@008b !kun mkhyen bla ma'i 'khrungs rabs dang 'brel ba'i bla ma'i rnal 'byor bzhugs so/ / ! /rnam kun mchog ldan dbyings dang dbyer med pa'i/ /ye shes sgyu 'phrul dra bar bzhengs ba las/ /gdul bya'i mos par 'tsham pa'i 'phrin las kyi/ /'jug pa dus las mi yol thugs rje'i bdag /gang gi bden stobs gzungs rig mos ba'i mthus/ /mdun gyi mkha' la dpag bsam ljon pa'i rtser/ /pad zla nyi ma'i gdan bcas seng+ge'i khri/ /yid 'phrog tshar du dang ra ba'i dbus ma la/ /skyabs gsum kun 'dus 'jigs med dbang po'i sde/ /chos 'chad mnyam gzhag phyag rgyas glegs bam bsnams/ /g.yas su rgyal sras dri med grags pa'i zhabs/ /dpal ldan sangs rgyas bskyangs dang phyogs kyi glang/ /zla ba'i zhabs dang grub chen dze tA ri/ /g.yon du bdag nyid chen po rin chen gsal/ /rje btsun dbum pa dang zhwa lu pa/ /rgyud chen rnam gnyis 'jam dbyangs bzhad pa'i sde/ /gzhan yang mkha' khyab gdul bya'i mos pa bzhin/ /gang 'dul sprul pa'i zlos gar mtha' yas dang/ /skyabs yul zhi khro rab 'byams ma lus pa/ /bdag sogs 'gro ba'i mgon du brtan par bzhugs/ /ji ltar dwangs ba'i mtsho la zla gzugs bzhin/ /gang la gang 'dul gzugs sku'i rnam rol gyis/ /ma lus 'gro ba srid las sgrol ba'i gnyen/ /skyabs mgon thugs rje'i gter la gus phyag 'tshal/ /kun bzang mchod pa'i sprin gyi phung po ni/ /bden tshig mos ba'i yid mkhar g.yo ba yang/ /lhan skyes bde ba'i dang du rol ba yis/ /bdag gi @009a @#/ /bsod nams tshogs chen rdzogs par mdzod/ /legs byas mtha' dag rang lus bcas 'bul na/ /sngon bsags dge tshogs chud mi za ba dang/ /sga gsum spyod pa bla ma'i dbang gyur te/ /rtag tu don dang ldan par byin gyis rlobs/ /mno ga chung srid 'byor sbrang rtsil chags te/ /mi bzad sdig ltung mtshon rnon bldag pa yi/ /rnam smin sdug bsngal bzod dka'i yid kyi rma/ /gso bar mdzod cig thugs rje'i sman gyi bla/ /khyod zhabs padmo gus pas bsten byas to/ /zab cing rgya che gdams pa'i a mr-i ta/ /'dod dgur spyad pas dug gsum sa bon bcas/ /drungs nas 'byin pa'i dga' ston myong bar shog /gang gang skye ba'i phreng ba de dang der/ /srid dang zhi ba'i mtha' la zhen pa'i blo/ /byin rlabs thugs rje'i phyag gis yongs bzungs ste/ /mi gnas zhi ba'i lam der drang bu gsol/ /dus gsum rgyal kun thugs kyi gsang ba'i mdzod/ /zab lam lta bas rgyas btab rdo rje'i theg /dbang bzhi'i sgo 'phar phye ba'i grong mchog tu/ /rim gnyis 'byor pa'i dpal la spyod par shog /mi 'gyur lhan skyes bde bas rab myos shing/ /mtshan dpe'i dpal 'bar mdzes sdug lang tshos sgeg /dmigs med snying rje'i 'dzum dkar sprob yi/ /zung 'jug dang po'i mgon por bdag grub mdzod/ /mdor na skyabs gnas ma lus 'dus pa'i dngos/ /'dren pa khyod min skyabs gzhan mi 'tshol bas/ /'de phyi'i bar do'i 'jigs las sgrol ba dang/ /rang gzhan don gnyis 'grub par byin gyis @009b rlobs/ /de ltar gsol ba btab pas skyabs yul kun/ /rim gyis bsdus te rtsa ba'i bla mar thim/ /de nyid dgyes bzhin rang gi tshangs bug nas/ /zhugs te gnyug ma'i sems dang dbyer med gyur/ /dpal ldan rtsa ba'i bla ma rin po che/ /bdag gi snying gar padma'i gdan bzhugs la/ /bka' drin chen po'i sgo nas rjes gzung ste/ /sku gsung thugs kyi dngos grub stsal du gsol/ /gangs can mkhas grub du mas rjes gzung zhing/ /zab rgyas gdams pa bye ba'i bang mdzod 'dzin/ /skal ldan smin cing grol mdzad chos kyi rje/ /'jigs med dbang po'i zhabs la gsol ba 'debs/ /zhes ci 'grub bzlas la/ mjug tu/ /dpal ldan bla ma'i rnam par thar pa la/ /zhes sogs dang/ skye ba kun tu yang dag bla ma zhes sogs bsdo smon gyis mtshams sbyar ca'o// zhes kun mkhyen bla ma mchog gi 'khrungs rabs dang 'brel ba'i bla ma'i rnal 'byor 'di ni/ dad brtson dang ldan pa dkon mchog yar 'phel gyis 'di lta bu zhig dgos zhes bskul ngor/ 7 btsun pa dkon mchog bstan pa'i sgron mes bris ba'o// //