@001a @#/ /khyab bdag rdo rje 'chang pha bong kha pa'i gsung las/
zhing khyad par can la maNDal bshad pa 'bul tshul dad gsum padmo
rgyas pa'i nyin byed ces bya ba bzhugs so//

@001b @##/ /oM bde legs su gyur cig /rmad byung mdzes sdug lang
tsho dar ba'i sku/ /rmad byung dri za'i dbyangs snyan 'phrog pa'i
gsung/ rmad byung bde gsal mi rtog ye shes thugs/

rmad byung yid bzhin 'khor los tshe dpal rtsol/ /zhes drang srong
bden pa'i dbyangs kyi me tog maNDa ra ba'i phreng ba sngon du
'thor bas bkra shis dge legs kyi sgo brgya yangs par phye nas/
de yang ji skad

du; 'phags mchog gsung gi bden tshig 'dod don lhun grub las/ ngag
gi dbang phyug blo bzang ring lugs che/ /thub bstan bzang po
rgya mtsho'i khyon yangs por/ /spel la 'jigs bral dbang phyug

phyogs kun las/ /rnam par rgyal ba'i sde la gsol ba 'debs/ /zhes
gsungs pa ltar rgyal kun yab gcig ngag gi dbang phyug mi yi sha
tshugs su rnam par rol ba/ blo bzang rgyal ba'i ring lugs thub

@002a @##/ /bstan bzang po'i snying po dri ma med pa 'di nyid rgya
mtsho'i gos can gyi khyon yangs por spel ba la 'jigs pa'i zla
thams cad dang bral ba'i tshes srid zung du 'brel ba'i 'phrin

las gser gyi 'khor los sa gsum gyi dbang phyug chen par mnga'
dbang bsgyur ba'i phyogs las rnam par rgyal ba'i sde/ rgyal kun
snying rje'i rang gzugs gangs can lha gcig gsum ldan sdom brtson

rgyal po'i rnam par rol ba/ 7 gongs lha mi'i rnam 'dren 7skyabs
mgon rgyal ba'i dbang po thams cad mkhyen cing gzigs pa chen po
don gyi slad du mtshan nas smos te rje btsun ngag dbang blo bzang
thub bstan

rgya mtsho 'jigs bral dbang phyug phyogs las rnam par rgyal ba'i
sde dpal bzang po mchog gi 7zhabs brten sa gsum che rgu'i gtsug
rgyan nor bu'i lan tshar brtsegs pa'i rdo rje'i khri 'phang mngon
par

@002b mtho ba'i drung du/ mi phyed dang gus kyi mdud rgya cung
zad lhod pa med pa'i skyabs 'bangs su spyod pa dga' ldan rnam
par rgyal ba'i gling gi bla grwa mgrin gcig nas/ yan lag bdun pa
maNDal dang bcas pa sngon du 'gro bas

lus kyi 'khri shings la 'dud cing/ sor bcu'i 'dab brgya spyi bor
bkod de zol med gdung shugs drag pos snying khong nas gsol ba
'debs pa'i snying po ni/ ji skad du/ dpal ldan zla ba grags pas/
gang phyir nam mkha'

dri ma med pa zla snang gsal bar gyur pa'i phyir/ /sngon tshe
stobs bcu skyed pa'i sa la khyod kyis slar yang 'bad gyur cing
/'og min du ni gang gi don du 'bad gyur go 'phang mchog zhi ba/
/yon tan mtha' dag mthar thug mtshungs

pa med de khyod kyis brnyes/ /zhes gsungs pa ltar/ mgon po gang
nyid ni/ sngon bskal pa dpag tu med pa'i snga rol nas rdzogs
smin sbyangs gsum gyi pha mthar son te stobs bcu mi 'jigs bzhi'i
bdag nyid de bzhin

gshegs 'od zer kun 'phags dpal brtsegs kyi rgyal po zhes bya
ba'i ngo bor mngon par rdzogs par sangs rgyas zin na'ang/ 'phags
mchog spyan ras gzigs dbang phyug ces byang chub sems dpa' sems
dpa' chen

po'i tshul bzung ste gang gi dbang po'i sgo dang sku'i ba spu
rnams su yang sangs rgyas kyi zhing gi bkod pa sna tshogs par
sprul nas de bzhin gshegs pa dang/ byang chub sems dpa' dang/
nyan rang/ tshangs pa brgya byin/

@003a @#/ /'khor los sgyur rgyal/ dge sbyong/ bram ze/ tshong
dpon/ khyim bdag/ bya ri dwags/ than gzings dang zam pa tshun
chad kyi sprul pa'i rol gar mtha' klas pas nam mkha' ji srid

kyi bar du sems can gyi don mdzad par mdo sde za ma tog bkod pa
dang/ sangs rgyas phal po che'i padma'i dra ba can gyi rgyud la
sogs pa mdo rgyud mtha' yas pa nas gsungs pa'i gsang ba bsam
gyis mi khyab pa'i yon

tan gyi mtha' dang grangs ni/ stobs bcu mnga' ba rnams kyi ye
shes kyi yul las kyang 'gongs par gyur na/ byis pa shed ma bye
ba dang tshul mtshungs pa'i so so skye bo tha mal ba bdag lta bus
brjod par nus pa ga la

zhig ;bstan pa 'di'i dbang du byas na'ang/ 'jam dpal rtsa rgyud
dang/ mdo sde langkar gshegs pa sogs mdo rgyud dang/ bka' gdams
glegs bam rin po che sogs su gsal bar gsungs pa yongs su

grags par yang/ thub pa'i spyan sngar bram ze'i khye'u snang ba
sogs nas chos rgyal dge ba dpal gyi bar gyi 'khrungs rabs du ma
dang/ lhag par bka' gdams glegs bam las/ shar rdo rje gdan gyi
byang phyogs na/

gnas pur rgyal bde ces bya ba yod/ /ri mthon po gnam gyi ka ba
yod/ /mtsho dma' mo g.yu yi maNDal yod/ /gangs dkar po shel gyi
mchod rten yod/ /spang ser po gser gyi lhun po yod/ /dri zhim po
sman gyi

