shu b+ha mastu sa rab dza ga tA ma/ @001a @#/ /dus tshigs kyi mchad 'grel dka' gnad sgo brgya 'byed pa'i lde mig ces bya ba bzhugs so// @001b @##/ /dbyings rig dbyer med nor 'dzin khyon yangs por/ /longs sprul dpag bsam ljon pa g.yur za bas/ /zab rgyas chos kyi dri bsung sbro mdzad pa/ /kun mkhyen yongs 'dus dbang pos rgyal gyur cig /stobs bcu mnga' ba kun gyi ye shes nyid/ /ngo mtshar mtshan dpes spras pa'i skur shar ba/ /dran pa tsam gyis blo mun sel mdzad pa'i/ / brtan pa'i 'khor los rab 'byams shes rab stsol/ /'phags mchog rigs gsum mgon sogs mi rje'i skur/ /sbrul pa'i chos rgyal bdun dang rigs ldan tshogs/ /tsi lu pa sogs 'phags yul paN grub dang/ /ra 'brog shong sogs mkhas rnams phyag gi yul/ /zur phud lnga pa'i mkhyen rab gser sbyangs mchog /bstan la rjes chags me yis zhu ba las/ / thub bstan mdzes byed rgyan du legs grub pa'i/ /kun mkhyen tsong kha pa des rtag tu skyongs/ /mgon de'i gsung gi gsang mdzod 'dzin pa'i sras/ /mkhas mang gtsug gi rgyan gyur dge @002a @#/ /legs dpal/ /chos dbang grags pa blo gros chos skyong sogs/ /legs bshad dbang phyug rnams la gus phyag 'tshal/ /gzhan phan thugs bskyed zla pa'i ma ma las/ /mkhas btsun bzang po'i kun snang 'phro bzhin par/ /rgyal bstan chu mthong dbyings su legs shar pa'i/ /'jam dpal dbyangs dngos bzhad pa'i rdo rjer 'dud/ /grangs mtha' bral ba'i mkhyen dpyod b+ha ma ras/ /legs bshad 'dab brgya'i bcud kyis myos pa'i glu/ /nyams 'gyur stong dang ldan pa'i mgrin pa nas/ /dbyangs su sgrogs pa skal bzang rna ba'i rgyan/ /de phyir mgon de'i legs bshad nyal 'gro'i rgyun/ /dpyod ldan bad dkar mig gi yon chab du/ /rnam par bsgreng phyir skal ldan shing rta yi/ /dpe zlar 'os pa'i mtshan 'grel deng 'dir spel/ /'dir mkhas grub dam pa 'jam dbyangs bzhad pa'i rdo rjes mdzad pa'i 'dul ba'i dus tshigs kyi skabs su mchan bkod pa ni/ gzhi smad shog bu nyer gcig par/ @002b nyin mtshan mnyam pa gnyis dang bgrod pa gnyis te dus bzhi mi 'gyur ba'i gzer ston pa'i bsdus rgyud las/ gang phyir ri la skye bo rnams kyi nyin mtshan mnyam par 'gyur te lug nyi srang gi nyi ma la'o/ /zhes gsungs te/ ri zhes ba bdun pa'i ming yin la/ lhun po'i lho nas byang dang byang nas lhor sa'i dum bu bdun pa la nyin mtshan mnyam pa gnyis nyin zhag cig tu 'byung ste/ de bzhin du bden bral gyi zur phyed snga ma lho gling nub ma nas dbang ldan gyi zur phyed snga ma byang gling nub ma dang/ dbang ldan gyi zur snga ma nas bden bral gyi zur snga ma la sogs par sbyar bar bya'o/ /dum bu gang la lug khyim gyi tshe dpyid mnyam du 'gyur na srang khyim gyi tshe ston mnyam du 'gyur ba dang/ srang khyim gyi tshe dpyid mnyam du 'gyur na lug khyim gyi tshe ston mnyam du 'gyur dgos/ de bzhin glang sdig dang 'khrig gzhud nga karkaTa chu srin la sogs par de ltar sbyar ro/ /gang phyir ri la zhes pa'i rkang pa dang pos lho dang byang gling dbus ma dang/ de phyir gnyis brgyad dum bu dag la nges bar glang la gnas dang sdig pa la gnas de bzhin no/ /zhes pas dum bu gnyis pa lho gling nub ma dang dum bu brgyad pa byang gling nub ma la glang sdig gi dus su nyin mtshan mnyam pa 'byung bar gsungs/ bug pa zhes bya me grangs dag la 'khrig pa gzhur gnas;phyogs kyi tshad dang bzhi ba dag la ni/ /nyi ma karkaT la gnas pa dag dang chu srin la gnas ! lnga pa bcu gcig pa la yang/ /seng ge bum par rab zhugs ! bcu gnyis ro yis ra ni nya dang bu mor gnas bdag la'o/ /zhes gsungs la/ bug pa zhes pa dum bu dgu pa dang/ me grangs gsum pa dang/ phyogs kyi tshad bcu pa dang ro yi sa ni drug pa yin zhing/ @003a @#/ /gzhan rnams go sla/ de dag kyang 'dzam gling nas grangs pa'i dbang du byas so/ /shog bu de nyid du/ bsdus rgyud las/ 'dir ni g.yon bgrod du 'gyur nyi ma chu srin gnas pa la ste bum par nyi mas gnyis pa la/ /nya la dum bu gsum par mi rnams kyi ni bgrod pa dag kyang lus gi nyi mas bzhi par ro/ /'byung ba zhes byar nyim glang la gnas pas 'khrigs par nyi gnas sa ni drug pa bdun par yang/ nyi ma karkaT la gnas pas 'gyur te ! seng ge la gnas sa ni dum bu brgyad par ro/ ! /bu mos bug par ! srang gi nyi mas bcu par 'gyur te ! sdig pa yis kyang drag po'i dum bu la'o/ /gzhu la gnas pas bcu gnyis par 'gyur ! mi rnams bgrod pa dag kyang bcu gnyis rtsibs kyis la'o/ ! /de bzhin lhor bgrod du 'gyur nyi ma bgrod pa'i dbang gis karkaT sogs khyim rnams dag la'o/ /zhes gsungs te/ 'dzam gling chung du 'dir ni nyi mchu srin gyi khyim la gnas pa'i tshe rang 'gros kha shar la bltas pa'i g.yon te byang bgrod kyi mgo brtsams par 'gyur ba dang/ gling 'di nas g.yas skor gyis bgrang ba'i dum bu gnyis par bum pa'i khyim la gnas pa'i tshe sogs su sbyar zhing/ 'byung ba zhes pa dum bu lnga pa/ bug pa dgu pa dang/ drag po bcu gcig pa yin la/ gzhan go sla/ de bzhin du gling 'dir nyi ma karkaTa'i khyim la gnas pa'i tshe lhor bgrod kyi mgo brtsams pa dang/ dum bu gnyis par seng ge'i khyim sogs su sbyar ro/ /shog bu de nyid du/ nyi zla lhun po'i phyed na'o/ /zhes pa dang mi mthun par/ dran pa nyer bzhag las/ ri rab kyi tshad steng du 'phags pa brgyad khri bzhi stong dang 'go tu'ang bgryad khri @003b bzhi stong du bshad cing/ nyi ma ni ri rab kyi rtse mo'i thad nas 'char nus byed par gsungs pa dang/ dus 'khor gyi lugs la/ ri rab kyi dpang tshad dpag tshad 'bum dang/ byang bgrod mthar thug gi nyi ma ri rab kyi rtse mo dang thad mnyam du sleb pa dang/ lhor bgrod mthar thug gi tshe me ri'i nang mtha'i steng thad drang gi nam mkhar sleb cing/ de'i tshe me ri dang nyi ma'i dkyil 'khor gyi bar la dpag tshad brgyad khri dgu stong yod par khas len dgos te/ nyi ma'i gdung byed 'og tu 'bab pa'i dpangs tshad dpag tshad stong phrag bcu bzhir gsungs shing/ gdung byed kyi ma sna'i rtse mo nas 'og sa'i bar la byang bgrod mthar thug gi tshe dpag tshad brgyad khri drug stong dang/ lhor bgrod mthar thug gi tshe bdun khri lnga stong dang/ nyin mtshan mnyam pa'i tshe brgyad khri lnga brgya yod par bsdus rgyud las gsungs pa'i phyir te/ de nyid las/ steng du drug dang klu yi grangs ni nyi ma'i gdung byed dag kyang byang du bgrod pa dag gi mthar/ de nas g.yas phyogs su yang zad par 'gyur te mi yi bdag po stong phrag dag ni drag po'i grangs/ stong phrag brgyad cu rtsa gcig mda' ni brgya dang bral bar gyur pa dbus nas go la'i ri mo ste/ de las gang zhig 'phel dang 'grib par 'gyur ba mkha' mkha' mda' dang mda' ni byang dang lhor yang ngo/ /zhes gsungs pa'i phyir/ khyab ste/ byad bgrod mthar thug gi tshe dpag tshad stong phrag ni drug dang klu ste gya drug dang/ de las g.yas phyogs te lhor bgrod mthar thug gi tshe stong phrag drag po ste bcu gcig zad pa'am 'bri ba dang/ dbus nas go la'i ri mo ste nyin mtshan mnyan pa'i tshe mda' ni brgya ste lnga brgya dang bral ba'i stong phrag gya gcig tu 'gyur ba'i phyir dang/ nyin mtshan mnyam pa'i ri mo de las byang bgrod mthar thug gi tshe 'phel ba dang lhor bgrod mthar thug gi tshe 'grib pa'i dpag tshad kyi @004a @#/ /grangs ni mkha' mkha' mda' dang mda' ni ste lnga stong lnga brgya yin pa'i phyir/ 'jal byed kyi dpag tshad kyang mdzod dang mi 'dra ste/ bsdus rgyud las/ phra rab brgyad rnams dag gis phra mo 'di gcig phra mo brgyad kyis skra yi rtse mo phra mo ste/ 'di rnams kyis ni ske tshe shig dang nas te ltos 'gro nas kyis sor te sor mo nyi ma ni/ zung gis khru'o khru bzhis gzhu ste 'dir ni stong phrag gnyis kyi gzhu yis rgyad grags dag du 'gyur/ rgyang grags bzhi rnams dag gis dpag tshad de yis lha yul sa dang nam mkha' dag la tshad yin no/ /zhes rdul phra rab dang/ phra mo dang/ mi'i skra'i rtse mo dang/ ske tshe dang/ shig dang/ nas dang/ sor mo rnams gong nas gong du brgyad bsgyur dang/ sor mo nyer bzhis khru gang/ khru bzhis gzhu/ gzhu stong phrag gnyis kyis rgyad grags/ rgyad grags bzhis dpag tshad du 'gyur bar gsungs so/ /'di ni mdzod kyi dpag tshad las gnyis 'gyur gyi che bas byang bgrod kyi tshe nyi ma steng du 'phags tshad mdzod kyi dpag tshad ltar na dpag tshad 'bum phrag gnyis yin no/ /de dag kyang steng 'og mtho dman du 'gro tshad yin la/ lho byang du thad kar 'gro tshad ni/ rta gdong gi me dang bsil ri'i bar du dpag tshad bdun khri lnga stong du 'gro bar byed do/ /de yang bgrod pa gcig la nyin zhag brgya brgyad cu rtsa phyed bcas gnyis yod pas nyin zhag gcig la lho byad du 'gro tshad ni/ sngar gyi dpag tshad kyi grangs phyed bcas mig klu zlas bgos pa'i cha gcig yin no/ /byang bgrod mtha'i nyi ma bsil ri'i bar du 'gro na sa cha 'dir byang 'grod mtha'i nyin gung tshe thur shing sor brgyad yan chad kyi grib ma @004b byang du lus pa med par lhor 'byung bar 'gyur dgos pa la de lta min par mngon sum gyis grub pa'i phyir bsil ri'i bar du 'gro bar gsungs pa'i dgongs pa 'tshol dgos zhes kha cig zer ro/ /shog bu nyer gnyis par/ /khams ler; phra dbugs d+hu dang chu tshod nyin zhag d+hu dang dus bzhi dag ni stong phrag nyi shu rtsa gcig dang/ drug brgya rnams ni rim pas lus skyes phra dang mi dang 'byung po lha dang lha min rnams dang ni/ nus dagng tso bo'i nyin zhag gcig gi tshad de; zhes gsungs la/ srog chags phra mo'i dbugs nyi khri tshig stong drug brgya ni srog chags phra mo'i nyin zhag gcig /de'i nyin zhag nyi khri tshig stong drug brgya ni mi'i nyin zhag /d+hu ste mi'i zla ba ni 'byung po yi dwags kyi nyin zhag /mi'i chu tshod nyi khri tshig stong drug brgya ni lha 'og ma'i nyin zhag /mi'i nyin zhag nyi khri tshig stong drug brgyad ni lha min rnams kyi nyin zhag /d+hru ste mi'i lo nyi khri tshig stong drug brgya ni nus pa ste 'og min pa'i nyin zhag /dus bzhi ste mi'i lo nyi khri tshig stong drug brgya slar yang grangs de nyid kyis bsgyur ba ni gtso bo ste srid rtse ba'i nyin zhag gcig gi tshad do/ /mi'i zla ba ni 'byung po yi dwags kyi nyin zhag ces pa ni go thob kyi dbang du byas kyi/ rtsa ba'i tshig don dang mthun na d+hu ste mi'i dbugs sum cu'i yun tshad kyi dus nyi khri tshig stong drug brgyas bsgyur ba ni yi dwags kyi nyin zhag gcig gi tshad ces sbyor dgos/ des na mi'i dbugs stong pa mkha' dus zla mig gis bgos pa'i cha gcig ni phra mo'i dbugs tshad dang/ phra mo'i dbugs grangs de nyid kyis bsgyur ba ni mi'i dbugs tshad dang/ mi'i zla ba grangs de nyid kyis bgos pa'i cha gcig ni yi dwags kyi dbugs tshad dang/ mi'i chu tshod ni lha 'og @005a @#/ /ma'i dbugs tshad dang/ mi'i nyin zhag ni lha min rnams kyi dbugs tshad dang/ mi'i lo ni 'og min pa'i dbugs tshad dang/ dus bzhi chung du'i lo grangs ni srid rtse ba'i dbugs tshad yin no/ /rang rang gi dbugs drug ni chu srang/ chu srang drug cu ni chu tshod/ chu tshod drug cu ni nyin zhag sogs su sbyar/ mi'i chu tshod nyi khri chig stong drug brgya ni mi'i lo dang lta 'og ma'i nyin zhag gnyis ka'i tshad yin la/ mi'i lo lnga bcu rgyal chen bzhi'i zhag tshad du mdon pa mdzod sogs nas gsungs pa dang ches mi 'dra'o/ /'dir srog chags phra mo nas gzung ste srid rtse ba'i bar gyi 'gro ba rang rang gi dbugs rtsis gzhir byas pa'i nyin zhag so sos phyogs nyer bzhi/ zla ba bcu gnyis/ dus drug /dus bzhi/ dus gsum/ bgrod pa gnyis su 'gyur ba thams cad lo'i yan lag tu shes par bya la/ lo gcig la nyin zhag sum brgya drug cu/ dus sbyor bzhi stong sum brgya nyi shu/ chu tshod nyi khri chig stong drug brgya/ chu srang sa ya gcig dang 'bum phrag gnyis dang khri khrag dgu dang stong phrag drug yod do/ /de ltar rang rang gi dbugs kyi dbye bas phyi rol tu nyin zhag dang nang gi lor 'gyur ba'i sgo nas phyi nang chos mtshungs par bgrod lugs ni/ phyi rol tu nyin zhag gcig la nang gi lor 'jog cing/ lo gcig la nyi ma khyim 'pho ba'i zla ba bcu gnyis dang mtshungs par nyin zhag gcig gi rlung gi 'pho chen bcu