@001a @#/ /mkhas mchog sbyin pa dar rgyas kyis mdzad pa'i yang dag mtha'i spyi don blo dman yid kyi mun sel ces bya ba bzhugs so/ / @001b @##/ /na mo gu ru mnya+dzu goha ShA ya/ mkhyen pa'i spyan gyis shes bya'i khyon kun gzigs/ /brtse ba'i thugs kyis 'gro kun bu bzhin skyong/ /mkhyen brtse'i dbang gis gdul bya'i dpal gyur ba/ /rje btsun 'jam dpal snying po'i zhabs la 'dud/ /ces mchod par brjod pa sngon du btang nas 'dir bshad pa skabs su babs pa ni/ rab 'byor/ byang chub sems dpa' rnams kyis ni/ nyan thos kyi lam gang yin pa dang/ rang sangs rgyas kyi lam gang yin pa dang/ sangs rgyas kyi lam gang yin pa'i lam thams cad bskyed par bya zhing lam thams cad shes par bya'o/ /de dag kyang yongs su rdzogs par bya zhing de dag gi lam gyi bya ba yang bya la/ smon lam yongs su rdzogs par ma byas pa dang/ sems can yongs su smin par ma byas pa dang/ sangs rgyas kyi zhing yongs su ma sbyangs par de dag gis yang dag pa'i mtha' mngon sum du ni mi bya'o/ /de'i phyir byang chub sems dpa' rnams kyi ni/lam gyi rnam pa shes pa nyid ces bya'o/ /zhes pa'i gzung 'di gang las 'phros na/ bcom ldan 'das/ ci'i slad du/ lam gsum gyi rnam pa tshal ba nyid byang chub sems dpa' rnams kyi lags zhes pa'i gzhung 'di las 'phros pa yin te/ 'phros tshul/ mdo snga ma 'di'i skabs su rab 'byor gyis bcom ldan 'das la lam shes kyis byang sems 'phags pa'i mngon @002a @#/ /rtogs bsdus pa'i rgyu mtshan dris pa la kho na re/ de ltar yin na/ bcom ldan 'das kyis de'i lan gsung tshul ji lta bu yin zhe na/ de la drangs ma thag pa'i gzhung 'di byung ba yin pa'i phyir/ 'di'i skabs su 'dir bstan lam gsum ngos bzung ba/ rdzogs smin sbyangs gsum byas pa'i tshad bshad pa/ nyan rang gi spangs rtogs kyi rigs dzogs pa'i tshad bshad pa/ 'dir bstan yang dag mtha' ngos bzung nas de mngon du byas pa'i tshad bshad pa dang bzhi las/ dang po ni/ gang zag gi bdag med mngon sum du rtogs pa'i mkhyen pa de/ nyan thos kyi lam gang yin dang zhes pa'i skabs nas bstan pa'i nyan thos kyi lam dang/ gnyis stong mngon sum du rtogs pa'i mkhyen pa de/ rang sangs rgyas kyi lam gang yin pa dang zhes pa'i skabs nas bstan pa'i rang rgyal gyi lam dang/ stong nyid mngon sum du rtogs pa'i mkhyen pa de/ sangs rgyas kyi lam gang yin pa'i zhes pa'i skabs nas bstan pa'i sangs rgyas kyi lam yin te/ rnam bshad snying po rgyan las nyan thos kyi lam gang yin pa gang zag gi bdag med rtogs pa'i ye shes dang/ rang sangs rgyas kyi lam gang yin pa gzung 'dzin rdzas tha dad kyis stong par rtogs pa'i ye shes dang/ sangs rgyas kyi lam gang yin pa chos thams cad bden med du rtogs pa'i lam gsum mo/ /zhes gsungs pa'i phyir/ de ltar yin kyang khyab pa ma nges @002b te/ theg dman gang zag gi rgyud kyi gang zag gi bdag med mngon sum du rtogs pa'i mkhyen pa de yang 'dir bstan nyan thos kyi lam ma yin/ theg chen gang zag gi rgyud kyi gang zag gi bdag med mngon sum du rtogs pa'i mkhyen pa de yang 'dir bstan nyan thos kyi lam ma yin te/ 'dir bstan nyan thos kyi lam yin na/ theg pa gsum ga'i gang zag gi rgyud la yod pas khyab pa'i phyir te/ de yin na/ khyod rgyud ldan gyi theg pa gsum ga'i gang zag yod pas khyab pa'i phyir/ 'phags pa yin na/ rang rgyud la 'dir bstan nyan thos kyi lam yod pas khyab ste/ 'phags pa yin na/ rang rgyud la gang zag gi bdag med mngon sum du rtogs pa'i lam yod pas khyab pa'i phyir/ 'phags pa yin na/ gang zag gi bdag med mngon sum du rtogs pas khyab pa'i phyir/ 'phags pa yin na/ rang rgyud la 'dir bstan rang rgyal gyi lam yod pas ma khyab ste/ gnyis stong ma rtogs pa'i nyan thos 'phags pa'i rgyud la de med pa'i phyir/ 'phags pa yin na/ rang rgyud la 'dir bstan sangs rgyas kyi lam yod pas ma khyab ste/ stong nyid ma rtogs pa'i nyan rang 'phags pa'i rgyud la de med pa'i phyir te/ theg chen 'phags pa yin na/ rang rgyud la 'dir bstan lam gsum ga yod pas khyab ste/ de yin na/ gang zag gi bdag med dang/ gnyis stong dang/ stong nyid gsum ga mngon sum du rtogs pas khyab pa'i phyir/ de bzhin du 'dir bstan rang rgyal gyi lam dang/ 'dir bstan sangs rgyas kyi lam gang rung yin na/ theg pa gsum ga'i gang zag gi rgyud la yod pas khyab cing/ gnyis stong mngon sum du @003a @#/ /rtogs pa'i mkhyen pa de/ 'dir bstan rang rgyal gyi lam yin kyang theg dman gang zag gi rgyud kyi gnyis stong mngon sum du rtogs pa'i mkhyen pa de/ 'dir bstan rang rgyal gyi lam ma yin pa sogs 'dir bstan sangs rgyas kyi lam la yang shes par bya'o/ /'dir bstan lam gsum gar ngo bo'i skabs su mngon sum du rtogs pa zhes pa'i khyad par ma sbyar kyang chog pa yin te/ rnam bshad las de ltar ma sbyar ba'i phyir/ des na/ 'dir bstan lam gsum 'gal yang spyir lam gsum mi 'gal te/ theg chen 'phags rgyud kyi gang zag gi bdag med rtogs pa'i mkhyen pa de/ nyan thos kyi lam/ rang rgyal gyi lam/ sangs rgyas kyi lam gsum ga yin pa'i phyir/ byas pa la kho na re/ rang rgyud pa yin na/ 'dir bstan lam gsum 'gal bar khas len pas khyab par thal/ skabs 'dir de gsum 'gal ba'i phyir/ 'dod na/ de yin na/ 'dir bstan lam dang po gnyis 'gal bar khas len pas khyab par thal/ 'dod pa'i phyir zer na ma khyab/ 'dod na/ slob dpon legs ldan 'byed chos can/ khyod kyis 'dir bstan lam dang po gnyis 'gal bar khas len par thal/ khyod rang rgyud pa yin pa'i phyir te/ khyod mdo sde spyod pa'i dbu ma rang rgyud pa yin pa'i phyir/ der thal/ khyod rang rig mi 'dod cing phyi don khas len pa'i rang rgyud pa yin pa'i phyir te/ rang rgyud pa la rang rig mi 'dod cing phyi don 'dod pa dang/ phyi don mi 'dod cing rang rig 'dod pa gnyis su yod pa las/ @003b slob dpon legs ldan 'byed dang ye shes snying po gnyis dang po dang/ slob dpon zhi ba 'tsho dang ka ma la shi+'a la dang/ 'phags seng la sogs pa'i rnal 'byor spyod pa'i dbu ma rang rgyud pa rnams gnyis pa yin pa'i phyir/ grub mtha' kun shes las/ 'di ni rang rig mi 'dod phyi don 'dod/ /de las ldog par smra ba gnyis su 'dod/ /dang po legs ldan ye shes snying po ste/ /gnyis pa zhi 'tsho yang sras rjes 'brang bcas/ /zhes gsungs pa'i phyir/ rtsa bar 'dod na/ de chos can/ khyod kyis 'dir bstan lam dang po gnyis 'gal bar khas mi len par thal/ khyod kyis gang zag gi bdag med rtogs pa'i mkhyen pa de/ 'dir bstan nyan thos kyi lam dang/ 'dir bstan rang rgyal gyi lam gnyis kar khas len pa'i phyir/ khyod kyis gnyis stong rtogs pa'i mkhyen pa de/ 'dir bstan rang rgyal gyi lam du khas mi len pa'i phyir/ der thal/ khyod kyis gzugs dang gzugs 'dzin pa'i tshad ma gnyis rdzas gzhan gyis stong par rtogs pa'i mkhyen pa de/ 'dir bstan rang rgyal gyi lam du khas mi len pa'i phyir/ khyod kyis de 'dra'i lam khas mi len pa'i phyir/ de skad du yang grub mtha' rgya mtshor 'jug pa'i gru rdzings las/ mdo sde spyod pa'i dbu ma rang rgyud pa'i lugs brjod pa'i skabs su/ gzung 'dzin rdzas gzhan gyis stong par rtogs pa'i lam zhal gyis mi bzhes la zhes gsungs pa'i phyir/ kha cig gis lung 'di'i tshig zin ltar/ slob dpon legs ldan 'byed kyi lugs la gzung 'dzin rdzas gzhan gyis stong par rtogs pa'i lam med zer na/ de'i lugs la de yod par thal/ de'i lugs la @004a @#/ /gzung 'dzin gnyis rdzas tha dad kyis stong par rtogs pa'i lam yod pa'i phyir/ de'i lugs la gzung 'dzin gnyis rdzas tha dad kyis stong pa yin pa'i phyir/ der thal/ de'i lugs la gzung 'dzin gnyis rdzas tha dad ma yin pa'i phyir te/ mdo sde pa nas thal 'gyur ba'i bar thams cad kyis gzung 'dzin gnyis rdzas tha dad ma yin par khas len pa'i phyir te/ de'i bar thams cad kyis de gnyis rdzas su ma grub par khas len pa'i phyir/ der thal/ de thams cad kyis de gnyis rtag par khas len pa'i phyir/ gzung 'dzin gnyis rtag pa yin pa'i phyir/ der thal/ gzung ba rtag pa yin pa'i phyir te/ gzhi grub na/ gzung ba yin dgos pa'i phyir/ gzhan yang gzung 'dzin gnyis rtag pa yin par thal/ rtag dngos gnyis rtag pa yin pa'i phyir/ ma khyab na/ gzung 'dzin gnyis rtag pa yin na/ 'dzin pa rtag pa yin dgos par thal/ de gnyis rtag pa ma yin pa'i rgyu mtshan 'thad pa'i phyir/ rtags khas/ 'dod na/ dngos po rtag pa yin par thal/ rtag dngos gnyis rtag pa yin pa'i phyir/ 'di gnyis rigs pa mtshungs so/ /yang kho na re/ slob dpon legs ldan 'byed kyi lugs la nyan rang 'phags pa'i rgyud la 'dir bstan sangs rgyas kyi lam med par thal/ de'i lugs la nyan rang 'phags pa'i rgyud la stong nyid rtogs pa'i mkhyen pa med pa'i phyir te/ de'i lugs la nyan rang 'phags pa'i rgyud la chos kyi bdag med rtogs pa'i mkhyen pa med pa'i phyir/ der thal/ de'i lugs la nyan rang 'phags pa la chos kyi bdag med rtogs pa med pa'i phyir/ slob dpon de'i @004b lugs bshad pa'i skabs su grub mtha' rgya mtshor 'jug pa'i gru rdzings las/ nyan rang la chos kyi bdag med rtogs pa med par bzhed cing zhes gsungs pa'i phyir/ zer na ma khyab ste/ lung de ni/ de'i lugs la dang po nyid nas theg dman du rigs nges pa'i nyan rang la chos kyi bdag med rtogs pa med ces pa'i don yin pa'i phyir/ stong thun skal bzang mig 'byed las/ de ltar lam gzhan du ma zhugs par rang lam gyis dgra bcom thob pa'i theg dman dgra bcom la chos kyi bdag med rtogs pa med par bzhed pa'i legs ldan sogs rang rgyud pa gzhan rnams kyi lugs la yang nyan rang 'phags pa yin na/ chos kyi bdag med ma rtogs pas khyab par khas len du mi rung ste/ de dag thams cad kyi lugs la ma gnes pa'i rigs can theg chen lam du zhugs pa'i byang sems chos kyi bdag med thos bsam gyis gtan la phab nas sgom par byed bzhin par rang lam las log nas nyan rang gi lam du zhugs pa 'dod pa'i phyir/ zhes gsungs pa'i phyir/ kha cig gis slob dpon de'i lugs la dang po nyid nas theg dman rigs nges kyi nyan rang 'phags pa yin na/ chos kyi bdag med ma rtogs pas ma khyab zer na/ de khyab par thal/ nyan rang 'phags pa yin na/ chos kyi bdag med ma rtogs pas khyab pa'i phyir te/ nyan rang yin na/ chos kyi bdag med ma rtogs pas