rus dang/ yul

@002b dang/ dus dang/ yum byed par nus pa'i bud med bcas gzigs
pa rnam pa lnga la gzigs nas/ lha yi 'khor grangs med pa dang/
mchod pa'i bye brag bsam gyis mi khyab pa dang bcas

dga' ldan nas phebs te glang po che'i phrug gu thal dkar mche ba
drug dang ldan pa'i gzugs kyis sa lug hor zla 6 tshes bco lnga'i
nam gyi gung thun la yum lha mo sgyu 'phrul ma gso sbyong blangs
pa'i glo g.yas

pa nas zhugs shing/ lha yi dbang po brgya byin gyis kyang/ lha'i
bu dpa' zhing brtul phod pa bzhi zhig sku'i srung mar bzhag /yum
yang lus ngal du ba dang/ sems nyon mongs pa med par gnas/

de ltar lhums su zla ba bcu lon te lcags spre sa ga zla ba'i
tshes bdun nyin yum sgyu ma lha mdzes grong khyer lhas bstan dang
nye ba'i lumbi ni'i tshal du 'byon par chas te rin po che sna
bzhi'i khyogs bshams pa

la 'dug cing/ g.yog mo du mas yongs su bskor/ rgyal po zas
gtsang yang dpung dang bcas te ser skya'i grong khyer nas 'phags
te lumbi ni tshal du son pa na yum shing rta las babs te phyogs
kun tu

gzigs pas/ sa phyogs yangs pa zhig tu shing mya ngan 'tshang
(br-ik+Sha) me tog rab tu rgyas pa zhig gzigs te de'i yal ga la
phyag g.yas pas bzung ste bya rmyang byed cing 'greng ste
bzhugs

@003a @#/ /bzhin pa'i tshe byang chub sems dpa' yum la gnod pa med
par rtsibs logs g.yas nas brtol te sku bltams/ de'i tshe brgya
byin gyis lha'i gos kyis blangs par brtsam pa na/ nga thongs
gsungs te sa

la zhabs bzhag nas phyogs bzhir gom pa bdun bdun bor zhing/ 'di
ni shar phyogs yin te mya ngan las 'das pa'i thog mar 'gro bar
bya'o/ /'di ni lho phyogs te 'gro ba thams cad kyi yon gnas su
'gyur bar bya'o/ /'di ni nub

phyogs te nga'i skye ba'i tha ma 'di yin par 'gyur ro/ /'di ni
byang phyogs te srid pa'i mtsho las brgal bar bya'o/ /zhes
gsungs/ de'i nyin par phyogs kyi rgyal po chen po bzhi la bu
btsas/ rgyal po zas gtsang gi rim gro

pa rnams la 'dun pa la sogs pa'i bu lnga brgya btsas shing/ de
bzhin du shAkya'i grong du bzang ldan la sogs pa'i shAkya'i bu
lnga brgya/ grags 'dzin ma sogs shAkya gzhon nu ma lnga brgya/
glang mo lnga brgyar glang phrug lnga brgya/

rta rgod ma lnga brgyar rte'u lnga brgya skyes/ gter lnga brgya
yang kha bye/ khams kyi rgyal phran rnams kyis kyang dpya phul
zhing 'dud pas/ rgyal pos bdag gi bu btsas pa na don thams cad
grub par gyur to zhes gzhon nu'i mtshan don thams

cad grub par btags so// ! //nges par 'byung ba'i mdzad pa ni/
sangs rgyas rnams kyi mthus/ sil snyan sogs rol mo'i sgra las/
sdug bsngal brgyas gang sems can mthong nas ni/ /'gro ba'i

@003b mgon dang skyabs dang gnas gyur cing/ /phan byed mgon dang
dpung gnyen gyur cig ces/ /khyod kyis sngon ni smon lam de ltar
btab/ /dge ba dpa' bo sngon gyi spyod pa dang/ /'gro phan bya
zhes smon lam dran par byos/ /'di ni

khyod kyi dus dang tshod yin gyis/ /drang srong mchog rab khyim
nas 'byung bar byos/ /zhes sogs bskul ba na/ byang chub sems
dpa' gzhon nu don grub kyis kha lo sgyur ba 'dun pa la bzhon pa
bzang po myur du shoms shig gsungs

nas shing rtar zhugs te skyed mos tshal du gshegs pa'i lam du mi
rgas shing 'khogs pa rgas pa'i sdug bsngal gyis nyen pa gzigs
nas/ 'dun pa la gsungs pa/ 'di ci/ lha; 'di ni rgas pa'o/ /de ci
zhig yin/ lha; 'di ring

por mi thogs par 'gum pa'o/ /'o na nga yang rgas pa'i chos las
ma 'das sam/ lha yang bgres pa'i chos nyid las ma 'das so/ /'dun
pa/ shing rta phyir sgyur zhi ga pho brang du 'di nyid bsam par
bya'o/ /de bzhin du/ na ba dang/ ro

skyel ba dag gzigs nas/ kha lo pa 'dun pa la gong bzhin dri ba
mdzad/ de nas yang gnas gtsang ma'i lhas sprul pa'i dge slong
zhig gzigs pa dang/ 'dun pa/ 'di ci/ lha; 'di ni rab tu byung ba
ste/ du la ba/ legs pa sogs

yin no sogs rgyas par gsol bas/ byang chub sems dpas rgyal srid
ni gnod pa du ma'i 'jug ngogs/ sdug bsngal 'bum gyi 'byung gnas/
nyes pa'i btson khang lta bur gzigs nas khyim nas khyim med par
nges par

