! //na maH shrI manydzu g+ho ShA ya/ dpag yas bskal par shin tu bya
dka' ba'i/ /rlabs chen tshogs gnyis rgya chen bskrun pa'i mthus/ /skye

dgu'i spyi gtsug rgyan du byon gyur pa'i/ /chos rje rin po che la gsol
ba 'debs/ /snyan pa'i grags pas rgya mtsho'i mtha' ru son/ /dul ba'i
spyod pas byang chub 'ba' zhig sgrub/ /dpal 'byor bzang pos 'gro ba'i
re ba skong/ /chos rje rin po che la gsol ba

'debs/ /nges 'byung thugs kyis srid la rgyab kyis phyogs/ /bslab la gus
pas kun spyod yongs su dag /nyes ltung phra mo tsam yang ring du
dor/ /chos rje rin po che la gsol ba 'debs/ /bdag bde gzhan la gtong
la ma zhum pa'i/ /bdag gzhan brje

@07a @#/ /ba'i thugs rje chen po yis/ /bdag nyid gces 'dzin ring du spangs
pa yi/ /chos rje rin po che la gsol ba 'debs/ /rnam dag dbang las
byung ba zab mo'i lam/ /rnam mkhyen myur du bgrod pa'i rim pa gnyis/
/rnam pa kun tu sgrub la mi g.yel pa'i/ /

chos rje rin po che la gsol ba 'debs/ /byams pa'i thugs kyis gdul bya
bu bzhin skyong/ /mkhyen pa'i spyan gyis shes bya'i gnas rnams gzigs/
/brtson 'grus mchog gis le lo'i go skabs bcom/ /chos rje rin po che la
gsol ba 'debs/ /mthong ba'i

mod la dad pa'i mchi ma 'khrug /ring du bsten na lhag par dad pa
'phel/ /ji tsam brtags kyang skyon gyis ma gos pa'i/ /chos rje rin po
che la gsol ba 'debs/ /dregs ldan rnams kyi zhabs la btud gyur
kyang/ /dregs pa'i rlom pa rdul tsam ma mchis shing/ /

dregs pa can la lhag par thugs brtse ba'i/ /chos rje rin po che la
gsol ba 'debs/ /'gro ba'i skyabs khyod mi pham mdun sa'am/ /mgon po
'od dpag med pa'i zhing mchog sogs/ /dag pa'i zhing khams gang du
gshegs pa der/ /bdag cag rnams

kyang 'khor du skye bar shog /mi 'phrogs pa'i mkhyen rab dang
thugs rje phun sum tshogs pa'i bdag nyid chos kyi rje rin po che grags
pa byang chub dpal bzang po la gsol ba 'debs pa'i tshul 'di ni/ blo
dang gtong ba dang gus pa dang ldan pa dpon yig rin chen

rgyal pos rgyang ring po nas bskul ba'i don du/ yul byang phyogs
kyi rgyud du byung ba'i snyan dngags mkhan shar tsong kha pa blo
bzang grags pa'i dpal gyis 'phags pa 'jig rten dbang phyug gi gnas
dang tshul mtshungs pa po ta la'i gnas mchog tu sbyar ba'o// //