@#/ /'grel pa bzhi sbrag gi zin bris snying gi mun sel zhes bya ba bzhugs so/ / @001b @##/ /bla ma dang dpal rdo rje sems dpa' la phyag 'tshal lo/ /gang la bsten na mchog thun dngos grub kun/ / 'bad med stsol mdzad drin can bla ma dang/ /dbyer med dang po'i mgon po'i zhabs sen rdul/ /snying dbus 'dab brgyar byang chub bar du bsten/ /bloO chen rgyal ba'i thugs gsang zab mo'i bcud/ /skal bzangO 'gro ba'i yid kyi zhing sa ru/ /'bebs mkhas tshulO gnas khrimsO ldan gtsug gi rgyan/ /mkhas grubO rgyaO mtsho'iO mgon la snying nas 'dud/ /gang gi zhal khyim rin chen 'byung gnas las/ /legs 'ongs dpal ldan 'dus pa'i @002a @##/ /rgyud 'grel gyi/ /bshad lung zab brling man ngag nor bu'i dbya/ ? /blo chung bdag yid bum bzang 'khyil ba gang/ / brjed nges chom rkun 'jigs las bsrung pa'i phyir/ /dran gso'i ched du brjed byang ri mo'i 'phreng/ /spel lo blo ldan sgeg mo'i do shal du/ /longs shig chos bdag bsrung mas bya ra mdzod/ /ces shis pa brjod cing mchod par brjod pa sngon du btang nas gang gleng bar bya ba ni/ shing sprel zla ba dang por khyab bdag rdo rje sems dpa' dang zhal mi gnyis pa bka' drin zla med rje btsun blo bzang tshul khrims rgya mtsho dpal bzang po'i zhal snga nas dpal gsang ba @002b 'dus pa'i rgyud 'grel gyi bshad lung thob skabs kyi gsung bshad rang blos gang zin brjed thor 'god pa la/ thog mar bla mas dbu bskul te sher snying tshar gsum/ mkha' la spyod pa'i shlau ka gcig / seng gzungs brgya skor gcig /tadya thA zhes sogs bdud bzlog byas rjes/ bla mas dbu bskul te/ yid kyi rol ba/ zhes sogs rdor sems bsgom bzlas/ yig brgya nyer gcig re/ byang 'dren gyis dbu bskul te 'grel gtor bsngo ba dang/ maNDal phul nas/ 'dus pa gsang ba las byung ba/ /zhes sogs shlau ka gcig gis gsol ba btab pa/ rmad byung mtshan dpe ma kha skong dang bcas pa'i brgyud 'debs/ sangs rgyas chos tshogs ma lan gsum/ de nas bla mas gsung bshad spyi bye brag mtha' yas pa bka' stsal mod blo'i rwa bar ma 'chun bas re zhig bzhag /dngos gzhi'i gsung bshad dang brda' sbyor tshul 'ga' zhig brjed byang du 'god pa la/ ^ 'grel pa bzhi sbrag gi bshad lung gi brgyud tshul ni/ srad rgyud/ rgyud smad/ rgyud stod sogs nas brgyud ba yod kyang/ nged tsho'i brgyud pa 'di la srad rgyud dang stod rgyud nas rgyud ba med/ 'dir smad rgyud kho na yin/ rje rin po ches shes rab seng ge la gtad tshul sogs dang/ de nas dam pa gong ma rnams rim par brgyud de rgyal ba @003a @#/ /bskal bzang rgya mtsho'i drung du kun mkhyen sku bar ba rang nyid kyis zhu ba po gnang ste dgyes bzhin du zla ba gcig gi ring la gnang ba ni ngo mtshar ba yin/ sku bar bas tshogs chen 'du khang du bla ma dpal mang rin po che dang dpal ris pa sogs la gnang/ de dus sku na phra yang thugs rig gsal pas phyag len dang brda' sbyor tshul sogs gcig kyang ma brjed kyi rang nyid nas gsung/ 'grel ba bzhi sbrag gi bshad lung tshar bco lnga gnang ba'i bcu gsum bcu bzhi pa gnyis nyid nas gsan/ de gnyis kyi skabs rdor sems bsgom bzlas kyi dbur yid kyi rol ba sogs ma gsung gsung/ 'grel ba bzhi sbrag ces pa'i 'grel ba bzhi brtsi tshul mi 'dra ba 'ga' re yod kyang/ kun mkhyen sku bar bas/ rgyud rtsa bar byas te/ sgron gsal dang/ dkyus mchan zur mchan gnyis gcig tu byas/ bsdus don dang/ mtha' dpyod bzhi la 'grel ba bzhi sbrag ces gsung/ yang/ rtsa rgyud sgron gsal gnyis bshad gzhir byas/ dkyus zur gyi mchan gnyis so sor bgrang/ bsdus don dang/ mtha' dpyod bzhi las ngo 'dzin pa'i gsung rgyun yod/ phyi ma ltar na rje rin po ches mdzad pa'i 'grel ba bzhi sbrag go /rje rin po ches rtsa rgyud kyi don rnams 'chad thabs yan lag lnga'i nang nas @003b bsdus don gyis 'chad pa la bsdus don zur du bkol/ brgal lan mtha' dpyod kyis 'chad/ tshig don rnams dkyus mchan gyis 'chad/ der ma 'dus pa 'ga' zhig zur mchan gyis 'chad pa yin/ bshad lung skabs/ dang por 'grel rkyang dang/ de nas mchan dang sbrag nas 'don pa sogs lung thob pa'i ched yin pas bshad lung thob na bzhi ka'i lung thob pa'i go chod gsung/ 'grel ba bzhi po de sbrag nas dpal gsang ba 'dus pa'i rtsa rgyud kyi don 'chad pas na 'grel ba bzhi sbrag ces pa yin/ de 'chad pa la bsdus don las/ rje btsun bla ma zhes pa nas/ dang po las phye ba ni mtha' dpyod du gsal lo; ;zhes brjod/ de nas mtha' dpyod la phebs par zhu gsung nas/ mtha' dpyod kyi dbu rgyud kyi rgyal po dpal gsang ba 'dus pa'i rgya cher bshad pa/ zhes pa nas/ dam pa snga ma rnams kyi phyag bzhes la 'dug pa ltar bya'o/ /zhes pa'i bar ljags lung mdzad/ de'i grangs bdun bar/ shad+ha ka ra warmas bshad ces pa ni dad byed go cha zhes pa yin/ 'phags pa gsang ba lung bstan pa'i mdo bod du ma 'gyur/ mdo sde gdams ngag 'bogs pa'i rgyal po'i nang tshan zhig yin par bu ston rin po ches gsung gsung/ brgyad par/ rig 'dzin gyi sde thams cad ces pa'i rig pa stong nyid la byed par sku @004a @#/ /bar bas gsung/ snyim pa'i me tog ces pa shanti pas mdzad/ nyer gnyis bar/ 'bum la dgyes pa'i rdo rje las/ zhes pa ni kyai rdo rje'i rgyud 'bum phrag lnga pa bod du ma 'gyur ba zhig yin la brtag gnyis ni 'di'i nang nas bsdus pa yin gsung/ so bdun par/ kha che la kbwil ? lag smi zhes dpal mang rin po ches gsung/ khungs ma yin zhes pa khungs ldan min