@004a @#/ /'byung ba'i yi dam brtan por bcas so/ /mtshan mkhan
rnams kyis gzhon nu zhag bdun gyi bar du rab tu ma byung na
'khor sgyur du 'gyur bar lung bstan pa ltar/ yab rgyal po zas
gtsang gis gzhon

nu bsrung ba'i slad grong khyer la lcags ri dang 'obs rim pa
bdun res bskor/ sgo 'phar rnams lcags las byas shing dril bu'i
sgra chen po 'byung ba btags/ /pho brang gi phyi'i skas spo ba
dang 'dzugs pa mi lnga brgyas byed dgos

pa bcos/ phyogs bzhi'i sgo bzhi yang rgyal po'i mched bzhi dpung
dang bcas pas bsrungs shing gnas/ de ltar zhag drug 'das te
byang chub sems dpa' dgung lo nyer dgu la bab pa kun 'dzin ces
pa sa pho byi ba'i lo'i sa ga zla ba'i

tshes brgyad kyi tho rengs gnod sbyin lngas rtsen gyis khang
bzang gi steng nas skas chen po btsugs pa las babs nas/ 'dun pa
la rta longs shig gsungs te rta bsngags ldan la chibs 'dun pa
chibs rgyab tu bskyon/ 'jig rten skyong ba'i lha

bzhis bsngags ldan gyi sug bzhi btegs nas nam mkha' las gshegs
te dpag tshad bcu gnyis kyi sa myur bar bgrod de chu klung yid
'ong ldan gyi 'gram du byon zhing/ chibs las babs/ der mchod
rten rnam dag gi drung du sku'i

rgyan bkrol nas 'dun pa la byin te/ rgyan dang/ rta khyer la
slar ldog cig /skye rgu 'di na skye na'ang gcig pur skye/ /de
bzhin 'chi na'ang gcig pur 'chi bar 'gyur/ /'di na gcig pus sdug
bsngal myong 'gyur gyi/ /'khor

@004b ba la ni grogs yod ma yin no/ /zhes sogs gsungs nas utpal
sngon po'i 'dab ma lta bu'i ral gris rang gis dbu skra rang gis
bregs te nam mkhar bor ba na/ brgya byin gyis blangs nas lha yul
du mchod pa chen po btsugs so/ /de nas

brgya byin rngon pa'i gzugs su sprul nas ngur smrig gi gos phul/
ka shi ka'i na bza' rnams lha yul du 'khyer/ de nas rab tu byung
ba'i cha byad kyis chu bo ganggA brgal te ma ga d+har byon nas
bla na med pa'i byang chub kyi lam

'tshol bar mdzad// ! //rnam 'dren shAkya'i rgyal po de nyid 'og
min du longs spyod rdzogs sku'i ngo bor sangs rgyas zin yang/ ji
skad du/ rgyud bla ma las/ chos kyi sku las ma g.yos par/
/sprul pa'i

rang bzhin sna tshogs pas/ /skye ba mngon par skye ba dang/ /dga'
ldan gnas nas 'pho ba dang/ /lhums su zhugs dang bltams pa dang/
/bzo yi gnas la mkhas pa dang/ /btsun mo'i 'khor gyi rol pa
dang/ /nges

'byung dka' ba spyad pa dang/ /byang chub snying por gshegs pa
dang/ /bdud sde bcom dang rdzogs par ni/ /byang chub chos kyi
'khor lo dang/ /mya ngan 'das dang gshegs mdzad rnams/ /yongs su
ma dag zhing rnams su/ /

srid pa ji srid gnas par ston/ /zhes nam mkha' ji srid bar mdzad
pa bcu gnyis la sogs pa'i bkod pa rim dang cig car ba du ma'i
tshul du ston par mdzad pa las/ 'dzam gling 'dir skye rgu'i tshe
lo brgya pa'i dus su mchog

@005a @#/ /gi sprul sku'i rnam par byon te yul dbus ma ga d+har
mngon par byang chub pa'i tshul bstan pa'i mdzad pa ni/ byang
chub sems dpas sgyu rtsal shes kyi bu ring 'phur dang/ rengs
byed kyi bu lhag

spyod sogs las gdams pa nod de chu klung nair dza na'i 'gram na
lo drug tu dka' ba spyad kyang 'di tsam gyis byang chub la reg
par mi nus par dgongs nas dka' thub las bzhengs te zhal zas rags
pa gsol/ sde

can gyi bu mo dga' ma dang/ dga' stobs ma gnyis kyis ba stong gi
'o ma nying khur byas pa phul ba gsol bas sku lus gser gyi kha
dog tu gyur cing/ rdo rje gdan du gshegs pa na brgya byin gyis
rtswa tshong gi khye'u bkra shis

kyi gzugs su sprul te rtswa sngo ljang reg na 'jam pa phul ba
bzhes te byang chub kyi shing la lan bdun du bskor ba mdzad nas
de'i drung rtswa'i gding ba bting ba'i steng du skyil mo krung
bcas te bzhugs nas/ ji srid sdug bsngal kun gyi

mtha'i/ /zag zad yang dag ma thob par/ /de srid srog gi mthar
gyur kyang/ /skyil krung 'di ni gzhig mi bya/ /zhes dam bca'
mdzad/ de'i tshe bdud sdig can 'ongs te/ byang chub sems dpa' la/
khyod kyis byang chub

ga la thob/ ces zer/ bka' stsal pa/ khyod kyis sbyin pa gcig
byas pas/ 'dod pa'i dbang phyug thob na/ ngas bskal pa grangs
med gsum du tshogs bsags pas/ byang chub mi thob pa srid re kan/
des

@005b smras pa/ ngas mchod sbyin gcig byas pa'i dbang po khyod
yin la/ khyod kyi dbang po su yod/ byang chub sems dpas nga'i
dbang po 'di yin zhes phyag sa la reg pa na/ sa'i lha mos sa
brtol te byung nas de de bzhin no/

smras pas/ bdud bag 'khums par gyur nas/ bdud kyi bu mo sred ma
dang/ dga' sred ma sogs btang nas de rnams kyis bud med kyi
g.yo sgyu rnams bstan te bslu bar brtsams pa na/ de dag rgan
mor byin gyis

brlabs/ slar yang bdud dmag bye ba phrag dung phyur bskul te
mtshon cha sna tshogs 'phangs pa rnams byams pa'i ting nge 'dzin
gyi mthus me tog gi bla bre dang gzhal med khang du gyur cing
bdud dmag rnams pham ste mi snang bar gyur/

de nas byang chub sems dpas nam gyi thun dang po la rdzu 'phrul
gyi mngon shes dang/ lha'i rna ba'i mngon shes dang/ gzhan gyi
sems shes pa'i mngon shes rnams bskyed/ gung thun la sngon gyi
gnas rjes su dran pa'i mngon

shes bskyed/ thun tha ma la lha'i mig dang/ zag zad kyi mngon
shes bskyed de bla na med pa'i ye shes brnyes/ de ltar dgung lo
so lnga la bab pa rgyal ba zhes pa shing pho rta'i lo sa ga zla
ba'i tshes bco lnga'i tho rangs mngon par rdzogs

par sangs rgyas shing/ de'i tshes chen po ni rab tu g.yos/
phyogs thams cad 'od kyi snang ba chen pos khyab pa sogs ngo
mtshar ba'i ltas bsam gyis mi khyab pas 'jig rten thams cad khyab
par gyur cing/ phyogs 

