@001a @#/ /dbu ma la 'jug pa'i tshig 'grel legs bshad rjes 'brang zhes bya ba bzhugs so/ / @001b @##/ /na mo gu ru manydzu g+ho ShA ya/ rten 'byung zab mo'i gtam snyan dbyar rnga'i sgras/ /skal bzang sprin la dga' ba'i shes rgyud la/ /thar lam mngal khur bzang po bskrun mdzad pa'i/ /zla med ston pa mchog des byin chen stsol/ /mgon po gang gi mtshan snyan gzegs ma tsam/ /sgra 'dzin bu gar zhugs pa'i tsha zer gyis/ /shes ldan sems kyi mun chen mthar mdzad pa'i/ /rje btsun mkhyen pa'i gter des bdag skyong shig /bstan pa'i bdag po ston pa rang nyid kyis/ /nga yi dgongs zab gsal bar byed do zhes/ /lung bstan 'brug gi sgra chen brgyar sgrog pa/ /'phags mchog klu sgrub yab sras rnam gnyis rgyal/ /'phags pa'i dgongs pa phyin ci ma log par/ /'grel mdzad sangs rgyas bskyangs @002a @##/ /dang zla ba'i zhabs/ /zhi ba lha zhes phyogs mthar yongs grags pa'i/ /mkhas dbang rnam gsum kun gyi bla mar 'os/ /'phags yul mkhas pa'i gzhung lugs padma'i gnyen/ /blo rmongs sprin nag 'thug pos bsgribs pa rnams/ /blo bzang legs bshad rlung gis bsal phyin chad/ /lta ba snyigs ma'ang ming tsam lhag mar lus/ /mdzangs pa'i ma yis bu chud skyong ba ltar/ /sna tshogs thabs kyis blo dman kho bo la/ /gzhung lugs lta ba'i blo mig stsol mdzad pa'i/ /bshes gnyen rnams kyi bka' drin kun las lhag /rang nyid chos la goms pa skyed phyir dang/ /skal mnyam gzhan la phan par 'dod pa'i blos/ /dbu ma'i bstan bcos rtsa ba shes rab la/ /'jug pa'i tshig don nyung gsal dbye bar bya/ /'jam @002b mgon bla ma'i 'jug TIk yod bzhin du/ /blo rmongs kho bos tshig 'grel byed pa ni/ /yan lag brgyad ldan gang+gA'i klung 'gram du/ /ba tshwa'i khron pa brko ba'i dper song yang/ /chu klung 'gram du 'gro ba'i mthu med la/ /skyog gang rnyog chus skom pa sel ba ltar/ /gzhung bzang chen mor lta ba'i mthu med la/ /gsar rtsom 'di 'dras phan par 'gyur ba'ang srid/ /'dir zab rgyas gnyis tshogs gtan la 'bebs pa'i bstan bcos chen po dbu ma la 'jug pa'i tshig don 'chad pa la bzhi/ mtshan don/ 'gyur phyag /gzhung don/ 'jug gi don no/ /dang po ni/ rgya gar nas/ zhes bya ba/ zhes byung/ gzhan rnams go bar sla zhing 'di'i 'jug bya'i dbu ma ni dbu ma'i bstan bcos rtsa ba shes rab yin la/ gzhung 'dis rtsa she la 'jug tshul la gnyis las/ zab pa'i sgo nas 'jug tshul ni/ gzhung 'di la brten nas rtsa she'i dgongs don sems tsam pa dang dbu ma rang rgyud pa dang mthun par bshad du mi rung bar legs par nges pa de yin te/ 'di nyid las/ gzung ba med par 'dzin pa ma mthong zhing/ zhes pa nas/ stong nyid don can nges don shes par gyis/ zhes tshigs bcad lnga bcu rtsa gsum gyis sems tsam pa'i lugs rgyas par bkag cing/ gal te rang gi mtshan nyid brten 'gyur na/ zhes pa nas/ stong nyid dag las rab tu skye bar 'gyur/ zhes tshigs bcad phyed dang lngas rang rgyud pa dmigs kyis bkar nas bkag pa'i phyir/ des na de gnyis kyi thun mong min pa'i 'dod ba rnams rtsa she'i dgongs don @003a @#/ /min par gzhung 'di la brten nas legs par nges nus pa'i phyir ro/ /rgya che ba'i sgo nas 'jug tshul ni/ gzhung 'di la brten nas rtsa sher bstan pa'i zab mo'i lam yid la byed pa'i tshe theg pa chen po'i rgya che ba'i lam gzhan gyis kha bskangs nas yid la byed dgos par legs par nges pa de yin te/ 'di nyid las/ rtsa sher bstan pa'i zab mo'i lam la theg pa chen po'i rgya cha ba'i lam gyis kha skong ba'i ched du/ 'phags pa'i man ngag dbu ma rin chen phreng ba la brten nas so skye'i sa'i chos gsum dang/ 'phags pa'i slob pa'i sa bcu dang/ 'bras bu'i sa dang/ sa lnga pa dang drug pa'i go rim gyis zhi gnas la brten nas bdag med rtogs pa'i lhag mthong sgom pa rnams gsungs pa'i phyir/ des na 'jug pa brtsams pa'i thun mong ma yin pa'i dgos pa gnyis yod de/ rtsa sher bstan pa'i zab don de rang rgyud ba man chad dang thun mong ma yin par nges pa dang/ zab don de nyid sgom pa'i tshe byams snying rje byang chub kyi sems sogs theg pa chen po'i rgya che ba'i lam gzhan dang zung 'brel du sgom dgos par nges pa de yin pa'i phyir ro/ /gnyis pa ni/ 'jam dpal zhes sogs byung/ rtsub reg gi dri ma spangs shing sems can mtha' dag la byams pas khyab pas 'jam dpal dang; gzhon nu bcu drug lon pa'i cha lugs can du gyur pa la phyag 'tshal lo zhes pa'o/ /gsum pa la bzhi/ bstan bcos rtsom pa la 'jug pa/ brtsams pa'i bstan bcos kyi lus/ ji ltar brtsams pa'i tshul/ brtsams pa'i @003b dge ba bsngo ba'o/ /dang po la gnyis/ snying rje chen po la so sor ma phye bar bstod pa dang/ so sor phye ste phyag 'tshal ba'o/ /dang po ni/ nyan thos sangs rgyas 'bring rnams thub dbang skyes/ zhes pa nas/ de phyir bdag gis thog mar snying rje bstod par bgyi/ zhes tshigs bcad gnyis gsungs/ nyan thos dang de nyid rtogs pa 'bring ste rang rgyal ni thub pa'i dbang po las skyes la/ rdzogs pa'i sangs rgyas ni byang chub sems dpa' las 'khrungs shing/ 'chad par 'gyur ba'i snying rje'i sems dang/ rtag chad kyi mtha' gnyis su med pa ste gnyis dang bral ba'i don rtogs pa'i blo shes rab dang byang chub kyi sems gsum ni/ rgyal sras byang chub sems dpa' rnams kyi rgyu'i gtso bo yin no/ /chos gzhan gnyis kyi rtsa ba yang snying rje yin pas na/ snying rje gtso bo yin par bstan par bzhed nas/ gang phyir zhes sogs gsungs so/ /gang gi phyir snying brtse ba ni rgyal ba'i lo tog phun tshogs 'di'i thog mar skyed pa la gal che ba sa bon dang/ bar du spel ba la gal che ba chu dang/ tha mar gdul byas yun ring du longs spyod pa la gal che ba 'bras bu'i smin pa lta bur 'dod par gyur pa de'i phyir zla ba'i zhabs bdag gis nyan rang sangs rgyas byang sems dang/ de'i rgyu gzhan gnyis las kyang thog mar ram bstan bcos rtsom pa'i thog mar snying rje chen po la bstod par bgyi'o; ;nyan thos zhes pa'i sgra bshad yod de/ yang dag pa'i gdams ngag gzhan las nyan nas bsgoms pa'i 'bras bu nyan thos kyi byang chub thob pa na/ bdag gis 'di ltar bya ba byas so/ /'di las srid pa gzhan mi shes so zhes sogs gzhan la thos @004a @#/ /par byed pas na de ltar brjod pa'i phyir/ yang na nyan thos kyi skad dod shra ba ka ni thos sgrog la'ang 'jug pa ltar na/ theg chen lam 'bras sangs rgyas las thos nas rang gis rjes su mthun pa tsam yang mi sgrub par theg chen gyi rigs can gzhan la sgrog par byed pas na nyan thos te/ dam chos pad dkar las/ mgon po de ring bdag cag nyan thos gyur/ /byang chub dam pa yang dag bsgrag par bgyi/ /byang chub pa yi sgra yang rab tu brjod/ /de bas bdag cag nyan thos mi bzad 'dra/ /zhes gsungs so/ /byang chub snga ma ni theg chen gyi byang chub dang phyi ma ni der bgrod pa'i lam la byed par gsungs shing/ rgyu mtshan 'di gnyis byang chub sems dpa' la ni nyan thos dang 'dra ba'i rgyu mtshan yin la/ nyan thos rnams la ni thos sgrogs gyi don dngos so/ /zhes rnam bshad las gsungs pas sgra bshad snga phyi gnyis ka tshang ba'i byang sems yod dam dpyad par bya'o/ /snga mas mnyan bya'i gdams ngag la theg dman gyi sde snod gtso che zhing/ theg chen gyi sde snod yod med dpyad bya ste/ theg chen gyi chos gsungs pa'i tshe 'bras bu bzhi thob par gsungs pa mang du yod pa'i phyir dang/ nyan thos kyi sa la bslab par 'dod pas kyang shes rab kyi pha rol tu phyin pa la bslab par bya'o zhes sogs gsungs pa'i phyir ro/ /phyi mas bsgrag par bya rgyu'i chos ni theg chen gyi chos kho na yin no/ /sangs rgyas 'bring zhes pa ni 'gyur skyon yin pas de nyid rtogs 'bring zhes bya la/ rang rgyal la de kho na nyid rtogs pa 'bring po zhes brjod pa'i rgyu mtshan yod de/ de kho na nyid @004b rtogs pa ni gang zag gsum ka la yod la/ rang rgyal rnams ni bskal ba brgyar bsod nams dang ye shes sten pa gong du 'phel ba'i khyad par gyis nyan thos las khyad par du 'phags shing/ bsod nams dang ye shes kyi tshogs gnyis dang/ sems can thams cad la dus thams cad du 'jug pa'i thugs rje chen po dang/ rnam pa thams cad mkhyen pa sogs med pas rdzogs pa'i sangs rgyas las dman pas de nyid rtogs pa 'bring po zhes brjod pa'i phyir/ rnam bshad snying po rgyan du tshogs spyod che chung gnyis dus nges pa med par tshogs gsog par bshad kyang/ gser phreng las rang rgyal gsum ka tshogs gsog pa'i dus mtshungs par gsungs so/ /bla med byang chub phyin ci ma log par sgrub pa'i thabs kyis 'bras bur 'dzin pa'i don tshang ba'i bsod nams dang ye shes ni tshogs gtso bo/ /don de ma tshang ba'i bsod nams dang ye shes ni tshogs phal bar rnam bshad las gsungs so/ /sangs rgyas bcom ldan 'das la thub pa'i dbang po zhes bya ste/ thub pa'i sgra ni nyan rang dgra bcom la yang 'jug cing/ sangs rgyas ni nyan rang byang sems las kyang gong na med pa'i chos kyi dbang phyug dam pa brnyes pa dang/ gang zag gsum po de sangs rgyas kyi bkas chos kyi srid la mnga' bsgyur ba'i phyir ro/ thub dbang gis nyan rang bskrun tshul yod de/ des rten 'brel zab mo'i don phyin ci ma log par ston pa de nyan rang gi rigs can rnams kyis nyan bsam sgom pa'i rim pas rang rang gi 'bras bu thob par 'gyur ba'i phyir/ 'di la rtsod lan ni/ rang rgyal rnams thub dbang las skyes pa mi 'thad de/ de dag srid pa tha @005a @#/ /ma'i tshe slob dpon gzhan gyi man ngag la ma brten par rang rgyal gyi myang 'das 'thob pa yin gyi/ sangs rgyas las chos thos pa'i tshe de la rang rgyal gyi myang 'das thob pa mi srid pa'i phyir zhe na skyon med de/ de dag sangs rgyas las chos thos pa'i tshe de la rang rgyal gyi myang 'das mi 'thob kyang/ thos pa'i don de nyid nyan bsams bsgoms pas skye ba gzhan du rang rgyal gyi myang 'das nges par 'thob pa'i phyir te/ dper na/ myong nges kyi las de sogs pa'i tshe 'di la 'bras bu mi myong yang/ skye ba gzhan du nges par myong bar 'gyur ba bzhin yin pa'i phyir te/ bzhi brgya pa las/ de nyid shes pas gal te 'dir/ /mya ngan 'das pa ma thob kyang/ /skye ba gzhan du 'bad med par/ /nges par thob 'gyur las bzhin no/ /zhes dang/ dbu ma las kyang/ rdzogs sangs rgyas rnams ma byung zhing/ /nyan thos rnams kyang zad pa na/ /rang sangs rgyas kyi ye shes ni/ /rten pa med par rab tu 'byung/ /zhes gsungs so/ /sangs rgyas byang sems las 'khrungs par gsungs pa de la rtsod lan ni/ sangs 'phags rnams byang sems las 'khrungs par bshad pa mi 'thad de/ byang sems rnams sangs rgyas kyis nye bar bstan pa las skyes pas rgyal ba'i sras zhes brjod pa'i phyir zhe na ma khyab ste/ byang sems rnams rgyal ba gang yang rung ba zhig gi sras yin mod kyang/ rgyal ba de rang gi sras su gyur ba'i byang sems de las 'khrungs ba min gyi/ rang dang rgyud gcig pa'i byang sems kyis nyer len dang/ rgyud tha dad pa'i byang sems gzhan zhig gis lhan @005b cig byed rkyen byas pa'i sgo nas 'khrungs pa yin pa'i phyir ro/ /byang sems rnams sangs rgyas kyi rgyu'i gtso bo yin pas sangs rgyas rnams kyis byang sems la bsngags pa cher mdzad cing/ de'i dgos pa bzhi yod de/ sangs rgyas kyi rgyu phun tshogs shin tu gces pa yin pa dang/ rgyu byang sems la mchod pas 'bras bu sangs rgyas la don gyis mchod par 'gyur ba dang/ sman gyi ljon shing gi myu gu ltar byang sems las dang po ba la yang gces spras su byas te 'bad pa chen pos skyong dgos par bstan pa dang/ dus der 'khor du nye ba'i gdul bya rnams theg chen la sbyar bar bya ba'i dgos pa yod pa'i phyir ro/ /bye smras sangs rgyas las byang sems la bsngags ba cher mdzad pas theg chen bka' ma yin par sgrub pa dang/ de la lan btab tshul rnams rtog ge 'bar bar blta bar bya'o/ /sangs rgyas las byang sems la bsngags pa che bar mdzad pa dang/ sangs rgyas rnams byang sems las 'khrungs par lung gis sgrub pa ni/ dkon brtsegs las/ 'od srungs 'di lta ste/ dper na zla ba tshes ba la phyag 'tshal ba ltar nya ba la ma yin no/ /'od srungs de bzhin du gang dag ngal rab tu dad pa de dag gis/ byang chub sems dpa' rnams la phyag bya'i/ de bzhin gshegs pa rnams la ni de ltar ma yin no/ /de ci'i phyir zhe na/ byang chub sems dpa' las ni de bzhin gshegs pa rnams 'byung ngo/ de bzhin gshegs pa rnams las ni nyan thos dang rang sangs rgyas thams cad 'byung ngo/ zhes gsungs pa lta bu'o/ /snying rje'i sems dang zhes sogs kyi skabs su @006a @#/ /rtsod lan ni/ chos gsum byang sems kyi rgyur 'jog pa mi 'thad de/ chos gsum las skyes pa'i byang sems kyi ma mtha' lam du zhugs ma thag pa'i byang sems las dang po pa la byed na sems bskyed dang gnyis med kyi blo de'i rgyu yin pa mi 'thad la/ byang sems las dang po pa la mi byed na zla tshes lta bu dang sman gyi ljon shing gi myu gu lta bu'i byang sems su bshad pa dang 'gal bar 'gyur ba'i phyir zhe na/ ji skad bshad pa'i skyon du 'gyur ba'i phyir phyogs gnyis pa khas mi len la/ phyogs dang po khas len kyang sngar bkod pa'i skyon ni med de/ byang sems kyi sngon du 'gro ba'i sems bskyed ni sems bskyed bcos ma yin gyi/ bcos min gyi myong ba thon pa'i sems bskyed mtshan nyid pa min pa dang/ byang sems kyi sngon du 'gro ba'i gnyis med kyi blo ni gnyis snang med pa'i blo min gyi/ mtha' gnyis dang bral ba'i shes rab la byed pas/ de gnyis byang sems kyi sngon du 'ong ba mi 'gal ba'i phyir ro/ /gnyis pa ni/ dang por nga zhes bdag la zhen gyur cing/ / zhes pa nas/ g.yo dang rang bzhin nyid kyis stong par mthong ba yi/ /zhes tshigs bcad phyed dang gnyis byung/ sems can 'di rnams ni dang por ngar 'dzin pa'i 'jig ltas bdag rang bzhin gyis yod do snyam nas/ nga zhes pa'i don de la bden par zhen par byed do/ /de'i 'og tu nga yir 'dzin pa'i 'jig ltas gzugs dang mig la sogs pa'i dngos po la 'di ni bdag gi'o zhes bdag gi ba la bden par chags pa bskyed pas/ zo chun 'phrul 'khor 'phyan pa ste 'khor ba ltar/ rang @006b dbang med par 'khor ba'i 'gro ba la snying rjer gyur pa gang yin pa de la 'dud do zhes pa ni/ sems can la dmigs pa'i snying rje la phyag 'tshal ba'i don no/ /sems can 'di rnams las nyon gyi thag pas ches dam du bsdams shing/ rnam par shes pa'i skor mkhan gyis/ 'khor ba'i khron pa chen por/ gyen dang thur du 'gro ba la 'bad rtsol dgos mi dgos pa dang/ kun nyon gsum gyi snga phyi'i go rim ma nges par/ sdug bsngal gsum gyis gcog pa ni/ zo chun gyi rgyud mo dang 'dra bar bstan to/ /'gro ba rlung gis g.yo ba'i chu'i nang gi zla ba ltar g.yo ba ste skad cig gis 'jig par mthong nas/ de la snying rjer gyur pa gang yin pa de la 'dud do zhes pa dang sbyar ba ni chos la dmigs pa'i snying rje la phyag 'tshal ba'o/ /de bzhin du 'gro ba chu'i nang gi zla gzugs ltar rang bzhin gyis grub par snang yang des stong par mthong nas/ de la snying rjer gyur pa la 'dud do zhes pa dang sbyar ba ni dmigs pa med pa'i snying rje la phyag 'tshal ba'o/ /mi rtag pa dang bdag med phra rags gang gis kyang khyad par du ma byas pa'i sems can la dmigs pa'i snying rje de/ sems can la dmigs pa'i snying rje'i mtshan nyid/ dbye na/ gang gis kyang khyad par du ma byas pa'i sems can tsam la dmigs pa'i de dang/ rtag pas khyad par du byas pa'i sems can la dmigs pa'i de dang/ rang skya thub pa'i rdzas yod kyis khyad par du byas pa'i sems can la dmigs pa'i de dang/ bden grub kyis khyad par du byas pa'i sems can la dmigs pa'i de sogs yod do/ /sa mtshams ni/ lam ma @007a @#/ /zhugs nas sa bdun pa'i bar ro/ /mi rtag pa dang bdag med rags pa gang rung gis khyad par du byas pa'i sems can la dmigs pa'i snying rje de/ chos la dmigs pa'i snying rje'i mtshan nyid/ sa mtshams ni/ lam ma zhugs nas sangs rgyas kyi sa'i bar ro/ bden med kyis khyad par du byas pa'i sems can la dmigs pa'i snying rje de/ dmigs med la dmigs pa'i snying rje'i mtshan nyid/ sa mtshams ni/ lam ma zhugs nas sangs rgyas kyi bar ro/ /gnyis pa la gnyis/ rgyu'i sa dang/ 'bras bu'i sa'o/ /dang po la gnyis/ sa so so'i rnam bzhag /sa bcu'i yon tan bstan pa'o/ /dang po la gsum/ rab dga' sogs sa lnga bshad pa dang/ sa drug pa mngon du gyur pa bshad pa dang/ ring du song ba sogs pa bzhi bshad pa'o/ /dang po la lnga las/ dang po rab tu dga' ba la gsum/ sa'i ngo bo mdor bstan/ sa'i yon tan rgyas par bshad/ mjug bsdu ba'o/ /dang po ni/ rgyal ba'i sras po 'di yi sems gang 'gro ba rnams/ zhes pa nas/ rab tu gnas pa de ni dang po zhes bya'o/ /zhes tshigs bcad gcig byung/ rgyal ba'i sras po rang bzhin gyis med pa snying rje'i dmigs yul gyi khyad par du bzung ba 'di yi sems gang 'gro ba rnams/ rnam par grol bar bya ba'i phyir du snying rje chen po'i gzhan dbang du gyur cing/ byang sems kun tu bzang po'i smon lam gyis dge ba rnams rab tu bsngos pa/ rab tu dga' ba zhes pa'i ming can gyi zag med kyi ye @007b shes; yon tan gyi grangs la sogs pa'i khyad par bzhis nye bar mtshon pa la rab tu gnas pa'i byang sems kyi don dam pa'i sems de ni 'jig rten las 'das pa'i sems dang po zhes bya'o/ /don dam pa'i sa bcug la dmigs rnam mi 'dra ba'i khyad par med kyang/ yon tan gyi grangs gong nas gong du 'phel ba dang/ dri ma sbyong ba dang lam bgrod pa'i stobs gong nas gong du 'phel ba dang/ phar phyin lhag pa dang/ rnam smin gyi skye ba gong nas gong du 'phel ba ste khyad par mi 'dra ba bzhis sa so sor 'jog par bstan no/ /gnyis pa la gsum/ rang rgyud mdzes par byed pa'i yon tan/ gzhan rgyud zil gyis gnon pa'i yon tan/ sa dang por lhag pa'i yon tan gzhan bstan pa'o/ /dang po la gnyis/ yon tan so sor phye ste bshad pa dang/ yon tan mdor bsdus te bstan pa'o/ /dang po la gsum/ don ldan gyi mtshan 'thob pa'i yon tan/ rigs su skye ba sogs bzhi'i yon tan/ sa gong ma gnon pa sogs gsum gyi yon tan no/ /dang po ni/ de nas bzung ste de ni thob par gyur pa yis/ byang chub sems dpa' zhes bya'i sgra nyid kyis bsnyad do/ /zhes gsungs/ sa dang po la zhugs pa de nas bzung ste byang sems de ni don dam pa'i sems de thob par gyur pa yis/ so skye'i sa las 'das pa'i skabs su don dam pa'i byang chub sems dpa' zhes bya ba'i sgra nyid kyis bsnyad par bya ba yin gyi/ de dang mi mthun pa'i rnam pa gzhan gyis brjod par mi bya ste/ de'i tshe de byang sems 'phags pa yin pa'i phyir ro/ gnyis pa ni/ 'di ni de@008a @#/ /bzhin gshegs pa rnams kyi rigs su'ang skyes pa ste/ zhes pa nas/ 'jig rten khams brgya kun nas g.yo bar nus par gyur pa'ang yin/ zhes tshigs bcad gcig byung/ gzhan yang sa dang po la gnas pa 'di ni so skye dang nyan rang gis las 'das shing/ sangs rgyas kyi sa'i rjes su 'gro bar nges pa'i lam rgyud la skyes pa'i phyir de bzhin gshegs pa'i rigs su'ang skyes pa ste/ rang gi lam du rigs nges pa yin no/ /'di ni gang zag gi bdag med mngon sum du mthong bas/ mthong spang gi phra rgyas kun tu sbyor ba gsum spangs pa yin no/ byang chub sems dpa' 'di ni/ rigs nges pa la zhugs pas/ de'i yon tan thob pa dang/ sa'i spang bya'i skyon dang bral bas thun mong ma yin pa'i dga' ba skyes pas dga' ba mchog tu gyur pa 'chang ba yang yin no/ /'jig rten gyi khams mi gcig pa brgya kun nas g.yo bar gyur pa'ang yin no/ /gsum pa ni/ sa nas sar gnon byed cing gong mar rab tu 'gro bar 'gyur/ /zhes sogs rkang pa gsum byung/ sa dang po nas sa gnyis par gnon par byed pa la sbro ba che zhing/ sa gong mar rab tu 'gro bar 'gyur ro/ /sa dang po thob pa de'i tshe byang sems 'di'i ngan 'gror 'gro ba'i lam rnams mtha' dag 'gag pa ste zad par 'gyur ro/ /bzod pa nas las dbang gis ngan song du mi skye ba ni rkyen ma tshang bas yin la/ 'dir ni sa bon bcom pa yin no/ /de'i tshe byang sems 'di'i so so skye bo'i sa ste gnas skabs thams cad zad do/ /gnyis pa ni/ 'di ni 'phags pa brgyad pa ji lta de ltar nye bar bstan/ @008b zhes gsungs/ 'phags pa brgyad pa rgyun zhugs zhugs pa la/ 'phags pa'i chos thob pa las rang dang rjes su mthun pa'i spangs rtogs kyi yon tan 'byung bar 'gyur ba bzhin du/ byang sems 'di yangs dang po thob pa las spangs rtogs kyi yon tan 'byung ba 'phags pa brgyad pa ji lta ba de ltar nye bar bstan no/ /gnyis pa ni/ rdzogs pa'i byang chub sems lta dang po la gnas kyang/ zhes pa nas/ de ni ring du song bar blo yang lhag par 'gyur/ /zhes tshigs bcad gcig byung/ rdzogs pa'i byang chub kyi sems lta gnyis pa sogs su ma zad/ sems dang po rab tu dga' ba la gnas pas kyang/ thub pa'i dbang po'i gsung las skyes pa nyan thos dang bcas pa'i rang sangs rgyas rnams ni/ kun rdzob byang chub kyi sems dang snying rje'i bsod nams dag gi dbang gis pham par byas pa ste zil gyis mnan nas/ de dag las bsod nams rnams par 'phel par 'gyur ba yin te/ byams pa'i rnam thar las rgyal po'i bu skyes nas ring po ma lon pa dang/ mkha' lding gi phru gu skyes nas ring po ma lon pa lta bu'i byang chub sems dpa' gnyis pos nyan thos dang rang sangs rgyas thams cad rigs kyi sgo nas zil gyis gnon par gsungs pa gang zhig /'di ni rtsa bar de bzhin gshegs pa'i rigs su skyes pas dang po nas yin par gsungs pa dang dpo so so ba tsam ma gtogs pa don gcig pa'i phyir dang/ rdzogs pa'i byang chub ces sogs kyi rkang pa gsum ni byams pa'i rnam thar gyi lung de'i don bsdus pa'i phyir ro/ /byang sems so skye yang kun rdzob sems bskyed gyi sgo nas nyan rang zil gyis gnon pa yin te/ rdo @009a @#/ /rje rin po che ni chag kyang gser gyi rgyan thams cad zil gyis gnon pa bzhin du/ byang chub kyi sems de spyod pa dang bral yang nyan rang gi yon tan thams cad zil gyis gnon par gsungs pa gang zhig /sa thob pa la sems bskyed spyod pa dang bral ba mi srid pa'i phyir ro/ /byang sems sa dang po bde ni/ sa ring du song bar son pa na kun rdzob byang chub kyi sems kyis zil gyis gnon par ma zad/ don dam pa'i sems bskyed kyi blo'i stobs kyis kyang/ nyan rang rnams lhag par te zil gyis gnon par 'gyur te/ sa bdun pa'i skabs su 'chad pa ltar sems kyi skad cig re re la 'gog pa yang dag pa'i mtha' la 'jug ldang byed pa sa 'di nas nus la/ sa drug pa man chad du mi nus par gsungs pa'i phyir ro/ /sa drug pa man chad du rtogs pa'i sgo nas nyan rang zil gyis mi gnon par gsungs pa 'di las ni/ nyan rang rnams la yang chos rang bzhin med par shes la yod par gsal bar nges te/ nyan rang la shes rab de med na/ sa dang po bas kyang rtogs pa'i sgo nas nyan rang dgra bcom pa rnams zil gyis gnon par 'gyur te/ nyan rang rnams la chos rang bzhin med par shes pa med pa'i phyir/ 'jig rten pa'i lam gyis ci yang med man chad la chags pa dang bral ba'i drang srong bzhin/ nyan rang dgra bcom pa rnams khams gsum ga'i nyon mongs sa bon dang bcas pa spangs par mi 'gyur te; stong nyid legs par rtogs nas goms pa med pa'i phyir/ chags bral gyi phyi rol ba bzhin/ de dag gang zag gi bdag med mtshan nyid rdzogs pa ma rtogs par 'gyur te/ phung po bden par 'dzin pa'i blo'i zhen yul sun ma byung ba'i phyir ro/ /zhes @009b pa'i rigs pa gsum gyis sgrub pa'o/ /'di'i rigs pa gnyis pa la/ rang rgyud pa sogs na re/ khams gsum ga'i nyon mongs sa bon dang bcas pa spong ba la rang bzhin med pa'i stong nyid rtogs mi dgos te/ gang zag rang skya thub pa'i rdzas yod phung po dang ngo bo gcig tu med pa dang/ de las tha dad pas stong pa'i stong bdag med mngon sum du rtogs pa dang/ mthong zin rgyun ldan du bsgoms pa'i lam gyis khams gsum ga'i nyon mongs kun btags dang/ lhan skyes sa bon dang bcas pa rim bzhin spong nus pa'i phyir/ zhes zer na/ rtags ma grub ste/ de 'dra ba'i lam gnyis kyis mngon pa gong 'og nas gsungs pa ltar gyi dmigs rnam can gyi nyon mongs kun btags dang/ lhan skyes mngon gyur pa re zhig spong nus kyang/ de dag gi sa bon spong mi nus la bden 'dzin gyi ma rig pa dang/ de'i dbang du byas pa'i lta ba dang lta min gyi nyon mongs rnams mngon gyur tsam yang spong mi nus pa'i phyir dang/ des na lam de tsam gyis dgra bcom pa thob pa lta zhog 'phags lam tsam yang thob mi nus pa'i phyir ro/ /de'i phyir lam des dgra bcom pa 'thob par bshad pa ni drang don du 'grel pa'i lugs yin te/ dper na sems tsam pas rdul cha med dang/ de bsags pa'i phyi don dang/ de las rdzas tha dad pa'i 'dzin pa gnyis bkag pa de mngon sum du rtogs pa dang/ mthong zin rgyun ldan du bsgom pa'i lam gyis sa bcu dang/ lam phyi ma gsum bgrod par bshad pa rnams dbu ma pas drang don du 'grel ba bzhin no/ /lugs 'di ni rgyal sras zhi ba lha yang bzhed de/ spyod 'jug las/ bden pa mthong bas grol 'gyur gyi/ /stong nyid @010a @#/ /mthong bas ci zhig bya/ /zhes sngar bzhin rtsod pa'i lan du/ gang phyir lung las lam 'di ni/ /med par byang chub med par gsungs/ /zhes yul gyi mdo las rang bzhin gyis stong par rtogs pa'i lam med par byang chub gsum gang yang thob pa med par gsungs par bzhed do/ /gzhan yang/ bstan rtsa dge slong nyid yin na/ /dge slong nyid kyang dka' bar gnas/ /sems ni dmigs dang bcas rnams kyis/ /mya ngan 'das pa'ang dka' bar gnas zhes bden 'dzin gyi dmigs pa dang bcas pa'i lam gyis myang 'das mi 'thob par gsungs shing/ nyon mongs spangs pas grol na de'i/ /de ma thag du der 'gyur ro/ /nyon mongs med kyang de dag la/ /las kyi nus pa mthong ba yin/ /zhes sngar bshad pa'i lam gyis mngon pa gong 'og nas bshad pa'i nyon mongs mngon gyur pa re zhig spangs pas zag pa zad pa'i grol ba thob par 'jog na/ de 'dra ba'i nyon mongs mngon gyur tsam re zhig spangs pa de'i de ma thag tu myang 'das thob par 'gyur ro/ /de 'dod par mi nus te/ de la de 'dra ba'i nyon mongs mngon gyur pa re zhig med kyang/ las kyi dbang gis yang srid phyi ma 'phen pa'i nus pa yod par mthong bas so/ /zhes bzhed do/ /re zhig nyer len sred pa ni/ /med ces des pa nyid ce na/ /sred 'di nyon mongs can min yang/ /kun rmongs bzhin du ci ste med/ /tshor ba'i rkyen gyis sred pa yin/ /tshor ba de dag la yang yod/ /ces yang srid len pa'i sreg pa lam des zad par byed pas/ las kyi dbang gis yang srid phyi ma mi len par nges pa @010b nyid do zhe na/ gang zag ngo bo nyid kyis grub par 'dzin pa'i 'jig ltas drangs pa'i sred pa 'di ni mngon pa nas bshad pa ltar gyi nyon mongs can min yang/ pha rol pos kun rmongs ma rig pa la mngon pa nas bshad pa ltar gyi nyon mongs can dang/ nyon mongs can ma yin pa gnyis 'dod pa bzhin du/ sred pa la yang mngon pa nas bshad pa ltar gyi nyon mongs can dang nyon mongs can ma yin pa gnyis ci ste med de/ bden par zhen pa'i tshor ba'i rkyen gyis sreg pa 'dren pa yin la/ bden par zhen pa'i tshor ba ni mngon pa nas bshad pa'i dgra bcom pa de dag la yang yod pa'i phyir te/ de dag la de kho na nyid rtogs pa'i lta ba med pa'i phyir ro/ /dmigs pa dang ni bcas pa'i sems/ /'ga' zhig la ni gnas par 'gyur/ /stong pa nyid dang bral ba'i sems/ /'gag bslar yang skye 'gyur te/ /'du shes med pa'i snyoms 'jug bzhin/ /des na stong nyid bsgom par bya/ /zhes sems bden 'dzin gyi dmigs pa dang bcas shing/ stong pa nyid rtogs pa dang bral na/ lam gzhan bsgoms pas nyon mongs dang bcas pa'i sems re zhig 'gags kyang/ gtan nas log pa min pas slar yang nyon mongs mngon gyur skye bar 'gyur te/ 'du shes med pa'i snyoms 'jug bsgoms pa bzhin no/ /des na nyon mongs gtan du spong bar 'dod na rang bzhin gyis med pa'i stong pa nyid bsgom par bya'o/ /gang tshe tshor po 'ga' med cing/ /tshor ba'ang yod pa ma yin pa/ /de tshe gnas skabs 'di mthong nas/ /sred pa ci'i phyir ldog mi 'gyur/ /zhes tshor ba po dang tshor ba 'ga' yang rang bzhin gyis grub pa med par mthong ba goms na @011a @#/ /sred pa ldog par bstan no/ /nyan rang la chos rang bzhin med par rtogs pa yod pa'i khungs bstan pa la/ theg chen gyi mdo'i shes byed ni/ lhag bsam bstan pas zhus pa las/ sgyu ma'i bud med la bud med dngos su bzung nas/ de la mi sdug pa dang/ mi rtag pa dang sdug bsngal ba dang stong pa dang bdag med par yid la bgyid pa'i mi de log par zhugs pa yin pa ltar/ phung po bden par bzung nas/ de la mi sdug pa sogs lngar yid la byed pa'i gang zag de log par zhugs pa yin par gsungs so/ /bden pa'i phung po la dmigs nas mi sdug pa sogs su yid la byed pa ni log shes yin pas lam gtan nas min la/ bden med ma rtogs pa'i gang zag gi rgyud kyi phung po mi sdug pa sogs su yid la byed pa'i lam 'di ni lam yin kyang 'khor ba las grol byed kyi lam min pas/ de nyid grol lam dngos su bzung na log par zhugs pa yin par gsungs so/ /bsam gtan dpe mkhyud kyi mdo las gang zag 'ga' zhig bden zhen dang ma bral ba'i lam gyis sngar bshad pa ltar gyi nyon mongs mngon gyur pa re zhig spangs pa na/ bdag ni zag pa thams cad zad do snyam pa'i blo skyes nas/ 'chi ba'i tshe rang skye ba len par mthong ba na/ sangs rgyas la the tshom zos pa'i nyes pas dmyal bar skye ba yod par gsungs so/ / rdo rje gcod pa las kyang rgyun zhugs kyis bden 'dzin gyi zhen yul sun ma phyung ba'i dbang gis bdag gis rgyun zhugs kyi 'bras bu thob po snyam du bden par zhen pa med par gsungs so/ /bstan bcos dang theg dman gyi mdo'i shes byed ni/ rin chen 'phreng ba @011b las; ji srid phung por 'dzin yod pa/ /de srid de las ngar 'dzin yod/ /ngar 'dzin yod na yang las te/ /de las yang ni skye ba yin/ /lam gsum thog mtha' dbus med pa/ /'khor ba'i dkyil 'khor mgal me yi/ /dkyil 'khor lta bu phan tshun gyi/ /rgyu can 'di ni 'khor bar 'gyur/ /de ni bdag gzhan gnyis ka dang/ /dus gsum nyid du'ang mthob phyir/ /ngar 'dzin pa ni zad par 'gyur/ /de las las dang skye ba yang/ /zhes ji srid du phung po bden par 'dzin pa yod pa de srid du ngar 'dzin 'jig lta yod pa dang/ ngar 'dzin 'jig lta'i zhen yul mngon sum gyis sun ma phyin par yod na 'phen byed kyi las gsar gsog yod pa dang/ de las las dbang gis 'khor bar skye zhing/ kun nyon gsum snga phyi'i rim pa med par mgal me'i 'khor lo bzhin du 'khor bar gsungs shing/ rten 'brel mtha' bzhir skye ba med pa dang/ dus gsum gar yang rang bzhin gyis skye ba ma thob pa ste med par mthong nas goms pas ngar 'dzin zad nas 'khor ba ldog par gsungs so/ /de'i 'og tu phung khams sogs rang bzhin med par gtan la phab pa'i mthar/ de ltar yang dag ji bzhin du/ /'gro ba don med shes nas ni/ /rgyu med pa yi me bzhin du/ /gnas med len med mya ngan na 'da'/ /zhes rang bzhin med pa'i de kho na nyid ma thong nas mya ngan las 'da' bar gsungs shing/ de yang nyan rang gi dbang du mdzad nas gsungs pa yin te/ lung de'i mjug thogs su/ /de ltar byang chub sems dpas kyang/ /mthong nas byang chub nges par 'dod/ /'on kyang de ni snying rje yis/ /byang chub bar du srid mtshams sbyor/ /zhes sogs @012a @#/ /gsungs pa'i phyir ro/ /nyan thos la bstan pa'i mdo las kyang/ nyan thos rnams kyi nyon sgrib spang bar bya ba'i phyir/ gzugs ni dbu ba brdos pa 'dra/ /tshor ba chu yi chu bur 'dra/ /'du shes smig rgyu lta bu ste; ;'du byed rnams ni chu shing bzhin/ /rnam par shes pa sgyu ma ltar/ /nyi ma'i gnyen gyis bka' stsal to/ /zhes dpe lngas 'dus byas rnams rang bzhin med par gsungs so/ /theg dman gyi sde snod du chos rang bzhin med pa'i don 'di nyid ston par mdzad pa ni/ rin chen 'phreng ba las/ theg pa che las skye med bstan/ /gzhan gyis zad pa stong pa nyid/ /zad dang mi skye don du ni/ /gcig pa de phyir bzod par gyis/ /zhes theg chen gyi mdo sde las rang bzhin gyis skye ba med pa stong nyid du bstan pa dang/ gzhan te theg dman gyi mdo las ni/ stong pa nyid ston pa na/ 'dus byas zad par bstan pas stong pa nyid ston pa ni don gcig pas/ theg chen las stong nyid bstan pa la mi bzod par ma byed ces gsungs so/ /rigs pa drug cu pa'i 'grel par drangs pa'i theg dman gyi mdo las/ gang sdug bsngal 'di ma lus par spangs pa/ nges par spangs pa/ byang bar gyur pa/ zad pa/ 'dod chags dang bral ba/ 'gog pa/ nye bar zhi ba/ nub pa/ sdug bsngal gzhan gyi mtshams mi sbyor zhing/ mi 'byung/ mi skye ba 'di ni zhib/ 'di ni gya nom pa ste/ 'di lta ste/ phung po thams cad nges par spangs pa/ srid pa zad pa/ 'dod chags dang bral ba/ 'gog pa/ mya ngan las 'das pa'o/ /zhes gsungs pa/ de'i don 'grel pa na/ @012b sdug bsngal 'di zhes nye ba'i tshig gis gsungs pa'i phyir/ tshe 'di'i sdug bsngal lam phung po kho na'i dbang du mdzad nas/ ma lus par spangs pa nas nub pa'i bar dang/ ma 'ongs pa'i sdug bsngal gyi dbang du mdzad nas/ sdug bsngal gzhan mtshams mi sbyor ba nas mya ngan las 'das pa'o zhes pa'i bar du gsungs so/ /de'i zad pa ni bden pa'i phung po gdod ma nas zad pa la byed dgos kyi/ dngos smra ba ltar bden grub kyi phung po gnyen po'i stobs kyis zad pa la byas na/ myang 'das mngon du byas pa'i gang zag med par 'gyur te/ gang zag yod pa na phung po ma zad pa dang/ phung po zad pa na gang zag med par 'gyur ba'i phyir ro/ /rtsa she las kyang/ bcom ldan dngos dang dngos med pa/ /mkhyen pas ka ta yan yi/ /gdams ngag las ni yod pa dang// med pa gnyis ka'ang dgag pa mdzad/ /ces gsungs pa 'dis kyang theg dman gyi mdo las mtha' gnyis bkag pa gsungs par bstan no/ /skabs 'dir rtsod pa spang ba la gnyis las/ 'grel pa nas bshad pa'i rtsod pa spang ba ni/ slob dpon legs ldan na re/ theg chen gyi sde snod logs su bstan pa don med par thal/ theg dman gyi sde snod las chos kyi bdag med dngos su bstan pa'i phyir zhes zer ro/ /de la zla ba'i zhabs na re/ spyir theg chen bstan pa don med du thal zer ram/ theg chen las chos kyi bdag med bstan pa don med du thal zer/ dang po ltar na ni/ theg chen las chos kyi bdag med 'ba' zhig bstan par thal/ khyod kyi thal 'gyur de la khyab pa yod pa'i phyir/ 'dod mi nus te/ theg chen las byang sems kyis dang phar phyin dang smon lam dang @013a @#/ /bsngo ba la sogs pa ston pa'i phyir dang/ (theg dman las de ltar mi) ston pa'i phyir te/ rin chen (phreng ba las/) nyan thos theg pa de las ni/ /byang chub sems dpa'i smon lam dang/ /spyod pa yongs bsngo ma bshad des// byang chub sems dpar ga la 'gyur/ /byang chub spyod la gnas pa'i don/ /mdo sde las ni bka' ma stsal/ /theg pa che las bka' stsal pa/ /de phyir mkhas pa rnams kyis gzung/ /zhes gsungs pa'i phyir/ lung 'di ni theg dman nas bshad pa'i lam nyid kyis sangs rgyas su bgrod nus pas/ theg chen gzhan mi dgos snyam pa'i log rtog sel ba la gsungs la/ khyod ltar na theg dman nas bshad pa'i lam tsam gyis mi chog gi/ theg chen las chos kyi bdag med gsungs pa'i phyir zhes gsungs dgos pa la/ de ltar ma gsungs par rgya che ba'i lam gzhan gsungs pa'i rgyu mtshan bkod pa'i phyir ro/ /gnyis pa ltar na yang khyab ba med de/ theg dman las ni chos kyi bdag med mdor bsdus tsam ston la/ theg chen las ni shin tu rgyas par bshad pa'i khyad par yod pa'i phyir te/ 'jig rten las 'das par bstod pa las/ mtshan ma med pa ma rtogs par/ /khyod kyis thar pa med par gsungs/ /de phyir khyod kyis theg chen las/ /de ni tshang bar bstan pa lags/ / zhes mtshan med kyi de kho na nyid ma rtogs par thar pa thob pa med pas na/ theg dman gyi gzhung du'ang chos kyi bdag med bstan dgos la/ de la theg pa che chung gi khyad par yang dgos pa de'i phyir/ theg chen gyi sde snod las chos kyi bdag med tshang bar te @013b shin tu rgyas par bstan pa yin par gsungs pa'i phyir ro/ /'grel par ma bshad pa'i rtsod pa spang ba ni/ rnal 'byor spyod pa'i dbu ma rang rgyud pa na re/ 'phags pa gsum gas chos kyi bdag med phra mo rtogs par bshad pa mi 'thad par thal/ mngon rtogs rgyan las/ gzung don rtog pa spong phyir dang/ /'dzin pa mi spong phyir dang ni/ /zhes sogs rang rgyal gyi lam gyis gzung don te phyi rol don 'dzin gyi rtog pa spong nus la/ 'dzin pa ste shes pa bden par 'dzin pa'i rtog pa spong mi nus par gsungs pa dang/ nyon mongs shes bya lam gsum gyi/ /nyams phyir slob ma bse ru dang/ /rgyal sras rnams kyi dag pa ste/ /sangs rgyas rnam kun shin tu ba/ /zhes nyon sgrib spangs pa'i nyan thos kyi rnam dag dang/ de dang shes sgrib kyi phyogs gcig phyi rol don 'dzin gyi rtog pa spangs pa'i rang rgyal gyi rnam dag dang/ de gnyis dang shes sgrib phra mo bden 'dzin ci rigs spangs pa'i rgyal sras kyi rnam dag dang/ sgrib pa gsum ga spangs pa'i sangs rgyas kyi rnam dag bzhi so sor gsungs pa'i phyir zhe na/ de ni re zhig zab mo'i snod du ma gyur pa'i nyan rang gi rigs can rnams rjes su gzung ba'i phyir du theg pa gsum gyi shes rab kyi rtogs rigs mi 'dra bar gsungs pa tsam yin gyi rgyan gyi dgongs don mthar thug min te/ chos kyi dbyings la dbyer med nphyir/ /rigs ni tha dad rung ma yin/ /rten pa'i chos kyi bye brag gis/ /de yi dbye ba yongs su brjod/ /ces sems can rnams kyi sems bden stong rigs yin na/ theg pa gsum gyi rigs tha dad pa ste mi 'dra bar 'jog mi rung bar thal/ chos kyi cad byings la ngo mo mi 'dra ba'i@014a @#/ /dbye ba med pa'i phyir zhes rtsod pa'i lan du/ chos kyi dbyings la ngo bo mi 'dra ba'i dbye ba med kyang/ rten pa'i chos dmigs byed kyi lam gyi bye brag gis rigs mchog 'bring dman gsum gyi dbye ba yod par gsungs pa'i phyir/ de ltar na rigs can gsum gsar rang rang gi 'bras bu thob pa la chos nyid la dmigs pa'i lam gyis 'thob dgos par gsungs pas/ nyan rang gnyis la'ang de kho na nyid kyi don rtogs pa yod par bstan to/ /gsum pa la bzhi/ sa dang po la gnas pa'i sbyin pa bshad pa/ rten dman pa rnams kyi sbyin pa bshad pa/ byang sems rnams kyi sbyin pa bshad pa/ sbyin pa'i phar phyin gyi dbye ba bstan pa'o/ /dang po ni/ de tshe de la rdzogs sangs byang chub rgyu/ zhes pa nas/ snang du mi rung dpog pa'i rgyur yang 'gyur/ zhes tshigs bcad gcig byung/ sa rab tu dga' ba thob pa de'i tshe byang sems de la 'jig rten las 'das pa'i dbang du byas na rdzogs pa'i sangs rgyas kyi byang chub kyi rgyu dang po sbyin pa'i phar phyin nyid de kho na ches lhag par yod par 'gyur zhing/ slong ba la phyi'i yo byad tsam du ma zad/ rang gi sha ster ba la'ang ches gus par byas pa yis/ gang zag gzhan phal che ba la snang du mi rung ba'i nang gi sa thob pa sogs dpog pa'i rgyur te gtan tshigs su 'gyur ro/ /gnyis pa ni/ skye bo 'di kun bde ba mngon 'dod cing; ;zhes pa nas/ de yi rgyu can zhi bar 'gro bar 'gyur/ /zhes tshigs bcad gsum byung/ skye bo 'di rnams kun bkres skom dang nad dang tsha grang sogs kyi sdug bsngal phyir bcos pa'i bde ba thob par mngon par 'dod cing/ mi la sogs @014b pa rnams kyi bde ba de'ang 'dod pa'i yul gyi longs spyod bza' btung dang/ nad gso ba'i chas dang/ gos dang gnas khang sogs la spyad pa med par skye ba min la/ longs spyod de rnams kyang ni sngon sbyin pa las byung ba'i bsod nams bsags pa las 'byung bar mkhyen nas/ thub pa'i dbang pos ches dang por sbyin pa'i gtam nyid mdzad de/ thabs de la 'jug par yang sla ba'i phyir ro/ /gal te sbyin pa btang ba las longs spyod phun sum tshogs pa thob pa de la/ gtong ba po tshul dang mthun pa dgos sam snyam na/ de ni mi dgos te/ byang sems rnams ltar snying rje'i dbang gis ma btang bar/ tshong ba bzhin du nor ches chung du btang ba las/ 'bras bu nor gyi phung po ches yangs pa 'dod pa'i gtong ba po snying rje dman zhing/ der ma zad sems can la shin tu rtsub pa'i sems dang ldan pa/ rang gi don mngon mtho'i bde ba tsam lhur len pa gang yin pa de dag la yang rnam smin tsam la re ba'i sbyin pa las longs spyod phun sum tshogs pa 'byung ba'i sgo nas bkres skom sogs kyi sdug bsngal nye bar zhi ba'i rgyur 'gyur ro / /gtong ba po dman pa 'di yang/ sbyin bdag gtod ba po'i thad du dam pa dag gis bgrod pa yin no/ /zhes gsungs pas/ sbyin pa gtong ba'i skabs kyis nam zhig gi tshe 'phags pa'i skye bo dang phrad pa myur du 'thob po/ /de nas dam pa des chos bstan pa las 'khor ba la yon tan med par rig cing lam zag med mngon du byas pas ma rig pa spangs nas/ srid pa'i rgyun yang dag par bcad par byas te/ dam pa dang phrad pa de'i rgyu can te 'bras bu nyan thos sam rang rgyal gyi zhib myang 'das su 'gro bar 'gyur ro/ /gsum pa ni/ @015a @#/ /'gro la phan par dam bcas yid can rnams/ zhes pa nas/ de bcad bya phyir myur du brtson 'grus rtsom/ /zhes tshigs bcad gsum byung/ byang sems ma yin pa rnams ni sbyin pas slong ba po tshim par byas ma thag tu sbyin pa'i 'bras bu'i bde ba la longs spyod pa'i nges pa med la/ 'gro ba thams cad la phugs su phan pa dang 'phral du bde ba sgrub par dam bcas pa'i yid can gyi byang sems rnams sbyin pas ring por mi thogs par/ slong ba po tshim par byas pa mthong ba'i mjug thogs su; sbyin pa'i 'bras bu dga' ba mchog tu gyur pa 'thob pas/ dus thams cad du sbyin pa gtong ba la dga' bar 'gyur ro/ /gang gi phyir sngar ji skad bshad pa'i tshul gyis brtse ba'i bdag nyid byang sems dang/ brtse ba'i bdag nyid ma yin pa thams cad kyi mngon mtho dang nges legs kyi bde ba rnams sbyin pas 'dren pa de'i phyir sbyin pa'i gtam nyid gtso bo ste shin tu gal che ba yin no/ byang sems kyis sbyin pa'i tshe dga' ba ji 'dra ba thob ba ni/ ji ltar slong pa pos byin cig ces zer ba'i sgra thos pa'i don bsams pa na/ rgyal sras la yid la bde ba yang yang 'byung ba de ltar ni thub pa dgra bcom pa rnams la zhi ba'i dbyings su zhugs pas bde ba skyed par byed pa min na/ phyi nang gi dngos po thams cad btang bas/ slong ba po tshim par byed pas zhi bde las lhag pa'i bde ba skyed pa lta ci zhig smos dgos te mi dgos so/ byang sems kyis lus sbyin pa la sdug bsngal yod med bstan pa ni/ byang sems rnams ni dmyal ba la sogs pa'i sdug bsngal drag pos lus 'joms pa/ rang gi lus gcod pa'i sdug bsngal stong 'gyur las kyang ches lhag @015b pa'i sdug bsngal bsran du med pa dang ldan pa dag la bltas pa na/ slong ba po la rang gi lus bcad nas ster ba'i bdag gi sdug bsngal gyis te sdug bsngal la rtsis med par byas nas/ rang gis sdug bsngal nyams su myong ba de nyid kyi rgyu mtshan las/ sems can gzhan dag rnams kyi dmyal ba la sogs pa'i sdug bsngal de bcad pa'i phyir du chos myur du brtson 'grus rtsom mo/ /'di ni nag tsho'i 'gyur las/ lus ni bcad nas byin pa'i sdug bsngal des/ /dmyal ba la sogs sdug bsngal gzhan dag la/ / bltas nas rang gi nyams su myong de las/ /gcod pa'i don du de ni brtson par byed/ /ces 'byung ba dang ba tshab kyi 'gyur gnyis ka la brten pa'i bshad pa yin par rnam bshad las gsungs so/ /'di yangs ma thob pa'i dbang du byas gyi/ sa thob pa'i byang sems rnams kyis rang gi lus bcad nas ster ba la sems med rnams la bcad pa ltar sdug bsngal gtan mi 'byung bar mdo las gsungs so/ /bzhi pa ni/ sbyin pa sbyin bya len po gtong pos stong/ zhes pa nas/ 'jig rten pa yi pha rol phyin ces bstan/ zhes tshigs bcad gcig byung/ gtong ba'i sems pa'i sbyin pa 'di yang sbyin par bya ba dang/ len pa po dang/ gtong ba por bden par dmigs pas stong pa'i shes rab zag med kyis zin pa ni/ 'jig rten las 'das pa'i pha rol tu phyin pa zhes bya ba dang/ sbyin pa'i 'khor gsum po dag la chags pa ste bden zhe na skyes par gyur pas bcings na ni/ sbyin pa de la 'jig rten pa'i pha rol tu phyin pa zhes mdo las bstan no/ /gsum pa ni/ de ltar rgyal ba'i sras kyi yid la rab gnas shing/ zhes pa nas/ mun pa stug po thams @016a @#/ /cad rnam par bsal nas rgyal/ /zhes tshigs bcad gcig byung/ sngar bshad pa de ltar sa'i yon tan thob pa'i rgyal ba'i sras kyi yid la rab tu gnas shing/ rang gang la gnas pa'i dam pa ste mchog gi rten de'i yid de ye shes kyi 'od chags pas mdzes pa rnyed par gyur pa/ sa rab tu dga' ba 'di ni nor bu chu shel zla ba'i dkyil 'khor ji lta ba bzhin du/ rang gi mi mthun phyogs mthong spang gi mun pa stug po ste 'thug po thams cad rnam par bsal nas rgyal bar gyur pa yin no; dbu ma la 'jug pa'i tshig 'grel legs bshad rjes 'brang zhes bya ba las/ don dam pa'i sems bskyed pa dang po'i skabs so// //gnyis pa dri ma med pa bshad pa la lnga/ sa 'dir tshul khrims yongs su dag par bstan pa/ tshul khrims kyi bsngags pa bstan pa/ tshul khrims kyi mi mthun phyogs dang ma 'dres pa'i dpe bstan pa/ tshul khrims kyi phar phyin gyi dbye ba bstan pa/ sa'i yon tan brjod pa'i sgo nas mjug bsdu ba'o/ /dang po ni/ de tshul phun tshogs yon tan dag ldan phyir/ zhes pa nas/ gnyis blo'i rgyu ba yang dag bral bar 'gyur/ /zhes tshigs bcad gsum byung/ sa gnyis pa la gnas pa de ni tshul khrims rab tu gyur pa'i phun sum tshogs pa dang/ yon tan rnams dag pa dang ldan pa'i phyir/ sad par ma zad rmi lam du yang bcas rang gi 'chal ba'i tshul khrims kyi dri ma spangs pa ste des ma gos pa'o/ /ji ltar yon tan rnams dag par 'gyur zhe na/ lus dang ngag dang yid kyi rgyu ba ste kun spyod gsum sad pa dang rmi lam gyi skabs kun tu ltung ba phra mos kyang dag par gyur pas/ dam pa ste mchog gi las lam bcu char @016b mtshang pa med par sog par byed pa'o/ /sa dang po bas kyang las lam bcu char gsog par byed mod kyang/ dge ba'i las lam 'di lta zhig bcu char yang/ sa gnyis pa de la klags pa ste shin tu phul du byung bar dag par 'gyur ba de ltar sa dang po ba ni ma yin no/ /ston ka'i zla ba la tsha gdung zhi bar byed pa dang/ dkar ba'i 'od kyis lam mer gnas pa gnyis yod pa ltar/ rtag tu tshul khrims rnam par dag par gnas pa de ni/ dbang po'i sgo bsdams pa'i zhi ba dang/ lam mer gsal ba'i lus can gyi 'od chags par de dag gis rnam par mdzes so/ /gang gi phyir dge slong kha cig so thar las brtsams te tshul khrims ches yongs su dag pa yin kyang/ gal te de ni chos rnams la rang bzhin gyis grub par lta na/ de'i phyir rgyu mtshan des tshul khrims dag par mi 'gyur ro; ;de ni zhes pa bshad ma thag pa la snyog tu mi rung bas/ nag tshos/ gal te rang bzhin tshul khrims rnam dag par/ /mthong na des de tshul khrims 'chal ba yin/ /zhes des de zhes bsgyur ba legs par rnam bshad las gsungs so/ /bden par ltan tshul khrims mi dag pa de'i phyir/ sa gnyis pa de ni rtag tu tshul khrims kyi 'khor gsum char la'ang dngos dang dngos med la sogs pa'i gnyis kyi chos la rang bzhin gyis grub par lta ba'i gnyis su 'dzin pa'i blo'i rgyu ba yang dag par bral bar te spong bar byed par 'gyur ro/ gnyis pa ni/ sbyin pas longs spyod dag ni 'gro ngan na'ang/ zhes pa nas/ mngon mtho'i rgyu ni tshul khrims las gzhan med/ /ces tshigs bcad bzhi byung/ sbyin pa btang ba las lha mi'i nang du longs spyod phun sum tshogs pa dag 'byung rgyu de ni/ @017a @#/ /'gro ba ngan pa nyi tshe ba'i dmyal ba la sogs par skyes pa na 'byung ba ni/ skye bo tshul khrims kyi rkang pa nyams pa ste bral ba las 'byung ngo/ /rten de la sngar gyi sbyin pa'i 'bras bu longs spyod pa tsam yin gyi/ sbyin sogs gsar du sgrub pa med/ pa'i phyir/ skyed dang bcas pa'i dngos po 'dub ste rtsa ba la spyad pas yongs su zad pas na/ phyin chad gang zag de la longs spyod 'byung bar mi 'gyur ro/ /der ma zad ngan 'gro nas thon pa yang rnyed dka' ba ni/ gang gi tshe dpa' bo mthun pa'i yul na gnas pa/ 'ching ba las grol ba ltar/ gzhan la rag ma las par rang gi 'dod pas rang dbang du 'jug cing/ mthun pa'i yul lha mi'i 'gro ba na gnas pa na/ gal te gang zag 'di bdag nyid ngan 'gror ltung ba las 'dzin par mi byed na/ dpa' bo bcings nas ri sul chen por bskyur ba ltar/ ngan 'gro'i g.yang sar ltung bas rang la dbang med par gzhan gyi dbang gis 'jug pa'i tshe/ ngan 'gror song ba de las phyi nas te da gzod gang gis slong bar byed de de ltar byed pa med do/ /de'i phyir rgyal bas sbyin pa'i gtam mdzad nas/ sbyin pa la sogs pa'i yon tan chud mi za bar bya ba'i phyir/ de'i mjug thogs su tshul khrims sbyin pa'i rjes su 'gro ba ste sgrub pa'i ste sgrub pa'i gtam nyid mdzad pa yin no/ /de'i rgyu mtshan ni/ sbyin sogs kyi yon tan rnams tshul khrims kyi zhing der rnam par 'phel na/ rgyu sbyin sogs dang 'bras bu lus longs spyod bzang po la nye bar spyod pa'i brgyud pa gong nas gong du chad pa med par 'gyur gyi/ de las gzhan du na de ltar mi nus pa'i phyir ro/ /bde 'gro'i lus dang rten de la sbyin 'bras yun ring du spyod pa gnyis ka tshul khrims @017b la rag las shing/ de nyid nges legs 'thob pa la yang med du mi rung yin pa'i phyir na/ tshul 'dis so so skye bo lam ma zhugs rnams kyi mngon mtho'i rgyu dang/ thub pa'i gsung las skyes pa nyan thos rnams dang/ rang rgyal gyi byang chub kyi lam du bdag nyid nges pa rnams dang/ rgyal sras byang sems rnams kyi nges par legs pa byang chub kyi rgyu ni/ tshul khrims las gzhan med do/ /de'i don ni tshul khrims kho na rgyu yin zhes rgyu gzhan gcod pa min gyi/ mngon mtho khyad par can dang nges legs 'grub pa la tshul khrims dang ma 'brel ba'i rgyu gzhan dag gis gtan mi 'grub pa'i don no/ /gsum pa ni/ ji ltar rgya mtsho ro dang lhan cig dang/ zhes pa nas/ de 'chal ba dang lhan cig gnas mi 'dod/ /ces tshigs bcad gcig byung/ ji ltar te dper na rgya mtsho chen po ni klu gtsang sbra can gnas pa'i mthus/ ro gang yin rlabs kyis phyi rol tu 'phen pas/ ro dang lhan cig tu mi 'grogs pa dang/ bkra shis pa'i phun tshogs dang/ rna nag ma ste bkra mi shis pa gnyis lhan cig tu mi 'grogs pa bzhin du/ tshul khrims yongs su dag pas dbang du byas pa'i bdag nyid chen pos gnyis pa ba de/ tshul khrims 'chal ba dang lhan cig tu gnas par mi 'dod do/ bzhi pa ni/ gang gis gang zhig gang la spong byed pa/ zhes pa nas/ gsum la chags pas stong de 'jig rten 'das zhes tshigs bcad gcig byung/ gang zag gang gis/ spang bya gang zhig /sems can gang la spong bar byed pa'i 'khor gsum du bden par dmigs pa'i sa bon 'gog mi nus pa yod na/ de 'dra ba'i tshul khrims 'jig rten pa'i pha rol tu phyin pa zhes @018a @#/ /bshad la/ tshul khrims de nyid sngar bshad pa'i 'khor gsum du bden par dmigs pa'i chags pas stong pa ste mi dmigs par rtogs pa'i zag med kyi shes rab kyis zin na/ 'jig rten las 'das pa'i pha rol du phyin pa yin pas tshul khrims la gnyis yod do/ /lnga pa ni/ rgyal sras zla ba las byung srid min srid pa yi/ zhes pa nas/ 'gro ba'i yid kyi gdung ba sel bar byed pa yin/ /zhes tshigs bcad gcig byung/ ji ltar ston ka'i dus kyi zla 'od dri ma dang bral bas skye bo'i gdung ba sel bar byed pa ji bzhin du/ rgyal ba'i sras sa gnyis pa ba'i zla ba las byung ba'i 'chal khrims kyi dri ma dang bral ba'i tshul khrims kyi 'od dang ldan pas/ sa gnyis pa dri ma med pa zhes pa'i mtshan don dang ldan pa 'di yang/ 'chal ba'i tshul khrims kyis skyed pa'i 'gro ba'i yid kyi gdung ba sel bar byed pa yin no/ /sa gnyis pa ba 'di ni 'khor bar 'khor ba'i khongs su mi gtogs pas srid pa 'khor ba min yang/ srid pa'i dpal du gyur pa yin te/ yon tan phun tshogs thams cad byang sems de'i rjes su 'gro ba'i phyir dang/ sems can gyi don du smon lam gyi dbang gis gling bzhi la dbang ba'i 'khor sgyur gyi rgyu phul du byung ba thob pa'i phyir ro/ /dbu ma la 'jug pa'i tshig 'grel legs bshad rjes 'brang zhes bya ba las/ don dam pa'i sems bskyed pa gnyis pa'i skabs so// //gsum pa 'od byed pa bshad pa la bzhi/ khyad par gyi gzhi sa'i nges tshig/ khyad par gyi chos sa'i yon tan/ phar phyin dang po gsum gyi khyad par gyi chos/ /sa'i yon tan brjod pa'i sgo nas mjug bsdu'o/ /dang @018b po ni/ shes bya'i bud shing ma lus sreg pa'i me'i/ zhes pa nas/ de tshe nyi ltar zangs 'dra'i snang ba 'byung/ /zhes tshigs bcad gcig byung/ byang sems kyis gsum pa 'di la 'od byed pa zhes bya ba ni mtshan don dang mthun pa yin te/ sa gsum pa thob pa de'i tshe shes bya'i bud shing ma lus pa sreg pa'i ye shes kyi me gnyis snang gi sbros pa kun mnyam gzhag tu zhi bar byed nus pa'i bdag nyid can gyi 'od 'byung ba'i phyir ro/ /bde bar gshegs pa'i sras po de las gsum pa de'i tshe/ nyi ma 'char la khad pa'i dus su zangs 'dra ba'i snang ba 'byung ba ltar/ rjes thob tu 'od dmar po'am dmar ser gyis kun tu khyab pa'i snang ba 'byung ba'o/ /gnyis pa la bzhi/ sa 'dir bzod pa lhag par bstan pa/ bzod pa gzhan ji ltar bsten pa'i tshul; bzod pa'i phar phyin gyi dbye ba/ sa 'dir 'byung ba'i dag pa'i yon tan gzhan bstan pa'o/ /dang po ni/ gal te gnas min 'khrugs pa 'ga' yis de'i/ zhes pa nas/ mthong ba des kyang de yis bzod par 'gyur/ /zhes tshigs bcad gnyis byung/ byang sems gsum ba ba ni khong khro ba'i gnas min yang/ gal te khong 'khrugs pa 'ga' yis byang sems de'i lus las sha ni rus pa dang bcas ba srang re re nas yun ring po'i bar du gcad par gyur kyang/ gcod pa po de la sems 'khrugs pa mi 'byung ba tsam du ma zad/ gcod byed de la dmigs nas ches lhag par bzod pa skye bar 'gyur ba'o/ /sa dang po gnyis su lus bcad pa la rgyud mi 'khrugs pa yod kyang/ bzod pa lhag par skye ba med la/ bzod pa lhag pa ni sa gsum pa @019a @#/ /nas 'byung bar gsungs so/ /de 'ba' zhig tu ma zad kyi/ gang gi phyir bdag med mthong ba'i byang chub sems dpa'i lus la/ gang gis gcod pa dang/ gang zhig gcad par bya ba dang/ dus gang gi tshe tshul ji ltar gcod pa'i 'khor gsum gyi chos rnams/ /sa gsum pa ba de yis gzugs brnyan lta bur mngon sum du mthong ba dang/ bdag dang bdag gi ba'i kun brtags kyi 'du shes dang bral ba des kyang/ byang sems de yis bzod par 'gyur ro/ /gnyis pa la gnyis; khong khro bya bar mi rigs pa dang/ bzod pa bsten par rigs pa'o/ /dang po ni/ gnod pa byas pas gal te der bkon na/ zhes pa nas/ mi bzod pa yis myur du ngan 'gror skyur bar byed/ /ces tshigs bcad gsum dang rkang pa gsum byung; 'di la bzhi las/ dgos pa med cing nyes dmigs che bas khong khro bar mi rigs pa ni/ gal te gnod pa byas pa las gnod byed der bkon pa ste khro na/ de la bkon pas gnod pa byas zin pa ldog gam ci ste mi ldog go/ /de'i phyir de la bkon pa 'dir nges par don med do/ /der ma zad 'jig rten pha rol gyi don dang yang 'gal bar 'gyur te/ shi ba'i 'og tu rnam smin yid du mi 'ong ba 'phen pa'i phyir ro/ /phyis kyi sdug bsngal mi 'dod pa dang gnod lan byed pa gnyis 'gal bar bstan pa ni/ rang gi lus la gnod pa'i sdug bsngal chen po dgra dag gis bsgrubs pa de ni/ sngon byas pa'i srog gcod kyi mi dge ba'i las kyi 'bras bu/ ngan song gsum du rnam smin drag po myong zhing/ rgyu mthun gyi 'bras bu lhag mar lus pa @019b can rnams kyi/ rgyu mthun gyi 'bras bu yid du mi 'ong ba ma lus pa ldog pa'i rgyu gang yin pa/ las kyi lhag ma zad par byed par brjod par 'dod pa de nyid ko ste de nyid ni/ gzhan la gnod pa'i lan byed pa dang/ rgyud khong nas 'khrugs pa'i khro bas sdug bsngal 'dir myong ba las ches lhag pa'i sdug bsngal/ phyir te slar yang sdug bsngal de'i sa bon te rgyu nyid du ji lta bur na 'khrid par byed pa rigs te mi rigs so/ sngar yun ring bsags pa'i dge ba 'joms pas khong khro bar mi rigs pa ni gang gi phyir byang sems stobs che bas rgyal sras stobs chung ba la khro ba'i bsam pa skad cig tsam bskyed pas kyang/ sbyin pa dang tshul khrims kyi phar phyin goms pa las byung ba'i dge ba bskal pa brgyar bsags pa rnams 'joms par 'gyur na/ byang sems stobs chung bas che ba la dang byang sems ma yin pas byang sems la khong khro ba bskyed na lta ci smos te/ de'i phyir de ltar na 'bras bu yid du mi 'ong ba 'phen pa dang/ dge ba la gnod pa byed pa'i sdig pa ni/ mi bzod pa khong khro las gzhan pa'i mchog tu gyur pa yod pa ma yin no/ /'o na slob dpon dpa' bo dang zhi bltas/ bskal ba stong du bsags pa yi/ /sbyin dang bde gshegs mchod la sogs/ /legs spyad gang yin de kun kyang/ /khong khro gcig gi 'joms par byed/ /ces bskal ba stong du bsags pa'i dge ba 'joms par byed par gsungs pa ji ltar yin zhe na/ 'di ni byang sems ma yin pas byang sems la khros pa'i dbang du byas pas rnam bshad las gsungs shing/ bskal pa brgya'am stong du bsags pa'i dge rtsa 'joms pa'i khong khro'i yul la byang sems dgos par yang gsungs@020a @#/ /so; sdud pa las/ lung bstan ma thob byang chub sems dpa' gang zhig gis/ /lung bstan thob la sems khros rtsod brtsom byed na/ /thab skyon ldan sems kyi skad cig ji snyed pa/ /de snyed bskal par gzhi nas go cha bgo dgos so/ /zhes lung bstan ma thob pa'i byang sems kyis lung bstan thob pa'i byang sems la yid kyis sdang ba tsam bskyed na ni/ sems de bskyed grangs ji tsam pa de tsam gyi bskal bar gzhi nas go cha bgo dgos par gsungs so/ /gzhi nas go cha bgo dgos pa ni/ dper na byang sems kyi tshogs lam chen po nas myur por sbyor lam du 'pho thub pa gcig gis/ lung bstan thob pa la khros na/ khro sems kyi grangs de snyed kyi bskal par sbyor lam du 'pho mi nus par gzhi nas lam la slob dgos pa lta bu'o/ /byang sems stobs chung bas che ba la khros pa dang/ de'i yul gyi mchog dman gyi khyad par dang/ yul dang rten stobs mnyam pas mnyam pa la khros pas dge rtsa 'joms pa yang lung la brten nas dpyad dgos par gsungs so/ /byang sems kyis byang sems min pa la yid kyis khros nas ngag gis gshe ba dang/ lus kyis brdeg pa bstan pa de yang byang sems la rma phyung zhing rmas pa dang mi 'dra bar mdo kun btus su byams pa seng ge sgra'i mdo drangs pa las gsungs pas/ de 'dra ba la gzhi nas go cha bgo mi dgos par rnam bshad las gsungs so/ /byang sems la khros na bskal ba mang por bsags pa'i dge rtsa 'joms par ma zad dmyal bar yun ring du gnas ba'i nyes dmigs kyang yod de/ spyod 'jug las/ gang zhig de 'dra'i rgyal sras sbyin bdag la/ /gal te ngan sems skyed @020b par byed pa de/ /ngan sems bskyed pa'i grangs bzhin bskal par ni/ /dmyal bar gnas par 'gyur zhes thub pas gsungs/ /zhes gsungs pas so/ /de'i steng du lung bstan thob pa la ma thob pas khros na de snyed kyi bskal par gzhi nas lam la slob pa yang dgos so/ /yul rten gnyis ka byang sems min kyang khong khor skyes na dge rtsa 'joms pa yod de/ dbu skra dang sen mo'i mchod rten la phyag 'tshal ba'i dge slong gis lus kyi 'og nas gser dkyil la thug pa'i bar gyi bye ma'i grangs dang mnyam pa'i 'khor bsgyur gyi rgyal srid stong 'gyur du longs spyod ba'i dge rtsa bsags pa de tshangs pa mtshungs par spyod pa la rma phyung zhing rmas par byas na zad par thams cad yod smra'i gzhung bslab btus su drangs pa las gsungs pa'i phyir dang/ zla ba sgron me'i mdo mdo btus su drangs pa las kyang/ phan tshun gnod pa'i sems su gang byed pa/ /de la tshul khrims thos pas skyob mi byed/ /bsam gtan dang ni dgon gnas mi skyob ste/ /sbyin dang sangs rgyas mchod pa'ang skyob mi byed/ /ces tshul khrims sogs drug gis kyang grogs tshangs pa mtshungs par spyod pa la khros pas dge rtsa 'joms pa 'gog mi nus par gsungs pa'i phyir ro/ /gzhom bya'i dge rtsa ni/ sbyin dang khrims byung zhes ba ltar/ bsod nams kyi tshogs rnams yin gyi/ bdag med legs par rtogs pa'i dge rtsa la mi byed pa 'dra gsungs/ mdo btus su mdo drangs pa las rdzogs byang du bsngos pa'i dge rtsa byang chub ma thob kyi bar du mi zad par gsungs pa ni/ 'bras bu byung bas mi zad pa yin gyi khong khros mi 'dzad pa min la/ rtsa ltung dang chos spong dang @021a @#/ /rnyed bkur la lhag par zhen pas khyim la lta ba dang/ mngon pa'i nga rgyal gyis khengs pas kyang dge rtsa zad par gsungs pas na/ dge ba 'joms byed kyi nyes pa yin na khong khro yin pas ma khyab gsungs te/ zhib tu mdo kun btus dang bslab btus su blta bar bya'o/ /byang sems la khros pa dang brnyas pa dang kun slong ngan pas smad pa la nyes pa mu med pa mdo btus las gsungs shing/ de la byang sems su nges ma nges dang/ khro ba'i rgyu mtshan bden mi bden gnyis 'dra bar gsungs pas; khong khro sbyi dang khyad par du tshangs pa mtshungs par spyod pa dang byang sems la dmigs pa'i khong khro 'gog pa la nus pa ci yod kyis 'bad par bya'o/ /zhes dang/ rnam par 'thag pa bsdus pa las gsungs pa'i chos spong byung bas lo bdun gyi bar du nyin gcig cing dus gsum du nyes ba bshags na rnam smin dag kyang/ bzod pa 'thob pa la myur na'ang bskal ba bcu dgos par gsungs pa ltar/ sgo du ma nas bshags bsdams byas na/ lam bul du song ba sor ma chud kyang rnam smin myong ba 'dag par 'gyur bas 'bad par bya'o/ /zhes rnam bshad las gsungs so/ /mi bzod pa'i skyon mang po bsams nas khong khro dgag pa ni/ nus pa med pas rang kho na 'joms la/ nus pa can snying rje med pas rang gzhan gnyis ka 'joms pa'i khong khro skyes pa nyid gyis bzhin mi sdug pa'i gzugs su byed cing/ dam pa min par bkri bar byed pa dang/ bya ba'i tshul dang tshul min shes pa'i rnam dpyod 'phrog par byed cing/ mi bzod pa khong khros shi ba'i 'og tu myur du ngan 'gror skyur bar byed pa'i nyes @021b dmigs rnams bsams la/ ci nas kyang khong khro ba la skabs mi sbyin par bya'o/ /gnyis pa ni/ bzod pas bshad zin dang 'gal yon tan rnams byed do/ /zhes pa nas/ bsngags pa'i bzod pa rtag tu myur bsten bya/ /zhes tshig bcad gnyis dang rkang pa gcig byung/ 'di la gnyis las/ bzod pa'i yon tan mang po bsams pa ni/ bzod pa bsgoms pas ni sngar bshad pa'i khong khro'i skyon dang 'gal ba'i yon tan rnams byed do/ /de yang bzod pa bsgoms pas gzugs mdzes pa thob cing/ skye bo dam pa rnams la phangs shing gces pa dang/ lugs dang lugs min shes pa la mkhas par 'gyur zhing/ shi ba de'i 'og tu lha dang mi'i skye ba len pa dang/ khong khro ba sogs kyis bsags pa'i sdig pa zad par 'gyur pa rnams bsams la bzod pa'i stobs bskyed do/ /don bsdus te bzod pa bsten par gdams pa ni/ sngar bshad pa de ltar so so skye bos khros pa'i skyon nyes dmigs dang/ rgyal sras rnams kyis bzod pa'i phan yon rig par byas te/ mi bzod pa spangs nas 'phags pa'i skye bos bsngags pa'i bzod pa rtag tu bsten par bya'o/ /gsum pa ni/ rdzogs sangs rgyas kyi byang chub phyir bsngos kyang/ zhes pa nas/ 'jig rten 'das pa'i pha rol phyin ces bstan/ /zhes tshigs bcad gcig byung/ rdzogs pa'i sangs rgyas kyi byang chub thob phyir du bsngo bar byas kyang/ bzod pa'i 'khor gsum du bden par dmigs pa'i blo'i zhen yul mngon sum gyis sun ma phyung bar yod na/ bzod pa de ni 'jig rten pa'i pha rol tu phyin pa zhes bya'o/ /bden par dmigs pa med bsten mi dmigs par rtogs @022a @#/ /ba'i zag med kyi shes rab kyis zin na/ bzod pa de nyid sangs rgyas bcom ldan 'das kyis 'jig rten las 'das pa'i pha rol tu phyin pa zhes bstan to/ /bzhi pa ni/ sa der rgyal sras bsam gtan mngon shes dang/ zhes pa nas/ 'dod pa'i 'dod chags 'joms par nus par 'gyur/ /zhes tshig bcad gcig byung/ sa gsum pa der rgyal sras de la bzod pa'i phar phyin dag pa de bzhin du/ bsam gtan bzhi dang/ des mtshon nas gzugs med bzhi dang/ tshad med bzhi dang/ mngon shes lnga dag pa 'thob par 'gyur ro/ /sa 'dir 'dod chags dang zhe sdang dang gti mug zad par 'gyur ba 'thob bo/ /'di'i zad pa'i don ni 'jig rten pa'i bsam gzugs kyi ting nge 'dzin gyi mthus ci yang med man chad la chags pa dang bral ba la byed do/ /der ma zad sa 'dir sgrom spang chen po skor gsum gyi sa bon kyang spong bar 'gyur ro/ /sa gsum pa ba des ni rtag tu 'jig rten pa sems can rnams kyi 'dod pa la chags pa'i 'dod chags 'joms par nus pa la mkhas par 'gyur zhing/ gtso bor gyur pas sems can rnams 'dod pa'i 'dam nas 'don pa lam mkhas pa yin no/ /gsum pa ni/ sbyin sogs chos gsum de dag phal mo cher/ zhes pa nas/ sangs rgyas gzugs kyi bdag nyid sku yi rgyu/ /zhes tshigs bcad gcig byung/ byang sems khyim pa dang rab byung gnyis ka sbyin sogs kyi rten yin mod kyang/ sgrub dka' sla la ltos nas ni/ sbyin pa la sogs pa'i chos gsum @022b bo de dag /bde bar gshegs pas byang sems khyim pa rnams la bsngags pa yin no/ /tshogs gnyis kyis nang nas bsod nams zhes bya ba'i tshogs kyang gsum po de dag nyid do/ /tshogs de ni sangs rgyas kyi gzugs kyi bdag nyid kyi sku yi rgyu ste/ gtso bo'i dbang du byas pa'o/ /byang sems rab byung rnams la ni phar phyin tha ma gsum sgrub sla ste/ bsam gtan dang shes rab ni ye shes kyi tshogs dang/ chos sku'i rgyu'i gtso bo yin la/ brtson 'grus ni tshogs gnyis ka'i rgyu yin gsungs so/ /bzhi pa ni/ rgyal ba'i sras po nyi ma la gnas 'od byed 'di/ zhes pa nas/ sa 'dir shin tu rno bar gyur kyang khro mi 'gyur/ /zhes tshigs bcad gcig byung/ 'od byed pa zhes bya ba rgyal ba'i sras po nyi ma la gnas pa 'di ni/ rang gi rgyud du gtogs pa'i mi shes pa'i mun ba don dam pa'i sa 'di 'byung ba'i gegs su gyur pa rnams/ sa de dang bo skye bzhin pa'i skabs su yang dag par bsal bar byas nas/ rnam pa de lta bu gzhan la nye bar bstan pa las 'gro ba gzhan rnams kyis gsum pa'i gegs byed pa'i mun pa rnam par 'joms par mdon par 'dod do/ byang sems de nis 'dir nyes pa'i mun pa yon tan 'joms par byed ba bcom pas nyi ma ltar shin tu rno bar gyur kyang/ skyon ldan gyi skye bo la 'khro bar mi 'gyur te/ bzod pa la ches lhag par goms pa'i phyir dang/ snying rjes rgyud snum par byas pa'i phyir ro/ /dbu ma la 'jug pa'i tshig 'grel legs bshad rjes 'brang zhes bya ba las/ don dam pa'i sems bskyed pa gsum pa'i skabs so// // @023a @#/ /bzhi pa 'od 'phro ba bshad pa la gnyis/ sa 'dir brtson 'grus lhag par bstan pa/ sa'i nges tshig dang spangs pa'i khyad par bstan pa'o/ /dang po ni/ yon tan ma lus brtson 'grus rjes 'gro zhing/ zhes pa nas; sa de bzhi pa 'od ni 'phro ba'o/ /zhes tshig bcad gcig byung/ dge ba la mi sbro ba la ni/ sbyin sogs la 'jug pa med pas yon tan gang yang 'byung ba med la/ de la sbro ba dang ldan pa la ni/ thob pa'i yon tan 'phel ba dang/ ma thob pa thob par 'gyur bas/ yon tan ma lus pa ni brtson 'grus kyi rjes su 'gro zhing/ brtson 'grus ni bsod nams dang blo gros te ye shes kyi tshogs gnyis ka'i rgyu yin no/ /de 'dra ba'i brtson 'grus sa gang du lhag par 'bar ba 'chang bar gyur pa de ni sa bzhi pa 'od 'phro ba zhes bya'o/ /sa gsum par ting nge 'dzin gyi bslab pa ches phul du byung ba thob pas/ de las skyes pa'i shin tu sbyangs pa le lo gtan nas sel bar byed pa khyad par can sa 'dir thob pa'i phyir na brtson 'grus kyi phar phyin lhag pa'o/ /gnyis pa ni/ der ni bde gshegs sras la rdzogs pa yi/ zhes pa nas/ rang du lta ba dang 'brel yongs su zad/ /ces tshigs bcad gcig byung/ sa 'di la ci'i phyir 'od 'phro ba zhes brjod ce na/ sa bzhi pa der ni bde bar gshegs pa'i sras po la/ rdzogs pa'i byang chub kyi phyogs kyi chos so bdun sngar las chos lhag par bsgoms pa las skyes pa'i ye shes kyi snang ba/ sa gsum par bshad pa'i zangs kyi 'od @023b dang 'dra ba las lhag pa 'byung ste/ de'i phyir yang dag pa'i ye shes kyi me'i 'od lhag pa 'byung pas/ byang sems kyi sa de la 'od 'phro ba zhes bya'o/ /rang ste phra ba'i 'jig lta'i bdag tu lta ba dang 'brel pa ste de sngon du 'gro ba'i bdag dang sems can sogs rang skya ba'i rdzas yod du 'dzin pa rags pa'i gang zag gi bdag dang bdag gi bar 'dzin pa dang/ phung khams skye mched la bden par zhen pa'i chos kyi bdag 'dzin rnams yongs su zad par 'gyur ro/ /zad pa'i don yang sa de'i spang byar gyur pa'i bdag 'dzin gnyis kyi sa bon spangs pa yin gyi/ thams cad zad pa min no/ /des ni rang skye ba'i rdzas yod du 'dzin pa'i 'jig lta lhan skyes yod par bstan no/ /dbu ma la 'jug pa'i tshig 'grel legs bshad rjes 'brang zhes bya ba las/ don dam pa'i sems bskyed pa bzhi pa'i skabs so// //lnga pa sbyang dka' ba bshad pa la gnyis/ sa lnga pa'i nges tshig bshad pa dang/ bsam gtan lhag cing bden ba la mkhas par bstan pa'o/ /dang po ni/ bdag nyid che de bdud rnams kun gyis kyang/ /sbyang dka'i sa la pham par nus ma yin/ /zhes byung/ bdag nyid chen po sa lnga pa sbyang dka' ba la gnas pa de ni/ 'jig rten gyi khams thams cad na gnas pa'i lha'i bu'i bdud rnams kun gyis kyang pham par bya bar nus pa ma yin na/ de dag las gzhan pa'i bka' nyan pa bran la sogs pa rnams kyis lta ci smos/ de'i phyir sa 'di'i ming sbyang dka' ba zhes bya'o/ / @024a @#/ /gnyis pa ni/ bsam gtan lhag cing blo bzang bden rang bzhin/ /zhi ba mo rtogs la'ang shin tu mkhas pa thob/ /ces byung/ sa lnga pa 'dir phar phyin lhag ma drug gi nang nas bsam gtan gyi phar phyin nyid ches lhag par 'gyur ro/ /bsam gtan lhag par ma zad blo bzang ste 'phags pa'i bden pa'i rang bzhin te rang gi ngo bo shes pa zhi ba mos khong du chud dgos pa phra mo rtogs pa la'ang shin tu mkhas pa 'thob pas/ 'dir bden pa phra rags la mkhas pa'i lhag pa'i shes rab can du 'gyur ro/ sa bcu pa las sa lnga pa bdes/ /sdug kun dang 'gog lam gyi bden pa dang/ kun rdzob dang don dam pa'i bden pa dang/ mtshan nyid kyi bden pa la mkhas pa sogs kyi bden pa'i ming 'dogs mang du 'byung yang/ de dag kyang bden pa gnyis su mi 'du ba min la/ bden pa bzhi las 'gog bden ni don dam bden pa dang/ gzhan gsum kun rdzob bden par gsungs so/ /dbu ma la 'jug pa'i tshig 'grel legs bshad rjes 'brang zhes bya ba las/ don dam pa'i sems bskyed pa lnga pa'i skabs so// //gnyis pa sa drug pa mngon du gyur pa bshad pa la bzhi/ sa'i nges tshig dang sher phyin lhag par bstan pa/ shes rab kyi phar phyin gyi bsngags pa/ zab mo rten 'byung gzigs pa'i de kho na nyid bshad pa/ sa'i yon tan brjod pa'i sgo nas mjug bsdu ba'o/ /dang po ni/ mngon du phyogs par mnyam gzhag sems gnas te/ zhes @024b pa nas/ shes rab gnas pas 'gog pa thob par 'gyur/ /zhes tshig bcad gcig byung/ sa lnga par bsam gtan gyi phar phyin yongs su dag pa thob pas/ sa drug pa mngon du phyogs pa ste gyur par mnyam bzhag gi sems phul tu byung ba la gnas te/ de la brten nas rten 'byung gi de kho na nyid mthong ba'i byang sems sa drug pa la gnas pas ni/ shes rab kyi pha rol tu phyin pa phul du byung ba la gnas pas 'gog pa thob par 'gyur gyi/ de'i snga rol tu ni ma yin te/ sher phyin lhag pa med pa'i phyir/ de ltar shes rab lhag pa'i sgo nas bden pa dang rten 'brel mngon du gyur pa'i phyir dang/ rdzogs pa'i sangs rgyas kyi chos thob pa la mngon du phyogs pa'i phyir sa 'di la mngon du gyur pa zhes bya'o/ /sa bzhi par byang chub phyogs mthun la mkhas pa'i shes rab dang/ sa lnga par bden bzhi phra rags la mkhas pa'i shes rab dang/ sa drug par rten 'brel lugs 'byung ldog la mkhas pa'i shes rab 'thob par gsungs shing/ de ltar nas 'dir shes rab kyi bslab pa gsum rdzogs pa'o/ /'dir shes rab phul du byung ba de'i phyir thun mong ma yin pa'i 'gog pa'i snyoms 'jug 'di nas 'thob pa yin no/ /gnyis pa ni/ ji ltar long ba'i tshogs kun bde blag tu/ zhes pa nas/ / mig nyams yon tan blangs te rgyal nyid 'gro/ /zhes tshigs bcad