@#/ /shes rab snying po'i rnam bshad zab mo'i de kho na nyid gsal bar byed pa'i nyi ma zhes bya ba bzhugs so/ / @001a @##/ /na mo gu ru manydzu g+ho ShA ya/ rten 'brel zab mo ji bzhin gzigs nas ni/ /de nyid 'gro la brtse bas 'doms mdzad pas/ /mkhyen dang ston pa bla na med gyur pa/ /thub dbang smra ba'i nyi mar gus phyag 'tshal/ /rgyal ba kun gyi thugs rje gcig bsdus nas/ /rgyal sras gzhon nu'i gar gyis srid gsum 'dir/ /rgyal ba'i mdzad pa mtha' dag sgrub brtson pa/ /rgyal sras thu bo spyan ras gzigs la 'dud/ /shes rab chen po'i mchog gyur shA ri'i bu/ /zab don 'grel mdzad klu sgrub zla ba grags/ /rgyal ba gnyis pa yab sras la btud nas/ /sher phyin snying po'i rnam bshad bri bar bya/ /'di la gsum/ spyir zab mo'i don la 'jug dgos par bstan pa/ skabs kyi gzhung don bshad pa/ zab don rigs pas gtan la 'beb tshul mdor bsdus bshad pa'o/ /dang po ni/ thar 'dod kyi skyes bus gang la 'jug par bya ba'i gzhi ni rgyal ba'i bstan pa yin la/ de'i nang nas kyang stong nyid kyi lta ba 'tshol ba la 'jug dgos pa yin te/ lta ba de ni rtogs pa'i bstan pa thams cad kyi gtso bo 'am snying po dang/ de ston pa'i gzhung ni lung gi bstan pa thams cad kyi gtso bo'am snying po yin pas/ 2chos ston pa thams cad kyi nang nas rten 'brel zab mo'i de kho na nyid ston pa de ston pa'i mchog dang/ chos shes pa thams @002a @#/ /cad kyi nang nas rten 'brel zab mo'i de kho na nyid shes pa de shes pa'i mchog yin pa'i phyir te/ rjes rten 'brel bstod pa las/ bstan pa'i snying po stong pa nyid/ /zhes pa dang/ s2ton pa'i nang nas rten 'brel ston pa dang/ /shes rab nang nas rten 'brel shes pa nyid/ /'jig rten dag na rgyal ba'i dbang po bzhin/ /phul byung lags par khyod mkhyen gzhan gy2is min/ /zhes gsungs pa'i phyir ro/ /thar pa thob pa la stong nyid rtogs pa'i lta ba med mi rung gi yan lag yin te; ting nge 'dzin rgyal po las/ gal te bdag med chos la so sor rtog /so sor der brtags gang zhig sgom byed na/ /de ni mya ngan 'das 'thob 'bras bu'i rgyu/ /rgyu gzhan gang yin des ni zhir mi 'gyur/ /zhes dang/ mgon po klu sgrub kyis kyang/ gang dag stong nyid mi shes pa/ /de dag thar pa bsten ma yin/ /'gro drug srid pa'i btson rar ni/ /rmongs pa de dag 'khor bar 'gyur/ /zhes gsungs pa'i phyir ro/ /de'i gnad kyang/ bdag dang bdag gir rang bzhin gyis srub par bzung na 'khor bar 'khor zhing/ de rang bzhin gyis med par rtogs na 'khor ba las grol bar 'gyur ba'i rgyu mtshan gyis yin te/ sdud pa las/ de bzhin byis pa bdag dang bdag gir khas len pa/ /bdag der 'du shes yang dag @002b min rtog skye zhing 'jig /ji ltar 'dzin pa de ltar kun nas nyon mongs bstan/ /bdag dang bdag gir mi dmigs rnam par byang bar gsungs/ zhes gsungs pa'i phyir ro/ /de'i phyir rgyal ba'i gsung rab mtha' dag dngos dang brgyud pa ci rigs kyi sgo nas rten 'brel zab mo'i de kho na nyid ston pa la gzhol pa yin te/ spyod 'jug las/ yan lag 'di dag thams cad ni/ /thub pas shes rab don du gsungs/ zhes dang/ rje nyid kyis kyang/ khyod kyis ji snyed bka' stsal pa/ /rten 'brel nyid las brtsams te 'jug /ces gsungs pa'i phyir ro/ /stong nyid zab mo la mos nas nyan pa dang ston pa dang rtogs pa'i phan yon ni mdo sngags gnyis ka las mang du gsungs shing/ khyad par du rdor gcod du grags pa'i sher phyin sum brgya ba las/ rab 'byor gang gis 'jig rten gyi khams de snyed rin po che sna bdun gyis gang bar byas te/ de bzhin gshegs pa dgra bcom pa yang dag par rdzogs pa'i sangs rgyas rnams la sbyin pa byin pa bas/ gang gis chos kyi rnam grangs 'di la tha na tshig bzhi pa'i tshigs su bcad pa tsam bzung nas/ gzhan dag la yang dag par bshad de yang dag par rab tu bstan na/ de nyid gzhi de 2las bsod nams chos mang du grangs med dpag tu med pa bskyed do/ /zhes dang/ khye'u rin chen byin pa'i mdo las kyang/ 'jam dpal b2yang chub sems dpa' thabs mkhas pa dang bral bas bskal pa brgya stong du pha rol tu phyin pa drug la spyad pa bas/ gang gis chos kyi rnam grangs 'di the tshom dang bcas pas nyan pa 'di bsod nams ches mang du bskyed na/ gang the tshom med par nyan pa lta ci smos/ gang gis yi ger bris nas lung 'bog pa dang 'chad pa dang gzhan dag la yang rgya cher rab tu ston pa lta ci smos/ zhes gsungs pa ltar te/ nyan pa nas gzhan @003a @#/ /la ston pa'i bar snga ma snga ma las phyi ma phyi ma phan yon lhag par che bar ston pa yin no/ /stong nyid ma rtogs kyang de la don 'gyur gyi the tshom skyes pa tsam gyis kyang srid pa hrul por byed cing/ thar pa'i sa bon 'jog nus pa yin te/ 'phags pa lhas bsod nams chung dus chos 'di la/ /the tshom za ba yang mi 'gyur/ 2/the tshom zos pa tsam gyis kyang/ /srid pa hrul por byed par 'gyur/ /zhes dang/ mdo lung snga mas kyang 'grub pa'i phyir ro/ /rdor gcod kyi gzhung gi phan yon yongs su rdzogs par ni/ de'i brjod bya don gyi sher phyin las 'byung bar dgongs pa yin gyi/ gzhung bklag pa t2zam las ni ma yin no/ /kha cig /sher snying 'don pa thams cad kyang gnod pa zhi ba'i ched tsam du dmigs nas byed pa ni/ dgos pa'i gtso bo phyin ci log tu song ba yin te/ bcom ldan 'das kyis sher phyin gyi mdo thams cad thar pa dang thams cad mkhyen pa thob pa'i thabs kyi gtso bo bdag med rtogs pa'i lta ba rgyud la bskyed pa'i ched du gsungs kyi/ gnod pa phal pa zlog byed tsam du gsungs pa ma yin pa'i phyir ro/ /'on kyang da lta zlog pa'i ched du dmigs nas 'don pa dar ba ni/ sngon lha'i dbang pos sher phyin gyi don yid la byed cing tshig kha ton byas pas bdud phyir ldog par gsungs pa la brten pa ste/ dgos pa phal pa'o/ /dgos pa'i gtso bo ni thar pa dang thams cad mkhyen pa thob pa'i ched du bdag med rtogs pa'i shes rab bskyed pa dang 'khor ba dang ngan song las thar pa dang/ las sgrib 'dags pa'i ched du dmigs nas 'don dgos la/ zhar byung ngam phal pa ni rang gzhan gyi gnod bzhi ba'i ched du dmigs nas 'don pa ni skabs dang bstun dgos par mngon no/ /gang ltar yang kun slong 'phen pa rgya che na phan yon che zhing chung na ni @003b de dang 'dra bas kun slong bzang ba gal che'o/ /mdor na rdor gcod sogs las sher phyin gyi gzhung don la thos bsam byas na phan yon mang po 'byung bar gsungs pa ltar/ phan yon shin tu che ba'i sher phyin zab mo 'di'i don shes pa la 'bad par bya'o/ /gnyis pa la gsum/ mtshan gyi don dang/ gzhung gi don dang/ mjug gi don no/ /dang po la gnyis/ dngos dang/ 'gyur gyi phyag go /dang po ni/ rgya gar na skad rigs bzhi yod pa'i nang nas legs sbyar gyi skad du b+ha ga wa ti zhes sogs yin la/ de nyid bod skad du bsgyur na/ bcom ldan 'das ma zhes sogs su 'gyur ba yin te/ b+ha ga wa ti ni bcom ldan 'das ma/ pradznyA ni shes rab/ pA ra mi tA ni pha rol tu phyin pa/ hri da ya ni snying po ces bya bar 'gyur ba'i phyir/ 'dir phar phyin zhes brjod pa'i rgyu mtshan ci zhe na shes rab kyi pha rol tu phyin zhes pa ni 'khor ba'i rgya mtsho'i pha rol tu phyin pa'i don yin la/ de yang byed tshig la sbyar ba dang/ las tshig la sbyar ba gnyis yod pa'i snga ma ltar na/ phyin par byed pa'i don yin pas slob lam na'ang sher phyin dngos yod la/ phyi ma ltar na phyin zin pa'i don yin pas sangs rgyas kyi sar yod pa dang sbyar dgos so/ /brjod bya don gyi sher phyin dngos ni stong nyid rtogs pa'i ye shes zhig la byed pa yin kyang/ yum dang sher phyin la sgras brjod rigs kyis dbye na/ r2ang bzhin gyi sher phyin/ gzhung sher phyin/ lam sher phyin/ 'bras bu sher phyin rnams su yod cing/ de'i dang po ni stong 2ny2id dang don gcig /gnyis pa ni stong nyid ston pa'i theg chen gyi mdo lta bu/ gsum pa ni byang sems 'phags pa'i mkhyen pa lta bu/ bzhi pa ni rnam mkhyen no/ /gnyis pa 'gyur phyag ni/ bcom ldan 'das ma shes rab kyi pha rol tu phyin pa la phyag 'tshal lo/ /zhes pa ste lo tsA bas bkod pa'o/ /'dir bcom ldan 'das ma @004a @#/ /ni; sher phyin nyid la dgag sgra sbyar ba yin gyi/ gang zag zhig la mi bzung ngo/ /gnyis pa la gnyis/ gleng gzhi dang/ dngos kyi don/ dang po la thun mong dang thun mong