@006a @#/ /bcu'i zhing kun na bzhugs pa'i rgyal ba thams cad kyis
kyang phyag g.yas pa brkyangs te ded dpon chen po rgyal bar
gyur cig /ces ched du brjod pa mdzad do// ! //bsngags 'os

bsngags bstod las/ nyid kyi don ni yongs rdzogs shing/ /gzhan
gyi don la mngon brtson pa/ /dam chos bdud rtsi stsol ba po/
/tshim par mdzad la phyag 'tshal lo/ /zhes bsngags pa ltar/ 'o
skol gyi ston pa mnyam

med shAkya'i rgyal po zhes mtshan gyi sgra dbyangs rna bar thos
pa tsam gyis kyang srid zhi'i gdung ba sel bar nus pa gang des
tshogs gnyis kyi mthu phul du byung ba bsags nas 'og min du lnga
ldan longs spyod rdzogs pa'i skur sangs

rgyas zin kyang/ gdul bya'i don du 'phags yul rdo rje gdan du
mchog gi sprul pa'i skur 'tshang rgya ba'i tshul bstan te/ mdzad
pa kun gyi nang nas mchog tu gyur pa gsung gi mdzad pa chos kyi
'khor lo rim pa gsum du bskor ba'i

nang tshan bka' dang po bden bzhi'i chos 'khor bskor ba'i tshul
ni/ ston pa dgung lo so lnga la bab pa shing rta sa ga zla ba'i
tshes bco lngar byang chub shing drung du mngon par rdzogs par
sangs rgyas pa'i tshul bstan pa'i rjes su

'di snyam du dgongs te/ bdag gis chos zab mo zab par snang ba/
khong du chud par dka' ba/ rtog ge pa rnams kyis rtog ge'i spyod
yul ma yin pa/ mkhas pas 'di shes shing rtogs na/ gzhan la smras
kyang

@006b mi shes pas bde bar gnas pa'i rnal 'byor la rjes su brtson
par bya'o/ /zhes dgongs nas/ zab zhi rdul bral 'od gsal 'dus ma
byas/ /bdud rtsi'i chos 'di bdag gis thob par gyur/ /bdag gis
bstan kyang gzhan

gyis mi shes te/ /mi smra nags 'dab gnas par bya ba snyam/ /zhes
sogs gsungs te zhag bdun phrag bdun du thugs las chung ngur
bzhugs te chos kyi 'khor lo ma skor ba'i tshul bstan pa na/
phyogs bcu'i zhing nas lhags pa'i

byang chub sems dpa' bgrang ba las 'das pa dang/ brgya byin la
sogs pa'i dkar phyogs kyi lha rnams kyis chos ston par gsol
zhing/ khyad par stong gsum gyi bdag po tshang pa chen po 'khor
tshangs pa 'bum phrag drug cu rtsa

brgyad bcas kyis thal mo sbyar te gsol pa/ ma ga d+har ni sngon
chad chos byung ba/ /dag pa ma lags dri mar bcas par rtogs/
/bdud rtsi chos kyi sgo ni phye mdzod la/ /dri ma med pas rtogs
pa bshad par mdzod/ /ces bskul ba na/

tshangs pa ngas ni tshegs chen gyis/ /skyon rnams bcom nas rtogs
gyur pa/ /srid dang chags pas dkris rnams kyis/ /chos ni legs
par rtogs mi 'gyur/ /zhes bka' stsal pas/ tshangs pas 'jig rten
na dbang po

mchog dang/ 'bring dang/ dman pa dag yod pas 'ga' zhig gis chos
thos na rtogs par 'gyur bas nges par chos gsung du gsol/ zhes
zhus pa na/ bka' stsal pa/ bdud rtsi'i sgo mo dag ni dbye bar
bya/ /nyan bar

@007a @#/ /su 'dod som nyi sol cig dang/ /tshangs pa mi rnams la
ni gya nom chos/ /klan ka mi btsal mdo tsam bshad par bya/ /zhes
zhal gyis bzhes pas tshangs pa dga' ste mi snang bar song ngo/
/de nas

bcom ldan 'das grong khyer wA ra NA sir byon te/ de'i tshe 'bab
chu gnod pa can gyi 'gram drang srong lhung ba ri dwags kyi nags
na lnga sde dag 'khod pas/ de bzhin gshegs pa 'byon pa rgyang
ring po nas mthong ste/ shes ldan

dag /dge sbyong gau ta ma mi brtan pa/ bya ba mang ba/ mang pos
'tsho ba/ mang du za ba/ spong pa nyams pa de 'ong gi /bdag cag
rnams kyis de la smra bar mi bya/ phyag dang ldang ba mi bya/
stan stob par mi bya'o/ /

stan nar ma bting pa 'di la 'dod na 'dug tu chug cig /ces nang
khrims bcas so/ /de nas bcom ldan 'das lnga sde'i gnas su byon
pa na gzi brjid ma bzod pas nang khrims dral te thams cad langs
shing phyag phul nas kau'u

de n+yas rim gro byed/ rta thul gyis bsus te chos gos dang lhung
bzed blangs/ rlangs pas gdan bshams/ ming chen gyis zhabs rten
stob/ bzang ldan gyis zhabs bsil phul te/ tshe dang ldan pa gau
ta ma byon pa legs

so; ;gdan bshams pa la bzhugs shig /ces zer ro/ /de nas ston pas
gdan bshams pa la bzhugs nas bka' stsal pa/ de bzhin gshegs pa
la tshe dang ldan pa zhes sogs ma smra zhig /khyod yun ring