gcig byung/ ji ltar de dper na skyes bu mig dang ldan pa gcig gis long ba'i tshogs kun te mtha' dag 'gro bar 'dod pa'i yul du bde blag tu 'khrid par byed pa de bzhin @025a @#/ /du; lam gyi skabs 'dir yang blo ste sher phyin gyis kyang/ de kho na nyid lta ba'i mig nyams pa'i sbyin sogs kyi yon tan rnams blangs pa ste yongs su bzung ste/ rgyal ba 'bras bu nyid kyi go 'phang du 'gro ste/ sher phyin ni lam yang dag pa yin min phyin ci ma log par mthong ba'i phyir ro/ /gsum pa la lnga/ zab mo'i don bshad par dam bca' ba/ zab mo'i don bshad pa'i snod ngos bzung ba/ de la bshad na yon tan 'byung tshul/ snod ldan gyi gang zag la nyan par bskul ba/ rten 'byung gi de nyid ji ltar bshad pa'i tshul lo/ dang po ni/ ji ltar de yis ches zab chos rtogs pa/ zhes pa nas/ ji ltar gnas pa'i lugs bzhin brjod par bya/ /zhes tshigs bcad gcig byung; sa drug pa bde yis ches shin tu zab pa'i chos zab mo ji ltar rtogs pa de ltar 'phags pa klu sgrub kyis lung phyin ci ma log par mkhyen nas/ dbu ma'i bstan bcos las mdo sde'i lung dang/ der ma zad lung las gzhan yang rigs pa dag gis chos rnams kyi de kho na nyid ches gsal bar bstan pa yin pas na/ de'i phyir 'phags pa klu sgrub kyi gzhung lugs las de kho na nyid ji ltar bstan pa de kho na ltar/ zla ba'i zhabs kyis klu sgrub des nye bar bstan pa'i lugs ji ltar gnas pa de bzhin du brjod par bya'o/ /'phags pa klu sgrub la nges don gyi lung gi don phyin ci ma log par nges pa ji ltar yod ce na/ lung las shes te/ lang gshegs las/ lho phyogs bde da'i yul du ni/ /dge slong dpal ldan zhes grags pa/ /de @025b ming klu zhes 'bod pa ste/ /zhes sogs des don gyi theg pa yod med kyi mtha' gnyis dang bral ba klu sgrub kyi 'grel par gsungs shing/ sbrin chen las li tsa byi gzhon nu mthong na dga' ba de ston pa 'das nas lo bzhi brgya lon pa na/ klu zhes bya ba'i dge slong du gyur nas bstan pa rgyas par byed par gsungs pa'i phyir ro/ /'jam dpal rtsa rgyud las kyang 'byung ba'i dus dang mtshan sbrin chen dang 'dra la/ lo drug brgya bzhugs par bshad do/ /bu ston rin po ches/ sbrin chen las klu zhes bya ba'i dge slong zhes mi 'byung gi /nga'i ming 'chang ba'i dge slong zhes gsungs pas/ klu sgrub kyi gsal kha med mod/ /kha cig klu sgrub kyi mtshan shAkya bshes gnyen du 'dod pa ltar na brtag gsungs kyang/ bod du 'gyur ba'i sbrin chen las klu zhes bya ba'i dge slong zhes mi 'byung yang/ sbrin chen po stong phrag bcu gnyis pa las de ltar 'byung ba zla ba'i zhabs kyis drangs pa yin pas dogs pa med par dbu ma'i yig char gsungs so/ /rnga bo che'i mdo las li tsa byi mthong na dga' ba 'di/ ston pa 'das nas lo brgyad cu pa la bstan pa nyams pa'i tshe/ ston pa'i mtshan 'chang ba'i dge slong du gyur nas bstan pa rgyas par byed par gsungs pa de/ zla ba'i zhabs kyis klu sgrub kyi lung bstan du ma drangs kyang/ gnas brtan byang bzang dang jo bo chen po bzhed de li tsa byi mthong na dga' ba klu sgrub dang rgyud gcig tu bshad pa la brten pa'o zhes rnam bshad las gsungs so/ 'di la kha cig na re/ rnga bo che las lung bstan pa de 'phags pa klu sgrub dang rgyud gcig yin kyang de dngos ma @026a @#/ /yin te/ 'phags pa klu sgrub ni ston pa dang mtshan mthun pa ma yin pa'i phyir te/ rab tu byung pa'i mtshan dpal ldan blo 'chang/ dngos grub brnyes pa'i mtshan klu sgrub ces bya ba yin par gsungs shing/ mtshan gzhan mi snang ba'i phyir zer na ma khyab snyam ste/ de la pham dang nye du rnams kyis ston pa'i mtshan dang mthun pa'i ming btags pa'i phyir te/ sprin chen las/ 'jig rten thams cad kyis mthong na dga' ba byang chub sems dpa' mi mchog de der rigs chen por skye bar 'gyur te/ de'i pha ma dang gnyen sde rnams kyis nga'i ming de'i ming du 'dogs par 'gyur ro/ /zhes gsungs pa'i phyir ro/ /yang kha cig na re/ 'phags pa klu sgrub ston pa 'das nas lo bzhi brgya lon pa na byon pa ma yin par thal; rnga bo che las lo brgyad cu pa na 'byung bar gsungs pa'i phyir na ma khyab ste/ rnga bo che las gsungs pa de mi'i tshe tshad lo brgyad cu pa'i dbang du byas pa'i phyir zhes skabs pa rnams kyis bshad do/ /de la kha cig na re/ 'o na/ ston pa 'das nas lo nyis stong bdun brgya lhag 'das pa'i deng sang gi dus su mi'i tshe tshad bzhi bcu kha ral du 'gyur par thal/ ston pa 'das nas lo dgu brgya lon pa'i dus su mi'i tshe tshad lo brgyad cu bar song ba'i phyir te/ 'phags pa klu sgrub lho phyogs su lan gsum 'byung ba'i tha ma'i dus su mi'i tshe tshad lo brgyad cu par song ba'i phyir zer na dpyad par bya'o/ /yang kha cig na re/ rtsa she'i TIka chen las/ rnga bo che las de ltar lung bstan pa de lho phyogs su 'byung ba'i tha ma gcig yin par gsungs pas/ lo bzhi @026b brgyan byon pa ni lho phyogs su 'byung ba'i tshul gnyis pa'o/ /zhes gsungs pa'i tha ma de lho phyogs su lan gsum 'byung ba'i tha ma la byed pa mi 'thad par thal/ bzang skyod dang phug sbas la sogs pa lho phyogs kyi byang sems lnga brgya'i tha mal byed pa'i phyir dang/ lo brgyad cu pa zhes pa yang/ theg chen gyi chos nub nas lo brgyad cu lon pa'i don yin pa'i phyir te/ mdo de nyid las/ dam pa'i chos nub nas lo brgyad cu lon pa dang/ lo brgyad cu pa nyid la/ lho phyogs kyi byang chub sems dpa' bzang skyong dang/ phug sbas la sogs te byang chub sems dpa' lnga brgya po gang yin pa de dag thams cad kyi tha ma shos des 'byin par 'gyur ba yin pas re zhig de tshol cig/ gsol ba/ lags so/ btsal lags te/ li tsa byi gzhon nu 'jig rten thams cad kyis mthong na dga' ba 'di nyid lags so/ /zhes gsungs pa'i phyir zer na dpyad par bya'o/ /gnyis pa ni/ so so skye bo'i dus na'ang stong pa nyid thos nas/ zhes pa nas/ de la dam pa'i don gyi bden pa bstan par bya/ /zhes tshigs bcad gcig dang rkang pa gsum byung/ so so skye bo las dang po ba'i dus na'ang stong pa nyid kyi gtam phyin ci ma log pa thos pa na/ de thos pa nas nang du gtam de la rab tu dga' ba yang dang yang du 'byung ba dang/ rab tu dga' ba de las byung ba'i mchi mas mig brlan pa dang lus kyi ba spu ldang ba skye bar 'gyur ba gang yin pa de la/ rdzogs pa'i sangs rgyas kyi blo rnam par mi rtog pa'i ye shes kyi sa bon stong nyid rtogs pa'i sa bon zhes pa yod la/ de kho na nyid slob dpon mkhas pas nye bar bstan pa'i snod ni gang zag de yin te/ gang zag @027a @#/ /de la 'chad par 'gyur ba'i mtshan nyid can gyi dam pa'i don gyi bden pa bstan par bya'o/ /gsum pa ni/ de la de yi rjes su 'gro ba'i yon tan 'byung/ zhes pa nas/ rdzogs pa'i byang chub sems dpa' rnams la gus par byed/ /ces tshigs bcad phyed dang gnyis byung/ sngar bshad pa'i nyan pa bo de la stod nyid bstan pa skyon du mi 'gyur bar ma zad/ stong nyid kyi lta ba nyan pa de'i rjes su 'gro ba ste 'bras bu'i yon tan rnams kyang 'byung ngo/ / 'byung tshul ji ltar zhe na snod ldan de stong nyid kyi lta ba nyan pa la gter rnyed ba dang 'dra bar sems shing/ lta ba de skye ba gzhan du yang mi nyams par bya ba'i phyir rtag tu tshul khrims yang dag par blangs nas gnas par 'gyur te/ ngan 'gror lhung na lta ba rgyun chad par 'gyur snyam pa'o/ /tshul khrims 'chal ba la ni sngon du tshul khrims blangs pa mi dgos kyi/ rang bzhin gyi kha na ma tho ba rnams kyang tshul 'chal yin pas so/ /bde 'gror skyes kyang yo byad kyis phongs na/ de 'tshol ba lhur len nas lta ba de nyan pa sogs rgyun chad par 'gyur snyam nas sbyin pa gtong bar 'gyur zhing/ lta ba de snying rje chen pos zin na sangs rgyas nyid 'dren par byed kyi gzhan du min no snyam nas rtsa ba snying rje chen po la goms pa sten par byed do; ;khro bas ni ngan song du 'gro ba dang dge ba 'joms la/ mdog shin tu mi sdug pa 'thob par byed pas/ de'i rkyen kyis 'phags pa rnams mnyes par mi 'gyur ro snyam nas bzod pa sgom par byed do/ /rdzogs byang du yang yang ma @027b bsngos pa'i tshul khrims la sogs pa ni sangs rgyas kyi rgyur mi 'gyur zhing/ lus la sogs pa phun sum tshogs pa rgyun mi chad par 'byung bar mi 'gyur bas/ tshul khrims la sogs pa de'i dge ba yang 'gro ba 'khor ba las sgrol bar bya ba'i phyir du byang chub tu yongs su bsngo bar byed do/ /nyan rang sogs kyis rten 'brel zab mo byang sems bzhin du ston mi nus par mthong nas/ rdzogs pa'i byang chub sems dpa' rnams la shin tu gus par byed do/ /bzhi pa ni/ zab cing rgya che'i tshul la mkhas pa'i skye bos ni/ zhes sogs rkang pa gsum byung/ zab pa dang rgya che ba'i tshul la mkhas pa'i skye bos ni/ yun ring du bar ma chad par zab rgyas kyi dge tshogs nges par bsags nas rim gyis rab tu dga' ba'i sa thob par 'gyur bas/ sa rab dga' de ni don du gnyer bas 'chad par 'gyur ba'i zab mo'i lam 'di mnyan par gyis shig ces nyan par bskul ba'o/ /lnga pa la gsum/ yang dag pa'i don lung gis bstan pa'i tshul/ lung gi don de rigs pas bsgrub pa/ des grub pa'i stong nyid kyi rab dbye bshad pa'o/ /dang po la gnyis/ lung las gsungs pa'i tshul dgod pa dang/ de kho na nyid shes pa'i mi mthun phyogs ngos gzung ba'o/ /dang po ni/ sa bcu pa'i mdo las/ sa lnga pa ba des drug pa la 'jug pa na/ chos mnyam pa nyid bcus 'jug go /zhes sogs 'jug 'grel du drangs pa de yin no/ /mnyam nyid bcu'i ngos 'dzin la/ sa bcu pa'i mdo 'grel dang/ byang sa dang/ lugs 'dis @028a @#/ /ji ltar bshad tshul gsum las/ dang po gnyis ni yig cha rgyas par blta bar bya'o/ /gsum pa ltar na/ chos thams cad mtshan ma med par mnyam pa nyid ni/ chos gang yin kyang rung mtshan ma mi 'dra bar snang ba rnams 'phags pa'i mnyam gzhag gi ngor med pa'o/ /chos thams cad mtshan nyid med par mnyam pa nyid ni/ chos gang yin kyang rung rang gi mtshan nyid kyis grub pa med pa'o/ de gnyis ni spyir bstan pa dang/ gzhan brgyad ni spyir bstan pa'i don de nyid khyad par du phye nas bstan pa'o/ /chos thams cad skye ba med par mnyam pa nyid ni/ chos gang yin yang rung ma 'ongs pa rang gi mtshan nyid kyis skye ba med pa'o/ /chos thams cad ma skyes par mnyam pa nyid ni/ chos gang yin yang 'das pa dang da ltar ba rang mtshan kyis ma skyes pa'o/ /chos thams cad dben par mnyam pa nyid ni/ chos gang yang rang mtshan gyis skye 'gyur dang skyes pas dben pa'o/ /chos thams cad gdod ma nas dag par mnyam pa nyid ni/ chos gang yang gdod ma nas rang mtshan gyis rnam par dag pa'o/ /chos thams cad spros pa med par mnyam pa nyid ni/ chos gang yang 'phags pa'i mnyam gzhag gi ngor gnyis snang gi spros pa med pa'am/ don dam par sgra rtog gis spro bar mi nus pa'o/ chos thams cad blang dor med par mnyam pa nyid ni/ chos gang yang 'phags pa'i mnyam gzhag gi ngor blang dor med pa'am/ don dam par blang dor med pa'o/ /chos thams cad dpe bdun ltar mnyam pa nyid ni/ chos gang yang sgyu ma la sogs pa'i @028b dpe bdun lta bur rang bzhin gyis med pa'o/ /chos thams cad dngos po dang dngos med gnyis su med par mnyam pa nyid ni/ chos gang la yang dngos po dang dngos med rang bzhin gyis grub pa med pa'o/ /gnyis pa ni/ chos rnams bden med du gtan la 'bebs pa 'di la/ bden par grub tshul dang/ bden par 'dzin tshul shes dgos te/ bden grub kyi spyi blo la ma shar na bden med rtogs mi nus pa'i phyir/ des na de 'chad pa la gnyis/ rang rgyud pa'i lugs kyi bden 'dzin ngos gzung ba dang/ thal 'gyur ba'i lugs kyi bden 'dzin ngos gzung ba'o/ /dang po ni/ rang rgyud pa'i gzhung khungs thub gzhan las dgag bya ngos 'dzin gsal bar mi 'byung la/ dbu ma snang ba las/ de dag gi bsam pa'i dbang gis dngos po brdzun pa'i ngo bo thams cad ni kun rdzob tu yod pa kho na'o zhes bya'o/ /zhes blo'i dbang gis bzhag pa'i yod pa de kun rdzob tu yod pa'i don du gsungs pas/ de'i bzlog phyogs kyi yod pa ni don dam par yod par shes dgos la/ de ltar na blo'i dbang gis bzhag pa min par don gyi sdod lugs su yod ba ni/ don dam par ram bden par yod pa dang/ de ltar 'dzin pa ni bden par 'dzin tshul yin no/ /'di la kha cig na re/ don dam par yod tshul de ltar bshad pa mi 'thad par thal/ snang ba las/ don dam par skye ba med do zhes bya ba ni/ 'di dag yang dag pa'i shes pas skye bar ma grub po zhes bshad par 'gyur ro/ /zhes de kho na nyid la dpyod pa'i rigs shes kyis skye bar ma grub pa de/ @029a @#/ /don dam par skye ba med pa'i don du gsungs pa'i shugs kyis/ de 'dra ba'i rigs shes kyis skye bar grub pa ni don dam par skye tshul dang/ de 'dra pa'i rigs shes kyis yod par grub pa ni don dam par yod tshul du bshad pa'i phyir na ma khyab ste /dgag bya la don dam gyi khyad par sbyar ba'i don dam la gnyis bshad pa'i phyir te/ thos bsam bsgom gsum gyi rigs shes rtog bcas la don dam du byas nas/ de'i dpyang tshul ltar du grub ma grub la don dam par yod med du bzhag pa dang/ blo'i dbang gis bzhag pa min par don gyi sdod lugs su yod med la don dam par yod med du bzhag pa gnyis yod pa'i phyir/ dang po'i don dam pa dang de'i ngor grub pa yang yod la/ phyi ma'i don dam dang der yod pa gnyis ka mi srid do/ phyi ma'i don dam du yod pa la snga ma'i don dam du yod pas khyab kyang/ snga ma'i yod 'dzin ni lhan skyes kyi bden 'dzin min pas/ dgag bya ngos 'dzin pa'i skabs 'dir phyi ma'i yod 'dzin shes pa gnad che'o/ /de'i phyir snga ma'i yod 'dzin ngos bzung bas lhan skyes kyi bden 'dzin ngos bzung pa'i go mi chod pas/ dbu ma snang ba ma gtogs pa'i rang rgyud pa'i gzhung khungs thub gzhan las dgag bya ngos 'dzin gsal bar mi 'byung bar rnam bshad las gsungs kyi/ snga ma'i yod 'dzin ni rtog ge 'bar ba sogs gzhung du mar bshad do/ /'jog tshul dang po'i don dam par yod med ni sngar bshad pa ltar yin gyi/ rigs shes kyi ngor yod med kyis don dam par yod med du 'jog pa gtan ma yin te/ @029b gzhan du na/ stong nyid don dam par yod par thal bar 'gyur ba'i phyir ro/ /'di skor rgyas par grub mtha' chen mo'i mchan dang phar phyin spyi don gyi zur mchan kho bos bris pa las shes par bya'o/ /blo'i dbang gis bzhag pa dang ma bzhag par 'dzin tshul ji ltar yin zhe na/ dper na sgyu ma mkhan gyis rde shing sogs rta glang du sprul pa na/ mig bslad pa'i ltad mo ba la ni sprul gzhi rta glang du snang ba de nang gi blo'i dbang gis bzhag par mi 'char gyi/ gzhi der rta glang mtshan nyid pa yod par 'dzin no/ /sgyu ma mkhan ltar na rta glang du snang ba de blo 'khrul ba la de ltar snang ba'i dbang gis 'jog gi /de ltar ma yin par sprul gzhi rang gi sdod lugs kyi dbang gis 'jog pa min no/ /de bzhin du sems can rnams kyis chos rnams bden par yod par snang ba na/ blo la snang ba'i dbang gis bzhag pa min par chos de rnams kyi sdod lugs zhig yod par 'dzin pa ni/ blo lhan skyes kyis bden par 'dzin tshul lo/ /nam zhig bden grub rigs pas khegs pa na sgyu ma mkhan bzhin du chos rnams blo'i dbang gis bzhag pa'i yod pa tsam du shes par 'gyur ro/ /'di la kha cig na re/ rang rgyud pa'i lugs la/ chos rnams blo'i dbang gis bzhag tsam yin par thal/ blo'i dbang gis bzhag pa yin pa'i phyir na ma khyab/ 'dod mi nus te/ rang ngos nas grub pa'i phyir/ byas pa la kho na re/ chos rnams blo'i dbang gis bzhag tsam yin par thal/ de rnams blo gnod med la snang ba'i dbang gis bzhag tsam yin par yig char bshad @030a @#/ /pa'i phyir na ma khyab ste/ der de ltar bshad kyang/ rtsa 'jug gi rnam bshad dang legs bshad snying po sogs rje'i legs bshad rnams su rang rgyud pa'i skabs su tsam sgra ma sbyar zhing/ thal 'gyur ba'i skabs su tsam sgra sbyar ba la rgyu mtshan yang dag cig yod pa'i phyir/ yang kha cig na re/ thal rang gnyis kyis tha snyad du yod par 'dod tshul la phra rags med par thal/ de gnyis kas chos rnams blo'i dbang gis bzhag pa'i yod par 'dod pa'i phyir na ma khyab ste/ de gnyis kas chos rnams blo'i dbang gis bzhag par 'dod pa mthun kyang/ bzhag tsam yin min la khyad par yod la/ blo'i dbang gis bzhag ces pa'i blo la yang khyad par che ba'i phyir/ phyi ma grub ste// thal 'gyur bas chos rnams ming gi tha snyad kyi dbang gis bzhag tsam du bzhed la/ rang rgyud pas/ tha snyad 'dogs pa'i blo'i dbang gis chos rnams 'jog mi nus shing/ snang zhen gyi yul gyi rang mtshan snang ba la ltos te tshad ma gzhan gyis gnod pa med pa'i blo la snang ba'i dbang gis bzhag par 'dod pa'i phyir ro/ /yang kho na re/ thal rang gnyis kyis chos rnams don dam par med par 'dod tshul la phra rags kyi khyad par med par thal/ de gnyis kas chos gang yin kyang de kho na nyid la dpyod pa'i rigs shes kyis dpyad bzod du ma grub par 'dod pa mthun pa'i phyir na ma khyab ste/ de tsam mthun kyang de kho na nyid la dpyod par song ma song gi mtshams mi 'dra ba'i phyir te/ thal 'gyur bas/ chos @030b rnams la de dang de'o zhes tha snyad btags pa tsam gyis ma tshim par rang rang gi tha snyad btags pa'i gdags gzhi de ji ltar yin dpyad na de kho na nyid la dpyod par 'gro bar bzhed la/ rang rgyud pas/ dpyad lugs de tsam gyis de kho na nyid la dpyod par 'gro bar mi 'dod kyi/ sngar bshad pa ltar gyi gnod pa med pa'i blo'i dbang gis bzhag pa min par yul rang gi gnas lugs kyi dbang gis yod med sogs dpyod pa nas de kho nar grub ma grub dpyod par 'gro bar 'dod pa'i phyir ro/ yang kha cig na re/ dngos smra bas kyang gzugs sogs chos rnams blo'i dbang gis bzhag par khas len par thal/ de dag gis tshad ma'i dbang gis gzhal bya 'jog par 'dod pa'i phyir na ma khyab ste/ tshad ma'i dbang gis gzhal bya 'jog ces pa ni/ gzhal bya'i sdod lugs tshad mas sgrub dgos pas/ tshad ma med par gzhal bya yod par 'jog mi rung ba'i don yin gyi/ sgyu ma'i rta de blo 'khrul ba'i dbang gis bzhag pa ltar/ gzugs sogs chos rnams blo la snang ba'i dbang gis bzhag par dngos smra bas mi 'dod pa'i phyir ro/ gnyis pa ni/ blo lhan skyes gyis chos rnams bden par 'dzin tshul yod de/ phyi nang gi chos rnams rtog pas btags pa tsam ma yin par rang gi ngo bo'i sgo nas yod par 'dzin pa de yin pa'i phyir/ chos rnams rtog pas btags pa tsam yin tshul ni/ dper na thag khra sbrul du 'dzin pa'i tshe/ thag pa'i ngos nas sprul gyi mtshan gzhir 'jog rgyu cung zad kyang med pas/ de'i sbrul ni rtog pas btags pa tsam yin pa bzhin du/ phung po la brten nas nga'o snyam du @031a @#/ /'dzin pa'i tshe/ phung po'i steng nas snga phyi'i rgyun gyi tshogs pa dang/ dus gcig pa'i tshogs pa dang/ de'i cha shas gang yang nga'i mtshan gzhir 'jog tu mi rung bas/ de'i nga ni rtog pas btags pa tsam yin no/ /gang zag rtog pas btags tsam yin tshul de ltar shes na/ chos gzhan rnams kyang de dang 'dra ste/ mdo las/ ji ltar khyod kyis bdag gi 'du shes ni/ /shes pa de bzhin kun la blos sbyar bya/ /zhes gsungs so/ ming gi tha snyad kyi dbang tsam gyis bzhag pa min pa'i yod par 'dzin pa ni/ bden par dang don dam par dang yang dag par grub pa dang/ rang gi ngo bos dang rang gi mtshan nyid kyis dang rang bzhin gyis yod par 'dzin pa yin la/ des bzung ba'i zhen yul ni brtag pa mtha' bzung gi bden tshad do/ /rang rgud pas bden pa sogs gsum du grub ba med kyang/ gzhan rnams tha snyad du yod par bzhed do/ /de rnams la dgag bya'i bdag ces bya la/ de nyid gang zag gi steng du med pa ni gang zag gi bdag med dang/ chos gzhan gyi steng du med pa ni chos kyi bdag med du gsungs pas/ bdag med gnyis stong gzhi dang bdag 'dzin gnyis dmigs yul gyis 'byed dgos kyi/ dgag bya dang 'dzin tshul gyi sgo nas mi 'byed do/ /byas pa la kha cig na re/ gang zag gi bdag 'dzin lhan skyes kyi dmigs rnam gnyis su phye ba'i dmigs pa'i yul yin na gang zag yin pas ma khyab par thal/ mig rna sogs la dmigs nas @031b nga yi bar 'dzin pa'i 'jig lta lhan skyes yod pa'i phyir te/ nga yir 'dzin pa'i 'jig lta lhan skyes yod pa'i phyir nam khyab ste/ nga yir 'dzin pa'i 'jig lta lhan skyes kyi dmigs pa ni nga yi ba nyid yin gyi rang gi mig sogs dmigs par mi bzung ngo/ zhes rnam bshad las gsungs pa'i phyir dang/ rtsa she'i TIka chen las kyang/ nga yi ba la dmigs nas rnam pa rang gi mtshan nyid kyis grub par 'dzin pa ni/ nga yir 'dzin pa'i 'jig lta lhan skyes dang gang zag gi bdag gi ba la rmongs ba'i ma rig pa gnyis ga'o/ nga yi ba'i gzhi mig rna sogs la dmigs nas de ltar 'dzin pa ni chos kyi bdag 'dzin yin pas/ nga yi ba la dmigs zhes pa ni de dag la dmigs pa min no/ /zhes gsungs pa'i phyir ro/ /rje'i gsung 'di la rjes 'jug rnams kyis sna tshogs bshad par snang ste/ stong thun las/ rang rgyud kyis bsdus pa'i mig rna sogs ning yi ba'i mtshan gzhi dang gang zag dang chos gnyis su phye ba'i ya gyal gyi chos kyi mtshan gzhi gnyis ka yin la/ de dag blo lhan skyes la yul gyi rang ngos nas grub pa'i nga yi par snang zhing/ de 'dra ba'i nga yi ba la dmigs nas rang gi mtshan nyid kyis grub par zhen pa ni nga yi bar 'dzin ba lhan skyes yin la/ zhes gsungs pa ltar na/ mig rna sogs nga yi ba yin kyang gang zag min la/ mig rna sogs nga yi bar snang ba'i nga yi ba ni nga yi ba dang gang zag gnyis ka yin zhes pa lta bur snang ngo/ /rnam bshad las/ bdag gi 'di zhes zhes pa'i rang 'grel las/ 'di ni bdag@032a @#/ /gi'o snyam du ngar 'dzin ba'i yul las gzhan pa'i dngos po'i rnam pa ma lus pa la mngon par zhen pa yin no/ /zhes mig la sogs pa'i gzhi la dmigs nas 'di ni bdag gi yin no snyam du zhen pa bdag gir 'dzin par bshad pa ji ltar yin snyam na/ de ni mig sogs rnams bdag gi bar mthong nas bdag gi ba la bden par mngon par zhen pa'i don yin gyi/ bdag gi ba'i mtshan gzhi mig sogs dmigs par ston pa min te/ zhes dang/ nga yir 'dzin pa'i 'jig ltas/ ngar 'dzin gyi dmigs yul las gzhan pa ste de min pa'i gzugs dang mig la sogs pa'i dngos po la 'di ni bdag gi'o zhes bdag gi ba la bden par chags pa bskyed pas/ zhes gsungs te; stong thun gyi lung de 'di la brten par snang ngo/ /dbu ma'i yig char/ mig rna sogs nga yi ba'i gdags gzhi yin gyi nga yi ba min la/ nga yi ba yin na gang zag yin pas khyab ste/ mig rna sogs ni nga'i yin rgyu'i gzhi dang/ mig rna sogs bdag de'i yin bal brten nas bdag gi ba'am/ bdag gi can zhes gang zag la byed pa'i phyir/ dber na nor can la nor ba dang rta can la rta ba zhes pa bzhin no gsungs/ bshad tshul 'di ni dpyad gzhi shin tu che ste/ mig rna sogs nga yi ba'i mtshan gzhir rnam bshad dang stong thun gnyis kar gsungs pa sngar drangs pa de'i phyir dang/ 'phags pa yab sras dang rje bdag nyid chen po'i gsung rab rnams su gzugs sogs dang mig rna sogs nga yi @032b bar bshad pa shin tu mang po yod pa'i phyir ro/ /shes byed rnams mangs dogs nas ma bris te/ kho bos bris pa'i grub mtha' chen mo'i mchan du blta bar bya'o/ /paN chen bsod grags kyis/ nga yi ba gang zag min la/ chos dang gang zag gnyis su phye ba'i chos kyang ma yin zhing/ nga yir 'dzin pa'i 'jig ltas nga dang nga yi ba gnyis ka la dmigs pa yin kyang mig rna sogs la dmigs pa min par bshad do/ /blun po kho bo'i blor shar tshod ltar na/ pha rol tu phyin pa'i don la/ pha rol der phyin pa zhes las la sbyar ba dang/ 'dis pha rol tu phyin par byed pa zhes byed pa la sbyar ba gnyis yod pa ltar bdag gi ba zhes pa yang/ bdag gir byed pa po zhes byed pa la sbyar ba dang/ bdag gir bya ba'i yul zhes las la sbyar ba gnyis ka 'thad pas/ skabs 'di'i 'jig lta'i dmigs yul du gyur pa'i bdag gi ba ni bdag gir byed pa po la bdag gi ba zhes pa yin gyi/ mig rna sogs bdag gi ba min zhes pa dang/ bdag gi pa yin na gang zag yin bas khyab par bshad ba min no/ /mngon pa ba'i lugs la/ bdag gi ba rnams gang zag rdzas yod de'i dbang bsgyur byar 'dzin pa ni/ bdag gir 'dzin pa'i 'jig lta yin par rnam bshad las gsungs pa ltar; lugs 'dir yang mig rna sogs bdag gi ba rnams rang gi ngo bos grub pa'i gang zag de'i dbang bsgyur byar 'dzin pa ni/ nga yir 'dzin pa'i 'jig lta yin par 'dod dgos te/ rnam bshad kyi lung sngar drangs pa dang/ rtsa she'i @033a @#/ /TIka chen las kyang/ ngo bos yod pa'i ngas nam myang 'das 'thob snyam pa dang/ de 'dra ba'i nga de'i bdag gi bar myang 'das nam zhig na 'gyur snyam du 'dzin na de 'jig lta yin pas/ de nyid kyis myang 'das 'thob pa la gegs byed par gsungs te/ zhes gsungs pa'i phyir/ khyab ste/ ngo bos yod pa'i nga de'i bdag gi bar myang 'das nam zhig na 'gyur snyam du 'dzin pa de 'jig lta yin na/ mig rna 'di ngo bos yod pa'i nga de'i dbang bsgyur byar 'dzin pa de 'jig lta yin par shin tu mtshungs pa'i phyir ro/ /des na mig rna sogs gang zag gi bdag de'i dbang bsgyur byar 'dzin pa de/ dgag bya phra rags kyi khyad par ma gtogs pa nga yir 'dzin pa'i 'jig lta yin par 'jog pa la gong 'og mthun kyang/ mi mthun pa'i cha 'di tsam zhig yod de/ mngon pa bas/ 'jig lta de'i dmigs pa la mig rna sogs 'jog pas/ zag bcas mtshan nyid pa yin na 'jig lta'i dmigs yul yin pas khyab bar 'dod la/ lugs 'dis 'jig lta de'i dmigs pa la byed pa po'i gang zag 'jog gi /las su bya ba phung po dang mig rna sogs mi 'jog pas/ 'jig lta lhan skyes kyi dmigs yul yin na gang zag yin pas khyab par bzhed do/ /byas pa la kha cig na re/ bshad tshul 'di mi 'thad bar thal/ nga yir 'dzin pa'i 'jig lta'i dmigs yul la phung po rnams 'jog pa'i phyir te/ rtsa she las/ bdag dang bdag gi zhi ba'i @033b phyir; ;ngar 'dzin nga yir 'dzin med 'gyur/ /zhes pa'i TIka chen las/ de ltar nga dang nga yi ba rang gi ngo bos ma grub par gtan la phab pa'i lta ba rnyed pa de nyid rgyun ldan du bsgoms pa la brten nas/ bdag ste ngar 'dzin pa'i yul gang zag dang/ bdag gi ba steng yir 'dzin pa'i yul phung po rnams kyi mtshan ma zhi ba ste/ zhes gsungs pa'i phyir na ma khyab ste/ de dag 'jig ltas nga yir 'dzin pa'i yul yin kyang/ dmigs yul ma yin par khas blang chog pa'i phyir/ 'on kyang 'di ni dka' gnas yin pas thag gcod mi snga bar dpyod cig /yang kha cig /'jig lta'i dmigs yul yin na gang zag yin pas ma khyab ste/ dka' gnad brgyad kyi zin bris las/ 'jig lta dang gang zag gi bdag 'dzin yin min la mu bzhi phye nas/ 'jig lta yin la gang zag gi bdag 'dzin ma yin pa'i mu de la nga yir 'dzin pa'i 'jig lta bzhag pa'i phyir na ma khyab ste/ rje bdag nyid chen pos ljags bshad stsal pa'i tshe de ltar bshad pa yang yod dam snyam yang phyi rtsom phal cher mthun pa rang yir 'dzin pa'i 'jig lta gang zag gi bdag 'dzin yin par gsungs pa'i phyir ro/ /'jig lta'i dmigs yul la grub mtha' gong 'og mi mthun pa ni/ chos thams cad bdag med pa'o/ /zhes pa'i bdag med kyi ngos 'dzin la mi mthun pa'i gnad kyis yin nam snyam ste/ 'og nas cung zad 'chad par 'gyur ro// //gnyis pa la gnyis/ chos kyi bdag med rigs pas bsgrub pa @034a @#/ /dang; gang zag gi bdag med rigs pas bsgrub pa'o/ /dang po la bzhi/ mtha' bzhi'i skye ba bden pa gnyis kar dgag pa/ de ltar bgag pa la rtsod pa spang ba/ rten 'byung gi skye ba nyid kyis mthar 'dzin gyi log rtog 'gog tshul/ rigs pas dpyad pa byas pa'i 'bras bu ngos gzung ba'o/ /dang po la gsum/ rang bzhin gyis skye ba med pa'i dam bca' gzhag ba/ de rigs pas sgrub pa'i sgrub byed bstan pa/ mtha' bzhi'i skye ba bkag pas grub pa'i don no/ /dang po ni/ skye ba med par mnyam pa nyid rigs pas bstan pa nyid kyis mnyam nyid gzhan rnams bstan pa sla bar dgongs te/ dbu ma'i bstan bcos kyi dang por/ bdag las ma yin gzhan las min/ /gnyis las ma yin rgyu med min/ /dngos po gang ngag gang na yang/ /skye ba nam yang yod ma yin/ /zhes nye bar bkod do/ /rkang pa dang po gnyis kyis bdag las ma yin zhes sogs gsungs pa la/ ci zhig ma yin zhes dris pa'i lan du/ skye ba nam yang yod ma yin zhes sbyor ro/ /phyi nang gi dngos po gang dag yul dus grub mtha' gang na yang bdag dang gzhan dang gnyis ka dang rgyu med las skye ba nam yang yod pa ma yin no zhes pa'o/ / skye ba nam yang yod ma yin zhes pas rang bzhin gyis skye ba med pa don gyis bstan pa yin gyi/ dngos su bstan pa min te/ 'jug 'grel las/ 'dir ma yin zhes bya ba 'di yod pa nyid kyi sgrub byed rang las skye ba dang 'brel gyi/ yod @034b pa dang ni ma yin te/ de dgag pa don gyis 'grub pa'i phyir ro/ /zhes gsungs pa'i phyir/ skye ba la rgyu yod med gnyis su kha tshon chod cing/ rgyu yod la rgyu 'bras gnyis rang bzhin gcig dang tha dad re re ba gnyis dang/ gnyis ka tshogs pa gsum du kha tshon chod pas rang bzhin gyis skye ba 'gog pa'i dam bca' yang bzhis chog par gsungs so/ /de ltar 'phags pa'i dam bca' bzhi 'dir bkod pa ni/ de nyid de las 'byung min gzhan dag las ltag la zhig /gnyis ka las kyang ma yin rgyu med par ni ga la yod/ /ces gsungs te/ 'bras bu de nyid de'i ngo bo nyid las 'byung ba min pa dang/ rgyu gzhan dag las 'byung ba gal zhig ste de med pa dang/ rang gzhan gnyis ka las kyang 'byung ba ma yin pa dang; rgyu med par 'byung ba ga la yod de med do/ /gnyis pa la bzhi/ bdag skye dgag pa/ gzhan skye dgag pa/ gnyis ka las skye ba dgag pa/ rgyu med par skye ba dgag pa'o/ /dang po la gnyis/ 'grel pa mdzad pa'i rigs pas dgag pa/ rtsa she'i rigs bas dgag pa'o/ /dang po la gsum/ grub mtha' mkhan gyi lugs dgag pa/ grub mthas blo ma bsgyur pa'i tha snyad du yang med par bstan pa/ de ltar bkag pa rnams kyi don bsdu ba'o/ /dang po la gnyis/ rang dang ngo bo gcig pa'i rgyu las skye ba dgag pa/ rgyu dang 'bras bu gnyis ngo bo gcig pa dgag pa'o/ /dang po ni/ de ni de las 'byung na yon tan 'ga' yang yod ma yin/ zhes pa nas/ ji ltar de nyid kyis de rnam par 'jig par byed par @035a @#/ /'gyur; ;zhes tshigs bcad phyed dang gnyis byung/ 'di la gsum las/ ngo bo gcig pa'i rgyu las skye ni don med du thal ba ni/ skye bzhin pa skye ba'i bya ba'i byed pa po myu gu de ni/ de'i rang gi ngo bo las 'byung na/ de ltar 'byung ba la 'byung dgos pa'i yon tan lhag po 'ga' yang yod pa ma yin te/ myu gu'i rang gi ngo bo yod pa nyid sngar rgyu'i dus na thob zin pa'i phyir ro/ 'di la grangs can pa rnams rgyu rkyen dang rgyu 'bras sogs rnam 'gyur thams cad la rang bzhin gcig pa'i gtso bo gcig rjes su 'gro ba med na rgyu rkyen so so ba rnams la 'bras bu thun mong pa gcig mi srid par 'gyur /rgyu nas kyi rang bzhin dang/ rkyen chu lud kyi rang bzhin dang/ de bzhin du myu gu'i rang bzhin dang/ de'i rgyu rkyen gyi rang bzhin rnams par yin tshur yin du 'dod do/ /de'i phyir myu gu myu gu las skye bar mi 'dod kyang/ myu gu de sa bon gyi rang bzhin las skye ba'i phyir/ rang gi rang bzhin las kyang skye ste/ sa myug gnyis rang bzhin gcig pas so/ /des na 'bras bu rnams rang rang gi rang bzhin las skye ba dang rang gi rgyu'i dus na mi gsal bar yod pa gsal bar skye ba ni bdag skye'i 'dod tshul lo/ /grangs can pa kha cig skye bar mi smra bar gsal bar 'dod mod kyang/ don 'dra'o/ /'dis spyi gsal ngo bo gcig tu 'dod pa yang de ltar yin gyi/ sangs rgyas bas sbyi dang bye brag ngo bo gcig tu 'dod pa dang gtan mi 'dra'o/ /sa bon gyi dus su myu gu'i ngo bo yod na/ myu gu'i ngo bo las @035b don gzhan pa'i myu gu'i gsal ba mi srid pas sa bon gyi dus su myu gu'i rang bzhin yod par ma zad; myu gu yang yod dgos pas/ de'i tshe de grub pa'i 'og du slar yang skye ba la don nam dgos pa gtan med do/ /gal te gsal ba'i phyogs 'dzin na'ang/ gsal ba rgyu'i dus su yod na khas blangs dang 'gal la/ med na spyi gsal rang bzhin gcig tha dad dpyad la dgag go /ngo bo gcig pa las skye na rigs pa dang 'gal ba ni/ skyes zin par gyur pa slar yang ldabs nas skye bar rigs pa ma yin pa nyid do/ /'ang gi sgras ni don med du 'gyur bar ma zad pa'o/ /skyes zin slar yang skye bar yongs su rtogs par 'gyur ba ste 'dod na ni/ myu gu la sogs pa rnams kyi skye ba 'jig rten 'dir rnyed par mi 'gyur zhing; sa bon de nyid bar ma chad par srid mthar thug pa'i bar du rab tu skye ba nyid du 'gyur ro/ /de ni myu gu sogs 'bras bu'i rigs 'dra rnams gtan nas mi skye ba dang/ sa bon sogs rgyu'i rigs 'dra rnams bar ma chad par skye bar thal skyes zin pa de nyid slar yang skye dgos pa'i phyir zhes pa'o/ /de dag gi nyes spong gi lan dgag pa ni/ ci ste myu gu skye ba la phan 'dogs pa'i rkyen drod gsher sogs kyis/ sa bon spang ngo lta bur rnam par 'gyur bar byed cing/ myu gu skyed par byed la/ myu gu yang rang skyed pa po sa bon dang lhan cig tu gnas pa 'gal ba'i phyir/ sa bon 'gag par byed cing 'byung bas/ sngar bshad pa'i skyon gnyis mi 'jug la/ sa myug rang bzhin gcig yin pas bdag las mi skye ba yang min @036a @#/ /no snyam na/ 'di yang mi rung ste/ gang gi phyir ga gi rang bzhin gcig yin pas/ ji ltar na myu gu de nyid kyis sa bon rnam par 'jig par byed par 'gyur te mi 'gyur te/ myu gus myu gu 'jig par mi byed pa bzhin no snyam du bsams so/ /'di la pha rol pos myu gus sa bon 'jig pa ni rnam 'gyur gyi steng nas yin pas/ rang gis rang 'jig pa dang gan 'dra snyam mod kyang/ rang bzhin thams cad phar yin tshur yin du song na rnam 'gyur so so ba yang mi 'grub pas gnod pa spang mi nus so/ /gnyis pa ni/ byed rgyu sa bon gyi las tha dad myu gu'i dbyibs dang ni/ zhes pa nas/ de yang gzung du yod 'gyur de phyir 'di ni khas mi blang/ /zhes tshigs bcad gnyis byung/ 'di la gsum las/ sa myug gnyis la dbyibs sogs tha dad med par thal bas dgag pa ni/ myu gu chos can/ rang skyed par byed pa'i sa bon gyi dbyibs dang kha dog sogs las tha dad pa'i ring thung sogs kyi dbyibs dang/ sngo ser sogs kyi kha dog dang/ mngar skyur sogs kyi ro dang/ nad sel ba sogs kyi nus mthu dang/ rkyen mi 'dra ba las rdzas kyi khyad par 'gyur ba'i rnam par smin pa tha dad pa khyod la med par thal bar 'gyur te/ sa myug gnyis kyi rang bzhin rnam pa thams cad du khyad par med pa'i phyir/ sa myug gnyis kyi rang bzhin rnam pa thams cad du khyad par med pa ma yin te/ rang bzhin rnam pa thams cad du khyad par med na de gnyis la dbyibs dang kha dog dang ro dang nus @036b mthu sogs khyad par med par 'gyur dgos pa la de ltar ma yin pa'i phyir zhes bzlog pa 'phen par mdzad do/ /de'i nyes spong gi lan dgag pa ni/ ci ste sa bon gyi gnas skabs btang nas myu gu'i gnas skabs gzhan du 'gyur bas/ sa myug gnyis gnas skabs tha dad pa tsam yin pa'i phyir sa bon de nyid myu gur 'gyur ba yin no zhe na/ gal te sngar gyi sa bon gyi bdag gi dngos po'i gnas skabs bsal nas de las gzhan myu gu'i gnas skabs kyi ngo bor 'gyur na/ de ltar 'dod pa de'i tshe sa bon de'i rang bzhin nyid myu gu'i rang bzhin de nyid yin zhes ji ltar rigs par 'gyur te/ de'i gnas skabs kyi dngos po de nyid de'i dngos po nyid yin pa'i phyir dang/ de'i ngo bo las don gzhan pa'i de'i dngos po med pa'i phyir ro/ /gnas skabs gnyis kyi re rer gnyis ka 'dzin mi 'dzin mtshungs par thal bas dgag pa ni/ gal te khyod kyi ltar sa bon dang myu gu'i ngo bo gnyis la 'jig rten 'dir ngo bo gzhan pa yod pa ma yin na/ ji ltar myu gu'i gnas skabs su sa bon gzung du med pa de bzhin du myu gu yang gzung du med par 'gyur ba'am/ yang na ji ltar myu gu'i gnas skabs su myu gu gzung du yod pa de bzhin du sa bon de yang dbang po'i shes pas gzung du yod par 'gyur ba las med pa de'i phyir/ nyes pa de dag spong bar 'dod pas/ sa myug gnyis kyi ngo bo la gzhan med pa 'di ni khas blang bar mi bya'o/ /gnyis pa ni/ gang phyir rgyu zhig na yang de'i 'bras bu mthong ba'i phyir/ de dag gcig pa yin zhes 'jig @037a @#/ /rten gyis kyang khas mi len/ zhes gsungs te/ gang gi phyir rgyu sa bon zhig na'ang sa bon de'i 'bras bu mthong ba'i phyir/ sa myug de dag ngo bo gcig pa yin zhes 'jig rten gyis kyang khas mi len no/ / gsum pa ni/ de phyir dngos po bdag las 'byung zhes rab tu brtags pa 'di/ /de nyid dang ni 'jig rten du yang rigs pa ma yin no/ /zhes gsungs te/ gang gi phyir bden pa gnyis su'ang bdag las skye ba rigs pa dang 'gal ba de'i phyir; phyi nang gi dngos po rnams bdag las 'byung ba yin zhes rab tu brtags pa 'di de nyid de don dam dang 'jig rten gyi kun rdzob tu'ang rigs pa ma yin no/ /gnyis pa ni/ bdag las skye bar 'dod na bskyed par bya dang skyed byed dang/ / zhes pa nas/ bya min rgya cher bshad pa'i nyes par thal bar 'gyur phyir ro/ /zhes tshigs bcad gcig byung/ skyon gzhan yang yod de/ bdag las skye bar 'dod na/ bskyed par bya ba 'bras bu dang/ skyed par byed pa rgyu dang gang zhig bya ba'i las dang/ gang gis byed pa'i byed pa po yang gcig nyid du 'gyur na/ de dag ni gcig ma yin bas na/ bdag las skye bar khas blang bar bya ba ma yin te/ bstan bcos 'di dang rtsa she las rgya cher bshad pa'i nyes par thal bar 'gyur ba'i phyir ro/ /de ltar bkag ba na rgyu dang 'bras bu dang byed pa bo dang las gnyis kyang ngo bo gcig tu thal zer na 'dod la/ spyir gcig tu thal zer nam khyab po zhes smra mod kyang/ sngar bshad pa ltar gyi rang bzhin gcig @037b tu 'dod na/ rnam 'gyur yang gcig tu 'phul nus pa'i rigs pas sbong mi nus par gsungs so/ /skabs 'dir mtha' dpyad pa la gsum/ sangs rgyas bskyangs kyis bdag skye bkag tshul/ de la legs ldan gyis skyon brjod tshul; skyon de sangs rgyas bskyangs la mi 'jug par zla bas bshad tshul lo/ /dang po ni/ sangs rgyas bskyangs kyis/ dngos po rnams bdag gi bdag nyid las skye ba med de/ de dag gi skye ba don med pa nyid du 'gyur ba'i phyir dang/ skye ba thug pa med par 'gyur pa'i phyir/ zhes gsungs so/ /de'i don ni/ dngos po rnams bdag las skye ba med ces dam bca' bzhag nas/ bdag las skye na skyon ci yod ce na/ myu gu la sogs pa'i dngos po rnams chos can/ slar yang skye ba don med par thal/ rang gi bdag nyid thob zin pa'i phyir/ ma khyab na/ de chos can/ nam yang slar mi skye bar mi 'gyur bar thal/ grub zin kyang yang skye dgos pa'i phyir/ zhes pa'i 'gal brjod kyi thal 'gyur gnyis kyis bkag go /de la grangs can kyis/ thal 'gyur snga ma la khyab pa med de/ nus pa'i ngo bor mi gsal bar yod pa gsal bar skye dgos pa'i phyir/ thal 'gyur phyi ma la khyab pa med de/ gsal zin nas slar skye mi dgos ba'i phyir/ zhes zer/ 'o na mngon gsal gyi bum par nga gi rgyu dus na yod dam med/ dang po ltar na/ rang gi rgyu dus na yod pa'i mngon gsal gyi bum pa chos can/ slar yang skye mi dgos par thal/ gsal zin pa'i phyir/ gnyis ba@038a @#/ /ltar na/ mngon gsal gyi bum pa chos can/ rang gi rgyu dus na yod par thal/ skye ldan gyi dngos po yin pa'i phyir/ rtags khas blangs kyis grub po/ zhes 'gog par mdzad do/ /rtsa she'i TIka chen las; de la pha rol pos nus pa'i ngo bor mi gsal bar yod pa gsal bar skye dgos pa dang/ gsal zin nas skye mi dgos pas thal ba snga phyi gnyis la khyab pa med ces smra mod kyang skyon spong mi nus te/ gsal ba snga nas yod na der skye mi dgos la/ snga nas yod kyang skye na thug med so na gnas shing/ gsal ba sngar med na rgyu la sngar yod kho na skye ba'i phyogs nyams so/ /zhes gsungs pa'i phyir/ gnyis pa ni/ de la legs ldan gyis/ de ni rigs pa ma yin te gtan tshigs dang dpe ma brjod pa'i phyir dang/ gzhan gyis smras pa'i nyes pa ma gsal ba'i phyir ro/ /glags yod pa'i tshig yin pa'i yang phyir te/ zhes skyon gsum brjod do/ /skyon dang po ni/ sangs rgyas bskyangs kyi sbyor ngag des bdag skye 'gog nus pa'i gtan tshigs dang dpe gang yang ma brjod pas dam bca' tsam du zad ba'i phyir zhes pa'o/ /skyon gnyis pa ni/ grangs can gyis/ bdag las zhes pa'i don de gang yin/ 'bras bu'i bdag nyid las sam; rgyu'i bdag nyid las yin/ gal te 'bras bu gsal ba'i bdag nyid las mi skye bar sgrub na grub zin sgrub pa'i skyon du 'gyur te/ kho bo cag kyang 'bras bu gsal ba'i bdag nyid las mi skye bar 'dod pa'i phyir/ 'on te rgyu mi gsal @038b ba'i bdag nyid las mi skye bar sgrub na gtan tshigs 'gal ba'i skyon du 'gyur te/ skye ldan thams cad rgyu mi gsal ba'i bdag nyid las skye ba'i phyir ro zhes dam bca' la brtags nas skyon brjod pa ma bsal ba'i phyir/ zhes pa'o/ /skyon gsum pa ni/ sangs rgyas bskyangs kyi 'grel ngag de la klan ka'i glags yod pa'i skyon yod de/ 'grel ngag de'i dngos zin la/ dngos po rnams bdag gi bdag nyid las skye ba med de/ skye ba don med dang thug med yin pa'i phyir/ zhes bkod 'dug kyang/ skye ba don med dang thug med ni sbyor ba de'i rtags su mi rung ste/ gtan tshigs ma grub par 'gyur ba'i phyir/ bdag las skye na don med thug med kyang de'i rtags su mi rung ste/ de rtsod gzhi'i steng du rtogs na bsgrub bya rtogs par 'gyur ba'i phyir ro/ /des na 'gyur ba'i phyir zhes pa'i tshig gi nus pa las/ bzlog don gnyis rtags yin te/ skye ba don med du 'gyur dgos pa las don bcas dang/ thug med du 'gyur dgos pa las thug bcas yin pa'i phyir zhes pa ni sangs rgyas bskyangs kyi 'dod par mngon no/ /de lta na dngos zin gyi dam bca' yang bzlog dgos te/ rtags bzlog na bsgrub bya'i chos kyang bzlog dgos pa ni rigs smra spyi'i lugs yin pa'i phyir/ 'on kyang don med thug med bzlog nas don bcas thug bcas su 'gyur ba ltar/ bdag skye med pa bzlog nas bdag skye yod de zhes pa'am/ bdag skye med pa ma yin te zhes bzlog par byar mi rung ste/ bdag skye med par sgrub pa'i skabs yin pa'i phyir ro/ /des @039a @#/ /na bdag skye rnam par bcad tsam ma yin pa bzlog don yin no/ de ltar na sangs rgyas bskyangs kyi dgongs tshod ni/ dngos po rnams rtsod gzhi/ bdag skye med pa tsam ma yin pa'am/ bdag skye bkag tsam ma yin pa'am; bdag skye rnam par bcad tsam ma yin pa bsgrub bya'i chos/ don med thug med rtags su bzhed par mngon pas/ dam bca' de gzhan skye shugs la 'phen pa'i ma yin dgag tu 'gyur te/ dngos po rnams bdag skye rnam par bcad tsam ma yin pa de gzhan skye shugs la 'phen pa'i ma yin dgag yin pa'i phyir te/ de ma yin dgag yin pa la dogs pa med la/ de ma yin dgag yin na 'phen rgyu'i chos ni gzhan skye las gzhan du mi rnyed pa'i phyir ro/ /de lta na klu sgrub yab sras kyi grub mtha' dang 'gal bar 'gyur te/ bdag las ma yin zhes ba'i don bdag skye rnam par bcad tsam gyi med dgag yin pa ni 'phags pa'i dgongs pa 'grel pa'i shing rta chen po rnams kyi gting tshugs pa'i grub pa'i mtha' yin pa'i phyir ro/ /'di la kha cig na re/ khyod kyis sangs rgyas bskyangs kyi dgongs tshod blangs pa'i sbyor ba bshad ba de mi 'thad par thal/ de'i bsgrub bya'i chos la/ skye ba gzhir byas la bdag las mi skye ste/ zhes 'god dgos pa'i phyir te/ don de ltar stong thun dang dbu ma'i yig char bshad pa'i phyir na ma khyab ste/ de gnyis su de ltar bshad kyang/ de nyid bdag skye med ba'i bzlog don ma yin pas na rnam bshad kyi tshig zin ltar legs pa'i phyir ro/ /stong thun las de ltar bshad pa de mkhas grub kyi @039b dgongs pa yin pa'i nges pa med de/ de nyid kyis mdzad pa'i ye shes 'od zer ba'i dris lan las/ dngos zin la bdag skye rnam par bcad tsam chos su song la/ de bzlog pa ni bdag skye rnam par bcad tsam ma yin pa la bya zhing/ dngos po gzhir byas la bdag skye rnam par bcad tsam min na/ gzhan skyer 'gyur te/ bdag gzhan gang las kyang mi skye ba'i dngos po phung gsum pa med pa'i phyir ro/ /des na tsam gyi nus pa go bar bya'o/ /zhes kyang gsungs pa'i phyir ro/ / gsum pa ni/ zla ba'i zhabs kyis/ skyon 'di dag thams cad ni rigs pa ma yin par kho bo cag gis mthong ngo/ zhes sogs gsungs so/ 'di la gnyis/ skyon gsum mi 'jug pa'i tshul/ legs ldan gyi lugs dgag pa'o; ;dang po la gnyis/ skyon dang po gnyis mi 'jug pa'i tshul/ gsum pa mi 'jug pa'i tshul lo/ /dang po la gnyis/ rang rgyud kyi dbang du byas pa'i skyon med tshul/ gzhan grags kyi dbang du byas pa'i skyon med tshul lo/ /dang po ni/ sangs rgyas bskyangs kyis rang rgyud kyi gtan tshigs dang dpe ma brjod pa'i skyon med de/ rang rgyud kyi gtan tshigs dang dpe brjod mi dgos pa'i phyir te/ rang rgyud kyi rtags dpe ma brjod kyang/ sngar bshad pa'i 'gal brjod kyi thal 'gyur gnyis kyis bdag las skye bar 'dod pa de 'thad pa dang bral ba dang/ rang gi khas blangs dang 'gal ba yin par ston thub pa gang zhig /de'i tshe pha rol pos bdag las skye bar 'dod pa de 'thad pa dang bral ba dang/ rang gi khas blangs dang 'gal @040a @#/ /bar mthong yang mi ldog par bsnyon na/ rang rgyud kyi rtags dpe brjod kyang mi ldog par mtshungs pa'i phyir ro/ /kho bos ni bsnyon pa rgol pa'i 'os ma yin pa dang lhan cig tu rtsod pa yang ma yin zhing/ slob dpon legs ldan ni rgol ba'i gnas ma yin pa de lta bur yang rang rgyud kyi rtags dpe 'tshangs ka byed pa ni gtan tshigs smra ba la dga' ba tsam du zad kyi/ dgos pa ci yang med do/ /der ma zad dbu ma pa yin na rang rgyud kyi sbyor ba khas len mi rigs te/ rang gi mtshan nyid kyis grub pa'i phyogs gzhan khas len mi rigs pa'i phyir ro/ /des na sangs rgyas bskyangs kyis rang rgyud kyi sbyor ba la gzhan gyis smras pa'i nyes pa sel mi dgos te/ des rang rgyud kyi sbyor ba khas ma blangs shing ma bkod pa'i phyir ro; ;'di la kha cig na re/ sangs rgyas bskyangs kyis rang rgyud sbyor ba khas blangs par thal/ rang rgyud kyi sbyor ba yod pa'i phyir te/ legs ldan gyis bdag skye 'gog pa'i sbyor ba de rang rgyud kyi sbyor ba yin pa'i phyir te/ dbu ma'i yig char legs ldan khyed rang ltar/ mig sogs nang gi skye mched rnams chos can/ don dam par bdag las skye ba med de/ yod pa'i phyir/ dper na shes pa yod pa nyid bzhin/ zhes pa lta bu'i rang rgyud kyi sbyor ba bkod na de 'dra'i dpyad pa 'jug pa bden yang/ zhes gsungs pa'i phyir dang/ zla ba'i zhabs kyis kyang/ rang rgyud kyi sbyor ba la ma grub pa dang ma nges pa'i skyon yod par gsungs pa'i phyir nam khyab ste/ dang po ni/ legs ldan khyed rang rang rgyud kyi sbyor ba 'god par 'dod pas/ de 'dra @040b ba'i sbyor ba bkod pa ltar/ sangs rgyas bskyangs kyis ma bkod pa'i don dang/ gnyis pa ni de 'dra ba'i sbyor ba rnams legs ldan gyi bsam tshod ltar rang rgyud kyi sbyor ba yin na de 'dra ba'i skyon yod pa'i don yin pa'i phyir/ dper na myu gu bden par grub na rgyu rkyen la ma ltos par thal pa'i skyon yod ces pa bzhin no/ /gnyis pa ni/ sangs rgyas bskyangs kyis rang rgyud sbyor ba khas mi len bas rang rgyud kyi rtags dpe ma brjod du chug kyang/ gzhan grags kyi gtan tshigs dang dpe brjod dgos ba la ma brjod pa'i phyir dang/ de la gzhan gyis smras pa'i nyes pa ma bsal ba'i phyir/ sngar gyi skyon so na gnas so zhe na/ sangs rgyas bskyangs la gzhan grags kyi gtan tshigs dang dpe ma brjod pa'i skyon yang med de rgol ba thams cad la gzhan grags kyi sbyor ba nges par brjod mi dgos pa'i phyir te/ gzhan grags kyi sbyor ba ma brjod kyang/ sngar bshad pa'i 'gal brjod thal 'gyur gnyis kyis bdag skye 'gog thub pa'i phyir dang rgol ba 'ga' zhig la gzhan grags kyi rtags dpe brjod dgos na yang/ sangs rgyas bskyangs kyis brjod pa'i phyir te/ dngos po rnams bdag gi bdag nyid las skye ba med de/ zhes sogs mdor bstan dang/ dngos po bdag gi bdag nyid du yod pa rnams la ni/ zhes sogs rgyas bshad gnyis kyis; rgyu dus na mngon par mi gsal ba'i tshul gyis yod par 'dod pa'i myu gu chos can/ slar yang skye ba don med de/ rang gi bdag nyid du yod pa'i phyir/ dper na mngon gsal gyi bum pa bzhin/ zhes pa'i gzhan grags kyi sbyor ba @041a @#/ /bstan pa'i phyir te/ bstan bshad kyi gzhung des sgrub ngag yan lag lnga ldan bshad pa'i phyir te/ de 'dra ba'i dngos po rnams slar yang skye ba don med de/ rang gi bdag nyid du yod pa ni slar yang skye ba don med pa'i phyir; rang gi bdag nyid du yod na slar yang skye ba don med pas khyab par mthong ste mngon gsal gyi bum pa bzhin/ mngon gsal gyi bum pa bzhin du de 'dra ba'i dngos po rnams kyang rang gi bdag nyid du yod pa yin no/ de'i phyir rang gi bdag nyid du yod pa nyid kyi phyir de 'dra ba'i dngos po rnams slar yang skye ba don med yin no/ zhes dam bca' dang/ rtags dang/ dpe la khyab pa bstan pa dang/ dpe don nyer sbyor dang/ mjug sdud de yan lag lnga ldan gyi sgrub ngag bshad pa'i phyir ro/ /sangs rgyas bskyangs kyis gtan tshigs dang dpe brjod par ma zad/ gzhan gyis smras pa'i nyes ba yang bsal ba yin te/ mngon gsal gyi bum pa mthun dper bkod pas gtan tshigs 'gal ba'i skyon bsal/ rgyu dus na mi gsal ba'i tshul gyis yod par 'dod pa'i myu gu slar yang skye ba don med ba bsgrub byar bkod pas grub zin sgrub pa'i skyon bsal ba'i phyir/ dang po grub ste/ mngon gsal gyi bum pa mthun dper bkod pas na rang gi bdag nyid du yod ba de bdag skye med par sgrub pa'i 'gal rtags yin nam snyam pa'i dogs ba snga rgol phyi rgol gnyis kal mi skye ba'i phyir te/ mngon gsal gyi bum pa ni snga rgol phyi rgol gnyis ka la grags pa'i rtags chos gnyis ldan gyi mthun dpe yin pa'i phyir @041b gnyis pa grub ste/ grangs can gyis rgyu dus na mi gsal ba'i tshul gyis yod par 'dod pa'i myu gu slar yang skye bar 'dod pa la/ de 'dra ba'i myu gu slar yang skye ba don med par sgrub pa yin pas na grub zin sgrub bam snyam pa'i dogs pa med pa'i phyir te/ ji skad du tshig gsal las/ gzhan gyis smras pa'i nyes pa ma bsal ba yang ma yin no/ /ci ltar zhe na/ grangs can pa dag mdun na gnas pa'i bum pa mngon par gsal ba'i rang bzhin can ni yang mngon par gsal bar mi 'dod cing; de nyid 'dir dpe nyid du grub pa'i ngo bo yin pa'i phyir la/ nus pa'i ngo bor gyur cing mngon par gsal ba'i rang bzhin ma yin pa skye ba bkag pas khyad par du byas pa ni bsgrub par bya ba yin pa nyid kyi phyir/ grub pa la sgrub pa'i phyogs kyi skyon nyid du dogs pa'am/ gtan tshigs 'gal ba'i don nyid du dogs pa ga la yod/ ces dang/ rtsa she'i TIka chen las kyang/ mngon gsal gyi bum pa slar yang gsal bar mi 'dod pa dpe yin la/ nus pa'i ngo bo mi gsal ba skye ba bkag pa bsgrub bya yin pas/ rtags grub pa la sgrub pa dang 'gal bar dogs pa yang med do/ zhes gsungs pa'i phyir ro/ yang na 'grel tshig de'i dngos bstan gyi sbyor ba 'god tshul sngar bshad pa las gzhan du byas kyang rung ste/ rang las skye bar smra ba'i don rnams chos can/ bdag nyid las skye ba med de/ rang gi bdag nyid du yod pa'i phyir/ dper na skyes bu bzhin/ zhes bkod na yang chog pa'i phyir te/ tshig gsal las/ yang na sbyor ba 'di ni tshul gzhan yin te/ rang las @042a @#/ /skye bar smra ba'i skyes bu las tha dad pa'i don rnams ni bdag nyid las skye ba med de/ rang gi bdag nyid du yod pa'i phyir/ skyes bu bzhin zhes dper brjod pa de nyid dper brjod par bya'o/ /zhes gsungs pa'i phyir/ sbyor ngag 'dis kyang gzhan gyis smras pa'i nyes pa bsal ba yin te/ pha rol bos rang las skye bar smra ba'i don rnams rtsod gzhir bzung bas grub zin sgrub pa'i skyon bsal/ skyes bu mthun dper bzung bas gtan tshigs 'gal ba'i skyon bsal ba'i phyir/ sbyor ba de'i rtsod gzhi la tshig gsal las gsungs pa ltar rang las skye bar smra ba'i khyad par sbyor dgos te/ de ma sbyar na sbyor ngag des gzhan gyis smras pa'i nyes pa sel tshul dka' bar 'gyur ba'i phyir dang/ skyes bu las tha dad pa'i don rnams rtsod gzhir bzung na spyi gtso bo la ltos te grub zin sgrub pa'i skyon du 'gyur zhes grangs can gyis rtsod pa'i gzhir 'gyur ba'i phyir ro/ 'di la kha cig na re/ sangs rgyas bskyangs kyi 'grel tshig des sgrub ngag yan lag lnga ldan sogs don mang po bshad pa mi 'thad par thal/ dngos zin la de lta bu'i tshig med pa'i phyir na ma khyab ste/ dngos zin la de lta bu'i tshig med kyang don de dag bsdus nas bstan pa yin pas/ don rgyas par bshad na de lta bu'i don mang po thon par 'gyur bar tshig gsal las gsungs pa'i phyir ro/ /gnyis pa ni/ tshig gsal las/ thal bar 'gyur ba bzlog pa'i don dang yang pha rol po nyid 'brel ba yin gyi/ kho bo cag ni ma yin te/ rang la dam bca' ba med pa'i phyir ro/ /de'i @042b phyir kho bo cag la grub pa'i mtha' dang 'gal bag la yod/ ces gsungs so/ bdag skye 'gog pa'i thal 'gyur gnyis kyi thal chos de bzlog pa'i don slar yang skye ba don bcas dang thug bcas ni grangs can kho na 'dod kyi/ rang la de'i khas len med pas de khas blangs pa'i rgyu mtshan gyis grub mtha' dang 'gal ba'i skyon ga la yod/ gzhan mi 'dod pa'i thal 'gyur 'phangs pa na 'phen mkhan gyis thal chos bzlog don nges par khas blang mi dgos te/ sgras don ston pa ni smra ba po rang dbang med par mi byed kyi smra ba po'i brjod 'dod kyi rjes su byed pa'i phyir dang/ sangs rgyas bskyangs kyis kyang slar yang skye ba don bcas dang thug bcas dgag pa tsam zhig 'dod nas 'phangs pa'i phyir ro/ /gnyis pa la gsum/ rang rgyud 'gog pa'i rigs pa dang/ rigs pa de pha rol pos kyang don gyis khas blangs tshul dang/ skyon brjod de rang gi sbyor ba la mi mtshungs pa'i rgyu mtshan no/ /dang po la gnyis/ don dam pa'i khyad par sbyar ba don med par bshad pa/ chos can spyi tsam 'dzin pa'i lan dgag pa'o/ / dang po ni/ legs ldan gyis/ don dam par nang gi skye mched rnams bdag las skye ba med par nges te/ yod pa'i phyir/ shes pa yod pa nyid bzhin no/ /zhes bkod pa la/ zla ba'i zhabs kyis/ de la don dam pa'i khyad par sbyar ba la dgos pa med de/ chos la sbyar na yang dgos pa med/ chos can la sbyar na yang dgos pa med pa'i phyir/ dang po grub ste/ snga rgol la ltos na yang dgos pa med/ phyi rgol la ltos nas kyang dgos pa med/ 'jig rten pa la ltos nas kyang @043a @#/ /dgos pa med pa'i phyir/ dang po grub ste/ snga rgol dbu ma pas bdag skye kun rdzob tu yang khas ma blangs pa'i phyir/ gnyis pa grub ste/ bden pa gnyis las nyams pa'i mu stegs ni bden pa gnyis char 'gog par rigs pa'i phyir; gsum pa grub ste/ 'jig rten pas ni rgyu las 'bras bu 'byung ba tsam zhig 'dod kyi/ bdag dang gzhan gang las skye zhes mi dpyod pa'i phyir/ rtsa rtags gnyis pa grub ste/ don dam pa'i khyad par chos can la sbyor na/ snga rgol la ltos te chos can ma grub pa'i skyon du 'gyur ba'i phyir/ gal te kun rdzob pa'i mig sogs rtsod gzhir bzung nas don dam par skye ba 'gog pas skyon med do zhe na/ de yang mi rigs te/ de skad du ma smras pa'i phyir dang/ smras na'ang phyi rgol la chos can ma grub pa'i skyon du 'gyur ba'i phyir te/ grangs can gyis mig sogs dbu ma pas 'dod pa ltar gyi don dam du 'dod kyi/ kun rdzob tu mi 'dod pa'i phyir ro/ gnyis pa ni/ legs ldan na re/ dper na sangs rgyas pas bye brag pa la sgra mi rtag par sgrub pa na/ 'byung 'gyur gyi sgra chos can du bzung na bye brag ba la mi 'grub/ nam mkha'i yon tan gyi sgra chos can du bzung na sangs rgyas pa la mi 'grub po/ de bzhin du bye brag pas gsal byed pa la sgra mi rtag par dam 'cha' ba na/ byas ba'i sgra chos can du bzung na gsal byed ba la mi 'grub/ sngar yod rkyen gyis gsal ba'i sgra chos can du bzung na bye brag ba la mi 'grub bo/ /de bzhin du sangs rgyas pas bye brag pa la sgra mi rtag par sgrub pa na/ 'jig pa phyis 'byung gi rgyu don @043b gzhan la mi ltos pa'i mi rtag pa chos can du bzung na bye brag pa la mi 'grub/ de la ltos pa'i mi rtag pa chos can du bzung na sangs rgyas pa la mi 'grub bo/ de'i phyir rgol ba so so'i 'dod pa thun mong ma yin pas khyad par du ma byas par/ snga rgol phyi rgol gnyis ka la mthun snang du grub pa'i spyi tsam zhig chos dang chos can dang dper bzung dgos so/ /de bzhin du dbu ma pas mig sogs bdag dang gzhan las skye ba med par grangs can pa dang dngos smra ba la sgrub pa na/ bden par grub pa'i mig sogs chos can du bzung na dbu ma pa la mi 'grub/ brdzun par grub pa'i mig sogs chos can du bzung na dngos smra ba la mi 'grub pas na/ bden brdzun gang gis kyang khyad par du ma byas par dbu ma pa dang dngos smra ba gnyis ka la mthun snang du grub pa'i mig sogs tsam po chos can du bzung dgos te/ dbu ma pa dang dngos smra ba gnyis kyis khyad par gyi chos dpyod pa'i gzhi yin pas gnyis ka'i mthun snang du grub dgos pa'i phyir/ zhes zer ro/ /mthun snang du grub pa'i don yang phyi rgol la tshad ma ji lta ba zhig gis grub pa'i tshad ma de 'dra ba zhig gis snga rgol la yang grub ba'o/ /de dgag pa la gnyis/ don mi 'thad pa dang/ dpe bkod pa dang mi 'dra'o/ /dang po ni/ skabs 'dir snga rgol phyi rgol gnyis ka'i mthun snang du grub pa'i chos can bzhag tu mi rung ste/ chos can mig sogs de phyi rgol dngos sgra ba'i lugs la yul gyi rang bzhin la ma 'khrul ba'i tshad ma'i rnyed don dang/ snga rgol dbu ma pa'i lugs la yul gyi rang bzhin la 'khrul ba'i tshad ma'i rnyed don yin pa'i phyir/ khyab@044a @#/ /ste; snga rgol phyi rgol gnyis ka la mthun snang ba yin na/ phyi rgol gyi lugs la tshad ma ji lta bu zhig gis grub pa'i tshad ma de 'dra ba zhig gis snga rgol gyi lugs la yang grub dgos pa'i phyir te/ mthun snang ba'i don de ltar lam rim las gsungs pa'i phyir ro/ /gzhan yang/ rgol ba gnyis ka'i lugs la bden gnyis kyi khyad par dor ba'i mig sogs spyi tsam chos can du bzung du mi rung ste/ de gnyis ka'i lugs la bden gnyis kyi khyad par dor ba'i mig sogs spyi tsam blos gzung du mi rung ba'i phyir te/ snga rgol dbu ma pa'i lugs la bden gnyis kyi khyad par dor ba'i mig sogs spyi tsam blos gzung du rung yang/ phyi rgol dngos smra ba'i lugs la bden gnyis kyi khyad par dor ba'i mig sogs spyi tsam blos gzung du mi rung ba'i phyir/ rtags phyi ma grub ste/ dngos smra ba'i lugs la/ don dam pa'i khyad par dor ba'i mig sogs spyi tsam blos gzung du mi rung ba'i phyir te/ de'i lugs la rang mtshan gyi khyad par dor ba'i mig sogs spyi tsam blos gzung du mi rung ba'i phyir te/ de'i lugs la mig sogs la tshad mar song na mig sogs kyi rang mtshan la tshad mar song bas khyab pa'i phyir ro/ /gzhan yang rgol ba gnyis ka'i lugs la mthun snang du grub pa'i chos can med de/ rgol ba gnyis ka'i lugs la mthun snang du grub pa'i chos can sgrub byed kyi tshad ma med pa'i phyir te/ chos can sgrub byed tshad ma de snga rgol dbu ma bas yul gyi rang bzhin la 'khrul ba'i tshad mar 'dod/ phyi rgol dngos smra @044b bas de la ma 'khrul ba'i tshad mar 'dod pa'i phyir ro/ /'di ni don thob kyi dbang du byas pa'i bshad pa'o/ /tshig gsal las/ de ni de ltar (ma yin te/ 'di ltar gang gi tshe 'dir skye ba bkag ba bsgrub par bya ba'i chos su 'dod pa de'i tshe/ de kho nar de'i rten chos can phyin ci log tsam gyis bdag gi ngo bo rnyed pa ni nyams par gyur par 'dis rang nyid kyis khas) blangs pa nyid do/ /phyin ci log dang phyin ci ma log pa dag ni tha dad pa yin no/ zhes pa nas/ gang gi phyir de ltar phyin ci log pa dang phyin ci ma log pa dag tha dad pa de'i phyir/ phyin ci ma log pa'i gnas skabs na phyin ci log yod pa ma yin pa'i phyir na/ gang zhig chos can nyid du 'gyur ba'i mig kun rdzob pa ga la yod/ de'i phyir gzhi ma grub pa'i phyogs kyi skyon dang gzhi ma grub pa'i gtan tshigs kyi skyon ldog pa med pas 'di lan ma yin pa nyid do/ /zhes gsungs pa'i tshig don ni/ legs bshad snying po ltar na/ rgol ba gnyis ka'i lugs la bden gnyis kyi khyad par dor ba'i mig sogs tsam po chos can du gzung du mi rung ste/ legs ldan khyed rang ltar na don dam pa'i khyad par dor nas mig sogs tsam yul du byed pa'i tshad ma med pa'i phyir te/ mig sogs de rang bzhin la 'khrul ba'i tshad ma'i rnyed don ma yin par legs ldan rang nyid kyis khas blangs pa'i phyir/ khyab ste/ de lta na yul gyi rang bzhin la 'khrul ba'i shes pa'i rnyed don dang de la ma 'khrul ba'i shes pa'i rnyed don gnyis dngos 'gal yin pas na mig sogs de yul gyi rang mtshan la ma 'khrul ba'i shes pa'i rnyed don du 'gyur la/ mig sogs kyi rang mtshan snang ba la ltos te ma 'khrul ba'i tshad mas ni mig sogs don dam par yod par 'jal dgos kyi/ don dam pa'i khyad par dor ba'i mig sogs tsam po 'jal mi rung ba'i phyir/ rtags snga ma legs ldan rang gi khas blangs kyis @045a @#/ /grub ste/ legs bshad snying po las/ yod pa gang yin rang gi ngo bos yod par 'dod pa'i lugs la rang mtshan snang ba la ltos te 'khrul bar song na/ des rang gi gzhal bya rnyed par 'jog mi nus pas/ rtog pa dang rtog med kyi tshad ma gang yin kyang tshad mar song sa snang yul dang zhen yul rang mtshan la ma 'khrul ba zhig dgos so/ /de'i tshe tha snyad du ming du btags pa tsam min pa'i don rang gi gnas tshul gyi ngo bo'am rang bzhin la tshad mar 'gro dgos shing rang gis khas len pa yang yin no/ /zhes gsungs pa'i phyir/ gnyis pa grub ste/ de nyid las/ de 'dra ba'i tshad mas rnyed pa'i don yin na shes bya phyin ci log yin par 'gal bas rtags phyi ma 'grub bo/ /zhes gsungs pa'i phyir/ khyab ste/ shes bya phyin ci log ni rang mtshan snang ba la ltos te 'khrul ba'i shes pas rnyed pa'i don yin ba'i phyir ro/ /des na rgol ba gnyis kar mthun snang du grub pa'i chos can med bas rang rgyud kyi sbyor ba'i chos can ma grub ba'i skyon ldog tu med do/ /lhag mthong chen mo ltar na/ gzhung de'i tshig don ni/ rgol ba gnyis kar mthun snang du grub pa'i chos can med de/ chos can mig sogs de don dam par ma grub bar legs ldan rang nyid kyis khas blangs pa'i phyir te/ legs ldan gyis mig sogs de don dam par skye ba med par sgrub pa'i chos can du bkod pa'i phyir ro/ /'o na de ltar khas len mod des cir 'gyur zhe na/ de ltar na mig sogs ni ma 'khrul ba'i shes pa'i rnyed don @045b ma yin par 'gyur te/ de kho nar ma grub cing de kho na nyid kyi don yang ma yin pa'i chos yin na 'khrul ba'i shes pa'i rnyed don yin bas khyab pa'i phyir dang/ 'khrul ba'i shes pa'i rnyed don dang ma 'khrul ba'i shes pa'i rnyed don gnyis dngos 'gal yin pa'i phyir/ 'dod na/ chos can mthun snang du ma grub par 'gyur te/ phyi rgol dngos smra bas mig sogs 'jal ba'i tshad ma de mig sogs kyi rang mtshan la ma 'khrul bar 'dod/ snga rgol dbu ma pas mig sogs 'jal ba'i tshad ma de mig sogs kyi rang mtshan la 'khrul bar 'dod pa'i phyir/ khyab ste/ mthun snang ba'i don sngar bshad pa ltar yin pa'i phyir ro/ /des na rgol ba gnyis ka'i lugs la mthun snang du grub ba'i chos can sgrub byed kyi tshad ma med pas rang rgyud kyi rtags kyis phyi rgol la bsgrub par bya ba'i phyogs skyon med gzhag tu med do/ /de ltar gzhung de'i tshig don la bshad tshul mi 'dra ba gnyis 'byung yang mthar rang rgyud 'gog pa la khyad par med de/ legs bshad snying bo las/ rten chos can de kho nar grub pa nyams par khas blangs pa'i steng nas kyang gzhan du bshad pa dang bshad tshul 'di gnyis mi mthun kyang rang rgyud 'gog pa'i grub mtha' mi mthun pa min no/ /zhes gsungs pa'i phyir ro/ /skabs 'dir shes pa phyin ci log dang shes pa phyin ci ma log pa gnyis dang/ shes bya phyin ci log dang shes bya phyin ci ma log pa gnyis te bzhi las/ rang bzhin la 'khrul ba'i shes pa ni shes pa phyin ci log yin la/ rang bzhin la ma 'khrul ba'i shes ba ni shes pa phyin ci ma @046a @#/ /log pa yin no/ /rang bzhin la 'khrul ba'i shes pa'i rnyed don ni shes bya phyin ci log gi mtshan nyid/ de dang kun rdzob bden pa dang snang tshul gnas tshul mi mthun pa'i chos don gcig /rang bzhin la ma 'khrul ba'i shes ba'i rnyed don ni/ shes bya phyin ci ma log pa'i mtshan nyid/ de dang don dam bden pa dang/ snang tshul gnas tshul mthun pa'i chos don gcig go/ /de ltar yin pa la/ /rang bzhin gyis yod par smra ba rnams kyis/ mig sogs 'dzin pa'i tshad ma mig sogs kyi rang bzhin la ma 'khrul ba dang mig sogs kyi rang bzhin la tshad mar song bar 'dod pas/ thal 'gyur ba'i rigs pas 'phul na/ mig sogs de don dam par 'gyur ba dang/ mig sogs 'dzin pa'i tshad ma don dam pa la tshad mar song bar 'gyur te/ mig sogs de rang bzhin lam 'khrul ba'i tshad ma'i rnyed don yin pa'i phyir dang/ mig sogs 'dzin pa'i tshad ma de rang bzhin la ma 'khrul ba'i shes pa yin pa'i phyir/ rtags re re nas khas blangs kyis grub bo/ /'dod na/ bden gnyis kyi khyad par dor nas mig sogs spyi tsam la tshad mar song ba med par thal/ mig sogs la tshad mar song na don dam la tshad mar song bas khyab pa'i phyir/ 'dod na/ bden gnyis kyis khyad par du ma byas pa'i mig sogs tsam po med par thal/ de tshad ma'i gzhal bya ma yin pa'i phyir/ 'dod na/ sngar gyi sbyor ba'i chos can ma grub par thal/ 'dod pa'i phyir/ 'dod na/ yod pa'i @046b phyir zhes bya ba'i gtan tshigs kyang ma grub par thal/ sbyor ba de'i chos can ma grub pa'i phyir/ zhes bkag pa yin no/ /gnyis pa ni/ tshig gsal las/ dpe la yang 'dra ba yod pa ma yin no/ /zhes sogs gsungs te/ 'byung 'gyur dang nam mkha'i yon tan gang gis kyang khyad par du ma byas par sgra tsam la tshad mar song ba ni sangs rgyas pa dang bye brag pa gnyis ka'i lugs la yod la/ rang bzhin gyis grub ma grub gang gis kyang khyad par du ma byas par mig sogs tsam la tshad mar song ba'i blo ni rang bzhin gyis stong par smra ba dang mi stong par smra ba gnyis ka'i lugs la med pa'i phyir dpe dang 'dra ba ma yin no/ /legs ldan sogs rang rgyud pa rnams kyis rang bzhin gyis grub ma grub gang gis kyang khyad par du ma byas par mig sogs tsam la tshad mar song ba med kyang/ don dam par yod med gang gis kyang khyad par du ma byas par mig sogs tsam la tshad mar song ba yod ces smra mod kyang skyon spong mi nus te/ rang bzhin gyis yod na don dam par yod pas khyab pa'i phyir ro/ /rang bzhin gyis yod med gang gis kyang khyad par du ma byas par mig sogs spyi tsam rtogs pa'i tshad ma rgol ba gnyis ka'i lugs la med kyang/ de 'dra ba'i tshad ma rgol ba gnyis ka'i rgyud la yod do/ /de 'dra ba'i tshad ma rgol phyi rgol gnyis ka'i rgyud la yod kyang/ phyi rgol gyis yod pa dang rang bzhin gyis yod pa gnyis mi phyed pa ltar/ yod par 'dzin pa dang rang bzhin gyis yod par 'dzin pa gnyis @047a @#/ /kyang mi phyed pas/ tshad ma thams cad yul gyi rang bzhin la tshad mar song bar 'dod pa'i phyir ro/ /gnyis pa ni/ chos can ma grub par bshad pa'i rigs pa 'dis/ yod pa'i phyir zhes pa'i gtan tshigs kyang rgol ba gnyis ka'i lugs la mthun snang du ma grub par 'gyur tshul sngar bshad pa bzhin du shes par bya dgos shing/ ji skad bshad pa'i don 'di ni legs ldan rang nyid kyis kyang don gyis khas blangs pa yin te/ nang gi skye mched rnams skyed byed kyi rgyu la sogs pa yod pa kho na yin te/ de ltar de bzhin gshegs pas gsungs pa'i phyir/ gang de bzhin gshegs pas ji skad du gsungs pa de ni de bzhin de/ dper na mya ngan las 'das pa ni zhi ba'o zhes bya ba bzhin no/ /zhes gzhan gyis bkod pa la/ legs ldan gyis/ de bzhin gshegs pas gsungs pa'i phyir/ zhes pa'i rtags kyi don de bden gnyis gang yin/ kun rdzob tu yod pa yin na ni/ rtags kyi don kun rdzob tu yod pa ni khyed rang la ma grub/ don dam du yod pa yin na ni/ rtags kyi don don dam par yod pa ni nged la ma grub/ de gnyis gang yang ma yin na rtags su bkod pa'i don de ma grub par 'gyur ba'i phyir/ zhes bden gnyis la brtags nas skyon brjod pa'i phyir/ khyab ste/ 'khrul ba'i shes pas rnyed pa de kun rdzob dang/ ma 'khrul ba'i shes pas rnyed pa de don dam pa yin pas bden gnyis gang yin zhes pa de/ 'khrul ma 'khrul gyi shes pa gang gis rnyed pa yin zhes pa dang gnad gcig yin pa'i @047b phyir dang/ rtags su bkod pa'i don de kun rdzob dang don dam du yod pa gang yang ma yin na rtags de ma grub par 'gyur dgos pa dang/ rtags su bkod pa'i don de 'khrul ma 'khrul gyi shes pa gang gis kyang ma rnyed na rtags su bkod pa'i don de ma grub par 'gyur dgos pa'i rgyu mtshan mtshungs pa'i phyir ro/ /skabs 'dir lam rim chen mo las/ de'i don ni/ de bzhin gshegs pas kun rdzob tu gsungs pa'i phyir zhes rtags su 'god dam/ don dam du gsungs pa'i phyir zhes rtags su 'god ces brtag pa byed pa ni ye ma yin te/ sngar phyogs snga bslang ba ltar/ chos can bden brdzun gang gis kyang khyad par du ma byas pa bzhag dgos kyi/ gzhan du na rgol phyi rgol gang rung gcig la ma grub par 'gyur bar 'dod pa bzhin du/ gtan tshigs dang dpe la sogs pa yang de ltar 'dod pas/ rags pa de 'dra ba'i ltag chod la yongs su rdzogs pa'i paNDi ta 'di 'khrul bag la srid/ ces gsungs kyang/ legs bshad snying po las/ rtags la bden gnyis kyi brtag pa gnyis las ma mdzad pa ltar na rtags kyi don gang yin zhes dri dgos la/ de gnyis gang gis kyang khyad par du ma byas pa'i tsam po dang bcas pa'i brtag pa gsum byas pa'i skabs su rtags su gang 'god ces dri dgos so/ /zhes gsungs pas/ snga ma ni brtag pa gnyis las ma mdzad pa la dgongs sam dpyad par bya'o/ /brtag pa gsum byed lugs ni/ de bzhin gshegs pas kun rdzob tu gsungs pa'i phyir zhes @048a @#/ /pa dang/ des don dam du gsungs pa'i phyir zhes pa dang/ /de bzhin gshegs pas gsungs pa'i phyir zhes pa gsum las gang rtags su 'god/ dang po ltar na khyed rang la gtan tshigs ma grub par 'gyur/ gnyis pa ltar na nged la ma grub par 'gyur/ gsum pa ltar na khyab pa ma nges pa'i skyon du 'gyur bas/ de bzhin gshegs pas gsungs pa'i phyir zhes pa'i rtags kyis rgyu rkyen don dam par yod par sgrub mi nus zhes pa'o/ /brtag pa gnyis byed lugs kyang sngar bshad pa ltar bya dgos kyi/ rtags kyi don de kun rdzob tu grub na rang la ma grub/ don dam du grub na nged la ma grub pas/ gtan tshigs rgol ba gnyis kar ma grub pa'i skyon yod ces pa gtan nas ma yin te/ gtan tshigs su bkod pa'i don de kun rdzob tu yod pa dang don dam par yod ba gang rung yin na gtan tshigs de rgol ba gnyis kar ma grub pa'i skyon yod ces brjod pa'i mkhas pa su yang med pa'i phyir te/ de ltar brjod pa de ni/ rtags su bkod pa'i don de yod pa yin na gtan tshigs de rgol ba gnyis kar ma grub pa'i skyon yod ces pa dang khyad par ci yang med pa'i phyir ro/ /gzhan yang/ rtags kyi don de kun rdzob tu grub na dngos smra ba la ma grub ces brtag pa byed pa'ang gtan nas ma yin te/ gzhan du na/ shes bya thams cad dngos smra ba la ma grub par 'gyur te/ kun rdzob tu grub pa'i phyir/ ji skad du/ lam rim chen mo las/ de ltar bden gnyis gang yin dris nas don dam yin na rang la ma grub pa yin kyang/ kun rdzob yin @048b na gzhan la ma grub ces ji ltar brjod du rung ste/ de lta ma yin na chos can du bzhag pa'i nang gi skye mched kyang kun rdzob tu yod pa'i phyir/ phyi rgol de dag gis ma grub par 'gyur ba'i phyir ro/ /zhes gsungs pa'i phyir/ legs ldan gyis/ de bzhin gshegs pas gsungs pa'i phyir zhes ba'i gtan tshigs ma grub par bshad pa ma yin gyi/ mtha' gzhan 'gog pa'i rigs pas gtan tshigs de rgyu rkyen don dam par yod pa'i sgrub byed du mi rung bar bshad pa yin pa'i phyir dang/ de bzhin gshegs pas gsungs pa'i phyir zhes pa la/ gtan