@003b bdug spos yod/ /tshon bkra ba gser gyi me tog yod/ /dbyar
bkra ba g.yu me tog yod/ /kye gangs ri'i mgon po spyan ras
gzigs/ /gnas de na khyod kyi zhing khams yod/ /zhing de na khyod
kyi gdul bya yod/ /ces dang/ kye gangs ri'i mgon po

spyan ras gzigs/ /ri padma stong ldan dbyibs legs pa/ /zhes pa
nas/ yul bkra shis 'byung de khyod kyi zhing/ /zhing de na khyod
kyi gdul bya yod/ /ces pa'i bar gsungs pa ltar/ bod yul gangs
can gyi ljongs 'dir lhag par brtse ba'i

gdul zhing gi phyag mtshan du bzhes nas spre'u byang chub sems
dpa'i rnam par rol te thog mar mi yi 'gro ba spel/ chos rgyal
srong btsan sgam po'i rnam par rol te sangs rgyas kyi bstan pa'i
srol btod par mdzad pa nas rgyal blon gyi rol gar du

ma dang/ 'brom rgyal ba'i 'byung gnas/ sa chen kun snying/ 'gro
mgon chos rgyal 'phags pa/ zhang g.yu grags pa sogs paN grub
byang chub sems dpa'i zlos gar mtha' yas pa dang/ gzhan yang bya
dang ri dwags/ chu klung dang ljon

shing sogs kyi sprul pa'i rnam rol du mas thun mong ma yin pa'i
gdul zhing gangs can gyi ljongs 'di nyid kyi lus can rnams chos
dang zang zing gis bsdu ba dang/ ma smin pa smin pa dang/ smin
pa grol bar mdzad pa'i ngang tshul bsam brjod kyi yul

las 'das/ lhag par du yang bka' gdams glegs bam las/ spyan ras
gzigs dbang bzang por sprul/ /zhes sogs rim par lung bstan pa
ltar 'jam mgon rgyal ba gnyis pa'i thugs sras lung zin gser gyi
ri lta bu bdun gyi nang

@004a @#/ /tshan; thams cad mkhyen dngos dge 'dun grub pa dpal
bzang po nas bzung/ rgyal ba'i dbang po 'phrin las rgya mtsho
dpal bzang po'i bar sdom brtson mkhas grub gnyis ldan gyi sku'i
phreng ba nyi zla'i 'gro 'od

lta bu zam ma chad par byon te/ thub bstan yongs kyi snying po
blo bzang rgyal ba'i ring lugs dri ma med pa 'di nyid 'dzin
skyong spel gsum gyi sgo nas nub dzA land+har nas shar phyogs
rgya mtsho chen po'i mtha' la thug gi bar nyin mo ltar gsal bar

mdzad/ lhag par deng gi dus bdag cag snyigs ma lnga bdo'i 'gro
ba nyam thag dmus long dmigs bus bor ba dang/ byis pa 'brog dgon
stug por 'khyams pa lta bu rnams la lhag par brtse ba'i 'phags
mchog 'jig rten gsum mgon slar yang mi

yi sha tshugs su rol te bdag cag mgon med rnams kyi mgon/ skyabs
med rnams kyi skyabs su gyur ba mgon po gang nyid kyi gsang ba
bsam gyis mi khyab pa'i rnam par thar ba mtha' dag pa lta ci/
cha shas tsam yang bdag lta bus brjod par

ga la nus te/ ji skad du/ rgyal ba rnams kyis dpag med bskal pa
ru/ /brjod kyang pha mtha' rnyed par mi sla ba'i/ /khyod kyi yon
tan phung po ci 'dra ba/ /de 'dra bdag gis brjod pa'i yul las
'das/ /zhes gsungs pa de ltar lags

shing; so skye tha mal pa tshun la snang du rung ba'i thun mong
ba'i snang ngor yang gzhon nu nyid nas mkhyen brtse nus gsum/
gzungs dang sbobs pa/ spyan dang mngon shes sogs dam pa'i ngang
tshul mtha' dag rang chas su byon/ mkhas grub

@004b rtsod med smra ba'i khyu mchog du ma rigs kyi bdag por
bzhes te/ gzhung bka' pod lnga sogs bcu phrag rig pa'i shes
bya'i gnas mtha' dag la lung rigs dri ma med pa'i lam las drangs
pa'i gsan bsam mthar phyin par mdzad pa'i tshul gyis rang dang

gzhan gyi grub pa'i mtha' rgya mtsho lta bu'i pha rol tu gshegs
pas mkhas pa gangs can na grags pa kun gyi gtsug na zhabs sen
gyi zla tshes ngal bso bar mdzad/ gdan sa chen po gsum dang/ lha
ldan smon lam chen mor grwa skor dam bca' mdzad de

lung rigs gdong lnga'i gang rgyangs mthon pos mkhas mang ri
drags kyi khyu tshogs smra ba'i spobs pa dmigs med du bcom/ rigs
kyi cod pan du ma las mdo sngags kyi zab chos mtha' dag bum pa
gang byo'i tshul du gsan te thub bstan yongs rdzogs kyi bdag

por bzhengs/ so sor thar pa sogs sdom gsum gyi bcas mtshams phra
mo las kyang mi 'da' bar jo bo bka' gdams pa'i rnam thar gtsang
ma bdag gir bzhes/ gangs can mtha' dbus kun gyi bstan ba'i rtsa
ba so sor thar pa la dag ther gyis thub pa'i

bstan pa rin po che rmang nas gso bar mdzad cing/ 'chad rtsod
rtsom gsum la mkhas pas khyu mchog rlabs po che'i gnas thob pas
blo bzang rgyal ba'i ring lugs nyin mo ltar gsal bar mdzad/ ji
ltar ri bo tA lar thugs bskyed kyi 'dul zhing du

bzhes pa bzhin gangs can gyi ljongs 'dir snyigs ma'i mthar yang
bde skyid rdzogs ldan gyi dga' ston gsar du bzhad pa'i slad/
chos srid gser gyi 'khor lo phyag mtshan du bzhes te/ brtse chen
'phrin las kyi gdugs dkar sa gsum gyi bla na g.yo

