@#/ /lam rim gyi zin bris sogs zin bris kyi skor bzhugs so/ / @001a @##/ /me rta lo'i zla ba bcu gcig pa'i tshes gsum nas/ gong sa rgyal ba'i dbang po thams cad mkhyen cing gzigs pa chen po'i thugs bzhed ltar/ skyabs rje zhwa dmar rdo rje 'chang nas/ nyin bcu'i ring la rje nyid kyis mdzad pa'i bde lam gyi khrid dmigs skyong tshul dge legs 'od snang 'byed pa'i nyin byed kyi khrid mnos pa'i skabs/ dang por mdo gsung nas bzlog pa gnang/ de nas dpal ldan rtsa ba'i zhes sogs lam rim gsol 'debs yongs grags ltar la/ rgyal ba'i rgyal tshab dar ma rin chen zhabs/ /zhes sogs bde lam kha skong bcas gsung/ de nas yon tan gzhi gyur ma'i @002a @#/ /rdo rje 'chang gi go 'phang myur thob shog /ces pa'i gsol 'debs tshar gcig ma gtogs gzhan rnams tshar gnyis re gsung/ de nas maNDal phul rjes/ 'o lags so zhes sogs gsung/ dang por dpe thog nas gcig gsung/ de nas thugs thog nas gcig gsung grub rjes/ 'o de ltar dpal mnyam med jo bo chen po dang/ 'jam mgon rgyal ba gnyis pa'i thugs kyi nying khu byang chub lam gyi rim pa la rtsal ci yod kyi sgo nas bstan pa rin po che'i 'dzin skyong spel ba re ci nas kyang gnang bar zhu/ der nas ring du zhes sogs lam rim smon lam gsung/ maNDal phul/ phyag thal mo sbyar @002b te; bdag gi ji snyedX bdag sogs rnams kyiX chos kyi rgyal poX bdag dang gzhan gyi dus gsumX phan bde 'byung ba'i gnasX de'i phyi nyin yang kha sang gsung ba de thugs thog nas tshar gcig gsung/ de rjes yang sngar ltar tshar gnyis/ de'i phyi nyin yang de ltar ma grol bar rigs 'grel/ khyad par grol nyin bshad pa'i sngon du lam rim gyi sa bcad yongs su rdzogs pa zhig gsung rgyu'i phyag bzhes yod pa ltar mdzad/ lam rim smon lam gyi 'gal rkyen sel phyir zhes pa'i skabs su khri'i mthar me tog cig dor/ bkra shis rgya mtshos phyogs kun khyab gyur cig gi skabs su phyogs bzhi dang dbus phyogs su me tog 'thor ba mdzad pa phyag bzhes yin gsung/ 'di'i brgyud rim ni zur 'debs kha skong ltar ro// ! //ljags byin rlabs kyi khrid gnang ba'i tshe na'ang/ sher snying bzlog pa bcas sngar bzhin la/ de nas maNDal ma gtogs gsol 'debs sogs 'don rgyu med/ mkhas grub khyung po rnal 'byor ni bstan pa snga dar gyi rjes phyi dar gyi sngon tsam na byung ba yin/ khong rgya gar la phebs nas/ a ti la badzra gyis khrid de/ bla ma rdo rje gdan pa dang mjal nas zab chos mang du gsan/ rjes sor lan gnyis phyin pa'i tshe gser mang pos bla ma rnams dang dge 'dun rnams la bsnyen bkur byas/ ni gu ma dang mjal @003a @#/ /nas/ ni gu'i chos drug gnang pa yin gsung/ khyung po'i mgur brgyad dang/ rwa ba'i chos brgyang gnyis tshig zin cung zad mi 'dra na'ang/ don gcig yin gsung/ mgur brgyad kyi gdams pa ni/ ngag byin rlabs kyi gdams pa/ keng rus kyi gdams pa/ thod pa kha sbyor gyi gdams pe/ bdud rtsi thig le'i gdams pa/ byang rdo'i gdams pa/ khyab 'jug rus spal gyi gdams pa/ tha gu gsum 'brel gyi gdams pa; thim pa gsum gyi gdams pa ste brgyad do/ /'di'i dang po ma gtogs