khyab pa'i phyir te/ der thal/ nyan rang yin na/ gang dran dran yin dgos pa'i phyir/ yang kha cig gis nyan rang 'phags pa la chos kyi bdag med tshad mas rtogs pa dang gnyis yod la/ de'i rgyu @005a @#/ /mtshan gyis nyan rang 'phags pa gang rung yin na/ chos kyi bdag med tshad mas rtogs pas ma khyab zer na/ skyon de bzhag tu bcug nas de chos can/ chos kyi bdag med tshad mas rtogs par thal/ chos kyi bdag med tshad mas gzhal ba'i phyir/ ma grub na/ der thal/ chos kyi bdag med tshad ma'i gzhal bya yin pa'i phyir/ ma grub na/ kho rang gi skyon du bzhag pa de chos can du bzung nas chos kyi bdag med gzhal bya ma yin par thal/ chos kyi bdag med tshad ma'i gzhal bya ma yin pa'i phyir/ rtags khas/ zhes sogs sgrub byed gtong tshul shes par bya'o/ /skabs 'dir mtha' dpyad pa la/ dgag gzhag spang gsum las/ dang po la/ kha cig/ nyan thos kyi lam yin na/ nyan thos rang rgyud kyis bsdus pas khyab zer na/ byang sems 'phags pa'i rgyud kyi gang zag gi bdag med mngon sum du rtogs pa'i mkhyen pa chos can/ der thal/ de'i phyir/ kho na re/ de chos can/ nyan thos kyi lam ma yin par thal/ nyan thos kyi bgrod bya'i lam yang ma yin/ nyan thos kyi bgrod byed kyi lam yang ma yin pa'i phyir/ zer na ma khyab/ dang po ma grub na/ de chos can/ nyan thos kyi mi slob lam ma yin par thal/ nyan thos kyi bgrod bya'i lam yin pa'i phyir/ gnyis pa ma grub na/ nyan thos kyi slob lam yin par thal/ nyan thos kyi bgrod byed kyi lam yin pa'i phyir/ yang kho na re/ gang zag gi bdag med mngon sum du rtogs pa'i rnam mkhyen chos can/ nyan thos kyi theg pa yin par thal/ nyan thos kyi lam yin pa'i phyir/ zer na ma khyab/ 'dod na/ mthar thug nyan thos kyi theg pa grub par thal/ 'dod @005b pa'i phyir/ 'dod mi nus te/ skabs 'dir mthar thug theg pa gcig tu grub pa'i phyir/ gzhan yang rang rgyal gyi lam yin na/ rang rgyal gyi rgyud kyis bsdus pas khyab par thal/ nyan thos kyi lam la de'i phyir/ 'dod na/ byang sems 'phags pas rang rgyal gyi lam shes pa'i tshul de mig shes kyis gzugs la blta ba'i tshul kyis shes par byed pa yin par thal/ des de shes pa'i tshul yod pa gang zhig des de rang rgyud la bskyed pa'i sgo nas shes par byed pa ma yin pa'i phyir/ dang po grub ste/ yum bar ma'i mdo las/ lam thams cad bskyed par bya zhing/ lam thams cad shes par bya'o/ /zhes gsungs pa'i phyir/ gnyis pa grub ste/ de'i rgyud la rang rgyal gyi lam med pa'i phyir/ rtags khas/ rtsa bar 'dod na/ rnam bshad las/ rtogs pa 'dis bsdus pa'i gzhi shes kyang rnam gzhag gi rten rang sangs rgyas la rnam par bzhag kyang byang chub sems dpa'i thugs rgyud la yang skye bas/ rang sangs rgyas kyi lam shes pa'i tshul mig gis gzugs la blta ba ltar du go bar mi bya'o/ /zhes gsungs pa mi 'thad par thal/ 'dod pa'i phyir/ gzhan yang sangs rgyas kyi lam yin na/ sangs rgyas rang rgyud kyis bsdus pas khyab par thal/ nyan thos kyi lam la de'i phyir/ 'dod na/ theg chen gyi tshogs lam chos can/ der thal/ de'i phyir/ byas pa la kho na re/ sangs rgyas kyi sar bsgrod par byed pa'i lam yin na/ sangs rgyas kyi lam yin dgos par thal/ theg chen gyi tshogs lam de sangs rgyas kyi lam yin pa'i phyir/ 'dod na/ sangs rgyas 'phags pa'i sar bsgrod par byed pa'i lam yin na/ sangs rgyas 'phags pa'i lam yin dgos par thal/ 'dod pa @006a @#/ /phyir/ zer na ma khyab/ 'dod na/ theg chen gyi tshogs lam chos can/ der thal/ de'i phyir/ 'dod na/ de chos can/ 'phags lam yin par thal/ sangs rgyas 'phags pa'i lam yin pa'i phyir/ 'dod mi nus te/ khyod rgyud ldan gyi so skye yod pa'i phyir/ ma khyab mtshams la/ mthar thug gi thar par bsgrod par byed pa'i lam yin na/ mthar thug gi thar lam yin dgos par thal/ thar par bsgrod par byed pa'i lam yin na/ thar lam yin dgos pa'i phyir/ khyab pa 'grig/ ma grub na/ der thal/ lam yin na/ thar lam dgos pa'i phyir/ rtsa bar 'dod na/ theg chen gyi mthong lam chos can/ der thal/ de'i phyir/ 'dod na/ de chos can/ mthar thug gi lam yin par thal/ 'dod pa'i phyir/ 'dod mi nus te/ gnas skabs kyi lam yin pa'i phyir/ byas pa la kho na re/ theg chen gyi tshogs lam chos can/ sangs rgyas kyi slob lam yin par thal/ sangs rgyas kyi lam gang zhig/ sangs rgyas kyi mi slob lam ma yin pa'i phyir/ ma grub na/ de chos can/ mi slob lam yin par thal/ sangs rgyas kyi mi slob lam yin pa'i phyir/ rang res rtsa bar 'dod byas pa la kho na re/ sangs rgyas slob pa yod par thal/ sangs rgyas kyi slob lam yod pa'i phyir/ zer na ma khyab ste/ sangs rgyas nyan thos yod par thal/ sangs rgyas kyi nyan thos yod pa'i phyir/ khyab pa 'grig/ ma grub na/ der thal/ ston pa shAkya thub pa'i nyan thos yod pa'i phyir/ rtsa bar 'dod na/ sangs rgyas sems can yod par thal/ sangs rgyas nyan thos yod pa'i phyir/ rtags khas/ byas pa la kho na re/ nyan @006b thos dgra bcom pa de nyan thos kyi lam mthar phyin pa'i gang zag ma yin par thal/ sangs rgyas 'phags pa'i rgyud la nyan thos kyi lam yod pa'i phyir/ zer na ma khyab ste/ nyan thos dgra bcom pa'i rgyud kyi chos nyid de gnas lugs mthar thug ma yin par thal/ sangs rgyas 'phags pa'i rgyud la gnas lugs yod pa'i phyir/ khyab pa 'grig/ 'dod na/ nyan thos dgra bcom pa'i rgyud kyi chos nyid chos can/ gnas lugs mthar thug yin par thal/ chos nyid yin pa'i phyir/ gzhan yang rgyun mtha'i bar chad med lam skad cig dang po de sems dpa'i rnal 'byor mthar thug ma yin par thal/ de skad cig gnyis pa la gnas pa'i sems dpa'i rgyud la sems dpa'i rnal 'byor yod pa'i phyir/ khyab pa 'grig/ 'dod na/ de chos can/ sems dpa'i rnal 'byor mthar thug yin par thal/ skad cig ma'i sbyor ba yin pa'i phyir te/ rgyun mtha'i ye shes yin pa'i phyir/ kha cig gis rgyun mtha'i bar chad med lam la skad cig snga phyi med de/ de dus mtha'i skad cig ma yin pa'i phyir te/ skad cig ma'i sbyor ba zhes pa'i skad cig ma de dus mtha'i skad cig ma la byed pa'i phyir zer na/ mi 'thad de/ de'i skad cig ma bya rdzogs kyi skad cig ma la byed pa'i phyir te/ rnam bshad las/ rgyun gyi tha ma na dus cha med kyi skad cig ma ni/ mi srid pas bya rdzogs kyi skad cig ma'i thung mtha'o/ /zhes gsungs pa'i phyir/ byas pa la kho na re/ nyan thos kyi lam la grangs nges shig med par thal/ nyan thos kyi lam de la nyan thos kyi slob lam dang/ nyan thos kyi mi slob lam gnyis su grangs ma nges pa'i phyir zer na ma khyab/ ma grub na/ der thal/ byang sems 'phags pa'i rgyud kyi gang zag gi bdag med mngon sum du rtogs pa'i mkhyen pa @007a @#/ /de/ nyan thos kyi lam gang zhig/ de nyan thos kyi slob lam yang ma yin/ nyan thos kyi mi slob lam yang ma yin pa'i phyir/ ma khyab mtshams la/ byang sems kyi sdom pa la grangs nges shig med par thal/ byang sems kyi sdom pa de la byang sems so skye'i sdom pa dang/ byang sems 'phags pa'i sdom pa gnyis su grangs ma nges pa'i phyir/ khyab pa 'grig/ ma grub na/ der thal/ sangs rgyas 'phags pa'i rgyud kyi 'jug sdom de/ byang sems kyi sdom pa gang zhig/ de byang sems so skye'i sdom pa yang ma yin/ byang sems 'phags pa'i sdom pa yang ma yin pa'i phyir/ kha cig gis byang sems 'phags pa'i rgyud kyi gang zag gi bdag med mngon sum du rtogs pa'i mkhyen pa chos can/ theg dman gyi lam yin par thal/ nyan thos kyi lam yin pa'i phyir/ 'dod na/ de chos can/ theg dman gyi lam ma yin par thal/ theg chen gyi lam yin pa'i phyir/ zer na ma khyab ste/ theg pa 'bring gi lam yin na/ theg pa chung ngu'i lam ma yin dgos par thal/ theg chen gyi lam yin na/ theg dman gyi lam ma yin dgos pa'i phyir/ rtags khas/ 'dod na/ rang rgyal gyi mthong lam chos can/ der thal/ de'i phyir/ rtags grub ste/ rang rgyal gyi lam yin pa'i phyir/ 'dod na/ de chos can/ theg pa chung ngu'i lam yin par thal/ theg pa che chung gnyis su phye ba'i theg pa chung ngu'i lam yin pa'i phyir/ byas pa la kho na re/ nyan thos dgra bcom pa'i rgyud kyi stong nyid mngon sum du rtogs pa'i mkhyen pa de theg chen gyi lam yin par thal/ byang sems 'phags pa'i rgyud kyi gang zag gi bdag med mngon sum du rtogs pa'i mkhyen pa de theg dman gyi lam ma yin pa'i phyir/ zer @007b na ma khyab ste/ 'o na/ nyan thos dgra bcom pa'i rgyud la byang sems kyi lam shes pa'i lam shes yod par thal/ byang sems 'phags pa'i rgyud la nyan thos kyi lam shes pa'i lam shes yod pa'i phyir/ khyab pa 'grig/ byas pa la kho na re/ nyan thos dgra bcom pa'i rgyud kyi stong nyid mngon sum du rtogs pa'i mkhyen pa chos can/ theg chen gyi lam yin par thal/ theg chen gyi rtogs rigs su gnas pa'i 'phags rgyud kyi mkhyen pa yin pa'i phyir/ zer na ma khyab/ byas pa la/ de la khyab pa yod par thal/ theg dman gyi rtogs rigs su gnas pa'i mkhyen pa yin na/ theg dman gyi lam yin dgos pa'i phyir na yang ma khyab ste/ theg chen gyi rtogs rigs su gnas pa'i 'phags rgyud kyi mkhyen pa yin na/ lam shes yin dgos par thal/ theg dman gyi rtogs rigs su gnas pa'i 'phags rgyud kyi mkhyen pa yin na/ gzhi shes yin dgos pa'i phyir/ khyab pa 'grig/ 'dod na/ nyan thos dgra bcom pa'i rgyud kyi stong nyid mngon sum du rtogs pa'i mkhyen pa chos can/ der thal/ de'i phyir/ 'dod na/ de chos can/ theg chen 'phags rgyud kyi mkhyen pa yin par thal/ lam shes yin pa'i phyir/ kho na re/ theg chen gyi lam yin na/ theg chen gyi gang zag gi rgyud kyis bsdus pas khyab par thal/ nyan thos dgra bcom pa'i stong nyid mngon sum du rtogs pa'i mkhyen pa de/ theg chen gyi lam ma yin pa'i phyir/ 'dod na/ theg dman gyi lam yin na/ theg dman gang zag gi rgyud kyis bsdus pas khyab par thal/ 'dod pa'i phyir zer na ma khyab ste/ dge tshul gyi sdom pa yin na/ dge tshul gyi rgyud kyis bsdus pas khyab par thal/ dge slong la de ltar khyab pa'i phyir/ khyab pa @008a @#/ /'grig/ 'dod na/ sdom gsum rim gyis ma ros pa'i dge slong gi rgyud kyi dge tshul gyi sdom pa chos can/ der thal/ de'i phyir/ ma grub na/ der thal/ de'i rgyud la dge tshul gyi sdom pa yod pa'i phyir/ rtsa