! //na mo gu ru manydzu g+ho ShA ya/ gang zhig gzigs

shing gsung ba yi/ /mkhyen dang ston pa bla na med/ /rgyal ba rten
cing 'brel bar 'byung/ /gzigs shing 'doms pa de la 'dud/ /'jig rten rgud
pa ji snyed pa/ /de yi rtsa ba ma rig ste/ /gang zhig mthong bas de
ldog pa/ /rten cing 'brel par 'byung bar

gsungs; ;de tshe blo dang ldan pa yis/ /rten cing 'brel par 'byung ba'i
lam/ /khyod kyi bstan pa'i gnad nyid du/ /ji ltar khong du chud mi
'gyur/ /de lta lags na mgon khyod la/ /bstod pa'i sgor ni su zhig gis/
/brten nas 'byung ba gsung ba las/ /

@013b ngo mtshar gyur pa ci zhig rnyed/ /gang gang rkyen la rag las
pa/ /de de rang bzhin gyis stong zhes/ /gsung ba 'di las ya mtshan pa'i/
/legs 'doms tshul ni ci zhig yod/ /gang du bzung bas byis pa rnams/
/mthar 'dzin 'ching ba brtan byed pa/ /de nyid mkhas la spros

pa yi/ /dra ba ma lus gcod pa'i sgo/ /bstan 'di gzhan du ma mthong
bas/ /ston pa zhes bya khyod nyid de/ /wa skyes la ni seng ge bzhin/
/mu stegs can la'ang gcam bu'i tshig /e ma'o ston pa e ma'o skyabs/
/e ma'o smra mchog e ma'o mgon/ /rten cing 'brel 'byung

legs gsung ba'i/ /ston pa de la bdag phyag 'tshal/ /phan mdzad khyod
kyis 'gro ba la/ /sman pa'i slad du bka' stsal pa/ /bstan pa'i snying po
stong pa nyid/ /nges pa'i rgyu mtshan zla med pa/ /rten cing 'brel par
'byung ba'i tshul/ /'gal ba dang ni ma grub par/ /mthong ba

'di yis khyod kyi lugs/ /ji ltar khong du chud par nus/ /khyod ni nam
zhig stong pa nyid/ /rten 'byung don du mthong ba na/ /rang bzhin
gyis ni stong pa dang/ /bya byed 'thad pa'ang mi 'gal zhing/ /de las
bzlog par mthong ba na/ /stong la bya ba mi rung zhing/ /bya dang
bcas

la stong med pas/ /nyam nga'i g.yang du lhung bar bzhed/ /de phyir
khyod kyi bstan pa la/ /rten 'byung mthong ba legs par bsngags/ /de
yang kun tu med pa dang/ /rang bzhin gyis ni yod pas min/ /ltos med
nam mkha'i me tog bzhin/ /des na ma brten yod ma

yin/ /ngo bos grub na de 'grub pa/ /rgyu dang rkyen la bltos par 'gal/
/de phyir brten nas 'byung ba las/ /ma gtogs chos 'ga' yod min pas/
/rang bzhin gyis ni stong pa las/ /ma gtogs chos 'ga' med par gsungs/
/rang bzhin ldog pa med pa'i phyir/

@014a @#/ /chos rnams rang bzhin 'ga' yod na/ /myang ngan 'das pa mi
rung zhing/ /spros kun ldog pa med par gsungs/ /de phyir rang bzhin
rnam bral zhes/ /seng ge'i sgra yis yang yang du/ /mkhas pa'i tshogs su
legs gsungs pa/ /'di la su yis 'god

bar nus/ /rang bzhin 'ga' yang med pa dang/ /'di la brten nas 'di
'byung ba'i/ /rnam gzhag thams cad 'thad pa gnyis/ /mi 'gal 'du ba
smos ci dgos/ /brten nas 'byung ba'i rgyu mtshan gyis/ /mthar lta ba la
mi brten zhes/ /legs gsungs 'di ni mgon

khyod kyi/ /smra ba bla na med pa'i rgyu/ /'di kun ngo bos stong pa
dang/ /'di las 'di 'bras 'byung ba yi/ /nges pa gnyis po phan tshun du/
/gegs med par ni grogs byed pa/ /'di las ngo mtshar gyur pa dang/ /'di
las rmad du byung ba gang/ /tshul 'dis khyod la bstod