@005a @#/ /ba'i thugs rje'i grib bsil snum por chab 'bangs su
spyod pa mtha' dag snyigs lnga'i tsha gdung las skyabs te bde
skyid kyi dpal yon gsar bar dbugs dbyung bar mdzad/ bod yul
bstan pa'i rtsa lag ras

'phrul snang gi gtsug lag khang sogs chos 'khor rnam pa gsum
dang/ gru 'dzin gnyis pa'i pho brang yas mas sogs nyams gso
mchod rgyun mig gi bdud rtsi lta bur bskrun par mdzad/ rgyal
ba'i bka' 'gyur rin po che sogs bka' bstan du

ma'i sbar gzhi bstan pa'i spyi nor du sngon med gsar du bskrun
par mdzad/ dman la lhag par brtse bas chab 'bangs nyam thag pa
dag gis smre sngags 'o dod kyis thugs rje yongs su bskul ba
brtse ba chen pos lhag par rjes su bzung/ khrims

gnyis kyi rgya las 'gongs pa'i skye bo mi bsrun pa dag tshar gcod
rjes 'dzin gyi thabs la mkhas pas gtan gyi 'dun ma yangs por
mdzad/ mdor na rgyal sras kyi spyod pa rlabs po che dpag par
dka' ba mgon po khyod kyi nyin zhag phrugs gcig gi

mdzad pa yang/ phal pa dag gis tshe hril por bsgrubs kyang 'grub
par mi nus pa'i ngo mtshar ba'i rnam par thar pa nam mkha' ltar
yangs shing/ rgya mtsho ltar gting zab pa/ ri rab kyi rdul phran
las kyang bgrang bar dka' ba'i gnas spyi dang/ lhag

par mtha' bzhi'i dregs ldan du ma log smon gyis yongs su bskul
bas dbus 'gyur rgyal bstan chab srid bde skyid dang bcas par
rngams sems mi bzod pa'i bsam sbyor ngan gshom 'thor rlung ltar
'tshubs kyang/ thugs bskyed snying stobs

@005b kyi go cha lhag par 'bar bas gsang gsum 'gal rkyen gyi
g.yo ba phra mo tsam yang mi bzhes par thugs dam bden tshig
btsan pos snyigs lnga'i rgud tshogs mtha' dag bye ma'i chang bu
ltar rang zhig tu gyur/ b+ho Ta'i ljongs kun bstan srid dkar 'jam

yug gcig tu mdzad de/ snyigs ma'i mthar yang bde skyid rdzogs
ldan gyi dga' ston gsar du bzhad par mdzad pa'i bka' drin 'di
lta bu ni/ bdag cag kha ba ri ba'i skye 'gro yongs kyis re re
nas stong gsum rin chen sna bdun gyis bkang ste bskal

pa rgya mtshor dbul yang/ cha tsam gzhal ba'i go skabs ga la
mchis/ 'on kyang rang gi bsod nams kyi skal bar bka' drin gyi
cha shas tsam bsab phyir/ zhing khams rgya mtsho'i bkod pas sna
drangs/ dngos 'byor gyi 'bul ba phran tshegs dang bcas

lus longs spyod dus gsum gyi dge rtsa dang bcas pa rin chen
maNDal bzang po'i tshom bur spungs te dbul ba dang chabs cig/
slar yang gsol ba rtse gcig tu 'debs pa'i snying po ni/ ji skad
du/ gangs ri'i rwa bas bskor ba'i zhing khams 'dir/ /phan dang

bde ba ma lus 'byung ba'i gnas/ /spyan ras gzigs dbang thub
bstan rgya mtsho yi/ /zhabs pad srid mtha'i bar du brtan gyur cig
/ces gsungs pa ltar snyigs lnga'i brlang spyod rlung ltar 'tshubs
pa'i skabs 'dir/ rgyal bstan/ chab srid/ chab 'bangs

dang bcas pa'i phan bde'i srog rtsa gcig pu ni mgon po gang nyid
kho na'i bka' drin la rag lus pa gangs can ser skya mchog dman
yongs kyi mngon sum tshad mas mthun snang du grub pa ltar lags
na/ 'jigs bral gdong lngas bteg pa'i rdo rje'i

@006a @#/ /khri 'phang mthon por 7zhabs sen bskal pa khri phrag
nas khri phrag gi bar du drang srong tshe mtha' yas pa'i do bor
brtan pa 'di kho na gangs can bsod nams kyi snying por thob pa
dang/ zhar byung du gus 'bangs x rnams

kyang gnas skabs chos sgrub pa'i 'gal rkyen nyer 'tshe zhi zhing/
thugs mthun khrims gtsang/ bshad sgrub 'khor lo gsum gyi bya ba
dbyar mtsho ltar 'phel zhing/ dus 'di nas bzung byang chub ma
thob kyi bar du mgon po khyod kyis 'bral med dgyes

bzhin rjes su 'dzin pa bcas brtse chen dgyes pa chen po'i klong
nas zhar yang 'dor ba med pa mkhyain/ mkhyen/ zhes snying khong
rus pa'i gting nas gsol ba 'debs pa lags na/ ji ltar gsol ba
btab pa'i mngon 'dod yid bzhin

stsol ba'i rdo rje'i bka' bzhes zab mo snying gi bdud rtsir
bcang chog pa zhig spyi bo'i mdzes rgyan du stsol ba mkhyain/
mkhyain/ mkhyain/ lags/ (zhes pa 'di ni/ rdo rje 'chang pha bong
kha pa bde chen snying po'i zhal snga nas kyis/ 'jam mgon rgyal
ba'i rgyal tshab

khwi rin po che thub bstan nyin byed dpal bzang po la gnang
ba'o//) // ! oM bde legs su gyur cig /bkra shis steng phyogs
lha rnams me tog char chen 'bebs la brel/ /bkra shis bog phyogs
klu rnams gtsug rgyan nor bus

mchod la zhugs/ /bkra shis bar gyi drang srong bden pa'i dbyangs
kyi bsngags brjod brtson/ /bkra shis gangs can khyon kun rdzogs
ldan snang bas gdal bar gyur/ /ces phan bde'i sgo brgya dbye
ba'i shis pa'i dbyangs kyi bden tshig khu