bar 'dod mi nus te/ dge slong gi rgyud la khyod yod pa'i phyir/ gzhan yang ngan 'gro'i lam yin na/ ngan 'gro'i rgyud kyis bsdus pas khyab pa dang/ bde 'gro'i lam yin na/ bde 'gro'i rgyud kyis bsdus pas khyab par thal/ nyan thos kyi lam la de'i phyir/ 'dod na/ dang po la mi dge bcu chos can/ der thal/ de'i phyir/ gnyis pa la dge ba bcu chos can/ der thal/ de'i phyir/ thal 'gyur gnyis ka'i rtags grub ste/ ngan 'gro'i lam dang/ bde 'gro'i lam gnyis ka yod pa'i phyir/ byams smon gyi mdo las/ ngan 'gro'i lam ni zlog bgyid cing/ /mtho ris lam ni rab ston la/ /zhes gsungs pa'i phyir/ yang kha cig gis gnas skabs kyi gang zag dang/ mthar thug gi gang zag gi gzhi mthun yod par thal/ gnas skabs kyi lam dang/ mthar thug gi lam gyi gzhi mthun yod pa'i phyir/ ma grub na/ der thal/ byang sems kyi lam dang/ sangs rgyas kyi lam gyi gzhi mthun yod pa'i phyir/ zer na ma khyab ste/ byang sems kyi lam yin na/ gnas skabs kyi lam yin pas khyab pa dang/ sangs rgyas kyi lam yin na/ mthar thug gi lam yin pas khyab pa gnyis ka yod par thal/ byang sems kyi lam dang/ sangs rgyas kyi lam gyi gzhi mthun yod na/ gnas skabs kyi lam dang/ mthar thug gi lam gyi gzhi mthun yod dgos pa'i phyir/ rtags khas/ 'dod na/ sangs rgyas kyi bka' yin na/ mthar thug gi @008b bka' yin dgos par thal/ 'dod pa'i phyir/ 'dod na/ nyan thos shA ri'i bu'i ngag tu gyur pa'i sangs rgyas kyi bka' chos can/ der thal/ de'i phyir/ 'dod na/ de chos can/ mthar thug gi yon tan yin par thal/ 'dod pa'i phyir/ 'dod mi nus te/ sems can kyi ngag yin pa'i phyir/ gzhan yang/ byang sems kyi sdom pa yin na/ gnas skabs kyi sdom pa yin dgos par thal/ 'dod pa'i phyir/ 'dod na/ sangs rgyas 'phags pa'i rgyud kyi 'jug sdom chos can/ der thal/ de'i phyir/ ma grub na/ der thal/ 'jug sdom yin pa'i phyir/ 'dod na/ de chos can/ gnas skabs kyi yon tan yin par thal/ 'dod pa'i phyir/ 'dod mi nus te/ mthar thug gi yon tan yin pa'i phyir/ sangs rgyas 'phags pa'i rgyud kyi yon tan yin pa'i phyir/ kho na re/ nyan thos kyi lam yin na/ byang sems kyi lam gyi ldog bya yin dgos par thal/ nyan thos kyi lam 'bras la dmigs nas longs spyod byar bden par zhen pa'i zhen rig de/ shes sgrib ldog pa gzung rtog yin pa'i phyir/ zer na ma khyab/ 'dod na/ byang sems 'phags pa'i rgyud kyi gang zag gi bdag med mngon sum du rtogs pa'i mkhyen pa chos can/ der thal/ de'i phyir/ ma khyab mtshams la/ nyan thos lam gyi 'bras bu yin na/ byang sems kyi lam gyi ldog bya yin dgos par thal/ nyan thos kyi lam 'bras la dmigs nas longs spyod byar bden par zhen pa'i zhen rig de/ shes sgrib ldog pa gzung rtog yin pa'i phyir/ khyab pa 'grig/ 'dod na/ nyan thos lam gyi 'bras bur gyur pa'i rnam mkhyen chos can/ der thal/ de'i phyir/ 'dod mi nus te/ rnam mkhyen yin pa'i phyir/ kha cig gis dman lam sngon du @009a @#/ /ma song ba'i byang sems sgom lam pa de/ nyan thos kyi lam sngon du song ba'i gang zag yin par thal/ de'i rgyud kyi gang zag gi bdag med mngon sum du rtogs pa'i mkhyen pa de/ nyan thos kyi lam yin pa'i phyir/ zer na ma khyab/ 'dod na/ de theg dman kyi lam sngon du song ba'i gang zag yin par thal/ de nyan thos kyi lam sngon du song pa'i gang zag yin pa'i phyir/ 'dod mi nus te/ dman lam sngon du ma song ba'i byang sems yin pa'i phyir/ ma khyab mtshams la/ byang sems sbyor lam pa de/ sar gnas kyi sems dpa' yin par thal/ byang sems kyi sbyor lam de/ byang sems kyi sa yin pa'i phyir/ khyab pa 'grig/ ma grub na/ der thal/ nyan thos kyi sbyor lam nyan thos kyi sa yin pa'i phyir te/ de rigs kyi sa yin pa'i phyir/ der thal/ dman pa sa brgyad kyi rnam gzhag 'thad pa yin pa'i phyir te/ rigs kyi sa/ brgyad pa'i sa/ mthong ba'i sa/ bsrabs pa'i sa/ 'dod chags dang bral ba'i sa/ byas pa rtogs pa'i sa/ nyan thos kyi sa/ rang rgyal gyi sa dang brgyad kyi rnam gzhag 'thad pa yin pa'i phyir/ 'dod na/ de chos can/ byang sems 'phags pa yin par thal/ sar gnas kyi sems dpa' yin pa'i phyir/ rtags khas/ byas pa la kho na re/ byang sems kyi mthong lam de/ byang sems kyi sa dang po ma yin par thal/ byang sems kyi sbyor lam byang sems kyi sa yin pa'i phyir/ zer na ma khyab ste/ byang sems mthong lam pa'i rgyud kyi gang zag gi bdag med rtogs pa'i mkhyen pa de/ rnal 'byor gyi sa dang po ma yin par thal/ byang sems sbyor lam pa'i rgyud kyi gang zag gi bdag med rtogs pa'i @009b mkhyen pa de/ rnal 'byor gyi sa yin pa'i phyir/ khyab pa 'grig/ 'dod na/ de chos can/ rnal 'byor gyi sa dang po yin par thal/ gang zag gi bdag med rtogs pa'i mkhyen pa yin pa'i phyir/ khyab ste/ gnyis stong rtogs pa'i mkhyen pa yin na/ rnal 'byor gyi sa gnyis pa dang/ bden med rtogs pa'i mkhyen pa yin na/ rnal 'byor gyi sa gsum pa yin dgos pa'i phyir/ der thal/ skabs 'dir rnal 'byor gyi sa la gsum yod cing/ de gsum la gang zag gi bdag med rtogs pa'i rnal 'byor gyi sa/ gnyis stong rtogs pa'i rnal 'byor gyi sa/ bden med rtogs pa'i rnal 'byor gyi sa gsum 'dran dgos pa'i phyir te/ rje btsun gyi skabs lnga ba'i thal phreng las/ rnal 'byor gyi sa la yul gyi sgo nas dbye na/ gang zag gi bdag med rtogs pa'i rnal 'byor gyi sa/ gnyis stong rtogs pa'i rnal 'byor gyi sa/ bden med rtogs pa'i rnal 'byor gyi sa dang gsum yod/ sa mtshams tshogs lam nas sangs rgyas kyi sa'i bar du yod ces gsungs pa'i phyir/ kho na re/ byang sems mthong lam pa'i rgyud kyi gang zag gi bdag med rtogs pa'i mkhyen pa chos can/ nyan thos kyi mthong lam yin par thal/ nyan thos kyi lam gang zhig/ mthong lam yin pa'i phyir/ zer na ma khyab/ 'dod mi nus te/ theg chen gyi mthong lam yin pa'i phyir te/ byang sems kyi mthong lam yin pa'i phyir/ gnyis pa la/ kha cig gis nyan rang gi rtogs pa'i rigs sa dang po nas rdzogs pa yin te/ sa dang po nas gang zag gi bdag med mngon sum du rtogs pa'i phyir/ nyan rang gi spangs pa'i rigs sa brgyad pa nas rdzogs pa yin te/ sa brgyad pa nas nyon yid gnas gyur cing nyon sgrib ma lus par @010a @#/ /spangs pa'i phyir zer na/ mi 'thad de/ nyon yid med pa'i phyir/ skabs 'dir rnam shes la tshogs drug tu grangs nges pa'i phyir/ gzhan yang sa brgyad pa nas nyon sgrib ma lus pa spangs pa de mi 'thad par thal/ sa bcu pa'i sgom spang nyon mongs yod pa'i phyir te/ brgyad stong 'grel chen las/ mthong ba dang sgom pa'i lam la yongs su sbyong ba'i chos kyi dbye bas rab tu dga' ba la sogs pa'i sa bcur rnam par bzhag go/ zhes gsungs pa'i phyir/ rong TIka pa na re/ nyan rang gi spangs rtogs gnyis ka sa dang po nas rdzogs la/ de yang nyan rang gi spangs pa sa dang po nas rdzogs pa yin te/ nyon sgrib la 'khor bar 'ching byed kyi nyon sgrib dang/ bag la nyal gyi nyon sgrib gnyis las 'khor bar 'ching byed kyi nyon sgrib de/ byang sems sa dang po pas kyang spangs la/ bag la nyal gyi nyon sgrib de/ nyan rang dgra bcom pas kyang ma spangs pa'i phyir te/ nyan rang dgra bcom pa rnams ma rig bag chags kyi sa dang/ zag med kyi las la brten nas yid kyi rang bzhin gyi lus len pa'i phyir zer na/ theg dman slob pa 'phags pa rnams dge 'dun dkon mchog ma yin par thal/ skyabs gnas yang dag la the tshom za ba'i the tshom gyi sa bon gyi dngos gnyen rgyud la skyes ma myong ba'i theg dman 'phags pa yod pa'i phyir to/ mthong lam bar chad med lam la gnas pa'i nyan thos 'phags pa'i rgyud la de'i dngos gnyen bar chad med lam skyes ma myong ba'i phyir/ der thal/ nyan thos kyi mthong lam bar @010b tshad med lam de/ de'i dngos gnyen bar chad med lam ma yin pa'i phyir/ nyan thos kyi mthong lam rnam grol lam pa ba des skyabs gnas yang dag la the tshom za ba'i the tshom gyi sa bon zad par ma spangs pa'i phyir/ der thal/ des nyon sgrib kun btags kyi sa bon zad par ma spangs pa'i phyir/ nyan thos dgra bcom pas nyon sgrib lhan skyes kyi sa bon zad par ma spangs pa'i phyir/ der thal/ des bag la nyal gyi nyon sgrib ma spangs pa'i phyir/ rtags khas/ gzhan yang ma rig bag chags kyi sa de nyon sgrib yin par thal/ nyan rang dgra bcom pas bag la nyal gyi nyon sgrib ma spangs pa'i shes byed du ma rig bag chags kyi sa dang/ zag med kyi las la brten nas yid kyi rang bzhin gyi lus len pa 'god rigs pa'i phyir/ rtags khas/ kha cig gis bag la nyal gyi nyon sgrib de/ shes sgrib yin zer na/ nyon sgrib la 'khor bar 'ching byed kyi nyon sgrib dang/ bag la nyal kyi nyon sgrib gnyis su 'byed mi rigs par thal/ bag la nyal gyi nyon sgrib shes sgrib yin pa'i phyir/ rtags khas/ de 'byed rigs par thal/ nyon sgrib la 'khor bar 'ching byed kyi nyon sgrib dag rang rgyud ldan gyi gang zag gi rgyud la bag la nyal ba'i tshul du gnas pa'i nyon sgrib gnyis su 'byed rigs pa'i phyir/ gzhan yang bag la nyal gyi nyon sgrib de/ shes sgrib ma yin par thal/ sgom sde spyi don las/ bag la nyal gyi nyon sgrib shes sgrib tu 'dod pa rnams rnam bshad la rgyab kyis phyogs pa yin pas dor bar bya'o/ /zhes gsungs pa'i phyir/ gzhan yang byang sems 'phags pa yin na/ @011a @#/ /nyon sgrib spangs pas khyab par thal/ nyan rang gi spangs pa'i rigs sa dang por rdzogs pa'i phyir/ 'dod mi nus te/ dman lam sngon du ma song ba'i byang sems 'phags pas nyon sgrib dang shes sgrib gcig car du spong ba'i phyir/ mngon pa kun btus las/ des byang chub thob pa na/ nyon mongs pa dang shes bya'i sgrib pa gcig car spong ngo/ /gcig car dgra bcom pa dang/ de bzhin gshegs par yang 'gyur ro/ /des nyon mongs ma spangs su zin kyang dper na/ sman dang sngags kyis bsad pa'i dug lta bu dang/ spangs pa'i dgra bcom pa ltar sa thams cad du nyon mongs pa'i nyes pa skyed par mi byed do/ /zhes gsungs pa'i phyir/ kha cig gis skyon med de/ dman lam sngon du ma song ba'i byang sems 'phags pas nyon mongs pa'i bag chags dang/ shes sgrib gcig car spong zhes pa lung de'i don yin pa'i phyir zer na/ spangs pa'i dgra bcom pa ltar zhes pa'i skabs nas bstan pa'i nyon mongs pa de nyon mongs pa'i bag