@07b swa sti/ ston zla rgyas pa'i dpal las lhag par mdzes/ /tshangs
dbyangs snyan pa'i gdangs kyang zil gyis gnon/ /zab yangs rgya
mtsho'i gting las dpag dka' ba/ /dbyangs can lha mo'i sku gsung thugs
la 'dud/ /'o ma'i rgya mtshe kun nas 'khyil bar

dang mo'i phang phung chas pa'am/ /gangs ri shin tu mtho ba'i tog
la zla 'od zhu ba 'bab 'dra yi/ /gang sku yid la dran pa tsam gyis 'gro
la spobs pa mchog stsol ba/ /sgra dbyangs lha mo rkang drug ldan
de bdag blo'i pad mtshor rol par mdzod/ /gang zhig rgya chen tshogs

gnyis rgya mtsho bsrubs pa'i dpal las legs 'khrungs shing/ /mtha' yas
yon tan nor bu'i rang bzhin gdul bya lha mang nyer 'tsho'i gzhi/ /rim
gnyis nyi zla'i ska rags dang ldan skye dgu'i gling bzhi'i dbus na
brjid/ /dpal ldan bla ma lhun po mchog de

bsngags la su zhig btang snyoms byed/ /gang gis rab rgyas sde bzhi'i
lung dang shin tu mdor bsdus ka ri ka/ ka ma la ltar dag pa'i yid kyis
lhur blang chos gos gur kum kha/ /kha dog mdzes pas kun nas klubs
pa'i sku ni bandu dzi bag /gnas bltas kyang

brjid pa ji bzhin 'gro mang dbus na nyam ming/ /nga yi gtsug gi rgyan
gyur bla ma mchog des 'gro la dge legs stsol/ /khengs dang dregs
pa'i rgod pa gang gis skyed par byed pa'i rgyan rna ca/ /ca co bag
med spyod tshul ring du dor ba khyod kyi grags pa'i cha/ /cha shas

phyogs rnams kun tu khyab cing dam pas bsngags pa'i shing lo'i ja/
/ja sogs rnam dag 'tsho bas chog shes gyur pa khyod sku bco lnga'i
nya/ /nya rgyas rgyu skar khrod na ji bzhin 'phrin las 'od kyis
phyogs kun khyab/ /gsung rab zab mo'i de nyid ji bzhin lags par

@08a @#/ /'byed la paNDita/ /tA res rjes bzung lus can re ba rdzogs par
skong la A shwad tha/ /tha dad 'dzin pa nye bar zhi ba khyod thugs
zung 'jug tha mi dad/ /da lta khyod sku dul bas gzhan yid rab tu
phrogs pa 'di mthong na/ /na tshod song song ring nas dul

ba'i drang srong rnams kyang spa bkong 'gyur/ /rmad byung rgyal
ba'i rnam thar tshul la sku tshe snga mar legs sbyangs pa/ /pa ra mi ta'i
spyod tshul lhur len lus can rjes su 'dzin pa'i pha/ /pha mtha' bral ba
zab mo'i mkha' la mkhyen pa'i nyi 'od kyis khyab pa/ /ba mo'i

mdangs ltar dkar ba'i thugs rjes 'gro ba kun la snyom pa'i ma/ /ma
lus sras bcas rgyal ba'i mkhyen brtse gcig tu bsdus la gus pas 'dud/
/khyod ni le lo'i mtshon gyis mi phigs brtson 'grus mchog gi ka ba tsa/
/tsa ri dang mtshungs gnas 'dir

bsgoms nas lus la gnod pa'i grang dang tsha/ /tsha grang sdug bsngal
khyad du bsad cing 'gro gdung sel la ka ran dza/ /dza la dregs ldan
cher rlom rnams kyang nyid kyi gam na srog chags wa/ /wa skyes du
mas bskor yang ri dwags dbang po'i drung na zhum bzhin 'gyur//

lhar bcas 'gro ba du ma'i rab dang yid kyi bsteng 'og ? skye dgu'i
zhwa/ /zhwa bzang tog ltar kun gyis bkur yang mi g.yeng ting 'dzin
zas su za/ /za ma nor la sred pa dor zhing rtse gcig zhi gnas lhan
ne 'a/ /'a cag 'gro ba'i skyabs gcig tshul khrims dri bzang dang ldan

ma la ya/ /ya mtshan du mas mngon par mtho ba khyod la su zhig 'dud
mi byed/ /khyod kyi thugs la brkam dang khro ba ji bzhin ri bong
mgo na rwa/ /rwa yi ming kyang mi dmigs ji bzhin kun nas spangs pa
khyod sku la/ /la las reg dang mthong dang thos pa gang yin de

@08b yang lus kyi sha/ sha rus gting nas dad pa'i spu long g.yo ba
med de sems med sa/ /sa steng 'gran zla bral ba khyod ni 'gro ba'i
dpal du brtan gyur cig /b+ho Ta'i yi ge sum cu'i bya dka' mkhas pa'i dga'
skyed gad rgyangs ha/ /ha ha zhes sgrog ngo mtshar gnas 'di

ka nas brtsams te tha ma'i a/ /a yig bar du thog tha' tshul gyis rjes
khrid rgyan du byas pa 'di/ /'di phyi'i skyabs gyur bla ma mchog gi
yon tan cha tsam bsgrag phyir bkod/ /bkod pa'i dge des grags pa'i
gzhir gyur byang chub mchog de thob par

shog /ces mi 'phregs pa'i mkhyen rab dang thugs rje gcig tu bsdus pa'i
mnga' bdag lha dang bcas pa'i 'gro ba du ma'i dbus na rgyal mtshan
gyi rtse mo ltar mngon par mtho ba chos kyi rje grags pa byang
chub dpal bzang po'i che ba'i yon tan rgya

mtsho lta bu las chu thigs tsam zhig blangs te bya dka' ba'i tshul gyis
sbyar ba 'di nyid chos rje de nyid kyi zhabs kyi rdul spyi bos mang du
reg pa'i snyan dngags mkhan shar tsong kha pa blo bzang grags pa'i
dpal gyis sbyar ba'o//