tshigs ma grub pa'i skyon med pa'i phyir ro/ /'di la kha cig na re/ legs ldan gyis de bzhin gshegs pas gsungs pa'i phyir zhes pa'i gtan tshig ma grub par bshad par thal; shes rab sgron me las/ don dam bar bsgrub par bya ba dang sgrub par byed pa nyid ma grub pa'i phyir gtan tshigs ma grub pa'i don nyid dang 'gal ba'i don nyid do/ /zhes dang/ tshig gsal las kyang/ gang gi phyir de ltar 'dis rang nyid kyis gtan tshigs ma grub par khas blangs pa de'i phyir/ dngos po'i chos gtan tshigs su bkod pa'i rjes su dpag pa thams cad la gtan tshigs la sogs pa rang la ma grub pa'i phyir sgrub par byed pa thams cad rnam par 'jig par 'gyur ro/ / zhes gsungs pa'i phyir na ma khyab ste/ rtags kyi don de don dam du grub na ma grub pa'i gtan tshigs su 'gyur/ kun rdzob tu grub na 'gal ba'i gtan tshigs su 'gyur zhes mtha' gzhan 'gog pa yin gyi/ gtan tshigs de ma grub pa dang @049a @#/ /'gal ba'i gtan tshigs gnyis ka yin zhes bshad du mi rung ba'i phyir te/ de sgrub kyi ma grub pa'i gtan tshigs dang 'gal ba'i gtan tshigs gnyis 'gal ba yin pa'i phyir/ lung gnyis pa ni/ rtags kyi don de don dam par grub na rang la ma grub par khas blangs pa ltar/ yod pa'i phyir zhes pa'i rtags kyi don de ma 'khrul ba'i shes pa'i rnyed don yin na legs ldan rang la ma grub par khas blangs dgos te; rtags kyi don de ma 'khrul ba'i shes pa'i rnyed don yin na de bden par grub dgos pa'i phyir ro/ /des na rtags kyi don rang mtshan gyis grub na thams cad rang la ma grub par 'gyur bas na sgrub byed thams cad 'jig par 'gyur zhes pa'o; ; dngos po'i chos zhes pa yang rang mtshan gyis grub pa la ma 'khrul ba'i shes pas rnyed pa la byed do/ /gsum pa ni/ pha rol pos/ rang rgyud kyi sbyor ba la chos can dang gtan tshigs ma grub pa la sogs pa'i skyon brjod pa mi rigs te/ rang rgyud kyi sbyor ba la brjod pa'i skyon de dag khyed rang gi gzhan grags kyi sbyor ba la yang 'jug par mtshungs pa'i phyir zhe na/ rang rgyud kyi sbyor ba la skyon de dag 'jug gi/ kho bo'i gzhan grags kyi sbyor ba la mi 'jug ste/ rang rgyud kyi sbyor ba'i chos can dang rtags dang dpe rnams phyi rgol la rang mtshan gyis grub pa la ma 'khrul ba'i tshad mas grub par grags pa ltar/ snga rgol dbu ma pa'i lugs la yang de 'dra ba'i tshad mas grub ba zhig dgos par 'dod pas skyon @049b de dag 'byung la/ kho bo'i gzhan grags kyi sbyor ba'i chos can la sogs pa rnams phyi rgol dngos smra ba la rang mtshan gyis grub pa la ma 'khrul ba'i tshad mas grub par grags pa des chog gi /snga rgol dbu ma pa'i lugs la de 'dra ba'i tshad mas grub par mi 'dod pas skyon de dag mi 'byung ba'i phyir/ dang po grub ste/ rang rgyud kyi sbyor ba'i chos can la sogs pa rnams rang mtshan gyis grub pa la ma 'khrul ba'i tshad mas grub na rang mtshan gyis grub dgos/ rang mtshan gyi sa grub na bden par grub dgos/ chos can la sogs pa rnams bden par grub na chos can la sogs pa rnams ma grub par 'gyur ba'i phyir ro/ /gnyis pa grub ste/ gzhan grags kyi sbyor ba'i chos can la sogs pa rnams snga rgol dbu ma pa'i lugs la rang mtshan gyis grub pa la ma 'khrul ba'i tshad mas grub par mi 'dod pas de dag rang mtshan gyis grub par thal ba sogs kyi skyon mi 'byung ba'i phyir ro/ /brtag pa mtha' gzung gi dbang du byas pa'i rang rgyud kyi sbyor ba'i gon don ni/ rgol ba gnyis kar rang mtshan la ma 'khrul ba'i tshad mas grub pa'i tshul gsum gyis bsgrub bya sgrub pa'i sbyor ngag de yin la/ gzhan grags kyi sbyor ba'i don ni/ de 'dra ba'i tshad mas mi 'grub par phyi rgol gzhan la grags pa'i tshul gsum gyis bsgrub bya sgrub pa'i sbyor ngag de yin te/ lam rim las/ sngar bshad pa lta bu'i tshad mas rgol ba gnyis ka la grub pa'i rtags kyis bsgrub bya sgrub ba la rang rgyud kyi rtags dang/ des mi 'grub par phyi rgol gzhan la@050a @#/ /grags pa'i tshul gsum gyis bsgrub bya 'grub pa la thal 'gyur bar 'jog pa 'di ni slob dpon gyi dgongs par shin tu gsal ba yin no/ /zhes gsungs so/ /rang rgyud kyi sbyor ba'i sgra bshad ni/ skabs 'di'i rang rgyud dang rang dbang dang bdag dbang dang/ gzhan la rag ma las pa rnams rnam grangs yin la/ phyi rgol gyis khas blangs la rag ma las par don gyi sdod lugs nas rang dbang du grub pa'i tshul gsum gyis bsgrub bya sgrub pa'i sbyor ngag yin pas rang rgyud kyi sbyor ba zhes bshad de/ legs bshad snying po las/ phyi rgol gyi khas blangs la ma 'khris par tshad mas don gyi sdod lugs nas rang dbang du chos can gnyis dang rtags kyi tshul rnams grub tshul nges par byas nas bsgrub bya rtogs pa'i rjes dpag skyed pa zhig rang rgyud kyi don yin no/ /zhes gsungs so/ gzhan grags kyi sbyor ba ni/ dper na rtsa she'i rab byed gsum pa las/ lta de rang gi bdag nyid ni/ /de la lta ba ma yin nyid/ /gang zhig bdag la mi lta ba; ;de gzhan dag la ji ltar lta/ /zhes gsungs pa ltar/ mig chos can/ gzugs la ngo bo nyid kyis mi lta ste/ rang la mi lta ba'i phyir/ dper na bum pa bzhin/ zhes pa'i sbyor ngag lta bu la mtshon na/ de'i chos can dang rtags chos dang dpe rnams snga rgol gyis khas mi len zhing/ phyi rgol gyis khas len pa tsam yin pas gnyis ka la ma grub pa dang/ gzhan la grub pa zhes pa ma yin te/ de dag snga rgol gyis khas len pa yin kyang/ de dag rang mtshan la ma 'khrul ba'i tshad @050b mas rnyed pa ni phyi rgol kho na la grub pa yin gyi/ rgol ba gnyis ka la mthun snang du ma grub pas gnyis ka la ma grub pa dang/ gzhan la grags pa 'am gzhan la grub pa zhes bya ba yin pa'i phyir te/ lam rim chen mo las/ de la grub pa zhes pa ni chos can mig dang dpe bum pa dang rtags rang la mi blta ba dang bsgrub bya'i chos sngon po la sogs pa la mi lta ba rnams rang lugs la khas mi len zhing/ gzhan gyis khas len pa tsam yin pas rtags dang khyab pa la sogs pa pha rol po kho na la grub pa zhes bya ba ni don min no/ 'o na ji ltar yin snyam na de dag rang lugs la yang khas len mod kyang/ de dag sgrub pa'i tshad ma rang gi ngo bos grub pa'i gzhal bya 'jal ba ni rang lugs la tha snyad du yang med la/ rang bzhin yod par smra ba la de dag grub pa ni tshad ma de 'grub pa la nges par ltos pas/ gnyis ka la mthun snang du grub pa'i rang gi ngo bos grub pa 'jal ba'i tshad ma med pas gnyis ka la grub pa ma yin pa dang gzhan la grags pa'am gzhan la grub pa zhes zer ba yin no/ /zhes gsungs pa'i phyir ro/ /'di la kha cig na re/ gzhan grags kyi sbyor ba de phyi rgol gyi khas blangs la brten pa dang phyi rgol gzhan la grags pa'i tshul gsum gyis bsgrub bya sgrub par bshad pa mi 'thad de/ de sgrub kyi tshul gsum tshad mas grub na ni rgol ba gnyis ka la 'grub dgos pas phyi rgol gyi khas blangs la brten pa dang gzhan kho na la grags pa zhes bshad pa mi 'thad la/ tshad mas ma grub na ni tshad mas ma grub pa'i rgyu mtshan la @051a @#/ /brten nas bsgrub bya rtogs mi rung bas mi 'thad pa'i phyir zer na/ rtags dang po ma grub ste/ sngar bshad pa ltar de sgrub kyi tshul gsum rgol ba gnyis ka'i rgyud kyi tshad mas grub pa yin kyang/ snga rgol gyis tshul gsum de dag rigs pas sgrub pa'i tshe/ phyi rgol gyis tshul gsum de dag tshad mas grub na rang mchon la ma 'khrul ba'i tshad mas 'grub dgos par 'dod pa'i khas blangs la brten nas sgrub dgos kyi/ de dag tshad mas grub na rang mtshan snang ba la ltos te 'khrul ba'i tshad mas 'grub dgos pa'i tshul nges su bcug nas sgrub mi rung bas phyi rgol gyi khas blangs la brten pa dang gzhan la grags pa zhes bshad pa'i phyir te/ sngon la rang mtshan snang yang snang ba ltar ma grub pa'i 'khrul ba'i tshad mas 'grub dgos tshul nges su bcug nas sgrub na ni/ de'i tshe rang bzhin med par rtogs pa'i lta ba rnyed zin pas rang la mi lta ba'i rtags kyis mig de gzugs la ngo bo nyid kyis mi lta bar sgrub yul gyi phyi rgol du mi rung ba'i phyir te/ ji skad du/ lhag mthong chen mo las/ rang la mi lta na rang gi ngo bos grub pa'i rang bzhin yod par 'gal ba ni tshad mas grub pas khas blangs tsam gyis mi 'jog go/ /'o na tshad ma de pha rol po la bstan nas 'gal ba nges par byas pas chog mod/ kho'i khas blangs la brten pa ci dgos snyam na/ dngos smra pa'i ngor 'gal bsgrub byed kyi tshad mar 'grub pa ni rang gi ngo bos grub pa'i gzhal bya 'jal ba grub pa la ltos shing/ @051b de yang med na rang gis de khas blangs nas ji ltar 'gal ba sgrub/ gzhal bya la rang gi ngo bos grub pa'i rang bzhin med kyang tshad mar 'jog pa mi 'gal ba kho la grub zin nas de 'dra ba'i tshad mas sgrub na ni/ chos rnams rang bzhin med par rtogs pa'i lta ba rnyed pa yin pas/ de la rang la mi lta ba yin na rang gi ngo bos grub pa'i lta ba yod par 'gal pa yin no zhes sgrub ci dgos/ zhes gsungs pa'i phyir ro/ /sbyor ba de'i chos can mig dang rtags rang la mi lta ba dang/ dpe bum pa rnams pha rol pos khas len pas dbu ma pas de dag bsgrub mi dgos shing/ rang la mi lta ba dang sngo sogs la ngo bo nyid kyis lta ba gnyis 'gal bar sgrub dgos la/ de yang phyi rgol rang la grags ba'i 'thad pas sgrub bar tshig gsal las gsungs pa la/ kha cig na re/ de gnyis 'gal bar phyi rgol rang la grags pa'i 'thad pas sgrub par bshad pa mi 'thad de/ rang la mi lta ba dang sngo sogs la ngo bo nyid kyis lta ba gnyis 'gal bar dngos smra ba la ma grags pa'i phyir na ma khyab ste/ rang la mi lta ba yin na gzhan la ngo bo nyid kyis mi lta bas khyab pa dang/ gzhan la ngo bo nyid kyis lta na rang la yang lta bas khyab pa gnyis ni dngos smra ba la ma grags pa yin kyang/ de gnyis skabs 'di'i bsgrub bya yin gyi 'thad pa ma yin pas skyon med la/ 'thad pa ni/ sna ma'i me tog dang ldan pa'i gos la dri zhim pa dmigs pa ni sna ma'i me tog la dri zhim pa dmigs pa la ltos dgos pa ltar/ dngos po rnams la @052a @#/ /rang gi ngo bos grub pa'i rang bzhin yod na/ rang bzhin de thog mar rang la dmigs/ de nas de dang ldan pa'i chos gzhan la dmigs dgos la/ gal te rang bzhin de rang la ma dmigs na de dang ldan pa'i chos gzhan la yang med par 'gyur te/ dper na sna ma'i me tog la dring ba ma dmigs na de dang ldan pa'i gos la yang dring ba mi dmigs pa bzhin no zhes phyi rgol rang la grags pa'i 'thad pas rjes su 'gro ldog nges su bcug nas/ de nas skabs kyi don la sbyor ba ni/ de'i phyir mig la yang lta ba'i rang bzhin yod na thog mar rang la lta ba dmigs nas/ de nas gzugs sogs dang tshogs pa na de dag la lta ba yang dmigs par 'thad pa zhig na/ mig la rang la lta ba med pa'i phyir gzhan la ngo bo nyid kyis lta ba yang med do zhes ston pa yin no/ /bzhi brgya pa las/ dngos po kun gyi rang bzhin ni/ /thog mar bdag la snang 'gyur na/ /mig nyid la yang mig gis ni/ /ci yi phyir na 'dzin mi 'gyur/ zhes gsungs pa ltar ro/ /rgyas par lhag mthong chen mo las shes dgos so/ /tshig gsal las gzhan la grags pa rtags su rung bar 'jig rten pa'i rtsod pa dper byas nas gsungs pa dang/ tshul gsum sogs rgol pa gnyis kar mthun snang du grub dgos par 'dod pa'i rtog ge ba rnams kyis kyang tshul de nyid khas len dgos te/ lung gis gnod pa ni gnyis ka la grub mi dgos pa dang/ rang don skabs kyi rjes dpag ni thams cad du @052b rang la grub pa tsam gyis chog pa'i phyir ro/ /de nyid kyi phyir rtog ge'i mtshan nyid brjod pa ni dgos pa med pa yin te/ sangs rgyas rnams kyis rang la ji ltar grags pa'i 'thad pas de kho na nyid ma shes pa'i gdul ba'i skye bo la phan btags pa'i phyir ro/ /zhes gsungs so// //gnyis pa la gnyis/ phyogs snga ma brjod pa dang/ lugs de dgag pa'o/ /dang po ni/ rang sde dngos smra ba rnams na re/ mtha' gzhan gsum las skye ba dgag par rigs mod kyang/ gzhan skye 'gog pa mi rigs te/ rang gi mtshan nyid kyis gzhan du gyur pa'i rkyen bzhi dngos po rnams kyi skyed byed du gsungs pa'i gsung rab la ltos nas/ mi 'dod bzhin du yang gzhan las skye ba khas blang bar bya'o; ;rkyen bzhi po de gang la 'jog pa la/ sde ba kha cig ni mdzod las/ rgyu zhes bya ba rgyu lnga yin/ /sems dang sems byung skyes pa rnams/ /tha ma min mtshungs de ma thag /dmigs pa chos rnams thams cad do/ / byed rgyu zhes bya bdag por bshad/ /ces gsungs pa ltar 'dod la/ sde ba kha cig ni/ gang zhig gang gi skyed byed sa bon gyi ngo bor gnas pa de ni de'i rgyu rkyen no/ /rgan po ldang pa ltar sems sems byung skye bzhin pa rnams rten 'khar ba dang 'dra ba'i dmigs pa gang gis skyed pa de ni de'i dmigs rkyen no/ rgyu 'gags ma thag pa ni 'bras bu skye ba'i de ma thag rkyen te/ sa bon 'gags ma thag pa myu gu 'byung ba'i de ma thag rkyen yin pa bzhin no/ /gang zhig yod na gang @053a @#/ /'byung ba 'di ni de'i bdag rkyen no zhes 'dod do/ /tshig gsal gyi 'gyur las/ sngar skyes pa dang lhan cig skyes pa dang phyis skye ba la sogs pa/ zhes 'byung ba dang/ shes rab sgron me las/ mdun du skyes pa dang yod pa dang med pa rnams/ zhes 'byung ba ni don gcig la 'gyur yang phyi ma bzang bar gsungs shing/ de'i mdun du skyes pa'i rkyen ni dbang mngon gyi dmigs rkyen dang/ yod pa'i rkyen ni rgyu rkyen dang bdag rkyen/ med pa'i rkyen ni de ma thag rkyen te/ 'di ni gnas brtan snga bas tha snyad btags pa yin par 'grel bshad las bshad do/ /de dag kyang rkyen bzhir 'du bas rkyen lnga pa yod pa min te/ mdzod las/ bzhi yis sems dang sems byung rnams; ;gsum gyis snyoms par 'jug rnam gnyis/ /gzhan ni gnyis po dag las skye/ /dbang phyug sogs min rim sogs phyir/ /zhes bshad pa bzhin du 'dod do/ /gnyis pa la gnyis/ gzhan skye 'dod pa'i phyogs spyir dgag pa/ sems tsam ba'i lugs bye brag tu dgag pa'o/ /dang po la lnga/ gzhan skye dgag pa dngos/ bkag pa la 'jig rten gyi gnod pa spang ba/ de ltar bkag pa'i yon tan bstan pa/ rang bzhin gyis skye ba 'gar yang med par bstan pa/ bden pa gnyis char du rang bzhin gyis skye ba bkag pa'i yon tan bstan pa'o/ /dang po la gsum/ gzhan skye spyir dgag pa/ gzhan skye bye brag tu dgag pa/ 'bras bu la mu bzhir dpyad nas gzhan @053b skye 'gog pa'o/ /dang po la gnyis/ ha cang thal bas dgag pa/ skyon spong gi lan dgag pa'o/ /dang po ni/ gzhan la brten nas gal te gzhan zhig 'byung bar 'gyur na ni/ /zhes pa nas/ skyed par byed pa ma yin ma lus la yang gzhan nyid mtshungs/ /zhes tshigs bcad gcig byung/ gzhan skye 'di ni gzhag par nus pa ma yin te/ lung dang rigs pa dang 'gal ba'i phyir ro/ /dang po ni sa lu ljang ba'i mdo las/ ming dang gzugs kyi myu gu de yang bdag gis ma byas gzhan gyis ma byas zhes pa lta bu'i lung mang po dang 'gal ba'o/ /rigs pa ni/ gal te rang gi ngo bos grub pa'i rgyu gzhan la brten nas rang gi ngo bos grub pa'i 'bras bu gzhan zhig 'byung bar 'gyur na ni/ de lta yin pa 'o na sel byed me lce rab tu 'bar ba las kyang bsal bya mun pa 'thug po 'byung bar 'gyur zhing/ rgyu yin min thams cad las kyang 'bras bu'i dngos po yin min thams cad skye bar 'gyur te/ gang gi phyir 'bras bu de skyed par byed pa ma yin pa ma lus pa la'ang rgyu 'bras su 'dod pa gnyis dang/ rang gi mtshan nyid kyis grub pa'i gzhan nyid mtshungs bar yod pa'i phyir ro/ /zhes gzhan gyis khas blangs pa'i gtan tshigs la brten pa'i thal 'gyur gnyis so/ /thal 'gyur gnyis ka la bzlog pa 'phen pa 'grel bar bshad do/ /thal 'gyur de gnyis 'god tshul ni/ me lce 'bar ba las kyang mun pa 'thug bo 'byung bar thal/ rang gi ngo bos grub pa'i rgyu gzhan las rang gi ngo bos grub pa'i 'bras bu gzhan skye ba'i phyir/ @054a @#/ /rgyu yin min thams cad las kyang 'bras bu yin min thams cad skye bar thal/ rtags snga ma de'i phyir/ de gnyis kyi don bsdu na/ rgyu 'bras so sor nges pa ma yin par thal/ gzhan las skye ba yod pa'i phyir zhes pa'o/ /thal 'gyur de gnyis kyi rtags la rim pa bzhin du/ gzhan yin pa'i phyir dang/ gzhan nyid mtshungs pa yin pa'i phyir zhes lhag mthong chen mo las gsungs pa ni/ rgyu 'bras rnams rang bzhin gyis gzhan yin pa'i phyir dang/ so so pa rnams rang bzhin gyis gzhan nyid mtshungs pa yin pa'i phyir zhes pa'i don yin nam dpyad par bya'o/ /rtags phyi ma'i don ni/ sa bon myu gu las rang bzhin gyis tha dad pa'i dad tshul dang sol ba las tha dad pa'i dad tshul mtshungs pa'i don yin la/ de gnyis mtshungs na sa bon dang sol ba las myu gu skye mi skye yang mtshungs par 'gyur te/ skyed par byed pa ma yin ma lus la yang gzhan nyid mtshungs/ /zhes pa'i don no/ /gzhan skye 'dod pa la ha cang thal ba 'phen pa'i rgyu mtshan ni/ gzhan skye'i gzhan ni dngos ming tha dad kyis so sor go ba'i tha dad tsam min gyi/ rang gi ngo bos grub pa'i tha dad yin la/ der grub na myu gu de sa bon la ltos par 'gal bas 'brel ba 'gog nus la/ myu gu de 'brel med don gzhan gyi sa bon gcig las skyen thams cad las skye bar 'gyur te/ 'brel med don gzhan du mtshungs pa la rgyu 'bras yin min dbye bar mi nus pa'i phyir ro/ /'di la kha @054b cig na re/ gzhan skye yod par thal/ rgyu rkyen gzhan las skye ba yod pa'i phyir te/ rgyu rkyen gyi gzhan dbang can yod pa'i phyir na ma khyab/ rtags grub ste/ gzhan dbang yod pa'i phyir te/ mtshan nyid gsum yod pa'i phyir te/ / 'jug 'grel las/ rang lugs kyis ngo bo nyid gsum gyi rnam bzhag gis mdo 'grel tshul gsungs ba de legs bshad snying por rgyas par bkral ba'i phyir ro/ /rtsa bar 'dod mi nus te/ gzhan skye'i don dang tha snyad 'dod pa ni/ 'bras bu rang ngam gzhan las skye ba gang yin snyam du grub mtha' smra bas brtags nas byed la/ des kyang 'bras bu rang dang tha dad tsam zhig las skye mi skye'i dpyod pa byed pa min gyi/ rang gi ngo bo nyid kyis tha dad pa yin min dpyad nas rang gi mtshan nyid kyis tha dad pa'i skye ba la gzhan skye'i tha snyad byed pa'i phyir dang/ gzhan dbang gi tha snyad ni 'bras bu rang dbang du 'byung ngam snyam pa bzlog pa'i phyir rgyu rkyen gyi dbang du gyur pa tsam la mdzad pa'i phyir ro/ /don de ltar rtsa she'i TIka chen las gsungs so/ /yang kha cig na re/ gzhan skye tha snyad du yod par thal/ rgyu 'bras gnyis tha snyad du gzhan yin pa'i phyir na ma khyab ste/ rgyu 'bras gnyis gzhan no zhes brjod pa'i gzhan de ni ltos grub kyi gzhan yin la/ gzhan skye'i gzhan ni rang gi ngo bo nyid kyis gzhan la byed pa'i phyir/ dang po grub ste/ rgyu 'bras bu las gzhan yin pa de 'bras bu la ltos nas gzhan du 'jog pa yin pa'i phyir/ khyab ste/ gang zhig gang la ltos te gzhan @055a @#/ /yin pa de ni ltos pa de las ngo bo nyid kyis gzhan ma yin pas khyab pa'i phyir te/ gang zhig gang las ngo bo nyid kyis gzhan du yod na ni gzhan pa de la ltos pa med par rang gcig bu la yang gzhan no zhes tha snyad 'dogs pa yod par 'gyur dgos pa las de ni ma mthong ba'i phyir ro/ /rtsa rtags gnyis pa grub ste/ gang phyir 'jig rten sa bon tsam btab nas/ /bdag gis bu 'di bskyed ces smra byed cing/ /shing yang btsugs so snyam du rtog des na/ /gzhan las skye ba 'jig rten las kyang med/ /ces gsungs pa ltar/ sa myug lta bu'i nyer len gyi rgyu 'bras la 'jig rten pa'i blo lhan skyes kyis rang mtshan gyis gzhan du 'dzin pa mi srid pas na/ myu gu bdag las skye'am gzhan las skye zhes dpyod pa ni 'jig rten tha snyad ba'i dpyad pa ma yin gyi/ don dam la dpyod par mngon la/ de ltar na dpyod tshul des dpyad pa'i mthar rnyed pa'i gzhan skye ni don dam pa'i skye bar 'gyur ba ma gtogs tha snyad pa'i skye bar mi rung ba'i phyir ro/ /gzhan skye 'dod pa la ha cang thal ba 'phen pa'i rgyu mtshan la/ bod kha cig rgyu 'bras la snga phyi bas khyab cing/ gzhan la dus mnyam dgos pa'i gnad kyis yin zer ba dang/ yang bod mang pos/ dza ya a nantas rang rgyud 'gog pa'i rigs pa ltar snang gi rjes su 'brangs te ldog pa gcig pa'i dpung 'phul 'dod pa sogs 'gog tshul ni lhag mthong chen mo dang legs bshad snying po las shes par bya'o/ /ldog pa gcig pa'i dpung @055b 'phul zhes pa ni/ sa bon dang sol ba ni myu gu las gzhan yin pa'i ldog pa gcig pas na/ myu gu de sa bon las skye na sol ba las kyang skye dgos zhes mthu dpung gis 'phul ba ma gtogs rigs pas 'phul ba min pas de ltar brjod dam snyam ste/ rnam bshad las/ 'di ni dpung 'phul zhes pa'i ming nyid kyis rigs pa mi shes pa'i sun 'byin du gsal bar byas ste/ zhes gsungs pa'i phyir ro/ /gnyis pa la gnyis/ skyon spong gi lan/ lan de dgag pa'o/ dang po ni/ rab tu bya bar nus pa de phyir 'bras bur nges brjod cing/ zhes pa nas/ sa lu'i myu gu nas la sogs las de lta min zhe na/ /zhes tshigs bcad gcig byung/ pha rol pos/ rgyu 'bras gnyis rang mtshan gyis grub pa'i gzhan yin kyang/ thams cad las thams cad 'byung ba min te/ rgyu 'bras so sor nges pa mthong ba'i phyir ro/ /'di yang 'di yin te/ gang gi phyir 'bras bu gang zhig rgyu gang gis rab tu bya bar nus pa de nyid de yi 'bras bur nges par brjod pa yin la/ rgyu gang zhig 'bras bu de skyed par nus pa de ni ngo bos grub pa'i gzhan yin na'ang rgyu yin la/ de'i phyir rgyu 'bras so sor nges so/ /de phyir zhes pa 'grel pa dang mi mthun par rnam bshad las gsungs pas/ rab tu bya bar nus pa de nyid 'bras bur nges brjod cing/ /zhes 'don dgos so/ /gzhan yang sa lu'i myu gu ni rang dang rgyud gcig tu gtogs pas lu'i sa bon las skye'i/ rgyud mi gcig pa nas kyi sa bon sogs las mi skye'o/ /rgyud gcig yin@056a @#/ /kyang skyed byed min pa skad cig phyi mas snga ma mi skyed pas/ rgyud gcig pa'i snga mas phyi ma skyed par byed pa las skye ba de'i phyir/ sa lu'i myu gu ni nas kyi sa bon sogs las nas kyi myu gu sogs kye ba de ltar skye ba min pas thams cad las thams cad mi skye'o zhe na/ gnyis pa ni/ ji ltar nas dang gi sar dang ni keng shu ka la sogs/ zhes pa nas/ sa lu'i sa bon yang na di yi min te gzhan nyid phyir/ /zhes tshigs bcad gcig byung 'dis rang mtshan gyis gzhan yin kyang rgyu 'bras so sor nges pa mthong ba mi 'gal ba'i rgyu mtshan ma bstan pas skyon sbong gi lan min la/ so so ba rnams rang mtshan gyis gzhan yin na rgyu 'bras so sor nges par mi 'gyur ro zhes bshad pa ni/ ji ltar te dper na nas dang padma la sogs pa'i ze'u 'bru ge sar dang keng shu ka'i me tog la sogs pa rnams gzhan yin pa'i phyir/ sa lu'i myu gu'i skyed par byed par 'dod pa min pa dang/ de skyed pa'i nus pa dang ldan pa min pa dang/ de dang rgyud gcig tu gtogs pa min pa dang/ de'i rigs 'dra ba'i snga ma ma yin pa de bzhin du/ sa lu'i sa bon yang sa lu'i myu gu de la ltos pa'i khyad par bzhi dang ldan pa min te/ rang gi ngo bo nyid kyis grub pa'i gzhan yin pa'i phyir/ khyab ste/ 'brel med don gzhan du mtshungs pa la khyad par bzhi yod med kyang gzhag par mi nus pa'i phyir ro/ /gnyis pa la gnyis/ rgyu 'bras snga phyi ba la gzhan skye dgag pa/ rgyu 'bras dus mnyam pa la gzhan skye dgag pa'o/ @056b dang po la gnyis/ dngos kyi don dang/ bkag pa la rtsod pa spang ba'o/ /dang po ni/ myu gu sa bon dang ni dus mnyam yod pa ma yin te/ /zhes pa nas/ gzhan las skye ba yin zhes bya ba'i phyogs 'di btang bar byos/ zhes tshigs bcad gcig byung/ de ltar re zhig gzhan la grags pa'i rang gi ngo bos grub pa'i gzhan grub grub ltar brjod nas sun 'byin byas so/ /da ni rgyu 'bras gnyis la ngo bos grub pa'i gzhan mi srid par bshad pa/ 'di na byams pa dang nyer sbas yod bzhin pa dag kho na phan tshun ltos nas 'di ni 'di las zhes gzhan nyid du mthong gi myu gu sa bon dang ni dus mnyam du yod pa ma yin te/ sa bon rnam par ma 'gyur bar myu gu skye ba med pa'i phyir ro/ /sa bon la myu gu las ngo bos grub pa'i gzhan nyid med la/ de med par sa bon myu gu las gzhan pa nyid du gal 'gyur te mi 'gyur ro/ /ngo bos grub pa'i gzhan nyid med pa des na myu gu sa bon las skyes pa ngo bo nyid kyis 'grub par 'gyur ba min pas/ dngos po rnams gzhan las skye ba yin zhes bya ba'i phyogs 'di gtang bar byos shig /'di ni sa bon myu gu las tha dad pa de rang bzhin gyis grub pa yin na/ rang bzhin gyis grub pa la dus nam yang ldog pa med pas/ sa bon gyi dus na'ang myu gu las rdzas tha dad du 'gyur la/ de ltar na de gnyis dus mnyam du 'gyur ba las de med pa'i phyir/ de gnyis la ngo bo nyid kyis grub pa'i gzhan med ces ston pa yin gyi/ rgyu 'bras gnyis tha snyad du ngo bo tha dad du 'dod pa 'gog pa min no/ gnyis @057a @#/ /pa ni/ ji ltar srang gi mda' gnyis ma tho ba dang ni dma' ba dag ces pa nas/ skye ba 'di ni byed po med par rig pa'i ngo bo'ang min/ zhes tshigs bcad gnyis byung/ myu gu sa bon dang ni dus mnyam yod pa ma yin te/ zhes smras pa ni rigs pa ma yin te/ ji ltar te dper na srang gi mda' gnyis kyi gcig mtho ba dang gcig shos dma' ba dag dus mnyam ma yin par min pa ste dus mnyam par mthong ba de bzhin du/ bskyed par bya ba myu gu dang skyed byed sa bon dag gi rim pa bzhin du skye ba dang 'gag pa'i bya ba gnyis dus gcig yin pa'i phyir/ sa myug gnyis kyang dus mnyam par 'gyur ro/ /de'i phyir gzhan nyid yod pas nyes pa med do zhe na/ srang gi dpes sa myug gnyis skye 'jig gi bya ba gnyis dus gcig tu rang bzhin gyis yod par rtog na de ni mi rung ste/ gal te srang gi dper mgo mjug gnyis dus gcig yin pas mtho dman gyi bya ba gnyis gcig tshe ste dus gcig yin na yang/ dpes mtshon ba'i don dngos 'dir ni sa myug dus gcig pa med pas na bya ba gnyis po de dus gcig tu rang bzhin gyis yod pa min no/ /sa myug dus gcig tu ji ltar med ce na/ gal te skye bzhin pa zhes pa de ni da ltar skye ba la mngon du phyogs pa yin pas/ myu gu'i ngo bor ma 'ongs pa'i phyir da ltar yod pa min zhing/ 'gag bzhin pa ni yod kyang 'jig pa la mngon du phyogs par gyur pa'i phyir da ltar yod pa'o/ /gang gi tshe myu gu skye ba la mngon du @057b phyogs pa'i dus su sa bon da ltar ba dang myu gu ma 'ongs pa yin pa de'i tshe/ sa myug gnyis po 'di ni ji lta bur na srang gi mtho dman gnyis dang mtshungs pa yin te min no/ /srang gi mgo mjug gnyis ni da ltar ba yin pa'i phyir/ de'i mtho dman gyi bya ba gnyis kyang dus gcig tu yod gyi/ sa myug gnyis la ni dus gcig pa med pa'i phyir ro/ /skyon gzhan yang yod de/ skye ba'i bya ba la ltos pa'i byed pa po myu gu ni skye ba la phyogs pa'i dus su ma 'ongs pa yin pas dus der yod pa ma yin no/ /dus der de med na rten byed pa po myu gu med par brten pa skye ba'i bya ba 'di ni rang bzhin gyis yod par rigs pa'i ngo bo'ang min pas 'gag pa'i bya ba dang dus gcig par med pa'i phyir/ rang mtshan gyis grub pa'i bya ba gnyis dus gcig par mi rigs so/ /gal te sa lu ljang ba'i mdo las/ srang mda'i mtho dman gyi tshul du skad cig gang kho na la sa bon 'gag pa de nyid la myu gu skye'o/ /zhes sa myug gi skye 'jig gi bya ba gnyis dus gcig par gsungs pas na bya ba gnyis dus gcig pa 'gog par mi rigs so zhe na/ de ni tha snyad pa'i bya ba gnyis dus gcig par gsungs pa yin la/ skabs 'dir rang mtshan gyis grub pa'i bya ba gnyis dus gcig ba 'gog pa yin pas skyon med do// ji skad du rnam bshad las/ de la skye ba 'dod phyin chad rgyu 'gag pa dang 'bras bu skye ba la mngon du phyogs pa gnyis dus mnyam ba cig dgos so/ /de ni skye ba tsam dang tha snyad du skye ba khas len pa la mi rigs pa med kyang/ don dam pa dang @058a @#/ /rang gi mtshan nyid kyis skye ba khas len pa la 'gal ba yin te/ snga ma la ni rgyu 'bras kyi skye 'gag gi bya ba gnyis dus mnyam yang rgyu 'bras gnyis dus mnyam mi dgos la/ phyi ma la ni bya ba dus mnyam na rgyu 'bras kyang dus mnyam dgos pa'i phyir ro/ /zhes gsungs so/ /phyi ma la bya ba dus mnyam na rgyu 'bras kyang dus mnyam dgos pa ni/ rang bzhin gyis yod na rang bzhin gzhan du mi 'gyur bas dus thams cad du yod dgos pa'i rgyu mtshan gyis yin te/ de nyid las/ 'di ltar 'bras bu skye ba'i bya ba ni 'di skye zhes pa'i byed pa bo myu gu sogs la brten dgos pas rten dang brten pa'o/ /rten brten pa don dam par grub na ni rang bzhin gzhan du 'gyur ba mi 'thad pas/ dus nam gyi tshe yang bya ba brten dgos pas myu gu sogs skye ba la phyogs pa'i dus su yang/ skye ba'i bya ba'i rten du myu gu yod dgos pas rgyu 'bras gnyis dus mnyam du 'gyur ba sogs kyis gnod pas mi 'thad do/ / tha snyad pa'i skye ba la lan gcig rten brten par song na dus thams cad du 'gro mi dgos pas mi mtshungs so/ zhes gsungs pa'i phyir ro/ /'di la kha cig na re/ myu gu rten dang myu gu skye ba la phyogs pa'i bya ba brten par bshad pa mi 'thad de/ myu gu skye ba la phyogs pa'i bya ba de myu gu'i rgyu dang/ myu gu de bya ba de'i 'bras bu yin pa'i phyir na ma khyab ste/ rgyu 'bras kyi dbang du byas na rgyu rten dang 'bras bu brten par bshad pa yod kyang/ skabs 'di'i rten dang brten pa ni bya byed kyi dbang du byas @058b pa'i rten brten pa yin pas mi 'gal ba'i phyir te/ rtsa she'i TIka chen las/ skye ba la mngon du phyogs pa'i dus kyi skye ba'i bya ba 'bras bu'i rgyu yin kyang/ spyir skye ba'i bya ba 'bras bu dang bya byed kyi rten brten par bshad pa mi 'gal te/ dung gi mi rtag pas dud sgra skyed kyang/ dung sgra dang mi rtag brten brten brten par mi 'gal ba bzhin no/ /zhes gsungs pa'i phyir/ 'dod mi nus te/ rnam bshad las/ sa bon dang dus mnyam pa'i myu gu skye ba'i bya ba ni myu gu skye ba la phyogs pa'i bya ba yin la/ de dang myu gu gnyis spyir rten brten pa yin pa dang/ bya ba de'i dus su myu gu med kyang bya ba yod pa mi 'gal ba ni/ dper na spyir 'brel yul khegs na 'brel bo ldog pa dang/ sa bon 'brel yul dang myu gu 'brel bo yin pa dang; myu gu'i dus na sa bon log kyang myu gu mi ldog pa mi 'gal ba bzhin no/ /zhes gsungs pa'i phyir ro/ /gnyis pa ni/ gal te mig gi blo la rang gi skyed byed dus gcig pa/ zhes pa nas/ ci ste de med ce na 'di la nyes pa bshad zin to/ /zhes tshigs bcad gcig byung/ 'dir smras pa/ sa myug dus mnyam pa med pas ngo bo nyid kyis gzhan nyid med ba'i phyir gzhan las skye ba mi rigs na/ rgyu 'bras dus mnyam pa yod pa der gzhan nyid yod pas gzhan skye yod de/ dper na mig gi rnam shes dang de dang dus mnyam pa'i tshor ba la sogs pa rnams phan tshun rkyen yin pa lta bu'o zhe na/ gal te mig gi blo ste rnam shes la rang gi skyed byed rang dang dus gcig pa mig la sogs pa dang/ lhan cig 'byung ba'i 'du shes la sogs pa rnams @059a @#/ /rkyen nyid du rtog na/ de'i tshe 'du shes sogs la ltos nas gzhan nyid yod du chug kyang/ rgyu dus nas yod pa la slar yang 'byung bas dgos pa ci zhig yod de cung zad kyang med pas skye ba med do/ /ci ste skye ba med pa'i skyon spang bar 'dod nas rgyu dus su 'bras bu de med do zhe na/ de'i tshe snga phyi ba 'di la ngo bos grub pa'i gzhan med pa'i nyes pa sngar bshad zin to/ /de ltar na rigs pa 'dis ni rgyu 'bras su 'dod pa la gzhan nyid yod kyang/ rang bzhin gyis skye ba mi srid bas gzhan skye med pa dang/ rigs pa snga mas ni rgyu 'bras la skye ba yod kyang/ rang bzhin gyis gzhan yin pa mi srid pas gzhan skye med par ston no/ /gsum pa ni/ skyed par byed pa bskyed bya gzhan skyed pa de rgyu yin na/ /zhes pa nas/ gnyis nyid la des ci bya gnyis dang bral la'ang des ci bya/ /zhes tshigs bcad gcig byung/ skyed par byed pa bskyed bya rang las gzhan skyed pa de rgyu yin na/ rgyu des 'bras bu rang bzhin gyis yod pa'am/ 'on te med pa dang/ yod med gnyis ka dang/ yod med gnyis ka dang bral ba zhig bskyed grang ste brtag go /de la re zhig 'bras bu rang bzhin gyis yod na de la skyed byed kyi rkyen ci zhig dgos te mi dgos te/ rang bzhin gyis yod pa skye na skyes zin slar yang skye bar 'gyur ba'i phyir ro/ /'bras bu med pa la'ang rkyen des ci zhig bya ste/ bong bu'i rwa ltar med pa'i phyir ro/ /yod med gnyis ka tshogs pa nyid la rkyen des ci zhig bya ste/ de gnyis tshogs pa mi srid pa'i phyir ro/ /yod @059b med gnyis ka dang bral ba de la'ang rkyen des ci zhig bya ste/ de gnyis gang yang min pa mi srid pa'i phyir ro/ /'dir kha cig na re/ rang rgyud pas gzhan skye tha snyad du yod par mi 'dod par thal/ des mtha' bzhi gang rung las skye ba mi 'dod pa'i phyir na ma khyab ste/ rang rgyud pa'i lugs la mtha' bzhi'i nang gi gzhan skye ni mu stegs pas sgro btags pa'i gzhan nyid ces bya ba'i don gzhan las skye ba la byed pa'i phyir te/ /dbu ma snang ba las/ tha snyad du ni gzhan nyid tsam grub pa'i phyir gtan tshigs ma grub pa nyid kyang ma yin te/ gtan tshigs la sogs pa yang dag pa'i dngos por gyur pas/ zhes pa nas/ mu stegs can rnams rgyu gzhan la sogs pa'i tha snyad kyi rgyu dngos su gzhan nyid la sogs pa'i dngos po de lta yin pa kho nar brjod pa de dag la slob dpon gyis/ dngos po rnams kyi rang bzhin i/ /rkyen la sogs par yod ma yin/ /zhes bya ba la sogs pa sun dbyung ba bshad de/ de'i phyir de'i gzhung lugs kyis gzhan nyid ma grub pas gzhan las mi skye'o zhes bstan par 'gyur ro/ /zhes tha snyad du gzhan skye yod pa dang/ mu stegs pas sgro btags pa'i gzhan nyid las mi skye bar sgrub pa yin par gsal bar bshad pa'i phyir ro/ /gzhan nyid ces bya ba 'di ni bum pa de ka ba las gzhan no snyam du 'dzin pa'i shes pa skye ba'i rgyu dang/ de ltar 'dzin pa'i shes pa'i snang yul du gyur pa bum pa'i chos bum pa las rdzas gzhan du gyur pa zhig yod par mu stegs bye brag pas 'dod pa de'o/ /gnyis pa la @060a @#/ /gnyis; 'jig rten grags pas gzhan skye khas blangs nas 'jig rten gyi gnod pa spang ba/ 'jig rten gyi tha snyad du yang gzhan skye med pas 'jig rten gyi gnod pa spang ba'o/ /dang po la gnyis/ 'jig rten gyis gnod pa'i rtsod pa dang/ des mi gnod pa'i lan bstan pa'o/ /dang po ni/ gang gis rang lta la gnas 'jig rten tshad mar 'dod pas na/ zhes pa nas/ des na gzhan las skye yod 'dir ni rigs ba ci zhig dgos/ / zhes tshigs bcad gcig byung/ gang gis 'jig rten pa thams cad rang gi lta ba kho na la gnas nas/ 'jig rten gyi mthong ba tshad mar 'dod pas na shin tu stobs dang ldan zhing/ ngo bo nyid kyis grub pa'i rgyu gzhan las 'bras bu gzhan 'byung ba yang 'jig rten pa rnams kyis mngon sum du rtogs par 'gyur te/ rigs pa'i 'thad pa yang mngon sum du gyur ma gyur gnyis las gnyis pa la 'god pa yin la/ dang po ni mngon sum tshad mas grub pa'i phyir de la 'thad pa 'god pa ma yin no/ /de'i phyir 'dir ni gzhan skye yod par sgrub pa'i rigs pa gzhan smras pa nyid kyis lta ko ci zhig bya/ des na gzhan skye sgrub byed kyi 'thad pa gzhan med par yang dngos po rnams gzhan las skye ba 'grub pas/ gzhan las skye ba yod pa 'dir ni rigs pa gzhan bstan pas dgos pa ci zhig yod de med de/ mngon sum gyis grub pa'i phyir ro zhe na/ gnyis pa ni/ gang zhig gsung rab kyi don phyin ci ma log par ma rtogs shing/ thog ma @060b med pa nas dngos po la bden par zhen pa/ 'bral bar byed pa'i thabs rang bzhin med pa'i tshul yang dang yang du thos pa dang bral ba/ 'jig rten gyi gnod pa'i rlab rdol la brten pa 'di ni/ 'jig rten gyi byung tshul mang po cig ma bshad par 'jig rten gyi gnod pa'i rlab rdol las bzlog par mi nus pas/ yul 'di 'dra ba zhig la 'jig rten gyis gnod do zhes de'i gnod yul khyad par can dang/ yul 'di 'dra ba la 'jig rten gyis mi gnod do zhes mi gnod pa'i yul khyad par can bstan dgos so/ /de la bden pa gnyis kyi rnam dbye bstan pa sngon du 'gro ba dgos pa la lnga/ bden pa gnyis kyi spyi'i rnam gzhag /skabs kyi don la sbyar ba/ bden gnyis so so'i ngo bo bshad pa/ bkag pa la 'jig rten gyis gnod pa la gnod byed bstan pa/ 'jig rten gyis gnod pa'i gnod tshul bstan pa'o/ /dang po la gsum/ bden pa gnyis su dbye bas chos rnams la ngo bo gnyis gnyis yod par brjod pa/ 'jig rten la ltos te kun rdzob kyi dbye ba bshad pa/ zhen yul la 'khrul ba'i zhen yul tha snyad du yang med par bstan pa'o/ /dang po ni/ dngos kun yang dag brdzun pa mthong ba yis/ zhes pa nas/ mthong ba brdzun pa kun rdzob bden par gsungs/ /zhes tshigs bcad gcig byung/ bcom ldan 'das kyis phyi nang gi dngos po kun gyi rang gi ngo bo rnam pa gnyis ni 'dzin par 'gyur bar nye bar bstan te/ yang dag pa'i don mngon sum du mthong ba rnams kyi ji lta ba 'jal @061a @#/ /ba'i (ye shes kyi yul nyid kyis bdag gi rang gi ngo bo rnyed pa dang/ so so skye bo ma rig pa'i rab rib kyi ling tog gis blo'i mig ma lus par khebs pa rnams kyis brdzun pa mthong ba'i stobs las bdag gi ngo bo yod pa rnyed pa'o/ /ngo bo de gnyis las kyang/ yang dag pa'i don mthong ba ste 'jal ba'i) rigs shes kyis rnyed pa'i yul gang yin pa de ni/ de nyid de don dam pa'i bden pa dang/ shes bya brdzun pa mthong ba tha snyad pa'i tshad mas rnyed pa ni kun rdzob kyi bden par ston pas gsungs so/ / shes bya ni bden gnyis kyi dbye gzhi dang/ de la kun rdzob dang don dam pa'i bden pa gnyis su 'byed pa ni dbye ba'i ngo bo'o/ /phye ba'i don ni ngo bo gcig la ldog pa tha dad de/ byas pa mi rtag pa lta bu'o/ /phye ba so so'i ngos 'dzin ni sngar bshad zin pa dang 'chad par 'gyur ba ltar ro/ /spyod 'jug las/ don dam blo yi spyod yul min/ /blo ni kun rdzob yin par brjod/ /ces pa'i don yod de/ don dam pa'i bden pa ni gnyis snang can gyi blo'i mngon sum gyi spyod yul ma yin pa'i chos dang/ gnyis snang can gyi blo'i mngon sum gyi spyod yul du gyur pa'i chos ni kun rdzob kyi bden pa'i ngo bo yin zhes pa'i don yin pa'i phyir ro/ /'di yang yab sras mjal pa'i mdo bslab btus su drangs pa las de la kun rdzob ni 'jig rten gyi spyod par de bzhin gshegs pas gzigs so/ /don dam pa gang yin pa de ni brjod du med pa ste/ shes par bya ba ma yin pa/ rnam par shes par bya ba ma yin pa/ yongs su shes par bya ba ma yin pa/ ma bstan pa/ zhes sogs gsungs pa'i don spyod 'jug tu bkod pa yin par gsungs te/ don dam bden pa shes bya ma yin par bshad pa'i don ni gnyis snang can gyi blos mngon sum du shes par bya ba ma yin pa'i don no/ / @061b gnyis pa ni/ mthong ba brdzun pa'ang rnam pa gnyis 'dod de/ zhes pa nas/ 'jig rten nyid las log par rnam par gzhag /ces tshigs bcad gnyis byung/ shes bya la bden pa gnyis su phye bar ma zad brdzun pa mthong ba'i yul can la'ang 'jig rten pa'i shes pa la ltos te yang dag pa dang log pa gnyis su 'dod de/ dbang po gsal ba ste 'phral gyi 'khrul rgyus ma bslad pa'i dbang po dang/ de la brten pa'i shes pa dang/ dbang po skyon ldan te 'phral gyi 'khrul rgyus bslad pa'i yul can gnyis so/ /de la skyon dang ldan pa'i dbang po can rnams kyi bslad pa'i shes pa ni/ dbang po legs par gyur pa ste 'phral gyi 'khrul rgyus ma bslad pa'i shes pa la ltos nas log pa'i shes par 'dod cing/ snga ma ni yul phyin ci ma log pa 'dzin par 'dod do/ /'phral gyi 'khrul rgyu'i gnod pa med par dbang po drug gi shes pa rnams kyis gzung bar bya ba'i don gang zhig 'jig rten gyis rtogs pa de ni/ 'jig rten nyid de/ kho na las bden pa ste yang dag pa yin gyi/ dbu ma'i lugs la yul de dag bden pa dang yang dag par 'jog pa ni min no/ lhag ma ste gzugs brnyan la sogs pa gang zhig dbang po rnams la gnod pa yod pa na yul du snang ba de ni/ 'jig rten nyid la ltos nas log par rnam par gzhag go /nyid kyi sgras ni shes pa de rnams 'khrul bar 'jog pa la ni/ tha snyad pa'i tshad ma nyid kyis chog gi rigs shes la mi ltos par ston pa'o/ /de@062a @#/ /la dbang po la gnod pa'i rkyen nang na yod pa ni rab rib dang mig ser la sogs pa dang da dur zos pa la sogs pa'o/ /phyi na yod pa ni me long dang brag phug la sogs pa nas sgra brjod pa dang/ sos ka'i nyi ma'i 'od zer bye ma skya bo'i yul dang nye bar gyur pa la sogs pa'o/ de bzhin du mig 'phrul mkhan la sogs pas sbyar ba'i sngags dang sman la sogs pa yang shes par bya'o/ /yid kyi dbang po'i gnod pa ni sngags dang sman la sogs pa de dag dang grub mtha' log pa dang gtan tshigs ltar snang dang gnyid kyi gnod pa sogs yin par gsungs so/ /'di la kha cig na re/ gzugs sogs don lnga chos can/ 'jig rten pa'i shes pa'i ngor yang dag kun rdzob yin par thal/ 'jig rten pa'i shes pa la ltos ste yang dag kun rdzob yin pa'i phyir na 'gal khyab yin te/ 'jig rten pa'i shes pa'i ngor yang dag kun rdzob med pa'i phyir te/ shes pa'i ngor yang dag kun rdzob med pa'i phyir te/ yang dag kun rdzob med pa'i phyir ro; ;yang kha cig na re/ 'jig rten pa'i shes pa'i ngor yang dag yod par thal/ shes pa'i ngor yang dag yod pa'i phyir na 'gal khyab/ rtags grub ste/ rigs shes kyi ngor yang dag yod pa'i phyir te/ de'i ngor yang dag pa'i don yod pa'i phyir te/ yang dag mthong yul gang de de nyid de/ /mthong ba brdzun pa kun rdzob bden par gsungs/ /zhes dang/ legs bshad snying po las/ shes bya yang dag pa mthong ba dang shes bya brdzun pa ste log pa @062b mthong ba'i shes pas rnyed pa gnyis bden gnyis kyi don du gsungs pa'i/ zhes gsungs pa'i phyir ro/ /rtsa bar 'dod mi nus ste/ 'jig rten pa'i shes pa'i ngor bden pa med pa'i phyir/ khyab ste/ yang dag pa dang bden pa gnyis don gcig /log pa dang brdzun pa gnyis don gcig pa'i phyir/ ma khyab mtshams kyi rtags grub ste/ tha snyad ba'i shes pa'i ngor bden pa med pa'i phyir ro/ /yang kha cig na re/ gzugs 'dzin dbang mngon chos can; 'jig rten pa'i shes pa'i ngor yul can yang dag yin par thal/ 'jig rten pa'i shes pa la ltos te yul can yang dag yin pa'i phyir na ma khyab/ rtags grub ste/ de ni rigs shes la ltos te yul can log pa yin kyang/ tha snyad pa'i shes pa la ltos te yul can yang dag yin pa'i khyad par 'thad pa'i phyir te/ de ni rigs shes la ltos te 'khrul shes dad tha snyad pa'i shes pa la ltos te 'khrul shes ma yin pa'i khyad par 'thad pa'i phyir te/ lam rim chen mo las; dbang po'i shes pa rnams tha snyad du gzugs sgra la sogs pa'i yul rnams rnam par 'jog pa'i tshad mar mi 'thad pa med de/ de rnams 'khrul bar 'jog pa'i rgyu mtshan snang ba ltar gyi rang gi mtshan nyid kyis grub pa'i don med pa ni; rang bzhin yod med dpyod pa'i rigs pa'i shes pas 'grub pa yin gyi tha snyad pa'i tshad mas gtan mi 'grub pas tha snyad pa'i shes pa la ltos te 'khrul ba ma yin no/ /zhes gsungs pa'i phyir ro/ /rtsa bar 'dod mi nus te/ gzugs @063a @#/ /'dzin dbang mngon de tha snyad pa'i shes pa'i ngor yul can yang dag ma yin pa'i phyir te/ de tha snyad pa'i tshad ma'i ngor yul can yang dag ma yin pa'i phyir te/ de yul can yang dag ma yin pa'i phyir te/ de yul can log pa yin pa'i phyir te/ /de shes pa phyin ci log yin pa'i phyir te/ tshig gsal las/ phyin ci log dang phyin ci ma log pa dag ni tha dad pa nyid do/ zhes pa'i skabs kyi lhag mthong chen mo las/ de la phyin ci log ces pa ni mig la sogs pa'i shes pa tha snyad pa ma rig pas bslad pa rnams so/ /zhes gsungs pa'i phyir ro/ /yang kha cig na re/ 'jig rten pa'i shes pa'i ngor yang dag med par bshad pa mi 'thad de/ 'jig rten pa'i shes pa'i ngor gzugs sogs don lnga yang dag yin pa'i phyir te/ gzugs bden par 'dzin pa'i blo'i ngor gzugs yang dag yin pa'i phyir na ma khyab/ 'o na khyod rang la/ log shes kyi ngor yod na shes pa'i ngor yod pas khyab par thal/ dam bca' 'thad pa'i phyir/ 'dod na/ log shes kyi yul yin na shes pa'i yul yin pas khyab par thal/ 'dod pa'i phyir/ 'dod na/ ri bong rwa chos can/ der thal/ de'i phyir 'dod na/ de chos can/ blo'i yul yin par thal/ shes pa'i yul yin pa'i phyir/ 'dod na/ yul yin par thal lo/ gzhan yang/ 'jig rten pa'i shes pa la ltos te yang log gi dbye ba yod ces pa ni/ 'jig @063b rten pa'i shes pa'i ngor yang log gi dbye ba yod ces pa gtan min te/ dper na grong gi mi gnyis lha khang gi ri mo la bltas nas/ gcig na re/ lag na 'khor lo thogs pa'i lha ni dbang phyug dang/ lag na rtse gsum thogs pa'i lha ni khyab 'jug yin zhes smras pa dang/ cig shos na re/ 'khor lo thogs pa ni khyab 'jug dang/ rtse gsum thogs pa ni dbang phyug yin zhes smras te phan tshun brtsad nas/ nye 'khor na gnas pa'i kun tu rgyu zhig la dris pa na/ kun tu rgyu des/ 'di na lha de gnyis med/ 'di dag ri mo yin no zhes mi brjod par/ dri ba po'i bsam pa la ltos te dang pos smras pa ltar mi bden la gnyis pas smras pa ltar bden no zhes bden brdzun gyi khyad par phye ba bzhin yin pa'i phyir/ khyab ste/ dri lan byed pa po'i bsam pa la ltos te de gnyis la bden brdzun gyi khyad par yod pa ma gtogs/ dri lan byed pa po'i shes ngor de gnyis la bden brdzun gyi khyad par med pa'i phyir te/ de dag dri lan byed pa po'i shes pa'i ngor lha dngos gnas pa ma yin par mtshungs pa'i phyir ro/ /byas pa la kho na re/ 'jig rten pa'i shes pa'i ngor yang log gi dbye ba yod par thal/ de ltar yod par stong thun las bshad pa ltar dbu ma'i yig char yang bshad pa'i phyir na ma khyab/ rtags grub ste/ stong thun las/ 'jig rten gyi shes ngo na yang log gi dbye ba gnyis yod kyang/ 'jig rten gyi shes ngon yod pa'i dbye ba de thal 'gyur ba rang lugs la khas mi len ces bya ba'i don yin gyi/ zhes dang/ @064a @#/ /'jig rten gyi shes ngo na yang log gnyis kyi dbye ba yod ces pa yang/ 'jig rten pa'i blo lhan skyes rang dga' bas yang log gnyis kyi dbye ba byed pa'i don yin gyi/ 'jig rten pa'i tha snyad pa'i tshad mas yang log gnyis su dbye ba byed pa gtan ma yin te/ tshad mas grub pa'i don du khas blangs nas rang lugs la khas mi len no zhes smra ba ni rigs pa smra ba'i tshul las 'das pa go bar byed pa'i phyir dang/ gzugs sogs rnams 'jig rten pa'i blo gang gi 'dzin stangs kyi ngo na yang dag par grub pa'i blo ni bden 'dzin yin pas tshad mar mi rung ba'i phyir ro/ /zhes dang/ 'jig rten pa'i shes ngo na yang dag dang log pa gnyis su dbye ba yod do zhes gsungs kyi/ 'jig rten gyi shes ngo na yang dag kun rdzob dang log pa'i kun rdzob gnyis kyi dbye ba yod do zhes dpal ldan zla bas gang du yang ma gsungs la/ bdag gi bla ma yang mi bzhed cing/ gtan nas khas blang du mi rung ste/ 'jig rten pa'i blo rang dga' ba'i don ka bum sogs kun rdzob ma yin pa'i phyir dang/ blo gang gi ngo la ltos nas bden par 'jog pa'i blo de'i ngo la ltos nas brdzun par 'jog pa ha cang thal ba'i phyir ro/ /zhes kyang gsungs ba'i phyir dang/ yig char yang phal cher 'di dang 'dra bar bshad pa'i phyir ro/ /gsung de dag ni paNDi tas mnyam par ma bzhag pa'i tshig la dpyad pa byed dgos par gser 'phreng las gsungs pa ltar yin nam/ yang na bshad pa'i rnam grangs la de ltar yang bshad du rung ngam snyam pa ma @064b gtogs/ rje bdag nyid chen po'i legs bshad rnams dang sgras zin mthun par khas len du mi rung ste/ tshig gsal dang rtsa 'jug gi rnam bshad chen mo gnyis dang/ lam rim che chung dang legs bshad snying po rnams su 'jig rten pa'i shes pa la ltos nas yang log gi dbye ba yod ces pa ma gtogs/ 'jig rten pa'i shes ba'i don yang log gi dbye ba yod ces zur tsam yang ma gsungs pa'i phyir dang/ shes pa gang la ltos nas kun rdzob pa'i don la yang log gnyis su dbyer yod pa'i shes pa ni yin tshul la ji ltar yin mi dpyod pa'i tha snyad pa'i tshad ma yin gyi/ tshad min gyi shes pa ma yin pa'i phyir dang/ 'jig rten pa'i shes pa gang la ltos nas gzugs sogs yang dag dang gzugs brnyan sogs log par 'jog pa'i shes pa de gnyis ka tha snyad pa'i tshad ma yin gyi/ gang la ltos nas gzugs sogs yang dag par 'jog pa'i shes pa de bden 'dzin ma yin pa'i phyir dang/ 'jig rten pa'am tha snyad pa'i tshad ma la ltos nas yang log gi dbye ba yod par ma zad/ de la ltos nas yang dag kun rdzob dang log pa'i kun rdzob gnyis su yang dbyer yod par rje bdag nyid chen pos gsal bar gsungs pa'i phyir/ rtags dang po grub ste/ lam rim chung ngu las/ thal 'gyur ba'i lugs kyis ni/ 'phral gyi 'khrul rgyus ma bslad pa'i shes pa drug dang/ de las bzlog pa'i shes pa drug dang/ shes pa snga ma drug gis bzung ba'i yul drug dang/ phyi ma drug gis bzung ba'i yul drug te/ log pa'i yul yul can drug log pa'i kun rdzob dang/ @065a @#/ /ma log pa'i yul yul can drug yang dag kun rdzob tu 'jog la/ de yang 'jig rten pa'am tha snyad pa'i tshad ma nyid la ltos nas yang dag dang log pa'i kun rdzob tu 'jog gi /'phags pa'i gzigs pa'i rjes su 'brang ba'i rigs shes la ltos nas min pas/ dbu ma pa rang gi lugs la ma rig pa dang ldan pa la gzugs brnyan sogs dang sngo sogs snang ba gnyis la snang yul la ltos te 'khrul ma 'khrul gnyis med pa'i phyir/ yang dag dang log pa'i kun rdzob gnyis su mi byed de zhes gsungs pa'i phyir dang/ gzhung gzhan rnams su yang tshig mi 'dra ba tsam ma gtogs dgongs don de kho na bzhin du gsungs pa'i phyir dang/ 'jig rten gyi shes ngor yang log gnyis kyi dbye ba yod ces ma gsungs pa ni gzhung de rnams su zhib tu bltas na gsal ba'i phyir ro/ /rtsa rtags gnyis pa grub ste/ gang la ltos nas gzugs 'dzin mig shes yul can yang dag dang/ gzugs brnyan 'dzin pa'i mig shes yul can log par 'jog pa'i shes pa la tha snyad pa'i tshad ma yod pa gang zhig /gang la ltos nas gzugs yul yang dag dang/ gzugs brnyan yul log bar 'jog pa'i shes pa la tha snyad pa'i tshad ma yod pa'i phyir/ dang po grub ste/ gzugs 'dzin mig shes kyi snang ba dang rjes su mthun pa'i don yod par rtogs pa'i tshad ma de gang la ltos nas gzugs 'dzin mig shes yul can yang dag par 'jog pa'i shes pa yin pa dang/ gzugs brnyan 'dzin pa'i mig shes kyi snang ba dang rjes su mthun pa'i @065b don med par rtogs pa'i tshad ma de/ gang la ltos nas gzugs brnyan 'dzin pa'i mig shes yul can log par 'jog pa'i shes pa yin pa'i phyir te/ mig shes de gnyis kyi snang ba dang rjes su mthun pa'i don yod med ni mig shes de gnyis 'jig rten pa'i shes pa la ltos nas yul can yang log tu 'jog pa'i sgrub byed yin pa'i phyir te/ lam rim chen mo las/ dbang shes rnams snang ba la 'khrul bar 'dra yang 'jig rten pa'i ngor snang ba dang rjes su mthun pa'i don yod pa dang med pa'i sgo nas/ gzugs brnyan sogs snang ba'i dbang shes rnams log pa'i kun rdzob yin la/ de las gzhan pa'i dbang shes gnod med rnams yang dag kun rdzob yin no/ /zhes gsungs pa'i phyir/ gnyis pa grub ste/ gzugs dang gzugs brnyan gnyis kyang rim pa bzhin du tshad ma de gnyis la ltos nas yul mang log tu 'jog dgos pa'i phyir te/ tha snyad pa'i shes pa rnams rigs shes la ltos te 'khrul bar 'jog na kun rdzob rnams rigs shes la ltos te yul phyin ci log tu 'jog dgos pa bzhin yin pa'i phyir dang/ lam rim chung ngu las/ 'jig rten pa'am tha snyad pa'i tshad ma nyid la ltos nas yang dag dang log pa'i kun rdzob tu 'jog gi zhes gsungs pa'i phyir/ khyab ste/ 'di ni yang dag 'jig rten pa dang log pa tha snyad pa'i tshad ma la ltos nas 'jog ces so sor sbyor mi rung ba'i phyir te/ de ltar so sor sbyar na'am zhes 'dam ka can gyi tshig smos pa don med du 'gyur ba'i phyir ro/ /rtsa ba'i rtags gsum pa grub ste/ gzugs sogs 'jig rten pa'i shes pa la ltos @066a @#/ /nas yang dag yin zhes pa ni bden 'dzin gyi ngo na yang dag yin zhes pa gtan ma yin pa'i phyir te/ 'jig rten pa'i shes pa la ltos nas yang dag ces pa'i yang dag ni bden grub la mi byed pa'i phyir te/ 'jig rten pa'i shes pa la ltos te log pa zhes pa ni brdzun pa phra mo la mi byed par 'jig rten pa'i shes pa la ltos te brdzun zhes pa'i tha snyad thob rung gi don la byed pa ltar/ de la ltos te yang dag ces pa yang bden grub la mi byed par de la ltos te bden zhes pa'i tha snyad thob rung gi don la byed par shin tu mtshungs pa'i phyir te/ de la ltos te gzugs sogs yang dag ces pa ni rang 'dzin pa'i shes pa la ji ltar snang ba ltar du grub pa la tha snyad pa'i tshad mas gnod pa med pa'i kun rdzob pa'i don dang; de la ltos te gzugs brnyan sogs log pa zhes pa ni rang 'dzin pa'i shes pa la ji ltar snang ba ltar du grub pa la tha snyad pa'i tshad mas gnod pa yod pa'i don la byed pa'i phyir te/ rtsa 'jug gi rnam bshad gnyis ka las/ de lta bu'i gnod pa med pa'i shes pa drug gis bzung ba'i kun rdzob pa'i don dang de las bzlog pa'i don la yang dag dang log par 'jog pa ni 'jig rten pa'i shes pa kho na la ltos nas yin te/ de dag ji ltar snang ba ltar gyi don du yod pa la 'jig rten pa'i shes pas gnod pa med pa dang yod pa'i phyir ro/ /zhes gsungs pa'i phyir/ rtsa ba'i rtags bzhi pa grub ste/ 'jig rten pa'am tha snyad pa'i tshad ma la ltos na yang dag kun rdzob dang log pa'i kun rdzob gnyis su dbyer yod par lam rim chung ngur gsal bar @066b gsungs pa sngar drangs pa de'i phyir dang/ 'jig rten pa'i shes pa la ltos nas kun rdzob gnyis su dbyer yod pa dang/ de'i ngor kun rdzob gnyis su dbyer yod pa gnyis la mi 'dra ba'i khyad par med na/ 'jig rten pa'i shes ngo na yang dag kun rdzob dang log pa'i kun rdzob gnyis kyi dbye ba yod par 'gyur ba'i phyir dang/ de gnyis la mi 'dra ba'i khyad par yod na/ 'jig rten pa'i shes pa la ltos nas yang dag kun rdzob dang log pa'i kun rdzob gnyis su dbyer yod do zhes gsungs pa'i phyir; 'jig rten pa'i shes don yang dag dang log pa gnyis su dbye ba yod do zhes zla ba'i zhabs dang rje bla mas gang du yang ma gsungs pa'i phyir ro/ /skabs 'dir rje bdag nyid chen po dang mkhas grub rje gnyis kyi bshad tshul mi 'dra bar 'byung ba la/ dbu ma'i yig char gnyis ka bsres nas bkod pas deng sang 'jig rten pa'i shes pa la ltos pa'i yang log gnyis kyi 'jog mtshams dka' bar gyur bas/ rmongs rtul kho bos cung zad dpyad pa 'di la dpyod ldan rnams kyis tshar gcod rjes 'dzin ji ltar 'os pa mdzod cig /kha cig na re/ 'jig rten pa'i shes pa la ltos nas yang dag ces pa'i yang dag ni bden grub la byed par thal/ 'jug 'grel las/ de la so so skye bo rnams kyi don dam ba gang yin pa de nyid 'phags pa snang ba dang bcas pa'i spyod yul can rnams kyi kun rdzob tsam yin la/ zhes dang/ rtsa she'i TIka chen las/ so so skye bo rnams kyis ni bum pa la sogs pa la bden par 'dzin la de nyid don dam par yod par 'dzin pa yang yin pas/ de dag gi shes ngo de la ltos te bum sogs @067a @#/ /rnams don dam par grub pa yin gyi kun rdzob pa'i don min no/ /de dag gi ngor don dam par grub pa'i gzhi bum pa la sogs pa rnams 'phags pa'i rgyud kyi snang ba sgyu ma lta bu'i don gzigs pa la ltos nas kun rdzob pa yin no/ /zhes gsungs pa'i phyir nam khyab ste/ 'di ni bum pa la sogs pa rnams so skye'i rgyud kyi bden par 'dzin pa'i blo'i ngor bden grub dang/ 'phags pa'i rgyud kyi bden stong sgyu ma lta bur rtogs pa'i ye shes kyi ngor kun rdzob yin par bshad pa yin pa'i phyir dang/ de tsam ni gzugs brnyan dang sgyu ma'i rta sogs la yang 'dra ba yin pas skabs 'di'i yang dag dang log pa'i don du mi rung ba'i phyir ro/ /yang kha cig na re/ gzugs bden par grub pa chos can/ 'jig rten pa'i shes pa la ltos nas yang dag kun rdzob yin par thal/ 'jig rten pa'i bsam pa rang dga' ba la ltos nas yang dag yin pa'i phyir na ma khyab/ rtags grub cing 'dod mi nus te/ rnam bshad las bdag 'dzin lhan skyes gnyis kyis bzung ba'i don lta bu ni/ gnod pa med pa'i dbang pos bzung ba zhes pa yin la/ 'jig rten pa'i bsam pa rang dga' ba la ltos nas yang dag pa'am bden pa yin mod kyang tha snyad du yang med do/ /zhes gsungs pa'i phyir ro/ /yang kha cig na re/ gzugs sogs don lnga chos can/ log pa'i kun rdzob yin par thal/ log pa dang kun rdzob gnyis ka yin pa'i phyir na ma khyab/ rtags grub ste/ shes bya phyin ci log dang kun rdzob gnyis ka yin pa'i phyir/ 'dod mi nus te/ rnam @067b bshad las/ gal te yang dag pa'i kun rdzob mi 'dod pas yang log gnyis su mi byed kyang/ ma rig pas bslad pa'i yul dang yul can rnams log pa'i kun rdzob tu ci'i phyir mi 'jog ce na/ kun rdzob ni tha snyad pa'i tshad mas 'jog dgos pa'i phyir log pa'i kun rdzob 'jog na yang de la ltos nas 'jog dgos na/ ma rig pa'i bag chags kyis bslad pa ni 'khrul bar tha snyad pa'i tshad mas mi 'grub pa'i phyir ro/ /zhes gsungs pa'i phyir ro/ /'on kyang gzhung 'di'i don ni 'jig rten pa'i shes ngo la ltos te log pa'i kun rdzob min pa'i don yin par yig char gsungs shing/ gzhung gi dgongs pa ni log pa'i kun rdzob med par gsungs pa lta bur snang la/ gang ltar yang dpyad gzhi che bar snang ngo// gzugs sogs log pa'i kun rdzob tu 'jog na log pa'i don ni brdzun pa rags pa la bshad du mi rung bas brdzun ba phra mo la bshad dgos la/ de lta na kun rdzob pa'i don yang de la byed dgos pas/ brdzun pa'i brdzun pa'am kun rdzob ba'i kun rdzob zhes pa lta bur 'gyur bar dgongs sam dpyad par bya'o/ /gsum pa ni/ mi shes gnyid kyis rab bskyod mu stegs can/ zhes pa nas/ de dag 'jig rten las kyang yod min nyid/ /ces tshigs bcad gcig byung/ da ni bshad zin pa'i yid kyi gnod pas zhen yul la 'khrul ba spyir bstan pa'i don de nyid mtshan gzhi bye brag la dper brjod pa'i tshul gyis bstan pa'i phyir bshad pa/ mi shes pa'i gnyid kyis yid rab tu bskyod pa'i mu stegs can de gnag rdzi yan chad la grags pa'i skye@068a @#/ /'jig sogs phyin ci ma log par ma bzung bar/ 'jig rten pa rnams las phul du byung bar 'gro bar 'dod pas/ shing la 'dzeg pas yal ga phyi ma ma bzung bar snga ma btang ba ltar/ lta ngan gyi ri sul du ltung bar 'gyur ba rnams kyis bdag nyid ji lta ba bzhin du yon tan gsum la sogs pa gang brtags pa dang/ de bzhin du sgyu ma dang smig rgyu dang gzugs brnyan sogs la/ rta glang dang chu dang byad bzhin sogs su brtags pa gang yin pa de dag kyang 'jig rten gyi kun rdzob las kyang yod pa min pa nyid do/ /gnyis pa ni/ mig ni rab rib can gyis dmigs pa yis/ zhes pa nas/ dri med blo la gnod pa yod ma yin/ /zhes tshigs bcad gcig byung/ de kho na nyid kyi don tha snyad pa'i shes pas mi 'jog pa de'i phyir/ gzhan skye 'gog pa ni 'jig rten pa'i lta ba kho na la gnas nas mi byed kyi/ 'phags pa'i de kho na nyid kyi gzigs pa khas blangs nas don dam par 'gog pa yin no/ /gang gi tshe gzhan skye dgag pa 'di la don dam gyi khyad par sbyor ba yin pa de'i tshe/ ji ltar mig ni rab rib can gyi shes pas skra shad la sogs pa dmigs pas rab rib med pa'i shes pa la skra shad sogs mi snang ba la gnod pa min pa ji lta ba de bzhin du/ dri ma ste zag pa med pa'i ye shes spangs pa ste de dang bral ba'i so skye'i blo ma rig pas bslad pas/ ma rig pas ma bslad pa'i dri ma med pa'i blo la gnod pa yod pa ma yin pas/ don dam par gzhan skye bkag pa la 'jig rten pa'i ngor gzhan skye grub tu chug kyang mi gnod do/ / @068b gsum pa la gnyis/ kun rdzob kyi bden pa bshad pa dang/ don dam pa'i bden pa bshad pa'o/ /dang po ni/ gti mug rang bzhin sgrib phyir kun rdzob ste/ zhes pa nas/ bcos mar gyur pa'i dngos ni kun rdzob tu'o/ /zhes tshigs bcad gcig byung/ 'dis sems can rnams dngos po ji ltar gnas pa'i rang bzhin lta ba la sgrib pa ste rmongs par byed pa'i phyir na gti mug ste ma rig pa dngos po'i ngo bo rang bzhin gyis yod pa ma yin pa la rang bzhin gyis yod par sgro 'dogs par byed pa/ yin lugs kyi rang bzhin mthong ba la sgrib pa'i bdag nyid can ni kun rdzob ste sgrib byed do/ /kun rdzob bden 'dzin de'i mthus sngon po la sogs pa gang zhig rang bzhin gyis grub pa med bzhin du der snang bar bcos pa'i bcos ma sems can rnams la bden par snang bde ni/ sngar bshad pa'i 'jig rten gyi phyin ci log gi blo kun rdzob pa de'i ngor bden pas 'jig rten gyi kun rdzob kyi bden pa zhes thub pa des gsungs te/ gsungs tshul ni lang gshegs las/ dngos rnams skye ba kun rdzob tu/ /dam pa'i don du rang bzhin med/ /rang bzhin med la 'khrul ba gang/ /de ni yang dag kun rdzob 'dod/ /ces pa'i mdo der gsungs pa'o/ /nyan rang dgra bcom pa dang dag sa'i byang sems te gang zag gsum po gang gi ngor mi bden pa'i rtog pas bcos pa'i bcos mar gyur pa'i dngos po ni de'i blo kun rdzob pa'i ngor mi bden pas kun rdzob tsam zhes bya'o/ /'di ni gzugs sogs rnams gang zag gsum po de'i blo'i ngor mi bden pas kun rdzob tsam zhes gsungs kyi/ de dag gi @069a @#/ /blo'i ngor kun rdzob kyi bden pa ma yin par gsungs pa min no/ /skabs 'dir 'grel pa las/ /gang zhig kun rdzob tu yang brdzun pa de ni kun rdzob kyi bden pa ma yin no/ /zhes gsungs pa'i don yod de/ /gzugs brnyan lta bu 'jig rten pa'i blo rang dga' ba'i ngor brdzun pa de ni blo kun rdzob pa de'i ngor bden pa ma yin zhes pa'i don yin pa'i phyir/ de ltar yin kyang kun rdzob bden 'dzin gyi ngor bden pas kun rdzob kyi bden pa yin no/ /rang bzhin ni ma rig pa dang ldan pa rnams la rnam pa thams cad du mi snang ngo/ /zhes pa'i don yod de/ yin lugs kyi rang bzhin ni ma rig pas bslad pa'i shes pa la mngon sum du mi snang ba'i don yin pa'i phyir/ /so skye dang slob pa rjes thob pa'i rgyud kyi stong nyid rtogs pa'i rtog pa ni ma rig pa dang de'i bag chags kyis bslad pas stong nyid mngon sum du mi snang yang snang bar 'dod dgos so/ /srid pa'i yan lag gis bsdus pa'i nyon mongs pa can gyi ma rig pa'i dbang gis kun rdzob kyi bden pa rnam par gzhag go zhes pa ni/ kun rdzob kyi bden pa zhes pa'i tshig zur gyi bden pa ni/ don la bden par 'jog mi rung bas ma rig pa de'i ngor bden par 'jog pa'i don yin gyi/ kun rdzob pa'i chos rnams ma rig pa des 'jog par ston pa min no/ skabs 'dir rnam bshad las chos dang gang zag bden par 'dzin pa'i blo gnyis ka nyon mongs can gyi ma rig pa dang/ nga dang nga yi ba rang gi mtshan nyid kyis grub par 'dzin pa gnyis 'jig lta dang/ 'dod chags la sogs pa'i nyon mongs gzhan rnams kyang bden 'dzin gyi ma rig @069b pa dang mtshungs ldan du 'jug gi de dang bral bar mi 'jug pa sogs thun mong ma yin pa'i nyon mongs kyi ngos 'dzin gsungs pa la/ kha cig na re/ thun mong ma yin pa'i nyon mongs yin na bden 'dzin yin pas khyab par thal/ rnam bshad kyi gsungs tshul de'i phyir/ 'dod mi nus te/ thun mong ma yin pa'i nyon mongs de la 'dzin tshul med pa'i rmongs tsam gyi ma rig pa dang/ the tshom dang/ mthar lta'i chad lta dang/ skur 'debs kyi log lta rnams yod pa'i phyir te/ mngon pa nas bshad pa'i dgra bcom pa'i rgyud la nyon mongs de dag yod pa'i phyir zer na/ de dag kyang bden 'dzin yin zer ram/ 'dod chags dang zhe sdang lta bu ni bden 'dzin gyi ma rig pa dang mtshungs ldan yin gyi/ thun mong ma yin pa'i nyon mongs thams cad la min zer ram dpyad par bya'o/ /yang kha cig na re/ mngon pa nas bshad pa'i 'dod chags zhe sdang sogs kyang bden 'dzin gyi ma rig pa dang mtshungs ldan yin par thal/ rang bzhin gyis grub pa kho na'i yid du 'ong mi 'ong sgro 'dogs pa'i tshul min yid byed kyis drangs pa'i yul la 'dod pa'i rnam pa can dang/ mi 'dod pa rgyab kyis phyogs pa'i rnam pa can gyi nyon mongs gnyis rim bzhin 'dod chags zhe sdang du 'jog pa'i rgyu mtshan gyis/ nyon mongs de gnyis bden 'dzin gyi ma rig pa dang mtshungs ldan du gsungs pa gang zhig mngon pa nas bshad pa'i 'dod chags zhe sdang gnyis kyang de 'dra ba'i tshul min yid byed kyis drangs pa'i yul la 'dod pa dang mi 'dod pa'i rnam pa can gyi nyon mongs yin pa'i phyir/ dang po grub ste/ bzhi brgya pa'i 'grel pa las/ 'dod chags la sogs @070a @#/ /pa dag kyang gti mug gis kun tu brtags pa'i dngos po'i rang bzhin kho na la sdug pa dang mi sdug pa la sogs pa'i khyad par sgro 'dogs par 'jug pa nyid kyi phyir/ gti mug las tha mi dad par 'jug par 'gyur zhing/ zhes gsungs pa'i phyir/ khyab ste/ rnam bshad las/ chags sogs rnams gti mug las tha mi dad par 'jug pa ni/ gti mug dang mtshungs ldan du 'jug gi de dang bral bar mi 'jug pa'o/ /de'i rgyu mtshan ni chags sogs nas 'jug pa nyid kyi phyir zhes pa yin no/ /de la yul la yid du 'ong mi 'ong gi khyad par sgro 'dogs pa ni chags sdang gnyis skye ba'i rgyu tshul min yid byed yin pas/ chags sdang gnyis kyi 'dzin stangs ston pa min no/ /des na gti mug gis kun brtags pa kho na la zhes sogs ni/ rang bzhin gyis grub pa kho na'i yid du 'ong mi 'ong sgro btags pa la brten nas chags sdang gnyis 'jug pa'i phyir zhes pa'o/ /zhes dang/ tshul min yid byed de gnyis kyis drangs pa'i yul la 'dod pa'i rnam pa can dang/ mi 'dod pa rgyab kyis phyogs pa'i rnam pa can ni chags pa dang sdang bar 'gyur bas/ gang zag rang skya thub pa'i rdzas yod du 'dzin pas drangs pa'i 'dod mi 'dod kyi rnam pa can tsam zhig 'dod chags dang zhe sdang du 'jog pa min pa'i phyir chags sdang gnyis kyang 'jog tshul mi 'dra'o/ /zhes gsungs pa'i phyir/ rtags gnyis pa grub ste/ thun mong ma yin pa'i chags sdang gnyis kyi rgyu tshul min yid byed ni rang bzhin gyis grub pa kho nas yid du 'ong mi 'ong sgro 'dogs pa yin la/ thun mong ba'i chags @070b sdang gnyis kyi rgyu tshul min yid byed ni rang bzhin gyis grub pas khyad par du ma byas pa'i yid du 'ong mi 'ong spyi tsam gyi khyad par bzung nas 'jug ces pa'i khyad par dbye dka' ba'i phyir dang/ lam rim chung ngu las/ sngar bshad pa'i ma rig pa lhan skyes kyis sgro btags pa'i yul de nyid la lhan skyes dang kun btags pa'i nyon mongs gzhan thams cad kyis yul gyi khyad par re re bzung nas 'jug pas/ zhes thun mong dang thun mong min pa'i khyad par ma phye bar spyir gsungs pa'i phyir dang/ rang bzhin gyis grub pas khyad par du ma byas par yul sdug pa spyi tsam la rjes su chags pa'i 'dod chags yod na/ de 'dra ba'i 'dod chags de mngon pa nas bshad pa'i dgra bcom pa'i rgyud la med pa'i rgyu mtshan gzhi ma grub pa'i phyir zer na/ blo gros kyi mig dang ldan pa rnams la dka' gnas yin min mi shes kyang/ bdag lta bu la dka' ba'i gnas su 'gyur bas blo ldan rnams kyis ji ltar rigs pa'i lan stsol par zhu/ lugs 'dis shes sgrib gang la byed ce na/ nyon mongs kyi bag chags la sa bon yin min gnyis las/ sa bon ma yin pa'i bag chags ni shes sgrib yin la/ de'i 'bras bu gnyis snang 'khrul ba'i cha thams cad kyang der bsdu'o/ sangs ma rgyas pa'i 'phags pa rnams ni shes sgrib kyi ma rig pa ma spangs pas/ rjes thob kyi snang bcas kyi rtog pa dang mnyam gzhag tu snang med du 'gyur ba'i res 'jog yod la/ sangs rgyas 'phags pa rnams ni blo gcig gis bden pa gnyis ka thugs su chung cing rnam rtog @071a @#/ /gi rgyu ba thams cad gtan log pas/ mnyam gzhag dang rjes thob kyi snang ba'i rtog pa yod med res 'jog pa med par gsungs so/ /rje'i legs bshad rnams su shes sgrib la mngon gyur dang sa bon gnyis su phye ba mi snang la; stong thun du shes sgrib la de gnyis su phye nas/ gnyis snang 'khrul ba'i cha de shes sgrib mngon gyur par bshad cing/ shes bya'i gnas rtogs par dka' ba la blo mi gsal ba'i cha yang shes sgrib tu 'du bar bshad do/ /dbu ma'i yig char; shes sgrib la mngon gyur dang sa bon gnyis su phye nas/ shes sgrib gang zhig /dmigs rnam 'dzin pa'i blo de/ shes sgrib mngon gyur pa'i mtshan nyid/ mtshan gzhi ni/ dgra bcom pa dang dags pa'i rgyud kyi ma rig pa dang/ bden snang gi cha lta bu/ zhes bshad do/ /bden snang gi cha ni dmigs rnam 'dzin pa'i blo ma yin pas/ shes sgrib mngon gyur pa'i mtshan gzhir ji ltar 'gyur dpyad par bya'o/ /mkhas pa gzhan dag gis/ shes sgrib yin na shes pa ma yin pas khyab/ 'jug TIka las shes sgrib kyi ma rig pa gsungs pa ni/ nyon mongs kyi bag chags la ma rig pa'i ming gis bstan pa yin zhes bzhed do/ /de dag las rje bdag nyid chen po'i dgongs par gang song ba de khas blang bar bya'o/ /stag tshang lo tsA bas/ nyon mongs can min ma rig yod pa dang/ /shes par gyur pa'i shes sgrib med pa 'gal/ zhes pa la/ gong gi bshad tshul gsum las gang khas blangs pa dang mthun pa'i lan gdab par bya'o/ /gnyis pa ni/ @071b rab rib mthu yis skra shad la sogs pa'i/ zhes pa nas/ /mthong de de nyid de bzhin 'dir shes gyis/ /zhes tshigs bcad gcig byung/ don dam pa'i bden pa ni 'phags pas gzigs pa ji lta ba bzhin du brjod par mi nus pas; de'i rang bzhin gsal bar bya ba'i phyir so skye rang gis myong ba'i dpe bshad pa ni/ mig rab rib kyis bslad pa'i mthu yis rab rib can gyis rang gi lag na thogs pa'i snod kyi nang du skra shad dang la sogs pas sbrang ma la sogs pa mthong pa na/ skra shad dang sbrang ma sogs yin par ngo bo log pa gang zhig rnam par brtags pa na/ mig dag pa'i rab rib med pas skra shad sogs de dag nyid kyi bdag nyid gzhi gang du mthong ba der mig gtad kyang skra shad kyi rnam pa de dag ma dmigs shing/ skra shad de'i khyad par gyi chos gang yang rtog par mi byed do/ mig dag pa des rab rib can gyi rnam rtog bsal bar 'dod pas 'di na skra shad med do zhes smra mod kyang/ skra shad la skur ba 'debs pa med do/ /rab rib can gyis mthong ba'i skra shad kyi de kho na nyid ni rab rib med pas mthong ba de yin gyi rab rib can gyis mthong ba de min no/ /dpe gnyis po de bzhin du don gyi skabs 'dir shes par gyis shig /shes par byed tshul ni ma rig pa'i rab rib kyis blo bslad pas de kho na nyid ma mthong ba rnams kyis/ phung khams skye mched sogs kyi rang gi ngo bo dmigs pa ni phung sogs de dag gi ngo bo kun rdzob pa ste rab rib can gyis skra shad dmigs pa lta bu'o/ phung po la sogs pa de kho na nyid ma mthong bas dmigs pa de dag nyid ma rig pa'i bag chags spangs pa'i sangs @072a @#/ /rgyas rnams kyis/ rab rib can ma yin pa'i mig gis skra shad ma mthong ba ltar ma gzigs pa'i tshul gyis phung sogs kyi rang bzhin gang du gzigs pa'i yul de ni de dag gi don dam pa'i bden pa'o/ 'di la rtsod pa spong ba ni; kha cig na re/ ma rig pas bslad pa'i blo la snang ba'i phung sogs kun rdzob pa rnams med par thal/ sangs rgyas rnams kyis phung sogs de dag ma gzigs pa'i tshul gyis de dag gi gnas lugs gzigs pa'i phyir zer na ma khyab ste/ sangs rgyas kyi ye shes kyis ji lta ba gzigs ngor gnyis snang nub pas phung sogs kun rdzob pa'i chos rnams ma gzigs pa yin kyang/ ye shes des ji snyed pa gzigs ngor phung sogs kun rdzob pa'i chos thams cad yul dang yul can gnyis su snang ba'i tshul gyis mkhyen pa'i phyir skyon med do/ /bzhi pa ni/ gal te 'jig rten tshad ma yin na ni/ zhes pa nas/ /de nyid skabs su 'jig rten gnod pa med/ /ces tshigs bcad phyed dang gnyis byung/ gal te 'jig rten gyi mthong ba de kho na nyid la tshad ma yin na ni/ 'jig rten rang dga' bas de kho na nyid mngon sum du mthong ba ste rtogs pa'i phyir dang/ de yang 'khor ba thog ma med pa nas yin pas ma rig pa spangs par khas blang dgos pas/ de kho na nyid mngon sum du rtogs pa la 'phags pa gzhan gyis ci zhig dgos te mi dgos la/ 'phags pa'i lam tshol bas kyang ci zhig bya ste dgos pa med do/ /'jig rten rang dga' ba'i blun po ni de kho na nyid la tshad mar rigs pa'ang ma yin no/ /de'i phyir de kho na nyid la dpyod pa'i skabs @072b su de kho na nyid la rnam pa kun te thams cad du 'jig rten gyi mthong ba tshad ma min pa de'i phyir/ de kho na nyid kyi skabs su 'jig rten gyi gnod pa med do/ /lnga pa ni/ 'jig rten don ni 'jig rten grags nyid kyis/ /gal te sel na 'jig rten gyis gnod 'gyur/ /zhes byung/ 'o na ji ltar 'jig rten gyis gnod par 'gyur zhe na/ 'jig rten nyid las grags shing grub pa'i don ni/ 'jig rten gyi grags pa nyid kyis gal te sel na/ gang zag de la 'jig rten gyis gnod par 'gyur ro/ / de ni dper na kha cig gis nga'i rdzas phrogs so zhes smras pa dang/ gang zag gzhan cig gis de la ris pa rdzas de ci zhig yin/ des bum pa'o zhes smras pa la/ gzhan des/ bum pa ni rdzas ma yin te/ gzhal bya yin pa'i phyir/ rmi lam gyi bum pa bzhin no/ /zhes sun 'byin pa de lta bu la sogs pa'i yul la 'jig rten gyis gnod kyi/ gang gi tshe 'phags pa'i don dam gyi gzigs pa la brten te/ skye bo don dam la mkhas pa tshad mar byas nas de kho na nyid gtan la 'bebs pa de'i tshe 'jig rten gyi gnod pa yod pa ma yin no/ /gnyis pa ni/ gang phyir 'jig rten sa bon tsam btab nas/ zhes pa nas/ gzhan las skye ba 'jig rten las kyang med/ /ces tshigs bcad gcig byung/ rgyu mtshan gang gi phyir 'jig rten pa rnams bu'i lus kyi rgyu mi gtsang ba dang shing sdong po'i sa bon tsam btab nas/ de gnyis las bu dang shing sdong skyes pa na de gnyis bstan nas/ bdag gis bu 'di bskyed ces smra bar byed cing/ shing sdong yang btsugs so snyam du rtog pa des na/ sa bon gyi mi gtsang ba dang bu gnyis @073a @#/ /dang; shing sdong po'i sa bon dang shing sdong gnyis la sogs pa la rang gi mtshan nyid kyis grub pa'i gzhan las skye bar 'dzin pa 'jig rten las kyang med do/ /btab pa'i sa bon gnyis shing sdong dang bu ma yin kyang/ de gnyis btab pa la brten nas shing sdong dang bu skyes pa na/ de gnyis bstan nas 'di bdag gis bskyed ces 'jog nus te/ na ba dang so pa'i lag pa gang zag de ma yin kyang/ lag pa na pa dang sos pas gang zag de na pa dang sos par 'jog nus pa bzhin no/ /gsum pa ni/ gang phyir myu gu sa bon las gzhan min/ zhes pa nas/ myug tshe sa bon yod ces brjod mi bya/ /zhes tshigs bcad gcig byung/ gal te myu gu sa bon las rnag bzhin gyis grub pa'i gzhan yin na ni/ sa myug gnyis rgyu 'bras su mi rung ba'i phyir/ the tshom med par myu gu yod bzhin du yang sa bon rgyun chad par 'gyur te/ de la ni sa myug 'brel med du song bas/ myu gu yod kyang sa bon gyi rigs rgyud ma chad pa la mi phan pa'i phyir te/ dper na ba men yod pas ba lang shi nas rigs rgyud chad pa min ba la mi phan pa bzhin no/ /de ltar yin pa la rgyu mtshan gang gi phyir myu gu sa bon las rang bzhin gyis grub pa'i gzhan min pa'i phyogs la/ de gnyis rgyu 'bras su mi 'gal ba de'i phyir myu gu yod pa'i tshe sa bon zhig pa ste de'i rigs rgyud chad pa med pas chad pa spangs so/ /gang gi phyir sa myug gnyis gcig nyid du yod pa min pas sa bon de nyid myu gur 'phos pa min pa'i phyir/ myu gu'i dus na sa bon mi 'jig ba bkag pa de'i @073b phyir yang/ myu gu'i tshe sa bon yod ces brjod par mi bya bas rtag pa yang bkag par 'gyur ro/ /bzhi pa la gnyis/ rang gi mtshan nyid kyis grub pa yod par 'dod pa dgag pa dang/ de ltar bkag pa la rtsod pa spang ba'o/ /dang po la gsum/ 'phags pa'i mnyam bzhag dngos po'i 'jig rgyur thal bas dgag pa/ tha snyad bden pa rig pas dpyad bzod du thal bas dgag pa/ don dam pa'i skye ba mi khegs par thal bas dgag pa'o/ /dang po ni/ gal te rang gi mtshan nyid brten 'gyur na/ zhes pa nas/ de ni rigs min de phyir dngos yod min/ /zhes tshigs bcad gcig byung/ gal te gzugs dang tshor ba la sogs pa'i rang gi mtshan nyid de rang gi ngo bo nyid kyis grub pa'i rang bzhin rgyu dang rkyen la brten nas skye bar 'gyur na ni/ rnal 'byor pas chos rnams rang bzhin gyis grub pas stong par mngon sum du rtogs pa'i tshe/ dngos po'i rang bzhin de la skur ba btab pa'i tshul gyis stong pa nyid rtogs par 'gyur te/ mnyam bzhag gis gzugs sogs rnams ma dmigs pa dgos la/ de rnams rang gi mtshan nyid kyis grub na mnyam bzhag gis dmigs dgos pa las ma dmigs pa'i phyir/ de'i tshe dngos po de rnams med par 'gyur ro/ /de med na ni dngos po de rnams mnyam bzhag gi sngar yod pa phyis med pa'i 'jig ba ste zhig par 'gyur ro/ /de'i phyir de ltar 'jig pa la mnyam bzhag nyid rgyur 'gro dgos bas/ thob la sogs pa bum pa la sogs pa'i 'jig rgyu yin pa de bzhin du/ stong nyid mthong ba yang@074a @#/ /dngos po'i rang bzhin 'jig pa dang de la skur ba'i rgyur 'gyur ba zhig na/ de ni rigs pa yang min pa de'i phyir dngos po rnams kyi rang gi mtshan nyid kyis grub pa ni yod pa min pas/ dus thams cad kyi tshe rang bzhin gyis skye ba khas blang bar mi bya'o/ skabs 'dir 'grel par/ dkon brtsegs las gang stong pa nyid kyis chos rnams stong par mi byed de/ chos rnams nyid stong pa nyid dang/ zhes sogs gsungs pa drangs te/ chos rnams la rang mtshan gyis grub pa'i rang bzhin yod na/ chos de rnams rang ngos nas stong par ma song bas chos rnams nyid stong pa nyid dang zhes pa dang 'gal la/ rang gi ngo bo nyid kyis yod pa ma bkag par gzhan zhig gis stong pa'i sgo nas stong par bstan dgos pas/ stong pa nyid kyis chos rnams stong par mi byed ces pa dang 'gal bar gsungs shing/ mdo 'dis rnam rig pas gzhan dbang rang mtshan gyis mi stong pa dang/ de gzung 'dzin rdzas tha dad med pas stong zhes ba yang bkag par gsungs so/ /gnyis pa ni/ gang phyir dngos po 'di dag rnam dpyad na/ zhes pa nas/ tha snyad bden la rnam par dpyad mi bya/ /zhes tshigs bcad gcig byung/ dbu ma rang rgyud pa rnams na re/ don dam par skye ba med pas bdag dang gzhan las skye ba 'gog par rigs mod; gzugs dang tshor ba la sogs pa'i dngos po rnams tha snyad du gzhan las skye bar 'dod dgos so zhe na/ gang gi phyir gzugs dang tshor ba la sogs pa'i dngos po 'di dag ni/ ci bdag las skye ba zhig gam/ cig gzhan las skye @074b ba zhig ces de lta bu la sogs bar rnam par dpyad pa na/ de kho na nyid kyi bdag nyid can gyi don dam par ma skyes pa dang ma 'gags pa las tshu rol te gzhan du gyur pa'i cha skye ba la sogs pa can la gnas pa rnyed pa ma yin te/ de'i phyir 'jig rten tha snyad kyi bden ba la bdag dang gzhan las zhes bya ba de lta bu la sogs pa'i rnam par dpyad par mi bya bar/ 'jig rten pas mthong ba 'di yod na 'di 'byung ngo zhes bya ba 'di tsam zhig gzhan 'jig rten la rag las pa'i tha snyad la 'jug pa'i sgo nas khas blang bar bya ste/ 'phags pa lhas/ ji ltar kla klo skad gzhan gyis/ /bzung bar mi nus de bzhin du/ /'jig rten pa yi ma gtogs bar/ /'jig rten gzung bar nus ma yin/ zhes gsungs so/ /'dir dpyad ma dpyad ni de kho na nyid la dpyad ma dpyad yin la/ thal rang gnyis kyi de kho na nyid la dpyod mtshams mi 'dra bas tha snyad du gzhan skye 'dod mi 'dod kyi khyad par 'byung ba yin no/ /gsum pa ni/ de nyid skabs su rigs pa gang zhig gis/ zhes pa nas/ khyod kyi skye ba gang gis par 'gyur/ /zhes tshigs bcad gcig byung/ yang rang rgyud pa na re/ don dam par skye ba med kyang kun byang gnyis kyi 'ching grol gyi rgyur 'gyur ba/ rang mtshan gyis grub pa'i bdag nyid 'ga' zhig tu skye bar 'gyur ba cig nges par 'dod dgos so zhe na/ ji ltar de kho na nyid don dam pa la dpyod pa'i skabs su ji skad bshad pa'i rigs pa gang zhig gis gzugs sogs bdag dang gzhan las skye ba rigs pa min pa de bzhin du/ tha snyad du yang rigs pa de nyid kyis rang gi @075a @#/ /mtshan nyid kyis skye bar rigs pa min pas/ khyod kyi rang bzhin gyis skye ba tshad ma gang gis 'grub par 'gyur te mi 'gyur ro/ /de'i phyir rang gi mtshan nyid kyis skye ba ni bden pa gnyis char du yang yod pa ma yin no zhes mi 'dod bzhin du yang gdon mi za bar khas blang bar bya'o/ /skabs 'di'i phyogs snga smra ba ni rang rgyud pa yin te/ rnam bshad las/ de 'dra ba de 'gog pa'i tshe dbum pa kha cig phyogs sngar byas pa ni sngar bshad pa dang/ tshig gsal las kyang; 'di ni de kho na ltar gdon mi za bar khas blang bar bya ste/ de lta ma yin na kun rdzob 'thad pa dang mi ldan pa ma yin nam/ des na 'di de kho na nyid du 'gyur gyi kun rdzob tu mi 'gyur ro/ /zhes tha snyad btags pa tsam gyis mi chog par btags don btsal ba'i dpyad pa byas nas tha snyad pa'i don 'jog pa bkag pa na/ de lta na don dam par yod par 'gyur ba/ gzugs sogs kun rdzob par mi 'gyur zhes gzugs sogs don dam du grub par khas mi len pa dang/ kun rdzob par 'jog pa cig la 'phen la/ de yang dngos por smra ba la min pas dbu ma rang rgyud pa yin par shin tu gsal lo/ /zhes gsungs pa'i phyir/ dpe phal cher las kun rdzob 'thad pa dang ldan pa ma yin nam zhes 'byung yang/ 'thad pa dang mi ldan pa ma yin nam zhes pa ni yi ge dag pa yin nam snyam ste/ kun rdzob de kho na nyid la dpyod pa'i rigs pas dpyad mi bzod pa ma yin nam zhes pa'i don yin pa'i phyir ro/ /gnyis pa ni/ dngos po stong pa gzugs brnyan la sogs pa/ / @075b zhes pa nas/ stong nyid dag las rab tu skye bar 'gyur/ /zhes tshigs bcad phyed dang gnyis byung/ gal te rang bzhin gyis skye ba bden pa gnyis char du yang med na gzugs sogs med par 'gyur la/ de lta na gzugs sogs mig shes sogs la mi snang bar 'gyur te/ de lta ma yin na ri bong gi rwa sogs kyang mig shes sogs la snang bar 'gyur te/ rgyu mtshan mtshungs pa'i phyir ro zhe na/ de'i lan bshad pa/ dngos po stong pa ste brdzun pa gzugs brnyan dang la sogs pas sgra brnyan la sogs pa rnams/ me long dang byad bzhin dang/ brag phug dang sgra phyung ba sogs kyi rgyu rkyen gyi tshogs pa la ltos pa ste brten nas skye ba 'jig rten na yang ma grags pa yang min pa ste grags so/ /ji ltar 'jig rten la grags pa der ni gzugs brnyan la sogs pa stong pa ste brdzun pa las mig la sogs pa'i shes pa gzugs brnyan la sogs pa ste de yi rnam pa can skye bar 'gyur ba ltar/ brdzun pa'i gzugs brnyan las brdzun pa'i rnam pa can gyi shes pa skye ba de bzhin du/ dngos po thams cad rang gi mtshan nyid kyis grub pas stong na yang/ des stong pa'i rgyu dag las des stong pa'i 'bras bu rab tu skye bar 'gyur ro/ 'dir gzugs brnyan las de 'dzin pa'i mig shes skye bar gsungs pas/ gzugs brnyan phyi rol gyi don dang gzugs kyi skye mched du bzhed pa yin la/ zla gnyis su snang ba dang skra shad du snang ba dang sgyu ma'i rta glang sogs gzugs kyi skye mched dang/ sgra brnyan sgra'i skye mched du shes par bya ste/ lugs dam pa 'di'i rnam gzhag @076a @#/ /thun mong min par gsungs so/ /lnga pa la gnyis/ rtag chad kyi lta ba spang sla ba'i yon tan dang/ las 'bras kyi 'brel ba ches 'thad pa'i yon tan no/ /dang po ni/ bden pa gnyis su'ang rang bzhin med pa'i phyir/ /de dag rtag pa ma yin chad pa'ang min/ /zhes byung/ don dam pa dang kun rdzob bden pa gnyis char du'ang rang bzhin gyis grub pa med pa'i phyir/ gzugs sogs de dag rang bzhin gyis grub pa'i rtag pa ma yin la/ skad cig gnyis par rgyun chad par 'gyur ba'i chad pa'ang min te/ gang phyir myu gu sa bon las gzhan min/ /zhes sogs kyi skabs su bshad pa ltar ro/ /rang gi mtshan nyid kyis grub pa don dam du bkag kyang kun rdzob tu ma bkag na/ shin tu phra ba'i rtag chad kyi mthar ltung bar 'gyur la/ de kun rdzob tu yod pa khegs na don dam la ltos pa'i rtag chad kyi lta bar mi ltung bar ma zad/ kun rdzob la ltos nas rtag chad kyi lta ba'i dri mas mi gos pas na/ rtag chad kyi lta ba spong sla ba'i yon tan yod par gsungs so/ /gnyis pa la gsum/ rang bzhin gyis grub pa mi 'dod pa la kun gzhi sogs khas blang mi dgos par bstan pa/ las 'gags pa las 'bras bu 'byung ba'i dpe bstan pa; de ltar bstan pa la rtsod pa spang ba'o/ /dang po ni/ gang phyir rang bzhin gyis de mi 'gag pa/ zhes pa nas/ 'bras bu yang dag 'byung bar rig par gyis/ /zhes tshigs bcad gcig byung/ skabs 'di'i @076b mtshams sbyor gyi gzhung las 'phros te thal 'gyur ba'i 'dod tshul thun mong ma yin pa bshad pa ni/ tshogs drug las ngo bo tha dad pa'i kun gzhi rnam shes dang/ rang rig 'gog tshul thun mong ma yin pa dang/ rang rgyud khas mi len pa dang/ shes pa bzhin du phyi don yang khas blang dgos pa dang/ nyan rang gis chos rnams rang bzhin med par rtogs pa dang/ chos kyi bdag 'dzin nyon sgrib yin pa dang/ zhig pa dngos por 'jog pa dang/ de'i rgyu mtshan gyis dus gsum 'jog tshul thun mong ma yin pa sogs yin par rnam bshad las gsungs shing/ dka' gnad brgyad kyi zin bris las 'di'i tha ma gnyis ma bgrang bar/ rang mtshan khas mi len pa dang/ sangs rgyas kyi ji snyed pa mkhyen tshul thun mong ma yin pa bsnan nas brgyad du bshad do/ /chos rnams rang bzhin gyis med par 'dod pa'i phyogs la/ kun gzhi sogs khas ma blangs kyang las 'bras kyi 'brel ba 'thad tshul ji ltar yin zhe na/ sngar bsags pa'i dge mi dge'i las kyis ring du lon nas bde sdug sogs kyi 'bras bu skyed pa ni rang sde gong 'og thams cad 'dod la/ de la rtsa she las/ gal te smin pa'i dus bar du/ /gnas na las de rtag par 'gyur/ /gal te 'gags na 'gags 'gyur bas/ /'bras bu ji ltar skyed par 'gyur/ /zhes pa ltar/ las de 'bras bu 'byin pa'i snga logs bar du gnas na rtag par 'gyur la/ rtag pas don byed par mi nus pas las las 'bras bu 'byung ba'i 'brel ba mi 'thad do/ / @077a @#/ /las de byas pa'i skad cig gnyis par zhig na ni/ mtshams de nas las de med la/ las zhig pa yang dngos por med pas las kyis 'bras bu ji ltar skyed par 'gyur zhes brtsad pa'i lan du/ 'gag kha ma'i las kyi nus pa gzhag par bya ba'i phyir sems tsam pa kha cig kun gzhi rnam shes dang/ kha che ba las gzhan pa'i bye smra kha cig bu lon gyi dpang rgya dang 'dra ba'i chud mi za ba dang/ bye smra'i nang tshan kha cig las kyi thob pa dang/ mdo sde pa dang kha che bye smras las kyi bag chags kyis bsgos pa'i rnam shes kyi rgyun rtog par byed do/ /thal 'gyur ba gang gi ltar na/ las rang gi bdag nyid kyis ma skyes pa de'i ltar na ni/ gang gi phyir las de rang bzhin gyis de mi 'gag pa rang bzhin gyis ma 'gags pa las kyang 'bras bu 'byung ba mi 'gal ba de'i phyir kun gzhi sogs khas ma blangs kyang/ las las 'bras bu 'di 'byung bar nus pa'i phyir/ sems can gyi rgyud la lar las gnyis byas pa 'gags nas yun ring po lon pa las kyang/ las las 'bras bu yang dag pa ste rgyu las 'bras bu mi 'khrul bar 'byung bar rig par gyis shig /'di ni rang bzhin gyis mi 'gag pa'i rgyu mtshan gyis las zhig pa'i zhig pa las phyis kyi 'bras bu 'byung bar gsungs te/ rang bzhin gyis ma grub par 'dod pa'i phyogs la zhig pa dngos por grub pa'i gnad kyis yin no/ /rang bzhin gyis yod par 'dod mkhan gyis/ myu gu zhig pa de dngos po ma yin te/ zhig rgyu'i dngos po dang/ @077b de dang rigs mthun pa'i dngos po gzhan gang yang de'i mtshan gzhir mi rung ba'i phyir zhes zer/ de la thal 'gyur bas/ zhig pa ni zhig rgyu'i dngos po dang/ de dang rigs mthun pa'i dngos po gzhan gang yang min kyang/ zhig rgyu'i dngos po la brten nas skyes pa'i phyir dngos po yin te/ dper na nyer sbas kyi phung po lnga re re ba dang/ de dag tshogs pa dang/ de dag las ngo bo tha dad pa'i dngos po gzhan gang yang nyer sbas kyi mtshan gzhir mi rung yang/ rang gi phung po la brten nas nyer sbas su btags pa dngos po yin par mi 'gal ba bzhin no zhes bzhed do/ /'dir zhig pa rgyu med du 'dod pa dgag pa la gnyis/ tshig gsal las 'byung ba dang/ rigs pa drug cu pa'i 'grel pa las 'byung ba'o/ /dang po ni/ tshig gsal las/ gang zhig 'jig pa rgyu med pa nyid du khas blangs nas 'dus byas rnams skad cig ma nyid du smra ba de'i ltar na/ nam mkha'i me tog ltar rgyu med pas 'jig pa med pa'i phyir/ dngos po rnams skad cig ma nyid dang 'jig ba dang bral ba rnams 'dus byas nyid du'ang grub par gal 'gyur/ de'i phyir de'i thams cad mi 'grig pa nyid du 'gyur ro/ /zhes gsungs/ de'i phyogs snga smra ba ni/ dngos po 'jig pa ni dngos po de'i rgyu las skye bas rgyu yod kyang de las gzhan phyis 'byung gi rgyu med par 'dod la/ dngos po zhig pa ni dngos med yin pas rgyu gtan med du smra zhing/ zhig 'jig 'gal bar 'dod do/ /lugs 'dir zhig pa yang 'jig pa yin pas zhig 'jig mi 'gal bar 'dod pa'i rgyu @078a @#/ /mtshan gyis/ tshig gsal las 'jig pa zhes gsungs kyang/ zhig pa rgyu med du 'dod pa 'gog pa yin la/ 'gog tshul ni/ dngos po rnams chos can/ skad cig ma ma yin par thal/ khyod skad cig gis 'jig pa med pa'i phyir te/ dngos po 'jig pa la rgyu med pa'i phyir te/ dngos po zhig pa la rgyu med pa'i phyir/ khyab ste/ dus gnyis par ma bsdad pa la rgyu med na dus gnyis par mi sdod pa la yang rgyu med dgos pa'i phyir te/ dngos po zhig ma zhig gnyis rgyus skyed mi skyed mtshungs pa'i phyir te/ rtags sgrub tshul 'chad bar 'gyur ba ltar yin pa'i phyir/ rtsa bar 'dod na/ dngos po rnams chos can/ 'dus byas su mi 'grub pa'am/ 'dus byas skad cig mar smra ba mi 'thad par thal/ 'dod pa'i phyir/ de ni rigs pas 'gog pa yin la/ lung gis 'gog pa ni/ dngos po zhig pa la rgyu yod de/ skye ba'i rkyen gyis rga shi zhes sems can shi ba rgyus bskyed par gsungs pa'i phyir/ khyab ste/ sems can shi ba ni sems can de zhig ba yin pa'i phyir ro/ /gzhan yang/ sngon po zhig pa la rgyu yod par thal/ sngon po'i 'jig pa'i bya ba la rgyu yod pa gang zhig sngon po'i 'jig pa'i bya ba la ni rang gi dus gnyis par zhig pa yang yod pa'i phyir/ dang po grub ste/ sngon po'i skye 'jig gnas rga'i bya ba bzhi la rgyu yod pa'i phyir te/ de bzhi 'du byed kyi phung po yin pa'i phyir te/ 'dus byas kyi mtshan nyid bzhi 'du byed kyi phung po'i nang @078b du 'du bar gsungs pa'i phyir/ khyab ste/ 'du byas kyi mtshan nyid bzhi ni bye smras byed pa po la sbyar zhing/ mtshan gzhi las rdzas logs su grub par 'dod la/ mdo sde pa yan chad kyis bya ba la sbyar zhing/ mtshan gzhi 'dus byas la brtags pa'i btags yod du 'dod pa'i khyad par yod pa'i phyir/ de dag shes par 'dod na mdzod gnas (gnyis pa'i 'grel pa 'grel bshad dang/ kho bos bris pa'i grub mtha'i zur mchan du blta bar bya'o/ rtsa rtags gnyis pa grub ste/ sngon po zhig pa ni sngon po'i 'jig pa'i bya ba yin pa'i phyir te/) rtsa she'i TIka chen las/ sngon po'i 'jig pa'i bya ba yin pa'i zhig pa bzhag dgos pa'i rgyu mtshan ni/ sngon po rang dus kyi ma zhig pa dang dus gnyis par zhig pa gnyis dngos po yin min mtshungs par ston pas de lta na de'i zhig pa yang de'i mi rtag par 'gyur bas so/ /zhes gsungs pa'i phyir/ khyab ste/ sngon po'i zhig pa dngos po yin na de nyid sngon po'i mi rtag bar 'gyur dgos la/ sngon po'i 'jig pa dang sngon po'i mi rtag pa zhes pa don la khyad par med cing/ sngon po'i 'jig pa zhes pa ni de'i 'jig pa'i bya ba la byed par mdo sde pa yan chad 'dod pa mthun par sngar bshad zin pa'i phyir ro/ /'dus byas kyi mtshan nyid bzhi 'du byed kyi phung por 'du bar gsungs pa de/ yig char zhig pa dngos por rigs pas sgrub pa'i skabs su bshad kyang/ rtsa she'i TIka chen las zhig ba rgyu med du 'dod pa lung gis 'gog pa yin par gsungs pa ni tshig gsal gyi dgongs pa'o/ /dngos po rnams dus gnyis par ma bsdad pa'i zhig pa rgyu la rag ma las na/ dus gnyis par mi sdod pa'i 'jig pa rgyu la rag las pa 'gal te/ dper na mi 'ga' zhig thag ring bar myur du 'gro ba ni rta la rag las @079a @#/ /na; thag ring po der myur du phyin pa ni rta la rag ma las pa 'gal ba bzhin no/ /zhig pa rgyu la mi ltos na 'jig pa rgyu la ltos pa 'gal bas/ phyogs snga ma'i lugs la dngos po rnams skad cig mar yang sgrub dka' zhing/ lugs 'dir zhig pa de zhig rgyu'i dngos po skyes pa tsam la ltos kyi gzhan la ltos mi dgos bas/ dngos po rnams 'jig pa yin par yang sgrub sla ba yin te/ rtsa she'i TIka chen las skye ba'i rkyen gyis rga shi zhes gsungs pa'i rigs pas dus gnyis par zhig pa de dus dang por skyes pa tsam la ltos kyi gzhan la ltos mi dgos pas/ dngos po rnams dus gnyis par mi sdod pa'i skad cig mar 'jig pa yang sgrub sla ste/ des na phyogs 'di la de thams cad legs par gnas par 'gyur ro/ /zhes gsungs pa'i phyir ro/ /zhig ma zhig gnyis rgyus skyed mi skyed mtshungs par sgrub pa'i rigs pa ni/ phyogs snga smra ba na re/ myu gu zhig pa ni rgyus mi bskyed de/ dngos med yin pa'i phyir zhes zer/ 'o na myu gu yang rgyus mi bskyed par thal/ skyes zin pa'i phyir te/ skyes zin slar yang bskyed du med pa'i phyir ro/ /kho na re/ myu gu skyes zin pas da gzod rgyus mi bskyed kyang/ myu gu skyes pa ni rgyus bskyed pas myu gu la rgyu yod do zhe na/ kho bo cag kyang myu gu zhig zin pa da gzod rgyus bskyed par mi 'dod kyi/ myu gu zhig pa ni rgyus bskyed pas zhig ba la rgyu yod do/ /kho na re/ myu gu zhig pa chos can/ dngos po yin par thal/ rgyus @079b bskyed pa'i phyir zhe na/ 'dod pa yin te/ de ni rang gi ngo bo la ltos nas dngos po yin la myu gu la ltos nas dngos med yin pa'i phyir ro/ /sngar med phyis 'byung gi rigs pa ni/ TIka chen las/ gzhan yang sngar sa bon gyi dus na med la phyis yod pas myu gu'i skye ba rgyu dang bcas pa yin pa de bzhin du/ myu gu'i zhig pa yang sngar myu gu'i dus na med la phyis yod pa'i phyir rgyu yod do/ /zhes gsungs pa ltar yin la/ 'di la kha cig na re/ rigs pa 'dis zhig pa rgyu dang bcas par sgrub mi nus te/ myu gu'i dus na med la phyis yod na rgyu dang bcas pas ma khyab pa'i phyir te/ sngar med la phyis yod na 'dus byas yin pas ma khyab pa'i phyir te/ mthong spang spangs pa'i 'gog bden ni mthong spang ma zad bar du med la zad pa'i dus su yod kyang rtag pa yin pa'i phyir zhes zer na/ de ni rgyu dang bcas te/ sngar med la phyis yod pa'i phyir zhes pa tsam ma yin te/ 'o na ci zhe na/ myu gu'i zhig pa chos can/ rgyu dang bcas pa yin te/ sa bon gyi dus na myu gu'i skye ba med tshul ltar du sngar med la/ myu gu'i skye ba phyis yod par 'gyur tshul ltar du phyis yod par 'gyur ba'i phyir zhes pa yin pa'i phyir te/ sa bon gyi dus na myu gu dang myu gu'i stong nyid gnyis ka med kyang/ de gnyis kyi med tshul mi 'dra ba'i phyir te/ sa bon gyi dus na myu gu med kyang myu gu skye bzhin pa yod la/ des sa bon zhig pa'i rgyu byed cing/ sa bon gyi dus na myu gu'i stong nyid med par ma zad/ stong nyid de skye bzhin pa yang med pas/ des sa bon zhig pa'i@080a @#/ /rgyu byed tshul med pa'i phyir te/ bzhi brgya pa las/ 'bras bu yis ni rgyu bshig pa/ /des na med ba skye mi 'gyur/ /zhes rgyu 'gags pa 'bras bu skye bzhin pas byas pa dang/ 'bras bu gang yin kyang rang skye bzhin pa las skye bas med pa mi skye bar bshad pa'i phyir ro/ /de bzhin du myu gu'i zhig pa ni myu gu'i dus su med pa phyis yod par 'gyur ba ni/ snga dro'i dus su phyi dro'i nam mkha'i med pa phyis yod par 'gyur ba ltar du sngar med phyis yod par 'gyur ba ma yin gyi/ /sa bon gyi dus su myu gu med pa phyis yod par 'gyur ba ltar du sngar med phyis yod par 'gyur ba yin pa'i phyir rgyu dang bcas pa yin no/ /'on kyang rje'i gsung de ni dka' gnas su snang yang/ rjes 'jug rnams kyis gsal du btang ba med pas/ kho bos cung zad dpyad pa 'di sngar gyi rtsod pa'i lan du ma song na blo ldan rnams kyis zhib tu dpyad nas lan gzhan gdab par bya'o/ /gzhan yang zhig pa ni rgyu dang bcas te/ zhig pas 'bras bu bskyed pa'i phyir te/ sa bcu pa las/ 'chi ba yang bya ba gnyis su nye bar gnas pa yin te/ 'du byed 'jig par yang byed pa dang/ yongs su mi shes pa rgyun mi 'chad pa'i rgyu yang 'byin pa'o/ /zhes zhig pas bya ba byed nus par gsungs pa'i phyir ro/ gnyis pa ni/ rig pa drug cu pa'i 'grel pa las mar dang snying po zad pa de mar me shi ba'i rgyur gsungs pas/ rgyun gyi zhig pa la yang rgyu yod par bzhed pa yin no/ /'di la pha rol @080b pos; mar dang sdong bu zad pa de mar me shi ba'i rgyu ma yin gyi/ mar me'i skad cig tha ma de'i rigs 'dra skye ba'i rkyen ma tshang ba tsam yin no zhe na/ 'o na mar dang sdong bu zad pa de chos can/ mar me'i skad cig tha ma de'i rigs 'dra ma 'ongs pa'i rgyur 'dod rigs bar thal/ de'i rigs 'dra mi skye ba'i rgyu yin pa'i phyir te/ de'i rigs 'dra mi skye ba ni mar dang sdong bu zad pa'i dbang gis yin pa'i phyir ro/ /de lta na mar dang sdong bu zad pa ni mar me shi ba'i rgyu yin par ma zad/ mar me'i skad cig tha ma de'i rigs 'dra ma 'ongs pa'i rgyu yang yin no/ /de bzhin du myu gu skye 'gyur re zhig ma skyes pa'i rgyu yang dgun dus kyi zhing lta bu la myu gu skye ba'i rkyen sngar yod zad nas ma tshang ba la bzhed do; ;pha rol po na re/ mar dang sdong bu zad pa chos can/ rgyu ma yin par thal/ mar dang sdong bu zad nas med ba yin pa'i phyir na ma khyab/ 'o na mar dang sdong bu gnyis kyang rgyu ma yin par thal/ de dag 'bras bu'i dus na 'gags nas med pa'i phyir te/ bzhi brgya pa las/ rgyu ni rnam par 'gyur ba na/ /gzhan gyi rgyu ru 'gyur ba ste/ /zhes 'bras bu'i dus na rgyu med par 'gyur bar gsungs pa'i phyir ro/ /ji skad du TIka chen las/ mar dang sdong bu zad pa rgyur mi rung bar brtsad pa'i lan du/ de dag ma zad pa'i yod pa yang rgyur mi 'thad do zhes mgo mtshungs mdzad nas/ sa bon ni yod pa'i gnas skabs kho nar myu gu'i rgyur mi rtogs zhes sogs bshad pa'i don ni @081a @#/ /sngar bshad zin to/ /zhes dang/ sngar bshad tshul ni de nyid las/ 'bras bu'i dus na rgyu'i gnas skabs ma btang na rgyur 'dod pa de 'bras bu de'i rgyur mi 'gyur ba la sa bon dang rnam shes snga ma med bar ma song bar rgyur mi 'gyur zhes gsungs pa yin/ zhes pa de yin pa'i phyir ro/ gzhan yang dngos po sngar yod zad pa rgyu yin te/ rgyu dang 'bras bu ni 'jig rten pas mthong ba ltar gzhag dgos pa gang zhig /'jig rten na chu zad bas nga'i 'bras nyes so/ /zas zad pas nga'i bu shi'o zhes phyi ma brlag pa snga ma zad pas byas par brjod pa'i phyir te/ zas dang chu ma zad pa bu 'tsho ba dang 'bras bu legs pa'i rgyur byed pa bzhin du/ zas dang chu zad pa yang bu shi ba dang 'bras bu zad pa'i rgyur 'jog pa'i phyir ro/ /zhig pa dngos po yin pa de 'phags pa yab sras kyi dgongs pa yin te/ rtsa she las/ dngos dang dngos med 'dus byas yin/ /zhes myu gu sogs kyi dngos po dang/ de zhig pa de'i dngos por med pa gnyis ka 'dus byas yin par gsungs pa dang/ rig pa drug cu pa las/ rgyu zad nyid las zhi ba ni/ /zad ces bya bar dmigs pa ste/ zhes snum lta bu'i rgyu zad pa ni mar me lta bu'i 'bras bu zad pa'i rgyur gsungs pa dang/ bzhi brgya pa las/ 'bras bu yis ni rgyu bshig pa/ /des na med pa skye mi 'gyur/ /zhes 'bras bu skye bzhin pa rgyu dang rgyu 'gag pa 'bras bur gsungs pa'i phyir ro/ /mtha' cung zad dpyad pa la @081b kha cig na re/ mar me'i skad cig tha ma de'i rigs 'dra ma 'ongs pa'i rgyu yod par bshad pa mi 'thad de/ mar me'i skad cig tha ma de'i rigs 'dra ma 'ongs pa de 'dus byas ma yin pa'i phyir te/ mar me'i skad cig tha ma de'i rigs 'dra phyi ma med pa'i phyir na ma khyab/ khyab par thal/ med pa yin na khyod ma 'ongs ba 'dus byas ma yin pas khyab pa'i phyir te/ med pa yin na khyod ma 'ongs pa ma 'ongs pa ma yin pas khyab pa'i phyir zer na/ rtags ma grub ste/ mar me rgyun chad pa las phyi ma'i rigs 'dra ma skyes pa de ma 'ongs pa yin par bshad pa gang zhig /nyon mongs rgyun chad pa las phyi ma'i rigs 'dra ma skyes pa yang ma 'ongs pa yin par bshad ba'i phyir/ dang po grub ste/ rab byed bdun pa'i TIka chen las/ 'di la pha rol pos mar dang sdong bu zad ba mar me shi ba'i rgyu min gyi/ mar dang sdong bu zad pa ni mar me'i skad cig tha mas de'i rigs 'dra ma 'ongs pa skyed pa'i rkyen ma tshang ba yin la/ ma 'ongs pa yang skye ba'i rkyen ma tshang pas ma skyes so zhes smra ba la/ de lta na rkyen ma tshang ba ma yin na de nges par skye bas/ rkyen ma tshang ba ma 'ongs pa mi skye ba'i rgyur khas blangs la/ de'i phyir gnas pa'i rgyu zad pas 'bras bu gnas pa zad par khas blangs par 'gyur ro zhes bshad do/ zhes gsungs pa'i phyir/ gnyis pa grub ste/ rab byed nyer lnga pa'i TIka chen las/ nyon mongs la sogs pa'i rgyu rkyen rgyun chad pa las phyi ma'i rigs 'dra ma skyes pa ni myang 'das su mi bya ste/ de ni rgyu snga ma @082a @#/ /zad pas bskyed pa'i ma 'ongs par bshad zin pa'i phyir ro/ /zhes gsungs pa'i phyir dang/ gong du bshad pa yang drangs ma thag pa'i gzhung snga ma der bshad pa la byed pa'i phyir ro/ /byas pa la kho na re/ med pa yin na khyod ma 'ongs pa de ma 'ongs pa ma yin pas khyab par thal/ ma 'ongs pa yin na gang ma 'ongs pa'i gzhi de'i rgyu yod kyang rkyen ma tshang ba'i dbang gis re zhig ma skyes pa yin pas khyab pa'i phyir te/ rab byed bcu dgu pa'i TIka chen las/ da ltar bar ma phyin pa ni nam mkha' dang ri bong rwa la sogs pa'ang yin pas de bcad pa'i phyir/ mngon pa las rgyu yod kyang ma byung ba dang zhes gsungs te/ dper na myu gu'i rgyu yod kyang dadung myu gur ma skyes pa'am ma phyin pa ni ma 'ongs pa yin gyi/ gang zhig ma 'ongs pa'i gzhi de nam yang 'byung ba'i rgyu med pas ma phyin pa ni ma 'ongs pa min no/ /zhes gsungs pa'i phyir nam khyab ste/ rgyu yod kyang ma byung ba zhes pa'i don ni/ gang ma 'ongs pa'i gzhi de'i rgyu yod kyang zhes sbyor mi dgos pa'i phyir te/ ma 'ongs pa la gang ma 'ongs pa'i gzhi de gtan nas ma skyes pa'i ma 'ongs pa dang/ re zhig ma skyes pa'i ma 'ongs pa gnyis yod pa las/ dang po ni rgyun 'chad kha ma'i nyon sgrib kyi rigs 'dra ma 'ongs pa lta bu dang/ gnyis pa ni dgu na dus kyi zhing sar myu gu ma 'ongs ba lta bu yin la/ de'i dang po la ni nyon mongs skye ba'i rgyu sngar yod kyang zad nas ma skyes pa zhes sbyor dgos shing/ gnyis pa la ni gang ma @082b 'ongs pa'i gzhi myu gu de'i rgyu yod kyang re zhig ma skyes pa zhes sbyor dgos pa'i khyad par yod pa'i phyir te/ gzhan du na TIka chen gyi lung sngar drangs pa dag dang 'gal bar 'gyur ba'i phyir ro/ byas pa la kho na re/ 'o na ri bong gi rwa ma skyes pa yang ma 'ongs ba yin par thal/ rgyun 'chad kha ma'i mar me'i rgyun phyi ma ma skyes pa de ma 'ongs ba yin pa'i phyir/ khyab ste/ de gnyis la ma 'ongs pa yin min gyi khyad par 'jog lugs med pa'i phyir te/ gang ma 'ongs pa'i gzhi de'i rgyu yod med kyis mi dbyed pa'i phyir na ma khyab ste/ de gnyis kyi gang ma 'ongs pa'i gzhi la rgyu med par 'dra yang/ de gnyis kho rang la rgyu yod med kyi khyad par yod pa'i phyir te/ ri bong gi rwa ma skyes pa'i rgyu med la/ rgyun 'chad kha ma'i mar me'i rgyun phyi ma mskyes pa'i rgyu yod ba'i phyir te/ ri bong gi rwa ni dang po nyid nas rgyu rkyen med pas ma skyes pa dang/ mar me de'i rgyun phyi ma ni rgyu rkyen zad nas med pas ma skyes pa yin pa'i phyir/ khyab ste/ dang po nyid nas rgyu rkyen med pa de rgyu ma yin la/ rgyu rkyen zad nas med pa de rgyu yin pa'i phyir te/ dang po nyid nas zas med pa de rgyu ma yin la/ zas zad nas med pa de rgyu yin pa'i phyir te/ TIka chen las/ zas dang chu ma zad pa bu 'tsho ba dang 'bras legs ba'i rgyur byed pa bzhin du de dag zad pa yang de rnams zad pa'i rgyur 'jog pa'i phyir/ zad pa min pa'i de dag med pa dang mi 'dra ste/ des 'bras bu'i phyogs kyang shes par bya'o/ zhes gsungs pa'i phyir/ 'bras bu'i phyogs shes bar byed tshul ni/ dang po nyid nas bu dang 'bras med pa @083a @#/ /ni 'bras bu ma yin la/ bu shi nas med pa dang 'bras brlag nas med pa ni 'bras bu yin pa'i khyad par shes pa de yin no/ yang kha cig na re/ ma 'ongs pa yin na gang ma 'ongs pa'i gzhi de dngos po yin pas khyab par thal/ dbu ma'i yig char/ dngos po gzhan zhig rang nyid skyed byed kyi rgyu yod kyang rkyen ma tshang bas ma skyes pa'i cha de/ ma 'ongs pa'i mtshan nyid/ ces gsungs pa'i phyir na ma khyab ste/ de ni TIka chen gyi gzhung gong 'og bsgrigs nas zhib tu dpyad pa ma mdzad par rab byed bcu dgu ba'i TIka chen tsam la brten pa'i bshad pa yin pa'i phyir ro/ /yang kha cig na re/ zas med pa dang chu med pa dag rgyu yin par thal/ yig char de ltar bshad pa'i phyir na ma khyab ste/ zas dang chu zad nas med pa la dgongs pa'i phyir/ 'dod mi nus ste/ zas dang chu zad pa rgyu yin kyang zas dang chu med pa rgyu ma yin par TIka chen las shin tu gsal bar gsungs pa de sngar drangs pa de'i phyir dang/ bum pa zhig pa rgyu yin kyang bum pa med pa rgyu ma yin pa bzhin yin pa'i phyir ro/ /yang kha cig na re/ 'das rgyu'i dngos po de rgyun chad pa'i zhig pa 'das pa ma yin par thal/ yig char 'das ma 'ongs su 'jog pa la gtan med dang gtan brlag ma yin pa zhig dgos par gsungs pa'i phyir na ma khyab ste/ yig char de ltar gsungs pa'i dgongs pa btsal bar bya dgos kyi/ tshig zin ltar 'dod mi rung ba'i phyir te/ mar me shi ba 'das pa yin bar rig pa drug cu @083b ba'i 'grel pa dang rab byed bdun pa'i TIka chen gnyis kar bshad pa'i phyir te/ TIka chen las/ rgyun gyi zhig pa'i rgyu ni rig pa drug cu pa'i 'grel pa las mar dang snying po zad pa mar me shi ba'i rgyur bshad pa lta bu rnams yin no/ / zhes gsungs pa'i phyir ro/ /byas pa la kho na re/ shes sgrib rgyun chad pa'i zhig pa chos can/ 'das pa yin par thal/ rgyun gyi zhig ba 'das pa yin par 'dod rigs pa'i phyir/ rtags khas/ 'dod na/ de chos can/ shes sgrib 'das pa yin par thal/ 'das pa gang zhig /khyod kyi 'das rgyu'i dngos po la shes sgrib las gzhan mi rnyed pa'i phyir/ 'dod na/ de chos can/ shes sgrib yin par thal/ shes sgrib 'das pa yin pa'i phyir na ma khyab/ 'dod mi nus te/ byang sems rgyun mtha' ba'i rgyud la khyod yod pa'i phyir/ yang kho na re/ shes sgrib zhig pa shes sgrib yin par thal/ las zhig pa de las yin pa'i phyir te/ rnam smin ma zad pa'i dge ba'i las zhig pa dge ba dang/ rnam smin ma zad pa'i mi dge ba'i las zhig pa mi dge ba yin pa'i phyir te/ de ltar zhig pa'i steng nas dge sogs gsum 'jog lugs yod par yig char bshad pa'i phyir zer na/ bshad tshul de ni dpyad gzhi che ste/ shes byed kyi lung mi snang la/ sgrub byed kyi rigs pa'ang ma bkod pa'i phyir dang/ las byas pa'i skad cig gnyis par las de rgyun chad pa'i nges ba med pas/ mtshams med kyi las lta bu la skad cig gnyis pa nas bzung ste rgyun tha dad pa'i mtshams med kyi las gnyis skye bar 'gyur ba'i @084a @#/ /phyir dang/ lus kyi las zhig pa lus kyi las yin na gzugs su 'gyur la/ min na las gsum po gang rung ma yin pa'i las su 'gyur ba'i phyir/ 'di la kho na re/ lus kyi las yin na gzugs yin pas khyab pa med de/ bcu pa srid pa'i ngo bor gyur pa'i lus kyi las yod pa gang zhig bcu ba srid pa bag chags yin pa'i phyir zer na/ rtags phyi ma ma grub ste/ bcu pa srid pa phung po lnga pa can yin pa'i phyir te/ rtsa she las/ srid pa de yang phung po lnga/ zhes pa'i TIka chen las/ len pa'i rkyen gyis 'byung ba'i srid pa de yang phung po lnga'i rnag bzhin du rig par bya ste/ zhes dang/ de la lus dang ngag gi las ni gzugs kyi phung po yin la/ yid kyi las ni phung po bzhi'i rang bzhin no/ /zhes pa nas/ yid kyi las ni sems pa yin mod kyang sems pa dang mtshungs ldan gyi sems sems byung gzhan rnams de dang ngo bo gcig pas yid las phung po bzhi'i rang bzhin du bshad do/ / zhes gsungs pa'i phyir ro/ /yang kho na re/ bcu pa srid pa bag chags yin bar thal/ TIka chen las/ ji ltar 'grub par byed na 'du byed kyis rnam shes la bsgos pa'i las kyi bag chags de nus pa mthu can du byas pa las kyi srid par byas pa'i tshul gyis so/ /zhes gsungs ba'i phyir zer na/ lus ngag gi las ni bcu pa srid pa'i bar du gzugs yin bzhin par 'gro ba dang bar skabs su bag chags su 'gyur ba gnyis yod zer ram/ yang na @084b lus ngag gi las ni gzugs yin bzhin par 'gro la/ yid kyi las ni bag chags su 'gyur ba yod zer ram dpyad par bya'o/ /yang kha cig na re/ ma 'ongs pa'i mtshan nyid med par thal/ de'i mtshan nyid yig char bzhag pa ltar mi rung ba'i phyir na ma khyab ste/ gzhi gzhan zhig rgyu rkyen sngar yod zad nas ma tshang ba'i dbang gis ma skyes pa'i cha de/ ma 'ongs pa'i mtshan nyid yin pa'i phyir te/ rgyu rkyen sngar yod pa'ang gang ma 'ongs pa'i gzhi de'i rgyu rkyen sngar yod pa la byed mi dgos par bshad zin pa'i phyir dang/ myu gu ma 'ongs pa lta bu yang gang ma 'ongs pa'i gzhi myu gu de rkyen sngar yod zad nas ma tshang ba'i dbang gis yul dus 'ga' zhig tu re zhig ma skyes pa yin pa'i phyir te/ TIka chen las; myu gu skye 'gyur da lta ma skyes pa'i ma 'ongs pa'i rgyu yang rkyen sngar yod zad nas ma tshang ba la bzhed de/ zhes gsungs pa'i phyir dang/ dang po nas rgyu rkyen ma tshang ba'i dbang gis ma skyes pa ni ri bong gi rwa la sogs pa'ang yin pas de bcad pa'i phyir rkyen sngar yod zad nas ma tshang ba zhes bshad pa yin pa'i phyir ro/ /de ltar na dang po nas rgyu rkyen ma tshang ba de rgyu min la/ rgyu rkyen sngar yod zad nas ma tshang ba de rgyu yin par bzhed par mngon no/ /yang kha cig mdo sems rang rgyud pa'i lugs la/ dus gsum gang rung yin na dus yin pas khyab zer/ de la skyon 'phen pa kha cig na re/ bum pa 'das pa chos can/ der thal/ de'i phyir/ 'dod mi nus te/ rtag pa yin pa'i phyir/ khyab ste/ dus ni 'dus byas kyi ming @085a @#/ /gi rnam grangs yin par mdzod las bshad pa'i phyir dang/ dus rtag par 'dod pa ni mu stegs pa'i lugs yin pa'i phyir zer na/ 'di la zhib cha gdon par bya'o/ /dus gsum gyi rnam gzhag gzhan rnams yig char gsal bar bshad 'dug pas 'dir ma bris so/ /gong du yig cha dang mi mthun pa'i bshad pa bkod pa ni/ blo gsar ba rnams dpyad pa 'jug ched du dogs slong tsam byas pa yin gyi/ mkhas grub dam pa 'jam dbyangs bzhad pa'i rdo rje'i bshad tshul de mtha' gcig tu mi 'thad ces pa ga la yin/ de'i phyir kho bos bshad pa ltar mi rung ba yin na/ yal bar mi 'dor bar lung rigs dri ma med pas tshar gcod par byos shig ces gzur gnas blo ldan rnams la gsol ba 'debs so/ /gnyis pa ni/ rmi lam dmigspa'i yul dag mthong nas ni/ zhes pa nas/ las las kyang ni 'bras bu yod pa yin/ /zhes tshigs bcad gcig byung/ sngar las 'gags pa las 'bras bu 'byung bar bshad pa'i don de nyid dpe'i sgo nas bshad pa/ rmi lam na bud med bzang mo dmigs ba'i yul dag mthong nas ni/ de nas gnyid sad kyang ste sad pa'i tshe na yang skye bo blun po la da lta 'gags shing med pa la dmigs nas chags pa drag po skye bar 'gyur ba de bzhin du/ rang bzhin gyis yod pa min pa'i las 'gags pa las kyang/ las kyi 'bras bu 'byung ba yod pa yin no/ /zhes las 'gags pa las 'bras bu 'byung bar bstan no/ /gsum pa la gnyis/ @085b rnam smin thug med du 'byin pa'i rtsod pa spang ba dang/ kun gzhi yod par gsungs pa'i lung dang 'gal ba'i rtsod pa spang ba'o/ /dang po ni/ ji ltar yul ni yod nyid min mtshungs kyang/ zhes pa nas/ las 'bras rnams la sems pa'ang dgag pa mdzad/ /ces tshigs bcad gnyis byung/ gal te las rang bzhin gyis zad pa med pas rnam smin 'byung bar 'dod na/ rnam par smin zin pa las kyang yang rnam smin 'byung bar 'gyur bas thug med du 'gyur te/ rnam smin phyung zin ma zin pa'i las gnyis ka rang bzhin gyis zad ba med par mtshungs pa'i phyir zhe na/ ji ltar te dper na yul ni yod pa nyid min par mtshungs bzhin du/ rab rib can gyi mig gis yod pa min pa'i skra shad la sogs pa'i rnam par ni mthong gi de las gzhan pa'i dngos po'i rnam pa bong bu'i rwa dang/ mo gsham gyi bu la sogs pa'i rnam par mthong ba ma yin pa ltar/ de bzhin du las rang bzhin gyis yod pa min par mtshungs bzhin du/ smin ma zin pa las smin pa dang smin zin pa las slar yang smin pa min par shes par gyis shig/ dpe 'dis las rnams kyi 'bras bu nges par 'grub pa 'ba' zhig tu ma zad kyi/ dge mi dge'i las las yid du 'ong mi 'ong gi 'bras bu yang so sor nges so zhes bshad pa/ rab rib can gyi mig gis skra shad sogs mthong ba dang/ bong bu'i rwa la sogs pa mi mthong ba'i nges pa de'i phyir rnam smin yid du 'ong ba ni mi dge ba las mi 'byung la/ rnam smin yid du mi 'ong ba ni dge@086a @#/ /ba las ma yin pa'i phyir/ rnam smin mi dge ba ste yid du mi 'ong ba ni nag po'i las las yin la/ rnam smin dge ba ste yid du 'ong ba ni dge ba las 'byung ba yin par mthong zhing/ dge ba dang mi dge ba'i las rang bzhin gyis med par rtogs pa'i blo can ni 'khor ba las thar par 'gyur ro/ /de'i phyir rgyal bas so so skye bo las kyi khyad par 'di dang 'di las 'bras bu'i khyad par 'di dang 'di 'byung ba'i rgyu mtshan 'thad sgrub kyi rigs pas zhi ba bar nges par dpyod par byed pa rnams la/ las dang 'bras bu la skur ba btab pa las kun rdzob 'jig par 'gyur du 'ong snyam ste/ las rnams kyi 'bras bu rnam par smin pa ni bsam gyis mi khyab bo/ zhes las dang 'bras bu rnams la brten pa'i sems pa ste dpyad pa'ang dgag par mdzad do/ /gnyis pa la gnyis/ lung 'gal spong ba'i tshig don dngos/ dgos pa'i dbang gis gsungs pa'i dpe bstan pa'o/ /dang po ni/ kun gzhi yod cing gang zag nyid yod la/ zhes pa nas/ rig par mi 'gyur gang yin de la'o/ /zhes tshigs bcad gcig byung/ gal te kun gzhi rnam shes med par 'dod na/ theg pa chen po'i mdo gzhan las tshogs drug las ngo bo tha dad pa'i kun gzhi rnam shes yod par gsungs pa dang 'gal bar 'gyur ro zhe na/ kun gzhi rnam shes yod cing/ gang zag nyid rdzas su yod la/ phung po 'di dag 'ba' zhig ste de tsam nyid bden par yod ces bstan pa 'di ni/ sngar @086b bshad pa de ltar te de lta bu'i ches zab pa'i don re zhig rig pa ste rtogs par mi 'gyur ba'i gdul bya gang yin pa de la dgongs te gsungs pa yin gyi/ sgra ji bzhin pa min pas 'gal skyon med do/ /gnyis pa ni/ 'jig tshogs lta dang bral yang sangs rgyas kyis/ zhes pa nas/ yod ces drang don nyid du bstan pa yin/ zhes tshigs bcad gcig byung/ /gdul bya gzhug bar bya ba'i phyir dang po kun gzhi rnam shes la sogs pa bstan pa 'ba' zhig tu ma zad kyi/ ji ltar te dper na 'jig tshogs la lta ba bag chags dang bcas pa dang bral bas/ nga dang nga yir 'dzin pa'i rtog pa thams cad spangs kyang/ nga dang nga yi zhes bsnyad pa 'jig rten gyis chos kyi don khong du chud pa'i thabs yin pa'i phyir/ sangs rgyas bcom ldan 'das kyis nga dang nga yi zhes ji skad bstan pa de bzhin du/ dngos po rnams rang bzhin gyis grub pa med mod kyang/ rang bzhin gyis yod ces drang don nyid du bstan pa ni/ 'jig rten gyi rim gyis de kho na nyid khong du chud pa'i thabs yin no/ /bsdu na nga dang nga yi'o zhes rtog pa yod pa ltar gsungs kyang/ rtog pa med pa nges don yin pa bzhin du/ chos rnams rang bzhin gyis grub bar gsungs pa yod kyang/ rang bzhin gyis med pa ni nges pa'i don no zhes pa'o/ /gnyis pa sems tsam pa'i lugs bye brag tu dgag pa la gsum/ phyi rol med pa'i shes ba rang bzhin gyis grub pa dgag pa/ gzhan dbang rang bzhin gyis grub pa'i sgrub byed kyi tshad ma @087a @#/ /dgag pa/ sems tsam du gsungs pa'i tsam gyi sgras phyi don 'gog pa min par bstan pa'o/ /dang po la gnyis/ gzhan lugs brjod pa dang/ lugs de dgag pa'o/ /dang po ni/ gzung ba med par 'dzin pa ma mthong zhing/ zhes pa nas/ yod dang spros kun yul min rang bzhin yod/ /ces tshigs bcad gsum byung/ sems tsam pa na re/ shes rab kyi pha rol tu phyin pa lhag pa la gnas pa ste zhugs nas de nyid sgom par byed pa'i byang chub sems dpa' sa drug ba ba des/ rigs pa gang gis de kho na nyid phyin ci ma log pa dang/ gzung 'dzin rdzas tha dad du lhag par sgro ma btags par rtogs pa dang mthong ba dang khong du chud pa ni de nyid rtogs pa ste/ rnam par shes pa tsam du de kho na nyid rtogs par 'gyur zhes rnam par sbyar ro/ /de yang phyi rol gyi gzugs med pas sems dang sems byung rnams kyang phyi rol gyi don med par rten 'byung gi dngos po tsam du rtogs pa'i phyir/ rnam shes tsam du de kho na nyid rtogs pa zhes bya'o/ /yang ji ltar byang sems 'dis de kho na nyid de ltar rtogs par 'gyur zhe na/ gang gi phyir byang sems 'dis nang gi bag chags smin pa las gzugs sogs 'byung bar 'chad par 'gyur ba'i rigs bas sems la rang las rdzas gzhan gyi gzung ba med par de las don gzhan pa'i de 'dzin par byed pa ma mthong zhing/ srid pa khams gsum po ni rnam par shes pa tsam mo zhes rab tu rtogs nas/ @087b gnyis stong gi de kho na nyid la yun ring por goms par byed la/ de goms pa las kyang sgras de kho na nyid du brjod du med pa'i dngos po ste gnyis stong gi ngo bo tsam zhig dang rig pas mngon sum du mthong ste/ de'i phyir sngon du goms pa'i rim pa 'dis sa drug pa bas rnam shes tsam du de kho na nyid rtogs par 'gyur ro/ /gal te 'di dag phyi rol med pa'i rnam par rig pa tsam yin na/ 'o na 'dir phyi rol med par de'i rnam pa can gyi sems tsam ji ltar skye bar 'gyur zhe na; smras pa ji ltar te dper na rgya mtsho chen po ni rlung gis bskul ba ste bskyod pa las/ sngar gnyid log ba lta bu'i mi g.yo bar gnas pa las chu'i rlabs rnams 'gran pa'i sgo nas/ bdag gi lus rnyed pa ltar yongs su rgyug bar rtogs pa de bzhin du/ phyi nang gi dngos po kun gyi sa bon kun gzhi rnam shes zhes bya ba las/ chags sogs dang dad sogs 'gag bzhin pas rang dang rjes su mthun pa'i nus pa kun gzhi la gzhag pa'i bag chags smin pa las ma dag pa'i gzhan dbang rnam shes tsam zhig 'byung ba de nyid la/ byis pa rnams gzung ba dang 'dzin pa phyi nang rgyangs chad par 'dzin pa'i tshul gyis rtog par byed kyi/ rnam shes las rdzas tha dad pa'i gzung ba ni cung zad kyang yod pa min no/ /'di ni mu stegs pas/ ba ni ba sbra rnams kyi rgyu/ /chu shel chu rnams kyi bzhin dang/ /bla ga sha yal ga rnams kyi ltar/ /de ni lus can kun gyi rgyu/ /zhes dbang phyug sogs 'gro ba'i byed pa por smra ba @088a @#/ /bzhin du/ kun gzhi rnam shes smra ba rnams kyang rnam shes dmigs pa'i dngos po mtha' dag gi rten nyid kyis sa bon thams cad pa smra bar byed do/ /gang dbang phyug rtag la kun gzhi rnam shes mi rtag go zhes bya ba 'di ni khyad par ro/ /de'i phyir tshe rabs gzhan mang por mu stegs pa'i lta ba goms pa rnams ni kun gzhi bshad pas 'dul ba yin par gsungs so/ /gang gi phyir gsung rab kyi rnam par gzhag pa ni sngar bshad pa 'di yin par grags pa de'i phyir gzhan gyi dbang rang bzhin gyis grub pa'i ngo bo gang yin pa 'di ni gdon mi za bar khas blang bar bya ste/ gang gi phyir gzung 'dzin gyi dngos po btags par yod pa ste rdzas tha dad du yod par 'dzin pa sogs kyi rtog pa'i 'dra ba ma lus pa'i rgyu ste gzhir 'gyur bar 'dod pa'i phyir ro/ /thag pa'i rgyu mtshan can gyi sbrul du 'khrul ba ni thag pa med pa'i gzhir mi skye ba bzhin du/ phyi rol gyi don med na sngon po la sogs pa phyi rol tu 'khrul ba'i rtog pa 'khrul gzhi ji lta bu zhig gi rgyu can du 'gyur/ /de'i phyir gdon mi za bar phyi rol tu 'khrul ba'i rtog pa'i rgyu gzung 'dzin rdzas tha dad pa gnyis su snang ba'i ma dag gzhan dbang khas blangs dgos te/ snang gzhi de nyid kun byang gi 'ching grol gnyis ka'i rgyu yin pa'i phyir ro/ /gong gi phyi rol gyi don med na zhes pa ni gzhi gzhan dbang med na zhes pa'i don yin pa lta bur snang yang/ 'jug 'grel dang rnam bshad gnyis kar phyi @088b rol gyi don med na zhes 'byung ba'i dpe dag ma dag dpyad par bya ste/ sems tsam pa'i lugs la/ phyi don med na 'khrul ba'i gzhi med par 'gyur ba'i skyon med pa'i phyir ro/ /gzhan dbang de ni phyi rol gyi gzung ba med par rang gi bag chags kho na las 'byung bar 'gyur la/ rang bzhin gyis yod pa dang/ 'di'i lugs kyi don dam par sgra rtog gi spros pa thams cad kyi yul min pa'i rang bzhin can du yod de/ phyi nang gi mngon par brjod pa ni dngos sun brtags pa'i rnam pa 'dzin pa'i phyir ro/ /des na gzhan dbang gi sngar bshad pa'i khyad par gsum ldan te/ btags par yod pa'i rgyu ni rang bzhin gyis yod pa'i khongs su 'du ba yin pa'i phyir ro/ /gang na gang med pa de ni des stong pa dang; 'di la lhag ma yod pa ni 'dir yod pa'o zhes yod med yang dag pa ji lta ba bzhin shes pa ni stong nyid la 'jug pa phyin ci ma log par gsungs pa'i don yang/ gzhan dbang gang na gzung 'dzin rdzas tha dad pa'i kun brtags gang med pa 'di ni gzhi de dgag bya des stong pa dang/ stong gzhi dang stong nyid gang lhag mar lus pa ni 'dir bden par yod pa'i don yin par byang sa dang dbus mtha'i 'grel par bshad pa rnams 'jug 'grel du phyogs sngar bkod la/ de'i don dbu ma'i lugs su 'grel tshul ni rgyud bla thogs 'grel sogs las shes dgos so/ /gnyis pa la gnyis/ dgag ba rgyas par brjod pa dang/ de ltar bkag pa'i don bsdu ba'o/ /dang po la gsum/ @089a @#/ /phyi rol med pa'i shes pa rang bzhin gyis grub pa'i dpe dgag pa/ bag chags kyi nus pa las don gyis stong pa'i shes pa skye ba'i don dgag pa/ de ltar bkag pa dang mi sdug pa sgom pa gnyis mi 'gal bar bstan pa'o/ /dang po la gnyis/ rmi lam gyi dpe dgag pa/ skra shad mthong ba'i dpe dgag pa'o/ /dang po la gsum/ rmi lam gyi dpes shes pa rang bzhin gyis yod pa mi 'grub pa/ rmi lam gyi dpes sad dus su phyi rol med pa mi 'grub ba/ rmi lam gyi dpes dngos po thams cad brdzun par 'grub ba'o/ /dang po ni/ phyi rol med sems dpe ni gang du yod/ ces pa nas/ de 'dra phyi rol la yang yod pa yin/ zhes tshigs bcad gnyis byung/ sems tsam pa khyed phyi rol med la rang gi mtshan nyid kyis grub pa'i sems yod par 'dod na/ 'di'i dpe ni gang du yod ce na/ sems tsam pas smras pa/ dper na khang mig chung ngur nyal zhing gnyid log bas glang po che myos pa'i khyu rmis pa'i glang po che ni khang mig der ji ltar yang yod pa min te/ de'i phyir rmi lam ji lta ba bzhin du phyi rol gyi yul med bzhin du rnam shes rang bzhin gyis yod pa 'di nges par khas blang par bya'o zhe na/ dpe de nyid 'dir bsam pa ste dpyad par bya'o/ /gang gi tshe rmi lam na yang ba lang myos pa'i khyu'i rnam pa can gyi sems rang gi mtshan nyid kyis grub pa de ni/ yul glang po che med pa ltar nga'i lugs la yod pa min te/ ma skyes pa'i phyir @089b ro; ;sems rang mtshan gyis grub pa med na/ de'i tshe rgol ba gnyis ka la grub pa'i khyed kyi dpe yod pa min pas/ phyi rol med bar rnam shes rang bzhin gyis yod pa min no/ /ci ste rmi lam na rnam shes rang bzhin gyis med na sad pa'i tshe rmi lam gyi nyams su myong ba dran par mi 'gyur ro snyam na/ 'di ni shes pa rang bzhin gyis med na ye med par bsams pa'i rtsod pa'o/ /rtsod pa 'di yang mi rung ste/ gal te gnyid sad pa'i tshe rmi lam gyi nyams su myong ba dran pa las/ rmi lam gyi yid rang bzhin gyis yod na/ rmi lam gyi glang po ches sogs pa phyi rol tu snang ba'i yul yang yid de bzhin du yod par 'gyur te/ ci'i phyir zhe na/ ji ltar khyod kyis dpe'i tshe pas rmi lam gyi dus su mthong snyam pa'i yul can gyi dran pa yod pa las yid yod pa de bzhin du/ rmi lam gyi dus su yul 'di mthong snyam pa'i yul myong de 'dra ba phyi rol te yul la yang dran pa yod pas/ yul yang yod pa'am yang na rnam shes kyang yod pa min no zhes khas blang bar bya'o/ /'o na rmi lam gyi yul dang yul can dran pa gnyis ka yod na/ de gnyis kyi yul gang yin zhe na/ rmi lam gyi yul can dran pa'i blo'i yul ni rmi lam gyi shes pa dang/ de'i yul dran pa'i blo'i yul ni rmi lam na glang po cher snang ba lta bu la byed do/ /rmi lam na glang po che med kyang/ glang po cher snang ba yod la de ni kun brtags pa'i gzugs yin par gsungs so/ /skabs 'dir rnam bshad las/ dmigs myong so sor 'byed pa ni skabs 'ga' zhig ma @090a @#/ /gtogs pa 'di 'dra ba mang po zhig la mi dgos so/ /zhes gsungs pa'i don ni/ bar chad med lam lta bu gnyis snang nub pa'i blos stong nyid snang ba ni blo de'i yul du mi 'jog pa ma gtogs pa/ gnyis snang can gyi blo thams cad kyis rang yul snang ba de blo de'i yul du 'jog pa'i don yin nam snyam yang dpyad par bya'o/ /de ltar na phyi rol gyis stong pa'i gzhan dbang rang bzhin gyis yod par 'jog mi nus te/ dngos kyi dpe yang med la/ skye ba snga phyi yod par sgrub pa lta bu la dngos kyi dpe med kyang/ ma'i mngal du nying mtshams sbyar ma thag pa'i rgyud kyi rig pa chos can/ rig pa snga ma sngon du song ba yin te/ rig pa yin pa'i phyir/ dper na da lta'i rig pa bzhin/ zhes sbyor ba'i 'god tshul gzhan gyis sgrub pa lta bu'i dpe yang 'di la med pas/ sems tsam pa 'gog pa ni rigs pa shin tu stobs che bar gsungs so/ /gnyis pa ni/ gal te gnyid na mig blo mi srid pas; zhes pa nas/ rna sogs lhag ma gsum po'ang skye ba med/ ces rkang pas lhag pa'i tshigs bcad gnyis byung/ gal te gnyid log pa na mig gi blo ste shes pa mi srid bas/ mig shes kyi gzung bya yod pa min la; yid kyi shes pa kho na yod cing/ yid kyi shes pa la phyi rol de'i rnam pa snang ba tsam la phyi rol nyid du mngon par zhen pa ni bzlog tu med par 'byung ngo/ /rmi lam du phyi rol med par rnam shes tsam 'byung ba ji lta ba de bzhin du/ @090b sad pa'i skabs 'dir yod do zhe na/ 'di ni rmi lam gyi dpes sad pa'i skabs su phyi rol med pa'i rnam shes rang bzhin gyis yod pa 'grub bo snyam pa'o/ /de ni ma yin te/ ji ltar khyod kyi ltar na phyi rol gyi yul de don rmi lam du ma skyes pa de bzhin du/ yid kyi rnam shes kyang rang bzhin gyis skyes ba ma yin no/ /rmi lam gyi mig dang mig gi yul gzugs dang/ de gnyis kyis bskyed pa'i sems mig gi rnam shes gsum po thams cad kyang brdzun pa yin no/ /rna ba dang sogs sgras yid kyi bar lhag ma'i yul dbang rnam shes gsum po'ang rang bzhin gyis skye ba med do/ /mig gi dbang yul rnam shes gsum nas lus kyi dbang yul rnam shes gsum gyi bar sum tshan lnga ni; rmi lam na de dag med kyang de dag gi rnam par snang bas brdzun pa dang/ yid kyi dbang yul rnam shes gsum ni rmi lam na yod kyang rang bzhin gyis med bzhin du der snang bas brdzun pa'o/ /rmi lam gyi dbang shes yod kyang de dbang shes ma yin te/ rmi lam gyi bum pa yod kyang de bum pa ma yin pa bzhin no/ /rmi lam na dbang shes med pas yul sngar snang ba rnams ni yid shes kho na la snang bas na/ gzugs sogs don lngar gzhag tu med kyang; chos kyi skye mched kyi gzugs lnga'i nang nas kun brtags pa'i gzugs su gsungs so/ /gsum pa ni/ rmi lam ji lta de bzhin sad 'dir yang/ zhes pa nas/ gti mug gnyid sad las de de bzhin no/ /zhes @091a @#/ /tshigs bcad gcig dang rkang pa gsum byung/ ji ltar rmi lam gyi yul dang dbang po dang rnam shes rnams brdzun pa yin pa de bzhin du/ sad pa'i skabs 'dir yang dngos po rnams brdzun pa yin pas/ sems de rang bzhin gyis yod pa ma yin la/ de bzhin du dbang po'i spyod yul gzugs la sogs pa rnams rang bzhin gyis med cing/ dbang po rnams kyang rang bzhin gyis skye ba med do/ /'jig rten 'di na ji ltar tha mal ba'i gnyid sad pa 'ga' zhig lam rig pa'i gnyid kyis rmi lam rmi bzhin pas dmigs pa'i ngor yul dbang rnam shes gsum char yang yod pa de bzhin du/ ji srid du tha mal ba'i gnyid mas rnams la yang de srid du de la steng de'i ngor yul dbang rnam shes gsum po yang yod la/ gnyid sad par gyur pa na rmi lam gyi yul dbang rnam shes gsum char yod pa min pa ltar/ gti mug gi gnyid sad pa'i sangs rgyas rnams kyis ji lta ba gzigs pa'i ngor gsum char yang yod pa min pas phyi rol med pa'i rnam par shes pa med do/ /gnyis pa ni/ dbang po rab rib bcas ba blo gang gis/ zhes pa nas/ de lta ma yin de phyir de yod min/ zhes tshigs bcad gnyis byung/ 'o na rab rib can gyis yod pa ma yin pa'i skra shad la sogs pa dmigs pa'i phyir/ phyi rol med pa'i rnam shes rang bzhin gyis yod do zhe na/ de yang mi 'thad de/ /ci'i phyir zhe na/ mig gi dbang po rab rib dang bcas pa la blo gang gis rab rib kyi @091b mthu las skra shad rnams gang mthong ba na/ gang zag de'i blo'i mthong ba la ltos na ni/ mig shes dang skra shad kyi rnam pa ste skra shad du snang ba'i yul gnyis char yang yod pa yin la/ don gsal mthong ba ste rab rib med pa'i mig gi mthong ba la ltos na ni skra shad du snang ba dang de snang ba'i shes pa gnyis ka'ang brdzun pa ste ma skyes pa yin te/ snang ba tsam gyi yul yang med par shes pa yod pa nges par dka' ba'i phyir ro/ /gal te rab rib can la shes bya skra shad med par skra shad kyi rnam pa can gyi rang bzhin gyis grub pa'i blo skye ba yod na/ gang du rab rib can gyis skra shad de mthong ba'i yul der mig ni rjes su 'brel ba ste gtad pa'i rab rib med pa la'ang rab rib can dang 'dra bas skra shad mthong ba'i blo skye bar 'gyur te/ yul med par mtshungs pa'i phyir ro/ /'di ni rab rib can la skra shad mthong ba'i blo rang bzhin gyis skye na/ de rab rib la ltos pa mi rung bas rab rib med pa la yang skye bar 'gyur ba'i rigs pa'o/ /rab rib med pa la skra shad du snang ba'i blo skye ba de lta ma yin pa de'i phyir phyi rol med par rang bzhin gyis grub pa'i shes pa de yod pa min no/ /gnyis pa la gsum/ bag chags smin ma smin nyid las don snang gi rnam shes skye ba dang mi skye ba dgag pa/ slar yang phyi rol med par rnam shes yod tshul brjod pa dgag pa/ sems tsam pa'i lugs bkag pa la lung gi gnod pa med par bstan pa'o/ /dang po la gnyis/ gzhan lugs brjod pa dang/ lugs de dgag pa'o/ /dang po ni @092a @#/ /gang phyir mthong ba dag la blo nus ni/ /zhes sogs rkang pa gsum byung/ gang zag gang la skra'i rnam pa can gyi shes pa snga ma gzhan gyis bzhag pa'i bag chags smin pa yod pa de kho na la skra shad kyi rnam pa can gyi shes pa 'byung la/ gang gi phyir rab rib med par yul mthong ba dag la skra shad du snang ba'i blo'i nus pa bag chags ni smin pa med pa de'i phyir rab rib med pa de la skra shad mthong ba'i blo skye bar mi 'gyur ba yin gyi/ shes bya skra shad du yod pa'i dngos po dang bral bas blo de mi skye ba min no zhe na/ gnyis pa la gsum/ da ltar ba la nus pa rang bzhin gyis grub pa dgag pa/ ma 'ongs pa'i nus pa rang bzhin gyis grub pa dgag pa/ 'das pa la nus pa rang bzhin gyis grub pa dgag pa'o/ /dang po ni/ nus de med pas 'di ni 'grub ma yin/ zhes sogs rkang pa gsum byung/ nus pa ngo bo nyid kyis grub pa de med pas/ nus pa smin ma smin las rnam shes 'byung mi 'byung gi phyogs 'di ni 'grub pa ma yin no/ /ji ltar mi 'grub ce na/ rnam shes 'das ma 'ongs da ltar ba gsum las/ re zhig skyes pa ste rnam shes da ltar ba la nus pa ngo bo nyid kyis grub pa srid pa nyid yod pa ma yin la/ ma skyes pa ma 'ongs pa'i ngo bo la yang nus pa yod pa ma yin no/ /de la re zhig rnam shes da ltar ba la de'i rgyu'i nus pa yod na/ de gnyis dus mnyam du 'gyur la/ de'i tshe nus pa'i rnam shes zhes rnam dbye drug pa yin pa de'i tshe ni/ de @092b gnyis don gzhan du mi rigs pas rnam shes ni nus pa nyid du 'gyur bas/ rnam shes de rang las skye bar 'gyur ro/ /nus pa las rnam shes zhes rnam dbye lnga pa yin pa de'i tshe ni/ rnam shes de dus mnyam pa'i nus pa las 'byung bar 'gyur bas/ rgyu'i dus na 'bras bu yod par 'gyur ro/ /de ltar na rnam shes da ltar ba la de'i rgyu'i nus pa yod pa ma yin no/ /gnyis pa ni/ khyad par med par khyad par can yod min/ zhes pa nas/ grub min nyid ces dam pa rnams kyis gsungs/ zhes tshigs bcad phyed dang gnyis byung/ rnam shes ma skyes pa la nus pa yod na ni/ rnam shes kyi nus pa zhes sbyar ba na/ nus pa khyad gzhi dang rnam shes khyad chos yin no/ /de ltar na khyad par gyi chos rnam shes med par des khyad par du byas pa can gyi nus pa yod pa ma yin te/ de ltar ma yin na mo gsham gyi bu la'ang de'i nus pa yod par thal bar 'gyur ro/ /gal te 'jig rten na 'byung 'gyur gyi 'bras can la bsams nas 'bras chan tshos shig ces smras pa dang/ bstan bcos las kyang/ mngal du 'jug pa gsum dag ste/ /'khor lo sgyur dang rang byung gnyis/ /zhes 'khor sgyur sogs su 'gyur rgyu la dgongs nas de ltar bshad pa ltar/ 'byung bar 'gyur ba'i rnam shes la bsams nas rnam shes kyi nus pa zhes bsnyad par 'dod do zhe na/ de yang snying po med de/ mo gsham gyi bu la sogs pa bzhin du rang bzhin gyis grub pa'i rnam shes skyed pa'i nus pa med @093a @#/ /par rang bzhin gyis grub pa'i rnam shes 'di yi 'byung bar 'gyur ba med do/ /rang bzhin gyis grub pa ni da lta med na dus nam yang 'byung bar mi 'gyur bas/ gzhi ma grub pa dang khyad med du 'gyur pa'i phyir ro/ /gzhan yang rnam shes 'byung 'gyur la ltos nas de'i nus pa 'jog la/ rgyu nus pa la ltos nas rnam shes 'jog na/ phan tshun gyi don la brten pa'i 'grub par 'gyur ro/ /de 'dod do zhe na/ de ltar na rnam shes rang bzhin gyis grub pa min pa nyid ces dam pa mkhyen rab mnga' ba rnams kyis gsungs so/ /de ltar na rnam shes ma 'ongs pa la yang nus pa med do/ /gsum pa ni/ gal te 'gags pa'i nus smin las 'gyur na/ zhes pa nas/ de dag rgyud gcig gtogs par rigs ma yin/ zhes tshigs bcad gsum byung/ gal te rnam shes snga ma 'gags pa'i nus pa smin pa las 'byung 'gyur gyi rnam shes 'byung bar 'gyur na ni/ rang bzhin gyis grub pa'i gzhan gyi nus pa las 'bras bu'i rnam shes gzhan 'byung bar 'gyur ro/ /ci'i phyir zhe na/ gang gi phyir rgyun can skad cig ma rnams rim can du 'byung ba der/ khyod ltar na snga phyi phan tshun ngo bo nyid kyis tha dad pa yod pa'i phyir ro; ;gal te de ni 'dod pa'i phyir skyon ma yin no snyam na/ de'i phyir dngos po thams cad rang las gzhan pa'i dngos po kun las 'byung bar 'gyur ro/ /gal te der ni rgyun can rdzas kyi skad cig ma rnams phan tshun ngo bo nyid @093b kyis grub pa'i tha dad de gzhan nyid yod mod kyi/ de lta na'ang skad cig snga phyi ba de dag la rgyun ni tha dad pa med pa ste gcig pa kho na yin pa de'i phyir/ thams cad las thams cad skye bar thal ba'i nyes pa med do zhe na/ snga phyi ngo bo nyid kyis grub pa'i so so ba la rgyud gcig pa 'di ma grub pas rgyud gcig pa 'di ni bsgrub par bya ba zhig go /ci'i phyir zhe na/ snga phyi ngo bo nyid kyis grub pa'i tha dad rnams la tha mi dad pa'i rgyun te rgyud gcig pa'i go skabs mi rigs pa'i phyir te/ dper na byams pa dang nyer sbas la brten pa ste rgyud gcig tu gtogs pa ni gang zag so so'i gzhan nyid yin pa'i phyir na/ rgyud gcig tu gtogs pa min pa de bzhin du/ snga phyi ba gang dag rang gi mtshan nyid kyis grub pa'i so so ba de dag ni rgyud gcig tu gtogs pa ste gcig pa nyid rigs pa dang ldan pa ma yin no/ /rgyun dang rgyun can gyi khyad par ni/ chu klung gi rgyun ltar rgyun chags par rgyu dang 'bras bu 'brel bar 'jug pa na/ snga phyi ba rgyud pas bar stong med par rnam par ma chad par gnas pa/ 'du byed kyi skad cig dus gsum pa'i nye bar len ba can la rgyun zhes bya ste/ skad cig ma rnams gang gi cha shas yin pa'i cha can yin gyi/ snga phyi bar ma chad pa tsam min no/ /de ni rgyun gyi cha shas rdzas kyi skad cig ma rnams la yod pas na/ rgyun gyi yan lag rdzas kyi skad cig ma rnams la rgyun can zhes brjod de/ rgyun gyi cha shas dang yan lag rnams cha can gyi rgyun de'i yin pas rgyun la de'i nye bar len pa @094a @#/ /zhes brjod de/ dper na bum pa ni bum pa'i mchu dang mgrin pa la sogs pa'i nye bar len pa yin pa bzhin no/ /zhes rnam bshad las gsungs pa ltar ro/ /gnyis pa la gnyis/ gzhan gyi lugs brjod pa dang/ lugs de dgag pa'o/ /dang po ni/ mig blo skye ba rang nus gang zhig las/ zhes pa nas/ phyi rol med par yid ni yod ce na/ /zhes tshigs bcad gsum byung/ slar yang sems tsam pas smras pa/ mig gi blo ste rnam par shes pa skye ba'i rang gi nus pa bag chags gang zhig kun gzhi la rnam par shes pa gzhan gyis rang 'gag bzhin pa na de ma thag tu 'jog par byed la/ de smin pa las dus phyis snga ma de'i rnam pa'i rjes su byed pa'i mig gi rnam shes skye bar 'gyur zhing/ rang gi ste mig gi rnam shes de gang las skye ba'i nus pa rten du gyur pa de la/ gti mug gis 'jig rten pa rnams dbang po gzugs can mig yin no snyam du rtogs kyi/ rnam shes las ngo bo tha dad pa'i mig dbang ni yod pa min no/ /de bzhin du dbang po gzugs can lhag ma la yang sbyar bar bya'o/ /de la mig shes skye ba'i rgyu bag chags ni de'i rgyu'i rkyen yin la/ mig dbang ni bdag rkyen no/ /shes pa la dbang po gzugs can du snang ba rnams mig dbang sogs su 'dod pa ltar/ yul rnams kyang de ltar yin pa ni/ 'jig rten 'di na dbang po lnga las byung ba'i rnam par rig pa lnga/ phyi rol gyi gzung ba med par rnam shes rang gis @094b bon kun gzhi la bzhag pa smin pa las sngo sogs su snang ba nyid 'byung bar ma rtogs nas/ skye bos sems sngo sogs su snang ba la phyi rol gyi gzung bar khas len pa ste mngon par zhen no/ /de'i phyir rnam shes las don gzhan pa'i phyi rol med do/ /rnam pa gcig tu na/ rmi lam na ni gzugs don gzhan du gyur pa med par rang gi bag chags kyi nus pa smin pa las gzugs sgra sogs de'i rnam pa can gyi sems 'byung ba ji lta ba de bzhin du/ sad pa'i skabs la'ang 'dir phyi rol gyi don med par yid ni yod do zhe na/ gnyis pa ni/ ji ltar mig med par ni rmi lam du/ zhes pa nas/ rtsod 'di sel byed ces tshigs bcad gsum dang rkang pa phyed dang gsum byung/ de ni mi rigs te/ ji ltar mig dbang med par rmi lam du sngo sogs snang ba'i yid shes kyi sems 'byung ba de ltar du/ mig dbang med bar rnam shes rang gi sa bon bag chags ni smin pa las sad pa'i long ba la yang ma long ba lta bu'i gzugs mthong ba sogs ci'i phyir mi skye ste/ sad rmi gnyis kar yang rnam shes kyi rten mig dbang med par mtshungs pa'i phyir ro/ /'di yang phyi rol med par rnam shes rang bzhin gyis skye na de rgyu rkyen la ltos pa mi rung bas/ sad rmi gnyis kyi gcig la skye la gcig shos la mi skye ba'i rgyu mtshan med pa'i gnad kyis yin no/ /ci ste de gnyis la de 'dra ba'i yid shes skye mi skye ni mig dbang yod med kyis ma yin gyi/ de 'dra ba'i yid shes 'byung ba'i nus pa @095a @#/ /smin ma smin gyis yin no snyam na/ de ni mi rigs te/ gal te khyod ltar rmi lam na drug ba yid shes kyi nus pa smin pa yod la sad pa la med par gyur na/ drug pa yid shes gzugs sogs su gsal bar snang ba'i nus pa smin pa sad pa'i skabs 'dir long ba la med pa ji lta ba de ltar rmi lam gyi tshe med ces cis mi rigs te rigs so/ /'di yang nus pa rang bzhin gyis grub pa de dus gcig tu med na dus rtag tu med dgos pa'i gnad kyis yin no/ /rmi lam mthong ba la ni sad pa'i long ba ltar rnam shes kyi rten mig dbang med pa'i phyir/ nus pa'i ming can gyi mig dbang de la rnam shes brten pa'i rnam pa'i rjes su byed pa/ yid shes kyi nus pa smin pa las byung ba'i yid kyi rnam par shes pa can ma yin no/ /de'i phyir mig med pa sad pa'i long ba 'di la don snang gi bag chags smin pa'i rgyu min pa ji lta ba de ltar rmi lam du yang gnyid ni don snang gi bag chags smin pa'i rgyu ma yin te/ phyi rol med par shes pa rang bzhin gyis skye na bag chags smin pa la mi ltos pa'i phyir ro/ /gang gi phyir bag chags brdzun pa las rmi lam gyi don snang gi shes pa brdzun pa bskyed ba de'i phyir/ rmi lam du yang sad pa'i skabs de lta bu'i yul gyi dngos po gzugs sogs su snang ba'i rnam shes brdzun pa dang/ rmi lam gyi mig rtogs pa ste rnam par shes pa'i rgyu ste rten du gyur pa khas blang bar bya'o/ /'di ni rmi lam gyi mig dang/ rmi lam gyi mig shes dang/ rmi lam gyi gzugs gsum @095b yod par gsungs kyi/ de gsum mi gsogs su 'dod pa min no/ /de'i phyir de ltar na sems tsam pa 'di yis dbu ma pa la lan gang dang gang btab pa de dang de ni/ dam bca' ste bsgrub bya ma grub pa dang mtshungs par mthong bas/ rtsod 'di ste rnam par rig pa tsam du smra ba 'di sel ba ste zlog par byed do/ /dper na dbu ma bas/ sad pa'i skabs kyi yul dbang rnam shes gsum rang bzhin gyis grub pas stong pa yin te/ dmigs pa yin pa'i phyir rmi lam bzhin no/ /zhes bkod pa na/ sems tsam pas/ sad pa'i rnam shes ni phyi don gyis stong ste/ rnam shes yin pa'i phyir rmi lam gyi rnam shes bzhin no/ /zhes bya ba la sogs pa'o/ /sbyor ba 'di ni dpe ma grub pas bsgrub bya dang mtshungs pa yin te/ rmi lam yid shes las ngo bo tha dad pa'i chos kyi skye mched kyi gzugs yod pa'i phyir ro/ /gsum pa ni/ sangs rgyas rnams kyis ni/ /'gar yang dngos po yod ces ma bstan to/ /zhes byung/ de ltar sems tsam pa'i lugs bkag pa la rigs pas mi gnod par ma zad/ lung gis gnod pa srid pa ma yin te/ gang gi phyir yang dag par rdzogs pa'i sangs rgyas rnams kyi sa ni/ rang gi lugs la gsung rab 'gar yang dngos po bden par yod ces ma bstan pa'i phyir ro/ /gsum pa ni; rnal 'byor ba yis bla ma'i man ngag las/ zhes pa nas/ chu 'bab klung la yi dwags rang blo yang/ /zhes tshigs bcad phyed dang gsum byung/ gal te phyi rol med pa'i shes pa rang bzhin gyis yod de/ rnal 'byor bas @096a @#/ /sa gzhi keng rus kyis gang bar mthong ba'i tshe/ keng rus med kyang rang bzhin gyis grub pa'i rnam shes ni yod pa'i phyir ro snyam na/ mi sdug pa sgom pa'i rnal 'byor pas bla ma'i man ngag las/ keng rus kyis sa gzhi gang bar mthong ba gang yin pa der yang yul dbang rnam shes gsum char rang bzhin gyis skye ba med par mthong ste/ ting nge 'dzin de ni log pa ste de kho na nyid ma yin pa yid la byed par bstan pa ste mdo las gsungs pa'i phyir ro; ;shes pa rang bzhin gyis grub na de'i snang ba yang de ltar 'gyur bas yid byed de de kho na nyid kyi yul can du 'gyur ro/ /de lta ma yin na khyod kyi zlos gar gyi ltad mo la sogs pa lta ba na yul der mi gtad pa rnams las/ ji ltar gang zag gcig la dbang po'i blo mig gi rnam shes yul de'i rnam pa can skye ba de bzhin du ste de 'dra ba'i rnam pa can ltad mo ba gzhan rnams la yang skye ba ji lta ba de ltar du/ mi sdug pa'i yid can gyi rnal 'byor ba ltar/ gcig shos te rnal 'byor pa ma yin pas yul der blo gtad pa ste keng rus la sogs pa'i yul la lta 'dod pa rnams la yang keng rus rtogs pa ste mthong ba skye bar 'gyur te/ sngon po sogs kyi rnam shes bzhin no/ /ting nge 'dzin 'di brdzun par te log pa'i don yid la byed par yang mi 'gyur ro/ /'grel pa dang bstun na/ khyod kyi dbang blo'i yul gtad ji lta ba/ /de ltar mi sdug yid can de bzhin du/ /yul der blo gtad gcig shos rnams la yang/ skye 'gyur @096b de ni brdzun par yang mi 'gyur/ /zhes pa'i 'gyur cig thob par snang ngo/ /zhes rnam bshad las gsungs so/ /rnal 'byor pa yin min mgo mtshungs mdzad pa yang/ shes pa rang bzhin gyis grub na keng rus kyi man ngag sgom pa la ltos pa 'gog nus pa'i gnad kyis yin no/ /de bzhin du rab rib dang ldan pa'i dbang po can dang mtshungs pa'i sgyu ma dang gzugs brnyan sogs dper 'god pa la yang lan gdab tshul shes par bya la/ chu 'bab pa'i klung la yi dwags rnams la rnag khrag gi blo skye ba la yang snga ma bzhin du shes par bya'o/ /de dag gi