chags la byed rigs par thal/ khyod kyi dam bca' 'thad pa'i phyir/ 'dod na/ nyan thos dgra bcom pas nyon mongs pa'i bag chags spangs par thal/ 'dod pa'i phyir/ 'dod na/ de chos can/ khyod kyis zag bcas kyi gnas ngan len spangs par thal/ 'dod pa'i phyir/ khyab ste/ zag bcas kyi gnas ngan len dang/ nyon mongs pa'i bag chags don gcig yin pa'i phyir/ bsdu ba las/ zag pa dang bcas pa'i gnas ngan len ni/ nyon mongs pa'i bag chags zhes gsungs te/ de yang dgra bcom pa dang/ rang sangs rgyas kyis ni/ ma spangs kyi/ de bzhin gshegs pa nyag gcig gis spangs @011b pa yin te/ de'i bag chags yang dag par bcom pa gang yin pa de ni/ sangs rgyas kyi chos ma 'dres pa zhes bya'o/ /zhes pa dang/ gser phreng las kyang/ zag pa'i gnas ngan len dang/ zag bcas kyi gnas ngan len gnyis las/ dang po nyan thos dgra bcom gyis spangs shing/ phyi ma sangs rgyas kho nas spangs par bshad pa'i phyir/ 'di dang ma rig bag chags kyi sa don gcig go/ zhes gsungs pa'i phyir/ gong du 'dod na/ de chos can/ khyod kyis shes sgrib spangs par thal/ 'dod pa'i phyir/ 'dod mi nus te/ sems can yin pa'i phyir/ gzhan yang nyi khri snang ba las/ rtogs pa'i tshad 'di tsam ma yin no/ /zhes bya ba ni/ rnam grangs gzhan yin no/ zhes sa dang po nas nyan rang gi spangs rtogs kyi rigs ma rdzogs par bshad pa de mi 'thad par thal/ de nas de rdzogs pa'i phyir/ rtags khas/ gzhan yang/ rgyan snang las/ de bas na sa dang po'i skad cig ma dang po ni/ mthong ba'i lam yin la/ de las gzhan skad cig ma gnyis pa la sogs pa nas rdo rje lta bur brjod pa'i bar chad med pa'i lam gang las de ma thag sangs rgyas kyi sa kun tu 'od thob pa'i bar 'di dag thams cad ni/ chos kyi dbyings mchog gi don la sogs par so sor rtogs pa'i phyir sgom pa'i lam yin par bshad de/ de la yang nyon mongs pa bcu drug po ci rigs par spong ngo/ /'di lta ste/ 'dod chags dang/ zhe sdang dang/ nga rgyal dang/ ma rig pa dang/ 'jig tshogs la lta ba dang/ mthar 'dzin par lta ba ste/ 'dod pa na spyod pa drug go/ de dag nyid las zhe sdang ma gtogs te/ gzugs dang/ gzugs med pa na spyod pa bcu'o/ /mthong ba dang/ sgom pa'i @012a @#/ /lam la yongs su sbyong ba'i chos kyi dbye bas rab tu dga' ba la sogs pa'i sa bcur rnam par bzhag go/ zhes theg chen gyi sgom spang nyon mongs la bcu drug gi dbye ba mdzad nas de sa bcu ga'i gnas skabs su spong par bshad pa de mi 'thad par thal/ nyan rang gi spangs rtogs kyi rigs sa dang po nas rdzogs pa'i phyir/ rtags khas/ 'o na ma rig bag chags kyi sa dang/ zag med kyi las de ji lta bu yin zhe na/ de yang yod de/ nyan rang dgra bcom pa dang/ dag sa la gnas pa'i sems dpa'i rgyud kyi gnas ngan len gyi dri ma phra mo de ma rig bag chags kyi sa dang/ de rnams kyi rgyud kyi yid lus len par 'dod pa'i kun slong gi rtsol ba phra mor gyur pa'i sems byung sems pa de/ zag med kyi las yin pa'i phyir/ kha cig gis dman lam sngon du ma song ba'i byang sems 'phags pas nyan rang gi spangs rtogs rdzogs pa dang sangs rgyas pa dus mnyam yin zer na/ dman lam sngon du ma song ba'i sangs rgyas 'phags pas nyan rang gi spangs rtogs rdzogs par thal/ dam bca' 'thad pa'i phyir/ 'dod na/ de'i rgyud la nyan rang gi spangs rtogs yod par thal/ 'dod pa'i phyir/ 'dod mi nus te/ nyan rang gang rung gi spangs rtogs gang rung yin na/ nyan rang gang rung gi rgyud kyis bsdus pas khyab pa'i phyir/ kha cig gis nyan rang gi spangs rtogs gang rung yin na/ nyan rang gang rung gi rgyud kyis bsdus pas khyab kyang de gang rung yin na/ nyan thos kyi rgyud kyis bsdus pas kyang ma khyab/ rang rgyal gyi rgyud kyis bsdus pas kyang ma khyab zer na/ de khyab par thal/ nyan rang gi spangs rtogs gang rung yin pa med pa'i phyir/ nyan rang gi spangs pa @012b yin pa yang med/ nyan rang gi rtogs pa yin pa yang med pa'i phyir/ dang po grub ste/ nyan thos kyi spangs pa yin na/ rang rgyal gyi spangs pa ma yin dgos pa'i phyir/ gnyis pa rigs 'dra'o/ /yang kha cig gis dman lam sngon du ma song ba'i byang chub sems dpas nyan rang gi spangs rtogs kyi rigs rdzogs pa dang/ rnam mkhyen thob pa dus mnyam zer na/ de yin na/ khyod kyis de dang rnam mkhyen thob pa dus mnyam pas khyab par thal/ 'dod pa'i phyir/ 'dod mi nus te/ rnam mkhyen ma thob par nyan rang gi spangs rtogs kyi rigs rdzogs par 'gyur ba'i dman lam sngon du ma song ba'i byang sems yod pa'i phyir te/ rnam mkhyen ma thob par rang rgyal dgra bcom pa'i 'bras bu thob par 'gyur pa'i de 'dra'i byang sems yod pa'i phyir/ kha cig gis dman lam sngon du song ba'i byang sems tshogs lam pas nyan rang gi spangs rtogs kyi rigs rdzogs zer na/ de yin na/ khyod kyis nyan rang gi spangs rtogs kyi rigs rdzogs pas khyab par thal/ dam bca' 'thad pa'i phyir/ 'dod na/ nyan thos mthong lam pa'i rtogs pa sngon du song zhing nyan thos dgra bcom pa'i rtogs pa sngon du ma song ba'i byang sems tshogs lam pa chos can/ der thal/ de'i phyir/ rtags grub ste/ de yod pa'i phyir/ nyan thos kyi mthong lam tsam nas theg chen lam du 'jug pa yod pa'i phyir/ nyan thos kyi tshogs lam tsam nas de ltar 'jug pa yod pa'i phyir/ rtsa bar 'dod na/ de chos can/ nyon sgrib spangs par thal/ nyan thos kyi spangs pa'i rigs rdzogs pa'i phyir/ rtags khas/ gzhan yang de chos can/ phyi rol don du 'dzin pa'i rtog pa spangs par thal/ rang rgyal gyi spangs pa'i rigs rdzogs pa'i phyir/ rtags khas/ kha cig gis theg dman dgra bcom pa'i rtogs pa sngon du song ba'i byang sems tshogs lam pas nyan rang gi spangs @013a @#/ /rtogs kyi rigs rdzogs zer na/ de yin na/ nyan rang gi spangs rtogs kyi rigs rdzogs pas khyab par thal/ khyod kyi dam bca' 'thad pa'i phyir/ 'dod na/ nyan thos dgra bcom pa'i rtogs pa sngon du song zhing rang rgyal dgra bcom pa'i rtogs pa sngon du ma song ba'i byang sems tshogs lam pa chos can/ der thal/ de'i phyir/ 'dod na/ khyod kyis rang rgyal gyi spangs rtogs kyi rigs rdzogs par thal/ 'dod pa'i phyir/ 'dod na/ de chos can/ khyod kyis phyi rol don 'dzin kyi rtog pa spangs par thal/ 'dod pa'i phyir/ gsum pa la/ kha cig /rang nyid sprul sku'i tshul du sangs rgyas pa'i sangs rgyas kyi zhing gi gdul bya rnams mngon shes dang mi ldan pa med par ma gyur pa de srid du rang nyid 'tshang mi rgya'o/ /zhes pa'i dam bca' ba'i dam bca'i nus pa rdzogs par byas pa de/ sprul sku'i dbang du byas pa'i smon lam rdzogs par byas pa'i tshad yin zer na/ sprul sku'i sku dngos kyi gdul bya yin na/ mngon shes dang ldan pas khyab par thal/ dam bca' 'thad pa'i phyir/ 'dod na/ ston pa sha'kya thub pa'i sku dngos kyi gdul byar gyur ba'i rgyun zhugs chos can/ der thal/ de'i phyir/ khyab pa khas/ rtags grub ste/ mchog gi sprul sku'i sku dngos kyi gdul bya yin pa'i phyir te/ de yod pa'i phyir/ der thal/ ston pa sha'kya thub pa'i sku dngos kyi gdul byar gyur pa'i phyir 'ong yod pa'i phyir/ rtsa bar 'dod na/ de chos can/ khyod kyis mngon shes thob par thal/ 'dod pa'i phyir/ 'dod na/ de chos can/ khyod kyis bsam gtan gyi dngos gzhi'i snyoms 'jug thob par thal/ 'dod pa'i phyir/ 'dod mi nus te/ rgyun zhugs yin pa'i phyir/ khyab ste/ bsngags @013b 'od bsngags bstod las/ khyod kyi bstan pa'i rdzas 'gro ba/ /bsam gtan dngos gzhi ma thob kyang/ /bdud kyi mig ras btsa' bzhin du/ /srid pa dag kyang zlog par byed/ /ces gsungs pa'i phyir/ kha cig gis de rgyal ba 'od dpag med kyis sprul sku'i smon lam rdzogs par byas pa'i tshad yin zer na/ ri bong rVa chos can/ rang nyid sprul sku'i tshul du sangs rgyas pa'i sangs rgyas kyi zhing gi gdul bya rnams mngon shes dang mi ldan pa med par ma gyur pa de srid du rang nyid 'tshang mi rgya'o/ /zhes dam bca' ba'i nus pa rdzogs par byas par thal/ rgyal ba 'od dpag med kyis sprul sku'i smon lam rdzogs par byas pa'i phyir te/ rgyal ba 'od dpag med de sangs rgyas 'phags pa yin pa'i phyir te/ de mchog gi sprul sku yin pa'i phyir/ rtsa bar 'dod na/ ri bong rVa chos can/ rang nyid yod par thal/ 'dod pa'i phyir/ yang kha cig/ skabs 'dir ni rnam bshad sgra ji bzhin par khas len mi rigs te/ gal te rigs na/ bde ba can gyi rten can gyi gang zag yin na/ mngon shes dang ldan pas khyab par thal/ rgyal ba 'od dpag med kyi sku dngos kyi gdul bya yin na/ mngon shes dang ldan pas khyab pa'i phyir/ 'dod na/ bde ba can gyi rten can gyi rgyun zhugs chos can/ der thal/ de'i phyir/ zhes zer ba mi 'thad de/ bde ba can gyi rten can gyi rgyun zhugs med pa'i phyir te/ de'i rten can gyi nyan thos slob pa 'phags pa med pa'i phyir/ der thal/ de'i rten can gyi lhag bcas myang 'das la gnas pa'i nyan thos dgra bcom pa med pa'i phyir/ ma grub na/ de'i rten can gyi lhag bcas myang 'das la gnas pa'i nyan thos dgra bcom pa'i rgyud kyi 'gog 'den chos can/ sdug bsngal gyi phung po'i lhag ma dang bcas par thal/ lhag bcas myang 'das yin @014a @#/ /pa'i phyir/ 'dod na/ bde ba can na sdug bsngal gyi phung po yod par thal/ 'dod pa'i phyir/ 'dod mi nus te/ mngon pa kun btus las/ yongs su dag pa'i 'jig rten gyi khams de dag ni/ sdug bsngal gyi bden pa ma yin par blta ste/ de dag ni/ las dang/ nyon mongs pa'i dbang gis skyes pa ma yin/ las dang/ nyon mongs pa'i dbang gis byung ba ma yin gyi/ smon lam dang/ dge ba'i rtsa ba'i dbang gis byung ba dag go/ zhes gsungs pa'i phyir/ gzhan yang bde ba can gyi rten la nyan thos dgra bcom pa'i 'bras bu gsar du thob pa yod par thal/ de'i rten can gyi nyan thos slob pa 'phags pa yod pa'i phyir/ 'dod na/ mdzod las/ 'dod par gsum thob tha ma ni/ /gsum du'o gong na mthong lam med/ /ces gsungs pa mi 'thad par thal/ nyan thos dgra bcom pa'i 'bras bu gsar du thob kha ma'i gang zag yin na/ khams gsum po gang rung gi gang zag yin pas ma khyab pa'i phyir/ bde ba can gyi rten la nyan thos dgra bcom pa'i 'bras bu gsar du thob pa yod pa'i phyir/ rtags khas/ gzhan yang/ rnam bshad las/ sprul sku'i dbang du byas na/ rgyal ba 'od dpag