blo sbyong thun brgyad ma lags so// ! theg chen dge ba'i bshes gnyen la phyag 'tshal lo/ /spyir jo bo la sngags pha rol tu phyin pa gsan pa'i bla ma bdun cu rtsa gnyis yod/ /khyad par gyis kyang byang chub kyi sems ston pa'i bla ma gsum yod/ byams pa'i rnal 'byor pa; d+harmma rak+Shi ta/ gser gling pa gsum yin gsungs/ de rnams kyi nang nas kyang bla ma gser gling pa la gsung ba'i gus pa'i rgyu mtshan bla ma gzhan la gdung khang med de/ gser gling pa la gdung khang dngul gdugs can yod/ bla ma gzhan la zla mchod med de/ gser gling pa la zla mchod yod/ bla ma gzhan gyi @161 mtshan thos tsam gyis thal mo thugs kar sbyor te/ mnyam med gser glang pa'i mtshan thos tsam na thal mo spyi bor sbyor/ bla ma gzhan dran kyang spyan chab mi 'ong ste/ bla ma gser gling pa dran tsam nas spyan chab yong skad/ a ti sha la bla ma mang du yod pa la gser gling pa la de tsam gus pa'i rgyu mtshan ci lags zhus pas/ jo bo'i zhal nas/ bdag gzhan brje ba'i byang chub kyi sems 'di bla ma gser gling pa min pa la ma byung ba yin gsungs/ bla ma gser gling pa des brgyud pa'i dbang du byas na/ yang dag par rdzogs pa'i sangs rgyas/ rje btsun byams pa/ thogs med/ dbyig gnyen/ 'phags pa rnam grol sde/ btsun pa grol sde/ des mchog gi sde/ des 'dul ba'i sde/ des mkhan po yang dag rnam par snang mdzad/ des seng gi bzang po/ des rin chen mdo/ des bla ma gser gling pa/ des dpal ldan a ti sha /des dge bshes ston pa/ des sku mched gsum la/ khyad par du spyan mnga' ba la gnang / des glang thang pa dang / sha pho sgang pa gnyis la/ glang thang pas zhang zhung dang lwa gur gnyis la/ de gnyis kyis phyis jo bo la/ des lung nang pa mkhan po rin po che/ des slob dpon brag ston shes rab rin chen bstan pa'i bdag po slob dpon gzhon nu bsam gtan/ des bud d+ha ratna la/ des kirtti shil la/ des rgyal ba'i mtshan can/ des puN+ye ratna la/ des gzhon nu rgyal mchog /de yan chad bla ma brgyud pa'i rim pa yin te/ de rnams chos 'di la brten nas grub pa thob/ rtogs pa khyad par can 'khrungs pa yin gsungs/ theg pa chen po'i blo sbyong zhes bya ba spyir du yang bka' sde snod kyi chos thams cad nas gsungs/ khyad par gyis kyang byang chub sems dpa'i spyod pa la 'jug pa'i bsam gtan le'u nas/ bdag nyid @162 skyon bcas gzhan la yang / /yon tan rgya mtshor shes byas nas/ bdag 'dzin yongs su dor ba dang / /gzhan blang ba yang bsgam par bya/ /zhes gsungs/ de la sogs pa'i tshigs su bcad pa de rnams kyi don go hril gyis gril ba la spyir 'khor bar 'khyams par byed pa'i rgyu nyon mongs pa brgyad khri bzhi stong / de tshur bsdun drug /rtsa ba'i nyon mongs pa'am nyi shu nye ba'i nyon mongs pa/ de'i rtsa ba bdag tu 'dzin pa 'di yin te/ rang bzhin gyis grub pa med pa gcig la/ nga bdag tu bzung nas 'di'i kha 'dzin shag 'debs byas pas/ tshe 'di la dge rgyu'i las mi dge bar song nas mi dge rgyu'i las sdug bsngal du song nas rang sa rang gis kha 'dzin shag 'debs byas pas lan/ da 'og man chad du yang bdag tu 