@#/ /rje rin po che'i gsang ba'i rnam thar rgya mtsho lta bu las
cha shas nyung du zhig yongs su brjod pa'i gtam rin po che'i
snyem bzhugs/ /

@01a @##/ /rje btsun bla ma dmigs pa med pa'i thugs rje chen po
dang ldan pa/ rgyal ba khyab bdag rdo rje 'chang chen po dang
dbyer ma mchis pa de'i zhabs la gus pa chen pos phyag 'tshal lo/
/brtse ba chen pos

dus thams cad du rjes su gzung du gsol/ /rgyal ba kun gyi mkhyen
brtse ni/ /'gro 'di'i bsod nams dpal 'byor las/ /mgon khyad
gzugs can bzhin gyur pa/ /skye dgu'i nyer 'tsho rgyal gyur cig
/kun la thun

mong ba nyid du/ /bsnyad par bgyi ba'i phul byung gtam/ /khyod
kyi mdzad pa las brtsams nas/ /bdag gis 'bad de gzhan du
bsgrags/ /'on kyang slar ni gsang ba las/ /shin tu gsang ba'i
rin chen gter/ /

mthu chen gyis kyang bsam dka' ba/ /ngo mtshar bla na med pa'i
gtam/ /mgon khyod zhal gyi bum bzang las/ /dgyes bzhin stsal
ba'i bdud rtsi'i rgyun/ /bdag blo dad pa'i snyim pa yis/ /gces
par bzung ba de nyid

kyis/ /skal bzang dad pa brtan po can/ /theg pa mchog gi bshes
gnyen la/ /snying nas gus pa'i brtul zhugs ni/ /rab tu blang ba
'ga' yi ched/ /bdud rtsi'i bgo skal 'di sbyin gyis/ /skal bzang
dad pa'i

lus mdzes ma/ /'dun ldan ri dwags mig can gyis/ /rna lung mdzes
byed rgyan 'di long/ /de yang bdag cag gi dpal ldan bla ma dam
pa rje btsun tsong kha pa chen po zhes 'jig rten gsum na rnam
par dkar

@02a @#/ / ba'i snyan pa'i ba dan gyo ba de'i rnam par thar pa pa
yon tan rin po che'i 'byung gnas las thun mong du yongs su
bsgrag par bya ba/ phul du byung ba'i dam pa'i spyod pa ngo
mtshar ba dag ni bdag gis phyogs gzhan du brjod zin la/

de lta na'ang thun mong ma yin pa'i rnam par thar pa sku dang
gsung dang thugs kyi gsang ba bla na med pa blo mchog tu gyur pa
dag gis kyang bsam par bya dka' ba bgrang ba las 'das pa zhig
mnga' ba las/ skal ba dang ldan pa dag la

cung zad tsam zhig bsgrag par rjes su gnang ba/ bdag gis phyogs
tsam zhig blo la nges pa gang yin pa de 'dir brjod par bya'o/
/de la bla ma dbu ma pa dang mjal ba yan chad kyi rnam par thar
pa ni thun mong bar brjod zin pa ltar ro/ /

bla ma dbu ma pa de yang sku tshe dpag tu med pa'i snga rol nas
tshogs gnyis rgya chen po bsags shing/ khyad par du sku tshe lan
grangs mang por rje btsun 'jam pa'i dbyangs kyis rjes su bzung
ba'i mthus/ sku tshe 'dir bsnyen sgrub

sogs la 'bad pa cher ma mjad par yang/ byis pa gzhon nu'i dus
nyid nas mdo khams su phyugs rdzi mdzad pa'i tshe/ lus kyi khong
pa'i nang snying gi thad tsam nas/ a ra pa tsa na'i sngags kyi
sgra 'ur 'ur ba 'ong zhing/ de byung

res kyis lus kyi ba spu zing byed cing/ thugs bzung mi thub pa
'dra ba 'ong ba zhig yod de/ lan cig de ltar byung bas rkyen
byas nas brgyal bar gyur cing/ brgyal ba sangs pa dang/ mdun na
rje btsun 'jam pa'i dbyangs sku

@02b mdog nag po zhig 'dug pa dngos su gzigs pa'i snang ba
byung/ de rjes rjes gnang dang sgrub pa'i lung gsan nas/ bsnyen
sgrub la shin tu 'grus par mdzad pas rnam par thar pa thun mong
bar bsnyad pa ltar sku dang gsung gi snang ba rgyun chags su
'ong ba zhig

yod par snang/ rje rin po che 'dis gtsang rong du khong dang
mjal nas/ bla ma dbu ma pas lotstsha ba mdzad/ rje 'dis 'dri ba
po mdzad nas/ rje btsun 'jam pa'i dbyangs la chos kyi dri ba
mang du mdzad/ khyad par du dbu ma'i lta ba 'di ma btsal na lam
gyi srog

mi rnyed btsal kyang shin tu rnyed dka' zhing/ phyin ci log tu
bzung na gol sa dang nyes dmigs gzhan las kyang che bar 'phags
pa yab sras kyis gsungs 'dug pas/ 'di nyid 'ba' zhig yid la
gcags pa'i thugs kyi bzhed pa rtag tu rgyun chags

pas/ de kho na nyid tshol ba la byang chub sems dpa' rtag tu ngu
dang 'dra bar yod pas/ de'i tshe yang rje btsun la lta ba'i dang
dri ba rang shas cher mdzad/ de dus nged kyi lta ba 'di thal
rang gang yin zhus pas/ gang yang min gsungs/ de dus rje 'di'i
thugs

la yang khas len ci yang med cing/ gang du'ang bzung mi nyan par
lta ba de thugs la bde ba tsam yod par 'dug go /de nas lta ba'i
skor la dri ba dang/ brgal brtag mang du mdzad pas/ rje btsun
'jam pa'i dbyangs kyi gsung nas/ snang phyogs dang stong phyogs

la nye ring gtan nas byed mi nyan/ khyad par snang ba la gtsigs
su byed dgos zhes yang yang gsung/ phyis dga' ba gdong du bzhugs
dus kyang de 'dra ba mang du byung ste/ mdor na tha snyad tshad
mas grub pa bzhag sa med par 'khrul ngo tsam la bsnyad nas gzhan

@03a @#/ /ngor 'jog pa ma gtogs/ rang lugs la gang yang bzhag sa
med par las 'bras la skur 'debs kyi chad lta chen po la dbu ma'i
lta ba mchog tu 'dzin pa de nyid 'gag pa'i ched du/ rje btsun
gyis nan tur che bar mdzad do/ /de ltar dri ba dang brgal

brtag mang du mdzad pa'i skabs su rje btsun gyis thal rang gi
khyad par/ lhan skyes dang kun brtags kyi bdag 'dzin gnyis kyis
ji ltar gyi bdag dang/ rtags kyi dgag bya'i tshad phra rags/ lta
ba rtogs pa'i tshad/ thal 'gyur ba'i lta ba 'di'i lugs kyis

kun rdzob ba rnam par 'jog pa'i tshul la sogs pa rnams kyi pa
dpyad pa zhib tu mdzad pa'i sa bon shin tu 'dril ba re dang/
sngags mtshan nyid kyi lam thun mong dang/ thun mong ma yin pa'i
khyad par dpal gsang ba 'dus pa'i rim pa lnga'i ngo bo dang/ go
rim grangs

nges la sogs pa rnams kyi gnad thun mong min pa shin tu 'dril ba
re gsungs/ mi go ba 'dug lags zhus pas/ 'di rnams ma brjed par
gyis la zin bris su bris/ bla ma dang yi dam tha mi dad du byas
pa la gsol ba 'debs shing bsnyen sgrub

byed pa dang/ bsags sbyang gnyis la legs par 'bad pa dang/
gzhung lugs kyi don la rig pas rnam par dpyod cing zhib tu sems
pa rnams sum sgril du nyams su long la tshim ma sla bar/ rgyun
bsrings la legs par dpyod cig dang/ skabs su

babs pa na/ ngas da lta sa bon btab pa 'di rnams kyis kyang
rkyen byas nas legs par go ba zhig myur du 'ong bar 'dug ces
gsung ngo/ /'phags pa klu sgrub yab sras kyi lugs kyi dbu ma
dang gsang ba 'dus pa la shes 'dod shin tu che bar yod pas