gnyis la nang gi zla ba bcu gnyis su 'jog go /phyi ru zla ba gcig la chu tshod stong brgyad brgya yin pa ltar/ nang du dbugs stong brgyad brgya la nang gi chu tshod kyi grangs su 'jog cing/ dbugs dgu brgya la nang gi @005b phyogs sam zla phyed du 'jog la/ dbugs sum stong drug brgya ni nang gi zla ba gnyis yin pas de 'dra drug la nang gi dus drug tu 'jog pa sogs yin te/ 'grel chen dri med 'od las/ de la dbugs dgu brgyas phyogs su 'gyur te phyogs nyi shu rtsa bzhis nyin zhag dang lor 'gyur ro/ /dbugs stong brgyad brgyas zla ba ste zla ba bcu gnyis kyis nyin zhag dang lor 'gyur ro/ /dbugs lnga stong bzhi brgyas dus su 'gyur te dus bzhis nyin zhag dang lor 'gyur ro/ /dbugs bdun stong nyis brgyas dus gcig tu 'gyur te dus gsum gyis nyin zhag dang lor 'gyur ro/ /dbugs khri brgyad brgyas bgrod par 'gyur te bgrod pa gnyis kyis nyin zhag dang lor 'gyur ro/ /de ltar na lus skyes la sogs pa rnams kyi rang rang gi tshad kyi dbugs kyi nyi khri tshig stong drug brgyas so so'i nyin zhag dang lor 'gyur ro/ /de bzhin du dbugs drug cus nyin mtshan du 'gyur te nyin mtshan sum brgya drug cus nyin zhag dang lor 'gyur ro/ /dbugs lngas dus sbyor du 'gyur te dus sbyor bzhi stong sum brgya nyi shus nyin zhag dang lor 'gyur ro/ /dbugs gcig gis chu tshod du 'gyur ro/ /dbugs gcig gi drug cu'i chas chu srang du 'gyur ro/ /dbugs sum brgya drug cu'i chas dbugs su 'gyur ste/ chu tshod nyi khri tshig stong drug brgyas nyin zhag dang lor 'gyur ro/ /chu srang stong phrag dgu bcu rtsa drug lhag pa'i 'bum phrag bcu gnyis kyis nyin zhag dang lor 'gyur ro/ /dbugs stong phrag bdun cu rtsa drug lhag pa'i 'bum phrag bdun cu rtsa bdun gyis nyin zhag dang lor 'gyur ro/ /de bzhin du dbugs 'bum phrag bdun cu rtsa drug lhag pa'i bye ba phrag @006a @#/ /bdun cu rtsa bdun gyis nyin zhag brgya dang lo brgyar 'gyur ro/ /zhes gsungs pa'i phyir/ khyab ste/ de dag thams cad la phyi rol tu nyin zhag dang nang gi khor 'gyur tshul mtshungs par sbyor dgos pa'i phyir/ shog bu nyer gsum par/ byang ba'i dris lan mkhas grub chos rjes mdzad pa las/ ci ste mngon pa nas bshad pa ltar gyi zhag mi thub 'dor ba sogs kyi rnam gzhag de ltar byas na nyi zla gzas 'dzin sogs kyis bsal ba mngon sum du 'bebs par 'gyur ba'i phyir dpyad pa gsum gyis dag pa mi 'grub po snyam na/ de ni mngon pa nas re zhig rags rtsis tsam zhig gi dbang du mdzad pa ste/ de'i phyir 'dul ba las kyang zla ba'i gshol 'dor ba dang rgyu skar la sogs pa zhib par skar rtsis mkhan po'i rjes su 'brang bar gsungs so/ /rags rtsis kyi rnam gzhag tsam zhig gsungs pa la zhib rtsis kyi bsal ba 'bebs pa'i rim pa phra rags du ma zhig dus 'khor las gsungs pa'i rtsis la yang yod do/ /zhes so/ /de'i tshig ji lta ba bzhin du dus 'khor Tik chen las kyang gsungs so/ /shog bu nyer bzhi par/ 'grel chen las/ dus bzhi'i mthar gza' tshogs rgyu ba nam gru'i mthar khyim ni stong ba dag la gnas so/ /zhes pa'i rtsa bar/ lo ni 'di dag rnams kyis dus kyi mthar ru gza' tshogs rgyu ba khyim ni stong pa dag la gnas/ /slar yang tha skar la sogs dag dang rab byung zhes dang de bzhin nag pa'i zla ba la sogs dang/ gza' dang sbyor ba tshes dang byed pa rnams kyang de bzhin dang po dag ste/ zhes gsungs/ de ni dus bzhi chen po'i lo grangs rdzogs pa'i mtha'i zad byed kyi lo'i zla ba tha ma dbo'i @006b zla ba'i nam stong gi mtshan mtha' 'das pa dang dus mnyam du gza' thams cad rang rang rgyu skar 'khor lo'i longs spyod gcig char rdzogs par gsungs la/ dus bzhi chen po'i lo grangs ni/ bsdus rgyud las/ stong pa stod pa nam mkha' klu dang lag pa thub pa ri bong can rnams rdzogs ldan dus kyi tshad/ ces mi'i lo sa ya gcig dang bdun 'bum nyi khri brgyad stong ni rdzogs ldan dus kyi tshad du gsungs/ de las bzhi cha 'bri ba ni gsum ldan/ rdzogs ldan gyi phyed ni gnyis ldan/ rdzogs ldan gyi bzhi cha ni rtsod ldan gyi tshad yin zhing/ bzhi ka sdoms na sa ya bzhi dang gsum 'bum nyi khrir 'gyur ro/ /de yang rdzogs ldan gyi rkang pa bzhi/ gsum ldan gyi rkang pa gsum/ gnyis ldan gyi rkang pa gnyis/ rtsed ldan gyi rkang pa gcig ste bcu'i rkang pa re re'i yun tshad ni mi'i lo bzhi 'bum sum khri nyis stong yin la/ dus bzhi chen po gang la 'jog pa'i gzhi skal pa'i dus tsam la dus kyi 'khor lo dang gtso bo zhes ming btags nas de'i cha shas su gyur ba'i dus bzhi chen po rdzogs pa la gtso'i rtsa g.yas g.yon gyi dkyil 'khor bcu'i dbugs kyi rgyu ba rdzogs pa'i ming gis btags nas bstan pa yin no/ /de yang rdzogs ldan gyi rkang pa bzhi dang gsum ldan gyi rkang pa dang po gcig ste ldan ni gtso bo'i g.yon nam mkha' rlung me chu sa'i dkyil 'khor lnga'i rlung rgyu ba'i ming gis bstan/ gsum ldan gyi rkang pa lhag ma gnyis/ gnyis ldan gyi rkang pa gnyis/ rtsod ldan gyi rkang pa gcig dang lnga po gtso bo'i g.yas kyi sa chu me rlung nam mkha'i dkyil 'khor lnga'i rlung rgyu ba dang sbyar bas gtso bo'i dkyil 'khor gcig la rlung rgyu ba'i tshad dang dus bzhi'i rkang ba gcig gi yun tshad @007a @#/ /gcig yin la/ de ni mi'i lo bzhi 'bum sum khri nyis stong gi yun tshad can yin no/ /rim pa des gtso bo'i g.yon gyi rtsa la dkyil 'khor lnga rdzogs pa'i tshad ni dus bzhi'i phyed yin zhing/ de la mi'i lo sa ya gnyis dang tshig 'bum drug khri yod do/ /de la gtso bo'i 'pho ba gcig tu btags shing/ gtso bo'i g.yas g.yon gyi 'pho ba gnyis dang dus bzhi'i yun tshad mnyam mo/ /gtso bo'i 'pho ba bcu gnyis ni gtso bo'i nyin zhag yin la/ de la dus bzhi chen po thebs drug rdzogs par bshad do/ /gzhan yang/ gza' lo nyi shu tshan pa lnga nam mkha' rlung me chu sa'i rim pas 'byung ba la rim bzhin gtso bo'i g.yon gyi dkyil 'khor lnga dang/ gza' lo nyi shu tshan pa lnga sa chu me rlung nam mkha'i rim pas 'byung ba la rim bzhin gtso bo'i g.yas kyi dkyil 'khor lnga dang sbyar bas gtso bo'i 'pho ba gcig dang gza' lo brgya'i tshad mnyam mo/ /des na gza' lo nyis brgya ni dus bzhi chen po'i yun tshad du 'gyur ro/ /gza' lo gcig gi tshad yod de/ mi'i lo nyi khri tshig stong drug brgya de yin pa'i phyir/ de yang zhib tu bshad na/ gza' brgyad po rang 'gros kyis rgyu skar nyer bdun longs spyod pa'i yun la gza' rang rang gi nyin zhag gcig tu byed cing/ de rtsis gzhir byas pa'i lo ni gza' rang rang gi lo yin la/ zla ba ni zhag gsum cu dang/ nyi ma lhag pa pa sangs gsum lo ni re re dang/ mig dmar ni zla ba bco brgyad dang/ phur bu ni lo bcu gnyis dang/ spen pa ni lo sum cu dang/ sgra gcan ni lo bco brgyad la rgyu skar nyer bdun longs spyod pa yin zhing/ de rnams bsdoms na mi'i lo drug cu rtsa bzhi zla ba bdun 'byung @007b ba de gza'i nyin zhag dang/ gza'i nyin zhag phyed dang gnyis la mi'i lo dgu bcu rtsa drug dang zla ba phyed dad bcu gcig gi steng du dus kyi 'khor lo'i lo gsum phyogs gsum dang bcas pas lo brgyar 'gyur la/ de'i rigs pas gza'i nyin zhag gsum na mi'i lo gnyis brgya/ nyin zhag sum cu na mi'i lo stong phrag gnyis/ gza'i lo'am gza'i nyin zhag sum brgya drug cu la mi'i lo nyi khri bzhi stong/ gza'i lo bcu la mi'i lo nyis 'bum bzhi khri/ gza'i lo brgya la mi'i lo sa ya gnyis dang 'bum phrag bzhi 'byung ba rnams gnas gnyis su byas pa'i 'og ma la bcus bgos pa'i cha gcig la nyis 'bum bzhi khri 'byung ba de steng ma la 'phri ba ste bu lon sbyang bar bya ba'i lhag mas ya gnyis dang 'bum phrag gcig dang khri phrag drug gi lo grangs ni gza'i lo brgya dang dus bzhi chen po'i phyed tshad yin no/ /gza' lo'i yun tshad mi'i lo nyi khri chig stong drug brgya dang/ nyi khri bzhi stong du bshad pa gnyis bu lon sbyang ma sbyang gi dbye ba yin pas mi 'gal bar shes par bya ste/ phyi ma la bcu chas 'bri na snga ma'i grangs su 'gyur ba'i phyir/ gal te dus bzhi'i mthar gza' thams cad stong par 'jug na/ dus bzhi gcig la gza' so so'i 'khor grangs ji tsam 'byung zhe na/ spen pa ni 'bum bzhi khri bzhi stong/ sgra gcan ni nyis 'bum bzhi khri/ phur bu ni sum 'bum drug khri/ mig dmar ni sa ya gnyis dang 'bum phrag brgyad dang brgyad khri/ /nyi ma lhag pa pa sangs 'jug ring bzhi ni sa ya bzhi dang sum 'bum nyi khri/ zla ba ni bye ba lnga dang sa ya gcig dang 'bum phrag brgyad dang bzhi khri 'khor bar gsungs te/ bsdus rgyud ye shes kyi le'u las/ stong pa la ni spen pa 'jug pa @008a @#/ /rang gi nyin zhag bgrod pa'i dbang gis dus kyi mthar 'gyur te/ stong pa nam mkha' mkha' mtsho chu gter zla ba'i nyin zhag longs spyod lhag ma rnams kyis nam gru'o/ /rang gi bgrod pa 'gro ba'i nyin zhag mkha' mkha' nam mkha' mkha' mtsho mig gis der ni sgra gcan 'jug /rang gi bgrod pa 'gro ba'i nyin zhag mkha' mkha' nam mkha' mkha' dus dus kyis lha yi blon po 'jug /nam mkha' mkha' dang stong pa mkha' brgyad sbrul dang mig gi nyin zhag rnams kyis bkra shis 'jug pa ste/ mkha' mkha' nam mkha' mkha' mig me dang chu gter grangs kyi nyin zhag rnams kyis nyi ma la sogs 'jug /mkha' mkha' nam mkha' mkha' mtsho brgyad dang zla ba mda' yi nyin zhag rnams kyis zla ba der 'jug ste/ de yi dus su rgyal po 'gro ba dag ni rang rang tshad kyis rnam par nyams par rab tu 'gyur/ /zhes gsungs pa'i phyir/ /de dag ni dus bzhi'i lo la spen pa'i nyin zhag mi'i lo sum cu dang/ sgra gcan gyi nyin zhag mi'i lo bco brgyad sogs gza' rang rang gi 'khor los bgos pa'i thob nor yin pa'i phyir te/ Tika chen las/ dus bzhi'i lo grangs ji snyed pa/ /sum brgya drug cus bsgyur ba la/ /gza' rnams rang rang dkyil 'khor lo/ /sum brgya drug cu bsgyur ba yi/ /zhag gis bgos pa'i rnyed pa dor/ /lhag ma med phyir stong par zhugs/ /bsil zer can ni sum cu'i zhag /nyi lhag pa sangs mjug rings kyi/ /nyin zhag mkha' ro me nyid de/ /mig dmar zla ba bco brgyad do/ /phur spen sgra gcan rim pa bzhin/ /nyi ma mkha' me skyon gyi lo/ /gza' yi byed @008b pa'i 'khor lo yin/ /zhes gsungs pas so/ /shog bu nyer lnga par/ nang le'i tshigs bcad bdun cu rtsa drug pa/ phyogs la zla ba rang gi rgyu bas nyin zhag ces bya'i rkang ba dag kyang bu lon dag tu byed/ /slar yang zla ba gnyis kyis gzhan pa dag kyang nyin zhag lo yi sbyor ba dag las 'phel ba ni/ rdzogs pa'i lo la nyin zhag drug tu 'gyur te gzhan yang de bzhin 'chi ba dag gis mtshams su 'phel/ rgyal po de ltar nyi ma'i bu lon nyis 'gyur 'di ni lo yi sbyor ba dag gis 'phel bar byed/ ces gsungs pa'i don ni/ nyin zhag las tshes zhag ni rags rtsis byas na chu tshod gcig gis dman pa dang/ 'bring du rtsis na rkang pa dang bcas pa'i chu srang lnga bcu rtsa drug gis dman pa yin pas/ rags rtsis ltar na phyogs te zla phyed la nyin zhag gi rkang pa ste bzhi cha'am chu tshod bco lnga bu lon du 'gyur zhing/ zla ba gnyis kyi tshe nyin zhag gcig bu lon du 'gyur la/ lo gcig na nyin zhag drug bu lon du 'gyur te/ yang 'chi ba'i 'tshams te lo brgya na nyin zhag drug brgyar 'gyur ro/ /'bring du rtsis na zla phyed la chu tshod bcu bzhi dang rkang pa gsum dang bcas pa'i chu srang gsum bu lon du 'gyur zhing/ nyin zhag drug cu rtsa bzhi nyin zhag gcig bu lon du 'gyur la/ lo gcig la nyin zhag lnga dang chu tshod sum cu rtsa bdun chu srang sum cu bu lon du 'gyur ba dang/ lo brgya na nyin zhag phyed dang bcas pa'i drug cu rtsa gnyis lhag pa'i lnga brgyar 'gyur ro/ /de nyid nyi ma'i longs spyod la nyis 'gyur du 'gro bas/ zhag drug cu rtsa bzhin nyin zhag gnyis bu lon du 'gyur zhing/ lo gcig la zhag bcu gcig chu tshod bco lnga bu lon du 'gyur la/ lo brgya na nyin zhag nyi shu rtsa lnga lhag pa'i brgya phrag bcu @009a @#/ /gcig gam lo gsum phyogs gsum bu lon du 'gyur ba'i phyir ro/ /de yang zhib par bshad na/ gshol dang bu lon gyi khyad par shes dgos la/ de ni khams le'i tshigs bcad re bzhi pa/ stong phrag nyi shu rtsa gcig ro brgya ldan pa dag las so yi cha yis nges par phyung gyur ba/ lus