na ni/ /bstod par 'gyur gyi gzhan du min/ /rmongs pas bran du bzung
ba yis/ /gang zhig khyod dang zhe 'gras pa/ /de yis rang bzhin med pa'i
sgra/ /mi bzod gyur la mtshar ci yod/ /khyod kyi gsung gi gces pa'i
mdzod/ /brten nas 'byung ba khas blangs

nas; ;stong nyid nga ro me bzod pa/ /'di la kho bo ngo mtshar gyur/
/rang bzhin med la bkri ba'i sgo/ /bla med rten cing 'brel 'byung gi
/ming nyid kyis ni rang bzhin du/ /'dzin na da ko skye bo 'di/ /'phags
mchog rnams kyis legs bgrod pa'i/ /'jug

ngogs zla dang bral gyur pa/ /khyod dgyes gyur pa'i lam bzang der/
/thabs gang gis ni bkri bar bya/ /rang bzhin bcos min stos med dang/
/rten 'brel ltos dang bcos ma gnyis/ /ji lta bur na gzhi gcig la/ /mi
'gal 'du ba nyid du 'gyur/ /

@014b de phyir brten nas 'byung ba gang/ /rang bzhin gyis ni gdod ma
nas/ /rnam par dben yang der snang bas/ /'di kun sgyu ma bzhin du
gsungs/ /khyod kyis ji ltar bstan pa la/ /rgol ba 'gas kyang chos
mthun du/ /glags mi rnyed bar gsungs pa yang/ /

'di nyid kyis ni legs par khums/ /ci slad ce na 'di bshad pas/ /mthong
dang ma mthong dngos po la/ /sgro 'dogs pa dang skur 'debs kyi/ /go
skabs ring du mdzad phyir ro/ /khyod kyi smra ba zla med par/
/mthong ba'i rgyu mtshan rten 'byung gi /lam 'di

nyid kyis gsung gzhan kyang/ /tshad mar gyur par nges pa skye/ /don
bzhin gzigs nas legs gsungs pa/ /khyod kyi rjes su slob pa la/ /rgud pa
thams cad ring du gyur/ /nyes kun rtsa ba ldog phyir ro/ /khyod kyi
bstan las phyir phyogs pas/ /yun ring ngal ba

bsten byas kyang/ /phyi phyir skyon rnams bos pa bzhin/ /bdag tu lta
ba brtan phyir ro/ /e ma'o mkhas pas 'di gnyis kyi/ /khyad par khong
du chud gyur pa/ /de tshe rkang gi khong nas ni/ /khyod la ci phyir
gus mi 'gyur/ /khyod gsung du ma ci zhig smros/ /cha shas re yi

don tsam la'ang/ /'ol spyi tsam gyi nges rnyed pa/ /de la'ang mchog
gi bde ba ster/ /kyi hud bdag blo rmongs pas bcom/ /'di 'dra'i yon tan
phung po la/ /ring nas skyabs su song gyur kyang/ /yon tan cha tsam
ma 'tshal to/ /'on kyang 'chi bdag khar phyogs

pa'i; ;srog gi rgyun ni ma nub bar/ /khyod la cung zad yid ches pa/ /de
yang skal ba bzang snyam bgyid/ /ston pa'i nang na rten 'brel ston
pa dang/ /shes rab nang na rten 'brel shes pa gnyis/ /'jig rten dag na
rgyal ba'i dbang po bzhin/ /phul byung legs

@015a @#/ /par khyod mkhyen gzhan gyis min/ /khyod kyis ji snyed bka'
stsal pa/ /rten 'brel nyid las brtsams te 'jug /de yang mya ngan 'das
phyir te/ /zhi gyur min mdzad khyod la med/ /kye ma'o khyod kyi
bstan pa ni/ /gang gi rna ba'i lam song ba/ /de

dag thams cad zhi 'gyur phyir/ /khyod bstan 'dzin par su mi gus/ /phas
rgol mtha' dag 'joms pa dang/ /ltag 'og 'gal 'dus stong pa dang/ /skye
dgu'i don gnyis ster byed pa/ /lugs 'dir kho bo spro ba 'phel/ /'di yi
phyir du khyod kyis ni/ /la lar

sku dang gzhan du srog /sdug pa'i gnyen dang longs spyod tshogs/
/grangs med bskal par yang yang btang/ /gang gi yon tan mthong pa
yis/ /lcags kyus nya la ji bzhin du/ /nyid kyi thugs drangs chos de ni/
/khyod las ma thos skal ba zhan/ /de yi mya

ngan shugs kyi ni/ /sdug pa'i bu la ma yi yid/ /rjes su song ba ji bzhin
du/ /bdag gi yid ni gtong mi byed/ /'di la'ang khyod gsung bsams pa
na/ /mtshan dpe'i dpal gyis rab tu 'bar/ /'od kyi dra bas yongs bskor ba'i/
/ston pa de yi tshangs dbyangs kyis/ /