@03b rtsad gcod pa'i bla ma bod na su drag zhus pa la/ red mda'
ba las drag pa med/ 'on kyang khyod la mtha' ma lus bchod pa'i
go ba rdzogs par bskyed mi thub/ dbu ma pa lo tstsha byas nas
ngas khyod la bshad na de ga drag pa 'ong na'ang/ khong yang
myur du mdo khams

la 'gro dgos par snang/ des na da lta nas bshad pa ma byed par
bya bral gyis la dben pa sten/ gong du bshad pa ltar sum sgril
du nyams su len pa dang/ dmigs rnam skyong ba sogs la legs par
'bod dang/ ring por mi thogs par de rnams kyi don rnyed par

'gyur ro/ /zhes gsung ngo/ /gzhan yang chos kyi gnad dang gzhung
gang la brten nas tshol ba sogs gsungs pa la tshad med/ rgya gar
gyi paNDi ta mkhas pa rnams la'ang 'ga' zhig gi la gzhung la
'khrul med rang 'ba' zhig tu bzung mi nyen pa'i dmigs bsal

re tsam yang byung bas/ 'o na 'phags pa klu sgrub kyi dgongs pa
'grel ba la slob dpon zla ba grags pa 'khrul med rang 'ba' zhig
tu bzung bas e chog zhus pas/ zla ba grags pa ni steng phyogs
kyi 'jig rten gyi khams kyi zhing zhig gi de bzhin gshegs pa

zhig gi zhabs drung nas byang chub sems dpa' rnam dpyod dang
snying stobs mchog tu gyur ba zhig /zhing 'dir 'phags pa klu
sgrub kyi lugs/ bstan pa'i snying po gsal bar bya ba'i slad du
bsam bzhin du skye ba bzung bu yin pas/ 'di 'phags pa klu sgrub
kyi

dgongs pa 'grel ba la sngags mtshan nyid gang gi skabs su'ang
'khrul pa phra mo tsam yang med pas/ 'di la rnam pa thams cad du
yid chos kyi gnas 'ba' zhig tu nges par bzung dgos pa yin no/
/zhes gsung ngo/ /bla ma dbu ma pas rje btsun

@04a @#/ /'jam pa'i dbyangs la/ rje rin po che 'di'i sku skye
snga phyi sogs kyi zhu ba mdzad pas/ sngon sangs rgyas 'jig rten
na bzhugs pa'i dus su bla ma 'di/ rgya gar du bram ze'i khye'u
zhig tu 'khrungs/ de'i tshe dge slong gi cha lugs 'dzin pa'i
byang chub

sems dpa' mos pa'i blo gros zhes bya ba dang mjal nas/ de nyid
mnyes par byas shing zhabs 'bring du 'brangs/ chos mang du gsan/
des khrid de ston pa shAkya thub pa'i zhabs drung du mjal zhing
sems bskyed/ de'i tshe ston pa la shel dkar po dri ma med pa

brgya rtsa'i phreng ba zhig dad pas phul nas/ smon lam btab pas
stong pa nyid kyi lta ba phyin ci ma log par rtogs pa'i sa bon
bzhag pa yin/ da sku skye 'di'i phyi ma la dga' ldan du rgyal ba
ma pham pa'i chos kyi mdun sar theg pa chen po'i 'byor pa

dpag tu med pa la longs spyod par 'gyur zhing/ mtshan la byang
chub sems dpa' 'jam dpal snying po zhes bya bar 'gyur ro/ /zhes
zer ro/ /de'i lo rgyus sku mdun du zhus dus/ 'di'i phyi ma dga'
ldan du 'gro ba 'di la rang bla ma dbu ma pa/

bla ma phyag rdor ba sogs mang po zhig kha 'cham par 'dug /ces
gsung ngo/ /gzhan yang nyams snang ba la sogs pa mang pos rje
bla ma 'di'i sku skye snga phyi'i skyes rabs sogs mang po zhig
gleng ba ni/ bla ma nyid kyi zhal snga nas thugs nges mi mdzad

par 'dug pas ma bris so/ /de dus rje rang yang cung zad 'chad
nyan la thugs bzhed che/ bla ma dbu ma pa yang de dang mthun pas
sku'i na tshod shin tu gzhon zhing/ mkhyen rab dang phan thogs
shin tu cha ba 'di 'dra ba la/ da dung bshad nyan rang mdzad

@04b na bstan pa la phan thogs shin tu che zhing/ 'chad nyan
'phel po 'di 'dra ba'i 'phro la bya bral la byon na/ nged la'ang
skye bo rnams kyis kha zer du 'ong bas na/ re zhig 'chad nyan
mdzad pas chog pa zhig 'tshal/ zhes zhus pas rje btsun gyi zhal
nas/

bstan pa dang sems can la gang phan khyod kyis mi shes/ kha zer
ba la bzod pa sgoms/ dben pa bsten nas thugs dam ma byas na sku
tshe ring po mi 'ong/ phan thogs kyang ltar snang zhig las mi
'ong bas bya bral la phyin pa 'thad ces gsung

ngo; ;skyid shod dga' ba gdong du bla ma dbu ma bya dang dpon
slob gnyis po las med pa'i sku mtshams dam po bcad/ gnyis po'ang
gzims khang so sor mdzad nas gsol ja sogs la 'tshog par mdzad
cing/ gsol ja bzhes pa'i skabs su'ang

bla ma dbu ma pas lotstsha mdzad nas/ rje btsun la chos mang du
gsan cing dri ba dpag tu med pa mdzad/ de dus thog mar bla ma
dbu ma pa la rje btsun gyis gnang ba'i zhi gnas kyi dmigs pa
gsan nas sgom gyin yod pa la/ do zhag rang 'di las kyang

rje btsun nyid la gsol ba btab cing bsnyen sgrub byas na de rang
don che ba 'dra dgongs nas/ bla ma dbu ma pa la de ltar zhus pas
de bzhin mdzad pas khyab ces gsungs nas/ nyin mtshan du bla ma
dang rje btsun tha mi dad du byas pa la gsol ba btab

cing bsnyen sgrub mdzad pas/ zhag mang po ma song ba la nyin
gcig /dkyil 'khor gyi lte ba'i rgya khyon 'tsham pa zhig kha dog
rgya mthing bzang pos legs par byugs pa 'dra ba la/ shin tu
dwang pa/ lta bas chog mi shes pa zhig gi dbyibs shin

@05a @#/ /tu zlum por 'dug pa'i mtha' thams cad 'od zer kha dog
sna lnga pa 'ja' tshon lta bu'i dra bas 'khrigs pa'i dbus kyi lte
ba sngon po de'i rgya khyon dang 'tsham par rdo rje'i skyil krung
gis bzhugs pa'i 'jam pa'i dbyangs a ra pa tsa na gung

kum gyi mdog can/ lta bas chog mi shes pa zhig gi sku'i snang ba
dngos su gzigs/ de bla ma dbu ma pa la ma zhus kyang/ bla ma dbu
ma pa na re khyed rang la'ang sku'i snang ba yod pa 'dra gsungs
nas thigs byung/ de 'dra ba'i sku'i snang ba de nam 'dod res
kyis gsol ba

btab pa'i dus phal che bar dngos su nar mar 'byung ba zhig de
nas brtsams te da lta'i bar du rtag par yod/ ces gsung ngo/ /de
yang rje rin po che 'dis/ rje btsun 'jam pa'i dbyangs dpa' gcig
dang/ bla med la sogs pa rnams

dang/ bka' sdod gshin rje chos kyi rgyal po phyi nang gsang gsum
la sogs pa rnams kyi rjes gnang dang byin rlabs ting nge 'dzin
gyi dbang bzhi sogs ni bla ma dbu ma pas lotstsha mdzad cing/ rje
btsun 'jam pa'i dbyangs rang nyid la gsan la/ de yang dpa'

gcig gi rjes gnang mdzad pa'i ring la rje btsun yang dpa' bo
gcig pa rang gi sku'i rnam par yod pa la/ nang sgrub dang gsang
sgrub sogs kyi dbang mdzad pa'i tshe/ dpa' bo gcig pa de/ de ma
thag yab yum zhal sbyor gyi rnam par 'gyur 'gro ba dang/

chos skyong gi rjes gnang mdzad pa'i skabs su de ma thag bcom
ldan 'das rdo rje 'jigs byed kyi sku'i rnam par gyur nas/ gshin
rje chos kyi rgyal po la bka' bsgo bar mdzad pa la sogs pa de
'dra ba'i rnam 'phrul ngo mtshar bston pa yod par 'dug

