@#/ /dge sbyong byed tshul gyi 'don bsgrigs snying gi thur ma bzhugs so/ / @001a @##/ /na mo badzra d+ha rA ya/ srid zhi'i tsha gdung gzhil mdzad bla ma dang/ /bslu med mchog gsum drang srong bden gsung tshogs/ /deng 'dir 'dod don kun 'grub tshe mjug 'dir/ /nyams len snying por lon pa'i shis pa stsol/ /'dir bdag legs su 'dod pa'i thar pa don gnyer can rnams kyis tshe mjug dgun nyi lta bur don ldan snying po len pa'i thabs bya sla la don che ba nyin zhag phrugs gcig gi dge sbyor kun dge phyogs su spyod tshul lag tu blang bde bar 'god pa la/ thog mar nam gyi gsum cha tho rangs la yar langs te gos tshag legs par bgos/ khrus byed skabs rnam 'joms kyi gzungs ring ngam @002a @##/ /gzungs thung bdun nam nyer gcig bzlas nas chu la sngags te khrus byed/ nang sgom phye gong 'jam dpal nag po'i gnad bcu gcig gi zhal gdams sogs mnos shing shes na 'dir nyams su blangs/ chus chag chag zil bu btab la phyags ma lag tu thogs nas lam chud ba'i rnam thar dran bzhin/ rdul spong/ dri ma spong/ zhes pa'am/ yang na/ kun slong dag pa stobs bzhi'i phyags ma yis/ /'gro kun las nyon nag nyil rnams phyag ste/ / me long ye shes rang mdangs gzhal med khang/ /g.ya' dag sems kyi steng du 'grub gyur cig /ces 'don bzhin byi dor legs par bya/ sku gsung thugs rten @002b rang gi bsod nams kyi zhing du gang bzhugs rnams la rdul sbug legs par byas/ gtsang zhing dwangs ba'i chu la bzang drug yod na legs par bsres nas yon chab ma mtha' bdun nam nyer gcig gam lnga bcu brgya stong sogs 'byor 'khos dang bstun nas ya yo khyag khyog yangs dog ran par sri zhu chen pos bkod nas 'bul/ spos dang/ mar me/ bsang bdug legs par byed/ de nas brkyang phyag lta bu lan gsum sogs 'tshal skabs/ bdag gis mchog gsum dam par phyag 'tshal mthus/ /zhes sogs sa skya paN chen gyis mdzad pa bton na legs mod/ mi sbro na/ oM na mo manydzu shri ye/ na maH su shri ye/ na maH utta ma shri ye swAhA/ lan gsum/ oM na mo b+ha ga wa te/ badzra sA ra pra ma dza ni/ ta thA ga tA ya/ arha te sa mya ksaM budd+hA ya/ ta dya thA/ oM badzre badzre/ mahA badzre/ mahA te dza badzre/ mahA bi dyA badzre/ mahA bo d+hi tsitta badzre/ mahA bo d+hi maNDo pa saM gram Na badzre/ sarba karma A Na bi sho d+ha ni badzre swAhA/ zhes mchod pa'i sprin gzungs lan gsum/ oM na mo b+ha ga wa te puShpeke tu rA dzA ya/ ta thA ga tA ya/ arha te samya ksaM budd+hA ya/ ta dya tha'/ oM puShpe puShpe swAhA/ puShpe su puShpe/ su 2puShpe udb+ha we/ puShpe A wa ka ri Ni swAhA/ zhes me tog 'bul sngags rnams brjod/ mar me 'bul skabs/ kun tu bzang po'i mchod pa'i sprin sa dang bar @003a @#/ /snang gi khyon thams cad yongs su gang bar gyur/ oM AH hUM/ lan gsum/ mar khu rgya mtsho yongs su 'khyil ba'i dbus/ /phun tshogs 'od stong 'bar ba'i sgron me yis/ /mun pa'i bskal ba ma lus mthar phyin nas/ /'gro kun sangs rgyas dngos su mthong bar shog /ces brjod/ de nas tsog tsog pur 'dug dus dran bsten/ yar langs nas phyag gsum 'tshal te gdan la 'khod nas sngags byin rlabs dang/ 'gyur sngags 'don bzhin gtor ma brgya rtsa/ tsha bsur sogs gang mos kyi gtor ma gtong/ de nas skyabs yul gsal btab ste skyabs 'gro stong dam/ lnga brgya 'am/ ma mtha' brgya tshar/ khrid dmigs ltar gyi tshogs zhing gsal btab nas/ dga' ldan lha brgya ma 'don/ dpal ldan sa gsum/ rje'i phyi nang gsang ba'i rnam thar dran bzhin/ mchog gi dngos grub brnyes la gsol ba 'debs/ zhes pa'i mtshams su dmigs brtse ma stong ngam brgya phrag sogs ci nus bzlas mthar deng brtsams ma/ lam yongs rdzogs la shar sgom dang 'brel bar byin rlabs spungs zhus dal brel ran par 'don/ de nas/ thab tu me sogs btang dus/ rnam thar sgo gsum tshon pa thab kyi nang/ /de nyid rtogs pa'i ye shes med dpung sbar/ /rang gzhan sgrib gnyis pud shing kun @003b bsregs te/ /kun mkhyen ye shes snang ba thob gyur cig /ces 'don b2zhin me 'bud/ ja 'thung dus ja mchod/ 'dren pa mnyam med ma'am/ bdag sogs 'khor bcas sogs gang rigs snying ga'i bla ma lha dkon mchog kun 