@007b por sdug bsngal bar 'gyur ta re/ zhes bka' stsal ba na/
lnga sdes/ khyod sngon dka' ba spyod pa na mi'i chos bla ma ma
thob la/ da bya ba mang zhing mang du za ba sogs kyi spyod tshul
'dis ga la thob nus/ zhes gsol ba na/

ngas ni thob bo/ dge slong dag rab tu byung bas ni mtha' 'di
gnyis la brten par mi bya ste/ 'dod pa bsod snyoms kyi mtha'
dang/ ngal zhing dub pa'i mtha' 'o/ /khyed kyis mtha' 'di gnyis
la mi brten par dbu ma'i laM la brten

dgos te/ gang zhe na/ 'phags lam yan lag brgyad pa'o/ /zhes
gsungs/ de nas zla ba drug pa'i tshes bzhi'i nyin bcom ldan 'das
kyis sa'i phyogs 'di gang du chos 'khor bskor snyam du dgongs pa
na/ gang du

sngon gyi rgyal ba rnams kyis chos 'khor bskor ba'i sa phyogs
der rin po che sna bdun gyi khri stong phrag gcig byung zhing/
bcom ldan 'das kyis sngon gyi rgyal ba rnams la gus par mdzad
pa'i phyir khri gsum la bskor ba

mdzad nas khri bzhi pa la skyil mo krung bcas te bzhugs/ sku las
spros pa'i 'od zer gyis bskul te/ lha/ klu/ gnod sbyin/ dri za/
lha ma yin sogs dang/ phyogs bcu'i byang chub sems dpa' grangs
med pa dag lhags

te 'dus pa na/ tshangs pas/ nyon mongs tshogs kyi nad brgyas gtses
pa'i skye bo de dag la/ /rgyal ba sman pa 'khor lo dam pa bskor
te thar mdzad gsol/ /nor bdun bgo bsha' mdzod cig 'dren pa 'khor
lo bskor bar

@008a @#/ /gsol/ /dgongs pa yongs rdzogs rims nad ma mchis 'khor
lo mchog bskor gsol/ /zhes lha'i 'dzam bu chu bo'i gser las byas
pa'i 'khor lo rtsibs stong pa phul zhing/ brgya byin gyis

kyang gser gyi maNDal dpag tshad lnga bcu pa dang/ dung dkar po
g.yas su 'khyil ba phul te gsol ba btab pa na/ bcom ldan 'das
kyis/ lnga sde bzang po la bos te/ dge slong dag /bden pa bzhi
gang zhe na/ sdug

bsngal dang/ kun 'byung dang/ 'gog pa dang/ lam mo/ /sdug bsngal
gang zhe na/ skye ba ni sdug bsngal lo/ /zhes sogs dang/ kun
'byung gang zhe na/ yang srid pa'i sred pa dga' ba'i 'dod chags
dang ldan pa de dang de la

mngon par 'dod pa ste zhes sogs dang/ 'gog pa gang zhe na/ yang
srid pa'i sred pa de nyid ma lus par spangs pa ste/ sogs dang/
lam gang zhe na/ 'phags lam yan lag brgyad pa ste/ de bsgom par
bya'o/ /zhes

sogs bden pa bzhi po dag gi ming dang/ spang blangs dang/ de dag
yongs su shes/ spangs/ mngon du bya/ bsgom par bya ba ste bden
bzhi lan gsum/ rnam pa bcu gnyis su bzlas te chos kyi 'khor lo
bskor/

de'i tshe kau di n+ya la/ khyod kyis chos kun shes sam/ zhes bka'
stsal pa na/ bcom ldan 'das/ bdag gis kun shes so/ /zhus pas kun
shes kau di n+yar grags shing dgra bcom thob/ gzhan bzhi pos
mthong lam

@008b thob/ de ltar lnga sdes bden pa rtogs ma thag bsnyen par
rdzogs pa'i dge slong gi dngos por gyur/ yang dge slong dag
/gzugs ni bdag ma yin no/ /zhes sogs bdag med pa las brtsams te
chos 'khor bskor

bas/ gzhan bzhis kyang dgra bcom pa mngon du byas/ 'khor du 'dus
pa'i lha brgyad khris kyang chos la chos kyi mig rdul med cing
dri ma dang bral ba skyes so// ! //mdo sde gser 'od dam pa las/

sangs rgyas bcom ldan bsam mi khyab/ /de bzhin gshegs pa rtag
pa'i sku/ /sems can rnams la phan pa'i phyir/ /bkod pa rnam pa
sna tshogs ston/ /zhes gsungs pa ltar/ sangs rgyas rnams kyis
'gro ba'i mos khams

dang 'tsham par dag dang ma dag gi sprul pa'i rol gar sna tshogs
su ston par mdzad pa las/ bdag cag gi ston pa shAkya'i rgyal po
de nyid 'dzam gling 'dir mchog gi sprul sku'i rnam par bstan te/
ji skad du/ rin chen phreng ba

las/ snying rje'i dbang du gyur pa rnams/ /gshegs dang bltams
dang rol pa dang/ /khab nas 'byung dang dka' spyod dang/ /byang
chub ched du bdud sde 'joms/ /chos kyi 'khor lo bskor ba dang/
/lha rnams

kun nas babs pa dang/ /de bzhin du ni mya ngan las/ /'das pa
ston par mdzad pa yin/ /zhes pa ltar mdzad pa mtha' yas pa'i sgo
nas gdul bya rnams smin grol gyi skal ba mchog la sbyor bar
mdzad pa'i nang