skabs su lan gdab tshul ni/ rnal 'byor pas sa gzhi keng rus kyis gang bar snang ba'i tshe yang/ de'i yul dbang rnam shes gsum char rang bzhin gyis med pas shes pa rang bzhin gyis yod pa'i dper ma grub pa dang/ de'i tshe keng rus med kyang keng rus kyis gang bar snang ba de nyid phyi rol tu gyur pa'i gzugs yin pas phyi don med pa'i dper ma grub ces pa'o/ /de bzhin du sgyu ma dang gzugs brnyan snang ba'i mig shes sogs 'phral gyi 'khrul rgyus bslad pa'i dbang shes rnams la ji ltar rigs par sbyar bar bya'o/ /chos kyi skye mched kyi gzugs lnga yod de/ bsdus pa las gyur pa ni rdul phra rab dang/ mngon par skabs yod pa ni yid shes kho nal bar gyi snang ba skye seng seng lta bur snang ba dang/ yang dag par blangs pa las byung ba ni sdom pa sdom min par mas bsdus pa'i rnam rig ma yin pa'i gzugs dang/ kun brtags pa ni mi sdug pa bsgom pa'i yid la @097a @#/ /gsal bar snang ba'i keng rus kyi gzugs brnyan dang rmi lam gyi gzugs sogs dang/ dbang 'byor pa ni zad par gyi ting nge 'dzin gyi yul du gsal bar snang ba'i sa chu'i gzugs brnyan lta bu de yin pa'i phyir ro/ / 'di la kha cig na re/ rdul phra rab chos can/ bstan med thogs med kyi gzugs yin par thal/ chos kyi skye mched kyi gzugs yin pa'i phyir/ khyab ste/ khams bco brgyad kyi nang nas gzugs khams ni bstan yod thogs bcas dang/ gzugs can gyi khams lhag ma dgu ni bstan med thogs bcas dang/ sems kyi khams bdun dang chos khams te brgyad ni bstan med thogs med yin par mdzod las bshad pa gang zhig/ kun btus dar TIka las kyang/ chos kyi skye mched pa'i gzugs dang/ ming gzhi'i phung po dang/ 'dus ma byas rnams thogs med do/ /zhes gsungs pa'i phyir ro/ /'dod mi nus te/ thogs bcas yin pa'i phyir te/ rdul yin pa'i phyir nam khyab zer ram dpyad par bya'o/ /yang kha cig na re/ mngon par skabs yod pa'i gzugs yin na chos kyi skye mched kyi gzugs yin pas khyab zer na/ de mi 'thad par thal/ de la gzugs kyi skye mched dang chos kyi skye mched gnyis yod pa'i phyir/ der thal/ der gyur pa'i chos kyi skye mched ni sngar bshad pa ltar yin la/ gzugs kyi skye mched ni mig shes kyis pha ri'i gzugs mthong ba la nges par dgos pa'i bar gyi snang ba lta bu de yin pa'i phyir ro/ /yang kha cig gis/ @097b mngon par skabs yod pa'i gzugs la chos kyi skye mched med de/ mig shes kyi gzung byar gyur pa'i mngon par skabs yod pa'i gzugs de nyid yid shes la yang snang ba'i phyir na ma khyab ste/ yid shes la snang ba'i mngon par skabs yod ba'i gzugs de la gzugs kyi skye mched yod kyang/ yid shes kho na la snang ba'i mngon par skabs yod pa'i gzugs ni chos kyi skye mched yin pa'i phyir ro/ /'on kyang yid shes kho na la snang ba'i mngon par skabs yod pa'i gzugs de'i mtshan gzhir gang 'jog pa ni blo gros dang ldan pa rnams la dka' gnas yin min mi shes kyang/ bdag lta bu blo dman pa rnams la dka' ba'i gnas su snang bas dpyad par bya'o/ /kha cig na re/ de'i mtshan gzhi yod de/ mig shes kyi gzung byar gyur ba'i bar snang de la yid kyi shes pas cha shas so sor phye ba'i mthar yid shes kho na'i yul du gyur pa'i cha phra ba zhig lus pa de la chos kyi skye mched du gyur pa'i mngon par skabs yod pa'i gzugs su 'jog pa'i phyir te/ dper na rags pa'i gzugs la cha shas so sor phye ba'i mthar yid shes kho na'i yul du gyur pa'i cha phra ba lus pa de la rdul phra rab dang bsdus pa las gyur pa'i gzugs su 'jog ba bzhin yin pa'i phyir zer na/ de yang dpyad gzhi che ste/ de ni snang ba'i rdul phra rab yin pas bsdus pa las gyur pa'i gzugs su 'gyur gyi de las logs su med pa'i phyir ro/ /byas pa la kho na re/ de ni rdul phra rab ma yin te/ rdul phra rab ni thogs bcas kyi gzugs la cha shas su phye ba'i cha phra ba la @098a @#/ /byed la/ yid shes kho na'i yul du gyur pa'i mngon par skabs yod pa'i gzugs ni thogs med kyi gzugs su gyur pa'i bar snang 'di la cha shas so sor phye ba'i cha phra ba la byed pa'i phyir te/ kun btus dar TIka las/ chos kyi skye mched pa'i gzugs lngar yod de/ phyi rol gyi gzugs thogs bcas la gzhig pa dang/ thogs med la gzhig pa dang/ gzugs su btags pa blangs pa las byung ba dang/ mi sdug ba sgom pa dang/ rnam thar gyi ting nge 'dzin la snang ba'i gzugs brnyan rnams su yod pa'i phyir/ zhes rdul phra rab ni thogs bcas la gzhig pa dang/ mngon par skabs yod pa'i gzugs ni thogs med la gzhig pa yin par bshad pa'i phyir zer na/ 'o na gzugs kyi skye mched du gyur pa'i bar snang chos can/ thogs med kyi gzugs yin par thal/ khyod kyi dam bca' 'thad pa'i phyir/ 'dod mi nus te/ thogs bcas kyi gzugs yin pa'i phyir te/ bstan yod thogs bcas kyi gzugs yin pa'i phyir te/ gzugs kyi skye mched yin pa'i phyir ro/ /yang kha cig na re/ de'i mtshan gzhi yod de/ mig shes kyi gzung byar gyur pa'i mngon par skabs yod pa'i gzugs 'dzin pa'i rtog pa'i snang yul de yin pa'i phyir te/ rnam 'grel thar lam gsal byed las/ rtog pa'i yul du gyur pa'i mngon par skabs yod kyi gzugs zhes bsnyad pa de ni gzugs ma yin gyi/ de ni rtog pa'i yul gyi sgro btags te/ de la chos kyi skye mched kyi @098b gzugs zhes kyang gzhan las bshad do/ /zhes gsungs pa'i phyir zer na/ de yang dpyad pa'i gzhi che ste/ de 'dra ba'i rtog pa'i zhen yul du gyur pa'i de la byed na ni de gzugs kyi skye mched du 'gyur ba'i phyir sgro btags yin par bshad pa dang 'gal bar 'gyur la/ de'i snang yul la byed na ni 'dus ma byas yin pa'i phyir chos kyi skye mched kyi gzugs su mi rung zhing/ chos kyi skye mched du gyur pa'i mngon par skabs yod pa'i gzugs 'dzin pa'i rtog pa'i zhen yul la byed na ni sngar gyi dogs pa so na gnas pa'i phyir ro/ /yang kha cig na re/ bar snang chos can/ thogs bcas kyi gzugs ma yin par thal/ rang gi go sar bum pa lta bu'i thogs bcas kyi gzugs 'byung ba la phar mi sgrib pa'i phyir na ma khyab ste/ bum pa lta bu la phar mi sgrib kyang tshur sgrib pa dang/ rang gi go sar mun pa 'byung ba la phan tshun sgrib pas na thogs bcas su 'jog pa'i phyir ro/ /yang kha cig na re/ rnam rig ma yin pa'i gzugs thob pa la khas blangs pa'i sgo nas thob dgos par thal/ rnam rig ma yin pa'i gzugs de yang dag par blangs pa las byung ba'i gzugs yin pa'i phyir na ma khyab ste/ phyogs gcig gi ming phyogs can la btags pa yin pa'i phyir ro/ /yang kha cig /me long nang gi gzugs brnyan dang skra shad 'dzag snang dang/ sgyu ma'i rta dang smig rgyu dang zla gnyis su snang ba rnams re re nas chos can/ kun btags pa'i gzugs yin par thal/ de dag kun btags @099a @#/ /pa'i gzugs yin par mdo sde spyod pa'i dbu ma rang rgyud pa sogs kyis 'dod pa'i phyir na ma khyab/ 'dod mi nus te/ gzugs kyi skye mched yin pa'i phyir te/ mig shes la snang ba'i gzugs yin pa'i phyir ro; ;yang kha cig/ mdo sde spyod pa'i dbu ma rang rgyud pa'i lugs la/ sgyu ma'i rta glang de kun btags pa'i gzugs ma yin par thal/ de gzugs kyi skye mched yin pa'i phyir te/ 'jug pa'i TIka chen las/ de ltar sgyu ma'i snang ba ni rnal 'byor spyod pa'i dbu ma pa ltar na rang rig mngon sum dang/ phyi rol khas len pa'i rang rgyud pa ltar na sa phyogs sam bar snang lta bu'i gzhi 'dzin pa'i dbang mngon gyis 'grub la/ zhes gsungs pa'i phyir nam khyab ste/ de ni gzhi 'dzin pa'i dbang mngon gyis shugs la rtogs pa'i don yin gyi/ des de dngos su rtogs mi rung ba'i phyir te/ dbang mngon de la sgyu ma'i rta snang na 'phral gyi 'phrul rgyus bslad par 'gyur bas dbang mngon du mi rung ba'i phyir ro/ /byas pa la kho na re/ nged kyi dam bca' 'thad par thal/ mdo sde spyod pa'i dbu ma rang rgyud pa ltar na/ sgyu ma'i rta glang de kun btags pa'i gzugs kyi skye mched yin par dbu ma'i mtha' dpyod chen mor bshad la/ dbu ma lung rigs sgron mer de gzugs kyi skye mched yin par bshad pa'i phyir na ma khyab ste/ lung de dag gi dgongs pa btsal bar bya dgos kyi/ de'i lugs la sgyu ma'i rta glang gzugs kyi skye mched du 'dod mi rung ba'i phyir te/ sgyu ma'i rta glang gzugs kyi skye @099b mched du 'dod pa ni thal 'gyur ba thun mong ma yin pa'i khyad chos yin pa'i phyir te/ rnam bshad las/ gzugs brnyan yang gzugs kyi skye mched du bzhed pa yin te/ 'og nas gzugs brnyan gyis de snang ba'i dbang shes skyed par yang gsungs so/ /tshul de dag ni mig la rta glang du snang ba'i sgyu ma dang brag cha sogs la yang shes par bya ste/ lugs dam pa 'di'i rnam gzhag thun mong ma yin pa'o/ /zhes gsungs pa'i phyir ro/ /yang kha cig /brag cha gzugs kyi skye mched yin par thal/ drangs ma thag pa'i lung de'i phyir na ma khyab ste/ gzugs brnyan gzugs kyi skye mched du bzhed pa'i rigs pa des brag cha sgra'i skye mched du shes par bya ba'i don yin pa'i phyir ro/ /yang kha cig na re/ chos kyi skye mched kyi gzugs chos can/ 'byung 'gyur yin par thal/ mdzod las/ reg bya rnam pa gnyis yin te/ ltag ma gzugs can dgu po ni/ 'byung 'gyur chos khams phyogs gcig kyang/ zhes dang/ kun btus las kyang/ rgyur byas pa'i gzugs gang zhe na/ mig gi dbang po dang/ zhes pa nas/ reg bya'i phyogs gcig dang/ chos kyi skye mched pa'i gzugs so/ /zhes gsungs pa'i phyir nam khyab ste/ de ni mdzod lugs la 'byung 'gyur dngos yin kyang/ skabs 'dir de ltar mi 'dod pa'i phyir te/ rim lnga gsal sgron las/ 'dir spyod bsdus las gzugs phung la sogs pa 'byung 'gyur du bshad pa ni/ 'byung ba bzhi dang chos kyi skye ma ched kyi gzugs ma @100a @#/ /gtogs pa'i gzugs phung ni 'byung 'gyur dngos yin la/ ming bzhi'i phung po ni 'byung ba'i lus la brten pa tsam la 'byung 'gyur du btags pa'o/ /zhes gsungs pa'i phyir ro/ /yang kha cig/ rnal 'byor pas sa gzhi keng rus kyis khyab par snang ba lta bu kun btags pa'i gzugs dang/ dgra bcom pa gnyis dang dag sa'i byang sems kyis dngos su de ltar sprul pa'i gzugs ni dbang 'byor pa'i gzugs yin par thal/ dbu ma'i yig char de ltar bshad pa'i phyir na ma khyab ste rnal 'byor pas sa chu dngos gnas par sprul pa'i gzugs ni dbang shes kyi gzhal bya yin pas chos kyi skye mched kyi gzugs su mi rung ba'i phyir te/ chos kyi skye mched yin na yid shes kho na'i gzhal bya yin pas khyab pa'i phyir te/ mdzod las/ gnyis kyi rnam shes phyi yi lnga/ /zhes gsungs pa'i phyir ro/ /gzhan yang/ de ltar mi 'thad par thal/ dbang 'byor pa'i gzugs ni zad par ting nge 'dzin gyi yul du snang ba'i sa chu'i gzugs brnyan lta bu la byed kyi/ des sprul pa'i sa chu dngos la mi byed pa'i phyir te/ kun btus dar TIk las/ dbang 'byor pa ni/ zad par la sogs pa'i ting nge 'dzin gyi yul dug sal bar snang ba'i sa chu'i gzugs brnyan te/ zhes gsungs pa'i phyir ro/ /'on kyang 'di ni dogs slong tsam yin gyi mtha' gcig tu de ltar yin zhes pa min no/ /stag los/ skra shad med dang rnag klung yod pa 'gal/ /zhes rje bdag nyid chen po la 'gal ba brjod pa @100b mi 'thad de/ 'phral gyi 'khrul rgyus bslad pa'i dbang shes dang las kyi bdag 'bras su grub pa'i rnag khrag snang ba'i dbang shes gnyis mtshungs pa'i go skabs med pa'i phyir dang/ de gnyis la tshad ma yin min gyi khyad par yod par grub mtha' bzhi kas 'dod pa'i phyir ro/ /yang kha cig na re/ dbu ma'i yig char zad par gyi ting nge 'dzin la sa gzhi keng rus kyis khyab par snang ba zhes bshad pa mi 'thad de/ sa gzhi keng rus kyis khyab par snang ba'i ting nge 'dzin de mi sdug pa'i ting nge 'dzin yin gyi/ zad par gyi ting nge 'dzin ma yin pa'i phyir zer na dpe dag ma dag dpyad par bya'o/ /yang kha cig /skra shad dang smig rgyu gnyis ka med par thal/ yig char skra shad dang smig rgyu sogs 'jig rten gyi tha snyad du med kyang/ zhes gsungs pa'i phyir na ma khyab ste/ smig rgyu chu yin pa med pa'i don yin pa'i phyir/ yang kha cig/ rab rib can la skra shad snang ba med par thal/ rab rib can la skra shad snang ba ni dbang po 'khrul ba'i snang ba yin pas don dngos gnas la med kyang zhes yig char bshad pa'i phyir naM ma khyab ste/ de la snang ba'i skra shad med pa'i don yin pa'i phyir/ 'o na khyod rang la/ dbang po 'khrul ba'i snang ba yin na med pas khyab par thal/ yig cha'i gzhung drangs ma thag pa de'i phyir/ 'dod mi nus te/ gnyis snang can gyi shes pa'i snang ba yin na dbang po 'khrul ba'i snang ba yin pas khyab pa dang/ gnyis snang can gyi shes pa yin na rang gi snang ba la mngon sum gyi tshad ma yin @101a @#/ /pas khyab pa gnyis ka yod pa'i phyir ro/ /yang kha cig na re/ las can gyi lha mi yi dwags gsum gyi rgyud la chu klung rtogs pa'i mig shes tshad ma yod par thal/ chu klung mthong ba'i mig shes tshad ma yod pa'i phyir na ma khyab/ rtags grub ste/ mig shes kyis chu klung gi dbyibs dang kha dog mthong ba la chu klung mthong bar 'jig rten na tha snyad btags pa ltar 'jog dgos pa'i phyir te/ mdzod las/ 'jig rten gyi ni tha snyad du/ /kha dog dbyibs la sa zhes brjod/ /chu me yang ngo/ /zhes gsungs pa'i phyir/ 'dod mi nus te/ chu klung de reg bya'i skye mched yin pa'i phyir ro/ /yang kha cig /chu klung chos can/ reg bya'i skye mched ma yin par thal/ gzugs kyi skye mched yin pa'i phyir te/ rnam bshad las/ yi dwags la chu klung rnag khrag tu snang ba ni de'i mig shes la snang ba yin pas gzugs kyi skye mched du gzhag dgos so/ /zhes gsungs pa'i phyir na ma khyab ste/ mig shes la chu klung rnag khrag tu snang ba gzugs kyi skye mched yin na chu klung gzugs kyi skye mched yin mi dgos pa'i phyir te/ mig shes la chu klung snang ba gzugs kyi skye mched yin na chu klung gzugs kyi skye mched yin mi dgos pa'i phyir te/ rab rib can gyi mig shes la skra shad snang ba gzugs kyi skye mched yin kyang skra shad gzugs kyi skye mched ma yin pa bzhin yin pa'i phyir ro/ /skabs 'dir rong ston chos rje'i bshes sbrings rnam bshad las/ gal te las kyis phan tshun bsgribs pas mi mthong ngo zhe na/ @101b skyes bu gcig la dgra gnyen gnyis kyis blta ba'i dus su yid du 'ong mi 'ong gnyis cha gnyis su gnas kyang gnyis kas gnyis ka mi mthong ste/ phan tshun las kyis bsgribs pa'i phyir ro/ /zhes smra ba chos kyi grags pas rigs pas bkag pa yin no/ /zhes 'byung la/ mkhas grub rjes/ rong ston gyis smras pa 'dis/ chos kyi grags pa'i gzhung lugs dang dgag yul gyi 'dod pa gnyis ka'i rgyus med pa gsal bar byas par gsungs so/ /rong ston gyi gzhung 'dis rje bdag nyid chen po'i bzhed pa bkag pa yin na/ rje bdag nyid chen pos/ mi dang yi dwags kyis chu klung gcig la blta pa'i tshe sngon las kyi dbang gis chu klung gi cha shas shig yi dwags rnams la rnag khrag dang/ cha shas gzhan zhig mi la btung ba dang khrus kyi chur skye ba yod par gsungs kyi/ mis rnag khrag dang yi dwags kyis chu dwangs bsil ma mthong ba ni las kyis bsgribs pa'i dbang gis yin par gsungs pa med pa'i phyir/ dgag yul gyi 'dod pa'i rgyus med par gsal yang/ chos kyi grags pa'i gzhung lugs kyi rgyus med par ci'i phyir gsungs te/ mus tegs bye brag pas/ skyes bu gcig gis gzugs de 'dod mi 'dod gnyis ka'i bdag nyid yin na yang/ sngon bsags pa'i las kyi dbang gis gang rung re bsgribs pa'i phyir dgra'i mig shes kyis yid du 'ong ba dang/ gnyen gyi mig shes kyis yid du mi 'ong ba ma mthong ba yin zhes 'dod pa de/ rnam 'grel le'u gsum bar/ khas blangs na yang gnyis po dag/ tha dad par ni myong mi 'gyur/ / @102a @#/ /ma mthong bsgribs phyir min zhe na/ don gyi dbang gis rtogs mi 'gyur/ /zhes sogs kyis dgag pa mdzad pa'i phyir ro/ /de dag cung zad phye ste bshad na/ phyi rol don ni yod na yang/ /ji ltar nyams su myong nyid de/ /nges pa'i bdag nyid rang ngo bos/ /ma yin du ma'i bdag skyon phyir/ zhes sems tsam pas/ mdo sde pa khyod phyi don du 'dod pa'i sngon po sogs ni gzhal byar yod na yang/ ji ltar sngo sogs nyams su myong ba'i dbang shes de la; sngo sogs 'dod mi 'dod sogs su snang ba ni bag chags kyi dbang gis 'dod mi 'dod kyi rnam ba so sor nges pa'i bdag nyid yin gyi/ sngo sogs rang gi ngo bos 'dod mi 'dod kyi rnam pa gtad pa ma yin te/ de yin na sngo sogs de yid du 'ong mi 'ong gnyis ka yin pa'i sgo nas mi mthun pa du ma'i bdag nyid du gnas par thal ba'i skyon 'byung ba'i phyir te/ sngon po gcig nyid lhas byin gyi mig shes la yid du 'ong ba dang mchod sbyin gyi mig shes la yid du mi 'ong bar snang ba yod pa'i phyir zhes bshad pa la/ bye brag pa na re/ de 'dod mi 'dod gnyis ka'i bdag nyid yin par khas blangs na yang skyon med do zhe na/ skyes bu gcig gi gzugs la dgra gnyen gnyis kyi mig shes kyis blta ba'i tshe 'dod mi 'dod so sor mi snang bar gnyis kas gnyis ka snang bar thal/ gzugs de 'dod mi 'dod gnyis ka'i bdag nyid du gnas pa gang zhig/ don rang gi ngo bos blo la snang ba'i phyir ro/ /gal te ma mthong ba las kyi dbang gis 'dod mi 'dod gang rung @102b bsgribs pa'i phyir/ gnyis kas gnyis ka mthong ba min no zhe na/ de lta na don gyi dbang gis rtogs par mi 'gyur te/ las dbang gis don gyi gnas lugs ji lta ba bzhin du ma mthong ba'i phyir te/ 'dod mi 'dod du ma'i bdag nyid du gnas pa'i dngos po de la du ma'i bdag nyid du ma mthong bar gcig gi bdag nyid du mthong bar byed pa ni/ don gyi gnas lugs ji lta ba bzhin du mthong bar 'gyur ba min pa'i phyir ro/ /zhes 'chad par/ khas blangs na yang gnyis po dag /tha dad par na myong mi 'gyur/ /ma mthong bsgribs phyir min zhe na/ don gyi dbang gis rtogs mi 'gyur/ /du ma'i bdag nyid dngos de la/ /gcig gi bdag tu mthong byed pa/ /ma mthong ba de ci ltar na/ /don mthong byed par 'gyur ba yin/ /zhes gsungs so/ /de la kha cig /rong ston pas/ skyes bu gcig gi gzugs 'dod mi 'dod gnyis ka'i bdag nyid du gnas kyang/ dgra gnyen gnyis kyi mig shes kyis phyogs re re las gzhan ma mthong ba ni las kyis bsgribs pa'i phyir yin zhes pa'i 'dod pa de/ khas blangs na yang gnyis po dag /ces sogs skyes bkag pa yin zhes bshad na skyon med kyang/ gal te der yang mthong med la/ /brten nas gzugs gzhan 'byung 'gyur na/ zhes sogs kyis bkag pa yin par bshad pas na/ chos kyi grags pa'i gzhung lugs kyi rgyus med pa'i skyon du 'gyur te/ gzhung phyi ma de ni/ sngar gyi 'dod pa de 'gog pa ma yin gyi/ /thag nye ring nas gzugs la blta ba'i tshe dbang gzugs kyi bar du las @103a @#/ /gzugs gsal mi gsal skye ba'i rgyu mtshan gyis gzugs gsal mi gsal snang ba yin zhes pa'i 'dod pa bkag pa yin pa'i phyir zer na dpyad par bya ste/ rong ston gyi gzhung yig char drangs ba las de ltar ma byung la/ de'i bshes springs kyi rnam bshad yul 'dir ma rnyed pa'i phyir ro/ /gal te der yang mthong med la/ /zhes sogs kyi don cung zad bshad na/ phyi don khas len pa'i phyogs la brten nas blo rnam med du 'dod pa dgag pa la/ yul gcig la dmigs pa'i dbang shes thams cad snang tshul khyad med du thal ba dang/ dbang shes 'khrul ba la ji ltar snang ba bzhin grub par thal ba dang/ thag nye ring las yul gsal mi gsal gyi khyad par med par thal ba dang/ gzung don skad cig ma dbang shes kyis 'dzin pa mi 'thad par thal ba'i rigs pa bzhi las/ rigs pa gsum pa ni/ nye ring la sogs khyad par gyis/ /gsal dang mi gsal mi rung ngo/ /zhes yul gcig nyid thag nye ring la sogs pa'i khyad par gyis gsal ba dang mi gsal bar snang ba mi rung bar thal/ shes pas yul rnam med thug phrad du 'dzin pa'i phyir zhes bkag pa la/ pha rol pos/ gsal mi gsal snang ba ni rnam pa'i khyad par las 'gyur ba ma yin gyi/ yul dbang par gyi snang ba'i khyad par las 'gyur ba yin zhe na/ snang bas yul de bar du chod cing bsgribs pa yin nam/ mchod cing ma bsgribs pa yin/ phyi ma ltar na thag nye ring gnyis ka nas gsal bar mthong bar thal/ sgrib byed @103b med cing rnam med du mthong bar mtshungs pa'i phyir/ sngam ltar na thag nye ring gnyis ka nas mi mthong bar thal/ bar du sgrib byed kyis bsgribs shing yul gyi rnam pa ma shar bar mtshungs pa'i phyir ro/ /zhes 'chad par/ gal te snang khyad las der 'gyur/ /de ni chod dang ma chod dag /mthong ngam mi mthong mtshungs par 'gyur/ zhes gsungs/ gal te snang ba mi gsal bas/ /de cha phra mo 'ga' zhig ni/ ma mthong de phyir tha dad na/ zhes phyogs snga smra bas/ snang ba ni sgrib byed min gyi yul gsal byed yin pa la/ yul thag ring ba'i tshe snang ba de mi gsal bas yul de'i cha phra mo ma mthong la/ thag nye ba'i tshe de las ldog pa de'i phyir/ yul gsal mi gsal tha dad du snang ba yin zhe na/ 'o na thag nye ring nas cha can phyi rol gyi don bum pa lta bu de gsal bar mthong ba dang ma mthong ba'i khyad par gang las yin/ bum pa de la yod pa'i phra rdul du ma tha dad du mthong mi mthong gi khyad par gang las yin te med par thal/ de gnyis ka'i tshe rnam med thug phrad du 'dzin par mtshungs pa'i phyir ro/ /zhes 'chad par/ phyi rol don gcig mthong ba dang/ /mi mthong tha dad gang las yin/ /phra rdul du ma tha dad mthong/ /mi mthong tha dad gang las yin/ /zhes gsungs/ gal te snang ba gsal mi gsal/ /khyad par gyis blo tha dad na/ /zhes phyogs snga smra bas/ yul dbang bar gyi snang ba gsal mi gsal gyi khyad par gyis yul gsal mi gsal snang ba'i blo tha dad 'byung ba yin zhe na/ par gyi snang ba@104a @#/ /gsal mi gsal las bum pa gsal mi gsal tha dad par snang bar 'gyur ba ma yin te/ snang ba dang bum pa 'brel med don gzhan yin pa'i phyir/ khyab ste/ 'brel med kyi chos gzhan tha dad pas gzhan tha dad du 'gyur ba med pa'i phyir ro/ /zhes 'chad par/ gzhan tha dad pas tha dad med/ /gang las tha dad par snang 'gyur/ zhes gsungs/ gzhan yang/ thag ring ba'i tshe snang ba de yang rgyu mtshan cis mi gsal ba yin zhes dris pas/ du ba dang khug sna la sogs pa'i rdul gyis snang ba'i rdul bsgribs pa'i phyir ro zhe na/ 'o na de dag thag nye ba 'dir sgrib byed cis ma yin zhes dris pas/ sgrib rdul srab ba'i phyir ro zhe na/ 'o na thag nye ba'i tshe snang ba'i rdul yang srab pa de lta nyid du thal/ de'i tshe sgrib rdul srab pa gang zhig rgyu mtshan mtshungs pa'i phyir/ 'dod na/ thag nye ba nas gzugs la blta ba na mi gsal bar thal/ gsal bar snang ba'i rgyu shas chung ba'i phyir/ thag nye ba las gzhan du thag ring po'i gzugs la blta ba na snang ba'i rdul srab min te 'thug po yod pa nyid du thal/ de'i tshe sgrib rdul 'thug po gang zhig/ rgyu mtshan mtshungs pa'i phyir/ thag nye ba nyi snang ba gsal ba'i rgyu yin na/ shin tu nye ba la snang ba ni ches cher gsal bar 'gyur bas ni rdzi ma de yang mig shes la ches cher gsal bar snang bar 'gyur ro/ /zhes 'chad par/ snang ba de yang cis mi gsal/ /bsgribs phyir de 'dir cis ma yin/ /srab phyir snang ba'ang de lta @104b nyid; ;gzhan du srab min yod pa nyid/ /shin tu nye la snang ba ni/ /cher gsal de yang snang bar 'gyur/ zhes gsungs/ de la mu stegs bye brag pa na re/ thag nye ring der yang mthong ba med pa dge mi dge'i las la brten nas yul dbang bar du las gzugs gsal mi gsal gzhan 'byung bar 'gyur ba mthong ba yin zhes pa'i 'dod tshul 'chad par/ gal te der yang mthong med la/ /brten nas gzugs gzhan 'byung 'gyur na/ zhes gsungs/ de lta na yul sngon po dang las gzugs de dag rnams ni phan tshun bsgrib bya sgrib byed du 'gyur dgos pa de'i phyir/ sngon po dbang shes la snang ba ni las gzugs kyis sgrib par byed pas/ sngon 'dzin mig shes de la las gzugs gcig bu snang bar thal bar 'gyur ro/ /gal te las gzugs kyis bar du chod kyang sngon po de ma bsgribs po zhe na/ de lta na thag nye ba nas blta ba'i tshe cig car du gsal ba'i rang bzhin gyi las gzugs dang sngon po gnyis ka so sor mthong ba dang/ thag ring ba nas pa lta ba'i tshe cig car du mi gsal ba'i rang bzhin gyi las gzugs dang sngon po gnyis ka so sor mthong bar 'gyur dgos pa la de ltar so sor snang ba ma mthong ba'i phyir mi 'thad do/ /zhes 'chad par/ de dag rnams ni phan tshun du; ;bsgribs 'gyur de phyir snang ba ni/ /sgrib byed de la gcig snang 'gyur/ /de ma bsgribs na cig car ni/ /gsal dang mi gsal rang bzhin dag /mthong 'gyur/ zhes gsungs/ gal te las gzugs skye ba ma yin gyi/ / @105a @#/ /mthong ba med pa dge mi dge'i las kho rang gis/ thag nye ba'i tshe gcig ste mi gsal ba bsgribs/ thag ring ba'i tshe gcig ste gsal ba bsgribs nas sngon po gsal mi gsal snang bar byed do zhe na/ dge mi dge'i las ni byed pa gang gis dbang shes la yul gsal ba dang mi gsal ba gang la yang don dang don min te phan gnod byed pa'i nus pa med pa'i phyir/ dbang shes de la ma mthong ba dge mi dge'i las kyis yul gsal mi gsal du snang bar ci zhig byed de byed par mi rigs so/ /zhes 'chad par/ mthong med kyis gcig bsgribs/ /gang gis don dang don min med/ /de la ma mthong bas ci byed/ ces gsungs/ de dag gi don bsdu ba ni/ ji skad bshad pa de dag gi phyir don la brten nas skyes bur gyur pa'i myong ba dbang shes rnams thag nye ring sogs ji ltar yod pa'i rgyu bzhin du yul gsal mi gsal gyi rnam pa tha dad 'dzin par byed de/ de las lhag ma shes pa rnam med du 'dod pa de dag blo gros ngan pas kun nas bslangs pa'i lugs ngan pa yin no/ /zhes 'chad par/ de phyir don rten skyes gyur pa'i/ /myong ba ji ltar rgyu bzhin du/ /rnam pa tha dad 'dzin byed de/ /lhag ma blo ngan lugs ngan yin/ zhes gsungs so// de ltar na skyes bu gcig la dgra gnyen gnyis kyis blta ba'i tshe yid du 'ong mi 'ong cha gnyis su gnas kyang phan tshun las kyis bsgribs pa'i phyir gnyis kas gnyis ka mi mthong zhes pa'i 'dod pa de/ gal te der yang mthong med laM/ /brten @105b nas gzugs gzhan 'byung 'gyur na/ zhes sogs kyis skabs su bkag pa ma yin par gsal yang/ de 'dra ba'i 'dod pa de ni/ khas blangs na yang gnyis po dag /tha dad par ni myong mi 'gyur/ /ma mthong bsgribs phyir min zhe na; ;don gyi dbang gis rtogs mi 'gyur/ zhes sogs kyi skabs su bkag pa yin pa la sus kyang bsnyon du med pas na/ stong thun dang yig char las can gyi lha mi yi dwags gsum gyis brlan gsher gyi dngos po gcig la thun mong du blta ba'i tshe chu rnag bdud rtsi gsum dngos gnas par skyes kyang/ de dag rang rang gi las kyis cha gzhan mi mthong bar gsungs pa de/ rnam 'grel gyi gzhung dang 'gal bar 'gyur snyam pa'i dogs pa da dung gcod dgos so zhe na/ 'di la zhib cha gdon par bya'o/ /de'i tshe brlan gsher phor gang gcig gi go sar chu rnag bdud rtsi phor gang gsum yod par dus 'khor TIka chen las bshad la/ de'i go sar chu rnag bdud rtsi phor gang gsum yod pa dang/ chu rdul gcig gi go sar rnag dang bdud rtsi'i rdul yod pa sogs ni rje bdag nyid chen po'i bzhed pa gtan min par stong thon las bshad pa dang/ yig char cha can brlan gsher phor gang gci ggi sar de dang tshad mtshungs pa'i rnag khag phor gang dang bdud rtsi phor gang sogs med pa ni stong thun gyi lung gi don du bshad nas/ cha can brlan gsher phor gang gcig gi go sar chu rnag bdud rtsi phor gang gsum yod kyang de gsum phan tshun gos tha dad yin par bshad do/ /bshad tshul 'di la @106a @#/ /dogs slong cung zad 'god na/ 'dul ba nas bshad pa'i drug phul gsum shong ba'i brlan gsher phor gang la mis blta bzhin pa'i skabs su lha dang yi dbwags gnyis 'ongs te bltas pa'i tshe sngar gyi chu drug phul gsum las drug phul gnyis bkag nas rnag khrag drug phul gcig dang bdud rtsi drug phul gcig skye ba dang/ chu drug phul gcig tsam lus bar thal/ de'i tshe cha can brlan gsher phor gang dang tshad mnyam pa'i rnag khrag phor gang sogs mi skye bar/ cha can brlan gsher phor gang de cha gsum du phye ba'i cha gcig ni rnag khrag dang/ cha gcig ni bdud rtsi dang/ cha gcig ni chu dwangs shing bsil bar skye bar 'dod rigs pa'i phyir/ rtags khas/ 'dod na/ lha dang yi dwags 'ongs pa'i tshe skad cig ma gcig la cha can chu dwangs bsil phor gang las sum cha gnyis bri ba dang de gnyis gzhan du song ba'i tshe skad cig ma gcig la sum cha gnyis 'phel bar thal/ 'dod pa'i phyir/ 'dod na/ chu dwangs bsil phor gang de skad cig re re la de ltar bri zhing 'phel ba de dang po nas blta bzhin pa'i mi nges mthong bar thal/ 'dod pa'i phyir/ ma khyab na/ chu dbangs bsil phor gang de'i tshad che chung ni mi de'i spyod yul ma yin par thal/ ma khyab pa de'i phyir/ 'dod na/ phor gang de'i tshad ni phal ba'i spyod yul ma yin par thal/ 'dod pa de'i phyir/ gzhan yang/ dus 'khor gyi lugs la/ bsdus rgyud nas bshad pa'i ri rab dang mngon pa nas bshad pa'i ri rab gnyis kyang cha can ri rab gcig gi go sar yod kyang phan tshun gos tha dad du gnas par thal/ sngar gyi chu rnag bdud rtsi phor @106b gang gsum la de'i phyir/ 'dod na/ bsdus rgyud nas bshad pa'i mi med 'jig rten gyi khams dang mngon pa nas bshad pa'i mi mjed 'jig rten gyi khams gnyis kyang phan tshun gos tha dad du gnas par thal/ 'dod pa'i phyir/ 'dod na/ de gnyis nas bshad pa'i 'dzam gling gnyis kyang phan tshun gos tha dad du gnas par thal/ 'dod pa'i phyir/ 'dod na/ de gnyis chos can/ gos tha dad du gnas pa ma yin par thal/ steng 'og tu gnas pa ma yin/ thad kar gnas pa ma yin pa'i phyir/ zhes zer na/ de dag la zhib cha gdon par bya'o/ /de la kha cig na re/ de 'dra ba'i chu rnag bdud rtsi gsum gos gcig tu gnas pa yod de/ de dag rigs mi mthun pa'i 'gro ba so so'i bdag 'bras yin pas chu dwangs bsil phor gang gcig gi go sar chu dwangs bsil phor gang gzhan mi chud pa dang mi 'dra ba'i phyir dang/ bdag 'bras thun mong ba'i dbang du byas kyang thogs bcas kyi gzugs can gcig gi go sar thogs bcas kyi gzugs can gzhan 'byung ba du ma yod pa'i phyir te/ lcags gong mes bsregs pa'i dmar 'bar ba de'i lcags dang me gnyis go sa gcig tu gnas par 'dod dgos pa'i phyir te/ gzhan du na lcags gong mes bsregs pa'i tshe bong tshad che bar 'gyur ba'am/ lcags de mer 'gyur bar 'dod dgos na de mi rigs pa'i phyir te/ lcags gong me 'bar ba'i tshe me'i ngo bor song yang me ma yin par bshad pa'i phyir ro/ /gzhan yang/ thogs bcas kyi gzugs yin na thogs bcas kyi gzugs gzhan thams cad la thogs pas khyab pas med de/ mdo'i @107a @#/ /lugs 'dir bar do ba'i lus thogs bcas yin pa gang zhig/ des lcags kyi gong bu dang rdo rje'i brag la yang mi 'thogs par bshad pa'i phyir/ dang bo grub ste/ mdzod las/ dbang po kun tshang thogs med ldan/ zhes gsungs la/ mig sogs dbang po lnga ga thogs bcas yin pa'i phyir te/ thogs med gzugs yin na chos khams yin pas khyab pa'i phyir dang/ rnam 'grel las/ lus can yin yang phra ba'i phyir/ 'ga' zhig thogs pa med pa yin/ zhes 'ga' zhig la mi thogs par bshad kyi/ thogs bcas thams cad la mi thogs pa ma yin pa'i phyir te/ rang gi skye gnas dang rdo rje'i gdan la thogs par bshad pa'i phyir ro/ /gzhan yang nged kyi dam bca' 'thad par thal/ zad par nam mkha'i ting nge 'dzin gyi stobs kyis rtsigs pa dang ri bo sogs la thogs pa med par 'gro bar bshad pa'i phyir ro/ /'di ni rnal 'byor ba'i nus mthu bsam gyis mi khyab pa'i stobs kyis de ltar 'gyur ba yin pas gzhan dang mi 'dra'o zhe na/ chu rdul gcig gi go sar rnag dang bdud rtsi'i rdul yod pa yang las kyi nus mthu bsam gyis mi khyab pa'i dbang gis de ltar 'gyur ba yin pas bum pa'i go sar bum pa gzhan mi chud pa dang mi 'dra ba'i phyir ro/ /zhes zer ba la kha cig na re/ bshad tshul 'di mi 'thad par thal/ de 'dra ba'i tshe cha can brlan gsher phor gang dang tshad mnyam pa'i rnag khrag phor gang sogs mi skye bar/ cha can brlan gsher phor gang de cha gsum du phye ba'i cha gcig ni rnag khrag dang/ cha gcig ni chu dwangs bsil dang/ cha gcig ni bdud rtsir skye ba ni rje bdag nyid chen po'i @107b bzhed pa yin pa'i phyir te/ rnam bshad las/ gzhi gang du chu klung 'bab pa'i gzhi der chu klung de'i cha shas shig yi dwags rnams la sngon las kyi dbang gis rnag khrag tu skyes pa dang/ chu klung gi cha shas gzhan zhig mi la sngon las kyi dbang gis rnag khrag tu mi snang ba'i btung ba dang khrus kyi chur skyes pa na/ de gnyis ka chu klung gcig gi cha shas re yin pas/ zhes gsungs pa'i phyir na ma khyab ste/ yi dwags la rnag khrag tu snang ba'i gzhi de nyid mi la chu dwangs shing bsil bar snang ba yin snyam pa'i log rtog sel ba'i ched du cha shas gzhan zhig ces gsungs kyi/ chu klung de'i zheng tshad la char phye ba'i ngos gcig ni rnag khrag dang ngos gcig ni chu dwangs shin bsil bar skye zhes ba lta bu phan tshun go sa tha dad pa'i cha shas la bzhed pa ma yin pa'i phyi te/ dper na bu ram gong bu gcig gi kha dog dang ro dang reg bya gsum ka bu ra ma gong bu de'i cha shas yin kyang/ bong tshad che chung gi khyad par med pa dang/ gos gcig tu gnas pa dang/ gsum ka thogs bcas su 'dod dgos pa bzhin yin pa'i phyir ro/ /zhes zer na/ de dag 'thad mi 'thad dpyad bar bya'o/ /yang kha cig na re/ lcags gong dmar 'bras ba'i reg byar gyur pa'i grang reg chos can/ me'i khams yin par thal/ de me'i khams yin par yig char bshad pa'i phyir na ma khyab/ 'dod mi nus te/ 'byung 'gyur gyi reg bya yin pa'i phyir te; 'byung 'gyur gyi reg bya bdun po gang rung yin pa'i phyir te/ grang ba'i reg bya yin pa'i phyir ro/ /byas pa la kho na re/ me'i khams dang 'byung 'gyur gyi gzhi mthun yod pas skyon med zer na/ de mi 'thad par thal/ mngon pa 'og ma ltar na @108a @#/ /me dang me'i khams don gcig yin pa gang zhig/ gong ma ltar na me dang me'i khams la mu bzhi yod kyang/ me ma yin pa'i me'i khams yin na me skyed byed kyi nus pa ldan min 'du byed yin pas khyab pa'i phyir ro/ /yig char grang ba'i reg bya dang me'i reg bya'i gzhi mthun yod gsungs pa yang dpyad bya ste/ rnam bshad las/ lcags gong dmar 'bar ba'i reg bya dang grang reg gi gzhi mthun yod par gsungs kyi/ me'i reg bya dang grang reg gi gzhi mthun yod par ma gsungs pa'i phyir ro/ /de la kho na re/ lcags gong dmar 'bar ba'i reg bya yin na me'i reg bya yin pas khyab zer na/ lcags gong dmar 'bar ba'i 'jam rtsub lci yang gi reg bya chos can/ der thal/ de'i phyir/ 'dod na/ de dag chos can/ lcags gong dmar 'bar ba'i tshogs pa na yod pa'i me log pa na khyod ldog par thal/ khyod me de'i reg bya yin pa'i phyir/ 'dod mi nus te/ mngon sum gyis gnod pa'i phyir ro/ /des na lcags gong dmar 'bar ba me yin par yig char gsungs pa yang de'i tshogs pa na me yod pa la dgongs par 'dod dgos so/ /mtha' dpyad pa gzhan phal cher yig char gsal bar yod pas 'dir ma bris so/ /gnyis pa ni/ mdor na ji ltar shes bya med de bzhin/ /blo yang med ces don 'di shes par gyis/ zhes byung/ sngar rgyas par bshad pa rnams kyi don mdor bsdus na shes bya rang bzhin gyis grub pa med pa ji lta ba de bzhin du shes bya'i rnam pa can gyi blo yang rang gi bdag nyid kyis skye ba med ces don 'di shes par gyis shig ces pa'o/ /gnyis pa la bzhi/ gzhan dbang gi sgrub @108b byed rang rig dgag pa/ sems tsam pa'i lugs bden pa gnyis char las nyams par bstan pa/ nges na klu sgrub kyi lugs kho na'i rjes su 'brang bar rigs pa/ gzhan dbang dang 'jig rten pa'i tha snyad 'gog pa gnyis mi mtshungs par bstan pa'o/ /dang po la bzhi/ gzhan dbang gi sgrub byed dris nas de mi 'thad par bstan pa/ de 'thad pa'i gzhan gyi lan dgag pa/ rigs pa gzhan gyis kyang rang rig mi 'thad par bstan pa/ gzhan dbang rang bzhin gyis grub pa mo gsham gyi bu dang mtshungs par bstan pa'o/ /dang po ni/ gal te gzung med 'dzin pa nyid bral zhing/ zhes pa nas/ de nyid kyis de myong bar grub ma yin/ zhes rkang pas lhag pa'i tshigs bcad gcig byung/ de ltar phyi rol med par rnam shes rang bzhin gyis yod pa mi srid par bstan/ da ni phyi rol med pas khyad par du ma byas pa'i gzhan dbang gi dngos po tsam zhig rang bzhin gyis grub pa dgag pa'i phyir bshad pa/ gal te phyi rol gyi gzung ba med pas de las don gzhan pa'i 'dzin pa nyid dang bral zhing/ gzung 'dzin rdzas tha dad pa gnyis kyis stong pa'i gzhan dbang gi dngos po yod na/ gzhan dbang 'di'i yod pa de khyod kyi shes pa gang gis shes par 'gyur zhes dri bar bya'o/ /de la shes pa de nyid kyis shes pa de nyid 'dzin pa mi 'thad de/ rang la rang gi byed pa 'jug pa 'gal ba'i phyir ro// 'di ltar ral gris rang mi gcod la/ sor mo'i rtse mos rang la mi reg cing/ legs par bslab pa'i mis kyang rang gi phrag ba la zhon par mi nus shing/ mes rang mi sreg la/ mig gis rang la lta ba ma yin no/ /shes pa de ni rang las don gzhan ba'i shes pas @109a @#/ /kyang 'dzin pa ma yin te/ sems tsam pa rang gi grub mtha' dang 'gal ba'i phyir te/ gal te 'bras bu'i gnas gyur mtho ba pa'i skabs su rnam par rig pa don gzhan cig rnam par rig pa'i snang yul yin na rnam par rig pa tsam nyid du smra ba nyams par 'gyur ro/ /zhes sems tsam gyi gzhung las 'byung ba'i phyir ro/ /de'i phyir sems tsam pa ltar byas na de'i 'dzin pa rnam pa thams cad du med la/ shes pas ma bzung bar yang yod ces bya bar mi rung ngo zhes dbu ma pas smras pa na/ sems tsam pa na re/ shes pa don gzhan gyis mi 'dzin kyang rang rig ni yod do/ /de'i phyir rang rig kho nas gzhan dbang de 'dzin pa'i phyir de yod do zhe na/ shes pa de nyid kyis de myong bar grub pa ma yin no/ /sems tsam pas shes pa kha nang lta la gnyis snang thams cad log pa dang/ de 'dra ba'i shes pa de kho rang gis kho rang rig pa'i rang rig tu 'dod do/ /de'i phyir de 'dra ba'i rang rig bkag pas/ so so rang rig pa'i ye shes bkag pa dang/ 'jig rten pas nges nga rang rig ces pa'i tha snyad kyi don gyi rang rig bkag pa ni min no/ /gnyis pa la gnyis/ gzhan lugs brjod pa dang/ lugs de dgag pa'o/ /dang po ni/ sems tsam pa na re/ dper na me skyes pa na rang dang bum pa la sogs pa dag cig car gsal bar byed pa dang/ bum pa'o zhes brjod pa na sgra rang la dmigs pa dang don bum pa sogs la dmigs pa gnyis ka skyed pa de bzhin du rnam shes kyang skye ba na rang dang yul gnyis ka cig car rig par byed do/ /de'i phyir rang rig pa ni yod pa kho na'o/ /rang rig med na sngar don 'di mthong ngo zhes yul dran pa dang/ ngas mthong ngo zhes yul can dran pa @109b ni srid par 'gyur te/ sngar ma myong ba la dran pa skye ba med pa'i phyir ro/ /de yang rang rig yod de/ dran pa yod pa'i phyir zhes sgrub na ni/ gzhan la grub pa'i dpe mi rnyed pas de ltar mi sgrub kyi/ sngon 'dzin chos can/ myong ba yod de/ dran pa yod pa'i phyir; dper na sngon po bzhin no/ /'dod na/ de chos can/ rang myong yod par thal/ de'i myong ba la rang myon gzhan myon gnyis su kha tshon chod pa gang zhig/ gzhan myong rigs pas khegs pa'i phyir ro zhes sgrub po/ /sngon 'dzin de rang las don gzhan pa'i shes pas myong ba ma yin te/ sngon 'dzin gyi shes pa de rang gi mjug thogs su 'byung ba'i shes ba gzhan gyis myong na/ de la yang myong byed don gzhan dgos pas thug med du thal ba'i phyir dang/ snga ma de sngon 'dzin phyi mas myong na sngon 'dzin skad cig gnyis pa phyin chad phyi rol gyi lu la la mi 'pho bar thal ba'i phyir ro/ /gal te sngon 'dzin gyi mig gi rnam shes skad cig gnyis pa dang sngon 'dzin snga ma myong ba'i mig gi rnam shes gnyis dus mnyam du skye bas sngon 'dzin phyi mas phyi rol gyi yul la mi 'pho ba'i skyon med do snyam na/ de ltar na mig gi rnam shes rigs mthun rdzas tha dad pa gnyis gang zag gcig gi rgyud la dus gcig tu skye bar 'gyur na de mi rigs te/ sems can rnams kyi rnam par shes pa'i rgyud re re bar gsungs pa'i mdo dang 'gal bar 'gyur ba'i phyir ro/ /bar skabs 'dir rang 'grel las/ rnam par shes pa utpa la'i 'dab ma zhes sogs la dogs pa gcod tshul 'og tu dpyad par bya'o/ /de'i phyir thug pa med pa dang yul gzhan mi gcod pa'i skyon gnyis spang ba'i phyir gdon mi@110a @#/ /za bar rang rig khas blang dgos so/ /zhes smra'o/ /gnyis pa la gsum/ gzhan lugs dgag pa dngos/ rang lugs la rang rig med kyang dran pa skye ba'i tshul/ de ltar bkag pa la rtsod pa spang ba'o/ /dang po ni/ gal te phyis dus dran pa las 'grub na/ zhes pa nas/ gtan tshigs 'dis ni khyad par dag kyang 'joms/ zhes rkang pas dman pa'i tshigs bcad gnyis byung/ gal te rang mtshan gyis grub pa'i dbang du byas nas phyis kyi dus kyi dran pa las/ dran yul gyi shes pa snga ma rang rig par 'grub na/ phyi rgol la rang rig ma grub ba bsgrub par bya ba'i phyir du brjod pa'i dran pa ma grub pa 'di ni/ rang rig sgrub par byed pa min te/ sgra mi rtag par sgrub pa la mig shes kyi gzung bya rtags su bkod pa bzhin no/ /'on te tha snyad pa'i dbang du byas pa yin na ni/ dran pa de ni rang rig sgrub byed ma yin te/ rang rig med na de 'dra ba'i dran pa mi 'byung ba'i 'brel ba ma grub pa'i phyir/ chu tsam las chu shel dang me tsam las me shel dpog pa bzhin no/ /mar mes rang gsal bar mi byed kyang de la gsal ba mi ldog pa bzhin du/ shes pas khyod rang gis 'dod pa ltar du rang myong bar mi byed kyang de la myong ba tsam mi ldog pa'i phyir te/ mar mes rang gsal bar byed na mun pas rang sgrib par 'gyur la/ de 'dod na mun khung du bum pa mi mthong ba bzhin du mun pa yang mi mthong bar thal bar 'gyur ba'i phyir te/ rtsa she las/ mar mes rang dang gzhan gyi dngos/ /gal te snang bar byed gyur na/ /mun pas rang dang gzhan gyi dngos/ /sgrib par 'gyur bar the tshom med/ /ces gsungs pa ltar ro/ / @110b ci ste de ltar rnam par dpyod pa btang nas kyang/ shes bas rang rig par byed pa ni grub la rag mod kyi ste grub tu chug kyang/ dran pa'i shes pas yul dang yul can de dag dran pa ni rigs pa min te/ phyis kyi dran shes dang sngar gyi yul myong gi shes pa gnyis rang bzhin gyis grub pa'i gzhan yin par khyed kyis khas blangs pa'i phyir ro/ /lhas byin gyi shes pas sngon po myong ba de/ sngar sngon po ma shes pa ste ma myong ba'i mchod sbyin gyi rgyud la skyes pa'i shes pas dran pa ma yin pa bzhin du/ myong dran gnyis rang bzhin gyis grub pa'i gzhan yin na phyis kyi dran pas sngar gyi myong ba dran par mi 'gyur ro/ /gal te de gnyis de 'dra ba'i gzhan yin kyang rgyud gcig tu gtogs pa rnams la rgyu 'bras kyi dngos po gnas pa'i phyir dran par 'gyur ro snyam na/ de yang mi rigs te/ sngar bshad pa ltar rang mtshan gyis gzhan yin pa'i phyir zhes pa'i gtan tshigs 'dis ni/ rgyud gcig tu gtogs ba dang rgyu 'bras la sogs pa'i khyad par de dag kyang 'joms par byed pa'i phyir ro/ /gnyis pa la gnyis/ gzhung 'di nyid nas bshad pa'i lugs dang/ gzhung gzhan nas bshad pa'i lugs so/ /dang po ni/ gang phyir gang gis yul myong gyur de las/ zhes pa nas/ 'di yang 'jig rten tha snyad tshul lugs yin/ zhes tshigs bcad gcig byung/ rang rig mi 'dod na dran pa skye lugs ji ltar yin zhe na/ gang gi phyir sngar gyi shes pa gang gis yul myong bar gyur ba'i shes pa de las dran pa'i shes pa 'di rang mtshan gyis gzhan du gyur pa de'i lugs la yod pa min pa ni bshad zin la/ sa myug lta bu'i nyer len gyi rgyu 'bras la rang mtshan @111a @#/ /gyis gzhan du 'dzin pa 'jig rten pa'i blo rang dga' ba la med par yang bshad zin pas/ myong ba dang dran pa gnyis rang mtshan gyis gzhan du 'dzin pa dang/ myong ba'i dus kyi yul dang dran pa'i dus kyi yul gnyis rang mtshan gyis gzhan du 'dzin pa gnyis ka 'jig rten pa'i blo lhan skyes la med par gsal lo/ /de'i phyir sngar gyi shes pas myong ba dang bcad pa de phyis kyi dran pas ma myong ba dang ma bcad pa min pas/ 'di sngar yang nga yis mthong snyam du dran pa skye bar 'gyur te/ 'di yang 'jig rten gyi tha snyad kyi tshul gyi lugs yin gyi/ btags don btsal nas 'jog pa'i lugs min no/ /dran pa'i rtags kyis rang rig yod par sgrub tshul sngar bshad pa de/ gang phyir gang gis yul myong gyur de las/ zhes sogs kyi gzhung 'dis sel ba ma yin te/ sngar gyi phyogs snga smra ba dang gzhung 'di'i phyogs snga smra ba ni mi gcig pa'i phyir te/ snga ma ni ma myong bar dran pa mi skye bas myong ba yod la/ myong ba la rang myong gzhan myong gnyis su kha tshon bcad nas gzhan myong rigs pas khegs pa'i phyir rang myong yod do snyam pa tsam yin la/ phyi ma ni dran pa skye ba'i dran tshul khyad par ba la brten nas sngar gyi myong ba de rang rig yin no snyam du bsam pa yin pa'i phyir te/ legs bshad snying po las/ rang rig med na dran pa skye ba 'gal lo snyam du 'dzin pa'i rgyu mtshan sngar bshad pa de 'dis sel ba min te/ 'di ni dran pa skye ba'i dran tshul khyad par ba la brten nas snga ma rang rig tu 'dzin pa zhig go /de yang sngar sngon po mthong ba phyis dran pa na ngas sngar mthong ngo zhes sngar mthong ba de nyid rang gis mthong bar @111b dran pas/ dran tshul de ni sngar gyi sngon 'dzin rang gis rang ma myong na skye bar 'gal bas snga ma rang rig go snyam pa'o/ zhes dang/ rnam bshad las kyang/ de la ngas mthong snyam du dran pa ni yul can dran pa dang/ sngon po la sogs pa 'di mthong snyam du dran pa ni yul dran pa'o/ /de yang sngar nga rang gis mthong ba de nyid nga rang gis dran snyam pa ni dran tshul khyad par ba yin la/ dran pa la de byung na sngar byams pa lta bu mthong ba'i yul can shes pa kho rang gis kho rang myong bar gsal te/ dran pa ni myong ba ji lta ba'i rjes su byed pa'i phyir ro snyam du bsams so/ /zhes gsungs pa'i phyir ro/ /'di ni rje'i rjes 'jug sus kyang ma bshad pa'i zhib cha phra ba cung zad gsal du btang ba yin pas gzur gnas blo ldan rnams dga' bar byos shig /dran shes kyis dran tshul khyad par pa la brten nas sngar gyi myong ba rang rig tu sgrub pa 'di ni rang rig 'dod mkhan gyi gzhung du gsal bar bshad ba kho bos ma mthong bas/ zla ba'i zhabs kyis dogs pa khong nas bslangs te bkag pa yin nam phyogs snga'i gzhung du dngos su byung ba yin dpyad byar snang ngo/ /'jig rten na nga rang gis mthong ba nga rang gis dran zhes pa ltar rang lugs la yang khas len kyang/ dran tshul de ni rang rig gi dbang gis byung ba ma yin gyi/ sngar gyi myong ba dang phyis kyi dran shes gnyis yul gcig la 'jug pa'i dbang gis de ltar dran pa yin te/ dper nas myug lta bu'i rgyu 'bras la blo lhan skyes kyis rang mtshan gyis gzhan du 'dzin pa med pa'i rgyu mtshan gyis/ 'jig rten pa rnams bu'i lus kyi rgyu dang shing sdong po'i sa bon tsam btab pa la @112a @#/ /brten nas bu dang shing sdong skyes pa na/ de gnyis bstan nas bdag gis bu 'di bskyed cing shing sdong 'di btsugs so zhes tha snyad 'dogs pa ltar 'jog nus pa bzhin du/ myong dran lta bu'i rgyu 'bras la yang blo lhan skyes kyis rang mtshan gyis gzhan du 'dzin pa med pas/ sngar sngon 'dzin gyis mthong ba de nyid phyis kyi dran shes kyis rang gis mthong bar dran pa ni shin tu 'thad la dran pa ltar du yang 'jog nus par mtshungs pa'i phyir ro/ /'o na ngas sngar sngon po mthong ngo zhes dran pa de sngon 'dzin shes pa dran pa ma yin par thal/ ngas mthong ngo zhes pa'i nga ni gang zag yin pa gang zhig /de dang sngon po 'dzin pa'i shes pa gnyis 'gal ba yin pa'i phyir na ma khyab/ 'o na khyod rang la/ sngon 'dzin mig shes kyis sngon po mthong ba la brten nas gang zag gis sngon po mthong bar 'jog mi nus par thal/ sngon 'dzin mig shes dang gang zag gnyis 'gal ba yin pa'i phyir/ khyab pa 'grig /'dod mi nus te/ gang zag gis gzugs mthong ba dang sgra thos pa sogs yod pa'i phyir ro/ /gzhan yang lag pa na ba dang sos pas gang zag na ba dang sos par 'jog mi nus par thal/ lag pa dang gang zag gnyis 'gal ba yin pa'i phyir zhes sogs gnod byed mang ngo/ /gnyis pa ni/ spyod 'jug las/ gal te rang rig yod min na/ /rnam shes dran par ji ltar 'gyur/ zhes rang rig 'dod mkhan gyis sngar bshad pa ltar brtsad pa'i tshe khyab pa med pa'i lan 'debs pas/ rang rig med kyang dran ba skye tshul ji ltar yin zhe na/ gzhan myong ba dang 'brel @112b ba las/ /dran 'gyur byi ba'i dug bzhin no/ zhes gsungs te/ don ni/ sngon 'dzin las gzhan sngon po myong ba la brten nas sngon 'dzin dran pa 'byung bar 'gyur ro/ /gal te sngar gang myong ba de nyid dran dgos kyi/ sngon po myong ba'i stobs kyis sngon 'dzin dran pa mi rigs te/ gzhan du na sngon po myong ba'i stobs kyis ser po dran pa yang yod par thal bar 'gyur ba'i phyir ro zhe na/ nyes pa med de/ yul myong ba las dran pa skye ba'i tshe/ yul can spangs nas yul gcig bu dran pa ma yin gyi/ sngar yul 'di mthong ngo zhes yul yul can 'brel bar dran pa'i phyir ro/ /dper na dgun gyi dus su byi bas lus la rmugs pa na/ byi du gzhugs yod kyang rmugs pa myong gi dug ma myong ngo/ /dus phyis 'brug gi sgra thos pa na rmugs pa'i tshe dug zhugs par 'dug snyam du dran kyang sngar dug ma myong ba bzhin no/ /dpe don sbyor tshul rgyas par rnam bshad las shes par bya'o/ /gsum ba la gnyis/ mngon sum gyi tshad ma gzhan dang rjes dpag la rtsod pa spang ba dang/ yid shes gzhan gyi rtsod spang ngo/ /dang po ni; de ltar bkag pa la/ kha cig na re/ thal 'gyur ba kho rang gi lugs la/ sngon 'dzin mig shes rgyud ldan gyi gang zag des sngon po dran pa'i dran shes ma skyes kyi bar du sngon 'dzin shes pa yod par mi 'grub par thal/ de yod par rang rig gis mi 'grub pa gang zhig shes pa don gzhan gyis mi 'grub pa'i phyir zer na/ de la khyab pa med de/ dper na yul dran pa nyid kyis yul can yang dran pas/ yul can dran pa zur ba mi dgos pa bzhin du/ yul sngon po grub ba nyid kyis sngon 'dzin @113a @#/ /yang 'grub kyi/ sngon 'dzin 'jal byed kyi tshad ma zur ba mi dgos pa'i phyir te/ tshig gsal las/ tshad ma'i grangs 'jug pa gzhal bya'i gzhan gyi dbang yin pa'i phyir dang/ gzhal bya'i rnam pa'i rjes su byed pa tsam gyis rang gi ngo bo yod par rnyed pa'i tshad ma dag gi rang gi ngo bo rnam par 'jog pa'i phyir/ zhes gsungs pa'i phyir/ khyab ste/ de dag gi don ni tshad ma gnyis su nges pa ni gzhal bya gnyis su nges pa'i dbang gis 'jog pa'i phyir dang/ tshad ma la gzhal bya'i rnam pa shar ba'i dbang gis 'jal byed kyi tshad ma'i rang gi ngo bo yod par 'jog pa'i phyir zhes pa dang/ gzhal bya grub pa tsam gyis tshad ma 'grub kyi/ gnyis snang dang bral ba'i rang rig gis 'grub ba min par shes pa'i ched du tsam sgra smos pa'i phyir ro/ /des na tshad ma de gzhal bya ji lta ba de 'dra ba'i rnam pa'i rjes su byed pas gzhal bya 'grub pa ni lugs gzhan dang 'dra yang/ de las logs su tshad ma 'grub tshul yod med la grub mtha' smra ba rnams mi mthun pas rtsod pa 'byung ba yin no; /skabs 'dir rnam bshad las/ sngon 'dzin ni gzhan lugs ltar rang rig gis mi 'grub kyi/ dbang po'i mngon sum tshad mas 'grub par bstan te/ de yod pa ni sngon 'dzin gyis gzhal bya grub pa de nyid kyis rtogs pa'i phyir ro/ /zhes gsungs ba la/ stong thun las/ kho bo ni 'di ltar smra ste/ sngon 'dzin mig shes kyis sngon 'dzin mig shes yod par grub/ ji ltar grub na sngon po gzhal ba'i stobs kyis grub ces mi smra'i/ zhes pa nas/ des na sngon 'dzin mig shes kyis sngon po @113b gzhal ba la ltos nas sngon 'dzin mig shes grub pa yin kyang sngon 'dzin mig shes kyis grub ba min no/ /zhes 'byung ba de ni rje'i gsung sngar drangs pa dang 'gal bar snang la/ yig char rje'i gsung de ma brtags ma dpyad pa'i 'jig rten gyi tha snyad rags pa'i dbang du byas shing/ stong thun las gsungs pa de 'jig rten gyi tha snyad phra mo'i dbang du byas pas dgongs pa mi 'gal bar bshad pa lta bur snang yang/ bshad pa'i gzhi gcig la ma brtags ma dpyad pa'i tshe de ltar yin/ brtags shing dpyad pa'i tshe de ltar yin zhes rnam gzhag mi 'dra ba gnyis byed pa ni bod snga rabs pa'i lugs yin gyi rje'i rang lugs min par mkhas dbang gung thang bas gsungs pa ni/ rje'i bka' rtsom phyi ma rnams dang shin tu mthun par snang bas/ yig cha'i tshig zin ltar khas len mi rung ngam snyam ste dpyad par bya'o/ /de la kha cig na re/ sngon 'dzin mig shes kyis rang nyid yod par 'grub par thal/ rnam bshad kyi lung de'i phyir/ 'dod na/ de chos can/ rang nyid yod par rtogs par thal/ rang nyid yod par 'grub pa'i phyir na ma khyab/ 'o na khyod rang la/ sgra mi rtag par 'grub na sgra mi rtag par rtogs pas khyab bar thal/ sngon 'dzin mig shes yod par 'grub na sngon 'dzin mig shes yod par rtogs pas khyab pa'i phyir/ rtags khas/ 'dod na/ gang byas na mi rtag pas khyab/ dper na bum pa bzhin sgra yang byas so/ /zhes pas sgrub dag chos can/ khyod kyis sgra mi rtag par rtogs par thal/ sgra mi rtag par 'grub pa'i phyir te/ rnam 'grel las/ sgra ni byas yin 'di 'dra @114a @#/ /kun; /mi rtag ces ni brjod pas kyang/ /don gyis de ni 'jig blor 'gyur/ /zhes gsungs pa'i phyir ro/ /yang kha cig na re/ sngon 'dzin gyis rang nyid yod par rtogs par thal/ sngon 'dzin gyis sngon po 'jal ba'i stobs kyis rang nyid yod par rtogs pa'i phyir na ma khyab/ rtags grub ste/ rnam bshad las/ de yod pa ni sngon 'dzin gyis gzhal bya grub pa de nyid kyis rtogs pa'i phyir ro/ /de'i phyir tshad ma gang yin thams cad rang gis gzhal bya grub pa de nyid kyis 'grub bo/ /zhes gsungs pa'i phyir dang/ gzhal bya grub pa de nyid kyis rtogs ces pa ni sngon 'dzin gyis sngon po 'jal ba'i stobs kyis sngon 'dzin rgyud ldan gyi gang zag des sgrub byed gzhan lam ltos par sngon 'dzin yod par rtogs nus pa'i don yin pa'i phyir ro/ /yang kha cig /stong nyid rtogs pa'i rigs shes kyis kyang rang nyid yod par 'grub par thal/ sngon 'dzin gyis rang nyid yod par 'grub pa'i phyir na ma khyab/ rtags bsgrubs zin/ 'dod mi nus te/ rigs shes kyis bden par yod med dpyod pa yin pas/ des yod par grub na bden grub tu thal bar 'gyur ba'i phyir ro/ /yang kho na re/ rigs shes kyis rang nyid yod par 'grub par thal/ des rang gi gzhal bya grub pa de nyid kyis rang nyid yod par 'grub pa'i phyir na ma khyab/ rtags grub ste/ rnam bshad las/ tshad ma gang yin thams cad rang gi gzhal bya grub pa de nyid kyis 'grub bo/ /zhes dang/ mnyam gzhag rnam par mi rtog pa'i ye shes kyis rang gi gzhal bya chos nyid grub pa na @114b de'i stobs kyis yul can gyi ye shes 'grub pa la/ rig bya rig byed so sor snang ba'i gnyis snang log pa dang/ gzhan lugs kyis shes pa thams cad kha nang lta la gnyis snang log pa'i 'dzin rnam yan gar bar 'dod pa dang mi mtshungs pa'i khyad par ni 'bras bu'i sa'i skabs su 'chad par 'gyur ro/ /zhes gsungs pa'i phyir ro/ /rang lugs kyi mnyam gzhag rnam par mir tog pa'i ye shes la rig bya rig byed so sor snang ba'i gnyis snang log pa dang/ gzhan lugs kyis shes pa thams cad kha nang lta la gnyis snang log pa'i 'dzin rnam yan gar bar 'dod pa gnyis mi mtshungs te/ rnam bshad las de gnyis mi mtshungs par skabs 'dir yang bshad pa gang zhig /'bras bu'i sa'i skabs su yang bshad pa'i phyir/ dang po grub ste/ de nyid las/ mnyam gzhag rnam par mi rtog pa'i ye shes kyi ngor gnyis snang med kyang/ blo gzhan gyis bltas pa na rig bya rig byed gnyis su snang la/ sngar bshad pa'i 'dzin rnam yan gar ba rtog pas yid ci tsam gtad kyang rig bya rig byed tha dad pa'i snang ba mi 'char bar gsungs pa'i phyir dang/ bden gnyis rang 'grel las kyang rang gi rig bya rig byed dang rdul phyogs kyi cha med gnyis ka blo la snang ba med par bshad pa'i phyir ro/ /gnyis pa grub ste/ gang tshe zhi ba de nyid yin na de la blo gros 'jug mi 'gyur/ /blo ma zhugs par shes bya'i yul can nges par rigs pa'ang ma yin la/ /kun nas shes med par ni shes par ji ltar 'gyur te 'gal bar 'gyur/ /mkhyen po med par khyod kyis gzhan la 'di lta'o zhes su zhig ston/ zhes @115a @#/ /rang bzhin gyis skye ba zhi ba de kho na nyid yin na blo la de kho na nyid kyi rnam pa 'char rgyu med pa dang/ de'i rnam pa ma shar na de la blo mi 'jug pa dang/ ma zhugs na de mi shes par 'gyur ba sogs su rtsod pa'i lan tu/ gang tshe skye med de nyid yin zhing blo yang skye ba dang bral ba/ /de tshe de rnam bsten las de yis de nyid rtogs pa lta bu ste/ /ji ltar sems ni gang gi rnam pa can tu 'gyur ba de yis yul/ /de yongs shes pa de bzhin du ni tha snyad brten nas rig pa yin/ /zhes yul gyi rnam pa ma shar na blo mi 'jug pa la sogs pa rnams rang yang de ltar 'dod pas de la lan mi 'debs la/ blo la de kho na nyid kyi rnam pa 'char rgyu yod pa dang/ de shar ba las de nyid rtogs par 'jog pa de dpe dang bcas par gsungs pa de ni rang rig gi 'dod tshul dang mi 'dra ba'i khyad par yin pa'i phyir te/ rang rig 'dod mkhan rnams kyis rang rig de yul gyi rnam pa ma shar ba'i 'dzin rnam yan gar bar 'dod pa'i phyir ro/ /gnyis pa ni/ 'on lugs 'dis gzugs brnyan dang sgyu ma'i rta dang zla ba gnyis snang sogs gzugs kyi skye mched dang sgra brnyan sogs sgra'i skye mched du bzhag pa dang/ gzugs sgra la sogs pa'i yul la mngon sum gyi sgra dngos ming dang/ de dag 'dzin pa'i yul can la btags ming du bstan pa dang/ zla ba gnyis snang sogs 'jig rten rang dga' ba la ltos te ltos te gzhal bya mngon sum pa ma yin kyang/ rang lugs la gzugs brnyan sgra brnyan sogs kyang gzhal bya mngon sum pa mngon gyur du bzhed pa'i phyir dbang shes thams cad rang gi @115b gzhal bya grub pa de nyid kyis rang nyid yod par 'grub par bzhed mod/ 'on kyang rang rig khas mi len pa la gzhi dus kyi yid shes snang ba dang zhen yul la 'khrul ba rnams yod par mi 'grub ste/ de dag la rang gi gzhal bya 'jal bas yul can grub pa med pa'i phyir ro zhe na/ 'di la lugs 'di'i tshad ma'i rnam gzhag thun mong ma yin pa shes na khyad par rnams legs par phyed par 'gyur bas de cung zad bshad pa la/ rang gi 'dzin stangs kyi yul la mi slu ba'i shes pa de/ tshad ma'i mtshan nyid yin gyi/ tshad pa ltar gsar du zhes pa'i khyad par mi sbyor te/ rtsa she'i TIka chen las/ 'dir tshad ma'i mtshan nyid mi slu ba ni 'jig rten na ji ltar 'jog pa bzhin du bzhed la/ 'jig rten na gsar du slu mi slu'i khyad ma phye bar spyir mi slu ba la tshad mar 'jog pas; zhes gsungs pas so/ /rtog ge bdag gis tshad ma la gsar du mi slu ba zhig dgos pa'i dpyad pa de btags don tshol ba'i dpyad pa yin par stong thun dang yig char gsungs pa ltar 'dod na/ gsar du mi slu ba'i shes pa med par 'dod dgos la; de lta na rang yul gsar du rtogs pa'i shes pa yod med dang/ gsar du skyes pa'i 'dus byas yod med dang/ gsar du sangs rgyas ba'i gang zag yod med sogs sbros na zhib cha gdon par bya dgos so/ /tshad ma la dbye na mngon rjes gnyis te/ rang gi 'dzin stangs kyi yul du gyur pa'i gzhal bya lkog gyur pa la mi slu ba'i shes pa de/ rjes dpag tshad ma'i mtshan nyid/ rang gi 'dzin stangs kyi yul gyi gzhal bya mngon gyur pa la mi slu ba'i shes pa de/ mngon sum gyi tshad ma'i mtshan nyid yin la/@116a @#/ /mngon sum gyi tshad ma yin na rtog med kyi shes pa yin pas ma khyab ste/ dngos smra bas mngon sum yin na rtog bral dang ma 'khrul ba dang dbang po so so la brten pas na mngon sum zhes pa'i sgra don gyi khyad par te gsum ldan yin pas khyab par 'dod pa de bzhi brgya pa'i 'grel par bkag pa'i don yig char bshad pa ltar yin pa'i phyir te/ dbang mngon gyis drangs pa'i dran shes rnams mngon sum gyi tshad ma yin pa'i phyir dang/ mnyam gzhag rnam par mi rtog pa'i ye shes ma gtogs pa'i sems can gyi shes pa thams cad 'khrul shes yin pa'i phyir dang/ mngon sum gyi sgra ni bum pa la sogs pa rnams dbang po la lkog tu ma gyur pas na mngon sum zhes yul la dngos dang/ dbang mngon la sogs pa ni yul mngon sum pa yin pas na mngon sum zhes yul can la btags nas 'jug pa yin gyi/ dbang po so so la brten pas na mngon sum zhes thun mong ma yin pa'i rten gyi sgo nas yul can 'ba' zhig gi dngos ming du bshad pa mi 'thad pa'i phyir ro/ /rjes dpag la dbye na/ rjes dpag tsam dang/ lung gi tshad ma dang/ dpes nyer 'jal gyi tshad ma ste gsum yod do/ /de'i dang po la dngos stobs kyi rjes dpag ces pa'i tha snyad sbyor mi sbyor dpyad byar snang la/ gzhi grub na rjes dpag gi gzhal bya yin pas ma khyab ste/ gzhi grub na khyod rtogs pa'i rjes dpag yod pas ma khyab pa'i phyir te/ rang bzhin med pa yod pa rtogs pa'i rjes dpag med pa'i phyir dang/ bden stong sgyu ma lta bur rtogs pa'i rjes dpag med pa'i phyir/ dang po grub ste/ @116b rtsa she'i TIka chen las/ rang bzhin med pa khyad gzhir grub nas yod med kyi don dang tha snyad gang la yang dpyod pa med pas rtags kyis 'grub pa min zhing/ rtags la ma ltos par rang bzhin med pa med par 'dzin pa'i sgro 'dogs gcod par yang nus pas rang bzhin med pa yod pa ni mngon gyur ro/ /zhes pa nas/ des na yod par nges pa'i tha snyad pa'i blo yang mngon gyur la mi slubs mngon sum gyi tshad ma'o/ /zhes gsungs pa'i phyir/ gnyis pa grub ste/ drangs ma thag pa'i lung 'di'i 'phror/ 'dis myu gu la sogs pa rang bzhin med par rigs shes kyis rtogs pa la myu gu'i snang ba rang bzhin med bzhin du snang bar gang gis 'grub pa yang shes par bya'o/ /zhes dang/ lam rim chen mo las/ de rnams la rang bzhin yod med dpyod pa'i rigs pas mang du dpyad nas/ rang bzhin khegs pa la nges pa drag po bskyed nas/ de nas snang ba shar pa la bltas na sgyu ma lta bur 'char ba yin gyi/ sgyu ma lta bu'i stong pa logs su gtan la 'bebs tshul med do/ /zhes gsungs pa'i phyir ro/ /'di la kha cig na re/ rang bzhin med pa yod pa dang bden stod sgyu ma lta bu re re nas chos na/ mngon gyur yin par thal/ khyod kyi bshad tshul 'thad pa'i phyir/ 'dod mi nus te/ dbang po'i yul ma yin pa'i phyir/ khyab ste/ mngon sum dang mngon gyur dang dbang po'i yul don gcig par yig char bshad pa'i phyir zer na/ yig char de ltar bshad pa'i khungs ni 'chi med mdzod las/ mngon sum dang ni dbang po'i yul/ zhes pa tsam las gzhan mi snang @117a @#/ /la; mngon brjod nas rnam grangs su bshad pa thams cad don gcig yin pa'i nges pa med pas dpyad par bya'o/ /yang kho na re/ khyod kyi bshad tshul de mi 'thad bar thal/ gzhi grub na khyod rtogs pa'i rjes dpag yod pas khyab ces yongs su grags pa'i phyir dang/ yig char yang de ltar bshad pa'i phyir zer na/ 'o na khyod rang la/ gzhi grub na khyod rtogs pa'i dngos stobs rjes dpag dang yid ches kyi rjes dpag re re nas yod pas khyab par thal/ yig char de ltar bshad pa'i phyir/ khyab pa khas/ 'dod mi nus te/ bden bzhi rtogs pa'i yid ches kyi rjes dpag med/ shin lkog rtogs pa'i dngos stobs rjes dpag med pa'i phyir te/ rnam 'grel las/ rjes dpag rang gi spyod yul la/ / lung la ltos pa med bar bshad/ /ces dang/ gnas gsum par ni 'phos pa na/ /bstan bcos len par rigs ldan yin/ /zhes gsungs pa'i phyir dang/ phar phyin gyi yig car yang de ltar bshad pa'i phyir ro/ /g+hzan yang yid shes kyi tshor ba'i gzhal byar gyur pa'i bde sdug btang snyoms gsum chos can/ dbang shes kyi gzhal bya yin par thal/ mngon gyur yin pa'i phyir/ der thal/ rtags sbyor sogs lam brten par mngon gyur du rtogs nus pa'i chos yin pa'i phyir te/ rnam bshad las/ mngon gyur du 'jal ba la dbang shes kyis gzugs sogs gcod pa lta bu dang/ tshor ba bde sdug la sogs pa ltar nang du nyams myong gis yongs su gcod pa gnyis gsungs so/ /zhes gsungs pa'i @117b phyir ro/ /gzhan yang/ de dag chos can/ lkog gyur yin par thal/ dbang shes kyi yul ma yin pa'i chos yin pa'i phyir/ khyab pa khas/ 'dod na/ de dag chos can/ khyod gsar du rtogs pa la rtags sbyor sogs la brten nas rtogs dgos pa'i chos yin par thal/ lkog gyur yin pa'i phyir/ khyab ste rtags la brten nas rtogs dgos pa'i chos de lkog gyur gyi mtshan nyid yin par yig char bshad pa'i phyir/ 'dod mi nus te/ rtags sbyor sogs la ma brten par nang du nyams myong gis bde sdug sogs rtogs pa yod par gsungs pa de'i phyir ro/ /gzhan yang/ bdag 'dzin gnyis la shar ba'i bdag gnyis kyi snang ba chos can/ lkog gyur yin par thal/ dbang shes kyi yul ma yin pa'i chos yin pa'i phyir/ 'dod mi nus te/ mngon gyur yin pa'i phyir te/ rtags sbyor sogs lam brten par bdag 'dzin kho rang gis de dag rtogs pa'i phyir ro/ /gzhan yang/ mngon gyur yin na dbang shes kyi yul yin pas mkhyab par thal/ gnyis snang can gyi shes pa yin na rang gi snang ba la mngon sum gyi tshad ma yin pas khyab par bshad pa'i phyir/ khyab ste/ de ltar na gnyis snang can gyi shes pa'i snang ba rnams rtags sbyor sogs la ma brten par rtogs nus pa'i chos yin pas mngon gyur du 'dod dgos pa'i phyir ro/ /mngon sum gyi tshad ma la dbye na/ dbang mngon/ yid mngon/ rnal 'byor mngon sum gsum yod/ rang gi 'dzin stangs kyi yul la mi slu ba'i dbang shes de/ dbang po'i mngon sum gyi tshad ma'i mtshan nyid/ mtshan gzhi @118a @#/ /ni; gzugs la mi slu ba'i dbang mngon lta bu'o/ /rang gi 'dzin stangs kyi yul yod cing de la nges pa 'dren mi nus pa'i dbang shes de/ snang la ma nges pa'i dbang mngon gyi mtshan nyid/ mtshan gzhi ni/ gzugs yid 'ong mthong ba la lhag par chags dus kyi sgra 'dzin rna shes lta bu'o/ /rang gi 'dzin stangs kyi yul med pa'i dbang shes de/ log shes su gyur pa'i dbang shes kyi mtshan nyid/ mtshan gzhi ni/ zla gcig zla gnyis su snang ba'i dbang shes lta bu'o/ /rang gi 'dzin stangs kyi yul gyi gzhal bya mngon sum pa la mi slu ba'i yid shes de/ yid kyi mngon sum gyi tshad ma'i mtshan nyid/ de la dbye na/ yid mngon tsam dang/ rnal 'byor mngon sum gnyis yod/ rang gi 'dzin stangs kyi yul gyi gzhal bya mngon gyur pa la mi slu zhing bden bzhi'i khyad chos sam bdag med phra rags gang rung gsal bar mi snang ba'i yid shes de/ dbang yid rnal 'byor mngon sum gsum du phye ba'i yid kyi mngon sum gyi tshad ma'i mtshan nyid/ mtshan gzhi ni/ gzugs 'dzin dbang mngon gyis drangs pa'i dran shes lta bu'o/ /lugs 'dir snang la ma nges pa'i yid mngon yod med dpyad bya'o/ /mngon sum gsum du phye ba'i yid mngon de la dbye na/ rtog par gyur pa'i yid mngon dang/ rtog bral gyi yid mngon gnyis yod/ dang po ni rang gi 'dzin stangs kyi yul gyi gzhal bya mngon gyur ba la mi slu ba'i rtog pa thams cad dang/ gnyis pa ni mngon shes dang po lnga la sogs pa lta bu'o/ bden @118b bzhi'i khyad chos sam bdag med phra rags gang rung mngon sum du rtogs pa'i yid shes de/ rnal 'byor mngon sum gyi mtshan nyid/ mtshan gzhi ni/ bar chad med lam lta bu'o/ /stong thun dang yig char rnal 'byor mngon sum yin na zhi lhag zung 'brel la brten pas khyab par bshad kyang/ 'dod sems su gyur pa'i rnal 'byor mngon sum khas blangs na ma nges so/ /rang gi 'dzin stangs kyi yul la mi slu ba ma yin pa'i shes pa de/ tshad min gyi shes pa'i mtshan nyid/ mtshan gzhi ni/ log shes dang/ the tshom dang/ snang la ma nges pa'i blo dang/ yid dpyod la sogs pa'o/ /rang dang 'dzin stangs dngos su 'gal ba'i tshad mas gnod par 'os pa'i shes pa de/ log shes kyi mtshan nyid/ de la dbye na/ der gyur pa'i rtog ba rtog med gnyis yod/ rang gi zhen yul la 'khrul ba'i zhen rig de/ rtog pa log shes kyi mtshan nyid/ rtog med log shes la dbang shes dang yid shes gnyis las/ dang po'i mtshan nyid ni sngar bshad zin/ gnyis pa'i mtshan nyid ni/ log shes sbyi'i mtshan nyid des rigs 'gre'o/ /tshad min gyi shes ba gzhan rnams ni sngar bshad pa rnams kyis dpag ste shes par sla'o/ /de la kha cig na re/ log shes kyi mtshan nyid bshad pa de mi 'thad par thal/ rang dang 'dzin stangs dngos su 'gal ba'i tshad ma yod pa'i shes pa de log shes kyi mtshan nyid yin pa'i phyir te/ stong thun las/ lugs 'dis rang dang 'dzin stangs dngos su 'gal ba'i tshad ma yod med kyis log shes yin min du 'jog gi/ zhes gsungs pa'i @119a @#/ /phyir na ma khyab ste/ phal che ba la dgongs pa'i phyir/ 'dod mi nus te/ sa gzhi thams cad chus gang bar mos pa'i zad par gyi ting nge 'dzin dang 'dzin stangs dngos su 'gal ba'i tshad ma yod pa'i phyir ro/ /yang kha cig / rang gi zhen yul la 'khrul ba'i zhen rig de rtog pa log shes kyi mtshan nyid du bshad pa mi 'thad par thal/ rtog pa yin na rang gi zhen yul la 'khrul pas khyab pa'i phyir te/ de ltar stong thun las gsungs pa'i phyir na ma khyab ste/ stong thun las de ltar gsungs pa'i dgongs pa btsal bar bya dgos kyi/ tshig zin ltar khas len mi rung ba'i phyir te/ lam rim las/ phung po mi rtog sogs su 'dzin pa'i rtog pa ni snang yul la 'khrul yang nges pa'i 'dzin stangs la tshad ma'i gnod pa med pas phyin ci ma log pa'am ma 'khrul pa zhes bya la/ dbang po'i shes pa rnams ni snang yul la 'khrul zhing ma 'khrul ba'i cha gzhan yang med pas ma 'khrul ba zhes mi bya'o/ /zhes gsungs pa'i phyir ro/ /'di la phung po mi rtag sogs su 'dzin pa'i rnal 'byor mngon sum de 'dzin stangs kyi yul la 'khrul ma 'khrul gang yin dang/ yig char sgra mi rtag par rtogs pa'i rjes dpag de rang gi zhen yul la ma 'khrul yang sgra mi rtag pa la 'khrul bar bshad pa de rje'i dgongs par song ma song dpyad par bya dgos par snang yang bdag lta bus thag gcod par dka' bas ma bris so/ /lugs 'dir zhen yul la 'khrul ba'i shes pa rnams yod par 'grub tshul yod de/ shes pa gang yin thams cad rang gi gzhal bya grub pa de nyid kyis rang nyid @319b yod par 'grub pa'i phyir te/ shes pa yin na rang gi gzhal bya yod pas khyab pa'i phyir te/ shes pa yin na rang gi snang yul la mngon sum tshad ma yin pas khyab pa'i phyir te/ tshig gsal las/ rang gi mtshan nyid dam sbyi'i mtshan nyid kyang rung ste/ 'jig rten na yod na ni thams cad mngon sum du dmigs par bya ba yin pa'i phyir lkog tu ma gyur pa yin te/ de'i phyir de'i yul can gyi rnam par shes pa dang lhan cig tu mngon sum nyid du rnam par gzhag go/ zhes gsungs pa'i phyir/ khyab ste; de'i don ni/ gzhi grub na rang snang yul du byed pa'i shes pa la lkog tu ma gyur pas khyab pa'i phyir khyod shes pa de'i yul mngon sum pa dang shes pa de khyod la mngon sum gyi tshad mar 'jog ces pa yin pa'i phyir te/ rnam bshad las/ de ltar shes pa rnams yul du snang ba'i snang yul mngon gyur grub par 'dra la/ zhes gsungs pa'i phyir/ snang yul de shes pa dang lhan cig tu mngon sum du 'jog ces pa'i don ni yul yul can phan tshun ltos te yul la mngon sum gyi sgra dngos dang/ yul can la btags nas 'jug par gsungs so/ /'di ltar sngon po de sngon 'dzin mig shes la ltos te mngon sum mtshan nyid pa dang/ sngon 'dzin mig shes de sngon po la ltos te mngon sum btags pa ba yin zhes pa yin gyi/ sngon 'dzin mig shes de mngon sum btags pa ba yin zhes pa min te/ sngon 'dzin mig shes de mngon sum mtshan nyid pa yin pa'i phyir te/ rtags sbyor sogs la ma brten par rtogs nus pa'i chos yin pa'i phyir ro/ /shes pa yin na rang gi snang yul la mngon sum tshad @120a @#/ /mar song bas khyab pa yod kyang/ snang gzhil tshad mar song bas ma khyab ste/ zla gcig zla gnyis su snang ba'i dbang shes de zla gnyis