! //oM bde legs su gyur cig /srid pa'i 'byor pa rmi lam dga' ston dang/
/'du 'dzi rnyed bkur chu shing snying po ltar/ /

gang gis gzigs nas rgyal bas bsngags pa'i lam/ /g.yel ba med pas
bsten pa de dag rgyal/ /yul la sred pa'i chang gis myos shing gti mug
mun pa 'thug pos bsgribs/ bdag 'dzin dra ba'i sbubs su chud cing
mtha' med skye 'chi'i brtsen rwar

@206a @#/ /lhungs/ /'jigs rung las kyi gshin rjes mnar zhing sdug bsngal
khur lcis ngal ba yi/ /'khor ba'i chos la yid 'byung gtam 'di snyan
dngags rgyan gyis spel bar bya/ /thugs rje'i rlabs chen rgyun chad
med par g.yo/ /mkhyen pa'i gting mtha' dpag

par mi nus pa'i/ /thub dbang dge legs chu yi gter chen nges/ /shin tu
rnyed dkar gsungs pa'i dal 'byor rten/ /rnyed par gyur tshe tshe la
long med pa/ /yang yang yid la le los ma byas bar/ /nyin mtshan 'das
na na tshod son pa'i mthar/ /'chi bdag

byung dus dus der 'gyod kyang 'phyis/ /mnyam du 'grogs pa'i grogs
rnams shi ba'i gtam/ /thos sam mthong yang yid la khu 'khrig med/
/gsod sar khrid pa'i phyugs kyi lhag ma rnams/ /gshed ma mthong
yang yid bder gnas pa bzhin/ /srid pa'i

bya lam yangs par las kyi rlung gis bskyod pa yi/ /lus can rnams kyi
srog gi nyin byed 'chi bdag nub kyis 'dzin rtsar/ /nub par ma gyur
sems can gang de 'di na 'gas kyang ma mthong na/ /nyam chung
gnod pa'i rkyen mang bdag la de ring mi 'chi'i gnas

yod dam/ /de ltar nges par 'chi na gtan du sdod snyam 'khrul par go
/go bzhin da dung 'jug na de ni phyugs pas phyugs/ /phyugs kyang
g.yang sa mthong na de la skrag pa skye/ /skye mtha' 'chi ba yin na
'di la cis mi 'jigs/ /shugs drag rlung

gis mar me'i phreng ba dang/ /nyin byed 'od kyis grib ma'i dpung la
bzhin/ /srog dbang mi brtan srin po'i khar chud na/ /de la ring du
'tsho ba'i skabs yod dam/ /de ltar nges par 'chi na phyi ma'i bya ba ji
ltar bshol/ /tshe 'dir bsdad long med na de la le

@206b lo ji ltar rigs/ /sha rus dag kyang 'gyes na gnyen bshes tshogs
la ji ltar chags/ /grogs med gcig bur 'gro na de tshe chos las skyabs
gzhan gang/ /nam zhig mdza' bshes tshogs kyis mtha' nas bskor/
/'byung ba 'khrugs pa'i mtshon gyis lus

la btab/ /bzod glags med pa'i tshor bas sems la zin/ /bshang gcis gos pa'i
stan la 'gre ldog tshe/ /mal nas mi g.yo zum pa'i mig dang ldan/ /yan
lag ring cing skra rnams gyen du gzings/ /sha rnams stongs shing
rus gzeb ma bral tsam//

mdog nag pags pas g.yogs pa'i drang srong des/ /nyin mo kha zas
gcod pa'i dka' thub blangs/ /mtshan mo gnyid kyi bde ba bkag nas ni/
/'khun bu'i drag sngags bgrang la brtson byas kyang/ /'chi bdag ba
spu gcig kyang g.yo mi nus/ /de tshe de la brtse ba'i

gnyen rnams kyang/ /rtab rtab gyur te drung du lhags nas su/ /brtse
ba'i lta stangs de yi gdong du blta/ /bzhin gyi dkyil 'khor mchi ma'i
chu yis bkrus/ /yid ni mya ngan bsam gtan la gnas shing/ /ngag gi 'o
dod nga ro dbyangs su blangs/ /lag pa'i dbyug gus

brang gi rnga brdungs kyang/ /rang nyid ngal ba tsam zhig 'bras
bur zad/ /rnam shes skyes bu phyi mar skyes chen 'degs/ /lus kyi grong
khyer 'brog stongs bzhin du byas/ /rten med rig pa las kyi rlung gis
bdas/ /rgyus med phyogs su 'khrul zhing 'khyams pa'i tshe/

sngon bsags las kyi nus pa ma gtogs pa/ /yun ring dga' mgur spyad
pa'i gnyen dang grogs/ /ngal ba du mas bsgrubs pa'i longs spyod
tshogs/ /til gyi cha shas tsam yang rjes mi 'brang/ /tshul 'di bsams na
glog bzhin mi brtan pa'i/ /yud tsam