@009a @#/ /tshan/ /rgyal ba lha las babs pa'i dus chen ni/ bcom
ldan 'das dgung lo bzhi bcu zhe gcig tu phebs pa lcags pho byi
ba'i lor/ yum lha gnas su skye ba bzhes pa de nyid bden

pa la 'god par bzhed pa dang/ gzhan yang lha bgrang ba las 'das
pa zhig la dge ba'i rtsa ba yod par gzigs nas/ bcom ldan 'das
'khor dang bcas pa ri rab kyi rtse mo sum cu rtsa gsum gyi gnas
su

gshegs te/ der shing yongs 'du sa brtol dang nye ba lwa ba dkar
po lta bu'i rdo leb kyi steng du bzhugs nas/ shA ri'i bu dang/
'od srungs chen po sogs dgra bcom pa brgyad stong dang/ kun dga'
bo dang

thabs cig tu dbyar gnas mdzad cing/ yum la sogs pa'i lha rnams
la chos ston par mdzad/ de'i ring 'phags pa mo'u 'gal gyi bu
chen po sogs dge slong mang po mnyan yod du dbyar gnas par mdzad

pa na/ rgyal po gzugs can snying po dang/ gsal rgyal sogs skye
bo rnams kyis sangs rgyas gang na bzhugs ma shes pa na/ mo'u gal
gyi bu chen po'i drung du song ste dris pa la/ lha'i gnas su
bzhugs so/

zhes bshad/ de nas zla ba gsum 'das pa na/ slar yang mo'u gal
gyi bu'i drung du song nas/ bdag cag gis bcom ldan 'das ma
mthong nas yun ring lon te/ 'phags pa rdzu 'phrul gyis bzhud

@009b la bcom ldan 'das spyan 'dren du gsol/ zhes zhus pa na/
mo'u gal gyi bus skad cig la lha yul du song nas bcom ldan 'das
la/ 'dzam bu gling ba'i mi rnams kyis lha'i gnas su 'dzeg mi nus
shing/

lha rnams ni 'dzam bu'i gling 'dir 'ong ba la dka' ba med pa'i
phyir/ da ni 'dzam bu'i gling du gshegs su gsol/ zhes sogs 'dzam
gling gi mi rnams kyi 'phrin gsol ba na/ khyod song la/ zhag
bdun nas grong khyer

gsal ldan gyi a pa dza ra'i nags u dum wa ra'i shing drung du
gshegs par 'gyur ro zhes bsgos shig gsungs/ des kyang skad cig
la 'dzam gling du 'ongs nas mi rnams la bshad pas/ de rnams kyis
sa phyogs

der byi dor byas shing mchod pa sna tshogs pa bshams so/ /de nas
ston zla 'bring po hor zla dgu pa'i tshes nyi shu gnyis la bcom
ldan 'das 'dzam gling du zhabs kyis gshegs par bzhed pa na/
brgya byin gyis

lha'i bzo bo bi shwa karma la bka' bsgos pas des sum cu rtsa
gsum nas 'dzam gling bar la dbus su baiDU rya'i skas dang/
g.yas su gser dang/ g.yon du shel gyi them skas sprul/ de'i
tshe lha tshangs

pas gser gyi skas las 'bab cing/ gzugs khams kyi lha rnams dang
lhan cig nor bu'i rnga yab kyis bcom ldan 'das la g.yob bzhin
g.yas nas 'gro /brgya byin gyis 'dod pa'i lha rnams dang lhan

@010a @#/ /cig shel gyi skas las 'bab cing/ gdugs rtsibs ma stong
ldan bzung ste bcom ldan 'das kyi sku'i g.yon phyogs nas 'gro
/bcom ldan 'das 'khor dang bcas pa ni bai DU rya'i them

skas las gshegs te/ gal te zhabs kho nas byon na mu stegs pa dag
gis dge sbyong gau'u ta ma rdzu 'phrul nyams so/ /zhes 'phya bar
'gyur la/ rdzu 'phrul kho nas gshegs na lha'i bzo bo'i bsod mi
'phel bar

gzigs nas/ res 'ga' ni rdzu 'phrul gyis byon/ res 'ga' ni zhabs
kyis gshegs shing/ mi'i 'gro ba'i dri mi zhim pa des lha rnams
'ong mi bzod pa la/ ston pas tsan dan gyi drir byin gyis brlabs

par mdzad cing/ skyes pa rnams kyis lha'i bu mo mi mthong ba
dang/ bud med rnams kyis lha'i bu mi mthong bar mdzad nas grong
khyer gsal ldan du gshegs te sengge'i khri bshams pa la bzhugs
shing/ 'khor

rnam bzhi dang/ rgyal po dang/ blon po dang/ bram ze dang/ khyim
bdag sogs skye bo'i tshogs mtha' yas pa 'dus pa la chos kyi sgo
du ma dag 'byed par mdzad do// ! //bskal bzang rnam

'dren bzhi pa nyi ma'i gnyen de nyid kyis 'dzam bu'i gling 'dir
mchog gi sprul sku'i snang brnyan bzung ste gdul bya rnams kyi
khams dang dbang po'i bye brag bsam mi khyab pa de dang der gang
la gang 'dul gyi mdzad pa

@010b mtha' klas pa'i nang tshan grong khyer mnyan yod du mu
stegs kyi ston pa drug 'khor dgu khri dang bcas pa cho 'phrul
chen pos btul ba'i tshul ni/ bcom ldan 'das dgung lo nga bdun pa
me pho 'brug gi lor/ rgyal po'i

khab 'od ma'i tshal na bzhugs shing/ de'i tshe skye bo thams cad
kyis sangs rgyas dang dge 'dun la mchod cing/ mu stegs byed
rnams kyi bsod snyoms dang rnyed pa ngan par gyur pa na/ bdud
sdig can gyis mu stegs kyi

ston pa 'od srungs rdzogs byed la sogs pa drug po'i rgyud bskul
ba la brten nas de dag lhan cig 'dus te/ 'di skad ces/ sngon ni
rgyal po la sogs pa thams cad kyis bdag cag la bkur ba sti byed
pa yin na/

da ni gau ta ma la byed kyi bdag cag la ma yin pas/ dge sbyong
gau tam 'di bdag cag gis mi'i chos bla ma'i cho 'phrul 'gran
pa'i phyir bkug ste/ des rdzu 'phrul gcig ston pa na/ bdag cag
gis gnyis ston pa soT

nyis 'gyur gyis lhag pa bstan par bya'o/ /zhes gros byas te/
rgyal po gzugs can snying po'i drung du song nas/ lha/ bdag cag
dang dge sbyong gau ta ma rdzu 'phrul 'gran du chug cig /rgyal
pos 'di skad ces

kyai ro dang 'dra ba khyed rnams kyis sangs rgyas la ji ltar
'gran/ de rnams kyis/ bdag cag zhag bdun na rdzu 'phrul 'gran na
mngon no/ /zhes smras/ rgyal pos bcom ldan 'das la don de gsol
pa dang/ / 