med kyis bdag sangs rgyas pa'i zhing 'dir mngon par shes pa dang mi ldan pa med par ma gyur pa de srid du bdag 'tshang mi rgya'o/ /zhes dam bcas pa lta bu sprul sku'i zhing khyad par can gyi gdul bya'i ched du gdams pa dang zhes sogs gsungs pa la/ kha cig/ langkar gshegs pa las/ 'dod pa'i khams dang gzugs med du/ /sangs rgyas rnam par 'tshang mi rgya/ /gzugs kyi khams kyi 'og min du/ /'dod chags bral khyod 'tshang rgya'o/ /zhes @014b gsungs pa mi 'thad par thal/ 'dod khams na gsar du sangs rgyas pa'i sangs rgyas yod pa'i phyir te/ bde ba can na gsar du sangs rgyas pa'i sangs rgyas yod pa'i phyir/ rnam bshad las de ltar gsungs pa sgra ji bzhin du khas len rigs pa'i phyir zer ba mi 'thad de/ lung de ni/ rgyal ba 'od dpag med kyis sprul sku'i tshul du sangs rgyas pa'i sangs rgyas kyi zhing der gdul bya rnams mngon shes lnga dang mi ldan pa med par ma gyur pa de srid du bdag 'tshang mi rgya'o/ /zhes dam bcas pa'i smon lam gyi nus pa yongs su rdzogs pa de/ rgyal ba 'od dpag med kyis sprul sku'i dbang du byas pa'i smon lam yongs su rdzogs pa'i tshad yin zhes pa'i don yin pa'i phyir/ kha cig gis bde ba can 'dod khams yin zer ba mi 'thad de/ de khams gsum gang rung gi nang du mi gtogs pa'i phyir/ der thal/ de dag pa'i zhing yin pa'i phyir/ byas pa la kho na re/ khams gsum po gang rung yin na/ ma dag pa'i zhing yin dgos par thal/ dam bca' 'thad pa'i phyir/ 'dod na/ 'og min stug po bkod pa'i zhing khams chos can/ der thal/ de'i phyir/ der thal/ gzugs khams yin pa'i phyir/ zer na/ ma khyab ste/ de gzugs khams yin kyang khams gsum gyi nang tshan du gyur pa'i gzugs khams ma yin pa'i phyir/ dper na/ de 'og min yin kyang gnas gtsang ma'i nang tshan du gyur pa'i 'og min ma yin pa bzhin yin pa'i phyir/ yang kha cig /'dod khams su gsar du sangs rgyas pa yod kyang 'dod pa'i rten la gsar du sangs rgyas pa med zer na/ de mi 'thad par thal/ 'dod pa'i khams su gsar du sangs rgyas pa med pa'i phyir te/ 'dod pa'i gnas su gsar du sangs rgyas @015a @#/ /pa med pa'i phyir/ der thal/ rgyan sdug pa bkod pa'i mdo las/ sangs rgyas mi gyur 'dod khams su/ /sangs rgyas mdzad pa mi mdzad do/ /zhes dang/ stong thun skal bzang mig 'byed kyi shog bu brgya dang nyi shu'i rgyab ngos rdzogs mtshams las/ pha rol tu phyin pa'i theg pa chen po'i lugs kyi dang por sangs rgyas pa'i gnas ni/ 'og min kho na dang/ byis 'tshang rgya ba'i tshul ston pa'i gnas ni/ 'dod khams yin la zhes gsungs pa'i phyir dang/ gzhan yang 'jug pa'i rang 'grel dang/ TIka chen gnyis kar/ 'og min du ni gang gi don du 'bad gyur go 'phang mchog zhi ba/ /zhes sogs kyi thad du yang de ltar bshad pa'i phyir/ kho na re/ 'dod khams su gsar du sangs rgyas pa yod par thal/ langkar gshegs pa las/ sprul pa po gcig 'dir 'tshang rgya/ /zhes gsungs pa'i phyir zer na ma khyab ste/ lung de'i don 'dod pa'i khams 'dir mchog gi sprul skur gsar du sangs rgyas pa yod ces pa'i don yin pa'i phyir/ stong thun las/ phyis 'tshang rgya ba'i tshul ston pa'i gnas ni/ 'dod khams yin la zhes gsungs pa'i phyir/ kha cig /rang zhid gang du sangs rgya 'gyur gyi sangs rgyas kyi zhing khyad par can gyi bcud kyi gdul bya 'grub pa'i dge ba'i rtsa ba bsags zin pa de/ smon lam yongs su rdzogs par byas pa'i tshad yin/ rang nyid gang du sangs rgya 'gyur gyi sangs rgyas kyi snod kyi zhing khyad par can 'grub pa'i dge ba'i rtsa ba bsags zin pa de/ sangs rgyas kyi zhing sbyangs pa'i tshad yin/ chos tshigs bcad gcig tsam bstan pas @015b rang gi sku dngos kyi gdul bya rnams smin grol gyi lam la 'god nus pa de/ sems can smin par byas pa'i tshad yin zer na/ dang po la ston pa shAkya thub pa chos can/ rang nyid gang du sangs rgya 'gyur gyi sangs rgyas kyi zhing yod par thal/ 'dod pa'i phyir/ 'dod na/ de chos can/ rang nyid sangs rgya 'gyur yin par thal/ 'dod pa'i phyir/ byas pa la kho na re/ byang sems 'phags pa chos can/ rang nyid sangs rgyas par thal/ rang nyid sangs rgyas pa'i sangs rgyas kyi zhing yod pa'i phyir zer na ma khyab/ byas pa la kho na re/ de la khyab pa yod par thal/ rang nyid sangs rgya 'gyur gyi sangs rgyas kyi zhing yod na/ rang nyid sangs rgya 'gyur yin dgos pa'i phyir zer na ma khyab ste/ rang nyid sems can du gyur pa yod na/ rang nyid sems can yin dgos par thal/ rang nyid sems can du 'gyur ba yod na/ rang nyid sems can yin dgos pa'i phyir/ khyab pa 'grig /ma grub na/ der thal/ sangs rgyas 'phags pa sems can du 'gyur ba mi srid pa'i phyir/ 'dod na/ ston pa shVakya thub pa chos canm der thal/ de'i phyir/ ma grub na/ der thal/ de rgyal po nga las nur gyur pa yod pa'i phyir te/ de ltar gyur pa'i dus yod pa'i phyir/ der thal/ mdo las/ nga de'i tshe de'i dus na rgyal po nga las nur gyur to/ /zhes gsungs pa'i phyir/ gzhan yang/ sems can smin par byas pa dang/ sems can smin pa gnyis don gcig par thal/ khyod kyis sems can smin par byas pa'i tshad de 'thad pa'i phyir/ 'dod na/ byang sems mthong lam pa chos can/ sems can smin par byas par thal/ sems can smin pa yin pa'i phyir te/ @016a @#/ /byang sems 'phags pa yin pa'i phyir/ 'dod na/ de chos can/ rdzogs smin sbyangs gsum byas pa'i gang zag yin par thal/ 'dod pa'i phyir/ 'dod mi nus te/ byang sems sa dang po pa yin pa'i phyir/ gzhan yang ston pa shAkya thub pa chos can/ sems can smin pa yin par thal/ sems can smin par byas pa'i phyir/ khyab pa khas/ ma grub na/ der thal/ rdzogs smin sbyangs gsum byas pa'i phyir te/ sangs rgyas 'phags pa yin pa'i phyir/ rtsa bar 'dod na/ de chos can/ sems can yin par thal/ sems can smin pa yin pa'i phyir/ khyab ste/ shing tog smin pa yin na/ shing tog yin dgos pa'i phyir/ kha cig /longs sku rang gi 'khor du byang sems 'phags pa sha stag 'byung ba'i dge rtsa bsags zin pa de/ longs sku'i dbang du byas pa'i smon lam rdzogs par byas pa'i tshad yin/ zhing bye ba phrag brgyar sku'i bkod pa grangs de snyed dang/ sku re re'i 'khor du sems can grangs las 'das pa la chos tshigs bcad re tsam bstan pas 'phags lam la 'god nus pa de/ sems can smin par byas pa'i tshad yin/ longs sprul gang rung gi zhing khyad par can 'grub pa'i dge rtsa bsags zin pa de/ sangs rgyas kyi zhing sbyangs pa'i tshad yin zer na/ rdzogs smin sbyangs gsum byas pa'i gang zag yin na/ sangs rgyas 'phags pa yin dgos par thal/ khyod kyi dam bca' de rnams 'thad pa'i phyir/ 'dod mi nus te/ rje btsun gyi thal phreng las/ rdzogs smin sbyangs gsum byas pa'i gang zag yin na/ sangs rgyas yin dgos pa de/ snga rabs pa kha cig gi lugs yin gyi/ rang lugs ma yin no/ /zhes gsungs pa'i @016b phyir; byas pa la kho na re/ rdzogs smin sbyangs gsum byas pa'i gang zag yin na/ sangs rgyas 'phags pa yin dgos par thal/ de yin na/ ma rig bag chags kyi sa dang/ zag med kyi las spangs pas khyab pa'i phyir/ rnam bshad las/ bar pa ni/ zhing bye ba phrag brgyar sku'i bkod pa grangs de snyed/ sku'i bkod pa re re'i 'khor du sems can grangs las 'das pa la chos tshigs bcad re res 'phags pa'i go 'phang la 'god nus pa ni/ ji srid kun slong gi rtog pa yod pa de srid du mi nus pas/ de 'dra dus gcig tu lan gcig byed pa yang 'bad med lhun grub tu 'byung ba la rag las shing/ ma rig bag chags kyi sa dang/ zag pa med pa'i las kyang spangs nas slar mi ldang ba'i tshul gyis zhi ba'i dbyings su snyoms par 'jug pa la ltos pa yin no/ /zhes gsungs pa'i phyir zer na/ skyon med de/ rnam bshad kyi lung gi don ni/ sgom sde spyi don las/ bar ba ni/ zhing bye ba phrag brgyar zhes sogs kyis 'khrul gzhi byas nas rdzogs smin sbyangs gsum byas pa'i sems can med par 'dod pa yang mi 'thad de/ lung de'i don ni/ zhing bye ba phrag brgyar sku'i bkod pa grangs de snyed/ sku re re'i 'khor du sems can grangs las 'das pa la chos tshigs su bcad pa re re bstan pas 'phags pa'i go 'phang la 'god bzhin pa'i gang zag yin na/ sangs rgyas yin pas khyab par bstan gyi/ de ltar 'god nus pa'i dge ba'i rtsa ba'i nus pa yongs su rdzogs pa'i gang zag la sangs rgyas kyis khyab par ma bstan pa'i phyir zhes gsungs pa ltar yin pa'i phyir/ rong TIka pa na re/ sems can thams cad kyi don du sangs rgyas thob par gyur cig /ces pa'i smon lam @017a @#/ /gyi don grub zin pa de/ smon lam yongs su rdzogs par byas pa'i tshad yin/ rang gi sku dngos kyi gdul bya rnams gnyen po dngos su skye rung dang/ spang bya dngos su spang rung du byas pa de/ sems can smin par byas pa'i tshad yin/ sangs rgyas rang snang la zhing yang dag pa rab 'byams 'ba' zhig snang pa de/ sangs rgyas kyi zhing sbyangs pa'i tshad yin zer na/ byang sems rgyun mtha' pa chos can/ sems can thams cad kyi don du sangs rgyas thob par gyur cig /ces ba'i smon lam gyi don grub zin par thal/ smon lam yongs su rdzogs par byas pa'i phyir/ 'dod na/ de chos can/ sangs rgyas zin par thal/ 'dod pa'i phyir/ gzhan yang/ ston pa shAkya thub pa chos can/ rang gi sku dngos kyi gdul bya rnams gnyen po dngos su skye rung dang/ spang bya dngos su spang rung du byas par thal/ sems can smin par byas pa'i phyir/ 'dod na/ ston pa shAkya thub pa'i sku dngos kyi gdul bya yin na/ lam zhugs kyi gang zag yin dgos par thal/ 'dod pa'i phyir/ 'dod mi nus te/ de'i sku dngos kyi gdul byar gyur pa'i lam ma zhugs kyi gang zag yod pa'i phyir te/ lam shes kyi mdo las/ lha'i bu gang dag gis bla na med pa yang dag par rdzogs pa'i byang chub tu sems ma bskyed pa de dag gis kyang bla na med pa yang dag par rdzogs pa'i byang chub tu sems bskyed par bya'o/ /zhes gsungs pa'i phyir/ gzhan yang/ ma dag pa'i zhing sangs rgyas la mi snang par thal/ sangs rgyas rang snang la zhing dag pa rab 'byams 'ba' @017b zhig snang ba'i phyir/ 'dod na/ de chos can/ thams cad mkhyen pa'i ye shes la mi snang bar thal/ 'dod pa'i phyir/ de chos can/ med par thal/ 'dod pa'i phyir/ khyab ste/ tshad ma rnam nges las/ thams cad mkhyen