zhes pa'i don yin/ rnal 'byor rgyud kyi skabs su bla med drang don du 'dod dgos pas/ drang tshul kun snying gis bshad pa ltar yin nam zhes dpal mang rin po ches gsung/ nyin gnyis pa bla ma rgyun mchod nyin/ rgyud pa'i phyag len la/ rgyud mchod skabs bdag bskyed tshogs mang nas gsungs te longs sku spyan 'dren mgor bla ma phebs pa yin/ sngar sde khri rin po che dang/ gung thang rin po che rnam gnyis nas de ltar gnang/ a lags dpal mang rin po che nas gnang skabs gzims chung sa khyon chung ba dang/ dgung lo mtho ba bcas phebs bzhugs kyi stabs ma bde bar bdag bskyed gsungs skabs dom ra mnabs te/ longs sku spyan 'dren gyi mgor dom ra phud pa yin gsung ste khong gis kyang de bzhin mdzad/ mdun bskyed kyi bla ma rdo rje 'chang du bskyed skabs su dbu zhwa man pas te rdor dril @004b bsnams pas 'khyud rgya dang bcas bzhugs pa ni rgyud mchod gnyis kar 'dra dkyil 'khor gyi gtso bor bskyed/ phyi nang gsang ba'i mchod pas mchod nas bstod pa maNDal gsol ba btab pa dang smon lam shis brjod rnams sngon du btang ste/ rdor sems bsgom bzlas/ 'grel gtor/ maNDal 'bul ba brgyud 'debs sogs byas/ de nas bla mas spyi bshad kun slong 'chos tshul sogs kyi gsung bshad gnang nas/ khyed rang rnams de ring nas rgyud 'grel nam gsan res kyi gnas 'di yang tha mal gyi snang ba tsam ma yin par ye shes rang snang las grub dpal gsang ba 'dus pa'i lha sum cu so gnyis kyi rten dang brten pa'i dkyil 'khor dngos dang/ bla ma yang seng chen brgyad kyis btegs pa'i rin po che'i khri'i steng du lus dkyil gyi lha bkod de dkyil 'khor gyi bdag po dang ngo bo dbyer med pa dang/ slob ma khyed rang rnams kyang 'khor gyi rigs lnga gang rung gi nga rgyal bzung bar bshad pas dmigs pa de bzhin ma yengs par gsan par mdzod ces brgyud pa'i bla ma gong mas phyag bzhes yin gsung/ rgyud 'grel 'chad pa la; bsdus don la phebs par zhu zhes brda' sbyar nas sa bcad bkrams rtsa rgyud la phebs par zhu gsungs nas/ rtsa rgyud ljags klog gnang/ de'i don mtha' dpyod la phebs par zhu/ mtha' dpyod @005a @#/ /bklags/ 'grel ba'i mtshan don 'grel rkyang la phebs par zhu/ 'grel pa mtshan dang sbrags pa la phebs par zhu zhes nges can du brda' sbyor dgos/ 'gyur phyag man chad/ 'grel ba la phebs dang/ mchan sbrag la phebs tsam gyis chog /a lags dpal mang rin po ches 'grel ba'i mchod brjod kyi skabs 'grel ba la phebs par zhu/ dpal ldan nas btud te zhes pa'i bar mchod brjod gsung ste/ yang bsdus don gyi rtsom par dam bca' 'grel ba la phebs par zhu/ zla ba grags pas rim bzhin bshad/ 'di gnyis mchan phyogs gcig tu yod pas 'di gnyis mchan sbrag la phebs pa zhu zhes slar yang dpal ldan rgyud rgyal nas/ rnyed pa bzhin du 'chad pa'i bar mthar chags su gnang gsung nas de bzhin mdzad/ 'grel ba'i bshad par dam bca'i mchan sbrag 'don skabs mchod brjod kyi dbu nas 'don pa dpal mang rin po che'i phyag len yin/ ba tshab zhes sogs pa'i mchan dang mchan gyi steng 'og tu ba tshab dang; chag ces yod pa de 'dra la 'gyur mchan zer/ tsheg skor gyi brda' sbyor tshe/ sngon 'grel ba bar ma mang po med bas/ 'i de tsheg gis bcad zer ba lta bu la/ 'i de med pa byas zhes @005b dang/ 'i de yig tshag byas zhes sogs kyis brda' sbyor bar gsungs/ tsheg gis bcad zer ba/ rgyal ba skal bzang rgya mtshos gsungs pa yin nam gsung/ 'i de tshig gis bcad lta bu phal cher la 'dra yang/ gang lta bu la gang zhes sbyar na mi bde bas/ gang zhes pa de tsheg gis bcad ces brjod/ zur mchan la yig rtags 'dug tshe/ dper na/ gzur mchan la phebs par zhu dang/ sa gnas pa nyid kyi sa zhes pa la/ kyi de tshig gis bcad/ sa de yar sbyar nas/ gnas pa nyid kyis zhes bklog dgos pa 'og gi de 'dra'i rigs thams cad la 'gre /rim pa so so'i don bshad la sems dmigs kyi rim pa'i tshig don bshad skabs 'grel ba brkyang ngam/ yang na/ mtha' dpyod dpar gsar du sems dmigs kyi skabs su sems dmigs kyi rim par bsdus pa'i lus dben dang ngag dben ni 'og tu ston no/ /zhes pa'i mtshams su sbrul shad gcig yod pas de'i kha skong mtha' dpyod byas na/ le'u dang por mtha' dpyod nyer dgu yin kyang/ nyid nas dpal mang rin po cher mtshams 'dir kha skong mtha' dpyod dgos sam zhu bas/ mtha' dpyod kyi sems dmigs kyi skabs su zhes pa'i tshig gi nus pa la dpag na kha skong mtha' dpyod dgos sam/ 'on kyang kho bos @006a @#/ /sngar 'chad thabs su/ le'u dang por mtha' dpyod nyer brgyad bshad yod pa de las mi thub gsung/ de tshig nyung bas ston po'i 'phror sprul shad med pa byas snang ba gsum gyi ming gi rnam grangs la mar sbyar nas sems dmigs kyi rim par 'grel rkyang byas na dpal mang rin po ches gsungs pa dang 'grig /gong gi 'gyur phyag de song nas/ gzhung dngos kyi don shes pa de/ 'di'i gsum pa yin pas/ de la gsum/ zhes sa bcad gong ma gang yin gyi ming 'og gi gnyis pa gsum pa sogs so so'i thad kar blangs te gsung/ gong gi snang ba gsum gyi ming gi rnam grangs zhes pa de song nas/ de'i sa bcad rjes ma gnyis lus yod pa skabs 'dir yong dgos pas/ snang ba gsum so so'i mtshan nyid des khungs mtha' dpyod la phebs par zhu gsungs red/ 'og ma rnams su yang de bzhin gnang ste/ 'od gsal las zung 'jug 'grub lugs zhes pa'i sa khungs mtha' dpyod song nas/ bsdus don la/ rgyud pa'i phyag len skabs 'dir bsdus rgyu