ma yin pa'i gleng gzhi gnyis yod pa'i dang po la bzhi ste/ dus dang ston pa dang gnas dang 'khor phun sum tshogs pa bzhi'o/ /dus phun sum tshogs pa ni/ 'di skad bdag gis thos pa dus gcig na zhes pas ston te/ 'di skad ces pa ni 'chad 'gyur gyi mdo 'di skad ces pa yin la/ bdag gis thos pa zhes pa ni gzhan las brgyud nas ma yin gyi/ bdag gis dngos su bcom ldan 'das las thos zhes pa'o/ /dus gcig na zhes pa ni/ spyir chos gzhan dus gzhan dang gzhan du thos la/ dus gcig gi tshe na 'di thos zhes pa s2te/ yang yang ma thos pas thos dka' ba'o/ /yang dus gcig gi tshe lan gcig thos pa tsam gyis bzung bar ston pas shes rab che ba bs2tan to/ /ston pa phun sum tshogs pa ni bcom ldan 'das zhes pa ste/ b+ha ga wan ni bcom ldan dang skal ldan gnyis ka la 'jug pas/ dang po'i dbang du byas na/ bcom ldan ni ji skad du nyon mongs las dang de bzhin skye/ /nyon mongs shes bya'i sgrib de bzhin/ /gang yang mi mthun phyogs chos bcom/ /de 'dir bcom ldan 'das su bshad/ /ces bshad pa ltar yin la/ phyi ma'i dbang du byas na/ saM b+hu Ti las/ dbang phyug dang ni gzugs bzang dang/ /dpal dang grags dang ye shes dang/ /brtson 'grus phun sum tshogs pa ste/ /drug po de ? bskal zhes bya/ /zhes gsungs pa ltar te/ lung snga ma bcom pa dang/ lung phyi ma ldan pa'i don du so sor sbyar yang rung ngo/ /b+ha ga wan la 'das zhes pa'i don dngos su med kyang/ don gyis thob pa'i dbang du byas nas bla thabs su bsnan pa ste/ srid zhi gnyis kyi mtha' las 'das shing 'jig rten pa'i lha las khyad par 'phags pa'o/ /gnas phun @004b sum tshogs pa ni/ rgyal po'i khab bya rgod phung po'i ri la zhes pas bstan te/ rgyal po bzhugs pa'i gnas yin pas na rgyal po'2i khab dang/ de'i shar na ri bya rgod kyi gzugs phung ltar yod pas bya rgod phung po dang/ bya rgod spungs pa ltar dang/ rin 2po che'i brag bya rgod kyi mgo bo lta bu yod pas bya rgod phung po'i ri zhes bya ba de la bzhugs nas so/ /de lta bu'i ri de bskal pa 'jig pa'i tshe yang mi 'jig ces mkhas pa kha cig gsung/ 'khor phun sum tshogs pa ni dge slong gi dge 'dun chen po dang byang chub sems dpa'i dge 'dun chen po dang thabs gcig tu bzhugs te zhes pas ston te/ dge slong gi dge 'dun chen po ni nyan thos kyi dbang du byas pa dang/ byang chub sems dpa'i dge 'dun chen po ni sgras zin ltar ro/ /dge slong ni bsnyen par rdzogs pa ste mya ngan las 'das pa dang nye bar byed pa'i don dang/ byang chub sems dpa' ni byang chub chen po thob pa'i ched du sems pas na de skad ces bya zhing/ dge 'dun ni mi mthun phyogs kyis mi phyed pa'i don dang/ chen po snga ma ni spangs rtogs kyi yon tan mthon po thob pa'i don yin la/ chen po phyi ma ni don bdun la 'jug ste/ mdo sde rgyan las/ dmigs pa che ba dang/ sgrub pa gnyis dang/ ye shes dang/ brtson 'grus dang/ thabs mkhas dang/ sgrub pa dang/ 'phrin las chen po ste bdun la 'jug par bshad pa ltar ro/ /thabs gcig tu bzhugs pa ni de rnams dang lhan cig tu bzhugs pa'o/ /gnyis pa thun mong ma yin pa la gsum/ gang gis byin gyis rlob pa'i ting nge 'dzin/ gang la byin gyis brlab pa'i gang zag /ji ltar byin gyis brlabs pa'i tshul lo/ /dang po ni/ de'i tshe bcom ldan 'das zab mo snang ba zhes bya ba'i chos kyi rnam grangs kyi ting nge 'dzin la snyoms par zhugs so zhes pas bstan te/ dus de'i tshe zhes pa dus kyi khyad par/ @005a @#/ /bcom ldan 'das ni ston pa'i khyad par/ zab mo ni yul gyi khyad par te stong pa nyid yin la/ snang ba zhes bya ba'i ting nge 'dzin ni yul can gyi khyad par te/ de lta bu'i zab mo rtogs pa'i ting nge 'dzin de la snyoms par zhugs pa ste mnyam par bzhag pa'o/ /spyir sangs rgyas bcom ldan 'das ni dus rtag tu de bzhin nyid la slar mi ldang ba'i tshul gyis mnyam par bzhag pa yin pas/ gsar du zab mo snang ba'2i ting nge 'dzin la mnyam par bzhag pa min yang/ snyoms par 'jug pa'i rnam pa bstan pa tsam ni mi 'gal lo/ /gnyis pa ni/ ston pa ting nge 'dzin de l2a snyoms par zhugs nas yul shA ri bu la zab mo'i don zhu bar byin gyis brlabs pa'o/ /gsum pa la gnyis/ dri ba'i rgyu dang/ dri ba dang lan gy8i tshul lo/ /dang po la 'og gi dris lan rnams 'byung ba'i rgyu ni/ yang de'i tshe byang chub sems dpa' sems dpa' chen po 'phags pa spyan ras gzigs2 dbang phyug /zhes pa nas/ rang bzhin gyis stong par rnam par lta'o/ /zhes pa ste/ yang ni ston pa zab mo snang ba'i ting nge 'dzin la snyoms par zhugs par ma zad ces pa'o/ /dus de'i tshe sangs rgyas kyi byang chub de ni byang sems rang don la dmigs nas th2ob par 'dod pas na byang chub sems dpa' dang/ gzhan don du dmigs nas thob par 'dod pas na sems dpa' chen po'o/ /so skye'i sa las 'das shing mi dge ba'i chos las ring du song bas na 'phags pa/ rgyud lnga'i 'gro ba la thugs rjes dus drug tu gzigs pas na spyan ras gzigs/ chos kyi dbang phyug yin pas dbang phyug ces bya ste/ de nyid kyis kyang ston pa dang mthun par shes rab kyi pha rol tu phyin pa zab mo'i spyod pa nyid la shes rab kyis rnam par lta zhing/ gzugs la sogs pa'i phung po lnga po de dag la yang rang bzhin gyis stong par shes rab kyis rnam par lta @005b par mdzad pa'o/ /blta'o zhes pas 'phul yod pa ltar byas na blta bar bya'o zhes pa'i don du 'gyur bas cung mi bde snyam yang/ phal cher las de ltar 'byung bas brtag /spyir rgyal sras kyi spyod pa la phyin drug yod kyang/ 'dir zab mo rtogs pa'i shes ra2b sgom pa la zab mo'i spyod pa zhes bya ste/ de lta na spyir lta spyod gnyis mi 'gal bar sems so/ /gnyis pa la gnyis/ dri ba dang de'i lan ji ltar mdzad pa'i tshul lo/ /dang po ni/ de nas sangs rgyas kyi mthus tshe dang ldan pa shA ri bus zhes pa nas/ 'di skad ces smras so zhes pa ste/ 'go'i de nas zhes pa ni mtshams s2byar ba ste dus kyi khyad par ro/ / sangs rgyas kyi mthus zhes pa ni 'dir shA ri'i bus dri ba mdzad pa 'di rang stobs tsam min gyi/ sangs rgyas kyi mthus zhus pa ste rgyu'2i khyad par ro/ /tshe dang ldan pa ni spyir tshe ma dor ba zhig la byed kyang/ 'dir bsngags pa'am zhes sa'i khyad par ro/ /ma shA ri ka'i bu yin pas na shA ri'i bu ste/ dri ba po'i gang zag gi khyad par ro/ /'di dngos po la nyan thos mtshan nyid pa ma yin te/ sgron gsal las sgrib sel gyi sprul par yin par bshad pas so/ /byang chub sems dpa' sems dpa' chen po zhes sogs ni sngar ltar yin la/ 'di skad ces smras so zhes pa ni 'chad par 'gyur ba ltar brjod pa'i don no/ /de nas dri ba dngos ni/ rigs kyi bu/ gang la la shes rab kyi pha rol tu phyin pa/ zhes pa nas/ ji ltar bslab par bya/ zhes dris pa ste/ de la rigs kyi bu zhes pa ni chos sam byang chub kyi rigs su skyes pa ste/ mkhas pa kha cig skabs 'dir rigs kyi bu mo zhes 'byung ba ni ma dag ces bzhed pa ltar na/ rigs kyi bu ni spyan ras gzigs la bsnyags dgos la/ kha cig rgya dpe la 'dir rigs kyi bu mo zhes 'dug ces gsung ba ltar na sher phyin 'di la bslab par 'dod pa'i skyes2 pa dang bud med spyi la sbyor dgos so/ /ci ltar yang/ gang la la ni skyes pa'am bud med @006a @#/ /gang la la zhes pa'am rigs kyi bu 'am bu mo gang la la zhes sbyar kyang rung ngo/ /shes rab kyi pha rol tu phyin pa zab mo'i spyod pa la brtson pas spyad pa ste bsgrub par 'dod pa'i gang zag des tshogs sbyor dang mthong sgom gyi lam rnams su tshul ji ltar bslab par bya zhes dris so/ /shA ri'i bus de skad ces smras pa dang zhes pa ni zhus zin pa'i mtshams sbyar ro/ /gnyis pa la bzhi/ bslab tshul so sor phye ste bstan pa/ sngags tshig gis bsdus nas bstan pa/ mdor bsdus te bslab par gdams pa/ rjes su yi rang mdzad pa'o/ /dang po la bzhi/ tshogs lam dang sbyor lam gnyis kyi skabs su sher phyin la slob tshul/ mthong lam du slob tshul/ sgom lam du slob tshul/ mi slob pa'i sangs rgyas thams cad kyang sher phyin la brten sa thob tshul lo/ /dang po la gnyis/ mtshams sbyar dang/ slob tshul dngos so/ /dang po ni/ de ltar zhus pa'i lan du/ byang chub sems dpa' sems dpa' chen po 'phags pa spyan ras gzigs/ zhes pa nas/ smras so zhes pa'i bar te de nas shA ri'i bu zhes bos