@001a @#/ /byang chub kyi sems gnyis sgom tshul theg pa mchog gi
'jug dogs zhes bya ba bzhugs so/ /

@001b @##/ /bstan pa'i bdag po thub dbang rdo rje 'chang/ /zab
rgyas gdams pa'i bka' babs byams 'jam dbyangs/ /kun gyi zhal
skyin bla ma'i zhabs pad la/ /btud nas theg pa

mchog la 'jug pa spro/ /de'ang sangs rgyas bcom ldan 'das kyis
dka' ba du mas byang chub mngon du mdzad de 'jig rten du byon pa
ni rang cag rjes su gzung ba kho na'i phyir yin/ rang cag kyang
srid pa'i rgya mtsho

gting dang mtha' med par 'khyams pa las da res stabs legs kyis
dal 'byor lan gcig thob ste bstan pa dang mjal ba 'di don ldan
du byed na ston pa'i rjes su slob dgos/ de la ston pa rang nyid
gang nas

gshegs pa'i lam thabs shes kyi spyod bzung du 'jug pa de nyid
nas zhugs te sangs rgyas kyi sar bgrod dgos/ nyan rang rnams
kyang sangs rgyas kyi rjes 'jug tu bzhag pa ni/ 'khor ba las
rgyab kyis phyogs

pa'i thar par rigs mtshungs pa tsam yin gyi/ sangs rgyas kyi rjes
dngos la 'jug na de'i lam mam theg par bgrod dgos la/ dman pa'i
byang chub thob zin pa'i rjes su gzod/ sangs rgyas theg pa 'di
ni btsal par gyis/ /

zhes de'i lam la 'jug par bskul dgos so/ /de dag gis dang po nas
don du ma gnyer bas gzhan don phun sum tshogs pa'i gnas med la/
rang don yang mthar ma phyin te/ mo'u 'gal gyi bu chen bo lta
bu'ang las kyis

@002a @##/ /non pas kun tu rgyu rnams kyis phyag zhabs 'dam du
ltar bcom ste 'das pa dang/ legs 'ong mu ges grong pa lta bu
gnas ngan len gyi lhag mas mnar ba'i lo rgyus mang ngo/ /de'i
phyir

rgyan las/ lam gyi rnam pa ma tshang zhing ched du bya ba log par
gsungs pas/ skye bo blo gros dang ldan pa 'khor ba phra grags
kyi pha rol tu brgal bar 'dod pa dag gis sku gnyis 'grub byed
kyi sgrub pa'i ngo bo kun rdzob byang

chub kyi sems dang/ de kho na nyid don dam byang chub kyi sems
kyi gshog yangs dkar po rgyas pa la brten nas rgyal ba'i yon tan
rgya mtsho'i klong du phyin par byed dgos so/ /des na 'di la
gsum/ /kun rdzob byang chub kyi sems

sgom tshul/ don dam byang chub kyi sems sgom tshul/ de gnyis zung
du 'jug pa'i tshul lo/ /dang po ni/ de'ang sangs rgyas thob par
'dod pa tsam gyis theg pa chen po'i sems bskyed du mi 'gyur te/
rang don du de 'dod

na rang sangs rgyas kyi sems bskyed du 'gyur bas/ sems bskyed pa
ni gzhan don phyir/ /yang dag rdzogs ba'i byang chub 'dod/ /ces
dgos pa'i gtso bo sgom pa sel ba'i chu lta bu ni gzhan don yin
la/ de 'thung pa'i

thabs su phor ba tshol ba bzhin sangs rgyas sgrub pa de'i yan lag
tu dgos pa yin no/ /gzhan don yang phyogs re btsam gyis mi chog
pas/ dmyal ba btso bsreg gis sdug bsngal ba nas bzung/ sa bcu
par shes

@002b bya'i sgrib pa phra mo las ma grol ba'i bar thams cad kyi
don la tshang bar dmigs pa yum las gsungs pa lta bu dang/ nang
gses kyis dgra gnyen bar ma lta ltu'i khyad mdod pas nye ring
snyom pa zhig gal che'o/ /da lta sems la nye ring gi

khyad 'byung ba ni da lta'i dgra gnyen 'di la gtan du bar bzung
ba'i stobs yin zhing/ de ni 'khor ba gting mtha' med par 'khyams
tshul ma bsam pas lan pa yin te/ gzhon nu ma bdun gyi rtogs brjod
ltar da lta gnyen du snang ba 'di dag gis

dgra byas te mgo bcad pa'ang stong gsum du mi shong/ da lta
dgrar snang ba 'di dag gis ma byas te nu zho 'thungs pa'ang rgya
mtsho'i chu las lhag /da dung yang 'di snang yud kyis 'gags nas
dgra gnyen go log pa ji ltar 'gro mi shes/ des na gang la ni

