@443 zhen pa bzhi bral gyi dmigs khrid kha gsal la grangs tshang ba gcig bzhugs so// gang gi mkhyen pa lha lam bzhin du shes bya kun la khyab/ /de ye thugs rje zla zer lta bur 'gro ba'i gtsug na mdzes/ /khyod kyi 'phrin las yid bzhi nor lta dgos 'dod 'byung ba'i gter/ /skyob pa mtshungs med shAkya seng ges 'gro la dge legs mjod/ /dus gsum rgyal ba kun gyi ye shes gcig bsdus 'jam pa'i dbyangs/ khams gsum 'gro ba kun gyi skyob par zhal bzhes spyan ras gzigs/ /snyigs dus 'gro ba 'dren phyir mi yi gzugs 'dzin sa skya ba/ /mtshan nas brjod par dka' ba de la gus pas phyag 'tshal nas/ /sngon bsags bsod nams stobs kyis dam chos bsgrub pa'i lus rten brnyes/ /dpal 'byor lhun gyis grub pas bstan dang bstan 'dzin mchod mdzad pa/ /rnam dkar dge ba'i blo can de yis slar yang dris pa'i lan/ theg chen gnad kyi gdams pa thun mong ma yin 'dir brjod bya/ /de la yang dag par rdzogs pa'i sangs rgyas 'jig rten thams cad la ma bskul bzhin du legs par mdzad pa'i thugs mnga' ba des gdul bya'i khams dang bsam pa dang bag la nyal dang mthun par chos kyi phung po ji snyed gsungs pa thams cad pha rol tu phyin pa dang / rdo rje theg pa gnyis su 'du ba las/ dang po gzhung las bshad pa gco che ba'i nyams len dang / man ngag gi gnad kyi nyams len gnyis las/ gzhung las bshad pa gco che ba'i dbang du byas na/ mgon po byams pas/ mngon rtogs rgyan las sher phyin gyi mdo'i mngon rtogs brgyad kyi lam rim dang / mdo sde rgyan las theg pa chen po'i mdo sde sna chogs kyi dgongs pa rigs dang chos la mos pa la sogs pa'i lam gyi rim pa gsungs pa @444 dang / 'phags mchog klu sgrub kyis/ dbu ma rin chen phreng bar sgrub bya mngon mtho dang nges legs gnyis/ sgrub ba byed dad pa dang shes rag gnyis kyis sgrub pa'i lam rim gsungs pa dang / slob dpon 'phags pa lhas phyin ci log bzhi spangs pa'i sangs rgyas dmigs yul byas nas byang chub sems dpa'i spyod pa mthar phyin pa'i gegs nyon mongs pa rgyu dang bcas pa bcad de/ de kho na nyid kyi snod rung du byas nas dngos gzhi de kho na nyid kyi bdud rtsi bstan pa'i lam rim gsungs ba dang / slob dpon zhi ba lhas/ dal 'byor gyi lus rten gyi steng du byang chub sems dpa'i spyod pa'i ngo bo pha rol tu phyin pa drug nyams su blangs nas smon lam rnam par dag pas 'tshams sbyar te/ sangs rgyas bsgrub pa'i lam rim gsungs pa dang / jo bo rjes/ tshe 'di'i zhen pa spangs nas phyi ma'i don tsam sgrub pa skyes bu chung ngu / 'khor ba'i bde 'bras spangs nas thar pa tsam sgrub pa skyes bu 'bring / sems can gyi don du sangs rgyas bsgrub pa skyes bu chen po ste gsum gyi lam rim gsungs pa dang / dpal ldan zla ba grags pas/ so so skye bo'i gnas skabs su snying rje dang / byang chub kyi sems/ /gnyis su med pa pa'i blo nyams su blangs nas 'phags pa'i sa thob pa na pha rol tu phyin pa bcus sa bcu bgrod sku gsum sgrub pa'i lam gyi rim pa gsungs pa rnams ni theg pa chen po'i sde snod kyi dgongs pa grub pa'i dbang phyug rnams kyis phyin ci ma logs par bkral ba'i lugs bzang po rmad du byung ba yin na yang / gzhung lugs la blo sbyangs pa dag gas rtogs par bya ba yin gyi/ 'dir nyung ngu'i sgo nas rtogs par bya