nas/ rigs kyi bu 'am rigs kyi bu mo gang la la shes rab kyi pha rol tu phyin pa/ zhes pa nas/ 'di ltar rnam par blta bar bya ste zhes pa ni mtshams sbyar ba'o/ /gzhan sla zhing 'di ltar ni 'chad par 'gyur ba'i slob tshul 'di ltar bya zhes pa'i don no/ kha cig 'di tshogs sbyor gnyis la slob tshul tsam dang sbyar yang 'chad par 'gyur ba'i nyams len thams cad la slob tshul dang sbyor rgyu yin no/ /gnyis pa la gnyis/ mdor bstan pa dang/ phye ste bshad pa'o/ /dang po ni/ phung po lnga po de dag kyang rang bzhin gyis stong par rnam par yang dag par rjes su blta'o/ /zhes pa ste/ phung po lnga la sogs pa'i chos thams cad don dam dpyod byed kyi rigs pas btags don ma btsal @006b bar tha snyad du 'jog nus mod/ btags don btsal na rig shes kyi dpyad bzod du ma grub pas/ gzugs sogs kyi phung po re rer ma zad/ phung po lnga po de dag thams cad kyang rang bzhin gyis stong par rnam par yang dag par te phyin ci ma log par gnas tshul ji lta ba bzhin rjes su blta bar bya'o zhes stong nyid zab mo la blta tshul mdor bsdus te bstan pa yin la/ de yang tshogs sbyor gyi gnas skabs su don spyi'i tshul gyis rtogs pa dang/ mthong lam nas mngon sum du rtogs pa dang/ sgom lam nas mngon sum du rtogs zin goms pa lhur len gyi tshul du sgom par byed dgos par bstan pa'o/ /gnyis pa la gnyis/ gzugs phung gi steng du zab mo bzhi sbyor bstan pa dang/ rigs pa de phung po gzhan bzhi la bsgre bar bstan pa'o/ /dang po ni/ gzugs phung lta bu rang bzhin med par blta tshul ji ltar bya zhe na/ gzugs stong ba'o/ /stong pa nyid gzugs so/ /gzugs las stong pa nyid gzhan ma yin/ stong pa nyid las kyang gzugs gzhan ma yin no zhes pa ste/ gang zag gi gzugs phung ni ma brtags ma dpyad pa'i tha snyad pa'i shes ngor snang ba tsam ma gtogs/ don dam dpyod byed kyi rigs pas rnam par brtags shing dpyad pa na btags don mi rnyed pas rang ngos nas sam rang bzhin gyis grub pas stong pa'o/ /dper na/ chu nang gi zla ba dang me long gi gzugs brnyan dang smig rgyu'i chu dang rmi lam gyi mi dang sgyu ma'i rta glang sogs tha snyad pa'i shes ngor snang ba tsam ma gtogs/ snang tsam nyid nas zla ba sogs su ma grub pa bzhin no/ /btags don 'tshol tshul ni 'og tu 'chad par 'gyur ro/ /gal te rang bzhin gyis ma grub na med par mi 'gyur ram snyam na/ der mi 'gyur ba ni de ltar rang bzhin gyis stong pa nyid yin bzhin du tha snyad tsam du gzugs su snang ngo/ /dper na/ zla ba'i gzugs brnyan ni zla ba yin par ma grub kyang zla bar snang ba tsam mi 'gal ba ltar ro/ /'o na/ zla ba'i gzugs brnyan zla bar ma grub pa de bzhin du/ gzugs nyid kyang gzugs @007a @#/ /su ma grub pa yin nam/ gzhan du de'i dper ji ltar rigs zhe na/ 'di lta bu ni dogs pa'i gnas chen po yin pas rgyas par bshad dgos pa yin yang/ 'dir mang du dogs pas rje yab sras kyi gzhung che ba dag las shes par bya dgos la/ cung zad brjod na/ dpe don de ltar sbyor ba ni gzugs brnyan byad bzhin du ma grub pa de bzhin du/ gzugs ni gzugs su rang bzhin gyis ma grub ces go bar byed pa yin zhing/ de yang me long gi gzugs brnyan lta bu ni 'jig rten pa'i rgan po brda byang rnams kyis byad bzhin du ma grub par rtogs nus pas/ gzugs brnyan de 'jig rten na brdzun par grags la/ gzugs rang bzhin gyis ma grub kyang der ma grub par 'jig rten rang ga bas rtogs mi nus pas/ gzugs de ni 'jig rten rang ga ba'i shes ngor bden par snang zhing de'i ngor bden yang/ dbu ma'i rigs pas snang ba ltar ma grub par rtogs nus pas dbu ma pa la grags pa'i brdzun pa yin no/ /de'i phyir 'jig rten na grags pa'i brdzun pa zhig dper bzung nas/ de la brdzun par ma grags pa'i gzugs sogs rang gi ngo bos grub par snang yang/ der ma grub par sgrub par byed pa yin no/ /des na gzugs brnyan byad bzhin du ma grub kyang gzugs brnyan du grub pa ltar/ gzugs rang bzhin gyis ma grub kyang gzugs su grub par tha snyad pa'i tshad mas 'jog nus te/ de 'dra ba gzhan la'ang sbyar ro/ /gal te gzugs ni kun rdzob pa'i ngo bo 'dus byas yin la/ gzugs rang bzhin gyis med pa ni don dam 'dus ma byas yin pas de gnyis ngo bo tha dad du 'gyur ro snyam na der mi 'gyur ba ni/ gzugs phung las de'i rang bzhin stong pa nyid ngo bo gzhan te ngo bo tha dad pa ma yin te/ ngo bo gcig yin no zhes pa'o/ /dper na gzugs brnyan zla bar snang ba dang de zla bar ma grub pa gnyi @007b ngo bo gcig cing tha dad ma yin pa ltar ro/ /de yang gzugs brnyan zla bar snang ba dang gzugs brnyan zla bar ma grub pa gnyis gzhi gcig la dus gcig tu tshogs pa 'jig rten pa'i tha snyad pa'i tshad mas nges pa mngon sum gyis grub pa yin la/ gzugs dang de'i rang bzhin med pa gnyis ngo bo gcig pa de 'jig rten rang ga bas mi nges kyang dbu ma'i rigs pa shes pas nges nus so/ /de ltar na gzugs las de'i rang bzhin stong pa nyid ngo bo gzhan ma yin par ma zad/ gzugs kyi rang bzhin stong pa nyid las kyang gzugs ngo bo gzhan te ngo bo tha dad ma yin no/ /dper na gzugs brnyan byad bzhin gyis stong pa las gzugs brnyan ngo bo tha dad du med pa bzhin no/ /mdor na gzugs sogs rnams rang gi rang bzhin stong pa nyid dang ngo bo gcig la ldog pa tha dad tsam yin te/ dper na/ byas pa dang de'i mi rtag dang ngo bo gcig la ldog pa tha dad pa bzhin no/ /de ltar yang/ mgon po klu sgrub kyis byang chub sems 'grel las/ kun rdzob las ni tha dad par/ /de nyid dmigs pa ma yin te/ /kun rdzob stong pa nyid du bshad/ /stong nyid kho na kun rdzob yin/ /med na mi 'byung nges pa'i phyir/ /byas dang mi rtag ji bzhin no/ /zhes gsungs so/ /gzugs sogs dang de rnams kyi rang bzhin med pa gnyis gcig dang ngo bo tha dad la/ gnod byed bzhi dgongs 'grel las gsungs kyang/ bsdun gzugs dang de'i rang bzhin gyis stong pa gnyis ngo bo gcig yin kyang gtan nas gcig ma yin te/ gzugs kun rdzob dang de'i rang bzhin gyis stong pa ni don dam bden pa yin pa'i phyir ro/ /de gnyis ngo bo tha dad ma yin te/ yin nam 'brel bas gzugs rang bzhin gyis stong pa ma yin par thal bar 'gyur ba'i phyir/ de'i tshul yang chos thams cad rten 'brel yin pas rten 'brel ma yin pa'i chos med la/ de med pas rang bzhin gyis stong pa ma yin pa'i chos kyang med de/ rten 'brel bstod pa las/ de phyir brten @008a @#/ /nas 'byung ba la/ /ma gtogs chos 'ga' yod min pas/ /rang bzhin gyis ni stong pa la/ /ma gtogs chos 'ga' med par gsungs/ /zhes gsungs pa'i phyir/ gnyis pa ni/ de bzhin du tshor ba dang/ 'du shes dang/ 'du byed dang/ rnam par shes pa rnams stong pa'o/ / zhes pa ste/ gzugs phung la bshad pa'i dpe don de bzhin du/ tshor ba sogs bzhi po rang bzhin gyis grub pa stong pa'o/ /tshor ba sogs bzhi rang bzhin gyis stong yang tha snyad du tshor ba sogs bzhi po der snang ngo/ /tshor ba sogs bzhi las de bzhi'i rang bzhin gyis stong pa nyid ngo bo gzhan ma yin/ de bzhi'i rang bzhin stong pa nyid las tshor sogs bzhi po de ngo bo gzhan nam ngo bo tha dad ma yin te ngo bo gcig go zhes sbyor rgyu yin no/ /gnyis pa mthong lam la slob tshul ni/ shA ri'i bu de lta bas na chos thams cad stong pa nyid de/ mtshan nyid med pa/ ma skyes pa/ ma 'gag pa/ dri ma med pa/ dri ma dang bral ba med pa/ bri ba med pa/ gang ba med pa'o zhes pa ste/ zab mo khyad par brgyad dang ldan par bstan to/ /de yang shA ri'i bu zhes bos nas/ sngar phung po lnga rang bzhin gyis stong par bshad pa de ltar skye mched bcu gnyis dang/ khams bco brgyad kyi chos thams cad kyang rang bzhin gyis stong pa nyid de de yang rang bzhin gyis stong yang chos de rnams su snang ngo/ /chos de rnams las de'i rang bzhin stong pa nyid ngo bo gzhan ma yin/ de rnams kyi rang bzhin stong pa nyid las chos de rnams ngo bo gzhan ma yin no zhes sbyar bar bya ste/ des rnam par thar pa'i sgo stong pa nyid bstan to/ /chos thams cad rang gi mtshan nyid gzugs su rung ba la sogs pa dang/ spyi'i mtshan nyid mi rtag pa dang bdag med pa la sogs pa rnams kyang rang gi mtshan nyid kyis grub pa med pa dang/ gzugs sogs 'dus byas kyi chos rnams tha snyad tsam du skye yang rang