chags par bya/ gang la ni sdang par bya/ de 'dra byed don med
par ma zad/ chags sdang 'dis sdig pa dang sdug bsngal thams cad
kyi rtsa ba byas/ sems bskyed bsgom pa'i thog ma sems snyoms pa
tsam skye ba'i go skabs mi ster bas/

thar pa dang thams cad mkhyen bsgrub pa'i sgo 'gag byed du shes
par byas la dmigs yul sbu ris phye ste sgom rim mkhas pas mthar
sems can thams cad kyi bar du bsgom/ de goms pa na rigs pa'i ya
mtha' thug pa med pas skye ba'i ya

mtha' thug pa med pa dang/ de'i rtags kyis sems can thams cad la
mar ma gyur pa med cing/ gyur pa'ang grags kyis mi chod tshul
rigs pa'i 'phrul gyis bsgoms te/ mtshan mo rgyang ring por khyi
du ba lta bu'i tshe'ang ma rgan gyis bos byung snyam@003a @#/ /pa lta bu tshun chad
byed/ ma nam byas pa na mngal dang
btsas pa'i gnas skabs kun tu nor bu rin po che rnyed pa lta bu'i
dga' tshor gyis rang srog las kyang gces par bskyangs te 'khos ka
gang yod kyis

phan pa thams cad la sbyar/ gnod pa thams cad las bskyabs/ khyad
par tshe 'di'i ma lta bur mtshon na byis pa rlon pan bun gyi 'bu
lta bu zhig dal 'byor tshang ba'i mi gral du btsud pa'i drin bsam
gyis mi khyab/ 'on kyang de dag ni dngos

su drin gyis bskyang tshul tsam yin/ brgyud nas zhib tu bsams na
legs tshogs thams cad ma rgan sems can gyi bka' drin kho na yin
te/ dal 'byor gyi rten thob pa 'di'ang rgyu tshul khrims kyi
'bras bu yin zhing/ de ni/ sdom pa

sems can thams cad las/ /zhes ba ltar/ zhings sems can gzhir
byas te de la gnod pa gzhi bcas spong ba las skye ba yin/ zas
kham gcig yan chad kyi longs spyod thams cad sbyin 'bras yin pas
sbyin yul gyi sems can brten nas

'byung dgos/ lus dang spyod pa gzhan gyi yid du 'ong bas rang la
dga' ba sogs bzod pa'i stobs yin la/ de bzod pa'i yul la ltos pa
sogs sems can lam brten par byung ba gcig kyang med/ rdzogs pa'i
sangs rgyas kyi go 'phang

sgrub pa'ang/ de'i gzhung lam pha rol tu phyin pa drug gis bsdus
pa'i tshogs gnyis rdzogs pa sems can la ltos te/ sangs rgyas kyi
chos 'grub pa'i rgyur 'gro ba rgyal ba rnams dang sems can khyad
med par gsungs so/ /drin che bar

@003b shes kyang drin gzo mi byed pa shin tu smad pa'i gnas
khrel med kyi spyod pa yin/ rang cag dang thub pa'i dbang po
gnyis ma rgan 'di dag gis sngon tshad med pa'i drin gyis bskyangs
par 'dra ba la/ thub pas dka' ba brgya phrag gis drin gzo ji
tsam zhig

mdzad 'dug /rang ni de thams cad yal bar dor nas bsdad pa'i la
yog gis da lta thub pa sangs rgyas la/ rang cag sdug bsngal gyi
rgya mtshor lus pa 'di byung bar snang/ da ni ya rabs kyi spyod
pas khrel ngo tsha bsrung ste drin gzo zhig byed dgos/ de'ang zag

bcas kyi bde ba phran tshegs re la sbyar yang sgom pa la tshwa chu
blud pa bzhin phan chung la gnod pa'i rgyur 'gro nyen che/
margan 'dis rang gnod pa kun dang bral ba/ bde ba kun dang ldan
pa zhig byed 'dod nas shes tshod dang nus tshod kyis 'bad pa yin
mod kyang/ phugs

kyi phan gnod mo rang gis ma shes par snang/ bdag gis kun byang
gi skyon yon mthong ba yin pas gnas skabs kyi bslu brid byis
pa'i mgo skor lta bu ma yin par gtan du phan rdzogs nges pa'i
drin gzo zhig byed dgos snyam du bsam ste/ gzhan don don du

gnyer ba'i go las 'gog byed btang snyoms dang/ sku lam 'deb byed
yid 'ong gi rnam par sgrub pa gnyis kyis gzhi brtan par bya/ de
nas don du gnyer bya'i ngo bo gzhan don ni bde ba la 'god pa
dang sdug bsngal sel ba gnyis las ma 'das te/ rang

nyams la dpag na rmi lam tshun chad du bde ba 'dod cing sdug
bsngal mi 'dod pa'i ngang tshul 'di sems can thams cad la'ang
mtshungs so/ /'on kyang 'di dag bde ba mtshan nyid pas shin tu
phongs te/ zag med kyi bde ba cung zad kyang med/ de lta khong