@006b byug nags su rtsen pa'i mgrin glu sngon du btang ste/ de
yang ni ji skad du kun gzigs rgyal ba'i dbang po bskal bzang
rgya mtsho'i gsung las/ phyogs bcu'i rgyal ba rab 'byams zhing gi
rdul dang mnyam pa de dag gi/ /'gro la chags pas kun tu chags

pa'i snying rje rgya mtsho lta bur zab/ /de las 'khrungs pa'i yon
tan lhun rdzogs spyan ras gzigs zhes rnam grags pa/ /mgon po
bdag cag kun gyis bsten 'os rin chen ri 'dra de la 'dud/ (/yang
na/) blo gros 'jam dbyangs gzhon nu la 'khyud

pa'i; ;rjes chags snying rje'i rang gzugs gru 'dzin bdag /mthu
stobs gsang ba kun 'dzin khro rgyal gyi/ /rigs gsum gcig tu 'dus
'di khyad par chos/ /zhes gsungs pa ltar/ dus gsum rgyal ba
thams cad kyi mkhyen brtse nus pa'i me

tog gi chun po/ sku gsung thugs gsang ba bsam gyis mi khyab pa
ro mtshar mtshan dpe'i dpal yon gcig tu spungs pa'i tshom bu/ srid
zhi'i dbyings na nyi zla/ dpad bsam gyi ljon shing/ yid bzhin
gyi nor bu/ gter gyi bum pa bzang po'i

mched zlar 'bar zhing/ lha mi lha ma yin gyi gtso bo bye ba
phrag brgya'i cod pan gyis mngon par btud pa/ 'phags mchog 'jig
rten gsum mgon/ sa steng rgyal bstan yongs kyi bdag po 7gong sa
7skyabs mgon 7rgyal dbang thams cad

mkhyen cing gzigs pa chen po yang srid mchog gi sprul sku rin po
che rje btsun x dpal bzang po mchog gi 7zhabs brten srid zhi'i
dge legs kyi 'dod pa 'jo ba'i dpag bsam nor bu'i khri 'phang
mngon mtho'i drung du/ mgon po gang gi chab 'bangs

@007a @#/ /su gtogs pa/ bod ljongs ser skya mgrin gcig nas rab
dwang mngon 'dod yid ches kyi rnam 'gyur sor bcu'i 'dab ma
tshangs gnas su bkod de gus phyag gi dngos po 'bum phrag dang
bcas gsol brtse

gcig tu 'debs pa'i snying po ni/ stobs bcu mnga' ba mtha' dag gi
spyi gzugs/ 'gro ba yongs kyi ma 'dris pa'i mdza' bshes/ bsil
ldan rwa ba'i ljongs 'di brtse chen spyan ras kyis lhag par
btsa' ba'i 7skyabs mgon/ skyon bral

puNDa ri ka'i phyag mtshan gyis khyad par du 'phags pa'i skyabs
mgon chen po gang nyid ni sngon bskal pa dpag tu med pa'i snga
rol nas rdzogs smin sbyangs gsum gyi pha mthar son te stobs bcu
mi 'jigs bzhi'i bdag nyid de bzhin gshegs pa

'od zer kun 'phags dpal brtsegs rgyal po'i ngo bor mngon par
rdzogs par sangs rgyas zin na'ang/ 'phags mchog spyan ras gzigs
dbang phyug ces byang chub sems dpa' sems dpa' chen po'i tshul
bzung ste gang gi dbang po'i sgo dang sku'i pa

spu'i bu ga rnams su yang sangs rgyas kyi zhing dang sku'i bkod
pa sna tshogs par sprul nas nam mkha' ji srid par 'gro ba'i don
mdzad pa ni/ ji skad du dpal ldan zla bas/ zhi sku dpag bsam
shing ltar gsal gyur cing/ /yid bzhin nor bu ji

bzhin rnam mi rtog /'gro sgrol bar du 'jig rten 'byor slad rtag
/'di ni spros dang bral la snang bar gyur/ /ces gsungs pa ltar
dang/ mngon rtogs rgyan las kyang/ rgyu ni yongs su smin gyur
na/ /gang dang gang la gang dang ni/ /gang

@007b tshe bya ba phan gyur ba/ /de dang de la der snang ngo/
/zhes dang/ mdo phal po che las/ de dag nags tshal sdong po chen
por 'gyur/ /sman dang rin chen mi zad gter dag dang/ /yid bzhin
nor bu 'dod pa 'byin shing dang/ /lam gol 'khyams la

de bzhin lam ston 'gyur/ /ces gsungs pa ltar dag pa dang ma dag
pa'i zhing du mar rgyal sras/ nyang rang/ tshangs pa brgya byin/
rgyal po rgyal phran/ dge sbyong dang bram ze/ khyim bdag dang
dmangs phal ba/ bdud dang srin po/ than bya ri dwags/

sman dang ljon shing/ gzings dang zam pa/ yid bzhin nor bu tshun
chad kyi sbrul pa'i rol gar chu zla dang mig 'phrul bzhin du
skad cig re rer yang zhing kham rab 'byams kyi rdul gyi grangs
dang mnyam pas lus can byang grol lam 'bras kyi bdud

rtsis chim par mdzad pa'i rang bzhin 'di ni/ dbu ma 'jug pa las
kyang/ nam mkha' med pas 'dab chags ldog par mi 'gyur gyi/ /'di
ni rang mthu zad pas ldog par 'gyur de bzhin/ /slob ma dang bcas
sangs rgyas sras rnams sangs rgyas

kyi; ;yon tan mkha' ltar mtha' yas ma brjod ldog par 'gyur/ /ces
gsungs pa ltar dang/ gzhan yang mdo sde zam tog bkod pa sogs
spyan ras gzigs kyi mdo rgyud mang po/ bka' gdams glegs bam rin
po che/ rgyal rabs chos

'byung du ma/ 7gongs phyag na padmo rim byon gyi rnam thar sogs
su rgya cher 'byung ba ltar bdag lta bu'i tshur mthong rang ga
bas bsam brjod kyi yul las 'gongs pas cha shas tsam yang brjod
par ga la nus/ lhag par du yang gangs can gyi ljongs 'di