gzhan la khrid rgyun med gsung/ zwa lo phyed ces par/ 'o na rje btsun mi las lo dgu dang/ rgod tshang bas lo bcu gnyis su z' bzhes nas ngag la mi gnod par ma zad/ /dngos grub brnyes pa'i rkyen du 'gyur ba ji ltar yin zhe na/ de dag ni dbang po rab yin pas skyon med do gsung/ a khu rin po che'i khrid yig nang du brgyud pa yod pa der bka' bcu blo bzang dngos grub ma gtogs/ de nas brag rgyab dpon slob blo bzang chos 'phel zhes pa 'di chad 'dug khri bsod nams dbang rgyal/ de nas a khu rin po che shes rab rgya mtsho/ bka' drin mtshungs med rje btsun dge 'dun bstan 'dzin rgya mtsho dpal bzang po/ des bdag la'o/ /a khu nas brag dkar sngags rams pa'i khrid yig rgyab yig tu/ ngag byin rlabs kyi gdams @003b pa zab la khungs btsun pa zhes yong pa de'i steng nas gnang/ da lta 'di'i dpe ma 'byor bas/ a khu'i khrid yig steng nas gnang ba yin/ jo bo'i dus su kha yab yab zer ba'i slob ma sngags mang po 'don mkhan zhig yod pa la/ jo bo'i zhal nas/ 'di'i sngags ma dag pas mi 'grub pa yin/ rgya gar yin na/ 'di 'dra'i sngags mang po 'don na mi 'grub pa ga la srid ces gsung zer/ brda sprod kyi gzhung sogs las dbyangs yig bcu drug ma gsungs gsung/ a li zhes pa/ a a zhes pa dang/ ma li ni phreng ba'i skad dod yin pas bsdoms pa'i a li ste/ a phreng zhes pa yin/ ka li la'ang rigs 'dra/ 'jigs byed ltar byed na/ skad cig krong bskyed bya/ rang gi snying khar nyi ma'i dkyil 'khor gyi dbus su/ rtsa sngags la/ yi ge bcu pa'i sngags kyis bskor ba gsal 'debs/ dbyangs bskyed na mgrin par bskyed dgos gsung/ dmigs pa'ang de ltar/ ye d+harmI'a nang yo ni ro d+ha zhes pa'i/ yo yar bcad/ ni ro d+ha mar bcad de 'don dgos pa yin/ yo yar mar bcad nas 'don na don gzhan du 'gyur te mo mtshan 'gog ces par 'gyur pa yin gsung/ 'dir dmigs skor cig zhal las shes so zhes pa'i skabs su khrid yig tu/ lce steng gi sngags phreng sa bon dang bcas pa las bdud rtsi dkar po'i rgyun babs/ mgrin pa yan chad @004a @#/ /gang/ thog med nas lus kyi sgo nas bsags pa'i sdig sgrib bag chags dang bcas pa thams cad dag ces pa las med la/ gsung bshad du/ bum pa'i dbang thob/ 'bras bu sprul sku 'grub pa'i nus pa bzhag ces dang/ yang bdud rtsi dmar po'i zhes sogs la/ gsang ba'i dbang thob/ kun rdzob sgyu ma'i sku longs sku 'grub pa'i nus pa bzhag ces dang/ yang bdud rtsi sngon po'i rgyun babs/ khrid yig tu/ rkang pa'i mtheb sor yan chad gang zhes yod la/ gsung bshad du/ lte ba yan gang/ thog med nas sogs kyi mthar sher dbang thob/ don dam 'od gsal chos sku 'grub pa'i nus pa bzhag ces dang/ yang bdud rtsi dkar po'i rgyun babs/ lus thams cad gang zhes par/ gsang gnas yan gang zhes gsungs/ lus kyi sgo nas zhes sogs kyi mthar/ bden gnyis zung 'jug 'bras bu mthar thug gi sku 'grub pa'i nus pa bzhag byung snyam pa dang/ de min gzhan khrid yig ltar yin no/ /'dir 'don pa'i skabs su/ dbyangs kyi mgor oM yod la mthar swA hA med/ gsal byed kyi mgor oM med cing mthar swAhA yod pa'i khyad