@05b de nas rje btsun gyis bla ma dbu ma pa la gnang ba'i las
tshogs dang dmigs pa skyong ba'i rim pa sogs mang po zhig gi lung
ni bla ma dbu ma pa nyid la gsan no/ /de nas sgrub pa la 'byon
pa'i thugs thag bcad/ 'khor ji lta bu 'khrid rje btsun la zhus
pas/ thun mong

bar bris pa'i brgyad po da 'khrid pa'i gnang ba byung/ de nas
bla ma dbu ma pa mdo khams la 'byon pa'i skyel mar lha sar byon
dus/ da dpon slob re zhig mi mjal/ gnas byin rlabs can 'dir rje
btsun la gsol ba btab/ nyams len gyi gnad bsdus pa'i gdams

pa zhig zhus pa drag ces bka' bgros nas/ lha sa'i thog steng ma
rang gi lho phyogs kyi gser phubs kyi bya 'dab 'og der mchod pa
bshams/ gsol ba drag tu btab pas/ rje btsun gyi nyams len gyi
gnad bsngas pa'i tshigs su bcad pa 'ga' zhig gsungs/ rje bla

ma 'dis de ka'i dus su gsung rim bzhin yi ger bkod 'dug go /de
nas thun mong bar bkod pa ltar sgrub pa la byon/ 'ol kha'i chos
lung du phebs/ dgun dpyid rnams dpon slob thams cad kyis gtso
bor bsag sbyang la thugs dam gyi mthil du mdzad

pa'i skabs su/ rje 'dis ltung bshags dang brgya phyag sprags nas
mdzad res kyis sangs rgyas sum cu rtsa lnga'i sku'i snang ba
dngos su gzigs pa nar mar byung/ de'i tshe rje btsun byams pa
mgon po sku gser btso ma'i kha dag lta bu la rin po che'i rgyan
dang chos

'chad kyi phyag rgyas me tog gi sdong bu bsnams pa/ rin po che'i
khri la skyil krung gis bzhugs pa de 'dra ba'i sku shin tu che
ba dang/ rgyal ba sman gyi bla bla gos ser po man bas pa dang/
rje btsun byams mgon bzang po'i 'dug stangs mdzad par byung gi
cha

@06a @#/ /byad can snam sbyar gsol ba phyag gis klu shing gi
sdong bu ril bas mtshan pa 'dzin pa de 'dra ba dang/ gzhan yang
rgyal ba tshe dpag tu med pa dang bcas pa rnams kyi sku'i snang
ba dngos su gzigs pa mang du byung/ 'di rnams nyams snang

yin pas nges pa cher med dgongs nas de tsam du ched cher ma
mdzad na'ang/ bla ma rtogs ldan 'jam dpal rgya mtsho ba la rje
btsun gyi sku dang gsung gi snang ba mngon sum 'byung ba
'khrul med gcig yod pas/ khong la rje btsun gyi gsung nas/

rje la gzigs snang byung ba de rnams nyams snang rang dga' ba
min pas gsol ba drag tu thob/ phyis rten 'brel khyad par can
yod pa yin gsung ba byung 'dug gsung ngo/ /rtogs ldan pa'i
snang pa de la'ang rje'i drung nas brtag dpyad mang

bu mdzad cing/ chos kyi gnad zab mo dris pa rnams phal cher
'phyug med du 'ong ba 'dug bas thugs legs par ches so/ /de'i
dpyid ka de rje btsun gyi zhal nas/ dmu rgod gdul dka'i sems
can 'di rnams la/ /bshad pas phan thogs chen po

gal 'gyur/ /de bas sgrub pa lhur blang dben pa sten/ /rang
gzhan gnyis ka 'tshengs pa'i lam rnyed snyam/ /zhes gdams shing
sgrub pa la bskul bar mdzad do/ /de nas rdzing ji'i jo bo la
mjal nas rgya sogs phur byon/ thugs dam shin tu 'phel/

de dus rje btsun 'jam pa'i dbyangs kyi sku shin tu che ba gzhi
brjid phun sum tshogs pa zhig la sangs rgyas dang byang chub
sems dpa' dpag tu med pa'i 'khor gyis bskor ba dang/ 'phags pa
klu sgrub/ a'r+ya de ba/ sangs rgyas bskyangs/ klu byang/ zla
ba

@06b grags pa/ thogs med sku mched/ phyogs glang chos grags/
yon tan 'od dang shAkya 'od/ lha dbang blo/ rgyan mkhan po/
ka ma la shI la/ a b+ha ya la sogs pa'i paNDi ta du ma dang/
rgyal po indra b+hU ti/ bram ze chen pos ra ha/ slob dpon
chen po lU i pa/ dril bu

pa/ nag po spyod pa la sogs pa'i grub chen du ma'i sku'i snang
ba dngos su gzigs/ nyams snang la gtad pha med las che dgongs
pas rje btsun gyis sngar bzhin/ nyams snang rang dga' ba min
pas gsol ba drag po thob/ 'di rnams kyi gzhung la brten nas
rang

gzhan la phan thogs rgya chen po 'ong ba'i rtan 'brel yin/
zhes gsung nga/ /da'i tshe bcom ldan 'das rdo rje 'jigs byed
kyi sku zhal phyag yongs su rdzogs pa shin tu che ba gzi brjid
bzod par dka' ba zhig zhal gzigs/ de dus nas 'jigs byed kyi
bdag 'jug

nyin re zhing mdzad pa nam yang chag med du mdzad do/ /yang
der sngar dang 'dra ba'i rje btsun gyi sku'i snang ba dngos su
gzigs pa'i thugs ka'i nang na phar ral gri'i yu ba zug cing/
de'i thugs kar rtsa mo zug pa la/ bdud rtsi'i rgyun kha dog
dkar por shin

tu snum pa 'od kyi chu rgyun 'dra ba zhig rje btsun gyi thugs
ka nas ral gri'i steng la brgyud de nar ra ra byung nas/ rje
'di'i thugs kar zhugs pas/ sku'i nang thams cad bde ba chen po
dpag tu med pas gang ba brjod par mi nus pa 'dra ba zhig

'khrungs/ de'i dus ngo mkhyen pa dang mi mkhyen pa'i 'khor du
ma kha gdangs nas bzed 'dug pas/ 'ga' zhig gi khar mang du
'gro zhing/ 'ga' zhig gi khar nyung zad re dang/ 'ga' zhig gis
kha gdangs kyang cung zad kyang mi 'gro ba de 'dra ba'ang 'dug