@004a @#/ /rang rnams la yod pa'i bde bar rlom pa 'di dag ni yun
pa srings te 'phel na sdug bsngal gyi rang mtshang ston pa'i
'gyur ba'i sdug bsngal lam/ sdug bsngal gyi tshang 'cha' ba'i
khyab pa 'du byed kyi

sdug bsngal kho nar snang/ des na 'di dag thams cad zag med kyi
bde ba dang ldan na ci ma rung/ ldan par gyur cig /rang gi bde
dge thams cad 'di dag la btang nas kyang 'di dag bde ba dang
ldan par bya'o snyam du bsam/ rang gi dge ba

rang la dgos mod snyam na/ sngon yang rang gces bar bzung legs
pa thams cad rang la dgos snyam pa byas pas rgud pa thams cad
byung/ ston pas rang yal bar dor te gzhan gces par bzung bas don
gnyis phun sum tshogs pa byung/ 'dam

ga ma nor ba khong gi de yin par snang bas/ blo ngan bdag 'dzin
'gong po 'di'i dbang du mi gtong bar lus srog yal bar dor nas
sems can la phan bde bsgrub par bya'o zhes byams pa bsgom/ de
lta na'ang nad drag pos gzer bzhin pa dang/

yan lag mes bsreg bzhin pas zas kyi zhim mngar mi myong ba
bzhin/ yun ring la shugs drag pa'i sdug bsngal brgya phrag du
mas non pa 'di dang ma bral bar bde ba'i go skabs skad cig kyang
gal yod/ sgo gsum nyon mongs kyi dbang du shor bas ci

byas thams cad ngan song du ltung ba'i rgyu las ma 'das/ ngan
song gsum gyi g.yang sa gting zab/ der lhung na sdug bsngal
drag po skad cig ma gcig la'ang bzod glags med rung mi bzod
bzhin du tha na brgyal ba dang 'chi ba'i dbang yang med par
bskal ba

@004b chen po sa'i rdul grangs dang mnyam pa'i bar du las ma zad
na ngan skad tsir re nyam thag bzhin du sdod dgos/ ma rgan drin
mo che dmyal ba'i me nang du bskyur nas/ bdag sos bder sdod
thabs ji ltar yod/ ma rgan gyi lus sems la sdug bsngal gang yod
rang gi thog tu spos

te/ margan sdug bsngal med par lhod cham gyis 'gro ba zhig byung
na ci ma rung/ sdug bsngal phra rigs thams cad dang bral bar
gyur cig/ /sdug bsngal gyi khur bdag gi phrag par blangs nas ma
rgan sdug bsngal dang bral bar bya'o/ /de ltar byed nus par bla
ma lhas byin gyis

brlab tu gsol/ zhes gsol ba btab pas bla ma thub pa'i dbang po'i
thugs ka'i 'od zer gyis sems can thams cad kyi sdig sdug mtha'
dag lhag med du phral nas mdun gyi nam mkhar bkug la rang gi
dbugs tshur rdub pas drangs te gces 'dzin gyi thog

tu phab/ dbugs phyir gtong ba na rgyal ba sras bcas kyi thugs
rje'i 'od zer gyis sna drangs te rang gi bde dge thams cad rgyal
ba'i byin rlabs zad mi shes pa dang ro mnyam du 'dres pas mkha'
khyab kyi 'gro ba mtha' dag bde ba ma tshang ba med pa la bkod
pa'i

dmigs pa sogs gtong len spel mar bya/ de ltar byams snying rje
yun du bsgoms pas shugs rdzogs te sems can gyi don mtha' dag
rang gcig pu'i steng du lhung blta bur song ba na/ stobs bcu
mnga' bsangs rgyas kyi go 'phang zhig thob par ma byas pa'i

thabs rang mi 'dug snyam du sangs rgyas thob 'dod ni gzhan don
don gnyer de'i shugs kyis drangs nas 'ong ba zhig dgos kyi/
byang chub don gnyer de las logs su dmigs kyis bkar nas bsgom
dgos pa byung na sems bskyed sgom tshul ma mkhas pa yin no/ /sku