par shes dgos gsungs/ khyad par du rdo rje sems dpar la sbyar na shin tu 'grigs zhes gsung gsungs/ grangs la gzhung du @004b bdun nam nyer gcig sogs mang po gsung kyang/ gsum tsam re 'don na mi chog pa med gsungs/ seng gdong ma'i sngags lta bu mgor oM dang/ mjug tu swAhA med pa'i btus pa zhes pa yin/ 'dir rdo rje gtsug tor gyi rgyud las gsungs bar bshad la/ 'di'i khyad par rim lnga gsal sgron du'ang yod gsung/ 'di'i khrid lan gcig las gnang ba'i srol med gsung/ mjug tu maNDal/ bsngo smon gyis mtha' brgyan par 'dra'o// ! //sgra mi snyan gyi tshe khrid gnang skabs/ maNDal yan gong ltar la/ de nas 'di'i 'byung khungs blo gros dpal bzang nas byung ba yin la/ 'di'i lo rgyus a khu rin po che'i brjed byang ltar la/ brgyud pa ni rje shes rab rgya mtsho yan gsan yig ltar la/ de nas thu'u bkwan yongs 'dzin bstan pa rgya mtsho/ rdo rje 'chang dge 'dun bstan 'dzin rgya mtsho dpal bzang po/ des bdag la'o; ;rje'i khrid yig gi dbur/ kun mkhyen bla ma'i gdams pa bzhin zhes pa/ kha cig gis/ spyan snga grags pa byang chub yin zer mod/ rje'i gsan yig tu/ dar yul pa nas gsan pa 'dra bas/ 'di yin nam snyam gsung/ chos sgrub pa la tshe ring ba gal che ba yin te/ bzhi brgya par/ lus ni dgra ltar mthong mod kyang/ /de lta na yang de bsrung bya/ /khrims ldan yun ring 'tsho ba @005a @#/ /ni/ /de pas bsod nams chen por gsungs/ /zhes pa'i dgongs pa ltar yin gsungs/ tshe ring du gnas pa'i rten 'brel gyis lcags kyi padma zhes pa yin/ bde ba can nas spyan drangs pa yin na 'od dpag med du gsal ba'i tshe dpag med yin la/ steng phyogs yon tan bkod pa nas spyan drangs pa yin na de 'dra min par tshe dpag med du gsal ba yin nam gsungs/ spyir bum pa'i mgul rgyan la/ mgrin par ras zung gsar pas spras zhes ras zung dgos pa yin/ zla ba'i rgyab yol yod pa spangs rtogs mtshon pa yin gsung/ a khu rin po che'i khrid yig dang mi mthun/ 'jig rten pa'i rdzas lha mi'i tshe dang bsod nams kyi gtso bo'i bsod nams phal cher dang/ 'jig rten las 'das pa'i rdzas sa thob pa yan chad kyi tshe bsod yin gsung/ gser gyi rdo rje rtse lnga pa'i lte ba'i dbus/ 'od kyi ga'u kha spyor gyi nang du mdun phyogs su hrIH rgyab phyogs su hUM yod pa'i gnyis ka'ang 'od zer gyis phan tshun du 'khril ba zhig yin gsung/ khrid yig gnyis kar/ nyi ma'i dkyil 'khor gyis grib ma dad pa bzhin du/ sdig sgrib spyi dang khyad par tshe'i bar chad rnams rim gyis phyir ded ces gsungs mod/ nyi ma'i dkyil 'khor gyis ni grib ma cig @005b car deng la/ tshe'i bar chad ni rim gyis deng pa yin pas cung mi 'dra gsungs/ rje'i khrid yig dang gsung bshad la sen mo nyi shu dang 'og sgo gnyis dang ba spu'i bug rnams las phyir thon par gsung la/ a khu rin po che'i khrid yig tu/ rkang pa'i sor mo bcu (zhes gsung 'dug /) 'di'i khrid lan gsum gnang ba'i phyag len ltar/ dang por rje'i khrid yig steng nas rgyas pa zhig gnang/ gnyis par/ a khu rin po ches mdzad pa'i sgra mi snyan gyi tshe sgrub kyi brjed byang 'chi med dpal ster zhes pa'i lung gnang/ gsum par/ khrid dang po'i bsdus don lta bu zhig gsung ba yin/ sa bcad blangs nas/ sbyor dngos mjug gsum yod mod kyang/ dngos gzhi'i skabs cung mi 'grigs gsung/ yang khrid gsum par zla ba steng dang nyi ma 'og tu bzhag pa'i ga'u kha sbyor gcig kyang gsung/ mjug tu maNDal sogs gong ltar ro// // ! 