bzhin gyis ma skyes pa dang/ de rnams @008b skyes mthar 'gag pa yar tha snyad tsam du yin gyi rang bzhin gyis ma 'gags pa dang/ thar 'dod kyi skyes bu rnams kyi spang bya'i dri ma 'khor brgyu dang bcas pa rang bzhin gyis med pa yin la/ blang bya dri ma dang bral ba mya ngan las 'das pa'i thar pa yang rang bzhin gyis med do zhes pas rnam par thar pa'i sgo mtshan ma med pa bstan to/ /kun nas nyon mongs pa'i phyogs bri ba ste zad par 'gyur ba yang rang bzhin gyis med pa dang/ rnam par byang ba'i phyogs gang ba ste rdzogs par 'gyur ba 'am gong 'phel du 'gro ba yang rang bzhin gyis med pa'o zhes pa rnam par thar pa'i sgo smon med bstan par bzhed do/ /de yang yum gyi mdo las/ gzugs ni gang nas kyang ma 'ongs/ gang du yang mi 'gro/ gang yang gnas par 'gyur ba med do/ /zhes sogs dang/ 'gres mos zhus pa las/ sring mo skye ba gang nas kyang ma 'ongs/ zhes sogs mang du gsungs pa ltar te/ 'di la spyir chos thams cad rang bzhin gyis med tshul shes na/ bye brag tu 'dus byas kyis chos thams cad dang por rang bzhin gyis ma skyes pa'i tshul shes la/ rang bzhin gyis ma skyes pa'i tshul shes na bar du rang bzhin gyis mi gnas pa dang mthar rang bzhin gyis mi 'gags pa sogs kyang shes nus pas blang dor gyi rnam gzhag thams cad tha snyad tsam ma gtogs/ don dam par med pa'i tshul rnams shes par nus so/ /rang bzhin gyis mi skye ba'i rgyu mtshan gyi gtso bo yang rgyu rkyen la brten nas skye ba'i dbang gis yin te/ ma dros bas zhus pa'i mdo las/ gang zhig rkyen las skyes pa de ma skyes/ /zhes dang/ klu sgrub kyis kyang rigs pa drug cu pa las/ brten nas skyes par ma skyes par/ de nyid mkhyen pa mchog gis gsungs/ /zhes dang/ dpal ldan zla bas dbu ma 'jug par yang/ gang phyir dngos po brten nas rab 'byung ba/ /zhes sogs dang/ rje nyid kyis kyang/ gang gang rkyen la rag las pa/ /de de rang bzhin gyis stong zhes/ /zhes sogs gsungs pa ltar ro/ / @009a @#/ /de yang rgyu rkyen dang cha shas la brten nas 'byung na gzhan dbang gis sam gzhan la rag las pa'i dbang gis byung ba yin gyi/ rang dbang gis sam gzhan la bltos med du byung ba yin pas na rang bzhin gyis med pa yin te/ bzhi brgya pa las/ 'di kun rang dbang med pa ste/ / des na bdag gi yod ma yin/ /zhes gsungs pas so/ /'on kyang don phra bas blo chung gis rtogs dka'o/ /gsum pa sgom lam la slob tshul la gnyis sgom lam la ji ltar slob tshul dang/ de ltar bslabs pas ji ltar 'tshang rgya ba'i tshul lo/ /dang po ni/ shA ri'i bu/ de lta bas na stong pa nyid la gzugs med/ zhes pa nas/ chos med do/ /zhes pa'i bar gyis skye mched bcu gnyis rang bzhin med pa dang/ mig gi khams med pa nas yid kyi khams med ces pas rten dbang po'i khams drug dang/ yid kyi rnam par shes pa'i khams kyi bar du yang med do ces pas brten pa rnam shes kyi khams drug gi rang bzhin gyis stong tshul dngos su bstan nas/ de gnyis ka ba sdoms pas dmigs pa yul gyi khams drug rang bzhin gyis stong tshul 'phangs pas/ khams bco brgyad rang bzhin gyis stong par bstan te/ de yang shA ri'i bu zhes bos nas/ gong du bshad pa'i rgyu mtshan de lta bas na stong pa nyid mngon sum du rtogs pa'i slob pa 'phags pa'i mnyam gzhag ye shes kyis gzigs ngo la ste gzigs ngor gzugs med/ de bzhin du sbyar te tshor ba med/ 'du shes med/ 'du byed med/ rnam par shes pa med pa ste phung po lnga'i gnyis snang med par bstan la/ de'i ngor mig gi skye mched med cing/ rna ba med/ sna med/ lce med/ lus med/ yid kyi skye mched rnams med pa ste yul can gyi skye mched drug gi gnyis snang med do/ /de bzhin du gzugs med/ sgra med/ dri med/ ro med/ reg bya med/ chos med pa ste/ yul gyi skye mched drug gi gnyis snang med do/ /de bzhin du mig gi @009b khams med pa nas/ yid kyi khams med ces pa'i nas zhes pa ni sdud tshig yin pas rna ba sna lce lus bzhi'i khams dang bcas pa'i dbang po'i khams drug dang/ yid kyi rnam par shes pa'i khams kyi bar du yang med do zhes pa'i bar gyis/ gzugs kyi khams dang/ sgra dri ro reg bya chos kyi khams te yul gyi khams drug dang/ mig gi rnam par shes pa dang/ rna ba sna lce lus yid kyi khams te rnam shes kyi khams drug gi gnyis snang ldog go /'dir phung po lnga dang skye mched bcu gnyis dang khams bco brgyad rnams stong nyid la chu la chu bzhag pa bzhin du gyur pa'i mnyam gzhag gi gzigs ngor med pa dang/ de rnams spyir rang bzhin gyis med pa dang/ don dam dpyod byed kyi rigs pa'i dpyad bzod du med pa dang/ de rnams kyi tha snyad btags don btsal na mi rnyed pa gang la sbyar yang gnad gcig tu 'gro'o/ /skabs 'di dag tu dgag bya'i khyad par dngos su ma sbyar yang/ gong du phung po lnga po rang bzhin gyis stong par gsungs pa'i tshe dgag bya la rang bzhin gyis zhes dngos su sbyar zin pa la dgongs shing/ 'dir stong pa nyid la zhes gsungs pas kyang go nus so/ /yang ma rig pa med pa nas rga shi med/ rga shi zad ba'i bar du yang med do zhes pas gzigs do der rten 'brel lugs 'byung dang lugs ldog gi gnyis snang med par ston te/ de yang ma rig pa med pa nas zhes pa'i nas ni sdud pa'i tshig yin pas/ de dang rga shi med pa'i bar kyis 'du byed dang rnam par shes pa dang ming dang gzugs dang skye mched dang reg pa dang tshor ba dang sred pa dang len pa dang srid pa dang skye ba dang bcas pa'i nyon mongs phyogs kyi yan lag bcu gnyis dang/ rga shi zad pa'i bar du yang med do zhes pas tha ma bstan pa dang bar du zhes pas der ma zad ma rig pa zad pa dang/ 'du byed zad pa dang/ de bzhin du/ skye ba zad pa dang/ rga shi zad pa'i bar gyis rnam byang phyogs kyi yan lag bcu gnyis kyi mngon zhen gzigs ngo der @010a @#/ /ldog par bstan to/ /yang de bzhin du sdug bsngal ba dang/ kun 'byung ba dang/ 'gog pa dang/ lam med ces pas sdug bsngal bden pa dang/ kun 'byung bden pa dang/ 'gog pa'i bden pa dang/ lam gyi bden pa ste 'phags pa'i bden pa bzhi'i mngon zhen gzigs ngo der med do/ / yang lam med/ ye shes med/ thob pa med/ ma thob pa yang med do zhes pas mnyam gzhag de'i gzigs ngor yul can lam dang ye shes rang nyid kyi gnyis snang med la/ thob par bya ba'i chos yang med cing/ thob 'gyur dang thob bya ma yin pa'i ma thob pa yang med do zhes gzigs ngo der blang dor la bden zhen ldog pa'i tshul bstan pa'o/ /phyi ma 'di dag la don 'chad tshul mi 'dra ba 'ga' re mthong ste don du mi 'gal yang/ 'di nyid 'thad par sems so/ /'on kyang rong Tik pas ma thob pa yang med do zhes pa ni/ kun rdzob tu thob pa yod pa la 'chad pa ni skabs su bab par ma mthong ngo/ / mdor na de dag /slob pa 'phags pa'i mnyam gzhag ye shes kyis don dam gzigs pa'i gzigs ngor gzugs sogs kun rdzob pa'i gnyis snang gi spros pa thams cad nye bar zhi ba'i don te/ de yang/ sdud pa las/ gzugs rnams {mi mthong?} tshor ba dang kyang mi mthong zhing/ /'du shes mthong ba med la sems pa mi mthong zhing/ /gang la rnam par shes dang sems yid mthong med pa/ /'di ni chos mthong yin zhes de bzhin gshegs pas bstan/ /zhes dang/ gang dag de ni 'dus ma byas yin spros med de/ /'di ni shes rab pha rol phyin mchog spyod pa yin/ /zhes dang/ mngon rtogs rgyan las/ gzugs la sogs pa mi shes phyir/ /de ni bsam mi khyab par 'dod/ /zhes dang/ klu sgrub kyis rtsa shes las/ gang gis rten cing 'brel bar 'byung/ /'gag pa med pa skye med pa/ /zhes sogs dang/ zhi ba lhas spyod 'jug las/ gang tshe dngos dang dngos med dag /blo yi mdun @010b na mi gnas pa/ /de tshe rnam pa gzhan med pas/ /dmigs pa med par rab tu zhi/ /zhes gsungs pa rnams dang don 'dra'o/ /de la 'phags pa'i mnyam gzhag mi rtog pa'i ye shes kyis stong nyid mngon sum du rtogs pa'i gzigs don gzugs sogs kun rdzob kyi rnam pa mi 'char ba'i rgyu mtshan yod de/ des stong nyid mngon sum du rtogs pa'i tshe gnyis snang nub pa'i sgo nas gzigs pa yin la/ kun rdzob pa'i chos gang blo la 'char ba na gnyis snang dang bcas pa'i tshul gyis 'char ba yin pa'i phyir te/ don dam pa'i chos rnams ni dgag bya bden grub sogs gnyis snang gi spros pa rnam par bcad pa'i tshul gyis