'dzin pa 'di ma spangs na 'khor bar de kho na bzhin du 'khyams nas 'das ma 'ongs da ltar dus gsum du sdug tu 'jug mkhan rang gces par 'dzin pa'i 'gong mong bdag bya ba 'di yin min la the tshom mi za/ 'di'i kha 'dzin shag 'debs byas pas lan/ mthong ba thob pa yid la 'gyus pa rnams lag len la ma btab pa gcig kyang med de/ 'khor ba la sngar 'dis gang yang ring du ma song bas da yod gang legs thong / byang chub sems dpa' la thong snyam du byas nas rang gzhan du longs skur la thong / lhod de glod la thong / bshig gis bshig la thong / sems can spyir mi 'os pa min pha ma drin can sha stag yin pas sems can gyi rgyu'i dus kyi sdig pa/ 'bras bu'i dus kyi sdug bsngal kob skyi gris bzhar ba bzhin du blangs nas rang gi lus po 'di'i steng du hril hril smin par bsam/ rang gi bde ba dang dge ba sems can la smin par bsam/ de gnyis phar log tshur log tu bsgom/ sangs rgyas dang byang chub sems dpa' rnams kyi dge ba'i rtsa ba la yang blos blangs nas sems can la smin @163 par bsgom/ theg pa chen po'i blo sbyong zhes bya ba'i go don de lta bu gcig yin gsungs/ mkhan po ba'i gsungs nas blo sbyong zhes bya ba bdag khyad du bsad nas sems can la gus/ bdag khyad du bsad pa bya ba 'khor ba thog ma med pa nas sdug tu 'jug mkhan rang gces par 'dzin pa'i 'gong po 'di yin pas gzhi 'di brlag na yang rlag gzhug gsungs/ don du ma la 'jug gsungs/ sems can la gus par bsgom pa ni gzhan khams gsum 'khor ba'i sems can 'di rnams spyir mi spang ba yin/ pha ma drin can sha stag yin pas sems can la gus par bsgom/ lus ngag yid gsum gyi zho sha mi bsri bar phan 'dogs gsung ngo // // zas la brten pa'i blo sbyong bzhugs so// ! yang dag bshes ston pa'i gdams ngag lag len du byed na/ sbyin bdag gis bsod nams kyi tshogs rdzogs pa'am/ gzhan gyi dad zas 'ju bar bya ba'i ched du zas la brten pa'i blo sbyong bgyi ba/ sems can gyi don du sangs rgyas thob par bya/ khyad par gyis kyang rang gi lus la srin bu'i rigs brgyad khri bzhi stong yod pas/ de rnams da lta zang zing gis sdud la/ ma 'ongs pa na chos kyis sdud snyam du bsam/ zas nang du mid pa'i dus su sems can rnams kyi rgyu'i dus kyi sdig pa/ 'bras bu'i dus kyi sdug bsngal thams cad ko ba skyi gris bzhar ba bzhin du rang gi lus 'di'i steng du hril gyis smin par bsgom/ dbugs phyir rgyu ba'i dus su rang gi bde ba dang dge ba sems can la smin par bsgom/ de gnyis phar log tshur log tu bsgom/ sangs rgyas dang byang chub sems dpa' @164 thams cad kyi dge ba'i rtsab yang blos blangs nas sems can la smin par bsgom/ de ltar sems can rnams kyi rgyu dus kyi sdig pa/ 'bras bu'i dus kyi sdug bsngal bral/ byang chub mchog tu sems bskyed/ tshogs gnyis rdzogs nas sangs rgyas thob pa yang rgyu'i dus kyi sdig pa/ 'bras bu'i dus kyi sdug bsngal dang bral/ byang chub mchog tu thugs bskyed/ tshogs gnyis rdzogs nas bcom ldan 'das mi g.yo bar krong nge gyur par bsgom/ de nas rang bzhin gyi gnas nas bcom ldan 'das mi g.yo ba ye shes sems dpa' tshon gang