'od dpag med la brten pa'i 'pho khrid kyi skabs/ maNDal sogs gong bzhin la/ de nas paN chen blo bzang chos rgyan gyis mdzad pa'i 'pho ba dpa' po g.yul 'jug dang/ yang gzhan gcig yod pa de gnyis kyi steng nas thugs thog nas gnang pa'i phyag bzhes yod gsung/ mdo phyogs nas 'pho ba ma gsung/ sngags nas kyang bya rgyud spyod rgyud rnal 'byor rgyud gsum las ma gsung/ bla med rgyud kyi pha rgyud nas @006a @#/ /kyang mang po ma gsung/ ma rgyud las 'pho ba mang po gsung ba las/ 'di nyid ma rgyud kha sbyor rtog pa gsum pa las gsung ba la brten pa yin gsung/ 'di'i rgyud ba ni/ rje shes rab rgya mtsho yan gsan yig ltar la/ de nas/ khyab bdag 'khor lo'i mgon po bka' drin mnyam med rje btsun dge 'dun bstan 'dzin rgya mtsho dpal bzang po/ des bdag la'o/ /bde ldan zhing du sngar smon lam gyi mthus ngan 'gro ba med mod/ chu bya la sogs pa ni sprul pa yin pas/ ngan 'gro ba min gsung/ zhing der 'pho ba'i thabs la/ mtshan brjod pa dang/ der skye ba'i 'dun pa shugs drag po btang ba dang; dge ba gang byas der skye ba'i rgyu ru bsngo ba dang/ byang chub kyi sems sgom pa bzhi yod pa las/ las dang po pa rnams kyis mtshan brjod pa gal che gsung/ zhing der 'pho ba'i tshe rnam shes spyi bo'i gser gyi sgo las 'pho ba yin/ de las 'pho na/ der skye bas khyab pa ma nges te/ de las 'pho nas gzugs med du skye ba'ang yod pa'i phyir ro gsung/ 'pho ba sbyangs dus yang/ rang nyid nad rims sogs kyis ma btab gong du sbyangs nas 'chi khar 'pho dgos pa yin/ de la 'chi ltas 'ang brtags dgos/ 'chi ma ran gong du 'pho na sngags kyi rtsa ltung 'byung gsung/ 'pho ba rang don du sbyangs pa la bshad pa gsum @006b gnang ba'i phyag bzhes yod pa ltar/ dang po rgyas pa zhig /de nas gnyis pa de las bsdus pa zhig /gsum pa shin tu bsdus pa zhig gnang ba ma gtogs 'dra/ 'di'i phal cher zhig a khu rin po che'i brjed byang du yod pa ltar yin gsungs so// ! //dga' ldan 'pho khrid skabs/ 'byung khungs sogs gong ltar la/ jo bo chen po yang dga' ldan du phebs pa yin te/ nag 'tshos jo bo'i 'dra sku bris thang zhig bzhengs 'dun yod pa las/ jo bo'i zhal nas/ khyod bla ma dznyana a gA ra dang mjal du phyin/ bris thang ngas 'bri/ nga dga' ldan du 'gro khyed kyis da dga' ldan nas drangs te bris thang la bstim par byas na bzang gsung ba yin/ des bka' gdams rim byon thams cad der 'phebs pa yin/ de bdag nyid chen pos kyang slob ma rnams la/ tshe phyi mar nga rang dga' ldan du 'gro ba la lha dang bla ma thams cad zhal mtshungs pa yin gsung gsungs/ der bgrod pa la/ 'phen pa'i stobs/ sgom pa'i stobs/ sun 'byin pa'i stobs/ dkar po sa bon gyi stobs/ smon lam gyi stobs ste stobs lnga'i sgo nas 'pho dgos pa yin gsungs/ 'dir sa bcad bkram na/ sbyor dngos mjug byas kyang chog /rang don du sbyangs pa dang/ gzhan don du dang/ mthar las la sbyor ba dang gsum byas kyang rung gsung/ 'dod pa'i srid pas bdag gir byas pa @007a @#/ /la/ 'dod pa'i sas bsdus bya ba yin/ 'pho ba sbyangs pa la snang shas ldog pa gal che/ 'di la ye shes pa spyan drangs nas bstim pa med gsungs/ dga' ldan zhes pa grong las dgon pa'i tshul du yod pa/ de na pho brang rgyal mtshan mthon po zhes pa/ rgya phebs gsum brtsegs can de'i mdun phyogs su rje btsun byams mgon gyis chos gsung yul gyi kun dga' rwa ba yid dga' chos 'dzin zhes pa yod/ deng sang dga' ldan yid dga' chos 'dzin zhes pa 'di'i ming thog pa yin nam snyam gsungs/ rje btsun gyi phyag gnyis kyis klu shing gi sdong po bsnams pa/ bdag cag gi ston pa rnam 'dren bzhi ba'i byang chub kyi shing ni/ shing a shwa ta zhes pa bod skad du/ mya ngan med pa'i shing zer/ klu shing yang/ rje btsun byams mgon gyis rdo rje gdan du sangs rgyas pa'i mdzad pa ston pa'i dus kyi byang chub kyi shing yin gsungs/ de'i steng du g.yas su 'khor lo yod pa chos 'khor bskor ba mtshan/ g.yon du spyi blugs ni bram ze'i rigs su 'khrungs rgyu'i rten 'brel mtshon pa yin gsungs/ de la nye sras sogs dang/ jo bo rje dga' ldan du nam mkha' dri ma med dang/ rje bdag nyid chen po 'jam dpal snying po dang/ lho brag grub chen dri med 'od zer zhes par 'gyur par gsungs/ 'ga' @007b zhig gis phaT dang/ la las hi ka brjod pa yin zer yang phyi ma 'thad de/ yi ge phyed dang gnyis kyis sbyangs zhes pa ltar/ hi'i srog tu i zhugs pas yi ge hril po dang/ kra'i srog tu a med pas kra yi ge phyed do/ /gnyis ka bsdoms pa'i hikra ces pa yi ge phyed dang gnyis su gsungs pa ltar 'thad pa yin gsung/ 'pho ba sbyangs pa'i tshe rang dang rje btsun gyi pho brang gnyis 'od zer ram sprin dkar pos phan tshun rgyun par 'grel bar mos na rten 'brel gyi gnad shin tu che gsungs/ dus su 'pho ba yin/ dus min du 'phon lha bsad pa'i nyes pa yod gsung/ thu'u bkwan chos kyi nyi mas mkha' spyod 'pho ba sbyangs te zhing du phebs khar hi ka lan gnyis kyi tshe cung zad re 'phags/ lan gsum pa brjod pa dang mnyam du spyi gtsug las 'od dkar po zhig steng phyogs su song ba thams cad kyis mthong bas ya mtshan po red gsungs/ kha kya'i dar rgyas zhes pa'i dge bshes zhig gis/ klong rdol bla mar dga' ldan du skye na bde ba can ltar slar mi ldog pa yin nam ldog pa yin zhes zhu ba'i lan du/ slar ldog pa yod gsung ba yin/ 'ga' zhig gis slar ldog rgyu med bde ba can dang 'dra gsungs ba'ang yod gsung/ 'di'i khrid lan gcig gnang ba yin/ brgyud pa ni/ rje shes rab rgya mtsho yan gsan yig chen mo ltar la/ de nas rigs @008a @#/ /dang dkyil 'khor kun gyi khyab bdag mtshungs med dge 'dun bstan 'dzin rgya mtsho dpal bzang po/ des bdag la'o/ /go khrab ces pa ma dag pa yin/ go grabs zhes pa yin/ dpa' bo g.yul du 'jug pa la go cha'i