snang tshul dang gnas tshul mthun par gnas shing/ gnas pa ltar gzigs pa yin la/ kun rdzob pa'i chos rnams ni gnyis snang gi spros pa du ma dang bcas te snang tshul dang gnas tshul mi mthun par gzigs pa'i phyir ro/ /spyir gnyi snang gi spros pa la sgra rtog dang/ yul yul can tha dad pa'i snang ba dang/ bden grub dang der snang ba dang/ kun rdzob kyi gnyis snang sogs mang yang 'dir shes na de rnams gang dang sbyar kyang mi 'gal lo/ /dgag bya la rtags kyi dgag bya dang/ rigs pa'i dgag bya dang/ lam gyi dgag bya sogs mang yang/ rtags yang dag gi dgag bya mthar thug ni/ rang bzhin gyis grub pa/ rang gi mtshan nyid kyis grub pa/ rang ngos nas grub pa/ bden par grub pa/ don dam par grub pa/ yang dag par grub pa/ rang dbang du grub pa rnams te/ rang bzhin gyis stong pa 'am/ rang bzhin gyis med ces sbyor rung ba thams cad la ni de thams cad kyis stong pa dang med ces sbyor rung ste/ de rnams don gcig ming gi rnam grangs tsam yin pa'i phyir ro/ /gnyis pa de la brten nas ji ltar 'tshang rgya ba'i tshul la gnyis kyi dang po nus pa ni/ shA ri'i bu de lta bas na byang chub sems dpa' rnams thob pa med pa'i phyir/ shes rab kyi pha rol tu phyin pa zab mo @011a @#/ /'di la brten cing gnas te zhes pas ston te/ shA ri'i bu zhes bos nas/ tshogs sbyor gnyis dang mthong sgom gyi laM gnyis te bzhi la slob tshul gong du bstan pa'i tshul de lta bas na/ gang zag byang chub sems dpa' sems dpa' chen po rnams kyi mnyam gzhag ye shes kyi gzigs ngo na gzugs med pa nas/ tha ma'i thob pa dang ma thob pa'i bar gang yang rang bzhin gyis grub pa med pa'i phyir de ltar med par mngon sum du rtogs pa'i tshul de nyid shes rab kyi pha rol tu phyin pa zab mo'i spyod pa spyad par 'jog la/ zab mo'i spyod tshul de la brten cing gnas par byas bas te/ de'i mthus 'bras bu 'chad par 'gyur ba ltar 'thob par nus so/ /'di ni 'chad tshul gcig gi dbang du byas pa yin la/ 'on kyang sems la sgrib pa med cing nas shin tu 'das zhes pa yan chad rgyun mtha' dang sbyar na'ang mi 'gal zhing/ skabs 'di gzhung sngon ma'i don bsdur sbyar rung bar sems so/ /gnyis pa mthar 'tshang rgya tshul ni/ sems la sgrib pa med pas skrag pa med de/ phyin ci log las shin tu 'das nas mya ngan las 'das par phyin to zhes bstan te/ 'di la chos rje rong Ti ka pa dang; gung ru rgyal mtshan bzang po gnyis kyis/ stong nyid kyi don rtogs shing goms na sems la bden 'dzin sgrib pa med pas/ stong pa nyid kyi don la skrag pa med de/ phyin ci log bden 'dzin las shin tu 'das nas theg chen gyi mya ngan las 'das pa'i mthar thob par bya ba sangs rgyas kyi sar phyin to zhes 'chad la/ 'jam dbyangs dga' blos de ni/ gang dran dran gyi 'bru bsnon yin par bshad nas/ sa bcu'i ngo skal gyi spang bya'i sgrib pa gnyis gnyis yod pa rnams rim gyis spangs te/ phyin ci log bzhis 'jigs skrags @011b pa med pas/ de las 'das pa'i mi gnas pa'i myang 'das thob par 'chad do/ /phyin ci log bzhi ni gtsang ba de rtag bdag tu 'dzin pa bzhi la gzhan nas bshad pa ltar ro/ /kho bo ltar na ni de gnyis gang byas kyang mi 'gal zhing/ khyad par du bshad pa dang po nyid bde bar sems so/ /bdag med pa la bdag tu 'dzin pa ni phyin ci log tu bshad pa'i phyir bdag 'dzin nam bden 'dzin yang phyin ci log tu 'jog dgos pas/ phyin ci log zhes pa tsam gyis phyin ci log bzhi ka la nges par bshad dgos pa ni ma yin no/ /kha cig tu 'das par phyin to zhes 'byung la/ la lar 'das par mthar phyin to zhes 'byung ba'i snga ma ltar byas na bde bar sems pas/ de ltar na sangs rgyas kyi sa'i mya ngan las 'das par phyin pa'am/ de thob par 'gyur ba'i don no/ /spyir 'chi ba'i dus byas pa 'ga' zhig la mya ngan las 'das pa zhes zer yang/ 'dir thar pa la myang 'das sam mya ngan las 'das pa'i tha snyad mdzad pa ltar yin gyi/ snga ma min la/ mya ngan yang sdug kun gnyis la byas nas/ de las 'das pa ni de spangs pa'i don no/ /de lta na'ang myang 'das thob na ni/ nyon mongs spangs pas khyab kyang/ sdug kun gnyis spangs pas khyab par mi 'dod do/ /bzhi ba ni/ dus gsum du rnam par bzhugs pa'i sangs rgyas thams cad kyang nas/ sangs rgyas so zhes pa ni/ 'das ma 'ongs da lta'i dus gsum du rang dus der sangs rgyas nas rnam par bzhugs pa'i sangs rgyas thams cad kyang shes rab kyi pha rol tu phyin pa 'di nyid bsgoms pa la brten nas bla na med pa yang dag par rdzogs pa'i byang chub tu rdzogs par sangs rgyas so zhes pa ste/ byang gi sgra ni sangs rgyas re re gnyis gnyis su ma zad ces pa'o/ /'o na 'das pa dang ma byon pa gnyis @012a @#/ /la bzhugs ces gsung ba ji ltar yin snyam na/ skyon med de/ rang dus la dgongs pa'i phyir ro/ /sher phyin ni 'dir gzhung sher phyin la byed pa ma yin gyi/ lam sher phyin tu gyur pa'i stong nyid rtogs pa'i ye shes la byed pa yin no/ / tshul de ni rgyal ba'i yum rgyas 'bring bsdus pa gsum nas 'byung ba'i don mdo sdud pa las/ rgyal ba 'das dang ma byon phyogs bcur gang bzhugs pa/ /kun lam pha rol phyin pa 'di yin gzhan ma yin/ /zhes gsungs pa ltar yin no/ /sangs rgyas thob pa la stong nyid rtogs dgos par ma zad/ theg pa gsum po gang gi'ang thar pa thob pa la ni stong nyid nges par rtogs dgos te/ stong nyid rtogs pa'i lta ba ni zhi sgo gnyis su med par bshad pa'i dgos pa de yin zhing/ ting nge 'dzin rgyal po'i lung sngar drangs pa ltar dang 'phags pa klu sgrub kyis kyang/ nyan thos rnams dang rang sangs rgyas/ /sangs rgyas rnams kyis nges bsten pa'i/ /thar lam khyod ni gcig pu ste/ /gzhan zhes bgyi ba ma mchis nges/ /zhes gsungs pa ltar yin la/ shes rab kyi pha rol tu phyin pa dngos ni theg chen pa'i rgyud kyi stong nyid rtogs pa'i ye shes dang don gcig tu 'dod pa dang de'i rgyud nyid stong nyid mngon sum du rtogs pa'i ye shes dang don gcig tu 'dod pa'i tshul sogs mang du yod kyang/ stong nyid rtogs dgos pa la ni 'dra'o/ /rdor gcod las/ dus gsum gyi rgyun tu zhugs pa nas sangs rgyas kyi bar thams cad sher phyin la brten nas thob par gsungs pa ni stong nyid rtogs pa'i ye shes la dgongs pa yin no/ /stong nyid rtogs pa'i ye shes de theg dman pa'i rgyud la yod kyang/ sher phyin tu mi @012b 'gyur ba ni theg chen sems bskyed dang rdzogs byang du bsngo ba'i bsngo bas ma zin pa'i dbang yin la/ ye shes de nyid sems bskyed dang bsngo ba de gnyis kyis zin na sher phyin du 'gyur bar bzhed pa ltar bya'o/ /sbyin sogs phar phyin dang po lnga stong nyid rtogs pa'i sher phyin gyis ma zin na long ba dang 'dra zhing/ des zin na long 'khrid dam mig ldan dang 'dra bar gsungs te/ sdud pa las/ dmus long dmigs pu med pa bye ba khrag khrig rnams/ /lam yang mi shes grong khyer 'jug par ga la 'gyur/ /shes rab med na mig mod pha rol phyin lnga 'di/ /dmigs pu med pa byang chub reg par nus ma yin/ /gang tshe shes rab kyis ni rab tu zin gyur na/ /de tshe mig rnyed gyur cing 'di yi ming 'thob bo/ /zhes dang/ rdor gcod las/ 'di lta ste dper na mig dang ldan pa'i mi zhig mun par zhugs nas ci yang mi mthong ba de bzhin du gang dngos por lhung ba'i sbyin pa yongs su gtong ba'i byang chub sems dpar blta bar bya'o/ /rab 'byor 'di lta ste/ dper na/ nam langs te nyi ma shar nas mig dang ldan pa'i mis gzugs rnam pa sna tshogs dag mthong ba de bzhin du/ gang dngos por ma lhung ba'i sbyin pa yongs su gtong ba'i byang chub sems dpar blta bar bya'o/ /zhes dang/ zla bas kyang/ ji ltar long ba'i tshogs kun bde blag tu/ /mig ldan skyes bu gcig gis 'dod pa yi/ /yul du 'khrid pa de bzhin 'dir yang blos/ /mig nyams yon tan blangs te rgyal nyid 'gro/ /zhes gsungs pa ltar ro/ /dngos por lhung ba ni bden 'dzin gyis bcings nas tong nyid ma rtogs pa yin la/ dngos por ma lhung ba ni bden med rtogs pa ste/ sbyin pas tshul khrims sogs lhag ma bzhi yang mtshon no/ /gnyis pa sngags tshig gis bsdus te bstan pa la gnyis/ che ba bstan pa dang/ sngags @013a @#/ /tshig dngos bshad pa'o/ /dang po ni de lta bas na shes rab kyi pha rol tu phyin pa'i sngags/ zhes pa nas/ mi brdzun pas na bden par