@011a @#/ /nga nyid dus mkhyen no/ /zhes gnang/ rgyal pos cho
'phrul ston pa'i gnas byed du bcug pa na/ zhag bdun gyi nyin par
bcom ldan 'das rgyal po'i khab nas yangs pa can du gshegs so/ /

ston pa drug gis kyang yangs pa can du bsnyegs nas li tsa byi
rnams la bskul cing/ zhag bdun thog bcom ldan 'das yul kau
shambir gshegs/ de bzhin du yul tsam pa dang/ wA ra NA si sogs
su rim gyis

gshegs pa'i mthar mnyan yod du byon nas rgyal byed tshal du
bzhugs/ ston pa drug gis kyang phyi bzhin bsnyegs nas rgyal po
gsal rgyal la gong bzhin brjod pas/ rgyal pos bcom ldan 'das la
rdzu 'phrul ston

par gsol ba na/ zhag bdun nas ston par zhal gyis bzhes so/ /de
nas rgyal pos zhag bdun gyi bar la mnyan yod dang rgyal byed
tshal gyi bar cho 'phrul gyi 'dun khang chen po lha'i khang bzang
lta bu byas shing/

gser gyi sengge'i khri yang bshams/ mu stegs can gyi dge bsnyen
sogs kyis kyang rang rang gi 'byor pa dang bstun pa'i 'dun khang
drug dang/ gdan khri drug kyang bshams so/ /de ltar zhag bdun
'das pa'i nang

par ston pa drug shin tu snga bar 'ongs to/ rgyal po la/ bdag
cag ni 'dir mchis lags na/ dge sbyong gau ta ma dgug tu gsol/
zhes pho nya btang bas rgyal po 'khor bcas cho 'phrul gyi 'dun
khang du song nas/

@011b bcom ldan 'das spyan 'dren par bram ze'i khye'u bla ma
zhes pa btang bas/ dgun zla tha chung gi yar ngo'i tshes gcig
nyin bcom ldan 'das bya ngang pa'i rgyal po ltar nam mkha' las
cho 'phrul gyi 'dun khang du

gshegs so/ /de'i tshe cho 'phrul chen po blta bar spro ba'i mi
grangs med pa dang/ nam mkha' la lha grangs med pa yang 'dus pa
na bcom ldan 'das me'i khams la snyoms par bzhugs pas/ sgo 'phar

gyi gseb nas me 'od byung zhing cho 'phrul gyi khang pa'i phyi
nang thams cad me dpung 'bar bar gyur pa na/ mu stegs rnams rab
tu dga' zhing/ gau ta ma mthu dang ldan na 'di zhi bar bgyid
grang/ zhes zer/ de ma

thag me lce'i cho 'phrul bsdus nas 'dun khang gi dri ma nag nog
thams cad me 'od kyis sbyangs te sngar las gsal zhing mdzes par
gyur/ (de nas rgyal po gsal rgyal gyis thog mar zhal zas bshams
te bsnyen bkur ba na/)

bcom ldan 'das kyis tshems shing sa la btsugs ma thag tu skyes
nas rin po che sna bdun gyi ljon pa chu zheng dpag tshad du ma
can/ me tog shing rta'i 'phang lo tsam dang/ 'bras bu 'bras bre
lnga shong ba'i bum pa tsam

pa; dri bsung dang ldan pa zhig sprul to/ /tshes gnyis la rgyal
po u tra ya nas bsnyen bkur ba na/ bcom ldan 'das kyi sku'i
g.yas g.yon du rin po che'i ri gnyis shin tu mtho zhing mdzes
pa/ me tog dang 'bras

@012a @#/ /bu rgyas pa'i shing sna tshogs skyes pa la mi dang dud
'gro'i tshogs kyis longs spyod cing tshim pa sprul/ tshes gsum la
rgyal po shun tsi da las bsnyen bkur ba na/ bcom ldan

'das kyi zhal bsil ba'i chu sa la dor ba rin po che'i rdzing bu
dpag tshad nyis brgya pa padma kha dog sna tshogs pas gang ba/ de
dag las spros pa'i 'od zer gyis phyogs kun snang bar byas pa
sprul/ tshes bzhi

la rgyal po indra wa rmis bsnyen bkur ba na/ rin po che'i
rdzing de'i ngos bzhir yur ba chen po brgyad brgyad las chu 'bab
pa las chos kyi sgra 'byung ba phyir yang 'khor zhing rdzing
nyid du 'bab pa sprul/ tshes lnga

la rgyal po tshangs sbyin gyis bsnyen bkur ba na/ bcom ldan 'das
kyi zhal nas gser gyi 'od bkye bas stong gsum gyi stong chen
po'i 'jig rten gyi khams snang bar byas te/ 'od des reg pa'i
sems can

rnams sdug bsngal dang bral nas lus sems rab tu bde bar gyur/
tshes drug la li tsa byi rnams kyis bsnyen bkur ba na/ bcom ldan
'das kyis 'khor mang po dag gcig gi bsam pa gcig gis shes

shing/ so so'i dge mi dge'i las kyang rtogs par mdzad do/ /tshes
bdun la shAkya pa rnams kyis bsnyen bkur ba na/ 'khor de dag so
so 'khor los bsgyur ba'i rgyal por gyur te rin po che sna bdun

@012b dang ldan cing/ rgyal phran dang blon po rnams kyis bsti
stangs byed par mthong bas spro ba skyes so/ /tshes brgyad la lha
dbang brgya byin gyis spyan drangs te sengge'i khri la bzhugs
nas phyag sa la reg pas/ sa