grabs byed pa dang mtshungs pa yin gsungs// ! //paN chen blo bzang chos kyi rgyal mtshan gyi gsung e waM gras su zhugs pa'i lta khrid dran pa bzhi ldan gyi snying po nyams su len tshul gyi steng nas khrid legs par mnos pa'i brgyud pa ni/ rje shes rab rgya mtsho yan de nyid kyi gsan yig chen mo ltar la/ de nas rje btsun dam pa ngag dbang dge legs thub bstan rgya mtsho/ rigs brgya'i khyab bdag rje btsun dge 'dun bstan 'dzin rgya mtsho dpal bzang po/ des bdag la'o/ /'di byin rlabs nye rgyud dang/ dben sa snyan brgyud gnyis ka yin gsungs/ rje bdag nyid chen po yang dbu ma'i lta ba'i don du rgya gar du phabs par dgongs nas/ rje btsun 'jam pa'i dbyangs la zhu bas/ rje btsun gyi zhal nas/ khyed rgya gar du phebs na 'phrin las shin tu rgyas shing/ na lenda'i mkhan por bzhugs pa sogs 'byung yang; slar bod du phebs mi thub pa 'dra/ de bas 'dir bzhugs nas tshogs bsags sgrib sbyang sa la 'bad na/ ring po mi 'gyangs par dbu ma'i lta ba'ang rnyed par 'gyur ro/ /zhes gsungs pa la brten @008b nas rgya gar du phebs rgyu'i 'phro bshol ba yin zhes 'di/ khrid 'di'i dbur gsung ba'i phyag bzhes yod gsungs/ skyabs 'gro yang kha tshig tsam min par snying khong rus pa'i gting nas gsol ba 'debs par byed dgos te/ rgyud las/ dri med sems ni sangs rgyas te zhes gsungs pa yin gsung/ sangs zhes pas spangs pa phun tshogs bstan/ rgyas zhes pas rtogs pa phun tshogs bstan/ yang na sangs zhes pas skyon kun bsal bar bstan/ rgyas zhes pas yon tan kun rdzogs bstan pa yin te/ ma rig gnyid las sangs phyir dang zhes sogs 'dren par mdzad do/ /'di'i skad dod du/ budd+ha zhes pa thad bsgyur byas na; de nyid khong du chud pa zhes pa yin/ rgyud bla mar/ ma dag ma dag dag pa dang/ /zhes sogs gsungs/ sbyin pa dang sbyin pa'i phar phyin gnyis la mu bzhi yod tshul gsungs/ glegs bam dang ral gri zhes par 'di gnyis utpala'i steng du yod par mos kyang chog mod/ ral gri'i yu ba phyag gis bsnams nas 'phyar stabs su bzung ba byas na dbu ma'i lta ba sgom pa la khyad shin tu che/ 'phyar stabs byas pas mthar 'dzin gyi 'ching ba gcod pa yin gsungs/ brgyud pa'i bla ma thams cad rje btsun 'jam dbyangs kyi rnam pa can mtho brtsegs su bzhugs pa gsal 'debs dgos/ 'di snyan brgyud thun mong min @009a @#/ /pa'i khyad chos yin/ rgyal ba rdo rje 'chang 'jam dbyangs su bskyed ba min/ yum nges pa can du mi dgos/ rdor dril bsnams pa/ rdo rje thabs dang dril bu shes rab mtshon pa yin gsungs/ phyag 'tshal ba nga rgyal gyi gnyen po dang/ mchod pa phul ba ser sna'i gnyen po sogs yan lag bdun po nyon mongs pa so so'i gnyen por 'gyur tshul yang yod/ de'i rjes su mkhyen brtse ma dang/ bdud rtsi 'bebs sbyangs 'don dgos/ bdud rtsi 'bebs pa'ang/ snga ma rnams zho'i skya ba la mdung gi phug pa las zho nur nur 'ongs pa ltar gsung mod/ dbyar rdza ri mo thon pa'i spor char zim babs pa ltar bsam na bzang zhes bla ma rdo rje 'chang nas gsung gsungs/ sdig sgrib kyi sdig ces pa rags pa la byed/ sgrib ces pa phra mo byed pa yin gsung/ khrid yig 'dir/ rdze shes rab seng ge'i gsol 'debs sogs mang po gsung mod/ de thams cad kyi gsol 'debs sgrigs dka' bas ma 'don kyang chog gam snyam gsung/ dran pa bzhi ni/ sems can thams cad pha mar dran pa/ bla ma sangs rgyas su dran pa/ rang lus lha skur dran pa/ chos thams cad rang bzhin med par dran pa bzhi yin/ 'di'ang nges na bzang/ lta ba ma rnyed par zhig nas grub pa mi srid gsung/ tho yor yin @009b pa cung zad kyang med gsung pa/ tho yor gyi btags don btsal na rnyed rgyu med pa la byed dgos pa yin/ dmigs rten ma gtogs/ khyad chos gnyis zhes pa tshig cung zad chad pa 'dra ste/ ma gtogs yul gzhan la mi 'phro ba'i khyad chos gnyis zhes dgos pa 'dra gsungs/ mnyam bzhag tu bden med de/ des rtsis zin pa zhes pa'ang cung ma dag /bzhi brgya par/ rtog pa med pas 'dod chags laX zhes sogs gsungs; rgyud la skye rim gyi dbang du byas na chos kyi bdag med la brten nas/ gang zag gi bdag med skye dgos/ rtogs rim gyi dbang du byas na dang por gang zag gi bdag med rtogs nas/ de'i rjes su chos kyi bdag med rtogs dgos pa yin gsungs/ yang bzhi brgya par/ bsod nams chung bas chos 'di laX zhes sogs gsung/ khrid yig 'di ka'i steng nas lan cig gnang/ de nas/ rgyal mchog bskal bzang rgya mtshos mdzad pa'i dbu ma'i lta khrid dran pa bzhi ldan gyi mgur dbyangs dngos grub char 'bebs zhes pa de'i steng nas bsdus pa zhig gsung/ 'dir dang por bla ma sangs rgyas su dran pa byas nas/ gnyis pa sems can pha mar dran pa byas pa las/ gzhan 'dra/ thabs shes zhes pas/ pad zla mtshon/ bde chen gyi gzhal yas zhes pa'ang/ bde ba chen po'i ye shes kyi @010a @#/ /gzung rnam gyi gzhal yas la/ rang lus lha sku bzhugs pa yin/ nam mkha'i khyab pa'ang/ stong gzhi chos can la stong pa nyid kyis khyab pa la byed/ brjod bralX ji lta ba bzhin brjod du med pa la byed/ blos byasX gnas tshod la mi 'gro ba zhig yin/ gzhi rtsa bral baX btags don btsal na med pa la byed/ 'di'i khrid lan gcig min ma gsungs// ! //lcang skya ngag dbang blo bzang chos ldan gyis mdzad pa'i glang ri thang pa'i blo sbyong tshig brgyad ma'i khrid yig theg chen dga' ston gyi steng nas/ khrid thob pa'i brgyud pa ni/ thu'u bkwan chos kyi nyi ma yan rje shes rab rgya mtsho'i gsan yig chen mo ltar la/ de nas bde thang 'jam dbyangs thub bstan nyi ma/ rje ngag dbang thub bstan rgya mtsho/ bka' drin mtshungs med rje btsun dge 'dun bstan 'dzin rgya mtsho dpal bzang po/ des bdag la gnang ba'o/ /de'i 'byung khungs lta bu dang por mnyam med jo bos bdag gzhan mnyam brje'i gdams pa bla ma gser gling ba las gsan te/ de nas 'brom la lkog chos kyi tshul du gsungs/ gzhan su la'ang ma gsungs pa la/ 'brom gyis jo bo lags/ khyed kyis bdag gzhan mnyam brje'i gdams pa nga la rgyun par gnang nas gzhan la mi gnang ba ci yin zhu bas/ khyed min @010b pa gdams pa zab mo 'di gtang mi ma rnyed pa yin gsung/ 'brom gyis bka' babs kyi slob ma/ pu to pa la gnang/ khong la