! //swasti/ legs tshogs rgya mtsho'i dpa' las legs 'khrungs shing/ /bsdu bzhi'i bang rim rnams kyis kun nas mdzes/ /skal ldan gser ri'i dbus na rab brjid pa/ /'od dpag med pa'i lhun po de la 'dud/ /grangs med tshad med bsam gyis mi khyab pa'i/ /bskal mang 'das pa'i sngon du mgon po khyod/ /'jig rten dbang phyug rgyal po'i bstan pa la/ /chos kyi 'byung gnas zhes bya'i dge slong gyur/ /de tshe rgyal ba de yi 'khor dbus su/ /bye ba khrag khrig brgya stong phrag gcig gi /zhing gi bkod pa phun tshogs gang yin rnams/ /zhing gcig tu ni yongs su bzung ba yi/ /dpag @18b med rgyal ba'i spyan sngar rgyal sras kyi/ /rlabs chen spyod pa'i tshul la rab sbyangs pas/ /rmongs pa'i rab rib bcom pa'i dge slong des/ /rgyal sras dga' skyed smon lam rgya mtsho btab/ /ring nas smon pa'i rab 'byams bzhed pa'i don/ /ji bzhin yongs su rdzogs pa dag pa'i zhing/ /gang gi ming ni bde ba can zhes par/ /mngon par byang chub khyod la phyag 'tshal lo/ /dpag tshad stong dang drug brgyar rab mtho zhing/ /yal ga lo ma brgyad brgya'i bar du 'phyang/ /rtsa ba'i spoms ni dpag tshad lnga brgya pa; ;rin chen du mas spras pa'i byang chub shing/ /de yi drung na nyer mdzes rgyal ba khyod/ /'od dang gzi brjid pha mtha' mi mngon zhing/ /'khor dang sku tshe tshad bzung mi nus par/ /'gro ba'i skyabs su bzhugs la phyag 'tshal lo/ /de ltar dag pa'i zhing mchog bde ba can/ /de yi bkod pa dkon mchog brtsegs pa yi/ /'dus pa lnga pa'i mdo yi rjes 'brangs nas/ /rgyal ba'i dgongs pa ji bzhin legs par bkod/ /'di yis bskrun pa'i dge legs phung po des/ /mtha' med 'khor bar dpag med sdug bsngal gyis/ /yang yang gtses pas bde ba'i go skabs bcom/ /nyam nga'i gnas su ltung ba'i 'gro ba kun/ /tshe yi 'du byed gtang bar gyur ma thag /dag pa'i zhing du bgrod pa'i lam bzang der/ /mthu chen rgyal sras brgyad kyis legs khrid nas/ /theg mchog spyod pa'i rigs su skye bar shog /