la dbugs lhag gang dag nyin zhag so so'i dus su 'byung ba ri dang dus rnams dag gi grangs/ /stong phrag sum cu rtsa drug dag gis bsgyur ba rnams kyang lo brgya'i tshad du rab tu grags pa ste/ stong du me yis rab tu phye ba dag ni chu tshod du 'gyur drug cu'i cha yis nyin zhag kyang/ /zhes pa'i don ni/ 'bring rtsis ltar na nyin zhag gcig gi dbugs stong phrag nyi shurtsa gcig ro brgya ldan pa ste nyi khri tshig stong drug brgya dag las/ so yi cha ste sum cu rtsa gnyis kyis bgos pa'i thob nor ni dbugs gshol gyi grangs yin zhing/ de yang nyin zhag gcig gi dbugs lhag gi grangs ni 'byung ba ri dang dus te drug brgya don lnga'o/ /nyi khri tshig stong drug brgya'i dbugs de dag lo brgya'i nyin zhag gi grangs stong phrag sum cu rtsa drug ste sum khri drug stong gis bsgyur ba ni lo brgya'i dbugs kyi grangs 'bum phrag bdun cu rtsa drug lhag pa'i bye ba phrag bdun cu rtsa bdun du 'gyur la/ de yang sum cu rtsa gnyis kyis bgos pa'i thob nor 'bum phrag bzhi bcu rtsa gsum lhag pa'i bye ba phrag gnyis ni lo brgya'i nang du rtsa dbum nas 'bab pa'i dbugs gshol gyi grangs yin zhing/ dbugs gshol gyi grangs de nyid kyis lo brgya'i dbugs la bu lon spyad par bya ba'i lhag ma ni lo brgya'i nang du ro rkyang nas 'bab pa'i dbugs kyi grangs su 'gyur ro/ /dbugs kyi phung @009b po de nyid stong dus me ste sum brgya drug cus bgos pa'i thob nor ni lo brgya'i chu tshod kyi grangs dang/ chu tshod kyi phung po de nyid drug cu sa bgos pa'i thob nor ni lo brgya'i nyin zhag gi grangs su 'gyur ba'i phyir ro/ /de ltar na lo brgya'i dbugs kyi tshogs sum cu rtsa gnyis kyis bgos pa'i thob nor ni lo brgya'i dbugs gshol gyi grangs yin pa bzhin du/ lo brgya'i nyin zhag sum khri drug stong de nyid so gnyis kyis bgos pa'i thob nor ni lo brgya'i zhag gshol gyi grangs dang/ lo brgya'i zla ba brgya phrag bcu gnyis po so gnyis kyis bgos pa'i thob nor ni lo brgya'i zla gshol gyi grangs dang/ lo brgya de nyid so gnyis kyis bgos pa'i cha lo gsum phyogs gsum du 'gyur ba'i lo gsum ni lo brgya'i lo gshol gyi grangs yin no/ /chu srang dang chu tshod kyi gshol yang de'i rigs pas rtsis sla/ de dag kyang 'bring rtsis kyi dbang du byas so/ /rags 'bring phrag sum so so'i gshol rtsis tshul ni/ dbugs chu srang chu tshod zhag zla lo drug po rang rang gi sum cu dang so gnyis dang phye dang so gsum na rim ba bzhin du rags 'bring phra ba'i dbang du byas pa'i rang rang gi gshol 'don tshul shes par bya'o/ /shog bu de nyid kyi rgyab logs na/ 'grel chen las/ byang du bgrod pa nas byang du bgrod pa'i bar la nyin zhag lnga chad par 'gyur ro/ /zla ba so so la chu tshod nyi shu rtsa lnga chad par 'gyur ro/ /byed pa 'pho ba'i dus nas byed pa 'pho ba'i dus kyi zla ba so so la chu tshod nyi shu rtsa lnga lhag ste/ lo'i 'tshams su gza' lnga lhag go /zhes pa ni/ nyi ma byang du bgrod pa nas slar yang byang du bgrod pa'i bar gyi longs spyod nyi ma'i nyin zhag lnga'i longs spyod chad par 'gyur ro/ /de'i cha shas dus kyi zla ba so @010a @#/ /so la khyim zla'i chu tshod nyi shu rtsa lnga re chad par 'gyur ro/ /longs spyod la chad pa dkyil 'khor la lhag pas byed pa 'pho ba'i dus nas slar yang lo'i byed pa 'pho ba'i dus kyi zla ba so so la dus kyi chu tshod nyer lnga re lhag ste; de bsdoms pas dus kyi lo'i 'pho mtshams su nyi mas khyim rdzogs pa la gza' lnga'am/ khyim zhag lnga lhag por dgos zhes pa'i don yin pas tshes zla dang nyin zla mthun pa'i ched du lo lnga na zla gshol 'don pa'i shes byed du ji ltar 'grig dpyad dgos/ yang shog bu de nyid du/ lug khyim nag zla'i nad du shar ba dang sa ga zla ba'i nang du shar ba gnyis yod pa'i dbang gis lo 'ga' zhig la nag zla zla ba dang po dang 'ga' zhig la bcu gnyis par song tshul gsungs pa 'di don la de ltar shin tu 'thad mod kyang/ rtsod tshe lo 'ga' zhig la nag zla lan gnyis su 'byung ba dang 'ga' zhig la nag zla chad pa'i skyon du mi 'gyur ba'i zhib cha byed dgos so/ / shog bu nyer bdun par/ kha cig nyi mas nag pa sa ri yongs rdzogs dang sa ga'i skar rkang gcig longs spyod pa'i yun lug gi khyim zlar 'jog pa 'gog pa la/ nag pa'i bzhi cha nas gzungs gdangs lugs khyim dus mnyam du rdzogs pa cig yod pa'i phyir gsungs pa ni/ phyogs snga smra ba'i bas pas mtshod ltar bshad pa yin gyi/ rang lugs la de ltar bshad pa ma yin te/ phyogs snga mas lug khyim nag pa zla ba dang sbyar ba'i rgyu mtshan gyis nyi ma nag pa'i skar khyim du slebs pa nas lug gi khyim zlar 'jog dgos na lug khyim sa ga zla ba dad sbyar ba yang 'grel chen las gsungs pa'i phyir na lug gi khyim zla la nyi mas sa ga'i skar khyim rdzogs @010b par longs spyod pa yang yod par khas blangs dgos zhes pha rol po'i bsam tshod ltar 'gog pa yin pa'i phyir te/ gzhan du na yar ngo'i tshes btso lngar nyi zla gnyis skar khyim gcig la lhan cig tu gnas pa yod par mi 'dod bzhin du khas len dgos par 'gyur ba'i phyir ro/ /shog bu de nyid du/ lug la lug gu skye dus de lug khyim dang/ glang gis zhing rmo ba'i dus de glang khyim dang/ dud 'gro phal cher 'khrig pa spyod pa'i dus de 'khrig khyim dang; karka Ta spal ba skad 'byin pa'i dus de karka Ta'i khyim dang/ seng ges 'khrig pa spyod pa'i dus de seng ge'i khyim dang/ bu mo rnams mdangs bzang ba'i dus de bu mo'i khyim dang/ srang gis tshod byed pa'i dus de srang khyim dang/ sdig pa khung du 'gro ba'i dus sam mi rnams dud 'gro gsod pa'i dus de sdig khyim dang/ gzhu sra ba'i dus de gzhu khyim dang/ chu srin kha nyi ma la bstan nas 'dug pa'i dus de chu srin gyi khyim dang/ bum pa'i nang gi chang ro nus dang ldan pa'i dus de bum pa'i khyim dang/ nya rnams chu la rgyu ba'i dus de nya'i khyim dang/ gzhu sra ba'i dus de gzhu khyim dang/ chu srin kha nyi ma la bstan nas 'dug pa'i dus de chu srang yi khyim dang/ bum pa'i nang gi chang ro par srid pa'i gnas su khyim gyi dbye bas yang dag gnas/ gzhu yi rnam pa'i dus khyim dag la go la'i dbus nas lhor ni me yi dkyil 'khor la gnas shing/ byang du de ni bsil ba'i ri ste pad 'dab bzang po bzhin du shar du lug dang srang sogs la'o/ /me nas bsil ba'i ri yi 'tshams su dpag tshad stong phrag mkha' dang nam mkha' mkha' dang mda' ri'o/ /zhes pa'i 'grel chen las/ 'dir shar gyi phyed du lug go /dbang ldan du glang ngo @011a @#/ /byang gi phyed du 'khrig pa'o/ /zhes pa nas/ shar gyi phyed du nya'o zhes pa ni go la la khyim dgod pa'o/ /'dir lug shar ba na srang nub po/ /glang shar ba na sdig pa nub ste/ de ltar thams cad du nyin mtshan gyis shar ba'i khyim nas khyim bdun pa ni nub par rig par bya'o/ /zhes pa'i don la bshad tshul mang po yod kyang/ /re zhig Tikka chen gyi bshad tshul 'god pa la/ thog mar go la ngos gzung ba ni Tikka chen las/ go la ces pa ni saM khr-i ta'i skad sor bzhag yin cing de nyid lotstsha ba snga ma kha cig gis khongs dang/ kha cig gis sbubs dang/ kha cig gis zlum por bsgyur mod kyang/ skabs su bab ba ni zlum po yin la/ de yang bsil ri'i steng gi nam mkha'i mtha'i bar gyi sa dang lan tshwa'i rgya mtsho'i steng gi nam mkha' la gza' dang rgyu skar rnams 'degs byed kyi rlung gis bteg nas ri rab dbus su gnas pa la bskor ba'i tshul gyis 'khor ba'i zlum po ni khyim gyi go la zhes bya zhing/ 'di la sa dum bu bcu gnyis po thams cad kyi spyi'i 'og la dang/ gling 'di lta bu sa dum po re re'i steng gi nam mkha'i go la zlum po ste go la che chung rigs gnyis yod do/ /de la 'degs bya ni skar khyim gyi go la nyid yin zhing/ rlung ni de 'degs byed yin gyi/ 'degs byed kyi rlung tsam go la'i mtshan gzhir mi gzung ngo/ /zhes dang/ rgyu skar nyer bdun 'degs byed kyi rlung gis bteg nas ri rab la zlum por 'khor ba ni rgyu skar gyi go la zhes bya zhing/ de nyid rgyu skar gnyis dang bzhi cha re'i yul gyi khyon bcu gnyis su phye ba'i dbang gis bzhag pa'i khyim bcu gnyis la nyi ma 'degs byed kyi rlung gis bteg nas rim pa bzhin spyod pa'i tshul gyis zlum por 'khor @011b ba ni khyim gyi go la zhes bya la/ nyim khyim bcu gnyis la spyod pas lto byad du bgrod pa'i gnas sam gzhir gyur ba bsil ri nas me ri'i bar gyi nam mkha'i khyon zlum po la yang go la zhes bya ste/ de dag thams cad la yang go la'i sgra dngos su 'jug mi 'jug gi khyad par lung dang rigs pa gang gi sgo nas kyang dbye bar mi nus pas gsum ka'ang go la'i mtshan gzhir gzung dgos so/ /zhes gsungs shing/ shar gyi phyed du lug go zhes sogs de go la chud du la khyim dgod tshul yin par bshad de/ Tikka chen las/ gling 'di'i nyin mtshan mnyam pa'i go la'i ri mo dbus su byas nas gling 'di rang gi thad kyi steng gi nam mkha' la skar khyim bcu gnyis zlum por bkod pa'i tshe/ zlum po de'i phyed khyim drug g.yas dang/ zlum po'i phyed khyim drug g.yon du gnas pa'i don te/ khyi drug drug la rgyu skar gyi gnas phyed dang bcu bzhi bcu bzhi yod cing/ g.yas ni me ri'i phyogs dang/ g.yon ni bsil ri'i phyogs te/ nyi ma kha shar la bltas nas rang 'gros byed pas de'i g.yas g.yon gyi dbang du byas pa'o/ /gling bcu gnyis po re re'i thad kyi steng gi skar khyim zlum po'i dbus gling rang rang gi nyin mtshan mnyam pa'i ri mo'i steng nas g.yas g.yon du khyim drug drug gnas tshul 'di dang rigs 'dra zhing/ nyi zla'i gling bcu gnyis po gang gi dbang du byas kyang rang 'gros gling de'i shar la kha bltas nas byed par khyad par med do/ /rlung 'gros kyis ni zhag re bzhin ri rab la g.yas skor du 'degs byed kyi rlung gi shugs kyis bgrod par byed de/ 'og tu 'grel par/ de'i phyir 'khor ba'i shugs 'di ni khyim gyi yin gyi/ khyim gyi gzhi la gnas pa'i nyi ma ni ma yin no/ /'dir khyim gyi 'khor lo ni g.yas skor gyis 'khor te/ @012a @#/ /gza' rnams ni khyim dag la g.yas min gyi rgyu'o/ zhes gsungs pa'i don yang de ltar yin la/ nyi ma rang 'gros de ltar byas pas rgyu skar ji 'dra ba zhig gi thob skal gyi nam mkha'i go sa der sleb pa de'i sgo nas nyi ma lug la sogs pa'i khyim de dang der sleb pa'i tha snyad byed do/ /zhes dang/ de ltar gling 'di'i nyin mtshan mnyam pa'i ri mo'i byad du khyim drug dang lhor khyim drug gnas pa ni gling 'di'i steng thad kyi go la'i nyin mtshan mnyam pa'i ri mo'i dbus nas bsil ri dang me ril reg gi par du zlum por bskor ba'i zlum po phyed byad ma dang zlum po phyed lho ma'i dbang du byas la/ yang tshul de ji lta ba bzhin du zlum por bskor ba'i zlum po phyed shar ma dang zlum po phyed nub ma gnyis su bgos pa'i dbang du byas na/ zlum po'i phyed shar du lug sogs dang/ phyed nub tu srang sogs te/ phyed shar mar lug nas bu mo'i mthar thug pa la gnas shing/ de bzhin du phyed nub mar srang la sogs pa nya'i mthar thug pa la nyi ma rim pa bzhin gnas so/ /yang sngar ji lta ba bzhin du zlum por bskor nas/ gling 'di'i steng thad kyi zlum po de nyid phyogs mtshams brgyad du cha bgos shing/ phyogs kyi cha bzhi yang phyed mar bgos nas cha brgyad du byas pa na zlum po de nyid phyogs mtshams kyi cha bcu gnyis su 'gyur ro/ /de ltar cha bgos pa'i dbang du byas pa'i tshe gling 'dir zlum po de'i shar gyi phyed g.yon du tha skar dang; bra nye'i thob thang gi nam mkha'i go sa rangs po dang/ smin drug gi thob thang gi gnas kyi bzhi cha ni lug go/ /dbang ldan du smin drug gi gnas kyi bzhi gsum dang/ snar ma rangs po dang/ mgo'i gnas phyed ni glang ngo/ / @012b zhes pa nas/ nam gru'i gnas rangs po ni nya'o zhes pa ni gling 'di'i thad kyi go la'am nam mkha'i zlum skor la khyim bcu gnyis phyogs mtshams so sor dgod pa'o/ /zhes gsungs pa'i phyir/ gling 'dir nyi ma rang 'gros byang dang lhor ba grod tshul zhib bar bshad du yod de/ de nyid las/ nyi ma lhor bgrod mthar thug pa rdzogs ma thag gzhu'i khyim nas 'byung zhing/ chu srin gyi khyim du sleb nas byang bgrod rtsom pa na/ gling 'di'i nam mkha'i gol zlum po sngar