gsum yod ces zer yang/ ^ sku bar pas bshad lung skabs/ skabs 'dir gong gi sa bcad rim pa lnga bstan pa de song nas/ sa bcad phyi ma gnyis lus @006b yod pa skabs 'dir yong dgos pas/ de nyid du rgyud kyi don kun gsal bar bstan pa zhes pa de tshar nas/ gong gi rgyud kyi don kun bsdus na du zhig tu 'du ba/ zhes sogs kyis brda' sbyar bar gsung gsungs nas nyid kyang de ltar mdzad/ 'og ma rnams su yang de bzhin gnang/ sgron gsal lnga bar mthar bcas zhes pa'i mtshams su zur mchan dang/ de nas 'i mtha' can no zhes byung ba lta bu la zur mchan tshar nas mthar bcas ni mtha' can no/ /zhes bklags dgos gsung/ dpal mang rin po che nas (ka )kha 'di 'dra la g.yas skor dang/ ka( kha) 'di 'dra g.yon skor gsungs pas/ sku bar ba dang/ rgyal ba skal bzang gi phyag len yin pa 'dra gsungs/ sde khri rin po che dang/ gung thang rin po ches/ snga 'khor phyi 'khor zhes gsungs/ sde khri rin po ches/ hor tshang sku gong ma'i mdun nas gsan/ des sku bar ba las gsan pa yin yang brda' sbyor tshul mi 'dra gsung/ kho tshe bsod nams tshang gis g.yas g.yon snga ma las ldog zer/ shog grangs bdun par/ {1}rgyud ? zur mchan 'don/ de nas gnyis yig la phebs par/ rgyud dang zhes 'don gsungs/ sgron gsal 'di 'gos gyur yin pas/ ba tshab kyis 'gyur mtshan byas pa yin/ rgyud la slob pa la @007a @#/ /thog mar rang rang gi cho ga sa chog sbyin sreg sogs 'don cha'i rim pa rnams blo la legs par sbyang ba zhig byas/ de nas rtsa rgyud la zhugs na go ba legs par chags pa zhig 'ong/ shog grangs bcu par/ mchan sbrags kyi dbur/ kha dkyil 'khor zhes sogs yod pa la/ mchan sbrags la phebs pa'i thog mar ka ba la phebs par zhu zhes sbyor/ der gsal ba'i mtshan gyi steng du ba tshab dang/ chag ces yod pa la/ ba tshab dang/ chag ces pa'i 'gyur mchan 'dug ces pa dang/ ba tshab dang chag gis zhes pa lta bur brda' sbyor/ bcu gsum par/ {1} de ni ba'i ma {2}lus pa ces pa la; gcig yig song nas gnyis yig la zhes pa ba'i zhes pa mi dgos/ bcu bzhi par/ {kha}shes {10} pa'i {ga} dbye {2} ba yis zhes pa la/ ka ba la phebs par zhu dbye ba/ kha ba la phebs par zhu shes pa/ gcig yig song nas gnyis yig la phebs par zhu/ dbye ba yis zhes brda' sbyor/ rgyud pas rgyud gzhung gong 'og dkrugs nas gsungs pa'i rgyu mtshan nga rang gis dpal mang rin po cher zhus pas/ bsnyen sgrub yan lag bzhi'i go rim dang bstun pa yin nam snyam pa yod kyang da dung dpyad dgos gsungs pas/ de ltar na le'u dang po'i 'grel bar de nas bcu drug gis bsnyen sgrub yan lag @007b bzhi rgyas par bshad ces dang/ mtha' dpyod du le'u gnyis pa nas bcu bdun pa'i bar bcu drug gi bzhi tshan re res bsnyen sgrub bzhi re re ston zhes sogs kyi steng nas dpyad dgos pa 'dra gsung/ ko Ta khya la sogs pa bcu phyag na rdo rje'i mtshan gyi rnam grangs su bshad pa yang yod/ sum cu par/ te zhes pa lta bu tshig gis ma bcad pa lta bu la zur mchan gong 'og 'grig mi dgos/ dkyus mchan la 'grigs dgos pas tshig gis bcad pa yin/ sku bar bas bshad lung gnang skabs/ sa khungs mtha' dpyod dang kha skong mtha' dpyod sogs kyi brda' gnang tshod red/ brda' sbyor tshul de 'ga' zhig /dpal mang rin po ches/ rgyud pa'i grwa ba gling 'jam dbyangs zhes pa'i ngag las gsan pa yin/ des ni de'i bshad lung dpal mang chung ba tshang gi gong ma blo bzang rgyal ba tshang nas thob/ des bse khri rgan tshang nas thob/ bya rkang/ mthing rkang la sku ba zhog nas brda' sbyor ma gnang bas/ ^ rgyal ba skal bzang rgya mtsho dang/ khri ngag dbang mchog ldan gyis brda' ma sbyar ba 'dra/ dpal mang chung ba tshang gi gong ma blo bzang rgyal bar grags pa khong gis/ khri rgan tshang las 'grel ba gsan/ phyis khri'i skabs 'grel ba gnang tshe brda' sbyor mdzad pas khri rgan dang kun mkhyen gong ma'i dus yod tshod 'dug /de ltar @008a @#/ /na sngon rgyud smad la yang yod kyang phyis zhig na chad par 'dra/ blo bzang rgyal ba tshang las 'grel ba thob pa'i rgyud pa'i a mchod rgya ldi zer ba rjes sor phung po ma bde bar yod skabs su/ a lags dpal mang rin po che'i mthar phyin zer ba mang/ bya rkang mthing rkang ci 'dra la ngos 'dzin dris par shog ldeb gcig bskur te bzung bas te nas zhu ba 'di yin zhus/ khong gi 'di'i steng nas thugs dpyad gnang ste bklog tshul 'grel ba'i 'chad thabs su bkod/ dpal mang rin po ches yang yang thugs dpyad gnang ste 'grel ba gnang skabs rjes ma zhig la/ bzung bas te nas zhes pa mthing rkang ma dang/ bzung bas te bzung nas zhes 'don na bya rkang ma yin nam snyam gsung/ yang na bzung nas te bzung nas sogs mthing rkang ma ni 'dra la/ dgongs pa yis ni ste dgongs nas zhes 'grel ba rang du bkrol yod pa rnams bya rkang ma byas na chog gam shar tshod yin pas dpyad gsung/ de yang rkang pa ma snyoms pa'am/ cha ma 'grigs pas mthing rkang ma zhes bshad pa yin/ 'grel ba dpar gsar so bzhi pa'i nyin phreng lnga par/ slob mas gsol ba zhes sogs la/ sprul shad kyis chod pa'i ga rtags gcig pu yod pas/ ka kha gnyis song @008b ga ba la phebs bar zhu zhes sbyor/ so brgyad par/ ma mthong ba na snang ngo/ /zhes pa ma mthong bar snang ngo zhes pa yin nam gsung/ zhe lnga par/ chag gis/ mtha' dag de bzhin gzugs rnams la zer/ de ltar na/ gcig yig song nas gnyis yig la phebs zhes sbyor mdzad/ de nyid re re'i