ba ma yin no// // gnyis pa de dag gi don gnad kyi nyams su len pa/ spyir rab tu mang po snang yang gtso bor gyur pa bla ma gser gling pas jo rje bo la gnang ba dang / @445 mgon po 'jam pa'i dbyangs kyis bla ma sa skya ba la gnang ba gnyis las/ dngos gzhi dal 'byor rnyed dka'/ 'chi ba mi rtag pa/ las rgyu 'bras/ 'khor ba'i nyes dmigs bzhis byang chub kyi sems skye ba'i rten du bsgrubs te/ sbyor ba byams pa dang snying rje yun ring du sbyangs nas/ dngos gzhi bdag gzhan brje ba'i byang chub kyi sems gco bor bsgom zhing skabs su bab pa na don dam byang chub kyi sems kyang bsgom ste/ lam gyi yan lag la rkyen ngan byang chub kyi lam du bsgyur ba tshe gcig gi nyams len gril te bstan pa/ blo 'byongs pa'i tshad/ blo sbyong gi dam tshig /blo sbyong gi bslab bya rnams nyams su len pa'i sgo nas mngon tshan chung la/ sa chod che ba'i lam phul du byung ba zhig ste/ 'di ni jo bo rjes bod du dge ba'i bshes gnyen 'brom ston pa las gzhan la ma gnang la/ dge bshes bas kyang sku mched rin po che rnam pa gsum las gzhan la ma gnang zhing / de nas shin tu dar ste gang ri'i khrod 'dir nyi zla ltar grags pa'i lam po che yin la/ 'di dag gi nyams len ni rgyal sras chos rjong pa yab sras dang / sems dpa' chen pa gzhon nu rgyal mchog la sogs pa'i gsung rab rnams la blta bar bya'o// // da ni skabs 'dir bstan par bya ba mgon po 'jam pa'i dbyangs kyis bla mas skya ba la gnang ba na/ sngar gyi de dag dang nyams len gyi gnad 'dra yang / brjod bya'i tshe bsgos dang / don gyi go rim ni gzhan las khyad par du 'phags pa zhig ste/ de yang bla ma sa skya ba chen po dgung lo bcu gnyis bzhes pa'i dus su 'jam pa'i dbyangs kyi sgrub pa mdzad pas zla ba drug na zhal gzigs te/ mgon po 'jam pa'i dbyangs kyi zhal nas/ tshe 'di la zhen na chos pa min/ 'khor ba la zhen na nges 'byung min/ /bdag don la zhen na byang sems min/ /'dzin pa @446 byung na lta ba min/ /zhes gsungs pas 'di'i nang du pha rol tu phyin pa'i nyams len mtha' dag 'dus pa yin no/ /'di dag gi don la tshe 'di la zhen pa dang bral nas blo chos su 'gro bar byed pa dang / 'khor ba la zhen pa dang bral nas chos lam du 'gro bar byed pa dang / bdag don la zhen pa dang bral nas lam 'khrul ba sel bar byed pa dang / mtha' bzhir zhen pa dang bral nas 'khrul pa ye shes su 'char bar byed pa dang bzhi las/ dang po la sngon 'gro dal 'byor rnyed dka'/ dngos gzhi 'chi ba mi rtag /lam gyi yan lag las rgyu 'bras sgom pa dang gsum/ dngos gzhi stan bde ba la sdad nas bla ma dkon mchog la skyabs 'gro lan mang du byas nas blo chos su 'gro ba la sogs pa bzhi'i gsol ba btab/ sems can thams cad kyi don du sangs rgyas thob par bya snyam du sems bskyed nas 'di ltar bsam ste; dal 'byor gyi lus 'di ngo bo'i sgo nas dal ba brgyad dang 'byor pa bcu tshang ba rnyed par dka' ba 'dug /rgyu'i sgo nas dge ba bsgrub dgos pa la sems rgyud 'di la dge ba shin tu dkon pas rnyed par dka' ba 'dug /grangs kyi sgo nas spyir 'gro ba rigs drug gong ma gong ma las 'og ma 'og ma mang bar mngon sum du mthong ba las dbyar ko mog gcig dang / shing phung gcig la gnas pa'i dud 'gro'i grangs de 'dzam bu'i gling