phyogs mtshams kyi cha bcu gnyis su phye ba'i lho'i phyed shar ma'i lho mtha' nas byang du nyin re bzhin rang 'gros kyi bgrod pas khyim zla gcig rdzogs pa na chu srin gyi khyim spyad zin nas/ bum pa'i khyim du sleb cing/ go la'i phyogs mtshams kyi cha bcu gnyis kyi nang nas me mtshams kyi char rang 'gros kyis slebs la/ de bzhin du rim pa bzhin byang du bgrod pas byang bgrod mthar thug cing 'khrig pa'i khyim spyad zin pa dang/ go la'i khyim bcu gnyis kyi nang nas byang gi phyed shar ma'i nam mkha'i go sa rang bgros kyis spyad zin nas/ lhor bgrod kyi mgo rtsom pa dang/ ka ra ka Ta'i khyim du sleb nas zhag re bzhin rang 'gros kyis lho la 'ongs pas khyim zla gcig rdzogs pa na ka ra ka Ta'i khyim spyad zin pa dang/ byad kyi phyed nub ma'i go sa'i byang mtha' nas lho mthar rang 'gros kyis sleb cing/ seng ge'i khyim du zhugs nas/ go la zlum po'i cha bcu gnyis kyi nang nas rlung mtshams kyi cha'i byang mtha' nas lhor zhag re bzhin bgrod pas/ khyim zla gcig na cha de'i lho mthar rang 'gros kyis slebs/ seng ge'i khyim spyad zin/ de nas bu mo'i khyim du zhugs nas go la'i cha bcu @013a @#/ /gnyis kyi nub kyi phyed byad ma'i mtha' nas lhor zhag re bzhin bgrod pas khyim zla gcig na cha de'i lho mthar rang 'gros kyis sleb/ bu mo'i khyim spyad zin/ de dag srang gi khyim du zhugs nas/ nub kyi phyed lho ma'i nam mkha'i go sa'i byad mtha' nas zhag re bzhin lhor bgrod pas khyim zla gcig na cha de'i lhor mthar sleb cing/ srang gi khyim spyad zin la/ de ltar rim pa bzhin sbyar nas/ gzhu'i khyim spyad zin cing/ cha bcu gnyis kyi nang nas lho'i phyed nub ma'i lho mthar sleb pa na/ lhor bgrod mthar thug nas slar yang byang bgrod kyi mgo rtsom pa la 'jug ste/ da ltar bgrod pa'i srang khyim du ston mnyam dang/ lug khyim du dpyid mnyam byed do/ /des na bgrod tshul 'di ltar shes par byed pa la/ nam mkha'i go la zlum po bcu gnyis su phye ba'i lho'i phyed shar ma'i cha de nyid kyi lho mtha' nas zhag re bzhin nyi ma byang du bgrod pa'i mgo brtsams nas lho'i phyed shar ma'i go sa de'i byang mthar thon gyi bar la nyi ma gling 'di'i thad du chu srin gyi khyim la gnas pa sogs shes par bya ba'i phyir dang/ slar yang lho'i phyed du chu srin no/ /zhes sogs 'di dag gsungs pa yin gyi/ khyim bcu gnyis gling 'di'i thad kyi nam mkha' la phyogs mtshams 'di ltar ma 'tshol bar dus gcig tu gnas pa skad cig tsam yang mi srid do/ /de yang nyi ma ni lhor bgrod kyi tshe kha lhor blta ba dang/ byang bgrod kyi tshe kha byang la bltas nas bgrod pa ma yin gyi/ kha shar la bltas rang 'gros byed kyang/ byang bgrod kyi tshe de ring gling 'di'i nam mkha'i go sa gang du slebs pa de las sangs nyin de'i byang du sleb pa sogs su shes par bya la/ gling 'di'i thad @013b kyi steng gi nam mkha'i go sa zlum po phyogs mtshams kyi cha bcu gnyis su bgos pa'i byang gi phyed shar mar byad bgrod mthar thug nas byang gi phyed nub ma'i go sa nas lhor bgrod rtsom pa dang/ lho'i phyed nub ma'i lho mthar lho bgrod mthar thug nas lho'i phyed shar ma'i lho mtha' nas byang bgrod mgo rtsom pa ltar/ gling gzhan thams cad du'ang rang rang gi steng nam mkha'i go sa zlum po phyogs mtshams kyi cha bcu gnyis su phye ba'i byang gi phyed shar mar byang bgrod mthar thug cing phyed nub ma nas lhor bgrod mgo rtsom pa dang/ lho'i phyed nub mar lho bgrod mthar thug nas phyed shar ma nas byang bgrod rtsom pa khyad par med kyang skar khyim gyi gzhi gang la gnas nas lhor bgrod byang bgrod rtsom pa mi 'dra ba bcu gnyis bcu gnyis yod de/ gling 'dir nyi ma kar kaTa'i khyim du zhugs nas lhor bgrod rtsom yang lho gling nub mar seng ge'i khyim dang/ nub gling g.yas mar bu mo'i khyim du zhugs nas/ lhor bgrod rtsom pa sogs 'og tu 'chad pa ltar yin pa'i phyir ro/ /gong du bshad pa'i khyim drug g.yas dang khyim drug g.yon du pad 'dab dang gzhu'i rnam pas gnas pa'i tshul de yang 'dir ji skad bshad pa ltar yin gyi/ dus gcig tu ma yin la/ de yang rgyud 'grel pa gnyis go la'i ri mo zhes yang yang gsung pa ni bgrod tshul de dag ri mor bris pa'i dpe ris bkod pa min la bstan te shes par byed par bstan pa yin gyi/ gling bcu gnyis dang rgya mtsho'i steng gi nam mkha' la ri mo su zhig gis 'dri bar byed/ des na shog bu sogs la go la'i ri mo zlum por bskor ba'i dbus su nyin mtshan mnyam pa'i gnas mtshon pa'i ri mo shar nub la byas pa'i tshe/ g.yas g.yon gyi zlum po phyed pa @014a @#/ /gnyis pad 'dab dang gzhu'i rnam par 'gyur zhing/ de re re la khyim drug drug gi ri mo byas nas g.yon gyi khyim drug gi gsum la byang bgrod dang/ gsum la lhor bgrod/ g.yas kyi khyim drug gi gsum la lhor bgrod dang gsum la byang bgrod/ g.yas kyi drug dang g.yon gyi drug gi bar du ston mnyam dpyid mnyam byed pa'i ri mo la mtshon nas shes par byed pa gtso bo'i don yin gyi/ ri mo la khyim drug drug g.yas g.yon du bkod pa ltar gling re'i thad ka'i nam mkha' la dus gcig tu yod par 'khrul par mi bya'o zhes kho bo smra'o/ /de ltar go la 'khyim dgod pa bstan nas kyi rnam 'char nub kyi tshul 'chad pa ni/ 'dzam gling chung du 'dir lug shar ba na srad nub po/ /glang shar ba na sdig pa nub ste/ gling 'dir 'char nub ji ltar byed pa'i tshul de ltar gling thams cad du nyin mtshan du shar ba'i khyim bdun pa ni nub par rig par bya'o/ /zhes gsungs so/ /shog bu de nyid kyi rgyab logs na/ khams le'i tshig bcad drug cu ba/ khyim gcig la ni nyi ma gnas pas mtha' dag dus kyi tshogs dang zla ba dang ni phyogs rnams byed/ dum bu dum bu dag tu zla bar 'gyur te sa gzhi bcu gnyis rtsibs rnams la ni rim pas so/ /tshad gang dum bu gang du nyin mo'i dbang gis yin pa de ni bdun pa dag tu mtshan mo la'o/ /la ma phyed 'bum phrag gsum po dag la nyi ma'i mdun du nyin mo dang ni rgyab tu mtshan mo'o/ / zhes pa 'di yig char rtsa rgyud kyi tshigs bcad du gsungs pa dpe ma dag gam dpyad dgos shing/ de'i 'grel chen las/ lhu7n po'i lho'i dum bu 'dir lug la nyi ma gnas pas dpyid kyi dus sa ga'i zla ba byed do/ /me'i zur gyi @014b phyed dum bu gnyis pa la sron gyi zla ba byed do/ /zhes pa nas/ bden bral gyi zur gyi phyed gzhan gyi dum bu la nag pa'i zla ba byed do/ /zhes pa'i don la/ yig char zla ba de dag gis nya skar gyi zla ba'i dod thub tam la dgongs par gsungs pa de ni shin tu legs te/ de'i don yang lug gi khyim zlas lho gling shar mar 'dzam du gling gi sron gyi zla ba'i 'dod thub pa dang/ shar gling nub mar 'dzam bu gling gi chu stod kyi zla ba'i dod thub pa dang/ shar gling dbus mar 'dzam bu gling gi gro bzhin gyi zla ba'i dod thub pa sogs su sbyar dgos pa'i phyir ro/ /rwa 'gyur dang 'bro 'gyur gnyis kar nya skar gyi ming mi 'byung bar ra 'bring tha mar 'gyur bas/ snga ma 'gyur mi legs par Tikka chen las gsungs mod kyang/ rgya gzhung tshig thub rnams las ra 'bring tha gsum gyi tha snyad 'byung ba ni go bde ba'i phyir lo tsA bas don 'gyur byas pa yin gyi/ rgya gar la ra 'bring tha gsum gyi tha snyad dang skad dod med par kun gzigs lnga pa chen pos gsungs pa ltar mdzod kyi mtha' dpyod du 'ang bshad pas dpyad dgos/ /shog bu nyer dgu par/ ye shes kyi le'u tshigs bcad brgya zhe gsum pa/ dang po'i dbugs ni yon tan med pa'i bdag nyid/ ces sogs dbu ma'i rlung las dbugs 'phel tshul ston pa'i skabs kyi 'grel chen las/ zla ba dang nyi ma'i rgyu ba rnam pa bzhi ste/ myur ba dang/ dal ba dang/ 'khyogs po dang/ 'byung ba'i rkang ba rnams kyi nor 'phel ba dang 'grib pa dang/ bu lon 'phel ba dang 'grib pa'i dbye bas so/ /zhes pa'i don la/ ye le'i 'grel bshad rje blo gros chos skyong gis mdzad pa las/ zla ba'i rim pa'i snga rkang dang nyi ma'i rim min gyi snga rkang la myur ba dang/ @015a @#/ /phyi rkang la dal ba dang/ zla ba'i rim min gyi snga rkang dang nyi ma'i rim pa'i snga rkang la 'khyogs po dang/ phyi rkang la 'byung ba'i rkang pa rnams kyi nor 'phel ba dang 'grib pa dang bu lon 'phel pa dang 'grib pa'i dbye bas so/ /zhes gsungs shing/ TIka chen las/ 'jig rten chags pa'i dus su nyi ma rgyu skar gyi dang po tha skar gyi steng du skyes nas de nas rim pa bzhin rgyu skar la longs spyod pa ma yin gyi/ lug glang 'khrig pa ste khyim gsum 'das pa kar kaTa'i khyim gyi dang po nab so'i gzhi gsum 'das pa'i mtshams su skyes te/ de nas rim pa'i mgo brtsams nas ji lta ba bzhin du spyod cing/ kar kaT seng ge bu mo gsum rim pa'i snga rkang/ srang sdig pa gzhu gsum rim pa'i phyi rkang ste chu smad kyi bzhi cha yar bcad 'das/ de nas chu smad kyi gzhi gsum nas/ chu srin bum nya gsum rim min gyi snga rkang ste nam gru 'das/ de nas tha skar nas lug glang 'khrig la gsum rim min gyi phyi rkang ste nab so'i gzhi gsum 'das te/ nyi ma'i dal rkang bgrod pa'i tshul 'di ni rnam pa thams cad du yin la/ zhes gsungs so/ /'di la snga ma kha cig /skyes skar nas 'khor lo bzhi cha'i bar du 'khyog 'gros nub tu 'gro'o/ /de nas bzhi cha'i bar du 'byung 'gros byang du ldog ste/ de gnyis ni rim pa lho bgrod do/ /de nas bzhi cha'i bar du myur 'gros shar du 'gro'o/ /de nas bzhi cha'i bar du dal 'gros lhor ldog ste/ de gnyis ni rim min byang bgrod do zhes 'dod la/ pad dkar zhal lung las/ nyi ma la mtshon na lho gling dbus mar rim pa'i mgo rtsom pa'i tshe rtag pa'i longs spyod kyi steng na gnas pa la/ de nas @015b zhag re bzhin bu lon 'phel ba'i sgo nas rtag pa'i longs spyod las chad pa 'ba' zhig tu spyad pas rim pa'i snga rkang gi par du 'khyog po'i rgyu pa zhes bya/ de nas zhag re bzhin bu lon 'grib pa'i sgo nas rtag pa'i longs spyod las lhag pa 'ba' zhig tu spyad de rkang pa ldog pas rim pa'i phyi rkang gi bar du 'byung ba'i rgyu ba zhes bya/ de nas zhag re bzhin nor 'phel ba'i sgo nas rtag pa'i longs spyod las lhag pa 'ba' zhig tu spyad pas rim min gyi snga rkang gi bar du myur ba'i rgyu ba zhes bya/ de nas zhag re bzhin nor 'grib sgo nas rtag pa'i longs spyod las chad pa 'ba' zhig tu spyad de rkang pa ldog pas rim min gyi phyi rkang gi bar du dal ba'i rgyu ba zhes bya'o/ /zhes bshad do/ /nor dang bu lon 'phel ba dang 'grib tshul ni/ TIka chen las/ tshes zhag so gcig cung med kyi bar la rtag pa'i longs spyod kyis gcig gsum lnga longs pa na rkang pa'i chu tshod drug ni rim pa'i snga rkang dang po dang rim min gyi phyi rkang tha ma la rgyu ba na bu lon yin pas chu tshod gcig gnyis dgu spyod la/ rim pa'i phyi rkang tha ma dang rim min gyi snga rkang dang po la rgyu ba na nor yin pas chu tshod brgya zhe gcig spyod pa yin no/ /rkang pa'i chu tshod bzhi ni/ rim pa'i snga gnyis pa dang rim min gyi phyi rkang lnga pa la rgyu ba na bu lon yin pas chu tshod brgya so gcig spyod cing/ rim pa'i phyi rkang lnga pa dang rim min gyi snga rkang gnyis pa la rgyu ba na nor yin pas chu tshod brgya so dgu spyod pa yin no/ rkang pa'i chu tshod gcig ni/ rim pa'i snga rkang gsum pa dang rim min gyi phyi rkang bzhi pa la rgyu ba na bu lon yin pas chu tshod brgya so bzhi dang/ rim pa'i phyi rkang bzhi pa dang rim min gyi snga rkang gsum pa la rgyu ba na nor yin pas @016a @#/ /chu tshod brgya so drug spyod pa yin no/ /zhes gsungs pa ltar yin la/ gcig gsum lnga ni brgya so lnga dang/ gcig gnyis dgu ni brgya nyer dgu dang/ chu tshod ni yul gyi chu tshod yin no/ /shog bu sum cu bar/ rta bya byi ba yos la bshol/ /ston dgun dpyid dbyar 'bring po gnyis/ /zhes pa ltar bshol 'don tshul dgag pa 'di dpyad dgos te/ zla bshol 'dor ba ni rgyal po'i rjes su 'brang bas so/ /zhes gsungs pa gang zhig /sngar ltar bshol 'dor ba'i rgyal po yod pa'i phyir te/ lung gleng gzhi las/ rgyal po dag ni lo gsum gsum zhing bshol 'dor bar byed do/ /zhes gsungs pas so/ /de yang rgya gar gyi rgyal po ni mo zla drug la zhag nyer dgu las med pas zhag lhag po drug dang dbyar