don spang ba zhes bsgyur/ zhes bdun par/ ga ldum gyi gyi de tsheg gis bcad pa de yar sbyar nas nyid kyis zhes sbyor bar mdzad/ le'u dang po'i zil gnon rdo rje'i ting nge 'dzin bshad pa la/ sa bcad bzhi yod pa'i gsum pa la 'grel ba med par/ re gsum pa'i nyin phred drug pa nas mchan rkyang yod der brda' sbyor tshe/ de la brten nas yig don kha bskang ba de nyid zur mchan la phebs par zhu/ lnga gcig par/ sku'i dang zhes pa tshig gis bcad/ yon tan dang sogs pas/ gsung gi yon tan dang thugs kyi yon tan zhes pa'am/ yang na gsung dang thugs kyi yon tan zhes sbyar ba la 'phar ma zer/ re brgyad par/ {ga}'di la {ka}snang ba gsum gyi dbye {kha}ba yis sogs la/ ka pa la phebs/ snang ba gsum gyi dbye ba/ kha par song nas/ ga ba la phebs par zhu 'di lang ba la phebs par zhu thun mtshams zhes sbyar/ don dgu'i rgyab phreng dang por/ sku bzhog nas ya mAn ta kri zur mchan @009a @#/ /la phebs par zhu/ ya ma gshin rje/ anta mthar/ ta kri byed pa zhes 'don pa sku bar bas gsung/ gsol dpon bstan pa dar rgyas kyis gshin rje anta zhes yod pa'i tshul gsung/ 'di gong gi rigs 'gre la dpag na dkyus mchan yin tshod 'dug kyang/ ya ma dang anta mtshams pas dkyus la 'jug pa bde ba yin nam gsung/ glan tsha nyi ma lcam dang/ rdog Arya de bas rgyud 'grel yod/ bshad rgyun la bgos dang/ khrid rgyun la mar lugs bzang pas mtha' dpyod kyi mjug tu yang/ 'gos lugs bshad rgyud kyi che ba dang/ mar lugs gdams ngag gi che ba zhes gsungs/ 'gos kyi stod thun chen mo/ rjes kyang tshad mar mdzad la/ skabs 'gar dpyad pa cung zad re mdzad/ rnam snang gtso bo byas nas lha so bdun re re gtso bor byas nas 'don chog kyang/ rang re'i cho ga la bshad rgyun med pas sbyor tshul dka'/ 'jam rdor yang/ gsang 'dus mi bskyod pa'i nang nas 'jam dbyangs gtso bor byas ste lha bcu dgu tsam gyis chog par byas pa yin; jo bo rjes lha bla ma byang chub 'od la 'jam rdor la gtso bo 'pho'i man ngag gis/ 'jig rten dbang phyug gtso bor byas te da lta'i gsang 'dus 'jig rten dbang phyug gi dkyil chog 'di @009b gnang ba yin/ rgyud nas bshad pa'i rdo rje slob dpon mtshan ldan gyis gtso bor 'pho ba'i sar so sor dbang bskur chog /yongs grags kyi gsang 'dus mi bskyod pa'i dbang thob na gtso bo 'pho ba'i so so'i dbang thob pa'i go chod/ le'u gnyis pa'i mtha' dpyod don gnyis pa'i rgyab tu/ yang dngos po med sogs/ de byang chub kyi sems tshul bzhir bshad pa'i sbas don la yar sbyor ba yod kyang/ a lags dpal mang rin po che'i mtha' dpyod drug gis bshad pa'i mjug tu sbyar/ brgya gnyis par/ mrka ta zhes brgya skad dngos yin/ da lta mrkad zhes pa zur chags pa yin gsung/ rgyud smad ba bla ma zhig gis le'u la skabs 'god pa dang/ shU n+ya ta'i sngags don rdor bzlas su bshad pa gnyis/ sa bcad so sor byas nas/ gnyis pa la lnga zhes dang/ 'grel ba brgya dang gsum par/ le'u gsung pa'o zhes pa'i mtshams su sprul shad bzhag kyang/ 'phags 'od yon tan rgya mtshos sgron gsal rnam nges dang/ dga' ldan bar gsar rnying gnyis kar gnyis pa la bzhi zhes yod pas mi dgos/ de yang 'grel rkyang gi dbang du byas nas le'u la skabs 'god pa byas na skabs 'dir 'brel med/ le'u la skabs 'god pa dang/ shU n+ya ta'i sngags dor gnyis rdor bzlas su bshad par mtshungs pa'i rgyu @010a @#/ /mtshan gyis gcig byed gsung/ brgya drug par/ mtshon pa ste mtshon pa zhes pa la/ yang na gong gi bzung bas ste bzung nas zhes yod pa la mthing rkang ma rang gi ngor 'di ltar yod pa la/ bya rkang ma zer ram gsung/ brgya brgyad par/ ba tshab kyis gzhi dang sbyor ba la zhes sogs ba tshab kyis zhes gzhung na yod pa la dkyus mchan dang steng du ba tshab zhes yod pa la 'gyur mchan zhes pa'i zhib cha yod gsung/ brgya dang bco brgyad pa'i rgyab kyi zur mchan la/ sku bzhog nas 'di klu byang gi sdom yin pas/ dang por sa gzhi sbyang ba dang zhes sogs yod pa la/ sbyang ba dang gcig /sa yongs su 'dzin pa dang gnyis zhes sogs sbyar nas de ltar gnang/ bsdus don tu 'jug bsdus te gzhan du kha 'phang ba zhes pa ni 'grel bar rgya cher ni klu byang gi dkyil 'khor gyi cho ga las blta bar bya'o zhes pa de yin pas/ dkyil chog nyi shu pa la blta dgos pa yin gsung/ lus kyi mchod par phyag bskor sogs 'jog pa'i khungs brgya bcu bdun par yod/ le'u drug par/ 'gyur 'phar ma'i skabs 'grel bar phebs par zhu/ zhes 'grel rkyang yul du byas pa'o yid ni dga' zhing zhes sogs 'don/ yang na 'gyur 'phar ma la phebs par zhu/ zhes yul du byas pa'o/ /yid ni dga' zhing sogs 'don/ / @010b de nas 'gyur 'phar ma'i mchan sbrags la phebs par zhu/ zhes 'phar ma'i thad kyi mchan sbrags 'don/ sgron gsal 'di dgos 'gyur yin zhing 'gos 'gyur la thad 'di med pas/ ba tshab kyis gyur nas/ rje rin po ches kha bskang ba yin pas/ ba tshab kyi hor khungs bsab pa mchan sbrags dang bcas pa la phebs par zhu/ zhes sbyar kyang chog gsungs/ 'don tshul 'di nges can min dkyus ltar bton kyang chog /da lta dbu sogs nas yang dkyus ltar 'don/ 'don tshul 'di dpal mang rin po ches gnang ba yin gsungs/ rim pa gnyis kyi phra mo'i sbyor ba rgyas bshad kyi drang don la/ rgyud smad pa'i phyag len la rgyud 'don srol yod pas/ 'don na de'i mdor bstan gyi rgyud slar yang 'don dgos pa yin/ 'don dgos pa'i nges pa med gsung/ tshogs 'khor kyi skabs