@207a @#/ /zhig gi tshe 'di'i bde ba'i phyir/ /bskal par brnag dka'i sdug
bsngal myong ba'i rgyu/ /sgrub par byed la sems yod su zhig 'jug
/dbang phyug rmi lam rgyal srid bzhin du g.yo/ /lang tsho dbang po'i
gzhu ltar myur du yal/ /grags pa sgra brnyan bzhin

du ming tsam pa/ /longs spyod sbrang ma'i rtsi bzhin gzhan gyis
spyod/ /de lta na yang ma rig ling tog gis/ /blo mig ring nas bsgribs
pa'i byis pa rnams/ /mi gtsang khrod na dga' ba'i sbrang bu bzhin/ /tshe
'di'i bslu brid dag gi dbang du gyur/ /kye ma mthon

po'i mtha' ni dma' bar ltung/ /lang tsho'i dpal ni rga ba'i nyes pas
'joms/ /'byor pa'i mtha' ni rgud par 'gyur la sogs/ /gang gang 'gro ba'i
skyabs kyis gsungs pa rnams/ /de de bzhin du 'di na snang gyur kyang/
/slar yang sred pa'i chu bos

khyer ba yi/ /lug ltar lkug pa'i blo can rnams kyis ni/ /'di yi rang
bzhin mi mthong ji ltar bya/ /nyam chung 'jig sla chu yi chu bur
bzhin/ /mi gtsang snod gyur ngan skyugs bum pa bzhin/ /sdug bsngal
kun ster stobs ldan dgra bo bzhin/ /rnyed par dka' zhing

shin tu 'jig sla'i lus/ /'jam pa'i gos dang zhim pa'i kha zas kyis/ /'bad pa
du mas lan mangs bskyangs gyur kyang/ /khyi dang bya rgod ce
spyang kha zas la/ /rtsol ba du mas gad dar byas par zad/ /skye dgu'i
phan bde'i rtsa ba bstan pa yang/ /nub

pa'i mtha' la shin tu nye bar sleb/ /srid mtsho sgrol ba'i dal 'byor gru
chen yang/ /nam gyi tshe na 'jig pa mi shes pas/ /de phyir dal 'byor thob
cing bstan dang mjal/ /bshes gnyen dam pa bsten du yod bzhin du/ /de
las 'ongs pa'i gdams ngag

@207b bdud rtsi'i rgyun/ /kye ma da lta nyid du mi 'thung na/ /nam
zhig glo bur nyid du dbang med par/ /gnyen bshes dbus na rtse dga'
skyong bzhin du/ /nad kyi pho nyas bzung nas 'chi bdag gi /drung du
khrid na de tshe ji ltar bya/ /de phyir yid smon tsam la ma bzhag par//

pang du dug sbrul byung ba'i mi bzhin du/ /le lo der nas brtson 'grus
shugs bskyed de/ /deng nas thar pa'i bde ba btsal bar rigs/ /sa dang
bar snang nam mkha' mi mtshon pa'i/ /stobs chen me lces 'khor ba'i
nags khrod kyi/ /srog chags

rnams kyis gnas dar bag phab nas/ /sos dal bde bar 'dug pa ji ltar 'os/
/shes ldan khyod la mang du smos ci dgos/ /mdor na 'khor ba'i bde
'byor kun gyis bslu/ /gcig tu yid brtan rung ba dam pa'i chos/ /de
phyir dal 'byor thob pa don yod mdzod//

tshul 'di 'di dang phyi mar bde ba'i gzhi/ /dam chos chos nas gsungs
bzhin bsgrub 'dod pa/ /rin rgyal rgyal ba'i bstan la gus pa des/ /spel
legs legs pa'i tshig gis yid skyo'i gtam/ /dad pa'i rlung gis bskul tshe
phyogs med du/ /ngal so med par 'khyis

pa'i rgyal khams pa/ /blo bzang grags pa'i mgrin pa'i dkyil 'khor nas/
/'thon par gyur pa'i 'od stong tshig gi phreng/ /chu skyes 'dab ma shog
bu'i ngos dag la/ /mig gi dga' ston ched du 'khrigs pa 'dis/ /khyod yid
thar pa'i lam du 'khul gyur cig /ces

pa 'di ni dad pa dang gtong pa'i yon tan dang ldan pa dpon yig rin
chen rgyal pos/ /rgyang ring po nas bskul ba'i don du mang du thos
pa'i rgyal khams pa blo bzang grags pa'i dpal gyis/ /'phags pa 'jig rten
dbang phyug gis rgyal po'i gzugs

@208a @#/ /bzung nas byin gyis brlabs pa'i gnas chen po po ta la zhas
grags par sbyar ba'o//