su snang ba la tshad mar song yang snang gzhi zla gcig la tshad mar ma song ba'i phyir te/ rang gi snang ba dang snang gzhi la tshad mar song ma song la mu bzhi yod pa'i phyir te/ rang gi snang ba la tshad mar song la snang gzhi la tshad mar ma song ba ni/ log shes su gyur pa'i dbang shes lta bu/ snang gzhi la tshad mar song la snang ba la tshad mar ma song ba ni; bar chad med lam lta bu/ gnyis ka la tshad mar song ba ni/ sngon 'dzin mig shes dang/ sgra mi rtag par rtogs pa'i rjes dpag dang/ phung po mi rtag sogs su rtogs pa'i rnal 'byor mngon sum lta bu/ gnyis ka la tshad mar ma song ba ni/ mig sogs dbang po lnga lta bu yin pa'i phyir ro/ /'o na rjes dpag tshad ma de rang gi snang yul la mngon sum tshad ma dang 'dzin stang kyi yul la rjes dpag tshad ma yin par 'dod par mngon yang/ rang gi gzhal bya la tshad ma gang du song ba yin zhe na; dpyad bar bya la/ de bzhin du phung po mi rtag par rtogs pa'i rnal 'byor mngon sum kyang rang gi snang ba la yid mngon dang 'dzin stangs kyi yul la rnal 'byor mngon sum tshad mar 'dod pa dang/ rjes dpag tshad mar gyur pa'i tshor ba bde ba yang rang gi myong bya'i bde ba la yid mngon dang 'dzin stangs kyi yul la rjes dpag tshad mar 'dod dgos pas/ de dag kyang rang gi gzhal bya la tshad ma gang du song dpyad par bya'o/ /'o na gnyis snang can gyi yid tshor gyis bde sdug sogs mngon gyur @120b du rtogs na rang rig tu thal bar mi 'gyur ram zhe na/ yig cha zag bcas kyi tshor ba bde ba dang/ de dang mtshungs ldan gyi sems sems byung dang de'i yul zag bcas thams cad 'gyur ba'i sdug bsngal du lam rim las gsungs pa ltar/ tshor ba'i myong bya la yang tshor ba de dang mtshungs ldan gyi sems sems byung dang/ tshor ba de'i yul rnams kyang 'jog pas na bkag pa'i rang rig dang mi 'dra bar bshad pa lta bur snang la/ 'on kyang yul stong nyid lta bu de stong nyid rtogs pa'i rjes dpag tshad ma'i ngo bor gyur pa'i tshor ba bde bde'i myong bya'i bde ba ma yin te/ de'i gzhal bya mngon gyur ba ma yin pa'i phyir te/ de'i 'dzin stangs kyi yul gyi gzhal bya lkog gyur pa yin pa'i phyir ro snyam pa dang/ tshor ba des rang dang mtshungs ldan gyi sems sems byung rnams kyang mngon gyur du gcod na/ de dag dmigs rnams mtshungs pa yin pas phan tshun yul yul can dang gzhal bya 'jal byed kyi tshad mar 'gyur ba dang/ de dag rang nyid rang dang yang gzhal bya 'jal byed du 'gyur bas rnag rig don pa las kyang thal che bar mi 'gyur ram snyam du dogs pa bslangs na lan ji ltar byed dpyad par bya'o/ /rnam bshad las/ 'o na yid shes kyi tshor bas bde sdug sogs mngon gyur du gcod na rang rig tu mi 'gyur ram snyam na/ skyon med de/ bkag pa'i rang rig ni shes pa thams cad kha nang lta la rig bya dang rig byed dang tha dad par snang ba nub pa'i 'dzin rnam yan gar ba yin zhing/ 'dir ni nyams su myong ba khyad par can tshor ba'i mtshan nyid du mdo sder gsungs la/ 'jig rten gyi tha snyad las kyang @121a @#/ /bde ba dang sdug bsngal nyams su myong ngo zhes brjod pa'i phyir/ myong bya dang myong byed tha dad pa nyid du snang ba'i phyir na phyogs snga ma'i rang rig dang mi gcig go/ zhes skyon spong mdzad do/ /gsung 'di'i don go dka' bar snang yang/ de gnyis mi mtshungs pa'i rgyu mtshan yod de/ rang rig ni bdag las skye'am gzhan las skye zhes dpyod pa ltar sngon 'dzin de rang gis rig gam gzhan gyis rig ces btags don la dpyad cing btsal nas rnyed pa'i don du 'gyur bas/ gal te rang rig yod na de don dam dpyod byed kyi rigs pa'i dpyad bzong du 'grub dogs pas mi srid la/ skabs 'di'i myong bya myong byed ni btags don la ma brtags ma dpyad par bde ba dang sdug bsngal myong ngo zhes pa'i 'jig rten gyi tha snyad kyi dbang gis 'jog pa yin pas mi 'dra ba'i phyir te/ btags don 'tshol ba'i dbang du byas na skabs 'di'i myong bya myong byed kyang tha dad par mi rung bas bya byed gcig tu thal bar 'gyur ba ni rang rig dang 'dra yang/ btags don la ma brtags ma dpyad pa'i 'jig rten gyi tha snyad kyi dbang du byas na skabs 'di'i myong bya myong byed gnyis don gcig yin kyang rtog dor tha dad du snang bas na bya byed gcig tu thal ba'i skyon med pa'i phyir/ dper nas dang sra ba gnyis don gcig yin kyang rtog ngor tha snyad du snang ba'i rgyu mtshan gyis mtshan mtshon du 'jog pa la bya byed gcig tu thal ba'i skyon mi 'byung ba bzhin no/ /gsum pa ni/ de phyir rang rig yod pa ma yin na/ zhes pa nas/ de nyid kyis de 'dzin par rigs ma yin/ zhes tshigs bcad gcig byung/ gang gi phyir de @121b lta yin pa de'i phyir rang rig yod pa ma yin na/ sems tsam pa khyod kyi gzhan dbang shes pa gang gis 'dzin par 'gyur/ shing gcod pa'i byed pa po dang/ bcad pa'i las su bya ba shing dang/ shing gcod pa'i bya ba gsum gcig min pas shes pa de nyid kyis de 'dzin par rigs pa ma yin no/ /'di'i gnod pa 'bab tshul ni bden gnyis rang 'grel las bshad pa ltar rtog ngor gnyis su mi snang ba'i rgyu mtshan gyis yin gyi/ ngo bo gcig gam don gcig tsam gyis bya byed tha dad par 'jog mi rung ba min no/ /bzhi pa ni gal te skye ba med cing ma shes pa'i/ zhes pa nas/ gzhan la mo gsham bus gnod ci zhig bskyal/ zhes tshigs bcad gcig byung/ gal te rang bzhin gyis skye ba med cing tshad mas ma shes pa'i bdag nyid can gyi gzhan dbang rang gi ngo bos grub pa'i dngos po yod na/ rgyu mtshan gang gis na 'di yod par mi rigs pa gzhan te sems tsam pa khyod la mo gsham gyi bus gnod pa ci zhig bskyal nas de yod par mi 'dod de yod par 'dod dgos so/ /gnyis pa ni/ gang tshe gzhan dbang cung zad yod min na/ zhes pa nas/ 'jig rten grags pa'i rnam gzhag kun kyang brlag /ces tshigs bcad gcig byung/ gang yang dngos po btags par yod pa'i rgyur 'gyur zhing/ zhes smras pa de yang gzhan dbang rang bzhin gyis yod na rigs pa zhig na/ gang gi tshe gzhan dbang rang bzhin gyis grub pa cung zad kyang yod pa min na/ tha snyad kun rdzob pa'i 'khrul pa'i rgyu ste gzhi rdzas su grub par ni gang zhig 'gyur te cung zad kyang med do/ des ni gzhan dbang bden grub tu 'dod pas don dam las nyams par bstan no/ / @122a @#/ /de'i phyir gzhan sems tsam pa'i ltar na gzhan dbang gi rdzas shas tsam la bden par chags pa'i sgo nas/ gzhan dbang gi rdza bum so ma btang bar tshul min gyi dpyad pa chu dang 'dra ba blugs nas/ 'jig rten la grags pa'i rnam gzhag 'jig rten kho na las grub pa 'dug cig song zhig byos shig ces pa sogs dang/ de bzhin du phyi'i gzugs dang phyi'i dmigs pa las skyes pa'i tshor ba la sogs pa de dag kun kyang brlag ba ste 'jig par byed do/ /des ni phyi rol bkag pas kun rdzob kyi bden pa las nyams par bstan pa'o/ /gsum pa ni/ slob dpon klu sgrub zhabs kyi lam las ni/ zhes pa nas/ de ni rnam rtog log pas lam ngan zhugs/ zhes tshigs bcad gnyis byung/ slob dpon 'phags pa klu sgrub zhabs kyis srol phye ba'i lam las ni phyi rol tu gyur pa la zhi ba myang 'das 'thob pa'i thabs kyi gtso bo med do/ ci'i phyir zhe na/ de dag ni kun rdzob dang de nyid de don dam bden pa las nyams par 'gyur la/ bden gnyis de las nyams pas kyang de ma btang gi bar tu thar pa 'grub pa yod pa min no/ bden gnyis las nyams pas thar pa ci'i phyir mi 'grub ce na/ tha snyad bden pa'i rnam gzhag ma log pa ni don dam bden pa ji bzhin du rtogs pa'i thabs su gyur pa dang/ don dam bden pa ji bzhin rtogs pa ni sngar bshad pa'i thabs las byung bar gyur pa ste/ bden pa de gnyis kyi rnam dbye gang gis mi shes pa 'di ni phyin ci log gi rnam par rtog pas lam ngan par zhugs pa'o/ /de'i phyir klu sgrub kyis srol phye ba'i lugs kho na'i rjes su @122b 'brang bar bya'o/ /bzhi pa ni/ ji ltar khyod kyis gzhan dbang dngos 'dod ltar/ zhes pa nas/ phyi nas stobs ldan bdag gis brten par bya/ zhes tshigs bcad gsum byung/ sems tsam pa na re/ ngo bo nyid med par smra ba khyod kyis bdag dang gzhan las skye ba sogs 'gog pa'i rigs pas gzhan dbang rang bzhin gyis grub pa'i ngo bo sel bar byed na/ nged cag gi kyang rigs pa de kho nas khyod la grags pa'i kun rdzob sel bar byed do zhe na/ ji ltar sems tsam pa khyod kyis gzhan dbang dngos por te ngo bos grub par 'dod pa de ltar kun rdzob kyang ni rang bzhin gyis grub par bdag gis khas ma blangs so/ /'o na ci zhe na/ phung po la sogs pa 'di dag rang bzhin gyis med kyang/ 'jig rten kho na las grags par 'gyur bas yod do zhes 'jig rten gyi ngo kho nar byas nas bdag gis ni smra bar byed do/ /'dir 'jig rten kyi ngor 'jog pa la tshul gnyis te/ dbu ma pa rang gis kun rdzob tu 'jog pa ni 'jig rten gyi tha snyad pa'i tshad ma'i ngor khas len la/ skabs 'gar dgos pa'i dbang gis phung sogs rang bzhin gyis yod par 'jog pa ni gzhan ngo kho nar khas len gyi rang lugs la mi 'dod do/ /gzhan dor de ltar khas len pa ni gdul bya de dag grub mtha' ngan pa gzhan las ldog pa dang rim gyis de kho na nyid la drangs ba'i 'bras bu ste dgos pa'i phyir yin no/ /lhag mthong chen mor/ 'jig rten gyi ngor byas zhes pa ni rang lugs min pa'i gzhan ngo la zer ba ma yin gyi tha snyad pa'i shes pa gnod med rnams la byed pa yin te/ zhes gsungs kyang/ rnam bshad las sngar ltar tshul gnyis @123a @#/ /mdzad do/ /ji ste kun rdzob 'di ji ltar dgra bcom pa phung po spangs nas lhag med kyi zhi ba'i dbyings su zhugs pa rnams la kun rdzob thams cad yod pa min pa de ltar du/ gal te 'jig rten la yang kun rdzob 'di med na lhag med pa de bzhin du kun rdzob pa 'di 'jig rten gyi tha snyad kyi ngo la ltos nas kyang yod ces bdag mi smra'o/ /de'i phyir gzhan 'jig rten gyi tha snyad la rag las pa nyid kyi sgo nas bdag gis kun rdzob khas blangs kyi/ de la ma ltos par rang dbang du khas blangs pa ni min no/ /de'i phyir gang gis khas blangs pa de kho na la ltos nas sel bar nus na bsal bar 'os pa yin te/ gzhan dbu ma pa la ltos nas ni ma yin no zhes bshad pa/ kho bo cag ni kun rdzob 'khrul ba'i snang ba rang rgyud la bzlog pa'i phyir shin tu tshegs che bas lam sgom pa la gnas par 'gyur gyi/ gal te 'jig rten gyis mi gnod na khyod kyis 'jig rten nyid la ltos nas kun rdzob 'di ni dgag par gyis shig /khyod dang 'jig rten pa gnyis 'dir rtsod pa gyis shig dang/ brtsad pa'i phyi nas gang stobs dang ldan pa de la bdag gis brten par bya'o/ /de ltar na phyi rol med pa la tha snyad pa'i tshad mas gnod pas phyi rol med par sgrub mi nus so/ /'o na sems tsam pas rdul cha med bsags pa'i phyir don 'gog mi nus sam zhe na/ de dag tshad mas khegs kyang phyi don med mi dgos so/ /'dis ni shes pa dus kyi cha med dang de 'thud pa'i rgyun khegs kyang shes pa mi khegs pa yang shes par bya'o/ /gzhan gyi lugs kyis ni phyi rol cha med khegs pas snang ba la ma 'khrul ba'i dbang @123b shes khegs/ dbang shes 'khrul pas don 'jog mi nus pas phyi don khegs so snyam du bsams so/ /'dir ni dbang shes 'khrul bas gzhal bya bden pa 'jog mi nus kyang/ gzhal bya brdzun pa 'jog pa la de grogs su song ngo snyam du dgongs so/ /zhes rnam bshad las gsungs so/ /rang rig 'dod pa'i gzhan lugs brjod pa'i skabs kyi 'jug 'grel las/ rnam par shes pa ud pa la'i 'dab ma brgya 'bigs pa ltar/ rim gyis 'byung ba rnams cig char 'jug pa lta bur mngon pa yin no/ /zhes pa'i don 'grel bshad dang bod mang bos bshad pa ni mi 'thad par rnam bshad dang yig char gsal bar gsungs pas 'dir ma bkod la/ rnam bshad las/ des na rnam shes rigs mthun cig char du skye bar brtsad pa'i lan du/ de rnams 'jug pa myur bas rim gyis skye yang cig char du skye bar mngon zhes 'chad dgos pa 'dra ba zhig snang yang/ rang rig sgrub mkhan de gnyis gyis 'jug pa myur ba cig char du 'khrul ba'i rgyu yin pa yang rnam 'grel du bkag pas na/ gzhung de de gnyis kyi lugs su 'jog dka' bar snang ste/ phal cher rgya dpe ma dag pa'i skyon yin nam 'on kyang blo gros dang ldan pa rnams kyis dpyad par bya'o/ /zhes gsungs pa'i don la dogs pa gcod tshul cung zad 'god na/ gzhung 'di skabs 'di'i rang rig sgrub mkhan mdo sems gnyis kyi lugs su 'jog mi rung ste/ skabs 'di'i rang rig sgrub mkhan mdo sems gnyis kyis khra 'dzin mig shes kyis khra bo la lta ba'i tshe khra bo'i steng gi sngo ser dkar dmar gyi grangs dang mnyam pa'i mig gi rnam shes du ma mi skye bar khra bo tsam 'dzin pa'i rnam @124a @#/ /shes gcig bu skye bar 'dod pa gang zhig /der ma zad de gnyis kyis 'jug pa myur ba cig car du 'khrul ba'i rgyu yin pa yang rnam 'grel du bkag pa'i phyir/ dang po grub ste/ de gnyis kyis rnam shes gcig gis don du ma cig car 'dzin pa 'thad par 'dod pa'i phyir te/ rnam 'grel las/ til sogs tha dad la ji ltar/ /cig car 'dzin par snang ba yin/ /'di la mgyogs pa bshad zin to/ /zhes blo gcig gis don du ma 'dzin pa med na ti la sogs tha dad du ma'i phung po la ji ltar cig car 'dzin par snang ba yin/ 'di la 'jug pa mgyogs pas cig car 'dzin par 'khrul ba yin gyi/ cig car 'dzin pa ma yin no zhes pa'i skyon spong mi 'thad par sngar bshad 'dzin pa med na ti la sogs tha dad du ma'i phung po la ji gzugs/ /du ma'ang ji ltar snang bar 'gyur/ zhes dang/ sna tshogs snang can don rnams la/ zhes sogs rtsod tshul gyis kyang shes pa'i phyir ro/ /gnyis pa grub ste/ de nyid las/ rim bzhin 'bab pa de nyid la/ /ji ltar rim min 'dzin mi 'gyur/ /blo rnams dag ni thams cad kyang/ /dus mtshungs ci ltar de dag la/ /'ga' zhig rim min snang ba dang/ /gzhan ni rim ldan snang bar 'gyur/ /de phyir don kun 'dzin pa la/ /'di ni rim min thal bar 'gyur/ /zhes 'jug pa myur ba cig car du 'khrul ba'i rgyur 'dod pa bkag pa'i phyir ro/ /'di'i don zhib tu bshad na 'di ltar yin te/ kha cig na re/ khra bo la lta ba'i tshe khra bo'i steng gi sngo ser dkar dmar gyi grangs dang mnyam pa'i mig gi rnam shes du ma rim gyis skye yang 'jug pa myur @124b bas cig car skye bar snang ba yin no zer ba la/ 'o na til la sogs pa'i 'bru'i rgyun bar ma chad par 'byung khungs nas rim bzhin 'bab pa de nyid la yang 'bru'i grangs dang mnyam pa'i rnam shes du ma rim min te cig car skye bar snang bar ji ltar mi 'gyur te cig car skye bar snang bar thal/ rnam shes de dag thams cad dus myur bar mtshungs pa'i phyir te/ dus myur bar mtshungs pa la 'ga' zhig rim min te cig car du skye bar snang ba dang/ gzhan ni rim ldan du skye bar snang bar ji ltar 'gyur te mi 'gyur ro/ /de'i phyir 'bru'i phung po la lta ba'am/ 'bru'i rgyun bar ma chad par rim bzhin 'bab pa la lta ba gnyis ka'i tshe rnam shes du ma cig car skye bar snang bar thal bar 'gyur bas mi 'thad do zhes pa'o/ /gzhan yang rnam 'grel du 'jug pa myur ba cig car du 'khrul ba'i rgyu yin pa bkag par thal/ yi ge'ang cig car thos par 'gyur/ zhes pa'i skabs su/ sarHra saH zhes brjod pa'i tshe yang cig car thos bar 'khrul bar 'gyur bar thal/ thos pa ches myur ba'i phyir/ 'dod na/ dang bor sa dang de'i rjes sur thos pa'i rim pa las mtsho go zhing/ dang por ra dang de'i rjes sus thos pa'i rim pa las ro go ba'i khyad par med par thal/ sarHdang rasHzhes brjod pa gnyis ka la sa dang ra cig car thos par 'khrul bar 'gyur ba'i phyir te/ 'jug pa ches myur ba'i phyir zhes bkag pa'i phyir ro/ /des na 'jug 'grel du gzhung de skabs 'di'i rang rig 'dod mkhan gyi rang lugs lta bur bkod pa ni rgya dpe ma dag pa'i skyon yin no zhes pa ni rje bdag nyid chen po'i dgongs pa yin no/ /de la kha cig na re/ @125a @#/ /rnam 'grel las 'jug pa myur ba cig car du 'khrul ba'i rgyu yin pa bkag pa ma yin par thal/ der 'jug pa myur ba de cig car du 'khrul ba'i rgyur bshad pa'i phyir te/ de nyid las/ rtog bcas rtog pa med pa'i yid/ /cig car du ni 'jug phyir ram/ /'jug pa myur phyir blun po dag /de dag la ni gcig tu zhe na/ zhes dang/ mgal me la sogs myur 'jug pa'i/ /rjes su 'gro ba'i gnod pa can/ /mig las 'khor lor 'khrul skye yi/ /de mthong mtshams sbyor las ma yin; zhes gsungs pa'i phyir nam khyab ste/ lung dang pos 'jug pa myur ba de mthong rtog gcig tu 'khrul ba'i rgyur bshad kyi cig car du 'khrul ba'i rgyur ma bshad la/ gnyis pas ni mgal me snga phyi bar ma chad par 'byung bar 'khrul ba'i rgyur bshad kyi; mgal me snga phyi cig car du 'byung bar 'khrul ba'i rgyur ma bshad pa'i phyir ro/ /lung dang po'i don ni/ rigs pa can gyis dbang shes rtog par 'dod pa ni/ gzugs mthong ba'i dbang shes dang gzugs so snyam du 'dzin pa'i rtog pa gnyis gcig tu 'dzin pa yin la/ de ltar 'dzin pa'i 'khrul rgyu ni/ rgyud gcig gi rtog bcas dang rtog pa med pa'i yid cig car du yul gcig la 'jug pa'i phyir ram/ de gnyis rim gyis 'byung yang skad cig gzhan gyis bar mchod pas 'jug pa myur ba'i phyir gcig tu 'khrul lo zhes pa yin la/ yig char lung 'di 'jug pa myur ba cig car du 'khrul ba'i rgyu yin pa bkag pa'i shes byed du drangs pa ni yi ge nor ram dpyad par bya'o/ /lung gnyis pa'i don ni/ rigs pa can @125b gyi lugs la/ shes pa du ma cig car mi skye bas/ dbang shes kyis gzugs mthong bzhin pa'i skabs su 'das pa'i don la rnam par rtog pa'i tshe rtog pas bar du chad cing chad cing 'jug pa yin kyang/ dngos po 'dzin pa'i dbang shes kyi phyogs stobs dang ldan pas bar ma chad pa ltar snang zhing zhen pa yin te/ dper na mgal me snga phyi bar du chod kyang 'jug pa myur bas rtog bas bar ma chad du mtshams sbyor ba stobs dang ldan pas 'khor lo'i rnam par mthong ba bzhin no/ /zhes pa'i dpe 'gog pa ni; mgal me la sogs myur 'jug pa'i/ zhes sogs 'di yin la/ mgal me la sogs myur du 'jug pa'i rjes su 'gro ba'i gnod pa can gyi mig dbang bslad pa las 'khor lor 'khrul ba'i dbang shes skye ba yin gyi/ mgal me bskor ba de 'khor lor mthong ba rtog pas snga phyi mtshams sbyar ba'i dbang las ma yin no zhes pa'o/ /de dag ni rnam nges TIk chen dang thar lam gsal byed ltar bris pa yin la/ rnam 'grel TIk chen las/ 'o na yi ge'ang cig car thos par 'gyur; zhes sogs kyis 'jug pa myur bas gcig tu 'khrul ba 'gog pa ma yin nam zhe na/ de ni 'jug pa myur ba mngon sum gyis gcig tu mthong ba'i rgyur smra ba 'gog pa yin gyi/ gcig tu 'khrul ba'i rgyur smra ba 'gog pa ga la yin de gnyis ma phyed pas nongs pa yin no/ /zhes gsungs shing/ rim bzhin 'bab pa de nyid la/ zhes sogs kyi don yang de ltar bshad do/ /bshad tshul 'di ltar na 'jug TIk chen mo dang 'gal ba spong tshul dka' bar snang zhing/ kho bos @126a @#/ /sngar sgo blo'i yig cha'i 'gal 'dod du 'jug TIk chen mo dang rnam 'grel TIk chen gnyis mi 'gal bar bshad khul byas kyang/ 'dir bshad pa ltar khas blangs na legs sam snyam mo/ /gsum pa la gsum/ sa bcu pa las sems tsam du gsungs pa'i dgongs pa bshad pa/ phyi rol dang nang gi sems yod med mtshungs par bstan pa/ lang gshegs las sems tsam du gsungs pa'i dgongs pa bshad pa'o/ /dang po la gsum/ tsam gyi sgras phyi rol mi 'gog pa sa bcu pa'i lung gis bsgrub ba/ don de nyid mdo gzhan gyis kyang bsgrub pa/ tsam gyi sgras sems gtso bo nyid du bsgrub pa'o/ /dang po ni/ mngon gyur mngon phyogs byang chub sems dpa' yis/ /zhes pa nas/ byed pa po ni sems tsam yin par rtogs/ zhes tshigs bcad gcig byung/ gal te de kho na nyid la dpyod pa'i rigs pas grub ba dang bral yang/ 'jig rten pa'i gnod pas 'jigs nas khyod kyis kun rdzob khas blangs na ni/ lung gi gnod pas 'jigs pas sems tsam du yang khas blang dgos te/ sa bcu pa las/ de 'di snyam du sems te/ 'di ltar khams gsum po 'di ni sems tsam ste/ zhes gsungs pa lta bu'o zhe na/ mdo'i dgongs pa 'di ni de ltar ma yin te/ sa drug pa mngon du gyur pa chos dbyings la mngon du phyogs pa'i byang chub thams cad mkhyen pa'i ye shes la sems pa de la yod pas byang chub sems dpa' yis/ srid pa gsum rnam shes tsam du rtogs par gsungs pa gang yin pa des ni/ bdag rtag pa byed pa po yin pa bkag nas @126b kun rdzob tu sems tsam zhig kho na byed pa po yin par rtogs pa'i phyir/ 'jig rten gyi byed pa bo ni byang sems des sems tsam zhig yin par rtogs te/ sa bcu pa'i mdo des byed pa po dang tshor ba po med pa'i 'ba' zhig pa 'grub ba dang/ sems tsam gyi don bshad pa na yan lag bcu gnyis sems gcig la brten par gsungs pas/ tsam gyi sgras phyi don mi 'gog pa dang sems las gzhan pa'i byed ba bo 'gog pa yin no/ /'di ltar sngon du legs ldan gyis kyang bshad do/ /gnyis pa ni/ de phyir blo ldan blo ni 'phel bya'i phyir/ zhes pa nas/ rgyal bas sems tsam 'jig rten byed por gsungs/ zhes tshigs bcad gnyis byung/ sa bcu pa'i don de ltar yin pa de'i phyir/ de kho na nyid rtogs nus pa'i blo ldan gyi blo ni 'phel bar bya ba'i phyir/ lang kar gshegs pa'i mdo de las kun mkhyen gyis mu stegs pa'i rgyud kyi bdag dang gtso bo sogs 'jig rten gyi byed pa por 'dod pa'i lta ba ngan pa'i ri bos po mthon po 'joms pa'i dag gi rang bzhin gyi rdo rje/ gang zag rgyun dang phung po dang/ /de bzhin rkyen dang rdul dag dang/ /gtso bo dbang phyug byed po rnams/ /sems tsam du ni ngas bshad do/ /zhes 'byung ba 'di ni mdo gzhan du sems tsam zhes gsungs pa'i dgongs pa gcad pa'i phyir du ston pas gsungs so/ /mdo 'di'i don dgrol ba'i phyir bshad pa ji bzhin te ji ltar rang rang gi bstan bcos de dang de las mu stegs rnams kyis gang zag dang sogs pas rgyun dang phung bo sogs byed pa por smras ba de dag byed pa por ma gzigs nas/ rgyal bas sems tsam zhig 'jig rten gyi byed pa por gsungs so/ /gang @127a @#/ /zag dang rgyun la sogs pa byed pa por 'dod pa'i chos 'di pa yod kyang/ rtsa bar mu stegs rnams kyis zhes pa ni phal che ba la bsams pa'am/ yang na gang zag sogs byed pa por smra ba ni sangs rgyas kyi bstan pa'i don phyin ci ma log par ma rtogs pas mu stegs par bshad do/ /gsum pa ni/ de nyid rgyas la sangs rgyas bsnyad ji bzhin/ /zhes pa nas/ bzlog gi gzugs ni bkag pa ma yin no/ /zhes tshigs bcad bzhi byung/ sems las gzhan pa'i byed pa po bkag gi phyi don 'gog mi nus par bshad nas/ sems gtso bor gyur par bshad pa las kyang phyi don 'gog pa mi srid par bstan pa'i phyir bshad pa/ ji ltar de kho na nyid la blo rgyas pa la sangs rgyas zhes bshad pa na/ tshig snga ma sangs zhes pa mi mngon kyang sangs rgyas zhes bsnyad pa yod pa ji lta ba de bzhin du/ gzugs sems gnyis kyi nang nas sems gtso bor gyur pa la tshig phyi ma mi mngon par byas nas/ mdo las 'jig rten la ste khams gsum ni sems tsam mo zhes gsungs par shes par bya'o/ /de'i phyir mdo 'dir ni khams gsum 'grub pa la gzugs sogs gtso bo yin pa sel bar byed kyi/ phyi rol gyi gzugs ni med do zhes 'gog pa de ltar 'chad pa ni mdo'i don ma yin no/ /gal te khams gsum po 'di dag rang bzhin gyis grub pa'i sems tsam mo zhes mkhyen nas/ sa bcu pa de las phyi rol gyi gzugs nyid dgag par mdzad na ni/ slar yang sa bcu pa de las bdag nyid chen po sangs rgyas kyis/ ma rig pa'i rkyen gyis 'du byed/ 'du byed kyi rkyen gyis rnam shes zhes sems de gti @127b mug dang 'du byed kyi las las skyes par ci'i phyir gsungs te mi rigs so/ /rten 'byung dang rang bzhin gyis grub pa'i gzhi mthun mi bzhed pas na/ sangs rgyas kyis sems rang bzhin gyis grub bar mkhyen pa yin na de rten 'byung du gsungs par mi 'gyur zhes pa yin gyi/ mdo gcig gi nang du sems rang bzhin gyis grub pa dang rten 'byung ba gnyis kar gsungs pa mi srid ces pa min te/ gdul bya gzhan dkri ba'i phyir 'khor lo dang po dang tha ma gnyis kar de ltar gsungs pa'i phyir ro/ /sems gtso bo yin pa de nyid bstan pa'i phyir bshad pa/ rang gi sems kyi bsags pa'i las kyi sems can gyi 'jig rten dang sngo kyi 'jig rten shin tu sna tshogs pa 'god pa ste skyed de/ de ltar na 'gro ba ma lus pa las las skyes par gsungs shing/ sems spangs nas ni las kyang yod pa ma yin te sems dang bcas pa kho nas las sogs pa'i phyir las kyang sems la brten pa'o/ /de ltar na bcu bar byed pa po dang tshor ba bo med pa zhes gsungs pa la brten nas/ tsam gyi sgras byed pa po gzhan 'gog par bstan la/ yan lag bcu gnyis po thams cad sems gcig la brten par gsungs ba la brten nas/ tsam gyi sgras sems gtso bor gyur bar bstan te/ bshad pa snga ma dgag phyogs dang phyi ma sgrub phyogs nas yin no/ /gal te gzugs yod par 'dod mod kyi ste 'dod mod kyang gzugs de la ni sems bzhin du i'gro ba'i byed pa po nyid ni yod pa ma yin no/ /des na sems las gzhan pa'i byed pa po bzlog pa ste bkag gi/ phyi rol gyi gzugs ni bkag pa ma yin no/ /gnyis pa ni/ 'jig@128a @#/ /rten pa yi de nyid la gnas la/ zhes pa nas/ de nyid ma skyes 'jig rten skyes rig bya/ zhes tshigs bcad gsum byung/ 'jig rten pa yi de nyid de rnam gzhag la gnas pa la phyi rol gyi gzugs kyi phung po la sogs pa rnams 'jig rten la grags te phung po lnga char yod la/ de kho na nyid mngon sum du rtogs pa'i ye shes 'char bar 'dod pa na rnal 'byor pa mnyam par gzhag pa la de'i ngor phung po de lnga 'byung bar mi 'gyur ro/ /de'i phyir phyi rol gyi gzugs med par 'dod na ni sems yod par ma 'dzin cig /nang gi sems yod par 'dod pa nyid yin na'ang phyi rol gyi gzugs med par ma 'dzin cig /gzugs la sogs pa'i phung po lnga po de dag ni shes rab kyi pha rol tu phyin pa'i tshul gyi mdor sangs rgyas kyis lnga char yang mtshungs par rang bzhin gyis grub pa spangs shing ste bkag cing/ chos mngon pa las ni lngar char yang rang dang spyi'i mtshan nyid la sogs pa'i sgo nas mtshungs par gsungs so/ /de'i phyir pha rol pos don sems yod med mtshungs par lung rigs kyis grub pa'i bden gnyis kyi rim pa 'di dag bshig par 'gyur ro/ /de ltar bshig nas kyang sems tsam pa khyod kyis gzhan dbang rdzas su grub pa ni 'grub par mi 'gyur te/ sngar gzhan dbang rdzas su grub pa lan du mar bkag pa'i phyir ro/ /bden gnyis rim pa mi 'jig pa la don dam par med cing tha snyad du yod par 'dod dgos pa de'i phyir/ sngar bshad pa de lta bu'i rim pas dngos po rnams gdod ma nas de kho na nyid du ma skyes shing/ 'jig rten gyi tha @128b snyad du skyes par rig par bya'o/ /gsum pa la gnyis/ phyi rol med pa'i sems tsam du gsungs pa drang don du bstan pa/ mdo'i drang nges kyi don rtogs pa'i thabs bstan pa'o/ /dang po la gnyis/ drang don du lung gis bstan pa/ rigs pas bstan pa'o/ /dang po la gnyis/ dngos kyi don dang/ de 'dra ba'i mdog gzhan yang drang don du bstan pa'o/ /dang po ni/ mdo sde gang las phyi rol snang yod min/ zhes pa nas/ 'di ni drang don nyid du rigs pas 'thad/ ces tshigs bcad phyed dang gnyis byung/ gal te sa bcu pa'i don de ltar bshad mod kyang/ lang gshegs las/ phyi rol snang ba yod min te/ /sems ni sna tshogs rnams su snang/ /lus dang longs spyod gnas 'dra ba/ /sems tsam du ni ngas bshad do/ zhes sems las logs shig na phyi rol yod pa ma yin te/ sems tsam zhig kho na lus mig sogs dbang po lnga dang/ longs spyod gzugs sogs yul lnga dang/ gnas snod kyi 'jig rten rnams su snang ba skye ba na yul gyi dngos por gnas pa lus la sogs pa sems las rdzas tha dad pa'i phyi rol lta bur snang ba 'byung bar gsungs pa'i phyir/ khams gsum ni sems tsam mo zhe na/ mdo 'di yang dgongs pa can du brjod pa'i phyir bshad pa/ mdo sde gang las phyi rol snang yod min/ /sems ni sna tshogs snang ngo zhes gsungs pa/ de'i dgongs pa ni 'di yin te/ gang dag gzugs la shin tu chags pa'i rkyen can gyi rjes su chags pa dang/ khong khro ba dang nga rgyal la sogs pa rnams kyis 'jug pa rang dbang med par byas par 'gyur zhing/ de la mngon par zhen pas @129a @#/ /de dag sdig pa chen po dang sbyor la/ tshogs gnyis bsags pa las nyams par 'gyur ba de dag la/ bcom ldan 'das kyis gzugs kyi rkyen can gyi nyon mongs pa bzlog pa'i phyir/ chags can la phyi rol gyi yul la chags pa 'joms pa'i keng rus ltar/ phyi rol yod kyang med par bstan pa yin par shes par bya'o/ /de ltar gang las shes she na/ mdo 'di ni ston pas drang don nyid du gsungs pas lung las drang don du 'grub la/ 'di ni drang don nyid du rigs pas kyang 'thad pa ste 'grub bo/ /zla ba'i zhabs kyis mdo 'di'i tsam sgras phyi rol mi 'gog ces mi 'chad kyi/ phyi rol 'gog kyang drang don no zhes 'grel lo/ /slob dpon legs ldan gyis mdo des kyang sems lus longs spyod dang 'dra ba ste de'i rnam pa grib ma lta bus kha bsgyur bar skye ba la 'chad cing/ phyi rol yod min zhes pas kyang blos rnam med du mthong ba 'gog pas na/ tsam sgras phyi rol 'gog pa min par bzhed do/ /legs bshad snying por rkang ba dang pos phyi rol bden med du bstan pa dang/ sems tsam gyi don ni sa bcu pa ltar byed pa po gzhan 'gog pa la gsungs te 'di dang cung mi 'dra'o/ /gnyis pa ni/ rnam pa de lta'i mdo sde gzhan yang ni/ drang don nyid du lung 'dis gsal bar byed/ ces gsungs/ phyi rol snang ba yod min te/ zhes sogs drang don yin par ma zad/ sngar bshad pa rnam pa de lta bu'i mdo sde sems tsam pas nges don du khas blangs pa gzhan rnams kyang drang don nyid du 'chad 'gyur gyi lung 'dis gsal bar byed do/ /drang don du 'grel rgyu'i @129b mdo sde de dag gang zhe na/ dgongs 'grel las ngo bo nyid dang po gnyis la rang mtshan gyis yod med kyi khyad par phye ba dang/ mdo der tshogs drug las ngo bo tha dad pa'i kun gzhi rnam shes yod par bstan pa dang/ mdo der phyi rol bkag pa dang/ mthar thug theg pa gsum du bshad pa ste/ skabs 'dir drang don du 'grel dgos pa'i mdo bzhi'o/ /rnam bshad las/ lugs 'dis sngar bshad pa'i don tshan bzhi ka drang don du 'grel gyi/ de dag gi gseb nas kha cig drang don dang kha cig nges don du 'grel pa ltar ni mi mdzad do/ zhes legs ldan dang zhi 'tsho yab sras kyis 'grel pa ltar min par gsungs so/ /de dag gis mthar thug theg pa gsum du bshad pa ni mdo kun btus las theg pa gcig tu bsgrub pa las go nus par dgongs nas 'jug 'grel du ma bshad la/ lhag ma gsum las phyi rol bkag pa drang don du ston pa'i lung nil lang gshegs las/ ji ltar nad pa na ba la/ snam pas sman rnams gtong ba ltar/ /sangs rgyas de bzhin sems can la/ /sems tsam du yang rab tu gsungs/ zhes pa 'di yin la/ kun gzhi rnam shes gsungs pa drang don du ston pa'i lung ni/ mdo gzhan du rtag brtan gyi snying po gsungs pa drang don du 'grel pa'i lung gshegs kyi lung de yin te/ mangs su dogs nas ma drangs pas legs bshad snying por blta bar bya'o/ /ngo bo nyid dang po gnyis la bden par yod med kyi khyad par phye ba drang don du ston pa'i lung ni/ lang gshegs las/ blo gros chen po stong pa nyid dang mi skye ba dang mi gnyis pa dang rang bzhin med pa'i mtshan nyid sangs @130a @#/ /rgyas thams cad kyi mdo sde'i nang du chud pa 'di/ zhes pa de yin no/ /dgongs 'grel gyi lung gsum po de sgra ji bzhin pa min par lang gshegs kyi lung gsum gyis rim bzhin sgrub tshul ni/ re zhig phyi rol bkag pa de sgra ji bzhin pa ma yin te/ nad pa so so la sman ster ba ni sman pa'i rang dbang gis ma yin gyi/ nad pa'i nad kyi tshul dang bstun dgos pa bzhin du/ sems tsam du gsungs pa yang ston pa'i rang lugs kyi dbang gis min gyi/ gdul bya'i bsam pa'i dbang gis yin par lang gshegs las gsungs pa'i phyir ro/ /kun gzhi rnam shes yod par gsungs pa sgra ji bzhin pa ma yin te/ mdo gzhan las rtag brtan gyi bde gshegs snying po yod par gsungs pa de dgongs gzhi dgos pa dngos la gnod byed gsum gyi sgo nas sgra ji bzhin pa ma yin par lang gshegs las gsungs pa'i phyir/ khyab ste/ snying po yod par gsungs pa drang don du bstan pa nyid kyis kun gzhi yod par gsungs pa yang drang don du 'grub pa'i phyir te/ de 'dra ba'i snying po dang kun gzhi gnyis don gcig yin par lang gshegs dang rgyan stug po bkod pa gnyis kar gsungs pa gang zhig /de gnyis don gcig par bshad pa'i don ni/ mdo de gnyis kyi sgras zin gyi don gnyis gcig tu bstan pa min gyi/ gang la dgongs nas snying po dang kun gzhi gsungs pa'i dgongs gzhi'i don gnyis gcig tu bstan pa yin pa'i phyir/ khyab ste/ de ltar na mdo gnyis dgongs gzhi gcig la dgongs nas sgras zin gyi brjod bya mi mthun pa gnyis bstan pa yin pas/ gcig drang @130b don du ston pa'i lung gis gcig shos kyang drang don du 'grub pa'i phyir ro/ /mdo de gnyis kyi dgongs gzhi don gcig yin te/ gnyis ka rang bzhin gyis med pa'i stong nyid la dgongs nas de ltar gsungs pa'i phyir te/ snying po bstan pa ni stong nyid mtshan med smon med la dgongs par lang gshegs las gsungs shing/ kun gzhi bstan pa yang de la dgongs par 'jug 'grel las/ dngos po thams cad kyi rang bzhin gyi rjes su zhugs pa'i phyir stong pa nyid kho na kun gzhi rnam par shes pa'i sgras bstan par rig par bya'o/ /zhes gsungs pa'i phyir dang/ 'jug 'grel gyi lung 'di dang rtag brtan sogs kyi snying po drang don du bstan pa gnyis legs par bsgrigs nas lung des kun gzhi drang don du bstan pa rtogs dgos par rnam bshad las gsungs pa'i phyir ro/ /mtshan nyid gsum la bden par yod med phye ba yang sgra ji bzhin pa ma yin te/ rang bzhin med pa mdo sde thams cad kyi nang du chud par lang gshegs las gsungs pa'i phyir ro/ /de'i don ni mdo sde gang yin kyang rang bzhin med par gsungs pa'am/ rang bzhin med pa rtogs pa'i thabs su gsungs pa gang rung yin dgos pa'i don yin nam dpyad par bya'o/ /rnam bshad las/ rtsa bar/ drang don nyid du lung 'dis gsal bar byed ces pa'i lung la gsum las/ zhes sogs sngar ltar bshad pa ltar gsungs la/ legs bshad snying por/ lung 'dis zhes pa la gnyis gsungs pa'i gcig ni skabs 'dir lang gshegs las snying po drang don dang/ rang bzhin med pa mdo sde thams cad kyi nang du chud par bstan pa drangs pa'o/ zhes lung tha ma gnyis @131a @#/ /las ma gsungs pa ni cung mi 'dra bar snang yang/ 'jug 'grel las skabs 'dir lung gsum ga drangs pas rnam bshad ltar 'dod dgos la/ legs bshad snying po'i dgongs pa ni/ ji ltar nad pa na ba la/ zhes pa ni/ lang gshegs las/ phyi rol snang ba yod min te/ zhes sogs drang don yin pa'i shes byed dang/ 'di ni ston pas drang don nyid gsungs shing/ zhes pa'i dngos bstan gyi lung yin pas/ skabs 'di'i dngos 'grel las 'byung ba'i mdo tshan bzhi drang don du 'grel byed kyi lung du ma bgrang ba tsam yin kyang/ 'jug 'grel du lung 'di gong du ma drangs bar skabs 'dir drangs pa ni/ lang gshegs las phyi rol med par gsungs pa dang/ dgongs 'grel las phyi rol med par gsungs pa gnyis ka phyogs gcig tu lung 'dis drang don du sgrub pa'i ched yin pas mi 'gal lo/ /de dag la kha cig na re/ dgongs 'grel las/ theg pa gsum du bstan pa de skabs 'dir drang don du 'grel bar thal/ de nyid skabs 'dir drang don du 'grel dgos pa'i mdo yin pa'i phyir na ma khyab/ rtag grub ste/ skabs 'dir drang don du 'grel dgos pa'i mdo tshan bzhi po gang rung yin pa'i phyir/ 'dod mi nus te/ skabs 'dir drang don du 'grel dgos pa'i mdo yin kyang/ mdo kun btus su theg pa gcig tu gsungs pa dang/ gang phyir 'di ni de nyid shes las dri ma mtha' dag sel ba ni/ zhes pa nas/ sbyar bar mdzad cing rnam par dben la blo sbyangs rnams la logs su gsungs/ zhes pa'i skabs su theg pa gsum bstan pa dgongs pa @131b can du bshad pa las mngon par go bar nus pas na skabs 'dir ma bshad pa'i phyir ro/ /yang kha cig na re/ skabs 'dir drang don du 'grel dgos pa'i mdo bzhir bshad pa mi 'thad par thal/ stong thun las skabs 'dir drang don du sgrub dgos pa'i mdo lnga dang/ drang don du sgrub byed kyi lung bzhir bshad pa'i phyir na ma khyab/ 'dod mi nus te/ rnam bshad dang legs bshad snying po gnyis kar skabs 'dir drang don du 'grel dgos pa'i mdo bzhir gsungs kyi/ bzhi las lhag ma gsungs pa'i phyir te/ rnam bshad las/ rnam pa de lta bu'i mdo sde de yang gang yin zhe na/ zhes pa nas/ 'dir drang don du 'grel dgos pa bzhi yod do/ zhes gsungs pa'i phyir dang/ legs bshad snying po las kyang de ltar gsungs pa'i phyir ro/ /'o na stong thun las sngar bshad pa'i mdo bzhi'i steng du snying po bstan pa'i mdo bstan te lngar bshad pa'i dgongs pa gang yin zhe na/ snying po bstan pa'i mdo de skabs 'dir drang don du sgrub rgyu'i mdo dang sgrub byed kyi lung gang yang ma yin kyang/ 'jug 'grel du snying po bstan pa'i mdo drang don du 'grel pa'i lang gshegs kyi lung de kun gzhi drang don yin pa'i shes byed du drang pa tsam la dgongs sam snyam mo/ /lung 'dis gsal bar byed/ ces pa'i lung yang gsum las lhag med kyang/ stong thun du bzhir bshad pa ni theg pa gsum drang don du ston pa'i lung mdo kun btus su drangs pa la dgongs so/ /byas pa la kho na re/ khyod kyi bshad tshul 'di mi 'thad par thal/ skabs 'dir drang don du 'grel rgyu'i mdo lnga yod par dbu ma'i yig cha dang grub mtha' rtsa ba @132a @#/ /dang 'grel pa gnyis kar bshad pa'i phyir na yang ma khyab ste/ de dag thams cad stong thun gyi sgras zin ltar bkod pa tsam yin pa'i phyir ro/ /gzhan yang/ snying po bstan pa'i mdo de skabs 'dir drang don du 'grel rgyu'i mdo ma yin te/ mdo de sems tsam pas nges don du khas ma blangs pa'i phyir/ khyab ste/ skabs 'dir drang don du 'grel rgyu'i mdo yin na sems tsam pas nges don du khas blangs bas khyab pa'i phyir te/ rnam bshad las/ rnam pa de lta bu'i mdo sde ni drangs ma thag pa'i lang gshegs kyi lung tshan pa gnyis min te/ de gnyis ka rnam rig pas nges don du khas ma blangs pa'i phyir dang/ sngar 'grel bar dgongs 'grel la gsal bor bshad pa'i phyir ro/ zhes dang/ legs bshad snying po las/ rnam pa de lta bu'i mdo ni sngar dgongs 'grel la bshad pa ltar yin gyi/ snying po drang don du ston pa'i mdo la rnam rig pas des don du 'dod par ston pa min te/ de la ni gnyis ka la rtsod pa med do/ zhes gsungs pa'i phyir ro/ /de la kha cig na re/ snying bo drang don du ston pa'i lang gshegs kyi lung de sems tsam pas sgras ji bzhin par mi 'dod par thal/ rnam bshad dang legs bshad snying po'i lung drangs ma thag pa de'i phyir/ 'dod mi nus te/ des snying po drang don du ston pa'i lang gshegs kyi lung de sgra ji bzhin par 'dod pa'i phyir te/ des snying po ston pa'i mdo sgra ji bzhin pa ma yin par 'dod pa'i phyir na ma khyab snyam ste/ sems tsam pas snying po ston pa'i mdo dang de drang don du ston pa'i lang gshegs kyi lung gnyis ka sgra ji bzhin pa ma yin par @132b 'dod pa'i phyir te/ des snying po ston pa'i mdo sgra ji bzhin pa ma yin par 'dod pa gang zhig /mdo de drang don du ston pa'i lang gshegs kyi lang yang sgra ji bzhin pa ma yin par 'dod pa'i phyir/ dang po sla/ gnyis pa grub ste/ lung des mdo gzhan du chos kyi bdag med la dgongs nas rtag brtan gyi snying po ston par gsungs pa gang zhig /sems tsam pas de ltar mi 'dod pa'i phyir te/ sems tsam pas kun gzhi rnam shes la sgongs nas snying po ston par 'dod dgos pa'i phyir te/ rgyan stug po bkod pa las/ /sa rnams sna tshogs kun gzhi ste/ /bde gshegs snying po dge ba'ang te/ zhes sogs dang/ lang gshegs las/ de bzhin gshegs pa'i snying po kun gzhi rnam par shes par bsgrags pa rnam par shes pa bdun dang bcas pa/ zhes pa'i don sems tsam pas 'chad tshul yod pa'i phyir ro/ /byas pa la kho na re/ 'o na snying po drang don du ston pa'i mdo de thal 'gyur ba dang sems tsam pa gnyis kas sgra ji bzhin pa ma yin par 'dod par thal/ legs bshad snying po las/ de la ni gnyis ka la rtsod pa med do/ zhes gsungs pa'i phyir na ma khyab ste/ snying po drang don du ston pa'i mdo de sems tsam pas nges don dang thal 'gyur bas skabs 'dir drang don du 'grel rgyu'i mdor bzhed pa'i dbang gis rtsod pa med pa'i don yin pa'i phyir te/ mdo de sems tsam pas sgra ji bzhin ma yin pa dang/ thal 'gyur bas sgra ji bzhin par bzhed pa'i phyir ro/ /de la kha cig na re/ khyod kyi bshad tshul de dag mi 'thad par thal/ gong du drangs ba'i rnam bshad kyi lung don ni/ rang bzhin med pa mdo sde @133a @#/ /thams cad kyi nang du chud par bstan pa dang/ snying po bstan pa gnyis ka rnam rig pas nges don du khas ma blangs pa'i don yin la/ legs bshad snying po'i lung don ni/ lang gshegs kyi lung gis drang don du 'grel rgyu'i mdo de sems tsam pas nges don du mi 'dod pa la dgongs pa yin zhing/ mdo de dbu sems gnyis kas sgra ji bzhin pa min par bzhed pas gnyis ka la rtsod pa med par gsungs pa'i phyir zer na/ bshad tshul 'di ni rje'i gsungs dang mi mthun pa'i dkyogs bshad lta bur snang ste/ snying po bstan pa de lang gshegs kyi lung ma yin pa'i phyir dang/ snying po drang don du ston pa'i mdo zhes gsungs pa'i don snying po ston pa'i mdo la byed pa'i phyir ro/ /'on kyang de'i skor la rje bdag nyid chen po'i nang gi thugs sras gcig bu mkhas grub thams cad mkhyen pa dang/ bka' dang bstan bcos 'gyur ro cog gi tshig don mtha' dag thugs su chud pa'i kun mkhyen 'jam dbyangs bzhad pa'i rdo rje gnyis kyis kyang rje'i gsung dang mthun par ma bshad pa lta bur snang bas/ zhib tu dpyad par bya ba'i gnas yin pas blo ldan rnams la rnam par dpyod pa'i sgo tsam zhig bstan pa yin no/ /gnyis pa ni/ shes bya med na shes pa bsal ba ni/ zhes pa nas/ dang por shes bya dgag pa mdzad pa yin/ /zhes tshigs bcad gcig byung/ zab mo'i don rdzogs pa thog ma nas rtogs mi nus pa'i gdul bya rnams sangs rgyas rnams kyis rim gyis rang bzhin med pa rtogs pa la 'dzud par mdzad do/ /de 'dra ba la sngon du shes bya phyi rol med pa bstan na shes pa rang bzhin gyis grub pa bsal ba ni bde blag @133b tu rnyed ces sangs rgyas rnams kyis gsungs so/ shes bya med na ste phyi rol gyi bdag med par rig pa rnams shes pa bkag pa ste de'i bdag med pa bde blag tu 'grub bas na/ sangs rgyas rnams kyis dang por shes bya phyi rol dgag par mdzad pa kho na gsungs pa yin no/ /gnyis pa ni/ de ltar lung gi lo rgyus shes byas te/ zhes pa nas/ stong nyid don can des don shes par gyis/ zhes tshigs bcad gcig byung/ mdo'i drang nges kyi don rtogs pa'i thabs bshad pa/ sngar bshad pa de ltar lung gi drang nges kyi lo rgyus te rnam gzhag shes par byas te/ mdo sde gang dag de kho na nyid kyi don ma yin pa bshad pa'i don can te brjod bya can/ skye ba med pa la sogs pas khyad par du byas pa'i rten 'byung dngos su gsal bar mi byed pa'i drang don gsungs pa'ang drang don du rtogs par byas nas/ drang bar bya zhing ste rang bzhin med pa rtogs pa la 'jug pa'i rgyur 'gyur bar bshad par bya zhing/ mdo gang las gang zag dang chos rang bzhin gyis stong pa nyid kyi don can te dngos su brjod par byed pa can de nges pa'i don du shes par gyis shig /ces pa'o/ /gsum pa ni/ gnyis las skye ba'ang rigs pa'i ngo bo ma yin gang gi phyir/ zhes pa nas/ gang phyir re re las ni skye ba 'grub pa yod ma yin/ zhes tshigs bcad gcig byung/ gcer bu ba rnams na re/ rdzu bum ni 'ji ba'i bdag nyid du yod pa kho na skye ba'i phyir bdag las skye la/ rdza mkhan gyi bya ba la sogs pa las skye ba'i phyir gzhan las kyang skye'o/ /de bzhin du byas pa tshe rabs snga mar srog gi bdag nyid du yod pa kho na las skye ba'i @134a @#/ /phyir bdag las skye la/ rang gi pha ma sogs las skye ba'i phyir gzhan las kyang skye'o/ /de'i phyir bdag gzhan re re kho na las skye bar khas mi len pas gong du bshad pa'i rigs pas kho bo cag la mi gnod do zhe na/ re re ba las skye ba mi rigs bar ma zad rang gzhan gnyis ka tshogs pa las skye ba'ang rigs pa'i ngo bo ma yin te/ gang gi phyir sngar bshad zin pa'i nyes pa de dag gnyis char las skye ba'i phyogs la yang thog tu 'bab pa nyid yin pa'i phyir ro/ bdag gzhan gnyis ka las skye ba 'di ni 'jig rten las kyang yod pa min la/ de nyid don dam du yang 'dod pa min te/ gang gi phyir bdag gzhan re re las ni skye ba 'grub pa yod pa ma yin pa de'i phyir ro/ /bzhi pa ni/ gal te rgyu med kho nar skye bar lta zhig 'gyur na ni/ zhes pa nas/ ma bshad 'byung ba 'di dag lta zhig yod pa ma yin no/ zhes tshigs bcad lnga byung/ 'dir rgyang ba na pa na re/ gal te skye ba rgyu las yin na skyon de dag tu 'gyur gyi/ bdag gis rgyu las skye bar khas ma blangs pas sngar bshad pa'i nyes pa med de/ 'di ltar bad ma'i chu ba dang 'dab ma rnams kyi rtsub pa dang 'jam pa dang/ 'dab ma dang ze'u 'bru dang lte ba rnams kyi kha dog dang dbyibs sna tshogs pa dag 'ga' zhig gis byed par ma mthong la/ de bzhin du nang la yang rma bya dang bya tI ti ri la sogs pa dag 'ga' zhig gis bzung nas kha dog dang dbyibs la sogs pa 'god par ma dmigs so/ /de'i phyir dngos po rnams kyi skye ba ni ngo bo nyid las byung pa kho na'o zhes smra'o/ /'di la bshad par bya ste/ gal te @134b dngos po rnams rgyu med pa kho nar skye bar lta zhig 'gyur na ni/ de'i tshe dngos po mtha' dag rtag tu skye ba dang rang gi rgyu min pa thams cad las kyang skye bar 'gyur te/ dus tshigs la mi ltos pa'i phyir dang/ thams cad kyang rgyu min par 'dra ba'i phyir ro/ /de bzhin du bya rog la yang rma bya'i mdongs yod pa dang/ rma bya la yang mngal gyi gnas skabs na'ang ne tso'i sgro yod par 'gyur te/ de dag rgyu la mi ltos pa'i phyir ro/ /de ltar rigs pa dang 'gal ba brjod nas mthong ba dang 'gal ba brjod pa/ ston thog la sogs pa'i 'bras bu 'byung ba'i ched du 'jig rten pa 'di yis sa bon la sogs pa dka' ba brgya phrag dag gi sgo nas sdud pa ste sog par byed par yang mi 'gyur ba zhig na byed pa yang yin pa'i phyir skye ba ngo bo nyid las byung ba ma yin no/ /skyon gzhan yang gal te 'gro ba rgyu yis stong pa ste rgyu med par 'byung bar 'gyur na 'gro ba 'di dag nam mkha'i ud pa la'i dri dang mdog ji bzhin du bzung du med pa nyid du 'gyur ba yin na shin tu ches bkra ba'i 'jig rten 'dzin pa'ang yin pa de'i phyir/ rang gi blo sngon po'i rnam pa can ni sngon po las skye ba de bzhin du 'jig rten mtha' dag rang gi rgyu kho na las skye ba yin par shes par gyis shig /rgyang pan pa khyod kyis gang zhig yongs su smin pa'i khyad par las phyi nang gi dngos po rnams skye bar 'dod pa'i sa la sogs pa'i 'byung ba bzhi po de dag khyod kyi gzhung las bshad pa'i bdag nyid gang zhig gis ni khyod kyi blo'i yul du 'gyur ba de ltar de'i bdag nyid can du ni yod pa ma yin na/ shin tu rags pa'i don gang la yid kyi mun pa 'thug po 'di nyid du yod pa des ni/ ji ltar na shin tu phra @135a @#/ /ba'i 'jig rten pha rol yod pa dang med pa gang yang dag par rtogs par 'gyur te rtogs pa med do/ /skyon gzhan yang 'jig rten pha rol 'gog par byed pa'i dus su bdag nyid de rgyang pa na ni shes bya'i rang bzhin phyin ci log tu lta bar rtogs par bya ste/ 'jig rten pha rol la skur ba 'debs pa de'i lta ba'i rnam pa'i rten te de gnas pa'i rgyur mtshungs pa ste 'dra ba'i lus kyi khog pa dang ldan pa nyid yin pa'i phyir/ dper na gang gi tshe 'byung ba'i bdag nyid bden par yod pa nyid khas len pa de'i tshe bzhin no/ /'byung ba rang bzhin gyis ma skyes pa de nyid bsgrub par bya dgos so zhe na/ 'byung ba de dag ji ltar rang bzhin gyis yod pa min pa de ltar sngar bshad zin te/ gang gi phyir na gong du rang dang gzhan las dang/ gnyis ka las skye ba dang/ rgyu med du skye ba 'gog par byed pa na 'byung ba rang bzhin gyis skye ba yang bdag gis thun mong du ni ste spyir bkag zin pa de'i phyir/ 'byung ba 'di dag lta zhig ste gang yang sngar spyi'i tshul gyis bkag bas ma bshad pa yod pa ma yin pas dpe grub bo/ /de bzhin du thams cad mkhyen pa la skur pa 'debs pa dang de las gzhan pa'i rang bzhin gyi dngos por smra ba rnams kyi grub pa'i mtha' 'gog pa na yang rtogs pa phyin ci log pa sbyar bar bya ste/ dper na/ rdzogs pa'i sangs rgyas 'gog par byed pa'i dus su bdag nyid ni/ shes bya'i rang bzhin phyin ci log tu lta bar rtogs bya ste/ zhes sogs dang/ gzhan la yang sbyar bar bya ste/ yod med kyi mthar lta ba thams cad dgag par 'dod pa'i phyir ro/ ci ste khyod la yang thal bar 'gyur ba 'di mtshungs @135b so snyam na de yang yod pa ma yin te/ kho bo cag phyin ci log par sgrub pa la dpe med pa'i phyir ro/ /'jig rten gzhan gtogs yod pa nyid du rtogs pa'i dus su bdag /shes bya rang bzhin dam pa'i don ni lta bar rtogs bya ste/ /bdag gi lta ba'i rnam pa'i rten mtshungs lus dang ldan nyid phyir/ /gang gi tshe na bdag med rtogs par khas len de tshe bzhin/ zhes brjod par nus pa yang yin no/ /de bzhin du/ 'di na thams cad mkhyen pa yod ces rtogs pa'i dus su bdag /shes bya'i rang bzhin dam pa'i don ni lta bar rtogs bya ste/ zhes sogs dang/ de bzhin du dngos po thams cad nges pa la yang sbyar bar bya'o/ de'i phyir tshul 'dis ni mtha' bzhi'i skye ba med pa'i dam bca' bzhi po rab tu bsgrubs pa yin no/ /gsum pa ni/ gang gi phyir na bdag dang gzhan dang gnyis ka las skye dang/ rgyu la ma ltos yod pa min pas dngos rnams rang bzhin bral/ zhes byung/ de ltar mtha' bzhi las skye ba bkag pa'i phyir dang/ skyed byed kyi rgyu'i rnam par rtog pa gzhan lnga pa med pa'i phyir dngos po rnams kyi rang bzhin skye ba med do zhes bstan pa'i phyir/ gang gi phyir na bdag dang gzhan dang gnyis ka las skye ba dang/ rgyu la ma ltos par skye ba yod pa min pas dngos po rnams rang bzhin gyis grub pa dang bral lo/ zhes smos so/ / gnyis pa la gnyis/ dngos kyi don dang/ de'i don bsdus te bstan pa'o/ /dang po ni/ gang gis sprin tshogs dang mtshungs gti mug stug po 'jig rten la/ zhes pa nas/ de yi phyir na smra 'di ma nges pa'o/ zhes tshigs bcad phyed dang @136a @#/ /bdun byung/ gal te dngos po rnams rang bzhin gyis med na sngon po la sogs pa rnams ji ltar gzung zhe na/ dngos po rnams kyi rang bzhin ni ma rig pas bslad pa 'ga' zhig gi snang yul min pas/ mig la sogs pa'i shes pas sngo sogs kyi rang bzhin bzung ba min no/ /'o na gang zhig yang dang yang du yul gyi ngo bo nyid du snang ba de ci yin zhe na/ 'di ni phyin ci log gi dbang gis snang bas na rang bzhin ma yin te/ ma rig pas bslad pa'i dbang gis bdag nyid der dmigs pa'i phyir ro zhes bstan pa'i phyir bshad pa/ gang gis te gang gi phyir char sprin nag po'i tshogs dang mtshungs pa'i gti mug stug pos te 'thug po sngo sogs kyi rang bzhin mthong ba g.yogs nas gnas pa 'jig rten sems can la yod pa des na/ byis pa rnams la sngo sogs kyi rang bzhin mthong ba yod pa min te/ yul rnams la rang gi ngo bo phyin ci log pa dag tu mngon par zhen pa'i gnas su gyur pa 'di ni/ byis pa 'di bden par zhen pa rnams la snang bar 'gyur ro/ / gal te gti mug gis bkab ba'i phyir de kho na nyid mi mthong du chug kyang/ phyin ci log tu ma thong ba ci las yin zhe na/ rang gi ngo bos grub pa min bzhin du der snang ba ni gti mug gi dbang gis yin no zhes phyi'i dpe'i sgo nas bstan pa'i phyir/ ji ltar dbang po rab rib kyis bslad pa'i mthu yis rab rib can 'ga' zhig gis skra shad dang zla ba gnyis dang rma bya'i mdongs dang sprang ma la sogs pa log par te med kyang yod pa ltar 'dzin pa ste mthong bar byed pa de bzhin du/ gti mug gi skyon gyi dbang gis mi @136b mkhas pa so skyes sngon po sogs kyi 'dus byas lta zhig sna tshogs pa blo gros kyis te de dag gi shes pas rtogs pa ste mthong bar 'gyur ro/ /'di ni mdo las ma rig pa'i rkyen gyis 'du byed rnams zhes bya ba la sogs pa gsungs pa yin no/ /de'i phyir tshul 'dis gal te gti mug la brten nas 'du byed kyi las 'byung la/ gti mug med par las de mi 'byung zhes bya bar gsungs pa ni mi mkhas pa kho nas rtogs par te de'i dbang du byas par gor ma chag go /mkhas pa dag ni ma rig pa'i rkyen gyis 'du byed do zhes gsungs pa mthong ba na/ 'du byed rnams rang bzhin med pa'i stong nyid khong du chud pa 'ba' zhig tu ma zad kyi/ rten 'byung gi de nyid rtogs pa'i blo bzang po'i nyi mas mun pa stug po dang 'dra ba'i ma rig pa rnam par bsal ba ste spong zhing/ las 'du byed dag kyang nye bar mi len te/ las de nye bar len pa'i rgyu ma rig pa spangs pa'i phyir ro/ /de'i phyir 'khor ba las nges par grol bar 'gyur ro/ /gal te de ltar dngos po rnams de nyid du ste don dam par rang bzhin med na/ mo gsham gyi bu ji lta ba bzhin du tha snyad du yang de dag gi ngo bo med pa nyid du 'gyur na/ gzugs sogs kyi ngo bo ni kun rdzob tu yod ba yang yin pa de'i phyir/ de dag gi yod pa ni rang bzhin gyis te don dam par yod pa nyid do snyam na/ 'di la brjod par bya ste/ gang dag rab rib can la sogs pa'i blo'i yul du gyur pa'i skra shad la sogs pa de dag ma skyes pas na/ ma skyes par mo gsham gyi bu dang mtshungs pa la/ ci'i phyir khyed cag gis yod pa min pa'i yul skra shad sogs mthong la/ mo gsham gyi bu mi mthong ba @137a @#/ /ci yin zhes/ re zhig sngon la rab rib la sogs pas mig nyams pa de dag nyid la brtsad par bya ste/ de'i phyi nas te rjes su ni ci'i phyir rang bzhin gyis ma skyes par mtshungs pa la/ khyod gzugs sogs mthong la mo gsham gyi bu mi mthong ba ci yin zhes/ ma rig pa'i rab rib rjes su 'brel ba ste des blo mig bsgribs pa rnams la brgal zhing brtag par bya'o/ kho bo cag la ni 'di brgal zhing brtag par bya ba ma yin te/ kho bo cag ni rnal 'byor pa rnams kyis dngos po dag 'di ltar gzigs shing/ gzhan rnal 'byor pa'i ye shes thob par 'dod pa rnams kyis kyang tshul de la lhag par mos par bya'o zhes lung ji lta ba bzhin du rnal 'byor pa'i ye shes kyis thugs su chud pa'i sgo nas/ dngos po rang bzhin med par 'chad par zhugs pa yin gyi/ rang gi shes pa la ltos nas ni ma yin te/ kho bo cag ni ma rig pa'i rab rib kyis blo'i mig bsgribs pa'i phyir ro/ /de'i phyir 'di ni rnal 'byor pa rnams la brgal zhing brtag pa ma yin te/ de dag gis don dam par ci yang ma gzigs par ma zad/ kun rdzob tu yang chos 'ga' zhig la rang gi ngo bos grub pa'i rang bzhin 'ga' yang ma gzigs pa'i phyir ro/ /rab rib can la brgal zhing brtag pa lta phar zhog cig /re zhig 'di ni khyod nyid la brgal zhing brtag par bya ba yin no zhes bshad pa/ gal te rmi lam gyi khang khyim dang dri za'i grong khyer dang bcas pa dang/ mig 'phrul mkhan gyis sprul pa'i bud med sogs dang/ smig rgyu'i chu dang gzugs brnyan mthong ba la sogs pa la skye med de yod pa min pa @137b mthong ba na/ yod pa nyid min par mtshungs kyang khyod la ji ltar khang khyim dang grong khyer dang bud med dang/ chu dang byang bzhin la sogs pa mthong ba der 'gyur la/ mo gsham gyi bu mthong ba der mi 'gyur ba de mi rigs so zhes je bdag nyid la brgal zhing brtag par gyis la/ phyis kho bo la brgal zhing brtag par bya'o/ /de'i phyir de kho na nyid du gzugs sogs de ji ltar yang skye ba med kyang/ gang gi phyir mo gsham gyi bu ltar 'jig rten gyi mthong ba'i yul du mi 'gyur ba ma yin pa de'i phyir/ don dam du med na tha snyad du yang mo gsham gyi bu bzhin mi mthong bar 'gyur ro/ zhes smra ba 'di ni gtan tshigs ma nges pa ste 'khrul ba can yin no/ /gnyis pa ni/ mo gsham bu la rang gi bdag nyid kyis/ zhes pa nas/ mo gsham bu dang mtshungs par thal mi 'gyur/ zhes tshigs bcad gsum byung/ ji ltar mo gsham gyi bu la rang gi bdag nyid kyis skye ba de kho na nyid du med cing 'jig rten gyi tha snyad du'ang yod pa min pa de bzhin du/ gzugs sogs kyi dngos po 'di kun 'jig rten gyi tha snyad dang de kho na nyid gnyis kar rang gi ngo bo nyid kyis ma skyes so/ /gang gi phyir de lta yin pa de'i phyir 'di ltar ston pa bcom ldan 'das kyis chos rnams kun gdod ma nas zhi zhing rang bzhin gyis skye ba dang bral ba dang/ rang bzhin gyis yongs su mya ngan las 'das pa zhes gsungs par gyur pa de'i phyir dus rtag tu rang bzhin gyis skye ba yod pa ma yin no/ /rang gi sde ba rnams kyis ni don dam du med na kun rdzob tu yang med do zhes pa'i brgal ba 'di bya ba ma yin te/ gang gi phyir de dag gis mdzod las/ gang la bcom dang @138a @#/ /blo yis gzhan/ zhes sogs bshad pa ltar khas blangs pa bum sogs 'di dag de nyid du ste don dam par med cing 'jig rten gyi rab tu grags pa ste tha snyad du yod pa ji bzhin pa de bzhin du/ dngos po thams cad kyang 'gyur pas na mo gsham gyi bu dang mtshungs par thal bar mi 'gyur ro/ /sde ba de dag gis ni spyir don dam du med na kun rdzob tu med do zhes smra ba mi rigs so zhes gsungs pa yin gyi/ de dag gis bden pa gnyis su yod tshul byas pa dang rang gis mdzad pa gnyis mthun par ston pa min no/ /gal te bum pa la sogs par gdags pa'i rten rdzas grub yod pa'i phyir/ bum pa la sogs par btags pa ni gzhi dang bcas par rigs na/ dbu ma pa ltar na chos thams cad btags pa tsam kho na yin gyi/ gdags pa'i rten rdzas su med pas na mo gsham gyi bu dang mtshungs par thal ba ldog tu med do snyam na/ de yang mi rigs te/ gdags pa'i rten rdzas grub tu sgrub mi nus pa'i phyir ro/ /dper na btags par yod pa ka ba sogs la brten nas khyim du btags pa bzhin du/ btags par yod pa thams cad kyi gdags gzhi yang btags yod du rigs so/ /gsum pa ni/ gang phyir rgyu med pa dang dbang phyug gi /zhes pa nas/ bud shing med par me yod min de bzhin/ zhes tshigs bcad gsum byung/ gal te dngos po rnams mtha' bzhi gang rung las mi skyen kun rdzob tu ji ltar skye zhe na/ gang gi phyir na dngos po rnams kyi skye ba rgyu med pa dang/ dbang phyug gi rgyu dang la sogs pas dus dang rdul dang rang bzhin sogs las kyang skye ba ma yin zhing/ bdag dang @138b gzhan dang gnyis ka las skye bar 'gyur ba ma yin pa de'i phyir/ rgyu dang rkyen 'di la brten nas 'bras bu 'di rab tu skye bar 'gyur ba zhig ste/ ston pa dang 'phags pas 'di tsam zhig kho na gsungs kyi mtha' bzhi'i skye ba ma gsungs so/ /de ltar rkyen nyid 'di pa tsam gyi rten 'brel bshad pa na/ mtha' bzhi'i skye ba mi srid pa 'ba' zhig tu ma zad kyi/ rang bzhin gyis yod pa'i rtag pa dang bya byed mi 'thad pa'i chad pa dang/ rang bzhin gzhan du mi 'gyur ba'i rtag pa dang skad cig snga phyi rang bzhin gyis tha dad pa'i mi rtag pa dang/ dngos po dang dngos med rang bzhin gyis yod pa la sogs par log par rtog pa'i zhen yul gzhan dag kyang mi srid do zhes bstan pa'i phyir bshad pa/ gang gi phyir rgyu 'di la brten nas 'bras bu 'di rab tu 'byung ngo zhes bya ba'i rigs pa 'di tsam zhig gis/ dngos po kun rdzob pa rnams kyi bdag gi dngos po yod pa 'thob kyi gzhan du ma yin pas/ bdag gzhan las skye ba la sogs pa'i rtog pa 'di dag brtag bar mi nus pa de'i phyir rten cing 'brel bar 'byung ba rkyen nyid 'di pa nyid kyi rigs pa 'di yis ni/ ji skad bshad pa'i bdag gzhan las skye ba la sogs par lta ba'i lta ba ngan pa'i dra ba mtha' dag gcod par byed pa yin no/ /gal te rang bzhin gyis grub pa 'ga' zhig yod na bdag gzhan sogs las skye bar 'gyur zhing/ rang bzhin gyis grub par 'dzin pa yod na rtag chad la sogs par rtog pa 'byung ba srid la/ de las gzhan du ma yin no zhes bstan pa'i phyir bshad pa/ mthar 'dzin pa'i rtog pa rnams dngos po rang bzhin gyis grub par 'dzin pa yod na 'byung bar 'gyur ba ste/ ji @139a @#/ /skad bshad pa'i rigs pas dngos po rang bzhin gyis grub pa ji ltar yang med par yongs su dpyad zin la/ dngos po rang bzhin gyis grub par 'dzin pa med par mthar 'dzin gyi rtog pa 'di rnams mi 'byung ste dper na rgyu bud shing med par 'bras bu me yod pa min pa de bzhin no/ bzhi pa ni/ so so skye bo rnams ni rtog pas bcings/ zhes pa nas/ rnam dpyod pa ni myur du grol bar 'gyur/ zhes tshigs bcad gsum byung/ gang gi phyir so sor skye bo chos nyid ma rtogs pa rnams ni gtso bor mthar 'dzin gyi rtog pas bcings pa de'i phyir/ chos nyid 'di thugs su chud pas phyin ci log tu rnam par mi rtog pa na rnal 'byor pa 'phags pa rnams ni grol bar 'gyur bas/ de'i phyir mthar 'dzin pa'i rtog pa rnams kyi zhen yul ma lus pa bkag pas rtog pa log par gyur pa gang yin pa de nyid 'phags pas dbu ma'i bstan bcos las bshad pa'i rnam par dpyod pa'i 'bras bur rnam par bzhag go zhes mkhas pa rnams gsung ngo/ /de nyid kyi phyir 'phags pas dbu ma'i bstan bcos las rigs pa'i rnam par dpyad pa shin tu mang bar mdzad pa ni/ rtsod la chags pa ste gzhan zil gyis gnon par 'dod pa'i phyir ma mdzad do/ /sems can rnams kyis de kho na nyid phyin ci ma log par rtogs nas thar pa thob par gyur na ci ma rung zhes skye bo rnams rnam par grol bar bya ba'i phyir ni mdzad pa yin no/ /gal te de kho na nyid rnam par bshad pa na/ snang ba nye ba na mun pa ltar gzhan gyi gzhung gis btags pa rnams 'jig par 'gyur na kho bo dag la nyes pa med do/ /'di ltar rang gi lta ba @139b la chags pa dang de bzhin du gzhan phyogs kyi lta ba la rgyud 'khrugs pa gang yin pa de ni/ 'ching ba'i rtog pa nyid yin pas bcings pa nyid du 'gyur gyi thar pa ni min no/ /de'i phyir rang phyogs la 'dod chags dang gzhan phyogs la khong khro ba rnam par bsal te/ rigs pas rnam par dpyod pa ni myur du grol bar 'gyur ro/ /bdag skye 'gog pa nas 'di yan chad kyis chos kyi bdag med bstan par gsungs so/ /gnyis pa gang zag gi bdag med rigs pas bsgrub pa la gsum/ thar 'dod kyis thog mar bdag rang bzhin gyis grub pa nyid dgag dgos par bstan pa/ bdag dang bdag gi ba gnyis rang bzhing yis grub pa 'gog pa'i tshul/ bdag dang shing rta'i dpyad pa dngos po gzhan la yang bsgre bar bstan pa'o/ /dang po ni/ nyon mongs skyon rnams ma lus 'jig tshogs la/ zhes pa nas/ rnal 'byor pa yis bdag ni 'gog par byed/ /ces tshigs bcad gcig byung/ thar 'dod rnams kyis 'khor bar 'khyams pa 'di'i rtsa ba gang yin snyam du brtags pa na/ rgyu 'dod chags la sogs pa'i nyon mongs pa dang 'bras bu skye rga na 'chi la sogs pa'i skyon rnams ma lus pa nga dang nga yi ba rang bzhin gyis grub par 'dzin pa'i 'jig tshogs la lta ba las byung bar blo yis mthong bar 'gyur te/ 'jig lta spong ba de yang 'jig ltas ji ltar bzung ba ltar gyi bdag yul (steng na mid par mthong bas spong dgos par mthong nas/ 'jig lta 'di'i dmigs rnam gang yin snyam du brtags pa na/ bdag ste nga tsam ni bdag tu lta ba 'di'i dmigs pa'i yul dang/) de rang bzhin gyis grub pa ni 'di'i rnam pa'i yul du rogs par byas nas/ rnal 'byor pas bdag rang gi ngo bo grub pa de 'gog par byed do/ /gnyis pa la gnyis/ bdag rang bzhin gyis grub pa dgag pa dang/ bdag@140a @#/ /gi ba rang bzhin gyis grub pa dgag pa'o/ /dang po la drug /gzhan sdes btags pa'i phung po las ngo bo tha dad pa'i bdag dgag pa/ rang sdes btags pa'i phung po nyid bdag tu 'dod pa dgag pa/ de gnyis kyi lhag ma'i phyogs rten dang brten pa sogs gsum dgag pa/ de nyid dang gzhan nyid du med pa'i gang zag rdzas yod dgag pa/ bdag brten nas btags pa tsam du bzhag pa dpe dang bcas par bshad pa/ de ltar gzhag pa la mthar 'dzin gyi rtog pa spang sla ba'i yon tan bstan pa'o/ /dang po la gnyis/ phyogs snga ma brjod pa dang/ lugs de dgag pa'o/ /dang po la gnyis/ grangs can gyi lugs brjod pa dang/ bye brag pa la sogs pa'i lugs brjod pa'o/ /dang po ni/ za bo rtag dngos byed po min pa'i bdag /yon tan bya med mu stegs rnams kyis brtags/ zhes byung/ 'jig lta'i dmigs yul bdag de ci zhig yin zhe na/ re zhig de zab po ste bde sdug sogs la longs spyod pa po dang/ rtag pa'i dngos po dang/ rnam 'gyur rnams kyi byed pa po min pa dang/ rdul mun snying stobs kyi rang bzhin gyi yon tan med pa dang/ khyab par byed pa nyid yin pa'i phyir na bya ba med par mu stegs grangs can rnams kyis brtags so/ /gnyis pa ni/ de'i dbye cung zad cung zad la brten nas/ /mu stegs can rnams lugs ni tha dad 'gyur/ zhes byung/ ji ltar grangs can dag gis bdag khas blangs pa de bzhin du/ bdag de'i dbye ba cung zad cung zad la brten nas mu stegs can rnams kyi lugs ni tha dad par 'gyur te// @140b bye brag pa rnams ni blo dang bde sdug la sogs pa'i bdag gi yon tan dgu smra bar byed cing/ bdag de yang rtag pa dang byed pa po dang/ zab po dang yon tan dang bcas pa dang/ bya ba med par yang smra ba'o/ /rig byed du smra ba dag ni bum pa la sogs pa tha dad pa rnams kyi nam mkha' gcig yin pa ltar/ rten lus tha dad pas brten pa bdag gcig nyid sna tshogs pa nyid do zhes pa la sogs pa khas len no/ /de dag gi khyad par zhib tu grub mtha' rtsa 'grel las shes par bya'o/ /gnyis pa ni/ mo gsham bu ltar skye ba dang bral phyir/ zhes pa nas/ des na phung po las gzhan bdag 'ga' med/ ces tshigs bcad bzhi byung/ mu stegs can rnams kyis 'dod pa'i bdag de ni/ de dag gis ji ltar btags pa de ltar gyur pa ste don dam par yod pa min te/ skye ba dang bral ba ste ma skyes pa'i phyir/ dper na mo gsham gyi bu ltar ro/ /de ltar gzhan gyis brtags pa'i bdag 'di ni/ don dam par ngar 'dzin lhan skyes kyi rten te dmigs yul du'ang mi rigs te/ rtags dang dpe ni sngar bzhin no/ / bdag 'di ni kun rdzob tu yang rdzas su yod pa dang ngar 'dzin lhan skyes kyi dmigs yul ma yin te/ rtags dpe sngar bzhin no/ /der ma zad mu stegs pas btags pa'i bdag de'i khyad par kun kyang yod pa ma yin no zhes bya bar rig par bya'o/ / de'i rgyu mtshan gang gi phyir na grangs can gyi bstan bcos dang/ bye brag ba sogs kyi bstan bcos las bdag de'i khyad par gyi chos mu stegs rnams kyis gang bstan pa de kun la/ mu stegs rang la grags pa'i ma skyes pa'i gtan tshigs kyis @141a @#/ /gnod pa de'i phyir ro/ /sbyor ba 'di'i 'god tshul ni/ gzhan gyis brtags pa'i bdag 'di ni/ grangs can dang bye brag pa sogs mu stegs pas sgro btags pa'i bdag gi khyad par dang ldan pa ma yin te/ ma skyes pa'i phyir mo gsham gyi bu bzhin no/ zhes pa lta bu'o/ /de'i phyir phung po las ngo bo gzhan pa'i bdag med de/ phung po bzung ba ma gtogs par bdag de yan gar du 'dzin pa ma grub pa'i phyir ro/ gzhan yang phung po las ngo bo tha dad pa'i bdag 'di 'jig rten sems can gyi ngar 'dzin pa'i blo lhan skyes kyi rten te dmigs par yang mi 'dod de/ mu stegs kyis btags pa ltar gyi bdag de rig pa min pa ste de'i rnam par mi 'dzin pa'ang mngon par zhen pa'i khyad par las bdag dang bdag gi zhes bdag tu lta bar 'gyur ba'i phyir ro/ /'di ni ngar 'dzin rten du'ang mi rigs zhes sngar bkag pa dang mi zlos te/ sngar ni bdag rdzas yod tsam bdag lta'i dmigs pa yin pa bkag la/ 'dir ni phung po las ngo bo tha dad pa'i bdag de'i dmigs pa yin pa bkag pa'i phyir ro/ /sems can gang dag dud 'gror bskal pa mang por tshe brkyal bar gyur pa des kyang gzhan gyis btags pa'i ma skyes pa dang rtag pa'i bdag 'di ma mthong ba de dag la yang ngar 'dzin 'jug par mthong ba ste shes nas/ blo ldan su zhig bdag de lta bu ngar 'dzin gyi rten du zhen par byed/ des na phung po las ngo bo gzhan pa'i bdag 'ga' yang med do/ /kyang gi sgras dmyal ba la sogs pa rnams sdud pa'o/ /gnyis pa la lnga/ phung po bdag tu 'dod pa la @141b gnod byed bstan pa/ de ltar 'dod par mi rung ba'i sgrub byed bstan pa/ phung po bdag tu smra ba la gnod byed gzhan bstan pa/ phung po bdag tu gsungs pa sogs kyi dgongs pa bshad pa/ gzhan gyi lugs 'brel med du bstan pa'o/ /dang po la gnyis/ dngos kyi don dang/ skyon spong gi lan dgag pa'o/ /dang po la gnyis/ phyogs snga ma brjod pa dang/ lugs de dgag pa'o/ /dang po ni/ phung po las gzhan bdag grub med pa'i phyir/ zhes pa nas/ lnga char yang 'dod kha cig sems gcig 'dod/ ces tshigs bcad gcig byung/ 'dir rang gi sde bdag na re/ phung po las ngo bo gzhan pa'i bdag grub pa med pa'i phyir bdag lta ste 'jig lta'i dmigs pa ni phung po kho na yin te/ phung po las ngo bo tha dad pa dang nang gi phung po dmigs par 'jog pa gnyis su nges pa las snga ma mi rung ba'i phyir ro/ /de'i phyir bdag ni phung po tsam yin no zer ro/ /'di ni gnas ma bu pa sogs mang pos bkur pa'i 'dod pa'o/ /de las kyang kha cig ni bdag lta'i rten du ni phung po lnga char yang 'dod cing/ bdag tu mngon par zhen pa 'di yang phung po lnga po de las yin no zhes smra ste/ mdo las/ bdag go snyam du yang dag par rjes su lta ba de dag ni/ nye bar len pa'i phung po lnga po 'di kho na la yang dag par rjes su lta'o/ zhes gsungs pa lta bu'o// de'i phyir lta ba 'di ni 'jig pa'i bdag nyid can gyi tshogs pa la yin gyi bdag dang bdag gi ba la ni ma yin no zhes gsal bar mdzad pa'i slad du 'jig tshogs la lta bar gsungs so zhes smra'o/ /mang bkur ba kha cig sems gcig bu la bdag go zhes 'dod de/ @142a @#/ /mdo las/ bdag nyid bdag gi mgon yin gyi/ /gzhan ni su zhig mgon du 'gyur/ /bdag nyid legs par thul bas ni/ /mkhas pas mtho ris thob par 'gyur/ zhes bdag dul bas mtho ris 'thob par gsungs la/ mdo gzhan las/ sems 'dul ba ni legs pa ste/ /sems 'dul ba ni bde ba 'dren/ zhes sems dul bas bde ba 'thob par gsungs pa'i phyir zer ro/ /slob dpon legs ldan gyis kyang/ drangs ma thag pa'i lung gnyis dang; phung po len mkhan ni bdag yin la rnam shes kyis yang srid len pa'i phyir zhes pa'i rigs pas yid kyi rnam shes bdag tu bzhed do/ /kun gzhi 'dod mkhan gyis kun gzhi rnam shes bdag gi mtshan gzhir 'dod par gsungs so/ / gnyis pa ni/ gal te phung po bdag na de phyir de/ zhes pa nas/ gzhan gyis bsags la gzhan gyis za bar 'gyur/ zhes tshigs bcad gnyis byung/ gal te rang rgyud kyi phung po lnga bdag yin pa'i phyogs ltar na/ de'i phyir phung po de mang bas gang zag gcig la yang bdag de dag kyang mang por 'gyur ro/ sems bdag yin pa ltar na rnam shes drug gi dbye bas sam/ rnam shes skad cig snga phyi'i dbye bas mang ba'i phyir bdag kyang mang por 'gyur ro/ /'di ni mang po dang ngo bo gcig tu 'dod pa tsam la 'phen du mi rung bas/ bdag phung gnyis tha dad gtan med kyi gcig tu 'dod pa la 'phen pa'o/ /de yang gzhan gyis bdag phung gnyis ldog pa gcig tu khas ma blangs kyang/ ngo bo gcig la ldog pa tha dad ni brdzun pa la skyon med kyang @142b bden grub tu khas len pa la ngo bo gcig na dbyer med gcig tu 'phul nus pa'i gnad kyis yin no/ /de'i tshe 'jig rten skye ba na gang zag nyag gcig skye'o zhes bya ba'i lung las na/ pha rol pos bdag mang por 'dod pa yang min no/ /bdag ni rdzas su 'gyur zhing ste/ gzugs la sogs pa'i rdzas 'das pa la sogs pa'i dbye bas tha dad par 'gyur ba kho na phung por brjod pa'i phyir dang/ de rnams kho na la bdag tu bsnyad pa'i phyir bdag rdzas su yod par 'gyur na/ mdo las 'das ma 'ongs dang nam mkha' myang 'das gang zag lnga btags pa tsam du gsungs pa dang/ ji ltar yan lag tshogs rnams la/ zhes sogs kyi lung 'di las na/ pha rol pos bdag rdzas yod du 'dod pa yang min no/ /gzhan yang phung po der lta ba'i 'jig lta rdzas la 'jug pa ste rdzas su grub pa'i yul can yin pas phyin ci log tu mi 'gyur ro/ /lhag med kyi mya ngan las 'das pa'i tshe phung po lnga char chad pas nges par bdag chad par 'gyur ro/ /de'i phyir mthar 'dzin gyi chad ltar 'gyur te/ khyed cag