! //na mo manydzu g+ho ShA ya/ gang zhig zhabs pad gus pas rab bsten
na/ /'dod pa thams cad bde blag stsol mdzad pa/ /'dren mchog bla
ma'i

zhabs la phyag byas te/ /mdor bsdus smra ba 'di ni nyan par gyis/
/bzang po'i las mang dag gis legs bsgrubs pa'i/ /dal ba'i rten bzang 'di
'dra rnyed pa'i tshe/ /nyin mtshan kun tu dge la ma 'bad na/ /de las bslus
par gyur pa gzhan gang

yod/ /deng bya sang bya'i le los g.yengs gyur na/ /don ma grub par
stobs chen 'chi bdag gis/ /'jig rten pha rol gnas su khrid gyur na/ /de
tshe mya ngan gyur kyang ci byar yod/ /de phyir myur du 'chi ba'i tshul
bsam zhing/ /shi nas lus kyi rjes su

grib ma bzhin/ /las gnyis 'brang ba yang dang yang bsams nas/ /sdig
sbyang dge ba bsag la gus par bya/ /skye dgu 'jigs rung 'khor ba'i
g.yang sa ru/ /grogs med gcig pur kun tu 'khyams pa na/ /dkon
mchog gsum dang 'dra ba'i

@196b skyabs gzhan med/ /de phyir bsam pa thag pas skyabs su song/
/sems can 'di rnams bdag gi gnyen yin te/ /yun ring dus nas phan pa
dpag med byas/ /'di dag sdug bsngal rgya mtshor lhung ba la/ /rnam
pa kun tu brtse bar bya bar rigs/ /de dag thar

pa'i lam la 'god pa'i phyir/ /rgyal ba'i go 'phang 'dod pa'i sems bskyed
nas/ /sna tshogs sgo nas dge ba gsag bya ste/ /phyogs re tsam gyis tshim
par bya ba min/ /mdor na gang zhig khas blangs sdom pa rnams/
/yongs su dag par bya ba gzhir bzung nas//

rang gi stobs dang 'tsham par nyan pa dang/ /sems dang sgom pa'i tshul
la 'bad par mdzod/ /mi 'dod sdug bsngal du ma'i rgyur gyur pa/ /sgo
gsum nyes spyod gsar du 'jug pa ni/ /sdom pas bkag ste sngon gyi nyes
spyod rnams/ /stobs bzhi'i 'bad pas rtag tu

sbyang bar bya/ /zhes pa 'di ni 'gro mgon rdo rje dpal gyis nye bar
bskul ba'i ngor/ /shAkya'i dge slong blo bzang grags pa'i dpal gyis
lcang ring thang du sbyar ba'o//