gi mi thams cad la med pas rnyed par dka' bar 'dug /dpe'i sgo nas kyang gyang logs la sran ma gtor ba chags pa dka' ba 'am/ rgya mtsho chen po rlung gis g.yengs pa la gnya' shing gi bu gar rus sbal gyi mgrin pa chud pa las kyang rnyed dka' bar 'dug /des na dal 'byor lan gcig rnyed pa 'di ci nas kyang chud ma zos par skye ba phyi ma phan chad kyi don du bsgrub par bya'o snyam du bsgom mo/ gnyis pa 'chi ba mi rtag pa bsgom pa ni/ skyabs 'gro @447 sems bskyed sngar ltar byas nas 'di ltar bsam ste/ skyes nas ma shi tshe thar du sdod pa su yang mi 'dug pas nges par 'chi/ de yang 'di tsam la 'chi/ 'di tsam la mi 'chi ba'i gdeng med/ /'chi ba'i rkyen mang / 'cho ba'i rkyen nyung bas nges par 'chi/ 'chi ba'i dus la bab na sman dang rim 'gro la sogs pa gang gis kyang bzlog mi nus pas 'chi ba la gang gis kyang mi phan/ shi ba'i 'og tu chos min pa 'khor dang longs spyod gang yang rjes su mi 'brang snyam du bsgoms nas tshe 'di la zhen pa dang bral bar bya'o/ /blo chos su 'gro bar byed pa'i thabs kyi gtso bo 'di yin pas zas bzang po za ba dang / gos bzang po gon pa dang / 'khor mang pos bskor ba'i tshe yang da lta ta 'di dang 'di lta bu 'dug ste/ nam zhig 'di dag dang bral nas gcig pur 'gro dgos pas snying po med do snyam du bsgoms te/ /tshe 'di'i bya byed la zhen pa dang bral bar bya'o/ /gsum pa las rgyu 'bras bsgom pa ni/ skyabs 'gro sems bskyed sngar ltar byas nas/ /de ltar rnyed dka' ba'i dal 'byor thob cing / de yang mi rtag par 'dug pas ma she ba'i gong du mi dge ba mtha' dag spangs shing dge ba ci nus su bsgrub dgos te/ de'i rgyu mtshan yang mi dge ba bcu spyad pa'i rnam smin gyi 'bras bu ngan song gsum du skye/ rgyu mthun gyi 'bras bu la myong ba rgyu mthun ni srog gcod pas tshe thung / ma byin par blangs pas nor dbul ba la sogs pa 'byung bar bshad la/ byed pa rgyu mthun ni/ ma dge ba gang dang gang la goms pa de slar yang byed 'dod pa 'byung zhing / yang de'i 'bras bu ngan song du ltung ba la sogs pa 'byung bas thar pa'i go skabs med/ skyes bu byed ba'i 'bras bu sa phyoT dri nga ba dang rdul tshub can du skye bas nges par yang spang dgos snyam du bsam/ de bzhin du dge ba bcu'i rnam smin gyi 'bras bu bde 'gror skye @448 ba dang / rgyu mthun gyi 'bras bu la myong ba rgyu mthun srog gcod spangs pas tshe ring ba sogs dang / byed pa rgyu mthun dge ba 'di dang 'di byed 'dod pa dang / skyes bu byed pa'i 'bras bu sa phyogs dri zhim par skye ba la sogs pa 'byung bas nges par bsgrub dgos par 'dug snyam du bsam zhing/ khyad par du las 'bras kyi blang dor 'di dag gi gnad shes par byas nas lag len la 'debs pa gal che ba yin no; ;gnyis pa 'khor ba la zhen pa dang bral nas chos lam du 'gro bar byed pa ni/ khams gsum 'khor ba'i nyes dmigs bsam pa ste/ skyabs 'gro sems bskyed sngar ltar byas nas/ khams gsum 'khor ba 'di sdug bsngal gyi rang bzhin las ma 'das par 'dug ste tsha ba'i dmyal ba rnams na lus mes bsreg pa dang mtshon gyis gcod pa la sags pa'i sdug bsngal dang / grang dmyal rnam na shin tu grang ste/ sha rus dum bur gas pa la sogs pa'i sdug bsngal dang / nye 'khor ba rnams la me ma mur