@#/ /sprul ba'i sku rin po che nas gnang ba'i gsung rtsom tshigs bcad kyi 'grel ba dad pa'i 'jug ngogs zhes bya ba bzhugs so/ / @001a @##/ /na mo gu ru manydzu g+ho ShA ya/ 'dir khyab bdag 'khor lo'i mgon po srid zhi'i gtsug rgyan ^che shos rdo rje 'chang chen po'i mchog sprul rin po che nas dgung lo bcu thog gnas mchog ri bo rtse lngar mjal skabs rgyu mtshan 'ga' zhig la brten nas thol byung du rje btsun 'jam pa'i dbyangs la phyag 'tshal ba'i tshigs bcad gcig /'gro don bcu gnyis thams cad dang/ /zab dang rgya che'i gnas rnams kyi/ /rma bya'i sgro mdongs bcas rnams rgyas/ /shes rab ral gri la phyag 'tshal/ /zhes pa ljags rtsom gnang ba ni 'dir gang bshad par bya ba'o/ /de la phyag 'tshal ba'i skad dod na ma sre ni rab tu 'dud pa'i dor la 'jug pas sgo gsum rab tu @002a @##/ /dang ba chen pos phyag 'tshal lo zhes bshad pa'i gzhir drang ngo/ /yul gang la zhe na/ de bzhin gshegs pa thams cad kyi shes rab ye shes kyi sku rmongs pa'i dra ba gcod pa'i nges don gyi ral gri chen po lhag pa'i lha rje btsun 'jam pa'i dbyangs de la zhes pa'i la ni dgos ched de/ de'i ched du zhes pa'o/ / tshul ji lta bus zhe na/ 'gro ba mtha' dag la bu gcig pa'i ma ltar lhag par thugs brtse ba'i gzhan dbang du gyur pa'i thugs rje chen pos gzhan gyi don kho na mdzad pa'i tshul la rab tu dang bas zhes phyag bya ba'i don mdor bsdus pa dang rgyu mtshan lhan cig tu gsal bar mdzad do/ /'o na 'gro ba'i don mdzad tshul ji lta bu zhe na/ nyid kyis gzigs @002b ba'i lam bzang po gang yin pa de nyid 'gro ba rnams kyi rgyud la bskrun par mdzad pa'i phyir du gzhan phan gyi khur chen po skyo ba med pa'i thugs kyis khyer bas 'gro ba mgon med cing gting dang mtha' mi mngon pa'i 'khor ba sdug bsngal gyi rgya mtsho chen por ltung bas nyam thag pa rnams la rten 'brel yan lag bcu gnyis dang bden stong rnam pa bcu gnyis ldan gyi dam pa'i chos kyi tshul gyis 'khor bar 'jug ldog gi rim pa la nges pa ster ba'i sgo nas thar pa don gnyer gyi nges 'byung gi bsam pa bcos min rgyud la bskyed par mdzad pa dang/ nges 'byung de yang byang chub kyi sems rin po che rnam par dag pas zin pa med par bla na med pa'i byang chub kyi go 'phang bde ba dam pa'i rgyur mi 'gro bas byang chub kyi sems bskyed du btsud cing/ de yang rnam par dag pa'i rigs pa rnon po brgya phrag dag gi sgo nas ldog tu med pa'i nges pa brtan pos bdag gzhan mnyam brje'i byang chub kyi sems rin po che bskyed nas snyigs ma lnga bdo ba'i dus mtha' chos kyi mthun rkyen med par 'gal rkyen kho nas gang pa'i 'khor ba'i gnas btsan dug gi nags dang 'dra bar rgyal sras dpa' bo rma bya lta bus rkyen ngan lam du 'khyer ba'i sgo nas rgya che'i lam la slob tshul dang/ de ltar nges 'byung dang byang chub kyi sems la 'bad par byas kyang chos rnams kyi gnas lugs zab mo rtogs pa'i shes rab mi ldan par srid pa'i rtsa ba gcod @003a @#/ /par mi nus pas rten 'brel zab mo rtogs pa'i thabs la 'bad dgos shing de yang rgyu rkyen sna tshogs pa la brten nas snang ba'i rma bya'i sgro mdobs kyi mdangs kha dog sna tshogs pa so sor ma 'dres par gsal bar snang ba bzhin du las dge sdig las 'bras bu bde sdug 'byung ba