! //'dren mchog rgyal ba de yi rgyal tshab dang/ /rje btsun mkhyen pa'i
gter dang klu sgrub zhabs/ /'phags pa thogs med rnams kyi mdzad
'phrin rnams/ /skal ldan khyod la rtag tu 'jug gyur cig /yangs pa'i
rnal 'byor mkha' ltar rgya che

zhing; ;phul byung dang ba ri dbang ltar brtan la/ /bstan pa'i khur
gyis nam yang mi ngal ba'i/ /bshes gnyen ngag dbang grags pa shes
grags pa'i/ /sdom brtson mchog des shing rta che gnyis las/ /legs par
brgyud pa'i skyes bu gsum gyi lam/ /legs bshad rgya

@195a @#/ /mtsho byang chub lam rim gyi/ /yi ge'i phreng bas mig la dpal
byin pas/ /don dpyod yid ni 'dud rtsis ngoms so zhes/ /rnar snyan yid
la 'bab pa'i phrin yig gis/ /srab 'jam yang ba'i dmar smug gos mchog
dang/ /mchil lham zung

gi rten bcas bskur ba 'phrod/ /gzar bus tshad ma'i ro la ji bzhin du/
/legs bshad ring du bsten kyang lcigs dka' ba/ /ro 'dzin dbang pos ro
la ji bzhin du/ /yud tsam re yis nyams su myong ba mtshar/ /deng dus
yang dag pa dang ltar snang gi/

lam gyi rnam dbye shes pa ches cher dkon/ /brgya la srid kyang legs
bshad legs bshad du/ /ji bzhin shes pa'ang de 'dra kho nar bas/ /de
phyir zab cing rgya che'i lam gyi gnad/ /phra mo rnams la'ang bcos
min nges rnyed cing/ /yi ger bkod pa mthong tshe

kho bo'i yid/ /ring du ngal ba'i 'bras bu thob pas tshim/ /chos kyi rje
nyid kyis brnyas pa'i go 'phang la gdul bya rnams dngos dang
brgyud pas bkri bar bzhed nas mdo sde dang rgyud sde'i rim pa
gsungs pa'i mdo nas 'byung ba'i thar pa dang thams cad mkhyen

par bgrod pa'i lam gyi rnam par bzhag pa 'dis/ /rgyal ba'i bstan pa
spyi'i rkang gzung nas gdul bya mchog 'ga' zhig la rgyud sde'i lam
gyi snon pa btab nas rgyal ba'i bstan pa yongs su rdzogs par 'dzin pa
'di/ /gsung rab thams cad gdams

ngag tu shar ba'i rgya bod kyi mkhas pa thams cad kyi bzhed pa yin/
/kho bos kyang de rtogs pa'i don du lo mang por bas mtha' brten
nas khas blangs pa'i tshul khrims srung ba gzhir bzhag bsag spyang
gi lhan cig byed rkyen mang po dang lam gyi

@195b lus tshang ba'i dmigs rnam skyong ba'i nyer len gyi rgyu la 'bad
pas mkhas pa dgyes pa'i mdo sngags kyi lam phyogs rigs pa tsam
mthong nas/ bstan pa la dmigs pa 'ba' zhig gis kun nas bslangs nas/
sngon la theg pa thun mong ba'i lam gyi

rim pa yi ger bkod pa yin/ 'di la'ang lam gyi lus rdzogs ma rdzogs
dang/ lam gyi go rim nges tshul dang lam gyi cha phra mo rnams nas
lag len du byas nas 'khrid tshul dang khyad par du zhi gnas dang
lhag mthong gzhung che ba'i dgongs pa bzhin du

gsal bar bkrol ba 'di dag snying nas sgrub pa byed 'dod byung ba'i
tshe/ nyams len gyi gnad la tshad mar gyur pa'i gzhung che ba rnams
nges par gzhag dgos par mthong nas 'dor zhing/ sgrub pa lhur len
gyi blo sna ma skyes pa'i tshe de dag la nyin mtshan du 'bad pa byed

pa nyams len ji ltar bstan la blo kha ma phyogs par tha snyad tsam
la mkhas pa'i yan lag tsam du mthong nas gzhung re re'i tshig don
la lugs mi 'dra ba mang po'i 'bru gnon tshig spyi tsam du ma song ba
re thebs na de tsam gyis de dag dpyis phyin par 'dod pa'i da lta'i

dus 'dra ba lta ci smos/ sngon dus kyi rnam dpyod can tsha 'di'i bun
long yal bar bzhag nas rig pa'i gnas mang du bslabs te/ nyams su len
pa'i gnad ji lta bu zhig yin snyam du sgrub 'dod kyis blangs pa'i shes
'dod can rnams kyis ring du dpyad kyang dpag

dka' bar gyur 'dug pas lam la bskor ba'i go yul rnams kyis tshim sla ba
ma mdzad par/ sngar bshad pa ltar gyi rgyu rkyen la 'bod la yang
dang yang du gsol ba thob la zhib par chod mdzod ma go ba'i go
rgyu byung res kyis 'dod pa'i lha dang dam pa'i

@196a @#/ /bshes kyi sku drin du bzung la slar yang zang zing dang
sgrub pa'i mchod pas sku drin gsob pa la 'bod dang blo khyad zhugs
par song nas lam gyi gnad phra rags thams cad la bcos ma ma yin pa'i
nges pa re rnyed nas/ lha dang bla ma

la je dad ston pa dang bstan pa la je gus sems can la je brtse sgrub
pa la je brtson du 'gro zhing/ legs par dmigs phyed pa'i gnad kyis bag
chags brtan par 'jog pa la gzhan dang mi 'dra'o zhes pa 'di ni che
kho ba mkhan chen ngag

dbang grags pa'i zhu yig gi lan du/ rje rin po che blo bzang grags
pa'i dpal gyis gnang ba'o//