pa'i ye shes kyi gzigs pa las log pa ni/ rnam pa thams cad du med pa kho nar go bar bya'o/ zhes gsungs pa'i phyir/ bzhi pa la kha cig /chad pa'i myang 'das 'dir bstan yang dag mtha' yin zer na/ de chos can/ dman lam sngon du ma song ba'i byang sems 'phags pas rdzogs smin sbyangs gsum byas rjes su khyod mngon du byed par thal/ khyod 'dir bstan yang dag mtha' yin pa'i phyir/ khyab ste/ 'dir bstan yang dag mtha' yin na/ dman lam sngon du ma song ba'i byang sems 'phags pas rdzogs smin sbyangs gsum ma byas pa'i snga rol du rang nyid mngon du byed nus pas khyab pa dang/ dman lam sngon du ma song ba'i byang sems 'phags pas rdzogs smin sbyangs gsum ma byas pa'i snga rol du rang nyid mngon du mi byed pas khyab pa dang/ dman lam sngon du ma song ba'i byang sems 'phags pas rdzogs smin sbyangs gsum byas rjes su rang nyid mngon du byed pas khyab pa rnams re re nas yod dgos pa'i phyir/ 'dir bstan yang dag mtha' yin na/ de lta bu'i khyad chos gsum ldan gyi 'dir bstan yang dag mtha' yin dgos pa'i phyir te/ rnam bshad las/ chad pa'i myang 'das la byed pa yang rdzogs smin sbyangs gsum byas nas mngon du byed par don gyis bstan pa dang 'gal ba'i phyir zhes dang/ sgom sde spyi don las/ snga rabs pa kha cig /chad pa'i myang 'das 'dir bstan yang dag @018a @#/ /mthar 'dod pa yang mi 'thad de/ 'dir bstan yang dag mtha' yin na/ khyad chos gsum ldang gyi 'dir bstan yang dag mtha' yin dgos pa'i phyir/ zhes gsungs pa'i phyir/ rtsa bar 'dod mi nus te/ theg dman gyi myang 'das yin pa'i phyir te/ zhi mtha' yin pa'i phyir/ de yang yin te/ lam Tika theg chen sgo 'byed las/ srid par skye ba chad pa las thob pa'i myang 'das zhi mtha' dang/ de thob ba zhi ba'i mthar lhung ba zhes bya'o/ /zhes gsungs pa'i phyir/ yang kha cig /chos nyid de bzhin nyid de/ 'dir bstan yang dag mtha' dang/ de la slar mi ldang ba'i tshul gyi mnyam par bzhag pa 'dir bstan yang dag mtha' mngon du byas pa'i tshad yin zer na/ de 'gog pa la/ rnam bshad las/ yang dag pa'i mtha' de bzhin nyid tsam la byas nas de mngon du byas pa'i don/ de la slar mi ldang ba'i tshul du mnyam par bzhag pa la byed pa dang/ chos nyid dri bral gyi 'gog pa yang dag pa'i mthar byas nas de thob pa mngon du byas par bzhed pa rnams ni/ sangs rgyas ma thob bar du sangs rgyas mngon du mi bya'o/ /zhes pa'i don du 'gyur bas 'thad par dka' 'o/ /zhes gsungs/ 'di'i phyogs snga smra ba po dnag/ gong du rnam bshad las/ smon lam rdzogs pa'i tshad chos nyid la mnyam par bzhag bzhin du gzhan don 'bad med lhun grub tu byed nus pa la 'chad pa ni/ chos sku ma thob bar du chos sku mngon du mi bya'o/ /zhes par 'gyur bas dogs pa'i gnas med la zhes pa 'di'i phyogs snga smra ba po don gcig /de yang ar byang chub ye shes dang/ rje btsun red mda' ba gnyis de gnyis ka'i phyogs snga @018b smra ba po yin te/ sgom sde spyi don las/ skabs 'di'i phyogs snga smra ba po dang/ 'og tu rnam bshad las yang dag pa'i mtha' de bzhin nyid tsam la byas nas de mngon du byas pa'i don/ de la slar mi ldang ba'i tshul du mnyam par bzhag pa la byed pa dang zhes pa'i phyogs snga smra ba po gnyis don gcig yin te/ ar byang chub ye shes dang/ rje btsun red mda' ba sogs de gnyis ka'i phyogs snga smra ba po yin pa'i phyir zhes gsungs pa'i phyir/ de rnam bshad kyis 'gog tshul ni/ mchog gi sprul skus dman lam sngon du ma song pa'i byang sems 'phags pa la chos sku ma thob par du chos sku mngon du mi bya'o/ /zhes gdams rigs par thal/ des de la rdzogs smin sbyangs gsum ma byas par 'dir bstan yang dag mtha' mngon du mi bya'o/ /zhes gdams rigs pa gang zhig / rdzogs smin sbyangs gsum byas pa'i gang zag yin na/ chos sku mngon du byas pa'i gang zag yin pas khyab/ 'dir bstan yang dag mtha' mngon du byas pa'i gang zag yin na/ chos sku mngon du byas pa'i gang zag yin pas khyab pa'i phyir/ dang po grub ste; khyod kyi smon lam rdzogs pa'i tshad 'thad pa'i phyir/ gnyis pa grub ste/ chos nyid de bzhin nyid la slar mi ldang ba'i tshul gyis mnyam par bzhag pa'i gang zag yin na/ chos sku mngon du byas pa'i gang zag yin pas khyab/ 'dir bstan yang dag mtha' mngon du byas pa'i gang zag yin na/ chos nyid de bzhin nyid la slar mi ldang ba'i tshul gyi mnyam par bzhag pa'i gang zag yin dgos pa'i phyir/ dang po der thal/ khyod kyi 'dir bstan yang dag mtha' mngon du byas pa'i tshad de 'thad pa'i phyir/ @019a @#/ /rtags rnams rim par song/ des na/ mchog gi sprul skus byang sems la ji ltar gdams tshul yod de/ des theg chen rigs nges kyi byang sems la rdzogs smin sbyangs gsum ma byas bar du 'dir bstan yang dag mtha' mngon du mi bya'o/ /zhes gtso bor gdams nas lhag med myang 'das la gnas pa'i nyan thos dgra bcom pa'i rtogs sngon du song ba'i byang sems la deng phyin chad rdzogs smin sbyangs gsum ma byas bar du 'dir bstan yang dag mtha' mngon du ma byed cig /ces zhar la gdams pa'i phyir te; rnam bshad las/ des na/ gdams ngag 'di theg pa chen por rigs nges pa'i gang zag la gtso bor gdams pa yin la/ de yang byang chub kyi mchog tu sems bskyed pa nas bzung ste dmigs bsal gsum po ma rdzogs pa'i skabs gang du'ang yang dag pa'i mtha' mngon du mi bya'o/ /zhes gdams pa yin zhing/ gdul bya phal pa'i dbang du byas na/ nyan rang dgra bcom pa zhi ba'i dbyings las langs nas theg pa chen por sems bskyed pa nas bzung ste dmigs bsal gsum po ma rdzogs pa'i skabs gang du yang deng phyin chad yang dag pa'i mtha' mngon du mi bya'o/ /zhes gdams pa yin no/ /zhes gsungs pa'i phyir/ byas pa la kho na re/ rgyun mtha'i bar chad med lam pa chos can/ sangs rgyas 'phags pa yin par thal/ chos nyid de bzhin nyid mngon du byas pa'i gang zag yin pa'i phyir te/ chos nyid mngon du byas pa'i gang zag yin pa'i phyir/ ma grub na/ der thal/ chos nyid la slar mi ldang ba'i tshul gyis mnyam par bzhag pa'i gang zag yin pa'i phyir/ khyod kyis @019b chos nyid la mnyam par gzhag pa gang zhig /khyod mnyam gzhag de las slar ldang ba mi srid pa'i phyir zer na ma khyab/ de chos can/ khyod kyis chos nyid rang las tha dad pa'i tshul gyis rtogs par thal/ khyod kyis chos nyid rtogs pa gang zhig /chos nyid khyod dang tha dad yin pa'i phyir/ khyab pa 'grig /'dod mi nus te/ khyod kyis chos nyid rang las tha mi dad pa'i tshul gyis rtogs pa'i phyir te/ khyod chos nyid la gnyis snang nub pa'i gang zag yin pa'i phyir/ gzhan yang de chos can/ khyod kyis bden 'dzin skye mi rung ba'i chos can du byas par thal/ khyod gang zag gang zhig /bden 'dzin khyod kyi rgyud la skye mi rung gi chos can yin pa'i phyir/ khyab pa 'grig /'dod na/ de chos can/ khyod kyis bden 'dzin spangs par thal/ 'dod pa'i phyir/ byas pa la kho na re/ khyod kyis chos nyid mngon du byas par thal/ khyod kyis chos nyid mngon sum du rtogs pa'i phyir zer na ma khyab ste/ longs sku'i 'khor du byung ba'i byang sems 'phags pa chos can/ khyod kyis longs sku mngon du byas par thal/ khyod kyis longs sku mngon sum du rtogs pa'i phyir; khyab pa 'grig /kha cig /glo bur dri bral gyi 'gog pa 'dir bstan yang dag mtha' dang/ de thob pa 'dir bstan yang dag mtha' mngon du byas pa'i tshad yin zer na/ de chos can/ dman lam sngon du ma song ba'i byang sems 'phags pas rdzogs smin sbyangs gsum ma byas par khyod mngon du byed nus par thal/ khyod 'dir bstan yang dag mtha' yin pa'i phyir/ 'dod mi nus te/ khyod mngon du byas pa'i gang zag yin na/ sangs rgyas 'phags pa yin dgos pa'i phyir byas pa la kho na re/ @020a @#/ /rgyun mtha'i bar chad med lam chos can/ sangs rgyas 'phags pa yin par thal/ glo bur dri bral gyi 'gog pa mngon du grub pa'i gang zag yin pa'i phyir te/ de'i rgyud kyi 'gog bden de glo bur dri bral gyi 'gog pa yin pa'i phyir te/ de'i rgyud la glo bur gyi dri ma med pa'i phyir zer na ma khyab/ ma grub na/ de chos can/ khyod kyi rgyud la glo bur gyi dri ma med par thal/ khyod glo bur gyi dri ma'i dngos gnyen bar chad med lam la gnas pa'i sems dpa' yin pa'i phyir/ byas pa la kho na re/ sangs rgyas 'phags pa'i rgyud kyi 'dir bstan yang dag mtha' chos can/ dman lam sngon du ma song ba'i byang sems 'phags pas rdzogs smin sbyangs gsum ma byas par khyod mngon du byed nus par thal/ khyod 'dir bstan yang dag mtha' yin pa'i phyir/ ma grub na/ der thal/ sangs rgyas 'phags pa'i rgyud kyi 'dir bstan yang dag mtha' yod pa'i phyir te/ de'i rgyud la de yod pa'i phyir zer na ma khyab/ ma grub na/ 'dir bstan yang dag mtha' yin na/ sangs rgyas 'phags pa'i rgyud la med pas khyab par thal/ de'i rgyud la 'dir bstan yang dag mtha' med pa'i phyir/ rtags khas/ 'dod na/ khyab pa 'du byed kyi sdug bsngal nye bar zhi ba'i nyer zhi chos can/ der thal/ de'i phyir/ kha cig gis sangs rgyas 'phags pa'i rgyud kyi sgrib pa spangs pa'i spangs pa yod par thal/ de'i rgyud la sgrib pa spangs pa'i spangs pa yod pa'i phyir zer na/ rang res 'dod byas pa la kho na re/ sangs rgyas 'phags pa'i rgyud kyi sgrib pa chos can/ khyod yod par thal/ khyod spangs pa'i spangs pa @020b yod pa'i phyir zer na/ chos can skyon can yin te/ de ltar ma yin na/ sangs rgyas 'phags pa'i rgyud kyi bden bzhi mi rtag sogs bcu drug mngon sum du rtogs pa'i mkhyen pa med par thal/ de'i rgyud kyi de bcu drug med pa'i phyir/ yang sems can gyi rgyud kyi ngo bo nyid sku chos can; khyod yod par thal/ khyod du 'gyur rung gi rigs yod pa'i phyir zer ba la yang skyon can gyi lan gdab bo/ /kha cig gis lhag med myang 'das la gnas pa'i nyan thos dgra bcom pa'i rgyud kyi 'dir bstan yang dag mtha' chos can/ dman lam sngon du ma song ba'i byang sems 'phags pas rdzogs smin sbyangs gsum ma byas par khyod mngon du byed nus par thal/ khyod 'dir bstan yang dag mtha' yin pa'i phyir/ der thal/ de'i rgyud kyi 'dir bstan yang dag mtha' yod pa'i phyir te/ de'i rgyud la de yod pa'i phyir zer na/ ma khyab/ yang kha cig gis khyab pa 'du byed kyi