'og nas klu rnams kyis phul ba'i gser gyi padma chen po 'dab ma
stong ldan zhig sa brtol nas byung ba na/ bcom ldan 'das padma
de'i snying po la bzhugs/ de bzhin du padma de 'dra ba lnga
brgya byung ba la

sangs rgyas lnga brgya bzhugs shing/ de dag kyang bzhengs pa
dang/ bzhugs pa/ 'chag pa/ char 'bebs pa/ glog 'byin pa la sogs
pa'i cho 'phrul tha dad pa sna tshogs ston pa rnams byis pa gzhon
nu

dang/ srog chags phra mo tshun chad kyis kyang sgrib pa med par
mthong bar mdzad rjes sprul pa'i bkod pa bsdus te mi snang bar
gyur to/ /de nas gsal rgyal gyis ston pa drug la/ kye; da ni
khyed rnams kyi res

la bab kyi rdzu 'phrul ston cig /ces bskul ba na/ de dag yul yul
po dang zhum zhum por gyur nas gdong pa smad de 'dug go /de nas
bcom ldan 'das kyi phyag gis sengge'i khri mnan bas de las glang
po che'i

skad lta bu'i sgra chen po zhig grags ma thag tu srin po chen po
lnga byung nas ston pa drug gi khri drangs te bshigs/ phyag na
rdo rjes rdo rje 'bar ba thogs nas ston pa drug gi mgor gzas
shing/ rlung dmar dang/ char drag

@013a @#/ /po btang bas ston pa drug po 'jigs shing skrag nas
rdzogs byed chu rdzing du mchongs te shi /gzhan rnams ni phyogs
thams cad du bros/ de dag gi 'khor khri khrag dgus sangs rgyas
la dad

nas skyabs su gsol ba dang/ bcom ldan 'das kyis legs par 'ongs
so/ /zhes bka' stsal bas skra dang kha spu rang byi ste dge
slong du gyur to/ /des na tshe bdun yan chad du ston pa drug pos
kyang rdzu 'phrul

'gran pa'i khul gyis khri bshams nas gnas pa las/ tshes brgyad
nas srin po lnga dang/ phyag na rdo rjes tshar bcad pas/ 'di man
chad kyi cho 'phrul la 'gran zla med pa'i cho 'phrul du grags
so// ! //

tshes dgu'i nyin lha tshangs pas bsnyen bkur ba na/ bcom ldan 'das
kyi sku tshangs pa'i 'jig rten la thug gi bar shin tu mtho ba
lhang nge lham mer bzhugs pa las 'od zer chen pos gnam sa kun
gsal bar mdzad

pa skye bo kun gyis mthong zhing/ gsung thos pa sprul/ /tshes bcu
la rgyal chen bzhis bsnyen bkur ba'i tshe/ bcom ldan 'das kyi sku
srid pa'i rtse mo la thug gi bar du yongs su gang bar mdzad
cing/ de dag

las 'od zer chen po 'bar ba skye bo kun gyis mthong ba sprul/
/tshes bcu gcig la khyim bdag mgon med zas sbyin gyis bsnyen bkur
ba'i tshe/ bcom ldan 'das sengge'i khri la bzhugs bzhin du sku

@013b mi snang bar mdzad nas 'od zer bkye ste/ shin tu 'jam pa'i
gsung gis chos bstan pa 'khor rnams kyis mthong zhing thos par
mdzad/ /tshes bcu gnyis la khyim bdag tsi tas bsnyen bkur ba na/
bcom ldan

'das byams pa'i ting nge 'dzin la bzhugs nas gser gyi mdog lta
bu'i 'od zer bkye ste/ des reg pa'i sems can kun dug gsum gyi
bsam pa zhi nas phan tshun mdza' zhing byams pa la la gnas par
mdzad do//

tshes bcu gsum la rgyal po shun tsi da las bsnyen bkur ba na/
ston pa sengge'i khri la bzhugs pa'i sku'i lte ba las 'od zer
gnyis byung ba/ sku las 'dom bdun tsam du nam mkhar 'phags pa'i
steng na padma re re/

de re re'i steng na sprul pa'i sangs rgyas re re/ de gnyis kyi
lte ba las kyang 'od zer gnyis gnyis byung ba re re'i rtser
padma re re/ de'i steng sprul pa'i sangs rgyas re re bzhugs pa/
de lta bu'i tshul gyis stong chen

po'i 'jig rten gang bar sprul/ /tshes bcu bzhi la rgyal po u tra
ya nas bsnyen bkur ba na/ rgyal pos me tog gtor ba de dag rin po
che'i shing rta nor bus brgyan pa stong nyis brgya lnga bcur
gyur cing/ de re re'i

steng na sprul pa'i sangs rgyas re bzhugs te 'od kyis 'jig rten
gyi khams kun snang bar byas pa sprul/ tshes bco lnga la/ rgyal
po gzugs can snying pos bsnyen bkur ba'i tshe/ zhal zas kyi snod
bshams te/

@014a @#/ /gdugs tshod kyi dus la bab pa na/ snod thams cad zas ro
brgya dang ldan pa sna tshogs pas gang ste cho 'phrul blta ba'i
'khor thams cad tshim pa dang/ bcom ldan 'das kyis phyag

sa la reg pas dmyal khams bco brgyad dag na sems can tshad med pa
dmyal ba'i sdug bsngal sna tshogs myong zhing/ de dag so so nas
'di skad ces/ bdag cag gis sngon sdig pa ji lta bu zhig byas pas
sdug bsngal

'di ltar myong ngo/ /zhes nyam thag gi 'o dod 'bod pa 'khor
rnams kyis thos shing mthong bar mdzad pas thams cad skrag cing
snying rje skyes/ dmyal ba pa rnams kyis sangs rgyas mthong
zhing/ ston pas

phyag sor lnga las 'od zer spros pa de rnams kyi lus la reg pa
tsam gyis sdug bsngal zhi zhing/ chos bstan pa thos pas mtho ris
su skyes so/ /de ltar cho 'phrul chen po 'di dag gi skabs su nyi
ma re re la'ang lha mi

dpag tu med pa mngon par mtho ba dang/ rnam par grol ba'i 'bras
bu thob par mdzad do// ! //bstod pa brgya lnga bcu pa las/ gzugs
kyi sku dang chos 'di dag /gzhan don kho nar mdzad do zhes/ /