@005a @#/ /gsung thugs kyi yon tan shes par byas nas bsgom dgos
mod kyang/ gzhan don bde blag tu sgrub pa la kun tu bzang po'i
'od zer de lta bu zhig dgos par mthong nas de'i yan lag tu btsal
ba yin gyi/ ngo mtshar

che ba gtso bor bzung ste rang la de 'dra zhig byung na snyam du
bsam pa min no/ /sems bskyed pa tsam la'ang sdig pa sbyong ba
dang bsod nams 'phel ba'i nus pa mtha' yas pa rdo rje rin po
che'i dpe ltar nyan rang gi dge tshogs zil gyis gnon

nus ba ni/ dmigs yul byang chub dang sems can gnyi ga zad mi
shes pa'i dbang yin la/ de'i sdom pa bzung ste 'jug sems bskyed
na dus dang spyod pa'ang mi zad pa la dmigs pas dpag tu med pa
bzhi tshang ste phan yon lhag par che'o/ /de'i

rgyu mtshan gyis smon sems 'phel ba'i thabs la 'jug sems las lhag
pa med par gsung ste/ 'phen pa'i dbang gis dus nam gyi tshe'ang
bsod nams rgyan chad med par 'phel la/ de nas bzung mgron po lam
du chas pa dang 'dra bas grangs med gsum gyi

mgo brtsams pa yin no/ /gnyis pa don dam byang chub kyi sems
sgom tshul ni/ sangs rgyas sgrub pa la thun mong ma yin pa'i sa
bon lta bu sems bskyed yin mod kyang/ blo sngon du gtong ba
rnams ni de la sangs rgyas thob dgos pa dang/ thob nus pa gnyis
nges

dgos so/ /dang po ni/ rang ma grol bar gzhan dgrol mi nus shing/
rang nyid grol ba la 'ching byed rtsa ba mthar thug de chod
dgos/ grub mtha' thams cad kyang rtsa ba 'di ngos 'dzin pa ya
thag nye ring gis mchog dman byung ste/ sher phyin gyi dgongs pa
ji

@005b lta ba klu sgrub yab sras kyis zhi sgo gnyis pa med bar
bkral ba 'di yin pas/ rgud pa kun gyi rtsa ba bden par 'dzin pa
yin/ drungs 'byin pa la dngos kyi 'gal zla bdag med rtogs pa'i
shes rab kyi snang ba 'di kho na dgos/ nyes pa'i tshogs kyis mi
brdzi/

zhing phar zil gyis gnon pa la dge ba gzhan las 'di'i char gtogs
tsam yang stobs che ba ni gsor sogs kyi 'od dang me 'od ltar
grogs stobs dang rang stobs kyi khyad par yin/ theg pa gsum ga'i
thun mong yin kyang bag chags kyi dri ma phra mo lta ba'i

dpyad pa mtha' yas pas gos kyi dri ma phra mo sbyong ba lta bu
yin pas/ theg chen las de lhag par tshang zhing rgyas par bstan
la bstan pa bzhin bsgom dgos/ gnyis pa 'thob nus pa ni lam shes
kyi yan lag gsungs pas kyang shes te/ rkyen sems

bskyed kyi chus bran pa med mi rung du dgos la/ de byas na rgyu
rigs kyis khyab yod pas 'bras bu sangs rgyas nges bar 'thob pa
rnam 'grel las rtag pa ma yin pa sogs kyi gtan tshigs kyis theg
pa gcig tu bsgrubs pa'ang mthar gtugs na

sems bden par med pa la thug ste/ rang bzhin la slad pa ma zhugs
pas bcos su rung ba 'di la dgongs nas/ rang bzhin gyis yongs su
mya ngan las 'das ba zhes gsungs so/ /de ltar gsungs pa'i chos
kyi nang na kun nyon phyogs kyang yod rung de rnam

dag gi chos su 'gyur mi dgos te/ gser gyi g.ya' bzhin sbyangs
pa na med 'gro ba glo bur ba'i dri ma yin pa de nyid de rang
bzhin gyis yongs su mya ngan las 'das pa'i don yin no/ /de ltar
dgos nus gnyig mthong ba na kun rdzob sems bskyed la spro ba
'phel

@006a @#/ /zhing; don dam sems bskyed bsgom pa la 'bad pas 'jug
par 'gyur ro/ /don dam sems bskyed mtshan nyid pa khyad par gsum
dang ldan pa ni sa rab tu dga' ba nas 'ongs kyang/ de'i rigs
'dra las dang po ba'i

skabs nas btsal te skyong dgos so/ /skyong tshul la 'gal zla
dmigs pa dang 'brel zla ma dmigs pa'i sgrub tshul mang yang/ gong
ma rnams gcig du bral gyi sgrub tshul 'di 'char sla bas gtso bor
mdzad pa bzhin byed na/ sgrub byed la gnad

bzhi ste/ dgag bya nges pa'i gnad/ khyab pa nges pa'i gnad/ gcig
bral nges pa'i gnad/ du bral nges pa'i gnad do/ /mda' brdeg pa
la 'ben mthong dgos pa bzhin/ thog mar dgag bya ngos zin pa shin
tu gal che ste/ dgag bya rags