ba gcig spyi bo'i steng du byon par bsam/ de la yid kyi sgo nas dad pa gus pa byed/ ngag gi sgo nas bstad pa byed/ mchod pa 'bul/ gsol ba btab/ da nas tshangs pa'i bu ga nas mar thim song nas stong pa nyid du cham cham snying gi thad kar sleb tsa na stong pa nyid du cham gyur par bsgom/ de'i ngang du 'bol le/ shigs se/ /lhod de; khril le bzhag /de'i 'phro la sems gnas na gnas su gzhug /de'i 'phro la gnyid du song na gnyid chos nyid du 'khyer ba'i man ngag yin/ de'i 'phro la shi na 'chi kha ma'i man ngag yin te/ bar dor phyag rgya chen po mchog gi dngos grub thob gsung nga/ /de' 'phro la bzlas pa byed na byin rlabs shin tu che ste/ sku gsung thugs kyi bzlas par 'gro ba yin/ yi dam lha bsgom pa de sku'i bzlas pa/ snying po bzlas pa de gsung gi bzlas pa yin/ stong pa nyid bsgoms pa de thugs kyi bzlas pa yin gsungs/ de las ldang bar 'dod na nam mkha' la 'ja' tshon chags pa bzhin du stong pa nyid kyi ngang las bcom ldan 'das mi g.yo ba lams te bskyed/ sngar bstim pa'i sems dpa' tshon gang ba de spyi bo'i steng na bzhugs par bsams la/ yid kyi sgo nas dad pa dang gus pa bya/ ngag gi sgo nas @165 bstod pa bya/ mchod pa 'bul/ gsol ba gdab/ de nas ras bris yod na de la bstim/ med na lugs ma'am gdung rten la bstim/ de lta bu mi zhugs na rang bzhin gyi gnas su gshegs su gsol/ sangs rgyas chos dang tshogs kyi mchog rnams la/ /zhes pa'i skyabs 'gro sems bskyed kyi bsdo ba lan gsum bya; da lta'i snang ba 'di rmi lam sgyu ma lta bur bsgom gsungs/ zas la rten pa'i le'u ste dang po'o// // dbugs la brten pa'i blo sbyong bzhugs/ ! gnyis pa dbugs la brten pa'i blo sbyong ni/ sems can gyi don du sangs rgyas thob par bya/ de'i ched du dbugs la brten pa'i blo sbyong bsgom snyam du bsams nas/ dbugs nang du rgyu ba'i dus su/ sems can rnams kyi sdug bsngal rang la smin par bsgom/ dbugs phyir rgyu ba'i dus su rang gi bde ba dang dge ba sems can la smin par bsgom/ de gnyis phar log tshur log tu bsgom/ sangs rgyas dang byang chub sems dpa' rnams kyi dge ba'i rtsa ba blos blangs nas sems can la smin par bsgom/ de ltar rang yang sdig sdug dang bral/ byang chub mchog tu sems bskyed la/ yi dam gyi bsgom bzlas sngar bzhin byas la/ dbugs la brten pa'i le'u ste gnyis pa'o// // ! gsum pa lus gangga'i klung gi bye ma de snyed du sprul nas rigs drug gi sdug bsngal dang du len pa'i blo sbyong bgyib/ sems can gyi don du sangs @166 rgyas thob par bya/ de'i ched du lus gangga'i klung gi bye ma snyed du sprul nas rigs drug gi sdug bsngal dang du len pa'i blo sbyong snyam du bsams la/ sems can dmyal ba'i gnas su rang gi lus gangga'i klung gi bye ma snyed du sprul nas sems can dmyal ba pa rnams kyi sdig sdug thams cad rang gi lus po de rnams kyi thog tu hril hril smin par bsgom/ rang gi bde ba dang dge ba thams cad dmyal ba pha la smin par bsgom/ de gnyis phar log tshur log tu bsgom/ sangs rgyas dang byang chub sems dpa' rnams kyi dge ba'i rtsa ba yang blos blangs nas