bza' btung sogs la rgya skad kyis smos dgos pas/ go ri la rgya skad mi shes pas 'khur ba zer/ rtsam pa la rgya skad kyang med de ces gsungs/ 'dir ba tshab rtsam pa'i zhes sogs la dpag na rgya skad yod dam gsung/ rgya gar du rtsam pa med kyang ming yod chog rgyu red gsung/ spyi don yan lag gnyis su phye ba'i spyi don la mtha' dpyod kyis khyab/ lus brtas par byed pa'i rnal 'byor dang/ lce chung las bdud rtsi btud tshul gnyis sbrags na bzang gsung/ rnam snang mngon @011a @#/ /byang spyod rgyud du zla bas bshad pa ni mngon par byang chub pa zhes bya ba spyod pa'i rgyud las zhes pa 'di yin gsung/ bla ma'i rgyun mchod skabs lag pa g.yas la gshin rje gshed ces pa'i skabs su rdzas bsdus pa'i rgyu mtshan/ dpal mang rin po ches len pa po lag pa yin pas lag pa gshin rje gshed du mos dgos pa yin gsung/ nyid nas mi bskyod pa de yi lag pa ma rig pa nyer thob yin te zhes dang/ zhes mi bskyod pa'i dam tshig gi nges don skabs gsungs pa de de'i nges don yin nam gsung/ le'u bcu pa'i rgyud kyi phyag 'tshal te zhes pa dang/ bshad du gsol zhes pa'i sprul shad gang rung zhig mi dgos gsungs kyang/ dang po de med pa byas na bde gsung/ blo bzang rgyal ba tshang gis 'grel pa nyan pa'i grwa rgan sga phug tshang gi ngag nas le'u bcu gcig pa la 'phar ma gsum yod pa dpe cha zhig la rtags rgyab pa da lta dngos mi zin tshul dpal mang rin po ches gsan te/ khong gis phyis su dpe cha de rtsar bcad nas gzigs kyang rtags ma byung le'u de 'phar ma 'di red snyam pa zhig ma rnyed gsungs pas/ ska phug tshang gis le'u gzhan zhig la 'chug pa yin nam gsungs/ bsdus don du yi ge gsum gyis sngags kyi sku phyag rgya chen po bskyed tshal zhes pa'i @011b thad kyi 'grel ba brgya so drug gi rgyab gzigs steng/ phyag rgya chen po zhes bya ba ni sogs zur mchan bcas pa der 'phar ma yod med rtog pa tsam gnang/ sgron gsal gnyis brgya so gsum par/ gang du yang zhes sogs la mchan sbrags la phebs par zhu/ gang du yang rung ba'i sngags kyi gsang ba la/ zur mchan la phebs par zhu/ sngags ni zhes sogs sbyar na bde gsung/ 'grel ba 'chad thabs su/ le'u bcu gnyis pa la sa khungs mtha' dpyod lnga yod gsungs kyang/ phyis khong gis 'grel ba rjes ma gnang skabs mtha' dpyod brgya bco brgyad pa'i chos rnams rang bzhin dag pa las; nas/ 'jigs nas ma bris so/ /zhes pa'i bar 'di bsdus don gyi don dam la dmigs nas zin pa'i ngang nas spros pa rnams bya bar bstan pa zhes pa'i kha skong la sbyor dgos pa 'dra ste/ chos rnams sogs rkang pa gnyis po de/ de'i thad kyi rgyud 'grel ba gnyis kar byung zhing/ spyi don gyi khungs la ma sbyar na rtsa 'grel gyi thad nas ring du 'jur 'gro bar 'dug /des na ma bris pa'i 'jug /rgyud 'dir zhes pa'i mgor dpar gsar gyi sprul shad phyis su blang ba de yang dgos gsung/ zhes sngar gyi mtha' dpyod de nyid spros pa rnams bya bar bstan pa zhes pa'i kha skong du gnang ste/ 'di ltar byas na le'u @012a @#/ /bcu gnyis pa la mtha' dpyod drug yod dgos gsung/ le'u 'dir phyag mchan gyi rig 'dzin sgrub skabs kyi bsdus don du/ dang po la gnyis/ sgrub pa'i tshul dang/ phan yon mjug sdud dang bcas pa'o/ /gnyis pa dang/ gsum pa dang/ bzhi pa yang de dang 'dra'o/ /zhes gsungs pa la/ gnyis pa rdo rje rig 'dzin sgrub pa la gnyis/ sgrub pa'i tshul dang/ phan yon mjug sdud dang bcas pa'o/ /gsum pa padma'i rig 'dzin sgrub pa la gnyis/ sgrub pa'i tshul dang/ phan yon 'jug sdud dang bcas pa'o/ /bzhi pa ral gri'i rig 'dzin sgrub pa la gnyis/ sgrub pa'i tshul dang/ phan yon 'jug sdud dang bcas pa'o/ /zhes sogs so sor sbyar nas gnang/ sum brgya gsum par/ thams cad du ni ste la'i don no zhes pa la/ thams cad du ni thams cad la'i don no zhes bklogs/ sum brgya bzhi par/ ma ning ste dngos po ste rang bzhin med pa zhes sogs la/ 'di dang 'dra ba dbus ste 'khor lo ste zhes pa zhig la/ dpal mang rin po ches de 'don tshul ji ltar yin ma shes gsungs pas/ 'di 'dra la 'don tshul gzhan zhig yod dam gsungs/ sum brgya lnga bzhi par/ ke sa'am sha ri ba zhes pa la/ kai sha ri ba'am/ kai sa ri ba zhes @012b pa klag kyang chog gsung/ yang/ ke sa'am ke sha ri zhes bklag kyang chog /mtha' dpyod brgya nyer bzhi par/ gzi brjid phung po gtsug tor rgyal/ /zhes pa'i rkang pa bzhi pa'i don ces pa'i mgor sprul shad bzhag pas 'grel ba la dpag na/ rgyud kyi yang tshig bcad de'i gong dang/ sgron gsal gyi yang de'i 'grel gyi gong du sprul shad byas na bde'am snyam pa 'char yang/ dpal mang rin po cher zhu bar/ de 'dra'i yar gcod mar gcod kyi rigs dogs pa can 'ga' re yod ces pa tsam las ma gsung/ sngon rgyud pa'i sbyin sreg gi rigs srod la byas pas rlung ldang ba sogs kyi rkyen gyis/ rgyud pa bla ma 'jam dbyangs dpal ldan gyis rgyud khri'i skabs zhig snga dro'i dus su sbyin sreg byas pa shin tu legs po byung bas/ de nas dus 'khor sman pa sogs de tshun la tshugs pa yin pas srol de tshugs song ba yin/ rang gi las rung sogs kyi kha skong gi sbyin sreg srod la thub na legs zhes gsungs/ sum brgya zhe bdun par/ bya mu sa'am/ sha la zhes pa mthing rkang/ mu sa la zhes bton na bya rkang/ mu sa la'am/ mu sha la byas na 'phar ma dang/ de bzhin du/ sum brgya nga bzhi par/ n+ya ke sa'am/ sha ri/ mthing rkang/ ke sa ri bya rkang/ ke sa ri 'am/ ke sha ri 'phar ma byas na chog gsungs/ le'u bcu bzhi par/ @013a @#/ /khro bo dgu'i 'phreng sngags gsungs kyang/ gtsug tor 'khor bsgyur gyi 'phreng sngags ma gsungs pa ni/ rgyud 'dir sbas pa yin la/ de nas gur nas 'byung ba de yin par sngags rim chen mor gsungs/ kun mkhyen gong mas dbus su ri chos grags las lam rim chen mo'i bshad lung gsan skabs/ dge lugs pa la mi dga' ba zhig gis dug drangs par gsang 'dus nas bshad pa'i dug sbyongs mdzad gsungs pa ni/ le'u bcu gsum pa'i rta mgrin gyi sgo nas ? dug bsal zhes pa 'di yin zhing/ de skabs tsab ya'i phor ba zhig gi nang du zhabs mthil zhags pas mthil nas khrag nag po zhig thon par dge bshes rgan po'i ngag rgyun la 'dug ste de'i thad kyi 'grel bar/ kha dog nag po'am sngon po lta bu 'og tu btang ste 'dab nas rkang mthil nas 'drud ces pa 'di dang 'grig par 'dug gsungs/ sde srid kyis zho drangs pa'i phyi lam lcang thang sgang brgyud de gcig pur phebs tshe bsgungs nas phebs ma thub par yod pa la/ a bo gzhon nu gnyis yong nas mchan phan tshun nas skyor te pha bod chen po zhig gi steng du dug sbyong gnang/ a bo gnyis ni dam can chos rgyal dang/ k+She tra pA la yin 'dug /mdzod dge dpon po zhig la dug nad byung ba la zhal chus bshal ba blud pas bde song ba @013b sogs kun mkhyen nas de 'dra mang po gnang gsungs/ rje'i gsung 'bum du bzhugs pa'i stobs po che'i char 'bebs de yang/ 'dir stobs po che'i sgo nas char 'bebs zhes bya ba 'di yin/ le'u bcu bzhi pa lus la phur bu gdab pa ces pa la mtha' dpyod dang/ yid kyi gnas la phur bus gdab pa ces pa la mtha' dpyod byed lugs gnyis yod/ gtan nas gnyis po gang la yang mtha' dpyod mi byed pa gcig kyang yod pas 'chad thabs su le'u bcu bzhi par mtha' dpyod bzhi 'am lnga zhes dang/ khyon bsdom na mtha' dpyod brgya dang bzhi'am lnga zer ba'i rgyu mtshan de yin/ yongs grags bsdus don rtags btab yod pa phal cher las; lus la phur bus gdab pa zhes pa la mtha' dpyod yod pa'i dbang du byas snang/ rgyu mtshan yang/ phan tshun bkri ba'i tshul du bya zhes pa'i rgyud 'di sa bcad/ dang po'i rgyud yin pa de mtha' dpyod dar yod pa'i rgyu mtshan gyis yin/ 'chad thabs las/ yid kyi gnas la phur bu gdab pa ces pa la mtha' dpyod yod tshe/ 'grel ba'i dgongs pa'o zhes pa'i mtshams nas sprul shad bgyi zhes pa la dogs pa gnang ba ma gtogs/ dang po la dogs pa tsam yang byas med pas/ dang po la mtha' dpyod byas tshe 'chad thabs dang mi mthun/ phyi ma la byas kyang phan tshun zhes sogs kyi rgyud don bshad pas mi gnod de/ @014a @#/ /rdzogs rim le'u gnyis pa'i bsdus don byang chub kyi sems bskyed par gdams shing gdams pa ltar bskyed pa las sa bcad gsum yod pa'i nges don la kha skong mtha' dpyod mdzad pa'i tshig la gsal gsungs pa'i phur gdab skabs kyi mtha' dpyod du yang de'i don bshad pa yod/ 'chad thabs kyi don yang mtha' dpyod du gzhan gnyis la zhes ngag dang yid kyi gnas la phur gdab yang bshad yod pas; gsum ga'i mthar sbyar na 'grig par dgongs pa yin/ 'phags 'od yon tan rgya mtsho'i sgron gsal rnam nges ltar na rnam snang gi rigs kyi spyod pa dang/ mi bskyod pa'i cho ga lhag ma zhes pa gnyis kyi mtshams su sprul shad byas te sa bcad bkram skabs yang/ dang po la bdun ces pa dang/ rgyud kyi btso blag mkhan gyi bdag nyid che ces pa'i mgor dang/ 'grel ba'i bu mo utpal ces pa'i mgor sprul shad 'jog pa'i dbang du byas kyang/ 'chad thabs su dga' ldan dpar rnying gi bsdus don rje rin po che'i dus nas phud pas khungs thub byas/ phyis kyi dbus dpar 'di khri dge 'dun phun tshogs kyis zhus dag gnang nas thud pa yin pas de gnyis dang bstun te sprul shad mi 'jog pa'i dbang du byas so/ /rtsa rgyud le'u bco lnga par/ gnod sbyin mo yi sngags rgyud la/ /gshin rje gshed ni brtags par bya/ /zhes pa 'di lha mo la @014b rdo rje 'jigs byed kyis dbu brgyan par gsungs pa'i khungs yin zhes a lags dpal mang rin po ches gsungs bshad gnang gsung/ le'u bco lnga par/ sku dkyil dang gsung dkyil gsung nas thugs dkyil ma gsung ba ni gong du le'u bzhi pa'i skabs su bshad zin pas yin no/ /gsang 'dus kyi cho ga sogs kyi dpe cha'i 'jug tu zas kyi lhag mas sbyin sreg bya zhes pa'i don le'u bco lnga pa'i bsdus don gyi gnyis ka'i rgyud las gsungs pa'i cho gas nang dang phyi'i zas kyi sbyin sreg rim can du bya ba zhes pa'i thad kyi rgyud/ dngos grub kun gyi 'bras 'dod pas zhes sogs/ rtsa 'grel las bshad/ 'phags 'od yon tan rgya mtsho'i sgron gsal rnam nges dang/ rgyud chen sbyin pas bris zer ba'i 'chad thabs sogs su rgyud kyi gshang gci ba yi bya ba dang zhes pa'i dbu dang/ 'grel ba'i ji ltar zhe na zhes pa'i mgor sprul shad 'jog pa'i dbang du byas nas/ sha lnga bdud rtsi lnga'i bskyed chog gsal bar bshad pa ces pa'i sa bcad la rgyud 'grel mtha' dpyod gsum ga sbyar yang/ dpal mang rin po ches phyi ma las khungs mtha' dpyod gcig pu tsam sbyor bar mdzad/ le'u bcu drug pa'i 'grel par/ theg pa gsar ba zhes pa sngags kyi theg pa yin zhes dpal mang rin po ches gsung/ le'u bcu bdun par/ drag po mi sdug khros pa ni/ /utpal sngon po'i kha dog @015a @#/ /'dra; ;phyag bzhi pa yi cho ga yi/ /zhes sogs rtsa 'grel las mgon po phyag bzhi pa bstan par sa skya ba'i gsungs las bshad/ de'i thad kyi 'grel bar/ srin bu sad pa ltar