pa'am phyogs re tsam las ma zin na/ de 'bad pas khegs kyang dgag
bya'i lhag ma lus pas bden 'dzin drungs 'byin mi nus/ dgag bya
thal ches te tha snyad pa'i don rnams kyang dgag byar bzung de
bkrag pa chad ltar 'gro bas nyen shin tu

che'o/ /phung po las don gzhan dang/ phung po'i dbyibs tshogs pa
sogs par 'dzin pa grub mtha'i sgro btags kho na las lhan skyes
su mi 'byung la/ lus kyi khong na gnas pa sogs kyang nyams kyi
'char sgo tsam yin no/ /res 'ga'

rkyen dbang gis lus sems re re ba bdag tu snang ba lta bu 'byung
yang/ rgyun chags su yod pa'i lhan skyes kyi nga'i snang tshul
mtshan nyid pa ni lus sems tshogs tsam gyi steng 'di na ming gis
phar btags tsam ma yin pa'i nga zhig tshugs thub tu yod

@006b par snang ba yin te/ dper na rang la gzhan gyis bstod pa
dang/ gzhi med pa'i skyon bkal ba lta bu'i tshe mtho dman du byed
rgyu'i nga zhig ling nge yod yod lta bur 'char ba ngos zin
sla'o/ /de'i snang tshul de shugs ma yal ba'i ngang nas blo'i zur
gcig

gis des nga ji ltar bzung 'dug pa blta dgos/ sems can rnams ni
rnam par shes brgyud re re bar gsungs kyang 'dzin stangs mi
mthun pa'i blo stobs mtshungs la dgongs kyi/ lam du 'gro ba lta
bu'i tshe'ang lam dang 'gro ba'i bya ba/

gzhan la byar byed pa gtam smra ba sogs kyi rnam rig du ma lhan
cig 'byung bar mi 'gal bar myong bas grub bo/ /mang po zhig 'di
la sems ngo mthong ba zhes zer ba yin du chug kyang/ sems dang
chos nyid gnyis don gcig tu byas te

bden pa mthong ba dang chos sku'i rang zhal mthong ba zhes zer
zhing de tsam gyis chog shes byas te/ gnad phyi ma'i dpyad pa
rnams ched du dor nas tsom 'jog byas pas 'du shes rags pa'i rnam
rtog cung zad khegs te mi rtog par song ba la

sgom gyi yang rtse byed kyang de tsam gyis gar yang mi phyin no/
/de ltar dgag bya ngos bzung ste de nyid gcig du bral gyi rigs
pas 'gog pa la/ bden pa'i gcig dang du ma gang rung du ma grub
na bden par grub lugs med pa'i khyab mtha'

zin pa dgos kyi/ de gang rang ma yin pa'i grub lugs shig yod na
de gnyis tsam bkag pas mtha' mi chod pas don med pa'i phyir no/
/des na khyab pa nges pa'i gnad 'di bsam dgos la/ de'ang sbyir
chos de yod na gcig dang du ma gang

@007a @#/ /rung du yod dgos te/ so so ba yin na tha dad min na
gcig tu 'gyur bas yin min gnyis kha tshon chod pa'i phyir/ spyi
la de ltar khyab pa grub na bye brag bden par yod na'ang bden
pa'i gcig dang du ma gang rung du yod

dgos pa'i khyab pa 'grub bo/ /de ltar khyab ba nges pa na bdag
phung po'i steng du bden par yod yod 'dra ba 'di phung po dang
bden pa'i gcig tu yod dam/ de dang bden pa'i tha dad du yod ces
dbyad dgos so/ /de la dang po gcig bral du sgrub pa ni/ bdag

phung gnyis bden pa'i gcig yin na bdag gcig yin pas phung po
lnga'ang gcig tu 'gyur ba'am/ yang na phung po lnga so sor yong
pas bdag kyang lngar 'gyur ba dang/ phung po 'dor ba na bdag
kyang chad de skye ba phyi ma med pa'am/ yang na phung

po'ang phyi mar 'gro bar 'gyur ba dang/ phung po blang bya yin
pas bdag kyang blang byar 'gyur ba'am/ bdag len pa po yin pas
phung po'ang lan pa por 'gyur ba dang/ de ltar na lus len pa po
dang rnam smin myong ba po zhig las 'bras kyi

rten gzhir dgos par bsam nas bdag khas blangs pa don med par
'gyur ba dang/ bdag gi bdag gam phung po'i phung po zhes pa dang
khyad med pa'i bdag gi phung po zhes ba'i tha snyad kyang 'brel
med du 'gyur ro/ /bdag phung bden par

ngo bo gcig kyang ldog pa tha dad pas skyon de dag med do snyam
na/ rdzun pa'i rnam gzhag la ngo bo gcig la ldog pa tha dad pa'i
rnam gzhag byas chog kyang/ bden grub kyi gcig ni dpyad bzod kyi
gcig yin pas bum pa dang bum pa