'dus su gsal bar dmigs nas mchod pa 'bul na dkor sbyong du 'gyur bar gsungs/ de nas/ yi dam bde gsang 'jigs gsum 'khor chen sogs gang la gtso bor byed pa de'i bsgom bzlas dang mjug gtor 'bul bar nyams su blang/ thun mtshams su phyag dang bskor ba maNDal sogs ci lcogs byed pa las/ bre mo'i gtam dang 'du long sogs kyis bag med du dus 'da' bar mi byed/ gdugs kyi dus la bab pa na phud mchod sogs dam pa'i phyag bzhes bzhin rim pa gsum gyi bzo dbyibs lta bu 'chang bu gsum bcas bshams la/ dkon mchog rjes dran sogs kyi gong du rten 'brel bstod pa'am/ gnas bcu'i bstod pa gang rigs bton nas rjes dran 'don/ bza' btung tshar 'phral zas bsngo'i mjug tu ltung bshags ma Ni brgya tshar/ thub na jo bo rje'i phyag bzhes ltar sa tstsha dgu/ khams sang dang 'brel bar bskor ba sogs ci nus/ snga gung la lam rim che chung sogs dam pa'i rnam thar/ mdo mdzangs blun/ las brgya rtogs brgya/ sdom gsum slab bya sogs la zhib tu mjal na rang sems gcong bo 'dul ba'i cha rgyen du gyur bar @004a @#/ /gsung/ srod la babs dus chos srung rnams kyi gtor 'bul bsdus pa gser zhun ma lta bu'i sgo nas dang/ rang gi sger chos la gtor rgyun chag med rnams byed/ ma nyal gong kha phyir log gis yar langs ba nas nyal ba'i bar nyin zhag gcig gi ring la dge sdig ji 'dra byas 'dug brtag dpyad zhib mor byas nas dge ba sha stag byung na dga' ba sgom/ 'dres ma byung 'dug na dkon mchog la gsol ba 'debs/ chos srung la 'phrin bcol zhu/ sdig pa 'ba' zhig byung na rang la ? ngan bgrang tshul ni/ tshe thung lug mjug lta bu 'dis nyin zhag re re tsam yang don ldan du byed mi nus pa klad med/ khog rul/ tha chad khyod 'dra ba zhes du rgyu 'ong ba'i tshod tsam du rang gis rang la ngan ? bgrang nas/ bla ma mchog gsum srung mar bcas la sang phyin chad bdag gi blo ngan chos su 'gro bar byin gyis brlab tu gsol/ chos lam du 'gro bar byin gyis brlab tu gsol/ lam la bar chad med par byin gyis brlab tu gsol/ rgyud la nges 'byung bcos ma ma yin pa'i bsam pa rnal ma myur du skye bar byin gyis brlab tu gsol/ byang chub kyi sems rin po che myur du rgyud la skye bar byin gyis brlab tu gsol/ zab mo dbu ma'i lta ba myur du rgyud la skye bar byin gyis brlab tu gsol/ lam rim pa gnyis kyi rnal 'byor zab mo sgom nus par byin gyis brlab tu gsol/ @004b zhes yang yang gsol ba btab/ nang snga bar dkon mchog gi thugs rje la brten nas ma shi snga bar langs nas dge sbyor byed nus par shog ces smon 'dun nan tan tu byas nas sengge'i nyal stabs kyis nyal bar bya'o/ /sang tho rangs langs nas brjod ma thag pa ltar gyi dge sbyor la deng gi nyin 'dir don ldan du byed nus par bla ma lhas byin gyis rlobs shig ces smon bzhin dge sbyor la brtson par bya'o/ /tho rangs/ nyi shar/ tsha rting ma/ nyin gung/ sa srod/ nyal kha rnams su thun drug gi rnal 'byor gyi dmigs rnam gsal ba'i ngang nas tshar drug 'don/ rdor sems sgom bzlas dang 'brel ba'i yig brgya ma mtha' nyer gcig ya mtha' ci nus/ dam tshig rdo rje'i bzlas pa'ang ci nus/ za byed mkha' 'gro'i sbyin sreg kyang nyin rer brgya phrag re/ zag pa rgyun gtor gyi nyams len rnams rtag tu 'grus par byas na nyin mtshan kun tu don yod cing byas lal tshegs chung dus dal ba'i rten la snying po len pa'i thabs mchog tu 'gyur ro/ /smras pa/ yid bzhin nor bus mched zlar 'os min pa'i/ /rten bzang lan cig thob pa'i dus 'di ru/ /don ldan snying po len pa'i thabs tshul 'dir/ / 'jug pa'i skal bzang thob rnams e ma ho/ /nog chung don med za zi'i 'khrul spyod dang/ /bre mo'i gtam dang rnam g.yeng phyi bshol dang/ /mi tshe zad bzhin spre 'us snye ma'i dpe/ /'ga' tsam spyod pa blun po'i ngang @005a @#/ /tshul yin/ /da dung lag len mi khel bslab bya la/ /tshim med yang yang rna ba 'dzer ba'i don/ /gang mchis snag shog gron 2tsam gzhan ma mchis/ /de slad rang babs bsten na ci ma legs/ /(zhes pa 'di yang dka' bcu smon lam rgya mtsho nas lha rdzas 'o zhag dkar yol gang bcas bskul ngor ! chos med snyoms las pa chos kyi rdo rjes bris pa'o// //