! oM swa sti/ sku ni gzhan phan bsam pas mdzes kyi rab bkra'i gos kyis
min/ /snyan ni legs bshad thos pas mdzes kyi gser gyi rna chas min/
/phyag ni gtong la 'jug pas mdzes kyi skra ldan gdu bus min/ /bsod
nams brgya yis lhag par mtho

ba'i mi dbang gang de rgyal/ /skyon med rigs kyi chu gter 'jings las
'khrungs/ /dge legs gser gyi rwa bas kun nas bskor/ /tshad med yon tan
brgya yi dpal 'bar ba/ /mi dbang lhun po gling bzhi'i dbus na brjid/ /sa
bdag gzhan phan dgongs pa gangs

ri'i gos/ /snyan zhing rnar 'bab gsung gi tsha zer gyis/ /legs par bzhu
pa'i chu rgyun grags pa'i tshogs/ /skye dgu kun gyi rna ba'i rgya mtshor
zhugs/ /de tshe khrims gnyis mkhyen pa'i blo gros kyis/ /skye dgu bde
la 'god pa'i khur 'khyer ba/ /sa skyong de yi lhag

bsam 'di 'dra zhes/ /ya mtshan gtam gyis gtam gzhan go skabs phrogs/
/dge mtshan rgyu skar bye bas bkra ba yi/ /sku yi nam mkha' mi mthun
chu 'dzin gyi/ /sgrib g.yogs bsal phyir bsam kun rdzogs mdzad pa'i/
/lhag pa'i lha la gsol ba 'debs

shing mchis/ /mi dbang byams pa'i thugs kyis mnga' ris rnams/ /chos
bzhin skyong ba'i chab sri da gang yin pa/ /pad gnyen lha yi lam nas
ma lhung ba/ /de srid yar ngo'i zla bzhin 'jug gyur cig /ces pa 'di ni
gong ma hor rgyal bu mi'i dbang po'i drung

@201b du/ /blo bzang grags pas zhu ba'i zhu yig gi skyes kyi mtshon par
phyag phyis dar kha dkar po kha gang 'bul/ /zhib kyi zhu ba dge
bshes bsod rgyal ba la gsal/ zla ba bcu gnyis pa'i nyer bdun la chos
grwa chen po bde ba can nas phul//