dgun gyi nyi ma ldog mtshams su zhag gnyis gnyis te lo gcig la zhag lhag po bcu 'byung bas/ lo gsum la zla ba gcig lhag ste zla bshol 'dor ba dang/ li'i rgyal ba na yud tsam sum cu la zhag gcig tu brtsi ba yin kyang/ nyin zhag gcig la yud tsam nyer dgu dang thang cig lnga las mi 'das pas/ zhag re la thang cig nyer lnga'i bshol 'byung ba bsags pas lo gcig la zhag bcu'i bshol yod pas lo gsum na zla bshol 'don par 'dod pa dang/ ltas sna tshogs bstan pa las/ sngar ltar rta bya byi yos la bshol 'don par bshad pa'i phyir/ mtsho TIka las so/ /gong rtse zhu lan du'ang/ dug ba can gyi lo dag la/ /dug pa can gyi zla ba 'don/ /zhes stag sprul sprel phag bzhi'i rang rang gi zla ba la bshol 'don pa ni rgya nag gi lugs kyi bshol 'don tshul yin pa'i phyir ro/ /der ma zad lung las kyang lo lnga ldan bshol 'dor bar @016b 'dir drangs pa dang/ lo drug drug cing bshol 'dor cig ces 'dul TIka rin chen 'phreng bar drangs ba dang/ de yang lo lnga lnga'i tshes zhag drug drug lhag pa lo drug pa la zla bar longs pa 'dor ba'am yang na zhag lnga lnga lhag pa khyim lo drug pa la 'dor bar mngon no/ /zhes rin chen phreng bar bshad do/ /zhib brtsis ni 'dir khyim zla phyed dang bcas pa'i sum cu rtsa gnyis na tshes zla phyed dang bcas pa'i so gsum du 'gyur ba'i phyir/ tshes kyi lhag pa'i zla bar 'gyur te/ zhag sum cu rdzogs pa'i tshes kyi gnam stong la ni nyi mas khyim re rdzogs pa'i sgo nas khyim 'pho ba'i nus pa med pa'i phyir ro/ /des na nyi mas khyim re rdzogs par longs spyod pa la tshes zhag so gcig cung med re dgos pas tshes zhag sum cu la nyi mas khyim re longs spyod par mi 'gyur ro/ /de'i phyir zla phyed drug cu rtsa lnga la zla lhag re 'don dgos so/ /mtsho TIka sogs las bshol zla thams cad thub par bshad/ kha cig dngos zla thub na bshol zla thub/ /dngos zla mi thub na bshol zla mi thub zer/ gzhan dag bzlog ste smra ba sogs sna tshogs yod kyang/ rang lugs ni dus tshigs drug gi dbang du byas nas/ mdzod 'grel las/ dgun dang dpyid dang dbyar rnams kyi/ /zla ba phyed dang gnyis 'das nas/ zla ba phyed ni lus pa na/ /mkhas pas zhag mi thub pa 'dor/ /zhes dang/ nya skar gyi dbang du byas na/ dge tshul gyi lo 'dri bar/ rgyal dang dbo dang sa ga can/ /chu stod 'khrums stod smin drug can/ /'di rnams kyi ni nag po'i phyogs/ /zla phyed gso sbyong bcu bzhi pa/ /zhes dang/ dus tshigs gsum gyi dbang du byas na/ tshig ler/ kha ba sos ka dbyar rnams kyi/ /zla ba gnyis dang bzhi yi ni/ /mar ngo la ni bcu bzhi ba'i/ /gso sbyongs dom brtson @017a @#/ /dag gis bya/ /zhes gsungs pa ltar ro/ /bzhir phye ba'i dbang du byas nas/ dge slong gi lo dri bar/ dgun zla 'bring po dang dpyid zla rab dang tha chung dang dbyar zla 'bring po dang ston zlar ba dang tha chung rnams kyi mar gyi ngo'i gso sbyong ni bcu bzhi pa'o/ /zhes gsungs shing/ TIka dang bam lngar dgun zla 'bring po dang dpyid zla ra ba sogs thub par gsungs te/ snga ma phyed tshes dang phyi ma ril tshes kyi lugs yin pas mi 'gal bar shes par gyis; shog bu so gcig par/ dbyar gyi zla ba gnyis pa yi/ /tha ma'i tshes dgu nas mtshan ring/ /zhes sogs kyi don la/ mdzod kyi yig char dus tshigs gsum du phye ba'i dbyar zla gnyis pa 'khrums stod zla ba'i phyogs tha ma yar ngo'i tshes brgyad la ston mnyam dang/ tshes dgu nas mtshan mo ring po dang nyin mo thung dur 'gyur zhing/ dgun zla bzhi pa dpe'i zla ba'i yar ngo'i tshes brgyad la dbyid mnyam dang/ tshes dgu nas nyin mo ring po dang mtshan mo thung dur 'gyur bar gsungs pa ltar 'dir yang bshad pa dpyad gzhi che ste/ 'di ltar na hor zla lnga ba'i tshes brgyad la dbyar nyi ldog dang/ hor zla bcu gcig pa'i tshes brgyad la dgun nyi ldog 'byung dgos la/ 'di ni rang cag gnas pa'i yul 'dir de ltar 'byung ba srid pa tsam las rgya gar gyi dbang byas na ji ltar snga yang de ltar 'byung ba mi srid pa'i phyir snyam mo/ /der ma zad 'dzod kyi 'grel pa 'grel bshad rnams su byang dang lhor bgrod mthar thug dang sbyar ba ma gtogs pa dbyid mnyam dang sbyar ba mi srid la/ rje yab sras kyis kyang nyi ldog gnyis dang sbyar nas bshad kyi mnyam pa gnyis dang sbyar ba mi srid pa'i phyir te/ de la 'dus bzang dang phyogs glang gnyis ka mthun par 'di'i @017b dbyar zla gnyis pa ni mar ngo sngon 'gro'i dbyar zla tha chung dang dgun zla bzhi ba ni mar ngo'i sngon 'gro'i dgun zla tha chung du bshad cing/ rim bzhin gro zhun dang mchu'i zla ba la byed do/ /'di ni gdags pa las/ lo gcig la dus gcig tu mtshan mo yud tsam bco brgyad/ nyin mo ni yud tsam bcu gnyis pa yod de/ de gang zhe na/ dgun zla tha chung gi yar gyi tshes brgyad la/ mtshan mo yud tsam bco brgyad/ nyin mo ni yud tsam bcu gnyis yod do/ /lo gcig la dus gcig tu nyin mo yud tsam bco brgyad/ mtshan mo yud tsam bcu gnyis pa yod de/ de gang zhe na/ dbyar zla tha chung gi yar ngo'i tshes brgyad la/ nyin mo ni yud tsam bco brgyad/ mtshan mo ni yud tsam bcu gnyis yod do/ /tshes dgu phan chad ni nyin mo 'bri mtshan mo skye ste zhes gsungs pa dang mthun zhing/ nyi ma'i snying po'i mdor dgun zla tha chung mchu'i zla bar dgun nyi ldog 'byung bar gsungs pa dang mthun no/ /rgyal sras mar 'di'i dbyar zla gnyis pa ni ston zla ra ba dang/ dgun zla bzhi pa ni dpyid zla ra bar bshad de/ bshad tshul 'di ni smin drug zla ba dgun zla ra ba dang/ de nas mo mchog 'dzin pa'i dbang du byas par 'dul TIk rin chen phreng bar bshad pa ltar na nyi ldog gi zla ba gnyis kyi ngos 'dzin ni snga ma dang mthun no/ /de ltar 'dus bzang dang phyogs glang gi bshad tshul ltar rje dge 'dun grub pa dang mkhas grub rjes kyang bshad do/ /dus 'khor TIka chen las/ dgun zla tha chung gi hor zla dang po'i tshes brgyad la dgun nyi ldog pa dang/ dbyar zla tha chung gi hor zla bdun pa'i yar ngo'i tshes brgyad la dbyar nyi ldog cing/ de dag gi tshes dgu nas nyin mo ring @018a @#/ /thung du 'gyur ba 'grel ba gzhan gnyis kyi 'chad lugs de nyid slob dpon dbyig gnyen gyi gzhung gi dgongs par byas na legs shing/ de yang dgun nyi ldog pa dang dbyar nyi ldog pa phyi mtha' gzung ba yin gyi/ de kho na la ldog pa'i nges gzung ma yin no zhes bshad na shin tu legs la/ slob dpon dbyig gnyin gyi dgongs pa 'grel pa la slob dpon phyogs glang las tshad mar gyur ba'i rjes 'jug gzhan 'ong don med do/ /zhes so/ /rin chen phreng bar yang mdzod lung de bstan bcos gdags pa'i don bsdus pa yin par gsungs pa'i phyir ro/ /'on kyang dbyar zla tha chung ni dus tshigs gsum du phye ba'i dbyar zla gnyis pa dang/ dgun zla tha chung ni dus tshigs gsum du phye ba'i dgun zla bzhi bar 'jog dka' la/ rje rin po ches kyang mkhas pa gzhon nu blo ldan gyi dri lan dang/ dbyar zla gnyis pa'i tha ma'i tshes dgu dang/ de bzhin dgun zla bzhi pa'i tshes dgu la/ /dbyar dgun nyi ma ldog par gsungs pa'i dus/ /ston dpyid ra ba'i dkar tshes dgu la yin/ /zla ba de gnyis nyi ma gang log pa'i/ /zla ba de nyid yin par mang po 'dod/ /'on kyang mdzod kyi dgongs pa 'khrums dang khra'i/ /zla ba yin par rgya dper snang ngo zhes/ /bdag gi bla na nam mkha' bzang po bzhed/ /de ltar na ni dbyar 'bring nya yi dus/ /chu stod zla ba yin par shes par 'gyur/ /tshul de mdo rtsa'i rgya dpe las kyang gsungs/ /zhes 'khrums dang dpo'i zla ba la nyi ma ldog par gsungs pas dpyad par bya'o/ /shog bu so gnyis par/ shed bu dang shed las skyes ni gang zag gi rnam grangs yin kyang gtso bor bskal @018b pa dang po'i mi la ming de skad 'dags te/ shed ces pa ni yid ces pa'i brda rnying yin la/ bskal ba dang po'i mi ni pha ma'i khu khrag la ma ltos par yid tsam las brdzus te skyes pa'i phyir de skad brjod do/ / ! /de bzhin gshegs pa'i yon tan dang ye shes bsam gyis mi khyab pa'i yul la 'jug pa bstan pa'i mdo las/ sangs rgyas kyi zhing gang du de bzhin gshegs ba byung ba der mu stegs can spyod pa dang/ kun tu rgyu dang gcer bu pa la sogs ba mu stegs can gyi gnas thams cad mi 'byung/ der lta bar gyur ba thams cad mi 'byung/ der 'khrugs pa thams cad mi 'byung/ der mtshams med pa lnga po dag mi 'byung/ der mi dge ba bcu'i las kyi lam rnams mi 'byung ngo/ der rgyal po'i bka' lung dang chos gces pa 'dor ba mi 'byung/ der nyi zla'i 'od dag mi 'byung/ der brgya byin dang tshangs dang dang 'jig rten skyong ba dag dang lha thams cad kyi 'od dag mi 'byung/ der nor bu rin po che'i 'od rnams dang/ me'i 'od rnams dang/ glog gi 'od rnams mi 'byung/ der yud tsam dang/ yud tsam phyed dang/ zla ba dang zla phyed dang lor bgrang ba rnams pa mi 'byung ste/ 'jam dpal gzhan du na sems can yongs su smin par bya ba'i phyir de bzhin gshegs pa'i byin gyis brlabs ni ma gtogs so/ /zhes dang/ zla ba'i dkyil 'khor ni nyi ma'i dbang gis 'bri ba dang/ skye ba dang/ mi snang bar yang snang la/ zla ba'i dkyil 'khor la ni 'bri ba dang/ mi snang ba dang/ skye ba med de; 'on kyang sems can rnams kyi sngon gyi dge ba'i las kyi rnam par smin pas nyi ma'i grangs dang/ yud tsam dang yud tsam phyed dang zla ba phyed dang zla ba dang lo bgrang ba'i grangs gzhag pa'i phyir de bzhin gshegs pa'i byin gyis brlabs kyis @019a @#/ /bya ba de lta bu dag 'byung yang/ 'jam dpal zla ba'i dkyil 'khor la ni 'bri ba'am/ 'phel ba'am/ mi snang bar 'gyur ba med de/ 'on kyang 'jam dpal sems can rnams kyi sngon gyi dge ba'i las kyi rnam par smin pa dang/ nyi ma'i dbang gis lhun gyis grub cing rnam par mi rtog par zla ba'i dkyil 'khor gyi bya ba de lta bu de 'byung ngo// zhes gsungs so// ! zhag mi thub dang bcas pa yi/ /zla ba bcu gnyis la lo gcig /ces pa'i don ni/ /tshes dang ba dang/ stong ba'i dbang gis nyin zhag drug 'dor dgos kyang lor 'jog tshe nyin zhag drug po de dang bcas pa ste de dag kyang rtsis pa'i nyin zhag sum brgya drug cu la nyin mor 'jog pa'am/ yang na nyin zhag sum brgya drug cu po des mi chog par zhag mi thub pa drug dang grangs mnyam pa'i zhag lhag dang bcas pa ste nyin zhag sum brgya drug cu re drug la khyim lor 'jog pa'am/ yang na zhag mi thub pa drug por ba'i nyin zhag sum brgya lnga bcu rtsa bzhi la tshes lor 'jog pa'i don gang yin dpyad par bya'o/ /shog bu so gsum par/ 'chi med mdzod snang thang bar mar/ mig 'dzum bco brgyad de yig nas/ / de ni sum cu cha shas te/ /de yi sum cu skad cig go /de ni bcu gnyis yud tsam dang/ /de sum cu yis nyin zhag go /zhes 'gyur khyad tsam ma yin par 'dir drangs pa dang don mi 'dra bar bshad pa dbu ma'i mtha' dpyod du'ang drangs yod do// /! rab byung gi lo me yos dang sbyar bar mdzod kyi mtha' dpyod las gsungs pa ltar gzhung mang po mthun par snang bas/ 'dir me stag dang sbyar ba ni yi ge nor ba yin/ @019b shog bu so bzhi bar/ zla ba bcu gnyis kyi ming gi rnam grangs ni/ mgo rgyal mchu gsum dang/ dbo nag pa sa gsum dang/ snron chu stod gro zhun gsum dang/ khrums tha skar smin drug gsum te bcu gnyis so/ /yang rim bzhin smal po rgyal smad nya pa gsum/ khra byi'u nal mgo gsum/ gdu bu bre phul bya spo gsum/ khrums smad dbyug pa nya drug gi zla ba gsum te bcu gnyis dang/ dus tshig bzhir phye na/ dgun zla ra ba la sogs pa bcu gnyis dang/ gsum du phye na dgun zla dang po la sogs pa bzhi/ dpyid zla dang po la sogs pa bzhi/ dbyar zla dang po la sogs pa bzhi ste bcu gnyis dang/ rten 'brel rtsis kyi lugs la/ rga shi ma rig pa la sogs pa bcu gnyis dang/ gdan gzhi dang rdo rje mkha' 'gro'i rgyud las gsungs pa ltar sa'i dbang phyug dang/ 'phel ba dang/ gti mug dang/ bzang po dang/ khyu mchog dang/ rus spal dang/ chu srin dang/ yug ma dang/ rme ba dang 'bug pa dang/ 'tsho ba dang/ rmi lam gyi zla ba ste bcu gnyis la sogs pa'o/ /shog bu so lnga par/ lho gling 'dir dpyid zla 'bring po shar nas chu tshod lnga 'das pa na lho nub kyi phyed la dpyid tha dang zhes sogs gsungs pa 'di