sems can dmyal ba pa rnams la smin par bsgom/ de ltar sems can dmyal ba rnams sdig sdug dang bral/ byang chub mchog tu thugs bskyed/ tshogs gnyis rdzogs nas mtho ris lha mi thob par bsgom/ da ltar yi dags dud 'gro lha ma yin rnams kyis kyang lha mi'i lus thob par bsgom/ mi'i gnas su lus gang ga'i klung gi bye ma snyed du sprul nas mi rnams kyi sdig sdug thaMs cad rang gi lus po de rnams kyi steng du hril hril smin par bsgom/ rang gi bde dge mi rnams la smin par bsgom/ de gnyis phar log tshur log tu bsgom/ sangs rgyas dang byang chub sems dpa' rnams kyi dge ba'i rtsa ba rnams kyang blos blangs nas sems can rnams la smin par bsgom/ de ltar mi rnams sdig sdug dang bral/ byang chub mchog tu sams bskyed/ tshogs gnyis rdzogs nas sangs rgyas par bsgom/ de nas phyi snod kyi 'jig rten 'di rin po che'i snod yangs shing rgya che ba gcig tu bsgom/ rang gi lus dum bur gtubs la sha khrag gis khengs par bsgom/ de la dmigs nas oM AHhUM lan gsum brjod pas bdud rtsir gyur par bsgom/ sangs rgyas dang byang chub sems dpa' rnams kyi thugs ka nas ye shes kyi bdud rtsi babs pas kyang khengs par bsgom/ sum cu rtsa gsum @167 dang / byang sgra mi snyan dang / 'jig rten gyi khams kyi bdud rtsi dang bcud kyis khengs par bsgom/ de nas bdud rtsi rnams dang por bla ma yi dam gyi lha la 'bul/ de nas sangs rgyas dang byang chub sems dpa' rnams la 'bul/ de nas rigs drug rnams la 'bul bas de rnams thams cad kyis rnam par mi rtog pa'i ye shes chos sku brnyes par bsam/ de ltar lus ni sems can la drangs nas med/ sems la ni rang bzhin grub pa med pa'i ngang la lhan gyis bzhag /yi dam gyi bsgom bzlas sngar bzhin bya/ dge ba'i rtsa ba bsngo/ lus gangga'i klung gi bye ma snyed du sprul nas rigs drug gi sdug bsngal dang du len pa'i le'u ste gsum pa'o// // ! bzhi pa sha khrag la brten pa'i blo sbyong zhes bgyi ba/ sems can gyi don du sangs rgyas thob par bya/ de'i ched du sha khrag la brten pa'i blo sbyong snyam du bsam nas/ de nas rang gi khang pa sha khrag gis khengs par bsams la/ yi dwags sha khrag la dga' ba thams cad 'dus byas pas 'dus par bsgom/ de nas sha la dga' ba sha zo/ khrag la dga' ba khrag 'thung/ mgo bo ya bdud rgyal pos khyer/ rkang pa ma bdud rgyal mos khyer/ bar rnams lha 'dre gnyan dgus khyer/ rings na rjen par zo/ ma rings na tshos la zo/ thabs ji ltar legs pa bzhin du gyis byas nas byin pas/ sha zos/ khrag btungs/ rus pa kun yang mur bar bsam/ de ltar lus ni khong rnams la byin nas med/ sems la ni rang bzhin med pa'i ngang du lhan ne 'jog pa yin/ de nas blo rgya cher song nas lcags ri'i nang gang tsam/ lung pa gang tsam/ 'jig rten gyi khams thams cad sha khrag gis khengs par bsgom pa yin gsungs/ de nas ldang bar 'dad na @168 dge ba bsngo/ rmi lam lta bur bsgom/ sha khrag btang ba'i le'u ste bzhi pa'o// // ! lnga pa gtor ma la brten pa'i blo sbyong bgyi ba/ sems can thams cad kyi don dus sangs rgyas thob par bya/ de'i ched du gtor ma la brten pa'i blo