! //na maHshrI

badzra gu ru pA Ni ya/ gdong bzhi dga' ma'i bdag po sprin la zhon/
/'phrog byed stobs ldan gsod dang rab 'phyang gsod/ /gdong drug
yi dwags dbang po sngon gyi lha/ /gdengs can dbang po rig 'dzin
grub pa'i rje/ /srid na dregs pa'i khur gyis rab brjid pa'i/ /gang gi gtsug
rgyan

@70b nor bus mtshan pa la/ /yid 'ong zhabs kyi rdul gyis reg gyur pa/
/mthu stobs bdag pos 'gro kun skyong gyur cig /skal bzang bde
gshegs stong gi bstan pa la/ /mtshan dpe'i dra bas dkrigs pa'i gzugs kyi
sku/ /ma lus srung ba'i don du dbang bskur ba/ /rgyal ba'i dbang po

khyod la phyag 'tshal lo/ /mu mad zhing gi rgyal ba sras bcas kyi/ /ma
lus sku gsung thugs kyi gsang pa'i gnad/ /kun la sgrib pa med pa'i
spyan mnga' ba/ /glog 'phreng 'khyug pa'i dbus na char sprin tshogs/
/'brug sgra'i gad mos nam mkha' 'gengs pa bzhin/ /mi bzad me

dpung dbus na drag po'i sku/ /bzhad pa'i nyams kyis sa gsum g.yo la
'dud/ /dpag med rgyal la rgya chen tshogs gnyis bskrun/ /mtha' med
'gro ba'i don du sems mchog bskyed/ /zad med smon lam mthu las
legs 'khrungs pa'i/ /mtshungs med rgyal ba'i sras po ring du rgyal/
/rnam

dag lam la lta ba'i dmigs bu bral/ /thar pa'i khang bzang 'khrid pa'i
mgon gyis dor/ /srid pa'i g.yang sar zhugs pa'i 'gro rnams kyi/ /dpung
gnyen mchog khyod dus ring zhabs brtan mdzod// //de ltar lhag pa'i
lha dang rgyal sras chen po la mchod cing

shis pa brjod pa'i ngag sngon du btang nas skabs kyi zhu ba ni/ sku
khams rin po che 'gro ba'i dpal du brtan pa'i thad nas gsung shog
sga skya'i rten dang bcas pa dge bshes gzhon seng gis 'phrod pas
thugs la btags shing khyad par du rgyal ba sras bcas kyi dgongs

pa'i gnad dril ba'i man ngag 'phags pa lag na rdo rje'i gsang tshig
/zhus lan sman mchog bdud rtsi'i phreng ba gsang bdag gi zhal
snga nas ji ltar gnang ba bzhin lhag chad nor gsum dang bral ba
yi ger bkod pa gnang ba 'phrod pa na/ gsang bdag gsung gi bdu

@071a @#/ /rtsi yis/ /yid kyi re ba rdzogs par byas/ /nyon mongs nad
las rgyal bar gyur/ /lcang lo can du phyin pa snyam/ /slar yang zhu
ba 'ga' zhig bgyid par spro ba'i rgyu mtshan ni/ ding sang thub pa'i
bstan pa nub tu ni nye/ bstan pa'i rtsa lag mchog rnams ni 'das/ sems

can gyi skal ba bzang po bri ba'i skabs su ni gyur/ pha rol tu phyin pa
dang sngags kyi theg pa'i nyams len gyi gnad snyan nas snyan du
brgyud pa'i brgyud pa rnams ni chad/ de'i stobs kyis bshad pa dang
sgrub pa mdzad pa rnams kyang snyan brgyud kyi gdams ngag gi
gnad med

par tshig dang yi ge tsam mthong ba dang thos pa lhur byas te/ lcags
kyu med pa'i glang po che bzhin du rgyal ba'i bka' la gya tshom gyis
zhugs nas rang rang gi 'dod pa'i dbang gis 'di ni bden gyi gzhan ni
gti mug go zhes phyogs yongs su bzung nas/ nyams len

la ched cher mi byed par rtsod pa 'ba' zhig lhur len to/ /der ma zad
gzhan gyi skyon 'ba' zhig rtog pa la zhugs pas pha rol gyi yon tan
lta ba'i mig ni long/ rang gi skyon la rtog pa'i bsam pa dang ni bral/
rnyed pa dang bkur sti'i zhags pas bcings pa la brten

nas; lkog tu gyur pa'i gang zag dam pa re re tsam yod na'ang/ phrag
dog dang nga rgyal gyi mun pa chen pos blo yi mig bsgribs pas
mthong ba'i lam du gyur pa ches shin tu dka' 'o/ /bdag gis kyang mdo
phyogs kyi bshad pa yod pa rnams la lo sbrel gyi bar du thos

pa cung zad bgyis shing/ man ngag zab par grags pa 'ga' yar yang
zhus pa'i mthar/ rgyal ba sras bcas kyi dgongs pa/ thos pa'i rjes 'jug
sgrub pa snying por byed/ /skye ba'i rdzong las tshegs chung thar par
'gyur/ /zhes gsungs pa ltar rig nas sgrub pa la mos pa

@071b drag po byung na 'ang/ tshe gcig lus gcig la 'tshang rgya ba
thun mong ma yin pa'i gdams ngag yod pa yin zer ba sha stag 'dug
pa la/ gsung rab nas bshad pa dang sbyar na lam dngos skyes pa lta
zhog /de skye ba'i snod du rung ba'i yon tan rnams skyes pa'ang dka'
ba'i rigs

su yod tshed du 'dug /theg pa dman pa'i go 'phang la rmi lam du yang
'dod pa med pa skad zer zhing/ rang bde 'dod pa la til gyi cha tsam
yang ma gnod par yod pa 'dra/ lam gyi gnad dam pa rnams la myong
ba phul du phyin par khas 'che zhing/ chos brgyad kyi gseb nas skad

cig kyang ma 'phags par 'dug pa dang/ thams cad mkhyen pa'i khyad
chos rgyu 'bras khyad du mi gsod pa yin pa la/ de la yid mi ches par
khyad du gsod 'dod pa'i skyabs la/ nged gsang sngags pa yin zer nas
blang dor yal bar 'dor/ de lta bur gyur pa'i skabs su the tshom kun

gcod nus pa'i gang zag gzhan ma rnyed pas/ khyed sangs rgyas la
dngos su zhus pas chog pas/ zhu ba 'di rnams dge bshes 'dis zhu bar
yod pas thugs la 'dogs par zhu/ zhes pa 'di ni lho brag mkhan chen
phyag rdor ba la/ rje thams cad mkhyen pa tsong kha pas phul

ba'o//