dus bzhig yon bsko rgyid bang byas pa'i bshad tshul bkod pa yin la/ 'di ni bsdus rgyud las sa dum bu bcu gnyis kyi nyi ma ldog tshul bshad pa dang 'gal bas khas blangs mi rung ngo/ /dus tshig gsum du phye ba dang lngar phye ba dang drug tu phye ba'i zla ba thams cad mar ngo sngon 'gro'i zla ba yin kyang/ dus tshigs bzhir phye ba'i zla ba de la gnyis yod de/ de la yar ngo sngon 'gro can dang mar ngo sngon 'gro can gnyis yod par dus 'khor TIka chen las gsungs@020a @#/ /pa'i phyir ro/ /shog bu so drug par/ rnam 'byed 'grel pa drangs pa las thang gcig de chu srang sum cu'i yun tshad du bshad pa sogs ni dpe ma dag par mngon te/ thang gcig ni chu srang bzhi'i yun tshid can dang/ yud tsam ni chu srang ba rgya nyi shu'i yun tshad can yin pa'i phyir te/ rnam 'byed 'grel ba snar thang bar ma las/ skad cig brgya nyi shu la de'i skad cig ste/ bud med mkhal sgyen pas ras pal mdab ma las lag pa ji tsam du rkyong pa'i dus kyis de las 'dres par byed do/ /zhes dang/ thang gcig ces bya ba ni de'i skad cig drug cu ste/ chu srang gi bzhi chu tshod kyis zad pa'i dus kyis mtshon pa yin no/ /yud tsam zhes bya ba ni thang gcig sum cu ste/ chu tshod gnyis zad pa'i dus kyis mtshon pa yin no/ /zhes gsungs pa'i phyir ro/ /thur shing gi 'grib mas nyi ldog brtag tshul ni/ slob dpon ab bya'i dus 'khor la 'jug pa las/ sa gzhi mnyam po la khru gang gi tshad ki maNDal gyi dbus su gtsugs pa'i mtho gang gi tshad kyi shing gi grib ma/ snga dro re kha'i phyi rol nas rim gyis bskum pa na/ gang gi tshe maNDal gyi mtha' re kha'i dbus su zhugs pa de'i tshe gnas der bya rog gi rjes mtshan ma bya ste/ de nyid nub kyi phyogs so/ /phyi dro ni maNDal gyi dbus nas rim gyis brkyang pa na/ gang gi tshe zhes pa la sogs pa sngar bzhin du mtshan ma bya ste/ de nyid shar gyi phyogs so/ /'dir mtshan ma gcig gi steng du skud pa bzung ste; mtshan ma gzhan gyi mdun nas maNDal thod le skor gyis bya zhing/ mtshan ma gzhan gyi steng du skud ba bzung nas de bzhin du byas pas ji ltar nya'i rnam par 'gyur ro/ /maNDal gnyis po 'di dag gi dbus kyi nya'i @020b rnam pa'i kha'i dbus ni lho phyogs so/ /mjug ma'i dbus ni byang phyogs so/ /de ltar phyogs gtan la phab nas maNDal gnyis po dbye bar bya'o/ byang du bgrod pa'i nyi ma las gong gi nyi ma bcu pa nas brtsams nas nyi ma'i gung la brtag par bya'o/ /de la thog ma'i maNDal gyi byang phyogs kyi mtha'i re kha'i dbus nas maNDal gyi nang du nyi ma gang la grib ma 'jug pa de nyi ma byang du bgrod pa'i 'pho ba'i nyin mo'o/ /de'i gza' dang de'i tshes dang de'i sbyor ba dang de'i byed pas so/ zhes bshad pa ltar brtag na rnam par dag par 'gyur ro/ /rgya mtsho chu zla zhes sogs ni dbyangs 'char las/ rgya mtsho chu dang zla ba la/ /cha bdun thur mgrib mar bcas/ /bgos pas thob pa chu tshod yin/ chu srang dbugs kyang rim bzhin sbyar/ lug dang sra nga la drug sbyin bya/ glang dang bu mor rang sar bzhag /'khrig pa seng ger brgyad dor ro/ /kar ka ta bu bco brgyad bri/ /sdig pa nya la bcu ba sbyin/ /gzhu dang chu srin bum pa la/ bcu gnyis dag ni sbyin pa las/ /snga dro 'das pa phyi dro lus/ /de yis 'das pa'i dbyug gur bri/ /lhag ma lus dang 'das pa shes/ /zhes pa'i ri mos shes dgos shing/ /'di ni gangs ldan gyi dum bur chu tshod bcu gnyis kyi 'phel 'grib 'byung ba'i dbang du mdzad pas/ /dum bu gzhan rnams la mi 'dra ba'i khyad par shes par bya'o/ /'di dag la mtha' cung zad dpyad na/ / kha cig na re/ lho gling dbus ma 'dir lug khyim gyi tshe dpyid nyin mtshan mnyam pa dang/ srang khyim gyi tshe ston nyin mtshan mnyam pa 'byung bar bshad pa mi 'thad par thal/ sa cha 'di'i nyin mtshan mnyam pa'i @021a @#/ /dus kyi ri mo la 'char ba dang mi mthun pa'i phyir na mkhyab/ rtags grub ste/ nyi ma lug khyim du 'pho ba'i nyin zhag der dpyid mnyam dang ka rka ta'i khyim du 'pho ba'i nyin zhag der dbyar nyi ldog dang/ srang khyim du 'pho ba'i nyin zhag der ston mnyam dang/ chu srin gyi khyim du 'pho ba'i nyin zhag der dgun nyi ldog 'byung bar bshad pa gang zhig /sa cha 'di'i ri mo la de ltar min pa mngon sum gyis grub pa'i phyir/ dang po grub ste/ dgun nyi ldog gi nyin zhag de la nyi ma'i longs spyod skar ma'i gnas su nyi shu dang chu tshog kyi gnas su bco lnga 'char bar 'grel chen las dngos su gsungs pas nyin zhag de nyi ma chu srin gyi khyim du gsar du 'pho ba'i nyin zhag yin par don gyis 'grub cing/ rgyu mtshan nges ston mnyam gyi tshe nyi ma srang khyim du gsar du 'pho ba dang nyi ma'i longs spyod skad ma'i gnas su bcu gsum dang chu tshod kyi gnas su sum cu 'char ba dang/ dbyar nyi ldog gi tshe nyi ma ka kka ta'i khyim du gsar du 'pho ba dang nyi ma'i longs spyod skar ma'i gnas su drug dang chu tshod kyi gnas su zhe lnga 'char ba dang/ dpyid mnyam gyi tshe nyi ma lug khyim du gsar du 'pho ba dang/ nyi ma'i longs spyod gnas gnyis kar thig le 'char bar 'os med gyi rigs pas 'grub pa'i phyir te/ nyi mas khyim zla gcig la skar ma gnyis dang skar rkang gcig longs spyod pa'i phyir te/ skar mig dbyug tshes lug gi tshad/ rig byed mkha' me glang du brjod/ /ro dang zhe lnga 'khrig pa yin/ /dgu dang nam mkha' karka ta/ /drag dang bco lnga seng ge'o/ /bcu gsum sum cu bu mor dran/ /tshe dang zhe lnga srang yin zer/ /nor @021b zla stong pa sdig par go /nyi shu bco lnga gzhu yin snyam/ /zung mig sum cu chu srin mtha'/ /rgyal ba mda' chu bum par 'dra/ /'khor lo nya ru shes par bya/ /zhes sogs gzhung du mas grub pa'i phyir ro/ /rta bar 'dod/ mi nus te/ de ltar bshad pa de ni 'phags pa'i yul gyi dbang du byas pa yin pa'i phyir te/ der thal/ lho gling dbus ma'i dbus kyi sa cha der nyi ma lug khyim du gsar du 'pho ba'i nyin zhag gi nang du dpyid nyin mtshan mnyam pa 'byung pa'i phyir te/ de bzhin du lho gling nub ma'i dbus kyi sa char nyi ma glang khyim du gsar du 'pho ba'i nyin zhag der dpyid mnyam 'byung/ nub gling shar ma'i dbus kyi sa char nyi ma 'khrig khyim du gsar du 'pho ba'i nyin zhag la dpyid mnyam 'byung ba nas lho gling shar ma'i dbus kyis cha la nyi ma nya'i khyim du gsar du 'pho ba'i nyin zhag der dpyid mnyam 'byung ba'i bar yin pa'i phyir/ der thal/ de'i rigs pas lho gling shar ma'i dbus nas lho gling dubs ma'i dbus kyis cha la nye ba'i bar gyi sa gzhi sum cu lhag tu 'gos pa'i sa cha so sor dpyid mnyam mi 'dra ba sum cu lhag 'byung ba thams cad nya'i khyim gyi nang du 'byung ba'i phyir dang/ de'i rgyu mtshan gyis sa cha 'di'i dpyid mnyam gyi ri mo nya'i khyim zlar 'byung ba'i phyir te/ khyim lo gcig gi nyin zhag sum brgya drug cu rtsa lnga re re la dpyid nyin mtshan mnyam pa re re dang/ dbyar nyi ldog re re dang/ ston nyin mtshan mnyam pa re re dang/ dgun nyi ldog re re 'byung ba'i phyir/ der thal/ 'dzam glang chen po 'am sa'i khor yug gi mtha' skor la dpag tshad 'bum phrag gsum yod pa de sum brgya drug cu rtsa lngar 'gos pa'i sa cha so so la gzer gzhi mi 'dra ba so sor 'byung @022a @#/ /ba'i phyir/ 'di la kha cig na re/ khyod kyi bshad tshul 'di mi 'thad par thal/ khyim lo gcig la dbyar nyi ldog mi 'dra ba sum brgya re lnga yod par khas blangs na Tikka chen de nyid snang ba dang 'gal ba'i skyon 'byung ba'i phyir te/ dus 'khor Tika chen las/ sa dum bu bcu gnyis dum bu sum brgya drug cu rtsa lnga lhag tsam du bgos pa'i dum bu so sor zhag re bzhin du bsil ri dang me ri la reg pas lhor bgrong byang bgrod kyi nyi ma ldog pa yang lo re la sum brgya drug cu rtsa lnga lhag tsam du 'gyur bas de dang mthun pa'i skyes skar sbyong dgos so zhes sma ba ni shin tu rags pa'i gnas la 'khrul ba ste/ de lta na 'dzam gling chung du 'dir lo gcig la ston mnyam dpyid mnyam yang mi 'dra ba sum cu lhag pa'i grangs su 'gyur zhing/ de 'dod na lho gling dbus ma 'dir lo gcig la dgun zla ra ba sum cu lhag tsam dang/ de bzhin du dgun 'bring de snyed dang/ rab 'bring po tha chung gzhan rnams kyang de snyed rer 'gyur pas/ gling re rer yang lo re la zla ba sum brgya drug cu lhag tsam rer 'gyur ba'am/ yang na gling 'dir lo gcig la zla ba bcu gnyis las med kyang/ de'i zla gcig rangs po lhor bgrod mthar thug dang/ zla ba gcig rangs po ston mnyam dang/ zla gcig rangs po dbyid mnyam la sogs par 'gyur pa sogs lung rigs mngon sum dang 'gal ba'i gnod pa du ma 'bab bar 'gyur te/ zhes gsungs pa'i phyir na ma khyab ste/ sa cha gcig la khyim lo gcig gi nang du dbyar nyi ldog sogs mi 'dra ba du ma mi 'byung ba'i don yin pa'i phyir/ gzhan du na 'grel chen las/ 'dir lhun po'i phyogs kyi cha thams cad du khyim gyi 'khor lo 'khor ba'i dbang gis me la reg pa gang @022b yin pa de ni bdun pa'i phyogs thob pa na lhun po'i rwa la reg cing/ zhes pa'i rigs pas gnod pa'i phyir dang/ lhun po'i rwa khor yug med na gzhung 'di dang 'gal bar Tik chen las gsungs pas kyang gnod pa'i phyir ro/ / yang kha cig na re/ sa cha gang yin kyang dbyar nyi ldog gi tshe nyin mo'i yun tshad chu tshod sum cu rtsa lnga yod pa ni mtshungs par thal/ bsdus rgyud las/ nyi ma ri bong can kyi nyin mtshan chu tshod drug cu dag las 'grib dang 'phel ba drug chas so/ / zhes nyin zhag gi drug cha 'phel bar gsungs pa'i phyir nam khyab ste/ 'di ni kai lA sha'i dum bu der nyin mtshan 'phel 'grib kyi tshad yin gyi sa cha thams cad kyi nyin mtshan 'phel 'grib kyi tshad ma yin pa'i phyir/ der thal/ 'phags pa'i yul du bcu cha dang/ bod yul du dgu cha dang/ li'i yul du brgyad cha dang/ rgya nag gi yul du bdun cha 'phel 'grib tu 'gyur bar 'grel chen las gsungs pa'i phyir te/ de nyid las/ kai lA sha'i du ma bu la grib mas nges pa ni 'phags pa'i yul du ma yin te/ 'phags pa'i yul du/ zhes pa nas/ bcu'i chas 'grib cing 'phel lo/ /de bzhin du bod dang li dang rgya nag la sogs pa'i yul rnams su dgu cha dang brgyad cha dang bdun cha dag gis sham b+ha la'i yul la thug pa'i bar du grib ma'i dbang gis 'grib cing 'phel bar rig par bya'o/ /zhes gsungs pa'i phyir/ yang kha cig na re/ 'phel 'grib ji ltar che yang drug cha'am chu tshod bcu las lhag par 'phel bgrib tu 'gyur ba med par thal/ sdus rgyud kyi lung don de'i phyir nam khyab ste/ kai lA sha'i byang gi kha ba can gyi bar du chu tshod bcu gnyis 'phel 'grib tu 'gyur bar rgyud dang 'grel ba gnyis kar gsungs pa ltar dbyangs 'char las kyang @023a @#/ /bshad pa'i phyir te/ de nyid las/ nam mkha' mkha' zung lug gi tshad/ /nam mkha' rig byed 'tshem glang/ /stong pa nor lha zung 'khrig pa'i/ /mkha' so kar ko tra ru dran/ /mkha' 'dus me rnams seng gel; ;nam mkha' mkha' mtsho bu mor dran/ /rim pa'i rim pa min pa las/ /srang sogs bzlog go gangs ri'i bdag/ ces gsungs ngas pa'i phyir/ khyab ste/ karka ta'i dus sbyor shar ba nas gzhu'i dus sbyor rdzogs par shar ba'i bar du chu srang nyis stong brgya drug cu 'byung bar bshad pas chu tshod sum cu rtsa drug 'byung bar 'grub pa'i phyir dang/ de ltar na nyi ma karka ta'i khyim du gsar tu 'pho ba'i nyin zhag der nyin mo chu tshod so drug gi yun tshad can du 'grub pa'i phyir/ rtags phyi ma grub ste/ nyin mo ring thung gang yin kyang dus sbyor drug 'char dgos pa'i phyir te/ nyin mo ring thung gang yin kyang dus sbyor drug 'byung ba dang mtshan mo ring thung gang yin kyang dus sbyor drug 'byung bar mtshungs pa'i phyir te/ bsdus rgyad las/ dus sbyor drug gis de nub gang phyir 'char ba dag kyang de bzhin nyi ma'i rgyu skar dbye bas so/ /zhes gsungs pa'i phyir dang/ de'i 'grel chen las/ dus sbyor drug dang skar ma phyed dang bcas pa'i bcu gsum gyis nyin ma'i dus su 'gyur ro/ /dus sbyor drug dang phyed dang bcas pa'i rgyu skar bcu gsum gyis mtshan mo'i dus su 'gyur ro/ /zhes gsungs pa'i phyir/ byas pa la kho na re/ dus sbyor bcu gnyis la nang phan tshun yun ring thung gi