sbyo bya snyam du bsams nas/ phyi snod kyi 'jig rten 'di rin po che yangs shing rgya che ba gcig tu bsgom/ rang gi lus dum bur gtubs la snod khengs par bsgom nas oM AHhUM lan gsum brjod pas bdud rtsir gyur par bsgom/ de bzhin gshegs pa rin chen mang la sogs pa bzhi'i mtshan brjod byas pas/ dam pa'i chos skyong ba' bsrung ma dpal mgon dang / lha mo la sogs pa sangs rgyas kyi bstan pa bsrung bar zhal gyis bzhes pa dkar phyogs la mngon par dga' ba rnams kyis bskor nas gsol bar bsams la/ na maH-sarba ta tha ga ta a wa lo ke te saM b+ha ra saM b+ha ra hUM/ lan gsum brjod pas sangs rgyas kyis gsol bar bsam/ rigs drug gi sems can thams cad mchod sbyin gyi gtor ma rgya chen po 'di bzhes la bdag dang sems can thams cad kyi rgyud la tshogs rdzogs par gyur cig /ces brjod/ bdag gi bsod nams stobs dang ni/ /zhes pa'i tshig brjod/ de ltar lus ni drangs nas med/ sems la ni rang bzhin med pas rang bzhin med pa'i ngang la lhan gyis gzhag /de nas ldang bar 'dod na/ dge ba bsngo/ rmi lam sgyu ma lta bur bsgom/ gtor ma la brten pa'i le'u ste lnga pa'o// // ! drug pa 'byung ba la brten pa'i blo sbyong bgyi ba/ spyod 'jug las/ sa sogs 'byung ba chen po dang / /nam mkha' bzhin du rtag par yang// @169 sems can dpag tu med pa yi/ /rnam mang nyer 'tsho'i rgyur yang shog /ces gsungs pas/ sems can gyi don du sangs rgyas thob par bya/ de'i ched du 'byung ba la brten pa'i blo sbyong bsgom snyam du bsam nas/ rang gi lus po 'di'i sha dang rus pa rnams phyi'i 'byung ba sa la thim par bsgom/ khrag dang chu ser rnams chu la thim par bsgom/ dbugs rnams rlung la thim par bsgom/ drod rnams me la thim par bsgom/ /lus 'byung ba bzhir gyur pa 'di sas sra zhing brtan pa'i sgo nas sems can gyi don byed/ chus brlan zhing gsher ba'i sgo nas sems can gyi don byed/ mes tsha zhing bsreg pa'i sgo nas sems can gyi don byed/ rlung gis yang zhing g.yo ba'i sgo nas sems can gyi don byed/ nyi ma dang zla ba gnyis mig gnyis su byas nas sems can gyi don byed pa yin te/ sems can zas za ba rnams rang gi sha za bar bsgom/ gos gyon pa rnams rang gi pags pa gyon par bsgom/ skom 'thung ba rnams rang gi khrag 'thung bar bsgom/ de nas sems can rnams kyi sdig sdug rang la smin par bsgom/ rang gi bde dge thams cad sems can la smin par bsgom/ de gnyis phar log tshur log tu bsgom/ sangs rgyas dang byang chub sems dpa' rnams kyi dge ba'i rtsa ba yang blos blang nas sems can la smin par bsgom/ de ltar sems can rnams sdig sdug dang bral/ byang chub tu sems bskyed nas tshogs gnyis rdzogs/ sgrib gnyis dag nas sangs rgyas par bsgom/ 'byung ba bzhi'i lus la oM AHhUM lan bdun brjod pas bdud rtsir gyur par bsgom/ sangs rgyas dang byang chub sems dpa' rnams kyi thugs ka nas ye shes kyi bdud rtse babs pas kyang khengs par bsgom/ sum cu rtsa gsum dang / byang sgra mi snyan dang / 'jig rten gyi khams bdud rtsi dang bcud du gyur pa thams @170 cad kyis kyang khengs par bsgom/ de dang por bla ma dang yi dam