shes par bya ste zhes pa ste/ sher phyin ni dus gsum gyi rgyal ba thams cad kyis kyang bslab par bya ba'i gzhi yin pa de lta bas na/ lam de ni shes rab kyi pha rol tu phyin pa'i sngags yin te/ 'khor ba'i rgya mtsho'i pha rol tu phyin par byed pa'i phyir ro/ /rig pa chen po'i sngags yin te/ ma rig pa sogs nyon mongs pa thams cad 'joms par byed pa'i phyir/ bla na med pa'i sngags yin te/ 'di las lhag pa'i thar par bgrod pa'i lam med pa'i phyir/ mi mnyam pa dang mnyam pa'i sngags yin te/ mnyam pa med pa'i sangs rgyas dang mnyam pa'i phyir/ sdug bsngal thams cad rab tu zhi bar byed pa'i sngags yin te/ sdug bsngal rgyu dang bcas pa thams cad zhi bar byed nus pa'i phyir/ bden par shes par bya ba'i sngags yin te/ sher phyin des chos nyid gzigs pa ltar bden cing mi slu ba'i mi brdzun pas na te de'i phyir ro/ /de yang sdud pa las/ rgyal ba'i shes rab pha rol phyin 'di rig sngags che/ zhes pa nas/ rig sngags 'di la bslabs nas mkhas pa byang chub reg /ces gsungs pa ltar te/ de ni yum rgyas 'bring bsdus pa gsum las 'byung ba'i don bsdus pa'o/ /nges don gyi gsang sngags dang rig sngags ni thabs shes khyad par can zhig la byed pas/ sher phyin dngos lang don du sngags su mi 'gal mod/ /mdo sngags gnyis su phye ba'i sngags ni ma yin no/ /'di'i sngags tshig kyang mdo phyogs kyi sngags tshig yin gyi/ rgyud bzhir gtogs pa'i sngags ma yin pas phyed par bya'o/ /gnyis pa ni/ shes rab kyi pha rol tu phyin pa'i sngags/ smras pa/ @013b tadya thA oM ga te ga te nas swA hA'i bar te/ 'di la mkhas pa phal cher ltar na/ tadya thA ni/ 'di lta ste'am/ de gang/ oM ni bkra shis pa dang bde ba ster ba sogs don bdun la 'jug ces bya la/ ga te ga te ni song shig song shig ces pa ste/ gang du song zhe na/ snga ma tshogs lam dang/ phyi ma sbyor lam du song shig /pA ra ga te'i pA ra ni pha rol te/ de'i pha rol mthong lam du song shig /pA ra sangga te ni/ de'i pha rol sgom lam du yang dag par song shig ces pa ste/ saM ni 'dir yang dag pa'i don du bsgyur ba'o/ /b+ho d+hi swA hA ni byang chub tu gzhi tshugs zhes pa yin la/ don ni byang chub chen po sangs rgyas kyi sar song shig ces pa'o/ /zhes pa'i don yin la/ bod snga ma kha cig /ga ti gnyis ni nyan thos kyi byang chub tu song/ pA ra ga te ni rang rgyal gyi byang chub tu song/ pA ra saM ga te ni sangs rgyas kyi byang chub tu song zhes 'dod/ po to ba dang dwags po bas ni/ ga te gnyis kyis rnam par thar pa'i sgo stong pa nyid bstan/ pA ra ga tes ni mtshan ma med pa dang/ pA ra saM ga tes ni smon med bstan par bzhed/ bshes gnyen ston pas ni/ sngar bshad pa ltar bzhed pas phyi ma'i bshad pa bde zhes mkhas pa kha cig gsungs shing/ rang lugs kyang de ltar ro/ /gsum pa mdor bsdus te bslab par gdams pa ni/ shA ri'i bu byang chub sems dpa' sems dpa' chen po de ltar shes rab kyi pha rol tu phyin pa zab mo la bslab par bya'o zhes pa ste/ shA ri'i bu zhes pos nas/ byang chub sems dpa' sems dpa' chen pos gong du bshad pa de ltar shes rab kyi pha rol tu phyin pa la bslab par bya'o/ /zhes gal che bar gdams pa'o/ /gsum pa rjes su yi rang mdzad pa ni/ de nas bcom ldan 'das ting nge 'dzin de las bzhengs te zhes pa man chad kyis ston cing/ de yang/ @014a @#/ /spyan ras gzigs kyis de ltar bstan zin pa de nas bcom ldan 'das zab mo snang ba zhes bya ba'i ting nge 'dzin de las bzhengs pa'i tshul bstan te/ byang chub sems dpa' sems dpa' chen po 'phags pa spyan ras gzigs dbang phyug la bka' stsal pa/ khyod kyis de ltar bstan pa de legs par bstan pas legs so zhes bya ba byin te/ legs so legs so gnyis gsungs pa ni shin tu legs par bstan pa la thugs dgyes shing/ gzhan yid ches su gzhug pa'i don du lhag par bsnan pa'o/ /rigs kyi bu de de bzhin no/ / de de bzhin te zhes gnyis gsungs pa ni/ don ji lta ba bzhin du chos dang mthun par bstan pa la bden kha ster ba ste/ de yang 'khor rnams yid ches pa'i don du'o/ /ji ltar khyod kyis bstan pa de bzhin du shes rab kyi pha rol tu phyin pa zab mo la byang chub sems dpa' rnams kyis kyang spyad par bya ste/ de ltar bstan pa 'di la ngas rjes su yi rang ba mdzad pa tsam du ma zad/ phyogs bcu'i de bzhin gshegs pa rnams kyang thugs dgyes pas rjes su yi rang ngo/ /bcom ldan 'das kyis de skad ces bka' stsal nas tshe dang ldan pa shA ri'i bu dang/ byang chub sems dpa' 'phags pa spyan ras gzigs dbang phyug dang/ gzhan der 'dus pa'i thams cad dang ldan pa'i 'khor byang sems nyan thos de dag dang/ lha dang mi dang lha ma yin dang dri zar bcas pa'i 'jig rten pa rnams yi rang zhing dga' ste/ bcom ldan 'das kyis ji skad gsungs pa la mngon par bstod do zhes pa ste/ yid ches pa'i mjug sdud dang bsngags pa'o/ /kha cig tu shA ra dwa ti'i bu zhes 'byung ba ltar na/ ston ldan ma'i bu ste shA ra da ni ston pa dang/ pa ti ? ldan pa'i don du bshad pa ltar ro/ /'o na 'di'i gzhung dngos ni spyan ras gzigs kyis bshad pas de sangs rgyas @014b kyi bka' ji ltar 'gyur zhe na/ spyir sangs rgyas kyi bka' la zhal nas gsungs pa dang/ byin gyis rlabs pa dang/ rjes su gnang ba'i bka' gsum yod pa ltar/ gzhung 'di la'ang de gsum ka tshang ste/ thog ma'i gleng gzhi dang mjug gi bcom ldan 'das kyis de skad ces bka' stsal nas sogs rjes su gnang ba'i bka'/ shA ri'i bus dris pa dang spyan ras gzigs kyis lan mdzad pa rnams byin gyis rlabs pa'i bka'/ sangs rgyas nyid kyis legs so dang yi rang mdzad pa ni zhal nas gsungs pa'i bka' yin no/ /sangs rgyas kyi bka' yin na zhal nas gsungs dgos pa'i nges pa med de/ gdugs dkar ni sangs rgyas kyi gtsug tor nas byung zhing/ der ma zad/ sangs rgyas kyi mdzod spu mgrin pa spyan snyan shangs la sogs pa'i sku'i cha shas thams cad dang ljon pa dag las kyang chos ston nus pa'i phyir te/ rjes bstod sprin rgya mtsho las/ spyi gtsug mdzod spu mgrin pa la sogs khyod sku'i cha shas kun nas 'byung bar rab ston kyang/ /zhes gsungs pa ltar yin pa'i phyir ro/ /gsum pa mjug gi don ni/ bcom ldan 'das ma shes rab kyi pha rol tu phyin pa'i snying po rdzogs so/ /zhes pa ste/ spyir bcom ldan 'das ni sangs rgyas la byed pa yin yang/ 'dir sher phyin la de'i sgras brjod pa yin la/ ma zhes pas ni stong phyogs skye med mtshon zhing/ yum zhes pa'i don kyang yin ste/ de yang rgyal ba'i yum zhes 'byung ba rnams ni/ rgyal ba rnams sher phyin nyams su blangs pa la brten nas 'khrungs pas de ltar du brjod kyi/ bud med la yum du byas pa lta bu ni ma yin no/ /sher phyin gyi don gong du cung zad bshad zin cing/ snying po zhes pa ni sher phyin gyi mdo rgyas 'bring bsdus gsum la sogs pa mang du bzhugs pa rnams kyi don gyi snying po bsdus te ston pa la bya dgos @015a @#/ /par mngon no/ /'dir bka' gdams pa 'ga' zhig gis yum chen mo'i sku bsgom pa dang/ sngags bzla bar bshad pa ni dpyad gzhir snang la/ kha cig dbang bskur byed pa ni rang bzor bshad do/ /zlog pa'i ched yin na/ mthar bden stobs brjod nas byed pa dar zhing/ thal mo brdabs pa ni de'i yan lag tsam yin no/ /'di dag la dpyad pa ni gong du brjod zin to// ! //gsum pa zab don rigs pas gtan la 'bebs tshul mdor bsdus zhig bshad pa la/ 'dir thal 'gyur pa'i lugs gzhir bzhag nas 'chad pa yin zhing/ 'di la rigs pa'i rnam grangs mang yang chos thams cad rtog pas btags tsam du 'jog lugs shes na rang bzhin gyis ma grub pa'i tshul shes sla bas/ rtog pas 'jog tshul yang dper na/ thag pa kha dog khra bo dang 'khyil lugs dbyibs sprul dang 'dra zhing yul mi gsal ba na gnas pa'i tshe 'di sprul lo snyam pa'i rnam rtog skye'o/ /de'i tshe thag pa'i kha dog dang dbyibs dang cha shas dang tshogs pa dang rgyun gang yang don la sbrul gyi mtshan gzhir bzung rgyu cung zad kyang med pas/ thag pa de nyid sbrul du snang ba ni rtog pas btags pa kho nar gsal lo/ /dpe de bzhin du phung po 'di la brten nas nga'o snyam pa'i blo skyes pa'i tshe/ rang gi phung po'i kha dog dang dbyibs dang skad cig re re dang yan lag dang de dag gi cha shas dang snga phyi'i tshogs pa dang rgyun sogs gang