@07a @#/ /gsung ngo/ /mdor na gnas der de 'dra ba'i dag pa'i
snang ba dang thugs rgyud la mngon par rtogs pa'i yon tan dpag
tu med pa zhig 'khrungs so/ /de nas rje btsun gyi gsung gis
bskul ba la brten nas/ rdzing ji'i gtsug lag khang gi zhig
gsos mdzad pa'i tshul zhib par thun mong ba nyid

du brjod zin la/ de'i tshe rje btsun gyi gsung gis rje btsun
byams mgon gyi bstod pa rin po che gsal ba'i sgron me zhes bya
ba/ rje btsun byams mgon la phyogs bcu'i sangs rgyas thams cad
kyis 'od zer chen po'i dbang bskur ba la gzhi gyis la rtsoms
gsung ba la brten nas rje btsun

byams mgon gyi bstod pa rin po che gsal ba'i sgron me mdzad
cing/ de bzhin du bde ba can du skye ba 'dzin pa'i smon lam
zhing mchog sgo 'byed dang/ rang nyid ma 'ongs pa na gang du
sprul pa'i skur 'tshang rgya ba'i mdzad pa ston pa'i zhing
yongs su bzung ba'i smon lam yang rje btsun gyi gsung gis

bskul nas/ don gyi ngo bo dang go rim sogs rje btsun gyis
gsungs pa nged kyis tshig sbyor gyis bsgrigs pa yin no/ /zhes
gsung ngo/ /de'i tshe rje btsun 'jam pa'i dbyangs kyi zhing
bkod bzhengs pa'i skya ris btab tshang ba la/ rab gnas shig
mdzad pas rje btsun gyi sku dngos su byan nas thim song

ba'i gzigs snang byung zhing/ de nub nas mar me bzung/ yang
sangs rgyas sum cu rtsa lnga'i sku 'dri bar brtsams pa la/ lha
bzo rnams kyis sku mdog phyag rgya sogs ji ltar 'dri ba ma
shes nas/ rje'i drung du zhus pas/ de'i tshe gsol ba btab pas
ji ltar 'dri ba'i go rim dang mthun par rgyal ba sum cu rtsa

lnga'i sku rim bzhin gzigs pa'i gzigs snang bzhin du sku mdog
sogs 'di ltar bris shig /ces zhal ta gnang nas 'drir bcug /der
ma zad zhing bkod gzhan rnams la'ang rab gnas kyi dus su ye
shes pa dgug gzhug mdzad pa na lha de dang de'i rnam pa re
thim song ba'i snang ba ma byung ba med/ ces gsung ngo/ /de'i
phyir

@07b rten de dag ni rgyal ba dngos dang mchod pa'i zhing du
khyad par med par shes par byes shig /de nas lho brag la byon
pa'i skabs su yang rje btsun nam mkha' rgyal mtshan pa dang
mjal nas dgung lo bzhi bcu rtsa lnga pa'i steng du sku tshe'i
bar tshang chen po 'ong ba'i mtshan ma

yod pa de bcom ldan 'das 'khor lo chen po'i sgo nas bzlog pa'i
rten 'brel bsgrigs/ rgya gar shing gi ril 'byon par bzhed pa'i
skabs su rje btsun gyi gsung nas/ rdzing ji'i jo bo la dge
sbyong gi rtags tshang ma'i skyes 'bul ba dang bcas pas bstod
cing gsol ba 'debs

pa'i cho ga tshangs pa'i cod pan zhes bya ba don gyi rim pa 'di
ltar gyis la rtsoms la phul zhig dang/ phyis 'dul ba'i bslab
khrims rnam par dag pa la brten nas bstan pa la phan pa rgya
chen po 'byung ba'i rten 'brel yod do/ /zhes gsungs pa la
brten nas de ltar mdzad/

phyis kyang rje btsun gyi gsung gis nan gyis bskul cing/ bstan
pa'i rtsa ba yin pa'i thugs nges shugs drag po 'khrungs pa
dang/ bstan pa nyams pa thugs kyis bsran par ma bzod pa'i
stobs kyis/ 'dul ba'i lag len phyir bcos yan chad yongs su
rdzogs pa snga

ma'i srol ba cam la ma ltos par legs par btsugs pa yin gyi/
gzhan las khyad par thon pa zhig don du gnyer nas byas pa ga
la yin/ zhes gsung ngo/ /de nas tsa ri nas gnyal la 'byon pa'i
lam du mo la'i la rtsar zhag bzhugs mdzad pa'i nub/ rje btsun
byams

mgon gyi sku shin tu che ba/ lhun po ltar mngon par brjid cing
nyi ma ltar gzi brjid 'bar ba zhig gis/ rigs kyi bu/ khyod
kyis sangs rgyas 'jig rten du byon pa 'dra ba zhig 'ong bar
shes par byos shig /ces sengge'i sgras dbugs phyung zhing spro
ba bskyed par mdzad

@08a @#/ /ba'i snang ba dngos su byung gsung ste/ de bas na
snyigs ma'i dus 'dir rje btsun bla ma 'di ni rgyal ba'i bstan
pa la rgyal ba nyid dang khyad par ma mchis pa'i tshig gis
bsngags pa ni rang bzhin brjod pa ste/ shes ldan dag gis kyang
ston pa nyid dang

mtshungs par ci'i phyir blta bar mi bya/ gnyal smad sengge
rdzong na bzhugs pa'i dus su dpal dus kyi 'khor lo'i rdzogs
rim yan lag drug la sogs pa'i lam gyi gnad rnams la dpyad pa
mang du mdzad pas mi 'khrul pa'i nges pa 'khrungs shing 'chug

med kyi gzer thebs nas mi 'jigs pa brnyes/ bcom ldan 'das dus
kyi 'khor lo dpa' bo gcig pa zhig gi sku'i gzigs snang nar mar
'ong zhing/ nub gcig gi mnal lam du khyod kyis dus kyi 'khor
lo 'di la rgyal po zla ba bzang po byon pa 'dra ba zhig

'ong bar yod do/ /zhes gsungs te/ sngon chad bshad pas phan
thogs 'jigs rung tsam ni ma byung/ rang gi rgyud la go ba rnam
par dag pa skyes pa la dgongs pa yin 'ong/ zhes gsung ngo/
/gnyal du bzhugs dus mnal lam du dbyangs can ma'i gsung

gis/ dgung lo lnga bcu rtsa bdun thub/ de bar rang gzhan gyi
don dpag tu med pa 'grub/ gsung ba la/ rje btsun ma rnam par
rgyal ma la sogs pa la gsol ba btab cing bsnyen sgrub mang du
byas pas de las ring zhig thub par mi 'gyur ram/ zhes zhus

pas de thams cad phal cher sngon gyi smon lam gyi shugs dang/
chos rab tu rnam 'phyed kyi shes rab la thugs 'dun ches pa la
sogs pa'i dbang gis/ blo gros gong nas gong du 'phel ba'i rgyu
'ba' zhig tu song bas sku cha la de tsam du phan pa ma byung/
zhes gsung

@08b pa zhig byung/ rtogs ldan pa brje btsun gyi gsung nas/ da
phan chad sku tshe'i bar chad la sgos su dmigs pa'i bzlog thabs
dang/ sku tshe bsring ba'i phyi nang gi rten 'brel legs par
bsgrigs na/ dka' se ba zhig la bzlog par bya nus so/ /zhes
gsung ba dang/

yang gnyal gyi sengge rdzong na bzhugs dus rje btsun la sngags
mtshan nyid kyi lam gyi ngo bo dang/ go rim grangs nges sogs
dang/ khyad par zhi lhag gi nyams len gyi gnad rnams zhus pas/
da nged la yang yang 'dri mi dgos/ gzhung chen mo rnams la
zhib

par dpyod dang/ ded kyis bstan pa rnams dang phal cher mthun
pa sha stag 'ong/ mi mthun par tsam byung na mdor len gdams
ngag tu 'dod pa rnams la 'babs kyi/ gzhung chen mo rnams 'dor
du mi rung ngo/ /zhes gsung zhing/ man ngag gis lde mig byas
nas

mdo rgyud dgongs 'grel dang bcas pa rnams la dpyad pas dpyad
pa rdzogs pa'i chad ni/ lung rigs kyi lam nas drangs pa'i nges
pa rnyed nas/ blo sa don der thag bcad kyang/ gting nas mi bde
ba'i rnam pa med pa zhig 'ong/ de dus don de la dpyad pa
rdzogs pa yin no/ /

zhes gsung ste/ phyin chad tshad de 'khrul med rang zhig byung
gsung ngo/ /gnyal nas dwags po lha sdings su phebs/ thal rang
gi lta ba'i gnad rnams la dpyad pa nar mar bya bral la 'byon
pa'i gong nyid nas de bar du mdzad na'ang/ mthar thug pa'i
gnad la mi bde ba gtan nas

log pa'i nges pa 'dren ma thub/ gnas der bla ma dang rje btsun
tha mi dad du byas shing gsol ba drag po mang du btab pas
mtshan mo zhig mnal lam du 'phags pa klu sgrub yab sras lnga
rang bzhin yod med kyi gnad rnams la 'phel ba'i gtam gyis bka'
bgro ba mdzad