sogs kun rdzob kyi chos rnams bsnyon med du so sor snang yang/ kha dog de dag snang ba ltar gyi don du grub ba rdul tsam yang med par gdod mnas ma grub pa'i gnas lugs su ro gcig pa ltar/ don dam par 'khor 'das kyi chos rnams rang bzhin gyis grub pa cung zad kyang med pa'i lta ba rnam par dag pa stong dang rten 'byung zung du 'jug pa dang stong pa nyid rgyu dang 'bras bur 'char ba'i tshul la nges pa brtan po rnyed pa'i sgo nas zab mo'i lam la slob tshul dang/ de'i steng du skal ba mchog dang ldan pa'i gdul bya rnams la 'jug dogs rmad du byung ba rdo rje theg pa'i lam zab ba mtshan med dang rgya che ba mtshan bcas lha'i 'khor lo'am/ zab pa rdzogs rim dang rgya che ba bskyed rim ma ma/ zab pa 'od gsal gyi ye shes dang rgya che ba sgyu ma'i sku sogs zab pa dang rgya che ba'i gnas rnams kyi ngo bo grangs nges go rim rnams ma nor bar nges pa'i sgo nas dpe rma byas dug kha zas su byed kyang dug gis mi gnod pa'i khar dug gi bcud kyis sgro @003b mdongs kyi mdangs rgyas shing phun sum tshogs pa'i rgyur 'gro ba bzhin du gdul bya rin po che lta bu'i gang zag dag gis rang bzhin shes pa'i sgo nas 'dod pa'i yon tan lnga la ci dgar longs spyod kyang mi gnod pa'i khar bde chen 'bar ba'i lam gyi grogs su byas te/ dga' ba bcu gnyis kyis drangs pa'i bde stong dbyer med kyi ye shes lam gyi srog tu byed pa las gzung 'dzin kun bskyed kyi rlung bcu gnyis la sogs pa'i las rlung gi rgyub dbyings su bcad de/ slob pa'i sa bcu gnyis po rim gyis mthar phyin par byas pa las/ kha sbyor yan lag bdun dang ye shes lnga ste bcu gnyis ldan gyi rdo rje 'chang gi go 'phang mngon du mdzad nas skad cig re la'ang sprul pa dpag tu med pas mkha' khyab kyi zhing du mdzad pa bcu gnyis kyi sgo nas 'gro ba'i don nam mkha' ji srid du sgrub nus pa'i lam yan lag dang bcas pa rnams legs par bstan par mdzad pas smin grol la 'god pa'i bar thams cad kyis phan btags pa dang/ de lta bu rtogs mi nus pa'i 'gro ba blo dman pa rnams kyi rmongs pa'i mun pa sangs shing gsung rab kyi don la rnam par dpyod pa'i blo gros bstsal te shes rab kyi snang ba rgyas par mdzad pa po zhes pa'o/ /tshigs rkang dang po gsum la thams cad dang rnams dang bcas zhes pa'i mang tshig sbyar ba'i gsung gi nus pas don de lta bu yong bar sems so/ / @004a @#/ /thugs gnyer ma gnang ba'i gnas skabs dang tshul bstun ched brda tshigs gi tshul du gnang yang brjod byed bsdu che la brjod don zab la rgya che bas bdag lta bus yongs rdzogs su spobs par mi nus pas mkhas pa rnams kyis rgya cher spros na phul du byung ba'i legs bshad du 'gyur ro/ /zhes pa dang ^ sprul pa'i sku rin po che nas gsung rtsom gyi thog ma gnang ba'i tshigs bcad 'di nyid don ldan gyi tshig tu byung tshe khyed rang gis 'di la 'grel ba gyis shig ces dam pa gang gi mdzod pa chos rje rin po che nas bka' phebs pa'i gsung gcog ma nus pa dang rang yang dang ba chen pos mtshams sbyar te/ khyab bdag 'khor lo'i mgon po rdo rje 'chang chen po 'di nyid kyi bka' 'bangs kyi tha shal du gtogs pa'i gyi na bar ba ming pa ye shes rgya mtsho'am ming gzhan tshangs sras bzhad pa'i blo rjes su 'dzin pa'i rgyur gyur cig dza yantu// //