yan lag thams cad la gnas pa'i khrag drangs la/ /zhes pa'i srin bu sad pa ni nA ro pa'i rnam thar du gsal ba ltar chur gnas pa'i srin po dang por khab rtse lta bu'i phra mo rim gyis yan lag sogs kyi khrag 'jibs pa na 'dzub mo sogs kyi che chung tsam du 'gro ba de yin gsungs/ ^ paN chen dpal ldan ye shes kyis kyang/ chur gnas pa'i srog chags phra mo mi'i khrag 'jibs pas chen por 'gro ba zhig yod gsungs/ sgron gsal le'u bcu bdun pa'i/ mi bskyod pa'i lus dang ngag dang sems gang la gnas zhes pa ni zhu ba'o zhes pa'i mjug gi sprul shad de/ rgyud kyi sprul shad dang bstun na de'i gong du dgos sam snyam zhing/ rgyud 'grel mtha' dpyod kyi sprul shad dang gcod mtshams rgyud chen gong ma rnams kyi rgyud TIkka tsho la bltas te dpyad na blo skyed che zhing dpyad gzhi gang chen sha stag snang gsung/ rgyud don rtags btab pa 'ga' rer; le'u gnyis par byang chub kyi sems bskyed par gdams shing gdams pa ltar bskyed pa la sa bcad gsum yod pa'i nang nas de la drang don la mtha' dpyod byas pa dang/ rdo rje 'chang dpal mang rin @015b po ches/ byang chub kyi sems tshul bzhir bshad pa'i mthar thug la kha skong med par/ sbas don la yod pa'i lugs su byas gnang/ 'grel grangs re brgyad thig phreng dang por/ 'grel tshig gcig ces pa dang/ dkyus na de zhes pa'i bar du tu zhes bcug /phreng lnga par/ de tsam zhig rgyu ba zhes dang/ spyan ma zhes pa'i bar du sgrol ma dang/ de nas yang de tsam rgyu ba zhes bdug /lha dang bzhi'i bar du mo zhes bcug /le'u bcu par/ dang po sbyor ba la kha skong byed dgos kyang de ma byas par/ dkyil 'khor rgyal mchog la kha skong zhes pa 'dug /le'u bcu gcig par rten gzhal yas khang bskyed tshul dogs gcod dang bcas pa la kha skongs/ mtha' dpyod re bzhi ba'i srib 'phro bar/ sems pa'i don no'i 'phror sprul shad chad/ chag lo tstsha ba rin chen chos bzang gis 'gyur thugs la babs pa'i skabs su 'gyur mtshan btab ste dkyus la gcig yig gnyis yig sogs kyi rtags btab pa yin/ de rnams kyi don rjes 'jug la sbyar te bshad pa ces pa'i skabs su sa khungs mtha' dpyod du mjug gi bla ma rgyun mchod byed tshul bstan la/ mjug gi bla ma rgyun mchod skabs khro bo'i gtor 'bul yang dgos gsungs/ rgyud pa bla ma 'jam dbyangs dpal ldan sku gong ma'i tshus yin/ mjug tshar ba'i go rim nges pa med gsungs/ nyid nas dang po bsdus don/ de nas rgyud/ @016a @#/ /'grel ba mtha' dpyod rnams rim gyis 'grub par mdzad/ dge 'dun phun tshogs dpar grub ma thag cung dkar blo bzang phun tshogs tshang gis phyag la 'grel ba tshar bcu lhag zhig kun mkhyen gong ma la bskur bar mdzad/ kun mkhyen nas phal cher rgyud pa'i dpe mdzod la bzhag kyang dpe mdzod mang po med pas/ 'grel ba'i dpe cha cig da lta rin chen chos bzang tshang gi phyag dpe'i khrod du yod pa rjes ma dpal mang rin po ches/ khong rgyud pa'i bla ma byas dus dpe cha gzhogs slong gi sgo nas blangs pa yin zhes zhal rtsed yang gsung/ dpal mang rin po ches rgyud par lo lnga la tshar lnga/ mdzod dge nas lo gsum la tshar gsum/ gnang ba de tshar bco lnga gnang ba'i grangs yin/ tshar bco lnga po dpe gcig po de'i steng du gnang zhing/ rjes ma mdzod dge la dad sten du gnang yod/ dpar ma'i mjug tu 'di la spyir zhes sogs khri dge 'dun phun tshogs kyis dpar phud dus bris pa yin/ rtsa ba ser 'byed ces pa sgron gsal gyi tshig thams cad ser leb byed pa min/ sgron gsal du de nas ces bya ba la sogs pa'i zhes pa'i de nas zhes pa dang/ nam mkha'i dbyings kyi zhes bya ba la sogs pa la ces pa'i nam mkha'i dbyings kyi zhes pa lta bu rgyud kyi tshig rnams ser leb byed pa yin gsung/ 'grel pa dpar rnying gi dpar @016b byang lung yang gnang/ 'grel ba de gzhung gis dpar phung pa'i rkyen gyis dpar byang/ rgyal dbang pad dkar 'dzin pas gsung tshul gnang ba ma gtogs/ khri dge 'dun phun tshogs kyis gsungs pa yin tshod red gsungs/ nga tsho 'khor ba thog ma med pa nas 'khyams pas re 'ga' brgya byin/ re 'ga' bdud dga' rab dbang phyug sogs kyi skye ba blangs pa yang grangs kyis mi chod/ re 'ga' bsam gtan gzugs med sogs su'ang skyes ris ri khrod pa lta bu byas nas dka' las chen po'i sgo nas dge ba bsgrubs snod bcud gnyis ka zad 'gro ba ni dper na shing gi snod du bza' btung sogs blug ste me sbar na skabs zhig snod bcud gnyis ka med 'gro ba de dang 'dra/ da re stes dbang gis dal 'byor rten 'di thob nas rgyud kyi don la nyan bsam 'di 'dra byed rgyu red byung ba 'di skal pa bzang snyam du bsam dgos/ 'dus pa'i bshad rgyud snga ma drug 'dren tshe/ 'phags pa yab sras kyis gsal bar bshad pa lnga dang ma bshad pa gcig ste drug go /bod du 'gyur ba lnga dang ma gyur gcig ste drug go /snga ma ltar na lha mo bzhi zhu/ dgongs pa lung ston/ rdo rje 'phreng ba/ ye shes rdo rje kun las btus pa/ lha'i dbang pos zhu pa ste lnga dang/ rtsa rgyud kyi le'u bco brgyad pa'o/ /phyi ma ltar na dbang pos zhu ba ma gyur bar byed/ rtogs brjod du @017a @#/ /gsungs pa phyi ma 'di la byed dgos sam snyam gsung/ indra b+hu tis mchog brnyes pas/ yul gyi skye bo rnams grol bar mdzad pas yul stong pa'i shul du he ru ka rang byung gi lha khang bzhengs/ mtsho chen po klus gang bar phyag na rdo rjes chos bstan pas klu skyes pa'i rnal 'byor ma byung/ mtsho skam shul du grong khyer chags