@09a @#/ /kyin 'dug pa'i nang nas/ slob dpon sangs rgyas
bskyangs yin zer ba'i paNDi ta sngo bsangs sku bong che ba
zhig gis dbu ma'i rgya dpe zhig phyag na bzung ba tshur byon
nas byin gyis brlabs pa'i mtshan ma zhig byung/ de'i phyi de
nyin rtsa she'i 'grel pa budd+hA

pA li ta gzigs pas/ 'bad pa med par thal 'gyur ba'i lta ba'i
gnad dang dgag bya'i mtshams 'dzin sogs la sngar dang mi 'dra
ba'i nges pa gting tshugs pa 'khrungs shing/ mtshan 'dzin gyi
dmigs gtad thams cad zhing/ de kho na nyid kyi don la mtha'
gzhan du dogs

pa'i sgro 'dogs lhag ma med par drungs phyung bar gyur te/
phyin chad rang ro'i rjes 'jug rnams la'ang slob dpon sangs
rgyas bskyangs kyi 'grel pa 'di la blta dgos zhes yang yang
gsungs pa'i rgyu mtshan ni/ de la bltas na lta ba'i gnad la
nges pa lhag

par rnyed pa'i rten 'brel zhig yod pas de ltar byas pa yin/
zhes gsung ngo/ /de nas rtsa she'i rgya cher 'grel mdzad pa'i
skabs su/ gzhung dka' ba'i gnas phal che bar sangs rgyas
bskyangs kyi 'gral ba re drangs pa'i bshad pa yang ched kyis
mdzad pa'i rgyu mtshan yang de

yin la/ ston pa la shas nas mi phyed pa'i dad pa thob pa'i
shugs kyis drangs pa'i bsngags pa brjod pa zab mo rten cing
'brel par 'byung ba gsungs pa'i sgo nas bstod pa legs par
bshad pa'i snying po zhes bya ba mdzad do/ /de nas 'ol kha'i
'gar phug dag

brag gdong dang/ g.ye'i te'u rar byon/ chos mang du gsungs/
sman lung gi rgya sog phur cho 'phrul chen po'i dus mched kyi
zhag bco lnga'i ring la mchod pa rgya che zhing bkod pa phun
sum tshogs pa bshams te ting nge 'dzin gyis byin gyis brlabs
nas/

@09b mchod phul thams cad mnyes par byed pa'i mchod pa'i cho
ga dang/ 'phral dang yun gyi phan bde rgyas pa'i smon lam dpag
tu med pa mdzad pa'i skabs su/ mchod pa'i zhing phyogs bcu'i
de bzhin gshegs pa spyan 'dren pa'i dmigs pa dang/ thugs kyi
'dun pa

shugs drag po mdzad pa na/ shar phyogs kyi de bzhin gshegs pa
thams cad sku mdog dkar po rnam snang gi rnam pas shar phyogs
kyi nam mkha'i khyon thams cad gang bar 'khrigs pa dang/ de
bzhin du lho phyogs dang nub dang byang dang dbus sam steng gi
nam mkha'i

mthil thams cad rim pa bzhin du/ rin 'byung 'od dpag med don
grub mi bskyod pa'i rnam pa can gyi de bzhin gshegs pas khyab
cing/ bkod pa de 'dra ba'i sgo nas steng dang logs kyi nam
mkha'i khams thams cad bar mtshams med par de bzhin gshegs pa'i

skus gung phub ba ltar gyur te/ mchod pa bdag gir mdzad pa'i
gzigs snang dngos su 'char ba yang yang byung/ phyis lha sar
cho 'phrul chen po'i mchod brgya chen po bsam gyis mi khyab
pa/ smon lam chan mor grags pa mdzad pa'i dus su'ang gzigs
snang de 'dra ba nar mar byung

ste; de dus mchod yul dang mchod pa thams cad la bde stong gis
rgyas btab cing mchod pa phul bas/ de thams cad bde stong gi
rnam rol tu 'char ba byung gsung ngo/ /de nas nyang po mdangs
mdor phebs pa nas bzung ste/ sras kyi thu bo gnyis kyis gtso

mdzad dge 'dran phal che bas grub pa'i gnas mchog 'brog ri bo
che dge ldan rnam par gyal ba'i gling btab cing/ rje rin po
ches mchin dang 'o la kha sogs su phebs pa'i bar kyi rnam par
thar pa gzhan thams cad thun mong gi yi ger brjod pa ltar yin

@10a @#/ /la/ 'o de gung rgyal gyi lha zhol byams pa gling du
bzhugs dus/ rje btsun 'jam pa'i dbyangs kyis gsung gi snang
bas slob dpon klu byang gi rnam gzhag rim pa la rnam bshad
rtsams/ phan thogs chen po 'ong zhes bskul bas

de 'phral du mdzad/ rdo rje 'chang gi lam gyi rim pa chen mo
mdzad pa la/ sngar rgya sog phung bzhugs dus grub chen rnams
dang/ slob dpon a b+ha ya'i gzhung la brten nas phan pa chen
po 'grub par 'gyur ro/ /zhes gsung ba de ma gtogs rtsom pa
rang gi  

skabs su dus myur ches/ gsol ba 'debs pa sogs yun ring ma grub
pas rgyu mtshan khyad par ba gzhan cher med/ ces gsung ngo/ /de
nas dben gnas chen po dge ldan gyi gzhi lding ba'i skabs su/
rje'i zhal snga nas 'ol kha'i bsam gtan gling du

bzhugs pa'i ring la/ sku mtshams dam po bcad nas bla ma dang yi
dam tha mi dad du dmigs pa la gsol ba shugs drag po 'debs pa
mang du mdzad cing/ dpal gsang ba 'dus pa'i rdzogs rim rim pa
lnga'i ngo sprod chen mo rim lnga gsal ba'i

sgron me rtsom pa'i thugs 'dun btang/ zin bris 'debs par mdzad
pa'i skabs su/ mnal lam gyi ltas ngo mtshar ba byung ba dag
bsnyel bar gyur na mi rung snyam du dgongs nas/ brda'i tshig
gis rnam par bcings pa'i tshigs su bcad pas yi ger

mdzad de/ kun gyi mig lam du mi 'gyur ba'i gnas ji lta bar
bzhag par mdzad do/ /da ni 'di yin te/ rje btsun 'jam pa'i
dbyangs la gus pas phyag 'tshal lo/ /byA g+hra'i gong gi
tsandra ni/ /mig dang zla ba'i grangs gsum la/ /bgro ba mdzad
pa'i chu

@10b 'dres chus/ /ka la sha bkang ster rtsis byed/ /bul byung
nas ni sum brgya bcu/ /song zer yab gcig dkyil 'khor gtso/
/bgro ba mdzad pa gnyis kyang snang/ /grangs bzhi pa la rnam
pa can/ /khri yi steng na rtsa ba ni/ /gtad nas 'di bdag gis
zhes tshe/ /

sngags rgyas lan gsum bteg sngon gyi/ /de 'dra'i ltas go lnga
pa la/ /lho yi thugs bcud dam pa la/ /'phrig tshud de nas drug
pa la/ /nges rnyed de nas bdun pa la/ /rtog bsres las ni shin
tu nges/ /shid zan zhes pa'ang de nas go /de

'dra'i ngo mtshar rmad du byung/ /brjed kyis dogs nas yi ger
bkod/ /de don sgrub pa mthar phyin shog /glang gi lo zla ba
bcu gnyis pa'i tshes bdun la 'ol kha'i bsam gtan gling du bris
pa dge legs su gyur cig /ces bya'o/ /da ni de dag gi don

rje rin po che nyid kyi gsung dag ji lta bu bzhin du bdag gis
dgrol bar bya'o/ /de yang byA g+hra ni stag gi skad dod yin
la/ de'i gong zhes pa glang gi lo go bar byed pa'o/ /tsandra
ni zla ba'i ming yin la/ /mig ni gnyis dang zla ba gcig yin
te/ /gcig

gi brda yig gi 'og tu gnyis yig bzhag pa ni bcu gnyis yin pas
zla ba bcu gnyis pa go bar byed pa'o/ /gsum la zhes pa ni zla
ba de'i tshes gsum gyi mtshan mo'o/ /da'i tshe rgyal ba kun gyi
yab gcig rje btsun 'jam pa'i rdo rje lha bcu dgu'i dkyil