@007b gnyis sgo gang nas tshul ji ltar dpyad kyang gcig ma gtogs
so sor 'byed rgyu med pa bzhin/ bden grub la ngo bo gcig na ldog
pa'ang gcig /rdzas dang nus pa ming don thams cad gcig dgos te/
ngo bo gcig tu snang la ldog pa tha dad du

gnas pa ni snang tshul dang gnas tshul ma mthun pa yin zhing/ de
rdzun pa'i rdzun tshul yin pa'i phyir ro/ /rigs pa'i 'phul 'di
dbu ma'i rigs pas sgrub tshul gyi skabs kun tu shes dgos/ gnyis
pa bden pa'i du bral sgrub pa ni/ de la

gcig ni med pas kyang/ /zhes sogs gcig med pa'i rtags kyis du ma
med par sgrub pa ya gyal dkag pas tshogs pa khegs lugs ni dgag
bya thams cad la 'dra bas/ des 'di'i gting mi dpog cid skabs
'dir sgrub lugs

dang mi mtshungs te/ 'dir du bral sgrub pa ni gang zag phung po
dang bden pa'i tha dad du grub pa bkag pa yin la/ gang zag chos
can/ phung po dang bden pa'i tha dad du med de/ bden pa'i gcig
tu med pa'i phyir byas na khyab pa 'gal bar 'gro'o/ /

des na bden pa'i tha dad du med tshul ni/ bden pa'i tha dad yin
na dpyad bzod kyi tha dad yin dgos la/ de lta na ngo bo dang
rdzas dang byed las sogs sgo thams cad nas tha dad pa'i 'brel
med don gzhan du 'gyur te/ sgo gcig nas tha dad kyang gcig nas

tha mi dad pa ni sna tshogs su smra ba'i mi bzhin rdzun pa'i rnam
gzhag yin pa'i phyir ro/ /de ltar 'brel med kyi tha dad yin na
phung po na rgas dor ba sogs kyis bdag na ba sogs su mi 'gyur
bas bdag la phung po'i mtshan nyid skye 'chi sogs med bar

@008a @#/ /thal ba dang/ de 'dod na gzhan gyi phung po dang 'dra
bas phan gnod kyis bde sdug tu mi 'gyur bar thal ba dang/ rta
glang lugs gsum tshogs nas rta glang gnyis song yang lug shul du
yod pa

bzhin phung po lnga so sor bsal ba'i shul na bdag ston rgyu yod
dgos/ gzhan dang gzhan min gyi ldan tshul sogs kyang gcig tha dad
kyi rigs pa 'dis khags so/ /tshogs pa'i steng nas dpyad tshul 'di
rgyun la sbyar na'ang tshe snga phyi rgan

gzhon sogs bden pa'i gcig tu grub na gcig gi tshe kun yod pa
grangs can bzhin rtswa rtser glang chen brgya gnas pa'i skyon
sogs su 'gyur/ tha dad na byams pa dang nye spas bzhin 'brel med
pas las chud za ba'am/ ma byas pa dang phrad

ba'i skyon du 'gyur ro/ /de bzhin du lus yan lag lnga ka dang
gcig gam tha dad/ shes pa skad cig snga phyi/ ldan min lo lta bu
zla ba bcu gnyis/ nam mkha' shar nub kyi cha lta bu la sbyar te
cha can gang yin de che mang por thal ba'am/ cha

shas re re bzhin cha can tshang ba der thal ba dang/ yang na cha
cha can 'brel med par thal ba sogs snga ma dang 'dra ste/ stong
nyid ni zab ches pa las chos thams cad kyi steng du dgag byas
stong tshul mi 'dra ba ci yang med par ro gcig pas/ lta ba'i

dpyad lugs kyang dmigs yul kha spob tsam las gzhan mi 'dra ba
med do/ /de ltar bden pa'i gcig dang du ma gang du'ang ma grub
par rtogs pa de bdag med rtogs pa yin par 'dod pa mi 'thad de/
de gtan tshigs rtogs pa'i blo yin

@008b pa'i phyir ro/ /kha cig de gang du'ang ma grub par rtogs
pa ni de rgyu mtshan du bkod de gzod dgag bya'i snang tshul gsal
btab nas 'di ma grub po snyam du rtogs zer ba mi 'thad de/ de
byas na kun rdzob kyi snang ba dang 'dres te dgag bya bcad tsam
du mi