la dbul/ de nas sangs rgyas dang byang chub sems dpa' rnams la dbul/ de nas rigs drug gi sems can rnams la phul bas de rnams kyis bdud rtsi rnams ma lus par sangs kyis gsol bar bsam/ de rnams kyis rnam par mi rtog pa'i ye shes chos kyi sku thob par bsgom/ de ltar lus ni bla ma dang yi dam gyi lha/ sangs rgyas dang byang chub sems dpa'/ rigs drug rnams la phul nas med/ sems ni rang bzhin gyis grub pa med pa'i ngang la lhan gyis 'jog pa yin gsungs/ yi dam gyi bsgom bzlas sngar bzhin bya/ dge ba'i rtsa ba bsngo/ rmi lam sgyu ma lta bur bsgom/ 'byung ba la brten pa'i blo sbyong gi le'u ste drug pa'o// // ! bdun pa lus yid bzhin gyi nor bu rin po cher bsgyur ba'i blo sbyong zhes bgyi ba/ spyod 'jug las/ yid bzhin nor bu bum pa bzang/ /rigs sngags grub dang sman chen dang / /dpag bsam gyi ni shing dag dang / /lus can rnams kyi 'dod 'jor 'gyur/ /zhes gsungs pas/ sems can gyi don du sangs rgyas thob par bya ba'i don du lus yid bzhin gyi nor bu rin po cher sprul pa'i blo sbyang bsgom snyam du bsams nas/ de nas rang gi lus po 'di yid bzhin gyi nor bu rin po che kha dog sngon po dbyibs brgyad gzhogs che chung mi 'bring po'i brla tsam du gyur par bsgom/ de rgyal mtshan gyi rtse mo la btags nas mchod pa phul te gsal ba btab pas mi mnyam pa'i char gcig babs/ des sa gzhi la chag chag btab par bsgom/ yang mchod pa phul nas gsol ba btab pas mi mnyam pa'i rlung gcig blangs/ des sa gzhi la phyag dar byas par bsgom/ yang @171 mchod pa phul nas gsol ba btab pas bdud rtsi'i char babs pas sems can rnams kyi las dang nyon mongs pa dang tha mal gyi sha khrag thug pa sbyangs nas byang chub mchog tu thugs bskyed/ tshogs gnyis rdzogs nas sangs rgyas par bsgom/ yang mchod pa phul nas gsol ba btab pas rin po che'i char 'bebs pas de rnams la rin po che'i rgyan btags par bsgom/ yang mchod pa phul nas gsol ba btab pas lha'i na bza' panyca li ka'i char babs pas de rnams la na bza' gsol bar bsam/ yang mchod pa phul nas gsol ba btab pas zag med kyi bdud rtsi'i char babs pas 'jig rten gyi khams khengs par bsgom/ sangs rgyas dang byang chub sems dpa' rnams kyi thugs ka nas bdud rtsi babs pas kyang khengs par bsgom/ sum cu rtsa gsum dang / sgra ma snyan dang / 'jig rten gyi khams kyi bdud rtsi dang bcud du gyur pa thams cad kyis khengs par bsgom/ de yang dang po de bla ma yi dam gyi lha la 'bul/ de nas sangs rgyas dang byang chub sems dpa' rnams la 'bul/ de nas riT drug sangs rgyas pa de rnams la phul bas de rnams kyis bdud rtsi de tsho ma lus par sangs kyis gsol basde rnams thams cad kyis rnam par mi rtog pa'i ye shes kyi chos sku thab par bsgom/ de ltar lus ni bla ma dang yi dam gyi lha/ sangs rgyas dang byang chub sems dpa' dang rigs drug sangs rgyas pa rnams la 'bul/ sems la ni rang bzhin grub pa med pas rang bzhin ma grub pa'i ngang la lhan gyis 'jog /de las ldang bar 'dod na dge ba'i rtsa ba bsngo/ rmi lam sgyu ma lta bur bsgom/ lus yid bzhin gyi nor bu