! //gang la brten na 'phral dang yun gyi don/ /bde

blag sbyin pa gcig pu kun gyi gnyen/ /mgon po thugs rje'i gter de'i
zhabs kyi rdul/ /skye dang skye bar gus pas mchod gyur cig /blo gos
gsal zhing dad pa'i rtsa ba brtan/ /gtong la lag brkyang thos la
'dug gyur pa/ /nam mkha' dpal gyis ring nas springs

pa yi/ /'phrin yig tshig don bzang zhing snyam pa'i ngag /rgyal sras
thu bo'i sku gzugs 'dis pa'i rgyud/ /ngur smrig rgyal mtshan zung la
sogs pa yi/ /yid 'ong skyes mang bskur ba pho nya bas/ /ma tshang med
par bdag gis gam du 'phrod/ /sngon chad phan

par smras pa'i rjes su bslabs/ /da dung legs bshad dga' ston stsol
zhes zer/ /sngon chad gdams pa rnams las ches lhag pa'i/ /gdams par
bgyi ba ci yang ma mchis mod/ /'on kyang gus par nyon la yang yang
du/ /legs par gdams na khyad par

thob 'gyur te/ /shin tu snyi ba'i chu thigs ltung ba yis/ /ches cher
mkhregs pa'i brag la ji bzhin no/ /kye ma 'gro 'di blo gros nyam
chung zhing/ /tshul bzhin 'doms pa'i dam pa'i mgon med pas/ /rgud pa'i
sgo la 'bad pa drag po yis/ /rgyun mi

@179a @#/ /'chad par rab tu 'jug par byed/ /de slad byis pa'i spyod las
ring song ba'i/ /dam pa'i tshul lugs thob par gyur pa na/ /de yis rangs
pa thob par mi 'gyur te/ /padmas brgyan pa'i re rtse ra lug bong
bzhin/ /bdag cag

legs par spyad pa'i bsags pa dman/ /nyes spyod sgo la rgyun mi chad
du phyogs/ /de phyir bde legs sgor gyur thub bstan dang/ /mjal ba'i
go skabs rnyed pa da res tsam/ /deng dus 'di na sbun pa 'phyar ba
bzhin/ /snying po me dpa'i bya ba ma

btang na/ /lus srog yal nas bskal mang ngan 'gro'i gnas/ /brgyud pa'i
sdug bsngal su yis gnag par nus/ /gdon gyis zin pa rnams la ches
brtse ba'i/ /bshes kyi srog la rgol bar byed pa ltar/ /rmongs par gyur
rnams rang gi bde

legs sgo/ /thub pas bcas pa'i mtshams la dgra bzhin blta/ /khyod ni
bdag gis smras pa'i rjes slob na/ /dal ba shin tu rnyed dka' don ched
dang/ /de yang chu bur bzhin du myur 'jig cing/ /de nas gzhag gang
rjes su mi 'brang la/ /dkar

nag las 'bras phra ba'ang mi slu ba/ /rten cing 'brel bar 'byung 'di
ring du soms/ /de yis phan bde'i rtsa ba'ang ma bzung ba'i/ /mkhas par
rlom dang yun ring bsam gtan la/ /spyod pa'i yus kyis gnang sa pa de
dag kun/ /nor bur 'khrul

nas 'ching bu'i khung thogs pa'i/ /gser gling phyin ? 'ching pa slar
log nas/ /rang gi yul du 'gro bzhin rig par mdzod/ /rnyed dka' rig na
gyi nar sdod thabs med/ /don chen mthong na don med 'da' ba
'phangs/ /'chi ba bsams na phyi

@179b mar 'gro grabs byed/ /las 'bras bsams na bag med gnas las ldog
/de ltar de bzhi'i rtsa ba brtan gyur na/ /dge chos lhag ma bde blag
nyid du skye/ /de phyir 'gram rtsa zad pa'i khang rul la/ /dga' bar ma
sems rtsa ba bzhin la slobs/ /

thog mar zhing gi mthu la brten nas ni/ /nang gi bsam pa'i stobs ni
skye 'gyur ba/ /dge ba'i bshes dang dkon mchog mchod pa la/ /rgyun
chad med pa'i sbyor ba rten 'tshal lo/ /de ltar rtsa ba brten la gtsor
'bad na/ /zab cing rgya che'i chos

rnams ma lus pa/ /kha cig da lta lag tu blang ba dang/ /gzhan dag
smon lam yul du byas gyur te/ /gcig kyang mi spong kun kyang sangs
rgyas thabs/ /de ltar rgyal ba'i bstan pa yongs rdzogs pa/ /lam du
bsrel ba she na mkhas pa'i phul//

gzhan du dam chos spong ba kho nar zad/ /mdor na rang gi bsams
pa gang dga' la/ /mi btang rgyal ba'i bcas pa'i dbang du btang/ /de tshe
'phral du gdung yang phan yon la/ /gus par bya ste gter dang sreg
pa bzhin/ /bdag gis brtse bas

cung zad gdams pa las/ /byung ba'i dge bde yis 'gro ba kun/ /dam pa'i
bshes kyis rjes su 'dzin pa dang/ /de yi gdams pa bzhin du sgrub gyur
cig /ces 'phrin yig phan bde'i gzhi 'dzin zhes bya ba 'di ni/ /shAkya'i
dge slong blo

bzang grags pa'i dpal gyis gnam rtsed ldeng gi gtsug lag khang nas
dpon po nam mkha' dpal bzang gi yi ge'i lan du la stong byad du
springs pa'o//