@008a @#/ /gdul zhing gi phyag mtshan du bzhes te/ pha spre'u
byang chub sems dpa' nas/ rje gong ma mtshan brjod par dka' ba
thub bstan rgya mtsho'i bar sprul pa'i rol gar rim dang cig car
mtha' yas pas

skyong bar mdzad/ khyad par 7gongs 7rgyal dbang rdo rje 'chang
sku phreng gong ma bcu gsum pa chen po bka' drin gyi phung bo
bla nam mchis pa don gyi slad du mtshan nas smas te mtshan brjod
par dka' ba 7rje btsun ngag dbang blo bzang thub bstan rgya
mtsho

'jigs bral dang dbang phyug phyogs las rnam par rgyal ba'i sde
dpal bzang po nyid sku dngos kyi gdul bya rdzogs shing/ rtag
'dzin can rnams chos la bskul phyir gzugs sku'i bkod pa chos
dbyings su thim tshul bstan te/ bdag cag kha ba

ri ba mtha' dag mgon dang bral/ skyabs kyis phongs/ mya ngan mun
nag gi khung bur chung pe 'jigs sar skyel mas bor ba bzhin du
'phags mchog nyid la gsol ba 'debs pa tsam las ci bya gtol bral
gyi mal du lhungs pa na/ ji skad

du rgyud bla ma las/ ji ltar baiDU'i sa gzhi gtsang ma la/ /lha
dbang lus kyi gzugs brnyan snang ba ltar/ /de bzhin 'gro sems sa
gzhi gtsang ma la/ /thub pa'i dbang po'i sku yi gzugs brnyan
'char/ /zhes dang/ mngon rtogs

rgyan las/ gang gis srid pa ji srid par/ /'gro la phan pa sna
tshogs dag /mnyam du mdzad pa'i sku de ni/ /thub pa'i sprul sku
rgyun mi 'chad/ /de bzhin 'khor ba ji srid 'di'i/ /las ni rgyun
mi 'chad par 'dod/ /ces gsungs pa ltar/ gdul

@008b bya'i shes rgyud dag na mchog gi sprul skur dngos su mjal
nus kyang/ de lta bu'i skal bas phongs pa/ snyigs ma lnga bdo'i
so skye tha mal ba las ngan can dag la'ang snang du rung ba'i
mdzes sku'i dkyil 'khor/ ji skad du myur byon gsol 'debs

drang srong bden tshig las/ gzhan gyi don slad gnas ngan 'khor
ba'i grong/ /mtho ris dga' tshal ltar 'jug 'phags chen gyi/ /rnam
thar bdag gir bzung nas mchog gi sku/ /mngon sum sprul pa'i zlos
gar myur ston cig /ces

gsungs pa ltar/ bdag cag kha ba ri pa'i me tog gang la phog pa'i
lha skal mgon po spyan ras gzigs nyid slar yang mtha' 'kho ba
kla klo'i khyu tshogs chos kyis 'dul ba dang/ 'jam mgon tsong kha
pa chen po dang rjes su mtshungs pa'i rnam thar bzang

bo nga yis ston no zhes gsal bar mtshon ba sogs dgongs gzhi dang
dgos pa du ma'i ched 'jam mgon tsong kha pa chen po'i sku'i lte
khrag po ba'i gnas chen khyad par can sku 'bum byams pa gling
dang 'dab chags par/ yab yum rigs rus cho

'brangs phun sum tshogs pa'i rgyud las mthong grol mtshan dpe'i
pad dkar mchog tu bzhad na'ang/ gangs can ba rnams lkog tu gyur
lta ba'i mig dang bral bas the tshom gyi dra bas bcings te ci
byar gyar ba na/ 'phags mchog dngos dang mi

gnyis pa'i lo ke shwa ra nyid kyis mu le ding gi bla mtshor brtag
dpyad bgyid dgos pa'i lung bstan gsal bar phebs pa bzhin/ sku
phreng du mar sku lus dang grib ma bzhin du las bzhi'i 'phrin
las g.yel ba med par sgrub pa'i bka' srung ma gcig 'dod

@009a @#/ /pa khams kyi dbang phyug rem tIs gang du 'khrungs
pa'i yul gyi bkod pa dang ming yig /'khrungs khang gi dbyibs/
yab yum gyi mtshan sgra bcas lag mthil du skyu rur rlon pa bzhag
pa bzhin du gsal bar

bstan pa na nges pa bde blag tu rnyed de thog ma'i rten 'byung
gi sgro 'phar dbye bar bod ljongs 7rgyal khab kyi mi sna ched
brjongs rnams mjal mthag na'ang sngon gnas rjes su dran pa ni
'di lta bu'o zhes ston pa'i ched du bod skad kyi brda yis so
so'i ming nas

'bod par mdzad pa dang/ rje gong ma de nyid 'khrul med nga nyid
yin no zhes pa'i brdar sku'i nyer spyad 'khrul med du ngos 'dzin
gnang ba dang/ nyam thag 'gro ba'i ded dpon phyag na padmo pa
nyid yin no zhes pa'i brdar gzungs sngags ma Ni yi ge drug

ma 'dren par mdzad pa sogs mngon sum gyi spyod yul du ston par
mdzad pas 'di ni byis pa'i gar du zlos kyang 'phags mchog phyag
na padmo de nyid mngon sum nyid do snyam du lus kyi ba spu
g.yos/ mig nas mchim 'khrug /ngag nas bstod bsngags kyi

mgrin rnga dbang med du 'khrol bzhin/ rgyu mtshan rnams 'dir zhib
par lhags ba na/ gus cag dga' dad spro gsum gyis sgo gsum ngal
ba khyad bsad kyi 'bad ba chen pos spyan drangs te zhabs sen
bkra shis kyi re khA gangs can bsod nams kyi

dga' ston du dngos su thob/ yang na/ 7zhabs sen bkra shis kyi re
khA gru 'dzin gnyis pa'i gzhal med khang gi gsar gyi khri
'phang mthon por dngos su bked/ dgyes zhal gyi zla ba dngos su
mjal zhing/ dgyes gsung gi bdud rtsir ngom med du spyod pa'i