pa da lta'i o rgyan no/ /klu sgrub sngags lugs la tshe gcig lus gcig la sangs rgyas bas rdo rje can zhes gsungs/ bod du rin sbung/ ba tshab/ chag sogs mang yang/ mar 'gos grags che/ mar pas nA ro las rgyud dang man ngag gsan/ sgron gsal bshad pa yang gsan kyang bshad rgyun ma tshugs/ rjes mar ba'i gsung sgros cung zad re yod pa drang bas tshad ldan kho na dang dgos kyis rgya gar du bla ma don gnyis sogs las 'dus skor bzhi sogs bshad rgyun man ngag rdzogs par gsan/ stong thun bzhi sbrags sogs las tshad mar mdzad byang tshig ris sogs yang gnang ba re gnyis kyang yod pas/ khrid kyi skor mar pa cung mi mnyam pa 'dra/ rje re mda' pa/ bu'i slob ma khyung po lhas pa/ chos kyi dpal pa gsum ga sdom pa las 'phags skor rdzogs par mnos zhes mtha' dpyod du gsungs/ 'dus pa'i dka' gnad phra mo rnams 'jam @017b dbyangs las dngos su gsan tshul nang gi rtogs pa sogs dkrol ba yin/ phyi'i rkyen bshes gnyen bsten tshul de ltar la/ thos bsam mdzad tshul/ rtogs brjod las/ rtsa ba'i rgyud du sogs/ rim gnyis kyi gnad mtha' dag gi byung khungs rtsa rgyud yin/ bshad rgyud dang ma sbyar bar rtogs mi nus/ sbyor tshul yang man ngag la ma bsten par/ rin po che lta bu'i gang zag gis kyang rang dbang du shes mi nus/ rim lnga las/ dpal ldan 'dus pa'i rgyud du ni/ /de nyid 'di dag rgyas btab nas/ /bshad pa'i rgyud kyi rjes 'brangs te/ /bla ma'i zhal las rtogs par bya/ /zhes pa ltar red/ man ngag gis kyang rgyud du mi gsal ba gsal bar byed dgos pa ni/ skad dod u pa de sha nye bar 'am bde blag tu rtogs byed la 'jug pas shes rgyud na med pa'i shog dril dang bka' rgya ma lta bu zur du yod par go mi rung; mdor byas/ spyod bsdus/ sgron gsal sogs rje yab sras lta bu la man ngag tu 'gro yang/ deng sang gi gdul byas de'i steng nas rgyud don bde blag tu rtogs mi nus pas/ rim lnga gsal sgron dang/ gdan rdzogs sgron gsal gyi don bzhin gtan la phebs pa de dag man ngag gi snying por byas nas rtogs dgos so/ /le'u bcu bdun pa'i rgyud yongs su gtad pa'i tshul la bzhi yod pa'i @018a @#/ /gsum pa de rnams kyi don rjes 'jug la sbyar te bshad pa zhes pa'i sa bcad la mtha' dpyod mjug byang gi bar rdzogs par byas/ de nas rgyud phyi ma le'u bco brgyad pa'i ljags lung bstsal/ phyi nyin bla ma rgyun mchod la gsang bdus mdun bskyed kyi mchod 'phreng gi 'gor maNDal phul te phyag 'tshal sngon du 'gro ba'i slob ma gsum tshan re'i 'gor rgyud kyi glegs bam gtad de 'grel dbang gnang/ mtha' dpyod kyi 'jug gi rigs kyi bu khyed rnams kyi/ zhes pa nas/ 'di bzung shig /ces pa'i bar bka' bsko rgyas pa dang/ de rjes slob ma gsum tshan lnga drug tsam la/ khyed rnams kyis de bzhin gshegs pa thams cad kyi dam tshig gi de kho na nyid bzung shig /ces bsdus pa gnang/ gong 'og kun tu/ thams cad kyis/ de bzhin du bgyi'o/ /zhes khas blang/ de rjes tshogs 'khor byin gyis rlabs te phul ba'am min kyang mchod phreng rnams dang dkyil 'khor pa'i lha'i bstod pa'i 'jug tu/ mtha' dpyod las gsungs pa ltar gyi bstod pa yi rang legs so 'bul ba'i tshigs bcad rnams dang khro bo la gtor 'bul bka' bsgo sogs byas nas/ gtang rag dang 'dus pa'i smon lam shis brjod rgyas par bya/ nyer bsdus rgyud stod la mdzad kyang/ rgyud smad kyi phyag len la nyer bsdu mi byed/ de nas @018b chos thun phyi ma'i mgor 'grel gtor maNDal brgyud 'debs sogs dkyus bzhin byas nas rgyud 'grel gyi mjug rdzogs par mdzad/ slar yang/ ma 'ongs pa'i rten 'brel gyi ched rgyud kyi rgyal po'i dbu nas shin tu gang bar snang bar gyur to/ /zhes 'khor phun tshogs rdzogs pa'i bar dang/ bsdus don gyi mchod par brjod cing bshad par dam bca' ba'o/ /zhes pa'i bar dang/ mtha' dpyod kyi bye brag tu rgyud 'grel gnyis kyi don bshad pa'o/ /dang po la gnyis/ zhes pa'i bar dang/ mchan 'grel gyi zla ba grags pas rim bzhin bshad/ ces pa'i bar 'grel rkyang dang mchan sbrag byas te bklags nas 'jog par mdzad de/ gtang rag gi maNDal/ 'dus pa'i smon lam dang bstan pa rgyas pa'i smon lam shis brjod byas te bkra shis kyi char chen dbab par mdzad do/ /rgyud 'grel dbu tshugs nas mjug rdzogs pa'i bar du nyin bzhin chos thun dang por bla mas dbu bskul te yid kyi rol ba zhes lan gsum/ rdor sems bsgom bzlas dang 'brel ba'i yig brgya nyer gcig /dbu mdzad kyis dbu bskul te/ 'grel gtor/ maNDal/ rgyud 'debs rnams ma chag par nges can du mdzad lags so/ /'dir smras pa/ khyab bdag rdo rje sems dpa'i zhal gyi bum bzang las/ /'ong ba'i legs bshad 'chi med bdud rtsi gsar ba @019a @#/ /gang; ;rang dang skal mnyam legs bris tshogs kyi dga' ston du/ /'gyed la ci dgar rol cig zab don sgo 'phar phye/ /tshul 'dir 'bad pas dge ba'i cha gang 'chis/ / skye dang skye bar dal 'byor legs brgyud de/ /theg mchog bshes gnyen dam pas rjes bzung nas/ /sa lam rim bsgrod sku bzhi myur thob shog / (//ces pa 'di ni shing sprel zla ba dang por khyab bdag rdo rje 'chang chen po rje sgo mang blo bzang tshul khrims rgya mtsho dpal bzang po'i zhal snga nas dpal gsang ba 'dus pa'i man ngag 'grel pa bzhi sbrag gi bshad lung gnang skabs gsung bshad rgya mtsho lta bu las brda' sbyor phyag len 'ga' zhig chos med snyom las pa 'du shes gsum ldan blo bzang byang chub bstan pa'i sgron me nas rang gi brjed byang du bris pa dge / //