gyi 'obs na gnas pa la sogs pa'i sdug bsngal dang / sdug bsngal da lta rang gi lus la bab na cha shas tsam yang mi bzod pa dang / yi dwags rnams la bkres pa dang / skom pa dang / tsha grang dang / ngal ba dang / 'jigs pa'i sdug bsngal yang yod/ dud 'gro phyings na gnas pa rnams la gcig la gcig za ba dang / kha 'thor ba rnams la yang bkol zhing spyod pa'i sdug bsngal yang yod/ mi rnams la yang mtho dman du 'gyur ba dang / 'dod pa btsal te ma rnyed pa dang / mi 'dod pa dang 'phrad pa dngos gnyen dang bral ba la sogs pa'i sdug bsngal da lta mngon sum du mthong ba rnams yin no/ 'dod khams kyi lha la yang 'chi ltas byung tshe sems can dmyal ba'i sdug bsngal las kyang sems kyi sdug bsngal che ba yod/ gzugs gzugs med kyi lha la yang da lta sdug bsngal mngon gyur ba med kyang/ nam @449 zhig 'og tu lhung ste ngan song gi sdug bsngal mtha' dag myong dgos pas/ khams gsum 'khor ba 'di sdug bsngal gyi rang bzhin las ma 'das/ des na 'khor ba mtha' dag spangs nas thar pa'i go 'phang thob par bya dgos snyam du bsam mo// 'di yan chad kyis skyes bu gsum gyi lam rim bstan/ skyes bu chung ngu dang 'bring gi lam rdzogs/ gser gling pa ltar sngon 'gro rten gyi chos bzhi rdzogs pa yin no/ /gsum pa bdag don la zhen pa bral nas lam 'khrul ba sel bar byed pa la/ byams pa dang snying rje byang chub kyi sems bsgoms pa gsum las/ dang po ni/ de ltar rang nyid gcig pu 'khor ba'i sdug bsngal las thar bas mi chog khams gsum gyi sems can thams cad bdag gi pha ma lan grangs du mar byas pa'i drin can 'ba' zhig yin/ khyad par rtsa ba'i ma 'dis dang po mngal du bzung/ phyir btsas pa na 'bu rid lta bu srog 'og bton/ de nas zas gos sogs kyis bskyangs pa'i drin yod tshad dran par byas nas ma 'di drin can yin pas bde ba la 'god dgos snyam du bsam/ de nas gnyen tshan gzhan rnams dang gnod pa bskyel ba'i dgra bo rnams dang / ngan song gsum la sogs pa-I sdug bsngal can rnams kyis kyang 'khor ba thog med nas ma yang yang byas pa'i dren dran par byas nas de dag bde ba la 'god par 'dod pa'i byams pa rgyud la skyes skyes su bsgom mo/ gnyis pa snying rje bsgom pa ni/ rtsa ba'i ma 'di'i drin gang yod dran par byas nas/ drin can gyi ma 'di sdug bsngal dang bral dgos kyang da lta sdug bsngal gyi rang bzhin du 'dug pas snying re rje/ 'di sdug bsngal dang bral na ci ma rung/ 'di sdug bsngal dang bral ba la 'god par bya'o snyam du bsgom/ de bzhin du 'gro ba gzhan rnams la sngar bzhin du drin dran par byas nas sdug bsngal dang 'bral 'dod kyi snying rje bsgom mo// @450 byams snying rje 'di gnyis rgyud la ma skyes na byang chub kyi sems rnal ma mi skye bas theg pa chen po'i chos thams cad kyi rtsa ba 'di nyid la 'bad par bya'o/ /gsum pa byang chub kyi sems bsgom pa la/ smon pa byang chub kyi sems dang / bdag gzhan mnyam pa'i byang chub kyi sems dang / bdag gzhan brje ba'i byang chub kyi sems gsum las/ dang po ni/ de ltar khams gsum 'khor ba'i pha ma drin can rnams bde ba dang ldan pa dang / sdug bsngal dang bral dgos kyang da'i nus pa bdag la med/ der ma zad 'jig rten pa'i che ba'i tshangs pa dang / brgya byin la sogs pa dang / 'jig