sdug bsngal nye bar zhi ba'i nyer zhi de/ 'dir bstan yang dag mtha' dang/ de thob pa 'dir bstan yang dag mtha' mngon du byas pa'i tshad yin zer na/ lham med myang 'das thob pa'i rjes thob ye shes la gnas pa'i nyan thos dgra bcom pa chos can/ 'dir bstan yang dag mtha' mngon du byas par thal/ khyab pa 'du byed kyi sdug bsngal nye bar zhi ba'i nyer zhi thob pa'i phyir te/ de 'dra'i sdug bsngal spangs pa'i phyir/ rtsa bar 'dod na/ de chos can/ theg dman gyi dbang du byas pa'i 'dir bstan yang dag mtha' mngon du byas par thal/ theg dman gyi gang zag gang zhig /khyod kyis 'dir bstan yang dag mtha' mngon du byas pa'i phyir/ 'dod na/ de chos can/ lhag med myang 'das thob ma thag pa'i theg dman dgra bcom pa yin par thal/ 'dir bstan yang dag mtha' mngon du byas @021a @#/ /pa'i sems can yin pa'i phyir/ de mngon du byas pa'i theg dman gyi gang zag yin pa'i phyir/ rtags khas/ gzhan yang/ lhag med myang 'das thob pa'i nyan thos dgra bcom pa'i rtogs pa sngon du song ba'i byang sems sa brgyad pa chos can/ 'dir bstan yang dag mtha' mngon du byas pa'i gang zag yin par thal/ khyab pa 'du byed kyi sdug bsngal nye bar zhi ba'i nyer zhi thob pa'i gang zag yin pa'i phyir/ khyab pa khas/ 'dod mi nus te/ byang sems 'phags pa yin pa'i phyir/ khyab ste/ 'dir bstan yang dag mngon du byas pa'i byang sems 'phags pa med pa'i phyir te/ sgom sde spyi don du/ rnam bshad las/ nyer zhi'i dbyings las langs nas theg pa chen por zhugs pa rnams bar bar du yang dag pa'i mtha' mngon du byed kyang zhes sogs kyis 'khrul gzhi byas nas 'dir bstan yang dag mtha' mngon du byas pa'i byang sems 'phags pa yod par 'dod pa mi 'thad de/ de ltar na/ nyan rang theg chen du zhugs pa rnams la deng phyin chad dmigs bsal gsum ma rdzogs kyi bar du 'dir bstan yang dag mtha' mngon du ma byed cig /ces gdams pa byin pa las nyams par srid par thal ba'i skyon yod pa'i phyir/ 'o na lung de'i don gang zhe na/ yod de/ de lta bu'i byang sems des sngon goms pa'i dbang gis khyab pa 'du byed kyi sdug bsngal nye bar zhi ba'i nyer zhi la bar du mnyam par bzhag pa yod pa la dgongs pa'i phyir/ zhes gsungs pa'i phyir/ kho na re/ lhag med myang 'das thob pa'i nyan thos dgra bcom pa'i rtogs pa sngon du song ba'i byang sems 'phags pa chos @021b can/ 'dir bstan yang dag mtha' mngon du byas par thal/ theg dman lam du 'dir bstan yang dag mtha' mngon du byas pa'i phyir/ lhag med myang 'das thob pa'i gnas skabs su de mngon du byas pa'i phyir te/ de thob ma thag pa'i gnas skabs su de mngon du byas pa'i phyir/ zer na ma khyab ma grub na/ der thal/ des de mngon du byed myong ba'i phyir/ yang kha cig gis/ 'dir bstan yang dag mtha' de la dbye na/ theg dman gyi dbang du byas pa'i 'dir bstan yang dag mtha' dang/ theg chen gyi dbang du byas pa'i 'dir bstan yang dag mtha' gnyis yod zer na/ de gnyis re re nas 'dir bstan yang dag yin par thal/ 'dir bstan yang dag mtha' de la de gnyis su yod pa gang zhig /de gnyis re re nas de ma yin na/ de la de gnyis su yod mi zer/ thabs med kyi khral 'gel mkhan med pa'i phyir/ gong du 'dod na/ theg dman gyi dbang du byas pa'i 'dir bstan yang dag mtha' chos can/ dman lam sngon du ma song ba'i byang sems 'phags pas rdzogs smin sbyangs gsum byas rjes su khyod mngon du byed par thal/ khyod 'dir bstan yang dag mtha' yin pa'i phyir/ rtags khas/ 'dod na/ de 'dra'i byang sems 'phags pas rdzogs smin sbyangs gsum byas rjes su theg dman lam du de mngon du byed par thal/ 'dod pa'i phyir/ 'dod na/ de 'dra'i byang sems 'phags pa de/ rdzogs smin sbyangs gsum byas rjes su theg dman lam du 'jug par thal lo/ /gzhan yang theg chen gyi dbang du byas pa'i 'dir bstan yang dag mtha' chos can/ dman lam sngon du ma song ba'i byang sems 'phags pas rdzogs smin sbyangs @022a @#/ /gsum ma byas par khyod mngon du byed nus par thal/ khyod 'dir bstan yang dag mtha' yin pa'i phyir/ rtags khas/ 'dod na/ de 'dra'i byang sems 'phags pas rdzogs smin sbyangs gsum ma byas par yang dag mtha' mngon du byed nus par thal/ 'dod pa'i phyir/ 'dod na/ des de gsum ma byas par chos sku mngon du byed nus par thal/ 'dod pa'i phyir/ 'dod na/ des de gsum ma byas par rnam mkhyen thob nus par thal lo/ /gong du khyab pa yod de/ theg chen gyi dbang du byas pa'i 'dir bstan yang dag mngon du byas pa dang/ 'dir bstan yang dag mtha' mngon du byas pa gnyis don gcig yin pa'i phyir/ de re re nas mngon du byas pa'i sems can med pa'i phyir/ des na/ 'dir bstan yang dag mtha' yin na/ yang dag mtha' ma yin pas khyab ste/ yang dag mtha' yin na/ don dam bden pa yin pas khyab/ 'dir bstan yang dag mtha' yin na/ kun rdzob bden pa yin pas khyab pa'i phyir/ dang po grub ste/ yang dag mtha' yin na/ stong nyid yin dgos pa'i phyir/ stong nyid/ de bzhin nyid/ yang dag mtha'/ mtshan ma med pa'i dbyings/ don dam bden pa/ chos kyi dbyings rnams don gcig ming gi rnam grangs yin pa'i phyir te/ dbus mtha' rnam 'byed las/ stong pa nyid ni mdor bsdu na/ /de bzhin nyid dang yang dag mtha'/ /mtshan ma med dang don dam dang/ /chos kyi dbyings kyi rnam grangs so/ /zhes gsungs pa'i phyir/ gnyis pa grub ste/ 'dir bstan yang dag mtha' yin na/ myang 'das yin dgos/ myang 'das yin na/ 'gog bden yin @022b dgos; 'gog bden yin na/ kun rdzob bden pa yin dgos pa'i phyir/ 'di ni/ rang rgyud pa'i lugs yin la/ thal 'gyur pas 'dir bstan yang dag mtha' la don dam bden pas khyab par khas len te/ des de yin na/ 'gog bden yin pas khyab par khas len pa gang zhig /des 'gog bden don dam bden par khas len pa'i phyir/ dang po grub ste/ sems tsam pa/ rang rgyud pa/ thal 'gyur ba gsum gas 'dir bstan yang dag mtha' yin na/ 'gog bden yin dgos par 'dod pa'i phyir te/ de gsum gas 'dir bstan yang dag mtha' yin na/ myang 'das yin dgos par 'dod pa'i phyir/ gnyis pa grub ste/ thal 'gyur bas 'gog bden bden gnyis gang rung du 'dod pa gang zhig /des 'gog bden kun rdzob bden par khas mi len pa'i phyir/ dang po sla/ gnyis pa grub ste/ rnam bshad dgongs pa rab gsal las/ 'gog bden kun rdzob bden par smra ba ni/ mtha' mchod pa'o/ /zhes gsungs pa'i phyir/ kha cig gis/ thal 'gyur ba'i lugs la 'dir bstan yang dag mtha' yin na/ don dam bden pa yin pas khyab kyang de yin na/ stong nyid yin pas ma khyab zer na/ mi 'thad de/ thal 'gyur bas 'dir bstan yang dag mtha' de stong nyid du khas len pa'i phyir te/ des 'dir bstan yang dag mtha' de de bzhin nyid du khas len pa'i phyir/ der thal/ rnam bshad snying po rgyan las/ 'gog bden don dam pa'i bden par bzhed pa'i shing rta chen po rnams kyi bzhed pa ltar na ni/ sher phyin gyi mdo'i skabs 'dir bstan yang dag mtha' de bzhin nyid 'ba' zhig la bshad par bya ba kho na'o/ /zhes gsungs pa'i phyir/ @023a @#/ /de yan chad kyi gzhan lugs dgag pa de song nas gnyis pa rang lugs bzhag pa la/ spyir btang dmigs bsal gyi don bshad pa/ 'dir bstan lam gsum ngos bzung ba sogs lnga las/ dang po ni/ zas ma zhu bar du sman mi za'o/ /zhes spyir btang bas zas zhu nas sman za ba don gyis go ba ltar/ rdzogs smin sbyangs gsum ma byas bar du 'dir bstan yang dag mtha' mngon du mi bya'o/ /zhes brjod pas rdzogs smin sbyangs gsum byas nas 'dir bstan yang dag mtha' mngon du byed par go ba'i dngos shugs kyi don la spyir btang dmigs bsal mi 'byed par lam gyi bya ba yang bya la zhes lam gyi bya ba la bya ste/ 'grel ba las/ de kho na nyid mngon du mi byed pa'i rten can zhes pa'i skabs su slob dpon chos bshes kyis gang zag la bdag med pa'i mtha' zhi ba nyid ces de nyid 'dir bstan yang dag mthar ngos bzung ba'i phyir/ khyab pa 'du byed kyi sdug bsngal nye bar zhi ba'i nyer zhi de la gang zag la bdag med pa'i mtha' zhi ba zhes brjod pa'i rgyu mtshan yod de gang zag gi bdag med sgom pa'i mthar thob dgos pa'i rgyu mtshan gyis de ltar brjod pa'i phyir/ de yang khyab pa 'du byed kyi sdug bsngal nye bar zhi ba'i nyer zhi nyid 'dir bstan yang dag mtha' yin gyi nyon sgrib spangs pa'i spangs pa dang/ phyi rol don 'dzin gyi rtog pa spangs pa'i spangs pa dang/ shes sgrib spangs pa'i spangs pa rnams 'dir bstan yang dag mtha' ma yin te/ rgyu mtshan 'og nas shes par 'gyur ba'i phyir/ 'dir bstan yang dag mtha' mngon du byas pa'i tshad yod de/ khyab pa 'du byed @023b kyi sdug bsngal nye bar zhi ba'i nyer zhi la rang gi bsam ngo la ltos te slar mi ldang ba'i tshul gyis mnyam par bzhag pa dang/ khyab pa 'du byed kyi sdug bsngal nye bar zhi ba'i nyer zhi la slar mi ldang ba'i tshul gyis mnyam par bzhag pa gang rung de/ spyir 'dir bstan yang dag mtha' mngon du byas pa'i tshad yin pa'i phyir/ theg pa so so'i dbang du byas na/ khyab pa 'du byed kyi sdug bsngal nye bar zhi ba'i nyer zhi la rang gi bsam ngo la ltos te slar mi ldang ba'i tshul gyis mnyam par bzhag pa de/ theg dman gyi dbang du byas pa'i 'dir bstan yang dag mngon du byas pa'i tshad yin/ theg dman gyi dbang du byas pa'i 'dir bstan yang dag mtha' mngon du byas pa/ theg dman lam du 'dir bstan yang dag mtha' mngon du byas pa/ rdzogs smin sbyangs gsum ma byas par 'dir bstan yang dag mtha' mngon du byas pa rnams don gcig /khyab pa 'du byed kyi sdug bsngal nye bar zhi ba'i nyer zhi la slar mi ldang ba'i tshul gyis mnyam par bzhag pa de/ theg chen gyi dbang du byas pa'i 'dir bstan yang dag mtha' mngon du byas pa'i tshad yin/ theg chen gyi dbang du byas pa'i 'dir bstan yang dag mtha' mngon du byas pa/ theg chen lam du 'dir bstan yang dag mtha' mngon du byas pa/ rdzogs smin sbyangs gsum byas rjes su 'dir bstan yang dag mtha' mngon du byas pa rnams don gcig go /de yang dman lam sngon du ma song ba'i byang sems rnams kyis mthong lam thob ma thag nas 'dir bstan yang dag mtha' mngon du byed nus te/ theg chen gyi gnas skabs su nyan rang gi spangs rtogs kyi rigs rdzogs par byed pa'i nus pa/ @024a @#/ /thob pa'i phyir te/ nyi khri