'di ni 'di ltar gsungs snyam du/ /yid la thub pa'i gzugs brnyan ni/
/shar ba tsam yang tsha ba yis/ /gdungs la zla zer bzhin du sman/ /de
ltar rmad du byung ba yi/ /lugs bzang de yang mi mkhas pa'i/ /skye bos
phal pa dza bzhin du/ /rnam pa kun tu 'dzings

par byas/ /tshul 'di mthong nas bdag gis ni/ /'bad pa du mas mkhas pa yi/
/rjes su 'brangs nas khyod kyi ni/ /dgongs pa yang dang yang du
btsal/ /de tsha rang gzhan sde pa yi/ /gzhung mang dag la sbyangs pa
na/ /phyi phyir the tshom dra ba yis/ /bdag gi yid

@015b ni kun tu gdungs/ /khyod kyi bla med theg pa'i tshul/ /yod dang
med pa'i mtha' spangs te/ /ji bzhin 'grel par lung bstan pa/ /klu sgrub
gzhung lugs kun de'i chal/ /dri med mkhyen pa'i dkyil 'khor rgyas/
/gsung rab mkha' la thogs med rgyu/ /mthar 'dzin snying

gi mun pa sel/ /log smra'i rgyu skar zil gnon pa/ /dpal ldan zla ba'i
legs bshad kyi/ /'od dkar 'phreng bas gsal byas pa/ /bla ma'i drin gyis
mthong ba'i tshe/ /bdag gi yid kyis ngal gso thob/ /mngad pa kun las
gsung gi ni/ /mdzad pa mchog yin te

yang ni/ /'di nyid yin phyir mkhas pa yis/ /'di las sangs rgyas rjes dran
byos/ /ston de'i rjes su rab tu byung gyur te/ /rgyal ba'i gsung la
sbyangs pa mi dman zhing/ /rnal 'byor spyod la brtson pa'i dge slong
zhing/ /drang srong chen po de la da ltar gus/ /ston pa

bla na med pa'i bstan pa dang/ /mjal ba 'di 'dra bla ma'i drin yin pas/
/dge ba 'di yang 'gro ba ma lus pa/ /bshes gnyen dam pas 'dzin pa'i
rgyu ru bsngo/ /phan mdzad de yi bstan pa'ang srid pa'i mthar/ /ngan
rtog rlung gis rnam par mi g.yo zhing/ /

bstan pa'i ngang tshul shes nas ston pa la/ /yid ches rnyed pas rtag tu
gang bar shog /brten nas 'byung ba'i de nyid gsal mdzad pa/ /thub pa'i
lugs bzang skye ba thams cad du/ /lus dang srog kyang btang nas
'dzin pa la/ /skad cig tsam yang lhod par

ma gyur cig /'dran pa mchog des dka' ba dpag med kyis/ /nan tan
snying por mdzad nas bsgrub pa 'di/ /thabs gang zhig gis 'phel par
'gyur snyam pa'i/ /rnam par dpyod pas nyin mtshan 'da' bar shog /lhag
bsam dag pas tshul der brtson

@16a @#/ /pa na/ /tshangs dang dbang po 'jig rten skyong ba dang/
/legs ldan nag po la sogs srung mas kyang/ /g.yel ba med par rtag
tu grogs byed shog /ces sangs rgyas bcom ldan 'das 'jig rten thams
cad kyi ma 'dris pa'i mdza' bshes chen po

ston pa bla na med pa la zab mo rten cing 'brel par 'byung ba gsung
ba'i sgo nas bstod pa legs par bshad pa'i snying po zhes bya ba 'di ni/
mang du thos pa'i dge slong blo bzang grags pa'i dpal gyis gangs
can khrod kyi gangs ri'i dbang po 'o de gung rgyal

gyi lha zhol dben gnas lha sdings ming gzhan rnam par rgyal ba'i
gling zhes bya bar sbyar ba'i yi ge pa ni nam mkha' dpal lo//