rten las 'das pa nyan thos dang rang sangs rgyas la med/ su la yod na yang dag par rdzogs pa'i sangs rgyas kho na la yod pas/ sems can thams cad kyi don du rdzogs pa'i sangs rgyas kyi go 'phang gcig thob par byas nas drin can gyi pha ma rnams 'khor ba'i rgya mtsho las bsgral bar bya'o snyam du bsgom mo/ /sangs rgyas bsgrub pa'i rgyu la 'di med ka med yin cing/ blo 'di yod na dge ba'i rtsa ba gang bsgrubs pa thams cad rdzogs pa'i sangs rgyas kyi rgyur 'gyur bas theg pa chen po'i sde snod rnams las 'di'i bsngags pa mang du gsungs so/ /gnyis pa bdag gzhan mnyam pa bsgom pa ni/ bdag bde ba 'dod pa ltar sems can thams cad kyang bde ba 'dod pas bdag gis bde ba bsgrub pa bzhin du sems can thams cad kyi bde ba yang sgrub dgos/ bdag sdug bsngal mi 'dod pa ltar sems can thams cad kyang sdug bsngal mi 'dod pas/ bdag gi sdug bsngal bsal ba bzhin du sems can thams cad kyi sdug bsngal yang bsal bar bya dgos so snyam du bsgom pa'o/ /gsum pa bdag gzhan brje ba bsgom pa ni/ rtsa ba'i ma mdun dmigs nas ma 'di drin can yin yang sdug bsngal gyi rang bzhin du 'dug pa @451 snying re rje/ ma 'di'i sdug bsngal dang de'i rgyu mi dge ba thams cad bdag la smin nas bdag gis nyams su myong bar gyur cig /bdag gi bde ba dang dge ba thams cad ma 'di la smin nas ma 'di sangs rgyas par gyur cig /snyam du bsgom mo// de bzhin du gnyen tshan gzhan rnams dang / mthong thos kyi sems can rnams dang / bdag la gnod pa byed pa'i dgra bo rnams dang / ngan song la sogs pa'i sdug bsngal can rnams la re re bzhin bsgoms te/ mthar sems can thams cad kyi sdug bsngal 'ubs kyis rang la 'dus nas rang gi bde dge sems can thams cad kyi gnas skabs su gang la gang 'dod kyi longs spyod rnams dang / mthar thug sangs rgyas pa'i rgyur 'gyur bar bsgom mo/ 'di ni theg pa chen po'i nyams len gyi snying po dus gsum sangs rgyas thams kyi gsang tshig yin pas 'di ltar bsgom dgos pa'i rgyu mtshan dang / shes byed kyi lung dang / sgom tshul gyi dowgs gcod dang bcas pa dgos mod kyis/ ha cang mang bar dogs nas ma spros so/ /smon pa byang chub kyi sems nas 'di'i bar rnams la sngar bstan pa gyi sngon 'gro skyabs 'gro sems bskyed ni nges par dgos la/ de'i steng du bla ma'i rnal 'byor bsgom na yang bzang ngo/ /dmigs pa thams cad kyi thun mjug tu bsngo ba smon lam g.yas rgyas btab la/ gzhan yang 'gro 'chag nyal 'dug gi spyod lam thams cad du yang dran par bya'o/ /bzhi pa mtha' bzhir zhen pa dang bral nas 'khrul pa ye shes su 'char bar byed pa ni/ /man ngag gzhan gyi lugs la zhi gnas dang lhag mthong gnyis las lhag mthong la yang gang zag gi bdag med bsgom pa dang / chos kyi bdag med bsgom pa la soT pa yod mod kye 'di yi lugs la mnyam gzhag tu snang ba sems su bsgrub pa/ sems sgyu mar bsgrub pa/ sgyu ma rang bzhin med par @452 bsgrub pa dang gsum bsgom zhing/ rjes thob tu zhen med sgyu ma dang rmi lam lta bur lta ba'i nyams len yod pa ni bla ma'i man ngag la ma ltos par rang dgar bsgoms na/ 'khrul gzhi che zhing/ yi ge tsam gyis shes par mi nus pas 'dir ma spros so// 'on kyang 'phral du phan pa ni/ dge ba'i rtsa ba gang bsgrub kyang bdag ni dge ba