@009b skal bzang gi dga' ston 'di 'dra tshe rabs bye ba phrag
brgyar yang rnyed par dka' ba 'di lta bu'i bka' drin ni stong
gsum rin chen sna bdun gyis byur bur bkang ste bskal pa'i bar du
dbul yang cha tsam yang gzhal bar gal nus/ 'on kyang bka' drin
gyi cha shas

tsam pas bcing/ thog ma'i rten 'byung gis rga zhes dang/ yang
na/ gser khrims mnga' gsol gyi skal bzang gi dga' ston rmad po
che'i sarga mi 'chol bar sku tshe rgyal ba tshe mtha' yas pa'i ngo
bor brtan par gsol ba 'debs pa'i slad du zhing khams rgya

mtsho'i bkod pas sna drangs/ /dngos 'byor gyi 'bul ba phran bu
dang bcas rang gzhan gyi lus longs spyod dus gsum dge tshogs dang
bcas pa kun bzang mchod sprin nam mkha' mdzod kyi rang bzhin du
blos blangs te phul ba lags na/ dngos 'bul

bad rtsa ltar phra yang dgyes bzhes kyi gzigs pa yud tsam g.yo
zhing/ slar yang gsol ba 'debs pa'i snying po ni/ ji skad du/
chos rnga chen po'i sgra yis ni/ /sems can sdug bsngal mthar
bgyid shog /bskal pa bye pa bsam yas su/ /

chos ston mdzad cing bzhugs gyur cig /ces gsungs pa ltar gangs
can gyi ljongs 'di'i rgyal bstan chab srid spyi dang/ khyad par
blo bzang rgyal ba'i ring lugs dar zhing rgyas pa'i rtsa lag
gcig pu ni mgon po khyod nyid kho nar rag lus pa zhig na/

7zhabs sen mi shigs pa'i rdo rje/ mi 'gyur ba'i g.yung drung/
mi nub pa'i rgyal mtshan gyi ngo bor brtan cing/ so sor thar ba'i
bcas mtshams phra mo las kyang mi 'da' ba'i gnas brtan 'dul ba
'dzin pa chen po'i ngang tshul lhur bzhes shing/ gzhung

@010a @#/ /chen bka' pod lnga sogs mdo sngags rig gnas dang bcas
pa'i gzhung lugs rgya mtsho lta bur gsan bsam gyi pha mthar son
pa'i snyigs dus kyi mahA paNDi tar bzhengs te/ rtsod ngag seng
ge'i sgra

dbyangs kyis smra ngan wa skyes kyi klad bum cig car dbral bar
mdzad pa dang/ gzhung don gdams par shar ba'i nyams myong thugs
thog tu khel zhing/ /de don gzhan la 'doms par mdzad pas gangs
can gyi ljongs kun mkhas pa dang grub

pa'i skyes bus yongs su 'geng bar mdzad pa sogs blo bzang rgyal
ba gnyis pa'i bstan pa 'dzin cing spel ba la 7rgyal dbang sku
phreng gong ma rim byon yongs kyi rnam par thar pa mtha' dag
gcig tu bsdus nas bdag gir mdzad pa lta bur mkhyen brtse nus
gsum/

mkhas btsun bzang gsum/ thos bsam sgom gsum/ lta sgom spyod
gsum/ 'chad rtsod rtsom gsum sogs sku gsung thugs mdzad pa
'phrin las dang bcas pa dpe zla med pas gangs can gyi bstan 'gro
mtha' dag rjes su skyong zhing/ bdag cag rnams/

kyang byang chub ma thob kyi bar du dgyes bzhin 'bral med rjes
su 'dzin par mdzad du gsol/ zhes snying khong rus pa'i gting nas
gsol ba 'debs pa lags na/ ji ltar gsol ba btab pa'i re 'bras
rnams de de bzhin du 'grub pa'i

skyabs 'jug brtse chen dgyis pa chen po'i klong nas zhar yang
'dor ba med pa mkhyain/ mkhyen/ zhes gsol ba phur tshugs su 'debs
pa lags na/ rdo rje'i bka' bzhes bzang po spyi bo'i mdzes rgyan
du smin pa mkhyaien/ mkhyaien/ mkhyaien/

@010b lags// / ! oM bde legs su gyur cig /dpal ldan yon tan
tshogs kyi byed po yis/ /mi 'jigs seng ge'i khril dbang bsgyur
zhing/ /rgyal ba gnyis pa'i rgyal tshab chos kyi rje/ /ma pha ma
bla ma gnyis pa rgyal gyur cig /

ces drang srong ngag gi rol mos bde legs su byed pa'i tshig gi
sgo yangs por phye ba sngon du btang nas ji skad du/ 'jam mgon
chos kyi rgyal po tsong kha pa chen po'i gsung las/ srid gsum
'gro ba'i re skong dngos grub gter/ /legs bshad

'od stong 'byed pa'i nyin mor byed/ /yon tan cha shas kun rdzogs
'od dkar can/ /dpal ldan bla ma lus can gtsug na rgyal/ /zhes
gsungs pa ltar/ 'gro ba mtha' dag la dgos 'dod yid bzhin du
stsol ba'i mchog thun grub gnyis kyi

gter chen po/ legs bshad kyi 'od stong nyi ma bye ba'i rlabs su
grol ba'i bstan pa'i nyi ma/ gsang gsum 'phrin las dang bcas
pa'i yon tan gyi cha shas yongs su rdzogs pa'i zla ba'i dkyil
'khor kun nas gang ba lta bu'i 'phags mchog snying

rje'i rang gzugs/ bdag cag kha pa ri pa'i me tog gang la phog
pa'i lha skal 7gong sa lha mi'i rnam 'dren 7skyabs mgon 7rgyal
ba'i dbang po thams cad mkhyen cing gzigs pa chen po don gyi
slad du mtshan nas smos te 7rje btsun 'jam dpal ngag

dbang blo bzang ye shes bstan 'dzin rgya mtsho srid gsum dbang
sgyur mtshungs pa med pa'i sde dpal bzang po mchog gi 7zhabs sen
srid zhi'i gdung ba sel ba'i 'bum phrag zla ba'i 'dzum zer mngon
par dgod pa'i khri drung du/ zhes dang/ yang na/