yang nga'i mtshan gzhir 'jog tu mi rung ste/ de la rigs pas gnod pa'i phyir ro/ /der ma zad gzugs sogs kyi phung po las ngo bo tha dad pa'i chos gzhan yang nga de'i mtshan gzhir mi rung la/ 'on kyang ma brtags ma dpyad par nga zhes pa'i tha snyad byed mod/ 'di la ngang @015b zhes pa'i tha snyad 'jug pa'i gzhi de gang zhig yin snyam du rigs pas rnam par dpyad pa na cung zad kyang mi rnyed pas/ de'i tshe nga de ni rtog pas bzhag pa tsam du zad do/ /de bzhin du gzugs phung yang mgo la sogs pa'i yan lag lnga tshogs pa'i steng nas bzhag pa yin gyi/ yan lag lnga re re nas gzugs phung de ma yin zhing yan lag lnga las ngo bo tha dad pa'i gzugs phung spyi tsam pa de med do/ /de bzhin du tshor phung sogs bzhi la'ang sbyor zhing dpung la bshad pa de bzhin du bum pa ka ba ri ra ba khang khyim yo byad sogs thams cad la sbyar bar bya ste/ ka bum lta bu'i cha shas tshogs pa sogs gang yang ka bum sogs kyi mtshan gzher mi rung zhing/ de las don gzhan pa zhig kyang de dag gi mtshan gzhir mi rung bar kun nas mtshungs pa'i phyir ro/ /'on kyang thag pa la sbrul du 'dogs pa'i rtog pa ni log shes yin la/ gang zag dang phung po dang ka bum sogs su 'dogs pa'i rgog pa ni ma brtags ma dpyad pa'i tha snyad pa'i rtog pa don mthun yin te/ de'i khyad par cung zad cig 'og tu 'chad par 'gyur ro/ /rigs pas des chos thams cad rtog pas btags tsam du grub pas/ rtog pas btags tsam min par rang dbang gis grub par 'dzin pa ni bden 'dzin dang/ des bzung bltar grub na rang bzhin gyis grub pa dang bden par grub pa sogs su 'gyur ro/ /dgag bya de 'gog pa'i regs pa ni mgon po klu sgrub kyi rtsa ba shes rab las rgyas par gsungs shing/ rin chen 'phreng ba las/ skyes bu sa min chu ma yin/ /me min rlung min nam mkha' min/ /rnam shes ma yin kun min na/ /de las gzhan pa'i skyes bu gang/ /skyes bu khams drug 'dus pa'i phyir/ /yang dag ma yin ji lta bar/ /de bzhin khams ni re re yang/ / @016a @#/ /'dus phyir yang dag nyid du min/ /zhes phung po'i steng du de rtog pas btags pa tsam ma gtogs/ nga rang ngos nas ma grub par bstan to/ /de yang skyes bu ni nga'am gang zag go /sa min nas rnam shes min zhes pa'i bar gyis gang zag gi sa la sogs pa'i khams drug gi cha so so nas gang zag tu 'jog pa bkag cing/ kun min zhes pas khams drug gi tshogs pa gang zag tu 'jog pa bkag la/ de las gzhan nas skyes bu gang/ /zhes pas phung khams las ngo bo tha dad pa'i gang zag 'jog pa bkag go /skyes bu khams drug 'dus pa'i phyir/ /zhes pas/ nga de khams drug 'dus pa'i steng nas bzhag par bstan cing/ rgyu mtshan de nyid kyis skyes bu'am nga rang bzhin gyis ma grub pa ni/ yang dag min zhes pas bstan to/ /dpe de bzhin du khams re re yang rang rang gi cha shas tshogs pa la brten nas bzhag pas yang dag par ram bden par grub pa med ces ston pa ni/ ji lta bar/ de bzhin khams ni re re yang/ /'dus phyir yang dag nyid du min/ /zhes gsungs so/ /rtsa shes las/ gal te phung po bdag yin na/ /skye dang 'jig pa can du 'gyur/ /gal te phung po rnams las gzhan/ /phung po'i mtshan nyid med par 'gyur/ /zhes nga bung gcig dang ngo bo tha dad pa'i phyogs gnyis ka yin pa bkag cing/ spyod 'jug las kyang de ltar gsungs so/ /ka bum sogs chos gzhan la'ang de bzhin du sbyor dgos pa yin te/ ting nge 'dzin rgyal po las/ ji ltar khyod kyis bdag gi 'du shes ni/ /shes pa de bzhin kun la blos sbyar bya/ zhes dang/ sdud pa las/ bdag ci 'dra ba de 'drar sems can thams cad shes/ / @016b sems can thams cad ci 'dra de 'drar chos kun shes/ /skye ba med dang skye ba gnyis kar mi rtog pa/ /'di ni shes rab pha rol phyin mchog spyod pa yin/ /zhes gsungs pa ltar ro/ /de yang bum pa lta bu la sbyor tshul gsal bar bshad na/ bum pa zhes 'jog pa ni tha snyad dam rtog pa'i dbang gis bzhag pa yin te/ bum pa yod par ni 'dod dgos la/ de yang bum pa'o zhes brjod pa na ming de tsam gyi rjes su 'brang nas lto ldir ba la bum pa'o snyam du 'dzin pa'i blo 'byung ba ltar bum pa mthong dang blang dor gyi bya ba la zhugs pas kun rdzob mi bslu ba dang bya byed kyi rnam gzhag 'thad pa yin gyi/ des mchog par bum pa de rang gi mchu dang lto ba dang zhabs dang mgrin pa sogs gang yin snyam du brtags pa na bum pa rnyed rgyu med pas/ blang dor gyi rnam gzhag byed mi nus so/ /de bzhin du skyes bu gang dang 'prad ? cing mthong bar 'dod pa'i tshe skyes bu de 'di'o zhes bstan pa na ming de tsam gyis rjes su 'brang nas bltas pas skyes bu de'i gzugs kyi cha mthong ba'i tshe skyes bu de mthong bar 'jog nus kyi/ de tsam gyis ma tshim par da dung skyes bu de kho rang gi mgo la sogs pa'i yan lag dang de'i cha shas dang de las ngo bo tha dad pa'i don gang yin zhes dpyad pa na skyes bu zhes bya ba ci yang mi rnyed pas/ de'i phyir chos thams cad kyang ming brdas bzhag tsam dang rtog pas btags tsam du grub bo/ /de ltar yang yum gyi mdo las/ 'di lta ste gzugs zhes bya ba 'di ni ming tsam mo/ /zhes sogs dang/ sdud pa las/ chos de rnams ni ming tsam du ni yongs su bsgrags/ /zhes dang/ rin chen 'phreng ba las kyang/ gzugs kyi dngos po ming tsam phyir/ /nam mkha' yang ni ming tsam mo/ /zhes sogs gsungs so/ /ming tsam zhes @017a @#/ /pas tha snyad kyi don yod pa mi 'gog gi /don dam par yod pa 'gog pa yin no/ /tha snyad kyi don la tha snyad kyi dpyad pa mi 'jug pa min kyang/ don dam gyi dpyad pa mi 'jug ste/ don dam dpyod byed kyi rigs pas rnam par dpyad na bshad pa ltar chos gang yang dpyad mthar mi rnyed pa'i phyir te/ de la dgongs nas dpal ldan zla bas/ tha snyad bden la rnam par dpyad mi bya/ /zhes gsungs pa yin no/ /don dam dpyod byed kyi rigs pas bum sogs btsal ba'i tshe ma rnyed pa de bum sogs don dam par ram rang bzhin gyis med pa'i don du song ba yin gyi/ spyir bum sogs med pa'i don du song ba min te/ de'i tshe buM sogs rang bzhin med par rnyed pa yin gyi/ bum sogs med par rnyed pa min no/ /'o na bum sogs kyi chos rang bzhin gyis med na/ med pa'i go mi chod dam zhe na/ tha snyad du yod pas yod go chod kyang/ rang bzhin gyis med pas med go mi chod pa yin te/ yod med ni tha snyad kyi dbang gis 'jog pa'i phyir ro/ /gsung rab las chos rnams yod pa dang med pa dang gnyis ka dang gnyis ka min pa bzhi po gang yang min pa lta bu zhig gsungs pa'i sgras zin gyi rjes su 'brang nas/ sngon gyi mkhas pa 'ga' zhig chos rnams yod pa yang min/ med pa'ang min zhes zer dgos pa byung ngo/ /rjes rten 'brel bstod pa las/ de yang kun tu med pa dang/ /rang bzhin gyis ni yod pas min/ /bltos med nam mkha'i me tog bzhin/ /des na ma brten yod ma yin/ /zhes pa'i rkang pa dang pos chos thams cad ni/ rnam pa kun tu ste gtan nas med pa min pa dang/ rang bzhin gyis ni yod pas min/ /zhes pas rang bzhin gyis grub pa min par @017b bstan te/ gtan nas med pa min zhes pas tha snyad du yod pa dang/ rang bzhin gyis yod pa min zhes pas bden par grub pa min zhes ston pas snga mas chad mtha' sel zhing/ phyi mas rtag mtha' sel ba'i phyir rtag chad kyi mtha' gnyis bkag go /rtag chad kyi mtha' gnyis dang bral ba'i rgyu mtshan gyi gtso bo ni rten 'brel yin pa'i rgyu mtshan gyis yin te/ rten 'brel yin pa'i don yang rang gi cha shas sogs la bltos pa'i don yin pas/ chos thams cad kyang rang rang gi cha shas sogs la bltos pa yin la cha shas la ma bltos pa ni med de/ nam mkha'i me tog bzhin no zhes bya bar dgongs so/ /mtha' gnyis 'gog byed kyi rigs pa'i rnam grangs mang yang gtso bo rten 'brel gyi rigs pa nyid yin te/ dpal ldan zla bas/ de phyir rten 'byung rigs pa 'di yis ni/ /lta ngan dra ba mtha' dag gcod par byed/ / ces dang/ rje nyid kyis/ brten nas 'byung ba'i rgyu mtshan gyis/ /mthar lta ba la mi brten zhes/ /legs gsungs 'di ni mgon khyod kyis/ /smra ba bla na med pa'i rgyu/ /zhes gsungs pa'i phyir ro/ /rten 'brel gyi rtags kyis mtha' gnyis cig car du sel nus pa yin te/ de yang rten 'brel ni brten nas byung ba'am brten nas bzhag pa dang bltos pa'i don yin pas/ brten nas byung zhes pas