'khor yongs su rdzogs par snang zhing/ dkyil 'khor gyi gtso
bos rgyan bzang po sna tshogs pas spras pa'i rin po che'i bum
pa chus bkang bzhig rje nyid la ster rtsis byed cing/ ka la
sha ni bum pa'i skad dod yin no/ /bum pa'i chu 'di jo bo chen
po dpal ldan a ti 

@011a @#/ /sha snye thang gi skyi chu'i 'gram na bzhugs dus/ rje
btsun 'jam dbyangs dang rje btsun byams pa gnyis sku gsum dang
gcig gang yin la chos kyi bgro ba mdzad pa'i chu 'dras pa'i chu
yin/ 'di jo bo chen po nas bzung ste/ da lta'i bar la lo sum

brgya dang bcu song/ de bar du ster sa ma rnyed/ da khyod la
ster ba yin no zhes zer zhing/ de'i tshe chos kyi bgro ba mdzad
pa po rje btsun byams pa dang/ 'jam dbyangs gnyis kyang snang
ngo/ /tshes bzhi'i nub mo rin po che sna tshogs pas spras pa'i
khri zhig gi steng

na thams cad mkhyen pa bu ston rin po che yin zer ba'i bra ma'i
rnam ba can zhig bzhugs 'dug ba des/ dpal gsang ba 'dus pa rtsa
rgyud kyi glegs bam zhig gnang nas 'di'i bdag po gyis shi gces
gsung ba la/ mjug nas cung zad ma tshang ba yin nam

snyam du dgongs nas gzigs pas thams cad chang 'dug /de nas phyag
gnyis kyis glegs bam de blangs/ hUM badzra utiShMA zhes pa'i
sngags dang phyag rgyas lan gsum du dbu'i steng du bteg /kha
sang nub snga ma la buM pa chus bkang ba ster rtsis byed pa'ang
'di'i

ltas yin par 'dug dgongs pa byung ngo/ /tshes lnga pa la lho brag
mar pa'i thugs bcud dam pa bsre 'pho'i skor la 'phrig tshud/ tshes
drug pa la rgyud dang 'phags pa yab sras kyi dgongs pa la gnas
pa'i rmad du byung ba'i man ngag yin par nges pa rnyed/

tshes bdun gyi nyin slob dpon 'phags pa lha'i spyod bsdus gzigs
pas gnyid dang rmi lam dang bsre ba'i skor gyi man ngag gi gzhi
thams cad gting yod pa gzigs nas shin tu nges pa rnyed/ nub
sngon ma'i dus su bcom ldan 'das 'khor lo bde mchog

@011b gi rten dang brten pa'i dkyil 'khor gyi bris sku zhig gi
'og na phar la/ bde mchog gi tshes bcu'i mchod pa byed pa'i bkod
pa zhig bris/ de'i 'og na shid zan gtong ba yin zer ba'i yi ge
zhig bris 'dug /de la nub bdun pa'i dus bcom ldan 'das 'khor lo
bde

mchog chos skor rnams dus phyis gangs ri'i khrod 'dir shi ba
ltar gyur pa la/ rje rin po che 'dis legs par gsal bar mdzad pa
ni/ mi shi ba'i rjes su shid zan gtong ba lta bu yin zer ba'ang
de'i tshe go bar gsung ba'o/ /gdan rdzogs kyi khrid yig dang gsal

sgron du/ 'dod pa'i mtshan ma brtan po rnyed ces gsungs pa ni/
don 'di nyid la dgongs pa'o/ /de nas dben gnas chen po dge ldan
du phebs nas/ legs par bshad pa'i dga' ston gyis gdul bya rnams
tshim par mdzad cing/ rgyud sde bzhi dang

'brel ba'i bshad pa dang rtsom pa dpag tu med pa mdzad pa dang/
sku tshe'i bar chad bzlog pa'i mtshan ma brtan pa ma rnyed pas/
sku mtshams la bzhugs pa sogs ni thun mong bar gsal la/ sku
bsnyel ba'i rnam pa ma bstan pa'i snga rol dgung lo nga drug
pa'i dus

sku mtshams shin tu dam par bzhugs pa'i skabs su/ lan cig thugs
dam la bzhugs pa'i tshe steng gi sna rtse'i phyogs la a ba d+hU
tI'i mar sna'i thad na mar/ e waM gyi gzugs 'od kyi thag pa
lta bu skya nar re re 'ong ba zhig mnal lam du byung/ dus de

nas thun mong min pa'i zhu bde khyad par can dang stong pa nyid
sbyar ba'i bde stong gi ye shes dga' ba bzhi dang stong pa
bzhi'i bdag nyid can 'khrungs nas/ de phyin chad bde stong gi ye
shes khyad par ba nar mar bskyangs pas/ mnyam gzhag tu

@012a @#/ /bde stong gi ye shes rgyud sde nas gsungs shing/ grub
chen gyi gzhung las 'byung ba/ phyi rol pa dang nang pa gnyis
ka'i ting nge 'dzin thun mong ba'i char gtogs tsam re la/ bde
stong gi ye shes su ming btags pa de lta bu ma yin

pa'i ting nge 'dzin la mnyam par bzhag cing/ rjes thob tu gang
shar lha'i 'khor lo bde stong gi rol par 'char bas dus 'da' bar
gyur to/ /tshul 'di ni rgyud sde dang grub chen gyi man ngag la
blo'i 'phrig tshud pa zhig gis bsams na dpag par dka' ba'i

mngon par rtogs pa'i yon tan rdo rje 'chang chen po tshe 'di nyid
la ster ba'i lam gyi rim pa thugs rgyud la 'khrungs pa yin par
shes par gyis shig /de nas dgung long bdun pa'i skabs su sku
khams bsnyel ba'i tshul bstan pa la/ nang du sku

mtshams kyi khongs sgrub grogs 'ga' zhig kyang shog gsungs nas/
dam chag dang sdom pa la gnas shing lha'i rnal 'byor la goms par
byas pa/ bsnyen sgrub dang bzlas pa tshad du phyin pa'i rtsa ba'i
rdo rje slob ma bdun gyis nyin mtshan du zhabs drung du nye bar

bsnyen nas lha'i rnal 'byor dang/ phyir bzlog dang srung ba'i
'khor lo sogs la brtson par byas shing rje rin po che rang nyid
kyis ne nyin par bcom ldan 'das rdo rje 'jigs byed dang 'khor lo
chen po'i thugs dam gtso bor mdzad cing/ mtshan mo bde stong
dbyer

med kyi ting nge 'dzin la mnyam par 'jog pa lhur mdzad pa las/
bar chad kyi mtshan ma mngon mtshan che ba rang zhig gi skabs su/
rje rin po che bzhugs gdan la bzang po'i 'dug stangs kyi rnam
pas bzhugs nas thugs dam mdzad pa'i zhabs drung na

