@#/ /kun bzang 'khor lo swa ra swa sti'i glu dbyangs zhes bya ba
bzhugs so/ /

@001a @#/ /stag brag bsam gtan gling bla brang gi sgo 'phyor du
'bri rgyu'i kun bzang 'khor lo swa ra swa sti'i glu dbyangs zhes
bya ba bzhugs so/ /

dge legs rin chen 'dod rgu'i gter chen blo bzang yab sras mchog
la bstod dbyangs bye ba rgya mtsho'i rol mo srid zhi'i gdung sel
'di na dge

dpal ldan rje btsun brtan pa'i 'khor lo phyogs bcu'i rgyal bas
dus kun bsngags pa don ldan lung rtogs nam mkha' mdzod kyi sprin
chen phun tshogs ldan

mgon po zab mo'i gnas kun ji bzhin gsal mdzad rgyal kun 'dus
pa'i dpal ldan mchog dang thun mong dngos grub re ba kun 'jo
'dod rgu'i dpyid

lus can zab rgyas gdams pa'i snang bas blo yi 'dab grol nyi ma
mchog gi dpal 'di 'gro ba'i mun sel theg gsum bstan pa'i snang
byed gcig

ma lus shes bya'i chos nyid gnas lugs tshul bzhin rig mdzad bla
ma'i bla ma thabs mkhas bla med mdzad pas gdul bya'i nor 'dzin
skyong bar mkhas

@002a @#/ /ma dag dri 'khrud thabs kyi zegs ma stong ldan dag
byed gang gA ma bcos spros bral 'dus ma byas shing dpal gyi
'phrin las lhun gyis grub

bla med zhi ba bdud rtsi'i gter chen gsum gsal yongs dag ston
ka'i zla bral rigs kyi bdag po skyabs kun 'byung gnas srid zhi'i
gtsug gi rgyan

gzugs dang gzugs med rnam thar kun mdzod zag pa bag chags dri ma
med bzhin snang la snang bzhin stong gnas mtshan dpe 'gro ba'i
dpal du gyur

spyi dang bye brag gdams zab gter gyis dben gsum sgyu ma ston
pa'i ngag la dbyangs can dpal yon 'dus pas kun dga'i legs bshad
sgrogs pa'i rje

kun bzang spyod pa'i nor bu'i gdengs ka tshangs gnas brgal ba'i
dpal la dbang rnon bshad dang sgrub sde 'dzin la gzhan las khyad
'phags mkhas bzang btsun

rgyal ba'i bzhed dgongs nor bu'i snying po phan bde bsam yas 'jo
ba'i chos bzhin spel ba'i bsam 'das bka' drin rgyal las lhag
pa'i mgon po khyod

@003a @#/ /mchog gi gsang gsum dge legs snang bas snying la bsam
gtan dga' bde 'phel bas bsam gtan thos dang sgom pa'i skal bzang
rtag par rgyas pa nyid

zhing mchog bslab pa'i khrims kyis thugs dul spong bdun nor bu'i
gling mchog khyod ni gling dang mgon dang skyabs zhes rab 'byams
zhing na snyan pas bsngags

mchod do thugs rje'i gzhan dbang gyur pa'i mgon po 'di ko skyabs
mchog gcig mchog skyabs gnas mgon po khyod las skyabs gzhan med
ces gus pas brjod

bstod do blo chen kun bzang bstan pa'i rgyal mtshan mi nub 'dzin
khyod rgyal kun ngag dbang gsung rab mkhyen rab gsung dbang ngag
gi mchog 'di bstod

mchog tu zhi ba 'jam dpal rdo rje'i ye shes sgyu ma'i gzugs
mchog che mchog rnam gnon b+hai ra wa zhes phyogs bcu'i rgyal bas
rab bsngags pa

'dzin ma kun tu g.yo ba'i drag shul stong gsum rdul mnyam gling
gi rgya chen gling 'dis 'khor los bsgyur ba'i sprul pa'i ngo
mtshar mtha' yas 'di