'char ba'i phyir/ dper na 'gros lung pa gnyis las med sa zhig tu
ba lang bor ba btsal te/ lung pa snga mar med rjes mar yang med
pa mthong tsam nas btsal rgyu'i ba yid la bzhag yod pa de mi
'dug go snyam pa lhang gis skye ba bzhin/

dgag bya'i snang tshul sngar nas zhe la bzhag bzhin par gcig du
bral gyis dpyad pa yin pas du bral rtogs ma thag zhel bzhag pa'i
dgag bya de gzhir byas/ de mi 'dug snyam stong cham gyis 'gro ba
byung na lta brnyed pa yin no/ /de'i tshe dbang

rnon goms pa che ba la gces nor rnyed pa lta bu dang/ rtul po la
gces nor ster ba lta bu'i 'jigs skrag 'byung yang skyon min no/
/mnyam gzhag de las langs pa na rjes thob sgyu ma lta bu'i snang
ba 'char te/ da lta yul gang snang yang

kho rang gi ngos nas tshur grub pa'i nyams nges can du 'char ba
bzhin de'i tshe phyi'i yul snang tsam nas ming dang rtogs pas
phar btags pa'i tha snyad tsam du 'char ro/ /lhag mar lus rgyu
ming tsam las med kyang de la bya byed sogs bsnyon med du 'grub

pa'i rten 'byung gi snang ba ches ngo mtshar bar mthong nas blang
dor la lhag par brtson pa byung na stong ba brten 'byung gi don
du mdor bas ches rmad du byung ba yin no/ /rten 'byung gi rnam
gzhag 'bras bu chu la ltos pa tsam zhig ni dngos smra rnams
gkyang shes
@009a @#/ /pas/ 'dir snam bu'i snal ma zhes pa lta bu rgyu'ang
'bras bu la ltos pa brten nas btags pa'i tha snyad phra mo rtogs
dgos so/ /dang por lta thog tu 'jog yun rang na ma yin dgag cu
'chor nyen che bas/ bskyar

nas gnad bzhis bsgoms pas lang lam shor ba bya/ dbang rnon gyis
lta ba rigs pas gtan la phab ste nges pa brtan pa na dran shes
kyis bying rgod bkag nas zhi gnas sgrub pa lta thog nas sgom
tshol lugs yin la/ rtul po dang rnam rtog

khug dka' ba rnams kyis dang por rigs pa'i dpyad pa mang po mi
dgos par nang pa phyogs ba sems lta bu la dmigs pa'i zhi gnas
bsgrubs te grub ba na lta ba chol ba phyag chen gyi khrid sogs
ni sgom thog nas lta ba tshol lugs yin no/ /gang

lta ba yang dpyad 'jog stobs mtshungs su song ste dpyad stobs
kyis g.yo ba med pa'i ting nge 'dzin lhag par brtan ba 'grub pa
na zhi lha gzung 'brel du 'gyur zhing sbyor lam drod du slebs pa
yin te/ 'on kyang don spyi'i gnyis snang mi khegs

pas yun du goms par byas te gzung 'dzin gyi rnam rtog rim par
nyams smad pas gnyis snang je phra je phrar song/ mthar gnyis
snang ma lus par 'gag ste chu la cha bzhag pa bzhin ro gcig tu
zhugs pa'i sgo nas chos nyid mngon sum

du rtogs pa'i ye shes snying rje'i snying po can ni don dam
byang chub kyi sems dngos yin la/ de na ma skyes ba nas don dam
pa'i sa la sleb cing/ grub bo che rgya mtshor zhugs pa bzhin yon
tan brgya phrag bcu gnyis sogs kyi sgo nas sa gong ma bde blag
tu gnon par

@009b 'gyur ro/ /gsum pa de gnyis zung du 'jug pa'i tshul ni/
thob bya'i 'bras bu chos gzugs kyi sku gnyis su nges la/ de
gnyis 'grub byed bsod nams dang ye shes kyi tshogs gnyis las ma
'das shing/ tshogs gnyi ga'ang byang chub kyi sems gnyis kyi

lag len du 'du'o/ /de nyams su len pa'i tshe so so bar song na
bogs mi phyin pas phan tshun gcig gis gcig zin par byas pas srid
zhi gnyi ga'i mtha' 'gog cing shin tu nus ldan du 'gyur ba'i
phyir/ sbyin la sogs pa'i bsod nams 'di dag ni/ /shes rab mgon

bcas lhag bar mthu ldan 'gyur/ /zhes dpa' bos gsungs te/ phar
phyin gang la slob kyang de sgrub tshul dang phan yon dang nyes
dmigs mtha' dag la mkhas pas de'i nyams len gnad tshang zhing
mthar phyin pa zhig 'byung/ tshad med bzhi'ang shes rab