@012b sku rim pa rnams kyang 'khod nas sgom bzlas la yid gzhungs
par yod pa'i tshe/ rje'i zhal snga nas/ bcom ldan 'das thub pa
chen po sku shin tu brjid pa/ gser btso ma'i mdog ltar mngon par
gsal zhing/ nyi ma bye ba'i mdangs dang ldan pa'i 'od kyi khor

yug can/ bdud 'dul chen po'i phyag rgya mdzad pa zhig mdun gyi
nam khar byon pa dngos su gzigs/ de'i tshe ting nge 'dzin brtan
pos thub pa'i dbang po de nyid slar tshur la spyan drangs te bdag
nyid la bcug pa'i dmigs pa mdzad pas/ dngos su bdag

nyid kyi sku la thim pa'i gzigs snang dang nga rgyal brtan pos
bdud thams cad zil gyis gnon pa la bag tsha ba med pa'i go 'phang
brnyes par gyur pa'i tshe/ de'i rjes thogs de ma thag tu/ ye shes
mgon po phyag drug pas sna drangs/ gshin rje chos

kyi rgyal pos gnod byed kyi mgrin pa nas zhags pas bcings te
khrid byung ba la/ gnod sbyin k+Shi tra pA las mjug nas ded cing
bsdigs bzhin pa dang bcas pas 'ongs te/ mdun du mgo gri gug gis
bcad nas rje rin po che'i ting nge 'dzin gyis sprul

pa'i 'brug khung gi nang du bcug song ba dang mnyam du/ phyi rol
na nag po'i phyogs kyi gza'/ klu/ sha za/ rgyal po ste bdud kyi
rigs kyi 'byung po mi bsrus pa bzhi po de sde dang bcas pas/
dmag pham mo zhes bya ba'i tshe de chen po mi bzad pa ngud mo'i
sgra dang

bcas pa bsgrags nas phyogs bcur byar ba/ de'i tshe zhabs drung na
'khod pa'i nyams snang bzang po yod pa 'ga' zhig gis kyang
mthong ba byung ste/ de nas ring po ma lon par sku khams kyang
rim gyis gong nas gong du bsnyun dang bral bar gyur to/ /

@013a @#/ /gzhan yang de'i tshe bar chad kyi mtshan ma cung zad
rtsub pa re 'ong res kyis/ rje'i zhal snga nas la bcom ldan 'das
rdo rje 'jigs byed dang/ 'khor lo chen po'i gzigs snang re nges
can du 'ong zhing/ de'i stobs kyis bar chad

kyi mtshan ma de yang myur du zhi 'gro ba zhig 'dug /bcom ldan
'das rnam par rgyal ma dang/ sgrol ma dang/ gdugs dkar dang/ 'od
zer can dang/ rgyal ba sman gyi bla dang/ de bzhin gshegs pa tshe
dpag tu med pa rnams kyi sku'i snang

ba dngos su gzigs pa phal cher gyi dus su byung zhing/ ye shes
mgon po phyag drug pa/ gur gyi mgon po/ phyag bzhi pa/ rnam thos
sras rnams kyi gzigs snang yang nar mar byung ngo/ /zhes gsung
la/ gshin rje chos kyi rgyal po dang/ gnod

sbyin k+She tra pA la gnyis ni bran bzhin du bka' sgrub par byed
do/ /sku khams bsnyel pa cung zad dwangs pa'i skabs shig tu/ rje
btsun 'jam pa'i dbyangs kyi zhal nas/ da phyin chad gtso bor
bskyed rdzogs kyi rnal 'byor thugs nyams su bzhes pa la 'grus

par mdzad na/ sngags bla med kyi sgo nas rtogs pa khyad par can
myur du rgyud la 'khrungs shing/ slob ma skal ldan bdun la yang/
lam gyi rtogs pa khyad par can re skye bar 'gyur ro/ /zhes lung
bstan par mdzad pa la/ rje'i zhal nas/

nged khams ma snyoms pa'i skabs kyi nyams kyi snang ba la gtad
pa cher med dam/ rtogs ldan pa la'ang 'dri dgos gsung nas bka'
gnang bas/ rtogs ldan pa na re/ bskyar ma zhu dgos pa med/ tshe
blos btang snod du rung ba'i 'khor rnams la

@013b mdo sngags kyi lam rdzogs par bstan nas sgom du bcug
/rje'i zhal snga nas rang gis gtso bor sku mtshams kyi ngang nas
sgrub pa lhur mdzad na/ rje'i zhal snga nas rang gi thugs rgyud
la lam de myur du 'khrung pa'i nang gi rgyu bde stong gi ye shes
khyad par can

la sogs pa sngar thugs rgyud la 'khrungs tshar zhing/ phyi'i
rkyen zhing skyes kyi pho nya mo rnams kyis grogs mdzad pa la
sogs pa khyad par can myur du 'ong/ lhag pa'i lhas kyang byin
gyis rlob pas rgyu tshogs rnams tshang/ lam de myur du thugs rgyud
la

'khrung ngo/ /zhes rje btsun gyis gsung/ zhes zer ro/ /de nas
nub gcig rtogs ldan pa'i mnal lam du/ rje rin po che pa'i mchod
rten yin zer ba'i phyag tshad yongs su rdzogs pa/ nor bu rin po
che'i tog sprin gyi gseb na sleb pa/ kha dog shin

tu dkar zhing mkhregs pa dkar yol gyi rnam pa lta bu byas pa
zhig la/ mkha' 'gro ma mang po 'dus pa/ la la ni mi'i bu mo lta
bu dang/ la la ni lha'i bu mo lta bu rus pa dang rin po che'i
rgyan sna tshogs 'phyang ba/ lag na rin po che'i

bum pa bdud rtsi dkar pos gang ba thogs pa dpag tu med pas bdud
rtsi'i rgyun gyis khrus gsol zhing 'dug mchod rten de'i drung na
de'i seng khri dang mnyam pa'i mchod rten drug 'dug pa la/ 'ga'
zhig na re bdud rtsi gsol ba drag ces zer ba la/

la la na re 'di rnams da dung bcos dgos par 'dug pas da lta mi
gsol/ bcos tshar nas gsol bar byed/ ces zer/ yang mchod rten gcig
gi go sa zhig 'dug pa der e gsol zer ba la/ da lta mchod rten
ma byung bas mi gsol byung nas

@014a @#/ /gsol zer ro/ /de nas man la sad ba dang rje btsun 'jam
pa'i dbyangs la sdang 'di 'dra ba'i rmi lam mi 'ong ba la de lan
byung ba 'di ji lta bu lags/ zhes zhus pas/ sngags mtshan nyid
kyi go ba thams cad legs par rdzogs

rdzogs rim gyi rtogs pa khyad par can bde stong gi ye shes khyad
par can thugs rgyud la 'khrungs pa rnams kyi ltas yin/ zhes
gsung ngo/ /rje'i zhal snga nas la/ 'di rnams kyi go ba thams
cad yongs su rdzogs par thugs rgyud la 'khrungs

pa ji tsam nas lags/ zhes zhus pas/ sngags kyi gnad thams cad la
the tshom gyi lhag ma med par yongs su rdzogs pa nga drug nas
yin/ pha rol tu phyin pa'i gnad rnams snga mo nas rdzogs rgyu
yin na'ang/ pha rol tu phyin pa'i yang

dag mtha' mngon du byed tshul dpyis phyin pa zhig go ba sngags
kyi spyod pa'i skabs shig legs par go ba la rag las 'dug /ces
gsung ngo/ /de nas bsnyun legs par dwangs/ gtsug lag khang rmad
du byung ba bzhengs shing/

chos kyi 'khor lo zab cing rgya che ba rgyun mi 'chad par bskor
ba rnams kyi rnam par thar pa ni thun mong bar gsal la/ yang
dgung lo drug cu rtsa gnyis bzhes pa'i dgun smad cig chos skyong
'di rnams la'ang gtor ma 'bul ba'i dus dbyangs

kyi nga ro dang bcas na shin tu dgyes bar 'dug pas 'di bzhin
byed pa yin gsungs nas/ gshin rje chos kyi rgyal po spyan 'dren
pa dang/ bsod cing bskul ba sogs kyi dbyangs bzhi mdzad/ de dus
nub gcig sku drung na gnas pa

