! //oM bde legs su gyur cig /bla na med pa'i rin po che gsum gyi gtam
gyi sbyor ba zhes bya ba/ rje btsun bla ma 'jam pa'i dbyangs kyi zhabs
kyi padmo la gus pas skyabs su mchi'o

rab brtan dad pas rgyal ba'i rjes 'jug cing/ /mngon par sbyor ba mi
dman rnam dpyod kyis/ /thub pa'i gsung las snying po len 'dod la/
/rin chen gtam gyi sbyor ba sgrog 'dod pas/ /gang gi thugs rje'i gzegs
ma'i cha shas tsam/ /yid la zhugs pa yis

kyang rtsol med par/ /tshig gi mchog sbyin ster mdzad 'jam pa'i
dbyangs/ /de la 'dud do re ba 'bras ldan mdzod/ /srid pa'i phun tshogs
g.yo ba glog gi gar/ /lang tsho mi sdod rgyug pa'i ri gzar chu/ /de
ltar rtogs nas blo gros tshan po 'gas/ /bdag gis

rig gnas gang la sbyangs snyam na/ /rigs lam phra mo phyed pa'i
rnam dpyod dang/ /gzhung lugs gdams par shar ba'i nyams len dang/
/tshig sbyor tshul la mkhas pa'i ngag gi dpal/ /sa steng 'di na rin chen
rnam gsum snang/ /'di ni shin tu dkon zhing

'dod pa 'jo/ /rmad du byung ba'i dga' ba rgyas byed pas/ /rin po che
zhes mkhas pa rnams la grags/ /mkhas pa'i yid 'phrog rin chen gzhan
yod min/ /smra ba'i khyu mchog 'phags pa yab sras dang/ /log smra
tshar gcod phyogs glang grags pa las/ /leD

@58b par 'ongs pa'i rigs lam bdud rtsi'i chus/ /blo mig dri ma yang
yang ma bkrus na/ /shin tu zab gnas mthong ba smos ci dgos/ /rags
pa'i lung don la yang dpyod pa na/ /phal cher log par rtog pa 'phel
'gyur zhing/ /gal te yang dag dam bca' tsam zhig gis/

nges pa rnyed kyang sgrub dang sun 'byin gyi/ /tshad ma'i stobs kyis
the tshom mchod phyir/ /'dam la btab pa'i phur pa bzhin 'gyur bas/
/yang dag bag chags brtan po 'jog mi nus/ /'di na rigs gzhung gnyis
la rab sbyangs kyang/ /shar du 'gro 'dod nub tu bgrod pa

dang; ;zla 'od phog pas yi drags sreg pa bzhin/ /rigs gzhung nyid la
brten pa'i log rtog gis/ /blo mig yang dang yang du bslad pa'i mthus/
/'di phyi'i dge legs kun 'joms yun ring du/ /yang dag lta las phyir
phyogs 'gyur ba'i rgyu/ /ches cher

brtan po gsog pa mang du snang/ /de phyir blo gros phra zhing
mdzangs pa dang/ /ku sha'i rtse ltar ma gyur de srid du/ /ngems mi
sla bar rigs pa'i gzhung lugs la/ /mkhas pa'i bshes la bsten te legs par
sbyang/ /de ltar blo gros mig ni bye ba des/ /rgyal bas theg

pa mchog gi zab mo'i don/ /rnam rig tsam dang ngo bo nyid med tshul/
/rnam gnyis gsungs pa'i dgongs pa rnyed par 'gyur/ /de nas mi pham
chos rje klu sgrub dang/ /thogs med mched la sogs pa'i shing rta'i
srol/ /dri med gzhung mang rnams la sbyangs pa na/ /rgya che'i

gtam gyis dang po'i las can rnams/ /da lta nyid nas sangs rgyas sa yi
bar/ /legs par 'khrid pa'i zab mo'i gdams pa la/ /nang byan tshud pas
bka' dang dgongs 'grel kun/ /gdams pa'i mchog tu shar la mkhas pa
zer/ /lhag ma ni tso'i 'don pa lta bu dang/

@59a @#/ /chu med khron pa ri mo'i mar me bzhin/ /ci phyir zhe na mkhas
pa'i mchog rnams kyis/ /gzhung rnams nyams len shes phyir brtsams
phyir ro/ /kye ma'o skye dgu'i don gnyis 'grub pa ni/ /rnam dag
gzhung lugs dag la ma brten min/ /de la

brten pa'ang sgra tsam lhur len pas/ /'das par byas nas de las bslus
pa gang/ /chus khyer 'ga' zhig skom pas shi ba bzhin/ /mang du thos
kyang chos kyis phongs pa ni/ /gzhung lugs gdams par shar ba med
pas nongs/ /de phyir gang bslabs gdams par shar

ba gces/ /de ltar don gyi gnad rnams ma 'phyugs na/ /tshig sbyor dman
na nyes pa chung mod kyang/ /rgyal ba nyid kyis gsung rab bsngags
pa na/ /don bzang ba dang tshig 'bru bzang po zhes/ /gsungs shing shin
tu dkar ba'i khang bzang la'ang/ /bsil zer byed pa'i 'od

kyis byugs pa bzhin/ /don bzang pa la'ang yid 'phrog tshig sbyor gyis/
/spras par gyur na ches cher mdzes par 'gyur/ /dmar ser can dang
rgyal ba'i lhas bkod pa/ /pr-itta dang ni dzA ti zhes bya ba'i/ /sdeb
sbyor ji bzhin bod skad la med kyang/ /tshigs bcad lhug pa gnyis

ka spel ba'i lus/ /don dang tshig gi rgyan la sogs pa yi/ /mdzes byed
rgyan gyis spud pa'i tshig sbyor tshul/ /snyan dang gas gzhung bzhin
legs par sbyar ba na/ /blo gsal rnams la dga' ba rgyas par byed/ /de
ltar rin chen rnam pa gsum ga'i yang/ /rtsa ba dam pa theg

mchog dge ba'i bshes/ /'dis ma zin na skye ba du mar yang/ /ngal
brgyas 'bad kyang rtogs par mi 'gyur pa/ /bshes des zin na tshe gcig
nyid la yang/ /bde blag nyid du nges pa ster ba'i phyir/ /tshe rabs kun
tu bshes gnyen dam pa yis/ /rjes su 'dzin dang zin pa'i

@59b thabs la 'bad/ /thar 'dod blo gros can gyi 'jug ngogs mchog /rin
chen gtam gyi sbyor ba 'dir 'bad las/ /byung ba'i bsod nams de yis 'gro
ba kun/ /bshes gnyen dam pa'i mgon dang 'bral med shog /de bsten pa
las blo mig dag gyur te/ /rgyal ba'i

lugs bzang ji bzhin rtogs pa dang/ /rtags ma thag tu nyams su len pa
dang/ /de ltar sgrub la bar chad med par shog /ma rtogs 'gro la
brtse bas thog mar ni/ /zang zing sbyor bas dga' bar byas pa'i mthar/
/don bzang tshig legs snyan par smra ba yis/ /bskul

bas bzang po'i spyod la 'god par shog /ces bla na med pa'i rin po che
gsum gyi gtam gyi sbyor ba zhes bya ba mang du thos pa'i dge slong
spong ba pa shar tsong kha pa blo bzang grags pa'i dpal gyis 'brog
ri bo che dge ldan rnam par rgyal ba'i gling du sbyar ba'i yi ge pa ni

dka' bzhi pa rin chen dpal lo/ /'dis kyang bstan pa rin po che phyogs
kun nas rgyas par byed nus par gyur cig/