'jig rten yid ches dka' 'di la/ /khyod kyis mya ngan 'das pa
bstan/ /zhes gsungs pa ltar ston pa mnyam med bu ram shing pa de
nyid re zhig sku dngos kyi gdul bya rnams rdzogs te chos dbyings
zhi ba chen po'i

@014b dbyings su mnal ba'i mdzad pa ni/ ston pa thugs rje can de
nyid kyis theg pa che chung gi chos kyi 'khor lo mtha' yas pa
zhig bskor te lha mi bgrang ba las 'das pa zhig smin cing grol
bar mdzad pa'i mthar mya ngan las 'da'

bar bzhed de/ grong khyer rtswa can du byon te rtswa can gyi
gyad kyi grong dang nye bar shing sA zung bar du khri chos la
dbu 'phang byang du ston cig /do nub nam gyi gung thun la mya
ngan las 'da' bar 'gyur ro/ /zhes gsungs shing/ kun

dga' bos kyang de ltar 'du byas/ de bzhin gshegs pa der phebs
glo g.yas pa phab/ zhabs kyi steng du zhabs bzhag /snang ba'i
'du shes dang/ dran pa dang/ shes bzhin dang/ mya ngan las 'das
pa'i

'du shes mdzad/ /der kun dga' bos ston pa'i gdung la mchod pa ji
ltar bgyi ba'i tshul zhus pas/ 'khor bsgyur gyi rgyal po'i gdung
la ji ltar bya ba bzhin byed tshul rnams zhu lan gyi tshul rgyas
par gsungs/ de

nas sku dngos kyi gdul bya'i mtha' ma dri za'i rgyal po rab
dga' dang/ kun tu rgyu rab bzang gnyis lus pa las/ dri za'i
rgyal po rab dga' de bcom ldan 'das kyis rab dga' ci 'dra ba'i
gzugs can bai DUrya'i

pi wang rgyud stong ldan bsnams par sprul nas dregs pa brtul/
sku dngos su bstan nas chos bstan pas rgyun zhugs tho ba/ kun tu
rgyu rab bzang la dga' bar bya ba'i gtam mang po mdzad pas bden
pa mthong zhing/

@015a @#/ /tshur shog gis bsnyen par rdzogs nas dgra bcom thob/
de nas ston pas 'khor rnams la bka' stsal pa/ rang gzhan la phan
pa'i phyir gsung rab yan lag bcu gnyis la

bslab/ ston pa so sor thar pa'i mdo la gyis/ dge slong gzhon pas
rgan rabs la thad kar ming 'bod mi bya/ rgan pas kyang gzhon pa
rnams chos gos sogs yo byad kyis bsdu/ dad pa can la

ston pa sku bltams pa dang/ sangs rgyas pa/ chos 'khor bskor
ba/ mya ngan las 'das pa ste bzhi po'i sa phyogs bstan par
bya'o/ /dge slong dag dkon mchog gsum dang/ bden pa bzhi la the
tshom

yod na zhus shig /ces gsungs/ de nas sku'i stod g.yogs bsal te/
dge slong dag ltos shig /de bzhin gshegs pa mthong ba ni rnyed
par dka' ba yin no/ /'di ltar 'dus byas thams cad ni

mi rtag cing 'jig pa'i chos can yin te/ de la 'di ni de bzhin
gshegs pa'i gsung gi tha ma yin no/ /zhes gsungs nas/ dgung lo
brgyad cu song nas gya gcig tu phebs pa rnam gnon zhes pa

lcags pho 'brug gi lo sa ga zla ba'i tshes bco lnga'i thun tha
ma'am nam gyi gung thun la don dam par nam mkha' ma zad kyi bar
du gzugs sku'i bkod pa dang/ 'phrin las rgyun chad pa med kyang
gdul bya rtag

@015b 'dzin can rnams chos la bskul ba dang/ de bzhin gshegs pa
'jig rten du 'byung ba dkon zhing/ rnyed par dka' ba 'doms pa
dang/ sngon gyi thugs bskyed dang smon lam gyi dbang sogs kyis

mya ngan las 'da' ba'i tshul bstan/ de ltar ston pa rang mya ngan
las 'da' tshul bstan kyang bstan pa lo lnga stong du gnas par
byin gyis brlabs shing/ sku gdung dang ring bsrel mang du 'phel
nas

'dzam gling gi khyon la mchod rten grangs med pa skye dgu'i bsod
nams kyi zhing du khyab par byin gyis brlabs so/ /spyir dus chen
thams cad la dge ba gang byas phan yon che zhing/ khyad par
sangs rgyas pa/

chos 'khor bskor ba/ cho 'phrul chen po/ lha las bab pa'i dus
chen bzhi la dge ba gang byas bye ba phrag brgyar 'gyur pa bcom
ldan 'das nyid kyis mdo sde las gsungs shing/ de yang lung phran

tshegs las/ zla ba skar mar bcas pa sa la lhungs kyang srid/ /sa
'di ri dang nags tshal mkha' la 'gro yang srid/ /rgya mtsho chen
po'i chu ni skam par 'gyur srid kyi/ /drang srong chen po rdzun
gsung

gyur pa srid pa min/ /zhes gsungs pa bzhin/ rgyal ba'i bka'
bslu ba med pa'i tshul yid la bcings te/ bde legs thams cad kyi
rtsa ba las 'bras la yid chen kyi dad pa dang/ dkon mchog rin po

@016a @#/ /che rnam pa gsum de gnas skabs dang mthar thug kun tu
mi bslu ba'i skyabs yang dag tu shes nas thugs rje dang byin
rlabs la mos pa drag po skyes te/ skyabs su 'gro ba dang/ phyag

mchod bskor ba dang/ sri zhu bsti stangs sogs sgo gsum dge ba'i
las la ci nus su brtson te dal 'byor gyi rten bzang khyad par
can da res lan gcig tsam thob pa 'di la snying po lon pa zhig
'bad gal che ba

lags so// //