rin pa cher sprul ba'i le'u ste bdun pa'o// // @172 ! brgyad pa blo sbyong 'chi kha ma'i man ngag bgyi ba/ 'chi ba pha rol tu phyin pa drug gi sgo nas 'chi dgos pa yin/ 'chi ba'i dus su yo byad gsum cha gsum du bgos la/ cha gcig bla ma dang dkon mchog la dbul/ cha gcig tshogs gsog byed/ cha gcig la bkye bkang la sogs pa ci rigs su byed pa yin gsung / de sbyin pa yin/ tshul khrims la so sor thar pa'i ltung ba bshags bsdams byed/ smon 'jug gi sems bskyed sngar 'jug byed/ de tshul khrims yin/ bzod pa sngar 'khon yod na bzod gsol byed/ rtsan med na ka cha rna cha gcig tsam bsngos nas 'o cag gnyis 'di lta bu gcig yod pas bzod pa mdzod zer/ khos bzod pa len du ma btub na rang gi sems la mi bde ba med par byed pa yin/ brtson 'grus de rnams byed pa thams cad dga' spro dang bcas pas byed pa yin/ bsam gtan dang shes rab gnyis 'di'i khog na yod/ de nas dkon mchog gi spyan sngar mchod pa grub na rgyas par byed/ yan lag bdun pa rgyas par byed/ bdag gi rgyud la theg pa chen po'i blo sbyong gi rtogs pa phyin cim log pa skye bar byin gyis brlab tu gsol/ blo sbyong brjed pa'i gnas bzhir mi brjed par byin gyis brlab tu gsol/ 'chor ba'i gnas bzhir mi 'chor bar byin gyis brlab tu gsol/ ces gsol ba btab/ de nas dkon mchog gi spyan sngar yi ge baM dmar ser gcig bsgom/ de 'od du zhu bas padma'i sdong po gcig tu gyur par bsgom/ padma'i ze'u 'bru rin po che dar zab kyis brgyan pa la bla ma dang yi dam gyi lha tha mi dad par bsgom la/ sngar gyi mchod pa de rnams blos blangs la 'bul/ yan lag bdun pa bya/ sngar bzhin gsol ba gdab/ de nas phyogs dben par 'bol ba'i gdan la lus rnam snang chos bdun nam bsam @173 gtan gyi chos drug la bslab zer nas rkang pa rdo rje'i skyil krung bca'/ rgal tshigs gser gyi dong rtse brtsegs pa bzhin du drang tig ste srangs/ lag pa gnyis lte ba'i thad sor bzhi tsam bzhag pa'i sar mnyam par bzhag /mgrin pa lcags kyu ltar bkug cing rgyab mdun gtam gsung/ g.yon phyogs su chus chus pa lan gsum tsam byas pa'i sna chu thigs pa lte ba'i thad kar yong tsam byed/ mig sna rtse la gtad/ so bar rta rnga shongba tsam byed/ lce yar rkan la sbyor/ mig btsums pa'ang min/ btsums na byang nas 'gro/ bgrad pa'ang min/ bgrad na yengs nas 'gro/ lha'i spyan ltar zim zim du bya/ de nas shes pa de lte ba'i thad kar khyil khyil pa lan gsum byed pa yin gsungs/ de nas sems can gyi don du sangs rgyas thob par bya/ de'i ched du theg pa chen po'i blo sbyong 'chi kha ma'i man ngag bsgam snyam du bsaMs nas 'khor ba'i sdug bsngal 'di thams cad dge mi dge mi g.yo ba'i las gsum las byung/ de nyon mongs pas kun nas bslangs pa las byung/ nyon mongs pa brgyad khri bzhi stong de'i rtsab bdag tu 'dzin pa 'di yin pas rang bzhin grub pa med pa gcig yang bdag tu bzung nas 'di'i kha 'dzin shags 'debs byed byed nas las bsags/ las kyis 'khor bar 'khyams nas 'khor ba'i sdug bsngal la thug pa med cing mtha' mi mngon pa gcig nyams su myong / tshe 'di la yang kha 'dzin shags 