snang ba las/ gzhan yang rgyun tu zhugs pa nas rang sangs rgyas kyi bar gyi shes pa dang spangs pa gang yin pa de ni/ mi skye ba'i chos la bzod pa thob pa'i byang chub sems dpa'i bzod pa ro/ / bzod pa gang zhe na/ sdug bsngal la chos shes pa'i bzod pa'o/ /zhes theg chen gyi mthong lam sdug bsngal chos bzod kyi byed par nyan rang gi spangs rtogs kyi byed pa spyir btang nas rdzogs smin sbyangs gsum ma byas bar du 'dir bstan yang dag mtha' mngon du mi bya'o/ /zhes dmigs kyis bsal ba yin te/ dper na/ thams cad kyang dgra bcom pa zag pa zad pa zhes spyir btang nas gang zag gcig ma gtogs pa ni/ 'di lta ste/ slob pa rgyun du zhugs pa tshe dang ldan pa kun dga' bo'o; ;zhes dmigs kyis bsal ba lta bu'o/ /gnyis pa 'dir bstan lam gsum ngos bzung ba ni/ gong du song zin la/ rab 'byor gyi sgra bshad yod de/ nyan thos nyon mongs med pa rnams kyi nang na mdzes shing mchog tu gyur pas na/ rab dang/ ting nge 'dzin la sogs pa sems kyi yo byad phun sum tshogs pa rang rgyud la 'byor pas na/ 'byor ces brjod pa'i phyir te/ gser phreng las/ nyan thos nyon mongs pa med pa rnams kyi nang na mdzes shing mchog tu gyur pas na/ rab/ sems kyi yo byad phun sum tshogs pa yod pas 'byor ba ste/ de la bos nas gsungs so/ /zhes gsungs pa'i phyir/ gsum pa ni/ sangs rgyas kyi zhing khyad par can gyi gdul bya'i don du dam bcas pa'i smon lam gyi don 'grub pa'i rgyu'i dge rtsa'i nus pa yongs su rdzogs @024b pa de; smon lam rdzogs par byas pa'i tshad yin/ zhing bye ba phrag brgyar sku'i bkod pa grangs de snyed dang/ sku re re'i 'khor du sems can grangs med pa la chos tshigs bcad re bstan pas 'phags lam la 'god nus pa'i rgyu'i dge rtsa'i nus pa yongs su rdzogs pa de/ sems can smin par byas pa'i tshad yin/ longs sprul gang rung gi zhing khyad par can 'grub pa'i rgyu'i dge rtsa'i nus pa yongs su rdzogs par byas pa de/ sangs rgyas kyi zhing sbyangs pa'i tshad yin la/ gser phreng las/ zhing sbyong ba ni/ rang gi sems sbyong ba yin te/ de yang zhing gi rgyur tshogs bsags nas smon lam 'debs pa'o/ /'di snod kyi zhing la bya ste/ bcud kyi ni/ sems can smin par byed pa yin pas so/ /zhes gsungs so/ /rdzogs smin sbyangs gsum byas pa'i sa mtshams yod de/ rgyun mtha' nas sangs rgyas kyi sa'i bar du yod pa'i phyir/ bzhi pa ni/ dman lam sngon du ma song ba'i byang sems 'phags pas nyan rang gi spangs rtogs kyi rigs rdzogs pa dang/ sangs rgyas pa dus mnyam ste/ des sgrib gnyis gcig car du spangs pa'i phyir/ dman lam sngon du song ba'i ba'i dbang du byas na/ theg chen gyi tshogs lam nas kyang nyan rang gi spangs rtogs kyi rigs rdzogs pa yod de/ rang rgyal dgra bcom pa'i rtogs pa sngon du song ba'i byang sems tshogs lam pas/ nyan rang gi spangs rtogs kyi rigs rdzogs pa'i phyir/ rang rgyal gyi spangs rtogs kyi rigs rdzogs na/ nyan thos kyi spangs rtogs kyi rigs rdzogs pas khyab kyang nyan thos kyi de rdzogs na/ rang rgyal gyi de rdzogs pas ma khyab ste/ gzugs phyi rol don 'dzin gyi rtog pa spangs na/ nyon sgrib spangs pas khyab kyang/ nyon sgrib spangs na/ de spangs pas @025a @#/ /ma khyab pa'i phyir/ lnga pa ni/ khyab pa 'du byed kyi sdug bsngal nye bar zhi ba'i nyer zhi de/ 'dir bstan yang dag mtha' yin te/ thams cad 'dus par bshad pa la rgyu mtshan yod pa'i phyir te/ sa brgyad par rgyal ba rnams kyis 'gog pa las slong bar mdzad pa'i rgyu mtshan yod de/ sa bdun pa man chad du rnam par mi rtog pa'i ye shes la dbang bsgyur ma thob pas 'dir bstan yang dag mtha' mngon du byed pa'i dogs pa chung la/ sa brgyad par de lta bu'i ye shes la dbang bsgyur thob pas 'dir bstan yang dag mtha' mngon du byed pa'i dogs pa che ba'i rgyu mtshan gyis de ltar mdzad pa'i phyir/ gsum pa rtsod pa spong ba la/ kho na re/ theg dman gyi dbang du byas pa'i 'dir bstan yang dag mtha' dang/ theg chen gyi dbang du byas pa'i 'dir bstan yang dag mtha' gnyis re re nas chos can/ khyod yod par thal/ khyod mngon du byas pa'i tshad yod pa'i phyir/ yang de gnyis re re nas chos can/ khyod yod par thal/ khyod mngon du byas pa'i gang zag yod pa'i phyir zer na/ gnyis ka la skyon can gyi lan 'debs pa yin te/ dper na/ nyan thos shA ri'i bu dag tu gyur pa'i sangs rgyas chos can/ khyod yod par thal/ khyod kyi bka' yod pa'i phyir zhes dang/ sangs rgyas 'phags pa'i rgyud kyi nyan thos chos can/ khyod yod par thal/ khyod kyi lam yod pa'i phyir zhes pa gnyis la skyon can gyi lan 'debs pa bzhin no/ /kho na re/ lhag med myang 'das thob pa'i rjes thob ye shes la gnas pa'i nyan thos dgra bcom pa chos can/ 'dir bstan yang dag mtha' mngon du byas pa'i gang zag yin par thal/ 'dir bstan yang dag thob pa'i gang zag yin pa'i phyir zhes pa dang/ yang @025b de chos can/ 'dir bstan yang dag mtha' mngon du byas pa'i gang zag yin par thal/ khyab pa 'du byed kyi sdug bsngal nye bar zhi ba'i nyer zhi mngon du byas pa'i gang zag yin pa'i phyir zhes pa gnyis ka la khyab med gyi lan 'debs so/ /kho na re/ nyon sgrib spangs pa chos can/ 'dir bstan yang dag mtha' yin par thal/ nyan thos kyi lam gang yin pa dang zhes pa'i skabs nas bstan pa'i de yin pa'i phyir zer na mi 'thad de/ de chos can/ khyod mngon du byas pa dang dus mnyam du 'dir bstan yang dag mtha' mngon du byas pa'i theg dman gyi gang zag yod par thal/ 'dod pa gang zhig /khyod 'dir bstan yang dag mtha' yin pa'i phyir/ rtags khas/ 'dod na/ lhag bcas myang 'das la gnas pa'i nyan thos dgra bcom pa de de yin par thal/ 'dod pa'i phyir/ 'dod mi nus te/ 'dir bstan yang dag mtha' mngon du byas pa'i theg dman gyi gang zag yin na/ lhag med myang 'das thob ma thag pa'i dgra bcom pa yin dgos pa'i phyir/ 'dir bstan yang dag mtha' mngon du byas pa'i sems can yin na/ de yin dgos pa'i phyir/ yang kho na re/ shes sgrib spangs pa'i spangs pa chos can/ 'dir bstan yang dag mtha' yin par thal/ sangs rgyas kyi lam gang yin pa'i zhes pa'i skabs nas bstan pa'i yang dag mtha' yin pa'i phyir zer na ma khyab/ yang de chos can/ rdzogs smin sbyangs gsum ma byas par khyod mngon du byas pa'i sems yod par thal/ khyod 'dir bstan yang dag mtha' yin pa'i phyir zer na rtags ma grub bo/ /'dod mi nus te/ khyod mngon du byas pa'i gang zag yin na/ sangs rgyas 'phags pa yin dgos pa'i phyir/ smras pa/ mi kho ba'i yid kyi me long la/ /don rab gsal @026a @#/ /gsung rab gzugs brnyan shar/ /des blo gsal du ma'i yid 'phrog byed/ /'di bka' drin 'khor med bla ma'i drin/ /spyi thal phreng yid kyi mun sel 'di/ /yul lho phyogs rgyas sman du skyes pa'i/ /phyin drug dang bsdu ba bzhi'i dang po/ / dAn zhes bya bas sbyar ba'o/ /dge 'dis kyang 'gro kun gnas skabs su/ /dal brgyad dang 'byor bcu'i rten thob nas/ /rdze blo bzang rgyal ba'i bstan zhugs te/ /mthar thug gi byang chub myur thob shog /smras pa/ blo gter smra ba'i sengge mi yi zol// bzang po'i 'phrin las thub bstan srog gi gsos/ /grags snyan sa gsum mkhas mang rna ba'i dpyid/ /rgyal ba gnyis pa srid zhi'i khongs na brjid/ /sbyin tshul bzod brtson ting 'dzin ke la shar/ /shes rab nyin byed 'bar bas 'khyud pa las/ /legs bshad tu klung kun tu dar ba'i gnyen/ /zab rgyas dpyig gi gan mdzod mchog der bsngags/ /gzhan du mi g.yo spyi don rtsa ba brtan/ /dgag sgrub mtha' dpyod yal 'ang ba me tog bkra/ /phra zhib rigs ba'i dri bsrung 'bum 'phros bas/ gzhung bzang 'di ni dpal gyi dum bur sems/ /de'i phyir blo gsal bye ba'i nyer 'tsho'i gzhir/ /'khor ba ji srid ma nyems gnas pa'i slad/ /dad gtong thos brtson nor bu'i rgyan ldan pas/ /ngo mtshar dpag yas spar gyi phyi mo bskrun/ /de yi dge bas rgyal rnams skyed pa'i yum/ /mkha' khyab skye rgu phan bdes skyong pa'i mi/ /nang gi mun sel dam pa'i 'od snang can/ lung rtogs bshad sgrub bla nas blar 'phel shog /khyad par gangs ri'i mgon po'i sku tshe brtan/ /gsang gsum @026b 'jug pa nam mkha'i mtha' la 'khu/ /mdo rgyud 'o mtshor mkhas grub ngang mo'i khyu/ /'chad rtsod rtsom pa'i mgrin rnga brdung gyur cig /rgyu sbyor 'brel thogs ltos par bcas pa yang/ /tshe ring nad med dpal 'byor rgyas pa dang/ /phyin drug bsdu bzhi'i bde lam yangs po nas/ /myur bar zhi ba'i khri 'phang gnon gyur cig /mdor na 'gro kun mdza' zhing skyid pas 'tsho/ /bstan pa'i snying po bshad sgrub gtsang mas mdzes/ /nges don dam pa'i dbu 'phang mtho ba sogs/ /bkra shis rgya mtshos nor 'dzin dge gyur cig / ces pa 'di ni/ rigs pa'i dbang phyug mkhas grub chen po sbyin pa dar rgyas kyis mdzad pa'i yang dag mtha' spyi don blo dman yid kyi mun sel zhes bya ba snga mo nas 'brag ri dga' ldan byang rtse slob dpon rim pas brtse gzhag tu gnas dang gnang mus yin 'dug na'ang blun po'i bris nor 'gyel ba 'gyel 'jus kun tu 'byams pa las dag pa'i dpe rgyun glog dang mar me skad cig tha ma'i ngang tshul 'dzin pa la nye bar brten/ rab byung bco lnga pa'i chu khyi lor tri hor dpon lag lnga'i nang tshan be ri dgon ltag gling bsres sprul sku blo bzang bstan 'dzin grags pa mtha' yas dang/ dge rgan byams don/ phyag mdzod dga' phrug bcas nas spar gzhi sgrub bzhed kyi thugs bskyed bzang pos kho bor zhus dag tu bsrings shing/ de bzhin mkhan rin po che bstan dar bas kyang nyid dang dge bshes mang gi 'dun mos yin tshul gyi phyag bris dang/ dngos mjal du'ang gsungs pa dang du blangs te tshig don gnyis kar brtag dpyad zhib mo bgyis khul la/ dogs nas 'ga' zhig dgos dbang gis rang sor bzhag ste ma phyir spel ba chu phag zla ba dang po'i nang bri brko legs par grub pa'i tshe dge rtsa chud mi 'dza' zhing gnas dam par bsngo ba'i smon tshig 'di lta bu zhig dgos zhes @027a @#/ /bsod nams sgrub pa po mchog sprul rin po ches nye bar bskul ba'i ngor/ 'jam mgon chos kyi rgyal po'i rjes su dad gus kyis phyogs pa'i ban chung rigs smra'i tha shal shes rab rgya mtshos nor gling rang spyil thos bsam nor bu'i lding khang du sbyar ba dge lan lugs bzang phyogs rgyar rgyas pa'i rgyur gyur cig