khyad par yod par thal/ dus thams cad du nyin mo la dus sbyor drug dang mtshan mo la dus sbyor drug 'byung ba'i phyir zer na/ shin tu 'dod de/ nyin mtshan so sor dus sbyor drug drug 'char bar @023b mtshungs kyang nyin mor chu tshod mang pa'i dus sbyor shar dus su ring por 'gyur ba dang/ nyin mor chu tshod nyung ba'i dus sbyor shar dus su thung dur 'gyur ba'i phyir dang/ kai lA sha'i yul gyi dbang du byas na chu tshod bzhi dang chu srang lnga bcu na lug gi dus sbyor gyi yun tshad dang/ de bzhin du chu tshod bzhi dang chu srang nyi shu ni glang/ chu tshod gsum dang chu srang nyi shu ni 'khrig pa/ chu tshod lnga ni karka Da/ chu tshod drug ni seng ge /chu tshod drug dang chu srang sum cu ni bu mo'i dus sbyor gyi yun tshad yin pa dang/ de bzhin du srang sogs drug la go rim bzlog ste chu tshod drug chu srang sum cu dang/ chu tshod drug dang/ chu tshod lnga dang/ chu tshod gsum chu srang nyi shu dang/ chu tshog bzhi chu srang nyi shu dang/ chu tshod bzhi chu srad lnga bcu zhes sbyor dgos par bsdus rgyud dang 'grel chen gnyis kar gsungs pa'i phyir dang/ kai lA sha'i byang gi kha ba can gyi bar du dus sbyor 'char tshul dbyangs 'char las/ nam mkha' mkha' zung lug gi tshad/ /ces sogs sngar drangs pa de'i phyir/ 'di la kha cig na re/ nyin zhag gcig dang dus sbyor bcu gnyis yun mnyam par thal/ nyin mtshan so sor dus sbyor drug drug dang phyed dang bcas pa'i rgyu skar bcu gsum bcu gsum 'char bar nges pa'i phyir zer nam khyab/ rtags grub zin/ 'dod mi nus te/ dus sbyor bcu gnyis 'char ba'i yun la nyin zhag gcig cung zad ma rdzogs pa'i phyir te/ tha skar shar nas yang tha skar 'char gyi bar la dus sbyor bcu gnyis rdzogs pa gang zhig /nyin zhag gcig gam chu tshod drug cu ma rdzogs pa'i phyir te/ de'i rgyu mtshan gyis khyim lo gcig la nyi ma'i 'khor grangs sum brgya drug cu rtsa lnga dang/ tha skar gyi 'khor grangs sum brgya drug cu rtsa drug 'byung ba'i phyir dang/ gzhan du na nyi mas khyim lo gcig la rgyu @024a @#/ /skar nyer bdun longs spyod pa mi srid par 'gyur pa'i phyir/ byas pa la kha cig na re/ tha skar shar nas yang tha skar 'char gyi bar la dus sbyor bcu gnyis rdzogs par bshad pa mi 'thad par thal/ 'di ltar na Tikka chen dang 'gal skyon yod pa'i phyir te/ Tikka chen las/ dus sbyor re la skar ma gnyis dang bzhi cha rer byas nas nyin phyed dang bcu bzhi dang/ mtshan phyed dang bcu bzhir bshad pa 'di ni cung zad rags pa tsam gyi dbang du mdzad pa ste/ tha skar shar nas yang tha skar 'char gyi bar la dus sbyor bcu gnyis cung mi rdzogs pa'i phyir ro/ /zhes gsungs pa'i phyir na dpe ma dag gam dpyad dgos par snang ngo/ /gzhan du na tha skar shar la nya'i dus sbyor ma rdzogs pa yod par thal/ tha skar shar la dus sbyor bcu gnyis ma rdzogs pa yod pa'i phyir/ rtags khas/ 'dod na/ tha skar shar la lug gi dus sbyor ma shar ba gcig yod par thal/ 'dod pa'i phyir/ 'dod na/ tha skar shar la lug khyim ma shar ba yod par thal/ 'dod pa'i phyir/ 'dod na/ nyi mas rgyu skar nyer bdun rdzogs par spyod la khyim bcu gnyis rdzogs par ma sbyod pa yod par thal/ 'dod pa'i phyir/ 'dod mi nus te/ nam gru rdzogs par longs spyod pa dang nya'i khyim rdzogs par longs spyod pa dus mnyam yin pa'i phyir te/ 'grel chen las/ gza' tshogs rgyu ba nam gru'i mthar khyim ni stong pa dag la gnas so/ /zhes pa'i don yod pa'i phyir/ yang kha cig na re/ byang bgrod mthar thug gi nyi ma bsil ri dang lhor bgrod mthar thug gi nyi ma me ri'i bar du 'gro bar thal/ bsdus rgyud las/ lan tsha'i rgya mtsho 'gongs nas nyin mor @024b byed pa dag ni lho ru me yi bar du 'gro bar byed/ /ces sogs dang/ 'grel bar yang/ lan tshwI rgya mtsho 'gongs nas lhor grong pa la gnas pa'i nyi ma me'i dkyil 'khor gyi dang po'i bar rgya mtsho'i mtha'i mtshams su 'gro par byed do/ /me'i dkyil 'khor gyi mtshams de nas kai lA sha'i byang du 'gro ste/ gangs kyi ril byang gi lam du yang byang bgrod pa la gnas pa'i nyi ma lho ba grod kyi dang po'i nyi zhag gi bar du'o/ /zhes dang/ lhun po'i phyogs kyi cha thams cad du khyim gyi 'khor lo 'khor ba'i dbang gis me la reg pa gang yin pa de ni bdun pa'i phyogs thob pa na lhun po'i rwa la reg cing gangs kyi ri'i steng du 'gro'o/ /zhes gsungs pa'i phyir na ma khyab ste/ lung 'di'i don ni lho byang du bgrod pa'i nyi ma gang du 'khor ba mtshon pa'i ri mo de lhun po'i rwa mtshon pa'i ri mo dang me rin mtshon pa'i ri mo gnyis la reg pa'i don yin par mkhas grub thams cad mkhyen pas bzhed pa gang zhig /mkhas pa gzhan dag gis lho byang du bgrod pa'i nyi ma'i gdung byed kyis gangs ri dang me ri la reg pa'i don yin par bshad pa'i phyir/ dang po grub ste/ TIka chen de nyid snang ba las/ dbus su lhun po'i rwI khor yug mtshon pa'i ri mo zlum po dang/ phyi mthar me ri mtshon pa'i ri mo zlum bo bkod nas de gnyis kyi khongs su nyi ma bgrod pa so so la khyim gyi 'khor lo 'khor ba'i dbang gis lho byad du nyin re bzhin bgrod pa'i tshul mtshon pa'i ri mo bskor ba na/ byang bgrod mthar thug gi nyin nyi ma gang nas 'khor ba mtshon pa'i ri mo de nyid lhun po'i rwI ri mo la reg par 'gyur shing/ lho bgrod mthar thug gi tshe nyi ma gad nas 'khor ba mtshon pa'i ri mo de nyid me ri'i ri mo la reg par@025a @#/ /'gyur la/ 'grel par me la reg pa dang lhun po'i rwa la reg ces gsungs pa ni de'i dbang du mdzad cing/ ri mo de ltar reg pas mtshon pa'i don ni byang bgrod mthar thug gi nyin nyi ma gangs ri'i steng lhun po'i rwa dang thad mnyam du sleb pa dang/ lho bgrod mthar thug gi nyin nyi ma me ri'i nang mtha'i steng thad drang gi nam mkha' la sleb pa'i don yin la/ zhes gsungs pa'i phyir/ gnyis pa grub ste/ byang bgrod mthar thug gi nyi ma sa'i khor yug gi phyeng las mi 'da' zhing/ lho bgrod mthar thug gi nyi ma chu'i khor yug gi bzhi gsum las mi 'da' bas nyi ma'i dkyil 'khor lhun po'i rwa dang lcags ri la reg pa'i skabs med la/ rgyud dang 'grel pa gnyis kar de gnyis la reg bar bshad pa ni nyi ma'i gdung byed de byang bgrod kyi tshe lhun po'i rwa la reg pa dang lho bgrod kyi tshe me ri la reg pa'i don yin pa'i phyir/ der thal/ le'u lnga ba'i rgyud kyi 'gyur kha cig las nyi ma thad kar lhor chu'i bzhi gsum dang/ byang du 'ang sa'i phyed las mi 'gro bar don gyis bshad pa dang/ da lta byang bgrod mthar thug gi nyin phyed kyi dus thur shing gi byang du grib ma lus pa mngon sum gyis mthong ba'i phyir/ zhes 'dod do/ /'di la kha cig na re/ bshad tshul 'di gnyis ka mi 'thad par thal/ nyi ma byang bgrod kyi tshe me ri nas gangs ri'i bar du mi 'gro na bsdus rgyud rtsa 'grel dang 'gal bar 'gyur pa'i phyir/ der thal/ dri med 'od las/ phyed bcas mig klu zlas thob nyin dang nyin la 'dor ba zhes pa ni phyed dang bcas pa'i brgya brgyad cu rtsa gnyis kyi cha thob pa ni stong phrag bdun cu rtsa lnga las nyin zhag so sor @025b dpag tshad rnams kyi phyogs cha nyi mas 'dor ro zhes me ri dang gangs ri'i bar gyi thad ka'i rgya tshad dpag tshad bdun khri lnga stong la bgrod pa gcig gi nyin zhag gi grangs brgya brgyad cu rtsa phyed bcas gnyis kyis bgos pa'i thob nor ni lhor bgrod kyi nyin zhag re la byang du tshad ji tsam re dor nas lhor 'gro ba'i tshad dang/ byang bgrod kyi nyin zhag re la lhor 'dod ba dang byang du 'gro ba'i tshad yin par bshad pa'i phyir/ zhes zer na/ TIka chen de nyid snang bar de lta bu'i skyon spong gsal bar ma mdzad la/ phug pa lhun grub rgya mtshos/ stong phrag bdun cu rtsa lnga las zhes pa ni bgo bar bya ba'i gzhi ma 'dres par bstan pa ma yin gyi/ nyi ma'i gdung byed kyis 'dor bar bya ba'i khyon bstan pa nyid du gzung bar bya'o/ /zhes bshad do/ /kha cig na re/ TIka chen de nyid snang bar lho bgrong mthar thug gi tshe nyi ma chu'i bzhi gsum las mi 'gro bar 'dod pa dgag nas/ rang lugs me ri'i par du 'gro bar bshad pa mi 'thad par thal/ nyi ma rlung 'gros kyis nyin zhag gcig la 'gro ba'i lam gyi tshad ni dpag tshad gsum 'bum bdun khri lnga stong du bshad pa dang 'gal bar 'gyur ba'i phyir/ der thal/ nyin zhag gcig la nyi ma rlung 'gros kyis dpag tshad sum 'bum bdun khri lnga stong du 'gro bar bsdus rgyud rtsa 'grel las gsungs pa gang zhig /lho'i me ri nas byang gi dum bu'i bkyil gyi bar du dpag tshad 'bum dang gsum khri bdun stong lnga brgya yod pas khor yug tu 'bum phrag bzhi khri phrag gcig stong phrag gnyis brgya phrag lngar 'gyur ba'i phyir/ dang po grub ste/ bsdus rgyud las/ @026a @#/ /chu tshod dus la dpag tshad stong phrag drug ni rkang pa dang bcas nyin mor byed pa 'gro ba ste/ zhes nyi ma chu tshod gcig la dpag tshad drug stong nyis brgya lnga bcur 'gro bar gsungs pas chu tshod drug cur dpag tshad sum 'bum bdun khri lnga stong du 'gro bar 'grub pa'i phyir/ rtsa rtags gnyis pa grub ste/ lho gling dbus mar byang bgrod mthar thug gi nyi ma sa'i khor yug phyed las byang du mi 'gro ba dang/ nyin zhag de'i byang gling dbus ma'i nyi ma me ri'i steng du sleb na phyogs gcig gi chu dang sa'i zheng tshad la dpag tshad stong phrag bdun cu rtsa lnga dang ri rab kyi steng gi rgyar dpag tshad stong phrag lnga bcu dang phyogs gcig shos kyi sa'i khor yug gi phyed tshad la dpag tshad khri nyis stong lnga brgya ste sdom pas dpag tshad 'bum gsum khri bdun stong lnga brgyar 'gyur ba'i phyir/ khyab ste/ de ltar na khor yug tu gsum 'gyur gyi rigs pas dpag tshad bzhi 'bum khri nyis stong lnga brgyar 'gyur bas rgyud dang 'grel pa gnyis ka dang 'gal bar 'gyur ba'i phyir/ zhes zer na/ de'i skyon spong tshul dka' bar snang bas blo ldan rnams kyis dpyad par bya'o/ /yang kha cig na re/ nyi ma ri bong can gyi nyin mtshan chu tshod drug cu dag las 'grib dang 'phel ba drug chas so/ /zhes kai lA sha'i dum bur nyin zhag gi drug cha'i 'phel 'grib gsungs pa ltar khas len mi rung bar thal/ kai lA sha'i dum bur nyin mtshan 'phel 'grib chu tshod bcu las lhag yod pa'i phyir/ der thal/ 'grel chen dri med 'od las/ nyin zhag so so la nyin mo dang mtshan mo 'phel ba'am 'grib pa ni dbugs gnyis dang chu srang gsum mo/ /zhes gsungs pa'i @026b phyir/ khyab ste/ de ltar na chu tshod bcu dang chu srad brgyad dang dbugs gnyis su 'gyur pa'i phyir/ der thal/ bgrod pa gcig la nyin zhag brgya brgyad cu rtsa phyed bcas gnyis yod pa'i phyir na ma khyab ste/ nyin zhag so so la zhes pa ni phyi ma zhag la nyin zhag gi ming gis btags nas bstan pa'i phyir/ der thal/ de ltar na bgrod pa gcig la khyim zhag brgya brgyad cu las lhag med pas chu tshod bcu las lhag tu mi 'gyur ba'i phyir/ des na 'phags pa'i yul gyi chu srang gnyis kyi 'phel 'grib dang/ mdzod lugs kyi thang cig gi 'phel 'grib sogs la'ang rigs pa de sbyar dgos par shes par bya'o/ /byas pa la kho na re/ zhag re'i nyin mtshan 'phel 'grib gsungs pa de khyim zhag la sbyar ba shin tu mi 'thad par thal/ khyim zhag la nyin mtshan 'phel 'grib sbyar tshul med pa'i phyir/ der thal/ nyin zhag las logs su khyim zhag la nyin mtshan 'phel 'grib sbyar tshul med pa'i phyir na ma khyab/ rtags grub ste/ nyin zhag gi dus las logs su khyim zhag gi dus med pa'i phyir/ der thal/ khyim zhag gi dus yin na/ nyin zhag gi dus yin pas khyab pa'i phyir/ der thal/ khyim zhag gi dus dang nyin zhag gi dus don gcig pa'i phyir/ der thal/ zhag gsum gyi dus don gcig pa'i phyir/ der thal/ zhag gsum 'gal ba yin kyang de gsum gyi dus don gcig pa'i phyir/ der thal/ dper na lo zla zhag gsum 'gal ba yin kyang de gsum gyi dus don gcig bzhin yin pa'i phyir/ rtsa bar 'dod mi nus te/ kai la sha'i dum bur nyin zhag re'i nyin mtshan 'phel 'grib chu srang gsum dang dbugs gnyis cung ma longs pas nyin zhag brgya brgyad cur chu tshod bcu'i 'phel 'grib mi 'byung @027a @#/ /la/ nyin zhag phyed dang bcas pa'i brgya brgyad cu