'debs byas pas bde rgyu las sdug bsngal du song ba'am dge rgyu las mi dge bar song bas rang sa rang gi kha 'dzin dang / shags 'debs byas pas lan/ da man chad du yang bdag tu 'dzin pa 'di ma spangs na snga mkho na bzhin du 'khor bar 'khyams pas/ 'das ma 'ongs da ltar dus gsum du sdug tu 'jug mkhan rnag la gces par 'dzin pa'i 'gong po nga bdag bya ba 'di yin min la the tsho ma mi za/ @174 'dis kha 'dzin shags 'debs byas pas phan na mthong ba thos pa yid la 'byung ba rnams lag len du ma btab pa gcig kyang med de/ 'khor ba las sngar 'dis gang yang ring du ma song bas da gang legs legs la thong / byug /legs la thong snyam du bgyis la rang bzhin lengs skyur/ lhod des klod/ shig gis shig la zhog/ gzhan khams gsum 'khor ba'i sems can 'di rnams spyir mi spong ba yin/ drin can kyi pha ma sha stag kyang yin pas sems can gyi sdug bsngal rang la smin par bsgom/ rang gi bde ba dang dge ba sems can la smin par bsgom/ de gnyis phar log tshur log tu bsgom/ sangs rgyas dang byang chub sems dpa' rnams kyi dge ba'i rtsa ba yang blos blangs nas sems can la smin par bsgom/ de ltar sems can rnams sdig sdug dang bral nas sangs rgyas par bsgom/ rang yang sdig sdug dang bral nas yi dam gyi lha'i bsgom bzlas gong dang mthun no/ /de nas dkon mchog gi spyan sngar mchod pa grub na rgyas par byed/ yan lag bdun pa grub na rgyas par byed/ bdag gi rgyud la theg pa chen po'i blo sbyong gi rtoT pa phyin ci ma log pa skye bar byin gyis brlab tu gsal/ /blo sbyong brjed pa'i gnas bzhir mi brjed par byin gyis brlab tu gsol/ 'chor ba'i gnas bzher mi 'char bar byin gyis brlab tu gsol/ de nas 'chi ba rang gi dus su bye dbuT chad pa'i dus su sems gsal la rtog pa med pa/ ston ka'i nam mkha' sprin bral ba lta bu/ sems can thams cad la yong / de dang sngar gyi de gnyis gung bsgrig pa yin/ gung 'grig na chu sna dang breng 'breng ba bzhin du song nas de la lo'am zla ba tsam du gnas nas bar dor longs spyod rdzogs pa'i skur ldang ba yin te/ brtson 'grus can mthong chos la sangs rgyas pa yin gsung / der ma zin na bar do'i chos su ldang bas yin te/ bar do'i byis pa lo lnga lon @175 pa'i tshod tsam gcig 'ong/ kha dog lnga rnam pa lnga'i tshul du yod/ der sgyu ma'i dpe brgyad dang gnyis su med par shes na dug lnga ye shes lngar gyur nas 'gro ste/ chos kyi dbyings kyi ye shes dang mnyam pa nyid kyi ye shes gnyis chos kyi sku/ me long lta bu'i ye shes longs sku/ bya ba grub pa'i ye shes dang / so sor rtogs pa'i ye shes gnyis sprul pa'i sku'o/ /'od kha dog lnga po de la chags shing mngan par zhen na dug lngar gnas gyur nas rgyu drug tu 'khor zhing rigs drug tu 'khyams te skye ba len pa yin gsungs so/ /lar skye ba 'di'am bdun nam bcu drug thug pas sangs rgyas pa yin gsungs te/ 'khor ba thog mtha' med pa la ltos na sang nang gi tshod tsam yin gsung / shin tu le lo can skye ba brgyud nas sangs rgyas pa bya ba yin gsung / thun brgyad ma'i man ngag dge legs su gyur cig/ //mangga lam// dd]