gyis zin bas 'dod chags dang sgyed lug g.yeng ba sogs kyi skyon
dang ma 'dres pa'i rnam dag tu 'gyur la/ thabs kyi spyod pa de
dag nyon mongs pa'i phyogs kyis brdzi mi nus pa'ang shes rab kyi
mthu kho na yin pas/ rgyan las sbyin pa nas bsam gtan gyi

bad lnga bo re re'i mthar/ ye shes kyis yongs zin pas 'jig rten
dag na mi zad bzhag /ces gsungs so/ /byang chub kyi sems gnyis
gcig gis gcig zin pa'i zung du 'jug tshul 'di lta don las yongs
su smin pa na mar me dang de'i 'od

bzhin blo gcig gi ngo bo la de gnyis dbyer mi phyed par sgrub
tshul rdo rje theg pa'i lam gyi rtogs bskye bas/ des ring por ma
thogs par byang chub kyi sems rdo rje zhes bya ba zung 'jug
rgyal ba rdo rje 'chang gi go 'phang mngon du byed par 'gyur ro/
/rtag

@010a @#/ /chad mtha' bral bden pa gnyis kyi gzhir/ /byang chub
sems gnyis zung du 'jug pa'i lam/ /yongs su goms pas sku thugs
zung 'jug 'bras/ /lhun grub mkha' mnyam 'gro ba'i dpal gyur cig
/ces byang chub

kyi sems gnyis sgom pa'i tshul theg pa mchog gi 'jug ngogs zhes
bya ba 'di ni/ or du su o thog shog nas mang du thos shing
sgrub pa lhur byed pa sman pa bla zur bka' 'gyur ba dkon mchog
rab rgyas kyis bskul dor/ 7btsun pa dkon mchog

bstan pa'i sgron mes 'phral du sbyar ba'i yi ge pa ni sngags ram
pa dkon mchog kun dga'o// (//lam gtso'i zin bris gsang ba'i sde
mig ni)/ mchod brjod kyis rtsa ba bshes gnyes bsten tshul dang
sbyor ba'i chos drug bstan/ rgyal ba'i

gsung rab kun gyi snying po'i don/ /zhes sogs lam gyi gtso bo
gsum la so sor sbyor tshul dang thun mong du sbyor tshul gnyis/
bshad tshe go rim yod kyang bsgom tshe gcig gis gcig zin dgos pa
rjes ma gnyi ga'i mtshams sbyar gyis shes te/ de

ma byas na dang po'i nges 'byung de theg chen gyi lam du mi 'gro
/chos sgrub 'dod tsam re kun la yod kyang phyi bshol gyis bslus
pas dal 'byor dang mi rtag pa sprel nas gsungs/ 'khor ba'i sdug
bsngal thams cad las mi dge ba las byung ba'i

'khor ba'i nyes dmigs dang lam 'bras sbrel nas gsung/ jo bo'i
lugs dang zhi lha'i lugs bsres pa'i sems sgom tshul gsungs te/ ma
rnams zhes pa'i rnams kyi sgras sems snyoms pa dang/ ma zhes pas
mar shes tshig snga ma'i snying rjed pa/

@010b ngang tshul la sngar phan btags pa'i ngang tshul mar shes
kyi drin bsam lugs dang/ slar phan 'dogs pa mnyam brje drin dran
lugs gnyis kyi phyi ma 'khrul che ste/ zhing bzang po la nas
btab ma thub kyi sems khral ma gtogs 'di la mang po btab ces
drin du rtsi ba med

pa ltar sems can gyi don bsgrub kyang yus mi 'byung ba yin/ rgyu
las byung ba'i rten 'brel las kyang/ lugs 'dir mdung khyim gyi
tshul du rgyu mang 'bras bu la brten pas ltos nas btags pa'i rten
'brel gtso bor mdzad de btags pa'i tshul yang/ sngar

bkra shis mi zer ba'i mi gcig la rang gis bkra shis zhes btags
nas zhag shas song ba na de la phar btags pa'i blo med par de'i
ngos nas bkra shis grub pa 'dra zhig skye ba'i ngang tshul phra
mo 'di rtogs dka' ste/ glegs bam las nges nges 'dra ban grub
mtha' 'og mtsho'i bdag med bshad pa'i don blo ngor e 'dug mas
nas bltas te mi 'dug na lta ba'i phyogs na med do/ /don dam
rtogs pa'i shes rab med na gzhan gnyis kyis mi thar ba bshad nas
dngos la rten 'brel gsungs pa 'di go na

go la; min na gnas lugs rtogs pa'i skabs med pa la dgongs shing
snang bas yod mtha' sel bas kyang yin te/ des med mtha' sel ba
mthong ba la mi skur ba'i rgyang 'phen yang 'dod na 'di ni thun
mong ma yin no/ /tshig nyung yang yongs 'dzin rin

po che'i gsung gi nying khu bsdus pa yin pas gces par zungs
shig/ //