@014b bsnyen sgrub sogs la brtson pa zhig gi rmi lam du/ gshin
rje chos kyi rgyal po sku shin tu brjid cing/ che ba zhig la
tshad nas byon nas/ bstod pa'i dbyangs 'di ltar gyis la 'then
zhig gsungs nas/ khong rang gis 'then gyin 'dug pas/ sa

dang ri bo thams cad be re re 'ong gin 'dug pa zhig rmis 'dug
/gzhan yang de 'dra ba'i rmi ltas 'ga' re la byung/ de nas
dbyangs sbyong ba rnams la'ang 'di'i gtor ma ma bshams par
dbyangs bya mi rung phar 'dug pas ma byed gsungs/ skabs

shig tu de'i rgyu mtshan ji lta bu mchis/ zhes zhus pas/ lar rang
gshin rje chos rgyal 'di khong rang gi sku'i rnam pa ji lta bas
kyang mang du 'ong/ khyad par sku drung na zhabs tog la rgyun
par yod pa gang yang rung ba re'i gzugs byad du byas nas gzims

khang gi nang du phar 'gro tshur 'gro dang/ sku mdun sogs su bya
byed mang po byed/ snyan drung du shub shub kyis zhal ta zhu
ba'i rnam pa byas nas/ gtam mang po zhig smra ba nar mar 'ong/
de gzims khang na nar mar gnas pa mang pos kyang mthong ba 'ong
zhing/ de yang

gang gi gzugs bsgyur ba der 'khrul nas gzhan tshos ngo mi shes pa
zhig 'ong/ kha sang nas dbyangs byed pa'i dus thams cad du 'ang
de 'dra zhig 'ongs nas lab lab rang byed/ gtor ma ster dgos pa
'dug /gtor ma byas na dbyangs kyi nga ro byas pa'i

che dga' ba'i rnam 'gyur sna tshogs byed pa 'dug /ces gsung ngo/
/'di dag ni bdag gis/ bdag nyid chen po 'di'i mngon par rtogs
pa'i yon tan zad mi shes shing/ gting dpag par dka' ba'i chu
gter chen po las/ ska rtse'i chu tshod tsam blangs nas

@015a @#/ /brjod par zad la/ mtha' dag bar ni lta ci zhig smos
la/ che long dag kyang ma lus pa bdag cag rnams kyi blo yul du
gyur pa ni rdo mi thogs la/ bdag nyid chen po 'di ni ji tsam gyi
lung dang mngon par rtogs pa'i yon tan brjod kyis mi lang ba la

dbang 'byor kyang/ khengs pa dang mngon pa'i nga rgyal gyi dri
tsam yang mi mnga' bar ma zad kyi/ mngon par rtogs pa'i yon tan
chen po'i chen po dag lta zhog /phra mo dag kyang phyi rol tu mi
mngon zhing 'chab par mdzad de/ rnyed bkur dang snyan grags la
sogs

pa'i ngor lta bas bdag nyid gsal bar sgrogs pa ni/ bskal pa dpag
tu med pa'i snga rol nas rmi lam du'ang rgyang bsrings par ma
zad kyi/ nyid la dad pa bsgom pa lhur byed pa chen po dag gis
nan gyis gsol ba dag la'ang bka' stsol ba shin tu dka' dka'

ltar ston na/ 'phros pa'i bka' mchid sna tshogs pa dag gi zhar
byung gi skabs phye nas bar ma dor gsung ba nyid du lta ga la
'gyur te/ gzhan la phan par 'gyur ba la sogs pa'i dgos pa khyad
par can nye bar ma gzigs par/ bdag nyid phun sum tshogs

par sgog pa lhur byed pa ni dam pa'i tshul ma yin par gzigs pa'i
phyir ro/ /de lta na yang bdag nyid/ rje rin po che la mi phyed
pa'i dad pa shugs drag pos yun ring du gsol ba btab cing/ khyad
par bdag nyid chen po 'di'i mngon par rtogs pa'i yon tan cha
shas

re tsam yang khong du chud bar gyur te de nyid rgyu mtshan du
byas pa'i sgo nas theg pa mchog gi dge ba'i bshes gnyen la dad
pa bsgom pa lhur byed pa dang/ bdag kyang tshe rabs kun tu dam pa
de'i legs par bshad pa'i bdud rtsis 'tsho bar smon pa rgyun gyi

@015b rnal 'byor du byed par gyur na ci ma rung snyam pa yid la
gcags bzhin pas/ gser gyi me tog dang bcas pa'i maNDal sngon du
btang ste gsol ba btab pa las/ rje btsun bla ma dmigs pa med
pa'i thugs rje chen po dang ldan pa des brtse ba chen pos nye

bar gzigs te/ dgyes bzhin du bka' stsal ba cung zad mchis pa dag
/rje nyid la mi phyed ba'i dad pa dang ldan pa'i bshes gnyen sde
snod dang rgyud sde 'dzin pa/ lung dang mngon par rtogs pa'i yon
tan gyis phyug ba shin tu mang po zhig gis thugs kyi 'dan pa

shugs drag pos zhal ta nan cher gnang zhing bskul ba'i bka'i
khur lci bas non par gyur te/ slar yang rje bla ma nyid la gsol
pa btab cing/ yi ger bkod pa'i gnang ba spyi bor mnos nas/ rje
btsun bla ma de'i mngon par rtogs pa'i yon tan rmad du byung ba

'di dag skal ba dang ldan pa dag la phan gdags pa'i slad du
mchog tu gsang ba'i gtam gyi dga' ston yi ger bkod pa la/ nongs
pa mchis pa gang lags pa de dag thams cad/ rje bla ma dmigs pa
med pa'i thugs rje chen po dang ldan pa de'i spyan sngar

'chags kyis/ brtse ba chen pos bzod par bzhes te bdag la sgrib
par mi 'gyur bar byin gyis brlab tu gsol/ bdag nyid chen po 'di
la gcig tu dad cing skal ba dang ldan pa dag gis kyang yi ge 'di
nyid tshogs par dbyung ba'i gtam du bya ba ma yin te/

mchog tu gsang ba'i gtam gyi rol pas/ dad pa lhag par bskyed pa
lhur blang bar bya'o/ /de ltar bdag gis rgyal ba sras bcas kun/
/gcig tu bsdus pa'i rje btsun thugs rje'i gter/ /mnyam med 'gro
ba'i mig gcig tsong kha pa/ /de yi rlabs chen

@016a @#/ /yon tan rgya mtsho las/ /rmad byung mngon par rtogs
pa'i yid bzhin nor/ /sa steng skye bo kun la gsal min pa/ /gang
gi cha shas tsam zhig rab blangs nas/ /skal ldan dad pa'i rgyal
mtshan rtser bkod do/ /gang yang

bdag blo'i nyes pas 'dir/ /sbas don gsal bar bgyis la sogs/
/nongs pa gang lags gnong ba yis/ /bla ma mchog la bdag 'chags
so/ /dge ba 'di yis tshe rabs kun tu bdag /gang gi mtshan yang
bskal par rnyed dka' ba/ /theg

mchog dge ba'i bshes khyed zhabs kyi rdul/ /'bral med gtsug phud
rgyan du bsten par shog /der ni sgo gsum bya ba kun gyis kyang/
/khyod mnyes bgyid pa 'ba' zhig lhur blangs nas/ /de yi mthu las
thugs kyi bcud phyung ba/ /khyod gsung bdud

rtsi'i ro yis 'tsho bar shog /theg chen lam gyi gzhung shing
byang chub sems/ /yang dag lta ba'i gnad dang rim gnyis la/
/'khrul med nges pa rnyed nas brtson pa yis/ /khyod gsung sgrub
pa snying por byed par shog /ces rgyal ba thams cad

kyi mkhyen brtse gcig tu bsdus pa/ lnga brgya ba thams cad kyi
gtsug gi nor bu/ snyigs ma'i dus 'dir rgyal ba'i bstan pa la
rgyal ba nyid dang mtshungs pa/ skye dgu ma lus pa'i gnyen gcig
pu/ rnal 'byor gyi dbang phyug thams cad mkhyen pa blo

bzang grags pa'i dpal zhes sa gsum na yongs su gsal ba de'i zhal
snga nas kyi rnam par thar pa mchog tu gsang brgya mtsho lta bu
las/ cha shas nyung ngu zhig yongs su brjod pa'i gtam/ rin po
che'i snye ma zhes bya ba 'di ni/ dpal ldan bla ma dam pa

@016b dmigs pa med pa'i thugs rje chen po dang ldan pa de'i
zhabs kyi padmo la gus pas gtugs pa'i bka' drin gyis nye bar
'tsho ba'i mang du thos pa'i gtsun pa dge legs dpal bzang pos/
grub ga'i gnas mchog phyogs thams cad las rnam par

rgyal ba'i sde chen po 'brog ri bo che dge ldan rnam par rgyal
ba'i gling du sbyar ba phyogs dus thams cad du dge zhing bkra
shis par gyur cig/ //mangga laM// //