dngos su chad pa'i mtha' 'gog pa yin la/ brten nas byung ba'am bzhag pa'i yod par go ba'i tshe/ gtan nas med pa'i chad mtha' dngos su 'gog nus pa'i tshul gyis rtag mtha' yang 'gog pa yin te/ brten nas byung ba'am bzhag gi /rang bzhin gyis grub pa min zhes go ba na rtag mtha' legs par 'gog nus pa'i phyir ro/ /chos gcig gi steng du mtha' gnyis bkag pa'i lta ba bskyed nus na/ chos gzhan gyi steng du @018a @#/ /de lta bu'i lta ba bskyed nus pa yin te/ 'phags pa lhas/ gcig gi lta bo gang yin pa/ /de ni kun gyi lta por brjod/ /gcig gi stong nyid gang yin pa/ /de ni kun gyi stong pa nyid/ /zhes dang/ gang gis dngos gcig de bzhin nyid mthong ba// de yis dngos kun de bzhin nyid du mthong/ /zhes gsungs pa'i phyir/ chos thams cad rtog pas btags tsam du go bas kyang mtha' gnyis sel nus pa yin te/ rtog pas btags tsam du yod na/ tha snyad du yod par go bas chad mtha' sel/ tha snyad du yod na rang bzhin gyis med par shes pas rtag mtha' sel lo/ /de ni yul gyi mtha' gnyis 'gog pa'i dbang du byas la/ yul can rtag chad kyi lta ba gnyis kyang sel ba yin no/ /spyir rtag chad gnyis kyi mtha' med kyang/ mthar lhung bar 'jog tshul ni/ dper na 'jig rten na brag g.yang gi mtha' la lhung na phung bar 'gyur ba ltar/ mtha' de gnyis su bzung na 'dzin pa po phung bar 'gyur bas mthar lhung bar 'jog la/ de yang rang bzhin gyis grub par bzung ba'i blo yod pa tsam gyis rtag mthar lhung bar mi 'jog ste/ rang bzhin gyis grub par 'dzin pa'i blo ni theg chen 'phags pa la yang yod pa'i phyir ro/ /'o na ji ltar 'jog ce na/ bden 'dzin gyis bcings na rtag mthar lhung ba yin la/ bcings pa'i don ni bden 'dzin yod pa tsam min gyi/ chos gang la yang bden par grub bam ma grub snyam du sems pa na/ de nyid bden par grub par 'dzin pa'i bden zhen las mi 'da' zhing 'da' mi nus na ni/ des bcings par 'jog go /des na bden med rtogs myong na bden 'dzin gyis bcings pa min no/ /chad mthar lhung ba yang yod pa zhig med par bzung ba tsam gyis mi 'jog ste/ @018b sangs rgyas ma gtogs so skye lta ci slob pa 'phags pa thams cad kyang ji snyed pa'i chos rnams kyi rnam pa'i rab dbye phra zhing phra ba mtha' dag la the tshom chod pa ma yin pa'i phyir ro/ /des na spyir las 'bras dang dkon mchog gsum med par lta ba sogs chad mthar lhung ba yin zhing; ji lta ji snyed pa'i chos rags pa dang bden bzhi rags pa sogs med par lta ba'ang de dang mtshungs par sems la/ las 'bras dang ji lta ji snyed pa'i chos phra mo 'ga' zhig yod par ma shes pas de dag med par bzung ba ni skyon yin yang/ de rgyud ldan gyi gang zag thams cad chad mthar lhung ba yin zhes byas na mi bde bas dpyad par bya'o/ /kha cig spyir yod par bzung na rtag mthar lhung ba dang/ med par bzung na chad mthar lhung bar 'dod pa ni ma go ba chen po yin te/ sangs rgyas la yon tan yod par bzung ba dang/ skyon med par bzung bas rtag chad du ga la ltung/ rang 'dzin rtog pa 'ga' zhig gi ngo bor yod na spyir yod mi dgos te/ bum pa bden grub de de 'dzin pa'i rtog pa'i ngo bor yod kyang spyir med la/ de bzhin du thag khra sprul yin pa de de sbrul 'dzin gyi rtog pa'i ngo bor yod kyang spyir med do/ /'o na thag khra'i steng du sprul med pa ltar/ chos thams cad kyang de ltar du 'gyur te/ gong du dpe don sbyor tshul de 'thad pa'i phyir ro snyam na/ 'di ni dka' ba'i gnas yin zhing/ shes dgos pa yin yang/ 'dir mang du dogs pas rgyas par mi 'chad la; cung zad brjod na skyon med de/ thag khra'i steng du sprul med kyang de yod par snang ba ltar/ nga sogs rang gi gdags gzhi'i steng du rang ngos nas med kyang yod par snang ba gnyis dpe don mtshungs pa'i sgo nas yin gyi/ thag khra'i steng du sprul dang gdags @019a @#/ /gzhi phung sogs kyi steng du nga sogs tha snyad du yod med mtshungs zhes sbyor ba min pa'i phyir te/ de gnyis la tha snyad pa'i tshad mas gnod mi gnod kyi khyad par yod pa'i phyir te/ thag khra'i steng du sprul yod pa la tha snyad pa'i tshad mas gnod/ gdags gzhi phung sogs kyi steng du nga sogs kyi chos yod pa la tha snyad pa'i tshad mas mi gnod pa'i phyir te/ dang po de ltar yod pa ni 'jig rten pa'i tha snyad dam grags pa don mthun la med/ phyi ma de ltar yod pa ni 'jig rten pa'i tha snyad don mthun la grags pa'i phyir/ / 'jig rten pas yod par khas len na yod pa dang/ med par khas len na med pas ma khyab kyang/ yod med ni 'jig rten gyi tha snyad dang grags pa don mthun la bltos nas 'jog pa yin te/ mgon po klu sgrub kyis/ sangs rgyas 'jig rten bsnyad dbang gis/ / gsungs kyi yang dag dbang gis min/ /zhes dang/ zla bas kyang/ 'jig rten rab tu grags par yod ji bzhin/ /zhes gsungs pa'i phyir ro/ /sangs rgyas kyis tha snyad kyi rnam gzhag 'jig rten pa dang mthun par mdzad kyang 'jig rten pas de dag rang bzhin gyis yod par 'dod pas/ sangs rgyas kyis ni de dag rang bzhin med par bstan pa la rtsod pa yin te/ sdud pa las/ sems can rnams ni gnas la dga' zhing yul rnams 'dod/ /'dzin la gnas shing mi mkhas blun rmongs mun pa bzhin/ /thob par bya ba'i chos ni gnas med 'dzin med de/ /des na 'jig rten dag dang rtsod pa 'byung ba yin/ /zhes dang/ dkon mchog brtsegs pa las kyang/ 'od srung 'jig rten nga dang rtsod kyi/ nga ni 'jig rten dang mi rtsod do/ /zhes gsungs pa'i phyir ro/ 'jig rten pa'i tha snyad don mthun ni/ 'jig rten rang ga ba'i tha snyad tsam la mi @019b byed kyi/ skye 'phags rnams la yod pa'i tha snyad pa'i tshad ma la byed pa yin no/ /mdor na/ mdo las/ ji ltar yan lag tshogs rnams la/ /brten nas shing ltar brjod pa ltar/ /de bzhin phung po rnams brten nas/ /kun rdzob sems can zhes bya'o/ /zhes shing rta'i yan lag re re ba dang tshogs pa shing rta ma yin kyang/ de dag la brten nas shing rta tha snyad kun rdzob tu 'thad pa ltar/ phung po rai ba dang tshogs pa sogs nga min kyang/ de dag la brten nas nga kun rdzob tu 'thad pa'ang rigs pas 'grub cing/ tshul de chos thams cad la sbyar nas/ rang bzhin gyis stong pa la bya byed kyi rnam gzhag thams cad shin tu 'thad pa'i tshul la nges pa rtan po btsal bar bya ste/ tshul de ni ngo mtshar rmad du byung ba'i gnas yin par mdo las gsungs shing/ sngags nas kyang gsungs te/ 'dus pa'i rtsa rgyud le'u bco lnga pa las/ bcom ldan 'das 'di ci zhig lags/ chos rnams ngo bo med pa la/ / chos kyi de nyid kun bshad pa/ /e ma'o ngo mtshar las byung ba/ /nam mkha' la ni nam mkha' bsgom/ /zhes dang/ le'u gnyis pa'i byang chub sems 'grel las mgon po klu sgrub kyis/ chos rnams stong pa 'di shes nas/ /las dang 'bras bu bsten pa gang/ / ngo mtshar bas kyang 'di ngo mtshar/ /rmad byung bas kyang 'di rmad byung/ /zhes dang/ rten 'brel bstod par yang/ 'di kun ngo bos stong pa dang/ /'di las 'di 'bras 'byung ba yi/ /nges pa gnyis po phan tshun du/ /gegs med par ni grogs byed pa/ /'di las ngo mtshar gyur pa gang/ / 'di las rmad du byung ba gang/ /zhes gsungs pa'i phyir ro/ /smras pa/ rgyal yum pha rol phyin rnams kyi/ /brjod bya'i gnad don kun bsdus pa/ /sher phyin snying por rab grags pa'i/ /dgongs don gsal byed nyi ma shar/ /'di ni rnam dpyod dad ldan pa'i/ /mthar @020a @#/ /'dzin lta ba'i mun sel dang/ /zab mo'i de nyid ston byed pa'i/ /legs bshad nyi ma gnyis pa'ang yin/ /de yang 'phags pa klu sgrub kyi/ /lugs bzang ji bzhin 'dzin mdzad pa/ /blo bzang rgyal ba gnyis pa yi/ /dgongs pa'i don gyi gnad bsdus bshad/ /tshul 'dir 'bad las bdag gis ni/ /rnam dkar dge ba gang bsags des/ /kun gyi zab mo'i don rtogs nas/ /rgyal ba'i go 'phang thob gyur cig (/ces pa 'di ni/ dad dang rnam dpyod ldan pa'i gnas brtan grags pa dpal 'byor gyis nan cher bskul ba la brten nas/ co ne'i mdo sngags zung 'brel gyi bla ma'i go sar gnas pa'i shAkya'i dge slong rigs pa smra ba don gyi dbu ma bar rlom pa grags pa bshad sgrub kyis bskul ba po'i ngo dang phan yon la bsams te lcags phag gi lor gzims khang nyid nas sbyar ba'o/ /yi ge ba ni dad stobs ldan pa'i gnas brtan kun dga' rin chen no// bkra shis//) dge'o// //