@011a @#/ /oM x gyur cig /chos kyi zhing du chos kyi rgyal po
khyod/ /chos kyi khrir bzhugs chos kyi rnga chen brdungs/ /chos
kyi dung bus chos kyi rgyal mtshan bsgreng/ /chos kyi rgyal srid
kyis skyong gyur cig /ces shis

par brjod pa'i me tog manda ra ba'i phreng ba 'thor bsngon du
btang bas ngag gi lam yangs par byas te/ de yang ni ji skad du/
/rgyal tshab byams pa mgon po'i gsung las/ spyod pa dang ni rtogs
pa dang/ ye shes dang ni phrin las kyi/ /nyan

thos rang sangs rgyas kun gyi/ /bla ma khyod la phyag 'tshal lo/
/zhes gsungs pa ltar bskal bzang bskal ba grangs med stong phrag
du ma'i bar du byang chub kyi sems kyis drangs pa'i pha rol tu
phyin pa drug gi spyod pa yongs su rdzogs shing/ rtogs ba bla na
med pa ye

shes chos kyi sku brnyes te phrin las nyer bdun gyi sgo nas 'gro
ba rnams smin grol la 'god par mdzad pas rgyal sras nyan rang
kun gyi bla mar gyur pa/ phyogs bcu'i rab 'byams zhing gi rgyal
ba kun gyi brtse chen snying rje'i rang gzugs gcig tu

bsdus pa'i phung po rgyal sras gzhon nu'i brol du rol bar 'phags
mchog spyan ras gzigs zhes yongs su bsngags pa/ 'gro ba kun gyi
ma 'dris pa'i mdza' bshes gcig pu nyid gangs can bsod nams kyi
skal ngor tha mal mi'i zlos gar du

byon pa 7skyabs mgon 7rgyal ba'i dbang po x dpal bzang po gang
gi 7zhabs sen lha mi klu dang bcas pa'i gtsug rgyan nor bu'i lan
tshar brtsegs pa'i rdo rje'i khri 'phang mngon mtho'i drung du/
gus 'bangs dol gsung rab gling bla grwa 'du spyi dang

@011b bcas pa nas/ mi phyed dad pa'i rang gzugs snyim pa'i padmo
spyi bor bkod de gsol ba 'debs pa'i snying po ni/ mgon po gang
nyid ni sngon bskal pa dpag tu med pa'i snga rol nas stobs bcu
mi 'jigs bzhi'i go 'phang mngon du mdzad de chos sku bde ba

chen po las nam mkha' ji srid gnas kyi bar g.yo ba med pa de
ltar yang/ ji skad du rgyud bla ma las/ ji ltar tshangs pa tshangs
pa yi/ /gnas las 'pho ba med bzhin du/ /lha yi gnas ni thams cad
du/ /snang ba 'bad med ston pa ltar/ /de bzhin

thub pa chos sku las/ /bskyod pa med par khams kun tu/ /skal
ldan rnams la 'bad med par/ /sprul pa dag gis ston par mdzad/
/ces gsungs pa ltar chos kyi sku las g.yo ba med par sprul pa'i
rol gar mtha' klas pa zhing khams rgya mtsho'i rdul

gyi grangs dang mnyam par 'gyed cing/ re re'i ba spu'i khung bu
rer yang zhing khams kyi bkod pa mtha' yas pa ston par mdzad
pa'i gsang ba bsam gyis mi khyab pa'i rnam par thar ba mtha' dag
pa ni kun mkhyen ye shes kyi spyod yul kho na las/ bdag lta

bus cha tsam yang brjod du ga la mchis/ yongs su grags pa'i
'khrungs rabs kyi phreng bar yang bram ze'i khye'u snang ba nas
7gong sa bka' drin gyi mnga' bdag chen po thub bstan rgya mtsho'i
bar gyi sku'i phreng ba zam ma chad par byon nas rgyal bstan
spyi dang

blo bzang rgyal ba'i ring lugs nyin mo ltar gsal bar mdzad cing/
skye 'gro grangs las 'das pa smin grol gyi lam bzang po la 'god
par mdzad pa'i thun mong snang ngo'i rnam par thar pa rnams
kyang cha shas tsam yang brjod pa'i yul las 'das/ bye brag

@012a @#/ /tu yang gangs can gyi ljongs 'di 'dul ba'i phyag mtshan
du bzhes te sprul pa'i rol gar sgyu ma dang/ chu zla/ mig 'phrul
bzhin du gang la gang 'dul rgya mtsho sbrin gyi bkod pa mtha' yas
pas kha ba can pa rnams pha

bzang pos bu bzhin du skyong bar mdzad/ lhag par deng gi dus
'dir rje gong ma bka' drin gyi mnga' bdag sku phreng bcu gsum pa
chen po nyid ji ltar bdag cag gi ston pa thugs rje can grong
khyer rtsa can du gshegs pa'i tshul bstan pa ltar dgongs

gzhi dang dgos pa du ma'i ched re zhig gzugs sku'i bkod pa chos
dbyings su thim tshul bstan te kha ba can pa rnams 'jigs sar
skyel mas bor ba lta bu/ dmus long dmigs bus bor ba lta bu/ byis
pa 'brog dgon du 'khyams pa lta bur ci bya

gter bral gyis shin tu nyam thag par gyur pa na/ dman la lhag
par brtse bas 'phags mchog 'jig rten gsum mgon nyid slar yang
sngon gyi thugs bskyed dang dam bca' btsan po rgya mtsho'i rlabs
bzhin dus las yol ba med par 'gro ba mgon

med pa rnams kyi mgon/ skyabs med pa rnams kyi skyabs su ston
phyir gzigs pa wa'i sgo nas riD rus cho 'brangs phun sum tshogs
par bsam bzhin mi yi srid pa'i gar du rol te gzhon nu nyid nas
mkhyen brtse gzungs spobs/ sngon gyi gnas

rjes su dran pa sogs dam pa'i rang bzhin mngon sum du sten
na'ang/ bdag cag gangs can pa rnams lkog gyur lta ba'i mig dang
bral bas bdag cag gi 'dren pa gcig pu de gang na snyam the tshom
gyi dra par tshud pa na/ /'phags mchog sku dngos