gis gang bdag tu bzung ba de nyid la rtag chad du 'dzin pa mthar 'dzin gyi lta bar 'dod pa'i phyir ro/ /mya ngan las 'das par zhugs pa'i sngon gyi skad cig dag la ni/ phung po skad cig re rer skye 'jig byed pa ltar bdag kyang skad cig re rer ngo bo nyid kyis so so ba'i skye 'jig byed par 'gyur ro/ /de'i phyir de'i tshe de'i dus na nga rgyal bo nga las nu zhes bya bar gyur to/ zhes kyang gsung bar mi 'gyur te/ de'i dus kyi bdag 'gags nas tshe 'dir de las rang bzhin gyis tha dad pa'i bdag gzhan skyes par khas blangs pa'i phyir ro/ /skad @143a @#/ /cig snga phyi rnams ngo bo nyid kyis gzhan yin na/ de'i tshe byed pa po'i bdag med pas/ las gnas pa'i rten med pa'i phyir las kyang med pas/ las rnams 'bras bu dang 'brel pa med par 'gyur ro/ /gal te skad cig snga mas byas pa'i las kyi 'bras bu skad cig phyi ma rnams su longs spyod pas skyon med do snyam na/ de'i tshe gzhan gyis bsags pa'i las kyi rnam smin gzhan gyis longs spyod pa'i phyir/ rgyud gzhan gyis bsags pa'i las kyi 'bras bu la gzhan gyis za bar 'gyur ro/ /de ltar na las byas pa chud zos pa dang/ ma byas pa dang phrad par 'gyur ro/ /gnyis pa ni/ de nyid du rgyud yod na skyon med na/ sngar rnams dpyad tshe rgyud la nyes bshad zin/ zhes byung/ de kho na nyid du rgyun can tha dad pa rnams la rgyud gcig yod pas skyon med do zhe na/ de yang mi 'thad de/ rang bzhin gyis tha dad pa rnams la rgyud gcig yin pa la/ sngar rnam par dpyad pa byas pa'i tshe nyes pa bshad zin te/ byams pa nyer sbas la brten chos rnams ni/ zhes bya ba der ro/ gnyis pa ni/ de phyir phung po dang sems bdag mi rigs/ 'jig rten mtha' ldan la sogs med phyir ro/ zhes byung/ ji skad bshad pa'i rigs pas phung po dang sems bdag min pa 'ba' zhig tu ma zad kyi/ gzhan yang 'jig rten mtha' dang ldan pa nyid dang/ la sogs pas mtha' dang mi ldan pa dang/ gnyis ka dang gnyis ka ma yin par lta ba la sogs pa bcu bzhi po der lung bstan du med par 'dod pa'i phyir lung ma bstan gyi lta bar sde ba thams cad kyis 'dod pa'i @143b phyir phung po bdag tu mi rigs so/ /gal te 'jig rten gyi sgras phung po rnams 'dzin na/ de'i tshe phung po rnams skye 'jig byed pa rang gi lugs yin pa'i phyir 'jig rten mi rtag par lung bstan dgos pa dang/ mya ngan las 'das pa'i 'og rol tu khyed ltar na phung po rnams med pas/ 'jig rten mtha' dang ldan pa dang de bzhin gshegs pa grongs nan chad yod pa min no zhes lung bstan dgos par yang 'gyur ro/ /'o na btags pa tsam gyi bdag skye 'jig byed pa rang gi lugs yin pa'i phyir/ 'jig rten mi rtag par lung bstan dgos par 'gyur ro zhe na/ de gnyis mi mtshungs te/ btags pa tsam gyi bdag mi rtag pa yin kyang de'i sgo nas mi rtag par lung bstan na/ 'dri ba po'i bsam ngor khyad gzhi med pas mi rung la/ phung po bdag yin na de'i sgo nas mi rtag par lung ston pa la dri ba po'i bsam ngor khyad gzhi med pa'i skyon mi 'byung ba'i rgyu mtshan gyis yin nam snyam ste dpyad par bya'o/ /lung ma bstan pa'i rgyu mtshan ni rnam bshad las/ de yang nang gi byed pa'i skyes bu la bsams nas 'dri na ni/ khyad gzhi ma grub pas khyad par gyi chos lung bstan du med do/ /btags pa tsam gyi bdag gi sgo nas lung bstan na ni/ de'i tshe 'dri ba po de rnams de 'dra ba'i bdag med rtogs pa'i skal ba dang mi ldan pas de yang lung bstan du med do/ /zhes gsungs pa ltar ro/ / gsum pa ni/ khyod kyi rnal 'byor bdag med mthong ba la/ zhes pa nas/ skye 'gyur de yi ngo bo rtogs med phyir/ zhes tshigs bcad gnyis byung/ skyon gzhan yang yod de/ gal te khyod kyi ltar na/ rnal 'byor bas bdag med pa mngon sum du @144a @#/ /mthong ba'i dus su/ chos thams cad bdag med par mthong ba de'i tshe/ nges par phung po'i dngos po rnams med par mthong bar 'gyur te/ phung po dang sems bdag yin pa'i phyir ro/ /de ltar 'dod pa yang ma yin pas de'i phyir phung po rnams bdag ma yin no/ /'o na thal 'gyur ba'i lugs la yang/ chos thams cad bdag med par mthong ba'i tshe/ ming du btags pa tsam gyi gang zag rnams med par mthong bar 'gyur te/ rgyu mtshan mtshungs pa'i phyir ro zhe na; rtags ma grub ste/ pha rol pos phung po rnams bdag tu 'dod pa ni/ btags don btsal nas bzhag pa yin pas rang gi ngo bo nyid kyis grub pa'i bdag tu 'gyur ba'i phyir na/ bdag med par mngon sum du mthong ba'i tshe de med par mthong dgos pa'i skyon 'jug la/ thal 'gyur bas bdag gi btags don btsal nas mi 'jog par ming du btags pa tsam gyis 'jog pas na skyon de rnam pa thams cad du med pa'i phyir ro/ /gal te bdag med par mthong ba'i dus su rtag pa'i bdag nang gi byed pa'i skyes bu spong ba ste med par mthong ba yin pas skyon med do zhe na/ de ltar 'dod pa de'i tshe skabs gzhan du yang bdag gi sgra nang gi byed pa'i skyes bu la 'jug par 'gyur bas/ khyod kyi sems sam phung po bdag tu mi 'gyur ro/ /gal te las 'bras kyi 'brel pa'i skabs su bdag gi sgra rtag bdag la 'jug par mi 'dod pas skyon med do zhe na/ de yang mi rigs te/ chos thams cad bdag med pa'o zhes pa'i skabs su nang gi byed pa'i skyes bu bdag yin la/ las 'bras kyi skabs su phung po @144b bdag yin zhes 'dod dgur sbyod pa la rigs pa med pa'i phyir ro/ /'o na thal 'gyur ba'i lugs la/ chos thams cad bdag med pa'o zhes pa'i skabs su bdag gi sgra'i don ni ngo bo nyid kyis grub pa la byed/ las 'bras kyi 'brel pa'i skabs su bdag gi sgra'i don ni ming du btags pa tsam gyi bdag la byed ces so sor bshad tshul med par thal/ khyod kyis gzhan lugs 'gog tshul 'thad pa'i phyir na ma khyab ste/ rang sde gzhan gyis phung po las rdzas gzhan pa'i gang zag khas len pa la gnod pa mthong ba'i rjes su/ 'o na gang zag ces bya ba de gang yin zhes logs su btsal nas 'jog pa yin la/ thal 'gyur bas rang gi ngo bos grub pa'i bdag khas len pa la gnod pa mthong ba'i rjes su/ 'o na gang zag ces bya ba de gang yin zhes logs su btsal nas 'jog pa ma yin gyi/ sngar nas gang zag bsnyon med du snang ba dang/ de nyid rang bzhin gyis grub pas stong par nges pa la brten nas gang zag ming gis btags pa tsam du 'char ba yin pas mi mtshungs pa'i phyir ro/ /skyon gzhan yang yod de/ khyod kyi ltar na rnal 'byor pas bdag med pa mngon sum du mthong ba yis/ gzugs sogs kyi de kho na nyid rtogs par mi 'gyur te/ des de'i tshe mu stegs kyis kun btags pa'i rtag bdag tsam med par mthong ba'i phyir ro/ /de'i phyir gzugs sogs la bden par 'jug pa'i phyir/ gzugs sogs kyi yul can gyi 'dod chags sogs da dung yang skye bar 'gyur te/ gzugs sogs de'i ngo bo ste yin lugs rtogs pa med pa'i phyir ro/ bzhi pa la lnga/ bdag tu gang lta ba thams cad phung po kho na @145a @#/ /la lta bar gsungs pa'i don bshad pa/ mdo gzhan la brten nas phung po'i tshogs tsam bdag min par bshad pa/ phung po tshogs pa tsam gyi dbyibs kyi bkod pa bdag yin pa dgag pa/ phung po tshogs tsam bdag tu 'dod pa la gnod byed gzhan bstan pa/ thub pas bdag de khams drug la sogs pa la brten nas btags par gsungs pa'o/ /dang po la gsum/ lung gi dgongs pa dgag bya gcod pa'i dgag phyogs nas yin par bstan pa/ sgrub phyogs nas yin du chug kyang phung po bdag tu ston pa min pa/ de dag la gzhan gyi rtsod pa spang ba'o/ /dang po ni/ gang phyir ston pas phung po bdag go zhes/ zhes pa nas/ mdor bstan phung po bdag ces bzhed ma yin/ zhes tshigs bcad gnyis byung/ gang gi phyir ston pas phung po bdag go zhes gsungs pa de'i phyir phung po bdag tu 'dod na/ mdo de ni phung po rnams bdag tu ston pa ma yin gyi/ phung po las ngo bo gzhan pa'i bdag bdag lta'i dmigs par 'dod pa 'gog pa yin te/ mdo gzhan las gzugs bdag min no zhes sogs gsungs pa'i phyir te/ gang gi phyir gzugs dang tshor ba bdag min pa dang/ 'du shes kyang bdag ma yin pa dang/ 'du byed rnams bdag min pa dang/ rnam shes kyang bdag min par mdo gzhan las gsungs pa de'i phyir nye bar len pa'i phung po lnga po 'di dag kho na la bdag go snyam du yang dag par rjes su lta'o zhes mdor bstan pa 'di las ni phung po rnams bdag go zhes bzhed pa min no/ /de'i phyir phung po la lta'o zhes pas phung po la brten nas btags pa'i bdag dmigs par @145b ston par gsal te/ phung po dang phung po las ngo bo tha dad pa'i bdag gnyis ka 'jig lta'i dmigs pa yin pa khegs pa'i phyir ro/ /gnyis pa ni/ phung po bdag ces brjod tshe phung rnams kyi/ zhes pa nas/ de med phyir de tshogs pa ma yin no/ zhes tshigs bcad gcig byung/ phung po lnga po 'di dag kho na la lta'o zhes pa 'di ni sgrub phyogs nas phung po bdag tu ston pa yin du chug kyang/ phung po lnga re re nas bdag tu ston pa min te/ 'di ltar phung po bdag go zhes brjod pa'i tshe/ phung po rnams kyi tshogs pa bdag tu brjod pa yin gyi/ phung po rnams kyi ngo bo ste re re ba bdag tu ston pa min pa'i phyir te/ dper na shing rnams ni nags tshal lo zhes brjod pa na/ shing gi tshogs pa nags tshal yin gyi shing re reb nags su brjod pa min pa bzhin no/ zhes gzhan la grub pa dper brjod pa'o/ /gal te tshogs pa bdag yin pa 'dod do zhe na/ de lta na mdo las/ bdag nyid bdag gi mgon yin te/ /bdag nyid bdag gi dgra yang yin/ /legs dang ngan pa byas pa la/ /bdag nyid bdag gi dpang po yin/ zhes dang/ bdag nyid legs par dul bas ni/ /mkhas pas mtho ris thob par 'gyur/ zhes bdag ni mgon dang 'dul ba'am dpang po nyid du gsungs la/ khyed ltar na tshogs pa rkyang pa de mgon min zhing/ 'dul ba'am dpang po nyid kyang min te/ tshogs pa tsam de ni rdzas su med pa'i phyir na bdag de phung po'i tshogs pa tsam ma yin no/ /'di la kha cig na re/ tshogs pa bdag yin pa 'gog tshul 'di mi 'thad de/ rdzas su med na bdag ma yin pas kyang ma khyab/@146a @#/ /mgon dang dpang po ma yin pas kyang ma khyab pa'i phyir zer na/ skabs 'di'i phyogs snga smra bas/ mgon dang dbang po sems kho nas byed pa dang/ sems de yang rdzas yod du 'dod pa'i dbang du byas nas de ltar bshad dam zhib tu dpyad par bya'o/ /gsum pa ni/ de tshe de yi yan lag tshogs gnas rnams/ /shing rta nyid 'gyur shing rta dang bdag mtshungs/ zhes byung/ ci ste tshogs pa ni tshogs pa can las ngo bo tha dad du med pa'i phyir/ mgon byed pa sogs ni tshogs pa can rnams kyi yin par rtogs par 'gyur bas/ mgon dang 'dul ba sogs rigs bar 'gyur ro snyam na/ bdag gi sgra res 'ga' phung po tshogs pa dang/ res 'ga' tshogs pa can phung po la nye bar sbyor ba 'di la/ sngar de ltar 'dod dgur so so la sbyor mi rung bar bshad zin pa'i phyir ro/ /skyon gzhan yang yod de/ phung po'i tshogs pa bdag tu 'dod pa de'i tshe shing rta de'i yan lag gi tshogs pa phyogs gcig tu gnas pa rnams shing rta nyid du gyur pa'i skyon yod de/ shing rta dang bdag gnyis rang gi yan lag tshogs pa la 'jog mi 'jog mtshungs pa'i phyir te/ mdo las/ ji ltar yan lag tshogs rnams la/ /brten nas shing rtar brjod pa ltar/ /de bzhin phung po rnams brten nas/ /kun rdzob sems can zhes bya'o/ /zhes gsungs pa'i phyir ro/ /gnyis pa ni/ mdo las phung po brten nas yin gsungs pa/ /de phyir phung po 'dus tsam bdag ma yin/ zhes byung/ sngar bshad pa de ltar na mdo las phung po tshogs pa la brten nas sems can du btags pa @146b yin no zhes gsungs pa de'i phyir phung po 'dus pa ste tshogs pa tsam bdag ma yin no/ /de nyid sgrub ngag gis gsal bar byed pa ni/ gang zhig la brten nas gang btags pa de ni btags pa nye bar len pa'i yan lag tshogs pa tsam ma yin te/ brten nas btags pa'i phyir 'byung 'gyur bzhin no/ /shing rta'i yag lag gi tshogs pa ni shing rta'i rten yin gyi brten pa shing rta ma yin pa ltar/ phung po'i tshogs pa yang gang zag gi rten yin gyi brten pa gang zag ma yin pa ni mdo de'i dgongs pa yin no/ /gsum pa ni; dbyibs zhe na de gzugs can la yod phyir/ zhes pa nas/ gang phyir de dag la dbyibs yod ma yin/ zhes tshigs bcad gcig byung/ gang gi tshe 'phang lo la sogs pa tshogs nas shing rta'i dbyibs khyad par can dang ldan par 'gyur ba de'i tshe shing rta'i ming rnyed par 'gyur ba ltar/ sems can gyi rgyud kyi gzugs sogs phung po rnams kyi dbyibs kyi bkod pa tsam bdag yin no zhe na/ dbyibs de ni gzugs can kho na la yod pa'i phyir/ khyod la ste ltar na gzugs can de dag nyid bdag ces bya bar 'gyur gyi; sems dang sogs pas sems byung gi tshogs pa ni bdag nyid du 'jog par 'gyur ba min par 'gyur te/ gan gi phyir na sems sems byung de dag la dbyibs yod pa ma yin pa'i phyir ro/ /bzhi pa ni/ len po rang nyer len gcig rigs dngos min/ zhes pa nas/ ma yin gang phyir byed po med las med/ ces tshigs bcad gcig byung/ skyon gzhan yang yod de/ 'dis nye bar len par byed pas na nye bar len pa bo rang ste byed pa po bdag dang/ 'di nye bar blang bar bya bas na nye bar len pa ste las su @147a @#/ /bya ba phung po lnga'o/ /de gnyis gcig pa'i dngos por rigs pa min pa ni tshogs pa tsam bdag tu 'jog par mi rigs pa'o/ /gal te phung po tshogs pa tsam bdag yin pa de lta na ni las dang byed pa po rnams gcig nyid du 'gyur la/ 'di ni 'dod pa yang ma yin te/ 'byung ba dang 'byung 'gyur gnyis dang/ bum pa dang rdza mkhan kyang gcig nyid du 'gyur ba'i phyir ro/ /ci ste byed pa po nyid du 'gyur ba phung po tshogs pa nye bar len pa bo ni 'ga' yang med de/ byed pa po 'di ni nye bar len pa las su bya ba phung po 'dus pa tsam zhig yod do snyam du blo la sems pa yin na/ de ni de ltar ma yin te/ gang gi phyir na byed pa bo med na rgyu med pa'i las kyang med pa'i phyir ro/ /lnga pa ni/ gang phyir thub pas bdag des chu me/ zhes pa nas; de phyir ngar 'dzin blo de rnams la min/ zhes tshigs bcad gnyis byung/ skyon gzhan yang yod de/ gang gi phyir thub pas mdo las bdag des dang chu dang me dang rlung gi khams dang/ rnam par shes pa'i khams dang/ bu ga nam mkha' zhes bya ba'i khams drug la brten nas dang/ mig gi reg pa'i skye mched dang la sogs pas yid kyi reg pa'i skye mched drug dag la brten nas nye bar bstan zhing/ sems dang de dag las gzhan pa'i sems byung gi chos rnams gdags gzhir nye bar bzung ba la brten nas bdag tu 'dogs so zhes nges par te gsal bar gsungs pa de'i phyir/ bdag de ni sa'i khams la sogs pa'i ya gyal de rnams dang de nyid ma yin pa ste de rnams re re nas bdag tu mi rung la/ de rnams kyi @147b tshogs ba tsam nyid kyang bdag tu 'jog pa min te/ de'i phyir ngar 'dzin pa'i blo lhan skyes kyis chos de rnams kyi tshogs pa dang ya gyal rnams la dmigs par byed pa min no/ /lnga pa ni/ bdag med rtogs tshe rtag pa'i bdag spong zhing/ zhes pa nas; kye ma gzhan gyi gnam bor 'gyur nyid do/ /zhes tshigs bcad gnyis byung/ rang sde gzhan gyi lugs 'brel med du bstan pa'i phyir bshad pa/ gang zag gi bdag med mngon sum du rtogs par 'dod pa'i tshe ni/ rtag pa'i bdag tsam zhig spong ba ste med par mthong zhing/ rtag pa'i bdag 'di ni ngar 'dzin pa'i 'jig lta lhan skyes kyi rten te dmigs rnam gang gi yul du'ang mi 'dod pa de'i phyir/ rtag pa'i bdag tsam med par mthong ba'i shes ba goms pas/ bdag tu lta ba lhan skyes dpyis te drung nas kyang 'byin zhes smra ba ni kye ma shin tu mtshar te/ dper na gang zag blun po kha cig rang gi khyim gyi rtsig phug na sbrul gnas pa mthong nas 'jigs bzhin du gnas pa la/ gzhan zhig gis kye mi khyod ma 'jigs shig / khyim 'di na glang chen med do zhes dogs pa bsal ba na/ khyim der glang po che med bar shes pas sbrul gyi 'jigs pa'ang spong bar byed pa ni/ kye ma'o mkhas pa gzhan gyi gnam por te bzhad gad du 'gyur ba nyid bzhin no/ /gsum pa la gnyis/ rten dang brten pa dang ldan pa'i phyogs dgag pa/ bkag pa rnams kyi don bsdoms te bstan pa'o/ /dang po ni/ phung por bdag yod ma yin bdag la yang/ zhes pa nas/ bdag ni gzugs las de nyid gzhan nyid med/ ces tshigs bcad gnyis byung/ @148a @#/ /phyogs lhag ma gsum med par bstan pa'i phyir bshad pa/ phung por te de la bdag ngo bo nyid kyis brten pa'i tshul gyis yod pa ma yin zhing/ bdag la yang phung po de rnams ngo bo nyid kyis brten pa'i tshul gyis yod pa min te/ gang gi phyir na phung po dang bdag 'dir ngo bo nyid kyis grub pa'i gzhan nyid yod na/ rang bzhin gyis grub pa'i rten dang brten pa'i rtog pa gnyis po 'dir 'gyur na/ rang bzhin gyis gzhan nyid du grub pa de med pa de'i phyir rten dang brten par ngo bo nyid kyis grub pa 'di phyin ci log gi rtog pas bzhag ba tsam mo/ /bdag ni gzugs phung dang ldan pa ngo bo nyid kyis grub par mi 'dod de/ gang gi phyir na bdag phung po las rang bzhin gyis gcig dang tha dad gang rung du grub pa yod pa min pa de'i phyir/ bdag phung po dang ldan pa'i sbyor ba rang bzhin gyis grub pa med de/ 'di ltar ldan pa'i rkyen yang lha sbyin gnag ste ba glang dang ldan no zhes pa lta bu ni gzhan na ste ngo bo tha dad pa la sbyor la/ lha sbyin gzugs dang ldan zhes pa lta bu ni ngo bo gzhan min pa la sbyor ba yin na/ bdag ni gzugs las de nyid de gcig dang gzhan nyid de tha dad pa med pa'i phyir ro/ /de dag gis ni phung po lhag ma bzhi dang ldan pa ngo bo nyid kyis grub ba yang bdag par shes par bya'o/ /gnyis pa ni/ gzugs bdag ma yin bdag ni gzugs ldan min/ zhes pa nas/ rtse mo mtho bar gyur pa 'di dag go /zhes tshigs bcad gnyis byung/ sngar bkag pa'i phyogs rnams bsdoms te bstan pa'i sgo nas rtse mo'i 'jig lta'i grangs bstan pa'i phyir bshad pa/ gzugs ni bdag ma yin pa la bdag @148b tu lta ba dang/ bdag ni gzugs dang ngo bo nyid kyis ldan pa min pa la der lta ba dang/ gzugs la bdag rang bzhin gyis med pa la yod par lta ba dang/ bdag la gzugs rang bzhin gyis yod pa min pa la yod par lta ba bzhi ste/ gzugs phung la bshad pa de ltar 'jig ltas lta ba'i tshul rnam pa bzhir phung po lhag ma bzhi po kun la bzhi bzhir lta ba shes par bya ste/ de dag ni bdag tu lta ba 'jig tshogs la lta ba'i cha nyi shur 'dod pa yin no/ bdag gzugs phung las ngo bo tha dad par lta ba bsnan nas phung po re re la lnga lngar lta ba ste cha nyer lngar 'gyur dgos pa la/ mdo las/ 'jig tshogs la lta ba'i ri'i rtse mo nyi shu mtho ba/ ye shes kyi rdo rjes bcom nas rgyun du zhugs pa'i 'bras bu mngon du byas so/ zhes 'jig lta'i cha nyi shur gsungs pa'i rgyu mtshan ni/ sngon du phung po ma bzung bar 'jig ltas bdag tu mngon par zhen par mi nus pas/ rnam pa bzhi bzhi'i sgo nas phung po rnams la dmigs shing bdag la 'jug go /de'i phyir phung po rnams ma gtogs par gzhan du bdag tu zhen ba'i gzhi lnga ba mu stegs pa ma gtogs pa la mi 'byung bas cha lnga pa ma gsungs so/ /rtsa shes las phyogs gzhan lnga pa gsungs pa ni mu stegs pa'i lugs dgag pa'i phyir ro zhes bya bar shes par bya'o/ zhes rnam bshad las gsungs so/ /dmigs pa da la dmigs nas rnam pa rang bzhin gyis grub par 'dzin pa'i 'jig tshogs la lta ba'i ri bo/ bdag med pa mngon sum du rtogs pa'i ye shes kyi rdo rjes bcom pa ste bshig pa na/ bcom pa'i bdag tu lta ba gang dang lhan cig tu 'jig par 'gyur ba/ bshad ma thag pa'i rtsa ba'i 'jig tshogs lta @149a @#/ /ba'i ri lhun stug po la gnas pa'i rtse mo mtho bar gyur ba nyi shu ni sngar phung bo lnga po re re la bzhi bzhir bshad pa 'di dag go /rtsa ba'i 'jig lta la nyi shu'i dbye ba med la/ blo kun brtags dang lhan skyes gnyis yod kyang/ gang dang lhan cig tu nyi shu rgyun zhugs kyis spangs pa'i rtsa ba'i 'jig lta ni kun brtags yin no/ /bzhi pa la gnyis/ phyogs snga ma brjod pa dang/ lugs de dgag pa'o/ /dang po ni/ kha cig de nyid gzhan nyid rtag mi rtag ces pa nas/ de ni ngar 'dzin gzhir yang 'dod pa yin/ zhes tshigs bcad gcig byung/ rang gi sde ba mang pos bkur ba ba kha cig ni/ gang zag phung po las ngo bo tha dad pa min la/ phung po'i rang bzhin can yang min pa de'i phyir bdag ni phung po las de nyid dang gzhan nyid du brjod du med do/ /de bzhin du gang zag ni rtag pa dang mi rtag pa la sogs pa nyid du yang brjod du med do/ /gang zag de rdzas yod du yang 'dod de/ dge mi dge'i byed pa po dang/ bde sdug gi za ba bo nyid du brjod pa'i phyir dang/ 'khor bar bcings pa dang myang 'das kyi skabs su grol ba po yin pa'i phyir ro/ /bdag de rnam shes drug gi shes byar yang 'dod cing/ bdag de ni ngar 'dzin pa'i gzhi ste dmigs par yang 'dod pa yin no/ /gnyis pa ni/ gang phyir gzugs las sems brjod med mi rtogs/ zhes pa nas/ de phyir bdag med dngos chos dang bral phyir/ zhes tshigs bcad gsum byung/ brjod du med pa la rdzas yod mi srid par bshad pa/ gang gi phyir na gzugs las sems de nyid dang @149b gzhan gang du yang brjod du med par mi rtogs pa ste mi 'dod pa ltar/ dngos po ste rdzas su yod pa rnams la de nyid dang gzhan nyid du brjod du med par rtogs pa ma yin pa nyid de/ 'di ltar gal te bdag 'ga' zhig dngos por te rdzas su grub par gyur na/ sems ltar du grub pa'i dngos po sgo gnyis gang du yang brjod du med par mi 'gyur ro/ /gang zag btags yod du bstan pa'i phyir bshad pa/ gang gi phyir khyod kyis ltar na bum pa rang skya thub pa'i dngos por ma grub pa'i ngo bo de rang gi yan lag gi gzugs sogs las de nyid dang ngo bo gzhan du brjod du med par 'gyur bar 'dod pas/ de bzhin du bdag gang yin pa de yang phung po las de nyid dang gzhan nyid du brjod du med pa'i btags yod du 'gyur ba de'i phyir gang zag rang gi ngo bo nyid kyis yod par grub par rtogs pa ste gzung bar mi bya'o/ /de nyid dang gzhan gnyis dngos po'i rten nyid du brjod nas/ rten de ma yin pa nyid kyis bdag rdzas yod 'gog par rtsom pa/ gal te khyod kyi ltar bdag rdzas su yod na ni/ khyod kyi rnam shes ni rang gi bdag nyid las gzhan ni min par 'dod pa bzhin du/ gang zag kyang nges par rang gi bdag nyid las gzhan nyid min pas de nyid du brjod dgos so/ /yang khyod kyi rnam shes gzugs sogs las gzhan pa'i dngos por 'dod pa bzhin du/ gang zag kyang phung bo las ngo bo tha dad par brjod dgos so/ /dngos po la gcig dang tha dad kyi rnam pa de gnyis nges par mthong bar 'gyur ba de'i phyir bdag rdzas su med de/ dngos po'i chos de nyid dang gzhan gnyis su grub pa dang bral ba'i phyir ro/ /lnga pa la bzhi/ bdag @150a @#/ /mtha' bdun du med kyang brten nas btags pa shing rta dang 'dra bar bstan pa/ sngar ma bshad pa'i phyogs lhag ma gnyis rgyas par bshad pa/ de ltar bshad pa la gzhan gyi rtsod pa spang ba/ ming gi tha snyad kyi don gzhan yang grub bar bstan pa'o/ /dang po ni/ de phyir ngar 'dzin rten ni dngos po min/ zhes pa nas/ 'dus pa tsam min dbyibs min ji bzhin no/ zhes tshigs bcad gnyis byung/ bdag rdzas yod mi 'thad pa de'i phyir ngar 'dzin pa'i rten te dmigs pa ni dngos po ste rang bzhin gyis grub pa min te/ rnam par dpyad pa na bdag ni phung po las gzhan te ngo bo tha dad pa min la/ phung po'i ngo bo tshogs pa dang ya gyal gang yang bdag min pa dang/ bdag phung po rnams kyi rten dang bdag 'di la phung po rten du yod pa min zhing; bdag 'di ni phung po de rnams dang ldan pa'ang ngo bo nyid kyis yod pa min no/ /de'i phyir bdag 'di ni phung po rnams la brten nas grub par 'gyur ba'o/ /dper na shing rta rang gi yan lag las don gzhan du 'dod pa min la/ gzhan min te gcig tu grub pa ma yin pa dang/ yan lag de dang ldan pa yang ngo bo nyid kyis grub pa min zhing/ yan lag la phar rten pa rang bzhin gyis grub pa min la/ yan lag dag shing rta der brten pa rang bzhin gyis yod pa min pa dang/ yan lag 'dus pa tsam min la/ yan lag gi dbyibs min pa ji lta ba de bzhin du/ bdag dang phung po gnyis kyang de bzhin du shes par bya'o/ /gnyis pa la gnyis/ dngos kyi don/ rigs pa de gzhan la kha so ba'o/ /dang po la gnyis/ tshogs pa shing @150b rtar 'dod pa dgag pa/ dbyibs tsam shing rtar 'dod pa dgag pa'o/ /dang po ni/ gal te tshogs tsam shing rtar 'gyur na ni/ zhes pa nas/ med pas dbyibs tsam shing rtar rigs pa'ang min/ zhes tshigs bcad gcig byung/ gal te shing rta'i yan lag tshogs tsam shing rtar 'gyur na ni/ shing rta bshig pa'i yan lag sil bur gnas pa tshogs pa la yang shing rta nyid yod par 'gyur ro/ /yan lag gi tshogs pa rang gi cha can yin pa sngar bkag kyang 'dir bkod pa ni skyon gzhan bstan pa yin no/ /skyon gzhan yang yod de/ gang gi phyir yan lag can med na yan lag dag kyang med ba de'i phyir/ yan lag rnams med par 'gyur te/ shing rta la yan lag kyang med par rang gi sde pa de dag gis khas blangs par song ba'i phyir te/ de dag gis yan lag gi tshogs pa min pa'i yan lag can mi 'dod pa gang zhig /shing rta'i yan lag tshogs pa ni shing rta'i yan lag yin gyi/ yan lag can gyi shing rta ma yin pa'i phyir ro/ /yan lag tshogs pa tsam shing rtar mi rigs par ma zad/ yan lag gi dbyibs tsam yang shing rtar rigs pa min no/ /gnyis pa ni/ khyod dbyibs yan lag re re sngar yod 'gyur/ zhes pa nas/ 'dir ni dbyibs su lta zhig ji ltar 'gyur/ zhes tshigs bcad gsum byung/ gal te shing rta'i dbyibs tsam shing rtar 'dod na/ dbyibs de yan lag so so ba'i dbyibs yin nam/ yan lag tshogs pa'i dbyibs yin/ dang po ltar na/ sngar ma bsgrigs pa'i dus kyi dbyibs dang khyad med pa'i dbyibs yin nam/ de dang @151a @#/ /mi 'dra ba'i dbyibs gzhan zhig yin/ dang po ltar na yang mi rigs so/ /ci'i phyir zhe na/ khyod kyi ltar na shing rta'i 'phang lo dang srog shing la sogs pa'i yan lag re re la sngar ma bsgrigs pa'i dus su dbyibs ji ltar yod par gyur pa de bzhin du/ phyis bsgrigs te shing rtar gtogs pa ste grub pa'i dus su'ang snga ma de bzhin du yod pa yin na/ ma bsgrigs pa'i bye bar gyur pa'i yan lag de dag la ji ltar shing rta yod pa min pa de bzhin du/ da ltar yan lag rnams bsgrigs pa'i tshe yang shing rta yod pa ma yin par 'gyur te/ yan lag so so ba'i dbyibs tsam la khyod shing rtar 'jog pa'i phyir dang/ snga phyi'i 'phang lo sogs kyi dbyibs la mi 'dra ba'i khyad par med pa'i phyir ro/ /de lta na phral ba'i tshe shing rta med pa ltar bsgrigs pa'i tshe yang shing rta med par 'gyur ro/ /gnyis pa ltar na/ gal te da lta shing rta nyid du grub pa'i dus 'dir 'phang lo dang srog shing sogs la sngar ma bsgrigs pa'i dus kyi 'phang lo dang srog shing sogs dang mi 'dra ba'i dbyibs tha dad pa yod na/ snga phyi'i yan lag so so'i dbyibs mi mthun pa 'di mig gi shes pas gzung du yod par 'gyur na/ de yang yod pa min te/ de'i phyir yan lag so so'i dbyibs tsam shing rtar yod pa ma yin no/ /yan lag tshogs pa'i dbyibs kyi spyil shing rtar 'jog go snyam na/ de yang mi rigs so/ /gang gi phyir khyod kyi ltar na tshogs ba cang med pa ste rdzas su med pas/ dbyibs de yan lag tshogs pa gdags gzhir byas pa la brten nas 'dogs pa ma yin te/ 'di 'dra ba'i btags yod rnams rdzas yod rte @151b du byas pa kho nar khyod kyis khas blangs shing/ yan lag tshogs pa yang brtags yod du khas blangs pa'i phyir ro/ /de'i phyir gang zhig ci yang ma yin pa ste cung zad kyang rdzas su yod pa ma yin pa de gdags gzhir byas pa la brten nas/ shing rta'i skabs 'dir ni shing rtar 'jog pa'i dbyibs su lta zhig ji ltar 'gyur te mi 'gyur ro/ /gnyis pa ni/ khyod kyi 'di ni ji ltar 'dod de ltar/ zhes pa nas/ de yi phyir yang de dag dbyibs mi rigs/ zhes tshigs bcad gnyis byung/ gal te mi bden pa'i tshogs pa la brten nas mi bden pa'i dbyibs su 'dogs pa mi 'thad pa med do zhe na/ khyod kyis tshogs pa btags yod la brten nas dbyibs btags yod 'jog pa 'di ni ji ltar 'dod pa de ltar tu/ ma rig pa dang sa bon lta bu'i mi bden pa'i rgyu la brten par byas nas/ 'du byed dang myu gu lta bu 'bras bu'i rnam pa mi bden pa'i rang bzhin nam ngo bo can rnams skye bar shes par bya la/ de bzhin du rgyu dang 'bras bu'i ngo bo mi bden pa'i rang bzhin can thams cad kyang skye bar shes par gyis shig /shing rta'i dpe 'dis ni rang gi sde ba mang pos bum pa'i gzugs la sogs pa'i rdul brgyad de ltar 'dab 'byor du gnas pa'i tshogs pa rnams bum pa yin pas/ de la bum pa'i blor 'gyur ro zhes smra ba de yang bsal bas na de ni rigs pa ma yin pa nyid do/ /gzhan yang rang bzhin gyis skye ba med par sngar bshad zin pas gzugs sogs kyang rang bzhin gyis yod pa min no/ /de yi phyir yang bum pa la sogs pa de dag rdzas su grub pa'i gzugs la sogs pa'i dbyibs kyi khyad par du mi rigs so/ /gsum pa ni/ de ni de nyid@152a @#/ /du'am 'jig rten du/ zhes pa nas/ rang gi yan lag brten nas 'dogs pa yin/ zhes tshigs bcad gcig byung/ pha rol po na re/ shing rta 'on cig /nyos shig /chos shig ces 'jig rten na grags pa ltar khas len mi rung bar thal/ shing rta rnam pa bdun du btsal ba na ma rnyed pa'i phyir zer na/ nyes pa 'di ni khyod kho na la 'jug par 'gyur te/ khyod kyis shing rta btags don btsal nas 'jog par 'dod pa gang zhig /btags don btsal ba na shing rta mi rnyed pa'i phyir ro/ /kho bo cag la ni nyes pa de med de/ shing rta de ni de nyid du ste don dam pa'am 'jig rten gyi kun rdzob tu btags don rnam pa bdun gyis btsal ba na 'grub par 'gyur ba ni min mod kyi/ de lta na yang shing rta 'di ni btags don 'tshol ba'i rnam par dpyad pa med par 'jig rten gyi tha snyad nyid las/ 'dir ni rang gi yan lag 'phang lo sogs la brten nas 'dogs pa yin pa'i phyir ro/ /bzhi pa ni/ de nyid yan lag can de cha shas can/ zhes pa nas/ 'jig rten grags pa'i kun rdzob ma brlag cig /ces tshigs bcad gcig byung/ lugs 'dir 'jig rten la grags pa'i sgo nas shing rta'i tha snyad 'dogs pa ches gsal bar grub par ma zad kyi/ shing rta'i ming gi khyad par gzhan dag kyang khas blang bar bya'o/ /de la shing rta de nyid ni rang gi yan lag la ltos nas yan lag can dang/ de rang gi cha shas la ltos nas cha shas can dang/ shing rta de nyid 'phang lo sogs nye bar blang bya nye bar len pa'i bya ba la ltos nas byed pa po zhes 'gro ba la bsnyad pa dang/ rang gi nye @152b bar len pa gzugs la sogs pa'i gdags gzhi la ltos nas skye bo rnams la len pa po nyid du yang 'grub bo/ /rang gi sde ba gzhan rnams kyis yan lag can sogs ming du btags pa tsam du 'jog mi shes pas/ btags don btsal nas yan lag tshogs pa tsam las gzhan du ma rnyed pa'i tshe/ yan lag tshogs pa la sogs pa yan lag can la sogs par 'dod cing/ de dag min pa'i yan lag can la sogs pa med par smra ba ltar na/ sngar bshad pa ltar yan lag can med na yang lag la sogs pa yang med par 'gyur bas/ 'jig rten na grags pa'i kun rdzob shing rta la sogs pa ma brlag pa ste 'jig par ma byed cig ces 'di ni bzlog par bya ba kho na'o/ /drug pa la lnga/ dngos kyi don/ de la rtsod pa spang ba/ shing rta dang bdag gi tha snyad rnams dpe don du sbyar ba/ brten nas btags pa'i bdag khas len pa'i yon tan gzhan bstan pa/ mkhas rmongs kyi 'ching grol gyi gzhi'i bdag ngos gzung ba'o/ /dang po ni/ rnam bdun gyis med gang de ji lta bur/ zhes pa nas/ 'dir de'i grub pa de bzhin 'dod par bya/ zhes tshig bcad gcig byung/ shing rta rang bzhun gyis grub pa bzhig yin na rnam pa bdun gyis btsal ba na nges par bdun po gang rung zhig tu rnyed dgos pa la/ rnal 'byor pas shing rta 'di'i yod pa nyid mi rnyed do/ /de'i tshe rnam pa bdun gyis btsal ba na mi rnyed pa gang de/ ji lta bur na rang bzhin gyis yod ces te med do/ /de'i phyir shing rta rang bzhin gyis yod ces bya ba ni ma rig pa kho nas btags pa yin gyi/ rang bzhin gyis yod pa ma yin no snyam du rnal 'byor pa la nges pa skye bar 'gyur zhing/ tshul @153a @#/ /des de kho na nyid la yang rnal 'byor pa bde blag tu 'jug par 'gyur ro/ /'ang gi sgras kun rdzob mi nyams pa yang bsdu'o/ /de bas na dbu ma pa'i skabs 'dir shing rta de'i tshul ni ma brgags par grub pa de bzhin du 'dod par bya'o/ / gnyis pa ni/ shing rta yod nyid min na de'i tshe/ zhes pa nas/ blo mes yan lag can bsregs yan lag go /zhes tshigs bcad gcig byung/ 'dir smras pa/ rnal 'byor pas sngar ltar dpyad pa na shing rta ma dmigs pa la rag mod/ de'i yan lag tshogs pa tsam zhig dmigs pa ni rang bzhin gyis yod do zhe na/ snam bu tshig pa'i thal ba la snal mtshol ba khyod ni bzhad gang du bya ba bzhig ste/ shing rta rang bzhin gyis yod pa nyid min na/ de'i tshe yan lag gcan ngo bo nyid kyis med pas/ de'i yan lag dag kyang ngo bo nyid kyis med do/ /dper na shing rta yan lag can mes tshig na yan lag rnams kyang med pa ste med 'tshig par 'gyur ba'i dpe de bzhin du/ rang bzhin gyis med par rtogs pa'i blo'i mas yan lag can shing rta rang bzhin gyis grub pa ma lus par bsregs pa na; shing rta'i yan lag rang bzhin gyis grub pa yang nges par bsregs pa'i phyir ro/ /gal te yan lag can med na de'i yan lag med pas khyab pa med de/ shing rta so sor bshig pa na yang 'phang lo la sogs pa dmigs pa'i phyir ro zhe na/ de ni de ltar ma yin te/ so sor gyes pa'i 'phang lo la sogs pa de shing rta'i yan lag ma yin pa'i phyir ro/ /gsum pa ni/ de bzhin 'jig rten grags pas phung po dang/ zhes pa nas/ nyer len las yin 'di ni byed pa'ong min/ zhes tshigs bcad gcig @153b byung; ji ltar shing rta la bshad pa de bzhin du/ 'jig rten la grags pa'i sgo nas nye bar len pa phung po lnga dang/ khams drug dang/ de bzhin du skye mched drug la brten nas bdag kyang shing rta ltar nye bar len pa po nyid du 'dod de/ de dag la brten nas bdag tu btags pa'i phyir ro/ /de bzhin du nye bar len pa phung po ni las yin la/ bdag 'di ni byed pa po'ang yin no zhes rnam par gzhag go /bzhi pa ni/ dngos yod min phyir 'di ni brtan min zhing/ zhes pa nas/ yod min de nyid dang ni gzhan nyid med/ ces tshigs bcad gcig byung/ phung po dag la brten nas btags pa'i bdag 'di ni rang bzhin gyis grub pa'i brtan pa min zhing mi brtan pa nyid min te/ bdag mi brtan par ngo bo nyid kyis yod na ni bdag dang nye bar len pa gnyis ngo bo tha dad pa mi rung bas nye bar len pa nyid bdag tu 'gyur la/ de lta na bdag skad cig so so la ngo bo nyid kyis skye 'jig so sor byed pas snga phyi 'brel med du 'gyur ba dang/ nye bar blad bya rnams de'i nye bar len pa por 'gyur ba'i phyir mi rigs so/ /bdag brtan par ngo bo nyid kyis yod na ni tshe snga ma'i bdag de nyid tshe 'di'i bdag yin par 'gyur ba la/ bdag de gnyis kyi nye bar len pa'i phung bo ngo bo tha dad pa yin pas bdag gcig tu mi rung ste/ nye bar len pa las ngo bo tha dad pa'i bdag med pa'i phyir ro/ /bdag 'di la rtag pa nyid la sogs pa'i bzhi tshan yang rang bzhin gyis yod pa min te/ bdag 'di ni de nyid de ngo bo gcig pa dang gzhan nyid du rang bzhin gyis med pa'i phyir te/ bdag ces bya ba'i dngos po rang bzhin gyis grub pa yod pa min pa'i phyir ro/ /lnga pa ni/ gang la rtag tu 'gro rnams ngar 'dzin blo/ zhes @154a @#/ /pa nas/ ma brtags grags par gti mug las yin no/ zhes tshigs bcad gcig byung/ mi dang yi dwags dang dud 'gro la sogs pa'i 'gro ba rnams la rtag tu dmigs pa'i gzhi gang la dmigs nas ngar 'dzin pa'i blo rab tu 'byung zhing/ gang du bdag 'di dbang byed pa nyid dam/ bdag de dang 'brel ba 'ga' zhig tu 'gyur ba bdag de gdags pa'i rten mig la sogs pa nang gi bdag nyid can dang/ phyi rol gang yin pa bdag de'i bdag gi ba gang yin pa der nga yi bar 'dzin pa'i blo 'byung ba'i bdag de ni ma brtags pa'i grags pa'i ngor gti mug ste mi shes pa las grub pa yin gyi rang gi ngo bos grub pa ni ma yin no/ /gnyis pa ni/ gang phyir byed po med can las med pa/ zhes pa nas/ rnal 'byor pa de rnam par grol bar 'gyur/ zhes tshig bcad gcig byung/ yang ji ltar bdag rang bzhin gyis med na bdag gi pa yang rang bzhin gyis med ce na/ ji ltar byed pa po rdza mkhan med pa can gyi las su bya ba rdza bum med pa de'i phyir bdag gi ba rang bzhin gyis grub pa ni bdag rang bzhin gyis grub pa med par yod pa min no/ /de'i phyir bdag dang bdag gi ba gnyis rang bzhin gyis grub pas stong par lta zhing/ de'i don goms par byed pa na rnal 'byor pa de 'khor ba las rnam par grol bar 'gyur ro/ /'di dag gi skabs su mtha' cung zad dpyad pa la/ kha cig na re/ kha cig bdag lta'i rten du phung po ni/ /lnga char yang 'dod kha cig sems gcig 'dod/ ces pa'i dngos bstan gyi phyogs snga smra ba ni mang bkur ba'i sde ba yin par bshad pa mi 'thad par @154b thal; skabs 'di'i phyogs snga smra ba ni phung po bdag lta'i dmigs par 'dod pa gang zhig /mang bkur sde ba ni phung po las de nyid dang gzhan du brjod du med pa'i bdag bdag lta'i dmigs pa dang gang zag tu 'dod pa'i phyir te/ de ni rang 'dzin gzhir yang 'dod pa yin/ zhes gsungs pa'i phyir zer ba la/ kha cig na re/ mang ba kur bas phung po dang brjod du med pa'i bdag gnyis ka gang zag dang bdag lta'i dmigs yul du 'dod pa yin pas skyon med zer/ kha cig na re/ mang pos bkur pa la/ phung po gang zag tu 'dod pa dang/ brjod du med pa'i bdag gang zag tu 'dod pa gnyis yod pas skyon med zer/ kha cig na re/ kha cig bdag lta'i rten du phung po ni/ zhes sogs kyi skabs nas bstan pa'i phyogs snga smra ba ni mang pos bkur ba'i sde ba yin par 'jug 'grel dang rnam bshad las gsungs pa ni/ mang pos bkur ba las gzhan pa'i sde ba zer rgyu la mang pos bkur pa'i sde ba zhes yi ge nor ba yin zer na/ re zhig 'dod tshul dang po dang bzhi pa gnyis ka mi 'thad de/ kha cig bdag lta'i rten du phung po ni/ zhes sogs kyi phyogs snga smra ba de mang bkur ba'i sde ba yin par 'jug 'grel las gsungs pa ltar/ rje bdag nyid chen po'i gsung rab du mar yang yang gsungs pa'i phyir ro/ /gsum pa yang mi 'thad de/ mang pos bkur ba la brjod du med pa'i bdag 'dod mi 'dod gnyis yod par bshad pa'i khungs mi snang ba'i phyir ro/ /des na lugs gnyis pa ltar 'dod dgos sam snyam mo/ /'di la skyon 'phen pa kha cig na re/ bshad tshul 'di mi 'thad par thal/ mang bkur ba yin na phung po bdag gi mtshan @155a @#/ /gzhir mi 'dod pas khyab pa'i phyir te/ mang bkur pas/ phung po ma bzung bar bdag yan gar bar gzung du mi rung bas gang zag phung po las ngo bo tha dad pa min la/ phung po'i rang bzhin can yang min te/ yin na bdag de skye 'jig dang ldan par 'gyur ba'i phyir zhes 'dod par 'jug 'grel dang rnam bshad gnyis kra gsungs pa'i phyir dang/ phung po bdag yin na de skye 'jig dang ldan pas mi rtag par 'gyur la/ de lta na gang zag rtag mi rtag gang du yang brjod du med ces pa dang 'gal bar 'gyur ba'i phyir dang/ de'i lugs la gang zag mi 'jig pa min na/ rnam 'grel las/ gang gi rang bzhin 'jig med pa/ /de la mkhas rnams rtag ces brjod/ /des na ngo tsha'i lta ba 'di/ /spong la de ni rtag par smos/ zhes 'gog pa 'brel med du 'gyur ba'i phyir ro/ zhes zer na/ gang zag rang gi ldog pa nas brjod du med pa yin kyang/ gang zag gi mtshan gzhir gyur pa'i phung po rnams skye 'jig dang ldan pas mi rtag pa yin zer ram zhib cha gzhan zhig yod dpyad par bya'o/ /yang kha cig na re/ mang pos bkur pa'i sde bas brjod du med pa'i bdag ngar 'dzin gyi dmigs par mi 'dod de/ des ngar 'dzin pa'i 'jig lta'i dmigs pa ni phung po kho nar 'dod pa'i phyir te/ phung po las gzhan bdag grub med pa'i phyir/ /bdag lta'i dmigs ba phung po kho na'o/ zhes pa'i rnam bshad las/ rang gi sde ba dag na re phung bo las ngo bo gzhan pa'i bdag grub pa yod pa'i phyir bdag tu lta ba ste 'jig tshogs la lta ba'i dmigs rnam gnyis kyi nang gi dmigs pa ni phung po kho na yin te/ phung po las ngo bo @155b tha dad pa dang phung po dmigs par 'jog pa gnyis su nges pa las snga ma mi rung ba'i phyir ro/ /de'i phyir bdag ni rang gi phung po tsam yin no zer ro/ /phyogs 'di ni gnas ma bu'i sde ba la sogs pa 'phags pa mang pos bkur ba'i sde ba'i'o/ /zhes gsungs pa'i phyir zer na/ skabs 'dir de ltar bshad pa dang/ de ni rang 'dzin gzhir yang 'dod pa yin/ zhes pa'i skabs su brjod du med pa'i bdag ngar 'dzin pa'i dmigs par bshad pa gnyis mi 'gal ba dang/ snga ma'i skabs su bdag ni phung po tsam yin par bshad pa dang/ phyi ma'i skabs su bdag ni phung po'i rang bzhin can min par bshad pa rnams mi 'gal bar 'dod dgos kyang/ mi 'gal tshul 'di ltar yin zhes blo dman kho bos 'chad par mi sbobs la/ rje'i rjes 'jug rnams kyis zhib cha gsal bor bshad pa yang mi snang bas blo gros kyi mig ldan rnams kyis zhib cha gdon par bya'o/ /kha cig na re/ rtse mo'i 'jig lta nyi shu po gang rung yin na/ 'jig lta rags pa yin pas khyab zer na/ bdag phung po dang ngo bo nyid kyis ldan par lta ba dang phung po la bdag rang bzhin gyis yod par lta ba dang/ bdag la phung po rang bzhin gyis yod par lta ba re re nas chos can/ der thal/ de'i phyir/ rtags grub ste/ de dag rtse mo'i 'jig lta nyi shu po gang rung yin par rnam bshad las gsungs pa'i phyir ro; ;'dod mi nus te/ de dag bden 'dzin yin pa'i phyir te/ de dag gi zhen yul med pa stong nyid yin pa'i phyir te/ rnam lnga'i gtan tshigs kyi rtags zur lnga po gang rung yin na stong nyid ma yin pas ma khyab pa'i phyir ro/ /yang kha cig na re/ @156a @#/ /lhas byin gyi rgyud kyi nga la 'gro ba rigs drug ka yod par thal/ lhas byin gyi rgyud kyi nga'o snyam pa'i blo lhan skyes kyi dmigs par gyur pa'i nga la 'gro ba rigs drug ka yod pa'i phyir na ma khyab/ rtags grub ste/ rtsa she'i TIka chen las/ tshe 'di'i lhas byin gyis gang la dmigs nas nga'o snyam pa skye ba'i dmigs par 'gyur ba'i bdag ni tshe rabs snga ma rnams su yang yod pas/ zhes pa nas/ ma 'ongs pa'i skye ba la yang tshe 'di'i dus kyi gang zag de nyid skye ba phyi mar mi 'gro yang nga'o snyam pa'i dmigs pa nga tsam zhig der yang rjes su 'gro bas/ zhes gsungs pa'i phyir ro/ /'dod mi nus te/ lhas byin gyi rgyud kyi nga de mi yin pa'i phyir te/ mi'i rgyud kyi nga de mi yin pa'i phyir te/ lha'i rgyud kyi nga de lha yin pa sogs 'gro ba gzhan la yang 'dra ba'i phyir ro/ /yang kha cig na re/ lhas byin gyis gang la dmigs nas nga'o snyam pa skye ba'i dmigs par 'gyur ba'i gang zag dang lhas byin dang rgyud gcig pa'i gang zag gnyis don gcig yin par thal ston pa thub pa'i dbang pos gang la dmigs nas nga'o snyam pa'i thugs dgongs skye ba'i gzhir gyur pa'i gang zag dang ston pa thub pa'i dbang po dang rgyud gcig pa'i gang zag gnyis don gcig yin pa'i phyir nam khyab/ rtags sla/ 'dod mi nus te/ lhas byin dang rgyud gcig yin kyang lhas byin gyi mngon shes kyi spyod yul du ma gyur pa'i gang zag du ma yod pa'i phyir snyam ste dpyad par bya'o/ /yang kha cig na re/ tshe 'di'i dus kyi gang zag de skye ba phyi mar mi 'gro bar thal/ TIka chen gyi @156b lung sngar drangs pa de'i phyir/ 'dod mi nus te/ de skye ba phyi mar 'gro ba yod pa'i phyir nam khyab/ yang kha cig /lhas byin dang lhas byin gyi rgyud kyi dge slong gnyis don gcig yin par thal/ lhas byin dang lhas byin gyi rgyud kyi mi gnyis don gcig pa'i phyir na ma khyab/ rtags grub ste/ lhas byin dang lhas byin gyi rgyud kyi bdag gam nga dang de'i rgyud kyi mi yin pa'i nga dang rgyal rigs yin pa'i nga rnams don gcig yin pa'i phyir/ 'dod mi nus te/ bsnyen par ma rdzogs pa'i lhas byin yod pa'i phyir ro/ /yang kha cig na re/ lhas byin dang lhas byin gyi rgyud kyi bdag gnyis don gcig yin kyang/ lhas byin dang lhas byin gyi bdag gnyis don gcig ma yin te/ rtsa she'i TIka chen las/ lhas byin gyi bdag tsam de tshe 'dir gsar du byung ba yin na de ltar 'byung ba de rgyu med pa can du 'gyur te/ de'i sngar lhas byin dang rgyud gcig pa'i bdag ma song ba'i phyir dang/ tshe 'di'i bdag la de byed pa bo bdag gcig sngon du 'gro dgos pa'i phyir ro/ zhes gsungs pa'i phyir zer na ma khyab snyam ste/ lhas byin gyis gang la dmigs nas nga'o snyam pa skye ba'i bdag tsam zer rgyu la/ bar tshig mi mngon par byas nas lhas byin gyi bdag tsam zhes gsungs pa yin pa'i phyir/ gzhan du na sangs 'phags kyi bdag so skye'i rgyud la yod pa dang/ lha'i bdag 'gro ba rigs drug ka'i rgyud la yod pa sogs su 'gyur ba dang/ gang zag yin na 'gro ba rigs drug ka'i bdag rgyud ldan yin pas khyab par thal ba'i phyir ro/ /yang kha cig /lhas byin dang lhas byin gyis gang la dmigs nas @157a @#/ /nga'o snyam pa skye ba'i bdag gnyis ngo bo gcig ma yin par thal/ rang bzhin gyis yod par 'dod pa'i lugs la de gnyis ngo bo gcig yin kyang/ thal 'gyur ba'i lugs la de gnyis ngo bo tha dad yin pa'i phyir te/ de nyid las/ tshe 'di'i lhas byin dang de'i bdag gnyis ngo bo nyid kyis grub pa'i phyogs la so so ba mi 'dod pas ngo bo gcig tu 'dod la/ de lta na gcig tu 'gyur bas tshe 'di'i lhas byin gyi skye shing de dang rgyud gcig pa'i skye ba dang rga shi gnyis la snga phyi yin min dbye bar mi nus so/ zhes gsungs pa'i phyir zer na/ rje gung thang bas/ lung de'i don lhas byin gyi gdags gzhir gyur pa'i nga de thog med nas yod par thal 'gyur bas 'dod kyang gzhan gyis mi 'dod pa'i don yin pa'i phyir/ zhes dang skye ba snga phyi gnyis ka yang zhes pa'i tha snyad thun mong du 'jug cing thal 'gyur ba'i lugs la tha snyad de tsam gyis nga 'jog nus pas/ gnyis ka'i gdags gzhir gyur pa'i nga thun mong ba ming gis btags pa tsam zhig yod kyang/ snga ma'i gdags gzhi'i nga de phyi ma'i gdags gzhi'i ngo yin mi dgos te/ zhes pa nas/ dngos smra rnams lhas byin gyi btags don btsal te gdags gzhi yang nga'i tshogs pa nas rnyed dgos par 'dod pas skye ba gzhan gyi tshogs par rjes su 'gro tshul med cing de'i gnad kyis gdags gzhi thun mong ba yang mi srid do/ zhes gsungs so/ /'di ni mkhas pa chen po'i gsung yin pas bdag lta bus mtha' gcig tu mi 'thad par smra mi nus kyang/ dpyad gzhi che bar snang bas dogs slong tsam bkod na/ @157b lhas byin gyi gdags gzhi de lhas byin gyi tshe rabs snga ma'i dus su med de/ lhas byin gyi tshe rabs snga ma'i bdag de lhas byin gyis nga'o snyam du tha snyad gdags pa'i gzhir gyur pa'i bdag yin kyang/ lhas byin no snyam du tha snyad gdags pa'i gzhir gyur pa'i bdag ma yin pa'i phyir te/ lhas byin no snyam du tha snyad gdags pa'i gzhir gyur pa'i bdag ni lhas byin gyi rgyud du bsdu dgos pa'i phyir te/ TIka chen las/ lhas byin gyis dus snga phyi'i bdag so sor ma phye bar nga'o snyam du 'dzin pa'i dmigs pa'i gzhir gyur pa'i bdag ni thog ma med pa nas zhugs pa'i nga tsam yin pas/ lha la sogs pa'i lus blangs dus kyi 'gro bos so ba'i bdag rnams ni snga ma'i bye brag re'o/ /lhas byin gyis skye ba so sor phye ba'i bdag la nga'o snyam du bzung ba'i bdag ni tshe re re'i bdag phyogs re ba yin no/ yul gyi bdag bzhin du yul can gyi ngar 'dzin yang so sor phye ba dang ma phye ba'i 'dzin stangs can du shes par bya'o/ /zhes gsungs pa'i phyir ro/ /gzhan yang/ lhas byin gyis skye ba snga ma'i bdag de lhas byin gyi gdags gzhir gyur pa'i nga ma yin te/ de la dmigs nas lhas byin no snyam du tha snyad btags pa'i blo lhan skyes med pa'i phyir ro/ /lhas byin gyis nga'o snyam du tha snyad du btags pa'i gzhi yin na lhas byin gyi gdags gzhi yin pas khyab pa med de/ gzhan du na lhas byin kho rang lhas byin gyi gdags gzhir 'gyur ba'i skyon 'byung ba'i phyir te/ lhas byin de lhas byin gyis nga'o snyam du tha snyad btags pa'i gzhi yin pa'i phyir te/ de nyid las/ @158a @#/ /nga'o snyam du tha snyad 'dogs mkhan gyi mi dang/ tha snyad btags pa'i gzhi bdag gnyis khyab mnyam du mi gzung bar mi de bdag de'i cha gcig yin par shes par byos shig /ces gsungs pa'i phyir ro/ / lhas byin gyis nga'o snyam du tha snyad btags pa'i gzhir gyur ba'i bdag de lhas byin gyi gdags gzhi ma yin te/ lhas byin gyi gdags gzhi yin na gang zag ma yin pas khyab pa'i phyir te/ gang zag gi gdags gzhi yin na gang zag ma yin pas khyab pa'i phyir te/ shing rta'i gdags gzhi yin na shing rtam yin pas khyab pa'i phyir ro/ /lhas byin dang de'i bdag ni ngo bo nyid kyis grub pa'i phyogs la so so ba mi 'dod pas ngo bo gcig tu 'dod la/ de lta na gcig tu 'gyur bas/ zhes gsungs pa'i don ni/ lhas byin dang lhas byin gyis gang la dmigs nas nga'o snyam du 'dzin pa'i gzhir gyur pa'i bdag gnyis rang rgyud pa man chad kyi lugs la ngo bo nyid kyis grub pa'i ngo bo gcig tu 'dod la/ thal 'gyur bas de ltar mi 'dod pa'i don yin te/ rang rgyud pa ltar na rang bzhin gyis grub pa'i ngo bo gcig yin kyang ldog pa tha dad pa mi 'gal la/ thal 'gyur ba ltar na rang bzhin gyis grub pa'i ngo bo gcig yin na tha dad gtan med kyi gcig tu 'gyur dgos pas/ de gnyis kyi khyad par phye ba yin gyi/ thal rang gnyis kyis lhas byin dang lhas byin gyis nga'o snyam pa'i gzhir gyur pa'i bdag gnyis ngo bo gcig tu 'dod mi 'dod kyi khyad par yod pa'ang ma yin la/ lhas byin gyi gdags gzhir gyur pa'i nga thog @158b med nas yod par 'dod mi 'dod kyi khyad par yod pa'ang ma yin pa'i phyir/ dang po grub ste/ thal rang gnyis kas lhas byin dang de 'dra'i bdag gnyis ngo bo gcig tu 'dod pa'i phyir te/ de gnyis spyi dang bye brag tu 'dod pa'i phyir ro/ gnyis pa grub ste/ thal rang gnyis kas lhas byin gyi skye ba snga ma'i bdag de lhas byin gyis nga'o snyam du tha snyad gdags pa'i gzhi yin kyang lhas byin du tha snyad gdags pa'i gzhi ma pa yin par 'dod pa mtshungs pa'i phyir ro/ zhes zer na gang lhar 'thad pa ni gzur gnas rnams kyis dpyad par bya'o/ /yang kha cig na re/ mig rna sogs rang gi mtshan nyid kyis grub par 'dzin pa'i 'jig lta yod par thal/ mig rna sogs rang gi mtshan nyid kyis grub pa'i nga yi bar 'dzin pa'i 'jig lta yod pa'i [phyir na ma khyag 'dod mi nus te/ de chos kyi bdag 'dzin yin pa'i phyir/ byas pa la kho na re/ de 'dra ba'i 'jig lta nges mig rna sogs la dmigs par thal/ mig rna sogs rang gi mtshan nyid kyis grub pa'i nga yi bar 'dzin pa'i blo yin pa'i phyir nam khyab/ 'dod mi nus te/ de 'dra ba'i 'jig lta de nga la dmigs pa'i blo yin pa'i phyir te/ mig rna sogs nga yi bar 'dzin pa'i tshad ma de ngal a dmigs pa'i blo yin pa'i phyir te/ tshad ma de nga la dmigs nas mig rna sogs da de'i yin par 'dzin pa'i blo yin pa'i phyir ro/ /yang kha cig na re/ de 'dra ba'i 'jig lta de nga la dmigs pa ma yin par thal/ nga yi ba la dmigs pa yin pa'i phyir na ma khyab/ rtags grub ste/ de 'dra ba'i 'jig lta'i dmigs yul du gyur ba'i gang zag deng dang nga yi ba @159a @#/ /gnyis ka yin pa'i phyir te/ deng yin pa gang zhig/ /da yi ba yin pa'i phyir/ dang po grub ste/ de gang zag yin pa'i phyir dang/ nga dang bdag dang gang zag rnams don gcig yin pa'i phyir/ gnyis pa grub ste; nga yir 'dzin pa'i 'jig ltas nga yi ba la dmigs par rtsa 'jug gi rnam bshad gnyis kar bshad pa'i phyir ro/ /yang kha cig na re/ phung po lnga dang mig rna sogs la dmigs pa'i 'jig lta yod par thal/ de dag la dmigs pa'i gang zag gi bdag 'dzin yod pa'i phyir te/ de yod par rang rgyud pa man chad kyis 'dod pa'i phyir na ma khyab ste/ thal 'gyur ba dang rang sde gzhan gyis gang zag gi bdag 'dzin 'dod tshul mi 'dra ba'i phyir te/ thal 'gyur bas/ chos thams cad bdag med pa'i zhes pa'i bdag ngo bo nyid kyis grub pa la byas nas de med pa ni bdag med pa'i don dang/ bdag de gzhi gang zag gi steng du med pa ni gang zag gi bdag med dang gang zag las gzhan pa'i chos kyi steng du med pa ni chos kyi bdag med du bzhed pas/ bdag de gang zag gi steng du yod par 'dzin pa ni gang zag gi bdag 'dzin dang/ chos kyi steng du yod par 'dzin pa ni chos kyi bdag 'dzin du shugs gyis rtogs nus bar lam rim chen mor gsungs la/ rang sde gzhan gyis/ chos thams cad bdag med pa'o zhes pa'i bdag ni phyi rol btags pa'i nang gi byed pa'i skyes bu la byas nas de med pa ni gang zag gi bdag med pa'i don dang/ skyes bu de yod par 'dzin pa'am/ chos rnams skyes bu @159b de'i dbang bsgyur byar 'dzin pa ni gang zag gi bdag 'dzin phra mor 'dod pa'i rgyu mtshan gyis/ chos thams cad kyi steng gi gang zag gi bdag med phra mo dang chos thams cad la dmigs pa'i gang zag gi bdag 'dzin yod par 'dod pa'i phyir ro/ /thal 'gyur bas de ltar bzhed pa'i khungs yod de/ sangs rgyas bskyangs kyis/ chos thams cad bdag med do zhes gsungs pa la bdag med pa zhes bya ba ni ngo bo nyid med pa'i don te/ bdag ces bya ba'i sgra ni ngo bo nyid kyi tshig yin pa'i phyir ro/ zhes dang/ bzhi brgya pa'i 'grel ba las/ de la bdag ces bya ba ni gang zhig dngos po rnams kyi gzhan la rag ma las pa'i ngo bo rang bzhin te de med pa ni bdag med pa'o/ /de ni chos dang gang zag gi dbye bas gnyis su rtogs te chos kyi bdag med pa dang/ gang zag gi bdag med pa zhes bya ba'o/ zhes gsungs pa'i phyir ro/ /rang sde gzhan gyis gang zag gi bdag med de ltar 'dod pa yin te/ legs bshad snying po las/ gang zag gi bdag med ni/ rang sde theg pa che chung gi grub mtha' smra ba gzhan gyi ltar na gang zag phung po dang mtshan nyid mi mthun pa'i rang skya thub pa'i 'dzas su med pa tsam la 'dod do/ zhes dang/ gzhan yang rang skya thub pa'i rdzas yod kyi bdag de ni phyir rol pas phung po las don gzhan du kun btags pa'i nang gi byed pa'i skyes bu yod par bzung ba'i yul yin la/ zhes gsungs pa'i phyir ro/ /kha cig na re/ gang zag rang skya thub pa'i rdzas su ma grub pa de rang sde gzhan gyis gang zag gi bdag med phra mor 'dod par thal/ gang zag rang skya @160a @#/ /thub pa'i rdzas su grub par 'dzin pa'i blo de de dag gis gang zag gi bdag 'dzin phra mor 'dod pa'i phyir te/ de dag gis gang zag phung po dang mtshan nyid mi mthun pa'i rang skya thub pa'i rdzas yod du 'dzin pa'i blo de gang zag gi bdag 'dzin phra mor 'dod pa'i phyir na ma khyab/ rtags grub te/ de dag gis gang zag phung po dang mtshan nyid mi mthun pa'i rang skye thub pa'i rdzas su med pa de gang zag gi bdag med phra mor 'dod par bshad zin pa'i phyir/ rtsa bar 'dod mi nus te/ de dag gis gang zag rang skya thub pa'i rdzas yod du 'dzin pa'i blo de gang zag gi bdag 'dzin phra mor mi 'dod pa'i phyir te/ gang zag rang skya thub pa'i rdzas yod du 'dzin pa'i blo de blo kun btags ma yin pa'i phyir te/ de la lhan skyes kyang yod pa'i phyir dang/ rang sde gzhan gyis 'dod pa'i gang zag gi bdag 'dzin yin na blo kun brtags yin pas khyab pa'i phyir/ dang po grub ste/ rnam bshad las/ gang zag rang skya thub pa'i rdzas yod du 'dzin pa ni grub mthas blo ma bsgyur ba la yang yod mod kyang/ gang zag phung po dang mtshan nyid mi mthun pa'i gzhan du yod par 'dzin pa ni grub mthas blo ma bsgyur ba la med do/ zhes gsugns pa'i phyir/ gnyis pa grub ste/ legs bshad snying po las/ de la phung po dang mtshan nyid mi mthun pa'i gang zag rang skya thub pa'i rdzas yod du 'dzin pa ni gang zag rkang lag sogs kyi chos las rdzas gzhan du 'dzin pa yin pas grub mthas blo ma bsgyur ba la med de/ zhes gsungs pa'i phyir ro/ / @160b gzhan yang/ rang sde gzhan gyi lugs la/ rang skya thub pa'i rdzas yod du 'dzin pa'i blo de gang zag gi bdag 'dzin ma yin te/ rang skya thub pa'i rdzas yod de yod pa yin pa'i phyir te/ rdzas yod dang rang skya thub pa'i rdzas yod gnyis don gcig yin pa'i phyir dang/ sems tsam pa sogs kyis yid kyi rnam shes dang kun gzhi rnam shes gnyis rang skya thub pa'i rdzas yod du 'dod pa'i phyir te/ rnam bshad las/ 'dir pha rol pos btags yod kyi dngos po rnams rang skya thub pa'i rdzas yod re gdags gzhir yod pa la brten nas 'dogs par khas len zhing/ zhes dang/ lugs de dag gis nyan rang gis gang zag rdzas yod du med par rtogs par 'dod kyang/ rnam shes gnyis po rdzas yod du med par rtogs par mi 'dod pas/ gang zag rang skya thub pa'i rdzas su med par smra ba ni gang zag gi rang gi ldog pa nas 'dod pa yin gyi/ gang zag gi mtshan gzhi rnam shes la de ltar 'dod pa min no/ zhes gsungs pa'i phyir ro/ /byas pa la khon re/ sems tsam pa'i lugs la/ nyon yid gang zag gi bdag 'dzin ma yin par thal/ kun gzhi rnam shes rang skya thub pa'i rdzas yod yin pa'i phyir na ma khyab ste/ nyon yid kyis kun gzhi rnams shes rang skya thub pa'i rdzas yod du 'dzin pa tsam min gyi/ des kun gzhi la dmigs nas mu stegs pas kun btags pa'i nang gi byed pa'i skyes bur 'dzin pa'i phyir ro/ /yang kho na re/ stag los/ rdzas yod bdag smra gnas ma bur nges dang/ /rnam shes @161a @#/ /bdag smra'i bud sems yod pa 'gal/ zhes skyon brjod pa de rje bla ma la 'jug par thal/ rje bdag nyid chen pos kun gzhi rnam shes rang skya thub pa'i rdzas yod du gsungs pa'i phyir zer na shin tu ma khyab ste/ gang zag gi bdag ces pa ni gang zag rang skya thub pa'i rdzas su yod pa tsam la mi byed par/ phung po dang mtshan nyid mi mthun pa'i gang zag rang skya thub pa'i rdzas su yod pa la byed par rje bdag nyid chen pos shin tu gsal bar gsungs pa'i phyir ro/ /yang kha cig na re/ phyi'i yo byad rang gi mtshan nyid kyis grub pa'i nga yi bar 'dzin pa'i 'jig lta med par thal/ de med par stong thun dang yig char bshad pa'i phyir na ma khyab/ 'dod mi nus te/ rnam bshad las/ bdag de gdags pa'i rten mig la sogs pa nang gi bdag nyid can dang/ phyi rol gang yin pa bdag de'i bdag gi ba gang yin pa der nga yi bar 'dzin pa'i blo 'byung ba'i bdag de ni/ ma brtags pa'i grags pa'i dor gti mug ste mi shes pa las grub pa yin gyi rang gi ngo bos grub pa ni ma yin no/ zhes gsungs pa'i phyir/ khyab ste/ so so'i skye bo'i rgyud la phyi rol gyi dngos po nga yi bar 'dzin pa'i blo yod na/ phyi rol gyi dngos po rang gi mtshan nyid kyis grub pa'i nga yi bar 'dzin ba'i blo med pa 'gal ba'i phyir ro/ /yang kha cig na re/ rtse mo'i 'jig lta nyi shu bo gang rung yin na 'jig ltar gas pa yin pas khyab par thal/ yig char de ltar bshad pa'i phyir na ma khyab ste/ thun mong ba'i 'jig lta nyi shu la dgongs pa'i @161b phyir ro/ /'dod mi nus te/ de la 'jig lta phra mo yod par sngar bshad zin pa'i phyir ro/ /gsum pa la gsum/ bum snam sogs kyi dngos po la bsgre ba/ rgyu dang 'bras bu'i dngos po la bsgre ba/ de la gzhan gyi rtsod pa spang pa'o/ dang po ni/ bum pa snam bu re lde dmag dang nags tshal phreng ba ljon shing dang/ zhes pa nas/ de las gzhan du gyur par 'jig rten grags pa'i sgo nas yod pa yin/ zhes tshigs bcad gnyis byung/ gang dag bum pa dang snam bu dang re lde dang/ dmag dang nags tshal dang/ 'phreng ba dang ljon shing/ khang khyim dang shing rta phran dang/ 'gron gnas la sogs dngos po de rnams shing rta'i rnam par dpyad pas rang rang gi btags don rnam pa bdun du btsal ba na yod pa ma yin zhing/ btsal ba de las gzhan du gyur par te ma dpyad par 'jig rten grags pa'i sgo nas yod pa yin no/ shing rta phran la bod kyi bla ma kha cig /sha ka kra ni 'khor lo can te shing rta'i phran ja sig gsum tsam 'gel ba ste/ de yang 'khor lo dang bar yod pa'i khang pa gcig yin zer ro/ zhes rnam bshad las gsungs so/ /de bzhin te de lta bu'i rigs can gyi dngos po gzhan gang dag gi sgo nas skye bo 'dis bsnyad ba ste tha snyad btags pa de rnams kyang ma brtags pa'i grags pa kho nar yod par rtogs par bya ste/ gang gi phyir na thub pa'i dbang po de ni 'jig rten dang lhan cig 'jig rten la mi mthun pa'i rtsod pa mi mdzad par gsungs pa'i phyir te/ mdo las/ 'jig rten nga dang lhan cig @162a @#/ /rtsod kyi nga ni 'jig rten dang mi rtsod do/ zhes 'jig rten gyi tha snyad gnod med kyis yod par bzhag pa rnams thub pa'i kyang zhal gyis bzhes par gsungs pas na/ 'jig rten gyi grags pa la gnod par mi bya'o/ /gang yang 'jig rten pa rnams dngos po gang dag gi sgo nas ji ltar tha snyad 'dogs zhe na/ de bstan pa'i phyir bshad pa/ ji ltar bum pa yan lag can dang gyo mo la sogs pa ni de'i yan lag dang/ bum pa yon tan can dang me ris sngo ba sangs la sogs pa ni de'i yon tan dang/ 'dod chags kyi rten gang zag ni chags pa dang zag bcas kyi yul la sred pa ni 'dod chags dang/ bum pa ni mtshan gzhi dang lto ba ldir ba la sogs pa ni mtshan nyid dang/ me ni sreg par byed pa dang bud shin ni bsreg par bya ba la sogs pa ni/ yan lag la brten nas yan lag can dang/ yan lag can la brten nas yang lag tu 'dogs te/ de bzhin du med dang bud shing gi bar du sbyar bar bya'o/ 'di rnams kyi btags don rnam par bdun du btsal ba na med kyang yod par 'jog nus pa ni 'jig rten gyi tha snyad kyis yin gyi/ de kho na nyid la dpyod pa'i rigs pa'i dpyad pa mi gzhug go/ /gnyis pa ni/ gal te rgyu yis bskyed par bya skyed de lta na de rgyu yin zhing/ zhes pa nas/ bdag la skyon du mi 'gyur 'jig rten pa yi dngos po rnams kyang yod/ ces tshigs bcad gsum byung/ yang lag la sogs par ma zad kyi rgyu 'bras gnyis kyang phan tshun ltos nas grub po zhes bshad pa/ @162b gang gi phyir na gal te rgyu yis bskyed par bya ba 'bras bu skyed pa de lta na skyed byed de rgyu yin zhing/ gal te 'bras bu mi skyed na ni skyed pa de med pas 'bras bu de rgyu med pa can du 'gyur ro/ /'bras bu yang rgyu yod par 'gyur na de las skye bar 'gyur ba de'i phyir; rgyu 'bras gnyis kyang phan tshun ltos nas yod pa yin gyi rang bzhin gyis yod pa min no/ /ci ste rgyu 'bras rang gi ngo bos grub par sems na/ kye rgyu'am 'bras bu gang la brten nas de gnyis gang zhig tu 'gyur ba gang zhig ste de gnyis las sngar rgyu gang zhig gam 'bras bu gang zhig 'gyur ba de smros shig /de la rang bzhin gyis grub pa la rgyu snga ba mi rigs te/ rgyu'i dus su rgyu'i ltos sa 'bras bu de grub dgos pas so/ /'bras bu snga ba yang mi rigs te rgyu med du 'gyur ba'i phyir ro/ /gal te khyod kyi ltar na rgyu yis 'bras bu dang phrad nas 'bras bu skyed par byed na/ de'i tshe rgyu 'bras de dag nus pa gcig tu 'gyur bas skyed byed dang 'bras bu tha dad med par 'gyur zhing/ ci ste so sor te ma phrad par skyed na ni rgyu 'di de'i rgyu min pa rnams dang khyad par med par 'gyur te/ rang bzhin gyis grub pa'i so so ba rnams 'brel med don gzhan du 'gyur pa'i phyir ro/ /khyod la rgyu 'bras phrad kyi rtog pa gnyis po 'di dag spangs nas te de ma gtogs pa'i rtog pa gsum pa gzhan yang yod par 'gyur pa ma yin pas/ rang bzhin gyis grub pa'i rgyus 'bras bu mi skyed pa kho na'o/ /de'i phyir ci ste khyod kyi ltar rang bzhin gyis grub pa'i rgyu yis 'bras bu skyed par mi byed pa de'i phyir 'bras bu zhes bya ba rang bzhin gyis @163a @#/ /yod pa min la/ 'bras bu dang bral ba ste med par rgyu ni rgyur 'jog pa'i rgyu mtshan med pa can du 'gyur na/ 'di ni yod pa'ang min te/ de'i phyir rgyu 'bras gnyis rang bzhin gyis yod pa min no/ /'on khyod kyi ltar na ji ltar yin zhe na/ gang gi phyir gang gi ltar na rgyu 'bras 'di dag gnyis char yang sgyur ma dang 'dra bar rang bzhin gyis ma skyes shing/ tha snyad pa'i rnam par rtog pa tsam gyis bzhag pa de'i phyir bdag la ji skad bshad pa'i skyon du mi 'gyur zhing/ 'jig rten la grags pa'i dngos bo ma brtags par grub ba rgyu 'bras dang shing rta la sogs pa rnams kyang yod pas thams cad 'grub po/ /gsum pa la gnyis/ rgyu 'bras rang bzhin gyis grub pa 'gog pa la skyon mtshungs pa'i rtsod pa/ rang la skyon mi mtshungs pa'i lan bstan pa'o/ /dang po ni/ sun 'byin 'dis sun dbyung bya phrad nas 'byin nas phrad par/ zhes pa nas/ khyod la rang phyogs med pas sun ci phyin du rgol ba'ang yin/ zhes tshigs bcad gnyis byung/ pha rol po na re/ khyod kyi sun 'byin pa 'dis sun dbyung bya phrad nas sun 'byin nam ma phrad par sun 'byin pa yin zhes pa'i nyes pa 'di ni khyod lAng 'gyur ba ma yin nam ste yin te/ gal te phrad nas sun 'byin na gcig tu 'gyur zhing/ ma phrad par sun 'byin na phrad pa thams cad kyis sun 'byin par 'gyur la/ de gnyis las gzhan ba'i brtag pa gsum pa yang med de/ gang gi tshe sun 'byin ltar snang de @163b skad smra zhing rang gi phyogs kho na rnam par 'joms pa de'i tshe khyed kyis gzhan gyi lugs sun dbyung bar bya ba sun 'byin par nus pa ma yin no/ /gzhan yang gang gi phyir na rgol ba rang gi tshig la'ang thal ba mtshungs pa'i ltag chod de sun 'byin ltar snang gis/ rigs pa med par dngos po mtha' dag la skur ba 'debs pa de'i phyir khyod ni skye bo dam pas bzhed pa ste 'dod par mi 'gyur ro/ /ji ltar zhe na/ ma phrad par skyed na ma phrad pa thams cad kyis skyed dgos zhes pa 'di la rigs pa ci zhig yod/ khab long gis ma phrad par lcags 'dren par byed kyi gzhan mi 'dren la/ mig gis ma phrad par gzugs mthong gi gzhan mi mthong ba bzhin du/ rgyus kyang ma phrad par rang 'bras skyed par byed kyi gzhan mi skyed do/ gzhan yang gang gi phyir khyod ni sun ci phyin du rgol ba nyid du yang 'gyur te/ rang gi phyogs bzhag pa dang bral zhing gzhan phyogs sel ba tsam la zhugs pa'i rgol ba ni sun ci phyin du rgol ba pa zhes bya na/ khyod kyang de ltar gnas pa'i phyir ro zhe na/ gnyis pa la bzhi/ rang gi phyogs la sun 'byin dang sgrub 'thad tshul/ gzhan gyi thal ba mi mtshungs pa'i rgyu mtshan gsal bar bshad pa/ rang bzhin med pa sgrub nus pa bzhin du gzhan gyis bzlog te sgrub mi nus pa/ 'dir ma bshad pa'i sun 'byin lhag ma shes par byed tshul lo/ /dang po la gnyis/ tha snyad du gzhan phyogs sun 'byin pa khas len tshul dang/ rang gi phyogs sgrub pa khas len tshul lo/ /dang po ni/ sun 'byin @164a @#/ /pas sun dbyud byam phrad sun ni 'byin byed dam/ zhes pa nas/ yod pa min pas thal bar 'gyur ba 'di ni srid ma yin/ zhes tshigs bcad gcig byung/ sun 'byin pas sun dbyud bya phrad nas sun 'byin par byed dam/ 'on tem phrad par sun 'byin par byed pa yin zhes sngar smras zin pa'i nyes pa ni/ 'dir rgol ba gang la phyogs yod pa ste rang bzhin gyis grub pa'i don dam 'cha' bde la skyon du 'gyur gyi/ bdag la rang bzhin gyis grub pa'i don dam 'cha' ba'i phyogs 'di ni yod pa min pas/ skyon du thal bar 'gyur ba 'di ni srid pa ma yin te/ de dkyis sun dbyung bya dang sun 'byin pa gnyis ka rang bzhin gyis mgrub par khas len pa'i phyir ro/ /gnyis pa ni/ ji ltar khyod kyi nyi ma'i dkyil 'khor la yod khyad par rnams/ zhes pa nas/ 'thad pa dang bral las kyang bsgrub bya rtogs zhes shes par bya/ zhes tshigs bcad gnyis byung/ gzhan yang ji ltar te dper na khyod kyis gzugs brnyan mthong ba la yang brten nas/ nyi ma'i dkyil 'khor dang byad bzhin la yod pa'i khyad par rnams nyi mgzas bzung ba la sogs pa rnams kyi cho mthong bar 'gyur la/ nyi ma dang byad bzhin dang de dag gi gzugs brnyan gnyis rnam par phrad pa dang ma phrad par skye zhes btags don 'tshol ba'i tshul gyis dpyad pa na skye bar mi rigs mod kyi/ 'on kyang nyi ma dang byad bzhin la brten nas tha snyad kyi dbang gis bzhag pa tsam gyi gzugs brnyan zhig 'byung bar 'gyur zhing/ des kyang 'dod pa'i don nges pa @164b dang gzugs brnyan mi bden bzhin du 'da rang gi byad bzhin mdzes par bsgrub par bya ba'i phyir/ gzugs brnyan de la ni nus pa yod pa ji lta ba de bzhin du/ 'dir yang gdong ba dang 'dra ba'i shes rab kyi dri ma ma rig pa sbyang bar bya ba la nus pa mthong bar 'gyur ba'i gtan tshigs rten 'brel dang gcig du bral sogs las bsgrub bya rang bzhin gyis med pa rtogs par shes par bya'o/ /de yang rang bzhin gyis yod par sgrub pa'i 'thad pa dang bral ba'i gtan tshigs so/ /kyang gi sgras ni 'thad pa dang bral ba'i sun 'byin gyis kyang sun dbyung bya sun 'byin nus bar shes par bya'o/ /gnyis pa ni/ gal te rang gi bsgrub bya go byed gtan tshigs dngos grub dang/ zhes pa nas/ de yang yod ba min pas khyod kyi yi chad 'ba' zhig yin/ zhes tshigs bcad gcig byung/ gal te rang gi bsgrub bya go byed gtan tshigs kyi dngos po ste ngo bo dang dngos su go bar bya ba nyid du 'gyur ba bsgrub bya'i ngo bo rang bzhin gyis grub pa yod par 'gyur na/ bsgrub bya dang sgrub byed phrad pa la sogs par bsgrub pa dang sun 'byin pa'i rigs pa nye bar sbyor bar 'gyur ba zhig na/ rang bzhin gyis grub pa de yang yod pa ma yin pas/ ma dag pa'i phyogs la bkod pa'i skyon dag pa'i phyogs la khyed kyis bkod ba 'di ni kho bo cag la don med par yi chad pa ste yid 'byung ba 'ba' zhig yin par rtogs so/ /gsum pa ni/ dngos rnams mtha' dag dngos po med par rtogs su gzhug par ni/ zhes pa nas/ rtog ge ngan pa'i dra bas 'jig rten ci ste 'dir bcol @165a @#/ /byed; ces tshigs bcad gcig byung/ gzhan yang ji ltar sgyu ma dang rmi lam sogs phyi rgol rang la grub pa'i dpe kho nas dngos po rnams mtha' dag dngos po ste rang bzhin gyis med par rtogs su gzhug par nus par ches sla ba ji lta ba de ltar/ khyod kyis gzhan dbu ma pa dag la dngos po rnams rang bzhin gyis grub par khong du chud par bde blag tu nus pa ma yin te/ gnyis ka la bden par grags pa'i dpe med pa'i phyir ro/ /de'i phyir 'jig rten la gnod pa bya ba'i phyir 'dir su zhig gis khyod bcol ba ste sbad cing/ khyod 'jig rten pa rnams rang gi nyon mongs dar gyi srin bu ltar rang gi rnam rtog ngan pa'i sbubs kyis gtums pa'i steng du/ rtog ge ngan pa'i srad bu bres pa'i dra bas te rgya shin tu sran te ma kun nas 'dzugs par ci ste byed de byed par mi rigs so/ /bzhi pa ni/ sun 'byin lhag ma gong du bstan pa yang ni shes byas nas/ zhes pa nas/ de skad sngar bshad lhag ma phyogs 'di nyid kyis rtogs par bya/ zhes tshigs bcad gcig byung/ sa bon la brten nas myu gu skye ba lta bu'i rten cing 'brel bar 'byung ba dang/ phung po la brten nas gang zag gdags pa lta bu'i brten nas btags pa rnam par gzhag ba byas pa'i skabs su/ dngos por smra ba'i phyogs la sun 'byin gang bshad pa'i lhag ma rgyus 'bras bu phrad nas sam ma phrad par skyed ces sun 'byin gong du bstan pa yang shes par byas nas/ rgyus 'bras bu phrad pa la sogs par brtags te bkag pa'i phyogs kyi lan brjod @165b pa'i ched du/ pha rol pos sun 'byin la phrad ma phrad kyi brtag pa gang gis smras pa de la rtsod pa'i skabs 'dir de'i brtag par rang la mi mtshungs pa'i lan gyi sun 'byin ba gtang bar bya ste/ sngar bstan pa de ni mtshon ba tsam du shes par bya'o/ dbu ma pa la sun ci phyin du rgol ba yang yod pa min te/ sun ci phyin du rgol ba ni rang gi phyogs bzhag na skyon byung gis dogs nas/ gzhan gyi phyogs sun ci phyin byed pa yin la/ dbu ma pas rang phyogs bzhag pa dang gzhan phyogs bsal ba gnyis ka don dam du med mnyam dang/ tha snyad du yod mnyam du 'dod pa'i phyir ro/ /de skad de de ltar sngar bshad pa'i sun 'byin pa'i lhag ma ni/ de ma thag tu bshad pa'i phyogs 'di nyid kyis rtogs par bya'o/ /nyon mongs skyon rnams ma lus 'jig tshogs la/ lta las byung bar zhes bya ba la sogs pa nas 'di yan chad kyis ni gang zag gi bdag med pa bstan par gsungs so/ /gsum ba la gnyis/ stong pa nyid kyi dbye ba mdor bstan pa/ phye ba so so'i don rgyas par bshad pa'o/ /dang po ni/ bdag med 'di ni 'gro ba rnam dgrol phyir/ zhes pa nas/ theg chen du yang bzhed pa yin/ zhes tshigs bcad gnyis byung/ chos rnams rang bzhin gyis grub pa med pa'i bdag med 'di ni/ bcom ldan 'das kyis gang zag gi bdag med dang chos kyi bdag med pa'i dbye ba rnam pa gnyis gsungs so/ /dgos ba gang gi phyir bstan zhe na nyan rang gi 'gro ba rnams 'khor ba las rnam par grol bar bya ba'i phyir gang zag gi bdag med bstan la/ byang @166a @#/ /sems kyi 'gro ba rnams rnam mkhyen thob bas grol bar bya ba'i bdag med gnyis ka bstan no/ /de ltar bdag med pa gnyis po 'di nyid ni bcom ldan 'das kyis slar yang gdul bya rnams la de dag gi bsam pa sna tshogs pa'i dor rnam pa mang po'i sbros pa dang bcas par phye ste gsungs so/ /ji ltar zhe na/ rgyal ba'i yum las/ stong pa nyid bcu drug gi dbye ba bshad nas/ slar yang mdor bsdus te bzhir bshad cing/ de dag ni theg chen du yang bzhed pa ste bshad pa yin te/ theg chen nyer gcig gi nang gi stong nyid kyi theg chen zhes bshad pa de yin no/ /de ltar na bsdus pa'i dbye ba gnyis dang/ 'bring po'i dbye ba bzhi dang/ rgyas pa'i dbye ba bcu drug tu gsungs so/ / gnyis pa la gnyis/ stong nyid bcu drug tu phye brgyas par bshad pa/ stong nyid bzhir phye ba bshad pa'o/ /dang po la bzhi/ nang stong pa nyid la sogs pa bzhi bshad pa/ chen po stong pa nyid la sogs pa bzhi bshad pa/ mtha' las 'das pa stong pa nyid la sogs pa bzhi bshad pa/ chos thams cad stong pa nyid la sogs pa bzhi bshad pa'o/ /dang po la gnyis/ nang stong pa nyid bshad pa dang/ stong nyid lhag ma gsum bshad pa'o/ /dang bo ni/ gang phyir de yi rang bzhin de/ zhes pa nas/ de ni nang stong nyid du 'dod/ ces rkang pas lhag pa'i tshigs bcad gnyis byung/ nang gi chos mig la sogs pa drug po rang bzhin gyis grub pa med pa nyid gang yin pa de ni nang stong pa nyid du 'dod do/ /de yang @166b mig ni mig rang gi ngo bo nyid gyis grub bas stong ste/ mig de'i rang bzhin ni rang gi ngo bo nyid kyis grub pas stong ba de yin pa'i phyir ro/ mig la bshad pa de bzhin du rna ba dang sna dang lce dang lus dang yid kyang bsnyad par bya'o/ /de ltar stong pa'i rgyu mtshan gang gi phyir na mig sogs de rnams ni don dam par ther zug tu gnas pa ste rtag pa ma yin pa dang/ 'jig pa ste mi rtag pa ma yin ba nyid kyi phyir ro/ gnyis pa ni/ gang phyir de yi rang bzhin te/ zhes pa nas/ 'dzin pa bzlog phyir gsungs pa yin/ zhes tshigs bcad bzhi byung/ rgyud kyis ma bsdus pa'i gzugs la sogs ba'i yul drug rang bzhin gyis grub bas stong pa'i rang bzhin med pa nyid ni phyi rol gyi stong pa nyid du 'dod do/ phyi'i gzugs ni gzugs kyi ngo bo nyid kyis grub bas stong pa ni/ gnag gi phyir gzugs de'i rang bzhin ni de yin pa'i phyir ro/ /sgra dang dri dang ro dang reg bya dang chos rnams nyid kyang de bzhin du shes par bya'o/ /shes rgyad kyis bsdus pa'i dbang rten khog pa lta bu ni shes rgyud kyis bsdus shing dbang pos ma bsdus pas na phyi nang gnyis char yin la/ de rang gi ngo bo nyid kyis grub pa'i rang bzhin med pa nyid ni phyi nang gi stong ba nyid yin no/ /phyi nang gi chos rnams rang bzhin gyis grub pa med pa nyid ni/ mkhas pas stong pa nyid ces bsnyad do; /stong nyid de yang stong nyid kyi rang gi ngo bo nyid kyis grub pas stong par 'dod pa yin no/ /stong gzhi stong nyid ces bya ba'i stong nyid gang yin pa de ni stong pa nyid stong pa nyid du 'dod pa ste/ stong nyid la dngos po ste bden par 'dzin pa'i blo can gyi bden @167a @#/ /par 'dzin pa bzlog par bya ba'i phyir rgyal ba'i yum las gsungs pa yin no/ /gnyis pa ni/ sems can snod kyi 'jig rten ni/ zhes pa nas/ de ni 'dus ma byas stong nyid/ ces tshigs bcad drug byung/ shar la sogs pa'i phyogs las logs shig tu snod bcud gnyis med pas/ /sems can dang snod kyi 'jig rten ni ma lus pa la khyab par byed pa nyid yin pa'i phyir dang/ phyogs tshad med pa'i dpes byams sogs tshad med bzhi sgom pa la yang mu mtha' ste tshad med par bzhag ba'i phyogs bcu ni chen po nyid do/ /shar la sogs pa 'di dag bcu char phyogs rnams kyi ngo bo nyid gyis grub pas stong pa nyid gang yin pa de ni chen po stong pa nyid yin te phyogs rnams chen por rang bzhin gyis grub par 'dzin pa bzlog pa'i phyir gsungs so/ /don dam zhes pa'i don ni mya ngan las 'das pa chos kyi sku yin te/ myad 'das de ni thob par bya dgos pa mchog yin pas so/ /chos sku de ni de'i rang ngo bo nyid kyis grub pas stong pa nyid gang yin pa de ni don dam pa stong pa nyid de/ de yang myang 'das chos sku la dngos po ste bden par 'dzin pa'i blo can gyi bden par 'dzin pa bzlog par bya ba'i phyir don dam mkhyen pa sangs rgyas kyis don dam pa stong pa nyid ni bstan par mdzad do/ /rgyu rkyen las byung ba ste skyes pa'i phyir khams gsum bo ni 'dus byas yin par nges bar bsnyad do/ khams gsum po de ni de'i rang bzhin gyis grub pas stong pa nyid @167b gang yin pa de ni 'dus byas stong pa nyid du gsungs so/ /chos gang la skye ba dang mi rtag pa ste 'jig pa dang gnas pa las gzhan du 'gyur ba de dag med pa ni 'dus ma byas so/ /de ni de'i rang bzhin gyis grub pas stong pa nyid gang yin pa ni 'dus ma byas stong pa nyid du gsungs so/ /gsum ba ni/ gang la mtha' ni yod min pa/ zhes pa nas/ de ni rang bzhin stong pa nyid/ ces tshigs bcad bdun byung/ gzhi gang la mthar 'dzin du ltung ba'i rtag chad kyi mtha' ni yod pa min pa de ni 'dir mtha' las 'das par brjod do/ /tha' bral den i mtha' bral de'i rang bzhin gyis grub ba kho nas stong pa nyid de ni mtha' las 'das ba stong ba nyid du bsnyad do/ /'di yan chad du 0m byung la 'di nas byung zhes pa'i thog ma ste dang bo dang/ 'di phyin chad du mi 'byung zhes pa'i tha ma'i mtha' de ngag med pas 'khor ba ni thog ma dang tha ma med par brjod do/ /'gro 'od rang bzhin gyis grub pa dang bral ba'i phyir rmi lam lta bu'i srid pa 'di srid pa de'i rang bzhin gyis grub pas dben pa nyid gang yin pa de ni thog ma dang tha ma med pa'i stong pa nyid do zhes bstan bcos chen po rgyal ba'i yum las ni nges par bsnyad do/ /dor ba zhes bya ba ni 'thor ba dang 'bo re ba la ni nges bar brjod la/ dor pa de med pa ni phar la gtong ba med pa ste/ rang gi ngo bo 'ga' dang dus 'gar yang dor du med pa ste dor du mi rung ba theg chen gang yin pa'o/ /dor ba med pa ni dor ba med bde nyid kyi rnag bzhin gyis grub pas stong pa de nyid kyi stong pa nyid gang yin pa de ni dor ba med pa @168a @#/ /stong pa nyid ces bya bar brjod de/ stong nyid de dor ba med ba'i rang bzhin yin pa de'i phyir na'o/ /'dus byas la sogs ba rnams kyi ngo bo nyid chos nyid ni rang bzhin nyid du bsnyad cing brjod pa ste/ gang gi phyir na 'dus byas la sogs pa rnams kyi ngo bo chos nyid ni slob ma nyan thos dang/ rang sangs rgyas dang/ rgyal sras dang de bzhin gshegs pa rnams kyis ma mdzad cing de gsal bar byed pa yin la/ gdod ma nas de dag gi gshis su gnas pa de'i phyir ro/ /rang bzhin de nyid de nyid kyi ngo bo nyid kyis grub pas stong pa nyid gang yin pa de ni rang bzhin stong pa nyid de/ /den dI stong pa nyid stong pa nyid kyi skabs su yang brjod mod kyang/ snga mar ni stong nyid de rigs shes kyis grub pas bden par grub bam snyam ba bsal ba'i phyir yin la/ 'dir ni sus kyang ma byas par gshis su grub ba'i rang bzhin yin na bden par grub bam snyam pa bsal ba'i phyir gsungs pas mi zlos so/ /bzhi pa la gsum/ chos thams cad stong ba nyid bshad pa/ rang gi mtshan nyid stong ba nyid bshad pa mi dmigs pa dang dngos po med pa'i ngo bo nyid stong ba nyid bshad pa'o/ /dang po ni/ khams bco brgyad dang reg drug dang/ zhes pa nas/ de dag gis dben stong nyid gang/ zhes tshigs bcad phyed dang gnyis byung/ chos thams cad ni khams bco brgyad dang/ reg pa drug dang de las byung ba'i tshor ba drug dang/ gzugs can dang gzugs can ma yin pa gnyis dang/ de bzhin du 'dus byas dang 'dus ma byas kyi chos rnams so/ /chos de dag thams cad ni de dag gi ngo bo nyid kyis grub pas dben pa'i @168b stong pa nyid gang yin pa de ni chos thams cad kyi stong pa nyid do/ gnyis pa la gsum/ mdor bstan pa/ rgyas par bshad pa/ don bsdu ba'o/ /dang po ni/ gzugs rung la sogs dngos med gang/ /de ni rang mtshan stong pa nyid/ ces byung/ gzugs phyung gi mtshan nyid ni gzugs su rung ba dang la sogs pas bsdus pa rnam byang gi bar gyi kun byang gi chos rnams kyi rnag rnag gi mtshan nyid dngos po ste rang gi ngo bo nyid kyis grub pa med pa gnag yin pa den i rnag gi mtshan nyid stong ba nyid do/ /gnyis pa la gsum/ gzhi'i chos dang/ lam gyi chos dang/ 'bras bu'i chos kyi mtshan nyid do/ /dang po ni/ gzugs ni gzugs rung mtshan nyid can/ zhes pa nas/ de ni 'du 'phro mtshan nyid do/ zhes tshigs bcad gsum byung/ gzugs ni gzugs su rung ba'i mtshan nyid can no/ /rang gi mtshan nyid 'di rnams don ldog yin pa'i nges pa med par rang rang gi rang bzhin mtshon pa'i gtso bo smos pa'o/ zhes rnam bshad las gsungs so/ /tshor ba ni bde sdug btang snyoms kyi myong ba'i bdag nyid can no/ 'du shes ni phyi'i mtshan ma sdo ser sogs dang/ nang gi mtshan ma bde sdug sogs kyi khyad par 'dzin pa ste/ mtshan ma ni yul gyi sbu ris so/ /'du byed ni 'dus byas mngon bar 'du byed ba ste/ phung bo gzhan bzhi las gzhan pa'o/ /gzugs sgra la sogs pa'i yul so so la so sor rnam par rig pa ni/ rnam shes kyi rang gi mtshan nyid do/ /phung po'i rang gi mtshan nyid sdug bsngal dang/ khams rnams kyi bdag nyid de rang gi rang gi mtshan nyid ni sbrul gdug pas gzhan la bzung nas gnod pa skyed pa @169a @#/ /dang 'dra ba sems can rnams 'khor bar 'dzin pa'o/ /skye mched rnams ni sangs rgyas kyis sdug bsngal 'byung zhing skye ba'i sgor gyur pa nyid du gsungs so/ /de gsum ni 'khor ba'i phung khams skye mched la dgongs pa'o/ /rten cing 'brel bar 'byung ba gang yin pa de'i rang gi mtshan nyid ni rgyu rken gyi 'du 'phrod kyis rab tu phye ba'o/ /gnyis ba ni/ gtong ba sbyin pa'i pha rol phyin/ zhes pa nas/ mtshan nyid rnam par grol byed pa'o/ zhes tshigs bcad lnga byung/ sbyin pa'i pha rol tu phyin pa'i mtshan nyid ni/ lus longs sbyod dge rtsa yongs su gtong ba'i sems pa'o/ /tshul khrims kyi mtshan nyid ni nyon mongs kyi gdung ba las de med pa'i bsil ba thob ba'o/ bzod pa'i mtshan nyid ni khro ba med ba ste de la sems kyi bsran 'dzugs nus pa'o/ brtson 'grus kyi mtshan nyid ni kha nam tho ba med pa'i dge ba yongs su 'dzin pa la spro ba nyid do/ /bsam gtan gyi mtshan nyid ni dge ba'i chos thams cad sdud pa'i phyir du dge ba'i dmigs pa la sems rtse gcig tu gnas pa'i mtshan nyid can no/ /shes rab kyi mtshan nyid ni chos 'ga' la yang chas pa ste bden zhen med pa ste 'gog par byed pa'o/ /de ltar na pha rol tu phyin pa drug po rnams kyi mtshan nyid ni sngar bshad pa 'di dag yin par mdo las brjod do/ /bsam gtan bzhi rnams dang/ tshad med bzhi dang/ de bzhin du snga ma gnyis las gzhan gang gzugs med pa'i snyoms par 'jug pa bzhi bo 'di dag yang dag mkhyen pa'i sangs rgyas kyis mi 'khrugs ba khro ba med pa'i mtshan nyid can @169b du gsungs te/ de rnams ni khro ba sbangs pas thob pa'i phyir ro/ /byang chub kyi phyogs kyi chos sum cu rtsa bdun gyi mtshan nyid ni/ thar par nges par 'byung bar byed pa'i/ /rnam par thar pa'i sgo stong pa nyid kyi mtshan nyid ni bden 'dzin gyi dmigs gtad kyi rtog pa'i drims ma sbags pa'i phyir rnam par dben pa'i mtshan nyid can no/ /rnam par thar pa'i sgo mtshan ma med pa ni mtshan ma ma dmigs pa'i sgo nas zhi ba'i mtshan nyid can no/ /rnam par thar ba'i sgo gsum pa smon pa med pa'i mtshan nyid ni/ 'du byed sdug bsngal gyi bdag nyid can rnams la sdug bsngal du lta zhing/ shes rab kyis 'du byed kyi yin lugs la lta ba na/ srid pa'i phun tshogs la mi smon zhing/ thar pa la yang bden par 'dzin pa'i sgo nas smon ba med pa'i phyir na/ sdug bsngal dang gti mug med pa'i mtshan nyid can no/ rnam par thar pa brgyad po rnams kyi mtshan nyid ni/ snyoms 'jug gi sgrib pa las rnam par grol bar byed pa'o/ /gsum pa ni/ stobs rnams shin tu rnam bar ni/ zhes pa nas/ mngon sum zhes byar mi 'dod do/ zhes tshigs bcad lnga byung/ stobs bcu po rnams ni yul rnams shin tu rnam par gtan la 'bebs pa'i rang bzhin nam mtshan nyid can du gsungs so/ /skyob pa'i mi 'jigs pa bzhi po rnams ni/ rgol bsus kyang gzhan du bya bar mi nus pas na shin tu brtan pa'i ngo bo nyid de mtshan nyid can yin no/ /so so yang dag par rig pa bzhi po rnams ni sbobs pa la sogs pa chad pa ste gtugs pa med pa'i mtshan nyid can no/ /'gro ba rnams la phan pa dang bde ba nye bar@170a @#/ /sgrub pa ni byams pa chen po zhes bya ba'i mtshan nyid dang/ sdug bsngal can gyi sems can rnams yongs su skyob pa ni thugs rje chen po'i mtshan nyid do/ dga' ba chen po ni rab tu ste mchog tu dga' ba'i mtshan nyid can no/ /btang snyoms chen po ni chags sngang la sogs pa dang ma 'dres pa ste de dag dang bral ba'i mtshan nyid can du shes par bya'o/ /sangs rgyas kyi chos ma 'dres pa bcu dang brgyad du gang 'dod pa de dag gzhan gyis mi 'phrog pa'i rang gi mtshan nyid can te/ gang gi phyir na ston pa la ma 'dres pa'i mi mthun phyogs 'khrul ba sogs mi mnga' bas/ de rnams kyis mi 'phrog ba ste thub par mi nus pa de'i phyir ro/ /rnam pa kun mkhyen pa nyid kyi ye shes ni/ shes bya thams cad mdon sum du mkhyen pa'i mtshan nyid can du 'dod de/ rnam mkhyen de las gzhan pa'i shes pa thams cad ni yul nyi tshe ba tsam la 'jug pa nyid kyi shes bya thams cad mngon sum du mkhyen pa zhes bya bar mi 'dod do/ /gsum pa ni/ gang zhig 'dus byas mtshan nyid dang/ zhes pa nas/ de ni rang mtshan stong pa nyid/ ces tshigs bcad gcig byung/ gang zhig 'dus byas kyi chos rnams kyi mtshan nyid dang/ 'dus ma byas kyi chos rnams kyi rang mtshon byed kyi mtshan nyid gang yin pa de rnams de'i rang bzhin gyis grub ba de kho nas stong ba nyid de ni rang gi mtshan nyid stong ba nyid do/ gsum pa ni/ da ltar ba 'di mi gnas shing/ zhes pa nas/ stong nyid dngos med stong nyid do/ /zhes tshigs bcad gsum byung/ da ltar ba 'di @170b rang grub pa'i dus phan chad du mi gnas shing/ 'das pa ni byung bde zhig ba dang/ ma 'ongs pa ni 'byung 'gyur de ma skyes pa'i phyir/ gsum po der yod pa ma yin no/ /gsum po de gang du mi dmigs pa de la ni mi dmigs pa zhes brjod do/ / mi dmigs pa ste rang gi ngo bo nyid kyis grub pa de yis dben pa nyid gang yin pa de ni/ ther zug tu gnas pa min pa dang 'jig pa min pas na mi dmigs pa zhes bya ba'i stong ba nyid do/ /rgyu dang rkyen las byung ba'i phyir na dngos po rnams la 'dus pa ba ste 'dus pa las byung ba'i ngo bo rang bzhin gyis grub pa med pas/ de rnams la dngos po med pa zhes bya la/ 'dus pa las byung ba de nyid kyi ngo bo nyid kyis grub pas stong pa nyid ni/ dngos po med pa'i ngo bo nyid do/ /gnyis pa ni/ dngos po'i sgras ni mdor bsdus na/ zhes pa nas/ de dag de skad rab tu bsgrags/ zhes tshigs bcad lnga byung/ dngos po stong pa nyid ces bya ba'i dngos po'i sgras ni mdor bsdus na phung po lnga rnams brjod pa yin no/ /phung po lnga po de rnams de'i rang bzhin gyis grub pas stong pa nyid gang yin pa de ni dngos po stong pa nyid du mdor bshad do/ /mdor bsdus na ni dngos po med pa ni 'dus ma byas kyi chos rnams la brjod do/ /de nyid dngos po med pa de'i rang bzhin gyis grub pas stong pa nyid ni dngos po med pa stong pa nyid do/ /rang bzhin chos nyid de rang gi ngo bo nyid kyis grub pa med pa ni rang bzhin stong pa nyid do zhes bya'o/ /'di ltar stong gzhi rang bzhin de ni nyan thos la sogs pas ma byas par gdod ma nas dngos po'i gshis lugs su gnas pas na rang @171a @#/ /bzhin zhes bya bar bsnyad do/ /sangs rgyas rnams ni byung ba'am ste byung yang rung ma byung yang rung ste dngos po kun gyi rang bzhin stong ba nyid ni gzhan gyi dngos po ste ngo bor rab tu bsgrags so/ /gzhan gyi ngo bo'i skad dod ni mchog dang gzhan dang pha rol gsum la 'jug pas/ dang po ltar na mchog tu byung ba'i de kho na nyid do/ /gnyis pa ltar na 'jig rten pa las gzhan 'jig rten las 'das pa'i rnam par mi rtog pa'i ye shes kyi gzhal bya dang/ gsum pa ltar na 'khor ba'i pha rol tu gyur pa'i yang dag pa'i mtha' ste 'khor bzad pa'i myang 'das so/ /de kho na nyid kyi mtshan nyid las rnam pa gzhan du 'gyur ba med pas de bzhin nyid do/ /de nyid ni de nyid kyi rang bzhin gyis stong pa'i mtshan nyid can gyi stong pa nyid de ni/ gzhan gyi dngos po ste ngo no stong pa nyid ces bya'o/ /de 'dra ba'i stong pa nyid de dag ni shes rab kyi pha rol tu phyin pa'i tshul rgyal ba'i yum las dbye ba dang stong tshul de dag 'dir bshad pa de skad du rab tu bsgrags pa ste bshad do/ /rang bzhin stong pa nyid la sogs pa sngar bshad kyang 'dir bshad pa mi zlas pa ni/ 'dir dbye sgo 'bring po'i dbang du mdzad pa'o/ /bshad pa phyi ma gnyis rgyas 'bring gnyis ka'i skabs su yang yang 'byung ba ni/ chos nyid de dngos po'i gshis yin pa dang/ rtag tu yod pa dang/ mi rtog ye shes kyi gzhal byar yod bar khas len na bden par grub po snyam pa'i dogs pa gcad pa'i don yin pas de rnams mi 'gal bar shes par bya'o/ zhes rnam bshad las gsungs so/ /bzhi ba sa'i yon tan brjod pa'i sgo nas @171b mjug bsdub ni/ de ltar blo gros zer gyis snang ba gsal byas pa/ zhes pa nas/ rgyal ba'i yon tan rgya mtsho'i pha rol mchog tu 'gro/ zhes tshegs bcad gsum byung/ sngar bshad pa'i rnam pa de ltar rnam par dpyad pa las byung ba'i blo gros kyi 'od zer gyis de kho na nyid mthong ba la gegs byed ba'i mun pa 'joms pa'i snang ba gsal bar byas ba'i byang sems rang gi lag na gnas pa'i skyu rur rlon pa'i 'bras bu bzhin du/ srid pa gsum po 'di dag ma lus pa gdod ma nas rang bzhin gyis skye ba med par mngon sum du rtogs pa de yang ni tha snyad pa kun rdzob bden pa'i stobs kyis te kun rdzob tu 'gog par 'gro ba ste de la snyoms par 'jug go/ /sa drug pa ba de rtag tu 'gog pa 'od gsal du gtogs pa'i bsam pa dang ldan pa yin mod kyi/ 'gro ba mgon med pa rnams la snying rje'ng skyed par byed pa ste 'phrel bar 'gyur ro/ /de'i phyir de'i sbyor ba ni 'khor bar gtogs pa dang/ bsam pa ni mya ngan las 'das par gtogs so/ /'dis sa drug pa de'i gong du ste phyi nas bder gshegs gsung skyes nyan thos sangs rgyas 'bring bo rang rgyal dang bcas pa ma lus pa rnams ni blo'i stobs kyis pham par byed pa ste zil gyis gnon ba'ang yin no/ /kun rdzob rgya che ba'i lam gyi rim pa dang/ de kho na nyid zab mo'i lam gyi rim pa'i g.yas g.yon gyi gshog pa dkar po rgyas par gyur pa'i ngang ba'i rgyal pos drug pa ba de ni/ gdul bya'i skye bo'i ngang ba phul du byung ba skyed pa rnams kyis mdun du bdar nas sngon lan mang du bsags pa'i dge ba'i rlung gi shugs @172a @#/ /chen po'i stobs kyis/ rgyal ba sangs rgyas kyi yon tan gyi rgya mtsho chen po'i pha rol mchog tu 'gro bar 'gyur ro/ /dbu ma la 'jug pa'i tshig 'grel legs bshad rjes 'brang zhes bya ba las/ don dam pa'i sems bskyed pa drug pa'i skabs so// //gsum pa la bzhi/ sa bdun pa dang/ sa brgyad pa dang/ sa dgu pa dang/ sa bcub bshad pa'o/ /dang po ni/ ring du song 'dir 'di ni skad cig dang/ zhes sogs rkang pa gsum byung/ sa bdun pa ring du song ba 'dir ni/ sa drug par thob pa'i 'gog pa de la skad cig dang skad cig ste skad cig re re la byang sems 'di snyoms par 'jug par 'gyur te/ de ltar sa bcu ba las gsungs so/ /sa 'dir thabs mkhas kyi pha rol tu phyin pa legs par 'bar ba ste ches yongs su dag par yang 'gyur te/ sher phyin nyid rnam pa khyad par can du zhugs pa la phar phyin phyi ma bzhi bzhag par gsungs so/ /thabs mkhas kyi phar phyin tu 'jog pa'i thabs la mkhas pa ni byangs las nang gi sangs rgyas kyi chos 'grub pa las brtsams pa'i thabs mkhas pa drug dang/ phyi'i sems can smin par byas pa las brtsams pa'i thabs mkhas pa drug ste drug tshan gnyis gsungs pa rnams rnam bshad las shes par bya'o/ /dbu mal 'jug pa'i tshig 'grel legs bshad rjes 'brang zhes bya ba las/ don dam pa'i sems bskyed pa bdun pa'i skabs so// //gnyis pa la gsum/ sa 'dir smon lam lhag cing 'gog ba las slong tshul/ nyon mongs thams cad zad par bstan pa/ dbang bcu @172b/ /thob par bstan pa'o/ /dang po ni/ yang yang sngar dge las lhag thob bya'i phyir/ zhes pa nas/ rgyal ba rnams kyis 'gog las slong bar mdzad/ ces rkang pas lhag pa'i tshigs bcad gcig byung/ sa bdun pa de ni yang dang yang du sngar gyi dge ba las lhag pa thob par bya ba'i phyir du/ sa gang du byang sems de phyir mi ldog pa nyid du 'gyur bas brgyad pa mi g.yo ba de la byang sems bdag nyid chen po de 'jug go/ /de la yang dang yang du sngar sa bdun pa man chad kyi dge ba las lhag pa thob lugs ni/ rgya mtshor rlung shugs chen pos bskyod pa'i grub po che nyin gcig lam ji tsam chod pa de ni/ skam sar skyes bu'i rtsol bas bskyod pa'i grub bo che de lo brgyar yang de tsam mi chod pa bzhin du/ sa brgyad pa thob nas yud tsam zhig la lam gong ma ji tsam gnon pa de ni/ sa brgyad pa ma thob pas bskal pa 'bum du yang de tsam gnon par mi nus par sa bcu pa las gsungs pa ltar ro/ /sa brgyad pa ba 'di'i smon lam sngon sa dang po thob pa na smon lam chen po bcu la sogs pa'i smon lam 'bum phrag grangs med pa phrag bcu btab ba de dag /sa 'di la shin tu dag pa ste smon lam gyi phar phyi nas 'dir ches lhag par 'gyur ro/ /sa 'di ni gzhon nu'i sar gzhag ste/ dgu par rgyal tshab 'thob la/ bcu par ni 'khor los sgyur pa ltar rgyal ba rnams kyis dbang bskur ro/ /sa mi g.yo bar 'gog pa chos nyid la zhugs pa na rgyal pa rnams kyis 'gog pa la zhugs pa de las slong bar yang mdzad de/ sa brgyad par rnam par mi rtog pa'i ye shes la dbang bsgyur pa thob nas @173a @#/ /de tsam la mnyam par bzhag pa na/ rgyal ba rnams kyis de las bslangs nas sangs rgyas kyi stobs la sogs pa thob ba'i rgyur rjes thob tu tshogs bsags pa la bskul bar sa bcu pa las gsungs so/ /gnyis pa ni; chags pa med pa'i blo ni skyon rnams dag dang lhan cig mi gnas phyir/ zhes pa nas/ 'byor ba mkha' ltar mtha' dang bral ba ma lus thob par nus ma yin/ zhes tshigs bcad gcig byung/ gang gi phyir sa brgyad pa 'dir rgyal ba rnams kyis 'gog pa las slong ba de'i phyir/ sa 'dir chags pa med pa'i blo ste ye shes ni chags sogs nyon mongs ba'i skyon rnams dag dang lhan cig tu mi gnas pa'i phyir/ sa brgyad pa la ni dri ma ste chags sogs nyon/ mongs pa de dag thams cad rtsa ba ste sa bon dang bcas pa nye bar zhi ba ste spangs par 'gyur zhing/ de ltar nyon mongs pa thams cad zad cings gsum ste khams gsum gyi bla mar gyur kyang/ byang sems 'dis nyon mongs zad pa'i gnas skabs 'dir sangs rgyas rnams kyi yon tan gyi 'byor pa mkha' ltar mtha' dang bral ba 'thob par nus pa ma yin pas/ de thob par bya ba'i phyir ras brgyad pa ba 'dir bsgrim par bya dgos so/ /gsum pa ni/ 'khor ba 'gags kyang dbang rnams bcu bo thob par 'gyur zhing de dag gis/ /srid pa'i 'gro bar rang gi bdag nyid sna tshogs ston par byed par 'gyur/ zhes byung/ gal te sa 'dir nyon mongs zad na 'khor bar skye ba 'gags pas/ byang sems 'dis sangs rgyas kyi rgyu tshogs ji @173b ltar rdzogs par byed par 'gyur zhe na/ sa brgyad pa ba 'di'i las nyon gyi dbang gis 'khor bar 'khor ba ni 'gags mod kyang/ sa 'di thob pa na dbang rnam pa bcu po thob par 'gyur zhing/ dbang bcu po de dag gis byang sems 'dis dpal 'phreng gi mdon sa bshad pa ltar gyi yid kyi rang gyi lus kyi sgo nas/ srid pa'i 'gro ba rnams su rang gi bdag nyid kyi lus sna tshogs ston par byed par 'gyur bas 'di'i tshogs rdzogs par 'gyur ba mi 'gal lo/ /dbang bcu ni/ tshe dang/ sems dang/ yo byad dang/ las dang/ skye ba dang/ smon lam dang/ mos pa dang/ rdzu 'phrul dang/ ye shes dang/ chos la dbang ba ste bcur gsungs te/ de rnams kyi don ni rnam bshad las shes par bya'o/ /dbu mal 'jug pa'i tshig 'grel legs bshad rjes 'brang zhes bya ba las/ don dam pa'i sems bskyed ba brgyad pa'i skabs so// //gsum pa ni/ dgu pa la ni de'i stobs lta zhig mtha' dag rdzogs par dag 'gyur zhing/ /de bzhin yang dag rig chos rang gi yon tan yongs su dag pa'ang 'thog ces byung/ sa dgu pa la ni byang sems de'i stobs lta zhig ste stobs kyi pha rol tu phyin pa mtha' dag rdzogs par dag par 'gyur ro/ /stobs kyi phar phyin la stobs bcu gsum bshad de/ rnam bshad du thub dgongs drangs pa las shes par bya'o/ /stobs kyi phar phyin rdzogs pa de bzhin du so so yang dag par rig pa'i chos kyi rang gi yon tan yongs su dag pa bzhi 'ang 'thob ste/ chos dang/ don dang/ nges pa'i tshig dang/ sbobs pa so so yang dag @174a @#/ /par rig pa bzhi'o/ /de la dang pos ni/ chos rnams kyi rang rang so so'i mtshan nyid rab tu shes so/ /gnyis pas ni chos thams cad kyi rnam pa'i dbye ba shes so/ /gsum pas ni chos rnams ma 'dres par so sor ston pa shes so/ /bzhi bas ni chos rnams kyi mthun pa'i rgyu rgyun chad pa med pa rab tu shes par rang 'grel las gsungs so/ /gzhung gzhan las ming gi rnam grangs kyi chos dang/ brjod bya'i don dang/ sgra'i nges pa'i tshig dang/ spobs pa mi zad pa rig pa la bshad do/ /dbum la 'jug pa'i tshig 'grel legs bshad rjes 'brang zhes bya ba las/ don dam ba'i sems bskyed pa dgu pa'i skabs so// //bzhi pa ni/ bcu pa'i sa la de yis kun nas sangs rgyas rnams las dbang bskur ba/ zhes pa nas/ dge ba'i lo tog ched du rgyal sras las kyang lhun grub chos char 'bab/ ces tshigs bcad gcig byung/ sa bcu bal gnas pa'i byang sems de yis phyogs bcu kun nas sangs rgyas rnams las 'od zer chen po'i dbang bskur ba dam pa ste mchog 'thob bo/ /'thob tshul ni gser phreng las shes par bya'o/ /byang sems 'di la phar phyin bcu'i nang nas ye shes kyi phar phyin lhag par mchog tu byung ba ste dag par 'gyur ba'ang yin no/ /char sbrin rnams las 'jig rten pa rnams kyi lo tog sbel ba'i slad du chu char 'bab ba ji ltar bde bzhin du/ gdul bya'i 'gro ba rnams kyi dge ba'i lo tog sbel ba'i ched du/ rgyal sras 'di @174b las kyang lhun gyis grub par dam pa'i chos kyi char mdon par 'bab pa ste 'bebs so/ /de'i phyi ras 'di la chos kyi sbrin zhes gsungs so/ /dbu ma la 'jug pa'i tshig 'grel legs bshad rjes 'brang zhes bya ba las/ don dam pa'i sems bskyed pa bcu pa'i skabs so// //gnyis pa sa bcu'i yon tan bstan pa la gsum/ sa dang po'i yon tan bshad pa/ sa gnyis pa nas bdun pa'i bar gyi yon tan bshad pa/ dag pas gsum gyi yon tan bshad pa'o// dang po ni/ de tshe 'dis ni sangs rgyas brgya mthong zhing/ zhes pa nas/ rgyal ba'i sras po brgya phrag dag dang rjes su 'brel ba'ang ston/ zhes tshigs bcad gsum byung/ sa dang po thob pa de'i tshe sa dang po ba 'dis ni/ skad cig thang cig yud tsam gcig la sangs rgyas brgya mthong ba dang/ sangs rgyas brgya po de dag gis rang byin gyis brlabs pa yang byang sems 'dis rtogs pa dang/ sa dang po la gnas pa de nyid kyi tshe na bskal pa brgyar gnas par byed pa dang/ sngon dang phyi ma'i mtha'i bskal pa brgyar yang ye shes kyi mthong ba yang dag par 'jug pa'o/ /blo ldan 'dis ting nge 'dzin brgya phrag gcig la snyoms par 'jug cing gtong ba ste ldang bar yang byed do/ /'dis 'jig rten gyi khams brgya kun nas g.yo bar byed pa dang/ 'jig rten gyi khams brgya snang bar byed nus pa dang/ de bzhin rdzu 'phrul gyis byang sems des sems can brgya phrag gcig smin par byed pa dang/ brgya phrag gi grangs dang rjes su 'brel ba ste grangs dang ldan pa'i @175a @#/ /sangs rgyas kyi zhing dag tu yang 'gro bar 'gyur ba dang/ byang sems des ni chos kyi sgo rnams te brgya yang dag par 'byed par byed pa dang/ thub dbang gi sras po 'dis rang gi lus la lus brgya rnams kun nas ston par byed pa'ang yin pa dang/ lus brgya po re re zhing yang rgyal ba'i sras po brgya phrag re re dag dang rjes su 'brel pa'ang ston pa'i rang gi 'khor dang bcas pas mdzes shing 'byor pa'o/ /gnyis pa ni/ blo ldan rab tu dga' bar gnas pas yon tan de dag ni/ zhes pa nas/ yang dag par ni bsgyur ba mtha' dag rab tu thob par 'gyur/ zhes tshigs bcad gnyis byung/ blo ldan sa rab tu dga' bar gnas bas yon tan brgya phrag bcu gnyis po 'di dag thob par gyur nas/ sa gnyis bar 'phos pa nas dang po la bshad pa de bzhin kho nar sa dri ma med pa la gnas pas/ yon tan sde tshan bcu gnyis po 'di dag ni stong du byas pa yang dag par thob par 'gyur ro/ /yon tan sde tshan bcu gnyis po de dag nyid sa gsum pa bzhi pa lnga ba drug pa bdun pa ste/ sa lnga po 'di dag rnams la byang chub sems dpa' snga pos rim pa bzhin dus gsum pa la 'bum phrag bcu gnyis dang/ bzhi ba la bye ba phrag brgya pa bcu gnyis dang/ lnga pa la bye ba phrag stod bcu gnyis dang/ drug pa la bye ba brgya phrag stong bcu gnyis dang/ bdun pa la bye ba phrag khrag khrig phrag brgyar rdzogs par bsgyur ba ste byed ba 'bum pa bcu gnyis dang/ slar yang stong phrag tu yang dag par ni bsgyur ba mtha' dag ste khrag khrig 'bum phrag bcu @175b gnyis rab tu 'thob par 'gyur ro/ /gsum pa ni/ mi g.yo'i sar gnas rnam rtog med pa des/ zhes pa nas/ skad cig skad cig la ni ston par nus/ zhes tshigs bcad bzhi byung/ sa brgyad pa mi g.yo ba'i sal gnas pa bden 'dzin gyi rnam rtog med pa des stong gsum brgya phrag stong bsdoms pa ste/ stong gsum gyi 'jig rten gyi khams 'bum gyi 'jig rten na rdul gyi grangs tshad ji snyed yod pa de rnams dang grangs mnyam pa'i yon tan snge tshan dag ni 'thob par 'gyur ro/ /sa dgu pa legs pa'i blo gros kyis la gnas pa'i byang chub sems dpa' des yon tan sngar bstan pa'i sde tshan bcu gnyis dag grangs med brgya phrag stong du yang dag par bsdoms ba phrag bcu ste/ stong gsum gyi 'jig rten gyi khams grangs med pa 'bum phrag bcu'i rdul phra rab kyi grangs kyi tshad dang mnyam pa 'thob par 'gyur ro/ /sa bcu pa 'dir sa de'i yon tan ni ngag gi spyod yul las ches 'das par 'gyur zhing/ ngag gi sbyod yul ma yin pa bsdoms ba ste sangs rgyas kyi zhing brjod du med pa'i yang brjod du med pa'i rdul gyi grangs dag ji snyed yod pa de snyed kyi grangs sdang mnyam pa'i yon tan sde tshan bcu gnyis 'thob par 'gyur ro/ /re zhig gi sgras ni re zhig sngon la yon tan sde tshan bcu gnyis brjod ces 'og nas yon tan gzhan ston pa'i go rim brjod pa'o/ /gzhan yang byang sems 'dis ni sprul pa ston pa la rtog pa'i kun slong rgyu ba med par/ rang gi lus kyi spu'i khung bu re rer byang chub sems dpa' rnams dang rdzogs pa'i sangs rgyas kyi sku grangs las 'das @176a @#/ /pa re re zhing byang sems gzhal gyis mi lang ba'i 'khor rnams dang lhan cig pa rnams dang/ skad cig skad cig la ni rnam pa gzhan dang gzhan du yang ston par nus la/ de bzhin du de dag las gzhan 'gro ba lnga'i 'khor ba lha dang lha min dang mi la sogs pa'i dbye bas tha dad pa yang ma 'dres par ba sbu'i khud bu re rel ston par nus so/ /kyang gi sgras ni brgya byin dang/ tshangs pa dang/ 'jig rten skyong ba dang/ mi'i rgyal po dang/ nyan thos dang/ rang sangs rgyas dang/ de bzhin gshegs pas gdul ba'i sems can rnams la brgya byin la sogs pa'i gzugs bzung nas lhun gyis grub par chos ston par nus so zhes bya ba la sogs pa'i bar gyi don sdud pa'o/ /rgyas par sa bcu pa las shes par gsungs so/ /gnyis pa 'bras bu'i sa la lnga/ dang por sangs rgyas pa'i tshul/ sku dang yon tan gyi rnam gzhag /sprul ba'i sku btshan pa/ theg pa gcig tu bsgrub pa/ mdon par byad chub pa dang bzhugs pa'i dus kyi bshad pa'o/ /dang po la gnyis/ dngos kyi don dang/ rtsod pa sbang ba'o/ dang po ni/ gang phyir nam mkha' drim med la zla snang gsal bar gyur pa'i phyir/ zhes pa nas/ mkhyen bzang khyod kyis skad cig gis ni shes bya thugs su chud; ces tshigs bcad gnyis byung/ ji ltar te dper na zla ba'i snang bas nam mkha' drim med pa la 'gro ba ma lus ba gsal bar nus pa de bzhin du/ sangs rgyas kyi chos rnams 'thob pa la gegs byed pa'i mun pa sbyong bar mdzad @176b pa thugs bskyed pa bcu pa brnyes pas/ rang gis sangs rgyas kyi chos rnams brnyes nus par mkhyen nas/ slar yang stobs bcu pa bskyed pa'i sngon gyis bcu pa der sangs rgyas kyis 'thob pa la 'bad pa mdzad pa'am brtsams par gyur cing/ gang gi don du 'bad pa 'di brtsams par gyur pa'i go 'phang mchog zhi ba bla na med pa'i ye shes de yang/ bcom ldan 'das kyis 'og min du ni ste gnas de kho nar khyod kyis brnyes par gyur to/ /ye shes de ni yon tan mtha' dag gi mthar thug ba ste/ dran pa nyer gzhag la sogs ba'i yon tan mtha' dag 'dir mthar thug cing phul du byung ba'i phyir ro/ /de ni mtshungs pa med pa yang yin te/ de dang 'dra ba med pa'i phyir dang/ gong na med pa'i phyir ro/ /tshig rkang dang po'i 'gyur ni 'grel pa dang bstun na sngar bshad pa ltar 'ong dgos la/ tshig rkang gnyis pa la nag tsho'i 'gyur las/ slar yang stobs bcu bskyed ba'i sngon gyis der 'bad pa mdzad gyur pa/ zhes 'byung ba ltar legs par rnam bshad las gsungs so/ /ji ltar te dper na bum pa dang mkhar gzhong la sogs pa'i snod kyi mi 'dra ba'i dbye ba dum yod kyang/ dbye ba de yis de dag tu khyab pa'i nam mkha' la ngo bo mi 'dra ba'i dbye ba med pa de ltar du/ gzugs tshor la sogs ba la dngos pos byas ba'i dbye ba mi 'dra ba dum yod kyang/ de dag gi de kho na nyid la dngos pos byas pa'i dbye ba 'ga' yang med pa de'i phyir de kho na nyid ni ro mnyam ba kho nar shes par bya'o/ /ro mnyam de yang mkhyen pa'i skad cig gcig @177a @#/ /kho nas yang dag par thugs su chud par mdzad par gyur pas na/ mkhyen ba bzang po can khyod kyis skad cig gis ni shes bya thams cad thugs su chud pa'i ye shes brnyes so/ /gnyis pa la gnyis/ phyogs snga ma dgod pa dang/ lugs de dgag pa'o/ /dang po ni/ gang tshe zhi ba de nyid yin na de la blo gros 'jug mi 'gyur/ zhes pa nas/ mkhyen po med par khyod kyis gzhan la 'di lta'o zhes su zhig ston/ zhes tshigs bcad gcig byung/ gang gi tshe rang bzhin gyis skye ba zhi ba ni de kho na nyid do zhes rnam par 'jog pa de'i tshe/ yul de la blo gros te shes rab 'jug par mi 'gyur ro/ /yul can gyi blo yul lam zhugs par ni shes bya'i yul blos nges par rigs pa'ang ma yin la/ yul kun nas shes pa med par ni shes par ji ltar 'gyur te 'gal bar 'gyur ba'i phyir ro/ /de kho na nyid mkhyen pa po med par 'di lta bu'i mtshan nyid can gyi de kho na nyid ngas thugs su chud do zhes khyed kyis gdul bya gzhan dag la su zhig gis ston par byed pa rigs te mi rigs so zhe na/ gnyis pa la gnyis/ de kho na nyid rtogs pa mi 'thad pa'i rtsod pa spang ba/ mkhyen pa po mi 'thad pa'i rtsod pa spang ba'o/ /dang po ni/ gang tshe skye med de nyid yin zhing blo yang skye ba dang bral ba/ zhes pa nas/ de yongs shes pa de bzhin du ni tha snyad brten nas rig pa yin/ zhes tshigs bcad gcig byung/ ji ltar sems ni yul sngon po gang gi rnam pa can du skye bar 'gyur ba na/ sems des yul sngon po de yongs su shes so zhes brjod pa de bzhin du/ @177b yul can gyi shes pa yul de kho na nyid ji 'dra ba de 'dra ba'i rnam pa can du skye ba na/ tha snyad kyi bden pa la brten nas de kho na nyid rig pa yin no zhes nye bar gdags so/ /shes pa de kho na nyid kyi rnam pa'i rjes su byed tshul ni/ gang gi tshe rang bzhin gyis skye ba med pa yul gyi de khon nyid yin zhing ste yin pa bzhin du/ de'i yul can gyi blo yang rang bzhin gyis skyeb dang bral ba'i rnam pa can du chu la chu bzhag pa bzhin du zhugs pa de'i tshe/ yul de'i rnam pa sten pa ste 'dzin pa nyid las de kho na nyid rtogs par 'jog pa'i phyir sngar gyi rtsod pa'i skyon med do/ /nag tsho'i 'gyur las 'byung ba ltar lta bu med pa dag par gsungs te/ de tshe de yi rnam pa 'dzin las de nyid rtogs par 'jog pa ste/ zhes pa lta bur 'gyur ram snyam mo/ /de ltar na phyogs snga smra ba pos blo la de kho na nyid kyi rnam pa 'char rgyu med pa dang/ yul de'i rnam pa ma shar na blo yul la mi 'jug pa dang/ ma zhugs na yul de mi shes pa dang/ ma shes na yul can de shes par 'gal lo zhes smra ba'i yul gyi rnam pa ma shar na blo mi 'jug pa la sogs pa rnams rang yang 'dod pas de la lan mi 'debs pas/ blo la don dam bden pa'i rnam pa 'char rgyu med pa bkag nas/ de'i rnam pa blo la 'char ba dang/ de shar ba las yul de rtogs bar 'jog ces dpe dang bcas par gsungs so/ /gnyis ba la gnyis/ dngos kyi don dang/ de'i 'thad pa dngos bstan pa'o/ /dang po ni/ de yi longs spyod rdzogs sku bsod nams kyis/ zhes pa nas/ de las 'jig rten gyis @178a @#/ /kyang de nyid rig /ces tshigs bcad gcig byung/ mkhyen po med par khyod kyis gzhan la 'di lta'o zhes su zhig ston/ zhes pa'i skabs su/ de kho na nyid la ro gcig pa'i tshul gyis rtag tu bzhugs pa yin na; kun slong gi rnam rtog med la/ de med na chos ston pa med ces rtsod pa 'di la yang lan brjod par bya ste/ sangs rgyas de yi longs sbyod rdzogs pa'i sku bsod nams kyi tshogs brgya phrag du ma zin pa ste mngon par 'du byas pa dang/ longs sku de'i sprul pa dang/ gzhan yang sprul pa de'i mthus nam mkha' dang/ gzhan rtsa dang shing dang rtsig pa dang brag la sogs pa sems med pa las sgra gang zhig chos kyi de kho na nyid ston pa 'byung bde las 'jig rten te gdul bya chos de lta bu nyan pa'i snod du gyur pas kyang de kho na nyid phyin ci ma log par rig par 'gyur ro/ gnyis pa ni/ ji ltar rdza mkhan stobs chen ldan pas 'dir/ zhes ba nas/ khyad par gyis 'phangs las ches bsam mi khyab/ ces tshigs bcad gnyis byung/ ji ltar te dper na 'jig rten 'dir rdza mkhan stobs chen po dang ldan pas 'bad pa chen pos bskor ba'i 'khor lo ni/ de 'das nas yun ring du song bas rdza mkhan de'i 'khor lo bskor ba'i 'bad rtsol da lta skye ba med bzhin du'ad 'khor lo 'di 'khor zhing rdza bum la sogs pa'i rgyur mthong ba ltar/ de bzhin du sangs rgyas pa'i tshe da lta skyes pa'i 'bad rtsol gyi rtog ba med bzhin du chos kyi sku'i bdag nyid can nyid la bzhugs pa'i sangs rgyas de'i 'phrin las kyi 'jug pa ni/ @178b yid bzhin gyi nor bu dang dpag bsam gyi shing dang 'dra bar sangs rgyas las de 'dra ba'i chos thos par 'gyur ba'i las yongs su smin ba'i dge ba gdul bya'i skye bos bsags ba dang/ sangs rgyas kyis sngon byang sems kyi skabs su smon lam khyad par can btab pa'i mthus 'phangs pa ste shugs las yin pas ches shin tu bsam gyis mi khyab ba yin no/ /gnyis pa la gnyis/ sku'i rnam bzhag dang/ stobs kyi rnam gzhag go /dang po la gsum/ chos kyi sku dang/ longs sbyod rdzogs pa'i sku dang/ rgyu mthun pa'i sku bshad pa'o/ /dang po ni/ shes bya'i bud shing skam po ma lus pa/ zhes pa nas/ sems 'gags pas de sku yis mngon sum mdzad/ ces tshigs bcad gcig byung/ yul can ye shes kyi rang bzhin te bdag nyid can gyi sku gnyis su snang ba'i shes bya'i yul bud shing skam po dang 'dra ba ma lus pa ye shes me dang 'dra ba'i bsregs pa las/ shes pa rang bzhin gyis skye ba med pa ji lta bde 'dra ba'i rnam ba can du zhugs pas/ shes pa rang bzhin gyis ma skyes pa de'i rnam pa can dang ldan par gyur pa'i de kho na nyid zhi ba de ni rgyal ba rnams kyi chos kyi sku'o/ /de kho na nyid kyi chos kyi sku de ni de'i tshe skye ba med cing 'gag pa med pa'o/ /de ltar na sangs rgyas kyi sar ye shes kyi yul de kho na nyid kyi don la rnam pa thams cad du de'i yul can gyi sems dang sems las byung ba'i rnam rtog 'gags shing mi 'jug pas/ rnam par mi rtog pa'i ye shes dang de kho na nyid gnyis chul chu bzhag pa bzhin du dbyer med par zhugs so/ /de'i phyir go 'phang de ni @179a @#/ /dang por longs spyod rdzogs pa'i sku yis mngon sum du mdzad pa ste brnyes so/ /sems 'gags pa'i don sems kyi rgyub rnam rtog med pa la gsungs pas/ sangs rgyas la ye shes med pa'i khungs su 'dren ba ni skur 'debs yin par rnam bshad las gsungs so/ /gnyis pa ni/ zhi sku dpag bsam shing ltar gsal gyur cing/ zhes pa nas/ 'di ni spros dang bral la snang bar 'gyur/ zhes tshigs bcad gcig byung/ longs sku 'di ni rnam rteg dang bral bas na zhi ba'i sku'o/ /rnam par mi rtog pa yin yang sems can gyi don mdzad par nus pa gsal bar byed ba ni/ dpag bsam gyi shing lta bu dang/ yid bzhin gyi nor bu ji bzhin du rnam par mi rtog par gdul bya'i 'dod pa'i don sgrub pa'i rgyu nyid du 'gyur ro/ /sku de ni 'gro ba thams cad grol grol gyi bar du gdul bya'i 'jig rten gyi 'byor ba'i slad du rtag tu yun ring bar gnas pa yin no/ /longs sku 'di ni byang sems spros ba dang bral ba ste sa thob ba rnams kho nal snang bar 'gyur gyi/ spros pa dang bcas pa so skye rnams la ni dngos su snang ba ma yin no/ /gsum pa la gsum/ sku dang bspu'i khud bu gcig tu rang gi spyod pa kun ston tshul dang/ gnas der gzhan gyi spyod ba kun ston tshul dang/ bzhed pa la mnga' bsgyur ba phun sum tshogs pa bshad pa'o/ /dang po ni/ thub dbang dus gcig kho nar de'i rgyu mthun/ zhes pa nas/ sku yib sbu'i khung bu'ang gsal bar ston/ zhes tshigs bcad bzhi byung/ thub pa'i dbang pos chos longs @179b kyi sku de'i rgyu mthun pa ste 'bras bu'i gzugs sku gcig la/ 'khor ba thog ma med pa nas kyi rang gi skye ba'i gnas skabs da lta 'gags zin pa sngon gyi byung ba'i mtha' ma lus pa bstan pa'i phyir/ gsal ba dang ma 'chol ba ste phan tshun ma 'dres par sngar gyi byung tshul ma lus pas bkra ba mtha' dag/ me long shin tu dag pa la gzugs brnyan ltar dus gcig kho nar lhun gyis grub par ston par mdzad do/ /bcom ldan 'das kyis sngon sbyin pa'i phar phyin la sbyod pa na/ sangs rgyas gang la bsnyen bkur gang mdzad pa dang/ sangs rgyas kyi zhing ji ltab zhig na thub pa'i dbang po bltams ba sogs ston par mdzad pa dang/ sangs rgyas de dag gi sku dang spyod pa'i mthu dang stobs phul du byung ba ji 'dra ba dang/ nyan thos kyi dge 'dun 'dus pa ji snyed pa dang/ chos la nan tan gang byas pas dge 'dun der gyur pa ji lta ba ste ji 'dra ba dang/ zhing der byang chub sems dpa' rnams gzugs mtshan dpes spras pa dang/ chos gos la sogs pa nyer spyod dang ldan pa ji lta ba dang/ theg pa gcig dang gsum las brtsams nas chos ji lta ba bstan pa dang/ zhing der bdag nyid bram ze la sogs pa'i rigs su skyes pa blo ldan khyim pa dang rab byung du gyur pa ji lta ba dang/ chos thos nas bslab pa'i gzhi ma rdzogs pa dang rdzogs pa'i bslab pa khas blangs te byang sems kyi sbyod pa gang la sbyad pa dang/ sangs rgyas la sogs ba la bza' ba la sogs pa'i sbyin pa gang dus ji tsam zhig tu tshad ji tsam zhig phul ba de ni ma lus par sku gcig la ston par mdzad @180a @#/ /do; /de bzhin du tshul khrims dang bzod pa dang/ brtson 'grus dang bsam gtan gyi ting nge 'dzin dang/ shes rab kyi phar phyin la sngon spyod pa'i tshe'i sngar gyi gnas skabs gang ma tshang ba med pa de dag sku gcig la ston par mdzad do//zhes gong du sbyin pa la bshad pa dang sbyar bar bya'o/ /sku gcig la cig car du gnas skabs thams cad ston pa lta zhog gi /'on kyang sngo na gyi nyid kyi spyod pa kun sku'i ba spu'i khung bu la yang ston par mdzad do/ /gnyis pa ni/ sangs rgyas gang dag 'das dang 'byung 'gyur gang/ zhes pa nas/ thams cad bspu'i khung bur gcig tshe ston/ zhes tshigs bcad gsum byung/ sangs rgyas gang dag sngar 'das pa dang/ ma 'ongs pa na 'byung bar 'gyur ba gang dang/ gang dag da ltar nam mkha'i mthar thug par gsung gi gdangs mthon pos chos ston pas/ sdug bsngal gyis bzung ba ste gzir ba'i 'gro ba rnams dbugs 'byin zhing 'jig rten na bzhugs pa dang/ dang po'i thugs bskyed pa bzung ba nas byang chub kyi snying bo'i bar dus gsum gyi rgyal bde dag gi sbyod ba kun/ bdag gi spyod pa kun ston pa de bzhin du ba spu'i khung bu gcig tu dus gcig la ni gsal bar ston par nus te/ mig 'khrul mkhan tha mal bas sngags dang rdzas kyi mthu tsam gyi kyang rang gi lus la snod bcud kyi rnam pa sna tshogs ston par nus na/ sangs rgyas byang sems dngos po rnams kyi rnag bzhin mig 'khrul gyi rang bzhin bden brdzun khyad par med par mkhyen nas de bskal pa du mar goms par mdzad pa rnams kyis @180b rnam 'phrul de rnams mdzad mi nus pa mi rigs ba'i phyir ro/ /de bzhin du dus gsum gyi byang chub sems dpa' dang/ rang rgyal 'phags pa dang nyan thos ma lus pa'i sbyod pa dang/ de rnams kyi lhag ma so so'i skye bo'i gnas skabs kyi sbyod pa thams cad ni ba spu'i khung bu gcig tu dus gcig gi tshe ston par nus so/ /gsum pa ni/ dag pa 'di ni bzhed pa 'jug pa yis/ zhes pa nas/ ma lus rdul gang de nyid la grangs med/ ces tshigs bcad gnyis byung/ dri ma ma lus pas dag pa'i sangs rgyas kyi mdzad pa 'di ni bzhed btsam gyi 'jug ba yis te de'i sgo nas/ nam mkha'i mthas gtugs pa'i 'jig rten nams rdul phra rab gcig gi yul gyi khyon la ston par nus la/ 'jig rten mtha' yas ba ste ma lus ba'i rten gyi khyon rdul phra rab gcig gis khyab pa yad ston par mdzad pa na/ rdul gcig po de rags pa che bar yang mi 'gyur la 'jig rten phra ba ste chung bar yang mi 'gyur ro/ /de bzhin du rnam par rtog pa mi mang' ba khyod kyis srid mtha'i bar du skad cig de re re la sbyod pa sna tshogs pa ji snyed ston pa de snyed kyi grangs ni/ 'dzam bu gling ma lus pa na rdul phra rab kyi grangs gang ji snyed yod pa de nyid kyi grangs la med do/ /sngam ni yul gyi dbang du byas la 'di ni dus kyi dbang du byas bar gsungs so/ /gnyis pa la bzhi/ stobs bcu mdor bstan pa/ de rnams rgyas par bshad pa/ yon tan kun brjod mi nus pa'i tshul/ yon tan gnyis shes pa'i phan yon bstan pa'o/ /dang po ni/ gnas dang gnas min mkhyen stobs dang/ zhes pa nas/ stobs ni bcu po @181a @#/ /'di dag go /zhes tshigs bcad gsum byung/ thub ba'i stobs la ni/ gnas dang gnas min mkhyen pa'i stobs dang/ de bzhin du las kyi rnam par smin pa blo ste mkhyen pa'i stobs dang/ mos pa sna tshogs pa thugs su chud pa'i stobs dang/ khams sna tshogs pa mkhyen pa'i stobs dang/ de bzhin du dbang po mchog dang mchog ma yin pa mkhyen pa'i stobs dang/ thams cad du 'gro ba'i lam mkhyen pa'i stobs dang/ bsam gtan dang rnam thar dang ting nge 'dzin dang snyoms par 'jug pa la sogs blo ste mkhyen pa'i stobs dang/ sngon gyi gnas rjes su dran pa mkhyen pa'i stobs dang/ de bzhin du 'chi 'pho ba dang skye ba dang gnas pa blo ste mkhyen pa'i stobs dang/ zag pa rnams zad pa mkhyen pa'i stobs te/ stobs ni bcu po 'di dag tu yod do/ /gnyis ba la gnyis/ gnas dang gnas min mkhyen pa sogs kyi stobs lnga bshad pa dang/ thams cad du 'gro ba'i lam mkhyen pa sogs kyi stobs lnga bshad pa'o/ /dang po ni/ rgyu gang zhig las gang zhig nges par skye 'gyur ba/ zhes pa nas/ rnam pa thams cad mkhyen pa chags med stobs su gsungs/ zhes tshigs bcad lnga byung/ rgyu gang zhig las 'bras bu gang zhig nges par skye bar 'gyur ba'i rgyu de ni 'bras bu de'i gnas su de ltar mkhyen pa'i sangs rgyas rnams kyis gsungs te/ dper na mi dge ba las rnam smin yid du mi 'ong ba 'byung ba lta bu'o/ de ltar bshad pa las bzlog pa ni gnas min pa zhes bya ste/ dper na dge ba las rnam smin yid du mi 'ong ba 'byung ba gnas ma yin zhing/ go skabs med pa @181b lta bu'o/ de 'dra ba'i gnas dang gnas ma yin pa'i shes bya mtha' yas pa mkhyen pa la thogs pa spangs pa ste med pa de ni gnas dang gnas ma yin pa mkhyen pa'i stobs su bshad do/ /'dod pa ste dge ba dang mi 'dod pa ste las mi dge ba ste ma 'dres pa gnyis dang de gnyis las bzlog pa ste 'dren ma dang/ zag bcas kyi las ngan pa zad par byed pa'i zag med kyi dngos po'i las dang/ las de'i rnam smin shin tu mi 'dra btshan tshogs pa la'ng mkhyen pa nus mthu thogs pa med par so sor 'jug par 'gyur ba/ dus gsum gyis bsdus pa'i las dang de'i 'bras bu'i shes bya kun la khyab par mdzad pa de ni las kyi 'bras bu mkhyen pa'i stobs su 'dod do/ /'dod chags des mtshon nas zhe sdang la sogs pa'i nyon mongs dang/ sogs kyis bsdus pa dad pa la sogs pa rnams kyi 'byung ba ste sa bon gyi stobs kyis bskyed pa'i 'dod pa ni shin tu mi 'drab sna tshogs ba dman pa dang/ 'bring dang gang yang khyad par du 'phags pa'i 'dod pa dang/ mos bde las gzhan pa'i chos kun tu sbyod pa rnams kyis sngar bshad pa'i mos ba'i sa bon g.yogs pa ste bsgribs pa'i mos pa la'ng/ mkhyen pa dus gsum du 'gro ba ste 'jug pas mos pa'i shes bya ma lus pa khyab pa ni mos pa sna tshogs pa mkhyen pa'i stobs zhes bya'o/ /sangs rgyas khams mtha' dag gi rnam par dbye ba la mkhas pa rnams kyis mig dang sogs kyis bsdus pa lhag ma bcu bdun dang/ de dag rnams kyi rang bzhin nang stong pa nyid la sogs pa gang yin pa de khams su gsungs pa'i khams kyi rab dbye rnam pa kun gyi khyad par rnams la/ rdzog@182a @#/ /pa'i sangs rgyas rnams kyi mkhyen pa mtha' yas pa 'jug pa ni khams sna tshogs pa mkhyen pa'i stobs su 'dod do/ /yang dag pa min pa lhag par sgro 'dogs pa'i kun tu rtog pa ni chags sogs skyed pa la dbang byed pas na dbang po'o/ / sogs kyis bsdus pa dad pa'i dbang po sogs ches rno ba nyid ni mchog tu bzhed la/ dbang bo 'bring gi gnas skabs dang/ dbang po rtul ba nyid chung ba'i gnas skabs ni mchog min par bshad pa dang/ mig la sogs pa'i dbang po nyer gnyis dang/ dbang po rnams kyi phan tshun 'bras bu chub pa ste sgrub nus ba'i rang gi ngo bo re re la rnam pa thams cad mkhyen pa'i chags pa ste thogs pa med pa de ni dbang po mchog dang mchog ma yin ba mkhyen pa'i stobs su gsungs so/ /gnyis pa ni/ lam 'ga' rgyal ba nyid dang 'ga' zhig rang rgyal kyi/ zhes pa nas/ de la mkhyen pa chags med mtha' yas stobs su 'dod/ ces tshigs bcad lnga byung/ lam 'ga' zhig rgyal ba nyid du 'gro ba dang/ lam 'ga' zhig rang rgyal gyi byang chub dang/ 'ga' zhig nyan thos kyi byang chub tu 'gro ba dang/ yi dwags dang dud 'gro dang lha dang mi dad dmyal ba rnams su 'gro ba dang/ sogs kyis ni yang dag pa dang log par nges pa'i lam la sogs pa rnam pa sna tshogs bston te/ de rnams la mkhyen ba chags thogs med pa ni mtha' yas pa ste thams cad du 'gro ba'i lam mkhyen pa'i stobs su 'dod do/ 'jig rten mtha' yas ba na yod pa'i rnal 'byor pa'i bye brag ste khyad par gyis rab tu dbye ba tha dad pa mtha' yas ba bsam gtan bzhi dang/ rnam par @182b thar pa brgyad dang/ gang zhi gnas gang dag ste ting nge 'dzin dang/ snyoms 'jug gi khyad par gang dag gcig dang brgyad du gyur pa ste mthar gnas snyoms 'jug dgu dang/ kun byang de dag la mkhyen pa thogs pa med pa 'di ni kun nas nyon mongs pa dang/ rnam par byang ba mkhyen pa'i stobs su bshad do/ /ji srid gti mug de srid pa ste gcig nas gcig tu brgyud pa thog ma med pa'i srid par gnas pa na/ 'das pa'i dus su bdag dang sems can gzhan re re'i srid pa'i sems can ji snyed pa de snyed kyi sems can mtha' yas pa gzhi ste rgyu dang bcas pa dang/ rnam pa dang bcas pa dang/ yul phyogs dang bcas pa ste dran pa'i yul de rnams la blo thogs pa med pa gang dang gang yin pa de ni/ sngon gyi gnas rjes su dran pa mkhyen ba'i stobs su bshad do/ / sems can rnams kyi sems can re re'i 'chi 'pho ba dang phung po nyid mtshams sbyor ba'i skye ba gang nam mkha'i mthar thug pa'i 'jig rten la gnas pa sna tshogs pa'i las kyi bzo bos bkra bar byas pa mang po del dus der mkhyen ba rnam pa kun yongs su dag pas ma chags pa ste ma thogs par 'jug pa yis/ yul mtha' yas pa mkhyen pa 'chi 'pho ba dang skye ba mkhyen pa'i stobs su 'dod do/ /rnam pa kun mkhyen pa'i rgyal ba rnams kyi stobs kyis myur du chags sogs nyon mongs pa dag bag chags dang bcas pa thams cad 'jig ba ste bcom par 'gyur ba dang/ slob ma nyan thos dang la sogs pas bsdus pa rang rgyal ba rnams kyis nyon mongs pa rnams blo ste zag med shes rab kyis 'gog ba ste sbangs pa gang yin bde la mkhyen pa chags pa ste thogs ba med pa ni/ @183a @#/ /mtha' yas ba zag pa zad ba mkhyen pa'i stobs su 'dod do/ /gsum pa ni/ nam mkha' med pas 'dab chags ldog par mi 'gyur gyi/ zhes pa nas/ bshad phyir dogs spang cung zad tsam zhig smras/ zhes tshigs bcad gnyis byung/ nam mkha' med pa ste zad pas 'dab chags kyi dbang po de ldog par mi 'gyur gyi/ 'dir ni 'phur 'phur bas nam zhig na rang gi mthu stobs zad pas ldog par 'gyur ba de bzhin du/ slob ma nyan thos dang de dang bcas pa'i rad sangs rgyas dang/ sangs rgyas kyi sras pos chen po la bzhugs pa rnams kyis kyang sangs rgyas kyi yon tan nam mkha' ltar mtha' yas pa ma brjod par ldog par 'gyur ba ni/ yon tan rdzogs pas ma yin gyi rang gi blo'i stobs nyams pas yin no; ;de'i phyir 'grel ba mdzad pa bdag 'dra bas sangs rgyas khyod kyi yon tan 'di dag ni chi shes pa dang brjod par nus par 'gyur ram ste mi nus so/ /de ltar bdag rang stobs kyis shes par mi nus pa 'on kyang/ yon tan de dag 'phags pa klu sgrub kyis bshad pa'i phyir del brten nas bdag gis dogs pa spangs pa ste tsham tshom med par yon tan cung zad tsam zhig smras so/ /bzhi pa ni/ zab mo stong pa nyid yin te/ zhes pa nas/ yon tan 'di dag 'thob par 'gyur/ zhes tshigs bcad gcig byung/ mdor bsdus na bstan bcos de las sangs rgyas kyi yon tan zab pa dang rgya che ba gnyis bstan pa'i zab mo ni stong pa nyid chos sku dang gzhi dang lam gyi stong ba nyid do/ /de las gzhan pas bcu gcig gi yon tan dang stobs la @183b sogs pa sngar bshad pa rnams ni rgya che ba'i yon tan no/ /de 'dra ba'i zab pa dang rgya che ba'i yon tan gyi tshul legs par shes pas ni/ don de gnyis shes nas bsgoms pas sangs rgyas kyi yon tan gnyis po 'di dag 'thob par 'gyur ro/ /gsum pa ni; slar yang mi g.yo'i sku mnga' khyod kyi srid gsum byon nas sprul rnams kyis/ zhes pa nas/ mad pos bcings pa ma lus thugs rjes mya ngan 'das par bkri bar mdzad/ ces tshigs bcad gcig byung/ chos kyi sku brnyes su zin kyang slar yang de kho na nyid la mnyam par bzhag ba las mi g.yo ba'i sku mnga' ba khyod kyis sa 'og sa steng sa bla'i srid pa gsum du byon nas/ sprul pa'i sku rnams kyis dga' ldan nas mi yul du gshegs pa dang bltams pa la sogs pas yab yum sras dang 'brel bar ston zhing/ byang chub pa zhib myang 'das kyi grod khyer du 'jug pa'i chos kyi 'khor lo 'ang dbang po dang 'tsham par ston par mdzad do/ /de ltar khyod kyis 'jig rten te sems can gyi khams spyod pa sna tshogs pa can re ba ste sred pa'i zhags pa mad pos bcings pa ma lus ba thugs rje chen pos mya ngan las 'das par bkri ba ste 'god par mdzad do/ 'grel bshad kyi 'gyur las g.yo bag zhes pa la sna tshogs zhes 'byung ba ni 'grel ba dang mthun par gsungs so/ /bzhi pa ni/ gang phyir 'di na de nyid shes las dri ma mtha' dag sel ba ni/ zhes pa nas/ sbyar bar mdzad cing rnam par dben la'ang blo sbyangs rnams la logs su gsungs/ zhes tshigs bcad gsum byung/ mthar thug theg pa gsum du bstan ba dgongs @184a @#/ /bcan du bshad pa/ gang gi phyir 'di na chos rnams kyi de kho na nyid shes pa las gzhan sgrib gnyis kyi drim mtha' dag sel ba ni lhur byed pa ste gtso bor gyur pa med la/ chos rnams kyi de kho na nyid kyang mi 'dra ba'i rnam 'gyur gyi dbye ba sten pa'ang min zhing ste min bas/ de kho na nyid kyi yul can gyi blo gros te ye shes 'di yang yul 'jal ba'i rnam pa tha dad pa mi 'dra bar 'gyur ba yang ma yin pa de'i phyir na/ thub pa khyod kyis gdul bya'i 'gro ba la theg pa gzhan gang dang yang mi mnyam pa dbyer med pa'i theg pa gcig bstan to/ /'o na mthar thug gi theg pa gcig kho na yin na nyan rang gi theg pa ci'i phyir bstan pa yin zhe na/ gang gi phyir 'gro ba rnams la nyes ba ste nyon mongs shas chen bo skyed par byed pa'i rgyur gyur pa lus sems las su mi rung bar byed pa'i sems can dang skal ba dang nyon mongs dang lta ba dang tshe'i snyigs ma lnga po 'di dag yod par gyur pa de dag gis/ lhag par mos pa 'joms pas sangs rgyas kyi ye shes la don gnyer byed pa 'gog par byed pa de'i phyir/ 'jig rten te gdul bya sangs rgyas kyi spyod yul zab pa la 'jug par mi 'gyur zhing/ gang gi phyir bde gshegs khyod la gdul bya thabs la mkhas pa'i mkhyen rab dang/ de dag gi don la bsnyel ba mi mnga' ba'i thugs rje'i thabs lhan cig ba mnga' ba dang/ gang gi phyir sngon byang sems kyi dus su bdag gis sems can thams cad dgrol bar bya'o zhes khyod kyis zhal gyis bzhes pa de nyid thabs kyi rnam ba gzhan gyis bsgrub dgos so/ /de'i phyir pad dkar las @184b gsungs pa ltar ded dpon mkhas pas rgya mtsho na gnas pa'i rin po che'i gling du chas pa'i tshe/ skye bo'i tshogs kyis yun ring bor bgrod pa'i dal ba nye bar sel ba'i phyir du rin po che'i gling du ma sleb pa'i bar du grong khyer yid du 'ong ba rnam par bkod pa ste sprul pa ltar du/ bcom ldan 'das khyod kyis kyang theg pa chen po'i tshu rol tu theg chen de thob pa'i thabs su gyur ba 'di ni/ nye bar zhi ba'i bde ba la yid sbyar ba'i phyir du/ slob ma nyan thos dang des mtshon pa'i rang rgyal la nyan rang gi theg pa gnyis gsungs shing/ de nas 'khor ba'i nyon mongs kyis rnam par dben pa'i blo sbyangs pa rnams la logs su ste phyi nas theg pa chen po kho na gsungs la/ de rnams kyis kyang sangs rgyas rnams ltar tshogs rdzogs par byas nas gdon mi za bar sangs rgyas thob par bya dgos so/ /lnga pa la gnyis/ mngon par byang chub pa'i dus kyi dbang du byas pa'i bshad pa dang/ bzhugs pa'i dus kyi dbang du byas ba'i bshad pa'o/ /dang po ni/ bde bar gshegs pa ma lus phyogs zhing sangs rgyas yul dag na/ zhes pa nas/ 'on kyang khyod kyi gsang ba 'di ni bsnyad bgyi ma lags so/ zhes tshigs bcad gcig byung/ phyogs bcu'i zhing ma lus pa sangs rgyas kyi yul du gyur bdag ji snyed bden rdul phra rab gyi rdul gyi grangs rnams bdog par gyur pa ji snyed pa bde bar gshegs pa khyod byang chub kyi mchog rab dam par gshegs pa'i bskal pa yang de snyed de/ de ltar yin pa 'on kyang sngon dge rtsa ma bsags pa rnams mos par dka' ba'i phyir/ khyod kyi gsang ba @185a @#/ /'di ni bsnyad par bya ba ma lags so/ de la lhag par mos pa rnams la ni bsod nams gzhal du med pa bsags par bya ba'i phyir 'dir bshad do/ /'di ni sangs rgyas nas slar yang byang chub kyi snying por sprul sku'i 'tshang rgya tshul ston pa'i grangs tshad ston pa yin ba dang/ 'gyur yang nag tshos/ sangs rgyas yul gyur zhing rnams phyogs bcu ma lus na/ /phrar brdul ni ji snyed yod pa de snyed du/ /bde bar bshegs pa mchog gyur khyod kyi byang chub kyang/ /'byud 'gyur zhes bsgyur ba ltar legs par rnam bshad las gsungs so/ /gnyis pa ni/ rgyal ba ji srid 'jig rten mtha' dag mchog tu rab zhi bar/ zhes pa nas/ bcom ldan thugs rjes khyod thugs zhi las bzlog pas khyed la mya ngan 'das mi mda'/ zhes tshigs bcad gsum byung/ rgyal ba'i ma 'ongs pa'i sku tshe'i tshad ni ji srid du 'jig rten gdul bya mtha' dag go 'phang mchog tu rab tu zhi bar 'gro ba min pa ste sangs rgyas sum gyur pa'i bar dang; ji srid du 'dus ma byas kyi nam mkha' rnam par 'jig par 'gyur ba min pa de srid du yin te/ sangs rgyas ni shes rab kyi pha rol tu phyin pa'i yum gyis bskyed nas thugs brtse ba chen po'i ma mal gtad pa las sngar bshad pa'i tshul lugs 'di byed pas/ de 'drab khyod la zhi ba phyogs gcig par 'gyur ba gal mnga' ste mi mnga' ba'i phyir ro/ /gang gi mthus zhib phyogs gcig par mi 'gyur ba'i sangs rgyas rnams kyi thugs rje de ji ltab zhig cen/ bden 'dzin gyi gti @185b mug gi skyon gyis 'jig rten pa rnams kha zas te 'dod yon lnga la mdon par zhen pas zos pas sdug bsngal rgya chen po'i rgyu byed pa'i phyir dug dang bcas ba zab po'i skye bo nyid kyi nang mi ste bdag gi bar byas pa de rnams la/ khyod brtse bskye ba ji lta bde ltar du dug zos nas nyen pa'i bu gcig bul ma yi sdug bsngal gyi yid skyeb min te/ de bas na mgon po sangs rgyas rnams mchog tu rab tu zhi ba phyogs gcig par gshegs par 'gyur ba ma lags so/ gang gi phyir na de kho na nyid kyi don la mi mkhas pas dngos po la bden par zhen pa'i blo can las 'bras la yid ches pas lha dang mir skye ba yod bar ltab rnams kyis ni skye ba dang 'jig ba'i gnas skabs te 'chi ba'i sdug bsngal dang/ yul sdug pa dang bral ba dang mi sdug ba dang phrad pas bskyed pa'i sdug bsngal myong bar 'gyur la/ rgyu 'bras kyi dngos po med par zhen pa'i blo can log par lta ba dang ldan pas ni sdig to can gyi 'gro ba dmyal ba la sogs pa'i ngan 'gro dang/ sngar bshad pa'i sdug bsngal yang 'thob pa de'i phyir dang/ 'jig rten gyi skye bo de rnams thugs brtse ba chen po'i yul du rab tu dong ba ste song bas na/ thugs rje chen bos bcom ldan 'das khyod kyi thugs zhib phyogs gcig pal gzhol ba las bzlog pas khyod la zhib phyogs gcig pa'i mya dan las 'das pa mi mnga' bar 'jig rten du bzhugs so/ /gsum pa bstan bcos ji ltar brtsams pa'i tshul ni/ lugs 'di dge slong zla grags kyis/ zhes pa nas/ gzhung lugs rnams ltar gzhan lugs bzhed gzhung 'di las gzhan la dga' blo dor bar bya/ @186a @#/ /zhes tshigs bcad bzhi byung/ mgon po klu sgrub kyi dgongs pa phyin cim log par 'grel ba'i lugs 'di dge slong dpal ldan zla grags kyis dbu ma'i bstan bcos rtsa ba shes rab sogs las btus nas/ des don gyi mdo sde rnams kyi lung ji lta ba bzhin dang/ 'phags pa klu sgrub kyi man ngag ji lta ba bzhin du brjod pa yin no/ /ji ltar dbu ma'i gzhung lugs 'di las ma gtogs par bstan bcos gzhan na stong pa nyid ces bya ba'i chos 'di ni phyin cim log par brjod pa med pa de bzhin du/ kho bo cag gis bsnyad pa 'dir 'byung ba'i lugs kyang bstan bcos gzhan na med do zhes mkhas pa rnams kyis nges par mdzod cig /de'i phyir dbu ma pa kha cig gis bye mdo gnyis kyis gang don dam par smras pa de nyid/ dbu ma pa rnams kyis kun rdzob tu 'dod do zhes smras pa de ni dbu ma'i bstan bcos kyi de kho na nyid ma shes pas smras pa yin te/ rang gi mtshan nyid kyis grub pa khas ma blang pa'i lugs ni rang gi mtshan nyid kyis grub pa kho na'i steng nas rnam gzhag byas pa'i dngos smra ba'i lugs dang bden gnyis gang dang yang mtshungs par mi rigs pa'i phyir ro/ /des na rang gi lugs 'di sems tsam pa dang yang thun mong ma yin par mzad/ klu sgrub yab sras kyi dgongs pa 'grel ba'i dbu ma ba gzhan dang yang thun mong ma yin par shes par gyis shig ces 'doms pa'o/ /'phags pa klu sgrub kyi zab mo rtogs pa'i blo'i rgya mtsho shin tu rgya chel gting dpag par dka' ba'i ngam gang pa'i kha dog gis 'jigs pas/ sems tsam pa missing page@186b la sogs pa'i skye bos klu sgrub kyi lugs bzang po gang dag rgyang ring du sbangs mod kyang/ dbu ma'i gzhung gi tshig le'ur byas pa kha 'bus pa'i ku mud kha phye ba'i chus ku mud kha 'byed byed zla ba grags pa da lta yid la re ba rnams skong bar byed do/ /de kho na nyid kyi don zab mo 'jigs su rung ba 'di ni skye bos sngon tshe rabs gzhan du stong pa nyid la lhag par mos pa'i bag chags goms pa nyid las nges par rtogs par 'gyur ba snang ngo/ /gsung rab mang du gsan pa rgya che ba mnga' ba yin yang zab mo'i don 'di ni gzhan gyis thugs su chud par mi 'gyur ro/ /de'i phyir dbu ma'i lugs las gzhan pa'i don dam pa ston pa'i tshul lugs sangs rgyas kyi dgongs par ma song bas rang gi blos sbyar ba 'di dag mthong ba ste bltas nas/ gang zag gi bdag tu brjod pa ste de gsal bar byed pa'i gzhung lugs rnams la bya ba ltar/ slob dpon gzhan gyi lugs kyi bzhed pa'i gzhung dbu ma'i lugs 'di las gzhan pa rnams la dga' ba'i blo dor bar bya ba ste/ lugs gzhan rang gi blos sbyar ba la ya mtshan par mi bya'i/ rang gi stong pa nyid kyi lta ba la lhag par mos pa kho na la ya mtshan par bya'o/ /bzhi ba btshan bcos brtsam pa'i dge ba bsdo ba ni/ slob dpon klu sgrub lugs bzang bsnyad las bdag gis bsod nams phyogs kyi mthar/ zhes pa nas/ 'jig rten ma lus de nyid rtogs nas myur du bder gshegs par bgrod shog ces tshigs bcad gcig byung/ slob dpon chen po 'phags pa klu sgrub kyi dbu ma'i lugs bzang po lung dang @187a @#/ /rigs pa'i tshogs shin tu gsal bas bsnyad pa las byung ba'i bdag gis phyogs kyi mthar khyab pa'i rgya che ba'i bsod nams bsags pa/ yid kyi nam mkha' nyon mongs pa'i tshogs kyis sngo zhing gnag par byas pa'i dkyil du ston ka'i rgyu skar ltar dkar ba'am/ rtsom pa po'i sems kyi sprul la ste sprul gyi gdengs ka'i nor bu dang 'dra ba gang zhig thob pa de'i mthus/ sems can gyi 'jig rten ma lus pas zab mo'i de kho na nyid ji lta ba bzhin du rtogs nas myur du bde bar bshegs pa'i sa kun tu 'do ces bya bar bgrod par shog cig /nag tsho'i 'gyur las/ klu sgrub lugs mdzes phyogs su grags pa brjod las thob pa'i bsod nams gang/ zhes 'byung ngo/ / bzhi pa mjug gi don la gnyis/ slob dpon gang gis mdzad pa dang/ lo paN gang gis bsgyur ba'o/ /dang po ni/ dbu ma la 'jug pa zab ba dang rgya che ba'i tshul gsal bar byed pa/ slob dpon zla ba grags pa theg pa mchog la thugs gzhol ba/ mi 'phrogs pa'i mkhyen rab dang thugs rje mnga' ba/ ri mor bris pa'i ba drus ma las 'o ma bzhos pas bden par zhen ba bzlog par mdzad pas sbyar ba rdzogs so/ /zhes byung/ zla ba grags ba yul sa mantar sku 'khrungs pa dang/ sgyu ma lta bu'i ting nge 'dzin brnyes par grags par rnam bshad las gsungs shing/ gzhan rnams go bar zad do/ /gnyis pa ni/ kha che'i yul gyi grong khyer dpe med kyi dbung/ rin chen sbas @187b pa'i gtsug lag khang du/ kha che'i rgyal po dpal 'phags pa lha'i sku ring la/ rgya gar gyi mkhan po til ka dang/ bod kyi lotstsha ba bnde ba tshab nyi ma grags kyis kha che'i dpe dang mthun par bsgyur/ phyis ra sar mo cher rgya gar gyi mkhan po ka nak warma dang/ lo tstsha bde nyid kyis nyi 'og shar phyogs pa'i dpe dang gtugs shing legs bar bcos te gtan la phab pa'o/ /'dir 'grel ba'i mdzad byang dang 'gyur byang gi steng nas thun mong ba rnams bkod pa ni/ rtsa ba logs su bsgyur ba dang 'grel pa'i nang gi rtsa ba gnyis sbyar nas zhus dag byas ba'i dbang du byas pa yin no/ zhes byung/ 'dir rnam bshad las/ kha che'i yul gyi grong khyer dpe med kyi dpung ste dbus/ zhes dang/ rgya gar gyi mkhan po ti lak ka la sha ste thig le bum ba dang/ zhes dang/ rgya gar gyi mkhan po ka na ka warma ste gser gyi go cha dang/ zhes gsungs shing/ gzhan rnams go bar sla'o/ /'dir smras pa/ /tshul bzhin rnam dbyod go la'i rlung shugs kyis/ /mtha' bral stong pa'i mkha' la legs shar te/ /srid pa'i grang reg ma lus mthar mdzad pa'i/ /zab lam nyi ma'i dpal la bdag phyag 'tshal/ /rnam dpyod nyal 'gro'i gter chen las 'ongs shing/ / log smra rlung gi shing rta las brgal ba'i/ /sngon med gsar bshad bde 'byung gtsug rgyan 'dis/ /blo gsal rab dga'i kunda cis mi bzhad/ /legs bshad ri dwags mtshan ma'i bsil zer gyis/ /gzhung don steng 'thung @188a @#/ /dkar po'i kha phye yang/ /mkhas rlom 'ga' zhig tsha bas gdud srid de/ /blo dman phyag dog can gyi gshis de 'dra/ /lung rigs rin chen rdul mang rab brtsegs pa'i/ /'khrul bral legs bshad sa 'dzin dbang po 'di/ /phyogs lhung rgol ba'i klan ka'i dri bzhon gyis/ /nam yang g.yo bar mi nus rang gi gshis/ /'on kyang gnas lugs rgya mtsho'i gting dgag dka'/ /byis pa'i blo gros nya chung bang rtsal chung/ /de phyir 'di la 'khrul ba gang smras pa/ /gzur gnas mkhas pa rnams kyis dag par mdzod/ /'dir 'bad legs tshogs rdul gyi kha lo bas/ /bdag gzhan sems kyi kun gsal khyon bsgribs pa'i; ;mthar 'dzin sgra ldan ma lus bsal byas te/ /yang dag lta ba'i 'od mdzod myur gsal shog /thub bstan nying khu mnyam med dge ldan pa'i/ /chos tshul phyogs dus kun tu rab rgyas shing/ /de nyid bshad sgrub gnyis kyis 'dzin mdzad pa'i/ /mkhas mang tshogs kyis sa steng khyab gyur cig /bdag kyang yang srid kun tu zab mo'i chos/ /srog kyang btang nas 'dzin cing sbel ba dang/ /sus kyang bsgrub par mi nus brtson 'grus kyis/ /kun kyang chos tshul 'di la 'god byed shog /ji srid chu gter skar gas can 'di ni/ /skye 'gro'i khur chen bzod pa de srid du/ /legs bshad nyin mo'i dbang phyug 'di nyid @188b kyang; ;rgyal bstan 'dab brgya'i tshal rab skyod gyur cig /ces dbu ma la 'jug pa'i tshig 'grel legs bshad rjes 'brang zhes bya ba 'di ni/ khal kha khu re chen mo'i grwa rigs blo gros kyi mig dang ldan ba bka' bcu pa ngag dbang rgya mtsho dang/ mang thos kyi nor dang ldan ba blo bzang rgya mtsho gnyis kyis snga mo nas bskul zhing/ dus phyis khal kha g.yon ru'i il ting cung wang gi shog nas khu re chen mo'i grwa rigs rnam dpyod dang ldan ba blo bzang phun tshogs kyis kyang bskul yod pa'i thog rang nyid zab mo'i chos la bag chags 'jog pa'i thabs su 'gyur bar rebs mtshams sbyar te/ mkhas btsun bzang gsum 'dzim ba'i dge ba'i bshes gnyen du ma'i zhabs kyi rdul spyi bos nod pa/ mang thos rigs ba smra ba'i gzugs brnyan/ 7 sbrang btsun ngag dbang dpal ldan gyis/ rab byung bcu bzhi pa'i bgrang bya lnga bcu rtsa lnga ba lcags mo bya lor har dal bes se'i chos grwa dga' ldan bshad sgrub bstan 'phel gling gi nye 'dab rang gshag nyams dga' bar sbyar ba 'dis kyang bstan 'gro la phan thogs par gyur cig/ //dri med gzhung bzang par du bskrun las legs byas yangs pa gang thob mthus/ /kun rtog 'khrul ba'i mun pa drungs 'byin legs bshad 'od stong yun ring gsal/ /khrims ldan 'dus pa'i pad tshal kun kyang 'phags nor sbrang rtsi'i bcud du smin/ / @189a @#/ /blo gsal rkang drug gzhon nu'i tshogs rnams lung rigs gar gyis rtsen gyur cig/ /ces khu re chen mo'i bka' bcu dge ba'i bshes gnyen ngag dbang dpal ldan gyis mdzad pa'i 'jug pa'i tshig 'grel legs bshad rjes 'brang zhes bya ba 'di nyid rje yab sras kyi legs bshad rnams dang/ sgo mang yig cha'i dka' gnas phal cher dpyis phyin par bkral ba'i legs bshad rmad du byung bar mthong nas/ chags sdang phyogs ris kyi dbang du ma shor bar zab mo'i gzhud don 'tshol bar 'dod pa dgal phan du reb dang/ bka' drin gzhal med dpal ldan bla ma dam pa rnams kyi bzhed dgongs rdzogs pa'i slad du kho bo cag gis ma dpe la zhus dag lam tsham dang gang ci'i cha rkyen sbyar thog par yig 'bri mi lha ri phun tshogs dang/ nyin tshang padma thar gnyis kyis res mos dang/ zhus dag pa gser lag bya btang 'jam dbyangs rgya mtsho; skos mkhan sde dge'i bkra shis dang/ bu rgyal rnams kyis me rta'i dbyar par du bsgrub pa'i 'go brtsams pa me lug zla nang rdzogs par grub pa'i dge bsdo'i smon tshig tu/ gyi nab ^ dge 'dun bstan 'dzin rgya mtshos bris pa'o// //