snga phyir slob ma stong phrag gnyis dang brgyad brgya 'du ba las/ dbus kyi nyi zla zung gcig tu grags pa'i nyi ma lta bu'i slob ma sha ra pa/ zla ba lta bu'i slob ma glang ri thang ba gnyis yin/ mchad kha pas bdag gzhan mnyam brje'i gdams pa 'di 'tshol ba'i phyir sha ra pa'i drung du phebs nas/ bla ma sha ra pa'i khrom chos gnang sar phyin pa na/ des bdag gzhan mnyam brje'i gdams pa gtan nas ma gsungs shing nyin kha shas la de ltar byas/ de nas slob ma su yang med dus zhig la mdun du 'gro bar dgongs nas/ slob ma rnams gdugs tshod la song rjes/ khong sha ra pa'i mdun du phyin pa na/ sha ra ba mchod rten zhig la bskor ba mdzad cing 'dug pa la 'phyam rtse ste zla gam gdan du bting ste/ khyed der bzhugs dang nged la zhu rgyu zhig 'dug zhus pas/ khong der bzhugs pa la/ mchad kha pas nged kyi sems la/ khe dang rgyal kha gzhan la ster/ /gyong dang pham kha rang gis blangs zhes pa zhig 'dug pas/ de 'dra rang e yin zhes sogs zhus nas/ rjes sor gdams pa zab mo bum pa gang byo'i tshul du gsan/ pu to pas glang ri thang ba la/ khyed kyi gzhi kha skyong mi dgos zhes gsungs kyang/ rjes sor dpal ldan @011a @#/ /lha mos bskul ba bsten nas/ glang thang dgon pa btab khong la bla ma ngo dagAng ? zer/ bsnyen par rdzogs nas sku tshe de la lan gsum mi nam bzhad par gsung/ khong la nye gnas zhig yod pa des/ khyed kyi sbyin bdag sogs 'ongs pa la zhal ngo dkar po zhig ston na legs/ 'o skol la ngo nag zer gin 'dug zhus pa la/ zhal nas jo bo/ sems can thams cad kyi sdug bsngal bsam tsan ngo dkar po ston pa'i go skabs med gsungs/ dngos gzhi'i skabs su/ khrid yig 'di ka'i mjug tu/ blo sbyong tshig brgyad kyi dang po/ bdag gis sems can thams cad la/ /yid bzhin nor bu las lhag pa'i/ /zhes sogs tshigs bcad gcig gsung rjes/ zhi ba lha yis ji skad du/ sems can rnams dang rgyal ba las zhes sogs bdud rtsi 'bebs sbyang gi bar dang/ de nas yang mjug gi tshigs bcad gnyis pa gsungs/ khrid yig gi bdud rtsi 'bebs sbyang gi 'tshams las yang bdud rtsi 'bebs sbyang gi bar gsungs pa sogs gzhan bdun la'ang de ltar yin no/ /de'i skabs su dge slong zhes pa sangs rgyas yin/ bde gshegs snying po 'ang rgyud la ldan gsung/ khrid yig tu/ de phyir rang nyid skyon mang dang/ /ldan pa'i dman par 'dzin pa dang/ /zhes sogs ni/ phugs nor bcu las/ @011b mi gral nas thon/ khyi gral du bsnyegs zhes pa'i don yin/ de bzhin 'phyar kha gtong yang rung zhes pa'i 'phyar kha ni mi kha ngan bstod smad par gsum du sgrigs pa la byed gsungs/ sdug bsngal gtong len byed pa gzhan gyis ma shes na bzang ba yin/ rang nyid yal bar 'dor ba dang zhes sogs tshig lhug pa'i sgo nas gsol 'debs byas kyang rung ste/ bla ma rin po che bdag gi rgyud la/ rang nyid yal bar 'dor zhing gzhan gces par 'dzin pa'i bcos min gyi blo khyad par can skye bar byin gyis brlab tu gsol zhes gsol 'debs bya zhing/ 'di la re 'dogs 'gog pa'i gsol 'debs zer gsungs/ 'di'i khrid lan gcig min ma gsung gzhan 'dra'o// //