@004a @#/ /pa Tu'i zab chos chos bzhin 'dzin pas thos dang bsam
gtan 'phel bas legs lam bsam gtan ting 'dzin zab mos dri ma dpag
yas yongs su dag

rig stong spros bral dam pa'i chos sku zag med bsam las 'das par
dge legs rgya chen bsam dang gzhal med rlabs chen 'phrin las
'gro ba'i dpal

dag gsal mtshan dpe lam lam rnam bkra mthong grol gzugs sku srid
mthar brtan zhing dul la blo ldan rje btsun bstod las byung ba'i
rab dkar gyi

rnam dkar kun gsal pha mtha' 'gog des yongs 'dzin rje btsun bla
ma'i zhabs zung mtha' yas bstan 'gro'i dpal du lhun chags phan
bde bye ba'i gter

khrims gnyis gser gyi 'khor lo 'bar bzang srid pa gsum gyi khyon
'di na med rdzogs ldan snying por yongs grub mngon dga' dus ring
skyong bar mdzod

tshul ldan rnyed bkur rgya che'i lam gyis lam bzang sgrub pa'i
dge 'dun mchod gnas bslab gsum yon tan rdzogs pas kun bzod nor
gyi blo gros khyab

@005a @#/ /thos dang bsam dang sgom pa'i sgron mes mtha' bral zab
don snang ba la 'ur tshul bzhin spyod pa'i dpal la mos pa lhur
byed skal bzang bdag

mang mang theg mchog thar pa'i lam bzang rang don chags bral
spyod pa mchog tu mthar phyin sangs rgyas myur thob 'gro ba'i
'dod 'jor srid mthar rtag

che mchog dpal ldan pho brang che 'dir sde bzhi'i dga' ba dal
'bab ma lus rab rgyas chos dang srid kyi 'dod 'jo'i dpag bsam
dus kun tu

rgya chen khrims gnyis dpal gyi lo 'dab srid las rab 'das zhi
ba'i bla med kun dga'i 'bras bur smin pa'i ngo mtshar mi nub dpag
yas rgyal

stobs bcu'i bdag nyid bla ma mchog la snyan ngag rgya ches rab
bsngags 'di nas byang chub snying po'i bar du mnyes bzhin rjes
bzung dge mtshan phyir

dge sems don ldan blo mchog bzang pos btsun zhing bzang la mkhas
mchog bstod las rab dang phul gyi dpal yon 'dod 'byung rten
'brel legs tshogs dge

@006a @#/ /bstod pa kun bzang 'khor lo 'di/ /thog mar thams cad
tshig bco lngar/ /bcad de dkyus su phyed len klog /de nas mtha'
nas g.yas bskor klog /skyabs mgon rje btsun bla ma che'i/
/sprul gzhi 'jam dbyangs zhi khro dang/ /gsang

gsum yon tan mdzad pa la/ /bstod cing spyi sgos 'dod don smon/
/zur bzhi nas brtsams dbus su klog /gling 'dir sde bzhi'i dpal
yon 'gugs/ /steng gi dkyil nas zur bcad de/ /phyogs bzhi'i bstod
nas bstod bar klog /bla ma mchog gsum tshogs

la bstod/ /phyogs bzhi'i dkyil gyi phreng bzhi po/ /bstod nas
brtsams te dbus su klog /sku phreng gsum la rab bsngags nas/
/zhabs brtan dge legs 'phel ba gsol/ /gzhan yang phyi nang grwa
brgyad la/ /ngo mtshar yi ge zung gsal zhing/ bsam dang brjod bya

rgya chen po'i/ /bstod dang smon lam sna tshogs pa/ /sdeb legs
tshig gis brjod tshul rnams/ /gzur gnas blo yis zhib brtag na/
/mkhas pa mgu ba'i ngo mtshar gsal/ /de ltar 'jigs med swa ra swa
sti'i glu/ /kun dga'i dbyangs bdun rdzogs pa'i rol mo 'di/ /

skyabs mgon bla ma'i bka' 'bangs khri byang pas/ /snyan ngag
beDUrya 'phang 'gro'i rgyud las drangs/ /'dir 'bad dge bas
rgyal kun gsang gsum gyi/ /bkod pa mi zad srid zhi'i nyi ma
mchog /rlabs chen snang ba stong gis sa gsum khyon/ /'gengs pa'i
mngon dga' dus ring

skyong gyur cig /'khor 'das dge ba'i bkra shis mtho ris klung/
/mngon 'dod re ba 'jo ba'i rlabs phreng can/ /'jig rten gsum na
rgyu ba'i dge mtshan gyis/ /'gro kun ngal gso'i bde ba thob gyur
cig / //dge legs 'phel// 384 //