byed pa'o// dge ba ni 'di dag go/ des na kho bos dge ba 'di byas so snyam pa'i mngon rlom med pa gal che/ gzhan dge ba la bskul ba'i ched du rang la rlom pa med par kho bo dge ba 'di lta bu bsgrub bo zhes sgrogs pa la nyes pa med do/ /des na dge ba'i rtsa ba bsgrubs pa dang / 'phral du 'jig rten gyi bya ba byed pa'i tshe sgyu ma yin nam/ rmi lam yin nam snyam du dran pa byed na lta ba rtogs pa'i rgyur gyur bas dran 'dzin byed pa gal che'o/ /de ltar 'di la lam rim bzhi yod pa'i dang po ni/ skye ba phyi ma phan chad kyi don bsgrub pas blo chos su 'gro ba zhes bya/ /gnyis pa 'khor ba spangs nas thar lam bsgrub pas chos lam du 'gro ba zhes bya/ gsum pa theg dman gyi bsam pa spangs nas theg chen la sbyor pas lam 'khrul ba sel ba zhes bya/ bzhi pas mthar 'dzin gyi sbros pa mtha' dag spangs nas gnas ba luT kyi don la sbyor bas 'khrul ba ye shes su 'char ba zhes bya ste/ lam gyi gtso bo 'di lta bu nyams su blangs shing 'phral gyi spyod pa lus don yod par bya ba'i phyir phyag dang bskor ba/ ngag don yod par bya ba'i phyir sangs rgyas byang sems kyi bstod pa dang mdo sde zab mo klog pa/ yid don yod par bya ba'i phyir byams snying rje byang chub kyi sems bsgoms pa/ longs spyod don yod par bya ba'i phyir dkon mchog pa dang dge 'dun gyi bsnyen bkur la sogs pa bya ste/ smon lam rnam par dag pas mtshams sbyar na skyon med yon tan kun dang ldan pa'i rdzogs pa'i sangs rgyas thob par @453 'gyur ba ni nges pa'i/ /slar yang gnad bsdus pa'i tshigs su bcad pa ni/ dam chos bsgrub pa'i lus rten rnyed dka' zhing/ /mi rtag myur du 'jig pa'i rang bzhin du// legs par rtogs nas dge sdig blang dor la/ /bzod pa lhur len rim pa dang / po'o/ /'khor ba'i rgya mchor mtha' med 'gro ba rnams/ /sdug bsngal chu srin kha ru chud mthong nas/ /myang 'das thar pa'i skam sa don gnyer ba'i/ /nges 'byung bskyed pa rim pa gnyis pa'o/ /mkha' mnyam 'gro bas bdag gi pha dang ma/ /yang yang byas shing phan gdags drin dran nas/ /byams dang snying rje byang chub sems mchog gis/ /gzhan don bsgrub pa rim pa gsum pa'o/ /ji ltar snang ba 'di dag rang gi sems/ /sems nyid rgyu rkyen tshogs tsam sgyu ma bzhin/ /sgyu ma spros dang bral brtogs gyur nas/ /gnas lugs bsgom pa rim pa bzhi pa'o/ /gnas skabs kun tu dkon mchog mchod pa dang / mi dge'i cha shas rim gyis spong ba dang / / mgon med dbul 'phongs sbyin pas tshim byas na/ gnas skabs mthar thug don rnams 'grub par nges/ /'di ni theg chen lam gyi gnad bsdus nas/ /bstan pa'i sbyin bdag khyed kyi thugs dam du/ /phan pa'i bsam pas 'bul ba bgyad lags kyi/ /nyams su blangs nas don kun 'grub par mdzod/ /ces pa 'di ni bstan pa rin po che la mi phyed pa'i dad pa dang ldan pa'i sgo nas bstan 'dzin gyi skyes bu rnams kyi sbyin bdag dam par gyur pa khyim pa'i rten can gyi byang chub sems dpa' ra lod rdo rjes gsung gi gdams pa lha chos la phan pa'i bslab bya zhib pa cig dgos zhes bskul ba'i ngor shAkya'i dge slong bsod nams seng ges/ smin drug zla ba'i yir tshes gsum la mdo mkhar gyi dben gnas dam par bris pa yin la/ las 'bras kyi gnad mda' lung khungs dang bcas pa zhig rjes su 'bul ba lags// //