rtsa gnyis dang khyim zhag brgya brgyad cu yun tshad mnyam pas der dus su chu tshod bcu'i 'phel 'grib 'byung ba dang bgrod pa gcig rdzogs pa dus mnyam yin pa'i phyir/ kha cig na re/ nyi ma shar gling dbus ma'i dbus kyi tshangs thig der sleb na lho gling dbu mar nyi ma shar bas khyab/ nyi ma nub gling dbus ma'i tshangs thig 'das na lho gling dbus mar nyi ma nub pas khyab pa gnyis ka yod par thal/ mdzod las/ nam phyed nyi ma nub pa dang/ /nyi ma phyed dang 'char dus gcig /ces gsungs pa'i phyir/ 'dod mi nus te/ lho gling dbus mar byang bgrod mthar thug 'byung ba'i nyin zhag la lho gling dbus ma'i nyin tshad yud tsam bco brgyad dang/ byang gling dbus ma'i nyin tshad yud tsam bcu gnyis yin par bstan bcos gdags par bshad pa'i phyir/ zhes zer ba la/ 'di'i lan bta ba tshul la mkhas pa'i bzhed pa mi mthun pa du ma yod par snang ste/ mkhas pa kha cig /nyi ma shar gling dbus ma'i tshangs thig der sleb tshe lho gling dbus mar nyi ma shar ba dang/ nub gling dbus ma'i tshangs thig 'das tshe lho gling dbus mar nyi ma nub pa ni dus thams cad du mtshungs pa yin kyang; byang bgrod kyi tshe nyi ma'i rlung 'gros bul ba dang/ lho bgrod kyi tshe nyi ma'i rlung 'gros myur ba'i rgyu mtshan gyis nyin mo ring thung du 'gyur pa'i phyir/ der thal/ de ltar yin par nyin mtshan ring thung gang yin kyang dus sbyor drug drug 'char bar bsdus rgyud rtsa 'grel las gsungs pa'i rigs pas shes pa'i phyir/ zhes zer/ mkhas pa gzhan dag /mdzod las/ nam phyed nyi ma nub pa dang zhes sogs ni nyin mtshan 'phel 'grib med pa'i sa tsha'i dbang du @027b byas pa'i phyir/ der thal/ dus thams cad du nyin mtshan 'phel 'grib med pa'i sa cha yod pa'i phyir/ der thal/ lho'i dum bu 'di lho nas byang du dum bu gsum du phye ba'i byang gi dum bu gcig bu la lho nas byang du 'phags yul dang bod yul dang li'i yul dang rgya nag gi yul dang kAi la sha'i yul dang gangs ldan gyi yul te dum bu drug tu phye la/ dum bu drug po byang nas lhor snga ma snga ma las phyi ma phyi ma nyin mtshan 'phel 'grib je chung du 'gyur ba'i rigs pas lho'i dum bu gzhan gnyis la nyin mtshan 'phel 'grib med pa'i sa cha yod par 'grub pa'i phyir dang/ rigs pa des gling gzhan gsum la'ang 'di dang khyon mtshungs pa'i sa char nyin mtshan 'phel 'grib med par 'grub pa'i phyir/ der thal/ lho'i dum bu rnams su byang bgrod kyi nyi ma 'char phya nu ba snga la/ lho bgrod kyi nyi ma 'char snga nub phyi ba'i rgyu mtshan gyis byang nas khor nyin mtshan 'phel 'grib je chung du 'gyur ba dang med par 'gyur ba yin pa'i phyir/ der thal/ byang bgrod mthar thug gi nyi ma bsil ri dang nye bar 'khor la/ lhor bgrod mthar thug gi nyi ma lcags ri dang nye bar 'khor ba'i phyir/ zhes zer/ yang mkhas pa kha cig na re/ dus thams cad du shar gling dbus ma'i nyin phyed kyi tshe gling 'dir nyi ma shar ba dang nub gling dbus ma'i nyin phyed kyi tshe gling 'dir nyi ma nub pa mi 'thad par thal/ gling 'dir byang bgrod mthar thug gi nyi ma shar gling dbus ma'i nyin phyed las chu tshod gsum gyi snga rol du shar ba dang nub gling dbus ma'i nyin phyed las chu tshod gsum gyi rjes su nub pa yin zhing/ gling 'dir lhor bgrod mthar thug gi nyi ma shar gling dbus ma'i nyin phyed las chu tshod gsum gyi rjes su shar ba dang/ nub gling dbus ma'i nyin phyed las chu tshod gsum gyi @028a @#/ /snga rol du nub pa yin pa'i phyir/ der thal/ de ltar yin par rgya mtsho chu dang zla ba la zhes sogs kyi ri mo'i rigs pas shes pa'i phyir/ zhes zer/ lugs 'di la nyin mtshan dus sbyor drug drug 'char bar mtshungs par bsdus rgyud rtsa 'grel du gsungs pa dang/ nam phyed nyi ma nub pa dang/ zhes sogs mdzod las gsungs pa dang 'gal skyon spong dgos so// yang kha cig na re/ nyin zhag las khyim zhag dbugs drug brgya don lngas lhag pa yin par thal/ lus la dbugs lhag gang dag nyin zhag so so'i dus su 'byung ba ri dang dus nams dag gi grangs/ /zhes gsungs pa'i phyir na ma khyab/ de ni nyin zhag gi dus su byung ba'i dbugs lhag gi grangs yin gyi/ nyin zhag las lhag pa'i dbugs kyi grangs ma yin pa'i phyir te/ khyim zhag ni nyin zhag las dbugs drug brgya don lngas lhag pa ma yin gyi/ tshes zhag las de ltar lhag pa yin pa'i phyir te/ tshes zhag ni dbugs nyi khri dang dgu brgya nyer lnga'i yun tshad can dang/ khyim zhag ni dbugs nyi khri tshig stong drug brgya'i yun tshad can yin pa'i phyir/ de ni 'bring rtsis kyi dbang du byas so/ /de la kho na re/ 'o na/ khyim zhag de chu tshod drug cu'i yun tshad can yin par thal/ de dbugs nyi khri tshig stong drug brgya'i yun tshad can yin pa'i phyir na ma khyab ste/ chu tshod drug cu dang dbugs nyi khri tshig stong drug brgya yun tshad mnyam par bshad pa ni dbugs gshol ma 'don pa'i rags rtsis kyi dbang du byas pa'i phyir/ yang kha cig na re/ khyim zla gcig la nyi ma rang 'gros skar ma gnyis dang skar rkang gcig ste yul gyi chu tshod brgya dang so lnga longs spyod par bshad pa mi 'thad par thal/ khyim zla gcig la nyi mas skar ma gnyis dang skar rkang gcig cung @028b ma lon par longs spyod pa yang yod la/ cung zad lhag par longs spyod pa yang yod pa'i phyir na ma khyab ste/ yul gyi chu tshod brgya dang so lnga longs spyod par bshad pa ni rtag longs kyi dbang du byas shing/ brgya dang so lnga ma lon pa dang lhag par longs spyad pa ni myur ba dang dal ba dang 'khyog po dang 'byung ba'i rkang pa rnams kyi nor 'phel 'grib dang bu lon 'phel 'grib kyi dbang gis yin pa'i phyir/ der thal/ lho gling dbus ma 'dir nyi ma kar ka Ta'i khyim du sleb pa nas rim pa ste lho bgrod kyi mgo rtsom pa na rim pa'i snga rkang ste rgyu skar gyi 'khor lo'i bzhi cha ka rkaT seng ge bu mo'i khyim gsum longs spyod pa'i tshe yul gyi chu tshod brgya dang so lnga rdzogs par spyod mi nus pas khyim zla gsum la rim bzhin yul gyi chu tshong drug dang bzhi dang gcig gi longs spyod ma tshang bas bu lon 'phel ba zhes bya la/ de nas rim pa ste lho bgrod kyi phyi rkang ste rgyu skar gyi 'khor lo'i bzhi cha srang sdig pa gzhu'i khyim gsum longs spyod pa'i tshe rim bzhin yul gyi chu tshod brgya dang so lnga las gcig dang bzhi dang drug lhag par spyod cing/ sngar gyi chu tshod bcu gcig gi bu lon 'jal bas bu lon 'grib pa zhes bya zhing/ de nas nyi ma chu srin gyi khyim du sleb pa nas rim min te byang bgrod kyi snga rkang ste rgyu skar gyi 'khor lo'i bzhi cha chu srin bum pa nya'i khyim gsum longs spyod pa'i tshe rim bzhin yul gyi chu tshod brgya dang so lnga las drug dang bzhi dang gcig lhag par spyod pa de la nor 'phel ba zhes bya la/ de nas rim min byang bgrod kyi phyi rkang lug glang 'khrig pa'i khyim gsum spyod pa'i tshe rim bzhin chu tshod brgya dang so lnga las gcig dang bzhi dang drug gi longs spyod ma tshang ba des sngar gyi chu tshod bcu gcig gi nor 'phel ba de zad par byed pas nor 'grib pa zhes bya ba yin pa'i phyir/ @029a @#/ /byas pa la kho na re/ srang sdig pa gzhu gsum la nor 'phel ba dang lug glang 'khrig pa gsum la bu lon 'phel ba yin par thal/ dang po gsum la brgya dang so lnga las lhag par spyod la/ phyi ma gsum la brgya dang so lnga ma tshang bar spyod pa'i phyir nam khyab ste/ dang po gsum la yul gyi chu tshod brgya dang so lnga las lhag par spyod kyang/ rang rang gi rtag longs las lhag par mi spyod pas nod 'phel ba'i tha snyad ma thob la/ phyi ma gsum la brgya dang so lnga tshang bar mi spyod kyang/ rang rang gi rtag longs tshang bar spyod pas bu lon 'phel ba'i tha snyad ma thob pa'i phyir/ der thal/ rtag longs ni dbyangs 'char las/ skar mig dbyug tshes lug gi tshad/ /rig byed mkha' me glang du brjod/ /ro dang zhe lnga 'khrig pa yin/ /dgu dang nam mkha' karka ta/ /drag dang bco lnga seng ge'o/ /bcu gsum sum cu bu mor dran/ /tshes dang zhe lnga srang yin zer/ /nor zla stong pa sdig par go/ /nyi shu bco lnga gzhu yin snyam/ /zung mig gsum cu chu srin mtha'/ /rgyal ba mda' chu bum par 'dra/ /'khor lo nya ru shes par bya/ /zhes pa ltar nyi mas tha skar nas brtsams te skar mig dbyung tshes te skar ma gnyis dang dbyug gu 'am chu tshod bco lnga spyod pa'i tshe lug gi khyim zla rdzogs/ rig byed de skar ma bzhi dang mkha' me ste chu tshod sum cu spyod tshe glang dang/ ro ste skar ma drug dang chu tshod zhe lnga spyod tshe 'khrig pa dang/ skar ma dgu spyod tshe karka ta dang/ 'di'i nam mkha' zhes pa ni chu tshod kyi gnas su thig le shar ba'i don no/ /drag po ste skar ma bcu gcig dang chu tshod bco lnga spyod tshe seng ge dang/ skar ma bcu gsum dang chu tshod sum cu spyod tshe bu mo dang/ tshes te skar ma bco lnga @029b dang chu tshod zhe lnga spyod tshe srang dang/ nor zla ste skar ma bco brgyad spyod tshe sdig pa dang/ 'di'i stong pa zhes pa chu tshod kyi gnas su thig le shar ba'i don no/ /skar ma nyi shu dang chu tshod bco lnga spyod tshe gzhu dang/ zung mig ste skar ma nyer gnyis dang chu tshod sum cu spyod tshe chu srin dang/ rgyal ba ste skar ma nyer bzhi dad mda' chu ste chu tshod zhe lnga spyod tshe bum pa dang/ 'khor lo ste skar ma nyer bdun rdzogs par spyod tshe nya'i khyim zla rdzogs par bshad pa'i phyir/ yang kha cig /yul gyi chu tshod de dus kyi yun tshad yin par thal/ chu tshod ces tha snyad btags pa'i rgyu mtshan yod pa'i phyir na ma khyab ste/ nyin zhag gi drug cu'i cha la dus kyi chu tshod du 'jog pa dang 'dra bar rgyu skar gcig gi thob thang gi nam mkha' drug cur phye ba'i cha gcig la yul gyi chu tshod du 'jog pa'i phyir ro/ /'dir smras pa/ dka' gnad don gsal mdzes sdug la nga tsho'i dpal/ /yongs su 'dzin pa'i zur mchan sked phra ma/ /tshig sbyor phun tshogs rin chen rgyan mang gis/ /spras na mkhas rnams mgu phyir gtam 'di bya/ /mdo rgyud dgongs 'grel tshig don tambu ra'i/ /rgyud du nyer khugs nyams 'gyur stong ldan dbyangs/ /mkhas dbang danTi'i ngo mtshar lugs srol 'dis/ / thugs rab mi 'phrog dpyod ldan su zhig mchis/ /rigs rus dpal 'byor mthon po'i 'od zer ba rgyas/ /phyed par dka' ba'i don zab pa ku la/ rnam dpyod lus phra gzhon nu'i 'gran chang rgyun/ /'thor tshe mi bzhad rang dbang yod dam ci/ /gnam gyi go lar gza' skar rgyu ba'i lam/ /mchan 'grel me long ngos su shar ba'i tshe/ /nyi zla rang gi gsang spyod shes dogs nas/ /gling bzho skor ba'i zol gyis bros sam snyam/ /mtha' yas gzhung don ri rab @030a @#/ /rgya mtsho'i mthil/ rnam dpyod gom pa gcig gis gzhal ba na/ /khyab 'jug rang min gnyis pa yod dam zhes/ /sems kyi ri dwags som nyi'i dwa bar tshud/ /mkhas pa'i bya ba rnam gsum kau mu rIs/ /gzhung don kunda bzhad tshe bsil zer can/ /bskyengs te chu srin grong du 'gro ba la/ /gsang tshig smra rnams zla ba'i ma mar 'bod/ /skyes thob blo gros rab gsal sdod po la/ /sbyor sbyangs shes rab yal ga lo 'dab rgyas/ /rtsom 'chad rtsod pa'i 'bras bzang smin legs pa'i; ;sngon med dpag bsam ljon pa deng 'dir 'grub/ /'dir 'bad legs byas rdul gyi kha lo bas/ /blo gsal drag po'i gtsug rgyan thos bsam gyi/ /dkar phyogs rdzogs pa gsum pa'i sar phyin te/ /sgom sgrub cha shas bcu drug gang bar shog/ ces dus tshigs kyi mchan 'grel dka' gnad sgo brgya 'byed pa'i lde mig zhes bya ba 'di ni/ snga sor yig char drangs pa'i gzhung 'ga' la zur mchan btab pa mthong bas rkyen byas te/ dad brtson rnam dpyod ldan pa dge slong blo bzang dkon mchog dang blo gsal chos la 'dun pa dge slong ngag dbang tshangs pa gnyis kyis 'phro rdzogs par byed dgos zhes bskul ba ltar/ slar bcos bcug dang mgo mjug tshang bar byas te/ btsun gzugs ngag dbang dpal ldan gyis nyin byed dbang po nab so'i dga' mar dgyes mgur rol ba'i dus su/ blo gsal mkhas mang 'byung gnas khal kha khu re chen mor 'khrigs chags su bkod pa 'dis kyang rgyal bstan rin po che dar zhing rgyas ba'i rgyur gyur cig/ //