@012b dang mi gnyis pa'i lo ke shwa ra nyid kyis rjes su bstan
pa dang mtshungs par/ kha ba can ba rnams nyam thag pa'i dus 'dir
rgyal bstan chab srid kyi srog rtsa 'dzin pa la thugs bskyed kyi
mthu lhag par grub pa 7skyabs mgon 7rgyal tshab srid skyong
yongs 'dzin rwa sgreng

ho thog thu rin po cher/ rgyal mchog sku phreng rim par sku lus
dang grib ma bzhin du 'grogs pa'i bka' srung gi gtso mo ma gcig
'dod pa khams kyi dbang phyug re ma tIs gang du 'khrungs pa'i
yul gyi bkod pa/ (zhes sogs nas gong bzhin la/) bstod bsngags

kyi mgrin rnga dbang med du 'khrol bzhin/ rgyu mtshan rnams
phyogs 'dir zhib tu gsol ba na/ 7skyabs mgon srid skyong 7rgyal
tshab rin po che nas thugs khur gyi ngal ba brgya phrag lhur
bzhes kyis ji ltar rta bdun gyi shugs rlabs drag pos nyin byed
kyi dkyil

'khor shar ri'i phrag pa nas bsus pa ltar ljongs 'di'i bsod nams
kyi dga' ston rmad po cher gdan drangs te 7zhabs sen bkra shis
kyi re khA dbus 'gyur ma ga d+ha gnyis pa'i ljongs 'dir mngon
par bkod/ dbus ljongs dag pa'i zhing 'dir byon

zin nas kyang rje gong ma de nyid mngon sum lta bu'i ngang tshul
yang nas yang du ston par mdzad pa na sku'i sri zhu ba mtha' dag
rang dbang med par dga' dad skyo gsum gyis mchi ma 'dren pas ngo
mtshar nges rnyed rgyun mi chad du stsal zhing/ rje gong ma na
rim

gyi rnam thar ltar mthon mthing ral ba'i lan bu dor te ngur
smrig gi rgyal mtshan sgreng bar mdzad/ /'phags mchog phyag na
padmo'i ye shes rang snang gi gzhal med khang dang gnyis su med
pa'i gru 'dzin gnyis pa'i pho brang chen po po ta la'i rje gong
ma rim byon gyi zhabs

@013a @#/ /sen nor bu'i lan tshar gyis mdzes par bcings pa'i mi
'jigs gdong lngas bteg pa'i gser gyi khri 'phang mthon por nyi
ma bye ba'i gzi byin mog por byed pa'i gsang gsum rdo rje'i
dkyil 'khor mthong na mi mthun pa

med pa'i 7zhabs sen rdo rje'i mdud rgya brtan por bcings te lhar
bcas srid zhi'i gtsug nor gcig pur mnga' gsol te/ bkra shis bde
legs kyi skal bzang gi dga' ston rmad po che 'di lta bu thob
ba'i bka' drin gyi cha shas tsam bsab phyir/ gus

'bangs x zhing khams rgya mtsho'i bkod pas sna drangs/ dngos
'byor gyi 'bul ba phran tshegs dang bcas lus longs spyod dus gsum
dge tshogs dang bcas pa kun bzang mchod pa'i sprin phung du spros
te dbul zhing/ slar yang gsol ba 'debs

pa'i snying po ni/ 'jam mgon chos kyi rgyal po tsong kha ba chen
po'i gsung las/ byang chub mchog gi thugs ni rab brtan pas/ /bde
bar gshegs pa'i gdung 'tshob rgyal ba'i sras/ /dur smrig 'dzin
pa'i dbang po dam pa khyod/ /mi mthun phyogs

las ring du rgyal gyur cig (/ces sam/ yang na/) rnam dag lam la
lta ba'i dmigs bu bral/ /thar pa'i khang bzang khrid pa'i mgon
gyis dor/ /srid ba'i g.yang sar zhugs pa'i 'gro rnams kyi/
/dpung gnyen mchog khyod dus ring zhabs

bstan mdzod/ /ces gsungs pa ltar/ mkha' khyab yid can spyi dang/
bdag cag kha ba ri ba'i bstan 'gro yongs kyi mgon skyabs gcig
pur 7zhabs sen bskal ba rgya mtshor mgon po tshe mtha' yas pa'i
ngo bor brtan cing/ mkhas

@013b mchog dbyig gi gnyen pos/ tshul gnas thos dad bsam ldan
pas/ /bsgom pa la ni rab tu sbyor/ /zhes dang/ ston pa'i dam
chos rnam gnyis te/ /lung dang rtogs pa'i bdag nyid do/ /de
'dzin byed pa smra byed dang/ /sgrub par byed pa kho na yin//

zhes gsungs pa ltar gzhi tshul khrims rnam bar dag pa 'phags pa'i
gnas brtan nye bar 'khor gyi rjes su skyong zhing/ gzhung lugs
rgya mtsho lta bu la gsan bsam gyi pha mthar son te/ gzhung don
gdams par shar ba'i nyams myong thugs thog tu

'gel bas 'dzam gling mkhas grub yongs kyi gtsug nas zhabs sen
gyi zla tshes ngal bso zhing/ bshad sgrub zung 'brel gyi sgo nas
blo bzang rgyal ba'i ring lugs nyin mo ltar gsal bar mdzad nas/
gangs can ba mtha' dag lam gol lam log

las ldog ste mngon mtho dang nges legs kyi las bzang po la ci
dgar 'god par mdzad pa dang/ bdag cag x kyang rjes brtse'i
skyabs rol nas nam yang mi 'dor ba bcas kyi skyabs 'jug brtse
chen dgyes pa chen po'i klong nas nam yang 'dor ba med

pa mkhyen/ mkhyen/ zhes gsol ba rtse gcig tu 'debs pa lags na
mngon 'dod yid bzhin stsol ba'i bka' bzhes bzang po spyi bo'i
mdzes rgyan du stsol ba mkhyain/ mkhyain/ mkhyain/ lags// (//'di
gnyis kyang 7rje pha bong kha ba dpal

bzang pos mdzad pa'o//) // ! ngad dam mtshungs med lha klu dga'
tshal bas/ /yon sbyar mthun rkyen 'brel tshad bla ma yis/ /tshe
rabs 'bral me'am mnyes bzhin rjes 'dzin cing/ /zung 'jug rdo rje
'chang dbang myur thob shog / //dge legs 'phel//